\id 2PE
\h 2 San Pedro
\toc1 2 San Pedro
\mt1 Ɨ yuꞌuxari tɨ raꞌuyuꞌuxacaꞌa aɨjna ɨ San Pedro, ɨ tɨ huaꞌapua
\c 1
\s Aɨ pu huaꞌataujteꞌe aɨjna ɨ Pedro
\p
\v 1 Inyaa Simón, i nyaj nyajta Pedro pueen, aij nu jetze tyajaꞌamuayuꞌuseꞌe nyaɨjna cɨmeꞌe nyaj ravaɨreꞌe nyaɨjna ɨ Jesús tɨ ajta Cɨriistuꞌu pueen. Aɨ pu naꞌantihuau nyej ni neyan tyuꞌutyaɨreꞌen ɨ jemin. Sajta muan, Dioj pu ayan amueꞌirajtua muejmi, aɨjna ɨ Dioj tɨ urareꞌenyaꞌacan cɨn seijreꞌe sej si seyan cheꞌeta sanaꞌa tyaꞌatzaahuateꞌe tyatɨj ityan. Ai pu aɨn pueen tɨ eihua huapɨꞌɨ tyajamuatyavaꞌɨri.
\v 2 Cheꞌe ayan eitzeꞌe tyajamuaacɨꞌɨti tɨ rɨꞌɨ tyajamuaataꞌacareꞌen, ajta tɨ rɨꞌɨ tyajamuaatyapuaꞌariteꞌen aɨjna cɨmeꞌe sej seri ramuaꞌate ɨ Dioj, sajta saɨjna ɨ Jesús, tɨ ajta tavastaraꞌa pueen.
\s Aꞌij mej rɨꞌɨ tityetyújcháɨj muaꞌaraꞌani aɨme ɨ mej tyaꞌatzaahuateꞌe
\p
\v 3 Rumuareꞌeriꞌiraꞌa pu cɨn Dioj ayan titaatáꞌa nain tɨ ruxeꞌeveꞌe ɨ tyaj cɨn ruuri huatyaturan ɨ jemin, ɨ tyaj tyajta cɨn teyan rɨꞌɨ tiꞌititachaꞌɨ aꞌij tɨ aɨn ayan tiꞌijxeꞌeveꞌe. Ayaa pu een cɨn ayan rɨꞌɨ titaatáꞌa aɨjna cɨmeꞌe tyej teyan raamuáꞌa tyaɨjna tɨ ayan taatajée tyej ti teyan huatyaturan ɨ jemin tɨj naꞌa rusen cɨmeꞌe tɨ ij ayan taacɨꞌɨti aɨjna ɨ tyaj cɨn rɨꞌɨ tiyáꞌuseijra, tyaɨjna cɨmeꞌe tɨ aɨn ayan nain cɨn antyujmuaꞌaree.
\v 4 Aꞌini ayan een ɨ jemin, aɨ pu ayan titaatáꞌa aɨjna ɨ nyuucari tɨ cɨn vaꞌacan cɨn tyaꞌataujratziiriꞌi, tɨ ajta eihua huapɨꞌɨ tajetze ruxeꞌeveꞌe tyej ti tyaɨjna cɨn huatátauuna tɨ ij cai aꞌij puaꞌa taaruuren aɨjna tɨ aꞌij puaꞌa een tɨ huaꞌa tzajtaꞌa seijreꞌe ɨ tyaɨte ɨ mej yan seijreꞌe chaanaca japua, tej ti tyajta teyan cheꞌeta tyanaꞌa urareꞌenyaꞌacan cɨn seijraꞌa tɨj ajta ɨ Dioj.
\p
\v 5 Aɨj xu cɨn, sataꞌaj seyan huatyaujcaꞌanyen sej saɨjna cɨn rajtyanaijmiꞌireꞌen ɨ saj cɨn tyaꞌatzaahuateꞌe saɨjna cɨmeꞌe saj sajta tzaahuatiꞌiraꞌa cɨn rɨꞌɨ titetyújchaꞌɨ. Sajta sataꞌaj seyan saɨjna cɨn rajtyanaijmiꞌireꞌen ɨ saj cɨn rɨꞌɨ titetyújchaꞌɨ saɨjna cɨmeꞌe saj tyamuaꞌa naa tiruꞌumuaꞌaree.
\v 6 Sataꞌaj sajta saɨjna cɨn rajtyanaijmiꞌireꞌen ɨ saj cɨn rɨꞌɨ tiruꞌumuaꞌaree saɨjna cɨmeꞌe saj sajta nain cɨn áꞌujcuꞌuvaa. Sataꞌaj sajta saɨjna cɨn rajtyanaijmiꞌireꞌen ɨ saj cɨn aꞌujcuꞌuve saɨjna cɨmeꞌe saj sajta tyaꞌutaviicueꞌi. Sataꞌaj sajta saɨjna cɨn rajtyanaijmiꞌireꞌen ɨ saj cɨn seyan teꞌeviicueꞌi saɨjna cɨmeꞌe saj tzaahuatiꞌiraꞌa cɨn ranaꞌamiche ɨ Dioj.
\v 7 Sataꞌaj sajta saɨjna cɨn rajtyanaijmiꞌireꞌen ɨ saj cɨn tzaahuatiꞌiraꞌa cɨn ranaꞌamiche ɨ Dioj saɨjna cɨmeꞌe saj tyamuaꞌa naa huataurihuaamuaꞌata. Sataꞌaj sajta saɨjna cɨn rajtyanaijmiꞌireꞌen ɨ saj seyan rɨꞌɨ tyuꞌutaurihuaamuaꞌatacaꞌa saɨjna cɨmeꞌe sej seyan titeehuaujxeꞌeveꞌe.
