\id 1CO
\h 1 Corintios
\toc1 1 Corintios
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Corinto aꞌuchaatɨmaꞌacaa ɨ tɨ saɨtɨ
\c 1
\s Pablo pu huáꞌataujteꞌe
\p
\v 1 Inyaa, i nyaj iꞌi Pablo, ɨ tɨ Dioj naꞌantihuau ruxéꞌeviꞌiraꞌa cɨmeꞌe nyej ni tyuꞌutyavaɨreꞌen ɨ Cɨriistuꞌu jetze maꞌacan tɨ ajta aɨn pueen ɨ Jesús, nyaɨjna jamuan ɨ taꞌihuaaraꞌa ɨ Sóstenes.
\v 2 Yaa nu tyajaꞌamuayuꞌuseꞌe muan mɨ saj saun eꞌetyujsaꞌɨri saujna Corinto sej si raatyaanajche ɨ Dioj, mɨ saj rɨꞌɨ tiꞌityeseijreꞌe saɨjna cɨmeꞌe tɨ aɨn Cɨriistuꞌu, tɨ ajta Jesús pueen, muejmi huatauraꞌate, ajta muejmi huatajée sej si jemin seijraꞌa. Muan xu sajta huaꞌa jemi seijreꞌe matɨj manaꞌa puaꞌamua mej yen seijreꞌe tɨj naꞌa veꞌe ɨ chaanaca ɨ maj majta meyan tiꞌixa tɨ yee Jesús pu huaꞌavastaraꞌa pueen. Ee xaa nyaꞌu, aɨ pu aɨn pueen ɨ huaꞌavastaraꞌa, ajta ayan cheꞌeta naꞌa tavastaraꞌa pueen itejmi.
\v 3 Ajta aɨn ɨ Dioj ɨ tyaj rajyaꞌupua, ajta ɨ tavastaraꞌa aɨjna ɨ Jesús tɨ ajta Cɨriistuꞌu pueen, micheꞌe maɨn rɨꞌɨ tyajamuaataꞌan, majta amuaatyápuaꞌariteꞌen.
\s Ɨ tɨ cɨn Dioj rɨꞌɨ tihuaꞌutaꞌa
\p
\v 4-5 Aꞌanaj tɨ naꞌa nu neyan rɨꞌɨ tirataꞌaca ɨ Dioj nyaj ranajche muejmi cɨmeꞌen, aꞌini eihua pu rɨꞌɨ tyajamuaataꞌa ɨ Dioj aɨjna cɨmeꞌe sej seri jemin seijreꞌe ɨ Cɨriistuꞌu, tɨ ajta Jesús pueen, aꞌini aɨjna jemi muan xu seri nain tyaꞌancuraꞌa tɨ tyajamuatyavaꞌɨri ɨ saj cɨn tihuaꞌutaꞌixaateꞌen ɨ tyaɨte, ajta ɨ saj cɨn yauꞌeitaa xaꞌaraꞌani aꞌij tɨ een ɨ Dioj jemi.
\v 6 Ayaa pu een cɨn amuaaruu aꞌini muan xu tyamuaꞌa naa tihuaꞌutaꞌixaa ɨ tyaɨte ɨ Cɨriistuꞌu jetze maꞌacan.
\v 7 Aɨj pu cɨn cai tiꞌitɨ jamaꞌutyaturaate ɨ tɨ cɨn Dioj rɨꞌɨ tyajamuaataꞌa. Aɨj xu cɨn, sauj rachuꞌeveꞌe tɨ yan huataseijreꞌen ɨ tavastaraꞌa, aɨjna ɨ Jesús tɨ ajta Cɨriistuꞌu pueen.
\v 8 Aɨ pu ajta caꞌanijraꞌa amuaataꞌasin sej si tyaꞌutaviicueꞌi asta naꞌa cai nain tyeꞌentipuaꞌare, tɨ ij cai aꞌatɨ tiꞌitɨ cɨn aꞌamua jetze tíꞌipuaꞌajtyaꞌa ajna xɨcajraꞌa tɨ jetzen tihuaꞌaxɨjteꞌen ɨ tyaɨte aɨjna ɨ tavastaraꞌa, ɨ Jesús tɨ ajta Cɨriistuꞌu pueen. Aɨ pu xaa tihuaꞌaxɨjteꞌen aꞌachu maj puaꞌamua yan huachaatɨme ɨ chaanaca japua.
\v 9 Ayaa pu teꞌeme aꞌini Dioj pu ayan araurastejsin aɨjna cɨmeꞌe ɨ tɨ cɨn tyaꞌataujratziiriꞌi. Ajta, aɨ pu amuaatajée sej si seyan ruuristan jamuan ɨ yaujraꞌan aɨjna ɨ tavastaraꞌa, aɨjna ɨ Jesús tɨ ajta Cɨriistuꞌu pueen.
\s Pablo pu ayan tihueꞌihuau tɨcɨn: “¿Ni qui ayan huatámuiꞌire ɨ Cɨriistuꞌu?”
\p
\v 10 Me nyajta inyaa, ayaa nu eihua tyajaꞌamuahuavii nyuucajtzeꞌen aɨjna ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu sej si ruxaꞌaj sanaꞌa tiꞌixajta, sej si cai cheꞌe eꞌitaꞌa aꞌutacɨꞌɨcaꞌan, sej si sajtahuaꞌa rɨꞌɨ huaujruuren, sej si saɨjna cɨn antyaujsaɨreꞌen náijmiꞌi sej si seyan cheꞌeta seij sanaꞌa cɨn seyan tiꞌixaꞌapɨꞌɨntaraꞌa.
\v 11 Ayaa nu een cɨn tyajaꞌamueꞌixaateꞌe, nyeꞌihuaamuaꞌa, aꞌini aɨme ɨ mej Cloé jemi eꞌeche, aɨ mu meyan tinaataꞌixaa muejmi cɨmeꞌen saj nuꞌu rujaaxaijviꞌi rujɨɨmuaꞌa sanaꞌa.
\v 12 Aɨjna cɨmeꞌen ɨ saj nuꞌu rujaaxaijviꞌi, ayaa pu huataujmuaꞌa sej seyan rɨcɨ, tɨ seij ayan tiꞌixa yee: “Nyaa nu Pablo jetze ajtyamaꞌacan.” Ajta seij ayan yee: “Nyajta inyaa, Apolos nu jetze ajtyamaꞌacan.” Ajta seij ayan yee: “Nyaa nu Pedro jetze ajtyamaꞌacan”; naꞌari yee: “Nyaa nu Cɨriistuꞌu jetze ajtyamaꞌacan.”
\p
\v 13 Nicheꞌe aꞌatzu tyajamuaataihuaꞌu. ¿Ni qui ayan saɨque huaujruu ɨ Cɨriistuꞌu tɨ ij ayan huatámuiꞌire? Capu xaa nyaꞌu. ¿Ni qui meyan naꞌutatai ɨ curuu jetze inyeetzi i nyaj iꞌi Pablo muejmi jetze maꞌacan? Camu xaa nyaꞌu aꞌatzu. Ari iꞌi, ¿ni qui neyan áꞌamuamuaɨꞌɨhuacaꞌa nyenyuucajtzeꞌen i nyaj iꞌi Pablo? Canu xaa nyaꞌu aꞌatzu.
\v 14-15 Eecan nu rɨꞌɨ tirataꞌaca ɨ Dioj nyaj cai aꞌatɨ huamuaɨꞌɨhuacaꞌa silu aɨme nuꞌu nyaɨjna ɨ Crispo, nyajta nyaɨjna ɨ Gayo. Ayaa nuꞌu huarɨj sej si cai saɨjna cɨn aꞌujtzaahuatyaꞌa saɨjna cɨmeꞌe saj huamuaɨꞌɨvijhuacaꞌa nyenyuucajtzeꞌe.
\v 16-17 Nyajta nu huaꞌumuaɨꞌɨhuacaꞌa aɨme ɨ tyaɨtestyamuaꞌameꞌen aɨjna ɨ Estéfanas. Ayaa puꞌu xaa nyaꞌu, canu cuiꞌi ramuaꞌaree tɨ puaꞌa nyajtahuaꞌa seij huamuaɨꞌɨhuacaꞌa nusu nyacai.
\p Jee xaa, capu Cɨriistuꞌu ayan naꞌutaityacaꞌa nyej ni huaꞌumuaɨꞌɨhua ɨ tyaɨte silu ayaa pu een cɨn naꞌutaityacaꞌa nyej ni neyan tihuaꞌutaꞌixaateꞌen ɨ nyuucari cɨmeꞌe ɨ tɨ cɨn Dioj hueꞌirajtuaani. Capu ayan naꞌutaityacaꞌa nyej ni nyaɨjna cɨn tihuaꞌutaꞌixaateꞌen nyej eihua huapɨꞌɨ raayɨꞌɨtɨ ɨ huaꞌamuaꞌatziiraꞌa aɨme ɨ tyetyaca ɨ maj nuꞌu rɨꞌɨ tyuꞌuyɨꞌɨtɨ. Capu xaa nyaꞌu, silu ayaa puꞌu aɨjna cɨn naꞌutaityacaꞌa tɨ ij ayan tiꞌivaɨraꞌa aꞌaraꞌani ɨ muáreꞌeriꞌiraꞌaraꞌan aɨjna ɨ nyuucari tɨ cɨmeꞌen raxa ɨ Cɨriistuꞌu, ɨ maj ráꞌutatai ɨ curuu jetze.
\s Cɨriistuꞌu pu aɨn pueen ɨ muáreꞌeriꞌiraꞌaraꞌan ɨ Dioj
\p
\v 18 Ayaa puꞌu, aꞌini aɨme jemi ɨ mej aꞌuvaꞌɨtzɨ, ayaa pu tihuaꞌamityejteꞌe tyaj huatyátatɨmueꞌi tyaɨjna cɨmeꞌe tyej teyan tihueꞌixaateꞌe tɨ Cɨriistuꞌu ayan huamɨꞌɨ huaꞌa jetze maꞌacan ɨ curuu jetze. Me tyajta ityan, ɨ tɨ Dioj tuꞌirajtuaasin, tejmi pu ayan titaꞌamitejteꞌe tɨ aɨn nyuucari aɨn pueen ɨ muáreꞌeriꞌiraꞌaraꞌan ɨ Dioj.
\v 19 Aꞌini ayaa pu tyaꞌasɨɨmueꞌi tɨcɨn:
\q Nyaa nu yee raꞌantipuaꞌariteꞌesin
\q2 ɨ huaꞌamuaꞌatziiraꞌa
\q2 aɨme ɨ maj nuꞌu eihua huapɨꞌɨ raayɨꞌɨtɨ.
\q Nyajta nu yee raatyáuuna nain
\q2 ɨ mej meri raarɨꞌɨre
\q2 aɨme ɨ maj tyamuaꞌa tiruꞌumuaꞌaree.
\p
\v 20 Tɨ puaꞌa ayan tiꞌayajna, ¿aꞌuni aꞌij een aɨjna ɨ tɨ tyamuaꞌa tiruꞌumuaꞌaree? Capu xaa nyaꞌu maꞌa aꞌahuaꞌa. Ajta aɨn tɨ tyuꞌujmuaꞌate, ¿aꞌuni aꞌij een aɨjna? Capu ajta maꞌa aꞌahuaꞌa. Naꞌari ɨ saɨj tɨ ayan huapɨꞌɨ raayɨꞌɨtɨ tɨ tyuꞌutaxaj aɨme jemi ɨ mej ijii huatyaɨte, ¿aꞌuni eꞌeseijreꞌe? Capu cheꞌe meꞌe eꞌeseijreꞌe aꞌini Dioj pu ari raataseijratacaꞌa tɨ cai tiꞌitɨ aꞌij huataujmuaꞌa ɨ huaꞌamuaꞌatziiraꞌa aɨme ɨ mej yan japuan huachaatɨme ɨ chaanaca.
\v 21 Ma ajta aɨn ɨ Dioj, ayaa pu raaxaꞌapɨꞌɨntare rumuaꞌatziiraꞌa cɨmeꞌe tɨ cai rɨꞌɨrista aꞌame mej meyan maɨjna cɨn raamuaꞌati huaꞌamuaꞌatziiraꞌa cɨmeꞌe aɨme ɨ mej meyan iyan seijreꞌe. Ayaa pu een cɨn ayan raaxaꞌapɨꞌɨntare ɨ Dioj aꞌini ayaa pu raxeꞌevaꞌacaꞌa tɨ ayan hueꞌirajtuaani aɨjna cɨmeꞌe mej meyan raꞌatzaahuateꞌe aɨjna ɨ nyuucari tɨ nuꞌu cai aꞌij huataujmuaꞌa ɨ nyuucari tyej teyan tihueꞌixaateꞌe.
\p
\v 22 Majta maɨn, ɨ mej Israel jetze ajtyamaꞌacan, ayaa mu tiꞌijhuavii ɨ Dioj jemi ɨ maj cɨn rɨꞌɨ naa tyaꞌutaseij, ajta aɨme ɨ mej seij chuejraꞌa japua eꞌemaꞌacan, aɨ mu rahuauhuau ɨ muaꞌatziiraꞌa mej mi maɨjna cɨn nain auꞌeitaa muaꞌaraꞌani.
\v 23 Me tyajta ityan, ayaa tu tihueꞌixaateꞌe tyaɨjna cɨmeꞌe ɨ Cɨriistuꞌu ɨ maj ráꞌutatai ɨ curuu jetze. Ajta aɨn ɨ nyuucari ɨ tyaj cɨn tihueꞌixaateꞌe, ayaa pu aɨjna cɨn huaꞌutajaaxaijteꞌesin aɨme ɨ mej Israel jetze ajtyamaꞌacan. Ajta aɨme ɨ mej seij chuejraꞌa japua eꞌemaꞌacan, ayaa pu tihuaꞌamityejteꞌe tɨ cai aꞌij huataujmuaꞌa.
\p
\v 24 Ma majta aɨme, ɨ tɨ Dioj huaꞌutajée, tɨ puaꞌa aɨme ɨ maj Israel jetze ajtyamaꞌacan naꞌari mej seij chuejraꞌa japua eꞌemaꞌacan, ayaa pu tihuaꞌamityejteꞌe tɨ Cɨriistuꞌu aɨn pueen ɨ muáreꞌeriꞌiraꞌaraꞌan tɨ cɨn Dioj hueꞌirajtuaani, ajta aɨ pu aɨn pueen ɨ muaꞌatziiraꞌa tɨ cɨn Dioj tiꞌijta.
\p
\v 25 Ee xaa nyaꞌu, aɨjna tɨ nuꞌu cai aꞌij huataujmuaꞌa, aɨjna tɨ Dioj jemi eꞌemaꞌacan eitzeꞌe pu raayɨꞌɨtɨ cai ɨ huaꞌamuaꞌatziiraꞌa ɨ tyetyaca. Ajta aɨjna tɨ nuꞌu cai ruꞌucaꞌanistiꞌi ɨ Dioj, eitzeꞌe pu tiꞌivaɨreꞌe cai ɨ huaꞌamuareꞌeriꞌiraꞌa ɨ tyetyaca.
\v 26 ¿Ni cai ayan tyajamuaꞌamitejteꞌe muejmi? Casiꞌi, aꞌij tɨ een muejmi tzajtaꞌa tɨ Dioj ayan amuaatajée. Caxu muiꞌi sanaꞌa mɨ sej eihua huapɨꞌɨ ruꞌumuaꞌaree ɨ huaꞌamuaꞌatziiraꞌa aɨmej, ɨ maj yan huachaatɨme iiyan chaanaca japua. Caxu sajta muiꞌi sanaꞌa mɨ saj saɨjna cɨn antyujmuaꞌaree ɨ tɨ eihua huapɨꞌɨ ruxeꞌeveꞌe nusu saɨjna jetze airaujneijte aɨme ɨ mej ruxaahua áꞌujhuaꞌanyaꞌa. Caxu xaa nyaꞌu.
\p
\v 27 Ma ajta aɨn Dioj, aɨ pu huaꞌantihuau aɨme ɨ maj cai aꞌij tyáꞌumuaꞌareeracaa tɨ ij aɨn huaꞌutatyeviꞌirasteꞌen aɨme ɨ mej meyan ruseijrata maj nuꞌu eihua huapɨꞌɨ tyaꞌumuaꞌaree. Dioj pu ajta ayan huaꞌantihuau aɨme ɨ maj cai tiꞌitɨj cɨn antyujmuaꞌaree aɨme jemi ɨ maj yan huachaatɨme chaanaca japua tɨ ij ajta huaꞌutatyeviꞌirasteꞌen aɨme ɨ maj vaꞌacan cɨn tyítyatatí.
\p
\v 28-29 Ee xaa, Dioj pu ayan huaꞌantihuau aɨme ɨ maj cai huaꞌa jetze tiꞌicaꞌanyajcaꞌa, ajta aɨme ɨ maj huaꞌaxaahuatacaꞌa. Ayaa pu xaa nyaꞌu tiꞌayajna, Dioj pu ayan aɨjna cɨn huaꞌantihuau aɨme ɨ maj cai seijreꞌe aɨme jemi ɨ tyetyaca tɨ ij ayan huaꞌantipuaꞌariteꞌen aɨme ɨ maj títyatatí iiyan chaanaca japua, tɨ ij cai aꞌatɨ ayan aꞌujtzaahuatyaꞌa ɨ Dioj jemi.
\p
\v 30 Ma sajta muan, xuꞌuri jemin seijreꞌe ɨ Cɨriistuꞌu aɨjna cɨmeꞌe aꞌij tɨ tyajamuaaxaꞌapɨꞌɨntariꞌiriꞌi ɨ Dioj. Cɨriistuꞌu pu jemi eꞌemaꞌacan ɨ Dioj muaꞌatziiraꞌa ɨ tyaj cɨn ruꞌumuaꞌaree aꞌij tɨ een ɨ Dioj jemi. Aɨ pu ajta tajapua huanyúu tyej ti urareꞌenyaꞌacan cɨn aꞌutyaturan ɨ jemin. Cɨriistuꞌu pu muejmi huatauraꞌate. Aɨ pu ajta tyuꞌutanajchitacaꞌa aꞌamua cɨmeꞌen ɨ saj cɨn tyeꞌechaɨcaꞌa.
\p
\v 31 Aɨj pu cɨn, ayan teꞌeyuꞌusiꞌi tɨcɨn: “Tɨ puaꞌa yee aꞌatɨ ayan raxeꞌevaꞌa tɨ tiꞌitɨj cɨn aꞌujtzaahuateꞌen, cheꞌe aɨn ayan huarɨni aɨjna cɨmeꞌe aꞌij tɨ tavastaraꞌa ayan rɨꞌɨ tiraataꞌa.”
\c 2
\s Ayaa puꞌu naꞌa tihueꞌixaateꞌe aɨjna cɨmeꞌe ɨ Cɨriistuꞌu ɨ maj ráꞌutatai
\p
\v 1 Nyajta inyaa, nyeꞌihuaamuaꞌa, nyatɨꞌɨj anacai a mujaꞌuvaꞌamuaaracaꞌa nyej ni tyajamuaataꞌixaateꞌen ɨ nyuucari tɨ cɨn Dioj tyaꞌataujratziiriꞌi, canu cuiꞌi neyan nyaɨjna cɨn tyajamueꞌixaa nyaɨjna cɨmeꞌe ɨ nyuucari tɨ huapɨꞌɨ cɨn naa namuajreꞌe, canu nyajta nyaɨjna cɨmeꞌe ɨ huaꞌamuaꞌatziiraꞌa ɨ tyetyaca silu
\v 2-3 ayaa nu tiraaxaꞌapɨꞌɨntare nyaj aɨ naꞌa yauꞌeitaa naꞌaraꞌani muejmi jemi nyaɨjna ɨ Jesús tɨ ajta Cɨriistuꞌu pueen, ɨ maj ráꞌutatai ɨ curuu jetze. Nyajta, nyatɨꞌɨj nyaun aꞌutyavaacaꞌa muejmi jemi, ayaa nu amuaꞌaseijratyaꞌacaa tɨ nuꞌu cai nuꞌucaꞌanistiꞌi. Cu xuee nyaj tiꞌitzɨɨnyaꞌacaa. Ee xaa, eihua nu nyevivajcaꞌa.
\v 4 Ajta aɨn ɨ nyuucari, ɨ nyaj cɨn tyajamueꞌixaa, capu ayan eenyaꞌa tɨj aɨjna tɨ huapɨꞌɨ naa namuajreꞌe, tɨ ajta huaꞌamuaꞌatziiraꞌa jetze airáninyeica ɨ maj cɨn huaꞌamueꞌitɨcɨ ɨ tyaɨte. Capu xaa nyaꞌu, silu ayaa nu nyaɨjna cɨn tyajamuaataꞌixaa sej si raamuaꞌaree nyaj nyaɨjna jetze arancaꞌanye ɨ xaijnyuꞌucaraꞌaraꞌan ɨ Dioj, ajta aɨ pu jemin maꞌacan ɨ muareꞌeriꞌiraꞌa ɨ nyaj cɨn neyan rɨcɨ.
\v 5 Ayaa nu nyaɨjna cɨn huarɨj, sej si cai saɨjna jetze araujcaꞌanyen ɨ huaꞌamuaꞌatziiraꞌa ɨ tyetyaca silu sej si saɨjna jetze araujcaꞌanyen ɨ muáreꞌeriꞌiraꞌaraꞌan ɨ Dioj saɨjna cɨmeꞌe ɨ saj tyaꞌatzaahuateꞌe.
\s Aɨjna tɨ ruꞌavaatacaꞌa ɨ Dioj jemi, tɨ ajta ari titaataseijrate
\p
\v 6 Me tyajta ityan, tyan tu xaa tyaɨjna cɨn tyajamueꞌixaa seij cɨmeꞌe ɨ muaꞌatziiraꞌa aɨme tzajtaꞌa ɨ mej meri tyuꞌunáijmire. Ajta aɨn ɨ muaꞌatziiraꞌa, capu huaꞌa jetze huanyej aɨme ɨ mej yan japuan seijreꞌe ɨ chaanaca. Capu ajta huaꞌa tzajtaꞌa maꞌacan aɨme ɨ mej tiꞌijta iiyan chaanaca japua, ɨ maj majta aꞌuvaꞌɨtzɨ.
\v 7 Ee xaa nyaꞌu, tyan tu teyan raxa ɨ Dioj muaꞌatziiraꞌa cɨmeꞌe tɨ cai rɨꞌɨri tɨ aꞌatɨ ayan rusaɨj aꞌij tirajtyauni ɨ muaꞌatziiraꞌa tɨ ruꞌavaatacaꞌa tɨ cɨmeꞌen jajcua ɨmɨ tɨꞌɨj cai xɨ huataseijre ɨ chaanaca. Dioj pu ayan tiraaxaꞌapɨꞌɨntare tɨ ayan titáacɨꞌɨti ityejmi aɨjna tɨ huapɨꞌɨ naa seiraꞌa aꞌaraꞌani.
\p
\v 8 Ma majta aɨme, ɨ mej yan tiꞌijta iiyan chaanaca japua, capu aꞌatzu aꞌij tihuaꞌamityejtyaꞌacaa aɨjna tɨ ruꞌavaatacaꞌa, aꞌini tɨ puaꞌa meyan ramuaꞌareeracajcheꞌe, camu meyan tiráꞌatatáncheꞌe ɨ tavastaraꞌa, ɨ tɨ ajta huapɨꞌɨ naa tiꞌiseiraꞌa aꞌaraꞌani tɨj naꞌa rusen cɨmeꞌe.
\v 9 Ma ajta, ayaa pu tyeꞌeyuꞌusiꞌi tɨcɨn:
\q Aɨjna tɨ yee Dioj rɨꞌɨ raaruu aɨme cɨmeꞌe
\q2 ɨ mej raxeꞌeveꞌe, capu aꞌatɨ ayan raaseij,
\q capu ajta aꞌij tihuaꞌamityejtyaꞌacaa
\q2 aꞌij tɨ tyeꞌemeꞌencheꞌe.
\m
\v 10 Ma ajta aɨn, Dioj pu taataseijrate aɨjna cɨmeꞌe tɨ tejmi jemi raatyajtuaa aɨjna ɨ ruxaijnyuꞌuca tɨ ij aɨn ayan titaataꞌitii. Ajta aɨn xaijnyuꞌucaraꞌaraꞌan, nain pu cɨn ayan tiraꞌamitejteꞌe, ajta nain pu ruꞌumuaꞌaree aꞌij tɨ tiraꞌamitejteꞌe ɨ Dioj.
\p
\v 11 Ayaa puꞌu, aꞌini huaꞌa cɨmeꞌen ɨ tyetyaca, aɨn xaijnyuꞌucaraꞌaraꞌan ɨ tyaataꞌa, aɨ puꞌu ruꞌumuaꞌaree aꞌij tɨ tiraꞌamitejteꞌe aɨjna ɨ aꞌatɨ. Ayaa pu cheꞌeta naꞌa een ɨ Dioj jemi. Capu aꞌatɨ ruꞌumuaꞌaree aꞌij tɨ tiraꞌamitejteꞌe ɨ Dioj silu aɨ puꞌu ɨ xaijnyuꞌucaraꞌaraꞌan ɨ Dioj.
\p
\v 12 Me tyajta ityan, catu tyaɨjna ancuraꞌa ɨ huaꞌamuaꞌatziiraꞌa aɨme ɨ maj yan japuan huachaatɨme ɨ chaanaca silu aɨ pu tyejmi jemi huatyajturaa aɨjna ɨ xaijnyuꞌucaraꞌaraꞌan ɨ Dioj tyej ti yauꞌeitaa taꞌaraꞌani aꞌij tɨ Dioj ari ruxéꞌeviꞌiraꞌa cɨn rɨꞌɨ titaatáꞌa.
\v 13 Ai pu aɨn pueen ɨ tyaj amueꞌixaa. Capu aɨn naꞌa pueen ɨ huaꞌamuaꞌatziiraꞌa ɨ maj cɨn taꞌitiiriꞌi ɨ tyetyaca silu ai pu aɨn pueen ɨ nyuucari tɨ ayan cɨn taꞌitiiriꞌi ɨ xaijnyuꞌucaraꞌaraꞌan ɨ Dioj. Ayaa tu rɨcɨ tyej hueꞌixaa aꞌij tɨ huataujmuaꞌa ɨ muaꞌatziiraꞌa tɨ Dioj jemi eꞌemaꞌacan tyaɨjna cɨmeꞌe ɨ nyuucari tɨ aɨn xaijnyuꞌucaraꞌaraꞌan ɨ Dioj caꞌanijraꞌa taataꞌa tyej teyan tyuꞌutaxaj.
\p
\v 14 Ajta aɨjna tɨ cai jemin huatyajturaa ɨ xaijnyuꞌucaraꞌaraꞌan ɨ Dioj, aɨ pu cai raꞌancuraꞌasin aɨjna tɨ jemin eꞌemaꞌacan ɨ xaijnyuꞌucaraꞌaraꞌan ɨ Dioj, aꞌini capu tiꞌitɨ aꞌij huataujmuaꞌa aɨjna jemi ɨ aꞌatɨ. Capu rɨꞌɨri tɨ aɨn yauꞌeitaa aꞌaraꞌani aꞌini ayaa pu ruxeꞌeveꞌe tɨ aꞌatɨ ayan jetzen araujcaꞌanyen ɨ xaijnyuꞌucaraꞌaraꞌan ɨ Dioj, tɨ ij ayan tiraꞌamitejtyaꞌa aꞌij tɨ huataujmuaꞌa.
\v 15 Ajta aɨn tɨ jetzen araujcaꞌanye ɨ xaijnyuꞌucaraꞌaraꞌan ɨ Dioj, nain pu ayan tiraꞌamitejtyaꞌa aꞌame tɨ puaꞌa ayan tiꞌivaɨreꞌe nusu cai. Ma ajta, capu rɨꞌɨri tɨ saɨj ayan raꞌaxɨjteꞌen aɨjna ɨ aꞌatɨ, tɨ puaꞌa tiꞌivaɨreꞌe nusu cai.
