\id JUD
\h San Judas
\toc1 San Judas
\mt1 Aꞌij tɨ raꞌuyuꞌuxacaꞌa aɨjna ɨ San Judas
\c 1
\s Judas pu tihuaꞌayuꞌuseꞌe aɨmej ɨ tɨ Dioj huaꞌutajee
\p
\v 1 Inyaa, i nyaj iꞌi Judas, nyaa nu saɨj pɨrɨcɨ tɨ tiꞌivaɨreꞌe aɨjna jemi ɨ Jesús tɨ ajta Cɨriistuꞌu pueen. Nyaa nu nyajta juutzajraꞌan pueen aɨjna ɨ Jacobo. Ayaa nu tyajaꞌamuayuꞌuseꞌe muan mɨ tɨ amuaatajée ɨ Dioj aɨjna ɨ tyaj tyajta rajyaꞌupua. Aɨ pu ajta aꞌamuachaɨ aꞌame tɨ ij ayan tyajamuaacɨꞌɨti sej seyan seiraꞌa saꞌajuꞌun jemin ɨ Cɨriistuꞌu.
\v 2 Cheꞌe ayan tyajamuaacɨꞌɨti tɨ Dioj, ayan amuaꞌancuꞌuvajxɨꞌɨn tyamuaꞌa naa, tɨ ij ajta nain cɨn amuaatyápuaꞌariteꞌen sej si seyan huapɨꞌɨ huaujxeꞌeveꞌen seij sajta seij.
\s Cɨmeꞌen aɨme ɨ maj hueꞌitzi cɨn tihuéꞌitii
\r (2 Pedro 2:1-17)
\p
\v 3 Ayaa puꞌu, neꞌihuaamuaꞌa mɨ nyaj aꞌamuaxeꞌeveꞌe, ayaa nu tiꞌijxeꞌevaꞌacaa nyej neyan nyaɨjna cɨn tyajamuaataitiꞌi nyaɨjna cɨmeꞌen tɨ Dioj tuꞌirajtuaasin tyatɨj tyanaꞌa puaꞌamua tej teyan raꞌastijreꞌe. Ma ajta, caꞌanijraꞌa pu naataꞌaca nyej ni neyan caꞌanejri cɨn tyajamuaatayuꞌuseꞌen nyej ni neyan tyajamuaatahuavii sej seyan tyuꞌutatyeseꞌen sej si sauj raꞌaraꞌastijreꞌen saɨjna ɨ nyuucari tɨ seij naꞌa raatyajtuaa huaꞌa jemi ɨ tɨ Dioj huatauraꞌate.
\p
\v 4 Seica mu aviitzi cɨn ajtyaujnaxcacaꞌa muejmi jemi. Ai mu aɨn pueen ɨ maj cai raꞌastijreꞌe ɨ Dioj. Majta saɨque pu ayan tihuaꞌamitejteꞌe aɨjna ɨ nyuucari ɨ tyaj cɨn raamuaꞌareeriꞌi tɨ huaapuaꞌa pu rɨꞌɨ titaatáꞌa aɨjna tɨ tiꞌitaijteꞌe, aɨjna ɨ tavastaraꞌa, ɨ Jesús tɨ ajta Cɨriistuꞌu pueen. Ayaa pu tihuaꞌamitejteꞌe tɨ nuꞌu aɨn tavastaraꞌa ayan rɨꞌɨ tihuaꞌutaꞌa mej mi meyan chaꞌa manaꞌa aꞌij puaꞌa titetyújchaɨca aꞌij tɨ tihuaꞌamitejteꞌe. Ayaa mu maɨjna cɨn huarɨn, aɨ mu majta ma rúujɨpua ɨ tavastaraꞌa. Ajta ayan tihuaꞌacɨꞌɨti aꞌij tɨ ajmiꞌi teꞌeyuꞌusiꞌihuacaꞌa ɨ maj cɨn rajpueitzi muaꞌajuꞌun.
