\id 2CO
\h 2 Corintios
\toc1 2 Corintios
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Corinto aꞌuchaatɨmaꞌacaa, ɨ tɨ huaꞌapua
\c 1
\s Aɨ pu tihuáꞌataujteꞌe
\p
\v 1 Inyaa, i nyaj iꞌi Pablo, nyaa nu seij nyaɨn pueen tɨ Dioj ayan tinyeijca ruxéꞌeviꞌiraꞌa cɨmeꞌe nyej ni neyan tihuaꞌutaꞌixaateꞌen aꞌij tɨ tiꞌitɨ tiꞌiseijreꞌe ɨ Cɨriistuꞌu jemi, ɨ tɨ ajta iꞌi Jesús. Jamuan aɨjna ɨ taꞌihuaaraꞌa aɨjna ɨ Timuteeyu, ayaa tu tyajaꞌamuayuꞌuseꞌe mɨ sej eꞌetyujsaꞌɨri sej si ratyaanajche ɨ Dioj, mɨ sej Corinto aꞌuchaatɨme, tyajta teyan tihuaꞌayuꞌuseꞌe naijmiꞌica ɨ mej Dioj jemi seijreꞌe, matɨj manaꞌa ɨ maj maun aꞌuchaatɨme tɨj naꞌa tɨ aun huatacáꞌa u Acaya.
\v 2 Cheꞌe aɨjna ɨ Dioj, ɨ tyaj rajyaꞌupua, ajta aɨjna ɨ tavastaraꞌa, aɨjna ɨ Jesús tɨ ajta Cɨriistuꞌu pueen, micheꞌe rɨꞌɨ tyajamuaataꞌacareꞌen, majta rɨꞌɨ tyajamuaatyapuaꞌariteꞌen sej si tyamuaꞌa naa, ruꞌihuáamuaꞌataa xaꞌaraꞌani.
\s Ɨ tɨ nuꞌu cɨn rajpueijtzi ɨ Pablo
\p
\v 3 Ticheꞌe rɨꞌɨ tiraataꞌacareꞌen tyaɨjna ɨ Dioj tɨ ajta yaꞌupuaaraꞌan pueen ɨ tavastaraꞌa, aɨjna ɨ Jesús tɨ ajta Cɨriistuꞌu pueen. Aɨjna ɨ Dioj, ai pu aɨn pueen ɨ tyaj rajyaꞌupua tɨ ajta nain cɨn taꞌacuꞌuvaa aꞌayeꞌi, ai pu aɨn pueen ɨ Dioj tɨ ajta nain cɨn rɨꞌɨ taarúꞌu.
\v 4 Aɨ pu ajta rɨꞌɨ taarúꞌu aɨjna cɨmeꞌe ɨ tyaj cɨn áꞌaviicueꞌiraꞌa taꞌayeꞌi tej ti teyan cheꞌeta tyanaꞌa rɨꞌɨ huaꞌanrúꞌureꞌen aɨme ɨ mej tiꞌitɨj cɨn áꞌaviicueꞌireꞌe. Aɨj tu cɨn ticheꞌe teyan rɨꞌɨ huaꞌanrúꞌureꞌen tyaɨjna cɨmeꞌe ɨ tɨ cɨn Dioj ajta rɨꞌɨ taarúꞌu.
\p
\v 5 Ayej xaa nyaꞌu tiꞌayajna tɨ tyamuaꞌa naa ayan tiꞌitacɨꞌɨpuaca aɨjna tɨ cɨn ajta rajpueijtzicaꞌa aɨjna ɨ Cɨriistuꞌu. Ayan cheꞌeta naꞌa Cɨriistuꞌu ajta tyamuaꞌa naa rɨꞌɨ taarúꞌu tej ti tyaꞌutaviicueꞌi.
\v 6 Tɨ puaꞌa teyan tiꞌitɨj cɨn áꞌaviicueꞌiraꞌa, ayaa pu ajta tiꞌivaɨreꞌe tɨ ij Dioj rɨꞌɨ amuaꞌanrúꞌureꞌen, ajta amueꞌirajtuaani. Ajta, tɨ puaꞌa Dioj ayan rɨꞌɨ taꞌanrúꞌureꞌe, ayaa pu ajta tiꞌivaɨreꞌe tɨ ij ajta aɨn rɨꞌɨ amuaꞌanrúꞌureꞌen. Ayaa pu xaa tyajaꞌamuaruure muejmi tɨ puaꞌa seyan cheꞌeta sanaꞌa tyamuaꞌa naa tyaꞌutaviicueꞌi ɨ saj cɨn rajpueijtzi tyatɨj ityan tirajpueiitzi.
\p
\v 7 Ayaa pu titaꞌamitejteꞌe sej seyan xaa nyaꞌu teꞌeviicueꞌi, aꞌini ayaa tu tiꞌijmuaꞌaree tɨ ayan cheꞌeta sanaꞌa tyajaꞌamuacɨꞌɨpuaca sej seyan rajpueijtzi tyatɨj ityan, ajta Dioj pu ayan cheꞌeta naꞌa rɨꞌɨ amuaꞌanrúꞌuraꞌa aꞌame muejmi tɨj ajta rɨꞌɨ titaꞌanrúꞌuraꞌa aꞌame itejmi.
\p
\v 8 Ayaa tu tiꞌijxeꞌeveꞌe, taꞌihuaamuaꞌa, sej raamuaꞌaree aꞌij tyaj tirajpueijtzicaꞌa tyatɨꞌɨj tyaun aꞌutyáꞌacaa aujna u Asia. Eecan tu huapɨꞌɨ áꞌaviicueꞌiraꞌacaa, asta naꞌa cai utyaavatzɨ ɨ tatzajtaꞌa. Ayaa pu titaꞌamityejtyaꞌacaa tyaj cai cheꞌe aꞌij huarɨni.
\v 9 Ee tzɨteꞌe, ayaa pu titaꞌamityejtyaꞌacaa ɨ tatzajtaꞌa tyaj huacuiꞌini. Ma ajta, ayaa pu aɨjna cɨn taaruu tej ti cai tajɨɨmuaꞌa áꞌatatzaahuatyaꞌa silu tej ti tyaɨjna jetze aratacaꞌanyen ɨ Dioj tɨ huaꞌajjáꞌajpuana ɨ mej meri huacuii.
\v 10 Aɨ pu ayan tuꞌirajtuaa tɨ ij cai ayan titáacɨꞌɨti tej tyaɨjna cɨn huacuiꞌini tɨ huapɨꞌɨ aꞌij puaꞌa seijreꞌe. Aɨ pu ajta aucheꞌe tuꞌirajtuaasin. Ee xaa nyaꞌu, ayaa tu tiꞌijchuꞌeveꞌe tɨ aɨn ajtahuaꞌa tuꞌirajtuaani.
\p
\v 11 Ma ajta, ayaa pu tyuꞌujxeꞌeveꞌe saj saɨjna cɨn taatavaɨreꞌen saj rahuaviira ɨ Dioj itejmi cɨmeꞌe, mej mi majta muiꞌitɨ meyan rɨꞌɨ tiraataꞌacareꞌen ɨ Dioj itejmi cɨmeꞌen maɨjna cɨmeꞌe tɨ aɨn Dioj ayan cheꞌeta naꞌa rɨꞌɨ titaatáꞌa itejmi aꞌij sej seri muiꞌitɨ tiraahuaviiriꞌi.
\s Aꞌini nuꞌu een cɨmeꞌe cai u aꞌatanye u Corinto aɨjna ɨ Pablo
\p
\v 12 Aɨj tu xaa cɨn áꞌatatzaahuateꞌen. Ajta aɨn ɨ taxaijnyuꞌuca ayan tiꞌitaꞌixaateꞌe tɨ ayan tiꞌayajna tyej teyan rɨꞌɨ tiꞌititachaꞌɨ huaꞌa jemi ɨ mej iiyan seijreꞌe chaanaca japua, tyajta eitzeꞌe rɨꞌɨ tiꞌititachaꞌɨ muejmi jemi. Tɨj naꞌa tej teyan huarɨj, ayaa tu tzaahuatiꞌiraꞌa cɨn teyan rɨjcaa ɨ Dioj jemi, nain cɨmeꞌe aꞌij tɨ tiraavijteꞌe. Catu teyan tiꞌijrɨꞌɨrajcaa aꞌij mej tiꞌijrɨꞌɨre ɨ tyetyaca mej iiyan seijreꞌe ɨ chaanaca japua silu Dioj pu ayan rɨꞌɨ titaatáꞌa.
\v 13-14 Ajta, ɨ nyaj tyajaꞌamuayuꞌuseꞌe, ayaa puꞌu naꞌa aɨn pueen aꞌij saj sanaꞌa tiraayɨꞌɨtɨ saj raꞌujijveꞌen, aꞌij saj sanaꞌa sajta tiyauꞌeite. Ayaa nu nyajta tiꞌijxeꞌeveꞌe saj raamuaꞌaree nain cɨmeꞌe tyaj tyaɨn pueen ɨ saj cɨn rɨꞌɨ tiraataꞌasin ɨ Dioj. Ee xaa, xuꞌuri seyan raamuaꞌareeriꞌi. Sajta muan, muan xu saɨn pueen ɨ tyaj cɨn rɨꞌɨ tiraataꞌasin ajna xɨcajraꞌan tɨ jetzen ajtahuaꞌa huataseijreꞌesin aɨjna ɨ tavastaraꞌa, aɨjna ɨ Jesús.
\p
\v 15 Aꞌini ayaa pu tinaꞌamitejtyaꞌacaa, ayaa nu tiraaxaꞌapɨꞌɨntare nyaj anacai nyaun aꞌatanyén muejmi jemi nyej ni huaꞌapua rɨꞌɨ tyajamuaataꞌan.
\v 16 Ayaa nu tiꞌijxeꞌevaꞌacaa nyaj amuaamuaare nyatɨꞌɨj nyaun aꞌumeꞌen u Macedonia, nyajta nyatɨꞌɨj nyaun pɨ eꞌejveti nyajtahuaꞌa amuaamuaare. Nyajta neyan raxeꞌevaꞌacaa saj seyan tiraaxaꞌapɨꞌɨntareꞌen ɨ saj cɨn naatyavaɨreꞌen nyej ni nyaun áꞌumeꞌen u Judea.
\v 17 ¿Aꞌini tyajamuaꞌamitejteꞌe muejmi? ¿Ni qui seyan tinaꞌaseijrateꞌe tɨ cai rɨꞌɨri saj naꞌantzaahuateꞌen saɨjna cɨmeꞌe nyaj nuꞌu cai tzaahuatiꞌiraꞌa cɨn tiꞌixaꞌapɨꞌɨntareꞌe? Me nyajta inyaa, canu xaa nyaꞌu neyan een, aꞌini canu neyan tiꞌijrɨꞌɨre matɨj aɨme ɨ tyetyaca ɨ maj rujɨɨmuaꞌa tiꞌimuaꞌatze tɨcɨn “jee.” Ma ajta, capu ayan teꞌiraame.
\p
\v 18 Ma ajta Dioj, aɨ pu cai aꞌanaj atyaꞌɨtzaꞌara. Aɨj pu cɨn, aɨjna ɨ tyej teri amuaataꞌixaa, capu ayan een tɨ huaꞌapuaca cɨn huataujmuaꞌa. Aɨjna tɨ cɨmeꞌen raxaj yee “jee”, capu ajta ayan huataujmuaꞌa yee “capu”.
\v 19 Ajta aɨjna tɨ yaujraꞌan pueen ɨ Dioj, aɨjna ɨ Jesús tɨ ajta Cɨriistuꞌu pueen, tyan tu teyan cɨmeꞌen amueꞌixaa inyaa, jamuan aɨjna ɨ Silvano, ajta aɨjna ɨ Timuteeyu. Aɨjna ɨ Cɨriistuꞌu, nain pu cɨn tihuaujmuaꞌatziityaꞌa, ajta raxaꞌapɨꞌɨntareꞌe. Aɨjna jemi tɨj naꞌa ɨ nyuucari tɨ cɨmeꞌen raxaj yee “jee”, aꞌanaj tɨ naꞌa pu ayan teꞌiraame tɨcɨn “jee”.
\v 20 Ajta nain ɨ tɨ cɨn Dioj tyaꞌataujratziiriꞌi, aɨ pu araurastejsin ɨ Cɨriistuꞌu jetze. Aɨj tu cɨn teyan tiꞌixaxaꞌa yee “jee”. Yaa pu tiꞌayajna ɨ jemin. Ayaa tu cɨn rɨꞌɨ tirataꞌaca ɨ Dioj.
\p
\v 21 Ma ajta Dioj, ai pu aɨn pueen ɨ tɨ rɨꞌɨ titájchaꞌɨ itejmi. Aɨ pu tyajamuájchaꞌɨ muejmi jemin ɨ Cɨriistuꞌu.
\v 22 Aɨ pu itejmi huatauraꞌate, ajta raatyajtuaa ɨ ruxaijnyuꞌuca itejmi jemi tej ti raamuaꞌaree tɨ aɨn ranaijmireꞌen ɨ tɨ ari taataꞌa.
\p
\v 23 Dioj pu ruꞌumuaꞌaree aꞌij nyej tiꞌimuaꞌatze. Canu tiꞌihueꞌi nyanaꞌa. Canu chaꞌa nyanaꞌa tiꞌixaꞌapɨꞌɨntareꞌe silu rɨꞌɨ nu tiꞌixaꞌapɨꞌɨntareꞌe. Ayaa nu een cɨn cai nyaun aꞌatanye muejmi jemi nyej ni cai amuaatamuáreꞌeristeꞌen.
\v 24 Catu xaa nyaꞌu teyan tyajaꞌamueijteꞌe sej si caꞌanyejri cɨn raꞌaraꞌastijreꞌen ɨ tavastaraꞌa, silu aꞌamua jamuan tu tiꞌimuareꞌe sej si saɨjna cɨn huataujtyamuaꞌaveꞌen, aꞌini muan xu raꞌastijraꞌa xaꞌayeꞌi tyamuaꞌa naa.
\c 2
\p
\v 1 Me nyajta inyaa, ayaa nu tihuanxaꞌapɨꞌɨntariꞌiriꞌi nyaj cai nyajtahuaꞌa amuaamuaare nyej ni cai nyajtahuaꞌa amuaatyaxaamɨsteꞌen.
\v 2 Ee xaa nyaꞌu, tɨ puaꞌa neyan amuaatyaxaamɨsteꞌen, ¿aꞌatyaɨnni manaꞌaqui maɨn pueenyaꞌa muaꞌajuꞌun ɨ mej naatátyamuaꞌavisteꞌesin inyeetzi? Capu cheꞌe sein aꞌatɨ, aꞌini muan xu saɨn pueen ɨ nyaj amuaatyaxaamɨste.
\p
\v 3 Ayaa nu een cɨn neyan tyajaꞌamuatayuꞌuse nyej ni ramuaꞌareera saj cai naatyaxaamɨsteꞌesin nyatɨꞌɨj nyaun aꞌaraꞌasti aꞌini ayaa pu tiraavijteꞌe saj naatátyamuaꞌavisteꞌen. Ma ajta, ayaa pu tinaꞌamitejtyaꞌacaa sej seyan eꞌen naijmiꞌi muan sej saɨjna cɨn huataujtyamuaꞌaveꞌen saɨjna cɨmeꞌe ɨ nyaj nyajta cɨn nyetyamuaꞌavi.
\v 4 Nyatɨꞌɨj tyajamuaatayuꞌuse, eihua pu aꞌij puaꞌa nyaꞌasajcaꞌa, nyajta nyeyeinya tyamuaꞌa. Ee xaa, huapɨꞌɨ pu nuꞌucuiꞌicaa yu nyatzajtaꞌa, aꞌini canu raxeꞌevaꞌacaa nyaj amuaatyaxaamɨsteꞌen, silu ayaa nu tiꞌijxeꞌevaꞌacaa saj ramuaꞌaree nyaj eihua huapɨꞌɨ aꞌamuaxeꞌeveꞌe.
\s Maj nuꞌu tiraatauuniꞌi aɨjna tɨ autyajturaa ɨ Pablo jemi
\p
\v 5 Ma ajta, tɨ puaꞌa aꞌatɨ ayan tiꞌitɨ cɨn aꞌij tyuꞌuruu tɨ i aꞌatɨ huataujxaamɨsteꞌen, capu ayan nyeetzi naꞌa huáruu silu eꞌicaj pu ajta muejmi ayan huáruu. Ayaa nu een cɨn tyajaꞌamueꞌixaateꞌe nyej ni cai eihua amuaatamuáreꞌeristeꞌen naijmiꞌica muejmi.
\v 6 Puꞌuri aɨ puꞌu ɨ maj muiꞌitɨ meri meyan pueijtzi raataꞌa aɨjna ɨ aꞌatɨ tɨ ayan huarɨj.
\v 7 Aɨj pu cɨn, ayaa pu ari tyuꞌujxeꞌeveꞌe saj tiraatauuniꞌi, sajta rɨꞌɨ raꞌanrúꞌureꞌen. Naꞌari cai, aɨ pu mueꞌitɨcheꞌen nain cɨmeꞌe aɨjna cɨmeꞌe tɨ eihua huapɨꞌɨ ruxaamɨsteꞌe.
\p
\v 8 Aɨj nu cɨn neyan caꞌanijraꞌa aꞌamuataꞌasin saj sajtahuaꞌa seyan tiraataseijrateꞌen saj sauj raxeꞌeveꞌe.
\v 9 Ayaa nu een cɨn tyajamuaatayuꞌuse nyej ni amuaatyeeseij aꞌij sej titetyújchaꞌɨ muan, ajta nyej ni ramuaꞌaree tɨ puaꞌa seyan nain cɨn tyaꞌaste.
\v 10-11 Aꞌatɨ tɨ naꞌa saj tiraatauuniꞌi, nyaa nu nyajta neyan cheꞌeta nyanaꞌa tiraatauuniꞌira. Tɨ puaꞌa neyan tiꞌitɨ cɨn tiraatauuniꞌiriꞌi, tiꞌitɨ tɨ naꞌa, ayaa nu een cɨn tiraatauuniꞌiriꞌi nyej ni aꞌamua japua huanyuuni ɨ Cɨriistuꞌu jemi tɨ ij cai aɨn Satanás tiꞌitɨ cɨn taꞌantimueꞌitɨn, aꞌini tyan tu xaa ramuaꞌaree aꞌij tɨ aɨn eenyeꞌequeꞌe tiꞌimuareꞌe.