\v 16 Ayan tɨcɨn: “¿Aꞌataani yee ruꞌumuaꞌaree aꞌij tɨ tiraꞌamitejteꞌe ɨ tavastaraꞌa tɨ ij aɨn aꞌatɨ ayan tiraꞌitii?” Me tyajta ityan, ayaa pu ayan titaꞌamitejteꞌe aꞌij tɨ ajta tiraꞌamitejteꞌe ɨ Cɨriistuꞌu.
\c 3
\s Maj nuꞌu tiꞌimuareꞌe jamuan ɨ Dioj
\p
\v 1 Ayaa nu tyajaꞌamueꞌixaateꞌe, nyeꞌihuaamuaꞌa, tɨ cai huatarɨꞌɨriistaracaꞌa nyej neyan tyajamuaataꞌixaateꞌen tɨj aɨme ɨ tɨ huaꞌa jemi huatyajturaa ɨ xaijnyuꞌucaraꞌaraꞌan ɨ Dioj, silu tɨj aɨme ɨ mej yan japuan seijreꞌe ɨ chaanaca, mɨ saj sauchan huataujtuiiriꞌi ɨ Cɨriistuꞌu jemi.
\v 2 Nyatɨꞌɨj tyajamuaamí, canu cueꞌira jamuaamí silu aɨj nuꞌu amuaꞌantiꞌite ɨ leechi aꞌini caxu xɨ yáꞌujapɨꞌɨraꞌa ɨ cueꞌira. Sajta ijii, saucheꞌe xu seyan eꞌen. Caxuu xɨ tyajaꞌujapɨꞌɨraꞌa.
\v 3 Saucheꞌe xu seyan eꞌen matɨj aɨme ɨ mej yan japuan huachaatɨme ɨ chaanaca. Aꞌini ayaa pu seijreꞌe muejmi tzajtaꞌa cumu saj ruchueereꞌe, sajta saj rujaaxaijviꞌi. ¿Ni cai ayan huataujmuaꞌa saj sauj huaꞌajemi ajtyamaꞌacan aɨme ɨ mej yan japuan seijreꞌe ɨ chaanaca? Ee xaa nyaꞌu, muan xu seyan tiꞌijrɨꞌɨre aꞌij mej tiꞌijrɨꞌɨre ɨ seica ɨ tyetyaca.
\v 4 Ayaa xu rɨcɨ. Seij tɨ muejmi jemi ajtyamaꞌacan ayan tiꞌixa tɨcɨn: “Nyaa nu Pablo jetze ajtyamaꞌacan.” Ajta ɨ saɨj ayan tɨcɨn: “Nyajta inyaa, Apolos nu jetze ajtyamaꞌacan.” ¿Ni sacai seyan cheꞌeta sanaꞌa rɨcɨ matɨj aɨme ɨ tyetyaca ɨ maj cai jetzen seijreꞌe ɨ xaijnyuꞌucaraꞌaraꞌan ɨ Dioj? Ee xaa nyaꞌu, ayaa xu rɨcɨ.
\p
\v 5 Nicheꞌe aꞌatzu tyajamueꞌihuaꞌu. ¿Aꞌini tiꞌitɨj cɨn tiꞌivaɨreꞌe aɨjna ɨ Apolos, naꞌari tiꞌitajni cɨn naꞌantinmuaꞌaree inyaa, inyaj iꞌi Pablo? Ayaa nu tyajaꞌamueꞌixaateꞌe. Tyan tuꞌu ravaɨreꞌe ɨ tavastaraꞌa jemi. Ayaa xu een cɨn tyaꞌantzaahua ɨ tavastaraꞌa jemi saɨjna cɨmeꞌe tyej teyan ravaɨreꞌe, aꞌij tɨj aɨn titaijca seij ajta seij.
\v 6 Ayaa nu tiꞌivaɨreꞌe tɨj aꞌatɨ tɨ ayan tyuꞌuhuii, ajta aɨn ɨ Apolos, aɨ pu ayan tiꞌivaɨreꞌe tɨj aꞌatɨ tɨ tyuꞌipuaa. Ajta aɨn ɨ Dioj, aɨ pu raaváujsiꞌiriꞌi tɨ ij huacɨɨre.
\p
\v 7 Aɨj pu cɨn, aɨjna tɨ tyuꞌuhuii capu tiꞌitɨj cɨn ruxeꞌeveꞌe. Ajta aɨn tɨ tyuꞌipuaa, capu tiꞌitɨj cɨn ruxeꞌeveꞌe, silu aɨ pu xaa ɨ Dioj tɨ raaváujsiꞌiriꞌi tɨ i huacɨɨre, aɨ pu xaa aɨn pueen ɨ tɨ ruxeꞌeveꞌe.
\v 8-9 Naijmiꞌi mu tiꞌivaɨreꞌe aɨjna tɨ tiꞌihuiiteꞌe, ajta aɨjna tɨ tiꞌipua aꞌayeꞌi. Ruxaꞌa muꞌu tiꞌivaɨreꞌe, ajta Dioj pu ayan huaꞌutaꞌasin aꞌij tɨ tiraavijteꞌe aɨjna cɨmeꞌe ɨ tɨ racɨꞌɨcɨpua ɨ tɨ cɨn tyuꞌumuarej, aꞌini tyan tu jamuan tiꞌimuareꞌe ɨ Dioj.
\p Sajta muan, ayaa xu tiꞌitɨj cɨn tiꞌivaɨreꞌe tɨj aꞌu maj tyajaꞌatasaahua, ajta tɨj chiꞌi tɨ Dioj raꞌajtaahua.
\v 10 Me nyajta inyaa, aꞌini Dioj pu jeihua huapɨꞌɨ naa tinaataꞌa nyej ni neyan tyuꞌumuareꞌen, ayaa nu huarɨj tɨj aꞌatɨ tɨ chiꞌi ajtaahua. Nyaa nu reꞌitátaahuaxɨ nyaɨjna tɨ japuan ájtaavijhua ɨ jaxuꞌu tɨj aꞌatɨ tɨ tyamuaꞌa naa raayɨꞌɨtɨ. Ajta ɨ saɨj aɨ pu japuan tyaꞌajtaahua. Ajta ayan ruxeꞌeveꞌe tɨ rɨꞌɨ naa tiraꞌajtaahua tɨ ij cai aꞌij puaꞌa eenyaꞌa ajcɨꞌɨpiihua.
\v 11 Aꞌini, cɨmeꞌen aɨjna tɨ eꞌitátaavijhua, saɨj puꞌu pueen, ajta ai pu aɨn pueen ɨ Jesús tɨ ajta Cɨriistuꞌu pueen. Capu maa aꞌatɨ tɨ ayan tiꞌivaɨreꞌe tɨj aɨjna tɨ eꞌitátaavijhua.
\p
\v 12-13 Ajta, ayaa pu seiraꞌa aꞌame tɨj tiꞌitɨj tɨ cɨn japuan ájtaavijhuacaꞌa tɨ puaꞌa aɨjna cɨmeꞌe ɨ ooro nusu plaata cɨmeꞌe naꞌari tetej cɨmeꞌe tɨ huapɨꞌɨ tiꞌijnajchi. Ajta ayan cheꞌeta naꞌa seiraꞌa aꞌame tɨ puaꞌa ayan ájtaavijhuacaꞌa aɨjna cɨmeꞌe ɨ cɨye naꞌari ɨxaj cɨmeꞌe caꞌɨn huaacɨxaꞌa cɨmeꞌe.
\p Ee xaa nyaꞌu, ayaa pu seiraꞌa aꞌame ɨ tiꞌitɨ ɨ maj cɨn tyuꞌumuarej ɨ tyaɨte, seij ajta seij, matɨj manaꞌa puaꞌamua mej iiyan seijreꞌe ɨ chaanaca japua. Ajna xɨcajraꞌa jetze, ayaa pu Dioj raaxaꞌapɨꞌɨntareꞌen aꞌij tɨ een aꞌini ayaa pu tyajaꞌureꞌenyejsin tɨj taij tɨ cɨn huaꞌutaseijrateꞌesin. Ajta aɨjna ɨ taij, aɨ pu raatyamuaꞌatzi tɨ puaꞌa xaꞌapɨꞌɨn metyuꞌumuarej seij ajta seij nusu macai.
\p
\v 14 Tɨ puaꞌa ayan tyeꞌeviicueꞌi ɨ taij tzajtaꞌa aɨjna tɨ cɨn aꞌatɨ tyuꞌumuarej, ayaa pu tiraacɨꞌɨti aɨjna ɨ aꞌatɨ aꞌij tɨ tiraavijteꞌe.
\v 15 Naꞌari cai, tɨ puaꞌa huatyajtaani ɨ tɨ cɨn tyuꞌumuarej ɨ aꞌatɨ, nain pu áꞌujɨsin. Ajta aɨn ɨ aꞌatɨ, Dioj pu xaa ruꞌiratuaasin aru ayaa pu eenyaꞌa aꞌame tɨj aꞌatɨ tɨ xaꞌichuꞌi aun ráavaɨ ɨ taij tzajtaꞌa.
\p
\v 16 Ayaa nu tyajaꞌamueꞌixaateꞌe nyaɨjna cɨmeꞌe saj saɨn pueen ɨ chiꞌiraꞌan ɨ Dioj. Ajta muejmi tzajtaꞌa pu huatyajturaa ɨ xaijnyuꞌucaraꞌaraꞌan ɨ Dioj.
\v 17 Tɨ puaꞌa aꞌatɨ ayan raatyáuuna aɨjna ɨ chiꞌiraꞌan ɨ Dioj, Dioj pu raꞌantipuaꞌariteꞌesin aɨjna ɨ aꞌatɨ aꞌini puꞌuri Dioj huatauraꞌate aɨjna ɨ chiꞌi, saj muan saɨn pueen ɨ chiꞌiraꞌan ɨ Dioj.
\p
\v 18-19 Caxu rucuanamua rujɨɨmuaꞌa. Tɨ puaꞌa ayan tiraꞌamitejtyaꞌa seij ɨ aꞌatɨ tɨ ayan rɨꞌɨ tiruꞌumuaꞌaree aɨjna cɨmeꞌe ɨ huaꞌamuaꞌatziiraꞌa aɨme ɨ mej ijii huatyaɨte, cheꞌe aɨn cai cheꞌe ayan aꞌujtzaahuatyaꞌa aɨjna cɨmeꞌe ɨ huaꞌamuaꞌatziiraꞌa. Cheꞌe aɨn ayan raꞌancuraꞌan ɨ muaꞌatziiraꞌa tɨ tavastaraꞌa jetze eꞌemaꞌacan, aꞌini aɨjna ɨ huaꞌamuaꞌatziiraꞌa aɨme ɨ mej ijii huatyaɨte, capu tiꞌitɨ aꞌij huataujmuaꞌa ɨ Dioj jemi. Ayaa pu xaa tyaꞌasɨɨmueꞌi tɨcɨn: “Dioj pu huaꞌaviviꞌiraꞌan aɨme ɨ maj meyan áꞌujtzaahuateꞌe maɨjna cɨmeꞌe mej tiꞌihueꞌitaca ɨ rumuaꞌatziiraꞌa cɨmeꞌe.”
\v 20 Ajta ayan teꞌeyuꞌusiꞌi tɨcɨn: “Tavastaraꞌa pu ramuaꞌaree tɨ cai tiꞌitɨj vaɨreꞌe ɨ huaꞌamuaꞌatziiraꞌa aɨme ɨ maj nuꞌu eihua huapɨꞌɨ tyaꞌumuaꞌaree.”
\v 21-22 Aɨj xu cɨn, caxu cheꞌe seyan aꞌujtzaahuatyaꞌa saɨjna cɨmeꞌe saj nuꞌu seij jetze ajtyamaꞌacan ɨ tyaataꞌa. Naimiꞌi pu ayan tyajaꞌamuacɨꞌɨti, tɨ puaꞌa neyan tyajaꞌamuavaɨraꞌa inyaa, i nyaj iꞌi Pablo naꞌari aɨn Apolos ayan tyajaꞌamuavaɨraꞌa nusu aɨjna ɨ Pedro. Tɨ puaꞌa ayan aɨjna cɨn rɨꞌɨ tyajamuaataꞌan ɨ Dioj aɨjna cɨmeꞌe tɨj naꞌa tɨ iiyan seijreꞌe chaanaca japua nusu sej seyan ruuri huatyaturan naꞌari sej seyan huacuiꞌini, tiꞌitɨ tɨ aꞌij tɨ ayan ijii tiꞌiseijreꞌe caꞌɨn tiꞌitɨ tɨ ayan tyajaꞌureꞌenyejsin, naimiꞌi pu ayan tyajaꞌamuavaɨreꞌe.
\v 23 Sajta muan, ayaa xu saɨjna jetze ajtyamaꞌacan ɨ Cɨriistuꞌu, ajta aɨn Cɨriistuꞌu, aɨ pu ajta Dioj jetze ajtyamaꞌacan.
\c 4
\s Ɨ maj cɨn antyujmuaꞌaree aɨme tɨ Dioj tíhuaꞌutáitiꞌire
\p
\v 1 Ayaa pu ruxeꞌeveꞌe tɨ ayan tyajamuaꞌamityejtyaꞌa ityejmi cɨmeꞌen tyej teyan ravaɨreꞌe ɨ Cɨriistuꞌu, ajta tɨ ayan titaijca aɨjna cɨmeꞌe ɨ tɨ ruaꞌavaa ɨ Dioj jemi.
\v 2 Ajta, aɨjna tɨ ravaɨreꞌe, ayaa pu tyuꞌujxeꞌeveꞌe tɨ aɨn ɨ aꞌatɨ ayan aráurasten nain cɨmeꞌe aɨjna ɨ tɨ cɨn tiraijca.
\v 3-4 Me nyajta inyaa, capu nyejetze ruxeꞌeveꞌe tɨ puaꞌa muan seyan naꞌuxɨjteꞌen, naꞌari meyan naꞌuxɨjteꞌen aɨme ɨ mej ijii huatyaɨte maɨjna cɨmeꞌe aꞌij tɨ tihuaꞌamityejteꞌe. Ee xaa nyaꞌu, canu nyasaɨj áꞌanxɨjteꞌen, aꞌini canu nyaa nyasaɨj ramuaꞌaree tij tiꞌitɨj cɨn nyaꞌutyajturaa ɨ Dioj jemi. Capu amɨn aꞌij, capu ayan huataujmuaꞌa nyej neri xaꞌapɨꞌɨn een ɨ Dioj jemi. Tavastaraꞌa pu aɨn pueen ɨ tɨ naꞌaxɨjteꞌen.
\v 5 Aɨj xu cɨn seyan huarɨni. Caxu tiꞌitɨ cɨn huaꞌaxɨjtyaꞌa asta naꞌa cai ajna tyajaꞌureꞌenyen ajna xɨcajraꞌa tɨ jetzen Dioj ari raaxaꞌapɨꞌɨntare. Sataꞌaj sauj raachuꞌevaꞌa saɨjna ɨ tavastaraꞌa tɨꞌɨj ajtahuaꞌa ya uvéꞌenyen. Aj pu xaa aɨn raataseijrata tɨj naꞌa tɨ ruꞌavaatacaꞌa aꞌu tɨ aꞌutɨcaꞌa. Aɨ pu ajta raataseijrata ɨ tɨ ayan tihuaꞌamityejtyaꞌacaa ɨ huaꞌa tzajtaꞌa ɨ tyaɨte. Aj puꞌi ayan tihuaꞌacɨꞌɨti tɨ Dioj ayan rɨꞌɨ tihuaꞌutaꞌasin naijmiꞌica aꞌij tɨ tiraavijteꞌe seij ajta seij.
\p
\v 6 Me nyajta inyaa, nain cɨn ɨ nyej neri tyajamueꞌixaa, ayaa nu tyajamuaataꞌitiiriꞌi nyeetzi cɨmeꞌen nyajta nyaɨjna cɨmeꞌen ɨ Apolos nyej ni nyaɨjna cɨn jamuaatyavaɨreꞌen. Caxu yáꞌuhuaꞌanan saɨjna ɨ nyuucari tɨ ayan tɨcɨn: “Sataꞌaj seyan aráurasten saɨjna cɨmeꞌe aꞌij tɨ teꞌeyuꞌusiꞌi.” Caxu seyan ahuaujtzaahuateꞌen saɨjna cɨmeꞌe saj nuꞌu seij jetze ajtyamaꞌacan. Caxu sajta raatyaxaahuata ɨ saɨj.
\v 7 ¿Ni tzaa aꞌatɨ ayan aɨjna cɨn timuéijca aɨjna cɨmeꞌe tɨ eitzeꞌe ruxeꞌeveꞌe cai ɨ tɨ cɨn antyujmuaꞌaree ɨ axaꞌaj tevi? Capu xaa nyaꞌu. ¿Ni qui peyan tiꞌitɨ tíꞌijchaꞌɨ ɨ paj cai raꞌancuraꞌa seij jemi? Capu xaa nyaꞌu. Ajta, tɨ puaꞌa ayan tiꞌayajna pej peyan raꞌancuraꞌa, ¿aꞌini een cɨmeꞌe peyan aꞌatzaahuateꞌe? Capu ayan tiraavijteꞌe aꞌini Dioj pu ayan muaatapueijve.
\p
\v 8 Muan xu nuꞌu seri huatajuxai tyamuaꞌa naa. Sajta nuꞌu seri huataujchijtyaanitacaꞌa. Muan xu nuꞌu cai taataꞌinyaa, sajta seyan tiꞌijta rujɨɨmuaꞌa sanaꞌa. Oojala cu tɨ ayan tyajaꞌureꞌenyen sej seyan tyuꞌutaijta. Eihua huapɨꞌɨ nu neyan tiꞌijxeꞌeveꞌe.
\v 9 Ayaa nu een cɨn neyan tyajaꞌamueꞌixaateꞌe aꞌini ayaa pu tinaꞌamitejteꞌe tɨ Dioj ayan taataseijratacaꞌa muejmi jemi tyaj ityan aɨn pueen ɨ tyaj cai tiꞌitɨj cɨn antitamuaꞌaree, tyajta tyan tu aɨn pueen ɨ maj majta cɨmeꞌen meri raaxaꞌapɨꞌɨntare tyaj nuꞌu huacuiꞌini aꞌu maj tityajaꞌacuiꞌica. Dioj pu ayan taataseijratacaꞌa naijmiꞌica jemi ɨ mej tajapua seijreꞌe, ajta huaꞌa jemi ɨ mej yan japuan huachaatɨme ɨ chaanaca, aꞌu tɨ naꞌa nainjapua.
\v 10 Ayaa xu tiꞌixaxaꞌa muan tyaj nuꞌu tatɨmueꞌi tyaɨjna cɨmeꞌe tyej teyan ravaɨreꞌe ɨ Cɨriistuꞌu. Ma sajta muan, saj nuꞌu huapɨꞌɨ naa tiruꞌumuaꞌaree ɨ Cɨriistuꞌu jemi. Capu nuꞌu tuꞌucaꞌanistiꞌi ityejmi. Ma sajta muan, ayaa xu nuꞌu nain cɨn tyeꞌeviicueꞌi. Eecan mu nuꞌu rɨꞌɨ tyajamuataꞌaca muejmi. Majta mátaxanaꞌaveꞌe mu nuꞌu ityejmi.
\p
\v 11 Tɨj naꞌa tɨ yu eꞌireꞌenye, ajta ijii ayaa tu tyanaꞌa jiꞌitajcu, tyajta jiꞌicu. Tyamuaꞌa tu titacacɨɨxureꞌe. Eecan mu aꞌij puaꞌa taruure. Catu tyajta meꞌe eꞌeche.
\v 12 Caꞌanin tu cɨn tiꞌimɨjhuaca tamuajcaꞌa cɨmeꞌe. Tɨ puaꞌa aꞌij puaꞌa metiꞌitaxajta, tyan tu teyan rɨꞌɨ tihuaꞌataꞌaca. Ajta tɨ puaꞌa aꞌij puaꞌa mataruura, tyan tu teyan raꞌaviicueꞌi.
\v 13 Ajta, matɨꞌɨj tyaɨte hueꞌitzi tataavijraꞌa ityejmi, rɨꞌɨ tu naa tihuaꞌajee. Tɨj naꞌa tɨ yu eꞌireꞌenye ajta ijii, ayaa pu tihuaꞌamityejteꞌe ityejmi cɨmeꞌen tyaj nuꞌu eihua huapɨꞌɨ huaꞌaxanaꞌavisteꞌe, tyaj nuꞌu teyan huaꞌaseijrateꞌe huaꞌa jemi tɨj ɨ xaɨri ɨ maj ma rúuraaraj ɨ mej yan japuan seijreꞌe ɨ chaanaca.
\p
\v 14 Canu nyaɨjna cɨn neyan tyajaꞌamueꞌixaateꞌe nyej ni neyan amuaatatyeviꞌirasteꞌen, silu nyej ni rɨꞌɨ jamuaataꞌitii muan, mɨ saj seyan naꞌaseijrateꞌe cumu niyaujmuaꞌa ɨ nyej eihua huapɨꞌɨ aꞌamuaxeꞌeveꞌe.
\v 15 Tij cai muiꞌitɨ mu tyajamueꞌitiiriꞌi ɨ Cɨriistuꞌu jetze maꞌacan. Capu aꞌij amiteereꞌe aꞌachu maj puaꞌamua araꞌase. Ma ajta, seij puꞌu ɨ tɨ aꞌamuayaꞌupuajtacaꞌa, nyajta inyaa, nyaa nu nyaɨn pueen i nyaj aꞌamuayaꞌupuajtacaꞌa ɨ Cɨriistuꞌu jemi nyaɨjna cɨmeꞌe nyej tyajamueꞌixaa ɨ nyuucari tɨ cɨn Dioj amueꞌirajtuaani.
\v 16 Aɨj nu cɨn neyan tyajaꞌamuajee sej seyan tityaajuꞌun nyatɨj inyaa.
\p
\v 17 Aɨj nu cɨn neyan amuaatáitiꞌiriꞌi nyaɨjna ɨ Timuteeyu ɨ nyaj nyajta yaꞌupuaaraꞌan pueenyaꞌa ɨ tavastaraꞌa jemi, ɨ nyaj nyajta eihua huapɨꞌɨ raxeꞌeveꞌe. Aɨ pu amuaatanamuajristeꞌesin aꞌij nyej tiꞌitinchaꞌɨ jemin ɨ Cɨriistuꞌu tɨ ajta iꞌi Jesús. Ayaa nu cheꞌeta nyanaꞌa tihuéꞌitii aɨme ɨ seica, aꞌu tɨ naꞌa maj eꞌetyujsaꞌɨri.
\v 18 Seica muan, xuꞌuri áꞌujtzaahuateꞌe. Cu xuee tɨ cuj ayan tyajamuaꞌamitejteꞌe nyaj cai cheꞌe nyaun mu aꞌatanyén.
\v 19 Me nyajta inyaa, nyaa nu xaa caꞌanacan nyaun aꞌatanyejsin muejmi jemi tɨ puaꞌa ayan tinaatáꞌacareꞌen ɨ tavastaraꞌa. Aj nu xaa ramuaꞌareeran tɨ puaꞌa seyan tiꞌityujchaꞌɨ muáreꞌeriꞌiraꞌaraꞌan cɨmeꞌe ɨ Dioj naꞌari nyuucari sanaꞌa cɨn seyan tiꞌityujchaꞌɨ.
\v 20 Ayaa puꞌu xaa nyaꞌu, aꞌini aɨjna ɨ Dioj, capu nyuucari naꞌa cɨn tieꞌijta silu rumuareꞌeriꞌiraꞌa cɨmeꞌe.
\v 21 ¿Aꞌini setiꞌijxeꞌeveꞌe muan? ¿Ni qui neyan nyaɨjna cɨn u aꞌumeꞌen nyej ni pueijtzi amuaataꞌan naꞌari nyej neyan nyaɨjna cɨn amuajaꞌuvaꞌamuaare nyaɨjna cɨmeꞌe nyajaꞌamuaxeꞌeveꞌe, nyej ni nyajta cuaꞌanin cɨn tyajamueꞌixaateꞌen?
\c 5
\s Ráꞌaxɨjteꞌe saɨj tɨ eihua huapɨꞌɨ aꞌij puaꞌa tiꞌityujchaꞌɨ
\p
\v 1 Ayaa nu tyuꞌunamuajriꞌi tɨ ayan tiꞌayajna tɨ saɨj tɨ muejmi jemi ajtyamaꞌacan tiꞌixanaꞌacɨreꞌe aɨjna cɨmeꞌe tɨ jamuan huiꞌica aɨjna tɨ ratyeviꞌitɨn ɨ yaꞌupuaaraꞌan. Eecan pu aꞌij puaꞌa seijreꞌe aɨjna. Majta aɨme ɨ mej seij chuejraꞌa japua eꞌemaꞌacan, camu meyan rɨcɨ.
\v 2 Ma sajta muan, aɨj xu cɨn áꞌujtzaahuateꞌe. ¿Ni cai ayan tiraavijteꞌe saj saɨjna cɨn huataujxaamɨsteꞌen? Ee xaa nyaꞌu. Sataꞌaj raatamuariteꞌen saɨjna ɨ aꞌatɨ tɨ ij cai cheꞌe seiraꞌa muejmi jemi.
\v 3 Ayaa nu tyajaꞌamueꞌixaateꞌe tzaahuatiꞌiraꞌa cɨmeꞌe. Ya nu ɨmɨ huaca inyaa. Me nyajta, au nu áꞌuca muejmi jemi nyamuaꞌatziiraꞌa cɨmeꞌe. Nuꞌuri neyan raꞌuxɨ́jte nyaɨjna ɨ aꞌatɨ tɨ ayan rɨcɨ nyatɨj neyan raruuréncheꞌe tɨ puaꞌa nyaun aꞌucatiicheꞌe.
\v 4-5 Ayaa xu huarɨni satɨꞌɨj eꞌetyujsaɨreꞌen nyuucajtzeꞌen ɨ tavastaraꞌa, aɨjna ɨ Jesús, ajta nyatɨꞌɨj nyaun muejmi jemi eꞌeseijraꞌa nyamuaꞌatziiraꞌa cɨmeꞌe. Sataꞌaj seyan saɨjna jetze araujcaꞌanyen ɨ muáreꞌeriꞌiraꞌaraꞌan ɨ tavastaraꞌa ɨ Jesús sej si raatatuireꞌen saɨjna ɨ aꞌatɨ ɨ Satanás jemi tɨ ij aɨn tiyaaruꞌu raꞌupuaꞌariteꞌen ɨ tevijraꞌan, tɨ ij ajta Dioj ruꞌirajtuaani ɨ xaijnyuꞌucaraꞌaraꞌan ɨ aꞌatɨ ajna xɨcajraꞌa tɨ jetzen tyuꞌutaijta ɨ tavastaraꞌa.
\p
\v 6 Capu xaꞌapɨꞌɨn saj seyan saɨjna cɨn aꞌujtzaahuatyaꞌa aꞌini ayaa pu tyuꞌutaujnaxca muejmi jemi tɨj ajta tyuꞌutaujnaxca ɨ maj ranajchiteꞌesin ɨ cueijtzi. Cɨj muꞌu caj tirajnajchiteꞌesin. Ajta eꞌeyan nain japua huanyajxɨꞌɨsin.
\v 7 Aɨj xu cɨn, sataꞌaj ma ruuraini saɨjna tɨ miꞌimaꞌacan sej si seyan huaujjajcuareꞌen tɨj aɨjna ɨ cueijtzi tɨ cai tiꞌitɨ ranaxcacaꞌa. Ayaa xu huarɨni aꞌini puꞌuri huataujmuaɨꞌɨvajtacaꞌa aɨjna ɨ Cɨriistuꞌu tɨ tejmi jetze maꞌacan huamɨꞌɨ tɨ ij cai pueijtzi taacɨꞌɨti.
\v 8 Aɨj pu cɨn, ticheꞌe teyan tyuꞌuyesten aꞌij tɨ tiraavijteꞌe ɨ Dioj jemi, tyataꞌaj cai cheꞌe teyan aꞌij puaꞌa tiꞌititachaꞌɨ, tyajta cai cheꞌe tiꞌitɨj cɨn autyaturan ɨ Dioj jemi silu ticheꞌe teyan rɨꞌɨ tiꞌititachaꞌɨ tzaahuatiꞌiraꞌa cɨmeꞌe, ticheꞌe tyajta teyan tyanaꞌa tyuꞌutaxaj nyuucari cɨmeꞌe tɨ ayan tiꞌayajna.
