\id 2TH
\h 2 Tesalonicenses
\toc1 2 Tesalonicenses
\mt1 Aꞌij tɨ raꞌuyuꞌuxacaꞌa ɨ San Pablo huaꞌa jemi ɨ mej Tesalonica aꞌuchaatɨmaꞌacaa, ɨ tɨ huaꞌapua
\c 1
\s Pablo pu tihuaꞌayuꞌuseꞌe aɨme ɨ maj Tesalónica aꞌuchaatɨmaꞌacaa, jamuan ɨ seica
\p
\v 1 Inyaa i nyaj iꞌi Pablo, jamuan ɨ Silvano, ajta aɨjna ɨ Timuteeyu, ayaa tu tyajaꞌamuayuꞌuseꞌe mɨ sej Tesalónica eꞌeche, sajta mɨ sej eꞌetyujsaꞌɨri jemin aɨjna ɨ Dioj ɨ tej rajyaꞌupua, sajta jemin ɨ tavastaraꞌa aɨjna ɨ Jesús tɨ ajta iꞌi Cɨriistuꞌu.
\v 2 Ajta aɨn ɨ Dioj ɨ tej rajyaꞌupua, ajta aɨn ɨ tavastaraꞌa, aɨjna ɨ Jesús tɨ ajta Cɨriistuꞌu pueen, micheꞌe maɨn rɨꞌɨ tyajamuaachaɨn, majta amuaatyápuaꞌariteꞌen tyamuaꞌa naa aꞌamua tzajtaꞌa.
\s Dioj pu nuꞌu huaꞌuxɨjteꞌesin ɨ mej aꞌij puaꞌa tiꞌityujchaꞌɨ tɨꞌɨj ya uveꞌenyén ɨ tavastaraꞌa
\p
\v 3 Ayaa pu xaa nyaꞌu tijíꞌixaꞌapɨꞌɨn tej teyan tíꞌijtaujtziꞌireꞌe ɨ Dioj aꞌanaj tɨ naꞌa muejmi cɨmeꞌen. Ayaa pu tiraavijteꞌe aꞌini tɨꞌɨj pɨ naꞌa tɨ yu auucáꞌa, eitzeꞌe xu muan tyaꞌatzaahuateꞌe, ajta eitzeꞌe xu muan huaujxeꞌeveꞌe seij sajta seij.
\v 4 Aɨj tu cɨn rɨꞌɨ tyajaꞌamuaxa ɨ seica jemi ɨ mej eꞌetyujsaꞌɨri mej mi tíꞌijtaujtziꞌireꞌe ɨ Dioj. Ayaa tu een cɨn rɨꞌɨ tyajaꞌamuaxa aꞌini muan xu raꞌaviicueꞌi tyamuaꞌa naa ɨ saj cɨn rajpueijtzi. Sajta muan, saucheꞌe xu raꞌastijreꞌe ɨ tavastaraꞌa.
\v 5 Aɨj tu cɨn ramuaꞌaree tɨ Dioj ayan tiꞌixaꞌapɨꞌɨntareꞌe aꞌij tɨ tiraavijteꞌe. Ajta ayaa pu tiraꞌamitejteꞌe ɨ Dioj tɨ ayan tiraavijteꞌe sej saun u aꞌutyarute aꞌu tɨ tyejeꞌijta. Aɨj xu cɨn rajpueiitzi xaꞌayeꞌi ijii.
\p
\v 6 Dioj pu ajta ayan cheꞌeta naꞌa een naijmiꞌica jemi. Aɨ pu seij huataꞌasin aꞌij tɨ tiraavijteꞌe. Majta aɨme ɨ mej tyájámuaꞌantyúꞌuuniꞌiriꞌi, aɨ pu pueijtzi huaꞌutaꞌasin aꞌij mej meri pueijtzi tyajamuaataꞌa muejmi.
\p
\v 7 Ajta Dioj pu aamuaataꞌasin sej huaujsaꞌupeꞌen tajamuan ajna xɨcajraꞌan tɨ jetzen ajtahuaꞌa huataseijreꞌesin u uteꞌe ɨ tavastaraꞌa, aɨjna ɨ Jesús. Aɨ pu huaꞌa jamuan huataseijreꞌesin aɨme ɨ mej tajapua tiꞌivaɨreꞌe, ɨ maj majta vaꞌacan cɨn títyatatí. Ayaa pu seiraꞌa aꞌame, cu xuee tɨ tiꞌityéchajca aɨjna cɨmeꞌe tɨ tyataasin.
