\id 1JN
\h 1 San Juan
\toc1 1 San Juan
\mt1 Ɨ yuꞌuxari tɨ anacai raꞌuyuꞌuxacaꞌa aɨjna ɨ San Juan
\c 1
\s Ɨ nyuucari tɨ ruurican eꞌihuatyajtuaani
\p
\v 1 Cɨmeꞌen aɨjna ɨ Jesús tɨ Cɨriistuꞌu pueen. Aɨ pu jajcua ɨmɨ seijraꞌacaa tɨj naꞌa tɨ yu eꞌireꞌenye. Aɨ pu ajta aɨn pueen ɨ tyej raanamuajriꞌi aꞌij tɨ yeꞌi tyuꞌutaxajtacaꞌa. Tyan tu tyajta tajɨꞌɨ cɨn raaseij, tyajta teyan raamuáꞌa aꞌatɨ tɨ puéenyaꞌa, tyajta teyan tamuajcaꞌa cɨn raꞌajtamuárej tyaɨjna tɨ nyuucari pueen tɨ ajta ruurican eꞌihuatyajtuaani.
\v 2 Ajta, aɨ pu huataseijre aɨjna tɨ ruurican eꞌihuatyajtuaani. Tyajta ityan, tyan tu raaseij. Tyajta teyan tiraatyáxajta, tyajta teyan tyajaꞌamueꞌixaateꞌe tyaɨjna tɨ rusen cɨn iꞌi ruuri, tɨ ajta jemin seijreꞌe ɨ rutaata ɨ Dioj. Ajta, aɨ pu tejmi jemi huataseijre.
\p
\v 3 Aɨj tu tyajta teyan tyajaꞌamueꞌixaateꞌe tyaɨjna ɨ tyaj raaseij, tyajta ɨ tyaj raanamuajriꞌi, sej si sajta muan seyan cheꞌeta sanaꞌa tyuꞌumuaꞌati tyatɨj ityan tiꞌimuaꞌatze tyej ti naijmiꞌi taꞌihuaamuaꞌa taꞌaraꞌani. Ee xaa nyaꞌu, tyan tu jemin seijreꞌe tyaɨjna ɨ Dioj jemi ɨ tyaj rajyaꞌupua. Tyan tu tyajta teyan cheꞌeta tyanaꞌa jemin seijreꞌe tyaɨjna jemi ɨ tɨ yaujraꞌan pueen ɨ Dioj, aɨjna ɨ Jesús, ɨ tɨ ajta Cɨriistuꞌu pueen.
\v 4 Ayaa tu een cɨn teyan tyajaꞌamuayuꞌuseꞌe tɨ ij ayan raanaijmiꞌireꞌen ɨ saj cɨn rutyamuaꞌaveꞌe.
\s Dioj pu tejmi jemi seijreꞌe tɨ ayan cheꞌeta naꞌa een tɨj tatzari
\p
\v 5 Ai pu aɨn pueen ɨ nyuucari ɨ tɨ Cɨriistuꞌu ayan titaataꞌixaa tɨ nuꞌu aɨn Dioj ayan tejmi jemi seijreꞌe tɨj tatzari tɨ ayan tatatzaviꞌi ɨ ta tzajtaꞌa, ajta nuꞌu capu aꞌatzu jemin seijreꞌe tiꞌitɨ tɨ aꞌij puaꞌa een, tɨ ayan cheꞌeta naꞌa een tɨj tɨcaꞌari.
\v 6 Tɨ puaꞌa teyan tyaɨjna jetzen teyan me títyajáuhuaanyeꞌen tyaráꞌantixáata tityaajuꞌun aꞌu tɨ aꞌutɨcaꞌa, tyajta teyan yee tyej teyan Dioj jemi seijreꞌe, catu tzaahuatiꞌiraꞌa cɨn teyan tiꞌititachaꞌɨ silu tetiꞌihueꞌitaca tuꞌu.
\p
\v 7 Me tyajta ityan, tɨ puaꞌa teyan cheꞌeta tyanaꞌa tyaɨjna jetze tityaajuꞌun, aɨ pu rɨꞌɨ taruure tyej ti teyan tyamuaꞌa naa taꞌihuaamuaꞌa taꞌaraꞌani. Ajta, aɨjna tɨ yaujraꞌan pueen aɨjna ɨ Jesús, aɨ pu ajta taꞌariꞌira nain tɨj naꞌa ɨ tyaj cɨn atyáturaavaca ɨ Dioj jemi. Aɨ pu ayan taruure aɨjna cɨmeꞌe tɨ ari huamɨꞌɨ ta jetze maꞌacan. Aɨj pu cɨn ayan tiraꞌiraaxɨre ɨ ruxuureꞌe.
\p
\v 8 Tɨ puaꞌa teyan tiraataxaj yee tyaj cai tiꞌitɨ cɨn atyáturaavaca ɨ Dioj jemi, ayaa tu tajɨɨmuaꞌa tyanaꞌa tacuanamua. Ajta, aɨjna ɨ nyuucari tɨ ayan tiꞌayajna, capu tejmi jemi seijreꞌe.
\v 9 Me tyajta ityan, tɨ puaꞌa teyan tiraataxaj ɨ tyaj cɨn autyajturaa ɨ Dioj jemi, ayaa tu tiꞌijmuaꞌaree tɨ Dioj araurastejsin aɨjna cɨmeꞌe tɨ cɨn tyaꞌataujratziiriꞌi tɨ nuꞌu ayan titaatauuniꞌi nain cɨmeꞌe ɨ tyaj cɨn autyajturaa ɨ jemin. Tyan tu tyajta teyan tiꞌijmuaꞌaree tɨ ayan tiraavijteꞌe tɨ Dioj ayan titaatauuniꞌi.
\p
\v 10 Tɨ puaꞌa teyan tiraataxaj yee tyaj cai aꞌanaj tiꞌitɨj cɨn autyajturaa ɨ Dioj jemi, ayaa pu huataujmuaꞌa aɨjna ɨ tyej teri teyan tyaɨjna cɨn raatamuáꞌa ɨ Dioj tɨ nuꞌu tiꞌihueꞌita. Ajta aɨjna ɨ nyuucari tɨ ayan tejmi jemi raatyajtuaa, capu xaa nyaꞌu aꞌatzu tejmi jemi seijreꞌe.
\c 2
\s Ajta aɨjna ɨ Cɨriistuꞌu, aɨ pu tiꞌixaꞌapɨꞌɨntareꞌe itejmi jetze maꞌacan
\p
\v 1 Mɨ sej tyaamua ijii, mɨ nyaj huapɨꞌɨ aꞌamuaxeꞌeveꞌe, ayaa nu een cɨn tyajaꞌamuayuꞌuseꞌe sej si cai tiꞌitɨ cɨn autyaturan ɨ Dioj jemi. Ma ajta, tɨ puaꞌa aꞌatɨ ayan tiꞌitɨ cɨn tyautyáturan ɨ Dioj jemi, saɨj pu tayaꞌupua jemi seijreꞌe tɨ tajetze maꞌacan tiꞌixaꞌapɨꞌɨntareꞌe. Ai pu aɨn pueen aɨjna ɨ Jesús tɨ ajta Cɨriistuꞌu pueen. Aɨ pu urareꞌenyaꞌacan cɨn seijreꞌe ɨ Dioj jemi.
\v 2 Cɨriistuꞌu pu ajta tajetze maꞌacan rɨꞌɨ tiraataꞌa ɨ Dioj tɨ ij cai pueijtzi taataꞌan aɨjna cɨmeꞌe ɨ tyaj cɨn autyajturaa ɨ jemin. Ayaa pu ajta cheꞌeta naꞌa huaꞌa japua huanyúu naijmiꞌica aꞌachu maj puaꞌamua ɨ mej yan huachaatɨme ɨ chaanaca japua.
\p
\v 3 Tɨ puaꞌa teyan tiraꞌastijraꞌa aꞌij tɨ aɨn titaataij, ayaa tu aɨjna cɨn teyan tiꞌijmuaꞌaree tyaj tzaahuatiꞌiraꞌa cɨn teyan tiꞌijmuaꞌate.