\p
\v 9 Nuꞌuri neyan tyajamuaataitiꞌiriꞌi ɨ yuꞌuxari jetze saj cai huaꞌa jamuan tyujsaꞌɨrihuaꞌan aɨme ɨ mej tiꞌixanaꞌacɨreꞌe.
\v 10 Aɨjna ɨ nyuucari tɨ cɨmeꞌen: “Ɨ mej tiꞌixanaꞌacɨreꞌe”, capu ayan huataujmuaꞌa aꞌatɨ tɨ naꞌa tɨ aꞌij puaꞌa rɨjca ɨ Dioj jemi, tɨ puaꞌa aꞌij puaꞌa tiꞌityujchaꞌɨ nusu tɨ huapɨꞌɨ tiꞌinyacuaꞌatze tɨ eihua tíꞌijchaꞌɨ naꞌari tiꞌinahuaꞌa caꞌɨn seij naꞌamicheꞌe tɨ cai Dioj pueen. Tɨ puaꞌa ayan huataujmuaꞌati, ayaa pu ruxeꞌevaꞌa aꞌame saj seyan ajtacɨɨnye naijmiꞌica jemi ɨ maj yan japuan seijreꞌe ɨ chaanaca.
\p
\v 11 Ma ajta, ayaa pu huataujmuaꞌa ɨ nyaj cɨn tyajamuaataitiꞌiriꞌi saj cai cheꞌe jamuan áꞌujhuaꞌanyeꞌen seij tɨ ayan tamuari tɨj taꞌihuaaraꞌa tɨ puaꞌa aɨn aꞌatɨ ayan tiꞌixanaꞌacɨreꞌe nusu huapɨꞌɨ tiꞌinyacuaꞌatze tɨ eihua tíꞌijchaꞌɨ naꞌari ranaꞌamiche tɨ cai Dioj pueen caꞌɨn aꞌij puaꞌa tyuꞌujepeꞌe. Caxu sajta jamuan áꞌujhuaꞌanyeꞌen tɨ puaꞌa ayan rutahuéiiveꞌe naꞌari tiꞌinahuaꞌara. Caxu sajta tiꞌicuaꞌaca jamuan saɨj tɨ ayan rɨcɨ.
\v 12-13 Canu nyaɨjna cɨn antinmuaꞌaree nyej neyan huaꞌuxɨjteꞌen aɨme ɨ maj cai tyejmi jetze ajtyamaꞌacan silu aɨ pu Dioj huaꞌaxɨjteꞌen. Ma sajta muan, muan xu xaa saɨjna cɨn antyujmuaꞌaree sej seyan huaꞌuxɨjteꞌen aɨme ɨ mej jaꞌamua jetze ajtyamaꞌacan. Sataꞌaj raatamuariteꞌen saɨjna ɨ aꞌatɨ tɨ aꞌij puaꞌa tiꞌityujchaꞌɨ.
\c 6
\s Aꞌij maj nuꞌu yeꞌi tiraaxaꞌapɨꞌɨntareꞌen rujɨɨmuaꞌa
\p
\v 1 Tɨ puaꞌa seyan tyuꞌujaaxaijviꞌira, ¿aꞌini tiꞌirɨꞌɨri tɨ aꞌatɨ ayan huatauraꞌan tɨ aun áꞌumeꞌen huaꞌa jemi ɨ jueesi ɨ maj cai tyejmi jetze ajtyamaꞌacan i tyej tyaꞌatzaahuateꞌe mej mi maɨn meyan raaxaꞌapɨꞌɨntareꞌen? ¿Aꞌini een cɨmeꞌe sacai rujɨɨmuaꞌa raaxaꞌapɨꞌɨntareꞌen aɨme jemi ɨ mej jemin seijreꞌe ɨ Dioj?
\v 2 Xuꞌuri ramuaꞌaree tyej teyan huaꞌuxɨjteꞌen naijmiꞌica ɨ mej yan japuan seijreꞌe ɨ chaanaca. Tɨ puaꞌa ayan teꞌeme saj huaꞌuxɨjteꞌen saɨme ɨ mej yan japuan seijreꞌe ɨ chaanaca, ¿ni tzaa sacai raayɨꞌɨtɨ sej seyan raaxaꞌapɨꞌɨntareꞌen saɨjna tɨ cai tiꞌitɨ jetzen ruxeꞌeveꞌe?
\p
\v 3 Casiꞌi, tyan tu tyajta huaꞌaxɨjteꞌe aɨme ɨ mej tajapua tiꞌivaɨreꞌe. Aɨj pu cɨn, capu aꞌatzu muareꞌeri tyej teyan raaxaꞌapɨꞌɨntareꞌen aɨjna tɨ tyejmi jetze ayan tiꞌijninyei ijii tyej huatyaɨte.
\v 4 Ajta tɨ puaꞌa ayan ruxeꞌevaꞌa sej seyan raaxaꞌapɨꞌɨntareꞌen saɨjna tɨ muejmi jetze tiꞌijninyei ijii, ¿aꞌini een cɨmeꞌe seyan saɨjna cɨn tihueꞌijcateꞌe mej mi jueesi cɨn antyujmuaꞌaréera aɨme ɨ maj cai rɨꞌɨ tihuaꞌaxeꞌeveꞌe ɨ tyaɨte?
\v 5 Ayaa nu een cɨn tyajaꞌamueꞌixaateꞌe nyej ni amuaatatyeviꞌirasteꞌen. ¿Ni tzaa cai rɨꞌɨri tɨ muejmi jemi seij seijraꞌa tɨ ayan raayɨꞌɨtɨ tɨ tyamuaꞌa naa raꞌuxɨ́jteꞌen aɨjna cɨmeꞌe ɨ maj rujaaxaijviꞌi ɨ taꞌihuaamuaꞌa ɨ maj majta tyaꞌatzaahuateꞌe?
\v 6 Ma sajta muan, ayaa xu tiꞌijrɨꞌɨre. Seij pu ayan runyuusteꞌe ɨ ruꞌihuaaraꞌa, ajta ayan rɨcɨ huaꞌa jemi ɨ maj cai tyaꞌatzaahuateꞌe.
\p
\v 7 Xuꞌuri saɨjna cɨn huamueꞌitɨche saɨjna cɨmeꞌe tɨ aꞌatɨ ayan runyuusteꞌe aɨjna jemi ɨ ruꞌihuaaraꞌa. Ayaa pu tyajamuaatyavaꞌɨri sej seyan huatauraꞌan tɨ aꞌatɨ ayan aꞌij puaꞌa amuaaruuren nusu tɨ ayan tiꞌitɨ amuaanahueꞌi.
\v 8 Ma sajta muan, ayaa xu rujɨɨmuaꞌa saɨn pueen ɨ sej aꞌij puaꞌa huaꞌaruuraa saꞌayeꞌi, sajta seyan tihuaꞌanahueꞌi. Ayaa xu huaꞌaruure ɨ aꞌamueꞌihuaamuaꞌa.
\p
\v 9 Muan xu ramuaꞌaree tyamuaꞌa naa tɨ cai ayan tihuaꞌacɨꞌɨti aɨme ɨ mej aꞌij puaꞌa tiꞌityujchaꞌɨ maj maun aꞌutyarute aꞌu tɨ Dioj tyejeꞌijta. Caxu tauraꞌacareꞌen tɨ aꞌatɨ aꞌamuacuanamua. Camu aun aꞌutyaruti aɨme ɨ mej aꞌij puaꞌa rɨjca naꞌari aɨme ɨ maj ranaꞌamiche aɨjna tɨ cai Dioj pueen nusu aɨme ɨ mej tiꞌixanaꞌacɨreꞌe ɨ ruxaꞌa tevi jamuan caꞌɨn aɨme ɨ mej ruxaꞌa tyetyaca jamuan tiꞌixanaꞌacɨreꞌe.
\v 10 Capu ajta tihuaꞌacɨꞌɨti aɨme ɨ mej tiꞌinahuaꞌara nusu ɨ mej eihua huapɨꞌɨ tiꞌinyacuaꞌatze maj tíꞌijchaɨca caꞌɨn ɨ mej rutaꞌarujveꞌe naꞌari ɨ mej aꞌij puaꞌa tyuꞌujepeꞌe o mej aviitzi cɨn tiꞌinahuaꞌa. Camu xaa nyaꞌu seiraꞌa muaꞌajuꞌun ɨ Dioj jemi.
\p
\v 11 Sajta muan, eꞌicaj xu huaꞌa jetze ajtyamaꞌacantacaꞌa. Ma ajta Dioj, aɨ pu ari tyajámuaacáꞌariꞌiriꞌi ɨ saj cɨn autyajturaa ɨ jemin. Aɨ pu ajta huatauraꞌate muejmi. Ajta aɨjna cɨmeꞌe ɨ xaijnyuꞌucaraꞌaraꞌan ɨ Dioj, muan xu urareꞌenyaꞌacan cɨn huatyajturaa ɨ Dioj jemi nyuucajtzeꞌen aɨjna ɨ tavastaraꞌa, ɨ Jesús tɨ ajta Cɨriistuꞌu pueen.
\s Aɨ pu nuꞌu tiꞌivaɨreꞌe ɨ tavastaraꞌa jemi aijna i tyaj ratyáhueꞌiraꞌa
\p
\v 12 Nain pu iꞌixaꞌapɨꞌɨn. Ajta ayaa pu tinataꞌaca nyej neyan huarɨni. Ma ajta, capu nain ayan tiꞌivaɨreꞌe. Naijmiꞌi pu iꞌi xaꞌapɨꞌɨn, ajta ayaa pu xaa nataꞌaca nyej neyan huarɨni. Me nyajta inyaa, canu huatanaꞌasin tɨ tiꞌitɨ naꞌantimueꞌitɨn nyej ni nyaɨjna cɨn caꞌanyejri cɨn tiraatyavaɨreꞌen.
\v 13 Ajta aɨjna tɨ tiꞌicueꞌiriꞌi, aɨ pu ayan tiꞌivaɨreꞌe ɨ jucáj jetze. Ajta aɨjna ɨ jucáj, aɨ pu ajta ayan tiꞌivaɨreꞌe tɨ cueꞌira tyaꞌarayeijxɨꞌɨn. Ma ajta Dioj, aɨ pu raꞌantipuaꞌariteꞌesin ɨ jucáj, ajta ɨ cueꞌira. Ajta ɨ tyej ratyáhueꞌiraꞌa, capu ayaa naꞌa tiꞌivaɨreꞌe tyej ti tyaɨjna cɨn tiꞌixanaꞌacɨraꞌa silu tej ti tyaɨjna cɨn raatyavaɨreꞌen ɨ tavastaraꞌa. Ajta ɨ tavastaraꞌa, aɨ pu ajta raatyavaɨreꞌesin aɨjna ɨ tyej ratyáhueꞌiraꞌa.
\v 14 Ajta aɨn Dioj, aɨ pu rumuareꞌeriꞌiraꞌa cɨn raꞌajjáj ɨ tavastaraꞌa huaꞌa tzajtaꞌa ɨ mɨꞌɨchite. Aɨ pu ajta taꞌajjájpua ityejmi.
\p
\v 15 Xuꞌuri ramuaꞌaree tɨ Cɨriistuꞌu jetze ajtyamaꞌacan aɨjna ɨ saj ratyáhueꞌiraꞌa. ¿Aꞌini huataujmuaꞌa aɨjna? ¿Ni qui nyaj raꞌantyanajchiteꞌe jamuan ɨ jɨitaꞌa tɨ tiꞌityejiꞌivi ɨ rutevi cɨmeꞌe nyaɨjna tɨ Cɨriistuꞌu jetze ajtyamaꞌacan? Capu xaa nyaꞌu.
\v 16 ¿Ni qui seyan ramuaꞌaree tɨ aɨn tɨ ayan antyaujnaxca jamuan ɨ jɨitaꞌa tɨ tiꞌityejiꞌivi ɨ rutevi cɨmeꞌe, ayaa pu huaujruu mej mi seij manaꞌa tevijraꞌan pueenyeꞌen?
\v 17 Ma ajta aɨn tɨ ayan huataujtuꞌireꞌen ɨ tavastaraꞌa jemi, ayaa pu ruruuren tɨ aɨjna jamuan seij naꞌa pueen ɨ xaijnyuꞌucaraꞌaraꞌan tzajtaꞌa.
\p
\v 18 Sataꞌaj nain cɨn raatapuaꞌajta sej seyan tiꞌixanaꞌacɨreꞌe. Ajta seica cɨmeꞌe ɨ maj cɨn atyaturaave ɨ Dioj jemi, naimiꞌi pu ayan cai rutevi cɨn aꞌij tyuꞌuruure. Ma ajta, tɨ puaꞌa aꞌatɨ ayan tiꞌixanaꞌacɨraꞌa, aɨ pu aꞌij puaꞌa raruure ɨ rutevi.
\v 19-20 Casiꞌi, ayaa pu tiꞌivaɨreꞌe ɨ aꞌamuatevi tɨj teyuu tɨ tzajtaꞌan huirajca ɨ xaijnyuꞌucaraꞌaraꞌan ɨ Dioj. Aɨ pu aꞌamua tzajtaꞌa seijreꞌe. Ajta, muan xu raꞌancureꞌeviꞌitɨ ɨ Dioj. Muan xu cai saɨjna cɨn antyujmuaꞌaree ɨ rutevi aꞌini aɨ pu tyuꞌutanajchitacaꞌa muejmi jetze maꞌacan. Aɨj pu cɨn ayan ruxeꞌeveꞌe sej seyan ranaꞌamicheꞌen ɨ rutevi cɨmeꞌe.
\c 7
\s Cɨmeꞌen aɨme ɨ mej nyéjnyaɨche, majta ɨ mej vɨɨche
\p
\v 1 Cɨmeꞌen aɨjna ɨ sej seri me tinyajaꞌutaitiꞌiriꞌi, ayaa pu tyamuaꞌa tiꞌixaꞌapɨꞌɨn tɨ cai aꞌatɨ nyaɨcha.
\v 2 Ma ajta, ayaa mu eihua maɨjna cɨn tiꞌixanaꞌacɨreꞌe. Micheꞌe meyan huarɨni, aꞌachu maj puaꞌamua. Micheꞌe huatyenyaɨche ɨ tyetyaca, seij ajta seij. Majta aɨme ɨ juuca, micheꞌe majta huatyevicheꞌen, seij ajta seij.
\v 3 Ajta aɨn ɨ tyaataꞌa, cheꞌe ayan raꞌaraꞌastijreꞌen aꞌij tɨ tiraavijteꞌe aɨjna jemi ɨ ruꞌɨj. Ajta aɨn jɨitaꞌa, cheꞌe ayan cheꞌeta naꞌa raꞌaraꞌastijreꞌen aꞌij tɨ tiraavijteꞌe ɨ rucɨn jemi.
\v 4 Ayaa puꞌu naꞌa, aꞌini aɨn jɨraꞌaraꞌan, capu ayan aɨjna cɨn antyujmuaꞌaree ɨ rutevi cɨmeꞌe silu aɨ pu xaa ayan antyujmuaꞌaree ɨ cɨnaꞌaraꞌan. Ajta aɨn cɨnaꞌaraꞌan, capu ajta ayan aɨjna cɨn antyujmuaꞌaree ɨ rutevi cɨmeꞌe, silu aɨn ɨraꞌaraꞌan, aɨ pu xaa aɨjna cɨn antyujmuaꞌaree.
\v 5 Caxu chaꞌa sanaꞌa ajtacɨ́ꞌɨcaꞌan silu saɨjna cɨmeꞌe sej seri seyan raaxaꞌapɨꞌɨntare sej aꞌatzu aꞌatyeeviꞌin saj huatyejnyuuni ɨ Dioj jemi. Sataꞌaj eꞌeyan ajtyaxɨɨre tɨꞌij cai aɨn Satanás ayan caꞌanijraꞌa jamuaataꞌan sej seij jamuan tyuꞌuxanaꞌacɨreꞌen aɨjna cɨmeꞌe saj cai aꞌujcuꞌuvajcaꞌa.
\p
\v 6 Canu neyan tyajaꞌamueꞌitii silu ayaa nu nyaɨjna cɨn caꞌanijraꞌa jamuaataꞌaca sej seyan rɨcɨ.
\v 7 Nyajta inyaa, ayaa nu tiꞌijxeꞌeveꞌe mej mi meyan eꞌenyeꞌen nyatɨj inyaa, matɨj manaꞌa puaꞌamua ɨ tyetyaca. Ma ajta aɨn Dioj, aɨ pu ari ayan tiraataꞌa seij ajta seij aꞌij tɨ aɨn tihuaꞌuxaꞌapɨꞌɨntariꞌiriꞌi.
\p
\v 8 Me nyajta inyaa, ayaa nu tihueꞌixaateꞌe nyaɨme ɨ maj cai xɨ huanyéjnyaꞌɨchacaꞌa, majta aɨme ɨ maj majta cai xɨ vícheꞌejmee, majta aɨme ɨ mej huaujsaɨjtaracaꞌa. Cɨmeꞌen aɨme, matɨj manaꞌa puaꞌamua, ayaa pu iꞌi xaꞌapɨꞌɨn mej mi meyan éꞌenyaꞌa huatyaturan nyatɨj inyaa.
\v 9 Aru, tɨ puaꞌa cai rɨꞌɨri maj áꞌujcuꞌuvaa, micheꞌe huanyéjnyaɨche, majta huávicheꞌen. Eitzeꞌe pu huaꞌatyavaꞌɨri mej meyan huarɨni maj cai rajpueijtzi muaꞌaraꞌani ɨ rutzajtaꞌa.
\p
\v 10 Me nyajta inyaa, canu neyan tihueꞌijcateꞌe aɨme ɨ mej nyéjnyaɨche, majta ɨ mej vícheꞌejmee silu aɨ pu tavastaraꞌa ayan tihueꞌijteꞌe. Cheꞌe cai aɨn jɨraꞌaraꞌan ajtayeꞌican aɨjna jemi ɨ rucɨn.
\v 11 Ajta, tɨ puaꞌa ayan ajtaraꞌani, cheꞌe ayan éenyaꞌa huatyaturan tɨ rusaɨjtan. Naꞌari cai, cheꞌe ajtahuaꞌa raꞌantyanaxca aɨjna ɨ rucɨn. Ajta aɨn ɨ cɨnaꞌaraꞌan, cheꞌe ayan cheꞌeta naꞌa huarɨni. Cheꞌe cai ajtayeꞌican aɨjna jemi ɨ ruꞌɨj.
\p
\v 12 Ajta, aɨme cɨmeꞌe ɨ seica, capu ayan tihueꞌixaateꞌe ɨ tavastaraꞌa silu inyaa, nyaa nu neyan tihueꞌixaateꞌe. Cheꞌe ayan huarɨni aɨjna ɨ taꞌihuaaraꞌa tɨ aɨjna tyeviꞌitɨn ɨ jɨitaꞌa tɨ cai tyaꞌatzaahuateꞌe. Tɨ puaꞌa aɨn jɨitaꞌa aꞌujcaꞌanyaa tɨ jamuan huatyaturan, ayaa pu tyuꞌujxeꞌeveꞌe tɨ aɨn taꞌihuaaraꞌa cai ma ruuraini.
\v 13 Ayan cheꞌeta naꞌa een cɨmeꞌen ɨ jɨitaꞌa tɨ raꞌantyanaxcacaꞌa seij tyaataꞌa tɨ ajta cai tyaꞌatzaahuateꞌe. Tɨ puaꞌa aɨn ajta ayan aꞌujcaꞌanyaa tɨ jamuan huatyaturan, ayaa pu cheꞌeta naꞌa ruxeꞌeveꞌe tɨ cai ma ruuraini ɨ rucɨn.
\p
\v 14 Ayaa pu aɨjna cɨn ruxeꞌeveꞌe, aꞌini Dioj pu ajta huatauraꞌate aɨjna ɨ cɨnaꞌaraꞌan tɨ cai tyaꞌatzaahuateꞌe aɨjna cɨmeꞌe nyuucajtzeꞌen ɨ jɨraꞌaraꞌan. Ajta aɨn ɨ jɨraꞌaraꞌan tɨ ajta cai tyaꞌatzaahuateꞌe, Dioj pu ajta ayan huatauraꞌate aɨjna jɨraꞌaraꞌan nyuucajtzeꞌen ɨ taꞌihuaaraꞌa. Naꞌari cai, aɨ mu xanaꞌavisiꞌi muaꞌajuꞌun ɨ yaujmuaꞌameꞌen. Ma ajta ɨ Dioj, aɨ pu ari huatauraꞌate aɨme.
\v 15 Ma ajta aɨn tɨ cai tyaꞌatzaahuateꞌe, tɨ puaꞌa ayan ajtaraꞌani, cheꞌe ayan eenyeꞌen. Capu cheꞌe ayan ruxeꞌeveꞌe maj naimiꞌi huatyeꞌen. Ajta aɨn ɨ taꞌihuaaraꞌa nusu aɨn ɨ tajuu, ayaa pu tihuaꞌacɨꞌɨti mej mi ruxaahua raaxaꞌapɨꞌɨntareꞌen, aꞌini Dioj pu ayan taatajée tej ti tyamuaꞌa naa taꞌihuaamuaꞌa taꞌaraꞌani.
\v 16 Cheꞌe ayan eenyeꞌen aꞌini mɨ pej jɨraꞌaraꞌan pueen, capaj ramuaꞌaree tɨ puaꞌa peyan ruꞌirajtuaani ɨ aꞌacɨn nusu pacai. Pajta muaa, mɨ pej cɨnaꞌaraꞌan pueen, capaj pajta ramuaꞌaree tɨ puaꞌa peyan ruꞌirajtuaani ɨ aꞌɨj nusu pacai.
\p
\v 17 Ayaa pu xaa nyaꞌu tiꞌayajna. Ayaa nu tihueꞌijcateꞌe aɨme ɨ mej eꞌetyujsaꞌɨri nainjapua teyujtaꞌa, aꞌachu maj puaꞌamua, mej mi meyan tityaajuꞌun aꞌij tɨ tavastaraꞌa ayan tihuaꞌuxaꞌapɨꞌɨntariꞌiriꞌi seij ajta seij, aꞌij tɨ ajta Dioj tihuaꞌutajée.
\v 18 Tɨ puaꞌa ari antisijchiꞌihuacaꞌa ɨ naviiraꞌan ɨ aꞌatɨ tɨꞌɨj Dioj raatajée, cheꞌe aɨn aꞌatɨ cai ayan tiꞌityesaꞌa tɨ raꞌavaꞌanan ɨ tɨ antisijchiꞌihuacaꞌa. Ajta, tɨ puaꞌa cai xɨ antisijchiꞌihuacaꞌa ɨ naviiraꞌan ɨ aꞌatɨ tɨꞌɨj Dioj raatajée, ayaa pu ruxeꞌeveꞌe tɨ aɨn aꞌatɨ cai raꞌantisiiche ɨ runavij.
\v 19 Ayaa puꞌu xaa nyaꞌu, aꞌini capu aꞌij huataujmuaꞌa ɨ Dioj jemi tɨ puaꞌa aꞌatɨ raꞌantisijche ɨ runavij nusu cai ayan raꞌantisijchacaꞌa.
\v 20 Aɨj pu cɨn, aꞌatɨ tɨ naꞌa, cheꞌe aɨn ayan eenyaꞌa huatyaturan aꞌij tɨ eenyaꞌa tɨꞌɨj Dioj ayan raatajée.
\v 21 Tɨ puaꞌa pauj caꞌanyejri cɨn tiꞌimuaraꞌacaa tɨꞌɨj Dioj muaatajée, capej paɨjna cɨn aꞌij tyáꞌamuajca. Aru tɨ puaꞌa ayan tiꞌirɨꞌɨristan pej pi raꞌantimueꞌitɨn, pej pi pajta axaahua áꞌuchaꞌacanyeꞌen, pataꞌaj peyan huarɨni.
\v 22 Ayaa puꞌu naꞌa tiꞌen, aꞌini aɨjna tɨ caꞌanyejri cɨn tiꞌimuaraꞌacaa tɨꞌɨj tavastaraꞌa raatajée, puꞌuri ayan ruxéꞌeviꞌiraꞌa cɨn tiꞌivaɨreꞌe ɨ tavastaraꞌa jemi. Ajta aɨn tɨ ruxaahua tiꞌimuaraꞌacaa tɨꞌɨj tavastaraꞌa raatajée, aɨ pu ari caꞌanyejri cɨn tiꞌivaɨreꞌe ɨ jemin.
\p
\v 23 Cɨriistuꞌu pu tyuꞌutanajchitacaꞌa ɨ saj cɨn tyeꞌechaɨcaꞌa ɨ Dioj jemi. Aɨj pu cɨn, caxu cheꞌe tauraꞌacareꞌen sej caꞌanyejri cɨn tiꞌimuaraꞌa huaꞌa jemi ɨ tyetyaca.
\v 24 Ayaa nu tyajaꞌamueꞌixaateꞌe, nyeꞌihuaamuaꞌa, sataꞌaj seyan cheꞌeta sanaꞌa eꞌenyeꞌen huatyaturan ɨ Dioj jemi seij sajta seij satɨj eꞌenyaꞌa tɨꞌɨj aɨn amuaatajée.
\p
\v 25 Cɨmeꞌen aɨme ɨ maj cai vícheꞌejmee, capu tiꞌitɨj cɨn tinyeijca ɨ tavastaraꞌa silu ayaa nu tyajaꞌamueꞌixaateꞌe aꞌij tɨ ayan tinaꞌamitejteꞌe inyeetzi i nyaj cai atyaꞌɨtzaꞌara aɨjna cɨmeꞌe tɨ aɨn náꞌancuꞌuvajxɨ ɨ tavastaraꞌa.
\v 26 Aꞌini puꞌuri tɨn tyajaꞌureꞌenyejsin ɨ tyaj cɨn rajpueiitzi taꞌajuꞌun, ayaa pu tinaꞌamitejteꞌe tɨ ayan tiraavijteꞌe sej seyan eꞌenyeꞌen huatyaturan satɨj eꞌen ijii.
\v 27 Tɨ puaꞌa peri seij tyeviꞌitɨnyeꞌen, capej peyan rahuauca aꞌij pej yeꞌi huarɨni paj ma ruuraini. Naꞌari tɨ puaꞌa pauj asaɨj áꞌuchaꞌacanyeꞌen, capej peyan rahuauca paj huatyenyaɨche.
\v 28 Ma ajta, tɨ puaꞌa saɨj huatyenyaɨche, capu aɨn tiꞌitɨj cɨn autyajturaa ɨ Dioj jemi. Ajta tɨ puaꞌa seij jɨitaꞌa ayan huatyevicheꞌen, capu ajta tiꞌitɨj cɨn autyajturaa. Camu xaa nyaꞌu aꞌij puaꞌa rɨcɨ silu ayaa pu huaꞌutamuareꞌeristeꞌesin maɨjna cɨmeꞌe mej meri naiimiꞌi áꞌujhuaꞌan.
\p Me nyajta inyaa, ayaa nu een cɨn neyan tyajaꞌamueꞌixaateꞌe aꞌini canu raxeꞌeveꞌe tɨ ayan tyajaꞌamuaruure.
\v 29 Casiꞌi, nyeꞌihuaamuaꞌa, ayaa pu huataujmuaꞌa aɨjna ɨ nyuucari nyaj jaꞌamueꞌixaateꞌe. Puꞌuri tɨn tyajaꞌureꞌenyejsin aɨjna xɨcajraꞌa tɨ ayan titaaxaꞌapɨꞌɨntariꞌiriꞌi. Tɨj naꞌa ijii tɨ yu aucaꞌitɨ aꞌame, micheꞌe meyan tiꞌityujchaɨ aɨme ɨ mej nyéjnyaɨche. Micheꞌe meyan rɨjca matɨj aɨme ɨ maj cai xɨ huanyéjnyaꞌɨchacaꞌa.
