\id 2TH
\h 2 TESALONICENSES
\toc1 San Pablo Tesalónica vʉejoopo painare joe chʉo tocha saosieame
\toc3 (2 Ts)
\mt San Pablo Tesalónica vʉejoopo painare joe chʉo tocha saosieame
\c 1
\s Chʉo saosieame
\p
\v 1 Chʉʉ, Pablo, Silvanoname Timoteo ijaova utijaova tocha saome mʉsanʉkonare Tesalónica vʉejoopo painare Jesuni cuasajʉ ũcuateeʉjakuanupʉ paijʉ, mai Jakʉ Dioname Maire Paakʉ Jesucristote jame painare.
\v 2 Mai Jakʉ Dioname Maire Paakʉ Jesucristoji mʉsanʉkona rekoñoãna reojache paichete chookaijʉna reojache paijʉ̃ʉ.
\s Cristo joe rairʉmʉna Dios pãi cuache painare roiche chʉ̃ʉjamʉ repana cuache choosie roi
\p
\v 3 Chʉkʉna majapãijana, mʉsanʉkona reojache paichete cuasajʉ Dioni siarʉmʉ, “Reorepamʉ, Jakʉ”, chiiche paimʉ chʉkʉnate. Jãajañe chooto reomʉ, mʉsanʉkonapi siarʉmʉ Repaʉni naa rʉa masi cuasajʉ chekʉnani naa rʉa oijʉ reojache chookaijʉ paijʉna.
\v 4 Jãajekʉna chʉkʉna mʉsanʉkona Jesure masi cuasajʉ paichete chekʉchejña painani Jesucristote cuasakuanupʉãre pojojʉ kʉame. Mʉsanʉkonapi rʉa cuache tijñecojñonatani Repaʉni ũcua cuasajʉ reojache paijʉ ñojʉna kʉame chʉkʉna.
\v 5 Jãajañe masi cuasajʉ ie masime mai: Pãi paiche cuasa ña ũcuarepa chʉ̃ʉkʉmʉ Dios. Jãajekʉna mʉsanʉkonare Repaʉ chiichete choojʉ cuache choocojñonare, “Reonaame ina”, chiiʉ Ũcuaʉ paichejana sajamʉ Repaʉ.
\p
\v 6 Dios ũcuarepa chʉ̃ʉkʉjekʉ maire cuache choojʉ painare repana cuache choosie roiajʉ chini sãiñe chʉ̃ʉjamʉ.
\v 7 Reparʉmʉ Maire Paakʉ Jesús joe rairʉmʉ Diopi chookakʉna mai cuache choocojñoñeji siasoʉna pani vajʉsojanaame mai. Jesús Repaʉ neena ángeles rʉa masinaname raijʉ toaname miañe ñoñe raijanaame.
\v 8 Rani Dioni cuasacuhejʉ Repaʉ Jesús paiche kʉachʉore jachajʉ painare vati toana saojamʉ Repaʉ, repana jachasie roi.
\v 9 Vati toa Dios Peore Masiʉji Reokʉ peochejajekʉ reojachejẽe peochejare ai saocojñosina siarʉmʉ uujʉ paijanaame.
\v 10 Repaʉ joe raiumucuse Jesús, Repaʉte cuasanani Repaʉ neenani pojocojñora chini reojache ñoʉ raijamʉ. Mʉsanʉkona ũcuachia chʉkʉna chʉvachʉo asa chẽa cuasanajejʉ Repaʉte jame pojojanaame reparʉmʉ.
\p
\v 11 Jãajekʉna mʉsanʉkonare mai Cuasakʉte Diore siarʉmʉ sẽekaijʉ painaame chʉkʉna, mʉsanʉkonani Repaʉ chẽa paanani ña, “Reonaame ina”, chiiʉ reojachere ĩsiakʉ chini. Ũcuachia Repaʉ masicheji chookaiʉna mʉsanʉkona reojache chooñu chiichete peore choojʉ paapʉ chini sẽekainaame chʉkʉna. Ũcuachia Jesuni cuasajʉ reojache choomasiajʉ chini sẽekainaame chʉkʉna.
