\id 1JN
\h 1 SAN JUAN
\toc1 San Juan charo chʉo tocha saosieame
\toc3 (1 Jn)
\mt San Juan charo chʉo tocha saosieame
\c 1
\s Jesucristo Pʉkakʉ Dios paiche kʉasiere kʉamʉ
\p
\v 1 Chʉkʉna ñasiename asasie mʉsanʉkonani Jesucristo paichete kʉakʉ ie chʉo tocha saomʉ chʉʉ. Ũcuachia chʉkʉna Repaʉte sũka pojosinaame.
\p Apereparʉmʉ chutaa cheja choomarʉmʉ cʉnaʉmʉre Pʉkakʉ Dioname paniasomʉ Repaʉ Jesucristo. Cʉnaʉmʉ Paikʉji icheja chejare caje paiʉ reojache paiche mai rekoñoã vajʉche jokasikʉamʉ Repaʉ. Ũcuachia chʉkʉnani Pʉkakʉ Dios paichete kʉakʉ Repaʉ chʉ̃ʉñe kʉasikʉamʉ Repaʉ.
\v 2 Repaʉ Jesús kʉache asajʉ Repaʉterejẽe ñasinajejʉ masime chʉkʉna chura Pʉkakʉ Dios paiche. Jãajekʉna mʉsanʉkonare Jesucristo Pʉkakʉname Paikʉji mai paichejare caje paiʉ maire ũcuanʉkore reojache chechoche asasinajejʉ ũcuare kʉame chʉkʉna.
\v 3 Ũcuachia Jesucristoji chechokʉna asasinajejʉ Dios paiche masime chʉkʉna chura. Repaʉte ñasinajejʉ Dios paiche masijʉ Dioname reojache jame paime chʉkʉna. Dios Mamakʉte Jesucristote ũcuachia reojache jame paime. Mʉsanʉkonapi asa chẽa chʉkʉnaname reojache paijʉ ũcuachia Dioname reojache paapʉ chini chʉkʉna ñasie peore kʉame chʉkʉna mʉsanʉkonare.
\v 4 Mʉsanʉkonapi ña naa rʉa pojojʉ paapʉ chini tocha saomʉ chʉʉ ijaova.
\s Dios reojachechia choochete kʉamʉ
\p
\v 5 Ie chʉo chʉkʉnate Jesucristo chechokʉna asasikʉjekʉ kʉamʉ chʉʉ mʉsanʉkonare. Ijache chechosikʉamʉ Repaʉ:
\p “Dios peore masikʉmʉ. Reokʉjekʉ cuachejẽe peokʉmʉ.” Jãajañe chiiʉ pãi chechosikʉamʉ Jesucristo.
\v 6 Pãi, “Dioname reojache paime chʉkʉna”, chiinapi cuache chooni chijachejajache cuache painajejʉ joreme repana. Jãajañe choona Dios chʉ̃ʉñe choomame.
\v 7 Repaʉ Dios cuachejẽe choomakʉjekʉ miañejañe paiʉ reojachechia chookʉ joremakʉamʉ. Mai ũcuajache miañejañe paijʉ reojache choojʉ joremaneni sãiñechia pojojʉ paijanaame. Ũcuachia Dios mai cua tʉnesõkaijamʉ, Jesucristo maire jũni roikaisiejekʉna.
\p
\v 8 “Pãi ũcuanʉko cuache choonaame”, chiimʉ Dios. Jãajekʉna maipi, “Cuache choomanaame chʉkʉna”, chini joreme. Rũhiñe cuasamanajejʉ Repaʉ ikache jachame mai jãajañe ikani.
\v 9 Jãatani maipi, “Cuache choonaame chʉkʉna”, chiijʉ mai cuache choochete Dioni kʉato joe cuasamanejamʉ Repaʉ. “Jãajañe choojamʉ chʉʉ”, chiisikʉjekʉ joremañe reojachechia choomʉ Dios. Jãajekʉna mai cuache choochete Repaʉni kʉaru mai rekoñoã paiche cua peore tʉnesõkani joe cuasamanejamʉ Repaʉ.
\v 10 Maipi, “Cuache choomanaame chʉkʉna”, chiito cuamʉ. Jãajañe ikani Dios ikasiere jachajʉ, “Joremʉ Dios”, chiime mai.
\c 2
\s Dios Raosikʉ Jesucristo maire sẽekaikʉmʉ Pʉkakʉ Diore
\p
\v 1 Mʉsanʉkonare chʉʉ chĩijavanare ie chʉo mʉsanʉkonapi
ña cuache choomañe paapʉ chini tocha saomʉ chʉʉ.