\v 4 Tɨ puaꞌa cai aꞌatɨ raꞌastijraꞌa aꞌij tɨ titaataij, ajta tɨ puaꞌa aɨjna ɨ aꞌatɨ ayan tyuꞌutaxaj yee tɨ ayan tiꞌijmuaꞌate aɨjna ɨ Jesús, aɨjna ɨ aꞌatɨ, ayaa pu tiꞌihueꞌitaca. Ajta, capu tzaahuatiꞌiraꞌa cɨn tiꞌityujchaꞌɨ.
\p
\v 5 Ma ajta, tɨ puaꞌa aɨjna ɨ aꞌatɨ ayan tiraꞌaraꞌasten aijna i nyuucari ɨ tɨ tejmi jemi huatyatuꞌiihuacaꞌa, ayaa tu tyaɨjna cɨn tiꞌijmuaꞌaree tɨ ayan raanaijmiꞌire ɨ tzajtaꞌan aɨjna ɨ aꞌatɨ tɨ aɨn tzaahuatiꞌiraꞌa cɨn raxeꞌeveꞌe ɨ Dioj nain cɨmeꞌe. Ayaa tu tyajta tyaɨjna cɨn tiꞌijmuaꞌaree tyej teyan tyaɨjna jemi seijreꞌe ɨ Dioj.
\v 6 Ajta tɨ puaꞌa aꞌatɨ ayan tyaꞌujseijrata tɨ aɨ pu mijmu ayan urareꞌenyaꞌacan cɨn seijreꞌe jemin ɨ Dioj, ayaa pu ajta tyuꞌujxeꞌeveꞌe tɨ aɨn aꞌatɨ ayan cheꞌeta naꞌa rɨꞌɨ tiꞌityujchaꞌɨ tɨj ajta rɨꞌɨ tiꞌityújchaɨcaꞌa aɨjna ɨ Jesús tɨ Cɨriistuꞌu pueen.
\s Ajta aɨjna ɨ nyuucari tɨ jajcuacan cɨn tiꞌitaijteꞌe
\p
\v 7 Mɨ nyaj aꞌamuaxeꞌeveꞌe, canu jajcuacan cɨn tyajaꞌamuayuꞌuseꞌe ɨ tɨ cɨn titaataij ɨ Dioj, silu aɨj nu cɨn tyajaꞌamuayuꞌuseꞌe nyaɨjna ɨ nyuucari tɨ jajcua ɨmɨ Dioj ayan aɨjna cɨn titaataij tɨj naꞌa tɨ jajcua ɨmɨ seijraꞌacaa muejmi jemi, tɨj naꞌa tɨ yu eꞌireꞌenye. Ajta aɨjna tɨ jajcua ɨmɨ cɨn titaataij ɨ Dioj, ai pu aɨn pueen ɨ nyuucari ɨ saj raanamuajriꞌi.
\p
\v 8 Me nyajta inyaa, nyajta nu jajcuacan cɨn tyajaꞌamuayuꞌuseꞌe tɨ ayan tiꞌayajna aɨjna jemi, ajta muejmi jemi, aꞌini puꞌuri teꞌentipuaꞌari aɨjna tɨ aɨn eꞌeseijreꞌe aꞌu tɨ aꞌutɨcaꞌa. Ajta puꞌuri autyejche tɨ huatatátzaveꞌen aɨjna tɨ tzaahuatiꞌiraꞌa cɨn tatatzaviꞌi.
\p
\v 9 Tɨ puaꞌa aꞌatɨ ayan tyuꞌujseijrata tɨ aɨn mijmu ari an áꞌumej aꞌu tɨ áꞌunyeeriꞌi, ajta ɨ aꞌatɨ, aɨ pu ruꞌihuaaraꞌa tichaɨreꞌe, aɨ pu ajta aucheꞌe an aume aꞌu tɨ aꞌutɨcaꞌa, aꞌu tɨ cai aꞌatatzaveꞌe.
\v 10 Ajta aɨn ɨ aꞌatɨ tɨ raxeꞌeveꞌe ɨ ruꞌihuaaraꞌa, aɨ pu xaa aun aume aꞌu tɨ aꞌatatzaveꞌe ɨ tavastaraꞌa. Ajta capu tiꞌitɨ cɨn aꞌaturaa ɨ Dioj jemi.
\p
\v 11 Ma ajta aɨn ɨ tɨ rajchaɨreꞌe ɨ ruꞌihuaaraꞌa, aɨ pu aun eꞌeseijreꞌe aꞌu tɨ aꞌutɨcaꞌa. Aɨ pu xaa auj aume aꞌu tɨ aꞌutɨcaꞌa, ajta capu ramuaꞌaree aꞌu tɨ aꞌuméj aꞌini tɨcaꞌari pu ayan raaruu tɨ ij aracun.
\s Tyaj nuꞌu cai tiꞌixeꞌevaꞌa aɨjna tɨ yan seijreꞌe ɨ chaanaca japua
\p
\v 12 Ayaa nu een cɨn tyajaꞌamuayuꞌuseꞌe muejmi mɨ sej tyaamua ijii, aꞌini Dioj pu ayan tyajamuaatauuniꞌiriꞌi ɨ saj cɨn autyajturaa ɨ jemin aɨjna cɨmeꞌe aꞌij tɨ huarɨj aɨjna ɨ Jesús.
\v 13 Sajta muan, mɨ saj huaꞌavaujsimuaꞌa pueen, ayaa nu een cɨn tyajaꞌamuayuꞌuseꞌe aꞌini muan xu ramuaꞌate saɨjna tɨj naꞌa tɨ jajcua ɨmɨ seijraꞌacaa tɨj naꞌa tɨ yu eꞌireꞌenye. Sajta muan, mɨ saj tyaamua, ayaa nu een cɨn tyajaꞌamuayuꞌuseꞌe aꞌini muan xu seri raꞌantimueꞌitɨ saɨjna ɨ xaijnyuꞌucari tɨ aꞌij puaꞌa een.
\p Sajta muan, mɨ saj huaꞌayaujmuaꞌa pueen, ayaa nu een cɨn tyajaꞌamuayuꞌuseꞌe aꞌini muan xu ramuaꞌate saɨjna ɨ tyaj rajyaꞌupua.
\v 14 Ayaa nu nyajta een cɨn tyajaꞌamuayuꞌuseꞌe mɨ saj huaꞌavaꞌujsimuaꞌa pueen aꞌini muan xu seri ramuaꞌate saɨjna tɨ jajcua ɨmɨ seijraꞌacaa tɨj naꞌa tɨ yu eꞌireꞌenye. Ayaa nu nyajta een cɨn tyajaꞌamuayuꞌuseꞌe mɨ saj tyaamua aꞌini muan xu tyamuaꞌa naa teꞌeviicueꞌi. Ajta aɨjna ɨ nyuucari tɨ Dioj ayan tejmi jemi raatyajtuaa, aɨ pu muejmi jemi seijreꞌe aꞌini muan xu raꞌastijreꞌe. Muan xu sajta seri raꞌantimueꞌitɨ saɨjna ɨ xaijnyuꞌucari tɨ aꞌij puaꞌa een.
\p
\v 15 Ayaa nu tyajaꞌamueijcateꞌe saj cai seyan tihuaꞌɨjchu aɨme ɨ maj yan japuan huachaatɨme ɨ chaanaca japua. Sataꞌaj cai sajta seyan tiꞌijxeꞌevaꞌa tɨj naꞌa ɨ tɨ tiꞌiseijreꞌe iiyan chaanaca japua. Aꞌatɨ tɨ naꞌa tɨ raxeꞌeveꞌe huaꞌayeꞌira ɨ mej yan huachaatɨme iiyan chaanaca japua, capu ajta cuiꞌi raxeꞌeveꞌe ɨ Dioj.
\p
\v 16 Ayaa pu xaa nyaꞌu tiꞌayajna aꞌini tɨj naꞌa tɨ ayan tiꞌiseijreꞌe iiyan chaanaca japua, yan pu maꞌacan. Tɨj naꞌa ɨ mej meyan jetzen tityaꞌujcaꞌane aꞌɨj tɨ tzajtaꞌan tasiseiri, ajta tɨj naꞌa ɨ mej raseij tɨ caꞌanijraꞌa huaꞌataꞌaca mej mi maɨjna cɨmeꞌen tiꞌinyacuaꞌatzen, ajta naijmiꞌi tɨj naꞌa ɨ maj cɨmeꞌen áꞌujtzaahuateꞌe, nain tɨj naꞌa tɨ ayan een, aɨj pu jetze mej eꞌeveꞌeme ɨ huaꞌamuaꞌatziiraꞌa ɨ maj yan seijreꞌe iiyan chaanaca japua. Capu Dioj jemi eꞌemaꞌacan.
