\id JHN 44JHNcoeNTu.SFM John Koreguaje-Colombia-SA
\h SAN JUAN
\toc1 San Juan Jesús cheja paiʉ choosiere kʉamʉ
\toc3 (Jn)
\mt San Juan Jesús cheja paiʉ choosiere kʉamʉ
\c 1
\s Dios paiche kʉakʉji Jesucristo cʉnaʉmʉpi cajemʉ
\p
\v 1 Chutaa cʉnaʉmʉname cheja choomarʉmʉ Jesucristo Dios paiche kʉajaʉ paniasomʉ. Dioname paniasomʉ repaʉ. Dioamʉ repaʉ.
\v 2 Reparʉmʉ Dioname paniasomʉ repaʉ.
\v 3 Diopi repaʉji jame chooakʉ chini chʉ̃ʉʉna peore chooasomʉ repaʉ ũcuaʉname. Repaʉji jame choomaneru peoraamʉ jãa.
\v 4 Repaʉ Jesucristo mai rekoñoã paiche reojachere ĩsikʉmʉ. Jãajekʉna Miañejañe Paikʉji rani mai rekoñoã Dios paiche masireoche chookaiʉna Repaʉ paichete masijʉ reojache paireomʉ maire.
\v 5 Repaʉ Miañejañe Paikʉ icheja mai paicheja chijachejajache cuache paina paichejana rani reojache choosikʉamʉ. Jãajañe paikʉni pãi repaʉni cuhejʉ repaʉ reojache chooche ʉ̃señu chiime. Jãatani ʉ̃secuamʉ.
\p
\v 6 Pãiʉte chẽa raoasomʉ Dios. Repaʉ mamiame Juan.
\v 7 Miañejañe Paikʉ Jesucristo paichete kʉaakʉ chini chẽa raoasomʉ Dios repaʉte, pãipi ũcuanʉko repaʉ kʉachete asa chẽa Jesucristoni cuasaajʉ chini.
\v 8 Miañejañe Paikʉmamʉ Juan. Repaʉ Miañejañe Paikʉ paichete kʉakaaʉ chini raocojñosikʉasomʉ repaʉ Juan.
\v 9 Naa paisirʉmʉna Miañejañe Paikʉ raniasomʉ, pãipi Dios paichete masijʉ reojache paimasiajʉ chini.
\p
\v 10 Repaʉ Jesucristo chejare pãiname paisikʉamʉ. Diopi chʉ̃ʉʉna peore chookʉtetani repaʉ paiche vesʉsinaame repana.
\v 11 Repaʉ choosichejana raisikʉretani repaʉ majapãi Israelpãi pojomanesinaame repaʉte.
\v 12 Chekʉnare repaʉte cuasajʉ pojonaretani, “Dios chĩiame ina”, chiniasomʉ repaʉ.
\v 13 Repaʉte cuasana paichete maipi ijache cuasato cuamʉ: “Pãi ũcuanʉko Dios chĩichiaame”, chini cuasato cuamʉ. Ũcuachia, “Ʉmʉʉname romiochia chiijʉ chĩivanare paa Dios chĩiame ina”, chini cuasato cuamʉ. Ũcuachia, “Pãiʉ chĩi paaneekʉ chĩivanare paa Dios chĩiame ina”, chini cuasato cuamʉ. Peore jãajañe cuasache cuamʉ. Jãatani, “Repanapi Dioni cuasajʉna Repaʉji chẽa paatotani Repaʉ chĩiame jãana”, chini cuasato reomʉ. Jãajañetani ũcuarepaame.
\p
\v 14 Jesús Dios paiche Kʉajaʉ pãioji jñaaona maijaiʉ pãiʉ ainee jmamakarʉ mainame paisikʉamʉ repaʉ. Pãire oiʉ reojache chookaisikʉamʉ repaʉ. Ũcuachia Dios paiche ũcuarepare kʉasikʉamʉ. Pʉkakʉpi, repaʉte ũcuateeʉte rʉa Masiʉte jokaʉna rʉa Masiʉ paiʉna ñasinaame chʉkʉna.
\v 15 Repaʉ Juan Pãi Okorovesikʉ Jesure ña ʉjachʉopi ijache ikaasomʉ:
\p “Aperʉmʉ ikʉ paijache ijache kʉasikʉamʉ chʉʉ: ‘Pãiʉ, choje Raijaʉ chʉʉre naa rʉa masiʉmʉ, chʉʉ chutaa peorʉmʉ paikʉjekʉ’, chiisikʉamʉ chʉʉ”, chiniasomʉ repaʉ Juan Pãi Okorovesikʉ.
\p
\v 16 Repaʉ Jesús maire rʉa oikʉjekʉ siarʉmʉ rʉa reojache chookaiʉ paimʉ.
\v 17 Dios Repaʉ chʉ̃ʉñete tocha jokaakʉ chini Moiseni chʉ̃ʉasomʉ. Jesucristotetani pãire oiʉ reojache chookaiʉ Repaʉ paichete ũcuarepare kʉaakʉ chini chʉ̃ʉ raoasomʉ Repaʉ Dios.
\v 18 Diore ñomakʉjekʉna ñamanaame pãi. Mamakʉtani ũcuateeʉji Pʉkakʉre siarʉmʉ kueñe jame paikʉji Pʉkakʉ paiche kʉasikʉamʉ maire.
\s Juan Pãi Okorovekʉ Jesucristo paichete kʉamʉ
\r (Mt 3.11-12; Mr 1.7-8; Lc 3.15-17)
\p
\v 19 Ũcuarʉmʉ Jerusalén vʉejoopo cana judíopãi chʉ̃ʉna Juan paichejana sani, “¿Keejaiʉʉ mʉʉ?”, chiapʉ chini phairipãiname Leví jojosinare Dios vʉe chooche chookainani saoasome.
\v 20 Saorena sani repaʉ paichete sẽejʉna rũhiñe kʉaasomʉ Juan repanare.
\p —‍Pãi ũcuanʉkore chʉ̃ʉakʉ chini Dios Raojamʉ chiisikʉmamʉ chʉʉ —‍chiniasomʉ repaʉ.
\p
\v 21 Chikʉna joe sẽniasome repana.
\p —‍Jãa paito, ¿keejaiʉʉ mʉʉ? ¿Aperʉmʉ paisikʉ, Elíaaʉ? ¿Dios chʉo kʉakʉʉ? —‍chiniasome repana.
\p Chitena ikaasomʉ repaʉ.
\p —‍Elíamamʉ chʉʉ —‍chiniasomʉ repaʉ.
\p Chikʉna joe sẽniasome repana.
\p —‍Jãa paito, ¿chʉkʉna chaacojñokʉʉ mʉʉ? ¿Dios chʉo kʉakaijaʉaʉ? —‍chiniasome repana.
\p Chitena ikaasomʉ repaʉ.
\p —‍Mʉsanʉkona chaacojñokʉmamʉ chʉʉ —‍chiniasomʉ repaʉ.
\p
\v 22 Chikʉna joe ikaasome repana.
\p —‍Jãa paito, ¿keejaiʉʉ mʉʉ? Kʉajʉ̃ʉ chʉkʉnate. Mʉʉ kʉasiere chʉkʉnate raosinare sa kʉache paimʉ. Mʉʉ chooche, ¿ʉ̃queache? —‍chiniasome repana repaʉte.
\p
\v 23 Chitena ikaasomʉ repaʉ.
\p —‍Pãi peochejare rani paiʉ pãipi raito ʉjachʉopi ijache ikakʉ chʉvamʉ chʉʉ: “Maire Paakʉni chaajʉ mʉsanʉkona rekoñoã maa rũhiñe paimaa carevachejache, reojarekoñoã carevajʉ paijʉ̃ʉ.” “Jãajañe ikajamʉ repaʉ”, chiiʉ aperʉmʉ Isaías, Dios chʉo kʉasikʉ tocha jokaasomʉ, chʉʉ ikajachere kʉara chini —‍chiniasomʉ repaʉ Juan.
\p
\v 24-25 Ũcuarʉmʉ Juanre sẽniasaajʉ chini fariseopãi saosina repaʉte joe ikaasome.
\p —‍“Pãi ũcuanʉkore chʉ̃ʉakʉ chini Dios Raojamʉ chiisikʉmamʉ chʉʉ. Elíamamʉ chʉʉ. Dios chʉo kʉakaikʉmamʉ chʉʉ. Mʉsanʉkona chaacojñokʉmamʉ chʉʉ”, chiikʉtani, ¿jese paiʉna pãi okorovekʉ mʉʉ? —‍chiniasome repana.
\p
\v 26 Chitena ikaasomʉ repaʉ.
\p —‍Pãi okorovekʉmʉ chʉʉ. Chekʉ mʉsanʉkonani jame paimʉ. Jãatani repaʉte pojomame mʉsanʉkona.
\v 27 “Chʉʉre choje raijamʉ”, chiisikʉre mʉsanʉkonare jame paikʉte naa rʉa masikʉjekʉna repaʉte cuasa, vajʉchʉkʉ paimʉ chʉʉ —‍chiniasomʉ repaʉ Juan Pãi Okorovekʉ.
\p
\v 28 Jordán chiacha chekʉkãko ʉ̃sʉʉ mʉikãko cacheja Betania chejana Juan Pãi Okorovekʉ paichejana jãajañe chooasome repana.
\s Jesús pãi ũcuanʉko cuache choochete roikasa chini chuenisõjamʉ
\p
\v 29 Joe apeñatato Jesupi repaʉ paichejana saiʉna ña ikaasomʉ Juan.
\p —‍Ñajʉ̃ʉ jãʉre Dios Raosikʉre. Pãi ũcuanʉko cuache choochete roikasa chini chuenisõjamʉ repaʉ.
\v 30 Aperʉmʉ repaʉ paijache ijache kʉasikʉamʉ chʉʉ: “Chʉʉ choje Raijaʉtani chʉʉ chutaa peorʉmʉ paikʉjekʉ chʉʉre naa rʉa masikʉmʉ”, chiisikʉamʉ chʉʉ.
\v 31 Aperʉmʉna repaʉ paiche vesʉkʉtani rani pãire okorovemʉ chʉʉ, Israelpãipi ũcuanʉko repaʉ paichete masiajʉ chini —‍chiniasomʉ repaʉ Juan.
\p
\v 32 Ũcuarʉmʉ Juan ijache kʉaasomʉ:
\p —‍Dios Rekocho ũkupojaiʉ cʉnaʉmʉpi ñoʉ caje ikʉni canʉkaʉna ñasikʉamʉ chʉʉ.
\v 33 Jãajañe repaʉ paiche chutaa ñamarʉmʉ vesʉsikʉamʉ chʉʉ. Chʉʉpi pãire okoroveakʉ chini chʉʉre Raosikʉ Dios aperʉmʉ ijache ikasikʉamʉ chʉʉre: “Naa paisirʉmʉ chʉʉ Rekochoji caje pãiʉni canʉkache ñajamʉ mʉʉ. Ũcuarekochote pãire ĩsijamʉ repaʉ, repaʉte cuasanani jame paaʉ chini”, chiisikʉamʉ Dios chʉʉre.
\v 34 Dios kʉasie Repaʉ Rekocho cajeche ñasikʉamʉ chʉʉ. Ñasikʉjekʉ, “Dios Mamakʉmʉ ikʉ”, chiiʉ kʉamʉ chʉʉ —‍chiniasomʉ repaʉ Juan.
\s Jesús chareparo jñaasinani kʉamʉ
\p
\v 35-36 Joe chekʉumucuse Juan repaʉ neena teekachapananame ũcuachejare paniasome. Jesupi ũcuachejapi caraiʉna ña ikaasomʉ repaʉ.
\p —‍Ñajʉ̃ʉ jãʉre, Dios Raosikʉre. Pãi ũcuanʉko repana cuache choochete roikasa chini chuenisõjamʉ jãʉ —‍chiniasomʉ repaʉ.
\p
\v 37 Chikʉna asa repaʉ neena teekachapana Jesure tuhaasome.
\v 38 Tuhajʉna Jesús chʉri ña ikaasomʉ repanare.
\p —‍¿Ʉ̃que tuhache mʉsanʉkona chʉʉre? —‍chiniasomʉ repaʉ.
\p Chikʉna ikaasome repana.
\p —‍Masiʉ, ¿keecheja cavʉere paiʉ kuikʉ mʉʉ? —‍chiniasome repana.
\p
\v 39 Chitena Jesús ikaasomʉ.
\p —‍Raijʉ̃ʉ. Sani ñañu —‍chiniasomʉ repaʉ. (Reparʉmʉ naito chekʉrʉmʉ cuatro paicosomʉ.)
\p Chikʉna repaʉ paivʉe tuha ña ũcuavʉere paijʉ naiasome repana.
\p
\v 40 Repana teekachapana Juanpi ikaʉna asa tuhasina teeʉ Andreamʉ, Simón Pedro chojeʉ.
\p
\v 41 Ũcuarʉmʉ Andrés nami sani repaʉ majaachʉni Simonre kue jñaa ikaasomʉ.
\p —‍Cristote tijñasinaame chʉkʉna —‍chiniasomʉ repaʉ. (“Cristo” chini “Pãi ũcuanʉkore chʉ̃ʉakʉ chini Dios Raosikʉamʉ” chiimʉ griego chʉo.)
\p
\v 42 Ika pini majaachʉre Simonre Jesús paichejana saasomʉ repaʉ. Saʉna ña Jesús repaʉte Simonre ijache ikaasomʉ:
\p —‍Mʉʉ mamiame Simón. Juan mamakʉmʉ mʉʉ. Joe chekere mami veojamʉ chʉʉ mʉʉre Cefate —‍chiniasomʉ repaʉ Jesús. (“Cefas” chini “Pedro” chiimʉ griego chʉo.)
\s Felipename Natanaelre soimʉ Jesús
\p
\v 43 Joe apeñatato repaʉ Jesús Galilea chejana sasa chiniasomʉ. Chutaa saimañe paiʉ Felipete tijña ikaasomʉ.
\p —‍Chʉʉni jame kuiʉ chʉʉ chʉ̃ʉñete chookʉ paijʉ̃ʉ —‍chiniasomʉ.
\p
\v 44 Repaʉ Felipe Betsaida vʉejoopo cakʉasomʉ. Andrename Pedro ũcuachia ũcuateejoopo canaasome.
\v 45 Ũcuarʉmʉ Felipe Natanaelre kue jñaa ikaasomʉ.
\p —‍Dios Raojamʉ chiisikʉni tijñacuhasinaame chʉkʉna. Moisés aperʉmʉ Dios chʉ̃ʉsie tocha jokasiphʉro repaʉ paijachere kʉamʉ, Dios chʉo kʉasina ũcuachia. Churatani ũcuarepaʉni ñame mai. Jesuamʉ repaʉ. Nazaret vʉejoopo cakʉamʉ. José mamakʉasomʉ —‍chiniasomʉ repaʉ.
\p
\v 46 Chikʉna Natanael ikaasomʉ.
\p —‍Nazaret vʉejoopo cana teeʉjẽe reokʉjẽe peocosome —‍chiniasomʉ.
\p Chikʉna Felipe ikaasomʉ.
\p —‍Rani ña masijʉ̃ʉ repaʉte —‍chiniasomʉ repaʉ.
\p
\v 47 “Jaʉ”, chini Jesús paichejana Natanaelpi tĩakʉna ña ikaasomʉ Jesús.
\p —‍Ñajʉ̃ʉ. Israelrepaʉji jmamakarʉjẽe joremakʉpi raimʉ jãʉ —‍chiniasomʉ repaʉ.
\p
\v 48 Chikʉna Natanael ijache sẽniasaasomʉ repaʉte:
\p —‍¿Jese paiʉna chʉʉ paiche masikʉ mʉʉ? —‍chiniasomʉ.
\p Chikʉna Jesús ikaasomʉ.
\p —‍Felipe mʉʉre chutaa soimarʉmʉ higoñʉ vʉevʉ paikʉni ñasikʉamʉ chʉʉ mʉʉre —‍chiniasomʉ repaʉ.
\p
\v 49 Chikʉna Natanael ikaasomʉ repaʉte.
\p —‍Masiʉ, Dios Mamakʉmʉ mʉʉ. Israelpãi chʉ̃ʉkʉmʉ —‍chiniasomʉ repaʉ.
\p
\v 50 Chikʉna Jesús ikaasomʉ repaʉte.
\p —‍Chʉʉpi repacheja paimanesikʉpi mʉʉni, “Higoñʉ vʉevʉ paikʉni ñasikʉamʉ chʉʉ mʉʉre”, chikʉna asa, “Dios Mamakʉmʉ mʉʉ”, chini cuasamʉ mʉʉ chʉʉre. Jãajekʉna chʉʉpi chekere naa vesachete chookʉna ñajamʉ mʉʉ —‍chiniasomʉ repaʉ.
\p
\v 51 Chini joe ikaasomʉ Jesús.
\p —‍Chʉʉre pãire jame paaʉ chini Dios Raosikʉre cʉnaʉmʉpi vataʉna chʉʉ nʉkachejana ángeles Diore jame painapi mʉni caje joe mʉni cajejʉ choonani ñajanaame mʉsanʉkona. Ũcuarepaame jãa —‍chiniasomʉ Jesús repanare.
\c 2
\s Galilea cheja Caná vʉejoopo cakʉ romiote vejarʉmʉ choosiere kʉamʉ
\p
\v 1 Kachaumucujña paisirʉmʉna Galilea cheja cajoopo Caná vʉejoopona pãiʉji romioni vejakʉna fiesta choosinaame pãi. Jesús pʉkako repanare jame paisikoamo.
\v 2 Sotena chʉkʉna Jesús neena repaʉname saisinaame.
\v 3 Fiesta choorʉmʉna pĩsi ʉche conopi siasõʉna Jesús pʉkako repaʉte ijache ikasikoamo:
\p —‍Pĩsi ʉche cono siasõmʉ —‍chiisikoamo repao.
\p
\v 4 Chikona Jesús ikasikʉamʉ.
\p —‍Jako, ¿jese paiʉna chʉʉni kʉako mʉʉ? Chʉʉ masiche choo ñorʉmʉ chutaa tĩamamʉ —‍chiisikʉamʉ repaʉ.
\p
\v 5 Chikʉna pĩsi ʉche cono ũkuanare ikasikoamo repao.
\p —‍Chʉʉ neekʉ chʉ̃ʉñe peore choojʉ̃ʉ —‍chiisikoamo repao.
\p
\v 6 Repana nʉkacheja kueñere churupʉã catapi choosipʉã seirepapʉã paisikʉamʉ. (Judíopãi cua tʉnorʉmʉ ũcuapʉãqueepi oko jʉ̃jña masi choasinaame. Teepʉ cincuenta litros chekʉrʉmʉ setenta litrojatʉka oko rove paaasome repana.) \fig water changed to wine|CN01667B.TIF|span||D.C.Cook| |Jn 2.6\fig*
\v 7 Reparʉmʉ Jesús pĩsi ʉche cono ũkuanare ijache ikasikʉamʉ:
\p —‍Ipʉã oko rove timujʉ̃ʉ —‍chiisikʉamʉ repaʉ. Chikʉna repapʉã oko rove timusinaame repana.
\v 8 Reparʉmʉ Jesús repanare joe ikasikʉamʉ.
\p —‍Chura jmarakarʉ ea sa fiesta chʉ̃ʉkʉni ũkuajʉ̃ʉ —‍chiisikʉamʉ repaʉ repanare.
\p Chikʉna repaʉ chʉ̃ʉsie choosinaame repana.
\v 9-10 Sa ĩsirena fiesta chʉ̃ʉkʉji charo ũku ñasikʉamʉ okopi pĩsi ʉche cono carũhisie. Jãatani repaʉ repana ea rasicheja vesʉsikʉamʉ. Repaʉte chooche chookainatani masisinaame easinajejʉ. Ũku pini fiesta chʉ̃ʉkʉ romi vejasikʉre soni ikasikʉamʉ.
\p —‍Pãi chekʉna fiesta chooni pĩsi ʉche cono naa rʉa reojachere charo ũkuanaame. Repana soicojñosina rʉa ũkusirʉmʉna pĩsi ʉche cono naa jmamakarʉ reojachere ũkuame. Mʉʉtani chojepi pĩsi ʉche cono rʉa reojachere ũkuamʉ mʉʉ soisinare —‍chiisikʉamʉ repaʉ.
\p
\v 11 Charo Galilea cheja cajoopo Caná vʉejoopona Diochia choomasichete choosikʉamʉ Jesús, repaʉ aperʉmʉ choomanesie. Repaʉ masichete pãire choo ñoʉna chʉkʉna repaʉ neena naa rʉa cuasasinaame repaʉte.
\p
\v 12 Jãa choo pinisirʉmʉ Capernaum vʉejoopona saisikʉamʉ repaʉ Jesús, pʉkakoname chojechĩiname chʉkʉna repaʉ neena. Sani tĩa jmamakarʉ paisinaame chʉkʉna.
\s Dios vʉena kaka põse ĩsinare Jesús eto saosiere kʉamʉ
\r (Mt 21.12-13; Mr 11.15-18; Lc 19.45-46)
\p
\v 13 Pascua, judíopãi fiestarʉmʉ tĩapirakʉna Jesús Jerusalén vʉejoopona maisikʉamʉ.
\v 14 Mani Dios vʉe kaka ñato pãi jochavanare vacaname ovejaname ũkupovanare ĩsijʉ paisinaame. Ũcuachia chekʉna soña raisinani kuri tĩikurire sañekaijʉ ñuisinaame naa rʉa jñaañu chini.
\v 15 Jãajañe choojʉna ña Jesús pĩsipi ʉjame vãto pini peochejñana suĩsuekʉ etosikʉamʉ repanare pãiname ovejaname vaca. Ũcuachia kuri sañena nee kurirere kʉni tojñosõ mesakoña sia pone ũhasikʉamʉ repaʉ.
\v 16 Jãajañe choo pini ũkupovanare ĩsinare ijache ikasikʉamʉ repaʉ:
\p —‍Mʉsanʉkona neemajñarʉã etuajʉ̃ʉ. Põse ĩsivʉe choochejache choomanejʉ̃ʉ chʉʉ Jakʉ vʉe —‍chiisikʉamʉ repaʉ.
\p
\v 17 Jãajañe ikaʉna asa chʉkʉna repaʉ neena Dios chʉo tocha jokasiere cuasasinaame. Ijache kʉamʉ repa:
\q Mʉʉ vʉe kuiraneekʉjekʉna cuache tijñejamʉ chʉʉre,
\m chiimʉ repa tocha jokasie.
\p
\v 18 Ũcuarʉmʉ Jesús choosiere ña judíopãi chʉ̃ʉna ijache sẽesinaame repaʉte:
\p —‍¿Neepi chʉ̃ʉ raorena Dios vʉe paisinare etoʉ mʉʉ? Dios Raosikʉ pani Diochia choomasichete choo ñojʉ̃ʉ chʉkʉnate —‍chiisinaame repana repaʉte.
\p
\v 19 Chitena Jesús ikasikʉamʉ.
\p —‍Ivʉere mʉsanʉkonapi ñañosõru choteumucujña joe choo pinijamʉ chʉʉ —‍chiisikʉamʉ repaʉ.
\p
\v 20 Chikʉna judíopãi ikasinaame repaʉte.
\p —‍Cuarenta y seirepaʉ̃sʉrʉmʉ choojʉ paniasome pãi ivʉe piniñetʉka. Jãarepakeerʉmʉ choosivʉe, ¿jese chookʉ choteumucujñachia choojaʉ mʉʉ? —‍chiisinaame repana repaʉte.
\p
\v 21 Jãatani Dios vʉe choochete ikamanesikʉamʉ Jesús. Repaʉ canivʉte ikasikʉamʉ repaʉ.
\v 22 Naa paisirʉmʉ repaʉ Jesús jũni vajʉraisirʉmʉ repaʉ ikasiere joe cuasasinaame chʉkʉna repaʉ neena. Cuasajʉ, “Dios chʉo tocha jokasiename Jesús ikasie ũcuarepaame”, chiisinaame chʉkʉna.
\s Pãi ũcuanʉko cuasache masimʉ Jesús
\p
\v 23 Pascuarʉmʉjekʉna Jesús Jerusalén vʉejoopote paiʉ Diochia choomasichete choo ñokʉna ña pãi jainʉko cuasaasome repaʉte, “Dios Raosikʉamʉ ikʉ”, chini.
\v 24 Jãatani pãi ũcuanʉko cuasache masikʉjekʉ sẽsevʉchia cuasana ikache jachaasomʉ repaʉ.
\v 25 Pãi cuasache kʉanare kuemakʉamʉ repaʉ, pãi ũcuanʉko cuasache masikʉjekʉ.
\c 3
\s Jesuname Nicodemo cutucheme
\p
\v 1 Reparʉmʉ Nicodemo paniasomʉ fariseopãiʉ. Judíopãi
teenare chʉ̃ʉkʉ paniasomʉ repaʉ.
\v 2 Jesuni ñara chini ñamipi mʉa ikaasomʉ repaʉ Nicodemo.
\p —‍Masiʉ, Diopi mʉʉre raocosomʉ pãire chechoakʉ chini.
Diopi mʉʉre chookaimato Repaʉchia choomasiche choomaneraamʉ
mʉʉ. Masime chʉkʉna jãa —‍chiniasomʉ repaʉ.
\p
\v 3 Chikʉna Jesús ikaasomʉ.
\p —‍Pãipi chĩivaʉ jñaacojñoñejañe joe mama
jñaacojñomaneni Dios neena paicuamʉ repanare. Ũcuarepaame
jãa —‍chiniasomʉ repaʉ.
\p
\v 4 Chikʉna Nicodemo ikaasomʉ repaʉte.
\p —‍Pãiʉ ai, ¿jese joe mama jñaacojñojaʉ? Pʉkako cʉtaro
kaka joe mama etacuamʉ maire ainare —‍chiniasomʉ.
\p
\v 5 Chikʉna Jesús ikaasomʉ.
\p —‍Pãi ũcuanʉkore romipi jñaame. Jãatani Dios Rekochoji
pãi rekoñoãre carevakaimato Repaʉ neena paicuamʉ repanare.
Ũcuarepaame jãa.
\v 6 Pãi romi jñaasinajejʉ pãiame mai. Dios Rekochoji pãi
rekoñoã carevacojñosina Repaʉ Rekochoji repanani jame paiʉna
paiche reojachere mama paime repana.
\v 7 Chʉʉ mʉsanʉkonare, “Chĩivaʉ jñaacojñoñejañe joe
mama jñaacojñojʉ̃ʉ”, chiisie asa tĩiñe cuasamanejʉ̃ʉ.
\v 8 Mʉsanʉkona tutache asanatani tutu raichejajẽe vesʉjʉ
tutu saichejajẽe vesʉme. Ũcuajache Dios Rekocho chooche
vesʉme pãi. Pãi rekoñoã carevakani jame paimʉ Reparekocho,
reojache paapʉ chini —‍chiniasomʉ repaʉ.
\p
\v 9 Chikʉna Nicodemo ikaasomʉ.
\p —‍Mʉʉ ikache asavesʉmʉ chʉʉ —‍chiniasomʉ repaʉ.
\p
\v 10 Chikʉna Jesús ikaasomʉ repaʉte.
\p —‍Mʉʉ judíopãi chechokʉtani, ¿jese paiʉna rʉa
masiʉtani chʉʉ ikache asavesʉkʉ?
\v 11 Mʉʉre chʉo ũcuarepare ijache ikamʉ chʉʉ: Chʉʉ
masichete ikakʉmʉ chʉʉ. Ũcuachia chʉʉ ñasiere
kʉakʉmʉ chʉʉ. Jãatani asa jachame mʉsanʉkona.
\v 12 Chʉʉre icheja cheja paiche kʉakʉtetani asa jachame
mʉsanʉkona. Jãajekʉna chʉʉpi Dios paichejaqueere kʉato
naa rʉa jachajanaame mʉsanʉkona.
\p
\v 13 ’Dios paicheja mʉni cajesinajẽe peome. Jãajekʉna
repacheja paiche masina peome. Pãire jame paaʉ chini Dios
Raosikʉjekʉ teeʉ masimʉ chʉʉ, ũcuacheja cajesikʉjekʉ.
Jãajekʉna repacheja paiche kʉamʉ chʉʉ.
\v 14 Ũcuachia iere kʉara: Aperʉmʉ Moisés repaʉ pãi peocheja
pairʉmʉ cʉnapi añajavaʉre choo vãsochona quẽo sʉo
nʉkochejache kurususẽverona jẽjo nʉkojanaame pãi chʉʉre
Dios Raosikʉre. Chʉʉre jãajañe vanisõjañe ʉ̃semanejamʉ
Dios,
\v 15 pãipi chʉʉre cuasanapi Repaʉ paichejare sani paapʉ
chini —‍chiniasomʉ repaʉ Jesús.
\s Pãi ũcuanʉkore oikʉmʉ Dios
\p
\v 16 Ũcuarʉmʉ Jesús repaʉte joe ijache ikaasomʉ:
\p —‍Dios pãi ũcuanʉkore rʉa oikʉjekʉ chʉʉre Repaʉ
Mamakʉte ũcuateeʉni chejana raosikʉamʉ, pãipi chʉʉni
cuasajʉ vati toa uumañe Repaʉ paichejare ai sani paapʉ chini.
\v 17 Pãire, “Mʉsanʉkona cuache choosie roijʉ̃ʉ”, chiaʉ
chini raomanesikʉamʉ Dios chʉʉre Repaʉ Mamakʉte. Pãire
vati toa uuchete ʉ̃seakʉ chini raosikʉamʉ Dios chʉʉre.
\p
\v 18 ’Pãi chʉʉre Dios Mamakʉte cuasana repana cuache
choosie roimanejanaame. Jãatani chʉʉre cuasamana repana
cuache choosie roijanaame, Dios Mamakʉte ũcuateeʉni
cuasamanajejʉ.
\v 19 Chʉʉ miañejañe reojache paikʉ pãipi Dios paiche
masiajʉ chini chejana raisikʉamʉ chʉʉ. Jãatani pãi
chijachejajache paichete cuare naa rʉa chiijʉ miañejañe
reojache paiche cuhejʉ cuasamame chʉʉre. Jãajekʉna
chʉʉre cuasamañe roi roijanaame repana.
\v 20 Cuache paina ũcuanʉko chʉʉre Miañejañe Paikʉte
raimame repana cuache choojʉ paichete kʉakʉ chini.
\v 21 Dios chʉo jachamanatani cuhemañe jovome chʉʉre
Miañejañe Paikʉte, reojache paijʉna pãipi ña, “Diopi
chookaiʉna Repaʉ chʉ̃ʉñe choonaame ina”, chiapʉ chini
—‍chiniasomʉ repaʉ.
\s Juan Pãi Okorovekʉ Jesús paichete joe ikamʉ
\p
\v 22 Ika pinisirʉmʉ chʉkʉna repaʉ neena Jesuname Judea
chejare sani jmamakarʉ paisinaame. Ũcuachejare paijʉ pãire
okorovesinaame chʉkʉna.
\v 23 Reparʉmʉ Juan Salim cheja kueñe cachejare Enón chejare
paiʉ pãire okore rovekʉ paniasomʉ, chĩichiañaã rʉa
paichejajekʉna. Pãi siarʉmʉ sani okorovecojñoasome
repaʉte.
\v 24 Jãajañe chookʉ paniasomʉ Juan pãi chẽavʉe repaʉte
chutaa cuaomarʉmʉ.
\p
\v 25 Reparʉmʉ Juan neenapi judíopãiʉni cua tʉnoñete cutujʉ
kereasome.
\v 26 Jãajañe choocuha repanare paakʉni Juanni ikañu chini
saniasome repana.
\p —‍Masiʉ, mʉʉ Jordán chiacha ʉ̃sʉʉ mʉikãko pairʉmʉ
mʉʉre jame paisikʉ, mʉʉ ña ikasikʉ Jesupi pãire
okorovekʉna pãi jainʉko jovojʉasome repaʉte —‍chiniasome
repana.
\p
\v 27 Chitena Juan ikaasomʉ.
\p —‍Pãi ũcuanʉko repana choomasiche Dios jokasieame.
Jokamato choovesʉraame repana.
\v 28 Ijache ikasikʉamʉ chʉʉ aperʉmʉ: “Dios chʉʉre
pãire ũcuanʉkore chʉ̃ʉakʉ chini raomanesikʉamʉ. Repaʉ
Raojaʉ raijachere kʉaakʉ chini raosikʉamʉ Dios chʉʉre”,
chiiche asasinaame mʉsanʉkona.
\v 29 Ijacheame: Pãiʉ romiote vejani paamʉ. Paakʉ repaoni
pojokʉ ikato repaʉte jame paikʉ repaʉ vejarʉmʉ
chookaisikʉpi kueñere nʉkakʉ asani rʉa pojosõmʉ.
Ũcuajache pãipi Jesuni cuhemañe asa jovojʉna rʉa pojosõmʉ
chʉʉ.
\v 30 Jesuni pãi naa jainʉko jovoajʉ chiimʉ chʉʉ.
Chʉʉretani naa teevana jovoajʉ chiimʉ chʉʉ —‍chiniasomʉ
repaʉ Juan Pãi Okorovekʉ.
\s Cʉnaʉmʉ cajesikʉ paichete kʉamʉ
\p
\v 31-32 Ũcuarʉmʉ Juan joe ikaasomʉ.
\p —‍Cʉnaʉmʉ cajesikʉ Dios Mamakʉ pãi ũcuanʉkore naa rʉa
masikʉmʉ. Pãi icheja cheja jñaacojñosinajejʉ cheja
paichechia masijʉ ikame. Cʉnaʉmʉ cajesikʉtani pãi
ũcuanʉkore naa rʉa masiʉjekʉ cʉnaʉmʉ repaʉ paiʉ
ñasiename asasie kʉamʉ. Jãatani pãi jainʉko jachame repaʉ
kʉache.
\v 33 Repaʉ kʉache jachamanatani, “Repaʉ paichete Dios
kʉasie ũcuarepaame”, chiijʉ cuasame.
\v 34 Repaʉ Jesús Dios Raosikʉjekʉ Dios chʉore kʉamʉ. Dios
Repaʉ Mamakʉte Jesure Repaʉ Rekochote ʉ̃semañe
ĩsisikʉamʉ, ũcuaʉni siarʉmʉ jame paiʉ peore reojache
chookaaʉ chini.
