\id EPH
\h Efesios
\toc1 Efesios
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Efeso aꞌuchaatɨmaꞌacaa
\c 1
\s Pablo pu tihuéꞌitii aɨme ɨ mej eꞌetyujsaꞌɨri huaꞌateyujtaꞌa aujna u Efeso
\p
\v 1 Inyaa, i nyaj iꞌi Pablo, nyaa nu saɨj pɨrɨcɨ tɨ Dioj naꞌantihuau ruxéꞌeviꞌiraꞌa cɨmeꞌe nyej ni tiꞌitɨj cɨn tiraatyavaɨreꞌen aɨjna ɨ Cɨriistuꞌu tɨ ajta iꞌi Jesús. Ayaa nu tyajaꞌamuayuꞌuseꞌe muejmi, mɨ saj tyaɨtestyamuaꞌameꞌen pueen ɨ Dioj, mɨ saj Efeso eꞌeche. Nain xu cɨn arauraste aꞌij tɨ ari tyajamueijca aɨjna ɨ Cɨriistuꞌu tɨ ajta iꞌi Jesús.
\v 2 Ajta aɨn ɨ Dioj, ɨ tyaj rajyaꞌupua, jamuan ajta aɨn ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, micheꞌe maɨn rɨꞌɨ tyajamuaachaɨn, majta amuaatyápuaꞌariteꞌen ɨ aꞌamua tzajtaꞌa.
\s Cɨmeꞌen aɨjna tɨ cɨn rɨꞌɨ titataꞌaca aɨjna ɨ Cɨriistuꞌu
\p
\v 3 Ticheꞌe rɨꞌɨ tiraataꞌan tyaɨjna ɨ Dioj ɨ tɨ yaꞌupuaaraꞌan pueen ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, aꞌini aɨn Dioj, aɨ pu ayan taatapueijve nain tɨj naꞌa tɨ eꞌeseijreꞌe u tajapua tɨ ij titáacɨꞌɨti jamuan ɨ Cɨriistuꞌu.
\v 4 Ayaa pu tiꞌayajna, aꞌini jajcua ɨmɨ, tɨꞌɨj cai xɨ ratyataahua ɨ chaanaca ɨ tyaj yan japuan seijreꞌe, ajnaꞌɨmɨ Dioj pu taꞌantihuau jamuan ɨ Cɨriistuꞌu tej ti teyan uraréꞌenyaꞌa taꞌaraꞌani ɨ tatzajtaꞌa, tej ti cai tiꞌitɨ cɨn autyaturan ɨ jemin.
\v 5-6 Aꞌini eihua pu huapɨꞌɨ taxeꞌevaꞌacaa, ayaa pu titaaxaꞌapɨꞌɨntariꞌiriꞌi tɨ aɨn rusaɨj tayaꞌupua aꞌaraꞌani aɨjna cɨmeꞌe tɨ Cɨriistuꞌu ayan huarɨni tɨ tajetze maꞌacan huamɨꞌɨni. Dioj pu ayan titaaxaꞌapɨꞌɨntariꞌiriꞌi ɨ ruxéꞌeviꞌiraꞌa cɨmeꞌe. Ayaa eenyaꞌa aꞌaraꞌani, tej ti teyan rɨꞌɨ tiraataꞌan aɨjna cɨmeꞌe tɨ eihua huapɨꞌɨ naa seijreꞌe tɨ aɨn Dioj ayan rɨꞌɨ titáachaɨn. Ajta ruxéꞌeviꞌiraꞌa cɨn ayan rɨꞌɨ tiꞌitaachaɨn jamuan aɨjna ɨ tɨ raxeꞌeveꞌe, aɨjna ɨ Cɨriistuꞌu.
\p
\v 7 Aɨ xaa tyuꞌutanajchitacaꞌa aɨjna ɨ tyaj cɨn téꞌechaɨcaꞌa ɨ Dioj jemi. Ayaa pu aɨjna cɨn tyuꞌutanajchitacaꞌa aɨjna cɨmeꞌe tɨ ruxuureꞌe airáaxɨre tajetze maꞌacan tɨ ij Dioj ayan titaatauuniꞌi ɨ tyaj cɨn jemin autyajturaa. Ayaa tu een cɨn ramuaꞌaree tɨ Dioj rɨꞌɨ tiꞌitachaɨ ruxéꞌeviꞌiraꞌa cɨmeꞌe, nain cɨmeꞌe tɨ tyejeꞌeseijreꞌe u tajapua.
\v 8 Nain pu ayan taatapueijve aɨjna cɨmeꞌe tɨ aɨn nain cɨn rɨꞌɨ me tyaúmuaꞌaree, ajta nain cɨn yauꞌeite aɨjna ɨ Dioj.
\v 9 Ajta, ayaa pu taataꞌa tyaj raamuaꞌati tiꞌitɨ tɨ pɨrɨcɨ tɨ ruꞌavaa aɨjna cɨmeꞌe aꞌij tɨ tiꞌijxeꞌeveꞌe, aꞌini ayaa pu raꞌaranajchacaꞌa tɨ ayan huarɨni tɨꞌɨj aɨn ayan tiraaxaꞌapɨꞌɨntareꞌen tiꞌitɨ tɨ cɨn tiꞌityavaa aꞌame ɨ Cɨriistuꞌu.
\v 10 Ayaa pu raaxaꞌapɨꞌɨntare tɨ ayan eenyaꞌa aꞌame tɨꞌɨj tyajaꞌureꞌenyen ajna xɨcajraꞌa tɨ jetzen nain araurastejsin, tɨ ij Cɨriistuꞌu huaꞌamuꞌucan puéenyaꞌa aꞌame naijmiꞌi matɨj manaꞌa puaꞌamua eꞌeseijreꞌe u tajapua, ajta matɨj manaꞌa puaꞌamua yan seijreꞌe iiyan chaanaca japua.
\p
\v 11-12 Tyajta ityan, i tyaj anacai ráꞌantzaahua tyaɨjna ɨ Cɨriistuꞌu, Dioj pu ajta taꞌantihuau tɨ ij tiꞌitɨ taacɨꞌɨti jamuan ɨ Cɨriistuꞌu. Aɨ pu jajcua ɨmɨ taaxaꞌapɨꞌɨntariꞌiriꞌi aꞌij tɨ ayan tiraꞌaranajchacaꞌa. Ai pu aɨn pueen ɨ tɨ Dioj nain cɨn rɨꞌɨ tyuꞌuruuren aꞌij tɨ ari tiꞌihuaujxaꞌapɨꞌɨntariꞌiriꞌi tej ti teyan rɨꞌɨ tiraataꞌan tyaɨjna cɨmeꞌe tɨ eihua huapɨꞌɨ naa tiꞌiseijreꞌe ɨ jemin.
\v 13 Sajta muan, mɨ sej seyan raanamuajriꞌi ɨ nyuucari tɨ ayan tiꞌayajna, ɨ tɨ Dioj cɨn amueꞌiratuaasin, muan xu sajta ráꞌantzaahua. Ajta, ayaa pu cheꞌeta naꞌa tyajamuaacɨ́ꞌɨ jamuan ɨ Cɨriistuꞌu tɨj ari Dioj ayan tyaꞌataujratziiriꞌi tɨ aɨn xaijnyuꞌucaraꞌaraꞌan ɨ Dioj ayan huatyaturan muejmi jemi.
\v 14 Ajta aɨn xaijnyuꞌucaraꞌaraꞌan ɨ Dioj, ai pu aɨn pueen ɨ tɨ tyejmi jemi huatyajturaa, ɨ tyaj tyajta cɨn ramuaꞌaree tɨ ayan tiꞌayajna tɨ tiꞌitɨ taacɨꞌɨti ajna xɨcajraꞌan tɨ jetzen Dioj titaatatuireꞌesin aɨjna cɨmeꞌe ɨ Cɨriistuꞌu tɨ tajetze maꞌacan tyuꞌutanajchitacaꞌa tej ti rɨꞌɨ tiraataꞌan tyaɨjna cɨmeꞌe tɨ eihua huapɨꞌɨ naa tiꞌiseijreꞌe ɨ jemin.
\s Pablo pu rahuavii ɨ Dioj jemi tɨ aɨn ayan huaꞌataꞌacareꞌen mej tyamuaꞌa náa maj rɨɨ titáuumuaꞌati
\p
\v 15-16 Aɨj nu cɨn, tɨj naꞌa nyaj anacai raanamuajriꞌi sej seyan rɨꞌɨ raꞌastijreꞌe ɨ tavastaraꞌa, aɨjna ɨ Jesús, sajta seyan rɨꞌɨ tihuaꞌajchaɨ naijmiꞌica aɨme ɨ tyaɨtestyamuaꞌameꞌen ɨ Dioj, tɨj naꞌa tɨ yu eꞌireꞌenye, canu aꞌanaj raatapuaꞌajtacaꞌa nyej neyan tíꞌijtaujtziꞌireꞌe ɨ Dioj muejmi cɨmeꞌe, nyajta nu rahuavii muejmi cɨmeꞌen.
\v 17 Ayaa nu nyauj neyan rahuavii jemin aɨjna tɨ yaꞌupuaaraꞌan pueen ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu. Ayaa nu rahuavii nyaɨjna ɨ yaꞌupuaaraꞌan tɨ huapɨꞌɨ naa seijreꞌe tɨ ij aɨn xaijnyuꞌucaraꞌaraꞌan ayan amuaataꞌan sej si rɨꞌɨ me tityaumuámuaꞌara, sej si sajta rɨꞌɨ tiyauꞌeitaa xaꞌaraꞌani aɨjna tɨ ari huataseijre muejmi jemi sej si seyan tiraamuaꞌati tyamuaꞌa naa ɨ Dioj.
\p
\v 18 Ayaa nu nyajta rahuavii sej si sajta yauꞌeitaa xaꞌaraꞌani tzaahuatiꞌiraꞌa cɨmeꞌe ɨ aꞌamua tzajtaꞌa sej si seyan raamuaꞌaree tiꞌitɨ tɨ pɨrɨcɨ ɨ saj rachuꞌeveꞌe, ɨ tɨ cɨn amuaatajée ɨ Dioj, sej si sajta seyan raamuaꞌaree aꞌij tɨ een tɨj naꞌa puaꞌamua tɨ rɨꞌɨ huapɨꞌɨ naa seiiraꞌa aꞌame aɨjna tɨ huaꞌacɨꞌɨti aɨme ɨ tyaɨtestyamuaꞌameꞌen ɨ Dioj.
