\id 1TI
\h 1 TIMOTEO
\toc1 San Pablo Timoteote charo chʉo tocha saosieame
\toc3 (1 Ti)
\mt San Pablo Timoteote charo chʉo tocha saosieame
\c 1
\s Chʉo saosieame
\p
\v 1-2 Dios maire vati toa uuche Ʉ̃sekaikʉji chʉ̃ʉʉna chʉʉ, Pablo, Maire Paakʉ Jesucristo saosikʉpi mʉʉre Timoteote ijaova utijaova tocha saomʉ. Chʉʉpi chʉvakʉna Dios chʉo asa chẽa Jesure cuasakʉ jovosikʉjekʉ chʉʉ chĩijaiʉ paikʉmʉ mʉʉ. Mai Jakʉ Dioname Maire Paakʉ Jesucristo mai pojojʉ chaache Ĩsijaʉpi oiʉ rʉa reojache paichete chookaaʉ mʉʉre, reojache paaʉ chini.
\s Jorechʉo chechoʉ̃sechete kʉamʉ
\p
\v 3 Chʉʉ icheja Macedonia cheja raipirarʉmʉ mʉʉre chooakʉ chini chʉ̃ʉ jokasiere ũcua chookʉ paaʉ chini joe chʉ̃ʉmʉ chʉʉ mʉʉre, ũcuachejare Efeso vʉejoopote saimañe paiʉ jorechʉo chechona chechochete ʉ̃sekʉ paaʉ chini.
\v 4 Jãajañe chookʉ repanare cuhamañe ũcua ikakʉ paijʉ̃ʉ, repanapi aichʉoname aipãi paisie cuhamañe siarʉmʉ cutujʉ paichete jokasoajʉ. Jãajañe cutujʉ sãiñechia kereme. Dios chookaiche jãajañe cutucheji asa chẽa cuasajʉ jovomame Jesure.
\p
\v 5 Repanapi pãire chekʉnani ña oijʉ reojache chookaijʉ paapʉ chini jãajañe chʉ̃ʉmʉ chʉʉ. Pãi repana rekoñoã cuachejẽe cuasamañe cuache choomanajejʉ sʉmañe paimana Dioni masi cuasajʉ chekʉnare pãi oimasime.
\v 6 Mʉʉ paicheja paina teena jãajañe reojache paichete cavesʉso peoche cutuchʉore asajʉ paime.
\v 7 Dios chʉ̃ʉ jokasie chechoñu chiinatani repa chʉ̃ʉsie kʉachʉo asavesʉme repana. Rʉa masiche cuasoche cutunatani vesʉme repana.
\p
\v 8 Iere masime mai: Dios chʉ̃ʉsie reojaimʉ. Jãatani Repaʉ choora chini chʉ̃ʉ jokasie masiche paimʉ.
\v 9 Reojache painani chʉ̃ʉkʉ jokasiemaʉasomʉ jãa. Ijache choonapi repana cuache choochete cuasa masi joe choomaneajʉ chini jokasieasomʉ: Repa chʉ̃ʉsie jachananame chʉ̃ʉnare cuhenare, Diore cuhenaname cuache choonare, Diore vajʉchʉmapʉ Repaʉte pojomajñarʉã choocuhenare, pʉkakʉpãi vanisonaname chekʉnare vanisonare,
\v 10 rʉ̃joromi peonare romineenaname ʉ̃jʉpãi peonare ʉmʉneena, ʉmʉpãi ũcuajanare ʉmʉneenaname romi ũcuajanare romineenare, pãi ũcuajanare chẽa kuripi ĩsisonare, jorechʉo cutunaname pãi chẽañe chʉ̃ʉnare roijʉ jorenaname cheke siache cuache choojʉ Dios chʉ̃ʉñete jachajʉ reojache choocuhejʉ painare.
\v 11 Jesucristote cuasache kʉachʉo ũcuarepare jachame repana. Repachʉo Dios Reokʉ chʉʉre jokasieame chʉʉpi kuiʉ chʉvakʉ paaʉ chini.
\s Repaʉte oiʉ Dios chookaisiere kʉamʉ Pablo
\p
\v 12 Chʉʉpi koka paakʉ Repaʉ chʉore chʉvaakʉ chini Maire Paakʉ Jesucristo chʉʉre chẽa sao chookaimʉ. “Chʉʉ chʉ̃ʉñe masi choojamʉ ikʉ”, chiiʉ Repaʉni choochete chookaaʉ chini chʉʉre chẽasikʉamʉ Repaʉ. Jãajekʉna, “Reorepamʉ”, chiiʉ paikʉmʉ chʉʉ Repaʉte.
