\id 2TI
\h 2 Timuteeyu
\toc1 2 Timuteeyu
\mt1 Aꞌij tɨ raꞌuyuꞌuxacaꞌa ɨ San Pablo aɨjna jemi ɨ Timuteeyu, ɨ tɨ huaꞌapua
\c 1
\s Pablo pu rataujteꞌe
\p
\v 1 Inyaa, nyaa nu iꞌi Pablo, tɨ Dioj naꞌantihuau ruxéꞌeviꞌiraꞌa cɨmeꞌe nyej ni ratyavaɨreꞌen ɨ Cɨriistuꞌu tɨ ajta iꞌi Jesús aɨjna cɨmeꞌe tɨ Dioj ayan tyaꞌataujratziiriꞌi tɨ taataꞌasin tyaj ruuri taꞌaraꞌani rusen cɨmeꞌe jamuan tyaɨjna ɨ Cɨriistuꞌu tɨ ajta iꞌi Jesús.
\v 2 Ayaa nu ye tiꞌimuayuꞌuseꞌe muaa pej iꞌi Timuteeyu, mɨ pej niꞌiyauj. Cheꞌe aɨn Dioj tɨ taꞌiyaꞌupua, ajta aɨn ɨ tavastaraꞌa, ɨ Cɨriistuꞌu, tɨ ajta iꞌi Jesús, micheꞌe maɨn rɨꞌɨ timuaataꞌan, micheꞌe muáꞌancuꞌuvajxɨꞌɨn, majta rɨꞌɨ timuaatyapuaꞌariten ɨ aꞌatzajtaꞌa.
\s Tyáꞌanxajta aɨjna cɨmeꞌe ɨ Cɨriistuꞌu
\p
\v 3 Tɨj naꞌa tyatɨꞌɨjta muaꞌutamuaꞌaree, nain xɨcaj tzajtaꞌa naꞌari nain tɨcaꞌari tzajtaꞌa, nyatɨꞌɨjta tyenyuusimeꞌen, nyaa nu tíꞌijtaujtziꞌireꞌe mueetzi cɨmeꞌe ɨ Dioj jemi ɨ nyaj jemin cai tiꞌitɨj cɨn autyajturaa nyej ravaɨreꞌe. Ayaa nu cheꞌe nyanaꞌa jemin ravaɨreꞌe matɨj maɨn tiꞌivaɨraꞌacaa ɨ nyahuaacɨxaꞌastyamuaꞌa tyaaca.
\v 4 Nyaa nu muaꞌutamuaꞌaree ɨ paj cɨn ayein. Aɨj nu cɨn eihua raxeꞌeveꞌe nyaj nyajtahuaꞌa muaaseij nyej ni nyaɨjna cɨn huatantyamuaꞌaveꞌen.
\v 5 Nyaa nu raꞌutamuaꞌareeriꞌi pej tyaꞌatzaahuateꞌe tzaahuatiꞌiraꞌa cɨmeꞌe. Aɨ pu anacaican tyaꞌantzaahua ɨ aꞌayaꞌacua aɨjna ɨ Loida tyaacan, ajta eꞌeyan aꞌanaana Eunice ayan cheꞌeta naꞌa tyaꞌantzaahua. Ajta ijii ayaa pu tinaꞌamitejteꞌe inyeetzi pej peyan cheꞌeta panaꞌa tyaꞌatzaahuateꞌe ɨ tavastaraꞌa jemi.
\p
\v 6 Aɨj nu cɨn neyan tiꞌimueꞌijteꞌe paj pajtahuaꞌa ahuaꞌacaꞌanyen pej tyuꞌutyavaɨreꞌen nain cɨmeꞌe aꞌij tɨ Dioj timuaataꞌa nyatɨꞌɨj muaꞌaváꞌamuarej ɨ nyamuajcaꞌa cɨmeꞌe.
\v 7 Pataꞌaj ahuaꞌacaꞌanyen tyamuaꞌa naa aꞌini capu ayan tiraataꞌa ɨ Dioj tyej teyan tiꞌitzɨɨneꞌe. Capu aꞌatzu, silu aɨ pu titaatáꞌa tyej taɨjna jetze aratacaꞌanye, tyajta tyej ti taxeꞌeveꞌe, tyajta tej ti rɨꞌɨ metityaumuámuaꞌaree.
\p
\v 8 Aɨj paj cɨn cai tiꞌityeviꞌiraꞌa pej tihuaꞌutaꞌixaateꞌen ɨ tyaɨte aꞌij tɨ tyuꞌuruu ɨ tavastaraꞌa. Capej pajta tiꞌityeviꞌiraꞌa paɨjna cɨmeꞌe nyaj raꞌastijreꞌe. Ma pajta muaa, pataꞌaj nya jamuan huataꞌan tyej ti naimiꞌi rajpueiitzi taꞌaraꞌani, tyej ti Dioj jetze aratacaꞌanye tyej teyan huarɨni mej mi eitzeꞌe raanamua ɨ nyuucari tɨ cɨn Dioj hueꞌiratuaasin.
\v 9 Aɨj tu jetze aratacaꞌanye ɨ Dioj tɨ tuꞌirajtuaa ityejmi, ajta titaijca tyej ti teyan uraréꞌenyeꞌen taꞌaraꞌani ɨ tatzajtaꞌa.
\p Capu aɨjna cɨn tuꞌirajtuaa aɨjna cɨmeꞌe tyej tiꞌitɨj cɨn tyuꞌutyavaɨ. Capu xaa nyaꞌu. Ayaa puꞌu naꞌa tuꞌirajtuaa aɨjna cɨmeꞌe aꞌij tɨ anacaican tiraaxaꞌapɨꞌɨntarej, ajta aɨjna cɨmeꞌe tɨ rɨꞌɨ titaatáꞌa. Aɨ pu ajmiꞌi rɨꞌɨ titaatáꞌa jamuan ɨ Cɨriistuꞌu tɨ ajta iꞌi Jesús. Tɨꞌɨj cai xɨ séiraꞌaca ɨ chaanaca tyej yan japuan puasaaruveꞌe, aɨ pu ayan rɨꞌɨ titaatáꞌa.