\p
\v 8 Sataꞌaj seyan nain cɨn rajtyanaijmiꞌireꞌen aꞌini tɨ puaꞌa seyan rɨꞌɨ titetyújchaɨca tyamuaꞌa naa, ayaa pu aꞌamuaruuráj aꞌame saj eihua huapɨꞌɨ tyuꞌutyavaɨreꞌen sej si tyamuaꞌa naa tiꞌitɨ cɨn tyuꞌutatuiireꞌen ɨ Dioj jemi saɨjna cɨmeꞌe saj tzaahuatiꞌiraꞌa cɨn ramuaꞌate saɨjna ɨ tavastaraꞌa, aɨjna ɨ Jesús tɨ ajta Cɨriistuꞌu pueen.
\p
\v 9 Naꞌari cai, aꞌatɨ tɨ naꞌa tɨ ayan tiraꞌaturaateꞌe tɨ ayan nain cɨn rajtyanaijmiꞌireꞌen ɨ tɨ cɨn tyaꞌatzaahuateꞌe, ayaa pu cheꞌeta naꞌa een tɨj aꞌatɨ tɨ aracun, tɨ cai aꞌɨmɨ tiꞌiseijrave. Aɨ pu ari yaꞌuhuaꞌaxɨ tɨ Dioj ayan tiraatauuniꞌiriꞌi aɨjna tɨ ajmiꞌi cɨn autyajturaa ɨ jemin.
\p
\v 10 Aɨj xu cɨn, nyeꞌihuaamuaꞌa, sataꞌaj seyan eitzeꞌe huatyaujcaꞌanyen sej si seyan huarɨni tɨ ij ayan amiteeraꞌa tɨ Dioj ayan amuaatajée, ajta amuaꞌantihuau. Tɨ puaꞌa seyan huarɨni, capu aꞌanaj ayan áꞌamuaruuren tɨ Dioj ayan ma amuuhuaꞌaxɨn tɨj naꞌa rusen cɨmeꞌe.
\v 11 Ma ajta, ayaa pu tyajaꞌamuacɨꞌɨti sej si tyamuaꞌa naa saun aꞌutyarute aꞌu tɨ rusen cɨn tyajaꞌutaijta aɨjna ɨ tavastaraꞌa tɨ tuꞌirajtuaa, aɨjna ɨ Jesús tɨ ajta Cɨriistuꞌu pueen.
\s Aꞌij tɨ een cɨn teꞌeyuꞌusiꞌi aijna i yuꞌuxari
\p
\v 12 Aɨj nu cɨn neyan rɨni nyaj aꞌanaj tɨ naꞌa neyan tyajaꞌamueꞌixaatyaꞌa sej seyan tiraꞌutamuaꞌaree saɨjna. Capu amɨn aꞌij sej seri ramuaꞌaree, sajta seri tyaꞌutaviicueꞌiriꞌi saɨjna cɨmeꞌe sej seyan tyaꞌatzaahuateꞌe.
\p
\v 13-14 Ayaa pu tinaꞌamitejteꞌe tɨ ayan tiraavijteꞌe nyej neyan huarɨni tɨj naꞌa nyaj nyauj yan seijreꞌe, nyej ni caꞌanijraꞌa amuaataꞌacareꞌen sej si seyan tiraꞌutamuaꞌaree aꞌij sej huarɨni, aꞌini nuꞌuri neyan ramuaꞌaree tɨ ari vejliꞌi pɨtiꞌirɨcɨ ajna xɨcajraꞌan jetze nyej jetzen huamɨꞌɨni. Ayaa nu nyaɨjna cɨn ramuaꞌaree aꞌini aɨ pu tavastaraꞌa, aɨjna ɨ Jesús, tɨ ajta Cɨriistuꞌu pueen, ayaa pu tinaataꞌixaa.
\v 15 Nyajta nu neyan huatyancaꞌanyejsin nyej ni neyan tyajamueꞌitii tɨ ij ayan huatarɨꞌɨristare sej seyan aꞌanaj tɨ naꞌa tiraꞌutamuaꞌaree nyatɨꞌɨj cai cheꞌe maꞌahuaꞌatan.
\s Pedro pu tyaꞌanxájta aɨjna cɨmeꞌe tɨ rɨꞌɨ tiyáꞌuseijra aɨjna ɨ Cɨriistuꞌu
\p
\v 16 Tyatɨꞌɨj tyaɨjna jamueꞌixaa aꞌij tɨ eenyeꞌequeꞌen huataseijreꞌesin ajna xɨcajraꞌan jetze tɨ jetzen ajtahuaꞌa ya vaꞌacányejsin aɨjna ɨ tavastaraꞌa, aɨjna ɨ Jesús tɨ ajta Cɨriistuꞌu pueen, tɨ ij ayan nain cɨn antyujmuaꞌaréera, catu raꞌastijraꞌacaa tyaɨjna ɨ nyuucari ɨ maj rujɨɨmuaꞌa manaꞌa rajtyau, ɨ maj meyan tiꞌimuaꞌatzajcaa. Catu xaa nyaꞌu tajɨɨmuaꞌa tyanaꞌa rajtyau silu tyajɨꞌɨsi tu cɨn naa rɨꞌɨ tiyaꞌuseiira taꞌaraa tɨ aɨ pu nain cɨn antyujmuaꞌaree.
\p
\v 17 Ajta, Dioj ayan rɨꞌɨ tiraatyajtuaa, ajta rɨꞌɨ tiraataꞌa aɨjna cɨmeꞌe tɨ huapɨꞌɨ tiꞌiseijreꞌe u tajapua tɨꞌɨj Dioj ayan cɨmeꞌen tyuꞌutaxajtacaꞌa tɨcɨn: “Ai pu aɨn pueen ɨ niyauj, ɨ nyaj eihua huapɨꞌɨ raxeꞌeveꞌe. Aɨ pu ajta rɨꞌɨ tinataꞌaca inyeetzi.”