\v 35 Mai Jakʉ Dios Repaʉ Mamakʉte chiimʉ. Peore paakʉ
chʉ̃ʉakʉ chini ũcuaʉni jokaasomʉ Repaʉ.
\v 36 Dios Mamakʉte cuasana repana jũnisõsirʉmʉ Dios
paichejare ai sani paijanaame. Dios Mamakʉte cuasamanatani
Repaʉ paicheja saimañe Diopi chʉ̃ʉʉna siarʉmʉ uujʉ
paijanaame repana —‍chiniasomʉ Juan Pãi Okorovekʉ.
\c 4
\s Samaria cakoname Jesús cutusiere kʉamʉ
\p
\v 1-3 Ũcuarʉmʉ ijache cutuasome pãi: “Pãi jainʉko repaʉ
neena pañu chini Juanre jovo okorovecojñome. Jãatani Jesuni
naa jainʉko pãi jovo okorovecojñome, repaʉ neena pañu
chini”, chiniasome. Pãi okorovemanesikʉamʉ Jesús. Chʉkʉna
repaʉ neenatani pãi okorovesinaame. Ũcuarʉmʉ repaʉ Jesús,
“Pãipi rʉa cutujʉna asa fariseopãi chʉʉ chooche masime”,
chini Judea cheja paikʉji, “Galilea chejana coiñu”,
chiisikʉamʉ chʉkʉnate.
\p
\v 4 Samaria chejapi caraiche paisikʉamʉ chʉkʉnate.
\v 5 Saijʉ Samaria cheja cajoopo Sicar vʉejoopona tĩasinaame
chʉkʉna. Aperʉmʉ Jacob repaʉ mamakʉte Josere repajoopo kueñe
cachejare cheja jokaasomʉ.
\v 6 Ũcuachejare oko eacoje paimʉ, “Jacob ũhisicojeame”,
chiicojñocoje. Ũcuarʉmʉ Jesús kuiʉ canasõ repacoje
rʉtʉvana pʉʉsikʉamʉ. Nʉkarepaʉ paicosomʉ reparʉmʉ.
\v 7-8 Chʉkʉna repaʉ neena ãure kooñu chini vʉejoopona
saisinaame. Chʉkʉna saisirʉmʉ Samariapãio okore eara chini oko
eacojena rani tĩaona Jesús ijache ikaasomʉ repaote:
\p —‍Oko ũkuajʉ̃ʉ chʉʉre —‍chiniasomʉ repaʉ.
\p
\v 9 Chikʉna ikaasomo repao.
\p —‍¿Jese paiʉna mʉʉ chʉʉre Samariapãioni judíopãiʉji
okore sẽekʉ? Tĩiñe choomʉ mʉʉ —‍chiniasomo repao.
(Judíopãipi Samariapãire cutucuheme. Jãajekʉna repaʉ
ikachete asa jñano jãajañe ikaasomo repao.)
\p
\v 10 Chikona ikaasomʉ repaʉ.
\p —‍Dios ĩsira chiichename chʉʉ mʉʉre oko sẽesikʉ
paiche masini sẽeraamo mʉʉ chʉʉre. Sẽeto mʉʉ rekocho
ũku vajʉchete oko ũkuaraamʉ chʉʉ mʉʉre —‍chiniasomʉ
repaʉ.
\p
\v 11 Chikʉna ikaasomo repao.
\p —‍Rʉa rʉimʉ icoje. ¿Ʉ̃quepi eajaʉ mʉʉ? ¿Jeechejare chʉʉ
rekocho ũku vajʉche oko eajaʉ mʉʉ?
\v 12 Mai aipãiʉ Jacobpi jokaasomʉ icoje maire oko ũkureoche
paicoje. Repaʉname repaʉ mamachĩiname repaʉ jochavana
ũkuasome icoje paiche oko. ¿Icoje paiche oko naa rʉa
reojachere ũkuajaʉ mʉʉ chʉʉre? ¿Repaʉte naa rʉa
masikʉ mʉʉ? —‍chiniasomo repao.
\p
\v 13 Chikona ikaasomʉ repaʉ.
\p —‍Icoje paiche oko ũkusinare joe okoʉajamʉ repanare.
\v 14 Jãatani chʉʉ ũkuachete oko ũkunare joe okoʉamanejamʉ. Chʉʉ ũkuachete oko ũkuna oko puniʉ siamañe
oko raichejache repana rekoñoã siarʉmʉ reojache paijanaame
—‍chiniasomʉ repaʉ.
\p
\v 15 Chikʉna ikaasomo repao.
\p —‍Mʉʉ ikachete oko ũkuajʉ̃ʉ chʉʉre, joe chʉʉni
okoʉamaneakʉ, icoje rani joe oko eache peoakʉ chʉʉre
—‍chiniasomo repao.
\p
\v 16 Chikona ikaasomʉ repaʉ.
\p —‍Mʉʉ̃jʉre soijani ichejana rajʉ̃ʉ —‍chiniasomʉ repaʉ
repaote.
\p
\v 17-18 Chikʉna ikaasomo repao.
\p —‍Ʉmʉ peokomo chʉʉ —‍chiniasomo.
\p Chikona ikaasomʉ repaʉ.
\p —‍Cincorepanare ʉmʉpãi veja panicuhasikoamo mʉʉ. Chura
chekʉre mʉʉ̃jʉmakʉni paimo mʉʉ. Jãajekʉna, “Ʉmʉ
peokomo chʉʉ”, chini chʉo ũcuarepare ikasikoamo mʉʉ
—‍chiniasomʉ repaʉ.
\p
\v 19-20 Ikaʉna asa ikaasomo repao.
\p —‍Dios chʉo kʉakʉcosomʉ mʉʉ. Chʉkʉna aipãi paisina
ikũtina mʉni Dioni pojoñu chini rore ñuniasome. Mʉsanʉkona
judíopãitani ijache ikanaame: “Jerusalén vʉejoopona sani
Diore pojoche paimʉ maire”, chiinaame mʉsanʉkona —‍chiniasomo
repao.
\p
\v 21 Chikona ikaasomʉ repaʉ.
\p —‍Chʉʉ ikache jachamañe cuasajʉ̃ʉ mʉʉ. Naa
paisirʉmʉ pãi ũcuanʉko Pʉkakʉre Diore pojoñu chiina ikũti
mʉimanejanaame. Ũcuachia Jerusalén vʉejoopo saimanejanaame
repana.
\v 22 Mʉsanʉkona Samariapãi mʉsanʉkona pojokʉ paiche vesʉme.
Chʉkʉna judíopãitani chʉkʉna pojokʉ paiche masime, vati toa
uuche Ʉ̃sekaikʉji Dios Raosikʉpi judíopãiʉjekʉna.
\v 23 Pãi Dios chʉo jachamañe repana rekoñoã Repaʉte
masirepa pojorʉmʉ tĩajamʉ. Chura reparʉmʉ tĩacuhamʉ.
Jãajañe choojʉ paapʉ pãi chiimʉ Repaʉ Dios.
\v 24 Dios canivʉjẽe peokʉjekʉ ñomakʉamʉ. Pãipi Repaʉ
chʉore jachamañe rekoñoãpi Repaʉni masi cuasajʉ pojoajʉ
chiimʉ Dios —‍chiniasomʉ Jesús.
\p
\v 25 Chikʉna ikaasomo repao.
\p —‍Iere masikomo chʉʉ: Mesías, pãi ũcuanʉkore chʉ̃ʉakʉ
chini Dios Raojaʉ raijamʉ. Rani maire peore chechojamʉ
—‍chiniasomo repao. (“Mesías” chini “Cristo” chiimʉ griego
chʉo.)
\p
\v 26 Chikona ikaasomʉ repaʉ.
\p —‍Chʉʉ mʉʉre ikakʉ ũcuaʉmʉ —‍chiniasomʉ repaʉ
repaote.
\p
\v 27 Ũcuarʉmʉ chʉkʉna repaʉ neena tĩa Jesupi romioname
cutukʉna ña jñanosinaame. Jãatani, “¿Jese paiʉna ikore
ikakʉ mʉʉ? ¿Ʉ̃quere mʉsanʉkona cutuche?”, chiimanesinaame
chʉkʉna.
\v 28 Ũcuarʉmʉ repao oko eapʉ ũcuachejana joka vʉejoopona
sani pãire ijache ikaasomo:
\p
\v 29 —‍Chʉʉ paio choosie ñamanesikʉtani peore masikʉ
kʉasikʉre ñajañu. Dios Raosikʉcosomʉ repaʉ —‍chiniasomo
repao repanare.
\p
\v 30 Chikona asa vʉejoopo eta chʉkʉna paichejana raisinaame
repana.
\v 31 Repana chutaa tĩamarʉmʉ chʉkʉna Jesús neena rʉa
ikasinaame repaʉte.
\p —‍Masiʉ, ãu ãijʉ̃ʉ —‍chiisinaame chʉkʉna.
\v 32 Chitena ikasikʉamʉ repaʉ.
\p —‍Ãu paamʉ chʉʉ, mʉsanʉkona vesʉchete —‍chiisikʉamʉ.
\p
\v 33 Chikʉna sãiñechia cutusinaame chʉkʉna repaʉ neena.
\p —‍¿Chekʉnapi ãu ra ãure ikʉre? —‍chiisinaame chʉkʉna.
\p
\v 34 Chʉkʉna cutuche masikʉ ikasikʉamʉ repaʉ.
\p —‍Ãu chʉʉ paacheme ie: Chʉʉ ãu ãiñe chiichejache
chʉʉre Raosikʉ chʉ̃ʉ jokasie choo pinira chiimʉ
chʉʉ.
\v 35 Mʉsanʉkona ijache ikanaame: “Ũcuakachapapãimia pani
tʉareomʉ trigo”, chiinaame. Ijache kʉamʉ chʉʉ
mʉsanʉkonare: Jãanare pãi, chʉʉre rainare ñajʉ̃ʉ.
Trigo reochejache paimʉ repana rekoñoã. Irʉmʉ chʉʉ chʉo
asa chẽareomʉ repanare.
\v 36 Chekʉrʉmʉ pãiʉji Dios chʉo chʉvakʉna asanatani
jachame pãi. Naa paisirʉmʉ chekʉpi ũcuanani chʉvakʉna
Dioni cuasajʉ jũnisõsirʉmʉ Dios paichejare sani paijanaame.
Jãajañe chooru pojosõjanaame repanare chʉvasina charo
chʉvasikʉname choje chʉvasikʉ.
\v 37 Aperʉmʉ pãi ijache ikaasome: “Pãiʉ trigo tãʉna ainee
rʉa paiʉna chekʉpi tʉakaimʉ”, chiniasome repana. Ũcuarepaame
jãa.
\v 38 Jãajañe paimʉ Dios chʉo chʉvache. Ijacheame:
Mʉsanʉkonare saomʉ chʉʉ, Dios chʉore chʉvajʉna pãipi asa
chẽa Repaʉni cuasaajʉ chini. Dios chʉo asa chẽamanesinani
chʉvajanaame mʉsanʉkona. Repanare aperʉmʉ chʉvasina
chʉvasiejachere ũcuare joe mʉsanʉkonapi chʉvajʉna asa
chẽa Diore cuasajanaame repana churatani, chiimʉ chʉʉ
—‍chiisikʉamʉ Jesús.
\p
\v 39 Ũcuarʉmʉ repajoopo cana rʉa jainʉko, repaoji, “Chʉʉ
paio choosie ñamanesikʉtani peore masikʉ kʉasikʉamʉ”,
chikona asa Jesure cuasajʉ jovosinaame, “Dios Raosikʉamʉ
repaʉ”, chini.
\v 40 Jãajekʉna Samariapãi Jesuni tĩa ikasinaame, repaʉji
saimañe repananame paaʉ chini. Ikarena kachaumucujña repanare
jame paisikʉamʉ repaʉ, chʉkʉnaname.
\v 41 Ũcuaʉji Jesupi ikaʉna asa naa jainʉko pãi cuasajʉ
jovosinaame repaʉte.
\v 42 Ũcuarʉmʉ romiote ikasinaame repana.
\p —‍Chura mʉʉ kʉasiechia asa cuasamame chʉkʉna. Ũcuaʉ
ikache asasinajejʉ cuasame chʉkʉna repaʉte. “Dios
Raosikʉamʉ ikʉ. Maire siachejña painare vati toa uuche
Ʉ̃sekʉmʉ”, chini masijʉ cuasame chʉkʉna repaʉte
—‍chiisinaame repana.
\s Pãi chʉ̃ʉkʉte chooche chookaikʉ mamakʉte Jesús
vasosiere kʉamʉ
\p
\v 43 Kachaumucujña paisirʉmʉna Jesús Samaria cheja
paisikʉpi eta joe kuniasomʉ Galilea chejana sasa chini.
\v 44 Repaʉ Jesús siarʉmʉ ijache ikasikʉamʉ: “Dios
chʉo kʉana aineesijoopoã cana pãi repana kʉache Dios chʉo
asa jachame”, chiisikʉamʉ.
\v 45 Jãatani Galilea cheja sani apetĩasirʉmʉ repacheja cana
ña pojoasome repaʉte, pascuarʉmʉna Jerusalén vʉejoopona sani
repaʉ rʉa masi chooche peore ñasinajejʉ.
\p
\v 46 Ũcuarʉmʉ Jesús repaʉ okopi pĩsi ʉche cono
carʉñosijoopo joe coiasomʉ, Galilea cheja cajoopo Caná
vʉejoopona. Ũcuarʉmʉ chekʉjoopo Capernaum vʉejoopo cakʉ,
pãi chʉ̃ʉkʉte chooche chookaikʉ mamakʉ ravʉ jũivaʉ
paniasomʉ.
\v 47 Judea chejapi Galilea chejana Jesús raisie asaasomʉ repaʉ.
Asa, repaʉ mamakʉji jũnisõpirakʉna Jesús paichejana sani
rʉa ikaasomʉ repaʉ, Jesupi repaʉ vʉena sani mamakʉni vasokaaʉ
chini.
\v 48 Sẽeʉna Jesús ikaasomʉ.
\p —‍Diochia choomasichete chʉʉ choo ñomato cuasamaneraame
mʉsanʉkona chʉʉre —‍chiniasomʉ repaʉ.
\p
\v 49 Chikʉna ikaasomʉ repaʉ.
\p —‍Chʉʉre paakʉ, pesa sañu. Chʉʉ chĩi jũnisõcuhajamʉ
—‍chiniasomʉ repaʉ.
\p
\v 50 Chikʉna ikaasomʉ repaʉ.
\p —‍Mʉʉ vʉena coijʉ̃ʉ. Mʉʉ chĩi vajʉcuhasikʉamʉ
—‍chiniasomʉ repaʉ.
\p Jesús ikasie jachamañe cuasa repaʉ vʉena coiasomʉ
repaʉ.
\v 51 Coiʉna repaʉte chooche chookaina eta tijña kʉaasome
repaʉte.
\p —‍Mʉʉ chĩi vajʉcuhasikʉamʉ —‍chiniasome repana.
\p
\v 52 Jãajañe kʉarena, “¿Keerʉmʉna repavaʉ vajʉʉ?”,
chiniasomʉ repaʉ. Chikʉna ikaasome repana.
\p —‍Neato una paito chavoche chʉrʉsikʉamʉ repaʉ
—‍chiniasome repana.
\p
\v 53 Chitena asa ũcuajarʉmʉna Jesús, “Mʉʉ chĩi
vajʉcuhasikʉamʉ”, chiisiere cuasaasomʉ repaʉ. Ũcuarʉmʉ
Jesuni cuasakʉ jovoasomʉ repaʉ majapãiname repaʉte chooche
chookaina.
\p
\v 54 Jãaname teekachapañoã choo ñocuhamʉ Jesús Diochia
choomasiche, repaʉ Judea chejapi Galilea cheja saisirʉmʉ.
\c 5
\s Betzata cakʉre cuacũa paakʉte Jesús vasosiere kʉamʉ
\p
\v 1 Naa paisirʉmʉ judíopãipi Jerusalén vʉejoopona fiesta
choojʉna ũcuajoopona joe maniasomʉ Jesús.
\v 2 Repajoopo kakasaaro “Ovejasaaro” chiicojñosaaro kueñere
okoruruvʉ paisikʉamʉ. Reparuruvʉ mami hebreo chʉo
“Betzata” chiimʉ. Reparuruvʉ rʉtʉvate vʉñarʉã
cincorepavʉñarʉã jeomavʉñarʉã paimʉ.
\v 3-4 Angel cʉnaʉmʉ paikʉji teeñoã ũcuaruruvʉna caje
chʉ̃ʉkʉna faaasomʉ oko reparuruvʉ paiche. Faakʉna ravʉ
jũikʉ charo vani kakasikʉpi vajʉasomʉ. Jãajekʉna pãi
jũina jainʉko ũcuavʉñarʉãre chaajʉ ũhisinaame,
naavana roovananame nʉka kuimavana.
\v 5 Teeʉ repanare jame ũhikʉ treinta y ochorepaʉ̃sʉrʉmʉ
jũivaʉ paniasomʉ.
\v 6 Ũcuarʉmʉ Jesús repaʉte ña, repaʉ jeerʉmʉ jũiñete
masikʉ ijache ikaasomʉ repaʉte:
\p —‍¿Vajʉra chiikʉ mʉʉ? —‍chiniasomʉ.
\p
\v 7 Chikʉna ikaasomʉ jũikʉ.
\p —‍Repa oko faarʉmʉ casokʉjẽe peomʉ chʉʉre. Jãajekʉna
repa oko faakʉna vani kaka vajʉra chiikʉtetani chekʉnapi
siarʉmʉ charo vani kakame —‍chiniasomʉ repaʉ.
\p
\v 8 Chikʉna Jesús ikaasomʉ repaʉte.
\p —‍Vʉni mʉʉ kãikãa mini saijʉ̃ʉ —‍chiniasomʉ repaʉ.
\p
\v 9 Jesupi ikaʉna teana vajʉ vʉni repaʉ kãikãa mini saniasomʉ
repaʉ. Pʉaumucuse paniasomʉ repaʉ vajʉsiumucuse.
\v 10 Repaʉ kãikãa mini kuãa saiʉna ña judíopãi chʉ̃ʉna ikaasome.
\p —‍Pʉaumucuseame iumucuse. Mʉʉ kãikãare mini saiʉ cuache
choomʉ mʉʉ. Mai aipãi chʉ̃ʉ jokasie pʉaumucuse
jãajañe chooche ʉ̃semʉ —‍chiniasome repana.
\p
\v 11 Chitena ikaasomʉ repaʉ.
\p —‍Chʉʉre vasosikʉ, “Mʉʉ kãikãa mini saijʉ̃ʉ”,
chiisikʉamʉ chʉʉre —‍chiniasomʉ repaʉ.
\p
\v 12 Chikʉna ikaasome repana.
\p —‍Mʉʉre, “Mʉʉ kãikãa mini saijʉ̃ʉ”, chiisikʉ,
¿kaʉaʉ? —‍chiniasome repana.
\p
\v 13 Sẽeto repaʉte vasosikʉre vesʉasomʉ repaʉ, pãipi
jairepanʉko paijʉna Jesupi ñomañe sanisõʉna.
\v 14 Naa paisirʉmʉ Jesús Dios vʉere paiʉ repaʉ
vasosikʉre joe tijña ikaasomʉ.
\p —‍Chura vajʉmʉ mʉʉ. Cuache chooche ũhasõjʉ̃ʉ,
mʉʉni naa rʉa cuache tijñemaneakʉ —‍chiniasomʉ repaʉ.
\p
\v 15 Chikʉna sani judíopãi chʉ̃ʉnare kʉaasomʉ repaʉ, “Jesupi
chʉʉre vasosikʉamʉ”, chiiʉ.
\v 16 Jesupi pʉaumucusena jũikʉni vasoʉna judíopãi chʉ̃ʉna repaʉte
cuache ikajʉ vanisõñu chiniasome.
\v 17 Repaʉte cuache ikajʉna ijache ikaasomʉ repaʉ:
\p —‍Chʉʉ Jakʉ siarʉmʉ pãi reojache chookaiʉ
paikʉmʉ. Jãajekʉna chʉʉ ũcuajache pãi reojache
chookaikʉmʉ —‍chiniasomʉ.
\p
\v 18 Jesupi pʉaumucusena pãiʉte vasosikʉpi, “Dios chʉʉ
Jakʉamʉ”, chikʉna asa, “ ‘Dios paichejache paikʉmʉ
chʉʉ’, chini cuasacosomʉ ikʉ”, chini perujʉ repaʉte naa
rʉa vanisõñu chiniasome repana.
\s Dios Repaʉ Mamakʉte Repaʉ masichete jokamʉ chooakʉ
chini
\p
\v 19 Reparʉmʉ Jesús ikaasomʉ repanare.
\p —‍Chʉʉ Dios Mamakʉ chʉʉchia teeʉ cuasakʉ choomamʉ.
Chʉʉ Jakʉ choochete ñakʉ ũcuare chookʉmʉ chʉʉ. Chʉʉ
Jakʉ choochejache chookʉmʉ chʉʉ Repaʉ Mamakʉ.
Ũcuarepaame jãa.
\v 20 Jakʉ chʉʉre rʉa chiimʉ. Repaʉ chooche peore ñomʉ
chʉʉre. Naa rʉa masiche ñojamʉ Repaʉ chʉʉre. Ñoʉna
chʉʉpi ũcuare chookʉna ña jñanojanaame mʉsanʉkona.
\v 21 Jakʉ jũnisõsinare vasokʉmʉ vajʉajʉ chini. Chʉʉ
Repaʉ Mamakʉ ũcuajache chʉʉre ʉanare vasokʉmʉ.
\v 22-23 Chʉʉ Jakʉ, “Mʉsanʉkonare pãi cuache choosie
roiche paimʉ”, chiimanejamʉ. Chʉʉpi jãajañe chooakʉ
chini jokasikʉamʉ Jakʉ chʉʉre, pãipi Repaʉte cuasa,
vajʉchʉchejache chʉʉni ña, vajʉchʉajʉ chini. Chʉʉre
Dios Mamakʉte ña, vajʉchʉmana chʉʉre Raosikʉre Jakʉre
ũcuajache cuasa, vajʉchʉmame.
\p
\v 24 ’Pãi ũcuaʉana chʉʉ ikache asa jachamañe Dios
chʉʉre Raosikʉre cuasani, paiche reojachere paijʉ repana
jũnisõsirʉmʉ Dios paichejana ai sani siarʉmʉ paijanaame.
Cuache choosie roiche peomʉ repanare. Vati toa sairaasinaame
repana Diore cuasamana pani. Diore cuasanajejʉ reojachejana
saijanaame repana Dios paichejana. Ũcuarepaame jãa.
\v 25 Pãi Diore cuasamana jũnisõsinajañe paime. Jãatani
chʉʉpi Dios Mamakʉji chʉvakʉna asa pãi ũcuaʉana cuasani
jũni vajʉraisina paichejache, paiche reojachere paijanaame.
Naa paisirʉmʉ tijñejamʉ chʉʉ ikasie. Chura tijñacuhamʉ
repa. Ũcuarepaame jãa.
\v 26 Jakʉchia paiche reojachere ĩsikʉmʉ. Jãajañe
chooche Jakʉ chʉʉni Repaʉ Mamakʉni jokasikʉamʉ
ũcuajache ĩsiakʉ chini.
\v 27 Chʉʉre Dios Raosikʉjekʉna cuache choonare pãi,
“Mʉsanʉkona cuache choosie roi roiche paimʉ”,
chiichename cuache chooche ũhasinare, “Roiche peomʉ
mʉsanʉkonare”, chiiche jokasikʉamʉ Jakʉ chʉʉre.
\v 28-29 Chʉʉ ikache asa, kʉkʉmanejʉ̃ʉ mʉsanʉkona. Naa
paisirʉmʉ pãi jũisina ũcuanʉko chʉʉpi soito asa
vajʉraijanaame. Reojache paisina vajʉrani Dioname siarʉmʉ
paijʉ paijanaame. Cuache paisinatani vajʉrani uujʉ
paijanaame —‍chiniasomʉ repaʉ.
\s “Chʉʉ paichete kʉame”, chiimʉ Jesús
\p
\v 30 Ũcuarʉmʉ Jesús joe ijachere ikaasomʉ:
\p —‍Chʉʉchia teeʉ cuasakʉ choomamʉ chʉʉ. Pãi chooche
ñani chʉʉ cuasache ikamakʉamʉ. Chʉʉ Jakʉpi
chʉ̃ʉkʉna asakʉ ũcuare ikakʉmʉ. Chʉʉ chiichechia
ikamakʉjekʉ ũcuarepa ikakʉmʉ chʉʉ. Pãi repana cuache
choosie roichia roiche chʉ̃ʉmʉ chʉʉ. Chʉʉre Raosikʉ
Jakʉ chiichechia ikakʉmʉ chʉʉ.
\v 31 Chʉʉ paichete chʉʉpi meñe kʉato pãipi asa,
“Joreʉmʉ mʉʉ”, chiiraacosome.
\v 32 Jãatani chekʉpi chʉʉ paichete kʉamʉ. Repaʉ kʉache
ũcuarepaame. Jãare masimʉ chʉʉ.
\v 33 Mʉsanʉkonapi chekʉnare Juan paichejana saoasome, chʉʉ
paichete sẽniasaajʉ chini. Sẽeto chʉo ũcuarepare
kʉasikʉamʉ Juan.
\v 34 “Dios Raosikʉamʉ mʉʉ”, chiinare kuemamʉ chʉʉ.
Jãatani, chʉʉ paichete Juan kʉasiere cuasajʉ̃ʉ
mʉsanʉkona, chiimʉ chʉʉ, mʉsanʉkonapi asa chẽa chʉʉni
cuasajʉ vati toana sani uumaneajʉ chini.
\v 35 Ʉopʉ rʉa miañejañe reojache chechosikʉamʉ Juan.
Repaʉ apechechorʉmʉchia asa pojosinaame mʉsanʉkona.
\v 36 Juanpi kʉaʉna chʉʉ paiche masime pãi. Rʉa reojaimʉ
jãa. Jãatani pãipi chʉʉre Jakʉ raosiere masiajʉ chini
naa ña masireoche choomʉ chʉʉ ie: Chʉʉpi choo piniakʉ
chini Jakʉ chʉ̃ʉ jokasiere chookʉna ña chʉʉre Jakʉ
raosie masijanaame pãi.
\v 37 Pãipi chʉʉ paichete tocha jokaajʉ chini
chʉ̃ʉsikʉamʉ Jakʉ, chʉʉre Raosikʉ. Repaʉ ikachejẽe
asamanaame mʉsanʉkona. Ũcuachia Repaʉterejẽe ñamanaame.
\v 38 Chʉʉ Repaʉ Raosikʉ kʉache asa jachanajejʉ Dios chʉo
asa chẽamame mʉsanʉkona.
\v 39 Ijache cuasame mʉsanʉkona: “Dios chʉo tocha jokasiere
checheni Dios paicheja saiche masijanaame mai”, chini cuasajʉ
rʉa checheme mʉsanʉkona. Repa tocha jokasie chʉʉ paichete
kʉamʉ.
\v 40 Jãatani mʉsanʉkona chʉʉre cuheme. Chʉʉni cuasajʉ
jovoni paiche reojachere paijʉ jũnisõsirʉmʉ Dios
paichejana sairaame mʉsanʉkona.
\p
\v 41 ’Pãi chʉʉ chooche cuasa ña, “Peore masikʉmʉ
Jesús”, chiina peoto karamamʉ chʉʉre.
\v 42 Mʉsanʉkona paiche masimʉ chʉʉ. Diore chiimame
mʉsanʉkona.
\v 43 Jakʉpi raoʉna chejare caje paiʉ chechokʉtetani
jachame mʉsanʉkona chʉʉre. Chekʉpi Dios raocojñomanesikʉpi
rani repaʉ cuasachete chechototani asa jachamaneraame
mʉsanʉkona.
\v 44 “Dios Ũcuateeʉji ña pojoakʉ, reojache chooñu mai”,
chiimame mʉsanʉkona. Pãichia ña pojoajʉ chini, “Reojache
chooñu”, chiinaame mʉsanʉkona. Jãajañe cuasanajejʉ
mʉsanʉkona chʉʉre cuasamanaame.
\v 45 Ijache cuasame mʉsanʉkona: “Mai Moisés chʉ̃ʉ
jokasiere chooni jũnisõsirʉmʉ Dios paichejana ai sani
paijanaame”, chiime mʉsanʉkona. Jãatani repaʉ Moisés
mʉsanʉkonare, “Cuache paisinaame ina”, chiijamʉ chʉʉ
Jakʉre. Jãajekʉna chʉʉ jãajañe ikamanejamʉ.
\v 46 Chʉʉ paijache Moisés aperʉmʉ tocha jokasikʉamʉ.
Repaʉ tocha jokasie jachamañe cuasani chʉʉ ikache
ũcuajache jachamañe cuasaraame mʉsanʉkona.
\v 47 Repaʉ tocha jokasie jachanajejʉ chʉʉ ikache jachame
mʉsanʉkona —‍chiniasomʉ Jesús repanare.
\c 6
\s Pãi cinco milrepanare Jesús ãu ãusiere kʉamʉ
\r (Mt 14.13-21; Mr 6.30-44; Lc 9.10-17)
\p
\v 1 Naa paisirʉmʉ Jesús Galilea chiara chekʉkãkona
jẽesikʉamʉ. Repara chiara mami cheke Tiberiaame.
\v 2 Jesupi Diochia choomasichete jũinani vasokʉna pãi
jainʉko tuhasinaame repaʉte.
\v 3 Ũcuarʉmʉ chʉkʉna Jesús neena ũcuaʉname aikũtina mʉni
pʉʉsinaame.
\v 4 Reparʉmʉ judíopãi fiesta pascuarʉmʉ
tĩapirasikʉamʉ.
\v 5 Pãipi jairepanʉko repaʉni raijʉna ña Felipeni ijache
ikasikʉamʉ repaʉ Jesús:
\p —‍¿Jeechejana ãu koojanaañe mai inare ũcuanʉkore ãujañe?
—‍chiisikʉamʉ repaʉ.
\p
\v 6 Jesús repaʉ choojache masikʉtani Felipe ikachete asara
chini sẽesikʉamʉ.
\v 7 Sẽkʉna Felipe ikasikʉamʉ.
\p —‍Maipi kurirere denariorere doscientoreparerepi pãre koo
ãuto ũcuanʉkore tĩamaneraamʉ ãu inare —‍chiisikʉamʉ.
\p
\v 8 Ũcuarʉmʉ chekʉ Jesús neekʉ, Simón Pedro chojeʉ Andrés
ijache ikasikʉamʉ:
\p
\v 9 —‍Icheja chĩivaʉ pãpʉã cebadaji choosipʉã
cincorepapʉã chiacha vai kachavanare paavaʉ paimʉ.
Jãatani inani pãire ãuñu chini chĩivaʉ paachete maipi
kooto tĩamamʉ. Jairepanʉkoame ina —‍chiisikʉamʉ repaʉ.
\p
\v 10 Chikʉna ikasikʉamʉ Jesús.
\p —‍Inare pãi ũcuanʉkore chʉ̃ʉjʉ̃ʉ pʉʉajʉ
—‍chiisikʉamʉ chʉkʉnate repaʉ neenare.
\p Chikʉna chʉ̃ʉrena pʉʉsinaame repana pãi. Pãi cinco
milrepana naa jainʉko paicosome, ʉmʉpãichia kuẽkueto.
Repacheja rʉa patu paisikʉamʉ.
\v 11 Pʉʉsirʉmʉ repaʉ Jesús chĩivaʉ paache pã sẽni koo
cãjikʉ Diore, “Reorepamʉ”, chiisikʉamʉ. Chini chʉkʉnani
repaʉ neenani ĩsiʉna repanare pãi ũcuanʉkore ãusinaame
chʉkʉna. Vaivanare sẽni koo ũcuajache choosikʉamʉ
repaʉ. Repanare ãiʉachetʉka ãisinaame repana.
\v 12 Pãi ũcuanʉko ãni chajirena ikasikʉamʉ Jesús
chʉkʉnate.
\p —‍Cajejaisimajñarʉã siajʉ̃ʉ, jmamakarʉjẽe
choosõmaneakʉ —‍chiisikʉamʉ repaʉ.
\p
\v 13 Chikʉna cebada pã pãi ãijʉna cajejaisie docerepajʉña
sia timusinaame chʉkʉna.
\v 14 Diochia choomasichete Jesupi chooʉna ña ijache
ikasinaame repana pãi:
\p —‍“Diopi Repaʉ chʉo Kʉajaʉre raojamʉ”, chiijʉ
chaanaame mai. Ũcuaʉcosomʉ ikʉ —‍chiisinaame repana.
\p
\v 15 Repanani chʉ̃ʉakʉ chini repaʉte chẽa sañu chiijʉna
masikʉ cuhekʉ aikũtina joe teeʉ mʉisikʉamʉ repaʉ Jesús.
\s Jesús oko sẽsevʉji nʉka kuisiere kʉamʉ
\r (Mt 14.22-27; Mr 6.45-52)
\p
\v 16-17 Naisõsirʉmʉ chʉkʉna Jesús neena chiarana caje
choovʉna tuhisinaame, Capernaum vʉejoopona jẽñu chini.
Chijanisõcuhasietani repaʉ Jesús aikũti mʉisikʉ chutaa
cajemanesikʉamʉ.
\v 18 Ũcuarʉmʉ jẽejʉna churatani rʉa tutakʉ rʉa
faasikʉamʉ chiara.
\v 19 Cinco kilómetros chekʉrʉmʉ seis kilómetros jẽenapi
Jesure chiara sẽsevʉji nʉka kuiʉ choovʉ kueñe tĩakʉni ña
rʉa kʉkʉsõsinaame chʉkʉna.
\v 20 Vajʉchʉjʉna ikasikʉamʉ repaʉ.
\p —‍Vajʉchʉmanejʉ̃ʉ chʉʉre. Jesuamʉ chʉʉ
—‍chiisikʉamʉ repaʉ chʉkʉnate.
\p
\v 21 Chikʉna asa, “Ũcuaʉmʉ”, chini masijʉ pojojʉ choovʉ
tuhiche ʉ̃semanesinaame chʉkʉna repaʉte. Repaʉ tuhisirʉmʉ
chʉkʉna saichejana teana tĩasinaame.
