\id 2PE
\h 2 SAN PEDRO
\toc1 San Pedro joe chʉo tocha saosieame
\toc3 (2 Pe)
\mt San Pedro joe chʉo tocha saosieame
\c 1
\s Chʉo saosieame
\p
\v 1 Chʉʉ, Simón Pedro, Jesucristote chooche chookaiʉ Repaʉ saosikʉpi ijaova utijaova joe tocha saomʉ mʉsanʉkonare, chʉkʉna cuasachejache Repaʉte reojache cuasajʉ painare. Dios mai Cuasakʉ maire vati toa sani uuche Ʉ̃sekaikʉji Jesucristo Reokʉjekʉ mʉsanʉkonare jãajañe cuasache jokasikʉamʉ.
\v 2 Maire Paakʉ Jesucristo paichename Dios paiche masinajejʉ Ũcuaʉji reojache paiche karamañe chookaiʉna reojache paijʉ̃ʉ.
\s Dioni cuasajʉ reojache paicheme
\p
\v 3 Dios peore Choomasiʉjekʉ peore Paakʉ Reokʉjekʉ maire chẽa paakʉ Repaʉ paichete masiajʉ chini kʉakʉmʉ. Ũcuachia maipi Repaʉni masi cuasajʉ reojachere choojʉ paapʉ chini maire karache peore ĩsimʉ Repaʉ.
\v 4 Jãajañe Paikʉjekʉ maire Repaʉ, “Rʉa reojachere chookaijamʉ chʉʉ”, chiisie chookaimʉ Repaʉ, maipi rekoñoã reojarekoñoãre paajʉ Repaʉ paichejache reojache paimasijʉ, jʉvomasijʉ Repaʉte cuasamana ũcuaʉache cuache choochete ña chẽa ũcuajache choomaneajʉ chini.
\v 5 Jãajekʉna Repaʉni cuasajʉ peore chooreochetʉka choojʉ, ñamemañe reojache choochete chechejʉ̃ʉ. Reojachere choojʉ paimasichete chechejʉ̃ʉ.
\v 6 Paimasijʉ cua jʉvomasichete chechejʉ̃ʉ. Cuache choochete jʉvomasijʉ cuache tijñetojẽe ũcua Diore cuasajʉ pojojʉ paijʉ̃ʉ. Jãajañe paijʉ Diore masi cuasajʉ pojochete chechejʉ̃ʉ.
\v 7 Ũcuachia mʉsanʉkona majapãijanare cuasajʉ pãi ũcuanʉkore oijʉ paijʉ̃ʉ.
\p
\v 8 Mʉsanʉkonapi jãajañe paijʉ siarʉmʉ naa rʉa reojache paichete chechejʉ paito chekʉna mʉsanʉkona paiche reojachere ña chẽajanaame, mʉsanʉkonapi Maire Paakʉni Jesucristoni cuasateemapʉna.
\v 9 Jãajañe choomanatani Dioni masi cuasavesʉjʉ repana cuache choosie Dios tʉnosõkaisie cavesʉsõsinajejʉ naavana paichejache paime.
\v 10 Jãajekʉna, chʉʉ majapãijana, mʉsanʉkonani Diopi chẽa paakʉna siarʉmʉ naa reojache paijʉ Repaʉ neena paiche choo ñojʉ̃ʉ. Jãajañe choojʉ pani jmamakarʉjẽe cacuamanejanaame mʉsanʉkona.
\v 11 Ũcuachia mʉsanʉkonare Dios Repaʉ paicheja siamacheja kakache ʉ̃semañe rʉa pojokʉ cuaajamʉ, Maire Paakʉ Jesucristo maire vati toa sani uuche Ʉ̃sekaikʉ chʉ̃ʉkʉ paicheja.
\p
\v 12 Jãajekʉna chʉʉ mʉsanʉkonare repare cavesʉmaneajʉ chini peore cuasakʉ siarʉmʉ kʉakʉ paijamʉ, mʉsanʉkonare chechosie chʉo ũcuarepare masijʉ reojache choojʉ painaretani.
\v 13 Chʉʉ vajʉʉ pairʉmʉjatʉka jãajañe chʉvakʉ pasa chiimʉ chʉʉ, mʉsanʉkonapi repare cuhamañe cuasajʉ paapʉ chini.
\v 14 Maire Paakʉ Jesucristoji kʉaʉna chʉʉ jmamakarʉ pani jũnisõjañe masimʉ chʉʉ.
