\id 1PE
\h 1 SAN PEDRO
\toc1 San Pedro chara chʉo tocha saosieame
\toc3 (1 Pe)
\mt San Pedro charo chʉo tocha saosieame
\c 1
\s Diore cuasanare siachejña kʉko saocojñosinani Pedro chʉo saosieame
\p
\v 1 Chʉʉ, Pedro, Repaʉ chʉore chʉvaakʉ chini Jesucristo saosikʉpi mʉsanʉkonare Repaʉte cuasanare ijaova utijaova tocha saomʉ. Chekʉnapi kʉko saorena teenachia tĩipãi paichejña sani painare, Ponto cheja, Galacia cheja, Capadocia cheja, Asia chejaname Bitinia cheja painare tocha saomʉ chʉʉ mʉsanʉkonare.
\v 2 Aperʉmʉna mʉsanʉkonare mai Jakʉ Dios “Inani paara”, chiisikʉjekʉ chẽa paamʉ. Mʉsanʉkonare Ũcuaʉ Rekochoji chookaisikʉamʉ Repaʉ, Jesucristoji mʉsanʉkona cuare kurususẽverona jũni roikakʉna rekoñoã meno peorekoñoã tʉnesõsirekoñoã paajʉ Ũcuaʉ neenajejʉ Repaʉ chʉ̃ʉñete asa jachamañe choojʉ paapʉ chini. Repaʉji reojache paiche karamañe chookaiʉna reojache paijʉ̃ʉ.
\s Maire reojache ĩsijachere cuasajʉ pojochete kʉamʉ
\p
\v 3 Diore Maire Paakʉ Jesucristo Pʉkakʉre pojojʉ pañu mai, “Peore masikʉmʉ mʉʉ”, chiijʉ. Maire rʉa oiʉ mai rekoñoã mamarekoñoã carevakaisikʉamʉ Repaʉ, Jesucristo jũnisõ tãcojñosikʉ vajʉraisiejekʉna. Jãajekʉna Repaʉ paicheja sani Ũcuaʉname siarʉmʉ paijachere cuasajʉ rʉa pojojʉ chaame mai.
\v 4 Repaʉ maire, “Mʉsanʉkonare chʉʉ paichejana sa rʉa reojachere ĩsijamʉ chʉʉ”, chiisiere phũkamañere poremañere ñañasõmañere chaame mai.
\v 5 Repaʉ Dios peore Masiʉjekʉ maire Jesucristoni masi cuasajʉna masi paakʉ chookaimʉ, naa paisirʉmʉ Repaʉ paichejana saʉna maipi Repaʉ ĩsijachere reojachere koo paaajʉ chini. Cheja siarʉmʉna Dios maire aperʉmʉ Repaʉ kʉa jñaumanesiere reojache peore ĩsijamʉ.
\p
\v 6 Jãajañejekʉna mai icheja cheja pairʉmʉ paivesache chʉovana cuache tijñecojñojʉ painatani Dios maire ĩsijachere reojachere cuasajʉ rʉa pojojʉ paime.
\v 7 Pãi pachokuricata choona repapʉã mini ña, repare masiñu chini toana ʉo kosi ñame. Jãatani repa pachokuri siasõjañeame. Pãi pachokuri paaneeñejañe Repaʉte masi cuasanare rʉa chiimʉ Dios. Jãajekʉna maire Repaʉte cuasanare pãi pachokuri paichete masiñu chini choochejache chookʉ, maire paicuache tijñeto teeñoã ʉ̃sekaimamʉ Repaʉ, mai Repaʉte masirepa cuasachete masira chini. Diore masi cuasani paicuache tijñetojẽe ũcua cuasajʉ paijanaame mai. Maipi jãajañe paito Dios aperʉmʉ Repaʉ Raosikʉ Jesucristo icheja cheja joe raiumucusena maire Repaʉte masi cuasanare pojokʉ, “Reonaame ina”, chiiʉ rʉa reojachere ĩsijamʉ.
\p
\v 8-9 Mʉsanʉkona Jesucristote jmamakarʉjẽe ñamanatani Repaʉte rʉa chiijʉ cuasarepame, “Dios maire Jesuni cuasajʉna Repaʉ paichejana sara chini chẽa paamʉ”, chiijʉ. Jãajañe cuasanajejʉ mʉsanʉkona Repaʉte ñamanatani cuasajʉ rʉa pojojʉ paime. Repa pojoche Dios chookaichejekʉ rʉarepajekʉ kʉavesamʉ.
\p
\v 10 Dios chʉo aperʉmʉ kʉasina Repaʉ maire, “Toana saimaneajʉ chini chẽa paajamʉ”, chiisie Ũcuaʉji kʉaʉna asaasome. Jãatani repare asavesʉjʉ asa masiñu chini rʉa cuasajʉ chechejʉ paniasome repana. Repaʉ maire irʉmʉ painare oiʉ reojache choojache kʉaʉna asa ũcuare kʉajʉ tocha jokaasome repana.
