\id TIT
\h Tito
\toc1 Tito
\mt1 Aꞌij tɨ raꞌuyuꞌuxacaꞌa ɨ San Pablo aɨjna jemi ɨ Tito
\c 1
\s Pablo pu tíꞌijyuꞌuseꞌe aɨjna ɨ Tito
\p
\v 1 Inyaa, i nyaj iꞌi Pablo, ayaa nu tiꞌivaɨreꞌe ɨ Dioj jemi. Ajta aɨn ɨ Jesús tɨ ajta iꞌi Cɨriistuꞌu, aɨ pu naꞌantihuau nyej ni neyan tyuꞌutyavaɨreꞌen nyaɨjna cɨmeꞌe mej mi eitzeꞌe tyaꞌatzaahuatyaꞌa aɨme ɨ Dioj tɨ huaꞌantihuau, mej mi majta eitzeꞌe yauꞌeitaa muaꞌaraꞌani tzaahuatiꞌiraꞌa cɨmeꞌe. Tɨ puaꞌa meri yauꞌeitaa muaꞌaraꞌani tzaahuatiꞌiraꞌa cɨmeꞌe, aj mu mi rɨꞌɨ titetyújchaɨɨ muaꞌajuꞌun maɨjna cɨmeꞌe ɨ ruyeꞌira.
\v 2 Aɨj mu cɨn rachueꞌevaꞌa muaꞌajuꞌun mej meyan ruuri muaꞌaraꞌani para rusen cɨmeꞌe, aꞌini ayaa pu tyaꞌataujratziiriꞌi ɨ Dioj jajcua ɨmɨ. Ajta aɨjna ɨ Dioj, capu tiꞌihueꞌitaca.
\p
\v 3 Ajta aɨn Dioj, tɨꞌɨj tyajaꞌureꞌenye aꞌanaj tɨ huaujxaꞌapɨꞌɨntariꞌire, aɨ pu raataꞌa maj raamuaꞌaree ɨ runyuuca cɨmeꞌe. Aɨj pu cɨn ayan tinaataij aɨjna ɨ Dioj tɨ tuꞌirajtuaani nyej ni tihuaꞌutaꞌixaateꞌen aɨjna cɨmeꞌe tɨ Dioj tyaꞌataujratziiriꞌi. Ee xaa nyaꞌu, aɨj nu cɨn tiꞌityejvee ɨ tavastaraꞌa jemi.
\p
\v 4 Ayaa nu tiꞌimuayuꞌuseꞌe, mɨ pej iꞌi Tito, mɨ pej pajta niyauj pueenyaꞌa puaꞌaraa tzaahuatiꞌiraꞌa cɨmeꞌe paɨjna cɨmeꞌe pej peyan cheꞌeta panaꞌa tyaꞌatzaahuateꞌe nyatɨj inyaa. Ayaa nu tiꞌijxeꞌeveꞌe mej meyan muaruuren aɨjna ɨ Dioj ɨ tyaj rajyaꞌupua, ajta aɨn ɨ Cɨriistuꞌu tɨ ajta iꞌi Jesús, ɨ tɨ tuꞌirajtuaani, micheꞌe rɨꞌɨ timuaachaɨn, micheꞌe majta muaatyapuaꞌariteꞌen ɨ aꞌa tzajtaꞌa.
\s Ɨ tɨ cɨn tiꞌimɨjhuaca aɨjna ɨ Tito aujna u Creta
\p
\v 5 Ayaa nu een cɨn muajaꞌutyajtuaa aujna u Creta ɨ chuej tɨ aꞌaraahuachi ɨ jaj japua pej pi rɨꞌɨ raaruuren ɨ tɨ aꞌaturaacaꞌa, pej pi pajta huaꞌantihuauni aꞌij nyej neri timueꞌixaa aɨme ɨ mej tyeꞌentyarute vaujsi cɨmeꞌe nain japua matɨj manaꞌa maj huachaatɨme aujna u Creta.
