\id 1TI
\h 1 Timuteeyu
\toc1 1 Timuteeyu
\mt1 Aꞌij tɨ raꞌuyuꞌuxacaꞌa ɨ San Pablo aɨjna jemi ɨ Timuteeyu, ɨ tɨ saɨtɨ
\c 1
\s Eijna yuꞌuxari jetze pu rataujteꞌe
\p
\v 1 Inyaa, i nyaj iꞌi Pablo, nyaa nu nyaɨn pueen seij tɨ ravaɨreꞌe aɨjna ɨ Cɨriistuꞌu tɨ ajta Jesús pueen. Ayaa pu eenyeꞌequeꞌe naꞌantihuau aꞌini ayaa pu tinaataij ɨ Dioj tɨ tuꞌirajtuaa, ajta ɨ Cɨriistuꞌu tɨ ajta iꞌi Jesús, ɨ tyaj rachuꞌeveꞌe.
\v 2 Ayaa nu ye tiꞌimuayuꞌuseꞌe muaa, Timuteeyu, pej peyan nyamuari yee niyauj aꞌini muaa paj pajta peyan cheꞌeta panaꞌa tzaahuatiꞌiraꞌa raꞌastijreꞌe ɨ tavastaraꞌa nyatɨj inyaa. Ayaa nu tiꞌijhuauhuau mueetzi cɨmeꞌe tɨ aɨn ɨ Dioj ɨ tɨ taꞌiyaꞌupua, ajta aɨn ɨ Cɨriistuꞌu tɨ ajta Jesús ɨ tavastaraꞌa, micheꞌe maɨn rɨꞌɨ timuaacháɨj muaꞌaraꞌani, micheꞌe majta muáꞌancuꞌuvajxɨꞌɨn, micheꞌe majta rɨꞌɨ muꞌuhuáruuren ɨ aꞌa tzajtaꞌa.
\s Cɨmeꞌen ɨ maj hueꞌitzi cɨn tiꞌimuaꞌata
\p
\v 3 Nyatɨꞌɨj nyaun aumaꞌaca u Macedonia, ayaa nu timuaatahuaviiriꞌi pej paun aꞌutyaturan aujna Efeso. Nyajtahuaꞌa nu neyen tiꞌimuahuavii pej paun aꞌutyaturan pej pi peyan tihuaꞌutaꞌijmɨ ɨ seica ɨ tyetyaca mej mi cai cheꞌe meyan tihuaꞌamuaꞌate maɨjna cɨmeꞌe ɨ nyuucari tɨ hueꞌitzi cɨn namuajreꞌe.
\p
\v 4 Mataꞌaj cai cheꞌe maɨjna namuajra aꞌij mej tiꞌitɨj tihueꞌixaateꞌe maɨjna cɨmeꞌe aꞌij mej tityeenyéj ɨ huaacɨxaꞌastyamuaꞌameꞌen. Cu xuee macai aꞌanaj raꞌantipuaꞌariteꞌesin mej meyan raataxaj yee ai pu aɨn pueen tɨ ayan huanyej ɨ seij jetze, ajta ɨ seij, saɨj pu ajta jetzen huanyej asta manaꞌa cai aꞌaraꞌasti ɨ Dioj jemi. Naijmiꞌi tɨj naꞌa, ayaa puꞌu tiꞌivaɨreꞌe mej mi huataujnyaꞌusiꞌiteꞌen ɨ tyaɨte maɨjna cɨmeꞌe ɨ maj cai aꞌij tiruꞌumuaꞌaree. Capu tiꞌitɨ vaɨreꞌe mej mi raanaijmiꞌireꞌen aꞌij tɨ tiꞌijxeꞌeveꞌe ɨ Dioj. Tɨꞌij aꞌatɨ ayan raanaijmiꞌireꞌen, ayaa pu tyuꞌujxeꞌeveꞌe tɨ aɨn aꞌatɨ ayan tiraꞌantzaahuateꞌen ɨ Dioj.
\p
\v 5 Ayaa tu een cɨn tiꞌimueijcateꞌe mej mi huaujxeꞌeveꞌen seij majta seij maɨjna cɨmeꞌe ɨ mej uraréꞌen ɨ rutzajtaꞌa, majta ɨ maj rɨꞌɨ mé titaumuámuaꞌarejmee, majta ɨ maj tzaahuatiꞌiraꞌa cɨn raꞌastijreꞌe ɨ tavastaraꞌa.
\v 6 Seica mu meri yaꞌuhuaꞌaxɨ mej meyan eꞌenyaꞌa. Aɨj mu cɨn autyajhuii mej meyan tyuꞌutaxaj maɨjna cɨmeꞌe ɨ nyuucari tɨ cai tiꞌitɨ vaɨreꞌe.
\v 7 Ayaa mu tiꞌijxeꞌeveꞌe mej teꞌentyarute maɨjna cɨmeꞌe mej tihuaꞌumuaꞌaten aꞌij tɨ huataujmuaꞌa ɨ nyuucari ɨ maj cɨn tiꞌijta tɨ Moises raꞌuyuꞌuxacaꞌa. Ma majta aɨme, camu aꞌatzu yauꞌeite aꞌij mej tiꞌixa. Camu majta ramuaꞌaree aꞌij tɨ een maɨjna cɨmeꞌe ɨ maj cɨn meyan raataxaj yee ayaa pu tiꞌayajna.
\p
\v 8 Tyan tu ramuaꞌaree tɨ tiꞌivaɨreꞌe aɨjna ɨ nyuucari ɨ maj cɨn tiꞌijta, Moises tɨ raꞌuyuꞌuxacaꞌa. Tɨ ij ayan tiꞌityavaꞌɨrihuaꞌan, ayaa pu ruxeꞌeveꞌe maj nain cɨn raꞌaraꞌastijreꞌen aꞌij tɨ tyuꞌujxeꞌeveꞌe.
\v 9 Tyajta, teyan tiꞌijmuaꞌaree tɨcɨn ayaa mu een cɨn tiraꞌuyuꞌuxacaꞌa aɨjna ɨ nyuucari ɨ maj cɨn tiꞌijta mej mi huaꞌutaꞌijmɨjra aɨme ɨ maj aꞌij puaꞌa titetyújchaꞌɨ. Camu maɨjna cɨn huaꞌutaꞌijmɨjra aɨme ɨ maj rɨꞌɨ mé tityaumuámuaꞌaree ɨ rutzajtaꞌa. Aɨme mu xaa maɨjna cɨn huaꞌutaꞌijmɨjra ɨ maj cai ranamuajracu aꞌij tɨ tiraꞌaxa ɨ nyuucari ɨ maj cɨn tiꞌijta, majta aɨme ɨ maj cai raꞌastijreꞌe aꞌij tɨ tiꞌijxeꞌeveꞌe ɨ Dioj.
\p Majta seica, ai mu aɨn pueen ɨ maj ráꞌaxaahuariꞌi ɨ huaꞌayeꞌira, majta aɨme ɨ maj aꞌij puaꞌa titetyújchaꞌɨ, majta aɨme ɨ maj rutaata cuiꞌica, naꞌari runaana, aꞌatɨ tɨ naꞌa tɨ tiꞌityacuiꞌica.
\v 10 Ayaa mu majta ɨ nyuucari cɨn huaꞌutaꞌijmɨjra aɨme ɨ maj xanaꞌacɨreꞌe juucate jemi, majta aɨme ɨ maj cheꞌeta manaꞌa xanaꞌacɨreꞌe huaꞌa jamuan ɨ tɨꞌɨrii caɨn huaꞌa jamuan seica ɨ tyetyaca.
\p Ayaa mu cheꞌeta seica maɨjna cɨn ɨ nyuucari huaꞌutaꞌijmɨjra aɨme ɨ maj seica viviꞌi mej mi tihuaꞌumuáristeꞌen caꞌanyejri cɨmeꞌe, majta aɨme ɨ mej tiꞌihueꞌitaca, majta aɨn ɨ maj tiꞌityacuanamuajca. Tiꞌitɨ tɨ naꞌa maj tɨ cai naa eꞌen, tɨ saɨque eꞌen, aɨ mu huataꞌijmɨjra maɨjna cɨmeꞌe ɨ nyuucari ɨ maj cɨn tiꞌijta, tiꞌitɨ tɨ naꞌa maj cai ranamuajracu ɨ nyuucari tɨ rɨꞌɨ tyuꞌuruure ɨ tyúꞌutzajtaꞌa.
\p
\v 11 Aijna ɨ nyuucari tɨ rɨꞌɨ tyuꞌuruure, aɨ pu aɨjna cɨn ayan tiraꞌaxa aꞌij tɨ tiraꞌaxa ɨ nyuucari tɨ naa namuajreꞌe, tɨ ajta cɨn Dioj tuꞌirajtuaani. Ajta aɨn Dioj, aɨ pu aɨjna cɨn tinyeijca inyeetzi nyej ni tihuaꞌutaꞌixaateꞌen nyaɨjna cɨmeꞌe ɨ nyuucari. Aɨj nu cɨn rɨꞌɨ tiraataꞌasin ɨ Dioj.