\s Cɨmeꞌen ɨ tɨ Dioj ajmiꞌi huaꞌuxɨjte
\p
\v 5 Ayaa nu raxeꞌeveꞌe nyej neyan amuaataꞌan saj raꞌutamuaꞌaree tɨ aɨn tavastaraꞌa xaa hueꞌirajtuaa aujna u Egipto aɨme ɨ rutyaɨtestyamuaꞌa. Aj puꞌi eꞌeyan aɨn ayan huaꞌupuaꞌari aɨme ɨ maj cai raꞌaraꞌastijre.
\v 6 Majta aɨme ɨ mej tajapua tiꞌivaɨreꞌe, ɨ maj majta cai arauraste maɨjna cɨmeꞌe ɨ tɨ cɨn Dioj huaꞌantihuau, silu maraatyaxaahuatacaꞌa maɨjna cɨmeꞌe ɨ́ maj cɨn titetyaꞌupuꞌucaꞌa u tajapua aꞌu mej aꞌutyáꞌacaa mej mi puaꞌamuaque tiꞌitɨ cɨn teꞌentyarute tɨ eitzeꞌe cɨn seijre, aɨj pu cɨn Dioj ayan hueꞌityaana aꞌu tɨ aꞌutɨcaꞌa. Au mu eꞌityanamiꞌi muaꞌajuꞌun tɨj naꞌa tɨ yu aucaꞌitɨ aꞌame tɨj naꞌa rusen cɨmeꞌe, tɨ i aɨn Dioj ayan pueijtzi huaꞌutaꞌan ajna xɨcajraꞌan tɨꞌɨj huaꞌaxɨjteꞌen naijmiꞌica matɨj manaꞌa puaꞌamua seijreꞌe.
\p
\v 7 Ayaa pu cheꞌeta naꞌa Dioj huaꞌuxɨjte aɨme ɨ maj Sodoma eꞌechajcaꞌa, majta ɨ seica ɨ maj Gomorra eꞌemaꞌacantacaa, majta seica ɨ maj aꞌɨmɨ aꞌatachaatɨmaꞌacaa. Ayaa mu huatauraꞌa aɨme mej mi huataujxanaꞌacɨreꞌen, mej mi majta saɨque huataujxanaꞌacɨreꞌen aꞌij tɨ cai tiraavijteꞌe, tyaataꞌa jamuan ɨ ruxaꞌaj tyaataꞌa. Ayaa mu tyuꞌutaseijritiꞌihuacaꞌa maj maɨn pueen ɨ mej meyan tirajpueiitzi muaꞌajuꞌun maɨjna jetze ɨ taij tɨ cai aꞌanaj aꞌamɨꞌɨni.
\p
\v 8 Majta aɨme ɨ mej aviitzi cɨn ajtyaujnaxcacaꞌa muejmi jemi, ayaa mu cheꞌeta manaꞌa maɨjna jetze tiꞌimuaꞌatze yee maj ruxaahua huataujxanaꞌacɨreꞌen. Aɨj mu cɨn aꞌij puaꞌa raruure ɨ rutevi. Majta meyan ma rúujɨpua aꞌatɨ tɨ naꞌa tɨ tiꞌitɨ cɨn antyujmuaꞌaree. Aɨ mu majta aꞌij puaꞌa tihuaꞌaxa aɨme ɨ maj tajapua eꞌeseijreꞌe, ɨ maj majta rɨꞌɨ huapɨꞌɨ naa seijreꞌe.
\p
\v 9 Ma ajta aɨn Miguel tɨ eihua tiꞌitɨ cɨn tiꞌivaɨreꞌe ɨ tajapua, capu ayan huatauraꞌa tɨ ayan caꞌanin cɨn raꞌuxɨ́jteꞌen aɨjna ɨ tiyaaruꞌu matɨꞌɨj tiꞌitesaꞌacaa maɨjna cɨmeꞌe aꞌij mej raaruuren ɨ tevijraꞌan aɨjna ɨ Moisés tyaacan. Capu xaa ayan caꞌanin cɨn raꞌuxɨ́jte silu ayaa pu tiraataꞌixaa tɨcɨn: “Cheꞌe aɨn tavastaraꞌa muaꞌajtyaꞌaxɨꞌɨn.”