\s Aꞌij pu nuꞌu puaꞌa tiraataꞌacaraꞌa aɨjna ɨ Pablo tɨꞌɨj auj aꞌucatii u Troas
\p
\v 12 Nyatɨꞌɨj nyaun aꞌaráꞌa nyaujna u chajtaꞌana tɨ ayan tyajaꞌarajtyahuaa tɨcɨn Troas, nyej ni nyaun tihuaꞌutaꞌixaateꞌen ɨ nyuucari tɨ cɨmeꞌen raxa ɨ Cɨriistuꞌu, nyavastaraꞌa pu ayan naataꞌa nyej ni nyaxaahua tyamuaꞌa naa tihuaꞌutaꞌixaateꞌen ɨ tyaɨte.
\v 13 Me nyajta, eihua nu huapɨꞌɨ tiꞌimuajcaa nyaɨjna cɨmeꞌe nyaj cai ráatyau ɨ nyeꞌihuaaraꞌa, nyaɨjna ɨ Tito, tɨ cai aun autyavaacaꞌa. Aɨj nu cɨn huaꞌutatautyaꞌa, nyaun áꞌumej u Macedonia.
\s Tyaj nuꞌu tyuꞌutyamueꞌitɨn jamuan ɨ Cɨriistuꞌu
\p
\v 14 Ajta, tyamuaꞌa tu rɨꞌɨ tiraataꞌasin tyaɨjna ɨ Dioj tɨ ayan taataꞌaca tyamuaꞌa naa tyaj tyuꞌutyamueꞌitɨn jamuan ɨ Cɨriistuꞌu. Cu xuee tyaj cuj ityan eꞌitaꞌa huajuꞌun, ajta aɨ pu Cɨriistuꞌu anacai huameꞌen, majta tacujtaꞌa huajuꞌun ɨ tyej teri huaꞌutyaamueꞌitɨ. Ajta aꞌu tɨ naꞌa tyaj eꞌitaꞌa huajuꞌun Dioj pu ayan raruure tɨ tyejmi jetze aꞌiráninyei aɨjna tɨ naa tyaꞌaaca ɨ maj cɨn ráamuaꞌati.
\p
\v 15 Tyajta ityan, ayaa tu seijreꞌe ɨ Dioj jemi. Cu xuee tyaj cuj ityan raatɨsin ɨ tɨ naa tyaꞌaaca aɨjna cɨmeꞌe tyej teyan Cɨriistuꞌu jetze ajtyamaꞌacan. Ayaa tu cheꞌeta tyanaꞌa seijreꞌe huaꞌa jemi ɨ tɨ Dioj hueꞌirajtuaasin, ajta huaꞌa jemi ɨ mej áꞌapuaꞌaren.
\v 16 Ayaa pu een aɨme jemi ɨ seica ɨ mej áꞌapuaꞌaren, ayaa pu huaꞌa jemi tyaꞌaaca tɨj tiꞌitɨ tɨ huamɨꞌɨ ɨ maj cɨn majta aꞌapuaꞌare. Ajta aɨme ɨ seica ɨ tɨ Dioj hueꞌiratuaasin, ayaa pu huaꞌa jemi tyaꞌaaca tɨj tiꞌitɨ tɨ ruuri tɨ naa tyáaráꞌi ɨ maj cɨn huaujrujteꞌen. ¿Aꞌatani ayan aꞌavejre tɨꞌi ayan tyuꞌutyavaɨreꞌen ɨ Dioj jemi? Capu xaa nyaꞌu ma aꞌa aꞌatɨ tɨ ayan aꞌavejre.
\p
\v 17 Me tyajta ityan, catu teyan eꞌen matɨj ɨ seica, ɨ maj muiꞌitɨ, ɨ mej meyan huataujvaɨreꞌen ɨ maj cɨn ramueꞌitɨcɨ maɨjna cɨmeꞌe maj ramuareꞌe ɨ nyuucari tɨ cɨmeꞌen raxa ɨ Dioj. Me tyajta ityan, ayaa tu tzaahuatiꞌiraꞌa cɨn tiꞌititachaꞌɨ aꞌini Dioj pu taꞌantihuau. Tyajta ityan, ayaa tu ɨ Dioj jemi tiꞌixaxaꞌa tɨj saɨj tɨ Cɨriistuꞌu jetze maꞌacan tiꞌivaɨreꞌe.
\c 3
\s Aɨjna ɨ nyuucari tɨ jajcuacan cɨn tyaꞌataujratziiriꞌi ɨ Dioj
\p
\v 1 ¿Ni qui ayan tyajamuaꞌamitejteꞌe tyaj tyajtahuaꞌa autyajhuii tej tyajɨɨmuaꞌa teyan rɨꞌɨ tiꞌitataꞌaca muejmi jemi? Naꞌari, ¿ni qui ayan ruxeꞌeveꞌe tɨ aꞌatɨ ayan yuꞌuxari autyéyuꞌuxan ɨ tɨ cɨn rɨꞌɨ tyajamuataꞌaca itejmi cɨmeꞌe nusu ayan tyuꞌujxeꞌeveꞌe saj raꞌutéyuꞌuxan ɨ sej jetzen rɨꞌɨ tiꞌitataꞌaca itejmi? Seica jemi pu xaa ayan tyuꞌujxeꞌeveꞌe, aru ityejmi jemi, capu.
\p
\v 2 Muan xu rujɨɨmuaꞌa sanaꞌa saɨn pueen ɨ tɨ titaatyavaꞌɨri tɨj yuꞌuxari ɨ tyaj cɨn huatataseijrata huaꞌa jemi, matɨj manaꞌa puaꞌamua yen seijreꞌe mej mi raꞌujijveꞌen, maj yauꞌeitaa muaꞌaraꞌani.
\v 3 Muan xu xaa seyan eꞌen tɨj yuꞌuxari tɨ Cɨriistuꞌu jetze aꞌuveꞌeme. Ma ajta, capu tetej jetze áꞌayuꞌusiꞌihuacaꞌa silu aɨn ɨ xaijnyuꞌucaraꞌaraꞌan ɨ Dioj, aɨ pu raatyajtuaa muejmi jemi tɨꞌij ayan aꞌamua tzajtaꞌa tyuꞌuseiraꞌa aꞌaraꞌani mɨ saj sauj ruuri.
\v 4 Ayaa tu tyaꞌatzaahuateꞌe aꞌini Cɨriistuꞌu pu ayan tiꞌiseijreꞌe ɨ Dioj jemi.
\p
\v 5 Capu ayan tiraavijteꞌe tyaj tyajɨɨmuaꞌa teyan tyuꞌutaxaj yee tejmi pu jetze seijreꞌe ɨ muareꞌeriꞌiraꞌa tej ti teyan raayɨꞌɨtɨhuaꞌan silu aɨjna ɨ tyaj jetzen aratacaꞌanye, aɨ pu aun aꞌuveꞌeyeꞌi ɨ Dioj jemi.
\v 6 Ajta aɨn Dioj, aɨ pu ayan taꞌantihuau tej ti teyan tyaɨjna cɨn tyuꞌutyavaɨreꞌen, aɨjna ɨ nyuucari tɨ jajcua tɨ Dioj ajta cɨn tyaꞌataujratziiriꞌi. Tyajta ityan, catu tyaɨjna cɨn tiꞌimuareꞌe tɨ aꞌayuꞌusiꞌi tetej jetze, silu aij tu cɨmeꞌen tɨ ayan seijreꞌe tɨ jetzen aꞌiráninyei ɨ xaijnyuꞌucaraꞌaraꞌan ɨ Dioj.
\p Ajta aɨn ɨ nyuucari tɨ áꞌayuꞌusiꞌihuacaꞌa ɨ tetej jetze, aɨ pu ayan huaꞌataꞌaca mej mi meyan aꞌatɨ aꞌuxɨ́jteꞌen tɨ ij aɨn huamɨꞌɨni. Ma ajta aɨn ɨ xaijnyuꞌucaraꞌaraꞌan ɨ Dioj, aɨ pu ruurican aꞌihuatyajtuaani.
\p
\v 7 Ma ajta aɨn ɨ nyuucari ɨ maj cɨn meyan aꞌatɨ aꞌuxɨ́jteꞌen tɨꞌi aɨn huamɨꞌɨni, ayaa pu áꞌayuꞌusiꞌihuacaꞌa tetej jetze tɨ aꞌuraꞌatzatzeihuacaꞌa. Eecan pu huapɨꞌɨ naa seijraꞌacaa tɨꞌɨj Dioj ayan raatyajtuaa aɨjna jemi ɨ Moisés. Ajta aɨn Moisés, ayaa pu huapɨꞌɨ tyataatɨyeꞌicaa ɨ nyeerimaꞌaraꞌan jetze. Majta aɨme ɨ maj Israel jetze ajtyamaꞌacan, capu rɨꞌɨristacaꞌa maj raꞌaraaseij ɨ Moisés aɨjna cɨmeꞌe tɨ ayan huapɨꞌɨ tyataatɨyeꞌicaa ɨ nyeerimaꞌaraꞌan jetze. Ma ajta, aɨ pu tyapuaꞌarijmaꞌacaa.
\p
\v 8 Ajta aɨn tɨ cɨn tiꞌivaɨreꞌe aɨjna ɨ xaijnyuꞌucaraꞌaraꞌan ɨ Dioj, ¿ni cai ayan eihua huapɨꞌɨ eitzeꞌe naa seiiraꞌa aꞌaraꞌani?
\v 9 Ee xaa nyaꞌu, ayaa pu tiꞌayajna. Tɨ puaꞌa ayan eihua huapɨꞌɨ naa seijraꞌacaa ajnaꞌɨmɨ tɨꞌɨj Dioj raatyajtuaa ɨ nyuucari ɨ maj cɨn aꞌatɨ aꞌuxɨ́jteꞌen, ayaa pu tyuꞌujxeꞌeveꞌe tɨ eitzeꞌe huapɨꞌɨ naa seiraꞌa aꞌaraꞌani aɨjna nyuucari tɨ rataꞌaca ɨ aꞌatɨ tɨ aɨn urareꞌenyaꞌacan cɨn huatyaturan ɨ Dioj jemi.
\p
\v 10 Ee tzɨteꞌe, ayaa pu tiꞌayajna, aɨ pu ajmiꞌi huapɨꞌɨ naa seijraꞌacaa aɨjna ɨ nyuucari tɨ raatyajtuaa ɨ Moisés jemi. Ajta ijii, capu cheꞌe naa seijreꞌe aɨjna cɨmeꞌe tɨ ari seij huataseijre tɨ eitzeꞌe huapɨꞌɨ naa seijreꞌe.
\v 11 Ajta, tɨ puaꞌa ayan náa eenyeꞌen huataseijre aɨjna tɨ ajta tyápuaꞌari, eitzeꞌe pu huapɨꞌɨ naa seiraꞌa aꞌame aɨjna ɨ tɨ ayan huatyaturaasin tɨj naꞌa rusen cɨmeꞌe.
\p
\v 12 Aꞌini tuꞌuri teyan rachuꞌeveꞌe ɨ Dioj jemi tɨ ayan teꞌirajraꞌani, aɨj tu cɨn teyan taxaahua tihueꞌixaateꞌe, tyajta cai tiꞌitzɨɨnyaꞌa.
\v 13 Catu teyan rɨcɨ aꞌij tɨj aɨn Moisés huarɨj tɨ cɨɨxuri cɨn araujna ɨ runyeerimaꞌa jetze mej mi cai raꞌaraaseij aɨme ɨ maj Israel jetze ajtyamaꞌacantacaa, mej mi cai raaseijra tɨꞌɨj tyápuaꞌarijmeꞌen aɨjna tɨ tyataatɨyeꞌicaa.
\p
\v 14 Majta maɨn, aɨ mu cai huatauraꞌa maj yauꞌeitaa muaꞌaraꞌani. Ayaa mu huarɨj. Cu xuee maj cuj araujna cɨɨxuri cɨmeꞌe. Tɨj naꞌa ajnaꞌɨmɨ tɨ yu eꞌireꞌenye, ayaa pu een seijreꞌe. Matɨꞌɨj raꞌajijvaꞌa maɨjna ɨ nyuucari tɨ miꞌimaꞌacan ɨ tɨ cɨn Dioj ayan anacai tyaꞌataujratziiriꞌi, aucheꞌe pu ayan seijreꞌe ɨ maj cɨn aranamiꞌi, ajta capu xɨ aꞌatɨ huaꞌutáxɨɨxɨ, aꞌini aɨ puꞌu raayɨꞌɨtɨ ɨ Cɨriistuꞌu.
\p
\v 15 Ee xaa nyaꞌu, ayaa pu tiꞌen ijii aꞌanaj tɨ naꞌa raxeꞌeveꞌe maj raꞌujijveꞌen aɨjna ɨ tɨ Moisés raꞌuyuꞌuxacaꞌa, maucheꞌe mu meyan aranamiꞌihuajmee mej mi cai yauꞌeitaa muaꞌaraꞌani.
\v 16 Ma ajta, tɨ puaꞌa aꞌatɨ ayan huataujtuꞌireꞌen ɨ tavastaraꞌa jemi, Dioj pu raꞌutáxɨjta aɨjna tɨ cɨn aránamiꞌihuacaꞌa.
\p
\v 17 Ajta aɨn ɨ tɨ iꞌi tavastaraꞌa, ajta aɨn ɨ tɨ iꞌi xaijnyuꞌucaraꞌaraꞌan, aɨ mu ruxaꞌaj een, ajta aꞌu tɨ aɨn eꞌeseijreꞌe ɨ xaijnyuꞌucaraꞌaraꞌan ɨ tavastaraꞌa, au pu aꞌarɨꞌɨri tɨ aꞌatɨ ruxaahua áꞌuchaꞌacanyeꞌen ɨ Dioj jemi.
\p
\v 18 Me tyajta ityan, ayaa tu eenyeꞌequeꞌe seijreꞌe. Ayaa tu seijreꞌe. Cu xuee tyaj cai aranamiꞌihuajmee, tyajta teyan cheꞌeta tyanaꞌa tyamuaꞌa naa tiꞌitaseijrata tɨj ajta aɨn tavastaraꞌa tyamuaꞌa naa tyuꞌujseijrata. Tyan tu saɨque huatyátaruurejsin tej ti teyan seiraꞌa taꞌaraꞌani tɨj tevijraꞌan ɨ tavastaraꞌa tej ti eitzeꞌe tyamuaꞌa naa rɨꞌɨ tiꞌitaseijratáa taꞌajuꞌun tɨj naꞌa tɨ yu aucaꞌitɨ aꞌame. Ajta, aɨ pu jetzen aꞌiráninyei ɨ tavastaraꞌa jetze, ajta aɨjna jamuan ɨ ruxaijnyuꞌuca.
\c 4
\s Aɨ mu nuꞌu tiꞌivaɨreꞌe ɨ Cɨriistuꞌu jemi
\p
\v 1 Tyajta ityan, tyan tu tyaɨjna cɨn tiꞌivaɨreꞌe ɨ Dioj jemi aɨjna cɨmeꞌe tɨ aɨn Dioj ayan táꞌancuꞌuvajxɨꞌɨ. Aɨj tu cɨn cai mueꞌitɨcheꞌe.
\v 2 Me tyajta ityan, tuꞌuri raataxaahuatacaꞌa tej tij teyan aꞌij puaꞌa rɨjcaa aviitzi cɨmeꞌe, tej tij tyajta cai teyan rɨjcaa aɨjna tɨ tyuꞌuteviꞌirasteꞌe, tej tij cai tiꞌitɨj cɨn tacuanamua. Catu áꞌatacaꞌanye tej teyan tiꞌitɨj cɨn tyuꞌuhuéꞌita. Catu tyajta áꞌatacaꞌanye tej saɨque tyuꞌutaxaj tyaɨjna cɨmeꞌe ɨ nyuucari tɨ cɨmeꞌen raxaj ɨ Dioj, silu ayaa tu ruunyátacan cɨn tiꞌixaxaꞌa tzaahuatiꞌiraꞌa cɨmeꞌe. Ayaa tu tyaɨjna cɨn rɨcɨ tej ti teyan tyuꞌutáseijrata huaꞌa jemi matɨj manaꞌa puaꞌamua ɨ tyaɨte tej ti caꞌanijraꞌa huaꞌutaꞌan mej mi raamuaꞌaree aꞌij tɨ ayan tiꞌayajna ɨ Dioj jemi.
\v 3 Ajta, tɨ puaꞌa ayan aꞌutanámiꞌi ɨ nyuucari ɨ tyaj cɨn tihueꞌixaateꞌe, ayaa puꞌu naꞌa aꞌutanámiꞌi huaꞌa jemi ɨ mej aꞌapuaꞌare.
\p
\v 4 Ai mu aɨn pueen ɨ tɨ huaꞌutanaamɨ ɨ huaꞌamuaꞌatziiraꞌa tzajtaꞌa aɨjna ɨ dioj tɨ naijmiꞌica tiꞌijteꞌe ɨ mej ijii huatyaɨte. Ayaa pu een cɨn huaꞌuruu mej mi cai yauꞌeitaa muaꞌaraꞌani ɨ nyuucari tɨ ayan tiꞌivaɨreꞌe tɨj tatzari tɨ huaꞌatatzaviꞌi ɨ huaꞌa tzajtaꞌa mej mi meyan raamuaꞌati maɨjna ɨ tavastaraꞌa tɨ ayan huapɨꞌɨ naa seijreꞌe. Aɨ pu ajta aɨn pueen ɨ tɨ nain cɨn ruxaꞌa een tɨj ɨ Dioj.
\p
\v 5 Ayaa pu xaa tiꞌayajna, aꞌini catu tajɨɨmuaꞌa tyanaꞌa tihueꞌixaateꞌe, silu aɨjna ɨ tyaj cɨmeꞌen tihueꞌixaateꞌe, aɨ pu aɨn pueen ɨ Jesús tɨ ajta iꞌi Cɨriistuꞌu. Ai pu ajta aɨn pueen ɨ tavastaraꞌa. Tyajta ityan, ayaa tu tyajaꞌamuavaɨreꞌe muejmi Jesús jetze maꞌacan.
\v 6 Ajta aɨn ɨ Dioj, ayaa pu jajcua ɨmɨ ayan tyuꞌutaxajtacaꞌa tɨcɨn: “Cheꞌe aꞌataaca ɨ taij ajna aꞌutɨ aꞌutɨcaꞌa.” Aɨ pu ajta utyátatzaracaꞌa yu tatzajtaꞌa, tɨ ij aɨn ayan taataꞌan tej yauꞌeitaa taꞌaraꞌani, aꞌij tɨ een cɨn huapɨꞌɨ naa seijreꞌe ɨ Dioj aɨjna cɨmeꞌe tɨ Cɨriistuꞌu aɨjna jemi seijreꞌe.