\s Aɨ pu tíꞌijtaujtziꞌireꞌe aɨjna cɨmeꞌe tɨ Dioj ráꞌancuꞌuvajxɨ
\p
\v 12 Eecan nu tíꞌijtaujtziꞌireꞌe nyaɨjna ɨ Cɨriistuꞌu tɨ ajta iꞌi Jesús ɨ tavastaraꞌa ɨ nyaj jetzen arancaꞌanye. Ayaa nu een cɨn tíꞌijtaujtziꞌireꞌe aꞌini ayaa pu tiraꞌamitejtyaꞌacaa nyaj cai tiꞌitɨj cɨn autaꞌɨtze. Aɨ pu naꞌantihuau inyeetzi nyej ni raatyavaɨreꞌen.
\v 13 Jajcua ɨmɨ nu aꞌij puaꞌa tiꞌixaxaꞌataꞌa ɨ Dioj jemi, nyajta aꞌij puaꞌa huaꞌuruurajcaꞌa aɨme ɨ maj raꞌastijreꞌe ɨ tavastaraꞌa. Eihua nu huáꞌunyaꞌusiꞌityaꞌacaꞌa. Aru capu amɨn aꞌij, Dioj pu náꞌancuꞌuvajxɨ aɨjna cɨmeꞌe nyaj cai ramuaꞌareeracaꞌa aꞌij nyaj rɨjca, nyajta cai tyaꞌatzaahuatyaꞌacaa.
\v 14 Eihua pu huapɨꞌɨ rɨꞌɨ tinajcháɨ aꞌaraa ɨ tavastaraꞌa. Aɨ pu ajta ayan naataꞌa nyej ni ráꞌantzaahua nyaɨjna ɨ Cɨriistuꞌu tɨ ajta ayan antyahuaa tɨcɨn Jesús. Ayaa pu ajta naataꞌa nyej ni raxeꞌevaꞌa naꞌaraꞌani.
\p
\v 15 Ayaa nu tiꞌimueꞌixaateꞌe tzaahuatiꞌiraꞌa cɨmeꞌe tɨ ayan tiꞌayajna tɨ aɨjna cɨn mu aꞌuveꞌeme iiyan chaanaca japua aɨjna ɨ Cɨriistuꞌu tɨ ajta iꞌi Jesús tɨꞌij aɨn hueꞌirajtuaani aɨme ɨ mej aꞌij puaꞌa titetyujchaꞌɨ. Cheꞌe cai aꞌatɨ ayan tiꞌixajta yee capu ayan tiꞌayajna. Nyaa nu ramuaꞌaree aꞌini nyaa nu nyaɨn pueen i nyaj eitzeꞌe aꞌij puaꞌa tiꞌitinchaɨcaꞌa cai maa aꞌatɨ.
\p
\v 16 Aɨj pu cɨn Dioj náꞌancuꞌuvajxɨ inyeetzi i nyaj aɨn pueen ɨ nyaj eitzeꞌe aꞌij puaꞌa tiꞌitinchaɨcaꞌa tɨꞌij aɨn Cɨriistuꞌu tɨ ajta iꞌi Jesús tihuaꞌutaseijrateꞌen ɨ tyaɨte aꞌij tɨ een cɨmeꞌe ɨ Cɨriistuꞌu raayɨꞌɨtɨ tɨ aꞌatɨ tyuꞌutauuniꞌi nain cɨmeꞌe tɨj naꞌa tɨ aꞌij puaꞌa een. Aɨ pu ayan tiꞌijxeꞌevaꞌacaa mej mi meyan raaseij aɨme ɨ maj raꞌantzaahuateꞌencheꞌe mej mi maun aꞌutyaturan jemin ruurican para rusen cɨmeꞌe.
\p
\v 17 Aɨj pu cɨn, ayan ruxeꞌeveꞌe tyej rɨꞌɨ tiraataꞌan para rusen cɨmeꞌe, tyajta tiratataujtziꞌireꞌen tyaɨjna tɨ Tajtuhuan cɨn tiꞌityejvee, tɨ cai aꞌanaj rupuataꞌatan, tɨ ajta cai aꞌanaj mɨꞌɨni, ɨ tyaj cai aꞌanaj raseij tajɨꞌɨ cɨmeꞌe. Ai pu aɨn pueen ɨ tɨ aɨ naꞌajcaj tiꞌiDioj.
\p
\v 18 Niyauj, mɨ paj iꞌi Timuteeyu, ayaa nu tiꞌimueꞌixaateꞌe aɨjna cɨmeꞌe ɨ maj anacaican a jemi tyuꞌutaxajtacaꞌa aɨme ɨ mej tiꞌixaxaꞌataꞌa ɨ Dioj jetze maꞌacan. Pataꞌaj peyan tyuꞌutateseꞌen tyamuaꞌa naa paɨjna cɨmeꞌe ɨ paj cɨn tiꞌivaɨreꞌe ɨ tavastaraꞌa jemi.
\v 19 Pataꞌaj pauj tyaꞌatzaahuatyaꞌa pajta muaa rɨꞌɨ tiꞌitíꞌacháɨɨ puaꞌaraꞌani ɨ aꞌatzajtaꞌa tɨꞌij cai aun huataseijreꞌen tiꞌitɨ tɨ tyuꞌutyeviꞌirasteꞌe. Seica mu meri ma ruuhuaꞌaxɨ mej tyaꞌatzaahuatyaꞌacaa, majta, aɨ mu raataxaahuatacaꞌa maj rɨꞌɨ tyáꞌuseijraꞌacaa ɨ rutzajtaꞌa. Ayaa mu cɨn huarɨn, nain pu áꞌupuaꞌarixɨ ɨ maj tyaꞌatzaahuatyaꞌacaa.
\v 20 Aɨme cɨmeꞌen nu tiꞌixa ɨ maj huaꞌapua, aɨjna ɨ Himeneo, ajta aɨjna ɨ Alejandro. Aɨme nu neri tyuꞌutatuii ɨ Satanás jemi mej mi raamuaꞌaree maj cai cheꞌe aꞌij puaꞌa tiraataꞌan ɨ tavastaraꞌa aɨjna cɨmeꞌe aꞌij mej rɨcɨ.
\c 2
\s Cɨmeꞌen aꞌij mej yeꞌi saɨj huatyejnyuuni
\p
\v 1 Ayaa pu tinaꞌamitejteꞌe tɨ ayan ruxeꞌeveꞌe sej si seyan huarɨni. Sataꞌaj naijmiꞌica cɨn huatyejnyuuni.
\v 2 Aɨj xu cɨn seyan tiraatahuavii, sajta seyan huaꞌa jemi huatyejnyuuni, sajta tihuaꞌatyaujtziꞌira naijmiꞌica jemi, aɨme ɨ maj tajtuhuan cɨn tiꞌityatatyáꞌupuꞌu, majta aɨme ɨ mej tiꞌijta. Ayaa xu huarɨni tyej ti rɨꞌɨ yee tíꞌitechajca, tyajta raꞌaraꞌasten ɨ tayeꞌirá cɨmeꞌe, tyajta rɨꞌɨ tirajchaɨ́ taꞌaraꞌani ɨ tavastaraꞌa tɨꞌɨj cai aꞌatɨ tajaaxaijtaꞌa.
\p
\v 3-4 Ayaa pu tiraavijteꞌe sej si seyan huarɨni. Ayaa pu tiraꞌaraanajchi aꞌame ɨ Dioj tɨ tuꞌirajtuaa, aꞌini aɨ pu ayan tiꞌijxeꞌeveꞌe tɨ naijmiꞌica huirajtuaani, mej mi raamuaꞌaree nain tɨj naꞌa tɨ ayan tiꞌayajna aɨjná jemi.
\p
\v 5 Ayaa puꞌu tiꞌen, aꞌini seij puꞌu ɨ Dioj, ajta seij puꞌu aɨ pueen tɨ huaꞌa japua huanyuuni ɨ tyaɨte ɨ maj cɨn autyajturaa ɨ Dioj jemi. Ajta pu tyaataꞌa pɨrɨcɨ. Ai pu aɨn pueen ɨ Cɨriistuꞌu tɨ ajta iꞌi Jesús.
\v 6 Aɨ pu huataujmuaɨꞌɨvejritacaꞌa tɨꞌij aɨn tyuꞌutanajchita nain cɨmeꞌe ɨ maj cɨn autyajturaa ɨ tyaɨte ɨ Dioj jemi. Ai pu aɨn pueen aɨjna tɨ Dioj tihuaꞌutaꞌixaa a eijreꞌe, aꞌatzaa tɨ puaꞌa raaxaꞌapɨꞌɨntare.