Jãatani maipi cuache chooto Jesucristo Reokʉjekʉ maire Repaʉ
Pʉkakʉni sẽekaimʉ. “Jakʉ, repana cuache joe
cuasamanejʉ̃ʉ”, chiiʉ sẽekaimʉ Repaʉ.
\v 2 “Cuache choona repana cuache choosie roijanaame”,
chiimʉ Dios. Jãatani Jesucristo mai cuache choosie roi jũni
roikakʉna maire chura roiche peomʉ. Jãatani mairechia
roikaimañe pãi ũcuanʉkore roikaisikʉamʉ Repaʉ
Jesucristo.
\p
\v 3 Maipi Diore masi cuasarepani Repaʉ chʉ̃ʉñe jachamañe
choome.
\v 4 Jãatani pãi, “Diore cuasanaame chʉkʉna”, chiinapi Repaʉ
chʉ̃ʉñe choomaneni joreme repana, Dios chʉo ũcuarepare asa
chẽamanajejʉ.
\v 5 Dios chʉ̃ʉñe jachamañe choona Diore masi cuasame.
Jãajekʉna maipi Repaʉ chʉ̃ʉñete chooni mai Repaʉte masi
cuasache masime.
\v 6 Jesucristo cheja pairʉmʉ cuachejẽe choomañe
reojachechia choosikʉamʉ. Jãajekʉna pãi, “Diore
cuasanaame chʉkʉna”, chiinare, “Jesucristo paichejache
reojache paijʉ̃ʉ”, chiiʉ chʉvamʉ chʉʉ.
\s Pãi Dios chʉ̃ʉsie asasinatani mamajañe asajʉ paichete
kʉamʉ
\p
\v 7 Asarepajʉ̃ʉ, chʉʉ majapãijana. Ie chʉo mʉsanʉkonani
Dios chʉ̃ʉsiere kʉara chini tochamʉ chʉʉ. Jãatani
mamachʉomamʉ ie. Aperʉmʉ mʉsanʉkona asasieame.
\v 8 Jãatani mʉsanʉkona ie chʉo asasinatani mamajañe asajʉ
paime chura. “Chekʉnare rʉa cuasajʉ oijʉ paijʉ̃ʉ”, chiimʉ
Dios. Ichejare caje paiʉ Jesucristo pãi rʉa oiʉ
paisikʉamʉ. Jãajekʉna maire ũcuajache choojʉ paapʉ
chini jokasikʉamʉ Repaʉ. Aperʉmʉ maire chijachejajache
cuache paijʉ vesʉjʉna reojache paicuasikʉamʉ. Chura
Jesucristoji chookaiʉna miañejañe reojache paime mai.
\p
\v 9 Pãi, “Diore cuasanajejʉ miañejañe reojache painaame
chʉkʉna”, chiinapi repana majapãijanani cuheni chutaa
chijachejajache cuache paijʉ Diore cuasamanajejʉ chʉochia
ikame.
\p
\v 10 Repana majapãijanare ña oinatani Diore masi cuasame.
Ũcuachia Diore cuasanajejʉ miañejañe reojache paijʉ
cacuamame repana.
\v 11 Jãatani repana majapãijanare cuhena Repaʉni masi cuasamapʉ
ũcua chijachejajache cuache paijʉ reojache cuasachejẽe
vesʉme repana. Chijacheja kuinajañe paivesʉjʉ naavana
paichejache paime repana.
\p
\v 12 Mʉsanʉkona chʉʉ chĩijavana, Jesucristoni cuasajʉ
rekoñoã cua tʉnesõcojñorena iere chʉo tocha saomʉ chʉʉ.
\v 13 Mʉsanʉkona aina, Jesucristote chutaa cheja choomarʉmʉ
Paikʉni masime. Mʉsanʉkona põsʉpãi, vati, “Cuache
choojʉ̃ʉ”, chiiche Dioni cuasajʉ Ũcuaʉji chookaiʉna jachajʉ
reojache paime.
\p
\v 14 Mʉsanʉkona chʉʉ chĩijavana, Mai Jakʉre Dioni masi
cuasajʉ paime. Mʉsanʉkona aina, chutaa cheja choomarʉmʉ
Paikʉte masime. Mʉsanʉkona põsʉpãi, Diopi chookaiʉna
reojache paime. Dios chʉ̃ʉñe asa chẽasinajejʉ vati cuache
chʉ̃ʉtojẽe cuache choomañe paime mʉsanʉkona. Dioni
cuasajʉna chʉo tocha saomʉ chʉʉ mʉsanʉkonare ũcuanʉkore.