\v 12 Mʉsanʉkonapi jãajañe reojache paito Jesús Maire Paakʉ jainʉkore pãi pojocojñojamʉ. Ũcuachia Repaʉji mai Cuasakʉji Diopi Maire Paakʉ Jesucristoname oijʉ chookaijʉna mʉsanʉkonapi rʉa reojache choo ñojʉna pojojamʉ Repaʉ mʉsanʉkonare.
\c 2
\s Maire Paakʉ joe raijachere kʉamʉ
\p
\v 1-2 Chʉkʉna majapãijana, chura Maire Paakʉ Jesucristo joe
rani mainame paijachere kʉamʉ chʉʉ. Jãajekʉna
mʉsanʉkonare pãipi tĩiñe chechojʉ, “Maire Paakʉ joe
ranicuhasikʉamʉ”, chiito kʉkʉmañe jachajʉ̃ʉ repanare,
chiimʉ chʉʉ. Chekʉrʉmʉ repana Dios chʉo kʉanajañe ikajʉ
jãapãani chʉore ra kʉajʉ jãapãani utijaovana chʉo tocha
sao, “Pablo tochasieame ie”, chiijʉ jorejanaame repana.
\v 3 Pãi mʉsanʉkonare jãajañe jorejʉ ikache jmamakarʉjẽe
asamanejʉ̃ʉ. Jesucristo joe rairʉmʉ ijache paijamʉ: Pãi
jainʉko Dioni jachajʉ cuache choojʉ pairʉmʉna pãi chʉ̃ʉkʉ
teeʉ Cristote rʉa cuhekʉji charo raijamʉ, cuacheja ai
saocojñojaʉ. Repaʉ raisirʉmʉna Jesucristo naa chojepi joe
raijamʉ.
\v 4 Repaʉ charo raijaʉ Diore rʉa cuhekʉjekʉ, repaʉchia
pojocojñora chini Diore cuasanare ũcuanʉkore cuasaʉ̃sekʉ cavakʉ
pãi ñajʉte Dios vʉe ʉjavʉena kaka pʉʉ, “Diorepaʉmʉ
chʉʉ”, chiijamʉ.
\p
\v 5 Chʉʉ mʉsanʉkonare jame pairʉmʉ ũcuare
kʉasikʉamʉ. ¿Jãa cuasamañe mʉsanʉkona?
\v 6 Repaʉ Cristote cuhekʉ Diopi ʉ̃sekʉna chutaa raimamʉ.
Repaʉ Dios ʉ̃semarʉmʉna raijamʉ Cristote cuhekʉ. Chura jãa
masime mʉsanʉkona.
\v 7 Vati ai irʉmʉ ropee chʉ̃ʉkʉ paimʉ pãipi Dios
chiichete cuhejʉ choomaneajʉ chini. Jãatani Diopi ʉ̃sekʉna
repaʉ choora chiiche peore choocuamʉ. Dios Repaʉte
ʉ̃seʉamarʉmʉjatʉka vati chooche ʉ̃sekʉ paijamʉ.
\v 8 Dios ʉ̃semarʉmʉpi vʉa pãiʉ vati ai neekʉjekʉ Cristote
cuhekʉji rʉa siache choo ñojamʉ. Jãatani Maire Paakʉ
Jesús reojache ñoʉ rani repaʉ choochete ʉ̃sekʉ
ikachechiapi vanisojamʉ repaʉte.
\v 9 Repaʉ Maire Paakʉ chutaa raimarʉmʉ repaʉ cuache paikʉ
rani vati aipi chookaiʉna rʉa masikʉ Jesús saocojñosina
choochejache pãijẽe choovesʉchete siache jorekʉ
choojamʉ.
\v 10 Ũcuachia pãi vati toa saina repaʉ jorekʉ siache cuache
chooche cuasajanaame, ũcuaʉni chini. Dios chʉo ũcuarepare
asacuhejʉ Jesure jovomanesinajejʉ vati toana sani choosojanaame
repana.