\v 6 Ajta ayaa pu ruxeꞌeveꞌe tɨ ayan een aɨjna ɨ aꞌatɨ tɨ tyeꞌentyarute vastaꞌa cɨmeꞌe, tɨ cai tiꞌitɨj cɨn aꞌaturaa, ajta tɨ seij naꞌa tyeviꞌitɨnyeꞌen ɨ jɨitaꞌa. Majta ɨ yaujmuaꞌameꞌen aɨjna ɨ aꞌatɨ, ayaa pu ruxeꞌeveꞌe mej tyaꞌatzaahuatyaꞌa, tɨꞌi cai aꞌatɨ aɨjna cɨn huaꞌa jetze tyaꞌupuáꞌajteꞌen mej aꞌij puaꞌa titetyújchaꞌɨ naꞌari maj cai tiꞌitɨj aꞌastijreꞌe.
\p
\v 7 Aꞌatɨ tɨ ayan vastaꞌa cɨn tiꞌityejvee, aɨ pu xaa ayan antyujmuaꞌaree aɨjna cɨmeꞌe tɨ Dioj jetze maꞌacan tiꞌivaɨreꞌe aɨme jemi ɨ tyaɨte. Aɨj pu cɨn ayan ruxeꞌeveꞌe tɨ rɨꞌɨ tiꞌityujchaꞌɨ, tɨ cai tiꞌitɨj cɨn aꞌaturaa. Ruxeꞌeveꞌe tɨ cai ayan áꞌujtzaahuateꞌe, ajta tɨ cai caꞌanacan huatanyuꞌucan, ajta tɨ cai rutyahueiveꞌe. Ajta, ayan cheꞌeta naꞌa ruxeꞌeveꞌe tɨ cai ayan runyaꞌusiꞌiveꞌe, ajta tɨ cai aɨjna cɨn ruvaɨraꞌa aɨjna cɨmeꞌe ɨ tumin maj tiꞌipueꞌivi u teyujtaꞌa, naꞌari tɨ tiꞌinyacuaꞌatze tɨ eihua tiꞌijchaꞌɨ.
\p
\v 8 Ma ajta aɨn, cheꞌe ayen eenyaꞌa aꞌaraꞌani tɨ ruxéꞌeviꞌiraꞌa cɨmeꞌe huaꞌancureꞌeviꞌitɨn matɨj manaꞌa puaꞌamua ramuaaren, tɨ ajta aɨjna jetze ucarutye aɨjna cɨmeꞌe tɨ xaꞌapɨꞌɨn een. Ajta pu ayan ruxeꞌeveꞌe tɨ aɨn rɨꞌɨ metyáumuaꞌaree, tɨ ajta rɨꞌɨ tiꞌityujchaꞌɨ, tɨ ajta uraréꞌen ɨ rutzajtaꞌa. Ajta iꞌi, ayaa pu ruxeꞌeveꞌe tɨ rucaꞌanye ɨ rutzajtaꞌa tɨ ij cai tiꞌitɨj cɨn autyaturan aɨjna cɨmeꞌe tɨ aꞌij puaꞌa een.
\p
\v 9 Ruxeꞌeveꞌe tɨ aɨn ajta yauꞌeitaa tyamuaꞌa naa ɨ nyuucari tɨ ayan tiꞌayajna aꞌij tyej teri tihuaꞌumuáꞌate tɨ ij cai aꞌanaj yáꞌuhuaꞌanan. Tɨ puaꞌa ayan huarɨn, aj pu xaa raayɨꞌɨtɨhuaꞌa aꞌame tɨ ij tihuaꞌumuaꞌaten tzaahuatiꞌiraꞌa cɨmeꞌe aꞌij tɨ ayan tiraavijteꞌe, aɨ pu ajta rayɨꞌɨtɨhuaꞌa aꞌame tɨ huaꞌutyamueꞌitɨn aɨme ɨ mej saɨque tiꞌixaxaꞌa.
