\id COL
\h COLOSENSES
\toc1 San Pablo Colosas vʉejoopo painare chʉo tocha saosieame
\toc3 (Col)
\mt San Pablo Colosas vʉejoopo painare chʉo tocha saosieame
\c 1
\s Chʉo saosieame
\p
\v 1-2 Chʉʉ, Pablo, Diopi chiiʉna Jesucristo saosikʉpi ijaova utijaova mai majapãiʉjaiʉ Timoteoname tocha saomʉ mʉsanʉkonare, Colosas vʉejoopo painare, reojache paijʉ Cristote chooche masi chookainajejʉ chʉkʉna majapãijanare. Mai Jakʉ Diopi mʉsanʉkona rekoñoãna reojache paichete chookaiʉna reojache paijʉ̃ʉ.
\s Jesure cuasanare Pablo Diore sẽekaichete kʉamʉ
\p
\v 3 Chʉkʉna mʉsanʉkonani sẽekaijʉ Maire Paakʉ Jesucristo Pʉkakʉre Diore siarʉmʉ, “Reorepamʉ, Jakʉ”, chiijʉ paime.
\v 4 Mʉsanʉkona Jesucristoni masi cuasajʉ chekʉnare Dios neenare ũcuanʉkore oijʉ reojache chookaijʉ paiche asasinaame chʉkʉna.
\v 5 Ũcuachia Jesucristote cuasache kʉachʉo ũcuarepare mʉsanʉkona apeasarʉmʉpi vʉa, Repaʉ paicheja sani reojache paijachere cuasajʉ pojojʉ chaajʉ paijʉasome mʉsanʉkona. Mʉsanʉkona pãi oichename Diore cuasachete asa, “Reorepamʉ, Jakʉ”, chiijʉ paime chʉkʉna Repaʉte Diore.
\v 6 Pãipi Jesucristote cuasache kʉachʉore chʉvajʉna cheja siacheja paina pãi asa chẽa naa jainʉko Jesuni cuasajʉ jovo reojache paime chura. Mʉsanʉkona repachʉo ũcuarepa Dios pãire oiʉ chookaiche kʉachʉo asa chẽa Repaʉte cuasajʉ jovorʉmʉpi vʉa paichejache reojache paime repana.
\v 7 Chʉkʉnaname Cristote chooche masi chookaikʉji chʉkʉna cuasakʉ Epafrapi chechoasomʉ jãa mʉsanʉkonare.
\v 8 Ũcuachia Dios Rekochoji chookaiʉna mʉsanʉkona chekʉnare oijʉ reojache chookaijʉ paichete ra kʉasikʉamʉ repaʉ Epafras chʉkʉnate.
\p
\v 9 Jãajekʉna chʉkʉna mʉsanʉkona reojache paiche asaumucusepi vʉa cuhamañe Dioni sẽekaijʉ paime, mʉsanʉkonapi Repaʉ chʉore naa rʉa asa chẽajʉ Repaʉ chiichete peore masijʉ, reojache paimasiajʉ chini.
\v 10 Jãajañe pani Maire Paakʉ neena paiche paijʉ Repaʉ chiichete siarʉmʉ choojʉ chekʉnani siache reojache chookaijʉ Ũcuaʉname naa reojache paijanaame mʉsanʉkona, Repaʉ paichete naa rʉa masijʉ.
\v 11 Ũcuachia Repaʉte Peore Masiʉji Reokʉte sẽekaime chʉkʉna mʉsanʉkonapi reojache choo koka paaajʉ chini. Ũcuachia mʉsanʉkonapi paimasijʉ cuache tijñetojẽe jʉvomasijʉ, “Pani etajaiche cuasomañeame ie”, chiimañe ũcua pojojʉ reojache paapʉ chini sẽekaime chʉkʉna.
