\id PHP
\h Filipenses
\toc1 Filipenses
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej u Filipos aꞌuchaatɨmaꞌacaa
\c 1
\s Pablo pu huaꞌataujteꞌe
\p
\v 1 Inyaa, i nyej iꞌi Pablo, ajta aijna i Timuteeyu, ityan i tyej ravaɨreꞌe tyaɨjna ɨ Jesús ɨ Cɨriistuꞌu, ayaa tu tyajáꞌamuayuꞌuseꞌe naijmiꞌica muan mɨ sej raꞌatzaahuateꞌe saɨjna ɨ Jesús ɨ Cɨriistuꞌu, majta maɨme ɨ mej tyajaꞌamueꞌijteꞌe, majta maɨme ɨ mej tyajaꞌamuavaɨreꞌe tiꞌitɨj cɨmeꞌe, naijmiꞌica tu tyajáꞌamuayuꞌuseꞌe mɨ sej huachaatɨme saujna Filipos.
\v 2 Cheꞌe aɨn Dioj ɨ tɨ taꞌiyaꞌupua, ajta aɨn ɨ tavastaraꞌa aɨjna ɨ Jesús tɨ ajta iꞌi Cɨriistuꞌu, micheꞌe maɨn rɨꞌɨ tyajaꞌamuachaɨj muaꞌaraꞌani, micheꞌe majta amuaatyápuaꞌariteꞌen ɨ aꞌamuaxaijnyuꞌuca jetze mɨ saj muiꞌi sej si xaꞌapɨꞌɨn ruꞌihuaamuaꞌa xaꞌaraꞌani tyamuaꞌa naa.
\s Pablo pu huáꞌahuaviitzeꞌe aɨme ɨ mej tyaꞌatzaahuateꞌe
\p
\v 3 Eecan nu nyetyamuaꞌaveꞌe ɨ Dioj jemi aꞌanaj tɨ naꞌa nyej huauhuau ɨ Dioj jemi muejmi cɨmeꞌen nyatɨꞌɨjta amuaꞌutámuaꞌaree.
\v 4 Aꞌanaj tɨ naꞌa nyej huahuauca ɨ Dioj jemi naijmiꞌica cɨmeꞌen muan, eecan nu tíꞌijtaujtziꞌireꞌe ɨ Dioj jemi nyatɨꞌɨjta aꞌamuaamuaꞌareera.
\v 5 Ayaa nuꞌu caj tiꞌirɨcɨ inyaa aɨjna cɨmeꞌe ɨ sej naatavaɨ tyej ti huaꞌutaꞌixaateꞌen ɨ tyaɨte tyaɨjna ɨ nyuucari tɨ cɨmeꞌen raxa ɨ Dioj. Sanaatávaɨ ɨ jajcua, sajta ijii.
\v 6 Nyaa nu nyajta ápɨꞌɨn tyajáꞌumuaꞌaree tɨ aɨjna ɨ tɨ autyejche tɨ rɨꞌɨ amuaaruuren ɨ aꞌamua tzajtaꞌa, aɨ pu xaa nyaꞌu raanaijmiꞌireꞌesin ajna xɨcajraꞌa jetze tɨꞌɨj ajtahuaꞌa uvéꞌenyen aɨjna ɨ Jesús tɨ ajta ayan antyahuaa ɨ Cɨriistuꞌu.
\p
\v 7 Ayáa pu tiraavijteꞌe nyej neyan tiꞌihuánmuaꞌaten muejmi cɨmeꞌe aꞌini muejmi nu aꞌamua jemi áꞌancaꞌanye. Tɨ puaꞌa neyan iꞌinamiꞌihua, naꞌari tɨ puaꞌa nyaj aɨjna jetze huatanyuuni ɨ nyuucari tɨ aɨjna jetze raxa ɨ Dioj, naꞌari neyan tiraataxaj yee tyamuaꞌa pu iꞌi xaꞌapɨꞌɨn amɨjna i nyuucari, naimiꞌi tu raꞌancuraꞌave ɨ tyaj cɨn rajpueitzi, tyajta aꞌachu tɨ caj taatapueijve ɨ Dioj.
\v 8 Dioj pu ramuaꞌaree nyaj eihua aꞌij puaꞌa tyaꞌanyamuaꞌate muejmi cɨmeꞌe. Ayaa nu cheꞌeta aꞌamua jetze áncaꞌanye aꞌij tɨ aɨn ajta aꞌamua jetze áꞌujcaꞌane aɨjna ɨ Jesús tɨ ajta iꞌi Cɨriistuꞌu.
\v 9 Ayaa nu tiꞌijhuavii ɨ Dioj jemi naijmiꞌi cɨmeꞌe mɨ sej ruꞌihuaamuaꞌa, sej si eitzeꞌe huaujxeꞌeveꞌen rujɨɨmuaꞌa tɨj naꞌa tɨ yu aucaꞌitɨ aꞌame, sataꞌaj cai tiꞌitɨj cɨn autaꞌɨtzen, sataꞌaj seyan raayɨꞌɨtɨhuaꞌan eitzeꞌe, sataꞌaj nain cɨn rɨꞌɨ me tityaumuámuaꞌaree ɨ Dioj jemi.
\p
\v 10 Nyajta nu neyan tiꞌijxeꞌeveꞌe tɨ ij ayan amuaatámitejteꞌen ɨ tɨ eitzeꞌe ruxeꞌeveꞌe, tɨ ij cai tiꞌitɨ aꞌamua tzajtaꞌa tasiseiirihuaꞌan tɨ aꞌij puaꞌa een, tɨ ij cai aꞌatɨ tiꞌitɨj cɨn muejmi jetze tyaꞌupuáꞌajteꞌen ajna xɨcajraꞌa jetze tɨꞌɨj yaj uvéꞌenyen aɨjna ɨ Cɨriistuꞌu ɨ tɨ Dioj an yáꞌujra ɨ ɨpuari japua.
\v 11 Sataꞌaj seyan huarɨni tiꞌitɨ tɨ íꞌixaꞌapɨꞌɨn aɨjna jemi ɨ Jesús tɨ ajta iꞌi Cɨriistuꞌu tij naꞌa tɨ yu áꞌucaꞌa. Aj mu mi xaa eihua rɨꞌɨ tiraataꞌasin ɨ Dioj.
\s Nain pu nuꞌu cɨn tyuꞌutyavaɨreꞌesin ɨ Cɨriistuꞌu jemi
\p
\v 12 Casiꞌi, nyeꞌihuaamuaꞌa, ayaa nu tiꞌijxeꞌeveꞌe saj raamuaꞌaree eijna cɨmeꞌe, aꞌij tɨ tiꞌitɨ naaruu, ɨ nyatɨꞌɨri tyuꞌutyavaɨ nyuucajtzeꞌen ɨ Dioj mej mi eitzeꞌe raanamua.
