1
00:00:05,000 --> 00:00:37,020
Yaa ruijmuaꞌateꞌe yee, tɨꞌɨj huatapuaꞌare, naijmiꞌi mu tyujsaɨj ɨ mej tihueꞌijteꞌe u teyujtaꞌa, majta huaꞌavaujsimuaꞌa, majta ɨ mej teꞌeyuꞌuxaca, majta ɨ seica ɨ maj majta iꞌijueesi. Naijmiꞌi mu tyúꞌurixaatyaꞌacaa aꞌij mej yeꞌi huarɨni. Aj mu mi raꞌanaajɨꞌɨque maɨjna ɨ Jesús. Meyaꞌujáj. Matɨꞌɨj mi raatatui aɨjna jemi, ɨ aꞌatɨ tɨ ayan antyahuaa tɨcɨn Pilaatu.

2
00:00:37,020 --> 00:00:55,340
Aj pu i Pilaatu ayan tiraataihuaꞌuriꞌi tɨcɨn: ―¿Ni muaa paɨn pueen ɨ huaꞌatajtuhuan ɨ juriiyu? Aj pu i Jesús ayan tiraataꞌixaa tɨcɨn: ―Nyaa nu nyaɨn pueen aꞌij pej yeꞌi tiꞌixa muaa. ―Yaa puꞌu tiraataꞌixaa aɨjna ɨ Jesús.

3
00:00:55,340 --> 00:01:01,320
Majta maɨn ɨ mej tihueꞌijteꞌe u teyujtaꞌa, eihua mu tiraaxajtziꞌiriꞌi.

4
00:01:01,320 --> 00:01:17,100
Ajta aɨn Pilaatu, ajtahuaꞌa pu ayan tiraataihuaꞌuriꞌi tɨcɨn: ―¿Ni pacai naataꞌixaateꞌen paɨjna cɨmeꞌe? Papuꞌuri huaꞌunamuajriꞌi mej eihua tiꞌimuaxajtziꞌi. ―Ayaa pu tiraataꞌixaa aɨjna ɨ Pilaatu.

5
00:01:17,100 --> 00:01:23,700
Ma ajta aɨn Jesús, capu tiꞌitɨj xajtacaꞌa. Aɨj pu cɨn, cai aꞌij raꞌamityejtyaꞌacaꞌa aɨjna ɨ Pilaatu.

6
00:01:23,700 --> 00:01:46,060
Ayaa pu tiꞌijrɨꞌɨrajcaa aɨjna ɨ Pilaatu matɨꞌɨj maɨn tiꞌiyestyahuaꞌa. Tɨ puaꞌa maraatahuavii ɨ tyaɨtye tɨ aɨn raatatuaani saɨj tɨ eꞌityanamiꞌi, aꞌatɨ tɨ naꞌa ɨ maj raatahuavii, aj pu i raatátuaasin.

7
00:01:46,060 --> 00:02:01,580
Ajna aꞌahuaꞌa seica mu eꞌityanamiꞌihuacaꞌa ɨ mej nyaꞌusaꞌacaa ɨ uꞌuvieernu jemi. Ai mu huaꞌucuii ɨ tyaɨte. Ajta saɨj aujna eꞌityanamiꞌihuacaꞌa tɨ ayan antyahuaacaꞌa tɨcɨn Barrabás.

8
00:02:01,580 --> 00:02:15,980
Aj mu mi aꞌuréꞌenye ɨ tyaɨte ɨ Pilaatu jemi. Aɨ mu autyajhuii maj raatahuavii tɨ aɨn ayan huarɨni aɨmej jemi aꞌij tɨ yeꞌi tiꞌijrɨꞌɨre.

9
00:02:15,980 --> 00:02:28,980
Aj pu i ayan tihuaꞌutaihuaꞌuriꞌi tɨcɨn: ―¿Aꞌini setiꞌijxeꞌeveꞌe muan? ¿Ni qui nyaraatatuaani nyeijna tɨ aꞌamuatajtuhuan pueen muan mɨ sej Israel jetze ajtyamaꞌacan?