\v 13 Aperʉmʉ chʉʉ Repaʉte Maire Paakʉte rʉa cuache cutusikʉamʉ. Chʉʉni teakʉna Repaʉ neenare rʉa cuache chookʉ paisikʉamʉ chʉʉ, repanani cacʉora chini. Jãajañe chookʉtetani Dios chʉʉre oiʉ chẽasikʉamʉ, Repaʉni cuasamaʉ paivesʉkʉ chookʉna.
\v 14 Jãajañe choo Maire Paakʉ Jesucristo chʉʉre oiʉ reojache karamañe ĩsisikʉamʉ, chʉʉpi Repaʉni masi cuasakʉ pãire chekʉnani oiʉ chookaiʉ paaʉ chini.
\p
\v 15-16 Ie chʉo ũcuarepajekʉna jachamañe cuasache paimʉ maire ũcuanʉkore: Jesucristo icheja cheja pãire, cuache choonani ũcuanʉkore jũni roikasa chini raisikʉamʉ, mai cuare Repaʉji jũni roikakʉna maipi vati toa saimaneajʉ chini. Jãajekʉna Dios chʉʉre teeʉ chekʉnare ũcuanʉkore naa rʉa cuache choosikʉretani oiʉ Repaʉ Jesucristo jmamakarʉjẽe perumañe chaakʉ paiche choo ñosikʉamʉ chekʉnare, Repaʉni cuasajʉ jovo Ũcuaʉname ai paijanare.
\v 17 Jãajekʉna Diore Peore Paakʉte Siarʉmʉ Paikʉtani Ñomakʉre, “Peore Masiʉji rʉa reokʉmʉ mʉʉ”, chiijʉ Repaʉtechia Ũcuateeʉte cuhamañe siarʉmʉ pojojʉ pañu mai. Jãajañe paaʉ.
\p
\v 18 Asarepajʉ̃ʉ, chʉʉ chĩijaiʉ Timoteo. “Ijache paijʉ̃ʉ”, chiiʉ chʉvamʉ chʉʉ mʉʉre: Dios chʉo kʉana kʉasiere ũcuarepa chookʉ cuache tijñetojẽe cuare cava cajejani Jesure cuasache ũhasomanejʉ̃ʉ.
\v 19 Ũcua masi cuasakʉ cuache choomañe reojache paijʉ̃ʉ. Chekʉna teena reojache cuasajʉ paichete jokaso cacuasojʉ paime.
\v 20 Jãajañe choosinaame Himeneoname Alejandro. Jãajekʉna repanare vati aini jokasikʉamʉ chʉʉ, repanapi kʉkʉ Diore cuache ikamañe paichete checheajʉ chini.
\s Diore pojoche chʉvacheme
\c 2
\p
\v 1 Ie rʉa chʉvamʉ chʉʉ mʉʉre: Ũcuanʉkore pãi Dioni
reojachere sẽekaiʉ, “Reorepamʉ, Jakʉ”, chiiʉ paijʉ̃ʉ
Repaʉte.
\v 2 Maipi ainani, chʉ̃ʉnani ũcuanʉkore Dioni sẽekaijʉ paito
repana maire reojache chʉ̃ʉjʉ paivesache choomapʉna
Repaʉte cuasachete ʉ̃secojñomañe ũcua cuasajʉ reojache
paijʉ chekʉnare reojache chookaijʉ paijanaame mai.
\v 3 Reojacheame jãa. Dios maire vati toa sani uuche Ʉ̃sekaikʉ
jãajañe reojache sẽekaiche asa pojomʉ.
\v 4 Repaʉ Dios pãi ũcuanʉkore Repaʉ chʉo ũcuarepare asa
chẽa Jesuni cuasajʉ jovo Ũcuaʉname ai paapʉ chiimʉ.
\v 5 Dios Ũcuateeʉmʉ. Ũcuachia maire Ikakaikʉ pãiʉ
Ũcuateeʉmʉ; Jesucristoamʉ Repaʉ. Jesucristochiaamʉ maire
Dioname reojache paapʉ chini Chookaikʉ.
\v 6 Repaʉ Jesucristo chookaicuhemañe maire pãi ũcuanʉkore
cua jũni roikaisikʉamʉ. Jãajañe choo Dios maire
ũcuanʉkore vati toa uuche ʉ̃sekasa chiiche choo ñosikʉamʉ
Repaʉ, Dios chiisirʉmʉjekʉna.
\v 7 Chʉʉ ikache ie chʉo ũcuarepaame. Joremamʉ chʉʉ.