\v 13 Puꞌuri eijreꞌe seijreꞌe nyaj namiꞌi nyaɨjna cɨmeꞌe nyej tiꞌivaɨreꞌe ɨ Cɨriistuꞌu jetze maꞌacan. Tyamuaꞌa mu ramuaꞌaree aɨ́me ɨ xantaaruꞌu ɨ maj rachaꞌɨ aɨjna tɨ vaꞌacan cɨn tiꞌityejvee, majta ɨ seica. Naimiꞌi mu ramuaꞌaree.
\v 14 Majta ɨ seica ɨ nyeꞌihuaamuaꞌa, ɨ maj majta tiꞌixa ɨ Cɨriistuꞌu jetze maꞌacan, muꞌuri aujcaꞌanyajcaꞌa maɨjna cɨmeꞌe nyaj namiꞌi. Muꞌuri tiꞌixa caꞌanisíj cɨmeꞌe. Camu tiꞌitɨj cɨn tiꞌitzɨɨneꞌe.
\p
\v 15 Ma majta seica meyan tiꞌixa ɨ Cɨriistuꞌu jetze maꞌacan, aꞌini eihua mu chueere nyeetzi cɨmeꞌe, mej nyeꞌijchaɨreꞌe. Majta seica meyan tiꞌixa tzaahuatiꞌiraꞌa cɨmeꞌe.
\v 16 Aɨme ɨ mej tiꞌixa tzaahuatiꞌiraꞌa cɨmeꞌe, ayaa mu rɨcɨ aꞌini meneꞌixeꞌeveꞌe. Aɨ mu ramuaꞌaree nyaj namiꞌi aɨjna cɨmeꞌe nyej nyaɨjna cɨn tíꞌixajtacaa Cɨriistuꞌu jetze maꞌacan.
\v 17 Ma majta ɨ seica, aɨ mu rujɨɨmuaꞌa manaꞌa aꞌij tirajtyau mej tyuꞌutaxaj ɨ Cɨriistuꞌu jetze maꞌacan. Camu tiꞌixa tzaahuatiꞌiraꞌa cɨmeꞌe silu ayaa mu tiꞌimuaꞌatze tɨ puaꞌa meyan tiꞌixa, aj nu ni eitzeꞌe tirajpueitzi naꞌame iiyu nyaj namiꞌi.
\v 18 Aru, ¿aꞌini iꞌirɨni? Ai pu aɨn pueen ɨ tɨ eitzeꞌe ruxeꞌeveꞌe ɨ mej tiꞌixaxaꞌa ɨ Cɨriistuꞌu jetze maꞌacan. Aɨj nu cɨn nyetyamuaꞌaveꞌe. Capu nye jetze ruxeꞌeveꞌe aꞌij mej yeꞌi tiꞌixa, tɨ puaꞌa metíꞌixajta huataujnyátacan cɨmeꞌe nusu macai. Ayej tiꞌayajna. Me nyajta inyaa, eitzeꞌe nu maa nyetyamuaꞌaveꞌe.
\p
\v 19 Ayaa nuꞌu, nyaa nu ramuaꞌaree tɨ xaꞌapɨꞌɨn tyeꞌiráame nyeetzi jemi aꞌini muan xu rahuavii ɨ Dioj jemi. Ajta aɨn ɨ xaijnyuꞌucaraꞌaraꞌan ɨ Cɨriistuꞌu, aɨ pu i ajta naatavaɨ.
\v 20 Eecan nu raachúꞌeveꞌe, ayaa nu nyajta tiꞌijxeꞌeveꞌe nyej nij cai aꞌanaj tiꞌityeviꞌiraꞌa ɨ Dioj jemi. Huapɨꞌɨ nu raxeꞌeveꞌe nyej neyan aꞌahuáncaꞌanyeꞌen nyej neyan rɨꞌɨ tyuꞌutanseijrata mej mi raamuaꞌaree ɨ nyaj Cɨriistuꞌu nu jetze nyacaꞌanye tɨ puaꞌa neyan iraꞌateeviꞌin nyej iꞌiruuri naꞌaraꞌani naꞌari nyaj huamɨꞌɨni.
\p
\v 21 Ayaa pu tinaꞌamitejteꞌe inyeetzi, tɨ puaꞌa neyan iraꞌateeviꞌin nyaj iꞌiruuri naꞌaraꞌani, nain nu cɨn tyuꞌutyavaɨreꞌesin nyaɨjna jemi ɨ Cɨriistuꞌu. Me nyajta, tɨ puaꞌa nyaa huamɨꞌɨni, nyaa nu xaa tyuꞌutyamueꞌitɨ ɨ tajapua.
\v 22 Tɨ puaꞌa neyan iraꞌateeviꞌin nyaj iꞌiruuri naꞌaraꞌani, aj nu xaa nyaꞌu nain tiꞌiseijran aɨjna cɨmeꞌe nyej tiꞌimuareꞌe. Aj nu xaa nyaꞌu tyuꞌutyamueꞌitɨ. Aɨj nu xaa cai muaꞌaree tiꞌitɨj tɨ eitzeꞌe iꞌixaꞌapɨꞌɨn, tij nyaj iraꞌateeviꞌin nyaj ruuri nusu nyaj caꞌanacan huamɨꞌɨni.
\v 23 Eecan nu ramuaꞌareeriꞌiraꞌa i nyaxaijnyuꞌuca cɨmeꞌe. Canu xaahui ramuaꞌaree tiꞌitɨj tɨ eitzeꞌe naꞌaraanajchi. Eecan pu ayan nyaꞌastɨ aꞌayeꞌi nyaj aꞌuraꞌani nyataꞌaj aꞌutyaváa naꞌaraꞌani ɨ Cɨriistuꞌu jemi. Eitzeꞌe pu íꞌixaꞌapɨꞌɨn tzɨteꞌe nyaj aꞌuraꞌani.
\p
\v 24 Ma ajta eitzeꞌe pu aꞌamua jetze ruxeꞌeveꞌe nyaj ruuri naꞌaraꞌani.
\v 25 Ayej nyaꞌase, ayan tiꞌayajna nyaj yan huacai naꞌaraꞌani. Ayan nu huacai naꞌaraꞌani sej si eitzeꞌe ráꞌantzaahuateꞌen, sej si eitzeꞌe huaujtyamuaꞌaveꞌen.
\v 26 Aɨj pu cɨn nyatɨꞌɨjtahuaꞌa ya huacai naꞌaraꞌani aꞌamua jemi, eecan xu huataujtyamuaꞌaveꞌesin, sajta rɨꞌɨ tiraataꞌan ɨ Cɨriistuꞌu tɨ iꞌi Jesús, aꞌiniꞌi aɨ pu naatavaɨ inyeetzi.
