\id JAS
\h Santiago
\toc1 Santiago
\mt1 Aꞌij tɨ raꞌuyuꞌuxacaꞌa aɨjna ɨ Santiago
\c 1
\s Santiago pu huáꞌataujteꞌe
\p
\v 1 Inyaa Santiago, i nyaj tiꞌivaɨreꞌe ɨ Dioj jemi, nyajta nyaɨjna ɨ tavastaraꞌa jemi, aɨjna ɨ Jesús tɨ ajta Cɨriistuꞌu pueen, ayaa nu nyeijna jetze tyajaꞌamuataujteꞌe, mɨ saj huaꞌa jetze ajtyamaꞌacan aɨme ɨ tyaɨtejraꞌa ɨ maj huaꞌa jetze aꞌiraujneijte aɨme ɨ huaꞌavaujsimuaꞌacɨꞌɨ ɨ maj tamuaamuataꞌa japuan huaꞌapua araꞌase, sajta mɨ tɨ Dioj amuaareꞌitixɨ aꞌu tɨ naꞌa seij chuejraꞌa japua.
\s Cɨmeꞌen ɨ aꞌatɨ tɨ xaa tyaꞌatzaahuateꞌe, tɨ ajta naa tiruꞌumuaꞌaree
\p
\v 2 Tɨ puaꞌa ayan tyajamuaacɨꞌɨti tɨj naꞌa aɨjna ɨ saj cɨn áꞌaviicueꞌireꞌe, sataꞌaj seyan tyuꞌumuaꞌati tɨ xaꞌapɨꞌɨn een, sataꞌaj sajta saɨjna cɨn huataujtyamuaꞌaveꞌen.
\v 3 Ayaa xu huarɨni, aꞌini xuꞌuri ramuaꞌaree tɨ puaꞌa ayan aɨjna cɨn amuaaruuren tɨ ij Dioj ayan amuaateeseij tɨ puaꞌa seyan raꞌastijreꞌe nusu sacai, aɨ pu ajta ayan áꞌamuaruuren sej si tyaꞌutaviicueꞌi.
\v 4 Sataꞌaj sajta seyan rɨꞌɨ raaruuren sej si nain cɨn tyaꞌutaviicueꞌi, aꞌini satɨꞌɨj seyan saɨjna cɨn huarɨn, ayaa xu nain cɨn araurastejsin ɨ Dioj jemi, sajta seyan runaijmiꞌireꞌen. Capu tiꞌitɨ tyajamuaꞌutyáturaateꞌesin.
\p
\v 5 Tɨ puaꞌa raꞌaturaateꞌe seij tɨ ij naa tiruꞌumuaꞌareera aꞌij tɨ yeꞌi huarɨni, cheꞌe aɨn ayan raatahuavii ɨ Dioj. Ajta aɨn Dioj, ayaa pu aɨjna cɨn raataꞌasin, aꞌini aɨ pu ruxéꞌeviꞌiraꞌa cɨn eihua huapɨꞌɨ tihuaꞌataꞌaca ɨ rutyaɨtestyamuaꞌa. Ajta, aɨ pu cai huaꞌajtyaꞌaxɨꞌɨsin.
\p
\v 6 Ma ajta, cheꞌe aɨn ɨ aꞌatɨ ayan aɨjna tiraatahuavii aɨjna cɨmeꞌe tɨ ayan tiꞌayajna tɨ xaa tyaꞌatzaahuateꞌe icu. Cheꞌe aɨn cai aꞌij meꞌe tyejéꞌetiꞌitɨɨtan, aꞌini aɨjna ɨ aꞌatɨ tɨ xaa aꞌij pu puaꞌa naꞌa tiraꞌamitejteꞌe, ayaa pu cheꞌeta naꞌa een tɨj ajta een ɨ jaj tɨ aujruuréjvee ɨ aaca cɨmeꞌe.
\v 7-8 Capu aꞌatzu xaꞌapɨꞌɨn metyáumuaꞌaree aɨjna ɨ aꞌatɨ aɨjna cɨmeꞌe tɨ huaꞌapuaca cɨn áꞌujcaꞌanye tɨ ij ayan huarɨni. Capu aꞌatzu ayan tiraꞌamitejteꞌe aꞌij tɨ huarɨni tiꞌitɨj cɨmeꞌe. Ajta aꞌatɨ tɨ ayan een, capu aꞌatzu raꞌancuraꞌasin ɨ tavastaraꞌa jemi.
\p
\v 9 Ajta aɨn ɨ taꞌihuaaraꞌa tɨ cai aꞌij tiꞌijviicueꞌi, cheꞌe aɨn aɨjna cɨn huataujtyamuaꞌaveꞌen aɨjna cɨmeꞌe tɨ Dioj ayan eihua huapɨꞌɨ rɨꞌɨ tiraataꞌasin.
\s Aɨ pu tyuꞌutyapuaꞌari aɨjna tɨ chijtyaani tichaꞌɨ
\p
\v 10 Ajta aɨn ɨ taꞌihuaaraꞌa tɨ ajta chijtyaani pueen, cheꞌe aɨn ayan rɨꞌɨ tirataꞌacareꞌen ɨ Dioj aɨjna cɨmeꞌe tɨ ayan tiraacɨꞌɨti aɨjna tɨ raatatyeviꞌirasteꞌesin. Aɨ pu xaa ayan cheꞌeta naꞌa tyuꞌutyapuaꞌari tɨj ajta aɨjna ɨ xuuxuꞌu tɨ tuꞌupi jetze xutaꞌa.
\v 11 Ee xaa, tɨꞌɨj u eꞌijnyen ɨ xɨcaj, aɨ puꞌi aɨn tuꞌupi ayan huatyáhuasin ɨ xɨcaj cɨmeꞌe. Ajta aɨn xuuxuꞌuraꞌan, aɨ pu cávatzɨjsin. Ayaa puꞌi tyuꞌutyapuaꞌari ɨ tɨ cɨn naa seijraꞌacaa. Ayaa pu cheꞌeta naꞌa tiꞌijruuren aɨjna ɨ chijtyaani. Aɨ pu áꞌapuaꞌaren nain cɨmeꞌe tɨ eihua huapɨꞌɨ tíꞌijchaɨcaꞌa.
\s Tɨ puaꞌa tiꞌitɨ ayan caꞌanijraꞌa tiꞌitaꞌacareꞌen tɨ aꞌatɨ aꞌij puaꞌa huarɨni ɨ Dioj jemi
\p
\v 12 Rɨꞌɨ pu tirataꞌaca aɨjna ɨ aꞌatɨ tɨ puaꞌa ayan raꞌaviicueꞌi aɨjna tɨ caꞌanijraꞌa rataꞌaca tɨ ayan huarɨni tɨ aꞌij puaꞌa een ɨ Dioj jemi, aꞌini tɨꞌɨj ari ayan tyaꞌutaviicueꞌi aɨjna tɨ cɨn raatamuáreꞌeristen, Dioj pu ayan tiraataꞌasin aɨjna tɨ ayan raamueꞌitɨ, tɨ ayan ruurican huatyaturan aꞌu tɨ Dioj eꞌeseijreꞌe tɨj naꞌa rusen cɨmeꞌe. Ayaa pu aɨjna cɨn tyaꞌataujratziiriꞌi ɨ Dioj tɨ ayan huaꞌutaꞌasin naijmiꞌica aɨme ɨ maj meyan raxeꞌeveꞌe maɨjna ɨ Dioj.
\p
\v 13 Tɨ puaꞌa ayan caꞌanijraꞌa tirataꞌaca seij ɨ aꞌatɨ tɨ ayan raaruuren aɨjna tɨ aꞌij puaꞌa een ɨ Dioj jemi, cheꞌe cai aɨn ayan tyuꞌutaxaj yee Dioj pu ayan caꞌanijraꞌa rataꞌaca tɨꞌij ayan huarɨni aꞌini capu rɨꞌɨri tɨ Dioj ayan caꞌanijraꞌa raataꞌan tɨ i aɨn aꞌatɨ ayan aꞌij puaꞌa huarɨni. Ee xaa nyaꞌu, capu ajta aꞌatzu rɨꞌɨri tɨ aꞌatɨ ayan caꞌanijraꞌa raataꞌan ɨ Dioj tɨꞌij aɨn Dioj ayan huarɨni aɨjna tɨ aꞌij puaꞌa een. Ajta aɨn ɨ Dioj, capu aꞌanaj ayan caꞌanijraꞌa tirataꞌaca ɨ aꞌatɨ tɨꞌij aɨn aꞌatɨ ayan huarɨni aɨjna tɨ aꞌij puaꞌa een.