\p
\v 7 Me nyajta inyaa, aɨj pu cɨn naꞌantihuau nyej ni tihuaꞌutaꞌixaateꞌen ɨ tyaɨte nyaɨjna cɨmeꞌe nyej ni tyuꞌutyavaɨreꞌen ɨ Dioj jemi. Ayaa nu tiꞌimueꞌixaateꞌe tzaahuatiꞌiraꞌa cɨmeꞌe. Canu tiꞌihueꞌi. Nyaa nu xaa tihuaꞌamuaꞌate aɨme ɨ mej tyaꞌatzaahuateꞌe ɨ tavastaraꞌa jemi, nyajta tihuaꞌutaꞌixaateꞌesin tzaahuatiꞌiraꞌa cɨmeꞌe aɨme ɨ maj majta Israel jetze ajtyamaꞌacan.
\p
\v 8 Aɨj nu cɨn neyan tiꞌijxeꞌeveꞌe matɨj manaꞌa aꞌu tɨ maj aꞌucaitɨme, micheꞌe huatyejnyuuni ɨ Dioj jemi, meyan rɨꞌɨ tityaꞌurareꞌenyeꞌe ɨ rutzajtaꞌa majta cai nínyuꞌucacu, majta cai rújaaxáiviꞌira.
\p
\v 9 Ajta aɨme ɨ juuca, ayaa nu cheꞌeta tiꞌijxeꞌeveꞌe mej mi meyan tiꞌityéchajca aꞌij tɨ tiraavijteꞌe, micheꞌe meyan cai tiꞌitéchajca maɨjna cɨmeꞌe tɨ tyuꞌutyeviꞌirasteꞌe silu maɨjna cɨmeꞌe tɨ cai aꞌij puaꞌa tihuaꞌaseijrateꞌe. Micheꞌe cai ayaa manaꞌa tyavaꞌujhuaꞌatyahuaꞌan ɨ rucɨpua jetze aɨjna cɨmeꞌe tɨ huapɨꞌɨ tiꞌinajchi, micheꞌe majta cai ayaa manaꞌa tyaꞌucárúutyeꞌejmeꞌen ooro cɨmeꞌe, micheꞌe majta cai huapɨꞌɨ ayaa manaꞌa tyaꞌacamuátzɨꞌɨjmeꞌe maɨjna cɨmeꞌe tiꞌitɨj peerla, nusu macai ayaa manaꞌa tyuꞌutaujcheꞌetyahuaꞌan maɨjna cɨmeꞌe ɨ cɨɨxuri tɨ huapɨꞌɨ tiꞌijnajchi.
\p
\v 10 Micheꞌe meyan huarɨni ɨ juuca mej mi seica meyan raamuaꞌareera mej rɨꞌɨ tiꞌityetyaɨte. Micheꞌe meyan tyuꞌuruuren aꞌij tɨ tiꞌixaꞌapɨꞌɨn, aꞌini ayaa pu tihuaꞌuvijteꞌe aɨme ɨ juuca ɨ maj meyan tyuꞌujseijrata mej meyan raꞌastijreꞌe ɨ Dioj jemi.
\v 11 Ayaa pu ruxeꞌeveꞌe aɨme jemi ɨ maj juuca mej mi raarɨꞌɨren meyan tiꞌinamuaara, majta meyan tihuaꞌaráꞌastijreꞌen ɨ tyetyaca.
\p
\v 12 Canu huaꞌataꞌaca aɨme ɨ juuca mej mi tihuaꞌumuaꞌaten u teyujtaꞌa ɨ tyetyaca, ni maj majta tihuaꞌutaijteꞌen. Ruxeꞌeveꞌe tɨ aɨn jɨitaꞌa aun teyujta cai aveꞌenyuucaꞌan.
\v 13 Ayaa puꞌu tiꞌen, aꞌini Dioj pu anacaican Adán huatyataahuacaꞌa. Ajta eꞌeyan aɨn Eva huatyataahuacaꞌa.
\v 14 Ajta, aɨn Adán, aɨ pu ramuaꞌareeracaꞌa aꞌij tɨ rɨjcaa tɨꞌɨj autyajturaa ɨ Dioj jemi. Capu aꞌatɨ raacuanamua. Ma ajta aɨn Eva, Satanás pu xaa raacuanamua. Aɨj pu cɨn aꞌaturaá aꞌaraa ɨ Dioj jemi.
\p
\v 15 Aru Dioj pu hueꞌirajtuaasin aɨme ɨ juuca matɨꞌɨj aɨme tiyaujmuaꞌa muaꞌaraꞌani tɨ puaꞌa meyan aꞌateeren mej tyaꞌatzaahuateꞌe majta maj rɨꞌɨ tihuaꞌajchaɨ ɨ seica. Majta mej urareꞌenyejmeꞌeni ɨ rutzajtaꞌa maɨjna cɨmeꞌe mej meyan huarɨni aꞌij tɨ tiraavijteꞌe.
\c 3
\s Cɨmeꞌen aꞌij mej yeꞌi huarɨni aɨme ɨ mej tiꞌijta teyujtaꞌa
\p
\v 1 Ayej xaa nyaꞌu tiꞌayajna aijna i nyuucari. Tɨ puaꞌa aꞌatɨ ayan raxeꞌevaꞌa tɨ aɨn antyujmuaꞌaréera aɨjna cɨmeꞌe tɨ huaꞌachaɨ ɨ mej eꞌetyujsaꞌɨri u teyujtaꞌa, aɨ pu xaa raxeꞌeveꞌe tɨ tyuꞌumuáriꞌihua tɨ iꞌi xaꞌapɨꞌɨn.
\v 2 Aɨj pu cɨn, ayan ruxeꞌeveꞌe tɨ ayan éenyeꞌen aɨjna tɨ ayan antyujmuaꞌaree aɨjna cɨmeꞌe tɨ huaꞌachaɨ. Ruxeꞌeveꞌe tɨ cai tiꞌitɨj cɨn aꞌaturaa mej mi cai aꞌij puaꞌa tiꞌixajta ɨ tyaɨte. Ajta tɨ saɨj naꞌa nyaɨcha.
\p Ajta ayan ruxeꞌeveꞌe tɨ rɨꞌɨ tiꞌityujchaꞌɨ, tɨ cɨj naꞌa tiꞌiyaꞌaca ɨ tiꞌitɨ nahuaj, ajta tɨ cai tyúꞌuxajtaveꞌe, mej mi rɨꞌɨ tiraataꞌan ɨ tyaɨte. Ajta ayan ruxeꞌeveꞌe tɨ huaꞌancureꞌeviꞌitɨn tyamuaꞌa naa aɨme ɨ maj ramuaarin ajna tɨ eꞌeche, ajta tɨ raayɨꞌɨtɨhuaꞌan tɨ tihuaꞌumuaꞌaten tyamuaꞌa naa.
\v 3 Ajta ayan ruxeꞌeveꞌe tɨ cai rutyahueiveꞌe, ajta tɨ cai nyaꞌusaꞌamɨꞌɨ, silu tɨ rɨꞌɨ tyajaꞌucati aɨme jemi ɨ tyaɨte, ajta tɨ cai tiꞌitɨ cɨn tiꞌijaaxaijta. Ayaa pu ajta ruxeꞌeveꞌe tɨ cai ramuájchyaꞌa ɨ tumin tɨ ramueꞌitɨcɨ.
\v 4 Ayaa pu ruxeꞌeveꞌe tɨ raayɨꞌɨtɨhuaꞌan tɨ tihuaꞌutaijteꞌen tyamuaꞌa naa aɨme ɨ maj jemin eꞌeche, ajta ɨ yaujmuaꞌameꞌen. Ayaa pu cheꞌeta naꞌa ruxeꞌeveꞌe mej raꞌaraꞌasten aꞌij tɨ tiraavijteꞌe.
\p
\v 5 Ayaa pu tíꞌen, aꞌini tɨ puaꞌa cai raayɨꞌɨtɨ tɨ tihuaꞌutaijteꞌen aɨme ɨ maj jemin eꞌeche, capu aꞌij tiꞌirɨꞌɨri tɨ huaꞌuchaɨn aɨme ɨ maj aun eꞌetyujsaꞌɨri ɨ teyujtaꞌa mej mi tiraatataujtziꞌireꞌen ɨ Dioj.
\v 6 Ruxeꞌeveꞌe tɨ ari aꞌatee tɨ tyaꞌantzaahua. Naꞌari cai, aɨ pu aꞌujtzaahuateꞌen aɨjna cɨmeꞌe tɨ vaꞌacan cɨn tiꞌityejvee. Tɨ puaꞌa ayan tyaꞌujtzaahuatyaꞌa, Dioj pu ayan cheꞌeta tiꞌijxaꞌapɨꞌɨntareꞌen aꞌij tɨ ari tiraaxaꞌapɨꞌɨntare ɨ tiyaaruꞌu jemi.
\v 7 Ajta ayan ruxeꞌeveꞌe mej jemin ramuaꞌareera tɨ rɨꞌɨ tiꞌitevi aɨme ɨ maj cai tyaꞌatzaahuateꞌe. Naꞌari cai, seica mu raꞌutaxaahuariꞌira, ajta aɨn tiyaaruꞌu, aɨ pu cɨmeꞌen ayan tiraatyamueꞌitɨ.