Dios chʉʉre Jesús saosikʉre ũcuare kʉaakʉ chini chʉ̃ʉ
jokasikʉamʉ, judío peonani Repaʉ chʉore ũcuarepa Repaʉte
cuasache kʉachʉore chechokʉ kuiʉ paaʉ chini.
\p
\v 8 Jãajañejekʉna pãi siachejña painare, cuache
choomañe paijʉ, chekʉnare kerejʉ perumañe reojache
paijʉ Dioni sẽejʉ paijʉ̃ʉ, chiimʉ chʉʉ.
\v 9-10 Romire ijache chʉvamʉ chʉʉ: Romi reojache pañu
chiina kãña reojakãña juicheji reojache ñoñechia
cuasamañe rekoñoã paichete naa rʉa cuasajʉ paijʉ̃ʉ.
Pekerʉ paijʉ mʉsanʉkona rekoñoãpi masi cuasajʉ reojache
choojʉ paijʉ̃ʉ; romi Diore cuasana paicheme jãa.
Jãajañe choojʉ paina repana rekoñoãpi reojache paiche
choo ñome. Pãipi mʉsanʉkonani chiapʉ chini raña siache
rʉarepa veni careva, kãña rʉa roikãñaname kosiʉa,
pachokuri choosimajñarʉã juijʉ paimanejʉ̃ʉ. Ũcuachia
ʉmʉpãipi ʉache ñaajʉ chini juijʉ paimanejʉ̃ʉ.
\v 11 Pãi Dioni pojoñu chini chiirʉmʉ ʉmʉpãi ña kʉkʉjʉ
paijʉ cutumañe Dios chʉore asa chẽajʉ paijʉ̃ʉ.
\v 12 Romipi ʉmʉpãire chʉ̃ʉjʉ chechojʉ ikamañe
paijʉ̃ʉ, chiimʉ chʉʉ.
\v 13 Ijacheame: Dios aperʉmʉ Adanni charo chooasomʉ, naa
chojena Evare.
\v 14 Repanare choosirʉmʉ Eva Dios chʉ̃ʉsiere jachako
reojachere choovesʉko vatipi jorekʉ chʉ̃ʉʉna asa chẽa
charo cuache chooasomo. Repao ʉ̃jʉ Adán vati jorekʉ
chʉ̃ʉñe, “Ũcuarepamamʉ ie”, chiiʉ masikʉtani ũcua
chooasomʉ.
\v 15 Aperʉmʉ paisiko jãajañe choosietani mʉsanʉkona
romi Dioni masi cuasajʉ, chekʉnare oijʉ reojache chookaijʉ
paijʉ, cuache choomañe reojache paimasijʉ chĩire masi
paato reojache paijamʉ mʉsanʉkonare.
\s Jesure cuasakuanupʉã chʉ̃ʉna paichete kʉamʉ
\c 3
\p
\v 1 Ie chʉo ũcuarepaame: Pãiʉ ũcuaʉakʉji Jesure
cuasakuanupʉ chʉ̃ʉkʉ pasa chiito rʉa reomʉ.
\v 2 Jãatani repanare chʉ̃ʉkʉ reojache paimasiakʉ,
pãipi repaʉni ñajʉ ikamaneajʉ chini. Rʉ̃jore ũcuateeote
paaakʉ. Masi cuasakʉ cuare jʉvokʉ reojache paiʉ pãi ña
kʉkʉcojñokʉ paaʉ. Ũcuachia pãi soña rainare siarʉmʉ
tijña repaʉ vʉena cuaa kuirakʉ ãu ãukʉ kãiñejatʉka
jokakʉ paaʉ. Ũcuachia Dios chʉo chechomasikʉ paaʉ.
\v 3 Conore jũiʉ cavakʉ paimaneakʉ. Pekerʉ paiʉ
keremañe, kurineekʉ paimaneakʉ.
\v 4 Repaʉ vʉe painare masi paaakʉ. Ũcuachia mamachĩi
repaʉte ña kʉkʉjʉ repaʉ chʉ̃ʉñe jachamañe choonare
paaakʉ.
\v 5 Pãiʉ repaʉ vʉe painare chʉ̃ʉvesʉkʉ Diore cuasakuanupʉ,
¿jese chʉ̃ʉjaʉ?
\v 6 Ũcuachia Jesure cuasanare chʉ̃ʉjaʉ Repaʉte apecuasakʉ
jovosikʉpi paimaneakʉ, chekʉrʉmʉ repaʉ paichete rʉarepa
meñe cuasakʉ pojokʉ vati ai tijñecojñosiejache
tijñecojñokʉ.
\v 7 Ũcuachia Jesure cuasamana ña kʉkʉ reojache cutucojñokʉ
paaʉ, pãipi repaʉni kerejʉna sãiñe perukʉ vatini
cacʉocojñokʉ.
