\id HEB
\h Hebreos
\toc1 Hebreos
\mt1 Ɨ tɨ teꞌeyuꞌusiꞌihuacaꞌa huaꞌa jemi ɨ mej Israel jetze ajtyamaꞌacan
\c 1
\s Aɨ pu yaujraꞌan tiꞌitaꞌixaateꞌe ɨ ruyaꞌupua jetze maꞌacan
\p
\v 1 Ayaa pu jajcua ɨmɨ Dioj muiꞌitɨ tihuaꞌutaꞌixaa ɨ tavaujsimuaꞌacɨꞌɨ, muiꞌicaca cɨmeꞌe ɨ nyuucari. Ajnaꞌɨmɨ Dioj pu ayan seica huataityacaꞌa mej mi tyuꞌutaxaj Dioj jetze maꞌacan.
\v 2 Ma ajta ijii, tyaj huatyaɨte, tɨj naꞌa tɨ nain araurastejsin, aɨn Dioj ayan tiraijca ɨ ruyauj tɨ ij aɨn titaataꞌixaateꞌen ɨ Dioj jetze maꞌacan. Aɨ pu ajta ayan raꞌantihuau tɨꞌij nain tiꞌijcɨꞌɨti aɨjna ɨ ruyauj. Dioj pu ajta jamuan tyuꞌutaahuacaꞌa ɨ chaanaca ɨ tyaj japuan yan seijreꞌe.
\v 3 Ajta aɨn ɨ yaujraꞌan, ayaa pu nain cɨn cheꞌeta naꞌa rɨꞌɨ huapɨꞌɨ naa seijreꞌe tɨj ajta ɨ Dioj. Ajta ɨ tevijraꞌan, ayaa pu cheꞌeta naꞌa seijreꞌe tɨj ajta ɨ Dioj. Aɨ pu ajta raviꞌi tɨj naꞌa tɨ iiyan tiꞌiseijreꞌe ɨ chaanaca japua, ajta u tajapua. Runyuuca pu cɨn huapɨꞌɨ antyujmuaꞌaree, aɨ pu ayan rɨcɨ tɨꞌij aꞌateeviꞌin. Tɨꞌɨj aɨn yaujraꞌan tihuaꞌacaꞌariꞌiriꞌi ɨ maj cɨn autyajturaa ɨ Dioj jemi, aj puꞌi aun aꞌujyeijxɨ ɨpuari japua ɨrɨɨtaꞌan aɨjna tɨ nain cɨn antyujmuaꞌaree, tɨ uteꞌe eꞌeseijreꞌe.
\s Ajta aɨn yaujraꞌan, jeitzeꞌe pu vaꞌacan cɨn tiꞌityejvee macai aɨme ɨ mej tiꞌivaɨreꞌe u tajapua
\p
\v 4 Ayaa pu een cɨn huarɨj, ajta ayan teꞌirajraa tɨ aɨn ayan huapɨꞌɨ eitzeꞌe reꞌenyaꞌa aꞌaraa macai aɨme ɨ xaijnyuꞌucari ɨ maj tajapua tiꞌivaɨreꞌe. Ajta eihua pu eitzeꞌe tiꞌivaɨreꞌe ɨ Dioj jemi aɨjna ɨ nyuucari tɨ cɨn Dioj ari raatamuáꞌa ɨ ruyauj cai aɨjna ɨ nyuucari tɨ ajta cɨn huaꞌutamuáꞌa aɨme ɨ mej tajapua tiꞌivaɨreꞌe.
\v 5 Ayaa puꞌu xaa, Dioj capu aꞌanaj ayan tiraataꞌixaa seij tɨ huaꞌa jetze ajtyamaꞌacan tɨj ayan tiraataꞌixaa ɨ ruyauj tɨcɨn:
\q Muaa paj niyauj pueen.
\q Nyajta inyaa, ijii nu muaꞌantíhuau.
\m Ajta ayan tɨcɨn:
\q Nyaa nu yaꞌupuaaraꞌan pueenyaꞌa naꞌame.
\q Ajta amɨn, amɨ pu niyauj pueenyaꞌa aꞌame.
\m
\v 6 Ajta, tɨꞌɨj ayan yaꞌaraaviꞌitɨ iiyan chaanaca japua aɨjna tɨ jajcua ɨmɨ seijraꞌacaa, ayaa pu tyuꞌutaxajtacaꞌa tɨcɨn:
\q Micheꞌe maɨn raatyaanajche matɨj manaꞌa puaꞌamua
\q2 ɨ mej tiꞌivaɨreꞌe ɨ Dioj jemi.
\m
\v 7 Ajta, ayaa pu huaꞌa cɨmeꞌen tiꞌixa aɨme ɨ maj tajapua tiꞌivaɨreꞌe tɨcɨn:
\q Ayaa pu huaꞌaruure aɨme ɨ mej tiꞌivaɨreꞌe
\q2 u tajapua mej mi meyan seijraꞌa tɨj aaca,
\q majta mej mi meyan seijraꞌa tɨj taij tɨ aꞌataa
\q2 aɨme ɨ tɨ tihueꞌijteꞌe.
\m
\v 8 Ma ajta, cɨmeꞌen ɨ ruyauj, ayaa pu tiꞌixa tɨcɨn:
\q Muaa, mɨ paj Dioj pueen,
\q2 muaa paj antiꞌamuaꞌareera puaꞌame
\q2 tɨj naꞌa rusen cɨmeꞌe.
\q Papuꞌuri icu ruꞌiteechui ɨ ’itzɨj ɨ maj cɨn raamuaꞌaree
\q2 paj uraréꞌen cɨn seijreꞌe,
\q paj pajta xaꞌapɨꞌɨn tiꞌijta aꞌij tɨ tiraavijteꞌe.
\q
\v 9 Muaa paj raataxeꞌeve maj rɨꞌɨ tiꞌityujchaꞌɨ
\q2 tzaahuatiꞌiraꞌa cɨmeꞌe.
\q Ajta, capu aꞌatzu muaꞌaránajchacaꞌa
\q2 maj aꞌij puaꞌa tiꞌityújchaɨca.
\q Aɨj pu cɨn, aɨn Dioj ɨ paj jemin seijreꞌe,
\q2 aɨ pu ayan rɨꞌɨ timuaatyajtuaa
\q pataꞌaj eitzeꞌe huataꞌatyamuaꞌaveꞌen
\q2 macai aɨme ɨ mej mueetzi jamuan seijreꞌe.
\m
\v 10 Ajta ayan tɨcɨn:
\q Muaa, nyavastaraꞌa,
\q2 jajcua ɨmɨ paj raatyataahuacaꞌa ɨ chaanaca.
\q Ajta, tɨj naꞌa tɨ iiyan seijreꞌe u tajapua,
\q2 amuajcaꞌa paj cɨn raatyataahuacaꞌa.
\q
\v 11 Aɨ pu teꞌentipuaꞌari tɨj naꞌa puaꞌamua
\q2 tɨ tiꞌiseijreꞌe.
\q Ma pajta muaa, paucheꞌe paj huatyavaa puaꞌame.
\q Ajta tɨj naꞌa tɨ tyuꞌutaavijhuacaꞌa,
\q2 ayaa pu tyuꞌutémíꞌimaꞌacantari
\q2 tɨj cɨɨxuri tɨ cai cheꞌe tiꞌitɨj vaɨreꞌe.
\q
\v 12 Ayaa paj raatyáxuꞌutaꞌinaxɨꞌɨsin tɨj cɨɨxuri
\q2 tɨ miꞌimaꞌacan, ɨ maj raatyajtutzi.
\q Naimiꞌi pu saɨque ruruuren.
\q Ma pajta muaa,
\q2 paucheꞌe peyan cheꞌeta panaꞌa seijreꞌe
\q2 tɨj naꞌa rusen cɨmeꞌe.
\q Capaj aꞌanaj áꞌapuaꞌaren.
\m
\v 13 Dioj capu aꞌanaj ayan tiraataꞌixaa seij tɨ tajapua tiꞌivaɨreꞌe silu ruyauj pu xaa ayan tyuꞌutaꞌixaa tɨcɨn:
\q Pataꞌaj ye aꞌujyéijxɨꞌɨn nyaꞌɨrɨɨtaꞌa.
\q Pataꞌaj peyan huacati asta nyanaꞌa cai
\q2 huaꞌantimueꞌitɨn aɨme ɨ maj muájchaɨreꞌe
\q2 mej mi meyan timuaꞌaraꞌastijreꞌen mueetzi.
\m
\v 14 Capu xaa nyaꞌu ayan tihuaꞌutaꞌixaa aɨme ɨ mej tajapua tiꞌivaɨreꞌe aꞌini aɨ mu aɨn pueen ɨ xaijnyuꞌucari tɨ Dioj ayan tihueꞌijteꞌe mej mi meyan tiꞌivaɨraꞌa maꞌujhuaꞌanyeꞌen, mej mi huaꞌutyavaɨreꞌen aɨme ɨ tɨ huaꞌacɨꞌɨti tɨ Dioj hueꞌirajtuaani.
\c 2
\s Tyaj nuꞌu raꞌaraꞌastijreꞌen ɨ tyaj raanamuajriꞌi
\p
\v 1 Aɨj pu cɨn ayan ruxeꞌeveꞌe tej eitzeꞌe tyamuaꞌa naa raꞌaraꞌastijreꞌen tyaɨjna ɨ tyaj raanamuajriꞌi, tej ti cai yáꞌuhuaꞌaxɨn.
\v 2-3 Ee xaa nyaꞌu, aɨjna ɨ nyuucari ɨ mej mejmiꞌi raataxajtacaꞌa aɨme ɨ maj tajapua tiꞌivaɨreꞌe, aɨ pu xaa tiꞌivaɨraꞌacaa. Ajta aꞌatɨ tɨ naꞌa tɨ cai tiꞌitɨj cɨn raꞌaraꞌastijre, ayaa pu pueijtzi ancuraꞌa aꞌij tɨ tiraavijtyaꞌacaa. Tɨ puaꞌa ajmiꞌi ayan tihuaꞌuruu, ¿aꞌini auj tiꞌirɨꞌɨri tɨ cai pueijtzi taataꞌan tɨ puaꞌa teyan raatyaxaahua tyaɨjna ɨ nyuucari tɨ cɨn Dioj tuꞌirajtuaasin, tɨ ajta eihua huapɨꞌɨ ruxeꞌeveꞌe? Anacaican, tavastaraꞌa pu ayan raataxajtacaꞌa. Ajta eꞌeyan, seica mu taataꞌixaa aɨme ɨ maj raanamuajriꞌi.
\v 4 Dioj pu ajta tyaꞌanxájtacaꞌa aɨjna cɨmeꞌe tɨ ayan huarɨj tiꞌitɨj cɨmeꞌe tɨ huapɨꞌɨ ruxeꞌeveꞌe, ajta tiꞌitɨ ɨ tyaj cɨn rɨꞌɨ tyaꞌutaseij. Aɨ pu ajta raatyajtuaa ɨ ruxaijnyuꞌuca huaꞌa jemi aꞌij tɨ tiraꞌaranajchacaꞌa tɨ ij aɨn xaijnyuꞌucaraꞌaraꞌan ayan huaꞌutaꞌan aꞌij mej yeꞌi tiraayɨꞌɨtɨhuaꞌan.
\s Cɨriistuꞌu pu ayan huanuꞌeihuacaꞌa matɨj aɨme ɨ juutzimuaꞌameꞌen
\p
\v 5 Ajta, capu Dioj ayan aɨjna cɨn tihuéijca aɨme ɨ mej tajapua tiꞌivaɨreꞌe mej mi maɨjna cɨn antyujmuaꞌaréera muaꞌaraꞌani ɨ chaanaca maj japuan huachaatɨmaꞌa muaꞌajuꞌun, aɨjna ɨ chaanaca ɨ tyaj cɨmeꞌen tiꞌixa.
\v 6 Ayaa pu aꞌatɨ aꞌanaj ayan tyaꞌanxájtacaꞌa tɨcɨn:
\q Muaa Dioj, mueetzi jemi cai aꞌatzu tiꞌitɨ cɨn ruxeꞌeveꞌe ɨ tyetyaca, matɨj manaꞌa puaꞌamua.
\q ¿Aꞌini een cɨn peyan raꞌutámuaꞌareeriꞌi?
\q Ajta, aɨn tɨ jetzen airaujneijte ɨ tyaataꞌa,
\q2 ¿aꞌini een cɨn peyan rɨꞌɨ tirataꞌaca
\q2 pej peyan rɨꞌɨ tirajchaɨ?
\q
\v 7 Ayaa paj raaruu tɨ ij aꞌatzu aꞌateeviꞌin
\q2 tɨ eitzeꞌe cɨleenyaꞌa cɨn tiꞌityavaa aꞌaraꞌani
\q2 cai aɨme ɨ mej tajapua tiꞌivaɨreꞌe.
\q Ma pajta muaa, rɨꞌɨ paj tiraataꞌa paɨjna cɨmeꞌe
\q2 paj raꞌantihuau tɨ eihua huapɨꞌɨ tiraacɨꞌɨti
\q2 mej mi naimiꞌi naa rɨꞌɨ tiraꞌutaseij.
\q
\v 8 Pajta peyan tiꞌitɨj cɨn tiraijca
\q2 tɨꞌij aɨn ayan tihueityaꞌa aꞌame ɨ tyaɨte
\q mej mi naimiꞌi caꞌanyejri cɨn raꞌaraꞌastijreꞌen.
\p Tɨ puaꞌa ayan aɨjna cɨn tiraijcatacheꞌe mej mi naimiꞌi raꞌaraꞌastijreꞌen, capu meꞌe jeꞌe tiꞌitɨjtacaꞌa tɨ cai raꞌaráꞌastijraꞌacaa. Ma ajta ijii, ayaa pu japɨꞌɨn seijreꞌe maj cai xɨ naimiꞌi meyan raꞌastijreꞌe.
\v 9 Ma ajta ityejmi, ayaa pu japɨꞌɨn seijreꞌe cɨmeꞌen aɨjna ɨ Jesús. Dioj pu ayan raaruu tɨ ij aꞌatzu aꞌateeviꞌin eitzeꞌe cɨleenyaꞌa cɨn tiꞌityavaa aꞌaraꞌani macai aɨme ɨ maj tajapua tiꞌivaɨreꞌe. Ajta ijii, Dioj pu ayan rɨꞌɨ raatyajtuaa, ajta vaꞌacan cɨn tiraijca, aɨjna cɨmeꞌe tɨ aɨn Jesús ayan rajpueitzi aꞌaraa aɨjna cɨmeꞌe tɨ huamɨꞌɨ. Dioj pu ayan rɨꞌɨ tihuaꞌutaꞌa ɨ tyaɨte aɨjna cɨmeꞌe tɨ aɨn Jesús ayan naijmiꞌica jetze maꞌacan huamɨꞌɨ.
\p
\v 10 Nain pu tiraacɨ́ꞌɨ aɨjna, ajta nain pu ayan jemin tiꞌiseijreꞌe aɨjna cɨmeꞌe tɨ ayan nain tyuꞌutaahuacaꞌa. Ayaa puꞌu xaa ruxeꞌevaꞌacaa tɨ aɨn hueꞌirajtuaani muiꞌicaca ɨ ruyaujmuaꞌa mej mi jemin huatyaturan tɨj naꞌa rusen cɨmeꞌe. Aɨj pu cɨn ayan tiraavijteꞌe tɨ ayan raanaijmiꞌireꞌen aɨjna tɨ eꞌitaꞌa veꞌejvee aɨjna cɨmeꞌe tɨ ayan rajpueitzi aꞌaraa, aɨjna tɨ hueꞌiratuaasin ɨ ruyaujmuaꞌa.
\v 11 Ajta aɨn tɨ huatauraꞌate aɨme, ajta aɨme tɨ aɨn ari hueꞌiteviꞌitɨcɨ, naimiꞌi mu seij manaꞌa jetze ajtyamaꞌacan. Aɨj pu cɨn, capu rateviꞌirasteꞌe tɨ aɨn ayan huaꞌatamuaꞌamuateꞌen tɨcɨn: “Nyeꞌihuaamuaꞌa mu pueen.”
\v 12 Ajta ayan tɨcɨn:
\q Nyaa nu huaꞌutanamuajristeꞌesin
\q2 aꞌij pej antyahuaa huaꞌa jemi ɨ nyeꞌihuaamuaꞌa.
\q Nyaa nu rɨꞌɨ timuaataꞌasin huaꞌa tzajtaꞌa
\q2 aɨme ɨ mej eꞌetyujsaꞌɨri.
\m
\v 13 Ajtahuaꞌa ayan tɨcɨn:
\q Nyaa nu aꞌancaꞌanye ɨ jemin.
\m Ajtahuaꞌa rujajcuatzeꞌen, ayan tɨcɨn:
\q Yaa nu huatejvee huaꞌa jamuan ɨ yaujmuaꞌameꞌen
\q2 tɨ Dioj naatáviꞌitɨste.
\p
\v 14-15 Majta aɨme ɨ yaujmuaꞌameꞌen aꞌini meyan cheꞌeta manaꞌa eenyeꞌen tyahueꞌiraꞌa, majta meyan eenyeꞌen tyáxuureꞌe, aɨj pu cɨn Jesús ayan huaujruu tɨꞌi ayan cheꞌeta naꞌa eenyeꞌen tyáhueꞌiraꞌacaa, ajta ayan eenyeꞌen tyáxuuraꞌacaa matɨj aɨme. Ayaa pu een cɨn huarɨj tɨꞌij ayan raꞌantipuaꞌariteꞌen aɨjna tɨ aɨjna cɨn antyujmuaꞌaree ɨ maj cɨn huacuiꞌini ɨ tyaɨte. Ai pu aɨn pueen ɨ tiyaaruꞌu.
\p Aɨj pu cɨn Jesús huaꞌa jetze maꞌacan huamɨꞌɨ, tɨ ij ajta hueꞌirajtuaani aɨme ɨ mej caꞌanyejri cɨn seijraꞌacaa tɨj naꞌa maj auj ruuri mej meyan tiꞌitzɨɨnyaꞌacaa maj huacuiꞌini.
\v 16 Ee xaa nyaꞌu ayan tiꞌayajna, capu ayan huaujruu matɨj aɨme ɨ mej tajapua tiꞌivaɨreꞌe tɨꞌij huaꞌutyavaɨreꞌen silu ayaa pu huaujruu matɨj aɨme ɨ mej Abraham jetze airaujneijte.
\v 17 Aɨj pu cɨn, ayan ruxeꞌevaꞌacaa tɨ aɨn ayan saɨque huaujruuren tɨ ij ayan eenyeꞌen seijraꞌa matɨj aɨme ɨ ihuaamuaꞌameꞌen nain cɨmeꞌe tɨ ij ayan aɨjna cɨn teꞌentyarute ɨ Dioj jemi, tɨ ij ayan nain cɨn tyuꞌutyavaɨreꞌen ɨ Dioj jemi, tɨ ij ajta ayan huaꞌancuꞌuvajxɨꞌɨn ɨ tyaɨte tɨ ij ajta cai aꞌanaj tiꞌitɨj cɨn atyaꞌɨtzaꞌaraꞌan, tɨ ij ajta huáꞌariꞌi ɨ maj cɨn autyajturaa ɨ Dioj jemi.
\v 18 Puꞌuri xaa nyaꞌu rɨꞌɨri tɨ aɨn ayan huaꞌutyavaɨreꞌen aɨme ɨ maj áꞌaviicueꞌireꞌe tiꞌitɨ cɨmeꞌe, aꞌini aɨ pu ari rajpueiitzi aꞌaraa, ajta ráꞌuviicueꞌiriꞌi.
\c 3
\s Eitzeꞌe vaꞌacan cɨn tiꞌityejvee ɨ Jesús cai aɨjna ɨ Moisés
\p
\v 1 Aɨj pu cɨn, ayaa xu huarɨni, nyeꞌihuaamuaꞌa, mɨ tɨ Dioj amueꞌitéviꞌitɨcɨ, aꞌini muejmi pu huataꞌinee aɨn tɨ uteꞌe eꞌeseijreꞌe sej si naimiꞌi seyan huatyaturan ɨ jemin. Sataꞌaj seyan saɨjna jetze tyuꞌumuaꞌati saɨjna jetze ɨ Jesús tɨ Dioj ayan aɨjna cɨn tiraijca tɨ titaataꞌixaateꞌen cɨmeꞌen aɨjna ɨ nyuucari ɨ tyaj raꞌastijreꞌe. Aɨ pu Jesús ajta nain cɨn tiꞌivaɨreꞌe ɨ Dioj jemi tɨ ij taatyavaɨreꞌen itejmi.
\v 2 Ayaa pu cheꞌeta naꞌa Jesús pu nain cɨn arauraste aɨjna jemi tɨ ayan raꞌantihuau tɨj ajta aɨn Moisés ayan nain cɨn arauraste tɨꞌɨj ajmiꞌi tiꞌivaɨraꞌacaa ɨ chiꞌiraꞌan jetze ɨ Dioj.
\p
\v 3 Ma ajta, Dioj pu ayan tiraaxaꞌapɨꞌɨntariꞌiriꞌi tɨ ayan tiraavijteꞌe tɨ eitzeꞌe rɨꞌɨ tiraatyajtuaani aɨjna ɨ Jesús cai aɨjna ɨ Moisés. Ee xaa nyaꞌu, eitzeꞌe tu rɨꞌɨ tirataꞌaca tyaɨjna tɨ chiꞌi taꞌahuaca tyacai tyaɨjna ɨ chiꞌi.
\v 4 Ayaa pu tiꞌayajna aꞌini tɨj naꞌa tɨ tiꞌiseijreꞌe ɨ chiꞌi, aꞌatɨ pu ráꞌajtaahuacaꞌa. Ma ajta Dioj, aɨ pu nain tyuꞌutaahuacaꞌa tɨj naꞌa tɨ tiꞌiseijreꞌe.
\p
\v 5 Ajta aɨn Moisés, nain pu cɨn arauraste tɨꞌɨj auj tiꞌivaɨraꞌacaa ɨ chiꞌiraꞌan jetze ɨ Dioj. Ayaa pu een cɨn huarɨj, aɨ pu ajta ayan tyaꞌanxájtacaꞌa aꞌij mej majcaꞌi huayee tyuꞌutaxajtancheꞌe.
