\id 1TH
\h 1 Tesalonicenses
\toc1 1 Tesalonicenses
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Tesalonica aꞌuchaatɨmaꞌacaa, ɨ tɨ saɨtɨ
\c 1
\s Aɨ mu huáꞌataujteꞌe ɨ maj Tesalónica eꞌetyujsaꞌɨri
\p
\v 1 Inyaa Pablo, ajta aɨjna ɨ Silvano, ajta aɨjna ɨ Timuteeyu, ayaa tu tyajaꞌamuayuꞌuseꞌe muejmi mɨ sej Tesalónica eꞌeche, saj sajta tyujsaꞌɨri ɨ Dioj jemi, sajta jemin ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu. Ayaa tu tiꞌijxeꞌeveꞌe tɨ Dioj rɨꞌɨ tyajamuaachaɨn, tɨ ajta rɨꞌɨ amuaaruuren aꞌamua tzajtaꞌa sej si rɨꞌɨ ruꞌihuaamuaꞌa xaꞌaraꞌani.
\s Cɨmeꞌen ɨ maj cɨn huaꞌutájuyeta mej mi tyaꞌantzaahuateꞌen aɨme ɨ maj Tesalónica eꞌeche
\p
\v 2-3 Aꞌanaj tɨ naꞌa tu rɨꞌɨ tirataꞌaca ɨ Dioj jemi muejmi cɨmeꞌe. Aꞌanaj tɨ naꞌa tyaj huavii ɨ Dioj, tyajta tu raꞌixaateꞌe muejmi cɨmeꞌen, aꞌini muan xu eihua tiꞌimuareꞌe saɨjna cɨmeꞌe saj raꞌastijreꞌe saɨjna ɨ tavastaraꞌa. Sajta seyan cheꞌeta sanaꞌa eihua tiꞌimuareꞌe saɨjna cɨmeꞌe saj raxeꞌeveꞌe saj huaꞌutyavaɨreꞌen ɨ seica ɨ maj eꞌeseijreꞌe ɨ Dioj jemi. Sajta muan, caxu aꞌanaj raatyaxaahuatacaꞌa ɨ saj rachuꞌeveꞌe ɨ tavastaraꞌa aɨjna ɨ Jesús tɨ ajta iꞌi Cɨriistuꞌu tɨꞌij aɨn amueꞌirajtuaani, aꞌu saj yáꞌajpueijtzicaꞌa.
\p
\v 4 Ayaa nu tyajaꞌamueꞌixaateꞌe mɨ sej taꞌihuaamuaꞌa. Tuꞌuri ramuaꞌaree tɨ Dioj aꞌamuaxeꞌeveꞌe, ajta aɨ pu amuaꞌaváꞌahuauxɨ.
\v 5 Ayaa tu een cɨn ramuaꞌaree aꞌini tyatɨꞌɨj teyan tyajamueꞌixaa ɨ nyuucari cɨmeꞌe tɨ cɨmeꞌen raxa ɨ Dioj, caxu chaꞌa sanaꞌa raanamuajriꞌi silu aɨj xu cɨn muáreꞌeriꞌiraꞌaraꞌan ɨ xaijnyuꞌucaraꞌaraꞌan ɨ Dioj. Aɨj xu cɨn tyamuaꞌa naa yauꞌeitaa xaꞌaraa ɨ rutzajtaꞌa.
\p Aɨj xu sajta cɨn rúꞌumuaꞌareeracaa tɨ ayan tiꞌayajna aɨjna ɨ nyuucari. Muan xu sajta seyan taseijracaꞌa tiꞌityaɨn tyaj tyaɨtejraꞌan pueenyaꞌa, tyajta teyan tiꞌivaɨraꞌacaa muejmi cɨmeꞌe. Ayaa tu huarɨj muejmi jemi sej si raamuaꞌaree aꞌij tɨ tiraavijteꞌe ɨ tavastaraꞌa jemi.
\p
\v 6 Sajta muan eꞌeyan xu seyan cheꞌeta sanaꞌa huarɨj tyatɨj ityan, ajta tɨj aɨn huarɨj ɨ tavastaraꞌa, aꞌini eihua xu rajpueijtzicaꞌa. Capu amɨn aꞌij. Saucheꞌe xu huataujtyamuaꞌave, aꞌini aɨn xaijnyuꞌucaraꞌaraꞌan ɨ Dioj, aɨ pu caꞌanijraꞌa amuaataꞌa ɨ aꞌamua tzajtaꞌa.
\v 7 Aɨj mu cɨn, naimiꞌi aɨme ɨ maj eꞌetyujsaꞌɨri, aꞌachu maj manaꞌa puaꞌamua ɨ maj maun eꞌemaꞌacan u Macedonia, majta ɨ maj maun eꞌemaꞌacan u Acaya, aɨ mu rɨꞌɨ tyajaꞌamuaseij muejmi aꞌij sej rɨcɨ.
\v 8 Capu au naꞌa aꞌanamuajreꞌe muejmi jemi ɨ nyuucari tɨ cɨmeꞌen raxa ɨ tavastaraꞌa, silu nainjapua pu namuajreꞌe aɨjna cɨmeꞌen sej seri raꞌastijreꞌe ɨ Dioj. Aɨj pu cɨn cai cheꞌe ruxeꞌeveꞌe tej tiꞌitɨ huataxaj taɨjna cɨmeꞌe.
\p
\v 9 Ee xaa nyaꞌu, seica mu tiꞌitaꞌixaateꞌe aꞌij tyaj tityaꞌutyajhuii tej tyuꞌumuareꞌen aꞌamua tzajtaꞌa. Sajta nuꞌu, satɨꞌɨj ráꞌantzaahua ɨ Dioj, sajta nuꞌu huajaꞌuhuaꞌaxɨ saɨme ɨ maj cai Dioosi pueen. Xuꞌuri nuꞌu ravaɨreꞌe saɨjna tɨ iꞌi Dioj tzaahuatiꞌiraꞌa cɨmeꞌe, tɨ ajta ruuri rusen cɨmeꞌe.