\v 11 Dios Rekocho Repaʉ chʉo kʉasinare naa paisirʉmʉ choocojñojañere ijache kʉaasomʉ aperʉmʉ:
\q Pãire cuache choocojñojamʉ Cristo,
\m chiniasomʉ. Ũcuachia jũni vajʉrani cʉnaʉmʉna mʉni Repaʉ chʉ̃ʉkʉ paijache kʉaasomʉ. Kʉaʉna asasinatani asavesʉasome repana. Vesʉjʉ, “Dios Rekocho kʉasie, ¿jese paijaʉ? ¿Jeerʉmʉ tijñejaʉ repa?”, chiijʉ masiñu chini rʉa cuasajʉ chechejʉ paniasome repana.
\p
\v 12 Jãatani Dios repanare Repaʉ choojamʉ chiisie ijache ikakʉ masi kʉa jñauasomʉ: “Chʉʉ reojache chookaijamʉ chiisie mʉsanʉkonare chookaijachemamʉ; naa choje paijanare chookaijachere kʉasieame jãa”, chiiʉ kʉaasomʉ Dios repanare. Irʉmʉ chʉkʉna mʉsanʉkonare Ũcuaʉ Rekochoji cʉnaʉmʉ Raosirekochoji chookaiʉna Repaʉ aperʉmʉ kʉasiere Repaʉte cuasanare chẽa paakʉ toa sani uuche ʉ̃sekaichete kʉasinaame. Diore jame paina ángelejatʉka asavesʉjʉ asamasiñu chiime repa.
\s Pãipi cuache choomañe reojache paapʉ chini chẽa paamʉ Dios
\p
\v 13 Jãajekʉna mʉsanʉkona choojachere rũhiñe cuasajʉ carevajʉ paijʉ̃ʉ, Dios chiichete chooñu chini. Cuare jʉvojʉ reojache paijʉ, Jesucristo joe raisirʉmʉ mʉsanʉkonare reojache chookaijachere rʉa cuasajʉ pojojʉ chaajʉ paijʉ̃ʉ.
\v 14 Dios chĩijejʉ repaʉ chʉ̃ʉñe jachamañe choojʉ paijʉ̃ʉ. Repaʉte cuasamarʉmʉ paivesʉjʉ mʉsanʉkonare ʉachechia cuache choojʉ paisie joe choomañe paijʉ̃ʉ chura.
\v 15 Cuache jmamakarʉjẽe choomañe siarʉmʉ reojache paijʉ̃ʉ, mʉsanʉkonare chẽa Paakʉ Dios reojache paichejache.
\v 16 Repaʉ chʉo aperʉmʉ tocha jokasie ijache kʉamʉ:
\q Chʉʉ cuache choomañejekʉna mʉsanʉkona ũcuajache cuachejẽe choomañe reojache paijʉ̃ʉ,
\m chiimʉ.
\p
\v 17 Mʉsanʉkonapi Diore, “Jakʉ”, chiijʉ pani pãi ũcuanʉko chooche peore ũcuaparʉvachia ñakʉ teenare naa rʉa oimakʉre mʉsanʉkona icheja cheja vajʉna pairʉmʉ siarʉmʉ Repaʉte cuasajʉ kʉkʉjʉ paijʉ̃ʉ.
\v 18 Aperʉmʉ mai aipãi paivesʉsiejache reojache paivesʉsinaretani maipi jãajañe paimaneajʉ chini chẽa paamʉ Dios maire, cuare ʉ̃sekasa chini. Rʉa roicheji ai paichete roikaisikʉamʉ Repaʉ maire cuare ʉ̃sekasa chini. Mʉsanʉkona masime jãa. Siasõñeji kuripi roimanesikʉamʉ Repaʉ.
\v 19 Jãajañepi roimañe Cristo cuachejẽe peokʉ chiepi roikaisikʉamʉ Repaʉ, Ũcuaʉji chʉ̃ʉʉna mai cuare roikani chẽa paara chini chuenisõ raosiepi. Aperʉmʉ paisina mai aipãi repana cuare tʉnoñu chini Dioni ĩsijʉ ovejachĩivaʉre cuachejẽe peovaʉni vanisõjʉna rao roikaisiejache Repaʉ chiepi rao mai cua roikaisikʉamʉ Repaʉ.
\v 20 Aperʉmʉna chutaa cheja choomarʉmʉna Repaʉte Cristote chʉ̃ʉ jokaasomʉ Dios, icheja chejana caje pãi cuache choochete jũni roikaaʉ chini. Jãatani Dios chureparana cheja siapirarʉmʉna casosikʉamʉ Repaʉte, maini reojache chookaaʉ chini.
\v 21 Repaʉ Cristo jũni roikaisiejekʉna Repaʉte Diore cuasame mai. Cristote jũnisõʉna vaso cʉnaʉmʉna mʉa Repaʉ paichejana Repaʉte kueñe ñuiʉ chʉ̃ʉñe jokasikʉamʉ Repaʉ. Jãajañejekʉna mai Repaʉni masi cuasajʉ Ũcuaʉname ai paijachere pojojʉ chaajʉ paime.