\v 17 Ajta tɨj naꞌa tɨ huaꞌa jetze ruxeꞌeveꞌe aɨme ɨ mej yan seijreꞌe iiyan chaanaca japua, ajta tɨj naꞌa ɨ mej jetzen tityaꞌujcaꞌane, aɨ pu teꞌentipuaꞌariteꞌesin.
\p Ma ajta aɨjna ɨ tɨ ayan tiraꞌastijreꞌe aꞌij tɨ tiꞌijxeꞌeveꞌe ɨ Dioj, aɨ pu ruuri huatyaturaasin ɨ jemin tɨj naꞌa rusen cɨmeꞌe.
\s Aɨjna tɨ nuꞌu ayan tiꞌayajna, ajta aɨjna tɨ nuꞌu hueꞌitzi pueen
\p
\v 18 Mɨ sej tyaamua pueen ijii, puꞌuri tɨn tyajaꞌureꞌenyejsin ajna xɨcajraꞌa tɨ jetzen nain teꞌentipuaꞌariteꞌesin. Muan xu sajta seri raanamuajriꞌi tɨ aɨn ayan huataseijreꞌesin aɨjna tɨ rajchaɨreꞌe ɨ Cɨriistuꞌu. Ee xaa nyaꞌu, ayaa pu tiꞌayajna maj meri muiꞌitɨ huataseijre ɨ maj rajchaɨreꞌe ɨ Cɨriistuꞌu. Aɨj tu cɨn teyan tiꞌijmuaꞌaree tɨ ari tɨmuaꞌa tyajaꞌureꞌenyejsin aɨjna xɨcajraꞌa jetze tɨ nain teꞌentipuaꞌariteꞌesin.
\p
\v 19 Aɨ mu ta jemi tihuii. Ma majta, camu tajetze ajtyamaꞌacantacaꞌa. Tɨ puaꞌa meyan tajetze ajtyamaꞌacantacheꞌe, aɨ mu tajemi huatyaturancheꞌe. Ma majta, ayaa mu een cɨn ajtacɨ́j tɨ ij ayan huataseijreꞌen maj cai naijmiꞌi tajetze ajtyamaꞌacan.
\p
\v 20 Ajta aɨn ɨ xaijnyuꞌucaraꞌaraꞌan ɨ Dioj, aɨ pu ari huatyajturaa muejmi jemi, ajta aɨ pu ayan tyajamuaataꞌa ɨ muaꞌatziiraꞌa sej si nain tzaahuatiꞌiraꞌa cɨn tyuꞌumuaꞌati.
\p
\v 21 Canu nyaɨjna cɨn tyajaꞌamuayuꞌuseꞌe nyaɨjna cɨmeꞌe saj cai tzaahuatiꞌiraꞌa cɨn ramuaꞌaree saɨjna tɨ ayan tiꞌayajna silu nyaɨjna cɨmeꞌe saj xaa seyan ramuaꞌaree. Ajta tiꞌitɨ tɨ ayan hueꞌitzi pueen, capu aɨjna jetze airáninyei aɨjna jetze tɨ tzaahuatiꞌiraꞌa cɨn ayan tiꞌayajna.
\p
\v 22 ¿Ni sacai ramuaꞌaree aꞌatɨ tɨ aɨn pueen tɨ tiꞌihueꞌitaca? Ee xaa, ai pu aɨn pueen ɨ tɨ ayan tiꞌixa yee tɨ cai Jesús aɨn pueen ɨ Cɨriistuꞌu. Ai pu aɨn pueen ɨ tɨ rajchaɨreꞌe aɨjna ɨ Cɨriistuꞌu. Aɨjna ɨ aꞌatɨ tɨ ayan cheꞌeta naꞌa ma rúujɨpua aɨjna ɨ tyaj rajyaꞌupua, aɨ pu ajta ma rúujɨpua aɨn tɨ yaujraꞌan pueen ɨ Dioj.
\v 23 Aꞌatɨ tɨ naꞌa tɨ ma ruuraini aɨjna tɨ yaujraꞌan pueen, capu ajta rɨꞌɨ tiꞌiseijreꞌe aɨjna jemi ɨ tyaj rajyaꞌupua. Ma ajta, aɨn tɨ ayan tiraataxaj yee Jesús pu aɨn pueen aɨjna tɨ yaujraꞌan pueen ɨ Dioj, tɨ puaꞌa ayan huarɨni, aɨ pu ajta rɨꞌɨ seijraꞌa aꞌame ɨ Dioj jemi.
\p
\v 24 Sajta muan, ayaa xu huarɨni. Cheꞌe aɨn nyuucari ɨ saj jajcua ɨmɨ raanamuajriꞌi, cheꞌe ayan muejmi jemi huatyaturan. Ajta aɨjna ɨ nyuucari ɨ saj jajcua ɨmɨ raanamuajriꞌi, tɨ puaꞌa ayan muejmi jemi huatyaturan, ayaa xu sajta muan naimiꞌi rɨꞌɨ tiꞌityeseiraꞌa xaꞌajuꞌun saɨjna jemi tɨ yaujraꞌan pueen ɨ Dioj, sajta saɨjna jemi ɨ tyaj rajyaꞌupua.
\v 25 Ajta ai pu aɨn pueen ɨ tɨ cɨn tyaꞌataujratziiriꞌi itejmi jemi tɨ ayan titáacɨꞌɨti tej teyan rusen cɨn ruuri taꞌaraꞌani ɨ jemin.
\p
\v 26 Ayaa nu tyajaꞌamuayuꞌuseꞌe nyaɨme cɨmeꞌen ɨ mej meyan tyajaꞌamuahueꞌitzeꞌe.
\v 27 Ma sajta muan, aucheꞌe pu muejmi jemi seijreꞌe aɨjna ɨ muaꞌatziiraꞌa tɨ aɨn xaijnyuꞌucaraꞌaraꞌan ɨ Dioj ayan tyajamuaataꞌa. Aɨj pu cɨn cai ayan tyuꞌujxeꞌeveꞌe tɨ aꞌatɨ ayan tyajamueꞌitii aꞌini aɨjna ɨ muaꞌatziiraꞌa, ayaa pu tyajaꞌamueꞌitii nain cɨmeꞌe. Aɨ pu ajta tzaahuatiꞌiraꞌa cɨn tyajaꞌamueꞌitii, ajta cai tyajaꞌamuahueꞌitzeꞌe. Sataꞌaj seyan cheꞌeta sanaꞌa huarɨni aꞌij tɨ ari tyajamuaataꞌitiiriꞌi, sataꞌaj naijmiꞌi huatyaturan ɨ jemin.
\p
\v 28 Ajta iꞌi, mɨ sej yaujmuaꞌameꞌen pueen, sataꞌaj seyan naimiꞌi huatyaturan ɨ jemin tej ti teyan aꞌatacaꞌanyaacan cɨn raꞌancureꞌeviꞌitɨn ajna xɨcajraꞌa tɨ jetzen huataseijreꞌesin. Sataꞌaj sajta seyan huarɨni tɨ ij cai taatatyeviꞌirasteꞌen ɨ jemin.
\v 29 Tɨ puaꞌa muan seri ramuaꞌareera tɨ urareꞌenyaꞌacan cɨn seijreꞌe ɨ Dioj, xuꞌuri sajta ramuaꞌaree tɨ ayan tiꞌayajna tɨ aꞌatɨ tɨ naꞌa tɨ ayan xaꞌapɨꞌɨn tiꞌityujchaꞌɨ, aɨjna ɨ aꞌatɨ, aɨ pu xaa aɨn Dioj jetze eiraanye.
\c 3
\s Ɨ maj yaujmuaꞌameꞌen pueen ɨ Dioj
\p
\v 1 Ee xaa nyaꞌu, sataꞌaj saɨjna jetze tyuꞌumuaꞌati tɨ aɨn ɨ tyaj rajyaꞌupua, ayan eihua huapɨꞌɨ taataxeꞌeve aꞌini aɨ pu xaa taateyaꞌupuatacaꞌa. Aɨj tu cɨn, tuꞌuri yaujmuaꞌameꞌen pueen ɨ Dioj. Aɨj mu cɨn cai tamuajte aɨme ɨ maj yan huachaatɨme ɨ chaanaca japua maɨjna cɨmeꞌe maj cai raamuáꞌa.