\v 10 Xuꞌuri nuꞌu ijii rachuꞌeveꞌe saɨjna tɨ yaujraꞌan pueen ɨ Dioj tɨ aɨn ajtahuaꞌa u eꞌicaanyen u tajapua, aɨjna Dioj tɨ raatarujte huaꞌa tzajtaꞌa ɨ mɨꞌɨchite. Ai pu aɨn pueen ɨ Jesús. Aɨ pu tuꞌirajtuaasin tɨꞌij cai pueijtzi taacɨꞌɨti tɨ Dioj huaꞌutaꞌasin aɨme ɨ maj yan chaanaca japua huachaatɨme.
\c 2
\s Aꞌij tɨ tyajaꞌumuáre aɨjna ɨ Pablo huaꞌa jemi
\p
\v 1 Sajta muan, nyeꞌihuaamuaꞌa, tyamuaꞌa xu ramuaꞌaree tɨ naa titaavaɨ tyatɨꞌɨj amuaamuaaracaꞌa.
\v 2 Anacai mu xaa aꞌij puaꞌa taaruu aɨme ɨ mej Filipos eꞌeche. Eihua tu rajpueijtzicaꞌa taujna. Xuꞌuri ramuaꞌaree tɨ ayan tiꞌayajna. Capu amɨn aꞌij. Aꞌini Dioj pu caꞌanijraꞌa taataꞌa, aɨj tu cɨn tyauj áꞌatacaꞌanyajcaꞌa tej teyan tyajamuaataꞌixaateꞌen ɨ nyuucari tɨ cɨn Dioj amueꞌiratuaasin. Eihua mu taatamuáreꞌeriste xaa nyaꞌu.
\p
\v 3 Catu taɨjna cɨn autyajhuii tej teyan tyajamuaataꞌixaateꞌen hueꞌitzi cɨmeꞌe, silu tyan tu teyan ámuaatáꞌixaate tyaɨjna cɨmeꞌe tyaj huataujnyátacan cɨn tiꞌixaxaꞌa. Catu tyajta tiꞌityeseꞌe tyaj amuaacuanamuan.
\p
\v 4 Me tyajta ityan, ayaa tu tyajaꞌamueꞌixaateꞌe aꞌini ayaa pu tiraꞌaranajchacaꞌa ɨ Dioj tɨ aɨjna cɨn taꞌantihuau tej ti amueꞌixaateꞌen ɨ nyuucari tɨ Dioj cɨn amueꞌiratuaasin. Catu teyan tiꞌityeseꞌe tej rɨꞌɨ tihuaꞌutaꞌan ɨ tyaɨte, silu tej rɨꞌɨ tiraataꞌan ɨ Dioj tɨ ruꞌumuaꞌaree aꞌij tej tyáꞌuhuátamuaꞌatzɨ ɨ tatzajtaꞌa.
\p
\v 5 Xuꞌuri ramuaꞌaree tyaj cai aꞌanaj teyan tyajamuaataꞌixa tyanaꞌa tyaɨjna cɨmeꞌe ɨ nyuucari tɨ naa aꞌamuanamuajristeꞌe. Catu tyajta teyan taseijratacaꞌa tyaj tiꞌitɨj ancuraꞌan. Dioj pu ruꞌumuaꞌaree tej teyan rɨcɨ tzaahuatiꞌiraꞌa cɨmeꞌe.
\v 6 Catu aꞌanaj teyan raahuau muejmi jemi sej rɨꞌɨ titaataꞌan. Catu tyajta teyan raahuau seica jemi. Rɨꞌɨríistaca pu tej teyan tyajamuaataꞌijteꞌencheꞌe caꞌanyejri cɨmeꞌe aɨjna cɨmeꞌe tɨ Cɨriistuꞌu taꞌantihuau.
\p
\v 7 Me tyajta ityan, catu teyan huarɨj, silu rɨꞌɨ tu tiꞌitítachaɨcaꞌa muejmi jemi. Ayaa tu cheꞌeta tyanaꞌa rɨꞌɨ tyajamuajchaɨcaꞌa tɨj aɨn ɨ huaꞌanaana ɨ tɨꞌɨrii rɨꞌɨ tihuaꞌajchaɨ.
\v 8 Eecan tu aꞌamuaxeꞌevaꞌacaꞌa. Aɨj pu cɨn, ayan taꞌaranajchacaꞌa tej teyan tyajamuaataꞌixaateꞌen ɨ nyuucari tɨ Dioj cɨn amueꞌiratuaasin. Tyajta teyan áꞌatacaꞌanyajcaꞌa tej tyajamuaataꞌan nain tɨj tyanaꞌa tej tíꞌijchaɨcaꞌa, ayaa tu tyajta áꞌatacaꞌanyajcaꞌa tej huacuiꞌini muejmi jetze maꞌacan. Ayaa tu tiꞌimuaꞌatzɨjcaꞌa aꞌini eecan tu áꞌatacaꞌanye muejmi jemi.
\v 9 Tij sacai sauj ramuaꞌaree, taꞌihuaamuaꞌa, tej eihua tyuꞌumuarej, tyajta tej rajpueijtzicaꞌa. Ee xaa, tetyuꞌumuare tujcaꞌari tzajtaꞌa, tyajta tɨcaꞌari tzajtaꞌa tej ti cai aꞌatɨ huatamuáreꞌeristeꞌen tej amuaataꞌixaateꞌen ɨ nyuucari cɨmeꞌe tɨ cɨn Dioj amueꞌiratuaasin.