\v 6 Ma ajta aɨn Cɨriistuꞌu, aɨ pu ayan nain cɨn arauraste tɨꞌɨj tiꞌivaɨraꞌacaa ɨ ruche. Ee xaa, aɨ pu yaujraꞌan pueenyaꞌa aɨjna tɨ huatyeechiꞌi. Tyajta ityan, tyan tu tyaɨtestyamuaꞌameꞌen pueen, tyan tu tyajta tyaun aꞌujti ɨ chiꞌiraꞌan jetze, tɨ puaꞌa teyan tyaꞌutaviicueꞌi tyaj tyaxaahua tyajáꞌuxajtanyeꞌen tyaɨjna ɨ tyaj cɨn tatyamuaꞌaveꞌe tyaɨjna cɨmeꞌe ɨ tyaj rachuꞌeveꞌe.
\s Aɨ mu nuꞌu huaujsaꞌupeꞌen ɨ Dioj jemi aɨme ɨ maj tyaɨtyestyamuaꞌameꞌen pueen
\p
\v 7 Aɨj xu cɨn, sataꞌaj raanamua tyamuaꞌa naa aꞌij tɨ tiꞌixaj aɨjna ɨ xaijnyuꞌucaraꞌaraꞌan ɨ Dioj, ayan tɨcɨn:
\q Tɨ puaꞌa ijii saraanamua tɨ ayan tyajaꞌamueꞌixaateꞌe
\q2 ɨ xaijnyuꞌucaraꞌaraꞌan ɨ Dioj.
\q
\v 8 Caxu seyan cheꞌeta sanaꞌa raꞌantanaamɨn
\q2 ɨ aꞌamua tzajtaꞌa matɨj aɨme
\q2 ɨ maj ajcaꞌihuaꞌɨmɨ naatatyése inyeetzi.
\q Ajna xɨcajraꞌa mej jetzen rájhuau
\q2 mej mi naatyeeseij ajna aꞌu tɨ cai eꞌetiꞌitɨjcaa.
\q
\v 9 Au mu meyan rájhuau mej mi naatyeeseij,
\q majta meyan maun eꞌetee
\q2 aꞌachu cumu huaꞌapuate ninyeꞌiraꞌa
\q2 mej tiꞌiseij nyatɨj nyanaꞌa rɨjcaa.
\q
\v 10 Aɨj nu cɨn huaꞌutajaaxaijviꞌiriꞌi nyaɨme
\q2 ɨ tyaɨtejraꞌa.
\q Nyajta neyan tyuꞌutanixaa yee aꞌanaj tɨ naꞌa
\q2 aɨ mu aꞌij puaꞌa tiꞌimuaꞌatze ɨ rutzajtaꞌa.
\q Majta, camu aꞌatzu ramuaꞌaree aꞌij nyej tiꞌijxeꞌeveꞌe.
\q
\v 11 Aɨj nu cɨn, nyenyuꞌucamɨꞌɨ
\q2 nu cɨn neyan tyaꞌatyanratziiriꞌi
\q2 maj cai aꞌanaj maun aꞌutyaruti
\q aꞌu maj ahuaujsaꞌupeꞌen inyeetzi jamuan.
\m Ayaa pu xaa tyuꞌutaxajtacaꞌa aɨjna ɨ Dioj.
\p
\v 12 Rɨꞌɨ xuꞌu, nyeꞌihuaamuaꞌa, tɨ ij cai ayan huataseijreꞌen muejmi jemi seij tɨ aꞌij puaꞌa tiꞌityujchaꞌɨ ɨ rutzajtaꞌa, tɨ ajta cai tyaꞌatzaahuateꞌe. Caxu raataꞌacareꞌen seij tɨ ayan een tɨ aɨn ayan áꞌujcaꞌanye tɨ ma ruuraini aɨjna ɨ Dioj tɨ iꞌiruuri.
\v 13 Sajta muan, sataꞌaj caꞌanijraꞌa huatauraꞌan seij sajta seij tɨj naꞌa nain xɨcajraꞌa tzajtaꞌa sej sauj ruuri tɨ ij cai seij muan ayan raꞌantanaamɨn ɨ rutzajtaꞌa aɨjna cɨmeꞌe tɨ ayan raacuanamua aɨjna tɨ aꞌij puaꞌa een.
\p
\v 14 Ee xaa nyaꞌu, ayaa pu ruxeꞌeveꞌe sej seyan huarɨni, aꞌini ayaa pu tiꞌitɨ titáacɨꞌɨti jamuan ɨ Cɨriistuꞌu tɨ puaꞌa teyan tyauj tyaꞌutaviicueꞌi tɨj naꞌa rusen cɨmeꞌe ɨ tyaj cɨn tatyamuaꞌaveꞌe tyaɨjna cɨmeꞌe ɨ tyaj rachuꞌeveꞌe tyatɨj tityaꞌutyajhuii.
\p
\v 15 Ayaa pu xaa aꞌij tɨ tyaꞌuyuꞌusiꞌihuacaꞌa ɨ yuꞌuxari jetze tɨcɨn:
\q Tɨ puaꞌa ijii saraanamua tɨ ayan tyajaꞌamueꞌixaateꞌe
\q2 ɨ xaijnyuꞌucaraꞌaraꞌan ɨ Dioj.
\q Caxu seyan cheꞌeta sanaꞌa raꞌantanaamɨn
\q2 ɨ aꞌamua tzajtaꞌa matɨj aɨme
\q2 ɨ mej ajcaꞌihuaꞌɨmɨ naatatyése inyeetzi.
\m
\v 16 Majta aɨme, ɨ maj raanamuajriꞌi, majta raꞌutaxaahuariꞌiriꞌi, ai mu aɨn pueen ɨ tɨ Moisés tyaacan hueꞌiraaviꞌitɨ aujna u Egipto.
\v 17 Ajta aɨme, ɨ tɨ Dioj ayan aꞌatee huaꞌapuate ninyeꞌiraꞌa tɨ huaꞌajaaxaijviꞌi aɨme, ai mu aɨn pueen ɨ maj autyajturaa ɨ Dioj jemi, majta áꞌupuaꞌaracaꞌa maujna aꞌahuaꞌa aꞌu tɨ cai eꞌetiꞌitɨjcaa.
\v 18 Aɨ mu majta aɨn pueen ɨ tɨ huaꞌa cɨmeꞌen Dioj ayan tyaꞌataujratziiriꞌi maj nuꞌu cai aꞌanaj maun aꞌutyaruti aꞌu maj ahuaujsaꞌupeꞌen aɨjna cɨmeꞌe maj cai raꞌaraꞌastijre.
\v 19 Ee xaa nyaꞌu ayaa pu tiꞌayajna tɨ ayan titaꞌamitejteꞌe tɨ cai ayan huaꞌucɨ́ꞌɨ maj maun aꞌutyarute aꞌu maj ahuaujsaꞌupeꞌen aɨjna cɨmeꞌe maj cai tyaꞌantzaahua.
\c 4
\s Dioj pu taataꞌasin tyej ti jemin aꞌahuátasaꞌupeꞌen
\p
\v 1 Aucheꞌe pu ayan tiꞌivaɨreꞌe ɨ nyuucari tɨ cɨn Dioj ayan tyaꞌataujratziiriꞌi tɨ íꞌirɨni tyej tyaun aꞌutyarute aꞌu tɨ aɨn taataꞌasin tyej tyaun aꞌahuátasaꞌupeꞌen. Aɨj pu cɨn, ticheꞌe rɨꞌɨ tyanaꞌa tɨ ij cai ayan teꞌirajraꞌani tɨ saɨj muan tiꞌitɨj cɨn autaꞌɨtzen tɨ ij cai raacɨꞌɨti tɨ aun aꞌutyarute.
\v 2 Ayaa puꞌu, ayaa pu cheꞌeta naꞌa taacɨ́ꞌɨ ɨ nyuucari tɨ cɨn Dioj tuꞌirajtuaani, tɨj ajta tihuaꞌucɨꞌɨ aɨme. Ma ajta, capu aꞌatzu aꞌij tihuaꞌutyavaɨ ɨ maj raanamuajriꞌi aɨjna cɨmeꞌe maj cai tyaꞌantzaahua matɨꞌɨj raanamuajriꞌi.
\p
\v 3 Ajta ijii, ityan i tyaj tyaꞌantzaahua, tyan tu tyaun aꞌutyaruti aꞌu tyej aꞌahuátasaꞌupeꞌen. Ayaa pu huataujmuaꞌa tɨ ayan titáacɨꞌɨti aꞌini ayaa pu Dioj tyuꞌutaxajtacaꞌa huaꞌa cɨmeꞌen tɨcɨn:
\q Nyenyuꞌucamɨꞌɨ nu cɨn tyaꞌatanratziiriꞌi
\q2 maj cai aꞌanaj maun aꞌutyaruti
\q aꞌu maj aꞌahuaujsaꞌupeꞌen inyeetzi jamuan.
\m Ma ajta, tɨj naꞌa ajnaꞌɨmɨ tɨ raatyataahuacaꞌa ɨ chaanaca tɨ yu eꞌireꞌenye, puꞌuri cɨꞌɨpiihuacaꞌa ɨ tɨ cɨn Dioj tyuꞌumuarej.
\v 4 Ee xaa nyaꞌu, aꞌini ma aꞌahuaꞌa pu ayan tyuꞌutaxajtacaꞌa aɨjna cɨmeꞌen ɨ xɨcajraꞌa taꞌarahuaꞌapua. Ayan tɨcɨn:
\q Ajta ajna xɨcajraꞌa jetze ɨ taꞌarahuaꞌapua,
\q Dioj ayan raatapuaꞌajtacaꞌa ɨ tɨ cɨn tyuꞌumuarej.
\q Tɨꞌɨqui huaujsaꞌupe.
\m
\v 5 Ajta, tyauucheꞌe tu tyaɨjna cɨmeꞌen tiꞌixa ɨ nyuucari tɨ cɨmeꞌen tiraataxajtacaꞌa ɨ Dioj tɨcɨn:
\q Camu nuꞌu aꞌanaj maun aꞌutyaruti
\q2 mej mi nyeetzi jamuan aꞌahuaujsaꞌupeꞌen.
\p
\v 6 Aɨj pu cɨn, maucheꞌe mu meyan seijreꞌe seica ɨ maj xaa maun aꞌutyarute mej mi jamuan ɨ Dioj aꞌahuaujsaꞌupeꞌen. Ma majta aɨme, ɨ tɨ anacai huaꞌa jemi raatyajtuaa ɨ nyuucari tɨ cɨn Dioj hueꞌirátuaaníicheꞌen, camu maun aꞌutyajrupi maɨjna cɨmeꞌe maj cai raꞌaraꞌastijre.
\v 7 Aɨj pu cɨn, puꞌuri eihua aꞌateeviꞌi tɨꞌɨj aɨn Dioj raataꞌa aɨjna ɨ David tyaacan tɨ ayan tyuꞌutaxaj tɨ Dioj ayan raaxaꞌapɨꞌɨntare aꞌanaj tɨ ayan tyajaꞌureꞌenyejsin ajna xɨcajraꞌan tɨ ayan raatamuáꞌa tɨcɨn: “ijii”. Ayaa pu aɨjna cɨn tyuꞌutaxajtacaꞌa tɨcɨn:
\q Tɨ puaꞌa ijii saraanamua aꞌij tɨ tiꞌixa ɨ Dioj,
\q caxu raꞌantanaamɨn ɨ aꞌamuatzajtaꞌa.
\m
\v 8 Ajta, tɨ puaꞌa aɨn Josué tyaacan ayan huaꞌutaꞌanicheꞌen maj huaujsaꞌupeꞌencheꞌe, capu ayan raataxájtancheꞌe ɨ Dioj aɨjna cɨmeꞌe ɨ seij jetze ɨ xɨcaj.
\v 9-10 Aɨj pu cɨn, aucheꞌe pu tura huaꞌa jemi ɨ tyaɨtestyamuaꞌameꞌen pueen ɨ Dioj mej mi jamuan huaujsaꞌupeꞌen, aꞌini aꞌatɨ tɨ naꞌa tɨ ayan aun aꞌutyarute tɨ ij aꞌahuáujsaꞌupeꞌen ɨ Dioj jamuan, aɨ pu ayan cheꞌeta naꞌa raatapuaꞌajta ɨ tɨ cɨn tiꞌimuareꞌe tɨj ajta Dioj tiraatapuaꞌajtacaꞌa ɨ tɨ cɨn tyuꞌumuarej.
\v 11 Aɨj pu cɨn ticheꞌe teyan ahuatacaꞌanyen nain cɨmeꞌe tacaꞌanijraꞌa tej ti tyaun aꞌutyarute, tɨ ij cai aꞌatɨ ayan cheꞌeta naꞌa huarɨni aꞌij mej mejmiꞌi huarɨj aɨme, ɨ maj cai tyaꞌaraꞌaste maɨjna cɨmeꞌe maj cai tyaꞌantzaahua.
\p
\v 12 Ajta aɨn ɨ nyuucari tɨ Dioj jetze airáninyei, aɨ pu eꞌihuarujteꞌen, ajta tiꞌimɨjhuaca huapɨꞌɨ. Tyamuaꞌa pu tyaꞌuruꞌipi ɨ tatzajtaꞌan. Eitzeꞌe pu tiꞌivaɨreꞌe cai ɨ chun tɨ huaꞌapua cɨn ajcamɨɨmɨ, tɨ ajta huapɨꞌɨ antamɨɨmɨ, ɨ maj majta cɨn rasiꞌichaca ɨ carij tɨ ruviꞌi, majta cɨn raꞌutasiꞌiche ɨ tuꞌutanaj. Au pu xaa uruꞌipi aɨjna ɨ nyuucari ɨ xaijnyuꞌucaraꞌaraꞌan jetze ɨ tevi, ajta ɨ muaꞌatziiraꞌaraꞌan jetze. Tyamuaꞌa pu raayɨꞌɨtɨ tɨ ayan raatamitejteꞌen aꞌij tɨ seij tiꞌimuaꞌatze, ajta aꞌij tɨ seij tiꞌijxeꞌeveꞌe tɨ ayan huarɨni.
\v 13 Tiꞌitɨ tɨ naꞌa tɨ ayan tiꞌiseijreꞌe, tɨ ajta aɨjna jetze ajtyamaꞌacan aɨjna tɨ Dioj ayan tyuꞌutaahuacaꞌa, tɨj naꞌa tiꞌijpuaꞌamua, ayaa pu eijreꞌe seijreꞌe ɨ jemin. Ajta ayan ruxeꞌeveꞌe tyaj naimiꞌi teyan tyuꞌutáseijrata ɨ jemin. Ajta capu tiꞌitɨ ruꞌavaa ɨ jemin.
\s Jesús pu aɨn pueen ɨ tɨ jeitzeꞌe vaꞌacan cɨn tiꞌityejvee tɨꞌij tajapua huanyuuni
\p
\v 14 Ayaa nu tyajaꞌamueꞌixaateꞌe. Puꞌuri seijreꞌe ɨ ta jemi seij tɨ vaꞌacan cɨn tiꞌivaɨreꞌe ta jetze maꞌacan ɨ Dioj jemi. Ajta aɨ pu ari aun aꞌujnyéj u tajapua. Aɨj pu cɨn, ticheꞌe teyan tacaꞌanijraꞌa cɨn tyauj raꞌastijraꞌa tyaɨjna ɨ tyaj tyaꞌatzaahuateꞌe.
\v 15 Aꞌini aɨ pu vaꞌacan cɨn tiꞌivaɨreꞌe tajetze maꞌacan ɨ Dioj jemi, aɨ pu raayɨꞌɨtɨ tɨ ayan táꞌancuꞌuvajxɨꞌɨn aɨjna cɨmeꞌe tyaj cai tacacaꞌanyej ɨ ta tzajtaꞌa. Aɨ pu cheꞌeta naꞌa nain cɨn tirajpueijtzicaꞌa tyatɨj ityan tirajpueiitzi. Ajta, aɨ pu cai tiꞌitɨj cɨn ataꞌɨtzaꞌara.
\v 16 Aɨj pu cɨn, ticheꞌe teyan taxeꞌeviꞌiraꞌa cɨn ajtyaxɨɨre tyajna vejliꞌi aꞌu tɨ aꞌutyejvee ɨ ɨpuari aꞌu tɨ aɨn aꞌacajca ɨ Dioj tɨ ij aɨn ayan táꞌancuꞌuvajxɨꞌɨn, tɨꞌij ajta rɨꞌɨ titaataꞌan, tɨ ij ajta taatavaɨreꞌen aꞌanaj tɨ naꞌa tɨꞌɨj ayan ruxeꞌeveꞌe.
\c 5
\s Jesús pu vaꞌacan cɨn tiꞌityejvee ɨ Dioj jemi tajetze maꞌacan
\p
\v 1 Ayaa pu een aɨjna cɨmeꞌen aꞌatɨ tɨ naꞌa tɨ ayan vaꞌacan cɨn tiꞌivaɨreꞌe ɨ Dioj jemi. Anacai mu meyan raꞌavaꞌahuausin huaꞌa tzajtaꞌa ɨ tyaɨte. Matɨꞌɨj mi meyan tíꞌiraijcateꞌen tɨ ij aɨn huaꞌa japua huanyuuni ɨ Dioj jemi. Aɨ pu ajta tyuꞌutamuaɨꞌɨvajta aɨjna ɨ maj raatapueijveꞌesin ɨ Dioj, ajta aɨjna ɨ yaꞌamuaate ɨ maj huaꞌutamuaɨꞌɨvajta maɨjna cɨmeꞌe ɨ maj cɨn autyajturaa ɨ Dioj jemi.
\v 2 Aꞌini aɨjna ɨ aꞌatɨ ajta ramuaꞌaree tɨ cai rusaɨj teꞌeviicueꞌi, aɨ pu ajta raayɨꞌɨtɨ tɨ huaꞌancuꞌuvajxɨꞌɨn aɨme ɨ maj cai aꞌij tiruꞌumuaꞌaree, ajta aɨme ɨ maj tiꞌitɨj cɨn atyaꞌɨtzaꞌara ɨ Dioj jemi.
\v 3 Aɨj pu cɨn ruxeꞌeveꞌe tɨ aɨn anacaiican ayan tyuꞌutamuaɨꞌɨvajta aɨjna cɨmeꞌe tɨ aɨn rusaɨj tiꞌitɨ cɨn autyajturaa ɨ Dioj jemi. Ajta jeꞌiyan, ayaa pu ruxeꞌeveꞌe tɨ ayan cheꞌeta naꞌa huarɨni huaꞌa cɨmeꞌen ɨ tyaɨte ɨ maj meyan cheꞌeta manaꞌa tiꞌitɨ cɨn tityaꞌutyajturaa ɨ Dioj jemi.
\p
\v 4 Ajta, capu aꞌatɨ ayan rusaɨj teꞌentyaruti aɨjna cɨmeꞌe tɨ ayan tyuꞌutyavaɨreꞌen ɨ Dioj jemi, silu tɨ puaꞌa Dioj ayan aɨjna cɨn tiraijcateꞌen aꞌij tɨ ayan tiraijca aɨjna ɨ Aarón tyaacan.
\v 5 Aɨj pu cɨn, capu ayan rusaɨj huataujtuaa aɨjna ɨ Jesús tɨ ayan vaꞌacan cɨn teꞌentyarute tɨ ij ayan tyuꞌutyavaɨreꞌen ɨ Dioj jemi. Capu xaa nyaꞌu, silu Dioj pu ayan tiraataꞌixaa tɨcɨn:
\q Muaa paj niyauj pɨrɨcɨ.
\q Ijii nu neyan muaatéyaꞌupuatacaꞌa.
\m
\v 6 Ajta puaꞌamuaque pu ayan tiꞌixa tɨcɨn:
\q Muaa paj peyan paɨjna cɨn tiꞌivaɨreꞌe ɨ Dioj jemi
\q2 tɨj ajta vaꞌacan cɨn tiꞌivaɨreꞌe
\q aɨjna ɨ Melquisedequi tɨj naꞌa rusen cɨmeꞌe.
\p
\v 7 Tɨꞌɨj auj yan seijraꞌacaa iiyan chaanaca japua, Jesús pu ayan huatyenyuu, ajta raatyahuau aɨjna jemi tɨ raayɨꞌɨtɨhuaꞌa tɨ ruꞌirajtuaani. Eihua pu ayan huaujyeinyacaꞌa aɨjna jemi tɨꞌij aɨn cai raataꞌacareꞌen tɨ huamɨꞌɨni. Ajta aɨn Dioj ayan raanamuajriꞌi aɨjna cɨmeꞌe tɨ ayan huatauraꞌa tɨ ayan aráurasten aꞌij tɨ tiꞌijxeꞌevaꞌacaa ɨ Dioj.
\v 8 Ayaa pu i yaujraꞌan pueenyaꞌa, aucheꞌe pu ayan rɨꞌɨ raaruu tɨ ayan raꞌaraꞌastijreꞌen aɨjna cɨmeꞌe ɨ tɨ cɨn rajpueijtzicaꞌa.
\v 9 Ajta, tɨꞌɨj Dioj ayan raanaijmiꞌire, Jesús pu aɨjna cɨn teꞌentyajrupi aɨjna cɨmeꞌe tɨ aɨn ayan hueꞌirajtuaani tɨj naꞌa rusen cɨmeꞌe naijmiꞌica aɨme ɨ mej raꞌastijreꞌe.
\v 10 Ajta Dioj ayan aɨjna cɨn tiraijca tɨ ij ayan cheꞌeta naꞌa vaꞌacan cɨn tyuꞌutyavaɨreꞌen ɨ Dioj jemi tɨj ajta tyuꞌutyavaɨ aɨjna ɨ Melquisedequi.
\s Maj nuꞌu jeitzeꞌe yauꞌeitaa muaꞌaraꞌani ɨ Dioj jemi
\p
\v 11 Eihua tu tyajaꞌamueꞌixaatyaꞌacu tyaɨjna cɨmeꞌe. Ma ajta, eecan pu muareꞌeri tej teyan tyamuaꞌa naa tyajamuaataꞌixaateꞌen aꞌini caxu caꞌanacan yauꞌeitaa xaꞌajuꞌun.
\v 12 Ee xaa nyaꞌu, ijii tej teyan tyajaꞌamueꞌixaateꞌe, ayaa pu tiraavijtyaꞌacacheꞌen sej seyan rujɨɨmuaꞌa sanaꞌa tihuaꞌumuaꞌaten ɨ seica. Ma ajta cai caxu, silu ayaa pu ruxeꞌeveꞌe tɨ aꞌatɨ ayan ajtahuaꞌa tyajamuáamuaꞌaten ɨ maj cɨn autyajhuiica mej tihuaꞌamuaꞌaten maɨjna cɨmeꞌe ɨ nyuucari tɨ Dioj jetze aꞌuveꞌeyeꞌi. Ayaa xu eꞌen matɨj aɨme ɨ tɨꞌɨrii maj rumuaꞌatɨ leechi yaꞌaca, maj cai xɨ yáꞌujapɨꞌɨreꞌe ɨ cueꞌira.