\s Repakuanupʉã chʉ̃ʉnare chookaina paichete kʉamʉ
\p
\v 8 Repakuanupʉã chʉ̃ʉnare chookaina ũcuachia pãi chekʉna
ña, vajʉchʉcojñona paapʉ. Repana ikache chʉo jmamakarʉjẽe
joremañe paapʉ. Cononeemañe paapʉ. Ũcuachia jorejʉ kuri
kooñu chiimana paapʉ.
\v 9 Dios chʉo mai cuasache ũcuarepare cuhasomañe cuasajʉ
paapʉ. Cuache choomanajejʉ oimañe paapʉ.
\v 10 Repanare chʉ̃ʉnare chookaiche jokara chini charo repana
paichete rʉa jeerʉmʉ ñañe chiimʉ. Repanapi reojache paito
jãajañe chooche jokareomʉ repanare.
\v 11 Repana rʉ̃joromi ũcuajache chekʉnare cuache cutumañe
pekerʉ paijʉ, cononeemañe paijʉ, repana chooche peore masi
choojʉ, pãi chekʉnare ña kʉkʉcojñona paapʉ.
\v 12 Jesure cuasana chʉ̃ʉnare chookaikʉ rʉ̃jore ũcuateeote
paaakʉ. Ũcuachia repaʉ mamachĩi reojache masi chʉ̃ʉkʉ
repaʉ vʉe painare ũcuanʉkore masi paaakʉ.
\v 13 Repana chʉ̃ʉnare chookaina repana chooche chekʉnare masi
kuirani rʉa ña kʉkʉcojñojanaame. Ũcuachia repana Jesure
cuasache kʉavajʉchʉmañe chekʉnare kʉajanaame.
\s Dios kʉasie mai cuasachʉo ũcuarepa paichete kʉamʉ
\p
\v 14-15 Nami sani ñara chiimʉ chʉʉ mʉʉre. Jãatani
chekʉrʉmʉ saicuakʉna chʉʉpi pesa saimato mʉʉpi masiakʉ
chini ijaova utijaova Dios neena paiche chechochete mʉʉni
chʉvakʉ tocha saomʉ chʉʉ, mʉʉpi repacheja painani
chechoakʉ chini. Repana Diore Siarʉmʉ Paikʉte cuasakuanupʉ
Repaʉ chʉo chekʉnani kʉajʉ paapʉ chini Ũcuaʉji chookaiʉna
asa cuasanaame.
\v 16 Diore jame paireochete Repaʉ kʉamanesiere churana
Ũcuaʉji kʉaʉna mai asa chẽa cuasachʉo ũcuarepajekʉ rʉa
reojaimʉ. Ijache cuasanaame mai:
\q Icheja chejare pãi canivʉ paakʉ rani paniasomʉ Cristo.
\q Dios Rekochoji chookaiʉna Repaʉ cuachejẽe choomañe
paiche ñaasome pãi.
\q Angeles ũcuachia Repaʉ chooche ñajʉ paniasome.
\q Repaʉ paiche siavãjʉpãire kʉakaisiejekʉna pãi
siachejña paina cuasame Repaʉte.
\q Cheja pani pini Dios paichejana cʉnaʉmʉna joe mʉnisoasomʉ
Repaʉ.
\s Jesure cuasache jokasona paichete kʉamʉ
\c 4
\p
\v 1 Jãatani Dios Rekochoji masi kʉaʉna ie masime mai: Cristo
chutaa raimarʉmʉ Repaʉte cuasana pãi teena Repaʉte cuasache
ũhaso vatipi chʉ̃ʉkʉna pãi jorena chechochʉore asa chẽa
cuasajʉ paijanaame.
\v 2 Sẽsevʉchia reojachejache ñoñe paijʉ jorena chʉore
asa jachamañe choojʉ paijanaame repana. Repana jorena cuache
choojʉ chechesosinajejʉ repanani cuasomaʉna repana cuache
chooche oimanaame.
\v 3 Repana jorena romi vejache ʉ̃seme. Ũcuachia ãu
teemajñarʉã ãiʉ̃seme repana. Repa ãu Dios choosieame,
Repaʉte cuasanapi chʉo ũcuarepare masijʉ Repaʉni,
“Reorepamʉ, Jakʉ”, chiijʉ ãijʉ paapʉ chini.
\v 4 Ãu Dios choosimajñarʉã peore reojacheame. Jãajekʉna
ãimajñarʉã ũcuaʉamajñarʉãre jñaani cuhemañe pojojʉ,
“Reorepamʉ, Jakʉ”, chiijʉ ãireomʉ maire.