\s Tyaj nuꞌu tyuꞌutyamueꞌitɨ tyaɨjna cɨmeꞌe tɨ Dioj jetze aꞌiráninyei
\p
\v 7 Tyajta ityan, ayaa tu seijreꞌe ɨ Dioj jemi tɨj xaꞌari tɨ xarij cɨn taavijhua, ɨ tyaj tzajtaꞌan teri ruuhuásaɨj ɨ tɨ cɨn Dioj rɨꞌɨ titaatáꞌa, ɨ tɨ ajta huapɨꞌɨ tiꞌijnajchi. Ayaa pu een ɨ tɨ seijreꞌe tɨ aɨn muáreꞌeriꞌiraꞌaraꞌan tɨ nain cɨn tyuꞌutyamueꞌitɨn, capu tejmi jetze aꞌiráninyei, silu aij puꞌu jetze ɨ Dioj.
\v 8 Nain tu cɨn rajpueijtzi ityan. Me tyajta, catu aꞌatzu mueꞌitɨcheꞌen. Capu ajta aꞌij taꞌamitejteꞌe aꞌij tɨ teꞌeme. Me tyajta ityan, tyan tu aꞌij tirajtyauve aꞌij tyaj huarɨni.
\p
\v 9 Aɨme ɨ tyaɨte, aꞌij mu puaꞌa xaa taruuraa muaꞌayeꞌi. Ma ajta Dioj, capu ma tuuhuaꞌana. Aɨ mu xaa taꞌajɨpua. Ma ajta, camu taꞌantipuaꞌariteꞌesin.
\v 10 Aꞌu tɨ naꞌa tej aꞌacɨɨnye, ayaa tu cheꞌeta tyanaꞌa tiꞌipueijtiꞌihua taꞌajuꞌun, aꞌij tɨ eenyeꞌequeꞌe huamɨꞌɨ ɨ Jesús. Ayaa tu tyaɨjna cɨn rɨni, aꞌini tyan tu raꞌaviicueꞌi, ajta ayan cheꞌeta naꞌa seijreꞌe jemin ɨ tyaj ratyáhueꞌiraꞌa aɨjna tɨ cɨn Jesús ajta tataꞌaca tej tyauj ruuri.
\v 11 Aꞌini ityan, i tej tyauj ruuri, ayaa pu tiꞌitaruure, aꞌanaj tɨ naꞌa tu áꞌatacaꞌanye tyaj huacuiꞌini nyuucajtzeꞌen ɨ Jesús. Ajta aɨjna jemi ɨ tyaj ratyáhueꞌiraꞌa tɨ ajta áꞌapuapuaꞌare, aɨjna jemi pu ajta seiraꞌa aꞌame ɨ muareꞌeriꞌiraꞌa tɨ cɨn ajtahuaꞌa ruuri aɨjna ɨ Jesús.
\p
\v 12 Aɨj pu cɨn, tyan tu teyan rajpueijtzi tyaɨjna cɨmeꞌe tej teyan áꞌatacaꞌanye tej huacuiꞌini. Ma sajta muan, ruxaahua xu rɨꞌɨ titeecháatɨmee saɨjna cɨmeꞌe tyaj ityan rajpueijtzi.
\v 13-14 Ayaa pu teꞌeyuꞌusiꞌi tɨcɨn: “Nyaa nu tyaꞌantzaahua. Aɨj nu hui cɨn neyan tyuꞌutaxajtacaꞌa.”
\p Ayaa pu cheꞌeta naꞌa een itejmi jemi. Tyan tu tyajta tyaꞌatzaahuateꞌe, tyajta teyan tiꞌixaxaꞌa tyaɨjna cɨmeꞌe tej teri ramuaꞌaree tɨ aɨjna ɨ tɨ raꞌajjáj ɨ tavastaraꞌa, aɨjna ɨ Jesús, huaꞌa tzajtaꞌa ɨ mɨꞌɨchite, aɨ pu ajta taꞌajjájpuaxɨꞌɨsin jamuan ɨ Jesús. Aɨ pu ajta taataseijrata muejmi jamuan tej ti naimiꞌi huatyaturan ɨ jemin.
\v 15 Ajta nain tɨ ayan tyuꞌurɨj, aɨ pu tyajamuatyavaꞌɨri muejmi, aꞌini satɨꞌɨj eitzeꞌe huatámuiꞌire saɨjna cɨmeꞌe tɨ Dioj rɨꞌɨ tyajamuataꞌaca, eitzeꞌe xu huataujtyamuaꞌaveꞌesin sej si huapɨꞌɨ rɨꞌɨ tiraataꞌan ɨ Dioj.
\s Aɨjna tɨ áꞌapuapuaꞌare, ajta aɨjna tɨ seiraꞌa aꞌame tɨj naꞌa rusen cɨmeꞌe
\p
\v 16 Ayaa tu cɨn cai cataxáahuajyeꞌi. Ee xaa, aɨjna ɨ tyaj ratyáhueꞌiraꞌa tɨ me eijreꞌe seijreꞌe, aɨ pu áꞌapuapuaꞌare. Ma ajta ɨ tɨ yu tatzajtaꞌa seijreꞌe, aɨ pu rujajcuareꞌen aꞌanaj tɨ naꞌa nain xɨcaj tzajtaꞌa.
\v 17 Ajta aɨjna ɨ tyaj cɨn cɨj caj rajpueijtzi, tɨ ajta cai eihua ruxeꞌeveꞌe, aɨ pu ayan rɨꞌɨ taruure tej ti teyan raꞌancuraꞌan tyaɨjna tɨ huapɨꞌɨ naa seiraꞌa aꞌame tɨj naꞌa rusen cɨmeꞌe. Capu aꞌatzu rátiꞌasi aɨjna tɨ ijii seijreꞌe. Ajta eihua pu eitzeꞌe ruxeꞌeveꞌe cai ɨ tyaj cɨn rajpueijtzicaꞌa.
\v 18 Aɨj tu cɨn, catu áꞌatacaꞌane aɨjna jemi ɨ tɨ tiꞌitaavijhua, tɨ ajta me eijreꞌe seijreꞌe, silu aij tu jemi áꞌatacaꞌane tyaɨjna tɨ cai taavijhua, ɨ tɨ ajta cai me eijreꞌe seijreꞌe, aꞌini aɨjna tɨ ayan taavijhua, capu aꞌateeri. Ma ajta, aɨjna tɨ cai taavijhua, tɨ ajta cai me eijreꞌe seijreꞌe, aɨ pu xaa aꞌateeri tɨj naꞌa rusen cɨmeꞌe.
\c 5
\s Capu nuꞌu teꞌeviicueꞌi ɨ tyaj ratyáhueꞌiraꞌa
\p
\v 1 Ajta aɨjna ɨ tyaj ratyáhueꞌiraꞌa, ayaa pu titaatyavaꞌɨri tɨj ɨnaamua tyaj jeten chajca. Tyajta teyan ramuaꞌaree tɨ puaꞌa huatyauune aɨjna ɨ ɨnaamua, tyaucheꞌe tu huatyeechiꞌi ɨ tɨ Dioj jemi eꞌeseijreꞌe, tɨ ajta cai muajcaꞌa cɨn taavijhua. Uteꞌe pu eꞌeséiraꞌa aꞌame tɨj naꞌa rusen cɨmeꞌe.
\v 2 Tyajta ityan, tej tyauj iiyan seijreꞌe chaanaca japua, tyan tu taxaijnyuusteꞌe yu tatzajtaꞌa, tyajta teyan taxaamɨsteꞌe tyaɨjna cɨmeꞌe tej tij tyaun aꞌutyarute tyaujna chiꞌita tɨ uteꞌe eꞌeseijreꞌe tɨ ajta Dioj cɨn taꞌancánajsin.
\v 3 Ayaa pu aɨjna cɨn rɨni tɨ ayan taꞌancanán, catu tij cheꞌe muamuaꞌavijmaꞌa áꞌujhuaꞌanyaꞌa taꞌajuꞌun.
\v 4 Ayaa pu tiꞌen, aꞌini ijii tej tyauj jeten huachaatɨme aɨjna ɨ ɨnaamua, eecan tu tayein yu tatzajtaꞌa, tyaɨjna cɨmeꞌe tɨ ayan tamuáreꞌeristeꞌe tiꞌitɨ cɨmeꞌe. Capu aɨ naꞌa tej teyan ratzɨɨnyeꞌe tɨ Dioj ayan taꞌariꞌi aɨjna tɨ cɨn taꞌancánajsin, silu tej huapɨꞌɨ teyan tiꞌijxeꞌeveꞌe tɨ aɨn eitzeꞌe taꞌancáanan, tɨ ij aɨn tɨ aꞌateeri tɨj naꞌa rusen cɨmeꞌe nain tiꞌicáanan aɨjna tɨ áꞌapuapuaꞌare.
\v 5 Ajta aɨn tɨ ayan rɨꞌɨ taruure tej ti teyan tyaɨjna ancuraꞌan, ai pu aɨn pueen ɨ tɨ Dioj rusaɨj raatyajtuaa itejmi jemi, ɨ ruxaijnyuꞌuca tej ti teyan raamuaꞌaree tɨ Dioj aɨjna cɨn tyaꞌataujratziiriꞌi itejmi jemi.
\p
\v 6-7 Aɨj tu cɨn, aꞌanaj tɨ naꞌa, aɨ pu caꞌanijraꞌa tataꞌaca aꞌini ayaa tu ramuaꞌaree tyatɨꞌɨj tyauj teyan ruuri seijraꞌa tyeijna jetze ɨ tej ratyáhueꞌiraꞌa, tyan tu cai xɨ tyaun aꞌutí ɨ tavastaraꞌa jemi. Ayaa puꞌu xaa nyaꞌu tiꞌen, aꞌini ayaa tu een cɨn ya áꞌujhuaꞌan tyaɨjna cɨmeꞌe tyaj raꞌatzaahuateꞌe. Catu tyaɨjna cɨmeꞌe tyanaꞌa ya áꞌujhuaꞌan tej ti tyaɨjna jetze aratacaꞌanyen aɨjna tej tiꞌisiseꞌi teyajna.
\p
\v 8 Tyamuaꞌa pu caꞌanijraꞌa tataꞌaca, ajta eitzeꞌe pu taꞌaraanajchi tyaj tihuiini tyaɨjna jetze ɨ tyaj ratyáhueꞌiraꞌa tej ti tyaun éꞌeseijraꞌa aꞌu tej aꞌutyeechiꞌi ɨ tavastaraꞌa jemi.
\v 9 Aɨj tu cɨn, teyan tiꞌityeseꞌe tej teyan rɨꞌɨ tiꞌititachaꞌɨ tej teyan rɨꞌɨ tiraataꞌan ɨ tavastaraꞌa, capu amɨn aꞌij tɨ puaꞌa teyan aꞌɨmɨ seijraꞌa nusu teyan jemin seijraꞌa.
\p
\v 10 Ee xaa nyaꞌu tɨ ayan tiꞌen, aꞌini ayaa pu tyuꞌujxeꞌeveꞌe tej naijmiꞌi teyan huatataseijrata aujna aꞌu tɨ aꞌutáca ɨ Cɨriistuꞌu tɨ ij aɨn taꞌuxɨ́jteꞌen naijmiꞌica itejmi. Aj pu xaa ayan tiꞌijcɨꞌɨti aꞌij tɨ tiraavijteꞌe seij ajta seij aꞌij tɨ tiꞌitɨ tyuꞌumueꞌitɨ aɨjna cɨmeꞌe aꞌij tɨ huarɨj tɨꞌɨj auj ruuricaa, tɨ puaꞌa xaꞌapɨꞌɨn huarɨj nusu aꞌij puaꞌa huarɨj.
\s Aɨjna tɨ Dioj raajajcuare
\p
\v 11 Aɨj tu cɨn, tuꞌuri ramuaꞌaree tɨ ayan tyuꞌujxeꞌeveꞌe tej eihua huapɨꞌɨ raꞌatesaꞌa ɨ tavastaraꞌa, ayaa tu een cɨn tiꞌityesaꞌa taꞌayeꞌi tej ti huaꞌutyamueꞌitɨn ɨ tyetyaca mej mi raꞌancuraꞌan ɨ tɨ ayan tiꞌayajna itejmi jetze. Ajta aɨn ɨ Dioj, aɨ pu ramuaꞌaree aꞌij tej eꞌen. Ajta, ayaa nu tiꞌijxeꞌeveꞌe tɨ ayan cheꞌeta naꞌa tyajamuaꞌamityejtyaꞌa ɨ aꞌamua xaijnyuꞌuca tzajtaꞌa.
\v 12 Catu tyajtahuaꞌa muejmi jemi raꞌiráꞌaca ɨ tyaj cɨn huatátatzaahuateꞌen, silu tyan tu jamuataꞌaca ɨ saj cɨn huataujtyamuaꞌaveꞌen itejmi cɨmeꞌe sej si seyan raayɨꞌɨtɨhuaꞌan saj huatanyuuni aɨme jemi ɨ mej meyan maɨjna cɨn ahuaujtzaahuateꞌe maɨjna cɨmeꞌe aꞌij tɨ aꞌatɨ rusiseꞌirata me seiraca ɨ tyaɨte, ɨ maj majta cai huaꞌa jetze ruxeꞌeveꞌe aꞌij tɨ een aɨjna ɨ aꞌatɨ ɨ rutzajtaꞌa.
\p
\v 13 Tɨ puaꞌa ayan tiꞌayajna aꞌij maj tiꞌixaxaꞌa tyaj nuꞌu tatɨmueꞌi, ayaa tu een cɨn tatɨmueꞌi tej ti teyan raatyavaɨreꞌen ɨ Dioj. Naꞌari cai, tɨ puaꞌa teyan rɨꞌɨ me tityaumuámuaꞌaree, ayaa tu een cɨn rɨcɨ tej ti rɨꞌɨ jamuaatyavaɨreꞌen muejmi.
\v 14 Ai pu xaa aɨn pueen ɨ tɨ tiꞌitaijteꞌe tɨ aɨn Cɨriistuꞌu taxeꞌeveꞌe. Ayaa pu titaꞌamitejteꞌe itejmi tɨ saɨj naꞌa huamɨꞌɨ huaꞌa jetze maꞌacan, naijmiꞌica, aꞌachu puaꞌamua ɨ tyaɨte. Ajta, tɨ puaꞌa ayan tyuꞌurɨj, aɨj mu cɨn naijmiꞌi jamuan huacuii.
\v 15 Ayaa pu ajta een cɨn huaꞌa jetze maꞌacan huamɨꞌɨ mej mi aɨme ɨ maj mauj ruuri maj cai cheꞌe rujɨɨmuaꞌa manaꞌa aꞌij tirájtyauveꞌen aꞌij mej yeꞌi tiꞌityujchaꞌɨ, silu mej mi rɨꞌɨ tiꞌityújchaɨca maɨjna jemi ɨ tɨ huaꞌa jetze maꞌacan huamɨꞌɨ, tɨ ajta huatarú huaꞌa tzajtaꞌa ɨ mɨꞌɨchite.
\v 16 Aɨj pu cɨn, ijii tɨ yu aucaꞌitɨ aꞌame, catu cheꞌe teyan aꞌatɨ maꞌusíseꞌij aꞌij tɨ titaꞌamitejteꞌe ɨ tatzajtaꞌa aɨjna cɨmeꞌe ɨ tyaj cɨn raaseij me jeijreꞌe. Ee xaa, ayaa tu tejmíꞌi raatasíseꞌiraꞌa ɨ Cɨriistuꞌu tɨꞌɨj aɨn auj tevi naꞌa pueenyaꞌa. Ajta ijii, catu cheꞌe teyan rasiseꞌij.
\v 17 Aɨj pu cɨn, tɨ puaꞌa aꞌatɨ ayan Cɨriistuꞌu jetze ajtyamaꞌacan, aɨ pu aɨn pueen seij tɨ Dioj ari raajajcuare. Puꞌuri me tyauvatzɨ aꞌij tɨ tiꞌityújchaɨcaꞌa tɨ miꞌimaꞌacan cɨmeꞌe. Nain pu jajcuacan cɨn seijreꞌe ɨ jemin.
\s Tyaj nuꞌu rɨꞌɨ huaꞌuruuren mej mi reꞌenyeꞌen huatyaturan ɨ Dioj jemi eijna ɨ tyaj cɨmeꞌen tiꞌixa
\p
\v 18 Naijmiꞌi tɨj naꞌa eijna ɨ tyaj cɨmeꞌen tiꞌixa, aɨ pu jemi eꞌemaꞌacan ɨ Dioj tɨ ayan taaruu tej ti tyajtahuaꞌa reꞌenyeꞌen huatyaturan ɨ jemin aɨjna cɨmeꞌe tɨ Cɨriistuꞌu ayan tajapua huanyúu. Aɨ pu Dioj ajta ayan aɨjna cɨn titaijca tej ti tyajta teyan huaꞌuruuren ɨ tyaɨte mej mi majtahuaꞌa reꞌenyeꞌen huatyaturan ɨ jemin.
\v 19 Ayaa pu huataujmuaꞌa tɨ aɨn Dioj ayan huaꞌuruu aɨme ɨ mej yan huachaatɨme ɨ chaanaca japua mej mi majtahuaꞌa reꞌenyeꞌen huatyaturan ɨ jemin aɨjna cɨmeꞌe tɨ Cɨriistuꞌu huaꞌajapua huanyúu. Aɨj pu cɨn cai ayan Dioj huaꞌuxɨjte aɨjna cɨmeꞌe ɨ maj cɨn autyajturaa ɨ jemin, silu aɨ pu aɨjna cɨn titaijca aɨjna cɨmeꞌe ɨ nyuucari ɨ tyaj cɨn rɨꞌɨ huaꞌuruuren mej mi majtahuaꞌa reꞌenyeꞌen huatyaturan ɨ jemin.
\v 20 Aɨj tu cɨn, tyan tu tyaɨn pueen ɨ tɨ Dioj taataityacaꞌa tej ti tihuaꞌutaꞌixaateꞌen ɨ Cɨriistuꞌu jetze maꞌacan. Dioj pu ayan tihuaꞌajee aɨjna cɨmeꞌe ɨ nyuucari ɨ tyaj cɨn tihueꞌixaateꞌe. Aɨj tu cɨn teyan tyajaꞌamuajee sataꞌaj seyan sajtahuaꞌa reꞌenyeꞌen huatyaturan ɨ Dioj jemi.
