\id ROM
\h Romanos
\toc1 Romanos
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Roma aꞌuchaatɨmaꞌacaa
\c 1
\s Pablo pu huaꞌataujtyeꞌe
\p
\v 1 Aij nu jetze tyajaꞌamuayuꞌuseꞌe nyaɨjna cɨmeꞌe ɨ nyaj ravaɨreꞌe ɨ Cɨriistuꞌu tɨ iꞌi Jesús. Aɨ pu naꞌantihuau inyeetzi, i nyaj iꞌi Pablo nyej ni nyaɨjna cɨn tyaꞌaraꞌasten aꞌij tɨ aɨn tinyeijca. Ayaa pu een cɨn naꞌavaꞌahuau huaꞌa tzajtaꞌa ɨ seica nyej ni tihuaꞌutaꞌixaateꞌen nyeijna cɨmeꞌe ɨ nyuucari tɨ cɨn Dioj huaꞌa japua huanyuuni.
\p
\v 2 Jajcua jɨmɨ pu Dioj ayan tyaꞌataujratziiriꞌi tɨ ayan rɨꞌɨ tihuaꞌutaꞌan aɨme ɨ maj tiꞌixaxaꞌataꞌa ɨ Dioj jetze maꞌacan. Aɨj mu cɨn meyan raꞌuteyuꞌuxacaꞌa maɨjna jetze ɨ yuꞌuxari tɨ yan tyejmi jemi huatyajturaa.
\v 3 Ajta aɨn ɨ nyuucari, aɨj pu cɨmeꞌen raxaj aɨjna tɨ iꞌi yaujraꞌan pueen, tɨ ajta eꞌiraanyej aɨjna jetze ɨ David tyaacan. Ayaa pu tyajaꞌureꞌenye aꞌini aɨ pu tyaatacan huanuꞌeihuacaꞌa matɨj ɨ seica.
\v 4 Ma ajta aɨn ɨ Dioj, aɨ pu eꞌeyan ayan raꞌantihuau tɨ nain cɨn antyujmuaꞌaréera aɨjna cɨmeꞌe tɨ aɨjna jetze araujcaꞌanyajcaꞌa ɨ xaijnyuꞌucaraꞌaraꞌan ɨ Dioj aɨjna tɨ ayan raatamuáꞌa tɨcɨn niyauj pu yee pueen. Dioj pu ayan nain cɨn tiraijca tɨꞌɨj aɨn aiitaraa huaꞌa tzajtaꞌa ɨ mɨꞌɨchite. Ai pu aɨn pueen aɨjna ɨ aꞌatɨ tɨ ayan antyahuaa Jesús tɨ ajta iꞌi Cɨriistuꞌu. Aɨ pu tavastaraꞌa pueen.
\v 5 Cɨriistuꞌu nu jetze raꞌancuraꞌa aɨjna tɨ cɨn ɨ Dioj rɨꞌɨ tinaataꞌa nyej ni neyan jetzen maꞌacan aꞌuraꞌani huaꞌa tzajtaꞌa ɨ tyaɨte nyej ni neyan huaꞌutaꞌinen mej mi raꞌaraꞌastijreꞌen maɨjna ɨ tavastaraꞌa maɨjna cɨmeꞌe mej tyaꞌantzaahuateꞌen, naimiꞌi ɨ tyaɨte ɨ mej yan chaanaca japua huachaatɨme.
\v 6 Sajta muan, muan xu sajta huaꞌa jetze ajtyamaꞌacan aɨme ɨ tyaɨte, ɨ tɨ Dioj ajta amuaꞌantihuau muejmi sej si jetzen ajtyamaꞌacanta xaꞌaraꞌani ɨ Jesús tɨ ajta iꞌi Cɨriistuꞌu.
\p
\v 7 Aijna yuꞌuxari jetze nu nyeyan tyajaꞌamuayuꞌuseꞌe naijmiꞌica mɨ sej saun huachaatɨme saujna u Roma, muan ɨ tɨ Dioj aꞌamuaxeꞌeveꞌe, tɨ ajta amuaꞌantihuau sej si jemin seijraꞌa xaꞌaraꞌani. Cheꞌe ayan tyajaꞌureꞌenyen tɨ aɨn ɨ Dioj, ɨ tyej rajyaꞌupua, ajta ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, micheꞌe maɨn rɨꞌɨ tyajamuaataꞌan, majta jamuaatyapuaꞌariteꞌen.
\s Pablo pu nuꞌu tiꞌijxeꞌeveꞌe tɨ huajaꞌuváꞌamuaaren u Roma
\p
\v 8 Anacaican cɨmeꞌe, ayaa nu naijmiꞌi rɨꞌɨ tirataꞌaca nyaɨjna ɨ Dioj ɨ nyaj ravaɨreꞌe nyaɨjna cɨmeꞌe saj seyan tiraꞌatzijreꞌe ɨ Dioj. Jamuan ɨ Jesús tɨ ajta iꞌi Cɨriistuꞌu, ayaa nu rɨꞌɨ tirataꞌaca, aꞌini nain japua chaanaca japua muꞌuri ramuaꞌaree sej seyan tyaꞌatzaahuateꞌe.
\v 9-10 Ajta aɨn ɨ Dioj, ɨ nyaj ravaɨreꞌe nain cɨn aꞌachu nyaj aꞌancaꞌanyaacan cɨn neyan tihuaꞌutaꞌixaateꞌen ɨ nyuucari tɨ cɨmeꞌen raxaj aɨjna tɨ yaujraꞌan pueen ɨ Dioj, aɨ pu ruꞌumuaꞌaree nyaj aꞌanaj tɨ naꞌa neyan amuaꞌatámuaꞌareeri nyatɨꞌɨjta rahuavíiraj naꞌayeꞌi. Ayaa nu tiꞌijhuavii tɨ ayan nataꞌacareꞌen ɨ Dioj nyaj nyaun aꞌamuamuaara naꞌaraꞌani tɨ puaꞌa ayan Dioj tiráꞌacaꞌane.
\v 11 Eihua nu áꞌamuaseijramɨꞌɨ nyej ni caꞌanijraꞌa amuaataꞌan sej si saɨjna jetze araujcaꞌanyen ɨ xaijnyuꞌucaraꞌaraꞌan ɨ Dioj sej si eitzeꞌe tyaꞌutaviicueꞌi.
\v 12 Ee xaa nyaꞌu, ayaa nu tiꞌijxeꞌeveꞌe inyaa, tej ti teyan cheꞌeta tyanaꞌa caꞌanijraꞌa huatátaꞌan ityejmi jemi, aɨjna cɨmeꞌe tyej tyaxáꞌa tyaꞌatzaahuateꞌe taxeꞌeviꞌiraꞌa cɨmeꞌe.
\p
\v 13 Ayaa nu nyajta tiꞌijxeꞌeveꞌe, nyeꞌihuaamuaꞌa, saj seyan raamuaꞌaree nyaj muiꞌitɨ neyan raaxaꞌapɨꞌɨntare nyaj nyaun aꞌatanyén muejmi jemi. Tɨj naꞌa nyaj anacai neyan tiraaxaꞌapɨꞌɨntarej nyaj neyan huarɨni, tɨj naꞌa tɨ yu eꞌireꞌenye, tiꞌitɨ pu naataꞌijmɨjriꞌi nyej ni cai nyaun áꞌumeꞌen. Ayaa nu tiꞌijxeꞌevaꞌacaa nyej neyan cheꞌeta nyanaꞌa tiraamueꞌitɨn muejmi cɨmeꞌe ɨ nyaj cɨn tyuꞌutatuꞌireꞌen ɨ Dioj jemi aꞌij nyej nyeri tiraamueꞌitɨ huaꞌa tzajtaꞌa ɨ seica ɨ tyaɨte ɨ maj seij chuejraꞌa japua huachaatɨme.
\v 14 Ayaa nu nyeri nyaɨjna cɨn tyaꞌatanratziiriꞌi ɨ Dioj jemi nyej ni tihuaꞌutaꞌixaateꞌen aɨme ɨ maj raayɨꞌɨtɨ huaꞌanyuuca aɨme ɨ maj Grecia eꞌemaꞌacan, nyej ni nyajta tihuaꞌutaꞌixaateꞌen aɨme ɨ maj seij chuejraꞌa japua eꞌemaꞌacan. Capu amɨn aꞌij tɨ puaꞌa eihua metyáumuaꞌaree nusu tɨ puaꞌa macai tiꞌitɨ aꞌij tyaꞌumuaꞌaree, nyaucheꞌe nu neyan tihuaꞌutaꞌixaateꞌesin naijmiꞌica.
\v 15 Aɨj nu cɨn eihua nu aꞌancaꞌanyaacan cɨn neyan raxeꞌeveꞌe nyaj nyajta tyajamuaataꞌixaateꞌen ɨ nyuucari cɨmeꞌe tɨ cɨn Dioj aꞌamuajapua huanyuuni, muan, mɨ sej Roma eꞌeche.
\s Aꞌij tɨ nuꞌu tiꞌivaɨreꞌe tɨ aꞌatɨ tyaꞌatzaahuateꞌen
\p
\v 16 Capu nyeteviꞌirasteꞌe aɨjna ɨ nyuucari, silu aɨj nu cɨn rɨꞌɨ tirataꞌaca ɨ Dioj, aꞌini ɨ nyuucari jetze pu maꞌacan ɨ muáreꞌeriꞌiraꞌaraꞌan ɨ Dioj ɨ tɨ cɨn huaꞌajapua huanyuuni naijmiꞌica ɨ mej raꞌaraꞌastijreꞌesin, anacaican aɨme ɨ maj Israel jetze ajtyamaꞌacan, majta eꞌeyan aɨme ɨ mej seij chuejraꞌa japua eꞌemaꞌacan.
\v 17 Aɨjna ɨ nyuucari jetze pu ajta seijreꞌe aꞌij tɨ huarɨj ɨ Dioj mej mi maɨn tyaɨte meyan urareꞌenyaꞌacan cɨn huatyaturan ɨ jemin. Ayaa mu xaa nyaꞌu urareꞌenyaꞌacan cɨn huatyaturaasin ɨ Dioj jemi tɨj naꞌa rusen cɨmeꞌe, maɨjna cɨmeꞌe mej meri tyaꞌatzaahuateꞌe. Aɨj pu cɨn ayan teꞌeyuꞌusiꞌi ɨ yuꞌuxari jetze tɨcɨn: “Aɨjna tɨ urareꞌenyaꞌacan cɨn huatyajturaa ɨ Dioj jemi ɨ rutzajtaꞌa, aɨ pu ruurican huatyaturaasin aɨjna cɨmeꞌe tɨ araujcaꞌanye aɨjna cɨmeꞌe tɨ tyaꞌatzaahuateꞌe.”
\s Matɨj manaꞌa puaꞌamua nuꞌu autyajturaa ɨ Dioj jemi
\p
\v 18 Ma ajta, uteꞌe pu eꞌeveꞌemaꞌacan aɨjna tɨ jeijreꞌe seijreꞌe tɨ rɨꞌɨ huapɨꞌɨ nyuꞌucamɨꞌɨ ɨ Dioj aɨjna cɨmeꞌe aꞌij maj rɨcɨ ɨ tyaɨte aɨjna tɨ aꞌij puaꞌa een, aɨjna cɨmeꞌe ɨ maj meri ma ruurai ɨ Dioj, majta eꞌij puaꞌa tihuaꞌajchaɨ ɨ ruxaꞌaj tyaɨte, majta meyan tihueꞌijmɨ maj cai cheꞌe ranajche ɨ Dioj tzaahuatiꞌiraꞌa cɨmeꞌe. Ayaa mu een cɨn huaꞌaruure mej mi aꞌij puaꞌa tiꞌitetyaɨtesta muaꞌaraꞌani.
\v 19 Ajta tɨj naꞌa tɨ ayan íꞌirɨni tɨ aꞌatɨ ayan tiraꞌamitejtyaꞌa aꞌij tɨ een ɨ Dioj, matɨj manaꞌa puaꞌamua ɨ tyaɨtye meyan ruꞌumuaꞌaree ɨ rutzajtaꞌa aꞌini Dioj pu rusaɨj ari huaꞌutaseijrate.
\v 20 Tɨj naꞌa tɨ Dioj raatyataahuacaꞌa ɨ chaanaca tɨ yu eꞌireꞌenye, tyamuaꞌa pu naa ayan tihuaꞌamityejtyaꞌa aꞌayeꞌi aɨme aɨjna ɨ tyaj cai rasiseꞌij tajɨꞌɨ cɨmeꞌe. Aɨ pu xaa ayan tiraꞌamitejtyaꞌa aꞌayeꞌi aꞌij tɨ een ɨ muáreꞌeriꞌiraꞌaraꞌan ɨ Dioj, ajta tɨ ayan huatyaturan tɨj naꞌa tɨ yu aucaꞌitɨ aꞌame, tɨj naꞌa rusen cɨmeꞌe, aꞌini ayaa pu een ɨ Dioj. Ayaa pu tiraꞌamitejtyaꞌa aꞌayeꞌi aɨjna cɨmeꞌe tɨ Dioj ari raatyataahuaacaꞌa. Aɨj pu cɨn, capu rɨꞌɨri tɨ aꞌatɨ ayan jetzen seij tyáꞌujpuaapuaꞌareꞌen. Aɨme mu rujɨɨmuaꞌa meyan púeenyaꞌa.
\v 21 Aɨ mu ramuaꞌatyajcaa ɨ Dioj. Majta raatyaxaahuatacaꞌa maɨjna cɨmeꞌe maj cai cheꞌe ranajchacaꞌa maɨjna tɨ iꞌi Dioj, camu majta rɨꞌɨ tiraataꞌacaa. Ma majta aɨme, aɨj mu jetze ucajrupi maj maɨjna jetze tyuꞌumuaꞌati ɨ muaꞌatziiraꞌa tɨ cai tiꞌitɨ vaɨraꞌacaa. Capu cheꞌe huatarɨꞌɨristaracaꞌa tɨ ayan tihuaꞌutamitejteꞌen tzaahuatiꞌiraꞌa cɨmeꞌe.
\v 22 Meenti mauj meyan tíꞌixajtacaa tɨcɨn tyan tu yee rɨꞌɨ metityaumuámuaꞌaree, capu ayan tyeꞌirájraa. Eꞌitzeꞌe mu cai mauumúmuaꞌaraa muaꞌaraa.
\v 23 Ayaa pu tihuaꞌaruurajcaa asta manaꞌa cai raatapuaꞌajtacaꞌa mej meyan rɨꞌɨ tiraataꞌan maɨjna ɨ Dioj tɨ cai aꞌanaj mɨꞌɨni. Ayaa muꞌu seij huatyaanajche tɨ ayan seijreꞌe tɨj tevi naꞌari tɨj pinaꞌa nusu tɨj tiꞌitɨ tɨ muaacuaca ajtaɨɨcajmee caꞌɨn tiꞌitɨ tɨ aꞌusinuuran.
\p
\v 24 Aɨj pu cɨn Dioj ayan mahuaꞌuhuaꞌaxɨ mej mi meyan raꞌaraꞌastijreꞌen naijmiꞌi tɨj naꞌa tɨ eꞌij puaꞌa een tɨ ayan tihuaꞌamitejteꞌe ɨ huaꞌa tzajtaꞌa, tiꞌitɨ tɨ naꞌa tɨ eꞌij puaꞌa een ɨ maj cɨn huaujtyamuaꞌaveꞌen. Aɨ mu majta meyan tiꞌijrɨꞌɨraa muaꞌaraa ɨ rujetze tɨj naꞌa tɨ tyuꞌutyéviꞌiraste.
\v 25 Ayaa pu aɨjna cɨn tihuaꞌuruu aꞌini aɨ mu yaꞌuhuaꞌaxɨ maɨjna tɨ cɨmeꞌen raxa ɨ Dioj tzaahuatiꞌiraꞌa cɨmeꞌe mej mi raꞌaraꞌastijreꞌen maɨjna tɨ hueꞌitzi naꞌa pueen. Aɨ mu meyan huaꞌutyanajchacaꞌa, majta huaꞌutyavaɨ aɨme tɨ Dioj huaꞌutaahuacaꞌa. Camu cheꞌe mi ravaɨraꞌacu muaꞌaraa maɨjna ɨ Dioj, ɨ tyej teyan rɨꞌɨ tirataꞌaca tɨj naꞌa rusen cɨmeꞌe. Cheꞌe ayan tyajaꞌureꞌenyen.
\p
\v 26 Aɨj pu cɨn Dioj ayan huaꞌutaꞌa mej mi meyan raꞌaraꞌastijreꞌen tiꞌitɨj tɨ aꞌij puaꞌa eenyaꞌacan cɨn eꞌiraninyeica ɨ huaꞌa tzajtaꞌa, tɨj naꞌa tɨ tyuꞌutyeviꞌirasteꞌe. Ajta aɨme ɨ maj juuca ɨ maj huaꞌa jetze ajtyamaꞌacantacaꞌa, aɨ mu tiratápuaapuaꞌajtyahuaꞌa mej meyan tityeꞌentyaujnyaxcan tyetyaca jamuan aꞌij tɨ aɨn Dioj tihuꞌautyajtuaa. Ayaa muꞌu een cɨn huarɨj mej mi meyan saɨque huarɨni tɨ cai aɨn Dioj ayan eenyeꞌequeꞌen tihuaꞌutyajtuaa.
\v 27 Majta aɨme ɨ tyetyaca, ayaa mu cheꞌeta manaꞌa tiratápuaapuaꞌajtyahuaꞌa mej meyan tihuaꞌantyanyaxcan ɨ juuca aꞌij tɨ tiraaxaꞌapɨꞌɨntare ɨ Dioj. Ayaa mu eenyeꞌequeꞌen huarɨj maɨjna cɨmeꞌe maj ruxaꞌa tyetyaca jamuan huaujxanaꞌacɨreꞌen aɨjna cɨmeꞌe ɨ tɨ aꞌij puaꞌa een tɨ huaꞌa tzajtaꞌa eꞌiráninyeicaꞌa. Ayaa mu huarɨj maɨjna cɨmeꞌe tɨ tyuꞌutyeviꞌirasteꞌe ɨ ruxaꞌaj tyetyaca jamuan. Aɨj pu cɨn puꞌuri tihuaꞌucɨꞌɨ aꞌij tɨ tiraavijteꞌe aɨjna cɨmeꞌe ɨ mej eihua huapɨꞌɨ aꞌij puaꞌa huarɨj.
\p
\v 28 Ajta, aꞌini capu ayan tihuaꞌamityejtyaꞌacaa tɨ ayan raavijtyaꞌacaa mej meyan raamuaꞌati ɨ Dioj, aɨ pu ayan huaꞌutaꞌa mej meyan tyuꞌumuaꞌati aꞌij mej tirajtyau rujɨɨmuaꞌa aɨjna cɨmeꞌe ɨ rumuaꞌatziiraꞌa. Ayaa muꞌu huarɨj maɨjna cɨmeꞌe tɨ cai tiꞌitɨj vaɨreꞌe, ajta mej mi meyan tiꞌijrɨꞌɨraa tɨj naꞌa tɨ cai ayan tiraavijteꞌe.
\v 29 Nain pu huaꞌa jemi seijreꞌe tɨ aꞌij puaꞌa een. Aɨj mu cɨn huataujxanaꞌacɨraꞌatacaꞌa, majta aꞌij puaꞌa titetyújchaɨcaꞌa. Eecan mu tiꞌinyacuaꞌatzacaꞌa. Ee xaa nyaꞌu aꞌij mu puaꞌa tiꞌityetyaɨtestacaꞌa. Aɨj mu jetze ucajrupi: aɨ mu tiꞌityauraꞌatyaꞌacaraꞌa ɨ tyiꞌaraꞌan ɨ ruxaꞌaj tevi. Majta tiꞌityacuiꞌica. Eihua mu majta rutyaꞌaxɨꞌɨcaa. Majta rucuanamuajcaꞌa rujɨɨmuaꞌa. Majta mu aꞌij puaꞌa huaꞌaruurajcaa ɨ ruꞌihuaamuaꞌa. Ee xaa nyaꞌu, ayaa mu rɨcɨ. Aꞌij mu puaꞌa tyuꞌujepeꞌe.
\v 30 Hueꞌitzi mu cɨn tihueꞌixaateꞌe ɨ ruxaꞌa tyaɨte, majta rajchaɨreꞌe ɨ Dioj. Majta ruxéꞌeviꞌiraꞌa cɨn huaꞌutyaxaahuaꞌajtacaꞌa ɨ ruxaꞌa tyaɨte. Majta aꞌujtzáahuatyaꞌa. Ayaa mu ruseijratacaꞌa maj nuꞌu huapɨꞌɨ ruxeꞌeveꞌe. Aɨj mu majta jetzen ucajrupi aꞌij mej yeꞌi huarɨni mej mi aꞌij puaꞌa tihuaꞌutzájraꞌamuaꞌan. Camu majta huaꞌastijreꞌe ɨ ruvaujsimuaꞌa.
\v 31 Camu aꞌatzu meyan tiꞌijrɨꞌɨre tɨ xaꞌapɨꞌɨn een seijreꞌe. Eihua mu majta cai arauraste ɨ maj cɨn tyaꞌataujratziiriꞌi. Camu majta huaꞌaxeꞌeveꞌe ɨ rutyaɨtestyamuaꞌa. Camu aꞌatzu xaa nyaꞌu huaꞌacuꞌuvaa muaꞌayeꞌi ɨ ruxaꞌaj tyaɨte.
\v 32 Rumuaꞌatziiraꞌa mu cɨn ruꞌumuaꞌaree aꞌij tɨ Dioj ari tiraaxaꞌapɨꞌɨntare tɨ ayan tiraavijteꞌe tɨ ayan tiraacɨꞌɨti tɨ huamɨꞌɨni aɨjna ɨ aꞌatɨ tɨ ayan tiꞌijrɨꞌɨre. Capu huaꞌa jetze ruxeꞌeveꞌe. Maucheꞌe mu meyan rɨcɨ. Majta caꞌanijraꞌa huaꞌataꞌaca ɨ seica mej mi meyan cheꞌeta manaꞌa tiꞌijrɨꞌɨraa muaꞌaraꞌani.
\c 2
\s Dioj pu tzaahuatiꞌiraꞌa cɨn tihuaꞌaxɨjteꞌe ɨ tyaɨte
\p
\v 1 Pajta muaa, aꞌatɨ paj pɨrɨcɨ, tɨ puaꞌa peyan seij jetze tíꞌijpuaꞌajteꞌe ɨ aꞌaxaꞌaj tevi tiꞌitɨj cɨmeꞌe, capu rɨꞌɨri pej peyan tyuꞌutaxaj yee capaj aɨn púeenyaꞌa ɨ paj cɨn peyan huarɨj tiꞌitɨj tɨ aꞌij puaꞌa een. Muaa paj asaɨj a jetze tiaꞌapuaꞌajteꞌe paɨjna cɨmeꞌe pej peyan cheꞌeta panaꞌa tiꞌityeꞌechaꞌɨ aꞌij tɨ aɨn tiꞌityujchaꞌɨ aɨjna ɨ pej jetzen tiꞌitɨj cɨn tiꞌipuaꞌajteꞌe.
\v 2 Tyajta ityan, ayaa tu ramuaꞌaree tɨ aɨn Dioj ayan tihuaꞌuxɨjteꞌen tzaahuatiꞌiraꞌa cɨmeꞌe aɨme ɨ mej meyan aꞌij puaꞌa títeetyújchaꞌɨ.
\v 3 ¿Ni qui ayan timuaꞌamitejteꞌe tɨ cai Dioj pueijtzi muaataꞌasin, muaa mɨ pej peyan cheꞌeta panaꞌa aꞌij puaꞌa tiꞌityeꞌechaꞌɨ tɨj ajta aɨn aꞌij puaꞌa tiꞌityujchaꞌɨ ɨ paj jetzen tiꞌijpuaꞌajteꞌe tiꞌitɨj cɨmeꞌen?
\v 4 ¿Ní qui muaa paj raatyaxaahuatacaꞌa paɨjna ɨ Dioj tɨ eihua huapɨꞌɨ rɨꞌɨ timuataꞌaca, tɨ ajta muaꞌacuꞌuvaa aꞌayeꞌi? Aucheꞌe pu teꞌeviicueꞌi mueetzi cɨmeꞌe. ¿Ni cai tiꞌitɨ mueetzi jetze tasiseiri tɨ Dioj ayan rɨꞌɨ timuataꞌaca pej pi saɨque tyuꞌumuaꞌati ɨ jemin?
\v 5 Ma pajta muaa, ¿aꞌini pej pi peri raꞌantyaana ɨ aꞌaxaijnyuꞌuca pej pi cai saɨque tyuꞌumuaꞌati ɨ Dioj jemi? Ayaa paj ramueꞌitɨcɨ tɨ aɨn Dioj eihua huapɨꞌɨ pueijtzi muaataꞌasin ajna xɨcajraꞌa jetze tɨ jetzen ayan huataseijreꞌen a jeijreꞌe ɨ Dioj tɨꞌij nain cɨn tityaꞌaxɨjteꞌen tzaahuatiꞌiraꞌa cɨmeꞌe.
\v 6 Aɨ pu Dioj nuꞌu aꞌatɨ ayan tyuꞌutaꞌasin aꞌij tɨ nuꞌu tiraavijteꞌe seij ajta seij.
\v 7 Majta seica, aɨ mu ɨ mej meyan teꞌeviicueꞌi mej meyan rɨꞌɨ titetyujchaꞌɨ maɨjna cɨmeꞌe mej meyan rahuauhuau tɨ Dioj ayan rɨꞌɨ tihuaꞌutaꞌan, tɨ aɨn ajta vaꞌacan cɨn tihuaꞌutaijteꞌen, tɨ ajta ayan tihuaꞌutaꞌan mej mi ruurican huatyaturan ɨ jemin tɨj naꞌa rusen cɨmeꞌe, ayaa pu xaa nyaꞌu tihuaꞌucɨꞌɨti mej meyan ruurican huatyaturan ɨ Dioj jemi tɨj naꞌa rusen cɨmeꞌe.
\p
\v 8 Ajta aɨme ɨ mej rujɨɨmuaꞌa manaꞌa rájtyauve, majta cai áꞌujcaꞌanye mej meyan raꞌaraꞌastijreꞌen aɨjna cɨmeꞌe tɨ ayan tiꞌayajna, silu aɨ muꞌu maɨjna cɨn raꞌaraꞌastijreꞌen maɨjna tɨ huaꞌa tzajtaꞌa huiraninyei tɨ aꞌij puaꞌa een, ayaa pu tihuaꞌacɨꞌɨti tɨ Dioj ayan huaꞌajtyaꞌaxɨꞌɨsin. Aꞌij pu puaꞌa tihuaꞌutaꞌasin ɨ pueijtzi aɨjna cɨmeꞌe tɨ nyuꞌucamɨꞌɨ.
\v 9 Matɨj manaꞌa puaꞌamua ɨ mej aꞌij puaꞌa títeetyújchaꞌɨ, eecan pu huaꞌutamuareꞌeristeꞌesin. Dioj pu huapɨꞌɨ pueijtzi huaꞌutaꞌasin, anacai aɨme ɨ maj Israel jetze ajtyamaꞌacan, ajta eꞌeyan aɨme jemi ɨ mej seij chuejraꞌa japua huachaatɨme.
\v 10 Majta aɨme, matɨj manaꞌa puaꞌamua ɨ mej rɨꞌɨ títeetyújchaꞌɨ, Dioj pu ayan rɨꞌɨ tihuaꞌutaꞌasin. Aɨ pu ajta vaꞌacan cɨn tihuaꞌutaijteꞌesin. Tyamuaꞌa pu naa huaꞌutyapuaꞌariteꞌesin tɨj naꞌa rusen cɨmeꞌe. Ayaa pu xaa nyaꞌu tihuaꞌacɨꞌɨti aɨme ɨ maj Israel jetze ajtyamaꞌacan, majta aɨme ɨ maj seij chuejraꞌa japua eꞌemaꞌacan.
\p
\v 11 Ayaa pu teꞌeme aꞌini naimiꞌi mu ruxaꞌa eꞌen ɨ Dioj jemi.
\v 12 Matɨj manaꞌa puaꞌamua ɨ maj cai aꞌanaj raꞌancuraꞌa ɨ nyuucari ɨ maj cɨn tiꞌijta, ayaa mu majta áꞌapuaꞌaren. Ma ajta Dioj pu cai huaꞌaxɨjteꞌesin aɨjna cɨmeꞌe ɨ nyuucari. Majta aɨme ɨ maj raꞌancuraꞌa maɨjna ɨ nyuucari, tɨ puaꞌa meyan tiꞌitɨ cɨn atyaꞌɨtzaꞌaraꞌan, matɨj manaꞌa puaꞌamua, aɨjna ɨ nyuucari, aɨ pu xaa tiꞌitɨ cɨn huaꞌajetze tyaꞌujpuáꞌajteꞌesin.
\v 13 Ayaa puꞌu, aꞌini aɨme ɨ mej urareꞌenyaꞌacan cɨn huatyaturaasin ɨ Dioj jemi, camu meyan huatyaturaasin maɨjna cɨmeꞌe maj ranamua maɨjna ɨ nyuucari ɨ maj cɨn tiꞌijta. Camu xaa nyaꞌu, silu ayaa mu xaa urareꞌenyaꞌacan cɨn huatyaturaasin ɨ Dioj jemi tɨ puaꞌa meyan raꞌaraꞌastijreꞌen aꞌij tɨ tiraꞌaxa aɨjna ɨ nyuucari.
\p
\v 14 Ee xaa nyaꞌu, aɨme ɨ mej seij chuejraꞌa japua eꞌemaꞌacan, ɨ maj cai aꞌanaj raꞌancuraꞌa ɨ nyuucari, tɨ puaꞌa meyan raꞌaraꞌastijreꞌen aꞌij tɨ tiꞌixa maɨjna cɨmeꞌe mej aꞌij tirajtyau ɨ rutzajtaꞌa, ayaa pu aɨjna cɨn huataujmuaꞌa maj rutzajtaꞌa aꞌij tirajtyau maɨjna ɨ nyuucari ɨ maj cɨn tiꞌijta.
\v 15 Aɨ mu meyan tiꞌitaseijrateꞌe tɨj naꞌa aꞌij tɨ aɨn tiꞌijxeꞌeveꞌe ɨ nyuucari ɨ maj cɨn tiꞌijta, aɨ pu seijreꞌe ɨ huaꞌa tzajtaꞌa. Tzaahuatiꞌiraꞌa pu cɨn huaꞌataꞌaca maj xaa ruꞌumuaꞌaree aꞌij tɨ tiꞌijxeꞌeveꞌe aɨjna ɨ nyuucari. Ayaa pu huaꞌa jetze tiꞌipuaapuaꞌajteꞌe ɨ huaꞌamuaꞌatziiraꞌa, ajta aɨ pu tihuaꞌataꞌuuniꞌiraca.
\v 16 Ayaa pu teꞌeme aꞌij nyej tyajáꞌamuamuaꞌate. Ajna xɨcajraꞌa jetze tɨ jetzen nain cɨn antyujmuaꞌaréera aꞌame aɨjna ɨ Jesús tɨ ajta iꞌi Cɨriistuꞌu, Dioj pu raataꞌasin tɨ aɨn Cɨriistuꞌu huaꞌuxɨjteꞌesin ɨ tyetyaca tɨj naꞌa ɨ maj cɨn meyan tyuꞌuruu aviitzi cɨmeꞌe.
\s Aɨme ɨ mej Israel jetze ajtyamaꞌacan, ajta ɨ nyuucari ɨ maj cɨn tiꞌijta
\p
\v 17 Pajta muaa, ticheꞌe teyan mueetzi cɨn tyuꞌutaxaj paj nuꞌu paɨjna jetze ajtyamaꞌacan ɨ Israel, pajta raꞌastijreꞌe paɨjna ɨ nyuucari ɨ maj cɨn tiꞌijta, pajta peyan aꞌatzaahuateꞌe paɨjna cɨmeꞌe paj nuꞌu ranajche tzaahuatiꞌiraꞌa cɨmeꞌe ɨ Dioj.
\v 18 ¿Ni qui ayan tiꞌayajna, nusu peri ramuaꞌaree aꞌij tɨ aɨn tiꞌijxeꞌeveꞌe?, ¿pajta peri peyan raxaꞌapɨꞌɨntare ɨ tɨ iꞌixaꞌapɨꞌɨn paɨjna cɨmeꞌe pej tyamuaꞌa naa tihuaꞌamuaꞌate paɨjna jetze ɨ nyuucari ɨ maj cɨn tiꞌijta?
\v 19 ¿Ni qui pajta peyan tiꞌimuaꞌatze paj nuꞌu raayɨꞌɨtɨ pej tihuaꞌumuaꞌaten aɨme ɨ maj cai aꞌanaj tiꞌihuaujmuaꞌate?, naꞌari ¿paj nuꞌu raayɨꞌɨtɨ pej tihuaꞌutaseijrateꞌen tzaahuatiꞌiraꞌa cɨmeꞌe aꞌij tɨ een ɨ Dioj?