\p
\v 10 Ma majta aɨme ɨ tyetyaca, ayaa mu chaꞌa manaꞌa aꞌij puaꞌa tiꞌixaxaꞌa maɨjna cɨmeꞌe tiꞌitɨ tɨ aꞌij maj cai yauꞌite. Ajta ayaa mu maɨjna cɨn rujɨɨmuaꞌa ahuaujpuaꞌariteꞌe maɨjna cɨmeꞌe ɨ maj rujɨɨmuaꞌa aꞌij tirajtyauve ajta aɨjna tɨ aꞌij puaꞌa tihuaꞌamitejteꞌe. Ayaa mu eꞌen matɨj ɨ tiꞌitɨ maj cai raayɨꞌɨtɨ maj tyuꞌumuaꞌati. Aɨj mu cɨn rujɨɨmuaꞌa ahuaujpuaꞌariteꞌe.
\p
\v 11 Cuiꞌi xaa, Dioj pu pueijtzi huaꞌutaꞌasin aɨme. Ayaa mu cheꞌeta manaꞌa aꞌij puaꞌa titetyújchaɨcaꞌa tɨj ajta aɨjna ɨ Caín. Huaapuaꞌa mu meyan huatauraꞌa mej mi meyan eihua huapɨꞌɨ raamueꞌitɨn ɨ pueijtzi. Ayaa mu cheꞌeta manaꞌa tɨj huarɨj aɨjna ɨ Balaam tyaacan tɨ eihua huapɨꞌɨ autaꞌɨtze ɨ Dioj jemi. Ayaa mu cheꞌeta manaꞌa ahuaujpuaꞌarixɨꞌɨn tɨj ajta áꞌupuaꞌaracaꞌa aɨjna ɨ Coré tɨꞌɨj aɨn caꞌanin cɨn raatyaxaahuatacaꞌa aɨjna tɨ cɨn antyujmuaꞌaréera aɨjna ɨ Moisés tyaacan.
\p
\v 12 Satɨj sanaꞌa eꞌetyujsaɨreꞌen sej si naimiꞌi tyuꞌucuaꞌani saɨjna cɨmeꞌe saj huaujxeꞌeveꞌen, aɨme mu aꞌij puaꞌa rɨɨ muaꞌayeꞌi. Ayaa muꞌu, camu aꞌij manaꞌa tiꞌicuaꞌaca muejmi jamuan, majta meyan tiꞌiseijreꞌe muejmi jemi tɨj cɨɨxuri tɨ tiꞌicameijriꞌi. Aɨ mu rujɨɨmuaꞌa manaꞌa tyuꞌujmiꞌicuaca, majta, camu tihuaꞌamiꞌicuaca ɨ seica.
\p Ayaa mu eꞌen tɨj jaitɨri maj cai jetzen vijviꞌiye silu aaca pu raatɨsin. Ayaa mu majta eꞌen tɨj cɨye tɨ cai taaca tɨꞌɨj cai cheꞌe xɨjcataꞌa pɨtiꞌirɨjcaa, tɨ puaꞌa aꞌatɨ raꞌijcupi. Cu xuee huaꞌapua pu huatyaahua nain cɨmeꞌe.
\v 13 Majta meyana eꞌen tɨj ɨ jaj tɨ áꞌujruuréjvee caꞌanin cɨmeꞌe, tɨ ajta jetzen aamɨxcueꞌiri ajninyei. Ajta aɨjna tɨ huaꞌa jetze airáninyei aɨme ɨ tyaɨte, ayaa pu huaꞌutatéviꞌirasteꞌen. Majta mu meyan eꞌen tɨj xuꞌuraꞌave ɨ maj mauj áꞌujhuaꞌan aꞌu tɨ aꞌutɨcaꞌa. Ayaa pu tihuaꞌacɨꞌɨti maj maun aꞌutyaturan aꞌu tɨ eihua huapɨꞌɨ aꞌutɨcaꞌa.
