\id REV
\h Apocalipsis
\toc1 Apocalipsis
\mt1 Ɨ nyuucari tɨ cɨmeꞌen raxa aɨjna ɨ Jesús tɨ aɨn tiraataseijrate aɨjna ɨ San Juan
\c 1
\s Ɨ nyuucari tɨ cɨn raꞌutyejchee
\p
\v 1 Yaa nu nyaɨjna cɨn tyuꞌutaxajta nyaɨjna cɨmeꞌen ɨ nyuucari ɨ tɨ ruꞌavaatacaꞌa ɨ Dioj jemi, tɨ ajta cɨmeꞌen raxa ɨ Jesús tɨ ajta Cɨriistuꞌu pueen. Dioj pu ayan raataꞌa tɨ aɨn Cɨriistuꞌu ajta huaꞌutaseijrateꞌen aɨme ɨ maj ravaɨreꞌe mej mi raamuaꞌaree tɨ Dioj ari ayan raaxaꞌapɨꞌɨntare aꞌij tɨ caꞌanacan tyajaꞌureꞌenyejsin. Ajta aɨn Cɨriistuꞌu, ayaa pu aɨjna cɨn huaꞌutaꞌixaa aɨjna cɨmeꞌe tɨ saɨj aꞌutaityacaꞌa tɨ jemin tiꞌivaɨreꞌe ɨ uteꞌe tɨ ij ayan raataseijrateꞌen aɨjna ɨ Juan.
\v 2 Nyaa nu neyan tyajaꞌamueꞌixaateꞌe tɨ ayan tiꞌayajna aɨjna ɨ nyuucari tɨ Dioj jemi eꞌemaꞌacan, tɨ cɨmeꞌen raxa aꞌij tɨ huarɨj aɨjna ɨ Jesús tɨ ajta Cɨriistuꞌu pueen.
\p
\v 3 Cheꞌe rutyamuaꞌavaꞌa aɨjna ɨ aꞌatɨ tɨ ayan huaꞌanamuajristeꞌe aijna i nyuucari tɨ Dioj jemi aꞌuveꞌeme. Micheꞌe majta rutyamuaꞌavaꞌa aɨme ɨ mej meyan ranamua, majta meyan raꞌastijreꞌe aꞌij tɨ teꞌeyuꞌusiꞌi aijna jetze, aꞌini puꞌuri tɨn tyajaꞌureꞌenyejsin.
\s Juan pu tihuaꞌayuꞌuseꞌe aɨme ɨ maj jeꞌetyújsaꞌɨri taꞌaraahuaꞌapua teyuu
\p
\v 4 Nyajta inyaa, i nyaj iꞌi Juan, ayaa nu tyajaꞌamuayuꞌuseꞌe mɨ sej saun eꞌetyujsaꞌɨri aráhuaꞌapuaqueꞌe aꞌu tɨ huacaꞌa u Asia. Cheꞌe aɨn rɨꞌɨ tyajamuaataꞌan, ajta amuaatyápuaꞌariteꞌen aɨjna tɨ jajcua ɨmɨ seijraꞌacaa, tɨ ajta ijii seijreꞌe, tɨ ajta ayan auj seiraꞌa aꞌame para rusen cɨmeꞌe. Cheꞌe ayan cheꞌeta naꞌa amuaaruuren aɨjna xaijnyuꞌucaraꞌaraꞌan tɨ aun eꞌeseijreꞌe aꞌu tɨ Dioj áꞌujca ɨpuari japua. Aɨ pu arahuaꞌapua cɨn tiꞌivaɨreꞌe.
\v 5 Cheꞌe ajta aɨn rɨꞌɨ tyajamuaataꞌan, ajta amuaatyápuaꞌariteꞌen aɨjna ɨ Jesús tɨ ajta Cɨriistuꞌu pueen. Aɨ pu cai aꞌanaj tiꞌitɨ cɨn atyaꞌɨtzaꞌara aɨjna cɨmeꞌe tɨ ayan tyaꞌanxájta ɨ Dioj jetze maꞌacan. Ai pu ajta aɨn pueen ɨ tɨ anacai aꞌitáraa huaꞌa tzajtaꞌa aɨme ɨ mɨꞌɨchite. Ai pu ajta aɨn pueen tɨ tihueꞌijteꞌe naijmiꞌica ɨ mej títyatatí iiyan chaanaca japua. Aɨ pu taxeꞌeveꞌe, ajta ruxuureꞌe cɨn tacaijxɨ ɨ tyaj cɨn autyajturaa ɨ Dioj jemi.
\p
\v 6 Aɨ pu ajta ayan taataꞌa tyej ti jamuan tyuꞌutaijta, ajta tej ti tyajta raatyavaɨreꞌen tyaɨjna ɨ Diojraꞌan, ɨ tɨ ajta rajyaꞌupua ɨ Cɨriistuꞌu. Ticheꞌe teyan rɨꞌɨ tirataꞌacareꞌen tɨj naꞌa rusen cɨmeꞌe. Cheꞌe aɨn ajta nain cɨn tyuꞌutaijta, tɨj naꞌa tɨ yu jaucaꞌitɨ aꞌame tɨj naꞌa rusen cɨmeꞌe.
\p
\v 7 Casiꞌi, xaaseij, aɨ pu jaitɨri jetze yavaꞌacányejsin. Naimiꞌi mu raseijran matɨj manaꞌa maj raajeꞌica. Majta naimiꞌi ɨ huaꞌatyaɨtestyamuaꞌa, matɨj manaꞌa puaꞌamua iiyan seijreꞌe ɨ chaanaca japua, aɨ mu ruyeinyen maɨjna cɨmeꞌe maj huataujxaamɨsteꞌesin matɨꞌɨj raaseij.
\p
\v 8 Ayaa pu tiꞌixa aɨjna ɨ tavastaraꞌa, tɨ ajta Dioj pueen tɨ seijreꞌe, tɨ ajta jajcua ɨmɨ seijraꞌacaa, ajta tɨ seijraꞌa aꞌame tɨj naꞌa rusen cɨmeꞌe. Ayan tɨcɨn: “Nyaa nu nyaɨn pueen ɨ taꞌanajca, nyajta, ɨ nyatuꞌuveꞌetyajtɨ.”
\s Juan pu raaseij ɨ Cɨriistuꞌu
\p
\v 9 Me nyajta inyaa, i nyaj iꞌi Juan, inyaj aꞌamueꞌihuaaraꞌa pueen, ayaa nu cheꞌeta nyanaꞌa aꞌamua jamuan rajpueijtzi nyaɨjna cɨmeꞌe nyaj Cɨriistuꞌu jetze ajtyamaꞌacan. Naimiꞌi tu tyuꞌutaijta Cɨriistuꞌu jamuan. Tyajta naimiꞌi tu teyan teꞌeviicueꞌi. Au nu aꞌucatii aujna aataꞌa tɨ aꞌaraahuachi tɨ ayan tyajaꞌarajtyahuaa tɨcɨn Patmos. Au nu aꞌityanamiꞌihuacaꞌa nyaɨjna cɨmeꞌe nyaj tihuaꞌutaꞌixaa nyaɨjna cɨmeꞌen ɨ nyuucari tɨ cɨn raxa ɨ Dioj, tɨ ajta aɨjna cɨn raxa aꞌij tɨ huarɨj aɨjna ɨ Jesús.
\p
\v 10 Tɨꞌɨj ari ajna pɨtiꞌirɨjcaa matɨꞌɨj ranaꞌamiche ɨ tavastaraꞌa, aɨn xaijnyuꞌucaraꞌaraꞌan ɨ Dioj ayan rajve nyeetzi jemi. Nyatɨꞌɨj ni nyeyan raanamuajriꞌi u nyahuaritaꞌa tɨ aꞌatɨ caꞌanin cɨn naatajée. Ayaa pu namuajraꞌacaa tɨj tɨ puaꞌa aꞌatɨ ucaajijhua trompeeta jetze.
\v 11 Ayan tɨcɨn:
\p ―Pataꞌaj hui raꞌutyeeyuꞌuxa ɨ yuꞌuxari jetze aꞌij pej tiꞌiseij. Pajta huaꞌutaiti huaꞌa jemi ɨ mej aráhuaꞌapuaqueꞌe eꞌetyujsaꞌɨri ɨ Dioj jemi, aun tɨ huacaꞌa u Asia. Tɨj naꞌa aujna u Efeso, ajta aujna u Esmirna, ajta aujna u Pérgamo, ajta aujna u Tiatira, ajta aujna u Sardis, ajta aujna u Filadelfia, ajta aujna u Laodicea.
\p
\v 12 Nyatɨꞌɨj ni pɨ aꞌureꞌeve nyej ni raaseij nyaɨjna ɨ aꞌatɨ tɨ nejeꞌejeevacaꞌa. Nyatɨꞌɨj neyan huarɨj, ayaa nu eenyeꞌequeꞌe tyuꞌuseij tiꞌitɨ tɨ japuan antitátzajmee, ooro tɨ cɨn taavijhuacaꞌa. Ayaa pu puaꞌamua araꞌasicaa arahuaꞌapua ɨ cantiiraꞌa.
\v 13 Ajta, au pu eꞌitaꞌa aɨjna tɨ japuan antitátzajmee, seij pu aun huatyavaacaꞌa tɨ ayan seijraꞌacaa tɨj tevi. Ayaa pu eꞌenyeꞌen tyaꞌucávɨjcaa cɨɨxuri cɨmeꞌe tɨ tɨtɨꞌɨj, ajta puaasi pu cɨn avaꞌajɨꞌɨquiꞌihuacaꞌa tɨ ooro cɨn taavijhua.
\v 14 Cueinaraꞌan pu huijmuꞌucaa, ajta cueinaviꞌican pu cácɨjpuajcaꞌa. Ayaa pu seijraꞌacaa tɨj canyaꞌa muxa tɨ cueina, tɨ ajta seijreꞌe tɨj ɨ seeri. Eecan pu ajta ayan seijraꞌacaa ɨ ɨꞌɨsaaraꞌan jetze tɨj taij tɨ aꞌataa.
\p
\v 15 Ajta, ayaa pu seijraꞌacaa ɨ ɨɨcajraꞌan jetze tɨj tiꞌitɨ tɨ camueijriꞌihua, tɨ mestí. Naa pu tiꞌityamastajyeꞌicaa tɨj coobre maj an yaꞌuxɨre ɨ taij tzajtaꞌa. Ajta, tɨꞌɨj aɨn tíꞌixajtacaa, ayaa pu namuajraꞌacaa tɨj jatyaꞌana tɨ sihuajna tɨ huatamɨꞌɨyacaꞌa.
\v 16 Aɨ pu ruꞌɨrɨɨtaꞌa ruꞌityaꞌacaa ɨ rumuajcaꞌa jetze, ɨ xuꞌuraꞌave ɨ maj arahuaꞌapua araꞌase. Ajta aɨn ɨ nyuucari tɨ jetzen eꞌijninyeicaꞌa, ayaa pu seijraꞌacaa tɨj chun tɨ ruxaꞌajtaꞌa tyaꞌajcámɨɨmɨ́jmee. Ajta ayaa pu tyaꞌataacaꞌa ɨ rujetze tɨj ɨ xɨcaj tɨ nain cɨn aꞌiraxɨꞌɨxɨre.
\p
\v 17 Cɨmeꞌen nuꞌu raaseij, aj nu ni aꞌarajve aꞌu tɨ aꞌaraɨɨcajme. Cu xuee nyaj cu huamɨꞌɨni. Ma ajta aɨn, ruꞌɨrɨɨtaꞌa cɨn ɨ rumuajcaꞌa naꞌajtamuare. Ayaa pu tinaataꞌixaa tɨcɨn:
\p ―Capej hui tiꞌitzɨɨnyaꞌa. Nyaa nu nyaɨn pueen ɨ nyaj anajca, ajta nyaj uveꞌetyajtɨ.
\v 18 Nyaa nu nyaɨn pueen ɨ nyaj iꞌiruuri. Nyaa nu huamɨꞌɨ. Me nyajta, ijii, nyajtahuaꞌa nu iꞌiruuri para rusen cɨmeꞌe. Nyajta nu nyaɨjna cɨn antinmuaꞌaree nyej ni raaxaꞌapɨꞌɨntareꞌen maj huacuiꞌini naꞌari maj ruuri muaꞌaraꞌani, nyajta nyej ni hueꞌityaanan aujna aꞌu maj aꞌacuiꞌini naꞌari nyaj hueꞌirajtuaani nyaujna.
\p
\v 19 ’Maꞌacui xaa, pataꞌaj paɨjna autyeeyuꞌuxa ɨ pej peri raaseij, ɨ tɨ ijii seijreꞌe, ajta ɨ tɨ auj seijreꞌe, ajta tɨ auj ayan tyajaꞌureꞌenyejsin.
\p
\v 20 ’Aɨme cɨmeꞌen ɨ xuꞌuraꞌave ɨ maj aráhuaꞌapua araꞌase ɨ paj huaꞌuseij ɨ nyaj hueꞌityaꞌaca nyaꞌɨrɨɨtaꞌa pujmeꞌen ɨ nyamuajcaꞌa jetze, ajta aɨjna ɨ tɨ arahuaꞌapua tɨ japuan antitátzajmee, ayaa nuꞌuri timuaataꞌixaateꞌesin matɨj manaꞌa puaꞌamua ruꞌavaatacaꞌa mueetzi jemi. Maɨjna ɨ xuꞌuraꞌave ɨ maj arahuaꞌapua araꞌase, ai mu aɨn pueen ɨ maj maɨjna cɨn antyujmuaꞌaree mej mi huaꞌuchaɨn ɨ maj eꞌetyujsaꞌɨri huaꞌa teyujtaꞌa. Ajta, ɨ tɨ arahuaꞌapua tɨ japuan antitátzajmee, ai mu maɨn pueen ɨ tyaɨte ɨ maj aráhuaꞌapuaqueꞌe eꞌetyujsaꞌɨri ɨ maj ranaꞌamiche ɨ Dioj.
\c 2
\s Ɨ nyuucari tɨ tihuaꞌayuꞌuseꞌe aɨme ɨ maj Éfeso eꞌetyujsaꞌɨri
\p
\v 1 ’Pataꞌaj peyan tiraataitiꞌi paɨjna ɨ tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Efeso tɨ cɨmeꞌen yee: “Ayaa pu tiꞌixa aɨjna ɨ tɨ hueꞌityaꞌaca ruꞌɨrɨɨtaꞌa aɨme ɨ xuꞌuraꞌave ɨ maj arahuaꞌapua araꞌase. Ayaa pu tiꞌixa aɨjna tɨ huaꞌa tzajtaꞌa an eꞌeyeꞌive ɨ tɨ ooro cɨn taavijhua, tɨ ajta antitátzajmee.
\v 2 Nyaa nu hui neyan tiꞌijmuaꞌaree aꞌij sej titetyújchaꞌɨ, saj sajta tyamuaꞌa naa teꞌeviicueꞌi. Sajta muan, caxu huaꞌancureꞌeviꞌitɨcɨ aɨme ɨ maj aꞌij puaꞌa titetyújchaꞌɨ silu ayaa xu seri huaꞌumuaꞌareeriꞌi aɨme ɨ meyan ruseijratacaꞌa maj nuꞌu aɨn pueen ɨ tɨ Dioj huaꞌantihuau; maj nuꞌu tyuꞌutyavaɨreꞌen tavastaraꞌa jetze maꞌacan. Ma majta aɨme, camu aɨn pueen. Ayaa muꞌu ruhueꞌitacaꞌa.
\v 3 Nyaa nu neyan tiꞌijmuaꞌaree saj raayɨꞌɨtɨ saj tyaꞌutaviicueꞌi nain cɨmeꞌe. Muan xu sajta rajpueijtzi xaꞌayeꞌi. Ma sajta muan, caxu raatyaxaahuatacaꞌa saj naꞌaraꞌastijreꞌe.
\p
\v 4 “Me nyajta inyaa, ayaa nu tyajaꞌamueꞌixaateꞌe ɨ saj cɨn autyajturaa inyeetzi jemi. Xuꞌuri raatyaxaahuatacaꞌa sej seyan nyexeꞌeveꞌe satɨꞌɨj anacai tiꞌinyexeꞌevaꞌacaa.
\v 5 Sataꞌaj seyan seijna jetze tyuꞌumuaꞌati aꞌij sej eenyeꞌequeꞌe ma nuurai. Sataꞌaj seyan saɨque tyuꞌumuaꞌati sej si seyan cheꞌeta rɨꞌɨ titetyújchaꞌɨ satɨꞌɨj anacai rɨjcaa. Naꞌari sacai seyan huarɨni, nyaa nu nyaun muejmi jemi aꞌatanyejsin nyej ni amuaꞌariꞌi aɨjna ɨ tɨ antitátzajmee ɨ tɨ ajta muejmi jemi seijreꞌe. Ayaa nu xaa rɨni tɨ puaꞌa sacai saɨque tyuꞌumuaꞌati.
\p
\v 6 “Ma sajta muan, xaꞌapɨꞌɨn xu rɨcɨ aɨjna cɨmeꞌe tɨ cai aꞌatzu amuaꞌaranajchi aꞌij mej yeꞌi rɨcɨ aɨme ɨ maj meyan huaꞌatamuaꞌamua tɨcɨn: Ɨ maj caꞌanyejri cɨn tieꞌijta. Ayaa pu cheꞌeta cai tinaꞌaraanajchi inyeetzi.
\v 7 Ajta aɨn ɨ tɨ huityajnamua, cheꞌe aɨn rɨꞌɨ tiraanamua aꞌij tɨ aɨn xaijnyuꞌucaraꞌaraꞌan ɨ Dioj tihueꞌixaateꞌe aɨme ɨ maj eꞌetyujsaꞌɨri ɨ Dioj jemi. Ajta, aɨjna cɨmeꞌe aɨjna ɨ aꞌatɨ tɨ tyuꞌumueꞌitɨn, ayaa nu raataꞌasin tɨ aɨn aꞌatɨ ayan raacuaꞌani aɨjna jetze ɨ tɨ seijreꞌe ɨ cɨye tɨ cɨn iꞌiruuri aꞌaraꞌani, aɨjna ɨ cɨye ɨ tɨ aun aꞌatavee aꞌu maj aꞌutaujtyamuaꞌaveꞌen jemin ɨ Dioj.”