\p
\v 10 Muan xu taaseij aꞌij tej tiꞌitítachaɨcaꞌa muejmi jemi, mɨ sej tyaꞌatzaahuateꞌe. Nain tu cɨn teyan huarɨj aꞌij tɨ tiraavijteꞌe ɨ Dioj jemi. Catu aꞌanaj aꞌatɨ aꞌij puaꞌa huáruu. Catu tyajta tiꞌitɨj cɨn autyajturaa. Dioj pu ajta ramuaꞌaree tɨ ayan tiꞌayajna.
\v 11 Muan xu ramuaꞌaree aꞌij tej rɨꞌɨ tiꞌitítachaɨcaꞌa muejmi jemi naijmiꞌica aꞌachu puaꞌamua. Ayaa tu cheꞌeta tyanaꞌa tyajamueꞌitiiriꞌi seij tyajta seij tɨj tihuéꞌitii ɨ huaꞌataata aɨme ɨ tɨꞌɨrii.
\v 12 Aɨj tu cɨn, caꞌanijraꞌa amuaataꞌa sej si seyan rɨꞌɨ titetyújchaꞌɨ aꞌij tɨ tiraavijteꞌe ɨ Dioj jemi. Tyajta teyan huarɨj sej si huatyaujcaꞌanyen ɨ rutzajtaꞌa. Eecan tu áꞌamuajee sej si seyan huarɨni aꞌij tɨ tiraavijteꞌe ɨ Dioj jemi, aꞌini ai pu aɨn pueen ɨ tɨ áꞌamuajee sej si saun aꞌaraꞌasti aꞌu tɨ aɨn tyejeꞌijta ɨ Dioj, sej si sajta saun yancuraꞌan ɨ saj cɨn naa seiraꞌa xaꞌajuꞌun para rusen cɨmeꞌe.
\p
\v 13 Tyan tu xaa tyajamueꞌixaa ɨ nyuucari tɨ cɨmeꞌen raxa ɨ Dioj. Sajta muan, satɨꞌɨj raanamuajriꞌi, caxu saɨjna jetze raꞌancuraꞌa ɨ mej chaꞌa manaꞌa tiꞌixaxaꞌa ɨ tyetyaca silu ayaa xu tiyaúchueereꞌe tɨ Dioj jetze maꞌacan ɨ nyuucari. Ee xaa nyaꞌu, aɨj pu jetze maꞌacan, ajta aɨ pu rɨꞌɨ áꞌamuaruuren ɨ aꞌamua tzajtaꞌa, mɨ sej tyaꞌatzaahuateꞌe. Aɨj tu cɨn aꞌanaj tɨ naꞌa tu tíꞌijtaujtziꞌireꞌe ɨ Dioj jemi taɨjna cɨmeꞌe sej seyan raꞌancuraꞌa ɨ nyuucari.
\p
\v 14 Sajta muan, taꞌihuaamuaꞌa, ayaa xu huarɨj, cu xuee saj huáɨjchucaꞌa aɨme ɨ maj Judeeya aꞌuchaatɨme, ɨ maj majta eꞌetyujsaꞌɨri teyujtaꞌa mej mi raatyaanajche ɨ Dioj, aꞌini aɨ mu majta ajtyamaꞌacan ɨ Cɨriistuꞌu jetze. Ayaa xu cheꞌeta sanaꞌa tirajpueíjtzicaꞌa aɨme jemi ɨ ruxaꞌa tyaɨte aꞌij mej tirajpueíjtzicaꞌa aɨme ɨ maj Judeeya eꞌemaꞌacan.
\v 15 Majta aɨme ɨ seica, ɨ maj Israel jetze ajtyamaꞌacan, aɨ mu raajeꞌica ɨ tavastaraꞌa tɨ ajta iꞌi Jesús. Majta huaꞌucuii aɨme ɨ maj Dioj jetze maꞌacan tiꞌixaxaꞌataꞌa. Majta taatamuári ityejmi. Eꞌij mu puaꞌa tirataꞌaca ɨ Dioj jemi. Majta mu huaꞌajchaɨreꞌe naijmiꞌica ɨ tyaɨte ɨ maj yan chaanaca japua huachaatɨme.
\v 16 Ayaa mu een cɨn meyan rɨcɨ mej mi taꞌijmɨjra tej ti cai cheꞌe huaꞌutaꞌixaateꞌen ɨ nyuucari tɨ Dioj jetze maꞌacan aɨme ɨ maj Israel jetze ajtyamaꞌacan. Camu aꞌatzu raxeꞌeveꞌe tɨ Dioj hueꞌirajtuaani ɨ huaꞌaxaꞌa tyaɨte. Ayaa mu maɨjna cɨn huarɨn, aɨ mu ramueꞌitɨn tɨ Dioj pueijtzi huaꞌutaꞌan para rusen cɨmeꞌe aɨjna cɨmeꞌe mej eihua huapɨꞌɨ autyajturaa jemin ɨ Dioj. Puꞌuri xaa ajna tyajaꞌureꞌenyejsin tɨ Dioj pueijtzi huaꞌutaꞌasin.
\s Pablo pu ayan tiꞌijxeꞌeveꞌe tɨ ajtahuaꞌa huaꞌumuaare
\p
\v 17 Ayaa nu tyajaꞌamueꞌixaateꞌe. Tyatɨꞌɨj caꞌanejri cɨn ajtacɨ́j, catu má amuuhuáꞌaxɨ, silu eihua tu tiꞌimuaꞌatzɨjcaꞌa muejmi cɨmeꞌen. Capu aꞌatzu aꞌatyeeviꞌica tyatɨꞌɨj cai cheꞌe huaapuaꞌa tej teyan yaꞌɨmɨ huateꞌen. Aɨj tu cɨn eihua huapɨꞌɨ tyuꞌutése tej ti aꞌatanyén muejmi jemi.