\v 20 ¿Ni qui peyan raayɨꞌɨtɨ paj rɨꞌɨ tihuaꞌumuaꞌaten aɨme ɨ tɨ cai ayan tihuaꞌamityejteꞌe aꞌij tɨ tiraavijteꞌe?, nusu ¿peyan raayɨꞌɨtɨ pej tihuaꞌumuaꞌaten aɨme ɨ maj cai xɨ huavaujse? ¿Ni qui ayan tiꞌayajna pej peyan raayɨꞌɨtɨ aɨjna cɨmeꞌe ɨ nyuucari ɨ maj cɨn tiꞌijta, tɨ ajta ayan tzaahuatiꞌiraꞌa cɨn teꞌeyuꞌusiꞌi? ¿Ni tzaa ayan tiꞌivaɨreꞌe aɨjna ɨ nyuucari pej pi nain cɨn ruꞌumuaꞌareera?
\v 21 Tɨ puaꞌa ayan tiꞌayajna mueetzi jemi, mɨ pej seica tyuꞌumuaꞌaten, ¿aꞌini een cɨmeꞌe pacai peyan tiaꞌamuaꞌate asaɨj? Mɨ pej peyan tihuaꞌamuaꞌate maj nuꞌu cai tyuꞌunahuaꞌan, ¿ni qui peyan cai tiꞌinahuaꞌa muaa?
\v 22 Ayaa paj pajta tihueꞌixaateꞌe maj nuꞌu cai ruxanaꞌacɨreꞌe. ¿Ni qui muaa pacai peyan axanaꞌacɨreꞌe? Mɨ tɨ cai muaꞌaraanajchi maj huaꞌanajche ɨ maj cai diooj pueen, ¿ni pacai peyan tiꞌinahuaꞌa huaꞌa teyujtaꞌa tzajtaꞌa?
\v 23 Muaa paj caꞌanyejri huaꞌataꞌaca mej mi ratyaxaahua ɨ Dioj aɨjna cɨmeꞌe paj cai raꞌaraꞌastijreꞌe paɨjna ɨ nyuucari ɨ maj cɨn tiꞌijta. Ma pajta muaa, muaa paj ahuaꞌatzaahuateꞌe paɨjna cɨmeꞌe ɨ nyuucari.
\v 24 Aɨj pu cɨn ayan teꞌeyuꞌusiꞌi, tɨcɨn: “Aꞌij mu puaꞌa tíyaꞌuséij ɨ Dioj aɨme ɨ mej seij chuejraꞌa japua eꞌemaꞌacan muejmi cɨmeꞌe.”
\p
\v 25 Tɨ puaꞌa peyan raꞌastijreꞌe paɨjna ɨ nyuucari ɨ maj cɨn tiꞌijta, aj pu xaa ayan timuaatyavaɨreꞌesin mej mi raamuaꞌaree ɨ tyaɨte paj paɨjna jetze ajtyamaꞌacan aɨjna ɨ Israel. Ma ajta, tɨ puaꞌa peyan tiꞌitɨ cɨn autyaturan paɨjna jetze ɨ nyuucari, ayaa mu muaruuren matɨj huaꞌarujca aɨme ɨ mej seij chuejraꞌa japua eꞌemaꞌacan.
\v 26 Ajta aꞌatɨ tɨ seij chuejraꞌa japua eꞌemaꞌacan, tɨ puaꞌa aɨn ayan raꞌaraꞌastijreꞌen ɨ nyuucari ɨ maj cɨn tiꞌijta. ¿Ni cai Dioj ayan tiraataꞌasin aɨjna ɨ jaꞌatɨ tɨ ayan eenyeꞌen huatyaturan aɨme jemi ɨ maj Israel jetze ajtyamaꞌacan tɨj ɨ aꞌatɨ tɨ raꞌantisijchacaꞌa ɨ runavij? Ee xaa nyaꞌu, ayaa pu tíꞌen.
\p
\v 27 Aɨjna ɨ aꞌatɨ tɨ cai raꞌantisijchacaꞌa ɨ runavij tɨ ajta auj raꞌastijreꞌe ɨ nyuucari ɨ maj cɨn tiꞌijta, aɨ pu muaꞌaxɨjteꞌen mueetzi aɨjna cɨmeꞌe pej atyaꞌɨtzaꞌara paɨjna jemi ɨ nyuucari. Capu amɨn aꞌij pej peri raꞌancuraꞌa paɨjna ɨ nyuucari, pajta raꞌantisijchacaꞌa ɨ aꞌanavij.
\v 28 Tɨ puaꞌa aꞌatɨ ayaa naꞌa tiꞌijrɨꞌɨra me jeijreꞌe, capu ayan huataujmuaꞌa tɨ aɨn ɨ aꞌatɨ tzaahuatiꞌiraꞌa cɨn Israel jetze ajtyamaꞌacan. Capu xaa nyaꞌu. Ajta aɨn ɨ aꞌatɨ tɨ ayan raꞌantisijchacaꞌa ɨ runavij, capu ayaa naꞌa tiꞌivaɨreꞌe tɨ ij ayan seiraꞌa aꞌaraꞌani me jeijreꞌe ɨ hueꞌiraꞌaraꞌan jetze.
\v 29 Capu ayan tiꞌayajna tɨ aꞌatɨ tzaahuatiꞌiraꞌa cɨn Israel jetze ajtyamaꞌacan aɨjna cɨmeꞌe tɨ aɨn tyaꞌaraꞌastijre me jeijreꞌe seijreꞌe. Aɨ puꞌu xaa ruxeꞌeveꞌe tɨ aɨn nain cɨn aráurasten ɨ rutzajtaꞌa. Ajta, aɨjna ɨ tiꞌitɨ tɨ tiꞌivaɨreꞌe tɨ ij aꞌatɨ ayan urareꞌenyaꞌacan cɨn huatyaturan ɨ Dioj jemi, capu aɨ naꞌa ɨ maj meyan tiꞌijrɨꞌɨre ɨ ruhueꞌiraꞌa cɨmeꞌe. Capu ajta aɨ naꞌa pɨrɨcɨ ɨ tɨ teꞌeyuꞌusiꞌi ɨ yuꞌuxari jetze, silu ai pu aɨn pɨrɨcɨ tɨ aɨn xaijnyuꞌucaraꞌaraꞌan ɨ Dioj ayan rɨꞌɨ raaruuren ɨ aꞌatɨ ɨ tzajtaꞌan. Ajta aɨjna ɨ maj cɨn rɨꞌɨ tiraataꞌasin aɨjna ɨ aꞌatɨ, capu huaꞌa jemi eꞌiraninyeica ɨ tyaɨte silu Dioj pu jemi eꞌiraninyeica.
\c 3
\s Cɨriistuꞌu pu taꞌariꞌira ɨ tyaj cɨn autyajturaa ɨ Dioj jemi
\p
\v 1 ¿Tiꞌitajni cɨn aꞌij tirajchaɨreꞌe aɨjna ɨ aꞌatɨ tɨ Israel jetze ajtyamaꞌacan? ¿Ni qui tiꞌitɨj aꞌij tiraatyavaꞌɨri tɨ aɨn raꞌantisijchacaꞌa ɨ runavij?
\v 2 Ayej xaa nyaꞌu. Eihua pu tiraꞌancuraꞌasin, ajta muiꞌicaca pu cɨn raatyavaꞌɨri, aɨjna cɨmeꞌe tɨ Dioj anacai raatyajtuaa ɨ runyuuca aɨme jemi ɨ maj Israel jetze ajtyamaꞌacan.
\v 3 Ma majta seica, camu meyan tiraꞌaraꞌastijre. ¿Aꞌini huataujmuaꞌa aɨjna ɨ maj cai meyan tiraꞌaraꞌastijre? ¿Ni qui meyan raꞌurauuna maɨjna tɨ cɨn Dioj tyaꞌataujratziiriꞌi?
\v 4 Camu aꞌatzu xaa nyaꞌu. Cheꞌe ayan eenyeꞌen ɨ Dioj jemi tɨ aɨn Dioj rusaɨj ayan tzaahuatiꞌiraꞌa cɨn huatyaturan tɨj naꞌa rusen cɨmeꞌe. Ma majta ɨ tyetyaca, cheꞌe ayan eenyeꞌen mej tiꞌihueꞌitaca. Cheꞌe ayen eenyeꞌen aꞌini ayaa pu teꞌeyuꞌusiꞌi tɨcɨn:
\q Mej mi raamuaꞌaree tɨ ayan tiꞌayajna
\q2 aꞌij pej peri tyuꞌutaxajtacaꞌa,
\q pej pi tyuꞌutyamueꞌitɨn paɨjna cɨmeꞌe
\q2 matɨꞌɨj maɨn muaꞌaxɨjteꞌen.
\p
\v 5 Tɨ puaꞌa ayan seijreꞌe tɨ Dioj ayan urareꞌenyaꞌacan cɨn huatyajturaa aɨjna cɨmeꞌe tyaj cai raꞌastijreꞌe ityan, ¿aꞌini huataujmuaꞌa amɨjna? ¿Ni qui teyan tyuꞌutaxaj aꞌij mej tiꞌixaxaꞌa aɨme ɨ maj cai ramuaꞌate ɨ Dioj? Ayaa mu tɨcɨn: “Capu nuꞌu xaꞌapɨꞌɨn rɨcɨ ɨ Dioj aɨjna cɨmeꞌe tɨ aɨn huatanyuꞌucan ityejmi jemi.”
\v 6 Ayaa nu tyajaꞌamueꞌixaateꞌe, tɨ puaꞌa ayan tiꞌayajna aꞌij mej tiꞌixaxaꞌa aɨme, ¿aꞌini auj tiꞌirɨꞌɨri tɨ aɨn Dioj huaꞌaxɨjteꞌen naijmiꞌica ɨ maj yan huachaatɨme ɨ chaanaca japua? Capu xaa nyaꞌu aꞌij tiꞌirɨꞌɨri.
\p
\v 7 Rɨꞌɨri tɨ aꞌatɨ ayan tyuꞌutaxaj yee, ¿aꞌini een cɨmeꞌe Dioj ayan auj naꞌaxɨjteꞌen aɨjna cɨmeꞌe ɨ nyaj nuꞌu autyajturaa ɨ jemin? Capu ayan tiraavijteꞌe aꞌini Dioj pu eitzeꞌe tzaahuatiꞌiraꞌa cɨn huatyaturaasin aɨjna cɨmeꞌe nyaj nuꞌu tiꞌihueꞌitaca. Ajta eitzeꞌe mu meyan rɨꞌɨ tirataꞌaca ɨ Dioj maɨjna cɨmeꞌe.
\v 8 Tɨ puaꞌa ayan tiꞌayajnacacheꞌe aꞌij tɨ tiꞌixa aɨjna ɨ aꞌatɨ, ayaa pu ajta rɨꞌɨrístaca tyej teyan tyuꞌutaxajtancheꞌe tɨcɨn: “Ticheꞌe nuꞌu teyan aꞌij puaꞌa tiꞌirajchaꞌɨ tɨ ij ayan huatyaturan ɨ tɨ iꞌixaꞌapɨꞌɨn.” Ee xaa nyaꞌu, ayaa mu seica ta jetze tiꞌipuaꞌariteꞌe tyaj nuꞌu teyan tiꞌixaxaꞌa. Muꞌuri xaa nyaꞌu meyan raꞌantimueꞌitɨ tɨ Dioj ayan aɨjna cɨn huaꞌaxɨjteꞌen.
\s Naiimiꞌi tu nuꞌu auutyájturaa tiꞌitɨj cɨmeꞌe ɨ Dioj jemi
\p
\v 9 ¿Aꞌini naꞌaqui? ¿Ni qui ayan huataujmuaꞌa tɨ eitzeꞌe naa tiꞌitavaɨreꞌe ityejmi i tyej Israel jetze ajtyamaꞌacan cai aɨme? Capu xaa nyaꞌu aꞌatzu, aꞌini tuꞌuri teyan raataxajtacaꞌa tɨ aɨn ɨ tɨ aꞌij puaꞌa een, aɨ pu taꞌantimueꞌitɨ tyej ti tyaꞌutaꞌɨtzee ɨ Dioj jemi naijmiꞌica ityan i tyaj Israel jetze ajtyamaꞌacan, majta aɨme ɨ mej seij chuejraꞌa japua eꞌemaꞌacan.
\v 10 Ayaa pu xaa nyaꞌu tiꞌayajna aꞌini ayaa pu teꞌeyuꞌusiꞌi tɨcɨn:
\q Capu nuꞌu maꞌa aꞌa aꞌatɨ
\q2 tɨ ayan urareꞌenyaꞌacan cɨn seijraꞌa.
\q Capu aꞌatɨ.
\q
\v 11 Capu nuꞌu maꞌa aꞌa aꞌatɨ
\q2 tɨ yauꞌeite aꞌij tɨ een ɨ Dioj jemi.
\q Capu nuꞌu maꞌa aꞌa aꞌatɨ
\q2 tɨ ayan rahuauhuau tɨ ij raatyaanajche.
\q
\v 12 Naijmiꞌi mu meri ma ruurai majcaꞌi.
\q Camu cheꞌe tiꞌitɨ cɨn tiꞌivaɨreꞌe ɨ jemin.
\q Capu maꞌa aꞌa aꞌatɨ
\q2 tɨ ayan rɨꞌɨ tiꞌityujchaꞌɨ.
\q Capu aꞌatɨ xaa nyaꞌu.
\q
\v 13 Aꞌij pu puaꞌa namuajreꞌe aꞌij mej tiꞌixaxaꞌa.
\q Runyanu mu cɨn tiꞌihueꞌitaca
\q2 mej mi huaꞌucuanamuan ɨ ruxaꞌa tyaɨte.
\q Ayaa pu cheꞌeta naꞌa tiꞌivaɨreꞌe ɨ nyuucari
\q2 ɨ maj cɨn tiꞌixaxaꞌa
\q2 tɨj ajta ɨ huaꞌaveꞌeri tɨ jeꞌihuajeꞌica,
\q aɨjna tɨ cuꞌucuꞌu jetze eꞌijninyei.
\q
\v 14 Eihua mu aꞌij puaꞌa tyuꞌujepeꞌe,
\q2 majta huapɨꞌɨ eihua huaꞌajaaxaijteꞌe ɨ ruxaꞌa tyaɨte.
\q
\v 15 Caꞌanacan mu aꞌuruaachejyeꞌi
\q2 mej mi seij huajeꞌica ma aꞌahuaꞌa.
\q
\v 16 Aꞌu tɨ naꞌa maj aꞌacɨɨnye,
\q2 aɨ mu aꞌujcaꞌanyaacan cɨn raatyáuuna
\q2 tɨj naꞌa tɨ aun tyejeꞌeseijreꞌe.
\q Eihua mu pueijtzi huaꞌataꞌaca ɨ ruxaꞌaj tyaɨte.
\q
\v 17 Capu ayan tihuaꞌamityejteꞌe aꞌij tɨ een
\q2 tɨꞌɨj Dioj huaꞌutyapuaꞌariteꞌen ɨ tyaɨte
\q2 mej mi ruꞌihuaamuaꞌatan tyamuaꞌa naa.
\q
\v 18 Camu majta raꞌateseꞌe ɨ Dioj.
\q Camu majta rataꞌaca tɨ huaꞌa jemi seijraꞌa.
\p
\v 19 Tyajta ityan, tuꞌuri teyan ramuaꞌaree aꞌij tɨ tiꞌixa ɨ nyuucari ɨ maj cɨn tiꞌijta. Ayaa pu tihueꞌixaateꞌe aɨme ɨ mej jetzen ruxeꞌeveꞌe mej meyan raꞌaraꞌastijreꞌen maɨjna ɨ nyuucari. Ajta ayan huatyatuiihuacaꞌa mej mi huatyaturan maj cai cheꞌe tiꞌitɨ xajta naijmiꞌi ɨ tyaɨte maɨjna cɨmeꞌe tɨ cai cheꞌe meꞌe tiꞌitɨ ɨ maj ru jetze rupuaꞌariteꞌe. Ayaa puꞌu teꞌirajraa tɨ ij ayan amiteera tɨ Dioj huaꞌaxɨjteꞌesin naijmiꞌica ɨ maj yan huachaatɨme ɨ chaanaca japua aɨjna cɨmeꞌe maj autyajturaa ɨ jemin.
\v 20 Aɨj pu cɨn capu aꞌatɨ ayan urareꞌenyaꞌacan cɨn huatyaturaasin ɨ Dioj jemi aɨjna cɨmeꞌe tɨ aɨn aꞌatɨ ayan raꞌastijreꞌe aɨjna ɨ nyuucari ɨ maj cɨn tiꞌijta. Me tyajta ityan, ayaa tu een cɨn ramuaꞌaree tiꞌitɨ tɨ pɨrɨcɨ tɨ aꞌij puaꞌa een tyaɨjna cɨmeꞌe tɨ cai rɨꞌɨri tyaj nain cɨn raꞌaraꞌastijreꞌen tyaɨjna ɨ nyuucari.
\s Aꞌij tɨ nuꞌu tiꞌirɨꞌɨri tyej teyan urareꞌenyaꞌacan cɨn huatyaturan ɨ Dioj jemi
\p
\v 21 Ajta ijii, puꞌuri ayan titaataseijrate aꞌij tɨ tiꞌirɨꞌɨri tyej teyan urareꞌenyaꞌacan cɨn huatyaturan ɨ Dioj jemi. Tuꞌuri ramuaꞌaree tɨ cai ayan cheꞌeta naꞌa tiꞌivaɨreꞌe aɨjna ɨ nyuucari ɨ maj cɨn tiꞌijta. Ee xaa nyaꞌu, ayaa pu cheꞌeta naꞌa tiꞌitaꞌixaateꞌe aɨjna ɨ nyuucari, majta aɨme ɨ mej mejmiꞌi tiꞌixaxaꞌataꞌa ɨ Dioj jetze maꞌacan.
\v 22-23 Ayaa pu cheꞌeta naꞌa tihuaꞌacɨꞌɨti naijmiꞌica mej mi meyan urareꞌenyaꞌacan cɨn huatyaturan ɨ Dioj jemi maɨjna cɨmeꞌe mej meyan raꞌaraꞌasten maɨjna ɨ Jesús tɨ ajta iꞌi Cɨriistuꞌu. Ayaa pu cheꞌeta naꞌa tihuaꞌacɨꞌɨti aɨme ɨ maj Israel jetze ajtyamaꞌacan, majta aɨme ɨ mej seij chuejraꞌa japua eꞌemaꞌacan, aꞌini naimiꞌi mu ruxaꞌa eꞌen ɨ Dioj jemi. Naimiꞌi mu majta autyajturaa ɨ jemin. Ajta capu aꞌatɨ ayan raayɨꞌɨtɨ tɨꞌij ayan nain cɨn rɨꞌɨ tiraataꞌan ɨ Dioj.
\p
\v 24 Ajta pu Dioj ruxéꞌeviꞌiraꞌa cɨn ayan tihuaꞌuxaꞌapɨꞌɨntariꞌiriꞌi mej mi urareꞌenyaꞌacan cɨn huatyaturan ɨ jemin aɨjna cɨmeꞌe tɨ aɨ pu ayan rɨꞌɨ tihuaꞌutaꞌa. Ayaa pu een cɨn huaꞌa japua huanyúu aɨjna cɨmeꞌe aꞌij tɨ huarɨj ɨ Cɨriistuꞌu tɨ ajta iꞌi Jesús.
\v 25 Dioj pu ayan raatyajtuaa ɨ Jesús huaꞌa tzajtaꞌa aɨme ɨ maj yan japuan huachaatɨme iiyan chaanaca japua tɨ ij aɨn ayan huatauraꞌan tɨj muaɨꞌɨvejri ɨ tɨ cɨn tyuꞌutanajchita aɨjna cɨmeꞌe ɨ mej tyeꞌechaɨcaꞌa ɨ Dioj jemi. Ajta tɨ ij aɨn huaꞌutyapuaꞌariteꞌen ɨ Dioj jemi aɨjna cɨmeꞌe mej raꞌatzaahuateꞌe. Dioj pu ayan huarɨj tɨ ij ayan tihuaꞌutaseijrateꞌen tɨ cai aɨn aꞌij puaꞌa huarɨj tɨꞌɨj aɨn anacai tihuaꞌutaꞌuuniꞌiriꞌi ɨ maj cɨn autyajturaa ɨ jemin. Capu ajnaꞌɨmɨ pueijtzi huaꞌataꞌacaraꞌa.
\v 26 Aɨ pu ajta ayan huarɨj mej mi maɨn ɨ mej huatyaɨte ijii meyan raaseij tɨ aɨn xaꞌapɨꞌɨn huarɨj aɨjna cɨmeꞌe tɨ rusaɨj uraréꞌen. Ayaa pu ajta huarɨj mej mi raamuaꞌaree tɨ ajta xaꞌapɨꞌɨn rɨcɨ aɨjna cɨmeꞌe tɨ ayan tihuaꞌaxaꞌapɨꞌɨntariꞌira mej mi meyan urareꞌenyaꞌacan cɨn huatyaturan ɨ jemin, naijmiꞌica, aꞌachu maj puaꞌamua raꞌastijreꞌe.
\p
\v 27 Tɨ puaꞌa ayan tiꞌayajna, ¿tiꞌitajni cɨn tyáꞌatatzaahuateꞌen? Catu tiꞌitɨj cɨmeꞌe, aꞌini capu cheꞌe ayan tiraavijteꞌe. ¿Tiꞌitajni pɨrɨcɨ ɨ nyuucari tɨ taataꞌijmɨjra? ¿Ni qui aɨjna cɨmeꞌe tyaj raꞌaraꞌastijreꞌen tyaɨjna ɨ nyuucari ɨ maj cɨn tiꞌijta? Capu xaa nyaꞌu aɨn pueen, silu aɨjna ɨ nyuucari ɨ tyaj cɨn tyaꞌatzaahuateꞌe.
\v 28 Ayaa pu xaa tiꞌayajna aꞌini ayaa pu titaꞌamitejteꞌe tɨ aꞌatɨ ayan urareꞌenyaꞌacan cɨn huatyaturaasin ɨ Dioj jemi aɨjna cɨmeꞌe tɨ aɨn aꞌatɨ tyaꞌatzaahuateꞌe. Ajta capu tiꞌitɨ cɨn raatyavaꞌɨri tɨ ayan raꞌaraꞌastijreꞌen aɨjna ɨ nyuucari ɨ maj cɨn tiꞌijta.
\p
\v 29-30 Ajta aɨn ɨ Dioj, ¿ni qui ayaa naꞌa pueen huaꞌa Dioj, ɨ maj Israel jetze ajtyamaꞌacan nusu ajta huaꞌa Dioj pueen aɨme ɨ maj seij chuejraꞌa japua eꞌemaꞌacan? Ee xaa nyaꞌu, aɨ pu ajta huaꞌa Dioj pueen aꞌini saɨj puꞌu aɨn pueen ɨ Dioj. Aɨ pu huaꞌaxɨjteꞌen aɨme ɨ mej Israel jetze ajtyamaꞌacan mej mi urareꞌenyaꞌacan cɨn huatyaturan ɨ jemin maɨjna cɨmeꞌe ɨ mej tyaꞌatzaahuateꞌe. Aɨ pu ajta ayan cheꞌeta naꞌa huaꞌaxɨjteꞌen aɨme ɨ mej seij chuejraꞌa japua eꞌemaꞌacan mej mi meyan cheꞌeta manaꞌa urareꞌenyaꞌacan cɨn huatyaturan ɨ jemin aꞌini ayaa mu cheꞌeta manaꞌa tyaꞌatzaahuateꞌe.
\v 31 ¿Ni qui teyan tyaɨjna cɨn raꞌurauuna tyaɨjna ɨ nyuucari ɨ maj cɨn tiꞌijta tyaɨjna cɨmeꞌe tyej teyan tyaꞌatzaahuateꞌe? Catu xaa nyaꞌu. Me tyajta ityan, tyan tu tyaɨjna cɨn ranaijmireꞌen.
\c 4
\s Cɨmeꞌen aɨjna ɨ Abraham
\p
\v 1 ¿Aꞌini tyanaꞌa tyuꞌutaxajta tyaɨjna cɨmeꞌe ɨ tayaaxujcɨꞌɨ, aɨjna ɨ Abraham tyaacan, ɨ tyaj jetzen eꞌiraanye? ¿Aꞌini tiraarɨꞌɨre aɨjna jemi ɨ Dioj?
\v 2 Ayej xaa nyaꞌu tiꞌayajna, tɨ puaꞌa aɨn Abraham ayan urareꞌenyaꞌacan cɨn huatyaturancheꞌe ɨ Dioj jemi, aɨjna cɨmeꞌe tɨ ayan tiꞌitɨj cɨn tyaꞌaraꞌaste, aj pu xaa rɨꞌɨrístacajcheꞌe tɨ aɨn rusaɨj ahuaujtzaahuateꞌen. Ma ajta cai, capu aꞌatzu rɨꞌɨristacaꞌa tɨ ayan huarɨni ɨ Dioj jemi.
\v 3 Ma ajta, ayaa pu tyaꞌaxa ɨ yuꞌuxari jetze tɨcɨn: “Abraham pu ráꞌantzaahua aɨjna ɨ Dioj. Aɨj pu cɨn, ayaa pu Dioj tiraaxaꞌapɨꞌɨntariꞌiriꞌi tɨ aɨn ayan urareꞌenyaꞌacan cɨn huatyajturaa ɨ jemin.” Ayaa pu teꞌeyuꞌusiꞌi.
\p
\v 4 Nicheꞌe seij huataxaj ɨ nyuucari. Tɨ puaꞌa aꞌatɨ tiꞌitɨj cɨn tiꞌimuaraꞌa ayaa pu ruxeꞌeveꞌe mej tiraanajchiteꞌen maɨjna cɨmeꞌe tɨ aɨn tyuꞌumuarej. Camu tiꞌitɨ raatapueijveꞌesin ruxéꞌeviꞌiraꞌa cɨmeꞌe, silu ayaa mu tiꞌijnajchiteꞌen aꞌij tɨ tiraavijteꞌe.
\v 5 Ayaa pu cheꞌeta naꞌa een ɨ Dioj jemi. Capu aꞌatzu aꞌij tiꞌirɨꞌɨri tɨ aꞌatɨ ayan raamueꞌitɨn tɨ ayan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tɨ ayaa naꞌa tyuꞌumuarej tiꞌitɨ cɨmeꞌe. Ma ajta aɨn, tɨ puaꞌa ayan ráꞌantzaahuateꞌen aɨjna tɨ tihuaꞌaxaꞌapɨꞌɨntariꞌira aɨme ɨ mej aꞌij puaꞌa tiꞌityetyújchaꞌɨ mej mi meyan urareꞌenyaꞌacan cɨn huatyaturan ɨ jemin, tɨ puaꞌa ráꞌantzaahuateꞌen naꞌa aɨjna ɨ aꞌatɨ, Dioj pu aɨjna cɨn tiꞌijxaꞌapɨꞌɨntariꞌiran tɨ ij aɨn urareꞌenyaꞌacan cɨn huatyaturan ɨ jemin.
\v 6 Ajta, ayaa pu cheꞌeta naꞌa raꞌuteyuꞌuxacaꞌa aɨjna ɨ David tyaacan tɨ ayan tyaꞌaxa tɨ nuꞌu Dioj ayan rɨꞌɨ tirataꞌaca aɨjna ɨ aꞌatɨ tɨ Dioj ayan tijiꞌijxaꞌapɨꞌɨntariꞌire tɨ ij ayan aɨn urareꞌenyaꞌacan cɨn huatyaturan ɨ jemin. Capu ajta nuꞌu jetzen ruxeꞌeveꞌe tɨ aɨn aꞌatɨ cai tyuꞌumuarej tiꞌitɨj cɨmeꞌe tɨ xaꞌapɨꞌɨn een.
\v 7 Ayan tɨcɨn:
\q Rɨꞌɨ pu tihuaꞌutaꞌa aɨme
\q2 ɨ tɨ Dioj tihuaꞌutaꞌuuniꞌiriꞌi
\q2 ɨ maj cɨn autyajturaa ɨ jemin.
\q Micheꞌe maɨjna cɨn huaujtyamuaꞌaveꞌen,
\q2 aꞌini capu cheꞌe pueijtzi huaꞌutaꞌasin.
\q
\v 8 Rɨꞌɨ pu tirataꞌaca aɨjna ɨ aꞌatɨ
\q2 tɨ Dioj cai ayan jetzen tiꞌitɨj cɨn tyaꞌujpuáꞌajteꞌen
\q2 tɨ aɨn tiꞌitɨj cɨn autyajturaa ɨ jemin.
\p
\v 9 Ajta aɨjna ɨ tɨ cɨn Dioj rɨꞌɨ tihuaꞌataꞌaca, ¿ni qui aɨme naꞌa cɨꞌɨti ɨ mej meri raꞌantisijchacaꞌa ɨ runavij naꞌari ajta ayan tihuaꞌucɨꞌɨti ɨ seica ɨ maj cai meyan raꞌantijsijchacaꞌa ɨ runavij? Ayaa nu neri tyajamuaataꞌixaa nyaɨjna cɨmeꞌe ɨ Abraham tyaacan, tɨ Dioj ayan tiraaxaꞌapɨꞌɨntariꞌiriꞌi tɨ aɨn urareꞌenyaꞌacan cɨn huatyajturaa ɨ jemin, aɨjna cɨmeꞌe tɨ aɨn Abraham ayan ráꞌantzaahua.
\v 10 ¿Aꞌanajni ayan tiraaxaꞌapɨꞌɨntariꞌiriꞌi ɨ Dioj? ¿Ni qui ayan raaruu tɨꞌɨj Abraham cai xɨ raꞌantisijchacaꞌa ɨ runavij?, naꞌari ¿ayan tiraaxaꞌapɨꞌɨntariꞌiriꞌi tɨꞌɨj aɨn ayan ari raꞌantisijchacaꞌa?
\p Ee xaa nyaꞌu, ayaa pu tiꞌayajna, capu Dioj ayan tiraaxaꞌapɨꞌɨntariꞌiriꞌi tɨꞌɨj ayan ari raꞌantisijchacaꞌa ɨ runavij silu tɨꞌɨj cai xɨ raꞌantisijchacaꞌa.
\v 11 Aj puꞌi ayan raatyajtua aɨjna ɨ yeꞌira mej mi meyan raꞌantisijche ɨ runavij. Ajta ayan huataujmuaꞌacaa aɨjna ɨ yeꞌira tɨ aɨn Abraham tyaacan ayan urareꞌenyaꞌacan cɨn huatyajturaa ɨ Dioj jemi, aɨjna cɨmeꞌe tɨꞌɨj cai xɨ raꞌantisíicha ɨ runavij, aɨ pu raꞌantzaahuate ɨ Dioj. Aɨj pu cɨn, ai pu aɨn pueen ɨ huaꞌahuaacɨxaꞌa naijmiꞌi aɨme ɨ maj cai raꞌantisiꞌiche ɨ runavij, ɨ maj majta tyaꞌatzaahuateꞌe. Aɨj pu cɨn Dioj ayan cheꞌeta naꞌa tihuaꞌaxaꞌapɨꞌɨntariꞌira mej mi meyan cheꞌeta manaꞌa urareꞌenyaꞌacan cɨn huatyaturan ɨ Dioj jemi tɨj aɨjna ɨ huaꞌahuaacɨxaꞌajcɨꞌɨ.
\p
\v 12 Ajta aɨjna ɨ Abraham tyaacan, aɨ pu ajta huaꞌahuaacɨxaꞌa pueen ɨ maj raꞌantisiꞌiche ɨ runavij. Majta aɨme, camu meyan manaꞌa raꞌantisiꞌiche ɨ runavij, silu aɨ mu majta meyan eenyeꞌe rɨꞌɨ tiꞌityetyújchaꞌɨ tɨj ajta aɨjna ɨ Abraham tyaacan rɨꞌɨ tiꞌityújchaɨcaꞌa, aɨjna tɨ tahuaacɨxaꞌa pueen, tɨ ajta tyaꞌatzaahuatyaꞌacaa tɨꞌɨj cai xɨ raꞌantisíicha ɨ runavij.
\s Abraham pu nuꞌu urareꞌenyaꞌacan cɨn huatyajturaa ɨ Dioj jemi
\p
\v 13 Ajta pu Dioj ayan tyaꞌataujratziiriꞌi aɨjna jemi ɨ Abraham, ajta aɨme jemi ɨ mej jetzen aꞌiraanye tɨ nuꞌu ayan tiraacɨꞌɨti nain tɨ seijreꞌe iiyan chaanaca japua. Capu Dioj ayan tyaꞌataujratziiriꞌi, aɨjna cɨmeꞌe tɨ aɨn Abraham ayan raꞌastijraꞌacaa aɨjna ɨ nyuucari ɨ maj cɨn tiꞌijta. Capu xaa nyaꞌu, silu ayaa pu een cɨn Dioj tyaꞌataujratziiriꞌi aɨjna cɨmeꞌe tɨ aɨn Abraham tyaacan ayan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tɨ tyaꞌatzaahuatyaꞌacaa.