\p
\v 8 Aɨ pu pueijtzi huaꞌutaꞌasin aɨme ɨ maj cai ramuaꞌate ɨ Dioj, majta ɨ maj cai raꞌaraꞌastijre ɨ nyuucari tɨ cɨmeꞌen raxa aꞌij tɨ huarɨj ɨ tavastaraꞌa aɨjna ɨ Jesús.
\v 9 Aɨ pu pueijtzi cɨn huaꞌutaꞌasin tɨ cai aꞌanaj antipuaꞌari. Aɨ pu ajta huaꞌureꞌiti mej mi aun aꞌutyarute aꞌu tɨ cai eꞌeseijreꞌe ɨ maj cɨn raamuaꞌaree tɨ Dioj nainjapua tieꞌijta rumuareꞌeriꞌiraꞌa cɨmeꞌe.
\p
\v 10 Ayaa pu huaꞌaruuren ajna xɨcajraꞌan tɨ jetzen ajtahuaꞌa ya uveꞌenyejsin mej mi rɨꞌɨ tiraataꞌan aɨme ɨ tyaɨtyestyamuaꞌameꞌen ɨ maj jemin huatyáuu. Majta naimiꞌi ɨ maj meri raꞌaraꞌastijre, aɨ mu rɨꞌɨ tyaꞌutaseijra maɨjna jemi. Ayaa pu ajta cheꞌeta naꞌa tyajamuaacɨꞌɨti saj raaseij aɨjna cɨmeꞌe saj raꞌantzaahuate aꞌij tej tyajamueꞌixaa.
\p
\v 11 Aɨj tu cɨn tɨꞌɨj pɨ naꞌa tu rahuavii ɨ Dioj jemi muejmi cɨmeꞌen. Ayaa tu rahuavii tɨ ayan tiraatámitejteꞌe ɨ Dioj tɨ ayan tiraaviityaꞌa aꞌayeꞌi tɨ amuaꞌantihuau. Cheꞌe aɨn raanaijmiꞌireꞌen naijmiꞌi tɨj naꞌa saj seri cɨn tyaꞌataujratziiriꞌi tɨ xaꞌapɨꞌɨn een. Cheꞌe aɨn raanaijmiꞌireꞌen aɨjna cɨmeꞌe ɨ rumuareꞌeriꞌiraꞌa, ajta naijmiꞌi tɨj naꞌa saj cɨn tyuꞌumuareꞌen aɨjna cɨmeꞌe sej tyaꞌatzaahuateꞌe.
\p
\v 12 Ayaa tu een cɨn rahuavii sej si rɨꞌɨ tiraataꞌan saɨjna ɨ tavastaraꞌa aꞌamua tzajtaꞌa. Cheꞌe aɨn tavastaraꞌa ajta rɨꞌɨ tyajamuaataꞌan muejmi. Ayaa tu tiꞌijxeꞌeveꞌe aꞌini aɨjna ɨ Dioj, ajta ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, aɨ mu rɨꞌɨ tyajaꞌamuachaɨ muaꞌajuꞌun para rusen cɨmeꞌe.
\c 2
\s Cɨmeꞌen aɨjna ɨ aꞌatɨ tɨ cai aꞌatɨ aꞌastijreꞌe, tɨ ajta rájchaɨreꞌe ɨ Dioj
\p
\v 1 Cɨmeꞌen ajna xɨcajraꞌan tɨ jetzen ya uveꞌenyejsin ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, tɨꞌɨj aɨn tajsaɨreꞌesin ɨ rujemi, ayaa tu tyajaꞌamuahuavii, taꞌihuaamuaꞌa, saj cai tiꞌitzɨɨnyaꞌa.
