\id COL
\h Colosenses
\toc1 Colosenses
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Colosas aꞌuchaatɨmaꞌacaa
\c 1
\s Pablo pu huaꞌataujteꞌe
\p
\v 1 Inyaa, i nyej iꞌi Pablo, nyaa nu nyajta huaꞌa jetze ajtyamaꞌacan aɨ́me ɨ tɨ tihuaꞌutaij aɨjna ɨ Jesús, ɨ tɨ ajta iꞌi Cɨriistuꞌu. Ayaa nu tiꞌivaɨreꞌe ɨ Cɨriistuꞌu jemi, aꞌini ayaa pu raxeꞌeveꞌe ɨ Dioj.
\v 2 Jamuan nyeijna i nyeꞌihuaaraꞌa, aijna i Timuteeyu, ayaa nu tyajaꞌamuayuꞌuseꞌe mɨ sej Colosas eꞌeche, muan mɨ saj aꞌutyáuu ɨ Dioj jemi. Ayaa tu tyajaꞌamuataujteꞌe muan, mɨ saj saucheꞌe teꞌeviicueꞌi, saɨjna cɨmeꞌe saj raꞌatzaahuateꞌe saɨjna ɨ Cɨriistuꞌu. Cheꞌe aɨn ɨ tɨ taꞌiyaꞌupua ɨ tɨ iꞌi Dioj, cheꞌe amɨn rɨꞌɨ tyajaꞌamuachaɨ́j aꞌaraꞌani, cheꞌe ajta amuaatyápuaꞌariteꞌen ɨ aꞌamuaxaijnyuꞌuca tzajtaꞌa.
\s Pablo pu huáꞌahuaviitzeꞌe aɨme ɨ mej tyaꞌatzaahuateꞌe
\p
\v 3 Aꞌanaj tɨ naꞌa tyej tiꞌijhuavii tyaɨjna ɨ Dioj, ɨ tɨ rajyaꞌupua aɨjna ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, aꞌanaj tɨ naꞌa tyej tiꞌijhuavii muejmi cɨmeꞌe, eecan tu tatyamuaꞌaveꞌe ɨ Dioj jemi.
\v 4 Ayaa tuꞌu rɨcɨ tyaɨjna cɨmeꞌe tyej teri yáꞌumuaꞌareeriꞌi saj nuꞌu raꞌatzaahuateꞌe saɨjna ɨ Cɨriistuꞌu tɨ iꞌi Jesús, sajta nuꞌu eihua hueꞌixeꞌeveꞌe naijmiꞌica ɨ maj aꞌutyáuu ɨ Dioj jemi.
\p
\v 5 Ayaa xu rɨjca, aꞌini saucheꞌe rachuꞌeveꞌen saɨjna ɨ tɨ Dioj aꞌamuaꞌɨnyeꞌe ɨ tajapua. Tyatɨꞌɨj cai xɨ tyajamuaatayuꞌuse, muan xu seri sejmiꞌi raanamuajriꞌi saɨjna ɨ nyuucari tɨ cɨmeꞌen raxa ɨ Dioj aꞌatzaahuatiꞌiraꞌa cɨmeꞌe.
\v 6 Eijna i nyuucari ayan cheꞌeta naꞌa huataseijre muejmi jemi tɨj ajta huataseijre nainjapua ɨ chaanaca. Ayaa pu seijreꞌe tyaɨte tzajtaꞌa tɨj cɨye tɨ ajvaujseꞌesin, tɨ ajta antatácaꞌa. Ayaa pu cheꞌeta naꞌa tiꞌiruure muejmi jemi. Tɨj aucheꞌe naꞌa, satɨꞌɨj anacaican raamuaꞌareeriꞌi iyaꞌahuauritaacan cɨmeꞌe tɨ Dioj tzɨteꞌe rɨꞌɨ aꞌamuachaꞌɨ tɨj naꞌa aɨn nyuucari tyaꞌutyejche tɨ rɨꞌɨ amuaaruuren.
\v 7 Naijmiꞌi tɨj naꞌa eijna, aɨ pu tyajamuaamuáꞌate aɨjna ɨ Epafras tɨ tajamuan tiꞌivaɨreꞌe. Eecan tu raxeꞌeveꞌe tyaɨjna. Ajta aɨn, huapɨꞌɨ pu tajetze maꞌacan tiꞌivaɨreꞌe ɨ Cɨriistuꞌu jemi. Capu tiꞌitɨj cɨn áꞌɨtze.
\v 8 Aɨ pu ajta ari titaataꞌixaa ɨ sej rɨꞌɨ huapɨꞌɨ ruꞌihuaamuaꞌa saɨjna cɨmeꞌe saj jetzen araujcaꞌanye ɨ xaijnyuꞌucaraꞌaraꞌan ɨ Dioj.
\p
\v 9 Aɨj tu cɨn, catu aꞌanaj raatapuaꞌajtacaꞌa tyej Dioj tiꞌihuavii muejmi cɨmeꞌen. Nain xɨcaj tzajtaꞌa tɨ yu eꞌireꞌenye tɨꞌɨj amɨn titaataꞌixaa, ayaa tu rɨcɨ. Dioj tu tiꞌihuavii tɨ i aɨn tyajamuáamuaꞌaten nain cɨmeꞌe sej si raamuaꞌaree aꞌij tɨ tiꞌijxeꞌeveꞌe ɨ Dioj, sej si tyamuaꞌa me tityaumuámuaꞌaree, tɨ ij aɨn xaijnyuꞌucaraꞌaraꞌan ɨ Dioj amuaataꞌan sej si raamuaꞌaree aꞌij sej yeꞌi huarɨni aꞌahuauritaacan cɨmeꞌe tyamuaꞌa náa.
\v 10 Ayaa tu een cɨn tiꞌijhuavii sej si seyan huarɨni aꞌij tɨ tihuaꞌuvijteꞌe aɨme ɨ maj ramuaꞌate aɨjna ɨ tavastaraꞌa. Tyajta sej si seyan rɨꞌɨ raataꞌan saɨjna cɨmeꞌe ɨ saj cɨn tiꞌimɨjhuacaraꞌa. Sataꞌaj seyan eenyeꞌen tɨj cɨye tɨ ajvaujseꞌesin, tɨ ajta antatácaꞌa. Ajta sej si eitzeꞌe raayɨꞌɨtɨhuaꞌan aꞌij tɨ een ɨ Dioj.
\p
\v 11 Cheꞌe Dioj amuaataꞌan nain ɨ caꞌanijraꞌa ɨ aꞌamuatzajtaꞌa aɨjna cɨmeꞌe ɨ muáreꞌeriꞌiraꞌaraꞌan ɨ tyaj cɨn rɨꞌɨ tiraꞌutaseijra. Aj xu si jetzen araujcaꞌanyejsin sej si tyaꞌutaviicueꞌi, sej si sajta sauj raachuꞌeveꞌen aꞌij tɨ tiꞌitɨ áꞌamuaruuren, sej si sajta huaujtyamuaꞌaveꞌen.