\v 2 Mɨ nyaj aꞌamuaxeꞌeveꞌe, tuꞌuri yaujmuaꞌameꞌen pueen ɨ Dioj. Ma ajta cai xɨ aꞌij amiteereꞌe aꞌij tyaj eenyaꞌa taꞌajuꞌun.
\p Me tyajta ityan, ayaa tu tiꞌijmuaꞌaree tɨ ayan tiꞌitacɨꞌɨti ajna xɨcajraꞌa jetze ɨ tɨ jetzen huataseijreꞌesin. Aɨ pu saɨque taruuren ya ta jetze tej ti teyan cheꞌeta tyanaꞌa eenyaꞌa taꞌaraꞌani tɨj ajta aɨn eenyaꞌa seijreꞌe u tajapua aꞌini ajna tu raseijran tyaɨjna aꞌij tɨ een.
\v 3 Ajta aꞌatɨ tɨ naꞌa tɨ ayan tiꞌijchuꞌeveꞌe aɨjna tɨ ayan tiraacɨꞌɨti, ayaa pu aɨjna cɨn rɨꞌɨ ruruuren tɨ ayan cheꞌeta naꞌa urareꞌenyaꞌacan cɨn seiraꞌa aꞌaraꞌani ɨ rutzajtaꞌa tɨj ajta aɨjna ɨ Jesús tɨ ajta Cɨriistuꞌu pueen.
\p
\v 4 Ma ajta, aꞌatɨ tɨ naꞌa tɨ tiꞌitɨ cɨn atyaꞌɨtzaꞌara ɨ Dioj jemi, aɨ pu ajta raatyaxaahuata aɨjna ɨ nyuucari tɨ cɨn Dioj tieꞌijta. Ajta tɨj naꞌa ɨ maj cɨn atyaꞌɨtzaꞌara, ayaa pu seijreꞌe ɨ Dioj jemi tɨ ayan cheꞌeta naꞌa een ɨ maj cɨn raatyaxaahuata maɨjna ɨ nyuucari tɨ ajta cɨn Dioj tieꞌijta.
\p
\v 5 Ajta, xuꞌuri ramuaꞌaree tɨ ayan een cɨn huataseijre aɨjna ɨ Jesús tɨ ’ij ayan raꞌurauuna ɨ tyaj cɨn autyajturaa ɨ Dioj jemi. Ajta, capu aꞌatzu tiꞌitɨ cɨn atyaꞌɨtzaꞌara ɨ Dioj jemi aɨjna ɨ Jesús, tɨ ajta Cɨriistuꞌu pueen.
\v 6 Ajta, aꞌatɨ tɨ naꞌa tɨ Dioj jemi seijreꞌe capu ajta aꞌatura ɨ jemin. Ma ajta, aꞌatɨ tɨ naꞌa tɨ ayan tiꞌitɨ cɨn atyaꞌɨtzaꞌara ɨ Dioj jemi, aɨjna ɨ aꞌatɨ capuu xɨ yauꞌeitaa aꞌaraa aꞌij tɨ een aɨjna, capu ajta xɨɨ raamuáꞌa.
\p
\v 7 Mɨ sej tyaamua pueen ijii, caxu raataꞌacareꞌen tɨ aꞌatɨ ayan tyájáꞌamuacuanamua. Aꞌatɨ tɨ naꞌa tɨ ayan xaꞌapɨꞌɨn tiꞌityujchaꞌɨ, aɨ pu ayan cheꞌeta naꞌa urareꞌenyaꞌacan cɨn seijreꞌe ɨ Dioj jemi tɨj ajta aɨjna ɨ Jesús, tɨ ajta Cɨriistuꞌu pueen.
\p
\v 8 Ma ajta, aꞌatɨ tɨ naꞌa tɨ tiꞌitɨ cɨn tyeꞌetyaꞌɨtzaꞌara ɨ Dioj jemi, aɨ pu aɨjna jetze ajtyamaꞌacan ɨ tiyaaruꞌu, aꞌini aɨjna ɨ tiyaaruꞌu, ayaa pu tɨj naꞌa jajcua jɨmɨ tyaꞌutyejche tɨ ayan tyeꞌetyaꞌɨtzaꞌara tɨj naꞌa ɨ tɨꞌɨri ye eꞌireꞌenye. Ayaa pu een cɨn huataseijre aɨjna tɨ yaujraꞌan pueen ɨ Dioj tɨ ij raatyáuuna nain ɨ muáreꞌeriꞌiraꞌaraꞌan ɨ tiyaaruꞌu.
\p
\v 9 Capu cheꞌe atyaꞌɨtzaꞌara ɨ Dioj jemi aꞌatɨ tɨ naꞌa tɨ Dioj jetze airaanye. Capu cheꞌe tiꞌitɨj cɨn atyaꞌɨtzaꞌara aɨjna cɨmeꞌe tɨ jemin seijreꞌe aɨjna tɨ Dioj ayan raatyajtuaa. Capu rɨꞌɨri tɨ aɨn aꞌatɨ ayan tiꞌitɨ cɨn tyeꞌetyaꞌɨtzaꞌaraꞌan aꞌini aɨ pu Dioj jetze airaanye.
\p
\v 10 Ayaa pu aɨjna cɨn tyeꞌemiteereꞌe aꞌatyaɨn maj pueen ɨ yaujmuaꞌameꞌen ɨ Dioj, ajta aꞌatyaɨn maj pueen ɨ yaujmuaꞌameꞌen ɨ tiyaaruꞌu. Capu Dioj jetze airaanye aꞌatɨ tɨ cai xaꞌapɨꞌɨn tiꞌityujchaꞌɨ, tɨ ajta cai raxeꞌeveꞌe ɨ ruꞌihuaaraꞌa.
\s Tyaj nuꞌu huátaxeꞌeveꞌen seij tyajta seij
\p
\v 11 Ajta, ai pu aɨn pueen ɨ nyuucari tɨj naꞌa saj jajcua ɨmɨ raanamuajriꞌi tɨj naꞌa tɨ yu eꞌireꞌenye tɨ ayan tyuꞌujxeꞌeveꞌe tej teyan tityahuátaxeꞌeveꞌen seij tyajta seij.
\v 12 Tyej ti cai teyan huarɨni aꞌij tɨ tiꞌitɨ cɨn huarɨj aɨjna ɨ Caín tɨ aɨjna jetze airaanye tɨ aꞌij puaꞌa een. Ajta ayan tiraajeꞌica ɨ ruꞌihuaaraꞌa. ¿Ni sacai ramuaꞌaree aꞌij tɨ een cɨn raajeꞌica? Ayaa pu aɨjna cɨn tiraajeꞌica aɨjna cɨmeꞌe tɨ aꞌij puaꞌa tiꞌityújchaɨcaꞌa aɨjna. Ma ajta xaꞌapɨꞌɨn pu tiꞌityújchaɨcaꞌa aɨjna ɨ ihuaaraꞌaraꞌan.
\p
\v 13 Neꞌihuaamuaꞌa, caxu aꞌij tyájáꞌuseijra tɨ puaꞌa meyan tyajamuájchaɨraꞌa aɨme ɨ maj yan huachaatɨme iiyan chaanaca japua.
\v 14 Ayaa tu tyaɨjna cɨn tiꞌijmuaꞌaree tyaj cai cheꞌe mɨꞌɨchijta seijreꞌe aun ɨ Dioj jemi silu tuꞌuri teyan ruurican jemin huatyajturaa aɨjna cɨmeꞌe tyaj huaꞌaxeꞌeveꞌe tyaɨme ɨ taꞌihuaamuaꞌa.
\p Ma ajta, aꞌatɨ tɨ naꞌa tɨ cai raxeꞌeveꞌe ɨ ruꞌihuaaraꞌa, aɨ pu aucheꞌe ayan mɨꞌɨchijta seijreꞌe ɨ Dioj jemi.