\v 2 Caxu tiꞌitaꞌacareꞌen tɨ aꞌatɨ tyajamuaꞌantyúꞌuuniꞌiran, tɨ ayan tiꞌixajta yee puꞌuri tyajaꞌureꞌenye ajna xɨcajraꞌan tɨ jetzen ya uveꞌenyejsin ɨ tavastaraꞌa. Caxu raꞌatzaahuateꞌe tɨ puaꞌa ayan tyajaꞌamueꞌixaatyaꞌa yee nyaa nu tiꞌixa Dioj jetze maꞌacan nyaɨjna cɨmeꞌe, naꞌari tɨ puaꞌa aꞌatɨ ayan yee ayaa nu tyaꞌancuraꞌanamuajriꞌi tɨcɨn yee puꞌuri tyajaꞌureꞌenye. Caxu sajta raꞌatzaahuateꞌe tɨ aꞌatɨ muejmi jemin aꞌuréꞌenyen, ayan tyajaꞌamueꞌixaatyaꞌa yee yuꞌuxari nu aꞌaraapi tɨ aɨn Pablo raꞌuteyuꞌuxacaꞌa tɨ jetzen teꞌeyuꞌusiꞌi tɨ yee ari tyajaꞌureꞌenye ajna xɨcajraꞌan tɨ jetzen ya uveꞌenyejsin.
\p
\v 3 Caxu aꞌatɨ taꞌacareꞌen tɨ amuaacuanamua tiꞌitɨ cɨmeꞌe, aꞌini ayaa pu ruxeꞌeveꞌe tɨ anacai ayan tyajaꞌureꞌenyen maj ma ruuraini ɨ Dioj, majta autyahuijsin maj rajchaɨ́ɨraꞌa muaꞌajuꞌun. Aj pu i huataseijreꞌesin aɨjna ɨ aꞌatɨ tɨ cai tiꞌitɨ aꞌastijreꞌe. Aɨ pu huaꞌa jetze ajtyamaꞌacan aɨme ɨ tɨ Dioj huaꞌantipuaꞌariteꞌesin.
\v 4 Aɨ pu ajta rajchaɨreꞌe matɨj manaꞌa puaꞌamua ɨ mej meyan huataujmuaꞌa tɨcɨn dioosi maj pɨrɨcɨ. Aɨ pu ayan áꞌujtzaahuateꞌe tɨ nuꞌu eitzeꞌe ruxeꞌeveꞌe cai maaj tiꞌitɨ ɨ mej meyan ratyaanajche. Aɨ pu cɨn ayan huarɨn, aj pu i aun aꞌutyarute teyujtaꞌa aꞌu mej yaꞌutyanajche ɨ Dioj. Aj pu i aɨjna japua aꞌujyeijxa ɨ ɨpuari japua, ajta aun huataujseijrata tɨ nuꞌu aɨn pueen ɨ Dioj.
\p
\v 5 ¿Ni qui sacai cheꞌe ramuaꞌaree nyej neyan nyaɨjna cɨn tyajamuaataꞌixaa nyatɨꞌɨj nyaun aꞌutyavaacaꞌa muejmi jemi? Ee xaa nyaꞌu, saucheꞌe xu ramuaꞌaree.
\v 6 Sajta seyan ramuaꞌaree tiꞌitɨ tɨ pɨrɨcɨ tɨ raꞌijmɨ tɨ ij cai caꞌanacan huataseijreꞌen aɨjna ɨ aꞌatɨ asta naꞌa cai ari tyajaꞌureꞌenyen aꞌanaj tɨ puaꞌa huaujxaꞌapɨꞌɨntariꞌiriꞌi.
\p
\v 7 Ayej xaa nyaꞌu tiꞌayajna. Puꞌuri tiꞌimuareꞌe aɨjna tɨ ruꞌavaa tɨ cai tiꞌitɨ aꞌastijreꞌe. Ma ajta aɨn tɨ raꞌijmɨ, aucheꞌe pu ayan raatyanajsin asta naꞌa cai yáꞌuviꞌitɨn.
\v 8 Aj pu xaa huataseijreꞌesin me eijreꞌe aɨjna tɨ cai tiꞌitɨ aꞌastijreꞌe. Ajta aɨn tavastaraꞌa, aɨjna ɨ Jesús, aɨ pu rajeꞌicatan. Aɨ pu raꞌapuaꞌariteꞌesin aɨjna ɨ runyuuca cɨmeꞌe, ajta aɨjna cɨmeꞌe tɨ naa seiraꞌa aꞌame tɨꞌɨj ajtahuaꞌa huataseijreꞌesin ɨ tavastaraꞌa.
\p
\v 9 Ajta aɨn tɨ cai tiꞌitɨj aꞌastijreꞌe, aɨ pu anacai huataseijreꞌesin cɨmeꞌen ɨ muareꞌeriꞌiraꞌaraꞌan aɨjna ɨ Satanás. Eihua pu ayan raruuren mej mi naa rɨꞌɨ tiraꞌutaseij ɨ tyaɨte. Eihua pu huaꞌacuanamuan aɨjna cɨmeꞌe ɨ tɨ cɨn huaꞌutaseijrateꞌesin, ɨ maj cɨn ramuaꞌareeran aꞌij tɨ teꞌeme.
