1
00:00:05,000 --> 00:00:30,520
Matɨꞌɨj raaxaꞌapɨꞌɨntare mej huaꞌutaite aujna Italia, matɨꞌɨj mi tyuꞌutatuii maɨjna ɨ Pablo, majta ɨ seica ɨ maj namiꞌihuacaa seij jemi ɨ tɨ anxɨte tiꞌijta. Ayaa pu antyahuaacaꞌa aɨjna tɨcɨn Julio. Aɨ pu tihueꞌijteꞌe ɨ mej meyan antyaꞌaruu tɨcɨn xantaaruꞌustyamuaꞌameꞌen ɨ tɨ tiꞌitaijteꞌe.

2
00:00:30,520 --> 00:01:08,500
Au tu aꞌatyaacɨ baarcu jetze aujna chajtaꞌa tɨ ayan tyajaꞌarajtyahuaa tɨcɨn Adramitio. Ajta aɨn ɨ baarcu, aɨ pu antaméꞌenicheꞌe utan pujmeꞌen tɨ ij aun aꞌureꞌenyénicheꞌe aꞌu maj baarcu áꞌutyauuve tɨ huatacáꞌa u Asia. Tyatɨꞌɨj ti aꞌucɨj, seij pu ajta áꞌuraa ta jamuan tɨ ayan antyahuaacaꞌa tɨcɨn Aristarco. Au pu eꞌemaꞌacan aujna Tesalónica, aujna chajtaꞌa tɨ aun huatacáꞌa aujna aꞌahuaꞌa tɨ ayan tyajaꞌarajtyahuaa tɨcɨn Macedonia.

3
00:01:08,500 --> 00:01:31,960
Yaa ruijmuaꞌateꞌe yee, tyatɨꞌɨj ti tyaun aꞌaráꞌa baarcu tɨ aꞌutyeechaꞌaca tɨ ayan tyajaꞌarajtyahuaa tɨcɨn Sidón. Ajta aɨn ɨ Julio, aɨ pu rɨꞌɨ tiꞌitevistacaa aɨjna jemi ɨ Pablo. Aɨ pu raataꞌa tɨ huaꞌumuaare ɨ ruꞌamiincustyamuaꞌa. Majta maɨn ɨ amiincustyamuaꞌameꞌen, rɨꞌɨ mu naa tiraꞌancureꞌeviꞌitɨ ɨ Pablo.

4
00:01:31,960 --> 00:01:49,500
Au tu tijta ti antacɨj. Tyatɨꞌɨj ti taun aꞌuréꞌenye tɨ aꞌaraahuachi, tauutataꞌa tu pujmeꞌen ajcaanye aujna tɨ ayan tyajaꞌarajtyahuaa tɨcɨn Chipre. Au tu pujmeꞌen aꞌuraꞌarupi aꞌini yeemeꞌen pu avaꞌaacacaa.

5
00:01:49,500 --> 00:02:06,200
Tyatɨꞌɨjta ti antacɨj ajna vejliꞌi tɨ aꞌavastɨme ɨ jaj, aun tɨ huatacáꞌa aujna u Cilicia, ajta u Panfilia. Tyatɨꞌɨjta ti taun antanyej aujna chajtaꞌa tɨ ayan tyajaꞌarajtyahuaa tɨcɨn Mira, ajta aun tɨ huatacáꞌa aꞌahuaꞌa Licia.

6
00:02:06,200 --> 00:02:23,080
Ajta aɨn tɨ anxɨte tieꞌijta, seij pu aun huátyau ɨ baarcu tɨ Italia áꞌumej. Au pu eꞌemaꞌacan aɨjna ɨ baarcu aujna Alejandría. Aj pu i aɨn taataij tyaj atyacɨɨnye tyaɨjna jetze.