\s Pãi Jesuni kueme
\p
\v 22 Joe apeñatato repana pãi chiara jẽemañe canʉkasina
ijache cuasaasome: “Neato icheja juisivʉ choovʉ
ũcuateevʉte Jesús neena chiara chekʉkãkona jẽnisõsinaame.
Jesutani jame tuni jẽemanesikʉamʉ”, chini cuasaasome
repana.
\v 23 Ũcuarʉmʉ pãi choovʉãpi Tiberias vʉejoopo raisina rani
tĩa jʉoasome. Jesús pã cãjikʉ Diore, “Reorepamʉ”, chini
ãukʉna ãisicheja kueñe paniasomʉ.
\v 24 Repacheja Jesupi peokʉna chʉkʉna repaʉ neenajẽe peojʉna
choovʉãpi joe tuni Capernaum vʉejoopona jẽniasome repana
repaʉni kueñu chini.
\s Paiche reojachere ĩsikʉmʉ Jesús pãipi reojache paapʉ
chini
\p
\v 25 Repana pãi chiara chekʉkãko jẽni tĩa Jesure kue jñaa
sẽesinaame.
\p —‍Masiʉ, mʉʉ, ¿jeerʉmʉ icheja jẽkʉ? —‍chiisinaame
repana.
\p
\v 26 Chitena ikasikʉamʉ repaʉ.
\p —‍Chʉʉpi Diochia teeʉ choomasichete chookʉna ña,
“Dios Raosikʉamʉ mʉʉ”, chiimame mʉsanʉkona chʉʉre.
Rupʉ chʉʉ ãuñe pã chajiche ãisinajejʉ kueme mʉsanʉkona
chʉʉre. Ũcuarepaame jãa.
\v 27 Mʉsanʉkona ãu koochechia cuasamanejʉ̃ʉ. Repa ãu
siasõjamʉ. Chʉʉ Dios Raosikʉ ĩsichetani siamañeame.
Jãare cuasajʉ̃ʉ. Chʉʉ ĩsichete kooni Dios paichejare ai
sani paijanaame mʉsanʉkona. Jãare chʉʉpi ĩsiakʉ chini chʉʉ
Jakʉ Dios chʉʉni chiiʉ jokasikʉamʉ —‍chiisikʉamʉ
repaʉ.
\p
\v 28 Chikʉna sẽesinaame repana.
\p —‍¿Jese choojanaañe chʉkʉna, Dios chʉ̃ʉñete chooñu
chini? —‍chiisinaame repana.
\p
\v 29 Chitena ikasikʉamʉ repaʉ.
\p —‍Ieame Dios chʉ̃ʉñe: Repaʉ Raosikʉni cuasajʉ̃ʉ
—‍chiisikʉamʉ repaʉ.
\p
\v 30 Chikʉna ikasinaame repana.
\p —‍Mʉʉpi Diochia teeʉ choomasichete choo ñoru, “Dios
Raosikʉamʉ mʉʉ”, chiijanaame chʉkʉna. ¿Ʉ̃quere choo
ñojaʉ mʉʉ?
\v 31 Mai aipãi pãi peocheja pairʉmʉ manacaã ãniasome. Dios
chʉo tocha jokasie ijache kʉamʉ:
\q Dios repanapi ãapʉ chini
ãu cʉnaʉmʉpi ĩsisikʉamʉ,
\m chiimʉ repa tocha jokasie
—‍chiisinaame repana.
\p
\v 32 Chitena Jesús ijache ikasikʉamʉ:
\p —‍Moisemamʉ cʉnaʉmʉpi ãu ĩsisikʉ. Chʉʉ Jakʉamʉ
cʉnaʉmʉpi ãurepa ĩsikʉ. Ũcuarepaame jãa.
\v 33 Ãu Dios ĩsisie cʉnaʉmʉ casosieame. Pãipi repa ãu
ãni paiche reojachere paijanaame. Ũcuajache cʉnaʉmʉpi
Dios Raosikʉre chʉʉni cuasa vajʉjʉ paiche reojachere
paijanaame pãi —‍chiisikʉamʉ repaʉ.
\p
\v 34 Chikʉna ikasinaame repana.
\p —‍Chʉkʉnate Paakʉ, ũcuare ãu siarʉmʉ ĩsikʉ paijʉ̃ʉ
chʉkʉnate —‍chiisinaame repana.
\p
\v 35 Chitena ikasikʉamʉ repaʉ.
\p —‍Ãu ãni reojache paichejache chʉʉpi jokaʉna chʉʉre
cuasana jũnisõsirʉmʉ Dios paichejana ai sani reojache paijʉ
paijanaame. Pãi ãu ãisinare joe ãucuhajamʉ repanare.
Ũcuachia pãi oko ũkusinare joe okoʉajamʉ. Naa paisirʉmʉ
joe ãuname oko chiijanaame repana. Jãatani chʉʉ ĩsiche
koosina chʉʉre cuasana karamaʉna joe chiimañe siarʉmʉ
reojache paijanaame.
\v 36 Mʉsanʉkonare ijache ikasikʉamʉ chʉʉ: “Chʉʉ
chooche ñanatani cuasamame mʉsanʉkona chʉʉre”,
chiisikʉamʉ chʉʉ.
\v 37-38 Cʉnaʉmʉpi chʉʉ chiichechia choora chini
cajemanesikʉamʉ chʉʉ. Chʉʉre Raosikʉ Dios chʉ̃ʉñete
choora chini cajesikʉamʉ. Jãajekʉna chʉʉ Jakʉpi
chookaiʉna pãi chʉʉre jovojanaame. Chʉʉre jovonare
teeʉterejẽe cuhemanejamʉ chʉʉ.
\v 39 Chʉʉre Raosikʉ Jakʉ ijache chʉ̃ʉmʉ chʉʉre:
“Mʉʉre cuasajʉ jovosinapi jũnisõsinare naa paisirʉmʉ pãi
ũcuanʉko choosie chʉʉ roiche chʉ̃ʉumucusena vasojʉ̃ʉ
repanare, teeʉjẽe choosõmaneajʉ”, chiimʉ Dios chʉʉre.
Jãajañere chiimʉ Repaʉ.
\v 40 Ũcuachia chʉʉ Jakʉ ijachere chiimʉ: Chʉʉre
Repaʉ Mamakʉni cuasajʉ chʉʉ paichete ña chẽa paiche
reojachere paijʉ Repaʉ paicheja ai sani paapʉ chiimʉ.
Chʉʉpi pãi ũcuanʉko chooche Dios roiche chʉ̃ʉumucusena
chʉ̃ʉʉna chʉʉre cuasasinapi jũisina joe vajʉraijanaame
—‍chiisikʉamʉ repaʉ Jesús.
\p
\v 41-42 “Ãu cʉnaʉmʉ casosiejache paikʉmʉ chʉʉ
cʉnaʉmʉ cajesikʉjekʉ”, chikʉna judíopãi asa perujʉ
ijache sãiñechia ikaasome:
\p —‍¿Ikʉ José mamakʉmakʉ? ¿Jesumakʉ? Ikʉ pʉkakʉpãi
masime mai. Jãatani, ¿jese ikʉ cuasakʉ, “Cʉnaʉmʉpi
cajesikʉamʉ chʉʉ”, chiikʉ? —‍chiniasome repana.
\p
\v 43 Jãajañe ikarena ikasikʉamʉ repaʉ.
\p —‍Chʉʉni perujʉ sãiñechia cuache cutumairo paijʉ̃ʉ
chʉʉre.
\v 44 Chʉʉre Raosikʉ Jakʉ chookaimato pãi teeʉjẽe
jovomaneraame chʉʉre. Chʉʉpi chejana joe caje chʉʉre
jovosina jũisinare vasojamʉ chʉʉ.
\v 45 Dios chʉo kʉasina tocha jokasie ijache kʉamʉ:
\q Pãi
ũcuanʉkore chechojamʉ Dios,
\m chiimʉ. Chʉʉ Jakʉ chʉo
asa chẽana chʉʉni cuasajʉ jovome.
\p
\v 46 ’Pãi teeʉjẽe chʉʉ Jakʉre ñamame. Chʉʉchia Repaʉ
paicheja cajesikʉjekʉ ñakʉmʉ Repaʉte.
\v 47 Chʉʉre cuasana paiche reojachere paijʉ jũnisõsirʉmʉ
Dios paichejana ai sani paijanaame. Ũcuarepaame jãa.
\v 48 Ãu ãni reojache paichejache chʉʉpi reojachere
jokaʉna chʉʉre cuasana reojache paijanaame.
\v 49 Mai aipãi pãi peocheja pairʉmʉ manacaã ãisinatani
jũnisõasome.
\v 50 Jãatani iere ãu cʉnaʉmʉ casosiere ãina rekoñoã
jũnisõmanejanaame. Ijacheame:
\v 51 Ãu cʉnaʉmʉ casosiejache paikʉmʉ chʉʉ cʉnaʉmʉ
cajesikʉjekʉ. Chʉʉ canivʉ vanisõñe ʉ̃semamʉ chʉʉ,
mʉsanʉkona cuache choochete jũni roikasa chini. Chʉʉ
ĩsiche ãu chʉʉ canivʉme. Repa ãu ãina jũnisõmañe
siarʉmʉ paijanaame —‍chiisikʉamʉ repaʉ Jesús.
\p
\v 52 Jãajañe ikaʉna asa judíopãi sãiñechia ijache
ikasinaame:
\p —‍¿Jese ikʉ maire repaʉ canivʉ ãujaʉ? —‍chiisinaame.
\p
\v 53 Chitena ikasikʉamʉ repaʉ.
\p —‍Mʉsanʉkonapi chʉʉ Dios Raosikʉ canivʉte ãimaneni chʉʉ
chiejẽe ũkumaneni reojache paimanejanaame. Ũcuarepaame
jãa.
\v 54 Pãi chʉʉ canivʉ ãijʉ chʉʉ chiejẽe ũkuna
reojache paijanaame. Jãajañe paijʉ jũisina pãi
ũcuanʉko choosie Jakʉ roiche chʉ̃ʉumucusena chʉʉpi
chʉ̃ʉʉna repana canivʉã vajʉrani Repaʉ paichejana sani
paijanaame repana.
\v 55 Chʉʉ canivʉ ãu rʉa ãireochejache paimʉ. Ũcuachia
chʉʉ chie oko rʉa ũkureochejache paimʉ.
\v 56 Pãi chʉʉ canivʉ ãijʉ chʉʉ chiejẽe ũkuna
chʉʉname siarʉmʉ painaame. Chʉʉ ũcuachia repana
rekoñoãre siarʉmʉ jame paikʉmʉ.
\v 57 Chʉʉre Raosikʉ Jakʉ jũnisõmañe Siarʉmʉ Paikʉji
chookaiʉna ai paikʉmʉ chʉʉ. Ũcuajache chʉʉpi
chookaiʉna chʉʉ canivʉ ãina ai paijanaame.
\v 58 Mai aipãi ãisicaãre manacaãre ikamamʉ chʉʉ. Repacaã
ãisina ũcuanʉko ai paimañe jũnisõasome. Ãu chura cʉnaʉmʉ
casosiere ikamʉ chʉʉ. Repa ãu chura cʉnaʉmʉ casosie ãina
Dios paichejana sani joe jũnisõmañe paijanaame
—‍chiisikʉamʉ repaʉ.
\p
\v 59 Jãajañe chechosikʉamʉ Jesús, Capernaum vʉejoopo
paivʉe judíopãi chiivʉe pairʉmʉ.
\s Diore siarʉmʉ jame paijachere kʉamʉ
\p
\v 60 Repaʉ chechochete asa repaʉte chiijʉ jame kuina
jainʉko ijache ikasinaame:
\p —‍Repaʉ chechoche rʉa asavesamʉ. Teeʉjẽe asa
chẽamanejacosome mai —‍chiisinaame repana.
\p
\v 61 Repana jachajʉ kerechete masikʉ ikasikʉamʉ Jesús.
\p —‍¿Chʉʉ chechosiere asa peruche mʉsanʉkona?
\v 62 Chekʉrʉmʉ chʉʉpi Dios Raosikʉ chʉʉ paisichejana
joe mʉnisõʉna ñani, ¿jese cuasajanaañe mʉsanʉkona?
\v 63 Dios Rekochochia mama paiche ĩsikʉmʉ. Repaʉ Rekochoji
chookaimato asa chẽa reojache paivesʉme pãi. Mʉsanʉkonapi
asa chẽa chʉʉni cuasajʉ jovo paiche mamare paapʉ chini, “Chʉʉ
canivʉ ãijʉ̃ʉ”, chiisikʉamʉ chʉʉ.
\v 64 Jãatani mʉsanʉkona chutaa teena chʉʉre cuasamame
—‍chiisikʉamʉ Jesús. Apereparʉmʉpi repaʉte
cuasamanejananame repaʉte cuache choojanare jokajaʉre
masiasomʉ Jesús.
\p
\v 65 Ũcuarʉmʉ Jesús joe ikasikʉamʉ.
\p —‍Mʉsanʉkona teena chʉʉre cuasamapʉna, ijache
chechosikʉamʉ chʉʉ: “Jakʉ chookaimato pãi teeʉjẽe
cuasajʉ jovomaneraame chʉʉre”, chiisikʉamʉ chʉʉ
mʉsanʉkonare —‍chiisikʉamʉ repaʉ.
\p
\v 66 Jãajañe ikasirʉmʉpi repaʉte jame kuisina jainʉko
jokasõ joe jame kuimanesinaame repaʉte.
\v 67 Jokasõrena Jesús chʉkʉnate repaʉ neena docerepanare
ijache sẽesikʉamʉ:
\p —‍¿Mʉsanʉkona ũcuajache chʉʉre jokasõñu chiiche?
—‍chiisikʉamʉ.
\p
\v 68 Chikʉna Simón Pedro ikasikʉamʉ.
\p —‍Chʉkʉnate Paakʉ, mʉʉ chechochejache chechokʉte
chekʉre kueni jñaamaneraame chʉkʉna. Mʉʉchiaamʉ paiche
reojachename Diore siarʉmʉ jame paijache chechokʉ.
\v 69 Mʉʉ chechoche jachamame chʉkʉna. Mʉʉ paiche masime
chʉkʉna. Dios Siarʉmʉ Paikʉ Mamakʉmʉ mʉʉ; Repaʉ
Raosikʉamʉ —‍chiisikʉamʉ repaʉ.
\p
\v 70 Chikʉna Jesús chʉkʉnate ikasikʉamʉ.
\p —‍Mʉsanʉkonare docerepanare chẽasikʉamʉ chʉʉ.
Jãatani teeʉ vati ai chʉ̃ʉñe chookʉmʉ —‍chiisikʉamʉ
repaʉ.
\p
\v 71 Jãajañe ikakʉ repaʉte cuache choojanare jokajaʉ
Judas paichete kʉasikʉamʉ repaʉ Jesús. Jesús neena
docerepanare jame paisikʉamʉ repaʉ Judas, Simón Iscariote
mamakʉ.
\c 7
\s Jesús chojechĩi repaʉte cuasasiere kʉamʉ
\p
\v 1 Jãa choo pinisirʉmʉ repaʉ Jesús Galilea chejare paiʉ
vʉñajoopoã peore kuisikʉamʉ. Judea chejatani saicuheasomʉ
repaʉ, judíopãi chʉ̃ʉnapi repaʉni vanisõñu chiijʉna.
\v 2-3 Ũcuarʉmʉ judíopãi vʉñarʉã choo pairʉmʉpi fiesta
tĩapirakʉna Jesús chojechĩi ikasinaame repaʉte.
\p —‍Icheja paimanejʉ̃ʉ mʉʉ. Judea chejana sani mʉʉ
choochete choojʉ̃ʉ, repacheja painapi mʉʉre chiinapi
ñaajʉ.
\v 4 Chekʉna pãi repana paiche pãi jainʉko masiajʉ chiina
repana chooche ropee choomame. Pãi chenevʉãna choome repana,
pãipi ñaajʉ chini. Jãajekʉna mʉʉ masiche pãi ũcuanʉkore
choo ñojʉ̃ʉ, ña masiajʉ —‍chiisinaame repana.
\v 5 Repaʉ chojechĩijẽe, “Dios raosikʉmamʉ ikʉ”, chiijʉ
jachajʉ cuasamanesinaame repaʉte.
\p
\v 6-7 Ũcuarʉmʉ Jesús ijache ikasikʉamʉ repanare:
\p —‍Pãi mʉsanʉkonare cuhemame. Jãajekʉna ũcuaʉarʉmʉjẽe
saireomʉ mʉsanʉkonare. Chʉʉretani pãi cuheme, repana
choochete ñakʉ, “Cuache choome mʉsanʉkona”, chiiʉ
chʉvakʉjekʉna. Jãajekʉna chʉʉre fiesta saicuamʉ chura.
\v 8 Chʉʉre saireorʉmʉ chutaa tĩamaʉna saimamʉ chʉʉ.
Mʉsanʉkonachia saijʉ̃ʉ —‍chiisikʉamʉ repaʉ.
\p
\v 9 Jãajañe ika pinisirʉmʉ saimañe canʉka Galilea
chejare paisikʉamʉ repaʉ Jesús.
\s Fiestarʉmʉna Jesús sani choosiere kʉamʉ
\p
\v 10 Repaʉ chojechĩi sanisõsirʉmʉna Jesús chekʉnare
kʉamañe ropee teeʉ fiesta saniasomʉ.
\v 11 Ũcuarʉmʉ judíopãi chʉ̃ʉna fiesta choocheja Jesuni
kuejʉ pãi ũcuanʉkore sẽniasome.
\p —‍¿Jeechejare Jesús paikʉ? —‍chiniasome repana.
\p
\v 12 Reparʉmʉ pãi jainʉko Jesús paiche sãiñechia
cutuasome. Teena, “Reokʉmʉ repaʉ”, chiniasome.
Chekʉnatani, “Reomamʉ repaʉ. Jorekʉ pãi cuache
chechokʉmʉ”, chiniasome.
\p
\v 13 Jãatani judíopãi chʉ̃ʉnani vajʉchʉjʉ repaʉ paiche
ropee cutuasome repana pãi, “Chekʉnapi asajʉ”, chini.
\p
\v 14 Repa fiesta joorepapo choocuharʉmʉna Dios vʉena Jesús
kaka chechosikʉamʉ.
\v 15 Chechokʉna judíopãi chʉ̃ʉna asa jñano ikasinaame.
\p —‍Ikʉ utijao chechemanesikʉtani, ¿jese paiʉna
jãarepa rʉa masikʉ? —‍chiisinaame.
\p
\v 16 Chitena Jesús ikasikʉamʉ.
\p —‍Chʉʉ cuasachete chechomamʉ chʉʉ. Chʉʉre Raosikʉ
kʉachete chechomʉ.
\v 17 Dios chʉ̃ʉñe chooñu chiina chʉʉ chechoche asa
chẽajanaame. Asa chẽa, “Repaʉ cuasache chechomʉ ikʉ”,
chiimanejanaame repana. “Diopi kʉakʉna chechomʉ ikʉ”, chini
masijanaame.
\v 18 Pãiʉ ũcuaʉakʉ repaʉ cuasachechia chechoni, pãipi,
“Rʉa masikʉmʉ mʉʉ”, chiapʉ chini chechomʉ. Jãatani
pãiʉ repaʉte raosikʉ kʉachechia chechoni, chekʉnapi,
“Mʉʉre raosikʉ rʉa masikʉmʉ”, chiapʉ chini chechomʉ.
Jãajañe paikʉ joremañe chʉo ũcuarepare chechomʉ.
\p
\v 19 ’Dios chʉ̃ʉñe Moisés tocha jokaasomʉ mʉsanʉkonare.
Jãatani repa teeʉjẽe choomanaame mʉsanʉkona. ¿Jese
paiʉna mʉsanʉkona, Diopi chʉ̃ʉʉna Moisés tocha jokasie
choomanatani chʉʉre, “Ũcuare choomamʉ”, chini vanisõñu
chiiche? —‍chiisikʉamʉ repaʉ.
\p
\v 20 Chikʉna ikasinaame repana.
\p —‍Vatire paakʉjekʉ jãajañe ikacosomʉ mʉʉ. Mʉʉre
vanisõñu chiina peome —‍chiisinaame repana.
\p
\v 21 Chitena Jesús ikasikʉamʉ.
\p —‍Pʉaumucusena chʉʉpi pãiʉni vasoʉna ũcuanʉko ña
jñanosinaame mʉsanʉkona.
\v 22 Moisés chutaa peorʉmʉ mʉsanʉkona aipãi choosie
jĩkochãtirʉ chʉto tʉache Moisepi chʉ̃ʉ jokaʉna chooñu
chini chekʉrʉmʉ mʉsanʉkona pʉaumucusetani chĩivaʉ
jĩkochãtirʉ cacanirʉ chʉto tʉame.
\v 23 Moisés chʉ̃ʉ jokasiere jachacuhejʉ chekʉrʉmʉ
mʉsanʉkona pʉaumucusetani chĩivaʉ jĩkochãtirʉ chʉto
tʉame. Jãajañe choonatani chʉʉre perume mʉsanʉkona,
chʉʉpi pʉaumucusena pãiʉni vasoʉna.
\v 24 Mʉsanʉkona chʉʉ choochete ña masi cuasamañe teana,
“Cuache choomʉ ikʉ”, chiime. Jãajañe choomanejʉ̃ʉ
mʉsanʉkona. Chʉʉ chooche ña peore masi cuasa pini rũhiñe
cuasajʉ ikajʉ̃ʉ chʉʉre —‍chiisikʉamʉ repaʉ Jesús.
\s Jesús repaʉ raisichejare kʉamʉ
\p
\v 25 Reparʉmʉ Jerusalén vʉejoopo cana teena ijache
sãiñechia sẽniasome:
\p —‍¿Pãi vanisoñu chini kuecojñokʉʉ ikʉ?
\v 26 Pãi ũcuanʉko asajʉte ikamʉ ikʉ. Jãatani maire
chʉ̃ʉna teeʉjẽe ʉ̃semame ikʉre. ¿“Dios Raosikʉamʉ
ikʉ”, chiijʉ cuasache repana?
\v 27 Dios Raojaʉ ratu repaʉ raisichejatani teeʉjẽe
masimanejanaame. Ikʉ Jesús raisicheja masime mai. Jãajekʉna
tĩiʉcosomʉ ikʉ —‍chiniasome repana.
\p
\v 28 Repana ikachete asa Jesús Dios vʉere paiʉ chechokʉ
ʉjachʉopi ijache ikasikʉamʉ:
\p —‍¿Mʉsanʉkona chʉʉ paiche masiche? ¿Chʉʉ raisicheja
ũcuachia masiche? Chʉʉ teeʉ cuasakʉ raisikʉmamʉ.
Chekʉpi Joremakʉpi raoʉna raisikʉamʉ chʉʉ. Repaʉ paiche
vesʉme mʉsanʉkona.
\v 29 Chʉʉtani Repaʉ paicheja raisikʉjekʉ Repaʉ paiche
masimʉ. Ũcuaʉji raosikʉamʉ chʉʉre —‍chiisikʉamʉ
Jesús.
\p
\v 30 Jãajañe ikakʉna asanatani repaʉte chẽañu chiina
teeʉjẽe chẽamanesinaame repaʉte, Dios chiisirʉmʉpi chutaa
tĩamaʉna.
\v 31 Chekʉnatani jainʉko repaʉni cuasajʉ ijache ikasinaame:
\p —‍Ikʉ choomasichejache choomasina peome. Chekʉrʉmʉ ikʉ
Dios Raosikʉcosomʉ —‍chiisinaame repana.
\s Fariseopãipi Jesuni chẽaajʉ chini pãi chẽanare saosiere
kʉamʉ
\p
\v 32 Pãipi Jesús paichete cutujʉna asa judío phairipãi
chʉ̃ʉnaname fariseopãi Jesuni chẽaajʉ chini Dios vʉe
pẽjekainani pãi chẽanani saoasome.
\v 33 Saorena sani ikajʉna Jesús ijache ikasikʉamʉ repanare:
\p —‍Jmamakarʉ mʉsanʉkonare jame paijamʉ chʉʉ. Pani pini
chʉʉre Raosikʉ paichejana coijamʉ chʉʉ.
\v 34 Chʉʉre mʉsanʉkona kuejanaame. Jãatani chʉʉ
saisichejare mʉsanʉkonani saicuakʉna chʉʉre jñaamanejanaame
mʉsanʉkona —‍chiisikʉamʉ repaʉ.
\p
\v 35 Chikʉna repana judíopãi sãiñechia ikasinaame.
\p —‍¿Keechejana sakʉna ikʉre mai jñaamanejanaañe? ¿Aperʉmʉ
judíopãi jainʉko saisichejñana griegopãi paichejñana sani
griegopãire chechojaʉ ikʉ?
\v 36 Ikʉ maire, “Chʉʉ saisicheja mʉsanʉkonani saicuakʉna
kuenatani chʉʉre jñaamanejanaame mʉsanʉkona”,
chiisikʉamʉ. ¿Jese chiikʉ jãa? —‍chiisinaame repana.
\s Chiañaã mevoñejañe Jesure cuasana rekoñoã siarʉmʉ
reojache paichete kʉamʉ
\p
\v 37 Repa fiesta cuhacho chooumucusena naa rʉa fiesta
choorʉmʉna Jesús vʉni nʉkakʉ ʉjachʉopi ikasikʉamʉ.
\p —‍Pãi ũcuaʉana okoʉato chʉʉni rani ũkujʉ̃ʉ.
\v 38 Dios chʉo tocha jokasie chʉʉre cuasana paiche ijache
kʉamʉ:
\q Chiañaã siarʉmʉ mevoñejañe repana rekoñoã siarʉmʉ
reojache paijanaame,
\m chiimʉ repa tocha jokasie —‍chiisikʉamʉ Jesús.
\p
\v 39 Repaʉ Jesús jãajañe ikakʉ repaʉte cuasanare Dios
Rekocho raijachere ikaasomʉ. Reparʉmʉ Jesupi chutaa
cʉnaʉmʉna mʉimaʉna Dios Rekocho pãi jame Paijarekocho
chutaa raimaneasomʉ.
\s Pãi Jesús paiche ikanatani ũcuatee ikamanesiere kʉamʉ
\p
\v 40 Jesús ikasiere asa pãi teena ijache ikasinaame:
\p —‍“Chʉʉ chʉo kʉajaʉre raojamʉ chʉʉ”, chiniasomʉ
Dios. Ũcuaʉcosomʉ ikʉ —‍chiisinaame repana.
\p
\v 41 Chekʉna ijache ikasinaame:
\p —‍Dios Raosikʉamʉ ikʉ. Cristoamʉ —‍chiisinaame.
\p Chekʉnatani ijache ikasinaame:
\p —‍Dios Raojaʉ Galilea chejapi raimaʉasomʉ.
\v 42 Dios chʉo tocha jokasie ijache kʉamʉ:
\q Aperʉmʉ paisikʉ David aineesijoopo Belén vʉejoopoji
raijamʉ Dios Raojaʉ.
\q Mai aipãiʉ David Jojocojñosikʉ paijamʉ repaʉ Dios
Raojaʉ,
\m chiimʉ repa tocha jokasie —‍chiisinaame repana.
\p
\v 43 Jesús paiche rʉa cutusinaame repana pãi. Jãatani
ũcuatee cutumanesinaame repana.
\v 44 Repana teena repaʉte chẽañu chiisinaame. Jãatani
teeʉjẽe chẽamanesinaame repaʉte.
\s Judíopãi chʉ̃ʉna Jesús ikasie jachasiere kʉamʉ
\p
\v 45 Ũcuarʉmʉ judío phairipãi chʉ̃ʉnaname fariseopãi
repana paichejana pãi chẽanapi coirena ikaasome repanare.
\p —‍¿Jese paiʉna mʉsanʉkona Jesure chẽa ramanere?
—‍chiniasome repana.
\p
\v 46 Chitena repana pãi chẽana ikaasome.
\p —‍Repaʉ masi ikachejache ikanare teeʉterejẽe asamanaame
chʉkʉna —‍chiniasome repana.
\p
\v 47 Chitena repana fariseopãi ikaasome.
\p —‍¿Mʉsanʉkona ũcuachia repaʉ jorechʉo asa chẽare?
\v 48 Maire chʉ̃ʉna teeʉjẽe cuasamame repaʉte. Ũcuachia
chʉkʉna fariseopãi teeʉjẽe cuasamame repaʉte.
\v 49 Diopi chʉ̃ʉkʉna Moisés tocha jokasie vesʉnachia
Jesús ikache asa chẽame. Jãajekʉna Dios repanare cuache
choojamʉ —‍chiniasome repana.
\p
\v 50 Reparʉmʉ Nicodemo fariseopãiʉ Jesuni ñara chini aperʉmʉ
ñamipi saisikʉ ikaasomʉ chekʉnare fariseopãi.
\p
\v 51 —‍Mai aipãi tocha jokasie Dios chʉo ijache kʉamʉ:
\q Chekʉnapi, “Cuache choosikʉamʉ ikʉ”, chiijʉna asani
teana,
\q “Jãa paito cuache choocojñojamʉ mʉʉ”, chiimanejʉ̃ʉ
mʉsanʉkona.
\q Charo repaʉni sẽniasajʉ̃ʉ, repaʉ choosiere masirepa
asañu chini.
\q Sẽejʉna repana ikasie ũcuarepa paito, “Cuache
choocojñojamʉ mʉʉ”, chiito reomʉ.
\m Jãajañe chiimʉ repa tocha jokasie —‍chiniasomʉ repaʉ.
\p
\v 52 Chikʉna ikaasome repana.
\p —‍¿Mʉʉ ũcuajache Galilea cheja raisikʉaʉ? Dios chʉo
tocha jokasiere ña masijʉ̃ʉ. Jmamakarʉjẽe, “Dios chʉo
kʉajaʉ Galilea chejapi raijamʉ”, chiimamʉ repa —‍chiniasome
repana.
\p
\v 53 Ũcuarʉmʉ repana pãi fiesta choo pinisirʉmʉ teenachia
repana vʉñana coisinaame.
\c 8
\s Romio cuache paiko choosiere kʉamʉ
\p
\v 1 Jesutani Olivo aikũtina mʉisikʉamʉ.
\v 2 Joe apeñatatona caje Dios vʉena kakasikʉamʉ repaʉ.
Kakaʉna pãipi repaʉni jainʉko chiirena pʉʉ ñuiʉ
chechosikʉamʉ repaʉ repanare.
\p
\v 3 Ũcuarʉmʉ judíopãi chechona fariseopãiname romiote
ʉ̃jʉmakʉre kãisikoni chẽa rasinaame. Ra repaote pãi
chenevʉna nʉko
\v 4 Jesuni ikasinaame repana.
\p —‍Masiʉ, ikore chekʉname kãiona ñaasome pãi.
\v 5 Diopi chʉ̃ʉkʉna Moisés tocha jokasiphʉro ijache kʉamʉ:
\q Romiote ʉmʉ paikoji chekʉname kãito catapi sua
vẽasõjʉ̃ʉ,
\m chiimʉ. Mʉʉjẽe, ¿jese chiikʉ?
—‍chiisinaame repana.
\p
\v 6 Repaʉji tĩiñere ikaʉna chẽañu chini jãajañe
ikasinaame repana repaʉte. Repana ikache sãiñe ikamañe pʉʉ
ñuiʉ mʉoñoji chejana tochakʉ paisikʉamʉ repaʉ Jesús.
\v 7 Repanapi cuharepamañe sẽejʉna vʉni nʉkakʉ ikasikʉamʉ
repaʉ.
\p —‍Mʉsanʉkonapi teeʉ cuachejẽe peokʉ pani catapʉ mini
charo suajʉ̃ʉ ikore —‍chiisikʉamʉ repaʉ.
\p
\v 8 Chini joe pʉʉ ñuiʉ chejana tochasikʉamʉ repaʉ.
\v 9 Repaʉji jãajañe ikaʉna asa ũcuanʉko teenachia
sanisõsinaame repana. Ainapi charo saisinaame. Sanisõrena repaʉ
Jesús repaoname teekachapana canʉkasinaame.
\v 10 Ũcuarʉmʉ Jesús vʉni ikasikʉamʉ repaote.
\p —‍Mʉʉre ikasina, ¿keechejare paiche? ¿Teeʉjẽe, “Mʉʉ
cuache choosie roijʉ̃ʉ”, chiimanere repana mʉʉre?
—‍chiisikʉamʉ repaʉ.
\p
\v 11 Chikʉna repao ikasikoamo.
\p —‍Teeʉjẽe jãajañe ikamanesinaame chʉʉre
—‍chiisikoamo.
\p Chikona ikasikʉamʉ repaʉ.
\p —‍Chʉʉ ũcuajache, “Mʉʉ cuache choosie roijʉ̃ʉ”,
chiimamʉ mʉʉre. Chura sani mʉʉ cuache chooche ũhasõ joe
choomanejʉ̃ʉ —‍chiisikʉamʉ Jesús repaote.
\s Pãire Miañejañe Paikʉmʉ Jesús
\p
\v 12 Ũcuarʉmʉ Jesús joe ikasikʉamʉ repanare Dios vʉe
painare.
\p —‍Pãi chʉʉre cuasajʉ jovosina chʉʉpi paiche reojachere
ĩsiʉna cuache paimañe miacheja painajañe repana rekoñoã
reojache paijanaame —‍chiisikʉamʉ repaʉ.
\p
\v 13 Chikʉna fariseopãi ikasinaame repaʉte.
\p —‍Mʉʉ paichete meñe kʉakʉ joremʉ mʉʉ —‍chiisinaame
repana.
\p
\v 14 Chitena ikasikʉamʉ repaʉ.
\p —‍Chʉʉ raisichejajẽe vesʉjʉ chʉʉ saijachejajẽe
vesʉme mʉsanʉkona. Chʉʉtani masimʉ. Jãajekʉna chʉʉ
paichete chʉʉ meñe kʉasie ũcuarepaame.
\v 15 Mʉsanʉkonatani chekʉna ikachejache chʉʉ paichete
vesʉjʉ, “Cuache choomʉ ikʉ”, chiime. Chʉʉtani pãire
jãajañe ikara chini raisikʉmamʉ.
\v 16 Chekʉrʉmʉ chʉʉpi mʉsanʉkona paichete ña ikani
ũcuarepa ikaraamʉ. Chʉʉ teeʉ cuasachete ikamamʉ
chʉʉ. Jakʉ chʉʉre Raosikʉ kʉachename chʉʉ cuasache
ikakʉmʉ chʉʉ.
