\id GAL
\h Gálatas
\toc1 Gálatas
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Gálatas aꞌuchaatɨmaꞌacaa
\c 1
\s Pablo pu huaꞌataujteꞌe
\p
\v 1 Inyaa, i nyaj iꞌi Pablo, naijmiꞌica jamuan ɨ nyeꞌihuaamuaꞌa ɨ mej nyaa jamuan ya huati,
\v 2 tyan tu ye tyajaꞌamuayuꞌuseꞌe muejmi mɨ sej eꞌetyujsaꞌɨri muiꞌicaque u Galacia. Nyaa nu nyaɨn pueen saɨj ɨ tɨ Dioj nyajaꞌutaityacaꞌa. Capu tevi naꞌa nyajaꞌutaityacaꞌa, capu aꞌatɨ ajta naꞌantihuau silu aɨ puꞌu nyaꞌu aɨjna ɨ Jesús tɨ iꞌi Cɨriistuꞌu, ajta ɨ taatajraꞌan tɨ aɨn pueen ɨ Dioj tɨ raꞌajjáj huaꞌatzajtaꞌa ɨ mɨꞌɨchite.
\p
\v 3 Cheꞌe aɨn ɨ Dioj ɨ tyaj rajyaꞌupua, ajta aɨn ɨ tavastaraꞌa aɨjna ɨ Jesús tɨ ajta iꞌi Cɨriistuꞌu, micheꞌe maɨn rɨꞌɨ tyajamuaataꞌan ruxéꞌeviꞌiraꞌa cɨmeꞌe, micheꞌe majta rɨꞌɨ tyajamuaatyápuaꞌariteꞌen ɨ aꞌamuatzajtaꞌa.
\v 4 Cheꞌe ayen éenyeꞌen, aꞌini aɨn ɨ tavastaraꞌa huatauraꞌa tɨ huamɨꞌɨni ta jetze maꞌacan tɨ ij aɨn tuꞌirajtuaani aɨme tzajtaꞌa ɨ mej aꞌij puaꞌa titetyújchaꞌɨ ɨ mej yan japuan huachaatɨme iiyan chaanaca japua. Ayaa pu tiꞌijxeꞌeveꞌe ɨ Dioj ɨ tyaj rajyaꞌupua tɨ aɨn Jesús ayan huarɨni.
\v 5 Aɨj pu cɨn ticheꞌe teyan rɨꞌɨ tiraataꞌan para rusen cɨmeꞌe. Ayaa puꞌu, cheꞌe ayan tyajaꞌureꞌenyen.
\s Capu nuꞌu maaj nyuucari ɨ tɨ cɨn hueꞌirajtuaasin aɨjna ɨ Dioj
\p
\v 6 Eecan nu aꞌij puaꞌa tyaꞌutanmuaꞌa nyaɨjna cɨmeꞌe sej seyan caꞌanacan ma rúuhuaꞌana saɨjna tɨ amuaatajée sej si raꞌaraꞌastijreꞌen seij aꞌini Cɨriistuꞌu pu aꞌamua japua huanyúu ruxéꞌeviꞌiraꞌa cɨmeꞌe. Muan xu ma rúuhuaꞌana sej si saɨque tiraꞌancuraꞌan seica ɨ nyuucari ɨ saj nuꞌu cɨn huataujtyamuaꞌaveꞌen.
\v 7 Ma ajta cai, capu aꞌatzu aɨn pueen seij ɨ nyuucari ɨ tɨ cɨn Dioj amueꞌiratuaasin. Ayej nyaꞌase seica mu aꞌamuaꞌɨtziiteꞌe sej si cai cheꞌe rɨꞌɨ tityáꞌujmuaꞌatya. Tij macai meyan tiꞌityeseꞌe mej saɨque raaruuren ɨ nyuucari tɨ xaa aꞌij tiꞌitɨj cɨmeꞌen raxa ɨ Cɨriistuꞌu.
\v 8 Aru tɨ puaꞌa aꞌatɨ ayan saɨque tyajaꞌamueꞌixaatyaꞌa ɨ nyuucari tɨ cai ayan namuajreꞌe aꞌij tej teri tyajamueꞌixaa, cheꞌe Dioj pueijtzi raataꞌan. Capu amɨn aꞌij aꞌatɨ tɨ pueen tɨ ayan saɨque tyajaꞌamueꞌixaateꞌe, tɨ puaꞌa inyaa naꞌari seij tɨ tiꞌivaɨreꞌe u tajapua.
\v 9 Tuꞌuri teyan tyajaꞌamueꞌixa. Tyajta tyajtahuaꞌa tu teyan tyajaꞌamueꞌixaateꞌe yee tɨ puaꞌa aꞌatɨ ayan saɨque tyajaꞌamueꞌixaatyaꞌa seica ɨ nyuucari tɨ cai ayan namuajreꞌe aꞌij tej teri tyajamueꞌixaa, cheꞌe Dioj pueijtzi raataꞌan.
\p
\v 10 ¿Aꞌini setiꞌimuaꞌatze muan nyeetzi cɨmeꞌen? ¿Ni qui yee nyej neyan raahuausin ɨ tyaɨte tzajtaꞌa mej mi rɨꞌɨ tinaaseij nusu nyej neyan raahuausin ɨ Dioj jemi tɨ aɨn xaa rɨꞌɨ tinaaseij? ¿Ni qui ayan tyajamuaꞌamitejteꞌe nyaj nyaɨjna cɨn neyan tiꞌityeseꞌe nyej ni rɨꞌɨ tihuaꞌutaꞌan ɨ tyaɨte? Tɨ puaꞌa ayan tyaꞌameꞌencheꞌe nyej nyaɨjna cɨn tiꞌityeseꞌe, capu cheꞌe rɨꞌɨrista aꞌameꞌencheꞌe nyej neyan nicu tiꞌijvaɨreꞌe ɨ Cɨriistuꞌu.
\s Capu nuꞌu rusaɨj áꞌij tirajtyau aꞌij tɨ tiꞌitɨj cɨn tiꞌivaɨreꞌe ɨ Cɨriistuꞌu jemi
\p
\v 11 Ayaa nu tiꞌijxeꞌeveꞌe, nyeꞌihuaamuaꞌa, sej si tiraamuaꞌati tɨ cai aꞌatɨ rusaɨj aꞌij tirajtyau ɨ nyuucari ɨ nyaj cɨn tyajamueꞌixaa.
\v 12 Canu raꞌancuraꞌa tyaɨte jemi. Capu aꞌatɨ ayan tinaamuaꞌate, silu aɨn Cɨriistuꞌu, aɨ pu tinaataseijrate aɨjna tɨ avítziꞌihuacaꞌa ɨ Dioj jemi.
\v 13 Sajta muan, xuꞌuri raamuaꞌareeriꞌi aꞌij nyej tiꞌijrɨꞌɨrajcaa ɨ jajcuaꞌɨmɨ nyatɨꞌɨj nyauj raꞌastijraꞌacaa ɨ huaꞌayeꞌira aɨme ɨ maj Israel jetze ajtyamaꞌacan. Naꞌarancaꞌanyaacan nu cɨn aꞌij puaꞌa huaꞌaruurajcaa aɨme ɨ mej Cɨriistuꞌu jemi seijraꞌacaa. Nyaa nu tiꞌityesaꞌacaa nyaj huaꞌantipuaꞌariteꞌen naijmiꞌica.
\p
\v 14 Eitzeꞌe nu raꞌastijraꞌacaa ɨ nyavaujsimuaꞌa tyaacan tihuaꞌayeꞌira cai aɨme ɨ nyaxaꞌaj tyaɨte, ɨ maj Israel jetze ajtyamaꞌacan, ɨ maj majta meyan tíꞌityeta nyatɨj inyaa. Naijmiꞌica nu huatyaamueꞌitɨ nyaɨjna cɨmeꞌe ɨ nyaj raayɨꞌɨtɨhuaꞌa ɨ tayeꞌirá.
\p
\v 15-16 Ma ajta Dioj, aɨ pu naꞌantihuau nyatɨꞌɨj cai xɨ huanuꞌeihuaj. Aɨ pu ajta naatajée aɨjna cɨmeꞌe tɨ náꞌancuꞌuvajxɨ ruxéꞌeviꞌiraꞌa cɨmeꞌe. Tɨꞌɨj i raꞌaranajchacaꞌa nyej raamuaꞌati aɨjna tɨ iꞌi yaujraꞌan nyej ni neyan tihuaꞌutaꞌixaateꞌen huaꞌa tzajtaꞌa aɨme ɨ maj cai Israel jetze ajtyamaꞌacan. Tɨꞌɨj Dioj ayan naaruu, canu aꞌatɨ jemi aꞌatanye tɨ ij aɨn tinaamuaꞌaten aꞌij nyej tiꞌitɨ cɨn neyan huarɨni.
\v 17 Canu nyajta nyaun aꞌujnyéj anti Jerusalén nyej ni huaꞌumuaare aɨme ɨ maj anacai antíhuaviihuacaꞌa nyatɨꞌɨj cai xɨ inyaa, silu eꞌeyan nu nyaun aꞌatanye u Arabia. Aj nu niꞌijta nyaun áꞌumej u Damasco.
\p
\v 18 Hueica ninyeꞌiraꞌa nu nyaun eꞌetee. Aj nu ni nyaun aꞌujnyéj anti Jerusalén nyej ni raamuaꞌati nyaɨjna ɨ Pedro. Nyajta nu jamuan aꞌucatii aꞌachu cumu huaꞌapua iteeri.
\v 19 Seij nu nyajta nyaun aꞌuseij nyaɨjna ɨ Jacobo tɨ iꞌi juutzajraꞌan ɨ tavastaraꞌa. Canu maa aꞌatɨ aꞌuseij tɨ huaꞌa jetze ajtyamaꞌacantacaa aɨme ɨ maj antíhuaviihuacaꞌa.
\v 20 Ayaa nu tyajaꞌamueꞌixaateꞌe tzaahuatiꞌiraꞌa cɨmeꞌe tɨ aɨn Dioj ajta ramuaꞌaree nyaj cai hueꞌitzi cɨn tyajaꞌamuayuꞌuseꞌe.
\p
\v 21 Nyajta eꞌeyan, nyaun u aꞌaráꞌa nyaujna ɨ seij chuejraꞌa japua u Siria, nyajta nyaujna u Cilisia.
\v 22 Majta aɨme ɨ maj maun aꞌuchaatɨme ɨ maj majta Cɨriistuꞌu jemi seijreꞌe, capu aꞌatɨ nyamuaꞌajcaa.
\v 23 Aɨ muꞌu nyuucari namuajracaꞌa tɨcɨn: “Aɨ pu yeehui aɨn pueen ɨ tɨ ajmiꞌi aꞌij puaꞌa taruurajcaꞌa. Ma ajta aɨn, ijii pu yeehui ayan tihueꞌixaateꞌe aꞌayeꞌi ɨ tyaɨte mej mi meyan tiraꞌaraꞌastijreꞌen ɨ yeꞌira tɨ ajmiꞌi raꞌantipuaꞌarityaꞌamɨꞌɨcaa.”