\s Cɨmeꞌen ɨ maj Esmirna eꞌetyujsaꞌɨri
\p
\v 8 ’Pataꞌaj pajta peyan tiraataitiꞌi paɨjna ɨ tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Esmirna tɨ cɨmeꞌen yee: “Ayaa pu tiꞌixa aɨjna ɨ tɨ aɨn pueen ɨ taꞌanajca, ajta ɨ tɨ aɨn pueen ɨ tuꞌuveꞌetyajtɨ, aɨjna ɨ tɨ huamɨꞌɨ, tɨ ajta ajtahuaꞌa huatarú.
\v 9 Nyaa nu neyan tiꞌijmuaꞌaree ɨ saj cɨn rajpueijtzi, sajta muan, sacai aꞌij tiꞌijviicueꞌi. Ma sajta muan, nyeetzi jemi xu chijtyaani pueen tyamuaꞌa eihua. Nyaa nu nyajta ramuaꞌaree maj eihua huapɨꞌɨ tiꞌihueꞌitaca aɨme ɨ mej meyan ruseijrataca maj nuꞌu maɨjna jetze ajtyamaꞌacan ɨ Israel. Ma ajta, capu ayan tiꞌayajna silu aɨ mu jemin eꞌetyujsaꞌɨri ɨ Satanás.
\p
\v 10 “Caxu ratzɨɨnyaꞌa ɨ saj rajpueiitzi xaꞌajuꞌun. Casiꞌi, aɨjna ɨ tiyaaruꞌu aɨ pu aun amuaꞌutyatuaasin seica jamuan aꞌu maj tityajaꞌanaamɨca. Ayaa pu aɨjna cɨn áꞌamuaruuren mej mi amuaatyeeseij tɨ puaꞌa seyan tinaꞌastijraꞌa nusu sacai. Ayaa xu puaꞌan xɨcaj rajpueiitzi xaꞌajuꞌun aꞌachu cumu tamuaamuataꞌa xɨcaj. Tɨ puaꞌa seyan nain cɨn tyaꞌutaviicueꞌi inyeetzi jemi, sajta cai aꞌij sanaꞌa tɨ puaꞌa meyan amuaacuiꞌini, nyaa nu nyaɨjna amuaataꞌasin nyaɨjna ɨ curuun ɨ saj cɨn iꞌiruuri xaꞌajuꞌun tɨj naꞌa rusen cɨmeꞌe.
\v 11 Ajta aɨn ɨ tɨ huityajnamua, cheꞌe aɨn rɨꞌɨ tiraanamua aꞌij tɨ aɨn xaijnyuꞌucaraꞌaraꞌan ɨ Dioj tihueꞌixaateꞌe aɨme ɨ maj eꞌetyujsaꞌɨri ɨ Dioj jemi. Ajta, aɨjna ɨ aꞌatɨ tɨ tyuꞌumueꞌitɨn, capu aꞌatzu racɨꞌɨti tɨ aɨn ayan cheꞌeta rajpueiitzi aꞌaraꞌani matɨj aɨme ɨ maj yáꞌujɨsin ɨ ruxaijnyuꞌuca ɨ tɨ auj ruuricaa.”
\s Cɨmeꞌen ɨ maj Pérgamo eꞌetyujsaꞌɨri
\p
\v 12 ’Pataꞌaj pajta peyan tiraataitiꞌi paɨjna ɨ tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Pérgamo tɨ cɨmeꞌen yee: “Ayaa pu tiꞌixa aɨjna ɨ tɨ ruꞌityeechui ɨ chun ɨ tɨ ruxaꞌajtaꞌa tyaꞌajcámɨɨmɨ́jmee.
\v 13 Nyaa nu hui ramuaꞌaree aꞌu saj aꞌuchaatɨme, aujna aꞌu tɨ tejeꞌijta aɨjna ɨ Satanás. Ma sajta muan, saucheꞌe xu naꞌastijreꞌe inyeetzi. Caxu raatyaxaahuatacaꞌa saj naꞌatzaahuateꞌe inyeetzi sajna xɨcajraꞌa tɨ jetzen seijraꞌacaa aɨjna ɨ Antipas tyaacan, aɨjna tɨ ayan huataujseijratacaꞌa tɨ aɨn nyeetzi jetze maꞌacan tiꞌivaɨraꞌacaa. Capu tiꞌitɨ cɨn autyajturaa inyeetzi jemi aɨjna ɨ aꞌatɨ. Ma majta, aɨ mu raajeꞌica muejmi tzajtaꞌa, maujna aꞌu tɨ tejeꞌijta aɨjna ɨ Satanás.
\p
\v 14 “Ma sajta muan, tiꞌitɨ xu cɨn autyajturaa inyeetzi jemi. Au mu eꞌeseijreꞌe muejmi jemi seica ɨ mej meyan tiraꞌastijreꞌe maɨjna ɨ nyuucari ɨ maj cɨn meyan cheꞌeta tihuaꞌamuaꞌate tɨj ajta aɨn Balaam tyaacan tiraamuáꞌate aɨjna ɨ Balac tyaacan tɨ ayan hueꞌitzi cɨn huaꞌutyamueꞌitɨn aɨme ɨ maj Israel jetze ajtyamaꞌacantacaa, mej mi meyan raacuaꞌani maɨjna ɨ hueꞌiraꞌa ɨ maj raamuaꞌɨvajtacaꞌa aɨme jemi ɨ maj cai dioj pueen, ajta maj tyuꞌuxanaꞌacɨreꞌe.
\v 15 Ayaa mu cheꞌeta manaꞌa seijreꞌe muejmi jemi seica ɨ mej meyan majta raꞌastijreꞌe ɨ huaꞌayeꞌira aɨme ɨ maj caꞌanejri cɨn tieꞌijta ɨ mej jee nicolaítas. Ma sajta muan, ayaa xu sauj huaꞌataꞌaca maj maun éꞌeseijraꞌa.
\p
\v 16 “Aɨj nu cɨn, neyan tyajaꞌamueꞌixaateꞌe yee sataꞌaj saɨque tyuꞌumuaꞌati. Naꞌari sacai seyan huarɨni, nyaa nu muejmi jemi aꞌatanyejsin, nyej ni huaꞌutyenyaꞌusiꞌiteꞌen aɨme aɨjna cɨmeꞌe nyej neyan tyuꞌutaijta saj caꞌanyejri cɨn huaꞌutamuariteꞌen.
\p
\v 17 “Ajta aɨn tɨ huityajnamua, cheꞌe aɨn tyamuaꞌa naa tiraanamua aꞌij tɨ aɨn xaijnyuꞌucaraꞌaraꞌan ɨ Dioj tihueꞌixaateꞌe aɨme ɨ maj eꞌetyujsaꞌɨri ɨ Dioj jemi. Ajta aɨn ɨ tɨ tyuꞌumueꞌitɨn, ayaa nu raatapueijveꞌesin aɨjna ɨ cueꞌira tɨ uteꞌe éꞌeviitziꞌi. Nyajta nu tetej raatátɨstejsin tɨ cueinaraꞌa. Ajta aɨjna jetze ɨ tetej jajcuacan cɨn pu teꞌeyuꞌusiꞌi aꞌij tɨ ari antyahuaa aɨjna ɨ aꞌatɨ. Ajta capu maꞌa aꞌatɨ ayan ramuaꞌaree aꞌij tɨ teꞌeyuꞌusiꞌi silu aɨ pu ɨ aꞌatɨ ramuaꞌaree ɨ nyaj raatátɨstejsin nyaɨjna ɨ tetej.”
\s Cɨmeꞌen ɨ maj Tiatira eꞌetyujsaꞌɨri
\p
\v 18 ’Pataꞌaj pajta peyan tiraataitiꞌi paɨjna ɨ tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Tiatira tɨ cɨmeꞌen yee: “Ayaa pu yee tiꞌixa aɨjna tɨ yaujraꞌan pueen ɨ Dioj, tɨ ajta ayan éꞌenyeꞌen aj jɨꞌɨsíjmee tɨj taij tɨ atyújmeme, tɨ ajta ayan eenyeꞌen tiɨɨcajmee tɨj coobre tiꞌitɨ ɨ maj tiracámeijriꞌi.
\p
\v 19 “Nyaa nu ramuaꞌaree aꞌij sej titetyújchaꞌɨ. Muan xu hui seyan ruxeꞌeveꞌe seij sajta seij. Sajta, seyan ruxéꞌeviꞌiraꞌa cɨn tiꞌivaɨreꞌe. Sajta teꞌeviicueꞌi tyamuaꞌa naa. Sajta ijii, eitzeꞌe xu rɨꞌɨ titetyújchaꞌɨ sacai sejmiꞌi.
\p
\v 20 “Ma ajta, aɨ pu cai naꞌaraanajchi aꞌij saj rɨcɨ. Muan xu rataꞌaca tɨ aɨn jɨitaꞌa ayan aꞌutyavaaca muejmi jemi, aɨjna ɨ jɨitaꞌa tɨ ayan antyahuaa tɨcɨn Jezabel. Ayaa pu ruseijrata tɨ Dioj jetze maꞌacan tiꞌixaxaꞌa. Ma ajta, capu aɨn pueen aꞌini aɨ pu ayan hueꞌitzi cɨn tihuaꞌamuaꞌate mej mi tyuꞌuxanaꞌacɨreꞌen mej mi majta meyan raacuaꞌani maɨjna ɨ hueꞌiraꞌa ɨ maj ramuaꞌɨvajtacaꞌa aɨme jemi ɨ maj cai dioj pueen.
\v 21 Nuꞌuri aꞌatee nyaj raataꞌa tɨ saɨque tyuꞌumuaꞌati. Ma ajta aɨn, capu aꞌatzu áꞌujcaꞌanye tɨ ayan saɨque huarɨni aɨjna cɨmeꞌe tɨ tiꞌixanaꞌacɨraꞌa.
\p
\v 22 “Maꞌacui xaa, ayaa nu an yaꞌarajɨsin utaatzi japua aꞌu maj aꞌacuꞌucutzu ɨ mej tiꞌicucuiꞌi. Majta aɨme ɨ maj jemin tiꞌixanaꞌacɨreꞌen, ayaa nu eihua huapɨꞌɨ pueijtzi huaꞌutaꞌasin tɨ puaꞌa macai raatyaxaahuata mej meyan aꞌij puaꞌa rɨcɨ tɨj ajta aɨjna.
\v 23 Nyajta nu huaꞌacuiꞌini nyaɨme ɨ yaujmuaꞌameꞌen aɨjna ɨ jɨitaꞌa. Majta naimiꞌi, aꞌachu maj puaꞌamua eꞌetyujsaꞌɨri ɨ Dioj jemi, aɨ mu ramuaꞌareeran nyaj nyaɨn pueen ɨ tɨ ruꞌumuaꞌaree aꞌij tɨ tiraꞌamitejteꞌe seij ɨ rumuaꞌatziiraꞌa jetze, ajta aꞌij tɨ tyaꞌumuaꞌatzɨ ɨ rutzajtaꞌa. Nyajta, ayaa nu amuaataꞌasin seij nyajta seij aꞌij tɨ ayan tiraavijteꞌe aɨjna cɨmeꞌe aꞌij tɨ saɨj tiꞌityújchaɨcaꞌa.
\p
\v 24-25 “Saj sajta muan, mɨ seica, mɨ saj saun Tiatira eꞌeche, mɨ saj sajta cai seyan tiraꞌastijreꞌe saɨjna ɨ nyuucari, caxu saɨjna huarɨꞌɨre ɨ mej ee eihua huapɨꞌɨ ruxeꞌeveꞌe ɨ Satanás jemi. Aɨj nu cɨn, canu maa aꞌij tiꞌitɨj cɨn tyajaꞌamueijcateꞌen, silu sataꞌaj seyan huarɨni saj sauj raꞌastijraꞌa aꞌij sej seri tiraarɨꞌɨre. Sataꞌaj seyan huarɨni, asta nyanaꞌa cai nyajtahuaꞌa ya uvéꞌenyen.
\p
\v 26 “Ajta aɨn tɨ tyuꞌumueꞌitɨn, tɨ ajta ayan cheꞌeta naꞌa rɨꞌɨ tiꞌityujchaꞌɨ nyatɨj inyaa, asta naꞌa cai nain teꞌentipuaꞌare, nyaa nu nyaɨjna cɨn tíꞌiraijcateꞌen tɨ ij aɨn tihuaꞌutaijteꞌen aɨme ɨ maj seij chuejraꞌa japua aꞌuchaatɨme.
\v 27 Caꞌanyejri pu cɨn tihueꞌityaꞌa aꞌame. Ayaa pu cheꞌeta naꞌa tihuaꞌantipuaꞌariteꞌesin aɨme ɨ maj rájchaɨreꞌe tɨj aꞌatɨ ayan tiraatyataaraxɨꞌɨn ɨ xaꞌari tɨ xarij cɨn taavijhua. Ayaa nu cheꞌeta nyanaꞌa tiꞌitɨ cɨn tíꞌiraijcateꞌen tɨj ajta aɨn niyaꞌupua ayan tiꞌitɨ cɨn tinyeijca.
\v 28 Nyajta neyan huatyaturan ɨ jemin tɨ ij aɨn ayan tatzavaꞌa aꞌaraꞌani tɨj aɨjna ɨ xuꞌuraꞌave tɨ eꞌijninyei tapuaꞌarijmaꞌaca.
\v 29 Ajta aɨn tɨ huityajnamua, cheꞌe aɨn aꞌatɨ tyamuaꞌa naa tiraanamua aꞌij tɨ aɨn xaijnyuꞌucaraꞌaraꞌan ɨ Dioj ayan tihueꞌixaateꞌe aɨme ɨ maj eꞌetyujsaꞌɨri ɨ Dioj jemi.”
\c 3
\s Cɨmeꞌen ɨ maj Sardis eꞌetyujsaꞌɨri
\p
\v 1 ’Pataꞌaj peyan tiraataitiꞌi paɨjna tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Sardis tɨ cɨmeꞌen yee: “Ayaa pu tiꞌixa aɨjna tɨ jemin seijreꞌe ɨ xaijnyuꞌucaraꞌaraꞌan ɨ Dioj tɨ arahuaꞌapuaca cɨn tiꞌimuareꞌe. Nyaa nu nyajta ruꞌityáꞌa ɨ xuꞌuraꞌave ɨ maj arahuaꞌapua araꞌase. Ayaa nu neyan tiꞌijmuaꞌaree ɨ saj cɨn tiꞌimuareꞌe. Ayaa mu tiꞌixaxaꞌa saj nuꞌu ruuri saɨjna cɨmeꞌe saj eihua tiꞌimuareꞌe. Ma sajta muan, nyeetzi jemi xu seyan mɨꞌɨchi.
\v 2 Sataꞌaj atanyéjnyeꞌere, sataꞌaj sajta rɨꞌɨ raaruuren saɨjna tɨ auj muejmi jemi seijreꞌe, tɨ ajta ari tɨmuaꞌa mɨꞌɨni, aꞌini ayaa pu tinaꞌamitejteꞌe inyeetzi saj cai tiꞌitɨj cɨn arauraste ɨ Dioj jemi.
\p
\v 3 “Sataꞌaj seyan raꞌutamuaꞌaree ɨ saj raꞌancuraꞌa, ɨ saj sajta raanamuajriꞌi. Sataꞌaj saɨjna cɨn aráurasten, sajta saɨque tyuꞌumuaꞌati. Tɨ puaꞌa sacai seyan atanyéjnyeꞌere, nyaa nu mu aꞌuveꞌemaꞌa naꞌame muejmi jemi tɨj nahuaꞌari. Sajta muan, caxu ramuaꞌareeran aꞌatzaj nyaj puaꞌa nyaun aꞌatanyejsin muejmi jemi.
\p
\v 4 “Ma majta, seica mu muejmi jemi seijreꞌe ɨ maj cai meyan tiꞌitɨ cɨn tityaꞌatura ɨ rujetze. Aɨ mu áꞌujhuaꞌanyaꞌa muaꞌajuꞌun inyeetzi jamuan, majta áꞌujhuaꞌanyaꞌa muaꞌajuꞌun maj cueiinaviꞌin tyuꞌuchán, aꞌini ayaa pu tihuaꞌuvijteꞌe aɨme.
\p
\v 5 “Aɨjna ɨ tɨ tiꞌimueꞌitɨn, ayaa pu hui éꞌenyeꞌe tiꞌityecháa aꞌame cueinaviꞌican. Nyajta inyaa, canu raꞌurauuna tɨ cɨn antyahuaa ɨ yuꞌuxari jetze ɨ mej jetzen aꞌayuꞌusiꞌi aɨme ɨ maj rusen cɨn huatyaturaasin ɨ Dioj jemi, silu nyaa nu nyajta neyan tiraataxajta ɨ tɨ cɨn antyahuaa jemin ɨ niyaꞌupua, nyajta huaꞌa jemi ɨ mej jemin tiꞌivaɨreꞌe ɨ niyaꞌupua.
\v 6 Ajta aɨn ɨ tɨ huityajnamua, cheꞌe aɨn aꞌatɨ tyamuaꞌa tiraanamua aꞌij tɨ tihueꞌixaateꞌe ɨ xaijnyuꞌucaraꞌaraꞌan ɨ Dioj aɨme ɨ mej eꞌetyujsaꞌɨri jemin ɨ Dioj.”
\s Cɨmeꞌen ɨ maj Filadelfia eꞌetyujsaꞌɨri
\p
\v 7 ’Pataꞌaj pajta tiraataitiꞌi paɨjna ɨ tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Filadelfia tɨ cɨmeꞌen yee: “Pataꞌaj peyan tɨcɨn yee ayaa pu tiꞌixa aɨjna ɨ Dioj ɨ tɨ rɨꞌɨ tirajchaꞌɨ, aɨjna ɨ tɨ ajta tzaahuatiꞌiraꞌa cɨn tiꞌixaxaꞌa. Aɨ pu yee ajta aɨjna cɨn antyujmuaꞌaree tɨ huaꞌataꞌaca mej mi maun aꞌutyarute aꞌu tɨ eꞌirajca aɨjna ɨ tɨ jetzen huanyej ɨ David tyaacan. Tɨ puaꞌa aɨn tyaꞌantacuuna, capu rɨꞌɨri tɨ aꞌatɨ teꞌityaanan. Ajta, tɨ puaꞌa aɨn teꞌityaanan, capu ajta rɨꞌɨri tɨ aꞌatɨ tyaꞌantacuuna.