\p
\v 10 Ayaa pu ruxeꞌeveꞌe aꞌini muiꞌitɨ mu me áꞌujhuaꞌan ɨ maj cai tiꞌitɨj aꞌastijreꞌe. Eihua mu tihuaꞌamuaꞌate maɨjna cɨmeꞌe ɨ nyuucari tɨ cai tiꞌitɨj vaɨreꞌe, tɨ ajta tyuꞌucuanamua. Aɨme mu jetze ajtyamaꞌacan aɨme ɨ mej raꞌantisiꞌiche ɨ ruhueꞌiraꞌa.
\v 11 Eecan pu ruxeꞌeveꞌe tyej huaꞌutaꞌijmɨ mej mi cai cheꞌe meyan tiꞌixajta aꞌini eihua mu tihuaꞌantyuꞌuuniꞌira matɨj manaꞌa puaꞌamua rutyaɨtestyamuaꞌa seij ɨ aꞌatɨ, majta meyee. Ayaa mu een cɨn meyan tihuaꞌamuaꞌate aɨjna cɨmeꞌe ɨ tɨ cai ayan tiraavijteꞌe mej mi aviitzi cɨn raamueꞌitɨn ɨ tumin ɨ maj rujɨɨmuaꞌa huataujvaɨreꞌen.
\p
\v 12 Seij tɨ huaꞌa jetze ajtyamaꞌacan, tɨ nuꞌu huaꞌa jetze maꞌacan tiꞌixaxaꞌa, ayan tyuꞌutaxajtacaꞌa aɨme cɨmeꞌen tɨcɨn: “Naimiꞌi mu tiꞌihueꞌitaca aɨme ɨ maj Creta huachaatɨme. Aꞌij mu hui puaꞌa tiꞌiruure aɨme ɨ maj huaꞌɨnaꞌaseꞌe. Majta eihua huapɨꞌɨ juxaavaca hasta manaꞌa cai anajucataxɨꞌɨn.”
\v 13-14 Ee xaa, ayaa pu tiꞌayajna aꞌij tɨ tiraataxajtacaꞌa. Aɨj pu cɨn, ayaa pu ruxeꞌeveꞌe pej peyan huarɨni. Pataꞌaj caꞌanin cɨn huaꞌajtyaꞌaxɨꞌɨn mej mi tyaꞌantzaahuateꞌen huataujnyáatacan cɨmeꞌe aꞌij tɨ tiraavijteꞌe, mej mi cai cheꞌe ranamuajra ɨ nyuucari tɨ cai tiꞌitɨj vaɨreꞌe tɨ ajta aɨme jetze huanyej aɨme ɨ maj Israel jetze ajtyamaꞌacan, mej mi cai cheꞌe ranamuajra aꞌij mej tihueꞌijteꞌe aɨme ɨ tyetyaca ɨ maj cai raataxeꞌeve ɨ tɨ ayan tiꞌayajna ɨ Dioj jemi.
\p
\v 15 Ajta aɨme jemi ɨ mej uraréꞌen seijreꞌe ɨ rutzajtaꞌa, ayaa pu tihuaꞌamitejteꞌe tɨ naimiꞌi tɨj naꞌa tɨ Dioj ayan tyuꞌutaahuacaꞌa, aɨ pu tiꞌivaɨreꞌe ɨ ruyeꞌira cɨmeꞌe. Majta, camu aꞌatzu tauraꞌaca tɨ tiꞌitɨ huaꞌutaxanaꞌaveꞌen tɨ aꞌij puaꞌa een. Ma ajta aɨme jemi ɨ maj aꞌij puaꞌa seijreꞌe ɨ rutzajtaꞌa, capu tiꞌitɨ iꞌireꞌen. Eihua mu aꞌij puaꞌa me tityaumuámuaꞌaree. Majta, camu cheꞌe raayɨꞌɨtɨ mej meyan raataxaj yee aɨ pu ayan tiraavijteꞌe nusu aɨ pu cai ayan tiraavijteꞌe.