\v 18 Eihua tu teyan tiꞌijxeꞌevaꞌacaꞌa tej taun aꞌatanyén aꞌu sej eꞌeche. Ee xaa nyaꞌu, ayaa nu tiꞌijxeꞌevaꞌacaꞌa inyaa, i nyaj iꞌi Pablo. Canu aꞌanaj cai tiꞌijxeꞌevaꞌacaꞌa. Ma ajta aɨn ɨ Satanás, aɨ pu naꞌantánaamɨɨ.
\p
\v 19 Nyajta nu neyan tyajaꞌamueꞌixaateꞌe tiꞌitɨ ɨ nyaj cɨmeꞌen tiꞌijchuꞌeveꞌe, ɨ nyaj cɨmeꞌen nyetyamuaꞌaveꞌe, ɨ nyaj cɨmeꞌen ahuantzaahuateꞌen nyaɨjna cɨmeꞌe nyej tiꞌimueꞌitɨn nyajna xɨcajraꞌan jetze tɨꞌɨj ajtahuaꞌa huataseijreꞌen ɨ tavastaraꞌa tɨ ajta iꞌi Jesús. ¿Ni sacai muan saɨn pueen?
\v 20 Ee xaa nyaꞌu, muan xu saɨn pueen, ɨ nyaj cɨmeꞌen ahuantzaahuateꞌesin, ɨ nyaj cɨmeꞌen huatantyamuaꞌaveꞌesin.
\c 3
\s Aꞌij mej tirajpueiitzi muaꞌajuꞌun
\p
\v 1 Tyatɨꞌɨj cai cheꞌe teꞌeviicueꞌi tyaj cai ramuaꞌaree aꞌij tɨ tyajaꞌamuavaɨraꞌacaa, ayaa pu titaꞌamityejtyaꞌacaa ityejmi tɨ ayan eitzeꞌe tiraavijteꞌe tej teyan tyajɨɨmuaꞌa huatyaturan teyujna Atena.
\v 2-3 Aɨj tu cɨn, tyaɨn Timuteeyu tyuꞌutaitiꞌiriꞌi tɨ u aꞌatanyén muejmi jemi. Aɨjna ɨ Timuteeyu, ai pu aɨn pueen ɨ taꞌihuaaraꞌa, ajta Dioj pu raꞌavaꞌahuau tɨ ij tajamuan áꞌuchaꞌacanyeꞌen tej tihuaꞌutaꞌixaateꞌen ɨ nyuucari tɨ cɨmeꞌen raxa aꞌij tɨ huarɨj ɨ Cɨriistuꞌu. Ayaa tu een cɨn tiraataitiꞌiriꞌi tɨ ij aɨn Timuteeyu caꞌanijraꞌa amuaataꞌan sej si huatyaujcaꞌanyen ɨ rutzajtaꞌa, tɨ ij cai seij raataxaahuata aɨjna cɨmeꞌe tɨ eihua tirajpueiitzi ijii. Xuꞌuri tyamuaꞌa ramuaꞌaree tɨ ari tiraaxaꞌapɨꞌɨntariꞌiriꞌi tej teyan tirajpueiitzi taꞌaraꞌani.
\p
\v 4 Ee xaa nyaꞌu, tyatɨꞌɨj taun aꞌutyáꞌacaa muejmi jemi, ayaa tu anacaican tyajamueꞌixaa tej teyan tirajpueiitzi taꞌaraꞌanícheꞌe tyaɨjna cɨmeꞌe mej aꞌij puaꞌa taruuréncheꞌe. Ajta ayan tyajaꞌureꞌenye. Aɨj xu seri muaꞌaree.
\v 5 Nyajta nu tiraatányuuche nyej ni raamuaꞌaree aꞌij tɨ tyajaꞌamuavaɨraꞌacaa, tɨ puaꞌa sauj tyaꞌatzaahuatyaꞌacaa. Canu cheꞌe téꞌeviicueꞌiracaa, aꞌini nuꞌuri tiꞌitzɨɨnyaꞌacaa nyaɨjna cɨmeꞌe tɨ aɨn tiyaaruꞌu amuaatamuáreꞌeristeꞌen muejmi jemi sej si cai cheꞌe tyaꞌantzaahuateꞌen, tɨꞌij cai cheꞌe tiꞌitɨ vaɨraꞌa aꞌaraꞌani naijmiꞌi ɨ tyaj cɨn tyuꞌumuarej muejmi jemi.
\p
\v 6 Aru aɨn ɨ Timuteeyu, puꞌuri muejmi jemi u aꞌarajraa. Tiꞌitaꞌixaateꞌe aɨjna ɨ tyaj cɨn tatyamuaꞌaveꞌe sej sauj tyaꞌatzaahuateꞌe, sajta huaujxeꞌeveꞌe seij sajta seij. Sajta nuꞌu sauj rutyamuaꞌaveꞌe satɨꞌɨjta taꞌutamuaꞌaree ityejmi. Muan xu nuꞌu raxeꞌeveꞌe saj taaseij. Tyajta ityan, ayaa tu cheꞌeta tyanaꞌa huapɨꞌɨ tiꞌijxeꞌeveꞌe tej amuaaseij.
\p
\v 7 Ayaa nu tyajaꞌamueꞌixaateꞌe, muan taꞌihuaamuaꞌa. Eecan pu rɨꞌɨ taataꞌa tyatɨꞌɨj raamuaꞌareeriꞌi saj sauj seyan tyaꞌatzaahuateꞌe. Puꞌuri xaa rɨꞌɨri tej tyaꞌutaviicueꞌi nain cɨmeꞌe ɨ tyaj cɨn rajpueijtzi, ajta ɨ tyaj cɨn taxaamɨsteꞌe.
\v 8 Aꞌini muan xu sauj teꞌeviicueꞌi sej sauj raꞌatzaahuateꞌe ɨ tavastaraꞌa, puꞌuri ajtahuaꞌa íꞌirɨni nyaj rɨꞌɨ me tyuꞌutyavaaca.