\v 14-15 Ayaa puꞌu naꞌa, aꞌini tɨ puaꞌa ayan tihuaꞌucɨꞌɨti aɨme ɨ maj raꞌastijreꞌe maɨjna ɨ nyuucari ɨ maj cɨn tiꞌijta, capu cheꞌe ayan ruxeꞌeveꞌe tɨ aꞌatɨ ayan tyaꞌantzaahuateꞌen, ajta capu cheꞌe tiꞌitɨj vaɨreꞌe ɨ tɨ cɨn Dioj tyaꞌataujratziiriꞌi. Pueijtzi pu huaꞌataꞌaca aɨjna cɨmeꞌe tɨ cai rɨꞌɨri tɨ aꞌatɨ nain cɨn raꞌaraꞌastijreꞌen aɨjna ɨ nyuucari. Ma ajta, camu tiꞌitɨj cɨn autyaturan tɨ puaꞌa cai seijreꞌe aɨjna ɨ nyuucari ɨ maj cɨn tiꞌijta.
\p
\v 16 Aɨj pu cɨn, aɨjna tɨ cɨn Dioj tyaꞌataujratziiriꞌi ayan tihuaꞌacɨꞌɨti aɨjna cɨmeꞌe maj meyan tyaꞌatzaahuateꞌe tɨ ij ayan eenyaꞌa aꞌaraꞌani tɨ Dioj ruxéꞌeviꞌiraꞌa cɨn rɨꞌɨ tihuaꞌutaꞌan, ajta tɨ ayan tzaahuatiꞌiraꞌa cɨn tihuaꞌucɨꞌɨti naijmiꞌica aɨme ɨ maj maɨjna jetze aꞌiraanye ɨ Abraham tyaacan. Naijmiꞌica pu tiꞌicɨꞌɨti anacaican aɨme ɨ maj raꞌantisijchacaꞌa ɨ runavij, ajta aɨme ɨ mej meyan cheꞌeta manaꞌa tyaꞌatzaahuateꞌe tɨj aɨjna ɨ Abraham tyaacan. Aɨ pu aɨn pueen ɨ tahuaacɨxaꞌa, naijmiꞌica aꞌachu tyaj puaꞌamua.
\v 17 Ayaa pu teꞌeyuꞌusiꞌi tɨcɨn: “Ayaa nu neri timuaaxaꞌapɨꞌɨntariꞌiriꞌi mueetzi. Muiꞌitɨ mu tyaɨtye mueetzi jetze eirányejsin.” Aɨj pu cɨn, ayaa pu tiraꞌamitejteꞌe ɨ Dioj, tɨ aɨn Abraham tyaacan aɨn pueenyaꞌa aꞌaraa ɨ tahuaacɨxaꞌa. Abraham pu ayan ráꞌantzaahua aɨjna ɨ Dioj tɨ raayɨꞌɨtɨ tɨ ajtahuaꞌa huaꞌutatɨsten ɨ huaꞌaxaijnyuꞌuca aɨme ɨ maj meri huacuii. Ajta aɨjna ɨ tɨ cai xɨ tiꞌiseijreꞌe, Dioj pu runyuuca cɨn ayan tiꞌixaxaꞌa tɨꞌij ajta ayan teꞌirajraꞌani.
\p
\v 18 Ajta aɨn ɨ Abraham, tɨꞌɨj ayan tiraꞌamitejtyaꞌacaa tɨ cai cheꞌe aꞌij tiꞌirɨꞌɨristacaꞌa tɨ tipeꞌeri aꞌaraꞌani, ma ajta ayaa pu tyaꞌantzaahua mej meyan muiꞌitɨ jetzen tityeꞌirányejsin ɨ tyaɨtye aꞌij tɨ Dioj tyaꞌataujratziiriꞌi ɨ jemin. Ayan tɨcɨn: “Ayaa mu puaꞌamua muaꞌajuꞌun aɨme ɨ mej mueetzi jetze eirányejsin tɨj xuꞌuraꞌave.”
\v 19 Puꞌuri rájchaɨcaꞌa aɨjna aꞌachu cumu anxɨte ninyeꞌiraꞌa aɨjna ɨ Abraham. Aɨj pu cɨn ayan tiraꞌamitejtyaꞌacaa tɨ ari áꞌapuaꞌaren ɨ rutevi jetze. Ayaa pu cheꞌeta naꞌa tiraꞌamitejtyaꞌacaa aɨjna rujɨ́raꞌaraꞌan cɨmeꞌen, aɨjna ɨ Sara, tɨ cai cheꞌe rɨꞌɨristacaꞌa tɨ tiyauj aꞌaraꞌani.
\v 20 Capu amɨn aꞌij. Capu raatyaxaahuatacaꞌa tɨ ráꞌantzaahuateꞌen. Eecan pu raꞌutamuaꞌareeriꞌi aꞌij tɨ tyaꞌataujratziiriꞌi ɨ Dioj. Aɨj pu cɨn, huatyaujcaꞌane ɨ rutzajtaꞌa tɨ ij eitzeꞌe ayan tyaꞌantzaahuateꞌen. Ajta, aɨ pu rɨꞌɨ tiraataꞌa ɨ Dioj.
\v 21 Ayaa pu nain cɨn tiraꞌamitejtyaꞌacaa tɨ Dioj ayan raayɨꞌɨtɨ tɨ ayan huarɨni ɨ rumuareꞌeriꞌiraꞌa cɨmeꞌe aꞌij tɨ aɨn ari tyaꞌataujratziiriꞌi.
\v 22 Aɨj pu cɨn ayan Dioj tiraaxaꞌapɨꞌɨntariꞌiriꞌi tɨ aɨn Abraham urareꞌenyaꞌacan cɨn huatyaturan ɨ jemin.
\p
\v 23-24 Ajta aɨjna ɨ nyuucari tɨ cɨmeꞌen ayan Dioj tiraaxaꞌapɨꞌɨntariꞌiriꞌi, capu ayan teꞌeyuꞌusiꞌihuacaꞌa tɨ ij ayaa naꞌa tiraacɨꞌɨti aɨjna silu ayaa pu ajta tiꞌitacɨꞌɨti ityejmi. Dioj pu ayan cheꞌeta naꞌa titaaxaꞌapɨꞌɨntariꞌira ityejmi tej ti tyajta urareꞌenyaꞌacan cɨn huatyaturan ɨ jemin. Ayaa pu ajta tiꞌitacɨꞌɨti ityejmi, i tyej raꞌatzaahuateꞌe aɨjna tɨ raꞌajjáj huaꞌa tzajtaꞌa ɨ mɨꞌɨchite aɨjna ɨ Jesús tɨ ajta aɨn pueen ɨ tavastaraꞌa.
\v 25 Aɨ pu ayan huatáujtuii tɨ i huamɨꞌɨni ta jetze maꞌacan, tɨ ij aɨn tyuꞌunajchitacaꞌa itá cɨmeꞌen ɨ tyej téꞌechaɨcaꞌa tyaɨjna cɨmeꞌe ɨ tyej cɨn autyajturaa ɨ Dioj jemi. Aj puꞌi Dioj aɨjna cɨn raꞌajjáj huaꞌa tzajtaꞌa ɨ mɨꞌɨchite tyej ti teyan urareꞌenyaꞌacan cɨn huatyaturan ɨ jemin.
\c 5
\s Capu cheꞌe tacɨꞌɨti ityejmi ɨ pueijtzi
\p
\v 1 Ayaa pu tiꞌayajna. Tuꞌuri urareꞌenyaꞌacan cɨn huatyajturaa ɨ Dioj jemi aɨjna cɨmeꞌe ɨ tyej tyaꞌatzaahuateꞌe. Ajta aɨn ɨ tavastaraꞌa, aɨjna Jesús tɨ ajta iꞌi Cɨriistuꞌu, aɨ pu ayan taatyapuaꞌari ɨ Dioj jemi.
\v 2 Puꞌuri xaa nyaꞌu rɨꞌɨri tyej teyan huataseijreꞌen jemin tɨ ij ijii aɨ rɨꞌɨ titaataꞌan. Ayaa tu eenyeꞌequeꞌe seijreꞌe tɨ aɨ rɨꞌɨ titaatáꞌa. Tyajta teyan tyaɨjna cɨn tatyamuaꞌaveꞌe tyaɨjna cɨmeꞌe tyej tyauj rachuꞌeveꞌe ajna xɨcaaraꞌan ɨ tyaj jetzen seijraꞌa taꞌaraꞌani tyaɨjna jamuan ɨ Dioj tɨ ayan rɨꞌɨ huapɨꞌɨ naa seijreꞌe mej mi maɨjna cɨn rɨꞌɨ naa tiraꞌutaseij ɨ tyaɨte.
\p
\v 3 Capu aɨ naꞌa, silu tyajta tyaɨjna cɨn teyan tatyamuaꞌaveꞌe tyaɨjna cɨmeꞌe ɨ tyaj cɨn rajpueijtzi, aꞌini ayaa tu tiꞌijmuaꞌaree tyej teyan raayɨꞌɨtɨ tyaj tyaꞌutaviicueꞌi tyaɨjna cɨmeꞌe tyej tiꞌitɨ cɨn tirajpueijtzicaꞌa.
\v 4 Ajta, tɨ puaꞌa teyan raayɨꞌɨtɨ tyej teyan tyaꞌutaviicueꞌi, tyajta tu teri tyuꞌutyaamueꞌitɨ ɨ Dioj jemi. Tɨ puaꞌa tyajta teyan tyuꞌutyamueꞌitɨn, aj pu xaa ayan íꞌirɨni tyej teyan raachuꞌeveꞌen tyej ti tyaun aꞌutyaturan ɨ Dioj jemi.
\v 5 Capu aꞌanaj taatatyeviꞌirasteꞌesin tyej teyan raachuꞌeveꞌen aꞌini eihua pu caꞌanijraꞌa taataꞌa ɨ Dioj ɨ tatzajtaꞌa aɨjna cɨmeꞌe tyaj jetzen arátacaꞌanye aɨjna ɨ xaijnyuꞌucaraꞌaraꞌan ɨ Dioj. Ajta Dioj ayan tiyaꞌutaityacaꞌa ɨ ruxaijnyuꞌuca tɨꞌi tyejmi jemi huatyaturan.
\p
\v 6 Tyaucheꞌe tu cai aꞌij téꞌeviicueꞌiracaa tɨꞌɨj ajna tyajaꞌureꞌenye ajna xɨcaaraꞌan tɨ jetzen Dioj ayan tiraaxaꞌapɨꞌɨntare tɨ aɨn Cɨriistuꞌu huaꞌa jetze maꞌacan huamɨꞌɨni ɨ tyaɨtye ɨ maj cɨn autyajturaa ɨ Dioj jemi.
\v 7 Aꞌanácɨmɨ pu ayan tiꞌirɨni tɨ aꞌatɨ ayan huatauraꞌan tɨ huamɨꞌɨni seij jetze maꞌacan tɨ rɨꞌɨ tiꞌitevij. Ee xaa nyaꞌu, camu muiꞌi ɨ mej meyan huatauraꞌan mej mi seij jetzen maꞌacan huacuiꞌini, capu amɨn aꞌij tɨ puaꞌa aɨn aꞌatɨ eecan huapɨꞌɨ rɨꞌɨ tiꞌitevij.
\p
\v 8 Ma ajta Dioj, ayaa pu een cɨn titaataseijrate tɨ aɨn huapɨꞌɨ taxeꞌeveꞌe aɨjna cɨmeꞌe tyatɨꞌɨj tyauj aꞌaturaacaraꞌa ɨ jemin, Cɨriistuꞌu pu xaa tajetze maꞌacan huamɨꞌɨ.
\v 9 Ayaa puꞌu een cɨn huamɨꞌɨ tej ti teyan urareꞌenyaꞌacan cɨn huatyaturan ɨ Dioj jemi. Aɨj pu cɨn ayan huarɨn, ayej xaa nyaꞌu tiꞌayajna tɨꞌi aɨn tajapua huanyuuni tɨ ij cai taacɨꞌɨti ɨ pueijtzi tɨ ayan tyajaꞌureꞌenyejsin.
\v 10 Ayaa pu tiꞌayajna, aꞌini tyatɨꞌɨj tyauj rajchaɨraꞌacaa tyaɨjna ɨ Dioj, aɨ pu ayan rɨꞌɨ taaruu tej ti teyan rɨꞌɨ titeetyaturan ɨ jemin aɨjna cɨmeꞌe tɨ aɨn yaujraꞌan tajetze maꞌacan huamɨꞌɨ. Ijii, aꞌini aɨ pu ayan rɨꞌɨ taaruu tej ti rɨꞌɨ titeetyaturan ɨ Dioj jemi, ¿ni cai ayan tiꞌayajna tɨ aɨn tuꞌirajtuaani aɨjna cɨmeꞌe tɨ ajtahuaꞌa iꞌiruuri? Ee xaa nyaꞌu ayaa pu tiꞌayajna.
\v 11 Capu aɨ naꞌa, silu tyajta tu teyan tatyamuaꞌaveꞌe jemin ɨ Dioj tyaɨjna cɨmeꞌe tɨ aɨn tavastaraꞌa, aɨjna ɨ Jesús tɨ ajta iꞌi Cɨriistuꞌu, aɨ pu ayan rɨꞌɨ titaaruu tyej ti teyan rɨꞌɨ titeetyaturan ɨ Dioj jemi.
\s Aɨjna ɨ Adán, ajta aɨjna ɨ Cɨriistuꞌu
\p
\v 12 Ayaa pu tiꞌayajna, tɨ aɨjna tɨ aꞌij puaꞌa een ayan huataseijre iiyan chaanaca japua aɨjna cɨmeꞌe tɨ saɨj naꞌa ayan autyajturaa ɨ Dioj jemi. Ajta aɨjna cɨmeꞌe tɨ aɨjna ɨ seij ayan autyajturaa, aj puꞌi ajta yan tyajaꞌureꞌenye tɨ huamɨꞌɨ aɨjna ɨ aꞌatɨ. Aꞌini naimiꞌi mu meyan eꞌiraanyej maɨjna jetze ɨ tevi, ayaa pu ajta tihuaꞌucɨꞌɨ mej mi majta huacuii aꞌini naimiꞌi mu majta meyan autyajturaa ɨ Dioj jemi.
\v 13 Ee xaa, tɨꞌɨj cai xɨ huatyatuiihuacaꞌa ɨ nyuucari ɨ maj cɨn tiꞌijta, muꞌuri meyan aꞌaturaacaꞌa ɨ tyaɨte ɨ Dioj jemi. Ma ajta, tɨ puaꞌa cai seijraꞌa ɨ nyuucari ɨ maj cɨn tiꞌijta, capu ajta xaa rɨꞌɨrista aꞌame tɨ aꞌatɨ ayan raꞌuxɨ́jteꞌen ɨ saɨj tiꞌitɨj cɨmeꞌe ɨ tɨ cɨn autyajturaa.
\v 14 Ma ajta, tɨj naꞌa tɨ Dioj raatyataahuacaꞌa aɨjna ɨ Adán asta naꞌa cai huataseijre aɨjna ɨ Moisés, naimiꞌi mu huacuii ɨ tyaɨte. Capu amɨn aꞌij tɨ puaꞌa macai meyan cheꞌeta manaꞌa huarɨj aꞌij tɨ huarɨj aɨjna ɨ Adán tɨ cai ayan raꞌaraꞌastijre aꞌij tɨ Dioj ayan tiraijca. Ajta aɨjna ɨ Adán, aɨ pu ayan éenyaꞌa tɨj aɨjna tɨ cai xɨ huataseijre.
\p
\v 15 Ma ajta, capu ruxaꞌaj naꞌa aɨjna tɨ teꞌirajraa aɨjna cɨmeꞌe tɨ Dioj ruxéꞌeviꞌiraꞌa cɨn taatapueijve, ajta aɨjna tɨ aꞌirájraa tɨ saɨj naꞌa autyajturaa ɨ Dioj jemi. Capu xaa nyaꞌu, aꞌini muiꞌitɨ mu meyan huacuii maɨjna cɨmeꞌe tɨ saɨj ayan autyajturaa ɨ Dioj jemi. Ma ajta, eitzeꞌe pu huapɨꞌɨ tiꞌivaɨreꞌe aɨjna tɨ Dioj taatapueijve, aꞌini aɨ pu raꞌuraú aɨjna tɨ jetzen maꞌacan seiraꞌa jaꞌaraa tɨ aꞌij puaꞌa eenyaꞌacaa tɨ ij ajta huáꞌucɨꞌɨti muiꞌicaca aꞌij tɨ ɨ saɨj ɨ tevi huarɨj ruxéꞌeviꞌiraꞌa cɨmeꞌe tɨ ij aɨn ayan rɨꞌɨ tihuaꞌutaꞌan.
\v 16 Ajta, aɨjna tɨ Dioj taatapueijve, capu ayan cheꞌeta naꞌa een aꞌij tɨ teꞌirajraa aɨjna cɨmeꞌe tɨ ɨ saɨj ayan autyajturaa ɨ Dioj jemi. Tɨꞌɨj aɨn ɨ aꞌatɨ ayan autyajturaa ɨ Dioj jemi, aj puꞌi Dioj raꞌuxɨjte, ajta pueijtzi raataꞌa. Ma ajta Dioj, matɨꞌɨj eihua autyajturaa ɨ jemin, aɨ pu ayan taatapueijve aɨjna ɨ tyaj cɨn uraréꞌenyeꞌen cɨn huatyaturan ɨ jemin.
\v 17 Ayaa puꞌu xaa nyaꞌu, aꞌini tɨ puaꞌa ayan tiꞌayántan ɨ maj huacuii matɨj manaꞌa puaꞌamua eꞌiraanye maɨjna jetze ɨ tevi, ayaa pu ajta ayan tiꞌayajna mej mi ruuri muaꞌaraꞌani maɨjna cɨmeꞌe maj raꞌancuraꞌa maɨjna tɨ cɨn Dioj eihua huapɨꞌɨ rɨꞌɨ tihuaꞌutaꞌa, majta maɨjna cɨmeꞌe meyan raꞌancuraꞌa tɨ huaꞌutapueijve mej mi meyan urareꞌenyaꞌacan cɨn huatyaturan ɨ jemin aɨjna cɨmeꞌe aꞌij tɨ huarɨj aɨjna ɨ tevi, aɨjna ɨ Jesús tɨ ajta iꞌi Cɨriistuꞌu.
\p
\v 18 Ayaa pu xaa nyaꞌu tyajaꞌureꞌenye, aꞌini seij puꞌu ayan autyajturaa ɨ Dioj jemi, Dioj pu naijmiꞌica auxɨ́jte tɨ ij pueijtzi huaꞌutaꞌan. Ayaa pu ajta teꞌirajraa mej mi naijmiꞌi meyan urareꞌenyaꞌacan cɨn huatyaturan, mej mi ruuri muaꞌaraꞌani tɨj naꞌa rusen cɨmeꞌe.
\v 19 Aɨj pu cɨn, ayan teꞌirajraa mej meyan tityaꞌutyajturaa ɨ Dioj jemi aɨme ɨ maj muiꞌi aɨjna cɨmeꞌe tɨ ɨ seij aɨjna ɨ Adán tyaacan ayan autyajturaa ɨ Dioj jemi, ayaa pu ajta tihuaꞌacɨꞌɨti muiꞌicaca mej mi meyan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tɨ ɨ saɨj ɨ tevi, aɨjna ɨ Jesús ayan arauraste aɨjna tɨ cɨn Dioj tiréijca.
\p
\v 20 Ajta aɨn ɨ nyuucari ɨ maj cɨn tiꞌijta, ayaa pu een cɨn raatyajtuaa tɨ ij ayan eitzeꞌe huataseijreꞌen ɨ maj cɨn autyajturaa ɨ Dioj jemi. Ma ajta cɨmeꞌen aɨjna tɨ nuꞌu ayan eitzeꞌe huataseijre ɨ maj cɨn autyajturaa, ayaa pu ajta teꞌirájraa. Dioj pu ajta eitzeꞌe rɨꞌɨ tihuaꞌutaꞌa ɨ ruxéꞌeviꞌiraꞌa cɨmeꞌe.
\v 21 Ayaa puꞌu xaa nyaꞌu, aɨjna tɨ aꞌij puaꞌa een ɨ Dioj jemi, ayaa pu aɨjna huaꞌutyaamueꞌitɨ ɨ mej huacuii. Ayaa pu teꞌirájraa tɨꞌij ayan cheꞌeta naꞌa tyuꞌutyaamueꞌitɨ aꞌame aɨjna ɨ tɨ cɨn Dioj rɨꞌɨ titaatáꞌa, tyej ti urareꞌenyaꞌacan cɨn huatyaturan, tyej ti teyan ruuri taꞌaraꞌani tɨj naꞌa rusen cɨmeꞌe aɨjna cɨmeꞌe tɨ aɨn tavastaraꞌa ɨ Jesús, tɨ ajta iꞌi Cɨriistuꞌu, aɨ pu ayan ta japua huanyúu.
\c 6
\s Tyan tu nuꞌu ruurican cɨn seijreꞌe Cɨriistuꞌu jemi
\p
\v 1 ¿Aꞌini huataujmuaꞌa ɨ nyej neri jamueꞌixaa? ¿Ni qui tyaj tyauj autyaꞌɨtzaꞌaraꞌan ɨ Dioj jemi tɨ ij eitzeꞌe Dioj rɨꞌɨ titaataꞌan?
\v 2 Catu xaa nyaꞌu. ¿Aꞌini tiꞌirɨꞌɨri tej teyan tyauj títyaꞌutyaꞌɨtzaꞌaraꞌan ɨ Dioj jemi, aꞌini catu cheꞌe raꞌastijreꞌe tyaɨjna tɨ aꞌij puaꞌa een? Capu xaa nyaꞌu cheꞌe aꞌij tiꞌirɨꞌɨri tyaj raꞌaraꞌasten ɨ tɨ aꞌij puaꞌa een.
\v 3 Ma sajta muan, xuꞌuri seyan ramuaꞌaree saɨjna, tyatɨꞌɨj huamuaɨꞌɨvijhuacaꞌa tyaɨjna cɨmeꞌe tyej teri raꞌastijreꞌe tyaɨjna ɨ Cɨriistuꞌu, tɨ ajta iꞌi Jesús, tyan tu tyajta tyaɨjna jetze ajtyamaꞌacantacaꞌa tɨꞌij aɨn huamɨꞌɨ.
\v 4 Tyatɨꞌɨj huamuaꞌɨvijhuacaꞌa, ayaa pu ajta titaaruu maj taꞌavaꞌana aɨjna jamuan ɨ tɨ huamɨꞌɨ, tej ti teyan cheꞌeta tyanaꞌa jajcuacan cɨn ruuri taꞌaraꞌani aꞌij tɨ ajta tiraaruu aɨjna ɨ Cɨriistuꞌu. Dioj pu ayan raꞌajjáj huaꞌa tzajtaꞌa ɨ mɨꞌɨchite aɨjna cɨmeꞌe tɨ muáreꞌeriꞌiraꞌaraꞌan huataseijre.
\p
\v 5 Tɨ puaꞌa teyan tyaɨjna jetze ajtyamaꞌacantacaꞌa tɨꞌɨj aɨn huamɨꞌɨ, ayaa pu tiꞌayajna tyaj tyajta jetzen ajtyamaꞌacanta taꞌajuꞌun tyaɨjna tɨꞌɨj Dioj ayan raꞌajjáj huaꞌa tzajtaꞌa ɨ mɨꞌɨchite.
\v 6 Ayaa puꞌu, ayaa pu titaꞌamitejteꞌe, tɨ aɨn tɨ aꞌij puaꞌa een, ɨ tyaj cɨn aꞌij puaꞌa tiꞌitítachaɨcaꞌa, Dioj pu ajta raꞌuxɨjte jamuan ɨ Cɨriistuꞌu matɨꞌɨj ráꞌutatai ɨ Curuu jetze, tɨ ij ayan antipuaꞌare aɨjna tɨ aꞌij puaꞌa een ɨ tyaj cɨn aꞌij puaꞌa tiꞌitítachaɨcaꞌa tɨ ij cai cheꞌe caꞌanijraꞌa tyajamuaataijteꞌen aɨjna tɨ aꞌij puaꞌa een.
\v 7 Tɨ puaꞌa aꞌatɨ arí huamɨꞌɨni, capu cheꞌe rɨꞌɨrista aꞌame tɨ aɨn ɨ tɨ aꞌij puaꞌa een ayan tiraataijteꞌen.
\v 8 Me tyajta ityan, ayaa pu titaꞌamitejteꞌe tɨ ayan tiꞌayajna. Tɨ puaꞌa ityan Cɨriistuꞌu jetze ajtyamaꞌacan aɨjna cɨmeꞌe tɨ huamɨꞌɨ, tyan tu tyajtahuaꞌa ruuri taꞌajuꞌun tyaɨjna jamuan.
\p
\v 9 Ayej xaa nyaꞌu tiꞌayajna, aꞌini Dioj pu ari raꞌajjáj aɨjna ɨ Cɨriistuꞌu huaꞌa tzajtaꞌa ɨ mɨꞌɨchite, aɨj pu cɨn, capu cheꞌe rɨꞌɨri tɨ Cɨriistuꞌu ajtahuaꞌa huamɨꞌɨni. Capu cheꞌe rɨꞌɨri tɨ raꞌantimueꞌitɨn aɨjna ɨ muáreꞌeriꞌiraꞌaraꞌan ɨ maj cɨn huacuiꞌini.
\v 10 Tɨꞌɨj aɨn huamɨꞌɨ, ayaa pu een cɨn huamɨꞌɨ tɨ ij raꞌupuaꞌariteꞌen aɨjna tɨ aꞌij puaꞌa een ɨ maj cɨn aꞌij puaꞌa titetyújchaɨcaꞌa. Ajta ijii, tɨ Cɨriistuꞌu ajtahuaꞌa iꞌiruuri, aɨ pu ayan aɨjna cɨn ruuri tɨ ij rɨꞌɨ tiraataꞌan ɨ Dioj.
\v 11 Cheꞌe ayan cheꞌeta naꞌa tyajamuaꞌamityejtyaꞌa sej seri huacuii sej si cai cheꞌe seyan raatyavaꞌɨrihuaꞌan saɨjna tɨ aꞌij puaꞌa een. Cheꞌe ajta ayan tyajamuaꞌamityejtyaꞌa sej ruurican huatyajturaa ɨ Dioj jemi aɨjna cɨmeꞌe sej seri saɨjna jetze ajtyamaꞌacan ɨ Cɨriistuꞌu tɨ ajta iꞌi Jesús.
\p
\v 12 Aɨj pu cɨn, caxu seyan rataꞌacareꞌen tɨ aɨn ɨ tɨ aꞌij puaꞌa een ayan tyajaꞌamueꞌijtyaꞌa ɨ aꞌamua tzajtaꞌa. Caxu sajta raꞌastijraꞌa aɨjna tɨ aꞌij puaꞌa een tɨ huiiraninyei ɨ aꞌamua tzajtaꞌa.
\v 13 Caxu sajta ratuiiraꞌa tɨj naꞌa tɨ seijreꞌe ɨ aꞌamuajetze saɨjna jemi ɨ tɨ aꞌij puaꞌa een sej si seyan ratyavaꞌɨrihuaꞌan, silu sataꞌaj seyan huataujtuiireꞌen ɨ Dioj jemi saɨjna cɨmeꞌe tɨ ayan tyajamuaꞌamitejteꞌe tɨ aɨn ari amueꞌirajtuaa huaꞌa tzajtaꞌa aɨme ɨ mej meri huacuii. Sataꞌaj seyan tiraatatuireꞌen tɨj naꞌa tɨ seijreꞌe aꞌamuajetze sej si seyan saɨjna cɨn raatyavaꞌɨrihuaꞌan tiꞌitɨj cɨmeꞌe tɨ xaꞌapɨꞌɨn een.
\v 14 Tɨ puaꞌa seyan huarɨni, capu aꞌanaj tyajamuaataijteꞌesin aɨjna tɨ aꞌij puaꞌa een, aꞌini xuꞌuri seyan saɨjna jetze araujcaꞌanye tɨ Dioj ruxéꞌeviꞌiraꞌa cɨn rɨꞌɨ tyajamuataꞌaca. Caxu cheꞌe seyan caꞌanyejri cɨn raꞌastijraꞌa saɨjna ɨ nyuucari ɨ maj cɨn tiꞌijta.
\s Tɨ puaꞌa nuꞌu caꞌanyejri mu cɨn tiꞌivaɨreꞌe
\p
\v 15 ¿Aꞌini tyajamuaꞌamitejteꞌe muejmi? ¿Ni qui teyan tyauj aꞌij puaꞌa tiꞌitítacháɨ taꞌaraꞌani tyaɨjna cɨmeꞌe tɨ Dioj ruxéꞌeviꞌiraꞌa cɨn rɨꞌɨ titaataꞌaca, tyajta cai cheꞌe raꞌastijraꞌa tyaɨjna ɨ nyuucari ɨ maj cɨn tiꞌijta? Catu xaa nyaꞌu aꞌatzu.
\v 16 Muan xu seyan ramuaꞌaree tɨ puaꞌa seyan huataujtuiireꞌen aꞌatɨ jemi sej si caꞌanyejri cɨn raꞌaraꞌastijreꞌen, muan xu caꞌanyejri cɨn raatyavaꞌɨrihaꞌa saꞌajuꞌun, xaa nyaꞌu. Capu amɨn aꞌij tɨ puaꞌa seyan tiraatyavaꞌɨrihuaꞌan saɨjna tɨ aꞌij puaꞌa een, tɨ ajta ayan amuaataꞌasin saj huacuiꞌini, naꞌari tɨ puaꞌa seyan sanaꞌa tiraatyavaꞌɨrihuaꞌan saɨjna tɨ xaꞌapɨꞌɨn een sej si seyan ruuri huatyaturan ɨ Dioj jemi.
\p
\v 17 Ajnaꞌɨmɨ xu xaa seyan caꞌanyejri cɨn raatyavaɨ saɨjna tɨ aꞌij puaꞌa een. Arú ijii, ayaa nu een cɨn rɨꞌɨ tirataꞌaca ɨ Dioj nyaɨjna cɨmeꞌe saj aꞌujcaꞌanyaacan cɨn raꞌaraꞌastijreꞌe saɨjna ɨ nyuucari ɨ maj cɨn tyajamuaamuáꞌate, ɨ saj sajta raꞌancuraꞌa.
\v 18 Dioj pu amueꞌirajtuaa sej si cai cheꞌe caꞌanyejri cɨn raatyavaꞌɨrihuaꞌan saɨjna tɨ aꞌij puaꞌa een. Ma ajta, ayaa pu amuaaruu sej si caꞌanyejri cɨn raatyavaɨreꞌen saɨjna tɨ xaꞌapɨꞌɨn een aɨjna jemi ɨ Dioj.
\v 19 Ayaa nu nyaɨjna cɨn aꞌahuauritaacan cɨn tyajaꞌamueꞌixaateꞌe aꞌij tɨ tihuaꞌaruurajcaa huaꞌa tzajtaꞌa ɨ tyaɨte aꞌini ayaa pu tyajamuaꞌaturaateꞌe saj cai nain jauꞌeite. Ayaa xu sejmiꞌi tyuꞌujtuiiraꞌacaa satɨj sanaꞌa saj ratyáhueꞌiraꞌa sej si seyan raatyavaꞌɨrihuaꞌan ɨ saj cɨn huataujxanaꞌacɨreꞌen, sej si sajta seyan huarɨni tɨj naꞌa tɨ cai xaꞌapɨꞌɨn een ɨ Dioj jemi. Aɨj pu cɨn, ayaa pu ruxeꞌeveꞌe sej seyan cheꞌeta sanaꞌa huataujtuiiren nain cɨmeꞌe satɨj sanaꞌa saj ratyáhueꞌiraꞌa sej si seyan raatyavaꞌɨrihuaꞌan ɨ tɨ xaꞌapɨꞌɨn een sej si seyan urareꞌenyaꞌacan cɨn huatyaturan ɨ Dioj jemi.
\p
\v 20 Satɨꞌɨj sauj raatyavaꞌɨrihuaꞌa saɨjna tɨ aꞌij puaꞌa een, capu aꞌamua jetze ruxeꞌevaꞌacaa sej seyan raꞌaraꞌastijreꞌen saɨjna tɨ xaꞌapɨꞌɨn een ɨ Dioj jemi.
\v 21 ¿Tiꞌitajni cɨn aꞌij tyajamuaatyavaɨ ajnaꞌɨmɨ aɨjna, tɨj naꞌa tɨ ari jáꞌamuatyeviꞌirasteꞌe? Capu sein tiꞌitɨ, aꞌini tɨj naꞌa tɨ ayan aꞌij puaꞌa een, ayaa pu huaꞌatyavaꞌɨrihuaꞌa mej mi maɨjna cɨn huacuiꞌini.