\v 18 Tyajta ityan, ayaa tu raanamuajriꞌi tyaɨjna ɨ nyuucari tɨ uteꞌe jeꞌicanamuajre tyatɨꞌɨj tyanna jaꞌutyáuucaꞌa tyaɨjna jamuan anna ɨ jɨri jetze tɨ Dioj huatauraꞌate.
\s Ɨ nyuucari maj cɨn tiꞌixaxaꞌa ɨ Dioj jetze maꞌacan
\p
\v 19 Ajta aɨjna ɨ tyaj yaꞌuseij, aɨ pu ayan arauraste aɨjna tɨ ajmiꞌi ayan teꞌeyuꞌusiꞌihuacaꞌa aɨjna ɨ yuꞌuxari jetze ɨ maj cɨmeꞌen tyuꞌutaxajtacaꞌa ɨ Dioj jetze maꞌacan. Aɨj tu cɨn teri eitzeꞌe tyamuaꞌa naa tiruꞌumuaꞌaree tɨ ayan tiꞌayajna aɨjna tɨ ajmiꞌi ayan teꞌeyuꞌusiꞌihuacaꞌa.
\p Rɨꞌɨ pu tyajamuaatyavaɨreꞌesin tɨ puaꞌa seyan cheꞌeta sanaꞌa raꞌaraꞌastijreꞌen tɨj ajta aꞌatɨ ayan tyamuaꞌa naa tyaꞌatanyee tatzari cɨmeꞌe aꞌu tɨ aꞌutɨcaꞌa. Sataꞌaj seyan cheꞌeta sanaꞌa raꞌaraꞌastijreꞌen tɨj ajta aꞌatɨ tɨ ayan atanyee asta naꞌajcai huataseijreꞌen aɨjna ɨ xuꞌuraꞌave tɨ tapuaꞌarijmaꞌaca ujeꞌijninyei. Sataꞌaj seyan raꞌaraꞌastijreꞌen asta naꞌajcai aɨn xaijnyuꞌucaraꞌaraꞌan ɨ Dioj ayan huatyaturan ɨ aꞌamua tzajtaꞌa.
\p
\v 20 Anacai, ayaa pu ruxeꞌeveꞌe sej seyan raamuaꞌaree tɨ cai aꞌatɨ aꞌanaj rusaɨj aꞌij tirajtyau aꞌij tɨ huataujmuaꞌa aɨjna ɨ nyuucari ɨ maj meyan tyuꞌutaxajtacaꞌa ɨ Dioj jetze maꞌacan tɨ ayan raatyajtuaa itejmi jemi.
\v 21 Capu aꞌatɨ aꞌanaj rusaɨj aꞌij tirajtyau tɨ ayan tyuꞌutaxaj ɨ Dioj jetze maꞌacan silu aɨjna xaijnyuꞌucaraꞌaraꞌan ɨ Dioj, ayaa pu caꞌanijraꞌa huaꞌutaꞌa maj meyan tyuꞌutaxaj, aɨme ɨ maj maɨjna cɨn tyuꞌutaxajtacaꞌa ɨ Dioj jetze maꞌacan.
\c 2
\s Aɨme ɨ maj cai tzaahuatiꞌiraꞌa cɨn tihuaꞌamuaꞌate
\p
\v 1 Aj mu mi huaꞌa tzajtaꞌa ɨ tyaɨte meyan huataseijre seica ɨ maj hueꞌitzi cɨn tihueꞌitiiriꞌi. Ayaa mu cheꞌeta manaꞌa huataseijreꞌesin muejmi jemi aɨme ɨ maj majta hueꞌitzi cɨn tyajamuaataꞌitiira. Aviitzi mu cɨn meyan raatyatuasin muejmi jemi maɨjna ɨ nyuucari tɨ amáꞌujɨsin, ɨ maj cɨn ma ruuraini maɨjna ɨ tavastaraꞌa tɨ ajta huaꞌa jetze maꞌacan tyuꞌutanajchitacaꞌa ɨ mej téꞌechaɨcaꞌa ɨ Dioj jemi. Aɨj pu cɨn ayaa tihuaꞌacɨꞌɨti tɨ aɨn Dioj ayan caꞌanacan huaꞌantipuaꞌariteꞌen.
\p
\v 2 Majta muiꞌitɨ mu meyan huaꞌaraꞌastijreꞌesein mej mi meyan cheꞌeta manaꞌa huataujxanaꞌacɨreꞌen matɨj aɨme. Ayaa mu een cɨn seica meyan aꞌij puaꞌa tiꞌijxaata muaꞌajuꞌun maɨjna ɨ nyuucari ɨ tyaj cɨmeꞌen huajuꞌun maɨjna cɨmeꞌe aꞌij maj rɨcɨ aɨme ɨ maj hueꞌitzi cɨn tyajamuaatáiitiira.
\v 3 Ayaa mu een cɨn meyan muejmi cɨmeꞌen tiꞌimueꞌitɨn maɨjna cɨmeꞌe mej huapɨꞌɨ raxeꞌeveꞌe mej eihua tíꞌijchaɨca. Aɨj mu cɨn meyan hueꞌitzi cɨn amuaatyamueꞌitɨ. Tɨj naꞌa ajcaꞌihuaꞌɨmɨ tɨꞌɨj Dioj ayan huaꞌuxɨjte, tɨj naꞌa ijii aucheꞌe pu araurastejsin aɨjna ɨ nyuucari tɨ huaꞌa cɨmeꞌen tyuꞌutaxajtacaꞌa. Ajta ayan tiꞌayajna tɨ Dioj auj ayan huaꞌantipuaꞌariteꞌesin.