\v 19-20 Nyajta nu neyan rahuavii sej si seyan raamuaꞌaree tɨ cai amiteereꞌe, tɨ huapɨꞌɨ eihua raayɨꞌɨtɨ ɨ Dioj tɨ tiꞌitɨj cɨn ayan huáruuren i tyejmi tzajtaꞌa aɨjna ɨ rumuareꞌeriꞌiraꞌa cɨmeꞌe.
\p Tyan tu teyan raꞌatzaahuateꞌe aɨjna cɨmeꞌe tɨ ari eihua huapɨꞌɨ rɨꞌɨ tyuꞌuruu ɨ rumuareꞌeriꞌiraꞌa cɨmeꞌe aɨjna cɨmeꞌe aꞌij tɨ huarɨj ɨ Cɨriistuꞌu cɨmeꞌen tɨꞌɨj ayan raatarujte huaꞌa tzajtaꞌa ɨ mɨꞌɨchite, ajta yaꞌuviꞌitɨ u tajapua. Tɨꞌɨj i an yáꞌujra ɨ ɨpuari japua ɨrɨɨtaꞌan pujmeꞌen.
\v 21 Cɨriistuꞌu pu aɨjna cɨn teꞌentyajrupi ɨ tɨ eitzeꞌe veꞌe cai maaj tiꞌitɨ tɨ u uteꞌe eꞌeseijreꞌe. Aɨ pu eitzeꞌe vaꞌacan cɨn tiꞌityejvee cai maa aꞌatɨ tɨ tieꞌijta naꞌari aꞌatɨ tɨ tiꞌitɨ cɨn antyujmuaꞌaree nusu tevi tɨ caꞌanyejri cɨn tyuꞌutyaamueꞌitɨ o aꞌatɨ tɨ aɨjna cɨn tiꞌityejvee tɨ anajca cɨmeꞌe. Eitzeꞌe pu ajta ayan ruxeꞌeveꞌe ɨ nyuucari ɨ tyaj cɨn teyan ratamuaꞌamua tyaɨjna ɨ Cɨriistuꞌu cai maa seij ɨ nyuucari ɨ tyaj cɨn aꞌatɨ huatamuaꞌa. Ayaa pu xaa nyaꞌu cheꞌeta een ijii tɨ maꞌacan, ajta tɨ yu aucaꞌitɨ aꞌame para rusen cɨmeꞌe.
\p
\v 22 Ajta aɨn Dioj, aɨ pu raataꞌa tɨ Cɨriistuꞌu nain cɨn antyujmuaꞌaréera, ajta aɨ pu raꞌantihuau tɨ tyuꞌutyavaɨreꞌen aɨjna cɨmeꞌe tɨ aɨn pueenyaꞌa aꞌaraꞌani ɨ huaꞌamuꞌucan nain cɨmeꞌe ɨ huaꞌa jemi ɨ mej eꞌetyujsaꞌɨri mej mi ratyaanajche ɨ Dioj.
\v 23 Majta aɨme ɨ mej eꞌetyujsaꞌɨri, ayaa mu cheꞌeta manaꞌa ajtyamaꞌacan aɨjna jetze ɨ huaꞌamuꞌucan tɨj aꞌatɨ ratyáhueꞌiraꞌa ɨ ru jetze, aꞌini aɨjna ɨ Cɨriistuꞌu tɨ ajta huaꞌamuꞌucan pueen, aɨ pu huaꞌanaijmiꞌireꞌen nain cɨmeꞌe. Aꞌini ai pu aɨn pueen ɨ tɨ ranaijmiꞌireꞌen tɨj naꞌa tɨ eꞌeseijreꞌe tɨ Dioj raatyataahuacaꞌa.
\c 2
\s Dioj pu nuꞌu hueꞌirajtuaa mej mi cai cheꞌe tiꞌitɨj cɨn tyaꞌutyáturan ɨ jemin
\p
\v 1 Sajta muan, ayaa xu éꞌenyaꞌa saj mɨꞌɨchicaꞌa ɨ Dioj jemi aɨjna cɨmeꞌe ɨ saj cɨn autyajturaa ɨ jemin, ajta aɨjna ɨ saj aꞌij puaꞌa rɨjcaa.
\v 2 Ayaa xu aꞌij puaꞌa titetyujchaɨcaꞌa satɨꞌɨj sauj seyan rɨjcaa aꞌij mej rɨcɨ ijii aɨme ɨ mej yan japuan seijreꞌe ɨ chaanaca japua. Ajnaꞌɨmɨ aɨ xu seyan aꞌastijraꞌacaa saɨjna tɨ aꞌij puaꞌa een tɨ ajta aɨjna cɨn antyujmuaꞌaree tɨ ayan tihuaꞌutaijteꞌen aɨme ɨ maj xaijnyuꞌucari pueen ɨ maj seijreꞌe aaca tzajtaꞌa. Ai pu aɨn pueen ɨ xaijnyuꞌucari tɨ ari tiꞌimuareꞌe huaꞌa tzajtaꞌa aɨme ɨ maj huaꞌa jetze ajtyamaꞌacan aɨme ɨ maj cai aꞌatɨ aꞌastijreꞌe.
\p
\v 3 Tyajta ityan, anacaican tu naimiꞌi teyan huaꞌa jetze ajtyamaꞌacantacaꞌa aɨme. Ayaa tu cheꞌeta tyanaꞌa raꞌastijraꞌacaa aꞌij tɨ titaꞌamityejtyaꞌacaa aɨjna cɨmeꞌe tiꞌitɨ tɨ huanyej ɨ tajetze nusu tiꞌitɨ tɨ huataseijre ɨ tamuaꞌatziiraꞌa cɨmeꞌe. Tɨj naꞌa tɨ seijraꞌacaa ɨ tajetze, tyan tu raataꞌacaraꞌa tɨ aɨn titaataijteꞌen. Ayaa tu éꞌenyaꞌacaꞌa matɨj ɨ seica ɨ tɨ Dioj pueijtzi huaꞌutaꞌasin.
\p
\v 4 Ma ajta Dioj, aɨ pu eihua huapɨꞌɨ taataxeꞌeve. Aɨj pu cɨn, naa pu táꞌancuꞌuvajxɨꞌɨ ruxéꞌeviꞌiraꞌa cɨmeꞌe.
\v 5 Tyatɨꞌɨj tyauj teyan éꞌenyaꞌa tyaj mɨꞌɨchicaꞌa aɨjna cɨmeꞌe ɨ tyaj cɨn autyajturaa ɨ jemin, aɨ pu taatarujte jamuan ɨ Cɨriistuꞌu. Aɨ pu amueꞌirajtua aɨjna cɨmeꞌe tɨ huapɨꞌɨ rɨꞌɨ tyajamuájchaɨ ruxéꞌeviꞌiraꞌa cɨmeꞌe.
\p
\v 6 Ajta, Dioj pu taajɨste jamuan ɨ Cɨriistuꞌu. Aɨ pu ajta aɨjna jamuan an tajaꞌuráꞌatzacaꞌa aujna u uteꞌe aꞌu tɨ tieꞌijta aɨjna ɨ Cɨriistuꞌu tɨ ajta iꞌi Jesús.
\v 7 Ayaa pu een cɨn huarɨj tɨ ij ayan éenyaꞌa aꞌaraꞌani tɨj naꞌa tɨ yu aucaꞌitɨ aꞌame para rusen cɨmeꞌe, aɨ pu taataseijrateꞌesin tɨ rɨꞌɨ huapɨꞌɨ titájchaꞌɨ aɨjna cɨmeꞌe tɨ aɨn tajapua huanyúu aɨjna ɨ Cɨriistuꞌu tɨ ajta iꞌi Jesús.
\v 8 Aɨ pu amueꞌirajtuaa aɨjna cɨmeꞌe tɨ aɨn rɨꞌɨ tyajamuájchaɨ aɨjna cɨmeꞌe saj ráꞌantzaahua. Dioj pu ayan amuaataꞌa ruxéꞌeviꞌiraꞌa cɨmeꞌe. Caxu rujɨɨmuaꞌa sanaꞌa aꞌij tirajtyau.
\v 9 Tɨꞌij cai aꞌatɨ aꞌujtzaahuatyaꞌa, aɨj pu cɨn cai rɨꞌɨri tɨ aꞌatɨ rusaɨj raamueꞌitɨn aɨjna cɨmeꞌe aꞌij tɨ xaꞌapɨꞌɨn cɨn rɨcɨ.
\p
\v 10 Ayaa puꞌu naꞌa, aꞌini tyan tu tyaɨn pueen ɨ tɨ Dioj ayan rusaɨj táaruurejsin aꞌij tɨ tiraꞌamitejteꞌe. Jajcuacan pu ayan taaruu ɨ tatzajtaꞌa jamuan aɨjna ɨ Cɨriistuꞌu tɨ ajta iꞌi Jesús tej ti teyan huarɨni aɨjna cɨmeꞌe tɨ iꞌi xaꞌapɨꞌɨn aꞌij tɨ aɨn anacaican rɨꞌɨ tiraaruu tyejmi cɨmeꞌe.
\s Cɨriistuꞌu pu taatyapuaꞌari yu tatzajtaꞌa
\p
\v 11-12 Aɨj pu cɨn caxu seyan yáꞌuhuaꞌanan tɨ ajnaꞌɨmɨ ayaa xu eꞌenyaꞌa saj cai Cɨriistuꞌu jemi huatyáuuca. Ajta muan xu cai huaꞌa jetze ajtyamaꞌacantacaꞌa aɨme ɨ mej Israel jetze ajtyamaꞌacan. Ayej xaa nyaꞌu tiꞌayajna, aɨme ɨ mej meyan huataujmuaꞌa tɨcɨn: “I tyaj raꞌantisiꞌiche ɨ tanavi”, ayaa mu amuaatamuaꞌa muejmi tɨcɨn: “Mɨ saj cai seyan raꞌantisiꞌiche ɨ runavij.” Ayaa mu tyajaꞌamuaxa maɨjna cɨmeꞌe sej seij chuejraꞌa japua eꞌemaꞌacan. Caxu sajta yáꞌuhuaꞌanan tɨ ajnaꞌɨmɨ, ayaa xu cai ajtyamaꞌacantacaꞌa aɨme jetze ɨ tɨ Dioj huaꞌa jemi raatyajtuaa ɨ nyuucari ɨ tɨ cɨn tyaꞌataujratziiriꞌi tɨ ayan rɨꞌɨ tihuaꞌutaꞌan. Capu ajta maꞌahuaꞌacaa ɨ saj cɨn rachuꞌeveꞌen. Ajta, capu huataseijre muejmi jemi ɨ Dioj iiyan chaanaca japua.