\p
\v 8 “Nyaa nu ramuaꞌaree aꞌij saj rɨcɨ. Casiꞌi, xaaseij. Nuꞌuri neyan amuaataꞌa sej si seyan ruxaahua saun aꞌutyarute. Ajta, capu rɨꞌɨri tɨ aꞌatɨ amuaataꞌijmɨ. Nyaa nu ramuaꞌaree tɨ cai eihua amúꞌucaꞌanistiꞌi. Ma sajta muan, saucheꞌe xu raꞌaraꞌastijreꞌe aꞌij nyaj tyajamueꞌixaa. Caxu sajta nyaxaahua.
\p
\v 9 “Maꞌacui xaa, ayaa nu huaꞌaruuren nyaɨme ɨ maj meyan ruseijrata maj nuꞌu Israel jetze ajtyamaꞌacan. Camu xaa nyaꞌu aɨjna jetze ajtyamaꞌacan silu metiꞌihueꞌitaca muꞌu. Aɨ mu jemin eꞌetyujsaꞌɨri ɨ Satanás. Ayaa nu caꞌanyejri cɨn huaꞌaruuren mej mi mu aꞌuvaꞌajuꞌun mej titunutaxɨꞌɨn muejmi jemi mej mi majta raamuaꞌaree nyaj aꞌamuaxeꞌeveꞌe.
\v 10 Aꞌini muan xu seyan raꞌaraꞌastijreꞌe aꞌij nyej neri tyajamueijca, saj seyan cheꞌeta sanaꞌa tyaꞌutaviicueꞌi nyatɨj nyajta inyaa tyaꞌutaviicueꞌiriꞌi, ayaa nu rɨꞌɨ tyajaꞌamuachaꞌɨ tɨ ij cai ayan tyajamuaacɨꞌɨti ajna maj jetzen meyan áꞌaviicueꞌiraꞌa muaꞌajuꞌun, ajna xɨcajraꞌa tɨꞌɨj ayan tyajaꞌureꞌenyejsin tɨꞌij huaꞌa japua rájveti naijmiꞌica ɨ maj iiyan huachaatɨme ɨ chaanaca japua. Miꞌi mu aꞌuvaꞌajuꞌun maj titunutaxɨꞌɨsin muejmi jemi mej mi majta raamuaꞌaree nyaj aꞌamuaxeꞌeveꞌe.
\p
\v 11 “Mu nu aꞌicáame inyaa caꞌanacan. Rɨꞌɨ xuꞌu, sataꞌaj seyan huarɨni sataꞌaj rɨꞌɨ tirajchaɨ́ xaꞌaraꞌani ɨ sej seri tíꞌijchaꞌɨ ɨ Dioj jemi. Caxu raataꞌacareꞌen tɨ aꞌatɨ amuaanáhueꞌiran ɨ curuun ɨ sej seri raatyaamueꞌitɨ.
\p
\v 12 “Ajta aɨn tɨ tyuꞌumueꞌitɨn, ayaa nu tiꞌitɨj cɨn tiraataijcateꞌesin tɨꞌij tiꞌityavaa aꞌame u teyujraꞌan ɨ nyeDioj. Aɨ pu aun aꞌuracaí aꞌame tɨj naꞌa rusen cɨmeꞌe. Nyajta nu raꞌacácheti nyaɨjna jetze ɨ tɨ cɨn antyahuaa ɨ nyeDioj, nyajta ɨ tɨ cɨn tyajaꞌarajtyahuaa chajtaꞌaraꞌan ɨ nyeDioj, aujna u Jerusalén ɨ tɨ jajcua, ɨ tɨ ajta aun eꞌicaanye u tajapua aꞌu tɨ eꞌeseijreꞌe ɨ nyeDioj. Nyajta nu neyan jetzen raꞌacachajtza ɨ nyaj jajcuacan cɨn antyahuaa.
\p
\v 13 “Ajta aɨn aꞌatɨ tɨ huiityajnamua, cheꞌe tyamuaꞌa naa tiraanamua aꞌij tɨ aɨn xaijnyuꞌucaraꞌaraꞌan ɨ Dioj ayan tihueꞌixaateꞌe aɨme ɨ mej eꞌetyujsaꞌɨri ɨ Dioj jemi.”
\s Cɨmeꞌen ɨ maj Laodicea eꞌetyujsaꞌɨri
\p
\v 14 ’Pataꞌaj pajta peyan tiraataitiꞌi paɨjna ɨ tɨ aɨjna cɨn antyujmuaꞌaree tɨ huaꞌachaꞌɨ aɨme ɨ maj maun eꞌetyujsaꞌɨri u Laodicea. Peyan tɨ cɨmeꞌen yee: “Ayaa pu tiꞌixa aɨjna tɨ ayan tzaahuatiꞌiraꞌa cɨn tiꞌixaxaꞌa tɨcɨn: Ayan tiꞌayajna, aɨjna tɨ ajta tzaahuatiꞌiraꞌa cɨn aꞌij tiꞌixa Dioj cɨmeꞌen. Ajta capu ayan tiꞌihueꞌitaca. Aɨ pu ajta aɨn pueen ɨ tɨ Dioj jamuan tyuꞌutaahuacaꞌa tɨj naꞌa tɨ tiꞌiseijreꞌe ijii.
\p
\v 15 “Nyaa nu ramuaꞌaree aꞌij sej titetyújchaꞌɨ. Caxu aꞌujcaꞌanyaacan cɨn naꞌancureꞌeviꞌitɨ inyeetzi. Caxu sajta caꞌanyejri cɨn naatamuari, silu chaꞌanaꞌa xuꞌu seyan titetyújchaꞌɨ. Ayaa pu tinaꞌaraanajchi saj aꞌujcaꞌanyaacan cɨn naꞌancureꞌeviꞌitɨn naꞌari caꞌanyejri cɨn saj naatamuariteꞌen.
\v 16 Ayaa xu tiꞌivaɨreꞌe tɨj jaj tɨ cɨj naꞌa tiꞌipɨstí. Caxu seyan tiꞌivaɨreꞌe tɨj jaj tɨ eihua pɨsti nusu tɨ eihua cɨmuajra. Aɨj nu cɨn neyan áꞌamuaruuren tɨj aꞌatɨ tɨ ayan jaj aijtzitzee tɨ cai xaꞌapɨꞌɨn rámencateꞌe. Nyaa nu caꞌanyejri cɨn ma amúuhuaꞌaxɨjsin.
\p
\v 17 “Ayaa xu tiꞌixaxaꞌa yee sej seri chijtyaani saj pueen, tɨ yee eihua huapɨꞌɨ rɨꞌɨ tyajamuaavaɨ, tɨ yee cai tiꞌitɨ tyajamuaꞌaturaateꞌe. Ma sajta muan, caxu seyan tiꞌijmuaꞌaree saj xanaꞌavisiꞌi, sajta seyan aꞌij puaꞌa huaꞌaseijrateꞌe huaꞌa jemi ɨ tyaɨte. Muan xu xaa cai aꞌij tiꞌijviicueꞌi, sajta aracucuꞌunijmee, sajta seyan muamuaꞌavijmee.
\p
\v 18 “Aɨj nu cɨn, neyan tyajaꞌamuahuavii sej si nyeetzi jemi raananan saɨjna ɨ ooro tɨ taij jetze rutaꞌahuaca sej si seyan huataujchijtyaanita. Sataꞌaj seyan nyeetzi jemi raananan ɨ cɨɨxuri tɨ naa tiꞌicueina sej si saɨjna cɨn ucaujchejtyaꞌaxɨꞌɨn tɨ ij cai ayan seijraꞌa ɨ saj cɨn tiꞌiteviꞌiraꞌa saɨjna cɨmeꞌe saj muamuaꞌavijmee. Sataꞌaj sajta nyeetzi jemi raananan saɨjna ɨ tiꞌitɨ ɨ saj araujhuaateꞌen ɨ rujɨꞌɨ jetze tɨꞌij rɨꞌɨristan sej tiꞌitɨ huaseij.
\p
\v 19 “Ayaa nu huáꞌatyaꞌaxɨꞌɨca, nyajta pueijtzi huaꞌataꞌaca aɨme ɨ nyaj huaꞌaxeꞌeveꞌe. Aɨj pu cɨn, sataꞌaj saɨque tyuꞌumuaꞌati, sajta aꞌujcaꞌanyaacan cɨn naꞌaraꞌastijreꞌen.
\p
\v 20 “Maꞌacui xaa, nyaa nu aꞌityejvee taꞌapueerta, nyeteꞌejtyaatuaꞌaxa. Tɨ puaꞌa aꞌatɨ ayan naanamua nyaj rajée, tɨ puaꞌa aɨn ajta tinaꞌantacuunyeꞌen, aj nu ni jemin utyaruti tyej ti naimiꞌi tyuꞌucuaꞌani tyajɨɨmuaꞌa.
\p
\v 21 “Ajta aɨn ɨ tɨ tyuꞌumueꞌitɨn, ayaa nu raataꞌasin tɨ nyajamuan aꞌujyeijxɨꞌɨn aꞌu nyej tejeꞌijta aꞌini ayaa pu tinaaruu inyeetzi. Nyatɨꞌɨj tyuꞌutyaamueꞌitɨ, aj nu ni an niyaꞌupua jamuan aꞌujyeijxɨ aꞌu tɨ aɨn tejeꞌijta.
\v 22 Ajta aɨn ɨ aꞌatɨ tɨ huiityajnamua, cheꞌe tyamuaꞌa naa tiraanamua aꞌij tɨ aɨn xaijnyuꞌucaraꞌaraꞌan ɨ Dioj ayan tihueꞌixaateꞌe aɨme ɨ mej eꞌetyujsaꞌɨri ɨ Dioj jemi.”
\c 4
\s Aɨ mu ranaꞌamicheꞌe u tajapua
\p
\v 1 Tɨꞌɨj raatapuaꞌajtacaꞌa tɨ tyuꞌuxajtacaꞌa, aj nu ni neyan eenyeꞌequeꞌe tyuꞌuseij. Seij nu huaseij ɨ pueerta tɨ antacuuniꞌihuacaꞌa u tajapua. Ajta aɨn ɨ nyaj anacaican raanamuajriꞌi, ajtahuaꞌa pu tiꞌinyeꞌixaatyaꞌacaa. Ayaa pu namuajraꞌacaa tɨj aꞌatɨ tɨ ucáajiꞌihuaꞌa trompeeta jetze. Ayan tɨcɨn:
\p ―Yen vejnyéchi nyej ni timuaataseijrateꞌen aꞌij tɨ tuꞌujxeꞌeveꞌe tɨ ayan tyajaꞌureꞌenyen majcaꞌi huayee.
\p
\v 2 Cɨmeꞌen puꞌu ayan tyuꞌutaxajtacaꞌa, aj pu aɨn xaijnyuꞌucaraꞌaraꞌan ɨ Dioj, aɨ pu nyeetzi jemi ruꞌutyíaꞌa. Ayaa nu eenyeꞌen tyuꞌuseij cumu aꞌu tɨ ɨpuari aꞌutyejvee u tajapua. Ajta aɨjna japua ɨ ɨpuari aꞌatɨ pu jetzen acajca.
\v 3 Ajta aɨn tɨ jetzen acajca, ayaa pu naa eenyeꞌen tiꞌitéechan. Ayaa pu seijraꞌacaa tɨj tetej tɨ huapɨꞌɨ tiꞌijnajchi, tɨ paꞌu ɨ tetej ajta tɨ tyaumua ajta ɨ tɨ ranaxca. Ajta ayan seijraꞌacaa tɨj ɨ saɨj ɨ tetej ɨ tɨ paꞌu tɨ ajta naa tiꞌimestí. Cuꞌuxai pu ajta atavɨjcaꞌa aꞌu tɨ aꞌutyavaacaꞌa ɨ ɨpuari. Ayaa pu ruaꞌaaraviꞌi seijraꞌacaa tɨj aɨjna ɨ tetej mej meyan ratamuaꞌamua tɨcɨn esmeralda.
\p
\v 4 Ajta, seica ɨ ɨpuari ajta atavaatɨmaꞌacaa aꞌu tɨ aꞌutejvee aɨjna ɨ ɨpuari. Seite japuan muaacua pu araꞌasicaa aɨjna ɨ ɨpuari. Majta maɨn ɨ vaujsi, aɨ mu acatyéꞌetyajmaꞌacaa jetzen ɨ seica ɨ ɨpuari. Majta meyan seite japuan muaacua araꞌasicaa aɨme ɨ vaujsi. Majta cueinaviꞌin mu tiꞌitéchajcaꞌa, majta curun tyaꞌutyarújteꞌemaꞌa tɨ ooro cɨn taavijhuacaꞌa.
\p
\v 5 Aɨjna seij japua ɨ ɨpuari meyan tyamaxcɨvaꞌaraꞌa, majta tenyuucaꞌa. Ajta, an tɨ aꞌaveꞌevee ɨ ɨpuari, tatzari pu aꞌataatɨmaꞌacaa tɨ ayan puaꞌamua arahuaꞌapua. Ajta aɨn ɨ tatzari, ai pu aɨn pueen ɨ xaijnyuꞌucaraꞌaraꞌan ɨ Dioj tɨ arahuaꞌapua cɨn tiꞌimuareꞌe.
\v 6 Ajta aujna aꞌu tɨ aꞌaveꞌevee, ayaa pu eꞌenyeꞌen huaraꞌamuaa a chuaataꞌa aɨjna cɨmeꞌe tɨ naa tiꞌimestí, tɨ ajta tiꞌitatza. Ayaa pu seijraꞌacaa tɨj aɨjna ɨ tetej mej meyan ratamuaꞌamua tɨcɨn cristal.
\p Majta aɨme ɨ maj muaacua araꞌase ɨ maj ruuri, au mu uhuáꞌupuꞌujmaꞌacaa tɨj naꞌa tiꞌipuaꞌamua ɨ ɨpuari. Tɨꞌɨj pɨ naꞌa mu tiꞌiseꞌij, nain japua, tɨj naꞌa utyaꞌɨmɨ, ajta iiyan chaanaca japua.
\v 7 Ajta aɨn ɨ tɨ saɨtɨ, ayaa pu araseijreꞌe tɨj muajye. Ajta ɨ tɨ huaꞌapua, ayaa pu araseijreꞌe tɨj puuye. Ajta aɨn tɨ ruuri tɨ hueica, ayaa pu tyaꞌacanyee tɨj tyaataꞌa, ajta aɨn ɨ tɨ muaacua, ayaa pu seijraꞌacaa tɨ cuaꞌɨraꞌave tɨ ráꞌaraꞌive.
\v 8 Majta aɨme ɨ maj muaacua, ɨ maj majta jiꞌi ruuri, aɨ mu arajsevica ajtáꞌanájmee ɨ maj muaacua. Tɨꞌɨj pɨ naꞌa mu tiꞌiseꞌij nainjapua tɨj naꞌa utyaꞌɨmɨ, majta iiyan chaanaca japua. Nain tujcaꞌari tzajtaꞌa, majta nain tɨcaꞌari tzajtaꞌa, aɨ mu jemin tiꞌichuiicacaꞌa ɨ Dioj. Camu aꞌanaj raatapuaꞌajta mej meyan tiꞌichuiica tɨcɨn:
\q Rɨꞌɨ pu tiꞌiseijreꞌe, tyamuaꞌa pu urareꞌenyaꞌacan cɨn seijreꞌe,
\q xaꞌapɨꞌɨn pu een seijreꞌe tɨj naꞌa rusen cɨmeꞌe
\q2 ɨ tavastaraꞌa,
\q aɨjna ɨ Dioj tɨ nain cɨn antyujmuaꞌaree,
\q aɨjna ɨ tɨ rusaɨj seijraꞌacaa, tɨ ajta seijreꞌe ijii,
\q2 tɨ ajta seiraꞌa aꞌame tɨj naꞌa rusen cɨmeꞌe.
\p
\v 9 Majta meyan rɨꞌɨ tirataꞌaca, majta ranaꞌamicheꞌe, aɨ mu majta tiꞌijtáujtziꞌiraꞌa muaꞌayeꞌi maɨjna tɨ aɨn ɨpuari jetze acajca, tɨ ajta ruuri tɨj naꞌa rusen cɨmeꞌe.
\v 10 Matɨj manaꞌa meyan rɨcɨ ɨ maj muaacua, ɨ maj majta ruuri, aɨ mu majta meyan rɨcɨ aɨme ɨ maj vaujsi ɨ maj seite japuan muaacua araꞌase. Aɨ mu aꞌicaujtuuxɨjsin maɨjna jemi ɨ tɨ ɨpuari jetze ajcajca, mej mi raatyaanajche maɨjna tɨ iꞌi ruuri tɨj naꞌa rusen cɨmeꞌe, majta raatatuireꞌesin ɨ jemin ɨ tyuꞌujcúrun. Majta meyan tiꞌichuiica tɨcɨn:
\q
\v 11 Ayaa pu timuaavijteꞌe mueetzi, mɨ paj tavastaraꞌa pueen, mɨ paj pajta iꞌi Dioj.
\q Tyej ti teyan rɨꞌɨ timuaataꞌan,
\q2 tyej ti teyan muanaꞌamicheꞌen.
\q Pej pi nain cɨn antiꞌamuaꞌareera,
\q aꞌini muaa paj nain tyuꞌutaahuacaꞌa,
\q2 nain ɨ tɨ seijreꞌe ijii.
\q Ayaa mu een cɨn huataseijre maɨjna cɨmeꞌe pej peyan tiraꞌutyaacaꞌanye axeꞌeviꞌiraꞌa cɨmeꞌe.