\p
\v 4 Ee xaa nyaꞌu, Dioj pu cai ayan tihuaꞌutauuniꞌiriꞌi aɨme ɨ maj mejmiꞌi tajapua tiꞌivaɨraꞌacaa, aɨmej ɨ maj majta meyan tiꞌitɨ cɨn autyajturaa ɨ jemin, silu au pu ayan huajeꞌetyaahuaꞌaxɨ u tajete aꞌu tɨ pueijtzi huaꞌataꞌacaraꞌa aꞌame. Au pu huaꞌutyajtuaa aꞌu tɨ eꞌetyacun mej mi maun aꞌanamiꞌihua aꞌu tɨ aꞌutɨcaꞌa. Au mu eꞌevíitziꞌihua muaꞌajuꞌun asta naꞌa cai Dioj ayan huaꞌuxɨjteꞌen ajna xɨcajraꞌan jetze tɨ jetzen nain teꞌentipuaꞌariteꞌesin.
\v 5 Capu ajta tihuaꞌutauuniꞌiriꞌi aɨme ɨ maj jajcua ɨmɨ yan seijraꞌacaa, silu ayaa pu tyuꞌutaꞌa tɨ aɨn jaj ayan tijɨste nainjapua ɨ chaanaca tɨ ij aɨjna cɨn pueijtzi huaꞌutaꞌan aɨme ɨ maj cai aꞌatzu raꞌastijraꞌacaa ɨ Dioj.
\p Ma ajta, aɨ pu xaa raatavaɨ aɨjna ɨ Noé tɨ ayan tihuaꞌutaꞌixaa aꞌij mej yeꞌi huarɨni mej mi xaꞌapɨꞌɨn cɨn seijraꞌa ɨ Dioj jemi. Ajta Dioj ayan huaꞌutavaɨ aɨme ɨ seica ɨ maj meyan arahuaꞌapua araꞌasicaa.
\p
\v 6 Aɨ pu ajta huaꞌuxɨjte aɨme ɨ maj maun aꞌuchaatɨmaꞌacaa ɨ chajtaꞌana jetze tɨ huaꞌapua, aujna u Sodoma ajta u Gomorra. Nain pu cɨn huaꞌutyaatai. Ayaa pu een cɨn huaꞌuruu tɨ ij ayan titaataꞌitii aꞌij tɨ huaꞌaruuren aɨme ɨ maj cai aꞌatzu raꞌastijreꞌe ɨ Dioj.
\p
\v 7 Ma ajta, aɨ pu raatavaɨj aɨjna ɨ Lot, aɨjna tɨ rɨꞌɨ tiꞌityújchaɨcaꞌa ɨ jemin, aɨjna tɨ ajta aꞌij puaꞌa raꞌasajcaa aꞌij maj rɨjcaa ɨ mej meyan huataujxanaꞌacɨre aɨme ɨ maj cai aꞌatzu tiꞌitɨ aꞌastyajcaꞌa.
\v 8 Ajta aɨn ɨ tevi tɨ rɨꞌɨ tiꞌityújchaɨcaꞌa ɨ Dioj jemi, aꞌini aɨ pu nain tujcaꞌari tzajtaꞌa ayan huaꞌa tzajtaꞌa eꞌechajcaꞌa, eihua pu rajpueijtzicaꞌa ɨ rutzajtaꞌa tɨ urareꞌenyaꞌacan cɨn seijraꞌacaa. Ayaa pu een cɨn tirajpueijtzicaꞌa aɨjna cɨmeꞌe tɨ ayan raaseij, ajta raanamuajriꞌi ɨ maj aꞌij puaꞌa rɨjcaa aɨme ɨ maj cai tiꞌitɨ aꞌastyajcaa.
\p
\v 9 Aɨj pu cɨn, Dioj ayan raayɨꞌɨtɨ tɨ ayan ruꞌijrajtuaani aɨjna jetze tɨ cɨn rajpueijtzi aɨjna ɨ aꞌatɨ tɨ rɨꞌɨ tiꞌityujchaꞌɨ. Aɨ pu ajta ayan raayɨꞌɨtɨ tɨ hueꞌityaanan aɨme ɨ maj aꞌij puaꞌa titetyújchaꞌɨ tɨ ij ayan pueijtzi huaꞌutaꞌan ajna xɨcajraꞌan jetze tɨ jetzen huaꞌaxɨjteꞌen naijmiꞌica.
\p
\v 10 Ee xaa nyaꞌu, ayaa pu tiꞌayajna, tɨ ayan tihuaꞌacɨꞌɨti aɨme ɨ mej jetzen áꞌujcaꞌanye maɨjna jetze tɨ eihua aꞌij puaꞌa tiꞌiseijreꞌe, mej mi meyan huataujxanaꞌacɨreꞌen maɨme jamuan ɨ ruxaꞌa tyetyaca. Ayaa pu cheꞌeta naꞌa aꞌij puaꞌa tiꞌiseijreꞌe maj cai aꞌatzu tiꞌitɨ cɨn tyaꞌaste. Ayaa mu áꞌujcaꞌanye maj meyan huarɨni aꞌij tɨ tihuaꞌamitejteꞌe. Eihua mu áꞌujtzaahuateꞌe. Aɨ mu majta cai ratzɨɨnyaꞌa meyan áꞌujcaꞌanye mej aꞌij puaꞌa tihuaꞌaxajta aɨme ɨ maj tajapua eꞌeseijreꞌe.
\v 11 Ma majta aɨme ɨ maj tajapua tiꞌivaɨreꞌe, camu meyan áꞌujcaꞌanye mej meyan aꞌij puaꞌa tihuaꞌaxajta aɨme ɨ tyetyaca maɨjna jemi ɨ tavastaraꞌa. Ma majta aɨme, eitzeꞌe mu rucacaꞌanye, majta eitzeꞌe vaꞌacan cɨn antyujmuaꞌaree macai aɨme ɨ tyetyaca.