\v 30 Majta aɨme ɨ maj ruxaamɨsteꞌe, micheꞌe meyan eꞌenyeꞌen yaa cumu maj cai ruyein. Majta aɨme ɨ maj rutyamuaꞌaveꞌe, micheꞌe majta meyan eꞌenyeꞌen yaa cumu maj cai cheꞌe naꞌanaj. Ajta aɨme ɨ mej tiꞌinanaave, cheꞌe ayan tihuaꞌamityejtyaꞌa maj cai tiꞌitɨ tichaꞌɨ.
\v 31 Ajta aɨme ɨ maj meyan maɨjna cɨn ruvaɨreꞌe tɨ iiyan tiꞌiseijreꞌe chaanaca japua, micheꞌe cai nain cɨn ruvaɨraꞌa, aꞌini puꞌuri tɨn tyeꞌentipuaꞌari nain tɨj naꞌa tɨ yan tiꞌiseijreꞌe iiyan chaanaca japua.
\p
\v 32 Nyajta inyaa, ayaa nu tiꞌijxeꞌeveꞌe muejmi cɨmeꞌen saj cai tiꞌitɨj cɨn aꞌij tyáꞌujmuajca aꞌini aɨjna tɨ cai nyaɨche, ayaa pu aɨjna jetze ruxeꞌeveꞌe aɨjna cɨmeꞌen ɨ tɨ tiraacɨꞌɨti ɨ tavastaraꞌa jemi. Aɨj pu cɨn ayan rɨꞌɨ tiꞌityujchaꞌɨ tɨꞌij ayan rɨꞌɨ tiraataꞌan aɨjna ɨ tavastaraꞌa.
\v 33 Ma ajta aɨn tɨ nyaɨche, ayaa pu aɨjna jetze ruxeꞌeveꞌe aɨjna cɨmeꞌen tɨ yan tiꞌiseijreꞌe iiyan chaanaca japua tɨ ij ayan aɨjna cɨn rɨꞌɨ tiraataꞌacareꞌen aɨjna ɨ ruꞌɨj. Aɨj pu cɨn cai cheꞌe rɨꞌɨri tɨ nain cɨn tiraatyavaɨreꞌen ɨ tavastaraꞌa.
\p
\v 34 Ayaa pu cheꞌeta naꞌa een cɨmeꞌen, ɨ jɨitaꞌa tɨ rusaɨj aꞌuchaꞌacan, tɨ ajta cai vicheꞌe. Ayaa pu aɨjna jetze ruxeꞌeveꞌe aɨjna cɨmeꞌen tɨ tiraacɨꞌɨti ɨ tavastaraꞌa jemi. Ayaa pu ajta aɨjna jetze ruxeꞌeveꞌe tɨ urareꞌenyaꞌacan cɨn huatyaturan ɨ Dioj jemi, nain cɨmeꞌe ɨ rutevi jetze, ajta ɨ ruxaijnyuꞌuca cɨmeꞌe. Ma ajta aɨn ɨ jɨitaꞌa tɨ ari vicheꞌe, ayaa pu aɨjna jetze ruxeꞌeveꞌe aɨjna tɨ yan tiꞌiseijreꞌe iiyan chaanaca japua tɨ ij ayan rɨꞌɨ tiraataꞌacareꞌen ɨ rucɨn.
\p
\v 35 Canu nyaɨjna cɨn neyan tyajaꞌamueꞌixaateꞌe nyej ni tiꞌitɨj cɨn amuaataꞌijmɨ silu nyej ni tiꞌitɨj cɨn amuaatyavaɨreꞌen sej si seyan rɨꞌɨ tiꞌityujchaɨ aꞌij tɨ tiraavijteꞌe, sej si nain cɨn ranaꞌamicheꞌen ɨ tavastaraꞌa.
\p
\v 36 Ajta aɨjna ɨ aꞌatɨ tɨ ayan tiyauj tɨ cai xɨ vicheꞌe, tɨ puaꞌa ayan raꞌamityejtyaꞌa tɨ cai xaꞌapɨꞌɨn rɨcɨ tɨ raataꞌijmɨ, ajta tɨ puaꞌa ari mu áꞌumeꞌen ɨ tɨ cɨn tyamueistaca aɨjna ɨ jɨitaꞌa, cheꞌe aɨn yaꞌupuaaraꞌan ayan huarɨni aꞌij tɨ tiraꞌamitejtyaꞌacaa. Capu tiꞌitɨj cɨn tiꞌixanaꞌacɨreꞌen ɨ Dioj jemi, cheꞌe aɨn jɨitaꞌa huatyevicheꞌen.
\v 37 Ma ajta aɨjna ɨ aꞌatɨ, tɨ puaꞌa ayan tyamuaꞌa naa tiraaxaꞌapɨꞌɨntare ɨ rutzajtaꞌa tirachaɨ́ɨ aꞌayeꞌi ɨ ruyauj aꞌij tɨ een, ajta tɨ puaꞌa cai aꞌatɨ ayan caꞌanyejri rataꞌaca tɨ huatyevicheꞌen aɨjna ɨ yaujraꞌan, aɨjna ɨ aꞌatɨ, aɨ pu xaa xaꞌapɨꞌɨn rɨcɨ.
\p
\v 38 Aɨj pu cɨn, xaꞌapɨꞌɨn rɨcɨ aɨjna ɨ aꞌatɨ tɨ ayan rataꞌacareꞌen ɨ ruyauj tɨ huatyevicheꞌen. Ajta aɨn ɨ aꞌatɨ tɨ ayan rachaɨ́ aꞌayeꞌi ɨ ruyauj aꞌij tɨ een, tɨ ij cai huatyevicheꞌen, aɨ pu eitzeꞌe xaꞌapɨꞌɨn rɨcɨ.
\v 39 Ajta, aɨjna ɨ jɨitaꞌa tɨ ari vicheꞌe, aɨ pu caꞌanyejri cɨn naiimiꞌi seijreꞌe jamuan ɨ rucɨn tɨj naꞌa tɨ auj ruuri aɨjna ɨ cɨnaꞌaraꞌan. Ajta, tɨ puaꞌa huamɨꞌɨni aɨjna ɨ cɨnaꞌaraꞌan, puꞌuri rɨꞌɨri tɨ ajtahuaꞌa ruxéꞌeviꞌiraꞌa cɨn huatyevicheꞌen aɨjna jamuan aꞌatɨ tɨ raꞌaraanajchi. Saɨj puꞌu ruxeꞌeveꞌe, tɨ ayan huatyevicheꞌen aꞌij tɨ tiraavijteꞌe ɨ tavastaraꞌa jemi.
\v 40 Ma ajta aɨjna ɨ jɨitaꞌa, eitzeꞌe pu ɨ Dioj rɨꞌɨ tirataꞌaca tɨ puaꞌa ayan eenyeꞌequeꞌe huatyaturan aꞌij tɨ een. Ayaa pu tinaꞌamitejteꞌe inyeetzi. Ajta ayej nyaꞌase tɨ ajta ayan cheꞌeta naꞌa tiraꞌamitejteꞌe ɨ xaijnyuꞌucaraꞌaraꞌan ɨ Dioj.
\c 8
\s Ɨ cueꞌira ɨ maj tiꞌimuaɨꞌɨvajtaca ɨ rudioosi
\p
\v 1 Cɨmeꞌen ɨ cueꞌira ɨ maj tiꞌimuaɨꞌɨvajtaca ɨ rudioosi jemi, ayaa tu ramuaꞌaree. Naijmiꞌi tu máumuaꞌarejmee. Ajta, ayaa pu tiꞌirɨnyaca tɨ aꞌatɨ ayan aɨjna cɨn aꞌujtzaahuatyaꞌa tɨ eihua máumuaꞌaree. Ma ajta, aꞌatɨ pu rɨꞌɨ aꞌij tiꞌijrɨꞌɨre tɨ puaꞌa rɨꞌɨ tiꞌijxeꞌeveꞌe ɨ ruxaꞌaj tevi.
\v 2 Ajta aɨjna ɨ aꞌatɨ tɨ ayan tiꞌimuaꞌatze ɨ rutzajtaꞌa tɨ eihua máumuaꞌaree, aɨ pu cai máumuaꞌaree aꞌij tɨ yeꞌi tyuꞌujxeꞌeveꞌe ɨ Dioj jemi.
\v 3 Ma ajta, Dioj pu ramuaꞌate aɨjna ɨ aꞌatɨ tɨ rɨꞌɨ tiꞌijxeꞌeveꞌe ɨ Dioj.
\p
\v 4 Aɨj pu cɨn, cɨmeꞌen aɨjna ɨ cueꞌira ɨ maj tihuaꞌamuaɨꞌɨvejteꞌe ɨ rudioosi, ayaa tu ramuaꞌaree maj cai rɨꞌɨ meyan seijreꞌe iiyan chaanaca japua ɨ maj nuꞌu dioosi pueen. Tyajta, tyan tu ramuaꞌaree tɨ saɨj naꞌa ɨ Dioj tɨ iiyan seijreꞌe.
\p
\v 5 Ee xaa nyaꞌu, ma muiꞌi ɨ mej jee dioosi pueen, tɨ puaꞌa iiyan mej seijreꞌe chaanaca japua nusu aun mej eꞌeseijreꞌe u tajapua, aꞌini ayaa pu titaꞌamitejteꞌe mej iꞌimuiꞌi ɨ mej dioosi pueen, majta iꞌimuiꞌi ɨ mej tiꞌitɨj cɨn títyatatí.
\v 6 Me tyajta ityan, ayaa tu tiꞌijmuaꞌaree tɨ, ityejmi jemi, saɨj naꞌa ɨ Dioj ɨ tyaj rajyaꞌupua. Nain pu aɨjna jemi tyuꞌutaseijre. Tyajta ityan, naimiꞌi tu tyaɨjna cɨn seijreꞌe tyej ti rɨꞌɨ tiraatyajtuaani ɨ jemin. Ajta seij puꞌu ɨ tavastaraꞌa, aɨjna ɨ Jesús tɨ ajta Cɨriistuꞌu pueen. Nain pu tyuꞌutaavijhuacaꞌa aɨjna jemi. Tyajta ityan, naimiꞌi tu tyaɨjna jetze aratacaꞌanye tej ti ruuri.
\p
\v 7 Ma majta, camu naimiꞌi meyan cheꞌata manaꞌa tiꞌijmuaꞌaree, silu seica, ayaa mu tiꞌijrɨꞌɨrajcaa maj huaꞌanaꞌamicheꞌen ɨ maj cai dioosi pɨrɨcɨ. Aɨj pu cɨn, tɨ puaꞌa meyan raacuaꞌani ɨ cueꞌira ɨ mej ramuaɨꞌɨvajtaca, aucheꞌe pu ayan tihuaꞌamityejteꞌe maj majta maɨjna naꞌamicheꞌe ɨ tɨ cai Dioj pueen maɨjna cɨmeꞌe maj raacuaa maɨjna ɨ cueꞌira maj raamuaɨꞌɨvajtacaꞌa. Ayaa mu aɨjna cɨn raacuaꞌan, tɨꞌɨqui aꞌij puaꞌa huaꞌataꞌacaraꞌa aꞌame ɨ huaꞌaxaijnyuꞌuca jetze aɨjna cɨmeꞌe tɨ aꞌij puaꞌa huarɨni aɨjna ɨ huaꞌaxaijnyuꞌuca.
\p
\v 8 Aru, casiꞌi muan, capu tiꞌitɨ cɨn titatyavaꞌɨri ɨ cueꞌira ɨ Dioj jemi. Capu aꞌatzu aꞌuvaɨjtzi tɨ puaꞌa tyacai raacuaꞌani. Capu ajta titatyavaꞌɨri tɨ puaꞌa tyaraacuaꞌani.
\v 9 Ma sajta muan, rɨꞌɨ xuꞌu sej si cai seyan aꞌij puaꞌa raaruuren saɨj ɨ aꞌatɨ tɨ cai eihua teꞌeviicueꞌi, sataꞌaj cai seyan caꞌanijraꞌa tiraataꞌacareꞌen tɨ aɨn ayan autyaturan Dioj jemi saɨjna cɨmeꞌe tɨ iꞌi xaꞌapɨꞌɨn muejmi jemi.
\p
\v 10 Casiꞌi muaa, mɨ paj rɨꞌɨ tiꞌijmuaꞌaree. Ticheꞌe teyan tiraataxaj yee aꞌatɨ tɨ cai eihua teꞌeviicueꞌi ɨ rutzajtaꞌa, ajta aɨ pu muaseij, paj paun tyajaꞌacuaꞌa paujna teyujtaꞌa aꞌu maj ranaꞌamicheꞌe ɨ huaꞌadiooj. Tij caꞌanijraꞌa papuꞌu raataꞌasin aɨjna ɨ aꞌatɨ tɨꞌij aɨn ajta raacuaꞌani ɨ cueꞌira ɨ maj raatamuaɨꞌɨvajtacaꞌa.
\v 11 Ayaa pu aɨjna cɨn huarɨj, aj puꞌi aꞌuvaɨjtzi aɨjna ɨ aꞌihuaaraꞌa tɨ cai eihua teꞌeviicueꞌi, tɨ ajta jetzen maꞌacan huamɨꞌɨ ɨ Cɨriistuꞌu. Aꞌuvaɨjtzi, icu, aɨjna cɨmeꞌe paj caꞌanijraꞌa raataꞌa paɨjna cɨmeꞌe paj rɨꞌɨ tiꞌijmuaꞌaree aꞌij tɨ een ɨ Dioj jemi.
\p
\v 12 Aɨj pu cɨn, satɨꞌɨj seyan autyaturan aɨme jemi saɨjna cɨmeꞌe saj aꞌij puaꞌa huaꞌuruu ɨ huaꞌamuaꞌatziiraꞌa jetze ɨ maj cai eihua teꞌeviicueꞌi, muan xu sajta saɨjna cɨn autyaturaave ɨ Cɨriistuꞌu jemi.
\v 13 Aɨj pu cɨn, tɨ puaꞌa nyeꞌihuaaraꞌa aꞌuvaɨjtzi aɨjna cɨmeꞌe tɨ raacuaa ɨ cueꞌira ɨ maj raamuaɨꞌɨvajtacaꞌa, canu aꞌanaj racuaꞌani nyaɨjna ɨ cueꞌira nyej ni cai caꞌanijraꞌa raataꞌan tɨ ayan huarɨni aɨjna tɨ cɨn aꞌuvaɨjtzi.
\c 9
\s Aꞌij tɨ tihuaꞌataꞌaca aɨme ɨ mej tyuꞌutaijtiꞌire
\p
\v 1 Nyajta inyaa, nyaxaahua nu aꞌuchaꞌacan. Nyajta nu nyaɨn pueen seij tɨ Dioj naꞌutaityacaꞌa nyej ni jetzen maꞌacan tyuꞌutaxaj. Nyajta nu raaseij nyaɨjna ɨ Jesús, ɨ tavastaraꞌa. Sajta muan, xuꞌuri nyeetzi jemi seijreꞌe aɨjna cɨmeꞌe nyej tiꞌivaɨreꞌe ɨ tavastaraꞌa jemi.
\v 2 Tɨ puaꞌa cai ayan tihuaꞌamitejteꞌe ɨ seica jemi tɨ Dioj ayan naꞌutaityacaꞌa, muejmi jemi pu xaa ayan tyajamuaꞌamitejteꞌe aꞌini muan xu saɨn pueen ɨ tyaj cɨn teyan ramuaꞌaree tɨ Dioj ayan aɨjna cɨn tineijca.
\p
\v 3 Ayaa nu huatyanna aɨme jemi ɨ mej nyaj cɨmeꞌen tiꞌihuaꞌu.
\v 4 ¿Ni cai ayan titataꞌaca tyej tyuꞌucuaꞌani, ajta tyaj huayeꞌen? Ee xaa nyaꞌu, ayaa pu tiꞌayajna.
\v 5 ¿Ni cai ayen cheꞌeta naꞌa titataꞌaca tyej seij tyeviꞌitɨnyeꞌen tɨ ajta tyaꞌatzaahuateꞌe matɨj ɨ seica ɨ tɨ Dioj huaꞌutaityacaꞌa, majta aɨme ɨ ihuaamuaꞌameꞌen ɨ tavastaraꞌa, ajta aɨjna ɨ Pedro?
\p
\v 6 Ari ityan, i nyaj iꞌi Pablo, ajta aɨjna ɨ Bernabé, ¿ni qui tyan tyanaꞌa tyaɨn pueen ɨ tɨ ayan ruxeꞌeveꞌe tyaj tamuajcaꞌa cɨn tyuꞌumuareꞌen?
\v 7 Capu aꞌatɨ tɨ ayan tiꞌivaɨreꞌe xantaaruꞌu cɨmeꞌe ayan tihuaujnajchiteꞌen rusaɨj. Ajta capu aꞌatɨ ayan cai racuaꞌani ɨ tacaꞌiraꞌan ɨ tɨ raahuii. Capu ajta aꞌatɨ ayan cai raꞌantiꞌisin huaꞌaleechi tɨ huaꞌasaɨreꞌe ɨ yaꞌamuaate.
\v 8 Canu neyan tiꞌixa aꞌij mej tirajtyau rujɨɨmuaꞌa manaꞌa ɨ tyetyaca silu ayaa pu cheꞌeta naꞌa teꞌeyuꞌusiꞌi jetzen ɨ nyuucari ɨ maj cɨn tiꞌijta.
\p
\v 9-10 Ayaa pu tyaꞌasɨɨmueꞌi ɨ yuꞌuxari jetze, tɨ Moisés tyaacan raꞌuyuꞌuxacaꞌa tɨcɨn: “Capej raꞌancánaamɨn ɨ puuye tɨꞌɨj aɨn atáyeꞌicaa rayuu ɨ triigu.” ¿Ni qui jetzen ruxeꞌeveꞌe ɨ Dioj aɨjna ɨ puuye, naꞌari tyejmi naꞌa cɨmeꞌen ayan tiꞌixa? Ee xaa nyaꞌu. Nain pu cɨn tyejmi cɨn ayan tyuꞌutaxajtacaꞌa. Ayaa pu een cɨn tyejmi cɨmeꞌen ayan teꞌeyuꞌusiꞌihuacaꞌa aꞌini ayaa pu tiraavijteꞌe tɨ aɨn aꞌatɨ tɨ tasaꞌahuaca ayan rachuꞌeveꞌe tɨ tiꞌitɨj raacɨꞌɨti aɨjna cɨmeꞌe tɨ tyuꞌutasaahuacaꞌa. Ajta, aɨn tɨ tiꞌitzaꞌanaca, ayaa pu ajta ayan tiraavijteꞌe tɨ ayan rachuꞌeveꞌe tɨ tiꞌitɨ raacɨꞌɨti aɨjna tɨ huacɨɨracaꞌa.
\p
\v 11 Tɨ puaꞌa teri raatyajtua muejmi jemi tyaɨjna tɨ Dioj jemi eꞌemaꞌacan tɨꞌij rɨꞌɨ áꞌamuaruuren, ¿ni qui ayan aꞌij puaꞌa tyajaꞌamuaseijrateꞌe tɨ ayan titáacɨꞌɨti aꞌicaj aɨjna ɨ saj cɨn huataujvaɨreꞌen iiyan chaanaca japua?
\v 12 Tɨ puaꞌa ayan tiraavijteꞌe tɨ ayan tihuaꞌucɨꞌɨti ɨ seica aꞌicaj ɨ saj cɨn huataujvaɨreꞌen, eitzeꞌe pu ayan tiraavijteꞌe tɨ ayan titáacɨꞌɨti itejmi.
\p Me tyajta ityan, catu teyan rɨcɨ silu nain tu cɨn teꞌeviicueꞌi tyej ti cai raꞌantanaamɨn sej si cai cheꞌe raꞌaraꞌastijreꞌen ɨ nyuucari tɨ cɨmeꞌen raxa ɨ Cɨriistuꞌu.
\v 13 Xuꞌuri ramuaꞌaree aꞌij mej rɨcɨ aɨme ɨ mej tiꞌivaɨreꞌe u teyujtaꞌa. Ayaa mu racuaꞌaca maɨjna ɨ maj seica maun tyaꞌutyatúutuhuaꞌa muaꞌayeꞌi u teyujtaꞌa. Majta aɨme ɨ mej maun tiꞌivaɨreꞌe aꞌu maj tyajaꞌamuaɨꞌɨvajtaca, aɨ mu majta meyan racuaꞌaca aꞌicaj ɨ maj maun raatamuaɨꞌɨvajtacaꞌa.
\p
\v 14 Ayaa pu cheꞌeta naꞌa een, tavastaraꞌa pu ayan tyuꞌutaijtacaꞌa tɨ ayan tiraavijteꞌe tɨ ayan tihuaꞌucɨꞌɨti aɨme ɨ mej tihuaꞌutaꞌixaateꞌesin ɨ nyuucari tɨ cɨmeꞌen raxa ɨ Dioj, mej mi maɨjna cɨn huataujvaɨreꞌen maj tyuꞌutaxajtacaꞌa maɨjna cɨmeꞌe ɨ nyuucari tɨ cɨn Dioj hueꞌirajtuaani.
\p
\v 15 Me nyajta inyaa, canu aꞌanaj huatannyaꞌa nyej nyaɨjna cɨn huatyanvaɨreꞌen aꞌij tɨ tiraavijteꞌe inyeetzi jemi. Canu nyajta nyaɨjna cɨn tyajaꞌamuayuꞌuseꞌe sej si seyan huarɨni inyeetzi jemi. Eitzeꞌe pu naꞌaraanajchi nyaj huamɨꞌɨni cai aꞌatɨ ayan tinaꞌariꞌi aɨjna ɨ nyaj neyan nyaɨjna cɨn huatyaturaasin.
\p
\v 16 Capu xaa nyaꞌu ayan tinataꞌaca nyaj nyaɨjna cɨn ahuantzaahuateꞌen nyaɨjna cɨmeꞌe nyej neyan tihuaꞌutaꞌixaateꞌen ɨ nyuucari tɨ cɨn Dioj hueꞌirajtuaani aꞌini Dioj pu ayan aɨjna cɨn tineijca. Pueijtzi pu naataꞌasin tɨ puaꞌa nyacai neyan tihuaꞌutaꞌixaateꞌen.
\p
\v 17 Ee xaa nyaꞌu, tiꞌitɨ pu ayan tiꞌinyacɨꞌɨtiicheꞌen tɨ puaꞌa neyan nyexeꞌeviꞌiraꞌa cɨn tíhuaꞌutaꞌixáateꞌencheꞌe. Ma ajta cai, capu, aꞌini Dioj ayan aɨjna cɨn tineijca.
\v 18 Tɨ puaꞌa ayan tiꞌayajna, ¿tiꞌitajni ayan tinaacɨꞌɨti inyeetzi? Ai pu aɨn pueen, nyaj cai huaꞌajijvaꞌa nyetihueꞌixaateꞌe, nyajta cai huatyanvaɨreꞌen nyaɨjna cɨmeꞌe ɨ nyaj cɨn antinmuaꞌaree.
\p
\v 19 Aɨj pu cɨn, nyaa nu neyan nyaxaahua naa tyajaꞌuchaꞌacan nain cɨmeꞌe. Capu aꞌatɨ tíꞌinyeijteꞌe. Me nyajta inyaa, nyaa nu neri huanruu naijmiꞌica jemi tɨj aꞌatɨ tɨ caꞌanyejri cɨn tiꞌimuareꞌe nyej ni eitzeꞌe huaꞌumueꞌitɨn.
\v 20 Aɨme jemi ɨ mej Israel jetze ajtyamaꞌacan, ayaa nu huanruu yaa cumu nyaj Israel jetze ajtyamaꞌacanta nyej ni huaꞌumueꞌitɨn ɨ mej Israel jetze ajtyamaꞌacan. Ee xaa nyaꞌu, capu ruxeꞌeveꞌe nyej neyan raꞌastijraꞌa ɨ nyuucari ɨ maj cɨn tiꞌijta. Capu amɨn aꞌij, ayaa nu huanruu tɨj aꞌatɨ tɨ ayan raꞌastijreꞌe nyej ni huaꞌumueꞌitɨn aɨme ɨ mej raꞌastijreꞌe ɨ nyuucari ɨ maj cɨn tiꞌijta.
\v 21 Nyajta, aɨme jemi ɨ maj cai raꞌastijreꞌe ɨ nyuucari ɨ maj cɨn tiꞌijta, ayaa nu nyajta huanruu tɨj aꞌatɨ tɨ cai ayan raꞌastijreꞌe nyej ni nyajta huaꞌumueꞌitɨn aɨme ɨ maj cai raꞌastijreꞌe ɨ nyuucari ɨ maj cɨn tiꞌijta.
\p Me nyajta inyaa, nyaa nu xaa seij nyuucari araꞌastejsin ɨ Dioj jemi, ɨ nyuucari tɨ cɨn titaꞌitiiriꞌi ɨ Cɨriistuꞌu.
\v 22 Aɨme jemi ɨ maj cai aꞌij tiꞌijviicueꞌi, nyajta nu neyan huanruu tɨj aꞌatɨ tɨ cai aꞌij tiꞌijviicueꞌi nyej ni huaꞌumueꞌitɨn aɨme ɨ maj cai aꞌij tiꞌijviicueꞌi. Naijmiꞌica jemi nu neyan huanruu tɨj naꞌa tɨ seijreꞌe nyej ni seica huamuéꞌitɨn nain cɨn aꞌij nyej yeꞌi rɨcɨ.
\v 23 Ayaa nu een cɨn rɨcɨ nyaɨjna cɨmeꞌe nyej ni tihuaꞌutaꞌixaateꞌen ɨ nyuucari tɨ cɨn Dioj hueꞌirajtuaani, tɨ ij ajta tinaacɨꞌɨti ɨ tɨ cɨn Dioj rɨꞌɨ tihuaꞌutaꞌasin aɨme ɨ mej raꞌaraꞌastijreꞌesin maɨjna ɨ nyuucari.
\p
\v 24 Xuꞌuri ramuaꞌaree aꞌij mej tiꞌijrɨꞌɨre aɨme ɨ mej ruꞌachaca aꞌu maj aꞌahuajcaca. Naimiꞌi ɨ maj ruaꞌachaca, ayaa mu cheꞌeta manaꞌa tiꞌityesaꞌa maj tyuꞌumueꞌitɨn. Ma ajta, seij puꞌu aɨn pueen ɨ tɨ tiꞌimueꞌitɨn, ajta raꞌancuraꞌasin ɨ maj raatapueijveꞌesin. Sataꞌaj seyan cheꞌeta sanaꞌa tyuꞌuteseꞌen sej si sajta seyan tiꞌitɨ huamuéꞌitɨn ɨ Dioj jemi.
\p
\v 25 Aꞌatɨ tɨ naꞌa tɨ huaꞌa jamuan taꞌichaca, ayaa pu aꞌujcuꞌuve nain cɨmeꞌe tɨ ij ayan curuun ancuraꞌɨn tɨ aꞌuvaɨjtzi. Me tyajta ityan, ayaa tu tiꞌityeseꞌe tyej ti curuun ancuraꞌɨn tɨ naa seiraꞌa aꞌame tɨj naꞌa rusen cɨmeꞌe.
\v 26-27 Aɨj nu cɨn, canu chaꞌa nyanaꞌa taꞌichaca. Canu nyajta chaꞌa nyanaꞌa tyaꞌancuráꞌatuꞌaxa ɨ aaca tzajtaꞌa, silu ayaa nu tyeꞌejtyantuꞌaxa ɨ nyejetze, nyajta inyaa raatyamueꞌitɨ naꞌayeꞌi caꞌanyejri cɨmeꞌe tɨꞌij naꞌaraꞌastijreꞌen ɨ nyaj ratyáhueꞌiraꞌa. Ayaa nu een cɨn rɨcɨ tɨ ij cai Dioj naaraꞌite nyatɨꞌɨj neri neyan tihuaꞌutaꞌixaa ɨ seica.
\c 10
\s Maj nuꞌu cai ranaꞌamiche maɨjna tɨ cai Dioj pueen
\p
\v 1 Ayaa nu tiꞌijxeꞌeveꞌe inyaa, sej raꞌutamuaꞌaree tɨ jaitɨri aꞌacáavaꞌa huaꞌuviꞌitɨjmaꞌa ɨ tavaujsimuaꞌacɨꞌɨ. Majta eꞌeyan jaataꞌa antacɨj.