\q Aɨj mu cɨn meyan huátaavijhuacaꞌa.
\c 5
\s Ɨ tɨ jíriꞌi tɨ teꞌeyuꞌusiꞌi, ajta ɨ Canyaꞌa
\p
\v 1 Nyatɨꞌɨj ni ayan eenyeꞌen tyuꞌuseij, tɨ aɨjna ɨ tɨ acajca ɨ ɨpuari jetze, ruꞌɨrɨɨtaꞌan pu ruꞌityépijcaa ɨ yuꞌuxari ɨ tɨ ruxaꞌajtaꞌa tyaꞌasɨɨmueꞌihuacaꞌa, ajta, áꞌavijtiꞌihuacaꞌa arahuaꞌapuaca cɨmeꞌe ɨ xɨjca.
\v 2 Nyajta aꞌatɨ huaseij tɨ uteꞌe tiꞌivaɨreꞌe. Aɨjna ɨ aꞌatɨ eecan pu huapɨꞌɨ uracaꞌanye. Caꞌanin pu cɨn tyuꞌutahuau. Ayaa pu tɨcɨn:
\p ―¿Aꞌataani ayan huataujcɨꞌɨpua tɨ aɨn raꞌajsújtzaꞌanaxɨꞌɨn ɨ tɨ cɨn áꞌaviꞌijtiꞌihuajmee, ajta ɨ tɨ raataxɨjta ɨ yuꞌuxari? ―Ayaa pu tyuꞌutaxajtacaꞌa.
\p
\v 3 Tɨꞌɨqui ayan teꞌirajraa. Tɨj naꞌa aujna aꞌahuaꞌa u uteꞌe, ajta iiyan chaanaca japua, ajta u tajete, capu maꞌa aꞌatɨ tɨ ayan tyuꞌutaujcɨꞌɨpua ɨ tɨ ayan tiraatáxɨjta, ajta tɨ raꞌuseij aꞌij tɨ teꞌeyuꞌusiꞌihuacaꞌa.
\p
\v 4 Nyajta inyaa, eihua nu huapɨꞌɨ nyeyeinyacaꞌa nyaɨjna cɨmeꞌe maj cai ratyauvaꞌacaꞌa seij tɨ ayan tyuꞌutaujcɨꞌɨpua ɨ tɨ ayan tiraatáxɨjta ɨ yuꞌuxari nusu tɨ raꞌuseij, ajta tɨ raꞌujijveꞌen.
\v 5 Tɨꞌɨqui saɨj tɨ huaꞌa jetze ajtyamaꞌacantacaa aɨme ɨ vaujsi, ayaa pu tinaataꞌixaa tɨcɨn:
\p ―Capaj ayeinya. Maꞌacui xaa, aɨjna mej meyan ratamuaꞌamua tɨcɨn Ɨ muajye ɨ tɨ huaꞌa jetze ajtyamaꞌacan aɨme ɨ maj Israel jetze airaanye, aɨjna ɨ maj majta meyan ratamuaꞌamua tɨcɨn Aɨjna ɨ tɨ David jetze airaujnejte, aɨ pu ari tyuꞌutyaamueꞌitɨ tɨꞌij aɨn ayan tiraꞌasujtzaꞌanaxɨꞌɨn ɨ taꞌarahuaꞌapuaca cɨn áꞌaviꞌijtiꞌihuajmee, tɨ ajta raatáxɨjta.
\p
\v 6 Nyajta neyan eenyeꞌen tyuꞌuseij tɨj tiꞌitɨ ɨ Canyaꞌa ayaa seijraꞌacaa tɨj ɨ mej meri raajeꞌica. Au pu aꞌutyavaacaꞌa jemin ɨ ɨpuari. Aɨ pu ajta huaꞌa tzajtaꞌa seijraꞌacaa ɨ maj muaacua ɨ maj ruuri, majta aɨme ɨ ma aꞌatacaitɨmaꞌacaa aɨme ɨ vaujsi.
\p Ajta aɨjna ɨ Canyaꞌa, arahuaꞌapuaca pu ájtaꞌahuájmaꞌacaa, ajta arahuaꞌapuacaꞌameꞌen pu ájjɨꞌɨsíjmaꞌacaa. Ajta aɨn jɨꞌɨsaaraꞌan ɨ taꞌarahuaꞌapua, ai pu aɨn pueen ɨ xaijnyuꞌucaraꞌaraꞌan ɨ Dioj ɨ tɨ nainjapua u yaꞌutaityacaꞌa iiyan chaanaca japua.
\p
\v 7 Ajta aɨn ɨ Canyaꞌa, au pu aꞌuveꞌeme aɨjna jemi ɨ tɨ aꞌacajca ɨ ɨpuari jetze. Tɨꞌɨqui raꞌancureꞌepi aɨjna ɨ yuꞌuxari ɨ tɨ ɨrɨɨtaꞌan seijraꞌacaa aɨjna ɨ tɨ ɨpuari jetze acajca.
\v 8 Tɨꞌɨj raꞌancureꞌepi aɨjna ɨ yuꞌuxari, aɨme ɨ maj muaacua ɨ maj ruuri, majta aɨme ɨ vaujsi ɨ maj seite japuan muaacua araꞌase, aɨ mu meyan aꞌɨmɨ aꞌicaujtuuxɨ maɨjna jemi ɨ Canyaꞌa. Matɨj manaꞌa puaꞌamua teꞌityaꞌɨcaꞌa maɨjna ɨ aarpa, majta tuxaꞌa tɨ ooro cɨn tíꞌitaavijhuacaꞌa. Cuaanyeꞌe pu avaꞌɨstijmaꞌacaa aɨjna jetze ɨ tuxaꞌa. Ajta aɨjna ɨ cuaaneꞌe, ai pu aɨn pueen maj raatahuaviiriꞌi ɨ Dioj aɨme ɨ maj rɨꞌɨ tíꞌityeseijreꞌe ɨ Dioj jemi.
\v 9 Matɨꞌɨj mi meyan jajcuacan cɨn tyuꞌutachuiicacaꞌa tɨcɨn:
\q Ayaa pu tiraavijteꞌe paj muaa peyan raꞌancureꞌepin, pajta raatáxɨjta aꞌini mamuaajeꞌica.
\q Pajta muaa, papuꞌuri tyuꞌutanajchitacaꞌa
\q2 paɨjna cɨmeꞌe ɨ aꞌaxuureꞌe
\q2 ɨ maj cɨn téꞌechaɨcaꞌa ɨ Dioj jemi,
\q pej pi tyuꞌutatuiireꞌen ɨ Dioj jemi ɨ tyaɨte
\q2 maj nainjapua eꞌemaꞌacan.
\q Aɨ mu huaꞌa jetze ajtyamaꞌacan matɨj manaꞌa
\q2 seij jetze maj airaujneijte
\q nusu aꞌachu puaꞌamua ɨ maj seij nyuucari cɨn tiꞌixaxaꞌa
\q nusu matɨj manaꞌa puaꞌamua
\q2 ɨ maj tyaɨtestyamuaꞌameꞌen pueen.
\q Aꞌu tɨ naꞌa mej eꞌeseijreꞌe seij japua ɨ chuej,
\q2 au mu eꞌemaꞌacan.
\q
\v 10 Pajta muaa, papuꞌuri peyan rɨꞌɨ huaꞌuruu
\q2 mej mi meyan maɨn tyaɨtestyamuaꞌameꞌen
\q2 pueenyaꞌa muaꞌaraꞌani aɨjna ɨ tɨ tiꞌijta,
\q mej mi majta tiꞌitɨj cɨn tyuꞌutyavaɨreꞌen
\q2 maɨjna jemi ɨ Dioj.
\q Ma majta aɨme, aɨ mu tyuꞌutaijta
\q2 iiyan chaanaca japua.
\m Ayaa mu tyuꞌutachuiicacaꞌa.
\p
\v 11 Nyatɨꞌɨj ni atanyeeracaꞌa. Nyatɨꞌɨj ni huaꞌunamuajriꞌi aɨme ɨ maj u tajapua tiꞌivaɨreꞌe. Ma muiꞌicá huapɨꞌɨ. Capu aꞌatzu rɨꞌɨri tɨ huaꞌutéꞌiten, ni capu amiteereꞌe aꞌachu maj puaꞌamua. Ayaa mu puaꞌamua matɨj ɨ xuꞌuraꞌave. Aɨ mu maun atavaatɨmaꞌacaa maɨjna jetze ɨ ɨpuari, majta aɨme jetze ɨ maj muaacua ɨ maj ruuri, majta aɨme jetze ɨ vaujsi.
\v 12 Aɨ mu meyan caꞌanin cɨn tyuꞌutachuiicacaꞌa tɨcɨn:
\q Ticheꞌe teyan rɨꞌɨ tiraataꞌan tyaɨjna ɨ Canyaꞌa
\q2 ɨ maj raajeꞌica.
\q Ee xaa, ayaa pu tiraavijteꞌe tɨ aɨn ayan tiraꞌancuraꞌan aɨjna tɨ Dioj cɨn tiraijcateꞌen,
\q ajta tɨj naꞌa tɨ jemin tiꞌiseijreꞌe ɨ Dioj,
\q ajta ɨ muaꞌatziiraꞌa ɨ tɨ cɨn tyuꞌutaijta,
\q ajta ɨ muáreꞌeriꞌiraꞌaraꞌan ɨ tɨ cɨn
\q2 nain cɨn tyuꞌutyamueꞌitɨn.
\q Ticheꞌe rɨꞌɨ tiraataꞌan, tyajta ahuatatzaahuateꞌen tyaɨjna jemi,
\q ticheꞌe tyajta huatatyamuaꞌaveꞌen tyaɨjna jemi
\q2 ɨ Canyaꞌa.
\m Ayaa mu tyuꞌutáchuiicaꞌa.
\p
\v 13 Nyatɨꞌɨj ni neyan tihuaꞌunamuajriꞌi mej tiꞌichuiica, matɨj manaꞌa puaꞌamua maj u tajapua eꞌeseijreꞌe, majta aɨme mej iiyan seijreꞌe ɨ chaanaca japua, majta aɨme, matɨj puaꞌamua u tajete mej eꞌeseijreꞌe, majta aɨme ɨ maj japuan eꞌeseijreꞌe ɨ jaj tɨ veꞌe, majta matɨj manaꞌa puaꞌamua aꞌaseijreꞌe ɨ jaj tzajtaꞌa. Naimiꞌi mu meyan tiꞌichuiicacaꞌa tɨcɨn:
\q Ticheꞌe rɨꞌɨ tiraataꞌan tyaɨjna ɨ tɨ acajca
\q2 ɨ ɨpuari jetze, tyajta tyaɨjna ɨ Canyaꞌa.
\q Ticheꞌe rɨꞌɨ tiraataꞌan, ticheꞌe tyajta rɨꞌɨ tirajchaꞌɨ,
\q2 tyajta rɨꞌɨ tiraatyajtuaani,
\q tyajta rɨꞌɨ tiraataꞌan ɨ tɨ nain cɨn antyujmuaꞌaréera aꞌaraꞌani tɨj naꞌa tɨ yu aucaꞌitɨ aꞌame tɨj naꞌa
\q2 rusen cɨmeꞌe.
\p
\v 14 Majta aɨme ɨ maj muaacua ɨ maj ruuri, ayaa mu tyuꞌutaxajtacaꞌa tɨcɨn:
\p ―Cheꞌe ayan tyajaꞌureꞌenyen.
\p Majta aɨme ɨ vaujsi, aɨ mu aꞌicaujtuuxɨ, majta raatyanajchacaꞌa ɨ Dioj.
\c 6
\s Ɨ tɨ arahuaꞌapuaca cɨn áꞌavijtiꞌihuacaꞌa
\p
\v 1 Nyatɨꞌɨj ni raaseij tɨ aɨn Canyaꞌa seij asujtzaꞌan ɨ tɨ cɨn áꞌavijtiꞌihuacaꞌa ɨ yuꞌuxari. Cɨmeꞌen puꞌu ayan huarɨj, aj nu ni raanamuajriꞌi seij tɨ huaꞌa jetze ajtyamaꞌacan ɨ maj ruuri, ɨ maj majta muaacua. Ayaa pu caꞌanin cɨn tyuꞌutaxajtacaꞌa. Cu xuee maj cuj huatyejnyuuni. Ayan tɨcɨn:
\p ―Iyaꞌa ii.
\p
\v 2 Nyajtahuaꞌa nu atanyeeracaꞌa tɨ puaꞌa a aꞌutejvee aɨjna ɨ cahuaayuꞌu ɨ tɨ cueinaraꞌa. Ajta aɨn tɨ avaꞌaca, aɨ pu túꞌunamɨꞌɨ huitechuiicaꞌa rumuajcaꞌa jetze. Ajta aɨ pu huiirajraa tɨ ij huaꞌantimueꞌitɨn. Aꞌu tɨ naꞌa pu aꞌuyeꞌicaa hasta naꞌa cai naijmiꞌica antimueꞌitɨ.
\p
\v 3 Tɨꞌɨqui ajtahuaꞌa rasujtzaꞌan. Nyatɨꞌɨj ni neyan tiraanamuajriꞌi tɨꞌɨj aɨn tɨ huaꞌapua tɨ ajta huaꞌa jetze ajtyamaꞌacan ɨ maj ruuri, ɨ maj muaacua, ayaa pu tyuꞌutaxajtacaꞌa tɨcɨn:
\p ―Iyaꞌa ii.
\p
\v 4 Cɨmeꞌen puꞌu ayan tyuꞌutaxajtacaꞌa, saɨj pu huiirajraa ɨ cahuaayuꞌu tɨ paꞌusáararaꞌa. Ajta ayaa pu tiraataꞌa aɨjna tɨ avaꞌaca tɨ ij aɨn ayan huaꞌɨtziiteꞌen ɨ tyaɨte ɨ maj yan seijreꞌe i chaanaca japua mej mi cai cheꞌe ruꞌihuaamuaꞌa muaꞌaraꞌani silu mej mi huaujcuiꞌini saɨj ajta saɨj. Aɨ pu cɨn, aɨ pu raꞌancureꞌechuii seij ɨ chun ɨ tɨ veꞌe, ɨ tɨ ajta tyaꞌajcámɨɨmɨ́jmee ruxaꞌajtaꞌa.
\p
\v 5 Aj puꞌi hueicacajretze rajsujtzaꞌan. Nyatɨꞌɨj ni neyan tiraanamuajriꞌi tɨ ajta saɨj tɨ huaꞌa jetze ajtyamaꞌacan ɨ maj ruuri, ɨ maj muaacua, aɨ pu ayan tyuꞌutaxajtacaꞌa tɨcɨn:
\p ―Iyaꞌa ii.
\p Nyatɨꞌɨj ni nyajtahuaꞌa atanyeeracaꞌa. Maꞌacui xaa, a pu aꞌutyejvee saɨj ɨ cahuaayuꞌu tɨ xuꞌumuaraꞌa. Ajta aɨn ɨ tɨ avaꞌaca, aɨ pu ráachuisimaꞌa ɨ maj cɨn tyaꞌacáꞌitaꞌara.
\v 6 Nyatɨꞌɨj ni aꞌatɨ huanamuajriꞌi. Cu xuee huaꞌa tzajtaꞌa aꞌa tyajaꞌutaxajtacaꞌa ɨ maj ruuri, aɨme ɨ maj muaacua. Ayan tɨcɨn:
\p ―Sei mediida ɨ triigu, ayaa pu cheꞌeta naꞌa tiꞌijnáachi aꞌame tɨj aꞌatɨ ayan tiramueꞌitɨn sei xɨcaj cɨmeꞌe. Ajta hui hueica mediida ɨ triigu tɨ tɨ́tɨꞌɨjméꞌen huíjmueiyujmee, ayaa pu cheꞌeta naꞌa tiꞌijnáachi aꞌame tɨj aꞌatɨ ayan tiramueꞌitɨn sei xɨcaj cɨmeꞌe. Ma sajta muan, caxu yáꞌujɨpuan aꞌu maj tyajaꞌahuasteꞌe aceituuna tiꞌitɨ naꞌari uuva tiꞌitɨ silu micheꞌe maɨjna cɨn huataujvaɨreꞌen. Ayaa pu tyuꞌutaxajtacaꞌa.
\p
\v 7 Tɨꞌɨqui ayan ɨ tɨ muaacua asujtzaꞌan. Cɨmeꞌen puꞌu ayan rasujtzaꞌan, aj nu ni raanamuajriꞌi tɨ aɨn ɨ tɨ muaacua tɨ ajta huaꞌa jetze ajtyamaꞌacan ɨ maj ruuri. Ayaa pu tyuꞌutaxajtacaꞌa tɨcɨn:
\p ―Iyaꞌa ii.
\p
\v 8 Nyajtahuaꞌa nu atanyeeracaꞌa. Nyatɨꞌɨj ni raaseij nyaɨjna ɨ cahuaayuꞌu ɨ tɨ cɨj tiꞌityaumuaraꞌa. Ajta aɨn ɨ tɨ avaꞌaca, ayaa pu antyahuaa tɨcɨn i nyaj huaꞌacuiꞌica. Ajta ɨ saɨj ɨ tɨ cujtaꞌan huamaꞌacaa, ayaa pu ajta antyahuaa tɨcɨn i nyaj huaꞌa chiꞌi pueen ɨ mɨꞌɨchite. Dioj pu ayan huaꞌutaꞌa mej mi maɨjna cɨn antyujmuaꞌaréera eꞌica aɨme ɨ maj yan huachaatɨme ɨ tyaɨte iiyan chaanaca japua mej mi huaꞌucuiꞌini aɨme ɨ tyaɨte maɨjna cɨmeꞌe maj tyújnyaꞌusiꞌiteꞌen nusu tujri cɨmeꞌe naꞌari cuiꞌiniꞌiraꞌa cɨmeꞌe o aɨme cɨmeꞌe ɨ tiꞌityaɨn ɨ maj tiꞌityacɨꞌɨmaca.