\v 16 Ayaa mu tiꞌixaxaꞌa tɨcɨn: “Tyan tu ramuaꞌate ɨ Dioj”. Ma majta cai, camu ramuaꞌate aꞌini camu meyan rɨcɨ aꞌij tɨ tiꞌijxeꞌeveꞌe ɨ Dioj. Eecan mu tyuꞌuxanaꞌamɨsteꞌe. Camu tiꞌitɨ aꞌastijreꞌe. Camu majta tiꞌitɨ cɨn tiꞌivaɨreꞌe ɨ Dioj jemi.
\c 2
\s Cɨmeꞌen ɨ nyuucari tɨ rɨꞌɨ huaꞌaruuraca
\p
\v 1 Ma pajta muaa, ayaa pu ruxeꞌeveꞌe pej peyan tihuaꞌumuaꞌaten mej mi meyan rɨꞌɨ titetyujchaꞌɨ aꞌij tɨ tiraavijteꞌe aɨjna cɨmeꞌe mej tyaꞌatzaahuateꞌe huataujnyáatacan cɨmeꞌe.
\v 2 Pataꞌaj peyan tihuaꞌumuaꞌaten ɨ maj vaujsicɨraꞌi maj cai eihua rayaꞌacareꞌen ɨ nahuaj, silu cɨj muꞌu, mej mi seica rɨꞌɨ tihuaꞌuseij. Ruxeꞌeveꞌe mej mi rɨꞌɨ me tityaumuámuaꞌaren, majta mej rɨꞌɨ titetyujchaꞌɨ maɨjna cɨmeꞌe mej raꞌastijreꞌe ɨ tavastaraꞌa. Ajta ayan ruxeꞌeveꞌe mej huaꞌuxeꞌeveꞌen ɨ ruxaꞌa tyaɨte, ajta mej mi tyaꞌutaviicueꞌi tyamuaꞌa naa.
\p
\v 3 Pataꞌaj peyan cheꞌeta panaꞌa tihuaꞌumuaꞌaten aɨme ɨ ucarijse mej mi majta rɨꞌɨ titetyujchaꞌɨ. Capaj huaꞌataꞌacareꞌen maj aꞌij puaꞌa tyuꞌujeeva seij ajta seij. Capu ajta ayan tiraavijteꞌe mej eihua rayaꞌacareꞌen ɨ nahuaj, silu mej mi tihuaꞌumuaꞌaten tiꞌitɨ tɨ aꞌij tiꞌivaɨreꞌe.
\v 4 Micheꞌe maɨn jucarijse meyan tihuaꞌumuaꞌaten ɨ maj juuca ɨ maj auj tyaamua mej mi meyan tihuaꞌuxeꞌeveꞌen ɨ rucɨnaꞌastyamuaꞌa, majta ɨ ruyaujmuaꞌa.
\p
\v 5 Ayaa pu ruxeꞌeveꞌe mej rɨꞌɨ metityaumuámuaꞌaree aɨme ɨ maj mauj tyaamua, mej mi cai tyuꞌuxanaꞌacɨreꞌen. Ajta, ayaa pu ruxeꞌeveꞌe mej nain cɨn tiꞌichaɨj ɨ ruche. Ajta, mej mi rɨꞌɨ huaꞌajchaɨ ɨ rutyaɨtestyamuaꞌa. Micheꞌe majta huaꞌaraꞌastijreꞌen ɨ rucɨnaꞌastyamuaꞌa. Naꞌari, tɨ puaꞌa macai ayan huarɨni, ɨ seica ɨ maj huaꞌaseij, camu cheꞌe raataxeꞌeveꞌesin maj raꞌaraꞌastijreꞌen ɨ tavastaraꞌa.
\p
\v 6 Ayaa paj cheꞌeta panaꞌa caꞌanijraꞌa huaꞌutaꞌan ɨ tyetyaca ɨ maj mauj tyaamua mej mi rɨꞌɨ metityaumuámuaꞌareꞌen maɨjna cɨmeꞌe aꞌij mej rɨcɨ.