\p
\v 14 Ma ajta, tɨ puaꞌa ayan caꞌanijraꞌa raataꞌan ɨ aꞌatɨ tɨ ayan huarɨni aɨjna tɨ aꞌij puaꞌa een ɨ Dioj jemi, ayaa pu xaa aɨjna jetze áꞌujcaꞌanye aɨjna jetze ɨ ruxéꞌeviꞌiraꞌa tɨ jetzen aꞌiráninyei ɨ rutzajtaꞌa. Aɨ pu aɨjna cɨn áꞌujcaꞌanye tɨ ayan tiraꞌamitejtyaꞌa tɨ naa seijreꞌe aɨjna ɨ tiꞌitɨ tɨ aꞌij puaꞌa een.
\v 15 Cɨmeꞌen puꞌu ayan raaxaꞌapɨꞌɨntare tɨ ayan huarɨni, aj puꞌi ayan autyaturaasin ɨ Dioj jemi. Ajta, tɨ puaꞌa ari huataujnaijmiꞌireꞌen aɨjna tɨ aꞌij puaꞌa een ɨ Dioj jemi, aj puꞌi mɨꞌɨni aɨjna ɨ aꞌatɨ tɨ aꞌutaꞌɨtzee ɨ Dioj jemi.
\p
\v 16 Neꞌihuaamuaꞌa, mɨ nyaj eihua huapɨꞌɨ aꞌamuaxeꞌeveꞌe, caxu huatauraꞌan tɨ aꞌatɨ tiꞌitɨ cɨn amuaacuanamuan.
\v 17 Tɨj naꞌa tɨ xaꞌapɨꞌɨn een, tɨ ajta cai tiꞌitɨ cɨn aꞌatura tɨ ayan rɨꞌɨ tyajamuaacɨꞌɨti aꞌanaj tɨ naꞌa, au pu eꞌemaꞌacan u tajapua, aɨjna jemi ɨ tej rajyaꞌupua, aɨjna tɨ nain tyuꞌutaahuacaꞌa aɨjna tɨ ayan tiꞌitatzaveꞌe tɨ uteꞌe eꞌeseijreꞌe. Ma ajta, aɨjna jemi, aꞌanaj tɨ naꞌa pu ayan cheꞌeta naꞌa tiꞌiseijreꞌe itejmi jemi. Capu aꞌatzu saɨque ruruurajca, capu ajta ayan raaruurejsin tɨꞌij ayan huatyatɨcaꞌare itejmi jemi.
\v 18 Ruxeꞌeviꞌiraꞌa pu cɨn, ayan taataꞌa tej teyan huataseijreꞌen ɨ chaanaca japua aɨjna cɨmeꞌe tɨ tejmi jemi raatyajtuaa ɨ runyuuca tɨ tzaahuatiꞌiraꞌa cɨn seijreꞌe. Ayaa pu een cɨn huarɨj tej ti teyan cheꞌeta tyanaꞌa eenyeꞌequeꞌen seijraꞌa tyaꞌaraꞌani tɨj ajta aɨjna tɨ anacaican cɨn huataseijre ɨ ilooti ɨ maj majta ratatúꞌirihuaꞌa muaꞌayeꞌi ɨ Dioj jemi.
\s Aɨme ɨ maj raꞌastijreꞌe ɨ nyuucari
\p
\v 19-20 Aɨj pu cɨn, sataꞌaj seyan raamuaꞌaree aꞌij sej yeꞌi huarɨni, neꞌihuaamuaꞌa, mɨ nyaj jaꞌamuaxeꞌeveꞌe. Rɨꞌɨ xuꞌu sej si raanamua tyamuaꞌa naa. Ma sajta, caxu caꞌanacan tihuaꞌutaꞌixaateꞌesin ɨ tyaɨte. Caxu sajta caꞌanacan huatanínyuꞌucacu, aꞌini capu rɨꞌɨri tɨ aꞌatɨ ayan raaruuren aɨjna tɨ xaꞌapɨꞌɨn een ɨ Dioj jemi tɨ puaꞌa ayan nyuꞌucamɨꞌɨ cɨn tiꞌityujchaꞌɨ.
\v 21 Aɨj pu cɨn, sataꞌaj seyan raatapuaꞌajta nain cɨmeꞌe tɨ aꞌij puaꞌa een, tɨ ajta xanaꞌavisiꞌi seijreꞌe. Ma sajta muan, sataꞌaj seyan ruxaamɨstyaꞌa raꞌancuraꞌan saɨjna ɨ nyuucari tɨ muejmi jemi huatyatuiihuacaꞌa, tɨ ajta cɨn Dioj ayan raayɨꞌɨtɨ tɨ amueꞌirajtuaani.
\p
\v 22 Sajta muan, caxu seyan sanaꞌa ranamuajra aꞌij tɨ tiꞌixa ɨ nyuucari silu sajta seyan huarɨni aꞌij tɨ tyajaꞌamueꞌitii. Naꞌari cai, ayaa xu rucuanamuáa xaꞌajuꞌun rujɨɨmuaꞌa sanaꞌa.
\v 23 Ayaa pu een aɨjna ɨ aꞌatɨ tɨ cai ayan rɨcɨ aꞌij tɨ tiꞌixa ɨ nyuucari silu ayaa naꞌa rusaɨj ranamuajra. Ayaa pu een tɨj aɨjna ɨ aꞌatɨ tɨ ruqueenimaꞌa seij ɨ astyaꞌahua jetze.
\v 24 Cɨmeꞌen puꞌu ruseij, aj pu i tichesin ajta eꞌiyan yáꞌuhuaꞌaxɨjsin aꞌij tɨ seijraꞌacaa ɨ queenimaꞌaraꞌan.
\p
\v 25 Ajta aɨn tɨ tyamuaꞌa naa tiraꞌaseij aɨjna ɨ nyuucari tɨ cɨn Dioj tiꞌijta, tɨ ajta cai tiꞌitɨ cɨn aꞌatura, tɨ ajta Dioj cɨn ruꞌirajtuaani, ayaa pu Dioj rɨꞌɨ tiraataꞌasin tɨ puaꞌa aɨn pueenyaꞌa aꞌame saɨj tɨ ayan rɨꞌɨ tiꞌityujchaꞌɨ aꞌij tɨ aɨn nyuucari tiꞌixa. Naꞌari cai tɨ puaꞌa ayan pueenyaꞌa aꞌame saɨj tɨ ayaa naꞌa ranamuajra, ajta caꞌanacan yáꞌuhuaꞌaxɨn, capu reꞌenyeꞌen huatyaturan ɨ Dioj jemi.
\p
\v 26 Tɨ puaꞌa aꞌatɨ ayan tyuꞌujxajta ɨ rutzajtaꞌa yee tɨ tyamuaꞌa naa tiraꞌastijreꞌe ɨ ruyeꞌira, ajta tɨ puaꞌa aɨn aꞌatɨ cai raatapuaꞌajta tɨ aꞌij puaꞌa tihuaꞌaxajta ɨ ruxaꞌa tyaɨte, aɨ pu ayan rucuanamua ɨ rutzajtaꞌa. Capu tiꞌitɨ vaɨreꞌe aɨjna ɨ yeꞌirajraꞌan aɨjna ɨ aꞌatɨ.
\v 27 Ayaa mu rɨcɨ aɨme ɨ mej meyan raꞌaraꞌastijreꞌe ɨ yeꞌira tɨ reꞌenyeꞌen cɨn seijreꞌe ɨ Dioj jemi, tɨ ajta cai tiꞌitɨj cɨn aꞌatura jemin ɨ tyaj rajyaꞌupua. Micheꞌe ayaa manaꞌa rɨjca: mej mi meyan huaꞌumuaare aɨme ɨ mej tiꞌitɨ cɨn rajpueijtzi maɨjna cɨmeꞌe ɨ maj xaꞌajcanta muaꞌaraa nusu maj antyujsaɨjtaracaꞌa; mej mi majta ahuaujcuꞌuven mej mi cai huataujxanaꞌacɨreꞌen aɨme jamuan ɨ mej chaanaca japua huachaatɨme.