\p
\v 10 Aru ijii, puꞌuri a eijreꞌe seijreꞌe aꞌij tɨ rɨꞌɨ titaatáꞌa aɨjna cɨmeꞌe tɨ huataseijre aɨjna tɨ tuꞌirajtuaa, aɨjna ɨ Cɨriistuꞌu tɨ ajta iꞌi Jesús. Aɨ pu raꞌantipuaꞌarite aɨjna ɨ maj cɨn cuiꞌini. Ajta, aɨ pu taataꞌa tyej raaseij ɨ tyaj ruuri taꞌaraꞌani rusen cɨmeꞌe tej raꞌaraꞌastijreꞌen ɨ nyuucari tɨ cɨn Dioj tuꞌirajtuaasin.
\p
\v 11 Ajta ineetzi, Dioj pu naꞌantihuau nyej ni tihuaꞌutaꞌixaateꞌen ɨ tyaɨte nyaɨjna ɨ nyuucari, nyajta nyaɨjna cɨn tyuꞌutyavaɨreꞌen, nyajta nyej tihuáꞌumuaꞌaten.
\v 12 Aɨj nu cɨn neyan nyanaꞌa rajpueijtzi. Me nyajta, canu tiꞌityeviꞌiraꞌa aꞌini nyaa nu ramuaꞌate nyaɨjna ɨ nyaj raꞌastijreꞌe. Ajta ayan tinaꞌamitejteꞌe tɨ aɨn raayɨꞌɨtɨ tɨ ratyaꞌavaa ɨ nyaj cɨmeꞌen tiraijca tɨꞌij ajna huataseijreꞌen ajna xɨcajraꞌa tɨ jetzen Dioj ayan naꞌuxɨjteꞌen aꞌij tɨ tiraavijteꞌe.
\p
\v 13 Ayaa papuꞌu pauj tihuaꞌamuaꞌatya paɨjna cɨmeꞌe aꞌij pej tinaanamuajriꞌi ɨ nyenyuuca cɨmeꞌe tɨ aꞌij huatarujteꞌen. Pataꞌaj pauj peyan raꞌastijreꞌe ɨ tavastaraꞌa, pataꞌaj pajta pauj peyan huaꞌaxeꞌeveꞌe ɨ tyaɨte.
\v 14 Pataꞌaj rɨꞌɨ tiratyáꞌavaa tɨ cɨn Dioj timuéijca. Pataꞌaj rɨꞌɨ tyaꞌuhuatyaꞌacaꞌanyen paɨjna cɨmeꞌe xaijnyuꞌucaraꞌaraꞌan ɨ Dioj pej jetze araꞌacaꞌanye pej pi rɨꞌɨ tiratyáꞌavaa, aꞌini aɨn xaijnyuꞌucaraꞌaraꞌan ye huatyaturaasin tyejmi jemi.
\p
\v 15 Papuꞌuri ramuaꞌaree ɨ maj ma nuurai naimiꞌi aɨme ɨ mej aun eꞌemaꞌacan tɨj naꞌa tɨ huatacáꞌa u Asia. Aɨ mu huaꞌa jetze ajtyamaꞌacan aɨjna ɨ Figelo, ajta aɨjna ɨ Hermógenes.
\v 16 Ayaa nu tiꞌijxeꞌeveꞌe tɨ aɨn tavastaraꞌa rɨꞌɨ huaꞌancuꞌuvajxɨꞌɨn ɨ tyaɨtestyamuaꞌameꞌen aɨjna ɨ Onesíforo aꞌini eihua pu ye nyavaꞌatui ɨ nyaj cɨn huarún. Capu ajta raatatyéviꞌiraste nyej aiityanamiꞌihuacaꞌa.
\v 17 Ma ajta aɨn Onesíforo, tɨꞌɨj aun aꞌutyavaacaꞌa u Roma, aɨ pu naahuau muareꞌeri cɨmeꞌe. Aj pu i xaa naatyau.
\v 18 Cheꞌe tavastaraꞌa ayan tiraataꞌan tɨ Dioj rɨꞌɨ raꞌancuꞌuvajxɨꞌɨn ajna xɨcajraꞌa tɨ jetzen tavastaraꞌa ajtahuaꞌa huataseijreꞌen. Muaa pa ramuaꞌaree tyamuaꞌa naa naijmiꞌi tɨj naꞌa ɨ tɨ cɨn tinaatyavaɨ nyatɨꞌɨj nyaun aꞌucatii u Efeso.
\c 2
\s Cɨmeꞌen aɨjna tɨ ravaɨreꞌe ɨ Cɨriistuꞌu tɨj xantaaruꞌu
\p
\v 1 Pajta muaa, pej niꞌiyauj, pataꞌaj huataꞌacaꞌanyen ɨ aꞌatzajtaꞌa paɨjna cɨmeꞌe tɨ Dioj rɨꞌɨ timuaataꞌa aꞌini muaa pa raꞌastijreꞌe ɨ Cɨriistuꞌu tɨ ajta iꞌi Jesús.
\v 2 Ayaa papuꞌu huarɨni. Aɨjna pej peri nyeetzi huanamuajriꞌi aꞌij nyej tihuaꞌutaꞌixaa ɨ tyaɨte, seica mej tiꞌiseiraca, patɨj panaꞌa tinaanamuajriꞌi, aɨj papuꞌu cɨn tihuaꞌutaijteꞌen seica ɨ tyetyaca ɨ maj rɨꞌɨ titetyújchaꞌɨ, mej mi raayɨꞌɨtɨhuaꞌan mej tihuaꞌumuaꞌaten ɨ tyaɨte. Pataꞌaj tyaꞌutaviicueꞌi tajamuan.