\v 7 Pajta muaa, pataꞌaj peyan aseijrata huaꞌa jemi tɨj saɨj tɨ ari arauraste nain cɨmeꞌe aꞌij nyej nyauchan timueꞌixaa, aɨjna cɨmeꞌe aꞌij paj rɨcɨ tɨ iꞌi xaꞌapɨꞌɨn cɨmeꞌe. Pataꞌaj tihuáꞌumuaꞌaten tzaahuatiꞌiraꞌa cɨmeꞌe, pajta peyan tihuaꞌutaseijrateꞌen tɨ huapɨꞌɨ ruxeꞌeveꞌe mej mi meyan huarɨni.
\v 8 Pataꞌaj peyan tihuaꞌutaꞌixaateꞌen tyamuaꞌa naa aꞌahuaritaacan cɨmeꞌe aꞌij tɨ tiraavijteꞌe mej mi cai meyan saɨque tiꞌixajta. Ayaa paj huarɨni tɨ i huaꞌutatéviꞌirasteꞌen aɨme ɨ maj muájchaɨreꞌe maɨjna cɨmeꞌe maj cai tiꞌitɨj cɨn huatanyuusin tɨ aꞌij puaꞌa namuajreꞌe maj cɨn titaaxajtziꞌi.
\p
\v 9 Pataꞌaj peyan tihuaꞌutajeeve aɨme ɨ mej tiꞌimuareꞌe caꞌanyejri cɨmeꞌe, mej mi huaꞌaraꞌastijreꞌen aɨme ɨ mej tihueꞌijteꞌe. Micheꞌe meyan tyuꞌumuareꞌen mej mi nain cɨn rɨꞌɨ tihuaꞌutaꞌan. Ayaa pu ruxeꞌeveꞌe maj cai aꞌij manaꞌa tihuaꞌajeeva aɨme ɨ mej tihueꞌijteꞌe.
\v 10 Mej mi majta cai tihuaꞌanahueꞌira, silu mej mi nain cɨn huaꞌaraꞌastijreꞌen, mataꞌaj cai tiꞌitɨj cɨn ataꞌɨtzaꞌaraꞌan. Tɨ puaꞌa meyan huarɨni, ayaa mu een cɨn caꞌanijraꞌa huaꞌutaꞌasin ɨ seica mej mi majta raataxeꞌeveꞌen, maj majta raꞌaraꞌastijreꞌen aꞌij tyej tihuaꞌamuaꞌate aɨjna cɨmeꞌen tɨ Dioj tuꞌirajtuaani.
\p
\v 11 Ee xaa, puꞌuri me eijreꞌe seijreꞌe tɨ Dioj ari rɨꞌɨ tihuaꞌachaꞌɨ ɨ tyetyaca aɨjna cɨmeꞌe tɨ Dioj raꞌujcaꞌanye tɨ hueꞌirajtuaani naijmiꞌica.
\v 12 Aɨj tu cɨn ramuaꞌaree tɨ ayan ruxeꞌeveꞌe tyej raꞌantipuaꞌariteꞌen nain cɨmeꞌe tɨ aꞌij puaꞌa een ɨ Dioj jemi, ajta nain cɨn tyej rahuausin iiyan chaanaca japua, tɨ cai ayan aꞌateeren rusen cɨmeꞌe. Ajta, ayaa pu ruxeꞌeveꞌe tyej teyan rɨꞌɨ tiꞌititachaꞌɨ aꞌij tɨ tiraavijteꞌe, aꞌij tɨ tiꞌijxeꞌeveꞌe ɨ Dioj. Ajta ayan ruxeꞌeveꞌe tyej rɨꞌɨ me tityaumuámuaꞌaren tyatɨj tyanaꞌa teyan aꞌateerin iiyan japuan ɨ chaanaca tɨ yan seijreꞌe.