\p
\v 12 Ayaa xu een cɨn tiꞌijtáujtziꞌiraꞌa xaꞌaraꞌani ɨ tɨ taꞌiyaꞌupua, aꞌini aɨ pu amuaataꞌa sej si raꞌancuraꞌan saɨjna ɨ tɨ tyajamuaacɨꞌɨti saxuꞌijméꞌen ajna aꞌutɨ aꞌanaj tɨ naꞌa huanyeeriꞌi. Ayaa pu cheꞌeta naꞌa tyajamuácɨꞌɨti seij ajta mɨ seij tɨj ayan tihuaꞌacɨꞌɨti ɨ seica ɨ maj huatyáuu ɨ Dioj jemi.
\v 13 Ayaa pu teꞌeme, aꞌini aɨ pu tuꞌirajtuaa aujna aꞌu tɨ aꞌutɨcaꞌa aꞌanaj tɨ naꞌa tɨꞌij cai cheꞌe tiꞌitaijteꞌen aɨjna tɨ aun antyujmuaꞌaree. Dioj pu taꞌaraaviꞌitɨ aujna aꞌu tɨ tieꞌijta aɨjna ɨ yaujraꞌan tɨ huapɨꞌɨ raxeꞌeveꞌe.
\v 14 Ayaa pu tyuꞌutanajchitacaꞌa ɨ tyaj cɨn téꞌechaɨcaꞌa ɨ Dioj jemi aɨjna cɨmeꞌe tɨ aɨn yaujraꞌan tajetze maꞌacan huamɨꞌɨ, ajta titaatauuniꞌiriꞌi ɨ tyaj cɨn autyajturaa ɨ jemin.
\s Dioj pu nuꞌu taatyápuaꞌarite aɨjna cɨmeꞌe tɨ Cɨriistuꞌu huamɨꞌɨ tajetze maꞌacan
\p
\v 15 Ajta aɨn ɨ yaujraꞌan, ai pu aɨn pueen ɨ tyaj jetzen raamuaꞌaree aꞌij tɨ een ɨ Dioj ɨ tyaj cai rasiseꞌij. Ai pu ajta aɨn pueen ɨ tɨ anacai seijraꞌacaa tɨꞌɨj cai xɨ meꞌe eꞌe tiꞌitɨjcaa.
\v 16 Aɨj pu jamuan Dioj nain tyuꞌutaahuacaꞌa, tɨj naꞌa puaꞌamua ɨ tajapua tɨ eꞌeseijreꞌe, ajta tɨj naꞌa puaꞌamua tɨ eꞌeseijreꞌe iiyan chaanaca japua, nain ɨ tyaj rasiseꞌij, ajta nain ɨ tyaj cai rasiseꞌij.
\p Majta maɨn ɨ xaijnyuꞌucari ɨ mej tieꞌijta u tajapua, Dioj pu nain huaꞌutaahuacaꞌa aꞌachu maj puaꞌamua. Aj pu i huaꞌantihuau mej mi meyan cheꞌeta manaꞌa tyuꞌutyavaɨreꞌen ɨ tajapua matɨj tajtuhuaani, arcaarti, muayajtuumuaꞌa tɨ veꞌe, pixcaa muayuu, ajta teneentiꞌi. Nain pu tyuꞌutaahuacaꞌa jamuan ɨ Cɨriistuꞌu, ajta Cɨriistuꞌu pu huaꞌancureꞌeviꞌitɨn.
\p
\v 17 Cɨriistuꞌu pu ayan seijraꞌacaa tɨꞌij cai xɨ meꞌe eꞌe tiꞌitɨjcaa. Ajta nain pu Cɨriistuꞌu jetze araujcaꞌanye tɨ ij tyaꞌutáviicueꞌiran.
\v 18 Ai pu aɨn pueen ɨ tɨ vaꞌacan cɨn antyujmuaꞌaree rutyaɨtestyamuaꞌa cɨmeꞌe, aɨme ɨ maj tyaꞌatzaahuateꞌe. Ai pu aɨn pueen ɨ tɨ jetzen tyuꞌunyej nain tɨ tiꞌiseijreꞌe, ajta ai pu aɨn pueen ɨ tɨ anacai aꞌitáraa huaꞌa tzajtaꞌa ɨ mɨꞌɨchite. Aɨj pu cɨn ayaa pu eenyaꞌa aꞌaraꞌani tɨ eitzeꞌe vaꞌatɨ aꞌame nain cɨmeꞌe.
\p
\v 19 Ayaa puꞌu, raꞌaranajchacaꞌa ɨ Dioj tɨ Cɨriistuꞌu ayan cheꞌeta naꞌa éenyaꞌa aꞌaraꞌani ɨ ruxaꞌaj Dioj nain cɨmeꞌe.
\v 20 Ajta, raꞌaranajchacaꞌa tɨ Cɨriistuꞌu jamuan huaꞌutyápuaꞌaren ɨ maj rajchaɨreꞌe mej mi rɨꞌɨ tityeetyáturan ɨ Dioj jemi. Naijmiꞌica aɨme ɨ maj tajapua eꞌeseijreꞌe, majta aɨme ɨ mej yan seijreꞌe iiyan chaanaca japua, aɨ pu huaꞌutyápuaꞌaracaꞌa aɨjna cɨmeꞌe tɨ Cɨriistuꞌu raꞌiraaxɨre ɨ ruxuureꞌe ɨ curuu jetze, tɨꞌɨj huamɨꞌɨ tajetze maꞌacan.
\p
\v 21 Sajta muan, anacai, caxu xaꞌapɨꞌɨn éꞌenyaꞌa ɨ Dioj jemi, sajta rájchaɨraꞌacaa ɨ aꞌamua tzajtaꞌa saɨjna cɨmeꞌe aꞌij sej yeꞌi tiꞌijrɨꞌɨrajcaa.
\v 22 Ma ajta Dioj pu ari amuaatyápuaꞌari aɨjna cɨmeꞌe tɨ Cɨriistuꞌu huamɨꞌɨ jetzen ɨ curuu. Cɨriistuꞌu pu aꞌamua japua huanyúu aɨjna cɨmeꞌe tɨ tirajpueijtzicaꞌa ɨ rujetze. Aj pu i amuaꞌanviꞌitɨn ɨ Dioj jemi, muan mɨ sej aꞌutyáuu xaꞌajuꞌun jemin. Caxu cheꞌe aꞌanaj tiꞌitɨj cɨn autyaturan ɨ Dioj jemi. Capu ajta aꞌatɨ muejmi jetze tiꞌitɨj cɨn tyaꞌupuáꞌajteꞌen.
\p
\v 23 Ayaa pu teꞌeme tɨ puaꞌa sauj tyaꞌutaviicueꞌi sej tyaꞌatzaahuateꞌe, ajta tɨ puaꞌa sacai yáꞌuhuaꞌanan ɨ saj sauj rachuꞌeveꞌen aꞌij tɨ tiꞌixaxaꞌa ɨ nyuucari tɨ cɨn Dioj amueꞌirajtuaani. Ai pu aɨn pueen ɨ nyuucari ɨ mej meri tihuaꞌutaꞌixaa nainjapua. Me nyajta inyaa, Dioj pu ajta ayan tinyeijca nyej ni nyaɨjna cɨn tyuꞌutyavaɨreꞌe.