10
00:02:28,980 --> 00:02:42,980
Ayaa pu tihuaꞌutaihuaꞌuriꞌi aꞌini aɨ pu raamuaꞌareeriꞌi maj raꞌachueeraꞌacaa ɨ Jesús aɨme ɨ mej tihueꞌijteꞌe u teyujtaꞌa. Aɨj mu cɨn raatatui maɨjna ɨ Pilaatu.

11
00:02:42,980 --> 00:02:59,340
Ma majta maɨn ɨ mej tihueꞌijteꞌe u teyujtaꞌa, aɨ mu raataꞌa ɨ caꞌanijraꞌa eihua ɨ tyaɨte mej mi raatahuavii aɨjna ɨ Pilaatu tɨ aɨn huatatuaani aɨjna ɨ Barrabás jetzen maꞌacan ɨ Jesús.

12
00:02:59,340 --> 00:03:09,820
Ajtahuaꞌa ayan tihuaꞌutaihuaꞌuriꞌi tɨcɨn: ―¿Aꞌini naarɨni nyamɨjna jemi, mɨ tɨ aꞌamuatajtuhuan pueen, mɨ sej Israel jetze ajtyamaꞌacan?

13
00:03:09,820 --> 00:03:17,460
Aj mu mi caꞌanin cɨn huajijhuacaꞌa. Meyan tɨcɨn: ―Pataꞌaj ráꞌutatan curuu jetze.

14
00:03:17,460 --> 00:03:35,940
Aj pu i Pilaatu ayan tɨcɨn: ―¿Aꞌini een cɨmeꞌe? ¿Tiꞌitajni aꞌij puaꞌa huáruu? Matɨꞌɨj raanamuajriꞌi, eitzeꞌe mu caꞌanin cɨn huajijhuacaꞌa. Meyan tɨcɨn: ―Aútataichi curuu jetze. ―Yaa muꞌu titeejíjhuacaꞌa.

15
00:03:35,940 --> 00:03:55,300
Ajta aɨn Pilaatu, aɨ pu raxeꞌevaꞌacaꞌa tɨ rɨꞌɨ tihuaꞌutaꞌan ɨ tyaɨte. Aɨj pu cɨn raatátuaa aɨjna ɨ Barrabás. Ajta raataijtacaꞌa maj raꞌiraꞌavajxɨꞌɨn aɨjna ɨ Jesús. Aj pu ijtaꞌi huaꞌutatui mej mi ráꞌutatan ɨ curuu jetze.

16
00:03:55,300 --> 00:04:14,780
Matɨꞌɨj mi maɨn xantaaruꞌu yaꞌujáj ajna tɨ tiꞌijta tɨ eꞌeche. Au mu yaꞌutyaarujte eꞌitaꞌa tɨ u aꞌaráyaujtaꞌa. Aj mu mi naijmiꞌica tísaɨj ɨ seica, xantaaruꞌu.

17
00:04:14,780 --> 00:04:25,980
Siicuꞌuri mu ruꞌucaachejte tɨ paꞌuviꞌin, xuꞌumuaviꞌican cɨmeꞌe. Majta curun mu raatyataave tɨ tzicareꞌe cɨmeꞌe cɨstíjhuacaꞌa. Aɨj mu raꞌavaꞌarujtiꞌiriꞌi.

18
00:04:25,980 --> 00:04:50,180
Matɨꞌɨj mi autyajhuii maj raatyejíivajra. Yaa cumu rɨꞌɨ mu tiraataꞌa. Meyan tɨcɨn: ―Ayajna nyaꞌu. Tyamuaꞌa pu iꞌixaꞌapɨꞌɨn. Cheꞌe aꞌatyeeviꞌi tɨ ruuri amɨjna tɨ huaꞌatajtuhuan pueen ɨ mej Israel jetze ajtyamaꞌacan. ―Ayaa mu tiráꞌuxaahuariꞌiriꞌi.