\p
\v 12 Majta aɨme ɨ tyetyaca, ayaa mu aꞌij puaꞌa tiꞌixaata muaꞌayeꞌi maɨjna cɨmeꞌe ɨ maj cai aꞌatzu yauꞌite. Aɨj mu cɨn meyan cheꞌeta manaꞌa seijreꞌe matɨj aɨme ɨ yaꞌamuaate ɨ maj cai tihuájáuꞌeite, ɨ maj chaꞌa manaꞌa áꞌujhuaꞌan. Ayaa mu een cɨn huanunuꞌeihuacaꞌa mej mi tyaɨte huaꞌuviviꞌin, majta huaꞌucuiꞌini. Majta aɨme ɨ tyetyaca, ayaa pu cheꞌeta naꞌa meyan antipuaꞌari maɨjna cɨmeꞌe ɨ maj cɨn aꞌij puaꞌa huaꞌuruu aɨme ɨ maj anacai rɨꞌɨ titetyújchaɨcaꞌa.
\p
\v 13 Ayaa pu cheꞌeta naꞌa tihuaꞌutaꞌasin tɨ aꞌatɨ ayan tihuaꞌariꞌira ɨ maj tíꞌijchaꞌɨ matɨj majta aɨme rujɨɨmuaꞌa manaꞌa meyan tihuaꞌariꞌiriꞌi ɨ seica ɨ mej tíꞌijchaɨcaꞌa. Ajta aɨjna ɨ maj tiꞌitɨ cɨn huataujtyamuaꞌaveꞌen, ayaa mu tujcaꞌari tzajtaꞌa ruxaahua tiꞌiteseijreꞌe maɨjna cɨmeꞌe tɨ ru jetze huiraninyei. Ayaa mu cheꞌeta manaꞌa seijreꞌe huaꞌa tzajtaꞌa ɨ tyaɨte tɨj tiꞌitɨ tɨ eꞌihuaméijra, tɨj ajta aɨjna tɨ cɨn capitaꞌinacaꞌa. Ruxaahua mu rutyamuaꞌaveꞌe maɨjna cɨmeꞌe maj amuaacuanamua muaꞌajuꞌun meenti majta meyan tiꞌiyeste muejmi jamuan.
\p
\v 14 Ayaa mu jetzen áꞌujcaꞌanye maɨjna jetze ɨ jɨitaꞌa matɨj manaꞌa mej meyan raseijra mej mi meyan jamuan tyuꞌuxanaꞌacɨreꞌen. Camu majta aꞌanaj raatapuaꞌajta maj meyan aꞌatura ɨ Dioj jemi. Majta, ayaa mu caꞌanijraꞌa huaꞌataꞌaca aɨme ɨ maj cai xɨ teꞌeviicueꞌi, mej mi majta meyan chaꞌata manaꞌa autyaturan ɨ Dioj jemi. Tyamuaꞌa mu tiraarɨꞌɨre aꞌij mej tiꞌitɨj cɨn huarɨni mej mi meyan tiraatyeeviꞌi tiꞌitɨ tɨ naꞌa mej meyan tiꞌijxeꞌeveꞌe maɨjna cɨmeꞌe mej chueere. Ai mu aɨn pueen ɨ tyaɨtejraꞌa tɨ Dioj pueijtzi huaꞌutaꞌasin.
\p
\v 15 Muꞌuri ajtacɨ́j ɨ juye jetze ɨ maj japuan huajuꞌun aɨme ɨ tɨ rɨꞌɨ tihuaꞌamityejteꞌe. Majta meri maɨjna jetze ucajrupi tɨj ajta ayan ucajrupi aɨjna ɨ Balaam tyaacan tɨ yaujraꞌan pueenyaꞌa aɨjna ɨ Beor tyaacan. Ajta aɨjna ɨ Balaam, ayaa pu raꞌaranajchacaꞌa tɨ tiꞌitɨ huamuéꞌitɨn aɨjna cɨmeꞌe tɨ aꞌij puaꞌa huarɨni.
\v 16 Ma ajta, puuruꞌu, tɨ cai tyáꞌanrɨꞌɨre, ayaa pu tyuꞌutanyu tɨj tyaataꞌa. Aj puꞌi raꞌajtyaꞌaxɨ aɨjna ɨ Balaam aɨjna cɨmeꞌe tɨ aꞌij puaꞌa rɨjcaa. Ayaa pu aɨjna cɨn huarɨj, aɨ pu ayan raataꞌijmɨjriꞌi aɨjna tɨ ayan ruseijratacaꞌa tɨ nuꞌu Dioj jetze maꞌacan tiꞌixaxaꞌataꞌa, tɨ cai tiꞌitɨ cɨn ayan huarɨni aɨjna cɨmeꞌe tɨ rutɨmueꞌi.
\p
\v 17 Ayaa mu cheꞌeta manaꞌa tiꞌivaɨreꞌe aɨme ɨ tyetyaca tɨj aꞌu tɨ aꞌajaijxa aꞌu tɨ cai jaj jetze airáninyei naꞌari ɨ jaitɨri tɨ aaca ráatajchi, ajta tɨ jetzen cai vijviꞌiye. Ayaa pu tihuaꞌacɨꞌɨti mej maun aꞌutyaturan u tajete aꞌu tɨ huapɨꞌɨ aꞌutɨcaꞌa tɨj naꞌa rusen cɨmeꞌe.
\p
\v 18 Ayaa pu aɨjna cɨn ayan tiꞌirɨnyaca aɨjna cɨmeꞌe mej meyan caꞌanin cɨn áꞌujtzaahuateꞌe maɨjna cɨmeꞌe ɨ nyuucari tɨ cai aꞌij huataujmuaꞌa. Majta meyan caꞌanijraꞌa huaꞌataꞌaca ɨ seica mej mi meyan tyuꞌumuaꞌati maɨjna jetze tɨ huaꞌajetze huiiraninyei tɨ ayan rusaɨj aꞌij tirajtyau. Ayaa mu aɨjna cɨn huarɨj, aɨ mu meyan majta caꞌanijraꞌa huaꞌataꞌaca aɨme ɨ maj maucheꞌe tihuijsin huaꞌa jemi mej mi majtahuaꞌa tiꞌitɨ cɨn autyaturan ɨ Dioj jemi maɨjna cɨmeꞌe mej hueꞌitzi cɨn tihueꞌijteꞌe aɨme ɨ tyetyaca.
