\id REV - Cakchiquel, Eastern (Oriental) NT [cke] -Guatemala 1986 (web version -2012 bd)
\h APOCALIPSIS
\toc1 Ri xekꞌalajrisüs chuvüch ri apóstol San Juan
\toc2 Apocalipsis
\mt Ri xekꞌalajrisüs chuvüch ri apóstol San Juan
\c 1
\s Ri nabey tak tzij
\p
\v 1 Ja ri nyecꞌulachitüj yan, jariꞌ ri xukꞌalajrisaj ri Dios chin ri Jesucristo, richin que ri Jesucristo tukꞌalajrisaj chiquivüch ri rusamajelaꞌ. Romariꞌ ri Jesucristo xutük cꞌa jun ru-ángel riqꞌuin ri Juan ri rusamajel, richin que xukꞌalajrisaj chuvüch, ronojel riꞌ.
\v 2 Y ri Juan xbij cꞌa que ketzij ri rutzij ri Dios, que ketzij ri xbij ri Jesucristo, y ketzij chukaꞌ ronojel ri xutzꞌet.
\p
\v 3 Jabel cꞌa ruquicot, ri jun ri nsiqꞌuin ri tzij ri tzꞌiban can chereꞌ, y quiriꞌ chukaꞌ jabel quiquicot ri nyeꞌacꞌaxan y nquitakej chukaꞌ. Roma nakaj chic cꞌo-vi ri kꞌij tok nyecꞌulachitüj ronojel ri ye tzꞌiban chereꞌ.
\s Ri nutük-e rubixic ri Juan cheque ri siete molaj hermanos ri yecꞌo pa ruchꞌulef Asia
\p
\v 4 Y yin Juan nintzꞌibaj cꞌa e ri vuj reꞌ chive que rix siete molaj hermanos ri rixcꞌo chiriꞌ pa ruchꞌulef rubiniꞌan Asia, y ticꞌuluꞌ cꞌa ri utzilüj sipanic ri nspaj-pe ri Dios y ri uxlanen ri nuyaꞌ ri Dios, ri cꞌo-pe pa rutzꞌuquic, cꞌo ri vocomi y ncꞌujeꞌ ri nbe-apu chukaꞌ. Y ticꞌuluꞌ ri uxlanen y ri utzilüj sipanic ri nyequispaj-pe ri siete utzilüj tak espíritu ri yecꞌo-apu chuvüch ri Dios ri tzꞌuyul pa lokꞌolüj ruchꞌacat.
\v 5 Y ticꞌuluꞌ cꞌa chukaꞌ ri uxlanen y ri utzilüj sipanic ri nyeruspaj-pe ri Cristo, ri nbin ri ketzij, ri nabey ri xcꞌastüj-pe chiquicojol ri caminakiꞌ y ri paꞌül pa quiviꞌ conojel autoridades ri yecꞌo chuvüch ri ruchꞌulef. Rijaꞌ nkurujoꞌ, y romariꞌ rijaꞌ xcom y xbiyin ruquiqꞌuel, richin xuchꞌüj-e ri kamac.
\v 6 Y xbün cꞌa cheke konojel roj ri kayoꞌon kánima riqꞌuin, que xojoc reyes y sacerdotes richin nkabün rusamaj ri Dios ri Rutataꞌ. Y quiriꞌ cꞌa, que ja ri Jesucristo ri cꞌo rukꞌij y cꞌo ru-autoridad ri man jun bey nqꞌuis.
\p
\v 7 Roma tivetamaj que ri Cristo npuꞌu na vi pa sutzꞌ. Y konojel nkutzꞌeton richin. Hasta ri vinük ri xeyoꞌon richin ri Jesucristo pa camic nquitzꞌet cꞌa chukaꞌ. Conojel vi vinük ri yecꞌo ronojel ruchꞌulef nyeꞌokꞌ tok nquitzꞌet rijaꞌ. Jaꞌ, quiriꞌ vi nbanatüj.
\p
\v 8 Ri Ajaf, ri ronojel vi uchukꞌaꞌ cꞌo pa rukꞌaꞌ y ri cꞌo-pe pa rutzꞌuquic, cꞌo chukaꞌ ri vocomi y ncꞌujeꞌ ri nbe-apu. Y rijaꞌ nbij: Ja yin ri rutzꞌuquic y ri ruqꞌuisbül, cachiꞌel ri nabey y ri ruqꞌuisbül letras.
\s Ri Jesucristo nukꞌalajrisaj-riꞌ chuvüch ri Juan
\p
\v 9 Y yin Juan ri i-hermano, rix vachibilan cꞌa chupan ri pokonül, rix vachibilan pa rukꞌaꞌ ri Dios, y junan chukaꞌ xkacꞌul ri cochꞌonic ri nuyaꞌ ri Jesucristo cheke. Yin xincꞌujeꞌ cꞌa pa vit ruchꞌulef rubiniꞌan Patmos, jun vit ruchꞌulef ri cꞌo pa nicꞌaj yaꞌ. Chiriꞌ xincꞌuje-vi roma ri rutzij ri Dios y roma chukaꞌ xinkꞌalajrisaj ri Jesucristo.
\v 10 Pero chupan ri jun kꞌij richin ri Ajaf Dios, yin xinbün cꞌa jun cachiꞌel achicꞌ roma ri ruchukꞌaꞌ ri Lokꞌolüj Espíritu, y xinvacꞌaxaj cꞌa que cꞌo jun ri nchꞌo-pe chuvij. Y ri rubanic tok nchꞌo, jabel cꞌa nkꞌalajin. Cachiꞌel nkꞌajan jun trompeta, quiriꞌ.
\v 11 Y xbij chuve: Ja yin ri yincꞌo-pe pa rutzꞌuquic y ri yincꞌo chukaꞌ pa ruqꞌuisbül, cachiꞌel ri nabey y ri ruqꞌuisbül letras. Tatzꞌibaj cꞌa pa jun vuj ronojel ri natzꞌet, y tataka-e pa ruchꞌulef Asia cheque ri siete molaj hermanos ri yecꞌo chiriꞌ, cheque ri aj pa tinamit Efeso, ri aj pa tinamit Esmirna, ri aj pa tinamit Pérgamo, ri aj pa tinamit Tiatira, ri aj pa tinamit Sardis, ri aj pa tinamit Filadelfia y cheque ri aj pa tinamit Laodicea, xbix cꞌa chuve.
\p
\v 12 Cꞌateriꞌ xinpiscolij-viꞌ richin nintzꞌet achique ri ntzijon-pe chuve. Y tok nupiscolin chic viꞌ, xintzꞌet cꞌa siete candeleros ye banun riqꞌuin kꞌanapük.
\v 13 Y pa quinicꞌajal ri siete candeleros paꞌül cꞌa jun ri cachiꞌel ri Jun ri xalüx chikacojol, rucusan jun rutziek ri napon cꞌa chirakün ka. Y rucusan chukaꞌ jun ruximbal banun riqꞌuin kꞌanapük, y ri ximbül reꞌ chuvüch-rucꞌuꞌx ncꞌo-vi.
\v 14 Ri rujolon y ri rusmal tak ruviꞌ sük-sük, cachiꞌel rusakil ri lana y ri sutzꞌ tok nsakrisan y chukaꞌ cachiꞌel ri hielo. Y ri runakꞌ-ruvüch cachiꞌel ruxak tak kꞌakꞌ.
\v 15 Jacꞌa ri rakün nyiqꞌuiyot cachiꞌel ri chꞌichꞌ bronce tok jabel joskꞌin ruvüch. Nbarür, cachiꞌel ta pa jun kꞌakꞌ cꞌo-vi. Y ri rutzij juis cꞌa nkꞌajan, cachiꞌel nyekꞌajan rakün tak yaꞌ.
\v 16 Y pa rajquikꞌaꞌ (pa ru-mano derecha) ye rucꞌuan siete cachiꞌel chꞌumilaꞌ. Jacꞌa pa ruchiꞌ ntel-pe jun cachiꞌel machet y chi caꞌiꞌ lados cꞌo-vi rey. Y ri ntzuꞌun, cachiꞌel ri kꞌij tok juis ruchukꞌaꞌ.
\p
\v 17 Tok xintzꞌet cꞌa yin riꞌ, cachiꞌel jun camnük xtzak-ka chirakün. Pero rijaꞌ xuyaꞌ ri rajquikꞌaꞌ (ru-mano derecha) pa nuviꞌ y xbij cꞌa chuve: Man taxbij-aviꞌ, roma ja yin ri nabey y ri ruqꞌuisbül.
\v 18 Y ja yin ri Jesucristo ri yin cꞌüs. Xincom na vi, pero vocomi cꞌo nucꞌaslen richin ri chi jumul nbe-apu. Quiriꞌ vi cꞌa. Y cꞌo chukaꞌ autoridad pa nukꞌaꞌ richin yincꞌo pariꞌ ri camic y pariꞌ ri lugar apeꞌ yecꞌo-vi ri caminakiꞌ ri man nquitakej tüj e.
\v 19 Tatzꞌibaj cꞌa ri xatzꞌet, ri nyebanatüj chic, y chukaꞌ ri nyebanatüj ri nbe-apu.
\v 20 Ri siete cachiꞌel chꞌumilaꞌ ri xatzꞌet pa vajquikꞌaꞌ (nu-mano derecha) y ri siete candeleros ri ye banun riqꞌuin kꞌanapük, cꞌo-vi cꞌa ri nyeꞌel chi tzij. Ri siete cachiꞌel chꞌumilaꞌ ri ye nucꞌuan pa vajquikꞌaꞌ (nu-mano derecha), ja ri siete nusamajelaꞌ ri yecꞌo pa quiviꞌ ri siete molaj ri ye takeyon vichin. Jacꞌa ri siete candeleros ri ye banun riqꞌuin kꞌanapük, ja rijeꞌ ri ye siete molaj ri ye takeyon vichin.
\c 2
\s Ri nbij ri Jesucristo cheque ri ye quitaken richin ri yecꞌo pa tinamit Efeso
\p
\v 1 Tatzꞌibaj cꞌa e chin ri nusamajel ri cꞌo pa quiviꞌ ri ye quitaken vichin chiriꞌ pa tinamit Efeso, y tabij-e chin, que yin ri ye nucꞌuan ri siete cachiꞌel chꞌumilaꞌ pa vajquikꞌaꞌ (nu-mano derecha) y yin ri nquibiyaj chukaꞌ chiquicojol ri siete candeleros ye banun riqꞌuin kꞌanapük, ninbij cꞌa,
\v 2 que vetaman ronojel ri inojibül ri nyixbanun. Vetaman ri janiꞌ pokonül icochꞌon roma ri samaj, y vetaman cꞌa chukaꞌ que man icꞌamon tüj ka quivüch ri vinük ri xa ye itzel. Y ye itijon ri nyebin que ye apóstoles y xeꞌivil que xa man ye ketzij tüj. Xa quiyon ye tzꞌucuy tak tzij.
\v 3 Icochꞌon y icꞌusan pokonül, y juis rix samajnük voma yin y man jani rix cosnük tüj.
\v 4 Xa jacꞌa cꞌo ri man ja tüj chic ri nquixtajin chubanic, y jariꞌ ri man nkaꞌ tüj chinuvüch yin. Y roma cꞌa riꞌ ninbij que ri cachiꞌel xinijoꞌ yin pa nabey, man ja tüj chic. Xa nvur-ka ri xinijoꞌ riꞌ.
\v 5 Y tika-pe cꞌa chiꞌicꞌuꞌx apeꞌ rix tzaknük-vi-pe. Chiriꞌ cꞌa chukaꞌ titzolij-vi icꞌuꞌx. Quinijoꞌ chic cꞌa cachiꞌel xinijoꞌ pa nabey. Roma si xa man quiriꞌ tüj ri nibün, chanin cꞌa nquinapon iviqꞌuin y ninvelesaj-e ri i-candelero ri apeꞌ cꞌo-vi. Y quiriꞌ ninbün chive si man nitzolij tüj pe icꞌuꞌx.
\v 6 Nkꞌalajin na cꞌa baꞌ que cꞌo utz pan icꞌaslen, roma man icꞌamon tüj ka quivüch ri vinük ri quibiniꞌan nicolaítas. Utz vi cꞌa que quiriꞌ ibanun, roma yin chukaꞌ itzel nintzꞌet ri nyebanun.
\v 7 Roma cꞌa riꞌ, achique ri cꞌo ruxiquin richin nracꞌaxaj, tracꞌaxaj cꞌa ri nbij ri Lokꞌolüj Espíritu cheque ri siete molaj vinük ri ye quitaken vichin. Roma achique cꞌa ri nchꞌacon, ninyaꞌ kꞌij chin richin nutij ruvüch ri cheꞌ ri richin cꞌaslen, ri cꞌo pa runicꞌajal ri lugar richin quicot, ri lugar apeꞌ cꞌo-vi ri Dios.
\s Ri nbij ri Jesucristo cheque ri ye quitaken richin ri yecꞌo pa tinamit Esmirna
\p
\v 8 Y tatzꞌibaj cꞌa e chin ri nusamajel ri cꞌo pa quiviꞌ ri ye quitaken vichin chiriꞌ pa tinamit Esmirna, y tabij-e chin, que yin ri yincꞌo-pe pa rutzꞌuquic y pa ruqꞌuisbül chukaꞌ, y ri xincamsüs y cꞌo nucꞌaslen, ninbij cꞌa ronojel reꞌ:
\v 9 Que vetaman ronojel ri inojibül ri nyixbanun, ri ipokonül, ri imebaꞌil, pero chinuvüch yin rix beyomaꞌ vi. Vetaman que ri vinük ri nyebin que ye israelitas y xa man ye israelitas tüj, qꞌuiy itzel ri nquibij chivij. Pero ri vinük riꞌ xa ye jun molaj richin ri itzel-vinük.
\v 10 Man cꞌa tixbij-iviꞌ chuvüch ri ncꞌulachij ri chivüch apu. Roma ri itzel-vinük nbün cheque chꞌaka ri yecꞌo chiꞌicojol que nyeruyaꞌ pa cárcel y nutzꞌet na cꞌa vi iyoꞌon ivánima riqꞌuin ri Dios. Diez cꞌa kꞌij ri nyixcꞌujeꞌ pa pokonül. Pero tiyaꞌ cꞌa ivánima riqꞌuin ri Dios, stapeꞌ (aunque) ta ncꞌatzin ta nyixapon chuvüch ri camic. Y yin ninyaꞌ ri lokꞌolüj sipanic chive, roma nicꞌul cꞌa icꞌaslen ri man nqꞌuis tüj.
\v 11 Roma cꞌa riꞌ, achique ri cꞌo ruxiquin richin nracꞌaxaj, tracꞌaxaj cꞌa achique ri nbij ri Lokꞌolüj Espíritu cheque ri siete molaj ri ye quitaken vichin. Roma achique cꞌa ri xtichꞌacon, man cꞌa napon tüj chupan ri pokonül richin ri rucaꞌn camic.
\s Ri nbij ri Jesucristo cheque ri ye quitaken richin ri yecꞌo pa tinamit Pérgamo
\p
\v 12 Y tatzꞌibaj cꞌa e chin ri nusamajel ri cꞌo pa quiviꞌ ri ye quitaken vichin ri chiriꞌ pa tinamit Pérgamo, y tabij-e chin, que yin ri ucꞌuayon ri cachiꞌel machet ri chi caꞌiꞌ lados cꞌo-vi rey, ninbij cꞌa:
\v 13 Yin vetaman ri inojibül ri nyixbanun. Vetaman que ri apeꞌ rixcꞌo-vi, chiriꞌ tzꞌuyul-vi ri itzel-vinük. Y man riqꞌuin tüj riꞌ ri nubiꞌ cꞌa cꞌüs na pa tak ivánima, y iyoꞌon ivánima viqꞌuin. Man xinimestaj tüj can chupan ri kꞌij tok ri hermano Antipas xcamsüs. Rijaꞌ xutzijoj ri nutzij, y roma ri man xuyaꞌ tüj can, rijaꞌ xcamsüs chiriꞌ apeꞌ cꞌo-vi ri ruchꞌacat ri itzel-vinük.
\v 14 Pero yecꞌo cꞌa inojibül ri nyixbanun ri man nyekaꞌ tüj chinuvüch. Ri chiꞌicojol yecꞌo cꞌa ri man ncajoꞌ tüj nquiyaꞌ can ri itzel tak tijonic richin ri Balaam ri xerubij chin ri Balac ojer can tiempo, que tubanaꞌ cheque ri israelitas que nyetzak pa mac, que quequitijaꞌ ri sujun chic chiquivüch ri dios (tiox) ri xa man ye ketzij tüj, y que ri achiꞌaꞌ y ri ixokiꞌ tiquicanola-quiꞌ richin nyemacun.
\v 15 Chukaꞌ yecꞌo chꞌaka chiꞌicojol ri man ncajoꞌ tüj nquiyaꞌ can ri quitijonic ri vinük ri quibiniꞌan nicolaítas. Y ri itzel tak tijonic riꞌ, xa man nyekaꞌ tüj chinuvüch yin.
\v 16 Roma cꞌa riꞌ, tiyaꞌ can rubanic ri itzel cꞌaslen y titzolij cꞌa pe icꞌuꞌx. Roma si man quiriꞌ tüj ri nibün, jariꞌ tok nquinapon y ninbün oyoval iviqꞌuin. Ninbün oyoval iviqꞌuin riqꞌuin ri cachiꞌel machet ri ntel-pe pa nuchiꞌ.
\v 17 Roma cꞌa riꞌ, achique ri cꞌo ruxiquin richin nracꞌaxaj, tracꞌaxaj cꞌa ri nbij ri Lokꞌolüj Espíritu cheque ri siete molaj ri ye quitaken vichin. Roma achique cꞌa ri nchꞌacon, ninyaꞌ cꞌa ri vüy ri rubiniꞌan maná chin, vüy ri yacül can. Y chukaꞌ ninjüch cꞌa jun vit sük abüj chin, ri apeꞌ tzꞌiban-e jun cꞌacꞌaꞌ biꞌaj. Y ri cꞌacꞌaꞌ biꞌaj reꞌ, xaxe cꞌa ri ncꞌulun richin ri nyeꞌetaman.
\s Ri nbij ri Jesucristo cheque ri ye quitaken richin ri yecꞌo pa tinamit Tiatira
\p
\v 18 Y tatzꞌibaj cꞌa chukaꞌ e chin ri nusamajel ri cꞌo pa quiviꞌ ri ye quitaken vichin chiriꞌ pa tinamit Tiatira, y tabij-e chin, que yin ri Rucꞌajol ri Dios, ri cachiꞌel ruxak-kꞌakꞌ ri runakꞌ-nuvüch y nyeyiqꞌuiyot chukaꞌ cachiꞌel bronce ri vakün, ninbij cꞌa:
\v 19 Yin vetaman ronojel ri inojibül ri nyixbanun. Vetaman que nkujijoꞌ, yin y chukaꞌ conojel vinük, que iyoꞌon ivánima viqꞌuin, que nyixtoꞌon, que ivetaman-vi nyixcochꞌon, y que más vi ri nyixtajin chubanic vocomi que chuvüch pa nabey.
\v 20 Xa jacꞌa cꞌo jun inojibül ri nyixbanun ri man nkaꞌ tüj chinuvüch, y riꞌ ja ri man jun ibin chin ri ixok Jezabel que man tubün ri ntajin chubanic. Roma rijaꞌ nbij cꞌa que ja ri rutzij ri Dios ri nukꞌalajrisaj, pero xaxe cꞌa richin nyeruchꞌüc ri nusamajelaꞌ. Nbün cheque ri nusamajelaꞌ riꞌ que nyetzak pa mac. Nbij cꞌa que tiquitijaꞌ ri sujun chic chiquivüch dios (tiox) ri xa man ye ketzij tüj, y que ri achiꞌaꞌ y ri ixokiꞌ tiquicanola-quiꞌ richin nyemacun.
\v 21 Y yin nuyoꞌon-vi kꞌij chin que tuyaꞌ can rubanic ri mac, cachiꞌel ri mac nbanalaꞌ quiqꞌuin achiꞌaꞌ, y que titzolij-pe rucꞌuꞌx viqꞌuin. Pero rijaꞌ xa benük cꞌa ránima chirij ri mac ri nbün y man ntzolij tüj pe rucꞌuꞌx. Xa man nrajoꞌ tüj cꞌa nuyaꞌ can ri mac.
\v 22 Y roma cꞌa ri man nuyaꞌ tüj can rubanic ri rumac, ninbün cꞌa chin que tika-ka chuvüch varabül roma jun yabil. Y chukaꞌ ri jampeꞌ ri quibanun mac riqꞌuin, nquicꞌusaj juis pokonül. Y quiriꞌ ninbün cheque si man nquiyaꞌ tüj can rubanic ri mac y si man ntzolij tüj pe quicꞌuꞌx.
\v 23 Y conojel cꞌa ri ye ral nyencamsaj, richin que tiquetamaj conojel ri molaj ri ye quitaken vichin, que yin vetaman ri achique ri nquinuc y vetaman chukaꞌ ri cꞌo pa tak cánima conojel. Y cachiꞌel cꞌa ri inojibül ri nyixbanun chiꞌijujunal, quiriꞌ cꞌa chukaꞌ ri ruqꞌuexel ri nicꞌul.
\v 24 Jacꞌa ri chꞌaka ri yecꞌo pa tinamit Tiatira ri man quitzekleben tüj ri rutijonic ri Jezabel, nixta chukaꞌ man xquetamaj tüj ruvüch ri itzel-vinük y ri nimalüj runojibül, cachiꞌel nbix que nchajin, utz vi ri xquibün, y man jun chic cꞌa ri ninchilabej cheque.
\v 25 Xaxe cꞌa ninjoꞌ que man tiquiyaꞌ can rubanic ri utz. Y cꞌa ja ta cꞌa riꞌ ri nyetajin chubanic tok yin nquipuꞌu jun bey chic.
\v 26 Ri ye jaruꞌ cꞌa ri nyechꞌacon y nquibün-vi ri ninbij cheque cꞌa tok napon na ri ruqꞌuisbül kꞌij richin ri quicꞌaslen chuvüch ri ruchꞌulef, ninbün cꞌa cheque que ja rijeꞌ ri nquibün mandar pa quiviꞌ ri vinük.
\v 27 Cachiꞌel ri rubanun-pe ri Nataꞌ chuve yin. Rujachon-vi-pe nuchukꞌaꞌ pa nukꞌaꞌ pa quiviꞌ ri ruchꞌulef. Y ri ninjüch cꞌa cuchukꞌaꞌ pa quikꞌaꞌ, nquibün mandar pa quiviꞌ ri ruchꞌulef riqꞌuin ronojel cuchukꞌaꞌ. Cachiꞌel xa ta jun chꞌichꞌ ri cꞌo pa quikꞌaꞌ, richin man cꞌayuf tüj nyequipaxilaꞌ, cachiꞌel nban cheque ri bojoꞌy.
\v 28 Y chukaꞌ ninjüch cꞌa pa quikꞌaꞌ rijeꞌ ri chꞌumil ri nyeqꞌuiyot ri cumaj saker yan.
\v 29 Roma cꞌa riꞌ, ri cꞌo ruxiquin richin nracꞌaxaj, tracꞌaxaj cꞌa ri nbij ri Lokꞌolüj Espíritu cheque ri siete molaj vinük ri ye quitaken vichin.
\c 3
\s Ri nbij ri Jesucristo cheque ri ye quitaken richin ri yecꞌo pa tinamit Sardis
\p
\v 1 Tatzꞌibaj cꞌa e chin ri nusamajel ri cꞌo pa quiviꞌ ri ye quitaken vichin chiriꞌ pa tinamit Sardis, y tabij-e chin, que yin ri cꞌo siete espíritu richin ri Dios viqꞌuin y siete chukaꞌ cachiꞌel chꞌumilaꞌ, ninbij cꞌa, que vetaman ronojel ri inojibül ri nyixbanun. Vetaman que nbix chive que cꞌo icꞌaslen, pero xa man quiriꞌ tüj. Xa rix camnük chinuvüch yin.