\p
\v 22 Chura mʉsanʉkona Repaʉ chʉo ũcuarepa asa cuasanajejʉ mʉsanʉkona rekoñoã paisie meno tʉnokaicojñosinaame Diore. Jãajekʉna rekoñoã reojarekoñoãre paajʉ mai majapãijanare peoche ikamañe oirepache oimasinajejʉ peore chooreochetʉka reojache chookaijʉ sãiñechia siarʉmʉ oijʉ paijʉ̃ʉ.
\v 23 Dios maire Repaʉ chʉo siarʉmʉ paiche jachamañe cuasanajejʉna mai rekoñoãquee cua tʉnosõkani mamarekoñoã sañokaisikʉamʉ Ũcuaʉname paapʉ chini. Repa mama paiche icheja cheja paichejachemañejekʉ jmamakarʉjẽe siasõmañeame.
\v 24 Dios chʉo tocha jokasie ũcuare ijache kʉamʉ:
\q Pãi ũcuanʉko ucha paichejache paime.
\q Ucharañʉrʉã jeerʉmʉ paimañe nami phãpha jũnisõmʉ.
\q Korosie ũcuachia rʉa reojache koro ño nami tuãtuasõmʉ.
\q Pãi ũcuajache ũcuanʉko jeerʉmʉ paimañe nami jũnisõme.
\q Repana rʉa masisie ũcuajache siasõmʉ repana jũnisõto.
\q
\v 25 Dios chʉotani siasõmañe siarʉmʉ paicheme,
\m chiimʉ repa tocha jokasie. Repa Dios chʉo reojache mʉsanʉkonare chʉvasieame.
\c 2
\p
\v 1 Jãajekʉna mʉsanʉkona chekʉnare cuhechename joreche,
sẽsevʉchia reojachejache ñoñe paiche, chekʉna
neemajñarʉã tʉa paaʉachename chekʉnare siache cuache
ikachete peore ũhasõjʉ̃ʉ.
\v 2 Vĩjachĩivana ojeneeñejañe Dios chʉo reojachere
asaneejʉ, reojache paichete naa rʉa chechejʉ paijʉ̃ʉ,
\v 3 Dios Reokʉ paiche asa chẽarepasinajejʉ.
\s Catapʉ reojaipʉjekʉ charo ũhasipʉjache paikʉmʉ
Cristo
\p
\v 4 Jesucristote jovosinajejʉ Repaʉni siarʉmʉ naa rʉa
cuasajʉ paijʉ̃ʉ. Chekʉna pãi catapi vʉere jenajʉ catapʉ
rʉa reojaipʉtani cuhejʉ sẽjoñejañe cuheme Repaʉte, Dios
rʉa chiiʉ Chẽasikʉre.
\v 5 Mai Repaʉte cuasana ũcuajache catapʉã Repaʉ vʉe
jenajapʉãjañeame. Repaʉte cuasakuanupʉ vʉe rʉa
reojavʉepi, chutaa pinimavʉejacheame. Pãipi Repaʉni
siarʉmʉ naa jainʉko cuasajʉ jovojʉna Repaʉte cuasakuanupʉ
aineeñejañe naa ʉjakuanupʉme. Ũcuachia mai majapãi judío
phairipãi Diopi pojoakʉ chini jocha vaivanare ĩsijʉ
vanisõsiejache Jesucristo reojache chookaisiejekʉna
Ũcuaʉni cuasajʉ Repaʉ chiichete choojʉna pojomʉ Dios maire.
\v 6 Jãajekʉna Dios chʉo aperʉmʉ tocha jokasie ijache
kʉamʉ:
\q ¡Ñajʉ̃ʉ!
\q Vʉe reojavʉe choopirakʉ catapʉ reorepajaipʉjekʉna
mini ra chareparo ũhañejañe
\q chʉʉ chẽa paakʉte Cristote Jerusalén vʉejoopona raomʉ
chʉʉ.
\q Repaʉte cuasanare ũcuarepa chookaijamʉ chʉʉ repanani
cacʉomanera chini,
\m chiimʉ.
\v 7 Maire Repaʉte cuasanare catapʉ rʉa reojaipʉ rʉa
paaʉapʉjache paimʉ Repaʉ. Jãatani Repaʉte cuhenare
ijache kʉamʉ Dios chʉo aperʉmʉ tocha jokasie:
\q Vʉe choona cuhejʉ sẽjosipʉ Diopi chooʉna reojaipʉjekʉ
charo ũhasipʉjache paimʉ,
\m chiimʉ.
\v 8 Chekʉcheja ijache kʉamʉ:
\q Chʉʉ, Dios, pãipi tota tãapʉ chini maana catapʉ
ũhañejañe Repaʉte raojamʉ,
\m chiimʉ. Jãajekʉna pãi Repaʉ chʉore asa jachajʉ tota
tãiñejañe cuache paime, aperʉmʉna Diore, “Chʉʉ Neekʉni
cuasacuhejʉ cuache paijanaame ina”, chiicojñosina.