\v 24 Majta aɨme, rɨꞌɨ mu tiraataꞌacaa ɨ Dioj inyeetzi cɨmeꞌe.
\c 2
\s Aɨ mu nuꞌu raꞌancureꞌeviꞌitɨ aɨme ɨ mej tyuꞌutáitiꞌire
\p
\v 1 Tɨꞌɨj arí ayan tyaumaꞌaca aꞌachu cumu tamuaamuataꞌa japuan muaacua ninyeꞌiraꞌa, nyajtahuaꞌa nu nyaun aꞌujnyéj anti Jerusalén nyaɨjna jamuan ɨ Bernabé. Nyajta nu nyaɨn aꞌuvíꞌitɨ ɨ Tito.
\v 2 Au nu aꞌujnyéj nyaɨjna cɨmeꞌe tɨ Dioj ayan caꞌanijraꞌa naataꞌa. Au nu tihuaꞌutaꞌixaa nain cɨmeꞌe ɨ nyuucari aꞌij nyej yeꞌi tihueꞌihueꞌixaateꞌesin nyaɨme ɨ maj cai Israel jetze ajtyamaꞌacan. Aru aviitzi nu cɨn neyan huarɨj huaꞌa jemi ɨ mej ee tihueꞌijteꞌe. Ayaa nu een cɨn huarɨj tɨ ij cai aꞌatɨ tinaꞌantyuꞌuuniꞌi aɨjna cɨmeꞌe aꞌij nyaj rɨcɨ. Tɨ puaꞌa ayan tinaꞌantyuꞌuuniꞌi, capu cheꞌe tiꞌitɨ huatyavaɨreꞌesin aꞌij nyaj rɨcɨ.
\p
\v 3 Ma ajta cai, capu ayan tyeꞌirájraa aꞌij mej ɨ seica tiꞌijxeꞌevaꞌacaa aꞌini aɨme ɨ mej tihueꞌityaꞌacaa, camu meyan raataityacaꞌa aɨjna cɨmeꞌe ɨ maj raꞌantisijchixɨꞌɨn ɨ runavij, aꞌini huaꞌa jetze pu ajtyamaꞌacan ɨ griego aɨjna ɨ Tito.
\v 4 Ayaa pu een cɨn huataseijre itejmi jemi aꞌini seica mu aviitzi cɨn utyajrupi itejmi tzajtaꞌa mej mi taajeeveꞌen aꞌij tej tiꞌititachaꞌɨ ityan ɨ Cɨriistuꞌu jemi tɨ aɨn ari tuꞌirajtuaa. Aɨ mu meyan ruseijratacaꞌa maj nuꞌu tejmi jemi jetze ajtyamaꞌacan. Ma majta cai, camu. Metiꞌihueꞌitaca muꞌu. Ayaa muꞌu raxeꞌevaꞌacaa micu mej mi titaataijteꞌen caꞌanyejri cɨmeꞌe.
\v 5 Catu aꞌatzu huaꞌutaꞌa mej mi meyan titaatyamueꞌitɨn, aꞌini ayaa tu tiꞌijxeꞌevaꞌacaa tɨ auj rɨꞌɨrista aꞌaraꞌani sej raanamua tzaahuatiꞌiraꞌa cɨmeꞌe ɨ nyuucari tɨ cɨn Dioj amueꞌiratuaasin.
\p
\v 6 Majta aɨme, ɨ mej jee huapɨꞌɨ mu ruxeꞌeveꞌe, camu maa aꞌij tirajtyau mej mi majta maɨn raanaijmiꞌireꞌen aꞌij nyej tihueꞌihueꞌixaa ɨ tyaɨte ɨ maj cai Israel jetze ajtyamaꞌacan. Ajta, capu nyejetze ruxeꞌeveꞌe tɨ puaꞌa mej meyan huapɨꞌɨ ruxeꞌeveꞌe nusu macai, aꞌini Dioj pu ruxaꞌa naꞌa huaꞌancureꞌeviꞌitɨcɨ ɨ tyaɨte, matɨj manaꞌa puaꞌamua.
\v 7 Ma majta maɨn, tɨꞌɨjtaꞌij ayan tihuaꞌamityejtyaꞌacaa tɨ aɨn Dioj ayan cheꞌeta naꞌa tinaataityacaꞌa inyeetzi tɨj ajta ayan aɨj tyuꞌutaityacaꞌa aɨjna ɨ Pedro. Tihuaꞌamityejtyaꞌacaa tɨ Dioj ayan tinaataityacaꞌa nyej ni tihuaꞌutaꞌixaateꞌen aɨme ɨ maj cai Israel jetze ajtyamaꞌacan nyaɨjna ɨ nyuucari tɨ cɨn Dioj hueꞌirajtuaani.
\p Ma ajta aɨn, ɨ Pedro, Dioj pu ayan tiraataityacaꞌa tɨ ayan tihuaꞌutaꞌixaateꞌen aɨme ɨ maj Israel jetze ajtyamaꞌacan.
\v 8 Ayaa puꞌu naꞌa, aꞌini aɨn tɨ tiꞌimuaraꞌacaa ɨ Pedro jamuan tɨ ij tiraataijteꞌen tɨ aɨn huaꞌa jamuan u áꞌumeꞌen ɨ maj Israel jetze ajtyamaꞌacan, aɨ pu ayan cheꞌeta naꞌa tiꞌimuaraꞌacaa inyeetzi jamuan nyej ni huaꞌa jamuan u áꞌumeꞌen ɨ maj cai Israel jetze ajtyamaꞌacan.
\p
\v 9 Majta maɨn ɨ maj hueica, aɨjna ɨ Jacobo, ajta aɨjna ɨ Pedro, ajta aɨjna ɨ Juan, ai mu aɨn pueenyaꞌa ɨ mej jee antyujmuaꞌaree aɨme jemi ɨ seica ɨ maj Dioj jemi seijreꞌe. Tɨꞌɨj ari ayan tihuaꞌamityejtyaꞌacaa tɨ Dioj ayan rɨꞌɨ tinaataꞌa, aj mu mi tyamuaꞌa naa tinaꞌancureꞌeviꞌitɨ, majta maɨn tyamuaꞌa naa raꞌancureꞌeviꞌitɨ maɨjna ɨ Bernabé. Aɨ mu xaa meyan tiraaxaꞌapɨꞌɨntare itejmi cɨmeꞌe tyaj nuꞌu huaꞌa jamuan u áꞌujuꞌun aɨme ɨ maj cai Israel jetze ajtyamaꞌacan tej ti teyan tihuaꞌutaꞌixaateꞌen, majta meyan ru jetze maj nuꞌu aɨme jemi u aꞌujuꞌun ɨ maj Israel jetze ajtyamaꞌacan.
\v 10 Aɨ muꞌu tajhuaviiriꞌi tyaj nuꞌu aɨme autamuaꞌaree tyaucheꞌe ɨ maj cai aꞌij teꞌeviicueꞌi tyaj nuꞌu huaꞌutavaɨreꞌen. Nyajta inyaa, nyaa nu xaa ahuancaꞌanye nyej ni nyexeꞌeviꞌiraꞌa cɨn neyan huarɨni.
\s Pablo pu raꞌajtyaꞌaxɨ aɨjna ɨ Pedro aujna aꞌahuaꞌa u Antioquía
\p
\v 11 Ajta aɨn ɨ Pedro, tɨꞌɨj aun aꞌatanye u Antioquía, nyaa nu raꞌajtyaꞌaxɨ ɨ jemin, aꞌini aɨ pu aꞌutaꞌɨtzee tiꞌitɨj cɨmeꞌe.
\v 12 Matɨꞌɨj cai xɨ a aꞌatanye seica ɨ tyetyaca jamuan aɨjna ɨ Jacobo, ayaa pu rɨjcaa aɨjna ɨ Pedro. Huaꞌa jamuan pu tiꞌicuaꞌacaraꞌa aɨme ɨ maj cai Israel jetze ajtyamaꞌacan. Ma ajta aɨn, matɨꞌɨj eꞌireꞌenye aɨme ɨ seica, Pedro pu ayan autyejche tɨ ajtaraꞌani huaꞌa jemi ɨ maj cai Israel jetze ajtyamaꞌacan. Capu cheꞌe huaꞌajaahuatyaꞌacaa aꞌini huaꞌatzɨɨnyaꞌacaa aɨme ɨ maj huaꞌa jetze ajtyamaꞌacan aɨme ɨ maj meyan raꞌantisiꞌiche ɨ runavij.
\v 13 Majta ɨ seica ɨ maj Israel jetze ajtyamaꞌacan, camu majta meyan huarɨj huataujnyátacan cɨmeꞌe silu meyan hueꞌitzi cɨn ruseijratacaꞌa aꞌij tɨ ajta huarɨj aɨjna ɨ Pedro. Aɨj pu cɨn tyaꞌutyaujhueꞌitze ajta aɨjna ɨ Bernabé.
\p
\v 14 Tɨꞌɨj ayan tinaꞌamitejtyaꞌacaa maj cai meyan rɨꞌɨ titetyújchaɨcaꞌa tzaahuatiꞌiraꞌa cɨmeꞌe aꞌij tɨ tiꞌitamuaꞌatya ɨ nyuucari, nyatɨꞌɨj ni meseíraca ɨ tyaɨte neyan tiraataꞌixaa nyaɨjna ɨ Pedro tɨcɨn: “Muaa paj huaꞌa jetze ajtyamaꞌacan ɨ mej Israel jetze huanyej. Ma pajta muaa, ayaa papuꞌu tiꞌitiáꞌachaꞌɨ matɨj aɨme ɨ maj cai Israel jetze ajtyamaꞌacan. Capaj xaa nyaꞌu peyan tiꞌitiáꞌachaꞌɨ. ¿Aꞌini een cɨmeꞌe peyan huaꞌaruure paɨme ɨ maj cai Israel jetze ajtyamaꞌacan mej mi meyan aráurasten tihuaꞌayeꞌira aɨme ɨ mej Israel jetze ajtyamaꞌacan?”
\s Dioj pu ayan naijmiꞌica huirátuaasin matɨj manaꞌa mej tyaꞌatzaahuateꞌe
\p
\v 15 Tyan tu huaꞌa jetze ajtyamaꞌacan tyaɨjna cɨmeꞌe tyej Israel jetze huanyej. Catu huaꞌa jetze ajtyamaꞌacan aɨme ɨ maj aꞌutaꞌɨtzaꞌara ɨ Dioj jemi.