\v 2 Roma cꞌa riꞌ, ninbij chive que tunaꞌ ivüch y man tiyaꞌ kꞌij que nyeqꞌuis chukaꞌ ri cꞌa utz na ri yecꞌo pa tak icꞌaslen. Pa ruqꞌuexel riꞌ xa tibanaꞌ cheque que nyeqꞌuiy, roma xa quitzꞌamon chukaꞌ quicamic ri caꞌi-oxiꞌ riꞌ. Yin nintzꞌet-vi cꞌa que ri nojibül ri nyeꞌibanalaꞌ rix ri rixcꞌo pa tinamit Sardis, man utz tüj. Man utz tüj vi chuvüch ri Dios.
\v 3 Tika-pe cꞌa chiꞌicꞌuꞌx ri rutzij ri Dios ri xicꞌul pa nabey y ivacꞌaxan-vi chukaꞌ. Titzolij chic cꞌa pe icꞌuꞌx viqꞌuin y titzeklebej jun bey chic ri rutzij ri Dios. Roma si xa man quiriꞌ tüj ri nibün, nquipuꞌu pan iviꞌ. Nquipuꞌu cachiꞌel nbün jun elekꞌon y man ninabej tüj cꞌa achique hora tok nquika-pe.
\v 4 Pero chiꞌicojol rix ri rix itaken vichin chiriꞌ pa tinamit Sardis, yecꞌo cꞌa ri ye chꞌajchꞌoj. Man quitzꞌilobisan tüj quiꞌ riqꞌuin nibün ri man ye utz tüj. Y jareꞌ cꞌa ri nyebiyin viqꞌuin yin, quicusalon sük tak tziük, roma ye cꞌuluman-vi.
\v 5 Achique cꞌa ri nchꞌacon, njach chukaꞌ ri sük tak rutziek. Y man ninvelesaj tüj ri rubiꞌ chupan ri vuj ri richin cꞌaslen. Y chukaꞌ ninbij cꞌa chin ri Nataꞌ y cheque ri ángeles, que ri jun riꞌ vichin yin.
\v 6 Ri vinük ri cꞌo cꞌa ruxiquin richin nracꞌaxaj, tracꞌaxaj cꞌa ri nbij ri Lokꞌolüj Espíritu cheque ri siete molaj ri ye quitaken vichin.
\s Ri nbij ri Jesucristo cheque ri ye quitaken richin ri yecꞌo pa tinamit Filadelfia
\p
\v 7 Tatzꞌibaj-e cꞌa chukaꞌ chin ri nusamajel ri cꞌo pa quiviꞌ ri ye quitaken vichin chiriꞌ pa tinamit Filadelfia, y tabij-e chin, que yin ri lokꞌolüj, ri ketzij y ri ucꞌuayon chukaꞌ ri llave richin ri David, llave ri tok nujük man jun ntzꞌapin y tok nutzꞌapij man jun njakon, ninbij cꞌa,
\v 8 que yin vetaman ronojel ri inojibül ri nyixbanun. Roma cꞌa riꞌ nujakon-vi jun puerta chivüch, ri man jun ntiquer ntzꞌapin. Roma man jun bey vi ivevan que itaken ri nubiꞌ. Y man riqꞌuin tüj que man jun oc ikꞌij banun chive, rix nitakej-vi ri nbij ri nutzij.
\v 9 Y roma cꞌa riꞌ, yin ninbün que nyexuqueꞌ chivüch ri jun molaj richin ri itzel-vinük ri nyebin que ye israelitas y xa man quiriꞌ tüj. Y quereꞌ ninbün cheque richin tiquetamaj que yin nyixinjo-vi.
\v 10 Rix nibün-vi ri nbij ri nutzij, que tivoyobej riqꞌuin cochꞌonic. Y roma cꞌa ri utzilüj inojibül ri xixbanun riꞌ, nyixinchajij cꞌa chuvüch ri pokonül tok nka-pe, pokonül ri nka-ka pariꞌ ri ruchꞌulef, richin nyetijox cꞌa conojel ri vinük.
\v 11 Y chanin vi cꞌa nquipuꞌu jun bey chic. Y roma cꞌa riꞌ tichajij vi cꞌa jabel ri iyacon pa tak ivánima, richin que man jun nrelesan chive ri lokꞌolüj sipanic.
\v 12 Y ri ye jaruꞌ cꞌa ri nyechꞌacon, ninbün cꞌa cheque que nyeꞌoc lokꞌolüj tak xataꞌtꞌ richin ri racho ri nu-Dios. Chiriꞌ cꞌa riqꞌuin ri Dios nyecꞌuje-vi chi jumul. Y chiquij cꞌa rijeꞌ nintzꞌibaj ri rubiꞌ ri nu-Dios y ri rubiꞌ ri rutinamit rijaꞌ. Y ri tinamit riꞌ ja ri cꞌacꞌaꞌ Jerusalén, ri nka-pe chilaꞌ chicaj riqꞌuin ri nu-Dios. Y chiriꞌ chiquij ri xataꞌtꞌ riꞌ nintzꞌibaj cꞌa chukaꞌ ri cꞌacꞌaꞌ nubiꞌ yin.
\v 13 Ri achique cꞌa ri cꞌo ruxiquin richin nracꞌaxaj, tracꞌaxaj-vi cꞌa ri nbij ri Lokꞌolüj Espíritu cheque ri siete molaj ri ye quitaken vichin.
\s Ri nbij ri Jesucristo cheque ri ye quitaken richin ri yecꞌo pa tinamit Laodicea
\p
\v 14 Y tatzꞌibaj cꞌa e chin ri nusamajel ri cꞌo pa quiviꞌ ri ye quitaken vichin chiriꞌ pa tinamit Laodicea, y tabij-e chin, que yin ri ketzij y yin ri nquitzijon ri nutzꞌeton, y yin chukaꞌ ri yincꞌo riqꞌuin ri Dios ri pa rutzꞌuquic, tok xban ri ruchꞌulef, ninbij cꞌa cheque,
\v 15 que yin vetaman ronojel ri inojibül ri nyixbanun. Vetaman que man iyoꞌon tüj ivánima viqꞌuin, pero chukaꞌ man nquiniyaꞌ tüj can. Más ta utz que rix mekꞌen ta o rix tef ta.
\v 16 Pero roma cꞌa ri xa man rix mekꞌen tüj, y xa rix liloj, nyixinxaꞌ cꞌa e.
\v 17 Roma rix nibij cꞌa que cꞌo itumin, rix beyomaꞌ chic y man jun chic cꞌa ri ncꞌatzin ta chive. Y man ivetaman tüj que xa cꞌayuf ibanun chinuvüch yin. Xa rix mebaꞌ, xa manak ichajin. Rix chꞌanül, y chukaꞌ rix moyiꞌ.
\v 18 Roma cꞌa riꞌ ninyaꞌ rutzijol chive, que tok rix nilokꞌ kꞌanapük, tilokꞌoꞌ cꞌa ri cꞌo viqꞌuin, richin quiriꞌ nquixoc-vi beyomaꞌ. Roma ri kꞌanapük cꞌo viqꞌuin, utz vi, roma cꞌusan chic pa kꞌakꞌ. Man jun chic cꞌa vit tzꞌil cꞌo chirij. Y tok rix nilokꞌ chukaꞌ tziük, tilokꞌoꞌ cꞌa ri sük tziük viqꞌuin yin, richin que nucuch rij ri iqꞌuix. Y quiriꞌ chukaꞌ que viqꞌuin yin tilokꞌo-vi ri akꞌon richin niyaꞌ pa tak runakꞌ-ivüch rix, richin nyixtzuꞌun jabel.
\v 19 Y yin ninbij cꞌa ri achique quibanun y nyenyaꞌ chukaꞌ pa cꞌayuf ri nyenjoꞌ. Romariꞌ rix riqꞌuin cꞌa ronojel ivánima titzolij chic pe icꞌuꞌx viqꞌuin.
\v 20 Roma yin jareꞌ yincꞌo pa ruchi-jay y nquinoyon-apu. Achique cꞌa ri nracꞌaxan-pe vichin y nujük-pe chinuvüch, nquinoc-apu riqꞌuin y nquivaꞌ riqꞌuin. Y chukaꞌ ri jun riꞌ nvaꞌ viqꞌuin yin.
\v 21 Achique cꞌa chukaꞌ ri nchꞌacon, ninyaꞌ cꞌa chukaꞌ kꞌij chin richin que ntzꞌuyeꞌ junan viqꞌuin. Cachiꞌel ri xban chuve yin tok xinchꞌacon, xintzꞌuye-vi riqꞌuin ri Nataꞌ Dios.
\v 22 Y ri achique cꞌa ri cꞌo ruxiquin richin nracꞌaxaj, tracꞌaxaj cꞌa ri nbij ri Lokꞌolüj Espíritu cheque ri molaj ri ye quitaken vichin.
\c 4
\s Ri Dios nucꞌul cꞌa rukꞌij
\p
\v 1 Y cꞌateriꞌ yin Juan, xintzꞌet yan chic que ri chicaj jakül jun puerta, y xinvacꞌaxaj cꞌa jun chꞌabül. Jariꞌ ri nabey chꞌabül ri xinvacꞌaxaj, y ri rubanic ri chꞌabül riꞌ cachiꞌel cꞌa ri nkꞌajan jun trompeta. Y xbij cꞌa pe chuve: Cajote-pe, y nincꞌut cꞌa chavüch ri nyebanatüj ri nbe-apu.
\p
\v 2 Y jariꞌ tok xinnaꞌ que ja ri Lokꞌolüj Espíritu ri ucꞌuayon vichin. Xintzꞌet cꞌa que ri chicaj cꞌo Jun tzꞌuyul pa lokꞌolüj ruchꞌacat.
\v 3 Y ri tzꞌuyul pariꞌ ri lokꞌolüj chꞌacüt ri cꞌo chicaj, ja ri Dios. Rijaꞌ cachiꞌel cꞌa ri abüj ri nbix jaspe y cornalina cheque, quiriꞌ ri ntzuꞌun. Y juis cꞌa nyiqꞌuiyot. Ri lokꞌolüj chꞌacüt riꞌ sutin cꞌa pe rij roma jun arco iris. Y ri arco iris reꞌ rüx cꞌa ntzuꞌun, cachiꞌel ri abüj ri nbix esmeralda chin.
\v 4 Ri Jun ri tzꞌuyul pa lokꞌolüj ruchꞌacat sutin cꞌa rij riqꞌuin veinticuatro chic chꞌacüt. Y ri veinticuatro rajatük tak achiꞌaꞌ ri ye tzꞌuyul chiriꞌ ye quicusalon cꞌa sük tak tziük y ye quicusalon chukaꞌ coronas ri ye banun riqꞌuin kꞌanapük.
\v 5 Jacꞌa pa nicꞌaj apeꞌ cꞌo-vi ri Jun ri tzꞌuyul pa lokꞌolüj ruchꞌacat, nyeꞌel cꞌa pe coyopaꞌ y truenos juis njinin ruchꞌabül. Y ri chuvüch apu nyecꞌat cꞌa siete kꞌakꞌ. Y ri kꞌakꞌ reꞌ, jareꞌ ri siete espíritu richin ri Dios.
\v 6 Chiriꞌ chuvüch chukaꞌ apu ri Jun ri tzꞌuyul pa lokꞌolüj ruchꞌacat, cꞌo cꞌa jun cachiꞌel mar y cachiꞌel vidrio ntzuꞌun.
\p Pa nicꞌaj cꞌo-vi ri Jun ri tzꞌuyul pa lokꞌolüj ruchꞌacat, y sutin-apu rij coma ye cajiꞌ ri juis qꞌuiy runakꞌ tak quivüch cꞌo. Nojnük cꞌa quij roma ri runakꞌ tak quivüch.
\v 7 Ri nabey cꞌa cheque ri ye cajiꞌ riꞌ cachiꞌel cꞌa rubeyal jun león. Ri rucaꞌn cachiꞌel cꞌa jun alaj vacx. Ri rox cachiꞌel cꞌa ntzuꞌun jun vinük. Y jacꞌa ri rucaj, cachiꞌel cꞌa jun xic ri ruricꞌon ruxicꞌ benük chicaj.
\v 8 Y rijeꞌ ox-ox cꞌa cꞌulaj quixicꞌ cꞌo, y nojnük-vi cꞌa ri quij y ri xeꞌ tak quixicꞌ riqꞌuin ri runakꞌ tak quivüch. Y man jun bey cꞌa ri man ta nquiyaꞌ rukꞌij ri Dios. Chi pakꞌij chi chakꞌaꞌ nquibij:
\q Lokꞌolüj, lokꞌolüj, lokꞌolüj Ajaf Dios
\q Ajaf Dios ri cꞌo-vi ronojel avuchukꞌaꞌ aviqꞌuin.
\q Rat ri ratcꞌo-vi-pe pa rutzꞌuquic, ri ratcꞌo vocomi, y ri ncacꞌujeꞌ chukaꞌ ri nbe-apu, nquibij cꞌa.
\p
\v 9 Y quiriꞌ nquibün cꞌa ri ye cajiꞌ ri juis qꞌuiy runakꞌ tak quivüch cꞌo, richin nquiyaꞌ rukꞌij ri tzꞌuyul pa lokꞌolüj ruchꞌacat. Nyematioxin cꞌa chin ri chi jumul cꞌo.
\v 10 Y tok quiriꞌ nquibün, ri veinticuatro rajatük achiꞌaꞌ nyexuqueꞌ cꞌa chuvüch ri tzꞌuyul pa lokꞌolüj ruchꞌacat. Nquiyaꞌ cꞌa rukꞌij ri chi jumul cꞌo. Y ri rajatük achiꞌaꞌ nquelesalaꞌ cꞌa ri qui-coronas y nyequiya-apu chuvüch ri tzꞌuyul pa lokꞌolüj ruchꞌacat, y nquibij cꞌa chukaꞌ:
\q
\v 11 Kajaf Dios,
\q cꞌuluman cꞌa que nacꞌul akꞌij y chukaꞌ ri avuchukꞌaꞌ,
\q roma xaxe rat ri cꞌo akꞌij y cꞌo chukaꞌ avuchukꞌaꞌ.
\q Ja rat ri xabanun ronojel ri cꞌo y xeꞌaqꞌuiytisaj,
\q roma jariꞌ ri arayibül.
\c 5
\s Ri Jesucristo ri cachiꞌel Alaj Oveja cꞌuluman-vi que nujük ri vuj
\p
\v 1 Y xintzꞌet cꞌa que ri Jun ri tzꞌuyul pa lokꞌolüj ruchꞌacat, cꞌo jun vuj boton ri rucꞌuan pa rajquikꞌaꞌ (ru-mano derecha). Ri vuj riꞌ, cꞌo tzꞌiban chuvüch y chirij, y tzꞌapin riqꞌuin siete retal.
\v 2 Y jariꞌ tok xintzꞌet jun ángel ri juis ruchukꞌaꞌ, y riqꞌuin ri juis ruchukꞌaꞌ nucꞌutuj cꞌa: ¿Cꞌo ta comi jun ri cꞌuluman richin nrelesaj ri siete retal richin ri vuj y nujük?
\p
\v 3 Pero man jun. Xa man jun cꞌa ri cꞌuluman ta richin nujük-ka ri vuj. Man jun chupan ri caj, nixta pariꞌ ri ruchꞌulef y nixta chuxeꞌ ka ri ruchꞌulef. Stapeꞌ (Aunque) ta xaxe richin nutzꞌet baꞌ.
\v 4 Y yin juis cꞌa nquinokꞌ, roma man jun ri cꞌuluman ta richin nujük ri vuj y nusiqꞌuij. Man jun cꞌo, stapeꞌ (aunque) ta xaxe richin nutzꞌet baꞌ.
\v 5 Y jun cheque ri rajatük tak achiꞌaꞌ xbij chuve: Man catokꞌ chic cꞌa, roma ri vuj cꞌo cꞌa Jun ri cꞌuluman richin nrelesaj ri siete retal richin y nujük, roma ja rijaꞌ ri chꞌaconük y junan cꞌa riqꞌuin jun león. Rijaꞌ ruxquin-rumam can ri Judá y ruxquin-rumam can chukaꞌ ri rey David, xbij chuve.
\p
\v 6 Y cꞌateriꞌ xintzꞌet que ri Jun riꞌ, jariꞌ ri cachiꞌel Alaj Oveja ri xcꞌo yan chuvüch ri camic. Rijaꞌ paꞌül cꞌa chiriꞌ pa quinicꞌajal ri Jun ri tzꞌuyul pa lokꞌolüj ruchꞌacat, ri ye cajiꞌ ri juis qꞌuiy runakꞌ tak quivüch cꞌo, y ri rajatük tak achiꞌaꞌ. Y ri cachiꞌel Oveja riꞌ cꞌo siete rucꞌaꞌ y siete chukaꞌ runakꞌ tak ruvüch. Y ri siete runakꞌ tak ruvüch riꞌ, ja ri siete espíritu richin ri Dios ri ye takon chuvüch ri ruchꞌulef richin nyesamüj.
\v 7 Xpuꞌu cꞌa ri cachiꞌel Alaj Oveja ri cꞌunük chic chuvüch ri camic, xberucꞌama-pe ri boton vuj pa rajquikꞌaꞌ (ru-mano derecha) ri tzꞌuyul pa lokꞌolüj ruchꞌacat.
\v 8 Y jacꞌa tok xberucꞌama-pe ri boton vuj riꞌ, ri ye cajiꞌ ri juis qꞌuiy runakꞌ tak quivüch y ye cachibilan ri veinticuatro rajatük tak achiꞌaꞌ, xexuque-ka chuvüch ri cachiꞌel Alaj Oveja ri cꞌunük chic chuvüch ri camic. Y ri rajatük tak achiꞌaꞌ riꞌ quicꞌualon cꞌa ri jun ruvüch kꞌojon rubiniꞌan arpa y quicꞌualon chukaꞌ lük ri ye banun riqꞌuin kꞌanapük ri cꞌo-e jubulüj tak akꞌon chupan. Y jariꞌ ri qui-oraciones ri yecꞌo chic pa rukꞌaꞌ ri Dios.
\v 9 Y ri rajatük tak achiꞌaꞌ riꞌ cꞌo cꞌa jun cꞌacꞌaꞌ bix nquibixaj, y ri bix riꞌ nbij cꞌa:
\q Rat ri cachiꞌel jun Alaj Oveja, cꞌuluman-vi richin xbeꞌacꞌama-pe ri vuj, y cꞌuluman-vi chukaꞌ richin nyeꞌavelesaj ri retal ri nyetzꞌapin cꞌa can.
\q Roma rat xacamsüs, y riqꞌuin ri aquiqꞌuel xojacol konojel richin xojoc richin ri Dios.
\q Achique na ta cꞌa ri ye kaxquin-kamamaꞌ y kachꞌabül, y achique na ta cꞌa chukaꞌ katinamit y ri karuchꞌulef.
\q
\v 10 Xabün cꞌa chukaꞌ cheke que xojoc reyes y sacerdotes richin ri Katataꞌ Dios,
\q y junan nkabün mandar pariꞌ ri ruchꞌulef.
\p
\v 11 Tok xintzuꞌun yan chic, xintzꞌet que ye juis qꞌuiy ángeles ri quisutin rij ri Jun ri tzꞌuyul pa lokꞌolüj ruchꞌacat y ri ye cajiꞌ ri juis qꞌuiy runakꞌ tak quivüch y ri rajatük tak achiꞌaꞌ. Y ri ángeles ri yecꞌo chiriꞌ, pa millones cꞌa, y xinvacꞌaxaj cꞌa
\v 12 que riqꞌuin ronojel cuchukꞌaꞌ nquibij:
\q Ri Jesucristo ri cachiꞌel Alaj Oveja ri xcamsüs,
\q cꞌuluman-vi que cꞌo ruchukꞌaꞌ, cꞌo rubeyomal y cꞌo etamabül riqꞌuin.
\q Rijaꞌ ronojel ntiquer nbün.
\q Y chukaꞌ cꞌuluman que nucꞌul rukꞌij, y cꞌuluman que ncꞌujeꞌ ri rubiꞌ pa nabey.
\p
\v 13 Y xinvacꞌaxaj cꞌa chukaꞌ conojel ri ye ruqꞌuiytisan ri Dios ri yecꞌo chupan ri caj, ri yecꞌo chuvüch ri ruchꞌulef, ri yecꞌo chuxeꞌ ka ri ruchꞌulef, y ri yecꞌo chupan ri mar, nquibij cꞌa:
\q Ri tzꞌuyul chupan ri lokꞌolüj ruchꞌacat y quiriꞌ chukaꞌ ri cachiꞌel Alaj Oveja ri cꞌunük chic chuvüch ri camic,
\q jariꞌ ri cꞌo rubiꞌ pa nabey, cꞌo rukꞌij, y cꞌo ruchukꞌaꞌ richin chi jumul, xquibij.
\p
\v 14 Y ri ye cajiꞌ ri juis qꞌuiy runakꞌ tak quivüch cꞌo, xquibij cꞌa: Quiriꞌ cꞌa.
\p Y ri veinticuatro rajatük achiꞌaꞌ cꞌateriꞌ xexuque-ka richin xquiyaꞌ rukꞌij ri chi jumul cꞌo rucꞌaslen.
\c 6
\s Tok ri Jesucristo xutzꞌom rujakic ri vuj ri tzꞌapin riqꞌuin siete retal
\p
\v 1 Y cꞌateriꞌ tok xintzꞌet que ri Jesucristo ri cachiꞌel Alaj Oveja, xrelesaj ri nabey retal richin ri boton vuj. Jariꞌ tok xinvacꞌaxaj chukaꞌ que xchꞌo ri jun cheque ri ye cajiꞌ ri juis qꞌuiy runakꞌ tak quivüch cꞌo. Ri rubanic ri nchꞌo, cachiꞌel cꞌa ri njinin, y xbij cꞌa: ¡Catampe! ¡Tatzꞌetaꞌ!
\p
\v 2 Y yin xintzꞌet cꞌa jun quiej sük rij, y ri tzꞌuyul-e chirij rucꞌuan cꞌa jun chꞌaꞌ pa rukꞌaꞌ. Xjach jun ru-corona. Y rijaꞌ xbe richin nbechꞌacon, y nbechꞌacon na vi cꞌa.
\p
\v 3 Tok ri Jesucristo ri cachiꞌel Alaj Oveja xrelesaj ri rucaꞌn retal richin ri boton vuj, xinvacꞌaxaj cꞌa que xchꞌo ri rucaꞌn cheque ri ye cajiꞌ ri juis qꞌuiy runakꞌ tak quivüch cꞌo, y xbij cꞌa: ¡Catampe! ¡Tatzꞌetaꞌ!
\p
\v 4 Y xbeꞌel-pe jun quiej cük rij. Y ri tzꞌuyul-pe chirij, xjach-e autoridad pa rukꞌaꞌ richin que tuyaꞌ oyoval chiquicojol ri vinük ri yecꞌo chuvüch ri ruchꞌulef, richin quiriꞌ tiquicamsalaꞌ na quiꞌ. Y xjach-e chukaꞌ jun machet nim pa rukꞌaꞌ.
\p
\v 5 Tok ri Jesucristo ri cachiꞌel Alaj Oveja xrelesaj ri rox retal richin ri boton vuj, xinvacꞌaxaj cꞌa que xchꞌo ri rox cheque ri ye cajiꞌ ri juis qꞌuiy runakꞌ tak quivüch cꞌo, y xbij cꞌa: ¡Catampe! ¡Tatzꞌetaꞌ!