\s Pablo pu nuꞌu aɨjna cɨn antyujmuaꞌaree tɨ huaꞌutyavaɨreꞌen aɨme ɨ mej eꞌetyujsaꞌɨri ɨ Dioj jemi
\p
\v 24 Ari ijii, nyaa nu huatantyamuaꞌaveꞌe nyaɨjna cɨmeꞌe tɨ ayan tyajamuaatyávaꞌɨrihuaꞌan ɨ nyaj cɨn tirajpueiitzi naꞌaraa. Nyajta neyan raanaijmiꞌireꞌen ɨ nyejetze cɨmeꞌe ɨ tɨ tyaꞌatura mej mi raamuaꞌaree aꞌij tɨ tirajpueijtzicaꞌa aɨjna ɨ Cɨriistuꞌu. Aɨj nu cɨn nyahuaꞌavaɨreꞌe aɨme, ɨ tɨ cɨn Cɨriistuꞌu antyujmuaꞌaree, aɨme ɨ mej iꞌi tyaɨtestyamuaꞌameꞌen.
\v 25 Nyaa nu xaa teꞌentyajrupi nyaɨjna cɨmeꞌe tɨ cɨn Dioj ayan tinyeijca nyej ni neyan huarɨni aꞌij tɨ Dioj ayan tiraaxaꞌapɨꞌɨntare. Aɨj nu cɨn tyajamuaataꞌixaateꞌesin nain cɨmeꞌe ɨ nyuucari tɨ jetzen raxa ɨ Dioj.
\p
\v 26 Aijna i nyuucari, ai pu aɨn pueen ɨ tɨ ruꞌavaa tɨ Dioj ramuaꞌareeracaꞌa, aviitzi cɨmeꞌe, ajcaꞌihuaꞌɨmɨ, nain xɨcaj tzajtaꞌa tɨ yu eꞌireꞌenye. Aɨme ɨ maj anacaican eꞌechajcaꞌa, camu aꞌatzu ramuaꞌareeracaꞌa aꞌij tɨ Dioj rɨniicheꞌe. Aru ijii, puꞌuri tihuaꞌutaꞌixaa me eijreꞌe huaꞌa jemi ɨ maj aꞌutyáuu ɨ Dioj jemi.
\p
\v 27 Ayaa pu raaxaꞌapɨꞌɨntare ɨ Dioj tɨ tihuaꞌutaꞌixaateꞌen me eijreꞌe mej mi raamuaꞌaree tɨ eecan pu naa seijreꞌe eijna ɨ tɨ ruꞌavaa huaꞌa tzajtaꞌa ɨ tyaɨte ɨ mej meyan aꞌuchaatɨme nainjapua, iiyan ɨ chaanaca japua. Ai pu aɨn pueen ɨ Cɨriistuꞌu tɨ aꞌamua tzajtaꞌa eꞌeseijreꞌe. Aɨ pu ajta amuaataꞌasin sej si raseíran tɨ eecan pu naa seijreꞌe ɨ Dioj jemi.
\p
\v 28 Tyajta ityan, ayaa tu tihueꞌixaateꞌe ɨ tyaɨte aꞌij tɨ tiꞌitɨj huáruu aɨjna ɨ Cɨriistuꞌu. Naijmiꞌica tu rɨꞌɨ tiꞌixaateꞌe, tyajta iyaꞌahuauritaacan cɨn tu tihuaꞌamuaꞌaten mej mi raamuaꞌaree tzaahuatiꞌiraꞌa cɨmeꞌe tɨ puaꞌa ayan tiꞌayajna nusu cai. Ayaa tu een cɨn rɨcɨ tyej ti urareꞌenyaꞌacan cɨn tyuꞌutatuiireꞌen ɨ Dioj jemi ajna xɨcajraꞌa jetze tyatɨꞌɨj huaꞌanviꞌitɨn naijmiꞌica ɨ Cɨriistuꞌu jemi.
\v 29 Aɨj nu cɨn neyan caꞌanin cɨn tiꞌimɨjhuaca, nyajta neyan tiꞌiteseꞌe nain cɨmeꞌe aꞌachu tɨ caj nyataꞌaca ɨ caꞌanijraꞌa, nyajta nain cɨn ɨ nyaj cɨn aꞌancaꞌanye.
\c 2
\s Aꞌij pu nuꞌu tyaꞌujmuaꞌate aɨme jemi ɨ maj Colosas aꞌuchaatɨme
\p
\v 1 Aɨj nu cɨn neyan raxeꞌeveꞌe sej si raamuaꞌaree nyaj aꞌamua japua tiꞌityeseꞌesin eihua. Ayaa nu cheꞌeta nyanaꞌa huaꞌa japua tiꞌityeseꞌe aɨme ɨ maj Laodicea eꞌeche, nyajta aɨme ɨ maj cai aꞌanaj naaseij nyenyeerime jetze.
\v 2 Ayaa nu een cɨn rɨcɨ mej mi huatyaujcaꞌane ɨ ru tzajtaꞌa, mej mi majta naijmiꞌi ruꞌihuaamuaꞌa muaꞌaraꞌani tyamuaꞌa naa maɨjna cɨmeꞌe ɨ mej huaujxeꞌeveꞌe rujɨɨmuaꞌa. Ayaa nu raxeꞌeveꞌe tɨ tihuaꞌacɨꞌɨti tiꞌitɨ tɨ eecan tihuaꞌutyavaꞌɨrihuaꞌan mej mi yauꞌeitaa muaꞌaraꞌani nain cɨmeꞌe, mej mi majta raamuaꞌaree tɨ ayan tiꞌayajna aɨjna tɨ ruꞌavaa ɨ Dioj jemi. Ai pu aɨn pueen aɨjna tɨ iꞌi Cɨriistuꞌu.
\p
\v 3 Naijmiꞌi ɨ tɨ ruxeꞌeveꞌe tyej ti rɨꞌɨ me tityaumuámuaꞌaree, eitzeꞌe pu titaatyavaꞌɨrihuaꞌan cai tumin tɨ ruꞌavaa tyastaꞌa. Ajta aɨn ɨ Cɨriistuꞌu, aɨ pu taataꞌasin tyej ti yauꞌeitaa taꞌaraꞌani nain cɨmeꞌe, tyej ti raamuaꞌaree tzaahuatiꞌiraꞌa cɨmeꞌe.
\p
\v 4 Ayaa nu tyajaꞌamueꞌixaateꞌe tɨ ij cai aꞌatɨ amuaacuanamuan aɨjna cɨmeꞌe ɨ nyuucari ɨ tɨ cai huataujnyátacan cɨn namuajreꞌe.
\v 5 Canu xaa yeꞌeche aꞌamua jamuan, silu ayaa nu yaꞌɨmɨ ya huaca. Capu amɨn aꞌij. Eihua nu amaꞌutamuaꞌaree yu nyatzajtaꞌa, cu xuee nyaj cu aꞌutyejvee muejmi jemi. Eecan nu huatatyamuaꞌaveꞌe nyaɨjna cɨmeꞌe nyaj neri ramuaꞌaree ɨ sej rɨꞌɨ ruꞌihuaamuaꞌa tyamuaꞌa naa, sajta tyaꞌutaviicueꞌi saɨjna cɨmeꞌe ɨ saj raꞌatzaahuateꞌe saɨjna ɨ Cɨriistuꞌu.