\p
\v 19 Ayaa mu tiꞌitɨ cɨn tyaꞌataujratziiraca maj nuꞌu tihuaꞌutaꞌan mej mi ruxaahua áꞌujhuaꞌanyeꞌen. Ma ajta, capu rɨꞌɨri aꞌini aɨ mu rujɨɨmuaꞌa manaꞌa meyan caꞌanyejri cɨn tiꞌivaɨreꞌe maɨjna cɨmeꞌe maj aꞌij puaꞌa titetyújchaꞌɨ, aꞌini aꞌatɨ tɨ naꞌa tɨ ayan caꞌanyejri cɨn tiꞌivaɨreꞌe, aɨ pu ayan ravaɨreꞌe aɨjna ɨ aꞌatɨ tɨ ari raꞌantimueꞌitɨ.
\p
\v 20 Ajta tɨ puaꞌa meri meyan raatapuaꞌajtacaꞌa maj meyan cheꞌeta manaꞌa aꞌij puaꞌa titetyújchaꞌɨ matɨj ɨ seica ɨ maj yan japuan seijreꞌe ɨ chaanaca, tɨ puaꞌa meyan raatapuaꞌajtacaꞌa maɨjna cɨmeꞌe maj raꞌancuraꞌa maɨjna ɨ tavastaraꞌa tɨ ajta ayan tuꞌirajtuaani, aɨjna ɨ Jesús tɨ ajta Cɨriistuꞌu pueen, tɨ puaꞌa meyan maɨjna cɨn huarɨj, majtahuaꞌa mu meyan aꞌij puaꞌa huatyaarɨj tɨ ij ajtahuaꞌa huaꞌutyamueꞌitɨn aɨjna tɨ aꞌij puaꞌa een, ayaa mu eitzeꞌe aꞌij puaꞌa tiꞌityeseiraꞌa muaꞌajuꞌun tɨꞌɨj nain teꞌentipuaꞌare cai tɨ jajcua maj ɨmɨ seijraꞌacaa.
\p
\v 21 Manaꞌajtzɨ cai aꞌanaj raamuaꞌatijcheꞌen maɨjna ɨ yeꞌira tɨ naa tiꞌiseijreꞌe ɨ Dioj jemi macai meyan ramuaꞌareera, majta yáꞌuhuaꞌaxɨn aɨjna ɨ nyuucari tɨ cɨn Dioj ayan huatauraꞌate, tɨ ajta ayan raatyajtuaa aɨme jemi tɨ ij aɨjna cɨn tihuaꞌutaijteꞌen.
\v 22 Ayaa pu xaa tihuaꞌuruu aꞌij tɨ teꞌeyuꞌusiꞌi ɨ yuꞌuxari jetze tɨcɨn: “Aɨjna ɨ tzɨꞌɨ ajtahuaꞌa pu mu aꞌuveꞌeme aꞌutɨ ajjáraj tɨꞌij raacuaꞌani ɨ rujaraꞌari.” Ajta tɨ ayan tɨcɨn: “Aɨjna ɨ tuiixu tɨ huaɨꞌɨhuacaꞌa, ajtahuaꞌa pu mu aꞌuveꞌeme aꞌu tɨ huaɨꞌɨhuacaꞌa ɨ xarij cɨmeꞌe tɨ ij ajtahuaꞌa ayan huaɨꞌɨhua.”
\c 3
\s Tɨꞌɨj uveꞌenyejsin ɨ tavastaraꞌa
\p
\v 1-2 Muan, nyaj aꞌamuaxeꞌeveꞌe, aɨ pu aɨn pueen ɨ nyaj huaꞌapuacajretze cɨn tyajaꞌamuayuꞌuseꞌe. Ayaa nu cheꞌeta nyanaꞌa nyaɨjna cɨmeꞌe ɨ tɨ huaꞌapua, caꞌanijraꞌa nu cɨn amuataꞌaca sej si seyan tzaahuatiꞌiraꞌa cɨn tyuꞌumuaꞌati saɨjna jetze ɨ nyaj cɨn neyan amuataꞌaca saj raꞌutamuaꞌaree aꞌij mej tyuꞌutaxajtacaꞌa aɨme ɨ maj Dioj jetze maꞌacan tiꞌixaxaꞌataꞌa, sataꞌaj seyan cheꞌeta sanaꞌa raꞌutamuaꞌaree ɨ nyuucari ɨ tɨ cɨn tyajamuaataij aɨjna ɨ tavastaraꞌa tɨ ajta aɨn pueen aɨjna tɨ amueꞌiratuaasin. Ai pu aɨn pueen ɨ nyuucari tɨ aɨn ayan tiraatyajtuaa itejmi jemi tyej ti teyan tyajamuaataꞌixaateꞌen muejmi.
\p
\v 3 Ayaa xu ramuaꞌaree tɨ ayan teꞌeme ajna xɨcajraꞌan jetze tɨ jetzen nain teꞌentipuaꞌari. Aɨ mu huataseijreꞌesin aɨme ɨ mej amuaꞌaxaahuariꞌi mej mi raꞌaxaahuariꞌira ɨ nyuucari tɨ tejmi jemi raatyajtuaa. Ayaa mu maɨjna cɨn áꞌujhuaꞌanyaꞌa muaꞌajuꞌun maj meyan raꞌastijraꞌa aɨjna tɨ ayan tihuaꞌamitejteꞌe tɨj naꞌa aꞌij tɨ tihuaꞌaraanajchi tɨ aꞌij puaꞌa een.
