\id 2JN
\h 2 San Juan
\toc1 2 San Juan
\mt1 Ɨ yuꞌuxari tɨ huaꞌapua, tɨ raꞌuyuꞌuxacaꞌa aɨjna ɨ San Juan
\c 1
\s Aɨjna tɨ ayan tiꞌayajna, ajta aɨjna tɨ cɨn Dioj taxeꞌeveꞌe
\p
\v 1 Inyaa, i nyaj vastaꞌa pueen, aij nu jetze ya muataujteꞌe, muaa mɨ pej huaꞌanaana pueen aɨme ɨ mej maun eꞌetyujsaꞌɨri, muaa tɨ Dioj muaꞌantíhuau. Yaa nu nyajta huaꞌataujteꞌe ɨ aꞌayaujmuaꞌa ɨ mej raꞌastijreꞌe ɨ nyuucari tɨ ayan tiꞌayajna. Ayaa nu neyan tzaahuatiꞌiraꞌa cɨn tyajaꞌamuaxeꞌeveꞌe, majta meyan cheꞌeta manaꞌa tyajaꞌamuaxeꞌeveꞌe matɨj manaꞌa puaꞌamua ɨ mej meyan tiꞌijmuaꞌaree ɨ nyuucari tɨ ayan tiꞌayajna.
\v 2 Ayaa tu tyaɨjna cɨn tyajaꞌamuaxeꞌeveꞌe tyaɨjna cɨmeꞌe tɨ aɨn nyuucari tɨ ayan tiꞌayajna. Ayaa pu tejmi jemi seijreꞌe, ajta ayan tejmi jemi seiraꞌa aꞌame tɨj naꞌa rusen cɨmeꞌe.
\p
\v 3 Cheꞌe aɨn Dioj ɨ tyaj rajyaꞌupua, aɨjna jamuan ɨ Jesús tɨ Cɨriistuꞌu pueen, aɨjna tɨ ajta yaujraꞌan pɨrɨcɨ ɨ Dioj, cheꞌe aɨn ayan rɨꞌɨ tyajamuaataꞌacareꞌen, ajta amuaꞌancuꞌuvajxɨꞌɨn, ajta amuaatyápuaꞌariteꞌen sej si seyan tzaahuatiꞌiraꞌa cɨn rɨꞌɨ titetyújchaɨca, sej si sajta huaujxeꞌeveꞌen seij sajta seij.
\s Tyaj nuꞌu teyan tityahuátaxeꞌeveꞌen seij tyajta seij
\p
\v 4 Eecan nu nyaɨjna cɨn nyetyamuaꞌaveꞌe nyaɨjna cɨmeꞌe nyej neyan tiraamuaꞌareeriꞌi maj seica ɨ maj mueetzi jetze ajtyamaꞌacan meyan cheꞌeta manaꞌa tzaahuatiꞌiraꞌa cɨn meyan rɨꞌɨ titetyújchaꞌɨ aꞌij tɨ titaataij aɨjna ɨ tyaj rajyaꞌupua.
\v 5 Ajta ijii, mɨ paj huaꞌanaana pueen, ayaa nu tiꞌitɨj cɨn tiꞌimuahuavii. Canu jajcuacan cɨn tiꞌimuayuꞌuseꞌe nyaɨjna cɨmeꞌe tɨ Dioj ayan aɨjna cɨn titaataij silu aij nu cɨn tiꞌimuayuꞌuseꞌe nyaɨjna cɨmeꞌe tɨ jajcua ɨmɨ tejmi jemi raatyajtuaa tyaj nuꞌu teyan tityahuátaxeꞌeveꞌen seij tyajta seij.
\p
\v 6 Ayaa pu aɨjna cɨn tyeꞌemiteereꞌe seij tyajta sei tzaahuatiꞌiraꞌa cɨn tiraꞌaraꞌastijreꞌen aꞌij tɨ aɨn tiꞌitaijteꞌe, tyej teyan tityahuátaxeꞌeveꞌen. Ajta, ai pu aɨn pueen ɨ tɨ cɨn titaataij. Aɨj pu cɨn, aꞌini ayaa xu jajcua ɨmɨ tiraanamuajriꞌi tɨj naꞌa tɨ yu eꞌireꞌenye, ayaa pu tyuꞌujxeꞌeveꞌe saj nuꞌu seyan tityahuaujxeꞌeveꞌen.