19
00:04:50,180 --> 00:05:03,460
Majta raꞌavaꞌavajxɨ an múutzeꞌen itzɨj cɨmeꞌe. Majta raꞌatyétziꞌitzicaꞌimuaꞌaxɨ. Majta mu titunutaxɨ. Ayaa cumu rɨꞌɨ mu tirataꞌacaraꞌa.

20
00:05:03,460 --> 00:05:21,620
Matɨꞌɨj raꞌuxaahuariꞌiriꞌi, aj mu mi rúꞌijchuiiriꞌi aɨjna ɨ siicuꞌuri tɨ paꞌuviꞌin, xuꞌumuaviꞌican cɨmeꞌe. Matɨꞌɨjta mi ruꞌucaachejte ɨ siicuꞌuraꞌaraꞌan. Aj mu mi yaꞌujáj mej mi ráꞌutatan ɨ curuu jetze.

21
00:05:21,620 --> 00:05:58,140
Ajna, saɨj pu huaꞌantinajchacaꞌa aujna aꞌu maj yaꞌavaꞌajajsimaꞌa aɨjna ɨ Jesús. Ayaa pu antyahuaa aɨjna ɨ aꞌatɨ tɨcɨn Simón. Au pu eꞌemaꞌacan tɨ ayan tyajaꞌarajtyahuaa tɨcɨn Cirene. Ai pu yaꞌupuaaraꞌan aɨjna ɨ Alejandro, ajtahuaꞌa saɨj ɨ Rufo. Au pu aꞌarajraa ajna aꞌahuaꞌa aꞌu tɨ cai aꞌatɨ aꞌa eꞌeche. Tɨꞌɨj aɨn Simón huaꞌantinajchacaꞌa, aɨ mu huataij tɨ aɨn raꞌanchueni cúruujraꞌan ɨ Jesús.

22
00:05:58,140 --> 00:06:13,700
Au mu yaꞌujáj aɨjna ɨ Jesús, ajna aꞌahuaꞌa, jɨri jetze tɨ ayan tyajaꞌarajtyahuaa huaꞌanyuuca cɨmeꞌe tɨcɨn Gólgota. Gólgota, ayaa pu huataujmuaꞌa tɨcɨn: Mɨꞌɨchí Muꞌujremi.

23
00:06:13,700 --> 00:06:26,260
Matɨꞌɨj mi raatanyɨste tiꞌitɨ nahuaj, cuaaneꞌe tɨ ranaxca. Ayaa mu ratamuaꞌamua aɨjna ɨ cuaaneꞌe tɨcɨn mirra. Ajta aɨn Jesús, capu raꞌantiꞌi aɨjna ɨ nahuaj.

24
00:06:26,260 --> 00:06:52,940
Matɨꞌɨj mi rúꞌijchuiiriꞌi ɨ siicuꞌuraꞌaraꞌan. Majta tiracáꞌariꞌiriꞌi ɨ tíꞌicɨɨxuraꞌaraꞌan. Matɨꞌɨjta mi ráꞌutatai ɨ curuu jetze. Aj mu mi tiꞌihuaujmueꞌitɨ tetej cɨmeꞌe mej mi raamuaꞌaree aꞌatɨ tɨ racɨꞌɨti ɨ cɨɨxuraꞌaraꞌan ɨ Jesús seij ajta seij. Ayaa mu tityaaráꞌujpijte aɨjna ɨ tíꞌicɨɨxuraꞌaraꞌan.

25
00:06:52,940 --> 00:06:57,140
Puꞌuri eꞌitaꞌa ujmáꞌaca ɨ xɨcaj matɨꞌɨj ráꞌutatai ɨ curuu jetze.