\c 2
\s Mej mi cai aꞌij puaꞌa huajaꞌuseijra ɨ ruxaꞌaj tyaɨte
\p
\v 1 Neꞌihuaamuaꞌa, aꞌini muan xu raꞌastijreꞌe ɨ tavastaraꞌa aɨjna ɨ Jesús tɨ ajta Cɨriistuꞌu pueen, tɨ ajta nain cɨn antyujmuaꞌaree ɨ Dioj jemi, aɨj pu cɨn, sataꞌaj seyan ruxaꞌaj sanaꞌa huajaꞌuseijra naijmiꞌica ɨ tyaɨte. Capu amɨn aꞌij tɨ puaꞌa saɨj chijtyaani pueen nusu cai.
\v 2 Ticheꞌe teyan tiraataxaj yee huaꞌapua mu maun aꞌutyarute aꞌu sej eꞌetyujsaꞌɨri. Ajta ɨ saɨj, ayaa pu aniira ucárujtyaꞌa, ajta náa eꞌenyeꞌen tiꞌityecháa. Ajta ɨ saɨj, aɨ pu cai aꞌij tiꞌijviicueꞌi, ajta ayan miꞌimaꞌacan ucacháa.
\p
\v 3 Sajta muan, ayaa xu tyamuaꞌa naa raꞌancureꞌeviꞌitɨn saɨjna tɨ naa eꞌenyeꞌen tiꞌitéechan, sajta seyan tiraataꞌixaateꞌen tɨcɨn: “Iiyaꞌa ij, pataꞌaj ya aꞌujyeijxɨꞌɨn ya tɨ eitzeꞌe aꞌujxeꞌeveꞌe.” Ajta, cɨmeꞌen aɨjna tɨ ayan miꞌimaꞌacan ucacháa, seyan chaꞌa sanaꞌa tiraataꞌixaateꞌen tɨcɨn: “Pataꞌaj ma huatyavaaca nusu ya aꞌujyeijxɨꞌɨ ye nyaɨ́ɨcataꞌa.”
\v 4 Tɨ puaꞌa seyan rɨjca, ¿ni qui seyan ruxaꞌa sanaꞌa tihuaꞌuseijra ɨ ruxaꞌaj tyaɨte? ¿Ni qui sacai seyan ruruure matɨj aɨme ɨ maj aꞌij puaꞌa me tityaumuámuaꞌaree, ɨ maj majta huaꞌaxɨjteꞌe ɨ ruxaꞌa tyaɨte? Ayej xaa nyaꞌu tiꞌayajna. Tɨ puaꞌa seyan cai ruxaꞌaj sanaꞌa tihuaꞌuseijra ɨ ruxaꞌa tyaɨtye, ayaa xu ruruure matɨj aɨme.
\p
\v 5 Casiꞌi, xaanamuajriꞌi, neꞌihuaamuaꞌa. Dioj pu ayan huaꞌavaꞌajajpuaxɨ aɨme ɨ maj cai aꞌij tiꞌijviicueꞌi aɨme tzajtaꞌa ɨ mej yan japuan huachaatɨme ɨ chaanaca japua, mej mi eihua huapɨꞌɨ tíꞌijchaɨca ɨ Dioj jemi maɨjna cɨmeꞌe mej tyaꞌatzaahuateꞌe, tɨ ij ajta ayan tihuaꞌucɨꞌɨti maj jamuan tyuꞌutaijta tɨj naꞌa Dioj ari aɨjna cɨn tyaꞌataujratziiriꞌi huaꞌa jemi ɨ maj raxeꞌeveꞌe.
\p
\v 6 Ma sajta muan, xuꞌuri raatyaxaahuatacaꞌa saɨjna tɨ cai aꞌij tiꞌijviicueꞌi. Majta aɨme ɨ maj chijtyaani pueen, aɨ mu aɨn pueen ɨ maj pueijtzi amuataꞌaca. Majta meyan amuaꞌaviꞌitɨjcɨca huaꞌa jemi ɨ mej tiꞌixaꞌapɨꞌɨntareꞌe.
\v 7 Aɨ mu majta aꞌij puaꞌa tiꞌijxa maɨjna ɨ nyuucajtzeꞌen saj cɨn seyan antyaꞌaruu, ɨ saj sajta rɨꞌɨ tirataꞌaca.
\p
\v 8 Xaꞌapɨꞌɨn xu rɨcɨ tɨ puaꞌa seyan tzaahuatiꞌiraꞌa cɨn raꞌaraꞌastijreꞌen saɨjna ɨ nyuucari tɨ cɨn Dioj tiꞌijta tɨ ayan cɨmeꞌen tiꞌixaj ɨ nyuucari jetze tɨcɨn: “Pataꞌaj peyan raxeꞌevaꞌa ɨ axaꞌaj tevi patɨj asaɨj tiꞌaxeꞌeveꞌe.”
\v 9 Ma ajta, tɨ puaꞌa sacai seyan ruxaꞌaj sanaꞌa tihuaꞌuseijra ɨ tyaɨte, ayaa xu seri autyajturaa ɨ Dioj jemi. Ajta aɨn ɨ nyuucari tɨ cɨn Dioj tiꞌijta, ayaa pu ari ayan amaꞌuxɨjte aɨjna cɨmeꞌe saj cai raꞌaste saɨjna ɨ nyuucari.
\p
\v 10 Ayaa puꞌu naꞌa aꞌini tɨ puaꞌa aꞌatɨ ayan nain cɨn tyaꞌaraꞌaste aɨjna ɨ nyuucari maj cɨn tiꞌijta, ajta tɨ puaꞌa ayan seij cɨn autyaturan ɨ nyuucari jemi, ayaa mu raꞌaxɨjteꞌe tɨ nain cɨn autyajturaa,
\v 11 Aꞌini aɨn tɨ ayan raataxajtacaꞌa tɨcɨn: “Capej tiꞌixanaꞌacɨraꞌa”, aɨ pu ajta ayan raataxajtacaꞌa tɨcɨn: “Capej tiꞌityacuiꞌica.” Aɨj pu cɨn, tɨ puaꞌa peyan cai tyuꞌuxanaꞌacɨre, ma pajta peyan xaa tyuꞌujéꞌica, aɨj paj cɨn peri autyajturaa aɨjna jemi ɨ nyuucari ɨ maj cɨn tiꞌijta.
\v 12 Aɨj pu cɨn, sataꞌaj seyan tiꞌixajta, sajta seyan rɨꞌɨ tiꞌityujchaꞌɨ aꞌij tɨ tiraavijteꞌe aɨjna cɨmeꞌe tɨ Dioj ayan aɨjna cɨn amuáꞌaxɨjteꞌen aɨjna jemi ɨ nyuucari tɨ cɨn amueꞌirajtuaani.
\v 13 Ee xaa nyaꞌu, tɨ puaꞌa aꞌatɨ cai ayan huaꞌacuꞌuve ɨ ruxaꞌaj tyaɨte, capu Dioj ayan ráꞌancuꞌuvajxɨꞌɨsin ajna xɨcajraꞌan tɨ jetzen tityaꞌaxɨjteꞌen. Naꞌari cai, tɨ puaꞌa aꞌatɨ ayan huaꞌacuꞌuve ɨ ruxaꞌaj tyaɨte, Dioj pu rɨꞌɨ tiraataꞌasin ajna xɨcajraꞌan jetze.
\s Aɨjna tɨ cɨn aꞌatɨ tyaꞌatzaahuateꞌe, ajta tɨ cɨn rɨꞌɨ tiꞌityujchaꞌɨ
\p
\v 14 Neꞌihuaamuaꞌa, ¿aꞌini tiꞌitɨ cɨn tiratyavaꞌɨri seij ɨ aꞌatɨ tɨ puaꞌa ayan naꞌa tiꞌixajta yee tɨ tyaꞌatzaahuateꞌe, ajta cai ayan tiꞌitɨ cɨn rɨjca ɨ maj cɨn raamuaꞌaree tɨ ayan tiꞌayajna tɨ aɨn aꞌatɨ tyaꞌatzaahuateꞌe? ¿Ni rɨꞌɨri tɨ aɨn ayan ruꞌirajtuaani tɨ ayan naꞌa tyaꞌatzaahuateꞌe? Capu xaa nyaꞌu.