\p
\v 27 Maꞌacui xaa, huapɨꞌɨ pu ruxeꞌeveꞌe sej seyan huarɨni aꞌij tɨ tiraavijteꞌe, satɨj tiraanamuajriꞌi seijna jetze ɨ nyuucari tɨ jetzen raxa ɨ Dioj. Tɨ puaꞌa nyaun nyaꞌatanyen nyej tyajamuaataꞌixaateꞌen naꞌari nyej yaꞌumuaꞌati yaꞌɨmɨ, ayaa nu raxeꞌeveꞌe nyej ni raamuaꞌaree saj sauj tyaꞌatzaahuateꞌe naijmiꞌi. Sataꞌaj naijmiꞌi tyuꞌutyeseꞌen tɨ ij cai aꞌatɨ aꞌamuamueꞌitɨn sej si cai cheꞌe ráꞌatzaahuateꞌen ɨ nyuucari tɨ jetzen raxa ɨ Dioj.
\v 28 Muan xu cai seyan tihueꞌitzɨɨneꞌe setyuꞌutatéseꞌe sej tihuaurixaateꞌen huaꞌa jamuan ɨ maj amuájchaɨreꞌe. Tɨ puaꞌa seyan huarɨni, aj mu xaa raamuaꞌaree maj huatyáapuaꞌare. Ma sajta muan, Dioj pu amueꞌirájtuani.
\v 29 Ayaa puꞌu naꞌa, aꞌini Dioj pu amuaataꞌa sej rajpueitzi xaꞌaraꞌani Cɨriistuꞌu jetze maꞌacan, sajta ráꞌantzaahuateꞌen.
\v 30 Ayaa tu teri taxaꞌa antyuꞌuuve tyaɨjna cɨmeꞌe satɨj anacaican naaseij ɨ nyaj cɨn tiꞌityesaꞌacaa, sajta saucheꞌe xu ranamuajran nyej tiꞌiteseꞌe nyaucheꞌe.
\c 2
\s Cɨriistuꞌu pu nuꞌu tiꞌitiáꞌa ɨ tɨ cɨn tiꞌityavaacaꞌa, aj pu i antiraa ɨ uteꞌe
\p
\v 1 Muan xu Cɨriistuꞌu jetze rucaꞌanye ɨ aꞌamua tzajtaꞌa. Aɨ pu ajta rɨꞌɨ amuaataꞌaca tɨ aɨn amueꞌixeꞌeveꞌe ɨ Cɨriistuꞌu sej si xaꞌapɨꞌɨn huarɨni, aꞌini xuꞌuri raꞌancureꞌeviꞌitɨ ɨ xaijnyuꞌucaraꞌaraꞌan, sajta seica xu tihuaꞌumuaꞌatziireꞌe, sajta xu seica a huaꞌacuꞌuve.
\v 2 Aɨj nu cɨn aꞌamuahuavii saj rɨꞌɨ tinaataꞌan nain cɨmeꞌe, sej si seyan ruxaꞌaj tyuꞌumuaꞌati naa tyamuaꞌa naijmiꞌi, sej si seyan ruxaꞌa títyaahuaujxeꞌeveꞌen, sej si ruxaꞌaj tirájtyauveꞌen seij ajta mɨ seij, sej si muan rujɨɨmuaꞌa raahuauni.
\v 3 Cheꞌe cai aꞌatɨ rusaɨj rajtyauveꞌen ɨ tɨ cɨn ahuaujtzaahuateꞌen. Ajta cheꞌe cai aꞌatɨ tyáuuraꞌatyaꞌa, silu cheꞌe aɨn ayan tiraatámitejteꞌen tɨ eitzeꞌe tiꞌivaɨreꞌe ɨ saɨj cai aɨjna.
\v 4 Cheꞌe cai aꞌatɨ aɨ naꞌa rahuauca aɨjna ɨ tɨ jetzen ruxeꞌeveꞌe rusaɨj, silu cheꞌe ajta raatavaɨreꞌe ɨ saɨj aɨjna cɨmeꞌe tɨ ajta aɨjna jetze ruxeꞌeveꞌe.
\p
\v 5 Sataꞌaj seyan cheꞌeta sanaꞌa tyuꞌumuaꞌati aꞌij tɨ tyuꞌumuáꞌa aɨjna ɨ Cɨriistuꞌu tɨ ajta iꞌi Jesús.
\v 6 Ajta aɨn ɨ Cɨriistuꞌu, ayaa pu i éenyaꞌa iꞌi Dioj, capu ayan tiraꞌamityejtyaꞌacaꞌa tɨ ayan tityauuraꞌatyaꞌa tɨ ayan aucheꞌe ruxaꞌa eꞌenyeꞌen ɨ Dioj jemi.
\v 7 Silu aa pu tiꞌityiaꞌa ɨ ruxéꞌeviꞌiraꞌa cɨmeꞌe ɨ tɨ cɨn tiꞌityavaa aꞌaraa u tajapua. Aj pu i aɨn huaseijre tɨj ɨ aꞌatɨ mej tiꞌiraꞌijteꞌe.
\p Ayaa pu huanuꞌeihuacaꞌa tyatɨj ityan.
\v 8 Ajta pu ayan tevi pueenyaꞌa tyatɨj ityan. Ajta aɨn, capu vaꞌacan cɨn tiꞌityavaacaꞌa, silu huatauraꞌa tɨ huamɨꞌɨni. Huamɨꞌɨ, icu, ɨ curuu jetze.
\v 9 Aɨj pu cɨn Dioj antyɨꞌɨmɨ raꞌantítuaa. Aj pu i raataꞌa tɨ tyeꞌentyaruti tiꞌitɨj cɨmeꞌe tɨ eitzeꞌe veꞌe cai maa tiꞌitɨ.
\p
\v 10-11 Aɨj pu cɨn, ajna xɨcaajraꞌan jetze tɨꞌɨj tyeꞌentipuaꞌariteꞌen nain, matɨꞌɨj raamuaꞌaree tɨcɨn: “Puꞌuri tieꞌijta ɨ Jesús” aj mu xaa, titunutaxɨꞌɨn naimiꞌi ɨ mej eꞌeseijreꞌe u tajapua, majta ɨ mej yan seijreꞌe iiyan chaanaca japua, majta ɨ mej eꞌeseijreꞌe u tajete, mataꞌaj naimiꞌi meyan raataxaj yee, “Ai pu tavastaraꞌa pueen aɨjna ɨ Jesús tɨ iꞌi Cɨriistuꞌu.” Ayaa mu maɨjna cɨn huarɨn, aj mu mi rɨꞌɨ tiraataꞌasin ɨ Dioj ɨ tyaj rajyaꞌupua.