\v 21 Ajta aɨn ɨ Dioj, ayaa pu raaruu ɨ Cɨriistuꞌu tejmi jetze maꞌacan. Eijna tɨ cai aꞌanaj tiꞌitɨ cɨn autyajturaa ɨ jemin, aɨ pu Dioj ayan raaruu tɨ japuan rajveti nain ɨ pueijtzi tɨ tacɨꞌɨtíicheꞌen itejmi aɨjna cɨmeꞌe ɨ tyaj cɨn autyajturaa ɨ Dioj jemi, tej ti jamuan ɨ Cɨriistuꞌu teyan urareꞌenyaꞌacan cɨn huatyaturan ɨ jemin.
\c 6
\s Aꞌij tɨ nuꞌu een aꞌatɨ tɨ Cɨriistuꞌu jetze maꞌacan tiꞌivaɨreꞌe
\p
\v 1 Aꞌini tyan tu naijmiꞌi tiꞌimuareꞌe, ayaa tu tyajtahuaꞌa tyajaꞌamuajee sej seyan raꞌancuraꞌan ɨ tɨ cɨn Dioj rɨꞌɨ tyajamuaataꞌasin sej si seyan eihua huapɨꞌɨ raatatuꞌireꞌen ɨ jemin aɨjna ɨ saj cɨn tyuꞌumuarej.
\v 2 Aɨj pu cɨn ayan teꞌeyuꞌusiꞌi tɨcɨn:
\q Ayaa nu muaanamuajriꞌi ajna xɨcajraꞌan
\q2 tɨ jetzen ari huaxaꞌapɨꞌɨn,
\q nyajta, neyan muaatavaɨ ajna xɨcajraꞌan
\q2 nyej hui jetzen mueꞌirajtuaa.
\m Casiꞌi, muan, puꞌuri ayan tyajaꞌureꞌenye ajna xɨcajraꞌa tɨ jetzen ari huaxaꞌapɨꞌɨn saj raꞌancuraꞌan. Ee xaa nyaꞌu, puꞌuri ajna pɨtiꞌirɨcɨ ajna xɨcajraꞌa tɨ jetzen Dioj amueꞌirajtuaani.
\p
\v 3 Tyajta ityan, catu teyan huaꞌutamuareꞌeristeꞌe tiꞌitɨ cɨmeꞌe tɨ tihuaꞌantyuꞌuuniꞌi, silu ayaa tu rɨꞌɨ tiꞌitítacháɨ taꞌayeꞌi tɨ ij cai aꞌatɨ aꞌij tiꞌitaxajta.
\p
\v 4 Me tyajta ityan, ayaa tu muejmi jemi taseijrata matɨj aɨme ɨ mej tiꞌivaɨreꞌe ɨ Dioj jemi nain cɨmeꞌe. Capu amɨn aꞌij tɨ puaꞌa teyan eihua huapɨꞌɨ tiꞌitɨj cɨn áꞌaviicueꞌireꞌe nusu teyan tirajpueiitzi naꞌari tiꞌitɨ tamuareꞌeristeꞌe caꞌɨn tiꞌitɨ aꞌij puaꞌa taruure.
\v 5 Tyaucheꞌe tu teyan cheꞌeta tyanaꞌa tiꞌivaɨreꞌe, tij majta meyan taatyavajxɨꞌɨn nusu taꞌityaanan naꞌari taatamuariteꞌen aꞌu tɨ naꞌa tyaj áꞌujhuaꞌan caꞌɨn tyaj muareꞌeri cɨn tiꞌimuareꞌe, nusu tyaj huatáxaireꞌen tyaj atanyeenyeꞌeri naꞌari tyaj huatatájcucaꞌa.
\p
\v 6 Ayaa pu ajta seijreꞌe tej teyan tiꞌivaɨreꞌe ɨ Dioj jemi aɨjna cɨmeꞌe tyaj cai tiꞌitɨ cɨn aꞌij puaꞌa rɨcɨ, tyajta tyamuaꞌa naa tiruꞌumuaꞌaree aꞌij tɨ een ɨ Dioj, tyajta tyamuaꞌa tu teꞌeviicueꞌi huaꞌa jemi ɨ seica. Tyan tu tyajta rɨꞌɨ tihuaꞌajchaꞌɨ ɨ taxaꞌa tyaɨte, tyajta tyaɨjna jetze aratacaꞌanye ɨ xaijnyuꞌucaraꞌaraꞌan ɨ Dioj. Tyajta tu tzaahuatiꞌiraꞌa cɨn huaꞌaxeꞌeveꞌe.
\v 7 Ayaa tu tyajta huataujnyátacan cɨn tiꞌixaxaꞌa. Catu tiꞌihueꞌi tyanaꞌa. Tyajta tyaɨjna cɨn tiꞌimuareꞌe ɨ muáreꞌeriꞌiraꞌaraꞌan cɨmeꞌe ɨ Dioj. Tyajta tu teyan seijreꞌe tyaɨjna jamuan ɨ tyaj cɨn tyuꞌuteseꞌen nain cɨmeꞌe tɨ ta jetze seijreꞌe tej ti teyan huarɨni tɨ naa een ɨ Dioj jemi.
\p
\v 8 Tɨ puaꞌa meyan rɨꞌɨ titaataꞌan naꞌari meyan taatyaxaahua, nusu meyan aꞌij puaꞌa tiꞌitaxajta caꞌɨn rɨꞌɨ metihueꞌixaatyaꞌa itejmi cɨmeꞌen, tyaucheꞌe tu teyan tiꞌivaɨreꞌe. Ayaa mu majta tiꞌitaxaata muaꞌajuꞌun tyaj nuꞌu tiꞌihueꞌitaca. Me tyajta ityan, tzaahuatiꞌiraꞌa tu cɨn teyan rɨcɨ.
\p
\v 9 Capu ajta tajetze ruxeꞌeveꞌe tɨ puaꞌa macai tamuaꞌate nusu matamuaꞌate. Ayaa tu tyajta huaꞌa jemi seijreꞌe cu xuee tyaj cuiꞌicu. Me tyajta ityan, tyaucheꞌe tu ruuri. Pueijtzi mu taꞌateꞌe aru camu taꞌapuaꞌariteꞌen.
\v 10 Ayaa tu seijreꞌe cumu tyaj taxaamɨsteꞌe. Me tyajta ityan, aꞌanaj tɨ naꞌa tu tatyamuaꞌaveꞌe. Catu aꞌij tiꞌijviicueꞌi. Me tyajta, ayaa tu huaꞌaruuren muiꞌitɨ mej mi huataujchijtyaanita. Catu nuꞌu tiꞌitɨ tichaꞌɨ. Me tyajta, nain tu xaa tíꞌijchaꞌɨ.
\p
\v 11 Ayaa nu aꞌahuauritaacan cɨn tyajamueꞌixaa nain cɨmeꞌe, muan, mɨ sej Corinto aꞌuchaatɨme. Eihua nu aꞌancaꞌanye muejmi jemi.
\v 12 Catu tiꞌitɨ aꞌamuamueireꞌe muejmi, silu muan xu rujɨɨmuaꞌa sanaꞌa rumueireꞌe saɨjna cɨmeꞌe aꞌij tɨ tyajamuaꞌamitejteꞌe ɨ aꞌamuatzajtaꞌa.
\v 13 Aɨj nu cɨn neyan tyajaꞌamuahuavii sej si sajtahuaꞌa ahuaujcaꞌanyen itejmi jemi. Ayaa nu xaa tyajaꞌamueꞌixaateꞌe cumu saj tɨꞌɨri púeenyeꞌen.
\s Tyaj nuꞌu cai huaꞌajtyájaꞌahuatyahuaꞌa aɨme ɨ maj cai tyaꞌatzaahuateꞌe
\p
\v 14 Caxu huaꞌajtyajaꞌahuatyahuaꞌan aɨme ɨ maj cai tyaꞌatzaahuateꞌe. Xuꞌuhuaujmuaꞌatzɨ aɨjna cɨmeꞌe, ¿aꞌini tiꞌirɨꞌɨri mej seij manaꞌa tyaɨtejraꞌa pueenyeꞌen aɨjna tɨ uraréꞌen ɨ Dioj jemi, ajta aɨjna tɨ aꞌij puaꞌa tiꞌityujchaꞌɨ? Capu xaa nyaꞌu aꞌij tiꞌirɨꞌɨri. Ari aɨjna, ¿ni qui ruxaꞌaj naꞌa seijreꞌe ɨ nyeeristeꞌe, ajta ɨ tɨcaꞌari tzajtaꞌa? Capu xaa nyaꞌu.
\v 15 ¿Tiꞌitajni aꞌij metiꞌixaꞌapɨꞌɨntareꞌen aɨjna ɨ Cɨriistuꞌu, jamuan aɨjna ɨ Satanás? Capu xaa nyaꞌu tiꞌitɨ. Ajta aɨn tɨ tyaꞌatzaahuateꞌe, ¿ni qui ayan ruxaꞌaj naꞌa raꞌancuraꞌasin tɨj ajta raꞌancuraꞌasin aɨjna tɨ cai tyaꞌatzaahuateꞌe? Capu xaa nyaꞌu tiꞌitɨ.
\v 16 ¿Tiꞌitajni aꞌij metiꞌixaꞌapɨꞌɨntareꞌen aɨme ɨ mej tiꞌivaɨreꞌe teyujtaꞌa aɨme jamuan ɨ tiꞌityaɨn ɨ maj huaꞌanaꞌamiche ɨ maj cai Dioj pueen? Capu xaa nyaꞌu tiꞌitɨ. Tyajta ityan, ayaa tu tiꞌivaɨreꞌe ɨ Dioj jemi tɨj teyuu tɨ tzajtaꞌan huirajca ɨ Dioj tɨ iꞌiruuri. Aɨj pu cɨn ayan tyuꞌutaxajtacaꞌa tɨcɨn:
\q Nyaa nu uꞌuchaa naꞌame huaꞌa tzajtaꞌa.
\q Nyajta nu neyan huaꞌa Dioj pueenyaꞌa naꞌame.
\q Majta aɨme, aɨ mu nyetyaɨtestyamuaꞌa
\q2 pueenyaꞌa muaꞌajuꞌun.
\m
\v 17 Ayaa pu tiꞌixa ɨ tavastaraꞌa tɨcɨn:
\q Aɨj xu cɨn ajtacɨɨnye huaꞌa jemi
\q2 sej si rujɨmeꞌen áꞌujhuaꞌanyeꞌen.
\q Caxu tiꞌitɨ muaraꞌa tɨ xanaꞌaviꞌireꞌe.
\q Nyajta nu neyan rɨꞌɨ amuaꞌancureꞌeviꞌitɨ.
\q
\v 18 Ajta ayan tiꞌixa ɨ tavastaraꞌa
\q2 tɨ nain cɨn antyujmuaꞌaree tɨcɨn:
\q Nyaa nu aꞌamuayaꞌupua pueenyaꞌa naꞌame.
\q Sajta muan, ayaa xu niyaujmuaꞌa pueenyaꞌa xaꞌajuꞌun,
\q2 satɨj sanaꞌa sej tyetyaca pueen,
\q2 ajta mɨ saj juuca. Yaa puꞌu.
\c 7
\p
\v 1 Aꞌini Dioj pu ayan tyaꞌataujratziiriꞌi, muan taꞌihuaamuaꞌa ɨ tej aꞌamuaxeꞌeveꞌe, ticheꞌe teyan me tiruuraini tɨj naꞌa tɨ ayan tiꞌitaxanaꞌavisteꞌe, tɨ aɨjna jetze airaninyeica ɨ tatyevi jetze nusu ɨ ta tzajtaꞌan, tej ti raanaijmiꞌireꞌen aɨjna tɨ titaꞌaturaateꞌe tej ti urareꞌenyaꞌacan cɨn huatyaturan ɨ Dioj jemi. Tataꞌaj teyan huarɨni tyaɨjna cɨmeꞌe tɨ Dioj ayan huatauraꞌate itejmi jemi.
\s Pablo pu huaꞌaxeꞌeveꞌe aɨme ɨ mej Corinto eꞌeche
\p
\v 2 Caxu raꞌantanaamɨn ɨ aꞌamuaxaijnyuꞌuca itejmi jemi, aꞌini catu aꞌij puaꞌa amuaaruu. Catu tyajta aꞌatɨ caꞌanijraꞌa huataꞌa tɨ ij aꞌij puaꞌa tiꞌityujchaꞌɨ. Ee xaa nyaꞌu, catu aꞌatɨ tyuꞌuhueꞌitze tej ti tiꞌitɨj cɨn huatyatavaɨreꞌen.
\v 3 Canu neyan tyajaꞌamueꞌixaateꞌe nyej ni tiꞌitɨj cɨn amaꞌuxɨjteꞌen. Canu aꞌatzu, aꞌini nuꞌuri neyan tyajamueꞌixaa tej teyan áꞌatacaꞌanye muejmi jemi, tɨ puaꞌa teyan naimiꞌi huacuiꞌini nusu teyan naimiꞌi ruuri huatyaturan.
\v 4 Eecan nu nyaxaahua tyajaꞌamueꞌixaateꞌe, canu aꞌij tiꞌitzɨɨnyaꞌa nyanaꞌa. Eihua nu aꞌantzaahuateꞌe muejmi cɨmeꞌe, nyajta eihua nu rɨꞌɨ tyanmuaꞌate. Nyajta huapɨꞌɨ nu nyetyamuaꞌaveꞌe nain cɨmeꞌe ɨ tyaj rajpueijtzi.
\s Aɨ mu saɨque tyuꞌumuáꞌa
\p
\v 5 Me tyajta ityan, tyatɨꞌɨj tyaun aꞌaráꞌa u Macedonia, capu aꞌatzu huatarɨꞌɨristaracaꞌa tej huatasaꞌupeꞌen, silu tyan tu rajpueijtzicaꞌa nain cɨmeꞌe, tɨj naꞌa tɨ ayan titaaruu. Eecan tu áꞌaviicueꞌiraꞌacaa huaꞌa jemi ɨ tyaɨte, tyajta tiꞌitzɨɨnyaꞌacaa ɨ tatzajtaꞌan.
\v 6 Ajta aɨn ɨ Dioj tɨ rɨꞌɨ huaꞌanrúꞌuraꞌa aꞌayeꞌi ɨ maj aꞌij tyaꞌujmuaꞌate, aɨ pu ayan rɨꞌɨ taaruu aɨjna cɨmeꞌe tɨ aɨn ya uveꞌenye ɨ Tito.
\v 7 Ayaa pu xaa aɨjna cɨn rɨꞌɨ taaruu, ajta aɨjna cɨmeꞌe tɨ aɨn Tito ajta rɨꞌɨ taaruu ajta aɨjna cɨmeꞌe saj anacai rɨꞌɨ raaruu aɨjna ɨ taꞌihuaaraꞌa. Aɨ pu xaa titaataꞌixaa muejmi cɨmeꞌen, saj nuꞌu eihua huapɨꞌɨ seyan tiꞌijxeꞌeveꞌe saj naaseij, saj nuꞌu tyamuaꞌa sajta tyujxaamɨsteꞌe, ajta nuꞌu tyamuaꞌa muejmi jetze ruxeꞌeveꞌe aꞌij tɨ tiꞌinyavaɨreꞌe inyeetzi. Aɨj nu cɨn eitzeꞌe huatantyamuaꞌave.
\p
\v 8 Me nyajta inyaa, capu cheꞌe aꞌij puaꞌa nyaꞌase nyaj neyan amuaatyaxaamɨste nyaɨjna cɨmeꞌe aꞌij nyaj tyajamuaataitiꞌiriꞌi. Anacai pu xaa, aꞌij puaꞌa nyaꞌasajcaꞌa, aru capu cheꞌe aꞌini aꞌatzu puꞌu aꞌatee saj ruxaamɨstyaꞌacaa.
\v 9 Ma ajta, canu nyaɨjna cɨn nyetyamuaꞌaveꞌe nyaɨjna cɨmeꞌe saj huataujxaamɨste, silu aɨj nu cɨn nyanaꞌa nyetyamuaꞌaveꞌe saj seyan huataujxaamɨste sej si saɨque tiꞌityújchaɨca. Ayaa pu xaa nyaꞌu aꞌij puaꞌa amuaataꞌa sej si seyan huataujxaamɨsteꞌen jemin ɨ Dioj. Aɨj pu cɨn, catu tajɨ́ɨmuaꞌa tyanaꞌa pueijtzi amuaataꞌa.
\p
\v 10 Ee xaa nyaꞌu. Tɨ puaꞌa aꞌatɨ ayan huataujxaamɨsteꞌen ɨ Dioj jemi tɨ ij saɨque tiꞌityújchaɨca, capu xaa aꞌij puaꞌa tiraataꞌasin, silu Dioj pu ruꞌiratuaasin. Naꞌari tɨ puaꞌa aꞌatɨ ayaa naꞌa ruxaamɨsteꞌe matɨj aɨme ɨ mej yan japuan seijreꞌe ɨ chaanaca, ayaa pu tyajaꞌureꞌenyejsin tɨ aupuaꞌare.
\p
\v 11 Aru casiꞌi muan, aꞌij tɨ tyajamuaaruu aɨjna cɨmeꞌe sej seyan huataujxaamɨsteꞌen ɨ Dioj jemi. Huapɨꞌɨ pu caꞌanijraꞌa amuaataꞌa saj raahuauni ɨ tɨ cɨn Dioj tyajamuaatauuniꞌi. Eecan xu huatanínyuꞌucacucaꞌa saɨjna cɨmeꞌe tɨ aꞌij puaꞌa eenyaꞌa. Eecan xu sajta tiꞌitzɨɨnyaꞌacaa saɨjna cɨmeꞌe tɨ aꞌamuacɨꞌɨtiicheꞌe ɨ pueijtzi. Sajta eecan huapɨꞌɨ áꞌujcaꞌanyajcaꞌa inyeetzi cɨmeꞌe, sajta huapɨꞌɨ xu aꞌij tyaꞌujmuaꞌate.
\p Muan xu sajta tyamuaꞌa naa pueijtzi raataꞌa aɨjna tɨ aꞌij puaꞌa rɨjcaa. Ijii tu xaa teyan ramuaꞌaree saj cai tiꞌitɨ cɨn autyajturaa aɨjna cɨmeꞌe tɨ aꞌij puaꞌa eenyaꞌa.