\v 5 Jãajekʉna Dios, “Reomʉ ie”, chiisiere ãure maipi
Ũcuaʉni sẽejʉna ĩsikʉna jñaa ãito reomʉ.
\s Jesucristo chʉ̃ʉñe masi chookaina paichete kʉamʉ
\p
\v 6 Mʉʉ cuasakʉ paichete Dios chʉo ũcuarepare Repaʉte
cuasache kʉachʉore siarʉmʉ ñakʉ chechekʉ mai
majapãijanani jãare chechokʉ pani Jesucristote chooche masi
chookaikʉ paijamʉ.
\p
\v 7 Jãatani aichʉo pãi cuasache jorechʉo Dios chʉomañe
asacuhekʉ choomañe paiʉ Dios chiichechia siarʉmʉ naa rʉa
chookʉ chechekʉ paijʉ̃ʉ.
\v 8 Mai canivʉãpi koka peocanivʉã paimaneakʉ chini,
choochete rʉa chooto reomʉ. Jãatani rekocho paiche Diore
cuasajʉ choochete naa rʉa cuasakʉ paijʉ̃ʉ. Jãajañe
chooto icheja cheja pairʉmʉchia reomañe
jũnisosirʉmʉjatʉka reojamʉ maire.
\v 9 Ũcuarepaame jãa. Pãipi ũcuanʉko jãare cuasato reomʉ.
\v 10 Jãajañejekʉna pãipi ũcuare cuasaajʉ chini, Diore
Siarʉmʉ Paikʉte maire reojache chookaijachere chaajʉ
pojojʉ Repaʉte chooche rʉa chookaijʉ painaame mai. Repaʉ
pãi ũcuanʉkore vati toa sani uuche Ʉ̃sekaimasikʉmʉ.
Jãatani Repaʉte cuasanarechia uuche Ʉ̃sekaikʉmʉ.
\p
\v 11 Ie chʉo chʉʉ mʉʉre chʉvache repacheja painare
chʉ̃ʉkʉ chechokʉ paijʉ̃ʉ, peore masi choojʉ paapʉ.
\v 12 Repanare Jesure cuasanare reojache ikakʉ paijʉ̃ʉ.
Ũcuachia mʉʉ reojache paiʉ Diore masi cuasakʉ cuachejẽe
choomañe paiʉ chekʉnare oiʉ reojache chookaiʉ paiche
choo ñojʉ̃ʉ repanare, ña chẽa ũcuajache choojʉ paapʉ
chini. Mʉʉpi jãajañe chooto põsʉʉtetani mʉʉre ña
kʉkʉjʉ paijanaame repana.
\v 13 Chʉʉ mʉʉ paicheja sairʉmʉjatʉka repanare siarʉmʉ
Dios chʉo tocha jokasie repana ũcuanʉko asajʉte ñakʉ
chʉvakʉ chechokʉ paijʉ̃ʉ.
\v 14 Jesure cuasana aina mʉʉre jʉ̃jñapi jajʉna Dios Rekocho
mʉʉre jokasie chekʉnare chookaimasiche cuhasomañe chookʉ
paijʉ̃ʉ.
\p
\v 15 Chʉʉ mʉʉre chʉvachʉo choo canasomañe peore masi
chookʉ paijʉ̃ʉ, pãipi ũcuanʉko mʉʉ siarʉmʉ naa
reojache paichete ñajʉ paapʉ.
\v 16 Ñarepakʉ reojache paiʉ masi chechokʉ paijʉ̃ʉ.
Mʉʉpi jãajañe ũhasomañe reojache chookʉ paito Diopi
rʉa reojache chookaijamʉ mʉʉre, mʉʉ chechonare
ũcuachia.
\s Jesure cuasanare kuirajʉ chʉ̃ʉñete kʉamʉ
\c 5
\p
\v 1 Ʉmʉpãi mʉʉre naa rʉa ainarejẽe keremañe
mʉjakʉpãijanare pekerʉ ikakʉ chʉvakʉ paijʉ̃ʉ.
Põsʉpãire mʉcheʉchĩijanare reojache chechokʉ paijʉ̃ʉ.
\v 2 Romi mʉʉre naa rʉa ainare mʉjakoromijanare chʉvakʉ
paijʉ̃ʉ. Romichĩi mʉcheoromijanare cuache choomañe paiʉ
reojache chechokʉ paijʉ̃ʉ.
\p
\v 3 Vajevanare kuiranare peonare ña oiʉ kuirakʉ paijʉ̃ʉ.
\v 4 Jãatani vajevaore chĩi paakote repao chĩipi kuiraajʉ.