\p
\v 13 Aꞌatɨ tɨ naꞌa tɨ ayan een tɨj paꞌarɨꞌɨ tɨ leechi cɨn ruuri, capu xɨ yauꞌeite aɨjna ɨ nyuucari ɨ maj cɨn tihuaꞌumuaꞌaten aꞌij tɨ yeꞌi saɨj rɨꞌɨ tiꞌityujchaꞌɨ ɨ Dioj jemi.
\v 14 Ma ajta, aɨjna ɨ nyuucari tɨ ayan tiꞌivaɨreꞌe tɨj ɨ cueꞌira ɨ maj racuaꞌaca ɨ maj vaujsi, ayaa pu tihuaꞌacɨꞌɨti mej mi maɨjna cɨn tihuaꞌamuaꞌaten aɨme ɨ maj meri vaujsi, ɨ maj majta meri raayɨꞌɨtɨ tɨ ayan tihuaꞌamityejtyaꞌa tɨ puaꞌa tiꞌitɨ ayan tiꞌixaꞌapɨꞌɨn nusu cai. Ayaa pu een cɨn meyan raayɨꞌɨtɨ maɨjna cɨmeꞌe mej meyan rɨꞌɨ tiꞌityujchaꞌɨ ɨ Dioj jemi.
\c 6
\p
\v 1 Aɨj pu cɨn, ticheꞌe teyan ma rúuhuaꞌaxɨn tyaɨjna ɨ maj cɨn anacai titaꞌitiiriꞌi cɨmeꞌen ɨ Cɨriistuꞌu tej ti teyan eitzeꞌe huavaujseꞌen ɨ Dioj jemi. Ticheꞌe cai cheꞌe tyaɨjna jetze ucaajuꞌun, aɨjna ɨ nyuucari tɨ cɨmeꞌen raxaj tyaj saɨque tyuꞌumuaꞌati tyaɨjna cɨmeꞌe ɨ yeꞌira tɨ cai cheꞌe tiꞌitɨj vaɨreꞌe ɨ Dioj jemi, nusu tɨ cɨmeꞌen raxaj tyaj ráꞌatzaahuateꞌen ɨ Dioj.
\v 2 Ajta seica tɨ ayan tiꞌitaijteꞌe tyaj nuꞌu huáꞌatamuaɨꞌɨvijhua naꞌari tyaj nuꞌu huaꞌaváꞌamuareꞌen caꞌɨn tɨ cɨmeꞌen raxaj ajna xɨcajraꞌa ɨ mej jetzen aꞌitajuꞌun aɨme ɨ maj meri huacuii. Ajta, aɨjna ɨ nyuucari tɨ cɨmeꞌen raxaj tɨ Dioj ayan huaꞌaxɨjteꞌen seij ajta seij aꞌij tɨ tiraacɨꞌɨti tɨj naꞌa rusen cɨmeꞌe.
\p Naijmi tɨj naꞌa ɨ tyaj tyauchan tiraataxajtacaꞌa, ayaa puꞌu een ɨ maj cɨn anacai titaꞌitiiriꞌi. Puꞌuri ruxeꞌeveꞌe tyej eitzeꞌe huavaujseꞌen ɨ Dioj jemi.
\v 3 Ayaa tu tyaɨjna cɨn rɨni tɨ puaꞌa Dioj ayan titaataꞌacareꞌen.
\p
\v 4 Ma majta seica, ayaa mu meri huarɨj. Seij pu aꞌanaj ayan tihuaꞌamitejtyaꞌacaa tɨ ayan tiꞌayajna aɨjna ɨ nyuucari. Muꞌuri aꞌanaj raamuáꞌa aɨjna tɨ Dioj huaꞌutapueijve tɨ ajta uteꞌe aꞌuveꞌeme. Ajta aɨn xaijnyuꞌucaraꞌaraꞌan ɨ Dioj ayan huaꞌa tzajtaꞌa huatyajturaa.
\v 5 Aɨ mu majta raataxeꞌeve aɨjna ɨ nyuucari tɨ iꞌireꞌen, tɨ ajta Dioj jemi u aꞌuveꞌeme. Majta mu raꞌancuraꞌa maɨjna ɨ muareꞌeriꞌiraꞌa tɨ cɨn Dioj ayan tyuꞌutaijta tɨj naꞌa rusen cɨmeꞌe.
\p
\v 6 Matɨꞌɨj mi ma ruurai. Aɨj pu cɨn capu aꞌatzu aꞌij tiꞌirɨꞌɨri tɨ ayan huaꞌujajcuareꞌen mej mi majtahuaꞌa saɨque tyuꞌumuaꞌati. Capu xaa nyaꞌu, aꞌini aɨ mu majtahuaꞌa rujɨɨmuaꞌa ráꞌutatan ɨ curuu jetze maɨjna tɨ yaujraꞌan pueen ɨ Dioj. Majtahuaꞌa mu a jeijreꞌe huaꞌa tzajtaꞌa ɨ tyaɨte, aɨ mu majta ráꞌaxaahuariꞌi.
\v 7 Ayaa pu cheꞌeta naꞌa tiꞌirɨnyaca huaꞌa tzajtaꞌa ɨ tyaɨte tɨj ajta ayan tiꞌirɨnyaca ɨ chuej japua matɨꞌɨj huateviiye. Dioj pu ayan rɨꞌɨ tirataꞌaca aɨjna ɨ chuej tɨ puaꞌa matɨꞌɨjta huateviiye, ayan japuan tyuꞌunyén aɨjna tɨ tihuaꞌatyavaꞌɨri aɨme ɨ maj japuan tiꞌihuaꞌastya.
\v 8 Ma ajta, tɨ puaꞌa japuan tyuꞌunyén aɨjna ɨ tyetzicareꞌe, ajta aɨjna tɨ tyúꞌuxuꞌuhuaꞌateꞌe matɨꞌɨj huateviiye, capu tiꞌitɨ vaɨreꞌe aɨjna ɨ chuej. Ee xaa nyaꞌu, ayaa pu tiꞌirɨꞌɨri tɨ ayan teꞌeme tɨ Dioj aꞌij puaꞌa raruuren, ajta ayan tiratyátairan.
\s Tɨ nuꞌu rɨꞌɨ naꞌa nyaꞌu tɨn ahuáꞌavaɨraꞌa mauj ruuri
\p
\v 9 Capu amɨn aꞌij tej teyan tyajaꞌamueꞌixaateꞌe, mɨ tej jaꞌamuaꞌaxeꞌeveꞌe, aꞌini ayaa pu titaꞌamitejteꞌe muejmi cɨmeꞌen tɨ cai ayan tyajamuaacɨꞌɨti aɨjna tɨ aꞌij puaꞌa een, silu sej seyan raꞌancuraꞌasin tɨj naꞌa tɨ ayan tiꞌiseiiraꞌa aꞌame ajna xɨcajraꞌan tɨ jetzen Dioj amueꞌirajtuaani.
\v 10 Dioj pu xaa raꞌutamuaꞌareera aꞌij tɨ tiraavijteꞌe ɨ saj cɨn tyuꞌumuarej, saj sajta huaꞌutaxeꞌeve ɨ Dioj jetze maꞌacan aɨme ɨ tɨ hueꞌiraviꞌitɨcɨ ɨ Dioj. Capu aꞌatzu yáꞌuhuaꞌana ɨ Dioj sej seri cɨn tihuaꞌutyavaɨ, saj sajta saucheꞌe tiꞌitɨ cɨn tihuaꞌatyavaꞌɨri.
\p
\v 11 Ayaa tu tiꞌijxeꞌeveꞌe muejmi cɨmeꞌen sej si seyan cheꞌeta sanaꞌa aꞌaraujcaꞌanyaacan cɨn seyan rɨjca seica cɨmeꞌe tɨ ij Dioj ayan amuaanáijmiꞌireꞌen aɨjna cɨmeꞌe ɨ saj cɨn rachuꞌeveꞌe asta naꞌa cai nain teꞌentipuaꞌare.
\v 12 Sataꞌaj cai seyan huaꞌɨnaꞌasaꞌa silu seyan cheꞌeta sanaꞌa huarɨni matɨj aɨme ɨ maj raꞌancuraꞌasin maɨjna tɨ cɨn Dioj tyaꞌataujratziiriꞌi tɨ ayan tihuaꞌucɨꞌɨti aɨjna cɨmeꞌe mej tyaꞌatzaahuateꞌe, majta maj tyaꞌutaviicueꞌiriꞌi.
\s Ayaa pu teꞌeme aꞌij tɨ Dioj tyaꞌataujratziiriꞌi
\p
\v 13 Tɨꞌɨj Dioj ayan tyaꞌataujratziiriꞌi aɨjna ɨ Abraham jemi, aɨ pu ayan rusaɨj tiraataꞌixaa ɨ runyuuca cɨmeꞌe, aꞌini capu maꞌa huaꞌacaa aꞌatɨ tɨ eitzeꞌe vaꞌacan cɨn tiꞌityavaacaꞌa tɨ ij ayan nyuucaraꞌaraꞌan cɨn tiraataꞌan.
\v 14 Ayaa pu tiraataꞌixaa tɨcɨn: “Huapɨꞌɨ nu rɨꞌɨ timuaatyatuaasin. Eihua nu huapɨꞌɨ huaꞌutamuiꞌirejsin ɨ aꞌayaujmuaꞌa.”
\v 15 Ajta aɨn Abraham, tɨꞌɨj aꞌateeviꞌi tɨ ayan rachuꞌeveꞌe ruxéꞌeviꞌiraꞌa cɨmeꞌe, aj puꞌi ayan raꞌancuraꞌa aɨjna tɨ cɨn Dioj tyaꞌataujratziiriꞌi.
\p
\v 16 Ee xaa nyaꞌu, aꞌini ayaa mu tiꞌijrɨꞌɨre ɨ tetyaca maj runyuuca tiꞌitaꞌaca aɨjna cɨmeꞌe ɨ nyuucajtzeꞌen aɨjna tɨ eitzeꞌe vaꞌacan cɨn tiꞌitejvee macai aɨme. Ajta aꞌanaj tɨ naꞌa maj tiꞌitɨj cɨn tyújtyaꞌaxɨꞌɨn, ayaa mu ramuaꞌaree tɨ ari rɨꞌɨ tiꞌihuaujxaꞌapɨꞌɨntare tɨꞌɨj saɨj runyuuca cɨn ayan tiꞌitáꞌaca.
\v 17 Aɨj pu cɨn, tɨꞌɨj Dioj ayan tiraaxaꞌapɨꞌɨntare tɨ ayan tihuaꞌutaseijrateꞌen tyamuaꞌa naꞌa aɨme ɨ tɨ tihuaꞌacɨꞌɨti mej mi raamuaꞌaree tɨ cai aꞌatzu rɨꞌɨri tɨ saɨque huarɨni aɨjna cɨmeꞌe aꞌij tɨ aɨn ari tiraaxaꞌapɨꞌɨntare, aɨ pu ajta ayan runyuuca cɨn tiraataxajtacaꞌa.
\p
\v 18 Aɨj pu cɨn, tiꞌihuaꞌapua pu tiꞌiseijreꞌe tɨ cai jaꞌatɨ raayɨꞌɨtɨ tɨ saɨque tyuꞌuruuren ɨ tatzajtaꞌan, tɨ cɨmeꞌen cai rɨꞌɨri tɨ Dioj ayan tyuꞌutyaahueꞌita: ai pu aɨn pueen, aɨjna ɨ tɨ cɨn tyaꞌataujratziiriꞌi, ajta runyuuca tɨ cɨn tyuꞌutaxajtacaꞌa. Aɨj tu cɨn huatyatacaꞌanyen tyamuaꞌa naa, ityan i tyaj jemin ajtyáxɨɨracaꞌa tɨ ij aɨn tachaɨj aꞌaraꞌani, tej ti teyan raꞌancuraꞌan ɨ tej rachuꞌeveꞌe, aɨjna tɨ ajta ayan raatyajtuaa itejmi jemi.
\v 19 Ajta aɨn ɨ tyaj rachuꞌeveꞌe, ayaa pu caꞌanijraꞌa tataꞌaca tɨ ij cai tiꞌitɨj tyaꞌɨtziityaꞌa ɨ tatzajtaꞌan, tɨ ij cai tiꞌitɨj taꞌantimueꞌitɨn. Cu xuee aɨ pu ari aun aꞌutyajrupi u tajapua, huaritaꞌan aɨjna ɨ cɨɨxuri tɨ eꞌitaꞌa aꞌacáavɨj.
\p
\v 20 Ajta aɨn ɨ Jesús, aɨ pu anacai aꞌutyajrupi tɨ ij aɨn tajapua huanyuuni, aɨjna cɨmeꞌe tɨ Dioj ayan aɨjna cɨn tiraijca tɨ i aɨn ayan cheꞌeta naꞌa vaꞌacan cɨn tyuꞌutyavaɨreꞌen ɨ Dioj jemi tɨj naꞌa rusen cɨmeꞌe tɨj ajta aɨjna ɨ Melquisedequi.
\c 7
\s Cɨmeꞌen ɨ tɨ cɨn tiꞌityavaacaꞌa aɨjna ɨ Melquisedequi
\p
\v 1-3 Ajta aɨn Melquisedequi, capu tíyaꞌupuajcaa, ajta capu tinaanacaa. Capu ajta amiteereꞌe aꞌatɨ tɨ jetzen airaujneijte, capu ajta ayan amiteereꞌe aꞌanaj tɨ huanuꞌeihuacaꞌa naꞌari aꞌanaj tɨ huamɨꞌɨ. Aɨj pu cɨn, ayaa pu cheꞌeta naꞌa huaujruu tɨj ajta saɨj tɨ yaujraꞌan pueen ɨ Dioj. Ajta aɨ pu ayan vaꞌacan cɨn tiꞌityavaa aꞌame ɨ Dioj jemi tɨj naꞌa rusen cɨmeꞌe. Ajnaꞌɨmɨ aɨ pu ajta aɨjna cɨn tiꞌityavaacaꞌa ɨ rey cɨmeꞌe aɨme jemi ɨ maj Salem eꞌechajcaꞌa, ajta vaꞌacan cɨn tiꞌityavaacaꞌa aɨjna jemi ɨ Dioj tɨ nain cɨn antyujmuaꞌaree.
\p Ajta aɨjna ɨ maj cɨn meyan ratamuaꞌamua tɨcɨn Melquisedequi, ayaa pu huataujmuaꞌa tɨcɨn “Rey tɨ rɨꞌɨ naa tiꞌijta”. Ajta aɨjna tɨ rey pueen tɨ Salem eꞌemaꞌacan, ayaa pu huataujmuaꞌa tɨcɨn “Rey tɨ rɨꞌɨ tihuaꞌajchaꞌɨ mej mi ruxaahua tíꞌiteseijraꞌa”. Aɨ pu raꞌantinajchacaꞌa aɨjna ɨ Abraham tyaacan tɨꞌɨj aun pɨjéꞌejve aꞌu tɨ huajaꞌucuii aɨme ɨ reeyejte. Ajta, aɨn Melquisedequi ayan rɨꞌɨ tiraatyajtuaa. Tɨꞌɨqui Abraham ayan raatapueijve tamuaamuataꞌa puaꞌamua tɨ aɨjna jetze ajtyamaꞌacantacaꞌa tɨj naꞌa tɨ ayan tihuaꞌariꞌiriꞌi.
\s Eecan pu vaꞌacan cɨn tiꞌityavaacaꞌa aɨjna ɨ Melquisedequi
\p
\v 4 Sataꞌaj seyan saɨjna jetze tyuꞌumuaꞌati tɨ huapɨꞌɨ vaꞌacan cɨn tiꞌityavaacaꞌa ɨ Dioj jemi aɨjna tɨ tayaaxúj pueen. Ajta aɨjna ɨ Abraham tyaacan, aɨ pu ayan raatapueijve aꞌachu cumu tamuaamuataꞌa puaꞌamua tɨ aɨjna jetze ajtyamaꞌacantacaꞌa tɨj naꞌa tɨ ayan tihuaꞌariꞌiriꞌi.
\p
\v 5 Ee xaa nyaꞌu, aɨme ɨ maj Leví jetze airaujneijte ɨ maj majta tiꞌitɨj cɨn títyatatí ɨ Dioj jemi, ayaa mu tyuꞌutaijtiꞌire mej meyan huaꞌutahuavii ɨ tyaɨte aꞌachu cumu tamuaamuataꞌa puaꞌamua ɨ mej tíꞌijchaꞌɨ aꞌij tɨ teꞌeyuꞌusiꞌi aɨjna jetze ɨ yuꞌuxari ɨ maj cɨn tiꞌijta. Ayaa mu xaa nyaꞌu huaꞌahuaviiracaꞌa ɨ ruꞌihuaamuaꞌa. Capu amɨn aꞌij tɨ puaꞌa aɨ mu majta Abraham jetze airaujneijte aɨme ɨ ihuaamuaꞌameꞌen.
\p
\v 6 Ma ajta amɨn, ɨ tɨ cai huaꞌa jetze ajtyamaꞌacan, aɨ pu raꞌancuraꞌa aɨjna Abraham jemi aꞌachu cumu tamuaamuataꞌa puaꞌamua. Aɨ pu ajta rɨꞌɨ raatyajtuaa aɨjna ɨ Abraham. Ajta Dioj pu tiꞌitɨj cɨn tyaꞌataujratziiriꞌi aɨjna jemi ɨ Abraham.
\v 7 Ajta, naimiꞌi mu meyan ramuaꞌaree tɨ ayan tiꞌayajna tɨ aɨn tɨ eitzeꞌe vaꞌacan cɨn tiꞌitejvee ayan rɨꞌɨ tirataꞌaca ɨ Dioj jetze maꞌacan aɨjna tɨ cɨleenyaꞌa cɨn tiꞌitejvee.
\p
\v 8 Ajta ayaa pu tiꞌirɨnyaca iiyan chaanaca japua mej mi meyan raꞌancuraꞌan maɨjna ɨ tamuaamuataꞌa tɨ puaꞌamua aɨme ɨ tyaɨte ɨ maj majta cuiꞌica. Ma ajta, ayaa pu tiꞌityaujxajta tɨ ajnaꞌɨmɨ, aɨ pu ayan raꞌancuraꞌa aɨjna tɨ auj cɨn ruuri.
\v 9-10 Aɨj pu cɨn, rɨꞌɨri tej teyan raataxaj yee aɨ pu Leví ajta ayan tyuꞌunajchitacaꞌa aꞌachu cumu tamuaamuataꞌa puaꞌamua aɨjna cɨmeꞌe tɨ aucheꞌe huataseijreꞌesin aɨjna jetze ɨ ruyaaxu, aɨjna ɨ Abraham tyaacan. Leví pu xaa tyuꞌunajchitacaꞌa ajna tɨꞌɨj Melquisedequi ayan raꞌantinajchacaꞌa aɨjna ɨ Abraham tyaacan.
\s Cɨriistuꞌu pu vaꞌacan cɨn tiꞌityavaa aꞌame tɨj naꞌa rusen cɨmeꞌe
\p
\v 11 Ajta, tɨ puaꞌa rɨꞌɨrístancheꞌe tɨ huaꞌunaijmiꞌireꞌen ɨ tyaɨte ɨ Dioj jemi aɨjna cɨmeꞌe mej vaꞌacan cɨn títyatatí aɨme ɨ maj Leví jetze ajtyamaꞌacan, capu aꞌatzu ruxeꞌevaꞌa aꞌameꞌencheꞌe tɨ seij ayan huataseijreꞌen tɨ ayan cheꞌeta naꞌa vaꞌacan cɨn tyuꞌutyavaɨreꞌen tɨj ajta tyuꞌutyavaɨ aɨjna ɨ Melquisedequi, tɨ ajta cai Leví jetze ajtyamaꞌacantacaꞌa. Capu xaa nyaꞌu ayan ruxeꞌevaꞌa aꞌameꞌencheꞌe aꞌini aɨn nyuucari ɨ maj cɨn tiꞌijta, aɨ pu ayan huataseijre huaꞌa jemi ɨ mej Leví jetze ajtyamaꞌacantacaꞌa.
\p
\v 12 Ma ajta xaa, tɨ puaꞌa ayan ruxeꞌeveꞌe maj saɨque huarɨni mej mi huaꞌantihuauni aɨme ɨ mej tyeꞌentyaruti ɨ Dioj jemi, ayaa pu cheꞌeta naꞌa ruxeꞌeveꞌe maj saɨque raaruuren ɨ nyuucari ɨ maj cɨn tyuꞌutaijta.
\v 13 Ee xaa nyaꞌu ayaa pu tiꞌayajna, aꞌini aɨjna ɨ tyaj cɨmeꞌen raxaj, seij pu tyaɨtejraꞌa jetze ajtyamaꞌacan, ajta capuuxɨ aꞌanaj aꞌatɨ ayan tiꞌitɨ cɨn tyuꞌutyavaɨ ɨ Dioj jemi, tɨ ajta aɨjna tyaɨtejraꞌa jetze ajtyamaꞌacan.
\p
\v 14 Ee sein, aɨn tavastaraꞌa ayan Judá jetze airaujneijte. Ajta aɨn Moisés tyaacan capu aꞌanaj tiꞌitɨ huataxajtacaꞌa aɨjna cɨmeꞌen ɨ tyaɨtejraꞌa, tɨ huaꞌa jetze huataseijreꞌencheꞌe aɨme ɨ maj vaꞌacan cɨn tiꞌityavaa muaꞌajuꞌuncheꞌe ɨ Dioj jemi.
\p
\v 15 Ee xaa, ayaa pu tiꞌayajna xaa nyaꞌu, tɨ seij ayan huataseijre tɨ ayan cheꞌeta naꞌa vaꞌacan cɨn tiꞌitejvee ɨ Dioj jemi tɨj ajta aɨjna ɨ Melquisedequi.
\v 16 Ajta aɨn, capu ayan aɨjna cɨn tiraijca aɨjna cɨmeꞌe tɨ ayan aráurasten aꞌij mej tiraꞌuyuꞌuxacaꞌa aɨme ɨ tetyaca ɨ maj cuiꞌica aꞌij tɨ tyuꞌujxeꞌeveꞌe tɨ seij jetzen airaanyen tɨꞌij tiꞌitɨ cɨn teꞌentyarute ɨ Dioj jemi. Capu xaa nyaꞌu ayaa naꞌa, silu aɨ pu aɨjna cɨn ayan teꞌentyajrupi aɨjna cɨmeꞌe tɨ ayan ruurican seiraꞌa aꞌame tɨj naꞌa rusen cɨmeꞌe. Ajta, capu rɨꞌɨri tɨ jaꞌatɨ raꞌupuaꞌariteꞌen.