\p
\v 14 Ajta aɨn ɨ Enóc, aɨjna tɨ arahuaꞌapua jetze tiꞌitej aɨme ɨ maj Adán jetzen airaanye, aɨ pu ayan tyuꞌutaxajtacaꞌa aɨme cɨmeꞌen tɨꞌɨj ayan tyuꞌutaxajtacaꞌa ɨ Dioj jetze maꞌacan tɨcɨn: “Casiꞌi, xaaseij tavastaraꞌa pu yavaꞌacányejsin huaꞌa jamuan ɨ maj ravaɨreꞌe ɨ tajapua, aɨme tɨ ajta huatauraꞌate.
\p
\v 15 “Aɨ pu huaꞌaxaꞌapɨꞌɨntariꞌiran naijmiꞌica, ajta aɨj pu cɨn huaꞌaxɨjteꞌen naijmiꞌica ɨ mej rajchaɨraꞌacaa ɨ Dioj aɨjna cɨmeꞌe ɨ mej aꞌij puaꞌa rɨjcaa tɨ cai ayan tiraavijteꞌe ɨ Dioj jemi. Aɨ pu ajta aɨjna cɨn huaꞌaxɨjteꞌen aɨjna cɨmeꞌe maj meyan eihua huapɨꞌɨ aꞌij puaꞌa tíꞌixajtacaa ɨ Dioj aɨme ɨ maj autyajturaa ɨ jemin mej mi cai meyan huarɨni aꞌij tɨ tiraavijteꞌe ɨ jemin.” Ayaa pu tyuꞌutaxajtacaꞌa aɨjna ɨ Enóc.
\p
\v 16 Aɨme ɨ tyaɨte, ai mu aɨn pueen ɨ maj tiꞌitɨ cɨn runyuusteꞌe, ɨ maj nínyuꞌucacu. Ayaa mu titetyújchaꞌɨ aꞌij tɨ tihuaꞌamitejteꞌe ɨ huaꞌa tzajtaꞌa. Caꞌanin mu cɨn tiꞌixaata muaꞌayeꞌi mej mi maɨjna cɨn áꞌujtzaahuateꞌe. Majta meyan rɨꞌɨ tihuaꞌajee ɨ tyaɨte mej mi tiꞌitɨ cɨn huaꞌutyamueꞌitɨn.
\s Caꞌanijraꞌa pu huaꞌataꞌaca aɨme ɨ mej tyaꞌatzaahuateꞌe
\p
\v 17 Ma sajta muan, mɨ nyaj aꞌamuaxeꞌeveꞌe, sataꞌaj raꞌutamuaꞌaree aꞌij mej tyuꞌutaxajtacaꞌa ɨ Dioj jetze maꞌacan aɨme ɨ tɨ huaꞌantihuau ɨ tavastaraꞌa, aɨjna ɨ Jesús tɨ ajta Cɨriistuꞌu pueen.
\v 18 Ayaa mu tyuꞌutaxajtacaꞌa tɨ ayan tyajaꞌureꞌenyejsin tɨcɨn: “Ajna, tɨꞌɨj ari nain teꞌentipuaꞌarijmeꞌen, aɨ mu huataseijreꞌesin aɨme ɨ maj tityaꞌaxaahuariꞌi, ɨ mej meyan titetyújchaɨ muaꞌajuꞌun aꞌij tɨ tihuaꞌamitejteꞌe ɨ huaꞌa tzajtaꞌa, tɨj naꞌa tɨ cai ayan tiraavijteꞌe ɨ Dioj jemi.”
\p
\v 19 Ai mu aɨn pueen ɨ mej caꞌanijraꞌa huaꞌataꞌaca ɨ tyaɨte mej mi eꞌitaꞌa aꞌutacɨꞌɨcaꞌan. Aɨ mu rujɨɨmuaꞌa manaꞌa aꞌij tirajtyau aꞌij mej rɨcɨ. Camu aꞌatzu jetzen araujcaꞌanye ɨ xaijnyuꞌucaraꞌaraꞌan ɨ Dioj.