\p
\v 22 Ma ajta ijii, tɨꞌɨj Dioj amueꞌirajtuaa sej si cai cheꞌe raatyavaꞌɨrihuaꞌan aɨjna ɨ tɨ aꞌij puaꞌa een, ayaa xu seri caꞌanyejri cɨn raatyavaꞌɨri saɨjna ɨ Dioj. Ajta, ayaa pu tyajamuaacɨꞌɨti sej seyan urareꞌenyaꞌacan cɨn huatyaturan ɨ Dioj jemi, sej si seyan seiraꞌa xaꞌaraꞌani ɨ jemin tɨj naꞌa rusen cɨmeꞌe.
\v 23 Ayaa puꞌu xaa nyaꞌu tiꞌayajna. Ayaa pu raamueꞌitɨn ɨ aꞌatɨ tɨ huamɨꞌɨni tɨ puaꞌa ayan raatyavaɨreꞌe aɨjna tɨ aꞌij puaꞌa een. Ajta, ayaa pu een cɨn Dioj rɨꞌɨ titaatáꞌa ruxéꞌeviꞌiraꞌa cɨmeꞌe tej ti teyan ruuri huatyaturan ɨ jemin, aɨjna cɨmeꞌe tyej tyaɨjna jetze ajtyamaꞌacan tyaɨjna ɨ Cɨriistuꞌu tɨ ajta iꞌi Jesús, ɨ tavastaraꞌa.
\c 7
\s Aꞌij tɨ huataujmuaꞌa tɨ puaꞌa jɨitaꞌa huatyevicheꞌen
\p
\v 1 Neꞌihuaamuaꞌa, mɨ sej ramuaꞌaree aꞌij tɨ tyaꞌaxa ɨ yuꞌuxari jetze ɨ maj cɨn tiꞌijta, ayaa nu tyajaꞌamueꞌixaateꞌe tɨ aɨn nyuucari ayaa naꞌa tiꞌiraijteꞌe ɨ aꞌatɨ tɨj naꞌa tɨ auj ruuri. Capu cheꞌe tiꞌiraityaꞌa aꞌame tɨꞌɨj huamɨꞌɨni.
\v 2 Ayaa pu tiꞌayajna, tɨ puaꞌa jɨitaꞌa ayan ari vicheꞌe, ayaa pu tiꞌiraijteꞌe aɨjna ɨ nyuucari tɨ nuꞌu ayan ruxeꞌeveꞌe tɨ aɨn jɨitaꞌa ayan huatyaturan jamuan ɨ rucɨn tɨj naꞌa tɨ auj ruuri. Aru tɨ puaꞌa aɨn cɨnaꞌaraꞌan huamɨꞌɨni, capu cheꞌe ayan tiꞌiraityaꞌa aꞌame.
\v 3 Aɨj pu cɨn, tɨ puaꞌa nuꞌu seij jamuan huatyevicheꞌen tɨ puaꞌa auj ruuri ɨ cɨnaꞌaraꞌan, ayaa mu tiraatamuaꞌamuatyaꞌa muaꞌajuꞌun maɨjna ɨ jɨitaꞌa tɨcɨn tɨ huataujxanaꞌacɨre. Ma ajta tɨ puaꞌa aɨn cɨnaꞌaraꞌan ayan huamɨꞌɨni, aɨjna ɨ nyuucari capu cheꞌe tiꞌiraityaꞌa aꞌame. Ajta camu cheꞌe meyan raatamuaꞌamuatyaꞌa muaꞌajuꞌun tɨcɨn tɨ huataujxanaꞌacɨre, tɨ puaꞌa seij jamuan huatyevicheꞌen.
\p
\v 4 Sajta muan, nyeꞌihuaamuaꞌa, aꞌini Cɨriistuꞌu pu ayan rajpueijtzi jaꞌaraa ɨ rutevi cɨmeꞌe muejmi jetze maꞌacan aɨjna cɨmeꞌe tɨ huamɨꞌɨ ɨ curuu jetze, capu cheꞌe tyajamueityaꞌa aꞌame aɨjna ɨ nyuucari ɨ maj cɨn tiꞌijta. Aɨj xu cɨn, muan seij jetze xu ajtyamaꞌacan. Ai pu aɨn pueen aɨjna tɨ Dioj ayan raꞌajjáj huaꞌa tzajtaꞌa ɨ mɨꞌɨchite sej si seyan raatatuiireꞌen ɨ Dioj jemi satɨj sanaꞌa saj saɨjna cɨn huarɨj tɨ iꞌixaꞌapɨꞌɨn.
\v 5 Ayaa puꞌu xaa nyaꞌu titaaruu tɨꞌɨj ayan tiꞌitaijtyaꞌacaa aɨjna cɨmeꞌe tɨ aꞌij puaꞌa een. Aɨjna ɨ nyuucari ɨ maj cɨn tiꞌijta, aɨ pu caꞌanijraꞌa raataꞌa aɨjna tɨ aꞌij puaꞌa een tɨ huiiraninyei ɨ ta tzajtaꞌa. Ajta aɨn tɨ aꞌij puaꞌa een, ayaa pu tiꞌimuaraꞌacaa ɨ ta tzajtaꞌa, tyatɨj tyanaꞌa veꞌe ɨ ta jetze, tyej ti teyan raamueꞌitɨn tyaj huacuiꞌini.
\v 6 Ajta ijii, capu cheꞌe tiꞌitaityaꞌa aꞌame aɨjna ɨ nyuucari ɨ maj cɨn tiꞌijta, aꞌini Cɨriistuꞌu pu huamɨꞌɨ ta jetze maꞌacan. Aɨ pu aɨjna jetze taatyajtuaa tyej ti jajcuacan cɨn tiꞌityavaꞌɨrihuaꞌan tyaɨjna cɨmeꞌe ɨ yeꞌira tɨ aɨjna jetze maꞌacan ɨ xaijnyuꞌucaraꞌaraꞌan ɨ Dioj, tyej ti cai cheꞌe teyan tiꞌityavaꞌɨrihuaꞌan ɨ yeꞌira cɨmeꞌe tɨ miꞌimaꞌacan, tɨ ajta teꞌeyuꞌusiꞌihuacaꞌa.
\s Aɨjna tɨ aꞌij puaꞌa een tɨ nuꞌu yen seijreꞌe nyeetzi jetze
\p
\v 7 ¿Aꞌini huataujmuaꞌa aɨjna? ¿Ni ayan huataujmuaꞌa, tɨ aɨn nyuucari ɨ maj cɨn tiꞌijta, ni cai aɨn pueen ɨ tɨ aꞌij puaꞌa een? Capu xaa nyaꞌu, aꞌini canu neyan ramuaꞌareerancheꞌe tiꞌitɨ tɨ pɨrɨcɨ tɨ aꞌij puaꞌa een tɨ puaꞌa cai huatyaturancheꞌe ityejmi jemi aɨjna ɨ nyuucari ɨ maj cɨn tiꞌijta. Tɨ puaꞌa cai ayan tinaataꞌixáateꞌencheꞌe aɨjna ɨ nyuucari tɨcɨn: “Capej tiꞌinyacuaꞌatze”, canu aꞌanaj ramuaꞌareerancheꞌe tɨ ayan aꞌij puaꞌa een tɨ puaꞌa neyan tiꞌinyacuaꞌatze.
\v 8 Ajta aɨjna tɨ aꞌij puaꞌa een tɨ huiiraninyei yu nyatzajtaꞌa, aɨ pu ayan tiꞌihuaujxeꞌeviste inyeetzi jetze nyej ni eihua huapɨꞌɨ tiꞌinyacuaꞌatze aɨjna cɨmeꞌe tɨ aɨn nyuucari ayan tinaamuaꞌate aꞌij tɨ huataujmuaꞌa aɨjna ɨ nyuucari tɨ cɨmeꞌen yee capej tiꞌinyacuaꞌatze. Ayaa puꞌu, aꞌini tɨ puaꞌa cai ayan seijraꞌa ɨ nyuucari ɨ maj cɨn tiꞌijta, capu rɨꞌɨri tej teyan raamuaꞌareera tiꞌitɨ tɨ pɨrɨcɨ tɨ aꞌij puaꞌa een.
\v 9 Ajta jajcua ɨmɨ nu neyan nyaxaahua áꞌuchaꞌacanyaꞌa; canu tiꞌitɨ tiꞌimuaꞌareeracaꞌa. Capu tiꞌinyeijtyaꞌacaa aɨjna ɨ nyuucari ɨ maj cɨn tiꞌijta. Aj nu ni neyan raꞌutamuaꞌareeriꞌi nyaɨjna ɨ nyuucari. Nyatɨꞌɨj ni neyan tiraamuaꞌareeriꞌi tɨj naꞌa ɨ nyaj cɨn autyajturaa nyaɨjna jemi ɨ nyuucari. Canu cheꞌe rɨꞌɨ me tyaꞌuchaꞌacanyaꞌa.
\v 10 Ajta, ayaa pu tinaꞌamitejtyaꞌacaa tɨ ayan tyuꞌurɨj. Aɨjna ɨ nyuucari tɨ cɨn Dioj ayan tiraaxaꞌapɨꞌɨntare tɨ nuꞌu cɨn rɨꞌɨ titaataꞌacareꞌencheꞌe, capu ayan rɨꞌɨ titaatáꞌa tzɨteꞌe, silu ayaa puꞌu naꞌuxɨjte nyej ni neyan huamɨꞌɨni nyaɨjna cɨmeꞌe nyaj cai raꞌaraꞌaste nyaɨjna ɨ nyuucari.
\v 11 Ayaa pu aɨjna cɨn tyeꞌirájraa. Aɨjna tɨ aꞌij puaꞌa een, ayaa pu tiꞌihuaujxeꞌeviste inyeetzi jetze aɨjna cɨmeꞌe tɨ aɨn nyuucari ayan tyuꞌutaxajtacaꞌa tiꞌitɨ tɨ pɨrɨcɨ tɨ aꞌij puaꞌa een. Ajta eꞌeyan, aɨn tɨ aꞌij puaꞌa een ayan naacuanamua nyej ni cai neyan raꞌaraꞌasten nyaɨjna ɨ nyuucari. Ayaa pu aɨjna cɨn huarɨj, aɨ pu ɨ nyuucari ayan nyaꞌuxɨjte nyej ni huamɨꞌɨni aɨjna cɨmeꞌe nyaj cai raꞌaraꞌastijre.
\p
\v 12 Aɨj pu cɨn, capu tiꞌitɨj raꞌaturaateꞌe aɨjna ɨ nyuucari ɨ maj cɨn tiꞌijta. Ajta aɨjna tɨ cɨn ayan tihueijteꞌe, capu ajta tiꞌitɨ raꞌaturaateꞌe. Ayaa pu een cɨn tiꞌijta aꞌij tɨ tiraavijteꞌe, ajta nain pu cɨn iꞌi xaꞌapɨꞌɨn.
\v 13 ¿Ni qui ayan huataujmuaꞌa tɨ aɨjna tɨ iꞌi xaꞌapɨꞌɨn ayan naꞌuxɨjte nyej ni nyeyan huamɨꞌɨni? Capu xaa nyaꞌu aꞌatzu. Ma ajta, ayaa pu ruxeꞌevaꞌacaa tyej teyan tiraatamuaꞌati tiꞌitɨ tɨ pɨrɨcɨ tɨ aꞌij puaꞌa een, tyej ti teyan raamuaꞌaree tɨ aɨn pɨrɨcɨ aɨjna tɨ xaa aꞌij puaꞌa een ɨ Dioj jemi. Aɨj pu cɨn aɨjna tɨ aꞌij puaꞌa een ayan tiꞌihuaujxeꞌeviste inyeetzi jetze, tɨ i aɨn tɨ iꞌi xaꞌapɨꞌɨn, ayan naꞌuxɨjteꞌen nyej ni nyaɨjna cɨn huamɨꞌɨni, nyaj cai raꞌaste nyaɨjna ɨ nyuucari, tɨ ij ajta ayan seiraꞌa aꞌaraꞌani tɨ eihua huapɨꞌɨ aꞌij puaꞌa seijreꞌe ɨ Dioj jemi aɨjna ɨ tiꞌitɨ tɨ aɨn nyuucari raataꞌijmɨ.
\p
\v 14 Ayaa tu ramuaꞌaree tɨ aɨn nyuucari aɨjna jetze maꞌacan ɨ xaijnyuꞌucaraꞌaraꞌan ɨ Dioj. Me nyajta inyaa, i nyaj cɨn ratyáhueꞌiraꞌa, nyaa nu nyajta tiꞌivaɨreꞌe nain cɨmeꞌe nyaɨjna tɨ aꞌij puaꞌa een.
\v 15 Ayaa puꞌu, canu yauꞌeite aꞌij nyej een cɨn neyan tiꞌitinchaꞌɨ. Aꞌini ɨ tiꞌitɨ ɨ nyaj neyan raxeꞌeveꞌe nyaj cɨn neyan huarɨni, canu xaa nyaꞌu neyan rɨcɨ. Ajta, aɨjna tɨ cai aꞌatzu naꞌaraanajchi, ayaa nu nyaɨjna cɨn rɨcɨ.
\v 16 Ayaa puꞌu, tɨ puaꞌa neyan rɨcɨ nyaɨjna cɨmeꞌe tɨ cai aꞌatzu naꞌaraanajchi, aj nu xaa nyaɨjna cɨn neyan tyuꞌutaxaj yee aɨ pu nuꞌu iꞌi xaꞌapɨꞌɨn aɨjna ɨ nyuucari ɨ maj cɨn tiꞌijta.
\v 17 Aɨj pu cɨn, ayaa naꞌa een. Canu cheꞌe nyaɨn pueen ɨ nyej nyasaɨj neyan rɨcɨ, silu aɨ pu aɨn pueen ɨ tɨ aꞌij puaꞌa een tɨ tasiseiri yu nyatzajtaꞌa.
\v 18 Ayaa nu ramuaꞌaree tɨ yu nyatzajtaꞌa aɨjna jetze ɨ nyaj ratyáhueꞌiraꞌa, capu tiꞌitɨ úꞌuseijreꞌe tɨ xaꞌapɨꞌɨn een. Nyaa nu xaa neyan aꞌancaꞌanye nyej neyan huarɨni nyaɨjna cɨmeꞌe tɨ iꞌi xaꞌapɨꞌɨn. Me nyajta inyaa, capu rɨꞌɨri nyej neyan rɨjca.
\v 19 Ma ajta, ɨ nyaj cɨn neyan rɨcɨ, capu aɨn pueen ɨ tɨ iꞌi xaꞌapɨꞌɨn tɨ ajta naꞌaraanajchi nyej neyan huarɨni. Ca pu xaa nyaꞌu. Ajta, aɨjna tɨ aꞌij puaꞌa een, tɨ ajta cai aꞌatzu naꞌaraanajchi nyej neyan rɨjca, nyaucheꞌe nu nyaɨjna cɨn neyan rɨcɨ.
\v 20 Aɨj pu cɨn, tɨ puaꞌa neyan nyaɨjna cɨn rɨjca aꞌij tɨ cai tinaꞌaraanajchi, canu cheꞌe nyaɨn pueen inyaa, i nyaj neyan rɨcɨ, silu aɨjna tɨ aꞌij puaꞌa een tɨ úꞌuseijreꞌe yu nyatzajtaꞌa, aɨ pu xaa aɨn pueen ɨ tɨ aɨjna cɨn ayan rɨcɨ.
\p
\v 21 Aɨj pu cɨn, ayaa pu tinaꞌamitejteꞌe tɨ ayan tiꞌinyaruure. Nyatɨj nyanaꞌa nyaj neyan nyaɨjna cɨn áꞌancaꞌanye nyej neyan huarɨni ɨ tɨ iꞌi xaꞌapɨꞌɨn cɨmeꞌe, aɨ pu ajta nyeetzi jemi seijreꞌe aɨjna tɨ aꞌij puaꞌa een.
\v 22 Ee xaa nyaꞌu, nyaxaijnyuꞌuca nu cɨn neyan tiꞌijxeꞌeveꞌe nyej neyan raꞌaraꞌastijreꞌen tɨj naꞌa tɨ taatyajtuaa ɨ Dioj.
\v 23 Ayaa pu ajta tinaꞌamitejteꞌe tɨ ayan tiꞌinyaruure nyatɨj nyanaꞌa tiꞌityejveꞌe ɨ nyejetze. Aɨ pu nyaꞌuseꞌe aɨjna tɨ aꞌij puaꞌa een aɨjna jamuan ɨ tɨ tiꞌijta yu nyaxaijnyuꞌuca jetze. Aɨ pu ajta naꞌantimueꞌitɨ nyej ni caꞌanyejri cɨn raatyavaꞌɨrihuaꞌan nyaɨjna tɨ aꞌij puaꞌa een tɨ ayan tiꞌijta yu nyej jetze nyatɨj nyanaꞌa tiꞌityejveꞌe.
\p
\v 24 Cuiꞌixaa inyeetzi. ¿Aꞌataani ayan nuꞌiratuaasin aɨjna jetze i nyaj ratyáhueꞌiraꞌa tɨ i cai ayan tiꞌinyacɨꞌɨti nyej neyan huamɨꞌɨni?
\v 25 Ee xaa nyaꞌu, eecan nu huapɨꞌɨ rɨꞌɨ tirataꞌaca ɨ Dioj nyaɨjna cɨmeꞌe aꞌij tɨ huarɨj ta jetze maꞌacan aɨjna ɨ Jesús, ɨ Cɨriistuꞌu tɨ ajta tavastaraꞌa pueen. Me nyajta inyaa, nyaxaijnyuꞌuca nu cɨn ratyavaꞌɨri aꞌij tɨ titaatyajtuaa aɨjna ɨ Dioj. Nyatɨj nyanaꞌa tiꞌityejveꞌe yu nye jetze, ayaa nu nyajta ratyavaꞌɨri aꞌij tɨ tíꞌinyeijteꞌe aɨjna tɨ aꞌij puaꞌa een.
\c 8
\s Tyaj nuꞌu teyan rɨꞌɨ tiꞌitachaɨ taꞌajuꞌun aꞌij tɨ tiꞌijxeꞌeveꞌe ɨ xaijnyuꞌucaraꞌaraꞌan ɨ Dioj
\p
\v 1-2 Rumuareꞌeriꞌiraꞌaraꞌan pu cɨn amueꞌirajtuaa aɨjna ɨ xaijnyuꞌucaraꞌaraꞌan ɨ Dioj sej si seyan ruuri huatyaturan ɨ jemin aɨjna ɨ Cɨriistuꞌu, tɨ ajta iꞌi Jesús. Capu cheꞌe aꞌanaj tyajaꞌamueityaꞌa aꞌame aɨjna ɨ muáreꞌeriꞌiraꞌaraꞌan aɨjna tɨ aꞌij puaꞌa een tɨ ajta jamuataꞌaca saj huacuiꞌini. Aɨj pu cɨn, capu cheꞌe Dioj tiꞌitɨj cɨn muejmi jetze tyaꞌupuáꞌajteꞌesin.
\v 3 Ajta aɨn ɨ Dioj, aɨ pu ayan huarɨj aꞌij tɨ cai tyuꞌutarɨꞌɨristaracaꞌa tɨ ayan huarɨni ityejmi jemi aɨjna ɨ nyuucari ɨ maj cɨn tiꞌijta. Capu aꞌatzu taavaɨraꞌacaa aɨjna ɨ nyuucari aɨjna cɨmeꞌe tyaj cai tyaꞌatavíꞌicueꞌiraꞌa tyej raꞌaraꞌasten. Aɨj pu cɨn Dioj ayan mu yaꞌutaityacaꞌa ɨ ruyauj tɨ ij aɨn ayan cheꞌeta naꞌa huataseijreꞌen matɨj aɨme ɨ tyetyaca ɨ mej aꞌij puaꞌa titetyújchaꞌɨ ɨ Dioj jemi, tɨ ij ajta aɨn huataujmuaɨꞌɨvejrita aɨme jetze maꞌacan ɨ maj cɨn autyajturaa ɨ Dioj jemi. Ayaa pu aɨjna cɨn huarɨj tɨꞌij ayan raꞌuxɨ́jteꞌen tɨ cai cheꞌe tiꞌitaityaꞌa aꞌaraꞌani aɨjna tɨ aꞌij puaꞌa een.
\v 4 Aɨ pu ayan huarɨj tyej ti tyaɨjna cɨn teyan raꞌaraꞌastijreꞌen aꞌij tɨ tiraavijteꞌe, aꞌij tɨ aɨn tiꞌijxeꞌeveꞌe aɨjna ɨ nyuucari. Ayaa tu xaa teri teyan raꞌaraꞌastijre aꞌini catu cheꞌe teyan tiꞌititachaꞌɨ tyaɨjna cɨmeꞌe tɨ aꞌij puaꞌa een tɨ huiiraninyei ɨ ta tzajtaꞌa, silu tyej teyan tyaɨjna jetze arátacaꞌanye tyaɨjna ɨ xaijnyuꞌucaraꞌaraꞌan ɨ Dioj.
\p
\v 5 Majta aɨme ɨ mej meyan tiꞌityujchaꞌɨ maɨjna cɨmeꞌe tɨ aꞌij puaꞌa een tɨ huiiraninyei ɨ huaꞌa tzajtaꞌa aɨme, ayaa mu maɨjna cɨn tiꞌimuaꞌatze aꞌij tɨ aɨn caꞌanijraꞌa tihuaꞌataꞌaca aɨjna tɨ aꞌij puaꞌa een. Majta aɨme ɨ mej maɨjna jetze araujcaꞌanye ɨ xaijnyuꞌucaraꞌaraꞌan ɨ Dioj, ayaa mu maɨjna cɨn rahuahuau aꞌij tɨ tiꞌijxeꞌeveꞌe aɨjna ɨ xaijnyuꞌucaraꞌaraꞌan ɨ Dioj.
\v 6 Tɨ puaꞌa aꞌatɨ ayan naꞌa aɨjna jetze tiꞌimuajca tɨ aꞌij puaꞌa een tɨ huiiraninyei ɨ tzajtaꞌan, ayaa pu tiꞌijcɨꞌɨti tɨ huamɨꞌɨni. Ma ajta tɨ puaꞌa aɨn aꞌatɨ ayan tyuꞌutauraꞌan tɨ ayan tiꞌityujchaꞌɨ aꞌij tɨ aɨn tiꞌijxeꞌeveꞌe aɨjna ɨ xaijnyuꞌucaraꞌaraꞌan ɨ Dioj, ayaa pu Dioj raatyapuaꞌariteꞌen ɨ tzajtaꞌan, ajta ayan raataꞌacareꞌen tɨ ayan ruurican huatyaturan ɨ jemin.
\v 7 Ajta aɨjna ɨ aꞌatɨ tɨ aɨjna jetze tyuꞌumuaꞌati tɨ aꞌij puaꞌa een, aɨ pu rajchaɨreꞌe ɨ Dioj. Capu tauraꞌaca tɨ aɨn tiꞌiraiítyaꞌa aꞌaraꞌani aɨjna ɨ nyuucari tɨ Dioj jetze eꞌiraninyei. Ee xaa nyaꞌu, capu aꞌatzu aꞌij tiꞌirɨꞌɨri tɨ aɨn aꞌatɨ ayan raꞌaraꞌasten rusaɨj.
\v 8 Ayaa puꞌu naꞌa. Capu aꞌij tiꞌirɨꞌɨri mej rɨꞌɨ tiraataꞌan ɨ Dioj aɨme ɨ maj manaꞌa meyan raꞌastijreꞌe maɨjna tɨ aꞌij puaꞌa een tɨ huiiraninyei ɨ huaꞌa tzajtaꞌa.
\p
\v 9 Ma sajta muan, caxu seyan tityatauraꞌacareꞌen tɨ aɨn ɨ tɨ aꞌij puaꞌa een ayan tyajaꞌamueityaꞌa jaꞌaraꞌani, aꞌini aɨj pu ari huatyajturaa muejmi jemi aɨjna ɨ xaijnyuꞌucaraꞌaraꞌan ɨ Dioj. Aɨj pu cɨn, aɨ pu tyajaꞌamueityaꞌa aꞌame. Ajta, tɨ puaꞌa cai ayan seij jemi huatyajturaa aɨjna ɨ xaijnyuꞌucaraꞌaraꞌan ɨ Cɨriistuꞌu, aɨjna ɨ aꞌatɨ capu Cɨriistuꞌu jetze ajtyamaꞌacan.
\v 10 Ajta, tɨ puaꞌa Cɨriistuꞌu ayan huatyajturaa ɨ aꞌamua tzajtaꞌa, ayaa pu jaꞌamuacɨꞌɨti tɨ aɨn aupuaꞌare ɨ saj ratyáhueꞌiraꞌa. Aꞌapuaꞌaren xaa nyaꞌu aɨjna cɨmeꞌe tɨ huiraninyeicaꞌa aꞌayeꞌi tɨ aꞌij puaꞌa een ɨ aꞌamua tzajtaꞌa. Ma ajta, ayaa xu ruuri huatyajturaa ɨ aꞌamua tzajtaꞌa aɨjna cɨmeꞌe tɨ Dioj ayan amuaꞌuxɨjte sej si seyan urareꞌenyaꞌacan cɨn huatyaturan ɨ jemin.
\v 11 Ajta, tɨ puaꞌa ayan huatyajturaa muejmi tzajtaꞌa ɨ xaijnyuꞌucaraꞌaraꞌan aɨjna ɨ Dioj tɨ raꞌajjáj aɨjna ɨ Jesús huaꞌa tzajtaꞌa ɨ mɨꞌɨchite, aɨjna tɨ raꞌajjáj ɨ Cɨriistuꞌu huaꞌa tzajtaꞌa ɨ mej meri huacuii, aɨ pu ajta rarujteꞌen ɨ saj ratyáhueꞌiraꞌa aɨjna cɨmeꞌe tɨ aɨn xaijnyuꞌucaraꞌaraꞌan ari seijreꞌe ɨ aꞌamua tzajtaꞌa.
\p
\v 12 Aɨj pu cɨn, ayan ruxeꞌeveꞌe ityejmi jemi tej ti cai cheꞌe teyan raꞌastijraꞌa tyaɨjna tɨ aꞌij puaꞌa een tɨ huiiraninyei ɨ ta tzajtaꞌa.
\v 13-14 Ayaa puꞌu naꞌa, aꞌini tɨ puaꞌa seyan raꞌaraꞌastijreꞌen saɨjna tɨ aꞌij puaꞌa een tɨ huiiraninyei ɨ aꞌamua tzajtaꞌa, ayaa pu tyajamuaacɨꞌɨti saj huacuiꞌini. Ma sajta muan, tɨ puaꞌa seyan tiraꞌantipuaꞌariteꞌen saɨjna tɨ aꞌij puaꞌa een tɨ ayan huiiraninyei ɨ aꞌamua tzajtaꞌa, tɨ puaꞌa sajta seyan huarɨni saɨjna cɨmeꞌe saj jetzen araujcaꞌanye ɨ xaijnyuꞌucaraꞌaraꞌan ɨ Dioj, ayaa pu tyajamuáacɨꞌɨti sej seyan ruuri huatyaturan ɨ Dioj jemi, aꞌini aɨme ɨ mej meyan jetzen araujcaꞌanye ɨ xaijnyuꞌucaraꞌaraꞌan ɨ Dioj, aɨ mu yaujmuaꞌameꞌen pueen ɨ Dioj.
\p
\v 15 Ajta aɨn ɨ xaijnyuꞌucaraꞌaraꞌan ɨ saj raꞌancuraꞌa, capu ayan tyajaꞌamueijteꞌe saj caꞌanyejri cɨn tyuꞌumuareꞌen, sej si sajtahuaꞌa ratzɨɨnyeꞌe saɨjna tɨ tyajaꞌamueijteꞌe. Capu xaa nyaꞌu, silu ai puꞌu aɨn pueen ɨ xaijnyuꞌucari tɨ ayan aꞌamuayaꞌupuajtacaꞌa. Aɨj tu cɨn teyan raꞌanjee ɨ Dioj, tɨcɨn: “Taata yee, taata.”
\v 16 Ajta aɨjna ɨ xaijnyuꞌucaraꞌaraꞌan ɨ Dioj, ajta ɨ tamuaꞌatziiraꞌa, ayaa mu cheꞌeta manaꞌa tiꞌijmuaꞌaree tyaj nuꞌu teyan yaujmuaꞌameꞌen pueen ɨ Dioj, ɨ tɨ taꞌiyaꞌupua.
\v 17 Ajta, tɨ puaꞌa teri teyan yaujmuaꞌameꞌen pueenyeꞌen ɨ Dioj, tiꞌitɨ pu aɨjna cɨn ajta tiꞌitacɨꞌɨti. Ayaa pu tiꞌitacɨꞌɨti ɨ Dioj jemi tɨj ajta ayan tiraacɨ́ꞌɨ ɨ Cɨriistuꞌu. Tɨ puaꞌa teyan tyajta jamuan Cɨriistuꞌu rajpueijtzi, tyan tu tyajta jamuan Cɨriistuꞌu raꞌancuraꞌasin tyaɨjna tɨ rɨꞌɨ huapɨꞌɨ naa seiiraꞌa aꞌame tɨj naꞌa rusen cɨmeꞌe.
\s Aɨjna tɨ rɨꞌɨ huapɨꞌɨ naa seiiraꞌa aꞌame tɨꞌɨj auj me eꞌeveꞌeme
\p
\v 18 Ayaa pu xaa nyaꞌu tinaꞌamitejteꞌe inyeetzi. Aɨjna tɨ cai xɨ seijreꞌe ityejmi jemi, ɨ tɨ huapɨꞌɨ naa seiiraꞌa aꞌame tɨ ajta tiꞌitacɨꞌɨti tɨꞌɨjtahuaꞌa huataseijreꞌen ɨ tavastaraꞌa, eihua pu jeitzeꞌe huapɨꞌɨ ruxeꞌeveꞌe aɨjna cai aɨjna ɨ tyaj cɨn rajpueijtzi iiyan chaanaca japua.
\v 19 Ajta, tɨj naꞌa tɨ ayan tiꞌiseijreꞌe tɨ Dioj ayan tyuꞌutaahuacaꞌa, aɨ pu ari aꞌujcaꞌanyaacan cɨn rachuꞌeveꞌe ajna xɨcaaraꞌan tɨ jetzen Dioj huaꞌutaseijrata aɨme ɨ mej yaujmuaꞌameꞌen pueen.
\v 20 Ajta nain tɨj naꞌa aɨjna tɨ tiꞌiseijreꞌe, ayaa pu saɨque huaujruu tɨ ij cai ayan eenyaꞌa aꞌaraꞌani aꞌij tɨ tiꞌijxeꞌevaꞌacaa ɨ Dioj. Ma ajta, capu ayan rusaɨj huaujruu silu Dioj pu ruxéꞌeviꞌiraꞌa cɨn ayan raatyajtuaa tɨ ij ayan raajajcuareꞌen majcaꞌihuayee.
\v 21 Nain tɨ tiꞌiseijreꞌe, ayaa pu tiꞌijchuꞌeveꞌe ajna xɨcaaraꞌan tɨ jetzen Dioj ayan raatyajtuaani tɨ ij cai cheꞌe ayan caꞌanyejri cɨn raatyavaꞌɨrihuaꞌan aɨjna tɨ raꞌantipuaꞌariteꞌesin. Aj pu xaa ayan cheꞌeta naꞌa huataujseijrata aꞌame tɨj naꞌa ɨ tɨ Dioj raatyataahuacaꞌa jamuan ɨ maj yaujmuaꞌameꞌen pueen ɨ Dioj. Ruxaahua pu cɨn naa seiraꞌa aꞌame.
\v 22 Ayaa tu tiꞌijmuaꞌaree tɨ ayan eenyaꞌa aꞌayeꞌi tɨj naꞌa jajcua jɨmɨ tɨ yu eꞌireꞌenye, tɨ ayan cheꞌeta naꞌa tiꞌiseijreꞌe tɨ taujyeꞌin aɨjna cɨmeꞌe tɨ tyamuaꞌa tirajpueitzi aꞌayeꞌi tɨj jɨitaꞌa tɨ puaꞌa ayan tiraꞌutacuiꞌinye.
\p
\v 23 Me tyajta ityan, tyan tu teyan cheꞌeta tyanaꞌa tatayeꞌin aꞌini puꞌuri seijreꞌe ityejmi jemi aɨjna ɨ xaijnyuꞌucaraꞌaraꞌan ɨ Dioj, tɨ aɨn pueen ɨ taꞌanajca tɨ Dioj ayan cɨn tyaꞌataujratziiriꞌi. Taꞌatacaꞌanyaacan tu cɨn teyan rachuꞌeveꞌe tɨ ij ayan nain cɨn titáacɨꞌɨti aɨjna cɨmeꞌe tyej yaujmuaꞌameꞌen pueen ɨ Dioj, tɨ ij ajta Dioj ayan ruꞌirajtuaani ɨ tyaj ratyáhueꞌiraꞌa.