\p
\v 15 Diore cuasamana paichejache paimanejʉ̃ʉ. Ũcuachia
repana choochejache cuache chooñu chiimanejʉ̃ʉ. Jãajañe
pañu chiina Diore cuhenaame.
\v 16 Diore cuasamana ijache paime: Cuache chooneejʉ, chekʉna
nee tʉa paaʉache ñajʉ, “Chekʉnare naa rʉa masinaame
chʉkʉna”, chiijʉ cuasame. Repana cuache paiche Dios
jokasiemamʉ. Diore cuasamana cuache cuasajʉ choocheme jãa
cua.
\v 17 Cheja siasõpiramʉ. Naa paisirʉmʉ cheja peojamʉ.
Ũcuajache cuache choona peojanaame. Jãatani Dios chʉ̃ʉñe
chooneena Repaʉ paichejare ai sani siarʉmʉ reojache
paijanaame.
\s Dios chʉo ũcuarepare chechonaname jorechʉo chechona
paichete kʉamʉ
\p
\v 18 Asarepajʉ̃ʉ, chʉʉ chĩijavana. Chura cheja
siapiramʉ. Aperʉmʉ mʉsanʉkona, “Jesucristote rʉa cuhekʉji
raijamʉ”, chiiche asasinaame. Chura Jesucristote cuhena pãi
jainʉko rani paime. Repanapi rani paijʉna ña, “Cheja
siasõpiramʉ”, chiime mai.
\p
\v 19 Repana Jesucristote cuhena maire jame jovo paisinapi Diore
cuasamanajejʉ maire joka sanisõsinaame. Mainame Diore cuasana
pani joka saimaneraasinaame repana. Jãatani repanapi joka
sanisõrena ña masijʉ, chekʉna pãi, “Diore cuasamanaame
jãana”, chiime repanare.
\p
\v 20 Cristo mʉsanʉkonare jame paaʉ chini Dios Rekochote
raosikʉamʉ. Ũcuarekochoji jame paiʉ chookaiʉna Dios chʉo
ũcuarepare masime mʉsanʉkona.
\v 21 Dios chʉo ũcuarepa vesʉjʉna tocha saomañe,
mʉsanʉkonapi ũcuare masijʉna ie chʉo tocha saomʉ chʉʉ.
Pãi chekʉna teena, “Dios chʉo chechonaame chʉkʉna”, chiijʉ
jorechʉore chechojʉ chʉo ũcuarepa chechomame.
\v 22 Pãi Dios ikasiere jachajʉ, “Dios Raosikʉmamʉ
Jesús”, chiina joreme. Jãajañe ikajʉ jachajʉ Jesure Dios
Raosikʉre cuhejʉ Pʉkakʉ Diorejatʉka cuheme repana.
\v 23 “Jesús Dios Mamakʉmamʉ”, chini Jesuni cuasamana
Pʉkakʉre ũcuachia cuasamame. Jãatani, “Jesús Dios
Mamakʉmʉ”, chiijʉ Jesure cuasana Pʉkakʉre Diore ũcuachia
cuasame.
\p
\v 24 Mʉsanʉkona aperʉmʉ asa chẽasie Dios chʉore
jokasõmañe cuasajʉ paijʉ̃ʉ. Jãajañe jokamañe cuasajʉ
pani Dios Mamakʉname reojache paijanaame mʉsanʉkona.
Ũcuachia Repaʉ Pʉkakʉ Dioname reojache paijanaame.
\v 25 Repaʉ Jesucristo, “Mʉsanʉkona Dios paichejare ai sani
siarʉmʉ paijanaame”, chiisikʉamʉ maire.
\v 26 Chekʉna pãi jorejʉ cacʉoñu chiime mʉsanʉkonare. Repana
jorena paichete kʉara chini ie chʉo tocha saomʉ chʉʉ
mʉsanʉkonare.
\v 27 Jesucristo mʉsanʉkonani jame paaʉ chini Dios Rekochote
raosikʉamʉ. Raoʉna Repaʉ Dios Rekocho mʉsanʉkonare
jokasõmañe jame paiʉ joremañe Dios chʉo peore ũcuarepa
reojache chechokʉ paimʉ mʉsanʉkonare. Jãajekʉna
mʉsanʉkona chekʉnare chechonare chiimame. Dios Rekocho
mʉsanʉkonare ũcuarepare chechokʉ, “Jesucristote cuasache
jokasõmanejʉ̃ʉ”, chiiʉ chʉvamʉ. Repa chʉvache asa chẽa
jokasõmañe cuasajʉ paijʉ̃ʉ.