\v 12 Jãajañe pani mʉsanʉkona mai Jakʉ Diore pojojʉ, “Reorepamʉ, Jakʉ”, chiijʉ paijanaame. Mʉsanʉkonare rekoñoã reojarekoñoã carevakaisikʉamʉ Repaʉ, Repaʉ neenare ĩsijachere Repaʉ paichejana sani kooajʉ chini.
\v 13 Mai vati chẽa paacojñonajejʉ cuache paijʉ chijachejajache paisinare tʉa Dios Repaʉ Mamakʉni Repaʉ rʉa cuasakʉni maini jokasikʉamʉ, maipi Ũcuaʉ chʉ̃ʉñete choojʉ paapʉ chini.
\v 14 Chura Dios mai cuache choosie joe cuasamamʉ, Cristo jũni roikaisiejekʉna.
\s Cristo jũni roikaisiejekʉna Dioname reojache paireochete kʉamʉ
\p
\v 15 Repaʉ Cristo Dios Ñomakʉjaiʉ maire Ñosikʉ chareparo cakʉamʉ. Chekʉna vajʉvana ũcuanʉko choje choocojñosivanaame.
\v 16 Diopi chʉ̃ʉʉna Repaʉ Cristo peore chooasomʉ. Chejaname cʉnaʉmʉ, repachejña paichename repachejña painare, ñoñename ñomañe, ñonaname ñomanare, pãi chʉ̃ʉnaname ángeles chʉ̃ʉnaname vati chʉ̃ʉnare ũcuanʉkore chooasomʉ Repaʉ naa paisirʉmʉ repana ũcuanʉko Repaʉte ña pojoajʉ chini.
\v 17 Cheke peore chutaa paimarʉmʉ Paikʉjekʉ peore Paakʉ chʉ̃ʉkʉmʉ Cristo, reojache paaʉ chini.
\v 18 Pãiʉ repaʉ canivʉte paachejache Repaʉte cuasakuanupʉte paamʉ Repaʉ. Repaʉji chooʉna painaame mai. Ũcuachia peore chʉ̃ʉkʉ pasa chini charo jũni vajʉraisikʉasomʉ Repaʉ.
\v 19 Repaʉ Cristo Diopi chiiʉna Ũcuaʉjaiʉjekʉ Repaʉ paiche peore ũcuajache paikʉmʉ.
\v 20 Jãajañe Paikʉte chejana raoasomʉ Repaʉ, Repaʉji kurususẽverona jẽjocojño chie rao mai ũcuanʉko choochete cuare jũni roikakʉna maini ũcuanʉkore Ũcuaʉname reojache paireoakʉ chini, cheja painaname cʉnaʉmʉ painare.
\p
\v 21 Aperʉmʉ mʉsanʉkona cuache choonajejʉ rekoñoãpi Repaʉni cuhejʉ Repaʉ paacojñomana paisinaame.
\v 22 Jãatani irʉmʉ Jesucristo pãi canivʉ paakʉ maire jũni roikaisiejekʉna Dioname reojache paireomʉ maire. Maipi Repaʉ chiiche reojachechia choojʉ rekoñoã cuachejẽe peojʉ Repaʉname paijʉ Repaʉ neerepana paapʉ chini jãajañe chookaniasomʉ Repaʉ.
\v 23 Jãajañe pañu chini Jesure cuasache cuhasomañe ũcua cuasajʉ paijʉ̃ʉ. Ũcuachia mʉsanʉkona asa chẽa cuasache Jesucristote cuasache kʉachʉo kʉache Repaʉ reojache ĩsijache pojojʉ chaache ũhasomanejʉ̃ʉ. Repa chʉo chʉʉ Pablo chekʉnaname siachejña kuiʉ chʉvakʉ paikʉmʉ.
\s Diopi jokaʉna Pablo Jesure cuasakuanupʉte chookaiʉ paisiere kʉamʉ
\p
\v 24 Chura mʉsanʉkonani chʉvakʉ cuache tijñecojñokʉtani pojomʉ chʉʉ. Jãajañe choocojñokʉ Jesucristoni chookaiʉ Repaʉ canivʉjañe painani Repaʉte cuasakuanupʉte chookaiʉ Repaʉ choocojñoñejañe chʉʉ canivʉji cuache choocojñokʉ chookaiʉ pojomʉ chʉʉ.