\p
\v 9 Tɨꞌɨqui ɨ taꞌanxɨvi asujtzaꞌan. Nyatɨꞌɨj ni nyaɨme huaseij ɨ huaꞌaxaijnyuꞌuca aɨme ɨ maj maɨjna cɨn huácuiihuacaꞌa maɨjna maj raꞌaraꞌastijre maɨjna ɨ nyuucari tɨ cɨmeꞌen raxa ɨ Dioj, majta maɨjna cɨmeꞌe maj raꞌancuraꞌa ɨ nyuucari Cɨriistuꞌu tɨ raatyajtuaa ɨ huaꞌa jemi. Majta aɨme an mu eꞌejtyaꞌacaa ɨ ɨpuari jete.
\v 10 Majta caꞌanin cɨn jíjhuacaa tɨcɨn:
\p ―Tavastaraꞌa, mɨ paj urareꞌenyaꞌacan cɨn seijreꞌe, mɨ paj tzaahuatiꞌiraꞌa cɨn tiꞌixaxaꞌa, ¿aꞌachuni auj aꞌateeri asta panaꞌa cai peyan tiraaxaꞌapɨꞌɨntareꞌen paɨme cɨmeꞌe ɨ maj taacuii, pej pi pueijtzi huaꞌutaꞌan paɨme ɨ maj an japuan huachaatɨme anna chaanaca japua?
\p
\v 11 Tɨꞌɨqui huaꞌureꞌepijte ɨ cɨɨxuri ɨ tɨ tɨtɨꞌɨjme, tɨ ajta tiꞌicueina. Ayaa pu tihuaꞌutaꞌixaa maj nuꞌu mauj aꞌatzu tyuꞌuchuꞌeveꞌen asta naꞌa cai ayan tyaꞌaraurasten aꞌachu tɨ ari huaꞌuxaꞌapɨꞌɨntariꞌiriꞌi aɨme jemi ɨ maj ruxaꞌaj tiꞌitɨj cɨn tiꞌivaɨraꞌacaa, ajta aɨme ɨ hueꞌihuaamuaꞌa ɨ maj meyan cheꞌeta manaꞌa eenyeꞌequeꞌe cuiꞌini matɨj aɨme.
\p
\v 12 Tɨꞌɨqui ɨ taꞌarajsevi asujtzaꞌan. Nyatɨꞌɨj ni nyajtahuaꞌa atanyeeracaꞌa. Maꞌacui xaa nyaꞌu. Eecan pu huapɨꞌɨ huataujcaꞌatzɨ ɨ chaanaca. Ajta aɨn ɨ xɨcaj, huatyaxuꞌumuaracaꞌa. Ayaa pu seijraꞌacaa tɨj aɨjna ɨ cɨɨxuri tɨ xuꞌumua ɨ maj cɨn tiꞌityaujcheꞌetyahuaꞌa muaꞌayeꞌi tɨ puaꞌa meyan maujxaamɨjteꞌe. Ajta aɨjna ɨ maxcɨraꞌi, aɨ pu huatyapaꞌuracaꞌa. Ayaa pu seijraꞌacaa tɨj xuureꞌe.
\v 13 Majta aɨme ɨ xuꞌuraꞌave, aɨ mu meyan cheꞌeta manaꞌa aꞌajvatzɨjxɨ ɨ chuej japua tɨj aɨjna ɨ tacaꞌiraꞌan ɨ huarej tɨ auj seijreꞌe tɨꞌɨj huaseeviꞌi aꞌayeꞌi. Tɨ puaꞌa aɨn cɨyaꞌaraꞌan huataujruurajxɨꞌɨn aaca cɨmeꞌe, naijmiꞌi pu cávaɨjtzi ɨ tacaꞌiraꞌan.
\p
\v 14 Ajta ɨ tajapua tɨ jeꞌeseijreꞌe, aɨ pu ahuáujpuaꞌarixɨ. Ayaa pu cheꞌeta naꞌa huateeseijre tɨj ajta aꞌatɨ yuꞌuxari huatyeejire. Ajta tɨj naꞌa aꞌutɨ aꞌu jɨrime, ajta tɨj naꞌa aꞌutɨ aꞌarahuáchijmee ɨ jaj japua, naijmiꞌi pu huaraꞌaxɨ. Capu cheꞌe muꞌu eꞌe seiraa aꞌaraa ɨ jɨri.
\p
\v 15 Majta naimiꞌi ɨ maj yan japuan seijraꞌacaa iiyan chaanaca japua, a mu ahuauravaatacaꞌa aꞌahuaꞌa tyastaꞌana tzajtaꞌa majta jaij tzajtaꞌa aujna jɨri jetze. Ayaa mu huarɨj aɨme ɨ maj tiꞌitɨj cɨn títyatatí, tɨ puaꞌa tajtuhuan pueen nusu presideenti pueen naꞌari ɨ maj tihueꞌijteꞌe ɨ xantaaruꞌu nusu ɨ macai maj chijtyaani pueen nusu ɨ maj eihua rucaꞌanyejme. Naimiꞌi matɨj manaꞌa puaꞌamua yen seijreꞌe iiyan chaanaca japua, meyan huatauravaatacaꞌa. Capu amɨn aꞌij tɨ puaꞌa ruxaꞌa manaꞌa áꞌujhuaꞌanyaꞌa aꞌij tɨ tihuaꞌaraanajchi, naꞌari caꞌanyejri mu cɨn tiꞌimuaraꞌacaa.
\v 16 Ayaa mu tihuaꞌutajée maɨjna ɨ jɨri, majta maɨjna ɨ tetej tɨcɨn:
\p ―Sataꞌaj yeehui tajapua rájveti sej si taꞌavaꞌanan tɨ ij cai taaseij aɨjna ɨ tɨ acajca ɨ ɨpuari japua, ajta tɨ ij cai pueijtzi taacɨꞌɨti aɨjna jemi ɨ Canyaꞌa ɨ tɨ ari nyuꞌucamɨꞌɨ.
\p
\v 17 Ee xaa, puꞌuri yeehui ayan tyajaꞌureꞌenye aɨjna xɨcajraꞌa mej jetzen pueijtzi taataꞌasin maɨjna cɨmeꞌe mej meri nínyuꞌucacu, majta capu aꞌatɨ raayɨꞌɨtɨ tɨ tyaꞌutaviicueꞌi aɨjna cɨmeꞌe.
\c 7
\s Aɨme ɨ mej Israel jetze ajtyamaꞌacan, ɨ tɨ Dioj huaꞌavaꞌajajpuaxɨ
\p
\v 1 Nyajta eꞌeyan muaacuaca huaseij ɨ mej tiꞌivaɨreꞌe u tajapua. Aa mu aꞌutyáuucaꞌa. Saɨj pu aun eꞌeseijraꞌacaa u jetze pujmeꞌen Teijmataꞌa, ajta saɨj aujna aꞌahuaꞌa Huaahuata pujmeꞌen, ajta saɨj Cuameche pujmeꞌen. Ajta ɨ saɨj, au pu aꞌutyavaacaꞌa Tzareemeꞌen pujmeꞌen. Majta aɨme ɨ maj muaacua, aɨ mu cai huaꞌataꞌacaraꞌa ɨ aaca tɨ huataꞌaacare ɨ chuej japua naꞌari ɨ jaj japua nusu cɨye tzajtaꞌa.
\p
\v 2 Nyatɨꞌɨj ni seij huaseij tɨ tiꞌivaɨreꞌe u tajapua. Au pu pujmeꞌen eꞌeveꞌemaꞌacaa aꞌu tɨ eꞌijninyei ɨ xɨcaj. Aɨ pu ruꞌityaatɨɨcaꞌa aɨjna ɨ tɨ cɨn Dioj huaꞌajtiyúꞌuxaxɨ áj huaꞌacuaatzeꞌe tɨ ayan tyaꞌaxa maj nuꞌu tyaɨtestyamuaꞌameꞌen pueen. Aj puꞌi aɨn tevi ayan caꞌanin cɨn huaꞌutajée aɨme ɨ maj maɨjna cɨn antyujmuaꞌareeracaꞌa maj aꞌij puaꞌa raaruuren ɨ chaanaca, majta ɨ jaj tɨ veꞌe.
\p
\v 3 Ayaa pu tihuaꞌutaꞌixaa tɨcɨn:
\p ―Caxu xɨ pueijtzi raꞌataꞌa ɨ chaanaca naꞌari ɨ jaj tɨ veꞌe nusu ɨ cɨye asta tyanaꞌa cai huaꞌajtiyúꞌuxaxɨꞌɨn huaꞌacuaatzeꞌe tyaɨme ɨ maj ravaɨreꞌe ɨ taDioj. ―Ayaa mu tyuꞌutaxajtacaꞌa.
\p
\v 4 Nyatɨꞌɨj ni neyan tiraanamuajriꞌi aꞌachu maj puaꞌamua ɨ tɨ huaꞌajtiyúꞌuxaxɨ ɨ huaꞌacuaatzeꞌe. Ayaa mu puaꞌamuacaa aꞌachu cumu anxɨte japuan huaꞌapuate japuan muaacua viꞌiraꞌa. Aɨ mu huaꞌa jetze ajtyamaꞌacan matɨj manaꞌa tyaɨtestyamuaꞌameꞌen maj pueen ɨ mej aꞌiraujnejte maɨjna jetze ɨ Israel.
\p
\v 5 Majta aɨme ɨ maj maɨjna jetze aꞌiraujneijte ɨ Judá, ayaa mu aráꞌaxcaa tamuaamuataꞌa japuan huaꞌapua viꞌiraꞌa. Majta aɨme ɨ maj maɨjna jetze aꞌiraujneijte ɨ Rubén, ayaa mu cheꞌeta aráꞌaxcaa tamuaamuataꞌa japuan huaꞌapua viꞌiraꞌa. Majta aɨme ɨ maj maɨjna jetze aꞌiraujnejte ɨ Gad, ayaa mu majta aráꞌaxcaa aꞌachu cumu tamuaamuataꞌa japuan huaꞌapua viꞌiraꞌa.
\v 6 Majta aɨme ɨ maj maɨjna jetze aꞌiraujneijte ɨ Aser, ayaa mu cheꞌeta manaꞌa aráꞌaxcaa tamuaamuataꞌa japuan huaꞌapua viꞌiraꞌa. Majta aɨme ɨ maj maɨjna jetze aꞌiraujneijte ɨ Neftalí, ayaa mu cheꞌeta manaꞌa aráꞌaxcaa aꞌachu cumu tamuaamuataꞌa japuan huaꞌapua viꞌiraꞌa. Majta mu meyan cheꞌeta manaꞌa aráꞌaxcaa aꞌachu cumu tamuaamuataꞌa japuan huaꞌapua viꞌiraꞌa aɨme ɨ maj maɨjna jetze aꞌiraujneijte ɨ Manasés.
\p
\v 7 Aɨme cɨmeꞌen ɨ seica, ɨ maj Simeón jetze aꞌiraujneijte, ayaa mu majta aráꞌaxcaa aꞌachu cumu tamuaamuataꞌa japuan huaꞌapua viꞌiraꞌa. Majta aɨme ɨ maj Leví jetze aꞌiraujneijte, ayaa mu cheꞌeta manaꞌa aráꞌaxcaa aꞌachu cumu tamuaamuataꞌa japuan huaꞌapua viꞌiraꞌa. Majta aɨme ɨ maj Isacar jetze aꞌiraujneijte, ayaa mu cheꞌeta aráꞌaxcaa tamuaamuataꞌa japuan huaꞌapua viꞌiraꞌa.
\p
\v 8 Naimiꞌi mu meyan tamuaamuataꞌa japuan huaꞌapua viꞌiraꞌa arastɨmaꞌacaa aɨme ɨ tyaɨtestyamuaꞌameꞌen ɨ maj Zabulón jetze aꞌiraujneijte, majta ɨ maj maɨjna jetze aꞌiraujneijte ɨ José, ayaa mu cheꞌeta aráꞌaxcaa matɨj ɨ seica, majta aɨme ɨ maj Benjamín jetze aꞌiraujneijte, ayaa mu cheꞌeta manaꞌa aráꞌaxcaa.
\s Cɨmeꞌen ɨ maj muiꞌitɨ ɨ maj majta cueiinaviꞌin tiꞌityeechan
\p
\v 9 Nyatɨꞌɨj ni nyajtahuaꞌa atanyeeracaꞌa, nyajta huaꞌuseij ɨ seica ɨ maj maun eꞌetyujsaɨraꞌacaa. Ayaa mu tyamuaꞌa tíꞌityamuiꞌicaa. Capu rɨꞌɨristacaꞌa tɨ aꞌatɨ huaꞌutéꞌiten. Aꞌu tɨ naꞌa mu eꞌemaꞌacantajmaꞌacaa, matɨj manaꞌa puaꞌamua maɨn pueen ɨ tyaɨte ɨ maj seij chuejraꞌa japua eꞌemaꞌacan, matɨj manaꞌa puaꞌamua ɨ tyaɨte ɨ maj saɨque tíꞌijyeꞌira, majta naijmiꞌi maj saɨque tiꞌixaxaꞌa. Au mu aꞌutyauucaꞌa jemin ɨ Canyaꞌa. Aɨ mu cueinaviꞌin tiꞌityecháatɨmaꞌacaa aɨme, majta tacɨj mu huiitepiitɨmaꞌacaa.
\v 10 Caꞌanin mu cɨn meyan tíꞌityejijhuacaꞌa tɨcɨn:
\q Caꞌanyejri pu cɨn tuꞌirajtuaa aɨjna ɨ taDioj
\q2 ɨ tɨ acajca ɨ ɨpuari jetze,
\q ajta aɨjna ɨ Canyaꞌa.
\p
\v 11 Majta aɨme ɨ mej tiꞌivaɨreꞌe u tajapua, aɨ mu atavaatɨmaꞌacaa aꞌu tɨ aꞌutyavaacaꞌa ɨ ɨpuari, majta aꞌu maj aꞌutyauucaꞌa aɨme ɨ vaujsi, majta aɨme ɨ maj muaacua ɨ maj ruuri. Matɨꞌɨj mi aꞌicaujtuuxɨ ɨ jemin ɨ tɨ acajca ɨ ɨpuari jetze mej mi raatyaanajche ɨ Dioj.
\v 12 Ayaa mu tyuꞌutaxajtacaꞌa tɨcɨn:
\q Cheꞌe ayan tyajaꞌureꞌenyen.
\q Tuꞌuri teyan rɨꞌɨ tiraataꞌasin, tyajta teyan
\q2 rɨꞌɨ tiyaꞌuseiira taꞌajuꞌun,
\q2 aꞌini aɨ pu nain tyaꞌumuaꞌaree.
\q Aɨj tu cɨn teyan rɨꞌɨ tirataꞌacaraꞌa taꞌajuꞌun,
\q2 tyajta rɨꞌɨ tiraatyatuutuhuaꞌa taꞌajuꞌun.
\q Aɨ pu taDioj jemi seiraꞌa aꞌame
\q2 ɨ muáreꞌeriꞌiraꞌaraꞌan, ajta ɨ caꞌanijraꞌa tɨj naꞌa
\q2 tɨ yu aucaꞌitɨ aꞌame tɨj naꞌa rusen cɨmeꞌe.
\p
\v 13 Aj puꞌi saɨj ɨ tɨ vastacɨraꞌi ayan tinaataihuaꞌuriꞌi tɨcɨn:
\p ―¿Aꞌatyaɨnni maj pueen aɨme ɨ maj cueinaviꞌin tiꞌityechaatɨme? ¿Aꞌuni jetze maꞌuvaꞌajuꞌun?
\p
\v 14 Nyatɨꞌɨj ni neyan tiraataꞌixaa tɨcɨn:
\p ―Muaa vastaꞌa, muaa paj ramuaꞌaree pej peyan tinaataꞌixaateꞌen.
\p Aj puꞌi ayan tinaataꞌixaa tɨcɨn:
\p ―Ai mu hui maɨn pueen ɨ maj tyaꞌutaviicueꞌiriꞌi ɨ maj eihua huapɨꞌɨ rajpueiitzi muaꞌaraa. Ai mu meri tyuꞌujaꞌusi ɨ tyuꞌujcɨɨxu, majta tyuꞌucueiinare ɨ tihuaꞌacɨɨxu maɨjna cɨmeꞌe maj raꞌaraꞌastijre maɨjna ɨ Cɨriistuꞌu ɨ tɨ huaꞌa jetze maꞌacan huamɨꞌɨ.
\v 15 Aɨj mu hui cɨn meyan iiya seijreꞌe jemin ɨ ɨpuari tɨ jetzen acajca aɨjna ɨ Dioj. Aɨ mu majta ravaɨreꞌe teyujtaꞌa aꞌu tɨ aɨn Dioj eꞌeseijreꞌe. Nain tujcaꞌari tzajtaꞌa, majta nain tɨcaꞌari tzajtaꞌa, au mu ravaɨreꞌe. Ajta aɨn ɨpuari jetze tɨ acajca, aɨ pu huaꞌachaɨn aɨjna cɨmeꞌe tɨ rusaɨj huaꞌa jemi huatyaturaasin.
\v 16 Camu hui cheꞌe huatyatujritzeꞌesin, camu majta cheꞌe huataꞌicuj. Capu ajta cheꞌe huaꞌacucuiꞌi aꞌame ɨ huaꞌamuꞌu ɨ xɨcaj cɨmeꞌe. Capu ajta cheꞌe huaꞌataixɨꞌɨra aꞌame ɨ xɨcaj.
\v 17 Aꞌini aɨ pu Canyaꞌa aɨjna jetze a aꞌutejvee ɨ ɨpuari. Aɨ pu huaꞌachaɨ aꞌame. Aɨ pu huaꞌaviꞌitɨn ajna aꞌu tɨ jajmuaa ɨ maj cɨn ruuri muaꞌaraꞌani. Ajta aɨn Dioj, aɨ pu rɨꞌɨ tihuaꞌutaꞌasin mej mi cai cheꞌe tiꞌitɨ cɨn ruxaamɨstyaꞌa.