\p
\v 9 Aɨj tu cɨn eecan huapɨꞌɨ tíꞌijtaujtziꞌireꞌe ɨ Dioj muejmi cɨmeꞌe tyaɨjna cɨmeꞌe tej eihua huapɨꞌɨ tatyamuaꞌaveꞌe ɨ muejmi jemi aꞌini muan xu rɨꞌɨ titataꞌaca.
\v 10 Nain tujcaꞌari tzajtaꞌa, ajta nain tɨcaꞌari tzajtaꞌa caꞌanin tu cɨn rahuavii tɨ Dioj ayan tataꞌacareꞌen tej ti tyajtahuaꞌa amuaaseij, tyajta tyajamuaatavaɨreꞌen tyaj raanaijmiꞌireꞌen tiꞌitɨ tɨ naꞌa tɨ tyajamuaꞌaturaateꞌe aɨjna cɨmeꞌe saj raꞌatzaahuateꞌe ɨ tavastaraꞌa.
\p
\v 11 Ajta aɨn ɨ Dioj ɨ tyaj rajyaꞌupua, ajta aɨn ɨ tavastaraꞌa tɨ ajta iꞌi Jesús, micheꞌe maɨn taataꞌacareꞌen tej ti taun aꞌatenyen muejmi jemi.
\v 12 Cheꞌe aɨn tavastaraꞌa ruxéꞌeviꞌiraꞌa cɨn amuaataꞌan sej si eihua huapɨꞌɨ huaujxeꞌeveꞌen seij sajta seij, sej si sajta seyan cheꞌeta sanaꞌa tihuaꞌuxeꞌeveꞌen naijmiꞌica ɨ tyaɨte aꞌachu puaꞌamua ɨ aꞌamuaxáꞌa tyaɨte tyatɨj ityan tyajaꞌamuaxeꞌeveꞌe.
\v 13 Cheꞌe ajta aɨn amuaataꞌan ɨ caꞌanijraꞌa ɨ aꞌamuatzajtaꞌa sej si cai tiꞌitɨj cɨn autyaturan ɨ Dioj jemi ɨ tej rajyaꞌupua, sej si sajta seyan urareꞌenyejmeꞌeni ɨ aꞌamua tzajtaꞌa ajna xɨcajraꞌan jetze tɨ ajtahuaꞌa huataseijreꞌen aɨjna ɨ tavastaraꞌa tɨ ajta iꞌi Jesús, jamuan naijmiꞌi ɨ mej tiꞌivaɨreꞌe u tajapua.
\c 4
\s Aꞌij mej yeꞌi huarɨni mej mi rɨꞌɨ tiraataꞌan ɨ Dioj
\p
\v 1 Ajta ijii, taꞌihuaamuaꞌa, tuꞌuri teyan tyajamuaataꞌixaa aꞌij sej yeꞌi titetyújchaꞌɨ sej si rɨꞌɨ tiraataꞌan ɨ Dioj. Ee xaa, xuꞌuri seyan rɨꞌɨ titetyújchaꞌɨ. Me tyajta ityan, ayaa tu tyajaꞌamuahuavii Jesús jetze maꞌacan sej si seyan eitzeꞌe rɨꞌɨ titetyújchaꞌɨ. Tyan tu caꞌanijraꞌa amuaataꞌasin sej si eitzeꞌe rɨꞌɨ titetyújchaꞌɨ tɨj naꞌa tɨ yu aucaꞌitɨ aꞌame.
\p
\v 2 Xuꞌuri xaa ramuaꞌaree tiꞌitɨ nyuucariraꞌan pueen ɨ tyaj cɨn teri amueꞌixaa Jesús jetze maꞌacan.
\v 3 Ayaa pu tiꞌijxeꞌeveꞌe ɨ Dioj sej si uraréꞌenyeꞌen xaꞌaraꞌani, ajta nuꞌu saj raatapuaꞌajta saj aꞌatɨ jamuan tiꞌixanaꞌacɨraꞌa.
\v 4 Ayaa pu tiꞌijxeꞌeveꞌe sej seyan tiꞌijmuaꞌareera sej seyan raaruuren ɨ rutevi sej si seyan huarɨni aꞌij tɨ tiraavijteꞌe tɨ puaꞌa aꞌatɨ huatyényaɨche. Cheꞌe aɨn ayan ratyeviꞌitɨnyeꞌen mej mi raaseij ɨ seica tɨ xaꞌapɨꞌɨn huarɨj nain cɨmeꞌe.
\p
\v 5 Cheꞌe aɨn cai chaꞌa naꞌa ratyeviꞌitɨnyeꞌen aꞌij mej rɨcɨ aɨme ɨ tyaɨtejraꞌa ɨ maj cai raꞌastijreꞌe ɨ Dioj, matɨj manaꞌa puaꞌamua yan huachaatɨme iyan chaanaca japua, ɨ mej chaꞌa manaꞌa nyejnyaꞌɨche aꞌij tɨ tihuaꞌamitejteꞌe rumuaꞌatziiraꞌa cɨmeꞌe tɨ aꞌij puaꞌa een.
\v 6 Ajta nuꞌu ayan tyuꞌujxeꞌeveꞌe tɨ aꞌatɨ cai aꞌanaj autyaturan aɨjna cɨmeꞌe tɨ aꞌij puaꞌa raaruuren ɨ ruxaꞌa tevi aɨjna cɨmeꞌe tɨ raxanaꞌacɨreꞌen jamuan ɨraꞌaraꞌan ɨ ruꞌihuaaraꞌa.
\p Ayaa puꞌu, aꞌini Dioj pu pueijtzi raataꞌasin aɨjna tɨ ayan rɨni. Tuꞌuri tyejmiꞌi teyan tyajamuaataꞌixaa.