\s Aɨme ɨ mej tyaꞌatzaahuateꞌe meyan nuꞌu tiꞌivaɨreꞌe mej huaꞌutátatzaviꞌi ɨ mej yan aꞌuchaatɨme iiyan chaanaca japua
\p
\v 12 Sajta muan, mɨ nyáa amueꞌixeꞌeveꞌe, aꞌanaj tɨ naꞌa nyaj aꞌucatii aꞌamua jamuan, aꞌanaj tɨ naꞌa, ayaa xu huarɨj nyatɨj tyajamueꞌixaa. Sajta ijii, nyaj ya aꞌɨmɨ huataca, sataꞌaj seyan cheꞌeta sanaꞌa huarɨni. Saucheꞌe xu seyan rɨjca, aꞌij nyaj tyajaꞌamueꞌixaateꞌe. Sataꞌaj raanaijmiꞌireꞌen ɨ tɨ auj tyajamuaꞌaturaateꞌe aꞌamua tzajtaꞌa. Rɨꞌɨ xuꞌu muan nain cɨmeꞌe, sej si cai tiꞌitɨj cɨn autaꞌɨtzen ɨ Dioj jemi.
\v 13 Ayaa puꞌu, aꞌini Dioj pu amuaataꞌaca ɨ caꞌanijraꞌa, sej si seyan rɨjcaa ɨ tɨ íꞌixaꞌapɨꞌɨn aꞌij tɨ aɨn tiraꞌaraanajchi. Ajta aɨ pu tyajámuaatavaɨreꞌesin sej si raanaijmiꞌireꞌen.
\p
\v 14-15 Naijmiꞌi tɨ naꞌa tɨ ayan ruxeꞌeveꞌe sej seyan huarɨni, sataꞌaj cai cɨmeꞌen runyuustyaꞌa, naꞌari saj cai cɨmeꞌen aꞌij puaꞌa tyuꞌurixaatyaꞌa tɨꞌij cai aꞌatɨ tiꞌitɨ cɨn muejmi jetze tyaꞌupuáꞌajteꞌen, sej si seyan tiꞌityeréꞌenyeꞌen ɨ aꞌamua tzajtaꞌa, sej si seyan tyaɨtestyamuaꞌameꞌen éenyaꞌa xaꞌajuꞌun ɨ Dioj, sej si cai tiꞌitɨj cɨn autyaturan ɨ Dioj jemi, iiyan chaanaca japua saj huapuasaaruveꞌen huaꞌa tzajtaꞌa ɨ maj aꞌij puaꞌa tiꞌityetyaɨte, ɨ maj cai xaꞌapɨꞌɨn metityaumuámuaꞌaree. Sajta huaꞌa tzajtaꞌa áꞌucɨɨnye sej tihuaꞌutaꞌixaateꞌen ɨ nyuucari tɨ cɨn Dioj taajajcuareꞌe ityejmi. Ayaa xu saɨjna cɨn huarɨn, muan xu huaseijreꞌen a eijreꞌe huaꞌa jemi ɨ tyaɨte. Xuee saj cu muan huaꞌatatzaviꞌira aɨme.
\p
\v 16 Aɨj nu cɨn ahuantzaahuateꞌesin nyajna xɨcajraꞌan jetze tɨꞌij ajtahuaꞌa uveꞌenyén aɨjna ɨ Cɨriistuꞌu. Ayaa nu neyan ahuantzaahuateꞌesin tɨ eecan naa tinaavaɨ nyej nyaɨjna cɨn tiꞌityesaꞌacaa, ajta ayan naa tinaavaɨ nyaɨjna cɨmeꞌe ɨ nyej tyuꞌumuarej.
\v 17 Muan xu tyuꞌutamuaɨꞌɨvajta saɨjna cɨmeꞌe sej tiꞌivaɨreꞌe ɨ Cɨriistuꞌu jemi, sajta saɨjna cɨmeꞌe saj raꞌatzaahuateꞌe. Ajta, tɨ puaꞌa menyajeꞌicatan ayajna mej mi raanaijmiꞌireꞌen ɨ saj cɨn seri seyan tyuꞌutamuaɨꞌɨvajtacaꞌa, nyaucheꞌe nu nyetyamuaꞌaveꞌe nyaɨjna cɨmeꞌe nyaj aꞌatzu tyajámuaatavaɨ. Muejmi nu jetze nyetyamuaꞌaveꞌe.
\v 18 Sajta muan, sataꞌaj seyan cheꞌeta sanaꞌa huaujtyamuaꞌaveꞌen, sajta nyeetzi huataꞌan ɨ nyaj cɨn huatántyamuaꞌaveꞌen.
\s Cɨmeꞌen aɨjna ɨ Timuteeyu, ajta aɨjna ɨ Epafrodito
\p
\v 19 Ajta, tɨ puaꞌa ayan naataꞌacareꞌen ɨ nyavastaraꞌa aɨjna ɨ Jesús, ayaa nu raxeꞌeveꞌe nyaj caꞌanacan Timuteeyu tyuꞌutaitiꞌi muejmi jemi nyej ni huatantyamuaꞌaveꞌen nyatɨꞌɨj raamuaꞌaree aꞌij tɨ tyajaꞌamuavaɨreꞌe muejmi.
\v 20 Capu maa aꞌatɨ ayajna tɨj amɨjna tɨ ayan cheꞌeta naꞌa tiꞌimuaꞌatze nyatɨj inyaa, tɨ ajta ayan rahuauca tzaahuatiꞌiraꞌa cɨmeꞌe aɨjna tɨ aꞌamua jetze ruxeꞌeveꞌe.
\p
\v 21 Ma majta mɨ seica, naimiꞌi mu rahuauca ɨ tɨ huaꞌa jetze ruxeꞌeveꞌe. Camu aꞌatzu rahuauca ɨ tɨ jetzen ruxeꞌeveꞌe ɨ Cɨriistuꞌu tɨ iꞌi Jesús.
\v 22 Aru xuꞌuri muan ramuaꞌaree tɨ aɨn Timuteeyu, puꞌuri tyuꞌutaséijratacaꞌa tɨ cai autaꞌɨtze aꞌini puꞌuri tinaatyavaɨ aɨjna cɨmeꞌe nyej tihuaꞌutaꞌixaa ɨ nyuucari tɨ cɨmeꞌen raxa ɨ Dioj. Eecan pu tyuꞌumuarej nya jamuan tɨj saɨj yaujraꞌan tiꞌimɨjhuaca jamuan ɨ taatajraꞌan.
\v 23 Aɨj nu cɨn nyéjxeꞌeveꞌe nyaj raataite muejmi jemi nyatɨj nyeri tiraamuaꞌareeriꞌi aꞌij tɨ yeꞌi tinaatyavaɨreꞌesin inyeetzi.
\v 24 Me nyajta inyaa, nyaucheꞌe nu rachuꞌeveꞌe ɨ nyavastaraꞌa, nyej ni nyasaɨj caꞌanacan aꞌatanyén.