\v 10 Ayaa pu een cɨn huaꞌacuanamuan nain cɨmeꞌe aꞌij tɨ tiruꞌumuaꞌaree mej mi aꞌupuaꞌarixɨꞌɨn ɨ tyaɨte aꞌini camu huatauraꞌa mej raataxeꞌeveꞌen ɨ tɨ ayan tiꞌayajna tɨ ij Dioj hueꞌirajtuaani.
\p
\v 11-12 Aɨj pu cɨn Dioj tyuꞌutaijta tɨ aun aꞌutyaturan huaꞌa jemi aɨjna tɨ huaꞌacuanamua mej mi caꞌanyejri cɨn ráꞌantzaahuateꞌen ɨ tɨ hueꞌitzi naꞌa, tɨ ij Dioj huaꞌuxaꞌapɨꞌɨntariꞌireꞌen ayan tihuaꞌaxɨjteꞌen mej meyan aꞌij puaꞌa huarɨj aɨjna cɨmeꞌe maj raꞌatzaahuateꞌe ɨ tɨ cai ayan tiꞌayajna, silu ayaa pu huaꞌaranajchacaꞌa mej meyan huarɨni ɨ tɨ aꞌij puaꞌa een ɨ Dioj jemi.
\s Dioj pu nuꞌu huaꞌantihuau tɨꞌij hueꞌirajtuaani
\p
\v 13 Sajta muan, mɨ saj taꞌihuaamuaꞌa, eihua pu aꞌamuaxeꞌeveꞌe ɨ tavastaraꞌa. Ajta, ayaa pu tiraavijteꞌe tej teyan tíꞌijtaujtziꞌireꞌe ɨ Dioj tɨꞌɨj pɨ naꞌa muejmi cɨmeꞌe aꞌini jajcua ɨmɨ Dioj pu amuaꞌantihuau tɨ ij aɨn amueꞌirajtuaani aɨjna cɨmeꞌe tɨ aɨn xaijnyuꞌucaraꞌaraꞌan ayée amuaatyahuii, ajta aɨjna cɨmeꞌe saj raꞌatzaahuateꞌe ɨ tɨ ayan tiꞌayajna ɨ Dioj jemi.
\v 14 Ayaa pu een cɨn Dioj ayan amuaatajée aɨjna cɨmeꞌe ɨ tej tyajamueꞌixaa ɨ Cɨriistuꞌu jetze maꞌacan tɨ ij ayan tyajamuaacɨꞌɨti sej seyan cheꞌeta sanaꞌa naa seiraꞌa xaꞌaraꞌani tɨ ajta ayan naa seijreꞌe u tajapua ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu.
\p
\v 15 Aɨj xu cɨn, mɨ sej taꞌihuaamuaꞌa, sataꞌaj huatyaujcaꞌanyen ɨ rutzajtaꞌa. Sajta muan ayaa xu huarɨni saɨjna cɨmeꞌe, tiꞌitɨ tyaj aꞌij tyajamuaamuáꞌate, nain tɨj tyanaꞌa tyajámuaatáꞌitiiriꞌi nusu tyaj amueꞌixaa, caxu yáꞌuhuaꞌanan.
\p
\v 16-17 Yaa puꞌicu, taꞌihuaamuaꞌa, cheꞌe ayen tyaꞌaraꞌani, mej meyan amuaatyápuaꞌariteꞌen ɨ aꞌamua tzajtaꞌa, majta caꞌanijraꞌa amuaataꞌan sej si seyan tyuꞌumuareꞌen saɨjna cɨmeꞌe nain cɨmeꞌe tiꞌimuariꞌiraꞌa tɨ iꞌi xaꞌapɨꞌɨn, sej si sajta seyan tihuaꞌutaꞌixaateꞌen. Cheꞌe ayan rɨꞌɨ amuaaruuren aɨjna ɨ tavastaraꞌa, aɨjna rusaɨj ɨ Jesús tɨ ajta iꞌi Cɨriistuꞌu, ajta ɨ Dioj ɨ tyaj rajyaꞌupua, ɨ tɨ taxeꞌeveꞌe para rusen cɨmeꞌe, ajta ayan taataꞌa aꞌij tej tiraachuꞌeveꞌen aɨjna cɨmeꞌe tɨ rɨꞌɨ titáachaɨn.