\v 17 Ajta, ayan cɨmeꞌen tyuꞌutaujxajtacaꞌa tɨcɨn:
\q Muaa pa peyan cheꞌeta panaꞌa
\q2 vaꞌacan cɨn tiꞌityavaa puaꞌame ɨ Dioj jemi
\q tɨj naꞌa rusen cɨmeꞌe tɨj ajta aɨjna ɨ Melquisedequi.
\m
\v 18 Ayaa pu teꞌeme, aꞌini Dioj pu ari ayan raꞌuraúu aɨjna ɨ nyuucari tɨ anacai raatyajtuaa aɨme jemi ɨ mej Israel jetze ajtyamaꞌacantacaꞌa. Ayaa pu aɨjna cɨn huarɨj aꞌini camu téꞌeviicueꞌiracaa aɨme ɨ maj vaꞌacan cɨn títyatatyáꞌacaa, ajta capu tiꞌitɨ tyuꞌutyavaɨ aɨjna ɨ nyuucari.
\v 19 Ee xaa, capu tiꞌitɨ huanaijmiꞌire aɨjna ɨ nyuucari ɨ maj cɨn tiꞌijtacaꞌa, silu aɨ pu xaa tɨꞌɨj Dioj ayan raatyajtuaa itejmi jemi aɨjna tɨ eitzeꞌe reꞌen ɨ tyaj rachuꞌeveꞌe, ɨ tyaj tyajta cɨn vejliꞌi ajtyaxɨꞌɨren jemin ɨ Dioj.
\p
\v 20 Ayaa pu ajta een cɨn eitzeꞌe tiꞌivaɨreꞌe aɨjna ɨ tyaj rachuꞌeveꞌe aɨjna cɨmeꞌe tɨ Dioj ayan runyuuca tyuꞌutaꞌan, ayan raatyajtua itejmi jemi. Majta aɨme ɨ seica, ayaa pu Dioj cai runyuuca cɨn tyuꞌutaꞌa aɨme cɨmeꞌe. Capu amɨn aꞌij maucheꞌe mu vaꞌacan cɨn teꞌentyajrupi ɨ Dioj jemi.
\v 21 Ma ajta aɨjna ɨ Jesús, aɨ pu aɨjna cɨn ayan teꞌentyajrupi nyuucajtzeꞌen aɨjna tɨ cɨmeꞌen tyuꞌutaxajtacaꞌa tɨcɨn:
\q Tavastaraꞌa pu runyuuca huataꞌa,
\q2 muaa paj vaꞌacan cɨn tiꞌityavaa puaꞌame
\q ɨ Dioj jemi tɨj naꞌa rusen cɨmeꞌe,
\q ajta aɨ pu cai aꞌanaj ruhuaritaꞌa acaame.
\p
\v 22 Aɨj pu cɨn, ayan éenyaꞌa aꞌaraa tɨ aɨn Jesús aɨn pueenyaꞌa ɨ tyaj cɨn raamuaꞌaree tɨ eihua huapɨꞌɨ eitzeꞌe reꞌen aɨjna ɨ nyuucari tɨ jajcua tɨ cɨn Dioj tyaꞌataujratziiriꞌi itejmi jemi.
\v 23 Majta aɨme ɨ mej mejmiꞌi vaꞌacan cɨn tyuꞌutyavaɨ ɨ Dioj jemi, muiꞌitɨ mu meyan araꞌasicaa maɨjna cɨmeꞌe maj cai aꞌachu aꞌatee maj meyan maɨjna cɨn tyuꞌutyavaɨreꞌen aɨjna cɨmeꞌe maj cuiꞌicaa.
\p
\v 24 Ma ajta amɨn ɨ Jesús, aꞌini amɨ pu ayan seiraꞌa aꞌame tɨj naꞌa rusen cɨmeꞌe, aɨ pu ajta vaꞌacan cɨn tiꞌityavaa aꞌame ɨ Dioj jemi tɨj naꞌa rusen cɨmeꞌe.
\v 25 Aɨj pu cɨn, aɨ pu raayɨꞌɨtɨ tɨ nain cɨn hueꞌirajtuaani aɨme ɨ maj huataujtuireꞌen ɨ Dioj jemi maɨjna cɨmeꞌe maj raꞌastijreꞌe maɨjna ɨ Jesús. Ayaa puꞌu xaa nyaꞌu, aꞌini ayaa pu een cɨn ruurican huatyaturaasin tɨ ij huaꞌa japua huanyuuni.
\p
\v 26 Aɨj pu ajta cɨn, ayaa pu tiraavijtyaꞌacaa tɨ ayan ta japua huanyuuni seij tɨ ayan een tɨj aɨjna tɨ ayan vaꞌacan cɨn tiꞌitejvee ɨ Dioj jemi. Aɨ pu urareꞌenyaꞌacan cɨn huatyajturaa ɨ Dioj jemi. Ajta, capu aꞌatzu tiꞌitɨj cɨn aꞌij puaꞌa huaꞌaruuren ɨ tyaɨte. Capu ajta tiꞌitɨ cɨn atyaꞌɨtzaꞌara ɨ Dioj jemi. Ajta, capu ayan tiꞌityujchaꞌɨ matɨj ɨ seica ɨ mej aꞌij puaꞌa seijreꞌe ɨ Dioj jemi. Dioj pu ajta ayan rɨꞌɨ raatyajtuaa tɨ ij aɨn ayan jemin aꞌutyaturan utyaꞌɨmɨ u tajapua.
\p
\v 27 Ajta, capu ayan ruxeꞌeveꞌe tɨ aɨjna Jesús ayan tyuꞌutamuaɨꞌɨvajta ɨ ru cɨmeꞌen nain xɨcaj tzajtaꞌa, capu ajta huaꞌa cɨmeꞌen ɨ tyaɨte matɨj tiꞌijrɨꞌɨre aɨme ɨ seica ɨ maj vaꞌacan cɨn títyatatí ɨ Dioj jemi. Capu xaa nyaꞌu, aꞌini ayaa pu seij naꞌa huarɨj nain cɨmeꞌe tɨꞌɨj aɨn rusaɨj huataujmuaɨꞌɨvajtacaꞌa.
\v 28 Ajta, aɨjna ɨ nyuucari ɨ maj cɨn tiꞌijta, ayaa pu huaꞌantihuauca mej mi vaꞌacan cɨn tyuꞌutyavaɨreꞌen aɨme ɨ tyaɨte ɨ maj cai teꞌeviicueꞌi ɨ rutzajtaꞌa. Ma ajta, aɨjna ɨ nyuucari ɨ tɨ cɨn Dioj tyaꞌataujratziiriꞌi, aɨ pu ayan raꞌantihuau aɨjna ɨ yaujraꞌan tɨ ari huataujnaijmiꞌire tɨj naꞌa rusen cɨmeꞌe.
\c 8
\s Jesús pu vaꞌacan cɨn tiꞌityejvee u tajapua
\p
\v 1 Ajta aɨjna ɨ tyaj cɨmeꞌen tiꞌixaj, ayaa pu huataujmuaꞌa. Puꞌuri seij ayan vaꞌacan cɨn tiꞌitejvee ɨ Dioj jemi tɨ ayan ta japua nyuuca. Aɨ pu ari aun aꞌujyeijxɨ ɨrɨɨtaꞌan aꞌu tɨ aꞌacajca aɨjna tɨ huapɨꞌɨ naa seijreꞌe aujna uteꞌe.
\v 2 Au pu tiꞌivaɨreꞌe u teyujtaꞌa, aɨjna jetze ɨ ɨnaamua tɨ tzaahuatiꞌiraꞌa cɨn aꞌutyejvee aꞌu tɨ Dioj eꞌeseijreꞌe. Capu tevi ráꞌajtaahuacaꞌa silu tavastaraꞌa puꞌu.
\p
\v 3 Ayaa pu tiꞌijcɨꞌɨcɨpua aꞌatɨ tɨ naꞌa tɨ vaꞌacan cɨn tiꞌitejvee ɨ Dioj jemi tɨ aɨn raatyajtuaani ɨ meesa japua aɨjna tɨ tyuꞌutapueijveꞌen, ajta ɨ tiꞌityaɨn maj huaꞌutamuaɨꞌɨvajtacaꞌa. Aɨj pu cɨn ayan ruxeꞌeveꞌe tɨ aɨn Jesús ajta tiꞌitɨ huatamuaɨꞌɨvajta.
\v 4 Tɨ puaꞌa aɨn ayan huatyávaacacheꞌen iiyan chaanaca japua, capu aꞌatzu rɨꞌɨríistancheꞌe tɨ aɨn ayan vaꞌacan cɨn tyuꞌutyavaɨreꞌen ɨ Dioj jemi, aꞌini maucheꞌe mu seica meyan seijreꞌe ɨ mej meyan maɨjna cɨn tiꞌimuaɨꞌɨvajtaca ɨ maj cɨn tyuꞌutapueijve ɨ Dioj jemi, aꞌij tɨ teꞌeyuꞌusiꞌi aɨjna jetze ɨ nyuucari ɨ maj cɨn tiꞌijta.
\v 5 Majta aɨme, ayaa mu tiꞌivaɨreꞌe aɨjna tɨ ayan seijreꞌe tɨj queenimaꞌaraꞌan aɨjna tɨ uteꞌe eꞌeseijreꞌe. Majta, matɨꞌɨj meyan aráurasten ɨ huaꞌayeꞌira, ayaa mu raꞌijchu aꞌij tɨ tzaahuatiꞌiraꞌa cɨn seijreꞌe ɨ uteꞌe ɨ Dioj jemi. Aɨj pu cɨn, tɨꞌɨj Moisés tyaacan ayan aꞌutecheniicheꞌen tɨ raꞌajtaahua aɨjna ɨ ɨnaamua tɨ Dioj ayan tiraataꞌitiiriꞌi, ayaa pu tiraataꞌixaa tɨcɨn: “Pataꞌaj hui peyan nain cɨn huarɨni aꞌij nyej timuaataseijrate patɨꞌɨj paun aꞌutyavaacaꞌa ɨ jɨri japua.”
\s Cɨriistuꞌu pu nuꞌu raatyajtua ityejmi jemi ɨ nyuucari tɨ eitzeꞌe reꞌen cai ɨ tɨ miꞌimaꞌacan
\p
\v 6 Ma ajta ijii, Cɨriistuꞌu puꞌuri ayan raꞌancuraꞌa tɨ ayan aɨjna cɨn tyuꞌutyavaɨreꞌen aɨjna cɨmeꞌe tɨ eitzeꞌe reꞌen ɨ Dioj jemi cai aɨjna ɨ maj cɨn tiꞌivaɨreꞌe iiyan chaanaca japua. Ayaa pu cheꞌeta naꞌa eitzeꞌe reꞌen aɨjna ɨ nyuucari ɨ tɨ cɨn ta japua huanyúu. Ayaa pu een cɨn eitzeꞌe reꞌen aꞌini eitzeꞌe reꞌen aɨjna ɨ nyuucari tɨ Dioj ayan raataꞌa, tɨ ajta jeitzeꞌe reꞌen aɨjna tɨ tyaꞌataujratziiriꞌi tɨ titáacɨꞌɨti.
\p
\v 7 Ajta aɨn nyuucarijraꞌa ɨ tɨ cɨn anacai Dioj tyaꞌataujratziiriꞌi, tɨ puaꞌa ayan cai tiꞌitɨj cɨn tyaꞌutyaturaancheꞌe, capu aꞌatzu huataujcɨꞌɨpuáacheꞌe tɨ seij ayan huatyauuni ɨ tɨ cɨn Dioj ayan tyaꞌataujratziira.
\v 8 Ma ajta Dioj, ayaa pu huaꞌa jetze tyaꞌujpuáꞌari maj cai aꞌatzu arauraste maɨjna cɨmeꞌe ɨ nyuucari tɨ anacai raatyajtuaa huaꞌa jemi. Aɨj pu cɨn ayan tyuꞌutaxajtacaꞌa tɨcɨn:
\q Ayaa pu tiꞌixa ɨ tavastaraꞌa yee maꞌacui xaa, nyaꞌu.
\q Puꞌuri ajna xɨcajraꞌa jetze tyajaꞌureꞌenyejsin
\q2 nyej jetzen jajcuacan cɨn nyuucari tihuaꞌutaꞌasin
\q2 ɨ nyaj cɨn tyaꞌatanratziira nyaɨme jemi
\q2 ɨ mej Israel jetze ajtyamaꞌacan,
\q nyajta huaꞌa jemi ɨ tyaɨtyejmuaꞌameꞌen pueen
\q2 aɨjna ɨ Judá.
\q
\v 9 Canu neyan cheꞌeta nyanaꞌa eenyeꞌequeꞌe
\q2 ɨ nyuucari huaꞌutaꞌasin nyatɨj tihuaꞌutaꞌa
\q2 aɨme ɨ huaꞌavaujsimuaꞌacɨꞌɨ,
\q ajna xɨcajraꞌan nyej jetzen huaꞌutavaɨ,
\q nyajta hueꞌiraaviꞌitɨ aujna u Egipto,
\q2 aꞌini camu aꞌatee mej meyan huarɨni
\q2 aꞌij nyej nyaɨjna cɨn tihuéijca nyaɨjna jetze
\q2 ɨ nyuucari nyaj raatyajtuaa aɨme jemi.
\q Ma ajta, capu cheꞌe nyej jetze ruxeꞌevaꞌacaa
\q2 nyaj rɨꞌɨ tihuaꞌuchaɨn.
\q
\v 10 Ai pu aɨn pueen ɨ nyuucari tɨ jajcua
\q2 ɨ nyaj cɨn tyaꞌatanratziira aɨme jemi
\q2 ɨ maj Israel jetze ajtyamaꞌacan.
\q Ayaa pu ajta tiꞌixa ɨ tavastaraꞌa tɨcɨn:
\q Tɨꞌɨj teꞌentipuaꞌare ajna xɨcajraꞌan jetze,
\q2 ayaa nu caꞌanijraꞌa huaꞌutaꞌasin
\q2 mej mi raꞌutamuaꞌaree ɨ rutzajtaꞌa
\q2 ɨ nyuucari ɨ nyaj cɨn tiꞌijta.
\q Ayaa nu raatyatuaasin ɨ nyenyuuca
\q2 huaꞌaxaijnyuꞌuca jetze,
\q2 seij nyajta seij tyamuaꞌa naa.
\q Nyajta nu inyaa huaꞌa Dioj pueenyaꞌa naꞌame.
\q Majta aɨme, aɨ mu nyetyaɨtestyamuaꞌa muaꞌajuꞌun.
\q
\v 11 Majta aɨme, camu cheꞌe meyan tihuaꞌutáꞌitiira
\q2 ɨ ruxaꞌa tyaɨte yee
\q2 sataꞌaj raamuaꞌati ɨ tavastaraꞌa.
\q Camu xaa nyaꞌu, aꞌini naimiꞌi
\q2 mu meyan nyamuaꞌatyaa muaꞌajuꞌun,
\q matɨj manaꞌa puaꞌamua ɨ tyaɨte,
\q2 aɨme ɨ maj cɨleenyaꞌa cɨn títyatatí,
\q majta aɨme ɨ maj vaꞌacan cɨn títyatatí.
\q
\v 12 Nyajta inyaa, nyaa nu neyan tihuaꞌutauuniꞌira
\q2 ɨ maj cɨn aꞌij puaꞌa tiꞌityújchaɨcaꞌa inyeetzi jemi.
\q Nyajta, canu cheꞌe aꞌanaj neyan raꞌutamuaꞌareera
\q2 ɨ maj cɨn nyeetzi jemi autyajturaa.
\m
\v 13 Ayaa puꞌu naꞌa, aꞌini tavastaraꞌa pu ayan cɨmeꞌen tiꞌixaj yee jajcuacan nu cɨn nyuucari huatyatuaasin, ayaa pu een cɨn ajta ayan tiraaxaꞌapɨꞌɨntare tɨ ari miꞌimaꞌacan aɨjna ɨ nyuucari tɨ anacai huaꞌa jemi raatyajtuaa. Ajta aɨn tɨ ari miꞌimaꞌacanta aꞌaraa, ajta cai cheꞌe tiꞌitɨj vaɨreꞌe, puꞌuri tɨn antipuaꞌari nain cɨmeꞌe.
\c 9
\s Ɨ ɨnaamua tɨ yan japuan seijraꞌacaa iiyan chaanaca japua
\p
\v 1 Ajta cɨmeꞌen ɨ nyuucari tɨ anacai aɨme jemi raatyajtuaa, ayaa pu jetzen teꞌeyuꞌusiꞌihuacaꞌa aꞌij mej yeꞌi huarɨni mej mi ranaꞌamicheꞌen ɨ Dioj, ajta aꞌij tɨ eenyaꞌa seiraꞌa aꞌame aɨjna ɨ ɨnaamua.
\v 2 Ajta aɨn ɨ ɨnaamua, huaꞌapua pu cɨn ájtaavijhuacaꞌa ɨ maj tzajtaꞌan teꞌiráꞌa ɨ maj cɨn tiꞌinaꞌamichaꞌa. Ajta tzajtaꞌan ɨ tɨ a jeijreꞌe ájtaavijhuacaꞌa, au pu aꞌutyaavaacaꞌa aɨjna tɨ antitátzajmee, ajta aɨjna ɨ meesa tɨ ajta japuan eꞌetyáꞌa aɨjna ɨ pan tɨ Dioj jemi huatyatuiihuacaꞌa. Ayaa pu tyajaꞌarajtyahuaa tɨ nuꞌu “ajna aꞌu tɨ Dioj huatauraꞌate”.
\p
\v 3 Ajta, huaritaꞌan aɨjna cɨɨxuri tɨ eꞌitaꞌa aꞌacáavɨj tɨ huaꞌapua, au pu seij aꞌutyavaacaꞌa ɨ ɨnaamua. Ayaa mu tyaꞌatamuaꞌamua tɨcɨn “Aɨjna tɨ Dioj huapɨꞌɨ huatauraꞌate.”
\v 4 Au pu tzajtaꞌan seijraꞌacaa aɨjna tɨ ooro cɨn taavijhuacaꞌa, maj majta japuan tiꞌimuaɨꞌɨvajtacaraꞌa cɨtziveꞌeri cɨmeꞌe. Au mu majta ruꞌutyajtua aɨjna ɨ chiꞌiraꞌan tɨ ooro cɨn nain japua cámeijriꞌihuacaꞌa, tɨ ajta uramuaacaꞌa aɨjna tetej tɨ jetzen teꞌeyuꞌusiꞌihuacaꞌa aɨjna ɨ nyuucari tɨ cɨn Dioj anacai tyaꞌataujratziiriꞌi. Au pu ajta huiiracatii aɨjna ɨ xaꞌari tɨ ooro cɨn taavijhuacaꞌa, tɨ ajta tzajtaꞌan uramuaanicaꞌa aɨjna ɨ cueꞌira, aɨjna ɨ mej meyan ratamuaꞌamua tɨcɨn maná. Au pu ajta huiiracaꞌatii aɨjna ɨ Aarón itzɨj tɨ jetzen tyaꞌajtanyajxɨ.
\p
\v 5 Majta aɨme ɨ maj tajapua tiꞌivaɨreꞌe, ɨ maj majta huapɨꞌɨ naa seijreꞌe, au mu japuan utyiꞌuucaꞌa aɨme ɨ maj huaꞌapua. Aɨ mu ruꞌanaj cɨn raꞌavaꞌanajcaꞌa aujna aꞌu tɨ Dioj tihuaꞌutauuniꞌiracaraꞌa. Aꞌini tiꞌimuiꞌi ɨ mej maun teꞌiráꞌa, capu cɨꞌɨpe tej ijii tyuꞌutaxaj saxuijmeꞌen nain tɨj naꞌa.
\p
\v 6 Matɨꞌɨj meri nain rɨꞌɨ tyuꞌuruu, aꞌanaj tɨ naꞌa mu maun aꞌutyaruꞌipichaꞌa tzajtaꞌan ɨ tɨ anajca ɨ ɨnaamua aɨme ɨ maj vaꞌacan cɨn tiꞌivaɨraꞌacaa ɨ Dioj jemi mej mi meyan huarɨni aꞌij mej maɨjna cɨn titeꞌentyujmuaꞌaree aꞌij tɨ tyuꞌujxeꞌeveꞌe.
\p
\v 7 Ajta ɨ seij jetze ɨ ɨnaamua, seij puꞌu aun aꞌutyaruꞌipi tɨj naꞌa sei ninyeꞌiraꞌa cɨmeꞌe. Aɨ pu aɨn pueenyaꞌa aɨjna tɨ eitzeꞌe vaꞌacan cɨn tiꞌivaɨraꞌacaa ɨ Dioj jemi. Ajta aɨjna huajajsimaꞌa aɨjna ɨ xuureꞌe tɨ cɨn tyuꞌutamuaɨꞌɨvajta ɨ rucɨmeꞌen ɨ tɨ cɨn autyajturaa ɨ Dioj jemi, ajta aɨme cɨmeꞌen ɨ tyaɨte, ɨ maj cɨn Dioj jemi autyajturaa.
\p
\v 8 Ajta aɨn ɨ xaijnyuꞌucaraꞌaraꞌan ɨ Dioj, ayaa pu cɨmeꞌen tiꞌitaꞌixaateꞌe tɨ ayan huataujmuaꞌa tɨ cai xɨ tyaꞌantacuuniꞌi tej ti tyaun aꞌutyarute ajna tɨ eihua huapɨꞌɨ huatauraꞌate ɨ Dioj tɨ puaꞌa auj aun aꞌutyavaaca aɨjna ɨ ɨnaamua tɨ a eijreꞌe eꞌeseijreꞌe.
\v 9 Ajta aɨn tɨ a eijreꞌe eꞌeseijreꞌe, ayaa pu huataujmuaꞌa ɨ huaꞌayeꞌira ɨ maj ijii huatyaɨte. Ayaa mu tiꞌijrɨꞌɨre aɨme ɨ mej meyan aráurasten maɨjna ɨ yeꞌira. Aɨ mu tiꞌitatuꞌire ɨ Dioj jemi tiꞌitɨ tɨ naꞌa maj tiꞌipueijveꞌe, majta ɨ maj raatamuaɨꞌɨvajta.