\v 25 Diopi chʉʉni mʉsanʉkonani Repaʉ chʉore peore kʉakaaʉ chini jokaʉna Jesure cuasakuanupʉte chooche chookaiʉ paikʉmʉ chʉʉ.
\v 26 Repa chʉo rʉa jeerʉmʉ aperʉmʉ kʉamanesichʉo irʉmʉna Diopi maini Repaʉ neenani kʉaʉna ũcuare chʉvamʉ chʉʉ.
\v 27 Dios maipi Repaʉ neenapi aperʉmʉ kʉamanesichʉore judío peonani Repaʉ chʉo Jesucristote cuasache kʉachʉore kʉajʉ paapʉ chini jokasikʉamʉ. Ijache chiimʉ repa chʉo kʉache: Jesucristoji maini jame paiʉna Dios paichejare sani paijanaame mai.
\p
\v 28 Chʉkʉna Repaʉ Cristo paichete pãi ũcuanʉkore kʉajʉ masi chʉvajʉ reojache chechojʉ painaame repanapi asa chẽa Repaʉni cuasajʉ jovo karamañe reojache paapʉ chini.
\v 29 Cristoji chʉʉni chookaiʉna chʉva koka paakʉ peore chooreochetʉka chookʉ paikʉmʉ chʉʉ.
\c 2
\p
\v 1 Mʉsanʉkonapi masiajʉ chini kʉamʉ chʉʉ ie:
Mʉsanʉkonare Colosas vʉejoopo canare reojache chookasa chini
chekʉna ʉ̃setotani ũcua chookʉ paikʉmʉ chʉʉ, ũcuachia
Laodicea vʉejoopo painaname chʉʉre chutaa ñamanani.
\v 2 Mʉsanʉkonapi ũcuanʉko ũcuatee cuasajʉ sãiñechia oijʉ
pojojʉ paijʉ Dios chʉo kʉachete masirepa asa chẽa cuasajʉ
reojache paapʉ chini chookaimʉ chʉʉ. Ũcuachia aperʉmʉ
vesʉsie Dios churana Raosikʉ Cristo paichete masijʉ
Ũcuaʉname reojache paapʉ chini chookaimʉ chʉʉ.
\v 3 Repaʉ Cristochiaamʉ maire Chookaikʉ, maipi Dios chʉo
reojachere karamañe asa masijʉ reojache paapʉ chini.
\v 4 Chekʉnapi mʉsanʉkonani jorejʉ reojachejache ikajʉ
teeʉjẽe cacʉomaneajʉ chini ikamʉ chʉʉ jãa.
\v 5 Mʉsanʉkonare jame paimakʉtani chʉʉ rekochoji jame
paichejache cuasakʉmʉ chʉʉ. Mʉsanʉkona reojache paijʉ
Cristote masirepa cuasajʉ paichete asa rʉa pojomʉ chʉʉ.
\s Cristo neena mama paichete kʉamʉ
\p
\v 6 Jãajekʉna Maire Paakʉni Jesucristoni cuasajʉ Repaʉ neena
pañu chini jovosinajejʉ Repaʉte cuasachete ũhasomañe ũcua
cuasajʉ reojache paijʉ̃ʉ.
\v 7 Repaʉte jame paichete jokasomañe mʉsanʉkonare
chechosiere Dios chʉore naa rʉa cheche Repaʉni naa rʉa
masi cuasajʉ siarʉmʉ, “Reorepamʉ, Jakʉ”, chiijʉ pojojʉ
paijʉ̃ʉ.
\p
\v 8 Ñarepajʉ paijʉ̃ʉ; pãipi mʉsanʉkonani jorejʉ chẽa
paañu chini repana peoche cuasachete chechojʉ. Cristo paiche
chechomanaame repana. Rupʉ pãi cuasachename pãi jeerʉmʉ
choosiename Diore cuasacuhena chʉ̃ʉñete chechonaame
repana.