\p
\v 3 Pataꞌaj rɨꞌɨ tiraatyavaɨreꞌen ɨ Cɨriistuꞌu tɨ ajta iꞌi Jesús. Pataꞌaj peyan cheꞌeta panaꞌa taꞌutaviicueꞌi tajamuan aɨjna cɨmeꞌe ɨ paj rajpueijtzi tɨj ajta xantaaruꞌu tɨ tiꞌivaɨreꞌe taꞌutaviicueꞌi aɨjna cɨmeꞌe tɨ rajpueijtzi.
\v 4 Ajta, aꞌatɨ tɨ naꞌa tɨ tiꞌivaɨreꞌe tɨj xantaaruꞌu, tɨꞌij aɨn rɨꞌɨ raataꞌan aɨjna tɨ taꞌuyuꞌuxacaꞌa, aɨ puꞌu naꞌa jetzen ruxeꞌeveꞌe aꞌij mej rɨcɨ ɨ mej iꞌi xantaaruꞌu.
\p
\v 5 Ayaa pu cheꞌeta naꞌa een aɨme ɨ mej maun aꞌutyarute mej mi tyuꞌutatyeseꞌen huaꞌa jamuan ɨ maj huatyaruaache. Tɨ ij seij raamueꞌitɨn aɨjna ɨ curuun, ayaa pu tyuꞌujxeꞌeveꞌe tɨ aɨn ayan tyuꞌutatyeseꞌen aꞌij mej tiraaxaꞌapɨꞌɨntare aɨme ɨ mej tiꞌijta.
\v 6 Ajta aɨjna tɨ eihua tiꞌimɨjhuaca japuan ɨ ruchuej, ayaa pu tiraavijteꞌe tɨ anacaican tiraacɨꞌɨti aɨjna tɨ tyuꞌucɨɨracaꞌa. Aj pu tihuaꞌacɨꞌɨti ɨ seica.
\v 7 Pataꞌaj peijna jetzen peyan tiꞌimuaꞌatzaa aꞌij nyej tiꞌimueꞌixaateꞌe, aꞌini tavastaraꞌa pu muaataꞌasin pej yauꞌeitaa puaꞌaraꞌani nain cɨmeꞌe aꞌij tɨ huataujmuaꞌa.
\p
\v 8 Pataꞌaj raꞌutamuaꞌaree peijna cɨmeꞌen ɨ Jesús, tɨ ajta iꞌi Cɨriistuꞌu. Aɨ pu ajtahuaꞌa huatarú huaꞌa tzajtaꞌa ɨ mɨꞌɨchite. Aɨ pu ajta huaacɨxaꞌaraꞌan pueen aɨjna ɨ David tyaacan. Ai pu aɨn pueen ɨ nyuucari ɨ nyej tihueꞌixaateꞌen ɨ tyaɨte.
\v 9 Aɨj nu cɨn neyan rajpueijtzi, mej meyan naꞌanaajɨꞌɨquen aꞌij mej tihuaꞌanajɨꞌɨqui ɨ mej aꞌij puaꞌa titetyujchaꞌɨ. Aru nyaucheꞌe nu tihuaꞌutaꞌixaateꞌesin aꞌini capu tiꞌirɨꞌɨri mej ratyaꞌavaa aɨjna ɨ nyuucari tɨ Dioj jetze raxa aꞌu nyaj aiityanamiꞌi.
\v 10 Aɨj nu cɨn nain cɨn taꞌutaviicueꞌira nyaɨme jemi ɨ tɨ Dioj huaꞌantihuau, tɨ ij ajta Cɨriistuꞌu tɨ ajta iꞌi Jesús hueꞌirajtuaani mej mi jemin huatyaturan rusen cɨmeꞌe aꞌu tɨ áꞌunyeeriꞌi tyamuaꞌa naa.
\p
\v 11 Ayaa nu tiꞌimueꞌixaateꞌe tzaahuatiꞌiraꞌa cɨmeꞌe seij nyuucari tɨ ayan tɨcɨn:
\q Tɨ puaꞌa tyej teyan jamuan huacuii,
\q2 tyan tu tyajta jamuan ruuri taꞌaraꞌani.
\q
\v 12 Tɨ puaꞌa tej teyan taꞌutaviicueꞌi ɨ tyaj rajpueijtzi,
\q2 tyan tu tyajta jamuan tieꞌijta taꞌajuꞌun.
\q Naꞌari cai, tɨ puaꞌa teyan ma ruurai,
\q2 aɨ pu ajta ma tuurai itejmi.
\q
\v 13 Tɨ puaꞌa teyan tityaꞌutáꞌɨtzaꞌaraꞌan ɨ Dioj jemi,
\q2 aɨ pu cai aꞌanaj aꞌutaꞌɨtzeesin itejmi jemi
\q2 aꞌini capu rɨꞌɨri tɨ aɨn rusaɨj rutíte.
\s Cɨmeꞌen aɨjna ɨ aꞌatɨ tɨ xaꞌapɨꞌɨn seijreꞌe
\p
\v 14 Pataꞌaj pauj paɨjna cɨn tihuaꞌutaꞌixaateꞌen mej mi maɨjna cɨn raꞌutamuaꞌaree aꞌij nyej neri timueꞌixaa. Pataꞌaj rɨꞌɨ tihuaꞌutaꞌixaateꞌen ɨ Dioj jemi mej mi cai tyúꞌujtyesiꞌiraꞌa rujɨɨmuaꞌa nyuucari cɨmeꞌe aꞌini capu tiꞌitɨj vaɨreꞌe silu aꞌij pu puaꞌa naꞌa huaꞌaruure aɨme ɨ maj ranamua.