\p Ma ajta, tɨj naꞌa tɨ ayan een ɨ maj raatamuaɨꞌɨvajta, capu aɨn pueen ɨ tɨ xaa raanaijmiꞌireꞌen ɨ muaꞌatziiraꞌaraꞌan aɨjna tɨ ranaꞌamiche ɨ Dioj.
\v 10 Capu xaa nyaꞌu, aꞌini ayaa puꞌu aɨjna cɨn tiꞌivaɨreꞌe ɨ maj racuaꞌaca nusu maj rayaꞌaca naꞌari ɨ maj cɨn huatyaɨꞌɨhuaxɨꞌɨn, naijmiꞌi tɨj naꞌa pu aɨn pueen ɨ maj manaꞌa cɨn tiꞌijta aꞌij tɨ huarɨni ɨ rucɨmeꞌen. Ayaa pu tiꞌihuaujxaꞌapɨꞌɨntare mej meyan rɨcɨ asta naꞌa cai Dioj ayan raanaijmiꞌireꞌen tɨj naꞌa tɨ tiꞌiseijreꞌe.
\s Ɨ xuureꞌe tɨ cɨn huaujnaijmire ɨ nyuucari tɨ jajcua
\p
\v 11 Ajta ijii, Cɨriistuꞌu pu ayan huataseijre itejmi jemi aꞌini aɨ pu vaꞌacan cɨn tiꞌitejvee ɨ Dioj jemi tɨ ij ayan aɨjna cɨn rɨꞌɨ titaataꞌan tɨj naꞌa tɨ iꞌixaꞌapɨꞌɨn een tɨ auj ayan tyajaꞌureꞌenyejsin. Au pu eꞌitaꞌa aꞌutyajrupi ɨ ɨnaamua jete tɨ eitzeꞌe tiꞌivaɨreꞌe, tɨ ajta eihua eitzeꞌe huataujnaijmiꞌire, aꞌini capu ayan ájtaavijhuacaꞌa muajcaꞌa cɨmeꞌe.
\v 12 Seij puꞌu aun aꞌutyajrupi aujna tɨ Dioj ayan huatauraꞌate. Ajta, capu aɨn huajajsimaꞌa aun aꞌutyajrupi ɨ huaꞌaxuureꞌe aɨme ɨ caurasi nusu aɨme ɨ visaaruꞌutzi, silu ruxuureꞌe pu cɨn aun aꞌutyajrupi tɨ ij raatahuauni tɨ tyuꞌutanajchita huaꞌa jetze maꞌacan ɨ tyaɨte tɨj naꞌa rusen cɨmeꞌe ɨ maj cɨn autyajturaa ɨ Dioj jemi.
\p
\v 13 Ee xaa nyaꞌu, cɨj pu caj tiꞌivaɨraꞌacaa mej meyan huaꞌaruuren aɨme ɨ maj tiꞌitɨj cɨn autyajturaa ɨ Dioj jemi, maj meyan huaꞌutyaɨɨraxɨꞌɨn maɨjna cɨmeꞌe ɨ huaꞌaxuureꞌe ɨ caurasi, ajta ɨ huaꞌaxuureꞌe ɨ tuuruꞌuse. Majta mu cɨn huaꞌacavivaaraca ɨ nasijraꞌan ɨ visaaruꞌu tɨ huáàcaj ɨ maj raatyaatai.
\v 14 Aɨj pu cɨn eihua huapɨꞌɨ eitzeꞌe jamuaatyaɨɨraxɨꞌɨn ɨ aꞌamua muaꞌatziiraꞌa jetze aɨjna cɨmeꞌe ɨ xuureꞌe tɨ Cɨriistuꞌu raꞌiraaxɨre. Ajta, aɨjna jetze ɨ xaijnyuꞌucaraꞌaraꞌan ɨ Dioj tɨ rusen cɨn seijreꞌe, aɨj pu jetze huatyaujcaꞌanyajcaꞌa tɨ ij ayan cai tiꞌitɨ cɨn aꞌaturaa tɨꞌɨj huataujmuaɨꞌɨvajtacaꞌa ɨ Dioj jemi. Ayaa pu een cɨn huarɨj sej si seyan raatapuaꞌajta sej raꞌastijreꞌe saɨjna ɨ yeꞌira tɨ cai cheꞌe tiꞌitɨj vaɨreꞌe, sej si tyuꞌutyavaɨreꞌen saɨjna jemi ɨ Dioj tɨ iꞌiruuri.
\p
\v 15 Aɨj pu cɨn, aɨ pu aɨn pueen tɨ ayan tiraaxaꞌapɨꞌɨntare tɨ Dioj jajcuacan cɨn tyaꞌataujratziira huaꞌa jemi tɨ huaꞌutajée mej mi meyan raꞌancuraꞌan aɨjna tɨ tihuaꞌacɨꞌɨti tɨj naꞌa rusen cɨmeꞌe aꞌij tɨ Dioj tyaꞌataujratziiriꞌi. Ayaa pu teꞌeme, aꞌini Cɨriistuꞌu pu huamɨꞌɨ aɨjna cɨmeꞌe tɨ ij huáꞌariꞌi ɨ maj cɨn autyajturaa ɨ Dioj jemi matɨꞌɨj mauj raꞌastijraꞌacaa maɨjna ɨ nyuucari ɨ tɨ anacai cɨn tyaꞌataujratziiriꞌi ɨ Dioj.
\p
\v 16 Ayaa pu tiꞌen, tɨ puaꞌa ayan seijraꞌa ɨ papee tɨ jetzen teꞌeyuꞌusiꞌi tɨ nuꞌu ayan tiraacɨꞌɨti seij ɨ aꞌatɨ, anacaican pu ayan ruxeꞌeveꞌe tɨ aɨjna ɨ jaꞌatɨ huamɨꞌɨni tɨ ayan papee cɨn tyaꞌataujratziiriꞌi.
\v 17 Ee xaa nyaꞌu, aj pu xaa ayan tiꞌivaɨreꞌe aɨjna ɨ papee tɨ puaꞌa ayan huamɨꞌɨni aɨjna ɨ jaꞌatɨ tɨ aɨjna cɨn tyaꞌataujratziiriꞌi. Ajta, tɨ puaꞌa auj ruuri aɨjna ɨ aꞌatɨ, capu aꞌatzu tiratyavaꞌɨri ɨ saɨj aɨjna ɨ papee tɨ ayan tiraacɨꞌɨti.
\p
\v 18 Aɨj pu cɨn, ayaa pu ajta ayan ruxeꞌevaꞌacaa tɨ aɨn nyuucari tɨ anacaican cɨn tyaꞌataujratziiriꞌi ɨ Dioj, aɨ pu ajta aɨjna cɨn tiꞌihuaujxaꞌapɨꞌɨntariꞌiriꞌi aɨjna cɨmeꞌe tɨ tiꞌitɨ ruxuureꞌe airáaxɨre.
\v 19 Tɨꞌɨj aɨn Moisés tyaacan ayan tihuaꞌutanamuajriste naijmiꞌica ɨ tyaɨte tɨj naꞌa tɨ ayan teꞌeyuꞌusiꞌihuacaꞌa jetzen ɨ nyuucari ɨ maj cɨn tiꞌijta, aɨ pu tírajnájchi aɨjna ɨ huaꞌaxuureꞌe ɨ visaaruꞌu, ajta jamuan ɨ huaꞌaxuureꞌe ɨ caurasi aɨjna ɨ jaj jamuan, ajta jamuan aɨjna ɨ muxa tɨ paꞌu, ajta jamuan aɨjna ɨ hisopo piꞌista. Aj pu ij, aɨjna cɨn, ayan raatyátzutijraxɨ ɨ yuꞌuxari tɨ íriꞌi, ajta huaꞌutyatzutijraxɨ naijmiꞌica ɨ tyaɨte.
\p
\v 20 Ayaa pu aɨjna cɨn huarɨj, aj puꞌi ayan tihuaꞌutaꞌixaa tɨcɨn: “Ai pu aɨn pueen ɨ xuureꞌe tɨ cɨn ayan tyuꞌuxaꞌapɨꞌɨntariꞌihuacaꞌa aɨjna ɨ nyuucari tɨ cɨn Dioj ayan tyaꞌataujratziiriꞌi muejmi jemi. Ayaa nu nyaɨjna cɨn huarɨj aꞌij tɨ aɨn titaataij.”
\v 21 Ajta aɨn Moisés tyaacan, ayan cheꞌeta naꞌa xuureꞌe cɨn raatyátzutijraxɨ aɨjna ɨ ɨnaamua, ajta tɨj naꞌa tiꞌipuaꞌamua ɨ xaꞌari, ajta ɨ tuxaꞌa ɨ maj cɨn tiꞌivaꞌɨri aujna ɨnaamua jete.
\v 22 Ee xaa nyaꞌu, ayan tiꞌayajna. Cɨmeꞌen ɨ aɨjna ɨ nyuucari ɨ maj cɨn tiꞌijta, tɨmuaꞌa mu tɨn nain huatyaɨɨraxɨ xuureꞌe cɨmeꞌe. Ajta, tɨ puaꞌa cai tiꞌitɨ raꞌiraxɨreꞌen ɨ ruxuureꞌe, capu aꞌij tiꞌirɨꞌɨri tɨ ayan tihuaꞌutauuniꞌi ɨ tyaɨte ɨ maj cɨn autyajturaa ɨ Dioj jemi.
\s Ɨ muaɨꞌɨvejri tɨ xaa eitzeꞌe reꞌen
\p
\v 23 Aɨj pu cɨn ayan ruxeꞌevaꞌacaa mej meyan raatyaɨɨraxɨꞌɨn tɨj naꞌa tɨ ayan seijraꞌacaa tɨj queenimaꞌaraꞌan pueen aɨjna tɨ uteꞌe eꞌeseijreꞌe. Ajta ayan ruxeꞌevaꞌacaa tɨ aꞌatɨ ayan raatyaɨɨraxɨꞌɨn aɨjna tɨ uteꞌe eꞌeseijreꞌe aɨjna cɨmeꞌe ɨ muaɨꞌɨvejri tɨ eitzeꞌe reꞌen cai ɨ maj cɨn meyan tiꞌijrɨꞌɨre iiyan chaanaca japua.
\p
\v 24 Ajta aɨn Cɨriistuꞌu, capu aun aꞌutyajrupi ɨnaamua jete tɨ muajcaꞌa cɨn ájtaavijhuacaꞌa, tɨ ajta ayan een tɨj queenimaꞌaraꞌan aɨjna tɨ uteꞌe eꞌeseijreꞌe, silu au pu u tajapua aꞌutyajrupi ɨ Dioj jemi ta jetze maꞌacan.
\v 25 Ajta, capu aun aꞌutyajrupi tɨ ij muiꞌitɨ huataujmuaɨꞌɨvajta tɨj ajta aɨn tɨ vaꞌacan cɨn tiꞌivaɨreꞌe iiyan chaanaca japua. Ayaa pu tɨj naꞌa seij ninyeꞌiraꞌa jetze aɨ pu utyaruꞌipi ajna tɨ Dioj huatauraꞌate tɨ ij raatyátzutijraxɨꞌɨn xuureꞌe cɨmeꞌe tɨ aɨn rusaɨj cai raꞌiraaxɨre, silu seij puꞌu aun aꞌutyajrupi aɨjna ɨ Cɨriistuꞌu.
\v 26 Naꞌari cai, ayaa pu ruxeꞌevaꞌa aꞌameꞌencheꞌe tɨ aɨn muiꞌitɨ rajpueitzi aꞌameꞌencheꞌe tɨj naꞌa tɨ huataseijre ɨ chaanaca tyaj japuan yan seijreꞌe.
\p Ma ajta, ayaa pu xaa nyaꞌu tiꞌayajna tɨ aɨn seij naꞌa ayan huataseijre ijii tɨ ari nain teꞌentipuaꞌari tɨ ij raꞌantipuaꞌariteꞌen ɨ maj cɨn atyaꞌɨtzaꞌara ɨ Dioj jemi. Ayaa pu een cɨn raꞌantipuaꞌari aɨjna tɨ rusaɨj huataujmuaɨꞌɨvajtacaꞌa.
\v 27-28 Ajta, ayaa pu tiꞌihuaujxaꞌapɨꞌɨntariꞌiriꞌi aɨme jemi ɨ tyaɨte tɨ seij naꞌa ayan tiraacɨꞌɨti ɨ tyaataꞌa tɨ huamɨꞌɨni, ajta eꞌeyan Dioj raꞌaxɨjteꞌen. Ayaa pu cheꞌeta naꞌa een tɨ aɨn Cɨriistuꞌu seij naꞌa huataujmuaɨꞌɨvajtacaꞌa huaꞌa jetze maꞌacan ɨ tyaɨte tɨ ij huáꞌariꞌi ɨ maj cɨn muiꞌitɨ autyajturaa ɨ Dioj jemi. Ajta, aɨ pu ajtahuaꞌa huataseijreꞌesin huaꞌa jemi ɨ maj aꞌujcaꞌanyaacan cɨn rachuꞌeveꞌe. Capu cheꞌe pueijtzi huaꞌutaꞌasin aɨjna cɨmeꞌe ɨ maj cɨn aꞌatura ɨ tyaɨte silu aɨ puꞌicu hueꞌiratuaasin.
\c 10
\s Capu rɨꞌɨri tɨ aɨn nyuucari ɨ maj cɨn tiꞌijta ayan huaꞌunaijmiꞌireꞌen ɨ tyaɨte
\p
\v 1 Ajta aɨn ɨ nyuucari ɨ maj cɨn tiꞌijta, ayaa puꞌu naꞌa een tɨj queenimaꞌaraꞌan tɨj naꞌa tɨ iꞌixaꞌapɨꞌɨn tɨ ayan tyajaꞌureꞌenyejsin. Capu aɨn pueen aɨjna tɨ tzaahuatiꞌiraꞌa cɨn seijreꞌe ɨ Dioj jemi. Ajta, aꞌini ayaa pu ruxeꞌeveꞌe mej meyan cheꞌeta manaꞌa tyuꞌutamuaɨꞌɨvajta tɨj naꞌa sei ninyeꞌiraꞌa cɨmeꞌe, aɨj pu cɨn capu aꞌatzu aꞌij tiꞌirɨꞌɨri tɨ aɨn nyuucari ayan huaꞌunaijmiꞌireꞌen aɨme ɨ mej jemin ajtyaxɨɨri ɨ Dioj jemi.
\v 2 Naꞌari cai, tɨ puaꞌa pɨ naꞌa, ¿ni qui macai raatapuaꞌajtancheꞌe mej meyan tyuꞌutamuaɨꞌɨvajta? Jee xaa nyaꞌu, aꞌini tɨ puaꞌa meyan tihuaꞌutáuuniꞌiracheꞌen ɨ maj cɨn autyajturaa ɨ Dioj jemi, camu cheꞌe meyan raꞌutamuaꞌaréerancheꞌe mej tiꞌitɨ cɨn autyajturaa.
\v 3 Ma ajta, ayaa mu maɨjna cɨn raꞌutamuaꞌaree tɨj naꞌa sei ninyeꞌiraꞌa ɨ maj cɨn Dioj jemi autyajturaa maɨjna cɨmeꞌe mej meyan tiꞌimuaɨꞌɨvajtaca,
\v 4 Ayaa puꞌu naꞌa, aꞌini capu rɨꞌɨri tɨ ayan aɨjna cɨn tihuaꞌutauuniꞌi ɨ maj cɨn autyajturaa ɨ Dioj jemi aɨjna cɨmeꞌe ɨ huaꞌaxuureꞌe aɨme ɨ tuuruꞌuse, majta aɨme ɨ caurasi.
\p
\v 5 Aɨj pu cɨn, tɨꞌɨj aɨn Cɨriistuꞌu yan huataseijre iiyan chaanaca japua, ayaa pu tyuꞌutaxajtacaꞌa tɨcɨn:
\q Capaj peyan raataxeꞌeve nyaj tiꞌitɨ tyuꞌutamuaɨꞌɨvajta
\q naꞌari nyaj tiꞌitɨ tyuꞌutatuiireꞌen mueetzi jemi,
\q silu ayaa paj rɨꞌɨ naaruu ɨ nyaj ratyáhueꞌiraꞌa.
\q
\v 6 Capu aꞌatzu muaꞌaránajchacaꞌa
\q mej meyan tyuꞌutamuaɨꞌɨvajta mueetzi jemi
\q2 ɨ maj huaꞌutyaatai naꞌari
\q ɨ maj meyan tyuꞌutatuiriꞌi mueetzi jemi aɨjna cɨmeꞌe
\q ɨ maj cɨn autyajturaa mueetzi jemi.
\q
\v 7 Nyatɨꞌɨj ni neyan tyuꞌutanixaa yee:
\q “Maꞌacui xaa, ayaa nu een cɨn mu aꞌuveꞌeme
\q2 nyej ni neyan tyaꞌaraꞌasten aꞌij pej tiꞌijxeꞌeveꞌe,
\q muaa, mɨ paj Dioj pueen, aꞌij tɨ nyeetzi cɨmeꞌen
\q2 teꞌeyuꞌusiꞌi ɨ yuꞌuxari jetze tɨ íriꞌi.”
\m
\v 8 Anacai pu ayan tyuꞌutaxajtacaꞌa yee tɨ Dioj cai raꞌaranajchacaꞌa mej meyan tyuꞌutamuaɨꞌɨvajta naꞌari maj tiꞌitɨ tyuꞌutatuiireꞌen ɨ jemin. Ajta yee tɨ cai raataxeꞌeve mej meyan tyuꞌutamuaɨꞌɨvajtacaꞌa ɨ maj huaꞌutyaatai nusu maj maɨjna cɨn tyuꞌutamuaɨꞌɨvajtacaꞌa maɨjna cɨmeꞌe ɨ maj cɨn autyajturaa ɨ Dioj jemi. Naimiꞌi tɨj naꞌa maj meyan tiꞌimuaɨꞌɨvajta, ayaa pu tihuaꞌutaij mej meyan huarɨni aɨjna ɨ nyuucari ɨ maj cɨn tiꞌijta.
\v 9 Ajta eꞌeyan ayan tyuꞌutaxajtacaꞌa tɨcɨn: “Maꞌacui xaa, ayaa nu een cɨn mu aꞌuveꞌeme nyej ni neyan tyaꞌaraꞌasten aꞌij pej tiꞌijxeꞌeveꞌe muaa, mɨ pej Dioj pueen.” Ayaa pu huataujmuaꞌa aɨjna tɨ raataxajtacaꞌa tɨ aɨn ari raꞌuraúu aɨjna ɨ nyuucari tɨ anacai huatyatuiihuacaꞌa tɨ ij raatyajtuaani ɨ tuꞌuveꞌetyajtɨ.
\v 10 Ajta, aꞌini ayan ruxéꞌeviꞌiraꞌa cɨn mu aꞌuveꞌeme, aɨ pu ajta ayan tuꞌiraaviꞌitɨ tɨj naꞌa rusen cɨmeꞌe aɨjna cɨmeꞌe tɨ ayan huataujmuaɨꞌɨvajtacaꞌa ɨ rutevi cɨmeꞌe aɨjna ɨ Jesús tɨ ajta Cɨriistuꞌu pueen.
\s Cɨriistuꞌu pu ayan tihuaꞌutauuniꞌi ɨ maj cɨn autyajturaa ɨ Dioj jemi
\p
\v 11 Ajta aꞌatɨ tɨ naꞌa tɨ vaꞌacan cɨn tiꞌitejvee ɨ Dioj jemi, ayaa pu nain tujcaꞌari tzajtaꞌa tiꞌivaɨreꞌe aɨjna cɨmeꞌe ɨ tɨ cɨn tiraijca. Aꞌanaj tɨ naꞌa ayan cheꞌeta naꞌa tiꞌimuaɨꞌɨvajtaca, aɨjna tɨ cai tiꞌitɨ vaɨreꞌe tɨ ij tihuaꞌutauuniꞌi ɨ maj cɨn autyajturaa ɨ Dioj jemi.
\v 12 Ma ajta aɨn Cɨriistuꞌu, tɨꞌɨj ayan seij naꞌa tyuꞌutamuaɨꞌɨvajtacaꞌa tɨ ij ayan tihuaꞌutauuniꞌi tɨj naꞌa rusen cɨmeꞌe ɨ maj cɨn autyajturaa ɨ Dioj jemi, aɨ pu aun aꞌujyeijxɨ ɨrɨɨtaꞌan ɨ Dioj.
\v 13-14 Aj puꞌi autejchee tɨ raachuꞌeveꞌen asta naꞌa cai tyamuaꞌa naa tihuaꞌutyamueꞌitɨn naijmiꞌica ɨ maj rajchaɨreꞌe, aꞌini seij pu cɨn ɨ muaɨꞌɨvejri, ayan huaꞌunáijmiꞌire tɨj naꞌa rusen cɨmeꞌe aɨme ɨ tɨ hueꞌiraaviꞌitɨ.
\v 15 Ajta aɨn xaijnyuꞌucaraꞌaraꞌan ɨ Dioj, ayaa pu cheꞌeta naꞌa tiꞌixaj itejmi jemi. Anacai pu ayan tyuꞌutaxajtacaꞌa tɨcɨn:
\q
\v 16 Ayaa pu tiꞌixa ɨ tavastaraꞌa tɨ cɨmeꞌen yee:
\q Ai pu aɨn pueen ɨ nyuucari
\q2 ɨ nyaj cɨn tyaꞌatanratziiriꞌi huaꞌa jemi
\q2 tɨꞌɨj teꞌentipuaꞌare ajna xɨcajraꞌa jetze.
\q Nyaa nu neyan huaꞌutaꞌasin
\q2 mej mi meyan raꞌutamuaꞌaree ɨ rutzajtaꞌa
\q2 ɨ nyuucari ɨ nyaj cɨn tiꞌijta.
\q Nyajta nu neyan raatyajtuaasin nyaɨjna ɨ nyuucari
\q2 ɨ huaꞌamuaꞌatziiraꞌa jetze.
\m
\v 17 Ajta ayan tiꞌixa tɨcɨn:
\q Canu cheꞌe raꞌutamuaꞌareera
\q2 ɨ maj cɨn nyeetzi jemi autyajturaa
\q naꞌari ɨ maj cɨn aꞌij puaꞌa tiꞌityújchaɨcaꞌa.