\v 15 Jãatani chʉʉre peore chooreochetʉka chechojamʉ chʉʉ, mʉsanʉkonapi chʉʉ jũnisõsirʉmʉjẽe ũcua cuasajʉ paapʉ chini.
\s Jesucristo Peore Masiʉ reojache ñokʉna ñasiere kʉamʉ
\p
\v 16 Chʉkʉna mʉsanʉkonare Maire Paakʉ Jesucristo masichename Repaʉ joe raijache chechosie rupʉ aichʉo kʉamasinapi cuasa kʉarena asa kʉasiemamʉ. Chʉkʉnapi ñasinaame Repaʉ paiche, Ũcuaʉji Repaʉ pãi chʉ̃ʉkʉ paichete rʉa reojache ñokʉna.
\v 17-18 Chʉkʉna reparʉmʉ Maire Paakʉname aikũti Dios paikũtire mʉni paijʉ Repaʉte Jesure reojache ñokʉte ñajʉ Repaʉ pãi chʉ̃ʉkʉ paichete kʉa jñaukʉ cʉnaʉmʉpi mai Jakʉ Dios Peore Paakʉ Reokʉ ikachʉo ijache chiichete asasinaame: “Ikʉ chʉʉ chĩiamʉ. Chʉʉ rʉa oiʉ pojokʉmʉ ikʉ”, chiisikʉamʉ Dios.
\p
\v 19 Mʉsanʉkona Dios chʉo kʉasina aperʉmʉ tocha jokasie kʉachʉo ũcuarepa asamasijʉ cuasame. Chura chʉkʉna kʉasiere asa naa masi cuasajʉ̃ʉ. Ijacheame: Ñami chijacheja ʉopʉji siañami miakʉna joe apeñatatojatʉka reojache paireomʉ. Ũcuajache Dios chʉ̃ʉñe asa chẽa choojʉ pani Repaʉ joe raiumucusejatʉka reojache paijanaame mʉsanʉkona.
\v 20-21 Iere masijʉ̃ʉ: Dios chʉo kʉasina kʉajʉ tocha jokasie Dios chʉo paikorovʉ repanachia cuasajʉ tochasiepi paimamʉ. Jmamakarʉjẽe repana cuasache ikamapʉ Dios Rekocho chʉ̃ʉñechia kʉajʉ Repaʉ chʉo masi kʉaasome repana. Jãajekʉna repana tocha jokasie Dios chʉojekʉ pãi repanare ʉache cuasajʉ kʉacuamʉ.
\c 2
\s Jorechʉo chechona paichete kʉamʉ
\p
\v 1 Aperʉmʉ paisinare Israelpãi kuanupʉ Dios chʉo kʉanapi
paijʉna ũcuachia jorechʉo chechona paniasome, “Dios chʉo
kʉanaame chʉkʉna”, chiijʉ jorechʉo chechona. Irʉmʉ
ũcuajache jorechʉo chechona rani mʉsanʉkonaname
paijanaame. Maire Paakʉ jũni roikaisiere jachajʉ
mʉsanʉkonani cacʉoñu chini jorechʉo jmanʉkorʉãchia
chechojʉ teana choosõjanaame repana.
\v 2 Repana cuache choojʉ paichete Jesure cuasanapi jainʉko
ña chẽa repana paichejache paijʉna chekʉna pãi repana
paichete ña cuache cutujanaame. Ũcuarepare, “Dios chʉo
cuasache cuamʉ”, chiijanaame.
\v 3 Repana jorechʉo chechona kurineenajejʉ mʉsanʉkonarejẽe
cuasamañe rupʉ repanare ʉachechia jñaañu chini choojʉ
cuache chechojanaame. Jãatani repana cuache choosie roi
tãtachejẽe peoche rʉa cuache tijñejamʉ repanare, aperʉmʉ
Dios, “Pãi cuache choonare ijache choojamʉ chʉʉ”,
chiisiepi.
\p
\v 4 Aperʉmʉ Dios ángelevanare Repaʉte jachajʉ choosie cua
tʉnomañe ũcua cuasakʉ vati toana rʉa chijachejana sẽjoasomʉ,
pãi ũcuanʉko choosie Repaʉ chʉ̃ʉrʉmʉjatʉka, quẽo
sʉosivanajañe paapʉ chini.