\p
\v 9 Repaʉ Cristo pãi canivʉ paasikʉtani Diojekʉ Dios
paiche peore ũcuajache paikʉmʉ.
\v 10 Mʉsanʉkonare ũcuachia Cristoji jame paiʉna Dios chiiche
reojache paireomʉ, Cristoji pãi chʉ̃ʉnare, ángeles
chʉ̃ʉnare, vati chʉ̃ʉnare ũcuanʉkore naa rʉa masikʉna.
\v 11 Ũcuachia Cristo neenajejʉ rekoñoã Ũcuaʉni
reojarekoñoã carevacojñosinajejʉ jĩkoramurʉ chãtirʉ
paicanirʉ chʉto tʉacojñosinajañe paime mʉsanʉkona. Pãi
chooche circuncisión canivʉã chʉtocojñomanesina Cristoni
circuncisión choocojñosinajañe paime mʉsanʉkona
cuarekoñoã Ũcuaʉni reojarekoñoã carevacojñosinajejʉ.
\v 12 Mʉsanʉkona Repaʉte Dios vasosiere cuasajʉ okorovecojño
aperʉmʉ cuache paisiere jokaso Repaʉname tãcojño
vajʉraisinajañe paijʉ mama paime chura.
\p
\v 13 Aperʉmʉ mʉsanʉkona judío peona ũcuanʉko Dios paichete
vesʉjʉ cuare choojʉ Repaʉ sẽjocojñosina paisinaame.
Irʉmʉtani Dios mʉsanʉkonare Cristo chookaisiejekʉna paiche
mamare joka mʉsanʉkona cuache choosie cuasamamʉ.
\v 14 Aperʉmʉ maire pãi Dioni põseroire paajʉna Repaʉ aperʉmʉ
chʉ̃ʉ jokasie chooche paisikʉamʉ. Jãatani irʉmʉ Dios
maire roikakʉna jãajañe chooche peomʉ. Pãi cuache
choosinare repana cuache choosie roi kurususẽverona jẽjo
repana cuache choosiere kʉajʉ tocha sʉome. Repa tochasie
kʉache cua jũni roisome repana. Ũcuajache Cristo jũni
roikaisiejekʉna mai põseroi tochasijaova kurususẽverona
jẽjo sʉosiejache choosiejekʉna peore roisieame chura.
\v 15 Repaʉ Cristo mai cuare roikaiʉ kurususẽverona jũni
maire cuache chʉ̃ʉnare cajejani repana chʉ̃ʉñe
tʉasokaniasomʉ. Repa tʉakaisie pãi jainʉko masime.
\s Cristoname jũni vajʉraisinajañe paichete kʉamʉ
\p
\v 16 Jãajekʉna mʉsanʉkona paichete pãipi ña ãu
ãiñename ũkuche teemajñarʉã ʉ̃seto jachajʉ̃ʉ repanare.
Ũcuachia Diore pojojʉ judío fiesta choochete chʉ̃ʉjʉ
pʉaumucujña chooche choochete ʉ̃sejʉ kereto jachajʉ̃ʉ
repanare.
\v 17 Jãamajñarʉã chooche maipi choojʉ cheche reojache
paijachere chaajʉ paapʉ chini aperʉmʉ chʉ̃ʉ
jokasieame. Jãatani repa reojache paiche Jesucristote
cuasajʉ jovo paicheme.
\v 18 Angelevanare pojonapi kerenare jachajʉ̃ʉ. Repana
rekoñoã, “Rʉa masiʉmʉ chʉʉ”, chini cuasanatani pãipi
asa ũcuanani pojoajʉ chini, “Rʉa vesʉʉmʉ chʉʉ”, chiime.
Ũcuana cuasachete kʉajʉ, “Dios ñoñete ñajʉ kʉame
chʉkʉna”, chiijʉ jorejʉ, meñe rʉa pojonaame repana.