7
00:02:23,080 --> 00:02:52,320
Aɨjna ɨ baarcu, yaa pu puaꞌan xɨcaj aꞌatee tɨ huamej. Eecan pu taatamuáreꞌeriste. Xaꞌichuꞌi tu a vejliꞌi aꞌuréꞌenye aujna tɨ aꞌaraahuachi tɨ ayan tyajaꞌarajtyahuaa tɨcɨn Gnido. Aucheꞌe pu aꞌavaꞌaacacaa aujna. Aɨj tu cɨn u jetze pujmeꞌen ajcaanye tɨ aꞌaraahuachi tɨ ayan tyajaꞌarajtyahuaa tɨcɨn Creta. Au tu vejliꞌi aꞌuréꞌenye aujna aꞌahuaꞌa Salmón.

8
00:02:52,320 --> 00:03:12,080
Tyatɨꞌɨjta ti mu aꞌujuꞌun muareꞌeri cɨmeꞌe aujna tɨ aꞌavastɨme ɨ jaj. Tyatɨꞌɨjta ti tyaun antanyej tɨ baarcu aꞌutyeechaꞌaca tɨ ayan tyajaꞌarajtyahuaa tɨcɨn Tɨ aꞌuréꞌen tɨ rɨꞌɨri tɨ iraꞌujcheni. Au pu vejliꞌi pɨtyajaꞌarɨcɨ aujna chajtaꞌa tɨ ayan tyajaꞌarajtyahuaa tɨcɨn Lasea.

9
00:03:12,080 --> 00:03:41,800
Tuꞌuri aꞌateeviꞌi tyaj huajuꞌun. Puꞌuri tyuꞌutzɨɨniꞌiraꞌacaa aujna aꞌu tyaj aꞌujuꞌucaa, aꞌini puꞌuri vejliꞌi pɨ tiꞌirɨjcaa ɨ tɨ jetzen tɨ huaseeviꞌi aꞌayeꞌi. Aɨj pu cɨn ayan tihuaꞌutaꞌixaa aɨjna ɨ Pablo, tɨcɨn: ―Muan tyetyaca, ayaa pu hui tinaꞌamitejteꞌe inyeetzi tɨ eecan tyuꞌutzɨɨniꞌiraꞌa aꞌame, tɨ puaꞌa taajuꞌun. Teyáꞌujɨsin i baarcu, tyajta ɨ ijca, ajta ayan tyuꞌutarɨꞌɨristari tyaj hui aꞌuveti ityan.

10
00:03:41,800 --> 00:04:00,040
Ajta aɨn tɨ anxɨte tieꞌijta, eitzeꞌe pu ráꞌantzaahua aɨjna ɨ aꞌatɨ tɨ baarcu huajájsín, ajta aɨjna tɨ antyujmuaꞌaree aɨjna u baarcu cɨmeꞌe. Ajta aɨjna ɨ nyuucari ɨ tɨ Pablo huaꞌutaꞌixaa, capu ráꞌantzaahua.

11
00:04:00,040 --> 00:04:35,060
Ajta aujna maj aꞌutyajhuii, capu naa hueꞌeenyaꞌa mej mi maun aꞌateeviꞌin maujna ajna xɨcajraꞌa jetze tɨ huacɨmuajra. Aɨj mu cɨn muiꞌitɨ meyan tyuꞌumuáꞌa maj áꞌucɨɨnye maujna mej mi maun aꞌaraꞌasti maujna Fenice, tyej ti aꞌatzu aꞌateeviꞌin tyaujna, baarcu tɨ aꞌutyeechaꞌaca. Aujna Fenice, au pu Creta eꞌejtyemaꞌacan. Au pu seijraꞌacaa tɨj naꞌa ujtyapua pujmeꞌen, ajta ante pujmeꞌen.

12
00:04:35,060 --> 00:04:54,940
Aujna, cɨj pu tiráacarejyeꞌicaa yente pujmeꞌen. Ayaa mu tíꞌixajtacaa tɨcɨn rɨꞌɨri maj nuꞌu mauj huajuꞌun. Matɨꞌɨj mi aꞌucɨj. Au mu vejliꞌi ajtéenyee aꞌu tɨ aꞌavastɨme ɨ jaj, aujna u Creta.