\s Cɨmeꞌen ɨ maj nuꞌu tiꞌityacuanamua
\p
\v 7 Ayaa pu aɨjna cɨn tyuꞌujxeꞌeveꞌe sej seyan huarɨni, aꞌini aɨme ɨ maj tyuꞌucuanamuajca muꞌuri muiꞌitɨ huataseijre huáꞌa tzajtaꞌa aɨme ɨ maj yan huachaatɨme ɨ chaanaca japua. Aɨ mu meyan aviitzi cɨn tiꞌixaxaꞌa tɨ nuꞌu aɨn Jesús tɨ ajta Cɨriistuꞌu pueen ayan nuꞌu cai ayan tyuꞌutaujtyevistacaꞌa. Ai mu aɨn pueen ɨ maj tyuꞌucuanamuajca, ɨ maj majta rajchaɨreꞌe ɨ Cɨriistuꞌu.
\v 8 Rɨꞌɨ xuꞌu muan, tɨ ij cai ayan amuaaruuren mɨ aꞌamua tzajtaꞌa sej si cai yaꞌuraini ɨ saj cɨn tyuꞌumuarej silu tɨ ij ayan naijmiꞌi tyajamuaacɨꞌɨti ɨ saj raamueꞌitɨ ɨ Dioj jemi.
\p
\v 9 Aꞌatɨ tɨ naꞌa tɨ ayan rɨcɨ rusaɨj aꞌij tɨ tirajtyauve, ajta cai ayan tiraꞌastijreꞌe aɨjna ɨ nyuucari tɨ cɨn Cɨriistuꞌu ayan titaꞌitiiriꞌi, capu seijreꞌe ɨ Dioj jemi aɨjna ɨ aꞌatɨ.
\p Ma ajta, aꞌatɨ tɨ naꞌa tɨ ayan tiraꞌastijreꞌe aɨjna tɨ cɨn ayan titaꞌitiiriꞌi, aɨ pu rajyaꞌupua. Ayaa pu cheꞌeta naꞌa seijreꞌe aɨjna jemi tɨ yaujraꞌan pueen ɨ Dioj.
\p
\v 10-11 Tɨ puaꞌa aꞌatɨ muejmi jemi mu aꞌuveꞌemeꞌen tɨ cai ayan tiraꞌastijreꞌe aɨjna ɨ nyuucari tɨ tejmi jemi raatyajtuaa, caxu raatataujtyaꞌa, caxu sajta raꞌancureꞌeviꞌitɨjcɨjcareꞌen aꞌu saj eꞌeche, aꞌini aꞌatɨ tɨ naꞌa tɨ ayan raꞌancureꞌeviꞌitɨn, aɨ pu jamuan ajta ayan rɨcɨ tɨ aꞌij puaꞌa een.
\s Ɨ tɨ nuꞌu cɨn teꞌentipuaꞌariteꞌesin
\p
\v 12 Aꞌini capu tiꞌiseicaj naꞌa ɨ tɨ tyuꞌujxeꞌeveꞌe ɨ nyaj cɨn tyajamuaataꞌixaateꞌen, silu tiꞌimuiꞌi, aɨj nu cɨn cai raxeꞌeveꞌe nyej neyan tyajamuaataitiꞌi aíjna i yuꞌuxari jetze silu ayaa nu tiꞌijchuꞌeveꞌe nyaj nyasaɨj u áꞌumeꞌen muejmi jemi tyej ti naijmiꞌi taseira taꞌaraꞌani, tyej ti teyan tiꞌihuátaꞌixaateꞌen tyej ti nain cɨn huatatyamuaꞌaveꞌen.
\p
\v 13 Majta aɨme ɨ maj yaujmuaꞌameꞌen pueen, ɨ maj jamuan eꞌetyujsaꞌɨri maɨjna aꞌajuu ɨ tɨ Dioj raꞌantihuau, aɨ mu ya áꞌamuataujteꞌe. Ayaa puꞌu, cheꞌe ayan tyajaꞌureꞌenyen.