\c 8
\s Aɨn nuꞌu ɨ Canyaꞌa rasujtzaꞌan aɨjna ɨ tɨ cɨn áꞌavijtiꞌihuajmaꞌacaa, aɨjna ɨ taꞌarahuaꞌapua
\p
\v 1 Tɨꞌɨqui aɨn Canyaꞌa rasujtzaꞌan aɨjna ɨ tɨ cɨn áꞌavijtiꞌihuajmaꞌacaa, aɨjna ɨ taꞌarahuaꞌapua. Aj puꞌi nainjapua tyuꞌupuáꞌarajraa u uteꞌe. Ayaa pu aꞌatee aꞌachu cumu eꞌitaꞌa hoora tɨ cai tiꞌitɨ namuajraꞌacaa.
\v 2 Nyatɨꞌɨj ni huaꞌuseij ɨ maj arahuaꞌapua, ɨ maj majta tiꞌivaɨreꞌe u tajapua. Aɨ mu aɨn pueen ɨ maj Dioj jemi huatyauuca. Matɨꞌɨj mi tyaꞌancuraꞌɨ ɨ trompeeta, ɨ tɨ taꞌarahuaꞌapua.
\p
\v 3 Aj puꞌi saɨj mu aꞌuveꞌeme tɨ ajta tiꞌivaɨreꞌe u tajapua. Aɨ pu jetzen ajtyeechaxɨ aɨjna ɨ maj japuan tiꞌimuaɨꞌɨvajtaca. Ajta tiꞌitɨ huiityajajnacaꞌa cɨtziveꞌeri. Seij pu raatatɨste ɨ cuaaneꞌe tɨ ij aɨjna rajnajchiteꞌen aɨjna jamuan ɨ nyuucari ɨ maj cɨn raatahuaucaraꞌa ɨ Dioj jemi matɨj manaꞌa puaꞌamua ɨ maj rɨꞌɨ tiꞌiteseijreꞌe ɨ Dioj jemi. Ajta, aɨjna ɨ huaꞌanyuuca, an pu eꞌeseijraꞌacaa japuan aɨjna ɨ tɨ ooro cɨn taavijhua ɨ maj japuan tiꞌimuaɨꞌɨvajtaca tɨ ajta jemin aꞌutejvee aɨjna ɨ ɨpuari.
\p
\v 4 Aj puꞌi tyamuaꞌa tyaꞌajcɨtzujtaracaꞌa aɨjna ɨ cuaaneꞌe aɨjna jamuan ɨ nyuucari ɨ maj cɨn raatahuaucaraꞌa ɨ Dioj jemi. Aɨj pu jetzen ájcɨtzujtaracaꞌa aɨjna ɨ muajcaꞌaraꞌaraꞌan aɨjna ɨ tɨ tiꞌivaɨreꞌe u tajapua.
\v 5 Aj puꞌi rajtɨɨ aɨjna ɨ cɨtziveꞌeri, ajta raꞌavaꞌɨstyaꞌa aɨjna ɨ taij tɨ aun aꞌuveꞌeme aɨjna japua ɨ maj japuan tiꞌimuaɨꞌɨvajtaca. Aj puꞌi ayaꞌucáaxɨre ɨ chaanaca japua. Cɨmeꞌen puꞌu ayan huarɨj, aj nu ni raanamuajriꞌi. Cu xuee muatyényuu. Eecan pu tyamuaꞌa tiꞌityácaꞌarajnajmáꞌa. Majta tyamaxcɨvaꞌaraꞌa. Ajta huataujcaꞌatzɨxɨ ɨ chaanaca.
\s Cɨmeꞌen ɨ trompeeta ɨ maj teꞌityaɨꞌɨcaꞌa
\p
\v 6 Majta aɨme ɨ maj arahuaꞌapua araꞌase, ɨ maj majta tiꞌivaɨreꞌe u tajapua, aɨme ɨ maj trompeeta teꞌityaꞌɨcaꞌa, aɨ mu rɨꞌɨ huaujruu mej mi maɨjna tzajtaꞌa ucaajijhua.
\p
\v 7 Ajta aɨjna taꞌanajca, aɨ pu ucájijhuacaꞌa aɨjna tzajtaꞌa ɨ trompeeta. Cɨmeꞌen puꞌu ayan huarɨj, matɨꞌɨj mi teetej caavatzɨ aɨjna jamuan ɨ taij, xuureꞌe tɨ ranaxca. Nainjapua pu huavatzɨ iiyan chaanaca japua. Ajta eꞌicaj pu tyuꞌuraꞌataa. Ajta aɨn ɨ cɨye, eꞌicaj pu ajta tyuꞌuraꞌataa. Ajta ɨ ɨxaj, naimiꞌi pu huaraꞌataa aɨjna.
\p
\v 8 Ajta aɨn ɨ tɨ huaꞌapua ɨ tɨ tiꞌivaɨreꞌe u tajapua, aɨ pu ajta ucájijhuacaꞌa aɨjna tzajtaꞌa ɨ trompeeta. Ajta tiꞌitɨ pu atyajrai ɨ jaj jetze ɨ tɨ veꞌe. Cu xuee jɨri naꞌa aɨjna ɨ tiꞌitɨ ɨ tɨ ajta tyataasimaꞌa. Tɨꞌɨqui a aꞌucajrupi a aataꞌa. Aj puꞌi eꞌicaj saɨque huaujruu ɨ jaj tɨj xuureꞌe.
\v 9 Majta eꞌicaj mu huacuii ɨ maj maun eꞌechajcaꞌa. Majta maɨn ɨ baarcu ɨ maj japuan aꞌacɨɨnyacaꞌa ɨ jaj, eꞌicaj mu majta huatyaanaꞌaxɨ.
\p
\v 10 Ajta aɨn ɨ tɨ hueica, aɨ pu ajta ucájijhuacaꞌa aɨjna tzajtaꞌa ɨ trompeeta. Cɨmeꞌen puꞌu ucájijhuacaꞌa, aj puꞌi xuꞌuraꞌave tɨ veꞌe eꞌicajve u uteꞌe. Ayaa pu tyaꞌataacaꞌa tɨj tatzari. Aj puꞌi a aꞌarajve eꞌicaca japua ɨ atyaꞌana, ajta eꞌicaca japua aꞌu tɨ a jaixaviꞌijmee.
\v 11 Ajta aɨn ɨ xuꞌuraꞌave, ayaa pu antyahuaacaꞌa tɨcɨn Taꞌantzijviꞌi. Eꞌicaj pu antziiviꞌi aꞌaraa ɨ jaj. Majta ɨ tetyaca, muiꞌitɨ mu huacuii maɨjna cɨmeꞌe maj reꞌi maɨjna ɨ jaj ɨ tɨ antzijviꞌi.
\p
\v 12 Ajta aɨn tɨ muaacua, aɨ pu ajta ucájijhuacaꞌa ɨ trompeeta jetze. Cɨmeꞌen puꞌu ayan huarɨj, tiꞌitɨ pu raꞌajtyaatuꞌa ɨ xɨcaj, ajta ɨ maxcɨraꞌi, ajta eꞌicaj ɨ xuꞌuraꞌave mej mi cai cheꞌe meyan aꞌatáatɨmeꞌeni. Eꞌicaj tujcaꞌari tzajtaꞌa, camu cheꞌe áꞌataacaꞌa, ajta eꞌicaj tɨcaꞌari tzajtaꞌa, camu majta cheꞌe áꞌataacaꞌa.
\p
\v 13 Nyatɨꞌɨj ni neyan aꞌujnyeeracaꞌa. Utyaꞌɨmɨ pu seij ráꞌaraꞌacaa ɨ cuaꞌɨraꞌave. Nyatɨꞌɨj ni neyan raanamuajriꞌi tɨ ayan tíꞌixajtacaa tɨcɨn:
\p ―Cuiꞌi xaa, cuiꞌi xaa, cuiꞌi xaa, aɨme hui ɨ maj iiyan japuan huachaatɨme ɨ chaanaca, aꞌini eihua mu hui rajpueitzi muaꞌajuꞌun matɨꞌɨj meyan ucajijhua ɨ seica ɨ maj hueica ɨ trompeeta jetze. Puꞌuri hui tɨn ayan tyajaꞌureꞌenyejsin.
\c 9
\p
\v 1 Aj puꞌi aɨn taꞌanxɨvi ayan ucájijhuacaꞌa ɨ trompeeta jetze. Cɨmeꞌen puꞌu ayan huarɨj, nyatɨꞌɨj ni raaseij ɨ xuꞌuraꞌave tɨ ari eꞌicajve u uteꞌe, ajta an aꞌarajve ɨ chaanaca japua. Ajta aɨn, aɨ pu raꞌancureꞌechuii aɨjna ɨ yaavi ɨ tɨ cɨn raꞌantacuuna aꞌu tɨ eꞌetyacun tɨ huápɨꞌɨ aꞌucatee.
\v 2 Aj puꞌi aɨ pu ayan raꞌantacú aɨjna tɨ eꞌetyacun tɨ ayan cai amiteereꞌe aꞌachu tɨ ucatee. Cɨmeꞌen puꞌu raꞌantacú, ayaa pu huitacɨtzujtaracaꞌa tɨj tyaꞌitacɨtzúuta aꞌayeꞌi ɨ hoorno tzajtaꞌa tɨ veꞌe. Ajta aɨn ɨ xɨcaj, ajta ɨ maxcɨraꞌi, aɨ mu aꞌutanamiꞌihua muaꞌaraa maɨjna cɨmeꞌe ɨ cɨtzij tɨ aꞌitacɨtzujtacaꞌa aujna aꞌu tɨ eꞌetyacun.
\p
\v 3 Matɨꞌɨj mi huatunaꞌise muꞌitacɨ́ cɨtzij tzajtaꞌa. Ayaa mu tihuaꞌutaꞌa mej mi meyan tyuꞌucheꞌeveꞌen matɨj aɨme ɨ tyaxcate.
\v 4 Ayaa mu tihuéijca maj nuꞌu cai aꞌij puaꞌa raruuraa ɨ ɨxaj tɨ ajninyei ɨ chuej japua naꞌari tuꞌupi tiꞌitɨ nusu cɨye. Ai muꞌu nuꞌu aɨn pueen ɨ maj aꞌij puaꞌa huaꞌaruuren, aɨme ɨ tyaɨte ɨ tɨ cai teꞌeyuꞌusiꞌi huaꞌacuaatzi jetze maj nuꞌu tyaɨtestyamuaꞌameꞌen pueen ɨ Dioj.
\p
\v 5 Ayaa mu tihauꞌutaꞌa mej meyan aꞌateeri aꞌachu cumu anxɨ maxcɨraꞌi maj pueijtzi huaꞌutaꞌan ɨ tetyaca. Majta, camu meyan tihuaꞌutaꞌa maj huaꞌucuiꞌini. Ajta, aɨjna ɨ maj cɨn pueijtzi huaꞌutaꞌasin, ayaa pu cheꞌeta naꞌa een tɨ puaꞌa tyaxca raacheꞌen ɨ aꞌatɨ.
\v 6 Ayaa pu teꞌeme ajna xɨcajraꞌa jetze. Ayaa mu rahuauni ɨ tyetyaca maj huacuiꞌini. Ma ajta, capu aꞌij tyuꞌutarɨꞌɨristari. Eihua mu huapɨꞌɨ jetzen áꞌujcaꞌanye maj huacuiꞌini mej mi cai cheꞌe rajpueijtzi. Ma majta, caꞌanyejri mu cɨn tyaꞌutaviicueꞌira.
\p
\v 7 Majta maɨn huatunaꞌise, ayaa mu seijraꞌacaa matɨj cahuaayuꞌuse ɨ mej meri huaꞌacáanajxɨ mej mi japuan huanyaꞌuseꞌen. Tiꞌitɨ mu avaꞌarújtyaꞌamaꞌacaa ɨ rumuꞌu jetze. Ayaa pu seijraꞌacaa tɨj curun tɨ ooro cɨn taavijhuacaꞌa. Majta, huaꞌanyeerime ayan seijraꞌacaa matɨj tyaɨte.
\v 8 Ayaa mu majta eꞌenyeꞌen cácɨjpuajcaꞌa matɨj juuca, majta meyan eꞌenyeꞌen antátamajcaꞌa matɨj muajyete.
\v 9 Nainjapua mu tiꞌicácaujnacaa tiꞌitɨj cɨmeꞌe tɨj tyapuustiꞌi pueenyaꞌa. Majta, eihua huapɨꞌɨ cáꞌarajnacaa matɨꞌɨj tiráꞌaraꞌixɨ. Yaa pu eꞌenyaꞌa namuajraꞌacaa matɨj aɨme ɨ cahuaayuꞌu ɨ maj caꞌanin cɨn ruꞌuvaꞌajaapuajmeꞌe ɨ carreta ɨ maj tzajtaꞌan huatyauucaꞌa aɨme ɨ maj unyaꞌuseꞌen.
\p
\v 10 Ayaa mu eꞌenyaꞌa huacuasi matɨj tyaxcate. Ajta aɨjna ɨ huaꞌamuareꞌeriꞌiraꞌa ɨ maj cɨn meyan eꞌenyaꞌa aꞌateeri anxɨj maxcɨraꞌi maj pueijtzi huaꞌutaꞌasin ɨ tetyaca, aɨ pu huaꞌacuasi pu seijreꞌe.
\v 11 Ajta aɨn tɨ tihueꞌijteꞌe, ai pu aɨn pueen ɨ xaijnyuꞌucari tɨ nain cɨn antyujmuaꞌaree aujna teꞌetyacun tɨ huápɨꞌɨ aꞌucatee. Ayaa pu antyahuaa huaꞌanyuuca cɨmeꞌe aɨme ɨ Hebreos tɨcɨn Abadón. Ajta huaꞌanyuuca cɨmeꞌe ɨ Griego, ayaa pu antyahuaa tɨcɨn Apolión. Ayaa pu huataujmuaꞌa tɨcɨn, “Aɨjna tɨ eꞌihuajeꞌica”.
\p
\v 12 Puꞌuri seij mu aꞌumej ɨ maj cɨn pueijtzi muaꞌaraꞌani. Ajta aucheꞌe huaꞌapua aꞌatura tɨ ayan tyajaꞌureꞌenyen.
\p
\v 13-14 Aj puꞌi aɨn tɨ arájsevi, aɨ pu ajta ucájijhuacaꞌa ɨ trompeeta jetze. Cɨmeꞌen puꞌu ayan ucájijhuacaꞌa, nyatɨꞌɨj ni aꞌatɨ huanamuajriꞌi tɨ aun tíꞌixajtacaa aꞌu tɨ aꞌutejvee aɨjna ɨ maj japuan tiꞌimuaꞌɨvajtaca. Ayaa pu tiraataꞌixaa aɨjna tɨ ucájijhuacaꞌa tɨcɨn:
\p ―Pataꞌaj hueꞌixɨ́jtaxɨꞌɨn aɨme ɨ maj muaacua ɨ maj majta aityanamiꞌi aujna vejliꞌi atyaꞌana jetze tɨ veꞌe tɨ ayan tyajaꞌarajtyahuaa tɨcɨn Eufrates.
\p
\v 15 Aj puꞌi huáꞌuxɨjtacaꞌa aɨme ɨ maj muaacua, ɨ maj majta aityanamiꞌihuacaꞌa asta ajna tyajaꞌureꞌenyen ɨ xɨcajraꞌan mej jetzen huacuiꞌini aꞌicaj ɨ tyaɨte ɨ maj yan japuan huachaatɨme. Puꞌuri pɨtiꞌihuaujxaꞌapɨꞌɨntare aꞌatzaj tɨ puaꞌa, tiꞌitani xɨcajraꞌan, ajta tiꞌitani maxcɨraꞌiraꞌan, ajta tiꞌitani ninyeꞌiraꞌa tɨ ayan huarɨni.
\p
\v 16 Majta maɨn ɨ xantaaruꞌu, ɨ maj avéꞌetyeꞌete, ayaa mu araꞌasicaa aꞌachu cumu seite viꞌiraꞌa puaꞌamuaj maj maꞌa, majta ayaa mu puaꞌamua aꞌachu cumu tamuaamuataꞌa viꞌiraꞌa ɨ mej meyan puaꞌamua maj maꞌa. Ayaa nu tyuꞌunamuajriꞌi aꞌachu maj puaꞌamua araꞌasicaa.
\p
\v 17 Nyajta, ayaa nu eꞌenyeꞌen huaꞌuseij ɨ cahuaayuꞌu nyatɨꞌɨj neyan tyuꞌumaaracaꞌa. Aɨme ɨ maj avéꞌetyeꞌete, ayaa mu antyaujna ɨ rutaviitzeꞌe tiꞌitɨj cɨmeꞌe tɨ ayan seijreꞌe tɨj taij tɨ aꞌataa, ajta ɨ tɨ cuatumua, ajta ɨ tɨ tyaumua. Majta aɨme ɨ cahuaayuꞌu, ayaa mu eꞌenyaꞌa huijmuꞌu matɨj muajyete. Ajta ɨ tɨ an huaꞌatenyeꞌe jetze eꞌijninyeicaꞌa ɨ taij, jamuan ɨ cɨtzij, ajta aɨjna tɨ tyaumua tɨ ayan tyaꞌaaca tɨj tyapuustiꞌi.
\v 18 Matɨꞌɨj eꞌicaj huácuiihuacaꞌa ɨ tetyaca ɨ tɨ hueica jetze ɨ maj cɨn pueijtzi huaꞌutaꞌa, aɨjna cɨn ɨ taij, ajta aɨjna ɨ cɨtzij, ajta aɨjna ɨ tɨ ayan tyaꞌaaca tɨj tyapuustiꞌi, tɨj naꞌa puaꞌamua aꞌijninyeicaꞌa aɨn huaꞌatenyeꞌetzeꞌe ɨ cahuaayuꞌu.
\p
\v 19 Ee xaa nyaꞌu, ayaa mu tiraayɨꞌɨtɨ mej tiꞌityacuiꞌini maɨjna cɨmeꞌe ɨ rutenyeꞌe. Ayaa mu majta eꞌenyeꞌen huacuasi matɨj cuꞌucuꞌuse, majta meyan eꞌenyeꞌen huijmuꞌu. Majta ɨ maj cɨn pueijtzi huaꞌutaꞌa ɨ tetyaca.