\p
\v 15-16 Ticheꞌe teyan tiraataxaj yee tɨ aꞌatɨ ayan huarɨni tɨ aꞌamua jetze ajtyamaꞌacan. Capu amɨn aꞌij, tɨ puaꞌa tyaataꞌa pɨrɨcɨ naꞌari jɨitaꞌa. Aɨ pu ayan cai tiꞌitéechan, ajta cai tiꞌitɨ tichaꞌɨ tɨ raacuaꞌani tɨj naꞌa sei xɨcaj jetze. Ajta aɨn aꞌatɨ ayan aꞌiréꞌenyen seij jemi tɨ ajta muejmi jetze ajtyamaꞌacan. Aj pu i ayan tiraataꞌixaateꞌen aɨjna tɨ tiraꞌaturaateꞌe. Ajta aɨjna ɨ aꞌatɨ, ayaa naꞌa tiraataꞌixaateꞌen yee “Aricu, cheꞌe rɨꞌɨ muꞌu timuajáꞌavaɨraꞌa.” Ajta cai tiꞌitɨ raataꞌan tɨ cɨn huataujvaɨreꞌen. ¿Aꞌini naꞌaqui teꞌeme aɨjna jemi tɨ cai tiꞌitɨ tihuaꞌutaꞌa, aɨjna ɨ aꞌatɨ tɨ ayaa naꞌa tyaꞌatzaahuateꞌe? ¿Ni qui tyamuaꞌa naa? Capu aꞌatzu xaa nyaꞌu.
\v 17 Aɨj pu cɨn, tɨ puaꞌa aꞌatɨ ayaa naꞌa tyaꞌatzaahuatyaꞌa, ajta cai tiꞌitɨ cɨn ayan rɨcɨ tɨ cɨn raataseijrateꞌesin yee ayej tiꞌayajna tɨ aɨn aꞌatɨ tyaꞌatzaahuateꞌe, capu aꞌatzu aꞌij tiꞌityavaꞌɨri.
\p
\v 18 Ma ajta, aꞌatɨ pu ayan tyuꞌutaxajta tɨcɨn: “Seij pu ayaa naꞌa tyaꞌatzaahuateꞌe, ajta ɨ saɨj, aɨ pu ayan tiꞌitɨ cɨn tɨ xaꞌapɨꞌɨn een rɨcɨ.” Me nyajta inyaa, ayaa nu tiꞌimueꞌixaateꞌe yee pataꞌaj naataseijrateꞌen ɨ paj cɨn tyaꞌatzaahuateꞌe pacai peyan tiꞌitɨ tɨ xaꞌapɨꞌɨn een cɨn tíꞌiruuraa.
\p Me nyajta inyaa, ayaa nu timuaataseijrateꞌesin tɨ ayan tiꞌayajna nyaj tyaꞌatzaahuateꞌe nyaɨjna cɨmeꞌe ɨ nyaj tiꞌitɨ cɨn neyan rɨcɨ tɨ xaꞌapɨꞌɨn een.
\p
\v 19 Ayaa papuꞌu tyaꞌatzaahuateꞌe tɨ saɨj naꞌa pueen ɨ Dioj. Xaꞌapɨꞌɨn paj rɨcɨ. Ayaa mu cheꞌeta manaꞌa tyaꞌatzaahuateꞌe aɨme ɨ tiyaaruꞌuse, majta ruvive.
\v 20 Mɨ paj cai rɨꞌɨ metyáumuaꞌaree, ¿ni tzaa peyan raxeꞌeveꞌe nyej neyan tyamuaꞌa naa timuaataseijrateꞌen tɨ cai tiꞌitɨ aꞌij tiꞌityavaꞌɨri tɨ puaꞌa aꞌatɨ ayaa naꞌa tyaꞌatzaahuateꞌe, ajta cai tiꞌitɨ cɨn ayan rɨcɨ tɨ xaꞌapɨꞌɨn een?
\p
\v 21 Aɨjna ɨ tayaꞌupuacɨꞌɨ aɨjna ɨ Abraham tyaacan, urareꞌenyaꞌacan pu cɨn huatyajturaa ɨ Dioj jemi aɨjna cɨmeꞌe tɨ raatamuaɨꞌɨvajtacaꞌa ɨ ruyauj ɨ tetej japua, aɨjna ɨ Isaac. ¿Ni cai ayan tiꞌayajna? Ee xaa nyaꞌu.
\v 22 Aɨj pu cɨn ayaa tu ramuaꞌaree tɨ aɨjna aꞌij tɨ huarɨj, ayaa pu jamuan tiꞌityavaꞌɨri aɨjna tɨ ajta tyaꞌatzaahuateꞌe. Ajta, ayaa pu raanaijmiꞌire tɨ tyaꞌatzaahuatyaꞌacaa aɨjna ɨ Abraham aɨjna cɨmeꞌe aꞌij tɨ huarɨj.
\v 23 Tɨꞌɨqui ayan arauraste aɨjna tɨ ayan teꞌeyuꞌusiꞌi ɨ yuꞌuxari jetze tɨcɨn: “Abraham pu ráꞌantzaahua aɨjna ɨ Dioj, ajta ayaa pu tiraaxaꞌapɨꞌɨntariꞌiriꞌi tɨ aɨn ayan urareꞌenyaꞌacan cɨn huatyajturaa ɨ Dioj jemi.” Matɨꞌɨj mi meyan raatamuáꞌa tɨcɨn: “Tɨ amiincuraꞌan pueen ɨ Dioj.”
\p
\v 24 Aɨj pu cɨn, ayaa pu amiteereꞌe tɨ saɨj ayan urareꞌenyaꞌacan cɨn huatyaturaasin ɨ Dioj jemi aɨjna cɨmeꞌe aꞌij tɨ ajta rɨcɨ, capu aɨ naꞌa cɨn tɨ tyaꞌatzaahuateꞌe.
\v 25 Ayaa pu cheꞌeta naꞌa tiraaruu aɨjna ɨ Rahab tyaacan, aɨjna ɨ jɨitaꞌa tɨ ramueꞌitɨcɨjca ɨ tumin ɨ rutevi cɨmeꞌe. Tɨꞌɨj aɨn ayan rɨꞌɨ huaꞌancureꞌeviꞌitɨ aɨme ɨ mej reꞌeevaꞌacaa, aj puꞌi seij jetze ɨ juye huaꞌutaityacaꞌa. Tɨꞌɨj ayan aɨjna cɨn huarɨj, aj puꞌi ayan urareꞌenyaꞌacan cɨn huatyajturaa ɨ Dioj jemi.
\v 26 Aꞌini capu rɨꞌɨri tɨ aꞌatɨ ruuri aꞌaraꞌani tɨ puaꞌa cai uráxaijnyuꞌuca, ayaa pu cheꞌeta naꞌa cai tiꞌitɨj vaɨreꞌe tɨ puaꞌa aꞌatɨ ayaa naꞌa tyaꞌatzaahuateꞌe, ajta cai tiꞌitɨ aꞌij ruura tɨ xaꞌapɨꞌɨn een.
\c 3
\s Aꞌij tɨ tiꞌitɨj cɨn tiꞌivaɨreꞌe nyanuraaraꞌan ɨ saɨj
\p
\v 1 Sataꞌaj cai seyan huatauraꞌan saj muiꞌitɨ saɨjna cɨn teꞌentyarute saɨjna cɨmeꞌe sej tihuaꞌamuaꞌatyá ɨ seica aꞌini xuꞌuri ramuaꞌaree tɨ eitzeꞌe caꞌanin cɨn taꞌaxɨjteꞌen ɨ Dioj itejmi, i tej teyan tiꞌimuaꞌata cai ayan huaꞌaxɨjteꞌen aɨme ɨ maj cai meyan tiꞌimuaꞌata.
\v 2 Ee xaa, naimiꞌi tu teyan tiꞌitɨj cɨn tityaꞌutáꞌɨtzaꞌara. Ajta tɨ puaꞌa aꞌatɨ cai ayan tiꞌitɨ cɨn atyaꞌɨtzaꞌaraꞌan aɨjna cɨmeꞌe aꞌij tɨ aɨn tiꞌixa, ayaa tu tiꞌijmuaꞌaree tɨ aɨn pueen tɨ urareꞌenyaꞌacan cɨn seijreꞌe, ajta tɨ aɨn raayɨꞌɨtɨ tɨ ayan áꞌujcuꞌuveꞌen ɨ rutevi tɨꞌij cai tiꞌitɨj cɨn autyaturan.
\p
\v 3 Casiꞌi, ayaa tu huaꞌancarujtiꞌiraca huaꞌatenyeꞌen ɨ cahuaayuꞌu tyaɨjna ɨ xaachiꞌin mej mi taꞌaraꞌastijreꞌen. Aɨj tu cɨn, tyaɨjna cɨn teyan huaꞌaraꞌacaꞌani.