\s Dioj pu nuꞌu huaꞌunaijmiꞌiriꞌi ɨ Cɨriistuꞌu jemi
\p
\v 6 Aꞌini xuꞌuri autyajhuii saj ráꞌantzaahuateꞌen saɨjna tɨ aɨn pueen ɨ tɨ iꞌi tavastaraꞌa aɨjna Jesús tɨ ajta iꞌi Cɨriistuꞌu, sataꞌaj seyan rɨꞌɨ tityeetyáuuca aꞌij tɨ tiraavijteꞌe aɨjna jemi.
\v 7 Sataꞌaj seyan seijna jetze ucarute ɨ saj rájtyauuni ɨ Cɨriistuꞌu jemi sej si seyan cheꞌeta sanaꞌa tyaꞌutáviicueꞌiran tɨj cɨye tɨ ajtanáanaꞌajme tyetyaꞌɨmɨ chuaataꞌa. Xuꞌuri cɨj caj yauꞌeite ɨ Cɨriistuꞌu jemi. Sataꞌaj seyan tihuaujmuaꞌaten sej si yauꞌeitaa xaꞌaraꞌani nain cɨmeꞌe, sej si eitzeꞌe tyaꞌutaviicueꞌi saɨjna cɨmeꞌe ɨ saj raꞌatzaahuateꞌe aꞌij mej meri tyajamuaamuáꞌate. Sataꞌaj sajta huapɨꞌɨ tiraatataujtziꞌireꞌen ɨ Dioj.
\s Maj nuꞌu áꞌujcuꞌuveꞌen tɨꞌij nuꞌu cai aꞌatɨ tihuaꞌariꞌiran ɨ maj cɨn tyaꞌatzaahuateꞌe
\p
\v 8 Rɨꞌɨ xuꞌu muan, caxu huaꞌutaꞌacareꞌen mej amuaatyamueꞌitɨn seica cɨmeꞌe nyuucari ɨ maj cɨn tiꞌihueꞌitaca. Ayaa mu tiꞌijxeꞌeveꞌe mej mi meyan tyajamuaꞌariꞌiran ɨ saj cɨn tyaꞌatzaahuateꞌe maɨjna cɨmeꞌe aꞌij maj tirajtyau rujɨɨmuaꞌa, ɨ nyuucari tɨ cai tiꞌitɨj vaɨreꞌe. Aɨjna, ɨ mej tiꞌixaxaꞌa, camu aꞌij tirajtyau ɨ Cɨriistuꞌu jemi, silu ayaa muꞌu tyajaꞌamueꞌixaateꞌe maɨjna cɨmeꞌe ɨ maj rujɨɨmuaꞌa manaꞌa tirajtyau, naꞌari ɨ maj cɨn tiꞌimuaꞌata maɨjna cɨmeꞌe ɨ maj rayeꞌirajcaꞌa ɨ jajcua.
\p
\v 9 Ayaa puꞌu, aꞌini nain tɨj naꞌa Dioj een, aɨ pu huatyajturaa ɨ Cɨriistuꞌu jemi ɨ rujetze.
\v 10 Ajta Dioj pu ayan amuaanaijmiꞌiriꞌi ɨ Cɨriistuꞌu jemi sej si ruuri xaꞌaraꞌani jemin. Ajta aɨn ɨ Cɨriistuꞌu, ai pu huaꞌa muꞌucan pueen matɨj manaꞌa puaꞌamua eꞌeseijreꞌe ɨ xaijnyuꞌucari ɨ maj tieꞌijta, majta aɨme ɨ maj títyetyáꞌupuꞌu ɨ tajapua.
\p
\v 11 Sajta muan, xuꞌuri raꞌaraꞌaste saɨjna cɨmeꞌe ɨ maj raꞌantisíꞌichaca ɨ runavij. Ma sajta, caxu raꞌaraꞌaste saɨjna cɨmeꞌe ɨ mej tyetyaca meyan amuaaruu ɨ rumuajcaꞌa cɨmeꞌe silu Cɨriistuꞌu puꞌu ayan raꞌaraꞌaste muejmi jetze maꞌacan tɨꞌɨj huamɨꞌɨ ɨ curuu jetze. Aɨ pu nain amuáꞌariꞌiriꞌi ɨ saj cɨn aꞌij puaꞌa rɨjcaa tɨ ij cai cheꞌe tyajamuaataijteꞌen ɨ rujetze.
\p
\v 12 Ayaa pu tiraꞌamitejteꞌe ɨ Dioj tɨ ayan tyajamuaaruu satɨꞌɨj huamuaɨꞌɨvijhuacaꞌa. Xuee saj cu muan avaꞌujnaa ɨ Cɨriistuꞌu jamuan. Ayan cheꞌeta naꞌa tɨj saj muan aꞌitacɨɨnye ɨ mɨꞌɨchite tzajtaꞌa jamuan ɨ Cɨriistuꞌu. Ayaa pu een aɨjna cɨmeꞌe saj muan raꞌatzaahuateꞌe saɨjna cɨmeꞌe ɨ muareꞌeriꞌiraꞌa Dioj tɨ cɨn raꞌajjáj aɨjna ɨ Cɨriistuꞌu huaꞌa tzajtaꞌa ɨ mɨꞌɨchite.
\p
\v 13 Ajnaꞌɨmɨ, ayaa xu eenyaꞌa ɨ rutzajtaꞌa, saucheꞌe xu mɨꞌɨchite pueenyaꞌa ɨ Dioj jemi, saɨjna cɨmeꞌe ɨ saj autyajturaa u Dioj jemi, sajta saɨjna cɨmeꞌe ɨ maj cai meyan amuaꞌantisijchixɨ ɨ aꞌamuanavi jetze.
\p Ma ajta ijii, Dioj pu ajtahuaꞌa amuaatatɨste ɨ aꞌamuaxaijnyuꞌuca sej si aꞌutyáuu xaꞌaraꞌani ɨ Cɨriistuꞌu jamuan. Nain pu ari tyajamuaatauuniꞌiriꞌi ɨ saj cɨn autyajturaa jemin.
\v 14 Aɨ pu xaa raꞌurauu aɨjna tɨ teꞌeyuꞌusiꞌihuacaꞌa, ɨ tɨ jetzen ráꞌaxajtacaꞌa ɨ nyuucari tɨ cɨmeꞌen tyejmi jetze tiꞌitɨj cɨn tyaꞌujpuáꞌajte, ɨ tyaj cɨmeꞌen tyeꞌechaɨcaꞌa. Aɨ pu antipuaꞌariꞌiraꞌa aɨjna cɨmeꞌe tɨ ráꞌutatai ɨ curuu jetze jamuan aɨjna ɨ Cɨriistuꞌu.