\p
\v 13 Ma ajta ijii, mɨ saj aꞌɨmɨ huatyáuuca aꞌu tyaj tyajta ityan eꞌeseijraꞌacaa, xuꞌuri vejliꞌi huatyáuu tyejmi jemi aɨjna cɨmeꞌe tɨ aɨn Cɨriistuꞌu ayan aꞌamua japua huanyúu aɨjna cɨmeꞌe tɨ ruxuureꞌe airaaxɨre.
\v 14 Ai pu aɨn pueen ɨ tɨ taatyapuaꞌari ɨ tatzajtaꞌa naijmiꞌica muejmi, ajta ityejmi. Aɨ pu ayan taaruu tej ti teyan seij tyanaꞌa tyaɨtestyamuaꞌameꞌen pueenyaꞌa taꞌaraꞌani. Aɨ pu raatyáuunite aɨjna tɨ tyaꞌantanaamɨɨ, aɨjna ɨ tyaj cɨn tanyaꞌusiꞌityaꞌacaa.
\p
\v 15 Aɨ pu raꞌantipuaꞌarite ɨ rutevi cɨmeꞌe aɨjna ɨ nyuucari ɨ maj cɨn tieꞌijta, nain cɨmeꞌe ɨ maj cɨn tyuiꞌimɨjra. Ayaa pu een cɨn huarɨj tɨ ij ayan huaꞌuruuren ɨ rujetze aɨme ɨ maj huaꞌapua mej mi seij manaꞌa tyaɨtestyamuaꞌameꞌen pueenyaꞌa muaꞌaraꞌani. Ayaa pu aɨjna cɨn huarɨj, aɨ pu huaꞌutyápuaꞌari ɨ maj huaꞌapua.
\v 16 Aɨj pu ajta cɨn ayan huarɨj tej ti tyajtahuaꞌa aꞌutyáuu taꞌaraꞌani ɨ Dioj jemi ɨ tyaj huaꞌapua aɨjna cɨmeꞌe ɨ rutevi ɨ maj ráꞌutatai ɨ curuu jetze. Ayaa pu een cɨn huarɨj, aɨ pu raꞌantipuaꞌarite ɨ tyaj cɨn tanyaꞌusiꞌityaꞌacaa.
\p
\v 17 Aɨ pu mu aꞌuveꞌeme tɨ i ayan tyajamuaataꞌixaateꞌen aɨjna cɨmeꞌe ɨ nyuucari ɨ tɨ cɨn amuaatyápuaꞌariteꞌen mɨ saj aꞌɨmɨ aꞌutyáuuca. Ayaa pu cheꞌeta naꞌa tihuaꞌutaꞌixaa aɨme ɨ mej vejliꞌi seijraꞌacaa aɨjna cɨmeꞌe ɨ nyuucari ɨ tɨ cɨn ajta huaꞌutyápuaꞌari aɨme.
\v 18 Ayaa puꞌu, Cɨriistuꞌu tajapua huanyúu, tej ti, i tyaj huaꞌapua, seij tyanaꞌa cɨn ɨ xaijnyuꞌucari teyan jamuan tyuꞌutaxaj tyaɨjna jamuan ɨ tyaj rajyaꞌupua.
\v 19 Aɨj xu cɨn cai cheꞌe saɨn pueen ɨ mej seij chuejraꞌa japua eꞌemaꞌacan naꞌari aɨme ɨ maj cai aꞌij rumuari, silu xuꞌuri huaꞌa jetze ajtyamaꞌacan aɨme jemi ɨ maj aꞌutyáuu ɨ Dioj jemi.
\p Ee xaa nyaꞌu, xuꞌuri huaꞌa jetze ajtyamaꞌacan aɨme ɨ maj tyaɨtestyamuaꞌameꞌen pueen ɨ Dioj.
\v 20 Naijmiꞌi tu tiꞌivaɨraꞌa taꞌajuꞌun tɨj seij ɨ chiꞌi tɨ tzajtaꞌan eꞌeseijreꞌe ɨ Dioj. Aɨme ɨ tɨ huaꞌutajée ɨ Jesús, majta aɨme ɨ mej mejmiꞌi tiꞌixaxaꞌataꞌa ɨ Dioj jetze maꞌacan, ayaa mu tiꞌivaɨraꞌa muaꞌajuꞌun tɨj tetej tɨ japuan ájtaavijhua ɨ jaxuꞌu. Ajta aɨn ɨ Cɨriistuꞌu tɨ ajta iꞌi Jesús, ai pu aɨn pueen ɨ tetej tɨ esquineeru cɨn tiꞌivaɨreꞌe.
\p
\v 21 Naimiꞌi tu títaviꞌiraxɨꞌɨsin jetzen tyaɨjna ɨ Cɨriistuꞌu, tyajta naimiꞌi tu huatyaajuꞌu taꞌajuꞌun tej ti teyan tiꞌivaɨraꞌa taꞌaraꞌani tɨj teyuu tɨ jetzen Dioj huiracatii.
\v 22 Sajta muan, jetzen aɨjna ɨ Cɨriistuꞌu, muan xu sajta tyújviꞌiraxɨꞌɨsin sej si seyan tiꞌivaɨraꞌa xaꞌaraꞌani tɨj chiꞌi tɨ jetzen huiracatii ɨ ruxaijnyuꞌuca cɨmeꞌe aɨjna ɨ Dioj.
\c 3
\s Pablo pu nuꞌu aɨjna cɨn antyujmuaꞌaree tɨ huaꞌutyajtuaani aɨjna ɨ nyuuca huaꞌa jemi ɨ maj cai Israel jetze ajtyamaꞌacan
\p
\v 1 Aɨj nu cɨn neyan huarɨni inyaa, i nyaj iꞌi Pablo, i nyaj nyajta aityanamiꞌi nyaɨjna cɨmeꞌe nyej tiꞌivaɨreꞌe jemin ɨ Cɨriistuꞌu tɨ ajta iꞌi Jesús nyaɨjna cɨmeꞌe nyej tyajaꞌamueꞌixaateꞌe muan mɨ saj cai Israel jetze ajtyamaꞌacan.
\v 2 Tij sacai seri raanamuajriꞌi saɨjna cɨmeꞌe tɨ Dioj ayan rɨꞌɨ tinaatyajtuaa aɨjna cɨmeꞌe tɨ ayan tinyeijca nyej ni tyajamuaataꞌixaateꞌen muejmi.
\p
\v 3 Nuꞌuri cɨj caj tyajamuaataitiꞌiriꞌi aɨjna cɨmeꞌe tɨ Dioj naataseijrate me eijreꞌe tiꞌitɨ tɨ pɨrɨcɨ ɨ tɨ ruꞌavaatacaꞌa ɨ jemin.
\v 4 Satɨꞌɨj raꞌujiiven aꞌij nyej tyajáꞌamuayuꞌuseꞌe nyeijna jetze i yuꞌuxari, aj xu xaa yauꞌeitaa xaꞌajuꞌun aꞌij nyej tiyauꞌeite tyamuaꞌa naa nyaɨjna cɨmeꞌe tɨ ruꞌavaatacaꞌa aɨjna jetze ɨ Cɨriistuꞌu.
\v 5 Capu xaa nyaꞌu huaꞌutaseijrate aɨme ɨ seica ɨ tyaɨte ɨ maj cai cheꞌe yaꞌahuaꞌacaa, ɨ maj jajcua ɨmɨ seijraꞌacaa.
\p Ma ajta ijii, aɨn xaijnyuꞌucaraꞌaraꞌan ɨ Dioj ayan huaꞌutaseijrate aɨme ɨ maj huatyáuu ɨ Dioj jemi mej mi meyan tiraatyavaɨreꞌen. Aɨ pu ajta ayan tihuaꞌutaseijrate aɨme ɨ mej tiꞌixaxaꞌataꞌa ɨ Dioj jetze maꞌacan.
\v 6 Ai pu aɨn pueen ɨ tɨ ruꞌavaatacaꞌa tɨ aɨme ɨ maj cai Israel jetze ajtyamaꞌacan, ayaa pu tihuaꞌacɨꞌɨti jamuan aɨme ɨ maj Israel jetze ajtyamaꞌacan, mej mi naimiꞌi antyaujsaɨreꞌen mej mi meyan eꞌenyeꞌen maj saɨj manaꞌa tyaɨtestyamuaꞌameꞌen pueenyaꞌa muaꞌaraꞌani, mej mi naimiꞌi raꞌancuraꞌan aɨjna tɨ tyaꞌataujratziiriꞌi tɨ ayan rɨniicheꞌen aɨjna ɨ Cɨriistuꞌu tɨ ajta iꞌi Jesús.
\p
\v 7 Aɨj nu cɨn neyan teꞌentyajrupi nyaɨjna cɨmeꞌe nyej neyan tiꞌivaɨreꞌe nyej tihuaꞌutaꞌixaateꞌen ɨ nyuucari cɨmeꞌe tɨ cɨmeꞌen raxa ɨ Dioj. Aɨ pu ayan rɨꞌɨ tinaachaɨ aɨjna cɨmeꞌe tɨ ayan naatapueijve ruxéꞌeviꞌiraꞌa cɨmeꞌe nyej ni neyan tyuꞌumuareꞌen nyaɨjna cɨmeꞌe ɨ muáreꞌeriꞌiraꞌaraꞌan ɨ Dioj.
\p
\v 8-9 Ayaa pu een, nyaa nu nyaɨn pueen ɨ tɨ eitzeꞌe cai ruxeꞌeveꞌe macai ɨ seica ɨ maj cɨleꞌen cɨn tiꞌitátyatyáꞌupuꞌu ɨ Dioj jemi. Capu amɨn aꞌij, aucheꞌe pu Dioj ayan rɨꞌɨ tinajchaꞌɨ tɨ aɨjna cɨn tinyeijca nyej ni tihuaꞌutaꞌixaateꞌen nyaɨme ɨ maj cai Israel jetze ajtyamaꞌacan mej mi raamuaꞌaree aꞌij tɨ een Cɨriistuꞌu jemi tɨ tiꞌiseijreꞌe, tɨ cai amiteereꞌe naijmiꞌi tɨj naꞌa tiꞌipuaꞌamua tɨ titáacɨꞌɨti aɨjna jemi para rusen cɨmeꞌe, nyej ni tihuaꞌutaꞌixaateꞌen naijmiꞌica tyamuaꞌa naa aꞌij tɨ Dioj tiraaxaꞌapɨꞌɨntare aꞌij tɨ teꞌeme aɨjna cɨmeꞌen ɨ tɨ ruꞌavaa. Jajcua ɨmɨ tɨj naꞌa tɨ yu eꞌireꞌenye, aɨ pu ruꞌavaatacaꞌa ɨ Dioj jemi, ɨ tɨ nain tyuꞌutaahuacaꞌa tɨj naꞌa tiꞌipuaꞌamua tɨ tiꞌiseijreꞌe.