\c 3
\s Pablo pu ayan tihuaꞌahuavii maj raahuavii tɨ aɨn Dioj hueꞌirajtuaani
\p
\v 1 Aj caahui, nyeꞌihuaamuaꞌa, sataꞌaj seyan rahuaviira tyejmi cɨmeꞌen tej ti caꞌanacan tihuaꞌutaꞌixaateꞌen ɨ nyuucari cɨmeꞌe ɨ tavastaraꞌa tɨ raxa naijmiꞌiqueꞌe mej meyanna huachaatɨme, mej mi majta raanamua aɨme ɨ mej a ɨmɨ aꞌuchaatɨme asta naꞌa cai nainjapua huanamuajreꞌen. Sataꞌaj seyan rahuaviira mej meyan cheꞌeta manaꞌa raꞌaraꞌastijreꞌen ɨ nyuucari satɨj muan tiraꞌaraꞌastijre.
\v 2 Sataꞌaj sajta rahuaviira tɨ aɨn tavastaraꞌa tuꞌirajtuaani mej mi cai aꞌij taaruuren ɨ tyetyaca ɨ maj aꞌij puaꞌa titetyujchaꞌɨ, ɨ maj majta aꞌij puaꞌa tiꞌityetyaɨte. Ayaa xu rahuaviira aꞌini camu naimiꞌi tyaꞌatzaahuateꞌe.
\p
\v 3 Ajta aɨn ɨ tavastaraꞌa, capu aꞌanaj atyaꞌɨtzaꞌara. Aɨ pu xaa caꞌanijraꞌa amuaataꞌasin sej si tyaꞌutaviicueꞌi. Ajta, aɨ pu rɨꞌɨ tyajaꞌamuacháɨ aꞌame tɨꞌij cai amuaatyamueꞌitɨn aɨjna tɨ aꞌij puaꞌa een.
\p
\v 4 Tyajta ityan, ayaa pu titaꞌamitejteꞌe aɨjna jemi ɨ tavastaraꞌa sej seyan huarɨni aꞌij tej teri tyajamuaataij. Ajta, ayaa pu cheꞌeta naꞌa titaꞌamitejteꞌe sej sauj seyan huarɨni majcaꞌihua yee.
\p
\v 5 Cheꞌe aɨn tavastaraꞌa caꞌanijraꞌa amuaataꞌan ɨ aꞌamua tzajtaꞌa sej si seyan cheꞌeta sanaꞌa tityahuaujxeꞌeveꞌen seij sajta seij tɨj ajta Dioj tyajaꞌamuaxeꞌeveꞌe muejmi. Cheꞌe aɨn ajta amuaataꞌan ɨ caꞌanijraꞌa sej si seyan cheꞌeta sanaꞌa tyaꞌutaviicueꞌi tɨj ajta Cɨriistuꞌu tyaꞌutaviicueꞌiriꞌi.
\s Tɨ nuꞌu ayan ruxeꞌeveꞌe mej tyuꞌumuareꞌen
\p
\v 6 Ayaa tu tyajaꞌamueꞌijteꞌe, taꞌihuáamuaꞌa, nyuucajtzeꞌen ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, sej si seyan cai tityajáꞌujhuaꞌaneꞌen jamuan seij aꞌamueꞌihuaaraꞌa tɨ ajta iꞌi huaꞌɨnaꞌaseꞌe, tɨ cai tiꞌimɨjhuaca, tɨ cai ayan cheꞌeta naꞌa rɨꞌɨ tiꞌityujchaꞌɨ aꞌij tej teri tyajamueꞌixaa muejmi.
\v 7 Muan xu rujɨɨmuaꞌa seri ramuaꞌaree aꞌij sej yeꞌi huarɨni, sej si seyan cheꞌeta sanaꞌa huarɨni tyatɨj ityan. Catu aꞌatzu huaꞌɨnaꞌasaꞌacaꞌa tyatɨꞌɨj tyauj muejmi jemi aꞌutyáuucaꞌa.
\p
\v 8 Catu huaapuaꞌa tyanaꞌa tyuꞌucuaa seij jemi, silu tetyuꞌunajchitacaꞌa ticu. Nain tujcaꞌari tzajtaꞌa, tyajta nain tɨcaꞌari tzajtaꞌa, tetyuꞌumuare caꞌanin cɨmeꞌe. Eihua tu tyaꞌutaviicueꞌiriꞌi tej ti cai tiꞌitɨ cɨn amuaatamuáreꞌeristeꞌen.