\p
\v 15 Majta maɨn ɨ xaijnyuꞌucari ɨ maj tieꞌijta, majta ɨ mej títyatatí ɨ tajapua, Cɨriistuꞌu pu huajáꞌuriiriꞌi ɨ maj cɨn antyujmuaꞌareeracaꞌa. Aɨ pu ajta huaꞌutatyéviꞌiraste me eijreꞌe. Huaꞌuvaꞌajaapuajmáꞌa, pu aꞌityajraa. Huaꞌutyáamueꞌitɨ aɨjna cɨmeꞌe tɨ huamɨꞌɨ ɨ curuu jetze.
\s Maj nuꞌu raahuauuni aɨjna tɨ ɨ uteꞌe yeꞌemaꞌacan
\p
\v 16 Aɨj pu cɨn, micheꞌe macai ámuamueireꞌe maɨjna cɨmeꞌe aꞌij sej tyuꞌucuaꞌani, aꞌij sej yeꞌi tityeeyéꞌen, nusu aɨjna xɨcajraꞌa tɨ jetzen ayan nuꞌu ruxeꞌeveꞌe sej tyuꞌuyesten tɨ tyaꞌutyeꞌitén ɨ maxcɨraꞌi, naꞌari tɨ tyaꞌaraꞌasti aꞌanaj maj rusaꞌupi.
\v 17 Naijmiꞌi tɨj naꞌa tɨ ayan tiꞌen, cu xuee tɨ aꞌatɨ huaquen jetze aꞌuchaꞌacan. Ayaa pu tiꞌivaɨreꞌe tyej ti teyan raamuaꞌaree aꞌij tɨ tyajaꞌureꞌenyejsin. Ma ajta, ɨ tɨ xaa ápɨꞌɨn tɨn, ai pu aɨn pueen, aɨjna ɨ Cɨriistuꞌu.
\p
\v 18 Majta maɨn ɨ maj huaꞌaraanajchi maj rucɨɨniveꞌe eijreꞌecɨtzeꞌe, aɨme ɨ tyetyaca mu nuꞌu tihuaꞌutatyaujtziꞌireꞌe aɨme ɨ mej títyatatí ɨ tajapua. Ma sajta muan, caxu huaꞌataꞌacareꞌen meyan tyajamuaꞌariꞌiran maɨjna cɨmeꞌe ɨ sej seri raamueꞌitɨ ɨ Dioj jemi. Aɨ mu xaa rucɨɨniveꞌe maɨjna cɨmeꞌe mej mi nain tyuꞌutaxaj aꞌij mej nuꞌu tyuꞌuseij aꞌij tɨ tiꞌen ɨ tajapua. Majta eihua ahuaujtzaahuateꞌen maɨjna cɨmeꞌe ɨ huaꞌamuaꞌatziiraꞌa ɨ maj rujɨɨmuaꞌa manaꞌa tirajtyau.
\v 19 Muꞌuri ma ruurai maɨjna ɨ muꞌucan ɨ tyej jetzen aiirányajxɨꞌɨn, ɨ tyaj jetzen aratacaꞌanye tyej ti teyan cheꞌeta tyanaꞌa naimiꞌi huavaujseꞌen aꞌij tɨ Dioj titataꞌaca tɨj ajta tyújviꞌiraxɨꞌɨn ɨ cari taataꞌa jamuan.
\p
\v 20 Casiꞌi muan, Cɨriistuꞌu pu aꞌamua japua huanyúu tɨꞌɨj huamɨꞌɨ, ajta camu cheꞌe tyajamueꞌijteꞌe maɨjna cɨmeꞌe ɨ huaꞌamuaꞌatziiraꞌa ɨ seica ɨ tyetyaca. Tɨ puaꞌa ayan, ¿aꞌini een cɨn seyan cheꞌeta sanaꞌa tiꞌijrɨꞌɨre matɨj ɨ seica ɨ maj meyan tiꞌijxeꞌeveꞌe mej tyajamuaataijteꞌen maɨjna cɨmeꞌe aꞌij mej meri tiꞌijrɨꞌɨrajcaa?
\p
\v 21 Ayaa mu tyajaꞌamueꞌixaateꞌe tɨcɨn: “Caxu rajtyámuaꞌatzi. Caxu raatyajcuaꞌani. Caxu rajtyámɨjhuaꞌan.”
\v 22 Naijmiꞌi tɨj naꞌa ɨ nyuucari tɨ ayan een, naimiꞌi pu cɨmeꞌen raxa tiꞌitɨ tɨ antipuaꞌari aɨjna cɨmeꞌe ɨ maj raaxɨn.
\v 23 Ayej xaa nyaꞌu, ayaa pu tihuaꞌamityejteꞌe tɨ iꞌi xaꞌapɨꞌɨn tɨ puaꞌa aꞌatɨ raꞌaraꞌastijreꞌen aɨjna cɨmeꞌe ɨ nyuucari tɨ ayan een. Cu xuee rɨꞌɨ mu mé tityaumuámuaꞌaree, cu xuee tɨ tiꞌitiáꞌa ɨ tɨ cɨn tiꞌityavaacaꞌa ruxéꞌeviꞌiraꞌa cɨmeꞌe, cu xuee pueijtzi pu raataꞌan ɨ rujetze. Ma ajta, capu tiꞌitɨj vaɨreꞌe silu ayaa puꞌu mej mi huatauraꞌan rujɨɨmuaꞌa manaꞌa micu.
\c 3
\s Aꞌij maj nuꞌu yeꞌi huarɨni aɨme ɨ mej tyaꞌatzaahuateꞌe
\p
\v 1 Ayaa pu tiraꞌamitejteꞌe ɨ Dioj ɨ sej seri sajtahuaꞌa huataruu jamuan ɨ Cɨriistuꞌu. Aɨj pu cɨn, ayaa pu ruxeꞌeveꞌe sej seyan tyuꞌumuaꞌati saɨjna cɨmeꞌe ɨ tɨ tyejeꞌeseijreꞌe ɨ tajapua aꞌu tɨ Cɨriistuꞌu nain cɨn antyujmuaꞌaree ɨ Dioj jemi.
\p
\v 2 Sataꞌaj seyan tyuꞌumuaꞌati saɨjna cɨmeꞌe ɨ tɨ tyejeꞌeseijreꞌe ɨ tajapua. Caxu seyan sanaꞌa tyuꞌumuaꞌati saɨjna cɨmeꞌe ɨ tɨ tiꞌiseijreꞌe iiyan chaanaca japua.
\v 3 Ayaa xu huarɨni, aꞌini xuꞌuri huacuii ɨ Cɨriistuꞌu jamuan. Ajta, Cɨriistuꞌu pu amuaataꞌɨnye ɨ tajapua ɨ Dioj jemi, ɨ saj cɨn ruuri xaꞌaraꞌani jemin.
\v 4 Ajta aɨn ɨ Cɨriistuꞌu, aɨjna tyaj jetzen arátacaꞌanye tyej iꞌi ruuri, tɨꞌɨj aɨn huataseijreꞌen me eijreꞌe, aj tu ti teyan cheꞌeta tyanaꞌa huataseijreꞌen jamuan. Nain pu ayan naa tiꞌiseiraꞌa aꞌame huapɨꞌɨ mej mi naijmiꞌi náa rɨꞌɨ tiraꞌutaseij.
