\id TIT
\h TITO
\toc1 San Pablo Titore chʉo tocha saosieame
\toc3 (Tit)
\mt San Pablo Titore chʉo tocha saosieame
\c 1
\s Pabloji Titoni sẽemʉ
\p
\v 1 Chʉʉ, Pablo, Dios chʉ̃ʉñe chooche chookaikʉmʉ. Jesucristoji chʉʉre saosikʉamʉ Dios chʉore chʉvaakʉ chini, Dios chẽa paajanapi Repaʉni cuasajʉ jovo Dios chʉo ũcuarepare masijʉ reojache paapʉ chini.
\v 2 Dios apereparʉmʉ chutaa cheja peorʉmʉ Repaʉ paicheja pãi sani paijachere kʉaasomʉ. Joremakʉamʉ Dios. Diore cuasajʉ jovosina Ũcuaʉ paichejare ai sani paijanaame.
\v 3 Chura Repaʉ paanare vati toa sani uuche Ʉ̃sekʉji Dios Repaʉ chiisirʉmʉjekʉna pãipi asa masiajʉ chini chʉʉni chʉ̃ʉsikʉamʉ Repaʉ chʉore chʉvaakʉ chini.
\v 4 Tito, chʉʉ ie chʉo tocha saomʉ mʉʉre. ¿Paikʉ mʉʉ? Mʉʉre rʉa cuasamʉ chʉʉ. Chʉʉpi mʉʉni Dios chʉore kʉaʉna Repaʉni cuasakʉ jovosikʉamʉ mʉʉ. Jãajekʉna chʉʉ chĩijaiʉ paimʉ mʉʉ chʉʉre chura. Jesucristote maire vati toa sani uuche Ʉ̃sekʉni Ũcuateeʉte cuasanaame mai. Repaʉ Jesucristo mai Jakʉ Dioname mʉʉ rekochona reojache paichete chookaijʉna reojache paijʉ̃ʉ.
\s Tito choojachere kʉamʉ Pablo
\p
\v 5 Chʉʉ mʉʉname Creta juupo paiʉ mʉʉre joka ranisosikʉamʉ, mai choo pinimanesiere mʉʉpi naa paiʉ choo piniakʉ chini. Mʉʉre chʉ̃ʉsikʉamʉ chʉʉ Jesure cuasana paijoopoã siache repajoopoã kuiʉ Jesure cuasanare chʉ̃ʉjʉ kuirajanani, ainani jñaa jokaakʉ chini.
\v 6 Ijache painani chẽajʉ̃ʉ: Jesure cuasanare chʉ̃ʉjana ijache paapʉ: Cuache choomañe paapʉ pãipi cuache cutumaneajʉ. Romi teenarechia paaajʉ. Repana mamachĩi Jesure cuasajʉ pʉkakʉpãi chʉ̃ʉñe jachamañe paapʉ. Mamachĩipi ũcuaʉache cuache chooto pʉkakʉpãi pãi chʉ̃ʉcuamʉ.
\v 7 Jesure cuasanare chʉ̃ʉnapi, repana chʉ̃ʉnare reojache paajʉ, Diore chooche chookaapʉ. Cuache choomaneajʉ repana. “Chʉkʉna naa rʉa masime”, chini chekʉna ikache asacuhemaneajʉ. Nami perumaneajʉ. Cono jũimaneajʉ. Chekʉnare vaimaneajʉ. Kurineemaneajʉ.
\v 8 Jesure cuasanare chʉ̃ʉnapi ijache paito reomʉ: Chekʉnare pãi soña rainare ãuname kãiruu ĩsiajʉ. Chekʉnare reojache chookaijʉ paapʉ. Dios chʉ̃ʉñete chooajʉ, chooʉamatojẽe. Chekʉnaname reojache paijʉ Dios chiichete chooajʉ. Chekʉrʉmʉ cuache chooʉatojẽe choomaneajʉ.