\m
\v 18 Aɨj pu cɨn, camu cheꞌe meyan tiꞌimuaɨꞌɨvajtaca maɨjna cɨmeꞌe ɨ maj cɨn autyajturaa ɨ Dioj jemi, aꞌini Dioj pu ari tihuaꞌutauuniꞌiriꞌi.
\s Maj nuꞌu tyaꞌutaviicueꞌi
\p
\v 19 Ajta ijii, nyeꞌihuaamuaꞌa, ayaa pu tiꞌitaꞌaca tej ti tyaxaahua tyaun aꞌutyarute teyujtaꞌa aꞌu tɨ Dioj eꞌirajca aɨjna cɨmeꞌe tɨ aɨn Jesús raꞌiraaxɨre ɨ ruxuureꞌe ta jetze maꞌacan.
\v 20 Aɨj pu cɨn ayan jajcuacan cɨn taatájuyete ɨ tyaj japuan huajuꞌun tej ti tyajna eꞌitaꞌa aꞌutyarute aꞌu tɨ aꞌacáavɨj aɨjna ɨ cɨɨxuri tej ti tyaun tzajtaꞌan ruurican cɨn huatyaturan tyaɨjna jemi aɨjna cɨmeꞌe tɨ ru cɨmeꞌen huataujmuaɨꞌɨvajtacaꞌa. Ajta aɨn ɨ cɨɨxuri, yaa pu huataujmuaꞌa ɨ tevijraꞌan aɨjna ɨ Jesús.
\v 21 Ajta, ijii pu ayan vaꞌacan cɨn tiꞌivaɨreꞌe ɨ jemin ta jetze maꞌacan ɨ tyaj tyaɨtestyamuaꞌameꞌen pueen ɨ Dioj.
\p
\v 22 Aɨj pu cɨn, ticheꞌe teyan vejliꞌi ajtyaxɨɨre ɨ jemin tyatɨj tyaɨte ɨ tyaj tzaahuatiꞌiraꞌa cɨn uraréꞌen seijreꞌe ɨ ta tzajtaꞌa. Ticheꞌe tyaxaahua jemin ajtyaxɨɨre tyaɨjna cɨmeꞌe tej teyan raꞌatzaahuateꞌe tɨ ayan tiꞌayajna tɨ aɨn Dioj rɨꞌɨ titaataꞌasin aɨjna cɨmeꞌe tɨ aɨn Cɨriistuꞌu ari taatyaɨɨraxɨ ɨ taxaijnyuꞌuca jetze tej ti cai cheꞌe raꞌutamuaꞌaree ɨ tamuaꞌatziiraꞌa jetze aɨjna tɨ aꞌij puaꞌa een. Nain pu cɨn icu, taatyaɨɨraxɨ ɨ ta jetze.
\p
\v 23 Ticheꞌe teyan tyaɨjna cɨn tyaꞌutaviicueꞌi tej tyauj teyan tyaꞌatzaahuatyaꞌa aꞌij tej teri tihuaꞌutaꞌixaa ɨ tyaɨte aɨjna cɨmeꞌen ɨ tyaj rachuꞌeveꞌe. Cheꞌe cai tiꞌitɨ ayan caꞌanijraꞌa tataꞌacareꞌen tej ti cai cheꞌe tyaꞌatzaahuatyaꞌa ɨ Cɨriistuꞌu, aꞌini aɨ pu cai aꞌanaj tiꞌitɨj cɨn atyaꞌɨtzaꞌara tɨ runyuuca cɨn tyaꞌataujratziiriꞌi itejmi jemi.
\v 24 Ticheꞌe teyan huarɨni tej ti caꞌanijraꞌa huatátaꞌan seij tyajta seij tej ti huátaxeꞌeveꞌen, tyajta teyan huarɨni tɨ xaꞌapɨꞌɨn cɨmeꞌe.
\v 25 Ticheꞌe cai raxaahuata tej teyan cai cheꞌe eꞌetitasaꞌɨrihuaꞌan aꞌij mej tiꞌijrɨꞌɨre ɨ seica, silu ticheꞌe eitzeꞌe caꞌanijraꞌa huatátaꞌan tej ti teyan rɨꞌɨ tiꞌihuataxeꞌeveꞌen tyatɨj taꞌihuaamuaꞌa tyaɨjna cɨmeꞌe tɨ ayan titaꞌamitejteꞌe tɨ ajna xɨcajraꞌan jetze ari tyajaꞌureꞌenyejsin.
\s Maj nuꞌu cai cheꞌe aꞌij puaꞌa tiꞌityujchaꞌɨ
\p
\v 26-27 Ma ajta, tɨ puaꞌa teyan taxeꞌeviꞌiraꞌa cɨn tyauj teyan aꞌij puaꞌa tiꞌititachaꞌɨ tyatɨꞌɨj teri raamuaꞌareeriꞌi aꞌij tɨ tiraꞌaxaj aɨjna jetze ɨ yuꞌuxari tɨ tzaahuatiꞌiraꞌa cɨn tyaꞌaxa, capu cheꞌe titáacɨꞌɨti saɨj ɨ muaɨꞌɨvejri tɨ cɨn Dioj titaatauuniꞌi, silu aɨ puꞌu xaa ayan titáacɨꞌɨti aɨjna tɨ tzɨɨniꞌireꞌe, tɨ aɨn Dioj pueijtzi cɨn taataꞌasin. Huapɨꞌɨ pu pueijtzi cɨn huaꞌutaꞌasin aɨme ɨ maj rajchaɨreꞌe. Ayaa pu aɨjna cɨn huaꞌaruuren tɨj taij tɨ nain cɨn tiꞌitaꞌiraca aɨjna cɨmeꞌe tɨ huapɨꞌɨ nyuꞌucamɨꞌɨ.
\v 28 Cɨmeꞌen aɨjna ɨ nyuucari tɨ raꞌuteyuꞌuxacaꞌa aɨjna ɨ Moisés tyaacan, tɨ puaꞌa huaꞌapua, naꞌari hueica metiꞌiseiraca tɨ aꞌatɨ ayan tiꞌitɨ cɨn autyajturaa aɨjna jemi ɨ nyuucari ɨ maj cɨn tiꞌijta, tɨ puaꞌa meyan raataxaj yee aɨ pu tiꞌitɨj cɨn autyajturaa, camu cheꞌe ráꞌancuꞌuvajxɨꞌɨsin, silu méjjeꞌicatan.
\v 29 Ajta eitzeꞌe pu aꞌij puaꞌa tiraacɨꞌɨti aɨjna ɨ aꞌatɨ tɨ ma ruuraini aɨjna tɨ yaujraꞌan pueen ɨ Dioj. Eihua pu huapɨꞌɨ eitzeꞌe pueijtzi cɨn tiraataꞌasin aɨjna cɨmeꞌe tɨ aɨjna ɨ jaꞌatɨ ayan raatyaxaahuatacaꞌa aɨjna ɨ xuureꞌe tɨ cɨn raaxaꞌapɨꞌɨntare aɨjna ɨ nyuucari tɨ cɨn Dioj tyaꞌataujratziiriꞌi, tɨ ajta cɨn Dioj ruꞌiraaviꞌitɨ. Aɨj pu ajta cɨn raatanyuꞌucaste aɨjna ɨ xaijnyuꞌucaraꞌaraꞌan ɨ Dioj.
\p
\v 30 Ayaa pu teꞌeme, aꞌini tuꞌuri ramuaꞌate aɨjna tɨ ayan raataxajtacaꞌa tɨcɨn: “Ayaa pu tiꞌinyecɨꞌɨcɨpua inyeetzi nyej ni pueijtzi raataꞌan nyaɨjna ɨ aꞌatɨ.” Ajta ayan tyuꞌutaxajtacaꞌa tɨcɨn: “Tavastaraꞌa pu huaꞌaxɨjteꞌen ɨ rutyaɨtestyamuaꞌa.”
\v 31 Ee xaa nyaꞌu, eihua pu huapɨꞌɨ tzɨɨniꞌireꞌe tɨ Dioj ayan raꞌuxɨ́jteꞌen saɨj tɨ aꞌij puaꞌa tiꞌityujchaꞌɨ ɨ Dioj jemi tɨ iꞌiruuri.
\s Ruxeꞌeveꞌe maj nuꞌu tyaꞌutaviicueꞌi
\p
\v 32 Sataꞌaj raꞌutamuaꞌaree aꞌij tɨ eenyeꞌequeꞌe seijraꞌacaa ajnaꞌɨmɨ, satɨꞌɨj anacai raꞌancuraꞌa saɨjna ɨ tavastaraꞌa. Aj xu si tyaꞌutaviicueꞌiriꞌi saɨjna ɨ saj cɨn tyuꞌutése. Eihua xu rajpueijtzicaꞌa.
\v 33 Ajnaꞌɨmɨ nyaꞌu mu meyan amáꞌuxaahuariꞌiriꞌi, metiꞌiseiraca ɨ tyaɨte. Majta, aꞌij mu puaꞌa amuaaruu. Ajnaꞌɨmɨ nyaꞌu, muan xu sajta caꞌanijraꞌa huaꞌutaꞌa aɨme ɨ seica, ɨ mej meyan cheꞌeta manaꞌa rajpueijtzicaꞌa, aꞌini naimiꞌi xu ruꞌihuaamuaꞌa pueen.
\v 34 Muan xu huaꞌancuꞌuvajxɨ aɨme ɨ mej aityanamiꞌihuacaꞌa. Sajta seyan saɨjna cɨn huataujtyamuaꞌave tyamuaꞌa naa matɨꞌɨj meyan tyajamuáꞌariꞌiriꞌi ɨ saj tíꞌijchaɨcaꞌa. Ayaa xu een cɨn seyan huataujtyamuaꞌave, aꞌini xuꞌuri ramuaꞌareeracaꞌa rujɨɨmuaꞌa sej seyan tíꞌijchaꞌɨ ɨ Dioj jemi saɨjna tɨ tyajáꞌamuaꞌa tɨ eitzeꞌe reꞌen, tɨ ajta ayan seiraꞌa aꞌame tɨj naꞌa rusen cɨmeꞌe.
\p
\v 35 Aɨj pu cɨn, caxu yáꞌujɨpuan ɨ saj aꞌujcaꞌanyaacan cɨn rachuꞌeveꞌe, aꞌini eihua pu huapɨꞌɨ tyajamuaacɨꞌɨti aɨjna cɨmeꞌe sej seyan tyaꞌutaviicueꞌiriꞌi.
\v 36 Ee xaa nyaꞌu, ayaa pu ruxeꞌeveꞌe sej seyan tyaꞌutaviicueꞌi, sej si sajta seyan huarɨni aꞌij tɨ aɨn tiꞌijxeꞌeveꞌe tɨ i ayan tyajamuaacɨꞌɨti aɨjna ɨ tɨ cɨn Dioj tyaꞌataujratziiriꞌi muejmi jemi.
\p
\v 37 Ayaa puꞌu naꞌa, aꞌini capu aꞌatzu aꞌateeri aꞌij tɨ teꞌeyuꞌusiꞌi tɨcɨn:
\q Aɨjna tɨ ya uveꞌenyejsin,
\q2 aɨ pu xaa huataseijreꞌesin.
\q Capu cheꞌe aꞌateeri.
\q
\v 38 Ajta aɨn tɨ urareꞌenyaꞌacan
\q2 cɨn huatyajturaa inyeetzi jemi,
\q aɨ pu aɨjna cɨn ruuri aꞌame
\q2 aɨjna cɨmeꞌe tɨ tyaꞌatzaahuateꞌe.
\q Ma ajta, tɨ puaꞌa aɨn caujxaahuata,
\q2 capu aꞌatzu naꞌaranáajchi aꞌame yu nyatzajtaꞌa.
\m
\v 39 Me tyajta ityan, catu huaꞌa jetze ajtyamaꞌacan ɨ mej meyan caujxaahuataca, aɨme ɨ tɨ Dioj huaꞌantipuaꞌariteꞌesin. Catu xaa nyaꞌu, silu tyan tu huaꞌa jetze ajtyamaꞌacan ɨ mej tyaꞌatzaahuateꞌe, aɨme ɨ tɨ Dioj hueꞌiratuaasin tɨj naꞌa rusen cɨmeꞌe.
\c 11
\s Aɨme ɨ mej tyaꞌantzaahua
\p
\v 1 Ayaa pu tiꞌen tej teyan tyaꞌatzaahuateꞌe, aɨj tu cɨn teyan ramuaꞌaree tɨ ayan teꞌeme aɨjna ɨ tyaj cɨn tiꞌichuꞌeveꞌe. Aɨj tu ajta cɨn ramuaꞌaree tɨ ayan tiꞌayajna ɨ tyaj cai rasiseꞌij.
\v 2 Aɨjna cɨn mej tyaꞌantzaahua aɨme ɨ mej mejmiꞌi seijraꞌacaa ɨ tavaujsimuaꞌacɨꞌɨ. Aɨj pu cɨn Dioj ayan rɨꞌɨ tihuaꞌutyáxajtacaꞌa.
\p
\v 3 Aɨjna cɨn tej tyaꞌatzaahuateꞌe, aɨj pu cɨn ayan titaꞌamitejteꞌe tɨ naijmiꞌi tɨj naꞌa jiiji tɨ tiꞌiseijreꞌe, ayaa pu een cɨn huataseijre aɨjna cɨmeꞌe tɨ cai seijraꞌacaa, aꞌini Dioj pu ayan raataxajtacaꞌa.
\p
\v 4 Aɨjna cɨn tɨ ayan tyaꞌantzaahua aɨjna ɨ Abel tyaacan, aɨj pu cɨn ayan tyuꞌutamuaɨꞌɨvajtacaꞌa ɨ Dioj jemi tiꞌitɨ cɨmeꞌe tɨ eitzeꞌe reꞌenyaꞌacan cɨn seijraꞌacaa ɨ Dioj jemi cai aɨjna tɨ cɨn tyuꞌutamuaɨꞌɨvajtacaꞌa aɨjna ɨ Caín tyaacan. Aɨj pu cɨn Dioj ayan cɨmeꞌen tiraatyáxajtacaꞌa tɨ aɨn Abel urareꞌenyaꞌacan cɨn huatyajturaa ɨ jemin aɨjna cɨmeꞌe tɨ raꞌancuraꞌa aɨjna tɨ cɨn tyuꞌutamuaɨꞌɨvajtacaꞌa. Ajta aɨn ɨ Abel, aɨ pu xaa huamɨꞌɨ. Ma ajta, aucheꞌe pu tiꞌitaꞌixaateꞌe aɨjna cɨmeꞌe tɨ tyaꞌantzaahua.
\p
\v 5 Aɨjna cɨn tɨ tyaꞌantzaahua aɨjna ɨ Enóc, aɨj pu cɨn Dioj ayan yaꞌuviꞌitɨ u tajapua tɨ ij cai raacɨꞌɨti ɨ tɨ huamɨꞌɨni. Majta ɨ seica, camu meꞌe yáꞌutyau aɨjna cɨmeꞌe tɨ Dioj yaꞌuviꞌitɨ. Ayaa mu cɨmeꞌen tyuꞌutyaxajtacaꞌa tɨ nuꞌu raꞌaranajchacaꞌa ɨ Dioj aꞌij tɨ tiꞌityújchaɨcaꞌa.
\v 6 Ajta tɨ puaꞌa aꞌatɨ cai tyaꞌatzaahuatyaꞌa, capu aꞌatzu rɨꞌɨri tɨ aɨn aꞌatɨ ayan huarɨni aꞌij tɨ tiraꞌaraanajchi ɨ Dioj. Ayaa pu tiꞌen, aꞌini tɨ puaꞌa aꞌatɨ ayan raxeꞌevaꞌa tɨ vejliꞌi ajtyaxɨɨre ɨ Dioj jemi, anacai pu ayan ruxeꞌeveꞌe tɨ aɨn aꞌatɨ ayan tyaꞌantzaahuateꞌen tɨ Dioj seijreꞌe, ajta tɨ aɨn Dioj ayan rɨꞌɨ tihuaꞌataꞌaca aɨme ɨ maj aꞌujcaꞌanyaacan cɨn rahuauhuau.
\p
\v 7 Aɨ pu ajta tyaꞌantzaahua aɨjna ɨ Noé tyaacan. Aɨj pu cɨn, tɨꞌɨj Dioj ayan tiraatányuuche aɨjna cɨmeꞌe tɨ nuꞌu ayan tyajaꞌureꞌenyejsin, aj puꞌi aɨn Noé ráꞌantzaahua, ajta eꞌeyan raatyataahuacaꞌa aɨjna ɨ canuuhuaꞌa tɨ veꞌe, tɨꞌij ajta cɨn huaꞌutavaɨ ɨ rutyaɨtestyamuaꞌa maj cai huacuiꞌini. Ayaa pu aɨjna cɨn huarɨj, aɨ pu huaꞌutaꞌa aɨme ɨ mej iiyan japuan seijraꞌacaa ɨ chaanaca maj raamuaꞌaree maj cai xaꞌapɨꞌɨn rɨjcaa ɨ Dioj jemi. Aɨj pu cɨn, ayaa pu tiraacɨ́ꞌɨ aɨjna ɨ Noé tyaacan tɨꞌij ayan urareꞌenyaꞌacan cɨn huatyaturan ɨ Dioj jemi aɨjna cɨmeꞌe tɨ tyaꞌantzaahua.
\p
\v 8 Ayaa pu cheꞌeta naꞌa tyaꞌantzaahua aɨjna ɨ Abraham tyaacan. Aɨj pu cɨn ayan raꞌaraꞌastijre tɨꞌɨj Dioj ayan raataityacaꞌa tɨ aun aꞌuraꞌani aujna aꞌu tɨ yaꞌacɨꞌɨti. Aɨj pu cɨn, aɨn cai ramuaꞌareeracaꞌa aꞌu tɨ aꞌumej, aɨ pu aun áꞌuraa.
\v 9 Aɨjna cɨmeꞌe tɨ tyaꞌantzaahua, aɨ pu aꞌucatii aꞌu tɨ cai eꞌemaꞌacan, aɨjna seij chuejraꞌa japua tɨ cɨmeꞌen Dioj ayan tyaꞌataujratziiriꞌi tɨ ayan yaꞌacɨꞌɨti. Au pu aꞌucatii navij chiꞌiraꞌa jete aɨjna jamuan ɨ Isaac tyaacan, ajta aɨjna ɨ Jacobo tyaacan, ɨ tɨ huaꞌa jemi Dioj ayan cheꞌeta naꞌa aɨjna cɨn tyaꞌataujratziiriꞌi tɨ ayan tihuaꞌucɨꞌɨti tɨj ajta tiꞌijcɨꞌɨti aɨjna ɨ Abraham tyaacan.
\v 10 Aɨj pu cɨn ayan huarɨj aꞌini ayaa pu tiꞌijchuꞌevaꞌacaa tɨ aun aꞌutyarute ajna chajtaꞌa tɨ cai jaꞌatɨ aꞌanaj ratyáuuna aɨjna cɨmeꞌe tɨ Dioj rusaɨj ráasɨɨmuaꞌa aꞌij tɨ seiraꞌa aꞌame, ajta ráꞌajtaahuacaꞌa.
\p
\v 11 Aɨjna cɨmeꞌe tɨ tyaꞌantzaahua aɨjna ɨ Sara tyaacan, aɨj pu cɨn Dioj ayan tiraataꞌa tɨ ayan paꞌarɨꞌɨ huataseijreꞌen ɨ jetzen, capu amɨn aꞌij tɨ ari huapɨꞌɨ ucaristacaꞌa. Ayaa pu aɨjna cɨn ayan tiraacɨ́ꞌɨ aɨjna cɨmeꞌe tɨ ayan tiraꞌamitejtyaꞌacaa tɨ aɨn Dioj ayan araurastejsin aɨjna cɨmeꞌe ɨ tɨ cɨn tyaꞌataujratziiriꞌi.
\v 12 Aɨj mu cɨn meyan aꞌiráanye muiꞌitɨ maɨjna jetze saɨj tɨ ari áꞌameꞌerajcaa. Ayaa mu muiꞌitɨ huataseijre ɨ yaujmuaꞌameꞌen matɨj manaꞌa puaꞌamua ɨ xuꞌuraꞌave ɨ maj uteꞌe eꞌeseijreꞌe, nusu matɨj majta meyan aꞌasicaꞌa tɨj ɨ sej tɨ aun aꞌajca aꞌu tɨ aꞌavastɨme ɨ jaj tɨ veꞌe. Ayaa mu muiꞌicaa tɨ cai rɨꞌɨri tɨ aꞌatɨ huaꞌutéꞌiten.
\p
\v 13 Naimiꞌi aɨme maj cai xɨ raꞌancuraꞌacaa maɨjna tɨ cɨn Dioj tyaꞌataujratziiriꞌi aɨjna cɨmeꞌe mej tyaꞌantzaahua, aɨ mu huacuii. Cu xuee muꞌuri aꞌɨmɨ raseira, majta aꞌɨmɨ aꞌutyáuu maraatataujte maɨjna tɨ tihuaꞌacɨꞌɨti aɨjna cɨmeꞌe mej tyaꞌantzaahua. Ayaa mu maɨjna cɨn huarɨj, ayaa mu majta maɨjna cɨn raataxajtacaꞌa yee maj cai huaꞌa jetze ajtyamaꞌacantacaa aɨme ɨ mej iiyan huachaatɨme chaanaca japua, majta caꞌanyejri cɨn u aꞌaraacɨ ɨ ruche.
\v 14 Ajta, tɨ puaꞌa meyan tiꞌixajta ɨ tyaɨte matɨj aɨme, ayaa pu huataujmuaꞌa aɨjna ɨ mej meyan tiꞌixa tɨcɨn muꞌuri seij chuejraꞌa úuhuaumen aꞌu maj aꞌutéꞌen.
\v 15 Ajta aɨjna ɨ seij chuejraꞌa ɨ maj nuꞌu rúuhuaumen, capu ajna pɨtyajaꞌarɨcɨ aꞌu maj u jaꞌaráacɨ, aꞌini tɨ puaꞌa meyan raꞌutamuaꞌaréerancheꞌe maɨjna ɨ chuejraꞌa ɨ maj japuan aꞌaraacɨ, ayaa pu rɨꞌɨrístaca maj huaraꞌacɨɨne.
\v 16 Ma majta aɨme, muꞌuri meyan raxeꞌevaꞌacaa maj aun aꞌutéꞌen seij chuejraꞌa japua tɨ eitzeꞌe reꞌen. Ayaa pu huataujmuaꞌa aɨjna ɨ nyuucari tɨcɨn seij chuejraꞌa mu uhuauumen tɨ tajapua eꞌeseijreꞌe. Aɨj pu cɨn, capu rateviꞌirasteꞌe ɨ Dioj mej meyan raatámuaꞌati tɨcɨn huaꞌa Dioj pu pueen, aꞌini aɨ pu ari rɨꞌɨ raaruu seij chajtaꞌa aꞌu mej aꞌutyaturan tɨj naꞌa rusen cɨmeꞌe.