\v 7 Capu ayan titaatajée ɨ Dioj tej ti teyan tyuꞌuxanaꞌacɨreꞌen silu aɨ pu ayan taꞌantihuau tej ti urareꞌenyejmeꞌeni ɨ tatzajtaꞌa.
\v 8 Aɨj pu cɨn, tɨ puaꞌa aꞌatɨ cai raꞌatzaahuateꞌe aꞌij tej tyajaꞌamueꞌixaateꞌe tyaɨjna cɨmeꞌe, aɨ pu cai má rúuhuaꞌaxɨjsin ɨ nyuucari tɨ tyetyaca jemi eꞌemaꞌacan. Capu aꞌatzu, silu aɨ pu xaa má rúuhuaꞌaxɨjsin ɨ Dioj tɨ ruxaijnyuꞌuca huataityacaꞌa tɨ muejmi jemi huatyaturan.
\p
\v 9 Capu aꞌatzu ruxeꞌeveꞌe nyej neyan tyajaꞌamuayuꞌuseꞌe aɨjna cɨmeꞌe sej huaujxeꞌeveꞌen sej si tyamuaꞌa naa tyuꞌurihuaamuaꞌatan. Dioj pu ari ramuaꞌaree sej seyan huaujxeꞌeveꞌen.
\v 10 Ee xaa, ayej tiꞌayajna sej huaꞌaxeꞌeveꞌe ɨ ruꞌihuaamuaꞌa naijmiꞌica aꞌachu maj puaꞌamua aꞌu maj aꞌuchaatɨme tɨj naꞌa au tɨ huatacáꞌa u Macedonia. Me tyajta ityan, ayaa tuꞌu caꞌanijraꞌa amuaataꞌasin sej si sauj eitzeꞌe huaujxeꞌeveꞌen.
\v 11-12 Tyan tu tyajta teyan tyajaꞌamueijcateꞌe sej si rɨꞌɨ titetyujchaꞌɨ tɨ ij cai tiꞌitɨ áꞌamuajaaxaijteꞌe, sej si antyujmuaꞌaréera saɨjna cɨmeꞌe aꞌij tɨ tiraacɨ́ꞌɨ seij ajta seij. Ajta iꞌi, cheꞌe aꞌatɨ tyuꞌumuareꞌen ɨ rumuareꞌeriꞌiraꞌa cɨmeꞌe seij ajta seij aꞌij tɨ tiruꞌumuaꞌaree. Ayaa tu anacaican tyajamueijca mej mi rɨꞌɨ tyajamuaaseij aɨme ɨ maj tyaꞌastijreꞌe ɨ tavastaraꞌa jemi, ajta tɨ ij cai tiꞌitɨ tyajamuáꞌaturaatyaꞌa.
\s Tɨꞌɨj ajtahuaꞌa yan huataseijreꞌen ɨ tavastaraꞌa
\p
\v 13 Cɨmeꞌen aɨme ɨ mej meri huacuii, ayaa mu seijreꞌe cu xuee maj cújcuꞌutzu. Ayaa tu tiꞌijxeꞌeveꞌe sej raamuaꞌaree tzaahuatiꞌiraꞌa cɨmeꞌe sej si cai cheꞌe ruxaamɨstyaꞌa matɨj aɨme ɨ seica ɨ maj cai rachuꞌeveꞌe ɨ tavastaraꞌa.
\v 14 Ayaa tu tyaꞌatzaahuateꞌe ityan: tɨꞌɨjta Jesús huamɨꞌɨ, aɨ pu tɨ ajtahuaꞌa huatarú. Aɨj tu cɨn teyan tyajta tyaꞌatzaahuateꞌe tɨ aɨn Dioj ajtahuaꞌa huaꞌaraviꞌitɨn jamuan ɨ Cɨriistuꞌu aɨme ɨ mej meri huacuii aɨjna cɨmeꞌe ɨ maj majta meri raꞌaraꞌastijre maɨjna ɨ Jesús.
\p
\v 15 Ayaa tu tyajaꞌamueꞌixaateꞌe ɨ tavastaraꞌa jetze maꞌacan tɨ ayan eenyaꞌa aꞌaraꞌani. Catu anáatyáꞌa taꞌajuꞌun ityan i tej teyan ruuri seijreꞌe yan chaanaca japua tɨꞌɨj amɨn ajtahuaꞌa huataseijreꞌen ɨ tavastaraꞌa silu aɨme ɨ mej meri huacuii, aɨ mu xaa anáatyáꞌa muaꞌajuꞌun.
\v 16 Tɨꞌɨj Dioj raataxajta ɨ nyuucari tɨ cɨn tihuaꞌutaijteꞌen, au pu eꞌicanamuaaraꞌa aꞌame tɨ aꞌatɨ ucajijhua ɨ trompeeta jetze aujna Dioj tɨ eꞌeseijreꞌe. Ajta u eꞌicájijhua aɨjna tɨ jemin tiꞌivaɨreꞌe. Aj pu xaa i tavastaraꞌa u eꞌicanyejsin u uteꞌe.
\p Majta maɨn ɨ maj huacuii, ɨ maj anáatyáꞌa raꞌaraꞌastijre, aɨ mu aꞌitajuꞌun aꞌu maj aꞌavaꞌanamiꞌihuajmaꞌacaa.
\v 17 Tyajta eꞌeyan ityan i tej tauj ruuri, ɨ tej yan seijreꞌe ɨ chaanaca japua, aɨ pu ajta taꞌaviꞌitɨn ɨ jaitɨri jetze huaꞌa jamuan ɨ maj mauchan huatarú. Ayaa tu seiraꞌa taꞌajuꞌun jamuan ɨ tavastaraꞌa para rusen cɨmeꞌe.
\v 18 Aɨj xu cɨn, rɨꞌɨ xu tyuꞌutauraꞌan muan rujɨɨmuaꞌa saɨjna cɨmeꞌe i nyuucari i nyaj áꞌamueꞌixaateꞌe.