\p Tok xintzꞌet na vi, xintzꞌet jun quiej xak rij, y ri jun tzꞌuyurnük-pe chirij rucꞌuan jun etabül pa rukꞌaꞌ.
\v 6 Y xinvacꞌaxaj cꞌa chukaꞌ que cꞌo jun ri nchꞌo-pe apeꞌ yecꞌo-vi ri ye cajiꞌ ri juis qꞌuiy runakꞌ tak quivüch, y nbij cꞌa: Rajil jun kꞌij samaj chin jun samjel rajil ri caꞌiꞌ libras trigo, y rajil chukaꞌ jun kꞌij samaj chin jun samjel rajil vakiꞌ libras cebada. Jacꞌa ri aceite olivo y ri ruyaꞌal-uva man tinük.
\p
\v 7 Tok ri Jesucristo ri cachiꞌel Alaj Oveja xrelesaj ri rucaj retal richin ri boton vuj, xinvacꞌaxaj cꞌa que xchꞌo ri ruqꞌuisbül cheque ri ye cajiꞌ ri juis qꞌuiy runakꞌ tak quivüch cꞌo, y xbij cꞌa: ¡Catampe! ¡Tatzꞌetaꞌ!
\p
\v 8 Tok xintzꞌet na vi, xintzꞌet jun quiej kꞌün rij y tzꞌuyuben-e roma jun ri rubiniꞌan Camic. Y chirij ri Camic reꞌ tzeketel cꞌa e ri jun ri rubiniꞌan Qui-Lugar ri Caminakiꞌ. Y pa rukꞌaꞌ cꞌa ri Camic y pa rukꞌaꞌ ri rubiniꞌan Qui-Lugar Ri Caminakiꞌ, xjach cꞌa cuchukꞌaꞌ richin que quequicamsaj jun molaj cheque ri cajiꞌ molaj vinük ri yecꞌo chuvüch ri ruchꞌulef, riqꞌuin oyoval, riqꞌuin vayjül, riqꞌuin yabil y quiqꞌuin ri chico ri nyecꞌuxun.
\p
\v 9 Tok ri Jesucristo ri cachiꞌel Alaj Oveja xrelesaj ri voꞌo retal richin ri boton vuj, xintzꞌet cꞌa que chuxeꞌ ri altar chiriꞌ cꞌo-vi ri cánima ri vinük ri ye camsan-e roma xquitzijolaꞌ ri rutzij ri Dios y roma chukaꞌ man nquixbij tüj quiꞌ xquikꞌalajrisaj que quitaken ri Dios.
\v 10 Y ri cánima ri vinük ri yecꞌo chuxeꞌ ri altar riꞌ, riqꞌuin cuchukꞌaꞌ nquibij: Lokꞌolüj y ketzij Kajaf, ¿jampeꞌ cꞌa nabün juzgar pa quiviꞌ ri vinük ri yecꞌo chuvüch ri ruchꞌulef? ¿Jampeꞌ cꞌa nayaꞌ ruqꞌuexel cheque roma ri kacamic roj? nquibij.
\p
\v 11 Y jariꞌ tok xjach quitziek sük chiquijujunal, y xbix cꞌa chukaꞌ cheque que cꞌa ticoyobej chic na baꞌ, roma cꞌa yecꞌo na ri cachibil pa rusamaj ri Cristo, y chukaꞌ ri qui-hermanos-quiꞌ quiqꞌuin, cꞌa man jani nyecamsüs coma ri vinük, cachiꞌel ri xquicꞌulachij-e rijeꞌ.
\p
\v 12 Tok ri Jesucristo ri cachiꞌel Alaj Oveja xrelesaj ri vakiꞌ (sexto) retal richin ri boton vuj, xintzꞌet cꞌa que xbün jun nimalüj cab-rakün. Y ri kꞌij man nsakrisan tüj chic, xa xkꞌekür cachiꞌel jun pin tziük ri banun riqꞌuin rusmal jun chico xak rij, ri tziük ri nucusüs tok cꞌo bis. Y ri icꞌ quicꞌ-quicꞌ ntzuꞌun roma xcakür-ka.
\v 13 Y ri chꞌumilaꞌ xebetzak-pe ri chicaj y xetzak-ka pariꞌ ri ruchꞌulef, cachiꞌel tok nyebetzak-pe ri ruvüch ri hiquera pa rukꞌaꞌ jun nimalüj cakikꞌ.
\v 14 Y ri caj xcꞌol-e-riꞌ cachiꞌel tibot-e-riꞌ jun vuj. Y ronojel juyuꞌ y chukaꞌ ri ruchꞌulef ri yecꞌo pa nicꞌaj tak yaꞌ xeꞌel pa tak quicꞌojlibül.
\v 15 Ri reyes ri yecꞌo chuvüch ri ruchꞌulef, ri chꞌaka chic autoridades, ri beyomaꞌ, ri ye ucꞌuey quichin achiꞌaꞌ ri ye richin oyoval, ri vinük ri cꞌo cuchukꞌaꞌ pa quikꞌaꞌ, ri lokꞌon tak samajelaꞌ y ri vinük ri ye libre vi, xquevalaꞌ cꞌa quiꞌ pa tak jul y chucojol tak abüj ri chuvüch tak juyuꞌ.
\v 16 Y conojel cꞌa ri vinük reꞌ nquibij cꞌa: Nyetzak ta pe ri juyuꞌ y abüj chikij y nkujquivevaj chuvüch la tzꞌuyul pa lokꞌolüj ruchꞌacat. Y nkujquivevaj chuvüch ri castigo ri nuyaꞌ ri Jesucristo ri cachiꞌel Alaj Oveja.
\p
\v 17 Roma xka-pe yan ri kꞌij tok nka-pe ri castigo pa kaviꞌ y man jun cꞌa ntiquer npaꞌeꞌ ta can.
\c 7
\s Ri israelitas ri xquicꞌul quetal pa nicꞌaj-quivüch
\p
\v 1 Y cꞌateriꞌ tok xentzꞌet ye cajiꞌ ángeles. Jun ángel paꞌül pa jun cachiꞌel ru-esquina ri ruchꞌulef, jun chic pa jun. Y quiriꞌ, jujun cꞌa ángel ye paꞌül pa jujun cheque ri cajiꞌ cachiꞌel ru-esquina ri ruchꞌulef, quikꞌaton ri cajiꞌ ruvüch cakikꞌ, richin que man nyeꞌapon tüj pariꞌ ri ruchꞌulef, pariꞌ ri mar, y pa quiviꞌ ri cheꞌ.
\v 2 Y xintzꞌet chukaꞌ que cꞌo jun ángel ri jotol-pe chiriꞌ pan oriente, rucꞌamon-pe ri retal richin ri cꞌaslic Dios. Y ri ángel reꞌ riqꞌuin cꞌa ronojel ruchukꞌaꞌ xchꞌo-apu cheque ri ye cajiꞌ ángeles, ri yoꞌon-vi-pe cuchukꞌaꞌ pa quikꞌaꞌ richin nyequibanaꞌ castigo pariꞌ ri ruchꞌulef y ri mar.
\v 3 Y xbij cꞌa ri jun ángel cheque ri ye cajiꞌ: Man jun na castigo tiyaꞌ pariꞌ ri ruchꞌulef, pariꞌ ri mar y cheque chukaꞌ ri cheꞌ, roma cꞌa ncꞌatzinej que nkayaꞌ quetal ri rusamajelaꞌ ri Dios pa nicꞌaj-quivüch, riqꞌuin ri retal ri Dios.
\p
\v 4 Cꞌateriꞌ yin Juan xinvacꞌaxaj cꞌa que ye ciento cuarenta y cuatro mil israelitas ri xquicꞌul quetal. Jariꞌ ri vinük richin ri doce tinamit ri rubanun ri nimalüj tinamit Israel.
\v 5 Ye doce mil cheque ri ye ruxquin-rumam can ri Judá. Ye doce mil cheque ri ye ruxquin-rumam can ri Rubén. Ye doce mil cheque ri ye ruxquin-rumam can ri Gad.
\v 6 Ye doce mil cheque ri ye ruxquin-rumam can ri Aser. Ye doce mil cheque ri ye ruxquin-rumam can ri Neftalí. Ye doce mil cheque ri ye ruxquin-rumam can ri Manasés.
\v 7 Ye doce mil cheque ri ye ruxquin-rumam can ri Simeón. Ye doce mil cheque ri ye ruxquin-rumam can ri Leví. Ye doce mil cheque ri ye ruxquin-rumam can ri Isacar.
\v 8 Ye doce mil cheque ri ye ruxquin-rumam can ri Zabulón. Ye doce mil cheque ri ye ruxquin-rumam can ri José, y ye doce mil cheque ri ye ruxquin-rumam can ri Benjamín. Y ja conojel reꞌ ri xquicꞌul quetal pa nicꞌaj-quivüch.
\s Ri quicusalon sük tak tziük ja ri ye colotajnük chic pe chupan ri nimalüj pokonül
\p
\v 9 Y cꞌateriꞌ yin xintzꞌet cꞌa que ye juis vinük ri man junan tüj ruchꞌulef nyepuꞌu-vi, man junan tüj chukaꞌ nyetzuꞌun, man junan tüj quitinamit y man junan tüj quichꞌabül. Conojel cꞌa ri vinük reꞌ yecꞌo cꞌa apu chuvüch ri Jun tzꞌuyul chupan ri lokꞌolüj ruchꞌacat y chuvüch chukaꞌ apu ri Jesucristo ri cachiꞌel Alaj Oveja. Y ri vinük reꞌ man jun cꞌa ri ntiquer ta najlan quichin, roma ye juis. Y sük cꞌa ri quitziek ri ye quicusalon, y ye quicꞌualon ramos pa tak quikꞌaꞌ.
\v 10 Y conojel riqꞌuin ronojel cuchukꞌaꞌ nquibij:
\q Ri xojcolotüj,
\q ja ri Dios ri tzꞌuyul pa lokꞌolüj ruchꞌacat ri xbanun,
\q y chukaꞌ ri Jesucristo ri cachiꞌel Alaj Oveja, nquibij.
\m
\v 11 Y conojel cꞌa ri ángeles ye paꞌül quisutin rij ri apeꞌ tzꞌuyul-vi ri Dios, y quisutin quij ri rajatük tak achiꞌaꞌ y ri ye cajiꞌ ri juis qꞌuiy runakꞌ tak quivüch cꞌo. Y richin cꞌa nquiyaꞌ rukꞌij ri Dios, xquikasaj-ka-quiꞌ cꞌa pan ulef.
\v 12 Y tok quibin chic que quiriꞌ vi, xquibij cꞌa:
\q Ja ri rubiꞌ ri ka-Dios cꞌo pa nabey.
\q Rijaꞌ cꞌo-vi rukꞌij, y ja rijaꞌ ri Rajaf ri etamabül.
\q Ja chukaꞌ rijaꞌ ri cꞌuluman que ncꞌulun ri matioxinic.
\q Rijaꞌ cꞌo-vi rukꞌij, cꞌo ruchukꞌaꞌ richin chi jumul. Ronojel vi ntiquer nbün.
\q Quiriꞌ cꞌa, nquibij.
\p
\v 13 Y cꞌateriꞌ jun cꞌa cheque ri rajatük achiꞌaꞌ xucꞌutuj chuve: ¿Avetaman achique cꞌa chi vinük la sük-sük quitziek quicusalon? ¿Y apeꞌ quepuꞌu-vi? xbij chuve.
\p
\v 14 Y yin Juan xinbij cꞌa chin: Ja rat ri rat etamayon achique chi vinük laꞌ, xinbij.
\p Y rijaꞌ xbij cꞌa chuve: Jareꞌ ri ye elenük chic pe chupan ri nimalüj pokonül, y quichꞌajchꞌojrisalon y quisakrisalon-pe-quiꞌ chupan ri ruquiqꞌuel ri Jesucristo ri cachiꞌel Alaj Oveja.
\v 15 Y romariꞌ yecꞌo-apu riqꞌuin ri Dios, chupan ri racho, y chi pakꞌij chi chakꞌaꞌ nquibün rusamaj. Y ri Dios tzꞌuyul cꞌa chupan ri lokꞌolüj ruchꞌacat ye ruchajin, roma quiqꞌuin cꞌo-vi.
\v 16 Ri vinük cꞌa reꞌ man nyenum tüj chic quipan, nixta nchakiꞌj chic pe quichiꞌ. Man nyecꞌat tüj chic chuvüch-kꞌij, nixta chukaꞌ man nquicꞌusaj tüj chic cꞌatün.
\v 17 Roma ja ri Jesucristo ri cachiꞌel Alaj Oveja, ri cꞌo-apu chunakaj ri apeꞌ tzꞌuyul-vi ri Dios, jariꞌ ri nchajin quichin. Y nyeruchajij cachiꞌel nyechajix ri ovejas, y nyerucꞌuaj cꞌa chukaꞌ richin nuyaꞌ quiyaꞌ pa tak apeꞌ nalüx yaꞌ richin cꞌaslen. Y ri Dios nbün cꞌa chukaꞌ cheque que man jun chic kꞌoxon ni bis ncꞌujeꞌ quiqꞌuin.
\c 8
\s Ri xbanatüj tok ri Jesucristo xrelesaj ri ruqꞌuisbül retal richin ri vuj
\p
\v 1 Y ja tok ri Jesucristo ri cachiꞌel Alaj Oveja xrelesaj ri ruvukuꞌ (séptimo) retal richin ri boton vuj, ri chilaꞌ chicaj colopeꞌ jun nicꞌaj hora xbün que man jun xkꞌajan.
\v 2 Y cꞌateriꞌ xentzꞌet cꞌa ri ye siete ángeles ri ye paꞌül-apu chuvüch ri Dios. Y cheque cꞌa ri siete ángeles reꞌ xjach jujun trompetas.
\v 3 Y cꞌateriꞌ tok xintzꞌet que petenük jun chic ángel y rucꞌamon-pe jun bambül richin pon banun riqꞌuin kꞌanapük, y choj xbepaꞌeꞌ chuvüch apu ri altar. Y xbejach cꞌa pe qꞌuiy pon chin, richin quiriꞌ nuporoj pariꞌ ri altar kꞌanapük, ri cꞌo-apu chuvüch ri apeꞌ tzꞌuyul-vi ri Dios. Ri jubulüj ruxlaꞌ ri pon y ri qui-oraciones ri lokꞌolüj tak ralcꞌual ri Dios, junan cꞌa nyeꞌapon-e cꞌa chuvüch rijaꞌ.
\v 4 Y quiriꞌ vi cꞌa, roma ri rusibil ri pon y ri qui-oraciones ri yecꞌo chic pa rukꞌaꞌ ri Dios, nkꞌalajin-vi cꞌa que pa rukꞌaꞌ ri ángel nyeꞌel-vi-e y nyeꞌapon cꞌa chuvüch ri Dios.
\v 5 Jariꞌ tok ri ángel xberucꞌamaꞌ chic pe ri bambül richin ri pon y xberuya-pe kꞌakꞌ chupan, ri cꞌo pariꞌ ri altar. Y cꞌateriꞌ xutorij ri kꞌakꞌ cꞌa pariꞌ ri ruchꞌulef xintzꞌet yin. Y jariꞌ tok xepuꞌu nyekꞌajan truenos, chꞌabül, coyopaꞌ, y chukaꞌ xbün cab-rakün.
\s Tok ri ángeles nquixupuj ri trompetas
\p
\v 6 Y ri siete ángeles ri ye ucꞌuayon ri trompetas, jariꞌ xquichojmirsala-quiꞌ richin nyequixubaj ri trompetas.
\p
\v 7 Y tok ri nabey ángel xuxubaj ri ru-trompeta, jariꞌ tok xka-ka sakboch y kꞌakꞌ yojon riqꞌuin quicꞌ pariꞌ ri ruchꞌulef. Y jun molaj cheque ri oxiꞌ molaj chin ronojel ri cheꞌ cꞌo, xqꞌuis kꞌakꞌ. Y quiriꞌ cꞌa ronojel kꞌayis.
\p
\v 8 Ja tok ri rucaꞌn ángel xuxubaj ri ru-trompeta, xintzꞌet cꞌa jun kꞌakꞌ cachiꞌel jun nimalüj juyuꞌ rubanun y xtorix pa mar. Y jun molaj cheque ri oxiꞌ molaj chin ri mar xoc quicꞌ.
\v 9 Y roma cꞌa jun molaj cheque ri oxiꞌ molaj chin chin ri mar xoc quicꞌ, ronojel ri cꞌo quicꞌaslen ri yecꞌo chiriꞌ, xecom, y ri barcos ri ye benük chiriꞌ, xeqꞌuis cꞌa.
\p
\v 10 Y tok ri rox ángel xuxubaj ri ru-trompeta, xintzꞌet cꞌa que jun nimalüj chꞌumil nbiron pa kꞌakꞌ xbetzak-pe ri chilaꞌ chicaj. Y ri chꞌumil reꞌ xka-ka cꞌa pa quiviꞌ jun molaj cheque ri oxiꞌ molaj cheque ri rakün tak yaꞌ y ri apeꞌ na nalüx tak yaꞌ ri yecꞌo chuvüch ri ruchꞌulef.
\v 11 Ri chꞌumil reꞌ rubiniꞌan Cꞌüy, y cꞌüy-cꞌüy xbün cheque ri yaꞌ chupan ri lugar apeꞌ xka-vi. Y romariꞌ ye qꞌuiy cꞌa vinük ri xecom.
\p
\v 12 Y ri rucaj ángel xuxubaj cꞌa ri ru-trompeta, y jubama nicꞌaj chin ri kꞌij, jubama nicꞌaj chin ri icꞌ y jubama nicꞌaj chukaꞌ cheque ri chꞌumilaꞌ, xemoyomoꞌ. Man xetzuꞌun tüj chic cꞌa jabel. Y xbün cꞌa que chin ronojel kꞌij, jubama nicꞌaj ri man xtzuꞌun tüj chic ri kꞌij. Y quiriꞌ cꞌa chukaꞌ xcꞌulachij ri akꞌaꞌ. Jubama nicꞌaj chukaꞌ ri man xetzuꞌun tüj chic ri icꞌ y ri chꞌumilaꞌ.
\p
\v 13 Y cꞌateriꞌ tok xintzꞌet y xinvacꞌaxaj chukaꞌ que tiropüp benük jun ángel pa runicꞌajal ri caj, y riqꞌuin cꞌa ronojel ruchukꞌaꞌ nbij: Juis cꞌayuf cꞌa ri nquicꞌulachij ri vinük ri yecꞌo chuvüch ri ruchꞌulef, tok nyekꞌajan-pe ri oxiꞌ chic trompetas ri nyexubüx coma ri ángeles.
\c 9
\p
\v 1 Y jariꞌ tok ri voꞌoꞌ (quinto) ángel xuxubaj ri ru-trompeta, y xintzꞌet cꞌa que cꞌo jun cachiꞌel chꞌumil ri xtzak-pe chilaꞌ chicaj y chuvüch ruchꞌulef xka-ka-vi. Y pa rukꞌaꞌ cꞌa rijaꞌ xjach-vi ri llave richin ri jul ri ruyon kꞌekuꞌn rupan.
\v 2 Ri jun cꞌa cachiꞌel chꞌumil riꞌ, xberujaka-pe ri ruchiꞌ ri jul ri kꞌekuꞌn rupan. Y chupan cꞌa ri jul riꞌ xbeꞌel cꞌa pe juis sib, cachiꞌel xa ta ri jul riꞌ jun ta nimalüj horno. Ri sib cꞌa ri xbeꞌel-pe chiriꞌ chupan ri jul ri kꞌekuꞌn rupan, xutzꞌapij cꞌa ruvüch ri kꞌij, y xunojsaj ri caj.
\v 3 Y chupan ri sib riꞌ xebecꞌulun cꞌa pe sacꞌ, y xebe pariꞌ ri ruchꞌulef. Y xban cꞌa cheque ri sacꞌ riꞌ que xeꞌoc cachiꞌel ri snaꞌj, roma nquibün-vi chꞌaꞌoj cachiꞌel nquibün ri snaꞌj.
\v 4 Y xbix cꞌa cheque que man tiquibün chꞌaꞌoj cheque ri cheꞌ, ri ticoꞌn o ri kꞌayis. Pero tiquibanaꞌ chꞌaꞌoj cheque ri vinük ri manak quetal pa nicꞌaj-quivüch, roma xa man ye richin tüj ri Dios.
\v 5 Pero man richin tüj que nyequicamsaj ri vinük, xaxe richin que nyequiyaꞌ pa kꞌoxomül voꞌoꞌ icꞌ. Y ri kꞌoxomül cꞌa riꞌ, cachiꞌel cꞌa ri kꞌoxomül ri nquiyaꞌ ri snaꞌj tok nquichꞌop can jun vinük.
\v 6 Y ja kꞌij cꞌa riꞌ tok ri vinük nquicanolaꞌ ri quicamic roma ri kꞌoxomül ri nquicꞌusaj, pero xa man jun cꞌa nquicꞌulachij. Juis vi cꞌa nquirayilaꞌ ri quicamic, pero ri camic xa nanmüj chiquivüch.
\p
\v 7 Y ri quibanic cꞌa ri sacꞌ riꞌ, cachiꞌel ri quiej ri banun chic e quicꞌojlen richin nyebe pan oyoval. Pa quijolon quicꞌuan cꞌa jun cachiꞌel corona ri cachiꞌel kꞌanapük ntzuꞌun, y ri quipalüj cachiꞌel cꞌa quipalüj vinük.
\v 8 Cꞌo cꞌa chukaꞌ rusmal quiviꞌ cachiꞌel ri rusmal quiviꞌ ri ixokiꞌ. Ri quey cachiꞌel quey ri león.
\v 9 Ri quij cachiꞌel cꞌa chꞌichꞌ. Ri quixicꞌ juis cꞌa nkꞌajan, cachiꞌel nyekꞌajan ye qꞌuiy carruajes ye chiriren coma quiej y junanin ye benük richin nyebe pan oyoval.
\v 10 Ri quijey cachiꞌel ri quijey ri snaꞌj, y chutzaꞌn cꞌo ri quichꞌutꞌ. Y riqꞌuin ri quichꞌutꞌ riꞌ nyetiquer cꞌa nyequiyaꞌ pa kꞌoxomül ri vinük voꞌoꞌ icꞌ.
\v 11 Y ri qui-rey ri sacꞌ riꞌ, ja ri ángel ri rajaf ri jul ri kꞌekuꞌn rupan. Ri qui-rey ri sacꞌ riꞌ Abadón cꞌa nbix chin pa kachꞌabül roj israelitas, y Apolión cꞌa nbix chin pa quichꞌabül ri vinük aj-Grecia.
\p
\v 12 Xcꞌo cꞌa ri jun pokonül reꞌ, pero cꞌa cꞌo chic caꞌiꞌ nyecanaj can.
\p
\v 13 Y tok ri ruvakiꞌ (sexto) ángel xuxubaj ri ru-trompeta, xinvacꞌaxaj cꞌa jun chꞌabül ri xel-pe ri chiquicojol ri cajiꞌ cachos ri yecꞌo riqꞌuin ri altar banun riqꞌuin kꞌanapük, ri altar ri cꞌo-apu chuvüch ri Dios.
\v 14 Y ri chꞌabül riꞌ xbij cꞌa chin ri ruvakiꞌ (sexto) ángel ri xuxuban ri trompeta: Queꞌasolotüj cꞌa ri cajiꞌ ángeles ri ye ximil can chuchiꞌ ri nimalüj rakün-yaꞌ Eufrates, xbij.
\p
\v 15 Y quiriꞌ cꞌa tok xebesol can ri cajiꞌ ángeles, richin nyequicamsaj ri vinük. Roma ri cajiꞌ ángeles riꞌ ye yacon cꞌa richin ri hora, ri kꞌij, ri icꞌ y ri junaꞌ riꞌ. Y jun molaj cheque ri oxiꞌ molaj cheque ri vinük ri yecꞌo chuvüch ri ruchꞌulef ri nyequicamsaj.