\p
\v 10-11 Ayaa pu tiraaxaꞌapɨꞌɨntarej mej mi meyan raꞌanticuuna aɨjna ɨ tɨ ruꞌavaatacaꞌa aɨme jemi ɨ maj eꞌetyujsaꞌɨri u teyujtaꞌa mej mi aɨme huaꞌuseij ɨ maj tieꞌijta u tajapua, majta aɨme ɨ maj tiꞌitɨj cɨn antyujmuaꞌaree aun tɨ Dioj eꞌeseijreꞌe, mej mi meyan raamuaꞌaree tɨ cai tiꞌiseicaj naꞌa ɨ tɨ cɨn Dioj ayan huarɨj ɨ rumuaꞌatziiraꞌa cɨmeꞌe, aɨjna tɨ jajcua ɨmɨ ayan tiraaxaꞌapɨꞌɨntare para rusen cɨmeꞌe. Aɨ pu ari raꞌanticɨꞌɨ aɨjna cɨmeꞌe tɨ aɨn Cɨriistuꞌu, aɨjna ɨ Jesús tɨ ajta iꞌi tavastaraꞌa pueen, aɨ pu tajapua huanyúu.
\p
\v 12 Aꞌini tuꞌuri raꞌatzaahuateꞌe tyaɨjna, ajta aɨjna cɨmeꞌe tɨ aɨn Cɨriistuꞌu huamɨꞌɨ tajetze maꞌacan, aɨj pu cɨn ari rɨꞌɨri tyej ti cai tiꞌitzɨɨnyaꞌa aꞌanaj tɨ naꞌa tyaun aꞌaraꞌasti ɨ Dioj jemi.
\v 13 Aɨj nu cɨn neyan tyajaꞌamuahuavii, saj cai ruxaamɨstyaꞌa aɨjna cɨmeꞌe nyej neyan tirajpueiitzi muejmi jetze maꞌacan, aꞌini eihua pu huapɨꞌɨ tyajáꞌamuacɨꞌɨti tɨ ayan tiꞌinyaruure.
\s Cɨriistuꞌu pu nuꞌu taxeꞌeveꞌe
\p
\v 14-15 Aɨj nu cɨn neyan titunuta jemin ɨ tyaj rajyaꞌupua ɨ tyaj jetzen raꞌancuraꞌa aꞌij tɨ huataujmuaꞌa seij ajta seij ɨ tyaɨtestyamuaꞌameꞌen, ɨ mej u uteꞌe eꞌeseijreꞌe, majta ɨ mej yan chaanaca japua huachaatɨme, matɨj manaꞌa puaꞌamua ɨ tyaɨtestyamuaꞌameꞌen ɨ Dioj.
\v 16-17 Ayaa nu tiꞌijhuavii tɨ aɨn Dioj caꞌanijraꞌa amuaataꞌan ɨ aꞌamua tzajtaꞌa sej si seyan saɨjna jetze araujcaꞌanyen ɨ xaijnyuꞌucaraꞌaraꞌan ɨ Dioj. Cheꞌe aɨn Dioj ajta ayan rɨꞌɨ tyajamuájchaɨ aɨjna cɨmeꞌe tɨ aɨn amuaareꞌepijte aɨjna tɨ naa eꞌicaj tiꞌiseijreꞌe ɨ jemin, tɨ ij aɨn Cɨriistuꞌu aun aꞌutyaturan muejmi jemi, aɨjna cɨmeꞌe sej seyan raꞌastijreꞌe.
\p
\v 18 Ayaa nu nyajta tiꞌijhuavii sej si seyan anacai huaujxeꞌeveꞌen nain cɨmeꞌe, sej si sajta seyan nain cɨn tyaꞌutaviicueꞌi saɨjna cɨmeꞌe sej huapɨꞌɨ huaujxeꞌeveꞌen, sej si sajta eꞌeyan saɨjna jetze araujcaꞌanyen ɨ xaijnyuꞌucaraꞌaraꞌan ɨ Dioj sej si raamuaꞌaree nain cɨmeꞌe ɨ tɨ cɨn Cɨriistuꞌu aꞌamuaxeꞌeveꞌe. Tɨj naꞌa aꞌu tɨ eꞌeseijreꞌe aatyaꞌɨmɨ, ajtyapuaꞌɨmɨ, aacɨꞌɨmɨ, aɨ pu xaa aun aꞌaraꞌasti tɨ ij aun amuaaxeꞌeveꞌen.
\p
\v 19 Ee xaa nyaꞌu, ayaa nu tiꞌijhuavii muejmi cɨmeꞌe sej si seyan raamuaꞌaree ɨ tɨ cɨn Cɨriistuꞌu aꞌamuaxeꞌeveꞌe, aɨjna tɨ cai amiteereꞌe nain cɨmeꞌe, tɨꞌij aun aꞌutyaturan muejmi jemi naijmiꞌi tɨj naꞌa ɨ tɨ cɨn Dioj aꞌamuanaijmiꞌireꞌen.
\p
\v 20-21 Ajta aɨn ɨ tɨ eihua huapɨꞌɨ raayɨꞌɨtɨ tɨ ayan huarɨni aɨjna cɨmeꞌe ɨ tyaj cai raayɨꞌɨtɨ tyaj rahuavii nusu tɨ cai ayan titaꞌamitejteꞌe aɨjna cɨmeꞌe tɨ aɨn tiꞌimuareꞌe ɨ ta tzajtaꞌa ɨ rumuareꞌeriꞌiraꞌa cɨmeꞌe, ticheꞌe teyan rɨꞌɨ tiraataꞌan aꞌu tyaj eꞌetitasaꞌɨri ɨ jemin. Jamuan aɨjna ɨ Cɨriistuꞌu tɨ ajta iꞌi Jesús, ticheꞌe teyan cheꞌeta tyanaꞌa rɨꞌɨ tiraataꞌan tɨj naꞌa tɨ yu aucaꞌitɨ aꞌame para rusen cɨmeꞌe. Yaa puꞌicu. Cheꞌe ayan tyajaꞌureꞌenyen.
\c 4
\s Naimiꞌi mu seij manaꞌa tyaɨtestyamuaꞌameꞌen pueen ɨ Dioj aꞌini xaijnyuꞌucaraꞌaraꞌan ɨ Dioj huaꞌutyápuaꞌari
\p
\v 1 Aɨj nu cɨn, inyaa, i nyaj aityanamiꞌi aɨjna cɨmeꞌe nyaj ravaɨreꞌe ɨ tavastaraꞌa, ayaa nu tyajaꞌamuahuavii sej si seyan rɨꞌɨ titetyujchaɨ aꞌij tɨ tiraavijteꞌe aꞌini Dioj pu amuaatajée.
\v 2 Sej si cai tiꞌitɨ cɨn aꞌujtzaahuatyaꞌa silu ayaa xuꞌu cumu saj cai tiꞌitɨj cɨn tiꞌityejvee. Sej si huaꞌancuꞌuvajxɨꞌɨn sej si tyaꞌutaviicueꞌi seij sajta seij aɨjna cɨmeꞌe sej huaujxeꞌeveꞌen.
\p
\v 3 Sataꞌaj huatyaujcaꞌanyen sej si sauj seij sanaꞌa tyaɨtestyamuaꞌameꞌen pueenyeꞌen aꞌini aɨn xaijnyuꞌucaraꞌaraꞌan ɨ Dioj, aɨ pu rɨꞌɨ tyajaꞌamuasaɨreꞌesin aɨjna cɨmeꞌe tɨ ari amuaatyapuaꞌari.
\v 4 Ayaa puꞌu tiꞌen, aꞌini seij muꞌu ɨ tyaɨtestyamuaꞌameꞌen ɨ mej yen seijreꞌe, ajta seij puꞌu ɨ xaijnyuꞌucaraꞌaraꞌan ɨ Dioj. Ayaa pu cheꞌeta naꞌa een tɨ seij naꞌa aɨjna sej jetzen rachuꞌeveꞌe aɨjna tɨ cɨn amuaatajée ɨ Dioj.
\v 5 Seij puꞌu ɨ tavastaraꞌa, ajta seij puꞌu aɨn pueen ɨ tyaj raꞌatzaahuateꞌe, ajta seij puꞌu cɨn ɨ nyuucajtzeꞌen ɨ maj cɨn muaɨꞌɨvijhuaca.
\v 6 Ajta seij puꞌu ɨ Dioj, ɨ tyaj naimiꞌi rajyaꞌupua. Aɨ pu nain cɨn antyujmuaꞌaree. Aɨ pu ajta nain cɨn tiꞌimuareꞌe tɨꞌij nain tyuꞌunáijmiꞌireꞌen. Aɨ pu ajta naijmiꞌi jemi seijreꞌe ityejmi jemi.
\p
\v 7 Ajta ityejmi, ayaa pu titaatapueijve ɨ Cɨriistuꞌu seij ajta seij aɨjna ɨ tɨ cɨn rɨꞌɨ titajchaꞌɨcaꞌa aꞌij tɨ aɨn titaaxaꞌapɨꞌɨntariꞌiriꞌi.
\v 8 Aɨj pu cɨn ayan teꞌeyuꞌusiꞌi tɨcɨn:
\q Tɨꞌɨj nuꞌu aɨn aꞌujnyéj u tajapua, aɨ pu nuꞌu huajaꞌuviꞌitɨ aɨme tɨ ij hueꞌityaanan naijmiꞌica ɨ tɨ huaꞌutyaamueꞌitɨ.
\q Aɨ pu ajta nuꞌu huaꞌureꞌepijte aɨme ɨ rutyaɨtestyamuaꞌa aɨjna tɨ cɨn rɨꞌɨ tihuaꞌajchaɨcaꞌa.
\p
\v 9 Ajta eijna i nyuucari tɨ ayan raxaj yee aɨ pu nuꞌu aꞌujnyéj u tajapua, ¿aꞌini huataujmuaꞌa aijna? ¿Ni qui ayen huataujmuaꞌa yee aɨ pu ajta anacai ya vaꞌacaanye iiyan chaanaca japua? Ee xaa nyaꞌu, ayaa pu tiꞌayajna tɨ ayan huataujmuaꞌa.