\p
\v 4 Ayaa mu tiꞌixaata muaꞌajuꞌun tɨcɨn: “Ai taꞌuj huarɨj aɨjna ɨ tɨ cɨn Dioj ayan tyaꞌataujratziiriꞌi tɨ nuꞌu ya huataseijreꞌesin. Tij cai capu ayan tyajaꞌureꞌenyejsin aꞌini aucheꞌe pu ayan cheꞌeta naꞌa seijreꞌe tɨj ajta ayan seijraꞌa aꞌayeꞌi tɨj naꞌa aɨjna xɨcajraꞌan mej jetzen huacuii ɨ tavaujsimuaꞌacɨꞌɨ tɨj naꞌa ajta ijii. Ayaa pu cheꞌeta naꞌa aucheꞌe seijreꞌe tɨj ajta seijraꞌacaa ajna tɨꞌɨj Dioj ayan raatyataahuacaꞌa ɨ chaanaca.”
\p
\v 5 Ayaa mu een cɨn meyan tiꞌixa maɨjna cɨmeꞌe maj meyan ruxéꞌeviꞌiraꞌa cɨn tauraꞌaca meyan yáꞌuhuaꞌaxɨn tɨ jajcua ɨmɨ Dioj ayan runyuuca cɨn tyuꞌutaijtacaꞌa tɨ ayan huataseijreꞌen aɨjna ɨ tajapua. Ajta aɨn ɨ chaanaca, ayaa pu tyuꞌutyataavijhuacaꞌa tɨꞌij ayan ajnyen a aataꞌa. Ajta aɨn tɨ japuan seijreꞌe, ayaa pu ajta aɨjna cɨn ruuri aꞌayeꞌi aɨjna cɨmeꞌe ɨ jaj.
\p
\v 6 Ajta aɨme ɨ maj jajcua ɨmɨ japuan huachaatɨmaꞌacaa ɨ chaanaca japua, aɨ mu huaꞌujpuaꞌarixɨ maɨjna cɨmeꞌe tɨ aɨn jaj ayan huatamɨꞌɨyacaꞌa, ajta huaꞌujamɨste.
\p
\v 7 Ma ajta ijii, ayaa pu tiꞌijcɨꞌɨti aɨjna ɨ tajapua tɨ ijii seijreꞌe, ajta aɨjna ɨ chaanaca ɨ tyaj yan japuan seijreꞌe i tyaj ijii huatyaɨte, Dioj pu ayan rachaꞌɨ tɨ ij ayan raatyataira. Ayaa pu ari raaxaꞌapɨꞌɨntare tɨ ayan huarɨni ajna xɨcajraꞌan jetze tɨ jetzen huaꞌaxɨjteꞌen ɨ runyuuca cɨmeꞌe, ajta huáꞌapuaꞌariteꞌen aɨme ɨ tyaɨte ɨ maj cai aꞌatzu raꞌastijreꞌe.
\p
\v 8 Sataꞌaj cai seyan tiyáꞌuhuaꞌaxɨn, tɨ seij xɨcaj ayan cheꞌeta naꞌa tiꞌitej ɨ Dioj jemi tɨj ajta tiꞌitej aꞌachu cumu sei viꞌiraꞌa ninyeꞌiraꞌa. Ajta, sei viꞌiraꞌa ninyeꞌiraꞌa ayan cheꞌeta naꞌa tiꞌitej ɨ Dioj jemi tɨj sei xɨcajraꞌa.
\v 9 Tɨ puaꞌa Dioj ayan cai caꞌanacan aráurasten aɨjna cɨmeꞌe ɨ tɨ cɨn tyaꞌataujratziiriꞌi, capu ayan huataujmuaꞌa tɨ cai aꞌanaj aɨjna cɨn aráurasten aꞌij mej tiꞌimuaꞌatze ɨ seica silu tyamuaꞌa pu ayan teꞌeviicueꞌi muejmi jemi aɨjna cɨmeꞌe tɨ cai raxeꞌeveꞌe tɨ aꞌatɨ ayan aꞌuveti. Capu xaa nyaꞌu ayan raxeꞌeveꞌe silu ayaa pu raxeꞌeveꞌe maj naimiꞌi meyan huataujtuiireꞌen ɨ jemin maɨjna cɨmeꞌe maj saɨque tyuꞌumuaꞌati mej mi cai cheꞌe aꞌij puaꞌa rɨjca.
\p
\v 10 Ma ajta, ayaa pu cheꞌeta naꞌa tyajaꞌureꞌenyejsin ajna xɨcajraꞌan jetze tɨ jetzen huataseijreꞌesin ɨ tavastaraꞌa tɨj ajta nahuaꞌari ayan aviitzi cɨn huataseijreꞌen ɨ tɨcaꞌari tzajtaꞌa. Ajta aɨn ɨ tajapua, ayaa pu huatanamuajreꞌesin tɨꞌɨj antipuaꞌare. Caꞌanin pu cɨn tyuꞌutátziꞌiti. Ajta tɨj naꞌa tɨ ayan tyuꞌutaavijhuacaꞌa, aɨ pu ayan huataujtuꞌisin aɨjna cɨmeꞌe tɨ rɨꞌɨ huatyataasin. Ajta aɨjna ɨ chaanaca, ajta nain tɨj naꞌa japuan tiꞌiseijreꞌe u tɨ tyuꞌutaavijhuacaꞌa, naijmiꞌi tɨj naꞌa ayan raatyataira.
\p
\v 11 Aꞌini nain pu ayan huataujtuꞌisin, ayaa pu tyuꞌujxeꞌeveꞌe sej seyan rɨꞌɨ titetyújchaɨca, sej si rɨꞌɨ tiꞌiteseijraꞌa ɨ Dioj jemi nain cɨmeꞌe aꞌij saj rɨcɨ, sej si sajta nain cɨn raꞌaraꞌastijreꞌen ɨ Dioj.