\v 9 Jesure cuasanare chʉ̃ʉnapi chʉʉ chechosiere Dios chʉo ũcuarepare jmamakarʉjẽe jokasomañe cuasajʉ paapʉ, pãi keretojẽe. Jokasomaneni chʉʉ chechosiere chʉo chekʉnani chechomasijanaame repana. Ũcuachia jorechʉo chechonare chʉvamasijanaame repana chʉvachʉore asa chẽaajʉ chini.
\p
\v 10 Dios chʉo jachana jainʉkoame, peoche ikajʉ jorena. Judíopãi rʉa jainʉko jãajañe choome. Ʉmʉpãi ũcuanʉkore ijache ikame: “Mʉsanʉkonapi jĩkochãtiro chʉto tʉacojñomato Dios paicheja saicuajamʉ”, chiime repana. Joreme.
\v 11 Repanare Dios chʉo jachanare ʉ̃sejʉ̃ʉ, cuache chechomaneajʉ. Kurire kooñu chini cuache chechome repana. Jãajañe chechojʉ teevʉña painare ũcuanʉkore cacʉojʉ paime. Jãajekʉna repana choochete ʉ̃seto rʉa reomʉ.
\v 12 Aperʉmʉ Creta juupo paikʉ rʉa masiʉji ijache ikaasomʉ: “Creta juupo paina ũcuanʉko jorenapi ãi ainaame. Paivesʉjʉ, ñamejʉ, vaineejʉ, cuavana paichejache painaame”, chiniasomʉ repaʉ.
\v 13 Ũcuarepaame repaʉ ikasie. Jãajekʉna repacheja painare rʉa chʉvajʉ̃ʉ, Dios chʉore asa chẽa cuasajʉ paapʉ.
\v 14 Rʉa chʉvajʉ̃ʉ repanare, judíopãi aichʉo kʉachete jorechʉore asa chẽa Dios chʉo ũcuarepare jachana chʉ̃ʉñete choomaneajʉ.
\v 15 Pãi reojarekoñoã paana reojachechia choonaame. Pãi cuarekoñoã paanatani, cuachechia choonaame. Dioni jachajʉ, cuachete cuasajʉ reojache choovesʉme repana.
\v 16 Repana cuache cuasana, “Diore cuasanaame chʉkʉna”, chiinatani reojache choomapʉna ña jachame pãi repanare. Dios peore, “Choomanejʉ̃ʉ”, chiisiere choojʉna perumʉ Dios repanare. Dios chʉ̃ʉsietani choomame. Reojachetani jmamakarʉjẽe choovesʉnaame repana.
\c 2
\s Pablo Tito chechojachere kʉamʉ
\p
\v 1 Mʉʉtani, reojachechia chechokʉ paijʉ̃ʉ, Dios
chʉo ũcuarepare.
\v 2 Ʉmʉpãi ainare ijache chechojʉ̃ʉ: “Reojache paijʉ,
cono jũimañe paijʉ̃ʉ, chekʉna pãi ña kʉkʉajʉ
mʉsanʉkonare. Cuache chooche jʉvomasijʉ choomañe
paijʉ̃ʉ. Diore masi cuasajʉ̃ʉ. Pãi ũcuanʉkore oijʉ̃ʉ.
Ũcuachia mʉsanʉkonare cuache tijñeto Diore cuasache
ũhasomanejʉ̃ʉ.” Jãare chechojʉ̃ʉ ʉmʉpãi ainare.
\v 3 Ũcuajache romi ainare ijache chechojʉ̃ʉ: “Reojache
paijʉ Dioni cuasajʉ paijʉ̃ʉ. Chekʉna paiche ñani cuache
cutumanejʉ̃ʉ. Cono jũimañe paijʉ̃ʉ. Reojache choojʉ
paijʉ̃ʉ, mʉsanʉkona paichete chekʉnapi ña chẽa paapʉ.