\p
\v 12 Aɨj pu cɨn tyamuaꞌa tyuꞌutyavaɨ ɨ nyaj amuaatáitiꞌiriꞌi. Me nyajta inyaa, canu nyaɨjna cɨn amuaatáitiꞌiriꞌi nyaɨjna cɨmeꞌe ɨ aꞌatɨ tɨ ayan autyajturaa, canu nyajta amuaatáitiꞌiriꞌi nyaɨjna cɨmeꞌe tɨ aꞌatɨ seij jemi aꞌutyajturaa, silu ayaa nu een cɨn amuaatáitiꞌiriꞌi tɨ ij ayan amuaatamitejteꞌen muejmi ɨ Dioj jemi aꞌachu saj caj áꞌujcaꞌanye tejmi jemi.
\v 13 Aɨj tu cɨn teri rɨꞌɨ huarɨj ɨ tatzajtaꞌa.
\p Capu ajta aɨ naꞌa tej teri rɨꞌɨ huarɨj, silu tyajta teyan tyaɨjna cɨn huatátatyamuaꞌaveꞌe tyaɨjna cɨmeꞌe tɨ aɨn Tito ayen cheꞌeta naꞌa rutyamuaꞌaveꞌe, aꞌini muan naimiꞌi xu rɨꞌɨ tiraataꞌa ɨ tzajtaꞌan.
\v 14 Ee xaa, nuꞌuri nejmiꞌi ahuantzaahua ɨ Tito jemi muejmi cɨmeꞌe. Sajta muan, caxu aꞌatzu naatatyeviꞌiraste. Aꞌini nain ɨ tej teri tyajamueꞌixaa, ayaa pu tiꞌayajna, ayaa pu cheꞌeta naꞌa ayan tiꞌayajna ɨ tyaj cɨmeꞌen ahuatatzaahuate jemin ɨ Tito.
\v 15 Ajta eitzeꞌe pu aɨn ayan ahuaujcaꞌanye muejmi jemi, aꞌini aɨ pu ayan raꞌutamuaꞌareeriꞌi aꞌij saj muan naimiꞌi titáꞌastijreꞌe. Aɨ pu ajta aɨjna autamuaꞌareera aꞌayeꞌi sej seyan tyamuaꞌa naa raꞌancureꞌeviꞌitɨ, sej seyan eihua huapɨꞌɨ tiꞌitzɨɨnyaꞌacaa.
\v 16 Nyajta inyaa, nyaa nu nyetyamuaꞌaveꞌe, aꞌini nain nu cɨn aꞌancaꞌanye muejmi jemi, aꞌini muan xu xaa araurastejsin.
\c 8
\s Aꞌij maj nuꞌu tyuꞌutapueijveꞌe aɨme ɨ mej eꞌetyujsaꞌɨri teyujtaꞌa
\p
\v 1 Taꞌihuaamuaꞌa, ayaa tu tiꞌijxeꞌeveꞌe saj raamuaꞌaree aꞌij tɨ Dioj rɨꞌɨ tihuaꞌutaꞌa aɨme ɨ mej u eꞌetyujsaꞌɨri aꞌu tɨ naꞌa aun tɨ huatacáꞌa u Macedonia.
\v 2 Matɨꞌɨj mauj eihua huapɨꞌɨ áꞌaviicueꞌiraꞌacaa, ajta eihua tihuaꞌaturaatyaꞌacaa ɨ maj cɨn ruvaɨraꞌacaa, ma majta, eihua mu huapɨꞌɨ rutyamuaꞌavaꞌacaa. Aɨj pu cɨn ayan teꞌirajraa mej meyan ruxéꞌeviꞌiraꞌa cɨn tyuꞌutyavaɨ maɨjna cɨmeꞌe tɨ eihua huapɨꞌɨ araꞌasicaa ɨ Dioj jemi.
\p
\v 3 Ayaa nu tihuaꞌutyaxajta ɨ mej meyan tyuꞌutapueijve aꞌachu maj caj tiꞌijviicueꞌiracaa. Ee xaa, aɨ mu ruxéꞌeviꞌiraꞌa cɨn eitzeꞌe meyan huarɨj.
\v 4 Caꞌanin mu cɨn tajhuaviiriꞌi tej teyan huaꞌutaꞌan maj tyuꞌutyavaɨreꞌen maɨjna cɨmeꞌe maj huaꞌutyavaɨreꞌen aɨme ɨ maj eꞌetyujsaꞌɨri ɨ maj ajtyamaꞌacan ɨ tavastaraꞌa jetze.
\v 5 Ma majta aɨme, camu meyan manaꞌa tyuꞌutapueijve aꞌij tej tiꞌijchuꞌevaꞌacaa. Anacai mu huataseijre ɨ tavastaraꞌa jemi, majta eꞌeyan itejmi jemi maɨjna cɨmeꞌe tɨ ayan tiꞌijxeꞌevaꞌacaa ɨ Dioj.
\p
\v 6 Aɨj tu cɨn teri caꞌanijraꞌa raataꞌa tyaɨjna ɨ Tito tɨ aɨn ayan raanaijmiꞌireꞌen muejmi jemi aɨjna tɨ cɨn anacai autyejche muejmi tzajtaꞌa sej si seyan cheꞌeta sanaꞌa tyuꞌutapueijveꞌen ruxéꞌeviꞌiraꞌa cɨmeꞌe.
\v 7 Ajta ijii, aꞌini eitzeꞌe pu ayan tyajamuaacɨ́ꞌɨ muejmi cai ɨ seica, nain cɨmeꞌe, tɨ puaꞌa saj ráꞌatzaahuateꞌen ɨ tavastaraꞌa naꞌari saj tihuaꞌutaꞌixaateꞌen ɨ nyuucari cɨmeꞌe tɨ ayan tiꞌayajna nusu saj ruꞌumuaꞌareera aꞌij tɨ een ɨ Dioj jemi, caꞌɨn sajta nain cɨn áꞌujcaꞌanye itejmi jemi, sajta taxeꞌeveꞌe, aɨj pu cɨn, ayaa tu tiꞌijxeꞌeveꞌe. Ayaa xu huarɨni sej si sajta huaꞌutyamueꞌitɨn saɨjna cɨmeꞌe ɨ saj cɨn rɨꞌɨ tihuaꞌutaꞌasin.
\p
\v 8 Canu nyaɨjna cɨn tyajamuaataijteꞌesin, silu ayaa nu een cɨn tyajaꞌamueꞌixaateꞌe sej si huataujseijrata sej seyan cheꞌeta sanaꞌa tzaahuatiꞌiraꞌa cɨn huaꞌaxeꞌeveꞌe saɨme ɨ maj Jerusalén eꞌetyujsaꞌɨri matɨj ɨ seica ɨ maj aꞌujcaꞌanyaacan cɨn huaꞌutyavaɨ ɨ ruꞌihuaamuaꞌa.
\v 9 Ee xaa, xuꞌuri ramuaꞌaree ɨ tɨ cɨn rɨꞌɨ titaatáꞌa ruxéꞌeviꞌiraꞌa cɨmeꞌe ɨ tavastaraꞌa, aɨjna ɨ Jesús, tɨ ajta Cɨriistuꞌu pueen. Aɨ pu ayan nain tíꞌijchaɨcaꞌa, ma ajta aɨ pu u uteꞌe ayan eenyeꞌequeꞌe huataujseijratacaꞌa tɨj seij tɨ cai aꞌij tiꞌijviicueꞌi tɨ ij muejmi japua huanyuuni, sej si seyan saɨjna cɨn seiraꞌa xaꞌaraꞌani saj saɨn pueenyaꞌa xaꞌaraꞌani ɨ saj raꞌancuraꞌasin ɨ jemin saɨjna cɨmeꞌe tɨ aɨn Cɨriistuꞌu cai aꞌij tiꞌijviicueꞌiracaa.
\p
\v 10 Ayaa pu tinaꞌamitejteꞌe aɨjna cɨmeꞌe ɨ saj huaꞌutyavaɨreꞌen. Ayaa pu iꞌi xaꞌapɨꞌɨn saj ijii raanaijmiꞌireꞌen ɨ saj cɨn autyajhuii ɨ ruꞌusi, ɨ saj anacai saɨjna cɨn tyaꞌataujratziiriꞌi, sajta anacai seyan rɨjcaa.
\v 11 Ma sajta muan, ijii sataꞌaj raanaijmiꞌireꞌen ɨ saj cɨn seyan rɨjcaa. Aꞌini muan xu aꞌujcaꞌanyaacan cɨn huatauraꞌa sej seyan huarɨni, sataꞌaj seyan cheꞌeta sanaꞌa saɨjna cɨn raanaijmiꞌireꞌen sej seyan tyuꞌutaꞌan aꞌachu saj caj tíꞌijchaꞌɨ.
\v 12 Aꞌini, tɨ puaꞌa aꞌatɨ áꞌujcaꞌanye tɨ tiꞌitɨ tyuꞌutaꞌan, ayaa pu xaꞌapɨꞌɨn tiraꞌaseijrateꞌe ɨ Dioj tɨ aɨn aꞌatɨ ayan tyuꞌuta aꞌachu tɨ caj tíꞌijchaꞌɨ. Capu aꞌatzu jetzen ruxeꞌeveꞌe ɨ Dioj tiꞌitɨ tɨ aꞌij cai tichaꞌɨ aɨjna ɨ aꞌatɨ tɨ xaa tiꞌitɨ tyuꞌutaꞌa.
\p
\v 13-14 Canu nyaɨjna cɨn neyan tyajaꞌamueꞌixaateꞌe tɨ ij cai huaꞌutamuareꞌeristeꞌen ɨ seica. Canu nyajta nyaɨjna cɨn amueijcateꞌe tɨ huapɨꞌɨ muareꞌeri een muejmi jemi. Ayaa nuꞌu ni neyan tiꞌijxeꞌeveꞌe sej si ruxaꞌa sanaꞌa tyaꞌutaviicueꞌi. Aɨj pu cɨn, ayan tiꞌivaɨreꞌe ɨ sej eihua tíꞌijchaꞌɨ ijii sej si saɨjna cɨn huaꞌutyavaɨreꞌen ɨ tɨ tihuaꞌaturaateꞌe. Ajta, majcaꞌihua yee, aɨ mu meyan cheꞌeta manaꞌa amuaatyavaɨreꞌesin maɨjna cɨmeꞌe ɨ mej eihua tíꞌijchaꞌɨ tɨ ij cai tiꞌitɨ tyajamuáꞌaturaatyaꞌa muejmi.
\p
\v 15 Ayaa pu xaa nyaꞌu, aꞌini ayaa pu teꞌeyuꞌusiꞌi tɨcɨn: “Capu nuꞌu tiꞌitɨ turaavaca aɨjna jemi tɨ eihua rajsaɨj. Ajta, capu nuꞌu tiraꞌaturaatyaꞌacaa aɨjna tɨ cɨj naꞌa rajsaɨj.”
\s Tito pu aun aꞌatanyejsin
\p
\v 16 Maꞌacui xaa, eihua tu huapɨꞌɨ rɨꞌɨ tiꞌiraꞌateꞌe ɨ Dioj tɨ ayan caꞌanijraꞌa raataꞌa aɨjna ɨ Tito tɨ ayan aꞌujcaꞌanyaacan cɨn amuaatamuaꞌareera nyatɨj inyaa.
\v 17 Aɨ pu xaa ayan raꞌancuraꞌa aɨjna ɨ tyaj cɨn caꞌanijraꞌa raataꞌa, ajta aɨjna cɨmeꞌe, tɨ eihua áꞌujcaꞌanyajcaꞌa. Aɨ pu rusaɨj huatauraꞌa tɨ ij aun u aꞌumeꞌen muejmi jemi.
\p
\v 18 Tyajta ityan, taꞌihuaaraꞌa tu huataityacaꞌa tɨ ij ajta jamuan u áꞌumeꞌen. Aɨjna ɨ taꞌihuaaraꞌa, naijmiꞌiqueꞌe mu rɨꞌɨ tiꞌijseij maɨjna cɨmeꞌe aꞌij tɨ aɨn tihueꞌixaatyaꞌa aꞌayeꞌi ɨ nyuucari tɨ cɨn Dioj hueꞌirajtuaani.
\v 19 Ajta, aɨme ɨ mej maun eꞌetyujsaꞌɨri ɨ Dioj jemi, aɨ mu raꞌantihuau tɨ ij aɨn tajamuan áꞌuchaꞌacanyeꞌen tej ti naimiꞌi teyan arátaraꞌasten tyaɨjna cɨmeꞌe ɨ tyaj huaꞌutaꞌasin, tej ti tyaɨjna cɨn rɨꞌɨ tiraatyajtuaani ɨ tavastaraꞌa. Tyajta teyan een cɨn raataijtacaꞌa tɨ aun aꞌuméꞌen muejmi jemi sej si raamuaꞌaree tej tyauj áꞌatacaꞌanye tej teyan huaꞌutyavaɨreꞌen ɨ maj cai aꞌij tiꞌijviicueꞌi.
\v 20 Ayaa tu tiꞌityeseꞌe tɨ ij cai aꞌatɨ ayan tiꞌitaxajtziꞌira aɨjna cɨmeꞌe tyaj nuꞌu aꞌij puaꞌa rɨcɨ tyaɨjna cɨmeꞌe tyaj ramuareꞌe aɨjna ɨ mej meyan aꞌujcaꞌanyaacan cɨn tyuꞌutaꞌa, tɨ tiꞌimuiꞌi.
\p
\v 21 Ayaa puꞌu xaa nyaꞌu, aꞌini catu teyan tyanaꞌa tiꞌiteseꞌe tej ti teyan rɨjca aꞌij tɨ tiraavijteꞌe ɨ tavastaraꞌa jemi, silu tej ti teyan cheꞌeta tyanaꞌa rɨjca aꞌij tɨ tiraavijteꞌe huaꞌa jemi ɨ tyetyaca.
\p
\v 22 Tyajta aɨme jamuan ɨ maj huaꞌapua, tyajtahuaꞌa tu seij huataíti ɨ taꞌihuaaraꞌa, ɨ tɨ ari muiꞌitɨ huataujseijratacaꞌa tɨ aɨn tyamuaꞌa naa áꞌujcaꞌanyajcaꞌa muiꞌitɨ cɨmeꞌe. Ajta ijii, eitzeꞌe pu áꞌujcaꞌanye aɨjna cɨmeꞌe tɨ eihua huapɨꞌɨ tyaꞌatzaahuateꞌe muejmi jemi.
\p
\v 23 Ajta, aɨjna ɨ Tito, ai pu aɨn pueen tɨ nyeetzi jamuan tiꞌivaɨreꞌe muejmi cɨmeꞌe. Naijmiꞌi tu tiꞌimuareꞌe. Majta aɨme ɨ maj huaꞌapua ɨ taꞌihuaamuaꞌa, ai mu aɨn pueen ɨ maj huaꞌutaityacaꞌa aɨme ɨ maj maun eꞌetyujsaꞌɨri. Ai mu aɨn pueen ɨ maj huaꞌa jetze maꞌacan tiꞌivaɨreꞌe ɨ tyaɨte majta maɨjna cɨn rɨꞌɨ tiraataꞌaca ɨ Cɨriistuꞌu.
\v 24 Aɨj xu cɨn, sataꞌaj seyan huaꞌutaseijrateꞌen saɨme ɨ tyetyaca saj tzaahuatiꞌiraꞌa cɨn huaꞌaxeꞌeveꞌe, mej mi naijmiꞌi meyan raamuaꞌaree nainjapua aꞌu maj eꞌetyujsaꞌɨri mej mi taꞌutatzaahuateꞌen aꞌij tɨ tiraavijteꞌe tej teyan áꞌatatzaahuateꞌe muejmi cɨmeꞌe.
\c 9
\s Aꞌij tej yeꞌi huarɨni tej ti huaꞌutyavaɨreꞌen ɨ seica
\p
\v 1 Cɨmeꞌen aɨjna ɨ tyaj cɨn huaꞌavaɨreꞌe aɨme ɨ tɨ Dioj rɨꞌɨ tihuaꞌajchaꞌɨ, capu aꞌatzu ruxeꞌeveꞌe tej teyan tyajamuaatayuꞌuseꞌen.
\v 2 Aꞌini nuꞌuri ramuaꞌaree sej seri áꞌujcaꞌanye sej si seyan huarɨni ruxéꞌeviꞌiraꞌa cɨmeꞌe. Aɨj nu cɨn neyan aꞌantzaahuateꞌe huaꞌa jemi ɨ mej maun aꞌuchaatɨme tɨj naꞌa aun tɨ huatacáꞌa u Macedonia. Ayaa nu tihueꞌixaateꞌe yee puꞌuri ayan aꞌatee sei ninyeꞌiraꞌa ɨ saj seri rɨꞌɨ huaujruu. Ajta, xuꞌuri caꞌanijraꞌa huaꞌataꞌaca aɨjna cɨmeꞌe sej seyan aꞌujcaꞌanyaacan cɨn tyuꞌutyavaɨreꞌen.
\p
\v 3 Me nyajta inyaa, ayaa nu een cɨn taꞌihuaamuaꞌa huataíti muejmi jemi tɨ ij cai ayan teꞌirajraꞌani tyaj huaapuaꞌa tyanaꞌa ahuatatzaahuateꞌen aɨjna cɨmeꞌe saj cai xɨ rɨꞌɨ huaujruu, aꞌij nyej neri tihuaꞌutaꞌixaa muejmi cɨmeꞌen.
\v 4 Naꞌari cai, tɨ puaꞌa seica ɨ mej maun Macedonia eꞌemaꞌacan meyan maun nya jamuan aꞌujuꞌun, teyan amuaatyauuni sacai xɨ rɨꞌɨ huaujruuren, aj pu xaa taatatyeviꞌirasteꞌesin itejmi. Capu amuaatatyeviꞌirasteꞌesin muejmi, silu itejmi pu xaa aɨjna cɨmeꞌe tyaj muejmi cɨmeꞌen ahuatatzaahuate.
\p
\v 5 Aɨj pu cɨn ayaa pu tinaatámitejte tɨ ayan tyuꞌujxeꞌeveꞌe nyej neyan caꞌanijraꞌa huaꞌutaꞌan ɨ nyeꞌihuaamuaꞌa mej mi maun áꞌujuꞌun muejmi jemi, mej mi anacai rɨꞌɨ amuaaruuren maɨjna cɨmeꞌe ɨ saj cɨn tyaꞌataujratziiriꞌi sej tyuꞌutapueijveꞌen. Ayaa puꞌu, aꞌini canu raxeꞌevaꞌacaa nyaj caꞌanyejri cɨn amuaataijteꞌen sej si tyuꞌutapueijveꞌen silu sej si ruxéꞌeviꞌiraꞌa cɨn tyuꞌutaꞌan.