\c 5
\s Maj nuꞌu huaujcaten tɨ puaꞌa ayaa uvéꞌenyen ɨ tavastaraꞌa
\p
\v 1 Taꞌihuaamuaꞌa, capu aꞌatzu ruxeꞌeveꞌe tej tyaɨjna cɨn tyajaꞌamuayuꞌuseꞌe aꞌatzaj tɨ puaꞌa ya uveꞌenyejsin ɨ tavastaraꞌa, tiꞌitɨ tɨ xɨcajraꞌan jetze ajtahuaꞌa huataseijreꞌesin.
\v 2 Xuꞌuri ramuaꞌaree tyamuaꞌa naa tɨ caꞌanacan tyajaꞌureꞌenyejsin. Ayaa pu huataseijreꞌesin tɨj nahuaꞌari tɨ utyaruti tɨcaꞌari tzajtaꞌa aꞌu tɨ tyajaꞌanahuaꞌan.
\p
\v 3 Majta maɨn ɨ tyaɨte, ayaa mu tiꞌixaata muaꞌajuꞌun tɨcɨn: “Capu cheꞌe tiꞌitɨ aꞌij rɨcɨ. Puꞌuri tyuꞌupuáꞌarajraa.” Tɨ puaꞌa meri meyan tiꞌixajta, aj pu i ajna tyajaꞌureꞌenyejsin ɨ xɨcajraꞌan tɨ jetzen huaꞌantipuaꞌariteꞌesin. Ayaa pu seiraꞌa aꞌame tɨj jɨitaꞌa tɨ raꞌutacuiꞌine. Capu huatarɨꞌɨristari maj huatyaujnan mej mi cai tirajpueiitzi muaꞌaraꞌani.
\p
\v 4 Ma sajta muan, taꞌihuaamuaꞌa, caxu cheꞌe tɨcaꞌamisteꞌe seijreꞌe. Aɨj pu cɨn, cai cheꞌe muejmi japua cájveti ajna xɨcajraꞌan jetze. Capu ayan tyajaꞌureꞌenyejsin muejmi jemi tɨj ɨ nahuaꞌari tɨ aun aꞌutyaruti tɨcaꞌari tzajtaꞌa.
\v 5 Capu aꞌatzu xaa nyaꞌu, aꞌini muan xu huaꞌa jetze ajtyamaꞌacan aɨme jemi ɨ maj ajna eꞌeseijreꞌe aꞌu tɨ áꞌunyeeriꞌi ɨ Dioj jemi. Muan xu huaꞌa jetze ajtyamaꞌacan aɨme jemi ɨ maj áꞌujhuaꞌan tujcaꞌari tzajtaꞌa. Aɨj pu cɨn, ayan tiraavijteꞌe tej teyan huarɨni.
\p
\v 6 Aɨj tu cɨn cai cheꞌe teyan rɨjcaa taꞌajuꞌun matɨj ɨ seica ɨ mej meyan seijreꞌe. Cu xuee maj cújcuꞌutzu. Ticheꞌe teyan eenyaꞌa taꞌaraꞌani tej atanyéjnyeꞌeri, tej rɨꞌɨ me tityaumuámuaꞌaree.
\v 7 Majta maɨn ɨ maj cuꞌutzu, ayaa mu tíꞌityacuꞌutzu tɨcaꞌamisteꞌe, majta maɨn ɨ maj rutaꞌarujveꞌe, aɨ mu rutaꞌarujveꞌe tɨꞌɨj auj huatɨcaꞌa.
\v 8 Me tyajta ityan, aꞌini tyan tu huaꞌa jetze ajtyamaꞌacan aɨme jemi ɨ mej nyeeristeꞌe áꞌujhuaꞌan ɨ Dioj jemi, ticheꞌe teyan rɨꞌɨ tityajáꞌujhuaꞌaneꞌen.
\p Ticheꞌe tyajta ráꞌantzaahuateꞌen ɨ tavastaraꞌa. Tɨ puaꞌa teyan huarɨni, aɨ pu tavastaraꞌa tajapua nyuuni. Ticheꞌe tyajta huátaxeꞌeveꞌen seij tyajta seij. Tɨ puaꞌa teyan huarɨni, ayaa pu xaa huatarɨꞌɨristari tej teyan tiꞌijjchuꞌeveꞌe tɨ Dioj tuꞌirajtuaani.
\p
\v 9 Ayaa pu een aꞌini capu Dioj ayan tiraaxaꞌapɨꞌɨntarej ityejmi jemi tej ti teyan tirajpueiitzi taꞌaraꞌani tyaɨjna cɨmeꞌe tɨ Dioj tiꞌitɨj cɨn titaꞌuxɨjteꞌen. Capu xaa nyaꞌu, silu ayaa pu Dioj ayan titaaxaꞌapɨꞌɨntariꞌiriꞌi tɨ aɨn tavastaraꞌa tɨ ajta iꞌi Jesús tɨ iꞌi Cɨriistuꞌu, aɨ pu tuꞌirajtuaasin.
\v 10 Aɨ pu huamɨꞌɨ tajetze maꞌacan tej ti teyan ruuri taꞌaraꞌani jamuan ɨ tavastaraꞌa, tyatɨj tyanaꞌa aꞌachu tyaj puaꞌamua. Capu amɨn aꞌij tej tyauj ruuri naꞌari teri huacuii, naimiꞌi tu huatyaturaasin jemin para rusen cɨmeꞌe.
\v 11 Aɨj xu cɨn caꞌanijraꞌa tyuꞌutaꞌan seij sajta seij. Sataꞌaj sauj tyuꞌutavaɨreꞌen. Ee xaa, xuꞌuri seyan rɨcɨ seij sajta seij.