\v 17 Mai aipãi tocha jokasie ijache kʉamʉ:
\q Pãi
teekachapanapi chekʉ paichete ña ũcuatee kʉato jachamanejʉ̃ʉ
repana kʉache,
\m chiimʉ.
\v 18 Chʉʉ paichete meñe kʉamʉ chʉʉ. Chʉʉre Raosikʉ
Jakʉ ũcuajache chʉʉ paiche kʉamʉ —‍chiisikʉamʉ repaʉ.
\p
\v 19 Chikʉna sẽesinaame repana repaʉte.
\p —‍Mʉjakʉ, ¿keechejare paikʉ? —‍chiisinaame repana.
\p Chitena ikasikʉamʉ repaʉ.
\p —‍Chʉʉ paiche vesʉme mʉsanʉkona. Chʉʉ Jakʉ paiche
ũcuajache vesʉme. Chʉʉ paiche masini Jakʉ paiche
ũcuajache masiraame mʉsanʉkona —‍chiisikʉamʉ repaʉ
repanare.
\p
\v 20 Dios vʉere paiʉ chechokʉ jãajañe ikasikʉamʉ
Jesús, Dioni ĩsijʉ kuri mañavʉã cachejare nʉkakʉ. Repaʉte
chẽareorʉmʉ Dios chiisirʉmʉpi chutaa tĩamaʉna teeʉjẽe
chẽamanesinaame repaʉte.
\s “Chʉʉ saicheja saicuamʉ mʉsanʉkonare”, chiimʉ Jesús
\p
\v 21 Ũcuarʉmʉ Jesús joe ikasikʉamʉ repanare.
\p —‍Sanisõjamʉ chʉʉ. Chʉʉ saisirʉmʉ kuejanaame
mʉsanʉkona chʉʉre. Jãatani jñaamapʉ rekoñoã cuache
tʉnocojñomanapi jũnisõjanaame mʉsanʉkona. Chʉʉ saicheja
saicuamʉ mʉsanʉkonare —‍chiisikʉamʉ repaʉ.
\p
\v 22 Chikʉna ikasinaame repana judíopãi chʉ̃ʉna.
\p —‍¿Jese paiʉna, “Chʉʉ saicheja saicuamʉ
mʉsanʉkonare”, chiikʉ ikʉ? ¿Repaʉji meñe vanisõjaʉ?
—‍chiisinaame repana.
\p
\v 23 Chitena ikasikʉamʉ repaʉ.
\p —‍Cheja canaame mʉsanʉkona. Chʉʉtani cʉnaʉmʉ
cakʉamʉ. Pãi cuasachechia cuasanaame mʉsanʉkona.
Chʉʉtani Dios cuasachejache cuasakʉmʉ.
\v 24 Jãajekʉna pãi cuasachechia cuasanajejʉna, “Rekoñoã
cuache tʉnocojñomanapi jũnisõjanaame mʉsanʉkona”,
chiisikʉamʉ. Chʉʉ paichete mʉsanʉkonare chʉʉ
kʉasiere asa chẽamaneni cuache tʉnocojñomanapi
jũnisõjanaame mʉsanʉkona —‍chiisikʉamʉ repaʉ repanare.
\p
\v 25 Chikʉna repaʉte sẽesinaame repana.
\p —‍¿Jeejaiʉʉ mʉʉ? —‍chiisinaame repana.
\p Chitena ikasikʉamʉ repaʉ.
\p —‍Chʉʉ apechechorʉmʉpi vʉa chʉʉ paiche kʉakʉ paimʉ
chʉʉ mʉsanʉkonare.
\v 26 Chutaa chʉo rʉa ikache paamʉ chʉʉ. Mʉsanʉkona
choojʉ paichete ñakʉ ikani, “Cuache choome ina”,
chiiraamʉ chʉʉ. Ñakʉtani ikamamʉ chʉʉ. Chʉʉre
Raosikʉpi chʉo ũcuarepare siarʉmʉ ikakʉna asakʉ ũcuare
pãire kʉamʉ chʉʉ —‍chiisikʉamʉ repaʉ.
\p
\v 27 Repaʉ Jesús Pʉkakʉ Dios paichete kʉasikʉamʉ.
Jãatani asavesʉsinaame repana.
\v 28 Asavesʉjʉna ijache ikasikʉamʉ repaʉ:
\p —‍Mʉsanʉkonapi chʉʉni Dios Raosikʉni kurususẽverona
jẽjo nʉkoni chʉʉ paiche masijʉ ijache ikajanaame: “Dios
Raosikʉamʉ ikʉ. Repaʉ cuasachechia ikamanesikʉamʉ. Repaʉ
Pʉkakʉ chechochechia ikasikʉamʉ ikʉ”, chiijʉ
masijanaame mʉsanʉkona.
\v 29 Chʉʉre Raosikʉ chʉʉname paimʉ. Repaʉ chiichete
chʉʉpi siarʉmʉ chookʉna jmamakarʉjẽe jokamakʉamʉ
Repaʉ chʉʉre —‍chiisikʉamʉ Jesús.
\p
\v 30 Repaʉji jãajañe ikaʉna reparʉmʉ pãi jainʉko, “Dios
Raosikʉamʉ ikʉ”, chiijʉ cuasajʉ jovosinaame repaʉte.
\s Diore cuasana paichename cuache paina paichete kʉamʉ
\p
\v 31 Ũcuarʉmʉ Jesús repaʉte cuasanare judíopãi ijache
ikasikʉamʉ:
\p —‍Mʉsanʉkonapi chʉʉ chʉ̃ʉñete jokasõmañe siarʉmʉ
choojʉ pani chʉʉ neerepana paijanaame.
\v 32 Chʉʉ kʉachete chʉo ũcuarepare asa chẽa masijʉna pãi
chẽa paacojñonajañe cuache paisinare etochejache reojache
chookaijamʉ chʉʉ mʉsanʉkonare —‍chiisikʉamʉ repaʉ.
\p
\v 33 Chikʉna ikasinaame repana.
\p —‍Aperʉmʉ paisikʉ Abraham jojosinaame chʉkʉna.
Jãajekʉna jmamakarʉjẽe chekʉna chẽa paacojñomanaame
chʉkʉna. Jãatani ijache ikasikʉamʉ mʉʉ chʉkʉnate:
“Mʉsanʉkonare pãi chẽa paacojñonajañe paisinare
etochejache reojache chookaijamʉ chʉʉ”, chiisikʉamʉ
mʉʉ. ¿Jese paiʉna jãajañe ikaʉ? —‍chiisinaame repana
repaʉte.
\p
\v 34 Chitena ikasikʉamʉ repaʉ.
\p —‍Cuache choona ũcuanʉko cuapi chẽa paakʉna choochete
rupʉ chookaapʉ chini chẽa paacojñonajañe paime.
Ũcuarepaame jãa.
\v 35 Pãiʉ repaʉ chẽa paakʉte majapãiʉmakʉjekʉna ai
paamamʉ. Repaʉ mamakʉtetani majapãiʉjekʉna ai paamʉ.
\v 36 Chʉʉpi Dios Mamakʉji mʉsanʉkonare pãi chẽa
paacojñonajañe painani etochejache reojache chookatu
chẽacojño etasina paichejache ũcuarepa reojache paijanaame
mʉsanʉkona.
\v 37 Abraham jojocojñosinaame mʉsanʉkona. Masimʉ chʉʉ
jãa. Repaʉ jojocojñosinatani chʉʉ chechochete jachajʉ
vanisõñu chiime mʉsanʉkona chʉʉre.
\v 38 Chʉʉ Jakʉname paiʉ ñasiere kʉamʉ chʉʉ.
Mʉsanʉkonatani mʉjakʉrepaʉ ikachete choome —‍chiisikʉamʉ
repaʉ.
\p
\v 39 Chikʉna ikasinaame repana.
\p —‍Abraham jojocojñosinaame chʉkʉna —‍chiisinaame repana.
\p Chitena ikasikʉamʉ repaʉ.
\p —‍Mʉsanʉkonapi Abraham choosiejache reojache chooni repaʉ
jojorepasina pairaame.
\v 40 Diopi chʉo ũcuarepare kʉakʉna asa kʉakʉte vanisõñu
chiime mʉsanʉkona chʉʉre. Jmamakarʉjẽe mʉsanʉkona
choochejache cuache choomanesikʉamʉ Abraham.
\v 41 Mʉjakʉrepaʉ choochejache choome mʉsanʉkona
—‍chiisikʉamʉ repaʉ.
\p Chikʉna ikasinaame repana.
\p —‍Chekʉ chĩimame chʉkʉna. Chʉkʉna Jakʉrepaʉ teeʉmʉ
Diochia —‍chiisinaame repana.
\p
\v 42 Chitena ikasikʉamʉ repaʉ.
\p —‍Diopi raoʉna ichejare rani paimʉ chʉʉ. Dios mʉsanʉkona
Jakʉrepaʉ paito chʉʉre Repaʉ raosikʉre chiiraame
mʉsanʉkona. Chʉʉchia teeʉ cuasa cajesikʉmamʉ chʉʉ.
Diopi raosikʉamʉ chʉʉre.
\v 43 ¿Jese paiʉna chʉʉ ikache asavesʉche mʉsanʉkona? Chʉʉ
ikachete asacuhejʉna asomamʉ mʉsanʉkonare.
\v 44 Mʉjakʉamʉ jãʉ vati ai. Repaʉ neenajejʉ repaʉ
chiichechia chooñu chiime mʉsanʉkona. Mamarʉmʉpi vʉa pãi
vaikʉmʉ repaʉ. Chʉo ũcuarepa cuhekʉjekʉ siarʉmʉ
jorekʉmʉ repaʉ. Jore aiamʉ repaʉ. Jore aijekʉ joreni repaʉ
choochete choomʉ. Repaʉ paicheme jãa. Jãajekʉna pãi
ũcuanʉko jorena pʉkakʉamʉ repaʉ.
\v 45 Chʉʉretani chʉo ũcuarepare ikakʉna jachame
mʉsanʉkona.
\v 46 Mʉsanʉkonapi teeʉ chʉʉ cuache chooche ñasikʉ pani
kʉajʉ̃ʉ. Chʉo ũcuarepare ikakʉmʉ chʉʉ. ¿Jese
paiʉna mʉsanʉkona chʉʉ ikache cuasamañe?
\v 47 Dios neena Repaʉ chʉo asa chẽame. Mʉsanʉkonatani Dios
neemanajejʉ Repaʉ chʉo asacuheme —‍chiisikʉamʉ repaʉ.
\s Abraham chutaa peorʉmʉ paikʉmʉ Cristo
\p
\v 48 Ũcuarʉmʉ judío aina ikasinaame repaʉte Jesure.
\p —‍“Samariapãiʉjekʉ vatire paamʉ mʉʉ”, chiijʉ chʉo
ũcuarepare ikame chʉkʉna —‍chiisinaame repana.
\p
\v 49 Chitena Jesús ikasikʉamʉ.
\p —‍Vatijẽe peomʉ chʉʉ. Chʉʉ Jakʉre cuasakʉjekʉ
Repaʉte reojache ikakʉmʉ chʉʉ. Mʉsanʉkonatani
chʉʉni ña kʉkʉmapʉ cuache ikame.
\v 50 “Pãi, ña kʉkʉjʉ̃ʉ chʉʉre”, chiimamʉ chʉʉ.
Jakʉtani, “Pãi ña kʉkʉajʉ mʉʉre”, chini raosikʉamʉ
chʉʉre. Chʉʉre ña kʉkʉmana Ũcuaʉji roiche chʉ̃ʉʉna
cuache choocojñojanaame repana.
\v 51 Chʉʉ ikache jachamañe choona choosõmanejanaame.
Ũcuarepaame jãa —‍chiisikʉamʉ repaʉ.
\p
\v 52 Chikʉna ikasinaame repana.
\p —‍Aperʉmʉ paisikʉ Abraham jũnisõasomʉ, Dios chʉo
kʉasina ũcuajache. Mʉʉtani, “Chʉʉ ikache jachamañe
choona choosõmanejanaame”, chiimʉ. Vatire paakʉjekʉ
jãajañe ikamʉ mʉʉ. Chura masime chʉkʉna.
\v 53 “¿Mai aipãiʉte Abrahamre naa rʉa masimʉ chʉʉ”,
chiikʉ mʉʉ? Repaʉ Abraham jũnisõasomʉ, Dios chʉo kʉasina
ũcuajache. “Repanare naa rʉa masikʉmʉ chʉʉ”, chiiʉ
cuasacosomʉ mʉʉ —‍chiisinaame repana.
\p
\v 54 Chitena ikasikʉamʉ repaʉ.
\p —‍Chʉʉpi meñe, “Rʉa masiʉmʉ chʉʉ”, chiito
jacharaame pãi chʉʉre. Chʉʉ Jakʉtani, “Chʉʉ chĩi
rʉa masiʉmʉ”, chiikʉmʉ chʉʉre. Repaʉ ikache
asacuhenatani, “Dios chʉkʉnate paakʉmʉ”, chiime
mʉsanʉkona.
\v 55 “Dios chʉkʉnate paakʉmʉ”, chiinatani Repaʉ paiche
vesʉnaame mʉsanʉkona. Chʉʉtani Repaʉ paiche masikʉmʉ.
Chʉʉpi, “Dios paiche vesʉkʉmʉ chʉʉ”, chini joreraamʉ
mʉsanʉkona jorechejache. Repaʉ paiche masikʉjekʉ Repaʉ
chʉ̃ʉñe chookʉmʉ chʉʉ.
\v 56 Mai aipãiʉ Abraham chʉʉ icheja cheja raijachere masikʉ
pojosikʉamʉ —‍chiisikʉamʉ repaʉ.
\p
\v 57 Chikʉna ikasinaame repana.
\p —‍¿Jese paiʉna chutaa cincuentarepaʉ̃sʉrʉmʉjẽe
peokʉtani, “Abrahamre ñasikʉamʉ chʉʉ”, chiikʉ mʉʉ?
—‍chiisinaame repana.
\p
\v 58 Chitena ikasikʉamʉ repaʉ.
\p —‍Repaʉ Abraham chutaa peorʉmʉ paikʉmʉ chʉʉ.
Ũcuarepaame jãa —‍chiisikʉamʉ.
\p
\v 59 Jãajañe ikaʉna asa perujʉ catare siasinaame repana,
Jesuni sua vẽasõñu chini. Jãajañe choojʉna Dios vʉe
paisikʉ kati eta pãi kuanupʉ chenevʉji ñomañe
sanisõsikʉamʉ repaʉ Jesús.
\c 9
\s Naavaʉ aineesikʉre Jesús vasosiere kʉamʉ
\p
\v 1 Ũcuarʉmʉ repaʉ Jesús kuiʉ pãiʉte naavaʉ aineesikʉni ñasikʉamʉ.
\v 2 Ñaʉna chʉkʉna repaʉ neena ikasinaame repaʉte.
\p —‍Masiʉ, ¿jese paiʉna ivaʉ naavaʉ jñaacojñoʉ? ¿Repaʉ rekocho cuache paache roire naavaʉ jñaacojñoʉ? Jãapãani, ¿pʉkakʉpãi cuache paiche roire naavaʉ jñaacojñoʉ? —‍chiisinaame chʉkʉna.
\p
\v 3 Chitena Jesús ikasikʉamʉ.
\p —‍Repaʉ cuache paache roimamʉ jãa. Ũcuachia pʉkakʉpãi cuache chooche roimamʉ. Rupʉ Diopi vasoʉna pãipi ña, “Dios peore masikʉmʉ”, chiijʉ masiajʉ chini naavaʉ aineesikʉamʉ ikʉ.
\v 4 Pãi repana chooche umucusena chooreomʉ. Ñamitani choocuamʉ. Ũcuajache chʉʉre Raosikʉ Dios chʉ̃ʉ jokasiere maipi churana choomato cuamʉ. Naa paisirʉmʉ choocuajamʉ.
\v 5 Chejare chutaa paiʉ pãire Miañejañe Paikʉmʉ chʉʉ —‍chiisikʉamʉ repaʉ.
\p
\v 6 Jãajañe ika pini chejana coo tutu chao chacho mini naavaʉ ñakocaãna suirisikʉamʉ repaʉ. \fig blind man healed with mud|Cn01739B.tif|span||D.C.Cook| |Jn 9.6\fig*
\v 7 Choo pini repaʉte ikasikʉamʉ repaʉ.
\p —‍Okoruruvʉ Siloé chiicojñoruruvʉna sani mʉʉ chia choasõjʉ̃ʉ chao —‍chiisikʉamʉ repaʉ. (“Siloé” chini “Saosie” chiimʉ.)
\p Ikaʉna sani choasõ rakʉna ñakocaã ñosikʉamʉ repaʉte.
\v 8 Ñakocaãre ñakʉna repaʉte kueñe painaname repaʉji kuri siarʉmʉ sẽeʉ ñuiʉna ñasina ikasinaame.
\p —‍¿Naavaʉjekʉ aperʉmʉ ichejare ñuiʉ kuri sẽesikʉmakʉ repa ikʉ? —‍chiisinaame repana.
\p
\v 9 Chitena chekʉna ikasinaame.
\p —‍Ũcuaʉmʉ ikʉ —‍chiisinaame.
\p Chekʉna ijache ikasinaame:
\p —‍Tĩiʉtani rupʉ ũcuaʉjaiʉmʉ ikʉ —‍chiisinaame.
\p Ũcuarʉmʉ ũcuaʉji ikasikʉamʉ.
\p —‍Ũcuaʉmʉ chʉʉ —‍chiisikʉamʉ repaʉ.
\p
\v 10 Chikʉna sẽesinaame repana.
\p —‍¿Jese paiʉna naavaʉ paisikʉtani chura ñakʉ mʉʉ? —‍chiisinaame repana.
\p
\v 11 Chitena ikasikʉamʉ repaʉ.
\p —‍Pãiʉ Jesús veekʉji coo tutu chao chacho mini chʉʉ ñakocaãna suiri ijache ikasikʉamʉ chʉʉre: “Okoruruvʉ Siloé chiiruruvʉna sani mʉʉ chia chaore choasõjʉ̃ʉ”, chiisikʉamʉ. Chikʉna sani choa piniʉna ñakocaã ñosikʉamʉ chʉʉre —‍chiisikʉamʉ repaʉ.
\p
\v 12 Chikʉna sẽesinaame repana.
\p —‍¿Jeechejare paikʉ repaʉ, mʉʉ ikakʉ? —‍chiisinaame.
\p Chitena ikasikʉamʉ repaʉ.
\p —‍Vesʉmʉ chʉʉ —‍chiisikʉamʉ repaʉ naavaʉ paisikʉ.
\s Fariseopãi naavaʉ paisikʉre repaʉte vasosiere sẽesiere kʉamʉ
\p
\v 13-14 Jesús chaopi chacho mini naavaʉre vasoumucuse pʉaumucuse paisikʉamʉ. Jãajekʉna pãi naavaʉ paisikʉre fariseopãi paivʉena mʉvaasome.
\v 15 Mʉvarena repana fariseopãi naavaʉ paisikʉre chekʉna sẽesiejache sẽniasome.
\p —‍¿Jese choo ñakocaã ñakʉ mʉʉ? —‍chiniasome.
\p Chitena ikaasomʉ repaʉ.
\p —‍Chʉʉ ñakocaãna chaopi chacho suiriʉna okopi choasõjani ñamʉ chʉʉ chura —‍chiniasomʉ repaʉ.
\p
\v 16 Chikʉna fariseopãi teena ijache ikaasome:
\p —‍Mʉʉre pʉaumucusena vasosikʉ Dios raomanesikʉcosomʉ. Dios Raosikʉ pani pʉaumucuse jãajañe choomaneraamʉ repaʉ —‍chiniasome.
\p Chekʉnatani ijache ikaasome:
\p —‍Ikʉre vasosikʉ cuache paikʉ pani Diochia teeʉ choomasiche choomaneraamʉ —‍chiniasome. Ũcuatee cuasamaneasome repana.
\p
\v 17 Jãajekʉna naavaʉ paisikʉre joe sẽniasome repana.
\p —‍Mʉʉre vasosikʉ paiche, ¿jese chiikʉ mʉʉ? —‍chiniasome repana.
\p Chitena ikaasomʉ repaʉ.
\p —‍“Dios chʉo kʉakʉmʉ”, chiimʉ chʉʉ —‍chiniasomʉ repaʉ.
\p
\v 18 Ũcuarʉmʉ judío aina repaʉte vasosiere jachajʉ, “Naavaʉ paisikʉmamʉ ikʉ”, chiijʉ jachaasome. Jachajʉ repaʉ pʉkakʉpãi soni rao
\v 19 sẽniasome repana.
\p —‍¿Ikʉ mʉsanʉkona chĩiaʉ? Ivaʉ mʉsanʉkona, “¿Chĩirʉmʉna teana naavaʉ aineesikʉ”, chiicojñovaʉaʉ? Jãa paito, ¿jese choo chura ñakocaã ñakʉ ikʉ? —‍chiniasome repana.
\p
\v 20 Chitena pʉkakʉpãi ikaasome repanare.
\p —‍Chʉkʉna chĩiamʉ ikʉ. Teana naavaʉ aineesikʉamʉ ikʉ.
\v 21 Jãatani repaʉ ñakocaã choo ñañe vesʉme chʉkʉna. Repaʉte vasosikʉre ũcuajache vesʉme chʉkʉna. Sẽniasajʉ̃ʉ repaʉni kʉaakʉ. Aiamʉ repaʉ —‍chiniasome repana.
\p
\v 22 Fariseopãire vajʉchʉjʉ jãajañe ikaasome repana pʉkakʉpãi. Aperʉmʉ judíopãi chʉ̃ʉna, “ ‘Jesús Dios Raocojñosikʉamʉ’, chiinare mai judíopãi chiivʉe kakache ʉ̃señu”, chiniasome.
\v 23 Jãajañe chiisiejekʉna, “Aiamʉ repaʉ. Repaʉni sẽniasajʉ̃ʉ”, chiniasome repana.
\p
\v 24 Ũcuarʉmʉ repana judío aina naavaʉ paisikʉre joe soni ikaasome.
\p —‍Dios ñakʉte chʉo ũcuarepare ikajʉ̃ʉ. “Mʉʉre vasomʉ chʉʉ”, chiisikʉ cuakʉmʉ —‍chiniasome repana.
\p
\v 25 Chitena ikaasomʉ repaʉ.
\p —‍Chekʉrʉmʉ cuache chookʉmʉ repaʉ. Chekʉrʉmʉ pãakʉmʉ. Vesʉmʉ chʉʉ. Ietani masimʉ: Aperʉmʉ naavaʉ paisikʉ chura ñamʉ chʉʉ —‍chiniasomʉ repaʉ.
\p
\v 26 Chikʉna joe sẽniasome repana repaʉte.
\p —‍¿Jese chooʉ repaʉ? ¿Jese chooʉna ñakocaã ñoʉ mʉʉre? —‍chiniasome repana.
\p
\v 27 Chitena ikaasomʉ repaʉ.
\p —‍Repaʉ choosie kʉacuhasikʉamʉ chʉʉ. Jãatani jachame mʉsanʉkona. ¿Jese paiʉna joe, “Kʉajʉ̃ʉ”, chiiche mʉsanʉkona chʉʉre? ¿Mʉsanʉkona ũcuachia repaʉni jovoñu chiiche? —‍chiniasomʉ repaʉ repanare.
\p
\v 28 Chikʉna asa perujʉ repaʉte ijache ikaasome repana:
\p —‍Mʉʉ repaʉ chʉ̃ʉñe chookʉmʉ. Chʉkʉnatani Moisés chʉ̃ʉ jokasie choonaame.
\v 29 Dios Moisere ikasie masinaame chʉkʉna. Mʉʉre vasosikʉre raosikʉretani vesʉme chʉkʉna —‍chiniasome repana.
\p
\v 30 Chitena ikaasomʉ repaʉ.
\p —‍¿Repaʉte raosikʉre vesʉche mʉsanʉkona? ¡Jeerʉa tĩiñeañe jãa! Chʉʉre vasosikʉamʉ repaʉ.
\v 31 Cuache paina sẽeñe chookaimamʉ Dios. Jãare masime mai. Repaʉte Diore pojojʉ Repaʉ chʉ̃ʉñe choona sẽeñetani chookaikʉmʉ Repaʉ.
\v 32 Teeʉterejẽe naavaʉ aineesikʉre vasoasomʉ chiicojñokʉte asamanaame mai.
\v 33 Repaʉji Dios raomanesikʉ pani Diochia teeʉ choomasiche choomaneraamʉ —‍chiniasomʉ repaʉ.
\p
\v 34 Chikʉna ikaasome repana.
\p —‍¿Chĩirʉmʉna teana cuache aineesivaʉpi chechora chiikʉ mʉʉ chʉkʉnate? Rʉa tĩiñeame jãa —‍chiniasome repana. Chini repaʉte vesena etoasome repana.
\s Diore cuasamana naavana paichejache paichete kʉamʉ
\p
\v 35 Ũcuarʉmʉ Jesús naavaʉ paisikʉre etosie asasikʉamʉ. Asasikʉjekʉ repaʉte kue jñaa ijache ikasikʉamʉ repaʉ:
\p —‍¿Dios Raosikʉre cuasakʉ mʉʉ? —‍chiisikʉamʉ repaʉ ũcuaʉji.
\p
\v 36 Chikʉna ikasikʉamʉ repaʉ.
\p —‍¿Kaʉaʉ repaʉ? Kʉajʉ̃ʉ chʉʉre; repaʉni cuasara —‍chiisikʉamʉ repaʉ.
\p
\v 37 Chikʉna Jesús ikasikʉamʉ repaʉte.
\p —‍Ñacuhamʉ mʉʉ repaʉte. Ũcuaʉmʉ chʉʉ, mʉʉre ikakʉ —‍chiisikʉamʉ repaʉ.
\p
\v 38 Chikʉna asa Jesure tijñeñe rore pʉʉ ñuiʉ ikasikʉamʉ repaʉ.
\p —‍Pãi Ũcuanʉkore Paakʉ, cuasamʉ chʉʉ mʉʉre —‍chiiʉ repaʉte pojosikʉamʉ repaʉ.
\p
\v 39 Ũcuarʉmʉ Jesús ikasikʉamʉ.
\p —‍Ichejare chejare caje paiʉ chechomʉ chʉʉ, cuache painajejʉ, “Naavana paichejache painaame chʉkʉna”, chiinapi asa chẽa chʉʉni cuasajʉ ñakocaã ñana paichejache reojache paapʉ chini. Jãatani chekʉnare, “Dios chʉo masinajejʉ reojache painaame chʉkʉna”, chiinani, “Dios chʉo masinatani chʉʉni cuhejʉ naavana paichejache paime mʉsanʉkona”, chisa chini cajesikʉamʉ chʉʉ —‍chiisikʉamʉ.
\p
\v 40 Repaʉ ikasiere asa fariseopãi teena repaʉte jame paina sẽesinaame.
\p —‍¿Mʉʉ cuasato chʉkʉna naavana paichejache painaañe? —‍chiisinaame repana.
\p
\v 41 Chitena ikasikʉamʉ repaʉ.
\p —‍Mʉsanʉkonapi Dios chʉore vesʉjʉ naavana paichejache pani chʉʉre cuheche roiche peoraamʉ mʉsanʉkonare. Jãatani, “Dios chʉo masime chʉkʉna”, chiinapi chʉʉni cuhejʉna roiche paimʉ mʉsanʉkonare —‍chiisikʉamʉ repaʉ Jesús.
\c 10
\s Oveja kuirakʉ paichete kʉamʉ
\p
\v 1 Ũcuarʉmʉ Jesús repanani chʉvakʉ ijache ikasikʉamʉ:
\p —‍Pãiʉ ñaaʉji ovejavana paisokorona rani jatisaaro
kakamañe tĩichejapi kakamʉ.
\v 2 Repavanare kuirakʉtani jatisaaroji kakamʉ.
\v 3 Repavanare kuirakʉji ũcuasokorona kakara chiito repasaaro
pẽjekaikʉji jatisaaro vatakaimʉ. Vataʉna kaka repavana mamire
veokʉ soito ũcuanʉko repavana mami asamasime repana. Soiʉna
tuha jame etame repaʉte.
\v 4 Repavanare ũcuanʉkore etua charo saiʉ soiʉna asamasijʉ
tuha repaʉ kuichejña jame kuime repavana.
\v 5 Tĩiʉpi repanare soito asavesʉjʉ tuhamañe vʉvʉsõme
tĩiʉjekʉna. Ũcuarepaame jãa —‍chiisikʉamʉ repaʉ.
\p
\v 6 Repanani chʉvakʉ jãajañe ikasikʉamʉ Jesús.
Jãatani repaʉ ikache asavesʉsinaame repana.
\s Ovejavanare reojache paakʉ paichejache paikʉmʉ Jesús
\p
\v 7 Ũcuarʉmʉ Jesús joe ikasikʉamʉ.
\p —‍Repana paisokorona ovejavana kakasaarojache paikʉmʉ
chʉʉ. Ũcuarepaame jãa.
\v 8 Chʉʉ chutaa raimarʉmʉ pãi jainʉko teenachia rani,
“Dios raosikʉamʉ chʉʉ”, chiijʉ jorejʉ chechosinaame.
Ñaana choochejache choosinaame repana. Repana chechoche chʉʉ
neena jachasinaame.
\v 9 Ovejavana paisokoro kakasaarojache paikʉmʉ chʉʉ.
Jãajekʉna ovejavanapi repana paisokorona kakachejache pãipi
chʉʉni cuasani chʉʉpi chẽa paakʉ kuirakʉna rʉa pojojʉ
reojache paijanaame.
\p
\v 10 ’Ñaaʉji rani ovejavanare ñaasõmʉ. Chekʉrʉmʉ
repavanare vani siasõmʉ. Jãajañe choora chinite raimʉ
ñaaʉ. Repaʉ choochejache choome jorejʉ chechona.
Chʉʉtani paiche reojachere ĩsira chini raisikʉamʉ,
pãipi karamañe reojache paapʉ chini.
\v 11 Ovejavanare reojache paakʉ paichejache paikʉmʉ
chʉʉ. Chekʉrʉmʉ ovejavanare paakʉ reokʉjekʉ, chaipi
ovejavanani ãnisõra chini raiʉna ñani, “Chʉʉpi ivanare
cuache choochete ʉ̃seto chai chʉʉni ãnisõjamʉ”,
chiikʉtani ũcua ʉ̃semʉ repaʉ.
\v 12 Chekʉrʉmʉ kurire koora chini tĩiʉpi kuirakaimʉ
repavanare. Kuirakʉna chekʉrʉmʉ chaipi repavanani ãnisõra
chini raiʉna ñani repavanare joka vʉvʉsõmʉ repaʉ, repanare
paakʉmakʉjekʉ. Joka vʉvʉsõʉna chaipi rani teevaʉre
chẽaʉna chekʉna teenachia vʉvʉsõme.
\v 13 Kurire koora chini kuirakʉjekʉ repavanare oimañe joka
vʉvʉsõmʉ repaʉ, chaipi rakʉna.
\p
\v 14 ’Ovejavanare reojache paakʉ paichejache paikʉmʉ
chʉʉ. Chʉʉ neenare masimʉ chʉʉ. Chʉʉre ũcuajache
masime repana.
\v 15 Chʉʉ Jakʉ masimʉ chʉʉre. Chʉʉ ũcuajache
Repaʉte masimʉ. Chʉʉ neenani cuache choochete ʉ̃sera chini
chuenisõñe cuhemañe jũijamʉ chʉʉ.
\v 16 Chekʉnare ũcuachia judío peonare paamʉ chʉʉ. Repanani
soiʉna asa jachamañe rani chʉʉni jovo judío pãiname
ũcuateekuanupʉjache paijʉna teeʉ paakʉ kuirajamʉ chʉʉ
repanare ũcuanʉkore.
\p
\v 17 ’Pãi cuache choochete roikasa chini chuenisõñete
cuhemaʉna Jakʉ chʉʉre rʉa chiimʉ. Joe vajʉrasa chini
cuhemañe chuenisõjamʉ chʉʉ.
\v 18 Chʉʉpi cuheto teeʉjẽe vanisõmanejanaame chʉʉre.
Jãatani chʉʉ canivʉ ʉ̃semañe ĩsijamʉ chʉʉ, pãipi
vanisõajʉ chini. Chʉʉ canivʉ ĩsireomʉ. Ũcuachia
chʉʉpi jũnisõ vajʉrasa chiito vajʉraireomʉ chʉʉre.
Jãajañe chooakʉ chini chʉ̃ʉ jokasikʉamʉ Jakʉ
chʉʉre —‍chiisikʉamʉ repaʉ.
\p
\v 19 Jãajañe ikaʉna asa ũcuatee cuasamapʉ sãiñechia
keresinaame repana judío aina.
\v 20 Jainʉko ijache ikasinaame:
\p —‍Vatire paakʉjekʉ vẽveʉmʉ ikʉ. Ikʉ ikache asamaneñu
mai —‍chiisinaame.
\p
\v 21 Chekʉnatani ijache ikasinaame:
\p —‍Vati paana jãajañe ikamanaame. Ũcuachia vati
naavanare vasomanaame —‍chiisinaame repana.
\s Judío aina Jesure cuhechete kʉamʉ
\p
\v 22 Ũcuarʉmʉ judíopãi Jerusalén vʉejoopona Dios vʉe
aperʉmʉ judío peonani tʉa carevasiere cuasajʉ fiesta
choosinaame. Okorʉmʉ paisikʉamʉ reparʉmʉ.
\v 23-24 Ũcuarʉmʉ Jesupi Dios vʉe vese cakachapate Portal de
Salomón chiikachapate nʉka kuiʉna ña judío ainapi rani
rũhisokoro nʉkajʉ ijache ikasinaame repaʉte:
\p —‍Mʉʉpi asavesache kʉakʉna vesʉme chʉkʉna mʉʉ paiche.
Dios Raosikʉ Cristo pani teana rũhiñe kʉajʉ̃ʉ chʉkʉnate
—‍chiisinaame repana.
\p
\v 25 Chitena ikasikʉamʉ repaʉ.
\p —‍Ũcuare kʉasikʉamʉ chʉʉ. Jãatani jachame
mʉsanʉkona. Jakʉpi chʉ̃ʉ raoʉna rani Repaʉchia teeʉ
choomasiche choo ñomʉ chʉʉ, pãipi chʉʉ paichete masiajʉ
chini.