\p
\v 6 Caxu yáꞌuhuaꞌanan. Tɨ puaꞌa cɨj sanaꞌa tyuꞌutaꞌan, cɨj xuꞌu sajta tyaꞌancuraꞌasin. Ajta, tɨ puaꞌa eihua setyuꞌutaꞌan, eihua xu sajta tyaꞌancuraꞌasin.
\v 7 Ayaa pu tyuꞌujxeꞌeveꞌe sej seyan huarɨni, seij sajta seij, cheꞌe aꞌatɨ tɨ naꞌa ayan tyuꞌutaꞌan aꞌij tɨ ari tiraaxaꞌapɨꞌɨntare ɨ rutzajtaꞌa. Cheꞌe cai ayan ramuájchyaꞌa, aꞌini eecan pu raꞌaraanajchi ɨ Dioj tɨ aꞌatɨ rutyamuaꞌavaꞌa tyuꞌutapueijveꞌen.
\v 8 Ajta aɨn ɨ Dioj, aɨ pu raayɨꞌɨtɨ tɨ ayan raatamuiꞌiren nain cɨmeꞌe ɨ tɨ cɨn rɨꞌɨ tyajamuaataꞌan sej si seyan aꞌanaj tɨ naꞌa tyaꞌancuraꞌaveꞌen tɨj naꞌa tɨ tyuꞌujxeꞌeveꞌe. Aɨ pu ajta ayan raatamuiꞌirejsin tɨ ij ayan tiꞌicɨꞌɨpáa aɨjna jetze satɨj sanaꞌa saj cɨn tyuꞌumuareꞌen tɨ xaꞌapɨꞌɨn een.
\v 9 Ayaa pu teꞌeyuꞌusiꞌi tɨcɨn:
\q Aɨ pu aꞌɨmɨ tihuaꞌuráꞌate,
\q2 aɨ pu ajta tihuaꞌapueijveꞌe
\q2 aɨme ɨ maj cai aꞌij tiꞌijviicueꞌi,
\q ajta, tɨj naꞌa tɨ ayan rɨcɨ tɨ xaꞌapɨꞌɨn een,
\q2 aɨ pu ayan huatyaturaasin ɨ Dioj jemi
\q2 tɨj naꞌa rusen cɨmeꞌe.
\m
\v 10 Ajta aɨn tɨ tiꞌitáꞌaca ɨ imueꞌeri tɨ cɨn aꞌatɨ ayan tyuꞌuhuasteꞌen, aɨ pu ajta ayan tyuꞌutaꞌasin, ajta raatamuiꞌiren ɨ saj cɨn huataujvaɨreꞌen sej si eitzeꞌe seyan tyuꞌumuareꞌen aɨjna cɨmeꞌe tɨ xaꞌapɨꞌɨn een.
\v 11 Eihua pu huapɨꞌɨ raatamuiꞌirejsin nain cɨmeꞌe tɨ tyajamuaꞌaturaateꞌe sej si ruxéꞌeviꞌiraꞌa cɨn tihuaꞌutaꞌan tyamuaꞌa naa.
\p Aɨj tu cɨn ityan, tyamuaꞌa tu rɨꞌɨ tiraataꞌasin ɨ Dioj.
\v 12 Aꞌini tɨj naꞌa sej seyan saɨjna cɨn tiꞌivaɨreꞌe, muan xu seyan huaꞌatyavaꞌɨri aɨme ɨ mej Dioj jemi seijreꞌe, saɨjna cɨmeꞌe ɨ tɨ tihuaꞌaturaateꞌe. Ajta, caxu aɨ sanaꞌa cɨn tiꞌivaɨreꞌe, silu ajta mu eihua rɨꞌɨ tirataꞌaca ɨ Dioj jemi maɨjna cɨmeꞌe aꞌij sej huarɨj.
\v 13 Ayaa puꞌu, aꞌini ayaa xu saɨjna cɨn tihuaꞌavaɨreꞌe, aɨ mu maɨjna cɨn ramuaꞌareeran aꞌij sej tiraꞌaste ɨ tavastaraꞌa. Sajta muan, ayaa xu saɨjna cɨn rɨꞌɨ tiraataꞌasin ɨ Dioj saj raꞌastijreꞌe, sajta raꞌancuraꞌaca ɨ nyuucari tɨ cɨn Dioj amueꞌiratuaasin. Ayaa xu sajta rɨꞌɨ tiraataꞌasin ɨ Dioj saɨjna cɨmeꞌe ɨ saj tyamuaꞌa naa tihuaꞌutapueijve aɨme ɨ mej Jerusalén aꞌuchaatɨme, sajta naijmiꞌica.
\p
\v 14 Majta aɨme, ayaa mu áꞌujcaꞌanye muejmi jemi, majta meyan rahuauhuau ɨ Dioj jemi muejmi cɨmeꞌen, maɨjna cɨmeꞌe tɨ Dioj eihua huapɨꞌɨ rɨꞌɨ tihuaꞌutaꞌa aꞌij sej tiꞌitɨ cɨn huarɨj.
\v 15 Ticheꞌe teyan rɨꞌɨ tiraataꞌan ɨ Dioj tyamuaꞌa naa tyaɨjna cɨmeꞌe tɨ aɨn ayan taatapueijve aɨjna tɨ ayan huapɨꞌɨ tyuꞌujxeꞌeveꞌe ɨ tɨ cɨmeꞌen cai rɨꞌɨri tej teyan rɨꞌɨ tiraataꞌan aꞌij tɨ tiraavijteꞌe.
\c 10
\s Pablo pu nuꞌu tiꞌiseijrata aꞌij tɨ Dioj tiraataij
\p
\v 1 Nyajta inyaa, i nyaj iꞌi Pablo, ayaa nu caꞌanijraꞌa amuataꞌaca nyaɨjna cɨmeꞌe nyej neyan cheꞌeta nyanaꞌa rɨꞌɨ tiꞌitinchaꞌɨ tɨj ajta ɨ Cɨriistuꞌu tɨ ayan tyaꞌutaviicueꞌiriꞌi matɨꞌɨj aꞌij puaꞌa raaruu, tɨ ajta huaꞌancuꞌuvajxɨ ɨ tyaɨte. Nyaa nu nyaɨn pueen ɨ mej meyan tiꞌixaxaꞌa nyaj nuꞌu tiꞌitzɨɨnyeꞌe tɨ puaꞌa muejmi jemi naatyavaaca, nyajta nuꞌu huatyancaꞌanye yu nyatzajtaꞌa muejmi jemi nyatɨꞌɨj nuꞌu yaꞌɨmɨ huatyavaaca.
\p
\v 2 Me nyajta inyaa, ayaa nu amuaatahuaviira saj cai seyan rɨjca nyatɨꞌɨj nyaun aꞌutyavaaca muejmi jemi, sataꞌaj cai caꞌanijraꞌa naataꞌacareꞌen nyej neyan huatanseijrata nyej neyan cheꞌeta nyanaꞌa nyacaꞌanye yu nyatzajtaꞌa nyatɨj neyan tiꞌihuanxaꞌapɨꞌɨntariꞌira nyej neyan huatanseijrata huaꞌa jemi ɨ mej meyan tiꞌitaxajtziꞌi tyaj nuꞌu teyan tiꞌititachaꞌɨ matɨj aɨme ɨ mej iiyan huachaatɨme chaanaca japua.
\p
\v 3 Tyajta ityan, tyan tu áꞌujhuaꞌan iiyan chaanaca japua tatevij cɨmeꞌe ɨ tyaj ratyáhueꞌiraꞌa. Me tyajta ityan, catu teyan tatevij cɨn nyaꞌuseꞌe.
\v 4 Aꞌini aɨjna ɨ tyaj cɨn nyaꞌuseꞌe, capu aun aꞌuveꞌeme ɨ huaꞌamuaꞌatziiraꞌa jetze ɨ maj rutevi cɨn áꞌujhuaꞌan, silu au pu aꞌuveꞌeme ɨ tej jetze aratacaꞌanye tej ti muáreꞌeriꞌiraꞌaraꞌan cɨn raatyáuuna tyaɨjna ɨ maj cɨn tyaujnaamɨ.
\v 5 Tyan tu raꞌuráꞌuunaca tɨj naꞌa ɨ huaꞌamuaꞌatziiraꞌa ɨ maj cɨn huaꞌacuanamua ɨ tyaɨte. Tyan tu ramueꞌitɨcɨ ɨ huaꞌamuaꞌatziiraꞌa, tɨj naꞌa ɨ maj cɨn aꞌujtzaahuatyaꞌa macai rataꞌaca ɨ ruxaijnyuꞌuca maj raamuaꞌati ɨ Dioj. Tɨj naꞌa huaꞌamuaꞌatziiraꞌa, ayaa tu cheꞌeta tyanaꞌa raruure tɨj ɨ xantaaruꞌu tɨ aꞌatɨ seij huateeviꞌi, ajta tyuꞌutatuiireꞌen aɨjna jemi tɨ tiꞌijta. Aɨj tu cɨn tɨj naꞌa ɨ huaꞌamuaꞌatziiraꞌa tej teyan ramueꞌitɨcɨ, tyan tu Cɨriistuꞌu jemi tiꞌituireꞌe tɨ ij ayan raꞌaraꞌastijreꞌen.
\p
\v 6 Tyajta ityan, tuꞌuri rɨꞌɨ huataruu tej ti teyan huarɨni satɨꞌɨj rɨꞌɨ raanaijmiꞌireꞌen saj raꞌastijreꞌen ɨ Dioj. Tɨ puaꞌa ajna seij ayan raatyaxaahuata tɨ cai cheꞌe ayan raꞌaraꞌastijreꞌen, pueijtzi tu raataꞌasin naijmiꞌica aꞌatɨ tɨ naꞌa tɨ ayan rɨni.
\p
\v 7 Maꞌacui xaa, sataꞌaj seyan seijna jetze tyuꞌumuaꞌati ɨ tɨ ayan tiꞌayajna. Tɨ puaꞌa aꞌatɨ ayan tiraꞌamitejtyaꞌa tɨ aɨn Cɨriistuꞌu jetze ajtyamaꞌacan, cheꞌe aɨn ajta raꞌutamuaꞌaree ɨ rutzajtaꞌa tej tyajta teyan cheꞌeta tyanaꞌa ityan ɨ Cɨriistuꞌu jetze ajtyamaꞌacan tɨj ajta aɨjna.
\v 8 Capu amɨn aꞌij tɨ puaꞌa inyaa eitzeꞌe naꞌahuantzaahuateꞌen nyaɨjna cɨmeꞌe ɨ tɨ cɨn nyavastaraꞌa tinyeijca. Capu aɨjna cɨn ayan tinyeijca nyej ni amuaꞌantipuaꞌariteꞌen silu nyej ni rɨꞌɨ amuaruuren. Me nyajta inyaa, canu aꞌatɨ huataꞌasin tɨ aɨn ayan naatateviꞌiraꞌasteꞌen.
\p
\v 9 Ayaa nu een cɨn tyajaꞌamueꞌixaateꞌe sej si cai ayan tinyajaꞌuseijra nyaj nuꞌu aꞌamuamuariteꞌe nyaɨjna cɨmeꞌe aꞌij nyej tyajaꞌamuayuꞌuseꞌe.
\v 10 Aꞌini ayaa mu tiꞌixaxaꞌa tɨcɨn tɨj naꞌa tɨ ráꞌayuꞌuxaca, caꞌanijraꞌa pu tataꞌaca, ajta caꞌanyejri pu cɨn tiꞌitaijteꞌe aɨjna ɨ yuꞌuxari jetze. Ma ajta aɨn, tɨ puaꞌa nuꞌu ya huatyavaaca itejmi jemi, capu áꞌujcaꞌanye tɨ ayan titaataꞌixaateꞌen. Ajta, capu nuꞌu aꞌatzu ruxeꞌeveꞌe aꞌij tɨ tiꞌixaata aꞌame.
\v 11 Majta aɨme ɨ mej meyan tiꞌixaxaꞌa, micheꞌe meyan raamuaꞌaree tɨcɨn ayaa tu cheꞌeta tyanaꞌa tiꞌixaxaꞌa ɨ yuꞌuxari jetze tɨ puaꞌa yaꞌɨmɨ taatyáuuca tyatɨj tyajta tiꞌixaxaꞌa tɨ puaꞌa tyaun muejmi jemi aꞌutyáuuca.
\p
\v 12 Me tyajta ityan, catu áꞌatacaꞌanye tej teyan raataxaj yee tyan tu huaꞌa jetze ajtyamaꞌacan ɨ seica. Catu tyajta teyan yee ayaa tu cheꞌeta tyanaꞌa eꞌen matɨj ɨ seica ɨ mej meyan rɨꞌɨ ruruure muejmi jemi. Majta aɨme, tɨ puaꞌa meyan tyuꞌujseijra seij ajta seij, majta meyan aꞌujtzaahuatyaꞌa rujɨɨmuaꞌa, tɨ puaꞌa meyan rɨjca, camu xaa nyaꞌu meyan rɨꞌɨ metityaumuámuaꞌaree.
\v 13 Me tyajta ityan, ayaa tu tyanaꞌa aꞌatatzaahuateꞌe aꞌij tɨ ayan tiraavijteꞌe. Ayaa tu rɨcɨ aꞌachu tɨ caj Dioj ayan taateꞌitiitze tej ti teyan ahuatatzaahuateꞌen muejmi cɨmeꞌe.
\v 14 Catu teyan huapɨꞌɨ mu aꞌucɨꞌɨca ɨ tɨ cɨn Dioj taateꞌitiitze tɨ puaꞌa teyan tyaun aꞌatanyén muejmi jemi silu tyan tu tyaɨn pueen ɨ tej anacai tyajamuaataꞌixaa ɨ nyuucari tɨ cɨmeꞌen raxa ɨ Cɨriistuꞌu.
\v 15 Catu huapɨꞌɨ aꞌatatzaahuateꞌe tyaɨjna cɨmeꞌe ɨ maj cɨn tyuꞌumuarej ɨ seica, silu ayaa tu tiꞌijxeꞌeveꞌe ityan, saj eitzeꞌe tyaꞌantzaahuateꞌen, tej ti eitzeꞌe tyuꞌutyavaɨreꞌen muejmi jemi.
\v 16 Tyan tu teyan raxeꞌeveꞌe tej tyaun tihuaꞌutaꞌixaateꞌen ɨ nyuucari tɨ cɨmeꞌen raxaj ɨ Cɨriistuꞌu, huaꞌa jemi ɨ mej aꞌɨmɨ aꞌuchaatɨme seij chuejraꞌa japua, tɨ ij cai ayan ruxeꞌevaꞌa tej teyan áꞌatatzaahuatyaꞌa tyaɨjna cɨmeꞌe aꞌij tɨ tyuꞌumuarej ɨ saɨj, ajna aꞌu tɨ ayan tiraꞌitiitze.
\p
\v 17 Ayan tɨcɨn: “Aɨjna tɨ ayan áꞌujtzaahuateꞌe, cheꞌe aɨn aɨjna cɨn aꞌujtzaahuatyaꞌa aꞌij tɨ Dioj ayan rɨꞌɨ tiraataꞌa.”
\p
\v 18 Ayaa puꞌu xaa tiꞌen, aꞌini aɨjna tɨ rusaɨj rɨꞌɨ tyuꞌujseijrata, capu aɨn pueen aɨjna tɨ Dioj ayan raꞌancureꞌeviꞌitɨ silu aɨjna ɨ aꞌatɨ tɨ aɨn tavastaraꞌa ayan rɨꞌɨ tiꞌijseijra.
\c 11
\s Pablo pu tzaahuatiꞌiraꞌa cɨn tiꞌityejvee ɨ tavastaraꞌa jemi
\p
\v 1 Ayaa nu tiꞌijxeꞌeveꞌe sej si aꞌatzu tyaꞌutaviicueꞌi saɨjna cɨmeꞌe nyej ni neyan nyatɨmueꞌira cɨn nyetyajaꞌamueꞌixaateꞌe. Ee xaa, sataꞌaj aꞌatzu tyaꞌutaviicueꞌi nyeetzi jemi.
\v 2 Tij cai tɨ aɨn Dioj ayan naataꞌa nyej ni neyan amuaꞌanchueereꞌen muejmi, aꞌini nyaa nu neyan raaxaꞌapɨꞌɨntare sej si seyan aɨj sanaꞌa jemin huatyaturan ɨ Cɨriistuꞌu saj cai tiꞌitɨ cɨn atyaꞌɨtzaꞌaraꞌan, yaa cumu saj huatyevicheꞌen ɨ jemin.
\p
\v 3 Me nyajta inyaa, ayaa nu eenyeꞌequeꞌe tiꞌitzɨɨnyeꞌe tɨ puaꞌa ayan cheꞌeta naꞌa aꞌatɨ amuaacuanamuan tɨj aɨn ɨ cuꞌucuꞌu ayan tiraacuanamua ɨ rumuaꞌatziiraꞌa cɨmeꞌe aɨjna ɨ Eva. Ayaa nu nyajta eenyeꞌequeꞌe tiꞌitzɨɨnyeꞌe, tɨ puaꞌa ayan aꞌij puaꞌa amuaaruuren ɨ áꞌamuamuaꞌatziiraꞌa jetze sej si cai cheꞌe tzaahuatiꞌiraꞌa cɨn raꞌastijraꞌa ɨ Cɨriistuꞌu, sej si cai cheꞌe seyan nain cɨn ranaꞌamicheꞌen.
\p
\v 4 Ayaa pu tiꞌen, aꞌini tɨ puaꞌa aꞌatɨ mu aꞌuveꞌemeꞌen tɨ ajta ayan tiꞌixaxaꞌa seica cɨmeꞌe ɨ nyuucari tɨ cɨmeꞌen raxaj ɨ Jesús, tɨ cai ruxaꞌa een aꞌij tej teri tyajamueꞌixaa, muan xu xaa rɨꞌɨ tiraꞌancureꞌeviꞌitɨjcɨca. Naꞌari cai, tɨ puaꞌa seij ayan huatyaturan muejmi jemi ɨ xaijnyuꞌucari tɨ cai aɨn pueen tɨ Dioj anacai raatyajtuaa muejmi jemi, ma sajta muan, naa xu tyamuaꞌa tiraꞌancureꞌeviꞌitɨjcɨca. Naꞌari cai, tɨ puaꞌa seyan raꞌancuraꞌan seij ɨ nyuucari tɨ ajta cai ruxaꞌa een aꞌij tɨ een ɨ saj anacai raꞌancuraꞌa, tyamuaꞌa xu naa tiraꞌastijreꞌe saɨjna.