\p
\v 13 Tyajtahuaꞌa tu tyauj rachuꞌeveꞌen ɨ tyaj cɨn huatatyamuaꞌaveꞌen ajna xɨcajraꞌa tɨ jetzen tyajaꞌureꞌenyejsin ɨ tyej rachuꞌeveꞌen tɨ ajtahuaꞌa ye huataseijreꞌesin aɨjna ɨ Dioj tɨ nain cɨn antyujmuaꞌaree, tɨ ajta tuꞌirajtuaani. Ai pu aɨn pueen ɨ Jesús tɨ ajta iꞌi Cɨriistuꞌu.
\v 14 Aɨ pu huatauraꞌa tɨ huamɨꞌɨni tajetze maꞌacan tɨ ij aɨn tyuꞌunajchita nain cɨmeꞌe aꞌij tyej téꞌechaɨcaꞌa ityan, tyaɨjna cɨmeꞌe tyaj cai aꞌatzu raꞌaraꞌastijre ɨ Dioj. Ayaa pu een cɨn ajta huamɨꞌɨ tajetze maꞌacan tɨ ij rɨꞌɨ taaruuren ɨ tatzajtaꞌa tyej ti tyaɨtestyamuaꞌameꞌen pueenyaꞌa taꞌaraꞌani, tyej ti ahuátacaꞌanyen tyej ti teyan huarɨni i tɨ iꞌixaꞌapɨꞌɨn cɨmeꞌe.
\p
\v 15 Aɨ pu aɨn pueen ɨ tɨ ruxeꞌeveꞌe pej peyan tihuaꞌumuaꞌaten. Pataꞌaj caꞌanijraꞌa huaꞌutaꞌan nain cɨmeꞌe ɨ paj cɨn antiꞌamuaꞌaree. Pataꞌaj pajta huaꞌajtyaꞌaxɨꞌɨn. Capaj huaꞌataꞌacareꞌen tɨ aꞌatɨ aꞌij puaꞌa tiꞌimuaseijra.
\c 3
\s Aꞌij mej yeꞌi huarɨni ɨ mej tyaꞌatzaahuateꞌe
\p
\v 1 Pataꞌaj huaꞌutaꞌijcateꞌen ɨ tyaɨte mej mi meyan huaꞌastijreꞌen aɨme ɨ mej tiꞌijta, majta aɨme ɨ mej tiꞌitɨj cɨn antyujmuaꞌaree. Micheꞌe meyan huarɨni aꞌij mej tiꞌijxeꞌeveꞌe ɨ mej tiꞌijta. Micheꞌe majta ahuaujcaꞌanyeꞌen mej mi maɨjna cɨn tyuꞌumuareꞌen tiꞌitɨ tɨ aꞌij tiꞌixaꞌapɨꞌɨn.
\v 2 Capaj huaꞌataꞌacareꞌen mej aꞌij puaꞌa tihuaꞌajeeva ɨ ruxaꞌa tyaɨte silu pataꞌaj caꞌanijraꞌa huaꞌutaꞌan mej mi ruꞌihuaamuaꞌa muaꞌaraꞌani tyamuaꞌa naa, mej mi majta rɨꞌɨ tihuaꞌuchaɨn ɨ seica. Micheꞌe majta rɨꞌɨ tihuaurixaateꞌen maj cai aꞌij manaꞌa puaꞌa tyuꞌujeeva.
\p
\v 3 Capaj yáꞌuhuaꞌanan aꞌij tyej eenyaꞌa ajcua ɨmɨ tyaj cai xɨ tyaꞌatzaahuatyaꞌacaa. Catu tiꞌitɨj uꞌumuaꞌareeracaꞌa. Catu tyajta tiꞌitɨ aꞌastijraꞌacaa. Tiꞌitɨ tɨ naꞌa pu tacuanamua. Cu xuee tyej ravaɨraꞌacaa caꞌanyejri cɨmeꞌe ɨ tɨ tatzajtaꞌan seijraꞌacaa tɨ aꞌij puaꞌa een. Ajta tiꞌitɨ tɨ taꞌaranajchacaꞌa, aɨj tu tyajta vaɨraꞌacaa. Ayaa tu tiꞌitítachaɨcaꞌa tyej huaꞌajchaɨraꞌacaa ɨ taxaꞌa tyaɨte. Seica mu majta tájchaɨraꞌacaa ityejmi. Tyajta ityan, ayaa tu cheꞌeta tyanaꞌa ityan tyajɨɨmuaꞌa tu tájaaxaijviꞌiracaꞌa seij tyajta seij.
