\id 2TI
\h 2 TIMOTEO
\toc1 San Pablo Timoteote joe chʉo tocha saosieame
\toc3 (2 Ti)
\mt San Pablo Timoteote joe chʉo tocha saosieame
\c 1
\s Chʉo saosieame
\p
\v 1 Chʉʉ, Pablo, Diopi chiiʉna maire Jesucristote cuasanare Repaʉ, “Chʉʉname siarʉmʉ paichete ĩsijamʉ chʉʉ”, chiisiere chʉvakʉ paaʉ chini Jesucristo saosikʉpi ijaova utijaova tocha saomʉ
\v 2 mʉʉre, Timoteote, chʉʉ chĩiʉjaiʉjekʉna chʉʉ cuasakʉte. Mai Jakʉ Dioname Maire Paakʉ Jesucristo oiʉ rʉa reojache paichete chookaaʉ mʉʉre reojache paaʉ chini.
\s Dios chʉo chʉvachete chʉ̃ʉmʉ
\p
\v 3 Chʉʉ aipãi chookaisiejache cuache choomaʉ sʉmakʉ paimaʉ, Diore chookaikʉmʉ chʉʉ. Umucujñaname ñami Repaʉni mʉʉni siarʉmʉ sẽekaiʉ, “Reorepamʉ, Jakʉ”, chiiʉ paimʉ chʉʉ Repaʉte.
\v 4 Mʉʉ chʉʉ joka rairʉmʉ oisiere cuasakʉ mʉʉname paiʉ pojora chini ñaneemʉ chʉʉ mʉʉre.
\v 5 Ũcuachia mʉʉ Diore masirepa cuasakʉ paiche cuasamʉ chʉʉ. Mʉcueo Loidaname mʉjako Eunice charo Repaʉte cuasajʉ jovosinaame. Chura mʉʉ ũcuachia repana cuasachejache cuasamʉ Repaʉte.
\p
\v 6 Jãajekʉna chʉʉ mʉʉre jʉ̃jñapi jarʉmʉ mʉʉpi choomasiakʉ chini Dios mʉʉre jokasiere chookʉ cheche naa rʉa chookʉ paijʉ̃ʉ, chiimʉ chʉʉ mʉʉre.
\v 7 Dios maire vajʉchʉrekoñoã paaajʉ chini jokamamʉ. Maipi rũhiñe cuasa masijʉ cuache choomañe reojache paijʉ chekʉnani ña oijʉ reojache chookaijʉ paapʉ chini chookaimʉ Dios maire.
\v 8 Jãajekʉna Maire Paakʉ paiche chekʉnare chʉvavajʉchʉmañe chʉvajʉ̃ʉ. Ũcuachia chʉʉ Repaʉ chʉo chʉvakʉjekʉ pãi chẽavʉe cuaocojño paichete cuasakʉ vajʉchʉmañe cuache tijñecojñokʉtani Diopi chookaiʉna Jesucristote cuasache kʉachʉore chʉʉname pojokʉ chʉvakʉ paijʉ̃ʉ.
\v 9 Repaʉ Dios maire vati toa sani uuche ʉ̃sekʉ chẽa paakʉmʉ, maipi Repaʉ neena paijʉ reojache paapʉ chini. Mai reojache choosiejekʉna chẽasiemaʉasomʉ jãa. Rupʉ Repaʉte ʉache choosieasomʉ jãa. Maire oiʉ jãajañe chookani chẽa paajache chutaa cheja peorʉmʉna cuasa Jesucristoni rao chookasa chiniasomʉ Dios.
\v 10 Chura mai cuare jũni roikaaʉ chini Ũcuaʉni rao Repaʉ maire oiʉ chookasa chiisie kʉacuhasikʉamʉ Repaʉ. Jesucristote cuasache kʉachʉo asa chẽasinajejʉ ie masime mai chura: Jesucristo chookaisiejekʉna mai jũnisosirʉmʉ cuanaretani toa saimañe Repaʉ paichejana ai sani Ũcuaʉname reojache paireoche.
\p
\v 11 Dios chʉʉre jãare kʉakʉ paaʉ chini chʉ̃ʉ jokasikʉamʉ, Jesucristo saosikʉ paiʉ Repaʉ chʉore kuiʉ chechokʉ paaʉ chini.