\s Cɨmeꞌen ɨ mej mejmiꞌi tiꞌijrɨꞌɨrajcaa, ajta ɨ tɨ jajcuacan cɨn seijreꞌe
\p
\v 5 Aɨj pu cɨn, sataꞌaj seyan raatapuaꞌajta naijmiꞌi tɨj naꞌa tɨ aꞌij puaꞌa een, tɨ aꞌamua jetze aiiráninyeiica. Caxu huaꞌa jamuan huajiti ɨ saj cai naijmiꞌi iꞌipi. Caxu cheꞌe seyan rɨjca ɨ ruxanaꞌacɨreꞌen cɨmeꞌe. Caxu sajta huatauraꞌan tɨ tyajamuaataijteꞌen ɨ aꞌamua jetze tɨ aiiráninyeiica. Caxu cheꞌe rahuauca ɨ tɨ aꞌij puaꞌa een. Sajta iꞌi, caxu tiꞌimuajchyaꞌa.
\p Aꞌatɨ tɨ ayan tiꞌimuajcheꞌe, ayaa pu cheꞌeta naꞌa een ɨ Dioj jemi tɨj aɨjna ɨ aꞌatɨ tɨ ranaꞌamicheꞌe ɨ tɨ cai Dioj pueen.
\v 6 Puꞌuri tyajaꞌureꞌenyejsin tɨ tyuꞌutyavaɨjtzi ɨ pueijtzi huaꞌa japua ɨ maj cai maɨjna cɨn raꞌaraꞌastijreꞌen ɨ Dioj. Eecan mu tirajpueitzi muaꞌajuꞌun.
\p
\v 7 Sajta muan, ayaa xu anacaican rɨjcaa nain cɨmeꞌe tɨ aꞌij puaꞌa een, satɨꞌɨj sauucheꞌe raꞌastyajcaꞌa nain tɨ ayan.
\v 8 Ari ijii, ayaa pu ruxeꞌeveꞌe sej ticauraꞌariꞌi naijmiꞌi tɨj naꞌa tɨ ayan een: Caxu nínyuꞌucacu, ni caxu rujaaxaijviꞌira, ni caxu rutyaꞌaxɨꞌɨ, ni caxu aꞌij puaꞌa éꞌenyeꞌen, ni caxu aꞌij puaꞌa tihuaꞌixaatyaꞌa huaꞌa jemi ɨ tyaɨte. Caxu sajta aꞌij puaꞌa tiꞌixajta.
\v 9 Caxu tyuꞌurixaatyaꞌa hueꞌitzi cɨmeꞌe seij ajta seij, aꞌini xuꞌuri raatapuaꞌajtacaꞌa saɨjna tɨ miꞌimaꞌacan úꞌuseijraꞌacaa ɨ rujetze, sajta nain maj uuraini aꞌij tɨ yeꞌi rɨjcaa aɨjna tɨ miꞌimaꞌacan.
\p
\v 10 Ari muan, xuꞌuri tihuaujchejte saɨjna cɨmeꞌe tɨ tiꞌireꞌen, tɨ tiꞌijájcua. Dioj pu auj amuaajajcuareꞌesin ɨ aꞌamua tzajtaꞌa sej si seyan eenyaꞌa xaꞌaraꞌani tɨj aɨjna tɨ amuaatyajtuaa iiyan chaanaca japua, sej si nain cɨn raamuaꞌati.
\p
\v 11 Ajta ɨ Dioj, capu jetzen ruxeꞌeveꞌe tɨ puaꞌa aꞌatɨ Israel jetze ajtyamaꞌacan nusu tɨ puaꞌa iꞌi Griego pueenyeꞌen. Capu ajta jetzen ruxeꞌeveꞌe tɨ puaꞌa peri raꞌaraꞌaste paɨjna cɨmeꞌe maj muaꞌantisijchacaꞌa aꞌa navi nusu pacai. Capu amɨn aꞌij tɨ puaꞌa aꞌɨmɨ peꞌemaꞌacan, naꞌari seij chuejraꞌa japua pejeꞌeche. Capu ajta aꞌij iꞌirɨni tɨ puaꞌa seica pej jemin tiꞌivaɨɨreꞌe naꞌari paj peyan tihueꞌijteꞌe ɨ seica. Ayaa puꞌu, Cɨriistuꞌu pu xaa aɨn pueen ɨ tɨ ruxeꞌeveꞌe. Nain pu cɨn raꞌaraꞌasten. Ajta aɨn pu huatyaturaasin huaꞌa tzajtaꞌa ɨ rutyaɨtestyamuaꞌa aꞌu tɨ naꞌa maj manaꞌa aꞌuchaatɨme.
\p
\v 12 Ayaa puꞌu, Dioj pu amuaꞌantihuau. Xuꞌuri huatyáuu jemin, ajta aɨ pu amueꞌixeꞌeveꞌe. Sej si seyan huarɨni aꞌij tɨ tiraavijteꞌe. Sataꞌaj ahuaujcuꞌuven seij sajta seij. Sataꞌaj rɨꞌɨ huaꞌachaɨn ɨ seica, caxu aꞌujtzaahuatyaꞌa, caxu sajta rucɨɨnivaꞌa. Sataꞌaj seyan tyaꞌutaviicueꞌi tiꞌitɨ tɨ aꞌij tyajaꞌamuaruure.
\v 13 Sataꞌaj seyan ráꞌuviicueꞌi seij sajta seij. Sataꞌaj sajta tyuꞌutauruuniꞌi tɨ puaꞌa saɨj rájaaxaijteꞌen ɨ ruxaꞌaj tevi. Aꞌini tavastaraꞌa pu ari muejmi tyuꞌutauuniꞌiriꞌi, sataꞌaj seyan cheꞌeta sanaꞌa tyuꞌutauruuniꞌi seij sajta mɨ seij.
\p
\v 14 Ajta, ɨ tɨ eitzeꞌe ruxeꞌeveꞌe cai maa nyuucari, sataꞌaj seyan huaujxeꞌeveꞌen. Ai pu aɨn pueen ɨ saj cɨn ahuaujxaxuꞌiteꞌen sej si seij sanaꞌa tyaɨtejraꞌa pueenyaꞌa xaꞌaraꞌani. Ajta, aɨ pu amuaanaijmiꞌireꞌesin.
\v 15 Cheꞌe Cɨriistuꞌu amuaatyápuaꞌariteꞌen ɨ aꞌamua tzajtaꞌa sej si ruꞌihuaamuaꞌa xaꞌaraꞌani tyamuaꞌa naa. Ayaa pu tyajamuaatajée ɨ tavastaraꞌa sej si seyan xaꞌapɨꞌɨn eenyaꞌa seij ajta mɨ seij, aꞌini naimiꞌi xu ruxaxuꞌitareꞌen. Sajta, seyan tiꞌijtaujtziꞌireꞌen ɨ Dioj.