\p
\v 9 Maitani Repaʉ chẽa paacojñonajejʉ Dios pãijejʉ, reovãjʉ
paijʉ, phairipãi Diore sẽekaichejache pãi ũcuanʉkore
sẽekaijʉ painaame. Maire chijachejajache cuache paisinare
chẽa paamʉ Repaʉ, maipi miañejañe reojache paijʉ Repaʉ
Masiʉ paichete chekʉnani kʉajʉ paapʉ chini.
\v 10 Aperʉmʉ mai Dios neena paimanesinaame. Chura Repaʉ
neenaame mai. Ũcuachia aperʉmʉ Repaʉ oicojñomana
paisinaame. Chura Repaʉ oicojñonaame mai.
\s Dios neena paiche paijʉ Repaʉte chookaina paichete kʉamʉ
\p
\v 11 Asarepajʉ̃ʉ, chʉʉ majapãijana. Mai icheja cheja
jmamakarʉ pani Dios paicheja ai sani paijanajejʉ icheja
canamame. Jãajekʉna mʉsanʉkonare cuache chooʉato
jʉvojʉ̃ʉ, cacuamañe reojache pañu chini.
\v 12 Diore cuasamana ñajʉte reojache paijʉ̃ʉ, repanapi
irʉmʉ mʉsanʉkonare cuache ikanatani Dios pãi ũcuanʉko
choosie roiche rani chʉ̃ʉumucuse mʉsanʉkona reojache
paijʉna ñanajejʉ Repaʉni, “Rʉa reokʉmʉ mʉʉ”, chiapʉ.
\p
\v 13 Dios chiichete choojʉ pãi chʉ̃ʉna chʉ̃ʉñe
jachamañe masi choojʉ paijʉ̃ʉ. Mʉsanʉkona paicheja
siachejña painare ũcuanʉkore chʉ̃ʉkʉ chʉ̃ʉñe choojʉ
paijʉ̃ʉ.
\v 14 Ũcuachia repaʉte jame chʉ̃ʉkaijʉ teenare chʉ̃ʉna
chʉ̃ʉñe jachamañe choojʉ paijʉ̃ʉ. Cuache choonare
roiche chʉ̃ʉjʉ reojache painare pojojʉ painaame repana.
\v 15 Dios mʉsanʉkonare reojache paijʉ̃ʉ chiimʉ, pãipi
Dios paiche vesʉnapi mʉsanʉkonani ñajʉ cuache cutumaneajʉ
chini.
\p
\v 16 Pãi chekʉnare chẽa paacojñomana paiche paijʉ
mʉsanʉkonare chooʉachete reojachere choojʉ paijʉ̃ʉ.
Jãatani, “Chẽa paacojñomanajejʉna ũcuaʉache chooreomʉ
chʉkʉnate”, chiimañe cuache chooʉachete jʉvojʉ
reojachechia choojʉ Dios chẽa paacojñona paiche paijʉ̃ʉ.
\v 17 Pãi ũcuanʉkore ña kʉkʉjʉ reojache paijʉ̃ʉ.
Chekʉnare Jesure cuasanare oijʉ paijʉ̃ʉ. Diore cuasajʉ,
kʉkʉjʉ paijʉ̃ʉ. Mʉsanʉkona paicheja siachejña canare
chʉ̃ʉkʉte reojache cutujʉ̃ʉ.
\s Cristo choocojñosiejache cuache choocojñojʉ reojache
paichete kʉamʉ
\p
\v 18 Asarepajʉ̃ʉ, chekʉnare chẽa paacojñona. Mʉsanʉkonare
paanare ña kʉkʉjʉ repana chʉ̃ʉñe jachamañe masi choojʉ
paijʉ̃ʉ. Reojache paanarechia masi chookaimañe cuache
paanarejẽe masi chookaijʉ paijʉ̃ʉ.
\v 19 Pãiʉ Diore cuasakʉji cuache choomakʉpi cuache
choocojñosikʉtani perukʉ keremañe pani rʉa reojache
choomʉ.
\v 20 Mʉsanʉkonapi cuache choosie roire perumañe cuache
choocojñoni, ¿ʉ̃queache mʉsanʉkona reojache chooche?
Jãatani cuache choomanapi cuache choocojñosinatani
mʉsanʉkonapi keremaneni rʉa reojache choome, Diopi ñato.
\v 21 Jãajañe choojʉ paapʉ chini chẽa paamʉ Dios
mʉsanʉkonare. Cristo cuache choomanesikʉtani cuache
choocojñokʉ keremanesikʉamʉ. Maini chookaiʉ jãajañe
choosikʉamʉ Repaʉ. Mʉsanʉkona Repaʉ choosiere cuasajʉ
ũcuajache choojʉ paijʉ̃ʉ, mʉsanʉkonare cuache chooto.
\q
\v 22 Repaʉ Cristo jmamakarʉjẽe cuache choomanesikʉamʉ.
\q Ũcuachia teeʉterejẽe joremanesikʉamʉ Repaʉ.