\s Aꞌij mej yeꞌi huarɨni aɨme ɨ mej tiꞌivaɨreꞌe u teyujtaꞌa
\p
\v 8 Cɨmeꞌen aɨme ɨ mej tiꞌivaɨreꞌe u teyujta, ayaa pu ruxeꞌeveꞌe mej meyan rɨꞌɨ me tityáꞌujhuaꞌaneꞌen maj cai tiꞌihueꞌita, mej mi ráꞌantzaahuateꞌen ɨ tyaɨte. Ajta ayan ruxeꞌeveꞌe maj cai eihua rayaꞌaca tiꞌitɨ nahuaj, majta maj cai ramuájchyaꞌa ɨ tumin maj ramueꞌitɨcɨ aɨjna cɨmeꞌe maj huaꞌucuanamua ɨ seica.
\v 9 Ayaa pu ajta ruxeꞌeveꞌe maj nain cɨn tyaꞌatzaahuateꞌen aɨjna tɨ ruꞌavaatacaꞌa ɨ Dioj jemi, aꞌij tɨ tyuꞌuruu ɨ tavastaraꞌa. Eecan pu ruxeꞌeveꞌe mej meyan tiruꞌumuaꞌareera ɨ rutzajtaꞌa tɨ ayan tiꞌayajna.
\p
\v 10 Tɨ puaꞌa meyan tiꞌijxeꞌevaꞌa mej mi tyuꞌutyavaɨreꞌen u teyujtaꞌa, aɨ pu ruxeꞌeveꞌe maj maɨn tyaɨte anacaican meyan tiraaxaꞌapɨꞌɨntareꞌen aɨme jemi ɨ mej tiꞌivaɨraꞌacu. Tɨ puaꞌa cai tiꞌitɨ aꞌij tihuaꞌaturaateꞌe, aj pu rɨꞌɨrista aꞌame mej meyan tyuꞌutyavaɨreꞌen.
\v 11 Ayaa pu cheꞌeta naꞌa tiꞌen aɨme jemi ɨ juuca ɨ maj huajaꞌuviꞌitɨn. Eecan pu ruxeꞌeveꞌe mej meyan rɨꞌɨ mé tityáꞌujhuaꞌaneꞌen. Ruxeꞌeveꞌe maj cai aꞌij puaꞌa tyúꞌuxajtaveꞌe, majta cai rútaꞌarujvaꞌa, maj cai tiꞌitɨ cɨn atáꞌɨtzaꞌaraꞌan.
\p
\v 12 Majta aɨme ɨ mej tiꞌivaɨreꞌe u teyujtaꞌa, ayaa pu ruxeꞌeveꞌe tɨ saɨj naꞌa nyaɨche, ajta tɨ raayɨꞌɨtɨhuaꞌan tɨ tyamuaꞌa naa tihuaꞌutaijteꞌen ɨ ruyaujmuaꞌa, ajta aɨme ɨ seica ɨ rutyaɨtestyamuaꞌa.
\v 13 Tɨ puaꞌa saɨj rɨꞌɨ tyuꞌutyavaɨreꞌen u teyujtaꞌa, ayaa pu ramueꞌitɨn mej rɨꞌɨ tiraataꞌan ɨ tyaɨte maɨjna cɨmeꞌe tɨ rɨꞌɨ tyuꞌutyavaɨ. Ajta pu Dioj raatácaꞌanyestiꞌireꞌesin tɨ ij auj tiꞌivaɨraꞌa, ajta cai tiꞌitzɨɨnyaꞌa aꞌini aɨ pu tyaꞌaste aɨjna ɨ Cɨriistuꞌu jemi tɨ ajta iꞌi Jesús.
\s Cɨmeꞌen ɨ nyuucari tɨ huataujnyátacan cɨn namuajreꞌe, tɨ ajta titaataseijrate ɨ Dioj
\p
\v 14-15 Ijii, nyej tiꞌimuayuꞌuseꞌe, ayaa nu tiꞌijxeꞌeveꞌe nyej caꞌanacan nyaun aꞌutyaváa naꞌaraꞌani mueetzi jemi. Aru tɨ puaꞌa naꞌateeviꞌin neyajna, ayaa nu tiꞌijxeꞌeveꞌe pej raamuaꞌaree aꞌij mej tiꞌitɨj cɨn huarɨni aɨme ɨ tyaɨtestyamuaꞌameꞌen ɨ Dioj, aɨme ɨ mej eꞌetyujsaꞌɨri u teyujtaꞌa mej mi tiraatataujtziꞌireꞌen maɨjna ɨ Dioj tɨ iꞌiruuri. Ai mu aɨn pueen ɨ maj tihueꞌixaateꞌe ɨ nyuucari tɨ ayan tiꞌayajna ɨ Dioj jemi. Majta aɨme, camu tauraꞌaca maj saɨque tihuaꞌutyamueꞌitɨn.
\v 16 Ee xaa nyaꞌu, ayaa pu tiꞌayajna, capu hueꞌitzi naꞌa. Huapɨꞌɨ pu muareꞌeri tɨ aꞌatɨ raamuaꞌati aɨjna tɨ ruꞌavaa ɨ Dioj jemi, ɨ tyaj cɨn teyan tiꞌiyeꞌira, aꞌini ayaa pu tyujuꞌurɨj:
\q Aɨ pu ayan huataseijre tyahuéꞌiraꞌacán cɨmeꞌe.
\q Ajta aɨn xaijnyuꞌucaraꞌaraꞌan ɨ Dioj,
\q2 aɨ pu ayan tihuaꞌutaꞌixaa yee
\q2 tɨ ayan tiꞌayajna ɨ Cɨriistuꞌu jemi.
\q Majta aɨme ɨ maj tajapua tiꞌivaɨreꞌe, aɨ mu raaseij.
\q Majta aɨme ɨ tyaɨtejraꞌa
\q2 maj yan huachaatɨme iiyan chaanaca japua,
\q2 seica mu meyan tihuaꞌutaꞌixaa aꞌij tɨ aɨn huarɨj.
\q Majta aɨme ɨ maj yan huachaatɨme iiyan chaanaca japua, muiꞌitɨ mu tyaꞌantzaahua aɨjna jemi.
\q Ajta Dioj pu yaꞌuviꞌitɨ ɨ tajapua
\q2 tɨ ij aun nain cɨn antyujmuaꞌaréera aꞌaraꞌani.
\c 4
\s Cɨmeꞌen aɨme ɨ mej raatáxaahuatá muaꞌajuꞌun mej mi cai cheꞌe tyaꞌatzaahuateꞌen
\p
\v 1 Ajta aɨn xaijnyuꞌucaraꞌaraꞌan ɨ Dioj, aɨ pu ayan tiꞌixa aꞌahuaritaacan cɨmeꞌe tɨ nuꞌu ayan teꞌeme majcaꞌihua yee tɨꞌɨj teꞌentipuaꞌarijmeꞌen. Seica mu nuꞌu yáꞌuhuaꞌaxɨꞌɨsin ɨ maj tyaꞌatzaahuateꞌe. Aɨme mu nuꞌu namuaara muaꞌajuꞌun ɨ xaijnyuꞌucari ɨ mej tihuaꞌahueitzeꞌe, majta mu ranamuajran aꞌij tɨ aɨn tiyaaruꞌu tihuaꞌamuaꞌaten.
\v 2 Aɨj pu cɨn ayan huataseijreꞌesin mej meyan hueꞌitzi cɨn tihuaꞌamuaꞌaten maɨjna cɨmeꞌe aɨme ɨ mej tiꞌihueꞌitaca, ɨ majta aꞌij puaꞌa titetyújchaꞌɨ. Capu rɨꞌɨri tɨ aꞌatɨ huaꞌutatyéviꞌimuaꞌan. Aꞌini camu meyan rɨcɨ aꞌij mej tiruꞌumuaꞌaree ɨ rutzajtaꞌa tɨ ayan tiraavijteꞌe, cu xuee tiyaaruꞌu pu huáꞌataixɨꞌɨ ɨ huaꞌa muꞌu jetze.
\p
\v 3 Aɨ mu huaꞌutaꞌijmɨjra ɨ tyaɨte maj cai huatyenyaɨchen, maj cai huatyevicheꞌen. Majta meyan tihuaꞌutaijteꞌesin maj cai raacuaꞌani tiꞌitɨ tɨ tiꞌicueꞌiriꞌi. Aru aɨn Dioj, nain pu yan tyuꞌutyájtua mej mi raꞌancuraꞌan ɨ tyaɨte ɨ maj tyaꞌatzaahuateꞌe, majta ramuaꞌaree tiꞌitɨ tɨ ayan tiꞌayajna, mej mi maɨjna cɨn tiraatataujtziꞌireꞌen.