\v 16 Y ri cajiꞌ ángeles riꞌ, ye juis cꞌa achiꞌaꞌ richin oyoval yecꞌo quiqꞌuin y quiriꞌ cꞌa chukaꞌ ri quiej. Nyejinin. Y jariꞌ yin Juan xinvacꞌaxaj cꞌa que ri achiꞌaꞌ richin oyoval, yecꞌo cꞌa caꞌiꞌ ciento millones. Y quiriꞌ chukaꞌ ri quiej yecꞌo quiqꞌuin.
\p
\v 17 Y chupan cꞌa ri cachiꞌel vachicꞌ ri xinbün, chiriꞌ tok xentzꞌet ri quiej. Y ri ye tzꞌuyurnük-pe chiquij ri quiej riꞌ, ye quicusalon cꞌa chꞌichꞌ chiquicꞌuꞌx chin nquitola-quiꞌ qꞌuin, y ri chꞌichꞌ riꞌ cük, kꞌün y azul cꞌa ri nyetzuꞌun. Jacꞌa ri quiquiej man choj tüj rujolon quiej, xa cachiꞌel ri quijolon ri león, quiriꞌ. Y kꞌakꞌ, sib y azufre ri ntel cꞌa pa tak quichiꞌ.
\v 18 Y ja ri kꞌakꞌ, sib y azufre ri nyeꞌel pa tak quichiꞌ ri quiej, jariꞌ ri xecamsan jun molaj cheque ri oxiꞌ molaj cheque conojel ri vinük ri yecꞌo chuvüch ri ruchꞌulef.
\v 19 Ri quiej cꞌa reꞌ, ja ri quichiꞌ y ri quijey ri nyebanun chꞌaꞌoj, roma pa quichiꞌ ntel kꞌakꞌ, sib y azufre. Y ri quijey cachiꞌel cumütz, roma riqꞌuin riꞌ chukaꞌ nquibün-vi chꞌaꞌoj.
\p
\v 20 Jacꞌa ri vinük ri cꞌa xecꞌaseꞌ can y man xka-ka tüj ri kꞌoxomül pa quiviꞌ, man riqꞌuin tüj riꞌ cꞌa xquitzolij ta pe quicꞌuꞌx. Xa cꞌa xequibanalaꞌ cꞌa ri itzel ri quibanun can. Xequiyalaꞌ cꞌa quikꞌij ri itzel tak espíritu, y xa cꞌa xequiyalaꞌ quikꞌij ri vachbül ri ye quibanun riqꞌuin kꞌanapük, sakpük, abüj, cheꞌ y riqꞌuin ri chꞌichꞌ nbix bronce chin. Jariꞌ ri xequiyaꞌ quikꞌij ri vinük riꞌ, y xa ye tiox ri man nyetzuꞌun tüj, nixta man ncacꞌaxaj tüj y nixta man nyebiyin tüj chukaꞌ.
\v 21 Man xquitzolij tüj pe cꞌa quicꞌuꞌx ri vinük riꞌ riqꞌuin ri Dios, richin xequiyalaꞌ ta can ri camsanic, ri itz y ri elekꞌ, y quiriꞌ ta cꞌa chukaꞌ chi ri achiꞌaꞌ y ri ixokiꞌ ri nquicanola-quiꞌ richin nyemacun, xquimestaj ta cꞌa can, pero xa man quiriꞌ tüj xquibün.
\c 10
\s Ri ángel ri ucꞌuayon ri vuj coꞌol
\p
\v 1 Y jariꞌ tok yin xintzꞌet chic cꞌa jun ángel, ri cꞌo-vi ruchukꞌaꞌ pa rukꞌaꞌ y ntajin cꞌa nka-ka-pe chicaj tok xintzꞌet. Cꞌo-pe pa jun sutzꞌ, y cꞌo jun arco iris pa rujolon. Xintzꞌet cꞌa chukaꞌ que ri ángel riꞌ cachiꞌel cꞌa ntzuꞌun ri kꞌij. Y ri rakün cachiꞌel ruxak tak kꞌakꞌ.
\v 2 Y pa rukꞌaꞌ rucꞌuan cꞌa jun vuj coꞌol, y jakül. Cꞌateriꞌ xuyaꞌ cꞌa jun rakün pa mar, y ri jun chic xuyaꞌ pariꞌ ri ruchꞌulef. Ja ri rajquikꞌaꞌ (ru-derecha) ri xuyaꞌ pa mar y ri ruxocon (ru-izquierda) xuyaꞌ pariꞌ ri ruchꞌulef.
\v 3 Ri ángel cꞌa reꞌ, riqꞌuin cꞌa ronojel ruchukꞌaꞌ xchꞌo, cachiꞌel tok nkꞌajan jun león. Y tok chꞌovinük chic ka, yecꞌo cꞌa siete cachiꞌel truenos ri xechꞌo-pe.
\v 4 Y tok ye chꞌovinük chic cꞌa pe ri siete cachiꞌel truenos riꞌ, ja yan riꞌ nintzꞌibaj-ka yin ri xquibij. Pero cꞌo cꞌa jun aj-chicaj chꞌabül ri xinvacꞌaxaj, y xbij cꞌa pe chuve: Xaxe aviqꞌuin rat ticꞌuje-ka ri tzij ri xquibij ri siete cachiꞌel truenos, y man tatzꞌibaj cꞌa.
\p
\v 5 Y ri ángel ri ruyoꞌon jun rakün pa mar y chukaꞌ pariꞌ ri ruchꞌulef, xintzꞌet cꞌa que xutzekej ri rajquikꞌaꞌ chicaj,
\v 6 y xbij cꞌa: Yin ninbün jurar chuvüch ri cꞌo-vi chi jumul, ri xbanun ri caj y ri yecꞌo chupan, ri xbanun ri ruchꞌulef y ri yecꞌo chuvüch, ri xbanun ri mar y ri yecꞌo chupan. Chuvüch cꞌa rijaꞌ ninbün-vi jurar que man ncꞌo tüj chic más tiempo.
\v 7 Roma ja tok nuxubaj ri ru-trompeta ri ruvukuꞌ (séptimo) ángel, jariꞌ tok nkꞌalajin jabel ri evatül-pe riqꞌuin ri Dios, ri xukꞌalajrisaj cheque ri rusamajelaꞌ ri xetzijon ri rutzij, ri achiꞌaꞌ ri xebin ri achique nyebanatüj.
\p
\v 8 Y ri aj-chicaj chꞌabül ri xinvacꞌaxaj yan cꞌa, xchꞌo cꞌa pe chuve jun bey chic y xbij cꞌa pe: Cabiyin y tacꞌama-pe la jun vuj coꞌol jakül pa rukꞌaꞌ la jun ángel la ruyoꞌon jun rakün pa mar y la jun chic ruyoꞌon pariꞌ la ruchꞌulef, xbij.
\p
\v 9 Xinbe na vi apu riqꞌuin ri ángel, y xincꞌutuj ri vuj chin. Y ri ángel xbij cꞌa chuve: Ja vuj reꞌ. Tacꞌuxuꞌ cꞌa. Y nanaꞌ cꞌa que pan achiꞌ cachiꞌel ruquiꞌil ri cab. Jacꞌa chi apan cꞌüy-cꞌüy nbün, xbij chuve.
\p
\v 10 Y yin xincꞌamaꞌ na vi pe ri vit vuj pa rukꞌaꞌ ri ángel, y xincꞌux-ka. Y xinnaꞌ na vi pa nuchiꞌ que cachiꞌel ruquiꞌil ri cab, pero chi nupan cꞌüy-cꞌüy na vi xbün.
\v 11 Y ri ángel riꞌ xbij cꞌa chuve: Ncꞌatzinej cꞌa que nakꞌalajrisaj jun bey chic ri nbij ri Dios chiquij ri tinamit, ri ruchꞌulef, ri reyes, y chiquij ri vinük ri man junan tüj quichꞌabül, xbix chuve.
\c 11
\s Ri ye caꞌiꞌ ri nyekꞌalajrisan richin ri Dios
\p
\v 1 Y xbejach cꞌa pe jun aj chuve, ri cachiꞌel jun cheꞌ richin etabül. Y xbix cꞌa chukaꞌ chuve: Cabiyin y tavetaj rupan ri racho ri Dios, tavetaj ri altar, y queꞌavajlaj-pe ri janiꞌ ri nyeyoꞌon rukꞌij ri Dios chiriꞌ.
\v 2 Jacꞌa ri ruvüch-jay ri richin ri racho ri Dios, man tavetaj, roma xa jachon chic pa quikꞌaꞌ ri vinük ri man ye israelitas tüj. Cuarentidos icꞌ nquiyek pa cakün ri lokꞌolüj tinamit.
\v 3 Y yecꞌo cꞌa nusamajelaꞌ ri nintük. Y yin ninyaꞌ cꞌa e cuchukꞌaꞌ cheque ri ye caꞌiꞌ riꞌ, richin que nquikꞌalajrisaj ri rutzij ri Dios. Y ri caꞌiꞌ samajelaꞌ riꞌ quiriꞌ cꞌa nquibün mil doscientos sesenta kꞌij, y quicusalon chukaꞌ tziük ri richin bis.
\p
\v 4 Y ri ye caꞌiꞌ cꞌa riꞌ, ja ri caꞌiꞌ cachiꞌel cheꞌ olivos y ri ye caꞌiꞌ cachiꞌel candeleros ri yecꞌo-apu chuvüch ri Dios, ri Rajaf ri ruchꞌulef.
\v 5 Y si cꞌo cꞌa jun vinük ri cꞌo jun itzel ri nrajoꞌ nbün cheque ri ye caꞌiꞌ riꞌ, man ntiquer tüj. Roma ri ye caꞌiꞌ riꞌ, ntel cꞌa kꞌakꞌ pa quichiꞌ richin nquiqꞌuis. Y ri jun ri cꞌo cꞌa nrajoꞌ nbün cheque, nqꞌuis-vi cꞌa riqꞌuin ri kꞌakꞌ ntel pa quichiꞌ ri ye caꞌiꞌ riꞌ.
\v 6 Yoꞌon cꞌa chukaꞌ cuchukꞌaꞌ pa quikꞌaꞌ ri ye caꞌiꞌ riꞌ, richin nquitzꞌapij ri job chupan ri kꞌij tok rijeꞌ nquikꞌalajrisaj ri rutzij ri Dios. Nyetiquer cꞌa chukaꞌ nquibün quicꞌ chin ri yaꞌ. Nyetiquer cꞌa chukaꞌ nyequiyaꞌ achique na kꞌoxomül pa quiviꞌ ri aj-ruchꞌulef tok ncꞌatzin.
\v 7 Y tok ri ye caꞌiꞌ riꞌ quiqꞌuison chic rukꞌalajrisasic ri rutzij ri Dios, ri itzel chico ri npuꞌu chupan ri jul kꞌekuꞌn rupan, nutzꞌom cꞌa quij ri ye caꞌiꞌ riꞌ, nyeruchꞌüc y pa ruqꞌuisbül nyerucamsaj.
\v 8 Y ri quichꞌacul nyecꞌujeꞌ cꞌa can pa nima-bey richin ri nimalüj tinamit Jerusalén. Tinamit ri apeꞌ chukaꞌ xcamsüs-vi chuvüch ri cruz ri Kajaf Jesucristo, y tinamit ri nbix chukaꞌ Sodoma y Egipto chin, roma ri itzel tak quinojibül ri nyebanun ri vinük ri yecꞌo chiriꞌ. Ye cachiꞌel ri vinük ri xecꞌujeꞌ pa tinamit Sodoma y ri pa ruchꞌulef Egipto.
\v 9 Y oxiꞌ cꞌa kꞌij riqꞌuin nicꞌaj nyecꞌujeꞌ ri chꞌacul chiquivüch ri vinük ri man junan tüj quitinamit, man junan tüj nyetzuꞌun, man junan tüj quichꞌabül y man junan tüj quiruchꞌulef. Y man nquiyaꞌ tüj cꞌa kꞌij que ri chꞌacul riꞌ nyebemuk ta can.
\v 10 Y ri vinük cꞌa riꞌ nyequicot juis roma ri ye caꞌiꞌ xecom yan. Y roma ri quiquicot riꞌ juis, nyequibanalaꞌ cꞌa sipanic chiquivüch ka rijeꞌ, roma xquicꞌusaj pokonül cꞌa pa quikꞌaꞌ ri ye caꞌiꞌ kꞌalajrisüy rutzij ri Dios.
\v 11 Jacꞌa tok cꞌunük chic ri oxiꞌ kꞌij riqꞌuin nicꞌaj, ri Dios xbün cꞌa que xcꞌujeꞌ chic quicꞌaslen ri ye caꞌiꞌ riꞌ. Romariꞌ rijeꞌ xepaꞌeꞌ cꞌa e jun bey chic. Y ri vinük ri xetzꞌeton quichin, juis cꞌa xbiriꞌ xpuꞌu cheque.
\v 12 Y ri ye caꞌiꞌ kꞌalajrisüy rutzij ri Dios ri xcꞌujeꞌ chic e jun bey quicꞌaslen, xcacꞌaxaj cꞌa que cꞌo jun ri nchꞌo-pe cheque riqꞌuin ruchukꞌaꞌ chilaꞌ chicaj, y nbij cꞌa pe cheque: Quixampe chereꞌ chicaj, xbij.
\p Y ri ye caꞌiꞌ riꞌ xebe na vi e chicaj chupan jun sutzꞌ. Y ri vinük ri xeꞌetzelan quichin, xequitzꞌet cꞌa e tok xebe chilaꞌ chicaj.
\v 13 Y jariꞌ tok xpuꞌu jun nimalüj cab-rakün chuvüch ri ruchꞌulef, y jun jay cheque ri lajuj tak jay richin ri tinamit xetzak cꞌa pan ulef ronojel tak apeꞌ chupan ri tinamit. Y ri vinük ri xecom roma ri cab-rakün ye siete mil. Jacꞌa ri chꞌaka chic vinük ri yecꞌo chupan ri tinamit riꞌ y man jun xquicꞌulachij, xpuꞌu cꞌa juis xbiriꞌ cheque. Y xquiyaꞌ cꞌa rukꞌij ri Dios ri cꞌo chilaꞌ chicaj.
\p
\v 14 Y quiriꞌ cꞌa, xcꞌo-e can ri rucaꞌn kꞌoxomül pariꞌ ri ruchꞌulef. Y ja chic cꞌa riꞌ chanin petenük ri rox kꞌoxomül.
\s Tok ri ruvukuꞌ (séptimo) ángel xuxubaj ri ru-trompeta
\p
\v 15 Y cꞌateriꞌ tok ri ruvukuꞌ (séptimo) ángel xuxubaj ri ru-trompeta. Y yecꞌo ri riqꞌuin cuchukꞌaꞌ xechꞌo-pe chilaꞌ chicaj, y nquibilaꞌ cꞌa:
\q Ri tinamit ri yecꞌo chuvüch ri ruchꞌulef,
\q vocomi ye richin chic ri Kajaf Dios y ye richin chukaꞌ chic ri Cristo ri chaꞌon-pe y takon-pe roma ri Dios.
\q Y jariꞌ ri nbün mandar richin chi jumul, xquibij.
\m
\v 16 Y chi veinticuatro rajatük achiꞌaꞌ ri ye tzꞌuyul-apu chuvüch ri Dios, cꞌateriꞌ xexuque-ka chuvüch, y xquikasaj-quiꞌ cꞌa pan ulef richin nquiyaꞌ rukꞌij.
\v 17 Y tok nyetajin cꞌa nquiyaꞌ rukꞌij ri Dios, nquibij cꞌa:
\q Kajaf Dios, matiox nkayaꞌ chave.
\q Rat ri cꞌo ronojel avuchukꞌaꞌ pan akꞌaꞌ,
\q y ratcꞌo-vi-pe pa rutzꞌuquic, ratcꞌo vocomi, y ncacꞌujeꞌ chukaꞌ ri nbe-apu.
\q Matiox nkayaꞌ chave roma vocomi xkꞌalajin ri nimalüj avuchukꞌaꞌ ri cꞌo pan akꞌaꞌ,
\q y ja rat ri Jun ri nabün mandar.
\q
\v 18 Ri tinamit ri yecꞌo chuvüch ri ruchꞌulef catanük cꞌa coyoval chavij rat,
\q pero xa ja yan cꞌa riꞌ xka-pe ri kꞌij richin que rat nayaꞌ ri a-castigo pa quiviꞌ.
\q Y jareꞌ chukaꞌ xka-pe ri kꞌij richin que rat nabün juzgar pa quiviꞌ ri caminakiꞌ.
\q Pero cheque ri asamajelaꞌ ri ye kꞌalajrisüy ri atzij,
\q cheque ri yeco-vi pan akꞌaꞌ y cheque ri nyeyoꞌon akꞌij,
\q nayaꞌ cꞌa rajil-ruqꞌuexel cheque, chi cocoj chi nimakꞌ.
\q Y xka-pe cꞌa chukaꞌ ri kꞌij que rat nyeꞌaqꞌuis ri vinük ri nyebanun chin ri ruchꞌulef richin nqꞌuis, xquibij ri veinticuatro rajatük achiꞌaꞌ.
\p
\v 19 Y cꞌateriꞌ tok ri racho ri Dios chilaꞌ chicaj, xjakatüj ri ruchiꞌ. Y nkꞌalajin cꞌa pe ri cajón ri richin ri ru-trato ri Dios. Y xepuꞌu cꞌa coyopaꞌ, chꞌabül, truenos, jun cab-rakün, y jun camic sakboch.
\c 12
\s Ri ixok y ri ral ri xechajix roma ri Dios
\p
\v 1 Y cꞌateriꞌ ri chicaj xkꞌalajin cꞌa pe jun ixok. Y ri rubanic cꞌa ri ixok riꞌ, man jun bey cꞌa tzꞌeton, roma cachiꞌel kꞌij ntzuꞌun ri rutziek y ja ri icꞌ ri cꞌunük rupalibül. Cꞌo cꞌa jun corona rucusan, y ri corona reꞌ ye rucꞌuan cꞌa doce chꞌumilaꞌ.
\v 2 Y ri ixok reꞌ nkꞌalajin que nralaj yan jun acꞌual. Rutzꞌamon cꞌa jiloj romariꞌ. Juis cꞌa kꞌoxomül ri nucꞌusaj.
\v 3 Y cꞌateriꞌ ri chicaj xkꞌalajin cꞌa pe jun itzel chico cük rij ri nbix dragón chin. Jun nimalüj chico ri man jun bey tzꞌeton, roma cꞌo siete rujolon, diez rucꞌaꞌ y rucꞌuan jujun corona pa jujun cheque ri siete rujolon.
\v 4 Y ri itzel dragón reꞌ cük rij, xaxe cꞌa riqꞌuin ri rujey xerumes-pe jun molaj cheque ri oxiꞌ molaj cheque ri chꞌumilaꞌ ri yecꞌo chicaj, y xerutorij cꞌa pariꞌ ri ruchꞌulef. Cꞌateriꞌ xbecꞌuje-apu chuvüch ri ixok ri ncꞌujeꞌ yan ral. Ruchajin-apu jampeꞌ ncꞌujeꞌ ri acꞌual, richin quiriꞌ nucꞌux-ka.
\v 5 Ri ixok riꞌ xalüx na vi cꞌa ri ral, y alaꞌ. Y xucꞌuꞌüx-e ri alaꞌ chuvüch, richin xucꞌuꞌüx chin ri Dios ri tzꞌuyul pa lokꞌolüj ruchꞌacat. Y ja ri jun ri cꞌateriꞌ nalüx ri nbün mandar pa quiviꞌ ri tinamit ri yecꞌo chuvüch ri ruchꞌulef, riqꞌuin ronojel ruchukꞌaꞌ.
\v 6 Y ri ixok ri xcꞌujeꞌ ral, xanmüj cꞌa, y xbe cꞌa pa tzꞌiran ruchꞌulef, roma ja lugar riꞌ ri canon roma ri Dios richin ncolotüj. Y chiriꞌ nilix-vi mil doscientos sesenta kꞌij.
\p
\v 7 Y chilaꞌ chicaj xbanatüj cꞌa jun oyoval. Ri nimalüj ángel Miguel ri rucꞌuan ri chꞌaka chic ángeles, ye rachibilan ri ru-ángeles, xquibün oyoval riqꞌuin ri itzel dragón cük rij y ri ye itzel tak ru-espíritus rijaꞌ.
\v 8 Pero ri itzel dragón cük rij y ri itzel tak ru-espíritus man xechꞌacon tüj, y xeꞌokotüx-pe chilaꞌ chicaj, roma man cꞌuluman tüj chic que nyecꞌujeꞌ chiriꞌ.
\v 9 Xtorix cꞌa pe ri itzel dragón cük rij ye rachibilan ri itzel tak ru-espíritus cꞌa pariꞌ ri ruchꞌulef. Xtorix-pe ri dragón ri nbix chukaꞌ itzel vinük y Satanás chin. Ja rijaꞌ ri xoc jun cumütz ojer can, y ja rijaꞌ ri nyojon ronojel ri utz chiquivüch ri vinük chuvüch ronojel ruchꞌulef.
\p
\v 10 Y jariꞌ tok yin Juan xinvacꞌaxaj cꞌa chi ri chicaj cꞌo cꞌa jun ri nchꞌo-pe, y riqꞌuin ruchukꞌaꞌ. Y nbij cꞌa: Ri colonic, ri ruchukꞌaꞌ y ri ru-autoridad ri Dios nyekꞌalajin chic. Y quiriꞌ chukaꞌ xka-pe yan ri kꞌij que conojel ncꞌatzinej que nquibün ri nbij ri Cristo ri chaꞌon-pe y takon-pe roma ri Dios. Roma ri nsujun quichin ri hermanos chuvüch ri Dios chi pakꞌij chi chakꞌaꞌ, xtorix yan e.
\v 11 Y ri hermanos xechꞌacon cꞌa chirij ri itzel-vinük, roma xecolotüj roma ri Jesucristo ri cachiꞌel Alaj Oveja, ri xcom y xbiyin ri ruquiqꞌuel. Y chukaꞌ man xeqꞌuix tüj xquikꞌalajrisaj-quiꞌ que quitaken ri Jesucristo. Y man xquixbij tüj quiꞌ nyecamsüs. Roma si nyecamsüs, quecamsüs cꞌa riꞌ, pero roma ri rubiꞌ ri Ajaf.
\v 12 Rix ri jaruꞌ ri rix cꞌo chilaꞌ chicaj, tiquicot cꞌa ri ivánima. Jacꞌa rix ri rixcꞌo chuvüch ri ruchꞌulef y ri rix benük pariꞌ tak yaꞌ, juyaꞌ ivüch. Roma ri itzel-vinük xxule-ka iviqꞌuin, y royoval roma retaman que man qꞌuiy tüj chic kꞌij ri yoꞌon chin.
\p
\v 13 Ri itzel dragón cük rij xtorix cꞌa pe, y tok xunaꞌ, chuvüch chic ri ruchꞌulef cꞌo-vi. Y jariꞌ tok xutzꞌom cꞌa rokotaxic ri ixok ri xcꞌujeꞌ ral-alaꞌ.
\v 14 Y roma cꞌa ri ixok riꞌ okotan, ri Dios xuyaꞌ jucꞌulaj ruxicꞌ, cachiꞌel ri quixicꞌ xic ri juis ye nimakꞌ, richin que ntiquer napon cꞌa pa tzꞌiran ruchꞌulef, ri lugar ri ruchaꞌon chic ri Dios richin nilix ri oxiꞌ junaꞌ riqꞌuin nicꞌaj, lugar ri man nilitüj tüj roma ri dragón.