\v 24 Ayaa pu een cɨn Dioj tuꞌirajtuaa tyej ti teyan raachuꞌeveꞌen tyaɨjna ɨ tyaj cai xɨ raseij. Aru, tɨ puaꞌa teri raaseij ɨ tej rachuꞌeveꞌe, capu cheꞌe ruxeꞌeveꞌe tyaj rachueꞌevaꞌa. ¿Ni cai ayan tiꞌayajna tɨ cai maꞌa aꞌatɨ tɨ ayan rachuꞌeveꞌe aɨjna tɨ ari raseij? Capu xaa nyaꞌu maꞌa aꞌa jaꞌatɨ.
\v 25 Aꞌini tuꞌuri rachuꞌeveꞌe tyaɨjna tɨ cai xɨ taacɨ́ꞌɨ, aɨj pu cɨn ayan tyuꞌujxeꞌeveꞌe tyej teyan raachuꞌeveꞌen tyacai teyan caxaahuata.
\p
\v 26 Ajta aɨn xaijnyuꞌucaraꞌaraꞌan ɨ Dioj, aɨ pu tavaɨreꞌe aɨjna cɨmeꞌe ɨ tyaj rahuaviꞌiraca ɨ Dioj jemi, aꞌini catu aꞌij rɨni tyajɨɨmuaꞌa, ni catu aꞌatzu ramuaꞌaree tiꞌitɨ tɨ nyuucarijraꞌa ayan ruxeꞌeveꞌe tej ti teyan tyuꞌutyejnyuuni ɨ jemin. Aɨj pu cɨn aɨ pu ta jetze maꞌacan tyenyuusin. Ayaa pu tiꞌicɨꞌɨxɨ, cumu tɨ cai tyáꞌanrɨꞌɨre, aꞌini capu aꞌatɨ raayɨꞌɨtɨ tɨ ayan tyuꞌutaxaj.
\v 27 Ajta aɨjna tɨ ayan tiruꞌumuaꞌaree nain cɨmeꞌe aꞌij tyej tiꞌimuaꞌatze ɨ ta tzajtaꞌa, aɨ pu ajta ramuaꞌaree aꞌij tɨ huataujmuaꞌa aɨjna tɨ rahuavii aɨjna ɨ xaijnyuꞌucaraꞌaraꞌan ɨ Dioj aꞌini aɨ pu ayan huaꞌa japua huatanyuusin aꞌij tɨ aɨn ayan tiꞌijxeꞌeveꞌe ɨ Dioj.
\s Nain tu nuꞌu cɨn tyuꞌutyaamueꞌitɨ aɨjna cɨmeꞌe tɨ Cɨriistuꞌu taataxeꞌeve
\p
\v 28 Tyan tu tyajta teyan ramuaꞌaree tɨ Dioj ayan tavaɨreꞌe tɨ ij nain cɨn ayan teꞌirajraꞌani tɨ i aɨjna cɨn rɨꞌɨ titaataꞌan ityejmi, i tyaj raxeꞌeveꞌe ɨ Dioj. Ajta Dioj pu aɨjna cɨn ayan taatajée tej ti teyan raatyavaꞌɨrihuaꞌan aꞌij tɨ aɨn ari titaaxaꞌapɨꞌɨntariꞌiriꞌi.
\v 29 Ajta aɨme ɨ tɨ Dioj jajcua jɨmɨ huaꞌamuajtyacaꞌa tɨ ayan hueꞌirajtuaani, aɨ pu ajta jajcua jɨmɨ huaꞌantihuau tɨ ij ayan huaꞌuruuren mej mi meyan cheꞌeta manaꞌa seiraꞌa muaꞌaraꞌani tɨj aɨjna ɨ yaujraꞌan. Ajta ayan tiraaxaꞌapɨꞌɨntare tɨ ij ayan huaꞌajáꞌa pueenyaꞌa aꞌaraꞌani, aɨ pu ajta eitzeꞌe vastaꞌa pueenyaꞌa aꞌaraꞌani macai ɨ seica ɨ ruꞌihuaamuaꞌa ɨ maj muiꞌi tɨ Dioj huaꞌayaꞌupuacaꞌa.
\v 30 Ajta aɨme ɨ tɨ ayan jajcua jɨmɨ huaꞌantihuau, aɨ pu ajta huaꞌutajée. Ajta aɨme ɨ tɨ ayan huaꞌutajée, aɨ pu ajta ayan tihuaꞌuxaꞌapɨꞌɨntariꞌiriꞌi maj nuꞌu urareꞌenyaꞌacan cɨn huatyaturan ɨ jemin. Ajta aɨme ɨ tɨ ayan tihuaꞌuxaꞌapɨꞌɨntariꞌiriꞌi, aɨ pu ajta ayan huaꞌutaꞌa mej mi nain cɨn meyan cheꞌeta manaꞌa seiiraꞌa tɨj ajta aɨn seijreꞌe ɨ yaujraꞌan tɨj naꞌa rusen cɨmeꞌe.
\p
\v 31 Aɨj pu cɨn, ¿aꞌini tetyuꞌutaxajta? Tɨ puaꞌa Dioj ayan tajapua nyuuca, ¿ni auj ayan tiꞌirɨꞌɨri tɨ aꞌatɨ ayan taꞌantipuaꞌariteꞌen ityejmi? Capu xaa nyaꞌu.
\v 32 Capu Dioj ayan tiraatauuniꞌiriꞌi ɨ ruyauj tɨ ij cai huamɨꞌɨni ɨ curuu jetze, silu ayaa pu tihuaꞌutatuii ta jetze maꞌacan naijmiꞌica, tyatɨj tyanaꞌa puaꞌamua ityan. Aɨj pu cɨn, ayan cheꞌeta naꞌa ruxéꞌeviꞌiraꞌa cɨn ayan nain taatapueijveꞌesin, nain tɨj naꞌa tɨ tiꞌiseijreꞌe ɨ Cɨriistuꞌu jemi.
\v 33 ¿Aꞌataani ayan tihuáꞌaxajtziꞌiran aɨme tɨ Dioj ayan huaꞌantihuau? Capu aꞌatɨ xaa nyaꞌu, aꞌini Dioj pu rusaɨj ayan tihuaꞌuxaꞌapɨꞌɨntariꞌiriꞌi mej mi meyan urareꞌenyaꞌacan cɨn huatyaturan ɨ jemin.
\v 34 ¿Aꞌataani ayan tiꞌijxaꞌapɨꞌɨntareꞌen tɨ ayan pueijtzi taataꞌan ityejmi? Capu aꞌatɨ, aꞌini saɨj puꞌu ta jetze maꞌacan nyuu aꞌame. Aɨ pu ajta aun eꞌeseijreꞌe ɨrɨɨtaꞌan ɨ Dioj. Ai pu aɨn pueen ɨ Cɨriistuꞌu tɨ huamɨꞌɨ tajetze maꞌacan. Ee xaa nyaꞌu, eitzeꞌe pu ayan tiraavijteꞌe tej teyan raataxaj yee ai pu aɨn pueen tɨ ajta aꞌitáraa huaꞌa tzajtaꞌa ɨ mej meri huacuii.
\v 35 ¿Aꞌataani ayan teꞌentyuꞌuuna ɨ Cɨriistuꞌu jemi tɨ ij cai cheꞌe ayan taxeꞌevaꞌa? ¿Ni qui ayan tiꞌijruuren tɨ puaꞌa tiꞌitɨ tamuareꞌeristeꞌe naꞌari tɨ puaꞌa tiꞌitɨ ayan taꞌɨtziityaꞌa? Capu xaa nyaꞌu. ¿Arí tɨ puaꞌa meyan aꞌij puaꞌa taaruuren nusu tɨ puaꞌa teyan tajcu? Capu ajta aɨjna. ¿Ari tɨ puaꞌa tyaj cai aꞌij tiꞌijviicueꞌi?, caꞌɨn ¿tɨ puaꞌa ayan titáacɨꞌɨti tɨ tzɨɨniꞌiraꞌa ɨ tyaj tyaɨjna cɨn huacuiꞌini? Capu xaa nyaꞌu ayan teꞌentyuꞌuuna ɨ Cɨriistuꞌu jemi. ¿Arí tɨ puaꞌa meyan taacuiꞌini? Capu ajta xaa nyaꞌu.
\v 36 Ayaa pu teꞌeyuꞌusiꞌi tɨcɨn:
\q Tɨj naꞌa tɨ éꞌijninyei ɨ xɨcaj,
\q2 asta naꞌa cai u eꞌetyarute,
\q tɨꞌɨj pɨnaꞌa mu meyan huaꞌatuꞌireꞌe aɨme
\q2 mej mi taacuiꞌini.
\q Ayaa pu tihuaꞌamityejteꞌe
\q2 tej teyan cheꞌeta tyanaꞌa tiꞌityavaꞌɨri
\q2 matɨj aɨme ɨ canyaꞌaxɨ ɨ mej huaꞌacuiꞌica
\q2 mej mi meyan raatuaani ɨ huaꞌahueꞌiraꞌa ɨ canyaꞌaxɨ.
\m
\v 37 Capu xaa nyaꞌu ayan aꞌatɨ teꞌentyuꞌuuna. Tɨj naꞌa tɨ ayan tiꞌitaruure, nain tu cɨn teyan tyuꞌutyamueꞌitɨ aɨjna cɨmeꞌe tɨ Cɨriistuꞌu ayan taataxeꞌeve tɨ ij ayan huamɨꞌɨni ta jetze maꞌacan.
\v 38-39 Ayej xaa nyaꞌu tiꞌayajna. Ayaa pu tinaꞌamitejteꞌe inyeetzi tɨ ayan tiꞌayajna tɨ cai tiꞌitɨ ayan teꞌentyuꞌuuna tɨ ij cai cheꞌe ayan titáacɨꞌɨti aɨjna tɨ cɨn Dioj taataxeꞌeve. Capu amɨn aꞌij tɨ puaꞌa teyan ruuri huatyaturan naꞌari tɨ puaꞌa teyan huacuiꞌini. Camu majta meyan teꞌentyuꞌuuna aɨme ɨ mej tajapua tiꞌivaɨreꞌe ɨ Dioj jemi, naꞌari aɨme ɨ mej meyan tiꞌivaɨreꞌe ɨ tiyaaruꞌu jemi. Tiꞌitɨ tɨ naꞌa tɨ aꞌij seijreꞌe, tɨ puaꞌa auj tyajaꞌureꞌenyejsin naꞌari tɨ puaꞌa ari ayan teꞌirajraa nusu muáreꞌeriꞌiraꞌaraꞌan pueen ɨ aꞌatɨ, capu ajta ayan teꞌentyuꞌuuna. Capu amɨn aꞌij tɨ puaꞌa aɨn puéenyeꞌen tɨ tajapua eꞌeseijreꞌe naꞌari u tajete, tiꞌitɨ tɨ naꞌa tɨ ayan seijreꞌe, capu aꞌatzu aꞌij tiꞌirɨꞌɨri tɨ ayan teꞌentyuꞌuuna ɨ Cɨriistuꞌu jemi, aɨjna ɨ Jesús tɨ ajta tavastaraꞌa pueen.
\c 9
\s Dioj pu nuꞌu huaꞌantihuau aɨme ɨ maj Israel jetze ajtyamaꞌacan
\p
\v 1 Ayaa nu tzaahuatiꞌiraꞌa cɨn neyan tyajaꞌamueꞌixaateꞌe ɨ Cɨriistuꞌu jemi. Canu tiꞌihueꞌi nyanaꞌa. Ayaa nu áꞌanxɨjteꞌen ɨ nyamuaꞌatziiraꞌa cɨmeꞌe nyej ni nyeyan raamuaꞌati tɨ puaꞌa ayan tiraavijteꞌe nusu cai. Ajta aɨn ɨ xaijnyuꞌucaraꞌaraꞌan ɨ Dioj, aɨ pu ajta aɨjna cɨn nyavaɨreꞌe.
\v 2 Eecan nu huatyanxaꞌamɨste, nyajta aꞌanaj tɨ naꞌa neyan rajpueijtzi yu nyatzajtaꞌa.
\v 3 Tɨ puaꞌa rɨꞌɨrístacajcheꞌe, naꞌaraanajchicacheꞌe tɨ Cɨriistuꞌu ayan ma nuurainijcheꞌe tɨ ij naꞌantipuaꞌariteꞌen huaꞌa jetze maꞌacan ɨ nyeꞌihuaamuaꞌa, aɨme ɨ mej meyan cheꞌeta manaꞌa airaujneijte nyatɨj inyaa.
\v 4 Aɨ mu Israel jetze ajtyamaꞌacan. Ai mu aɨn pueen ɨ tɨ Dioj huaꞌayaꞌupuacaꞌa. Aɨ pu ajta huataseijre huaꞌa jemi aɨjna tɨ naa seiraꞌa aꞌaraa mej mi meyan raamuaꞌaree tɨ Dioj aun huatyajturaa huaꞌa jemi. Dioj pu ajta huaꞌa jemi muiꞌicaca cɨn tyuꞌutaꞌa ɨ runyuuca aꞌij tɨ ayan tyaꞌameꞌencheꞌe. Majta aɨme, ayaa mu raꞌancuraꞌa maɨjna ɨ nyuucari ɨ maj cɨn tiꞌijta, majta maɨjna ɨ yeꞌira aꞌij mej tiꞌinaꞌamiche. Dioj pu ajta muiꞌicaca cɨn tyaꞌataujratziiriꞌi huaꞌa jemi.
\v 5 Aɨ mu majta huaꞌa jetze huanyej ɨ tavaujsimuaꞌa jetze. Ajta, huaꞌa jetze pu ayan airaujneijte aɨjna ɨ Cɨriistuꞌu tɨ ajta aɨn pueen ɨ Dioj ɨ tɨ nain cɨn antyujmuaꞌaree. Ticheꞌe teyan rɨꞌɨ tiraataꞌacareꞌen tɨj naꞌa rusen cɨmeꞌe. Cheꞌe ayen tyajaꞌureꞌenyen.
\p
\v 6 Canu nyeyan tyajaꞌamueꞌixaateꞌe tɨ aɨn nyuucari cai tiꞌitɨ vaɨraꞌacaa tɨ Dioj ayan tihuaꞌutaꞌa. Canu xaa nyaꞌu, aꞌini aɨme ɨ mej jetzen airaujneijte ɨ tayaꞌupuacɨꞌɨ aɨjna ɨ Israel, camu naimiꞌi meyan Israel jetze ajtyamaꞌacan.
\v 7 Ajta capu ayan huataujmuaꞌa maj naimiꞌi yaujmuaꞌameꞌen pueen aɨjna ɨ Abraham tyaacan tɨ puaꞌa meyan maɨjna jetze airaujneijte. Camu xaa nyaꞌu. Ma ajta ayan tɨcɨn: “Ayaa pu amiteeraꞌa aꞌame. Aɨ muꞌu aɨn pueenyaꞌa muaꞌajuꞌun ɨ aꞌayaujmuaꞌa, aɨme ɨ mej jetzen airanyejsin aɨjna jetze ɨ Isaac.”
\v 8 Ayaa puꞌu naꞌa, aɨme ɨ maj Abraham jetze airaujneijte, capu ayaa naꞌa huaꞌucɨ́ꞌɨ naijmiꞌica tɨ Dioj ayan huaꞌayaꞌupuacaꞌa maɨjna cɨmeꞌe maj maɨjna jetze airaujneijte. Ayaa pu ajta tihuaꞌacɨꞌɨti aɨme ɨ maj tyaꞌatzaahuateꞌe maɨjna tɨ cɨn Dioj tyaꞌataujratziiriꞌi. Aɨme pu xaa ayan amiteeraꞌa aꞌame maj meyan yaujmuaꞌameꞌen pueen aɨjna ɨ Abraham tyaacan.
\v 9 Ayaa puꞌu, aꞌini Dioj pu ayan tyaꞌataujratziiriꞌi tɨcɨn: “Ajna tɨ ari ayan tiraaxaꞌapɨꞌɨntare tɨ ayan tyajaꞌureꞌenyejsin, nyaa nu nyajtahuaꞌa ya uveꞌenyejsin. Ajta aɨn ɨ Sara, aɨ pu arí tiyauj aꞌame.”
\p
\v 10 Ajta ɨ tɨ eitzeꞌe ruxeꞌeveꞌe, ayaa pu tiraaruu aɨjna ɨ Rebeca. Aɨ pu huaꞌapuaca tiyaujmuaꞌa aꞌaraa. Ajta saɨj puꞌu aɨn pueenyaꞌa ɨ huaꞌataata, aɨjna ɨ tayaꞌupuacɨꞌɨ, aɨjna ɨ Isaac.
\v 11-13 Ajta matɨꞌɨj cai xɨ huanunuꞌeihuacaꞌa ɨ maj huaꞌapua, matɨꞌɨj cai xɨ tiꞌitɨ aꞌij huaruurajcaꞌa, tɨ puaꞌa tɨ xaꞌapɨꞌɨn een naꞌari tɨ aꞌij puaꞌa een, ayaa pu Dioj tiraataꞌixaa ɨ huaꞌanaana tɨcɨn: “Aɨjna tɨ vastaꞌa, aɨ pu raatyavaɨreꞌesin aɨjna tɨ paꞌarɨꞌɨ.” Ajta ayan tɨcɨn: “Nyaa nu raataxeꞌeve nyaɨjna ɨ Jacobo. Nyajta rájchaɨraꞌacaa nyaɨjna ɨ Esaú.” Ayaa pu een cɨn tiraataꞌixaa tɨ ij ayan raamuaꞌaree aꞌij tɨ rɨcɨ ɨ Dioj tɨ aɨn seij avaꞌahuau. Capu ayan aɨjna cɨn raꞌavaꞌahuau aɨjna cɨmeꞌe tɨ aɨn aꞌatɨ tiꞌitɨj cɨn raꞌaraꞌastijre, silu aɨ pu ayan een cɨn raꞌavaꞌahuau tɨ aɨn Dioj rusaɨj raatajée.
\p
\v 14 Aꞌini teyan tyaɨjna cɨn tyuꞌutaxajta. ¿Ni qui teyan tyuꞌutaxajta tɨ cai xaꞌapɨꞌɨn rɨcɨ ɨ Dioj? Catu xaa nyaꞌu.
\v 15 Ayaa pu tiraataꞌixaa aɨjna ɨ Moisés tɨcɨn: “Nyaa nu neyan tiraatauuniꞌira aꞌatɨ tɨ naꞌa tɨ ayan naꞌaraanajchi. Nyajta nu neyan raꞌacuꞌuve aꞌatɨ tɨ naꞌa tɨ ayan naꞌaraanajchi.”
\v 16 Aɨj pu cɨn, capu ayan tiꞌijcɨꞌɨti seij ɨ aꞌatɨ aɨjna cɨmeꞌe tɨ ayan raxeꞌeveꞌe rusaɨj. Capu ajta aɨjna cɨn tɨ tiꞌitɨj rɨcɨ, silu aɨjna cɨn pu ayan tiꞌijcɨꞌɨti tɨ Dioj ayan ráꞌancuꞌuvajxɨ.
\v 17 Aɨj pu cɨn Dioj ayan tiraataꞌixaa aɨjna ɨ Faraón tɨcɨn: “Ayaa nu nyaɨjna cɨn neyan timuéijca pej teꞌentyarute paɨjna cɨmeꞌe pej iꞌi rey, nyej ni huaꞌutaseijrateꞌen aꞌij nyej huarɨni ɨ nyamuareꞌeriꞌiraꞌa cɨmeꞌe nyej ni pueijtzi muaataꞌan. Aj mu mi nyeetzi cɨmeꞌen meyan tihuaꞌutaꞌixaateꞌesin aꞌu tɨ naꞌa maj huachaatɨme iiyan chaanaca japua.”
\v 18 Aɨj pu cɨn Dioj ayan raꞌacuꞌuve aꞌatɨ tɨ naꞌa tɨ ayan raꞌaraanajchi. Ajta pu ayan raataꞌaca tɨ ayan raꞌantyánaamɨn ɨ ruxaijnyuꞌuca aꞌatɨ tɨ naꞌa tɨ ayan raꞌaraanajchi ɨ Dioj tɨ ij ayan raaruuren.
\p
\v 19 Ajta saɨj muan, ayan pu tinaataꞌixaateꞌesin tɨcɨn: “Tɨ puaꞌa ayan tiꞌayajna, ¿aꞌini een cɨmeꞌe Dioj ayan auj ta jetze tiꞌipuaꞌariteꞌe? ¿Aꞌataani rajchaɨreꞌe ɨ Dioj?”
\v 20 Me nyajta inyaa, ayaa nu tiꞌimueꞌihuau tɨcɨn: “¿Aꞌataani paj pueen pej pi peyan anyuusteꞌe ɨ Dioj jemi mɨ pej iꞌi tyaataꞌa?” Dioj pu muaatyataahuacaꞌa mueetzi. ¿Ni peyan tiraataꞌixaateꞌesin paɨjna tɨ muaatyataahuacaꞌa tɨcɨn: “Aꞌini een cɨmeꞌe peyan naatyataahuacaꞌa”? Capaj xaa nyaꞌu.
\v 21 Nicheꞌe nyajtahuaꞌa seij tiꞌimueꞌihuau nyaɨjna cɨmeꞌe ɨ aꞌatɨ tɨ xaꞌari tíꞌitaꞌahuaca. ¿Ni cai ayan tiraavijteꞌe tɨ aɨn seica huátaahuan ɨ xaꞌari tɨ naa tiꞌiseijreꞌe, tɨ ajta huapɨꞌɨ tiꞌinajchi, ajta seica tɨ cai naa tiꞌen, tɨ chaꞌanaꞌa naꞌa cɨn tiꞌivaɨreꞌe? Ajta nain, aɨj pu cɨn ayan tíꞌitaavijhuacaꞌa seij cɨmeꞌe ɨ xarij.
\p
\v 22 ¿Aꞌini panaꞌa tyuꞌutaxajta tɨ puaꞌa Dioj ayan huárɨniicheꞌe tɨ aɨn cai huatanyuꞌucan, ajta ayan taꞌutaviicueꞌirancheꞌe tyamuaꞌa naa aꞌij mej rɨꞌɨ muaꞌayeꞌi aɨme ɨ tɨ ayan tiraavijteꞌe tɨ aɨn Dioj pueijtzi huaꞌutaꞌan? Ayaa pu een cɨn rɨni ɨ Dioj tɨ ij ayan amiteeraꞌa tɨ aɨn rumuareꞌeriꞌiraꞌa cɨn pueijtzi huaꞌutaꞌasin aɨme ɨ mej aꞌij puaꞌa titetyujchaꞌɨ.
\v 23 Ajta, ayaa pu taꞌutaviicueꞌirancheꞌe tɨ ij ajta tiraataseijrata tɨ ayan huapɨꞌɨ rɨꞌɨ tihuaꞌutaꞌa aɨme ɨ tɨ huaꞌancuꞌuvajxɨ, ɨ tɨ anacai ayan rɨꞌɨ tihuaꞌutyajtuaa tɨ ij ayan tihuaꞌucɨꞌɨti mej mi ruuri meyan eenyeꞌequeꞌe huatyaturan ɨ jemin tɨj naꞌa rusen cɨmeꞌe.
\v 24 Ayaa pu xaa nyaꞌu tiꞌitaruuren ityejmi ɨ tɨ ari taatajée, ityejmi i tyaj Israel jetze ajtyamaꞌacan, ajta aɨme ɨ maj seij chuejraꞌa japua eꞌemaꞌacan.
\v 25 Jee xaa nyaꞌu, ayaa pu aɨjna cɨn tiꞌixaj ɨ Dioj aɨjna jetze tɨ ayan raꞌuteyuꞌuxacaꞌa aɨjna ɨ Oseas tyaacan tɨcɨn:
\q Aɨme ɨ maj cai anacai nyeetzi jetze ajtyamaꞌacantacaꞌa,
\q2 nuꞌuri neyan huaꞌutamuaꞌatzi
\q2 tɨcɨn maj nyetyaɨtejmuaꞌa pueen.
\q Ajta aɨjna nyaj cai raataxeꞌeve,
\q2 ayaa nu nyajta raatámuaꞌatzi
\q2 tɨcɨn mɨ nyaj muaxeꞌeveꞌe.
\q
\v 26 Ajta, ayaa pu teꞌeme ajna
\q2 aꞌu maj meyan tihuaꞌutaꞌixaa ɨ tyaɨte
\q2 maj nuꞌu cai nyetyaɨtestyamuaꞌa pueen,
\q amajna mu meyan huaꞌutamuaꞌatzi
\q2 maj nuꞌu yaujmuaꞌameꞌen pueen ɨ Dioj tɨ iꞌi ruuri.
\m
\v 27 Ajta aɨn ɨ Isaías tyaacan, ayaa pu caꞌanin cɨn tyuꞌutaxajtacaꞌa aɨme cɨmeꞌen ɨ maj Israel jetze ajtyamaꞌacan tɨcɨn: “Capu amɨn aꞌij tɨ puaꞌa meyan muiꞌicá aɨme ɨ huaꞌayaujmuaꞌa aɨme ɨ mej Israel jetze ajtyamaꞌacan. Tɨ puaꞌa maj meyan aꞌachu araxca tɨj naꞌa tɨ seijreꞌe ɨ sej tɨ aun aꞌajca aꞌu tɨ aꞌavastɨme ɨ jaj, capu naijmiꞌica huiiratuaasin ɨ Dioj, silu aɨme puꞌu huiiratuaasin ɨ maj cɨn meyan huatyajturaa.
\v 28 Ayaa pu teꞌeme, aꞌinicaꞌanacan pu Dioj ayan nain cɨn raꞌantipuaꞌariteꞌesin tɨ pueijtzi huaꞌutaꞌasin aɨme ɨ maj yan huachaatɨme ɨ chaanaca japua.”
\v 29 Ayaa pu cheꞌeta anacai tiraꞌuteyuꞌuxacaꞌa aɨjna ɨ Isaías tɨcɨn:
\q Ayaa tu eenyaꞌa taꞌajuꞌuncheꞌe matɨj aɨme
\q2 ɨ maj maun aꞌuchaatɨmaꞌacaa u Sodoma,
\q matɨj majta aɨme ɨ maj aun eꞌechajcaꞌa u Gomorra,
\q2 ɨ maj cai cheꞌe eꞌeseijreꞌe maujna.
\q Ma ajta aɨn Dioj, ɨ tɨ tihueꞌijteꞌe naijmiꞌica
\q2 ɨ maj aun eꞌeseijreꞌe u tajapua,
\q aɨ pu ayan raatyajtuaa ityejmi jemi
\q2 mej mi meyan huatyaturan aɨme
\q2 ɨ maj ta jetze airaujneijte.
\s Cɨmeꞌen aɨme ɨ mej Israel jetze ajtyamaꞌacan, ajta ɨ nyuucari tɨ Dioj raatyajtuaa ityejmi jemi
\p
\v 30 Aɨj pu cɨn, ¿aꞌini tiꞌitɨ tetyuꞌutaxajta? Ayaa puꞌu xaa nyaꞌu. Aɨme ɨ maj seij chuejraꞌa japua eꞌemaꞌacan, camu meyan rahuaucaꞌa mej mi meyan urareꞌenyaꞌacan cɨn huatyaturan ɨ Dioj jemi. Capu amɨn aꞌij. Ayaa pu ajta tihuaꞌucɨꞌɨ maj meyan urareꞌenyaꞌacan cɨn huatyajturaa ɨ Dioj jemi maɨjna cɨmeꞌe mej tyaꞌantzaahua.
\p
\v 31 Ma majta aɨme, ɨ maj Israel jetze ajtyamaꞌacantacaꞌa, ɨ maj meyan rahuaucaꞌa mej mi urareꞌenyaꞌacan cɨn huatyaturan ɨ Dioj jemi, maɨjna cɨmeꞌe mej meyan raꞌaraꞌastijre maɨjna ɨ nyuucari ɨ maj cɨn tiꞌijta, aɨ mu xaa cai meyan raꞌancuraꞌa maɨjna ɨ maj rahuaucaꞌa.
\v 32-33 ¿Aꞌini een cɨn macai meyan raꞌancuraꞌa? Ayej xaa nyaꞌu, ayaa mu een cɨn huamueꞌitɨche maɨjna cɨmeꞌe maj rahuaucaꞌa mej mi meyan huarɨni maj tiꞌitɨj cɨn tyaꞌaraꞌastijreꞌen. Camu meyan rahuaucaꞌa maɨjna cɨmeꞌe maj tyaꞌantzaahua. Aɨ mu meyan huamueꞌitɨche maɨjna cɨmeꞌe maj ratite maɨjna tɨ cɨmeꞌen ayan teꞌeyuꞌusiꞌi tɨcɨn:
\q Casiꞌi, ayaa nu ratyatuaasin nyaɨjna
\q2 ɨ aꞌatɨ nyaujna u Sión.
\q Ayaa pu tinaatyavaꞌɨri tɨj ɨ tetej
\q2 ɨ mej jetzen aꞌijcáꞌacatá ɨ tyetyaca,
\q ɨ maj majta jetzen aꞌitavitze.
\q Ma ajta capu raatatyeviꞌirasteꞌesin aɨjna
\q2 ɨ aꞌatɨ tɨ ayan ráꞌatzaahuateꞌen.
\c 10
\s Camu nuꞌu raatamuáꞌa maɨjna tɨ Dioj raatyajtuaa
\p
\v 1 Ayaa nu tyajaꞌamueꞌixaateꞌe, nyeꞌihuaamuaꞌa, nyej neyan aꞌancaꞌanyaacan cɨn tiꞌijxeꞌeveꞌe yu nyatzajtaꞌa, nyajta nu rahuavii ɨ Dioj tɨ ij aɨn Dioj ayan hueꞌirajtuaani.
\v 2 Aɨme nu cɨn neyan tiꞌixa ɨ maj aꞌujcaꞌanyaacan cɨn ranaꞌamiche ɨ Dioj. Aru camu tzaahuatiꞌiraꞌa cɨn ranaꞌamiche.
\v 3 Matɨꞌɨj meyan rahuauca aꞌij mej yeꞌi huarɨni mej mi meyan urareꞌenyaꞌacan cɨn huatyaturan ɨ Dioj jemi, camu aꞌatzu ramuaꞌareeracaꞌa aꞌij tɨ Dioj ari tiraaxaꞌapɨꞌɨntare tɨ ij aꞌatɨ ayan urareꞌenyaꞌacan cɨn huatyaturan ɨ jemin. Ayaa muꞌu rahuauca maɨjna ɨ maj cɨn rujɨɨmuaꞌa manaꞌa rajtyau. Aɨj mu cɨn meyan ratite maɨjna ɨ tɨ Dioj ari ayan tiraaxaꞌapɨꞌɨntare.
\v 4 Ayaa puꞌu naꞌa, aꞌini Cɨriistuꞌu pu nain cɨn raꞌaraꞌastijre aɨjna ɨ nyuucari ɨ maj cɨn tiꞌijta tɨ ij aꞌatɨ tɨ naꞌa ayan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tɨ aɨn ɨ jaꞌatɨ ayan tyaꞌatzaahuateꞌe.
\p
\v 5 Ajta aɨjna ɨ Moisés, ayaa pu raꞌuyuꞌuxacaꞌa tɨ nuꞌu aɨn ɨ aꞌatɨ tɨ ayan raꞌastijreꞌe aɨjna ɨ nyuucari ɨ maj cɨn tiꞌijta, ayaa pu nuꞌu ajta tyuꞌujxeꞌeveꞌe tɨ aɨn aɨjna jetze araujcaꞌanye ɨ nyuucari.
\v 6-7 Ajta aɨjna ɨ aꞌatɨ tɨ ari urareꞌenyaꞌacan cɨn huatyajturaa ɨ Dioj jemi, ayaa pu tiꞌimuaꞌatze tɨcɨn: “Capej peyan tyaꞌumuaꞌatzɨ ɨ aꞌatzajtaꞌa tɨ ayan ruxeꞌeveꞌe paj aꞌujnyén u tajapua pej yáravaꞌacájneijteꞌen paɨjna ɨ Cɨriistuꞌu.” Ajta ayan tɨ aɨjna cɨmeꞌen: “Capej peyan paj tyetyaꞌɨmɨ aꞌucaanyen ɨ tajete paj raꞌitatuaani ɨ Cɨriistuꞌu huaꞌa tzajtaꞌa ɨ mej meri huacuii.”
\v 8 Ma ajta, ayaa pu tiꞌixa aɨjna tɨ tzaahuatiꞌiraꞌa cɨn huatyajturaa urareꞌenyaꞌacan cɨn ɨ Dioj jemi tɨcɨn: “Puꞌuri mueetzi jemi seijreꞌe ɨ nyuucari paj peyan tihuaꞌutaꞌixaateꞌen, pajta paɨjna jetze peyan tiꞌimuaꞌatza ɨ aꞌa tzajtaꞌa.” Ai pu aɨn pueen ɨ nyuucari ɨ tej teyan tihueꞌixaatyaꞌa taꞌayeꞌi.