\p
\v 28 Asarepajʉ̃ʉ, mʉsanʉkona chʉʉ chĩijavana. Maipi
Jesucristote cuasache jokasõmaneni Repaʉ icheja mai paichejana
joe cajerʉmʉ ña pojojanaame, Repaʉte cuasache
jokasõmanesinajejʉ. Repaʉte cuasache jokasõnitani Repaʉ
cajerʉmʉ ña vajʉchʉjʉ katiñu chiijanaame mai.
\v 29 Dios Mamakʉ Jesucristo reojachechia chookʉmʉ. Jãare
masini ie ũcuachia masime mai: Pãi reojachechia choona Dios
chĩiame, Jesucristo repanare chookaisiejekʉna.
\c 3
\s Diore cuasana Repaʉ chĩijana paichete kʉamʉ
\p
\v 1 Asarepajʉ̃ʉ mʉsanʉkona. Mai Jakʉ Dios maire rʉa chiiʉ,
“Mʉsanʉkona chʉʉ chĩiame”, chiimʉ. Jãajekʉna Dios
chĩiame mai. Pãi chekʉna Diore cuasamana Dios paichejẽe
vesʉjʉ ũcuajache mai paiche vesʉme.
\p
\v 2 Asarepajʉ̃ʉ chʉʉ cuasana. Chura Dios chĩiame mai. Mai
paijache chutaa vesʉme mai. Jãatani chura iere masime: Icheja
mai paichejana Jesucristoji joe ratu Repaʉ paiche masirepa
ñajanaame mai jãarʉmʉtani. Ũcuachia Repaʉni ña
Ũcuaʉjana carũhijanaame.
\v 3 Jãajekʉna mai Repaʉte cuasana Repaʉ joe rairʉmʉ
Ũcuaʉjana carũhijañere cuasajʉ pojojʉ cuache chooche ũhasõ
Repaʉ paichejache reojache paime.
\p
\v 4 Pãi cuache choona Dios chʉ̃ʉñe jachasõme. Cuache
chooche Dios chʉ̃ʉ jokasiemamʉ.
\v 5 Jesucristo mai cuache choochete tʉnesõkasa chini icheja
mai paichejare caje paiʉ jũni roikaisikʉamʉ. Repaʉ
jmamakarʉjẽe cuache choomakʉamʉ. Chura mʉsanʉkona masime
jãa.
\v 6 Pãi Jesucristote masi cuasana cuare jʉvojʉ reojache
paime. Siarʉmʉ cuache choona Jesucristo paiche vesʉme.
Cuare choojʉ Repaʉte Jesucristote masi cuasamame repana.
\p
\v 7 Asarepajʉ̃ʉ, chʉʉ chĩijana. Pãipi mʉsanʉkonani
jorechʉore chechojʉ cacʉoñu chiito repana ikachʉo asa
chẽamanejʉ̃ʉ. Jesucristo reojachechia chookʉmʉ.
Jãajekʉna pãi reojache choona Repaʉ paichejache paime.
\v 8 Jãatani cuache choona vati neenaame. Repaʉ vati mamarʉmʉ
cuache chookʉ chutaa irʉmʉjatʉka cuache chookʉ paimʉ.
Jãajekʉna Dios Mamakʉ repaʉ vati cuache choochete ʉ̃sera
chini chejana cajesikʉamʉ.
\p
\v 9 Dios chĩi, Repaʉte cuasana Dios Rekochote paajʉ
siareparʉmʉ cuache choojʉ paimame. Repaʉ chĩijejʉ
cuachejẽe choocuheme repana.
\v 10 Pãi cuache choona Dios chĩimame, ũcuachia chekʉnare
cuasamana. Jãajekʉna pãi cuache choojʉ chekʉnare oimanare
ña, “Dios chĩimame ina; vati chʉ̃ʉñete choome”,
chiireomʉ.
\s Maire ũcuanʉkore pãi, “Chekʉnare oijʉ paijʉ̃ʉ”, chiimʉ
Dios
\p
\v 11 Aperʉmʉ Dios chʉo apechecherʉmʉ Dios chʉ̃ʉñe
chekʉnapi chechojʉna asasinaame mʉsanʉkona. Ijache
chechosinaame repana: “ ‘Mʉsanʉkona pãi sãiñechia oijʉ
cuasajʉ paijʉ̃ʉ’, chiimʉ Dios maire ũcuanʉkore”, chiijʉ
chechosinaame repana.