\p
\v 10 Aɨjna tɨ ya vaꞌacaanye, ai pu aɨn pueen ɨ tɨ aun aꞌujnyéj annaꞌɨmɨ u tajapua tɨ ij raanaijmiꞌireꞌen tɨj naꞌa tɨ tiꞌityapuaꞌamua tɨ nainjapua tiꞌiseijreꞌe.
\v 11 Ai pu aɨn pueen ɨ tɨ seica antihuau, mej mi teꞌentyarute maɨjna cɨmeꞌe ɨ maj tamuaamuataꞌa japuan huaꞌapua araꞌase, ajta seica, mej mi meyan tyuꞌutyavaɨreꞌen maɨjna cɨmeꞌe mej tyuꞌutaxaj Dioj jetze maꞌacan. Aɨ pu ajta seica antihuau mej mi meyan áꞌujhuaꞌanyeꞌen mej tihuaꞌutaꞌixaateꞌen ɨ tyaɨte ɨ nyuucari tɨ cɨn Dioj hueꞌiratuaasin, ajta seica, mej mi meyan maɨjna cɨn antyujmuaꞌaréera mej mi rɨꞌɨ tihuaꞌuchaɨn ɨ mej eꞌetyujsaꞌɨri. Ajta seica, aɨ pu ayan tihuaꞌutaꞌa mej mi tihuaꞌumuaꞌaten ɨ tyaɨte.
\p
\v 12 Ayaa pu een cɨn huaꞌantihuau mej mi rɨꞌɨ huaꞌuruuren ɨ huaꞌa tzajtaꞌa ɨ mej huatyáuu ɨ Dioj jemi, mej mi aɨme majta tyuꞌutyavaɨreꞌen aɨjna cɨmeꞌe mej mi tyújviꞌiraxɨꞌɨn jamuan ɨ Cɨriistuꞌu.
\v 13 Ayaa tu een cɨn huarɨn, aj tu xaa aꞌaraꞌasti tej ti seij tyanaꞌa cɨn ráꞌantzaahuateꞌen, tej ti teyan cheꞌeta tyanaꞌa raamuaꞌati tyaɨjna tɨ yaujraꞌan pueen ɨ Dioj. Aj tu xaa, nain cɨn teri huavaujse aɨjna cɨmeꞌe tej teri tyuꞌunáijmiꞌire aꞌij tɨ Cɨriistuꞌu titaaxaꞌapɨꞌɨntariꞌiriꞌi tej ti teyan eꞌenyeꞌen tɨj ajta aɨn een.
\v 14 Ayaa tu tyajta tyaɨjna cɨn huarɨn, catu cheꞌe teyan éꞌenyaꞌa taꞌajuꞌun matɨj ɨ tɨꞌɨrii maj manaꞌa tyajaꞌunamuajran, maɨjna cɨmeꞌe maj cai xɨ ramuaꞌaree yee ayaa pu tiꞌixaꞌapɨꞌɨn o capu ayan tiꞌixaꞌapɨꞌɨn. Catu cheꞌe teyan chaꞌa tyanaꞌa tityaajuꞌun tɨj ɨ jaitɨri tɨ aɨn aaca ayan ráatajchi aꞌu tɨ naꞌa pujmeꞌen. Capu cheꞌe rɨꞌɨriista aꞌame mej mi meyan chaꞌa manaꞌa titaacuanamuan maɨjna cɨmeꞌe aꞌij tɨ tihuaꞌaraanajchi mej titaꞌixaateꞌen aɨme ɨ tyetyaca ɨ maj raayɨꞌɨtɨ tyamuaꞌa naa maj cɨn eꞌihuacuanamuan maɨjna cɨmeꞌe tɨ hueꞌitzi naꞌa pueen.
\p
\v 15 Me tyajta ityan, ayaa tu tiꞌixaata taꞌajuꞌun huataujnyátacan cɨmeꞌe aꞌini tyátaxeꞌeveꞌe. Ayaa tu een cɨn huarɨn, aj tu xaa nain cɨn títaviꞌiraxɨꞌɨsin jamuan ɨ tɨ tamuꞌucan pueen, tɨ iꞌi Cɨriistuꞌu.
\v 16 Ajta aɨjna jetze, naijmiꞌica pu ayan vaujsiꞌi ɨ rutyaɨtestyamuaꞌa, ajta naijmiꞌi mu tyújviꞌiraxɨꞌɨsin nainjapua tɨj manaꞌa maj antyújnaꞌamiche. Ayaa pu teꞌeme aɨjna cɨmeꞌe mej huaujxeꞌeveꞌen seij majta seij, ajta aɨjna cɨmeꞌe matɨj manaꞌa puaꞌamua meyan tiꞌimuareꞌe maɨjna cɨmeꞌe aꞌij tɨ tihuaꞌucɨꞌɨ seij ajta seij.
\s Aɨ mu nuꞌu jájcuatzeꞌen eꞌiten seijreꞌe ɨ Cɨriistuꞌu jemi
\p
\v 17 Aɨj nu cɨn, neyan tyajaꞌamueꞌixaateꞌe. Ayaa nu tyajaꞌamueijcateꞌe ɨ tavastaraꞌa jetze maꞌacan sej si cai cheꞌe seyan titetyujchaꞌɨ matɨj aɨme ɨ maj cai Israel jetze ajtyamaꞌacan. Capu tiꞌitɨj vaɨreꞌe ɨ huaꞌamuaꞌatziiraꞌa.
\v 18 Camu rɨꞌɨ tiyauꞌeite, majta aꞌɨmɨ mu aꞌutyajturaa aꞌu tɨ cai eꞌeseijreꞌe ɨ Dioj tɨ iꞌi ruuri, aɨjna cɨmeꞌe maj cai ramuaꞌaree aꞌij tɨ een ɨ Dioj jemi maɨjna cɨmeꞌe mej raꞌantaná ɨ ruxaijnyuꞌuca.
\v 19 Camu cheꞌe ruteviꞌiraꞌa. Aɨj mu cɨn meyan huatauraꞌa mej meyan huarɨni aꞌij tɨ tihuaꞌamityejteꞌe, tiꞌitɨ tɨ huaꞌaraanajchi ɨ rutzajtaꞌa mej mi nain cɨn tyuꞌuxanaꞌacɨreꞌen. Majta maɨn, maucheꞌe mu cai áꞌujcuꞌuváa raahuausin maj majtahuaꞌa meyan aꞌij puaꞌa huarɨni.
\p
\v 20 Ma sajta muan, caxu seyan raamuáꞌa saɨjna jemi ɨ Cɨriistuꞌu, sej si seyan cheꞌeta sanaꞌa aꞌij puaꞌa huarɨni matɨj aɨme.
\v 21 Ayej nyaꞌase xuꞌuri raamuaꞌareeriꞌi, tɨ ajta aɨn tyajamuaamuáꞌate tzaahuatiꞌiraꞌa cɨmeꞌe aꞌij tɨ een aɨjna jemi ɨ Jesús.
\v 22 Ayaa pu tyajamuaamuáꞌate aɨjna cɨmeꞌe aꞌij sej sejmiꞌi titetyujchaɨcaꞌa, sej si yáꞌuhuaꞌaxɨn aꞌij sej sejmiꞌi titetyujchaɨcaꞌa, aꞌini ayaa pu aꞌij puaꞌa áꞌamuaruurajcaꞌa aɨjna cɨmeꞌe tɨ áꞌamuacuanamuajcaꞌa aɨjna ɨ áꞌamuamuaꞌatziiraꞌa tɨ tiꞌihueꞌitaca.
\v 23-24 Ajta, sej si seyan huaujjajcuareꞌen saɨjna cɨmeꞌe aꞌij sej me tityaumuámuaꞌaree sej si seyan rɨꞌɨ titetyujchaɨ aꞌij tɨ tyajamuaaxaꞌapɨꞌɨntariꞌiriꞌi sej si seyan eꞌenyaꞌa xaꞌaraꞌani tɨj ɨ Dioj tɨ nain cɨn ayan rɨcɨ tzaahuatiꞌiraꞌa cɨmeꞌe aꞌij tɨ tiraavijteꞌe, ajta aɨ pu uraréꞌen.
\p
\v 25 Aɨj pu cɨn, ayan ruxeꞌeveꞌe sej raatapuaꞌajta saj cai seyan tyuꞌujcuanamua, silu ayaa xu huataujnyátacan cɨn tiraataꞌixaateꞌen ɨ ruxaꞌaj tevi, aꞌini naimiꞌi tu seij tyanaꞌa jetze ajtyamaꞌacan ɨ tyaɨtestyamuaꞌameꞌen.
\p
\v 26-27 Tɨ puaꞌa seyan tiꞌitɨj cɨn huatanínyuꞌucacu, caxu saɨjna cɨn tiꞌitɨj cɨn autyaturaaveꞌen ɨ Dioj jemi. Caxu sajta seyan aꞌatyeeviꞌin sej seri nínyuꞌucacu tiꞌitɨj cɨmeꞌe. Ayaa nu tyajamuéijcateꞌe saj cai raataꞌasin tɨ aɨn tiyaaruꞌu ayan aviitzi cɨn huataseijreꞌen muejmi tzajtaꞌa.
\p
\v 28 Ajta aɨjna tɨ tiꞌinahuaꞌaraꞌa, ayaa pu ruxeꞌeveꞌe tɨ cai cheꞌe tiꞌinahuaꞌa silu cheꞌe rumuajcaꞌa cɨn tyuꞌumuareꞌen tiꞌitɨj tɨ aꞌij tiratyavaꞌɨri tɨ ij ayan tiꞌitɨ huamuéꞌitɨn ɨ tɨ cɨn huaꞌutyavaɨreꞌen aɨme ɨ maj cai aꞌij tiꞌijviicueꞌi.
\p
\v 29 Caxu tiꞌitɨ xajta tɨ aꞌij puaꞌa namuajreꞌe, ajta tɨ cai tiꞌitɨj vaɨreꞌe silu aɨj xuꞌu huataxaj ɨ nyuucari tɨ iꞌi xaꞌapɨꞌɨn aɨjna cɨmeꞌe tɨ huaꞌatyavaꞌɨri mej mi eitzeꞌe yauꞌeitaa muaꞌaraꞌani aꞌij tɨ tihuaꞌaturaateꞌe, tɨ ij ajta rɨꞌɨ tihuaꞌutaꞌan aɨme ɨ maj ranamua.