\p
\v 20 Majta maɨn ɨ seica ɨ maj yan japuan seijraꞌacaa iiyan chaanaca japua, ɨ maj cai huácuiihuacaꞌa maɨjna cɨmeꞌe ɨ cuiꞌiniꞌiraꞌa, camu raataxaahuatacaꞌa ɨ maj tiꞌitɨ huátaahuan ɨ tɨ cai Dioj pueen. Camu majta raatapuaꞌajtacaꞌa mej meyan ranaꞌamicheꞌen maɨjna ɨ tiyaaruꞌu naꞌari maɨme ɨ tiꞌitɨ tevijraꞌa tɨ ayan taavijhua ooro cɨmeꞌe naꞌari plaata cɨmeꞌe nusu coobre cɨmeꞌe caꞌɨn tetej cɨmeꞌe o cɨye cɨmeꞌe, tiꞌitɨ tɨ naꞌa, maj cai atanyéjnyeꞌe, majta cai huitanajcaꞌamua, majta cai cɨɨnivej.
\p
\v 21 Majta aɨme ɨ tyaɨte, camu majta raatapuaꞌajtacaꞌa maj cai tiꞌityacuiꞌica. Majta maɨjna ɨ chahueiiri camu majta raatapuaꞌajtacaꞌa maj cai ramuaraꞌa maɨjna ɨ tɨ tyuꞌutyáhueiitacaꞌa tɨꞌij aráurasten ɨ huaꞌayeꞌira. Majta ɨ tyaɨte, maucheꞌe mu meyan ruxanaꞌacɨraꞌacaa, majta tyúꞌunahueꞌiracaa.
\c 10
\s Ɨ tɨ tajapua tiꞌivaɨreꞌe, ajta aɨjna tɨ jíriꞌi tɨ ajta teꞌeyuꞌusiꞌi
\p
\v 1 Nyatɨꞌɨj ni nyajtahuaꞌa seij huaseij tɨ tiꞌivaɨreꞌe u tajapua. Eecan pu rucaꞌanye aɨjna, ajta uteꞌe pu a vaꞌacámaꞌacaa. Jaitɨri pu racánajcaꞌa, ajta cuꞌuxai atavɨjcaꞌa ɨ muuraꞌan jetze. Ayaa pu tyáꞌajtaaveꞌe ɨ nyeerimaꞌaraꞌan tɨj ɨ xɨcaj, ajta ayan seijraꞌacaa ɨ ɨɨcajraꞌan tɨj tiꞌitɨ tɨ tyataasin.
\v 2 Aɨ pu ruꞌityépijcaa ɨ rumuajcaꞌa jetze ɨ yuꞌuxari tɨ cɨleꞌen. Puꞌuri autácuuriꞌihuacaꞌa. Aj puꞌi a aꞌaraɨ́ɨcatacaꞌa ɨ jaj japua ɨ tɨ veꞌe aɨjna cɨmeꞌe ɨ ruɨɨca ruꞌɨrɨɨtaꞌa pujmeꞌen. Aɨ pu ajta aꞌaraɨ́ɨcatacaꞌa ɨ chuej japua ɨ seij cɨmeꞌe ɨ ruɨɨca ruutataꞌa pujmeꞌen.
\v 3 Aj puꞌi caꞌanin cɨn huajijhuacaꞌa. Ayaa pu namuajraꞌacaa tɨj muajye tíꞌijiꞌihuaca. Cɨmeꞌen puꞌu ayan tyuꞌujijhuacaꞌa, matɨꞌɨj mi huateenyuu aɨme ɨ maj arahuaꞌapua araꞌase.
\v 4 Matɨꞌɨj meyan huateenyuu, nyaa nu ráꞌayuꞌuxácheꞌe. Nyajta eꞌeyan raanamuajriꞌi ɨ aꞌatɨ tɨ uteꞌe nyajaꞌutajée ayan tɨcɨn:
\p ―Pataꞌaj ruꞌumuaꞌareera aꞌij mej tyuꞌutaxajtacaꞌa ɨ maj huateenyuu aɨme ɨ maj aráhuaꞌapua araꞌase. Capaj raꞌayuꞌuxa.
\p
\v 5-6 Ajta aɨn ɨ tɨ tajapua tiꞌivaɨreꞌe ɨ nyaj raaseij tɨ jaj japua aꞌaraɨ́ɨcatacaꞌa, ajta chuej japua ajta aꞌaraɨ́ɨcatacaꞌa, aɨ pu ajméijcaꞌatacaꞌa, ajta ayan tyaꞌataujratziiriꞌi tɨ nuꞌu ari tyajaꞌureꞌenyejsin ajna xɨcajraꞌan tɨ jetzen nain teꞌentipuaꞌari. Aɨj pu jetze tyaꞌataujratziiriꞌi ɨ nyuucajtzeꞌen aɨjna tɨ rusen cɨn ruuri. Ai pu aɨn pueen ɨ Dioj tɨ tajapua huatyataahuacaꞌa, ajta naijmiꞌica tɨ aun eꞌeseijreꞌe. Aɨ pu ajta raatyataahuacaꞌa ɨ chaanaca ɨ tyaj japuan yen seijreꞌe, aɨ pu ajta raatyataahuacaꞌa tɨj naꞌa tɨ japuan tiꞌiseijreꞌe, ajta ɨ jaj tɨ veꞌe, ajta tɨj naꞌa tɨ aun eꞌeseijreꞌe.
\p
\v 7 Ayaa pu tyuꞌutaxajtacaꞌa aɨjna ɨ aꞌatɨ tɨ nuꞌu ajna aꞌaraurastejsin aɨjna ɨ tɨ ruꞌavaa ɨ Dioj jemi aꞌij tɨ aɨn Dioj tyaꞌataujratziiriꞌi huaꞌa jemi ɨ maj ravaɨraꞌacaa maɨjna cɨmeꞌe mej jetzen maꞌacan tiꞌixaxaꞌataꞌa. Ajna pu nuꞌu ayan aꞌaraurastejsin ajna xɨcajraꞌan tɨ jetzen ucajijhua ɨ tɨ tajapua tiꞌivaɨreꞌe ɨ tɨ arahuaꞌapua pueen.
\p
\v 8 Aj puꞌi aɨn ɨ nyaj raanamuajriꞌi tɨ uteꞌe tyajaꞌutaxajtacaꞌa, ayaa pu tinaataꞌixaa tɨcɨn:
\p ―Aricu, aɨjna jemi pataꞌaj raꞌancuraꞌɨn ɨ yuꞌuxari tɨ autacuuriꞌi muajcaꞌaraꞌaraꞌan jetze aɨjna tɨ tajapua tiꞌivaɨreꞌe, tɨ aun japuan huatejvee ɨ jaj japua, tɨ ajta aun japuan huatejvee ɨ chuej japua.
\p
\v 9 Nyatɨꞌɨj ni nyaun áꞌumej nyaɨjna jemi tɨ tajapua tiꞌivaɨreꞌe. Ayaa nu tiraataꞌixaa tɨ naataꞌɨteꞌen ɨ yuꞌuxari tɨ cɨleꞌen. Aj puꞌi ayan tinaataꞌixaa tɨcɨn:
\p ―Yaꞌacui, nyaꞌu. Pataꞌaj hui raatyajcuaꞌani. Aɨ pu muaꞌatzíivityaꞌa pu aꞌame muaꞌa jucaatzeꞌe. Ajta, ayaa pu muaꞌaméncatyaꞌa aꞌame muaꞌaténiꞌitzeꞌe tɨj sarate.
\p
\v 10 Nyatɨꞌɨj ni raꞌancuraꞌɨ nyaɨjna ɨ yuꞌuxari tɨ cɨleꞌen. Au nu yaꞌancuraꞌɨ ɨ muajcaꞌaraꞌaraꞌan jetze aɨjna tɨ tajapua tiꞌivaɨreꞌe. Nyatɨꞌɨj ni raatyajcuaa. Eecan pu naa tinúꞌucacarajcaꞌa ɨ neteni jetzeꞌe tɨj sarate. Ajta, nyatɨꞌɨj yáꞌuxɨj, eecan pu naꞌatzíjvityaꞌacaa ye nyajucaatzeꞌe.
\v 11 Aj puꞌi ayan tinaataꞌixaa tɨcɨn:
\p ―Ayaa pu ajta ayan tyuꞌuxeꞌeveꞌe paj pajtahuaꞌa tyuꞌutaxaj aɨme jemi ɨ tyaɨte ɨ maj seij chuejraꞌa japua eꞌemaꞌacan, ɨ maj majta seij nyuucari cɨn tiꞌixaxaꞌa, pajta huaꞌa cɨmeꞌen ɨ mej tihueꞌijteꞌe.
\c 11
\s Cɨmeꞌen ɨ maj huaꞌapua ɨ maj tyaꞌanxájta
\p
\v 1 Aj puꞌi aꞌatɨ naatachui tiꞌitɨ cɨye ɨ maj cɨn tíꞌitaaca aꞌachu tɨ huatatee. Ayaa pu tinaataꞌixaa tɨcɨn:
\p ―Iyaꞌa i, pataꞌaj hui raatéꞌiten aꞌachu tɨ antayauj ɨ teyuu aꞌu mej yáꞌanaꞌamiche ɨ Dioj, pataꞌaj pajta raatéꞌiten aꞌachu tɨ auyauj aɨjna ɨ maj japuan tiꞌimuaɨꞌɨvajtaca. Pataꞌaj pajta huaꞌutéꞌiten aꞌachu maj puaꞌamua ɨ maj maun ranaꞌamiche.
\v 2 Pajta, capaj hui paun raꞌitáa aꞌachu tɨ antayauj aujna u puaꞌaque tɨ aꞌaráyaujtaꞌa. Pataꞌaj rujɨɨmeꞌe raatyajtuaani aꞌini Dioj pu ari huaꞌutaꞌa ɨ maj seij chuejraꞌa japua eꞌemaꞌacan mej mi meyan aꞌateere aꞌachu cumu huaꞌapuate japuan huaꞌapua maxcɨraꞌi maj maun raꞌaveꞌechetziꞌinaxɨꞌɨn maɨjna chajtaꞌa tɨ Dioj ayan rusaɨj huatauraꞌate.
\p
\v 3 ’Nyajta inyaa, ayaa nu hui tihuaꞌutaꞌasin aɨme ɨ maj huaꞌapua ɨ maj caꞌanijraꞌa tiꞌitaꞌaca inyaa cɨmeꞌe ɨ muareꞌeriꞌiraꞌa mej mi meyan aꞌateeviꞌin aꞌachu cumu seiviꞌiraꞌa japuan tamuaamuataꞌate japuan hueicate xɨcaj maj tihuaꞌutaꞌixaateꞌen nyeetzi jetze maꞌacan. Ayaa mu maɨjna cɨn tiꞌitéechan maɨjna cɨmeꞌe ɨ maj cɨn tiꞌityaujcheꞌeta aɨme ɨ maj ruxaamɨsteꞌe maɨjna tɨ saɨj huamɨꞌɨ.
\p
\v 4 Ai mu hui aɨn pueen ɨ huarej ɨ tɨ tiꞌihuaꞌapua ɨ tɨ jemin aꞌatavee ɨ tavastaraꞌa tɨ iiyan tieꞌijta chaanaca japua. Ai mu hui majta maɨn pueen ɨ maj huaꞌapua ɨ taꞌantitátzajmee. Aɨ mu xaa jemin seijreꞌe ɨ tavastaraꞌa.
\v 5 Tɨ puaꞌa aꞌatɨ ayan tiꞌixeꞌevaꞌa tɨ aꞌij puaꞌa huaꞌuruuren, taij pu aijninyei an huaꞌatenyiꞌitzeꞌe, ajta huaꞌamueꞌitɨcɨ aɨme ɨ maj huaꞌajchaɨreꞌe. Ee xaa, tɨ puaꞌa hui aꞌatɨ ayan tiꞌijxeꞌevaꞌa tɨ aꞌij puaꞌa huaꞌuruuren, ayaa pu tiꞌihuaujxaꞌapɨꞌɨntare aɨjna jemi ɨ aꞌatɨ maj maɨn raajeꞌica.
\p
\v 6 Majta aɨme ɨ maj huaꞌapua, aɨj mu hui cɨn antyujmuaꞌaréera muaꞌajuꞌun maj huaꞌutaꞌijmɨ ɨ viite mej mi cai cheꞌe viiya menti mauj tihueꞌixaateꞌe ɨ tyaɨte. Aɨj mu cɨn meyan titeꞌentyujmuaꞌareera muaꞌajuꞌun maj saɨque raaruuren ɨ jaj tɨꞌij ayan huataujruꞌureꞌen tɨj xuureꞌe. Ayaa mu cheꞌeta manaꞌa cɨn titeꞌentyujmuaꞌareera muaꞌajuꞌun maj pueijtzi huaꞌutaꞌan aɨme ɨ tyaɨte ɨ mej iiyan seijreꞌe ɨ chaanaca japua. Nain mu hui cɨn pueijtzi huaꞌutaꞌasin ɨ cuiꞌiniꞌiraꞌa cɨmeꞌe tɨj naꞌa tɨ ayan tihuaꞌaraanajchi.
\p
\v 7 Matɨꞌɨj raꞌantipuaꞌariteꞌen ɨ maj cɨn naatyaxajta, aj puꞌi tiꞌitɨ aun aꞌitamé aꞌu tɨ eꞌetyacun ɨ tɨ huápɨꞌɨ aꞌucatee. Aɨ pu hui huaꞌutenyaꞌusiꞌiteꞌesin, ajta huaꞌacuiꞌini ajta, huaꞌutyaamueꞌitɨ.
\v 8 Au mu majta aꞌutyáꞌa muaꞌajuꞌun ɨ mɨꞌɨchite caaye jetze aujna aꞌahuaꞌa chajtaꞌana jetze tɨ veꞌe ɨ tɨ nuꞌu ayan tyajaꞌarajtyahuaa tɨcɨn Sodoma, ajta ayan tɨcɨn Egipto. Au pu huaꞌavastaraꞌa áꞌutataihuacaꞌa ɨ curuu jetze.
\p
\v 9 Ayaa mu mɨꞌɨchite huáruuren aɨme ɨ tetyaca mej nain japua huachaatɨme, aꞌu tɨ naꞌa seij chuejraꞌa japua, aɨme ɨ mej seij nyuucari cɨn tiꞌixaxaꞌa, aꞌachu maj puaꞌamua araꞌase ɨ tyaɨtejraꞌa. Hueica xɨcaj japuan eꞌitaꞌa mu huaꞌaseira muaꞌajuꞌun ɨ mɨꞌɨchite. Majta, camu raataꞌacaraꞌa tɨ aꞌatɨ huaꞌavaꞌanan.
\v 10 Majta aɨme ɨ maj iiyan huachaatɨme ɨ chaanaca japua, eihua mu huataujtyamuaꞌaveꞌesin maɨjna cɨmeꞌe ɨ mej meri huaꞌucuii. Aɨ mu majta maɨjna cɨn tiꞌiyesten, majta tyuꞌutaujpueijveꞌesin tiꞌitɨ maɨjna cɨmeꞌe ɨ maj cai cheꞌe huaꞌɨtziiteꞌe aɨme ɨ maj huaꞌapua ɨ maj tiꞌixaxaꞌataꞌa ɨ Dioj jetze maꞌacan, ɨ maj majta nuꞌu pueijtzi huaꞌutaꞌa aɨme ɨ mej iiyan seijreꞌe i chaanaca japua.
\p
\v 11 Tɨꞌɨj tyaumaꞌaca hueica xɨcaj japuan eꞌitaꞌa, xaijnyuꞌucaraꞌaraꞌan ɨ Dioj, aɨ pu huatyajturaa aɨme jemi ɨ maj huaꞌapua. Ajtahuaꞌa pu huaꞌutatɨste ɨ huaꞌaxaijnyuꞌuca ɨ maj cɨn ruuri. Matɨꞌɨj mi ajhuiixɨ. Majta eihua tyuꞌutatzɨn aɨme ɨ maj huaꞌuseij.
\v 12 Matɨꞌɨj mi raanamuajriꞌi tɨ aꞌatɨ caꞌanin cɨn u eꞌicájijhuacaꞌa u uteꞌe ayan tɨcɨn:
\p ―Iyaꞌa, sajcɨɨnyechi seyujna uteꞌe, jaitɨri jetze u tajapua.
\p Matɨꞌɨj mi ticɨj, mahuaꞌaseiiraca ɨ maj huaꞌajchaɨraꞌacaa.
\v 13 Cɨmeꞌen muꞌu ticɨj, aj puꞌi huatyaujcaꞌatzɨjxɨ ɨ chaanaca tyamuaꞌa naa. Ajta eꞌicaj pu aꞌavatzɨ ɨ tihuaꞌachiꞌi ɨ tɨ aun aꞌuvaatɨmaꞌacaa. Majta aráhuaꞌapua viꞌira mu huacuii ɨ tyaɨte tɨꞌɨj huatyaujcaꞌatzɨjxɨ. Majta aɨme ɨ seica ɨ tyaɨte, eihua mu huapɨꞌɨ tyuꞌutatzɨn, majta rɨꞌɨ tiraatyeejee ɨ Dioj.
\p
\v 14 Puꞌuri mu aꞌumaꞌa ɨ maj cɨn rajpueijtzi ɨ tɨ huaꞌapua. Ajta puꞌuri tɨn tyajaꞌureꞌenyejsin ɨ tɨ hueica ɨ maj cɨn rajpueijtzi muaꞌajuꞌun.
\s Ɨ trompeeta tɨ aráhuaꞌapua
\p
\v 15 Aj puꞌi aɨn tɨ uteꞌe tiꞌivaɨreꞌe, aɨjna tɨ arahuaꞌapua pueen, aɨ pu ajta ucájijhuacaꞌa. Nyajta huaꞌunamuajriꞌi maj caꞌanin cɨn tíꞌixajtacaa u uteꞌe, meyan tɨcɨn:
\q Puꞌuri xaa teꞌentyajrupi ɨ tavastaraꞌa,
\q2 aɨjna ɨ tɨ Dioj raꞌantihuau.