\v 12 Aperʉmʉ paisikʉ Caín jãajañe choomañe cuache
chookʉ paniasomʉ. Repaʉ chojeʉtani reojache chookʉ
paniasomʉ. Jãajekʉna majaachʉ Caín chojeʉte cuhekʉ
vanisõasomʉ, vati cuache chʉ̃ʉñe chookʉjekʉ. Repaʉ Caín
paisiejache paimaneñu mai. Reojache paijʉ chekʉnare oijʉ
pañu.
\p
\v 13 Asarepajʉ̃ʉ, chʉʉ chĩijana. Chekʉna pãi Diore cuhena
maire ũcuachia cuheme. Jãajekʉna, “¿Jese paiʉna jãana
maire cuheche?”, chiijʉ cuasamanejʉ̃ʉ mʉsanʉkona. Jãajañe
choome pãi maire Jesure cuasanare.
\p
\v 14 Pãi chekʉnare cuasamana ũcuachia Diore cuasamame.
Repaʉte cuasamana repana jũnisõsirʉmʉ Dios paicheja saimañe
vati toare ai sani uujʉ paijanaame. Mai Diore cuasanatani
chekʉnare oinajejʉ chura iere masime: Repaʉte cuasanajejʉ Dios
paichejana ai sani mai reojache paijache.
\v 15 Pãi chekʉnare cuhena pãi vaina cuasachete cuasame.
Jũnisõsirʉmʉ Dios paicheja saimanejanaame repana. Jãa masime
mʉsanʉkona.
\v 16 Jesucristo mai cuache chooche jũni roikaisikʉjekʉ maire
oimʉ. Masime mai jãa. Jesucristo maire oichejache chekʉnare oijʉ
reojache chookaijʉ pañu. Mai reojache choochete ʉ̃sejʉ
chekʉnapi perujʉ maire vanisõñu chiitojẽe ũcua chekʉnare
reojache chookaijʉ pañu.
\v 17 Diore cuasana teena põse karamañe paame. Chekʉnatani
Diore cuasana chʉovana paime. Jãajekʉna põse paanare,
“Chʉovana painare ña oijʉ chookaijʉ̃ʉ”, chiimʉ chʉʉ.
Ña oimato cuamʉ. Chʉovana painani ña oimaneni Diore
cuasanamame repana.
\p
\v 18 Asarepajʉ̃ʉ, chʉʉ chĩijana. Maipi, “Chekʉnare
oinaame chʉkʉna”, chiinatani repanare reojache chookaimato
cuamʉ. Choomanapi ikani peoche ikame mai. Chekʉnare oijʉ
ũcuarepa reojache chookaijʉ pañu mai.
\s “Dios chookaijamʉ chʉʉre”, chini cuasajʉ vajʉchʉmañe
Diore ikachete kʉamʉ
\p
\v 19-20 Jãajañejekʉna maipi pãi chekʉnani oni, “Diore masi
cuasanaame”, chiireomʉ maire. Jãatani teeñoã mai, “Dios
chʉ̃ʉñe siareparʉmʉ choomakʉamʉ chʉʉ”, chini oijʉ
cuasame. Jãatani Dios peore Masiʉ mai rekoñoã paiche peore
Ñakʉ mai Repaʉte masi cuasache ñamʉ.
\v 21 Maipi pãi chekʉnare oijʉ paito Diore vajʉchʉmañe
sẽereomʉ.
\v 22 Ũcuachia maipi Repaʉni pojojʉ Repaʉ chʉ̃ʉñe
reojache choojʉ maire ʉachete sẽeto reojache ĩsikʉna
koojanaame mai.
\v 23 Ijachere chʉ̃ʉmʉ Dios maire: “Mʉsanʉkona chʉʉ
Neekʉre Jesucristoni cuasajʉ Repaʉ chʉ̃ʉñe sãiñechia
cuhemañe cuasajʉ paijʉ̃ʉ”, chiiʉ chʉ̃ʉmʉ Dios maire.
\v 24 Pãi Dios chʉ̃ʉsie choona siarʉmʉ Ũcuaʉname
reojache paime. Dios Rekocho maini jame paaʉ chini Repaʉ
Raosirekochoji jame paiʉ, “Dios mʉsanʉkonare jame paimʉ”,
chiiʉ kʉakʉna masime mai.
\c 4
\s Diore cuasana choochename Diore cuhena choochete kʉamʉ
\p
\v 1 Asarepajʉ̃ʉ, chʉʉ cuasana. Pãi mʉsanʉkonare, “Dios
chʉo chechome chʉkʉna”, chiito repana chechoche teana
asamanejʉ̃ʉ. Dios chʉo ũcuarepa ikatote, repana chechoche
asajʉ̃ʉ. Rʉa jainʉko jorechʉo chechona paime icheja cheja.