\v 19 Cristote mai rekochojache paikʉte cuasache
jokasosinaame repana. Maitani Repaʉ neerepanajejʉ Repaʉ
canivʉjañe painaame. Diopi chʉ̃ʉkʉna mai rekochojache
paiʉ maire siarʉmʉ chookaiʉ paikʉmʉ Repaʉ, maipi naa
rʉa chechejʉ siarʉmʉ naa reojache paapʉ chini.
\p
\v 20 Chura mʉsanʉkona Cristoname jũnisosinajañe paijʉ
Repaʉte cuasamana paichejache pañu chiimanaame. Jãajañe
painatani, ¿jese paiʉna repana chʉ̃ʉñe chutaa chooʉache
cuasache?
\v 21 Ijache ikajʉ siache chʉ̃ʉnaame repana: “Chẽamanejʉ̃ʉ
jãamajñarʉã; ãimanejʉ̃ʉ jãamajñarʉã;
jãajamajñarʉã miimanejʉ̃ʉ”, chiinaame.
\v 22 Peore jãamajñarʉã sẽsevʉ choomajñarʉã rupʉ pãi
cuasajʉ chʉ̃ʉñejekʉ siasojacheame.
\v 23 Chekʉrʉmʉ pãi jãare choojʉ chekʉnapi ñato
reojachejache ñoñe paime. Chekʉrʉmʉ rʉa masinajañe
paijʉ, Diore rʉa pojonajañe paijʉ, meñe pojomañejañe
paijʉ cuache chooche ʉ̃sejʉ naa rʉa ʉ̃sejʉ painaame
repana. Repana jãamajñarʉãchia choona repana rekoñoã
cuache chooʉache cuasachetani jʉvomañe ũcua choojʉ
painaame.
\c 3
\p
\v 1 Cristoname jũni vajʉraisinajañe paijʉ reojache
painaame mʉsanʉkona. Jãajekʉna Dios paicheja sani paijache
cuasana paiche paijʉ̃ʉ. Repaʉ Cristo ũcuachejare paiʉ Diore
kueñe ʉjajʉ̃tʉcakãkore ñuiʉ chʉ̃ʉkʉ paiʉasomʉ.
\v 2 Cheja paimajñarʉãchia cuasajʉ paimañe cʉnaʉmʉ
paichete naa rʉa cuasajʉ paijʉ̃ʉ.
\v 3 Cristoname jũnisosinajañejejʉ rekoñoãpi Ũcuaʉname
paijʉ Dios neenaame mʉsanʉkona.
\v 4 Ũcuaʉji Cristo mʉsanʉkonare paiche mamare ĩsisikʉamʉ.
Repaʉ joe rairʉmʉ Ũcuaʉjana carũni Repaʉname chʉ̃ʉjʉ
paijanaame mʉsanʉkona.
\s Aperʉmʉ paisiename mama paichete kʉamʉ
\p
\v 5 Jãajañejekʉna mʉsanʉkona cuarekoñoã cuache
chooʉache cuasachete peore jʉvojʉ ũhasojʉ̃ʉ, ijachere:
rʉ̃joromi peonare romineeñe, ʉ̃jʉpãi peonare ʉmʉneeñe,
vajʉchʉache chooche, cua chooneeñe, cuache ũcuaʉache
choochename kurineeñe. Pãi kurineena kurichia cuasanajejʉ
Diore cuasamañe tʉ̃osivanare pojochejache choome.
\v 6 Jachajʉ jãamajñarʉã choonare pãi perukʉ cuache
tijñeñe chʉ̃ʉjamʉ Dios.
\v 7 Aperʉmʉ mʉsanʉkona ũcuachia jãamajñarʉã choojʉ
paisinaame.
\v 8 Jãatani jãajañe choochete peore masirepa ũhasojʉ
paijʉ̃ʉ chura: peruche, teache, chekʉnare cuache chooche,
chekʉnare cuache cutuchename vajʉchʉache ikache.