\p
\v 17-18 Aɨjna cɨmeꞌe tɨ tyaꞌantzaahua aɨjna ɨ Abraham tyaacan, aɨj pu cɨn tɨꞌɨj Dioj ayan raateeseij, aɨ pu raatamuaɨꞌɨvajtacaꞌa ɨ ruyauj aɨjna ɨ Isaac tyaacan. Aɨjna ɨ aꞌatɨ tɨ raꞌancuraꞌa aɨjna tɨ cɨn tyaꞌataujratziiriꞌi ɨ Dioj, aɨ pu ajta ayan titauuraꞌacaraꞌa tɨ raatamuaɨꞌɨvajta ɨ ruyauj tɨ saɨj naꞌa pueen, tɨ ajta cɨmeꞌen Dioj ayan raataxajtacaꞌa tɨcɨn: “Naimiꞌi ɨ mej aꞌiranyejsin mueetzi jetze, ayaa mu raatámuaꞌatzi tɨcɨn huaꞌayaꞌupua pu pueen aɨjna ɨ Isaac.”
\v 19 Aɨj pu cɨn ayan tiraꞌamitejtyaꞌacaa aɨjna ɨ Abraham tɨ aɨn Dioj raayɨꞌɨtɨhuaꞌa tɨ huaꞌajjajpuan aɨme ɨ tetyaca ɨ mej meri huacuii. Ajta, tɨꞌɨj Dioj ayan raatatui ɨ yaujraꞌan, ayaa pu tiraatamitejte tɨ aɨn Isaac aꞌitáraa huaꞌa tzajtaꞌa ɨ mej meri huacuii.
\p
\v 20 Aɨjna cɨmeꞌe tɨ ajta tyaꞌantzaahua aɨjna ɨ Isaac tyaacan, aɨj pu cɨn ayan rájhuaviiriꞌi ɨ Dioj tɨ aɨn rɨꞌɨ tihuaꞌutyajtuaani majcaꞌihua yee ɨ yaujmuaꞌameꞌen aɨjna ɨ Jacobo tyaacan, ajta aɨjna ɨ Esaú tyaacan.
\v 21 Aɨjna cɨmeꞌe tɨ tyaꞌantzaahua aɨjna ɨ Jacobo tyaacan, aɨj pu cɨn tɨꞌɨj ari áꞌameꞌerajcaa, aicaujtutá japuan ɨ ruꞌitzɨj, rɨꞌɨ tihuaꞌutyajtuaa seij ajta seij ɨ yaujmuaꞌameꞌen aɨjna ɨ José tyaacan. Aɨ pu ajta ranaꞌamichaꞌa ɨ Dioj.
\v 22 Aɨjna cɨmeꞌe tɨ tyaꞌantzaahua aɨjna ɨ José tyaacan, aɨj pu cɨn, tɨꞌɨj ari vástacɨraꞌicaa, ayaa pu tihuaꞌutaꞌixaa aɨjna cɨmeꞌen maj nuꞌu meyan huiiraajuꞌun aɨme ɨ mej Israel jetze ajtyamaꞌacantacaa mej mi seij chuejraꞌa japua aꞌutéꞌen. Ajta pu ayan tihuaꞌutaij aꞌu maj tyajaꞌavaꞌanan ɨ tiꞌicariiraꞌan.
\p
\v 23 Aɨjna cɨmeꞌe mej tyaꞌantzaahua ɨ vaujsimuaꞌameꞌen aɨjna ɨ Moisés tyaacan, aɨj pu cɨn, tɨꞌɨj huanuꞌeihuacaꞌa, aɨ mu raatyaꞌavaatacaꞌa hueica maxcɨraꞌi cɨmeꞌe aꞌini ayaa pu tihuaꞌamitejtyaꞌacaa tɨ naa seijraꞌacaa aɨjna ɨ paꞌarɨꞌɨ. Majta, camu raatatzɨn aɨjna ɨ tɨ cɨn tyuꞌutaijtacaꞌa aɨjna ɨ rey maj nuꞌu huaꞌucuiꞌini ɨ tɨꞌɨri mej tetyaca.
\p
\v 24 Aɨjna cɨmeꞌe tɨ tyaꞌantzaahua aɨjna ɨ Moisés tyaacan, tɨꞌɨj ari vástacaa, capu huatauraꞌa mej meyan raatámuaꞌati tɨcɨn yaujraꞌan pu pueen aɨjna ɨ jɨitaꞌa ɨ rey tɨ rapeꞌeri.
\v 25 Ayaa pu tiraaxaꞌapɨꞌɨntare tɨ ayan rajpueitzi aꞌaraꞌani aɨme jamuan ɨ tyaɨtestyamuaꞌameꞌen pueen ɨ Dioj. Ajta, capu aꞌatzu raꞌaranajchacaꞌa tɨ ayan aꞌatzu aꞌateeviꞌin huataujtyamuaꞌaveꞌen aɨjna cɨmeꞌe tɨ ayan huarɨni aɨjna tɨ aꞌij puaꞌa een ɨ Dioj jemi.
\v 26 Ayaa pu tiraꞌamitejtyaꞌacaa tɨ ayan eitzeꞌe ratyavaꞌɨri mej meyan tiráꞌuxaahuariꞌi Cɨriistuꞌu jetze maꞌacan cai tɨ ayan tiratyavaꞌɨri tɨj naꞌa tɨ huapɨꞌɨ tiꞌijnajchi ɨ mej tíꞌijchaꞌɨ aɨme ɨ mej tíꞌijtacaa aujna u Egipto. Ayaa pu een cɨn ayan rachuꞌevaꞌacaa aɨjna tɨ tiraacɨꞌɨti ɨ Dioj jemi.
\v 27 Aɨjna cɨmeꞌe tɨ tyaꞌantzaahua, aun pu aꞌarajraa u Egipto. Ajta, capu raatatzɨn tɨ puaꞌa eihua huapɨꞌɨ huatanyuꞌucan aɨjna ɨ rey, silu tyamuaꞌa pu tyaꞌutaviicueꞌiriꞌi. Cu xuee tɨ cuj aꞌɨmɨ raseiraca aɨjna ɨ Dioj tɨ cai seijreꞌe.
\p
\v 28 Aɨjna cɨmeꞌe tɨ tyaꞌantzaahua, aɨj pu cɨn ayan tyaꞌaraꞌaste aɨjna xɨcajraꞌa tɨ jetzen Dioj tihuaꞌutauuniꞌi. Ayaa pu een cɨn raꞌajtyapɨtijraxɨ xuureꞌe cɨmeꞌe tɨ i cai ayan tihuaꞌucɨꞌɨti aɨjna tɨ huaꞌacuiꞌini aɨme ɨ maj anáatyáꞌa huanunuꞌeihuacaꞌa.
\v 29 Aɨjna cɨmeꞌe mej tyaꞌantzaahua ɨ tyaɨte, aɨj mu cɨn meyan antacɨj ɨ jaj japua tɨ veꞌe tɨ ayan tyajaꞌarajtyahuaa tɨcɨn Jaj tɨ Paꞌu. Ayaa mu japuan antacɨj tɨj chuej tɨ huachi. Ma majta, aɨme ɨ maj Egipto eꞌemaꞌacantacaa, matɨꞌɨj meyan raataxeꞌeve mej meyan cheꞌeta manaꞌa huarɨni, matɨꞌɨj mi auujamɨj.
\p
\v 30 Aɨjna cɨmeꞌe mej tyaꞌantzaahua ɨ mej Israel jetze ajtyamaꞌacantacaa, aɨj pu cɨn matɨꞌɨj meri arahuaꞌapua xɨcaj puaꞌamua ataujnajchacaꞌa aujna chajtaꞌana, aj puꞌi aꞌavatzɨ ɨ jaxuꞌu ɨ tɨ cɨn raꞌanamiꞌihuacaꞌa aujna chajtaꞌana, u Jericó.
\v 31 Aɨjna cɨmeꞌe tɨ tyaꞌantzaahua aɨjna ɨ Rahab tyaacan, aɨjna ɨ jɨitaꞌa tɨ huáꞌajijvaꞌacaꞌa mej mi jamuan jiꞌipityaꞌa, aꞌini aɨ pu tyamuaꞌa naa huaꞌancureꞌeviꞌitɨ aɨme ɨ mej meyan tyuꞌiréꞌixeꞌereꞌen ɨ chajtaꞌana, aɨj pu cɨn cai huamɨꞌɨ huaꞌa jamuan ɨ maj cai raꞌaraꞌastijre ɨ Dioj.
\p
\v 32 ¿Tiꞌitajni nyajtahuaꞌa jamuaataꞌixaateꞌen? Capu tiꞌicɨꞌɨpe nyej neyan tyajamuaataꞌixaateꞌen aꞌij mej huarɨj aɨjna ɨ Gedeón tyaacan, ajta aɨjna ɨ Barac tyaacan, ajta aɨjna ɨ Sansón tyaacan, ajta aɨjna ɨ Jefté tyaacan, ajta aɨjna ɨ David tyaacan, ajta aɨjna ɨ Samuel tyaacan, majta aɨme ɨ maj Dioj jetze maꞌacan tiꞌixaxaꞌataꞌa.
\v 33 Ayaa mu huaꞌutyaamueꞌitɨ aɨme ɨ maj títyatatyáꞌacaa ɨ rey cɨmeꞌe seij chuejraꞌa japua, majta rɨꞌɨ tyuꞌutaijtacaꞌa, majta raꞌancuraꞌa aɨjna tɨ cɨn Dioj tyaꞌataujratziiriꞌi. Majta seica meyan huaꞌancaanajxɨ huaꞌateniꞌitzeꞌen ɨ muajyete. Matɨj manaꞌa mej meyan huarɨj, ayaa mu maɨjna cɨn huarɨj aɨjna cɨmeꞌe mej tyaꞌantzaahua.
\p
\v 34 Majta seica meyan raꞌujeꞌica ɨ taij tɨ ij cai huaꞌutyataira, majta seica huatauruu mej mi cai huaꞌucuiꞌini. Ayaa pu tihuaꞌuruu aɨme ɨ maj cai rucacaꞌanyajcaa. Caꞌanijraꞌa pu xaa huaꞌutaꞌa mej mi meyan huatyaujcaꞌanyen tyamuaꞌa naa. Matɨꞌɨj mi meyan huaꞌutyaamueꞌitɨ matɨj manaꞌa maj cɨn huanyaꞌuse, majta huaꞌutamuari aɨme ɨ xantaaruꞌu ɨ mej seij chuejraꞌa japua eꞌemaꞌacantacaa.
\v 35 Majta aɨme ɨ juuca, ayaa mu majtahuaꞌa huaꞌancureꞌeviꞌitɨ ɨ rutyaɨtestyamuaꞌa ɨ maj majtahuaꞌa aꞌitacɨj huaꞌa tzajtaꞌa ɨ mej meri huacuii.
\p Majta seica, ayaa mu rajpueiitzi muaꞌaraa maɨjna cɨmeꞌe maj cai huaꞌataꞌacaraꞌa maj hueꞌirajtuaani aꞌu maj huaꞌityaana. Ayaa mu een cɨn huarɨj maɨjna cɨmeꞌe mej meyan rachuꞌevaꞌacaa maj majtahuaꞌa huatarun mej mi maun ruuri aꞌutyaturan seij chuejraꞌa japua tɨ eitzeꞌe reꞌen.
\v 36 Majta seica meyan rajpueiitzi muaꞌaraa maɨjna cɨmeꞌe maj huaꞌuxaahuariꞌiriꞌi nusu maj huaꞌutyaavajxɨ naꞌari maj huaꞌanaajɨꞌɨcaꞌaxɨ cadeena cɨmeꞌe naꞌari maj hueꞌityaana.
\p
\v 37 Ayaa mu majta huaꞌuruu. Mahuaꞌutyatuꞌasixɨ tetej cɨmeꞌe. Majta eꞌitaꞌa huaꞌutáveichixɨ. Majta huaꞌucuii chun cɨmeꞌe tɨ ruxaꞌajtaꞌa camɨɨmɨjmee. Ayaa mu eꞌenyeꞌen tiꞌitechajcaꞌa maɨjna cɨmeꞌe ɨ huaꞌanavij ɨ canyaꞌaxɨ nusu ɨ huaꞌanavij ɨ caurasi. Camu aꞌij tiꞌijviicueꞌiracaa. Eihua mu rajpueijtzicaꞌa. Majta aꞌij mu puaꞌa tihuaꞌajchaɨcaꞌa.
\v 38 Camu huatyéechiꞌicaa. Aꞌu tɨ naꞌa mu aꞌujhuaꞌanyaꞌacaa aꞌu tɨ cai eꞌetiꞌitɨjcaa, majta aꞌu tɨ huájɨrimaꞌacaa. Majta au mu eꞌechajcaꞌa aꞌu tɨ eꞌetyastaꞌa, majta maujna cuuniꞌistyaꞌa, ajta aꞌu tɨ aꞌucucuꞌunijmee tɨj naꞌa iiyan chaanaca japua. Ma majta aɨme, eihua mu huapɨꞌɨ eitzeꞌe tiꞌivaɨraꞌacaa ɨ Dioj jemi macai aɨme ɨ maj cai huaꞌaxeꞌevaꞌacaa.
\p
\v 39-40 Dioj pu ayan rɨꞌɨ tihuaꞌutyajtuaa naijmiꞌica aɨjna cɨmeꞌe mej tyaꞌantzaahua. Ma majta aɨme, camu xɨ raꞌancuraꞌa aɨjna tɨ cɨn Dioj tyaꞌataujratziiriꞌi aɨjna cɨmeꞌe tɨ Dioj ari titaaxaꞌapɨꞌɨntariꞌiriꞌi itejmi jemi aɨjna tɨ eitzeꞌe reꞌen tɨ aɨn ayan tejmi jamuan huaꞌunaijmiꞌireꞌen aɨme.
\c 12
\s Aꞌij tɨ yeꞌi rɨꞌɨ tiꞌityujchaꞌɨ aɨjna tɨ Cɨriistuꞌu jemi seijreꞌe
\p
\v 1 Aꞌini eihua mu ta jemi huatyáuu ɨ mej tiꞌiseij, ticheꞌe teyan raatyaxaahua tyaɨjna cɨmeꞌe tɨ ayan tamuareꞌeristeꞌe, ticheꞌe tyajta raatapuaꞌajta tyaɨjna ɨ tyaj cɨn atyaꞌɨtzaꞌara ɨ Dioj jemi, tyaɨjna tɨ aꞌanaj tɨ naꞌa tatyajɨꞌɨqui. Ticheꞌe teyan tyaꞌutaviicueꞌi tyamuaꞌa naa tej ti xaꞌapɨꞌɨn rɨjca tyaɨjna cɨmeꞌe ɨ tɨ cɨn Dioj titaijca tej raꞌantipuaꞌariteꞌen iiyan chaanaca japua.
\v 2 Ticheꞌe tyamɨjna jetze aratacaꞌanyen ɨ Jesús, aɨjna tɨ anacai taataseijrate aꞌij tɨ tiꞌijxeꞌeveꞌe ɨ Dioj. Aɨ pu ajta ayan taanaijmiꞌireꞌen ɨ Dioj jemi aɨjna cɨmeꞌe tej teyan tyaꞌantzaahuateꞌen. Aꞌini aɨ pu ayan ramuaꞌareeracaꞌa tɨ ayan tiraacɨꞌɨti aɨjna tɨ cɨn huataujtyamuaꞌave, aɨj pu cɨn ayan ráꞌuviicueꞌiriꞌi maj ráꞌutatan ɨ curuu jetze. Capu jetzen ruxeꞌevaꞌacaa mej meyan maɨjna cɨn pueijtzi raataꞌan tɨ ayan rateviꞌirastyaꞌacaa. Ajta ijii, an pu aꞌacajca aɨjna japua ɨ ɨpuari ɨrɨɨtaꞌan aꞌu tɨ Dioj aꞌacajca.
\p
\v 3 Sataꞌaj seyan saɨjna jetze tyuꞌumuaꞌati aꞌij tɨ aɨn huarɨj tɨ ayan tyaꞌutaviicueꞌiriꞌi tyamuaꞌa naa aɨme ɨ maj eihua huapɨꞌɨ rajchaɨraꞌacaa ɨ Dioj jemi. Sataꞌaj seyan saɨjna jetze raꞌutamuaꞌaree sej si cai cuaꞌana, tɨ i cai utyavatzɨn ɨ aꞌamua tzajtaꞌa.
\v 4 Caxuu xɨ seyan tyuꞌutése asta sanaꞌa cai raꞌiraaxɨre ɨ aꞌamuaxuureꞌe saɨjna cɨmeꞌe saj saɨjna jamuan áꞌaviicueꞌireꞌe tɨj naꞌa tɨ aꞌij puaꞌa een ɨ Dioj jemi.
\v 5 Sajta seyan yaꞌuhuaꞌaxɨ saɨjna ɨ nyuucari tɨ cɨmeꞌen Dioj ayan caꞌanijraꞌa aꞌamuataꞌaca, tɨj huaꞌataata ayan tihueꞌixaateꞌe ɨ ruyaujmuaꞌa tɨcɨn:
\q Niyauj, capaj raxaahuata
\q2 tɨ tavastaraꞌa ayan tiꞌimueꞌitii,
\q capaj pajta peyan axaamɨstyaꞌa
\q2 tɨ puaꞌa aɨn pueijtzi muaataꞌan.
\q
\v 6 Capaj xaa nyaꞌu huarɨni,
\q aꞌini tavastaraꞌa pu ayan tiꞌiraꞌitii
\q2 aɨjna tɨ raxeꞌeveꞌe,
\q ajta ayan pueijtzi rataꞌaca aꞌatɨ tɨ naꞌa
\q2 tɨ ayan raꞌancureꞌeviꞌitɨ tɨj ruyauj.
\p
\v 7 Ruxeꞌeveꞌe sej seyan tyaꞌutaviicueꞌi aꞌini Dioj pu aꞌamueꞌitii. Ayaa pu cheꞌeta naꞌa aꞌamuaruure tɨj saɨj tyaataꞌa ayan huaꞌaruure ɨ ruyaujmuaꞌa. Aꞌatɨ tɨ naꞌa tɨ yaꞌupuaaraꞌan pueen ayan tiꞌihueꞌitii ɨ ruyaujmuaꞌa aꞌachu ma puaꞌamua.
\v 8 Tɨ puaꞌa ayan tihuaꞌacɨꞌɨti matɨj manaꞌa puaꞌamua ɨ mej yaujmuaꞌameꞌen pueen tɨ huaꞌayaꞌupua ayan tihuéꞌitii, ajta tɨ puaꞌa cai aꞌatɨ ayan tyajamueꞌitii, aɨj xu cɨn cai yaujmuaꞌameꞌen pueen, silu aɨme xu pueen ɨ mej chaꞌa manaꞌa huanunuꞌeihuacaꞌa, ɨ maj cai tíyaꞌupua.
\p
\v 9 Ajta iꞌi, naimiꞌi tu tyatɨj tyanaꞌa puaꞌamua teyan tíyaꞌupuajcaa, tyajta tu teyan huaꞌastijraꞌacaa tyaɨjna cɨmeꞌe maj titaꞌitiiriꞌi. Aɨj pu cɨn, eihua pu eitzeꞌe ayan tiraavijteꞌe tej teyan raꞌaraꞌastijreꞌen tyaɨjna ɨ tayaꞌupua tɨ rusen cɨn seijreꞌe, tej ti jemin ruuri taꞌaraꞌani.
\v 10 Aɨme ɨ tayaꞌupua, ayaa mu aꞌatzu manaꞌa aꞌateeviꞌi meyan titaꞌitiiriꞌi aꞌij tɨ tihuaꞌaranajchacaꞌa.
\p Ma ajta aɨn Dioj, ayaa pu een cɨn ayan tiꞌitaꞌitii tɨ ij rɨꞌɨ taaruuren, tej ti teyan urareꞌenyaꞌacan cɨn huatyaturan tɨj ajta aɨjna.
\v 11 Ee xaa, capu naa tyuꞌase tɨ puaꞌa auj tiꞌitaꞌitiira, silu tyaj tu rajpueijtzi. Ma ajta, tɨꞌɨj ajtahuaꞌa rɨꞌɨ titaatyápuaꞌariteꞌen tyej ti rɨꞌɨ tiꞌitachaɨ taꞌaraꞌani tyaɨjna cɨmeꞌe tɨ ayan titaataꞌitiiriꞌi aɨjna cɨmeꞌe ɨ tyaj rajpueijtzicaꞌa.
\s Maj nuꞌu cai tiꞌitɨj cɨn autyaturan
\p
\v 12 Aɨj pu cɨn, sataꞌaj huatyaujcaꞌanyen. Caxu seyan seijraꞌa tɨj aꞌatɨ tɨ ruxaamɨsteꞌe, tɨ cai rucaꞌanye ɨ rumuajcaꞌa jetze, ajta rutunuj jetze.
\v 13 Sataꞌaj rɨꞌɨ huaujruuren nain cɨmeꞌe sej si tyamuaꞌa naa tityaajuꞌun ɨ Dioj jemi, sej si cai cheꞌe aꞌij puaꞌa huatzúnaꞌicheꞌen, silu sej si huarún tyamuaꞌa naa.
\p
\v 14 Sataꞌaj saɨjna cɨn tyuꞌutateseꞌen saj ruxaahua tiꞌiteseijraꞌa naijmiꞌica jemi ɨ tetyaca. Sataꞌaj sajta sej seyan urareꞌenyaꞌacan cɨn huatyaturan ɨ aꞌamua tzajtaꞌa, aꞌini tɨ puaꞌa aꞌatɨ cai ayan uraréꞌen ɨ rutzajtaꞌa, capu aꞌanaj raseijran ɨ tavastaraꞌa.
\v 15 Caxu raataꞌacareꞌen tɨ saɨj muan ayan tiꞌitɨj cɨn autyaturan tɨ ij cai cheꞌe Dioj ayan rɨꞌɨ tiraataꞌan. Rɨꞌɨ xuꞌu muan tɨ cai ayan huataseijreꞌen muejmi jemi aꞌatɨ tɨ ayan saɨque amuaaruuren tɨ ij ayan tyajamuaɨꞌɨtziiteꞌen, tɨ ajta ayan caꞌanijraꞌa huaꞌutaꞌan eihua ɨ tyaɨte mej mi meyan tiꞌitɨ cɨn autyaꞌɨtzen ɨ Dioj jemi.