\v 15 Ee xaa nyaꞌu, aɨjna ɨ aꞌatɨ tɨ rajchaɨreꞌe ɨ ruꞌihuaaraꞌa, ai pu aɨn pueen tɨ tiꞌityacuiꞌica. Sajta muan, xuꞌuri seyan tiꞌijmuaꞌaree tɨ cai rusen cɨn ruuri huatyaturaasin ɨ Dioj jemi aꞌatɨ tɨ naꞌa tɨ ayan tiꞌityacuiꞌica.
\v 16 Ayaa tu tyaɨjna cɨn tiꞌijmuaꞌaree aꞌij tɨ een, tɨ puaꞌa aꞌatɨ tzaahuatiꞌiraꞌa cɨn raxeꞌevaꞌa ɨ ruꞌihuaaraꞌa tyaɨjna cɨmeꞌe tɨ aɨn Jesús tɨ Cɨriistuꞌu pɨrɨcɨ, aɨ pu tajetze maꞌacan huamɨꞌɨ. Aɨj pu cɨn, ayan tyuꞌujxeꞌeveꞌe tej teyan cheꞌeta tyanaꞌa huaꞌa jetze maꞌacan huacuiꞌini ɨ taꞌihuaamuaꞌa.
\p
\v 17 Ma ajta, capu aꞌatɨ jemi seijreꞌe aɨjna tɨ cɨn Dioj taxeꞌeveꞌe tɨ puaꞌa ayan huarɨni. Tɨ puaꞌa aɨn aꞌatɨ ayan eihua huapɨꞌɨ tíꞌijchaꞌɨ ɨ maj cɨn huataujvaɨreꞌen iiyan chaanaca japua, tɨ puaꞌa ajta ayan raseijra tɨ aɨn ihuaaraꞌaraꞌan cai aꞌij tiꞌijviicueꞌi, ajta tɨ puaꞌa cai raꞌancuꞌuvajxɨꞌɨn tɨ ij tiꞌitɨ cɨn raatavaɨreꞌen, capu aꞌatzu jemin seijreꞌe aɨjna tɨ eihua tíꞌijchaꞌɨ aɨjna tɨ cɨn taxeꞌeveꞌe ɨ Dioj.
\p
\v 18 Mɨ sej yaujmuaꞌameꞌen pueen, ticheꞌe cai teyan tyanaꞌa tiꞌixajta tyaj nuꞌu taxeꞌeveꞌe seij tyajta seij. Ticheꞌe cai tyaɨjna cɨn tyanaꞌa teyan tiꞌixajta tanyuuca cɨmeꞌe silu ticheꞌe tyaɨjna cɨn tihuaꞌutaseijrateꞌen tej tzaahuatiꞌiraꞌa cɨn huaꞌaxeꞌeveꞌe tyaɨjna cɨmeꞌe tyaj tiꞌitɨ cɨn huaꞌuatyavaɨreꞌen ɨ taꞌihuaamuaꞌa.
\s Aꞌij tɨ nuꞌu yeꞌi tiꞌirɨꞌɨri tyaj nuꞌu cai tiꞌitzɨɨnyaꞌa ɨ Dioj jemi
\p
\v 19 Tɨ puaꞌa teyan tyaɨjna cɨn huarɨni, aj tu xaa teyan tiꞌijmuaꞌareeran tej teyan tzaahuatiꞌiraꞌa cɨn rɨꞌɨ tiꞌititachaꞌɨ tyaɨjna jemi ɨ nyuucari tɨ ayan tiꞌayajna. Tɨ puaꞌa tyajta tyaɨjna cɨn teyan huarɨni, aj tu ti cai cheꞌe aꞌij puaꞌa tityaꞌutátamuajti ɨ taxaijnyuꞌuca jetze tyaɨjna jemi ɨ Dioj.
\v 20 Tɨ puaꞌa ayan taꞌaxɨjtyaꞌa ɨ taxaijnyuꞌuca, capu ruxeꞌeveꞌe tyej teyan tiꞌitzɨɨnyaꞌa aꞌini eitzeꞌe pu vaꞌacan cɨn tiꞌitejvee ɨ Dioj cai ɨ taxaijnyuꞌuca. Ajta, aɨ pu nain tyaꞌumuaꞌaree.
\p
\v 21 Mɨ nyaj aꞌamuaxeꞌeveꞌe, tɨ puaꞌa cai tiꞌitɨ cɨn taꞌaxɨjtyaꞌa ɨ taxaijnyuꞌuca, ayaa pu een cɨn rɨꞌɨri tyaj cai tiꞌitɨ cɨn tiꞌitzɨɨnyaꞌa ɨ Dioj jemi.
\v 22 Ayaa tu tyajta tyaɨjna cɨn teyan tiraꞌancuraꞌasin tyaɨjna jemi tiꞌitɨ tɨ naꞌa tyaj raatahuaviira. Ayaa pu aɨjna cɨn tiꞌitacɨꞌɨti aɨjna cɨmeꞌe tej teyan tiraꞌastijreꞌe aꞌij tɨ aɨn tiꞌitaijteꞌe, ajta aɨjna cɨmeꞌe tej teyan rɨꞌɨ tiꞌititachaꞌɨ aꞌij tɨ tiraꞌaraanajchi.
\p
\v 23 Ai pu aɨn pueen aɨjna tɨ cɨn ayan tiꞌitaijteꞌe tej ti teyan tyaꞌantzaahuateꞌen tɨ aɨn Jesús yaujraꞌan pueen ɨ Dioj, ajta ai pu aɨn pueen ɨ Cɨriistuꞌu Dioj tɨ raꞌantihuau, tej ti tyajta teyan tityahuátaxeꞌeveꞌen seij tyajta seij aꞌij tɨ aɨn titaataij.
\v 24 Ajta aɨn tɨ ayan raꞌastijreꞌe aꞌij tɨ Dioj tieꞌijta, aɨ pu ayan cheꞌeta naꞌa jemin seijreꞌe ɨ Dioj tɨj ajta Dioj jemin tiꞌiseijreꞌe aɨjna ɨ aꞌatɨ. Ayaa tu tyaɨjna cɨn tiꞌijmuaꞌaree tɨ aɨn Dioj ta jemi seijreꞌe aɨjna cɨmeꞌe tɨ aɨn xaijnyuꞌucaraꞌaraꞌan ɨ Dioj ayan ta jemi huatyajturaa.
\c 4
\s Aɨjna ɨ xaijnyuꞌucaraꞌaraꞌan ɨ Dioj, ajta aɨjna ɨ xaijnyuꞌucari tɨ rajchaɨreꞌe ɨ Cɨriistuꞌu
\p
\v 1 Mɨ nyaj aꞌamuaxeꞌeveꞌe, sataꞌaj cai raꞌatzaahuatyaꞌa aꞌatɨ tɨ naꞌa tɨ ayan ruseijrata tɨ nuꞌu aɨn xaijnyuꞌucaraꞌaraꞌan ɨ Dioj caꞌanijraꞌa raataꞌa tɨ tyuꞌutaxaj, silu sataꞌaj anacaican huaꞌuteeseij sej si raamuaꞌaree tiꞌitɨ tɨ xaijnyuꞌucarijraꞌa caꞌanijraꞌa huaꞌataꞌaca maj meyan tyuꞌutaxaj. Sataꞌaj seyan huarɨni aꞌini aɨme ɨ maj cai tzaahuatiꞌiraꞌa cɨn tiꞌixaxaꞌa ɨ Dioj jetze maꞌacan, muiꞌitɨ mu meri huaꞌa tzajtaꞌa huataseijre aɨme jemi ɨ maj yan seijreꞌe iyan chaanaca japua.
\p
\v 2 Ayaa tu tyaɨjna cɨn tiraamuaꞌaree tɨ puaꞌa aɨn xaijnyuꞌucaraꞌaraꞌan ɨ Dioj ayan caꞌanijraꞌa rataꞌaca tɨ aꞌatɨ ayan tyuꞌutaxaj ɨ Dioj jetze maꞌacan nusu cai. Aꞌatɨ tɨ naꞌa tɨ ayan tiraataxaj yee tɨ aɨn Jesús tɨ Cɨriistuꞌu pueen, aɨ pu nuꞌu ajta ayan tyahuéꞌiraꞌacán cɨn huataseijre iiyan chaanaca japua, tɨ puaꞌa aɨjna ɨ aꞌatɨ, ayan tiraataxaj, aɨ pu aɨn pueen tɨ aɨn xaijnyuꞌucaraꞌaraꞌan ɨ Dioj ayan caꞌanijraꞌa rataꞌaca tɨ ayan tyuꞌutaxaj Dioj jetze maꞌacan.
