\id PHM
\h FILEMON
\toc1 San Pablo Filemonre chʉo tocha saosieame
\toc3 (Flm)
\mt San Pablo Filemonre chʉo tocha saosieame
\c 1
\s Filemonni chʉo saomʉ Pablo
\p
\v 1 Chʉʉ, Pablo, Jesucristo paiche chʉvakʉjekʉ pãi chẽavʉere paimʉ. Mai majapãiʉjaiʉ Timoteoname chʉʉ ie chʉo saomʉ mʉʉre Filemonre, chʉkʉna rʉa cuasakʉte, Dios chʉo chʉkʉna sani chʉvarʉmʉ chookaisikʉre.
\v 2 Ũcuajache chekʉnare Diore cuasakuanupʉ mʉʉ vʉe chiinare Diore cuasakote Apianame chʉkʉna chʉvachejache Dios chʉo chʉvakʉte Arquipote iere saome chʉkʉna.
\v 3 Mai Jakʉ Dios, Maire Paakʉ Jesucristoname mʉsanʉkona rekoñoãna reojache paiche chookaijʉna reojache paijʉ̃ʉ.
\s Filemón Diore cuasachename repaʉ Diore cuasanare oichete kʉamʉ
\p
\v 4-5 Maire Paakʉni Jesucristoni chiiʉ mʉʉ cuasache asasikʉamʉ chʉʉ. Ũcuajache Diore cuasanare ũcuanʉkore mʉʉ oiche asasikʉamʉ chʉʉ. Jãajekʉna mʉʉ reojache paichete asa cuasakʉ, Dioni siarʉmʉ sẽeʉ, “Reorepamʉ”, chiimʉ chʉʉ Repaʉte.
\v 6 Dioni sẽekaimʉ chʉʉ, mʉʉpi Jesucristote cuasache kʉachʉore chekʉnani kʉakʉ Repaʉ maire Repaʉte cuasanare reojache chookaichete peore masiakʉ chini.
\v 7 Diore cuasakʉjekʉ chʉʉ majapãiʉjaiʉmʉ mʉʉ. Diore cuasanare mʉʉpi oiʉna asa pojokʉ reojache paimʉ chʉʉ. Mʉʉpi reojache chookaiʉna sʉmavana paisina rʉa pojojʉ paime repana.
\s Filemonpi Onésimoni reojache chookaaʉ chini sẽemʉ Pablo
\p
\v 8 Mʉʉpi chʉʉni reojache chookaaʉ chini chʉʉre Cristo saosikʉni chʉ̃ʉʉato chʉ̃ʉreomʉ.
\v 9 Jãatani mʉʉre Diore cuasanare oikʉjekʉna chookaaʉ chini sẽemʉ chʉʉ. Chʉʉ, Pablo chura aivaʉamʉ. Jesucristo paiche chʉvakʉjekʉ pãi chẽavʉere paimʉ chʉʉ.
\v 10 Mʉʉpi Onésimoni oiʉ reojache chookaaʉ chini sẽemʉ chʉʉ. Chʉʉpi pãi chẽavʉere paiʉ Dios chʉore chʉvakʉna asa chẽa Jesucristote cuasamʉ repaʉ Onésimo. Jãajekʉna chʉʉ chĩijaiʉmʉ repaʉ.
\p
\v 11 Aperʉmʉ repaʉ Onésimo cuache paiʉ mʉʉ chʉ̃ʉñe reojache chookaimaneasomʉ. Churatani Jesucristote cuasakʉjekʉ chʉʉre reojache chookaiʉ, mʉʉre ũcuachia reojache chookaijamʉ repaʉ.
\v 12 Mʉʉni cochomʉ chʉʉ repaʉte. Chʉʉ meñe oichejache rʉa oimʉ chʉʉ repaʉte.
\v 13 Mʉʉpi ichejare pani chʉʉre Dios chʉore chʉvakʉ chẽacojñosikʉre chookairaamʉ. Jãajekʉna mʉʉ chookairaasiejache Onésimopi saimañe paiʉ chookaito pojoraamʉ chʉʉ.