\v 15 Pataꞌaj peyan paɨjna cɨn tiꞌityesaꞌa nain cɨn aꞌachu paj caj tiruꞌumuaꞌaree pej pi huataꞌaseijrata ɨ Dioj jemi, patɨj seij ɨ tɨ Dioj raataxajtacaꞌa tɨcɨn xaꞌapɨꞌɨn paj huarɨj. Ayaa paj peyan eenyaꞌa puaꞌame tɨj seij tɨ tiꞌimɨjhuaca tɨ cai aꞌanaj autyajturaa tiꞌitɨj cɨmeꞌe tɨ raatatyeviꞌirasteꞌen. Ayaa puꞌu naꞌa, aꞌini aɨ pu xaꞌapɨꞌɨn rɨjca aɨjna cɨmeꞌe tɨ tiꞌimuaꞌata aꞌij tɨ tiraavijteꞌe aɨjna ɨ nyuucari tɨ ayan tiꞌayajna.
\p
\v 16 Capej huaꞌajaahuateꞌe aɨme ɨ mej eihua tyuꞌujxajtaveꞌe, aꞌini aɨme ɨ maj meyan tyuꞌujxajtaveꞌe, eitzeꞌe mu maruujɨpua ɨ yeꞌira tɨ ayan tiꞌayajna asta manaꞌa cai cheꞌe tiꞌitɨ xajta tɨ xaꞌapɨꞌɨn een.
\v 17 Eihua mu aꞌij puaꞌa tyuꞌuruure aɨme ɨ mej meyan tyuꞌujxajtaveꞌe, tɨj naꞌa tɨ tyuꞌume aꞌij mej tiꞌixa, eitzeꞌe pu aꞌij puaꞌa huaꞌaruuren ɨ tyaɨte.
\p Ayaa pu tiꞌirɨnyaca aɨme jemi ɨ maj huaꞌapua, aɨjna ɨ Himeneo, ajta aɨjna ɨ Fileto.
\v 18 Aɨ mu meri ma ruuhuaꞌaxɨ ɨ nyuucari tɨ ayan tiꞌayajna aꞌini ayaa mu tiꞌixaxaꞌa maj nuꞌu meri majtahuaꞌa huatarú ɨ mɨꞌɨchite. Muꞌuri seica huatyaamueꞌitɨ aꞌij mej tyaꞌantzaahuateꞌen.
\p
\v 19 Ma ajta, Dioj ayan tyuꞌuruu tɨ ij cai tiꞌitɨ taꞌantipuaꞌariteꞌen itejmi. Cu xuee tɨj chiꞌi ájtaahuacaꞌa tɨ cimieentu japua ruꞌujche tɨ cai rɨꞌɨri tɨ aꞌatɨ raꞌanján, ajta, tɨ aꞌayuꞌusiꞌi tɨ ayan tɨcɨn: “Tavastaraꞌa pu huaꞌamuajte aɨme ɨ rutyaɨtestyamuaꞌa”; ajta tɨ ayan tɨcɨn: “Naimiꞌi matɨj manaꞌa puaꞌamua ɨ maj meyan raataxaj yee tɨ raꞌastijreꞌe ɨ tavastaraꞌa, micheꞌe maɨn ma rúuhuaꞌaxɨn ɨ maj aꞌij puaꞌa cɨn titetyujchaꞌɨ.”
\p
\v 20 Eihua pu tiꞌitɨ aun tyaꞌuseijreꞌe chiꞌi tzajtaꞌa tɨ veꞌe. Capu aɨ naꞌa seijreꞌe tiꞌitɨ tɨ taavijhua ɨ ooro cɨmeꞌe naꞌari plaata cɨmeꞌe silu ajta pu aɨn tyaꞌuseijreꞌe tɨ cɨye cɨn tiꞌitaavijhua, ajta xarij cɨmeꞌe. Seica tɨ aun tyeꞌiráꞌa, ayaa pu tiꞌivaɨɨreꞌe matɨꞌɨj tiꞌiyeste, ajta seica tɨ ajta aun tyeꞌiráꞌa, chaꞌa naꞌa pu cɨn tiꞌivaɨreꞌe.
\v 21 Ayaa pu tíꞌen. Tɨ puaꞌa aꞌatɨ ayan raxeꞌeveꞌe tɨ tiꞌivaɨreꞌe ɨ Dioj jemi tɨj aɨjna ɨ tiꞌitɨ tɨ ayan tiꞌivaɨreꞌe matɨꞌɨj tiꞌiyeste, ayaa pu ruxeꞌeveꞌe tɨ ma ruuraini naijmiꞌi tɨj naꞌa tɨ aꞌij puaꞌa een, aj pu xaa ayan tiraaviityaꞌa aꞌame tɨ ij tiraatyavaɨreꞌen ɨ tavastaraꞌa, tɨ ij tavastaraꞌa ayan ratyaꞌavaa tɨ ij tiraatyavaꞌɨrihuaꞌan tiꞌitɨj cɨmeꞌe tɨ xaꞌapɨꞌɨn een.
\p
\v 22 Pataꞌaj pauj ma rúuhuaꞌaxɨn ɨ maj cɨn aꞌij puaꞌa titetyujchaꞌɨ ɨ mej tyaamua. Pataꞌaj peyan huarɨni huaꞌa jamuan ɨ mej meyan tiꞌixa yee mej raꞌastijreꞌe ɨ tavastaraꞌa maɨjna cɨmeꞌe ɨ mej uraréꞌen ɨ rutzajtaꞌa. Pataꞌaj peyan rɨjca aꞌij tɨ tiꞌijxeꞌeveꞌe ɨ Dioj. Pataꞌaj pajta huaꞌaxeꞌeveꞌe ɨ tyaɨte. Pajta peyan huaꞌutyapuaꞌariteꞌen ɨ huaꞌa tzajtaꞌa ɨ aꞌihuaamuaꞌa.
\p
\v 23 Capej huaꞌastijreꞌe aɨme ɨ mej eihua tyúꞌuxajtaveꞌe aꞌini papuꞌuri ramuaꞌaree tɨ ayaa naꞌa tiꞌivaɨreꞌe mej mi tyuꞌujaaxaijteꞌen ɨ tyaɨte ɨ maj rɨꞌɨ me tityaumuámuaꞌaree.