\p
\v 25 Ajta, ayej nyaꞌase, ayaa pu ruxeꞌeveꞌe nyaj anacaican muejmi jemi raataite ɨ nyeꞌihuaaraꞌa, aɨjna ɨ Epafrodito. Ai pu aɨn pueen ɨ saj muan nyajaꞌutaitiꞌiriꞌi inyeetzi jemi tɨ aɨn tinaataꞌan tiꞌitɨ tɨ naꞌaturaateꞌe. Aɨ pu tyuꞌumuarej nya jamuan, tyajta naijmiꞌi tu tyuꞌutyésaꞌacaꞌa.
\v 26 Eecan pu xaa áꞌamuaseijramɨꞌɨ. Ajta eꞌij puaꞌa raataꞌa aɨjna cɨmeꞌe ɨ sej raamuaꞌareeriꞌi tɨ aɨn tijcuiꞌinyacaꞌa.
\v 27 Ayej xaa nyaꞌu tiꞌayajna tɨ tiꞌicuiꞌicaꞌa. Tɨn pu huamɨꞌɨ. Ma ajta Dioj pu ráꞌacuꞌuvajcaꞌa aɨjna. Ajta ayan cheꞌeta naꞌa náꞌacuꞌuvajcaꞌa inyeetzi nyej ni cai nyaxaamɨstyeꞌecheꞌe. Puꞌuri naacɨꞌɨ ɨ nyaj cɨn rajpueitzi naꞌayeꞌi.
\p
\v 28 Aɨj nu cɨn nyeri eitzeꞌe raxeꞌeveꞌe nyej raataite muejmi jemi sej si huaujtyamuaꞌaveꞌen satɨꞌɨjtahuaꞌa raaseij. Me nyajta inyaa, nyej ni cai cheꞌe neyan tiꞌinyaxaamɨjtyaꞌa.
\v 29-30 Sataꞌaj raꞌancureꞌeviꞌitɨn ɨ tavastaraꞌa jetze maꞌacan. Sataꞌaj huaujtyamuaꞌaveꞌen aɨjna jemi ɨ Epafrodito. Sajta rɨꞌɨ tihuáꞌajchaɨca ɨ tyetyaca tɨj amɨjna, saɨjna cɨmeꞌe tɨ tɨn huamɨꞌɨ tɨ tiꞌimuaraꞌacaꞌa ɨ Cɨriistuꞌu jetze maꞌacan. Aɨ pu ayan huataujtuaa tɨ huamɨꞌɨni tɨꞌij tinaavaɨreꞌen inyeetzi. Capu ayan tyajamuaacɨ́ꞌɨ muejmi sej si seyan huarɨni aꞌini saj cai ya aꞌahuaꞌacaꞌa.
\c 3
\s Cɨmeꞌen aɨjna tɨ xaa tiꞌivaɨreꞌe ɨ Dioj jemi
\p
\v 1 Puꞌuri ijii, nyeꞌihuaamuaꞌa, sataꞌaj huaujtyamuaꞌaveꞌen jemin ɨ tavastaraꞌa. Nuꞌuri neyan tyajamuaataitiꞌiriꞌi. Nuꞌuri nyajtahuaꞌa nyanaꞌa tyajáꞌamueꞌitiꞌi. Capu nyaꞌunaꞌavisteꞌe nyeetzi jemi nyej neyan rɨcɨ, aꞌini aɨ pu aꞌamuacháɨj aꞌame.
\p
\v 2 Rɨꞌɨ xuꞌu muan, aɨme jemi ɨ tyetyaca ɨ mej meyan áꞌujhuaꞌan matɨj ɨ tzɨꞌɨcɨ ɨ tɨ cai aꞌatɨ huaꞌayaꞌamua. Aꞌij mu puaꞌa rɨcɨ aɨme ɨ tyetyaca, maj ruhueꞌiraꞌa ájtasíꞌiche. Tyuꞌɨtziiteꞌe, micu.
\v 3 Me tyajtá ityan, ai tu aɨn pueen ɨ tyaj tanavi aꞌantisiꞌiche tzaahuatiꞌiraꞌa cɨmeꞌe. Ajta aɨn xaijnyuꞌucaraꞌaraꞌan ɨ Dioj, aɨ pu xaa taataꞌaca tyej rɨꞌɨ tirataꞌacareꞌen ɨ Dioj. Eecan tu jetzen huatátatyamuaꞌaveꞌesin ɨ Cɨriistuꞌu tɨ ajta iꞌi Jesús. Tyajta ityan, catu xaa raꞌatzaahuateꞌe tyaɨjna cɨmeꞌe ɨ tyaj rajtyau ɨ tatzajtaꞌa.
\p
\v 4 Tɨ puaꞌa seij ayan tiraꞌamitejteꞌe tɨ ayan tiraavijteꞌe tɨ raꞌatzaahuatyaꞌa aɨjna ɨ tɨ tirajtyau ɨ rutzajtaꞌan, cheꞌe aɨn raamuaꞌaree tɨ eitzeꞌe ayan tiraavijteꞌe inyeetzi jemi.
\v 5 Tɨꞌɨj tyaumaꞌaca arahueica xɨcaj nyej jetzen huanuꞌeihuacaꞌa, manaꞌantísijchacaꞌa ɨ nyenavi jetze. Huaꞌa jetze nu ajtyamaꞌacan ɨ mej jee yaujmuaꞌameꞌen aɨjna Israel tyaacan. Nyajta iꞌi huaacɨxaꞌaraꞌan aɨjna ɨ Benjamín tyaacan. Huaꞌa jetze nu ajtyamaꞌacan ɨ mej jee hebreo pueen. Ayaa nu huanuꞌeihuacaꞌa. Nyajta nu huaꞌanyuuca cɨn tiꞌixaxaꞌa.
\p Cɨmeꞌen aɨjna ɨ yuꞌuxari tɨ raꞌuteyuꞌuxacaꞌa aɨjna ɨ Moises tyaacan, nyaa nu iꞌi fariseeyu.
\v 6 Ayaa nu rɨꞌɨ huapɨꞌɨ tíꞌityesaꞌacaꞌa nyaɨjna cɨmeꞌe ɨ nyeyeꞌira. Aɨj nu cɨn aꞌij puaꞌa tihuáꞌajtyaꞌaxɨꞌɨcaꞌa ɨ mej raꞌatzaahuatyaꞌacaa maɨjna ɨ Jesús. Nyajta, canu aꞌanaj tiꞌitɨj cɨn autyajturaa aijna cɨmeꞌe ɨ nyej tiyeꞌiracaꞌa.
\v 7 Nain aꞌachu tɨ caj tiꞌipuaꞌamua, eecan pu nyejetze ruxeꞌevaꞌacaꞌa ɨ nyej nyejmiꞌi tiyeꞌiracaꞌa.