\p
\v 4 Ma ajta aɨn ɨ Dioj ɨ tɨ tuꞌirajtuaani, aɨ pu taataꞌa tyej teyan raaseij tɨ aɨn rɨꞌɨ tyamuaꞌa tiꞌitachaɨ. Aɨ pu ajta taxeꞌeveꞌe.
\v 5 Aɨ pu xaa tuꞌirajtuaa. Capu aɨjna cɨn tuꞌirajtuaa aɨjna cɨmeꞌe tyej teyan huarɨj ɨ tɨ iꞌixaꞌapɨꞌɨn silu aɨjna cɨmeꞌe tɨ aɨn táꞌancuꞌuvajxɨꞌɨ. Aɨ pu taajajcuare ɨ ruxaijnyuꞌuca cɨmeꞌe. Cu xuee tyaj tyajtahuaꞌa huanuꞌeihua ɨ Dioj jemi, aɨjna cɨmeꞌe tɨ taꞌariꞌiriꞌi tɨ xanaꞌaviꞌiraꞌacaa ɨ tajetze.
\v 6 Ruxaijnyuꞌuca pu xaa huatyajtuaa ityejmi jemi nain cɨmeꞌe ɨ ruxéꞌeviꞌiraꞌa aɨjna cɨmeꞌe tɨ tajapua huanyúu aɨjna ɨ Jesús tɨ ajta iꞌi Cɨriistuꞌu.
\v 7 Ayaa pu een cɨn raatyajtua tyejmi jemi tɨ i aɨn ayan tiraaxaꞌapɨꞌɨntareꞌen tyej ti cai cheꞌe tiꞌitɨj cɨn autyaturan ɨ jemin aɨjna cɨmeꞌe tɨ táꞌancuꞌuvajxɨꞌɨ. Ayaa tu een cɨn seijreꞌe tyej ti teri rachuꞌeveꞌe tɨꞌij titáacɨꞌɨti majcaꞌihua yee tyej ruuri taꞌaraꞌani jemin para rusen cɨmeꞌe.
\p
\v 8 Ayaa pu xaa nyaꞌu tiꞌayajna. Aɨj nu cɨn neyan tiꞌijxeꞌeveꞌe paj muaa caꞌanijraꞌa huaꞌutaꞌan mej mi ráꞌantzaahuateꞌen tɨj nyanaꞌa neri timueꞌixaa aɨme ɨ mej meri raꞌastijreꞌe ɨ Dioj. Micheꞌe majta rɨꞌɨ manaꞌa maɨjna jetze ucarute maj rɨꞌɨ titetyújchaɨca maɨjna cɨmeꞌe tɨ iꞌixaꞌapɨꞌɨn. Tɨ puaꞌa meyan huarɨni, aɨ mu xaa rɨꞌɨ tiraataꞌasin ɨ Dioj, majta huaꞌutyavaɨreꞌen naijmiꞌica.
\p
\v 9 Ma majta seica, eihua mu maɨjna cɨn tyuꞌurihuaꞌura muaꞌajuꞌun maɨjna cɨmeꞌe tɨ cai amiteereꞌe, majta seica maɨjna jetze ucaruti mej meyan tiꞌixaata muaꞌajuꞌun yee aꞌatani tevijraꞌan jetze huanyej ɨ ruhuaacɨxaꞌastyamuaꞌacɨꞌɨ. Majta seica, ayaa mu tyuꞌurihuaꞌura muaꞌajuꞌun maɨjna cɨmeꞌe yee aꞌiqui huataujmuaꞌa aɨjna ɨ nyuucari tɨ raꞌuyuꞌuxacaꞌa aɨjna ɨ Moisés tyaacan. Ayaa mu een cɨn meyan autyahuijsin mej mi eꞌitaꞌa aꞌutácɨɨnye, majta mej mi huataujnyaꞌusiꞌiteꞌen. Naijmiꞌi matɨj manaꞌa meyan eꞌen matɨj aɨme, camu tiꞌitɨj vaɨreꞌe. Capaj huaꞌajaahuatyaꞌa.