\v 15 Y ri dragón riꞌ xuxaꞌ cꞌa jun cachiꞌel rakün-yaꞌ riqꞌuin ri ruchiꞌ chirij ri ixok, richin que nuchirirej ta e ri ixok.
\v 16 Pero ri ruchꞌulef xutoꞌ ri ixok richin que man tzꞌamos chupan ri cachiꞌel rakün-yaꞌ ri xuxaꞌ ri dragón, roma xubekꞌ chanin ri yaꞌ riꞌ.
\v 17 Y roma cꞌa ri dragón riꞌ man xtiquer tüj chirij ri ixok, juis cꞌa royoval xcatüj. Romariꞌ xbe, y xberutzꞌamaꞌ quij ri ye ral y ri ye riy ri ixok chi oyoval. Roma ri ye ral y ri ye riy ri ixok nquitakej-vi ri nyerubij ri Dios y chukaꞌ cꞌo chiquicꞌuꞌx ri rubin can ri Jesucristo.
\c 13
\s Caꞌiꞌ itzel tak chico
\p
\v 1 Y yin Juan ninnaꞌ cꞌa que xinpaꞌeꞌ pa sanayiꞌ chuchiꞌ ri mar, y xintzꞌet cꞌa que chupan ri yaꞌ xbeꞌel-pe jun itzel chico. Y ri chico reꞌ cꞌo siete rujolon y diez rucꞌaꞌ. Y pa quiviꞌ ri diez rucꞌaꞌ ri chico riꞌ, cꞌo cꞌa jujun corona. Y pa quiviꞌ jujun jolon ye tzꞌiban cꞌa jujun biꞌaj. Y riqꞌuin cꞌa ri biꞌaj reꞌ nuyokꞌ rubiꞌ ri Dios.
\v 2 Ri chico ri xintzꞌet, cachiꞌel cꞌa ntzuꞌun jun tigre. Xa jacꞌa ri rakün ye cachiꞌel rakün ri chico ri nbix oso chin. Y pa ruchiꞌ, cachiꞌel pa ruchiꞌ león. Xpuꞌu cꞌa ri itzel dragón cük rij xuyaꞌ cꞌa ruchukꞌaꞌ y ru-autoridad y xuyaꞌ chukaꞌ kꞌij chin ri chico riꞌ que ja ri nbij rijaꞌ ri ncꞌatzinej que nquibün ri vinük.
\v 3 Y jun cꞌa cheque ri siete rujolon ri chico riꞌ xucꞌulachij cꞌa jun socotajic ri rucꞌamon chic pe rucamic. Pero xa man xcom tüj, xa xcꞌachoj. Y romariꞌ ri vinük ri yecꞌo chuvüch ri ruchꞌulef xquitzeklebej.
\v 4 Y ri vinük riꞌ xquiyaꞌ cꞌa chukaꞌ rukꞌij ri itzel dragón cük rij, roma jariꞌ ri xyoꞌon ruchukꞌaꞌ pa rukꞌaꞌ ri chico. Ri vinük riꞌ, ri ye tzeklebey cꞌa richin ri chico, tok nquiyaꞌ rukꞌij nquibilaꞌ cꞌa: ¿Cꞌo comi cꞌa jun ri junan ta riqꞌuin ri chico reꞌ? ¿Y cꞌo ta comi cꞌa jun ri nchꞌacon ta chirij? nquibij.
\p
\v 5 Ri chico riꞌ xucꞌul cꞌa chukaꞌ ruchukꞌaꞌ richin que tunimirsaj-riꞌ riqꞌuin ri rutzij, richin que itzel tichꞌo chirij ri Dios, y richin chukaꞌ que cuarentidos icꞌ ri ja ri nbij rijaꞌ ri ncꞌatzinej que nquibün ri vinük.
\v 6 Y quiriꞌ vi cꞌa xbün ri chico riꞌ. Itzel xchꞌo chirij ri Dios. Xuyokꞌ rubiꞌ ri Dios. Itzel chukaꞌ xchꞌo chirij ri racho ri Dios y chiquij ri yecꞌo chilaꞌ chicaj.
\v 7 Chukaꞌ ri chico riꞌ yoꞌon cꞌa kꞌij chin chupan ri tiempo riꞌ richin que xcatüj y xerutzꞌom cꞌa chi oyoval ri lokꞌolüj tak ralcꞌual ri Dios, richin nyeruchꞌüc. Yoꞌon cꞌa chukaꞌ kꞌij chin richin que xe ri nbij rijaꞌ ri ncꞌatzinej que nquibün ri vinük. Vinük ri xa man junan tüj nyetzuꞌun, man junan tüj quitinamit, man junan tüj quichꞌabül y man junan tüj quiruchꞌulef.
\v 8 Conojel vi cꞌa ri yecꞌo chuvüch ri ruchꞌulef, xquiyaꞌ rukꞌij ri chico riꞌ. Pero ri vinük ri xebanun quiriꞌ, ja ri man ye colotajnük tüj, nixta man tzꞌiban tüj ri quibiꞌ chupan ri vuj ri richin cꞌaslen, ri ruvuj ri Jesucristo ri cachiꞌel Alaj Oveja, ri xcamsüs roma quiriꞌ ri runucun-pe ri Dios pariꞌ tok cꞌa man jani cꞌo tüj ri ruchꞌulef.
\p
\v 9 Ri cꞌo quixiquin richin ncacꞌaxaj, ticacꞌaxaj cꞌa ri nbix cheque:
\v 10 Ri vinük ri nyebanun cheque ri chꞌaka chic richin nyeꞌoc preso, quiriꞌ cꞌa chukaꞌ nquicꞌulachij rijeꞌ. Y ri nyecamsan chi machet, chi machet cꞌa chukaꞌ nyecamsüs-vi. Roma cꞌa riꞌ ri yecꞌo-vi pa rukꞌaꞌ ri Dios, xaxe cꞌa quecochꞌon y tiquiyaꞌ más cánima.
\p
\v 11 Y yin Juan xintzꞌet cꞌa que cꞌo chic cꞌa jun itzel chico ri xbeꞌel-pe pan ulef. Y ri jun chic chico reꞌ cꞌo caꞌiꞌ rucꞌaꞌ cachiꞌel richin jun alaj oveja achij. Jacꞌa ri ruchꞌabül cachiꞌel ri ruchꞌabül ri dragón.
\v 12 Y ri jun chic chico reꞌ, riqꞌuin cꞌa ri ruchukꞌaꞌ ri nabey chico tok nyerubanalaꞌ ri rusamaj. Man ruyon tüj cꞌa nyerubanalaꞌ, xa chuvüch cꞌa ri nabey chico. Nbün cꞌa cheque ri vinük ri yecꞌo chuvüch ri ruchꞌulef que nquiyaꞌ rukꞌij ri nabey chico, ri xcꞌachoj ri rusocotajic ri rucꞌamon chic pe rucamic.
\v 13 Ri rucaꞌn chico qꞌuiy cꞌa milagros man jun bey ye tzꞌeton tüj ri nyerubanalaꞌ. Nbün cꞌa que nka-ka-pe kꞌakꞌ ri chicaj richin nka-ka pariꞌ ri ruchꞌulef. Y chiquivüch cꞌa ri vinük nbanalaꞌ quiriꞌ.
\v 14 Y roma ri yoꞌon kꞌij chin ri rucaꞌn chico que chuvüch apu ri nabey chico nyerubanalaꞌ ri man jun bey ye tzꞌeton, ri vinük ri yecꞌo chuvüch ri ruchꞌulef xechꞌacatüj na vi pa rukꞌaꞌ. Y xbün cꞌa cheque ri vinük que tiquibanaꞌ jun ruvachbül ri nabey chico ri xcꞌachoj qꞌuin ri rusocotajic ri xban riqꞌuin jun machet.
\v 15 Y ri rucaꞌn chico xjach cꞌa ruchukꞌaꞌ pa rukꞌaꞌ richin tuyaꞌ rucꞌaslen ri ruvachbül ri nabey chico, richin que ri vachbül riꞌ tichꞌo y tutakaꞌ quicamsasic ri man nyeyoꞌon tüj rukꞌij.
\v 16 Xbün cꞌa chukaꞌ que tiyalox quetal ri vinük pa tak cajquikꞌaꞌ o pa nicꞌaj-quivüch. Chi cocoj chi nimakꞌ. Chi vinük beyomaꞌ, chi vinük ri manak quichajin. Chi lokꞌon y chi man lokꞌon tüj vinük.
\v 17 Y man jun cꞌa cheque ri vinük ri ntiquer ta nbün jun vit rulokꞌoj o jun vit rucꞌayij, si xa manak retal pa rukꞌaꞌ o pa nicꞌaj-ruvüch. Y ri quetal riꞌ ja ri rubiꞌ ri nabey chico, si ja ri rubiꞌ tzꞌiban riqꞌuin letras o ja ri banun riqꞌuin números.
\v 18 Y ri ru-número ri nabey chico ja ri seiscientos sesenta y seis, y reꞌ jun número richin vinük. Qꞌuiy cꞌa etamabül nrajoꞌ richin nyetamüx achique ntel chi tzij. Romariꞌ ri vinük ri cꞌo etamabül riqꞌuin, tucusaj cꞌa richin que nunuc pariꞌ ri ru-número ri nabey chico richin nretamaj achique ri rubiꞌ.
\c 14
\s Ri nyebixan ri cꞌacꞌaꞌ bix
\p
\v 1 Y jariꞌ tok xintzꞌet chic cꞌa que ri Jesucristo ri cachiꞌel Alaj Oveja, paꞌül pariꞌ ri juyuꞌ rubiniꞌan Sión, y yecꞌo cꞌa ciento cuarenta y cuatro mil vinük riqꞌuin. Y conojel cꞌa reꞌ, cꞌo ri rubiꞌ ri Jesucristo y cꞌo chukaꞌ ri rubiꞌ ri Rutataꞌ ri Jesucristo pa nicꞌaj-quivüch.
\v 2 Y jariꞌ tok xinvacꞌaxaj que cꞌo jun bix ri nban-pe chicaj, y ri rubanic, cachiꞌel cꞌa tok juis nyejinin qꞌuiy rakün-yaꞌ, o cachiꞌel tok nvulul jun nimalüj trueno, o cachiꞌel tok navacꞌaxaj que nyekꞌojomüx juis qꞌuiy kꞌojon ri nbix arpa cheque.
\v 3 Chuvüch cꞌa apu ri apeꞌ tzꞌuyul-vi ri Dios y ri apeꞌ yecꞌo-vi ri rajatük achiꞌaꞌ y ri ye cajiꞌ ri juis qꞌuiy runakꞌ tak quivüch, chiriꞌ nyebixan-vi. Y jun cꞌacꞌaꞌ bix cꞌa ri nquibixaj. Y man jun cꞌa chukaꞌ ri ntiquer ta nretaman ri bix riꞌ, xaxe cꞌa ri ciento cuarenta y cuatro mil ri ye colotajnük chic e chuvüch ri ruchꞌulef.
\v 4 Y jareꞌ ri man xetzak tüj pa tak mac, ni riqꞌuin ixok, ni pa chꞌaka chic mac. Ye chꞌajchꞌoj vi, y chi jumul quitzekleben ri Jesucristo ri cachiꞌel Alaj Oveja. Jareꞌ ri nabey ri xecol-pe chiquicojol ri vinük, richin que nyeꞌoc cachiꞌel nabey sipanic chin ri Dios y ri Jesucristo ri cachiꞌel Alaj Oveja.
\v 5 Y man jun tzꞌucun tzij xilitüj ri elenük ta pe pa quichiꞌ, xa ye chꞌajchꞌoj vi chuvüch ri Dios ri tzꞌuyul pa lokꞌolüj ruchꞌacat.
\s Ri nquikꞌalajrisaj ye oxiꞌ ángeles
\p
\v 6 Y yin Juan xintzꞌet jun chic cꞌa ángel ri benük pa runicꞌajal ri caj, y ja rijaꞌ ri ucꞌuayon ri utzilüj tzij richin colonic ri man nqꞌuis tüj. Y richin cꞌa que nuyaꞌ rutzijol cheque ri vinük ri yecꞌo chuvüch ri ruchꞌulef, cheque ri vinük ri yecꞌo ronojel ruchꞌulef, ri man junan tüj nyetzuꞌun, ri man junan tüj quichꞌabül, y ri man junan tüj quitinamit.
\v 7 Y riqꞌuin cꞌa ronojel ruchukꞌaꞌ nbij: Titakej rutzij ri Dios, y tiyaꞌ chukaꞌ rukꞌij, roma ri kꞌij richin que nbün juzgar xa xka-pe yan. Tiyaꞌ cꞌa rukꞌij ri Dios ri banayun ri caj y ri ruchꞌulef, ri nimakꞌ tak yaꞌ y ri apeꞌ nyeꞌalüx tak yaꞌ.
\p
\v 8 Y jariꞌ tok xel-pe jun rucaꞌn ángel, y xbij: Xtzak yan ri nimalüj tinamit Babilonia. Xtzak yan. Ja nimalüj tinamit reꞌ ri xbanun cheque conojel ruchꞌulef richin que xquiyüc royoval ri Dios pa quiviꞌ, roma xbün cheque que xerukꞌabarisaj pa rukꞌaꞌ ri mac quiqꞌuin achiꞌaꞌ y ri ixokiꞌ.
\p
\v 9 Y jariꞌ petenük cꞌa jun rox ángel, y riqꞌuin cꞌa chukaꞌ ruchukꞌaꞌ xbij: Si yecꞌo cꞌa nyeyoꞌon rukꞌij ri nabey chico y nquiyaꞌ chukaꞌ rukꞌij ri ruvachbül, y nkaꞌ chiquivüch que nquicꞌul quetal pa nicꞌaj-quivüch o pa quikꞌaꞌ,
\v 10 ri nyebanun cꞌa quiriꞌ, nka-ka-vi castigo pa quiviꞌ. Roma ri Dios man nujoyovaj tüj baꞌ quivüch, xa nuya-pe ronojel ru-castigo pa quiviꞌ. Ri Dios nbün cꞌa cheque que tiquikumuꞌ ri ru-castigo rijaꞌ. Y chiquivüch apu ri lokꞌolüj tak ru-ángeles ri Dios y chukaꞌ chuvüch ri Jesucristo ri cachiꞌel Alaj Oveja, nquitij pokonül chupan ri kꞌakꞌ y azufre.
\v 11 Y ri kꞌakꞌ ri nbün cheque que nquicꞌusaj pokonül, man jun bey nchup tüj, roma ri sib richin chi jumul paꞌül ri chicaj. Y man jun bey cꞌa ntevur ta ka baꞌ chiriꞌ, nixta chakꞌaꞌ nixta pakꞌij. Y chupan ri lugar riꞌ nyeꞌapon-vi ri nyeyoꞌon rukꞌij ri nabey chico y ri ruvachbül, y quicꞌuan rubiꞌ ri chico riꞌ pa nicꞌaj-quivüch o pa quikꞌaꞌ richin quetal.
\v 12 Roma cꞌa riꞌ, ri ye cꞌunük-vi pa rukꞌaꞌ ri Dios y ncacꞌaxaj y nquibün ri nyerubij rijaꞌ y chi jumul quiyoꞌon cánima riqꞌuin ri Jesús, xaxe cꞌa ncꞌatzin que yoꞌon cánima ticoyobej-apu.
\p
\v 13 Y yin Juan xinvacꞌaxaj cꞌa que cꞌo jun ri nchꞌo-pe chuve chilaꞌ chicaj, y nbij: Tatzꞌibaj cꞌa ri ninbij chave: Vocomi jabel utzilüj cꞌa quiquicot conojel ri xa jun chic quibanun riqꞌuin ri Ajaf nyecom-e, xbij. Y xinvacꞌaxaj cꞌa chukaꞌ que ri Lokꞌolüj Espíritu xbij: Jaꞌ. Roma nyeꞌuxlan chin ri quisamaj, y nquicꞌul cꞌa ri rajil-ruqꞌuexel ri utzilüj quinojibül ri quibanun.
\s Ri castigo ri npuꞌu pariꞌ ri ruchꞌulef
\p
\v 14 Y tok xintzꞌetaꞌ yan chic, xintzꞌet cꞌa jun sutzꞌ sük. Y pariꞌ cꞌa ri sutzꞌ reꞌ tzꞌuyul cꞌa jun ri cachiꞌel ri Jun ri alaxnük chikacojol. Rijaꞌ rucusan cꞌa jun corona ri banun riqꞌuin kꞌanapük, y pa rukꞌaꞌ rucꞌuan jun kupibül-trigo ri juis rey.
\v 15 Y cꞌateriꞌ xbeꞌel-pe chukaꞌ jun chic ángel chiriꞌ pa racho ri Dios, y riqꞌuin cꞌa ruchukꞌaꞌ nchꞌo-apu chin ri tzꞌuyul pariꞌ ri sutzꞌ. Y nbij cꞌa apu chin: Tacusaj cꞌa la akupibül y takꞌataꞌ la ticoꞌn, roma xa xka-pe yan ri hora y kꞌün chic ri ticoꞌn richin ri ruchꞌulef.
\p
\v 16 Y ri tzꞌuyul pariꞌ ri sutzꞌ quiriꞌ vi xbün, xucꞌusaj ri rukupibül chuvüch ri ruchꞌulef, y xkupij cꞌa e.
\p
\v 17 Y cꞌateriꞌ xbeꞌel chic cꞌa pe jun ángel pa racho ri Dios ri cꞌo chilaꞌ chicaj, rucꞌamon-pe chukaꞌ jun kupibül-trigo ri juis rey.
\v 18 Y riqꞌuin ri altar xbeꞌel cꞌa pe chukaꞌ jun ángel ri yoꞌon ruchukꞌaꞌ pa rukꞌaꞌ pariꞌ ri kꞌakꞌ. Y riqꞌuin cꞌa ruchukꞌaꞌ xchꞌo-apu chin ri ángel ri ncꞌuayon kupibül, y xbij: Tacusaj cꞌa la akupibül juis rey, richin nyeꞌakupij-pe ri tzekaj uva. Roma ri uva ri yecꞌo chuvüch ri ruchꞌulef xekꞌanür yan.
\p
\v 19 Y ri ángel ri ucꞌuayon ri kupibül juis rey, quiriꞌ vi xbün. Xucꞌusaj ri rukupibül chuvüch ri ruchꞌulef, y xerukupij-e ri tzekaj uva. Cꞌateriꞌ xeruyaꞌ pa jun nimalüj cachiꞌel pila richin que riqꞌuin akün nquiyitzꞌ can ri quiyaꞌal. Y ri yitzꞌoj reꞌ nukꞌalajrisaj cꞌa chikavüch ri rubanic ri nimalüj castigo ri nuyaꞌ ri Dios.
\v 20 Ri uva ri xerukupij ri ángel, cꞌa chuchiꞌ e ri tinamit xbeyitzꞌ-vi. Y ri pila apeꞌ xyitzꞌitüj-vi ri uva, tok xbeꞌel-pe ri ruyaꞌal chupan, xa quicꞌ yan chic. Y juis qꞌuiy, roma ri rakün xapon cꞌa pan oxiꞌ ciento kilómetros. Y ri rupimil napon cꞌa apeꞌ nbe-vi ri chꞌichꞌ pa quichiꞌ ri quiej.
\c 15
\s Ri siete ángeles ri nyeyoꞌon castigo pariꞌ ri ruchꞌulef
\p
\v 1 Y cꞌateriꞌ yin Juan xintzꞌet cꞌa que ri chicaj yecꞌo cꞌa siete ángeles ri xekꞌalajin y man jun bey ye tzꞌeton ta chukaꞌ. Ri siete cꞌa ángeles reꞌ jachon cꞌa jujun kꞌoxomül pa quikꞌaꞌ richin que nyebequiya-pe tok napon ri kꞌij. Y riꞌ ja ruqꞌuisbül tak castigos ri nuyaꞌ ri Dios pariꞌ ri ruchꞌulef. Roma jariꞌ ri ru-castigo ri Dios ri nuyaꞌ pa quiviꞌ ri man xetaken tüj richin.
\p
\v 2 Y yin xintzꞌet cꞌa chukaꞌ que cꞌo jun mar ri cachiꞌel vidrio ntzuꞌun, y yojon-vi cꞌa riqꞌuin kꞌakꞌ. Y yecꞌo cꞌa ri ye paꞌül chiriꞌ pariꞌ. Conojel reꞌ ja ri man xetzak tüj pa rukꞌaꞌ ri nabey chico y ri ruvachbül, y chukaꞌ nixta xcajoꞌ quetal o ri ru-número ri rubiꞌ ri chico pa nicꞌaj-quivüch o pa quikꞌaꞌ. Y conojel reꞌ ye paꞌül cꞌa pariꞌ ri mar riꞌ, y ye quicꞌualon arpa ri ye richin ri Dios.
\v 3 Y nquibixaj cꞌa ri rubix ri Moisés ri rusamajel ri Dios y ri rubix ri Jesucristo ri cachiꞌel Alaj Oveja. Y ri bix quereꞌ cꞌa ri nquibij:
\q Ajaf Dios, rat ja ri nimakꞌ tak nojibül ri man jun bey ye tzꞌeton ri nyeꞌabün,
\q y cꞌo-vi ronojel avuchukꞌaꞌ pan akꞌaꞌ.
\q Ketzij y choj ri abey,
\q y ja rat ri Rey quichin conojel ri yecꞌo-vi pan akꞌaꞌ.
\q
\v 4 Man jun cꞌa ri man ta nuxbij-riꞌ chavüch,
\q y man ta chukaꞌ nuyaꞌ akꞌij, rat Ajaf.
\q Y xaxe cꞌa rat ri lokꞌolüj.
\q Y romariꞌ ronojel ruchꞌulef npuꞌu chin nyaꞌ akꞌij,
\q roma ri xquitzꞌet que xkꞌalajin yan ri chojmil ri ncabanun.
\q Quiriꞌ nquibij ri bix riꞌ.
\p
\v 5 Y tok ye nutzꞌeton chic ka ronojel reꞌ, xintzꞌet que ri chicaj xjakatüj ri jay apeꞌ nukꞌalajrisaj-vi-riꞌ ri Dios.
\v 6 Y chiriꞌ xebeꞌel-vi-pe ri siete ángeles ri jachon jujun kꞌoxomül pa quikꞌaꞌ. Y ri quitziek ri ye quicusalon, jacꞌa ri tziük ri nbix lino chin, jun tziük ri sük-sük y nyiqꞌuiyot cꞌa chukaꞌ. Y ri chuvüch-quicꞌuꞌx cꞌunük cꞌa chukaꞌ jun ximbül ri riqꞌuin kꞌanapük banun-vi.
\v 7 Y jariꞌ tok jun cheque ri ye cajiꞌ ri juis qꞌuiy runakꞌ tak quivüch, xuyalaꞌ cꞌa e jujun lük pa quikꞌaꞌ chiquijujunal ri siete ángeles, lük ri ye banun riqꞌuin kꞌanapük, y chupan riꞌ ye benük-vi ronojel ri rubanic ri castigo ri nuyaꞌ ri Dios ri chi jumul cꞌo.
\v 8 Ri racho cꞌa ri Dios ri chicaj xnoj cꞌa pe riqꞌuin jun cachiꞌel sib, ri retal ri rukꞌij y ri ruchukꞌaꞌ ri Dios. Y man jun cꞌa ri ntiquer ta ntoc-apu chiriꞌ pa racho. Xaxe cꞌa tok tzakon chic can ruyaꞌic ri siete kꞌoxomül coma ri ángeles, cꞌateriꞌ cꞌa tok utz nyeꞌoc-apu.