\v 26 Mʉsanʉkona chʉʉ neenamanajejʉ jachajʉ cuasamame
chʉʉre.
\v 27 Chʉʉ neena chʉʉ ikache asamasijʉ jovo jame kuijʉ chʉʉ
chʉ̃ʉñe choome. Repanare masimʉ chʉʉ.
\v 28 Chʉʉpi repanani chookaiʉna reojache paijʉ
jũnisõsirʉmʉ vati toa saimañe Dios paichejare ai sani
paijanaame repana. Teeʉjẽe tʉamanejanaame repanare chʉʉ
neenare.
\v 29 Jakʉpi pãi ũcuanʉkore naa rʉa Masikʉji chʉʉni
jokaʉna teeʉterejẽe tʉacuamʉ repanare.
\v 30 Chʉʉname Jakʉ ũcuateeʉjache painaame chʉkʉna
—‍chiisikʉamʉ repaʉ Jesús.
\p
\v 31 Jãajañe ikaʉna asa perujʉ joe cata siasinaame repana
judío aina repaʉni sua vẽasõñu chini.
\v 32 Jãajañe chooñu chiijʉna Jesús ikasikʉamʉ
repanare.
\p —‍Jakʉpi chʉʉni chookaiʉna Repaʉchia choomasiche
mʉsanʉkona ñajʉte chooche reojachere rʉa choosikʉamʉ
chʉʉ. Chʉʉ choosie, ¿jeere mʉsanʉkona cuhejʉ chʉʉre
catapi sua vẽasõñu chiiche? —‍chiisikʉamʉ repaʉ.
\p
\v 33 Chikʉna joe ikasinaame repana.
\p —‍Mʉʉ reojache choosiere cuhejʉ catapi sua vẽasõñu
chiimame chʉkʉna. Mʉʉpi, “Chʉʉname Jakʉ
ũcuateeʉjache painaame chʉkʉna”, chikʉna cuhejʉ catapi
sua vẽasõñu chiime chʉkʉna mʉʉre, Dios cuhechete ikaʉna.
Diomamʉ mʉʉ. Rupʉ pãiʉmʉ —‍chiisinaame repana.
\p
\v 34 Chitena ikasikʉamʉ repaʉ.
\p —‍Mai aipãi tocha jokasie Dios chʉo ijache kʉamʉ:
\q Diovanaame mʉsanʉkona,
\m chiiche tocha jokaasome repana.
\v 35 Repana tocha jokasie, “Diovanaame mʉsanʉkona”, chini
Dios chʉo asa chẽana paichete ikamʉ. “Dios chʉo
jorechʉoame”, chiicuamʉ.
\v 36 Jãatani chʉʉpi, “Dios chĩiamʉ chʉʉ”, chiiʉna
asa, “Dios asacuhechete ikamʉ mʉʉ”, chiime mʉsanʉkona
chʉʉre, Repaʉ Chẽa Raosikʉni. ¿Jese paiʉna mʉsanʉkona
jãajañe ikache?
\v 37 Chʉʉ Jakʉ chiichete choomato jachareomʉ chʉʉre.
\v 38 Chʉʉ ikache jachanatani chʉʉ Jakʉ chiiche
Repaʉchia choomasichete chʉʉpi choo ñokʉna jachamanejʉ̃ʉ
mʉsanʉkona. Jachamañe ijache cuasajʉ̃ʉ: “Dioname
ũcuateeʉjache paikʉmʉ ikʉ”, chini cuasa masijʉ̃ʉ
—‍chiisikʉamʉ repaʉ.
\p
\v 39 Chikʉna joe chẽañu chiinaretani joka sanisõsikʉamʉ
repaʉ.
\p
\v 40 Eta Jordán chiacha chekʉkãkona aperʉmʉ Juan pãi
okorovesichejana ʉ̃sʉʉ mʉikãkona jẽni canʉka paisikʉamʉ
repaʉ, chʉkʉna repaʉ neenaname.
\v 41 Ũcuachejare paijʉna pãi jainʉko repaʉni ñañu chini
rani teena ijache ikasinaame:
\p —‍Juan Diochia teeʉ choomasiche choomanesikʉamʉ.
Jãatani ikʉ Jesús paiche repaʉ kʉasie peore ũcuarepaame
—‍chiisinaame repana.
\p
\v 42 Ũcuachejana pãi jainʉko repaʉte Jesure cuasajʉ
jovosinaame.
\c 11
\s Lázaro jũnisõsiere kʉamʉ
\p
\v 1 Ũcuarʉmʉ Betania vʉejoopo cakʉ Lázaro ravʉna jũniasomʉ. Repaʉ chojeromi ũcuajoopote paniasome Maríaname Marta.
\v 2 Repao María Jesús cũana okomaña ro repao rañapi tʉnesikoamo.
\v 3 Majaachʉ Lázaroji jũiʉna chojeromi chekʉnani raoasome Jesuni, “Mʉʉ chiicojñokʉ jũimʉ”, chiapʉ chini.
\p
\v 4 Sa kʉarena asa ikasikʉamʉ repaʉ.
\p —‍Jũnisõakʉ chini ravʉ jũiñe choomaneasomʉ Dios Lázarote. Rupʉ Repaʉ choomasichete pãire choo ñora chini chooasomʉ. Jãajekʉna jũnisõsikʉtani vajʉrakʉna ña, “Dios peore masikʉmʉ”, chiijanaame pãi. Ũcuachia, “Dios Mamakʉ rʉa masimʉ”, chiijanaame repana —‍chiisikʉamʉ repaʉ.
\p
\v 5-6 Repaʉ Jesús repanare Martaname chojeoname Lázarote rʉa chiikʉtani, “Lázaro jũimʉ”, chiito asa teana saimanesikʉamʉ. Saimañe teekachapaumucujña ũcuachejare canʉka paisikʉamʉ repaʉ.
\v 7 Ũcuarʉmʉ repaʉ chʉkʉnate repaʉ neenare ikasikʉamʉ.
\p —‍Judea chejana joe sañu mai —‍chiisikʉamʉ.
\p
\v 8 Chikʉna ikasinaame chʉkʉna.
\p —‍Masiʉ, aperʉmʉ repacheja paina judío aina catapi sua vẽasõñu chiniasome mʉʉre. ¿Ũcuachejana joe sasa chiikʉ mʉʉ? —‍chiisinaame chʉkʉna.
\p
\v 9 Chitena ikasikʉamʉ repaʉ.
\p —‍Teeumucuse doce horas paimʉ. Pãiʉji umucusena kuni tota tãimañe kuimʉ miakʉna.
\v 10 Pãiʉji ñamipi kuni tota tãiʉ kuimʉ miañeji karakʉna —‍chiisikʉamʉ repaʉ.
\p
\v 11 Ũcuarʉmʉ Jesús joe ikasikʉamʉ.
\p —‍Mai cuasacojñokʉ Lázaro kãnisõcuhasikʉamʉ. Jãajekʉna saimʉ chʉʉ repaʉni vʉora chini —‍chiisikʉamʉ.
\p
\v 12 Chikʉna joe ikasinaame chʉkʉna.
\p —‍Chʉkʉnate Paakʉ, Lázaroji jũiʉ kãnisõsikʉ pani vajʉjamʉ —‍chiisinaame chʉkʉna.
\p
\v 13 Repaʉ Jesús, “Lázaro kãnisõsikʉamʉ”, chiiʉ repaʉ jũnisõsiere ikasikʉamʉ. Repaʉ ikachete asavesʉjʉ, “Lázaro rupʉ kãisiere ikamʉ ikʉ”, chini cuasasinaame chʉkʉna.
\v 14 Jãajañe cuasajʉna Jesús rũhiñe kʉasikʉamʉ chʉkʉnate.
\p —‍Repaʉ Lázaro jũnisõsikʉamʉ.
\v 15 Repana chʉʉre soito teana saimanesikʉamʉ chʉʉ, mʉsanʉkonapi chʉʉni masi cuasaajʉ chini. Mʉsanʉkona chʉʉre masi cuasajachere cuasakʉ pojomʉ chʉʉ. Chura sani ñañu mai —‍chiisikʉamʉ repaʉ.
\p
\v 16 Ũcuarʉmʉ Tomás Gemelo chiicojñokʉji ikasikʉamʉ chʉkʉnate.
\p —‍Ikʉni jame sañu mai. Sani pãipi repaʉni vaito ũcuaʉname chuenisõñu mai —‍chiisikʉamʉ chʉkʉnate.
\s Jesús Lázarote jũnisõsivaʉni vasora chini saimʉ
\p
\v 17 Chʉkʉna sani tĩa ñato ũcuakachapaumucujña tãcojñosikʉ paisikʉamʉ repaʉ Lázaro.
\v 18 Betania vʉejoopo Jerusalén vʉejoopo kueñere paimʉ. Chekʉrʉmʉ tres kilómetrocosomʉ.
\v 19 Maríaname Marta majaachʉpi jũnisõʉna otare oijʉna chʉroñu chini saisina judío aina jainʉko paisinaame reparʉmʉ.
\v 20 Ũcuarʉmʉ Jesupi raiʉna asa etasikoamo Marta repaʉni tijña pojora chini. Maríatani etamañe vʉere paisikoamo.
\v 21 Eta tijña pojo pini ikasikoamo repao.
\p —‍Pãi Ũcuanʉkore Paakʉ, mʉʉpi ichejare paito chʉʉ achʉ jũnisõmaneraasikʉamʉ.
\v 22 Jãatani mʉʉ sẽeñe peore ĩsijamʉ Dios mʉʉre. Masimo chʉʉ jãa —‍chiisikoamo repao.
\p
\v 23 Chikona Jesús ikasikʉamʉ.
\p —‍Mʉachʉ vajʉraijamʉ —‍chiisikʉamʉ repaʉ.
\p Chikʉna Marta ikasikoamo.
\p
\v 24 —‍Masimo chʉʉ jãa. Pãi ũcuanʉko choosie Dios cuasa roiche chʉ̃ʉumucusena vajʉraijamʉ repaʉ —‍chiisikoamo repao.
\p
\v 25 Chikona ikasikʉamʉ repaʉ.
\p —‍Chʉʉamʉ pãi jũnisõsinare vasokʉ. Ũcuachia pãi rekoñoãna reojachere paiche jokakʉmʉ chʉʉ. Pãi chʉʉre cuasanapi jũnisõsina chʉʉpi joe rani vasoʉna vajʉrani reojache paijanaame.
\v 26 Chʉʉre cuasana reparʉmʉ chutaa vajʉna ũcuachia Dios paichejare ai sani paijanaame. ¿Chʉʉ ikache jachamañe cuasako mʉʉ? —‍chiisikʉamʉ repaʉ.
\p
\v 27 Chikʉna ikasikoamo repao.
\p —‍Jʉ̃jʉ, Cristo, Dios Raocojñosikʉamʉ mʉʉ. Dios aperʉmʉ, “Chejana chʉʉ neekʉre saojamʉ chʉʉ”, chiniasomʉ. Ũcuaʉmʉ mʉʉ. Jãajañe cuasamo chʉʉ —‍chiisikoamo repao.
\s Lázarote tãsichejare Jesús ña oisiere kʉamʉ
\p
\v 28 Jãajañe ika pini repao Marta vʉena coi chojeote Maríate soni teeote kʉaasomo.
\p —‍Pãi chechokʉ ranicuhasikʉamʉ. Mʉʉni soimʉ repaʉ —‍chiniasomo repao.
\p
\v 29 Chikona repao María asa teana vʉni etaasomo repaʉni tijñara chini.
\v 30 Chʉkʉna chutaa repajoopo vʉejoopo tĩamanesinaame. Marta chʉkʉnate tijñasichejare chutaa maare paisinaame chʉkʉna.
\v 31 Maríapi vʉni eta raiona ña judío aina repanapi otare oijʉna chʉroñu chini raisina repavʉe jame chii paina jame tuhasinaame repaote, “Majaachʉre tãsichejare osa chini saicosomo”, chini.
\p
\v 32 Eta rani chʉkʉna paicheja tĩa Jesús tijñeñena meñe sime ñuio ijache ikasikoamo repao:
\p —‍Pãi Ũcuanʉkore Paakʉ, mʉʉpi ichejare paito chʉʉ achʉvaʉ jũnisõmaneraasikʉamʉ —‍chiisikoamo repao.
\p
\v 33 Judío ainapi repaoname oijʉ raichete ña sʉmavaʉ paisikʉamʉ Jesús.
\v 34 Repaʉni sʉmaʉna repanare sẽesikʉamʉ repaʉ.
\p —‍¿Jeechejana mʉsanʉkona repavaʉre tãre? —‍chiisikʉamʉ.
\p Chikʉna ikasinaame repana.
\p —‍Pãi Ũcuanʉkore Paakʉ, rani ñajʉ̃ʉ —‍chiisinaame repana.
\p
\v 35 Jesús reparʉmʉ oisikʉamʉ.
\v 36 Oiʉna repana judío aina ikasinaame.
\p —‍Ñajʉ̃ʉ; Lázarote rʉa chiicosomʉ ikʉ —‍chiisinaame.
\p
\v 37 Chekʉna teena ijache ikasinaame repaʉte:
\p —‍Naavaʉre vasoasomʉ ikʉ. ¿Jese paiʉna Lázarote jũiñe ʉ̃sekaimaneʉ? —‍chiisinaame repana.
\s Lázaro vajʉraisiere kʉamʉ
\p
\v 38 Reparʉmʉ Jesús joe cuasa oiʉ naa rʉa sʉmavaʉ Lázarote tãsicojena saisikʉamʉ. Aikũti caripana tẽtoche ũhisicoje paisikʉamʉ repacoje. Ũcuachia catapʉ ʉjapʉji tapisicoje paisikʉamʉ repacoje.
\v 39 Sani tĩa ikasikʉamʉ repaʉ.
\p —‍Catapʉte kʉñojʉ̃ʉ —‍chiisikʉamʉ.
\p Jãajañe ikaʉna jũnisõsivaʉ chojeo Marta ikasikoamo.
\p —‍Pãi Ũcuanʉkore Paakʉ, repavaʉre tãsie ũcuakachapaumucujñaame ie chura. Jãajekʉna icoje vataru rʉa ʉ̃tosʉjacosomʉ —‍chiisikoamo.
\p
\v 40 Chikona ikasikʉamʉ repaʉ.
\p —‍Mʉʉre ijache ikasikʉamʉ chʉʉ: “Chʉʉre cuasani Dios peore Masiʉ chooche ñajamo mʉʉ”, chiisikʉamʉ chʉʉ mʉʉre —‍chiisikʉamʉ repaʉ.
\p
\v 41 Chikʉna repapʉ kʉñosinaame repana. Kʉñorena repaʉ Jesús ʉmʉre ñakʉ ijache ikasikʉamʉ:
\p —‍Jakʉ, mʉʉpi chʉʉ sẽeñete asakʉna, “Reorepamʉ”, chiimʉ chʉʉ mʉʉre.
\v 42 Chʉʉ sẽeñe siarʉmʉ asakʉmʉ mʉʉ. Masimʉ chʉʉ jãa. Jãatani chura ʉjachʉopi ikakʉ sẽemʉ chʉʉ mʉʉre, inapi asa, “Dios Raosikʉamʉ ikʉ”, chini cuasaajʉ chini —‍chiisikʉamʉ repaʉ.
\p
\v 43 Jãajañe ika pini ʉjachʉopi ijache ikasikʉamʉ repaʉ:
\p —‍Lázaro, etajʉ̃ʉ —‍chiisikʉamʉ.
\p
\v 44 Chikʉna repaʉ jũnisõsivaʉ vajʉrani etasikʉamʉ jʉ̃jñaname cũaname chia reasõsikʉ. Etaʉna Jesús ikasikʉamʉ. \fig Lazarus raised|CN01768B.TIF|span||D.C.Cook| |Jn 11.44\fig*
\p —‍Repaʉte reasikãña vanakaijʉ̃ʉ saaʉ —‍chiisikʉamʉ repaʉ.
\s Jesuni chẽañu chini pãi teena cutusiere kʉamʉ
\r (Mt 26.1-5; Mr 14.1-2; Lc 22.1-2)
\p
\v 45 Jesupi jãajañe chooʉna judío aina jainʉko Maríate ñañu chini saisina repaʉ vasosiere ña cuasa jovoasome Jesure.
\v 46 Chekʉnatani sani Jesús choosiere fariseopãire kʉaasome.
\v 47 Kʉarena asa repana fariseopãiname phairipãi chʉ̃ʉna judíopãi ũcuanʉkore chʉ̃ʉnare soni chii ikaasome.
\p —‍Repaʉ Jesús Diochia choomasiche rʉa chookʉasomʉ. ¿Jese choojanaañe mai?
\v 48 Maipi ʉ̃semato pãipi ũcuanʉko repaʉni cuasajʉ repaʉ chʉ̃ʉñete chiijʉ jovorena Romapãi chʉ̃ʉnapi asani perujʉ rani Dios vʉe ñañosõ maire ũcuajache jainʉkore vanisõjanaame —‍chiniasome repana.
\p
\v 49 Chitena Caifás repaʉ̃sʉrʉmʉ judío phairi ai ikaasomʉ repanare jame paikʉji.
\p —‍Rʉa vesʉme mʉsanʉkona.
\v 50 Maipi repaʉ choochete ʉ̃semapʉ jainʉko chuenisõto cuamʉ. “Chookʉchia ũcuateeʉ pãi ũcuanʉko chuenisõmaneajʉ chini chuenisõkaito naa reomʉ maire”, chiimacosome mʉsanʉkona —‍chiniasomʉ repaʉ.
\p
\v 51 Repaʉchia cuasachete jãajañe ikamaneasomʉ repaʉ. Repaʉ̃sʉrʉmʉ phairi aijekʉna Diopi repaʉ rekochona kʉaʉna judíopãi cuache choochete roikasa chini Jesús chuenisõjañere ikaasomʉ repaʉ.
\v 52 Judíopãichia jũni roikaijachere ikamaneasomʉ repaʉ. Ũcuachia Dios Repaʉ neenare siachejñarʉã painare ũcuateekuanupʉ jovojachere ikaasomʉ repaʉ.
\v 53 Ũcuaumucusepi vʉa repana judíopãi chʉ̃ʉna Jesure vanisõjañere rʉa cutujʉ paniasome.
\p
\v 54 Jãajekʉna repaʉ Jesús reparʉmʉpi vʉa judíopãi chʉ̃ʉna paichejña kuimañe paiʉ Judea cheja paisikʉpi eta pãi peocheja kueñe cajoopo Efraín vʉejoopona sani canʉka paisikʉamʉ, chʉkʉna repaʉ neenaname.
\p
\v 55 Reparʉmʉ Jerusalén vʉejoopo judíopãi repana fiestapi pascuarʉmʉpi tĩapirakʉna repajoopo kueñe cana pãi jainʉko ũcuajoopona maniasome, aperʉmʉ chʉ̃ʉ jokasiere choojʉ cuare tʉneñu chini.
\v 56 Mani Dios vʉere kaka paijʉ Jesure kuenajejʉ ijache cutuasome repana sãiñechia:
\p —‍¿Jese cuasache mʉsanʉkona? ¿Icheja fiesta choochejana raijaʉ repaʉ? ¿Pãajaʉ? —‍chiniasome repana pãi.
\p
\v 57 Phairipãi chʉ̃ʉna fariseopãiname ijache ikaasome:
\p —‍Pãiʉ ũcuaʉakʉji repaʉ Jesús paichejare masini rani kʉajʉ̃ʉ chʉkʉnate. Repaʉni chẽañu chiime chʉkʉna —‍chiniasome repana.
\c 12
\s Romio Jesús cũana okomaña rovesiere kʉamʉ
\r (Mt 26.6-13; Mr 14.3-9)
\p
\v 1 Repaʉ Jesús seirepaumucujña pascuarʉmʉ tĩañe karatona Betania vʉejoopona saisikʉamʉ, repaʉji vasoʉna Lázaro vajʉraisikʉ paijoopona.
\v 2 Sakʉna repajoopo cana, pãipi chii Jesuni pojoajʉ chini ãure choosinaame. Chiirena Martapi ãure ãukona Jesuname ñuijʉ ãisinaame repana. Lázaro ũcuajache ũcuaʉname ñuiʉ ãisikʉamʉ.
\v 3 Ũcuarʉmʉ repao María trescientos gramos pairaka okomañaraka nardochia choosirakajekʉ rʉa roisirakapi Jesús cũana rove pini repao rañapapi tʉnesõkaisikoamo. Roveona vʉe peore mañasʉsikʉamʉ.
\v 4 Ũcuarʉmʉ Jesús neekʉ Judas Iscariote Jesuni cuache chooajʉ chini jokajaʉ ikasikʉamʉ.
\p
\v 5 —‍¿Jese paiʉna repao trescientoreparere ĩsisõjʉ kuri denariorere koorʉrakare rupʉ jañosõo? Irakare ĩsisõ kuri koo chʉovana paivanani ĩsirʉjachere rurepapʉ choosõmʉ —‍chiisikʉamʉ repaʉ.
\p
\v 6 Chʉovana paivanare oichete ikamanesikʉamʉ repaʉ. Rupʉ ñaaʉjekʉ jãajañe ikasikʉamʉ. Chʉkʉna Jesús neena chiiche kuri paakaiʉ siarʉmʉ teererechia siasõkaiʉ paisikʉamʉ repaʉ Judas.
\v 7 Jãajañe ikaʉna Jesús ikasikʉamʉ.
\p —‍Iko chooche ʉ̃semanejʉ̃ʉ. Chʉʉpi jũnisõʉna chʉʉre tãumucuse chʉʉ canivʉte rovejarakare careva paamo repao.
\v 8 Chʉovana paivana mʉsanʉkonare siarʉmʉ jame paijavanaame. Jãajekʉna repanare siarʉmʉ reojache chookaijʉ paireojamʉ mʉsanʉkonare. Chʉʉtani mʉsanʉkonare siarʉmʉ jame paimanejamʉ. Jãajekʉna chʉʉre siarʉmʉ jãajañe chookaicuajamʉ mʉsanʉkonare —‍chiisikʉamʉ repaʉ.
\s Phairipãi Lázarote vanisõñu chiichete kʉamʉ
\p
\v 9 Ũcuarʉmʉ judíopãi jainʉko Jesús Betania vʉejoopo paichete asa saniasome repaʉni ñañu chini. Ũcuachia jũnisõʉna Jesús vasosikʉni Lázaroni ñañu chiniasome repana.
\v 10-11 Jesús repaʉte vasosiere asa judíopãi jainʉko Jesure cuasajʉ jovoasome. Jãajekʉna phairipãi chʉ̃ʉna, “Mai chechoche pãi jainʉko ũhasõ Jesuni cuasajʉ jovome”, chini perujʉ Lázaroni vanisõñu chiniasome, Jesure vanisõñu chiichejache.
\s Jerusalén vʉejoopo Jesús sani tĩasiere kʉamʉ
\r (Mt 21.1-11; Mr 11.1-11; Lc 19.28-40)
\p
\v 12 Ũcuarʉmʉ judíopãi repana fiestaji pascuarʉmʉpi tĩapirakʉna Jerusalén vʉejoopona jainʉko maniasome. Mani paijʉ joe apeñatatona Jesús raijache asaasome repana.
\v 13 Asa pũti kare veri eta repaʉni tijña ʉjachʉopi ijache ikasinaame repana:
\p —‍Dios peore masikʉmʉ. Ikʉre Israelpãire chʉ̃ʉakʉ chini repaʉ Raosikʉre reojache chookaaʉ —‍chiisinaame repana.
\p
\v 14 Ũcuarʉmʉ repaʉ Jesús burrovaʉre jñaa tuhisikʉamʉ. Dios chʉo aperʉmʉ tocha jokasie kʉache choosikʉamʉ. Ijache kʉamʉ repa:
\q
\v 15 Ũcuanʉko vajʉchʉmañe paijʉ̃ʉ mʉsanʉkona Jerusalén vʉejoopo cana.
\q Mʉsanʉkonare chʉ̃ʉkʉte burrochĩivaʉni tuhiʉ raiʉna ñajʉ̃ʉ,
\m chiimʉ repa tocha jokasie. \fig triumphal entry|CN01782B.TIF|span||D.C.Cook| |Jn 12.15\fig*
\p
\v 16 Reparʉmʉ chʉkʉna Jesús neena, “Dios chʉo kʉachete choome ina ikʉre”, chiimanesinaame. Repaʉ Jesús jũni vajʉrani cʉnaʉmʉ mʉisirʉmʉtani repa tocha jokasiere asamasijʉ, “Repa tochasie kʉache choosinaame pãi Jesure”, chiisinaame chʉkʉna.
\p
\v 17 Pãi Jesuni jame paijʉ repaʉji Lázaroni jũnisõ tãcojñosikʉni soiʉna vajʉrani etaʉna ñasina chekʉnare kʉajʉ paisinaame.
\v 18 Diochia choomasiche Jesús chooche kʉajʉna asanajejʉ etasinaame repana pãi repaʉni tijñañu chini.
\v 19 Jãajañe choojʉna ña sãiñechia ikasinaame fariseopãi.
\p —‍Rʉa cuamʉ ijache paito. Ñajʉ̃ʉ. Pãi ũcuanʉko repaʉte jovome. Ʉ̃secuamʉ jãajañe chooto —‍chiisinaame repana.
\s Griegopãi Jesure kuesiere kʉamʉ
\p
\v 20 Fiestarʉmʉjekʉna Dios chookaisiere cuasajʉ pojoñu chini Jerusalén vʉejoopona sani painare griegopãi sani jame paisinaame.
\v 21 Paijʉ Galilea cheja cajoopo Betsaida vʉejoopo cakʉre Felipete mʉa rʉa ikaasome repana griegopãi.
\p —‍Jesuni ñañu chiime chʉkʉna —‍chiniasome repana.
\p
\v 22 Chitena asa mʉa Andreni kʉaasomʉ repaʉ. Kʉa ũcuaʉname Jesuni kʉañu chini mʉaasomʉ repaʉ.
\v 23 Kʉarena asa Jesús ikaasomʉ.
\p —‍Chʉʉ Dios Raosikʉ paichete pãi jainʉko masirʉmʉ tĩacuhajamʉ. “Rʉa masiʉmʉ ikʉ”, chiijanaame pãi chʉʉre.
\v 24 Ijacheame: Ãurakarʉã tãru charo joimʉ. Repacaãpi jonisõmaneni aineemamʉ. Jonisõni ainee pini repañʉ rʉa kʉ̃ijamʉ. Ũcuarepaame jãa.
\v 25 Ũcuajache pãiʉ ũcuaʉakʉji repaʉ chiichechia choora chiikʉ cuache paiʉ Dios paicheja saimanejamʉ. Pãiʉ Dios chʉ̃ʉñe choora chiikʉtani reojache paiʉ repaʉ jũnisõsirʉmʉ Dios paichejana ai sani reojache paijamʉ.
\v 26 Chʉʉ chʉ̃ʉñe chooñu chiinare, “Chʉʉni jovojʉ̃ʉ”, chiimʉ chʉʉ. Chʉʉre jovoni Dios paichejare sani chʉʉname paijanaame repana. Chʉʉ chʉ̃ʉñe choonare reojache chookaijamʉ Dios, “Reonaame ina”, chini —‍chiniasomʉ repaʉ.
\s Jesús repaʉ chuenisõjañere kʉamʉ
\p
\v 27 Ũcuarʉmʉ Jesús ijache ikaasomʉ:
\p —‍Chura rʉa sʉmamʉ chʉʉre. Jakʉre, ¿jese chiijache chʉʉ? “¿Chʉʉre tijñejañe cuache ʉ̃sekaijʉ̃ʉ”, chiijache chʉʉ? Pãara. Jãare choocojñora chini cajesikʉamʉ chʉʉ —‍chiniasomʉ.
\v 28 Ũcuarʉmʉ Pʉkakʉre ijache ikasikʉamʉ repaʉ:
\p —‍Jakʉ, mʉʉ siache choomasichete choo ñora chini mʉʉre ʉache choojʉ̃ʉ chʉʉre —‍chiisikʉamʉ repaʉ.
\p Chikʉna cʉnaʉmʉpi chʉo ikache asosikʉamʉ.
\p —‍Chʉʉ masiche siache choo ñocuhasikʉamʉ chʉʉ. Joe choo ñora —‍chiisikʉamʉ Dios.
\p
\v 29 Ikaʉna asa pãi teena ijache ikasinaame:
\p —‍Okocurucosomʉ jãa —‍chiisinaame.
\p Chekʉnatani,
\p —‍Angelpi ikʉni ikacosomʉ jãa —‍chiisinaame.
\p
\v 30 Chitena Jesús joe ikasikʉamʉ.
\p —‍Chʉʉpi asaakʉ chini ikasiemamʉ jãa. Mʉsanʉkonapi asaajʉ chini ikasieame.
\v 31 Chʉʉre cuasamanajejʉ cuache painare cuache tijñerʉmʉ tĩacuhamʉ. Ũcuachia cuache paijʉ chʉʉre cuasamanare chʉ̃ʉkʉte vati aire ʉ̃serʉmʉ tĩacuhamʉ.
\v 32 Chʉʉre jẽjo nʉkosirʉmʉ chʉʉpi soiʉna pãi siachejña paina chʉʉni cuasajʉ jovojanaame —‍chiisikʉamʉ repaʉ.
\p
\v 33 Repaʉte kurususẽverona jẽjo nʉko vẽasõjañere repaʉ jãajañe ikakʉ kʉasikʉamʉ.
\v 34 Jãajañe ikaʉna asa ikasinaame pãi.
\p —‍Mai aipãi tocha jokasie Dios chʉo ijache kʉamʉ:
\q Cristo Dios Raosikʉ jũnisõmañe ai paijamʉ,
\m chiimʉ. Jãatani mʉʉ, ¿jese paiʉna, “Pãire jame paaʉ chini Dios Raosikʉre jẽjo nʉkojanaame pãi”, chiikʉ? Jãa paito, Cristo chiicojñokʉ, ¿tĩiʉʉ? —‍chiisinaame repana.
\p
\v 35 Chitena Jesús ikasikʉamʉ.
\p —‍Chʉʉ icheja cheja painare pãi Miañejañe Paikʉ mʉsanʉkonare jmamakarʉ jame pani sanisõjamʉ. Jãajekʉna chutaa miarʉmʉna churana kuijʉ̃ʉ mʉsanʉkona, ruru naisõmaneñu chini. Ruru naisõni ñamipi kuijʉ maapi ñomaʉna cavesʉsõjanaame mʉsanʉkona.
\v 36 Chʉʉre Miañejañe Paikʉte chutaa mʉsanʉkonare jame pairʉmʉna cuasajʉ̃ʉ chʉʉ paichejache reojache pañu chini —‍chiisikʉamʉ repaʉ.
\p Jãajañe ika pini sani katisõsikʉamʉ repaʉ Jesús.
\s Judíopãi Jesure cuasamañere kʉamʉ
\p
\v 37 Repana ñajʉte Diochia choomasiche siarʉmʉ chookʉtetani repaʉte Jesure cuasamanesinaame repana pãi.
\v 38 Dios chʉo kʉakaisikʉ Isaías tocha jokasie kʉache choosinaame repana. Repaʉ tocha jokasie ijache kʉamʉ:
\q Chʉʉre Paakʉ, mai kʉache jachajʉ cuasamame pãi.
\q Mʉʉ masiche siache choo ñokʉtetani jachame pãi,
\m chiimʉ.
\v 39 Pãipi cuasavesʉjʉna repaʉ Isaías cheke ijache tocha jokaasomʉ:
\q
\v 40 Ñakocaã ñamavanajañe paapʉ chini jokaasomʉ Dios.
\q Ũcuachia Repaʉ chʉo asavesache chooasomʉ repanare.
\q Diopi jãajañe chooʉna, “Ikʉ maire vasojamʉ”, chiimapʉ chʉʉre raimame repana,
\m chiiʉ tocha jokaasomʉ.
\v 41 Diopi ñokʉna Jesús Masiʉ paiche ñasikʉjekʉ repaʉ paichete kʉakʉ jãajañe tocha jokaasomʉ Isaías maire.
\p
\v 42 Reparʉmʉ judíopãi jainʉko Jesuni cuhejʉ cuasamanesinaame. Chekʉnatani jachamañe cuasasinaame repaʉte. Ũcuachia repanare chʉ̃ʉna teena cuasasinaame. Cuasanatani fariseopãire vajʉchʉjʉ kʉamanesinaame, “Kʉarena fariseopãipi asa mai judíopãi chiivʉe kakachete ʉ̃sejʉ”, chini.
\v 43 Ũcuachia repanare pãi pojochete naa rʉa chiijʉ kʉamaneasome repana, “Kʉato pojojamʉ Dios maire”, chiimapʉ.
\s Jesús ikache jachasie roi roijachere kʉamʉ
\p
\v 44 Ũcuarʉmʉ Jesús ʉjachʉopi ijache ikasikʉamʉ:
\p —‍Pãi chʉʉre cuasana chʉʉrechia cuasamame. Chʉʉre Raosikʉre Diore ũcuachia cuasame repana.
\v 45 Chʉʉ paiche masina ũcuajache chʉʉre Raosikʉ paiche masime.
\v 46 Chʉʉ Miañejañe Paikʉ chejana raisikʉamʉ, pãi chʉʉre cuasanapi chijacheja paina paichejache cuache paimaneajʉ chini.
\v 47 Chʉʉ ikache asanatani jachajʉ choomanare, “Jachasie roiche paimʉ”, chisa chini cajesikʉmamʉ chʉʉ. Chʉʉre cuasanani chẽa paakʉ vati toa saichete ʉ̃sekasa chini cajesikʉamʉ chʉʉ.
\v 48 Jãatani pãi chʉʉni cuhejʉ chʉʉ ikache asana jachajʉ choomanesie roijanaame Dios pãi ũcuanʉko choosie roiche chʉ̃ʉumucuse.
\v 49 Chʉʉchia cuasachete ikamamʉ chʉʉ. Jakʉ, chʉʉre Raosikʉ kʉachete ikamʉ chʉʉ.
\v 50 Iere masimʉ chʉʉ: Jakʉ kʉachete chʉʉpi ikakʉna pãipi asa chẽa choona Repaʉ paichejana ai sani paijanaame. Jãajekʉna Jakʉ chʉʉre kʉachetechia ikakʉmʉ chʉʉ —‍chiisikʉamʉ repaʉ.