\v 5 Ũcuachia aperʉmʉ Noé reparʉmʉ paisinare
chʉvasietani repanapi jachajʉna repana cuache choosie
tʉnomañe ũcua cuasakʉ oko rʉa ra cheja peore kosa timusõñe
chʉ̃ʉasomʉ Dios, cuanapi peore choosõajʉ chini. Noere
reojache paiche chʉvakʉtechia teeʉte jũiñe ʉ̃sekʉ,
chekʉnare sieterepanare ũcuachia ʉ̃seasomʉ Repaʉ.
\v 6 Ũcuachia aperʉmʉ paisinare Sodoma vʉejooponame Gomorra
vʉejoopo paisinare uusõñete chʉ̃ʉasomʉ Dios, repajoopoãpi
peore ũhacʉtapoãchia uusõakʉ chini. Naa paisirʉmʉ paijʉ
cuache choojanapi repajoopoã painare cuache tijñesiere asa
kʉkʉ repana cuache choochete ũhasõ reojache paichete
chechejʉ paapʉ chini jãajañe chooasomʉ Dios.
\v 7 Jãatani reparʉmʉ Lotechia uumaneakʉ chini etoasomʉ
Dios, reojache paiʉ repana cuache chooche ñakʉ oiʉ
paisikʉre.
\p
\v 8 Repaʉ Lot reojache paikʉji pãi cuache painani jame
paiʉ repaʉ rekocho reojache cuasakʉjekʉ repanapi siarʉmʉ
cuache choojʉna ñakʉ ũcuachia asakʉ rʉa oiʉ paniasomʉ
repaʉ rekocho.
\v 9 Jãare cuasajʉ iere masime mai: Dios Repaʉ neenare cuache
tijñeto ʉ̃sekaimasiche. Ũcuachia cuache painare Repaʉ pãi
ũcuanʉko choosie roiche chʉ̃ʉrʉmʉjatʉka chẽa vati toa
sao paamasiche masime mai.
\v 10 Pãi tĩiñe cuasajʉ repanare ʉachechia choonaname Maire
Paakʉ chʉ̃ʉñe cuhejʉ jachanare naa rʉa cuache chʉ̃ʉjamʉ
Repaʉ. Repana cuasajʉ paiche rʉa ikajʉ cʉnaʉmʉre paijʉ
peore chʉ̃ʉnare ñomanarejẽe cuasa, kʉkʉmañe cuache
cutunaame repana.
\v 11 Jãatani ángeles naa rʉa koka paajʉ naa rʉa
masinatani Dios asakʉte jãajañe cuache ikamañe ña,
kʉkʉme repanare jorechʉo chechonare.
\p
\v 12 Repana jorechʉo chechona paivesʉjʉ repanare ʉachechia
choojʉ cuasavesʉjʉ cuavana paichejache painaame. Repana
ñamamajñarʉãname ñamanare cuache ikajʉ, cuavana chẽa
vanisõcojñoñejañe choosõjanaame repana.
\v 13 Repanare ʉache choorʉmʉ pojojʉ cuache choochejẽe
cuasamañe choosie roi chekʉnare repana cuache choosiejache
choocojñojanaame. Mʉsanʉkona chii sãiñechia pojojʉ ãu
ãirʉmʉ jame chii vajʉchʉache ñoñe repanare ʉache rʉa
tĩiñe choojʉ jorenaame repana.
\p
\v 14 Romiote teeoterejẽe ʉache ñamañe paimapʉ rʉa
cuache choonatani canamanaame repana. Dioni apecuasajʉ
reojache choo koka peovanare jorejʉ cuache chechojʉ
cacʉonaame repana. Cuachechia choonajejʉ kuri chii ainaame
repana. Repana cuache roi Dios toana saojamʉ repanare.
\v 15 Maa rũhiñe saimaa saicuhejʉ tĩimaana sani
cavesʉsinajañe reojache paiche ũhasõ cuache painaame
repana. Beor mamakʉ Balaam kurire koora chini cuache
choosiejache choonaame repana.
\v 16 Repaʉte Balaamre cuache choora chini saikʉni burravao
chʉo ikamavaotani repaʉ tĩiñe choojasa chini saichete
ʉ̃seko pãi chʉopi ikako kerekotetani jachaasomʉ.
\p
\v 17 Repana jorechʉo chechona oko puni oko raimana paichejache
paijʉ oko rara chini ramañe tuta saochejache jorenajejʉ vati
toa rʉa chijachejare ai sani paijanaame.