\v 4-5 Aꞌini tyamuaꞌa pu tiꞌireꞌen naijmiꞌi tɨj naꞌa tɨ Dioj tyuꞌutaahuacaꞌa, capu ayan tiraavijteꞌe tɨ aꞌatɨ tiꞌitɨ ma uraini silu cheꞌe aɨn raꞌancuraꞌan. Cheꞌe ajta aɨjna cɨn tiraatataujtziꞌireꞌen ɨ Dioj jemi, aꞌini puꞌuri aun aꞌaviitziꞌireꞌen ɨ Dioj jemi aɨjna cɨmeꞌe tɨ aɨn Dioj ari ayan tyuꞌutatuireꞌesin tɨꞌɨj huatyejnyuuni ɨ Dioj jemi.
\s Cɨmeꞌen aɨjna tɨ tyamuaꞌa naa tiꞌivaɨreꞌe ɨ Jesús jemi
\p
\v 6 Pataꞌaj peyan tihuaꞌutaꞌan mej mi raamuaꞌati ɨ aꞌihuaamuaꞌa aíjna i nyej neri muaataꞌixaa. Tɨ puaꞌa peyan huarɨni, tyamuaꞌa pej tyuꞌutyavaɨreꞌesin ɨ Cɨriistuꞌu jemi tɨ ajta iꞌi Jesús. Petyuꞌutyavaɨreꞌesin paɨjna cɨmeꞌe tɨj naꞌa paj paꞌarɨꞌɨstacaꞌa muaa pa ranamuajracaa ɨ nyuucari pej jetzen tyaꞌantzaahua, ɨ nyuucari ɨ mej tyamuaꞌa naa timuaamuáꞌate.
\p
\v 7 Capej raꞌatzaahuatyaꞌa aɨjna ɨ nyuucari tɨ cai Dioj jemi eꞌemaꞌacan, tiꞌitɨ mej tiꞌimuarita tɨ cai ayan tiꞌayajna, tɨ cai tiꞌitɨj vaɨreꞌe. Pataꞌaj peyan ámuaꞌatya paɨjna cɨmeꞌe pej peyan huarɨni aꞌij tɨ tiꞌijxeꞌeveꞌe ɨ Dioj.
\v 8 Cɨj pu caj tiꞌivaɨreꞌe tɨ puaꞌa peyan huaꞌacuaꞌajtyeꞌen paɨjna cɨmeꞌe paj raataꞌan ɨ aꞌatzajtaꞌa pej pi huatyaꞌacaꞌanye ɨ muaꞌatéviraꞌa jetze. Aru tiꞌivaɨreꞌe para naijmiꞌica tɨ puaꞌa peyan ámuaꞌatya paɨjna cɨmeꞌe pej peyan huarɨni aꞌij tɨ tiꞌijxeꞌeveꞌe ɨ Dioj. Tiꞌivaɨreꞌe ijii pej yan huatyaturan iiyan chaanaca japua, ajta timuaatyavaꞌɨri pej pi ruuri puaꞌaraꞌani para rusen cɨmeꞌe.
\p
\v 9 Ayaa nu tiꞌimueꞌixaateꞌe tzaahuatiꞌiraꞌa cɨmeꞌe tɨ ayan tiꞌayajna. Cheꞌe cai aꞌatɨ ayan saɨque tiꞌixajta.
\v 10 Ayaa tu een cɨn tiꞌimɨjhuaca, tyajta tiꞌityesaꞌaca tyej teyan raachuꞌeveꞌen tyaɨjna jemi ɨ Dioj tɨ iꞌiruuri, tɨ ajta rɨꞌɨ tihuaꞌataꞌaca naijmiꞌica ɨ tyaɨte eitzeꞌe. Aɨ pu ajta hueꞌiratuaasin aɨme ɨ mej tyaꞌatzaahuateꞌe.
\p
\v 11 Paucheꞌe tihuaꞌamuaꞌatya, pajta pauj tihuaꞌutaijteꞌen paɨjna cɨmeꞌe nyej ye tiꞌimueꞌiyuꞌuseꞌe.
\v 12 Capej tiꞌitaꞌacareꞌen tɨ aꞌatɨ muacáxaahuata aɨjna cɨmeꞌe pej pauj tyamueij, silu ayaa papuꞌu rɨꞌɨ tyajaꞌuchaꞌacaneꞌen tyamuaꞌa naa mej mi aɨme ɨ mej tyaꞌatzaahuateꞌe meyan cheꞌeta manaꞌa áꞌujhuaꞌanyeꞌen patɨj muaa aɨjna cɨmeꞌe aꞌij pej tihueꞌixaateꞌe, aꞌij pej rɨꞌɨ tiꞌitiáꞌachaꞌɨ, ajta aꞌij pej tihuaꞌaxeꞌeveꞌe.
\p Micheꞌe majta meyan cheꞌeta manaꞌa timuáɨjchu patɨj muaa aɨjna cɨmeꞌe aꞌij pej tiraꞌastijreꞌe ɨ tavastaraꞌa, ajta aꞌij pej tyaꞌurareꞌen ɨ aꞌatzajtaꞌa.
\p
\v 13 Ayaa paj rɨjca asta nyacai uvéꞌenyen, pataꞌaj peyan huaꞌutanamuajristeꞌen ɨ yuꞌuxari jetze ɨ tyaɨte tzajtaꞌa, pajta tihuaꞌutaꞌixaateꞌen, pajta tihuáꞌumuaꞌaten.
\v 14 Capej raxaahuata aɨjna tɨ Dioj muaatapueijve matɨꞌɨj maɨn vaujsi mamuaꞌajtamuarej, majta tyuꞌutaxajtacaꞌa mueetzi cɨmeꞌen ɨ Dioj jetze maꞌacan.
\p
\v 15 Pataꞌaj peyan raaruure paɨjna cɨmeꞌe, pataꞌaj nain cɨn tiꞌamuaꞌatya mej mi naimiꞌi meyan tiraaseij pej ranaijmiꞌireꞌen ɨ tɨ mueetzi jemi huatyajturaa.
\v 16 Rɨꞌɨ papuꞌu paɨjna cɨmeꞌe aꞌij pej tiꞌitɨj ruure, pajta aꞌij pej tiꞌitɨ tihuaꞌamuaꞌate. Pataꞌaj peyan taꞌutaviicueꞌi paɨjna cɨmeꞌe aꞌini tɨ puaꞌa peyan huarɨni, muaa paj asaɨj huiiráꞌatuaasin, pajta hueꞌiratuaasin aɨme ɨ maj muanamuajran.
\c 5
\s Aꞌij tɨ yeꞌi tiꞌityújchaɨ́ aꞌaraꞌani aɨme jemi ɨ mej tyaꞌatzaahuateꞌe
\p
\v 1 Capaj aꞌij puaꞌa tiꞌijtyáꞌaxɨꞌɨ seij tɨ ari vastacɨraꞌi, silu rɨꞌɨ pej tiraatajeeva cumu aꞌataata papuꞌu. Ajta aɨme ɨ tyetyaca ɨ maj cai xɨ vaujsicɨraꞌi, pataꞌaj rɨꞌɨ tihuaꞌutajeeva cumu aꞌihuaamuaꞌa papuꞌu.
\v 2 Pataꞌaj rɨꞌɨ tihuaꞌutajeeva ɨ juuca ɨ mej meri ucarijse cumu aꞌanaana papuꞌu, majta aɨme ɨ maj cai xɨ ucarijse cumu aꞌacuꞌutzimuaꞌa papuꞌu naꞌari ajuutzimuaꞌa. Pataꞌaj rɨꞌɨ tihuaꞌutajeeva aꞌij tɨ tiraavijteꞌe nain cɨmeꞌe.
\p
\v 3 Ajta aɨme ɨ juuca ɨ maj meri huaujsaɨjtaracaꞌa, tɨ puaꞌa ayan tiꞌayajna maj huaujsaɨjtaracaꞌa, majta ɨ maj cai aꞌij tiꞌijviicueꞌira, pataꞌaj huaꞌutavaɨreꞌen.
\v 4 Naꞌari cai, tɨ puaꞌa auj tiyaujmuaꞌa caꞌɨn auj tiyaꞌacuajmuaꞌa, ayaa paj huarɨni. Micheꞌe aɨme miꞌi rɨꞌɨ raaruuren mej maɨjna cɨn tyaꞌaraꞌasten mej huaꞌutavaɨreꞌen ɨ ruxaꞌaj tyaɨtestyamuaꞌa. Matɨꞌɨj meyan huarɨn, muꞌuri xaa tyuꞌunajchitacaꞌa maɨjna cɨmeꞌe ɨ mej téꞌechaɨcaꞌa ruvaujsi jemi naꞌari ruyaꞌacuajmuaꞌa jemi. Ajta ai pu aɨn pueen ɨ tɨ rɨꞌɨ tirataꞌaca ɨ Dioj.
\v 5 Pataꞌaj peyan huarɨni, tɨ puaꞌa aꞌatɨ xaa huaujsaɨjtaracaꞌa, tɨ ajta cai aꞌij tiꞌijviicueꞌira, aɨ pu xaa tyaꞌantzaꞌahuatya ɨ Dioj jemi, ajta tyenyuuveꞌen nain xɨcaj tzajtaꞌa, ajta nain tɨcaꞌari tzajtaꞌa tɨ ij ayan tiꞌijhuaviira tɨ Dioj raatavaɨreꞌen.