\p
\v 5 Ayaa pu tinaꞌamitejteꞌe inyeetzi, nyaj cai neyan eitzeꞌe cɨleenyaꞌa cɨn tiꞌivaɨreꞌe macai aɨme ɨ maj nuꞌu meyan tyuꞌutaijtiꞌire mej mi eihua huapɨꞌɨ vaꞌacan cɨn tyuꞌutyavaɨreꞌen.
\v 6 Tɨ puaꞌa ayan tiꞌen nyaj nuꞌu cai neyan nyaɨjna cɨn tihuaꞌamuaꞌate nyej ni tyamuaꞌa naa tyuꞌutaxaj huaꞌa jemi ɨ tyaɨte, capu amɨn aꞌij, aꞌini tyamuaꞌa nu naa inyaa rɨꞌɨ tiruꞌumuaꞌaree nyaɨjna cɨmeꞌe aꞌij nyaj tiꞌixaxaꞌa. Nain tu cɨn teyan tyamuaꞌa naa tyajamuaataseijrate muejmi jemi, tyajta naijmiꞌica jemi.
\p
\v 7 ¿Ni qui nyacai autyajturaa ɨ Dioj jemi nyaɨjna cɨmeꞌe nyaj neyan huanruu nyej ni cɨleenyaꞌa cɨn tyuꞌutyavaɨreꞌen muejmi jemi tɨ ij Dioj huapɨꞌɨ tyajamuaataꞌan muejmi aɨjna cɨmeꞌe nyaj huaapuaꞌa nyanaꞌa tyajamuaataꞌixaa ɨ nyuucari tɨ cɨmeꞌen raxa ɨ Dioj? Canu xaa aꞌatzu aɨjna cɨn autyajturaa ɨ Dioj jemi.
\v 8 Nyaa nu huajáꞌuriiriꞌi aɨme ɨ mej puaꞌamuaque eꞌetyujsaꞌɨri ɨ Dioj jemi nyej ni nyaɨjna cɨn huatyanvaɨreꞌen nyej ni nyajta amuaatyavaɨreꞌen muejmi.
\v 9 Ajta, nyatɨꞌɨj nyaun aꞌutyavaacaꞌa muejmi jemi, ajta eihua pu tinaꞌaturaatyaꞌacaꞌa, canu tiꞌitɨj cɨn amuaatamuáreꞌeriste aꞌini aɨme ɨ nyeꞌihuaamuaꞌa ɨ mej maun aꞌuvaꞌajuꞌun, aɨ mu meyan naataꞌa ɨ tɨ tinaꞌaturaatyaꞌacaꞌa. Ayaa nu nain cɨn huarɨj nyej ni cai amuaatajaaxaijteꞌen. Nyajta nyaucheꞌe nu neyan nyaɨjna cɨn rɨcɨ.
\p
\v 10 Tɨj naꞌa tɨ ayan tiꞌayajna Cɨriistuꞌu jemi, aɨ pu ajta nyeetzi jemi seijreꞌe. Aɨj nu cɨn cai raataꞌasin tɨ aꞌatɨ ayan naataꞌijmɨn nyej ni cai cheꞌe tihuaꞌutaꞌixaateꞌen tɨj naꞌa aꞌu tɨ huatacáꞌa u Acaya aɨjna ɨ nyaj cɨn aꞌutantzaahuateꞌen.
\v 11 ¿Aꞌini een cɨmeꞌe? ¿Ni qui aɨjna cɨmeꞌe nyaj cai aꞌamuaxeꞌeveꞌe? Capu xaa nyaꞌu. Dioj pu xaa ramuaꞌaree tɨcɨn nyajaꞌamuaxeꞌeveꞌe.
\p
\v 12 Nyajta, aꞌij nyaj rɨcɨ, nyaucheꞌe nu eitzeꞌe neyan rɨni nyej ni raꞌantipuaꞌariteꞌen nyaɨjna cɨmeꞌe ɨ maj cɨn áꞌujtzaahuateꞌe maj nuꞌu meyan cheꞌeta manaꞌa tiꞌimuareꞌe tyatɨj ityan.
\v 13 Matɨj manaꞌa mej meyan eꞌen matɨj aɨme, aɨ mu cai tzaahuatiꞌiraꞌa cɨn huataitiꞌihuacaꞌa. Aɨ mu hueꞌitzi cɨn tiꞌimuareꞌe, majta meyan tyuꞌujseijrata tɨ nuꞌu Cɨriistuꞌu huaꞌutaityacaꞌa.
\v 14 Tyajta ityan, catu rɨꞌɨ tiraꞌutaseij tyaɨjna cɨmeꞌe. Tyan tu teri teyan ramuaꞌaree tɨ aɨn Satanás ajta ayan ruseijrata tɨ aɨn pueen saɨj tɨ tiꞌivaɨreꞌe u tajapua aꞌu tɨ áꞌunyeeriꞌi rusen cɨmeꞌe.
\v 15 Aɨj pu cɨn, capu aꞌij taatyéjtyauuve tɨ puaꞌa aɨme ɨ mej meyan tiꞌijvaɨreꞌe ɨ Satanás jemi meyan cheꞌeta manaꞌa tyuꞌujseijrata maj nuꞌu maɨjna cɨn tiꞌivaɨreꞌe ɨ tɨ xaꞌapɨꞌɨn een cɨmeꞌe. Majta, ayaa mu teꞌentipuaꞌariteꞌesin aꞌij mej meri tiraamueꞌitɨ maɨjna cɨmeꞌe aꞌij mej tiꞌitɨj huáruu.
\s Pablo pu nuꞌu tirajpueijtzi
\p
\v 16 Nyajtahuaꞌa nu neyan tyajaꞌamueꞌixaateꞌe: caxu seyan tiꞌinyeseijra nyaj nuꞌu nyatɨmeꞌi. Naꞌari cai, tɨ puaꞌa seyan tiꞌinyeseijra, sataꞌaj seyan naꞌancureꞌeviꞌitɨn tɨj saɨj tɨ rutɨmueꞌi nyej ni nyajta aꞌatzu ahuantzaahuateꞌen.
\v 17 Canu nyaɨjna cɨn neyan tyajaꞌamueꞌixaateꞌe nyaɨjna cɨmeꞌe tɨ ayan tineijca ɨ tavastaraꞌa, silu nyej neyan nyatɨmueꞌiracan cɨn tiꞌixa nyej ni tzaahuatiꞌiraꞌa cɨn ahuantzaahuateꞌen.
\v 18 Aꞌini muiꞌitɨ mu meyan áꞌujtzaahuateꞌe maɨjna cɨmeꞌe aꞌij mej tiꞌityujchaꞌɨ ɨ rujetze, ayaa nu cheꞌeta nyanaꞌa aꞌantzaahuateꞌen aꞌij nyej tiꞌitinchaꞌɨ ɨ nyejetze.
\p
\v 19 Ma sajta muan, eihua xu rɨꞌɨ me tityaꞌumuámuaꞌaree. Aɨj xu cɨn tyamuaꞌa naa tyaꞌatavíꞌicueꞌi aɨme jemi ɨ mej rutɨmueꞌi.
\v 20 Tɨ puaꞌa aꞌatɨ ayan tyajamuaataijteꞌen sej si caꞌanyejri cɨn tyuꞌumuareꞌen, muan xu seyan tyaꞌatavíꞌicueꞌi. Naꞌari, tɨ puaꞌa aꞌatɨ ayan amuaꞌariꞌi ɨ saj cɨn huataujvaɨreꞌen, muan xu sajta tyaꞌatavíꞌicueꞌi saɨjna cɨmeꞌe. Sajta seyan cheꞌeta sanaꞌa rɨcɨ tɨ puaꞌa aꞌatɨ amuaacuanamuan nusu tɨ puaꞌa aꞌatɨ áꞌujtzaahuateꞌe muejmi jemi naꞌari tɨ puaꞌa ayan amueꞌityejveeni.
\v 21 Ee xaa nyaꞌu, eecan nu huapɨꞌɨ tiꞌityeviꞌiraꞌa tyaj cai teyan cheꞌeta tyanaꞌa áꞌatacaꞌanye matɨj aɨme.
\p Ma ajta, tiꞌitɨ tɨ naꞌa tɨ cɨn aꞌatɨ ayan áꞌujtzaahuateꞌe, ayaa nu cheꞌeta inyaa nyaɨjna cɨn aꞌantzaahuateꞌe.
\v 22 ¿Ni qui meyan nuꞌu aɨme jetze ajtyamaꞌacan ɨ mej meyan huaꞌatamuaꞌamua tɨcɨn Hebreos? Nyaa nu nyajta aɨme jetze ajtyamaꞌacan. ¿Ni qui meyan nuꞌu maɨjna jetze aꞌiráanye aɨjna ɨ Israel? Ayaa nu cheꞌeta inyaa nyaɨjna jetze aꞌiráanye. Naꞌari, tɨ puaꞌa meyan nuꞌu Abraham jetze aꞌiraujneijte. Nyajta nu inyaa aɨjna jetze aꞌiranneijte.
\v 23 ¿Ni qui meyan nuꞌu tiꞌivaɨreꞌe Cɨriistuꞌu jetze maꞌacan? Eitzeꞌe nu inyaa neyan tiꞌivaɨreꞌe. Ijii nu xaa nyatɨmueꞌiracan cɨn tyajaꞌamueꞌixaateꞌe. Eitzeꞌe nu eihua tiꞌimuareꞌe macai aɨme. Eitzeꞌe nu eihua aityanamiꞌihuacaꞌa macai aɨme. Muiꞌitɨ mu naatyáavajxɨ. Canu cheꞌe ramuaꞌaree aꞌachu maj puaꞌamua meyan naaruu. Nyajta nu muiꞌitɨ tɨn huamɨꞌɨ.
\p
\v 24 Anxɨvi puaꞌamua mu meyan naaruu aɨme ɨ mej Israel jetze ajtyamaꞌacan, mej meyan naꞌityaavajxɨ navij puaasajraꞌaraꞌan cɨmeꞌe ayan puaꞌamua seite japuan tamuaamuataꞌa japuan aramuaacua.
\v 25 Hueica puaꞌamua mu naꞌityaavajxɨ cɨye cɨmeꞌe. Majta seij naatyatuaꞌasixɨ tetej cɨmeꞌe. Hueica puaꞌamua pu atyajrupi ɨ baarcu ɨ nyaj tzajtaꞌan yéꞌicacareꞌe. Ayaa nu nyajta aꞌatee sei tɨcaꞌari, nyajta sei tujcaꞌari nyaj nyaun jaj japua huajaujsimaꞌa.
\p
\v 26 Eihua nu aꞌɨmɨ huayeꞌive ɨ juye jetze, nyajta eihua nu tyuꞌutatzɨn nyaɨjna cɨmeꞌe nyaj antáyeꞌicáa ɨ atyaꞌana japua, nyajta nyaɨme cɨmeꞌe ɨ nahuaꞌari, ajta aɨme jemi ɨ nyej huaꞌaxaꞌa Israel jetze ajtyamaꞌacan naꞌari aɨme jemi ɨ mej seij chuejraꞌa japua eꞌemaꞌacan. Nyajta neyan cheꞌeta nyanaꞌa tyuꞌutatzɨn aꞌu nyej aꞌuyeꞌicaa tɨ puaꞌa chajtaꞌa naꞌari aꞌu tɨ cai maꞌa aꞌa aꞌatɨ nusu atyaꞌana jetze tɨ veꞌe, nyajta aɨme jemi mej meyan tiꞌihueꞌitaca maɨjna cɨmeꞌe maj nuꞌu taꞌihuaamuaꞌa pueen.
\p
\v 27 Eihua nu ráꞌuviicueꞌiriꞌi, nyajta eihua rajpueijtzicaꞌa. Muiꞌitɨ nu puaꞌamua huatáxai nyaj atanyee nyaɨjna cɨmeꞌe ɨ nyaj tyuꞌutatzɨn. Nyajta nu rajpueijtzicaꞌa nyaɨjna cɨmeꞌe nyaj huataꞌicuatacaꞌa, nyajta nyaj huataꞌimɨ. Muiꞌitɨ nu puaꞌamua nyacai tyuꞌucuaa, nyajta huatyaxaamɨ, nyajta cai tíꞌityechajca.
\p
\v 28 Ajta iꞌi, tɨj naꞌa nain tujcaꞌari tzajtaꞌa, ayaa pu tiꞌinyamuareꞌeristeꞌe aɨjna cɨmeꞌe nyaj eecan aꞌij tyaꞌanmuaꞌate aɨme jemi ɨ mej nain japua eꞌetyujsaꞌɨri ɨ Dioj jemi.
\p
\v 29 Ayaa nu tyajaꞌamueꞌixaateꞌe, tɨ puaꞌa seij cai ruꞌucaꞌanistiꞌira tɨ huaꞌa jetze ajtyamaꞌacan ɨ mej eꞌetyujsaꞌɨri ɨ Dioj jemi, ayaa pu ajta cai nyeetzi tinuꞌucaꞌanistiꞌi ɨ jemin. Ajta, tɨ puaꞌa aꞌatɨ ayan caꞌanijraꞌa raataꞌan seij tɨ ajta huaꞌa jetze ajtyamaꞌacan tɨ ij aɨn ayan autyaꞌɨtzen ɨ Dioj jemi, eecan pu naatajaaxaijteꞌesin.
\p
\v 30 Tɨ puaꞌa ayan tyuꞌujxeꞌeveꞌe nyaj tiꞌitɨ cɨn ahuantzaahuateꞌen, ayaa nu huarɨni nyej neyan nyaɨjna cɨn aꞌantzaahuateꞌen nyaɨjna cɨmeꞌe ɨ tɨ cai nuꞌucaꞌanistiꞌi.
\v 31 Ajta aɨn ɨ Dioj tɨ ajta yaꞌupuaaraꞌan pueen ɨ tavastaraꞌa, aɨjna ɨ Jesús, aɨ pu ramuaꞌaree nyaj cai tiꞌihueꞌi. Ticheꞌe rɨꞌɨ tiraataꞌan aɨjna ɨ Dioj tɨj naꞌa rusen cɨmeꞌe.
\p
\v 32 Nyatɨꞌɨj nyaun aꞌutyavaacaꞌa u Damasco, aɨjna ɨ tajtuhuan tɨ aɨn rey raꞌantihuau, aɨ pu rachaɨcaꞌa ɨ chajtaꞌana, aujna u Damasco, tɨ ij aɨn ayan naateeviꞌi.
\v 33 Me nyajta inyaa, ayaa nu eenyeꞌequeꞌe huiirajraa maj naꞌacajtuaa sicɨri jetze aujna aꞌu tɨ anacun ɨ jaxuꞌu jetze.
\c 12
\s Tiꞌitɨ pu xaa huataseijre ɨ Pablo jemi
\p
\v 1 Nyaucheꞌe nu aꞌantzaahuateꞌe. Capu aꞌij rɨni tɨ cai tiꞌitɨ cɨn tinaatyavaꞌɨri. Nuꞌuri nyaɨjna cɨn tyajamuaataꞌixaateꞌesin aꞌij tɨ tiꞌitɨ tyuꞌutaseijre inyeetzi jemi, ajta aɨjna tɨ tavastaraꞌa ayan naataseijra.
\v 2 Aꞌatɨ nu neyan muaꞌate tɨ Cɨriistuꞌu jetze ajtyamaꞌacan tɨ aꞌanaj ayan tiraaruu. Puꞌuri aꞌatee aꞌachu cumu tamuaamuataꞌa japuan muaacua ninyeꞌiraꞌa tɨ Dioj utyaꞌɨmɨ yaꞌuviꞌitɨ aꞌu mej eꞌeseijreꞌe ɨ mej Dioj jemi tiꞌivaɨreꞌe. Canu ramuaꞌaree tɨ puaꞌa aɨn aꞌatɨ aucheꞌe ayan seijraꞌa ɨ rutevi cɨmeꞌe nusu cai. Dioj pu xaa ramuaꞌaree.
\v 3 Nyaa nu xaa ramuaꞌaree tɨ Dioj ayan yaꞌuviꞌitɨ u utyaꞌɨmɨ aujna aꞌu tɨ naa hueꞌen. Canu ramuaꞌaree tɨ puaꞌa auj seijreꞌe ɨ rutevi cɨmeꞌe nusu cai cheꞌe, silu aɨ pu ɨ Dioj ramuaꞌaree.
\v 4 Auu pu ayan eenyeꞌequeꞌe tyajaꞌanamua aɨjna tɨ cai aꞌij rɨꞌɨri tɨ aꞌatɨ raataxaj iiyan chaanaca japua, aꞌini capu ayan aꞌachauutzijreꞌe tɨ aꞌatɨ ayan raataxaj iiyan chaanaca japua.
\p
\v 5 Canu nyacɨmeꞌen aꞌantzaahuateꞌen, silu aɨj nu xaa cɨn aꞌantzaahuateꞌen nyaɨjna ɨ aꞌatɨ. Ajta tɨ puaꞌa neyan nyacɨmeꞌen aꞌantzaahuateꞌe, aij nu cɨn aꞌutantzaahuateꞌesin nyaɨjna cɨmeꞌe ɨ tɨ cai nuꞌucaꞌanistiꞌi.
\v 6 Ma ajta, tɨ puaꞌa neyan caꞌanijraꞌa tiꞌitanyaꞌacareꞌen nyej ni aꞌutantzaahuateꞌen, canu nyaɨn pueenyaꞌa naꞌame saɨj tɨ chaꞌa naꞌa tiꞌixaj, aꞌini nyaa nu tzaahuatiꞌiraꞌa cɨn tyuꞌutaxajta. Me nyajta inyaa, canu neyan rɨni tɨ ij cai aꞌatɨ ayan huapɨꞌɨ tiꞌinyeseijra inyeetzi aꞌij tɨ cai tiraavijteꞌe, silu cheꞌe aɨn ayan tiꞌinyeseijra aꞌij nyej rɨcɨ, ajta aꞌij nyaj tiꞌixa.
\p
\v 7 Aꞌini eecan pu huapɨꞌɨ tyuꞌujxeꞌevaꞌacaa aɨjna tɨ huataseijre inyeetzi jemi, nyej ni cai huapɨꞌɨ ahuantzaahuateꞌen, Dioj pu ayan raatyajtuaa inyeetzi jemi tiꞌitɨ tɨ nyaꞌɨtziityaꞌacaa ɨ nyetevi jetze. Cu xuee tɨ cuj tzicareꞌe naꞌajtejtze i nyejetze. Aɨ pu aɨn pueenyaꞌa ɨ tɨ Satanás yaꞌutaityacaꞌa tɨ nyaꞌɨtziiteꞌen nyej ni cai huapɨꞌɨ ahuantzaahuateꞌen.