\v 18 “Rʉa masime chʉkʉna”, chiijʉ peoche ikajʉ cuache
chooche ũhasõ aperepa reojache painare jorejʉ cuache
chechojʉ, “Ũcuaʉache chooreomʉ”, chiijʉ cacʉome repana.
\v 19 “Chʉkʉna chechochete asa chẽa mʉsanʉkonare ʉache
choojʉ pani reojache paijanaame”, chiijʉ jorenaame repana.
Jãatani repanapi reojache chooñu chiito cuachechia
choomasinajejʉna choocuakʉmʉ repanare. Pãi ũcuanʉko chẽa
paacojñonajañechia paijʉ repana siarʉmʉ choojʉ paiche
ũhasõʉanaretani ũhacuamʉ, choojʉ chechesõrena.
\v 20 Cuache paisinapi Maire Paakʉni Jesucristoni vati toa sani
uuche Ʉ̃sekaikʉni cuasajʉ jovo Ũcuaʉji chookaiʉna Repaʉte
cuasamana cuasachejache cuasajʉ cuache choochete ũhasõ
reojache choojʉ paisinapi cavesʉsõ joe cuache choojʉ
paito aperʉmʉ paisie naa rʉa cuajamʉ repanare.
\v 21 Dioni cuasamapʉ reojache paimanare rʉa cuamʉ.
Jãatani Jesure jovosinapi Repaʉ chʉ̃ʉñe jachajʉ Repaʉte
cuasache jokasõsinare naa rʉa cuajamʉ.
\v 22 Jãajañe choona ijache chiichejache paime: “Jamuchai
repaʉ sisosie joe ãimʉ. Jochasẽse cuchasina chaophanapʉna
teana ʉme sisi choosõme”, chiichejache paime.
\c 3
\s Maire Paakʉ joe raijachere kʉamʉ
\p
\v 1 Asarepajʉ̃ʉ, chʉʉ majapãijana. Ijaova utijaova joe
tocha saomʉ chʉʉ mʉsanʉkonare chʉʉ chʉvakʉ kachañoã
tocha saochʉore mʉsanʉkonapi cavesʉmañe rũhiñe cuasajʉ
paapʉ chini.
\v 2 Cavesʉmañe paijʉ aperʉmʉ Dios chʉo kʉasina tocha
jokasie cuasajʉ paijʉ̃ʉ. Ũcuachia chʉkʉna Repaʉ saosina
Maire Paakʉ vati toa sani uuche Ʉ̃sekaikʉji chʉ̃ʉʉna
mʉsanʉkonare chechosie cavesʉmañe cuasajʉ paijʉ̃ʉ.
\p
\v 3 Ie ũcuachia cuasajʉ̃ʉ: Chutaa Jesús joe raimarʉmʉ
pãi repanare ʉachechia cuasajʉ cuache choojʉ paina rani
pãisojanaame mʉsanʉkonare.
\v 4 Ijache ikajanaame repana: “¿Jese paiʉna Cristo, ‘Joe
raijamʉ chʉʉ’, chiisikʉtani raimakʉ? Repaʉte jovo mai
jakʉpãijañe paijʉ maire chechojʉ paisina peore
jũnisõcuhasinaame. Jãatani cheja paiche mamarʉmʉpi
sañomañe ũcuatee paimʉ. Raimanejacosomʉ Repaʉ”,
chiijanaame.
\v 5 Repana jorena mamarʉmʉ choosiere cuasacuhejʉ jãajañe
ikame. Jãatani Diopi chʉ̃ʉkʉna cheja paiche teeñoã
sañekʉ paimʉ. Aperʉmʉ Diopi ikaʉna cʉnaʉmʉ peosiʉmʉpi
paniasomʉ. Ũcuachia Repaʉji ikaʉna okochia paisie cheja
paniasomʉ. Pooname chiaraã chiañaã paaʉ chini jãajañe
chooasomʉ Repaʉ.
\v 6 Ũcuachia naa paisirʉmʉ okopi rʉa ra, chejare peore kosa
timuʉna cheja paiche peore choosõasomʉ.
\v 7 Chura paiche cʉnaʉmʉname cheja pãi ũcuanʉko choosie
Dios cuasa cuache choosinare vati toa saoumucusena Ũcuaʉji
chʉ̃ʉʉna peore uu sañosõjamʉ.