\v 4 Romichĩire reojache chechoñu chini jãajañe
paijʉ̃ʉ. Mʉsanʉkona airomipi romichĩi ʉmʉ painare ijache
chechoto reomʉ: ‘Mʉʉ̃jʉre cuasajʉ paijʉ̃ʉ, chĩivanare
ũcuachia.
\v 5 Masi cuasajʉ cuache choomañe paijʉ̃ʉ. Ñamemañe masi
kuirajʉ paijʉ̃ʉ chĩivanare, pʉkakʉre ũcuachia.
Chekʉnare pãi ña oijʉ pekerʉji ikajʉ paijʉ̃ʉ. Romi
mʉsanʉkona ʉ̃jʉpãi chʉ̃ʉñe jachamañe choojʉ
paijʉ̃ʉ. Jãajañe paijʉna pãipi ñani, Diore cuasanajejʉ
reojache painaame jãana, chiijanaame mʉsanʉkonare.
Cuachʉo ikachejẽe peojamʉ repanare.’ ” Airomipi romichĩire
jãajañe chechoto reomʉ.
\p
\v 6 Ũcuachia põsʉpãire ijache chechojʉ̃ʉ:
“Mʉsanʉkonare cuache chooʉatojẽe reojachechia choojʉ
paijʉ̃ʉ”, chiijʉ̃ʉ repanare.
\v 7 Mʉʉjẽe repana ñajʉte siarʉmʉ reojachechia
choojʉ̃ʉ, mʉʉ paichete ña chẽaajʉ. Repanare chʉvani
jmamakarʉjẽe joremañe chʉvajʉ̃ʉ. Apemañe rũhiñe
chechojʉ̃ʉ repanare.
\v 8 Siarʉmʉ chʉo ũcuarepare ikakʉ paijʉ̃ʉ, pãipi
mʉʉni cuache cutumaneajʉ. Reojachechia ikajʉ̃ʉ maire
cuhenapi cuache ikamañe paapʉ. Cuache choomanajejʉna maire
cuache ikavajʉchʉjanaame repana.
\p
\v 9 Pãi chekʉnare chooche chookainare ijache chʉvajʉ̃ʉ:
“Mʉsanʉkonare paana chʉ̃ʉñe peore reojache choojʉ̃ʉ,
repanapi ña pojoajʉ. Mʉsanʉkonare chʉ̃ʉto keremanejʉ̃ʉ
repanare.
\v 10 Repana nee jmamakarʉjẽe ñaasokaimanejʉ̃ʉ. Reojache
paijʉ̃ʉ, mʉsanʉkonani repana cuamajñarʉã kuirachete
jokavajʉchʉmaneajʉ. Reojachechia choojʉ paijʉ̃ʉ,
mʉsanʉkona paichete pãipi ña ũcuanʉko, ‘Dios vati toa sani
uuche Ʉ̃sekʉ chʉo rʉa reojaimʉ’, chiijʉ masiajʉ.”
Jãajañe chʉvajʉ̃ʉ chooche chookainare.
\p
\v 11 Diopi oiʉ reojache Chookaikʉjekʉ Repaʉ paanare vati toa
sani uuche ʉ̃semʉ. Pãipi Repaʉ paichete masiajʉ chini
ũcuanʉkore reojache chookaikʉmʉ Dios.
\v 12 Diopi maini reojache chookaiʉna reojache paimasinaame
mai. Dios maire chechokʉmʉ Repaʉ, “Choomanejʉ̃ʉ”,
chiisiere choomaneajʉ chini. Chechomʉ maire, ũcuaʉache
cuache chooʉatojẽe reojachechia choojʉ paapʉ chini.
Chechomʉ, maipi chekʉnani reojache jame paapʉ chini. Chechomʉ
maire, icheja cheja painapi Repaʉni masi cuasaajʉ chini.