13
00:04:54,940 --> 00:05:07,680
Ma ajta, capu aꞌachu aꞌateeviꞌi, caꞌanin cɨn acaꞌaacaracaꞌa ɨ jɨri jetze. Caꞌanin pu cɨn raatajɨꞌɨtze ɨ baarcu aɨjna tɨ yentyapua pujmeꞌen aꞌiraꞌaacaracaꞌa.

14
00:05:07,680 --> 00:05:19,120
Eecan pu yáꞌutajchájraa ɨ baarcu. Capu cheꞌe huatarɨꞌɨristaracaꞌa tyaj huajuꞌun ɨ aaca tzajtaꞌa. Aɨj tu cɨn huatátaꞌa tɨ taꞌantɨni ɨ aaca.

15
00:05:19,120 --> 00:05:38,080
Aj tu ti tyaun aꞌuréꞌenye tɨ aꞌaraahuachi, chuej tɨ calen, tɨ ayan tyajaꞌarajtyahuaa tɨcɨn Cauda. Capu ayan rɨꞌɨ huapɨꞌɨ tyuꞌaacacaꞌa aujna. Ajta aɨn ɨ baarcu tɨ cɨleꞌen tyaj raajájsimaꞌa, muareꞌeri tu cɨn raꞌantítuaa ɨ baarcu jetze tɨ veꞌe.

16
00:05:38,080 --> 00:05:59,700
Matɨꞌɨj meri raꞌantítuaa, aj mu mi raatacáꞌanye caujnari cɨmeꞌe ɨ baarcu tɨ veꞌe. Muꞌuri tiꞌitzɨɨnyaꞌacaa tɨ ari tyáꞌajcachaa ɨ sej japua. Ayaa pu tyajaꞌarajtyahuaa aujna tɨcɨn La Sirte. Aɨj mu cɨn raꞌacajtuaa a jaataꞌa ɨ tiꞌitɨj tɨ ij raꞌanján ɨ aaca.

17
00:05:59,700 --> 00:06:12,240
Yaa ruijmuaꞌateꞌe yee, aucheꞌe pu huaꞌaacacaꞌa tyamuaꞌa, eihua. Matɨꞌɨj mi autyajhuii maj teꞌetyáhuaꞌaxɨn a jaataꞌa ɨ ijca maj tyuꞌutɨsimaꞌa ɨ baarcu jetze.

18
00:06:12,240 --> 00:06:19,660
Hueica xɨcaj tu aꞌatee tyej teꞌetyaahuaꞌaxɨ tamuajcaꞌa cɨmeꞌe nain tɨ tyuꞌutɨsimaꞌacaa ɨ baarcu.

19
00:06:19,660 --> 00:06:40,760
Eecan tu aꞌatee tyaj cai aꞌatzu raaseij ɨ xɨcaj, tyajta ɨ xuꞌuraꞌave. Ajta aucheꞌe pu aꞌij puaꞌa hueꞌeenyaꞌacaa. Tyamuaꞌa pu tyuꞌaacacaꞌa, majta viiyacaa. Tuꞌuri teyan tiꞌimuajcaa tej teri mueꞌitɨcheꞌesin. Tyajta teyan tiꞌimuajcaa tyaj cai cheꞌe aꞌij rɨni.

20
00:06:40,760 --> 00:07:04,640
Ajta tuꞌuri aꞌateeviꞌi tyaj cai tiꞌitɨj cuaꞌacaa. Aj pu i huatyeechaxɨ huaꞌa tzajtaꞌa aɨjna ɨ Pablo. Ayaa pu tihuaꞌutaꞌixaa tɨcɨn: ―Muan tyetyaca, sanaꞌajtzɨ́ naꞌantzaahuateꞌencheꞌe. Saj cai aꞌaracɨꞌɨcaꞌancheꞌe saujna u Creta, catu teyan tyajaꞌurainiicheꞌe ɨ ijca.