\m
\v 23 Pãi Repaʉte cuache ikato sãiñe cuache
ikamanesikʉamʉ Repaʉ. Repaʉte asi choonare, “Sãiñe
cuache choojamʉ chʉʉ mʉsanʉkonare”, chiimanesikʉamʉ
Repaʉ. Diopi pãi ũcuanʉko chooche roiche ũcuarepa
Chʉ̃ʉkʉji repana cuache choosie roi cuache tijñeñe
chʉ̃ʉakʉ chini jʉvosikʉamʉ Repaʉ Cristo.
\v 24 Ũcuaʉji mai cua kurususẽverona jẽjocojño jũni
roikaisikʉamʉ, maipi cuache choochete ũhasõ reojachere
choojʉ paapʉ chini. Repaʉ Cristo mai rekoñoã vajʉajʉ chini
chuenisõ roikaisikʉamʉ maire.
\v 25 Aperʉmʉ mai ovejavana maare vesʉjʉ cavesʉsõsinajañe
paisinaame. Jãatani chura Cristoni oveja kuirakʉjache
paikʉni joe coichejache cuasajʉ jovorena kuirakʉ cuache
ʉ̃sekaimʉ Repaʉ maire.
\c 3
\s Rʉ̃joname ʉ̃jʉ reojache paichete kʉamʉ
\p
\v 1-2 Rʉ̃joromi, mʉʉ̃jʉpãi chʉ̃ʉñe jachamañe masi choojʉ
paijʉ̃ʉ, repanapi Dios chʉo cuasamana pani mʉsanʉkonapi
repanani ña kʉkʉjʉ cuache choomañe reojache paijʉna ña
chʉvachiimañe Jesuni cuasaajʉ chini.
\v 3-4 Ijacheame reojache paiche: Sẽsevʉchia reojache
ñomajñarʉã raña vãto paiche, pachokuri choosimajñarʉã
juichename kãña reojakãña juiche rʉarepa cuasajʉ
paimañe rekoñoã reojache paichete naa rʉa cuasajʉ
paijʉ̃ʉ. Rekoñoã reojache paiche, pekerʉ paichename
reojache ikajʉ paiche canivʉ airekochejache
airekomañeame. Ũcuachia Diopi ñato rʉa reojaimʉ
jãajañe paiche.
\v 5 Aperʉmʉ paisina romi Dioni cuasajʉ jãajañe paijʉ
repana rekoñoãpi reona paniasome; ʉ̃jʉpãi chʉ̃ʉñe
jachamañe masi choojʉ paniasome repana.
\v 6 Jãajañe paniasomo Sara. Repao ʉ̃jʉ Abraham chʉ̃ʉñe
asa jachamañe chooko repaʉte, “Chʉʉre paakʉmʉ ikʉ”,
chiio paniasomo. Mʉsanʉkonapi vajʉchʉmañe reojachere
ũcuajache choojʉ pani repao chĩijana paijanaame.
\p
\v 7 Mʉsanʉkona ʉ̃jʉpãi ũcuajache mʉrʉ̃joromi cuasajʉ
reojache paajʉ̃ʉ. Naa koka peonajejʉna masi kuirajʉ paajʉ̃ʉ
repanare, Dios ĩsiche reojache paiche jame koonajejʉna.
Jãajañe paijʉ Dioni sẽeto mʉsanʉkona sẽeñe asajamʉ
Repaʉ.
\s Reojachere choojʉ cuache choocojñoñeme
\p
\v 8 Mʉsanʉkona ũcuanʉko sãiñechia cuasajʉ majapãijañe
paijʉ cavamañe reojache jame paijʉ̃ʉ. “Jãanare naa
rʉa masimʉ chʉʉ”, chiimañe sãiñechia oijʉ reojache
chookaijʉ pojojʉ paijʉ̃ʉ.
\v 9 Pãi mʉsanʉkonare cuache choonare sãiñe cuache
choomanejʉ̃ʉ. Mʉsanʉkonare cuache ikanare sãiñe cuache
ikamañe Dioni reojachere sẽekaijʉ̃ʉ repanare. Jãajañe
reojache choojʉ paapʉ chini chẽa paamʉ Dios mʉsanʉkonare.
Jãajañe chooto reojache chookaijamʉ Repaʉ mʉsanʉkonare.
\v 10 Repaʉ chʉo aperʉmʉ tocha jokasie ijache kʉamʉ jãa:
\q Pãiʉ reojache paiʉ pojokʉ pasa chiikʉ cuache
ikachename jorechʉo cutuche jʉvoakʉ.
\q
\v 11 Cuache choochete ũhasõ reojachere chookʉ paaʉ.
\q Reojache paichete kue jñaa reojache paaʉ.
\q
\v 12 Dios reojache painare pãi kuirakʉ repana Repaʉte
sẽeñe asakʉ paimʉ.
\q Cuache choonaretani repana chiiche ʉ̃semʉ Repaʉ,
\m chiimʉ.
\p
\v 13 Mʉsanʉkonapi siarʉmʉ reojachere choojʉ paito pãi
teeʉjẽe cacʉomanejanaame mʉsanʉkonare.