\v 24 Ajta, capu ayan tiraavijteꞌe seij tɨ tavastaraꞌa vaɨreꞌe tɨ ayan eenyaꞌa auchaꞌacanyaꞌa tɨ seica jamuan tiꞌijaaxaijta. Capu aꞌatzu, silu cheꞌe aɨn rɨꞌɨ tihuaꞌumuaꞌaten. Cheꞌe ajta cai nyuꞌucamɨꞌɨ tyaꞌutaviicueꞌi.
\p
\v 25-26 Ajta aɨn tɨ ravaɨreꞌe ɨ tavastaraꞌa, ayaa pu ruxeꞌeveꞌe tɨ ruxaahua rɨꞌɨ huaꞌuruuren aɨme ɨ maj rajchaɨreꞌe aꞌij tɨ aɨn tiꞌimuaꞌataca. Ruxeꞌeveꞌe tɨ aɨn raꞌutamuaꞌaree yee rɨꞌɨri tɨ Dioj huaꞌutaꞌan mej mi saɨque tyuꞌumuaꞌati mej mi raamuaꞌati ɨ nyuucari tɨ ayan tiꞌayajna, mej mi majtahuaꞌa rɨꞌɨ me títyaꞌumuámuaꞌaraa muaꞌaraꞌani. Matɨꞌɨj meyan huarɨni, rɨꞌɨriista pu aꞌame maj huiracɨɨnye aꞌu tɨ tiyaaruꞌu huájeꞌityáana aꞌu tɨ ayan huaꞌuruu aꞌij tɨ aɨn tiꞌijxeꞌevaꞌacaa maj raꞌaraꞌastijreꞌen.
\c 3
\s Aꞌij mej eenyaꞌa muaꞌajuꞌun ɨ tyaɨte tɨꞌɨj teꞌentipuaꞌariteꞌen nain
\p
\v 1 Ayej xaa nyaꞌu tiꞌayajna tɨ ayan teꞌeme majcaꞌihua yee tɨꞌɨj teꞌentipuaꞌarijmeꞌen nain. Eihua mu rajpueiitzi muaꞌajuꞌun.
\v 2 Ayaa mu eenyaꞌa muaꞌajuꞌun ɨ tyaɨte. Ayaa mu raxeꞌevaꞌa aꞌame seij ɨ tyaɨte aꞌij tɨ aɨme tihuaꞌamitejteꞌe seij ajta seij. Majta eihua huapɨꞌɨ raxeꞌeveꞌe maj tumin tisaɨreꞌen. Eihua mu aꞌujtzaahuatyaꞌa muaꞌajuꞌun, majta eihua huaꞌaxaahuata muaꞌajuꞌun ɨ ruxaꞌaj tyaɨte. Eihua mu aꞌij puaꞌa tyúꞌuxajtavaꞌa muaꞌajuꞌun. Camu huaꞌatzaahuatyaꞌa muaꞌajuꞌun ɨ ruvaujsimuaꞌa. Camu majta rɨꞌɨ tihuaꞌutaꞌasin aɨme ɨ maj tiꞌitɨj cɨn huaꞌutyavaɨ. Eihua mu aꞌij puaꞌa titetyujcháɨ muaꞌajuꞌun.
\p
\v 3 Camu huaꞌaxeꞌevaꞌa muaꞌajuꞌun ɨ tyaɨte. Camu majta tihuaꞌutaꞌuuniꞌira silu eihua mu aꞌij puaꞌa tyuꞌujxaatavaꞌa muaꞌajuꞌun. Aɨ mu majta simuaruuni muaꞌajuꞌun. Marajchaɨraꞌa mu muaꞌajuꞌun nain cɨmeꞌe tɨ iꞌi xaꞌapɨꞌɨn.
\v 4 Aviitzi mu cɨn tyuꞌutatuꞌireꞌesin ɨ ruxaꞌa tevi. Camu aꞌatzu áꞌujcuꞌuvaa muaꞌajuꞌun. Eihua mu aꞌujtzaahuatyaꞌa muaꞌajuꞌun maɨjna cɨmeꞌe tɨ ayan tihuaꞌamitejteꞌe mej eihua ruxeꞌeveꞌe. Eihua mu raxeꞌevaꞌa muaꞌajuꞌun mej meyan huarɨni aꞌij tɨ tihuaꞌaraanajchi. Majta camu raxeꞌevaꞌa muaꞌajuꞌun ɨ Dioj.
\v 5 Aru aɨ mu majta meyan huataujseijrata ɨ tyaɨte jemi maj nuꞌu raꞌastijreꞌe ɨ Dioj, aru camu aɨjna jetze araujcaꞌanyaa muaꞌajuꞌun.
\p Capaj huaꞌajaahuatyaꞌa muaa.
\v 6 Ayaa mu eꞌen matɨj aɨme ɨ maj hueꞌitzi cɨn utyaruꞌipi u huaꞌachiꞌita ɨ tyaɨte mej mi huaꞌutyamueꞌitɨn aɨme ɨ juuca ɨ maj cai teꞌeviicueꞌi ɨ rutzajtaꞌa, ɨ maj ruxaamɨsteꞌe maɨjna cɨmeꞌe ɨ maj cɨn autyajturaa ɨ Dioj jemi. Majta meyan huatauraꞌaca tɨ tiꞌitɨ caꞌanijraꞌa huaꞌutaꞌan mej mi meyan huarɨni tiꞌitɨ tɨ aꞌij puaꞌa een, tɨ ajta huaꞌaraanajchi.
\v 7 Aꞌanaj tɨ naꞌa meyan tihuaꞌanamuajran ɨ mej tihuaꞌamuaꞌate mej mi eitzeꞌe yauꞌeitaa muaꞌaraꞌani tiꞌitɨ tɨ jajcua. Camu aꞌanaj huatauraꞌasin mej raamuaꞌati ɨ nyuucari tɨ ayan tiꞌayajna.