\v 11 Jãajekʉna Dios repanare Repaʉ chʉo asa chẽañe ʉ̃semʉ
jorechʉore cuasaajʉ chini.
\v 12 Jãajañe paijʉ repana cuache chooneeñete jokasocuhejʉ
Repaʉ chʉo ũcuarepare asacuhesinajejʉ ũcuanʉko vati toana
sani choosojanaame repana, cuache choosie roi.
\s Repaʉname reojache paapʉ chini Dios chẽacojñosina
paichete kʉamʉ
\p
\v 13 Chʉkʉnatani mʉsanʉkona reojache paichete cuasajʉna
Dioni siarʉmʉ, “Reorepamʉ, Jakʉ”, chiiche paimʉ. Dios
mʉsanʉkonare Ũcuaʉ Rekochoji chookaiʉna Jesuni cuasajʉ
jovosina Repaʉ neenajejʉ Ũcuaʉname ai reojache paapʉ chini
chẽaasomʉ, Repaʉ chutaa chejajẽe choomarʉmʉna.
\v 14 Mʉsanʉkonapi chʉkʉna chʉvachʉore Jesucristote
cuasache kʉachʉore asa chẽa Repaʉni cuasajʉ jovo Maire Paakʉ
Jesucristo paichejare ai sani paijʉ Ũcuaʉ paichejache
reojache paapʉ chini chẽaasomʉ.
\p
\v 15 Jãajekʉna, chʉkʉna majapãijana, mʉsanʉkona Jesure
cuasache ũhasomañe cuasajʉ chʉkʉna sani chʉvasiename
utijaopi tocha saojʉ chechosie cavesʉmañe cuasajʉ
paijʉ̃ʉ.
\v 16 Repaʉ Maire Paakʉ Jesucristo mai Jakʉ Dioname oiʉ
cuhamañe reojache chookaiʉ paikʉmʉ, maipi pojojʉ paijʉ
reojarekoñoã paaajʉ chini. Ũcuachia maire Repaʉ paicheja
sani reojache paijache jokasikʉamʉ, maipi repare cuasajʉ
pojojʉ chaajʉ paapʉ chini.
\v 17 Ũcuaʉji mʉsanʉkona rekoñoãna chookaaʉ reojache choo
koka paajʉ pojojʉ ikajʉ reojachechia choojʉ paapʉ chini.
\c 3
\s Dioni sẽekaapʉ chini Pablo ikasiere kʉamʉ
\p
\v 1 Chʉkʉna majapãijana, Diore sẽekaijʉ̃ʉ, chʉkʉna
chʉvachʉore pãipi ũcuaʉachejña painapi nami asa chẽa
mʉsanʉkona choosiejache pojojʉ Jesuni cuasajʉ jovoajʉ.
\v 2 Ũcuachia pãi cuache choonapi chʉkʉnani cuache
choomaneajʉ chiijʉ sẽekaijʉ̃ʉ chʉkʉnate. Pãi
ũcuarepanʉko Diore cuasanachiamame.
\v 3 Jãatani Maire Paakʉ ũcuarepa chookʉjekʉ vati ai
mʉsanʉkonare cuache chooche ʉ̃sekʉ chookaijamʉ reojache
choo koka paaajʉ chini.
\v 4 Ijache cuasajʉ paime chʉkʉna: “Mai repanapi chooajʉ
chini chʉ̃ʉ jokasie Maire Paakʉji chookaiʉna irʉmʉ choojʉ
paicosome repana. Ũcuachia naa paisirʉmʉ cuhamañe ũcua
choojʉ paijacosome”, chiijʉ cuasame chʉkʉna mʉsanʉkonare.
\v 5 Maire Paakʉ Jesucristoji chookaaʉ mʉsanʉkonare, Repaʉ
paichejache reojache paimasijʉ cuache tijñetojẽe koka
paajʉ Repaʉni cuhasomañe ũcua cuasajʉ Dios pãi ña
oichejache sãiñechia oijʉ reojache chookaijʉ paapʉ chini.