\v 16 Tyan tu teyan ramuaꞌaree aꞌij tɨ een ɨ Dioj jemi tɨ aꞌatɨ urareꞌenyaꞌacan cɨn huatyaturan ɨ jemin. Capu xaa nyaꞌu tiꞌitɨ aꞌij tiraatyavaɨreꞌen aɨjna ɨ aꞌatɨ tɨ puaꞌa nain cɨn aráurasten aɨjna ɨ nyuucari ɨ maj cɨn tieꞌijta, silu aɨ pu xaa urareꞌenyaꞌacan cɨn huatyaturan ɨ Dioj jemi tɨ puaꞌa aɨn raꞌaraꞌastijreꞌen ɨ Jesús tɨ ajta iꞌi Cɨriistuꞌu. Tyajta ityan, ayaa tu tyajta ityan teri raꞌatzaahuateꞌe tyaɨjna ɨ Cɨriistuꞌu tɨ ajta iꞌi Jesús tej ti teyan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tyaj raꞌaraꞌastijreꞌen tyaɨjna ɨ Cɨriistuꞌu. Catu xaa nyaꞌu raꞌaraꞌastijreꞌe tyaɨjna ɨ nyuucari ɨ maj cɨn tieꞌijta aꞌini capu aꞌatɨ urareꞌenyaꞌacan cɨn huatyaturaasin ɨ Dioj jemi tɨ puaꞌa raꞌaraꞌastijreꞌen aɨjna ɨ nyuucari ɨ maj cɨn tiꞌijta.
\p
\v 17 Ari tɨ puaꞌa ayan teꞌirajraꞌani tej teyan aꞌij puaꞌa eenyaꞌacan cɨn huatyaturan matɨj aɨme ɨ maj cai Israel jetze ajtyamaꞌacan tyaɨjna cɨmeꞌe tej teyan raahuausin tej ti teyan urareꞌenyaꞌacan cɨn huatyaturan jemin ɨ Cɨriistuꞌu, ¿aꞌini naꞌaqui huataujmuaꞌa? ¿Ni qui ayan huataujmuaꞌa tɨ Cɨriistuꞌu caꞌanijraꞌa tataꞌaca tej ti teyan aꞌij puaꞌa tiꞌititachaꞌɨ? Capu xaa nyaꞌu, capu aꞌatzu.
\p
\v 18 Me nyajta inyaa, tɨ puaꞌa nyajtahuaꞌa nyanaꞌa raꞌutyejcheni nyaj raꞌaraꞌastijreꞌen ɨ nyej nyejmiꞌi raatapuaꞌajtacaꞌa nyej neyan raꞌastijraꞌacaa, tɨ puaꞌa neyan huarɨni nyajtahuaꞌa, ayaa pu huataujmuaꞌa tɨcɨn yee nyaꞌutaꞌɨtze tiꞌitɨj cɨmeꞌe nyatɨꞌɨj anacaican raatapuaꞌajtacaꞌa.
\p
\v 19 Aɨj pu cɨn, nyatɨꞌɨj raꞌastijraꞌacaa ɨ nyuucari ɨ maj cɨn tieꞌijta, ayaa pu tyajaꞌureꞌenye tɨ cai huatarɨꞌɨristaracaꞌa nyaj nain cɨn aranrastijreꞌen. Aɨj pu cɨn ayaa pu huataujmuaꞌa, cu xuee nyaj huamɨꞌɨ jemin aɨjna ɨ nyuucari ɨ maj cɨn tieꞌijta nyej ni ruurican huatyaturan ɨ Dioj jemi.
\v 20 Naacɨꞌɨ ajta inyeetzi mej mi meyan naaruuren matɨꞌɨj ráꞌutatai ɨ Cɨriistuꞌu ɨ curuu jetze. Aɨj nu cɨn cai cheꞌe nyanaꞌa ruurican huatyajturaa silu ruurican nu huatyajturaa aꞌini Cɨriistuꞌu pu ruurican seijreꞌe nyeetzi jetze. Ajta aꞌij nyej rɨꞌɨ tiꞌitinchaꞌɨ ijii nyej nyau ratyáhueꞌiraꞌa, ayaa nu arancaꞌanye nyaɨjna cɨmeꞌe nyaj raꞌaraꞌastijreꞌen nyaɨjna tɨ iꞌi yaujraꞌan pueen ɨ Dioj. Aɨ pu icu naataxeꞌeve, ajta huatauraꞌa tɨ huamɨꞌɨni nyeetzi jetze maꞌacan.
\p
\v 21 Aɨj nu cɨn cai ma rúujɨsin nyaɨjna ɨ tɨ Dioj cɨn rɨꞌɨ tinaataꞌa ruxéꞌeviꞌiraꞌa cɨmeꞌe. Ayej xaa nyaꞌu, tɨ puaꞌa rɨꞌɨrístancheꞌe tɨ aꞌatɨ ayan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tɨ nain cɨn aráurasten aɨjna cɨmeꞌe ɨ nyuucari ɨ maj cɨn tieꞌijta, capu cheꞌe tiꞌitɨ huatyavaɨɨreꞌencheꞌe tɨ huamɨꞌɨ ɨ Cɨriistuꞌu.
\c 3
\s Cɨmeꞌen aɨjna ɨ nyuucari ɨ maj cɨn tiꞌijta, ajta ɨ mej tyaꞌatzaahuateꞌe
\p
\v 1 Muan, mɨ sej Galacia aꞌuchaatɨme, caxu aꞌatzu aꞌuumuaꞌaree muan. ¿Aꞌataani amuaaxainyaracaꞌa sej si seyan aꞌij puaꞌa me tityáumuaꞌaren? Muejmi jemi tu tyamuaꞌa naa tyajamuaataꞌixaa maj ráꞌutatai maɨjna ɨ Jesús tɨ ajta iꞌi Cɨriistuꞌu.
\v 2 Nicheꞌe seij tyajamuaataihuaꞌu. ¿Aꞌini sej eenyeꞌequeꞌe raꞌancuraꞌa ɨ xaijnyuꞌucaraꞌaraꞌan ɨ Dioj? ¿Ni qui saɨjna cɨn saj raꞌastijraꞌacaa ɨ nyuucari ɨ maj cɨn tieꞌijta naꞌari saɨjna cɨn saj raꞌatzaahuatyaꞌacaa ɨ sej raanamuajriꞌi itejmi jemi?
\v 3 ¿Ni tzaa seyan rɨꞌɨ huapɨꞌɨ cai mauumuámuaꞌaree? Ayaa xu raꞌutyajhuii sej seyan araujcaꞌanye saɨjna jetze ɨ xaijnyuꞌucaraꞌaraꞌan ɨ Dioj. ¿Ni tzaa ayan tyajamuaꞌamitejteꞌe sej si seyan raanaijmiꞌireꞌen saj raꞌaraꞌastijreꞌen ɨ tavastaraꞌa saɨjna cɨmeꞌe saj ru jetze aꞌij tirajtyau rujɨɨmuaꞌa sanaꞌa? Capu xaa nyaꞌu aꞌij tiꞌirɨꞌɨri.
\v 4 Naijmiꞌi tɨj naꞌa ɨ tɨ Dioj cɨn rɨꞌɨ tyajamuaataꞌa, ¿ni qui ayan tyajamuaaruu tɨ ij ayan eenyaꞌa aꞌaraꞌani tɨ nain tyajaꞌuveti? Ma ajta, capu xaa nyaꞌu aꞌij amiteereꞌe tɨ puaꞌa nain tyajaꞌuveti nusu cai.
\v 5 ¿Aꞌini een cɨmeꞌe Dioj raataityacaꞌa ɨ ruxaijnyuꞌuca tɨ aɨn muejmi jemi huatyaturan? Ajta, ¿aꞌini een cɨmeꞌe Dioj ayan tyuꞌumuarej muejmi jemi aɨjna cɨmeꞌe tɨ raꞌaráꞌan ɨ tiꞌimuariꞌi tɨ huapɨꞌɨ ruxeꞌeveꞌe? ¿Ni qui ayan huarɨj aɨjna cɨmeꞌe saj raꞌaraꞌastijre saɨjna ɨ nyuucari ɨ maj cɨn tieꞌijta? Capu aꞌatzu xaa nyaꞌu, silu ayaa pu huarɨj aɨjna cɨmeꞌe saj raꞌatzaahuatyaꞌacaa ɨ tej teri tyajamueꞌixaa.
\p
\v 6 Ayaa pu cheꞌeta naꞌa tyaꞌatzaahuatyaꞌacaa aɨjna ɨ Abraham tyaacan aꞌij tɨ Dioj tiraataꞌixaa. Aɨj pu cɨn, Abraham urareꞌenyaꞌacan cɨn huatyajturaa ɨ Dioj jemi.
\v 7 Sataꞌaj seyan raamuaꞌaree saɨjna tɨ cɨmeꞌen yee matɨj manaꞌa puaꞌamua ɨ mej tyaꞌatzaahuateꞌe, ai mu nuꞌu aɨn pueen ɨ mej jetzen eꞌiraanye aɨjna ɨ Abraham tyaacan.
\v 8 Ajta, jajcua ɨmɨ, aɨ pu ayan teꞌeyuꞌusiꞌihuacaꞌa ɨ yuꞌuxari jetze tɨ Dioj ayan tihuaꞌataꞌacareꞌen aɨme ɨ maj cai Israel jetze ajtyamaꞌacan mej mi urareꞌenyaꞌacan cɨn huatyaturan ɨ jemin aɨjna cɨmeꞌe ɨ mej tyaꞌatzaahuateꞌe, micu. Ajta aɨn ɨ Dioj, anacaican pu ayan tiraataꞌixaa aɨjna ɨ Abraham tyaacan aɨjna ɨ nyuucari tɨ cɨmeꞌen Dioj hueꞌirajtuaani, ayan tɨcɨn: “Naijmiꞌica ɨ tyaɨte ɨ maj huachaatɨme iiyan chaanaca japua, nyaa nu yee rɨꞌɨ tihuaꞌutaꞌasin mueetzi cɨmeꞌe.”
\v 9 Aɨj pu cɨn, naijmiꞌica ɨ maj tyaꞌatzaahuateꞌe, Dioj pu rɨꞌɨ tihuaꞌutaꞌasin jamuan aɨjna ɨ Abraham tyaacan tɨ ajta raꞌatzaahuatyaꞌacaa ɨ Dioj.
\p
\v 10 Ma ajta aɨme ɨ mej raꞌaraꞌastijre maɨjna ɨ nyuucari ɨ maj cɨn tieꞌijta, naijmiꞌica pu pueijtzi huaꞌataꞌasin ɨ Dioj, aꞌini ayaa pu teꞌeyuꞌusiꞌi tɨcɨn: “Pueijtzi pu yee tiraataꞌasin aꞌatɨ tɨ naꞌa tɨ cai nain cɨn raꞌaraꞌastijreꞌen aꞌij tɨ yeꞌi tyaꞌaxa jetzen ɨ nyuucari ɨ maj cɨn tieꞌijta.”
\v 11 Ajta aɨjna ɨ nyuucari ɨ maj cɨn tieꞌijta, capu rɨꞌɨri tɨ aɨn ayan raaruuren ɨ aꞌatɨ tɨꞌij ayan urareꞌenyaꞌacan cɨn huatyaturan ɨ Dioj jemi. Ayaa puꞌu eenyaꞌa aꞌaraa aꞌini ayaa pu ajta teꞌeyuꞌusiꞌi tɨcɨn: “Aɨ pu yee tɨ urareꞌenyaꞌacan cɨn huatyajturaa ɨ Dioj jemi, aɨ pu yee ruuri aꞌame aɨjna cɨmeꞌe, icu, tɨ aɨn ayan tyaꞌatzaahuateꞌe.”