\c 16
\s Ri siete ruvüch kꞌoxomül ri xevoxix pariꞌ ri ruchꞌulef
\p
\v 1 Y cꞌateriꞌ xinvacꞌaxaj cꞌa que cꞌo jun ri nim ruchꞌabül nchꞌo-pe chiriꞌ chupan ri racho ri Dios y xbij cꞌa cheque ri siete ángeles: Quixbiyin tibevoxij pariꞌ ri ruchꞌulef, ronojel ruvüch ri kꞌoxomül ri nuyaꞌ ri Dios ri yecꞌo-e pa siete kꞌanapük lük.
\p
\v 2 Y jariꞌ tok xbe ri nabey ángel y xberuvoxij can pariꞌ ri ruchꞌulef, ri cꞌo-e chupan ri lük ri rucꞌuan. Ri nabey kꞌoxomül xbün cꞌa que xeꞌel-pe itzel chꞌaꞌc chiquij ri vinük ri quicꞌuan retal ri nabey chico pa nicꞌaj-quivüch o pa quikꞌaꞌ. Ja vinük reꞌ ri xeyoꞌon rukꞌij ri ruvachbül ri nabey chico.
\p
\v 3 Quiriꞌ cꞌa chukaꞌ, ri rucaꞌn ángel rucꞌuan ri lük xberuvoxij can ri cꞌo-e chupan, pariꞌ ri nimalüj mar. Y ri mar xchuvir cachiꞌel ri ruquiqꞌuel jun camnük, y romariꞌ ronojel cꞌa ri cꞌo quicꞌaslen ri yecꞌo chiriꞌ, xecom.
\p
\v 4 Y ri rox ángel xberuvoxij cꞌa can ri rucꞌuan chupan ri lük pa quiviꞌ ri rakün tak yaꞌ y pa quiviꞌ ri apeꞌ nyeꞌalüx tak yaꞌ. Y ri yaꞌ reꞌ xeꞌoc cꞌa quicꞌ.
\v 5 Y yin xinvacꞌaxaj cꞌa que ri ángel ri yoꞌon ruchukꞌaꞌ pa rukꞌaꞌ pa quiviꞌ ri yaꞌ, xchꞌo cꞌa y xbij: Ajaf Dios, rat ri chi jumul cꞌa ratcꞌo-pe, rat ri rat choj y rat lokꞌolüj vi, pa rubeyal cꞌa ri ncatajin chubanic riqꞌuin ri a-juicio.
\v 6 Roma nayaꞌ rutojic cheque ri xecamsan quichin ri lokꞌolüj tak avalcꞌual y ri ye asamajelaꞌ ri xekꞌalajrisan ri atzij. Y utz vi cꞌa rubanic nabün cheque que tiquikumuꞌ quicꞌ, roma jariꞌ ri nkaꞌ chiquivüch.
\p
\v 7 Y jariꞌ tok yin Juan xinvacꞌaxaj que cꞌo jun ri nchꞌo-pe riqꞌuin ri altar, y nbij cꞌa: Quiriꞌ vi Ajaf Dios ri cꞌo ronojel avuchukꞌaꞌ aviqꞌuin, nkꞌalajin-vi cꞌa que ri a-juicio ketzij y choj vi.
\p
\v 8 Cꞌateriꞌ tok xpuꞌu ri rucaj ángel xuvoxij ri cꞌo-e pa lük pariꞌ ri kꞌij. Y ri kꞌij xjach-vi ruchukꞌaꞌ pa rukꞌaꞌ que queruporoj ri vinük riqꞌuin ri rukꞌakꞌal.
\v 9 Y quiriꞌ vi cꞌa xcꞌulachitüj, ri kꞌij itzel vi chi cꞌatic ri xbün cheque ri vinük, y man riqꞌuin tüj riꞌ ri vinük man xbij tüj baꞌ cánima que xquitzolij ta pe quicꞌuꞌx riqꞌuin ri Dios o xquiyaꞌ ta chukaꞌ rukꞌij. Pa ruqꞌuexel quiriꞌ ta xquibün, xa xquiyokꞌ ri rubiꞌ ri Dios ri takayon-pe ri kꞌoxomül.
\p
\v 10 Ri voꞌoꞌ (quinto) ángel xberuvoxij cꞌa can ri rucꞌuan pa lük, pariꞌ ri ruchꞌacat ri nabey chico y ri ruchꞌulef apeꞌ nbün mandar rijaꞌ, y xka-ka cꞌa jun nimalüj kꞌekuꞌn pariꞌ. Y roma cꞌa ri kꞌoxomül ri nyetajin nquicꞌusaj ri vinük ri aj-ruchꞌulef riꞌ juis cꞌayuf, romariꞌ nquicachꞌulaꞌ cakꞌ.
\v 11 Y nixta riqꞌuin riꞌ ri vinük man xquitzolij tüj pe quicꞌuꞌx riqꞌuin ri Dios richin xquiyaꞌ ta can rubanic ri itzel. Xa pa ruqꞌuexel quiriꞌ ta xquibün, xa xquiyokꞌ ri Dios ri cꞌo chilaꞌ chicaj, roma ri kꞌoxomül y ri itzel chꞌaꞌc ri cꞌo chiquij.
\p
\v 12 Ri ruvakiꞌ (sexto) ángel xberuvoxij can pariꞌ ri nimalüj rakün-yaꞌ Eufrates ri rucꞌuan-e chupan ri lük ri rucꞌuan. Y ri rakün-yaꞌ riꞌ xchakiꞌj-ka richin que nyetiquer nyecꞌo ri reyes ri ye petenük chiriꞌ pan oriente.
\p
\v 13 Y cꞌateriꞌ yin xintzꞌet que ri itzel dragón cük rij, ri nabey chico y ri achi ri nbin que nukꞌalajrisaj ri rutzij ri Dios y xa man ketzij tüj, jujun cꞌa ranas ri nyeꞌel-pe pa quichiꞌ. Y ri oxiꞌ ranas reꞌ, xa ye oxiꞌ cꞌa itzel tak espíritu.
\v 14 Ri oxiꞌ itzel tak espíritu, riqꞌuin cꞌa ri itzel-vinük ye petenük-vi, y nyequibanalaꞌ cꞌa milagros richin nyechꞌacatüj ri vinük pa quikꞌaꞌ. Ye elenük cꞌa pe richin nyequimol conojel reyes richin ri ruchꞌulef ye cachibilan ri achiꞌaꞌ banuy tak oyoval. Nyequimol-apu richin ri kꞌij tok nquibün oyoval riqꞌuin ri Dios ri cꞌo-vi ronojel ruchukꞌaꞌ riqꞌuin.
\v 15-16 Y ri oxiꞌ itzel tak espíritu ye cachiꞌel quetzuꞌun ranas, xequimol cꞌa conojel ri reyes richin ri ruchꞌulef ye cachibilan ri achiꞌaꞌ banuy tak oyoval. Xequimol cꞌa pa jun lugar ri nbix Armagedón chin, y ri lugar riꞌ quiriꞌ cꞌa nbix chin pa chꞌabül rubiniꞌan hebreo. Jariꞌ tok xchꞌo ri Jesucristo, y xbij: Tivacꞌaxaj na peꞌ. Yin tok nquika-pe, nquipuꞌu cachiꞌel nbün jun elekꞌon, man ninyaꞌ tüj rutzijol. Y ri quichajin quicꞌaslen y ye chꞌajchꞌoj, jabel cꞌa quiquicot, roma manak itzel tak quinojibül ri quibanun ri nyechꞌanaban tüj chiquivüch ri vinük.
\p
\v 17 Y jariꞌ tok ri ruvukuꞌ (séptimo) ángel xuvoxij pa cakikꞌ ri rucꞌuan chupan ri lük, y xinvacꞌaxaj cꞌa que cꞌo nchꞌo-pe ri apeꞌ cꞌo-vi ri lokꞌolüj ruchꞌacat ri Dios chiriꞌ pa racho, chilaꞌ chicaj. Y riqꞌuin cꞌa ruchukꞌaꞌ nbij-pe: Jareꞌ tzakon yan,
\p
\v 18 Y xe cꞌa xbij quiriꞌ ri tzij riꞌ, xekꞌajan cꞌa truenos, xepuꞌu coyopaꞌ y xekꞌajan chꞌaka chic chꞌabül. Y xbün cꞌa jun nimalüj cab-rakün ri man jun bey banatajnük janipeꞌ ri yecꞌo-pe vinük chuvüch ri ruchꞌulef.
\v 19 Y ri apeꞌ cꞌo-vi ri nimalüj tinamit xjakatüj ri ruchꞌulef roma ri cab-rakün. Pan oxiꞌ cꞌa xbün chin ri tinamit riꞌ. Y ri chꞌaka chic cꞌa nimakꞌ tak tinamit ri yecꞌo chuvüch ri ruchꞌulef, xebe-vi cꞌa chukaꞌ pan ulef. Xetzak. Ri Dios ja yan cꞌa riꞌ xucꞌuxlaꞌaj ri nimalüj tinamit Babilonia, y ncꞌatzinej-vi cꞌa que nuyaꞌ ruqꞌuexel cheque ri vinük aj chiriꞌ. Romariꞌ ri Dios xbün cheque que tiquikumuꞌ ri ru-castigo rijaꞌ.
\v 20 Y roma chukaꞌ ri nimalüj cab-rakün ri xbün, ri ruchꞌulef ri yecꞌo pa tak yaꞌ xebe chuxeꞌ yaꞌ. Y ri juyuꞌ man xetzꞌetetüj tüj chic.
\v 21 Chukaꞌ chupan ri tiempo riꞌ xka-ka cꞌa pe sakboch ri chilaꞌ chicaj. Y jujun sakboch colopeꞌ jujun cꞌa quintal calal. Y roma cꞌa ri jun camic sakboch reꞌ, ri vinük juis cꞌa nquetzelaj ri Dios. Ri kꞌoxomül cꞌa ri xuyaꞌ ri Dios pa quiviꞌ ri vinük riꞌ, juis cꞌayuf vi.
\c 17
\s Ri itzel tinamit Babilonia
\p
\v 1 Y jun cꞌa cheque ri siete ángeles ri ye ucꞌuayon jujun lük banun riqꞌuin kꞌanapük, xchꞌo-pe chuve y xbij-pe cꞌa chuve: Catampe viqꞌuin y nincꞌut cꞌa chavüch ri achique chi castigo ri nka-ka pariꞌ ri ixok ri ruchujirsan rucꞌaslen quiqꞌuin achiꞌaꞌ y tzꞌuyul pa quiviꞌ qꞌuiy yaꞌ.
\v 2 Ja riqꞌuin ri ixok reꞌ quibanun-vi quimac ri nimakꞌ tak reyes ri yecꞌo chuvüch ri ruchꞌulef. Y rumac cꞌa chukaꞌ ri ixok reꞌ tok ri vinük ri yecꞌo chuvüch ri ruchꞌulef ye kꞌabarnük pa rukꞌaꞌ ri mac.
\p
\v 3 Y chupan cꞌa ri jun cachiꞌel achicꞌ ri xinbün roma ri ruchukꞌaꞌ ri Lokꞌolüj Espíritu, xinnaꞌ que ri ángel xinrucꞌuaj cꞌa pa jun cachiꞌel tzꞌiran ruchꞌulef. Y chiriꞌ xintzꞌet yan chic ri ixok, tzꞌuyul chirij jun chico cük rij ri cꞌo siete rujolon y diez rucꞌaꞌ. Ri chico cük rij reꞌ ruyon cꞌa biꞌaj rij, richin nretzelaj ri rubiꞌ ri Dios.
\v 4 Y ri ixok riꞌ rucusan cꞌa tziük cük y morado. Ye rucusan chukaꞌ chꞌaka chic cosas ri ye banun riqꞌuin kꞌanapük, riqꞌuin jabel tak abüj y ri abüj chukaꞌ ri nbix perla cheque, richin ruvekon-riꞌ jabel. Y pa rukꞌaꞌ, rucꞌuan cꞌa jun copa ri banun riqꞌuin kꞌanapük. Y ri copa riꞌ nojnük-e rupan riqꞌuin ri itzel tak runojibül ri ye rubanalun chuvüch ri Dios, y riqꞌuin chukaꞌ ri tzꞌilolüj tak nojibül ri ye rubanalun, cachiꞌel ri mac quiqꞌuin achiꞌaꞌ.
\v 5 Y ri ixok riꞌ tzꞌiban-vi cꞌa pa nicꞌaj ruvüch ri rubiꞌ. Y ri rubiꞌ rijaꞌ man katz kꞌalüj tüj achique ntel-vi chi tzij, pero quereꞌ cꞌa ri nbij: Ri nimalüj tinamit Babilonia, quiteꞌ ri xtaniꞌ ri man utz tüj quicꞌaslen y ri quiteꞌ chukaꞌ ri vinük ri nyebanun itzel chuvüch ri Dios.
\v 6 Tok yin xintzꞌet cꞌa ri ixok riꞌ, xsatz cꞌa nucꞌuꞌx. Roma xa xerucamsaj juis ye qꞌuiy yecꞌo-vi pa rukꞌaꞌ ri Dios, ri xetaken ri Jesucristo, que cachiꞌel tok jun kꞌabarel nutij qꞌuiy aguardiente hasta que juis mekꞌen rupan.
\v 7 Y ri ángel ri ucꞌuayon vichin, xbij cꞌa chuve: Yin ninkꞌalajrisaj cꞌa chavüch ri achique nyeꞌel-vi chi tzij ri ixok ri tzꞌuyul chirij ri chico. Y ninbij-vi chukaꞌ chave achique ntel-vi chi tzij ri nimalüj chico siete rujolon y diez rucꞌaꞌ. Romariꞌ manak cꞌatz que nsatz acꞌuꞌx.
\v 8 Roma ri chico ri xatzꞌet, xa jun chico ri xcꞌujeꞌ ojer can y vocomi manak chic. Pero man riqꞌuin tüj riꞌ cꞌa ri xa manak chic, xa nkꞌalajin chic cꞌa pe. Ntel cꞌa pe chupan ri jul ri ruyon kꞌekuꞌn rupan. Roma xa jariꞌ ri ruqꞌuisbül ri nbün can y nbe pa kꞌakꞌ. Y yecꞌo cꞌa juis vinük ri yecꞌo chuvüch ri ruchꞌulef, ri xa man ncꞌujeꞌ tüj quibiꞌ chupan ri vuj ri richin cꞌaslen. Y reꞌ ja pa rutzꞌuquic pe ri ruchꞌulef tok etaman chic pe roma ri Dios. Ri vinük riꞌ nsatz cꞌa quicꞌuꞌx roma ri nquitzꞌet. Roma ri chico ri xcꞌujeꞌ ojer y xa manak chic tzꞌeton, xbekꞌalajin cꞌa pe jun bey chic.
\p
\v 9 Reꞌ qꞌuiy cꞌa etamabül nrajoꞌ richin nkꞌax chin jun, roma ri siete rujolon ri chico, xa ye siete cꞌa juyuꞌ ri apeꞌ rubanun-vi ruchꞌacat ri ixok riꞌ.
\v 10 Chukaꞌ ri siete rujolon ri chico, xa ye siete cꞌa rey. Ye voꞌoꞌ cꞌa cheque ri siete reyes reꞌ xecꞌo yan. Ri ruvakiꞌ (sexto) rey nbün mandar vocomi. Jacꞌa ri ruvukuꞌ (séptimo) rey man jani nkꞌalajin-pe richin nbün-pe mandar. Pero tok nkꞌalajin-pe ri rey reꞌ, xa man cꞌa nlayuj tüj ri ru-autoridad.
\v 11 Cꞌateriꞌ, ja ri chico ri xcꞌujeꞌ y vocomi manak chic tzꞌeton, jariꞌ ri ntoc can rey. Ri ruqꞌuisbül rey reꞌ, junan vi cꞌa runaꞌoj quiqꞌuin ri siete itzel tak reyes ri ye cꞌunük chic. Chukaꞌ rijaꞌ nbün mandar, y cꞌateriꞌ nbe pa kꞌakꞌ.
\p
\v 12 Y jacꞌa ri lajuj (diez) rucꞌaꞌ ri xatzꞌet que rucꞌuan ri chico, xa ye lajuj (diez) cꞌa reyes ri man jani nquibün ta mandar. Y ri lajuj (diez) reyes reꞌ cachibilan ri chico, njach-vi cꞌa cuchukꞌaꞌ pa quikꞌaꞌ richin nquibün mandar. Pero ri cuchukꞌaꞌ ri njach cheque, xa man cꞌa nlayuj tüj. Xa baꞌ oc nbün.
\v 13 Ri lajuj (diez) reyes ri cꞌa man jani nquibün tüj mandar, junan vi cꞌa quivüch. Y chi lajuj (diez) reyes nquiyaꞌ cꞌa chiquivüch richin nquiyaꞌ ri qui-autoridad y ri cuchukꞌaꞌ pa rukꞌaꞌ ri chico riꞌ.
\v 14 Y ri reyes riꞌ nquibün cꞌa chukaꞌ oyoval riqꞌuin ri Jesucristo ri cachiꞌel Alaj Oveja. Rijaꞌ cꞌo pa quiviꞌ conojel reyes y jun nimalüj Ajaf. Y romariꞌ ri nyecatüj chirij, xa nyechꞌacatüj roma rijaꞌ y coma ri yecꞌo riqꞌuin. Ri yecꞌo riqꞌuin ri Ajaf Jesucristo, ye oyon y ye chaꞌon roma ri Dios, y quiyoꞌon-vi cánima chukaꞌ.
\p
\v 15 Y ri ángel ri ucꞌuayon vichin xbij cꞌa chukaꞌ chuve yin Juan: Ri yaꞌ ri xatzꞌet-vi que tzꞌuyul ri ixok ri man utz tüj rucꞌaslen, xa ye tinamit, ye juis qꞌuiy vinük, ri man junan tüj quichꞌabül y man junan tüj quiruchꞌulef chukaꞌ.
\v 16 Y ri lajuj (diez) rucꞌaꞌ ri xatzꞌet que rucꞌuan ri chico, xa nquetzelaj cꞌa ri ixok ri xa man utz tüj rucꞌaslen. Y nquiyaꞌ cꞌa can ruyon. Xa nquichꞌanaba-vi can. Y ri ruchꞌacul ri ixok riꞌ, cꞌo chꞌaka nquicꞌux, y cꞌo ri chꞌaka chic xa nquiporoj pa kꞌakꞌ.
\v 17 Ri Dios xuyaꞌ pa cánima ri lajuj (diez) reyes que junan quivüch richin que xecatüj chirij ri ixok ri man utz tüj ri rucꞌaslen, y chukaꞌ que junan quivüch richin que xquijüch ri qui-autoridad chin ri chico. Y quiriꞌ nquibün, pero man richin tüj chi jumul, roma tok nyebanatüj ri ye rubin can ri Dios que nyebanatüj, xa nqꞌuis cꞌa can.
\v 18 Y ri ixok ri xatzꞌet, jacꞌa ri jun nimalüj tinamit ri cꞌo pa quiviꞌ ri chꞌaka chic tinamit richin ri ruchꞌulef.
\c 18
\s Tok xtzak ri itzel tinamit Babilonia
\p
\v 1 Cꞌateriꞌ xintzꞌet cꞌa chukaꞌ jun chic ángel. Jun ángel ri cꞌo juis autoridad pa rukꞌaꞌ, y ntajin nka-ka-pe cꞌa chicaj. Ri ángel reꞌ chukaꞌ, roma ri nyiqꞌuiyot, xusakrisaj ri ruchꞌulef.
\v 2 Riqꞌuin cꞌa ruchukꞌaꞌ nchꞌo, y nbij: Vocomi xtzak yan, vocomi xtzak yan ri nimalüj tinamit Babilonia. Vocomi xa cꞌunük chic cꞌa ri apeꞌ nquimol-quiꞌ itzel tak espíritu. Y chiriꞌ chukaꞌ cꞌo-vi quisoc itzel y tzꞌilolüj tak chꞌipaꞌ.
\v 3 Roma xa ja ri Babilonia ri xbanun cheque ri chꞌaka chic ruchꞌulef richin que xquiyüc ru-castigo ri Dios pa quiviꞌ, roma xbün cheque que mekꞌen quipan pa rukꞌaꞌ ri mac quiqꞌuin achiꞌaꞌ y ri ixokiꞌ. Ja chukaꞌ ri Babilonia ri xbanun cheque ri reyes quichin chꞌaka chic ruchꞌulef richin xetzak pa mac, cachiꞌel ri mac quiqꞌuin ixokiꞌ. Y ja chukaꞌ ri tinamit Babilonia ri xbanun cheque qꞌuiy cꞌayinelaꞌ que xebeyomür can, roma ri aj-Babilonia xquicꞌuaj jun itzel cꞌaslen y romariꞌ xquisatzalaꞌ juis tumin, xbij ri ángel.
\p
\v 4 Cꞌateriꞌ xinvacꞌaxaj cꞌa que cꞌo jun ri nchꞌo-pe chilaꞌ chicaj y nbij: Rix ri rix vichin chic yin, quixel cꞌa pe pa tinamit Babilonia, man xa quixka-ka chukaꞌ pa mac y nquixilon chukaꞌ rix riqꞌuin ri kꞌoxomül ri nka-ka pa quiviꞌ ri vinük aj chiriꞌ.
\v 5 Y ri quimac ri vinük ri aj chiriꞌ chupan ri tinamit riꞌ, molon-vi cꞌa ronojel. Y ronojel ri mac reꞌ jun nimalüj montón chic cꞌa rubanun. Romariꞌ ri montón reꞌ xa xkꞌalajin yan e cꞌa chilaꞌ chicaj. Y ri Dios nuya-vi cꞌa kꞌoxomül pa quiviꞌ ri vinük, roma ri quimac cꞌunük cꞌa ruviꞌ quibanun.
\v 6 Pero rix, xbij cꞌa ri chꞌabül petenük chilaꞌ chicaj cheque ri nyebanun ruqꞌuexel chin ri Babilonia, tibanaꞌ cꞌa ruqꞌuexel chin, cachiꞌel xbün rijaꞌ cheque chꞌaka chic. Cachiꞌel cꞌa ri rubanun rijaꞌ, jariꞌ chukaꞌ ri tibanaꞌ chin rijaꞌ. Caꞌiꞌ mul cꞌa más cꞌayuf tibanaꞌ chin, que chuvüch ri xbün rijaꞌ cheque ri chꞌaka. Rijaꞌ xa jun lük chin ri itzel ri xuyaꞌ, pero rix caꞌiꞌ lük tiyaꞌ chin richin nibün ruqꞌuexel chin y tutijaꞌ na pokonül.
\v 7 Tiyaꞌ pa kꞌoxomül. Roma rijaꞌ xunimirsaj-riꞌ, y tok ruyoꞌon-riꞌ chupan ri itzel cꞌaslen, xusatzalaꞌ ri rutumin. Y xubilaꞌ cꞌa pa ránima: Ja yin ri cachiꞌel reina yin tzꞌuyul chereꞌ. Ni man yin malcaꞌn tüj, nixta man nincꞌusaj tüj kꞌoxon chukaꞌ, nbij.
\v 8 Y roma cꞌa ri rutzij riꞌ, pa jun kꞌij cꞌa nyepuꞌu ronojel ruvüch kꞌoxomül pariꞌ. Npuꞌu camic, okꞌej y vayjül. Y ncꞌat chukaꞌ pa rukꞌaꞌ kꞌakꞌ. Y quiriꞌ vi cꞌa ri ncꞌulachitüj, roma ri xbin que quiriꞌ ri nbanatüj, ja ri Ajaf Dios ri cꞌo-vi ruchukꞌaꞌ riqꞌuin.