\p Ajta ijii, ayaa pu tinaꞌamitejteꞌe inyeetzi tɨ cai cheꞌe tiꞌitɨj vaɨreꞌe aɨjna cɨmeꞌe nyej nyeri ravaɨreꞌe nyaɨjna ɨ Cɨriistuꞌu.
\v 8 Ajta eꞌeyan, ɨ tɨ eitzeꞌe ruxeꞌeveꞌe, aꞌij tɨ tiꞌitɨ tinaacɨꞌɨtíicheꞌe, puꞌuri ayan tinaꞌamitejteꞌe tɨcɨn yee tyuꞌɨtziiteꞌe. Nicheꞌe yee maruuhuaꞌaxɨn. Ai puꞌu, eecan pu eitzeꞌe tinaatyávaꞌɨrihuaꞌan nyaj raamuaꞌati nyaɨjna ɨ nyavastaraꞌa aɨjna ɨ Cɨriistuꞌu tɨ ajta iꞌi Jesús. Nyaɨjna cɨmeꞌe ɨ Cɨriistuꞌu, nain nu ma huahuaꞌaxɨ. Cu xuee, xaɨri puꞌu pueenyaꞌa aɨjna tɨ ajmiꞌi naꞌaránajchacaꞌa. Ayaa pu tinaꞌamitejteꞌe ijii tɨ ayan een cɨmeꞌe. Nyaa nu má rúuraaxɨ nyaɨjna cɨmeꞌe nyej ni tyuꞌutyáamueꞌitɨn ɨ Cɨriistuꞌu jemi.
\p
\v 9 Ayaa nuꞌu tiꞌimuaꞌatze nyaɨjna cɨmeꞌe, nyej ni huatyavaa naꞌaraꞌani ɨ Cɨriistuꞌu jemi, nyej ni cai tiꞌitɨ cɨn autyaturan ɨ Dioj jemi. Canu cheꞌe neyan tiꞌimuaꞌatze yee nyaa nu rɨꞌɨ tiꞌitevi nyaɨjna cɨmeꞌe nyej yee nain cɨn raꞌaraꞌastijre aꞌij tɨ tyaꞌaxa ɨ yuꞌuxari jetze, silu ayaa pu tiraꞌamitejteꞌe ɨ Dioj ɨ nyej rɨꞌɨ tiꞌitevi, aɨjna cɨmeꞌe nyaj raꞌatzaahuateꞌe ɨ Cɨriistuꞌu.
\v 10 Ai pu aɨn pueen ɨ nyej raxeꞌeveꞌe nyataꞌaj raamuaꞌati nyaɨjna ɨ Cɨriistuꞌu, nyajta raamuaꞌati ɨ muareꞌeriꞌiraꞌa ɨ tɨ cɨn Dioj raꞌajjáj ɨ Cɨriistuꞌu huaꞌa tzajtaꞌa ɨ mɨꞌɨchite, nyajta rajpueiitzi naꞌame ɨ Cɨriistuꞌu jamuan, nyej ni neyan seiraꞌa naꞌaraꞌani tɨj aɨjna ɨ Cɨriistuꞌu tɨꞌɨj huamɨꞌɨ.
\v 11 Aɨj nu cɨn rachuꞌeveꞌen nyaj raataꞌase ajna xɨcajraꞌan jetze matɨꞌɨj aꞌitacɨɨnye ɨ mɨꞌɨchite tɨ puaꞌa nyacai aꞌij huarɨni inyaa.
\s Aɨ pu nuꞌu tiꞌiteseꞌe tɨ ayan tiraꞌaraꞌasten tɨ cɨmeꞌen Cɨriistuꞌu raataꞌasacaꞌa
\p
\v 12 Caxɨɨ nu xaa nyaꞌu raataꞌasacaꞌa nyaɨjna ɨ nyaj cai xɨ aꞌutaꞌɨtzaꞌaraꞌan; canu nyajta xɨɨ nain raꞌaraꞌastijre. Naucheꞌe nu huátain nyej ni raataꞌase nyaɨjna ɨ tɨ cɨmeꞌen naataꞌasacaꞌa ɨ Cɨriistuꞌu tɨ iꞌi Jesús tɨ ij aɨn huatauraꞌateꞌen inyeetzi.
\v 13 Nyeꞌihuaamuaꞌa, canu neyan tyajaꞌamueꞌixaateꞌe yee nuꞌuri raanaijmiꞌire, silu ayaa nuꞌu rɨcɨ: canu cheꞌe neyan nyaɨjna cɨn tiꞌimuaꞌatze yee ɨ tuꞌuveꞌetyajtɨ silu nyetiꞌiteseꞌe nyej ni raataꞌase ɨ taꞌanajca.
\v 14 Ayaa nu een cɨn rɨcɨ, nyej ni raataꞌase aꞌu tɨ aꞌutavɨɨ ɨ úmiꞌinari, nyej ni tiꞌitɨ huamuéꞌitɨn ɨ tɨ cɨn Dioj nyeꞌejee u uteꞌe ɨ Cɨriistuꞌu jemi, aɨjna jemi tɨ ajta iꞌi Jesús.
\p
\v 15 Naimiꞌi aꞌachu tyaj caj tiꞌityapuaꞌamua ɨ tyej teri vaujsi, ticheꞌe teyan cheꞌeta tyanaꞌa tyuꞌumuaꞌati. Naꞌari cai tɨ puaꞌa seyan saɨque tyuꞌumuaꞌati tiꞌitɨj cɨmeꞌe, tɨ cai ayan tyajámuaavijteꞌe, Dioj pu tyajámuaataseíjrateꞌesin.
\v 16 Aɨj tuꞌu, ticheꞌe teyan raꞌaraꞌastijreꞌen tyaɨjna cɨmeꞌe ɨ tyej teri raataꞌasacaꞌa.
\p
\v 17 Nyeꞌihuaamuaꞌa, sataꞌaj seyan tiꞌityeteꞌen nyatɨj rɨcɨ inyaa. Sajta muan, ayaa xu tyuꞌumuaꞌati saɨjna cɨmeꞌe ɨ mej meyan rɨcɨ aꞌij tyej tyajamueꞌixaa. Nyajta nu xaa huányeinixɨ nyaɨjna cɨmeꞌe ɨ nyej neriꞌitahuaꞌa neyan tyajaꞌamueꞌixaateꞌe.
\v 18 Rɨꞌɨ xuꞌu muan, aꞌini muiꞌi nu tyajámuaataꞌixaa, nyaɨjna cɨmeꞌe ɨ nyej neriꞌitahuaꞌa neyan tyajamuaataꞌixaateꞌesin, nyajta nu nyeyéenyen huányeinixɨꞌɨsin nyaɨjna cɨmeꞌe, ɨ maj muiꞌitɨ saɨque meyan tiꞌimuaꞌatze.