\v 9 Ayaa puꞌu naꞌa, aꞌini tɨ puaꞌa mamuaseiiraca ɨ tyaɨte, pej peyan raataxaj yee Jesús pu tavastaraꞌa pueen, ajta tɨ puaꞌa peyan tyaꞌatzaahuateꞌe ɨ aꞌatzajtaꞌa tɨ Dioj ayan raꞌajjáj huaꞌatzajtaꞌa ɨ mɨꞌɨchite, aj pu xaa Dioj mueꞌirajtuaani.
\v 10 Jee xaa nyaꞌu, ayaa pu tiꞌayajna, aꞌatɨ pu ayan urareꞌenyaꞌacan cɨn huatyaturaasin ɨ Dioj jemi aɨjna cɨmeꞌe tɨ tyaꞌatzaahuateꞌe ɨ rutzajtaꞌa. Dioj pu ajta ruꞌirajtuaasin aɨjna cɨmeꞌe tɨ aɨn aꞌatɨ ayan tyuꞌutaxajtacaꞌa tɨ Dioj jetze ajtyamaꞌacan, meseíraca ɨ tyaɨte.
\p
\v 11 Ayej xaa nyaꞌu tiꞌayajna, aꞌini ayaa pu teꞌeyuꞌusiꞌi ɨ nyuucari jetze tɨcɨn: “Capu aꞌanaj ratatyeviꞌirasteꞌesin aꞌatɨ tɨ naꞌa tɨ ráꞌantzaahuateꞌen aɨjna ɨ Cɨriistuꞌu.”
\v 12 Ayaa puꞌu, naimiꞌi mu ruxaꞌa een, aɨme ɨ maj Israel jetze ajtyamaꞌacan, majta aɨme ɨ mej seij chuejraꞌa japua eꞌemaꞌacan, aꞌini seij puꞌu aɨn pueen ɨ tavastaraꞌa tɨ ayan tiꞌitaijteꞌe naijmiꞌica ityejmi, tɨ ajta nain cɨn rɨꞌɨ tihuaꞌataꞌaca aɨme ɨ mej meyan rahuavii tɨ aɨn huaꞌutavaɨreꞌen.
\v 13 Ajta ayan tyeꞌeyuꞌusiꞌi tɨcɨn: “Aꞌatɨ tɨ naꞌa tɨ ayan rahuauhuau ɨ tavastaraꞌa jemi tɨ aɨn raatavaɨreꞌen, Dioj pu ayan ruꞌirajtuaasin aɨjna ɨ aꞌatɨ.”
\v 14 Aru, ¿aꞌini tiꞌirɨꞌɨri mej meyan rahuaviira maɨjna ɨ tavastaraꞌa tɨ puaꞌa maj cai xɨ raꞌatzaahuatyaꞌa? Capu aꞌij tiꞌirɨꞌɨri xaa nyaꞌu. Ajta, ¿aꞌini tiꞌirɨꞌɨri mej meyan ráꞌantzaahuateꞌen tɨ puaꞌa maj cai xɨ raanamuajriꞌi maɨjna aꞌatɨ tɨ pɨrɨcɨ? Capu aꞌatzu aꞌij tiꞌirɨꞌɨri. Ajta, ¿aꞌini tiꞌirɨꞌɨri mej meyan raanamuaj tɨ puaꞌa cai aꞌatɨ ayan tihuaꞌutaꞌixaateꞌen? Capu xaa nyaꞌu aꞌij tiꞌirɨꞌɨri.
\v 15 Ajta, ¿aꞌini tiꞌirɨꞌɨri mej meyan tihuaꞌutaꞌixaateꞌen tɨ puaꞌa ma cai huataitiꞌihuacaꞌa maj aun áꞌujuꞌun huaꞌa jemi? Capu xaa nyaꞌu aꞌij tiꞌirɨꞌɨri. Aɨj pu cɨn ayan teꞌeyuꞌusiꞌi tɨcɨn: “Eecan tu huapɨꞌɨ naa huaꞌaseijrateꞌe aɨme ɨ maj huataitiꞌihuacaꞌa tejmi jemi mej mi taataꞌixaateꞌen maɨjna cɨmeꞌen ɨ tavastaraꞌa.”
\p
\v 16 Ma ajta, camu naimiꞌi meyan raꞌancuraꞌa maɨjna ɨ nyuucari ɨ tyaj cɨn tatyamuaꞌaveꞌe, aꞌini ayaa pu tyuꞌutaxajtacaꞌa aɨjna ɨ Isaías tyaacan tɨcɨn: “Tavastaraꞌa, capu aꞌatɨ ayan ráꞌantzaahua aꞌij tyej tihuaꞌutaꞌixaa.”
\v 17 Ayaa puꞌu. Aꞌatɨ pu ayan tyaꞌatzaahuateꞌe aɨjna cɨmeꞌe tɨ ayan raanamuajriꞌi ɨ mej tyuꞌutaxajtacaꞌa. Ajta aɨn ɨ nyuucari ɨ mej meyan raataxajtacaꞌa, ayaa mu een cɨn raataxajtacaꞌa aꞌini Cɨriistuꞌu pu ayan huaꞌutaij.
\p
\v 18 Nyajta inyaa, ayaa nu tyajaꞌamueꞌihuau tɨ puaꞌa macai raanamuajriꞌi. Aꞌini mijta, xaa nyaꞌu. Ayan teꞌeyuꞌusiꞌi tɨcɨn:
\q Ayaa pu nainjapua namuajreꞌe
\q2 aꞌij mej tiꞌixaxaꞌa iiyan chaanaca japua.
\q Ajta huaꞌanyuuca, muꞌuri meyan raanamuajriꞌi
\q2 aꞌu tɨ naꞌa yan japuan ɨ chaanaca tɨj naꞌa aꞌuyauj.
\m
\v 19 Nyajtahuaꞌa nu neyan tyajaꞌamueꞌihuau tɨ puaꞌa macai yauꞌeitaa muaꞌaraa aɨme ɨ maj Israel jetze ajtyamaꞌacan. Ajmiꞌi pu ayan tyuꞌutanyúu aɨjna ɨ Moisés tyaacan. Ayan tɨcɨn:
\q Ayaa nu caꞌanyejri cɨn amuaataꞌasin
\q2 saj ahuaujchueereꞌen nyaɨjna cɨmeꞌe
\q2 nyaj rɨꞌɨ tihuaꞌutaꞌasin aɨme
\q2 ɨ maj cai Israel jetze ajtyamaꞌacan.
\q Nyajta nu amuaatanyúꞌucasteꞌesin nyaɨjna cɨmeꞌe
\q2 nyej ni rɨꞌɨ tihuaꞌutaꞌasin aɨme ɨ tyaɨte
\q2 ɨ maj cai rɨꞌɨ me tityaꞌumuámuaꞌaree.
\m
\v 20 Ajta aɨn Isaías, ayaa pu huatauraꞌa tɨ ayan a jeijreꞌe tyuꞌutaxaj tɨcɨn:
\q Ayaa mu naꞌantinajchacaꞌa aɨme
\q2 ɨ maj cai nyaꞌuuhuausimaꞌa.
\q Nyajta nu huatanseijratacaꞌa aɨme jemi
\q2 ɨ maj cai nyahuaucaꞌa.
\m
\v 21 Ma ajta aɨn, ayaa pu tyuꞌutaxajtacaꞌa aɨme cɨmeꞌen ɨ mej Israel jetze ajtyamaꞌacantacaꞌa tɨcɨn: “Tɨꞌɨj pɨ naꞌa nain xɨcaj tzajtaꞌa, ayaa nu huaꞌahuavii mej mi saɨque tyuꞌumuaꞌati inyeetzi jemi. Ma ajta, camu aꞌatzu naꞌastijreꞌe. Tyamuaꞌa mu antaujnaamɨ inyeetzi jemi.”
\c 11
\s Cɨmeꞌen ɨ Israel, ɨ tɨ Dioj raꞌantihuau
\p
\v 1 Aɨj nu cɨn neyan tyajaꞌamueꞌihuaꞌu. ¿Ni qui ari ma huaꞌuhuaꞌaxɨ ɨ Dioj aɨme ɨ maj tyaɨtestyamuaꞌameꞌen pueen? Capu xaa nyaꞌu, aꞌini capu ma nuurai inyeetzi, i nyaj nyajta Israel jetze ajtyamaꞌacan, aꞌini aɨj nu jetze airáanye ɨ Abraham tyaacan, nyajta huaꞌa jetze ajtyamaꞌacan aɨme ɨ mej airaujneijte maɨjna jetze ɨ Benjamín.
\v 2 Ee xaa nyaꞌu, capu ayan ma huaꞌuhuaꞌaxɨ ɨ Dioj aɨme ɨ rutyaɨtestyamuaꞌa ɨ tɨ jajcua ɨmɨ huaꞌantihuau. ¿Ni sacai seyan ramuaꞌaree aꞌij tɨ teꞌeyuꞌusiꞌi ɨ yuꞌuxari jetze tɨ aɨjna cɨn ayan tyaꞌaxa aꞌij tɨ aɨn Elías ayan tiraatyajhuau ɨ Dioj jemi tɨ ij aɨn pueijtzi huaꞌutaꞌan? Ayan tɨcɨn:
\v 3 “Casiꞌi, nyavastaraꞌa, muꞌuri huaꞌucuii aɨme ɨ mej mueetzi jetze maꞌacan tiꞌixaxaꞌa. Majta meyan tyuꞌutauunaxɨ maɨjna ɨ tyajcua ɨ mej japuan tiꞌimuaɨꞌɨvajtaca. Nyaa nuꞌu ni ya huatyejvee. Capu cheꞌe maa aꞌatɨ. Majta meri nyajeꞌicatacu.” Ayaa puꞌu tyuꞌutaxajtacaꞌa aɨjna ɨ Elías.
\p
\v 4 Ma ajta aɨn ɨ Dioj, ayaa pu tyuꞌutanyúu tɨcɨn: “Ayaa nu huaꞌutyajtuaa mej mi meyan huatyaturan inyeetzi jemi aꞌachu cumu arahuaꞌapua viꞌiraꞌa ɨ tyaɨte, ɨ maj cai aꞌanaj ranajchacaꞌa maɨjna ɨ Baal.” Ayaa pu tiraataꞌixaa.
\v 5 Ayaa pu cheꞌeta naꞌa seijreꞌe ijii aɨme ɨ maj tyaɨtestyamuaꞌameꞌen pueen. Dioj pu ruxéꞌeviꞌiraꞌa cɨn huaꞌantihuau.
\v 6 Ajta tɨ puaꞌa Dioj ayan huaꞌantihuau ruxéꞌeviꞌiraꞌa cɨmeꞌe, capu cheꞌe rɨꞌɨri mej meyan tiꞌitɨ cɨn teꞌentyarute ɨ jemin aɨjna cɨmeꞌe mej meyan tiꞌitɨj cɨn raꞌaraꞌastijren. Naꞌari cai, capu tiꞌitɨ aꞌij tiꞌityavaꞌɨri tɨ Dioj ayan huaꞌantihuau ɨ ruxéꞌeviꞌiraꞌa cɨmeꞌe.
\p
\v 7 ¿Aꞌini naꞌaqui? Aɨjna ɨ maj aꞌujcaꞌanyaacan cɨn rahuaucaꞌa aɨme ɨ maj Israel jetze ajtyamaꞌacantacaꞌa, camu raꞌancuraꞌa maɨjna. Ma majta, aɨme ɨ tɨ Dioj huaꞌantihuau, aɨ mu xaa raꞌancuraꞌa. Majta aɨme ɨ seica, Dioj pu ayan caꞌanijraꞌa huaꞌutaꞌa mej mi antaujnaamɨn ɨ ruxaijnyuꞌuca ɨ jemin.
\p
\v 8 Ayaa puꞌu naꞌa, aꞌini ayaa pu teꞌeyuꞌusiꞌi tɨcɨn: “Dioj pu ayan huaꞌuruu mej mi meyan tyuꞌujtɨmueꞌira ɨ rumuꞌu jetze. Ayaa pu huaꞌuruu tɨ ij cai aꞌij tihuaꞌamityejtyaꞌa ɨ maj rasiseꞌij, mej mi majta cai yauꞌeitaa muaꞌaraꞌani ɨ maj ranamuaj. Ayaa puꞌi eenyaꞌa jaꞌaraa tɨj naꞌa tɨ yu eꞌireꞌenye.”
\v 9 Ajta aɨn ɨ David tyaacan, ayaa pu tyuꞌutaxajtacaꞌa tɨcɨn:
\q Micheꞌe cai cheꞌe meyan rutyamuaꞌavaꞌa
\q maɨjna cɨmeꞌe tɨ eihua tihuaꞌucɨꞌɨ,
\q silu micheꞌe seica tihuaꞌariꞌi nain cɨmeꞌe,
\q2 majta huaꞌantipuaꞌariteꞌen.
\q Cheꞌe ayan huaꞌa japua rajveti
\q2 aꞌij tɨ tiraavijteꞌe aɨjna cɨmeꞌe
\q2 mej autaꞌɨtze ɨ Dioj jemi.
\q
\v 10 Cheꞌe cai ayan tihuaꞌamityejtyaꞌa aꞌij tɨ tiꞌitɨ tihuaꞌucɨꞌɨti.
\q Micheꞌe meyan tyaujcaꞌanihuaꞌan tɨj naꞌa
\q2 tɨ yu aucaꞌitɨ aꞌame maɨjna cɨmeꞌe
\q2 maj caꞌanyejri cɨn tiꞌimuareꞌe.
\s Cɨmeꞌen aꞌij tɨ nuꞌu Dioj hueꞌiratuaasin aɨme ɨ maj cai Israel jetze ajtyamaꞌacan
\p
\v 11 Nyajta nu neyan tyajaꞌamueꞌihuaꞌu. ¿Ni qui meyan nain cɨn autaꞌɨtze tɨ ij ayan huaꞌa japua rajveti mej rajpueiitzi muaꞌaraꞌani tɨj naꞌa rusen cɨmeꞌe, tɨ ij cai cheꞌe rɨꞌɨristan tɨ Dioj hueꞌirajtuaani? Capu xaa nyaꞌu aꞌatzu, silu ayaa pu eenyaꞌa aꞌaraa. Aꞌini aɨ mu autyajturaa ɨ Dioj jemi, Dioj pu ayan rɨꞌɨ tihuaꞌutaꞌa aɨme ɨ mej seij chuejraꞌa japua eꞌemaꞌacan mej mi meyan ruuri huatyaturan ɨ jemin. Ayaa pu een cɨn huarɨj ɨ Dioj tɨ ij ayan huaꞌuruuren aɨme ɨ maj Israel jetze ajtyamaꞌacan mej mi chueeraꞌa muaꞌaraꞌani.
\v 12 Ajta, tɨ puaꞌa Dioj ayan eihua huapɨꞌɨ rɨꞌɨ tihuaꞌutaꞌa aɨme ɨ mej seij chuejraꞌa japua eꞌemaꞌacan aɨjna cɨmeꞌe ɨ mej meyan huamueꞌitɨche ɨ jemin aɨme ɨ mej Israel jetze ajtyamaꞌacantacaꞌa, eihua pu eitzeꞌe huapɨꞌɨ tihuaꞌutaꞌasin naijmiꞌica ajna xɨcaaraꞌan tɨ jetzen huaꞌanaijmireꞌen aɨme ɨ mej Israel jetze ajtyamaꞌacan.
\p
\v 13 Ayaa nu tyajaꞌamueꞌixaateꞌe mɨ sej seij chuejraꞌa japua eꞌemaꞌacan, aꞌini Dioj pu ayan tinaataij nyej neyan tyajamuaataꞌixaateꞌen muejmi, ayaa nu tyuꞌutancaꞌanyej nyej ni nain cɨn jamuaatyavaɨreꞌen aꞌij tɨ tiraavijteꞌe.
\v 14 Ayaa nu een cɨn rɨcɨ nyej nyaɨjna cɨn caꞌanijraꞌa huaꞌutaꞌan nyaɨme ɨ nyaxaꞌaj tyaɨte tɨ puaꞌa rɨꞌɨristan mej mi chueeraꞌa muaꞌaraꞌani nyej ni jeꞌicaca antimuéꞌitɨn mej meyan ráꞌantzaahuateꞌen.
\v 15 Ayaa puꞌu, tɨꞌɨj aɨn Dioj ayan ma huaꞌuhuaꞌaxɨ aɨme ɨ mej Israel jetze ajtyamaꞌacantacaꞌa, aj pu i aɨn huaꞌancureꞌeviꞌitɨ aɨme ɨ mej seij chuejraꞌa japua eꞌemaꞌacantacaa. ¿Aꞌini teꞌeme icu, tɨꞌɨj Dioj ajtahuaꞌa huaꞌancureꞌeviꞌitɨn aɨme ɨ mej Israel jetze ajtyamaꞌacan? ¿Ni cai ayan seiraꞌa aꞌame tɨj tɨ puaꞌa Dioj ayan huaꞌajjájpua huaꞌa tzajtaꞌa ɨ mej meri huacuii?
\v 16 Nicheꞌe seij nyuucari jamuaataꞌixaateꞌen nyaɨjna cɨmeꞌe ɨ cueijtzi ɨ maj pan huátaahuan. Tɨ puaꞌa Dioj huatauraꞌateꞌen aɨjna ɨ cueijtzi ɨ maj anacaican raatamuaɨꞌɨvejte, aɨ pu ajta huatauraꞌateꞌesin nain ɨ pan ɨ maj raataahuacaꞌa. Ajta, tɨ puaꞌa Dioj ayan huatauraꞌate aɨjna ɨ naanaꞌa tɨ jetzen ajtanyéj ɨ cɨye, aɨ pu ajta huatauraꞌate naijmiꞌi ɨ piꞌista tɨ jetzen ajtaꞌupuꞌu ɨ cɨye jetze. Ayaa pu cheꞌeta naꞌa een muejmi jemi.
\p
\v 17 Ticheꞌe teyan raataxaj tɨ Dioj ayan raꞌantinaꞌaxɨ jetzen ɨ aceituuna jeꞌicaca ɨ piꞌista. Aj pu ij seij antiviꞌite ɨ piꞌista tɨ seij jetze maꞌacantacaꞌa aceituuna tɨ rusaɨj ajnyej. Sajta muan, ayaa xu saɨjna jetze ajtyamaꞌacantacaꞌa ɨ aceituuna tɨ rusaɨj ajnyej. Ajta ijii, muan xu seri saɨjna jetze ajtyamaꞌacan tɨ Dioj jetze raꞌantiviꞌijte aɨjna ɨ piꞌista. Puꞌuri amúꞌucaꞌanistiꞌi aɨjna tɨ aꞌaraꞌaraꞌan pɨrɨcɨ aɨjna ɨ aceituuna.
\v 18 Aɨj xu cɨn, caxu seyan aꞌujtzaahuatyaꞌa saɨjna cɨmeꞌe ɨ tɨ Dioj ari raꞌantinaꞌaxɨ aɨjna ɨ piꞌista. Tɨ puaꞌa seyan aꞌujtzaahuatyaꞌa sataꞌaj seyan tyuꞌumuaꞌati saɨjna jetze ɨ nyuucari tɨ ayan tɨcɨmeꞌen yee “capu ayan muejmi jetze araujcaꞌanye ɨ naanaꞌaraꞌan aɨjna ɨ cɨye, silu muan xu saɨjna jetze araujcaꞌanye ɨ naanaꞌaraꞌan.”
\p
\v 19 Tɨ puaꞌa seyan tiꞌixajta tɨcɨn: “Ayaa pu raꞌantinaꞌaxɨ aɨjna ɨ piꞌista tɨ ij ayan taꞌantiviꞌijtyaꞌaxɨꞌɨn ityejmi ɨ cɨye jetze.”
\v 20-21 Ee xaa nyaꞌu, ayaa pu tiꞌayajna. Capu amɨn aꞌij. Ayaa pu een cɨn huaꞌuruu aɨjna cɨmeꞌe maj cai ráꞌantzaahua. Ma sajta muan, ayaa xuꞌu sanaꞌa saɨjna jetze ajtyamaꞌacan saɨjna cɨmeꞌe sej seyan tyaꞌatzaahuateꞌe. Caxu seyan aꞌujtzaahuatyaꞌa, silu sataꞌaj seyan tiꞌitzɨɨnyaꞌa, aꞌini Dioj capu ayan tiraatauuniꞌiriꞌi aɨjna ɨ piꞌista tɨ ajtanyajxɨ ɨ cɨye jetze tɨ reꞌen. Capu ajta tyajamuaatauuniꞌira muejmi.
\v 22 Sataꞌaj seyan saɨjna jetze tyuꞌumuaꞌati ɨ tɨ cɨn Dioj amuaꞌancuꞌuvajxɨ muejmi, ajta ɨ tɨ cɨn muareꞌeri huaꞌutaꞌa aɨme. Aɨ pu muareꞌeri huaꞌutaꞌa aɨme ɨ maj autyajturaa ɨ jemin. Aɨ pu ajta amuaꞌancuꞌuvajxɨ muejmi. Ajta, ayaa pu auj áꞌamuaruuren tɨ puaꞌa seyan aꞌatyeeviꞌin saj saɨjna jetze araujcaꞌanye tɨ cɨmeꞌen Dioj rɨꞌɨ tyajamuaataꞌa. Naꞌari cai, aɨ pu ajta ma amúuhuaꞌaxɨjsin muejmi.
\v 23 Ajta aɨme, tɨ puaꞌa macai cheꞌe aꞌateeviꞌin maj cai meyan tyaꞌatzaahuatyaꞌa, Dioj pu ayan ajtahuaꞌa huaꞌantiviꞌijteꞌesin aꞌini aɨ pu raayɨꞌɨtɨ tɨ ayan huarɨni.
\p
\v 24 Ayej xaa nyaꞌu tiꞌayajna, Dioj pu raayɨꞌɨtɨ tɨ ayan huarɨni aꞌij tɨ cai tiꞌirɨnyaca aꞌanaj tɨ naꞌa iiyan. Aɨ pu amuaꞌantinaꞌaxɨ aɨjna jetze ɨ cɨye tɨ ɨtzitá huanyej tɨ ij ayan amuaꞌantiviꞌijteꞌen jetzen ɨ saɨj ɨ mej raꞌatyahuii. Ma ajta, aɨme ɨ mej Israel jetze ajtyamaꞌacan, aꞌini aɨme anacai mu ajtyamaꞌacantacaꞌa maɨjna jetze ɨ cɨye, capu aꞌatzu muareꞌerista aꞌame tɨ Dioj ajtahuaꞌa huaꞌantiviꞌijtyaꞌaxɨꞌɨn aɨjna jetze, mej mi majtahuaꞌa tyaɨtestyamuaꞌameꞌen pueenyaꞌa muaꞌaraꞌani.
\s Dioj pu nuꞌu hueꞌirajtuaani naijmiꞌica aɨme ɨ mej Israel jetze ajtyamaꞌacan
\p
\v 25 Ayaa nu tiꞌijxeꞌeveꞌe, nyeꞌihuaamuaꞌa, sej si yauꞌeitaa xaꞌaraꞌani tyamuaꞌa naa aꞌij tɨ huataujmuaꞌa aijna tɨ ruꞌavaa ɨ Dioj jemi, sej si cai aꞌujtzaahuatyaꞌa tiꞌitɨ cɨmeꞌe. Ayaa nu tyajaꞌamueꞌixaateꞌe mej meri antaujnaamɨ muiꞌitɨ aɨme ɨ maj Israel jetze ajtyamaꞌacan. Maucheꞌe mu meyan huatyaturaasin asta manaꞌa cai meyan araꞌastɨ muaꞌaraꞌani aꞌachu maj puaꞌamua tɨ Dioj ayan huaꞌuxaꞌapɨꞌɨntare mej tyaꞌantzaahuateꞌen aɨme ɨ mej seij chuejraꞌa japua eꞌemaꞌacan.
\v 26 Aj pu i xaa Dioj hueꞌirajtuaani naijmiꞌica aɨme ɨ mej Israel jetze ajtyamaꞌacan. Aɨj pu cɨn ayan teꞌeyuꞌusiꞌi tɨcɨn:
\q Mu pu aꞌuveꞌemaꞌa aꞌame aujna u Sión,
\q2 aɨjna ɨ aꞌatɨ tɨ hueꞌirajtuaani.
\q Ayaa pu rɨꞌɨ huaꞌaruuren aɨme
\q2 ɨ mej Jacobo jetze airáanye mej mi cai cheꞌe
\q2 aꞌij puaꞌa titetyújchaɨ ɨ Dioj jemi.
\q
\v 27 Nyajta nu neyan tyaꞌatanratziiriꞌi aɨme jemi
\q nyej neyan huaꞌuruuren nyajna xɨcaaraꞌan
\q2 nyej jetzen tihuaꞌutaꞌuuniꞌira
\q2 ɨ maj cɨn autyajturaa nyeetzi jemi.
\p
\v 28 Aɨ mu rájchaɨreꞌe ɨ Dioj maɨjna cɨmeꞌe maj raatityacaꞌa maɨjna ɨ nyuucari ɨ tɨ cɨn Dioj hueꞌirajtuaani. Ayaa mu maɨjna cɨn huarɨj, ayaa pu tyajamuaacɨ́ꞌɨ muejmi sej si sajta raanamua saɨjna ɨ nyuucari. Ma ajta, aɨn ɨ Dioj, aucheꞌe pu huaꞌaxeꞌeveꞌe aɨjna cɨmeꞌe tɨ jajcua ɨmɨ huaꞌantihuau, ajta aɨjna cɨmeꞌe tɨ tiꞌitɨ cɨn tyaꞌataujratziiriꞌi aɨme jemi ɨ huaꞌahuaacɨxaꞌastyamuaꞌacɨꞌɨ.
\v 29 Ee xaa nyaꞌu, aucheꞌe pu huaꞌutyavaɨreꞌesin aꞌini Dioj pu cai raꞌurauuna aɨjna ɨ nyuucari tɨ tiꞌitɨj cɨn tyaꞌataujratziiriꞌi. Capu ajta yáꞌuhuaꞌana aɨjna tɨ cɨn huaꞌutajee.
\v 30 Sajta muan, ajnaꞌɨmɨ xu cai sajta raꞌastijraꞌacaa. Ma ajta aɨn Dioj pu ayan amuaꞌancuꞌuvajxɨ muejmi, aꞌini aɨme ɨ mej Israel jetze ajtyamaꞌacan, camu raꞌastijraꞌacaa.
\v 31 Ajta ijii, ayaa mu een cɨn autyajturaa ɨ Dioj jemi tɨ ij ajta Dioj huaꞌancuꞌuvajxɨꞌɨn aɨjna cɨmeꞌe tɨ ari amuaꞌancuꞌuvajxɨ muejmi.
\v 32 Ayaa pu Dioj huaꞌuxɨjte naijmiꞌica ɨ maj cɨn autyajturaa ɨ jemin, tɨ ij ajta huaꞌancuꞌuvajxɨꞌɨn matɨj manaꞌa puaꞌamua meyan seijreꞌe.
\p
\v 33 Ee xaa nyaꞌu, ayaa pu tiꞌayajna. Eecan pu huapɨꞌɨ tyuꞌuyɨꞌɨtɨ aɨjna ɨ Dioj. Nain pu cɨn ruꞌumuaꞌaree. Capu aꞌatzu amiteere aꞌij tɨ tiꞌitɨ cɨn ayan tiꞌixaꞌapɨꞌɨntareꞌe. Capu rɨꞌɨri tyej teyan yauꞌeitaa taꞌaraꞌani aꞌij tɨ Dioj ayan ruxéꞌeviꞌiraꞌa cɨn huaꞌaruure ɨ tyaɨte ɨ maj yan japuan seijreꞌe ɨ chaanaca japua.
\v 34 “¿Aꞌataani ramuaꞌaree aꞌij tɨ een ɨ muaꞌatziiraꞌaraꞌan ɨ Dioj? ¿Aꞌataani ayan raatavaɨ ɨ Dioj tɨ ij ayan tiraataꞌixaateꞌen aɨjna ɨ Dioj aꞌij tɨ yeꞌi huarɨni? Capu aꞌatɨ xaa nyaꞌu.
\v 35 ¿Aꞌataani ari ayan tiꞌitɨ tiraatapueijve ɨ Dioj tɨ ij ayan ruxeꞌevaꞌa aꞌaraꞌani tɨ aɨn Dioj ajta tiꞌitɨ cɨn ayan tiraꞌachaɨreꞌe aɨjna ɨ aꞌatɨ? Capu aꞌatɨ xaa nyaꞌu.”
\v 36 Ayaa puꞌu, aꞌini naijmiꞌi pu jemin maꞌacan. Aɨ pu nain tyuꞌutaahuacaꞌa. Nain pu aɨjna cɨn ayan tiꞌiseijreꞌe tɨ ij ayan rɨꞌɨ tiraataꞌan. Tyajta ityan, ticheꞌe tyajta rɨꞌɨ tiraataꞌan tɨj naꞌa rusen cɨmeꞌe. Cheꞌe ayan tyajaꞌureꞌenyen.
\c 12
\s Maj nuꞌu huataujtuiireꞌen ɨ Dioj jemi
\p
\v 1 Aꞌini Dioj pu ari amuaꞌancuꞌuvajxɨ, ayaa nu tyajaꞌamuahuavii, nyeꞌihuaamuaꞌa, sej si seyan huataujtuiireꞌen ɨ Dioj jemi ɨ rutevi cɨmeꞌe, sataꞌaj raatyajtuaani ɨ Dioj jemi, ɨ saj sajta cɨn rɨꞌɨ tiraataꞌan. Tɨ puaꞌa seri seyan huarɨni, aj xu si raatyavaɨreꞌen aꞌij tɨ tiraavijteꞌe, saj ruuri cɨn huataujmuaɨꞌɨvajta.
\v 2 Caxu seyan tityatauraꞌacareꞌen sej seyan cheꞌeta sanaꞌa titetyújchaɨ matɨj aɨme ɨ seica ɨ mej yan japuan seijreꞌe i chaanaca. Caxu xaa nyaꞌu seyan rɨjca muan, silu sataꞌaj seyan saɨque huaujruuren saɨjna cɨmeꞌe sej seri huaujjajcuare ɨ áꞌamuamuaꞌatziiraꞌa jetze. Aj xu seyan ramuaꞌareeran aꞌij tɨ tiꞌijxeꞌeveꞌe ɨ Dioj, sajta seyan ramuaꞌareeran tiꞌitɨ tɨ iꞌi xaꞌapɨꞌɨn ɨ Dioj jemi, tiꞌitɨ tɨ ayan tiraꞌaraanajchi, nusu aꞌij sej huarɨni sej si nain cɨn raꞌaraꞌastijreꞌen aꞌij tɨ Dioj tiꞌijxeꞌeveꞌe.
\p
\v 3 Aꞌini Dioj pu aɨjna cɨn tinyeijca nyej ni neyan tyajamuáamuaꞌaten, ayaa nu tyajaꞌamueꞌixaateꞌe naijmiꞌica muejmi. Cheꞌe cai aꞌatɨ ayan aꞌujtzaahuatyaꞌa, aꞌini capu ayan tiraavijteꞌe. Caxu xaa nyaꞌu seyan rɨjca, silu sataꞌaj seyan rɨꞌɨ me tityaꞌumuámuaꞌaraꞌa ɨ ru jetze. Sataꞌaj seyan saɨjna jetze tyuꞌumuaꞌati aꞌij tɨ tiꞌitɨj cɨn Dioj ari tyajamueijca, seij ajta seij. Ayaa pu xaa nyaꞌu tiraavijteꞌe.
\v 4 Ayaa puꞌu naꞌa. Tyatɨj tyanaꞌa puaꞌamua tyej teyan ratyáhueꞌiraꞌa, ajta capu tiꞌiseicaj naꞌa tɨj naꞌa tiꞌityejveꞌe ɨ tajetze. Capu ajta tiꞌiseicaj naꞌa ɨ tɨ cɨn titaatyavaꞌɨri tyatɨj tyanaꞌa teyan tiꞌityejveꞌe, silu ayaa pu tiꞌimuiꞌi.
\v 5 Ayaa pu cheꞌeta naꞌa een tyej teri Cɨriistuꞌu jetze ajtyamaꞌacan. I tyaj muiꞌitɨ araꞌase, ayaa tu naijmiꞌi tiꞌitaseijrata tyaj seij tyanaꞌa jetze ajtyamaꞌacan ɨ tevi. Ajta aꞌatɨ tɨ naꞌa tɨ ta jetze ajtyamaꞌacan, aɨ pu ajta huaꞌa jetze ajtyamaꞌacan ɨ seica, aꞌachu maj puaꞌamua.