\v 9 Ũcuachia sãiñechia jorejʉ paimanejʉ̃ʉ, ũcuare
aperʉmʉ paisiename choosie jokasosinajejʉ.
\v 10 Chura mʉsanʉkona rekoñoã mamarekoñoã
carevacojñosinajejʉ paiche mamare paime. Dios maire choosikʉ
siarʉmʉ chookaiʉ paimʉ, maipi Repaʉ paichete masijʉ Ũcuaʉ
paichejache siarʉmʉ naa reojache paapʉ chini.
\v 11 Jãajekʉna chura ijache cuasamañe pañu: griegopãi
paichename judíopãi paiche, jĩkoramurʉ chãtirʉ paicanirʉ
chʉto tʉacojñosina paichename choocojñomanesina paiche,
pãirepa paichename tĩipãi paiche, chẽa paacojñona
paichename chẽa paacojñomana paiche. Jãajañejẽe
cuasamañe Cristo neena paichechia cuasajʉ pañu mai. Peore
Paakʉji maire ũcuanʉkore paakʉmʉ Repaʉ.
\p
\v 12 Dios mʉsanʉkonare Repaʉ neena paapʉ chini oiʉ chẽa
paamʉ. Jãajekʉna paiche mama painajejʉ chekʉnare pãi
oirepache oijʉ reojache chookaijʉ, “Naa rʉa masikʉmʉ
chʉʉ”, chiimañe, pekerʉ paijʉ perumañe paijʉ̃ʉ.
\v 13 Sãiñechia keremañe paijʉ, mʉsanʉkonare chekʉna
cuache chooche cuasamanejʉ̃ʉ. Dios mʉsanʉkona chooche cua
joe cuasamañejañe chekʉna mʉsanʉkonare cuache chooche joe
cuasamanejʉ̃ʉ.
\v 14 Jãajañe choojʉ ũcuachia chekʉnare oijʉ siarʉmʉ
reojache chookaijʉ paijʉ̃ʉ. Jãajañe choojʉ pani
reojache jame paijanaame mʉsanʉkona.
\v 15 Cristoji chookaiʉna mʉsanʉkona rekoñoã reojachechia
paijʉ̃ʉ. Ũcuachia Cristo canivʉ ũcuateecanivʉjañe
painajejʉ rekoñoãpi reojache paijʉ ũcuanʉko reojache
jame paijʉ̃ʉ. Jãajañe paapʉ chini chẽa paamʉ Dios maire.
Ũcuachia siarʉmʉ pojojʉ, “Reorepamʉ”, chiijʉ paijʉ̃ʉ
Repaʉte.
\v 16 Cristo chʉore asa chẽa siarʉmʉ cuasajʉ sãiñechia
masi chechojʉ reojache chʉvajʉ paijʉ̃ʉ. Dios
mʉsanʉkonare chookaichete cuasajʉ Repaʉni pojojʉ Dios ujare
ujajʉ paijʉ̃ʉ.
\v 17 Mʉsanʉkonapi choomajñarʉãre ũcuaʉamajñarʉãre
chooni jãapãani chʉo cutuni siarʉmʉ Maire Paakʉ Jesús
neena paiche paijʉ reojache paijʉ̃ʉ. Ũcuachia Ũcuaʉji
chookaiʉna siarʉmʉ mai Jakʉni Dioni, “Reorepamʉ, Jakʉ”,
chiijʉ paijʉ̃ʉ.
\s Ũcuanʉkore chʉvacheme
\p
\v 18 Rʉ̃joromi, mʉʉ̃jʉpãi chʉ̃ʉñe jachamañe choojʉ
paijʉ̃ʉ. Maire Paakʉte cuasana paicheme jãa.
\v 19 Ʉ̃jʉpãi, mʉrʉ̃joromi oijʉ repanare paivesache
choomañe reojache chookaijʉ paajʉ̃ʉ.