\v 8 Ajta aɨme ɨ tyetyaca ɨ mej tihuaꞌamuaꞌate, ayaa mu cheꞌeta manaꞌa tirajchaɨreꞌe ɨ tɨ ayan tiꞌayajna matɨj aɨme ɨ maj Moisés tyaacan mej tichaɨraꞌacaa, aɨme ɨ maj huaꞌapua. Ai mu aɨn pueenyaꞌa aɨjna ɨ Janes tyaacan, ajta aɨjna ɨ Jambres tyaacan. Ajta aɨme ɨ mej meyan eꞌen, ayaa mu aꞌij puaꞌa me tityaumuámuaꞌaree. Camu aꞌatzu tyaꞌatzaahuateꞌe tzaahuatiꞌiraꞌa cɨmeꞌe.
\v 9 Camu cheꞌe aꞌateere mej meyan rɨcɨ aꞌini ayaa cheꞌeta naꞌa tihuaꞌaruuren aꞌij tɨ tihuaꞌuruu ɨ seica ɨ maj huaꞌapua. Naimiꞌi mu ramuaꞌareeran tɨ cai tiꞌitɨj vaɨreꞌe aꞌij mej tiꞌixaxaꞌa.
\s Pablo pu raꞌantipuaꞌari ɨ tɨ cɨn tiraijcateꞌen aijna i Timuteeyu
\p
\v 10 Ma pajta muaa ramuaꞌaree nain cɨmeꞌe aꞌij nyej eenyeꞌequeꞌe aꞌuchaꞌacan, ɨ nyaj cɨn tiꞌimɨjhuaca. Muaa paj pajta ramuaꞌaree nyaj tzaahuatiꞌiraꞌa cɨn tyaꞌatzaahuateꞌe, nyajta tyeꞌeviicueꞌi tyamuaꞌa naa ɨ nyaj cɨn rajpueijtzi.
\v 11 Muaa pa ramuaꞌaree tyamuaꞌa naa mej aꞌij puaꞌa naaruu, nyaj eihua rajpueijtzi naꞌaraa. Muaa pa ramuaꞌaree tiꞌitɨ tɨ aꞌij naaruu aujna aꞌahuaꞌa u Antioquía, ajta aujna u Iconio, ajta aujna u Listra. Eihua nu tyaꞌutaviicueꞌiriꞌi ɨ nyaj cɨn rajpueijtzicaꞌa. Ajta nyavastaraꞌa pu nuꞌirajtuaa nain cɨmeꞌe ɨ nyaj rajpueijtzicaꞌa.
\p
\v 12 Ayej xaa nyaꞌu, ayan cheꞌeta naꞌa tiꞌiruuren aꞌatɨ tɨ naꞌa tɨ tiꞌityeseꞌe tɨ raꞌaraꞌastijreꞌen ɨ Cɨriistuꞌu tɨ ajta iꞌi Jesús. Aꞌij mu puaꞌa raruuren maɨjna ɨ aꞌatɨ.
\v 13 Ajta aɨme ɨ mej aꞌij puaꞌa titetyujchaꞌɨ, majta aɨme ɨ maj cai tzaahuatiꞌiraꞌa cɨn meyan rɨcɨ, maucheꞌe mu eitzeꞌe aꞌij puaꞌa eꞌenyaꞌa muaꞌajuꞌun ɨ rutzajtaꞌa. Maucheꞌe mu eitzeꞌe huaꞌacuanamua muaꞌajuꞌun seica ɨ tyaɨte. Majta eitzeꞌe mu tyaꞌutyaúhueꞌitzeꞌesin rujɨɨmuaꞌa.
\p
\v 14 Ma pajta muaa, pataꞌaj pauj peyan tyaꞌatzaahuatyaꞌa aꞌij pej tiraarɨꞌɨre, peijna jetze tɨ ayan timuaꞌamitejtyaꞌacaa. Pataꞌaj peyan pauj tyaꞌatzaahuatyaꞌa aꞌini muaa pa huaꞌamuajte aꞌij mej timuaamuáꞌate.
\v 15 Pajta, tɨj naꞌa patɨꞌɨj paꞌarɨꞌɨsta, muaa pa ramuaꞌareeracaꞌa aꞌij tɨ teꞌeyuꞌusiꞌi aɨjna jetze ɨ yuꞌuxari tɨ Dioj rujemi ratyaꞌavaatacaꞌa. Ai pu aɨn pueen ɨ nyuucari tɨ muaataꞌasin pej rɨꞌɨ me tyáumuaꞌaraa tɨ ij Dioj mueꞌirajtuaani aɨjna cɨmeꞌe pej ráꞌantzaahua ɨ Cɨriistuꞌu tɨ ajta iꞌi Jesús.
\p
\v 16 Naijmiꞌi tɨj naꞌa tɨ teꞌeyuꞌusiꞌi ɨ yuꞌuxari jetze tɨ Dioj rujemi ratyaꞌavaatacaꞌa, au pu eꞌemaꞌacan ɨ Dioj jemi aꞌini xaijnyuꞌucaraꞌaraꞌan ɨ Dioj, aɨ pu rumuareꞌeriꞌiraꞌa cɨn huaꞌutaꞌa mej mi meyan tiraꞌuyuꞌuxa. Ajta tiꞌivaɨreꞌe mej mi cɨn tihuaꞌumuaꞌaten ɨ tyaɨte naꞌari mej mi cɨn huaꞌutaꞌixaateꞌen ɨ maj cɨn raamuaꞌaree ɨ maj cɨn autyajturaa ɨ Dioj jemi, mej mi rɨꞌɨ huaꞌuruuren. Ajta pu tiꞌivaɨreꞌe mej mi tihuaꞌumuaꞌaten aꞌij tɨ tiꞌixaꞌapɨꞌɨn ɨ Dioj jemi, ajta aꞌij tɨ cai tiꞌixaꞌapɨꞌɨn mej mi uraréꞌenyaꞌa muaꞌaraꞌani ɨ rutzajtaꞌa.