\v 2 Aɨ mu huamuaɨꞌɨvijhuacaꞌa jamuan aɨjna ɨ Moisés tyaacan tɨꞌɨj auj aꞌacaváꞌacaj aɨjna ɨ jaitɨri, majta matɨꞌɨj antajuꞌucaa a jaataꞌa.
\v 3 Naimiꞌi mu majta raacuaa maɨjna ɨ cueꞌira tɨ aun aꞌuveꞌeme Dioj tɨ eꞌeseijreꞌe.
\v 4 Majta maɨjna antiꞌi ɨ jaj tɨ ajta aun aꞌuveꞌeme ɨ Dioj jemi, aꞌini aɨ mu jetze raꞌantiꞌi maɨjna jetze ɨ tetej tɨ huaꞌa jamuan huamaꞌacaa. Ajta aɨn ɨ tetej, ai pu aɨn pueenyaꞌa ɨ Cɨriistuꞌu.
\p
\v 5 Ma majta aɨme, muiꞌitɨ mu cai rɨꞌɨ tiraataꞌa ɨ Dioj. Aɨj pu cɨn Dioj ayan huaꞌantipuaꞌari ajna aꞌu tɨ cai eꞌetiꞌitɨjcaa.
\p
\v 6 Ajta, ayaa pu een cɨn teꞌeyuꞌusiꞌihuacaꞌa tɨ ij ayan titaataꞌitii ityejmi tyej ti cai teyan tyaɨjna jetze tityaajuꞌun aɨjna jetze tɨ aꞌij puaꞌa een matɨj aɨme huarɨj.
\v 7 Caxu huaꞌanajcha ɨ maj cai dioj pueen, matɨj seica aɨme huarɨj. Caxu huaꞌanajcha xaa nyaꞌu, aꞌini ayaa pu teꞌeyuꞌusiꞌi tɨcɨn: “Aɨme mu tyaɨte meyan aꞌujráꞌasacaꞌa mej mi tyuꞌucuaꞌani, mej mi majta huayeꞌen. Matɨꞌɨj mi meyan ajhuiixɨ mej tyuꞌutyeenyeꞌen.”
\p
\v 8 Eecan pu ruxeꞌeveꞌe saj cai seyan cheꞌeta sanaꞌa tyuꞌuxanaꞌacɨreꞌen matɨj seica aɨme huarɨj. Majta, ayaa mu huacuii sei xɨcaj tzajtaꞌa aꞌachu cumu seite japuan hueica viꞌiraꞌa ɨ tyaɨte.
\v 9 Ticheꞌe cai tiꞌitɨ cɨn raꞌihuauꞌura ɨ tavastaraꞌa matɨj seica aɨme meyan huarɨj. Matɨꞌɨj mi áꞌupuaꞌaracaꞌa, matɨꞌɨj cuꞌucuꞌuse huaꞌuchei.
\v 10 Tyataꞌaj tyajta cai aꞌij tyanaꞌa tiꞌityenyuucaꞌan matɨj majta seica meyan huarɨj. Ajta aɨn tɨ tyeꞌentipuaapuaꞌate, aɨ pu huaꞌantipuaꞌari aɨme.
\p
\v 11 Ee xaa nyaꞌu, ayaa pu een cɨn tihuaꞌuruu tɨ ij Dioj ayan tihuaꞌutaꞌitii. Ma ajta, ayaa pu teꞌeyuꞌusiꞌihuacaꞌa aɨjna cɨmeꞌe tɨꞌi rɨꞌɨ taaruuren itejmi, aꞌini puꞌuri ajna tyajaꞌureꞌenyejsin ɨ xɨcaj tɨ jetzen teꞌentipuaꞌari ɨ chaanaca i tyaj japuan yan seijreꞌe.
\p
\v 12 Aɨj pu cɨn, tɨ puaꞌa ayan aꞌatɨ seij tiraꞌamitejtyaꞌa tɨ cai rɨꞌɨristan tɨ tiꞌitɨj cɨn atyaꞌɨtzaꞌaraꞌan ɨ tavastaraꞌa jemi, cheꞌe aɨn rɨꞌɨ tyuꞌuméꞌen tɨ ij cai autyaturan.
\v 13 Tɨj naꞌa tɨ ayan aꞌamua japua rajve tɨ ij caꞌanijraꞌa amuaataꞌan sej si tiꞌitɨj cɨn autyaturan ɨ Dioj jemi, ayaa pu cheꞌeta naꞌa huaꞌa japua rajve matɨj manaꞌa puaꞌamua iiyan seijreꞌe chaanaca japua. Ajta aɨn Dioj, capu aꞌanaj atyaꞌɨtzaꞌara muejmi jemi. Aɨj pu cɨn, Dioj cai aꞌanaj raataꞌasin tɨ tiꞌitɨj ayan huapɨꞌɨ caꞌanijraꞌa jamuaataꞌan sej si autyaturan ɨ Dioj jemi saɨjna cɨmeꞌe saj cai cheꞌe tyaꞌutaviicueꞌi. Ma ajta aɨn, tɨꞌɨj auj ayan caꞌanijraꞌa amuaataꞌan sej si tiꞌitɨj cɨn autyaturan, Dioj pu ajta amuaataꞌasin aꞌij sej yeꞌi huarɨni sej si ajtacɨɨnye, sej si sajta tyaꞌutaviicueꞌi.
\p
\v 14 Aɨj xu cɨn, ayaa xu huarɨni, mɨ nyej aꞌamuaxeꞌeveꞌe. Rɨꞌɨ xuꞌu muan, sej si cai aꞌanaj huaꞌanaꞌamicheꞌen aɨme ɨ maj cai dioosi pueen.
\v 15 Ayaa nu tyajaꞌamueꞌixaateꞌe tɨj tyaɨte ɨ maj rɨꞌɨ metityaumuámuaꞌaree. Sataꞌaj rujɨɨmuaꞌa seyan tiraaxaꞌapɨꞌɨntareꞌen tɨ puaꞌa xaꞌapɨꞌɨn nyetiꞌixa naꞌari nyacai.
\p
\v 16 Aɨjna ɨ vaasu ɨ tyej jetzen yaꞌaca tej ti teyan rɨꞌɨ tiraataꞌan ɨ Dioj, aɨ pu ajta ayan huataujmuaꞌa tyej naimiꞌi huatyatavaɨreꞌen tyaɨjna cɨmeꞌe Cɨriistuꞌu tɨ raxuureꞌe. Ajta aɨjna ɨ pan tej raꞌantitaꞌaraꞌa taꞌayeꞌi, tyan tu tyajta naimiꞌi huatyatavaɨreꞌen tyaɨjna cɨmeꞌe tɨ Cɨriistuꞌu tajapua huanyúu ɨ rutevi cɨmeꞌe.
\v 17 Ajta, aꞌini saɨj puꞌu ɨ pan, ayaa pu huataujmuaꞌa i tyaj iꞌi muiꞌi, tuꞌuri seij tyanaꞌa tyaɨtejraꞌan pueen tyej seij tyanaꞌa jetzen ajtyamaꞌacan, aꞌini naimiꞌi tu seij tyanaꞌa cuaꞌaca ɨ pan.
\p
\v 18 Casiꞌi, xuꞌuhuaujmuaꞌatzɨ seijna jetze aꞌij mej tiꞌijrɨꞌɨre aɨme ɨ mej Israel jetze ajtyamaꞌacan. Aɨme ɨ mej racuaꞌaca ɨ mej tiꞌimuaɨꞌɨvajtaca, aɨ mu majta naimiꞌi tiꞌivaɨreꞌe ɨ Dioj jemi.
\p
\v 19 ¿Aꞌini nyaꞌu huataujmuaꞌa ɨ nyej tiꞌixa? ¿Ni qui eihua jetzen ruxeꞌeveꞌe ɨ cueꞌira ɨ mej tiꞌimuaɨꞌɨvajta huaꞌa jemi ɨ maj cai dioosi pueen? Capu xaa nyaꞌu. Ari aɨjna tɨ cai dioj pueen, ¿ni qui eihua jetzen ruxeꞌeveꞌe aɨjna?
\v 20 Capu xaa nyaꞌu, sein. Ayaa pu huataujmuaꞌa ɨ nyaj tyajaꞌamueꞌixaateꞌe. Aɨjna ɨ mej tiꞌimuaɨꞌɨvajta ɨ mej seij chuejraꞌa japua eꞌemaꞌacan, camu raatamuaɨꞌɨvajta ɨ Dioj jemi silu aɨme jemi muꞌu ɨ tiyaaruꞌuse. Canu raxeꞌeveꞌe saj huaꞌutyavaɨreꞌen aɨme ɨ tiyaaruꞌuse.
\p
\v 21 Capu rɨꞌɨri sej seyan jetzen yaꞌaca ɨ vaasu ɨ maj cɨn rɨꞌɨ tiraataꞌaca ɨ tavastaraꞌa tɨ puaꞌa sajta sauj saɨjna jetze yaꞌaca ɨ vaasu ɨ maj cɨn ranaꞌamiche ɨ tɨ cai Dioj pueen. Capu ajta rɨꞌɨri sej jetzen tiꞌicuaꞌaca ɨ meesa ɨ mej jetzen raꞌutamuaꞌaree ɨ tavastaraꞌa tɨ puaꞌa sajta sauj saɨjna jetze tiꞌicuaꞌaca ɨ meesa mej jetzen huaꞌanaꞌamiche ɨ tiyaaruꞌuse.
\p
\v 22 Naꞌari cai, ayaa tu aɨjna cɨn rɨni, caꞌanijraꞌa tu raataꞌasin ɨ Dioj tɨ aɨn chueeraꞌa jaꞌaraꞌani aɨme jemi ɨ tiyaaruꞌuse tɨ ij ayan huatanyuꞌucan ityejmi jemi. Ajta, aɨ pu eihua huapɨꞌɨ eitzeꞌe rucaꞌanye tyacai ityan.
\s Tyaj nuꞌu nain cɨn teyan huarɨni tyaj nuꞌu ti rɨꞌɨ tiraataꞌacareꞌen ɨ tavastaraꞌa
\p
\v 23 Nain pu nuꞌu ayan tinataꞌaca. Ma ajta, capu nain ayan tinaatyavaꞌɨri. Nain pu xaa ayan tinataꞌaca. Ma ajta, capu nain ayan rɨꞌɨ nyaruure.
\v 24 Sajta, sataꞌaj seyan huaujruuren seij sajta seij. Aꞌatɨ tɨ naꞌa, cheꞌe cai ayan rahuauca ɨ tɨ cɨn rɨꞌɨ huataujvaɨreꞌen, silu cheꞌe ayan rahuauca aꞌij tɨ yeꞌi huarɨni tɨ rɨꞌɨ tiraataꞌan ɨ ruxaꞌaj tevi.
\p
\v 25-26 Sataꞌaj seyan raacuaꞌani tiꞌitɨ tɨ naꞌa ɨ maj ratua ajna mej eꞌeseijreꞌe ɨ mej tiꞌituꞌaraca. Caxu sajta seyan tyuꞌurihuaꞌura tɨ puaꞌa ayan aꞌij puaꞌa amuaaruuren ɨ aꞌamuaxaijnyuꞌuca jetze nusu cai, aꞌini tavastaraꞌa pu raꞌa ɨ chuej i tyaj japuan huachaatɨme. Aɨ pu ajta raꞌa tɨj naꞌa tɨ iiyan tiꞌiseijreꞌe.
\p
\v 27 Tɨ puaꞌa saɨj tɨ cai tyaꞌatzaahuateꞌe ajta amuaataꞌinyen saj jamuan tyuꞌucuaꞌani, pataꞌaj peyan ahuaꞌacaꞌanyen paj paun aꞌumeꞌen jamuan aɨjna ɨ aꞌatɨ, pataꞌaj nain tyuꞌucuaꞌani tɨj naꞌa tɨ an tyejeꞌetiaꞌasin mueetzi jemi. Capaj tiꞌihuaꞌu panaꞌa tɨ ij cai aꞌij puaꞌa muaruuren ɨ axaijnyuꞌuca jetze.
\p
\v 28-29 Ma ajta, tɨ puaꞌa aꞌatɨ ayan timuaataꞌixaateꞌen yee tɨ nuꞌu huatamuaɨꞌɨvijtiꞌihuacaꞌa, ayaa paj huarɨni paj cai racuaꞌaca paɨjna cɨmeꞌe paj raxeꞌeveꞌe paj raatavaɨreꞌen paɨjna ɨ aꞌatɨ tɨ ayan timuaataꞌixaa, pajta paɨjna tɨ cai aꞌij puaꞌa raruuren ɨ xaijnyuꞌucaraꞌaraꞌan aɨjna ɨ aꞌatɨ.
\p Ee xaa nyaꞌu, capu aꞌij raruuren ɨ aꞌaxaijnyuꞌuca. ¿Aꞌini een cɨmeꞌe ayan tyuꞌutaꞌijmɨ nyeetzi jemi nyej ni cai neyan huarɨni aꞌij tɨ tinataꞌaca nyej ni cai aꞌij puaꞌa raruuren ɨ xaijnyuꞌucaraꞌaraꞌan ɨ nyaxaꞌaj tevi?
\v 30 ¿Aꞌini auj tiꞌirɨꞌɨri tɨ aꞌatɨ ayan aꞌij puaꞌa tíꞌinyaxajta aɨjna cɨmeꞌe nyaj rɨꞌɨ tirataꞌaca ɨ Dioj nyaɨjna cɨmeꞌe ɨ cueꞌira nyaj nyaxaahua raacuaa?
\p
\v 31 Ayaa puꞌu naꞌa, satɨj sanaꞌa tiꞌitɨj cɨn rɨcɨ, tɨ puaꞌa setiꞌicuaꞌaca naꞌari seyaꞌaca nusu tiꞌitɨ saj aꞌij ruure, sataꞌaj seyan huarɨni sataꞌaj rɨꞌɨ tiraataꞌacareꞌen ɨ Dioj jemi.
\v 32 Sataꞌaj seyan huarɨni sej si cai aꞌij puaꞌa tihuaꞌataꞌacareꞌen saɨme ɨ mej Israel jetze ajtyamaꞌacan nusu saɨme ɨ mej seij chuejraꞌa japua eꞌemaꞌacan naꞌari saɨme ɨ mej eꞌetyujsaꞌɨri ɨ Dioj jemi.
\v 33 Ayaa nu tiꞌityeseꞌe nyaj rɨꞌɨ tihuaꞌataꞌacareꞌen naijmiꞌica nain cɨmeꞌe tɨ ij ayan tihuaꞌucɨꞌɨti ɨ tɨ huaꞌatyavaꞌɨri, tɨ ij ajta Dioj hueꞌirajtuaani. Aɨj nu cɨn cai neyan nyanaꞌa rahuauca ɨ tɨ nyeetzi tyavaꞌɨri.
\c 11
\p
\v 1 Nyajta inyaa, ayaa nu tyuꞌumé tɨj ajta Cɨriistuꞌu tyuꞌumé. Sataꞌaj sajta muan seyan cheꞌeta sanaꞌa huarɨni nyatɨj inyaa.
\s Aꞌij maj nuꞌu yeꞌi huarɨni ɨ juuca teyujtaꞌa
\p
\v 2 Ma sajta muan, xaꞌapɨꞌɨn xu huarɨj saɨjna cɨmeꞌe saj nain cɨn nyamuaꞌaree, sajta sauj raꞌastijreꞌe ɨ yeꞌira ɨ nyaj jamuaatáꞌitiiriꞌi.
\v 3 Me nyajta inyaa, ayaa nu tiꞌijxeꞌeveꞌe sej seyan raamuaꞌati tɨ Cɨriistuꞌu ayan antyujmuaꞌaree aɨme jemi, matɨj manaꞌa puaꞌamua seijreꞌe ɨ tyetyaca. Ayaa mu cheꞌeta manaꞌa ɨ tyetyaca titeꞌentyujmuaꞌaree aɨme jemi ɨ ruꞌɨstyamuaꞌa. Ajta Dioj pu ayan antyujmuaꞌaree ɨ Cɨriistuꞌu jemi.
\v 4 Aɨj nu cɨn, ayaa nu tyajaꞌamueꞌixaateꞌe. Aꞌatɨ pu ayan raatyaxaahuata aɨjna tɨ cɨn antyujmuaꞌaree tɨ puaꞌa utyamuucuꞌutzi huatyejnyuuni.
\v 5 Ajta, tɨ puaꞌa jɨitaꞌa ayan antimuaꞌaviꞌi huatyejnyuuni, nusu antimuaꞌaviꞌi tiꞌixajta ɨ Dioj jetze maꞌacan, aɨ pu ajta raatyaxaahuata aɨjna ɨ tɨ tiꞌiraꞌijteꞌe. Ayaa pu cheꞌeta naꞌa tyuꞌutyeviꞌirasteꞌe tɨj jɨitaꞌa tɨ ayan caujyen rumuꞌu jetze.
\p
\v 6 Ayaa pu xaa tiꞌayajna, aꞌini tɨ puaꞌa jɨitaꞌa cai ayan áꞌujcaꞌanye tɨ raꞌavaꞌanan ɨ rumuꞌu, ayan tiraavijteꞌe tɨ aɨn jɨitaꞌa caujsisaaxɨꞌɨn ɨ rumuꞌu jetze. Ma ajta, tɨ puaꞌa ayan tiraꞌamitejteꞌe tɨ tyuꞌutyeviꞌirasteꞌe tɨ ayan caujsisaaxɨꞌɨn, cheꞌe aɨn ayan raꞌavaꞌanan ɨ rumuꞌu.
\v 7 Ee xaa nyaꞌu, ayaa pu ruxeꞌeveꞌe tɨ antimuaꞌaviꞌi seijraꞌa ɨ tyaataꞌa aꞌini aɨ pu aɨn ɨ taavijraꞌaraꞌan pueen ɨ Dioj, ajta aɨ pu aɨn pueen ɨ tɨ rɨꞌɨ tirataꞌaca. Ma ajta aɨn jɨitaꞌa, aɨ pu aɨn pueen ɨ tɨ rɨꞌɨ tirataꞌaca ɨ tyaataꞌa.
\v 8 Aꞌini aɨjna ɨ tyaataꞌa, capu ayan aɨjna jetze huatyataavijhuacaꞌa ɨ jɨitaꞌa jetze silu aɨn jɨitaꞌa, aɨ pu xaa aɨjna jetze huatyataavijhuacaꞌa ɨ tyaataꞌa jetze.
\v 9 Capu ajta ayan huatyataavijhuacaꞌa ɨ tyaataꞌa aɨjna cɨmeꞌe tɨꞌi raatavaɨreꞌen ɨ jɨitaꞌa silu aɨn jɨitaꞌa, ayaa pu huatyataavijhuacaꞌa aɨjna cɨmeꞌe tɨꞌi raatavaɨreꞌen ɨ tyaataꞌa.
\p
\v 10 Aɨj pu cɨn ayan ruxeꞌeveꞌe tɨ aɨn jɨitaꞌa ayan raꞌavaꞌanan ɨ rumuꞌu tɨ ij ayan seijreꞌe tɨ aɨn raꞌastijreꞌe aɨjna tɨ tiꞌiraijteꞌe. Ayaa pu ajta ruxeꞌeveꞌe tɨ ij cai aꞌij puaꞌa huaꞌataꞌacareꞌen aɨme ɨ mej tiꞌivaɨreꞌe ɨ tajapua.
\v 11 Ma ajta, camu rujɨɨmuaꞌa seijreꞌe ɨ juuca ɨ tavastaraꞌa jemi. Camu majta rujɨɨmuaꞌa seijreꞌe ɨ tyetyaca jemi.
\v 12 Ayaa puꞌu naꞌa aɨjna cɨmeꞌe tɨ aɨn jɨitaꞌa aɨjna jetze huatyataavijhuacaꞌa ɨ tyaataꞌa, ajta aɨn tyaataꞌa, ayaa pu aɨjna jetze airaujneijte ɨ jɨitaꞌa. Ajta nain pu Dioj jemi tyajaꞌuveꞌeme.
\p
\v 13 Sataꞌaj seyan rujɨɨmuaꞌa sanaꞌa tiraaxaꞌapɨꞌɨntareꞌen tɨ puaꞌa ayan tiraavijteꞌe tɨ puaꞌa jɨitaꞌa ayan antimuaꞌaviꞌi huatyejnyuuni ɨ Dioj jemi.
\v 14 ¿Ni cai ayan tyajamuaꞌamitejteꞌe aɨjna cɨmeꞌe ɨ tyaj ratyáhueꞌiraꞌa tɨ ayan tyuꞌutyeviꞌirasteꞌe tɨ puaꞌa tyaataꞌa ayan caatɨꞌɨre?
\v 15 Ma ajta, tɨ puaꞌa jɨitaꞌa ayan caatɨꞌɨre, ai pu aɨn pueen ɨ tɨ cɨn rɨꞌɨ tirataꞌaca ɨ Dioj aꞌini ayaa pu raatyajtuaa ɨ cɨpua ɨ jemin tɨ ij ayan raꞌavaꞌanan.
\v 16 Tɨ puaꞌa aꞌatɨ ayan huarɨni tɨ tajaaxaijviꞌi aɨjna cɨmeꞌe, sataꞌaj seyan tiraataꞌixaateꞌen yee catu saɨque teyan tiꞌititachaꞌɨ, majta aɨme ɨ mej puaꞌamuaque eꞌetyujsaꞌɨri ɨ Dioj jemi, camu yee majta saɨque meyan tiꞌityujchaꞌɨ.
\s Aꞌij mu puaꞌa rɨcɨ matɨꞌɨj eꞌetyújsaɨreꞌen
\p
\v 17 Ajta ɨ nyej neri jamuaataꞌixaateꞌesin, canu rɨꞌɨ tyajamuaataꞌasin aꞌini satɨꞌɨj muan eꞌetyujsaɨreꞌen, caxu reꞌen cɨn eꞌetyujsaɨreꞌen silu aꞌij puaꞌa xuꞌu rɨjca.
\v 18-19 Anacaican, ayaa nu ya raamuaꞌareeriꞌi sej eꞌitaꞌa aꞌutacɨ́ꞌɨca satɨꞌɨj saun eꞌetyujsaɨreꞌen. Me nyajta inyaa, tɨmuaꞌa nu tɨn tyaꞌatzaahuateꞌe aꞌini ayaa pu ruxeꞌeveꞌe mej seica airaajuꞌun muejmi jemi ɨ mej saɨque tiꞌimuaꞌatze sej si seyan huaꞌutamuaꞌati aɨme ɨ mej muejmi jemi seijreꞌe, ɨ maj majta tzaahuatiꞌiraꞌa cɨn meyan rɨcɨ.
\p
\v 20 Muan xu sajta seyan huarɨni. Satɨꞌɨj eꞌetyujsaɨreꞌen, caxu saɨjna cɨn tiꞌicuaꞌani ɨ saj cɨn raꞌutamuaꞌaree tɨ tavastaraꞌa tajapua huanyúu.
\v 21 Caxu xaa nyaꞌu, silu tɨꞌɨj ajna tyajaꞌureꞌenyen sej seyan tyuꞌucuaꞌani, satɨj sanaꞌa puaꞌamua seyan rɨcɨ seij sajta seij. Ayaa xu anáatyáꞌa tiꞌicuaꞌani ɨ sej tyaꞌucaꞌinyaꞌamaꞌacaa. Ajta ɨ seica ɨ maj cai meyan tyaꞌucaꞌinyaꞌamaꞌacaa, capu cheꞌe tihuaꞌacɨꞌɨti, silu mataacuj mu muaꞌajuꞌun. Majta seica meyan huapɨꞌɨ huatyataꞌarujsin.
\v 22 ¿Ai taꞌuj naꞌa? ¿Ni tzaa sacai huachaatɨme aꞌu sej tyajaꞌucuaꞌani, aꞌu saj sajta aꞌuyeꞌen?, ¿naꞌari seri huaꞌaxaahua aɨme ɨ mej eꞌetyujsaꞌɨri ɨ Dioj jemi?, ¿nusu sej seyan raxeꞌeveꞌe saj aꞌij puaꞌa tihuaꞌutaꞌan aɨme ɨ maj cai tiꞌitɨ tichaꞌɨ? ¿Aꞌini naꞌa ɨ nyaj cɨn tyajaꞌamueꞌixaateꞌe? ¿Ni qui neyan rɨꞌɨ tyajamueꞌixaateꞌen nyaɨjna cɨmeꞌe sej seyan tiꞌityujchaꞌɨ? Canu xaa nyaꞌu.
\s Matɨꞌɨj nuꞌu raꞌutamuaꞌaree ɨ tavastaraꞌa
\p
\v 23 Ayaa puꞌu naꞌa, ɨ tɨ nyavastaraꞌa raatyajtuaa inyeetzi jemi, aij nuꞌu nyajta muejmi jemi huatyajtuaa. Ajnaꞌɨmɨ tɨcaꞌari tzajtaꞌa tɨꞌɨj aviitzi cɨn huatatuiriꞌihuacaꞌa ɨ tavastaraꞌa, aɨjna ɨ Jesús, aɨ pu raatyɨꞌɨpɨ ɨ pan.
\v 24 Tɨꞌɨj rɨꞌɨ tiraataꞌa ɨ Dioj, aj puꞌi raꞌantitaaraxɨ, ajta ayan tihuaꞌutaꞌixaa tɨcɨn: “Ai pu aɨn pueen i nyaj raatyahueꞌiraꞌa i nyaj cɨn muejmi japua nyuuni. Sataꞌaj seyan raacuaꞌani sej si saɨjna cɨn naꞌutamuaꞌaree.”
\p
\v 25 Matɨꞌɨj tyuꞌucuaa, ayaa pu cheꞌeta naꞌa huarɨj aɨjna cɨmeꞌe ɨ vaasu ɨ mej jetzen huayeꞌen. Ayaa pu tihueꞌixaatyaꞌa tɨcɨn: “Ayaa pu huataujmuaꞌa aijna i vaasu. Ai pu aɨn pueen ɨ nyuucari tɨ jajcua ɨ tɨ cɨn Dioj tiꞌitɨj cɨn tyaꞌataujratziiriꞌi aɨjna cɨmeꞌe nyaj raꞌiráxɨreꞌesin i nyaxuureꞌe. Ajta, aijna i yeꞌira i saj cɨn huayeꞌen saijna jetze i vaasu, satɨj sanaꞌa sej seyan rɨcɨ, saj seyan saɨjna cɨn naꞌutamuaꞌaree”. Ayaa puꞌu tihuaꞌutaꞌixaa.
\p
\v 26 Aɨj pu cɨn, satɨj sanaꞌa saj racuaꞌani saɨjna ɨ pan, sajta saj huayeꞌen saɨjna jetze ɨ vaasu, ayaa xu saɨjna cɨn tihuaꞌutaꞌixaateꞌen aꞌij tɨ huataujmuaꞌa tɨ aɨn tavastaraꞌa huamɨꞌɨ. Muan xu seyan tihuaꞌutaꞌixaateꞌesin tɨj naꞌa tɨ yu aucaꞌitɨ aꞌame asta naꞌa cai uvéꞌenyen ɨ tavastaraꞌa.
\s Aꞌij maj nuꞌu yeꞌi tiraacuaꞌani ɨ maj cɨn raꞌutamuaꞌaree ɨ tavastaraꞌa
\p
\v 27 Aɨj pu cɨn, aꞌatɨ tɨ naꞌa tɨ ayan chaꞌanaꞌa raacuaꞌani aɨjna ɨ pan, nusu chaꞌanaꞌa naꞌa huayeꞌen aɨjna jetze ɨ vaasu aꞌij tɨ cai tiraavijteꞌe, ayaa pu jetzen újpuaꞌari tɨ raatyaxaahuatacaꞌa ɨ Cɨriistuꞌu tɨ ayan rajpueijtzicaꞌa ɨ rutevi cɨmeꞌe, tɨ ajta raꞌiraaxɨre ɨ ruxuureꞌe.