\p
\v 20 Chĩi, mʉjakʉpãi chʉ̃ʉñe jachamañe peore choojʉ
paijʉ̃ʉ. Jãajañe choojʉ painare pojomʉ Maire Paakʉ
Dios.
\v 21 Pʉkakʉpãi, mʉsanʉkona chĩivanare rʉarepa cuajare
chʉ̃ʉjʉ paimanejʉ̃ʉ, repanapi perujʉ, “Pani etajani
reojache pai cuasomañeame ie”, chiimaneajʉ chini.
\p
\v 22 Chekʉnare chẽa paacojñovana, icheja cheja pairʉmʉ
mʉsanʉkonare paana chʉ̃ʉñe jachamañe peore choojʉ
paijʉ̃ʉ. Repanapi ña pojoajʉ chini repana ñarʉmʉchia
reojache choojʉ paimañe, ũcuarepa paijʉ Dioni cuasa,
vajʉchʉjʉ, repana ñamarʉmʉjẽe repana chʉ̃ʉñe masi choojʉ
paijʉ̃ʉ.
\v 23 Mʉsanʉkona chooche ũcuaʉachete chooni rupʉ pãire
chookainajañe choomañe masi chooʉache cuasajʉ Maire
Paakʉte chookaichejache cuasajʉ choojʉ paijʉ̃ʉ.
\v 24 Mʉsanʉkonapi reojache chooni Maire Paakʉji ĩsikʉna
rʉa reojachere koojanaame, reojache choosie roi. Cristoamʉ
mʉsanʉkonare Paarepakʉ. Ũcuaʉni chooche chookaijʉ paime
mʉsanʉkona.
\v 25 Jãatani cuache choona Diopi teenare naa rʉa oimañe
ũcuaparʉvachia oiʉ cuasakʉna ũcuanʉko repana cuache
choosie roi roijanaame.
\c 4
\p
\v 1 Chekʉnare koo paana, mʉsanʉkona paanare cuache choomañe
reojache paajʉ̃ʉ, iere cuasajʉ: Maire Paakʉ Dios Cʉnaʉmʉ
Paikʉ mʉsanʉkona chooche peore ñakʉmʉ.
\p
\v 2 Siarʉmʉ ũcuanʉko Dioni sẽejʉ paijʉ̃ʉ. Ñarepajʉ
paijʉ Repaʉni pojojʉ, “Reorepamʉ, Jakʉ”, chiijʉ
paijʉ̃ʉ.
\v 3 Chʉkʉnate ũcuachia Repaʉte sẽekaijʉ̃ʉ Ũcuaʉji
chookaiʉna pãipi Dios chʉo chʉkʉna chʉvachʉore asaajʉ
chini. Chura, repa chʉo Cristo paiche aperʉmʉ kʉamanesichʉo
chʉvakʉjekʉ pãi chẽavʉere paimʉ chʉʉ.
\v 4 Ũcuachia chʉʉpi Repaʉ chiichete chookʉ Ũcuaʉ
chʉore asamasireoche chʉvakʉna pãipi asa chẽaajʉ chini,
sẽekaijʉ̃ʉ Repaʉte.
\p
\v 5 Masi cuasajʉ Diore cuasamanare reojache jame paijʉ̃ʉ.
Repanare chʉvareorʉmʉ siarʉmʉ chʉvajʉ paijʉ̃ʉ
vasesomaneñu chini.
\v 6 Repanare cutuni siarʉmʉ reojachere asareoche ikajʉ
paijʉ̃ʉ, pãipi mʉsanʉkonani Dios paichete sẽeto
ikamasiñu chini.
\s Tocha pini chʉo saosieame
\p
\v 7 Mai majapãiʉjaiʉ chʉʉ cuasakʉji Tíquico chʉʉ
paichete sa kʉajamʉ mʉsanʉkonare. Maire Paakʉte
chʉkʉnaname chooche rʉa masi chookaiʉ paikʉmʉ repaʉ.