\p
\v 3 Ma ajta aꞌatɨ tɨ naꞌa tɨ cai ayan tiraataxaj yee tɨ Jesús ayan tyahuéꞌiraꞌacán cɨn huataseijre, aɨ pu cai tzaahuatiꞌiraꞌa cɨn tiꞌixaxaꞌa ɨ Dioj jetze maꞌacan, silu aɨ pu ayan caꞌanijraꞌa rataꞌaca aꞌij tɨ tyuꞌutaxaj aɨjna ɨ xaijnyuꞌucari tɨ rajchaɨreꞌe ɨ Cɨriistuꞌu. Xuꞌuri seyan tiraanamuajriꞌi tɨ aɨn yan huataseijreꞌesin iiyan chaanaca japua. Ee xaa nyaꞌu, puꞌuri yan seijreꞌe huaꞌa tzajtaꞌa ɨ maj yan huachaatɨme iiyan chaanaca japua.
\p
\v 4 Mɨ sej tyaamua ijii, muan xu Dioj jetze ajtyamaꞌacan. Sajta seri huaꞌutyaamueꞌitɨ saɨme ɨ mej hueꞌitzi cɨn tiꞌixaxaꞌa saɨjna cɨmeꞌe tɨ aɨn ɨ tɨ muejmi jemi huatyajturaa, eitzeꞌe pu vaꞌacan cɨn antyujmuaꞌaree cai aɨjna tɨ yan seijreꞌe iiyan ɨ chaanaca japua.
\v 5 Ma majta aɨme, aɨ mu huaꞌa jetze ajtyamaꞌacan aɨme ɨ maj yan huachaatɨme iiyan chaanaca japua. Aɨj pu cɨn, tɨj naꞌa mej meyan tiꞌixaata muaꞌayeꞌi, aɨ pu caꞌanijraꞌa huaꞌataꞌaca mej meyan tyuꞌutaxaj aɨjna ɨ huaꞌamuaꞌatziiraꞌa aɨme ɨ maj yan seijreꞌe iiyan chaanaca japua. Majta aɨme ɨ maj yan seijreꞌe, aɨ mu meyan tihuaꞌanamua.
\p
\v 6 Me tyajta ityan, tyan tu Dioj jetze ajtyamaꞌacan. Aꞌatɨ tɨ naꞌa tɨ ayan ramuaꞌate ɨ Dioj, aɨ pu ayan tanamua. Ajta aɨjna ɨ aꞌatɨ tɨ cai ramuaꞌate ɨ Dioj, aɨ pu ajta cai tanamua itejmi. Ayaa tu een cɨn teyan tiꞌijmuaꞌaree tɨ puaꞌa aꞌatɨ ayan tzaahuatiꞌiraꞌa cɨn tiꞌixaxaꞌa ɨ Dioj jetze maꞌacan naꞌari tɨ puaꞌa hueꞌitzi cɨn tiꞌixaxaꞌa.
\s Dioj pu huapɨꞌɨ taxeꞌeveꞌe itejmi
\p
\v 7 Mɨ nyej aꞌamuaxeꞌeveꞌe, ticheꞌe teyan tityahuátaxeꞌeveꞌen seij tyajta seij aꞌini Dioj pu rusaɨj ayan caꞌanijraꞌa titataꞌaca tej ti teyan huátaxeꞌeveꞌen. Ajta aɨn tɨ huaꞌaxeꞌeveꞌe ɨ ruxaꞌaj tyaɨte, aɨ pu Dioj jetze eꞌiraanye, ajta aɨ pu ramuaꞌate ɨ Dioj.
\v 8 Ma ajta, aɨn tɨ cai huaꞌaxeꞌeveꞌe ɨ ruxaꞌaj tyaɨte, aɨ pu cai xɨ ramuaꞌate ɨ Dioj, aꞌini Dioj pu tzaahuatiꞌiraꞌa cɨn rusaɨj taxeꞌeveꞌe, nain xɨcaj tzajtaꞌa, ajta nain tɨcaꞌari tzajtaꞌa.
\v 9 Ayaa pu aɨjna cɨn tejmi jemi huataseijre tɨ Dioj ayan taxeꞌeveꞌe aɨjna cɨmeꞌe tɨ aɨn ayan yaꞌutaityacaꞌa ɨ ruyauj tɨ saɨj naꞌa pueen tɨ ij ya uvéꞌenyen iiyan chaanaca japua tej ti ruuri huatyaturan ɨ Dioj jemi tyaɨjna cɨmeꞌe tɨ aɨn tajapua huanyúu.
\p
\v 10 Ayaa pu aɨjna cɨn ayan eenyeꞌequeꞌe seijreꞌe tɨ Dioj ayan taxeꞌeveꞌe. Catu tyan anacai raataxeꞌeve ɨ Dioj, silu aɨ pu anacai taataxeꞌeve itejmi, ajta ayan yaꞌutaityacaꞌa ɨ ruyauj tɨ ij aɨn ayan raꞌurauuna ɨ tyaj cɨn autyajturaa ɨ Dioj jemi tɨ ij cai Dioj ayan pueijtzi titataꞌacareꞌen.
\p
\v 11 Mɨ nyaj aꞌamuaxeꞌeveꞌe, jaꞌini Dioj puꞌuri ayan titaataxéꞌeve, ayaa pu tyúꞌujxeꞌeveꞌe tyej teyan cheꞌeta tyanaꞌa huátaxeꞌeveꞌen seij tyajta seij.
\v 12 Capu aꞌatɨ aꞌanaj raaseij ɨ Dioj. Ma ajta, tɨ puaꞌa teyan tiꞌitaxeꞌevaꞌa seij tyajta seij, Dioj pu ayan tejmi jemi seijreꞌe, ajta aɨ pu tejmi jemi runaijmiꞌireꞌe aɨjna tɨ cɨn Dioj ayan tiꞌitaxeꞌeveꞌe.
\p
\v 13 Ayaa tu een cɨn teyan tiꞌijmuaꞌaree tyej teyan jemin seijreꞌe, ajta tɨ ayan aɨn tejmi jemi seijreꞌe aɨjna cɨmeꞌe tɨ ayan tejmi jemi raatyajtuaa ɨ ruxaijnyuꞌuca.
\v 14 Tyajta ityan, tyan tu teyan tiraaseij, tyajta teyan tiratyaxájta tɨ aɨn ɨ tyaj rajyaꞌupua, aɨn ayan tiyaꞌutaityacaꞌa ɨ ruyauj tɨ ij ayan hueꞌirajtuaani aɨme ɨ maj yan huachaatɨme iiyan chaanaca japua.
\p
\v 15 Aꞌatɨ tɨ naꞌa tɨ ayan tiraataxaj yee Jesús tɨ ajta Cɨriistuꞌu aɨ pueen, aɨ pu ajta aɨn pueen tɨ yaujraꞌan pɨrɨcɨ ɨ Dioj, Dioj pu jemin seijreꞌe aɨjna ɨ aꞌatɨ. Ajta aɨn ɨ aꞌatɨ, aɨ pu ayan cheꞌeta naꞌa seijreꞌe ɨ Dioj jemi.
\p
\v 16 Aɨj tu cɨn teyan tiꞌijmuaꞌaree, tyajta teyan tiraꞌatzaahuateꞌe tɨ ayan tiꞌitaxeꞌeveꞌe ɨ Dioj, aꞌini Dioj pu ayan aꞌanaj tɨ naꞌa tiꞌitaxeꞌeveꞌe. Ajta aɨn ɨ aꞌatɨ tɨ ayan seijreꞌe tɨ huaꞌaxeꞌeveꞌe, aɨ pu ajta jemin seijreꞌe ɨ Dioj. Ajta Dioj pu ayan cheꞌeta naꞌa jemin seijreꞌe aɨjna ɨ aꞌatɨ.
\v 17 Ayaa pu eenyeꞌequeꞌe seijreꞌe tɨ ayan huaujnaijmiꞌire itejmi jemi tej ti cai tiꞌitzɨɨnyaꞌa ajna xɨcajraꞌa tɨ jetzen thuáꞌaxɨjteꞌen aɨjna cɨmeꞌe tej teyan cheꞌeta tyanaꞌa seijreꞌe iiyan chaanaca japua tɨj ajta aɨjna, tyaɨjna cɨmeꞌe tyaj huaꞌaxeꞌeveꞌe ɨ tyaxáꞌa tyaɨte.