\v 12 Chura repachʉo chechokʉjekʉ cuache choocojñokʉ pãi chẽavʉere cuaorena paimʉ chʉʉ. Jãatani chʉʉ Repaʉ Jesucristo kuiramasikʉ reojache paiche masikʉjekʉ vajʉchʉmamʉ. Repaʉ joe rairʉmʉjatʉka Ũcuaʉji masi kuirakʉna reojache paijamʉ chʉʉ.
\p
\v 13 Chʉʉ mʉʉre chechosiere Dios chʉo ũcuarepare chechokʉ paijʉ̃ʉ repacheja painare. Ũcuachia Jesucristoni masirepa cuasakʉ chekʉnare pãi oiʉ reojache chookaiʉ paijʉ̃ʉ.
\v 14 Dios Rekocho mai rekoñoã jame Pairekochoji chookaiʉna Repaʉ mʉʉre chʉvaakʉ chini chʉ̃ʉ jokasiere Repaʉ chʉore masi chʉvakʉ paijʉ̃ʉ.
\p
\v 15 Asia cheja cana ũcuanʉko Figeloname Hermógenejatʉka chʉʉre chookaicuhejʉ jokasosie masimʉ mʉʉ.
\v 16 Jãatani Onesíforore chʉʉre rʉarepañoã chʉʉ chiimajñarʉã reojache kuirasikʉre Diopi oiʉ reojache chookaaʉ, repaʉ neenare ũcuachia. Icheja pairʉmʉ chʉʉre pãi chẽavʉe paikʉtetani vajʉchʉmañe jame paisikʉamʉ repaʉ.
\v 17 Repaʉ ijoopo Roma vʉejoopo apetĩasirʉmʉ vajʉchʉmañe chʉʉre jñaañejatʉka rʉa jeerʉmʉ kuesikʉamʉ repaʉ.
\v 18 Ũcuachia repaʉ Efeso vʉejoopo pairʉmʉ repaʉ chʉʉre rʉa reojache chookaisie peore masimʉ mʉʉ. Maire Paakʉ Dios Repaʉ pãi ũcuanʉko choosie roiche chʉ̃ʉumucuse chʉʉre reojache chookaisie roi repaʉte ña oiʉ rʉa reojachere ĩsiakʉ.
\s Sõtao reokʉ choochejache Jesucristote chooche chookaichete kʉamʉ
\c 2
\p
\v 1 Mʉʉ, Timoteo, chʉʉ chĩijaiʉ, Jesucristo mʉʉre
chookaiche reojache choo koka paajʉ̃ʉ.
\v 2 Chʉʉ mʉʉname chekʉna jainʉko asajʉte chechosie asa
chẽa ũcuarepa chookʉ chekʉnare chechomasinare chechojʉ̃ʉ,
asa chẽa chechojʉ paapʉ.
\p
\v 3 Sõtao reokʉ paivesache paitojẽe pojokʉ masi chookʉ
paichejache paiʉ Jesucristoni cuasakʉna mʉʉre cuache
tijñeñe cuhemañe ũcua pojokʉ chooche chookaiʉ paijʉ̃ʉ
Repaʉte.
\v 4 Sõtaopãi teeʉjẽe repanare ʉache choomañe paijʉ
repanare chʉ̃ʉna chʉ̃ʉñechia choome repanapi pojoajʉ
chini.
\v 5 Vitopʉ apena ũcuajache vito apeche chʉ̃ʉna
chʉ̃ʉñete peore masi choomaneni cajejaimame.
\v 6 Pãiʉ chooche rʉa chookʉ repaʉ chio ãu tãsikʉ ãu
kʉ̃irʉmʉ ũcuaʉji charo tʉa ãimʉ repa.
\v 7 Peore jãa chotemajña chʉʉ ika kʉasie asa cuasakʉ
chechekʉ paijʉ̃ʉ. Jãajañe chooni Maire Paakʉ Diopi
chookaiʉna asamasijamʉ mʉʉ.
\p
\v 8 Jesucristo paisiere cuasajʉ̃ʉ. Aperʉmʉ paiʉ pãi
chʉ̃ʉsikʉ David jojocojñosikʉamʉ Repaʉ.
Chuenisosikʉtani Diopi vasoʉna joe vajʉraisikʉamʉ. Ũcua
kʉachete Repaʉ Jesucristote cuasache kʉachʉore chʉvakʉ
paikʉmʉ chʉʉ.