26
00:06:57,140 --> 00:07:12,680
Majta tiꞌitɨ taabla áutatai curuu japua. Ayaa pu teꞌeyuꞌusiꞌihuacaꞌa aɨjna jetze ɨ taabla ɨ maj tiꞌitɨj cɨn jetzen tyaꞌujpuáꞌajte tɨcɨn: “Huaꞌatajtuhuan ɨ maj Israel jetze ajtyamaꞌacan.”

27
00:07:12,680 --> 00:07:28,700
Majta jamuan Jesús, mahuáꞌutataixɨ curuu jetze huaꞌapuaca ɨ nahuaꞌari maj pueen. Saɨj mu aꞌutyejche ɨ curuu ɨrɨɨtaꞌan pujmeꞌen, majta seij utataꞌan pujmeꞌen.

28
00:07:28,700 --> 00:07:44,400
Ayaa puꞌu eenyaꞌacan cɨn arauraste eijna ɨ nyuucari tɨ teꞌeyuꞌusiꞌi ɨ yuꞌuxari jetze. Ayan tɨcɨn: “Yaa mu yaꞌumuaꞌarajcaꞌa tɨj aꞌij puaꞌa tiꞌitevijcaꞌa.”

29
00:07:44,400 --> 00:08:07,260
Majta maɨn ɨ maj a aꞌatáninyeicaꞌa, matɨꞌɨj raaseij, aɨ mu aicamuꞌuvajra maj cai raꞌajcuꞌuvajcaꞌa. Ayaa mu aꞌij puaꞌa tíꞌixajtacaa tɨcɨn: ―¿Ni cai icu muaa pa aɨn pueen ɨ paj nuꞌu raatyáuuna ɨ teyuu, pajta nuꞌu hueica xɨcaj jetze raꞌajtaahua?

30
00:08:07,260 --> 00:08:17,820
Ijii muaa asaɨj a japua huanyuuchi pej pi cai huamɨꞌɨni. Acajraꞌa yeehui amɨjna jetze mɨ curuu. ―Ayaa mu tiraꞌaxaahuariꞌiracaꞌa.

31
00:08:17,820 --> 00:08:38,520
Aɨ majta ɨ mej tihueꞌijteꞌe u teyujtaꞌa, majta ɨ mej teꞌeyuꞌuxaca, aɨ mu naijmiꞌi raꞌaxaahuariꞌiracaa. Meyan tyúꞌurixaatyaꞌacaa rujɨɨmuaꞌa tɨcɨn: ―Amɨ pu ari huaꞌa japua huanyu ɨ seica. Ma ajta, capu raayɨꞌɨtɨ tɨ rusaɨj rujapua huanyuuni.

32
00:08:38,520 --> 00:09:06,680
Amɨjna tɨ nuꞌu iꞌi Cɨriistuꞌu tɨ nuꞌu tatajtuhuan i tyej Israel jetze ajtyamaꞌacan, cheꞌe amɨn acajraꞌani amɨjna jetze mɨ curuu tyej ti raaseij, tyataꞌaj tyaꞌantzaahuateꞌen. ―Ayaa mu tyúꞌurixaatyaꞌacaa. Majta maɨn ɨ maj jamuan huaꞌutatai ɨ curuu jetze, aɨ mu majta raꞌuxaahuariꞌiriꞌi.

33
00:09:06,680 --> 00:09:21,660
Tɨꞌɨj ajna tyajaꞌureꞌenye aꞌatzaj tacuarixpua, aj pu i huatyatɨcaꞌaracaꞌa nainjapua ɨ chuejraꞌa aun tɨ huatacáꞌa u Israel. Ajta aꞌatee tɨ ayan huatɨcaꞌa eꞌitaꞌa tacuarixpua.