\p
\v 6 Ajta aɨn ɨ jɨitaꞌa tɨ huaujsaɨjtaracaꞌa, tɨ puaꞌa ayan rɨꞌɨ tiraꞌaraanajchi aɨjna cɨmeꞌe tɨ naa seijreꞌe jemin, cu xuee tɨ huamɨꞌɨ ɨ Dioj jemi. Ma ajta aucheꞌe pu ruuri.
\v 7 Pataꞌaj pajta huaꞌutanamuajristeꞌen ɨ tyaɨte paɨjna ɨ nyuucari mej mi cai tiꞌitɨj cɨn aꞌaturaá muaꞌaraꞌani, tɨꞌij ajta cai aꞌatɨ tiꞌitɨj cɨn huaꞌa jetze tíꞌipuaꞌajtyaꞌa.
\v 8 Tɨ puaꞌa aꞌatɨ cai tihuaꞌutavaɨreꞌen aɨme ɨ rutyaɨtestyamuaꞌa, aɨme ɨ maj eitzeꞌe vejliꞌi jemin eꞌeche, aɨ pu aɨjna cɨn ma ruurai tɨ raꞌatzaahuatyaꞌacaa ɨ Dioj jemi. Eitzeꞌe pu aꞌij puaꞌa rɨcɨ cai saɨj tɨ aꞌij puaꞌa tiꞌityujchaꞌɨ, tɨ ajta cai aꞌanaj raꞌatzaahuateꞌe.
\p
\v 9 Cɨmeꞌen aɨme ɨ maj huaujsaɨjtaracaꞌa, aɨme papuꞌu auyuꞌuxan ɨ mej meyan rajchaꞌɨ aꞌachu cumu hueicate ninyeꞌiraꞌa o eitzeꞌe ninyeꞌiraꞌa. Ajta, ayaa pu ruxeꞌeveꞌe tɨ cai aꞌanaj tiꞌixanaꞌacɨraꞌa jemin ɨ rucɨn tyaacan.
\v 10 Ayaa pu ajta ruxeꞌeveꞌe, maj naimiꞌi ramuaꞌareera ɨ tyaɨte tɨ puaꞌa xaꞌapɨꞌɨn huarɨj tiꞌitɨj cɨmeꞌe, tɨ rɨꞌɨ tihuaꞌuxaꞌapueiriꞌi ɨ tɨꞌɨrii caꞌɨn tɨ huaꞌancureꞌeviꞌitɨ aɨme ɨ maj ramuaaracaraꞌa nusu tɨ huaꞌanajaꞌusixɨ ɨ huáɨɨca jetze aɨme ɨ maj huatyáuu ɨ Dioj jemi naꞌari tɨ huaꞌutavaɨ aɨme ɨ maj tihuaꞌamuareꞌeristeꞌe o tɨ ayan huatauraꞌa tɨ ayan huarɨni tiꞌitɨ tɨ aꞌij tiꞌixaꞌapɨꞌɨn.
\p
\v 11 Ajta aɨme ɨ maj huataujsaɨjtaracaꞌa, ɨ maj mauj tyaamuastaca, capaj peyan huaꞌayuꞌuxa jetzen ɨ papee, aꞌini tɨꞌɨj ari eitzeꞌe huaꞌutaꞌasi maj huavicheꞌen, majta cai cheꞌe raxeꞌevaꞌa muaꞌajuꞌun mej tyuꞌutyavaɨreꞌen ɨ Cɨriistuꞌu jemi, aɨ mu xaa huatyevicheꞌesin.
\v 12 Tɨ puaꞌa peyan huaꞌuyuꞌuxan ɨ papee jetze, ajta tɨ puaꞌa meyan huatyevicheꞌen, aɨ mu rajpueitzi muaꞌajuꞌun ɨ Dioj jemi aꞌini muꞌuri raꞌutaxaahuariꞌiriꞌi ɨ maj anacaican cɨn tyaꞌataujratziiriꞌi ɨ Dioj jemi.
\v 13 Ajta aɨjna cɨmeꞌe, ayaa mu tiꞌijrɨꞌɨre mej áꞌujhuaꞌanyeꞌen ɨ huaꞌachiꞌi tzajtaꞌa meyee, majta meyee. Ayaa mu cɨn maꞌujhuaꞌanyeꞌen aꞌini ayaa mu rɨcɨ aꞌij tɨ tiꞌitɨ tihuaꞌaraanajchi. Ayaa mu áꞌujhuaꞌanyeꞌen meyee, majta meyee mej eihua tyuꞌujxajtaveꞌe, majta eihua tyuꞌurihuaꞌuveꞌe maɨjna cɨmeꞌe aꞌij tɨ rɨcɨ ɨ ruxaꞌaj tevi. Ajta ayaa teꞌirajraꞌani mej eihua tyúꞌuxajtaveꞌe tɨ ayan tiraavijteꞌe.
\p
\v 14 Ayaa pu tiꞌirɨnyaca aɨme jemi ɨ maj mauj tyaamuastaca ɨ maj huataujsaɨjtaracaꞌa. Aɨj nu cɨn neyan tiꞌimueꞌixaateꞌe tɨcɨn micheꞌe huatyevicheꞌen mej mi tiyauumuaꞌa muaꞌaraꞌani. Micheꞌe majta rɨꞌɨ tyuꞌumuareꞌen aꞌu me eꞌeche mej mi cai raataꞌan maɨjna tɨ tajchaɨreꞌe tɨ tiꞌitɨ cɨn huaꞌajetze tyaꞌujpuáꞌajteꞌen.
\v 15 Ayaa pu tiꞌayajna maj seica meri ma ruurai ɨ maj anacaican tyaꞌataujratziiriꞌi ɨ Dioj jemi mej mi raꞌaraꞌasten maɨjna ɨ Satanás.
\p
\v 16 Ajta aɨn jɨitaꞌa tɨ ajta tyaꞌatzaahuateꞌe, tɨ puaꞌa a me eꞌeche jemin seica ɨ maj huaujsaɨjtaracaꞌa, cheꞌe aɨn huaꞌutavaɨreꞌen tɨ ij cai huáꞌamuareꞌeristyaꞌa aɨme ɨ mej tiꞌivaɨreꞌe u teyujtaꞌa. Tɨ puaꞌa ayan huarɨni, aj pu xaa huatarɨꞌɨristari aɨme jemi ɨ maj teyujtaꞌa tiꞌivaɨreꞌe mej mi huaꞌutavaɨreꞌen ɨ maj cai aꞌij teꞌeviicueꞌi ɨ maj huaujsaɨjtaracaꞌa.
\p
\v 17 Pataꞌaj peyan huaꞌuruuren aɨme ɨ mej antyujmuaꞌaree u teyujtaꞌa. Tɨ puaꞌa xaꞌapɨꞌɨn marɨcɨ, ayaa pu tiraavijteꞌe pej tyamuaꞌa rɨꞌɨ tihuaꞌataꞌacareꞌen tiꞌitɨj cɨmeꞌe tɨ tihuaꞌaturaateꞌe. Pataꞌaj eitzeꞌe rɨꞌɨ tihuaꞌutaꞌan aɨme mej miꞌi huatyaujcaꞌanyen maɨjna cɨmeꞌe mej tihuaꞌutaꞌixaateꞌen, majta mej tihuáꞌumuaꞌaten.
\v 18 Ayaa paj huarɨni, aꞌini ayaa pu teꞌeyuꞌusiꞌi ɨ yuꞌuxari jetze tɨcɨn: “Caxu raꞌanajɨꞌɨquihuaꞌan mɨ puuye tɨ raayun ɨ triigu ruɨɨca cɨmeꞌe silu cheꞌe rɨꞌɨristan tɨ cɨj caj tiraacuaꞌani.”
\p Ajta pu ayan teꞌeyuꞌusiꞌi tɨcɨn: “Ayaa pu tiraavijteꞌe mej mi tiraanajchiteꞌe aꞌatɨ tɨ tiꞌimɨjhuaca aꞌachu tɨ caj raamueꞌitɨ.”
\p
\v 19 Tɨ puaꞌa aꞌatɨ tiꞌitɨj cɨn jetzen tiꞌijpuáꞌajtyaꞌa seij tɨ huaꞌachaɨ u teyujtaꞌa, tɨ puaꞌa aɨ naꞌa tiꞌijpuáꞌajtyaꞌa, capej ranamuajra. Aru tɨ puaꞌa ma huaꞌapua naꞌari mahueica meyan jetzen tiꞌijpuáꞌajtyaꞌa, aj paj xaa raanamua.