\v 12 Tɨ puaꞌa aꞌatɨ ayan raꞌaraꞌastijreꞌen ɨ nyuucari ɨ maj cɨn tieꞌijta, capu ayan ruxeꞌeveꞌe tɨ aɨjna aꞌatɨ tyaꞌantzaahuateꞌen, silu cheꞌe raꞌaraꞌastijreꞌen puꞌu aɨjna ɨ nyuucari aꞌini ayaa pu teꞌeyuꞌusiꞌi tɨcɨn: “Aɨjna tɨ yee ayan raꞌaraꞌastijreꞌen aꞌij tɨ teꞌeyuꞌusiꞌi ɨ nyuucari jetze, aɨ pu yee aɨjna cɨn rɨꞌɨ tiꞌityújchaɨ́ aꞌame.”
\p
\v 13 Ajta aɨjna ɨ Cɨriistuꞌu, aɨ pu tuꞌirajtuaa tɨ ij cai pueijtzi taacɨꞌɨti aɨjna cɨmeꞌe tyaj cai raꞌastijreꞌe ɨ nyuucari ɨ maj cɨn tieꞌijta. Pueijtzi pu xaa raacɨ́ꞌɨ ta jetze maꞌacan aꞌini ayaa pu teꞌeyuꞌusiꞌi tɨcɨn: “Pueijtzi pu yee raataꞌasin aꞌatɨ tɨ naꞌa maj raꞌatatan ɨ cɨye jetze.”
\v 14 Ayaa pu aɨjna cɨn tiraaruu tɨ ij ayan tihuaꞌucɨꞌɨti aɨme ɨ maj cai Israel jetze ajtyamaꞌacan eijna ɨ tɨ cɨn Dioj rɨꞌɨ tiraataꞌa aɨjna ɨ Abraham tyaacan, tɨ ij ajta tyaj tyaɨjna cɨn tyaꞌatzaahuatyaꞌa tej tij raꞌancuraꞌan tyaɨjna ɨ xaijnyuꞌucaraꞌaraꞌan ɨ Dioj aꞌij tɨ aɨn ari tyaꞌataujratziiriꞌi.
\s Cɨmeꞌen ɨ nyuucari ɨ maj cɨn tiꞌijta ajta aɨjna tɨ cɨn Dioj tyaꞌataujratziiriꞌi
\p
\v 15 Casiꞌi, nyeꞌihuaamuaꞌa, ticheꞌe tyaɨjna cɨn tyuꞌutaxaj aꞌij tɨ tiꞌirɨnyaca tej ti tyauj yan huachaatɨme iiyan chaanaca japua. Tɨ puaꞌa aꞌatɨ ari raꞌuyuꞌuxacaꞌa ɨ papee jetze ɨ maj cɨn raꞌancuraꞌan ɨ tiꞌaraꞌan aꞌatɨ tɨ huamɨꞌɨ, tɨ puaꞌa ari ayan teꞌeyuꞌusiꞌihua aꞌij tɨ tiraavijteꞌe, capu rɨꞌɨri tɨ aꞌatɨ tiꞌitɨ maa jetzen tiraꞌuyuꞌuxan. Ruxeꞌeveꞌe maj raꞌaraꞌastijreꞌen aꞌij tɨ teꞌeyuꞌusiꞌihua.
\v 16 Maꞌacui xaa, Dioj pu ayan ajmiꞌi tyaꞌataujratziiriꞌi tiꞌitɨj cɨmeꞌe aɨjna jemi ɨ Abraham tyaacan ajta aɨme jemi ɨ mej jetzen eꞌiranyejsin. Arú, capu ayan teꞌeyuꞌusiꞌi ɨ yuꞌuxari jetze tɨ ayan tihuaꞌucɨꞌɨtincheꞌe ɨ maj muiꞌitɨ eꞌiranyejsin aɨjna ɨ Abraham tyaacan jetze, silu tɨ ayan tiraacɨꞌɨtincheꞌe ɨ tɨ saɨj naꞌa eꞌiranyejsin. Ajta aɨn tɨ saɨj naꞌa, ai pu aɨn pueen ɨ Cɨriistuꞌu.
\v 17 Ayaa pu huataujmuaꞌa eijna. Anacaican, Dioj pu ayan raataꞌa ɨ runyuuca ɨ Abraham jemi aꞌij tɨ tyajaꞌureꞌenyejsin. Tɨꞌɨjta ari tyaumaꞌaca aꞌachu cumu muaacuacientos ninyeꞌiraꞌa japuan seite japuan tamuaamuataꞌa, aj puꞌi Dioj huaꞌutaꞌa aɨjna ɨ nyuucari ɨ maj cɨn tieꞌijta. Aɨj pu cɨn, capu rɨꞌɨri tɨ aɨn nyuucari raꞌurauuna aɨjna tɨ cɨn Dioj anacaican tihuaurijca ɨ Abraham tyaacan jemi. Aɨj pu cɨn aucheꞌe tiꞌivaɨreꞌe aɨjna ɨ tɨ cɨn tihuaurijca.
\v 18 Ayaa puꞌu tiꞌen, aꞌini tɨ puaꞌa tiꞌitɨ ayan tiraacɨꞌɨti saɨj ɨ aꞌatɨ aɨjna cɨmeꞌe tɨ aɨn nyuucari ɨ maj cɨn tieꞌijta ayan tiraataꞌaca, capu cheꞌe ayaa naꞌa eenyaꞌa aꞌame tɨ ayan tiraacɨꞌɨti aɨjna cɨmeꞌe tɨ aꞌatɨ ayan tyaꞌataujratziiriꞌi tɨ ayan nuꞌu tyajaꞌureꞌenyejsin. Ajta aɨn Dioj, aɨ pu ruxéꞌeviꞌiraꞌa cɨn ayan rɨꞌɨ tiraataꞌa aɨjna ɨ Abraham tyaacan aꞌini ayaa pu tihuaurijca.
\p
\v 19 Tɨ puaꞌa ayan een, ¿aꞌini tɨ i Dioj huaꞌutaꞌa aɨjna ɨ nyuucari ɨ maj cɨn tieꞌijta? Ayej xaa nyaꞌu, ayaa pu een cɨn raatyajtuaa huaꞌa jemi mej miꞌi raamuaꞌaree nain cɨmeꞌe ɨ maj cɨn autyajturaa ɨ Dioj jemi. Ayaa pu eenyaꞌa aꞌameꞌencheꞌe asta naꞌa cai huataseijreꞌencheꞌe aɨjna tɨ jetzen huanyej aɨjna ɨ Abraham tyaacan aꞌij tɨ ayan Dioj tihuaurijca tɨ ayan teꞌemeꞌencheꞌe. Ajta aɨn ɨ nyuucari ɨ maj cɨn tieꞌijta, capu Dioj rusaɨj raatyajtuaa huaꞌa jemi, silu aɨme ɨ mej tiꞌivaɨreꞌe ɨ tajapua, aɨ mu majta raaxaꞌapɨꞌɨntare mej mi huaꞌa jemi raatyajtuaani maɨjna ɨ nyuucari.
\v 20 Ayaa puꞌu naꞌa, tɨ puaꞌa ayan seijreꞌe saɨj tɨ iꞌixaꞌapɨꞌɨntacaꞌa, aɨ pu tihuaꞌutyavaɨreꞌesin naijmiꞌica ɨ mej tyuꞌurixaateꞌe, mej mi raꞌantipuaꞌariteꞌen. Ma ajta, seij puꞌu pueen ɨ Dioj. Rusaɨj pu ayan tihuaurijca, ajta rusaɨj pu raanaijmiꞌireꞌen.
\s Cɨmeꞌen ɨ tɨ cɨn tiꞌivaɨreꞌe aɨjna ɨ nyuucari ɨ maj tiꞌijta
\p
\v 21 ¿Aꞌini naꞌaqui? ¿Ni qui ayan huataujmuaꞌa tɨ saɨque tyaꞌaxa aɨjna jetze ɨ nyuucari ɨ maj cɨn tieꞌijta, ajta saɨque tyaꞌaxa aɨjna tɨ cɨn Dioj tyaꞌataujratziiriꞌi? Capu xaa nyaꞌu, aꞌini tɨ puaꞌa ayan tiꞌirɨꞌɨriistacheꞌe tɨ taataꞌacareꞌen tyaj ruuristacheꞌe ɨ Dioj jemi aɨjna ɨ nyuucari tɨ huatyajturaa aɨme jemi, aj pu xaa, icu, rɨꞌɨrístaca tyaj urareꞌenyaꞌacan cɨn huatyaturan ɨ Dioj jemi aɨjna cɨmeꞌe tyaj raꞌastijreꞌe tyaɨjna ɨ nyuucari ɨ maj cɨn tieꞌijta.
\v 22 Ma ajta, aɨjna ɨ nyuucari jetze, ayaa pu tyaꞌaxa tɨ nuꞌu naimiꞌi meyan autyajturaa ɨ Dioj jemi, aꞌachu maj manaꞌa puaꞌamua yan huachaatɨme iiyan chaanaca japua. Ayaa pu een cɨn tyaꞌaxa tɨ ij aɨjna cɨn rɨꞌɨristan tɨ aɨn Dioj tyaꞌataujratziiriꞌi tɨ tihuaꞌucɨꞌɨti aɨjna cɨmeꞌe maj raꞌaraꞌastijreꞌen maɨjna ɨ Jesús tɨ ajta iꞌi Cɨriistuꞌu. Ee xaa nyaꞌu, ayaa puꞌu naꞌa tɨ aɨjna tɨ cɨn Dioj tyaꞌataujratziiriꞌi, aɨme pu tiꞌicɨꞌɨti aɨme ɨ maj meyan tyaꞌatzaahuateꞌe.
\p
\v 23 Tɨꞌɨj cai xɨ huataseijre ɨ Cɨriistuꞌu tej ti teyan raꞌaraꞌastijreꞌen, ayaa pu eenyeꞌequeꞌe seijraꞌacaa cumu tej aꞌityanamiꞌihuacaꞌa aɨjna cɨmeꞌe tɨ caꞌanin cɨn taachaɨ aɨjna ɨ nyuucari ɨ maj cɨn tieꞌijta. Ayaa tu eenyaꞌa huatyajturaa ajnaꞌɨmɨ tɨj naꞌa tɨ yu eꞌireꞌenye tɨj ijii ayan huataseijre aɨjna ɨ tyaj teri ticu raꞌatzaahuateꞌe.
\v 24 Aɨj pu cɨn, ayaa pu taachaɨ aɨjna ɨ nyuucari asta naꞌa cai huataseijreꞌen ɨ Cɨriistuꞌu tej ti teyan urareꞌenyaꞌacan cɨn huatyaturan aɨjna cɨmeꞌe tej raꞌaraꞌastijre tyaɨjna ɨ Cɨriistuꞌu.
\v 25 Maꞌacui xaa nyaꞌu, aꞌini ari huataseijre ɨ tej jemin raꞌastijreꞌe, capu cheꞌe tachaɨj aɨjna ɨ nyuucari ɨ maj cɨn tieꞌijta.