\v 9 Repachʉo chʉvakʉjekʉ cuache choocojñokʉ pãi
chẽavʉere paiʉ cuache choosikʉre quẽo sʉochejache
cʉnamepi quẽo sʉocojñosikʉ paimʉ chʉʉ. Jãatani Dios
chʉo chʉvachetani ʉ̃secuamʉ pãi.
\v 10 Jãajekʉna Repaʉni cuasakʉ rʉa cuache
choocojñokʉtani Repaʉ chʉo ũcua masi chʉvakʉ paimʉ
chʉʉ, Repaʉ chẽa paajanapi asa chẽa Jesucristoni cuasajʉ jovo
Ũcuaʉname siarʉmʉ reojache paapʉ chini.
\v 11 Ie chʉo rʉa ũcuarepaame:
\q Maipi Repaʉni cuasajʉ cuache choocojñoni Ũcuaʉname
jũnisosinajañe paijʉ
\q Repaʉname siarʉmʉ reojache paijanaame.
\q
\v 12 Cuache tijñecojñonatani maipi Repaʉni ũcua cuasani
\q Ũcuaʉname paijʉ pãire chʉ̃ʉjanaame.
\q Jãatani maipi Repaʉte cuasachete kʉavajʉchʉjʉ,
\q “Repaʉte cuasamanaame chʉkʉna”, chiito
maire ũcuajache sãiñe,
\q “Chʉʉ neenamame ina”, chiijamʉ
Repaʉ.
\q
\v 13 Maire Repaʉ chʉ̃ʉñe masirepa reojache choojʉ
paimanaretani
\q ũcua reojache chookʉ paikʉmʉ Repaʉ,
\q ũcuarepa paiʉ ũcuarepa choochechia masikʉjekʉ.
\s Diopi pojoakʉ chini Repaʉ chiiche masi chookaikʉ paichete
kʉamʉ
\p
\v 14 Ie chʉʉ chʉvachʉo repacheja painare siarʉmʉ
chʉvakʉ paijʉ̃ʉ, cavesʉmañe cuasajʉ paapʉ. Ũcuachia
mai vesʉchete repana sãiñechia cutujʉ kereche Dios asakʉte
ʉ̃sejʉ̃ʉ repanare. Jãajañe ikachʉo naa reojache
paiche chechochʉomamʉ. Jãajañe ikache siarʉmʉ asana
pãi rupʉ cacuasome.
\v 15 Mʉʉre peore chooreochetʉka Dios chiichete chookʉ
paijʉ̃ʉ, Ũcuaʉji mʉʉni pojoakʉ. Jãajañe chookʉ pani
Repaʉ chʉo ũcuarepa vajʉchʉmañe chekʉnare rũhiñe
chechomasijamʉ mʉʉ.
\v 16 Diore cuasamana peoche ikachʉo ikamañe paijʉ̃ʉ.
Jãajañe ikana siarʉmʉ naa rʉa cuache choojʉ painaame.
\v 17 Repana chechochʉo phũkaravʉ chachakʉ saichejache
cuachejekʉna repachʉo asana cacuasojʉ paime. Himeneoname
Fileto ũcuare peoche chʉore chechojʉ paime.
\v 18 Dios chʉo ũcuarepare cuhejʉ chura tĩiñere jorechʉore
chechojʉ paime repana, ijache ikajʉ: “Pãi jũnisosina
vajʉraimanejanaame; Jesure jovorʉmʉchia repana rekoñoã
vasocojñoñe paimʉ repanare”, chiijʉ. Jãajañe ikajʉ jorejʉ
chechojʉ pãi teenare Jesure cuasanare cacʉosojʉ paime
repana.
\v 19 Jãatani Dios chʉo ũcuarepajekʉ ai paiche, ijache
kʉamʉ:
\q Maire Paakʉ Dios Repaʉ neerepanare masimʉ.
\m Ũcuachia,
\q Repanare reojache chookaaʉ chini Repaʉte sẽenare ijache
ikamʉ Dios:
\q “Cuache chooche peore ũhasoche paimʉ mʉsanʉkonare”,
chiimʉ.
\m Jãajañe kʉamʉ Repaʉ chʉo tocha jokasie.
\p
\v 20 Pãi paivʉe ʉjavʉe sanavʉ paimajñarʉã
pachokuriname pokuri choosimajñarʉãchia paimañe
chookoñaname toto choosimajñarʉã paimʉ. Repa
teemajñarʉã siaumucujña chooche choojʉ paamajñarʉãame.