\c 13
\s Jesús repaʉ neena cũare choamʉ
\p
\v 1 Reparʉmʉ pascuarʉmʉ tĩaumucuse paisikʉamʉ. Reparʉmʉ
Jesús repaʉ saijarʉmʉ tĩakʉna masiasomʉ icheja cheja paiche
joka Pʉkakʉ paicheja saijachere. Chʉkʉnate repaʉ neenare
cheja painare cuhamañe siarʉmʉ rʉa cuasakʉ paisikʉamʉ
repaʉ.
\p
\v 2-4 Simón Iscariote mamakʉni Judare aperʉmʉ vati aipi repaʉ
rekochona cuache chʉ̃ʉasomʉ, Jesure cuache choojanani
jokaakʉ chini. Repaʉ Jesús Pʉkakʉ Dios repaʉte
raosiename repaʉ paicheja repaʉ joe saijachename pãi
ũcuanʉkore chʉ̃ʉakʉ chini Pʉkakʉ repaʉte jokasie
masiasomʉ. Jãajañe masikʉji chʉkʉna repaʉ neenaname ãu
ãiʉ ñuisikʉpi vʉni repaʉ sẽsevʉ juikãa tĩto repaʉ
jiisaivʉna toalla kãapi quẽosikʉamʉ repaʉ.
\v 5 Quẽo pini totoreavana oko ro chʉkʉna repaʉ neena cũare
choa pini ũcuakãapi jose tʉnesõkaisikʉamʉ repaʉ.
\p
\v 6 Choakʉ saiʉ Simón Pedro cũa choapirakʉna ijache
ikasikʉamʉ repaʉ:
\p —‍Chʉʉre Paakʉ, ¿chʉʉ cũare choajaʉ mʉʉ?
—‍chiisikʉamʉ.
\p
\v 7 Chikʉna Jesús ikasikʉamʉ.
\p —‍Chʉʉ chura chooche vesʉmʉ mʉʉ. Naa paisirʉmʉ
masijamʉ mʉʉ —‍chiisikʉamʉ repaʉ.
\p
\v 8 Chikʉna Pedro joe ikasikʉamʉ repaʉte.
\p —‍Chʉʉ cũa choache ʉ̃semʉ chʉʉ —‍chiisikʉamʉ.
\p Chikʉna Jesús ikasikʉamʉ.
\p —‍Mʉʉ cũa choache ʉ̃seni chʉʉ neekʉ paimanejamʉ mʉʉ
—‍chiisikʉamʉ.
\p
\v 9 Jãajañe ikaʉna ikasikʉamʉ repaʉ.
\p —‍Jãa paito, Chʉʉre Paakʉ, chʉʉre cũaname jʉ̃jña
sĩjopʉ peore choajʉ̃ʉ —‍chiisikʉamʉ.
\p
\v 10 Chikʉna ikasikʉamʉ repaʉ.
\p —‍Pãiʉ cucha pinisikʉ joe cuchache chiimamʉ ũcuare meno
peocanivʉ cuchasikʉjekʉ. Cũachia choache chiimʉ chao
chacasicũajekʉna. Ũcuajache mʉsanʉkona rekoñoã
cuchasinajañe cuachejẽe peonaame. Jãatani mʉsanʉkonare
jame paikʉ teeʉ repaʉ rekocho ũcua cuache cuasakʉ paimʉ
—‍chiisikʉamʉ repaʉ.
\p
\v 11 Repaʉte cuache choojanare jokajaʉni masikʉ,
“Mʉsanʉkonare jame paikʉ teeʉ repaʉ rekocho ũcua cuache
cuasakʉ paimʉ”, chiisikʉamʉ repaʉ.
\p
\v 12 Chʉkʉna cũa choa pini repaʉ sẽsevʉ juikãa sacha
joe pʉʉ ñuiʉ ikasikʉamʉ repaʉ.
\p —‍¿Chʉʉ mʉsanʉkonare choosie masiche?
\v 13 Chʉʉre mʉsanʉkona, “Masiʉ, Chʉkʉnate Paakʉ”,
chiinaame. Jãajañe ikajʉ ũcuarepa ikanaame mʉsanʉkona.
Mʉsanʉkonare chechokʉ paakʉmʉ chʉʉ.
\v 14 Mʉsanʉkonare paakʉtani cũa choakaisikʉamʉ chʉʉ.
Jãajekʉna mʉsanʉkona ũcuajache chʉʉ choosiejache
sãiñechia chookaijʉ paijʉ̃ʉ.
\v 15 Mʉsanʉkonapi ña chẽa choojʉ paapʉ chini choo
ñocuhasikʉamʉ chʉʉ mʉsanʉkonare.
\v 16 Choochete rupʉ chookaaʉ chini chẽa paacojñokʉ repaʉ
paakʉte naa cajejaiche paikʉmamʉ. Saocojñosikʉ ũcuachia
repaʉte saosikʉre naa cajejaiche paikʉmamʉ. Ũcuarepaame
jãa. Mʉsanʉkona ũcuajache chʉʉre naa cajejaiche
painamame. Jãajekʉna mʉsanʉkonare chʉʉ choochejache
sãiñechia reojache chookaijʉ paijʉ̃ʉ.
\v 17 Mʉsanʉkonapi chʉʉ ikasiere asa chẽa choojʉ pani
pojojʉ paijanaame.
\p
\v 18 ’Jãatani mʉsanʉkona ũcuanʉkore ikamamʉ chʉʉ. Chʉʉ
chẽasina paiche masimʉ chʉʉ. Dios chʉo tocha jokasie
ijache kʉamʉ:
\q Chʉʉre jame ãu ãikʉji cuache choojamʉ
chʉʉre,
\m chiimʉ. Repa tocha jokasie ũcuarepa tijñejamʉ.
\v 19 Chutaa repa tocha jokasie tijñemarʉmʉna kʉamʉ chʉʉ
mʉsanʉkonare, asa repapi tijñeʉna, “Jesús Dios
Raosikʉamʉ”, chiijʉ cuasaajʉ chini.
\v 20 Pãi chʉʉ saosinare pojona chʉʉre ũcuajache pojome.
Pãi chʉʉre pojona chʉʉ Jakʉre ũcuajache pojome.
Ũcuarepaame jãa —‍chiisikʉamʉ repaʉ Jesús.
\s Repaʉte cuache choojanare Judas jokajachere kʉamʉ Jesús
\r (Mt 26.20-25; Mr 14.17-21; Lc 22.21-23)
\p
\v 21 Jãajañe ika pini Jesús rʉa sʉmavaʉ paiʉ ijache
ikasikʉamʉ:
\p —‍Mʉsanʉkonare jame paikʉ chʉʉni cuache chooajʉ chini
chʉʉre cuhenani jokajamʉ. Ũcuarepaame jãa —‍chiisikʉamʉ
repaʉ.
\p
\v 22 Ikakʉna asa repaʉni vesʉjʉ sãiñechia ñasinaame
chʉkʉna repaʉ neena.
\v 23 Chʉʉ repaʉ neekʉ rʉa chiicojñokʉ repaʉte rʉ̃ʉñe
ñuisikʉamʉ.
\v 24 Ũcuarʉmʉ Simón Pedro chʉʉre Jesure rʉ̃ʉñe
ñuikʉjekʉna repaʉte jokajaʉni sẽniasa kʉaakʉ chini rupʉ
vevosikʉamʉ.
\v 25 Vevoʉna sẽesikʉamʉ chʉʉ Jesure.
\p —‍Chʉkʉnate Paakʉ, ¿kaʉni ikakʉ mʉʉ, mʉʉre cuache
choojanare jokajaʉre? —‍chiisikʉamʉ chʉʉ.
\p
\v 26 Chikʉna ikasikʉamʉ repaʉ.
\p —‍Pãmakarʉte chũsa ĩsijamʉ chʉʉ repaʉte chʉʉre
jokajaʉre —‍chiisikʉamʉ.
\p Chini pãmaka chũsa Simón Iscariote mamakʉni Judani
ĩsisikʉamʉ repaʉ.
\v 27 Pãmakare ĩsiʉna koosirʉmʉ repaʉte vati ai teana
kakaasomʉ. Kakaʉna Jesús repaʉte ikasikʉamʉ.
\p —‍Mʉʉ choojache pesa choojaijʉ̃ʉ —‍chiisikʉamʉ.
\p
\v 28 Jesús repaʉte ikasie ãu ãijʉ ñuina ũcuanʉko
asavesʉsinaame.
\v 29 Asavesʉjʉ ijache cuasaasome teena: “Chʉkʉna chiisie
kuri paakaikʉjekʉna Judare pascua choojamajñarʉã koojaaʉ
chini saocosomʉ Jesús”, chiisinaame. Chekʉna ijache cuasaasome:
“Judapi chʉovana paivanare kurire ĩsiakʉ chini saocosomʉ
Jesús”, chiisinaame.
\p
\v 30 Repaʉ Judas pãmaka koo ãni pini vʉni eta
sanisõsikʉamʉ. Reparʉmʉ ñami paisikʉamʉ.
\s Mama chʉ̃ʉñe jokasiere kʉamʉ
\p
\v 31 Repaʉ Judas etasirʉmʉ Jesús ijache ikasikʉamʉ:
\p —‍Chura chʉʉ Dios Raosikʉ peore Masiʉ paiche ñojamʉ
Dios. Ũcuachia Repaʉ chiichete chʉʉpi jachamañe choo
ñoʉna Repaʉ peore masichete masijanaame pãi.
\v 32 Chʉʉpi Repaʉ peore Masiʉ paichete choo ñoʉna Repaʉ
ũcuajache chʉʉ peore Masiʉ paiche choo ñojamʉ. Chura
ñojamʉ Repaʉ.
\v 33 Asarepajʉ̃ʉ, chʉʉ chĩivana. Mʉsanʉkonare rʉa
jeerʉmʉ jame paimañe joka sanisõjamʉ chʉʉ. Chʉʉpi
sanisõʉna kuejanaame mʉsanʉkona chʉʉre. Jãajekʉna chura
mʉsanʉkonani judíopãi chʉ̃ʉnare ikasiejache ikamʉ chʉʉ:
“Mʉsanʉkonare chʉʉ saicheja saicuamʉ.”
\v 34 Ie mamare chʉ̃ʉ jokamʉ chʉʉ mʉsanʉkonare:
Sãiñechia oijʉ paijʉ̃ʉ. Chʉʉ mʉsanʉkonare oichejache
mʉsanʉkona ũcuajache sãiñechia oijʉ paijʉ̃ʉ.
\v 35 Mʉsanʉkonapi sãiñechia oijʉ paito pãipi ñani
ũcuanʉko, “Jesús neenaame ina”, chiijanaame —‍chiisikʉamʉ
repaʉ Jesús chʉkʉnate.
\s Pedro, “Repaʉte ñamakʉamʉ chʉʉ”, chiijachere kʉamʉ
Jesús
\r (Mt 26.31-35; Mr 14.27-31; Lc 22.31-34)
\p
\v 36 Ũcuarʉmʉ Simón Pedro Jesure sẽesikʉamʉ.
\p —‍Chʉkʉnate Paakʉ, ¿jeechejana saijaʉ mʉʉ?
—‍chiisikʉamʉ.
\p Chikʉna Jesús ikasikʉamʉ.
\p —‍Chʉʉ saicheja saicuamʉ mʉʉre chura. Naa
paisirʉmʉtani saireojamʉ mʉʉre —‍chiisikʉamʉ repaʉ.
\p
\v 37 Chikʉna Pedro ikasikʉamʉ.
\p —‍Chʉkʉnate Paakʉ, ¿jese paiʉna mʉʉname churana
saicuakʉ chʉʉre? Pãipi mʉʉni vanisõñu chiito
chuenisõñejẽe vajʉchʉmañe mʉʉni ʉ̃sechiiʉ chuenisõra
chiimʉ chʉʉ, mʉʉpi chuenisõmaneakʉ chini —‍chiisikʉamʉ
repaʉ.
\p
\v 38 Chikʉna Jesús ikasikʉamʉ.
\p —‍¿Chuenisõkairepajaʉ mʉʉ chʉʉre? Jãajañe
ikasikʉtani chutaa kura chuimatona pãipi sẽejʉna
choteñoã, “Jesure ñamakʉamʉ chʉʉ”, chiijamʉ mʉʉ.
Ũcuarepaame jãa —‍chiisikʉamʉ Jesús.
\c 14
\s Jesure cuasanachia Dios paicheja saijachere kʉamʉ
\p
\v 1 Ũcuarʉmʉ Jesús chʉkʉnate repaʉ neenare ikasikʉamʉ.
\p —‍Sʉmavana paimanejʉ̃ʉ mʉsanʉkona. “Diopi chookaiʉna
vajʉchʉmañe pañu”, chini Repaʉni masi cuasajʉ̃ʉ.
Ũcuajache, “Ikʉ Jesupi chookaiʉna vajʉchʉmañe pañu”,
chini chʉʉni masi cuasajʉ̃ʉ.
\v 2 Chʉʉ Jakʉ paichejare cʉnaʉmʉre vʉña rʉa paimʉ.
Jãajañe peoto kʉaraasikʉamʉ chʉʉ mʉsanʉkonare.
Ũcuachejana saimʉ chʉʉ mʉsanʉkona paijavʉñare carevakasa
chini.
\v 3 Careva pini joe ichejana rani ũcuachejana sajamʉ chʉʉ
mʉsanʉkonare, chʉʉ paichejare jame sani paapʉ chini.
\v 4 Chʉʉ saicheja saimaa masime mʉsanʉkona —‍chiisikʉamʉ
repaʉ.
\p
\v 5 Chikʉna Tomás ikasikʉamʉ.
\p —‍Chʉkʉnate Paakʉ, mʉʉ saichejare vesʉjʉ repacheja
saimaajẽe vesʉme chʉkʉna —‍chiisikʉamʉ.
\p
\v 6 Chikʉna Jesús ikasikʉamʉ.
\p —‍Chʉʉ Jakʉ paicheja saimaajañe paikʉmʉ chʉʉ.
Jãajekʉna chʉʉre cuasanachia Repaʉ paicheja saijanaame.
Jakʉ paiche ũcuarepare kʉakʉmʉ chʉʉ. Chʉʉre cuasanapi
jũnisõsirʉmʉ Dios paicheja ai sani paapʉ chini chʉʉpi
jokaʉna repanachia Repaʉ paicheja ai sani paijanaame.
Chʉʉre cuasamanatani Dios paicheja saimanejanaame.
\v 7 Mʉsanʉkonapi chʉʉ paiche masini Jakʉ paiche
ũcuajache masiraame. Churana Jakʉ paiche masime mʉsanʉkona
chʉʉre ñanajejʉ —‍chiisikʉamʉ repaʉ.
\p
\v 8 Chikʉna Felipe joe ikasikʉamʉ.
\p —‍Chʉkʉnate Paakʉ, mʉjakʉni ñojʉ̃ʉ chʉkʉnate. Ñoru
pojosõjanaame chʉkʉna —‍chiisikʉamʉ.
\p
\v 9 Chikʉna ikasikʉamʉ repaʉ.
\p —‍Felipe, asarepajʉ̃ʉ. ¿Chʉʉre mʉsanʉkonare rʉa jeerʉmʉ
jame paikʉte chʉʉ paiche chutaa vesʉkʉ mʉʉ? Pãi chʉʉ
paiche ñana Jakʉ paiche ũcuajache ñame. Jãatani,
¿jesejekʉna mʉʉ chʉʉre, “Mʉjakʉni ñojʉ̃ʉ
chʉkʉnate”, chiikʉ?
\v 10 Chʉʉname Jakʉ ũcuateeʉjache painaame chʉkʉna.
¿Jãa mʉsanʉkona cuasamañe? Chʉʉ ikache chʉo
chʉʉchia cuasakʉ ikachemamʉ. Jakʉ kʉachechia ikakʉmʉ
chʉʉ. Ũcuachia Repaʉji jame paiʉ chookaiʉna Repaʉchia
choomasichete chookʉmʉ chʉʉ.
\v 11 Chʉʉ ikasie jachamanejʉ̃ʉ mʉsanʉkona, “Chʉʉname
Jakʉ ũcuateeʉjache painaame chʉkʉna”, chiisie.
Mʉsanʉkonapi chʉʉ ikasiere asa jachanijẽe chʉʉpi
Diochia choomasichete chookʉna ñani jachamañe cuasajʉ̃ʉ
mʉsanʉkona.
\v 12 Chʉʉre cuasana chʉʉ Diochia choomasiche choochejache
choojanaame. Ũcuajache chʉʉ sanisõsirʉmʉ chʉʉ
choosiejache naa rʉa vesachete choojanaame repana, chʉʉ
Jakʉ paichejana sakʉna. Ũcuarepaame jãa.
\v 13 Mʉsanʉkonapi chʉʉ Jakʉni sẽejʉ, “Chʉkʉnate Jesús
neenajejʉna chookaijʉ̃ʉ chʉkʉna sẽeñe”, chiijʉ sẽeto
chookaijamʉ chʉʉ, Repaʉ peore Choomasikʉjekʉ
mʉsanʉkonare oiʉ chookaichete pãipi masiajʉ chini.
\v 14 Mʉsanʉkonapi chʉʉni ũcuaʉachete sẽejʉ,
“Chʉkʉnate mʉʉ neenajejʉna chookaijʉ̃ʉ chʉkʉna
sẽeñe”, chiijʉ sẽeto chookaijamʉ chʉʉ mʉsanʉkonare
—‍chiisikʉamʉ repaʉ Jesús.
\s “Dios Rekochote raojamʉ chʉʉ”, chiimʉ Jesús
\p
\v 15 Ũcuarʉmʉ Jesús joe ikasikʉamʉ.
\p —‍Mʉsanʉkonapi chʉʉre chini chʉʉ chʉ̃ʉñe choojʉ
paijanaame.
\v 16-17 Jakʉni sẽekaimʉ chʉʉ mʉsanʉkonare chʉʉ
chookaichejache Chookaijarekochote Repaʉ Rekochote chʉo
ũcuarepa Kʉarekochote raoakʉ chini, raoʉna mʉsanʉkonani
siarʉmʉ jame paiʉ chookaiʉ paaʉ chini. Diore cuasamana Repaʉ
Rekocho choochejẽe vesʉjʉ Reparekocho paichejẽe vesʉme.
Vesʉjʉna Repaʉ Rekocho paacuamʉ repanare. Dios Rekochoji
mʉsanʉkonare jame paiʉ mʉsanʉkona rekoñoãre siarʉmʉ
jame Paijarekocho paiche masijanaame mʉsanʉkona.
\p
\v 18 ’Mʉsanʉkonare chʉvivanarejache jokamanejamʉ chʉʉ.
Jokajamʉ chʉʉ mʉsanʉkonare. Jãatani jmamakarʉ pani joe
rani jame paijamʉ chʉʉ mʉsanʉkonare.
\v 19 Jmamakarʉ paisirʉmʉ Diore cuasamana joe ñamanejanaame
chʉʉre. Mʉsanʉkona chʉʉpi jũnisõsikʉtani joe
vajʉrakʉna ñajanaame. Chʉʉ jũni vajʉraisiejache
mʉsanʉkona ũcuajache chʉʉre cuasana jũnisõsinatani
vajʉrani Dios paicheja ai sani paijanaame.
\v 20 Dios Rekocho mʉsanʉkonare raiumucuse chʉʉname Jakʉ
ũcuateeʉjache paiche masijʉ mʉsanʉkonare chʉʉ jame
paichename chʉʉre mʉsanʉkona jame paiche masijanaame
mʉsanʉkona repaumucuse.
\v 21 Chʉʉ chʉ̃ʉñe asa jachamañe choona chiime chʉʉre.
Chʉʉre chiinare Jakʉ ũcuajache chiimʉ. Chʉʉ ũcuajache
repanare chiiʉ chʉʉ paiche ñojamʉ masiajʉ chini
—‍chiisikʉamʉ repaʉ Jesús.
\p
\v 22 Ũcuarʉmʉ chekʉ Judas, Iscariotemakʉpi, ijache
ikasikʉamʉ:
\p —‍Chʉkʉnate Paakʉ, mʉʉ paiche chʉkʉnatechia ñojamʉ
chiisikʉamʉ. ¿Jese paiʉna chekʉnare pãi ñomanejaʉ?
—‍chiisikʉamʉ repaʉ.
\p
\v 23 Chikʉna Jesús ikasikʉamʉ.
\p —‍Pãi chʉʉre chiina chʉʉ chʉ̃ʉsie asa jachamañe
choojanaame. Chʉʉ Jakʉ repanare chiimʉ. Chʉʉ Jakʉname
rani jame paijanaame chʉkʉna repanare.
\v 24 Chʉʉre cuhenatani chʉʉ chʉ̃ʉñe asa jachajʉ
choomame. Chʉʉchia teeʉ cuasachete ikamamʉ
mʉsanʉkonare. Chʉʉre Raosikʉ Jakʉ kʉachechia ikakʉmʉ
chʉʉ.
\p
\v 25 ’Irʉmʉ mʉsanʉkonare jame pairʉmʉna teana iere peore
ikamʉ chʉʉ.
\v 26 Chʉʉ mʉsanʉkonare chookaisiejache Chookaijarekochote
Repaʉ Rekochote raojamʉ Dios. Raoʉna mʉsanʉkonare Dios chʉo
peore chechojamʉ Reparekocho, mʉsanʉkonapi chʉʉ ikasiere
cavesʉmañe cuasajʉ paapʉ chini.
\p
\v 27 ’Saipirakʉ mʉsanʉkona rekoñoãre pojojʉ paichete
jokamʉ chʉʉ. Chʉʉre cuasamana pojojʉ paichejachemamʉ chʉʉ
jokache. Vajʉchʉmañe paijʉ sʉmavana paimanejʉ̃ʉ
mʉsanʉkona.
\v 28 Chʉʉ ikasie asasinaame mʉsanʉkona, “Saimʉ chʉʉ.
Jãatani joe rani mʉsanʉkonare jame paijamʉ chʉʉ”,
chiisie. Mʉsanʉkonapi chʉʉre chiirepana pani chʉʉre naa
rʉa Masikʉ Jakʉ paicheja chʉʉ saijache asa pojokairaame
mʉsanʉkona.
\v 29 Chutaa chʉʉ saimarʉmʉna jãare kʉamʉ chʉʉ
mʉsanʉkonare, reparʉmʉpi tĩaʉna chʉʉni jachamañe
cuasaajʉ chini.
\p
\v 30 ’Chura jmanʉkorʉ kʉache paamʉ chʉʉ mʉsanʉkonare.
Chura chʉʉre cuasamanare paakʉji vati aipi chʉ̃ʉʉna pãi
raipirame, chʉʉni chẽa sa cuache chooñu chini.
Chʉʉretani paamakʉamʉ repaʉ vati ai.
\v 31 Jakʉ chʉ̃ʉsie peore chookʉmʉ chʉʉ, pãipi ña
Jakʉre chʉʉ chiichete masiajʉ chini. Reomʉ. Jʉna, mʉañu
—‍chiisikʉamʉ repaʉ chʉkʉnate repaʉ neenare.
\c 15
\s Ʉcheñʉname repañʉ ka paichejache paichete kʉamʉ
\p
\v 1 Ũcuarʉmʉ Jesús chʉkʉnate repaʉ neenani chʉvakʉ
ijache ikasikʉamʉ:
\p —‍Ʉcherepañʉ paichejache paikʉmʉ chʉʉ. Chʉʉ
Jakʉtani ʉcheñʉ paakʉjache paikʉmʉ.
\v 2 Jãajekʉna repañʉ kapi ũcuaʉakapi ʉche kʉ̃imato
tʉsesõmʉ Repaʉ repaka. Kʉ̃itotani repañʉ carevakʉjekʉ
repakapi naa rʉa kʉ̃aʉ chini repaka paikarʉãre cuakarʉãre
verisõmʉ.
\v 3 Repañʉ kapi naa rʉa kʉ̃aʉ chini carevakʉ choochejache
Dios mʉsanʉkona chʉʉ chechoche Dios chʉo asa chẽana
rekoñoãre ũcuajache carevamʉ Dios, siarʉmʉ naa reojache
paapʉ chini.
\v 4 Chʉʉni siarʉmʉ cuasajʉ mʉsanʉkona rekoñoã
chʉʉname paijʉ̃ʉ. Chʉʉ mʉsanʉkonare siarʉmʉ cuasakʉ
mʉsanʉkonaname paijamʉ. Ʉche kapi repañʉte sʉimaneni
ʉchechacha kʉ̃imamʉ. Ũcuajache mʉsanʉkonapi chʉʉni
siarʉmʉ cuasajʉ paimaneni reojache paimanejanaame.
\p
\v 5 ’Ʉcheñʉ paichejache paikʉmʉ chʉʉ. Mʉsanʉkona
chʉʉre cuasana repañʉ ka reojache kʉ̃iñejañe painaame.
Mʉsanʉkona rekoñoã chʉʉname pani chʉʉpi mʉsanʉkonani
jame paiʉ chookaiʉna siarʉmʉ naa reojache paijanaame.
Chʉʉpi chookaimato reojache paimanejanaame mʉsanʉkona.
\v 6 Mʉsanʉkona rekoñoã chʉʉname paimaneni ʉche ka
kʉ̃imanesika choocojñoñejañe choocojñojanaame, pãi veri
sẽjo jũkʉna ʉosõñejañe.
\p
\v 7 ’Mʉsanʉkona chʉʉre cuasachete ũhamañe chʉʉname
paijʉ chʉʉ chechochete choojʉ mʉsanʉkonare ʉache
ũcuaʉachete sẽejʉ̃ʉ chʉʉre. Sẽeto ĩsijamʉ chʉʉ.
\v 8 Mʉsanʉkonapi reojache paijʉna chekʉnapi ñani, “Ina
Jesús neena, Diopi chookaiʉna, reojache painaame”, chini
Diore pojojanaame repana.
\v 9 Chʉʉre Jakʉ oichejache mʉsanʉkonare oimʉ chʉʉ. Chʉʉ
oiche cuhemañe mʉsanʉkona rekoñoã chʉʉname paijʉ̃ʉ.
\v 10 Jakʉ chʉ̃ʉñe jachamañe chookʉjekʉ Repaʉ
oicojñokʉmʉ chʉʉ. Mʉsanʉkona ũcuajache chʉʉ
chʉ̃ʉñete asa jachamañe chooni chʉʉ oicojñona
paijanaame.
\p
\v 11 ’Mʉsanʉkonapi chʉʉ pojokʉ paichejache siarʉmʉ pojojʉ
paapʉ chini jãare peore ikamʉ chʉʉ mʉsanʉkonare.
\v 12 Ijache paapʉ chini chʉ̃ʉmʉ chʉʉ mʉsanʉkonare: Chʉʉ
mʉsanʉkonare oichejache sãiñechia oijʉ paijʉ̃ʉ.
\v 13 Pãiʉ repaʉte jame paikʉji repaʉte cuache choochete
ʉ̃sekʉ jũnisõñejẽe cuhemañe chuenisõkʉ repaʉte jame
paikʉte oirepamʉ repaʉ. Oiʉ repaʉ chookaisiejache cheke
joe naa rʉa oiʉ chookaichejẽe peomʉ.
\v 14 Mʉsanʉkonapi chʉʉ chʉ̃ʉñete chooni chʉʉname
paijanaame mʉsanʉkona.
\v 15 “Chʉʉre chooche chookainaame ina”, chiimamʉ chʉʉ
chura mʉsanʉkonare. Chooche chookaina repanare paakʉ chooche
vesʉme, kʉamaʉna. Chʉʉtani, “Chʉʉre jame painaame
ina”, chiimʉ chʉʉ mʉsanʉkonare. Jãajekʉna chʉʉre Jakʉ
ikasie peore kʉasikʉamʉ chʉʉ mʉsanʉkonare.
\v 16 Mʉsanʉkonapi chẽamanesinaame chʉʉre. Chʉʉamʉ
mʉsanʉkonare chẽasikʉ. Chẽa paakʉ iere chʉ̃ʉ jokamʉ chʉʉ:
Siarʉmʉ cuhamañe reojache choojʉ paijʉ̃ʉ, chekʉnapi
ña chẽa chʉʉni cuasaajʉ chini. Jãajañe choojʉ
mʉsanʉkonare ʉachete Dioni sẽeto chookaijamʉ Repaʉ.
\v 17 Ijache paapʉ chini chʉ̃ʉmʉ chʉʉ mʉsanʉkonare:
Sãiñechia oijʉ paijʉ̃ʉ —‍chiisikʉamʉ repaʉ.
\s Pãi Diore cuasamana Jesurejẽe cuhejʉ repaʉ neenare cuheme
\p
\v 18 Ũcuarʉmʉ Jesús joe ikasikʉamʉ.
\p —‍Diore cuasamanapi mʉsanʉkonare cuhejʉna repana chʉʉre
charo cuhesiere cuasajʉ̃ʉ.
\v 19 Mʉsanʉkonapi Diore cuasamana paito chiiraame repana
mʉsanʉkonare repana paichejache painajejʉna. Aperʉmʉ repana
cuasachejache cuasasinaame mʉsanʉkona. Chura chʉʉpi
mʉsanʉkonare chẽa paakʉna repana cuasachejache cuasamame
mʉsanʉkona. Jãajekʉna repana mʉsanʉkonare cuheme.
\v 20 Chʉʉ mʉsanʉkonare ijache ikasie cavesʉmanejʉ̃ʉ,
“Chooche chookaikʉ repaʉ paakʉte naa rʉa paikʉmamʉ”,
chiisiere. Chʉʉre cuhejʉ cuache choona mʉsanʉkonare
ũcuajache cuhejʉ cuache choojanaame. Chʉʉ chʉvache asa
jachamañe choonapi mʉsanʉkona chʉvache ũcuajache asa
jachamañe choojanaame.
\v 21 Chʉʉ neenajejʉna mʉsanʉkonare jãajañe choojanaame
repana chʉʉre Raosikʉ paiche vesʉnajejʉ.
\p
\v 22 ’Chʉʉ repanare rani chʉvamato repana cuache chooche
vesʉraame repana. Jãatani chura chʉʉpi rani chʉvakʉna
asasinajejʉna, “Vesʉjʉ choosinaame chʉkʉna”, chiicuamʉ
repanare.
\v 23 Pãi chʉʉre cuhena chʉʉ Jakʉre ũcuachia cuheme.
\v 24 Chʉʉpi chekʉna pãi choomanesie Diochia choomasichete
rani choo ñomato roiche peoraasikʉamʉ repanare. Jãatani
chʉʉ chooche ñasinatani chʉʉre cuheme repana, chʉʉ
Jakʉre ũcuachia. Jãajekʉna roiche paimʉ repanare
jachasinajejʉna.
\v 25 Aperʉmʉ tocha jokasie Dios chʉo repana choojachere
ijache kʉamʉ:
\q Chʉʉre rupʉ peoche cuheme repana,
\m chiimʉ.
Repa tocha jokasie ũcuare choocuhame repana chʉʉre cuhena.
\p
\v 26 ’Chʉʉpi sẽkʉna Jakʉ mʉsanʉkonare Repaʉ Rekochote
raojamʉ, mʉsanʉkonare chookaiʉ chʉo ũcuarepa
Kʉajarekochote. Raoʉna rani mʉsanʉkonare chʉʉ paichete
kʉajamʉ Reparekocho.
\v 27 Mʉsanʉkona ũcuajache chʉʉ apechechorʉmʉpi
irʉmʉjatʉka chʉʉre jame paijʉ ñanajejʉ chekʉnani kʉajʉ
paijʉ̃ʉ chʉʉ paichete —‍chiisikʉamʉ repaʉ Jesús.
\c 16
\p
\v 1 Ũcuarʉmʉ Jesús joe ikasikʉamʉ.
\p —‍Chʉʉre cuasachete ũhasõmaneajʉ chini mʉsanʉkonare
jãare peore kʉamʉ chʉʉ.
\v 2 Pãi mʉsanʉkonare chʉʉre cuasanajejʉna mai judíopãi
chiivʉña kakache ʉ̃sejanaame. Naa paisirʉmʉ pãiʉ
ũcuaʉakʉji pãiʉte chʉʉre cuasakʉni vanisõni, “Diore
chooche chookaikʉmʉ chʉʉ”, chiiʉ cuasajamʉ.
\v 3 Reparʉmʉ mʉsanʉkonare jãajañe choojana chʉʉrejẽe
Jakʉrejẽe vesʉnajejʉ jãajañe choojanaame repana
mʉsanʉkonare.
\v 4 Jãajekʉna mʉsanʉkonare churana teana peore kʉamʉ chʉʉ
jãa, jãajañe choorʉmʉ tĩaru, “Maire Paakʉ kʉasiepi
tijñecuhamʉ maire”, chiijʉ cuasaajʉ chini —‍chiisikʉamʉ
repaʉ.
\s Dios Rekocho chookaijachere kʉamʉ
\p Ũcuarʉmʉ Jesús joe ikasikʉamʉ.
\p —‍Chʉʉ apechechorʉmʉ mʉsanʉkonani jame paiʉ chutaa
saimaʉ mʉsanʉkonare tijñejañe kʉamanesikʉamʉ chʉʉ.
\v 5 Chura chʉʉre Raosikʉni jame pasa chini coimʉ chʉʉ.
Teeʉjẽe mʉsanʉkona chʉʉre, “¿Jeechejana saikʉ mʉʉ?”,
chiimame.
\v 6 Chʉʉpi mʉsanʉkonani chʉʉ saijachename mʉsanʉkonare
tijñejañe kʉaʉna sʉmamʉ mʉsanʉkonare.
\v 7 Chʉʉ saimato Dios Rekocho mʉsanʉkonare jame paiʉ
Chookaijarekocho raimanejamʉ mʉsanʉkona rekoñoã. Chʉʉpi
sanitani Dios Rekocho raojamʉ. Jãajekʉna chʉʉpi
mʉsanʉkonani joka sanisõru, naa reojamʉ mʉsanʉkonare.
Ũcuarepaame jãa.
\v 8 Dios Rekochoji rani pãi rekoñoãna kʉakʉna repana rekoñoã
cuache paiche cuasa masijanaame repana. Ũcuachia Dios chiiche
rũhiñe paiche Repaʉ Rekochoji kʉakʉna masijanaame repana.