\v 30 Caxu sajta aꞌij puaꞌa tiraataꞌan ɨ xaijnyuꞌucaraꞌaraꞌan ɨ Dioj, aɨjna tɨ rujɨmeꞌe amuatyahuii asta naꞌa cai tyajaꞌureꞌenyen ajna xɨcajraꞌa tɨ jetzen Dioj amueꞌiratuaasin.
\p
\v 31 Sataꞌaj raatapuaꞌajta nain cɨmeꞌe ɨ saj cɨn aꞌij puaꞌa me tityaumuámuaꞌaree, naꞌari ɨ saj cɨn tiꞌijaaxaijteꞌe nusu ɨ saj cɨn nínyuꞌucacu caꞌɨn ɨ saj cɨn huaꞌatajiꞌivi ɨ tyaɨte o saj cɨn aꞌij puaꞌa tihuaꞌaxa. Nain tɨj naꞌa tɨ aꞌij puaꞌa een, sataꞌaj seyan raatapuaꞌajta.
\v 32 Sataꞌaj rɨꞌɨ titetyujchaɨ, sajta ahuaujcuꞌuven seij sajta seij. Sataꞌaj seyan tyuꞌutauruuniꞌi seij sajta seij aꞌini Dioj pu ajta tyajamuaatauuniꞌiriꞌi aɨjna cɨmeꞌe tɨ Cɨriistuꞌu aꞌamua japua huanyúu.
\c 5
\s Aꞌij mej yeꞌi rɨꞌɨ tiꞌityújchaɨ́ muaꞌaraꞌani aꞌij tɨ tiꞌijxeꞌeveꞌe ɨ Dioj
\p
\v 1 Aɨj xu cɨn seyan tityahuaujcaꞌanyen sej si seyan rɨꞌɨ tityaꞌurareꞌenyeꞌen ɨ aꞌamua tzajtaꞌa aꞌij tɨ tyaꞌurareꞌen ɨ Dioj, aꞌini xuꞌuri yaujmuaꞌameꞌen pueen ɨ Dioj tɨ aꞌamuaxeꞌeveꞌe.
\v 2 Sataꞌaj seyan rɨꞌɨ titetyujchaɨ saɨjna cɨmeꞌe saj huaujxeꞌeveꞌen aꞌini Cɨriistuꞌu pu ayan cheꞌeta naꞌa taataxeꞌeve. Aɨ pu huataujmuaɨꞌɨvajtacaꞌa tajetze maꞌacan ɨ Dioj jemi. Aꞌini aɨ pu aɨjna cɨn rɨꞌɨ tiraataꞌa ɨ Dioj, aɨj pu cɨn ayan eenyaꞌa seijreꞌe tɨj muaɨꞌɨvejri tɨ naa tyáaráꞌi u tajapua aɨjna cɨmeꞌe tɨ aɨn ayan tajetze maꞌacan huanyúu.
\p
\v 3 Caxu aꞌatzu raataꞌacareꞌen tɨ ayan huarɨni muejmi tzajtaꞌa maj huataxanaꞌacɨreꞌen naꞌari maj tiꞌitɨ cɨn aꞌij puaꞌa huarɨni nusu maj huapɨꞌɨ ranyacuaꞌatze ɨ tumin. Capu xaa nyaꞌu ayan tiraavijteꞌe mej meyan huarɨni aɨme ɨ mej tyaɨtestyamuaꞌameꞌen pueen ɨ Dioj, ɨ tɨ huaꞌutyahuii ɨ rujemin.
\v 4 Caxu sajta huaꞌataꞌacareꞌen mej meyan tiꞌixajta nyuucari cɨmeꞌe tɨ aꞌij puaꞌa namuajreꞌe naꞌari tɨ cai tiꞌitɨj vaɨreꞌe nusu ɨ maj cɨn tityaꞌaxaahuariꞌi. Capu aꞌatzu iꞌi xaꞌapɨꞌɨn mej meyan aꞌij puaꞌa tiꞌijeeva silu micheꞌe rɨꞌɨ tiraataꞌan ɨ Dioj.
\p
\v 5 Jee xaa nyaꞌu, ayaa pu tiꞌayajna, tɨ puaꞌa aꞌatɨ ayan aꞌij puaꞌa tiꞌitevista aɨjna cɨmeꞌe tɨ tyuꞌuxanaꞌacɨreꞌen nusu aɨjna cɨmeꞌe tɨ aꞌij puaꞌa me tyauumuaꞌaree caꞌɨn aɨjna cɨmeꞌe tɨ huapɨꞌɨ raxeꞌeveꞌe tɨ eihua tiꞌijchaꞌɨ, capu aꞌanaj racɨꞌɨti tɨ aɨjna aun aꞌutyarute Dioj tɨ eꞌeseijreꞌe ajna ɨ xɨcajraꞌa tɨ jetzen tyuꞌutaijta aɨjna ɨ Cɨriistuꞌu, aꞌini aɨn tɨ huapɨꞌɨ raxeꞌeveꞌe tɨ eihua tiꞌijchaꞌɨ, ayaa pu seijreꞌe ɨ Dioj jemi tɨj saɨj tɨ ayan ranaꞌamiche tiꞌitɨ tɨ cai Dioj pɨrɨcɨ.
\v 6 Caxu raataꞌacareꞌen tɨ aꞌatɨ amuaacuanamua aɨjna cɨmeꞌe ɨ nyuucari tɨ hueꞌitzi naꞌa pueen, aꞌini Dioj pu eihua huapɨꞌɨ pueijtzi huaꞌutaꞌasin aɨme ɨ mej meyan tiꞌihueꞌitaca. Ai mu aɨn pueen ɨ maj cai raꞌastijreꞌe ɨ Dioj.
\v 7 Aɨj xu cɨn, caxu huaꞌajtyanaxcan aɨme.
\p
\v 8 Anaꞌɨmɨ xu sajta seyan titetyujchaɨcaꞌa matɨj aɨme ɨ maj tɨcaꞌamisteꞌe áꞌujhuaꞌan. Ma sajta ijii, ayaa xu eꞌen matɨj aɨme ɨ mej nyeeristeꞌe áꞌujhuaꞌan. Ayaa xu seri eꞌen aɨjna cɨmeꞌe tɨ Cɨriistuꞌu aꞌamua japua huanyúu. Aɨj xu cɨn, sauj seyan rɨꞌɨ huarɨni matɨj aɨme ɨ mej nyeeristeꞌe áꞌujhuaꞌan.
\v 9 Ayaa mu xaa nyaꞌu rɨꞌɨ titetyujchaɨ ɨ mej nyeeristeꞌe áꞌujhuaꞌan mej meyan nain cɨn rɨcɨ tɨ xaꞌapɨꞌɨn cɨmeꞌe, majta meyan rɨcɨ aꞌij tɨ tiraavijteꞌe, ajta tɨ tzaahuatiꞌiraꞌa cɨmeꞌe seijreꞌe.
\v 10 Sataꞌaj sajta raahuauni saj yauꞌeitaa xaꞌaraꞌani aꞌij sej rɨꞌɨ tiraataꞌan ɨ Dioj.
\v 11-12 Caxu aꞌatzu huaꞌajtyanaxcan huaꞌa jemi ɨ mej meyan aꞌij puaꞌa titetyujchaɨ ɨ maj tɨcaꞌamisteꞌe áꞌujhuaꞌan, silu ayaa xu huaꞌutaseijrateꞌen tɨ cai tiꞌitɨj vaɨreꞌe aꞌij mej rɨcɨ, aꞌini ayaa pu tyuꞌuteviꞌirasteꞌe tɨ aꞌatɨ ayan tiꞌixajta aꞌij maj aviitzi cɨn rɨcɨ aɨme ɨ maj cai aꞌatɨ aꞌastijreꞌe.
\v 13-14 Ma ajta, naijmiꞌi pu huataseijreꞌesin aꞌij tɨ een tɨ puaꞌa aꞌatɨ raatyatátzaviꞌi, aꞌini aɨjna ɨ tatzari, nain pu cɨn tiꞌiseijrata aꞌij tɨ een. Aɨ pu cɨn, ayan teꞌeyuꞌusiꞌi tɨcɨn:
\q Huatajɨsi mɨ pej iꞌi cutzu, ajta ajchesi amajna huaꞌa tzajtaꞌa ɨ mɨꞌɨchite.
\q Ajta aɨn Cɨriistuꞌu pu muatyatátzaviꞌira.
\p
\v 15 Rɨꞌɨ xuꞌu muan, sej si seyan rɨꞌɨ titetyujchaɨ matɨj aɨme ɨ mej rɨꞌɨ metityaumuámuaꞌaree. Caxu seyan eꞌenyeꞌen matɨj aɨme ɨ maj saɨque metityaumuámuaꞌaree.
\v 16 Sataꞌaj seyan ahuaujcaꞌanyen sej si nain cɨn seyan huarɨni aꞌij tɨ tiꞌixaꞌapɨꞌɨn ijii tɨ auj huaxaꞌapɨꞌɨn aꞌini aꞌij puaꞌa mu meyan rɨcɨ ɨ maj huátyaamua ijii.
\p
\v 17 Aɨj xu cɨn, caxu saɨque metityaumuámuaꞌara silu ayaa xu ahuaujcaꞌanyen sej si seyan yauꞌeitaa xaꞌaraꞌani aꞌij tɨ tiꞌijxeꞌeveꞌe ɨ tavastaraꞌa.
\v 18 Caxu seyan taꞌaruu aꞌini tɨ puaꞌa seyan huarɨni, aꞌij pu puaꞌa áꞌamuaruuren asta sacai nain cɨn aꞌuveti. Ma sajta muan, sataꞌaj nain cɨn araujcaꞌanyen saɨjna jetze ɨ xaijnyuꞌucaraꞌaraꞌan ɨ Dioj.
\v 19 Satɨꞌɨj u eꞌetyujsaɨreꞌen, sataꞌaj seyan tihuaurixaateꞌen saɨjna cɨmeꞌe ɨ chuiicari ɨ saj sajta cɨn tiꞌicuiina, sajta ɨ saj cɨn rɨꞌɨ tiraataꞌan ɨ Dioj. Sataꞌaj seyan tyuꞌutachuiica, sajta tyuꞌutacuiina ɨ aꞌamua tzajtaꞌa sej si seyan rɨꞌɨ tiraataꞌan ɨ tavastaraꞌa.