\p
\v 26-27 Naimiꞌi xu yaujmuaꞌameꞌen pueen ɨ Dioj saɨjna cɨmeꞌe saj raꞌastijreꞌe saɨjna ɨ Cɨriistuꞌu tɨ ajta iꞌi Jesús, aꞌini Cɨriistuꞌu pu aꞌamuanyeereꞌe sej siꞌi seyan eenyaꞌa xaꞌaraꞌani tɨj aɨjna, satɨj sanaꞌa puaꞌamua huamuaɨꞌɨvijhuacaꞌa ɨ jemin.
\v 28 Aɨj pu cɨn, cai cheꞌe ma aꞌahuaꞌa ɨ tɨ ee Israel jetze ajtyamaꞌacan, naꞌari tɨ ee ɨ Griego. Capu ajta ma aꞌahuaꞌa ɨ Cɨriistuꞌu jemi ɨ tɨ ee saɨj tɨ caꞌanyejri cɨn tiꞌimuareꞌe nusu ɨ tɨ ee ruxaahua cɨn tiꞌimuareꞌe. Capu ajta jetzen ruxeꞌeveꞌe ɨ Cɨriistuꞌu tɨ puaꞌa aꞌatɨ tyaataꞌa pueen nusu jɨitaꞌa naꞌa, aꞌini naijmiꞌi xu Cɨriistuꞌu jetze ajtyamaꞌacan. Muan xu xaa seij tyaɨtyejraꞌan pueen ɨ jemin.
\v 29 Ajta, tɨ puaꞌa seyan Cɨriistuꞌu jetze ajtyamaꞌacan, aɨj xu cɨn sajta yaujmuaꞌameꞌen pueen aɨjna ɨ Abraham tyaacan, ajta aɨ pu tyajaꞌamuacɨꞌɨti aɨjna tɨ cɨn Dioj tyaꞌataujratziiriꞌi.
\c 4
\s Cɨriistuꞌu puꞌu raayɨꞌɨtɨ tɨ rɨꞌɨ taatyajtuaani tɨꞌij Dioj taatéyaꞌupuatan
\p
\v 1 Nicheꞌe neyan nyajta seij tyuꞌutaxaj. Aɨjna ɨ aꞌatɨ tɨ ayan nain tiraacɨꞌɨti, meenti auj paꞌarɨꞌɨsta, ayaa pu cheꞌeta naꞌa een tɨj ajta saɨj tɨ caꞌanyejri cɨn tiꞌimuareꞌe. Capu amɨn aꞌij tɨ ari nain tiaꞌaraꞌan pueen.
\v 2 Ruxeꞌeveꞌe tɨ aɨn huaꞌaraꞌastijreꞌen aɨme ɨ maj rachaɨ́, ɨ maj maɨjna cɨn antyujmuaꞌaree mej tyuꞌuchaɨn nain ɨ tiaꞌaraꞌan asta naꞌa cai ari ayan aráurasten aꞌachu puaꞌan ninyeꞌiraꞌa tɨ ari pɨtiꞌihuaujxaꞌapɨꞌɨntariꞌiriꞌi ɨ taatajraꞌan jemi.
\v 3 Ayaa pu cheꞌeta naꞌa eenyaꞌa aꞌaraa itejmi jemi. Tɨꞌɨj cai xɨ tyajaꞌureꞌenye ajna xɨcajraꞌa tɨ jetzen titáacɨꞌɨti aɨjna ɨ tɨ ari pɨtiꞌihuaujxaꞌapɨꞌɨntariꞌiriꞌi, ayaa tu eenyeꞌequeꞌe seijraꞌacaa matɨj aɨme ɨ mej caꞌanyejri cɨn tiꞌimuareꞌe aꞌini tyaucheꞌe tu raꞌastijraꞌacaa ɨ tihuaꞌayeꞌira ɨ maj rujɨɨmuaꞌa manaꞌa rajtyau ɨ maj Israel jetze ajtyamaꞌacan.
\p
\v 4-5 Ma ajta Dioj, tɨꞌɨj ari tyajaꞌureꞌenyen ajna xɨcajraꞌa tɨ jetzen ayan tiraaxaꞌapɨꞌɨntare, aɨ pu ruyauj aꞌutaityacaꞌa tɨ yavaꞌacáanyen. Ajta aɨn yaujraꞌan, aɨ pu huanuꞌeihuacaꞌa ɨ jɨitaꞌa jetze, ajta ayan tiraacɨ́ꞌɨ tɨ ayan raꞌaraꞌastijreꞌen ɨ nyuucari ɨ maj cɨn tieꞌijta, tɨ ij aɨn hueꞌirajtuaani aɨme ɨ maj caꞌanyejri cɨn raꞌastijraꞌacaa maɨjna ɨ nyuucari ɨ maj cɨn tiꞌijta, tej ti teyan raꞌancuraꞌan nain aꞌij tɨ tiraavijteꞌe tɨ titáacɨꞌɨti aɨjna cɨmeꞌe tɨ Dioj ayan taateyaꞌupuatacaꞌa.
\p
\v 6 Aꞌini muan xu yaujmuaꞌameꞌen pueen ɨ Dioj, Dioj pu yaꞌutaityacaꞌa ɨ ruyauj xaijnyuꞌuca tɨꞌij aɨn xaijnyuꞌucaraꞌaraꞌan huatyaturan ɨ aꞌamuatzajtaꞌa. Ai pu aɨn pueen ɨ xaijnyuꞌucari tɨ ayan rájee tɨcɨn: “Abba, mɨ pej niꞌiyaꞌupua.”
\v 7 Aɨj xu cɨn cai cheꞌe caꞌanyejri cɨn tiꞌimuareꞌe silu seri yaujmuaꞌameꞌen pueen. Aꞌini muan xuꞌuri yaujmuaꞌameꞌen pueen, Dioj pu ajta ayan amuaaruu tɨ tiꞌitɨj tyajamuaacɨꞌɨti.
\s Pablo pu áꞌij tyáꞌujmuajca aɨme ɨ mej tyaꞌatzaahuateꞌe
\p
\v 8 Jajcua ɨmɨ, satɨꞌɨj cai xɨ ramuaꞌatyajcaa ɨ Dioj, muan xu caꞌanyejri cɨn tihuaꞌavaɨraꞌacaa aɨme ɨ maj cai meyan huataseijre mej mi dioosi pueenyeꞌen muaꞌaraꞌani silu tyaɨte muꞌu meyan tiꞌijxeꞌevaꞌacaa.
\v 9 Aru ijii, saj seri ramuaꞌate ɨ Dioj nusu ijii tɨ Dioj rɨꞌɨ tyajamuaataꞌa aɨjna cɨmeꞌe tɨ aꞌamuamuaꞌate muejmi, ¿aꞌini auj tiꞌirɨꞌɨri tɨ tiꞌitɨ caꞌanijraꞌa amuaataꞌan sej siꞌi sajtahuaꞌa raꞌaraꞌastijreꞌen ɨ tihuaꞌayeꞌira tɨ cai tiꞌitɨj vaɨreꞌe, ɨ tɨ cai amuataꞌacaraꞌa saj rɨꞌɨ metityaumuámuaꞌareꞌen? ¿Ni qui seyan huatauraꞌan saj sajtahuaꞌa caꞌanyejri cɨn tyuꞌutyavaɨreꞌen saɨjna cɨmeꞌe ɨ nyuucari?
\p
\v 10 Muan xu seyan raꞌutamuaꞌareera saɨjna cɨmeꞌe tɨ ari ajna tyajaꞌureꞌenye ɨ xɨcaj tɨ jetzen tiꞌitɨ aꞌij huarɨj naꞌari ɨ maxcɨraꞌi tɨ jetzen tiꞌitɨ tyajaꞌureꞌenyejsin nusu ajna tɨꞌɨj ari pɨtiꞌirɨcɨ viitaꞌari tzajtaꞌa caꞌɨn xɨjcataꞌa. Sajta saɨjna autamuaꞌareera ɨ ninyeꞌiraꞌa mej jetzen meyan tiꞌijrɨꞌɨre tiꞌitɨj cɨmeꞌe.
\v 11 Aɨj nu cɨn neyan tiꞌitzɨɨnyeꞌe muejmi cɨmeꞌe. Ayej nyaꞌase capu tiꞌitɨj huatyavaɨ nain ɨ nyaj cɨn tyuꞌumuarej muejmi tzajtaꞌa.
\p
\v 12 Nyeꞌihuaamuaꞌa, ayaa nu tyajaꞌamuahuavii sej seyan rɨjca nyatɨj inyaa. Ayaa nu nyajta tiꞌitinchaɨcaꞌa satɨj muan, satɨꞌɨj cai xɨ ramuaꞌajcaa ɨ nyuucari ɨ maj cɨn tieꞌijta. Nyatɨꞌɨj nyaun aꞌucatii aꞌamua jamuan, caxu tiꞌitɨj cɨn autyajturaa inyeetzi jemi.
\v 13 Nyatɨꞌɨj anacaican tyajamuaataꞌixaa ɨ nyuucari tɨ cɨn Dioj amueꞌirajtuaani, ayaa nu tiꞌicuiꞌican cɨn neyan huarɨj.
\v 14 Eihua pu huapɨꞌɨ amuaatamuareꞌeristaracaꞌa aɨjna cɨmeꞌe nyej neyan tiꞌicuiꞌicaa. Ma sajta muan, caxu naataxánaꞌave. Caxu sajta naatyaxaahuatacaꞌa, silu tyamuaꞌa xu naa tinaꞌancureꞌeviꞌitɨ yaa cumu nyaj aɨn pueenyeꞌen seij tɨ tiꞌivaɨreꞌe u tajapua naꞌari nyaj inyaa aɨn pueenyeꞌen ɨ Cɨriistuꞌu rusaɨj tɨ ajta iꞌi Jesús.
\p
\v 15 ¿Ai taꞌuj tzaa huarɨj sej si cai cheꞌe seyan rɨꞌɨ naa tyuꞌujtyamuaꞌaveꞌe satɨj sejmiꞌi eenyaꞌa nyatɨꞌɨj nyaun aꞌucatii aꞌamua jamuan? Ee xaa nyaꞌu, rɨꞌɨri nyej neyan raataxaj tzaahuatiꞌiraꞌa cɨmeꞌe yee tɨ puaꞌa rɨꞌɨrístancheꞌe ajnaꞌɨmɨ sej seyan huarɨni, ayaa xu raꞌitatuꞌutuꞌuncheꞌen ɨ aꞌamuajɨꞌɨsi, sajta naatatuꞌutuꞌuteꞌencheꞌe inyeetzi.
\v 16 ¿Aꞌini naꞌa qui? ¿Ni seri nyejchaɨreꞌe saɨjna cɨmeꞌe nyej neyan tzaahuatiꞌiraꞌa cɨn tyajaꞌamueꞌixaateꞌe?