\p
\v 8 Hueica puaꞌamua nu neyan nyaɨjna cɨn tirajhuaviiriꞌi ɨ tavastaraꞌa tɨ naꞌariꞌi aɨjna tɨ nuꞌucuiꞌicaꞌa yu nyatzajtaꞌa.
\v 9 Ajta aɨn ɨ tavastaraꞌa, aɨ pu ayan tinaataꞌixaa tɨcɨn: “Aɨjna ɨ nyaj cɨn nyexeꞌeviꞌiraꞌa cɨn rɨꞌɨ timuaataꞌaca, ayaa pu aꞌavejre mueetzi, aꞌini ayaa pu ranaijmireꞌen ɨ nyamuareꞌeriꞌiraꞌa aɨjna cɨmeꞌe ɨ tɨ cai muꞌucaꞌanistiꞌi.”
\p Aɨj nu cɨn, neyan nyexeꞌeviꞌiraꞌa cɨn ahuantzaahuateꞌen nyaɨjna cɨmeꞌe tɨ cai nuꞌucaꞌanistiꞌi tɨ ij aɨn muáreꞌeriꞌiraꞌaraꞌan ɨ Cɨriistuꞌu ayan nyeetzi jemi huatyaturan.
\v 10 Aɨj nu cɨn, neyan nyexeꞌeviꞌiraꞌa cɨn aꞌancaꞌanye ɨ Cɨriistuꞌu jetze maꞌacan nyej ni nyaɨjna cɨn tyaꞌutaviicueꞌi aɨjna tɨ cai nuꞌucaꞌanistiꞌi nusu ɨ maj aꞌij puaꞌa tiꞌinyejee naꞌari aɨjna tɨ nyamuareꞌeristeꞌe caꞌɨn maj aꞌij puaꞌa nyaruure naꞌari maj pueijtzi naataꞌaca. Ayaa nu áꞌancaꞌanye aꞌini tɨj naꞌa tɨ cai nuꞌucaꞌanistiꞌi, aɨj nu jetze arancaꞌanye ɨ tɨ tavastaraꞌa rɨꞌɨ tinataꞌaca inyeetzi.
\s Pablo pu nuꞌu aꞌij tyaꞌujmuajca cɨmeꞌen aɨme ɨ mej Corinto aꞌuchaatɨmee
\p
\v 11 Ee xaa nyaꞌu, nyaa nu xaa nyatɨmueꞌi. Muan xu caꞌanyejri naataꞌa nyej ni neyan huarɨni. Ma ajta, eitzeꞌe pu ayan tiraavijtyaꞌacacheꞌe sej seyan rɨꞌɨ naꞌanrúꞌureꞌen, aꞌini canu xaa nyaꞌu eitzeꞌe cɨleenyaꞌa cɨn tiꞌivaɨreꞌe macai aɨme ɨ maj nuꞌu huapɨꞌɨ vaꞌacan cɨn tiꞌivaɨreꞌe tɨ eeriꞌi Dioj nuꞌu huaꞌantihuau. Capu amɨn aꞌij nyaj cai tiꞌitɨ cɨn antinmuaꞌaree.
\p
\v 12 Xuꞌuri tyuꞌuseij muejmi jemi tɨ ayan huarɨj tɨj naꞌa tɨ ayan rɨjca ɨ aꞌatɨ tɨ Dioj raataityacaꞌa. Aɨjna ɨ maj cɨn naa rɨꞌɨ tiraꞌutaseij, ajta aɨjna tɨ cɨn Dioj tihueꞌitiiriꞌi, ajta aɨjna tɨ ayan huarɨj aɨjna cɨmeꞌe ɨ muáreꞌeriꞌiraꞌaraꞌan ɨ Dioj, naijmiꞌi pu ayan tyuꞌutaseijre muejmi jemi nyatɨꞌɨj nyauj téꞌeviicueꞌiracaa aɨme jemi ɨ mej nyejchaɨreꞌe.
\p
\v 13 ¿Tiꞌitajni ayan cai tyajamuaacɨ́ꞌɨ tɨ ajta cai ayan tihuaꞌucɨꞌɨ aɨme ɨ mej puaꞌamuaque eꞌetyujsaꞌɨri? Capu tiꞌitɨ xaa nyaꞌu, silu aɨjna ɨ nyaj cai aꞌanaj tiꞌitɨj cɨn muareꞌeri amuaataꞌa. Sataꞌaj tinaatauuniꞌi nyaj cai nyaɨjna cɨn xaꞌapɨꞌɨn pɨ amuaaruu.
\s Hueica pu cɨn ayan tiꞌixa aɨjna ɨ Pablo tɨ huajaꞌuváꞌamuaaren
\p
\v 14 Casiꞌi, muan, nuꞌuri nyajtahuaꞌa rɨꞌɨ huanruu nyej ni nyajtahuaꞌa amuajaꞌuvaꞌamuaare. Puꞌuri hueica tyajaꞌureꞌenyejsin. Nyajta, canu aꞌatzu tiꞌitɨj cɨn muareꞌeri amuaataꞌasin, aꞌini canu rúuhuaumen tɨ muejmi aꞌamuaꞌa, silu nyaj muejmi aꞌuvaꞌahuauni. Ayaa nu rɨcɨ aꞌini capu ayan tiraavijteꞌe maj maɨn tɨꞌɨrii meyan ruvaujsimuaꞌa tiꞌitɨ taꞌacareꞌen, silu aɨme ɨ vaujsimuaꞌameꞌen, aɨ mu meyan tiꞌitɨ huaꞌuataꞌaca ɨ ruyaujmuaꞌa.
\v 15 Nyaa nu xaa nyexeꞌeviꞌiraꞌa cɨn tiꞌitɨ áꞌujɨsin nyeetzi tɨ nyaꞌa naꞌari neyan raaxɨjteꞌen tɨj naꞌa tɨ nyeetzi nyaꞌa nyej ni jamuaatyavaɨreꞌen muejmi. Ajta, tɨ puaꞌa neyan eitzeꞌe aꞌamuaxeꞌevaꞌa, ¿ni qui ayan huataujmuaꞌa saj cai cheꞌe seyan nyexeꞌeveꞌe inyeetzi?
\p
\v 16 Cheꞌe ayan eenyeꞌen nyaj cai tiꞌitɨ cɨn muareꞌeri ámuaataꞌa. Ayaa xu tiꞌixa nyaj nuꞌu huapɨꞌɨ ruꞌumuaꞌaree nyaj hueꞌitzi cɨn tiꞌitinchaɨca, nyajta nuꞌu hueꞌitzi cɨn amaꞌurai.
\v 17 ¿Ni neyan tiꞌitɨ cɨn amuajaꞌurai nyaɨjna cɨmeꞌe nyej seica huataityacaꞌa muejmi jemi? Canu xaa nyaꞌu.
\v 18 Nyaa nu caꞌanijraꞌa raataꞌa nyaɨjna ɨ Tito tɨ ij aɨn áꞌumeꞌen muejmi jemi. Nyajta jamuan raataityacaꞌa nyaɨjna ɨ taꞌihuaaraꞌa. ¿Ni qui tiꞌitɨ cɨn amuaajaꞌurai aɨjna ɨ Tito? Capu xaa nyaꞌu. ¿Ni tyacai ityan teyan cheꞌeta tyanaꞌa tiꞌititachaꞌɨ tɨj ajta aɨjna? ¿Ni tyacai teyan cheꞌeta tyanaꞌa áꞌatacaꞌanye muejmi jemi tɨj ajta aɨjna? Aꞌini tijta xaa nyaꞌu.
\p
\v 19 Tɨj naꞌa nyej neyan tyajaꞌamueꞌixaateꞌe, ayan tyajamuaꞌamitejteꞌe tej teyan tajapua huatyátanan muejmi jemi. Me tyajta ityan, catu, silu ɨ Dioj jemi tu teyan tyajaꞌamueꞌixaateꞌe tyaɨjna cɨmeꞌe tej Cɨriistuꞌu jetze ajtyamaꞌacan, tej ti nain cɨn rɨꞌɨ amuaaruuren muejmi, ɨ tej aꞌamuaxeꞌeveꞌe.
\p
\v 20 Ayaa nu een cɨn tiꞌitzɨɨnyeꞌe tɨ puaꞌa neri nyaun araꞌasti, nyajta neyan eenyeꞌequeꞌe amuaatauuni saj cai seyan tiꞌityujchaꞌɨ aꞌij nyej tiꞌijxeꞌeveꞌe, sajta seyan eenyeꞌequeꞌe naatyauni muan nyaj cai neyan een aꞌij sej sajta tiꞌijxeꞌeveꞌe. ¿Ni qui seyan muan xu tyujtyaꞌaxɨꞌɨsin nusu seyan ahuaujchueereꞌen naꞌari seyan tininyuꞌucacu? ¿Ni qui seyan aꞌitaꞌa aꞌutajuꞌun naꞌari sajta seyan aꞌij puaꞌa tiꞌihuaujxajtziꞌi nusu aꞌij puaꞌa setyuꞌujxajta? ¿Ni qui majta seica meyan aꞌujtzaahuatyaꞌa muaꞌajuꞌun, majta aꞌij puaꞌa rɨɨ muaꞌajuꞌun?
\p
\v 21 Ayaa nu nyajta eenyeꞌequeꞌe tiꞌitzɨɨnyeꞌe tɨ ayan Dioj naatateviꞌiraꞌasteꞌen muejmi jemi nyatɨꞌɨj nyajtahuaꞌa nyaun aꞌaraꞌasti. Tij cai ayan tyuꞌujxeꞌevaꞌa aꞌame nyaj nyaɨjna cɨn huatyanxaamɨsteꞌen nyaɨjna cɨmeꞌe ɨ maj muiꞌitɨ, aɨme ɨ maj aꞌamua jetze ajtyamaꞌacan, ɨ maj majta anacai autyajturaa ɨ Dioj jemi. Aɨ mu aɨn pueen ɨ maj majta cai xɨ saɨque tyuꞌumuáꞌa mej mi raatapuaꞌajta ɨ maj cɨn autaꞌɨtzaꞌara, tɨj naꞌa tɨ aꞌij puaꞌa seijreꞌe ɨ Dioj jemi, maj ruxanaꞌacɨraꞌacaa, maj majta rutevi cɨn raamueꞌitɨjcɨ ɨ tumin, maj cai tiꞌitɨ aꞌastijreꞌe, aɨjna ɨ maj cɨn meyan aꞌij puaꞌa tiꞌityujchaꞌɨ.
\c 13
\s Pablo pu tíhuéꞌijmɨn
\p
\v 1 Nuꞌuri huaꞌapua jamaꞌuvaꞌamuaaracaꞌa, nyajtahuaꞌa nu neri tɨn aꞌatanyejsin muejmi jemi. Ayaa nu rɨni aꞌij tɨ teꞌeyuꞌusiꞌi tɨcɨn: “Mej mi tzaahuatiꞌiraꞌa cɨn seij aꞌuxɨ́jteꞌen, ayaa pu ruxeꞌeveꞌe mej meyan tyuꞌutaxaj huaꞌapua ɨ tyaɨte nusu hueica.”
\v 2 Ayaa nu tihuaꞌutanyuuche ɨ mej mejmiꞌi autyajturaa ɨ Dioj jemi, nyajta naijmiꞌica ɨ seica. Ijii, nyaj yaꞌɨmɨ huatejvee, nuꞌuri nyajtahuaꞌa neyan cheꞌeta nyanaꞌa tihuáꞌanyuuche nyatɨj huarɨj nyatɨꞌɨj huaꞌapuacajretze amuámuaaracaꞌa. Tɨ puaꞌa nyajtahuaꞌa nyaun aꞌatanyén, canu cheꞌe tihuaꞌutauuniꞌira,
\v 3 aꞌini muan xu seyan raxeꞌeveꞌe nyaj tiꞌitɨ jamuaataseijrateꞌen ɨ saj cɨn raamuaꞌaree tɨ aɨn Cɨriistuꞌu ayan caꞌanijraꞌa naataꞌaca nyej ni neyan tyuꞌuxáj aɨjna jetze maꞌacan. Ajta aɨn Cɨriistuꞌu, capu ayan een muejmi jemi tɨj seij tɨ cai ruꞌucaꞌanistiꞌi, silu eecan pu huapɨꞌɨ tyuꞌumuarej muejmi jemi aɨjna cɨmeꞌe ɨ rumuareꞌeriꞌiraꞌa.
\p
\v 4 Aɨ pu xaa cɨn ayan áutataihuacaꞌa ɨ curuu jetze aɨjna cɨmeꞌe tɨ cai ruꞌucaꞌanistiꞌiracaꞌa ɨ rutevi jetze. Ma ajta ijii, aɨ pu ruuri seijreꞌe aɨjna cɨmeꞌe ɨ muáreꞌeriꞌiraꞌaraꞌan ɨ Dioj. Ajta, ityejmi, ayaa pu cheꞌeta naꞌa cai tuꞌucaꞌanistiꞌi aɨjna cɨmeꞌe tej Cɨriistuꞌu jetze ajtyamaꞌacan. Me tyajta ityan, ɨ tyaj cɨn tiꞌivaɨreꞌe muejmi jemi, tyan tu ruuri taꞌajuꞌun ɨ jemin tyaɨjna cɨmeꞌe tej jetzen aratacaꞌanye ɨ Dioj.
\p
\v 5 Sataꞌaj seyan huaujmuaꞌatziiteꞌen aisɨ tɨ puaꞌa seyan raꞌastijreꞌe saɨjna cɨmeꞌe sej tyaꞌatzaahuateꞌe nusu sacai. Sataꞌaj huatyaujsei tyamuaꞌa naa ɨ rujetze. ¿Ni qui ayan ari tyajamuaꞌamitejteꞌe tɨ aɨn Jesús, tɨ ajta Cɨriistuꞌu pueen, aɨn muejmi jemi huatyajturaa? Naꞌari cai, nusu seri huamuéꞌitɨche.
\v 6 Ayaa nu tiꞌijxeꞌeveꞌe tɨ ij ayan tyajamuaꞌamityejtyaꞌa tyaj cai huamueꞌitɨche ityan.
\p
\v 7 Me tyajta ityan, ayaa tu tiꞌijhuavii ɨ Dioj sej si cai tiꞌitɨ cɨn autyaturan. Catu teyan tacɨmeꞌen rahuavii tɨ ij ayan tyajamuaꞌamityejtyaꞌa tej teyan tyaɨjna cɨn tyaꞌaraꞌasten, silu sej si seyan huarɨni aꞌij tɨ tiraavijteꞌe. Capu amɨn aꞌij tɨ puaꞌa ayan tyajamuaꞌamitejteꞌe tyaj huamueꞌitɨche nusu tyacai.
\v 8 Ayaa nu een cɨn neyan tyajaꞌamueꞌixaateꞌe, aꞌini catu tyaɨjna cɨn antitamuaꞌaree tej raataꞌijmɨ tyaɨjna tɨ tzaahuatiꞌiraꞌa cɨn seijreꞌe, silu tyan tu tyaɨjna cɨn antitamuaꞌaree tej ti tyuꞌutyavaɨreꞌen tyaɨjna cɨmeꞌe tɨ tzaahuatiꞌiraꞌa cɨn seijreꞌe.
\p
\v 9 Tyan tu xaa teyan tatyamuaꞌaveꞌe tyaɨjna cɨmeꞌe tɨ cai tuꞌucaꞌanistiꞌi itejmi, tyajta tyaɨjna cɨmeꞌe saj muan seri huatyaujcaꞌane ɨ rutzajtaꞌa ɨ tavastaraꞌa jemi. Ayaa tu muejmi cɨmeꞌen tiꞌijhuavii tɨ ij Dioj ayan amuaanáijmireꞌen.
\v 10 Ayaa nu yaꞌɨmɨ huatyavaa neyan tyajaꞌamuayuꞌuseꞌe tɨ ij cai ayan tyuꞌujxeꞌevaꞌa aꞌaraꞌani nyej ni neyan amuaatamuáreꞌeristeꞌen nyaɨjna cɨmeꞌe tɨ nyavastaraꞌa ayan tinyeijca nyej ni rɨꞌɨ amuaaruuren. Capu xaa nyaꞌu aɨjna cɨn ayan tinyeijca nyej ámuaatyáuuna.
\s Huáꞌataujtyaꞌa, aɨ pu ajta raꞌantipuaꞌari
\p
\v 11 Sataꞌaj huaujtyamuaꞌaveꞌen, nyeꞌihuaamuaꞌa. Sataꞌaj rɨꞌɨ huaujruuren saɨjna cɨmeꞌe aꞌij sej tiꞌityujchaꞌɨ. Sataꞌaj sajta seyan raꞌastijraꞌa ɨ nyaj cɨn aꞌamuahuavii. Sataꞌaj sajta seyan cheꞌeta sanaꞌa rɨꞌɨ tyuꞌumuaꞌati, sataꞌaj sajta ruxaahua tíꞌichajca. Tɨ puaꞌa seyan huarɨni, aɨ pu muejmi tzajtaꞌa huatyaturaasin aɨjna ɨ Dioj tɨ ayan aꞌamuaxeꞌeveꞌe, tɨ ajta amuaatyápuaꞌariteꞌen.
\v 12 Sataꞌaj seyan huáujtaujteꞌen, xuꞌityaujvisiꞌitɨmuaꞌacareꞌe saɨjna cɨmeꞌe saj naimiꞌi Cɨriistuꞌu jetze ajtyamaꞌacan.
\p
\v 13 Naimiꞌi ɨ mej tyaꞌatzaahuateꞌe, ɨ maj majta iiya tyujsaꞌɨri, aɨ mu áꞌamuataujteꞌe.
\p
\v 14 Cheꞌe ayan muejmi jemi huatyaturan aɨjna ɨ tɨ cɨn rɨꞌɨ tyajamuaataꞌaca ɨ tavastaraꞌa, aɨjna ɨ Jesús tɨ ajta Cɨriistuꞌu pueen. Cheꞌe ajta aꞌamuaxeꞌevaꞌa ɨ Dioj. Cheꞌe ajta aɨn xaijnyuꞌucaraꞌaraꞌan ɨ Dioj ayan huatyaturan muejmi jemi naijmiꞌica. Cheꞌe ayan tyáꞌaraꞌani.