21
00:07:04,640 --> 00:07:16,560
Aru ijii, eihua nu hui aꞌamuahuavii saj uhuatyaujcaꞌanyen mɨ rutzajtaꞌa, aꞌini capu aꞌatɨ mɨꞌɨni muan. Tij tyajta baarcu aꞌuraini. Capu amɨn tiꞌitɨ.

22
00:07:16,560 --> 00:07:25,180
’Tɨcaꞌa, saɨj pu hui huataseijre inyee jemi, saɨj tɨ ravaɨreꞌe ɨ Dioj ɨ nyaj nyajta ravaɨreꞌe inyaa, ɨ tɨ ajta nyechaꞌɨ.

23
00:07:25,180 --> 00:07:41,460
Ayaa pu tinaataꞌixaa tɨcɨn: “Pablo, capej nuꞌu tiꞌitzɨɨnyaꞌa. Ruxeꞌeveꞌe tɨ aɨn César raaxaꞌapɨꞌɨntareꞌen ɨ maj cɨn tiꞌimuaxajtziꞌi. Ajta nuꞌu ruxéꞌeviꞌiraꞌa pu cɨn Dioj raataꞌa maj ruuri muaꞌaraꞌani naijmiꞌi aꞌachu puaꞌamua maj huajuꞌun aꞌa jamuan.”

24
00:07:41,460 --> 00:07:52,020
Aɨj pu hui cɨn sataꞌaj uhuatyaujcaꞌanyen mɨ rutzajtaꞌa, muan, tyetyaca. Nyaa nu xaa raꞌatzaahuateꞌe ɨ Dioj. Ayaa pu teꞌeme aꞌij tɨ aɨn tinaataꞌixaa.

25
00:07:52,020 --> 00:07:58,620
Ma ajta, aucheꞌe pu hui ruxeꞌeveꞌe tyej tyaun aꞌaraꞌasti aujna aꞌahuaꞌa tɨ aꞌaraahuachi.

26
00:07:58,620 --> 00:08:26,800
Tyauumaꞌaca aꞌachu cumu tamuaamuataꞌa japuan muaacua xɨcaj, tɨcaꞌa, aucheꞌe pu ráatajchijmaꞌa ɨ baarcu ɨ aaca. Aɨjna japua ɨ jaj tɨ ayan tyajaꞌarajtyahuaa tɨcɨn Adriático, tɨꞌɨj tyajaꞌureꞌenye cumu aꞌatzaj eꞌitaꞌa tɨcaꞌa, aɨme ɨ maj ramuareꞌe ɨ baarcu, muꞌuri ramuaꞌareeracaꞌa tyej teri rataꞌasijmaꞌa aꞌu tɨ aꞌaraahuachi.

27
00:08:26,800 --> 00:08:47,960
Matɨꞌɨj mi raateꞌitee caujnari cɨmeꞌe aꞌachu tɨ auutɨꞌɨ. Ayaa pu autɨ́ꞌɨcaa aꞌachu cumu seite japuan tamuaamuataꞌa japuan arajsevij meetru. Capu aꞌatzu aꞌatyeeviꞌi, majtahuaꞌa raateꞌitee, puꞌuri seite japuan arahuaꞌapua meetruu autɨ́ꞌɨcaa.

28
00:08:47,960 --> 00:09:09,880
Matɨꞌɨj mi muaacuaca atyaahuaꞌaxɨ ɨ tyapuustiꞌi tɨ acaujtuáavijmee cɨtzajtaꞌan ɨ baarcu tɨ i sej jetze aváꞌujnan. Metiꞌitzɨɨnyaꞌacaa tyaj tyaꞌaraatuꞌan ɨ tetej jetze. Majta tiꞌitzɨɨnyaꞌacaa, aɨj mu cɨn autyajhuii mej huatyejnyuuni asta naꞌa cai huatapuaꞌare.

29
00:09:09,880 --> 00:09:30,680
Seica mu meyan tiꞌijxeꞌevaꞌacaa maj huiracɨɨnye ɨ baarcu jetze. Aɨ mu meyan ruseijratacaꞌa maj raꞌatyahuaꞌaxɨn ɨ tyapuustiꞌi tɨ acaujtuáavijmee. Ma majta cai ayan huarɨj. Maraacajtuaa muꞌu ɨ baarcu ɨ tɨ calen mej mi maɨjna jetze huataujvaɨreꞌen.