34
00:09:21,660 --> 00:09:54,800
Cɨmeꞌen puꞌu tyajaꞌureꞌenye ajna eꞌitaꞌa tacuarixpua, aj pu i Jesús caꞌanin cɨn huajijhuacaꞌa runyuucajtzeꞌen. Ayan tɨcɨn: ―Eloi, eloi, ¿lama sabactani? ―Ayaa pu tyuꞌujijhuacaꞌa. Eijna i nyuucari, ayaa pu huataujmuaꞌa tɨcɨn: Niyaꞌupua, ¿aꞌini een cɨn penyajaꞌuhuaꞌaxɨ muaa, pej iꞌi nyeꞌiyaꞌupua? Ayaa pu huataujmuaꞌa eijna i nyuucari.

35
00:09:54,800 --> 00:10:11,400
Seica ɨ maj maun aꞌutyáuucaꞌa maraanamuajriꞌi. Matɨꞌɨj mi meyan tyuꞌutaxajtacaꞌa tɨcɨn: ―Xaanamuajriꞌi. Aɨj pu huatajee aɨjna ɨ Elías tɨ ajmiꞌi tiꞌityavaacaꞌa ɨ Dioj jemi.

36
00:10:11,400 --> 00:10:45,000
Aj pu i saɨj eꞌireꞌenye taichijmaꞌa. Tiꞌitɨj pu autɨɨ tɨ uꞌurajtaꞌati. Aɨj pu huatyáaruꞌune nahuaj cɨmeꞌe tɨ antzijviꞌi. Tɨꞌɨqui raꞌantijɨꞌɨque cɨye jetze. Aj pu i aɨn raꞌajchui tɨꞌij Jesús raꞌantiyeꞌen aɨjna jetze ɨ tiꞌitɨ. Tɨꞌɨj ayan huarɨj, aj puꞌi ayan tihuaꞌutaꞌixaa aɨjna ɨ aꞌatɨ tɨcɨn: ―Saachuꞌevaꞌa. Tɨ puaꞌa yatanyén aɨjna ɨ Elías tɨ ij raꞌacajtuani. ―Ayaa pu tihuaꞌutaꞌixaa.

37
00:10:45,000 --> 00:10:49,500
Aj pu i Jesús caꞌanin cɨn huajijhuacaꞌa. Tɨꞌɨqui huamɨꞌɨ.

38
00:10:49,500 --> 00:11:01,940
Ajna teyujtaꞌa, tiꞌitɨ pu huatávivɨ́jmaꞌaca cɨɨxuri tɨ itzijhua. Cɨmeꞌen puꞌu huamɨꞌɨ ɨ Jesús, aj pu i eꞌitaꞌa acásujtzaꞌan aɨjna ɨ cɨɨxuri.

39
00:11:01,940 --> 00:11:33,660
Ajta aɨn ɨ huaꞌacapitan ɨ xantaaruꞌu ɨ maj anxɨte araꞌase, aa pu aꞌutyavaacaꞌa ajna vejliꞌi taꞌaveꞌenyee aɨjna ɨ Jesús. Aɨ pu raanamuajriꞌi aꞌij tɨ yeꞌi tyuꞌujijhuacaꞌa ɨ Jesús. Ajta raaseij aꞌij tɨ yeꞌi tyuꞌumɨꞌɨ. Aj pu i ayan tyuꞌutaxajtacaꞌa aɨjna ɨ capitán tɨcɨn: ―Ayej xaa nyaꞌu tiꞌayajna. Ai pu aɨn puéenyaꞌa ɨ yaujraꞌan ɨ Dioj.

40
00:11:33,660 --> 00:12:02,140
Majta seica a muꞌu ɨmɨ aꞌutyáuu mejseiiraca aɨme maj juuca. Saɨj pu ayan antyahuaacaꞌa tɨcɨn Mariiya, tɨ Magdala eꞌemaꞌacan. Ajta saɨj tɨ ajta ayan antyahuaacaꞌa tɨcɨn Mariiya. Huaꞌanaana aɨjna ɨ Jacobo tɨ cɨleꞌen, ajta aɨjna ɨ José. Ajtahuaꞌa saɨj jɨitaꞌa huaꞌa jamuan pu aꞌutyavaacaꞌa tɨ ayan antyahuaacaꞌa tɨcɨn Salomé.