\v 28 Aɨj pu cɨn, cheꞌe ayan huarɨni aꞌatɨ tɨ naꞌa tɨ ayan anacai raꞌamityejtyaꞌa aꞌij tɨ een ɨ rutzajtaꞌa ɨ Dioj jemi tɨ ij ayan raamuaꞌaree tɨ ari ayan tiraavijteꞌe. Aj pu xaa, rɨꞌɨrista aꞌame tɨ ayan raacuaꞌani ɨ pan, ajta tɨ huayeꞌen ɨ vaasu jetze.
\v 29 Ayaa pu een cɨn ayan ruxeꞌeveꞌe tɨ aꞌatɨ ayan raꞌamityejtyaꞌa aꞌij tɨ huataujmuaꞌa aɨjna tɨ ratyáhueꞌiraꞌa ɨ tavastaraꞌa. Tɨ puaꞌa aꞌatɨ cai ayan raꞌamityejtyaꞌa aꞌij tɨ huataujmuaꞌa ɨ yeꞌira, ajta chaꞌanaꞌa naꞌa raacuaꞌani ɨ pan, ajta chaꞌanaꞌa naꞌa huayeꞌen ɨ vaasu jetze, Dioj pu ayan pueijtzi raataꞌasin aɨjna cɨmeꞌe tɨ cai huaujruu aꞌij tɨ tiraavijteꞌe.
\v 30 Aɨj mu cɨn muiꞌitɨ cai cheꞌe huaꞌacaꞌanistiꞌi ɨ mej aꞌamua jetze ajtyamaꞌacan, majta tiꞌicucuiꞌi. Majta seica meri huacuii.
\p
\v 31 Aɨj pu cɨn, tɨ puaꞌa ayan anacai taꞌamityejtyaꞌa aꞌij tɨ een ɨ tatzajtaꞌa ɨ Dioj jemi, capu ayan pueijtzi taacɨꞌɨti.
\v 32 Ajta, tɨj naꞌa tɨ tavastaraꞌa ayan taꞌaxɨjteꞌen, aɨ pu aɨjna cɨn pueijtzi taataꞌasin tɨ ij cai pueijtzi taacɨꞌɨti naijmiꞌica jamuan ɨ mej yan huachaatɨme, iiyan chaanaca japua.
\p
\v 33 Aɨj xu cɨn, muan, nyeꞌihuaamuaꞌa, ayaa xu huarɨni. Satɨꞌɨj u eꞌetyujsaɨreꞌen, sataꞌaj huaujxeꞌeveꞌen seij sajta seij sej si naimiꞌi tyuꞌucuaꞌani.
\v 34 Tɨ puaꞌa aꞌatɨ ayan eihua tiꞌicuata, cheꞌe aɨn aun tyajaꞌucuaꞌani u ruche. Naꞌari cai, Dioj pu amuáꞌaxɨjteꞌen satɨꞌɨj u eꞌetyujsaɨreꞌen. Nyajta inyaa, nyatɨꞌɨj nyaun aꞌatanyén muejmi jemi, aj nu ni eitzeꞌe rɨꞌɨ áꞌamuaruuren.
\c 12
\s Ɨ tɨ nuꞌu cɨn tihuéijca ɨ xaijnyuꞌucaraꞌaraꞌan ɨ Dioj
\p
\v 1 Ayaa nu tiꞌijxeꞌeveꞌe saj raamuaꞌaree aꞌij tɨ een aɨjna ɨ tɨ cɨn tyajamueijca ɨ xaijnyuꞌucaraꞌaraꞌan ɨ Dioj.
\p
\v 2 Xuꞌuri sicu ramuaꞌaree aꞌij sej tiꞌijrɨꞌɨrajcaa satɨꞌɨj cai xɨ tyaꞌatzaahuatyaꞌacaa. Aɨme xu jemi áꞌujcaꞌanyajcaꞌa ɨ maj cai dioosi pueen, ɨ maj majta cai tiꞌixaxaꞌa. Muan xu huaꞌajaahuatyaꞌacaꞌa aꞌij tɨ yeꞌi tyajamuaꞌamityejtyaꞌacaa.
\v 3 Aɨj nu cɨn neyan tyajaꞌamueꞌixaateꞌe. Tɨ puaꞌa aꞌatɨ ayan aɨjna jetze araujcaꞌanyen ɨ xaijnyuꞌucaraꞌaraꞌan ɨ Dioj, aɨjna ɨ xaijnyuꞌucaraꞌaraꞌan capu aꞌanaj caꞌanijraꞌa raataꞌasin aɨjna ɨ aꞌatɨ tɨ ayan tyuꞌutaxaj yee: “Cheꞌe Dioj pueijtzi raataꞌan aɨjna ɨ Jesús.” Ma ajta, tɨ puaꞌa aꞌatɨ cai aɨjna jetze araujcaꞌanyáa ɨ xaijnyuꞌucaraꞌaraꞌan ɨ Dioj, capu aꞌatzu ajta rɨꞌɨri tɨ aɨn ayan tyuꞌutaxaj yee: “Jesús pu vastaraꞌaraꞌan pueen”.
\p
\v 4 Capu tiꞌiseicaj naꞌa ɨ tɨ cɨn tyajamueijca ɨ xaijnyuꞌucaraꞌaraꞌan ɨ Dioj. Ma ajta, seij puꞌu aɨjna ɨ xaijnyuꞌucari.
\v 5 Capu tiꞌiseicaj naꞌa ɨ saj cɨn tiꞌivaɨreꞌe ɨ Dioj jemi. Ma ajta, seij puꞌu ɨ tɨ tavastaraꞌa pueen.
\v 6 Capu ajta tiꞌiseicaj naꞌa ɨ saj cɨn tiꞌimuareꞌe. Ma ajta, seij puꞌu ɨ Dioj tɨ nain cɨn tiꞌimuareꞌe huaꞌa jamuan ɨ tetyaca, aꞌachu maj puaꞌamua iiyan seijreꞌe.
\p
\v 7 Ajta naijmiꞌica jemi, aɨn xaijnyuꞌucari ayan huataseijre tɨ ij tiꞌitɨ cɨn tihuéijcateꞌen seij ajta seij, mej mi maɨjna cɨn tihuaꞌutyavaɨreꞌen naijmiꞌica.
\v 8 Seij pu ayan aɨjna cɨn tiraijca aɨjna ɨ xaijnyuꞌucari tɨ ayan tyuꞌutaxaj tyamuaꞌa pu naa raayɨꞌɨtɨhuaꞌacan cɨmeꞌe. Ajtahuaꞌa seij, aɨn xaijnyuꞌucari rusaɨj pu ajta aɨjna cɨn tiraijca ɨ aꞌatɨ tɨ ayan tyuꞌutaxaj aꞌij tɨ tiruꞌumuaꞌaree.
\v 9 Aɨjna ɨ xaijnyuꞌucari, rusaɨj pu ajta caꞌanijraꞌa rataꞌaca tɨ aꞌatɨ tyaꞌatzaahuatyaꞌa, ajta seij pu ayan tirataꞌaca tɨ aɨn aꞌatɨ tihuaꞌahuaꞌatyahuaꞌan.
\v 10 Ajta seij, aɨ pu ayan tirataꞌaca ɨ aꞌatɨ tɨ ayan rɨjca ɨ maj cɨn rɨꞌɨ tiraꞌutaseij. Ajta seij tɨ ayan tihuaꞌutaꞌixaateꞌen ɨ Dioj jetze maꞌacan aɨjna cɨmeꞌe tɨ aɨn xaijnyuꞌucari caꞌanijraꞌa rataꞌaca. Ajta ɨ saɨj, ayaa pu tirataꞌaca tɨ raayɨꞌɨtɨhuaꞌan tɨ raatamitejteꞌen tiꞌitɨ tɨ xaijnyuꞌucari pueen. Ajta seij rayɨꞌɨtɨ tɨ tyuꞌutaxaj seica cɨmeꞌe ɨ huaꞌanyuuca ɨ mej seica chuejraꞌa japua eꞌemaꞌacan. Ajta seij ɨ aꞌatɨ, ayaa pu rataꞌaca tɨ rayɨꞌɨtɨhuaꞌan tɨ ayan tyuꞌutaxaj aꞌij tɨ huataujmuaꞌa aɨjna tɨ raataxajtacaꞌa ɨ saɨj.
\p
\v 11 Tɨj naꞌa mej meyan cɨn rɨcɨ, aɨ pu rusaɨj caꞌanijraꞌa huaꞌataꞌaca aɨjna ɨ xaijnyuꞌucari. Aɨ pu rusaɨj ayan huaꞌataꞌaca naijmiꞌica, seij ajta seij, aꞌij tɨ aɨn tihuaꞌuxaꞌapɨꞌɨntariꞌiriꞌi.
\s Seij puꞌu nuꞌu ɨ tyaj jetzen ajtyamaꞌacan
\p
\v 12 Ayaa pu cheꞌeta naꞌa een ɨ Cɨriistuꞌu jemi aꞌij tɨ een aɨjna cɨmeꞌen tɨ seij ratyáhueꞌiraꞌa. Seij puꞌu tɨ ratyáhueꞌiraꞌa, ajta eihua pu tiꞌimuiꞌi tɨ jetzen tiꞌiseijreꞌe. Ma ajta, tɨ puaꞌa ayan tiꞌimuiꞌi tɨ jetzen seijreꞌe, seij puꞌu pueen ɨ tevijraꞌan.
\p
\v 13 Aɨj pu cɨn, satɨꞌɨj huamuaɨꞌɨvijhuacaꞌa, seij puꞌu ɨ xaijnyuꞌucari tɨ muejmi tzajtaꞌa huatyajturaa tɨ ij ayan amuaaruuren sej si seij sanaꞌa tevijraꞌan pueenyaꞌa xaꞌaraꞌani jamuan ɨ Cɨriistuꞌu. Capu amɨn aꞌij tɨ puaꞌa Israel jetze saꞌajtyamaꞌacan naꞌari seyan seij chuejraꞌa japua eꞌemaꞌacan nusu seyan caꞌanyejri cɨn tiꞌimuareꞌe caꞌɨn seyan ruxaahua áꞌujhuaꞌan, seij puꞌu ɨ xaijnyuꞌucari saj jetzen araujcaꞌanye.
\p
\v 14 Ajta, capu tiꞌiseicaj naꞌa tɨ jetzen seijreꞌe ɨ tevijraꞌan silu tiꞌimuiꞌi.
\p
\v 15 Aɨj pu cɨn, tɨ puaꞌa aɨn ɨɨcajraꞌan ayan tyuꞌutaxaj yee aꞌini canu muajcaꞌa pueen, canu nyajta ajtyamaꞌacan ɨ tevijraꞌan jetze, capu ayan tiꞌayajna. Aɨ pu jaucheꞌe aɨn tevijraꞌan jetze ajtyamaꞌacan.
\v 16 Ayan chaꞌata naꞌa, tɨ puaꞌa aɨn naxairaꞌan ayan tyuꞌutaxaj yee aꞌini canu jɨꞌɨsi pueen, canu nyajta jetzen ajtyamaꞌacan ɨ tevijraꞌan, capu ajta ayan tiꞌayajna. Aɨ pu xaa tevijraꞌan jetze ajtyamaꞌacan aɨjna ɨ naxairaꞌan.
\p
\v 17 Tɨ puaꞌa nain tevijraꞌan aɨn pueenyeꞌen ɨ jɨꞌɨsi, ¿aꞌini tiꞌirɨꞌɨri tɨ huiityanamuajra? Capu aꞌij tiꞌirɨꞌɨri. Ajta, tɨ puaꞌa nain tevijraꞌan aɨn pueenyeꞌen ɨ tɨ cɨn huiityajnamua, ¿aꞌini tiꞌirɨꞌɨri tɨ tyuꞌɨchu? Capu xaa nyaꞌu aꞌij tiꞌirɨꞌɨri.
\v 18 Ma ajta aɨn Dioj, ayaa pu eenyeꞌen tyuꞌutyájtua ɨ tɨ jetzen seijreꞌe ɨ tevijraꞌan ɨ Cɨriistuꞌu aꞌij tɨ aɨn tiraaxaꞌapɨꞌɨntare.
\v 19 Tɨ puaꞌa naimiꞌi tɨ jetzen seijreꞌe ayan seij naꞌa pueenyeꞌen, ¿aꞌuni eꞌeseijraꞌa aꞌame ɨ tevijraꞌan? Capu maꞌa aꞌahuaꞌa aꞌame.
\v 20 Ma ajta, ayaa pu tiꞌimuiꞌi tɨ tevijraꞌan jetze tiꞌiseijreꞌe, ajta seij puꞌu ɨ tevijraꞌan.
\p
\v 21 Aɨj pu cɨn, capu rɨꞌɨri tɨ aɨn jɨꞌɨsi ayan tiraataꞌixaateꞌen ɨ muajcaꞌa tɨcɨn: “Capej nyej jetze ruxeꞌeveꞌe muaa.” Capu ajta rɨꞌɨri tɨ aɨn muuraꞌan ayan cheꞌeta naꞌa tiraataꞌixaateꞌen ɨ ɨɨca yee: “Capej nyej jetze ruxeꞌeveꞌe muaa.”
\p
\v 22 Ma ajta, aɨn tɨ jetzen seijreꞌe tɨ ayan titaꞌamitejteꞌe tɨ cai rucaꞌanye, aɨ pu xaa ayan eitzeꞌe ruxeꞌeveꞌe cai ɨ seica.
\v 23 Ajta, aɨn tɨ jetzen seijreꞌe ɨ tyej teyan ratyaxaahuata tyaɨjna cɨmeꞌe tɨ ayan titaꞌamitejteꞌe tɨ cai tiꞌitɨj vaɨreꞌe, aɨ tu eitzeꞌe rɨꞌɨ tirataꞌaca tyaɨjna cɨmeꞌe ɨ tyaj cɨn rɨꞌɨ tiraatyechejteꞌen. Ajta aɨn tɨ jetzen seijreꞌe tɨ ajta tyuꞌutyeviꞌirasteꞌe tɨ puaꞌa ayan seijreꞌe me eijreꞌe, aɨj tu teyan rɨꞌɨ tiꞌitecheꞌete aꞌij tɨ tiraavijteꞌe.
\v 24-25 Ajta, ɨ seica tɨ jetzen seijreꞌe, tɨ ajta cai ayan tyuꞌutyeviꞌirasteꞌe, catu teyan rɨꞌɨ tiratecheꞌete.
\p Ma ajta Dioj, ayaa pu eenyeꞌen huatyajtuaa ɨ tevijraꞌan tɨꞌij ayan eitzeꞌe rɨꞌɨ tirataꞌacareꞌen aɨjna tɨ tiraꞌaturaateꞌe mej mi cai eꞌitaꞌa aꞌutácɨɨnye ɨ mej tevijraꞌan jetze ajtyamaꞌacan silu mej mi meyan cheꞌeta manaꞌa ahuaujcuꞌuven seij majta seij.
\v 26 Aꞌini tɨ puaꞌa seij ayan tirajpueiitzi, naimiꞌi mu meyan cheꞌeta manaꞌa tirajpueiitzi muaꞌajuꞌun. Ajta tɨ puaꞌa ayan tiraacɨꞌɨti seij tɨ tiꞌitɨj cɨn rɨꞌɨ tyuꞌutyaturan, naimiꞌi mu majta jamuan huataujtyamuaꞌaveꞌesin.
\p
\v 27 Ayaa pu ajta xaa nyaꞌu tiꞌen muejmi cɨmeꞌe. Muan xu tevijraꞌan pueen ɨ Cɨriistuꞌu. Naimiꞌi xu jetzen ajtyamaꞌacan, seij sajta seij.
\v 28 Ajta aɨn Dioj ari huaꞌantihuau aɨme ɨ mej tiꞌitɨ cɨn tihuaꞌutyavaɨreꞌen ɨ mej u eꞌetyujsaꞌɨri teyujtaꞌa.
\p Anacai, aɨ pu huaꞌantihuau aɨme ɨ tɨ huaꞌutaityacaꞌa maj áꞌujhuaꞌanyeꞌen metihueꞌixaatyaꞌa, ajta eꞌeyan aɨme ɨ mej Dioj jetze maꞌacan tiꞌixaxaꞌataꞌan. Aɨ pu ajta huaꞌantihuau aɨme mej mi meyan tihuaꞌumuaꞌaten, majta ɨ mej meyan tyuꞌumuáreꞌen ɨ maj cɨn naa rɨꞌɨ tyaꞌutaseij ɨ tyaɨte, ajta aɨme ɨ mej tihuaꞌahuaꞌatyahuaꞌan. Majta aɨme ɨ mej tiꞌitɨ cɨn huaꞌutyavaɨreꞌen, majta ɨ mej tiꞌitɨj cɨn antyujmuaꞌaree, majta aɨme ɨ mej seica nyuucari cɨn tiꞌixaxaꞌa, naijmiꞌica pu ayan tyuꞌutaꞌa ɨ Dioj.
\p
\v 29 ¿Ni qui naijmiꞌica ayan tyuꞌutaꞌa mej mi meyan áꞌujhuaꞌanyeꞌen metihueꞌixaatyaꞌa? Capu xaa nyaꞌu. ¿Ni qui majta naijmiꞌi meyan tiꞌixaxaꞌa ɨ Dioj jetze maꞌacan? Camu majta xaa nyaꞌu. Naꞌari, ¿ni qui naijmiꞌi meyan tihuaꞌumuaꞌaten? Camu xaa nyaꞌu. ¿Ni qui naijmiꞌica ayan tyuꞌutaꞌa mej mi tyuꞌumuareꞌen ɨ maj cɨn naa rɨꞌɨ tyaꞌutaseij ɨ tyaɨte? Camu xaa nyaꞌu.
\v 30 Cari qui aɨjna, ¿ni naijmiꞌi meyan tihuaꞌahuaateꞌe nusu meyan seij nyuucari cɨn tiꞌixaxaꞌa naꞌari meyan tyuꞌutaxaj aꞌij tɨ huataujmuaꞌa ɨ tɨ raataxajtacaꞌa ɨ saɨj? Camu xaa nyaꞌu naijmiꞌi meyan titeꞌentyujmuaꞌaree.
\v 31 Sajta muan, sataꞌaj seyan huatyaujcaꞌanyen sej si seyan raatyauni ɨ Dioj jemi saɨjna tɨ eitzeꞌe ruxeꞌeveꞌe, tɨ puaꞌa seyan tiꞌijxeꞌevaꞌa. Me nyajta inyaa, nyaucheꞌe nu jamuaataꞌitiira aꞌij sej eitzeꞌe reꞌenyeꞌen cɨn tiꞌiteseijraꞌa.
\c 13
\s Maj nuꞌu huaujxeꞌeveꞌen seij majta seij
\p
\v 1 Tɨ puaꞌa nyacai raxeꞌevaꞌa ɨ nyaxaꞌaj tevi nyej neyan tiꞌiraꞌixaatyaꞌa, capu tiꞌitɨj vaɨreꞌe. Ayaa nu eenyaꞌa naꞌame ɨ jemin tɨj ɨ tyapuustiꞌi tɨ ayan een tɨj taampu ɨ tɨ cɨn aꞌatɨ chaꞌa naꞌa tiꞌiruajteꞌe naꞌari tɨj tuxaꞌa ɨ tɨ rujetze rajvitze. Capu amɨn aꞌij tɨ puaꞌa neyan seica nyuucari cɨn tiraꞌixaateꞌen nusu nyaɨjna cɨmeꞌe ɨ huaꞌanyuuca ɨ mej tiꞌivaɨreꞌe u tajapua.
\v 2 Tɨ puaꞌa nyacai raxeꞌevaꞌa ɨ nyaxaꞌaj tevi, capu ajta tiꞌitɨj vaɨreꞌe nyaj raayɨꞌɨtɨ nyej tyuꞌutaxaj Dioj jetze maꞌacan tɨ puaꞌa neyauꞌeitaa nain tɨj naꞌa tɨ ruꞌavaa ɨ Dioj jemi, nusu nyaj nain uꞌumuaꞌaree naꞌari neyan tyaꞌatzaahuatyaꞌa nyej ni neyan tiraataijteꞌen ɨ jɨri tɨ aun ticheni aꞌu tɨ aꞌutáca, tɨ puaꞌa neyan raayɨꞌɨtɨ, canu tiꞌitɨj cɨn tiꞌivaɨreꞌe tɨ puaꞌa nyacai nyajta raxeꞌevaꞌa ɨ nyaxaꞌaj tevi.
\p
\v 3 Ayaa pu cheꞌeta naꞌa een tɨ puaꞌa neyan tíhuaꞌuráꞌateꞌen nain tɨj naꞌa nyej tíꞌijchaꞌɨ naꞌari tɨ puaꞌa, nyajta neyan huatanyaꞌan ɨ nyacɨmeꞌen mej mi naatyataira, canu nyajta tiꞌitɨj mueꞌitɨn tɨ puaꞌa nyacai raxeꞌevaꞌa ɨ nyaxaꞌaj tevi.
\p
\v 4 Tɨ puaꞌa aꞌatɨ ayan raxeꞌevaꞌa ɨ ruxaꞌaj tevi, ayaa pu eenyaꞌa aꞌame. Aɨ pu aꞌateeviꞌi tɨ tyaꞌutaviicueꞌi aꞌame, ajta rɨꞌɨ tiráꞌancuꞌuvajxɨꞌɨsin ɨ saɨj. Capu ajta chueere, ajta capu áꞌujtzaahuateꞌe.
\v 5 Ajta aɨn tɨ raxeꞌeveꞌe ɨ ruxaꞌaj tevi, capu runyáta tɨ huatanyuꞌucan, ajta capu rajchaɨreꞌe ɨ saɨj. Capu ajta teꞌentyuꞌuuniꞌiraca, ajta cai rahuauca ɨ tɨ jetzen ruxeꞌeveꞌe. Capu ajta raꞌutamuaꞌareera tɨ puaꞌa aꞌatɨ ayan aꞌij puaꞌa raaruuren.
\p
\v 6 Ayaa pu ajta een ɨ aꞌatɨ tɨ ayan raxeꞌeveꞌe ɨ ruxaꞌaj tevi. Capu aɨjna cɨn huataujtyamuaꞌaveꞌesin aɨjna cɨmeꞌe tɨ aꞌij puaꞌa een silu aɨj pu cɨn huataujtyamuaꞌaveꞌesin aɨjna cɨmeꞌe tɨ tzaahuatiꞌiraꞌa cɨn ayan huarɨj.
\v 7 Tɨ puaꞌa aꞌatɨ ayan raxeꞌevaꞌa ɨ ruxaꞌaj tevi, aɨ pu nain cɨn tiraatauuniꞌira. Nain pu ajta cɨn tyaꞌatzaahuateꞌe tɨ aɨn Dioj rɨꞌɨ tiraataꞌasin. Aɨ pu ajta nain cɨn tiꞌijchuꞌeveꞌe tɨ Dioj nain cɨn araurastejsin. Nain pu ajta cɨn teꞌeviicueꞌi ɨ tɨ cɨn tirajpueiitzi.
\p
\v 8 Capu aꞌanaj huatyapuaꞌari tyej ti teyan tiꞌitaxeꞌeveꞌe. Ma ajta, aɨ pu xaa huatyapuaꞌari tyej teyan tiꞌixaxaꞌa ɨ Dioj jetze maꞌacan. Ajta, tyej teyan seica nyuucari cɨn tiꞌixaxaꞌa, aɨ pu ajta huatyapuaꞌari. Ajta, aɨjna tɨ tyejmi jemi huatyajturaa tyej ti tyamuaꞌa naa tiruꞌumuaꞌareera, aɨ pu ajta huatyapuaꞌari.
\v 9 Ayaa puꞌu xaa, catu nain cɨn ruꞌumuaꞌaree. Catu tyajta nain cɨn tiꞌixaxaꞌa ɨ Dioj jetze maꞌacan.
\p
\v 10 Ma ajta, tɨꞌɨj ayan huataseijreꞌen ɨ tɨ ari huaujnaijmire, aj pu xaa huatyapuaꞌari ɨ tɨ aꞌaturaacaꞌa.
\p
\v 11 Nyatɨꞌɨj nyauj paꞌarɨꞌɨstacaꞌa, ayaa nu cheꞌeta nyanaꞌa tiꞌixaxaꞌataꞌa tɨj paꞌarɨꞌɨ, nyajta neyan tiꞌimuaꞌatzɨjcaꞌa tɨj paꞌarɨꞌɨ. Ajta ijii, ɨ nyej neri vastaꞌa, ayaa nu neri ma ruurai nyej neyan me tyáumuaꞌarajcaꞌa tɨj paꞌarɨꞌɨ.
\v 12 Ajta ijii, ayaa tu cheꞌeta tyanaꞌa rasiseꞌij ɨ Dioj tyatɨj taqueenimeꞌe tiꞌisiseꞌi ajtyaꞌahua jetze, ɨ tyaj cai tyamuaꞌa raseij. Ma ajta, ajna xɨcajraꞌa tɨ meꞌe veꞌeme, aj tu xaa raseijran ɨ jetzen, tyamuaꞌa naa. Ijii, eꞌicaj nu caj tyaꞌumuaꞌaree. Ma ajta, ajna xɨcajraꞌa jetze, nain nu cɨn yauꞌeitaa naꞌame tɨj ajta Dioj tiꞌinyamuaꞌate.
\v 13 Aɨj pu cɨn, tiꞌihueica tɨ ijii ayan seijreꞌe ityejmi jemi. Ai puꞌu aɨn pueen: tyej tyaꞌatzaahuateꞌe, tyej rachuꞌeveꞌe tɨ Dioj nain cɨn ranaijmireꞌen, tyej huátaxeꞌeveꞌen. Ajta ai pu aɨn pueen ɨ tɨ eitzeꞌe ruxeꞌeveꞌe, tyej huátaxeꞌeveꞌen seij tyajta seij.
\c 14
\s Cɨmeꞌen ɨ saɨj tɨ raayɨꞌɨtɨ tɨ seij nyuucari cɨn tyuꞌutaxaj
\p
\v 1 Sataꞌaj seyan rahuauca saj haujxeꞌeveꞌen seij sajta seij. Ayaa pu i éenyaꞌa, saucheꞌe su seyan sajta rahuauca tɨ Dioj rɨꞌɨ tyajamuaataꞌacareꞌen aɨjna cɨmeꞌe ɨ muáreꞌeriꞌiraꞌaraꞌan tɨ aɨjna jemi seijreꞌe ɨ xaijnyuꞌucaraꞌaraꞌan ɨ Dioj, sej si seyan tyuꞌutaxaj Dioj jetze maꞌacan.
\v 2 Ma ajta, aɨn ɨ tɨ raayɨꞌɨtɨ tɨ seij nyuucari cɨn tyuꞌutaxaj, capu ayan tihueꞌixaateꞌe ɨ tyaɨte aꞌini camu yauꞌeitaa muaꞌaraꞌani aꞌij tɨ tiꞌixa. Aɨ puꞌu jamuan tiꞌixa ɨ Dioj aɨjna cɨmeꞌe tɨ ruꞌavaa jemin ɨ xaijnyuꞌucaraꞌaraꞌan ɨ Dioj.
\v 3 Ma ajta aɨn tɨ Dioj jetze maꞌacan tiꞌixaxaꞌa, aɨ pu xaa aɨme tiꞌixaateꞌe ɨ tetyaca tɨ ij rɨꞌɨ huaꞌuruuren, tɨ ij ajta caꞌanijraꞌa huaꞌutaꞌan, tɨ ij ajta rɨꞌɨ tihuaꞌutajeeve.
\v 4 Ajta aɨn tɨ seij nyuucari cɨn tiꞌixaxaꞌa, aɨ pu rusaɨj rɨꞌɨ ruruure. Ma ajta aɨn tɨ Dioj jetze maꞌacan tiꞌixaxaꞌa, aɨ pu rɨꞌɨ huaꞌaruuren naijmiꞌica ɨ mej aun eꞌetyujsaꞌɨri teyujtaꞌa.
\p
\v 5 Ayaa nu xaa tiꞌijxeꞌeveꞌe saj naimiꞌi seyan seica nyuucari cɨn tyuꞌutaxaj. Me nyajta inyaa, eitzeꞌe nu neyan tiꞌijxeꞌeveꞌe aɨjna saj Dioj jetze maꞌacan tiꞌixaxaꞌataꞌan.