\p
\v 17 Majta aɨme ɨ tyaɨte, eihua mu áꞌaviicueꞌireꞌe mej mi amuaatyamueꞌitɨn mej miꞌi rujɨɨmuaꞌa muejmi cɨmeꞌe huaujtyamuaꞌaveꞌen. Ayaa mu tiꞌijxeꞌeveꞌe tej ti eꞌitaꞌa aꞌutácɨɨnye sej si cai cheꞌe áꞌaviicueꞌiraꞌa tejmi jamuan silu sej siꞌi seyan sicu rɨꞌɨ tihuaꞌaxeꞌevaꞌa aɨme.
\v 18 Naa pu xaꞌapɨꞌɨn tɨ puaꞌa aꞌatɨ áꞌaviicueꞌiraꞌa sej si rɨꞌɨ tiraataxeꞌeveꞌen. Ajta capu ayan ruxeꞌeveꞌe nyej nyaun aꞌucatii aꞌamua jamuan. Aɨ puꞌu cheꞌe aɨn aꞌutyeviicueꞌireꞌen aꞌij tɨ tiraavijteꞌe aɨjna cɨmeꞌe tɨ iꞌixaꞌapɨꞌɨn.
\v 19 Mɨ sej nyeꞌitɨꞌɨrijmuaꞌa, eihua nu tirajpueiitzi naꞌame muejmi cɨmeꞌe, ayan cumu ɨ jɨitaꞌa tɨ raꞌutacuiꞌini paꞌarɨꞌɨ cɨmeꞌe. Ayaa pu teꞌeme asta sanaꞌa cai seyan cheꞌeta sanaꞌa rɨꞌɨ titetyújchaꞌɨ tɨj aɨjna ɨ Cɨriistuꞌu.
\v 20 Canu aꞌatzu ramuaꞌaree aꞌij nyej yeꞌi huarɨni muejmi cɨmeꞌe. Ojala cu nyej nyaun aꞌucatiicheꞌe muejmi jemi nyej niꞌi cai cheꞌe tyajaꞌamuayuꞌuseꞌe nyanaꞌa, silu nyej ni tyajamueꞌixaateꞌen senyeseíiraca.
\s Aɨjna ɨ Agar, ajta aɨjna ɨ Sara, ɨ tyaj cɨmeꞌen yauꞌeitaa taꞌaraꞌani ɨ maj huaꞌapua
\p
\v 21 Sataꞌaj seyan tinaataꞌixaateꞌen muan mɨ sej seyan raxeꞌeveꞌe sej si raꞌaraꞌastijreꞌen saɨjna ɨ nyuucari ɨ maj cɨn tieꞌijta, ¿ni tzaa sacai seyan tiraanamuajriꞌi aꞌij tɨ tyaꞌaxa aɨjna jetze ɨ nyuucari?
\v 22 Ayaa pu teꞌeyuꞌusiꞌi tɨ nuꞌu huaꞌapuaca tipeꞌeristyamuaꞌa ɨ mej tyetyaca aɨjna ɨ Abraham tyaacan. Seij pu nuꞌu jetzen huanuꞌeihuacaꞌa aɨjna ɨ jɨitaꞌa tɨ nuꞌu caꞌanyejri cɨn tiꞌimuaraꞌacaa, ajta ɨ saɨj, aɨ pu nuꞌu jetzen huanuꞌeihuacaꞌa aɨjna ɨ jɨitaꞌa tɨ nuꞌu ruxaahua áꞌuchaꞌacanyaꞌa.
\v 23 Aɨjna tɨ huanuꞌeihuacaꞌa aɨjna jetze ɨ jɨitaꞌa tɨ caꞌanyejri cɨn tiꞌimuaraꞌacaa, aɨ pu nuꞌu cheꞌeta naꞌa ayana eenyeꞌen huanuꞌeihuacaꞌa matɨj ɨ tɨꞌɨrii. Ajta nuꞌu ɨ saɨj, aɨjna tɨ nuꞌu huanuꞌeihuacaꞌa jetzen ɨ jɨitaꞌa tɨ nuꞌu ruxaahua áꞌuchaꞌacanyaꞌa, aɨ pu aɨjna cɨn huanuꞌeihuacaꞌa tɨ nuꞌu Dioj ayan cɨn tyaꞌataujratziiriꞌi.
\v 24 Rɨꞌɨri tej teyan raataxaj tɨ ayan huataujmuaꞌa aɨjna ɨ nyuucari tɨ ayan teꞌeyuꞌusiꞌi. Aɨme ɨ juuca ɨ maj huaꞌapua, ayaa mu huataujmuaꞌa ɨ nyuucari tɨ huaꞌapua tɨ cɨn Dioj tihuaurijca ɨ tyetyaca jemi. Seij nyuucari pu aun eꞌemaꞌacan ɨ jɨri japua tɨ ayan tyajaꞌarajtyahuaa tɨcɨn Sinaí. Aɨj mu jetzen eꞌiranyejsin aɨme ɨ tɨꞌɨrii ɨ maj tyuꞌutyavaɨreꞌesin caꞌanyejri cɨmeꞌe. Ajta aɨjna ɨ nyuucari, aɨj pɨrɨcɨ aɨjna ɨ jɨitaꞌa tɨ ayan antyahuaa tɨcɨn Hagar.
\v 25 Aɨjna ɨ Hagar, ayaa pu huataujmuaꞌa aɨjna ɨ jɨri ɨ Sinaí, tɨ aun aꞌutacáꞌa u Arabia. Ayaa pu ajta huataujmuaꞌa chajtaꞌa tɨ eꞌeseijreꞌe u Jerusalén, aꞌini aucheꞌe pu caꞌanyejri cɨn tiꞌimuareꞌe jamuan ɨ yaujmuaꞌameꞌen.
\v 26 Ajta aɨjna ɨ Jerusalén tɨ tajapua eꞌemaꞌacan, aɨ pu ruxaahua aꞌuchaꞌacan. Ajta aɨ pu pueen ɨ tanaanaj.
\v 27 Ayaa puꞌu naꞌa aꞌini ayaa pu teꞌeyuꞌusiꞌi tɨcɨn:
\q Pajta muaa, tɨ cai cheꞌe muaꞌutacuiꞌini, pataꞌaj caꞌanin cɨn huáꞌayeinixɨꞌɨn.
\q Ayaa paj huarɨni, aꞌini papuꞌuri eitzeꞌe tiyaujmuaꞌa puaꞌame mɨ paj cai aꞌanaj autájucatacaꞌa cai aɨjna ɨ jɨitaꞌa tɨ rucɨn jamuan huahuii.
\p
\v 28 Sajta muan, nyeꞌihuaamuaꞌa, ayaa xu cheꞌeta sanaꞌa seijreꞌe tɨj aɨjna ɨ Isaac tɨ aɨjna cɨn eꞌiraanye tɨ cɨn Dioj ayan tyaꞌataujratziiriꞌi.
\v 29 Ajnaꞌɨmɨ aɨjna ɨ yaujraꞌan tɨ ayan cheꞌeta naꞌa eenyeꞌen huanuꞌeihuacaꞌa matɨj ɨ tɨꞌɨrii, aɨ pu aꞌij puaꞌa tiraaruu aɨjna ɨ yaujraꞌan tɨ ayan huanuꞌeihuacaꞌa aɨjna cɨmeꞌe ɨ tiꞌimuareꞌeriꞌiraꞌaraꞌan ɨ xaijnyuꞌucaraꞌaraꞌan ɨ Dioj. Ajta ijii, ayaa pu cheꞌeta tiꞌirɨnyaca.
\v 30 Ma ajta, ¿aꞌini tyaꞌaxa ɨ yuꞌuxari jetze? ¿Ni qui ayan tɨ cɨmeꞌen yee: “Pataꞌaj yeehui raatamuariteꞌen paɨjna ɨ jɨitaꞌa tɨ caꞌanyejri cɨn tiꞌimuareꞌe, pajta yeehui ɨ yaujraꞌan, aꞌini capu yee aꞌanaj tiꞌitɨ tiꞌijcɨꞌɨti aɨjna ɨ yaujraꞌan ɨ jɨitaꞌa tɨ caꞌanyejri cɨn tiꞌimuareꞌe, silu nain pu yee tiꞌijcɨꞌɨti icu aɨjna ɨ yaujraꞌan ɨ jɨitaꞌa tɨ ruxaahua aꞌuchaꞌacan”?
\v 31 Aɨj pu cɨn, nyeꞌihuaamuaꞌa, catu tyaɨjna jetze eꞌiraanye aɨjna ɨ jɨitaꞌa tɨ caꞌanyejri cɨn tiꞌimuaraꞌacaa. Catu xaa nyaꞌu, silu aɨj tu jetzen eꞌiraanye aɨjna ɨ jɨitaꞌa tɨ ruxaahua áꞌuchaꞌacanyaꞌa.
\c 5
\s Maj nuꞌu cai tauraꞌacareꞌen maj caꞌanyejri cɨn tiꞌimuaraꞌa
\p
\v 1 Cɨriistuꞌu pu tuꞌirajtuaa tej ti taxaahua áꞌujhuaꞌanyeꞌen. Aɨj xu cɨn, caxu cheꞌe tauraꞌacareꞌen sej seyan caꞌanyejri cɨn tiꞌimuaraꞌa. Aɨ pu xaa aꞌamuamuareꞌeristaa aꞌame.
\p
\v 2 Nyajta inyaa, i nyaj iꞌi Pablo, ayaa nu tyajaꞌamueꞌixaateꞌe. Tɨ puaꞌa seyan huatauraꞌan maj raꞌantisijchixɨꞌɨn ɨ aꞌamua navi jetze, capu cheꞌe aꞌatzu jamuaatyavaɨreꞌesin ɨ Cɨriistuꞌu.
\v 3 Nyajta nu neyan tiraataꞌixaateꞌesin tzaahuatiꞌiraꞌa cɨmeꞌe aꞌatɨ tɨ naꞌa tɨ ayan huatauraꞌan maj raꞌantisijche ɨ naviiraꞌan jetze, ayaa pu ajta ruxeꞌeveꞌe tɨ aɨn nain cɨn raꞌaraꞌastijreꞌen tɨj naꞌa aꞌij tɨ teꞌeyuꞌusiꞌi jetzen ɨ nyuucari ɨ maj cɨn tieꞌijta.
\v 4 Muan, mɨ saj nuꞌu seyan rahuauhuau sej si urareꞌenyaꞌacan cɨn huatyaturan ɨ Dioj jemi, muan xu seri ma ruurai saɨjna ɨ Cɨriistuꞌu. Muan xu ajtacɨ́j jemin aɨjna ɨ tɨ rɨꞌɨ tyajamuaataꞌa.
\v 5 Me tyajta ityan, tyan tu tyaɨjna jetze aratacaꞌanye ɨ xaijnyuꞌucaraꞌaraꞌan ɨ Dioj tyaɨjna cɨmeꞌe tej tyaꞌatzaahuateꞌe. Ayaa tu een cɨn taꞌatacaꞌanyaacan cɨn rachuꞌeveꞌen tɨ ayan titáacɨꞌɨti tej ti teyan urareꞌenyaꞌacan cɨn huatyaturan ɨ Dioj jemi aꞌij tej tiꞌijxeꞌeveꞌe.