Chĩi peokoji majanajechĩichia paakote ũcuanapi kuiraajʉ
repaote. Ũcuachia Dioni masi cuasajʉ reojache choochete
cheche pʉkakʉpãi repanare oijʉ reojache kuirasiejache
repana majapãire sãiñe kuirato pojomʉ Dios.
\v 5 Vajevao teeo paio chʉovao paivao Dioni cuasako Repaʉ
chookaijachere pojoko chaako umucujñaname ñami Repaʉni
siarʉmʉ cuhamañe sẽeo paimo. Jãajañe paivanani
chookañu chiime mai.
\v 6 Jãatani chekʉna vajevana repanare ʉachechia ũcuaʉache
cuache choojʉ paina vajʉnatani repana rekoñoã
jũnisosinajañe paime. Jãajañe painare chookaicuheme mai.
\v 7 Ũcuachia repacheja painare majapãi kuirachete
chechojʉ̃ʉ, reojache paijʉna chekʉnare repana paichete
ñajʉ cuache cutucuaakʉ.
\v 8 Mai majapãi kuirache paimʉ maire. Naa soo majapãijẽe
cuasajʉ ũcuateekoa painare majapãirepa naa rʉa cuasajʉ
kuirache paimʉ maire. Jãajañe choomaneni Diore cuasana
paiche paimanajejʉ Repaʉte cuasamanare naa rʉa cuache
choome mai.
\p
\v 9 Jesure cuasakuanupʉ kuiracojñojanare vajevanare ijache
painarechia repana mami tochajʉ̃ʉ: Ʉ̃jʉpãi ũcuateenare
paisinapi sesentarepaʉ̃sʉrʉmʉ naa rʉa paanarechia.
\v 10 Ũcuachia reojache choo ñojʉ paina paapʉ: Mamachĩi
reojache jojasina paapʉ, repana vʉña rainare pãi pojojʉ
reojache choojʉ paina paapʉ, Jesure cuasanare reojache
chookaijʉ paina, chʉovana painare reojache chookaijʉ
paina, reojache siache peore choona paapʉ.
\p
\v 11 Jãatani vajenare naa romichĩi mami tochamanejʉ̃ʉ.
Chekʉrʉmʉ repanare ʉachete choojʉ joe ʉmʉ vejaso repana
Jesucristote chookaichete jokasojʉ.
\v 12 Jãajañe chooni repana choojanaame chiisiere jorejʉ
choomaneni cuache choome.
\v 13 Ũcuachia repana vajena naa romichĩi siarʉmʉ
kuichechia paijʉ chekʉnani pãire cuache cutujʉ ñamena
carũniso Jesure cuasana ikamañere ikajʉ painaame.
\v 14 Jãajekʉna vajenare naa romichĩi joe ʉmʉ veja chĩi
paajʉ vʉe kuirana paapʉ, chiimʉ chʉʉ, maire cuhenapi
repanani cuache cutumaneajʉ chini.
\v 15 Chekʉna vajevana teena Jesure cuasache jokaso vati ai
chʉ̃ʉñete choojʉ paime.
\p
\v 16 Romio ũcuaʉako Jesure cuasakoji repao majapãire
vajevanare paani kuirako paao, Jesure cuasakuanupʉ painani
rʉarepa kuirache chiimaneakʉ. Jãajañe chooto repanare Jesure
cuasakuanupʉ painare vajevanare kuirareojamʉ, kuiranare
peonare.
\p
\v 17 Jesure cuasana aina chekʉnare masi chʉ̃ʉjʉ kuirana repana
chʉ̃ʉnare rʉa reojache pojocojñojʉ paapʉ. Repanapi Dios
chʉo siarʉmʉ chechojʉ chʉvana pani naa reojache
chookaicojñoajʉ.
\v 18 Dios chʉo aperʉmʉ tocha jokasie ũcuare ijache kʉamʉ:
\q Vacare trigo chaca potekaikʉte trigo ãiʉ̃semanejʉ̃ʉ; ãiʉ
chooakʉ,
\m chiimʉ. Chekʉcheja ijache kʉamʉ:
\q Chooche chookaikʉte repaʉ chooche choosie roi
roijʉ̃ʉ,
\m chiimʉ.
\p
\v 19 Pãipi Jesure cuasana chʉ̃ʉnani, “Cuache choosinaame
ina”, chiito jachajʉ̃ʉ, chekʉnapi repana cuache choosie
ñasiere chotena jãapãani kachana ũcuatee kʉamato.
\p
\v 20 Cuache chooreparu joe choomaneajʉ chini pãi ũcuanʉko
asajʉte ikajʉ̃ʉ repanare, chekʉnapi asa kʉkʉ repana
choosiejache choomaneajʉ chini.