\v 14 Jãatani mʉsanʉkonapi reojache choojʉ cuache
choocojñoni pojojʉ paijʉ̃ʉ, Dios reojache chookaijachere
cuasajʉ. Pãi teeʉterejẽe vajʉchʉmañe paijʉ
kʉkʉmanejʉ̃ʉ.
\v 15 Pãijẽe vajʉchʉmañe Cristoni cuasajʉ vajʉchʉjʉ,
“Chʉʉre paakʉmʉ Repaʉ”, chiijʉ cuasajʉ̃ʉ. Siarʉmʉ
masi cuasajʉ paijʉ̃ʉ, pãipi mʉsanʉkonani mai pojojʉ
chaachete sẽeto kʉamasiñu chini.
\v 16 Jãatani repanare ña, vajʉchʉjʉ pekerʉ kʉajʉ̃ʉ,
“Rʉa masiʉmʉ chʉʉ”, chiimañe cuasajʉ. Cuache
choomañe reojache paijʉ̃ʉ, Jesure cuasanajejʉ mʉsanʉkona
reojache paichete pãipi cuache cutuni kʉkʉsõajʉ chini.
\p
\v 17 Chekʉrʉmʉ Dios maire teeñoã cuache choocojñoajʉ
chiimʉ. Jãatani maipi cuache choosie roire cuache
choocojñoto cuamʉ. Maipi cuache choomañe reojachere choojʉ
cuache choocojñoto naa reomʉ.
\v 18 Maire Paakʉ Cristo mai ũcuanʉko cuache choochete roikaiʉ
chuenisõsikʉamʉ. Ũcuateechoji peore ũcuanʉkore
roikaisikʉamʉ. Reokʉjekʉ cuache painani chookaisikʉamʉ
Repaʉ, maipi Dioname reojache paapʉ chini. Maijaiʉ paiʉ
chuenisõsikʉtani Dios Rekochoji chookaiʉna joe
vajʉraisikʉamʉ.
\v 19-20 Repaʉ Cristo jũnisõ rekochoji apereparʉmʉ Noé
pairʉmʉ kosaʉna jũnisõsina paicheja painare
chʉvajaniasomʉ. Aperʉmʉ repana chutaa vajʉrʉmʉ Noé choovʉ
ʉjavʉ choo piniñetʉka repanare perumañe chaakʉni Diore
jachajʉ paniasome. Repavʉ choo pinisirʉmʉ okopi ra cheja
siacacheja kosa timuʉna pãi ũcuanʉko runisõsirʉmʉ
ochorepanachia jũiñe ʉ̃secojñoasome.
\v 21 Okochia paicheja repana jũimañe pani etajani reojache
paisiejache mai irʉmʉ cuache paichete jokasõ Jesuni cuasajʉ
jovo okorovecojño reojache paime chura. Okoroveche rupʉ
canivʉ paiche meno choachemamʉ. Pãi reojache paijʉ repana
Dios chiiche chooneeñe okorovecojñoñeji choo ñome. Jesucristo
chuenisõ tãcojño vajʉraisiejekʉna jãajañe choona Dios
paichejare ai sani paijanaame.
\v 22 Jesucristo Repaʉ vajʉraisirʉmʉ cʉnaʉmʉna mʉni Dios
ʉjajʉ̃tʉ cakãkona kueñe pʉʉ ñuiʉ chʉ̃ʉkʉ ʉ̃sekʉ
paimʉ. Aijekʉ ángeles chʉ̃ʉnare chʉ̃ʉmʉ. Ũcuachia pãi
ũcuanʉkore chʉ̃ʉnaname vati chʉ̃ʉnare ʉ̃sekʉna repanare
ʉache cuache choojʉ Repaʉ ʉ̃semamajñarʉãchia choome.
\c 4
\s Dios ĩsicheji masijʉ chekʉnare chookaichete kʉamʉ
\p
\v 1 Jãajekʉna Repaʉ Cristo cheja pairʉmʉ cuache
choocojñosiejache choocojñojʉ cuasajʉ paijʉ̃ʉ. Maipi
pãire cuache choocojñojʉ Repaʉni ũcua cuasani cua jʉvoche
chechesõme.
\v 2 Cuare jʉvomasini maire ũcuaʉache chooʉache cua
choomañe paijʉ mai jũnisõñejatʉka Dios chiichete choojʉ
paijanaame.
\v 3 Aperʉmʉ mʉsanʉkona Diore cuasamana chooche rʉa jeerʉmʉ
choojʉ paisinaame. Ũcuaʉache choojʉ romineejʉ, ʉmʉneejʉ,
cono ũkunachia paijʉ, vẽve paijʉ rʉa siache choojʉ,
tʉ̃osivanare pojojʉ paisinaame.
\v 4 Chura mʉsanʉkonapi aperʉmʉ ũcuaʉache choojʉ paisiere
cuare ũhasõ repanani jame choomañe paijʉna ña jñanejʉ
siarʉmʉ rʉa cuache cutujʉ paime mʉsanʉkonare.
