\id 3JN
\h 3 San Juan
\toc1 3 San Juan
\mt1 Ɨ yuꞌuxari tɨ hueica, tɨ raꞌuyuꞌuxacaꞌa aɨjna ɨ San Juan
\c 1
\s Rɨꞌɨ pu nuꞌu naꞌa tiꞌijxajtacaꞌa aɨjna ɨ Gayo
\p
\v 1 Inyaa, i nyaj vastaꞌa pueen, ya nu muataujteꞌe, muaa Gayo mɨ nyaj muaxeꞌeveꞌe. Ee xaa nyaꞌu, tzaahuatiꞌiraꞌa nu cɨn muaxeꞌeveꞌe.
\p
\v 2 Ayaa nu tiꞌijhuavii mueetzi cɨmeꞌen, mɨ nyaj muaxeꞌeveꞌe, tɨ ij tyamuaꞌa naa timuaavaɨreꞌen, pej pi pajta cai tiꞌijcuiꞌinye. Nyaa nu ramuaꞌaree paj urareꞌenyaꞌacan cɨn seijreꞌe muaꞌa tzajtaꞌa.
\v 3 Eihua nu nyaɨjna cɨn huatantyamuaꞌave nyaɨjna cɨmeꞌe matɨꞌɨj yaraꞌa seica ɨ taꞌihuaamuaꞌa, matɨꞌɨj meyan tinaataꞌixaa paj nuꞌu tzaahuatiꞌiraꞌa cɨn rɨꞌɨ tiꞌitiáꞌachaꞌɨ, aꞌini muaa paj xaa peyan raꞌastijreꞌe paɨjna tɨ ayan tiꞌayajna.
\s Tɨ nuꞌu huaꞌutavaɨreꞌen ɨ ruꞌihuaamuaꞌa tɨ cai huaꞌamuajte
\p
\v 4 Ai pu aɨn pueen tɨ huapɨꞌɨ rɨꞌɨ naa tinataꞌaca nyej ni neyan tiraanamua mej meyan tzaahuatiꞌiraꞌa cɨn rɨꞌɨ titetyújchaɨ́ muaꞌayeꞌi ɨ niyaujmuaꞌa.
\p
\v 5-6 Mɨ nyaj muaxeꞌeveꞌe, xaꞌapɨꞌɨn paj rɨcɨ tɨj naꞌa paj peyan tiꞌitɨj cɨn tihuaꞌatyavaꞌɨri ɨ taꞌihuaamuaꞌa. Ajta eitzeꞌe pu xaꞌapɨꞌɨn cɨn seijreꞌe ɨ Dioj jemi tɨ puaꞌa peyan huaꞌutyavaɨreꞌen paɨme ɨ paj cai huaꞌamuajte aꞌini aɨ mu meyan raatyaxajtacaꞌa huaꞌa jemi ɨ maj ya tyujsaꞌɨri mueetzi cɨmeꞌen paj nuꞌu peyan huaꞌaxeꞌeveꞌe ɨ aꞌaxaꞌaj tyaɨte. Ayaa nu tiꞌimuahuavii pataꞌaj peyan tihuaꞌutyavaɨreꞌen tyamuaꞌa naa tɨ ij cai tiꞌitɨj huaꞌaturaatyaꞌa matɨꞌɨj aꞌucɨɨne aꞌini ayaa pu tiraavijteꞌe aɨjna cɨmeꞌe mej meyan tiꞌivaɨreꞌe ɨ Dioj jemi.
\p
\v 7 Aɨ mu maɨjna jetze maꞌacan u aꞌaraacɨ, majta camu tiꞌitɨ ancuraꞌa aɨme jemi ɨ mej seij chuejraꞌa japua eꞌemaꞌacan.
\v 8 Aɨj pu cɨn ayan tyuꞌujxeꞌeveꞌe tyej teyan tyamuaꞌa naa tihuaꞌancureꞌeviꞌitɨn, tyajta huaꞌutyavaɨreꞌen tiꞌitɨ cɨmeꞌe ɨ maj meyan rɨcɨ tyej ti huaꞌa jamuan naijmiꞌi tyuꞌumuareꞌen tyaɨjna jetze maꞌacan tɨ ayan tiꞌayajna.