\v 18 Tɨ puaꞌa aꞌatɨ ayan tiꞌijxeꞌevaꞌa aꞌame ajna xɨcajraꞌa jetze tɨ Dioj jetzen huaꞌaxɨjteꞌen, capu ayan tiꞌitzɨɨnyaꞌa, aꞌini tɨ puaꞌa aɨjna ɨ aꞌatɨ nain cɨn ayan tiꞌijxeꞌevaꞌa ɨ Dioj, aɨj pu cɨn raatyapuaꞌariteꞌesin ɨ ru tzajtaꞌa aɨjna tɨ cɨn tiꞌitzɨɨnyeꞌe tɨ Dioj pueijtzi raataꞌan.
\p Ayaa pu xaa nyaꞌu tiꞌayajna aꞌini tɨ puaꞌa aꞌatɨ ayan tiꞌitzɨɨnyaꞌa, aɨ pu ajta tiꞌitɨ cɨn rajpueijtzi aꞌayeꞌi, ajta aɨn tɨ tiꞌitzɨɨnyeꞌe, capu u huatyaujnaijmiꞌire ɨ rutzajtaꞌa tɨ aɨn ayan tiꞌijxeꞌeveꞌe ɨ ruxaꞌaj tevi.
\p
\v 19 Ayaa tu tyaɨjna cɨn tiꞌijxeꞌeveꞌe ɨ Dioj aꞌini Dioj pu anacai ayan titaataxéꞌeve itejmi.
\v 20 Tɨ puaꞌa aꞌatɨ ayan tiꞌixajta yee aɨ pu nuꞌu raxeꞌeveꞌe ɨ Dioj, ajta tɨ puaꞌa rajchaɨ́ɨraꞌa ɨ ruꞌihuaaraꞌa, ayaa pu tiꞌihueꞌitaca aɨjna ɨ aꞌatɨ aꞌini tɨ puaꞌa aɨn cai raxeꞌevaꞌa ɨ ruꞌihuaaraꞌa tɨ ayan me tíruusíseꞌiran, capu aꞌatzu aꞌij tiꞌirɨꞌɨri tɨ aɨjna ɨ aꞌatɨ ayan raxeꞌevaꞌa aɨjna ɨ Dioj tɨ cai aꞌanaj rasiseꞌij.
\p
\v 21 Ajta ai pu aɨn pueen ɨ nyuucari tɨ cɨn aɨn ayan titaataij. Cheꞌe nuꞌu aɨn tɨ ayan tiꞌijxeꞌeveꞌe ɨ Dioj, cheꞌe aɨn ajta ayan tiꞌijxeꞌevaꞌa ɨ ruꞌihuaaraꞌa.
\c 5
\s Tyaj nuꞌu teri huaꞌutyaamueꞌitɨ tyaɨjna tɨ aꞌij puaꞌa een, tɨ ajta yan japuan seijreꞌe iiyan ɨ chaanaca japua
\p
\v 1 Aꞌatɨ tɨ naꞌa tɨ ayan tyaꞌatzaahuateꞌe tɨ Jesús aɨn pueen aɨjna ɨ Cɨriistuꞌu tɨ Dioj raꞌantihuau, aɨjna ɨ aꞌatɨ, aɨ pu ajta Dioj jetze huanyej. Ajta aɨn tɨ ayan tiꞌijxeꞌeveꞌe aɨjna tɨ yaꞌupuaaraꞌan pueen, aɨ pu ajta ayan huaꞌaxeꞌeveꞌe aɨme ɨ tɨ ayan huaꞌuteyaꞌupuatacaꞌa.
\v 2 Ayaa tu een cɨn teyan tiꞌijmuaꞌaree tyej tzaahuatiꞌiraꞌa cɨn huaꞌaxeꞌeveꞌe tyaɨme ɨ maj yaujmuaꞌameꞌen pueen ɨ Dioj tyaɨjna cɨmeꞌe tej teyan tiꞌijxeꞌeveꞌe ɨ Dioj, tyajta teyan tiraꞌastijreꞌe aꞌij tɨ aɨn tiꞌitaijteꞌe.
\v 3 Ajta, ayaa pu huataujmuaꞌa aɨjna ɨ tyaj nuꞌu raxeꞌeveꞌe ɨ Dioj tyej ti teyan tyaɨjna cɨn raꞌaraꞌastijreꞌen tyaɨjna ɨ tɨ cɨn tiꞌitaijteꞌe. Ajta, capu muareꞌeri tyej teyan tyaɨjna cɨn raꞌaraꞌastijreꞌen tyaɨjna tɨ cɨn Dioj ayan tiꞌitaijteꞌe.
\p
\v 4 Ayaa pu aɨjna cɨn ayan tiꞌen aꞌini aꞌatɨ tɨ naꞌa tɨ ayan Dioj jetze airaanye, aɨ pu huaꞌantimueꞌitɨcɨ aɨme ɨ maj yan seijreꞌe iiyan chaanaca japua. Ajta, ayaa tu tyaɨjna cɨn huaꞌantimueꞌitɨcɨ tyaɨjna cɨmeꞌe tyej tyaꞌatzaahuateꞌe.
\v 5 Ai pu aɨn pueen tɨ huaꞌantimueꞌitɨcɨ aɨme ɨ maj yan seijreꞌe iiyan chaanaca japua. Aɨ pu aɨn pueen tɨ ayan tyaꞌatzaahuateꞌe tɨ Jesús aɨn pɨrɨcɨ tɨ yaujraꞌan pueen ɨ Dioj.
\s Aɨjna tɨ nuꞌu raatyaxajta aɨjna ɨ xaijnyuꞌucaraꞌaraꞌan ɨ Dioj aɨjna cɨmeꞌe aɨn tɨ yaujraꞌan pueen ɨ Dioj
\p
\v 6 Ajta aɨjna ɨ Jesús, tɨ Cɨriistuꞌu pueen, ai pu aɨn pueen tɨ ayan huataseijre itejmi jemi. Ayaa tu tyaɨjna cɨn tiꞌijmuaꞌaree tɨ aɨ pu tzaahuatiꞌiraꞌa cɨn tejmi jemi jemi huataseijre tɨꞌɨj aɨn ayan huamuaɨꞌɨvijhuacaꞌa, ajta tɨꞌɨj ayan tiraꞌiraaxɨre ɨ ruxuureꞌe tɨꞌɨj huamɨꞌɨ. Dioj pu ayan cɨmeꞌen tiraatyáxajtacaꞌa aɨjna cɨmeꞌe ɨ Jesús tɨꞌɨj aɨn huamuaɨꞌɨvijhuacaꞌa. Ajta ayan cheꞌeta naꞌa cɨmeꞌen tiraatyáxajtacaꞌa tɨꞌɨj Jesús huamɨꞌɨ, majta raseiraca ɨ tyaɨte.
\v 7 Ajta aɨn xaijnyuꞌucaraꞌaraꞌan ɨ Dioj, aɨ pu ayan tiraatyáxajta aɨjna cɨmeꞌe aꞌini aɨ pu tzaahuatiꞌiraꞌa cɨn tiꞌixaxaꞌa.
\p
\v 8 Ee xaa nyaꞌu, mahueica ɨ mej meyan tiraatyáxajta. Ai pu aɨn pueen ɨ xaijnyuꞌucaraꞌaraꞌan ɨ Dioj tɨ tejmi jemi raatyajtuaa. Ai pu ajta aɨn pueen ɨ nyuucari ɨ tyaj raanamuajriꞌi tɨꞌɨj Jesús ayan huamuaɨꞌɨvijhuacaꞌa. Ai pu ajta aɨn pueen ɨ tyaj cɨn raꞌutamuaꞌaree tɨ Cɨriistuꞌu ayan tyuꞌumɨꞌɨ ɨ curuu jetze. Majta maɨjna ɨ maj hueica, naijmiꞌi mu meyan cheꞌeta manaꞌa tiraatyáxajta.