\p
\v 16 Sataꞌaj seyan tyuꞌumuaꞌati eihua saɨjna cɨmeꞌe ɨ nyuucari tɨ cɨmeꞌen raxa ɨ Cɨriistuꞌu sej si raamuaꞌaree aꞌij sej tihuaꞌamuaꞌaten ɨ seica, aꞌij sej yeꞌi rɨꞌɨ me tityaumuámuaꞌaren sej si tihueꞌixaateꞌen nain aꞌahuaritaacan cɨmeꞌe. Sajta chuiicari xu cɨn tiraatataujtziꞌireꞌen ɨ Dioj. Ayaa xu tyuꞌutachuiica ɨ rutzajtaꞌa saɨjna cɨmeꞌe chuiicari tɨ yuꞌuxari jetze maꞌacan, nusu chuiicari tɨ Dioj jetze raxa, naꞌari tiꞌitɨ tɨ rɨꞌɨ amaꞌutámuaꞌatziiteꞌen ɨ xaijnyuꞌucaraꞌaraꞌan ɨ Dioj.
\p
\v 17 Ayaa puꞌu, satɨj sanaꞌa tiꞌixa, satɨj sanaꞌa rɨcɨ, sataꞌaj seyan huarɨni nain cɨmeꞌen nyuucajtzeꞌen ɨ tavastaraꞌa aɨjna ɨ Jesús. Sataꞌaj tiraatataujtziꞌireꞌen ɨ Dioj ɨ taꞌiyaꞌupua jamuan ɨ Cɨriistuꞌu.
\s Aꞌij maj yeꞌi huarɨni ɨ mej tyaꞌatzaahuateꞌe aɨme jemi ɨ tyaɨte
\p
\v 18 Muan, mɨ sej vɨɨche, sataꞌaj raꞌaraꞌastijreꞌen aɨme jemi aꞌamuacɨnaꞌastyamuaꞌa, aꞌini ayaa pu tiraavijteꞌe ɨ tavastaraꞌa jemi.
\v 19 Sajta muan, mɨ sej nyaɨche, sataꞌaj rɨꞌɨ tihuaꞌajcháɨɨ xaꞌaraꞌani tyamuaꞌa naa aɨme ɨ sej huajaꞌuviꞌitɨn. Caxu aꞌij tihuaꞌajeeva.
\v 20 Sajta muan, mɨ sej huataatajmuaꞌa, sataꞌaj seyan nain cɨn huaꞌaraꞌastijreꞌen matɨj manaꞌa tyajaꞌamueꞌixaateꞌen aɨme ɨ aꞌamuavaujsimuaꞌa, aꞌini aɨ pu rɨꞌɨ tiraataꞌasin aɨjna ɨ tavastaraꞌa.
\p
\v 21 Sajta muan, mɨ sej huaꞌavaujsimuaꞌa, caxu huapɨꞌɨ huaꞌajtyaꞌaxɨꞌɨ aɨme ɨ aꞌamuayaujmuaꞌa mej mi cai aꞌij puaꞌa tyáꞌujmuajtya.
\v 22 Sajta muan, mɨ sej tiꞌijtiꞌireꞌe, sataꞌaj nain cɨn raꞌaraꞌastijreꞌen aɨme ɨ mej tyajaꞌamueꞌijteꞌe. Sataꞌaj seyan tyuꞌumuareꞌen tyamuaꞌa naa satɨj sanaꞌa tiraayɨꞌɨtɨ aꞌini muan xu raꞌatzaahuateꞌe saɨjna ɨ tavastaraꞌa. Caxu raatapuaꞌajta saɨjna cɨmeꞌe tɨ cai maꞌa aꞌahuaꞌa aɨjna ɨ tɨ tyajaꞌamueꞌijteꞌe. Seica mu meyan rɨcɨ. Aɨj mu caj tiꞌimuareꞌe tɨ puaꞌa aɨn tɨ tihueꞌijteꞌe tɨ huaꞌaseijra. Ayaa muꞌu rɨjca mej mi rɨꞌɨ raataꞌan.
\p
\v 23 Ma sajta muan, satɨj sanaꞌa rɨcɨ, sataꞌaj seyan cheꞌeta sanaꞌa tyuꞌumuareꞌen tzaahuatiꞌiraꞌa cɨmeꞌe satɨj tiraatyavaɨ́reꞌencheꞌe saɨjna ɨ tavastaraꞌa. Caxu seyan sanaꞌa tyuꞌumuareꞌen mej mi amuaaseij aɨme ɨ tyetyaca.
\v 24 Xuꞌuri ramuaꞌaree tɨ aɨn tavastaraꞌa, aɨ pu ajta tyajámuaatanajchiteꞌesin ɨ tɨ rujɨmeꞌe. Aucheꞌe pu tyajamuaacɨꞌɨti aɨjna saj raamueꞌitɨ, aꞌini ai pu aɨn pueen ɨ sej tiꞌijvaɨreꞌe aɨjna ɨ tavastaraꞌa tɨ ajta iꞌi Cɨriistuꞌu.
\p
\v 25 Ma ajta, aɨn ɨ tɨ aꞌij puaꞌa rɨcɨ, ayaa pu cheꞌeta naꞌa aꞌij puaꞌa tiꞌijcɨꞌɨti. Ruxaꞌa pu tihuaꞌaruuren ɨ Dioj, capu aꞌatɨ eitzeꞌe reꞌen cai ɨ saɨj ɨ jemin.
\c 4
\p
\v 1 Sajta muan, mɨ sej tihueꞌijteꞌe, sataꞌaj tihuaꞌutapueijveꞌen tɨj naꞌa ɨ tɨ ruxeꞌeveꞌe, tɨj naꞌa tɨ ayan tiraavijteꞌe tɨ tihuaꞌacɨꞌɨti. Ayaa xu huarɨni aꞌini xuꞌuri ramuaꞌaree tɨ saɨj ajta tyajaꞌamueꞌijteꞌe muejmi. Uteꞌe pu eꞌeseijreꞌe aɨjna.
\s Cɨmeꞌen ɨ tɨ teꞌentipuaꞌari, ajta ɨ tɨ cɨn caꞌanijraꞌa huaꞌutaꞌasin
\p
\v 2 Sataꞌaj sauj rahuaviira ɨ Dioj jemi. Caxu aꞌij ruaaca. Sajta muan, saucheꞌe tiꞌijtáujtziꞌiraꞌa ɨ Dioj.
\v 3 Sajta, sataꞌaj seyan sauj rahuaviira ɨ Dioj jemi ityejmi cɨmeꞌen tɨ ij Dioj ayan taataseijrateꞌen aꞌij tɨ yeꞌi tiꞌitɨ huáruuren tyej ti teyan tihuaꞌutaꞌixaateꞌen ɨ nyuucari, tyej ti tyaɨjna huaꞌutaseijrateꞌen ɨ Cɨriistuꞌu, aɨjna tɨ ruꞌavaa ɨ Dioj jemi. Aɨj pu cɨn, nuꞌuri aiityanamiꞌi.
\v 4 Saucheꞌe xu sajta rahuaviira ɨ Dioj jemi nyeetzi cɨmeꞌen nyej ni aꞌahuauritaacan cɨn tihueꞌixaateꞌen aꞌij tɨ tiraavijteꞌe nyej neyan rɨcɨ.