\s Pablo pu rɨꞌɨ hueꞌixaateꞌe aɨme ɨ mej tyaꞌatzaahuateꞌe
\p
\v 12 Mɨ saj taꞌihuaamuaꞌa, ayaa tu tyajaꞌamuahuavii sej si rɨꞌɨ tihuaꞌajchaɨ aɨme ɨ aꞌamuavaujsimuaꞌa, ɨ mej rɨꞌɨ tiꞌimɨjhuaca muejmi jemi, ɨ maj majta maɨjna cɨn antyujmuaꞌaree mej tyajamuáamuaꞌaten aꞌij tɨ tiꞌijxeꞌeveꞌe ɨ tavastaraꞌa. Aɨ mu majta caꞌanijraꞌa amuaataꞌaca.
\v 13 Cheꞌe ayan tyajamuaꞌamityejtyaꞌa mej eihua huapɨꞌɨ rɨꞌɨ tiꞌitetyaɨte aɨjna cɨmeꞌe mej meyan tiꞌimɨjhuaca muejmi jemi, sej si seyan rɨꞌɨ tiꞌityeseijreꞌe ɨ rutzajtaꞌa.
\p
\v 14 Ayaa tu tyajta tyajaꞌamuahuavii sej si rɨꞌɨ tihuaꞌutaꞌixaateꞌen aɨme ɨ maj cai tiꞌimuaraꞌacu mej mi majtahuaꞌa tyuꞌumuareꞌen. Sej si caꞌanijraꞌa huaꞌutaꞌan aɨme ɨ maj cai rucacaꞌanye ɨ ruxaijnyuꞌuca jetze. Sataꞌaj sajta huaꞌutavaɨreꞌen aɨme ɨ maj cai aꞌij tiꞌijviicueꞌi. Sataꞌaj naijmiꞌica áꞌacuꞌuvaa.
\p
\v 15 Rɨꞌɨ xuꞌu muan tɨ ij cai aꞌatɨ ayan cheꞌeta naꞌa aꞌij puaꞌa raaruuren ɨ ruxaꞌa tevi tɨj ajta aꞌij puaꞌa raaruu aɨjna. Ayaa xu tiꞌityesaꞌa sej si aꞌanaj tɨnaꞌa rɨꞌɨ tihuaꞌajchaɨ seij sajta seij, sajta naijmiꞌica.
\p
\v 16-17 Sataꞌaj rutyamuaꞌaveꞌe aꞌanaj tɨ naꞌa. Caxu aꞌanaj ratápuaapuaꞌajtaꞌan saj huatejnyuuni ɨ Dioj jemi.
\v 18 Sataꞌaj nain cɨn tíꞌijtaujtziꞌireꞌe ɨ Dioj aꞌini ayaa pu tiꞌijxeꞌeveꞌe sej seyan huarɨni aꞌini Jesús, ɨ tɨ iꞌi Cɨriistuꞌu, aɨ pu aꞌamua japua nyuuni.
\p
\v 19 Caxu raꞌantanaamɨn saɨjna ɨ xaijnyuꞌucaraꞌaraꞌan ɨ Dioj.
\v 20 Caxu sajta aꞌij puaꞌa tihuaꞌaseijra aɨme ɨ mej tiꞌixaxaꞌa ɨ Dioj jetze maꞌacan, silu rɨꞌɨ xu tihuaꞌunamua tyamuaꞌa naa aꞌij mej tiꞌixa.
\v 21 Naa xu tyamuaꞌa tyuꞌutaihuau tiꞌitɨ tɨ naꞌa iꞌi xaꞌapɨꞌɨn naꞌari cai. Caxu aꞌanaj yáꞌuhuaꞌanan ɨ tɨ iꞌi xaꞌapɨꞌɨn.
\v 22 Tɨ puaꞌa tiꞌitɨ ayan tyajamuaꞌamitejtyaꞌa tɨ aꞌij puaꞌa een, caxu aꞌanaj seyan rɨjca tiꞌitɨ tɨ naꞌa tɨ ayan aꞌij puaꞌa éenyeꞌen.
\p
\v 23 Ajta aɨn Dioj, aɨjna tɨ amuaatyápuaꞌariteꞌen, cheꞌe aɨn amuaatyáꞌavaa tɨ ij nain cɨn amuaanáijmiꞌireꞌen.
\p Cheꞌe Dioj amuaatyáꞌavaa muejmi sej si cai tiꞌitɨ cɨn aꞌaturaa u aꞌamuaxaijnyuꞌuca tzajtaꞌa nusu áꞌamuamuaꞌatziiraꞌa jetze naꞌari ɨ rutevi jetze ajna xɨcajraꞌan tɨ jetzen ajtahuaꞌa ya uveꞌenyejsin ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu.
\v 24 Capu aꞌatzu atyaꞌɨtzaꞌara aɨjna tɨ ayan tyajamuaatajée. Aɨ pu ajta araurastejsin aɨjna cɨmeꞌe ɨ tɨ cɨn ataujratziiriꞌi.
\s Ɨ tɨ cɨn raꞌantipuaꞌari
\p
\v 25 Taꞌihuáamuaꞌa, sataꞌaj rahuauca ɨ Dioj jemi tyejmi cɨmeꞌen.
\p
\v 26 Sataꞌaj sajta huaꞌutataujteꞌen tyamuaꞌa naa naijmiꞌica ɨ taꞌihuaamuaꞌa.
\p
\v 27 Ayaa nu tyajaꞌamueijcateꞌe jemin ɨ tavastaraꞌa sej raataijta maj huaꞌutanamuajristeꞌen eijna i yuꞌuxari naijmiꞌica ɨ taꞌihuaamuaꞌa.
\p
\v 28 Ajta aɨn tavastaraꞌa, ɨ Jesús tɨ ajta iꞌi Cɨriistuꞌu, cheꞌe aɨn rɨꞌɨ tyajamuaachaɨn muejmi. Cheꞌe ayan tyaꞌaraꞌani.