30
00:09:30,680 --> 00:09:48,240
Aj pu i Pablo ayan tiraataꞌixaa aɨjna anxɨte tɨ tiꞌijta, ajta ɨ maj jamuan áꞌujhuaꞌanyaꞌa tɨcɨn: ―Ayaa pu hui tyuꞌujxeꞌeveꞌe maj yaa huatyaturan ta jamuan iiya baarcu jetze, naꞌari cai, capu tiꞌitɨ aꞌij tyajamuaatyavaɨreꞌesin.

31
00:09:48,240 --> 00:09:57,040
Aɨj mu cɨn maɨn xantaaruꞌu raꞌantiveijchacaꞌa ɨ caujnari ɨ tɨ cɨn aꞌijtapiꞌihuacaꞌa ɨ baarcu tɨ calen. Aj pu i atyejve a aataꞌa.

32
00:09:57,040 --> 00:10:16,080
Tɨꞌɨj ari tɨn tapuaꞌarijmaꞌaca, Pablo pu ayan caꞌanijraꞌa tihuaꞌutaꞌa ɨ huaꞌa tzajtaꞌa maj nuꞌu tiꞌicuaꞌani. Ayan tɨcɨn: ―Puꞌuri aꞌatyee tamuaamuataꞌa japuan muaacua xɨcaj sej seyan tiꞌijchuꞌeveꞌe, sajta seyan tirajpueiitzi tujri cɨmeꞌe, caxu meꞌe tyajaꞌacuaꞌa.

33
00:10:16,080 --> 00:10:25,880
Nuꞌuri tyajaꞌamueꞌixaateꞌe saj aꞌatzu tyuꞌucuaꞌani. Ayaa pu hui tyuꞌujxeꞌeveꞌe sej si cai huacuiꞌini, aꞌini capu tiꞌitɨ aꞌij áꞌamuaruuren.

34
00:10:25,880 --> 00:10:39,800
Tɨꞌɨj ayan tihuaꞌutaꞌixaa, aj pu i pan huiiráꞌɨ. Tɨꞌɨj i rɨꞌɨ tiraataꞌa ɨ Dioj jemi, meseíraca ɨ tyaɨte. Tɨꞌɨj i raꞌantitaaraxɨ ɨ pan, aj pu i autyejche tɨ raacuaꞌani.

35
00:10:39,800 --> 00:10:44,840
Naijmiꞌi mu aꞌujcaꞌanyajcaa. Matɨꞌɨj mi tyuꞌucuaa majta aɨme.

36
00:10:44,840 --> 00:10:56,180
Ayaa tu aráꞌaxcaa aꞌachu cumu huaꞌapua ciento japuan hueicate japuan tamuaamuataꞌa japuan arájsevi tyaj arátyaꞌacaa ɨ baarcu jetze.

37
00:10:56,180 --> 00:11:09,280
Matɨꞌɨj tyuꞌucuaa aꞌachu tɨ huaꞌaranajchacaꞌa, matɨꞌɨj mi raꞌatyájrai a jaataꞌa maɨjna ɨ triigu tɨ ij cai cheꞌe tíjetyejtere ɨ baarcu.

38
00:11:09,280 --> 00:11:30,160
Tɨꞌɨj huatapuaꞌaracaꞌa, camu cheꞌe huamuájtyajcaa aꞌu tɨ pɨtyajaꞌarɨcɨ. Matɨꞌɨj mi raaseij aꞌu tɨ aꞌarɨꞌɨri tɨ aꞌutyejcheni ɨ baarcu, aꞌu tɨ aꞌutásaataꞌa. Au mu tiꞌijxeꞌevaꞌacaa maj yaꞌusaráichajraꞌani ɨ baarcu ɨ sej japua tɨ puaꞌa rɨꞌɨristan.