Cheke naa reojamajñarʉãtani chooche choomaumucujñachia
pojojʉ choojʉ paamajñarʉãame.
\v 21 Pãiʉte cuache chooche peore ũhasosikʉre
reojamajñarʉãjañe paikʉjekʉna Maire Paakʉ Dios chiiche
reojache ũcuaʉache chooreomʉ.
\p
\v 22 Jãajekʉna põsʉpãi cuache chooʉache cuasachete jʉvokʉ
choomañe reojache paiʉ Dioni masi cuasakʉ cavamañe paiʉ,
chekʉnare oiʉ reojache chookaiʉ paijʉ̃ʉ, reojarekoñoã
paajʉ Diore sẽenaname.
\v 23 Mai vesʉchete cutujʉ pãi sãiñechia kerechʉo asakʉ
paimanejʉ̃ʉ. Repachʉo cutuna rʉa cavajʉ painaame.
\v 24 Maire Paakʉte chooche chookaikʉte cavaneemañe paiʉ
pãi ũcuanʉkore reojache jame paiche paimʉ. Ũcuachia
chechomasikʉ nami perumakʉ paaʉ repaʉ.
\v 25 Ũcuachia pãi repaʉ chʉvachʉo asacuhenare Diopi
chookaiʉna jachachete ũhaso Repaʉ chʉo ũcuarepare asa chẽa
cuasaajʉ chini pekerʉ ikakʉ paaʉ.
\v 26 Repanapi jãajañe chooni rũhiñe cuasajʉ reojache
paijanaame, vati aipi paakʉ chʉ̃ʉkʉna repana ũcuaʉache
cuache choojʉ paisiere jʉvomasijʉ.
\s Jesucristo joe raipirarʉmʉ paijachere kʉamʉ
\c 3
\p
\v 1 Ũcuachia iere masiche paimʉ: Jesucristo joe raipirarʉmʉ
rʉa paivesache paijamʉ maire.
\v 2 Reparʉmʉ pãi jainʉko meñechia chiijʉ chekʉnare
chookaicuhejʉ kurineejʉ, “Chekʉnare naa rʉa masiʉmʉ
chʉʉ”, chiijʉ ũcuanachia meñe pojojʉ paijanaame.
Ũcuachia Diore cuache ikajʉ, pʉkakʉpãi jachajʉ, repanare
reojache chookainare pojomañe kerejʉ, Diore pojojʉ chooche
ña pãisojʉ paijanaame.
\v 3 Majapãijẽe cuasamapʉ ña oimañe cuache cutujʉ, chekʉna
chooche perujʉ cuhamañe cuasajʉ, repanare chooʉache cua
jʉvovesʉjʉ, chekʉnare asi choojʉ reojache chooche peore
siache cuhena paijanaame repana.
\v 4 Ũcuachia rʉa jorejʉ repana cuache choochejẽe
cuasamañe paijʉ, meñechia cuasajʉ chekʉnare cuhejʉ, Dios
chiiche choochejẽe cuasamañe repanare ʉachechia choojʉ
paijanaame repana.
\v 5 Diore pojona choochejache jorejʉ choojʉ repana cuache
choocheji Repaʉ reojache chookaichete jachajʉ paijanaame
repana. Jãajañe painare pãi jame paimanejʉ̃ʉ.
\p
\v 6 Repana pãi teena kuijʉ vʉñana tĩa romivanare
vesʉvanare cuare jʉvovesʉjʉ ũcuaʉache cuache choojʉ
vajʉchʉvanare jorejʉ peochete chechojʉ painaame.
\v 7 Repana romi pãi chechoche siarʉmʉ siache chechejʉ
painatani jmamakarʉjẽe Dios chʉo ũcuarepa asa chẽamanaame.
\v 8 Repana jorena Dios chʉo ũcuarepare cuhejʉ jachajʉ paime,
Janename Jambres Moiseni cuhejʉ aperʉmʉ keresiejache.
Cuachechia cuasanajejʉ Diore cuasacuhenaame repana.
\v 9 Jãatani pãi ũcuarepanʉko asa chẽamanejanaame repana
jorechʉo. Repana jorena chooche pãi ũcuanʉko ña masijanaame,
Moisete cuhesina Janename Jambres cuache choojʉ ña
masicojñosiejache.