\p
\v 6 Capu ayan ruxaꞌa naꞌa titaacɨ́ꞌɨ ityejmi aɨjna ɨ tyaj cɨn teri ratyavaꞌɨri. Aɨj pu cɨn, ticheꞌe teyan tiraatyavaɨreꞌen aꞌij tɨ aɨn Cɨriistuꞌu ayan rɨꞌɨ titaatáꞌa. Tɨ puaꞌa ayan tiraacɨ́ꞌɨ seij ɨ aꞌatɨ tɨ ayan tyuꞌutaxaj ɨ Dioj jetze maꞌacan, cheꞌe aɨn ayan jetzen maꞌacan tyuꞌutaxajta aꞌachu tɨ caj ruꞌumuaꞌaree.
\v 7 Tɨ puaꞌa ayan tiraacɨ́ꞌɨ seij ɨ aꞌatɨ tɨ ayan huaꞌutyavaɨreꞌen ɨ seica, cheꞌe ayan huaꞌutyavaɨreꞌen, naꞌari tɨ puaꞌa ayan tiraacɨ́ꞌɨ tɨ ayan tihuáꞌumuaꞌaten ɨ seica, cheꞌe ayan tihuáꞌumuaꞌaten.
\v 8 Tɨ puaꞌa ayan tiraacɨ́ꞌɨ aɨjna ɨ aꞌatɨ tɨ ayan raayɨꞌɨtɨhuaꞌan tɨ caꞌanijraꞌa huaꞌutaꞌan ɨ seica, cheꞌe ayan caꞌanijraꞌa huaꞌutaꞌan. Seica pu ayan tihuaꞌucɨꞌɨ mej meyan tihuaꞌutapueijveꞌen aɨme ɨ maj cai aꞌij tiꞌijviicueꞌi. Micheꞌe meyan ruxéꞌeviꞌiraꞌa cɨn tyamuaꞌa naa tihuaꞌutapueijveꞌen. Ajta aɨn tɨ ayan antyujmuaꞌaree aɨjna cɨmeꞌe tɨ tiꞌijta teyujtaꞌa, cheꞌe aɨn aꞌujcaꞌanyaacan cɨn tiꞌivaɨraꞌa. Ajta aɨn tɨ huaꞌacuꞌuve aɨme ɨ maj cai aꞌij tiꞌijviicueꞌi, cheꞌe aɨn rutyámuaꞌavaꞌacan cɨn huaꞌancuꞌuvajxɨꞌɨn.
\s Aꞌij tyaj nuꞌu yeꞌi huarɨni
\p
\v 9 Ayaa pu ruxeꞌeveꞌe saj tzaahuatiꞌiraꞌa cɨn huaujxeꞌeveꞌen seij sajta seij. Sataꞌaj raatite saɨjna tɨ aꞌij puaꞌa een, sajta seyan raꞌaraꞌastijreꞌen saɨjna tɨ iꞌi xaꞌapɨꞌɨn.
\v 10 Sataꞌaj seyan huaujxeꞌeveꞌen seij sajta seij tɨj ruꞌihuaamuaꞌa naa. Sataꞌaj sajta seyan huataujcaꞌanyen tyamuaꞌa naa saɨjna cɨmeꞌe saj rɨꞌɨ tyuꞌutaꞌan seij sajta seij.
\p
\v 11 Caxu raaxaahuata saj ratyavaꞌɨrihuaꞌan ɨ tavastaraꞌa, silu saꞌujcanyaacan xu cɨn seyan saɨjna jetze huataujcaꞌanyen ɨ xaijnyuꞌucaraꞌaraꞌan ɨ Dioj.
\p
\v 12 Sataꞌaj huaujtyamuaꞌaveꞌen saɨjna cɨmeꞌe sej seyan tiꞌijtɨj cɨn tiꞌichueꞌeveꞌe tɨ Dioj jemi eꞌemaꞌacan. Sataꞌaj sajta seyan tyaꞌutaviicueꞌi saɨjna cɨmeꞌe ɨ saj cɨn rajpueiitzi xaꞌayeꞌi. Saucheꞌe xu rahuaviira ɨ Dioj. Caxu raatápuaapuaꞌataꞌan.
\p
\v 13 Sataꞌaj seyan tihuaꞌuraꞌan ɨ sej tíꞌijchaꞌɨ aɨme jemi ɨ maj cai aꞌij tiꞌijviicueꞌi. Sataꞌaj sajta seyan ruxéꞌeviꞌiraꞌa cɨn huaꞌancureꞌeviꞌitɨn ɨ aꞌamuaxáꞌa tyaɨte ɨ ruche.
\p
\v 14 Ayaa xu sajta seyan huaꞌuruuren aɨme ɨ mej aꞌij puaꞌa aꞌamuaruure. Sataꞌaj rɨꞌɨ tihuaꞌutaꞌan. Caxu seyan rahuaviira ɨ Dioj jemi tɨ ij aɨn pueijtzi huaꞌutaꞌan, silu rɨꞌɨ xu tihuaꞌutaꞌan.
\p
\v 15 Sataꞌaj seyan huaujtyamuaꞌaveꞌen aɨme jamuan ɨ maj rutyamuaꞌaveꞌe. Ayaa xu sajta huarɨni saj huatyáujxaamɨsteꞌen aɨme jamuan ɨ maj ruxaamɨsteꞌe.
\p
\v 16 Sataꞌaj seyan rɨꞌɨ tíꞌityechajca tɨj ɨ ruꞌihuaamuaꞌa naa. Caxu aꞌujtzaahuatyaꞌa, silu sataꞌaj seyan antyaujsaɨreꞌen huaꞌa jamuan ɨ maj cai tiꞌitɨ cɨn títyetyáꞌupuꞌu tɨ eihua ruxeꞌeveꞌe. Caxu seyan aꞌujtzaahuatyaꞌa ɨ rutzajtaꞌa saj nuꞌu rɨꞌɨ me tityaꞌumuámuaꞌaree tyamuaꞌa naa cai maa aꞌatɨ.
\v 17 Tɨ puaꞌa aꞌatɨ ayan aꞌij puaꞌa aꞌamuaruure muejmi, caxu seyan cheꞌeta sanaꞌa aꞌij puaꞌa raruure muan. Rɨꞌɨ xuꞌu sataꞌaj seyan sanaꞌa huarɨni tɨꞌi ayan rɨꞌɨ tihuaꞌamityejyaꞌa naijmiꞌica ɨ tyaɨte saj xaꞌapɨꞌɨn rɨcɨ.
\v 18 Sataꞌaj seyan huarɨni, satɨj sanaꞌa saj caj tiruꞌumuaꞌaree, tɨ puaꞌa rɨꞌɨristan, sataꞌaj rɨꞌɨ titetyújchaɨ huaꞌa jemi ɨ seica ɨ tyaɨte, aꞌachu maj puaꞌamua.
\v 19 Caxu pueijtzi rataꞌacareꞌen ɨ aꞌatɨ tɨ ari aꞌij puaꞌa amuaaruu, silu cheꞌe aɨn Dioj ayan pueijtzi raataꞌan. Ayaa xu huarɨni, aꞌini ayaa pu teꞌeyuꞌusiꞌi tɨcɨn: “Ayaa pu tiꞌinyacɨꞌɨpua inyeetzi nyej pueijtzi raataꞌan nyaɨjna ɨ aꞌatɨ tɨ aꞌij puaꞌa muaaruu. Nyaa nu raataꞌasin nyaɨjna aꞌij tɨ tiraavijteꞌe.”
\v 20 Ma sajta muan, ayaa xu huarɨni aꞌij tɨ teꞌeyuꞌusiꞌi tɨcɨn: “Tɨ puaꞌa iꞌicuata aɨjna tɨ muájchaɨreꞌe, pataꞌaj tiraamín. Ajta tɨ puaꞌa huataꞌimɨn aɨjna ɨ aꞌatɨ, pataꞌaj jaj raataꞌan. Tɨ puaꞌa peyan huarɨni, ayaa paj pueijtzi raataꞌasin paɨjna cɨmeꞌe paj xaꞌapɨꞌɨn raaruu. Aɨ pu xaa, aɨ pu tirajpueiitzi aꞌame tyamuaꞌa naa.”
\v 21 Caxu rataꞌacareꞌen tɨ aɨjna tɨ aꞌij puaꞌa een ayan amuaamueꞌitɨn, silu sataꞌaj seyan tiraamueꞌitɨn saɨjna tɨ aꞌij puaꞌa een saɨjna cɨmeꞌe saj xaꞌapɨꞌɨn rɨcɨ.
\c 13
\p
\v 1 Ayaa pu tyuꞌujxeꞌeveꞌe tɨ aꞌatɨ tɨ naꞌa ayan huaꞌaraꞌastijreꞌen aɨme ɨ mej tiꞌitɨj cɨn antyujmuaꞌaree. Dioj pu ayan raaxaꞌapɨꞌɨntare mej meyan tiꞌitɨj cɨn títyatatéꞌen. Aɨj pu cɨn Dioj ayan huaꞌantihuau.
\v 2 Aɨj pu cɨn, tɨ puaꞌa aꞌatɨ cai huatauraꞌan tɨ ij ayan huaꞌaraꞌastijreꞌen, aɨ pu ajta ma rúuhuaꞌana aɨjna tɨ Dioj ayan raatyajtuaa iiyan chaanaca japua. Ajta, tɨ puaꞌa aꞌatɨ ayan huarɨni, pueijtzi pu aɨjna japua rávaɨjtzi.
\v 3-4 Tɨ puaꞌa aꞌatɨ ayan rɨꞌɨ tiꞌityujchaꞌɨ, capu ruxeꞌeveꞌe tɨ aɨn aꞌatɨ ayan huaꞌatzɨɨnyaꞌa aɨme ɨ mej tiꞌitɨj cɨn antyujmuaꞌaree. Ma ajta aɨjna tɨ aꞌij puaꞌa tiꞌityujchaꞌɨ, ayaa pu xaa nyaꞌu tiraavijteꞌe tɨ aɨn ayan huaꞌatzɨɨnyaꞌa aɨme ɨ mej tiꞌijta. Tɨ puaꞌa peyan tiꞌijxeꞌeveꞌe paj cai tiꞌitɨj cɨn ratzɨɨnyaꞌa paɨjna tɨ tiꞌijta, pataꞌaj peyan huarɨni tiꞌitɨj cɨmeꞌe tɨ iꞌi xaꞌapɨꞌɨn. Tɨ puaꞌa peyan huarɨni, ayaa pu rɨꞌɨ timuaataꞌasin aɨjna tɨ tiꞌijta, aꞌini Dioj pu aɨjna cɨn raꞌantihuau tɨ ij aɨn tiꞌityavaꞌɨrihuaꞌan jemin. Ma ajta, tɨ puaꞌa peyan aꞌij puaꞌa títiáꞌachaꞌɨ, aj paj xaa ratzɨɨnyaꞌa puaꞌame, aꞌini aɨ pu aɨjna cɨn antyujmuaꞌaree tɨ pueijtzi muaataꞌan. Aɨ pu xaa nyaꞌu tiꞌivaɨreꞌe ɨ Dioj jemi tɨ ij Dioj jetze maꞌacan ayan pueijtzi huaꞌutaꞌan aɨme ɨ maj aꞌij puaꞌa titetyújchaꞌɨ.
\v 5 Aɨj pu cɨn, ayan tyuꞌujxeꞌeveꞌe sej seyan huaꞌaraꞌastijreꞌen aɨme ɨ mej tiꞌitɨj cɨn títyatatí tɨ ij cai ayan aꞌamua japua rájveti ɨ pueijtzi. Ayaa pu ajta ruxeꞌeveꞌe aɨjna cɨmeꞌe sej seyan raꞌaraꞌastijreꞌe ɨ Dioj.
\v 6 Ayaa pu ajta tyuꞌujxeꞌeveꞌe saj sajta saɨjna cɨn tiꞌinajchita aɨjna tɨ aꞌamuajijveꞌe, aꞌini aɨme ɨ mej meyan aꞌamuajijveꞌe, aɨ mu tiꞌivaɨreꞌe ɨ Dioj jemi. Tɨꞌɨj pɨ naꞌa nain xɨcaj tzajtaꞌa, ayaa mu maɨjna cɨn tiꞌivaɨreꞌe.
\p
\v 7 Tɨ puaꞌa peyan aꞌatɨ teꞌechaɨreꞌe, pataꞌaj peyan tiraanajchiteꞌen aꞌachu paj caj tiraꞌachaɨreꞌe, naꞌari tɨ puaꞌa peyan paɨjna cɨn teꞌechaɨ ɨ mej uvieernu jemi muajijveꞌe, pataꞌaj peyan cheꞌeta panaꞌa tihuaꞌunajchiteꞌen. Ajta tɨ puaꞌa peyan paɨjna cɨn teꞌechaɨ ɨ mej muajijveꞌe maɨjna cɨmeꞌe ɨ pej tiꞌituꞌaraca, pataꞌaj pajta peyan paɨjna cɨn tyuꞌunajchi. Tɨ puaꞌa ayan tiraavijteꞌe pej peyan rɨꞌɨ tihuaꞌajchaɨ aɨme ɨ mej tiꞌijta, pataꞌaj peyan huarɨni. Naꞌari tɨ puaꞌa ayan tiraavijteꞌe pej rɨꞌɨ tihuaꞌutyajtuaani aɨme ɨ mej tiꞌitátyatyáꞌupuꞌu, pataꞌaj peyan rɨꞌɨ tihuaꞌutaꞌan.
\v 8 Sataꞌaj nain cɨn tyuꞌunajchita sej si cai cheꞌe tiꞌitɨj cɨn teꞌechaɨ ɨ aꞌamuaxáꞌa tevi jemi. Ayaa xuꞌu sanaꞌa saɨjna cɨn tiraꞌachaɨraꞌa ɨ saɨj saj huaujxeꞌeveꞌen seij sajta seij, aꞌini aɨjna tɨ ayan raxeꞌeveꞌe ɨ ruxaꞌa tevi, aɨ pu aɨjna cɨn ari raꞌaraꞌastijre aɨjna ɨ nyuucari ɨ maj cɨn tiꞌijta.
\v 9 Ayaa pu tihuaꞌutaij tɨcɨn: “Capej tiꞌixanaꞌacɨraꞌa.” Ajta ayan tɨcɨn: “Capej tiꞌityacuiꞌica.” Ajta iꞌi tɨ ayan tɨcɨn: “Capej tiꞌinahuaꞌa.” Ajta iꞌi tɨ ayan tɨcɨn: “Capej tiꞌinyacuaꞌatza.” Naijmiꞌi ɨ nyuucari tɨ ayan een, ajta tiꞌitɨ tɨ aꞌij tɨ raꞌityaꞌasi, naijmiꞌi tɨj naꞌa tɨ ayan, aɨ pu araꞌase aɨjna jetze ɨ nyuucari tɨ ayan teꞌeyuꞌusiꞌi tɨcɨn: “Pataꞌaj peyan raxeꞌevaꞌa ɨ axaꞌaj tevi patɨj asaɨj tiꞌaxeꞌeveꞌe.”
\v 10 Tɨ puaꞌa aꞌatɨ ayan tzaahuatiꞌiraꞌa cɨn raxeꞌevaꞌa ɨ ruxaꞌaj tevi, aɨ pu cai aꞌanaj aꞌij puaꞌa raruuren. Aɨj pu cɨn, aɨjna ɨ aꞌatɨ nain cɨn raꞌaraꞌastejsin aɨjna ɨ nyuucari ɨ maj cɨn tiꞌijta.
\p
\v 11 Sataꞌaj seyan huarɨni saɨjna cɨmeꞌe sej seri ruꞌumuaꞌaree tiꞌitɨj tɨ xɨcaaraꞌan jetze pɨtiꞌirɨcɨ. Puꞌuri ayan tyajaꞌureꞌenye sej rɨꞌɨ huaujruuren sej si atanyéjnyeꞌeri tyamuaꞌa naa, aꞌini puꞌuri eitzeꞌe vejliꞌi ajna xɨcaaraꞌan tɨ jetzen Dioj tajapua nyuuni. Puꞌuri xaa nyaꞌu eitzeꞌe vejliꞌi tɨ cai vejliꞌitaca tyatɨꞌɨj anacai tyaꞌantzaahua.
\v 12 Puꞌuri eitzeꞌe huatɨcaꞌa aɨjna tɨ jetzen tiꞌijta aɨjna tɨ aꞌij puaꞌa een. Puꞌuri ajta vejliꞌi ajna xɨcaaraꞌan tɨ jetzen Cɨriistuꞌu tajapua nyuuni. Aɨj pu cɨn, ticheꞌe teyan ma rúuhuaꞌaxɨn tɨj naꞌa tɨ aꞌij puaꞌa een tyej teyan anacai tyaɨjna cɨn rɨjcaa. Ticheꞌe tyajta tyaɨjna jetze aratacaꞌanyen ɨ tyaj cɨn raatyamueꞌitɨn tyaɨjna ɨ tyaj cɨn tiꞌityeseꞌe.
\v 13 Ticheꞌe teyan rɨꞌɨ tiꞌititachaɨca aꞌij mej tiꞌijrɨꞌɨre ɨ tyaɨte maj nyeeristeꞌe áꞌujhuaꞌan. Ticheꞌe tyajta cai cheꞌe teyan aꞌij puaꞌa eenyaꞌacan cɨn tiꞌiyestya, tyajta cai cheꞌe aꞌij puaꞌa tiꞌityataꞌaru, tyajta cai cheꞌe tiꞌixanaꞌacɨraꞌa huaꞌa jamuan ɨ maj tyuꞌunacuaꞌatzisteꞌe, tyajta cai cheꞌe tiꞌixanaꞌacɨraꞌa seij jamuan tɨ cai aɨn pueen ɨ tyaj yáꞌuviꞌitɨn. Ticheꞌe tyajta cai teyan nyaꞌusaꞌa tajɨɨmuaꞌa. Capu ajta xaꞌapɨꞌɨn tyej teyan aꞌatachueeraꞌa tajɨɨmuaꞌa.
\v 14 Ma sajta muan, sataꞌaj seyan rɨꞌɨ titetyújchaɨca aꞌij tɨ tiꞌityújchaɨcaꞌa ɨ tavastaraꞌa, aɨjna ɨ Jesús tɨ ajta Cɨriistuꞌu pueen. Caxu cheꞌe seyan saɨjna jetze tiꞌimuajca aꞌij sej yeꞌi huarɨni sej si seyan raꞌaraꞌastijreꞌen saɨjna tɨ aꞌij puaꞌa een tɨ huiiraninyei ɨ aꞌamuatzajtaꞌa.
\c 14
\s Catu nuꞌu raꞌaxɨjtyaꞌa ɨ taxaꞌa tevi
\p
\v 1 Tɨ puaꞌa aꞌatɨ cai xɨ ruꞌumuaꞌaree aꞌij tɨ huataujmuaꞌa tɨ ayan raꞌaraꞌastijreꞌen ɨ tavastaraꞌa, sataꞌaj raꞌancureꞌeviꞌitɨn ruxéꞌeviꞌiraꞌa cɨmeꞌe. Caxu seyan sanaꞌa raꞌaxɨjtyaꞌa saɨjna cɨmeꞌe aꞌij tɨ tiraꞌamitejteꞌe aɨjna.
\v 2 Ayaa pu maujmuaꞌare ɨ seij ɨ Dioj jemi tɨ ayan tiꞌitaꞌaca tɨ nain tyuꞌucaꞌani, ajta aɨjna ɨ saɨj, tɨ cai tyamuaꞌa naa tiruꞌumuaꞌaree aꞌij tɨ een ɨ Dioj jemi, ayaa pu tiraꞌamitejteꞌe tɨ ayaa naꞌa tiꞌitaꞌaca tɨ raacuaꞌani tɨ tyeꞌejnyéj a chuaataꞌa.
\v 3 Ayaa pu tyuꞌujxeꞌeveꞌe tɨ aɨn ɨ tɨ nain tiꞌicuaꞌaca cai ayan raxaahuata aɨjna tɨ cai nain tiꞌicuaꞌaca. Ajta aɨn tɨ cai nain tiꞌicuaꞌaca, ayaa pu cheꞌeta naꞌa ruxeꞌeveꞌe tɨ aɨn cai raꞌaxɨjtyaꞌa aɨjna tɨ nain tiꞌicuaꞌaca, aꞌini Dioj pu ajta ayan raꞌancureꞌeviꞌitɨ aɨjna ɨ aꞌatɨ.
\v 4 Pajta muaa, mɨ pej cai nain tiꞌicuaꞌaca, ¿aꞌataani ayan aɨjna cɨn timuéijca pej peyan raꞌaxɨjteꞌen ɨ aꞌatɨ tɨ seij jemi tiꞌivaɨreꞌe? Capu aꞌatɨ, aꞌini seij pu tiꞌiraijteꞌe. Ajta aɨn ɨ aꞌatɨ, aɨ pu araꞌastijreꞌesin aɨjna tɨ tiꞌiraijteꞌe. Naꞌari tɨ puaꞌa cai ayan huarɨni, aɨ pu jemin mueꞌitɨcheꞌen. Ma ajta, aɨjna tɨ nain tiꞌicuaꞌaca, aɨ pu xaa araꞌastijreꞌesin, aꞌini tavastaraꞌa pu caꞌanijraꞌa raataꞌasin tɨ ij ayan raꞌaraꞌastijreꞌen.
\p
\v 5 Ajta saɨj jemi, ayaa pu tiraꞌamitejteꞌe tɨ sei xɨcaj ayan eitzeꞌe ruxeꞌeveꞌe ɨ Dioj jemi cai seica xɨcajraꞌan jetze. Ajta seij jemi, ayaa pu tiraꞌamitejteꞌe tɨ ruxaꞌaj naꞌa ayan eꞌen nain xɨcajraꞌan jetze. Micheꞌe meyan rujɨɨmuaꞌa manaꞌa tiraaxaꞌapɨꞌɨntareꞌen tyamuaꞌa naa, aꞌij tɨ tyaꞌumuaꞌatze ɨ rutzajtaꞌa ɨ tɨ xaꞌapɨꞌɨn een ɨ Dioj jemi.
\v 6 Aɨjna tɨ ayan tiraꞌamitejteꞌe tɨ seij xɨcajraꞌan jetze eitzeꞌe ruxeꞌevaꞌa, ayaa pu tiraaxaꞌapɨꞌɨntare ɨ tavastaraꞌa jemi. Ajta aɨn tɨ nain tiꞌicuaꞌaca, ayaa pu ajta rɨcɨ ɨ tavastaraꞌa jemi, aꞌini aɨjna ɨ aꞌatɨ ajta pu rɨꞌɨ tirataꞌaca ɨ Dioj. Ajta aɨn tɨ cai nain tiꞌicuaꞌaca, aɨ pu ayan cheꞌeta naꞌa tiꞌicuaꞌaca ɨ tavastaraꞌa jemi. Aɨ pu ajta rɨꞌɨ tirataꞌaca ɨ Dioj.
\p
\v 7 Ayaa puꞌu, aꞌini tyatɨj tyanaꞌa puaꞌamua ityan, capu aꞌatɨ ayan rusaɨj ruuri. Capu ajta ayan rusaɨj mɨꞌɨni.
\v 8 Tɨ puaꞌa teyan iꞌiruuri, ayaa tu iꞌiruuri tyej ti rɨꞌɨ tiraataꞌan ɨ tavastaraꞌa naꞌari tɨ puaꞌa teyan huacuiꞌini, ayaa tu cheꞌeta tyanaꞌa cuiꞌini tyej ti huatatatuiireꞌen ɨ tatevij cɨmeꞌe tyaɨjna jemi. Aɨj pu cɨn, capu amɨn aꞌij tɨ puaꞌa teyan iꞌiruuri nusu tɨ puaꞌa teyan huacuiꞌini. Tyaucheꞌe tu tavastaraꞌa jetze ajtyamaꞌacan.
\v 9 Aɨj pu cɨn, Cɨriistuꞌu ayan huamɨꞌɨ, ajta aꞌitáraa huaꞌa tzajtaꞌa ɨ mɨꞌɨchite tɨ ij aɨn ayan huaꞌavastaraꞌa pueenyaꞌa aꞌaraꞌani aɨme ɨ mej meri huacuii, ajta aɨme ɨ maj mauj iꞌiruuri.
\p
\v 10 Pajta muaa, ɨ paj cai xɨ ruꞌumuaꞌaree tyamuaꞌa naa, ¿aꞌini een cɨn peyan raꞌaxɨjteꞌe ɨ aꞌihuaaraꞌa? Pajta muaa, ɨ paj nain cɨn tiꞌitaꞌaca, aꞌini een cɨn peyan raxaahua paɨjna ɨ eꞌihuaaraꞌa. Capu aꞌatzu ayan tiraavijteꞌe sej seyan rɨjca, aꞌini naijmiꞌi tu teyan huataseijreꞌesin aɨjna jemi ɨ Dioj tɨ ij aɨn ayan taꞌuxɨ́jteꞌen naijmiꞌica ityejmi.
\v 11 Ayaa pu xaa nyaꞌu teꞌeyuꞌusiꞌi tɨcɨn:
\q Ayaa pu tiꞌixa aɨjna ɨ tavastaraꞌa tɨcɨn:
\q Aꞌini nyaa nu ruuri, ayaa pu tiꞌayajna,
\q2 matɨj manaꞌa puaꞌamua
\q2 maj yan chaanaca japua seijreꞌe,
\q2 aɨ mu titunutaxɨꞌɨsin inyeetzi jemi.
\q Aɨ mu majta, meyan rɨꞌɨ tinaataꞌasin
\q2 maɨjna cɨmeꞌe ɨ nyaj Dioj pueen.
\m
\v 12 Aɨj pu cɨn, aꞌachu tyaj puaꞌamua tyaj yan seijreꞌe, naijmiꞌi tu teyan tyuꞌutaxajta mé jeijreꞌe ɨ Dioj jemi aꞌij tyaj tiꞌitɨj cɨn huarɨj.
\s Tyaj nuꞌu cai caꞌanijraꞌa raataꞌan ɨ taꞌihuaaraꞌa tɨꞌi tiꞌitɨj cɨn autaꞌɨtzen
\p
\v 13 Aɨj pu cɨn, ticheꞌe teyan raatapuaꞌajta tyej teyan tyaꞌataxɨjteꞌe tajɨɨmuaꞌa. Aru ticheꞌe teyan raaxaꞌapɨꞌɨntareꞌen ɨ ta tzajtaꞌa tyej ti cai cheꞌe tiꞌitɨj cɨn raatamuáreꞌeristen ɨ taꞌihuaaraꞌa, nusu tyej ti cai cheꞌe caꞌanijraꞌa raataꞌan tɨ ij tiꞌitɨj cɨn huamueꞌitɨchen ɨ Dioj jemi.
\v 14 Ayaa nu ruꞌumuaꞌaree inyaa, aꞌini ayaa nu tyuꞌunamuajriꞌi nyaɨjna jemi ɨ tavastaraꞌa, aɨjna ɨ Jesús tɨ ayan tiꞌayajna. Tɨj naꞌa tɨ seij racuaꞌaca tɨ tiꞌicueꞌiriꞌi pueen, capu rusaɨj naꞌa raxanaꞌaveꞌe aɨjna tɨ racuaꞌaca. Ma ajta, tɨ puaꞌa aɨjna jemi ɨ aꞌatɨ ayan tiraꞌamitejtyaꞌa tɨ tiꞌitɨ ayan xanaꞌaviꞌireꞌe, aɨjna jemi pu xaa ayan een, tɨ ayan xanaꞌaviꞌireꞌe.
\v 15 Tɨ puaꞌa peyan caꞌanijraꞌa rataꞌaca ɨ eꞌihuaaraꞌa tɨ aɨn cai ayan racuaꞌaca ɨ tiꞌitɨ ɨ paj xaa racuaꞌaca, rɨꞌɨríista aꞌame paj raajeꞌihuaꞌatan i tzajtaꞌan aꞌini, aɨjna jemi, aɨ pu xanaꞌaviꞌireꞌe aɨjna tɨ raacuaa. Capaj xaꞌapɨꞌɨn huarɨj. Capaj xaa nyaꞌu raxeꞌeveꞌe ɨ eꞌihuaaraꞌa paɨjna cɨmeꞌe paj caꞌanijraꞌa raataꞌa tɨ ayan huarɨni aꞌij tɨ tiraajeꞌihuaꞌajtacaꞌa. Capej raꞌantipuaꞌariteꞌen ɨ eꞌihuaaraꞌa aꞌini Cɨriistuꞌu pu jetzen maꞌacan huamɨꞌɨ aɨjna ɨ eꞌihuaaraꞌa.
\v 16 Capaj cheꞌe peyan tiꞌitiáꞌachaꞌɨ. Naꞌari cai, ayaa mu seica meyan tiꞌijxájtziꞌiraꞌa muaꞌaraꞌani maɨjna tɨ ayan timuaꞌamitejteꞌe tɨ xaꞌapɨꞌɨn een.
\p
\v 17 Ayaa nu tyajaꞌamueꞌixaateꞌe aꞌini aɨjna tɨ ayan titaacɨ́ꞌɨ tɨ Dioj ayan tiꞌitaijteꞌe naijmiꞌica ityejmi, capu ayan aɨjna cɨn tyej teyan tiꞌicuaꞌaca naꞌari tyej teyan yaꞌaca. Capu xaa nyaꞌu, silu ayaa tu urareꞌenyaꞌacan cɨn huatyajturaa ɨ Dioj jemi. Tyajta rɨꞌɨ tityeetyajturaa ɨ ta tzajtaꞌa. Ajta, aɨ pu caꞌanijraꞌa taataꞌa aɨjna ɨ xaijnyuꞌucaraꞌaraꞌan ɨ Dioj tyej ti teyan huatatatyamuaꞌaveꞌen.
\v 18 Ee xaa nyaꞌu, aꞌatɨ tɨ naꞌa tɨ ayan ravaɨreꞌe ɨ Cɨriistuꞌu, aɨjna ɨ aꞌatɨ ayaa pu rɨꞌɨ tirataꞌaca ɨ Dioj. Majta maɨn ɨ tyaɨte, ayaa pu ajta huaꞌaranajchi tɨ ayan tiꞌijrɨꞌɨre aɨjna ɨ aꞌatɨ.
\p
\v 19 Aɨj pu cɨn ticheꞌe teyan ahuatacaꞌanyen tyej ti teyan rɨꞌɨ tiꞌitítacháɨ tej teyan taꞌihuaamuaꞌa taꞌaraꞌani tyamuaꞌa naa, tyej tyajta rɨꞌɨ huátaruuren tajɨɨmuaꞌa tyej ti eitzeꞌe raayɨꞌɨtɨhuaꞌan aꞌij tɨ tiꞌijxeꞌeveꞌe ɨ Dioj.
\v 20 Caxu saɨjna cɨn raatyauunan saɨjna tɨ Dioj ayan raatyajtuaa huaꞌa jemi ɨ aꞌamueꞌihuaamuaꞌa saɨjna cɨmeꞌe saj nain tiꞌicuaꞌaca. Naa pu tiꞌireꞌen tɨj naꞌa tɨ tiꞌicueꞌiriꞌi. Ma ajta, tɨ puaꞌa aꞌatɨ aɨjna cɨn caꞌanijraꞌa raataꞌan ɨ ruꞌihuaaraꞌa tɨ aɨn ihuaaraꞌaraꞌan ayan raacuaꞌani aɨjna tɨ raajeꞌihuaꞌa ɨ Dioj jemi, aɨj pu cɨn ayan autyaturaasin ɨ Dioj jemi aɨjna ɨ aꞌatɨ tɨ ayan caꞌanijraꞌa raataꞌa ɨ ruꞌihuaaraꞌa.
\v 21 Aɨj pu cɨn, eitzeꞌe pu ayan tiraavijteꞌe paj cai peyan racuaꞌaca ɨ hueꞌiraꞌa caꞌɨn paj cai peyan rayaꞌaca ɨ nahuaj. Jee xaa nyaꞌu pataꞌaj cai peyan tiꞌitɨj cɨn aꞌij huarɨni tɨ ayan caꞌanijraꞌa raataꞌacareꞌen tɨ aɨn eꞌihuaaraꞌa tiꞌitɨj cɨn autyaturan ɨ Dioj jemi.
\v 22 Tɨ puaꞌa ayan timuaꞌamitejteꞌe tɨ ayan tiꞌireꞌen ɨ Dioj jemi pej peyan tiꞌitɨ huacuaꞌani, pataꞌaj peyan asaɨj panaꞌa aviitzi cɨn tiruꞌumuaꞌareera. Capej peyan tiꞌixajta me jeijreꞌe, tyaɨte tzajtaꞌa. Cheꞌe huaujtyamuaꞌaveꞌen aɨjna ɨ aꞌatɨ tɨ cai rumuaꞌatziiraꞌa cɨn aꞌujxɨjteꞌe aɨjna cɨmeꞌe aꞌij tɨ tiꞌitɨj cɨn rɨcɨ, aꞌini aɨ pu ari ayan tiraaxaꞌapɨꞌɨntare tɨ ayan tiꞌireꞌen ɨ Dioj jemi.