39
00:11:30,160 --> 00:12:10,240
Matɨꞌɨj mi raꞌantiveijchacaꞌa ɨ caujnari ɨ maj cɨn raꞌijtápe ɨ baarcu. Majta raatáxɨpi ɨ cɨye mej jetzen huajuꞌun. Matɨꞌɨj mi raataxɨjtacaꞌa maɨjna ɨ caujnari ɨ tɨ cɨn ajtatápiꞌihuajmaꞌacaa ɨ paala ɨ maj cɨn raacáꞌaca ɨ baarcu. Majta meyan huarɨj, marajcaꞌanye ɨ cɨɨxuri ɨ taꞌacaavɨ ɨ baarcu jetze a tɨ auunyee tɨ ij raꞌanján aaca cɨmeꞌe aɨjna ɨ cɨɨxuri. Matɨꞌɨj mi huatauraꞌa tɨ raꞌantɨni aɨjna ɨ baarcu.

40
00:12:10,240 --> 00:12:30,840
Ajta catu raataꞌasacaꞌa ajna aꞌu tɨ áꞌusaataꞌa aꞌini sej jetze pu tyeꞌijcáxɨ. Capu cheꞌe rɨꞌɨristacaꞌa maj raatáruꞌuxanteꞌen aꞌu tɨ aunyee. Ajta ɨ cɨtzajtaꞌan u baarcu, puꞌuri tyaanáꞌachijmaꞌacaa aɨjna cɨmeꞌe tɨ raꞌajtyaavaꞌara ɨ jaj caꞌanin cɨmeꞌe.

41
00:12:30,840 --> 00:12:42,820
Majta maɨn xantaaruꞌu, mahuaꞌacuiꞌicucaa naijmiꞌica ɨ maj aityanamiꞌihuacaꞌa mej mi cai antajaun, ajta, mej mi cai aꞌucɨ́ꞌɨcaꞌan.

42
00:12:42,820 --> 00:13:11,440
Ajta aɨn anxɨte tɨ tieꞌijta, aɨ pu ayan tiꞌijxeꞌevaꞌacaa tɨ japuan huanyuuni tɨꞌij raavaɨreꞌen aɨjna ɨ Pablo. Aj pu cɨn cai huaꞌutaꞌa ɨ xantaaruꞌu maj huaꞌucuiꞌini. Aj pu i ayan tihuaꞌutaij ɨ maj raayɨꞌɨtɨhuaꞌa maj huatajaun maj nuꞌu anáatyáꞌa muaꞌatyavatzɨn a jaataꞌa mej mi antajaun u jetze pujmeꞌen aꞌu tɨ áꞌusaataꞌa.

43
00:13:11,440 --> 00:13:26,640
Majta nuꞌu seica cɨye japua huatajaun, majta seica cɨye japua tɨ tiꞌipaꞌatza ɨ baarcu jetze ajtanáꞌaxɨ. Au mu naijmiꞌi aꞌaráꞌa u jetze pujmeꞌen. Capu aꞌatɨ aujamɨ.

44
00:13:26,640 --> 00:13:42,200
Tyatɨꞌɨj tyeri tyaun eꞌereꞌeti tɨ aꞌaraahuachi, naijmiꞌi tu ruuricaa. Capu saɨj huamɨꞌɨ. Aj tu ti raamuaꞌareeriꞌi tɨcɨn ayaa pu tyajaꞌarajtyahuaa ajna tɨ aꞌaraahuachi tɨcɨn Malta.

45
00:13:42,200 --> 00:13:57,060
Majta maɨn ɨ maj aun eꞌeche, rɨꞌɨ mu tiꞌityetyaɨtestacaꞌa ityejmi jemi. Matɨꞌɨj mi auunai, aj mu mi taatajée tyaj ahuátacɨxaiteꞌen aꞌini meviiyacaa, ajta huaseeviꞌi.