\v 20 Sajta, sataꞌaj seyan huarɨni aꞌanaj tɨ naꞌa saj tiꞌijtáujtziꞌiraꞌa ɨ Dioj ɨ tyaj rajyaꞌupua nain cɨmeꞌe tɨ tiꞌiseijreꞌe nyuucajtzeꞌen ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu.
\s Aꞌij mej yeꞌi rɨꞌɨ titetyujchaɨ muaꞌaraꞌani aɨme ɨ mej vícheꞌejmee
\p
\v 21 Sataꞌaj seyan huarɨni sej seyan huatauraꞌan saj huaujvaɨreꞌen seij sajta seij saɨjna cɨmeꞌe saj raꞌastijreꞌe saɨjna ɨ Cɨriistuꞌu.
\p
\v 22 Sajta muan, mɨ sej vícheꞌejmee, sataꞌaj seyan huatauraꞌan saj seyan cheꞌeta sanaꞌa huaꞌaraꞌastijreꞌen ɨ aꞌamuacɨnaꞌastyamuaꞌa satɨj seri tiraꞌastijreꞌe saɨjna ɨ tavastaraꞌa.
\v 23 Ayaa xu een cɨn huarɨni aꞌini aɨn ɨ cɨnaꞌaraꞌan, ayaa pu cheꞌeta naꞌa muꞌucan pueen aɨjna jemi ɨ tɨ raatyeviꞌitɨn tɨj ajta aɨn Cɨriistuꞌu huaꞌamuꞌucan pueen naijmiꞌica jemi ɨ mej eꞌetyujsaꞌɨri ɨ jemin. Ajta Cɨriistuꞌu pu hueꞌiratuaasin.
\v 24 Maꞌacui xaa, aꞌini aɨ mu raꞌastijreꞌe maɨjna ɨ Cɨriistuꞌu aɨme ɨ mej eꞌetyujsaꞌɨri ɨ jemin, ayaa pu cheꞌeta naꞌa ruxeꞌeveꞌe mej mi aɨme ɨ mej vícheꞌejmee mej mi huaꞌaraꞌastijreꞌen aɨme ɨ rucɨnaꞌastyamuaꞌa nain cɨmeꞌe.
\s Aꞌij mej yeꞌi rɨꞌɨ titetyujchaɨ muaꞌaraꞌani aɨme ɨ mej nyaɨcheꞌejmee
\p
\v 25-26 Sajta muan, mɨ saj huaꞌacɨnastyamuaꞌa pueen, sataꞌaj seyan cheꞌeta sanaꞌa huaꞌaxeꞌevaꞌa ɨ ruꞌɨstyaꞌamuaꞌaca tɨj ajta aɨn Cɨriistuꞌu tíhuaꞌutaxéꞌeve aɨme ɨ mej eꞌetyujsaꞌɨri ɨ jemin. Aɨ pu ajta huatauraꞌa tɨ huamɨꞌɨni huaꞌa jetze maꞌacan tɨ ij ajta rujɨmeꞌe huaꞌutyahuii ɨ rutyaɨtestyamuaꞌa. Aɨ pu huaꞌujajcuare aɨjna cɨmeꞌe tɨ huaꞌariꞌiriꞌi ɨ maj cɨn autyajturaa ɨ jemin. Aɨ pu ajta rɨꞌɨ huaꞌuruu ɨ huaꞌa tzajtaꞌa aɨjna cɨmeꞌe maj ráꞌantzaahua maɨjna ɨ nyuucari tɨ aɨn raatyajtuaa huaꞌa jemi.
\p
\v 27 Aɨ pu Cɨriistuꞌu ajta huaꞌutatuiireꞌesin ɨ rujemi. Ayaa mu seiraꞌa muaꞌajuꞌun tɨj aꞌatɨ tɨ siicuꞌuri cɨn ucaujchejte tɨ cai aꞌatzu tiꞌitɨj cámeijriꞌi, tɨ cai aꞌatzu huatyatzuꞌuta, tɨ cai tiꞌitɨ tiraꞌaturaateꞌe. Ayaa mu naa seiraꞌa muaꞌajuꞌun tɨj tiꞌitɨj tɨ tyámaxcɨvaꞌaraꞌa. Naa mu uraréꞌenyaꞌa muaꞌajuꞌun, majta camu tiꞌitɨj cɨn aꞌaturaa muaꞌajuꞌun tɨꞌij cai aꞌatɨ tiꞌitɨj cɨn huaꞌa jetze tyaꞌupuáꞌajteꞌen.
\p
\v 28 Ayaa pu ruxeꞌeveꞌe mej mi aɨme ɨ mej nyaɨcheꞌejmee meyan cheꞌeta manaꞌa tihuaꞌaxeꞌevaꞌa ɨ ruꞌɨstyaꞌamuaꞌaca matɨj majta tyuꞌujxeꞌeveꞌe ɨ rujetze. Aɨn tɨ ayan raxeꞌeveꞌe ɨ ruꞌɨj, aɨ pu ajta ayan ruxeꞌeveꞌe rusaɨj.
\v 29 Ayaa puꞌu tiꞌen, aꞌini capu aꞌatɨ aꞌanaj ayan rajchaɨraꞌacaa ɨ rutevi, silu aɨ pu tiꞌijmicua, ajta rɨꞌɨ pu ayan cheꞌeta naꞌa raaxaꞌapuei tɨj ajta aɨn Cɨriistuꞌu rɨꞌɨ tihuaꞌaxaꞌapuei aɨme ɨ mej eꞌetyujsaꞌɨri ɨ jemin.
\p
\v 30 Tyan tu xaa títaviꞌiraxɨ jamuan aɨjna ɨ Cɨriistuꞌu.
\v 31 Ayan tɨcɨn: “Aɨj pu nuꞌu cɨn, aꞌatɨ pu ayan ma rúujɨsin ɨ rutaata, ajta ɨ runaana tɨ ij nuꞌu huatyenyaɨche aɨjna jamuan ɨ ruꞌɨj. Majta nuꞌu aɨme ɨ maj huaꞌapua, ayaa mu nuꞌu seij manaꞌa tyaɨtejraꞌa puéenyaꞌa muaꞌaraꞌani.” Yaa puꞌu xaa nyaꞌu.
\v 32 Ai pu pueen tiꞌitɨj tɨ huapɨꞌɨ ruxeꞌeveꞌe tɨ ajta aviitzi cɨn ayan tiꞌen. Me nyajta inyaa aij nu cɨmeꞌen tiꞌixa nyaɨjna ɨ Cɨriistuꞌu, nyajta nyaɨme cɨmeꞌen ɨ maj eꞌetyujsaꞌɨri ɨ jemin.
\p
\v 33 Ma sajta muan, satɨj sanaꞌa saj nyaɨcheꞌejmee, ayaa pu ruxeꞌeveꞌe sej seyan cheꞌeta sanaꞌa huaꞌaxeꞌevaꞌa ɨ aꞌamuaꞌɨjstyaꞌamuaꞌaca satɨj sajta tyuꞌujxeꞌeveꞌe ɨ rutevi jetze. Ajta aɨme ɨ maj vícheꞌejmee, ayaa pu ajta ruxeꞌeveꞌe maj huaꞌaraꞌastijreꞌen ɨ huaꞌacɨnastyamuaꞌa.
\c 6
\s Aꞌij mej yeꞌi rɨꞌɨ titetyujchaɨ muaꞌarani aɨme ɨ mej yaujmuaꞌameꞌen pueen
\p
\v 1 Sajta muan, mɨ sej iꞌi tɨꞌɨrii, sataꞌaj huaꞌaraꞌastijreꞌen ɨ aꞌamuavaujsimuaꞌa aꞌini ayaa pu tiraavijteꞌe ɨ tavastaraꞌa jemi.
\v 2 Ayan tɨcɨn: “Pataꞌaj nuꞌu rɨꞌɨ tihuaꞌutaꞌan ɨ ataata, ajta anaana.” Ai pu aɨn pueen ɨ nyuucari tɨ cɨn Dioj tyaꞌataujratziiriꞌi tiꞌitɨj cɨmeꞌe tɨ puaꞌa aꞌatɨ ayan raꞌaraꞌastijreꞌen.
\v 3 Ajta ayan tɨcɨn: “Tɨ ij tyamuaꞌa naa timuaavaɨreꞌen, pej pi pajta nuꞌu aꞌateeviꞌin paj ruuri puaꞌaraꞌani iiyan chaanaca japua.”
\p
\v 4 Sajta muan, mɨ sej huaꞌayaꞌupua pueen, caxu muareꞌeristan ɨ aꞌamuayaujmuaꞌa jemi mej mi cai huatanyuꞌucan, silu rɨꞌɨ xu tihuaꞌuchaɨn. Sej si tihuaꞌumuaꞌaten, sajta tihuaꞌutaꞌixaateꞌen tyamuaꞌa naa aꞌij tɨ tiꞌijxeꞌeveꞌe ɨ tavastaraꞌa.
\p
\v 5 Sajta muan, mɨ saj caꞌanyejri cɨn tiꞌivaɨreꞌe seij jemi, sataꞌaj huaꞌaraꞌastijreꞌen aɨme ɨ mej iiyan chaanaca japua tyajaꞌamueꞌijteꞌe. Sataꞌaj seyan cheꞌeta sanaꞌa huaꞌaraꞌastijreꞌen satɨj sajta tiraꞌastijreꞌe tzaahuatiꞌiraꞌa cɨmeꞌe saɨjna ɨ Cɨriistuꞌu, aɨjna cɨmeꞌe saj rɨꞌɨ huataujseijrata, sajta seyan tiꞌitzɨɨnyeꞌe tɨ puaꞌa sacai nain cɨn tyaꞌaraꞌasten.
\p
\v 6 Sataꞌaj seyan aꞌujcaꞌanyaacan cɨn tihuaꞌutyavaɨreꞌen aɨme ɨ mej tyajaꞌamueꞌijteꞌe tɨ puaꞌa meyan tyajaꞌamuaseij nusu macai. Sataꞌaj cheꞌeta sanaꞌa tihuaꞌutyavaɨreꞌen satɨj sajta tiraatyavaɨreꞌen saɨjna ɨ Cɨriistuꞌu. Sataꞌaj seyan saɨjna cɨn aráurasten aꞌij tɨ tiꞌijxeꞌeveꞌe ɨ Dioj nain cɨmeꞌe aꞌachu saj caj áꞌujcaꞌanye ɨ aꞌamua tzajtaꞌa.