\p Casiꞌi muaan, tɨ puaꞌa cai maꞌa aꞌahuaꞌa aꞌatɨ tɨ ayan tihueꞌixaateꞌen aɨme jemi ɨ tyaɨte aꞌij tɨ huataujmuaꞌa aɨjna tɨ raataxajtacaꞌa aɨjna tɨ seij nyuucari cɨn tiꞌixaxaꞌa, tɨ puaꞌa cai aꞌatɨ tɨ ayan raayɨꞌɨtɨ, capu aꞌij tiꞌirɨꞌɨri tɨ rɨꞌɨ huaꞌuruuren aɨme ɨ mej eꞌetyujsaꞌɨri teyujtaꞌa. Aɨj pu cɨn eitzeꞌe pu ruxeꞌevaꞌa aꞌame aɨjna tɨ Dioj jetze maꞌacan tiꞌixaxaꞌa cai aɨjna ɨ aꞌatɨ tɨ seij nyuucari cɨn tiꞌixaxaꞌa.
\v 6 Casiꞌi, nyeꞌihuaamuaꞌa, tɨ puaꞌa nyaun aꞌuméꞌen muejmi jemi nyej tyajamuaataꞌixaateꞌen seij cɨmeꞌe ɨ nyuucari ɨ saj cai yauꞌeite, canu tiꞌitɨ cɨn aꞌij tyajamuaatyavaɨreꞌesin. Ayaa pu teꞌeme tɨ puaꞌa nyacai tyajamuaataꞌixaateꞌen nyaɨjna tɨ ruꞌavaatacaꞌa ɨ Dioj jemi, nusu tɨ puaꞌa nyacai Dioj jetze maꞌacan naꞌari tɨ puaꞌa nyacai tiꞌitɨj cɨn tyajamuaataꞌixaateꞌen tɨ caꞌanijraꞌa jamuaataꞌan caꞌɨn tɨ puaꞌa nyacai tyajamuaataꞌitii.
\p
\v 7 Ayaa pu cheꞌeta naꞌa ruxeꞌeveꞌe tɨ aꞌatɨ ayan aꞌahuauritaacan cɨn tyuꞌutacuiina aɨjna jetze ɨ tuuturuꞌu tɨ cai uráxaijnyuꞌuca naꞌari aɨjna jetze ɨ mej jetzen ruxɨte cɨn tiꞌicuinaca. Tɨ puaꞌa cai aꞌahuaritaacan cɨn tyuꞌutacuiina ɨ tuuturuꞌu jetze, ¿aꞌini auj tiꞌirɨꞌɨri tɨ aꞌatɨ ayan raamuaꞌaree tiꞌitɨ tɨ chuiicariraꞌa pueen?
\v 8 Ajta, tɨ puaꞌa cai aꞌahuauritaacan cɨn huatánamuajreꞌen ɨ corneeta jetze, capu aꞌatɨ rucaten tɨ ij u aꞌuveꞌenyaꞌuseꞌen.
\p
\v 9 Ayaa pu cheꞌeta naꞌa een muejmi jemi, tɨ puaꞌa seyan tihuaꞌutaꞌixaateꞌen ɨ tyaɨte nyuucari cɨmeꞌe ɨ maj cai yauꞌeite. ¿Aꞌini tiꞌirɨꞌɨri tɨ aꞌatɨ ayan raamuaꞌaree aꞌij tɨ huataujmuaꞌa ɨ sej raataxajtacaꞌa? Capu aꞌij tiꞌirɨꞌɨri. Capu tiꞌitɨj vaɨraꞌa aꞌame ɨ saj raataxajtacaꞌa.
\p
\v 10 Tyamuaꞌa pu tiꞌimuiꞌi ɨ nyuucari tɨ iiyan namuajreꞌe chaanaca japua. Ajta naimiꞌi mu meyan aꞌahuaritaacan cɨn tiꞌixaxaꞌa.
\v 11 Ma ajta, tɨ puaꞌa nyacai ramuaꞌaree aꞌij tɨ huataujmuaꞌa ɨ nyuucari, ayaa nu seiiraꞌa naꞌame ɨ jemin ɨ tɨ raxa tɨj aꞌatɨ tɨ seij chuejraꞌa japua eꞌemaꞌacan. Ajta aɨjna tɨ tiꞌixa, aɨ pu ajta inyeetzi jemi ayej eenyaꞌa seiiraꞌa aꞌame tɨj aꞌatɨ tɨ seij chuejraꞌa japua eꞌemaꞌacan.
\p
\v 12 Aɨj pu cɨn, mɨ saj huapɨꞌɨ raxeꞌeveꞌe tɨ aɨn xaijnyuꞌucaraꞌaraꞌan ɨ Dioj tiꞌitɨj amuaataꞌan, ayaa pu cheꞌeta naꞌa een muejmi cɨmeꞌe, sataꞌaj ahuaujcaꞌanyen saj huaꞌutyamueꞌitɨn ɨ seica saɨjna cɨmeꞌe saj rɨꞌɨ huaꞌuruuren aɨme ɨ mej u eꞌetyujsaꞌɨri teyujtaꞌa.
\p
\v 13 Ma ajta aɨn tɨ seij nyuucari cɨn tiꞌixaxaꞌa, ayaa pu ruxeꞌeveꞌe tɨ aɨn aꞌatɨ ayan raatahuavii tɨ aɨn Dioj ayan raataꞌan ɨ muáreꞌeriꞌiraꞌaraꞌan tɨ cɨn yauꞌeitaa aꞌaraꞌani aꞌij tɨ tiꞌixaj.
\p
\v 14 Ayaa pu xaa nyaꞌu tiꞌen, aꞌini tɨ puaꞌa neyan nyaɨjna cɨn raatyajhuauni seij cɨmeꞌe ɨ nyuucari, nyaxaijnyuꞌuca pu xaa ajta huatyenyuusin. Ma ajta, nyamuaꞌatziiraꞌa pu cai tiꞌitɨ cɨn tiꞌimueꞌitɨn.
\v 15 Ari inyaa, aꞌini nyarɨni. Nyaxaijnyuꞌuca nu cɨn xaa huatyenyuusin. Nyajta neyan cheꞌeta nyanaꞌa nyamuaꞌatziiraꞌa cɨn neyan rɨni. Nyajta nu tyuꞌutachuiica nyaxaijnyuꞌuca cɨmeꞌe, nyajta ɨ nyamuaꞌatziiraꞌa cɨmeꞌe.
\v 16 Tɨ puaꞌa peyan rɨꞌɨ tiraataꞌan ɨ Dioj aꞌaxaijnyuꞌuca cɨmeꞌe, ¿aꞌini tiꞌirɨꞌɨri tɨ aꞌatɨ tɨ cai muejmi jetze ajtyamaꞌacan ayan huatyejnyuuni yee cheꞌe ayen tyaꞌaraꞌani tɨꞌɨj ayan muaanamua pej peyan rɨꞌɨ tiraataꞌaca ɨ Dioj? Capu rɨꞌɨri aꞌini aɨjna ɨ aꞌatɨ, capu yauꞌeitaa aꞌame aꞌij pej tyuꞌutaxajta.
\v 17 Rɨꞌɨriista pu aꞌame pej peyan tyamuaꞌa naa rɨꞌɨ tiraataꞌan ɨ Dioj. Ma pajta muaa, capaj aꞌij rɨꞌɨ raaruu ɨ axaꞌaj tevi.
\p
\v 18 Ayaa nu een cɨn eihua rɨꞌɨ tirataꞌaca ɨ Dioj nyaɨjna cɨmeꞌe nyej eitzeꞌe neyan tiꞌixaxaꞌa seica cɨmeꞌe ɨ nyuucari sacai naimiꞌi muan.
\v 19 Nyajta, nyatɨꞌɨj huaꞌa jemi aꞌutyavaaca aɨme ɨ mej eꞌetyujsaꞌɨri teyujtaꞌa, nyej ni neyan tihuaꞌutaꞌitii, eitzeꞌe pu naꞌaraanajchi inyeetzi nyaj aꞌahuaritaacan cɨn tihuaꞌutaꞌixaateꞌen anxɨ nyuucari cɨmeꞌe nyacai nyej neyan tyuꞌutaxaj tamuaamuataꞌa viꞌiraꞌa nyuuca seij cɨmeꞌe ɨ nyuucari ɨ maj cai yauꞌeite.
\p
\v 20 Nyeꞌihuaamuaꞌa, caxu cheꞌe seyan tiꞌimuajca matɨj ɨ tɨꞌɨrii, silu sataꞌaj seyan eenyeꞌen seiiraꞌa matɨj ɨ tɨꞌɨrii saɨjna cɨmeꞌe saj cai aꞌij puaꞌa rɨcɨ. Sataꞌaj sajta seyan cheꞌeta sanaꞌa tyuꞌumuaꞌati matɨj aɨme ɨ mej meri vaujsi.
\v 21 Ayaa pu teꞌeyuꞌusiꞌi aɨjna jetze ɨ nyuucari ɨ maj cɨn tiꞌijta tɨcɨn: “Ayaa nu tihuaꞌutaꞌixaateꞌesin aɨjna ɨ tyaɨtejraꞌa nyaɨjna cɨmeꞌe ɨ mej seica nyuucari cɨn tiꞌixaxaꞌa. Aɨme ɨ mej seij chuejraꞌa japua eꞌemaꞌacan, aɨ mu tihuaꞌutaꞌixaateꞌesin. Ma majta aɨme ɨ nyetyaɨtestyamuaꞌa, camu naꞌaraꞌastijreꞌesin inyeetzi.”
\p
\v 22 Aɨj pu cɨn, aɨjna ɨ nyuucari ɨ maj cai yauꞌeite, capu ayan tiꞌivaɨreꞌe tɨ i tihuaꞌutaꞌitii aɨme ɨ mej tyaꞌatzaahuateꞌe silu ayaa puꞌu naꞌa tiꞌivaɨreꞌe tɨ i tihuaꞌutaꞌitii huaꞌa jemi ɨ maj cai tyaꞌatzaahuateꞌe.
\p
\v 23 Ee xaa nyaꞌu, ayaa pu tiꞌayajna. Casiꞌi, aꞌini tiꞌitɨ metyuꞌutaxajta ɨ seica ɨ maj cai tyaꞌatzaahuateꞌe, naꞌari ɨ seica ɨ maj cai rɨꞌɨ me tityaumuámuaꞌaree tɨ puaꞌa aun maꞌutyarute aꞌu sej eꞌetyujsaꞌɨri. Sajta muan, tɨ puaꞌa xu seyan naimiꞌi tiꞌixaata xaꞌajuꞌun seica cɨmeꞌe ɨ nyuucari ɨ maj cai yauꞌeite, aꞌini tihuaꞌamityejteꞌe aɨme. ¿Ni qui seyan nuꞌu tyaꞌataujtɨmueꞌiriꞌi? Ee xaa nyaꞌu.
\p
\v 24 Ajta, tɨ puaꞌa seij aun aꞌutyarute muejmi jemi tɨ cai tyaꞌatzaahuateꞌe nusu tɨ cai muejmi jetze ajtyamaꞌacan, sajta muan, tɨ puaꞌa xu naimiꞌi tiꞌixaata xaꞌajuꞌun ɨ Dioj jetze maꞌacan, ayaa pu tiraatamitejteꞌesin saj naimiꞌi raꞌaxɨjteꞌen aɨjna cɨmeꞌe tɨ aɨn ayan autyajturaa ɨ Dioj jemi.
\v 25 Aj puꞌi ayan huataseijreꞌesin tɨj naꞌa tɨ ruꞌavaatacaꞌa u tzajtaꞌan. Ajta aɨn tyaataꞌa, a aꞌarávaɨjtzi a chuaataꞌa. Aɨ pu raatyanajchi ɨ Dioj, ajta ayan tyuꞌutaxajta yee tɨ Dioj muejmi jemi seijreꞌe.
\s Maj nuꞌu nain cɨn meyan huarɨni aꞌij tɨ tiraavijteꞌe
\p
\v 26 ¿Aꞌini sanaꞌa sij rɨni nyeꞌihuaamuaꞌa? Sataꞌaj seyan huarɨni satɨj sanaꞌa saj eꞌetyujsaɨreꞌesin. Sataꞌaj naiimiꞌi rɨꞌɨ huaujruuren tiꞌitɨ cɨmeꞌe, tɨ puaꞌa seij tiꞌichuiicamɨꞌɨ, nusu seij tiꞌitɨ cɨn tihueꞌitiiramɨꞌɨ naꞌari tiꞌixajtamɨꞌɨ ɨ tɨ jetzen raatyajtuaa ɨ Dioj caɨn seij nyuucari cɨn tiꞌixajtamɨꞌɨ, naꞌari saɨj ayan raxeꞌeveꞌe tɨ tihueꞌixaateꞌen aꞌij tɨ huataujmuaꞌa ɨ nyuucari tɨ raataxajtacaꞌa ɨ saɨj. Sataꞌaj seyan huarɨni sej rɨꞌɨ huaꞌuruuren naijmiꞌica.
\p
\v 27 Tɨ puaꞌa seica meyan raxeꞌevaꞌa maj seica nyuucari cɨn tyuꞌutaxaj, micheꞌe meyan eenyeꞌen maj huaꞌapua maꞌa naꞌari maj hueica maꞌa. Micheꞌe meyan tyuꞌutaxaj seij majta seij. Ajta, cheꞌe seij ayan tihueꞌixaateꞌen aꞌij tɨ huataujmuaꞌa.
\v 28 Ajta, tɨ puaꞌa cai maꞌa aꞌatɨ tɨ ayan raayɨꞌɨtɨ tɨ ayan tihueꞌixaateꞌen aꞌij tɨ huataujmuaꞌa, cheꞌe aɨn cai tiꞌixajta huaꞌa jemi ɨ mej eꞌetyujsaꞌɨri. Cheꞌe aɨn rusaɨj tiꞌixajta ɨ rujemi, ajta ɨ Dioj jemi.
\v 29 Majta aɨme ɨ mej Dioj jetze maꞌacan tiꞌixaxaꞌa, micheꞌe meyan eenyeꞌen tiꞌixajta, maj huaꞌapua manaꞌa, naꞌari maj hueica manaꞌa. Majta ɨ seica, micheꞌe meyan tiraaxaꞌapɨꞌɨntareꞌen aꞌij tɨ tiꞌixa ɨ saɨj.
\v 30 Ajta, tɨ puaꞌa iyeꞌitzi cɨn tiꞌitɨ raatyatuaani seij jemi, cheꞌe aɨn tɨ tiꞌixa ayan raatapuaꞌajta.
\p
\v 31 Ayaa pu tiꞌirɨꞌɨri saj naimiꞌi Dioj jetze maꞌacan tyuꞌutaxaj sej si tihuaꞌutaꞌitii naijmiꞌica, sej si sajta caꞌanijraꞌa huaꞌutaꞌan.
\v 32-33 Majta aɨme ɨ maj Dioj jetze maꞌacan tiꞌixaxaꞌa, ayaa pu ruxeꞌeveꞌe maj majta raayɨꞌɨtɨhuaꞌan maj tiraijteꞌen ɨ ruxaijnyuꞌuca huaꞌa jemi ɨ mej eꞌetyujsaꞌɨri. Ayaa pu ruxeꞌeveꞌe aꞌini capu Dioj chaꞌanaꞌa huaꞌaruuren mej mi cai xaꞌapɨꞌɨn ruruure silu aɨ pu huaꞌutyapuaꞌariteꞌesin.
\p Sataꞌaj seyan cheꞌeta sanaꞌa huarɨni aꞌij mej meri tiꞌijrɨꞌɨre naijmiꞌi ɨ seica ɨ mej eꞌetyujsaꞌɨri ɨ Dioj jemi.
\v 34 Caxu huaꞌataꞌacareꞌen aɨme ɨ juuca, mej mi tiꞌixajta matɨꞌɨj eꞌetyujsaɨreꞌen u teyujtaꞌa. Capu aꞌij tiꞌirɨꞌɨri mej tiꞌixajta silu mej raꞌaraꞌastijreꞌen aꞌij tɨ teꞌeyuꞌusiꞌi ɨ yuꞌuxari jetze ɨ maj cɨn tiꞌijta.
\v 35 Tɨ puaꞌa meyan raxeꞌevaꞌa maj tiꞌitɨ huamuaꞌareera, micheꞌe meyan tihuaꞌutaihuaꞌu ɨ rucɨnaꞌastyamuaꞌa ɨ ruche. Ayaa pu xaa nyaꞌu, aꞌini ayaa pu tyuꞌutyeviꞌirasteꞌe tɨ puaꞌa jɨitaꞌa tiꞌixajta huaꞌa jemi ɨ mej eꞌetyujsaꞌɨri u teyujtaꞌa.
\p
\v 36 ¿Ai taꞌuj naꞌa? ¿Ni muejmi jetze aꞌuveꞌeme ɨ nyuucari tɨ cɨmeꞌen raxa ɨ Dioj, naꞌari ayan naꞌa muejmi jemi huatyatuiihuacaꞌa? Capu xaa nyaꞌu.
\v 37 Tɨ puaꞌa aꞌatɨ ayan tiraꞌamitejtyaꞌa ɨ rujetze tɨ aɨ rusaɨj aɨn pueen seij tɨ tiꞌixaxaꞌa ɨ Dioj jetze maꞌacan, naꞌari aɨn jetze araujcaꞌanye ɨ xaijnyuꞌucaraꞌaraꞌan ɨ Dioj, cheꞌe aɨn ayan ráamuaꞌati nyej neyan nyaɨjna cɨn tyajaꞌamuayuꞌuseꞌe aꞌij tɨ aɨn tinyeijca ɨ tavastaraꞌa.
\v 38 Tɨ puaꞌa aɨn aꞌatɨ cai ayan ráamuaꞌati, caxu sajta muan seyan raꞌastijre.
\p
\v 39 Aɨj pu cɨn, nyeꞌihuaamuaꞌa, naa pu tiꞌixaꞌapɨꞌɨn saj caꞌanin cɨn rahuauca saj Dioj jetze maꞌacan tiꞌixajta. Sajta, sataꞌaj cai hueꞌijmɨjra ɨ maj seica nyuucari cɨn tiꞌixajta.
\v 40 Ayaa puꞌu naꞌa, satɨj sanaꞌa sej seyan rɨcɨ, sataꞌaj seyan xaꞌapɨꞌɨn eenyaꞌacan cɨn rɨjca aꞌij tɨ tiraavijteꞌe.
\c 15
\s Cɨriistuꞌu pu aꞌitáraa huaꞌa tzajtaꞌa ɨ mɨꞌɨchite
\p
\v 1 Nyajta nu neyan tyajaꞌamueꞌixaateꞌe, nyeꞌihuaamuaꞌa, sej si raꞌutamuaꞌaree aꞌij nyaj eenyeꞌen cɨn tyajamueꞌixaa nyaɨjna ɨ nyuucari tɨ cɨn Dioj jamueꞌiratuaasin, ɨ saj sajta raꞌancuraꞌa, ɨ saj sajta sauj seyan jemin seijreꞌe.
\v 2 Ai pu aɨn pueen ɨ nyuucari tɨ cɨn Dioj amueꞌiratuaasin tɨ puaꞌa sauj seyan raꞌastijraꞌa aꞌij nyej neri tyajamuaataꞌixaa. Naꞌari cai, capu tiꞌitɨj aꞌij tyajaꞌamuavaɨreꞌe tɨ puaꞌa saɨque sanaꞌa tiraꞌantzaahua.
\p
\v 3 Ayaa naꞌa, aꞌini ayaa nu cheꞌeta nyanaꞌa aꞌamua jemi raatyajtua nyaɨjna ɨ nyaj nyajta raꞌancuraꞌa ɨ tɨ eitzeꞌe ruxeꞌeveꞌe tyaj raamuaꞌaree tɨ aɨn Cɨriistuꞌu huamɨꞌɨ tajetze maꞌacan tɨ ij titaatauuniꞌi ɨ tyaj cɨn autyajturaa ɨ Dioj jemi. Ayaa pu teꞌeyuꞌusiꞌi ɨ yuꞌuxari jetze.
\v 4 Matɨꞌɨj nuꞌu raꞌavaꞌana, ajta, tɨꞌɨj ayan tyauumaꞌaca hueica xɨcaj tzajtaꞌa, Dioj pu ayan raꞌajjáj huaꞌa tzajtaꞌa ɨ mɨꞌɨchite aꞌij tɨ teꞌeyuꞌusiꞌi ɨ yuꞌuxari jetze.
\p
\v 5 Aj puꞌi aɨjna jemi huataseijre ɨ Pedro, ajta eꞌeyan huaꞌa jemi ɨ maj tamuaamuataꞌa japuan saɨj araꞌase.
\v 6 Ajta eꞌeyan aɨme jemi huataseijre ɨ mej meyan aꞌaraꞌase aꞌachu cumu anxɨ cieentu japuan cɨj caj matɨꞌɨj naijmiꞌi u eꞌetyujsaɨɨraꞌacaꞌa. Maucheꞌe mu muiꞌitɨ ruuri, majta seica, meri huacuii.
\p
\v 7 Tɨꞌɨqui ajta aɨjna jemi huataseijre ɨ Jacobo, ajta eꞌeyan naijmiꞌica jemi ɨ tɨ huaꞌantihuau.
\p
\v 8-9 Ajta, nyeetzi jemi puꞌuqui teꞌentipuaꞌari tɨ ayan huataseijre. Tij ayaa nu huanuꞌeihuacaꞌa matɨꞌɨj cai xɨ nyechuꞌevaꞌacaꞌa, aꞌini nyaa nu nyaɨn pueen ɨ tɨ eitzeꞌe cɨleꞌenyeꞌen cɨn tiꞌityejvee huaꞌa jemi tɨ Dioj huaꞌantihuau. Ee xaa nyaꞌu, capu ayan tiraavijteꞌe nyej neyan raataxaj yee nyaa nu huaꞌa jetze ajtyamaꞌacan aɨme ɨ tɨ Dioj huaꞌantihuau, aꞌini nyaa nu huapɨꞌɨ aꞌij puaꞌa huaꞌuruu aɨme ɨ mej eꞌetyujsaꞌɨrihuaꞌa mej mi raatyanajche ɨ Dioj.
\p
\v 10 Ma ajta Dioj, aɨ pu rɨꞌɨ tinaataꞌa. Aɨj nu cɨn nyaa nu nyaɨn pueen seij tɨ Dioj naꞌantihuau. Ajta eecan pu huapɨꞌɨ tyuꞌutyavaɨ tɨ aɨn ayan rɨꞌɨ tinaataꞌa aꞌini eitzeꞌe nu caꞌanin cɨn tyuꞌumuarej macai ɨ seica. Ma ajta, Dioj pu aɨn pueenyaꞌa tɨ caꞌanijraꞌa naataꞌa. Canu nyasaɨj nyanaꞌa tyuꞌumuarej.
\v 11 Capu amɨn aꞌij. Capu jetzen ruxeꞌeveꞌe tɨ puaꞌa aɨme me tyuꞌumuarej nusu inyaa. Naimiꞌi tu teyan cheꞌeta tyanaꞌa tihueꞌixaateꞌe. Sajta muan, ayaa xu cheꞌeta sanaꞌa tyaꞌantzaahua.
\s Matɨꞌɨj aꞌitajuꞌun ɨ mɨꞌɨchite
\p
\v 12 Ajta, tɨ puaꞌa teri teyan tyajamueꞌixaa tɨ Dioj raꞌajjáj ɨ Cɨriistuꞌu huaꞌa tzajtaꞌa ɨ mɨꞌɨchite, ¿aꞌini een cɨmeꞌe meyan tiꞌixaata muaꞌayeꞌi seica, ɨ mej aꞌamua jetze ajtyamaꞌacan aɨjna cɨmeꞌe maj nuꞌu cai cheꞌe huatarujsin aɨme ɨ mej meri huacuii?
\v 13 Ayaa nu tyajaꞌamueꞌixaateꞌe. Tɨ puaꞌa ayan macai cheꞌe huatarun aɨme ɨ mej meri huacuii, capu ajta Dioj raꞌajjáj ɨ Cɨriistuꞌu huaꞌa tzajtaꞌa ɨ mɨꞌɨchite.
\v 14 Ajta, tɨ puaꞌa Dioj cai raꞌajjáj ɨ Cɨriistuꞌu, capu tiꞌitɨ vaɨreꞌe ɨ tyej teri tyajamueꞌixaa, ajta capu tiꞌitɨj vaɨreꞌe sej seyan tyaꞌatzaahuateꞌe.
\v 15 Ajta, ayaa pu teꞌeme tyaj hueꞌitaꞌame pueen tyaɨjna cɨmeꞌe ɨ tyaj cɨn tyuꞌutaxajtacaꞌa tyaɨjna cɨmeꞌen ɨ Dioj, aꞌini tuꞌuri teyan raataxajtacaꞌa yee: “Aɨ pu raꞌajjáj ɨ Cɨriistuꞌu huaꞌa tzajtaꞌa ɨ mɨꞌɨchite.” Ma ajta cai capu, tɨ puaꞌa macai cheꞌe huatarun ɨ mej meri huacuii. Ee xaa nyaꞌu, tɨ puaꞌa ayen een matɨj seica tiꞌixaxaꞌa, capu Dioj ayan raꞌajjáj.
\p
\v 16 Ayaa puꞌu, tɨ puaꞌa Dioj cai huaꞌajjájpuaxɨꞌɨ aɨme ɨ mej meri huacuii, ayaa pu huataujmuaꞌa tɨ cai Dioj ajta raꞌajjáj ɨ Cɨriistuꞌu.
\v 17 Tɨ puaꞌa cai raꞌajjáj aɨjna ɨ Cɨriistuꞌu, capu tiꞌitɨj vaɨreꞌe sej seyan tyaꞌatzaahuateꞌe. Ajta, tɨ puaꞌa cai raꞌajjáj, capu ayan aꞌamua japua huanyúu ɨ saj cɨn autyajturaa ɨ Dioj jemi.
\v 18 Ajta aɨme ɨ mej meyan tyaꞌatzaahuatyaꞌa ɨ Cɨriistuꞌu jemi muaacuii, muꞌuri áꞌuvej.
\v 19 Tɨ puaꞌa ayaa naꞌa auj titaatyavaꞌɨri tyej tyauj iꞌiruuri tyej teyan raꞌatzaahuatyaꞌa ɨ Cɨriistuꞌu, eitzeꞌe pu aꞌij puaꞌa tiꞌitaruure tɨ cai aꞌij tihuaꞌaruure naijmiꞌica aɨme ɨ seica ɨ mej yan japuan seijreꞌe ɨ chaanaca.
\p
\v 20 Ma ajta xaa, ayaa pu tiꞌayajna tɨ Cɨriistuꞌu aꞌitáraa huaꞌa tzajtaꞌa ɨ mɨꞌɨchite. Ai pu aɨn pueen ɨ taꞌanaayeijxɨ ɨ tyaj cɨn raamuaꞌaree maj majta huatarujsin aɨme ɨ mej meri huacuii.
\v 21 Ayaa puꞌu naꞌa, aꞌini ayaa pu tihuaꞌacɨꞌɨti ɨ tyaɨte mej meyan huacuiꞌini maɨjna cɨmeꞌe tɨ seij naꞌa ɨ tyaataꞌa ayan autyajturaa ɨ Dioj jemi, ayaa pu cheꞌeta naꞌa tihuaꞌacɨꞌɨti maj huatarun maɨjna cɨmeꞌe tɨ ajta seij naꞌa ɨ tyaataꞌa huatarú huaꞌa tzajtaꞌa ɨ mɨꞌɨchite.
\v 22 Aꞌini naimiꞌi mu meyan cuiꞌica maɨjna cɨmeꞌe tɨ aɨn Adán autyajturaa ɨ Dioj jemi, ayaa mu cheꞌeta manaꞌa huatarujsin maɨjna cɨmeꞌe mej maɨjna jetze ajtyamaꞌacan aɨjna ɨ Cɨriistuꞌu.