\v 6 Ayaa puꞌu tiꞌen, aꞌini ɨ Cɨriistuꞌu jemi, capu aꞌatzu jetzen ruxeꞌeveꞌe tɨ puaꞌa aꞌatɨ ari raꞌantisijchacaꞌa ɨ runavij nusu cai. Ma ajta, aɨ pu xaa jetzen ruxeꞌeveꞌe tɨ aꞌatɨ ayan huaꞌutaxeꞌeveꞌen ɨ tyaɨte aɨjna cɨmeꞌe tɨ tyaꞌatzaahuateꞌe tzaahuatiꞌiraꞌa cɨmeꞌe.
\p
\v 7 Tyamuaꞌa xu sejmiꞌi seyan tiꞌijrɨꞌɨrajcaa. ¿Aꞌataani tyájámuaꞌantyúꞌuuniꞌiriꞌi sej si cai cheꞌe seyan raꞌastijreꞌe saɨjna ɨ nyuucari tɨ ayan tiꞌayajna?
\v 8 Capu xaa nyaꞌu ayan caꞌanijraꞌa amuaataꞌaca aɨjna tɨ áꞌamuajee, silu seij pu aꞌatɨ jetze maꞌacan.
\v 9 Ayej nyaꞌase tɨ ayan cheꞌeta naꞌa aꞌamuaruure tɨj ajta ayan raruure ɨ pan ɨ maj rajnaachitya maɨjna ɨ levaduura tiꞌitɨ. Aj puꞌi rarutixɨꞌɨn nain japua ɨ pan tzajtaꞌa.
\v 10 Ayaa pu tinaꞌamitejteꞌe tɨ tavastaraꞌa cai amuaataꞌa saj saɨque tyuꞌumuaꞌati. Ajta aɨn ɨ aꞌatɨ tɨ tyajamuaꞌantyuꞌuuniꞌi, tavastaraꞌa pu pueijtzi raataꞌasin, aꞌatɨ tɨ naꞌa tɨ ayan rɨcɨ.
\p
\v 11 Ayaa nu tyajaꞌamueꞌihuaꞌu, nyeꞌihuaamuaꞌa, tɨ puaꞌa neyan nyanaꞌa tyajaꞌamueꞌixaateꞌe tɨ ayan nuꞌu ruxeꞌeveꞌe maj raꞌantijsiche ɨ runavij, ¿aꞌini een cɨn meyan mauj aꞌij puaꞌa nyaruure? Tɨ puaꞌa neyan tyajaꞌamueꞌixaatyaꞌa, capu cheꞌe aꞌatɨ nyajaaxaityaꞌa aꞌame aɨjna cɨmeꞌe nyej neyan tyajaꞌamueꞌixaateꞌe tɨ Cɨriistuꞌu huamɨꞌɨ ɨ curuu jetze.
\v 12 Ajta cɨmeꞌen aɨme ɨ mej tyajamuaꞌantyuꞌuuniꞌi, ayaa pu tinaꞌaraanajchi inyeetzi, tɨ ruꞌuraxuaahua ɨ nahuaa tɨ ij nain cɨn huaꞌatyasijchixɨꞌɨn.
\p
\v 13 Ma sajta muan, nyeꞌihuaamuaꞌa, Dioj pu ayan amuaatajée sej siꞌi ruxaahua áꞌujhuaꞌanyeꞌen, sicu. Ayaa pu i éenyaꞌa, caxu huatauraꞌan sej si seyan chaꞌa sanaꞌa tiꞌijrɨꞌɨraa aꞌij tɨ tyajamuaꞌamitejteꞌe ɨ tɨ aꞌij puaꞌa een cɨmeꞌe, silu sataꞌaj huataujvaɨreꞌen rujɨɨmuaꞌa saɨjna cɨmeꞌe saj huaujxeꞌeveꞌen.
\v 14 Sataꞌaj seyan rɨꞌɨ titetyujchaɨ aꞌini tɨj naꞌa tɨ tyaꞌaxa jetzen ɨ nyuucari ɨ maj cɨn tiꞌijta, nain pu araurastejsin seij cɨmeꞌe ɨ nyuucari tɨ ayan yee: “Pataꞌaj yee raxeꞌevaꞌa paɨjna ɨ axaꞌaj tevi patɨj asaɨj tiꞌaxeꞌeveꞌe.”
\v 15 Tɨ puaꞌa sauj seyan aꞌij puaꞌa tyúꞌuxajta, naꞌari sauj seyan titetyújchaɨraꞌa saɨjna cɨmeꞌe saj chueere, rɨꞌɨ xuꞌu muan sej si cai ahuaujpuaꞌariteꞌen rujɨɨmuaꞌa.
\s Cɨmeꞌen aɨjna tɨ tatzájtaꞌa huiráninyeica, ajta aɨjna tɨ aɨn xaijnyuꞌucaraꞌaraꞌan ɨ Dioj airáninyeica
\p
\v 16 Aɨj nu cɨn, ayaa nu tyajaꞌamueꞌixaateꞌe, sataꞌaj seyan tiꞌijrɨꞌɨraa saj saɨjna jetze araujcaꞌanyaꞌa ɨ xaijnyuꞌucaraꞌaraꞌan ɨ Dioj sej si cai seyan raꞌaraꞌastijreꞌen saɨjna ɨ tɨ aꞌij puaꞌa een tɨ huiraninyei ɨ aꞌamua tzajtaꞌa.
\v 17 Ayaa puꞌu, aꞌini ɨ xeꞌeviꞌiraꞌaraꞌan tɨ aꞌij puaꞌa een tɨ huiraninyei ɨ tzajtaꞌan ɨ aꞌatɨ, aɨ pu rajchaɨreꞌe ɨ xeꞌeviꞌiraꞌaraꞌan ɨ xaijnyuꞌucaraꞌaraꞌan ɨ Dioj. Aɨ mu meyan tyujchaɨreꞌe. Aɨj xu cɨn cai aꞌanaj aꞌaturaaven tiꞌitɨj cɨmeꞌe sej si cai seyan huarɨni aꞌij sej rɨniicheꞌen.
\v 18 Ma ajta, tɨ puaꞌa aɨn xaijnyuꞌucaraꞌaraꞌan ɨ Dioj ayan caꞌanijraꞌa amuaataꞌan sej si seyan raꞌaraꞌastijreꞌen aꞌij tɨ aɨn tiꞌijxeꞌeveꞌe, capu cheꞌe muejmi jetze tyaꞌupuáꞌajteꞌen tiꞌitɨj cɨmeꞌe aɨjna ɨ nyuucari ɨ maj cɨn tieꞌijta.
\p
\v 19 Tyamuaꞌa pu tiraꞌamitejteꞌe aꞌij tɨ rɨcɨ tɨ puaꞌa aꞌatɨ ayan raꞌaraꞌastijreꞌen ɨ ruxéꞌeviꞌiraꞌa tɨ aꞌij puaꞌa een tɨ huiraninyei ɨ tzajtaꞌan. Ayaa mu rɨcɨ ɨ tyaɨte, metiꞌixanaꞌacɨreꞌe, majta aꞌij puaꞌa tityajáꞌujhuaꞌaneꞌen, chaꞌa naꞌa mu tauraꞌaca seica jamuan ɨ tyaɨte.
\v 20 Aɨ mu majta huaꞌanajche aɨme ɨ maj cai dioosi pueen, majta mu huaꞌachyahueꞌiraca ɨ ruxaꞌa tyaɨte. Eecan mu tyujchaɨraꞌa muaꞌayeꞌi seica jamuan. Camu majta rɨꞌɨ tyuꞌurixaateꞌe. Majta mu aꞌujchueere muaꞌayeꞌi. Eecan mu majta runyaꞌusiꞌityaꞌa muaꞌayeꞌi maɨjna cɨmeꞌe maj tyuꞌutauraꞌateꞌen nain. Eꞌitaꞌa mu aꞌutacɨ́ꞌɨca muaꞌayeꞌi. Majta tihuiicaraꞌa muaꞌayeꞌi seica jemi maɨjna cɨmeꞌe maj saɨque tiꞌimuaꞌatze.
\p
\v 21 Eecan mu majta tiꞌinyacuaꞌatze ɨ tihuáꞌa ɨ seica, majta rutaꞌarujveꞌe. Mataꞌaruj mu ruxaahua aꞌuhuaꞌanyaꞌa muaꞌayeꞌi jamuan ɨ mej tiꞌiyeste tiꞌitɨj cɨmeꞌe. Tɨj naꞌa tɨ ayan aꞌij puaꞌa een, ayaa mu rɨcɨ aɨme ɨ maj raꞌaraꞌastijreꞌen ɨ ruxéꞌeviꞌiraꞌa tɨ aꞌij puaꞌa een tɨ huiraninyei ɨ huaꞌa tzajtaꞌa. Ayaa nu tyajaꞌamueꞌixaateꞌe tzaahuatiꞌiraꞌa cɨmeꞌe, aɨme ɨ mej meyan aꞌij puaꞌa titetyújchaꞌɨ, capu xaa nyaꞌu ayan tihuaꞌacɨꞌɨti mej maun aꞌutyarute aꞌu tɨ Dioj eꞌeseijreꞌe.
\p
\v 22 Ma majta aɨme ɨ mej jetzen araujcaꞌanye maɨjna jetze ɨ xaijnyuꞌucaraꞌaraꞌan ɨ Dioj, ayaa mu rɨꞌɨ titetyújchaꞌɨ. Mahuaujxeꞌevaꞌa mu muaꞌayeꞌi ɨ seica ɨ tyaɨte. Maujtyamuaꞌavaꞌa mu muaꞌayeꞌi. Tyamuaꞌa pu naa rɨꞌɨ huatyapuaꞌaracaꞌa ɨ huaꞌa tzajtaꞌa. Majta raayɨꞌɨtɨ maj tyaꞌutaviicueꞌi maɨjna cɨmeꞌe tɨ huaꞌamuareꞌeristeꞌe. Rɨꞌɨ mu majta tihuaꞌachaꞌɨ muaꞌayeꞌi ɨ ruxaꞌa tyaɨte. Rɨꞌɨ mu tiꞌitetyaɨte aɨme. Camu tiꞌitɨj cɨn aꞌutaꞌɨtzaꞌara ɨ seica jemi.
\v 23 Rɨꞌɨ mu titetyujchaɨcan cɨn majaꞌujhuaꞌan. Camu majta rɨꞌɨ aꞌij rɨj muaꞌayeꞌi. Ajta aɨme cɨmeꞌe ɨ tyaɨte mej meyan eꞌen, capu ma aꞌahuaꞌa seij ɨ nyuucari tɨ ayan huaꞌa jetze tiꞌitɨj cɨn tyaꞌupuáꞌajteꞌen.
\p
\v 24 Majta aɨme, ɨ maj jetzen ajtyamaꞌacan ɨ Cɨriistuꞌu, muꞌuri nain tityacáꞌa maɨjna cɨmeꞌe ɨ ruxéꞌeviꞌiraꞌa tɨ aꞌij puaꞌa een tɨ huiraninyeꞌi ɨ huaꞌa tzajtaꞌa mej mi cai cheꞌe aꞌij puaꞌa titetyújchaꞌɨ.