46
00:13:57,060 --> 00:14:17,300
Ajta aɨn Pablo, cɨye pu huaraꞌasaɨj tɨꞌij raꞌanajtuaa a táꞌataa. Aj pu i cuꞌucuꞌu u aꞌiraanye tɨ tyuꞌujéꞌica ɨ taij jetze aꞌini capu raꞌaviicueꞌiracaꞌa tɨ pɨsti ɨ taij. Tɨꞌɨqui Pablo tímuiiriꞌi muajcaꞌaraꞌaraꞌan jetze.

47
00:14:17,300 --> 00:14:44,480
Majta maɨn ɨ maj aun eꞌeche, matɨꞌɨj raaseij tɨ cuꞌucuꞌu an cávɨjcaa muajcaꞌaraꞌaraꞌan jetze ɨ Pablo, ayaa mu tyúꞌurixaatyaꞌacaa tɨcɨn: ―Cu xuee aɨn pueen ɨ tɨ tiꞌityacuiꞌica. Puꞌuri xaa ráavaɨ tɨ cai aujamɨ a jaataꞌa. Ma ajta ayaa pu hui tiraavijteꞌe ɨ Dioj jemi, tɨ cai raataꞌasin tɨ ruuri aꞌaraꞌani aɨjna ɨ Pablo.

48
00:14:44,480 --> 00:14:53,940
Tɨꞌɨqui aɨn Pablo, raatyaacaꞌatzɨj ɨ rumuajcaꞌa. Aj pu i an táꞌataa huavatzɨ ɨ cuꞌucuꞌu. Capu tiꞌitɨ aꞌij raaruu ɨ Pablo.

49
00:14:53,940 --> 00:15:22,240
Majta maɨn ɨ tyaɨte, ayaa mu tiꞌimuajcaa tɨcɨn puꞌuri tɨn tyájaasin. Majta seica meyan tɨcɨn puꞌuri tɨn mɨꞌɨni. Metiꞌijchúꞌevaꞌacaa aꞌatzaj tɨ tiꞌitɨ aꞌij raruuren. Aꞌatzu aꞌateeviꞌica, ajta aɨjna ɨ Pablo, capu tiꞌitɨ aꞌij raaruu. Aj mu mi saɨque tyuꞌumuáꞌa. Matɨꞌɨj mi meyan tyuꞌutaxajtacaꞌa tɨcɨn: ―Amɨjna, Dioj pu hui pɨrɨcɨ.

50
00:15:22,240 --> 00:15:44,420
Aujna vejliꞌi chuej tɨ aꞌutacáꞌa, ajta aɨjna ɨ aꞌatɨ ɨ tɨ tajtuhuan pɨrɨcɨ aujna tɨ aꞌaraahuachi, aɨ pu taꞌancureꞌeviꞌitɨ. Ajta, tyamuaꞌa pu naa titaaxaꞌapueiriꞌi hueica xɨcaj tzajtaꞌa. Ayaa pu antyahuaacaꞌa aɨjna tɨcɨn Publio.

51
00:15:44,420 --> 00:16:05,420
Ajta aɨn taatajraꞌan aɨjna ɨ Publio, aɨ pu tiꞌicuiꞌicaa. Eihua pu pɨstacaraꞌa, ajta aꞌachuꞌitacaꞌa. Tɨꞌɨqui Pablo raamuaaracaꞌa. Ajta raatahuaviiriꞌi ɨ Dioj tɨ huarún. Aj pu i raꞌavaꞌamuarej an múutzeꞌen. Tɨꞌɨj i huaruj.

52
00:16:05,420 --> 00:16:15,540
Ayaa puꞌu huarɨj, majta mu seica u aꞌuvaꞌajuꞌun ɨ mej tiꞌicucuiꞌi ɨ maj aun eꞌeche. Aɨme pu ajta tyuꞌuhuaa.

53
00:16:15,540 --> 00:16:29,540
Eecan mu rɨꞌɨ titaatyeejee, majta nain mu titaatapueijve aꞌachu tɨ titaꞌaturaatyaꞌacaa ɨ tyaj cɨn aꞌujuꞌun. Tyatɨꞌɨjta ti huátacate tyej ti áꞌucɨɨnye.