\p
\v 16 Rɨꞌɨ xuꞌu sajta, tɨꞌij cai aꞌatɨ ayan tyuꞌuxanaꞌacɨreꞌen naꞌari raatyaxaahua aɨjna tɨ Dioj raatyajtuaa itejmi jemi tɨj aɨjna ɨ Esaú. Aɨ pu ayan raatuaa aɨjna tɨ raacɨꞌɨtiicheꞌen, tɨ aꞌaraꞌan pueenyaꞌa aɨjna cɨmeꞌe tɨ Israel jetze ajtyamaꞌacan. Aɨ pu ajta aɨn pueenyaꞌa tɨ anacai huanuꞌeihuacaꞌa. Ajta ayaa pu een cɨn raatuaa aɨjna cɨmeꞌe tɨ huataꞌicuatacaꞌa.
\v 17 Sajta seri ramuaꞌaree aꞌij tɨ teꞌirajraa. Tɨꞌɨj ajtahuaꞌa ayan raataxeꞌeve tɨ ayan tiraacɨꞌɨti aɨjna tɨ cɨn Dioj ayan rɨꞌɨ tiraatyajtuaani, ayaa pu raaraꞌityacaꞌa aɨjna ɨ yaꞌupuaaraꞌan. Capu cheꞌe huatarɨꞌɨristaracaꞌa tɨ caujxaahuata. Capu amɨn aꞌij tɨ ajta ruyeinyaj rájhuau.
\s Aɨjna ɨ jɨri, ɨ Sinaí, ajta ɨ saɨj ɨ Sión
\p
\v 18 Ajta, caxu seyan cheꞌeta sanaꞌa ajtyáxɨɨracaꞌa ɨ Dioj jemi matɨj aɨme ɨ maj maun aꞌatanye jɨri jetze aꞌu tɨ cai huaꞌutaꞌa maj japuan áꞌujhuaꞌanyeꞌen, aꞌu tɨ jetzen eihua áꞌataacaꞌa, aꞌu tɨ aꞌutɨcaꞌacaa. Huapɨꞌɨ pu xaa huatɨcaꞌacaa, ajta éꞌecan mu viiyacaa apuutzari cɨmeꞌe.
\v 19 Ajta ayan aꞌatɨ ucájijhuacaꞌa trompeeta jetze. Aj pu i seij ayan tyuꞌutaxajtacaꞌa. Huapɨꞌɨ pu tzɨɨniꞌiraꞌacaa tɨ namuajraꞌacaa. Aɨj mu cɨn meyan rájhuaviiriꞌi ɨ tyaɨte tɨ aɨn cai cheꞌe ayan tihueꞌixaatyaꞌa.
\p
\v 20 Ayaa mu huarɨj aꞌini camu aꞌatzu raꞌaviicueꞌiracaꞌa maɨjna tɨ ayan tihuaꞌutaij tɨcɨn: “Tɨ puaꞌa tiꞌitɨ ayan japuan áꞌuchaꞌacanyeꞌen ɨ jɨri, capu amɨn aꞌij tiꞌitɨ tɨ pɨrɨcɨ, sataꞌaj seyan raatyatuꞌasixɨꞌɨn tetej cɨmeꞌe.”
\v 21 Ee xaa nyaꞌu, huapɨꞌɨ pu tzɨɨnisiꞌi seijraꞌacaa ɨ tɨ raaseij aɨjna ɨ Moisés tyaacan. Aɨj pu ayan tyuꞌutaxajtacaꞌa tɨcɨn: “Nenvivej nyaɨjna cɨmeꞌe nyaj tiꞌitzɨɨnyeꞌe.”
\p
\v 22 Ma ajta, caxu seyan saujna ajtyáxɨɨracaꞌa, silu seij xuꞌu jetze, aɨjna ɨ jɨri tɨ ayan tyajaꞌarajtyahuaa tɨcɨn Sión, aꞌu tɨ eꞌeseijreꞌe aɨjna ɨ chajtaꞌa aꞌu tɨ áꞌucaj ɨ Dioj tɨ ruuri, aujna u Jerusalén tɨ uteꞌe eꞌeseijreꞌe. Au mu majta eꞌetyujsaɨre muiꞌitɨ ɨ mej tajapua tiꞌivaɨreꞌe mej mi maujna tyuꞌuyesten. Majta ayaa mu puaꞌamua tɨ cai rɨꞌɨri tɨ aꞌatɨ ayan huaꞌutéꞌiten aꞌachu maj araꞌase.
\p
\v 23 Muan xu sajta huaꞌa jamuan ajtyáxɨɨracaꞌa ɨ mej meyan eꞌetyujsaɨre maɨjna cɨmeꞌe tɨ ayan cheꞌeta tihuaꞌacɨꞌɨti tɨj ayan tiraacɨꞌɨti aɨjna ɨ yaujraꞌan tɨ anacai huanuꞌeihuacaꞌa. Aɨ mu majta meri aꞌayuꞌusiꞌi maujna u tajapua. Sajta muan, ayaa xu jemin ajtyáxɨɨracaꞌa saɨjna jemi tɨ huaꞌaxɨjteꞌe ɨ tyaɨte. Ai pu aɨn pueen ɨ Dioj tɨ naijmiꞌica tiꞌijteꞌe. Muan xu sajta huaꞌa jamuan eꞌetyujsaɨ ɨ huaꞌaxaijnyuꞌuca aɨme ɨ tetyaca ɨ maj urareꞌenyaꞌacan cɨn huatyajturaa ɨ Dioj jemi, aɨme tɨ ajta Dioj huaꞌunáijmiꞌire.
\p
\v 24 Xuꞌuri sajta ajtyáxɨɨracaꞌa saɨjna jemi ɨ Jesús, aɨjna tɨ ayan raaxaꞌapɨꞌɨntare aɨjna cɨmeꞌe ɨ nyuucari tɨ eitzeꞌe reꞌen, tɨ ajtahuaꞌa cɨn tyaꞌataujratziiriꞌi ɨ Dioj. Ajta aɨn ɨ xuuraꞌaraꞌan tɨ aɨn raꞌiraaxɨre, eitzeꞌe pu reꞌenyaꞌacan cɨn seijreꞌe ɨ Dioj jemi cai ɨ tɨ Abel tyaacan yaꞌurai, aꞌini aɨjna tɨ Jesús ayan raꞌiraaxɨre, ai pu aɨn pueen tɨ cɨn Dioj rɨꞌɨ titaatáꞌa itejmi.
\p
\v 25 Rɨꞌɨ xuꞌu muan, sej si cai seyan raatyaxaahua saɨjna tɨ tyajaꞌamueꞌixaateꞌe. Ee xaa nyaꞌu, camu huataujvaɨ aɨme matɨꞌɨj raatyaxaahuatacaꞌa aɨjna tɨ iiyan chaanaca japua tihuaꞌutajée. Aɨj pu cɨn, capu aꞌatzu aꞌij huatarɨꞌɨristari tej teyan huatyatavaɨreꞌen tɨ puaꞌa teyan raatyaxaahua tyaɨjna tɨ ayan tiꞌitajee tɨ uteꞌe eꞌeseijreꞌe.
\p
\v 26 Ajnaꞌɨmɨ, aɨ pu raataruurajxɨ ɨ chaanaca tɨꞌɨj tyuꞌutaxajtacaꞌa. Ma ajta ijii, puꞌuri ajtahuaꞌa ayan tyaꞌataujratziiriꞌi tɨcɨn: “Nyajtahuaꞌa nu neyan raataruurajxɨꞌɨsin nyaɨjna ɨ chaanaca, nyajta naijmiꞌi tɨj naꞌa tɨ eꞌeseijreꞌe u tajapua.”
\v 27 Aɨjna ɨ nyuucari tɨ cɨmeꞌen yee “nyajtahuaꞌa nu raataruurajxɨꞌɨsin”, ayaa pu huataujmuaꞌa tɨ anacai raataruurajxɨꞌɨsin tɨj naꞌa tɨ tyuꞌutaavijhuacaꞌa. Aj puꞌi tiꞌityíꞌasin tɨ ij ayan huatyaturan aɨjna tɨ cai rɨꞌɨri tɨ aꞌatɨ ayan raataruurajxɨꞌɨn.
\v 28-29 Aɨj pu cɨn, ticheꞌe tyaɨjna cɨn huatatatyamuaꞌaveꞌen tyaɨjna cɨmeꞌe tɨ ayan titáacɨꞌɨti tej tyaun aꞌutyaturan seij chuejraꞌa japua tɨ cai aꞌatɨ raayɨꞌɨtɨ tɨ raataruurajxɨꞌɨn. Aɨj pu cɨn, ticheꞌe tyajta teyan ranaꞌamicheꞌen tyaɨjna ɨ Dioj aꞌij tɨ tiraꞌaraanajchi. Ticheꞌe teyan ratzɨɨnyaꞌa raꞌaraꞌastijreꞌen, aꞌini aɨjna ɨ Dioj ɨ tyaj ranaꞌamiche, ayaa pu een tɨj taij tɨ nain tiꞌitaꞌiraca.
\c 13
\s Aꞌij tyaj nuꞌu teyan huarɨni
\p
\v 1 Sataꞌaj sauj huaujxeꞌeveꞌen tɨj ruꞌihuaamuaꞌa.
\v 2 Caxu yáꞌuhuaꞌanan saj tyamuaꞌa naa huaꞌancureꞌeviꞌitɨn ɨ taꞌihuaamuaꞌa ɨ saj cai huaꞌamuajte aꞌini matɨꞌɨj seica meyan huarɨj, ayaa pu teꞌirajraa maj cai ramuaꞌareeracaꞌa meyan huaꞌancureꞌeviꞌitɨ aɨme ɨ maj tajapua tiꞌivaɨraꞌacaa.
\p
\v 3 Sataꞌaj huaꞌutamuaꞌaree saɨme ɨ maj aꞌityanamiꞌi yaa cumu muan xu sajta huaꞌa jamuan aꞌityanamiꞌi. Sataꞌaj sajta huaꞌutamuaꞌaree saɨme ɨ mej aꞌij puaꞌa huaꞌaruure aꞌini naimiꞌi tu seij tyanaꞌa jetze ajtyamaꞌacan.
\p
\v 4 Micheꞌe naimiꞌi meyan tiꞌimuajca tɨ iꞌixaꞌapɨꞌɨn mej huanyejnyaɨche ɨ tyaɨte. Caxu huaꞌataꞌacareꞌen mej meyan tiꞌixanaꞌacɨreꞌe ɨ maj meri nyejnyaꞌɨche aꞌini Dioj pu xaa huaꞌaxɨjteꞌen aɨme ɨ maj aꞌij puaꞌa tiꞌityujchaꞌɨ, majta aɨme ɨ mej tiꞌixanaꞌacɨreꞌe.
\p
\v 5 Caxu seyan huatauraꞌan sej seyan eitzeꞌe raxeꞌevaꞌa ɨ tumin sacai maa tiꞌitɨ. Sataꞌaj seyan saɨjna cɨn huataujtyamuaꞌaveꞌen saɨjna cɨmeꞌe saj caj tíꞌijchaꞌɨ, aꞌini ayaa pu tyuꞌutaxajtacaꞌa aɨjna ɨ tavastaraꞌa tɨcɨn: “Canu aꞌanaj maꞌa muajáujɨsin. Canu nyajta aꞌanaj muájáꞌuhuaꞌaxɨjsin.”
\v 6 Aɨj pu cɨn, rɨꞌɨri tej teyan taxaahua tyuꞌutaxaj yee:
\q Tavastaraꞌa pu nyavaɨreꞌe,
\q aɨj nu cɨn cai tiꞌitzɨɨnyeꞌe
\q2 aꞌij mej nyaruuren ɨ tyaɨte.
\p
\v 7 Sataꞌaj huaꞌutamuaꞌaree aɨme tyaaca, ɨ mej tyajamueꞌitiiriꞌi maɨjna cɨmeꞌe ɨ nyuucari tɨ Dioj jetze aꞌuveꞌeme. Sataꞌaj saɨjna jetze tyuꞌumuaꞌati aꞌij tɨ huaꞌa jemi teꞌirajraa sej si seyan cheꞌeta sanaꞌa raꞌaraꞌastijreꞌen saɨjna ɨ Jesús matɨj aɨme.
\p
\v 8 Ajta aɨn Jesús tɨ ajta Cɨriistuꞌu pueen, ayaa pu cheꞌeta seijreꞌe ijii, tɨj ajta seijraꞌacaa jajcua jɨmɨ, tɨj ajta ayan seiraꞌa aꞌame tɨj naꞌa rusen cɨmeꞌe.
\v 9 Caxu huatauraꞌan tɨ aꞌatɨ ayan amuaacuanamuan aɨjna cɨmeꞌe ɨ nyuucari maj chaꞌa manaꞌa cɨn tyajaꞌamueꞌitii tɨ saɨque huataujmuaꞌa aꞌij tyaj tyajamueꞌitiiriꞌi ityan. Ma sajta muan, Sataꞌaj seyan huatyaujcaꞌanyen ɨ jaꞌamua tzajtaꞌa saɨjna cɨmeꞌe tɨ Dioj tiꞌitɨj cɨn rɨꞌɨ tyajamuaataꞌa. Capu aꞌatzu aꞌij tiꞌirɨꞌɨri saj huatyaujcaꞌanen ɨ aꞌamua tzajtaꞌa saɨjna cɨmeꞌe ɨ yeꞌira tɨ ayan tihueꞌijteꞌe tiꞌitɨ cueꞌira maj raacuaꞌani. Capu aꞌatzu huaꞌutyavaɨ aɨme ɨ maj maɨjna cɨn raꞌaraꞌastijreꞌe.
\p
\v 10 Ajta ayaa pu Dioj raatyajtuaa itejmi jemi ɨ maj japuan tiꞌimuaɨꞌɨvajtaca tɨ cɨmeꞌen cai ayan huaꞌataꞌaca mej jetzen tyuꞌucuaꞌani aɨme ɨ maj maun tiꞌivaɨreꞌe ɨ ɨnaamua jete.
\v 11 Ayaa pu cheꞌeta naꞌa tiraaruu aɨjna ɨ Jesús tɨj ajta aɨn tɨ vaꞌacan cɨn tiꞌitejvee ɨ Dioj jemi ayan huaꞌaruurajcaa aɨme ɨ yaꞌamuaate ɨ maj huaꞌatamuaɨꞌɨvajtacaꞌa maɨjna jetze maꞌacan ɨ maj cɨn autyajturaa ɨ Dioj jemi ɨ tyaɨte. Tɨꞌɨj ari huaꞌucuii, aj puꞌi aun raatyatuaaracaraꞌa ɨ huaꞌaxuureꞌe aujna ɨnaamua jete. Ajta ɨ huaꞌa hueꞌiraꞌa, aɨ pu aun raatyatuaaracaraꞌa a puaꞌaque aꞌu mej aꞌuchaatɨmaꞌacaa ɨ tyaɨte, tɨ ij aun raatyataira.
\p
\v 12 Ajta aɨn Jesús, ayaa pu cheꞌeta naꞌa tirajpueijtzicaꞌa a puaꞌaque ɨ chajtaꞌana jetze tɨ ij ayan urareꞌenyaꞌacan cɨn hueꞌiraviꞌitɨn ɨ rutyaɨtestyamuaꞌa aɨjna cɨmeꞌe tɨ raꞌiraaxɨre ɨ ruxuureꞌe.
\v 13 Aj pu cɨn, ticheꞌe teyan jemin ajtyaxɨɨre a puaꞌaque aꞌu tej tejmíꞌi aꞌuchaatɨmaꞌacaa tej ti teyan cheꞌeta tyanaꞌa tyaꞌutaviicueꞌi tyaɨjna cɨmeꞌe tɨ tyuꞌuteviꞌirasteꞌe tɨj ajta aɨn tyaꞌutaviicueꞌiriꞌi.
\p
\v 14 Ayej xaa nyaꞌu ayan tiraavijteꞌe aꞌini capu ayan raatyajtuaa itejmi jemi chajtaꞌa tɨ iiyan seijreꞌe chaanaca japua tɨ aꞌateeviꞌin silu tyaucheꞌe tu raahuausin tyaɨjna tɨ ayan auj huataseijreꞌesin.
\v 15 Aꞌini Jesús pu ayan tajapua huanyúu, ticheꞌe teyan aꞌanaj tɨ naꞌa nyuucajtzeꞌen rɨꞌɨ tiraatyajtuaani ɨ Dioj jemi. Ai pu aɨn pueen ɨ tyaj cɨn tiꞌimuaɨꞌɨvajtaca, aɨjna ɨ nyuucari ɨ tyaj cɨn huatatatyamuaꞌaveꞌen, ɨ tyaj tyajta cɨn raꞌutamuaꞌaree.
\v 16 Caxu yáꞌuhuaꞌanan saj seyan rɨjca saɨjna tɨ iꞌixaꞌapɨꞌɨn, sajta seyan tihuaꞌutyavaɨreꞌen ɨ seica saɨjna cɨmeꞌe ɨ sej tíꞌijchaꞌɨ, aꞌini tyamuaꞌa pu raꞌaraanajchi ɨ Dioj sej seyan saɨjna cɨn rɨꞌɨ tiraataꞌacareꞌen aꞌij saj rɨcɨ. Tij seyan tyuꞌutámuaɨꞌɨvejta ɨ Dioj jemi.
\p
\v 17 Sataꞌaj huaꞌaraꞌastijreꞌen saɨme ɨ mej meyan antyujmuaꞌaree teyujtaꞌa. Sataꞌaj seyan huarɨni aꞌij mej tyajaꞌamueꞌijteꞌe, aꞌini aɨ mu aꞌamuachaꞌɨj muaꞌayeꞌi maɨjna cɨmeꞌe sej si seyan raꞌaraꞌastijreꞌen ɨ Dioj. Majta mu meyan ramuaꞌaree tɨ ayan ruxeꞌeveꞌe maj raatanamuajristeꞌen ɨ Dioj aꞌij mej tiꞌitɨj cɨn huarɨj. Micheꞌe meyan ruxaahua tyajamuaataꞌitii, aꞌini capu aꞌatzu aꞌij tyajamuatyavaꞌɨri tɨ puaꞌa meyan huataujxaamɨsteꞌen maɨjna cɨmeꞌe saj muareꞌeri huaꞌutaꞌa.
\s Aɨjna tɨ cɨn raꞌantipuaꞌari
\p
\v 18 Ayaa pu titaꞌamitejteꞌe yu tatzajtaꞌa tyaj nain cɨn xaꞌapɨꞌɨn rɨcɨ, tyajta teyan tiꞌijxeꞌeveꞌe tej teyan huarɨni aꞌij tɨ tiraavijteꞌe. Aɨj xu cɨn, sataꞌaj sauj rahuavíira ɨ Dioj jemi itejmi cɨmeꞌe.
\v 19 Nyajta nu neyan áꞌamuajee caꞌanín cɨmeꞌe sej si eitzeꞌe seyan huarɨni saj rájhuavii ɨ Dioj jemi tɨ ij ajtahuaꞌa naataꞌan nyej caꞌanacan muejmi jemi aꞌutyavaaca.
\p
\v 20-21 Ticheꞌe teyan rɨꞌɨ tiraataꞌacareꞌen tyaɨjna ɨ Dioj tɨ aꞌij huatyapuaꞌariteꞌen, tɨ ajta raꞌajjáj huaꞌa tzajtaꞌa ɨ mɨꞌɨchite aɨjna ɨ tavastaraꞌa aɨjna tɨ Jesús pueen. Ai pu aɨn pueen tɨ ayan vaꞌacan cɨn antyujmuaꞌaree aɨjna cɨmeꞌe tɨ huaꞌachaɨ aꞌaraꞌani ɨ rutyaɨtestyamuaꞌa tɨj saɨj tɨ huaꞌa cujtaꞌa huaméꞌen ɨ canyaꞌaxɨ. Ayaa pu éenyeꞌequeꞌe seijreꞌe aɨjna cɨmeꞌe tɨ raꞌiraaxɨre ɨ ruxuureꞌe tɨ ij ayan raaxaꞌapɨꞌɨntareꞌen aɨjna ɨ nyuucari tɨ cɨn Dioj tyaꞌataujratziiriꞌi tɨj naꞌa rusen cɨmeꞌe. Cheꞌe aɨn Dioj ayan amuaanáijmiꞌireꞌen nain cɨmeꞌe tɨ xaꞌapɨꞌɨn een sej si seyan huarɨni aꞌij tɨ aɨn tiꞌijxeꞌeveꞌe. Cheꞌe aɨn ayan amuaaruuren sej si seyan eꞌenyeꞌen seijraꞌa aꞌij tɨ tiraꞌaraanajchi aɨjna cɨmeꞌe tɨ aɨn Jesús tɨ ajta Cɨriistuꞌu pueen ayan aꞌamua japua huanyúu. Aɨj pu cɨn, ticheꞌe teyan rɨꞌɨ tirataꞌacareꞌen tɨj naꞌa rusen cɨmeꞌe.
\p
\v 22 Nyeꞌihuaamuaꞌa, ayaa nu tyajaꞌamuahuavii sej seyan ráꞌuviicueꞌi saɨjna ɨ nyuucari ɨ nyaj cɨn caꞌanijraꞌa amuataꞌaca, aꞌini cɨj nuꞌu caj neyan tyajamuaataꞌitiiriꞌi.
\v 23 Sataꞌaj raamuaꞌaree mej meri raatátuaa ɨ taꞌihuaaraꞌa aɨjna ɨ Timuteeyu. Tɨ puaꞌa caꞌanacan ye raꞌasti, nyaa nu raꞌaviꞌitɨn nyeetzi jamuan, aj nu ni aꞌumaꞌa naꞌame muejmi jemi tej ti naimiꞌi jamuaaseij.
\p
\v 24 Sataꞌaj huaꞌutataujteꞌen aɨme ɨ mej nain cɨn antyujmuaꞌaree muejmi jemi, sajta naijmiꞌica ɨ tɨ Dioj huatauraꞌate. Majta aɨme ɨ maj meyun Italia eꞌemaꞌacan, aɨ mu naijmiꞌi ya áꞌamuataujteꞌe.
\v 25 Cheꞌe aɨn Dioj rɨꞌɨ tyajamuaataꞌacareꞌen naijmiꞌica muejmi. Yaa puꞌu xaa. Cheꞌe ayan tyaꞌaraꞌani.