\p Ayaa mu rɨcɨ, cu xuee maj cu rájchaɨreꞌe ɨ Cɨriistuꞌu tɨ aɨn huamɨꞌɨ ɨ curuu jetze.
\v 19 Ayaa pu tihuaꞌacɨꞌɨti ɨ maj yaꞌuraini ɨ huaꞌaxaijnyuꞌuca tɨ auj ruuricaa. Maꞌahúaujpuaꞌarixɨꞌɨsin, micu. Eitzeꞌe pu huaꞌa jetze ruxeꞌeveꞌe mej eihua tyuꞌucuaꞌani, aɨj pu cɨn huaꞌaxaye pu pueen ɨ huaꞌa Dioj. Majta meyan áꞌujtzaahuateꞌe maɨjna cɨmeꞌe ɨ maj cɨn tyuꞌutatyéviꞌiraꞌata. Ai muꞌu jetze tyuꞌumuaꞌati aɨjna tɨ eꞌeseijreꞌe iiyan chaanaca japua.
\p
\v 20 Me tyajta ityan, au tu eꞌemaꞌacan u tajapua. Tyajta eecan tu rachuꞌeveꞌe tɨ aun eꞌivacaanyen aɨjna tɨ tuꞌirajtuaani, ɨ tavastaraꞌa, aɨjna ɨ Jesús tɨ iꞌi Cɨriistuꞌu.
\v 21 Aɨ pu saɨque taaruuren tɨj naꞌa aɨn raatyahueꞌiraꞌa tɨ naa seijreꞌe, aɨjna ɨ rumuareꞌeriꞌiraꞌa cɨmeꞌe, ɨ tɨ cɨn tyuꞌutyamueꞌitɨn naijmiꞌi tɨ ye seijreꞌe iiyan chaanaca japua, ajta naijmiꞌi tɨ an eꞌeseijreꞌe u tajapua.
\c 4
\s Tyaj nuꞌu rɨꞌɨ huátaruuren ɨ tavastaraꞌa jemi
\p
\v 1 Ayaa puꞌu, nyeꞌihuaamuaꞌa ɨ nyaj amueꞌixeꞌeveꞌe. Eecan nu áꞌamuaseijramɨꞌɨ, aꞌini muan xu aɨn pueen ɨ nyaj cɨn huatantyamuaꞌaveꞌe, ɨ nyaj raamueꞌitɨ. Sahuaujcaꞌanyen ɨ aꞌamua tzajtaꞌa sej si tyuꞌutyavaɨreꞌen saucheꞌe ɨ tavastaraꞌa jemi, muan mɨ nyaj amueꞌixeꞌeveꞌe.
\p
\v 2 Nyaa nu hueꞌijee amɨme, nyaɨjna ɨ Evodia, nyajta nyaɨjna ɨ Síntique, mej mi muaꞌatyujcɨꞌɨpiireꞌen mej mi ruꞌihuaamuaꞌa muaꞌaraꞌani ɨ tavastaraꞌa jemi.
\v 3 Pajta muaa, mɨ paj xaa nyeetzi jetze ajtyavaɨreꞌe, nyaa nu muahuavii ɨ paj huaꞌutavaɨreꞌen amɨme ɨ uuca, aꞌini aɨ mu majta ajtyavaɨraꞌacaa inyeetzi jetze, tyatɨꞌɨj tihuaꞌutáꞌixaatyaꞌacaa ɨ nyuucari tɨ cɨn Dioj tuꞌirajtuaani. Majta jetzen ajtyavaɨraꞌacaa aɨjna ɨ Clemente, majta huaꞌa jetze mɨ seica ɨ mej nyeetzi jetze ajtyavaɨraꞌacaa. Ayaa pu tyeꞌeyuꞌusiꞌi ɨ yuꞌuxari jetze aꞌij mej antyaꞌaruu mej mi aꞌutyáuu muaꞌaraꞌani ruurican para rusen cɨmeꞌe ɨ Dioj jemi.
\p
\v 4 Aꞌanaj tɨ naꞌa nain xɨcaj tzajtaꞌa, ajta nain tɨcaꞌari tzajtaꞌa, sahuaujtyamuaꞌaveꞌen muan ɨ tavastaraꞌa jemi. Nyajtahuaꞌa nu tyajamuaataꞌixaateꞌesin yee: Sahuáujtyamuaꞌaveꞌen.
\v 5 Sataꞌaj naimiꞌi seyan tiraamuaꞌaree saj cai tiꞌitɨ tyauraꞌatyaꞌa, silu saraꞌuviicueꞌi tyamuaꞌa naa aɨme ɨ maj saɨque tiꞌimuaꞌatze. Puꞌuri ye vejliꞌi huatyéjvee ɨ tavastaraꞌa.
\p
\v 6 Caxu tiꞌimuajca tiꞌitɨj cɨmeꞌe, silu nain xu tiraataꞌixaateꞌen ɨ Dioj jemi aꞌachu tɨ caj tyajamuaꞌaturaateꞌe, sataꞌaj raatahuavii nain cɨmeꞌe, sajta rɨꞌɨ tiraataꞌan ɨ Dioj.
\v 7 Aj pu xaa Dioj amuaataꞌasin ɨ saj cɨn rɨꞌɨ huarɨni ɨ rutzajtaꞌa. Capu aꞌatɨ ramuaꞌaree aꞌij tɨ yeꞌi iꞌi rɨꞌɨri tɨ ayan rɨꞌɨ amuaataꞌan ɨ rutzajtaꞌa. Aɨ pu xaa Dioj amuaatyápuaꞌariteꞌesin ɨ aꞌamuaxaijnyuꞌuca, ajta ɨ áꞌamuamuaꞌatziiraꞌa aɨjna cɨmeꞌe ɨ saj jetzen araujcaꞌanye ɨ Cɨriistuꞌu tɨ iꞌi Jesús.
\s Maj nuꞌu rɨꞌɨ tyúꞌumuaꞌatzɨ maɨjna jetze tɨ xaꞌapɨꞌɨn een
\p
\v 8 Sajta eꞌeyan, nyeꞌihuaamuaꞌa, sataꞌaj seyan tyuꞌumuaꞌati seijna jetze tiꞌitɨ tɨ ayan tiꞌayajna, naꞌari tiꞌitɨ tɨ ayan raavijteꞌe sej si rɨꞌɨ tiraatyajtuaani nusu tiꞌitɨ tɨ ayan raavijteꞌe tɨ tiraacɨꞌɨti seij. Sajta seyan jetzen tyuꞌumuaꞌati tiꞌitɨ tɨ runyáta, caꞌɨn tiꞌitɨ tɨ naa seijreꞌe. Tɨ puaꞌa tiꞌitɨ tiꞌixaꞌapɨꞌɨn naꞌari ayan tiraavijteꞌe sej rɨꞌɨ tiraataꞌixaateꞌen, sataꞌaj seijna jetze tyuꞌumuaꞌati.