\p
\v 21 Ie chʉo mʉʉpi asa chooakʉ chini Dioname Jesucristo
Repaʉ chẽa paacojñona ángeles asajʉte chʉ̃ʉ jokamʉ chʉʉ
mʉʉre: Chʉʉ chʉvache chookʉ mʉʉ chiinarechia naa
reojache chookaiʉ paimañe pãi ũcuanʉkore
ũcuaparʉvachia oiʉ chookaiʉ paijʉ̃ʉ.
\v 22 Chʉ̃ʉnare jokara chini repana paiche mʉʉ rʉa jeerʉmʉ
ñasinani jokajʉ̃ʉ. Repana paiche mʉʉ masi ñamanare
chʉ̃ʉñe jokamanejʉ̃ʉ, chekʉrʉmʉ repanapi cuache
choojʉna ña pãipi mʉʉni cuache cutujʉ. Jmamakarʉjẽe
cuache choomañe paiʉ reojache paijʉ̃ʉ mʉʉ.
\p
\v 23 Timoteo, mʉʉni chʉvamʉ chʉʉ ie: Mʉʉ teeñoã
cʉtaro jũni okorepachia ũkukʉ paimañe ʉche conopi jmarakarʉ
jame ũkukʉ paijʉ̃ʉ.
\p
\v 24 Joe chʉ̃ʉnare jokachete ikamʉ chʉʉ. Rʉa jeerʉmʉ
ñasinarechia jokato rʉa reomʉ, chiimʉ chʉʉ. Irʉmʉ pãi
teena cuache chooche ñomʉ, pãi ũcuanʉko choosie roiche
Dios chʉ̃ʉumucuse chutaa tĩamarʉmʉna. Jãatani chekʉna
ñomañe cuache chooche pãi ũcuanʉko choosie roiche Dios
chʉ̃ʉumucuse Ũcuaʉji kʉaʉna masijanaame pãi.
\v 25 Ũcuajache pãi reojache chooche teeñoã pãi
ũcuanʉkore masi ñomʉ. Jãatani teeñoã ñomañe reojache
chooche pãi ũcuanʉko choosie roiche Dios chʉ̃ʉumucusena
masicojñojamʉ.
\c 6
\p
\v 1 Chekʉnare chẽa paacojñonapi Jesure cuasana repanare paanare
ña, vajʉchʉjʉ jachamañe paapʉ, pãipi repana paichete ña
mai chechochʉore asa, “Cuamʉ jãa”, chiijʉ Dioni cuache
cutumaneajʉ chini.
\v 2 Chẽa paacojñonapi Diore cuasana teena repanare paanapi
ũcuajache Jesure cuasana paito repana majapãijanajejʉna naa
jmamakarʉ ña, vajʉchʉjʉ paimañe chooche naa reojache
chookaijʉ paapʉ, chookaicojñonapi repana cuasana
majapãijanajejʉna. Ie chechokʉ chʉ̃ʉkʉ paijʉ̃ʉ repacheja
painare:
\s Reojache paichete kʉamʉ
\p
\v 3 Pãiʉ ũcuaʉakʉji Maire Paakʉ chechosie ũcuarepare
jachakʉ, Diore masi cuasajʉ paichete kʉachʉo chechomañe
jorechʉore chechoni cuache choomʉ.
\v 4 Repaʉji meñe, “Rʉa masiʉmʉ chʉʉ”, chiiʉ cuasakʉ
Dios chʉo ũcuarepare asacuhekʉ rʉa vesʉʉmʉ repaʉ. Pãi
sãiñechia cutujʉ kerechʉochia ũcuarepamañere asakʉ cutumʉ
repaʉ. Jãajañe cutuna pãi chekʉnare ña pojomañe cavajʉ
cuache ikajʉ sãiñechia jorenaame.
\v 5 Cuhamañe cavajʉ cuache cuasanajejʉ chʉo ũcuarepa
cuasamanaame repana. Kurire kooñu chini Dios chʉojache ikajʉ
repana cuasachechia chʉvanaame repana.
\v 6 Jãatani pãi Dioni masi cuasajʉ repana paanʉkorʉchia
paajʉ pojojʉ naa rʉa paaneemana kurina karamañe paachejache
repana rekoñoã reojachere paame.
\v 7 Mai pãi ũcuanʉko icheja cheja rairʉmʉ cuamajñarʉãjẽe
peona raisinaame. Ũcuachia mai jũnisorʉmʉ sacuakʉna peovana
saijanaame mai.
\v 8 Jãajekʉna maini ãiñename kãña karamato, ũcua
jãajamakarʉ paajʉ pojojʉ naa rʉa paaneemaneñu mai.