\p
\v 9 Ajta, tɨ puaꞌa teyan tiraꞌancuraꞌan aꞌij mej tiꞌixa ɨ tyaɨte, ayaa pu eitzeꞌe ayan tiraavijteꞌe tyej teyan tiraꞌancuraꞌan aꞌij tɨ ajta tiꞌixa ɨ Dioj aꞌini eitzeꞌe pu ruxeꞌeveꞌe aꞌij tɨ tiꞌixa. Ai pu aɨn pueen tɨ cɨmeꞌen Dioj raatyaxajtacaꞌa, aɨjna tɨ tiraatyáxajtacaꞌa cɨmeꞌen ɨ ruyauj.
\p
\v 10 Aꞌatɨ tɨ naꞌa tɨ raꞌatzaahuateꞌe aɨjna tɨ yaujraꞌan pueen ɨ Dioj, aɨjna ɨ aꞌatɨ, aɨ pu jemin seijreꞌe aɨjna tɨ cɨmeꞌen huataujxajtacaꞌa. Ajta aꞌatɨ tɨ naꞌa tɨ cai raꞌatzaahuateꞌe ɨ Dioj, aɨ pu ayan tiꞌixa tɨ nuꞌu tiꞌihueꞌitaca ɨ Dioj aɨjna cɨmeꞌe tɨ cai ráꞌantzaahua aɨjna tɨ cɨn Dioj raatyaxajtacaꞌa ɨ ruyauj cɨmeꞌen.
\p
\v 11 Ajta, ai pu aɨn pueen tɨ cɨmeꞌen tiraatyáxajtacaꞌa tɨcɨn Dioj ayan taataꞌa tyej ti teyan ruuri huatyaturan ɨ jemin tɨj naꞌa rusen cɨmeꞌe. Ajta, ayaa tu een cɨn ruuri taꞌajuꞌun tyaɨjna cɨmeꞌe tɨ aɨjna jetze tɨ yaujraꞌan pueen, aɨj pu jetze airáninyei ɨ tyaj cɨn ruuri taꞌaraꞌani.
\p
\v 12 Aꞌatɨ tɨ naꞌa tɨ jemin seijreꞌe aɨjna tɨ yaujraꞌan pueen ɨ Dioj, aɨ pu ajta jemin ruuri huatyaturaasin tɨj naꞌa rusen cɨmeꞌe. Ma ajta aꞌatɨ tɨ naꞌa tɨ cai jemin seijreꞌe aɨjna tɨ yaujraꞌan pueen ɨ Dioj, capu ajta ruuri huatyaturaasin ɨ jemin tɨj naꞌa rusen cɨmeꞌe.
\s Tyej teyan ruuri huatyaturaasin tɨj naꞌa rusen cɨmeꞌe
\p
\v 13 Ayaa nu een cɨn neyan tyajamuaatayuꞌuse sej si seyan tiraamuaꞌaree sej seyan jemin ruuri huatyaturaasin tɨj naꞌa rusen cɨmeꞌe mɨ sej seyan tyaꞌatzaahuateꞌe saɨjna jemi tɨ yaujraꞌan pueen ɨ Dioj.
\p
\v 14 Ajta, ai pu aɨn pueen tɨ caꞌanijraꞌa tataꞌaca tyej ti teyan tyaxaahua ajtyaxɨɨre ɨ jemin. Tɨ puaꞌa teyan tiꞌitɨj tiraatahuavii aꞌij tɨ tiraavijteꞌe ɨ jemin, ayaa tu tiraamuaꞌaree tɨ aɨn ayan tiꞌitanamua.
\v 15 Ajta tɨ puaꞌa teyan tiraamuaꞌaree tɨ aɨn ayan tiꞌitanamua tɨj naꞌa aꞌij tyej tiꞌitɨ tiraatahuaviira, aɨj tu cɨn teyan tyajta tiraamuaꞌaree tɨ ayan titaataꞌasin aꞌij tɨ tiraavijteꞌe ɨ tyaj cɨmeꞌen raatahuaviiriꞌi.
\p
\v 16 Tɨ puaꞌa aꞌatɨ ayan tiꞌijseijra tɨ aɨn ihuaaraꞌaraꞌan ayan tiꞌitɨ cɨn tyeꞌetyaꞌɨtzaꞌaraꞌan tiꞌitɨ cɨmeꞌe tɨ cai ayan tiraavijteꞌe tɨ huamɨꞌɨni, cheꞌe aɨn aꞌatɨ ayan aɨjna cɨn tiraatahuavii ɨ Dioj. Tɨ puaꞌa ayan aɨjna cɨn huarɨni, Dioj pu ajta ayan tiraataꞌasin tɨ aɨn ruuri huatyaturan ɨ jemin aɨjna ɨ ihuaaraꞌaraꞌan tɨ ayan tiꞌitɨj cɨn tyeꞌetyaꞌɨtzaꞌara tɨ cai ayan aɨjna cɨn tiraacɨꞌɨti tɨ huamɨꞌɨni. Ma ajta, ayaa pu ajta seijreꞌe ɨ maj cɨn atyaꞌɨtzaꞌaraꞌa tɨ aɨjna cɨn ayan tiraacɨꞌɨti tɨ aꞌatɨ huamɨꞌɨni. Canu neyan tyajaꞌamueijcateꞌe sej si saɨjna cɨn seyan tiraatahuavii.
\p
\v 17 Matɨj manaꞌa meyan maɨjna cɨn aꞌij puaꞌa tíꞌityarɨcɨ, ai pu ajta aɨn pueen ɨ maj cɨn atyaꞌɨtzaꞌara ɨ Dioj jemi. Ajta, aucheꞌe pu tejmi jemi seijreꞌe ɨ maj cɨn atyaꞌɨtzaꞌara tɨ ajta aɨjna cɨn cai ayan tiraacɨꞌɨti tɨ aꞌatɨ aɨjna cɨn cai huamɨꞌɨni.
\s Ɨ tɨ nuꞌu cɨn teꞌentipuaꞌariteꞌesin
\p
\v 18 Tyan tu teyan tiꞌijmuaꞌaree tɨ cai tiꞌitɨ cɨn atyaꞌɨtzaꞌara ɨ aꞌatɨ tɨ ayan Dioj jetze airaanye, silu aɨjna ɨ aꞌatɨ tɨ Dioj jetze airaanye, aɨ pu ayan tyaꞌujcuꞌuve, ajta cai ɨ xaijnyuꞌucari raꞌajtamɨjhua aɨjna tɨ aꞌij puaꞌa een.
\p
\v 19 Tyan tu tyajta teyan tiꞌijmuaꞌaree tyaj Dioj jetze ajtyamaꞌacan. Majta aɨme ɨ seica ɨ maj yan huachaatɨme iiyan chaanaca, naijmiꞌi mu raꞌastijreꞌe maɨjna ɨ xaijnyuꞌucari tɨ aꞌij puaꞌa een.
\p
\v 20 Tyajta tu teyan tiraamuaꞌaree tɨ aɨn tɨ yaujraꞌan pueen ɨ Dioj yan huataseijre. Aɨ pu ajta ayan taataꞌa tyej ti teyan tiyauꞌeitaa taꞌaraꞌani tiꞌitɨ tɨ ayan tiꞌayajna. Tyan tu tyajta teyan tiꞌijmuaꞌate tyaɨjna tɨ tzaahuatiꞌiraꞌa cɨn tiꞌixaxaꞌa. Tyan tu tyajta jemin seijreꞌe tyaɨjna jemi tɨ ayan cheꞌeta naꞌa tzaahuatiꞌiraꞌa cɨn tiꞌixaxaꞌa, tyajta tyaɨjna jemi seijreꞌe tɨ yaujraꞌan pueen ɨ Dioj, aɨjna ɨ Jesús tɨ ajta Cɨriistuꞌu pueen. Ai pu aɨn pueen ɨ Dioj tɨ nain cɨn ajta tzaahuatiꞌiraꞌa cɨn seijreꞌe, tɨ ajta ayan titataꞌaca tyej teyan ruuri huatyaturan ɨ jemin tɨj naꞌa rusen cɨmeꞌe.
\p
\v 21 Mɨ sej yaujmuaꞌameꞌen pueen, rɨꞌɨ xuꞌu saɨjna cɨmeꞌe, sej si cai ranaꞌamicheꞌen tiꞌitɨ tɨ naꞌa tɨ cai Dioj pueen.