\v 4 Ajta aɨjna ɨ baarcu, tɨ ajta tyamuaꞌa tiꞌiveꞌe. Aɨ pu aaca ayan ráatajchi caꞌanin cɨmeꞌe. Ma ajta aɨjna cɨn ɨ cɨye tɨ aataꞌa atejvee, ayaa pu tiꞌivaɨreꞌe tɨ ij aɨn ɨ tɨ ramuareꞌe ayan raajajsimeꞌen ɨ baarcu aꞌu tɨ aɨn ayan yeꞌexeꞌeveꞌe.
\p
\v 5 Ayaa pu cheꞌeta naꞌa cɨleenyeꞌen seijreꞌe ɨ tajetze aɨjna ɨ tanyanuj. Ma ajta, ayaa pu áꞌujcaꞌanye tɨ vaꞌacan cɨn ahuaujtzaahuateꞌen. Tyajta ityan, tyamuaꞌa tu teri teyan ramuaꞌaree tɨ ayan rɨꞌɨri tɨ taij tɨ cɨj naꞌa tyajtaani, ayaa pu vaꞌacan cɨn tyuꞌuraꞌataasin.
\p
\v 6 Ee xaa nyaꞌu, ayaa pu cheꞌeta naꞌa seijreꞌe ɨ tanyanuj tɨj taij. Ayaa pu ajta seijreꞌe tɨj naꞌa tɨ aꞌij puaꞌa een ɨ maj cɨn aꞌij puaꞌa títyeetyújchaꞌɨ aɨme ɨ maj yan japuan huachaatɨme ɨ chaanaca japua. Aɨ pu tajaꞌujɨpua tɨj naꞌa ɨ tajetze. Aɨjna tɨ aꞌij puaꞌa een tɨ jetzen eꞌijninyei ɨ tanyanuj, aɨ pu caꞌanijraꞌa rataꞌaca ɨ tiyaaruꞌu tɨ ayan huarɨni. Aɨ pu ajta aɨjna cɨn ayan caꞌanijraꞌa huaꞌataꞌaca mej mij meyan nyuꞌucamɨꞌɨ cɨn aꞌij puaꞌa tiꞌiteseijraꞌa matɨj manaꞌa puaꞌamua meyan yan japuan huachaatɨme iiyan chaanaca japua.
\p
\v 7 Ee xaa nyaꞌu, ayaa mu raayɨꞌɨtɨ ɨ tyaɨte maj huáꞌumuaꞌacanteꞌen matɨj manaꞌa puaꞌamua yen seijreꞌe aɨme ɨ tiꞌityaɨn mej iiyan xuaa, majta ɨ maj ráꞌaraꞌive, majta ɨ maj sinuurave a chuaataꞌa, majta ɨ maj jaataꞌa aꞌaxuaa. Muꞌuri meyan tihuaꞌumuaꞌacaante naijmiꞌica.
\p
\v 8 Ma ajta, capu aꞌatɨ ayan raayɨꞌɨtɨ tɨ rusaɨj ayan ráamuaꞌajcanteꞌen ɨ runyanu. Ayaa pu een aɨjna ɨ nyanuri tɨj aɨjna tɨ aꞌij puaꞌa een, tɨ cai aꞌanaj tiꞌitɨj cɨn tyaꞌastijreꞌe. Ajta aɨn tɨ jetzen aꞌijninyei, ayaa pu cheꞌeta naꞌa een tɨj huaꞌaveꞌeri tɨ tyuꞌujéꞌica.
\v 9 Aɨj tu cɨn tanyanuj teyan rɨꞌɨ cɨn tirataꞌaca tyaɨjna ɨ tavastaraꞌa, tyaɨjna ɨ tyaj tyajta rajyaꞌupua. Tyajta tyaɨjna cɨn teyan aꞌij puaꞌa tihuaꞌaxa tyaɨme ɨ tetyaca ɨ tɨ Dioj ayan huaꞌutaahuacaꞌa meyan seiraꞌa tɨj ɨ tevijraꞌan.
\v 10 Ajta, ayaa pu tiꞌirɨnyaca tɨ aɨj tyanaꞌa cɨn ɨ tanyanuj teyan rɨꞌɨ tiꞌitaꞌaca, tyajta teyan tyaɨjna cɨn aꞌij puaꞌa tiꞌixa. Ayaa nu tyajaꞌamueꞌixaateꞌe, neꞌihuaamuaꞌa, tɨ cai ayan tiraavijteꞌe.
\p
\v 11 Nicheꞌe seij cɨn neyan tyajamueꞌitii. Cɨmeꞌen aɨjna aꞌu tɨ aꞌajaijxa, ¿ni qui rɨꞌɨri tɨ aun mijmu ayan ajnyen aɨjna ɨ jaj tɨ rumuaꞌatɨ jamuan ɨ jaj tɨ antzijviꞌi? Capu aꞌatzu xaa nyaꞌu.
\v 12 Neꞌihuaamuaꞌa, ayaa pu cheꞌeta naꞌa een aɨjna cɨmeꞌe ɨ huarej, aꞌini capu rɨꞌɨri tɨ aɨjna jetze ayan huatácaꞌan aɨjna ɨ aceituuna. Ajta aɨjna jetze ɨ uuva, capu rɨꞌɨri tɨ ayan jetzen huatácaꞌan aɨjna ɨ huarej. Aɨj pu cɨn, ayan cheꞌeta naꞌa cai rɨꞌɨri tɨ jaj tɨ rumuaꞌatɨ aun ajnyen aꞌu tɨ aꞌajaijxa tɨ ajta jetzen ajnyen aɨjna ɨ jaj taꞌantzijviꞌi.
\s Cɨmeꞌen ɨ muaꞌatziiraꞌa tɨ uteꞌe eꞌemaꞌacan
\p
\v 13 Tɨ puaꞌa aꞌatɨ muejmi jemi seijraꞌa tɨ rɨꞌɨ metyáumuaꞌaree, tɨ ajta yauꞌite tyamuaꞌa naa, cheꞌe aɨn ayan aɨjna cɨn tyajamuaataseijrateꞌen aɨjna cɨmeꞌe tɨ rɨꞌɨ tiꞌityujchaɨɨca, tɨ ajta ayan ruseijrata tɨ cai vaꞌacan cɨn antyujmuaꞌaree. Ayaa xu saɨjna cɨn ramuaꞌaree tɨ aɨn aꞌatɨ tzaahuatiꞌiraꞌa cɨn rɨꞌɨ metyáumuaꞌaree.
\p
\v 14 Ma sajta muan, tɨ puaꞌa seyan huapɨꞌɨ chueeraꞌa ɨ rutzajtaꞌa, ajta tɨ puaꞌa seyan caꞌanin cɨn tiꞌitesaꞌaca sej seyan raꞌantimueꞌitɨn aꞌij sej tiꞌijxeꞌeveꞌe ɨ ru tzajtaꞌa, caxu seyan saɨjna cɨn aꞌujtzaahuatyaꞌa. Caxu sajta tiꞌihueꞌita saɨjna cɨmeꞌe aꞌij saj rɨcɨ.
\v 15 Tɨj naꞌa tɨ ayan een, capu ayan tiraavijteꞌe. Capu ajta aun aꞌuveꞌeme u tajapua Dioj tɨ eꞌeseijreꞌe silu yan pu chaanaca japua huataseijre. Au pu eꞌiraninyei huaꞌa muaꞌatziiraꞌa jetze aɨme ɨ mej rujɨɨmuaꞌa manaꞌa aꞌij tirajtyauve aꞌij maj rɨcɨ.
\p Ee xaa nyaꞌu, tiyaaruꞌu pu ayan caꞌanijraꞌa huaꞌataꞌaca mej mi meyan huarɨni.
\v 16 Aꞌu tɨ naꞌa mej meyan chueere, ajta aꞌu tɨ naꞌa mej meyan caꞌanin cɨn tiꞌiteseꞌe mej mi meyan raꞌantimueꞌitɨn aꞌij mej tiꞌijxeꞌeveꞌe, au mu meyan chaꞌa manaꞌa aꞌij puaꞌa tiꞌityujchaɨ muaꞌayeꞌi, majta meyan raꞌastijreꞌe tiꞌitɨ tɨ naꞌa tɨ aꞌij puaꞌa een.
\p
\v 17 Ajta aɨn muaꞌatziiraꞌa tɨ aun aꞌuveꞌeme u tajapua Dioj tɨ eꞌeseijreꞌe, ayaa pu caꞌanijraꞌa huaꞌataꞌaca mej meyan urareꞌenyaꞌacan cɨn seiraꞌa muaꞌaraꞌani, mej mi majta tyamuaꞌa naa tyuꞌurihuaamuaꞌatan, majta ruxéꞌeviꞌiraꞌa cɨn meyan rɨꞌɨ tiꞌiteseijraꞌa. Aɨ pu ajta ayan caꞌanijraꞌa huaꞌataꞌaca mej mi huaꞌastijraꞌa aɨme ɨ mej tihueꞌijteꞌe, mej mi majta ruxéꞌeviꞌiraꞌa cɨn huaꞌancuꞌuvajxɨꞌɨn ɨ ruxaꞌaj tyaɨte. Nain mu cɨn meyan rɨcɨ tiꞌitɨj cɨmeꞌe tɨ rɨꞌɨ tiꞌiseijreꞌe. Tɨ puaꞌa meyan tiꞌitɨj cɨn tyaꞌataujratzii, ayaa pu teꞌeme mej meyan huarɨni. Camu tiꞌihueꞌitaca.
\p
\v 18 Ajta aɨme ɨ maj meyan rahuauhuau aꞌij mej huarɨni mej mi huaꞌutyapuaꞌariteꞌen ɨ ruxaꞌa tyaɨte mej mi cai cheꞌe meyan runyaꞌusiꞌiteꞌe, ayaa mu tyuꞌutatuireꞌesin ɨ Dioj jemi aɨjna tɨ reꞌenyaꞌacan cɨn seijreꞌe ɨ jemin maɨjna cɨmeꞌe mej ruxéꞌeviꞌiraꞌa cɨn rɨꞌɨ tiꞌityujchaɨɨca, majta caꞌanijraꞌa huaꞌataꞌaca ɨ seica mej mi meyan cheꞌeta manaꞌa huarɨni.
\c 4
\s Aꞌini een cɨmeꞌe maujnyaꞌusiꞌiteꞌen ɨ tyaɨte
\p
\v 1 Ayaa pu tiꞌirɨnyaca muejmi tzajtaꞌa. Xuꞌuri eꞌitaꞌa aꞌutacɨ́ꞌɨca, sajta runyaꞌusiꞌiteꞌe. ¿Aꞌuni jetze eꞌiraayeꞌi aɨjna tɨ caꞌanijraꞌa amuataꞌaca sej si seyan rɨcɨ? ¿Ni cai aun eꞌiraayeꞌi ɨ aꞌamua tzajtaꞌa? Ee xaa nyaꞌu, aɨ pu pɨrɨcɨ ɨ áꞌamuamuaꞌatziiraꞌa tɨ ayan caꞌanijraꞌa amuataꞌaca saj runyaꞌusiꞌiteꞌe.
\p
\v 2 Ayaa xu raxeꞌeveꞌe saj eihua tíꞌijchaɨca. Ma sajta cai, caxu seyan tíꞌijchaꞌɨ. Aɨj xu cɨn seyan tiꞌityacuiꞌica. Sajta eihua huapɨꞌɨ tiꞌinyacuaꞌatze. Ma sajta muan, caxu seyan ráacuꞌuvijreꞌe. Aɨj xu cɨn seyan autyajhuiica saj runyaꞌusiꞌiteꞌen, sajta rujaaxaijviꞌi. Ayaa xu een cɨn sacai tíꞌijchaꞌɨ saɨjna cɨmeꞌe saj cai seyan rahuavii ɨ Dioj jemi.
\v 3 Naꞌari cai, tɨ puaꞌa seyan raatahuavii, capu ayan tyajamuaataꞌaca aɨjna cɨmeꞌe saj cai seyan huataujnyátacan cɨn raatahuaviiriꞌi, aꞌini ayaa xu eenyeꞌequeꞌen raxeꞌevaꞌacaa sej si chaꞌa sanaꞌa raaxɨjteꞌen aꞌij tɨ tyajamuaꞌamitejtyaꞌacaa, sej si saɨjna cɨn huataujtyamuaꞌaveꞌen.
\p
\v 4 Mɨ sej seyan ruxanaꞌacɨreꞌe, ¿ni tzaa sacai seyan ramuaꞌaree aꞌij tɨ seijreꞌe ɨ Dioj jemi? Tɨ puaꞌa aꞌatɨ ayan huaꞌajtyájaahuateꞌen aɨme ɨ maj iiyan chaanaca japua huachaatɨme, tɨ puaꞌa ayan cheꞌeta naꞌa huarɨni aꞌij mej tiꞌijrɨꞌɨre, aɨ pu ajta ayan eenyeꞌequeꞌen huatyaturaan ɨ Dioj jemi tɨ saɨj tɨ rajchaɨreꞌe. Aɨj pu cɨn, tɨ puaꞌa aꞌatɨ ayan raxeꞌeveꞌe tɨ huaꞌajtyájaahuateꞌen tyamuaꞌa naa aɨme ɨ maj iiyan seijreꞌe ɨ chaanaca japua, aɨ pu ajta ayan eenyaꞌa aꞌame tɨj saɨj tɨ rajchaɨreꞌe ɨ Dioj.
\p
\v 5 Ee xaa nyaꞌu ayaa pu tiꞌayajna. Naꞌari cai, capu tiꞌitɨ cɨn aꞌij huataujmuaꞌa aɨjna ɨ nyuucari tɨ ari aꞌayuꞌusiꞌi ayan tɨcɨn: “Eecan pu chueere aɨjna jemi ɨ xaijnyuꞌucaraꞌaraꞌan tɨ ayan raatyajtuaa itejmi tzajtaꞌa.”
\p
\v 6 Ma ajta aɨn Dioj, ayaa pu eitzeꞌe rɨꞌɨ titataꞌaca tej ti teyan raꞌaraꞌastijreꞌen. Aɨj pu cɨn, ayan teꞌeyuꞌusiꞌi tɨcɨn: “Dioj pu ayan huaꞌajchaɨreꞌe aɨme ɨ maj áꞌujtzaahuateꞌe. Ma ajta, aɨ pu rɨꞌɨ tihuaꞌataꞌaca aɨme ɨ maj ruxaamɨsteꞌe ɨ jemin.”
\p
\v 7 Aɨj pu cɨn, sataꞌaj seyan raꞌaraꞌastijreꞌen ɨ Dioj. Sataꞌaj sajta rajchaɨ́ɨraꞌa saɨjna ɨ tiyaaruꞌu. Tɨ puaꞌa seyan huarɨni, aj pu xaa tichesin muejmi jemi.
\v 8 Sataꞌaj ajtyaxɨɨre vejliꞌi ɨ Dioj jemi. Tɨ puaꞌa seyan huarɨni, aj pu i Dioj ajta huatyaturaasin vejliꞌi muejmi jemi. Sataꞌaj cai cheꞌe tiꞌitɨ cɨn aꞌij rɨjca tɨ aꞌij puaꞌa seijreꞌe, mɨ sej ataꞌɨtzaꞌara ɨ Dioj jemi. Sajta, sataꞌaj raatatuireꞌen ɨ aꞌamuaxaijnyuꞌuca ɨ Dioj jemi tɨ ij aɨn ayan huatauraꞌateꞌen muejmi, mɨ saj seyan ruseijrata saj nuꞌu cai tiꞌitɨj cɨn ataꞌɨtzaꞌara ɨ Dioj jemi.
\p
\v 9 Sataꞌaj aꞌij puaꞌa tyaꞌutaujmuaꞌati saɨjna cɨmeꞌe ɨ saj cɨn autyajturaa ɨ Dioj jemi, sataꞌaj sajta huataujxaamɨsteꞌen, sajta huaujyeinixɨꞌɨn. Sataꞌaj cai cheꞌe seyan tiꞌitɨj cɨn naꞌanaa silu sataꞌaj seyan huataujxaamɨsteꞌen saɨjna cɨmeꞌe aꞌij sej sejmiꞌi rɨjcaa. Sataꞌaj sajta cai cheꞌe huaꞌa jemi huataujtyamuaꞌaveꞌen silu cheꞌe ayan aꞌij puaꞌa amuaataꞌasti.