Ũcuachia cuache chooche ũhamana roijache Dios Rekochoji
kʉakʉna masijanaame repana.
\v 9 Dios Rekochoji kʉaʉna, “Jesucristoni cuasamapʉ cuache
choojʉ paime mai”, chiijʉ masijanaame pãi.
\v 10 Chʉʉ Jakʉ paichejana coisõʉna pãi chʉʉre joe
ñamanejanaame. Jãatani Dios Rekochoji kʉaʉna chʉʉ rũhiñe
paiche masijanaame repana.
\v 11 Chʉʉpi icheja cheja painare chʉ̃ʉkʉni vati aini
cajejanisõʉna repaʉ cuache chookʉ paiche peore roijamʉ
repaʉ. Jãa peore masijanaame pãi, Dios Rekochoji kʉaʉna.
\p
\v 12 ’Chʉo naa rʉa ikache paamʉ chʉʉ. Jãatani chura
kʉamamʉ chʉʉ. Churana teana kʉatojẽe asa chẽamaneraame
mʉsanʉkona.
\v 13 Dios Rekochoji chʉo ũcuarepa Kʉarekochoji rani Dios chʉo
ũcuarepare peore karamañe kʉaʉna asa masijanaame mʉsanʉkona.
Jãatani Reparekocho Teerekocho cuasakʉ kʉamanejamʉ.
Asasiechia kʉajamʉ naa paisirʉmʉ tijñejañere.
\v 14 Dios Rekochoji chʉʉ ikachename chʉʉ chooche kʉaʉna
asa chʉʉ Masiʉ paiche masijanaame mʉsanʉkona.
\v 15 Jakʉpi ikaʉna asa joe ũcuare ikamʉ chʉʉ.
Jãajekʉna, “Chʉʉ ikachename chʉʉ chooche Dios Rekochoji
kʉaʉna asa chʉʉ Masiʉ paiche masijanaame mʉsanʉkona”,
chiisikʉamʉ chʉʉ mʉsanʉkonare.
\p
\v 16 ’Jmamakarʉ paisirʉmʉ mʉsanʉkona chʉʉre
ñamanejanaame. Jãatani jmamakarʉ pani joe ñajanaame
mʉsanʉkona chʉʉre. Jakʉ paichejana coimʉ chʉʉ
—‍chiisikʉamʉ repaʉ.
\s Chura sʉmavana paina naa paisirʉmʉ pojojʉ paijanaame
mʉsanʉkona
\p
\v 17 Jãajañe ikaʉna asa chʉkʉna repaʉ neena teena
sãiñechia ijache sẽesinaame:
\p —‍¿Jesere ikakʉ jãʉ maire? “Jmamakarʉ paisirʉmʉ
mʉsanʉkona chʉʉre ñamanejanaame. Jãatani mʉsanʉkona
chʉʉre jmamakarʉ pani joe ñajanaame. Jakʉ paichejana coimʉ
chʉʉ”, chiisikʉamʉ.
\v 18 Repaʉ, “Jmamakarʉ”, chiisie, ¿jese chiikʉ jãa? Repaʉ
ikache asavesʉme mai —‍chiisinaame repana. Asavesʉjʉ repaʉni
sẽniasañu chiinatani sẽemanesinaame.
\p
\v 19 Repaʉte sẽni asañu chiichete masikʉ ikasikʉamʉ
repaʉ.
\p —‍Chʉʉ mʉsanʉkonare, “Jmamakarʉ paisirʉmʉ mʉsanʉkona
chʉʉre ñamanejanaame. Jãatani mʉsanʉkona chʉʉre
jmamakarʉ pani joe ñajanaame”, chiisiere asavesʉjʉ,
¿sãiñechia sẽniasajʉ paiche mʉsanʉkona?
\v 20 Ũcuachia chʉʉre cuache tijñeʉna ña otare oijʉ
sʉmavana paijanaame mʉsanʉkona. Chʉʉre cuasamanatani pojojʉ
paijanaame. Mʉsanʉkona sʉmavana paisinatani naa paisirʉmʉ
pojojʉ paijanaame. Ũcuarepaame jãa.
\v 21 Romio chĩipirani rʉarepa asikʉna oimo, reparʉmʉpi
tĩaʉna. Jãatani repao jñaasirʉmʉ chĩivaʉni pojoko
repaote asisiejẽe cuasamamo.
\v 22 Jãajañe paime mʉsanʉkona. Chura sʉmavana paime.
Jãatani mʉsanʉkonani joe ñara chini raijamʉ chʉʉ.
Reparʉmʉ repao romio pojochejache rʉa pojojanaame mʉsanʉkona.
Pãi teeʉterejẽe ʉ̃secuajamʉ mʉsanʉkona pojoche.
\p
\v 23 ’Reparʉmʉtani mʉsanʉkona chʉʉre jmamakarʉjẽe chʉo
sẽniasamanejanaame. Reparʉmʉ mʉsanʉkonapi chʉʉ Jakʉni,
“Chʉkʉna Jesús neenaame. Chʉkʉna sẽeñe chookaijʉ̃ʉ”,
chiijʉ ũcuaʉachete sẽeto chookaijamʉ Repaʉ. Ũcuarepaame
jãa.
\v 24 Irʉmʉjatʉka mʉsanʉkona, “Chʉkʉna Jesús neenajejʉ
chʉkʉna sẽeñe chookaijʉ̃ʉ”, chiijʉ Diore jmamakarʉjẽe
sẽemanaame. Churatani Jakʉni jãajañe sẽejʉ̃ʉ. Sẽeto
chookaijamʉ Repaʉ, mʉsanʉkonapi pojojʉ paapʉ chini.
Ũcuarepaame jãa —‍chiisikʉamʉ repaʉ.
\s Diore cuhenare Jesucristo naa rʉa masikʉ paichete kʉamʉ
\p
\v 25 Ũcuarʉmʉ Jesús joe ikasikʉamʉ.
\p —‍Mʉsanʉkonare Jakʉ paichete kʉakʉ vesache chʉʉ
cuasacheji kʉasikʉamʉ chʉʉ. Naa paisirʉmʉtani Jakʉ
paiche jãajañe kʉamañe teerũhiñe kʉajamʉ chʉʉ.
\v 26-27 Reparʉmʉ mʉsanʉkonare ʉachete Dioni sẽni, “Jesús
neenaame chʉkʉna. Jãajekʉna chʉkʉna sẽeñe
chookaijʉ̃ʉ”, chiijanaame mʉsanʉkona. Reparʉmʉ
mʉsanʉkonani Jakʉpi oiʉ ũcuare chookasa chiiʉna, “Repana
sẽeñe chookaijʉ̃ʉ”, chiimanejamʉ chʉʉ Jakʉre.
Mʉsanʉkonapi chʉʉni chiijʉ, “Dios Raosikʉamʉ ikʉ”,
chini cuasanajejʉna mʉsanʉkonare oiʉ chookaijamʉ Jakʉ.
\v 28 Jakʉ paicheja paisikʉpi icheja chejana cajesikʉamʉ
chʉʉ. Chura icheja cheja paisikʉpi joka Jakʉ paichejana
coipiramʉ chʉʉ —‍chiisikʉamʉ repaʉ.
\p
\v 29 Chikʉna chʉkʉna repaʉ neena ikasinaame.
\p —‍Churatani mʉʉ aperʉmʉ ikasiejache ikamañe
teerũhiñe ikamʉ mʉʉ, asamasireoche.
\v 30 Peore masikʉmʉ mʉʉ. Masime chʉkʉna chura jãa. Pãi
ũcuanʉko cuasache masikʉmʉ mʉʉ. Jãajekʉna pãi,
“¿Ʉ̃quere mʉsanʉkona chʉʉre sẽñu chiiche?”, chiimakʉamʉ
mʉʉ. Mʉʉpi jãajañe paiʉna, “Dios Raosikʉamʉ ikʉ”,
chiinaame chʉkʉna mʉʉre —‍chiisinaame chʉkʉna.
\p
\v 31 Chitena Jesús ikasikʉamʉ.
\p —‍Chura mʉsanʉkona chʉʉre cuasarepame.
\v 32 Jãatani mʉsanʉkona jmamakarʉ paisirʉmʉ vajʉchʉjʉ
teenachia chʉʉre teeʉte joka mʉsanʉkona vʉñana
coisõjanaame. Teevaʉre joka coisõcojñosivaʉtani
chʉʉni Jakʉpi jame paiʉna teevaʉ paimanejamʉ chʉʉ.
\v 33 Mʉsanʉkonare chʉʉre cuasanajejʉna jãare ikamʉ
chʉʉ, asa reojache pojojʉ paapʉ chini. Diore cuasamana
mʉsanʉkonare cuache choojanaame. Cuache choocojñojanatani
vajʉchʉmañe pojojʉ reojache paijʉ̃ʉ mʉsanʉkona. Diore
cuhenare naa cajejaiche paikʉjekʉ mʉsanʉkonare chookaijamʉ
chʉʉ —‍chiisikʉamʉ repaʉ Jesús.
\c 17
\s Jesús repaʉ neenare Diore sẽekaichete kʉamʉ
\p
\v 1 Jãajañe ikacuha Jesús cʉnaʉmʉre mʉñe ñakʉ ijache
ikasikʉamʉ:
\p —‍Jakʉ, mʉʉ chiisirʉmʉ tĩacuhamʉ. Mʉʉpi chʉʉ
peore Masiʉ paiche pãire choo ñojʉ̃ʉ. Chʉʉ ũcuajache mʉʉ
peore Masiʉ paiche choo ñora.
\v 2 Chʉʉre mʉʉ chĩire pãire ũcuanʉkore chʉ̃ʉakʉ
chini jokasikʉamʉ mʉʉ. Chʉʉpi paakʉ chʉ̃ʉakʉ chini
mʉʉ chẽa jokasinare mʉʉ paicheja sani paichete jokamʉ
chʉʉ.
\v 3 Mʉʉre Diorepaʉte Ũcuateeʉte cuasajʉ chʉʉre mʉʉ
Raosikʉre Jesucristote cuasana mʉʉ paichejare ai sani
paijanaame.
\p
\v 4 ’Mʉʉ, “Chejana sani choojʉ̃ʉ”, chiisiere chʉʉpi
ichejare chejare rani paiʉ choo piniʉna ña mʉʉ peore Masiʉ
paiche masime pãi.
\v 5 Jakʉ, chura chʉʉre chutaa cheja choomarʉmʉpi vʉa
mʉʉname paiʉ chʉʉ aperʉmʉ chʉ̃ʉsiejachere joe
jokajʉ̃ʉ chʉʉre, ũcuajache chʉʉpi joe chʉ̃ʉkʉ paaʉ
chini.
\p
\v 6 ’Pãi mʉʉre cuasamanesinapi chura mʉʉni cuasajʉna
chʉʉni chẽa jokasikʉamʉ mʉʉ, chʉʉpi paaakʉ chini. Mʉʉ
paichete kʉasikʉamʉ chʉʉ repanare, asa masiajʉ chini. Mʉʉ
neenaame repana. Chʉʉpi paaakʉ chini chʉʉni jokasikʉamʉ
mʉʉ repanare. Mʉʉ chʉ̃ʉñe asa jachamañe choome repana.
\v 7 Chʉʉ chechochename chʉʉ paiche peore mʉʉ
jokasieame. Chura masime repana jãa.
\v 8 Mʉʉ chʉʉre kʉasie chʉʉpi kʉaʉna asa chẽasinaame
repana. Jãajekʉna chʉʉre, “Dios paicheja raisikʉamʉ
ikʉ. Dios Raorepasikʉamʉ”, chiijʉ masime repana.
\p
\v 9 ’Mʉʉni sẽekaimʉ chʉʉ repanare. Mʉʉre
cuasamanaretani sẽekaimamʉ chʉʉ. Chʉʉpi paaakʉ chini mʉʉ
chẽa jokasinarechia sẽekaimʉ chʉʉ, mʉʉ neenajejʉna.
\v 10 Chʉʉ neenare ũcuanʉkore jame paakʉmʉ mʉʉ. Chʉʉ
ũcuajache mʉʉ neenare ũcuanʉkore jame paakʉmʉ. Repanapi
reojache paijʉna ñani, “Inare Paakʉ Jesucristo peore
masikʉmʉ”, chiijanaame pãi.
\p
\v 11 ’Icheja cheja naa jeerʉmʉ paimanejamʉ chʉʉ. Mʉʉ
paichejana coipiracuhamʉ chʉʉ. Repanatani saimairo ichejare
chejare paijʉ paijanaame. Jakʉ, reokʉmʉ mʉʉ. Repanare mʉʉ
chʉʉre jokasinare mʉʉpi peore Masikʉji kuirajʉ̃ʉ, mai
ũcuateeʉ paichejache repanapi ũcuateeʉjache paapʉ chini.
\v 12 Mʉʉpi chookaiʉna chʉʉ neenani jame paiʉ kuirakʉ
paikʉmʉ chʉʉ, mʉʉre cuasachete ũhasõ choosõmaneajʉ
chini. Jãatani choosõjaʉ teeʉ paimʉ. Repaʉ chookʉ
choosõjañere kʉañu chini Dios chʉo kʉana tocha jokasiepi
ũcuarepa tijñejamʉ repaʉte. Chekʉnaretani teeʉterejẽe
choosõmanesikʉamʉ chʉʉ.
\p
\v 13 ’Chura mʉʉ paichejana saipiramʉ chʉʉ. Jãatani
chutaa ichejare chejare paiʉ chʉʉ neenani iere peore ikamʉ
chʉʉ, repanapi chʉʉ pojokʉ paichejache cuhamañe pojojʉ
paapʉ chini.
\v 14 Mʉʉ chʉʉre kʉasie chʉo kʉasikʉamʉ chʉʉ
repanare. Mʉʉre cuasamana cuasachejache cuasamakʉamʉ
chʉʉ. Chʉʉ neena ũcuajache repana cuasachejache
cuasamanaame. Jãajekʉna mʉʉre cuasamana cuheme repanare.
\v 15 Mʉʉpi repanani tĩichejana saakʉ chini sẽemamʉ
chʉʉ. Rupʉ mʉʉpi vati repanare cuache choora chiichete
ʉ̃seakʉ chini sẽekaimʉ chʉʉ repanare.
\v 16 Mʉʉre cuasamana cuasachejache cuasamakʉamʉ chʉʉ. Chʉʉ
neena ũcuajache repana cuasachejache cuasamanaame.
\v 17 Mʉʉ chʉo ũcuarepaame. Repanare chechojʉ̃ʉ
repachʉo, asa chẽa mʉʉ chʉ̃ʉñete choojʉ reojache paapʉ
chini.
\v 18 Mʉʉ chʉʉre icheja raosiejache chʉʉ repanare mʉʉ
chʉore siachejña kuijʉ chʉvajʉ paapʉ chini saojamʉ.
\v 19 Chʉʉ neenapi ña chẽa chʉʉ choochejache mʉʉ
chʉ̃ʉñete choojʉ paapʉ chini mʉʉ chʉ̃ʉñechia
chookʉmʉ chʉʉ.
\p
\v 20 ’Repanarechia sẽekaimamʉ chʉʉ. Repanapi chʉvajʉna
asa chẽa chʉʉre cuasajanare ũcuachia sẽekaimʉ chʉʉ.
\v 21 Mʉʉname chʉʉ ũcuateeʉjache painaame mai. Jakʉ,
mʉʉni sẽemʉ chʉʉ, chʉʉ neenapi mai ũcuateeʉ
paichejache ũcuateeʉjache paapʉ chini, ũcuachia mainame
siarʉmʉ ũcuateeʉjache paapʉ chini. Jãajañe paijʉna
repana reojache paichete ñani mʉʉre cuasamana, “Jesús
inare paakʉ Dios Raosikʉamʉ”, chiijanaame. Jãajañere
chiimʉ chʉʉ.
\v 22 Mʉʉ chʉʉre ĩsisiejache chʉʉ neenare jokamʉ
chʉʉ, repanapi mai ũcuateeʉ paichejache ũcuateeʉjache
paapʉ chini.
\v 23 Repanare jame paikʉmʉ chʉʉ. Mʉʉ ũcuajache
chʉʉre jame paikʉmʉ. Pãipi mʉʉre cuasamanapi repanapi
ũcuateeʉjache paijʉna ña, “Jesús Dios Raosikʉamʉ; Repaʉ
Mamakʉte oichejache oimʉ Dios inare”, chiijʉ masiajʉ chini.
\p
\v 24 ’Jakʉ, mʉʉ chʉʉre paaakʉ chini jokasinare chʉʉ
sani paijachejare mʉʉ paichejare sani jame paapʉ chiimʉ
chʉʉ, chʉʉ Masiʉ paichete ñajʉ paapʉ chini. Mʉʉ
chʉʉre chutaa cheja choomarʉmʉpi vʉa oikʉjekʉ chʉʉni
Masiʉ paiche jokasikʉamʉ.
\v 25 Jakʉ, reokʉmʉ mʉʉ. Mʉʉre cuasamana mʉʉ paiche
vesʉme. Chʉʉtani masimʉ. Chʉʉ neena ũcuajache mʉʉ
chʉʉre raosie masime.
\v 26 Mʉʉ paiche kʉasikʉamʉ chʉʉ repanare. Ũcua
cuhamañe kʉakʉ paijamʉ chʉʉ, repanapi mʉʉ chʉʉre
oichejache sãiñechia oijʉ paapʉ chini. Repana rekoñoãre
jame paijamʉ chʉʉ —‍chiisikʉamʉ repaʉ.
\c 18
\s Jesure chẽasiere kʉamʉ
\r (Mt 26.47-56; Mr 14.43-50; Lc 22.47-53)
\p
\v 1 Jesús Diore sẽni pinisirʉmʉ chʉkʉna repaʉ neena
ũcuaʉname eta sani Cedrón chiaracharʉ chekʉkãkona
jẽesinaame. Jẽni sani olivo sũkiñʉã paichejana
tĩasinaame chʉkʉna.
\v 2 Aperʉmʉ chʉkʉna Jesuname siarʉmʉ chiisichejajekʉna
Judas masisikʉamʉ repacheja, pãipi cuache chooajʉ chini
Jesure jokajaʉ.
\v 3 Jãajekʉna Judapi saʉna Jesuni chẽajaapʉ chini phairipãi
chʉ̃ʉna fariseopãiname Dios vʉe pẽjekainani chʉ̃ʉasome.
Chʉ̃ʉrena Jesús paichejana Dios vʉe pẽjekainaname
sõtaopãi Judapi rakʉna vaichename ʉoñoãname ʉopʉã rajʉ
raisinaame.
\v 4 Ũcuarʉmʉ Jesús repaʉte tijñejañe peore masikʉjekʉ
repanare eta tijña sẽesikʉamʉ.
\p —‍¿Neeni kueche mʉsanʉkona? —‍chiisikʉamʉ repaʉ.
\p
\v 5 Chikʉna ikasinaame repana.
\p —‍Nazaret vʉejoopo cakʉni Jesuni kueme chʉkʉna
—‍chiisinaame.
\p Chitena ikasikʉamʉ repaʉ.
\p —‍Ũcuaʉmʉ chʉʉ —‍chiisikʉamʉ.
\p Repaʉ Judas Jesure cuache chooajʉ chini rasikʉ
ũcuananame paisikʉamʉ.
\v 6 Jesupi, “Ũcuaʉmʉ chʉʉ”, chikʉna asa teana choje
coiche tãisinaame repana.
\v 7 Choje coiche tãijʉna repanare joe ikasikʉamʉ repaʉ.
\p —‍¿Neeni kueche mʉsanʉkona? —‍chiisikʉamʉ.
\p Chikʉna joe ikasinaame repana.
\p —‍Nazaret vʉejoopo cakʉni Jesuni kueme chʉkʉna
—‍chiisinaame repana.
\p
\v 8 Chitena Jesús joe ikasikʉamʉ.
\p —‍“Ũcuaʉmʉ”, chinicuhasikʉamʉ chʉʉ mʉsanʉkonare.
Chʉʉre kueni inare chʉʉ neenaretani chẽamanejʉ̃ʉ, sani
paapʉ —‍chiisikʉamʉ repaʉ.
\p
\v 9 Aperʉmʉ Jesús Pʉkakʉni sẽeʉ ijache ikasikʉamʉ:
“Jakʉ, chʉʉpi paakʉ chʉ̃ʉakʉ chini mʉʉ chʉʉre
jokasinare teeʉterejẽe choosõmanesikʉamʉ chʉʉ”,
chiisikʉamʉ. Jãajekʉna aperʉmʉ repaʉ ikasiepi ũcuarepa
tijñeakʉ chini, “Inare chekʉnaretani chẽamanejʉ̃ʉ sani
paapʉ”, chiisikʉamʉ repaʉ.
\v 10 Ũcuarʉmʉ Simón Pedro vati paakʉjekʉ ruta judío phairi
aire chooche chookaikʉ Malcote cãjoro ʉjajʉ̃tʉ cakãko
paicãjorote tẽo vatosikʉamʉ.
\v 11 Tẽoʉna Jesús repaʉte Pedrote ikasikʉamʉ.
\p —‍Repavati joe jʉojʉ̃ʉ. Ina chʉʉre cuache choojache
Jakʉ jokasieame. Jakʉ jokasie cuhemamʉ chʉʉ
—‍chiisikʉamʉ repaʉ.
\s Jesure vẽe Anás vʉena sasiere kʉamʉ
\p
\v 12 Ũcuarʉmʉ repana sõtaopãi repanare chʉ̃ʉkʉname
judíopãi chʉ̃ʉna chẽa vẽesinaame repaʉte Jesure.
\v 13 Chẽa vẽe repaʉte charo Anás vʉena sasinaame repana.
Reparʉmʉ Caifás Anás mamakoni paasikʉamʉ. Repaʉ Caifás
repaʉ̃sʉrʉmʉ judío phairi ai paisikʉamʉ.
\v 14 Aperʉmʉ repaʉ Caifás judíopãi chʉ̃ʉnare ijache
chʉvaasomʉ: “Maipi Jesús choochete ʉ̃semapʉ jainʉko
chuenisõto cuamʉ. Pãi ũcuanʉko chuenisõmaneajʉ chini
chookʉchia ũcuateeʉ chuenisõto naa reomʉ”, chiniasomʉ.
\s Pedro, “Jesús neekʉmamʉ chʉʉ”, chiisiere kʉamʉ
\r (Mt 26.69-70; Mr 14.66-68; Lc 22.55-57)
\p
\v 15 Jesuni sasõjʉna chʉkʉna repaʉ neena Simón Pedroname chʉʉ
chojepi tuhasinaame repanare. Tuha judío phairi ai vʉe sanavʉ
cararipʉna cuaajʉna jame kakasikʉamʉ chʉʉ phairi ai
masicojñokʉjekʉ.
\v 16 Pedrotani kakamañe jatisaaro kueñena canʉkasikʉamʉ.
Ũcuarʉmʉ chʉʉ Jesús neekʉ joe eta repavʉe
choomajñarʉã chookaio jatisaaro ñakaikoni sẽeʉna vataona
Pedrote cuaosikʉamʉ chʉʉ.
\v 17 Jãajañe vata cuaoko ña ikasikoamo repao Pedrote.
\p —‍¿Jesús neekʉmakʉ mʉʉ? —‍chiisikoamo repao.
\p Chiiona ikasikʉamʉ repaʉ.
\p —‍Pãamʉ. Jãʉ neekʉmamʉ chʉʉ —‍chiiʉ joresikʉamʉ
repaʉ.
\p
\v 18 Reparʉmʉ rʉa sʉsʉkʉna toa suha rũhisokoro nʉkajʉ
kũhisinaame repavʉe chooche chookainaname Dios vʉe
pẽjekaina. Ũcuajache Pedro repanare jame nʉkakʉ
kũhisikʉamʉ.
\s Phairi ai Jesure chʉo sẽesiere kʉamʉ
\r (Mt 26.59-66; Mr 14.55-64; Lc 22.66-71)
\p
\v 19 Ũcuarʉmʉ judío phairi ai Jesure repaʉ chechochename
repaʉ neena paiche sẽesikʉamʉ.
\v 20 Sẽeʉna Jesús ikasikʉamʉ.
\p —‍Pãi ũcuanʉko asajʉte judíopãi chiivʉñana kaka
chechosikʉamʉ chʉʉ. Chekʉrʉmʉ Dios vʉena kaka
chechosikʉamʉ, repana judíopãi siarʉmʉ chiivʉñana.
Ropee chechomanesikʉamʉ chʉʉ.
\v 21 Chʉʉre sẽemanejʉ̃ʉ. Chʉʉ ikache asasinani
sẽniasajʉ̃ʉ. Chʉʉ ikasie masime repana —‍chiisikʉamʉ
repaʉ.
\p
\v 22 Jesupi jãajañe ikaʉna Dios vʉe pẽjekaikʉ pãi
chẽakʉ kueñere nʉkakʉ Jesure chiana vaiʉ ijache ikasikʉamʉ:
\p —‍¿Jese paiʉna mʉʉ ikʉre phairi aire jãajañe ikakʉ?
—‍chiisikʉamʉ.
\p
\v 23 Chikʉna Jesús ikasikʉamʉ.
\p —‍¿Ʉ̃quere chʉʉ cuache ikare? Chʉʉ cuache ikasie
paito kʉajʉ̃ʉ. Jãatani, ¿jese cuasakʉ mʉʉ chʉʉre
cuache ikamanesikʉre vaikʉ? —‍chiisikʉamʉ repaʉ.
\p
\v 24 Chikʉna Anás repaʉte Jesure vẽesie chutaa josemakʉni
judío phairi ai Caifás vʉena mʉvaajʉ chini
chʉ̃ʉsikʉamʉ.
\s Pedro joe, “Jesús neekʉmamʉ chʉʉ”, chiisiere kʉamʉ
\r (Mt 26.71-75; Mr 14.69-72; Lc 22.58-62)
\p
\v 25 Ũcuarʉmʉ Pedrote nʉkakʉ kũhikʉni ijache sẽesinaame
repana:
\p —‍¿Jesús neekʉmakʉ mʉʉ? —‍chiisinaame.
\p Chiijʉna Pedro jachakʉ,
\p —‍Pãamʉ. Jãʉ neekʉmamʉ chʉʉ —‍chiisikʉamʉ.
\p
\v 26 Jãapi phairi aire chooche chookaikʉji cãjoro tẽo
vatocojñosikʉ majapãiʉji ikasikʉamʉ Pedrote.
\p —‍Mʉʉre olivo sũkiñʉã paichejana Jesuname paikʉni
ñasikʉamʉ chʉʉ —‍chiisikʉamʉ.
\p
\v 27 Chikʉna Pedro joe jachasikʉamʉ. Jachatona kura
chuisikʉamʉ.
\s Pilato tijñeñe Jesure nʉko chʉo sẽesiere kʉamʉ
\r (Mt 27.1-2, 11-14; Mr 15.1-5; Lc 23.1-5)
\p
\v 28 Ũcuarʉmʉ judíopãi chʉ̃ʉna ñatapiratona Jesure
Caifás vʉe paisikʉre Romapãi chʉ̃ʉkʉ Pilato vʉena
mʉvasinaame. Mʉva tĩa judío peona vʉejekʉna cuare cuhejʉ
kakamanesinaame repana pascua ãijañere ãure ãñu chini. Aperʉmʉ
repana aipãipi pascua tĩapirarʉmʉ judío peona vʉña kakache
ʉ̃seasome. Jãajekʉna repanapi ũcuavʉena kakaru pascua ãiñe
ãu ãicuaraamʉ, repanapi cuare paajʉna.
\v 29 Jãajekʉna Pilato repanare vesena eta ikasikʉamʉ.
\p —‍¿Ʉ̃quere cuache chooʉna mʉsanʉkona ikʉre rare?
—‍chiisikʉamʉ repaʉ.
\p
\v 30 Chikʉna ikasinaame repana.
\p —‍Chʉkʉna ikʉre cuache choomanesikʉ paito
ramaneraasinaame —‍chiisinaame repana.
\p
\v 31 Chitena Pilato ikasikʉamʉ.
\p —‍Ikʉre mʉsanʉkonapi sa mʉsanʉkona aipãi chʉ̃ʉ
jokasiepi cuache choojʉ̃ʉ —‍chiisikʉamʉ.
\p Chikʉna ikasinaame repana.
\p —‍Chʉkʉna judíopãi pãiʉte teeʉterejẽe vanisõñe
jokacojñomanesinajejʉna cuache choonare vanisõñu chiitojẽe
vaicuakʉmʉ —‍chiisinaame.
\p
\v 32 Jãajañe choojʉna Jesús ikasie repaʉ,
“Kurususẽvero jẽjo vẽasõjanaame chʉʉre”, chiisie
tijñepirasikʉamʉ.
\v 33 Pilato joe kaka Jesure soni rao ikaasomʉ.
\p —‍¿Mʉʉ judíopãi ũcuanʉkore chʉ̃ʉkʉʉ? —‍chiniasomʉ.
\p
\v 34 Chikʉna Jesús ikaasomʉ.
\p —‍¿Mʉʉ teeʉ cuasachete sẽekʉ mʉʉ chʉʉre? Rupʉ
chekʉnapi kʉajʉna asasiere, ¿jãajañe sẽekʉ mʉʉ
chʉʉre? —‍chiniasomʉ repaʉ.
\p
\v 35 Chikʉna Pilato ikaasomʉ.
\p —‍Judíopãiʉmamʉ chʉʉ. Mʉʉ majapãi judíopãipi judío
phairipãi chʉ̃ʉnaname rasinaame mʉʉre. ¿Ʉ̃quere mʉʉ
chooʉ? —‍chiniasomʉ repaʉ.
\p
\v 36 Chikʉna Jesús ikaasomʉ.
\p —‍Pãi chʉ̃ʉkʉtani icheja canare chʉ̃ʉmakʉamʉ
chʉʉ. Chʉʉpi icheja canare chʉ̃ʉkʉ paito chʉʉ neenapi
chʉʉre sa judíopãi chʉ̃ʉnani jokamaneajʉ chini ʉ̃sejʉ
cavajʉ vairaasinaame. Icheja canare chʉ̃ʉkʉmamʉ chʉʉ
—‍chiniasomʉ repaʉ.
\p
\v 37 Chikʉna Pilato sẽniasomʉ repaʉte.
\p —‍¿Jãa paito mʉʉ pãi chʉ̃ʉkʉʉ? —‍chiniasomʉ.
\p Chikʉna Jesús ikaasomʉ.
\p —‍Jʉ̃jʉ, mʉʉ ikache ũcuarepaame. Pãi chʉ̃ʉkʉmʉ
chʉʉ. Cʉnaʉmʉ paisikʉpi icheja chejana pãio
jñaacojñosikʉamʉ chʉʉ Dios paichete chʉo ũcuarepare
kʉara chini. Dios paiche masiñu chiinachia chʉʉ kʉache
ũcuarepa jachamañe asa chẽame —‍chiniasomʉ repaʉ.
\p
\v 38 Chikʉna Pilato joe ikaasomʉ.
\p —‍¿Ʉ̃queache jãa, chʉo ũcuarepa kʉache? —‍chiniasomʉ
repaʉ.
\s Pãi Jesure vanisõñe chʉ̃ʉsiere kʉamʉ
\r (Mt 27.15-31; Mr 15.6-20; Lc 23.13-25)
\p Repaʉte sẽni pini Pilato joe eta ikasikʉamʉ repanare
judíopãi chʉ̃ʉnare.
\p —‍Ikʉre repaʉ cuache choosiere kʉakʉna asara chini chʉo
sẽniasasikʉamʉ chʉʉ. Jãatani chʉʉ cuasato
jmamakarʉjẽe repaʉ cuache choosie peomʉ. Mʉsanʉkona,
“Cuache chookʉmʉ ikʉ”, chiiche choomakʉamʉ.
\v 39 Pascuarʉmʉ tĩato ʉ̃sʉrʉmʉ paiche chẽacojñosikʉre
teeʉte etokʉmʉ chʉʉ, mʉsanʉkona etojʉ̃ʉ chiikʉni.
¿Ikʉni judíopãi chʉ̃ʉkʉni etojʉ̃ʉ chiiche mʉsanʉkona?
—‍chiisikʉamʉ repaʉ.
\p
\v 40 Chikʉna asa ũcuanʉko cuijʉ ikasinaame repana.
\p —‍Etomanejʉ̃ʉ jãʉre. Barrabani etokaijʉ̃ʉ chʉkʉnate
—‍chiijʉ cuisinaame repana.
\p Repaʉ Barrabás ñaaʉ paniasomʉ.
\c 19
\p
\v 1 Repanapi jãajañe ikajʉ cuirena Pilato Jesuni sa suĩsueajʉ chini chʉ̃ʉasomʉ. Chʉ̃ʉʉna sõtaopãipi sa suĩsueasome repaʉte.
\v 2 Ũcuachia miu tuhivʉ choo Jesús sĩjopʉna tʉo kãa pãi chʉ̃ʉna juikãare chimaajakãare sachaasome repaʉte.
\v 3 Sacha pini repaʉte rʉarepañoã kueñe raijʉ ijache ikaasome repana:
\p —‍¡Ikʉpi judíopãire siarʉmʉ chʉ̃ʉkʉ paaʉ! —‍chiijʉ repaʉ chiana vaniasome repana.
\p
\v 4 Jãajañe choorena Pilato repanare pãi joe eta ikasikʉamʉ.
\p —‍Asarepajʉ̃ʉ, mʉsanʉkona. Eto ñojamʉ chʉʉ repaʉte. Chʉʉ cuasato cuache choomakʉamʉ repaʉ —‍chiisikʉamʉ repaʉ.
\p
\v 5 Ũcuarʉmʉ Jesupi sĩjopʉte miu tuhivʉ tuhiʉ kãa chimaajakãare juiʉ etaʉna ijache ikasikʉamʉ Pilato:
\p —‍¡Ñajʉ̃ʉ! Ikʉamʉ repaʉ —‍chiisikʉamʉ. \fig thornes on Jesus|cn01828B.tif|span||D.C.Cook| |Jn 19.5\fig*
\p
\v 6 Chikʉna phairipãi chʉ̃ʉnaname Dios vʉe pẽjekaina repaʉte Jesure ña cuijʉ ikasinaame.
\p —‍Kurususẽverona jẽjo nʉkojʉ̃ʉ jãʉre. Kurususẽverona jẽjo nʉkojʉ̃ʉ —‍chiisinaame repana.
\p Chitena Pilato ikasikʉamʉ.