\v 2 Jesucristo icheja cheja caje maijaiʉ paisikʉamʉ. Jãare
kʉajʉ chechona Dios chʉ̃ʉ jokasiere chʉo chechome.
Mʉsanʉkonapi repana chechochete asani, “Dios Rekocho paame
ina”, chini repana paiche cuasa masijanaame.
\v 3 Repana pãi, “Jesucristo Dios Raosikʉmamʉ”, chiijʉ
chechoni Dios Rekocho peome. Naa paisirʉmʉ Jesucristote rʉa
cuhekʉji raijamʉ. Mʉsanʉkona repaʉ raijache asasinaame. Pãi
teena repaʉ cuasachejache cuasame chura paina.
\p
\v 4 Asarepajʉ̃ʉ, chʉʉ chĩijana. Vati Diore cuhenare
paakʉmʉ. Mʉsanʉkonatani Dios chẽa paacojñonajejʉ repanare
cajejaime, Diopi jame paiʉ chookaiʉna. Vatire naa rʉa
masikʉmʉ Dios.
\v 5 Cuache chechona vati neenaame. Jãajekʉna repaʉ
chʉ̃ʉñete ikajʉ chechojʉna Diore cuhena pãi asajʉ paime.
\v 6 Pãi Diore cuasana chʉkʉna Repaʉ raosina chechochete asajʉ
paime. Repaʉte cuasamanatani asacuheme. Jãajekʉna Dios chʉo
asacuhenare ñani, “Diore cuasamanaame jãana”, chiireomʉ.
Jãatani pãi Dios chʉo asaneenare, “Diore cuasame ina”, chini
repana paichete ña masireomʉ maire.
\s Dios pãi ũcuanʉkore oichete kʉamʉ
\p
\v 7 Asarepajʉ̃ʉ, chʉʉ cuasana. Ũcuanʉko sãiñechia cuasajʉ
pañu mai. Jãajañe paapʉ chini chʉ̃ʉ jokasikʉamʉ Dios
maire. Pãi chekʉnare cuasana Dios chĩijejʉ Repaʉ paiche
masime.
\v 8 Pãi ũcuanʉkore oikʉmʉ Dios. Jãatani pãi chekʉnare
cuasamana maire Oikʉte Diore cuasamame.
\v 9 Dios Repaʉ Mamakʉte Ũcuateeʉni chejana casosikʉamʉ,
maipi Repaʉni cuasajʉ reojache paijʉ mai jũnisõsirʉmʉ Dios
paichejare ai sani paapʉ chini. Jãajekʉna maipi Dios Mamakʉte
casosiere cuasani, “Dios maire rʉa oimʉ”, chiijʉ cuasame mai.
\v 10 Mai rekoñoã ʉache cuasajʉ chareparo Dioni
cuasamanesinaame mai. Repaʉ Dios maire rʉa oikʉjekʉ Repaʉ
Mamakʉte chejana casoʉna caje paiʉ mai cuache choochete
roikaiʉ chuenisõsikʉamʉ Repaʉ.
\p
\v 11 Asarepajʉ̃ʉ, chʉʉ cuasana. Dios maire rʉa oiʉna mai
ũcuachia chekʉnare rʉa cuasajʉ oijʉ pañu.
\v 12 Pãi teeʉjẽe Diore ñamanaame. Jãatani maire
chekʉnare cuasanare Dios jame paimʉ. Jãajekʉna maini
Ũcuaʉji chookaiʉna chekʉnare siarʉmʉ naa rʉa cuasajʉ
paijanaame.
\v 13 Dios maini jame paaʉ chini Repaʉ Rekochote raosikʉamʉ.
Ũcuarekochoji jame paiʉ chookaiʉna Dios maire jame paiche
masime mai. Ũcuachia mai Repaʉname reojache jame paiche
masime.
\p
\v 14 Mai Jakʉ Dios Repaʉ Mamakʉte chejana casosikʉamʉ,
Repaʉte cuasanani Mamakʉji chẽa paakʉ vati toa sani uuchete
ʉ̃sekaaʉ chini. Chʉkʉna Repaʉte Jesucristote cheja pairʉmʉ
ñasinajejʉ Repaʉ paichete pãi ũcuanʉkore kʉajʉ paime,
masiajʉ chini.
\v 15 “Jesús Dios Mamakʉmʉ”, chiinachia pãi Dioname
reojache paime. Ũcuachia Repaʉte cuasanare jokamañe jame
paimʉ Dios.