\v 20 Majta aɨme ɨ maj huaꞌachaɨ ɨ tyaɨte teyujtaꞌa, tɨ puaꞌa aꞌij puaꞌa me titetyújchaɨ ɨ Dioj jemi, pataꞌaj huaꞌajtyaꞌaxɨꞌɨn, metiꞌinamuáaraca ɨ tyaɨte, mej mi raamuaꞌaree ɨ seica mej mi cai meyan tityaꞌɨtzaa.
\v 21 Jemin ɨ Dioj, nyajta jemin ɨ Cɨriistuꞌu tɨ ajta iꞌi Jesús, nyajta huaꞌa jemi ɨ mej tiꞌivaɨreꞌe ɨ tajapua, Dioj tɨ huaꞌantihuau, ayaa nu tíꞌimueꞌijcateꞌe pataꞌaj nain cɨn naꞌaraꞌastijreꞌen aꞌij nyej neri timueꞌixaa. Capej tiꞌitɨ cɨn aꞌij rɨjca paɨjna cɨmeꞌe pej seij eitzeꞌe xeꞌeveꞌe, pajta seij cai peyan tiꞌixeꞌevaꞌa silu pataꞌaj peyan cheꞌeta panaꞌa huaꞌaruure naijmiꞌica.
\v 22 Capej áꞌiyiꞌitzeꞌe paj raꞌavaꞌamɨjhuaꞌan seij ɨ aꞌatɨ tiꞌitɨ tɨ aꞌij cɨmeꞌen pej pi cai jamuan autyaturan ɨ Dioj jemi. Pataꞌaj asaɨj rɨꞌɨ tihuaꞌachaɨn pataꞌaj cai tiꞌitɨj cɨn autyaturan ɨ Dioj jemi, seij jamuan ɨ tevi.
\p
\v 23 Pataꞌaj raatapuaꞌajta paj cai aɨ panaꞌa jaj yaꞌaca. Pataꞌaj cɨj caj tiꞌitɨ nahuaj tyuꞌuyeꞌen aꞌini eihua pej tíꞌicucuiꞌi.
\p
\v 24 Aɨjna cɨmeꞌen ɨ seica ɨ tyetyaca, a eijreꞌe pu seijreꞌe ɨ maj cɨn autyajturaa ɨ Dioj jemi tɨ ij anacaican pueijtzi huaꞌutaꞌan. Ajta seica cɨmeꞌen, capu aꞌij amiteere anacaican ɨ maj cɨn autyajturaa ɨ Dioj jemi, silu majcaꞌi huayee xaa tyajaꞌureꞌenyejsin ajna xɨcajraꞌan tɨ jetzen huataseijreꞌesin.
\v 25 Ayaa pu cheꞌeta naꞌa een aɨjna cɨmeꞌe ɨ tɨ xaꞌapɨꞌɨn ɨ maj cɨn meri tyuꞌutavaɨ, aɨ pu a eijreꞌe seijreꞌe. Naꞌari tɨ puaꞌa cai anacai amiteere, majcaꞌi huayee pu huataseijreꞌesin. Capu rɨꞌɨri tɨ huatáuravaa para rusen cɨmeꞌe.
\c 6
\p
\v 1 Ayaa pu ruxeꞌeveꞌe muejmi jemi satɨj sanaꞌa puaꞌamua mej caꞌanyejri cɨn tyajaꞌamuamuaristeꞌe tɨ i ayan tyajamuáꞌamityejtyaꞌa tɨ ayan raavijteꞌe sej huaꞌaraꞌastijreꞌen aɨme ɨ mej tyajaꞌamueꞌijteꞌe. Naꞌari tɨ puaꞌa sacai seyan huarɨni, aɨ mu aꞌij puaꞌa tyuꞌutaxajta maɨjna cɨmeꞌe ɨ tyej teyan raatamuaꞌamua tɨcɨn Dioj tɨ taꞌivastaraꞌa, majta maɨjna cɨmeꞌe aꞌij tyej tiꞌimuaꞌata.
\p
\v 2 Ajta, aꞌini aɨ mu ɨ mej tyajaꞌamueijteꞌe, aɨ mu majta tyaꞌatzaahuateꞌe, ayaa xu huarɨni. Caxu huaꞌaxaahuariꞌira saɨjna cɨmeꞌe sej ruꞌihuaamuaꞌa ɨ tavastaraꞌa jemi, silu ayaa xu eitzeꞌe tihuaꞌutyavaɨreꞌen. Ayaa xu huarɨni aꞌini eitzeꞌe pu tihuaꞌacɨꞌɨti aɨme ɨ mej tyajaꞌamueijteꞌe aɨjna cɨmeꞌe sej seyan tihuaꞌutyavaɨreꞌen, majta meyan tyaꞌatzaahuateꞌe, ajta Dioj pu huaꞌaxeꞌeveꞌe. Ai pu aɨn pueen ɨ tɨ ruxeꞌeveꞌe pej peyan tihuaꞌumuáꞌate. Pajta, pataꞌaj caꞌanijraꞌa huaꞌutaꞌan mej mi meyan huarɨni.
\s Cɨmeꞌen ɨ tɨ tzaahuatiꞌiraꞌa cɨn ajchaɨreꞌe
\p
\v 3-4 Seica mu meyan tiꞌimuaꞌataca maɨjna cɨmeꞌe tɨ cai ayan tiꞌayajna, tɨ saɨque een aɨjna cɨmeꞌe ɨ nyuucari tɨ rɨꞌɨ taaruuren tɨ cɨmeꞌen taamuáꞌate ɨ tavastaraꞌa ɨ Jesús tɨ ajta iꞌi Cɨriistuꞌu. Majta meyan tiꞌimuaꞌataca aɨjna cɨmeꞌe tɨ saɨque een aɨjna cɨmeꞌen ɨ nyuucari tɨ tzaahuatiꞌiraꞌa cɨn tiꞌixa ɨ Dioj jemi.
\p Tɨ puaꞌa aꞌatɨ ayan eenyeꞌen, capu tiꞌitɨ uꞌumuaꞌaree silu áꞌujtzaahuateꞌe puꞌu. Eihua pu tyuꞌurihuauveꞌe nain cɨmeꞌe, ajta nyaꞌusaꞌamɨꞌɨ aɨjna cɨmeꞌe aꞌij tɨ huataujmuaꞌa seij ɨ nyuucari. Ai pu aɨn pueen ɨ tɨ teꞌiraayeꞌi tɨ ayan rɨcɨ. Maujcheere rujɨɨmuaꞌa naꞌari maujtyesaꞌa. Majta aꞌij puaꞌa tyuꞌujxajtaveꞌe caꞌɨn sei pu ayan tíꞌijxajtziꞌi ɨ ruxaꞌaj tevi tɨ ij aꞌij puaꞌa raaruuren.
\p
\v 5 Aꞌanaj tɨ naꞌa maujtyeseꞌe aɨme ɨ mej aꞌij puaꞌa me tyaumuámuaꞌaree. Aɨ pu tiyaaruꞌu tihuaꞌariꞌiriꞌi ɨ maj anacaican cɨn rúꞌumuaꞌareeracaa tzaahuatiꞌiraꞌa cɨmeꞌe. Aɨj pu cɨn ayan tihuaꞌamitejteꞌe mej meyan tiraamueꞌitɨn maɨjna cɨmeꞌe mej huataujseijrata maj nuꞌu Cɨriistuꞌu jemi tiꞌivaɨreꞌe.
\p
\v 6 Ma ajta, tɨ puaꞌa aꞌatɨ rɨꞌɨ huaꞌuruuren aɨjna cɨmeꞌe tɨ raꞌastijreꞌe ɨ Dioj eihua pu aɨjna cɨn ramueꞌitɨn, tɨ puaꞌa ajta rutyamuaꞌaveꞌe.
\v 7 Aꞌini tyatɨꞌɨj huataseijre iiyan chaanaca japua, catu tiꞌitɨ uveꞌeneijte. Ajta, tyatɨꞌɨj huiracɨɨnye teyanna chaanaca japua, catu tiꞌitɨj aꞌatɨni.
\v 8 Ayaa pu éenyaꞌa, ticheꞌe huatatyamuaꞌaveꞌen tyaɨjna cɨmeꞌe tyej tíꞌijchaꞌɨ ɨ tyej tiꞌicuaꞌa, ajta ɨ tyaj cɨn tíꞌityatacheꞌete.
\p
\v 9 Majta aɨme ɨ mej meyan raxeꞌeveꞌe mej huataujchijtyaanita, ayaa mu eꞌen matɨj aɨme ɨ tiꞌityaɨn aꞌatɨ tɨ caujnari cɨn huaꞌutyaajɨꞌɨque. Aɨ pu huaꞌatyanaamɨ ɨ huaꞌa tzajtaꞌa mej mi eihua tiꞌijxeꞌeveꞌe, maj cai cɨn rɨꞌɨ me tauúmuaꞌaraa, tɨ eihua aꞌij puaꞌa tyuꞌuruure. Ai pu aɨn pueen ɨ tɨ nain tihuaꞌariꞌira, tɨ huaꞌantipuaꞌariteꞌesin rusen cɨmeꞌe.