\v 9 Ee xaa nyaꞌu, ayaa pu tiraavijtyaꞌacaa tej huaapuaꞌa tyanaꞌa tyuꞌucuaꞌani. Capu amɨn aꞌij. Saɨque tu huarɨj tej ti amuaamuaꞌaten aꞌij sej huarɨni, sej si seyan cheꞌeta sanaꞌa rɨꞌɨ titetyujchaꞌɨ.
\v 10 Ayej xaa nyaꞌu tiꞌayajna. Tyatɨꞌɨj tyauj aꞌutyáuucaꞌa muejmi jemi, ayaa tu tyajámuaatáijte aɨjna tɨ cɨmeꞌen yee: Tɨ puaꞌa aꞌatɨ cai raꞌujcaꞌanye tɨ tyuꞌumuareꞌen, caxu raataꞌacareꞌen tɨ aɨn tyuꞌucuaꞌani.
\p
\v 11 Ajta ijii, ayaa tu tiꞌinamua tɨcɨn seica aɨme, aɨ mu nuꞌu huaꞌɨnaꞌaseꞌe. Camu tiꞌitɨj cɨn tiꞌimuareꞌe silu ayaa mu rucɨɨniveꞌen mej mi tyuꞌɨtziiteꞌe.
\v 12 Ayaa tu caꞌanijraꞌa huaꞌutaꞌasin naijmiꞌica ɨ mej meyan eꞌen, ayaa tu tihuaꞌutaijteꞌesin aɨjna jemi ɨ tavastaraꞌa, aɨjna ɨ Jesús tɨ ajta iꞌi Cɨriistuꞌu, mej mi tyuꞌumuareꞌen, maj cai cheꞌe aꞌij manaꞌa tiꞌityáruurejnyeꞌen, mej mi rujɨɨmuaꞌa raamueꞌitɨn ɨ maj cɨn huataujvaɨreꞌen.
\p
\v 13 Sajta muan, nyeꞌihuaamuaꞌa, caxu raxaahuata sej seyan huarɨni aꞌij tɨ tiraavijteꞌe.
\v 14 Tɨ puaꞌa aꞌatɨ cai áꞌujcaꞌanye tɨ raꞌaraꞌastijreꞌen aꞌij tej tyajaꞌamuayuꞌuseꞌe tyeijna jetze i yuꞌuxari, ayaa xu huarɨni. Sataꞌaj raamuaꞌati saɨjna ɨ aꞌatɨ, sajta seyan tiyáꞌuhuaꞌaxɨn tɨ ij huataujtyéviꞌirata aɨjna ɨ aꞌatɨ.
\v 15 Ma sajta muan, caxu seyan aꞌij puaꞌa raruure tɨj aꞌatɨ tɨ amuájchaɨɨreꞌe, silu ayaa xu rɨꞌɨ tiraatajeeve aꞌini aꞌamueꞌihuaaraꞌa pu pueen.
\s Aɨ pu rɨꞌɨ tihuaꞌutyátuaasin, ajta raꞌantipuaꞌari
\p
\v 16 Ajta aɨn tavastaraꞌa tɨ tyuꞌutyapuaꞌari, cheꞌe aɨn rusaɨj amuaatyápuaꞌariteꞌen aꞌamua tzajtaꞌa, aꞌanaj tɨ naꞌa ajta nain cɨmeꞌe. Cheꞌe aɨn tavastaraꞌa huatyaturan muejmi jemi.
\p
\v 17 Inyaa Pablo, nyamuajcaꞌa nu cɨn tyajaꞌamuayuꞌuseꞌe aijna i yuꞌuxari jetze i nyaj cɨn amuaatataujteꞌe. Ayaa nu teꞌeyuꞌuxaca nainjapua ɨ tiꞌinyeyuꞌuxa. Aɨj xu cɨn raamuaꞌaree tɨ ayan tiꞌayajna nyaj raꞌuyuꞌuxacaꞌa nyasaɨj.
\v 18 Ajta aɨn tavastaraꞌa, aɨjna ɨ Jesús, tɨ ajta iꞌi Cɨriistuꞌu, cheꞌe aɨn rɨꞌɨ tyajamuaachaɨn naijmiꞌica muejmi.