\v 12 Sataꞌaj seyan rahuauca, sajta seyan aꞌujcaꞌanyaacan cɨn tiꞌijchueꞌevaꞌa tɨ ayan tyajaꞌureꞌenyen ajna xɨcajraꞌan jetze tɨ jetzen Dioj teꞌentipuaꞌariteꞌesin. Ayaa pu aɨjna cɨn huataujtuꞌisin aɨjna ɨ tajapua aɨjna cɨmeꞌe tɨ taij raatyataira. Ajta aɨjna tɨ cɨn nain tyuꞌutaavijhuacaꞌa tɨj naꞌa tɨ tiꞌiseijreꞌe, aɨ pu ajta huataujtuꞌisin aɨjna cɨmeꞌe tɨ rɨꞌɨ tiraatyátaira.
\p
\v 13 Me tyajta ityan, aꞌini aɨ pu aɨjna cɨn tyaꞌataujratziiriꞌi tɨ ayan huarɨni, aɨj tu cɨn teyan rachuꞌeveꞌe seij ɨ tajapua tɨ jajcua, ajta seij ɨ chaanaca tɨ ajta jajcua aꞌu tɨ eꞌeséiraꞌa aꞌame aɨjna tɨ urareꞌenyaꞌacan cɨn seijreꞌe matɨj manaꞌa maun seiraꞌa muaꞌajuꞌun.
\s Ɨ nyuucari tɨ cɨn raꞌantipuaꞌari
\p
\v 14 Aɨj xu cɨn seyan huarɨni, mɨ nyaj aꞌamuaxeꞌeveꞌe, aꞌini ayaa xu seri rachuꞌeveꞌe tɨ ayan tyajaꞌureꞌenyejsin. Sataꞌaj seyan tityaatyaujcaꞌanyen sej seyan eenyeꞌequeꞌen seijraꞌa ɨ jemin saj tyamuaꞌa naa ruꞌihuaamuaꞌatan, sej si cai tiꞌitɨ cɨn aꞌaturaaca, tɨ ij aɨn Dioj cai tiꞌitɨ cɨn aꞌamua jetze tyaꞌujpuaꞌariteꞌen.
\v 15 Sataꞌaj saɨjna jetze tyuꞌumuaꞌati tɨ Dioj ayan amueꞌiratuaasin aɨjna cɨmeꞌe tɨ raayɨꞌɨtɨ tɨ tyaꞌuteviicueꞌi muejmi jemi.
\p Ajta aɨn ɨ taꞌihuaaraꞌa ɨ tyaj raxeꞌeveꞌe, aɨjna ɨ Pablo, Dioj pu ayan raataꞌa tɨ yauꞌeitaa aꞌaraꞌani tyamuaꞌa naa. Aɨ pu ayan cheꞌeta naꞌa tyajamuaatayuꞌuse nain cɨmeꞌe tyatɨj ityan.
\v 16 Ajta aɨjna jetze tɨ aɨn raꞌuteyuꞌuxacaꞌa, aɨjna jetze ayan namuajreꞌe seica ɨ nyuucari tɨ ayan muareꞌeri tɨ aꞌatɨ ayan yauꞌeitaa aꞌaraꞌani. Ajta seica ɨ tyaɨte ɨ maj cai tiꞌitɨ uꞌumuaꞌaree, ɨ maj majta cai xɨ teꞌeviicueꞌi ɨ maj cɨn tyaꞌatzaahuateꞌe, ayaa mu tiꞌiteseꞌe mej mi meyan saɨque tiyauꞌeitaa muaꞌaraꞌani, mej mi majta tihuéꞌitiira aꞌij tɨ cai ayan tiraavijteꞌe aɨjna tɨ Pablo raꞌuteyuꞌuxacaꞌa, ajta aɨjna tɨ teꞌeyuꞌusiꞌi aɨjna jetze ɨ yuꞌuxari tɨ Dioj ayan raatyajtuaa itejmi jemi. Tɨ puaꞌa meyan maɨjna cɨn huarɨni, ayaa pu tihuaꞌacɨꞌɨti maj antyujpuaꞌariteꞌen.
\p
\v 17 Aꞌini xuꞌuri caꞌanijraꞌa ramuaꞌaree, muan mɨ nyaj aꞌamuaxeꞌeveꞌe, rɨꞌɨ xuꞌu muan tɨ ij cai aꞌatɨ ayan amuaataꞌan sej si seyan cheꞌeta sanaꞌa caujxaahuatan ɨ Dioj jemi matɨj aɨme ɨ maj cai tiꞌitɨ aꞌastijreꞌe. Rɨꞌɨ xuꞌu sej si cai saɨjna cɨn tiyáꞌuhuaꞌaxɨn ɨ sej seyan teꞌeviicueꞌi saɨjna cɨmeꞌe saj huaꞌastijreꞌe saɨme.
\p
\v 18 Ma sajta muan, sataꞌaj seyan huaujnaijmiꞌireꞌen ɨ rutzajtaꞌa saɨjna cɨmeꞌe tɨ aɨn tavastaraꞌa rɨꞌɨ tyajamuataꞌaca, aɨjna tɨ ajta amueꞌirajtuaa, aɨjna ɨ Jesús tɨ ajta Cɨriistuꞌu pueen. Sataꞌaj seyan cheꞌeta sanaꞌa huaujnaijmiꞌireꞌen saɨjna cɨmeꞌe saj ramuaꞌate. Ticheꞌe rɨꞌɨ tiraatyajtuaani ijii, tyajta tɨj naꞌa rusen cɨmeꞌe. Cheꞌe ayan tyajaꞌureꞌenyen. Yaa puꞌu. Puꞌuri antipuaꞌaracaꞌa.