\v 14 Jãatani mʉʉre sẽemañe tʉa paacuhekʉ cochomʉ chʉʉ repaʉte. Mʉʉpi, “Onésimore paajʉ̃ʉ”, chiitotani paaraamʉ chʉʉ.
\p
\v 15 Repaʉ Onésimo mʉʉre joka saniso jmamakarʉ jame paimanesie cuamamʉ. Chura Diore cuasakʉ mʉʉni coiʉna siarʉmʉ paajamʉ mʉʉ repaʉte.
\v 16 Aperʉmʉ mʉʉ repaʉte mʉʉni rupʉ choochete chookaaʉ chini paasikʉamʉ. Churatani Jesucristoni cuasakʉna mʉcheʉre rʉa chiiʉ paachejache paajamʉ mʉʉ repaʉte. Repaʉte Onésimore rʉa chiimʉ chʉʉ. Jãatani mʉʉpi repaʉte naa rʉa chiijʉ̃ʉ. Repaʉ Onésimo mʉʉre rupʉ chooche chookaijachechia cuasamañe, “Onésimo Jesucristote cuasakʉjekʉ chʉʉ majapãiʉjaiʉmʉ”, chiiʉ cuasakʉ pojojʉ̃ʉ.
\v 17 “Chʉʉre jame paikʉmʉ Pablo”, chiikʉmʉ mʉʉ chʉʉre. Jãajekʉna mʉʉ chʉʉre ña pojokʉ choochejache Onésimore ũcuajache ña pojokʉ choojʉ̃ʉ.
\v 18 Repaʉ Onésimo mʉʉre cuache choosie paito chekʉrʉmʉ mʉʉni põseroi paato chʉʉpi roikaijamʉ.
\v 19 Chʉʉrepaʉji ijaovana tochamʉ chʉʉ ie: Repaʉ Onésimo mʉʉni põseroi paato chʉʉpi roikaijamʉ. Chura chʉʉre ikaʉamañetani ũcua ikara. Chʉʉpi mʉʉni cuare ʉ̃sekaimaʉ Jesucristo paichete mʉʉni kʉamaneru Repaʉte cuasamakʉ jũnisoru cuache tijñeraamʉ mʉʉre. Jãajekʉna mʉʉ chʉʉre rʉa põseroi paakʉjache paimʉ cuache ʉ̃sekaisie roi.
\v 20 Chʉʉ majapãiʉjaiʉ, asarepajʉ̃ʉ. Mai Jesucristote ũcuateeʉte cuasanaame. Jãajekʉna mʉʉpi chʉʉni chookaaʉ chini sẽemʉ chʉʉ. Repaʉte Onésimore mʉʉpi cuhemañe joe paato rʉa pojojamʉ chʉʉ.
\p
\v 21 Ijache cuasamʉ chʉʉ: “Chʉʉ sẽesie Filemón chookaijacosomʉ. Ũcuachia chekʉrʉmʉ ikʉre Onésimore naa rʉa reojache chookaijacosomʉ repaʉ”, chini cuasakʉ ie chʉo tocha saomʉ chʉʉ mʉʉni sẽeʉ.
\v 22 Ũcuachia chʉʉ sani kãijaruupʉ carevakaijʉ̃ʉ. Mʉsanʉkonapi chʉʉni etoakʉ chini Dioni sẽekaijʉna, ivʉe pãi chẽavʉe eta sani ñajamʉ chʉʉ mʉsanʉkonare, chini cuasamʉ chʉʉ.
\s Tocha pinisieame
\p
\v 23 Epafras, ũcuajache Dios chʉo chʉvakʉjekʉ chʉʉname pãi chẽavʉere paiʉ chʉo saomʉ mʉsanʉkonare.
\v 24 Ũcuajache chʉʉpi Dios chʉore chʉvakʉna chookaisina Marconame Aristarco, Demaname Lucas chʉo saome mʉsanʉkonare.
\p
\v 25 Maire Paakʉ Jesucristoji reojache chookaaʉ mʉsanʉkonare. Reomʉ.
\cls Pablo