\v 10 Aꞌini aij pu jetze airáninyei naijmiꞌi tɨj naꞌa tɨ aꞌij puaꞌa seijreꞌe aɨjna cɨmeꞌe maj huapɨꞌɨ tumin ranyacuaꞌatzeꞌe. Majta seica, aɨ mu meri raꞌatyaxaahuatacaꞌa ɨ mej tyaꞌatzaahuateꞌe maɨjna cɨmeꞌe mej eihua huapɨꞌɨ ranyacuaꞌatzeꞌe ɨ tumin. Matɨꞌɨj meyan huarɨni, eihua mu rajpueitzi muaꞌaraꞌani.
\s Tɨ nuꞌu tíꞌiteseꞌen tyamuaꞌa naa tɨꞌij ratyámueꞌitɨn ɨ tɨ xaꞌapɨꞌɨn een
\p
\v 11 Pajta muaa, mɨ pej raꞌastijreꞌe ɨ Dioj, pataꞌaj cai aꞌatzu tyaꞌaste paɨjna cɨmeꞌe silu ayaa papuꞌu huarɨni. Pataꞌaj peyan tiraahuauni pej uraréꞌenyeꞌen ɨ aꞌatzajtaꞌa, pajta pataꞌaj rɨꞌɨ tíꞌichajca ɨ Dioj jemi. Pajta pataꞌaj tyaꞌatzaahuatyaꞌa tzaahuatiꞌiraꞌa cɨmeꞌe. Ayaa papuꞌu pajta tiraahuauni paj huaꞌaxeꞌeveꞌen tyamuaꞌa naa ɨ tyaɨte, paj tyaꞌutaviicueꞌi, pajta ayan huatyaꞌapuaꞌariteꞌe ɨ aꞌatzajtaꞌa.
\v 12 Pataꞌaj tiꞌityeseꞌe tyamuaꞌa naa pej pi ratyamueꞌitɨn paɨjna tɨ xaꞌapɨꞌɨn een aɨjna cɨmeꞌe pej tyaꞌatzaahuateꞌe. Pataꞌaj tiꞌityeseꞌe paɨjna huatyamueꞌitɨn paj ruuri puaꞌaraꞌani rusen cɨmeꞌe ɨ Dioj jemi, aꞌini aɨj pu cɨn Dioj muaatajée ajna xɨcajraꞌan pej jetzen raataꞌa aꞌanyuuca metiꞌiseiraca ɨ tyaɨte. Xaꞌapɨꞌɨn paj raataxajtacaꞌa paj nuꞌu raꞌaraꞌastijreꞌen ɨ tavastaraꞌa jemi.
\p
\v 13 Ayaa nu tiꞌimueijcateꞌe tiꞌitɨj cɨmeꞌe jemin ɨ Dioj tɨ naijmiꞌica huaꞌataꞌaca maj ruuri muaꞌaraꞌani, ajta jemin ɨ Cɨriistuꞌu tɨ ajta iꞌi Jesús tɨ ajta xaꞌapɨꞌɨn tyuꞌutaxajtacaꞌa tɨꞌɨj aɨn tiꞌixaatyaꞌacaa jemin aɨjna ɨ tajtuhuan tɨ ayan antyahuaacaꞌa tɨcɨn Póncio Pilaatu.
\p
\v 14 Ayaa nu tiꞌimueijcateꞌe pej peyan raꞌaraꞌastijreꞌen nain cɨn aꞌij nyej neri timuaataíj, pej pi cai tiꞌitɨj cɨn autyaturan, tɨ ij cai aꞌatɨ tiꞌitɨj cɨn mueetzi jetze tyaꞌupuáꞌajteꞌen. Pataꞌaj pauj peyan rɨjca tɨj naꞌa tɨ yu aucaꞌitɨ aꞌame asta cai ajtahuaꞌa ye huataseijreꞌen ɨ tavastaraꞌa, aɨjna ɨ Jesús, tɨ ajta iꞌi Cɨriistuꞌu.
\v 15 Ajta ayen teꞌeme tɨꞌɨj Dioj ayan raaxaꞌapɨꞌɨntareꞌen yee puꞌuri raavijteꞌe tɨ ajtahuaꞌa huataseijreꞌen.
\p Ajta aɨn Dioj, ai pu aɨn pueen ɨ tyaj rɨꞌɨ tirataꞌaca, ɨ tɨ rusaɨj nain japua tieꞌijta. Aɨ pu tihueꞌijteꞌe aɨme ɨ maj tajtuhuan cɨn tiꞌitátyatyáꞌupuꞌu. Ai pu ajta aɨn pueen ɨ huaꞌavastaraꞌa aɨme ɨ tyej teyan huaꞌatamuaꞌamua tɨcɨn yee tavastaraꞌa, ɨ maj meyanna seijreꞌe iiyan chaanaca japua.
\v 16 Aɨ puꞌu naꞌa aɨn pueen ɨ tɨ cai aꞌanaj mɨꞌɨni, ajta aɨn áꞌuca aꞌu tɨ ayan eihua aꞌutáca aꞌu tyaj cai aꞌarajvee ɨ jemin. Capu aꞌatɨ aꞌanaj raaseij, ajta capu rɨꞌɨri tɨ aꞌatɨ rujɨꞌɨ cɨn raaseij. Ticheꞌe rɨꞌɨ tiraataꞌan, ajta cheꞌe aɨn nain cɨn antyujmuaꞌaréera aꞌaraꞌani rusen cɨmeꞌe.
\p
\v 17 Ayaa paj tihuaꞌutaijteꞌen aɨme ɨ maj chijtyaani pueen, ɨ maj yan huachaatɨme iiyan chaanaca japua mej mi cai huaꞌaxaahuata ɨ seica ɨ maj cai aꞌij tiꞌijviicueꞌi. Micheꞌe majta cai maɨjna cɨn aꞌujtzaahuatyaꞌa maɨjna cɨmeꞌe mej eihua tíꞌijchaꞌɨ tɨ huapɨꞌɨ tiꞌijnajchi, aꞌini capu rɨꞌɨri mej raamuaꞌaree tɨ tyahuaꞌavaꞌɨrihuaꞌan majcaꞌi huayee. Aɨj pu cɨn, micheꞌe raꞌatzaahuatyaꞌa ɨ Dioj tɨ ruxéꞌeviꞌiraꞌa cɨn taatapueijveꞌesin naijmiꞌi tɨj naꞌa tyej ti tyaɨjna cɨn huatatyamuaꞌaveꞌen.
\p
\v 18 Pataꞌaj tihuaꞌutaijteꞌen mej mi meyan huarɨni ɨ tɨ iꞌi xaꞌapɨꞌɨn cɨmeꞌe, mej mi eihua huapɨꞌɨ meyan tyuꞌumuareꞌen maɨjna cɨmeꞌe tɨ xaꞌapɨꞌɨn, mej mi ruxéꞌeviꞌiraꞌa cɨn tihuaꞌutaꞌan ɨ maj cai aꞌij tiꞌijviicueꞌi, mej mi raꞌujcaꞌanye mej tyuꞌuraꞌan tyamuaꞌa naa aɨjna mej tíꞌijchaꞌɨ.
\v 19 Tɨ puaꞌa meyan huarɨni, eihua mu huapɨꞌɨ ratyaꞌavaata ɨ Dioj jemi tɨ tihuaꞌatyavaꞌɨrihuaꞌan majcaꞌi huayee rusen cɨmeꞌe. Ayaa mu meyan huarɨn, aɨ mu xaa ramuaꞌareeran mej maun teꞌentyaruti ɨ Dioj jemi mej mi ruuri muaꞌaraꞌani rusen cɨmeꞌe. Ai pu aɨn pueen ɨ tɨ tihuaꞌatyavaꞌɨrihuaꞌan tzɨteꞌe.
\s Cɨmeꞌen ɨ tɨ raꞌantipuaꞌari
\p
\v 20 Muaa, pej iꞌi Timuteeyu, pataꞌaj rɨꞌɨ panaꞌa pej pi nain cɨn tyaꞌaraꞌasten Dioj tɨ cɨmeꞌen timuéijca. Capaj aꞌatzu raꞌaste ɨ mej eihua tyúꞌuxajtaveꞌe maɨjna cɨmeꞌe ɨ nyuucari tɨ cai tiꞌitɨj vaɨreꞌe, ajta tɨ saɨque een. Ayaa mu tyaꞌujtzaahuateꞌe mej ruꞌumuaꞌaree, aru capu ayan tiꞌayajna. Camu aꞌatzu ruꞌumuaꞌaree.
\v 21 Majta seica meri huaꞌunamuajriꞌi. Ayaa mu cɨn huarɨn, matɨꞌɨj mi maɨn caꞌanacan yáꞌuhuaꞌaxɨ ɨ mej tyaꞌatzaahuateꞌe.
\p Aj mu mi ajtacɨ́j ɨ tavastaraꞌa jemi, micu. Yaa pu i cu. Cheꞌe aꞌij tiꞌimuavaɨraꞌa.