\p
\v 8 Ũcuachia, chʉʉ majapãijana, ie cavesʉmañe cuasajʉ
paijʉ̃ʉ: Maire Paakʉ cuasato teeumucuse
milrepaʉ̃sʉrʉmʉjañeasomʉ. Ũcuachia milrepaʉ̃sʉrʉmʉ
teeumucusejacheasomʉ Repaʉte.
\v 9 Pãi teena cuasato Maire Paakʉ Repaʉ, “Joe raijamʉ
chʉʉ”, chiisie nami rairʉjachere raimanesikʉamʉ.
“Churajẽe rʉa jeerʉmʉtani rairʉjachere raimanecuhamʉ
Repaʉ”, chiime. Jãatani Repaʉte raireoumucusepi
caranisõʉna raimañe paimamʉ Repaʉ. Rupʉ maini oiʉ
Repaʉte jovojanapi repana cuache choochete ũhasõ Repaʉni
cuasajʉ jovo teeʉjẽe choosõmaneajʉ chini chaakʉ raimañe
paimʉ Repaʉ.
\p
\v 10 Maire Paakʉ joe raiumucuse teana tĩajamʉ. Ñaaʉni
pẽjejʉ raimaʉna chaatee pãi pẽjemaumucusena ñaaʉ
raichejache Maire Paakʉ ũcuajache Repaʉte pẽjemaumucusena
raijamʉ. Reparʉmʉ cʉnaʉmʉ paiche rʉa vajʉchʉache asoche
peore uu ñañasõjamʉ. Cheja ũcuachia repacheja paichename
peore uu sañosõjamʉ Diopi chʉ̃ʉʉna.
\p
\v 11 Peore jãajañe ñañasõjañejekʉna asa kʉkʉ cuache
chooche peore ũhasõ Repaʉni masi cuasajʉ pojojʉ paijʉ̃ʉ
mʉsanʉkona.
\v 12 Mʉsanʉkonare peore chooreochetʉka reojachere choojʉ
Dios Repaʉ masiche peore choo ñoumucusere chaajʉ paijʉ̃ʉ,
naa nami raaʉ chini. Repaumucuse cʉnaʉmʉ uu ñañasõjamʉ.
Cuamajñarʉãtani toapi peore uu kosisõjamʉ.
\v 13 Maitani Dios, “Ijache choojamʉ chʉʉ”,
chiisichejñare cheja mamachejaname cʉnaʉmʉ mamaʉmʉre chaajʉ
paime, reonachia paijʉ reojachechia choojachejñare.
\p
\v 14 Jãajekʉna, chʉʉ majapãijana, jãare chaajʉ peore
chooreochetʉka Repaʉname reojache paijʉ, reojachere
cuasajʉ cuache peona paijʉ̃ʉ, Diopi reojache painani rani
ñaakʉ.
\v 15 Maire Paakʉ maini oiʉ vati toa sani uuchete Ʉ̃sekʉ maipi
Repaʉni jovo Ũcuaʉname siarʉmʉ paapʉ chini chaache
cavesʉmañe cuasajʉ̃ʉ. Mai majapãiʉjaiʉ mai rʉa cuasakʉ
Pablo ũcuachia Diopi chookaiʉna masikʉ ũcuateere kʉakʉ
tocha saosikʉamʉ mʉsanʉkonare.
\v 16 Repaʉ Pablo tocha saosijao siajao jãare kʉamʉ.
Jãatani repajao tochasie teemajñarʉã asavesache kʉakʉ
tochasieame. Jãajekʉna Diore masi cuasamana repare asavesʉjʉ
cheke Dios chʉo tochasie chechochejache repana cuasachechia
tĩiñe chechome. Jãajañe repana cuasachechia chechojʉ masi
kʉamanesie roi choosõjanaame repana.
\p
\v 17 Jãajekʉna, chʉʉ majapãijana, mʉsanʉkona chutaa
repana raimarʉmʉ asasinajejʉ ñarepajʉ paijʉ̃ʉ, reojache
paichete repanapi rani jorechʉore chechojʉna asa chẽa cuasajʉ
cacʉocojñoñe.
\v 18 Ũcua reojache paijʉ Maire Paakʉ vati toa sani uuche
Ʉ̃sekaikʉ Jesucristo paichete naa rʉa chechejʉ siarʉmʉ
Repaʉni naa rʉa cuasajʉ paijʉ̃ʉ. Irʉmʉpi ai siarʉmʉ
pojocojñokʉ paaʉ Repaʉ. Jãajañe paaʉ. Reomʉ.
\cls Pedro