\p
\v 10 Tɨ puaꞌa aꞌatɨ ayan tyajáꞌamuaꞌɨtziityaꞌa sej si seyan autyahuiini sej si eꞌitaꞌa aꞌutácɨɨnye, ayaa paj raaruuren. Pataꞌaj raataꞌijmɨ seicajretze, naꞌari huaꞌapuacajretze. Tɨ puaꞌa auj ayan rɨjca tɨ cai muaꞌastijraꞌa, pataꞌaj raataite ma aꞌahuaꞌa.
\v 11 Tɨ puaꞌa cai muaꞌastijreꞌe, ayaa papuꞌu een cɨn peyan tiraamuaꞌaree tɨ aɨn ɨ tevi saɨque naꞌa tiꞌimuatze tɨ cai ayan tiraavijteꞌe. Puꞌuri Dioj raaxaꞌapɨꞌɨntariꞌiriꞌi aɨjna cɨmeꞌe tɨ pueijtzi raataꞌasin.
\s Pablo pu tíꞌirixaateꞌe
\p
\v 12 Nyaa nu muaataitiꞌira mueetzi jemi nyaɨjna ɨ Artemas, nyajta nyaɨjna ɨ Tíquico. Matɨꞌɨj maun aꞌaraꞌasti aꞌu pej aꞌutyejvee, aj paj xaa ahuaꞌacaꞌanyen aꞌachu paj caj ruꞌumuaꞌaree pej ya tanyen nyeetzi jemi, ayujna Nicópolis. Ayaa nu tiraaxaꞌapɨꞌɨntare nyej neyan nyeyun aꞌateeri tɨj naꞌa ajna tɨ huaseeviꞌi aꞌame.
\v 13 Pataꞌaj peyan huarɨni nain tɨj naꞌa tɨ íꞌirɨni paj huaꞌutavaɨreꞌen paɨjna ɨ Zenas, pajta paɨjna ɨ Apolos. Aɨjna ɨ Zenas, ai pu aɨn pueen seij tɨ tiꞌixaꞌapɨꞌɨntareꞌe. Pataꞌaj huaꞌutavaɨreꞌen mej mi aun aꞌarácɨɨne. Pataꞌaj peyan rɨꞌɨ raaruuren tɨ ij cai tiꞌitɨ tihuaꞌaturaatyaꞌa.
\v 14 Majta aɨme ɨ tatyaɨtestyamuaꞌa, ayaa pu ruxeꞌeveꞌe mej meyan tiraayɨꞌɨtɨhuaꞌan mej maɨjna jetze ucarute mej meyan rɨjca ɨ tɨ iꞌixaꞌapɨꞌɨn cɨmeꞌe mej mi maɨjna cɨn huataujvaɨreꞌen. Naꞌari cai, camu tiꞌitɨ cɨn huatyavaɨreꞌesin.
\s Ɨ tɨ cɨn raꞌantipuaꞌari
\p
\v 15 Aɨ mu yaj muataujteꞌe matɨj manaꞌa puaꞌamua mej ye huatyáuu nya jamuan. Pataꞌaj peyan tihuaꞌutataujteꞌen tajetze maꞌacan aɨme ɨ maj taxeꞌeveꞌe, ɨ maj meyan cheꞌeta manaꞌa tyaꞌatzaahuateꞌe. Cheꞌe rɨꞌɨ tyajaꞌamuavaɨraꞌa.