\v 17 Ajta ayan tiraatyavaꞌɨrihuaꞌan aɨjna ɨ aꞌatɨ tɨ raꞌastijreꞌe ɨ Dioj tɨ aɨn ɨ yuꞌuxari cɨn huaujnaijmiꞌireꞌen naimiꞌi tɨj naꞌa tɨ ruxeꞌeveꞌe tɨ ij ayan huarɨni tiꞌitɨ tɨ aꞌij tiꞌixaꞌapɨꞌɨn.
\c 4
\p
\v 1 Ayaa nu een cɨn tíꞌimueꞌijcateꞌe jemin ɨ Dioj, ajta jemin ɨ Cɨriistuꞌu tɨ ajta iꞌi Jesús. Aꞌini Cɨriistuꞌu pu raxaꞌapɨꞌɨntare aɨme jemi ɨ maj mauj yan huachaatɨme iiyan chaanaca japua, ajta aɨme jemi ɨ maj meri huacuii. Aɨ pu ajtahuaꞌa huataseijreꞌesin tɨꞌij tyuꞌutaijta nainjapua.
\v 2 Pataꞌaj muaa tihuaꞌutaꞌixaateꞌen ɨ nyuucari cɨmeꞌe. Pajta pataꞌaj huaꞌutahuavii caꞌanin cɨmeꞌe mej mi raanamua tɨ puaꞌa meyan tityaꞌujcaꞌane maj raanamua naꞌari macai ranamuajracu. Pataꞌaj rɨꞌɨ huaꞌuruuren aɨme ɨ maj cai xaꞌapɨꞌɨn metityaúmuaꞌaree. Pataꞌaj huaꞌutaꞌijmɨ mej mi cai aꞌij puaꞌa rɨjca. Pataꞌaj pajta huaꞌutaꞌan ɨ caꞌanijraꞌa mej mi meyan huarɨni aꞌij tɨ tyuꞌujxeꞌeveꞌe. Rɨꞌɨ papuꞌu paɨjna cɨmeꞌe pej pi taꞌutaviicueꞌi huaꞌa jemi ɨ tyaɨte, pajta paɨjna cɨmeꞌe pej tihuaꞌamuaꞌaten tyamuaꞌa naa.
\p
\v 3 Ayaa paj huarɨni aꞌini ajna pu tyajaꞌureꞌenyejsin ajna xɨcajraꞌan jetze mej jetzen cai cheꞌe teꞌeviicueꞌira muaꞌajuꞌun mej raanamua ɨ tɨ iꞌi xaꞌapɨꞌɨn aꞌij pej tiꞌihuaꞌamuaꞌatyaca. Ma majta aɨme, seica mu huatájeevi aɨme maj raanamua maɨjna cɨmeꞌe aꞌij mej rujɨɨmuaꞌa manaꞌa tirajtyau.
\v 4 Aɨ mu yáꞌuhuaꞌaxɨjsin ɨ tɨ ayan tiꞌayajna mej mi ráꞌantzaahuateꞌen ɨ nyuucari tɨ chaꞌa naꞌa puꞌu tiꞌixa.
\p
\v 5 Ma pajta muaa, pataꞌaj pauj nain cɨn rɨꞌɨ me tyáumuaꞌaraa pataꞌaj pajta tyaꞌutaviicueꞌi tɨ puaꞌa tiꞌitɨ muaatamuáreꞌeristen. Nyajta nu neyan tíꞌimueꞌijcateꞌe pej peyan áꞌuchaꞌacanyeꞌen pej pi tihuaꞌutaꞌixaateꞌen ɨ tyaɨte ɨ nyuucari cɨmeꞌe tɨ cɨn Dioj hueꞌirajtuaani. Pataꞌaj nain cɨn tyaꞌaraꞌasten ɨ paj cɨn antiꞌamuaꞌaree paɨjna cɨmeꞌe ɨ paj cɨn tiꞌivaɨreꞌe ɨ Dioj jemi.
\p
\v 6 Ayaa puꞌu tiꞌen aꞌini ayaa pu tinaꞌamitejteꞌe tɨj nyanaꞌa nyaj rajpueijtzicaꞌa tɨ ayan tiꞌivaɨreꞌe ɨ Dioj jemi cumu muaꞌɨvejri ɨ maj an yajxɨreꞌesin japuan ɨ mej jetzen tiꞌimuaɨꞌɨvajta. Puꞌuri tyajaꞌureꞌenye ajna ɨ nyaj jetzen huamɨꞌɨni.
\v 7 Eihua nu ráꞌuviicueꞌiriꞌi nyej neyan huarɨni aꞌij tɨ tiraavijteꞌe ɨ Dioj jemi. Nuꞌuri raꞌanticɨꞌɨ ɨ nyaj cɨn avaꞌanmuaꞌareeracaꞌa. Canu raatyaxaahuatacaꞌa silu nyaraꞌastijracaꞌa ɨ nyavastaraꞌa.
\v 8 Aɨj pu cɨn Dioj ratyaꞌavaatacaꞌa inyeetzi jemi tiꞌitɨ tɨ tinaacɨꞌɨti aɨjna cɨmeꞌe nyaj urareꞌenyeꞌe ɨ nyatzajtaꞌa.
\p Nyavastaraꞌa pu raaxaꞌapɨꞌɨntare aꞌij tɨ tiraavijteꞌe, aɨ pu aɨjna naatátɨstejsin ajna xɨcajraꞌan tɨ jetzen ayan tiraaxáꞌapɨꞌɨntariꞌiran inyeetzi cɨmeꞌe. Ajta, capu nyeetzi naꞌa huatátɨstejsin, silu naijmiꞌica aꞌachu puaꞌamuaca ɨ mej maɨjna cɨn rachuꞌevaꞌacaa tɨ aɨn ajtahuaꞌa huataseijreꞌen huaꞌa jemi.