\s Tɨ nuꞌu aꞌij puaꞌa tiꞌityujchaꞌɨ aɨjna ɨ Diótrefes
\p
\v 9 Nuꞌuri tiꞌitɨ tihuaꞌutaitiꞌiriꞌi aɨme ɨ maj maun eꞌetyujsaꞌɨri. Ma ajta aɨn Diótrefes, tɨ huapɨꞌɨ raꞌaraanajchi tɨ nain cɨn antyujmuaꞌaréera huaꞌa jemi, aɨ pu cai raꞌancureꞌeviꞌitɨjcɨcaꞌa aɨjna ɨ nyuucari.
\v 10 Aɨj nu cɨn, nyatɨꞌɨj nyaun aꞌatanyén, nyaa nu neyan tyajamuaataꞌasin saj raꞌutamuaꞌaree aꞌij tɨ aɨn rɨcɨ, tɨ ayan aꞌij tíꞌinyaxaj aɨjna cɨmeꞌe ɨ nyuucari tɨ hueꞌitzi pueen. Ajta, capu aɨ naꞌa ayan tiraꞌaraanajchi tɨ ayan nyaruure, silu aɨ pu ajta cai huaꞌancureꞌeviꞌitɨjcɨca ɨ taꞌihuaamuaꞌa.
\p Ee xaa, aɨ pu ajta ayan hueꞌijmɨ, aɨme ɨ mej meyan tiꞌijxeꞌeveꞌe mej meyan tihuaꞌancureꞌeviꞌitɨn. Ajta, aɨn Diótrefes, aɨ pu ayan tihuaꞌamuariteꞌe mej mi cai cheꞌe maun eꞌetyujsaꞌɨrihuaꞌan.
\s Tɨ nuꞌu rɨꞌɨ tiꞌityujchaꞌɨ aɨjna ɨ Demetrio
\p
\v 11 Mɨ nyaj muaxeꞌeveꞌe, capej peyan cheꞌeta panaꞌa rɨjca tɨj aɨjna tɨ aꞌij puaꞌa tiꞌityujchaꞌɨ, silu pataꞌaj peyan cheꞌeta panaꞌa rɨjca tɨj ajta aɨn tɨ xaꞌapɨꞌɨn tiꞌityujchaꞌɨ. Aꞌatɨ tɨ naꞌa tɨ xaꞌapɨꞌɨn rɨcɨ, aɨ pu Dioj jetze ajtyamaꞌacan. Ma ajta, aꞌatɨ tɨ naꞌa tɨ aꞌij puaꞌa rɨcɨ, aɨ pu cai aꞌanaj raamuáꞌa ɨ Dioj.
\p
\v 12 Ma ajta, cɨmeꞌen aɨjna ɨ Demetrio, naimiꞌi mu meyan rɨꞌɨ tiꞌijxa. Ee xaa nyaꞌu, ayaa pu tiꞌayajna tɨ aɨn ayan tzaahuatiꞌiraꞌa cɨn tiꞌityujchaꞌɨ. Nyaa nu nyajta neyan tiraatyáxajta nyaɨjna ɨ Demetrio. Sajta muan, ayaa xu seyan tiꞌijmuaꞌaree nyeetzi cɨmeꞌe nyaj huataujnyátacan cɨn neyan tiraatyáxajta.
\s Ɨ nyuucari tɨ cɨn teꞌentipuaꞌariteꞌesin
\p
\v 13 Nyatɨꞌɨj tiꞌimuayuꞌusaꞌacaa, ayaa pu caꞌanijraꞌa tinataꞌacaraꞌa nyej eihua timuaataꞌixaateꞌen. Nyajta inyaa, canu neyan tiraataxeꞌeve nyej neyan timuaatayuꞌuseꞌen ɨ yuꞌuxari jetze.
\v 14 Me nyajta inyaa, ayaa nu tiꞌijxeꞌeveꞌe nyej caꞌanacan muejmi jemi aꞌatanyén tyej ti naijmiꞌi tyuꞌutaxaj tyamuaꞌa naa.
\p
\v 15 Cheꞌe Dioj muaatyapuaꞌariteꞌen. Aɨ mu ɨ taꞌamincustyamuaꞌa ya muataujteꞌe. Pataꞌaj muaa peyan nyeetzi jetze maꞌacan huaꞌutataujteꞌen naijmiꞌica ɨ nyaꞌamincustyamuaꞌa ɨ maj maun aꞌutyáuu. Ayaa puꞌu xaa, nuꞌuri raꞌantipuaꞌari.