\v 13 Icheja chejare paijʉ pojojʉ chaame mai, Jesucristo joe
cajejachere. Maire vati toa sani uuche Ʉ̃sekʉ, Peore Masikʉ,
Jesucristo reojache ñoʉ kosijaiʉ cajejamʉ. Dioamʉ Repaʉ.
\v 14 Repaʉ Jesucristo maini oiʉ vati toa sani uuchete Ʉ̃sekʉ
jũiñe cuhemañe mai cuache chooche jũni roikaisikʉamʉ.
Ũcuachia mai rekoñoãre carevakasa chini jũni
roikaisikʉamʉ, maipi cuache choochete ũhaso reojache
choojʉ paapʉ chini. Maini paara chini jãajañe choosikʉamʉ
Repaʉ.
\p
\v 15 Tito, ie chʉʉ tochasie peore chechokʉ paijʉ̃ʉ
mʉʉ. Repaʉ chʉore chʉvaakʉ chini Dios mʉʉre
chʉ̃ʉsie Repaʉte masi cuasanare chʉvakʉ paijʉ̃ʉ,
ũhasomaneajʉ. Ũcuajache masi cuasamanare Dios chʉ̃ʉñete
rʉa ikajʉ̃ʉ masi cuasaajʉ. Ũcuanʉkore masi chʉvajʉ̃ʉ,
mʉʉni jachamaneajʉ.
\c 3
\s Jesure cuasana reojache paichete kʉamʉ
\p
\v 1 Repacheja painare Jesure cuasanare siarʉmʉ ũcuanʉkore
ijache chʉvakʉ paijʉ̃ʉ: “Pãi chʉ̃ʉnare jachamañe
choojʉ paijʉ̃ʉ repana chʉ̃ʉñe. Repana chooʉ̃seche
choomañe paijʉ̃ʉ. Reojache choochechia cuasajʉ
paijʉ̃ʉ.
\v 2 Pãi chekʉna paiche ñani teeʉterejẽe cuache
cutumanejʉ̃ʉ. Chekʉnare keremañe pekerʉji ikajʉ
paijʉ̃ʉ. ‘Naa rʉa masime chʉkʉna’, chiimañe, chekʉnare
rʉarepa chʉ̃ʉmañe paijʉ̃ʉ, Jesure cuasananame
cuasamanare.” Jãajañe chʉvajʉ̃ʉ repanare.
\p
\v 3 Aperʉmʉ mai ũcuachia rʉa cuache choojʉ paisinaame
Jesure chutaa cuasamarʉmʉ. Pãi chʉ̃ʉnare rʉa jachasinaame.
Cuache cuasajʉ reojachejẽe choovesʉsinaame mai. Ũcuaʉache
cuache choojʉ painajejʉna, reojache choocuasikʉamʉ
maire. Pãi chekʉnare rʉa cuhesinaame mai. Mai ũcuachia
sãiñechia cuhesinaame. Pãi ũcuachia rʉa cuhesinaame maire.
Pãire cuhejʉ cuache choojʉ paisinaame mai. Pãi chekʉnare
reojache tijñeto perusinaame mai. Jãajañe paisinaame mai
aperʉmʉ.
\v 4 Jãajañe painaretani oisikʉamʉ Dios maire. Dios Repaʉ
chiisirʉmʉ tĩaʉna chejana raosikʉamʉ Jesure, mai cuache
choochete jũni roikaaʉ chini.
\v 5 Ijache ikamakʉamʉ Dios: “Reojache choonajejʉna
chookaimʉ chʉʉ inare”, chiimamʉ Dios maire. Cuache
choonaretani maini oiʉ vati toa sani uuche ʉ̃sesikʉamʉ Repaʉ
maire. Repaʉ chĩi paapʉ chini mai cuarekoñoã paasie
reojarekoñoã carevasikʉamʉ Repaʉ. Mai rekoñoãna Ũcuaʉ
Rekochote rao mamarekoñoã choosikʉamʉ Repaʉ maire.