\v 25 Tɨ puaꞌa teyan ruurican huatyaturan ɨ Dioj jemi tyaɨjna cɨmeꞌe tej jetzen aratacaꞌanyen tyaɨjna jetze ɨ xaijnyuꞌucaraꞌaraꞌan ɨ Dioj, ticheꞌe tyajta teyan rɨꞌɨ tiꞌititachaꞌɨ tyaɨjna cɨmeꞌe tyaj tyajta jetzen aratacaꞌanyen tyaɨjna ɨ xaijnyuꞌucaraꞌaraꞌan jetze.
\p
\v 26 Ticheꞌe cai áꞌatatzaahuatyaꞌa tiꞌitɨj cɨmeꞌe. Ticheꞌe tyajta cai caꞌanijraꞌa tataꞌacareꞌen tej ti huatatyenyaꞌusiꞌiteꞌen tajɨɨmuaꞌa. Ticheꞌe tyajta cai tihuaꞌanyacuaꞌatziꞌira ɨ tihuáꞌa ɨ tyaxáꞌa tyaɨte.
\c 6
\s Maj nuꞌu huatáujvaɨreꞌen saɨj ajta saɨj
\p
\v 1 Nyeꞌihuaamuaꞌa, tɨ puaꞌa saɨj muan autyaturan tiꞌitɨj cɨmeꞌe, sataꞌaj seyan huarɨni. Cheꞌe saɨj muan rɨꞌɨ raaruuren. Ajta aɨn tɨ rɨꞌɨ raaruurejsin, cheꞌe aɨn pueenyaꞌa ɨ tɨ eitzeꞌe araujcaꞌanye aɨjna jetze ɨ xaijnyuꞌucaraꞌaraꞌan ɨ Dioj. Cheꞌe ajta rɨꞌɨ tiꞌityujchaɨcan cɨn ayan rɨꞌɨ raaruuren, ajta cai yáꞌuhuaꞌanan tɨ íꞌirɨni tɨ tiꞌitɨ caꞌanijraꞌa raataꞌan tɨ ij ayan cheꞌeta naꞌa autyaturan tɨj ajta ɨ saɨj.
\v 2 Sej si raꞌaraꞌastijreꞌen ɨ nyuucari tɨ Cɨriistuꞌu jetze maꞌacan. Ruxeꞌeveꞌe sej seyan huataujvaɨreꞌen seij ajta seij saɨjna cɨmeꞌe tɨ aꞌatɨ tyaꞌutaviicueꞌi aɨjna tɨ raatamuáreꞌeristeꞌe.
\p
\v 3 Ayaa puꞌu, aꞌini tɨ puaꞌa aꞌatɨ ayan tiraatamitejtyaꞌa tɨ aɨ pu mijmu eihua ruxeꞌeveꞌe, tɨ puaꞌa cai tiꞌitɨ, aɨ pu rucuanamuan rusaɨj ɨ rutzajtaꞌa.
\v 4 Ma ajta, cheꞌe ayen eenyeꞌen tɨ aꞌatɨ tɨ naꞌa ayan tiraamuaꞌati aꞌij tɨ tiꞌimɨjhuaca rusaɨj. Tɨꞌɨjta ayan huarɨn, aj pu xaa rɨꞌɨriista aꞌame tɨ ahuaujtzaahuateꞌen, aru aɨ puꞌu naꞌa aɨjna cɨmeꞌe tɨ ari tyuꞌuruu rusaɨj. Capu cheꞌe ruxeꞌevaꞌa aꞌame tɨ aɨn ayan ahuaujtzaahuateꞌen aɨjna cɨmeꞌe tɨ ayan nuꞌu eitzeꞌe ruxeꞌeveꞌe cai ɨ ruxaꞌa tevi.
\v 5 Cheꞌe ayan eenyeꞌen aꞌini ayaa pu ruxeꞌeveꞌe tɨ aꞌatɨ tɨ naꞌa ayan raꞌaviicueꞌiran aɨjna cɨmeꞌe tɨ raatamuáreꞌeristeꞌen.
\p
\v 6 Ajta aɨme tɨ aꞌatɨ ayan tihuaꞌamuaꞌate aꞌij tɨ teꞌeyuꞌusiꞌi ɨ yuꞌuxari jetze, micheꞌe maɨn cɨj tiraataꞌan ɨ tɨ cɨn huataujvaɨreꞌen aɨjna tɨ tihuaꞌamuaꞌate.
\p
\v 7 Caxu seyan rucuanamua. Capu rɨꞌɨri saj raꞌutaxaahuariꞌi ɨ Dioj, aꞌini aɨ pu tyuꞌutanajchita aꞌij tɨ tiraavijteꞌe. Aꞌachu saj caj tyuꞌutaꞌan, ayaa pu cheꞌeta naꞌa tyajaꞌamuacɨꞌɨti.
\v 8 Aɨjna ɨ aꞌatɨ tɨ ayan tiꞌityujchaꞌɨ tɨ ij ayan rɨꞌɨ tiraataꞌan ɨ ruxéꞌeviꞌiraꞌa tɨ aꞌij puaꞌa een tɨ huiiraninyei ɨ tzajtaꞌan, ayaa pu tiraacɨꞌɨti tɨ tyajaꞌuraiini aɨjna cɨmeꞌe ɨ ruxéꞌeviꞌiraꞌa tɨ aꞌij puaꞌa een. Ajta aɨn ɨ aꞌatɨ tɨ ayan rɨꞌɨ tiꞌityujchaꞌɨ tɨ ayan rɨꞌɨ tiraataꞌan aɨjna ɨ xaijnyuꞌucaraꞌaraꞌan ɨ Dioj, ayaa pu tiraacɨꞌɨti tɨ ayan ruurican huatyaturan ɨ Dioj jemi para rusen cɨmeꞌe.
\v 9 Ticheꞌe cai taxaamɨstyaꞌa tyaɨjna cɨmeꞌe tej teyan raruure ɨ tɨ iꞌi xaꞌapɨꞌɨn, aꞌini tɨꞌɨj ajna tyajaꞌureꞌenyen aꞌanaj tɨ huaujxaꞌapɨꞌɨntare, tɨ puaꞌa tyacai anacaican raataxaahuata, ajna xɨcajraꞌa jetze pu xaa titáacɨꞌɨti nain aꞌij tɨ tiraavijteꞌe.
\v 10 Aɨj pu cɨn, tɨj naꞌa tɨ ayan titáacɨꞌɨti tej teyan huarɨni, ticheꞌe teyan rɨꞌɨ tihuaꞌuchaɨn ɨ taxaꞌa tyaɨte. Tyataꞌaj eitzeꞌe rɨꞌɨ tihuaꞌuchaɨn aɨme ɨ maj majta tajamuan tyaꞌatzaahuateꞌe.
\s Maj nuꞌu rɨꞌɨ tiraaseij tɨ ij cai aꞌatɨ huaꞌucuanamuan
\p
\v 11 Rɨꞌɨ xuꞌu muan tiraaseij aꞌij nyaj vaꞌacan cɨn tiraꞌuyuꞌuxacaꞌa ɨ nyamuajcaꞌa cɨmeꞌe.
\v 12 Ma majta, aɨme ɨ maj aꞌamuaꞌɨtziiteꞌe, ayaa muꞌu een cɨn tiꞌityeseꞌe sej si caꞌanyejri cɨn raꞌantisijchixɨꞌɨn ɨ runavij mej mi rujɨɨmuaꞌa manaꞌa huataujvaɨreꞌen. Camu raxeꞌeveꞌe tɨ pueijtzi huaꞌutaꞌan aɨjna cɨmeꞌe maj nuꞌu majta raꞌaraꞌastijreꞌen maɨjna ɨ Cɨriistuꞌu ɨ tɨ áutataihuacaꞌa ɨ curuu jetze.
\v 13 Aɨ mu huatauraꞌa mej mi raꞌantisijche ɨ runavij, ma majta cai camu raꞌaraꞌastijreꞌe ɨ nyuucari ɨ maj cɨn tieꞌijta. Ayaa muꞌu raxeꞌeveꞌe mej mi amuaataseijrateꞌen aɨme ɨ maj Israel jetze ajtyamaꞌacan mej mi maɨjna cɨn ahuaujtzaahuateꞌen aɨme jemi ɨ saj nuꞌu raꞌantisijchacaꞌa ɨ runavij.
\p
\v 14 Me nyajta inyaa, cheꞌe nyaj cai aꞌanaj ahuantzaahuateꞌen tiꞌitɨj cɨmeꞌe silu cheꞌe aɨ puꞌu naꞌa tɨ Cɨriistuꞌu nyej jetze maꞌacan rajpueijtzi aꞌaraa ɨ curuu jetze. Aɨj pu cɨn nyacai cheꞌe raꞌaraꞌastijreꞌen ɨ tihuaꞌayeꞌira aɨme ɨ maj yan chaanca japua huachaatɨme. Aɨj mu majta cɨn nyeijchaɨreꞌe inyeetzi.
\v 15 Ayaa nu tyajaꞌamueꞌixaateꞌe aꞌini capu cheꞌe tiꞌitɨj nyejetze ruxeꞌeveꞌe tɨ puaꞌa aꞌatɨ raꞌantisijchacaꞌa ɨ runavij nusu cai. Ai puꞌu xaa Dioj jetze ruxeꞌeveꞌe tɨ aɨn aꞌatɨ saɨque tyuꞌumuaꞌati tɨ ij rujajcuatzeꞌen huatyaturan jemin ɨ Dioj.
\s Ɨ tɨ cɨn raꞌantipuaꞌari
\p
\v 16 Cheꞌe Dioj huaꞌutyapuaꞌariteꞌen, ajta huaꞌancuꞌuvajxɨꞌɨn aꞌachu maj manaꞌa puaꞌamua raꞌaraꞌastijreꞌen aɨjna ɨ nyuucari, aꞌini ai mu aɨn pueen ɨ maj Israel jetze ajtyamaꞌacan, ɨ tyaɨtejraꞌan ɨ tɨ Dioj huaꞌantihuau.
\p
\v 17 Aɨj pu cɨn ijii tɨ yu aucaꞌitɨ aꞌame, cheꞌe cai cheꞌe aꞌatɨ nyaꞌɨtziityaꞌa, aꞌini tyamuaꞌa nu neri nicu tiꞌicapitaꞌinaraꞌa nyaɨjna cɨmeꞌe ɨ nyaj rajpueijtzi ɨ Jesús jetze maꞌacan.
\p
\v 18 Cheꞌe aɨn tavastaraꞌa, aɨjna ɨ Jesús tɨ ajta iꞌi Cɨriistuꞌu, cheꞌe aɨn rɨꞌɨ tyajamuaataꞌan ɨ aꞌamua tzajtaꞌa, mɨ sej nyeꞌihuaamuaꞌa pueen. Ayaa puꞌu, cheꞌe ayan tyaꞌaraꞌani.