\s Pablo Timoteote joe chʉ̃ʉ jokasieame
\p
\v 10-11 Mʉʉtani chʉʉ chechochʉore masikʉmʉ. Ũcuachia
chʉʉ paiche peore masikʉmʉ, chʉʉ choora chiiche, chʉʉ
Diore masi cuasache, chʉʉ pekerʉ chechochename chʉʉ
chekʉnare oiʉ reojache chookaiche. Ũcuachia chʉʉ cuache
choocojñokʉtani Diore cuasache ũhasomañe ũcua cuasakʉ
Repaʉte chooche chookai koka paache masikʉmʉ mʉʉ. Chʉʉ
Antioquía vʉejoopo Iconio vʉejooponame Listra vʉejoopo
painare cuache choocojñosie peore masikʉmʉ mʉʉ. Repanare
rʉa cuache choocojñokʉtani Diopi chookaiʉna reojache pani
etajaisikʉamʉ chʉʉ.
\v 12 Reojache paijʉ Jesucristoni masi cuasajʉ Repaʉ
chiichechia chooñu chiina pãi cuache choocojñojanaame.
Ũcuarepaame jãa.
\v 13 Jãatani cuache painaname jorechʉo chechona jorejʉ,
jorecojñojʉ siarʉmʉ naa rʉa cuache choojʉ paijanaame.
\p
\v 14 Mʉʉtani mʉʉ chechocojñosiere peore masi cuasakʉ
ũhasomañe ũcua cuasakʉ paijʉ̃ʉ. Chʉkʉnate mʉʉre
chechosinare masikʉjekʉ repachʉo ũcuarepa paichete masimʉ
mʉʉ.
\v 15 Mʉʉ chĩirʉmʉna masichete Dios chʉo tocha jokasiere
cuasajʉ̃ʉ. Jesucristote cuasajʉ jovo Ũcuaʉname siarʉmʉ
reojache paichete kʉamʉ repachʉo.
\v 16 Dios chʉo tocha jokasie peore Ũcuaʉ kʉasiejekʉ maire
chechochʉoame. Maipi asa cuache choochete ũhasoajʉ chini
kʉachejekʉ maire reojache paiche chʉvachʉoame.
\v 17 Mai Diore cuasanapi repachʉore asajʉ chechejʉ pani
reojache paiche chechenajejʉ siache reojache
choomasijanaame.
\c 4
\p
\v 1 Dios asakʉte ũcuachia Jesucristo Pãi Ũcuanʉkore
Chʉ̃ʉkʉ Paijaʉ joe rani pãi jũnisosinaname vajʉna
choosie peore roiche chʉ̃ʉjaʉ asakʉte iere chʉ̃ʉ jokamʉ
chʉʉ mʉʉre:
\v 2 Dios chʉo chʉvache cuhasomañe siarʉmʉ chʉvakʉ
paijʉ̃ʉ, chʉvareorʉmʉname chʉvacuache pairʉmʉ.
Pekerʉ chechokʉ repanapi cuache chooto perumañe ikakʉ
chʉvajʉ̃ʉ repanare, joe choomañe Dioni masi cuasajʉ
vajʉchʉmañe reojache paijʉ paapʉ chini.
\v 3 Naa paisirʉmʉ Dios chʉo ũcuarepa chechoche rʉa
asacuhejanaame pãi. Chʉo ũcuarepare asacuhejʉ repanare
ʉachechia asajʉ, repana chiichechia chechojʉna asajʉ pañu
chini chechonare rʉa jainʉkore kue jñaajanaame repana.
\v 4 Dios chʉo ũcuarepare asacuhejʉ rupʉ aichʉore pãi cuasajʉ
kʉachete asajʉ paijanaame repana.
\v 5 Mʉʉtani siarʉmʉ rũhiñe cuasakʉ paivesache
tijñetojẽe ũcua reojache paiʉ mʉʉpi chooakʉ chini
Dios mʉʉre jokasiere Repaʉ chʉo chʉvachete peore masi
chookʉ paijʉ̃ʉ, Repaʉte cuasamanapi asa chẽa Jesuni cuasajʉ
jovoajʉ.
\p
\v 6 Chʉʉre vanisojarʉmʉ tĩañe jmamakarʉ karamʉ. Dios
chʉo chʉvakʉjekʉ chuenisopiramʉ chʉʉ.
\v 7 Jesuni masi cuasakʉ chʉʉre peore chooreochetʉka chookʉ
cuache tijñecojñokʉtani Repaʉte cuasachete ũhasomañe
ũcua cuasakʉ reojache paiʉ chʉʉpi chooakʉ chini Dios
chʉʉre jokasie peore choo pinicuhamʉ chʉʉ.