\v 9 Pãi kurina pañu chiina paivesʉjʉ cuache cuasajʉ vati
chʉ̃ʉñete asa chẽa repanare ʉachete choojʉ ũcuanapi meñe
cuache choojʉ cacua choosojʉ paime.
\v 10 Kurineena siache rʉa cuache choome kurire kooñu chini.
Pãi teena kurire rʉarepa chiijʉ Jesure cuasache jokaso
reojache paichete cavesʉso cuache paijʉ rʉa chʉovana
paime.
\s Reojache paimasichete kʉamʉ
\p
\v 11 Mʉʉtani Dios neekʉjekʉ jãajañe choocuhekʉ
choomañe Repaʉni masi cuasakʉ pojokʉ pekerʉ paiʉ Repaʉ
chiichete chookʉ chekʉnani oiʉ reojache chookaiʉ, cuache
tijñetojẽe ũhasomañe ũcua reojache paijʉ̃ʉ.
\v 12 Mʉʉre peore chooreochetʉka Dioni masi cuasakʉ
reojache paijʉ̃ʉ, Repaʉ paichejare ai sani pasa chini.
Jãare chini Dios mʉʉre chẽa paamʉ. Mʉʉ Repaʉte cuasakʉ
jovosirʉmʉ pãi jainʉko asajʉte mʉʉ Repaʉte cuasakʉ
jovosie reojache kʉa jñausikʉamʉ.
\v 13 Icheja chejaname cʉnaʉmʉ painare ũcuanʉkore paiche
ĩsikʉ Dios asakʉte, ũcuachia Poncio Pilatote chʉo
reojache ikasikʉ Jesucristo asakʉte chʉ̃ʉmʉ chʉʉ
mʉʉre ie chʉo:
\v 14 Dios mʉʉre jokasie jachamañe jmamakarʉjẽe cuache
choomañe paiʉ Maire Paakʉ Jesucristo joe rairʉmʉjatʉka
rʉa reojache chookʉ paijʉ̃ʉ.
\v 15 Repaʉte raoʉarʉmʉna Dios Jesucristote joe raojamʉ.
Repaʉ Dios Teeʉji Reokʉ Masiʉjekʉ ainarejẽe naa rʉa
Masiʉmʉ. Pãi chʉ̃ʉnare ʉ̃sekʉna repanare ʉachete cuache
choojʉ Repaʉ ʉ̃semamajñarʉãchia choome.
\v 16 Repaʉchiaamʉ teeʉ Siarʉmʉ Paikʉ. Ũcuaʉji rʉarepa
miakʉ ñacuakʉna pãi teeʉjẽe ñamanaame Repaʉte.
Ũcuanʉko cuhamañe siarʉmʉ Repaʉni pojojʉ paijʉ̃ʉ.
“Peore Masiʉmʉ mʉʉ”, chiijʉ pañu mai Repaʉte.
Jãajañe paaʉ.
\p
\v 17 Pãi cheja pairʉmʉ kurinajejʉ põse rʉa paanare,
“Chekʉnare cuhemañe, kuri ai paimañechia cuasajʉ, ‘Kurire
paakʉ chʉʉ chiiche peore paakʉmʉ chʉʉ’, chiimañe
paijʉ̃ʉ”, chiiʉ chʉ̃ʉjʉ̃ʉ, Dios repanare chookaijachere
pojojʉ naa rʉa cuasajʉ paapʉ. Repaʉ Dios maipi reojache paapʉ
chini mai chiiche peore karamañe ĩsikʉmʉ maire.
\v 18 “Reojachere siarʉmʉ karamañe choojʉ paijʉ̃ʉ”,
chiiʉ chʉ̃ʉjʉ̃ʉ repanare, chekʉnani oijʉ repana paachete
ĩsijʉ paapʉ.
\v 19 Jãajañe choojʉ pani Dios paichejana ai sani repana
choojʉ chiisie reojache karamañe paajʉ pojojʉ reojache
paijanaame repana.
\s Timoteote cuhacho chʉ̃ʉsieame
\p
\v 20 Timoteo, Dios mʉʉre jokasie reojache cuhamañe
chechokʉ paijʉ̃ʉ. Diore cuasamana peoche ikachʉo, “Rʉa
masina cuasacheme ie”, chiiche jorechʉo asamañe paijʉ̃ʉ.
\v 21 Pãi teena Dios chʉo asasina repana jorena chʉvachete
asa chẽa Diore masi cuasache kʉachʉo asacuheme chura.
\p Reomʉ. Diopi reojache chookaiʉ paaʉ mʉsanʉkonare.
\cls Pablo