\p
\v 9 Y ri reyes ri yecꞌo chuvüch ri ruchꞌulef juis cꞌa ncokꞌej ri tinamit Babilonia. Ri reyes riꞌ jariꞌ ri xechꞌacatüj pa rukꞌaꞌ, richin que xetzak pa mac, cachiꞌel ri mac quiqꞌuin ixokiꞌ, y chukaꞌ richin que xetzak chupan ri itzel tak cꞌaslen ri apeꞌ xquisatzala-vi qui-tumin. Ncokꞌej y nquibisoj cꞌa ri tinamit Babilonia tok nquitzꞌet ri sib njoteꞌ chicaj, roma ntajin rucꞌatic.
\v 10 Pero roma cꞌa ri nquixbij-quiꞌ chuvüch ri kꞌoxomül ri kajnük pariꞌ, cꞌanüj cꞌa nyecꞌuje-vi-e chin y nquibij cꞌa: Juyaꞌ ruvüch ri nimalüj tinamit Babilonia, jun tinamit ri cꞌo ruchukꞌaꞌ richin xcꞌujeꞌ pa quiviꞌ conojel. Juyaꞌ cꞌa ruvüch roma xa pa jun hora xqꞌuis pa rukꞌaꞌ ri castigo ri xka-pe pariꞌ.
\p
\v 11 Y ri cꞌayinelaꞌ cꞌa ri yecꞌo chuvüch ri ruchꞌulef, juis cꞌa chukaꞌ ncokꞌej y nquibisoj ri tinamit riꞌ, roma man jun chic cꞌa nlokꞌon richin ri cꞌayij ye quicꞌualon-apu richin nyequicꞌayij can chiriꞌ.
\v 12 Y ri cꞌayij cꞌa ri ye quicꞌualon ri cꞌayinelaꞌ riꞌ, ja ri kꞌanapük, sakpük, ri chꞌichꞌ cobre y hierro, ri abüj ri galán ye jabel, ri mármol, y ri abüj nbix chukaꞌ perla chin, ri tziük ri galán ye jabel, cachiꞌel ri lino, ri seda, y ri tziük morado y cük, ri cosas ri ye banun quiqꞌuin jabel tak cheꞌ y jubul tak cheꞌ, y ye quicꞌualon chukaꞌ cosas ye banun riqꞌuin bak.
\v 13 Quicꞌualon chukaꞌ canela, akꞌon, pon, mirra y chꞌaka chic jubulüj tak akꞌon, ri ruyaꞌal-uva, aceite, cꞌüj y trigo. Ye quicꞌualon-apu chukaꞌ richin nyebequicꞌayij can, ovejas, quiej y chꞌaka chic chico, carruajes, y hasta vinük.
\v 14 Vocomi ri vinük ri xecꞌujeꞌ pa nimalüj tinamit, man nyequitij tüj chic cꞌa quivüch-cheꞌ ri jabel ye quiꞌ y juis xekaꞌ chiquivüch. Xqꞌuis cꞌa ronojel ri jabel tak cosas ri yecꞌo quiqꞌuin, y xqꞌuis chukaꞌ ri quibeyomal.
\p
\v 15 Y ri cꞌayinelaꞌ ri nyeꞌapon pa Babilonia richin nyebequicꞌayij cosas, juis cꞌa xebeyomür can. Ri cꞌayinelaꞌ reꞌ nquixbij cꞌa quiꞌ chuvüch ri castigo ri kajnük pariꞌ ri tinamit, cꞌanüj cꞌa yecꞌo-vi-e. Juis vi cꞌa ncokꞌej y nquibisoj.
\v 16 Y nquibij: Juyaꞌ cꞌa ruvüch ri nimalüj tinamit Babilonia, roma xa cachiꞌel cꞌa jun ixok ri ruvekon-riꞌ riqꞌuin tziük galán jabel. Ruvekon-riꞌ riqꞌuin ri tziük rubiniꞌan lino, y quiqꞌuin ri tziük ri cük y morado nyetzuꞌun. Y xerucusaj cꞌa chukaꞌ kꞌanapük, perlas y chꞌaka chic quivüch abüj ri galán ye jabel.
\v 17 Y xa pa jun hora xqꞌuis ri jaruꞌ chi beyomül ri nchajin.
\p Y ri achiꞌaꞌ capitanes ri cꞌo quikꞌij pa tak barcos y ri chꞌaka chic ri nyesamajin chin ri barcos, ri vinük ri ye petenük chupan ri barcos, y conojel vi cꞌa ri samajelaꞌ ri richin pa yaꞌ, man xejel tüj apu cꞌa chunakaj ri tinamit Babilonia. Xa cꞌanüj xepaꞌe-vi chin.
\v 18 Roma xquitzꞌet ri sib ri jotol chicaj. Sib ri nbukun nbe chicaj, roma ntajin rucꞌatic ri tinamit. Y riqꞌuin cꞌa cuchukꞌaꞌ xechꞌo, y xquibij: ¿Cꞌo ta comi jun tinamit ri junan riqꞌuin ri nimalüj tinamit reꞌ? xquibij.
\p
\v 19 Y ri vinük cꞌa ri ye richin pa tak barcos y ri samajelaꞌ ri richin pa tak yaꞌ, xquiyalaꞌ cꞌa ulef pa tak quijolon, nyeꞌokꞌ y juis cꞌa nyebison, y riqꞌuin cuchukꞌaꞌ nquibij: Juyaꞌ cꞌa ruvüch ri nimalüj tinamit Babilonia. Riqꞌuin cꞌa ri rubeyomal rijaꞌ xebeyomür can conojel rajaf tak barcos. Y xa pa jun hora xqꞌuis ronojel, xquibij.
\p
\v 20 Y jariꞌ tok xacꞌaxatüj jun chꞌabül y xbij: Rix ri rixcꞌo chicaj, rix apóstoles, rix kꞌalajrisüy ri rutzij ri Dios y rix chukaꞌ ri rixcꞌo-vi pa rukꞌaꞌ ri Dios, quixquicot cꞌa, roma ri Dios xutzꞌet ri xicꞌusaj pa rukꞌaꞌ ri Babilonia. Romariꞌ xuyaꞌ rutojic chin.
\p
\v 21 Y jariꞌ tok jun ángel ri juis ruchukꞌaꞌ, xberuliꞌej cꞌa pe jun nimalüj abüj, ri cachiꞌel jun caꞌ ntzuꞌun. Cꞌateriꞌ ri ángel riꞌ riqꞌuin ronojel ruchukꞌaꞌ xucꞌük ri abüj cꞌa pa mar, y xbij cꞌa: Quereꞌ cꞌa nban chin ri nimalüj tinamit Babilonia richin que tiqꞌuis chiriꞌ. Ri tinamit riꞌ man ntzꞌetetüj tüj chic.
\v 22 Nixta jun bey chic cꞌa chukaꞌ nacꞌaxüx ta pa tak rubey riqꞌuin ri nyekꞌajan ri arpas, ri trompetas y ri xul. Man jun chic cꞌa ri nkꞌojoman. Nixta cꞌa chukaꞌ nyecꞌujeꞌ chic achique na quivüch samajelaꞌ chiriꞌ cachiꞌel ri rubanun can. Y man nyekꞌajan tüj chic pe ri caꞌ chukaꞌ.
\v 23 Man jun chic cꞌa kꞌakꞌ ri ntzꞌetetüj ta chupan, richin ta nsakrisan. Man nacꞌaxüx tüj chic cꞌa chukaꞌ que cꞌo ta jun cꞌulubic nbanatüj. Roma chiriꞌ xecꞌuje-vi ri más nimakꞌ tak cꞌayinelaꞌ. Y chukaꞌ roma ri achique xquibün ri aj-itz chiriꞌ, xechꞌacatüj cꞌa conojel ri ruchꞌulef.
\p
\v 24 Y chupan cꞌa chukaꞌ ri tinamit Babilonia xbiyin-vi quiquiqꞌuel ri ye rusamajelaꞌ ri Dios ri xekꞌalajrisan ri rutzij, y ri quiquiqꞌuel ri chꞌaka chic ri yecꞌo-vi pa rukꞌaꞌ ri Dios. Pariꞌ cꞌa ri tinamit riꞌ xka-ka-vi ri quicamic conojel ri takenelaꞌ richin ri Dios ri ye camsan-e chuvüch ri ruchꞌulef.
\c 19
\p
\v 1 Y chirij cꞌa ronojel reꞌ tok yin Juan xinvacꞌaxaj que juis cꞌa quichꞌabül vinük ri nvunu chicaj. Y ri vinük reꞌ riqꞌuin cuchukꞌaꞌ nquibij cꞌa:
\q Tinimirsaj rubiꞌ ri Kajaf Dios, roma riqꞌuin rijaꞌ petenük-vi ri colonic, richin rijaꞌ ri ruchukꞌaꞌ, y cꞌo chukaꞌ ri nimalüj rukꞌij.
\q
\v 2 Tinimirsaj rubiꞌ ri ka-Dios roma ri nbün juzgar, ketzij y choj,
\q roma xuyaꞌ ru-castigo pariꞌ ri ixok ri itzel rucꞌaslen,
\q ri xbün cheque ri vinük ri yecꞌo chuvüch ri ruchꞌulef richin xetzak pa mac, cachiꞌel ri mac quichin ixokiꞌ y achiꞌaꞌ.
\q Y ri ka-Dios, pariꞌ cꞌa ri ixok itzel rucꞌaslen xuya-vi ri rutojic ri quicamic ri rusamajelaꞌ, nquibij.
\p
\v 3 Cꞌateriꞌ ri vinük ri nvunu quichꞌabül chicaj, xquibij cꞌa chukaꞌ: Tinimirsaj cꞌa rubiꞌ ri Dios, roma ri Babilonia rutzꞌamon rucꞌatic, y ri rusib njoteꞌ cꞌa chi jumul.
\p
\v 4 Y chi veinticuatro rajatük achiꞌaꞌ ri yecꞌo chicaj y ri ye cajiꞌ ri juis qꞌuiy runakꞌ tak quivüch cꞌo, jariꞌ tok xexuque-ka pan ulef richin xquiyaꞌ rukꞌij ri Dios cꞌo pa lokꞌolüj ruchꞌacat. Y ri rajatük achiꞌaꞌ y ri ye cajiꞌ ri juis qꞌuiy runakꞌ tak quivüch cꞌo, xquibij cꞌa: Quiriꞌ ta cꞌa. Xtinimirsüs cꞌa ri rubiꞌ ri Dios, xquibij rijeꞌ.
\p
\v 5 Y jariꞌ tok cꞌo cꞌa jun ri xbechꞌo-pe apeꞌ cꞌo-vi ri lokꞌolüj ruchꞌacat ri Dios, y quereꞌ cꞌa ri nbij:
\q Chiꞌivonojel rix rusamajelaꞌ ri Dios,
\q tiyaꞌ cꞌa rukꞌij ri ka-Dios.
\q Rix ri nitakej rutzij ri Dios, tiyaꞌ rukꞌij.
\q Chi cocoj y chi nimakꞌ tibanaꞌ quiriꞌ.
\s Ri nimakꞌij richin rucꞌulubic ri Jesucristo
\p
\v 6 Y yin Juan, xinvacꞌaxaj cꞌa chukaꞌ que cachiꞌel quichꞌabül juis vinük ri nyevunu chilaꞌ chicaj. Ri quichꞌabül nyevunu cꞌa cachiꞌel nyevunu rakün tak yaꞌ, y chukaꞌ cachiꞌel nkꞌajan trueno. Y nquibij cꞌa:
\q Tinimirsaj rubiꞌ ri Ajaf ri ka-Dios, ri cꞌo ronojel ruchukꞌaꞌ riqꞌuin, roma ja rijaꞌ ri Jun ri nbün mandar.
\q
\v 7 Titzeꞌen cꞌa kavüch y tinoj ri kánima riqꞌuin quicot, y tikayaꞌ rukꞌij ri Dios.
\q Roma xka-pe yan cꞌa ri kꞌij richin nbanatüj ri nimalüj cꞌulubic richin ri Jesucristo ri Jun cachiꞌel Alaj Oveja.
\q Y ri xtün ruchojmirsan chic riꞌ richin ri rucꞌulubic.
\q
\v 8 Xyaꞌ cꞌa kꞌij chin ri xtün richin que xuvek yan riꞌ riqꞌuin tziük ri juis chꞌajchꞌoj y nyiqꞌuiyot, tziük ri nbix lino chin, ri juis jabel.
\m Y ri tziük riꞌ, xa ja ri chojmilüj tak quicꞌaslen ri yecꞌo-vi pa rukꞌaꞌ ri Dios.
\p
\v 9 Y ri ángel ri benük viqꞌuin, xbij cꞌa chuve: Tatzꞌibaj cꞌa, que jabel quiquicot ri ye oyon richin ri nimakꞌij chupan ri rucꞌulubic ri Jesucristo ri cachiꞌel Alaj Oveja, xbij.
\p Y ri ángel riꞌ xbij cꞌa chukaꞌ chuve: Ri tzij ri xinbij chave, ja ri Dios biyon y ketzij vi.
\p
\v 10 Y yin jariꞌ xinxuqueꞌ chuvüch ri ángel riꞌ richin ninyaꞌ rukꞌij, pero rijaꞌ xbij cꞌa chuve: Man caxuqueꞌ chinuvüch. Man tayaꞌ nukꞌij yin. Ja ri Dios ri tayaꞌ rukꞌij. Roma yin xa jun rusamajel ri Dios cachiꞌel rat, y cachiꞌel chukaꞌ ri chꞌaka chic ri xquicꞌul ri rutzij ri Jesús y nquitzijoj chukaꞌ. Xa roj junan, roma jun kꞌalajrisüy richin ri nbix chin roma ri Dios y jun tzijoy ri rutzij ri Jesús, xa jun mismo Espíritu ri nyoꞌon quitzij chi caꞌiꞌ. Ri Espíritu riꞌ richin cꞌa ri Jesús.
\s Ri tzꞌuyben richin jun quiej sük rij
\p
\v 11 Y tok xintzuꞌun yan chic, xintzꞌet cꞌa ri caj que jakül. Y xintzꞌet cꞌa jun quiej sük rij, tzꞌuyben roma ri Jun ri rubiniꞌan Ketzij y nbün-vi ri nbij. Ri Jun cꞌa ri tzꞌuyben ri quiej sük rij, riqꞌuin cꞌa ruchojmil nbün juzgar y nbün oyoval quiqꞌuin ri nyeꞌetzelan richin.
\v 12 Ri runakꞌ-ruvüch ye cachiꞌel cꞌa ruxak tak kꞌakꞌ. Cꞌo cꞌa qꞌuiy coronas rucusan, y tzꞌiban-e ri rubiꞌ chiriꞌ. Y ri biꞌaj reꞌ, man jun cꞌa achique chok nkꞌax-vi chin, xaxe cꞌa chin rijaꞌ.
\v 13 Ri rutziek cꞌa ri rucusan, muꞌul pa quicꞌ. Y rijaꞌ cꞌo cꞌa jun chic rubiꞌ, y riꞌ ja ri Rutzij ri Dios.
\v 14 Y ri aj-chicaj banuy tak oyoval ri ye benük riqꞌuin, quicusan tziük ri nbix lino chin, tziük ri juis jabel. Tziük ri sük-sük y chꞌajchꞌoj-chꞌajchꞌoj. Y conojel cꞌa ri banuy-oyoval reꞌ, ye tzꞌuyul-e chiquij quiej sük tak quij.
\v 15 Y pa ruchiꞌ rijaꞌ ncꞌulun cꞌa pe jun cachiꞌel machet ri juis rey. Y riqꞌuin cꞌa riꞌ nukasaj quikꞌij ri vinük ri ye cꞌo pa tak ruchꞌulef. Y ja rijaꞌ ri nbün mandar riqꞌuin ronojel ruchukꞌaꞌ pa quiviꞌ ri vinük. Y nyeruyitzꞌ riqꞌuin ri ru-autoridad. Cachiꞌel cꞌa tok nyitzꞌitüj riqꞌuin akün ri uva chupan ri cachiꞌel pila, quiriꞌ cꞌa ri nbün rijaꞌ cheque. Nukꞌalajrisaj cꞌa chikavüch ri rubanic ri nimalüj castigo ri nuyaꞌ ri Dios ri cꞌo ronojel ruchukꞌaꞌ riqꞌuin.
\v 16 Y ri Jun ri rubiniꞌan Ruchꞌabül ri Dios, rucusan cꞌa jun rutziek nim rakün, y chirij riꞌ tzꞌiban cꞌa jun chic rubiꞌ. Quiriꞌ cꞌa chukaꞌ ri pa nicꞌaj ka baꞌ chin ri rutziek, tzꞌiban jun chic. Y ri caꞌiꞌ cꞌa biꞌaj riꞌ ja ri Rey pa quiviꞌ ri reyes, y Ajaf pa quiviꞌ ri ajaf.
\p
\v 17 Y cꞌateriꞌ xintzꞌet jun ángel paꞌül pariꞌ ri kꞌij. Ri ángel cꞌa reꞌ riqꞌuin ruchukꞌaꞌ xbij cheque ri chꞌipaꞌ ri nyebiyaj chicaj: Quixampe. Timolo-pe iviꞌ, roma ri Dios nuyaꞌ cꞌa jun nimalüj vaꞌin chive.
\v 18 Ri vüy cꞌa ri nuyaꞌ ri Dios ja ri quichꞌacul ri reyes, quichꞌacul capitanes, y quichꞌacul cꞌa chukaꞌ ri chꞌaka chic achiꞌaꞌ ri juis cuchukꞌaꞌ. Quichꞌacul cꞌa chukaꞌ quiej y ri ye tzꞌuyben. Ja ri quichꞌacul conojel vinük, chi lokꞌon y chi man lokꞌon tüj, chi cocoj y chi nimakꞌ, xbij ri ángel.
\p
\v 19 Y cꞌateriꞌ tok yin Juan xintzꞌet chic ri nabey chico y xentzꞌet ri reyes richin ri ruchꞌulef chukaꞌ, y ye juis cꞌa chukaꞌ achiꞌaꞌ banuy-oyoval ri ye cachibilan-e. Y conojel reꞌ quimolon cꞌa quiꞌ richin nquibün oyoval riqꞌuin ri Jun ri tzꞌuyul chirij ri quiej sük rij y quiqꞌuin chukaꞌ ri ye tzekleben richin.
\v 20 Y ri nabey chico xtzꞌam cꞌa e, rachibilan ri jun achi ri nbin que kꞌalajrisüy ri rutzij ri Dios y xa man ketzij tüj. Ri jun cꞌa achi tzꞌucuy-tzij reꞌ, xerubanalaꞌ cꞌa milagros ri man jun bey ye tzꞌeton tüj, chuvüch apu ri chico. Y riqꞌuin cꞌa riꞌ, xeruchꞌüc ri vinük richin que xquicꞌul ri quetal pa nicꞌaj-quivüch o pa tak quikꞌaꞌ. Y ri vinük reꞌ xquiyaꞌ cꞌa chukaꞌ rukꞌij ri ruvachbül ri chico. Y romariꞌ ri chico y ri jun ri xechꞌacon ri vinük, ye cꞌüs cꞌa xetorix chupan ri kꞌakꞌ yojon riqꞌuin azufre nbarür.
\v 21 Y ja ri chꞌaka chic vinük ri ye benük quiqꞌuin ri ye caꞌiꞌ riꞌ, xecamsüs cꞌa conojel. Xecamsüs cꞌa riqꞌuin ri jun cachiꞌel machet ri ncꞌulun-pe pa ruchiꞌ ri tzꞌuyul chirij ri quiej sük rij. Y ri quichꞌacul cꞌa conojel ri xecamsüs, ja ri chꞌipaꞌ ri xecꞌuxun. Nquinojsaj-vi cꞌa quipan riqꞌuin ri tiꞌij riꞌ.
\c 20
\s Ri jun mil junaꞌ
\p
\v 1 Y cꞌateriꞌ yin xintzꞌet cꞌa jun ángel ri ntajin nka-ka-pe chilaꞌ chicaj y rucꞌamon-pe ri llave richin ri jul ri ruyon kꞌekuꞌn rupan. Y rucꞌamon cꞌa chukaꞌ pe jun nimalüj cadena pa rukꞌaꞌ.
\v 2 Ri ángel reꞌ xberutzꞌamaꞌ cꞌa pe ri itzel dragón cük rij, ri nbix chukaꞌ itzel-vinük y Satanás chin. Y jariꞌ ri xoc jun cumütz ojer can. Xxim cꞌa can roma ri ángel, richin jun mil junaꞌ.
\v 3 Cꞌateriꞌ xberutorij can chupan ri jul ri ruyon kꞌekuꞌn rupan, xutzꞌapij can y xuyaꞌ can jun retal chiriꞌ pariꞌ ri tzꞌapibül ri jul richin que man jun njakon. Quiriꞌ xban can chin, richin que man queruchꞌüc chic más ri yecꞌo pa ronojel ruchꞌulef. Jun mil cꞌa junaꞌ ri man nkꞌalajin tüj chic ri rusamaj rijaꞌ. Jacꞌa tok cꞌunük chic ri jun mil junaꞌ reꞌ, nyejak cꞌa pe y ntzolij chic chubanic ri rusamaj, pero xa richin baꞌ chic tiempo.
\p
\v 4 Y xintzꞌet cꞌa que yecꞌo chꞌacüt quichin autoridades, y chiriꞌ ye tzꞌuyul-vi ri yoꞌon chic cuchukꞌaꞌ pa quikꞌaꞌ richin nquibün juzgar. Xentzꞌet cꞌa chukaꞌ ri cánima ri ye camnük chic e roma xtzaqꞌuis quikul. Rijeꞌ xecamsüs-e roma xquitzijoj ri rutzij ri Jesús y xquitzijoj ri rutzij ri Dios. Conojel cꞌa reꞌ, jareꞌ ri man xeyoꞌon tüj rukꞌij ri nabey chico y ri ruvachbül. Nixta chukaꞌ man xcajoꞌ tüj quetal ri richin ri chico pa nicꞌaj-quivüch o pa tak quikꞌaꞌ. Y rijeꞌ xecꞌastüj y junan cꞌa nyebanun juzgar riqꞌuin ri Cristo, chupan ri jun mil junaꞌ.
\v 5 Y jariꞌ ri nabey cꞌastajbül ri nbanatüj. Jacꞌa ri chꞌaka chic caminakiꞌ man nyecꞌastüj tüj. Xa jacꞌa tok cꞌunük chic cꞌa ri jun mil junaꞌ, cꞌateriꞌ tok nyecꞌastüj-pe.
\v 6 Lokꞌolüj cꞌa ri quicꞌaslen y jabel chukaꞌ quiquicot ri janipeꞌ nyecꞌastüj chupan ri nabey cꞌastajbül. Roma man ntiquer tüj ri rucaꞌn camic chiquij. Rijeꞌ nyeꞌoc cꞌa sacerdotes richin ri Dios y ri Cristo. Y junan cꞌa nyebanun mandar riqꞌuin ri Cristo chupan ri jun mil junaꞌ.
\p
\v 7 Y ja tok cꞌunük chic ri jun mil junaꞌ, ri itzel-vinük ntelesüs cꞌa pe chupan ri lugar apeꞌ tzꞌapül-vi can.
\v 8 Y npuꞌu cꞌa jun bey chic chin nyeruchꞌüc ri yecꞌo pa ronojel ruchꞌulef. Y ri vinük aj-Gog y aj-Magog reꞌ, nyeruchꞌüc-vi. Nyerumol cꞌa e richin ri oyoval. Y nyevuchꞌuban can. Xa ye cachiꞌel ri sanayiꞌ ri cꞌo chuchiꞌ ri mar.
\v 9 Xejoteꞌ na vi e pa tinamit ri juis nrajoꞌ ri Dios y ri apeꞌ yecꞌo-vi ri yecꞌo-vi pa rukꞌaꞌ rijaꞌ. Ri vinük cꞌa ri ye ruyacon-e ri itzel-vinük, quinojsan cꞌa e ruvüch ri ruchꞌulef y choj xbequisutij quij ri apeꞌ yecꞌo-vi ri yecꞌo-vi pa rukꞌaꞌ ri Dios y ri tinamit. Pero ri Dios xbün que xbetzak-pe kꞌakꞌ pa quiviꞌ, y xeruqꞌuis kꞌakꞌ.