\v 5 Jãatani repana cuache paisie Diore tijñeñe nʉkajʉ
kʉache paijamʉ repanare, pãi jũisina choosiename vajʉna
chooche roiche chʉ̃ʉkʉte tijñeñe nʉkajʉ.
\v 6 Jãajañejekʉna Jesucristote cuasache kʉachʉo,
jũisinajatʉka chʉvacojñosieame, repana vajʉna pairʉmʉ
ũcuanʉko cuache choosie roi cuache tijñecojño
jũnisõsinatani, rekoñoãpi ũcua vajʉjʉ Dios paichejache ai
paapʉ chini.
\p
\v 7 Icheja cheja siasõrʉmʉ tĩapiramʉ. Jãajekʉna rũhiñe
cuasajʉ cuache chooʉache jʉvojʉ reojache paijʉ Diore
sẽemasina paijʉ̃ʉ.
\v 8 Ie ũcuachia asarepajʉ̃ʉ: Sãiñechia oirepache oijʉ
paijʉ̃ʉ. Mʉsanʉkonapi sãiñechia oirepani chekʉrʉmʉ
rʉarepañoã cuache choonijẽe ũcua reojache jame
paijanaame.
\v 9 Sãiñechia pojojʉ teeʉterejẽe cuhemañe mʉsanʉkona
vʉña tĩanare kãiñe ĩsijʉ paijʉ̃ʉ.
\v 10 Mʉsanʉkonapi chooajʉ chini Dios ũcuanʉkore siacairo
ĩsisie Repaʉ Rekochoji chookaiʉna choomasiche
chookaiñamemañe chekʉnare reojache masi chookaijʉ
paijʉ̃ʉ.
\v 11 Chekʉnare chʉvani Dios chʉore chʉvaajʉ. Chekʉnare
reojache chookaina Diopi chookaiʉna koka paajʉ rʉa reojache
chookaijʉ paapʉ, Jesucristote cuasanapi siarʉmʉ Repaʉni,
“Rʉa reokʉmʉ mʉʉ”, chiijʉ paapʉ chini. Ũcuachia
Repaʉte cuhamañe siarʉmʉ pojojʉ, “Peore Paakʉji peore
Masiʉmʉ mʉʉ”, chiijʉ pañu mai. Jãajañe paaʉ.
\s Jesuni cuasajʉ cuache choocojñoñete kʉamʉ
\p
\v 12 Asarepajʉ̃ʉ, chʉʉ cuasavana. Pãipi mʉsanʉkonani
cuache chooto ña jñanomanejʉ̃ʉ. Jãajañe paimʉ maire
Jesure cuasanare, maipi mai rekoñoã Repaʉte cuasachete choo
ñoajʉ chini.
\v 13 Cristo choocojñosiejache cuache choocojñoni Repaʉ
paisiejache painajejʉ pojojʉ paijʉ̃ʉ. Ũcuachia Repaʉ
joe rani pãi ũcuanʉkore chʉ̃ʉrʉmʉ mai ũcuajache pojojʉ
jame paijachere cuasajʉ pojojʉ̃ʉ.
\v 14 Cristoni cuasajʉna pãipi mʉsanʉkonani cuache ikato
pojojʉ̃ʉ, Dios Rekocho Masirekochoji mʉsanʉkonani
jokasõmañe jame paiʉna.
\v 15 Mʉsanʉkonapi ũcuaʉakʉji cuache choocojñoni pãi
vanisõsikʉpi, põse ñaasikʉpi, jãapãani cheke cuache
ũcuaʉache chookʉ, chekʉna choochete ñakʉ jame cutukʉ
keresikʉpi cuache choocojñokʉ paimanejʉ̃ʉ.
\v 16 Jãatani mʉsanʉkonapi Jesure cuasanajejʉ cuache
choocojñoni kʉkʉmañe Repaʉ neenajejʉ Dioni, “Reorepamʉ,
Jakʉ”, chiijʉ paijʉ̃ʉ.
\p
\v 17 Pãi ũcuanʉko choosie roiche Dios chʉ̃ʉrʉmʉ
tĩapiracuhamʉ. Charo Repaʉ neena choosiere cuasa ñajamʉ
Repaʉ. Jãa choo pini Repaʉ chʉo jachasina choosie cuasa
ña repana cuache choosie roi rʉa vajʉchʉache peore roiche
chʉ̃ʉjamʉ Repaʉ.
\v 18 Dios chʉo tocha jokasie ijache kʉamʉ repa:
\q Reojache painarejẽe Dios paicheja saiche vesato,
\q ¿jese paijaʉ Repaʉni cuasacuhejʉ cuache choonare?
\m chiimʉ.
\v 19 Jãajekʉna mʉsanʉkonapi Repaʉji chiiʉna cuache
choocojñonijẽe cuhasõmañe ũcua reojache choojʉ
paijʉ̃ʉ, “Maire Choosikʉ Dios ũcuarepa chookʉji
chookaijamʉ maire”, chini cuasajʉ.