\v 7-8 Sataꞌaj seyan cheꞌeta sanaꞌa ruxéꞌeviꞌiraꞌa cɨmeꞌe tihuaꞌutyavaɨreꞌen yaa cumu tavastaraꞌa jemi xu tiꞌivaɨreꞌe. Ee xaa nyaꞌu, caxu tetyaca sanaꞌa jemin tiꞌivaɨreꞌe aꞌini ayaa xu ramuaꞌaree tɨ aɨn tavastaraꞌa ayan tiraatapueijveꞌesin naijmiꞌica aꞌij tɨ tiꞌitɨ huáruu tɨ iꞌi xaꞌapɨꞌɨn. Capu amɨn aꞌij tɨ puaꞌa aꞌatɨ caꞌanyejri cɨn tiꞌimuareꞌe nusu ayan ruxéꞌeviꞌiraꞌa cɨn tiꞌivaɨreꞌe.
\p
\v 9 Sajta muan, mɨ sej tihueꞌijteꞌe, ayaa xu cheꞌeta sanaꞌa rɨꞌɨ tihuaꞌajchaɨ aɨme ɨ mej muejmi jemi tiꞌivaɨreꞌe. Caxu huaꞌanyeeche aꞌini xuꞌuri ramuaꞌaree tɨ aɨn tɨ aun eꞌeseijreꞌe u tajapua, aɨj pu tɨ tihueꞌijteꞌe aɨme ɨ mej muejmi jemi tiꞌivaɨreꞌe. Aɨ pu ajta tyajaꞌamueꞌijteꞌe muejmi. Ajta ɨ jemin, naimiꞌi xu ruxaꞌaj eꞌen, mɨ sej tihueꞌijteꞌe, sajta mɨ sej caꞌanyejri cɨn tiꞌimɨjhuaca.
\s Cɨmeꞌen ɨ tyaj cɨn tyuꞌutéseꞌen
\p
\v 10 Ajcaahui, sataꞌaj seyan huataujcaꞌanyen aɨjna cɨmeꞌe sej jetzen araujcaꞌanen ɨ tavastaraꞌa saj nain cɨn tyuꞌutyamueꞌitɨn ɨ muáreꞌeriꞌiraꞌaraꞌan cɨmeꞌe.
\v 11 Sataꞌaj rɨꞌɨ tityacaujnan nain cɨmeꞌe ɨ tɨ Dioj raatyajtuaa muejmi jemi ɨ saj cɨn tiꞌityeseꞌe tɨj ajta xantaaruꞌu tɨ nainjapua caujnan, sej si tyaꞌutaviicueꞌi nain cɨmeꞌe tɨ tiyaaruꞌu aviitzi cɨn tiraaxaꞌapɨꞌɨntare aꞌij tɨ huarɨni tɨ amuaatyamueꞌitɨn.
\v 12 Ayaa xu huarɨni aꞌini catu xaa nyaꞌu aɨme jamuan tiꞌitesaꞌaca ɨ tyetyaca silu huaꞌa jamuan aɨme ɨ mej tiꞌitɨj cɨn antyujmuaꞌaree, majta aɨme ɨ mej tieꞌijta, aɨme ɨ xaijnyuꞌucari ɨ maj aꞌij puaꞌa eꞌen, ɨ maj majta títyatatí tiꞌitɨj cɨmeꞌe tɨ tɨcaꞌamisteꞌe seijreꞌe iiyan chaanaca japua, ajta ɨ mej eꞌeseijreꞌe u tajapua.
\p
\v 13 Aɨj xu cɨn nainjapua caujnan saɨjna cɨmeꞌe tɨ Dioj raatyajtuaa muejmi jemi sej si cɨn tiꞌityesaꞌa tɨꞌɨj ajna tyajaꞌureꞌenyen ɨ xɨcaj tɨ jetzen huataseijreꞌen aɨjna tɨ aꞌij puaꞌa een. Ayaa xu huarɨni tɨ ij cai aɨn amauutaxɨn aujna u saj aꞌutyáuuca, sajta muan, satɨꞌɨj seri raatyamueꞌitɨ, ayaa xu huarɨni, sataꞌaj saun aꞌutyáuu xaꞌaraꞌani.
\v 14 Ayaa xu seiiraꞌa xaꞌajuꞌun, nain ɨ sej seyan tyuꞌutaxaj, huataujnyátacan xu cɨn seyan raataxaj. Ajta nain aꞌij sej rɨcɨ, ayaa xu seyan raruuren aꞌij tɨ tiraavijteꞌe ɨ Dioj jemi. Aɨj pu xaa ayan tyajamuaatyavaɨreꞌesin tɨj ajta tiꞌivaɨreꞌe aɨjna ɨ puaasi tɨ cɨn avaꞌujjɨꞌɨqui ɨ xantaaruꞌu, ajta aɨjna tɨ cɨn antyaujnaamɨ ɨ rutaviitzeꞌe.
\p
\v 15 Sataꞌaj seyan cheꞌeta sanaꞌa rɨꞌɨ huaujruuren tɨj ajta saɨj tɨ reꞌenyaꞌa cɨn ajtaujcaꞌacaiteꞌe tɨ i aun japuan eꞌeyeꞌiva aꞌu tɨ aꞌij puaꞌa hueꞌen. Sataꞌaj seyan huatyaujcaꞌanyen sej si seyan tyaꞌutaviicueꞌi saj tihuaꞌutaꞌixaateꞌen ɨ tyaɨte saɨjna cɨmeꞌe ɨ nyuucari tɨ cɨn Dioj huaꞌutyapuaꞌariteꞌesin.
\v 16 Sajta saɨjna cɨmeꞌe, sataꞌaj seyan huarɨni, sataꞌaj nain cɨn ráꞌantzaahuateꞌen ɨ tavastaraꞌa. Ayaa xu een cɨn huarɨn, muan xu raayɨꞌɨtɨhuaꞌan saj huatyaujnan tɨꞌij cai tiꞌitɨj cɨn amuaꞌantipuaꞌariteꞌen aɨjna ɨ tiyaaruꞌu.
\v 17 Sataꞌaj sajta raꞌancuraꞌan aɨjna tɨ cɨn Dioj amueꞌiratuaasin. Ayaa pu tyajamuaatyavaꞌɨri tɨj ajta tiraatyavaꞌɨri ɨ xantaaruꞌu aɨjna tɨ cɨn utyamuucuꞌu. Ajta iꞌi, sataꞌaj seyan ruꞌityechuaaca aɨjna ɨ chun tɨ ruxaꞌajtaꞌa ajcamɨɨmɨjmee tɨ amuaatachuiiteꞌesin aɨjna ɨ xaijnyuꞌucaraꞌaraꞌan ɨ Dioj. Aɨjna tɨ ruxaꞌajtaꞌa ajcamɨɨmɨjmee, ai pu aɨn pueen ɨ nyuucari tɨ jetzen raxa ɨ Dioj.
\s Aꞌini een cɨmeꞌe meyan huatyejnyuuni, ajta aꞌij mej yeꞌi huarɨni
\p
\v 18 Sataꞌaj seyan araujcaꞌanyen saɨjna jetze ɨ xaijnyuꞌucaraꞌaraꞌan ɨ Dioj sej si rahuauca ɨ Dioj jemi tɨꞌɨj pɨ naꞌa saɨjna cɨmeꞌe nain tiꞌitɨ tɨ aꞌij tyajamuaꞌaturaateꞌe. Aɨj xu cɨn, saucheꞌe xu atanyéjnyeꞌeri. Caxu raxaahuata sej seyan huaꞌa cɨmeꞌe rahuauca ɨ Dioj jemi naijmiꞌica aɨme ɨ mej huatyáuu ɨ Dioj jemi.
\v 19 Sataꞌaj seyan rahuauca ɨ Dioj jemi nyeetzi cɨmeꞌen tɨ ij aɨn Dioj ayan naataꞌan aꞌij nyej neyan tyuꞌutaxaj aꞌanaj tɨ naꞌa, nyej ni neyan tihuaꞌutaꞌixaateꞌen ɨ tyaɨte, nyej ni neyan cai tiꞌitzɨɨnyaꞌa tiꞌitɨ cɨmeꞌe nyej neyan tihuaꞌutaꞌixaateꞌen nyaɨjna cɨmeꞌe tɨ aꞌaviitziꞌi aɨjna cɨmeꞌe aꞌij tɨ Cɨriistuꞌu tajapua huanyúu.
\v 20 Aɨj nu cɨn nyeri aityanamiꞌi nyaɨjna cɨmeꞌe nyej tihueꞌixaateꞌe ɨ tyaɨte ɨ Jesús jetze maꞌacan. Sataꞌaj seyan tiꞌihuaviira ɨ Dioj jemi nyej ni cai tiꞌitzɨɨnyaꞌa tiꞌitɨj cɨmeꞌe nyej tihuaꞌutaꞌixaateꞌen aꞌij tɨ ayan tinaavijteꞌe inyeetzi nyej neyan huarɨni.
\s Pablo pu huaꞌataujteꞌe, ajta raꞌantipuaꞌajte
\p
\v 21 Ajta aɨn Tíquico, ɨ nyeꞌihuaaraꞌa ɨ nyaj raxeꞌeveꞌe tɨ ayan cheꞌeta naꞌa tyaꞌatzaahuateꞌe ɨ tavastaraꞌa jemi nyatɨj inyaa, aɨ pu cai tiꞌitɨj cɨn atyaꞌɨtzaꞌara ɨ Dioj jemi. Aɨ pu nain tyajamuaataꞌixaateꞌesin sej si raamuaꞌaree aꞌij tɨ tiꞌinyavaɨreꞌe, sej si sajta raamuaꞌaree aꞌij nyej rɨcɨ.
\v 22 Ayaa nu een cɨn muejmi jemi raatáiti sej si raamuaꞌaree aꞌij tɨ tiꞌitavaɨreꞌe, tɨ ij ajta aɨn rɨꞌɨ tyajamuaataꞌan.
\p
\v 23 Cheꞌe Dioj huaꞌutyapuaꞌariteꞌen naijmiꞌica ɨ sej ruꞌihuaamuaꞌa. Ajta aɨn ɨ Dioj ɨ tyaj rajyaꞌupua, ajta aɨn ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, micheꞌe maɨn amuaataxeꞌeveꞌen aꞌini muan xu tyaꞌatzaahuateꞌe.
\v 24 Cheꞌe aꞌij tihuáꞌavaɨɨraꞌa naijmiꞌica ɨ maj rusen cɨn raxeꞌeveꞌe maɨjna ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu.