\id 1PE
\h 1 San Pedro
\toc1 1 San Pedro
\mt1 Ɨ yuꞌuxari tɨ raꞌuyuꞌuxacaꞌa aɨjna ɨ San Pedro, ɨ tɨ saɨtɨ
\c 1
\s Pedro pu huaꞌataujteꞌe aɨme ɨ mej tyaꞌatzaahuateꞌe
\p
\v 1 Inyaa, Pedro, tɨ Dioj naataityacaꞌa nyej tyuꞌutyavaɨreꞌen ɨ jemin, yaa nu áꞌamuataujteꞌe muejmi, mɨ saj seij chuejraꞌa japua aꞌuchaatɨme aꞌu maj amuaareꞌitixɨ, tɨj naꞌa aꞌu tɨ huatacáꞌa u Ponto, ajta aujna u Galacia, ajta aujna u Capadocia, ajta aujna u Asia, ajta aujna u Bitinia, aꞌu tɨ naꞌa saj aꞌutyáuu.
\v 2 Aɨ pu ayan amuaꞌantihuau aɨjna cɨmeꞌe tɨ jajcua ɨmɨ ayan tyajamuaaxaꞌapɨꞌɨntariꞌiriꞌi aꞌij tɨ tyájamuáaruuren aɨjna ɨ Dioj ɨ tyaj rajyaꞌupua. Ajta aɨn xaijnyuꞌucaraꞌaraꞌan ayan amueꞌiraaviꞌitɨ sej si seyan huatyaturan ɨ Dioj jemi, aɨjna cɨmeꞌe sej seri raꞌastijreꞌe saɨjna ɨ Cɨriistuꞌu tɨ ayan raꞌiraaxɨre ɨ ruxuureꞌe tɨ ij ayan muejmi japua huanyuuni. Cheꞌe aɨn Dioj ayan rɨꞌɨ tyajamuataꞌacareꞌen, ajta cheꞌe ayan jamuaatyapuaꞌariteꞌen tyamuaꞌa naa.
\s Aɨjna tɨ rachuꞌeveꞌe aɨjna tɨ tyaꞌatzaahuateꞌe
\p
\v 3 Ticheꞌe rɨꞌɨ tiraataꞌacareꞌen tyaɨjna ɨ Dioj, tɨ ajta yaꞌupuaaraꞌan pueen ɨ tavastaraꞌa, aɨjna ɨ Jesús tɨ ajta Cɨriistuꞌu pueen. Aꞌini aɨ pu eihua huapɨꞌɨ táꞌancuꞌuvajxɨꞌɨ, aɨ pu ayan taataꞌa tej ti jajcuacan cɨn huanunuꞌeihua tej ti teyan raachuꞌeveꞌen tyaɨjna, ɨ tyaj cɨn ruuri taꞌajuꞌun aɨjna cɨmeꞌe tɨ aɨn Dioj ayan raꞌajjáj huaꞌa tzajtaꞌa ɨ mɨꞌɨchite aɨjna ɨ Jesús tɨ ajta Cɨriistuꞌu pueen.
\v 4 Aɨ pu ajta ayan titaataꞌasin tɨ ayan titáacɨꞌɨti aɨjna tɨ cai aꞌanaj huataujtuꞌisin, tɨ cai ajta aꞌanaj huatechuaamuari, tɨ ajta cai aꞌanaj ahuaujpuaꞌarixɨꞌɨsin. Dioj pu ayan amuajtáꞌare aujna u tajapua.
\p
\v 5 Aɨ pu ajta ayan rɨꞌɨ aꞌamuachaꞌɨ aɨjna cɨmeꞌe ɨ muáreꞌeriꞌiraꞌaraꞌan, aꞌini muan xu seyan tyaꞌatzaahuateꞌe. Ajta puꞌuri ayan rɨꞌɨ ruurijhua tɨ ij aɨn ayan huataseijreꞌen aɨjna tɨ cɨn amueꞌirajtuaani ajna xɨcajraꞌan jetze tɨ jetzen nain cɨn teꞌentipuaꞌari.
\p
\v 6 Aɨj xu cɨn seyan tyamuaꞌa naa rutyamuaꞌavaꞌa saɨjna cɨmeꞌe tɨ Dioj ayan rɨꞌɨ tyajamuaataꞌasin. Ma ajta ijii, ayaa pu ruxeꞌeveꞌe saj seyan saɨjna cɨn ruxaamɨstyaꞌa saj muiꞌicá cɨn rajpueijtzi.
\v 7 Ayaa pu een cɨn ayan aꞌamuaruure mej mi meyan rɨꞌɨ tiraataꞌacareꞌen ɨ Dioj muejmi cɨmeꞌe ajna xɨcajraꞌan tɨ jetzen ajtahuaꞌa huataseijreꞌen aɨjna ɨ Jesús tɨ ajta Cɨriistuꞌu pueen.
\p Ee xaa nyaꞌu, aɨ mu majta meyan rɨꞌɨ amuaatyatuaasin, majta rɨꞌɨ tyajamuaꞌutaseijra aꞌini muan xu seyan saɨjna cɨn tyaꞌutaviicueꞌiriꞌi ɨ saj cɨn rajpueijtzicaꞌa saɨjna cɨmeꞌe saj tyaꞌatzaahuateꞌe. Ayaa pu tiꞌivaɨreꞌe sej seyan rajpueijtzi tɨ ij Dioj ayan raamuaꞌaree saj tzaahuatiꞌiraꞌa cɨn tyaꞌatzaahuateꞌe. Aɨj pu cɨn eitzeꞌe ayan tiꞌivaɨreꞌe ɨ Dioj jemi sej seyan rajpueijtzi cai aɨjna ɨ ooro, ɨ maj taij cɨn raatyáuuna tɨ ij rumuaꞌatɨ aꞌaraꞌani.
\p
\v 8 Ajta aɨn Cɨriistuꞌu, muan xu cai aꞌanaj raaseij, ayaa xu sauj raxeꞌeveꞌe. Sajta, cai xɨ raaseij ijii, saucheꞌe xu seyan tyaꞌatzaahuateꞌe, sajta seyan saɨjna cɨn rɨꞌɨ rutyamuaꞌaveꞌe. Capu ayan rɨꞌɨri tɨ aꞌatɨ ayan raataxaj yee aꞌachu tɨ caj rɨꞌɨ tirataꞌaca aɨjna cɨmeꞌe tɨ ayan tyajamuaacɨꞌɨti aɨjna tɨ huapɨꞌɨ naa seiiraꞌa aꞌame.
\v 9 Ayaa xu raꞌancuraꞌasin tɨ Dioj ayan amueꞌirajtuaani aɨjna cɨmeꞌe sej seyan tyaꞌatzaahuateꞌe.
\p
\v 10 Majta aɨme ɨ maj tiꞌixaxaꞌataꞌa ɨ Dioj jetze maꞌacan, aɨ mu mejmiꞌi meyan tyuꞌutaxajtacaꞌa maɨjna cɨmeꞌe tɨ cɨn Dioj ayan rɨꞌɨ tyajamuaatáꞌanicheꞌe. Aɨ mu majta aꞌujcaꞌanyaacan cɨn tiꞌihuaucaꞌa, majta maɨjna cɨn tiꞌimuaꞌatzɨjcaꞌa mej mi yauꞌeitaa muaꞌaraꞌani.
\p
\v 11 Ayaa mu tiꞌihuaucaꞌa tiꞌitɨj tɨ xɨcajraꞌan jetze ayan tyajaꞌureꞌenyejsin, ajta aꞌij tɨ eenyaꞌa aꞌameꞌencheꞌe ajna xɨcajraꞌan jetze tɨ cɨmeꞌen raataxajtacaꞌa aɨjna ɨ xaijnyuꞌucaraꞌaraꞌan ɨ Dioj tɨ ajta ayan huatyajturaa huaꞌa jemi. Camu aꞌatzu yauꞌeityajcaꞌa aꞌij tɨ huataujmuaꞌan aɨjna tɨ cɨmeꞌen anacai raataxajtacaꞌa yee tɨ aɨn Cɨriistuꞌu ayan rajpueijtzi aꞌaraꞌani, tɨ ajta nuꞌu eꞌeyan Dioj rɨꞌɨ raatyatuasin mej mi rɨꞌɨ tiyaꞌuseiira muaꞌaraꞌani.
\p
\v 12 Ayaa pu Dioj huaꞌutaꞌa mej mi meyan raamuaꞌaree maj cai rujɨmeꞌe meyan tíꞌixajtacaa silu ayaa mu maɨjna cɨn tiꞌivaɨraꞌacaa muejmi cɨmeꞌen, matɨꞌɨj meyan cɨn tyuꞌutaxajtacaꞌa aꞌij tɨ aɨn xaijnyuꞌucaraꞌaraꞌan ɨ Dioj ayan caꞌanijraꞌa huaꞌutaꞌa mej mi meyan tyuꞌutaxajtacaꞌa maɨjna cɨmeꞌen ɨ nyuucari tɨ cɨn Dioj amueꞌiratuaasin aꞌij sej sauchan tiraanamuajriꞌi. Dioj pu u tajapua yaꞌutaityacaꞌa ɨ ruxaijnyuꞌuca tɨ ij aɨn huaꞌa jamuan huatyaturan. Majta aɨme ɨ maj tajapua tiꞌivaɨreꞌe, maucheꞌe mu meyan raxeꞌeveꞌe mej meyan yauꞌeitaa muaꞌaraꞌani aɨjna tɨ cɨn Dioj amueꞌiratuaasin.
\s Caꞌanijraꞌa pu huaꞌutaꞌasin mej mi rɨꞌɨ tiꞌityujchaɨ muaꞌaraꞌani
\p
\v 13 Aɨj xu cɨn, sataꞌaj huatyaujcaꞌanyen ɨ rutzajtaꞌa. Sataꞌaj sajta rɨꞌɨ tyaꞌutaujmuaꞌati sej si tyamuaꞌa naa nain cɨn raachuꞌeveꞌen aɨjna tɨ ayan tyajamuaacɨꞌɨti ɨ tɨ cɨn Dioj rɨꞌɨ tyajamuaataꞌasin ajna xɨcajraꞌan jetze tɨ jetzen huataseijreꞌesin aɨjna ɨ Jesús tɨ ajta iꞌi Cɨriistuꞌu.
\v 14 Sataꞌaj seyan cheꞌeta sanaꞌa huarɨni matɨj tɨꞌɨrii ɨ maj huaꞌastijreꞌe ɨ ruvaujsimuaꞌa. Sataꞌaj cai cheꞌe seyan aꞌij puaꞌa tiꞌityujchaꞌɨ aꞌij tɨ ajmiꞌi caꞌanijraꞌa amuataꞌacareꞌe aɨjna tɨ ru tzajtaꞌa huiraninyeicaꞌa satɨꞌɨj cai xɨ yauꞌeityajcaꞌa aꞌij tɨ tiraavijteꞌe ɨ Dioj jemi.
\p
\v 15-16 Ee xaa nyaꞌu, sataꞌaj cai aꞌij puaꞌa rɨjca, silu sataꞌaj seyan nain cɨn urareꞌenyaꞌacan cɨn tiꞌiteseijraꞌa tɨj ajta urareꞌenyaꞌacan cɨn tiꞌiseijreꞌe aɨjna tɨ amuaatajée. Sataꞌaj seyan nain cɨn huarɨni aꞌij sej tiꞌityujchaꞌɨ aꞌini ayaa pu teꞌeyuꞌusiꞌi tɨcɨn: “Sataꞌaj seyan urareꞌenyaꞌacan cɨn tiꞌiteseijraꞌa aꞌini nyaa nu nyajta urareꞌenyaꞌacan cɨn seijreꞌe.”
\p
\v 17 Ajta aɨn Dioj ayan ruxaꞌa naꞌa huaꞌaxɨjteꞌen ɨ tyaɨte aꞌij tɨ saɨj huarɨj. Aɨj pu cɨn, tɨ puaꞌa seyan raatamuáꞌamuateꞌen yee rutaata, sataꞌaj seyan raꞌatesaꞌa satɨj sanaꞌa sauj iiyan tipuasaaruveꞌe chaanaca japua.
\v 18-19 Ayaa pu tiraavijteꞌe sej seyan rɨꞌɨ tiꞌityujchaꞌɨ aꞌini xuꞌuri ramuaꞌaree tiꞌitɨ tɨ pɨrɨcɨ tɨ cɨmeꞌen Cɨriistuꞌu ayan tyuꞌutanajchitacaꞌa aɨjna ɨ saj cɨn téꞌechaɨcaꞌa ɨ Dioj jemi sej si cai cheꞌe seyan tiꞌijrɨꞌɨraa aꞌij sej sejmiꞌi tiꞌijrɨꞌɨrajcaa saɨjna cɨmeꞌe ɨ yeꞌira tɨ cai tiꞌitɨ vaɨraꞌacaa, ɨ maj amuaataꞌitiiriꞌi ɨ aꞌamuavaujsicɨꞌɨ. Capu Cɨriistuꞌu aɨjna cɨn tyuꞌutanajchitacaꞌa aɨjna cɨmeꞌe ɨ ooro, naꞌari aɨjna cɨmeꞌe ɨ plaata, tɨ ayan aꞌapuaꞌare, silu aɨ pu aɨjna cɨn tyuꞌutanajchitacaꞌa aɨjna cɨmeꞌe ɨ ruxuureꞌe tɨ huapɨꞌɨ tiꞌivaɨreꞌe. Ayaa pu Cɨriistuꞌu huataujmuaɨꞌɨvajtacaꞌa tɨj canyaꞌa, tɨ cai aꞌatzu cápitaꞌina, tɨ cai tiꞌitɨ cɨn aꞌatura.
\p
\v 20 Ayaa pu Dioj raꞌantihuau tɨꞌɨj cai xɨ raatyataahua aɨjna ɨ chaanaca tɨꞌi ayan aɨjna cɨn tyuꞌutyavaɨreꞌen. Ajta, ijii tɨ nain teꞌentipuaꞌari, Cɨriistuꞌu pu ayan huataseijre tɨ ij aꞌamua japua huanyuuni.
\v 21 Ayaa xu een cɨn seyan raꞌatzaahuateꞌe ɨ Dioj saɨjna cɨmeꞌe aꞌij tɨ huarɨj aɨjna ɨ Cɨriistuꞌu. Ajta Dioj ayan raꞌajjáj huaꞌa tzajtaꞌa ɨ mɨꞌɨchite. Tɨꞌɨjtaꞌi ayan rɨꞌɨ tiraatyajtuaa tɨ ij ayan nain cɨn antyujmuaꞌaréera tɨj naꞌa rusen cɨmeꞌe. Aɨj xu cɨn seyan tyaꞌatzaahuateꞌe, sajta tiꞌichueꞌeveꞌe.
\s Caꞌanijraꞌa pu huaꞌutaꞌasin maj nuꞌu huaujxeꞌeveꞌen
\p
\v 22 Aꞌini muan xu seyan ráꞌantzaahua saɨjna ɨ nyuucari tɨ ayan tiꞌayajna sej si sajta seyan huaꞌaxeꞌevaꞌa ɨ ruꞌihuaamuaꞌa, aɨj xu cɨn seri rɨꞌɨ uhuaujruu ɨ aꞌamua tzajtaꞌa. Aɨj xu cɨn, sataꞌaj seyan aꞌujcaꞌanyaacan cɨn huaujxeꞌeveꞌen seij sajta seij, tyamuaꞌa naa.
\v 23 Cheꞌe ayan tyajaꞌureꞌenyen aꞌini caxu jajcuacan cɨn huanunuꞌeihuacaꞌa aɨjna cɨmeꞌe tɨ áꞌapuapuaꞌare silu aɨjna cɨmeꞌe tɨ cai aꞌanaj áꞌapuaꞌaren. Ai pu aɨn pueen ɨ nyuucari tɨ Dioj jemi aꞌuveꞌeyeꞌi. Aɨ pu taarujteꞌeve, ajta ayan rusen cɨn aꞌateeri.
\p
\v 24 Ee xaa nyaꞌu, ayaa pu cheꞌeta naꞌa teꞌeyuꞌusiꞌi ɨ yuꞌuxari jetze tɨcɨn:
\q Matɨj manaꞌa puaꞌamua mej tyahueꞌiraꞌa,
\q2 ayaa mu eꞌen tɨj aɨjna ɨ ɨxaj.
\q Ajta ɨ maj cɨn áꞌujtzaahuateꞌe,
\q2 ayaa pu een tɨj aɨjna ɨ xuuxuꞌuraꞌan
\q2 aɨjna ɨ ɨxaj.
\q Ayaa pu tiꞌirɨnyaca tɨ ayan huatyaahuan
\q2 aɨjna ɨ ɨxaj,
\q ajta cávatzɨjsin aɨjna ɨ xuuxuꞌuraꞌan.
\q
\v 25 Ma ajta aɨn ɨ nyuucari
\q2 tɨ Dioj jemi aꞌuveꞌeyeꞌi,
\q aɨ pu rusen cɨn seiraꞌa aꞌame.
\p Ajta aɨn ɨ nyuucari, ai pu aɨn pueen ɨ mej tyajamuaataꞌixaa, ɨ saj sajta cɨn huataujtyamuaꞌave.
\c 2
\s Caꞌanijraꞌa pu huaꞌutaꞌasin mej mi eitzeꞌe yauꞌeitaa muaꞌaraꞌani aꞌij tɨ tyuꞌujxeꞌeveꞌe
\p
\v 1 Aɨj pu cɨn, ayaa pu ruxeꞌeveꞌe saj raatapuaꞌajta saɨjna cɨmeꞌe saj aꞌij puaꞌa huaꞌaruure ɨ ruxaꞌaj tyaɨte nusu saj huaꞌacuanamua caꞌɨn saj hueꞌitzi cɨn ruseijrata. Sataꞌaj sajta cai ruchueera seij sajta seij. Sajta sataꞌaj cai aꞌij puaꞌa tihuaꞌaxajta ɨ ruxaꞌaj tyaɨte.
\v 2-3 Sataꞌaj seyan éꞌenyeꞌen matɨj ɨ tɨꞌɨri ɨ maj eihua huapɨꞌɨ tzaꞌacuj mej mi maɨjna cɨn huavaujseꞌen maɨjna cɨmeꞌe ɨ huaꞌa tziꞌime ɨ huaꞌanaana. Sataꞌaj seyan cheꞌeta sanaꞌa raxeꞌevaꞌa tɨ ij aɨn xaijnyuꞌucaraꞌaraꞌan ɨ Dioj ayan aɨjna cɨn tyajamuaataitiꞌi aɨjna cɨmeꞌe ɨ nyuucari tɨ reꞌenyaꞌacan cɨn seijreꞌe tɨ ij aɨjna cɨn rɨꞌɨ amuaaruuren tɨ ij ayan tyajamuaacɨꞌɨti tɨ aɨn Dioj ayan amueꞌirajtuaani, aꞌini xuꞌuri raamuaꞌareeriꞌi tɨ aɨn tavastaraꞌa ayan rɨꞌɨ tyajaꞌamuachaɨ aꞌayeꞌi.
\s Cɨmeꞌen ɨ Cɨriistuꞌu ɨ tɨ tetej pueen tɨ eꞌihuatyajtuaani
\p
\v 4 Ayaa xu seri ajtyáxɨɨracaꞌa saɨjna jemi tɨ ayan een tɨj tetej tɨ iꞌiruuri. Majta ɨ tyetyaca, maruuhuaꞌaxɨ maɨjna ɨ tetej. Ma ajta Dioj, aɨ pu raꞌavaꞌahuau aɨjna cɨmeꞌe tɨ rɨꞌɨ huapɨꞌɨ tyuꞌutyavaɨreꞌen.
\p
\v 5 Sajta muan, ayaa pu cheꞌeta naꞌa Dioj rɨꞌɨ áꞌamuaruuren sej si seyan cheꞌeta sanaꞌa eenyeꞌen tyuꞌutyavaɨreꞌen tɨj ɨ tetej tɨ iꞌiruuri ɨ tɨ cɨn chiꞌi iraꞌajtaahua. Ayaa pu áꞌamuaruuren sej si seij sanaꞌa seijraꞌa ɨ tyaɨte tɨ muejmi jamuan huatyajturaa aɨjna ɨ xaijnyuꞌucaraꞌaraꞌan ɨ Dioj, sej si seyan urareꞌenyaꞌacan cɨn seijraꞌa ɨ Dioj jemi, sej si vaꞌacan cɨn tyuꞌutyavaɨreꞌen ɨ jemin. Aɨj xu cɨn, sataꞌaj seyan rɨꞌɨ xaꞌajuꞌun saj saɨjna cɨn tyuꞌutamuaɨꞌɨvajta saɨjna cɨmeꞌe tɨ aɨn xaijnyuꞌucaraꞌaraꞌan ɨ Dioj ayan amuaataꞌasin, sej si seyan raꞌutamuaꞌaree tɨ ij ajta Dioj ayan raꞌancuraꞌan aɨjna ɨ muaɨꞌɨvejri aɨjna cɨmeꞌe aꞌij tɨ huarɨj aɨjna ɨ Jesús tɨ Cɨriistuꞌu pueen.
\p
\v 6 Ayaa pu tiꞌeen, aꞌini ayaa pu teꞌeyuꞌusiꞌi ɨ yuꞌuxari jetze tɨcɨn:
\q Casiꞌi, xaaseij.
\q Nuꞌuri raꞌatyájra aujna u Sión, seij ɨ tetej,
\q2 ɨ nyaj raꞌavaꞌahuau
\q2 tɨ i ayan tyuꞌutyavaɨreꞌen
\q2 nyaj japuan raꞌajtaahua ɨ chiꞌi.
\q Ajta aɨn ɨ tetej,
\q2 eihua nu huapɨꞌɨ rɨꞌɨ tiraatyajtuaa.
\q Ajta, capu aꞌatzu rɨꞌɨri
\q2 mej meyan tyuꞌutatéviꞌiraꞌa
\q2 aꞌatɨ tɨ naꞌa tɨ ayan raꞌaraꞌastijreꞌen
\q2 aɨjna ɨ tetej.
\m
\v 7 Ajta, muejmi jemi ɨ sej tyaꞌatzaahuateꞌe, eecan pu naa tyajamuaꞌaseijrateꞌe aɨjna ɨ tetej. Ma majta aɨme jemi ɨ maj cai áꞌujcaꞌanye mej tyaꞌantzaahuateꞌen, ayaa pu teꞌeme aꞌij tɨ teꞌeyuꞌusiꞌi tɨcɨn:
\q Aɨjna ɨ tetej ɨ maj ma ruuhuaꞌaxɨ
\q2 aɨme ɨ maj raꞌajtaahua ɨ chiꞌi,
\q Dioj pu ayan raꞌavaꞌahuau
\q2 tɨ ayan tyuꞌutyavaɨreꞌen
\q2 tɨ japuan raꞌajtaahua ɨ chiꞌi.
\m
\v 8 Ajta, ayan tɨcɨn:
\q Aɨj pɨrɨcɨ ɨ tetej
\q2 ɨ maj jetzen áꞌijcaacata ɨ tyaɨte,
\q2 ajta ɨ mej jetzen aꞌitávitzej.
\q Ayaa mu een cɨn jetzen áꞌijcaacata
\q2 maɨjna cɨmeꞌe maj cai raꞌastijreꞌe
\q2 maɨjna ɨ nyuucari ɨ maj raanamuajriꞌi.
\m Ayaa pu een cɨn ayan tihuaꞌuxaꞌapɨꞌɨntariꞌiriꞌi tɨꞌi Dioj ayan huaꞌuruuren.
\s Cɨmeꞌen aɨme ɨ mej Dioj jetze ajtyamaꞌacan
\p
\v 9 Ma sajta muan, ayaa xu eꞌen tɨj seica ɨ tyaɨte tɨ Dioj huaꞌantihuau, sej si seyan jamuan huatyaturan. Muan xu sajta saɨn pueen aɨme ɨ saj seij chuejraꞌan japua eꞌemaꞌacan tɨ Dioj ayan huatauraꞌate. Muan xu sajta tyaɨtestyamuaꞌameꞌen pueen ɨ Dioj sej si seyan tihuaꞌutaꞌixaateꞌen ɨ saj cɨn rɨꞌɨ tirataꞌaca saɨjna tɨ ayan amuaatajée. Sataꞌaj cai cheꞌe seyan áꞌujhuaꞌanyeꞌen aꞌu tɨ aꞌutɨcaꞌa, silu sej si saun aꞌutyaturan ɨ jemin aꞌu tɨ áꞌunyeeriꞌi sej si saun rɨꞌɨ tiyáꞌuseijra.
\p
\v 10 Ajnaꞌɨmɨ, caxu tyaɨtestyamuaꞌameꞌen pueenyaꞌacaa ɨ Dioj. Ma sajta ijii, xuꞌuri muan tyaɨtestyamuaꞌameꞌen pueen aɨjna. Ajnaꞌɨmɨ, capuuxɨ amuaꞌacuꞌuvajcaꞌa aɨjna ɨ Dioj. Ma ajta ijii, aɨ pu ari amuaꞌacuꞌuve.
\s Aꞌij mej yeꞌi huarɨni aɨme ɨ mej tyaꞌatzaahuateꞌe
\p
\v 11 Ayaa nu tyajaꞌamuahuavii mɨ nyej aꞌamuaxeꞌeveꞌe sej seyan seijraꞌa matɨj aɨme ɨ maj seij chuejraꞌa japua eꞌepuasaaruveꞌe, naꞌari matɨj aɨme ɨ maj huaꞌutamuari. Caxu seyan tauraꞌacareꞌen sej seyan raꞌastijraꞌa saɨjna tɨ aꞌamua tzajtaꞌa huiraninyei tɨ aꞌij puaꞌa een, tɨ ajta tiꞌiteseꞌe aɨjna jetze ɨ aꞌamuaxaijnyuꞌuca.
\v 12 Sataꞌaj seyan rɨꞌɨ titetyújchaɨca huaꞌa jemi ɨ mej seij chuejraꞌa japua eꞌemaꞌacan tɨ ij xaꞌapɨꞌɨn teꞌirajraꞌani tɨ puaꞌa meyan tiꞌitɨ cɨn aꞌij puaꞌa tyajaꞌamuaxajta. Tɨ puaꞌa seyan rɨjca, ayaa mu raseira muaꞌajuꞌun saj xaꞌapɨꞌɨn huarɨj saɨjna cɨmeꞌe ɨ maj cɨn aꞌij puaꞌa tyajaꞌamuaxajtacaꞌa, majta meyan rɨꞌɨ tiraataꞌasin maɨjna ɨ Dioj ajna xɨcajraꞌan tɨ jetzen ajtahuaꞌa huataseijreꞌesin itejmi jemi ɨ tavastaraꞌa.
\p
\v 13 Sataꞌaj seyan huaꞌastijraꞌa matɨj manaꞌa puaꞌamua ɨ tyaɨte ɨ maj tiꞌitɨ cɨn antyujmuaꞌaree aꞌini ayaa pu titaataꞌitiiriꞌi ɨ tavastaraꞌa. Ticheꞌe raꞌastijraꞌa tyaɨjna tɨ aɨjna cɨn tiꞌitejvee tɨ nain cɨn tyuꞌutaijta, aꞌini aɨ pu aɨn pueen tɨ eitzeꞌe vaꞌacan cɨn tiꞌivaɨreꞌe.
\p
\v 14 Ticheꞌe tyajta huaꞌastijraꞌa aɨme ɨ tajtuhuaani, aꞌini aɨjna tɨ nain cɨn tiꞌijta aɨ pu ayan huaꞌutaityacaꞌa mej mi pueijtzi huaꞌutaꞌan aɨme ɨ maj aꞌij puaꞌa tiꞌityujchaꞌɨ, mej mi majta rɨꞌɨ tihuaꞌataꞌacareꞌen aɨme ɨ maj meyan rɨcɨ aꞌij tɨ tiraavijteꞌe.
\v 15 Ayaa pu xaa tiꞌijxeꞌeveꞌe ɨ Dioj sej seyan rɨꞌɨ titetyújchaɨca sej si saɨjna cɨn huaꞌantimueꞌitɨn aɨme ɨ maj cai máumuaꞌaree, mej mi cai cheꞌe meyan aꞌij puaꞌa tiꞌixajta, tɨ cai tiꞌitɨ vaɨreꞌe.
\p
\v 16 Sataꞌaj seyan rɨjca matɨj aɨme ɨ maj ruxaahua tiꞌimɨjhuaca. Ma sajta muan, caxu seyan titaatáujtuuhuaꞌan saj aꞌij puaꞌa huarɨni, sajta seyan jetzen rupuaꞌarityaꞌa saj nuꞌu xaꞌapɨꞌɨn huarɨj saɨjna cɨmeꞌe saj ruxaahua áꞌujhuaꞌan. Sataꞌaj seyan rɨꞌɨ titetyújchaɨca matɨj aɨme ɨ mej ravaɨreꞌe ɨ Dioj.
\v 17 Sataꞌaj rɨꞌɨ tihuaꞌajchaɨ naijmiꞌica aꞌij tɨ tiraavijteꞌe. Sataꞌaj huaꞌaxeꞌevaꞌa ɨ taꞌihuaamuaꞌa ɨ maj majta tyaꞌatzaahuateꞌe. Sataꞌaj raꞌatesaꞌa ɨ Dioj. Sataꞌaj sajta rɨꞌɨ tiraatyajtuaani aɨjna ɨ tajtuhuan tɨ nain cɨn tiꞌijta iiya chuejraꞌa japua.
\s Aꞌij tɨ tyuꞌutavaɨ ɨ Cɨriistuꞌu
\p
\v 18 Sajta muan, mɨ sej caꞌanyejri cɨn tiꞌimɨjhuaca, sataꞌaj huaꞌaraꞌastijreꞌen aꞌij tɨ tiraavijteꞌe aɨme ɨ mej tyajaꞌamueꞌijteꞌe. Sataꞌaj huaꞌastijraꞌa aꞌachu maj puaꞌamua. Caxu aɨme sanaꞌa tɨ puaꞌa meyan rɨꞌɨ tyajamuájchaɨ, naꞌari maj rɨꞌɨ tiꞌitetyaɨte, naꞌari tɨ puaꞌa aꞌij puaꞌa metiꞌitetyaɨte, sataꞌaj naijmiꞌica aꞌastijraꞌa.
\p
\v 19 Ee xaa nyaꞌu, ayaa pu Dioj rɨꞌɨ tiraatyatuaasin aɨjna ɨ aꞌatɨ tɨ puaꞌa aɨn ayan raꞌutamuaꞌaree ɨ Dioj, ajta aɨn ayan tyaꞌutaviicueꞌi tɨ puaꞌa saɨj ayan pueijtzi raataꞌan tɨ cai ayan tiraavijteꞌe.
\v 20 Aru tɨ puaꞌa ayan pueijtzi muaacɨꞌɨti aɨjna cɨmeꞌe pej peyan aꞌij puaꞌa huarɨj, tɨ puaꞌa peyan paɨjna cɨn tyaꞌutaviicueꞌi tyamuaꞌa naa, capu aꞌatzu aꞌij timuatyavaꞌɨri. Naꞌari cai, tɨ puaꞌa peri xaꞌapɨꞌɨn huarɨj, tɨ puaꞌa paɨjna cɨn rajpueijtzi, pajta peyan tyaꞌutaviicueꞌi tyamuaꞌa naa, Dioj pu rɨꞌɨ timuaatyatuaasin.
\p
\v 21 Ee xaa nyaꞌu, Dioj pu ayan aɨjna cɨn amuaatajée sej seyan rajpueijtzi, sajta tyaꞌutaviicueꞌi, aꞌini aɨjna ɨ Cɨriistuꞌu aꞌamua jetze maꞌacan pu rajpueiitzi aꞌaraa.
\p Ayaa pu aɨjna cɨn huarɨj, tɨꞌij muejmi huataꞌitii sej si seyan cheꞌeta sanaꞌa huarɨni aꞌij tɨ aɨn anacai huarɨj.
\v 22 Capu tiꞌitɨj cɨn autyajturaa ɨ Dioj jemi. Capu ajta aꞌanaj tyuꞌuhueꞌitacaꞌa.
\v 23 Matɨꞌɨj meyan raꞌajtyaꞌaxɨ, aɨ pu cai ayan huaꞌajtyaꞌaxɨ aɨme. Matɨꞌɨj pueijtzi raataꞌa, ni capu ayan tihuaꞌuxájtziꞌiriꞌi, silu ayaa pu huataujtuiiriꞌi aɨjna jemi tɨ ayan tzaahuatiꞌiraꞌa cɨn tihuaꞌaxɨjteꞌe.
\p
\v 24 Aɨ pu rusaɨj rajpueiitzi aꞌaraa ɨ rujetze tajetze maꞌacan aɨjna cɨmeꞌe ɨ tyaj cɨn autyajturaa ɨ Dioj jemi. Ayaa pu aɨjna cɨn huarɨj tej ti teyan raatapuaꞌajta ɨ tyaj cɨn atyaꞌɨtzaꞌara ɨ Dioj jemi. Muan xu saɨjna cɨn huaruj saɨjna cɨmeꞌe tɨ aɨn rajpueijtzicaꞌa.
\v 25 Ajnaꞌɨmɨ, ayaa xu seijraꞌacaa matɨj ɨ canyaꞌaxɨ tɨ cai aꞌatɨ huaꞌasaɨreꞌe. Ma ajta ijii, xuꞌuri saɨjna jemi tyujsaɨj, saɨjna jemi tɨ aꞌamua cujtaꞌa huameꞌen, tɨ ajta aɨjna cɨn antyujmuaꞌaree tɨ nain cɨn aꞌamua japua huanyuuni.
\c 3
\s Aꞌij mej yeꞌi huarɨni ɨ maj náijmiꞌi
\p
\v 1 Sajta muan, mɨ sej vícheꞌejmee, sataꞌaj seyan cheꞌeta sanaꞌa huaꞌastijraꞌa saɨme ɨ aꞌamuacɨnaꞌastyamuaꞌa. Ayaa xu huarɨni sej si seyan eenyeꞌequeꞌen huaꞌantimueꞌitɨn ɨ seica ɨ maj cai raꞌaste ɨ nyuucari tɨ cɨmeꞌen raxaj ɨ Cɨriistuꞌu. Tɨ puaꞌa seyan huarɨni, capu ruxeꞌevaꞌa jaꞌame saj tihuaꞌutaꞌixaateꞌen sej si huaꞌutyamueꞌitɨn silu seyan sanaꞌa huáꞌamueꞌitɨn saɨjna cɨmeꞌe saj rɨꞌɨ tiꞌityujchaꞌɨ.
\v 2 Aɨ mu xaa meyan raꞌancuraꞌasin ɨ nyuucari matɨꞌɨj raaseij sej seyan tzaahuatiꞌiraꞌa cɨn ranaꞌamiche ɨ Dioj, sajta saj cai tiꞌitɨ cɨn aꞌatura aɨme jemi ɨ rucɨnaꞌastyamuaꞌa.
\p
\v 3 Majta aɨme ɨ mej vícheꞌejmee, capu ayan tiraavijteꞌe maj meyan manaꞌa rɨꞌɨ huaujruuren maɨjna cɨmeꞌe tɨ jeijreꞌe seijreꞌe, tɨ puaꞌa aɨjna cɨmeꞌe maj meyan rɨꞌɨ tiꞌihuaujcɨsta, nusu maj meyan tiꞌitɨ cɨn ucaujrujtiꞌiraxɨꞌɨn tɨ ooro cɨn taavijhua naꞌari maj meyan reꞌenyaꞌacan cɨn tyuꞌutyaujchejteꞌen cɨɨxuri cɨmeꞌe tɨ tɨtɨꞌɨj.
\v 4 Capu aɨ naꞌa ayan tiraavijteꞌe silu micheꞌe meyan rɨꞌɨ tihuaꞌaseijratyaꞌa maɨjna tɨ ruꞌavaa ɨ huaꞌa tzajtaꞌan, maɨjna tɨ cai aꞌanaj aꞌapuaꞌari. Micheꞌe cai meyan tiꞌitɨj cɨn huaꞌamuareꞌeristeꞌe ɨ rucɨnaꞌastyamuaꞌa. Ai pu aɨn pueen tɨ eihua huapɨꞌɨ ruxeꞌeveꞌe ɨ Dioj jemi.
\p
\v 5 Ayaa mu eenyeꞌequeꞌen rɨꞌɨ huaujruu ajcaꞌihuaꞌɨmɨ aɨme ɨ juuca ɨ maj urareꞌenyaꞌacan cɨn huatyajturaa ɨ Dioj jemi, ɨ maj majta tyaꞌantzaahua ɨ Dioj jemi.
\v 6 Ayaa mu cheꞌeta manaꞌa huaꞌaraꞌastijre ɨ rucɨnaꞌastyamuaꞌa tɨj aɨjna ɨ Sara tyaacan ayan raꞌaraꞌastijre aɨjna ɨ Abraham tyaacan. Ajta, pu ayan raatamuáꞌa tɨcɨn “nyavastaraꞌa”. Sajta muan mɨ sej vícheꞌejmee, ayaa xu yaujmuaꞌameꞌen pueenyaꞌa xaꞌajuꞌun aɨjna ɨ Sara tɨ puaꞌa seyan nain cɨn rɨꞌɨ huarɨni, sajta cai tiꞌitɨ cɨn tiꞌitzɨɨnyaꞌa.
\p
\v 7 Sajta muan, mɨ sej nyejnyaꞌɨche, sataꞌaj seyan rɨꞌɨ tihuaꞌajchaɨ ɨ ruꞌɨstyamuaꞌa. Sataꞌaj seyan rɨꞌɨ tihuaꞌutyajtuaani aꞌini camu meyan rucaꞌanye satɨj muan, mɨ sej tetyaca pueen. Naimiꞌi xu sajta seyan cheꞌeta sanaꞌa raꞌancuraꞌasin saɨjna tɨ cɨn Dioj rɨꞌɨ tyajamuaataꞌasin sej si ruuri huatyaturan ɨ Dioj jemi. Ayaa xu rɨꞌɨ tihuaꞌajchaɨ ɨ aꞌamuaꞌɨstyamuaꞌa tɨ ij cai tiꞌitɨ cɨn amuaatamuáreꞌeristeꞌen aɨjna cɨmeꞌe ɨ saj cɨn raatahuaviira ɨ Dioj.
\s Mej mi nuꞌu ruxaahua autyaturan
\p
\v 8 Yaa puꞌu xaa, ayaa xu huarɨni, naijmiꞌi muan. Sataꞌaj seyan cheꞌeta sanaꞌa rahuauca ɨ Dioj jemi sej sij seyan ruꞌihuaamuaꞌaca tyamuaꞌa naa. Sataꞌaj ahuaujcuꞌuven seij sajta seij, sataꞌaj seyan sajta huaujxeꞌeveꞌen. Sataꞌaj sajta seyan ahuaujcaꞌanyen aɨme jemi ɨ mej rajpueijtzi sej si rɨꞌɨ tihuaꞌutaꞌan. Sajta muan, sataꞌaj cai tiꞌitɨ cɨn aꞌujtzaahuatyaꞌa.
\p
\v 9 Tɨ puaꞌa aꞌatɨ ayan aꞌij puaꞌa amuaaruuren, caxu seyan cheꞌeta sanaꞌa aꞌij puaꞌa raruuraa. Naꞌari, tɨ puaꞌa aꞌatɨ ayan aꞌij puaꞌa tyajaꞌamuaxajta, caxu seyan cheꞌeta sanaꞌa aꞌij puaꞌa tiꞌijxajta, silu sataꞌaj seyan rɨꞌɨ tiraataꞌan, aꞌini ayaa pu aɨjna cɨn Dioj tyajamuaatajée sej si seyan huarɨni tɨ ij ajta aɨn Dioj ayan tiꞌitɨ cɨn rɨꞌɨ tyajamuaataꞌan.
\v 10 Ayaa pu aɨjna cɨn teꞌeyuꞌusiꞌi tɨcɨn:
\q Tɨ puaꞌa aꞌatɨ ayan raxeꞌevaꞌa
\q2 tɨ aꞌateeviꞌin ruuri,
\q tɨ ajta rɨꞌɨ tiraatyavaɨreꞌen
\q2 nain xɨcaj tzajtaꞌa,
\q cheꞌe aɨn ayan huarɨni
\q2 tɨ cai aꞌij puaꞌa tyúꞌujxajtavaꞌa,
\q2 tɨ cai ajta ayan tíꞌihueꞌitacareꞌen.
\q
\v 11 Cheꞌe aɨn raatapuaꞌajta
\q2 tɨ aꞌij puaꞌa tiꞌityujchaꞌɨ,
\q ajta cheꞌe aɨn ayan huarɨni
\q2 tɨ xaꞌapɨꞌɨn cɨn seijraꞌa.
\q Cheꞌe ajta aɨn ayan rahuauca
\q2 tɨ rɨꞌɨ tiꞌiseijraꞌa huaꞌa jemi ɨ tyaɨte.
\q Cheꞌe ahuaujcaꞌanyen tɨ ayan huarɨni.
\q
\v 12 Ee xaa, rɨꞌɨ pu tihuaꞌaseij ɨ Dioj
\q2 aɨme ɨ maj rɨꞌɨ titetyújchaꞌɨ.
\q Aɨ pu huaꞌanamua
\q2 matɨꞌɨj meyan tiꞌijhuaviira ɨ jemin.
\q Ajta ayaa pu tavastaraꞌa
\q2 aꞌij puaꞌa tihuaꞌaseij
\q2 aɨme ɨ maj aꞌij puaꞌa titetyújchaꞌɨ.
\s Tɨ puaꞌa nuꞌu meyan rajpueijtzi maɨjna cɨmeꞌe maj rɨꞌɨ titetyújchaꞌɨ
\p
\v 13 Tɨ puaꞌa ayan tiꞌen, ¿ni cai aꞌatɨ ayan meꞌeseijreꞌe tɨ ayan aꞌij puaꞌa amuaaruuren aɨjna cɨmeꞌe saj aꞌujcaꞌanyaacan cɨn tiꞌiteseꞌe sej seyan huarɨni tiꞌitɨ cɨmeꞌe tɨ íꞌixaꞌapɨꞌɨn? Capu xaa nyaꞌu. Capu maꞌa aꞌatɨ xaa nyaꞌu.
\v 14 Ma ajta, tɨ puaꞌa seyan saɨjna cɨn rajpueijtzi saɨjna cɨmeꞌe saj xaꞌapɨꞌɨn cɨn huarɨj, capu amɨn aꞌij. Dioj pu rɨꞌɨ tyajamuaataꞌasin. Aɨj xu cɨn, caxu huaꞌatzɨɨnyaꞌa, caxu sajta aꞌij puaꞌa tityaꞌujmuajca.
\p
\v 15 Ma sajta muan, sataꞌaj seyan rɨꞌɨ tiraatyajtuaani ɨ rutzajtaꞌa saɨjna ɨ Cɨriistuꞌu, aꞌini aɨ pu tavastaraꞌa pueen. Aꞌanaj tɨ naꞌa xu seyan rɨꞌɨ huaujruuren sej si seyan huatyaujnan huaꞌa jemi ɨ maj meyan maɨjna cɨn tyajaꞌamueꞌihuaꞌura ɨ saj cɨn tiꞌichuꞌeveꞌe ɨ rujemi.
\p
\v 16 Ma sajta, sataꞌaj seyan sanaꞌa rɨjca, sataꞌaj cai aꞌujtzaahuatyaꞌa seyan tihueꞌixaatyaꞌa, sataꞌaj sajta raꞌatesaꞌa saɨjna ɨ saj jamuan tiꞌixa. Sataꞌaj seyan rɨꞌɨ tyaꞌutaujmuaꞌati ɨ rumuaꞌatziiraꞌa cɨmeꞌe sej si cai tiꞌitɨ cɨn aꞌaturaaca, tɨ ij ayan tihuaꞌutateviꞌirasteꞌen aɨme ɨ maj aꞌij puaꞌa aꞌamuaruure maɨjna cɨmeꞌe maj meyan aꞌij puaꞌa tyajaꞌamuaxa aꞌij saj rɨcɨ saɨjna cɨmeꞌe saj rɨꞌɨ titetyújchaꞌɨ ɨ Cɨriistuꞌu jemi.
\p
\v 17 Ayaa naꞌa, aꞌini tɨ puaꞌa Dioj ayan tiꞌijxeꞌeveꞌe saj tiꞌitɨj cɨn rajpueijtzi, eitzeꞌe pu rɨꞌɨ tyajamuatyavaꞌɨri saj seyan saɨjna cɨn rajpueijtzi saj xaꞌapɨꞌɨn rɨcɨ cai tɨ puaꞌa seyan saɨjna cɨn rajpueijtzi saɨjna cɨmeꞌe saj aꞌij puaꞌa rɨcɨ.
\p
\v 18 Ajta aɨn Cɨriistuꞌu, ayan seij naꞌa huamɨꞌɨ aɨjna cɨmeꞌe ɨ maj cɨn naijmiꞌi meyan autyajturaa ɨ Dioj jemi. Aɨjna tɨ cai tiꞌitɨ cɨn autyajturaa ayan huaꞌa jetze maꞌacan huamɨꞌɨ aɨme ɨ maj aꞌij puaꞌa titetyújchaɨcaꞌa tɨ ij ayan huaꞌanviꞌitɨn ɨ Dioj jemi. Aɨjna ɨ maj meyan raajeꞌica ɨ Cɨriistuꞌu tɨ ratyáhueꞌiraꞌacaa, Dioj pu ajta ayan ruxaijnyuꞌuca cɨn raꞌajjáj huaꞌa tzajtaꞌa ɨ mɨꞌɨchite.
\p
\v 19 Ajta aɨn xaijnyuꞌucaraꞌaraꞌan ɨ Dioj ayan raataꞌa tɨ tihuaꞌutaꞌixaateꞌen aɨme ɨ xaijnyuꞌucari ɨ mej maun tajete aityanamiꞌihuacaꞌa.
\v 20 Majta aɨme ɨ xaijnyuꞌucari, ajnaꞌɨmɨ mu meyan cai raꞌaraꞌastijre, ajna xɨcajraꞌa jetze tɨ jetzen Dioj auj ayan téꞌeviicueꞌiracaa, ajta ayan rachuꞌevaꞌacaa tɨꞌɨj auj aɨn Noé ratyataahuajmaꞌa aɨjna ɨ baarcu tɨ veꞌe. Ajta aɨ pu seica huatyavaɨ mej mi maun utyajrupi ɨ baarcu tzajtaꞌa mej mi cai aujamɨn ɨ jaj cɨmeꞌe. Ayaa mu araꞌasicaa arahueica.
\p
\v 21 Ajta aɨn ɨ jaj ayan huataujmuaꞌa ɨ saj cɨn huamuaɨꞌɨvijhuacaꞌa, aɨjna tɨ ajta cɨn Dioj ayan amueꞌirajtuaa. Capu ayan huataujmuaꞌa tɨ Dioj ayan amuáꞌariꞌiriꞌi ɨ chuej tɨ caꞌameꞌe ɨ aꞌamua jetze, silu ayaa pu huataujmuaꞌa sej seyan rájhuaviiriꞌi ɨ Dioj tɨ ayan amuaataꞌan sej urareꞌenyaꞌacan cɨn huatyaturan ɨ rumuaꞌatziiraꞌa jetze ɨ Dioj jemi, aɨjna cɨmeꞌe tɨ ayan raꞌajjáj huaꞌa tzajtaꞌa ɨ mɨꞌɨchite aɨjna ɨ Jesús tɨ Cɨriistuꞌu pueen.
\p
\v 22 Ajta ijii, an pu aꞌujnyéj u tajapua tɨ ari aun aꞌacajca ɨrɨɨtaꞌan pujmeꞌen ɨ Dioj. Aɨ pu ajta ari aɨjna cɨn antyujmuaꞌaree tɨ tihuaꞌutaijteꞌen aɨme ɨ maj tajapua tiꞌivaɨreꞌe, ajta aɨme ɨ maj tiꞌitɨj cɨn antyujmuaꞌaree, ajta aɨme ɨ maj vaꞌacan cɨn tityatatyaꞌupuꞌu, matɨj manaꞌa puaꞌamua ɨ maj xaijnyuꞌucari pueen.
\c 4
\s Aꞌij tɨ tiꞌijxeꞌeveꞌe ɨ Dioj tyej teyan huarɨni
\p
\v 1 Aꞌini aɨn Cɨriistuꞌu pu ayan rujetze rajpueiitzi aꞌaraa, sataꞌaj seyan saɨjna jetze tyuꞌumuaꞌati sej si seyan cheꞌeta sanaꞌa huarɨni, aꞌini aꞌatɨ tɨ naꞌa tɨ ayan rujetze rajpueiitzi aꞌaraa, ayaa pu ari raatapuaꞌajtacaꞌa tɨ tiꞌitɨ cɨn atyaꞌɨtzaꞌara ɨ Dioj jemi.
\v 2 Ayaa pu aɨjna cɨn aꞌateeviꞌi tɨ ruuri aɨjna ɨ aꞌatɨ aɨjna cɨmeꞌe tɨ aɨjna jetze araujcaꞌanye aꞌij tɨ tiꞌijxeꞌeveꞌe ɨ Dioj tɨj naꞌa tɨ auj aꞌateeviꞌi aꞌame. Capu cheꞌe aɨjna jetze aꞌujcaꞌanyaa aꞌame aɨjna tɨ aꞌij puaꞌa een tɨ ajta rujetze huiraninyei.
\p
\v 3 Cheꞌe ayaa naꞌa eenyeꞌen aꞌij tɨ ari tyuꞌurɨj tɨj naꞌa maj anacai huataseijre ɨ tyetyaca tɨj naꞌa tɨ yu jeꞌireꞌenye aꞌij tɨ tihuaꞌaraanajchi aɨme ɨ maj seij chuejraꞌa japua eꞌemaꞌacan. Tej ti cai cheꞌe teyan tyanaꞌa tiꞌijrɨꞌɨraa matɨj aɨme. Ayaa mu ruxanaꞌacɨraꞌacaa, majta áꞌujcaꞌanye maɨjna jetze tɨ aꞌij puaꞌa een. Majta rutaꞌarujveꞌe, majta maj huapɨꞌɨ tiꞌiyeꞌestyahuaꞌa. Aɨ mu majta eꞌetyujsaꞌɨri mej mi naimiꞌi meyan ranaꞌamicheꞌen aɨjna tɨ cai Dioj pueen.
\p
\v 4 Ajta ijii, ayaa mu aꞌij puaꞌa tyajáꞌuseij saj cai cheꞌe huaꞌajaahuateꞌe sej seyan cai tiꞌitɨ aꞌastijreꞌe saj huaꞌa jamuan áꞌujhuaꞌanyeꞌen. Aɨj mu cɨn meyan aꞌij puaꞌa aꞌamuaruure.
\p
\v 5 Ma ajta, ayaa pu tihuaꞌacɨꞌɨti mej meyan tyuꞌutaxaj aꞌij maj titetyújchaɨcaꞌa maɨjna jemi tɨ ari rɨꞌɨ huaujruu tɨ ij ayan huaꞌuxɨjteꞌen aɨme ɨ maj ruuri, ajta aɨme ɨ maj meri huacuii.
\v 6 Aꞌini aɨ pu ajta ayan cheꞌeta naꞌa huaꞌaxɨjteꞌen aɨme ɨ mej meri huacuii tɨj ajta titaꞌaxɨjteꞌen itejmi i tyaj tyauj ruuri. Aɨj pu cɨn ajta ayan tihuaꞌutaꞌixaa aɨme ɨ mej huacuii aɨjna ɨ nyuucari tɨ cɨn Dioj hueꞌirajtuaani tɨ ij aɨn xaijnyuꞌucaraꞌaraꞌan ɨ Dioj ayan tihuaꞌutaꞌan mej meyan ruuri huatyaturan tɨj naꞌa rusen cɨmeꞌe tɨj ajta ɨ Dioj.
\s Aꞌij tɨ nuꞌu teꞌeme tɨꞌɨj nain teꞌentipuaꞌari
\p
\v 7 Puꞌuri tɨn nain teꞌentipuaꞌari. Aɨj xu cɨn seyan rɨꞌɨ tyajamuaꞌamitejteꞌe, sajta seyan nain cɨn áꞌujcuꞌuvaa sej si seyan tiꞌijhuauca ɨ Dioj jemi aꞌij tɨ tiraavijteꞌe.
\v 8 Ajta, ai pu aɨn pueen tɨ eitzeꞌe ruxeꞌeveꞌe saj cai tiꞌitɨ cɨn aꞌaturaa, sataꞌaj seyan huaujxeꞌeveꞌen tyamuaꞌa naa aꞌini tɨ puaꞌa seyan huaujxeꞌeveꞌen, ayaa xu sajta tyuꞌutauruuniꞌira muiꞌicaca cɨmeꞌe tɨ saɨj ayan tiꞌitɨ cɨn autyajturaa muejmi jemi.
\v 9 Sataꞌaj cai aꞌij puaꞌa tiꞌixaata silu seyan ancuraꞌujviꞌitɨn seij sajta seij.
\p
\v 10 Ayaa xu sajta huarɨni aꞌij tɨ tiraavijteꞌe aɨme jemi ɨ mej ravaɨreꞌe aɨjna ɨ Dioj, aꞌini capu tíꞌiseicaj naꞌa ɨ tɨ cɨn rɨꞌɨ tyajamuaataꞌa sej si saɨjna cɨn tyuꞌutyavaɨreꞌen. Sataꞌaj seyan huataujvaɨreꞌen seij sajta seij saɨjna cɨmeꞌe aꞌij tɨ Dioj seij tyuꞌutapueijve.
\p
\v 11 Aꞌatɨ tɨ naꞌa tɨ ayan tyuꞌutaxaj, cheꞌe aɨn ayan huarɨni tɨ ayan Dioj jetze maꞌacan tiꞌixajta. Ajta aꞌatɨ tɨ naꞌa tɨ ayan tiꞌitɨ cɨn tiꞌivaɨraꞌa, cheꞌe aɨn ayan huarɨni tɨ aɨjna jetze araujcaꞌanyaa ɨ Dioj. Ayaa xu een cɨn seyan huarɨni mej mi nain cɨn rɨꞌɨ tiraatyajtuaani maɨjna ɨ Dioj maɨjna cɨmeꞌe tɨ aɨn Jesús, tɨ Cɨriistuꞌu pueen, ayan huaꞌutaꞌa ɨ caꞌanijraꞌa mej mi meyan huarɨni. Ayaa mu rɨꞌɨ tiraataꞌasin maɨjna ɨ Cɨriistuꞌu, aꞌini aɨ pu ajta ayan nain cɨn antyujmuaꞌaréera aꞌame tɨj naꞌa rusen cɨmeꞌe. Cheꞌe ayan tyajaꞌureꞌenyen.
\s Aꞌij mej yeꞌi huarɨni matɨꞌɨj tirajpueitzi muaꞌajuꞌun aɨme ɨ mej tyaꞌatzaahuateꞌe
\p
\v 12 Muan, mɨ nyaj aꞌamuaxeꞌeveꞌe, tɨ puaꞌa seyan tiꞌitɨ cɨn áꞌaviicueꞌiraꞌa saɨjna ɨ saj cɨn huapɨꞌɨ rajpueijtzi, tɨ ajta caꞌanin cɨn aꞌamua japua rajve, caxu seyan aꞌij tyáꞌujmuajca, setyeꞌentixaata yee tɨ cai xɨ aꞌanaj ayan tiꞌiseijreꞌe ɨ chaanaca japua, aꞌini ayaa pu een cɨn ayan tyajamuaaruu tɨ ij Dioj ayan amuaateeseij, aisɨ tɨ puaꞌa sacai urareꞌenyaꞌacan cɨn seijreꞌe nusu sacai.
\v 13 Caxu aꞌij tyáꞌujmuajca silu ayaa xu huataujtyamuaꞌaveꞌen aꞌini xuꞌuri rajpueijtzi ɨ Cɨriistuꞌu jamuan sej si sajta seyan huataujtyamuaꞌaveꞌen saɨjna cɨmeꞌe tɨ rɨꞌɨ tyajamuaataꞌasin ajna xɨcajraꞌan jetze tɨ jetzen huataseijreꞌesin aɨjna ɨ maj cɨn naa rɨꞌɨ tiraꞌutaseijra ɨ tavastaraꞌa.
\p
\v 14 Ee xaa nyaꞌu ayaa pu tiꞌayajna. Tɨ puaꞌa meyan aꞌij puaꞌa tyajaꞌamuaxajta maɨjna cɨmeꞌe sej seyan Cɨriistuꞌu jetze ajtyamaꞌacan, Dioj pu aɨjna cɨn rɨꞌɨ tyajamuaataꞌaca, ajta aɨn xaijnyuꞌucaraꞌaraꞌan ɨ Dioj, ɨ tɨ ajta ayan caꞌanijraꞌa tataꞌaca tej ti teyan rɨꞌɨ tiraatyajtuaani ɨ Cɨriistuꞌu, aɨ pu xaijnyuꞌucaraꞌaraꞌan ajta muejmi jemi seijreꞌe.
\p
\v 15 Ma ajta, cɨmeꞌen aꞌatɨ tɨ naꞌa tɨ muejmi jetze ajtyamaꞌacan, cheꞌe amɨn cai ayan aɨjna cɨn tirajpueiitzi aɨjna cɨmeꞌe tɨ seij huajeꞌica, naꞌari tiꞌitɨ huanahua nusu tɨ aꞌij puaꞌa tiꞌityujchaꞌɨ, caꞌɨn ayan rɨjcaa tɨ cai jetzen ruxeꞌeveꞌe.
\p
\v 16 Ma ajta, tɨ puaꞌa seij ayan aɨjna cɨn áꞌaviicueꞌireꞌe aɨjna tɨ cɨn rajpueijtzi aɨjna cɨmeꞌe tɨ Cɨriistuꞌu jetze ajtyamaꞌacan, cheꞌe aɨn cai tiꞌiteviꞌiraꞌatan, silu cheꞌe rɨꞌɨ tiraataꞌan ɨ Dioj aɨjna cɨmeꞌe tɨ Cɨriistuꞌu jetze ajtyamaꞌacan.
\p
\v 17 Ayaa puꞌu xaa nyaꞌu, aꞌini puꞌuri ajna tyajaꞌureꞌenye tɨ ij Dioj ayan huaꞌuxɨjteꞌen ɨ tyaɨte. Ajta, ayan autechesin tɨ huaꞌaxɨjteꞌen ɨ rutyaɨtestyamuaꞌa. Ajta, tɨ puaꞌa ayan autejcheni itejmi jemi, ¿aꞌiqui teꞌeme ɨ tɨ huaꞌacɨꞌɨti aɨme ɨ maj cai raꞌastijreꞌe maɨjna ɨ nyuucari tɨ Dioj rɨꞌɨ titaatyajtuaani itejmi jemi?
\p
\v 18 Aɨj pu cɨn ayan teꞌeyuꞌusiꞌi tɨcɨn: “Tɨ puaꞌa muareꞌeri cɨn Dioj ayan ruꞌirajtuaa aɨjna ɨ aꞌatɨ tɨ rɨꞌɨ tiꞌityújchaɨcaꞌa, ¿aꞌiqui eenyaꞌa aꞌame huaꞌa jemi ɨ mej aꞌij puaꞌa tiꞌijxa ɨ Dioj, majta aɨme jemi ɨ maj aꞌij puaꞌa titetyújchaꞌɨ? Capu aꞌatzu aꞌij xaa nyaꞌu tihuaꞌutyavaɨreꞌesin.”
\p
\v 19 Aɨj pu cɨn, micheꞌe meyan huarɨni tiꞌitɨ cɨmeꞌe tɨ xaꞌapɨꞌɨn een, aꞌij tɨ tiraavijteꞌe aɨme ɨ mej tiꞌitɨj cɨn áꞌaviicueꞌireꞌe maɨjna ɨ maj cɨn rajpueijtzi maɨjna cɨmeꞌe tɨ Dioj ayan tihuaꞌutaꞌa. Micheꞌe meyan raatatuiireꞌen ɨ ruxaijnyuꞌuca aɨjna jemi tɨ huaꞌutyataahuacaꞌa tɨ ajta cai aꞌanaj tiꞌitɨ cɨn atyaꞌɨtzaꞌara.
\c 5
\s Pedro pu caꞌanijraꞌa huaꞌataꞌaca aɨme ɨ vaujsi
\p
\v 1 Ayaa nu caꞌanijraꞌa huaꞌataꞌaca, nyaɨme ɨ mej vaujsi pueen, ɨ maj muejmi jetze ajtyamaꞌacan. Nyaa nu nyajta vastaꞌa pueen. Nyajta nu neyan tyuꞌuseij aɨjna tɨ cɨn rajpueijtzicaꞌa aɨjna ɨ Cɨriistuꞌu. Ayaa pu cheꞌeta naꞌa tiꞌinyacɨꞌɨti inyeetzi tɨj ajta tihuaꞌacɨꞌɨti aɨme ɨ maj majta Jesús jamuan áꞌujhuaꞌanyaꞌa ajna xɨcajraꞌan jetze tɨ jetzen huataseijreꞌesin aɨjna tɨ huapɨꞌɨ naa tiꞌiseiraꞌa aꞌame ɨ Dioj jemi.
\p
\v 2 Ayaa nu tyajaꞌamueijcateꞌe sej rɨꞌɨ tihuaꞌuchaɨn aɨme ɨ maj tyaɨtestyamuaꞌameꞌen pueen ɨ Dioj aꞌij tɨ aɨn ari aɨjna cɨn tyajamueijca. Caxu caꞌanyejri cɨn seyan rɨjca silu ruxéꞌeviꞌiraꞌa cɨmeꞌe xuꞌu, aꞌij tɨ Dioj tiꞌijxeꞌeveꞌe. Caxu sajta saɨjna cɨn seyan rɨjca sej si tiꞌitɨ cɨn huamuéꞌitɨn, silu ayaa xuꞌu aꞌujcaꞌanyaacan cɨn tyuꞌutyavaɨreꞌen. Naꞌari cai, ayaa xu tyuꞌutatéviꞌiraꞌata saɨjna cɨmeꞌe saj tiꞌitɨ huamueꞌitɨ.
\p
\v 3 Sataꞌaj cai aꞌujtzaahuatyaꞌa saj vaꞌacan cɨn antyujmuaꞌaree sej seyan tihuaꞌutaijteꞌen mej mi caꞌanyejri cɨn meyan tiꞌitɨ cɨn huarɨni aɨme ɨ saj huaꞌachaꞌɨ.
\p Ma sajta muan, sataꞌaj seyan rɨꞌɨ titetyújchaɨca huaꞌa jemi aꞌij tɨ tiraavijteꞌe.
\v 4 Tɨ puaꞌa seyan huarɨni, ayaa pu tyajaꞌamuacɨꞌɨti ajna xɨcajraꞌan jetze tɨ jetzen huataseijreꞌesin aɨjna tɨ nain cɨn antyujmuaꞌaree tɨ ayan cheꞌeta naꞌa rɨꞌɨ tiꞌitachaɨca tɨj ajta ayan rɨcɨ aɨjna tɨ rɨꞌɨ tihuaꞌachaꞌɨ ɨ rucanyaꞌaxɨjstyamuaꞌa. Aɨ pu ayan amuaatátɨstejsin aɨjna ɨ curun tɨ cai aꞌanaj aꞌupuaꞌarixɨꞌɨsin, tɨ ajta rɨꞌɨ tiꞌiseiraꞌa aꞌame ɨ Dioj jemi tɨj naꞌa rusen cɨmeꞌe.
\p
\v 5 Sajta muan, mɨ sej sauj tyaamua, sataꞌaj seyan huaꞌastijraꞌa saɨme ɨ vaujsi. Sataꞌaj naijmiꞌi seyan huarɨni, sej si seyan huarɨni sacai aꞌujtzaahuatyaꞌa seij sajta seij aꞌini ayaa pu teꞌeyuꞌusiꞌi tɨcɨn:
\q Dioj pu muareꞌeri huaꞌataꞌaca
\q2 aɨme ɨ mej áꞌujtzaahuateꞌe.
\q Ma ajta, aɨ pu ayan rɨꞌɨ tihuaꞌataꞌaca
\q2 aɨme ɨ maj cai meyan áꞌujtzaahuateꞌe.
\s Caꞌanijraꞌa pu huaꞌataꞌaca aɨme ɨ mej eꞌetyujsaꞌɨri
\p
\v 6 Sataꞌaj seyan huatauraꞌan saj cɨleenyaꞌacan cɨn tyuꞌutyavaɨreꞌen ɨ Dioj jemi, aɨjna tɨ nain cɨn antyujmuaꞌaree, tɨ ij aɨn ayan vaꞌacan cɨn tyajamuéijcateꞌen aꞌanaj tɨ ayan tyajamuaaxaꞌapɨꞌɨntariꞌiriꞌi.
\v 7 Sataꞌaj seyan saɨjna jemi ɨ Dioj raatyajtuaani tɨj naꞌa ɨ saj cɨn aꞌij tyaꞌujmuaꞌate aꞌini eihua pu tiꞌimuaꞌatze muejmi cɨmeꞌe aꞌij tɨ tyajaꞌamuaruure.
\p
\v 8 Sataꞌaj tyamuaꞌa naa tityaꞌujcuꞌuvaa, sajta rɨꞌɨ tíꞌityeꞌixeꞌeraꞌa muan saɨjna cɨmeꞌe tɨ aɨn tiyaaruꞌu, ɨ tɨ amuajchaɨreꞌe, ayan eenyeꞌequeꞌen aꞌuchaꞌacan tɨj muajye tɨ áꞌujijhuan aɨjna cɨmeꞌe tɨ ayan rahuauhuau aɨjna tɨ raatyacɨꞌɨme.
\v 9 Sataꞌaj seyan huatyaujcaꞌanyen saɨjna cɨmeꞌe saj tyaꞌatzaahuateꞌe sej si cai rataꞌacareꞌen tɨ aɨjna ɨ tiyaaruꞌu amuaꞌantimueꞌitɨn. Ayaa xu sajta ramuaꞌaree tɨ ayan huaꞌaruure aɨme ɨ aꞌamueꞌihuaamuaꞌa ɨ maj meyan aꞌucaitɨme aꞌu tɨ naꞌa ɨ chaanaca japua. Ayaa pu eenyeꞌequeꞌe seijreꞌe tɨ ayan huaꞌanaijmiꞌireꞌen mej mi meyan cheꞌeta manaꞌa aɨjna cɨn áꞌaviicueꞌiraꞌa ɨ maj cɨn rajpueijtzi satɨj sajta muan.
\p
\v 10 Ajta aɨn ɨ Dioj tɨ nain cɨn rɨꞌɨ tiꞌitaꞌaca, aɨjna tɨ ayan amuaatajée tɨ ij ayan tyajamuaacɨꞌɨti aɨjna ɨ saj cɨn naa rɨꞌɨ tiyáꞌuseijra ɨ Cɨriistuꞌu jemi tɨj naꞌa rusen cɨmeꞌe, ayaa pu áꞌamuaruuren. Satɨꞌɨj aꞌatzu aꞌateeviꞌin saj tiꞌitɨ cɨn áꞌaviicueꞌiraꞌa ɨ saj cɨn rajpueijtzi, aɨ pu rusaɨj ayan aꞌamuanaijmiꞌireꞌen, ajta ayan caꞌanijraꞌa amuaataꞌasin sej si tyaꞌutaviicueꞌi. Aɨ pu ajta ayan amuaataꞌasin sej seyan huatyaujcaꞌanyen tyamuaꞌa naa.
\v 11 Cheꞌe aɨn ayan aɨjna cɨn tiꞌityávaaca tɨ ayan nain cɨn antyujmuaꞌaréera tɨj naꞌa tɨ yu aucaꞌitɨ aꞌame, tɨj naꞌa rusen cɨmeꞌe.
\s Ayaa pu raꞌantipuaꞌari
\p
\v 12 Ayaa nu cɨj caj tyajaꞌamuayuꞌuseꞌe nyaɨjna jamuan ɨ Silvano tɨ ayan tinaꞌamitejteꞌe tɨ aɨn pueen seij ɨ nyeꞌihuaaraꞌa tɨ cai tiꞌitɨ cɨn atyaꞌɨtzaꞌara. Ayaa nu nyeijna jetze tyajaꞌamueꞌixaateꞌe tɨ ai pu aɨn pueen ɨ tɨ tzaahuatiꞌiraꞌa cɨn Dioj ayan rɨꞌɨ titataꞌaca. Nyajta nyeijna jetze neyan caꞌanijraꞌa amuataꞌaca sej si cai aꞌanaj yáꞌuhuaꞌanan aꞌij nyej tyajaꞌamueꞌixaateꞌe.
\p
\v 13 Aɨme ɨ mej ya huatyáuu iiya Babilonia, ɨ tɨ Dioj ajta huaꞌantihuau, ya mu áꞌamuataujteꞌe. Aɨ pu ajta ya áꞌamuataujteꞌe ɨ niyauj, aɨjna ɨ Marcos.
\v 14 Sataꞌaj seyan huáujtaujteꞌen xuꞌityaujvisiꞌitɨmuaꞌacaraꞌa saɨjna cɨmeꞌe saj huaujxeꞌeveꞌe, seij sajta seij. Cheꞌe aɨn Dioj rɨꞌɨ amuaatyápuaꞌariteꞌen naijmiꞌica muejmi mɨ sej Cɨriistuꞌu jetze ajtyamaꞌacan. Ayaa puꞌu xaa. Antipuaꞌaracaꞌa.