\c 5
\s Jesure cuasanare chʉvacheme
\p
\v 1 Chura mʉsanʉkonare kuiranani, ainani, chʉvara chiimʉ
chʉʉ, repana paichejache aijekʉ pãi kuirakʉjekʉ. Jesucristo
cuache choocojñoñe peore ñasikʉamʉ chʉʉ. Repaʉ pãi
ũcuanʉkore chʉ̃ʉrʉmʉ chʉʉ ũcuachia jame chʉ̃ʉkʉ
paijamʉ.
\v 2 Aina, mʉsanʉkonapi kuiraajʉ chini jokasinare Diore
cuasanare ovejavanajañe painare kuirajʉ paijʉ̃ʉ.
Kurineemañe, reojache chookaineejʉ, kuiracuhemañe Dioni
pojojʉ Repaʉ chiichete choojʉ masi kuirajʉ paijʉ̃ʉ
repanare.
\v 3 Mʉsanʉkona chẽa paacojñonare choochejache choomañe
reojache choo ñojʉ pekerʉ chechojʉ̃ʉ repanare, ña chẽa
ũcuajache paapʉ chini.
\v 4 Jãajañe choojʉ pani maire ovejavanarejache Paakʉji
joe ratu pãi chʉ̃ʉna tuhivʉãjañere rʉa reojachere
ĩsiʉna koo Ũcuaʉname siarʉmʉ chʉ̃ʉjʉ paijanaame mai.
\p
\v 5 Mʉsanʉkona naa põsʉpãi ũcuajache, ʉmʉpãiname romi,
asarepajʉ̃ʉ. Aina chʉ̃ʉñe jachamañe choojʉ paijʉ̃ʉ.
Ũcuanʉko, “Naa rʉa masiʉmʉ chʉʉ”, chiimañe, chekʉna
chʉ̃ʉñe sãiñechia chookaijʉ paijʉ̃ʉ. Dios chʉo tocha
jokasie ijache kʉamʉ:
\q “Rʉa masiʉmʉ chʉʉ”, chiina chooche ʉ̃semʉ Dios.
\q “Vesʉvaʉamʉ chʉʉ”, chiinaretani oiʉ reojache
chookaimʉ Repaʉ,
\m chiimʉ.
\v 6 Jãajekʉna, Dioni Peore Masiʉni, “Peore Masiʉjekʉ
chʉʉre rʉa vesʉvaʉjekʉna chookaijʉ̃ʉ”, chiijʉ
paijʉ̃ʉ, Repaʉji mʉsanʉkonani Repaʉte ʉarʉmʉna naa
masinare chooakʉ chini.
\v 7 Maire rʉa oikʉjekʉna mʉsanʉkonare paivesache Ũcuaʉni
kʉajʉ̃ʉ chookaaʉ.
\p
\v 8 Ñarepajʉ paijʉ cuache chooche jʉvojʉ reojache
paimasijʉ̃ʉ; vati maire cuhekʉ chai kũni ãnisõnani kuekʉ
kuichejache cacʉonani kuekʉ siarʉmʉ kuiʉ paimʉ.
\v 9 Ũhasõmañe ũcua Dioni masi cuasajʉ vati chʉ̃ʉñe jʉvojʉ
paijʉ̃ʉ, mai majapãijana cheja siachejña cana ũcuajache
cuache choocojñojʉ paichete masijʉ.
\p
\v 10 Jãatani mʉsanʉkona jmamakarʉ cuache
choocojñosirʉmʉna Pãi Oi Ai Dios mʉsanʉkonapi koka paajʉ
Repaʉni naa masi cuasajʉ siarʉmʉ naa reojache paapʉ chini
chookaijamʉ. Ũcuaʉji maire Cristoni cuasajʉ Ũcuaʉname
siarʉmʉ reojache paapʉ chini chẽa paamʉ.
\v 11 Repaʉte siarʉmʉ cuhasõmañe, “Peore Masiʉmʉ
mʉʉ”, chiijʉ pañu mai. Jãajañe paaʉ.
\s Chʉo saokʉ cuhacho tochasieame
\p
\v 12 Chʉʉpi ñato Jesuni cuasakʉ Repaʉ chiiche masi chookaikʉ
Silvanopi tochakaiʉna inʉkorʉchia chʉvakʉ saomʉ chʉʉ
mʉsanʉkonare, Dios ũcuarepa chookʉ maire oiʉ chookaichete
asa pojojʉ reojache paapʉ chini. Chʉʉ chʉvachʉore
ũcuarepare asa chẽa ũhasõmañe masi cuasajʉ Repaʉni oicojñojʉ
reojache chookaicojñojʉ paijʉ̃ʉ.
\p
\v 13 Icheja Babilonia vʉejoopo cana Jesure cuasakuanupʉ
mʉsanʉkona chẽa paacojñoñejañe Diore chẽa paacojñona jame
chʉo saome mʉsanʉkonare; chʉʉ chĩijaiʉ, Marcos,
ũcuachia.
\v 14 Sãiñechia cuasajʉ oijʉ sũka pojojʉ paijʉ̃ʉ.
Mʉsanʉkona Cristo neena ũcuanʉko reojache paijʉ̃ʉ.
Reomʉ.
\cls Pedro