\p
\v 5 Ayaa xu rɨjca muan, caxu chaꞌa sanaꞌa áꞌujhuaꞌanyeꞌen huaꞌa jamuan ɨ maj cai tyaꞌatzaahuateꞌe, silu ayaa xuꞌu rɨjca matɨj tyaɨte ɨ mej rɨꞌɨ metityaumuámuaꞌaree. Aꞌanaj tɨ naꞌa tɨ íꞌirɨni sej seyan huarɨni ɨ tɨ iꞌi xaꞌapɨꞌɨn, ayaa xuꞌu rɨjca.
\v 6 Sataꞌaj rɨꞌɨ huaꞌataꞌacareꞌen saɨjna cɨmeꞌe sej seyan tiꞌixaxaꞌa, mej mi maɨjna cɨn raamuaꞌaree ɨ saj cai rucɨɨniveꞌe. Sajta seyan tihueꞌixaateꞌen mej mi huajɨ́jxɨn, mej mi reꞌenyaꞌa muaꞌaraꞌani.
\s Cɨmeꞌen ɨ tɨ teꞌentipuaꞌari
\p
\v 7 Ajta aɨn ɨ Tíquico aɨjna ɨ taꞌihuaaraꞌa ɨ Cɨriistuꞌu jemi, aɨ pu tyajamuaataꞌixaateꞌesin nain aꞌij tɨ tiꞌinyavaɨreꞌe inyeetzi. Eihua nu raxeꞌeveꞌe nyamɨjna. Aɨ pu ari tinaavaɨ. Capu aꞌanaj aꞌɨtzee. Ajta, naijmiꞌi tu tiꞌivaɨreꞌe ɨ tavastaraꞌa jemi.
\v 8 Aɨj nu cɨn nyaraatáiti muejmi jemi tɨ ij ayan tyajamuaataꞌixaateꞌen aꞌij tɨ tiꞌitavaɨreꞌe, tɨ ij rɨꞌɨ amuaataꞌan.
\v 9 Nyajta nu jamuan raataiti nyaɨjna ɨ Onésimo, ɨ tɨ muejmi jetze ajtyamaꞌacan. Eecan tu tyajta raxeꞌeveꞌe tyaɨjna ɨ taꞌihuaaraꞌa. Capu ajta aꞌanaj aꞌɨtzee. Aɨ mu nain cɨn tyajamuaataꞌixaateꞌesin aꞌij tɨ tiꞌiruure iyaacui.
\p
\v 10 Majta maɨn ɨ taꞌihuaamuaꞌa, aɨ mu áꞌamuataujteꞌe, anacaican aɨjna ɨ Aristarco tɨ ajta ayajna aiityanamiꞌi nyaa jamuan, ajta aɨjna ɨ Marcos, tɨ iꞌi nyausajraꞌan pɨrɨcɨ aɨjna ɨ Bernabé. Xuꞌuri ramuaꞌaree aꞌij sej yeꞌi huarɨni aɨjna cɨmeꞌe, tɨ cɨmeꞌen yee tɨ puaꞌa aɨn aꞌuréꞌenyen muejmi jemi aɨjna ɨ Marcos, sataꞌaj raꞌancureꞌeviꞌitɨn tyamuaꞌa naa.
\v 11 Ajta aɨn ɨ Jesús, ɨ tɨ ajta ayan antyahuaa tɨcɨn Justo, aɨ pu ajta áꞌamuataujteꞌe. Aime ɨ maj hueica, ai muꞌu aɨn pueen ɨ mej Israel jetze ajtyamaꞌacan, ɨ mej meyan nyeetzi jetze ajtyavaɨreꞌe tyej ti teyan tihuaꞌutaꞌixaateꞌen ɨ tyaɨte cɨmeꞌen ɨ Dioj tɨ tieꞌijta iiyan chaanaca japua. Eecan mu rɨꞌɨ naataꞌa inyeetzi.
\v 12 Ajtahuaꞌa seij pu áꞌamuataujteꞌe, aɨjna ɨ Epafras. Aɨ pu ajtyamaꞌacan muejmi jetze, ajta pu ravaɨreꞌe aɨjna ɨ Jesús tɨ iꞌi Cɨriistuꞌu. Aꞌanaj tɨ naꞌa pu tíꞌityeseꞌe aɨjna cɨmeꞌe tɨ rahuavii ɨ Dioj jemi muejmi cɨmeꞌen, sej si tyaꞌutaviicueꞌi, sej si cai tiꞌitɨj cɨn autyaturan, sej si sajta raꞌaraꞌastijreꞌen nain cɨmeꞌe aꞌij tɨ tiꞌijxeꞌeveꞌe ɨ Dioj.
\p
\v 13 Ayaa nu tyajaꞌamueꞌixaateꞌe tɨ ayan tiꞌayajna. Aɨjna ɨ Epafras, eecan pu tiꞌityeseꞌe muejmi cɨmeꞌen, ajta aɨme cɨmeꞌen ɨ mej maun aꞌuchaatɨme, ajna aꞌahuaꞌa Laodicea, majta ɨ maj seij jetze eꞌeche ɨ chajtaꞌa ajna Hierápolis.
\v 14 Aɨ mu majta áꞌamuataujteꞌe, aɨjna ɨ Lucas, ɨ tɨ tihuaꞌahuaꞌatya, ɨ tyaj raxeꞌeveꞌe, ajta aɨjna ɨ Demas.
\p
\v 15 Sataꞌaj seyan huaꞌutataujteꞌen nyeetzi jetze maꞌacan aɨme ɨ taꞌihuaamuaꞌa Laodicea maj aꞌuchaatɨme, sajta saɨjna ɨ Ninfas. Sataꞌaj sajta huaꞌutataujteꞌen aɨme ɨ mej eꞌetyujsaꞌɨri aꞌu tɨ eꞌeche ɨ Ninfas.
\v 16 Satɨꞌɨj seri raꞌujijve seijna i yuꞌuxari sej si naijmiꞌi raanamua, sataꞌaj seyan tyuꞌutaite mej mi huaꞌutanamuajristeꞌen aɨme Laodicea mej eꞌeche. Ajta ɨ saɨj ɨ yuꞌuxari, Laodicea tɨ eꞌemaꞌacan, sataꞌaj sajta raꞌujijveꞌen sej si sajta naijmiꞌi raanamua.
\v 17 Sajta, sataꞌaj seyan tiraataꞌixaateꞌen saɨjna ɨ Arquipo yee: “Rɨꞌɨ papuꞌu muaa, pej pi nain cɨn raꞌaraꞌasten ɨ tavastaraꞌa tɨ tíꞌimueꞌijcateꞌe.”
\p
\v 18 Inyaa, i nyej iꞌi Pablo, aij nu jetze tyajaꞌamuataujteꞌe eijna i nyej raꞌuyuꞌuxacaꞌa nyamuajcaꞌa cɨmeꞌe. Caxu yáꞌuhuaꞌanan ɨ nyej aiityanamiꞌi. Cheꞌe aꞌij tyajaꞌamuavaɨraꞌa. Yaa puꞌu.