41
00:12:02,140 --> 00:12:18,420
Ai mu aꞌujhuaꞌanyaꞌacaa ɨ Jesús jamuan. Majta raatyavaɨraꞌacaꞌa tɨꞌɨj aɨn aꞌutyavaacaꞌa aujna aꞌahuaꞌa Galileeya. Ma muiꞌitɨ mu majta aꞌutyáuucaꞌa ɨ maj jamuan aꞌujnyéj anna Jerusalén.

42
00:12:18,420 --> 00:12:35,000
Tɨꞌɨj huatyechumuaꞌaracaꞌa, puꞌuri tyajaꞌureꞌenye ajna xɨcajraꞌa jetze matɨꞌɨj rɨꞌɨ huaujruuren. Yaa ruijmuaꞌa yee pu tyajaꞌureꞌenyejsin ajna xɨcajraꞌa mej jetzen rusaꞌupi.

43
00:12:35,000 --> 00:13:33,960
Aj pu i aꞌatɨ aꞌuréꞌenye jemin aɨjna ɨ Pilaatu. Ayaa pu antyahuaacaꞌa aɨjna ɨ aꞌatɨ tɨcɨn José. Au pu aꞌahuaꞌa eꞌemaꞌacantacaa tɨ ayan tyajaꞌarajtyahuaa tɨcɨn Arimatea. Aɨ pu ajta huaꞌa jetze ajtyamaꞌacan aɨme ɨ mej iꞌijueesi. Eecan pu vaꞌacan cɨn tiꞌityavaacaꞌa aɨjna ɨ José. Aɨ pu ajta rachuꞌevaꞌacaa ajna xɨcajraꞌa jetze tɨꞌɨj Dioj autyejcheni tɨ tyuꞌutaijta nainjapua iiyan chaanaca japua. Aɨ pu uhuatyaujcaꞌanye ɨ rutzajtaꞌa. Au pu aꞌutyajrupi aꞌu tɨ aꞌutyavaacaꞌa aɨjna ɨ Pilaatu. Aj pu i rájhuaviiriꞌi tɨ aɨn raataꞌan tɨ raꞌacajtɨni ɨ Jesús, tɨ ari mɨꞌɨchi.

44
00:13:33,960 --> 00:13:51,400
Ajta aɨn ɨ Pilaatu, eecan pu aꞌij tyaꞌutaseij tɨ Jesús ari huamɨꞌɨ. Aj pu i raatajé ɨ huaꞌacapitan ɨ maj ráꞌutatai ɨ curuu jetze. Raataihuauꞌuriꞌi tɨ puaꞌa ayan tiꞌayajna tɨ ari huamɨꞌɨ.

45
00:13:51,400 --> 00:14:02,100
Aj puꞌi aɨn huaꞌacapitan ayan tiraataꞌixaa tɨ ayan tiꞌayajna. Tɨꞌɨqui Pilaatu raataꞌa aɨjna ɨ José tɨ aɨn raꞌacajtɨni.

46
00:14:02,100 --> 00:14:29,740
Tɨꞌɨqui áꞌuraa aɨjna ɨ José tɨ cɨɨxuri aꞌunanan tɨ reꞌen, tɨ naa tiꞌicueina. Aj pu i raꞌacájchuii aɨjna ɨ mɨꞌɨchi. Tɨꞌɨqui raꞌiráꞌijcatacaꞌa aɨjna cɨmeꞌe ɨ cɨɨxuri. Ajta eꞌeyan aun yaꞌuteete aujna aꞌu maj ruꞌureꞌijche u teteꞌe ɨ tetej tzajtaꞌa. Ayaa pu huarɨj, tɨꞌɨqui tetej aityajmua tɨ sicɨɨraraꞌa.

47
00:14:29,740 --> 00:14:43,700
Majta maɨn ɨ juuca, ɨ Mariiya tɨ Magdala eꞌemaꞌacan, ajta aɨjna Mariiya tɨ iꞌinaanajraꞌan aɨjna ɨ José, aɨ mu raaseij aꞌu tɨ yeꞌetéetye.