\v 23 Ma ajta aɨn ɨ aꞌatɨ, tɨ puaꞌa cai xɨ tyamuaꞌa naa tiraaxaꞌapɨꞌɨntare tɨ ayan tiꞌireꞌen ɨ Dioj jemi tɨ ij tiꞌitɨ huacuaꞌani, tɨ puaꞌa ayan racuaꞌaca, aɨ pu aɨjna cɨn aꞌujxɨjteꞌen tɨ aꞌij puaꞌa rɨcɨ aꞌini aɨ pu cai tyaꞌatzaahuatyaꞌa ayan racuaꞌa. Ajta, tiꞌitɨ tɨ naꞌa tɨ aꞌatɨ ayan cɨn rɨcɨ, tɨ puaꞌa cai ayan tiraaxaꞌapɨꞌɨntare tɨ ayan tiꞌireꞌen ɨ Dioj jemi tɨ ayan huarɨni, aɨ pu aɨjna cɨn autyaturaasin ɨ Dioj jemi tɨ puaꞌa ayan rɨjca, aꞌini capu tyaꞌatzaahuatyaꞌacaa.
\c 15
\s Tyaj nuꞌu rɨꞌɨ tihuaꞌataꞌacareꞌen ɨ tyaxáꞌa tyaɨte
\p
\v 1 Tyajta ityan, i tyej tyamuaꞌa naa tiruꞌumuaꞌaree aꞌij tɨ een ɨ Dioj jemi, ayaa pu tiraavijteꞌe tyej tyaꞌutaviicueꞌi tyaɨjna cɨmeꞌe aꞌij maj tiꞌijrɨꞌɨre aɨme ɨ maj cai xɨ yauꞌeite tyamuaꞌa naa ɨ Dioj jemi. Ticheꞌe cai teyan tyanaꞌa rahuauca ityejmi cɨmeꞌe aꞌij tɨ titaꞌamitejteꞌe, silu ticheꞌe rɨꞌɨ tihuaꞌutaꞌan ɨ seica.
\v 2 Ayaa pu titaavijteꞌe ityejmi, aꞌachu tyaj puaꞌamua, tyej ti rɨꞌɨ tiraatyavaɨreꞌen ɨ taꞌihuaaraꞌa tɨ ij aɨn eitzeꞌe raayɨꞌɨtɨhuaꞌan aꞌij tɨ tiꞌijxeꞌeveꞌe ɨ Dioj.
\v 3 Ayaa pu xaa nyaꞌu Cɨriistuꞌu ajta ayan huarɨj. Capu ayaa naꞌa rahuaucaꞌa aꞌij tɨ tiraꞌaranajchacaꞌa, silu ayaa pu raaraꞌaste aꞌij tɨ teꞌeyuꞌusiꞌi tɨcɨn: “Ayaa pu nyeetzi japua rajve maj naꞌajtyaꞌaxɨ mueetzi jetze maꞌacan.”
\v 4 Ayaa puꞌu, aꞌini nain tɨj naꞌa tɨ ajnaꞌɨmɨ áꞌayuꞌusiꞌihuacaꞌa, ayaa pu een cɨn teꞌeyuꞌusiꞌihuacaꞌa tyej ti jetzen huatamuaꞌaten, tɨ ij aɨn tɨ áꞌayuꞌusiꞌihuacaꞌa caꞌanijraꞌa taataꞌacareꞌen tyej ti teyan tyaꞌutaviicueꞌi, tyajta teyan rachueꞌevaꞌa tɨ Dioj ayan tuꞌirajtuaani.
\v 5-6 Ajta aɨn Dioj tɨ ayan caꞌanijraꞌa amuaataꞌaca sej si seyan huatyaujcaꞌanyen, ajta sej si tyaꞌutaviicueꞌi, cheꞌe aɨn ajta amuaataꞌacareꞌen sej rɨꞌɨ titetyújchaɨ rujɨɨmuaꞌa sej si seyan ruꞌihuaamuaꞌa xaꞌaraꞌani tyamuaꞌa naa aꞌachu saj puaꞌamua. Cheꞌe Dioj rɨꞌɨ tyajamuaataꞌacareꞌen aɨjna cɨmeꞌe saj sauj seyan raꞌastijreꞌe ɨ Cɨriistuꞌu tɨ ajta iꞌi Jesús, sej si naijmiꞌi seyan rɨꞌɨ tiraataꞌan saɨjna ɨ Dioj tɨ yaꞌupuaaraꞌan pueen ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu. Sataꞌaj seyan rɨꞌɨ tiraataꞌacareꞌen aꞌachu saj ruꞌumuaꞌaree ɨ aꞌamuatzajtaꞌa.
\s Naijmiꞌica pu nuꞌu tihuaꞌacɨꞌɨti ɨ nyuucari ɨ maj cɨn huataujtyamuaꞌaveꞌesin
\p
\v 7 Sataꞌaj seyan cheꞌeta sanaꞌa ancuraꞌujviꞌitɨn seij sajta seij aꞌij tɨ Cɨriistuꞌu ajta amuaꞌancureꞌeviꞌitɨ muejmi sej si seyan saɨjna cɨn rɨꞌɨ tiraataꞌan ɨ Dioj.
\v 8-9 Ayaa nu tyajaꞌamueꞌixaateꞌe tɨ aɨn Cɨriistuꞌu ayan aɨjna cɨn teꞌentyajrupi tɨ ij huaꞌutyavaɨreꞌen aɨme ɨ maj runavij antisiꞌiche aɨjna cɨmeꞌe mej meyan raamuaꞌaree tɨ Dioj tzaahuatiꞌiraꞌa cɨn arauraste aꞌij tɨ ari tyaꞌataujratziiriꞌi. Cɨriistuꞌu pu nain cɨn tyaꞌataujratziiriꞌi huaꞌa jemi ɨ huaꞌahuaacɨxaꞌastyamuaꞌacɨꞌɨ mej mi aɨme ɨ mej seij chuejraꞌa japua eꞌemaꞌacantacaa majta meyan rɨꞌɨ tiraataꞌasin ɨ Dioj maɨjna cɨmeꞌe tɨ aɨn huaꞌancuꞌuvajxɨ. Ayaa pu teꞌeyuꞌusiꞌi tɨcɨn:
\q Aɨj nu cɨn rɨꞌɨ timuaataꞌasin huaꞌa tzajtaꞌa aɨme
\q2 ɨ mej seij chuejraꞌa japua eꞌemaꞌacan.
\q Ayaa nu tiꞌichuiica naꞌame
\q2 nyej ni nyaɨjna cɨn rɨꞌɨ timuaataꞌan.
\m
\v 10 Ajtahuaꞌa ayan tɨcɨn:
\q Sataꞌaj huataujtyamuaꞌaveꞌen huaꞌa jamuan
\q2 ɨ tyaɨtestyamuaꞌameꞌen pueen ɨ Israel tyaacan,
\q muaan mɨ sej seij chuejraꞌa japua eꞌemaꞌacan.
\m
\v 11 Ajtahuaꞌa seij ayan tɨcɨn:
\q Sataꞌaj rɨꞌɨ tiraataꞌan ɨ tavastaraꞌa,
\q2 naijmiꞌi muan, aꞌachu saj puaꞌamua,
\q2 mɨ sej seij chuejraꞌa japua eꞌemaꞌacan.
\q Sataꞌaj sajta seyan tyuꞌutachuiica ɨ jemin
\q2 sej si saɨjna cɨn rɨꞌɨ tiraataꞌan,
\q naijmiꞌi muan, mɨ tyaɨte
\q2 sej yan huachaatɨme chaanaca japua.
\m
\v 12 Ajtahuaꞌa, ayan tyuꞌutaxajtacaꞌa aɨjna ɨ Isaías tyaacan tɨcɨn:
\q Seij pu airaujneijteꞌesin aɨjna jetze ɨ Isaí.
\q Aɨ pu ayan huataseijreꞌesin
\q2 tɨ ij ayan tihuaꞌutaijteꞌen naijmiꞌica aɨme
\q2 ɨ mej seij chuejraꞌa japua eꞌemaꞌacan.
\q Majta aɨme, ayaa mu rajchuꞌeveꞌesin
\q2 tɨꞌi aɨn hueꞌirajtuaani.
\p
\v 13 Ajta aɨn ɨ Dioj tɨ ayan caꞌanijraꞌa tataꞌaca tej ti teyan raachuꞌeveꞌen, cheꞌe aɨn ayan rɨꞌɨ tyajamuaataꞌan sej si eihua huapɨꞌɨ huataujtyamuaꞌaveꞌen, tɨ ij ajta amuaatyápuaꞌariteꞌen tyamuaꞌa naa saɨjna cɨmeꞌe sej seyan raꞌastijreꞌe saɨjna ɨ tavastaraꞌa. Cheꞌe aɨn ajta ayan rɨꞌɨ tyajamuaataꞌan sej si eitzeꞌe seyan raachuꞌeveꞌen saɨjna cɨmeꞌe saj saɨjna jetze araujcaꞌanye ɨ xaijnyuꞌucaraꞌaraꞌan ɨ Dioj.
\p
\v 14 Ayaa pu tinaꞌamitejteꞌe inyeetzi tɨ ayan tiꞌayajna muejmi cɨmeꞌe sej seyan nain cɨn rɨꞌɨ titetyújchaꞌɨ seij sajta seij. Nain xu uꞌumuaꞌaree ɨ tɨ ruxeꞌeveꞌe, sajta seyan raayɨꞌɨtɨ sej si huauritii seij sajta seij.
\v 15-16 Ayaa nu eihua ahuanyacaꞌanyaa nyej ni neyan tyajamuaatayuꞌuseꞌen tiꞌitɨ cɨmeꞌe. Capu tiꞌiseicaj naꞌa, canu nyajta tiꞌitzɨɨnyaꞌacaa nyej neyan huarɨj, silu ayaa nu nyajtahuaꞌa tiꞌitɨ cɨn amuaꞌutamuaꞌareeriꞌi nyaɨjna cɨmeꞌe, aꞌini Dioj pu ayan tinyeijca. Ayaa nu nyaɨjna cɨn teꞌentyajrupi nyej ni tyuꞌutyavaɨreꞌen ɨ Dioj jemi. Nyajta nu nyaɨjna cɨn antinmuaꞌaree nyej neyan ratyavaɨreꞌen ɨ Cɨriistuꞌu, tɨ ajta iꞌi Jesús, nyej ni neyan tihuaꞌutaꞌixaateꞌen aɨme ɨ mej seij chuejraꞌa japua eꞌemaꞌacan aꞌij tɨ ari huarɨj ɨ Dioj. Ayaa mu eenyaꞌa muaꞌajuꞌun tɨj muaɨꞌɨvejri tɨ seij raatyajtuaa ɨ Dioj jemi tɨ ij ayan rɨꞌɨ tiraataꞌan. Ee xaa nyaꞌu, aɨn ɨ xaijnyuꞌucaraꞌaraꞌan ɨ Dioj, aɨ pu ayan huaꞌaruuren mej mi meyan urareꞌenyaꞌacan cɨn huatyaturan ɨ Dioj jemi.
\p
\v 17 Aɨj nu cɨn huapɨꞌɨ huatantyamuaꞌaveꞌe jemin ɨ Cɨriistuꞌu tɨ ajta iꞌi Jesús nyaɨjna cɨmeꞌe nyej neyan ravaɨreꞌe ɨ Dioj.
\v 18-19 Aɨj nuꞌu cɨn neyan aꞌancaꞌanye nyej tyajaꞌamueꞌixaateꞌen nyaɨjna cɨmeꞌe tɨ Cɨriistuꞌu ari ayan tyuꞌuruu aɨjna cɨmeꞌe nyaj ravaɨreꞌe mej mi maɨn ɨ mej seij chuejraꞌa japua eꞌemaꞌacan meyan raꞌaraꞌastijreꞌen maɨjna ɨ Dioj. Ayaa mu een cɨn raꞌastijreꞌe maɨjna cɨmeꞌe mej meyan raanamuajriꞌi aꞌij nyej tyuꞌutaxajtacaꞌa, majta meyan naaseij inyeetzi aꞌij nyej tiꞌitɨj cɨn huarɨj, nyej neyan huarɨj tɨ huapɨꞌɨ ruxeꞌeveꞌe, ɨ maj cɨn aꞌij tyaꞌutaseij, aꞌini Dioj pu raatyajtuaa ɨ rumuareꞌeriꞌiraꞌa inyeetzi jemi aɨjna cɨmeꞌe nyaj nyaɨjna jetze arancaꞌanyajcaꞌa ɨ xaijnyuꞌucaraꞌaraꞌan ɨ Dioj. Aɨj nu cɨn nain japua neri tihuaꞌutaꞌixaa nyaɨjna ɨ nyuucari tɨ cɨmeꞌen raxa ɨ Cɨriistuꞌu. Nainjapua tɨj naꞌa aun maj huachaatɨme u Jerusalén, nyajta meyee aꞌu maj eꞌereꞌetyaꞌacaa asta nyanaꞌa cai nyaun ɨmɨ aꞌatanye nyaujna aꞌu maj aꞌuchaatɨme tɨj naꞌa tɨ aun huatacáꞌa u Ilírico, nain nu cɨn tihuaꞌutaꞌixaa ɨ Cɨriistuꞌu jetze maꞌacan.
\v 20 Tɨj naꞌa nyaj autyejche nyaj raꞌaraꞌastijreꞌen ɨ tavastaraꞌa tɨ yu eꞌireꞌenye, ayaa nu ahuancaꞌanye nyej neyan tihuaꞌutaꞌixaateꞌen ɨ nyuucari cɨmeꞌe aꞌu maj cai xɨ aꞌanaj yaꞌunamuajriꞌi, nyej ni cai neyan cheꞌeta nyanaꞌa nyaɨjna jetze aꞌutejcheni aꞌu tɨ ari saɨj tyajaꞌumuáre.
\v 21 Me nyajta inyaa, ayaa nu huarɨj aꞌij tɨ teꞌeyuꞌusiꞌi tɨcɨn:
\q Aɨ mu raseijran maɨjna
\q2 ɨ tɨ cai xɨ aꞌatɨ aɨjna cɨn tihuaꞌutaꞌixaa.
\q Majta mu yauꞌeitaa muaꞌajuꞌun maɨjna
\q2 ɨ maj cai xɨ aꞌanaj raanamuajriꞌi.
\s Pablo pu nuꞌu aꞌuyeꞌimɨꞌɨ u Roma
\p
\v 22 Aɨj pu cɨn, muiꞌitɨ mu naataꞌijmɨjriꞌi nyaj cai neyan nyaun aꞌatanyén muejmi jemi.
\v 23-24 Aru ijii, aꞌini capu cheꞌe maꞌa aꞌarɨꞌɨri nyej nyaun tyajaꞌumuareꞌen tɨj naꞌa ayun tɨ huacaꞌa, ajta aꞌini puꞌuri tyajaume aꞌachu puaꞌan ninyeꞌiraꞌa nyej neyan tiꞌijxeꞌeveꞌe nyej amuajaꞌuvaꞌamuaare, ayaa nu tiꞌimuaꞌatze nyej neyan huarɨni nyatɨꞌɨj nyaun aꞌuméꞌen u España. Ayaa nu tiꞌijxeꞌeveꞌe inyaa nyej nyaun amuajaꞌutéseijra nyatɨꞌɨj nyaun aꞌuméꞌen, tyej ti aꞌatzu huatatyamuaꞌaveꞌen tajɨɨmuaꞌa, sej si sajta naatavaɨreꞌen nyej ni nyajtahuaꞌa u aꞌuméꞌen aꞌu nyaj aꞌuméj.
\p
\v 25 Me nyajta inyaa, ijii, u nu aꞌumaꞌa naꞌame u Jerusalén nyej ni huaꞌutavaɨreꞌen aɨme ɨ mej maun eꞌeche ɨ taꞌihuaamuaꞌa, ɨ mej Dioj jemi seijreꞌe.
\v 26 Majta aɨme ɨ mej maun Macedonia huachaatɨme, majta aɨme ɨ maj maun Acaya eꞌemaꞌacan, ayaa pu huaꞌaranajchacaꞌa mej tiꞌitɨj huaꞌutaꞌan aɨme ɨ maj cai aꞌij tiꞌijviicueꞌi, ɨ maj maun eꞌeche u Jerusalén.
\v 27 Ayaa pu tihuaꞌaranajchacaꞌa mej meyan huarɨni. Ee xaa nyaꞌu, ayaa mu tihuaꞌachaɨraꞌacaa, aꞌini aɨme ɨ mej seij chuejraꞌa japua eꞌemaꞌacan, ayaa pu tihuaꞌucɨꞌɨ maj raꞌancuraꞌan maɨjna ɨ tɨ cɨn Dioj rɨꞌɨ tihuaꞌutaꞌa aɨme ɨ mej Israel jetze ajtyamaꞌacantacaꞌa. Aɨj mu cɨn aɨme ɨ mej seij chuejraꞌa japua eꞌemaꞌacan meyan tihuaꞌachaɨreꞌe maj meyan tiꞌitɨ tihuaꞌutaꞌan maɨjna ɨ maj cɨn huataujvaɨreꞌen.
\v 28 Ayaa nu anacai huaꞌutatuiireꞌesin nyaɨjna ɨ mej tyuꞌutaꞌa ɨ taꞌihuaamuaꞌa. Nyatɨꞌɨj nain cɨn raꞌanticɨꞌɨ, aj nu ni nyaun aꞌuméj muejmi jemi. Nyajta eꞌeyan u aꞌumaꞌa naꞌame u España.
\v 29 Ayaa nu ruꞌumuaꞌaree tɨ ayan teꞌeme ajna nyatɨꞌɨj nyaun aꞌuméꞌen muejmi jemi tɨ aɨn tavastaraꞌa ayan nain cɨn rɨꞌɨ titaataꞌan naijmiꞌica ityejmi. Capu tiꞌitɨ aꞌij titaꞌaturaatyaꞌa aꞌame.
\p
\v 30 Ayaa nu tyajaꞌamuahuavii, nyeꞌihuaamuaꞌa mɨ saj sajta raꞌaraꞌastijreꞌen ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, sej si seyan tinaatyavaɨreꞌen saɨjna cɨmeꞌe ɨ nyaj cɨn tíꞌityeseꞌe. Sataꞌaj seyan tiꞌijhuaviira ɨ Dioj inyeetzi cɨmeꞌe.
\v 31 Sataꞌaj seyan tiꞌijhuaviira tɨ ij aɨn Dioj ayan nuꞌirajtuaani mej mi cai áꞌij nyaruure aɨme ɨ maj cai meyan raꞌaraꞌastijreꞌe ɨ tavastaraꞌa, aɨme ɨ maj Judea huachaatɨme. Sataꞌaj sajta seyan rahuaviira mej mi maɨn ɨ mej Dioj jemi seijreꞌe, ɨ maj Jerusalén eꞌemaꞌacan, mej mi meyan raꞌancuraꞌan ɨ nyaj cɨn huaꞌutavaɨreꞌen.
\v 32 Ayaa xu huarɨni nyej ni nyaun aꞌuméꞌen muejmi jemi tɨ puaꞌa Dioj ayan naataꞌacareꞌen, tyej ti tajɨɨmuaꞌa huatatatyamuaꞌaveꞌen, tyej ti tyajta caꞌanijraꞌa huatátaꞌan seij tyajta seij.
\v 33 Ajta aɨn ɨ Dioj tɨ rɨꞌɨ taatyapuaꞌari, cheꞌe aɨn ayan huatyaturan naijmiꞌica jemi, muejmi. Cheꞌe ayan tyajaꞌureꞌenyen.
\c 16
\s Pablo pu huaꞌataujtyeꞌe ɨ ruꞌamiincustyamuaꞌa
\p
\v 1 Ayaa nu tyajaꞌamueꞌixaateꞌe nyaɨjna cɨmeꞌe ɨ taꞌihuaaraꞌa tɨ jɨitaꞌa, aɨjna ɨ Febe. Aɨ pu huaꞌavaɨreꞌe aɨme ɨ mej eꞌetyujsaꞌɨri aujna aꞌahuaꞌa Cencrea.
\v 2 Ayaa nu tyajaꞌamuahuavii sej si seyan raꞌancureꞌeviꞌitɨn tyamuaꞌa naa aꞌij tɨ tiraavijteꞌe ityejmi jemi, i tyej Dioj jemi seijreꞌe. Sataꞌaj seyan raꞌancureꞌeviꞌitɨn aꞌini aɨ pu ajta raꞌastijreꞌe ɨ tavastaraꞌa. Sataꞌaj seyan nain cɨn raatyavaɨreꞌen tɨj naꞌa tɨ tiraꞌaturaateꞌe, aꞌini aɨ pu ari muiꞌicaca huatavaɨ ɨ tyaɨte, ajta pu nyeetzi huatavaɨ.
\p
\v 3 Sataꞌaj huaꞌutataujteꞌen saɨme ɨ Priscila, sajta saɨjna ɨ Aquila. Aɨ mu majta meyan nyeetzi jamuan tiꞌimuareꞌe tyej ti naijmiꞌi raatyavaɨreꞌen tyaɨjna ɨ Cɨriistuꞌu tɨ ajta iꞌi Jesús.
\v 4 Aɨ mu meyan huatauraꞌa mej mi nyeetzi japua huanyuuni. Ayaa mu tɨn maɨjna cɨn huacuii. Eecan nu nyaɨjna cɨn tiꞌintyamuaꞌaveꞌe. Majta aɨme, ayaa mu majta tyuꞌujtyamuaꞌaveꞌe matɨj manaꞌa puaꞌamua ɨ mej eꞌetyujsaꞌɨri, aɨme ɨ mej seij chuejraꞌa japua eꞌemaꞌacan.
\v 5 Sataꞌaj sajta huaꞌutataujteꞌen aɨme ɨ mej aun eꞌetyujsaꞌɨri aꞌu maj eꞌeche aɨjna ɨ Priscila, ajta aɨjna ɨ Aquila. Sataꞌaj sajta seyan tiraatataujteꞌen saɨjna ɨ nyaꞌamiincu ɨ Epeneto, tɨ aun eꞌeche u Acaya tɨ ayan anacai huataujtuiiriꞌi ɨ Cɨriistuꞌu jemi.
\v 6 Sataꞌaj seyan tiraatataujteꞌen saɨjna ɨ Mariiya, aɨjna tɨ ari eihua tyuꞌumuarej muejmi jemi.
\v 7 Sataꞌaj sajta huaꞌutataujteꞌen saɨme ɨ Andrónico, sajta ɨ Junias. Aɨ mu majta nyaa jamuan aityanamiꞌihuacaꞌa. Majta aɨme ɨ maj tamuaamuataꞌa japuan huaꞌapua araꞌase, aɨ mu tyamuaꞌa naa huaꞌamuajte maɨjna ɨ maj huaꞌapua, ɨ maj majta anacai raꞌaraꞌastijre ɨ Cɨriistuꞌu nyaa cai inyaa.
\p
\v 8 Sataꞌaj seyan cheꞌeta sanaꞌa tiraatataujteꞌen saɨjna ɨ Ampliato, ɨ nyaj eihua raxeꞌeveꞌe ɨ tavastaraꞌa jemi.
\v 9 Ayaa xu sajta tiraatataujteꞌen saɨjna ɨ Urbano tɨ ta jamuan ravaꞌɨreꞌe ɨ Cɨriistuꞌu. Sataꞌaj seyan tiraatataujteꞌen saɨjna ɨ Estaquis, ɨ nyaꞌamiincu ɨ nyaj nyajta eihua raxeꞌeveꞌe.
\v 10 Sataꞌaj saɨjna huatataujteꞌen ɨ Apeles. Aɨ pu eihua ráꞌuviicueꞌiriꞌi ɨ Cɨriistuꞌu jetze maꞌacan, ajta ayaa pu tyuꞌutyaamueꞌitɨ. Sataꞌaj seyan huaꞌutataujteꞌen saɨme ɨ mej Aristóbulo jamuan eꞌeche.
\v 11 Sataꞌaj sajta raatataujteꞌen ɨ nyeꞌihuaaraꞌa, saɨjna ɨ Herodión. Ajta aɨme ɨ maj Narciso jamuan eꞌeche, ɨ maj majta raꞌastijreꞌe ɨ tavastaraꞌa, sataꞌaj seyan cheꞌeta sanaꞌa tihuaꞌutataujteꞌen.
\p
\v 12 Sataꞌaj sajta saɨme huatataujteꞌen aɨjna ɨ Trifena, sajta saɨjna ɨ Trifosa. Aɨ mu juuca pueen, ɨ maj majta eihua huapɨꞌɨ tiꞌimuareꞌe ɨ tavastaraꞌa jemi. Sataꞌaj seyan raatataujteꞌen saɨjna ɨ Pérsida, ɨ nyaꞌamiincu ɨ nyaj nyajta eihua raxeꞌeveꞌe. Ai pu aɨn pueen seij ɨ jɨitaꞌa tɨ ajta eihua huapɨꞌɨ ari tyuꞌumuarej ɨ tavastaraꞌa jemi.
\v 13 Sataꞌaj sajta raatataujteꞌen saɨjna ɨ Rufo, tavastaraꞌa tɨ raꞌantihuau. Sataꞌaj sajta seyan raatataujteꞌen saɨjna naanajraꞌan aɨjna ɨ Rufo, aꞌini aɨ pu ayan tinaachaɨ cumu nyaj yaujraꞌan iꞌi pueenyeꞌen.
\v 14 Sataꞌaj seyan huaꞌutataujteꞌen saɨme ɨ Asíncrito, sajta saɨjna ɨ Flegonte, sajta saɨjna ɨ Hermas. Sataꞌaj seyan cheꞌeta sanaꞌa huaꞌutataujteꞌen ɨ seica, saɨjna ɨ Patrobas, sajta saɨjna ɨ Hermes, sajta aɨme ɨ taꞌihuaamuaꞌa ɨ maj huaꞌa jamuan eꞌereꞌeti.
\v 15 Sataꞌaj sajta saɨme huatataujteꞌen saɨjna ɨ Filólogo, sajta saɨjna ɨ Julia, sajta saɨjna ɨ Nereo, sajta ɨ juutzajraꞌan tɨ jɨitaꞌa, sajta saɨjna ɨ Olimpas, sataꞌaj sajta seyan huaꞌutataujteꞌen naijmiꞌica aɨme ɨ maj huaꞌa jamuan eꞌereꞌeti, ɨ maj majta Dioj jemi seijreꞌe.
\p
\v 16 Sataꞌaj sajta seyan huaꞌutaujteꞌen seij sajta seij aꞌij tɨ tiraavijteꞌe ɨ Dioj jemi. Matɨj manaꞌa puaꞌamua ɨ mej eꞌetyujsaꞌɨri mej mi raanajche ɨ Dioj, naimiꞌi mu meyan tyajaꞌamuataujteꞌe.
\p
\v 17-18 Ayaa nu tyajaꞌamueꞌixaateꞌe tzaahuatiꞌiraꞌa cɨmeꞌe, muan, nyeꞌihuaamuaꞌa. Rɨꞌɨ xuꞌu muan aɨme jemi ɨ maj caꞌanijraꞌa amuaataꞌaca sej si eꞌitaꞌa aꞌutácɨɨnye, majta meyan aꞌamuamuáreꞌeristeꞌe sej seyan autaꞌɨtzen ɨ Dioj jemi. Aɨ mu meri ajtacɨ́j aɨjna jetze aꞌij sej seri tiraarɨꞌɨre. Caxu huaꞌa jamuan áꞌujhuaꞌanyeꞌen, aꞌini matɨj manaꞌa mej meyan eꞌen, camu aꞌatzu ravaɨreꞌe ɨ tavastaraꞌa, aɨjna ɨ Cɨriistuꞌu. Rujɨɨmuaꞌa muꞌu ravaɨreꞌe. Ayaa mu maɨjna cɨn huaꞌacuanamua ɨ tyaɨte ɨ maj cai tiꞌitɨj cɨn aꞌaturaj. Ayaa mu maɨjna cɨn tihueꞌixaateꞌe nyuucari cɨmeꞌe tɨ ayaa naꞌa naa namuajreꞌe, nusu tiꞌitɨ maj cɨn ahuaujtzaahuateꞌen aɨme ɨ mej meyan ranamua.
\v 19 Naimiꞌi mu meri meyan raanamuajriꞌi sej seri raꞌastijreꞌe ɨ tavastaraꞌa. Aɨj nu cɨn huapɨꞌɨ nyetyamuaꞌaveꞌe muejmi cɨmeꞌe. Me nyajta inyaa, ayaa nu tiꞌijxeꞌeveꞌe sej seyan támuaꞌaraa sej si seyan rɨjca aꞌij tɨ ayan tiraavijteꞌe ɨ Dioj jemi, sej si sajta cai seyan huatauraꞌan sej seyan rɨjca saɨjna cɨmeꞌe tɨ aꞌij puaꞌa een.
\v 20 Ajta aɨn ɨ Dioj tɨ rɨꞌɨ taatyapuaꞌari, caꞌanacan pu nain cɨn raꞌantipuaꞌariteꞌesin aɨjna ɨ Satanás, tɨ ij ayan amuaataꞌan saj nain cɨn raatyamueꞌitɨn saɨjna ɨ tiyaaruꞌu.
\p
\v 21 Aɨ pu ayan ya aꞌamuaataujteꞌe aɨjna ɨ Timuteeyu, tɨ nya jamuan tiꞌimuareꞌe. Ya mu majta áꞌamuataujteꞌe ɨ nyeꞌihuaamuaꞌa aɨjna ɨ Lucio, ajta ɨ Jasón, ajta aɨjna ɨ Sosípater.
\p
\v 22 Nyajta inyaa, i nyaj iꞌi Tercio, i nyaj nyajta neyan raꞌayuꞌuxa ɨ Pablo jetze maꞌacan nyeijna i yuꞌuxari, nyaa nu nyajta áꞌamuataujteꞌe ɨ tavastaraꞌa jetze maꞌacan.
\p
\v 23 Ajta aɨjna ɨ Gayo, ɨ nyaj jemin ya huaca ajta tɨ rɨꞌɨ tihuaꞌataꞌaca naijmiꞌica aɨme ɨ mej meyan ye tyujsaꞌɨri meyajna, aɨ pu ajta ya áꞌamuataujteꞌe.
\p
\v 24 Majta aɨme, ɨ Erasto tɨ aɨjna cɨn tiꞌityejvee iyaa chajtaꞌa tɨ tumin tisáꞌɨri, ajta aɨjna ɨ taꞌihuaaraꞌa, aɨjna ɨ Cuarto, aɨ mu majta ya áꞌamuataujteꞌe.
\s Tyaj nuꞌu rɨꞌɨ tiraataꞌan ɨ Dioj
\p
\v 25 Ticheꞌe teyan rɨꞌɨ tiraataꞌan tyaɨjna ɨ Dioj tɨ ayan raayɨꞌɨtɨ tɨ caꞌanijraꞌa amuaataꞌan sej si seyan rɨꞌɨ titetyújchaɨca aꞌij nyej tyajaꞌamueꞌixaatyaꞌa naꞌayeꞌi nyaɨjna cɨmeꞌe ɨ nyuucari tɨ cɨmeꞌen raxa aꞌij tɨ huarɨj ɨ Jesús tɨ ajta iꞌi Cɨriistuꞌu. Aɨjna ɨ nyuucari, ai pu aɨn pueen ɨ tɨ Dioj cɨn ari titaataseijrate aɨjna tɨ ayan ruꞌavaatacaꞌa tɨj naꞌa tɨ Dioj raatyataahuacaꞌa ɨ chaanaca tɨ yu eꞌireꞌenye.
\v 26 Ma ajta ijii, Dioj pu ari titaataseijrate. Aɨjna ɨ Dioj tɨ seijreꞌe tɨj naꞌa rusen cɨmeꞌe, aɨ pu ayan tyuꞌutaijtacaꞌa tej teyan raamuaꞌaree tyaɨjna jetze ɨ mej jetzen raꞌuyuꞌuxacaꞌa aɨme ɨ mej tiꞌixaxaꞌataꞌa ɨ Dioj jetze maꞌacan. Ayaa pu tiꞌijxeꞌeveꞌe mej mi naimiꞌi matɨj manaꞌa puaꞌamuaꞌa mej iiyan seijreꞌe ɨ chaanaca japua, mej mi ráꞌantzaahuateꞌen, majta raꞌaraꞌastijreꞌen ɨ jemin.
\v 27 Ticheꞌe teyan rɨꞌɨ tiraataꞌacareꞌen tɨj naꞌa rusen cɨmeꞌe tyaɨjna ɨ Dioj tɨ aɨn rusaɨj nain cɨn támuaꞌaree. Ticheꞌe teyan rɨꞌɨ tiraataꞌacareꞌen aɨjna cɨmeꞌe tɨ tajapua huanyúu aɨjna ɨ Jesús tɨ ajta iꞌi Cɨriistuꞌu. Cheꞌe ayan tyajaꞌureꞌenyen.