\p
\v 16 Dios maire rʉa oichete masijʉ Repaʉte cuasame mai. Pãi
ũcuanʉkore rʉa oimʉ Dios. Jãajekʉna pãi chekʉnare cuasache
jokasõmana Dioname reojache paijʉna Repaʉ repanare
jokamañe jame paimʉ.
\v 17 Jesucristo Repaʉ Pʉkakʉre vajʉchʉmañe cuasamʉ. Mai
ũcuajache Repaʉte Diore vajʉchʉmañe cuasajʉ paime,
Repaʉji maini oiʉna. Naa paisirʉmʉ Dios pãi ũcuanʉkore
repana cuache choosie roiajʉ chini chʉ̃ʉjamʉ. Maitani
Repaʉte cuasajʉ Repaʉ paichejache reojache painajejʉ
vajʉchʉmanejanaame reparʉmʉ tĩato.
\v 18 Jãatani, “Dios maire cuache choojamʉ”, chiijʉ
cuasani vajʉchʉraame. Vajʉchʉjʉ, “Dios maire oimamʉ”,
chiijʉ cuasaraame. Jãatani, “Dios maire rʉa oikʉjekʉ
cuache choomanejamʉ”, chini cuasajʉ Repaʉte vajʉchʉmañe
cuasame.
\p
\v 19 Pãi teeʉjẽe chutaa Repaʉte cuasamarʉmʉpi pãi
ũcuanʉkore oikʉmʉ Dios. Jãajekʉna mai ũcuachia Repaʉte
maire charo cuasasikʉjekʉna chura sãiñe cuasame.
\p
\v 20 Pãi teena, “Diore cuasanaame chʉkʉna”, chiime.
Jãatani repanapi chekʉnani majapãijañe painani cuheni
jorenajejʉ peoche ikame. Chekʉnare majapãijanare repana ñanare
cuhena, “Diore Ñomakʉretani cuasame chʉkʉna”, chiina peoche
ikame.
\p
\v 21 Jesucristo maire ijache chʉ̃ʉ jokasikʉamʉ:
“Mʉsanʉkona pãi Diore cuasana pani ũcuachia chekʉnare pãi
cuasajʉ paijʉ̃ʉ”. Jãajañe chʉ̃ʉ jokasikʉamʉ Repaʉ
maire.
\c 5
\s Diore cuasana Ũcuaʉji chookaiʉna vati chʉ̃ʉñe siarʉmʉ
choomañere kʉamʉ
\p
\v 1 “Pãi ũcuanʉkore chʉ̃ʉakʉ chini Dios Raosikʉamʉ
Jesús”, chini cuasana Dios chĩiame. Dios chĩi chekʉna
Repaʉte cuasanare mai Jakʉ Dios chĩijejʉna cuasame.
\v 2 Maipi Dioni cuasajʉ Repaʉ chʉ̃ʉñe chooni, “Chekʉnare
Dios chĩi cuasame mai”, chiireomʉ.
\v 3 Maipi Dios chʉ̃ʉñete chooni Repaʉte masi cuasame.
Ũcuaʉji maini chookaiʉna Repaʉ chʉ̃ʉñe choovesamamʉ
maire.
\v 4 Repaʉ chĩi, “Dios maire oiʉ chookaijamʉ”, chiijʉ
cuasanajejʉ Ũcuaʉji chookaiʉna vati chʉ̃ʉñe choomañe
reojachechia choome.
\v 5 “Jesús Dios Mamakʉmʉ”, chiijʉ cuasanachia koka paajʉ
vati chʉ̃ʉñe choomañe paime.
\s Dios Mamakʉ paichete kʉamʉ
\p
\v 6 Jesucristo icheja chejare caje paiʉ okorocojñosikʉamʉ.
Naa paiʉ mai cuache choochete roikaiʉ kurususẽverona
jẽjo nʉkorena jũnisõ chie meosikʉamʉ. Dios Rekochoji
ũcuarepare chʉo kʉakʉna Jesús paiche masime mai.
\v 7 Chotena cʉnaʉmʉ paina, “Jesús Dios Mamakʉmʉ”, chiijʉ
kʉame maire. Mai Jakʉ Dios Repaʉ chʉore kʉamʉ maire. Repaʉ
Mamakʉ ũcuachia kʉamʉ. Repaʉ Rekocho ũcuachia kʉamʉ maire.
Chotena ũcuateere chʉo kʉame maire. Jãajañe kʉajʉna
masime mai Jesús paiche.