\v 10 Sataꞌaj seyan ruyeinya setíraꞌaraꞌastijreꞌen ɨ tavastaraꞌa jemi. Tɨ puaꞌa seyan huarɨni, aj pu ij rɨꞌɨ tyajamuaatyatuaasin.
\s Tyaj nuꞌu cai raꞌaxɨjteꞌen ɨ taꞌihuaaraꞌa
\p
\v 11 Caxu aꞌij puaꞌa tyuꞌujxajta seij sajta seij, neꞌihuaamuaꞌa, aꞌini tɨ puaꞌa aꞌatɨ ayan aꞌij puaꞌa tiꞌijxajta ɨ ruꞌihuaaraꞌa, naꞌari ayan raꞌaxɨjteꞌe, aɨ pu ajta aꞌij puaꞌa tiꞌijxa aɨjna ɨ yuꞌuxari ɨ maj cɨn tiꞌijta. Aɨ pu ajta ayan rusaɨj raaxaꞌapɨꞌɨntare tɨ cai cheꞌe tiꞌitɨ vaɨreꞌe aɨjna ɨ nyuucari. Sajta muan, tɨ puaꞌa seyan rujɨɨmuaꞌa sanaꞌa raaxaꞌapɨꞌɨntareꞌen tɨ cai cheꞌe tiꞌitɨ vaɨreꞌe ɨ nyuucari ɨ maj cɨn tiꞌijta, caxu cheꞌe seyan raꞌastijreꞌe aꞌij tɨ tiraavijteꞌe silu xuꞌuri seyan huaujruu tɨj aɨme ɨ mej tiꞌixaꞌapɨꞌɨntareꞌe.
\p
\v 12 Ma ajta, saɨj puꞌu aɨn pueen tɨ ayan raatyajtuaa aɨjna ɨ nyuucari ɨ maj cɨn tiꞌijta. Ajta, ai pu aɨn pueen tɨ ajta saɨj naꞌa ayan tiꞌixaꞌapɨꞌɨntareꞌe. Aɨ puꞌu naꞌa raayɨꞌɨtɨ tɨ amueꞌirajtuaani, ajta ayan cheꞌeta naꞌa, aɨ puꞌu naꞌa raayɨꞌɨtɨ tɨ amuaꞌantipuaꞌariteꞌen. Tɨ puaꞌa ayan, ¿aꞌini een cɨn peyan tiꞌimuaꞌatze paj paɨjna cɨn antiꞌamuaꞌaree paɨjna cɨmeꞌe paj peyan raꞌaxɨjteꞌe ɨ aꞌihuaaraꞌa?
\s Tyaj nuꞌu cai ramuaꞌaree aꞌij tɨ teꞌemáꞌa aꞌame
\p
\v 13 Rɨꞌɨ xuꞌu muan, mɨ sej seyan tiꞌixaxaꞌa tɨcɨn saj nuꞌu saun aꞌujuꞌu xaꞌajuꞌun ijii nusu ruijmuaꞌa aꞌahuaꞌa chajtaꞌana jetze, saj nuꞌu saun seyan eꞌeteeri aꞌachu cumu sei ninyeꞌiraꞌa sej tiꞌitɨj cɨn tyajaꞌumuareꞌen sej si saɨjna cɨn tumin huamuéꞌitɨn.
\v 14 Ayaa xu tiꞌixaxaꞌa aꞌij sej huarɨni.
\p Ma sajta muan, caxu ramuaꞌaree aꞌij tɨ teꞌeme ruijmuaꞌa, tɨ puaꞌa sauj ruuri xaꞌajuꞌun nusu sacai. Ayaa xu een tɨj aɨjna pɨxcaari tɨ aꞌatzu aꞌateeviꞌi huataseijreꞌesin, ajta eꞌeyan aꞌupuaꞌarixɨꞌɨsin.
\v 15 Aɨj pu cɨn ayan tiraavijteꞌe saj seyan tyuꞌutaxaj yee tɨ puaꞌa nuꞌu aɨn tavastaraꞌa ayan amuataꞌacareꞌen, sej seyan ruuri huatyaturaasin, aj xu si sajta seyan huarɨni tiꞌitɨ cɨmeꞌe nusu ɨ saɨj cɨmeꞌe.
\p
\v 16 Ma sajta muan, caxu seyan tiꞌixaxaꞌa silu ayaa xu áꞌujtzaahuateꞌe saɨjna cɨmeꞌe aꞌij tɨ rujɨɨmuaꞌa sanaꞌa ayan tyajamuaꞌamitejteꞌe. Aɨjna ɨ saj cɨn áꞌujtzaahuateꞌe, tɨj naꞌa puaꞌamua tɨ ayan een, ayaa pu aꞌij puaꞌa seijreꞌe ɨ Dioj jemi.
\v 17 Ajta, aꞌatɨ tɨ naꞌa tɨ ayan ruꞌumuaꞌaree aꞌij tɨ tiraavijteꞌe tɨ ayan huarɨni tiꞌitɨ cɨmeꞌe, aɨ pu autyaturaasin ɨ Dioj jemi tɨ puaꞌa cai ayan huarɨni.
\c 5
\s Micheꞌe nuꞌu rɨꞌɨ tiraanamua aɨme ɨ maj chijtyaani pueen
\p
\v 1 Rɨꞌɨ xuꞌu muan, mɨ sej chijtyaani pueen. Sataꞌaj huaujyeine, sajta ruxaamɨstyaꞌa huajijhua saɨjna cɨmeꞌe tɨ tɨn ari ajna tyajaꞌureꞌenyejsin ajna xɨcajraꞌan jetze sej jetzen rajpueiitzi xaꞌajuꞌun.
\v 2 Puꞌuri tíꞌipeti tɨj naꞌa ɨ saj seri tíꞌijsaɨj a sej eꞌeche. Ajta, ɨ tyajaꞌamuacɨɨxu, muꞌuri raráacɨꞌɨxɨ aɨme ɨ jatzipuꞌuse.
\v 3 Ajta puꞌuri tyuꞌutyáujchuitaamua aɨjna ɨ ooro ɨ sej eihua rajchaꞌɨ; ajta aɨjna ɨ plaata ɨ saj sajta tíꞌijsaɨj, ayaa pu cheꞌeta naꞌa tyuꞌutyáujchuitaamua.
\p Ajta aɨjna tɨ cɨn tyuꞌutyáujchuitaamua, aɨ pu rusaɨj amuaatyaxajta, ajta tɨꞌɨj ayan aꞌamuaꞌaxɨjtyaꞌa, ayaa pu cheꞌeta naꞌa áꞌamuaruuren tɨj taij tɨ raatyataira ɨ aꞌamuahueꞌiraꞌa. Ayaa xu saɨjna cɨn tíꞌijsaɨj tɨ eihua huapɨꞌɨ tiꞌijnajchi sej si saɨjna cɨn huataujtyamuaꞌaveꞌen ijii tɨ nain ari teꞌentipuaꞌari.
\p
\v 4 Ma sajta muan, ayaa xu hueꞌitzi cɨn huaꞌariꞌiriꞌi ɨ maj raamueꞌitɨ ɨ tetyaca, ɨ maj tyuꞌureꞌeveijchacaꞌa ɨ aꞌamuaviꞌiraꞌataꞌa. Ajta aɨn tavastaraꞌa puꞌuri ramuaꞌaree aꞌij sej huarɨj aꞌini aɨn tɨ nain cɨn antyujmuaꞌaree puꞌuri huaꞌunamuajriꞌi ɨ mej maɨjna cɨn runyuusteꞌe aɨme ɨ mej tiꞌimuaraꞌacaa muejmi jemi.
\p
\v 5 Ayaa pu cai tiꞌitɨj tyajamuáꞌaturaatyaꞌa, seyan ruxaahua tíꞌitechajcaꞌa iiyan chaanaca japua. Ayaa xu cheꞌeta sanaꞌa ruxaahua tiꞌicuaꞌacaraꞌa. Cu xuee saj tyuꞌujcɨꞌɨmiteꞌe mej mi amuaacuiꞌini tɨj visaaruꞌu tɨ tyaruu.
\v 6 Muan xu sajta raꞌuxɨjte, sajta raajeꞌica saɨjna tɨ rɨꞌɨ tiꞌityújchaɨcaꞌa. Ajta aɨn, capu aꞌatzu amuaataꞌijmɨjra.