\p
\v 9 Ajta tiꞌitɨ nyej tyajamuaamuáꞌate, nusu tiꞌitɨ saj raꞌancuraꞌa nyeetzi jetze, naꞌari nyej tyajámuaataꞌixaa, sataꞌaj seyan huarɨni. Ajta aɨn ɨ Dioj pu amuaatyávaɨreꞌesin sej si naa rɨꞌɨ tityeetyáuuca.
\s Cɨmeꞌen ɨ maj cɨn raatapueijve
\p
\v 10 Eecan nu huatantyamuaꞌaveꞌe ɨ nyavastaraꞌa jemi, nyaɨjna cɨmeꞌe ɨ saj sajtahuaꞌa sanaꞌa nyaꞌutámuaꞌareeriꞌi. Muan xu nyamuaꞌajcaa tzɨteꞌe tiꞌitɨ tɨ naꞌaturaatyaꞌacaa. Ayaa puꞌu, capu tyajamuaataꞌa aꞌij sej yeꞌi tinaatyavaɨreꞌen.
\v 11 Canu neyan tiꞌixa yee canu aꞌij tiꞌijviicueꞌi. Canu xaa nyaꞌu. Nuꞌuri raarɨꞌɨre aꞌij nyaj tiraꞌaviicueꞌiran nyaɨjna cɨmeꞌe aꞌachu nyaj caj tiꞌituave.
\p
\v 12 Nyaa nu ramuaꞌaree aꞌij nyej yeꞌi huarɨni tɨ puaꞌa nyaj cai aꞌij tiꞌijviicueꞌi nusu tɨ puaꞌa yee nyetiꞌituaave inyaa. Nyaa nu nyeri raarɨꞌɨre nyej nain cɨn tyuꞌutyamueꞌitɨn nyaɨjna cɨmeꞌe ɨ nyaj uxa naꞌari tɨ puaꞌa nyeꞌicua. Ajta tɨ puaꞌa tiꞌitɨ naꞌavaꞌaturaateꞌen, naꞌari tɨ puaꞌa nyacai tiꞌitɨj tichaꞌɨ, nyajta neyan raarɨꞌɨre nyej tyuꞌutyamueꞌitɨn.
\v 13 Nain nu cɨn tyuꞌutyamueꞌitɨn, nyaɨjna cɨmeꞌe nyej Cɨriistuꞌu jetzen arancaꞌanye.
\p
\v 14 Ma sajta muan, xaꞌapɨꞌɨn xu huarɨj saɨjna cɨmeꞌe seyan tinaatavaɨ iiya nyaj aɨjna cɨn tíꞌityesaꞌacaꞌa.
\p
\v 15 Sajta muan, mɨ sej Filipos eꞌeche, xuꞌuri ramuaꞌaree aꞌij tɨ eꞌenyaꞌa satɨꞌɨj xaꞌichuꞌi tyaꞌaraꞌaste anacaican ɨ saj cɨj ráꞌantzaahua ɨ nyuucari tɨ cɨmeꞌen raxa ɨ Dioj. Nyatɨꞌɨj neri huiramaꞌaca nyaujna Macedonia, muan xuꞌu naatavaɨ saɨjna cɨmeꞌe ɨ tyej naijmiꞌi tyuꞌumuarej. Muan xu xaa tinaatapueijve inyeetzi. Sajta muan xu tyaꞌancuraꞌa nyeetzi jemi. Aꞌu tɨ naꞌa mu tyujsaꞌɨrihuaꞌa mɨ seica, camu aꞌatzu meyan huarɨj satɨj muan.
\v 16 Ajta, nyatɨꞌɨj nyaun aꞌutyavaacaꞌa aujna Tesalónica, caxu seij sanaꞌa tinyajaꞌutaitiꞌiriꞌi aɨjna cɨmeꞌe ɨ tɨ tinaꞌaturaatyaꞌacaꞌa.
\p
\v 17 Canu xaa rahuauca saj sajtahuaꞌa tinaataꞌan, silu aij nuꞌu huauuca ɨ tɨ tyajamuáacɨꞌɨti auúcheꞌe.
\v 18 Nain nu neri ancuraꞌa. Nyajta xaa nyaꞌu eitzeꞌe aucheꞌe. Aꞌini Epafrodito ari tinaataꞌa aꞌachu saj caj tinyajaꞌutaitiꞌiriꞌi, eihua nu tíꞌijchaꞌɨ nyeri. Ɨ saj tinyajaꞌutaitiꞌiriꞌi, yaa pu een tɨj muaɨꞌɨvejri tɨ naa tyáaráꞌi, tɨ naa een, tɨ raꞌaraanajchi ɨ Dioj.
\p
\v 19 Ajta aɨn ɨ Dioj ɨ nyej tiꞌijvaɨreꞌe, aɨ pu nain tyajamuaatapueijveꞌesin ruxéꞌeviꞌiraꞌa cɨmeꞌe aꞌachu tɨ caj tyajamuaꞌaturaateꞌe. Ayaa pu tyajamuaataꞌasin aꞌij tɨ tiraavijteꞌe, aꞌini aɨn pu nain tíꞌijchaꞌɨ jamuan aɨjna ɨ Cɨriistuꞌu, ɨ tɨ iꞌi Jesús.
\v 20 Ticheꞌe eecan tiraatataujtziꞌireꞌe ɨ Dioj, aɨjna ɨ tyaj rajyaꞌupua. Ticheꞌe rɨꞌɨ tiraataxaj para rusen cɨmeꞌe. Cheꞌe ayajna.
\s Aɨjna tɨ cɨn raꞌantipuaꞌari
\p
\v 21 Sataꞌaj huaꞌutataujteꞌen nyeetzi jetze maꞌacan naijmiꞌica ɨ maj aꞌutyáuu ɨ Dioj jemi aɨjna cɨmeꞌe tɨ aɨn Cɨriistuꞌu huaꞌa japua huanyúu. Majta ɨ nyeꞌihuaamuaꞌa ɨ maj ayajna huati, aɨ mu majta huáꞌataujteꞌe.
\v 22 Naijmiꞌi ɨ maj ya huati ayajna, ɨ maj ya huatyauu ɨ Dioj jemi, aɨ mu áꞌamuataujteꞌe tzɨteꞌe, aɨme ɨ maj huaꞌa jetze ajtyamaꞌacan ɨ huaꞌatyaɨtestyamuaꞌa aɨjna tɨ iꞌi Cesar.
\p
\v 23 Cheꞌe aɨn ɨ tavastaraꞌa, aɨjna ɨ Cɨriistuꞌu tɨ iꞌi Jesús, cheꞌe aɨn rɨꞌɨ tyajáꞌamuacháɨ aꞌaraꞌani.