\v 8 Ũcuachia chotemajña Repaʉ cheja pairʉmʉ choosiere
cuasajʉ Repaʉ paiche masime mai. Repaʉte Jesure okoroumucuse
Dios Rekocho ũkupojaiʉ cajesikʉamʉ. Cajeʉna Dios
cʉnaʉmʉpi ijache ikasikʉamʉ: “Chʉʉ chĩiamʉ mʉʉ”,
chiisikʉamʉ Dios. Naa paiʉ Repaʉ Jesús Dios Mamakʉjekʉ
Repaʉ chiepi mekʉna jũni roikaisikʉamʉ maire.
\v 9 Pãipi ũcuaʉache ikato repana ikachete asa cuasame mai.
Jãajekʉna Dios naa rʉa masikʉ ikasie, “Ũcuarepaame”,
chiijʉ naa rʉa cuasañu mai, Repaʉ, “Chʉʉ chĩiamʉ
Jesús”, chiisie.
\v 10 Dios Repaʉ Mamakʉ paiche kʉasie pãi teena asa
jachamañe cuasajʉ paime. Chekʉnatani Dios kʉasie asa
jachajʉ, “Joremʉ Dios”, chini, cuasamame.
\v 11 Dios Repaʉ Mamakʉ paichete kʉakʉ ijache ikaasomʉ:
“Chʉʉ chĩire cuasanachia jũnisõsirʉmʉ chʉʉ paichejare
rani ai paijanaame”, chiniasomʉ Dios.
\v 12 Dios Mamakʉte cuasana jũnisõsirʉmʉ Dios paichejare ai
sani reojache paijanaame. Repaʉte Dios Mamakʉte
cuasamanatani vati toana ai sani uujʉ paijanaame.
\s Cuhacho chʉvasieame
\p
\v 13 Mʉsanʉkona Dios Mamakʉte cuasana jũnisõsirʉmʉ Dios
paichejare ai sani reojache paijanaame. Jãare masiajʉ chini
mʉsanʉkonare ie chʉo tocha saomʉ chʉʉ.
\v 14 Jãajekʉna, “Dios maire chookaijamʉ”, chini masijʉ
Repaʉ chʉ̃ʉñe choojʉ maire ʉachete sẽeto asa, ĩsimʉ Dios
mai Repaʉte sẽeñe. Jãare masijʉ vajʉchʉmañe maire ʉache
sẽeme mai Repaʉte.
\v 15 Dios mai sẽeñe peore asamʉ. Jãare masijʉ, “Mai sẽeñe
Dios chookaijamʉ”, chiijʉ masime mai.
\p
\v 16 Mʉsanʉkonapi chekʉna pãi cuache choochete ñani Dioni
sẽekaijʉ̃ʉ repanare. Dioni sẽekaito repanare reojache paiche
chookaijamʉ Dios. Jãatani repanapi cuache choochete
jmamakarʉjẽe ũhacuheto Dioni sẽekaijʉ̃ʉ repanare chiimamʉ
chʉʉ. Cuache chooche ũhamanare jũnisõsirʉmʉ vati toana
saojamʉ Dios, repana cuache choosiere roiajʉ chini.
\v 17 Pãipi ũcuaʉache cuache chooto cuamʉ. Dios rʉa cuhemʉ
jãajañe chooche. Jãatani cuache choonapi repana cuache
choochete ũhasõru Dios repana cuache choosie tʉnosõ joe
cuasamamʉ.
\p
\v 18 Pãi Diore cuasana Repaʉ chĩijejʉ siareparʉmʉ cuache
choojʉ paimame. Vati repanare Diore cuasanare cuache chʉ̃ʉra
chiimʉ, repanapi cuache chooajʉ chini. Jãatani Jesucristo
Dios Mamakʉji ʉ̃sekaiʉna repana cuache choomañe paime.
Jãare masime mai.
\v 19 Pãi Diore cuhena vati chʉ̃ʉñete choojʉ paime.
Maitani Dios chʉ̃ʉñete choojʉ painaame Repaʉ neenajejʉ.
Jãare masime.
\v 20 Jesucristo, Dios Mamakʉ chejare caje paiʉ Pʉkakʉ
paichete chechosikʉamʉ, pãipi Diorepaʉ paichete masiajʉ
chini. Jãare masime mai. Dios Mamarepakʉni Jesucristote masi
cuasanajejʉ Dios paichejare ai sani paijanaame mai.
\v 21 Asarepajʉ̃ʉ, chʉʉ chĩijana. Vati chʉ̃ʉñe
choomañe paijʉ̃ʉ. Reomʉ.
\cls Juan