\v 10 Y ri itzel-vinük ri xchꞌacon quichin conojel ri vinük riꞌ, xtorix cꞌa chupan ri kꞌakꞌ yojon riqꞌuin azufre, ri apeꞌ chukaꞌ xetorix-vi ri chico rachibilan ri jun achi ri xbin que kꞌalajrisüy ri rutzij ri Dios y xa man ketzij tüj. Y chiriꞌ chupan ri kꞌakꞌ nquitij cꞌa pokonül chi pakꞌij chi chakꞌaꞌ y richin cꞌa chi jumul.
\s Ri nimalüj juicio
\p
\v 11 Cꞌateriꞌ yin xintzꞌet cꞌa jun lokꞌolüj chꞌacüt ri sük ntzuꞌun, y xintzꞌet cꞌa chukaꞌ ri tzꞌuyul chupan. Y ja ri caj y ri ruchꞌulef ri yecꞌo-apu chuvüch ri tzꞌuyul chupan ri lokꞌolüj chꞌacüt riꞌ, xeꞌanmüj y xquisütz cꞌa e quiꞌ chuvüch. Y man xilitüj tüj chic lugar cheque rijeꞌ. Man xetzꞌetetüj tüj chic.
\v 12 Y xentzꞌet ri caminakiꞌ, chi cocoj chi nimakꞌ ye paꞌül-apu chuvüch ri Dios. Xejakalox cꞌa chꞌaka vuj, y xjak cꞌa chukaꞌ ri jun ri richin cꞌaslen. Conojel cꞌa ri caminakiꞌ reꞌ xban cꞌa juzgar pa quiviꞌ, riqꞌuin ri ronojel ri xquibanalaꞌ chuvüch ri ruchꞌulef, cachiꞌel ri ye tzꞌiban pa tak vuj riꞌ.
\v 13 Conojel cꞌa ri caminakiꞌ ye paꞌül-apu chuvüch ri Dios, conojel ri ye yacon richin nban juzgar pa quiviꞌ. Yecꞌo cꞌa apu ri xquicꞌulachij-e quicamic chupan ri mar chin, y yecꞌo chukaꞌ apu ri xquicꞌulachij-e quicamic lojcꞌan chic. Y cachiꞌel ri xquibanala-e chiquijujunal ri caminakiꞌ riꞌ, quiriꞌ ri juicio ri xban pa quiviꞌ.
\v 14 Y jariꞌ tok man ncꞌulachitüj tüj chic camic, nixta ncꞌujeꞌ chic chukaꞌ ri lugar ri apeꞌ nyeyac-vi ri caminakiꞌ richin nban juzgar pa quiviꞌ, roma xa nyeqꞌuis chi caꞌiꞌ, ri camic y ri lugar. Nyebeqꞌuis cꞌa pa kꞌakꞌ. Y ja ri kꞌakꞌ ri rucaꞌn camic, ri nbe ruvüch apu.
\v 15 Y chupan cꞌa chukaꞌ ri kꞌakꞌ reꞌ xetorix-vi conojel ri vinük ri man tzꞌiban tüj quibiꞌ chupan ri vuj ri richin cꞌaslen.
\c 21
\s Ronojel chic cꞌacꞌaꞌ
\p
\v 1 Y yin Juan xintzꞌet cꞌa ri caj y ri ruchꞌulef, xejalatüj. Ye cꞌacꞌaꞌ vi cꞌa. Ri caj y ri ruchꞌulef ri xecꞌujeꞌ pa nabey, xa ye manak chic. Xejal-e. Manak chic cꞌa chukaꞌ ri mar.
\v 2 Y yin Juan xintzꞌet cꞌa ri lokꞌolüj tinamit, ri cꞌacꞌaꞌ Jerusalén. Xintzꞌet cꞌa que ri tinamit reꞌ, ntajin nka-ka-pe chilaꞌ chicaj riqꞌuin ri Dios. Y jabel cꞌa chojmirsan y vekon-pe, cachiꞌel nbün jun xtün tok nuvek-riꞌ jabel richin más nkaꞌ chuvüch ri alaꞌ ri ncꞌule-vi.
\v 3 Y jariꞌ tok xinvacꞌaxaj que cꞌo jun ri riqꞌuin ruchukꞌaꞌ nchꞌo-pe cꞌa chilaꞌ chicaj y nbij cꞌa: Tatzꞌetaꞌ na peꞌ, vocomi ri Dios chiquicojol la vinük cꞌo-vi. Ja rijeꞌ ri ye rutinamit, y ja rijaꞌ ri qui-Dios. Junan cꞌa nyecꞌujeꞌ.
\v 4 Y ri Dios nusuꞌ cꞌa e ri ruyaꞌal tak runakꞌ-quivüch, roma nbün que nqꞌuis-e ri kꞌoxomül y ri jiloj. Nqꞌuis-e chukaꞌ ri camic y ri okꞌej. Nyeqꞌuis cꞌa ronojel. Ri xecꞌujeꞌ rubanun can, man jun chic quetal, xbij.
\p
\v 5 Y cꞌateriꞌ ri Jun ri tzꞌuyul pa lokꞌolüj chꞌacüt xchꞌo cꞌa y xbij: Yin cꞌacꞌaꞌ vi ri nyenbün. Ronojel vi cꞌacꞌaꞌ, xbij.
\p Y chukaꞌ xbij cꞌa: Queꞌatzꞌibaj cꞌa ri tzij ri nyenbij chave, roma ketzij y utz que nayaꞌ avánima riqꞌuin.
\p
\v 6 Y xbij cꞌa chukaꞌ chuve: Ronojel cꞌa tzakon yan. Ja yin ri xintzꞌucutun-pe y ja yin chukaꞌ ri xinqꞌuison pariꞌ. Ja yin ri cachiꞌel nabey letra y ri ruqꞌuisbül. Y ri achique nchakiꞌj ruchiꞌ, yin ninyaꞌ cꞌa ruyaꞌ ri elesan-pe pa jun apeꞌ nalüx yaꞌ richin cꞌaslen, y ri yaꞌ reꞌ span.
\v 7 Jareꞌ ri nquichinaj ri nyechꞌacon. Ja yin cꞌa ri qui-Dios, y rijeꞌ ri ye valcꞌual.
\v 8 Jacꞌa ri man yinquitakej tüj y ri nquixbij-quiꞌ nyeꞌapon pa tak pokonül voma yin, nyentük pa kꞌakꞌ. Y quiriꞌ cꞌa chukaꞌ ninbün quiqꞌuin ri man nyekaꞌ tüj chinuvüch, ri camsanelaꞌ, ri achiꞌaꞌ y ri ixokiꞌ ri nquicanola-quiꞌ richin nyemacun, ri aj-itzaꞌ, ri nyeyoꞌon quikꞌij dios (tiox) ri xa man ye ketzij tüj, y ri ye tzꞌucuy tak tzij. Nyentük na vi pa kꞌakꞌ. Ri yojon riqꞌuin azufre nbarür. Y jariꞌ ri rucaꞌn camic.
\s Ri lokꞌolüj tinamit Jerusalén
\p
\v 9 Y cꞌateriꞌ, jun cꞌa cheque ri vukuꞌ (siete) ángeles ri xeyoꞌon ri vukuꞌ ruqꞌuisbül tak kꞌoxomül pariꞌ ri ruchꞌulef, kꞌoxomül ri ye quicꞌualon pa tak lük, xchꞌo-pe chuve y xbij cꞌa chuve: Catampe, y nincꞌut chavüch ri xtün ri cꞌulan riqꞌuin ri Jesucristo ri cachiꞌel Alaj Oveja.
\p
\v 10 Y chupan cꞌa ri jun cachiꞌel achicꞌ ri xinbün, roma ri ruchukꞌaꞌ ri Lokꞌolüj Espíritu, ri ángel ri xchꞌo-pe chuve xinrucꞌuaj cꞌa pariꞌ jun nimalüj juyuꞌ, y chiriꞌ cꞌa rojcꞌo-vi tok xucꞌut cꞌa chinuvüch ri lokꞌolüj tinamit Jerusalén ntajin nka-ka-pe chilaꞌ chicaj riqꞌuin ri Dios.
\v 11 Y ri tinamit cꞌa reꞌ, nyiqꞌuiyot roma ri rusakil ri Dios, cachiꞌel tok nyiqꞌuiyot ri jaspe, ri jun abüj juis jabel. Ri tinamit cachiꞌel vidrio ntzuꞌun.
\v 12 Y chirij cꞌa e ri tinamit reꞌ cꞌo cꞌa jun tzꞌak ri rusutin rij, jun nimalüj tzꞌak ri nüj jotol chicaj y rucꞌuan doce puertas. Y pa ronojel ri puertas reꞌ yecꞌo cꞌa jujun ángel. Pa tak puertas riꞌ, ye tzꞌiban cꞌa ri quibiꞌ ri doce tinamit ri quichin ri doce rucꞌajol ri Israel.
\v 13 Y chi cajiꞌ cꞌa lados chin ri tinamit ye cꞌo ox-ox puertas: oxiꞌ pan oriente, oxiꞌ pan occidente, oxiꞌ pa norte, y oxiꞌ pa sur.
\v 14 Y ri ye cꞌunük cꞌa ruxeꞌ ri tzꞌak riꞌ, doce cꞌa abüj ri cꞌo quibiꞌ ri ye doce ru-apóstoles ri Jesucristo chirij, ri Jesucristo ri cachiꞌel Alaj Oveja.
\p
\v 15 Y ri ángel ri nchꞌo chuve, rucꞌuan cꞌa jun cachiꞌel aj richin etabül, y ri etabül reꞌ riqꞌuin cꞌa kꞌanapük banun-vi. Y ri ángel reꞌ rucꞌuan cꞌa ri etabül reꞌ richin nretaj ri tinamit Jerusalén, ri doce ru-puertas y ri tzꞌak.
\v 16 Ri tinamit Jerusalén cuadrado ri rubanic. Junan vi cꞌa rakün chi cajiꞌ lados. Y xpuꞌu ri ángel xretaj cꞌa ri tinamit, y ri tinamit riꞌ rucꞌuan cꞌa caꞌiꞌ mil riqꞌuin caꞌiꞌ ciento kilómetros. Quiriꞌ cꞌa ri ruvüch, ri rakün y ri jotol ri tinamit.
\v 17 Y ri ángel xretaj cꞌa ri jaruꞌ jotol ri tzꞌak. Y ri tzꞌak riꞌ jotol cꞌa sesenta y cuatro metros chicaj. Quiriꞌ cꞌa ri xretaj ri ángel riqꞌuin ri jun etabül ri junan quiqꞌuin ri etabül aj-ruchꞌulef.
\p
\v 18 Y ri tzꞌak cꞌa ri rusutin rij ri tinamit, riqꞌuin cꞌa ri jun abüj ri juis jabel banun-vi. Riqꞌuin cꞌa ri jaspe banun-vi. Y ri tinamit riꞌ, kꞌanapük, ri cachiꞌel vidrio ri chꞌajchꞌoj-chꞌajchꞌoj ntzuꞌun.
\v 19 Y ri doce abüj ri ye cꞌunük cꞌa ruxeꞌ ri tzꞌak, chiquijujunal jun vi cꞌa ruvüch abüj y ye vekon-vi. Ri vekbül-abüj ja ri jaspe, ri zafiro, ri ágata, ri esmeralda,
\v 20 ri ónice, ri cornalina, ri crisólito, ri berilo, ri topacio, ri crisoprasa, ri jacinto, y ri ruqꞌuisbül vekbül ja ri amatista.
\v 21 Y ri doce puertas ye ri vekbül-abüj ri nyebix perlas quichin. Ri doce puertas riꞌ, doce cꞌa perlas. Ja ri nima-bey richin ri tinamit, riqꞌuin cꞌa kꞌanapük banun-vi, y cachiꞌel vidrio ntzuꞌun.
\p
\v 22 Y yin Juan man jun cꞌa racho ri Dios ri xintzꞌet, roma ri Ajaf Dios ri cꞌo-vi ronojel ruchukꞌaꞌ riqꞌuin, chi jun cꞌa ri tinamit ri cꞌunük racho. Y quiriꞌ cꞌa chukaꞌ rubanun ri Jesucristo ri cachiꞌel Alaj Oveja, chi jun ri tinamit cꞌunük racho.
\v 23 Ri tinamit riꞌ man cꞌa ncꞌatzin tüj ri rusakil ri kꞌij y ri icꞌ chin, roma ri nsakrisan richin ja ri rusakil ri Dios y ri Jesucristo ri cachiꞌel Alaj Oveja.
\v 24 Y ri ye petenük pa ronojel ruchꞌulef, ri ye colotajnük chic, ja riqꞌuin ri rusakil ri tinamit nyetzuꞌun-vi richin nyebiyin. Y ri reyes richin ri ruchꞌulef nyequicꞌualaꞌ cꞌa apu pa tinamit chuvüch ri Dios, ri cuchukꞌaꞌ y ri quikꞌij.
\v 25 Chiriꞌ, man jun bey cꞌa nyetzꞌapeꞌ tüj ri puertas richin ri tinamit, roma man jun bey nkꞌekumür-ka tok ncokꞌa-ka.
\v 26 Ri cuchukꞌaꞌ y ri quikꞌij cꞌa ri ruchꞌulef nyeꞌucꞌuꞌüx-apu chupan ri tinamit, richin nyesuj chin ri Dios.
\v 27 Pero ronojel cꞌa ri xa tzꞌil, man jun bey cꞌa ntoc-apu chupan ri tinamit. Nixta chukaꞌ jun vinük ri itzel rubanun chuvüch ri Dios ri ntoc ta apu chiriꞌ. Nixta ri ye tzꞌucuy tak tzij chukaꞌ. Ri nyeꞌoc-apu chiriꞌ, xaxe cꞌa ri cꞌo ri quibiꞌ tzꞌiban chupan ri vuj richin cꞌaslen, ri ruvuj ri Jesucristo ri cachiꞌel Alaj Oveja.
\c 22
\p
\v 1 Y cꞌateriꞌ ri ángel ri ucꞌuayon vichin xucꞌut cꞌa jun chꞌajchꞌojilüj rakün-yaꞌ chinuvüch, ri rakün-yaꞌ ri nyoꞌon cꞌaslen. Ri rakün-yaꞌ riꞌ, cachiꞌel vidrio ntzuꞌun y nalüx-pe apeꞌ cꞌo-vi ri lokꞌolüj ruchꞌacat ri Dios y ri ruchꞌacat ri Jesucristo ri cachiꞌel Alaj Oveja.
\v 2 Pa runicꞌajal cꞌa ri nima-bey richin ri tinamit, chiriꞌ ncꞌo-vi ri rakün-yaꞌ ri nyoꞌon cꞌaslen. Y chi caꞌiꞌ ruchiꞌ ri rakün-yaꞌ nyeqꞌuiy cꞌa ri cheꞌ ri nyeyoꞌon chukaꞌ cꞌaslen, y doce cꞌa mul nquiyaꞌ quivüch pa jun junaꞌ. Ri cheꞌ cꞌa ri nyeqꞌuiy chuchiꞌ ri rakün-yaꞌ, icꞌ-icꞌ nquiyaꞌ quivüch. Y ri quixak ri cheꞌ riꞌ, nyecꞌatzin cheque ri ye petenük ronojel ruchꞌulef richin nyerokꞌomaj.
\v 3 Y chiriꞌ man jun chic ri ncꞌatzinej que napon ta chuvüch ri castigo, roma man jun chic mac. Chiriꞌ cꞌa cꞌo-vi ri lokꞌolüj ruchꞌacat ri Dios y ri Jesucristo ri cachiꞌel Alaj Oveja. Y conojel cꞌa ri yecꞌo chiriꞌ, jariꞌ ri nyesamajin richin.
\v 4 Y chiriꞌ, nquitzetaꞌ cꞌa quiꞌ chiquivüch riqꞌuin. Y chukaꞌ nquicꞌuaj cꞌa ri rubiꞌ pa nicꞌaj-quivüch.
\v 5 Chiriꞌ chupan ri tinamit riꞌ, man jun bey cꞌa nkꞌekumür ta richin ncokꞌa-ka. Y conojel cꞌa ri yecꞌo chupan ri tinamit riꞌ, man jun cꞌa ncꞌatzin-vi ri rusakil jun kꞌakꞌ o rusakil ta ri kꞌij cheque. Man jun. Roma ja ri Dios ri Ajaf ri nsakrisan quichin. Y conojel reꞌ, jareꞌ ri nquibün mandar richin chi jumul.
\s Ri ruqꞌuisbül tak tzij
\p
\v 6 Y ri ángel ri ucꞌuayon cꞌa vichin xbij chuve: Tayaꞌ avánima riqꞌuin ri tzij reꞌ. Reꞌ tzij richin ri ketzij. Roma jacꞌa ri Ajaf Dios ri xyoꞌon tzij pa tak cánima ri ye kꞌalajrisüy ri rutzij, ja rijaꞌ chukaꞌ ri takayon richin ri ru-ángel richin que nuyaꞌ rutzijol cheque ri ye rusamajelaꞌ pariꞌ ri nyebanatüj yan.
\p
\v 7 Y ri Jesucristo xchꞌo cꞌa y xbij: Nquinapon yan cꞌa ka iviqꞌuin.
\p Jabel cꞌa quiquicot pa quicꞌaslen ri achique ri nyetaken richin ri ye tzꞌiban chupan ri vuj reꞌ.
\p
\v 8 Y yin Juan, xinvacꞌaxaj y xintzꞌet cꞌa chukaꞌ ronojel reꞌ. Y ja tok ye vacꞌaxan y ye nutzꞌeton chic ka, jariꞌ tok xinxuqueꞌ chuvüch ri ángel ri xcꞌutun ronojel reꞌ chinuvüch. Xinxuqueꞌ cꞌa chuvüch richin ninyaꞌ rukꞌij.
\v 9 Pero ri ángel reꞌ xbij chuve: Man tayaꞌ cꞌa nukꞌij yin. Yin xa jun chukaꞌ rusamajel ri Dios, junan aviqꞌuin rat y quiqꞌuin ri chꞌaka chic kꞌalajrisüy richin ri nbix cheque roma ri Dios, y chukaꞌ quiqꞌuin ri nyetaken ri tzij ri ye tzꞌiban chupan ri vuj reꞌ. Ja ri Dios tayaꞌ rukꞌij, xbij.
\p
\v 10 Y ri ángel reꞌ xbij cꞌa chukaꞌ chuve: Ri rutzij ri Dios tzꞌiban chupan ri jun vuj reꞌ, man tavevaj cꞌa. Takꞌalajrisaj. Roma ri kꞌij richin que nbanatüj ri nbij, xa nakaj chic cꞌo-vi.
\v 11 Romariꞌ ri man choj tüj rucꞌaslen, tubanaꞌ na cꞌa ri nrajoꞌ. Y ri ucꞌuayon jun tzꞌilolüj cꞌaslen, tubanaꞌ na cꞌa ri nrayij. Jacꞌa ri choj quicꞌaslen, man tiquijül rubanic. Y ri chꞌajchꞌoj quicꞌaslen, quiriꞌ cꞌa tiquibana-apu. Tiquiyaꞌ cꞌa cánima chi jumul.
\p
\v 12 Y ri Jesucristo xchꞌo cꞌa y xbij: Ketzij vi que nka-pe yan ri kꞌij que nquinapon. Y cꞌo cꞌa rajil ruqꞌuexel nincꞌuaj cheque chiquijujunal. Y achique cꞌa rubanic ri quibanun, quiriꞌ cꞌa chukaꞌ ri rajil ruqꞌuexel nquicꞌul.
\v 13 Y ja yin ri nabey y ja yin chukaꞌ ri ruqꞌuisbül. Ja yin ri xintzꞌucuban-pe ronojel y ja yin chukaꞌ ri nquiqꞌuison na pa quiviꞌ. Yin cachiꞌel vi cꞌa ri nabey y ruqꞌuisbül letras.
\p
\v 14 Jabel cꞌa quiquicot ri nchꞌajchꞌojrisüs quicꞌaslen, roma ri ye quiriꞌ, cꞌo cꞌa quikꞌaꞌ chin ri ruvüch ri cheꞌ ri nyoꞌon cꞌaslen, y nyetiquer chukaꞌ nyeꞌoc pa tak puertas richin que nyeꞌoc chupan ri cꞌacꞌaꞌ tinamit.
\v 15 Jacꞌa ri itzel quicꞌaslen, man nyetiquer tüj nyeꞌoc-apu chupan ri tinamit. Y quiriꞌ chukaꞌ nban cheque ri aj-itzaꞌ, ri achiꞌaꞌ y ri ixokiꞌ ri nquicanola-quiꞌ richin nyemacun, ri camsanelaꞌ, ri nyeyoꞌon quikꞌij dios (tiox) ri xa man ye Dios tüj, y ri nkaꞌ chiquivüch nquitzꞌuc tzij. Man nyeꞌoc tüj vi pa cꞌacꞌaꞌ tinamit.
\p
\v 16 Y yin ri Jesús nutakon cꞌa e ri nu-ángel richin que nukꞌalajrisaj can ronojel reꞌ chiquivüch ri molaj ri ye takeyon vichin ronojel lugar. Y ja yin ri ruxquin-rumam can ri rey David. Y ja chukaꞌ yin ri Jun ri cachiꞌel nima-chꞌumil ri niyuqꞌuin cumaj yan.
\p
\v 17 Y ri Lokꞌolüj Espíritu y ri xtün cꞌulan riqꞌuin ri Jesucristo, nquibij cꞌa: Quixampe.
\p Y ri nyeꞌacꞌaxan, tiquibij chukaꞌ: Quixampe.
\p Y ri nchakiꞌj ruchiꞌ y nrajoꞌ cꞌa npuꞌu, tipuꞌu cꞌa y tukumuꞌ ri Yaꞌ ri richin cꞌaslen. Y ri Yaꞌ reꞌ span.
\p
\v 18 Y ninbij cꞌa cheque conojel ri nyeꞌacꞌaxan ri nukꞌalajrisaj ri Dios chupan ri jun vuj reꞌ, que si cꞌo cꞌa jun ri nuya-e ruviꞌ, quiriꞌ chukaꞌ nban chin ri castigo ri nuyaꞌ ri Dios pariꞌ ri nbanun quiriꞌ, ri castigos ri ye tzꞌiban chupan ri jun vuj reꞌ.
\v 19 Y si cꞌo chic cꞌa jun ri xa nrelesaj ruchukꞌaꞌ y nujül rubanic ri nukꞌalajrisaj ri Dios chupan ri jun vuj reꞌ, ri Dios nbün que man nucꞌul tüj ri utzilüj rusipanic ri ncꞌul coma ri vinük ri tzꞌiban quibiꞌ chupan ri vuj richin cꞌaslen, y man nuyaꞌ tüj kꞌij chukaꞌ chin richin ntoc-apu chupan ri lokꞌolüj tinamit. Man nrichinaj tüj cꞌa ri utz ri nbij chupan ri vuj reꞌ.
\p
\v 20 Y ri nkꞌalajrisan cꞌa ronojel reꞌ, nbij cꞌa chukaꞌ: Jaꞌ, ketzij vi que nquinapon yan, nbij.
\p Y yin Juan ninbij: Quiriꞌ ta cꞌa. Catampe yan cꞌa, Ajaf Jesús.
\p
\v 21 Y ri Ajaf Jesucristo nuyaꞌ ta cꞌa ri utzilüj sipanic ri nspaj-pe rijaꞌ pan iviꞌ chiꞌivonojel ri nyixtaken richin. Quiriꞌ cꞌa.