\s Caꞌanijraꞌa pu huaꞌataꞌasin mej mi tyamuaꞌa naa tyaꞌutaviicueꞌi
\p
\v 7 Aɨj xu cɨn neꞌihuaamuaꞌa, sataꞌaj tyamuaꞌa naa tyaꞌutaviicueꞌi asta naꞌa cai ya uvéꞌenyen ɨ tavastaraꞌa. Casiꞌi, autamuaꞌareeriꞌi aꞌij tɨ rɨcɨ aɨjna tɨ chuej japua tiꞌimɨjhuaca. Ayaa pu rachuꞌeveꞌe asta naꞌa cai tyuꞌucɨɨre aɨjna tɨ ajninyei a chuaataꞌa, tɨ ij ayan raꞌancuraꞌan ɨ tacaꞌiraꞌan tɨ eihua huapɨꞌɨ ruxeꞌeveꞌe. Ayaa pu rachuꞌeveꞌe maj autyajhuiini maj huateviiye ajna viitaꞌari tzajtaꞌa, ajta matɨꞌɨj atacheni.
\v 8 Sataꞌaj seyan cheꞌeta sanaꞌa raachuꞌeveꞌen. Sataꞌaj huatyaujcaꞌanyen ɨ aꞌamua tzajtaꞌa, aꞌini puꞌuri tɨn ya uveꞌenyejsin aɨjna ɨ tavastaraꞌa.
\p
\v 9 Caxu aꞌij puaꞌa tyuꞌujxajta seij sajta seij, neꞌihuaamuaꞌa, tɨ ij cai Dioj ayan cheꞌeta naꞌa amuaꞌuxɨjteꞌen muejmi. Rɨꞌɨ xuꞌu muan, aꞌini puꞌuri tɨn ya uveꞌenyejsin aɨjna tɨ ayan tiꞌixaꞌapɨꞌɨntareꞌe.
\p
\v 10 Sataꞌaj seyan huaꞌutamuaꞌaree saɨme ɨ mej tiꞌixaxaꞌataꞌa ɨ tavastaraꞌa jetze maꞌacan. Sataꞌaj seyan tiraarɨꞌɨren saɨme jemi aꞌij mej huarɨj maɨjna cɨmeꞌe maj tyaꞌutaviicueꞌiriꞌi ɨ maj cɨn rajpueijtzicaꞌa.
\p
\v 11 Casiꞌi, autamuaꞌareeriꞌi muan. Ayaa pu titaꞌamitejteꞌe tɨ Dioj rɨꞌɨ tihuaꞌutaꞌa aɨme ɨ maj tiꞌitɨj cɨn tyaꞌutaviicueꞌiriꞌi. Xuꞌuri raamuaꞌareeriꞌi saɨjna ɨ tɨ cɨn tyaꞌutaviicueꞌiriꞌi aɨjna ɨ Job tyaacan. Sajta, xuꞌuri raamuaꞌareeriꞌi aꞌij tɨ tiꞌitɨ cɨn tavastaraꞌa ayan tiraaxaꞌapɨꞌɨntariꞌiriꞌi aɨjna jemi, tɨ aɨn tavastaraꞌa ayan rɨꞌɨ tirajchaɨ́ aꞌaraa, ajta ayan ráꞌancuꞌuvajxɨ.
\s Seica nyuucari tɨ cɨn caꞌanijraꞌa huaꞌataꞌaca
\p
\v 12 Ajta, ai pu aɨn pueen tɨ eitzeꞌe ruxeꞌeveꞌe, neꞌihuaamuaꞌa, saj cai tiꞌitɨj cɨn tyaꞌataujratziꞌiracareꞌen, caxu seyan rɨjca ɨ tajapua tɨ eꞌemaꞌacan cɨmeꞌe, nusu ɨ chaanaca cɨmeꞌe, ni caxu tiꞌitɨ cɨmeꞌe silu cheꞌe ayan eenyaꞌa aꞌaraꞌani. Tɨ puaꞌa seyan raataxaj yee jee, cheꞌe ayan tyajaꞌureꞌenyen. Naꞌari, tɨ puaꞌa seyan raataxaj yee capu, cheꞌe ajta ayan tyajaꞌureꞌenyen. Ayaa xu aɨjna cɨn huarɨni tɨ ij cai Dioj ayan amaꞌuxɨjteꞌen.
\p
\v 13 Tɨ puaꞌa saɨj tɨ muejmi jetze ajtyamaꞌacan ayan rajpueijtzi, cheꞌe aɨn ayan huatejnyuuni ɨ Dioj jemi tɨꞌij Dioj ayan raꞌancuꞌuvajxɨꞌɨn. Naꞌari tɨ puaꞌa seij ayan rutyamuaꞌavaꞌa, cheꞌe aɨn chuiicari cɨn rɨꞌɨ tiraataꞌacareꞌen ɨ Dioj.
\v 14 Tɨ puaꞌa saɨj tɨ muejmi jetze ajtyamaꞌacan ayan tiꞌicuiꞌicaa, cheꞌe aɨn huaꞌutajeeve aɨme ɨ vaujsi ɨ mej teyujtaꞌa tiꞌivaɨreꞌe mej mi maɨjna cɨn huatejnyuuni, mej mi majta nyuucajtzeꞌen ɨ tavastaraꞌa meyan raꞌavaꞌahuaateꞌen maɨjna ɨ aꞌaraꞌaraꞌan aɨjna ɨ aceituuna.
\v 15 Tɨ puaꞌa meyan tyaꞌatzaahuatyaꞌa muaatejnyuuni, ayaa pu aɨjna cɨn Dioj ayan ruꞌiratuaasin aɨjna tɨ tiꞌicuiꞌicaa. Tavastaraꞌa pu xaa rarujteꞌen, ajta ayan tiraatauuniꞌira tɨ puaꞌa aɨn aꞌatɨ tiꞌitɨj cɨn autyajturaa ɨ jemin.
\p
\v 16 Aɨj pu cɨn sataꞌaj seyan aꞌij tyuꞌutaxaj seij sajta seij ɨ saj cɨn autyajturaa ɨ Dioj jemi, sajta seyan huatejnyuuni seij cɨmeꞌe sajta seij tɨ ij Dioj ayan amuaarujteꞌen.
\p Ee xaa nyaꞌu, eecan pu tiꞌivaɨreꞌe tiꞌitɨj cɨmeꞌe tɨ puaꞌa aꞌatɨ tɨ urareꞌenyaꞌacan cɨn seijraꞌa ayan huatejnyuuni ɨ Dioj jemi.
\v 17 Ajta aɨjna ɨ Elías, ayaa pu cheꞌeta naꞌa tíꞌityaatacaꞌa tyatɨj ityan. Ajta, caꞌanin pu cɨn huatejnyuu maj cai huateviiye. Aɨj pu cɨn, ayan aꞌatee aꞌachu cumu hueica ninyeꞌiraꞌa japuan eꞌitaꞌa maj cai huaviiyacaꞌa.
\v 18 Tɨꞌɨqui ajtahuaꞌa huatejnyuu. Majta eꞌeyan huateviiyacaꞌa. Ajta aɨn tɨ tyuꞌuhuástiꞌihuacaꞌa a chuaataꞌa ayan tyuꞌucɨɨracaꞌa.
\p
\v 19 Neꞌihuaamuaꞌa, ayaa nu tyajaꞌamueꞌixaateꞌe. Tɨ puaꞌa aꞌatɨ ayan ruhuaritaꞌa tiꞌicaame tɨ ij cai cheꞌe ayan tyaꞌatzaahuatyaꞌa, ayaa pu teꞌeme tɨ puaꞌa saɨj ayan raatyaamueꞌitɨn tɨꞌij ajtahuaꞌa tyaꞌatzaahuatyaꞌa.
\v 20 Aꞌatɨ tɨ naꞌa tɨ ayan raatyamueꞌitɨn aɨjna tɨ autyajturaa ɨ Dioj jemi tɨ ij aɨn ayan raatapuaꞌajta aɨjna tɨ cɨn ataꞌɨtzaꞌara, aɨ pu ayan raatavaɨreꞌesin aɨjna cɨmeꞌe tɨ cai yaꞌuraini ɨ ruxaijnyuꞌuca tɨ cɨn ruuri. Aɨ pu ajta aɨjna cɨn ayan huarɨni tɨ eihua huapɨꞌɨ tiraatauuniꞌi aɨjna ɨ Dioj aɨjna tɨ cɨn autyajturaa ɨ jemin.
\p Ayaa puꞌu xaa. Antipuaꞌaracaꞌa.