48
00:14:43,700 --> 00:15:12,820
Tɨꞌɨj mu áꞌumej ajna xɨcajraꞌa me jetzen rusaꞌupi, aɨme ɨ juuca, aɨjna ɨ Mariiya tɨ Magdala eꞌemaꞌacan, ajta aɨn Mariiya tɨ iꞌinaanajraꞌan aɨjna ɨ Jacobo, ajta aɨn Salomé, aɨ mu tiꞌitɨj huananai tɨ náa tyáaráꞌi, tuꞌupi jaꞌaraꞌa. Matɨꞌɨj maɨn huananai aj mu mi áꞌujuꞌun mej mi raꞌacáameijra aɨjna ɨ mɨꞌɨchi.

49
00:15:12,820 --> 00:15:27,680
Yaa ruijmuaꞌateꞌe yee, tɨꞌɨj auchan eꞌireꞌenyeesimaꞌaca ɨ xɨcaj, au mu aꞌaráꞌa aꞌu tɨ aꞌaváꞌanamiꞌihuacaꞌa. Aij pu jetze pɨtiꞌirɨcɨ i xɨcaj taꞌanajca ɨ iteeri.

50
00:15:27,680 --> 00:15:38,060
Ayaa mu tyuꞌurihuaꞌuracaꞌa tɨcɨn: ―¿Aꞌataqui saɨjtaꞌa yaꞌanxɨɨra ɨ tetej tɨ cɨn ujnámiꞌi ɨ tɨ úucun tyej ti utyarute?

51
00:15:38,060 --> 00:15:50,760
Matɨꞌɨj mauj ɨmɨ avaꞌajuꞌucaa maraaseij tɨ puaꞌa aɨn tetej cai cheꞌe aityajmuaa. Tyamuaꞌa pu tiꞌivaꞌacaa aɨjna tɨ aityamuaacaꞌa.

52
00:15:50,760 --> 00:16:11,040
Aj mu mi aꞌutyajrupi ajna tɨ auucun matɨꞌɨj mi seij huaseij tɨ anuꞌujcatii ɨrɨɨtaꞌan. Tyamueij pu pɨrɨcɨ aɨjna. Tɨtɨꞌɨcan pu tyaꞌucávɨjcaa unúꞌujcatii. Naa pu tiꞌicueinaviꞌi tyaꞌucávɨjcaa aɨjna ɨ tyamueij. Matɨꞌɨj mi tyamuaꞌa eihua tyuꞌutatzɨn.

53
00:16:11,040 --> 00:16:32,760
Aj pu i aɨn ayan tihuaꞌutaꞌixaa tɨcɨn: ―Caxu tiꞌitzɨɨnyaꞌa. Muan xu yaꞌuhuaunyen saɨjna ɨ Jesús tɨ Nazaret eꞌemaꞌacan, ɨ tɨ áꞌutataihuacaꞌa ɨ curuu jetze. Capu yuꞌu aꞌahuaꞌa. Puꞌuri huatarú. Casiꞌi. Xaaseij iiyan maj yaꞌujté.

54
00:16:32,760 --> 00:17:00,100
Sericu, sataꞌaj huaꞌutaꞌixaateꞌen ɨ maj jamuan áꞌujhuaꞌanyaꞌa, sajta saɨjna ɨ Pedro. Muan xu huaꞌutaꞌixaateꞌen yee: “Tɨ nuꞌu aɨn anacai aꞌumaꞌa aꞌame anna Galileeya tɨꞌij huaꞌuchuꞌeveꞌen. Ayan cheꞌeta naꞌa teꞌeme tɨj aɨn ari tihuaꞌutaꞌixaa maj nuꞌu aun yeꞌeseijran.” ―Ayaa pu tihuaꞌutaꞌixaa aɨjna ɨ tyamueij.