\p
\v 20 Ma sajta muan, mɨ nyaj aꞌamuaxeꞌeveꞌe, sataꞌaj caꞌanijraꞌa tyuꞌutaꞌan seij sajta seij sej si tyaꞌutaviicueꞌi saɨjna cɨmeꞌe saj raꞌaraꞌastijreꞌen saɨjna tɨ Dioj ayan huatauraꞌate. Sataꞌaj sajta araujcaꞌanyen saɨjna jetze ɨ xaijnyuꞌucaraꞌaraꞌan ɨ Dioj, sej si seyan huatejnyuuni ɨ Dioj jemi.
\v 21 Sataꞌaj sauj raꞌutamuaꞌaree tɨj naꞌa tɨ yu aucaꞌitɨ aꞌame tɨ aɨn Dioj ayan aꞌamuaxeꞌeveꞌe. Sataꞌaj sajta seyan rachueꞌevaꞌa saɨjna ɨ tavastaraꞌa, aɨjna ɨ Jesús tɨ ajta Cɨriistuꞌu pueen tɨ ij aɨn aɨjna cɨn amuaꞌancuꞌuvajxɨꞌɨn aɨjna cɨmeꞌe tɨ ayan tyajamuaataꞌasin sej seyan jemin ruurican huatyaturan tɨj naꞌa rusen cɨmeꞌe.
\p
\v 22 Sataꞌaj sajta caꞌanijraꞌa huaꞌutaꞌan seica ɨ maj cai rɨꞌɨ tyaꞌatzaahuateꞌe.
\v 23 Sataꞌaj sajta hueꞌirajtuaani seica, muareꞌeri cɨmeꞌe. Ayaa pu seiraꞌa aꞌame. Cu xuee saj hueꞌirajtuaani ɨ taij jetze. Sajta seica, ɨ mej tiꞌitzɨɨniꞌireꞌe, sataꞌaj huaꞌancuꞌuvajxɨꞌɨn. Ayaa xu saɨjna cɨn tiꞌitzɨɨnyaꞌa aꞌini eihua mu huapɨꞌɨ xanaꞌavisiꞌi. Cu xuee ajta tihuaꞌacɨɨxu ayan tiꞌichuaamua aɨjna cɨmeꞌe ɨ maj cɨn autyajturaa ɨ Dioj jemi.
\s I nyuucari tɨ cɨn raꞌantipuaꞌariteꞌe
\p
\v 24-25 Ajta aɨn ɨ Dioj tɨ saɨj naꞌa pueen, ai pu aɨn pueen tɨ tuꞌirajtuaani. Aɨ pu raayɨꞌɨtɨ tɨ caꞌanijraꞌa amuaataꞌan sej si cai tiꞌitɨ cɨn atyaꞌɨtzaꞌaraꞌan ɨ jemin. Aɨ pu ajta amuaatyahuiiteꞌesin ɨ jemin aꞌu tɨ rɨꞌɨ huapɨꞌɨ naa tiꞌiseijreꞌe. Muan xu cai tiꞌitɨ aꞌaturaacan cɨn saun huateꞌen, sajta huapɨꞌɨ xu huataujtyamuaꞌaveꞌesin.
\p Ticheꞌe teyan rɨꞌɨ tiraataꞌan aꞌini aɨ pu aɨjna cɨn tiꞌityejvee aɨjna cɨmeꞌe tɨ eitzeꞌe veꞌe. Aɨ pu ajta nain cɨn tiꞌijta, ajta nain cɨn antyujmuaꞌaree. Aɨ pu ajta ayan tyejmi japua huanyúu aɨjna cɨmeꞌe tɨ Cɨriistuꞌu tuꞌirajtuaa tɨꞌɨj cai xɨ huataséiiraꞌa ɨ chaanaca tyaj japuan seijreꞌe. Ticheꞌe teyan tyaɨjna cɨn rɨꞌɨ tiraataꞌan tɨjnaꞌa tɨ yu aucaꞌitɨ aꞌame tɨj naꞌa rusen cɨmeꞌe. Cheꞌe ayan tyajaꞌureꞌenyen.