\v 8 Chura chʉʉ reojache choosie roi Maire Paakʉ Reokʉ
pãi ũcuanʉko choosie roiche Repaʉ chʉ̃ʉumucuse chʉʉre
ĩsijachere cuasakʉ chaamʉ chʉʉ. Chʉʉrechia ĩsimañe
Repaʉ joe raijache rʉa cuasajʉ pojojʉ chaanare ũcuachia
ĩsijamʉ Repaʉ.
\s Timoteoji chookaaʉ chini Pablo chʉ̃ʉkʉ chʉvasieame
\p
\v 9 Mʉʉre peore chooreochetʉka chookʉ nami rani ñajʉ̃ʉ
chʉʉre.
\v 10 Demas Diore cuasamana paichete naa rʉa chiiʉ chʉʉre
joka Tesalónica vʉejoopona sanisosikʉamʉ. Crescenteji
Galacia chejana sanisosikʉamʉ. Titopi Dalmacia chejana
saisikʉamʉ.
\v 11 Lucachia jame paimʉ chʉʉre. Marcote kue jñaa
rakaijʉ̃ʉ. Chʉʉre chooche rʉa chookaimasikʉmʉ repaʉ.
\v 12 Tíquicote mʉʉ sani paichejana Efeso vʉejoopona
saosikʉamʉ chʉʉ.
\v 13 Mʉʉ rairʉmʉ chʉʉ Troas vʉejoopo joka raisikãa chʉʉ
sẽsevʉ juikãa rakaijʉ̃ʉ chʉʉre, Carpo vʉe jokasikãa.
Ũcuachia chʉʉ utijaokorovʉã rakaijʉ̃ʉ. Chekʉjao utijao
ũcuachia rʉa chiimʉ chʉʉ. Jãa cavesʉmañe rakaijʉ̃ʉ
chʉʉre.
\p
\v 14 Cʉna chooche chookʉ Alejandro rʉa cuache choosikʉamʉ
chʉʉre. Maire Paakʉji repaʉ cuache choosinʉkorʉ cuache
tijñeñe chʉ̃ʉjamʉ repaʉte.
\v 15 Ñarepakʉ paijʉ̃ʉ repaʉ chooche. Mai chʉvache Dios
chʉo rʉa cuhekʉ chʉvaʉ̃semʉ repaʉ.
\p
\v 16 Pãi chẽañe chʉ̃ʉna charo chʉʉni soni chʉʉ
choosiere cuasa ñarʉmʉ chʉʉre jame paina teeʉjẽe jame
ikakaimañe ũcuanʉko joka sanisosinaame chʉʉre. Jãatani
repana choosie cuasamaneakʉ Dios, chiimʉ chʉʉ.
\v 17 Jãatani reparʉmʉ chʉʉre Maire Paakʉji jame paiʉ
chookaisikʉamʉ, chaire ãusomañe paiʉ Repaʉ chʉore ũcua
koka paakʉ masi chʉvakʉna judío peonapi ũcuanʉko asajʉ paapʉ
chini.
\v 18 Maire Paakʉ chʉʉre cuache chooche siache peore Ʉ̃sekaiʉ
Repaʉ paicheja reojachejana sajamʉ. Siarʉmʉ cuhamañe pojojʉ
pañu mai Repaʉte. Jãajañe paaʉ.
\s Chʉo saokʉ reojache ika jokasiere kʉamʉ
\p
\v 19 Priscaname Aquilate chʉo sa kʉakaijʉ̃ʉ chʉʉre,
Onesíforoname repaʉ majapãi ũcuachia.
\v 20 Erasto Corinto vʉejoopona canʉkasikʉamʉ.
Trófimoretani jũikʉni Mileto vʉejoopona joka ranisosikʉamʉ
chʉʉ.
\v 21 Mʉʉre peore chooreochetʉka chookʉ chutaa sʉsʉrʉmʉ
tĩamarʉmʉna raijʉ̃ʉ icheja. Eubuloname Pudente, Linoname
Claudia, chekʉna mai majapãijana ũcuanʉko icheja paina chʉo
saome mʉʉre.
\p
\v 22 Maire Paakʉji mʉʉ rekochote jame paaʉ. Mʉsanʉkonare
ũcuanʉkore Diopi rʉa reojache chookaaʉ reojache paapʉ
chini. Reomʉ.
\cls Pablo