\v 8 Jãajekʉna mʉsanʉkona paichejana saomʉ chʉʉ repaʉte
sa kʉaʉna chʉkʉna paichete asa masijʉ naa rʉa pojojʉ paapʉ
chini.
\v 9 Mai majapãiʉjaiʉ mai cuasakʉ Onésimo mʉsanʉkona
paicheja cakʉ ũcuaʉname saimʉ. Maire Paakʉte Jesure
cuhasomañe cuasakʉ paikʉmʉ repaʉ. Repana kachana sani
icheja choocojñoñe peore kʉajanaame mʉsanʉkonare.
\p
\v 10 Aristarco chʉʉname ivʉe pãi chẽavʉe paikʉ jame
chʉo saomʉ mʉsanʉkonare. Bernabé majapãiʉ Marcos ũcuachia
chʉo saomʉ mʉsanʉkonare. Aperʉmʉ chʉʉ mʉsanʉkonare,
“Repaʉji mʉsanʉkona paicheja sani ñato pojojʉ reojache
chookaijʉ̃ʉ repaʉte”, chiiʉ chʉvakʉ chʉo saosie
asaasome mʉsanʉkona. Jãajekʉna chura jãajañe chookaijʉ̃ʉ
repaʉte.
\v 11 Jesús Justo ũcuachia chʉo saomʉ mʉsanʉkonare.
Repanachia judíopãi Jesucristote cuasana chekʉnapi Dios
chiichete choojʉ paapʉ chini chʉʉname chʉvame. Chekʉna
judíopãi Jesucristote cuasanatani Dios chʉo chʉvamame. Chʉʉ
sʉmañe cuasakʉ oirʉmʉ ũcuana reojache paichete cuasani
naa pojokʉ paikʉmʉ chʉʉ.
\v 12 Mʉsanʉkona paicheja cakʉ Epafras ũcuachia chʉo saomʉ
mʉsanʉkonare. Jesucristote chooche chookaiʉ paikʉmʉ
repaʉ. Mʉsanʉkonare siarʉmʉ Diore sẽekaiʉ paimʉ repaʉ,
Ũcuaʉji chookaiʉna Repaʉte cuasachete ũhasomañe masi
cuasajʉ Repaʉ chiichechia choojʉ paapʉ chini.
\v 13 Repaʉ Epafras mʉsanʉkonaname Laodicea vʉejoopo
painaname Hierápolis vʉejoopo painare cuasakʉ rʉa oiʉ
chookaiʉ paiche ñakʉjekʉ kʉamʉ chʉʉ.
\v 14 Lucas, ʉ̃ko choomasi ai, mai cuasacojñokʉ chʉo saomʉ
mʉsanʉkonare, Demas ũcuachia.
\p
\v 15 Laodicea vʉejoopo painare mai majapãijanare chʉo sa
kʉakaijʉ̃ʉ. Ninfate ũcuachia chʉo kʉakaijʉ̃ʉ, repao
vʉe Jesure pojojʉ chiikuanupʉ ũcuachia.
\v 16 Ijaova utijaova tochasie ña pini Laodicea vʉejoopo
painani Jesure cuasakuanupʉna saojʉ̃ʉ ñaajʉ. Mʉsanʉkona
ũcuachia chʉʉ repanare tocha saosijaova ñajʉ̃ʉ.
\v 17 Arquipote ijache ikakaijʉ̃ʉ chʉʉre: “Mʉʉpi
chooakʉ chini Maire Paakʉ jokasie peore masi choo
pinijʉ̃ʉ”, chiijʉ̃ʉ repaʉte.
\p
\v 18 Chʉʉ, Pablo, inʉkorʉ chʉo saomakarʉchia
chʉʉrepaʉji tochamʉ. Chʉʉ pãi chẽavʉe paiche
cavesʉmañe cuasajʉ̃ʉ. Diopi mʉsanʉkonare rʉa reojache
chookaaʉ. Reomʉ.
\cls Pablo