\s Ñamemañe chooche choojʉ paichete kʉamʉ
\p
\v 6 Asarepajʉ̃ʉ, chʉkʉna majapãijana. Maire Paakʉ
Jesucristoji chʉ̃ʉkʉna mʉsanʉkonare ijache chʉ̃ʉ jokame
chʉkʉna: Mai majapãiʉjaiʉ ũcuaʉakʉji ñamekʉ chooche
choocuhekʉji chʉkʉna chechosie jachakʉ choomakʉre jame
paimanejʉ̃ʉ.
\v 7 Chʉkʉna mʉsanʉkonare jame pairʉmʉ choojʉ
paisiejache choomato cuamʉ. Jãa masime mʉsanʉkona.
Reparʉmʉ ñamemañe chooche choojʉ paisinaame chʉkʉna.
Mʉsanʉkonare ũcuajache chʉkʉna choosiejache choojʉ
paiche chiimʉ.
\v 8 Reparʉmʉ chʉkʉna, ãu chekʉna nee roimañe
ãimanesinaame. Jãajañe choomañe mʉsanʉkonani
teeʉterejẽe karachete choocuhejʉ umucujñaname ñami
chooche choojʉ paisinaame chʉkʉna.
\v 9 Jãatani chʉkʉnapi mʉsanʉkonani, “Kuirajʉ̃ʉ
chʉkʉnate”, chiijʉ sẽni cuare choomaneraasinaame. Ũcua
mʉsanʉkonapi chʉkʉna paichete ña chẽa ũcuajache choojʉ
paapʉ chini ñamemañe choochete choojʉ chʉkʉnate kuiraajʉ
chini sẽemanesinaame.
\v 10 Reparʉmʉpi vʉa ijache chʉ̃ʉjʉ painaame chʉkʉna:
“Pãiʉ ñamekʉ chooche choocuhekʉ ãu ãimaneakʉ”,
chiinaame chʉkʉna.
\p
\v 11 Mʉsanʉkona paiche ijache asajʉ paime chʉkʉna:
Mʉsanʉkona teena chooche jmamakarʉjẽe choomañe rupʉ paijʉ
kuijʉ chekʉna paichete ña cutujʉ paijʉasome.
\v 12 Jãajañe painare Maire Paakʉ Jesucristo neenajejʉna
reojache paijʉ choochete ñamemañe choojʉ repanare
karachete koo paaajʉ chini chʉ̃ʉnaame chʉkʉna.
\p
\v 13 Chʉkʉna majapãijana, mʉsanʉkona reojache chooche
jmamakarʉjẽe choo canasomanejʉ̃ʉ.
\v 14 Ijaova utijaova chʉkʉna chʉ̃ʉjʉ tocha saochete
ũcuaʉanapi ña jachato repana paichete ña masi jame
paimanejʉ̃ʉ, kʉkʉso reojache paapʉ.
\v 15 Jãatani repanare cuhemanejʉ̃ʉ. Mʉsanʉkona
majapãijanare pekerʉ ikajʉ chʉvajʉ̃ʉ, repanare ũcuamakarʉ
jãajañe chooajʉ chini.
\s “Diopi reojache chookaaʉ”, chiiʉ chʉo saosieame
\p
\v 16 Maire Paakʉ, reojache paiche ĩsi Ai, Ũcuaʉji jame paiʉ
reojache paiche siache rekoñoãna siarʉmʉ chookaiʉ paaʉ
mʉsanʉkonare.
\p
\v 17 Chʉʉ Pablo, inʉkorʉ chʉo saochechia chʉʉrepaʉji
tochamʉ. Utijao chʉʉ tocha saojao siajaorʉã ijachechia
tochakʉmʉ chʉʉ. Ijamajña tochakʉmʉ chʉʉ.
\v 18 Maire Paakʉ Jesucristoji mʉsanʉkonare ũcuanʉkore
reojache chookaaʉ. Reomʉ.
\cls Pablo