\p —‍Chʉʉ cuasato cuache choomanesikʉamʉ ikʉ. Jãajekʉna ikʉre vanisõñe chʉ̃ʉcuhemʉ chʉʉ. Mʉsanʉkonapi sa kurususẽverona jẽjo nʉkojʉ̃ʉ ikʉre —‍chiisikʉamʉ repaʉ.
\p
\v 7 Chikʉna judíopãi chʉ̃ʉna ikasinaame.
\p —‍“Dios Mamakʉmʉ chʉʉ”, chiiʉ jorekʉmʉ ikʉ. Chʉkʉna aipãi jãajañe ikajʉ jorenare, “Vanisõjʉ̃ʉ”, chiijʉ chʉ̃ʉ jokaasome. Jãajekʉna repana chʉ̃ʉ jokasie vanisõñe paimʉ ikʉre —‍chiisinaame repana.
\p
\v 8 Jãajañe ikachete asa Pilato naa rʉa vajʉchʉasomʉ.
\v 9 Ũcuarʉmʉ repaʉ joe vʉena Jesure cuaa sẽniasomʉ.
\p —‍¿Jeecheja cakʉaʉ mʉʉ? —‍chiniasomʉ repaʉ.
\p Sẽekʉtetani Jesús ikamaneasomʉ.
\p
\v 10 Ikamaʉna Pilato joe ikaasomʉ.
\p —‍¿Chʉʉ sẽeñe kʉamanejaʉ mʉʉ? Pãi chʉ̃ʉkʉjekʉna chʉʉre ʉache chʉ̃ʉreomʉ chʉʉre, mʉʉre kurususẽverona jẽjo nʉkochename jose etoche. ¿Jãa vesʉkʉ mʉʉ? —‍chiniasomʉ repaʉ.
\p
\v 11 Chikʉna Jesús ikaasomʉ.
\p —‍Mʉʉni Diopi pãi chʉ̃ʉñe jokamaneru chʉʉre jãajañe choojache chʉ̃ʉcuaraamʉ mʉʉre. Chʉʉre chẽaajʉ chini sa jokasikʉ mʉʉre naa rʉa cuache choosikʉamʉ —‍chiniasomʉ repaʉ.
\p
\v 12 Jãajañe ikaʉna asa Pilato repaʉni jose etora chini joe eta rʉa ikasikʉamʉ repanare pãi. Ikakʉtetani repana judíopãi cuijʉ ikasinaame.
\p —‍“Pãi chʉ̃ʉkʉmʉ chʉʉ”, chiinapi maire ũcuanʉkore chʉ̃ʉkʉte Césate cuheme. Jãajekʉna mʉʉpi jãʉni ũcuare jãajañe ikasikʉni jose etoni repaʉte maire ũcuanʉkore chʉ̃ʉkʉte jame paikʉmamʉ mʉʉ —‍chiisinaame.
\p
\v 13 Repana ikache asa pini Pilato Jesure vesena etojʉ̃ʉ chini pãi cuache choosie kʉajʉna asakʉ ñuisaivʉna pʉʉsikʉamʉ. (Repasaivʉ rʉ̃iraripʉ “Gabata” chiimʉ hebreo chʉo. “Gabata” chini “Cata jenasiraripʉ” chiimʉ.)
\v 14 Pascuarʉmʉ tĩañe teeumucuse karatona nʉkarepaʉ sʉitona judíopãi chʉ̃ʉnare ikasikʉamʉ Pilato.
\p —‍¡Ñajʉ̃ʉ ikʉre, mʉsanʉkonare ũcuanʉkore chʉ̃ʉkʉte! —‍chiisikʉamʉ repaʉ.
\p
\v 15 Chikʉna cuijʉ ikasinaame repana.
\p —‍Sa vanisõjʉ̃ʉ jãʉre. Sa vanisõjʉ̃ʉ jãʉre. Kurususẽverona jẽjo nʉkojʉ̃ʉ jãʉre —‍chiisinaame repana.
\p Chitena ikasikʉamʉ repaʉ.
\p —‍¿Mʉsanʉkonare chʉ̃ʉkʉte kurususẽverona jẽjo nʉko vẽasõjʉ̃ʉ chiiche mʉsanʉkona? —‍chiisikʉamʉ.
\p Chikʉna judío phairipãi chʉ̃ʉna ikasinaame.
\p —‍Césachiaamʉ pãi ũcuanʉkore chʉ̃ʉkʉ —‍chiisinaame.
\p
\v 16 Chitena Pilato Jesure sõtaopãire jokasikʉamʉ, sa kurususẽverona jẽjo nʉkoajʉ chini. Jokaʉna repaʉte sasõsinaame repana.
\s Jesure kurususẽverona jẽjosiere kʉamʉ
\r (Mt 27.32-44; Mr 15.21-32; Lc 23.26-43)
\p
\v 17 Sajʉna Jesús repaʉte jẽjo nʉkojasẽvero kurususẽvero kuãiʉ Calavera aikũtina Pãi sĩjopʉjakũti chiikũtina saisikʉamʉ. “Calavera” chini “Gólgota” chiimʉ hebreo chʉo.
\v 18 Ũcuachejana repana Jesure kurususẽverona jẽjo nʉkosinaame. Chekʉnare ũcuajache kachanare kurususẽveroãna jẽjo nʉkosinaame repana. Teeʉte Jesús ʉjajʉ̃tʉ cakãkona nʉkosinaame repana. Chekʉni kãkojʉ̃tʉ cakãkona nʉkosinaame. Jesure repana chenevʉna nʉkosinaame.
\v 19 Ũcuarʉmʉ Pilatoji chʉ̃ʉʉna tochasikoa kurususẽvero chãtirona jẽjo sʉosinaame repana, \sc Ikʉ Jesus, Nazaret Vʉejoopo Cakʉamʉ. Judiopãi Chʉ̃ʉkʉmʉ\sc*, chiiche tochasikoare.
\v 20 Pilatoji chʉ̃ʉʉna hebreo chʉo, griego chʉo, latín chʉo tochasinaame repakoa. Repacheja Jesure kurususẽvero jẽjo nʉkosicheja Jerusalén vʉejoopo kueñe paisikʉamʉ. Jãajekʉna judíopãi jainʉko rani repakoa tochasie ñasinaame.
\v 21 Judío phairipãi chʉ̃ʉna repakoa tochasiere ña ikasinaame Pilatote.
\p —‍Jãa, “Judíopãi chʉ̃ʉkʉmʉ ikʉ”, chiijʉ tochasie tʉnosõ, “ ‘Judíopãi chʉ̃ʉkʉmʉ chʉʉ’, chiisikʉamʉ ikʉ”, chiiche tocha sʉojʉ̃ʉ —‍chiisinaame repana.
\p
\v 22 Chitena Pilato ikasikʉamʉ.
\p —‍Chʉʉpi chʉ̃ʉʉna tochasieame jãa. ¡Ũcua jãajañe paaʉ! —‍chiisikʉamʉ repaʉ.
\p
\v 23 Repana sõtaopãi Jesure kurususẽverona jẽjo nʉko pini repaʉ juisikãa mini ũcuakachapana teeserechia chere paasinaame. Chekʉkãa tʉ̃osikãa repakãapi juhasiepi peokʉna teeʉjakãajekʉna sãiñechia ijache ikasinaame repana:
\p
\v 24 —‍Ikãa cheresõmaneñu mai. Rupʉ ikãa paajaʉni catarakarʉã tochasirakarʉãpi chejana sua jñaañu —‍chiisinaame repana.
\p Jãajañe choojʉ Dios chʉo kʉakaisina tocha jokasie kʉachete ũcuarepa choosinaame repana sõtaopãi, ijache kʉachete:
\q Chʉʉ juisikãa teeserechia chere paasinaame repana.
\q Chekʉkãa tʉ̃osikãa paajaʉni jñaañu chini catarakarʉã mami tochasirakarʉãpi chejana suasinaame repana,
\m chiimʉ repa tocha jokasie.
\p
\v 25 Jesús jẽjo sʉocojñosikʉ nʉkasẽvero kueñere romi ũcuakachapana nʉkasinaame, repaʉ pʉkakoname repao chojeo, cheko María Cleofas rʉ̃joname María Magdalena.
\v 26 Nʉkajʉna chʉʉ Jesús neekʉ repaʉ rʉa chiicojñokʉ repaʉ pʉkakore kueñe nʉkasikʉamʉ. Nʉkakʉna ña Jesús repaʉ pʉkakore ikasikʉamʉ.
\p —‍Jako, mʉʉ chĩijaiʉ paijamʉ ikʉ —‍chiisikʉamʉ repaʉ chʉʉre.
\v 27 Chini chʉʉre ũcuajache ikasikʉamʉ repaʉ—‍ Mʉjakojaio paijamo iko —‍chiisikʉamʉ repaʉ.
\p Jãajañe ikaʉna asa jãarʉmʉpi teana repaote chʉʉ vʉena sa kuirasikʉamʉ chʉʉ.
\s Jesús jũisiere kʉamʉ
\r (Mt 27.45-56; Mr 15.33-41; Lc 23.44-49)
\p
\v 28 Jãajañe ika pini, “Jakʉ chʉ̃ʉ jokasie peore choo pinicuhasieame”, chini cuasakʉ ijache ikasikʉamʉ:
\p —‍Okoʉamʉ chʉʉre —‍chiisikʉamʉ repaʉ.
\p Jãajañe ikakʉ Dios chʉo aperʉmʉ kʉasina tocha jokasie kʉachete ũcuarepa choosikʉamʉ repaʉ.
\p
\v 29 Ũcuachejare chururapʉrʉ ʉche cono rʉaraka timusirapʉrʉ ñuisikʉamʉ. Repana sõtaopãi ũcuarakana chʉisʉovʉji chũsa chʉ̃ʉ hisopo vãsocho chãtirona repasʉorʉ quẽo sʉo mʉo repaʉ chʉopona nosinaame chʉchʉakʉ chini.
\v 30 Mʉorena chʉchʉ ũku pini ijache ikasikʉamʉ repaʉ:
\p —‍Peore choo pinicuhasieame —‍chini meñe sime jũnisõsikʉamʉ repaʉ.
\s Cʉnarʉji Jesús mejupona sõtao totasiere kʉamʉ
\p
\v 31 Pʉaumucuse chutaa tĩamarʉmʉjekʉna repana judíopãi, “Maipi kurususẽveroã jẽjocojñosinani casomato cuamʉ. Chero pascuarʉmʉ naa rʉa fiesta chooumucuseame. Jãajekʉna maipi repana cũare tʉka jʉchesõñu naa nami jũnisõrena nami caso reoakʉ”, chini repana Pilatoni sani ikaasome jãajañe choochete chʉ̃ʉakʉ chini.
\v 32 Ũcuarʉmʉ repana sõtaopãi Pilatoji chʉ̃ʉʉna rani Jesure jame jẽjo nʉkocojñosikʉre charo nʉkakʉni repaʉ cũa tʉka jʉchesinaame. Chekʉre ũcuajache choosinaame repana.
\v 33 Choo pini Jesure ñasinaame. “Ikʉtani jũnisõsikʉamʉ”, chini repaʉ cũa tʉka jʉchemanesinaame.
\p
\v 34 Jãatani sõtao teeʉ cʉnarʉji Jesús mejupona totasikʉamʉ. Totaʉna chiename oko raisikʉamʉ repaʉ totasicoje.
\v 35 Jãajañe chooche ñasikʉjekʉ joremañe ũcuarepare chʉo kʉamʉ chʉʉ, mʉsanʉkonapi ña, “Jesús Dios Mamakʉmʉ”, chini repaʉni cuasaajʉ chini.
\v 36 Repaʉ cũare tʉka jʉchemanerena Dios chʉo aperʉmʉ kʉakaisina tocha jokasie ũcuarepa tijñesikʉamʉ.
\q Repaʉ tara teetarapʉjẽe jʉchʉmanejamʉ,
\m chiimʉ repa tocha jokasie.
\v 37 Dios chʉo tochasiphʉro chekʉcheja ijache kʉamʉ:
\q Repana totasikʉre ñajanaame pãi,
\m chiimʉ.
\s Jesure tãsiere kʉamʉ
\r (Mt 27.57-61; Mr 15.42-47; Lc 23.50-56)
\p
\v 38 Jãa choo pinisirʉmʉ José Arimatea vʉejoopo cakʉ Jesure jũisikʉre Pilatoni sẽniasomʉ sa tãra chini. (Repaʉ José judíopãire vajʉchʉkʉ Jesure ñomañe chiikʉ paniasomʉ.) Sẽeʉna Pilatoji, “Jaʉ”, chikʉna sani Jesure caso saasomʉ repaʉ.
\v 39 Saʉna Nicodemo Jesure ñamipi mʉa cutusikʉ jame saiʉ maña jũisivanare roveche mirraname áloe jamesie treinta kilos saasomʉ.
\v 40 Sa kãana reajakãana mañapi chʉ̃ʉ Jesure reaasome repana Josename Nicodemo. Jũisinare judíopãi choocheme jãa.
\v 41 Jesure kurususẽvero jẽjo nʉkosichejare oterañʉrʉã paicheja paisikʉamʉ. Ũcuachejare mamacoje chutaa jũisikʉre teeʉterejẽe tãmacoje paisikʉamʉ, aikũti caripana tẽtoche ũhisicoje.
\v 42 Reparʉmʉ judíopãi pʉaumucuse tĩacuhakʉna repacojepi kueñe paiʉna ũcuacojena cuaa ũhaasome repaʉte Jesure. Ũha eta repacoje kakasaaro catapʉji rʉa ʉjapʉji tapi vʉena coiasome repana.
\c 20
\s Jesús vajʉraisiere kʉamʉ
\r (Mt 28.1-10; Mr 16.1-8; Lc 24.1-12)
\p
\v 1 Romicorʉmʉ apeñatato rʉa ñami chutaa chijajʉ̃vana María Magdalena Jesure ũhasicojena saniasomo. Sani ñato catapʉ repacoje tapisipʉ kʉñosõsipʉ paniasomʉ.
\v 2 Ña vʉvʉsõ Simonname chʉʉ Jesús neekʉ repaʉ rʉa chiicojñokʉ paichejana rani kʉasikoamo repao.
\p —‍Maire Paakʉte pãi mini etua sasõsinaame. Repaʉte sa ũhasicheja vesʉme mai —‍chiisikoamo repao.
\p
\v 3 Chikona asa chʉʉ Pedroname eta ũcuacojena saisinaame.
\v 4 Vʉvʉjʉ saisinaame chʉkʉna Jesús neena. Jãatani chʉʉ Pedrote naa charo vʉvʉ tĩasikʉamʉ repacoje.
\v 5 Vʉvʉ tĩa repacoje sanavʉ rʉ̃a ñato Jesure reasikãñachia ũhisikʉamʉ. Rʉ̃a ñakʉtani chʉʉ kakamanesikʉamʉ.
\v 6 Naa chojepi vʉvʉ tĩasikʉamʉ Simón Pedro repacoje. Ũcuajache repakãña kaka ñasikʉamʉ repaʉ.
\v 7 Ũcuachia Jesús sĩjopʉ reasikãa tĩichejana pʉse ũhasikãare ñaasomʉ repaʉ.
\v 8 Ũcuarʉmʉ chʉʉ charo vʉvʉ tĩasikʉ repacoje ũcuajache kaka ña, “¡Vajʉranicuhacosomʉ repaʉ!”, chini cuasasikʉamʉ.
\v 9 Reparʉmʉ Dios chʉo aperʉmʉ tocha jokasie repaʉ vajʉraijache kʉache asanatani chutaa asavesʉsinaame chʉkʉna.
\v 10 Ña pini vʉena coisinaame chʉkʉna.
\s María Magdalenani Jesús peosichejapi rani ñosiere kʉamʉ
\r (Mr 16.9-11)
\p
\v 11-12 María Magdalenatani chʉkʉnate tuhasiko coimanesikoamo. Coimañe paio repacoje kueñere nʉkako oniasomo repao. Oio repacoje sanavʉ rʉ̃a ñato Jesús ũhisichejare ángeles teekachapana pojakãña juinapi ñuniasome. Jesús sĩjopʉ caruru paisichejare chekʉ ñuniasomʉ. Chekʉtani Jesús cũa caruru paisichejare ñuniasomʉ.
\v 13 Ũcuarʉmʉ ángeles repaote sẽniasome.
\p —‍¿Jese paiʉna oiko mʉʉ? —‍chiniasome repana.
\p Chitena ikaasomo.
\p —‍Chʉkʉnate Paakʉte pãipi sasõsinaame. Repaʉte sa ũhasichejajẽe vesʉmo chʉʉ —‍chiniasomo repao.
\p
\v 14 Jãajañe ikacuha chʉriko Jesure ũcuacheja nʉkakʉni ñaasomo repao. Ñakotani ñavesʉasomo repao repaʉte.
\v 15 Vesʉkona ikaasomʉ Jesús repaote.
\p —‍¿Jese paiʉna oiko mʉʉ? ¿Neeni kueko mʉʉ? —‍chiniasomʉ repaʉ.
\p Chikʉna, “Oterañʉrʉã kuirakʉcosomʉ ikʉ”, chini cuasako ikaasomo repao.
\p —‍Mʉʉpi sasikʉ pani kʉajʉ̃ʉ chʉʉre repaʉte sa ũhasicheja. Miijani rara chiimo chʉʉ —‍chiniasomo repao.
\p
\v 16 Chikona Jesús ikaasomʉ.
\p —‍¡María! —‍chiniasomʉ.
\p Chikʉna asa chʉri hebreo chʉopi ikaasomo repao.
\p —‍\it ¡Rabuni!\it* —‍chiniasomo. (“Rabuni” chini “Masiʉ” chiimʉ hebreo chʉo.)
\p
\v 17 Jãajañe ikaona ikaasomʉ Jesús.
\p —‍Chẽamanejʉ̃ʉ chʉʉre. Jakʉ paicheja chutaa coimakʉamʉ chʉʉ. Jãajekʉna chẽamanejʉ̃ʉ chʉʉre. Jãatani chʉʉ neenare chʉʉ chojechĩijañe painare coi ijache kʉakaijʉ̃ʉ: “Jesús, ‘Chʉʉ Jakʉ Dios paichejana coimʉ chʉʉ. Repaʉ chʉʉ Jakʉ ũcuachia Mʉjakʉamʉ. Chʉʉre paakʉmʉ Repaʉ. Ũcuachia mʉsanʉkonare Paakʉmʉ Repaʉ’, chiisikʉamʉ”, chiijʉ̃ʉ repanare —‍chiniasomʉ repaʉ.
\p
\v 18 Chikʉna repao María Magdalena rani chʉkʉnate repaʉ neenare repaʉte ñasiename repaʉ ikasie kʉasikoamo.
\s Jesús repaʉ neenare peosichejapi rani ñosiere kʉamʉ
\r (Mt 28.16-20; Mr 16.14-18; Lc 24.36-49)
\p
\v 19 Ũcuaumucuse romicorʉmʉ naitona chʉkʉna Jesús neena judíopãi chʉ̃ʉnani vajʉchʉjʉ jatisañaroã peore masi jeo tachesõ chii paisinaame. Jãajañe chii painani Jesús chʉkʉna chenevʉte peosichejapi rani nʉkakʉ ijache ikasikʉamʉ:
\p —‍Reojache paijʉ̃ʉ mʉsanʉkona —‍chiisikʉamʉ.
\p
\v 20 Chini repaʉ jʉ̃jñaname mejupo totasicoje ñosikʉamʉ repaʉ chʉkʉnate. Ñokʉna ña, “Maire Paakʉmʉ ikʉ”, chini pojosinaame chʉkʉna.
\v 21 Ũcuarʉmʉ repaʉ joe ũcuare ikasikʉamʉ.
\p —‍Reojache paijʉ̃ʉ mʉsanʉkona. Repaʉ chʉ̃ʉñe chooakʉ chini Jakʉ chʉʉre raosiejache mʉsanʉkonare saomʉ chʉʉ —‍chiisikʉamʉ repaʉ.
\p
\v 22 Chini chʉkʉnani jujukʉ ijache ikasikʉamʉ:
\p —‍¡Dios Rekochoji mʉsanʉkona rekoñoãre jame paaʉ!
\v 23 Cuache chooche ũhasõsinare pãi, “Mʉsanʉkona cuache choosie tʉnosõsieame”, chiireomʉ mʉsanʉkonare. Chiito tʉnorepasieame repa. Jãatani cuache chooche ũhamanaretani, “Mʉsanʉkona cuache chooche tʉnomañeame”, chiireomʉ mʉsanʉkonare, tʉnomañejekʉna —‍chiisikʉamʉ repaʉ.
\s Jesure vajʉraisikʉre Tomás ñasiere kʉamʉ
\p
\v 24 Reparʉmʉ chʉkʉnate Jesús neenare docerepanare jame paikʉ, “Gemelo”, chiicojñokʉ Tomás peosikʉamʉ, Jesús chʉkʉnate peosichejapi rani ñorʉmʉ.
\v 25 Peosikʉjekʉna repaʉte ijache kʉasinaame chʉkʉna:
\p —‍Maire Paakʉte ñasinaame chʉkʉna —‍chiisinaame chʉkʉna repaʉte.
\p Chitena Tomás jachakʉ ijache ikasikʉamʉ:
\p —‍Repaʉ jʉ̃jña jẽjosicojña ña chʉʉ mʉoñoji cuacha ñanite ũcuachia repaʉ mejupo totasicoje chʉʉ jʉ̃tʉpi suãni ñanite mʉsanʉkona ikache cuasajamʉ chʉʉ —‍chiisikʉamʉ repaʉ.
\p
\v 26 Teesemana paisirʉmʉna joe ũcuavʉena chiisinaame chʉkʉna. Reparʉmʉtani Tomás jame paisikʉamʉ. Chii paijʉ jatisañaroã masi jeo tachesõsisañaroãtani Jesús chʉkʉna chenevʉte peosichejapi rani nʉkakʉ ijache ikasikʉamʉ:
\p —‍Reojache paijʉ̃ʉ mʉsanʉkona —‍chiisikʉamʉ.
\p
\v 27 Chini repaʉte Tomare ikasikʉamʉ.
\p —‍Chʉʉ jʉ̃jña jẽjosicojñana mʉʉ mʉoñoji cuacha ñajʉ̃ʉ. Ũcuachia chʉʉ mejupo totacojñosicoje mʉʉ jʉ̃tʉpi suãni ña jachamañe cuasajʉ̃ʉ chʉʉre. Ũcuaʉmʉ chʉʉ —‍chiisikʉamʉ repaʉ. \fig Jesus appears to disciples in upper room|cn01865B.tif|span||D.C.Cook| |Jn 20.27\fig*
\p
\v 28 Chikʉna ikasikʉamʉ repaʉ.
\p —‍Dioamʉ mʉʉ. Chʉʉre Paakʉmʉ —‍chiisikʉamʉ repaʉ.
\p
\v 29 Chikʉna ikasikʉamʉ repaʉ.
\p —‍Chura chʉʉre ñasikʉjekʉ jachamañe cuasamʉ mʉʉ. Jãatani chʉʉre ñamanapi cuasana mʉʉre naa rʉa pojojʉ paijanaame —‍chiisikʉamʉ repaʉ.
\s Pãipi ña, “Jesús Dios Mamakʉmʉ”, chiijʉ cuasaajʉ chini Juan iphʉro tocha jokasiere kʉamʉ
\p
\v 30 Repaʉ Jesús cheja pairʉmʉ chʉkʉna repaʉ neena ñajʉte Diochia choomasiche rʉa choo ñosikʉamʉ. Jãatani repa chʉkʉna ñasie peore kʉakʉ tocha jokamamʉ chʉʉ iphʉro.
\v 31 Ie iphʉro tochasie peore mʉsanʉkonapi ña, “Jesucristo Dios Raosikʉamʉ. Ũcuaʉ Mamakʉmʉ repaʉ”, chini cuasa, repaʉni cuasajʉ reojache paijʉ jũnisõsirʉmʉ Dios paichejare ai sani paapʉ chini tocha jokamʉ chʉʉ.
\c 21
\s Repaʉ neenare sieterepanare Jesús peosichejapi rani ñosiere
kʉamʉ
\p
\v 1 Jãajañe choosirʉmʉ chʉkʉna Jesús neena naa paijʉ
Tiberias chiara rʉtʉvate paijʉna Jesús joe peosichejapi
ñosikʉamʉ chʉkʉnate aperʉmʉ choosiejache. Ijache
choosikʉamʉ repaʉ:
\v 2 Repacheja Simón Pedromʉ, “Gemelo” chiikʉ Tomaamʉ,
Galilea cheja cajoopo Caná vʉejoopo cakʉ Natanaelamʉ,
chʉkʉna Zebedeo chĩi teekachapana achʉname paisikʉamʉ
chʉʉ. Ũcuachia chekʉna teekachapana chʉkʉnate jame
paisinaame Jesús neena.
\v 3 Ũcuarʉmʉ Simón Pedro chʉkʉnate ikasikʉamʉ.
\p —‍Vai saimʉ chʉʉ —‍chiisikʉamʉ.
\p Chiiʉna chʉkʉna,
\p —‍Jame sañu —‍chiisinaame.
\p Chini choovʉ caje tuni jame vai saisinaame chʉkʉna. Sani
siañami chonatani teevaʉrejẽe vaire chomanesinaame
chʉkʉna.
\v 4 Ñatapiratona repaʉ Jesús chiara rʉtʉvate peosichejapi
rani nʉkasikʉamʉ. Jãatani chʉkʉna repaʉ neena repaʉte
ñavesʉsinaame.
\v 5 Ũcuarʉmʉ Jesús chʉkʉnate ikasikʉamʉ.
\p —‍Põsʉpãi, ¿vai chomanere? —‍chiisikʉamʉ.
\p Chikʉna chʉkʉna ikasinaame.
\p —‍Pãasinaame chʉkʉna —‍chiisinaame.
\p
\v 6 Chitena ikasikʉamʉ repaʉ.
\p —‍Vai chorʉ choovʉ ʉjajʉ̃tʉ cakãkona sua rʉoru vai
kakajanaame —‍chiisikʉamʉ repaʉ.
\p Chikʉna repaʉ chʉ̃ʉñe choojʉ jairepanʉkore vaire
chorena vai chorʉ miicuasikʉamʉ chʉkʉnate.
\v 7 Ũcuarʉmʉ chʉʉ Jesús rʉa chiicojñokʉji ikasikʉamʉ
Pedrote.
\p —‍Maire Paakʉmʉ jãʉ —‍chiisikʉamʉ chʉʉ.
\p Jãajañe ikaʉna asa Simón Pedro Jesuni ñara chini sẽsevʉ
juikãa repaʉ tĩtosikãa mini sacha chiarana sʉa tuãni runi
chuasikʉamʉ.
\v 8 Chʉkʉnatani repaʉ neena canʉka choovʉji vai chorʉji
vaipi timusõrena chiachaji vavo rajʉ paisinaame. Chʉkʉna
raisicheja cien metros paisikʉamʉ chiara joopo.
\v 9 Rani rʉtʉvana jʉo mani toa ñasinaame chʉkʉna.
Ũcuatoare chiacha vainame pã paisikʉamʉ.
\v 10 Ũcuarʉmʉ Jesús chʉkʉnate ikasikʉamʉ.
\p —‍Vai mʉsanʉkona chosivanare teevanare rajʉ̃ʉ
—‍chiisikʉamʉ.
\p
\v 11 Chikʉna joe Simón Pedro choovʉna caje tuni vai chorʉ
ciento cincuenta y trerepana vai ʉjanachia timusirʉre jñajñu
ma ũhasikʉamʉ. Vai jainʉko pairʉtani cheremanesikʉamʉ
reparʉ.
\v 12 Jãajañe choo piniʉna Jesús ikasikʉamʉ
chʉkʉnate.
\p —‍Rani ãijʉ̃ʉ ãu —‍chiisikʉamʉ.
\p Chʉkʉna repaʉ neena teeʉjẽe, “¿Jeejaiʉʉ mʉʉ?”,
chiimanesinaame, repaʉni ña masijʉ. “Chʉkʉnate Paakʉmʉ
ikʉ”, chini cuasasinaame.
\v 13 Ũcuarʉmʉ Jesús chʉkʉnate pãname vai mini
ãusikʉamʉ.
\p
\v 14 Repaʉ Jesús vajʉrani paiʉ chʉkʉnate repaʉ neenare
peosichejapi rani ñosie chura choteñoãame.
\s Simón Pedroname Jesús cutusiere kʉamʉ
\p
\v 15 Ãu ãni pinisirʉmʉ Jesús Simón Pedrote sẽesikʉamʉ.
\p —‍Simón, Juan mamakʉ, ina chiime chʉʉre. Jãatani, ¿mʉʉ
chʉʉre naa rʉa chiimakʉ? —‍chiisikʉamʉ.
\p Chiiʉna Pedro ikasikʉamʉ.
\p —‍Jʉ̃jʉ, Chʉʉre Paakʉ, mʉʉre rʉa chiimʉ chʉʉ. Masimʉ
mʉʉ jãa —‍chiisikʉamʉ repaʉ.
\p Chikʉna Jesús ikasikʉamʉ.
\p —‍Jãajañe paito ovejachĩivanare kuirachejache kuirakaijʉ̃ʉ
mʉʉ chʉʉ neenare —‍chiisikʉamʉ repaʉ.
\p
\v 16 Chini repaʉte joe sẽesikʉamʉ repaʉ.
\p —‍Simón, Juan mamakʉ, ¿chʉʉre chiikʉ mʉʉ?
—‍chiisikʉamʉ.
\p Chiiʉna ikasikʉamʉ repaʉ.
\p —‍Jʉ̃jʉ, Chʉʉre Paakʉ, mʉʉre chiimʉ chʉʉ. Masimʉ mʉʉ
jãa —‍chiisikʉamʉ repaʉ.
\p Chiiʉna Jesús ikasikʉamʉ.
\p —‍Ovejavanare kuirachejache kuirakaijʉ̃ʉ chʉʉ neenare
—‍chiisikʉamʉ.
\p
\v 17 Joe ũcuateere sẽesikʉamʉ Jesús repaʉte.
\p —‍Simón, Juan mamakʉ, ¿chʉʉre chiikʉ mʉʉ?
—‍chiisikʉamʉ.
\p Jesupi ũcuateere choteñoã, “¿Chʉʉre chiikʉ mʉʉ?”,
chiiʉna Simón Pedro sʉmaʉna ikasikʉamʉ.
\p —‍Chʉʉre Paakʉ, peore masikʉmʉ mʉʉ. Chʉʉ mʉʉre
chiiche masimʉ mʉʉ —‍chiisikʉamʉ.
\p Chikʉna ikasikʉamʉ repaʉ.
\p —‍Jãajañe paito mʉʉpi ovejavanare kuirachejache
kuirakaijʉ̃ʉ chʉʉ neenare.
\v 18 Ijachere ikamʉ chʉʉ mʉʉre: Mʉʉ aperʉmʉ põsʉʉ
pairʉmʉ kãña sache mʉʉre ʉachejña kuisikʉamʉ mʉʉ.
Jãatani naa paisirʉmʉ mʉʉ aivaʉ paitona chekʉpi mʉʉ
jʉ̃jña saʉʉna vẽe mʉʉre saiʉamachejñana sajamʉ mʉʉre.
Ũcuarepaame jãa —‍chiisikʉamʉ repaʉ.
\p
\v 19 Jãajañe ikacheji Jesús Simón Pedro Dios chʉore
chʉvakʉ chuenisõʉna pãi Diore cuasajachere kʉasikʉamʉ,
ũcuaʉji asa masiakʉ chini. Jãajañe chiimʉ Dios.
\p Ũcuarʉmʉ Jesús Simón Pedrote joe ikasikʉamʉ.
\p —‍¡Chʉʉ chʉ̃ʉñete chookʉ paijʉ̃ʉ!
—‍chiisikʉamʉ.
\s Jesús repaʉ neekʉ rʉa chiicojñokʉ paichete kʉamʉ
\p
\v 20 Ũcuarʉmʉ chʉʉ, Jesús neekʉ repaʉ rʉa chiicojñokʉji
repanani chojepi tuhakʉna Pedro chʉri ñasikʉamʉ chʉʉre,
aperʉmʉ pascua ãu ãirʉmʉ Jesuni kueñe ñuiʉ repaʉte
jokajaʉni, sẽesikʉni.
\v 21 Ũcuarʉmʉ Pedro chʉʉni ña Jesure sẽesikʉamʉ.
\p —‍Chʉkʉnate Paakʉ, ikʉrejẽe, ¿jese tijñejaʉ?
—‍chiisikʉamʉ.
\p
\v 22 Chikʉna Jesús ikasikʉamʉ.
\p —‍Chʉʉ cheja joe cajerʉmʉjatʉka jũnisõmañe paichete
chʉ̃ʉ jokaʉato jokareomʉ chʉʉre ikʉre. Mʉʉtani ikʉ
paijache cuasamañe chʉʉ chʉ̃ʉñete chookʉ paijʉ̃ʉ
—‍chiisikʉamʉ repaʉ.
\p
\v 23 Jesupi jãajañe ikaʉna asa chekʉna repaʉ neena
asavesʉjʉ sãiñechia ijache cutuasome: “Repaʉ Juan
jũnisõmañe ai paijaʉasomʉ”, chiniasome. Jãatani repaʉ
Jesús, “Jũnisõmañe ai paijamʉ ikʉ”, chiimanesikʉamʉ
chʉʉre Juanre. Rupʉ, “Chʉʉ cheja joe cajerʉmʉjatʉka
jũnisõmañe paichete ikʉre chʉʉni jokaʉato
jokareomʉ”, chiisikʉamʉ Jesús chʉʉre Juanre.
\p
\v 24 Chʉʉ Jesús neekʉ paichete ikasinaame repana. Chʉʉ
ũcuaʉji ie chʉo reparʉmʉ choosiere iphʉrona tochamʉ. Chʉʉ
kʉache chʉo ũcuarepaame. Masime mai jãa.
\v 25 Chekʉmajñarʉã Jesús rʉa siache choosikʉamʉ.
Iphʉro tochamamʉ chʉʉ repa. Repaʉ choosiere peore tocharu
chekʉrʉmʉ repaʉ choosie kʉaphʉroã timusõraacosomʉ cheja.
Jãajañe cuasamʉ chʉʉ. Ũcuamakarʉ tochamʉ chʉʉ Juan.