\v 6 Dios cuhemañe Ũcuaʉ Rekochote raosikʉamʉ maire siache
chookaaʉ chini, Jesucristoji maire vati toa sani uuchete Ʉ̃sekʉ
jũni roikaisiejekʉna.
\v 7 Dios maire oiʉ rupʉ chookaiʉ cuache choomanare
cuasachejache cuasamʉ, naa paisirʉmʉna mai Repaʉ chĩijejʉ
Ũcuaʉ paichejare ai sani paapʉ chini. Jãare chaame mai.
\v 8 Ie chʉo chʉʉ tochasie peore ũcuarepaame. Jãajekʉna
iere chʉo siarʉmʉ chechokʉ paijʉ̃ʉ, repacheja painapi
Diore cuasanapi chekʉnare reojache chookaijʉ paapʉ chini.
Repanani jãajañe chooto rʉa reomʉ. Chekʉnare pãi
ũcuachia, repana tijñe reojache choojanare ũcuanʉkore
reojache paijamʉ.
\p
\v 9 Mai vesʉchete chekʉnapi sãiñechia cututo jame cutumañe
paijʉ̃ʉ mʉʉ. Pãi teena aipãi aperʉmʉ chĩi jojosiere
aichʉopi jorejʉ kʉato jame cutumanejʉ̃ʉ. Ũcuachia judío
aipãi chʉ̃ʉsiere cutujʉ sãiñe perujʉ paimanejʉ̃ʉ. Rupʉ
peoche ikacheme jãa. Jãare cutujʉ reojache paiche
chechemanaame mai.
\v 10 Pãi teena cuache cutume, chekʉnapi cavajʉ sãiñechia
cuhejʉ jame paimaneajʉ chini. Jãajañe cutunare ʉ̃sejʉ̃ʉ
joe cutumaneajʉ. Joe cuache cututo joe teecho ikajʉ̃ʉ
repanare. Kachañoã ikasiere cuhamañe ũcua cututo chekʉnare
Jesure cuasanare jame paiche ʉ̃sejʉ̃ʉ repanare.
\v 11 Jãajañe paina cuanajejʉ ũcuarepa choomanaame.
Cuache choojʉna repana cuarekoñoã paache masime pãi.
\s Tito choojachere kʉamʉ Pablo
\p
\v 12 Icheja paikʉte teeʉte mʉʉ paichejana saojamʉ
chʉʉ, chekʉrʉmʉ Artemani, chekʉrʉmʉ Tíquiconi. Repaʉ
saisirʉmʉ saireoto Nicópolis vʉejoopona pesa sani tijñajʉ̃ʉ
chʉʉre. Ũcuajoopona sani canʉka okorʉmʉ siachetʉka pasa
chiimʉ chʉʉ.
\v 13 Ũcuachia Roma chʉ̃ʉna chʉ̃ʉjʉna tochasie rʉa
masikʉte Zenate Apoloname mʉʉ paichejana saisirʉmʉ
chookaijʉ̃ʉ repanare, joe reojache kuhapʉ chini. Ũcuaʉache
repana chiiche karato ĩsijʉ̃ʉ repanare.
\v 14 Ũcuajache Jesure cuasana repacheja paina, chekʉnare
reojache chooche cheche sãiñechia kuirato, repana chiiche
karamanejamʉ. Ũcuachia repanapi reona pañu chini reojache
choojʉ paapʉ.
\s Tocha pinicuhasieame
\p
\v 15 Chʉʉre jame painaname, chʉo saomʉ chʉʉ mʉʉre.
Jesuni cuasajʉ chʉkʉnate cuasanare chʉo sa kʉakaijʉ̃ʉ
mʉʉ. Diopi mʉsanʉkonare ũcuanʉkore rʉa reojache
chookaaʉ, reojache paimasiajʉ chini.
\cls Pablo