\s Pablo pu tíꞌirixaateꞌe aꞌij tɨ yeꞌi huarɨni
\p
\v 9-10 Pataꞌaj huataꞌacaꞌanyen tɨj naꞌa tɨ tiꞌirɨꞌɨri paj yatanyen nyeetzi jemi, aꞌini Demas pu ma nuurai aɨjna cɨmeꞌe tɨ eitzeꞌe raꞌaranajchacaꞌa ɨ tɨ ayan tiꞌiseijreꞌe iiyan chaanaca japua. Crescente pu aun áꞌumej aujna aꞌahuaꞌa tɨ huatacáꞌa u Galacia.
\v 11 Ajta aɨjna ɨ Lucas, aɨ pu ye huatyajturaa nyeetzi jemi. Pataꞌaj raataꞌinen paɨjna ɨ Marcos tɨ puaꞌa meꞌe peyaꞌuseij tɨ ajamuan ya tanyen. Pataꞌaj yaꞌaráviꞌitɨn, aꞌini aɨ pu tinaatyavaꞌɨri ɨ nyaj cɨn tiꞌivaɨreꞌe ɨ Dioj jemi.
\p
\v 12 Nyaraataityacaꞌa nyaɨjna ɨ Tíquico tɨ aun áꞌumeꞌen u Efeso.
\v 13 Patɨꞌɨj mu aꞌarajraꞌani, pataꞌaj mu nyajaꞌarápijreꞌen ɨ nyaj raꞌityavaara naꞌayeꞌi ɨ nyaj nyaun yaꞌutyajtua aɨjna jemi ɨ Carpo, aujna Troas tɨ eꞌeche. Pajta, pataꞌaj mu tinyajaꞌarapijreꞌen ɨ yuꞌuxari, ajta ɨ seica ɨ papee, nyeetzi tɨ tiꞌinyaꞌa.
\p
\v 14 Ajta aɨn ɨ Alejandro tɨ tyapuustiꞌi tíꞌitaꞌahuaca, eihua pu aꞌij puaꞌa naaruu. Aru tavastaraꞌa pu ayan raaruuren aꞌij tɨ tiraavijteꞌe aɨjna jemi aɨjna cɨmeꞌe aꞌij tɨ naaruu.
\v 15 Pajta muaa, rɨꞌɨ papuꞌu paɨjna jemi tɨꞌij aɨn cai muaatyamueꞌitɨn, aꞌini eihua pu rájchaɨraꞌacaa aꞌij tej tihuaꞌutáꞌixaatyaꞌacaa ɨ tyaɨte.
\p
\v 16 Nyatɨꞌɨj anacaican huatyanna, capu aꞌatɨ nyeetzi cɨmeꞌe huatyeechaxɨ tɨ nyajapua huanyuuni. Naimiꞌi mu ma nuurai. Cheꞌe Dioj cai pueijtzi huaꞌataꞌacareꞌen aɨjna cɨmeꞌe aꞌij maj huarɨj.
\p
\v 17 Me nyajta inyaa, aɨj nu jetze aráꞌancaꞌanye ɨ tavastaraꞌa. Aɨ pu naataꞌa ɨ rucaꞌanijraꞌa nyej ni nain cɨn tihuaꞌutaꞌixaateꞌen ɨ tyaɨte, mej mi naimiꞌi raanamua aɨme ɨ maj cai Israel jetze ajtyamaꞌacan. Ajta aɨ pu nuꞌirajtuaa nyej ni cai caꞌanacan huamɨꞌɨni.
\v 18 Tavastaraꞌa pu naatavaɨreꞌesin nain cɨmeꞌe tɨꞌij cai aɨn tɨ aꞌij puaꞌa een naatyamueꞌitɨn tiꞌitɨj cɨmeꞌe. Aɨ pu nuꞌirajtuaasin tɨ ij naꞌaviꞌitɨn u uteꞌe aꞌu tɨ aɨn tyejeꞌijta nyej ni aun aꞌutyaváa naꞌaraꞌani. Ticheꞌe teyan rɨꞌɨ tiraataꞌan tɨj naꞌa tɨ yu auumé para rusen cɨmeꞌe. Cheꞌe ayan tyaꞌaraꞌani.
\s Ɨ tɨ cɨn raꞌantipuaꞌari
\p
\v 19 Pataꞌaj naatataujtiꞌitzeꞌen aɨjna ɨ Prisca, ajta aɨjna ɨ Aquila, ajta aɨme ɨ tyaɨtestyamuaꞌameꞌen aɨjna ɨ Onesíforo.
\v 20 Ajta aɨn ɨ Erasto, au pu aꞌutyajturaa aujna chajtaꞌana jetze u Corinto. Nyajta Trófimo nu aun aꞌutyajtuaa tiꞌicuiꞌican aujna chajtaꞌana jetze u Mileto.
\v 21 Pataꞌaj huataꞌacaꞌanyen pej yatanyen anacaican meenti cai xɨ ajna pɨtyajaꞌarɨcɨ tɨ huaseeviꞌi aꞌayeꞌi.
\p Aɨ mu ya muatataujteꞌesin aɨjna ɨ Eubulo, ajta aɨjna ɨ Pudente, ajta aɨjna ɨ Lino, ajta aɨjna ɨ Claudia, majta naimiꞌi ɨ taꞌihuaamuaꞌa ɨ mej tyaꞌatzaahuateꞌe.
\p
\v 22 Cheꞌe aɨn tavastaraꞌa huatyaturan mueetzi jemi. Cheꞌe aɨn rɨꞌɨ timuaataꞌan. Yaa puꞌu. Puꞌuri antipuaꞌaracaꞌa.