\v 23 Ma ajta, ayaa pu tihuaꞌacɨꞌɨti aꞌij tɨ tihuaꞌuxaꞌapɨꞌɨntariꞌiriꞌi ɨ xɨcajraꞌan jetze tɨ ayan tiraavijteꞌe. Anacai pu huatarú aɨjna ɨ Cɨriistuꞌu. Ajta eꞌeyan, tɨꞌɨj ya uvéꞌenyen, aɨme mu huatarun aɨme ɨ maj Cɨriistuꞌu jetze ajtyamaꞌacan.
\v 24 Aj puꞌi nain teꞌentipuaꞌariteꞌesin. Anacai pu Cɨriistuꞌu aɨme antipuaꞌariteꞌesin matɨj manaꞌa tityátatyáꞌupuꞌu, ajta aɨme ɨ mej tiꞌitɨj cɨn antyujmuaꞌaree. Aj puꞌi xaa tyuꞌutatuireꞌesin ɨ Dioj jemi tɨj naꞌa aɨn tɨ cɨn antyujmuaꞌareeracaꞌa.
\p
\v 25 Ayaa puꞌu, aꞌini ayaa pu ruxeꞌeveꞌe tɨ aɨn Cɨriistuꞌu ayan tyuꞌutaijta asta naꞌa cai huaꞌutyamueꞌitɨn matɨj manaꞌa puaꞌamua maj rajchaɨreꞌe.
\v 26 Ajta ɨ tɨ cɨn teꞌentipuaꞌariteꞌesin tɨ raatyamueꞌitɨn ɨ tɨ rajchaɨreꞌe, ai pu aɨn pueen ɨ tɨ cɨn uꞌumɨꞌɨni.
\v 27 Ajta, tɨꞌɨj ayan tiꞌixa tɨ nuꞌu aɨn nain tyuꞌutyaamueꞌitɨ, capu xaa nyaꞌu ayan huataujmuaꞌa tɨ aɨn ajta raatyamueꞌitɨ aɨjna ɨ Dioj tɨ ayan raataꞌa tɨ nain cɨn antyujmuaꞌaréera.
\p
\v 28 Tɨꞌɨj tyuꞌutyamueꞌitɨn nain tɨj naꞌa tɨ iiyan tiꞌiseijreꞌe, ajta uteꞌe tɨ tejeꞌeseijreꞌe, aɨjna tɨ iꞌi yaujraꞌan pueen ɨ Dioj, aɨ pu rusaɨj huataujtuireꞌesin aɨjna jemi ɨ Dioj tɨ nain cɨn antyujmuaꞌareeracaꞌa, matɨj manaꞌa puaꞌamua ɨ maj iiyan seijreꞌe chaanaca japua, ajta u tajapua.
\p
\v 29 Tɨ puaꞌa pɨ naꞌa ayan saɨque eenyeꞌen, ¿aꞌij tɨ huataujmuaꞌatiicheꞌe mej meyan tiꞌijrɨꞌɨre ɨ tyaɨte maj huamuaɨꞌɨvijhua aɨme jetze maꞌacan ɨ mej meri huacuii? Tɨ puaꞌa macai cheꞌe meyan huatarun ɨ mej meri huacuii, ¿aꞌini een cɨmeꞌe meyan huaꞌa nyuucajtzeꞌen rumuaɨꞌɨvijhua?
\p
\v 30 Tyajta ityan, ¿aꞌini een cɨmeꞌe teyan áꞌatacaꞌanye tɨꞌɨj pɨ naꞌa tyej teyan huacuiꞌini pueijtzi cɨmeꞌe?
\p
\v 31 Ayaa nu tyajaꞌamueꞌixaateꞌe tzaahuatiꞌiraꞌa cɨmeꞌe nyaɨjna cɨmeꞌe nyaj ahuantzaahuateꞌen muejmi cɨmeꞌe ɨ Cɨriistuꞌu jemi, aɨjna ɨ Jesús tɨ ajta tavastaraꞌa pueen. Tɨꞌɨj pɨ naꞌa nain xɨcaj tzajtaꞌa, ayaa pu tinaꞌamitejteꞌe inyeetzi nyej neri mɨꞌɨmɨca.
\v 32 Tɨ puaꞌa macai huatarun ɨ mej meri huacuii, ¿aꞌini tiꞌitɨj tinatyavaꞌɨri nyaj neyan tyaataꞌa pueen, tɨ puaꞌa neyan huatenyaꞌuseꞌen huaꞌa jamuan ɨ tiꞌityaɨn aujna aꞌahuaꞌa u Efeso?
\p Ayaa mu xaa tiꞌixaxaꞌa tɨcɨn: “Ticheꞌe yee tyuꞌucuaꞌani, tyajta tiꞌitɨ antiyeꞌen, aꞌini ruijmuaꞌa tu cuiꞌini.”
\p
\v 33 Caxu rataꞌacareꞌen tɨ aꞌatɨ aꞌamuacuanamua tiꞌitɨj cɨmeꞌe. Casiꞌi, aɨme ɨ mej aꞌij puaꞌa titetyujchaꞌɨ, ayaa mu nuꞌu aꞌij puaꞌa caꞌanijraꞌa huaꞌataꞌaca ɨ maj rɨꞌɨ titetyujchaꞌɨ mej mi majta meyan cheꞌeta manaꞌa aꞌij puaꞌa huarɨni.
\p
\v 34 Sataꞌaj sajtahuaꞌa rɨꞌɨ me tityaumuámuaꞌaren, sataꞌaj sajta raatapuaꞌajta ɨ saj cɨn atyaꞌɨtzaꞌara ɨ Dioj jemi. Camu tzaahuatiꞌiraꞌa cɨn ramuaꞌate ɨ Dioj seica ɨ mej aꞌamua jetze ajtyamaꞌacan. Ayaa nu een cɨn tyajaꞌamueꞌixaateꞌe nyej ni amuaatatyeviꞌirasteꞌen.
\s Aꞌij mej seiraꞌa muaꞌajuꞌun matɨꞌɨj huatarun ɨ mɨꞌɨchite
\p
\v 35 Ma ajta, tɨ puaꞌa aꞌatɨ ayan tyuꞌutaihuaꞌusin tɨcɨn: “¿Aꞌini yeꞌi tiꞌirɨꞌɨri mej huatarun ɨ mɨꞌɨchite? ¿Tiꞌitajni tevijraꞌan cɨn meyan seiraꞌa muaꞌajuꞌun?”
\v 36 Me nyajta inyaa, ayaa nu tiraataꞌixaateꞌesin yee, mɨ paj cai máumuaꞌaree. Aɨjna ɨ jatzi paj raahuaste, capu ajnyejsin tɨ puaꞌa cai anacai aꞌutátziꞌite.
\v 37 Patɨꞌɨj tiꞌihuasteꞌe, capej paɨjna huasteꞌe ɨ cɨye tɨ ajnyejsin silu aɨj paj huasteꞌen ɨ jatzi tɨ puaꞌa tiꞌitɨ triigu nusu tiꞌitɨ seica.
\v 38 Ajta aɨn ɨ Dioj, aɨ pu ayan rataꞌaca ɨ cɨyaꞌaraꞌan aꞌij tɨ ari tiraaxaꞌapɨꞌɨntariꞌiriꞌi, seij ajta seij ɨ jatzi.
\p
\v 39 Ajta, capu ruxaꞌa naꞌa eꞌen ɨ hueꞌiraꞌa. Seij pu saɨque eꞌenyaꞌa tyahueꞌiraꞌa ɨ tyaataꞌa. Ajta saɨque mu eꞌenyeꞌen tyahueꞌiraꞌa ɨ yaꞌamuaate. Majta aɨme ɨ pinaꞌase, aɨ mu majta saɨque eꞌenyeꞌen tyahueꞌiraꞌa. Aɨ mu majta ɨ hueꞌité, saɨque mu majta eꞌenyeꞌen tyahueꞌiraꞌa.
\p
\v 40 Ajta tɨ uteꞌe tiꞌiseijreꞌe, ajta tɨ iiyan tiꞌiseijreꞌe chaanaca japua, capu ruxaꞌa naꞌa tiꞌen. Ajta, seij pu aɨn pueen ɨ tɨ naa tihuaꞌaseijrateꞌe aɨjna tɨ uteꞌe tiꞌiseijreꞌe. Ajta seij pu ajta aɨn pueen ɨ tɨ naa tihuaꞌaseijrateꞌe aɨjna tɨ tiꞌiseijreꞌe iiyan chaanaca japua.
\v 41 Aɨjna ɨ xɨcaj, aɨ pu seij aɨn pueen tɨ naa tihuaꞌaseijrateꞌe. Ajta ɨ maxcɨraꞌi, capu ruxaꞌaj naꞌa ayan tihuaꞌaseijrateꞌe. Majta aɨme ɨ xuꞌuraꞌave, camu majta ruxaꞌa manaꞌa meyan eꞌen.
\p
\v 42 Ayaa pu cheꞌeta naꞌa eꞌenyeꞌen tiꞌiseijreꞌe aɨjna cɨmeꞌe ɨ mej huatarun aɨme ɨ mej meri huacuii. Aɨjna ɨ tevijraꞌan tɨ huanuꞌeihuacaꞌa, aɨ pu áꞌapuaꞌaren. Ajta aɨn tɨ Dioj rajjajsin, capu cheꞌe aꞌanaj áꞌapuaꞌaren aɨjna.
\v 43 Aɨjna tevijraꞌan, ayaa pu huanuꞌeihuacaꞌa maj cai rɨꞌɨ tirataꞌacareꞌen. Ajta, tɨꞌɨj Dioj rajjan, aɨ pu tyamuaꞌa naa rɨꞌɨ tiraataꞌasin. Tɨꞌɨj huanuꞌeihua aɨjna ɨ tevijraꞌan, capu aꞌatzu rucaꞌanye. Ajta, tɨꞌɨj Dioj rajjan, aɨ pu rumuareꞌeriꞌiraꞌa cɨn rajjajsin.
\p
\v 44 Ayaa pu eenyeꞌen núꞌeihuan tɨ ij tyaꞌutaviicueꞌi iiyan chaanaca japua. Ajta, ayaa pu eenyeꞌen rajjajsin tɨ ij ayan jetzen araujcaꞌanyen ɨ xaijnyuꞌucaraꞌaraꞌan ɨ Dioj. Tɨ puaꞌa ayan seijreꞌe ɨ tevijraꞌan tɨ ayan tyaꞌutaviicueꞌi iiyan chaanaca japua, ajta pu ayan cheꞌeta naꞌa seijraꞌa ɨ tevijraꞌan tɨ jetzen araujcaꞌanyen ɨ xaijnyuꞌucaraꞌaraꞌan ɨ Dioj.
\p
\v 45 Jee xaa nyaꞌu, ayaa pu teꞌeyuꞌusiꞌi tɨcɨn: “Aɨjna ɨ tevi, aɨjna ɨ Adán tɨ anacai huataseijre, aɨ pu ayan eenyeꞌen ruuri huatyajturaa.” Ajta aɨjna ɨ tevi, aɨjna tɨ ajta Adán pɨrɨcɨ ɨ tuꞌuveꞌetyajtɨ, ayaa pu eenyeꞌen huatyajturaa xaijnyuꞌucari tɨ ayej auj tihuaꞌataꞌaca mej meyan ruuri muaꞌaraꞌani.
\p
\v 46 Capu anacai huataseijre aɨjna tɨ jetzen araujcaꞌanyen ɨ xaijnyuꞌucaraꞌaraꞌan ɨ Dioj, silu aɨjna tɨ rusaɨj taꞌutaviicueꞌi iiyan chaanaca japua. Tɨꞌɨj aɨn ayan huataseijreꞌen, aj pu xaa huataseijreꞌesin aɨjna tɨ aɨn xaijnyuꞌucaraꞌaraꞌan jetze araujcaꞌanyen.
\v 47 Ajta, aɨn ɨ tyaataꞌa, ɨ tɨ anacai huataseijre, aɨ pu chuej cɨn huatyataavijhuacaꞌa. Aɨj pu cɨn, iiyan maj chuej japua maꞌacan. Ajta ɨ tyaataꞌa, ɨ tɨ huaꞌapua tɨ huanyej, aɨ pu uteꞌe eꞌemaꞌacan.
\v 48 Majta aɨme ɨ mej yan japuan huachaatɨme iiyan chaanaca japua, ayaa mu eꞌen tɨj ajta een ɨ tevi tɨ chuej japua maꞌacan. Majta aɨme ɨ mej jetzen ajtyamaꞌacan aɨjna tɨ uteꞌe eꞌemaꞌacan, ayaa mu majta eꞌen tɨj een aɨjna ɨ aꞌatɨ.
\v 49 Aꞌij tyej teri teyan eꞌen taavijraꞌan cɨmeꞌe aɨjna ɨ tevi tɨ chuej japua maꞌacan, ayaa tu cheꞌeta tyanaꞌa eenyaꞌa taꞌajuꞌun taavijraꞌan cɨmeꞌe aɨjna ɨ tevi tɨ uteꞌe eꞌemaꞌacan.
\p
\v 50 Ayaa nu tyajaꞌamueꞌixaateꞌe, nyeꞌihuaamuaꞌa. Capu rɨꞌɨri tɨ aun aꞌutyarute aꞌu tɨ Dioj tieꞌijta aꞌatɨ tɨ naꞌa tɨ auj ayen seijreꞌe taavijraꞌan cɨmeꞌe aɨjna ɨ tevi tɨ chuej japua maꞌacan. Ajta, aɨjna ɨ aꞌatɨ tɨ áꞌapuaꞌaren, capu rɨꞌɨri tɨ ayan tiraacɨꞌɨti aɨjna tɨ cai aꞌanaj áꞌapuaꞌaren.
\p
\v 51 Xaanamuajriꞌi muan, aꞌini ayaa nu tyajamuaataꞌixaateꞌesin tiꞌitɨj cɨmeꞌe tɨ ruꞌavaatacaꞌa ɨ Dioj jemi. Catu naimiꞌi cuiꞌini, silu Dioj pu naijmiꞌica saɨque taruuren ityejmi.
\v 52-53 Ayaa pu teꞌeme ajna xɨcajraꞌa tɨ jetzen huatánamuajreꞌen ɨ trompeeta tɨ cɨmeꞌen nain teꞌentipuaꞌariteꞌesin. Tɨꞌɨj aɨn tɨ tajapua tiꞌivaɨreꞌe ucaajijhua ɨ trompeeta jetze, aj puꞌi ayan seiiraꞌa aꞌame tɨꞌɨj maj huatyamaxcavaꞌaxɨꞌɨn iyeꞌitzi cɨmeꞌe. Aj puꞌi Dioj huáꞌajjajpuaxɨꞌɨsin aɨme ɨ mej meri huacuii mej mi cai cheꞌe aꞌanaj aupuaꞌare. Tyajta ityan, saɨque tu huatyátaruurejsin, aꞌini ayaa pu ruxeꞌeveꞌe tɨ aɨn tɨ áꞌapuaꞌaren ayan saɨque huaujruuren tɨ ij cai cheꞌe aupuaꞌare. Ajta ayan ruxeꞌeveꞌe tɨ aɨn tɨ mɨꞌɨni, ajta ayan saɨque huaujruuren tɨ ij cai cheꞌe huamɨꞌɨni.
\p
\v 54 Tɨꞌɨj saɨque huaujruuren aɨjna tɨ áꞌapuaꞌaren tɨ ij cai cheꞌe aupuaꞌare, ajta tɨꞌɨj ari saɨque huaujruu aɨjna tɨ mɨꞌɨniicheꞌen tɨ ij cai cheꞌe huamɨꞌɨni, aj pu xaa ayan tyajaꞌureꞌenyejsin aꞌij tɨ anacai teꞌeyuꞌusiꞌihuacaꞌa, aɨjna ɨ nyuucari tɨ cɨmeꞌen raxa yee: “Nain pu hui cɨn ratyaamueꞌitɨ aɨjna ɨ tɨ huaꞌacuiꞌica.
\v 55 Mɨ paj huaꞌacuiꞌica, ¿aꞌuni aꞌij een ɨ paj cɨn huaꞌutyaamueꞌitɨ? Capu meꞌe eꞌeseijreꞌe xaa nyaꞌu.” Ajta ayan tɨcɨn: “Mɨ paj cɨn tihuaꞌupueij, ¿aꞌuni aꞌij een? Capu xaa nyaꞌu maꞌa jaꞌahuaꞌa.”
\p
\v 56 Ajta aɨjna tɨ cɨn tihuaꞌapueijteꞌe aɨjna tɨ ajta huaꞌacuiꞌica, ai pu aɨjna jetze araujcaꞌanyen ɨ maj cɨn atyaꞌɨtzaꞌara ɨ Dioj jemi. Ajta aɨjna ɨ nyuucari ɨ maj cɨn tiꞌijta, ai pu aɨn pueen tɨ caꞌanijraꞌa huaꞌataꞌaca mej mi meyan autaꞌɨtzaꞌaraꞌan ɨ Dioj jemi.
\v 57 Ma ajta, ticheꞌe teyan rɨꞌɨ tirataꞌacareꞌen tyaɨjna ɨ Dioj tɨ ayan titataꞌaca tyej teyan tyuꞌutyamueꞌitɨn tyaɨjna cɨmeꞌe tyej jetzen ajtyamaꞌacan ɨ tavastaraꞌa, aɨjna ɨ Jesús tɨ ajta Cɨriistuꞌu pueen.
\p
\v 58 Aɨj xu cɨn seyan huarɨni, nyeꞌihuaamuaꞌa, mɨ nyaj aꞌamuaxeꞌeveꞌe huapɨꞌɨ. Sataꞌaj rɨꞌɨ tiꞌityeseiraꞌa aꞌanaj tɨ naꞌa, sataꞌaj sajta tyaꞌutaviicueꞌi tɨ ij cai aꞌatɨ amuaꞌariꞌi ɨ áꞌamuamuaꞌatziiraꞌa. Sataꞌaj sajta aꞌujcaꞌanyaacan cɨn tyuꞌumuareꞌen ɨ tavastaraꞌa jemi aꞌanaj tɨ naꞌa, aꞌini xuꞌuri ramuaꞌaree tɨ eecan huapɨꞌɨ tyajamuatyavaꞌɨri. Caxu huaapuaꞌa sanaꞌa tiꞌimuareꞌe tavastaraꞌa jetze maꞌacan.
\c 16
\s Cɨmeꞌen ɨ́ tumin ɨ maj huaꞌuhuaviiriꞌi huaꞌa cɨmeꞌe ɨ ruꞌihuaamuaꞌa
\p
\v 1 Cɨmeꞌen ɨ tumin sej rasaɨreꞌe sej si cɨn huaꞌutavaɨreꞌen aɨme ɨ mej Dioj jemi seijreꞌe, ayaa nu cheꞌeta nyanaꞌa tyajaꞌamueijcateꞌe aꞌij nyej neri tihuéijca aɨme ɨ mej eꞌetyujsaꞌɨri nain japua u Galacia.
\v 2 Ayaa xu huarɨni seij sajta seij, ajna xɨcajraꞌa tɨ jetzen tyaꞌutyeꞌitén ɨ iteeri. Cheꞌe seij ayan raꞌajtaꞌan ɨ ruche aꞌachu tɨ caj tiꞌixeꞌeviꞌiraꞌa, tɨ puaꞌa Dioj raataꞌa eihua nusu cɨj naꞌa. Cheꞌe aɨn rajsaɨreꞌen tɨj naꞌa sei iteeri tɨ ij cai cheꞌe ayan ruxeꞌevaꞌa saj rajsaꞌɨrihuaꞌan ajna nyatɨꞌɨj nyaun aꞌatanyén.
\v 3 Nyatɨꞌɨj nyaun aꞌaraꞌasti, aj nu ni neyan huaꞌureꞌepijteꞌesin ɨ yuꞌuxari aɨme ɨ saj huaꞌantihuau mej mi maɨjna cɨn majta raꞌanyaꞌa aujna u Jerusalén ɨ sej seri rajsaɨj saj huaꞌutapueijveꞌesin.
\v 4 Tɨ puaꞌa ajta ayan tinaꞌamitejtyaꞌa tɨ ayan titaatyavaꞌɨri nyaj nyajta nyaun áꞌumeꞌen, aɨ mu majta aꞌujuꞌu muaꞌajuꞌun nyeetzi jamuan.
\s Aꞌij tɨ nuꞌu huarɨni tɨꞌij aun aꞌuméꞌen seij chuejraꞌa japua
\p
\v 5 Nyatɨꞌɨj nyaun anacai aꞌatanyén u Macedonia, aj nu ni amuumuaarin. Me nyajta inyaa, nyauj miꞌi nyaun u aꞌatanyén u Macedonia.
\v 6 Tij nyacai aꞌatzu muejmi jemi aꞌateeri, naꞌari neyan aꞌatyeeviꞌin tɨj naꞌa tɨ huaseeviꞌi aꞌame sej si seyan naatyavaɨreꞌen saɨjna cɨmeꞌe aꞌu tɨ naꞌa nyaj áꞌumej.
\v 7 Canu neyan raxeꞌeveꞌe nyaj ijii nyanaꞌa amuaaseij nyej ni aꞌatzu nyanaꞌa amuaamuaare, silu ayaa nu raxeꞌeveꞌe nyej ni aꞌatyeeviꞌin nyaj nyaun aꞌucatii muejmi jemi, tɨ puaꞌa ayan tinataꞌacareꞌen ɨ tavastaraꞌa.
\p
\v 8-9 Me nyajta inyaa, au nu aꞌutyaváa naꞌame nyaujna u Efeso asta naꞌa cai tyajaꞌureꞌenyen ajna matɨꞌɨj tiꞌiyeste maɨjna cɨmeꞌe taꞌaraahuaꞌapua tɨ araꞌase i iteeri. Ee xaa, ayaa nu huarɨni aꞌini naa pu tinaavaɨ aɨjna cɨmeꞌe ɨ nyej tiꞌimuareꞌe nyej ni eihua huapɨꞌɨ raatyavaɨreꞌen ɨ tavastaraꞌa. Capu amɨn aꞌij mej eihua nyejchaɨreꞌe.
\p
\v 10 Ajta, tɨꞌɨj aun aꞌatanyén aɨjna ɨ Timuteeyu, sataꞌaj rɨꞌɨ tirájchaɨɨca tyamuaꞌa naa, aꞌini aɨ pu ayan cheꞌeta naꞌa tiꞌivaɨreꞌe ɨ tavastaraꞌa jemi nyatɨj inyaa.
\v 11 Cheꞌe cai aꞌatɨ raxaahuata. Tɨꞌɨj ajtahuaꞌa u aꞌarajraꞌani, sataꞌaj raataꞌan tɨj naꞌa tɨ ayan ruxeꞌeveꞌe tɨ ij ajtahuaꞌa ya raꞌasti nyeetzi jemi. Ayaa nu rachuꞌeveꞌe tɨ aɨn ya huacati huaꞌa jamuan ɨ seica ɨ taꞌihuaamuaꞌa.
\p
\v 12 Ajta aɨjna ɨ taꞌihuaaraꞌa, aɨjna ɨ Apolos, eecan nu caꞌanijraꞌa raataꞌacaraꞌa naꞌayeꞌi tɨ muejmi jemi aꞌatanyén huaꞌa jamuan ɨ seica ɨ taꞌihuaamuaꞌa. Ma ajta aɨn, capu aꞌuyeꞌimɨɨ aꞌaraa. Aj pu nuꞌu aun aꞌatanyejsin muejmi jemi tɨꞌɨj huatácɨꞌɨpáaca.
\s Ɨ nyuucari tɨ cɨn raꞌantipuaꞌari
\p
\v 13 Rɨꞌɨ xuꞌu muan. Sataꞌaj rɨꞌɨ tiꞌityeseiraꞌa saɨjna cɨmeꞌe saj raꞌastijreꞌe ɨ tavastaraꞌa. Sataꞌaj sajta huatyaujcaꞌanyen ɨ rutzajtaꞌa. Sataꞌaj sajta araujcaꞌanyen saɨjna jetze ɨ xaijnyuꞌucaraꞌaraꞌan ɨ Dioj sej si tyaꞌutaviicueꞌi.
\v 14 Satɨj sanaꞌa sej seyan rɨcɨ, sataꞌaj seyan rɨjca saɨjna cɨmeꞌe saj huaujxeꞌeveꞌen.
\p
\v 15-16 Xuꞌuri ramuaꞌaree ai mu aɨn pueen ɨ maj anacai huataujtuꞌiriꞌi ɨ tavastaraꞌa jemi ayujna Acaya aɨme ɨ tyaɨtestyamuaꞌameꞌen aɨjna ɨ Estéfanas. Aɨ mu majta meri maɨjna cɨn autyajhuii maj huaꞌutyavaɨreꞌen aɨme ɨ mej Dioj jetze ajtyamaꞌacan. Ayaa nu caꞌanijraꞌa amuaataꞌaca, nyeꞌihuaamuaꞌa, sej si huaꞌatzaahuatyaꞌa aɨme, sajta naijmiꞌica ɨ tyaɨte ɨ mej meyan cheꞌeta manaꞌa tiꞌimuareꞌe tyatɨj ityan, ɨ maj majta tzaahuatiꞌiraꞌa cɨn tiꞌivaɨreꞌe tavastaraꞌa jetze maꞌacan.
\p
\v 17 Nyaa nu xaa huatantyamuaꞌave matɨꞌɨj ya raꞌa, aɨjna ɨ Estéfanas jamuan aɨjna ɨ Fortunato, ajta aɨjna ɨ Acaico. Aɨ mu xaa rɨꞌɨ tinaataꞌa maɨjna cɨmeꞌe maj ya náamuaaracaꞌa muejmi jetze maꞌacan tɨ ij cai tiꞌitɨ naꞌaturaatyaꞌa.
\v 18 Aɨ mu rɨꞌɨ tinaataꞌa yu nyatzajtaꞌa. Majta mu rɨꞌɨ amuaataꞌasin muejmi ɨ aꞌamua tzajtaꞌa. Ayaa pu tyuꞌujxeꞌeveꞌe saj rɨꞌɨ tihuaꞌutaꞌan naijmiꞌica ɨ tyetyaca mej meyan eꞌen matɨj aɨme ɨ maj hueica.
\p
\v 19 Ya mu áꞌamuataujteꞌe aɨme ɨ mej eꞌetyujsaꞌɨri huaꞌateyujtaꞌa tɨ ayun seijreꞌe tɨj naꞌa tɨ ayun huatacáꞌa iiya Asia. Ajta aɨjna ɨ Aquila, ajta aɨjna ɨ Priscila, aɨ mu tyamuaꞌa naa áꞌamuataujteꞌe nyuucajtzeꞌen ɨ tavastaraꞌa. Ayaa mu cheꞌeta manaꞌa ya áꞌamuataujteꞌe naijmiꞌi ɨ mej eꞌetyujsaꞌɨri aꞌu mej eꞌeche aɨjna ɨ Aquila, ajta aɨjna ɨ Priscila.
\v 20 Naimiꞌi ɨ taꞌihuaamuaꞌa ɨ mej ya huati, aɨ mu majta áꞌamuataujteꞌe. Sataꞌaj huaujtaujteꞌen tyamuaꞌa naa, suꞌityaujvisiꞌitɨmuaꞌacareꞌe nyuucajtzeꞌen ɨ tavastaraꞌa.
\p
\v 21 Nyajta inyaa, i nyaj Pablo pueen, nyamuajcaꞌa nu cɨn tyajaꞌamuayuꞌuseꞌe nyej ni nyajta amuaatataujteꞌen.
\p
\v 22 Tɨ puaꞌa aꞌatɨ cai raxeꞌevaꞌa ɨ tavastaraꞌa, cheꞌe ayan pueijtzi raacɨꞌɨti. Cheꞌe ya uvéꞌenyen ɨ tavastaraꞌa.
\p
\v 23 Cheꞌe aɨn tavastaraꞌa, aɨjna ɨ Jesús, cheꞌe aɨn rɨꞌɨ tyajamuataꞌacareꞌen.
\v 24 Eihua nu nyajta aꞌamuaxeꞌeveꞌe nyaɨjna cɨmeꞌe saj sajta saɨjna jetze ajtyamaꞌacan ɨ tavastaraꞌa, aɨjna ɨ Jesús. Yaa puꞌu, cheꞌe ayan tyajaꞌureꞌenyen.