\q Puꞌuri nain cɨn antyujmuaꞌaree tɨ tihuaꞌutaijteꞌen aɨme ɨ maj huachaatɨme anna chaanaca japua.
\q Aɨ pu tihuaꞌutaijteꞌesin tɨj naꞌa tɨ yu aucaꞌitɨ aꞌame tɨj naꞌa rusen cɨmeꞌe.
\p
\v 16 Majta aɨme ɨ vaujsi ɨ maj seite japuan muaacua araꞌase, ɨ maj majta huaꞌɨpuari japua eꞌereꞌeti ɨ Dioj jamuan, aɨ mu aꞌicaujtuuxɨ, majta raatyanajchacaꞌa ɨ Dioj.
\v 17 Meyan tɨcɨn:
\q Rɨꞌɨ tu timuaataꞌaca, tavastaraꞌa,
\q mɨ paj Dioj pueen,
\q mɨ paj pajta nain cɨn antiꞌamuaꞌaree,
\q mɨ paj pajta seijreꞌe ijii,
\q mɨ paj pajta seijraꞌacaa jajcua ɨmɨ.
\q
\v 18 Majta aɨme ɨ maj seij chuejraꞌa japua eꞌemaꞌacan, matɨj puaꞌamua,
\q2 eihua mu huapɨꞌɨ nínyuꞌucacucaꞌa.
\q Pajta muaa, papuꞌuri huatanyuꞌucacaꞌa.
\q Puꞌuri ajna tyajaꞌureꞌenye ajna xɨcajraꞌa paj jetzen huaꞌaxɨjteꞌen aɨme ɨ mej meri huacuii.
\q Pataꞌaj rɨꞌɨ tihuaꞌutaꞌan paɨme ɨ maj muavaɨreꞌe, aɨme ɨ mej mueetzi jetze maꞌacan tiꞌixaxaꞌa, majta aɨme ɨ maj mueetzi jemi rɨꞌɨ tiꞌiteseijreꞌe.
\q Pataꞌaj rɨꞌɨ tihuaꞌutaꞌan matɨj puaꞌamua muaꞌastijreꞌe, capu amɨn tɨ puaꞌa meyan vaꞌacan cɨn títyatatí
\q2 naꞌari cɨleenyaꞌa cɨn metítyatatí.
\q Pataꞌaj pajta huaꞌantipuaꞌariteꞌen aɨme
\q2 ɨ mej meri huaꞌupuaꞌari aɨme
\q2 ɨ mej iiyan chaanaca japua huachaatɨme.
\m Ayaa mu tyuꞌutaxajtacaꞌa aɨme ɨ maj seité japuan muaacua araꞌase.
\p
\v 19 Aj puꞌi aɨn ɨ teyuu aꞌu tɨ Dioj eꞌeseijreꞌe u tajapua, aɨ pu antácuunyaracaꞌa. Ajta aun teyujtaꞌa seijraꞌacaa aɨjna ɨ chiꞌi tɨ cɨleꞌen tɨ ajta tzajtaꞌan urácatii ɨ nyuucari tɨ cɨn tyaꞌataujratziiriꞌi ɨ Dioj. Matɨꞌɨj mi huatyamaxcavaꞌaxɨ aujna teyujtaꞌa, majta tyenyuucaꞌa. Eihua pu caꞌanin cɨn tiꞌityácaꞌarajnajmáꞌa. Huatyaujcaꞌatzɨjcaꞌa ɨ chuej, majta caavatzɨ ɨ tyeetej.
\c 12
\s Ɨ jɨitaꞌa, ajta ɨ cuꞌucuꞌu
\p
\v 1 Aj puꞌi tiꞌitɨ huataseijre u uteꞌe ɨ nyaj cɨn rɨꞌɨ tyaꞌutaseij. Jɨitaꞌa pu seijraꞌacaa tɨ ayan eenyeꞌen tiꞌitechajcaꞌa cɨɨxuri cɨmeꞌe tɨ naa tíꞌityatáatɨyeꞌi tɨj ɨ xɨcaj. Ajta maxcɨraꞌi japua ujvaacaꞌa aɨjna ɨ jɨitaꞌa. Aɨ pu curuun ajta uꞌutyarujtyaꞌacaa tɨ jetzen seijraꞌacaa tiꞌitɨ cumu xuꞌuraꞌave. Ayaa mu araꞌasicaa aꞌachu cumu tamuaamuataꞌa japuan huaꞌapua.
\v 2 Puꞌuri autájucacaꞌa, ajta ruyeinyacaꞌa aɨjna cɨmeꞌe tɨ raꞌacuiꞌicaa aꞌini puꞌuri tɨn tiyauj aꞌame.
\p
\v 3 Ajtahuaꞌa saɨj huataseijre. Maꞌacui xaa, aɨjna ɨ cuꞌucuꞌu ɨ tɨ paꞌu, ɨ tɨ vivéj. Arahuaꞌapuaca pu huijmuꞌu, ajta tamuaamuataꞌa avaꞌahuajmee. Aɨ pu ajta ruꞌutyarujtyaꞌacaa ɨ curuun ɨ tɨ arahuaꞌapua.
\v 4 Ajta, rucuasi pu cɨn huaꞌajcuraꞌana eꞌicaca aɨme ɨ xuꞌuraꞌave ɨ maj uteꞌe eꞌeseijreꞌe. Aj pu ꞌi huaꞌajájpuacaꞌa. Aj puꞌi huajeꞌicaahuaꞌaxɨ iiyan chaanaca japua. Ajta aɨn ɨ cuꞌucuꞌu, aa pu vejliꞌi jemin aꞌutyeechaxɨ aɨjna ɨ jɨitaꞌa tɨ ari tɨn tiyauj aꞌame tɨꞌij raatyacɨꞌɨme tɨꞌɨj huanuꞌeihua ɨ unyaacaꞌi.
\p
\v 5 Aj puꞌi tiyauj aꞌaraa, tyaatacan. Ai pu aɨn pueen tɨ caꞌanyejri cɨn tihuaꞌutaijteꞌesin matɨj manaꞌa puaꞌamua ɨ maj chaanaca japua jeꞌemaꞌacan. Ajta aɨn unyaacaꞌi, Dioj pu yaꞌuviꞌitɨ u tajapua aꞌu tɨ eꞌeseijreꞌe ɨ ɨpuari tɨ japuan acajca ɨ Dioj.
\v 6 Aɨjna ɨ jɨitaꞌa, a pu huatauruu aujna pujmeꞌen aꞌu tɨ cai aꞌa aꞌatɨ, aꞌu tɨ ajta Dioj rɨꞌɨ yaꞌuruurijtze. Au pu eꞌeteeri aꞌachu cumu seiviꞌiraꞌa japuan tamuaamuataꞌate japuan hueicate xɨcaj. Ajta aɨn ɨ Dioj, aɨ pu rachaɨ́ aꞌame.
\p
\v 7 Matɨꞌɨj mi autyajhuii maj huatenyaꞌuseꞌen ɨ tajapua. Aɨjna ɨ Miguel, majta ɨ maj jamuan tiꞌivaɨraꞌacaa, aɨ mu ranyaꞌusiꞌityaꞌacaa maɨjna ɨ cuꞌucuꞌu, majta maɨjna ɨ maj ravaɨraꞌacaa ɨ cuꞌucuꞌu.
\v 8 Matɨꞌɨj mi huaꞌutyaamueꞌitɨ maɨjna ɨ cuꞌucuꞌu, majta aɨme ɨ maj ravaɨraꞌacaa. Capu cheꞌe huaꞌutaꞌa maj maun aꞌutyauuca u tajapua.
\p
\v 9 Matɨꞌɨj mi yeꞌicajrai maɨjna ɨ cuꞌucuꞌu tɨ vivéj, aɨjna ɨ cuꞌucuꞌu tɨ jajcua jɨmɨ seijraꞌacaa, aɨjna ɨ tej teyan ratamuaꞌamua tɨcɨn tiyaaruꞌu, tyajta ɨ tyej teyan ratamuaꞌamua tɨcɨn Satanás. Ai pu aɨn pueen aɨjna ɨ tɨ huaꞌacuanamua matɨj manaꞌa puaꞌamua yen seijreꞌe iiyan chaanaca japua. Aj mu mi ayeꞌicajrai iiyan chaanaca japua, jamuan ɨ maj ravaɨraꞌacaa.
\p
\v 10 Nyatɨꞌɨj ni raamuaꞌareeriꞌi tɨ aꞌatɨ aun tajapua aꞌutyaavaacaꞌa. Tɨꞌɨqui caꞌanin cɨn tyuꞌutaxajtacaꞌa ayan tɨcɨn:
\p ―Puꞌuri hui xaa ayan tyajaꞌureꞌenye tɨ aɨn ɨ TaDioj ari hueꞌirajtuaa aɨme ɨ maj raꞌastijreꞌe. Puꞌuri nain cɨn antyujmuaꞌaree tɨ iꞌi tihuaꞌutaijteꞌen naijmiꞌica tɨj naꞌa rusen cɨmeꞌe. Puꞌuri hui nain cɨn tiraijca aɨjna ɨ Cɨriistuꞌu tɨ ari raꞌantihuau, aꞌini puꞌuri yaꞌucajrai aɨjna tɨ tihuaꞌaxajtziꞌi ɨ taꞌihuaamuaꞌa. Nain xɨcaj tzajtaꞌa, ajta nain tɨcaꞌari tzajtaꞌa, aɨ pu hui ayan tihuaꞌaxajtziꞌi aɨjna jemi ɨ Dioj.
\p
\v 11 ’Majta maɨn ɨ taꞌihuaamuaꞌa, aɨ mu maɨjna cɨn raꞌantimueꞌitɨ maɨjna cɨmeꞌe tɨ aɨn Canyaꞌa raꞌiraaxɨre ɨ ruxuureꞌe tɨj muaɨꞌɨvejri ɨ Dioj jemi, majta mu raꞌantimueꞌitɨ maɨjna cɨmeꞌe mej meyan tihuaꞌutáꞌixaatyaꞌacaa aɨjna cɨmeꞌe ɨ nyuucari ɨ tɨ cɨmeꞌen raxa ɨ Cɨriistuꞌu. Camu aꞌatzu raataxaahuatacaꞌa maj raꞌastijreꞌe. Capu amɨn aꞌij tɨ puaꞌa aꞌatɨ ayan huaꞌanyeecha tɨ huaꞌucuiꞌini. Maucheꞌe mu raꞌaviicueꞌi.
\p
\v 12 ’Sataꞌaj seyan huaujtyamuaꞌaveꞌen mɨ saj seyun seijreꞌe tajapua, sajta muan, mɨ saj seyun tiꞌivaɨreꞌe. Sajta muan, mɨ saj seyun huachaatɨme saujna chaanaca japua, sajta muan, mɨ saj saun aꞌutyauuca ɨ jaj japua, cuiꞌi xaa, aꞌini muejmi jemi ari huataseijre aɨjna ɨ tiyaaruꞌu. Ajta iꞌinyuꞌucamɨꞌɨ huapɨꞌɨ aꞌini puꞌuri ramuaꞌaree tɨ cai cheꞌe aꞌateeri, aꞌini Dioj puꞌuri raꞌityánajsin. ―Yaa pu tyuꞌutaxajtacaꞌa aɨjna ɨ Dioj.
\p
\v 13 Ajta aɨn ɨ cuꞌucuꞌu, tɨꞌɨj raamuaꞌareeriꞌi tɨ aun eꞌejve ɨ chaanaca japua, aj puꞌi raatavén aɨjna ɨ jɨitaꞌa ɨ tɨ tiyauj aꞌaraa.
\v 14 Ajta Dioj pu ayan tiraataꞌa aɨjna ɨ jɨitaꞌa tɨ raavaɨreꞌen tɨꞌij caꞌanacan ticheni aꞌu tɨ aꞌij eenyaꞌa aɨjna jemi ɨ cuꞌucuꞌu. Ajta Dioj pu tiꞌijmiꞌicua aꞌame. Aj puꞌi aun aꞌaráꞌa aꞌu tɨ cai aꞌa aꞌatɨ, aꞌu tɨ ajta Dioj rɨꞌɨ tiyaꞌuruurijtze. Au pu eꞌeteeri aꞌachu cumu hueica ninyeꞌiraꞌa japuan eꞌitaꞌa.
\p
\v 15 Aj puꞌi aɨn cuꞌucuꞌu eihua jaj aijxɨ́re an ruteneꞌetzeꞌe tɨꞌij yaꞌujáujteꞌen, ajta raꞌujamɨsteꞌen aɨjna ɨ jɨitaꞌa.
\v 16 Ajta aɨn ɨ chuej, aɨ pu raatavaɨ aɨjna cɨmeꞌe tɨ aꞌutátziꞌite tɨꞌij atyarute ɨ jaj, ɨ tɨ raꞌijxɨ́re ɨ cuꞌucuꞌu an ruteneꞌetzeꞌe.
\v 17 Aj puꞌi aɨn cuꞌucuꞌu raatajaaxaijviꞌiriꞌi aɨjna ɨ jɨitaꞌa. Ajta áꞌuraa. Aj puꞌi autyejche tɨ huaꞌutenyaꞌusiꞌiteꞌen aɨme ɨ seica, ɨ maj yaujmuaꞌameꞌen pueen aɨjna ɨ jɨitaꞌa. Ai mu aɨn pueen ɨ mej meyan raꞌastijreꞌe aꞌij tɨ tihueꞌijteꞌe ɨ Dioj, ɨ maj majta tyaꞌanxájta maɨjna cɨmeꞌe ɨ Jesús. Ajta aɨn ɨ cuꞌucuꞌu, aɨ pu aun huateechaxɨ aꞌapueiri japua, aꞌu tɨ aꞌavastɨme ɨ jaj tɨ veꞌe.
\c 13
\s Cɨmeꞌen ɨ maj huaꞌapuaꞌa ɨ maj majta huapɨꞌɨ áꞌatyesiꞌireꞌe seijreꞌe
\p
\v 1 Nyatɨꞌɨj ni aꞌatɨ tɨ huapɨꞌɨ áꞌatyesiꞌireꞌe huaseij. Aɨ pu ɨ jaj tzajtaꞌa tɨ veꞌe aꞌitamaꞌacaa. Tamuaamuataꞌa puaꞌamuaca pu avaꞌahuajmee, ajta arahuaꞌapuaca huijmuꞌu. Curuun pu tyaꞌutyarujtiꞌihuacaꞌa ɨ ruꞌahuaj jetze seij ajta seij, ajta ayaa pu teꞌeyuꞌusiꞌi aɨjna jetze ɨ muuraꞌan aꞌij tɨ antyahuaa tɨ aꞌij puaꞌa namuajreꞌe ɨ Dioj jemi.
\v 2 Ayaa pu seijraꞌacaa aɨjna ɨ tiꞌitɨ ɨ nyaj raaseij. Ayaa pu eenyaꞌa seijraꞌacaa tɨj jɨripu. Ayaa pu eꞌenyeꞌen tiɨɨcajmee tɨj juutzeꞌe. Ayaa pu ajta een anténi tɨj muajye. Ajta aɨn ɨ cuꞌucuꞌu, aɨ pu nain raatatui aɨjna ɨ tiꞌitɨ ɨ rumuareꞌeriꞌiraꞌa, ajta tɨj naꞌa tɨ cɨn tieꞌijta, ajta ɨ tɨ cɨn eihua antyujmuaꞌaree.
\p
\v 3 Cu xuee tiꞌipueijtiꞌihuacaꞌa saɨj ɨ muuraꞌan tɨꞌij huamɨꞌɨni. Ajta, ajtahuaꞌa pu huaruj aɨjna ɨ tɨ tiꞌipueijtiꞌihuacaꞌa. Aɨj pu cɨn naijmiꞌi matɨj manaꞌa maj yan huachaatɨme iiyan chaanaca japua, eecan mu rɨꞌɨ tiraꞌutaseij, majta raꞌaraꞌastijre maɨjna ɨ tiꞌitɨ.
\v 4 Majta maɨn ɨ tyetyaca aɨ mu raatyanajchacaꞌa maɨjna ɨ cuꞌucuꞌu aꞌini puꞌuri aɨn cuꞌucuꞌu raatatui aɨjna ɨ tiꞌitɨ tɨ huapɨꞌɨ áꞌatyesiꞌireꞌe ɨ tɨ cɨn antyujmuaꞌaree. Majta maɨn tyaɨte raatyanajchacaꞌa maɨjna ɨ tiꞌitɨ. Ayaa mu tɨcɨn:
\p ―¿Aꞌataani ayan een tɨj amɨjna mɨ tiꞌitɨ? ¿Aꞌini auj tiꞌirɨꞌɨri tɨ aꞌatɨ raatyenyaꞌusiꞌiteꞌen tɨ ij raatyamueꞌitɨn? Capu xaa nyaꞌu aꞌatɨ. ―Ayaa mu tyuꞌutaxajtacaꞌa.
\p
\v 5 Caꞌanijraꞌa pu raataꞌa tɨꞌij aꞌujtzaahuatyaꞌa huapɨꞌɨ ɨ Dioj jemi. Ayaa pu tiraataꞌa tɨ ayan aꞌateeviꞌin tɨ aɨjna cɨn antyujmuaꞌaréera tɨ eihua huapɨꞌɨ aꞌij puaꞌa tiꞌixajta. Ayaa pu áꞌatyeere aꞌachu cumu huaꞌapuate maxcɨraꞌi japuan huaꞌapua.
\v 6 Aj puiꞌi autyejche tɨ aꞌij puaꞌa tiꞌixajta ɨ Dioj jemi aɨjna cɨmeꞌe tɨ rusaɨj ayan huaujruu tɨj ɨ Dioj. Eecan pu aꞌij puaꞌa tiraꞌixaa aɨjna ɨ Dioj, ajta aɨme ɨ maj aun eꞌeseijreꞌe ɨ Dioj jemi u tajapua. Aɨ mu tiꞌivaɨreꞌe matɨj chiꞌiraꞌan ɨ tɨ tzajtaꞌan seijreꞌe ɨ Dioj.
\p
\v 7 Ajta aɨn ɨ cuꞌucuꞌu aɨ pu caꞌanijraꞌa raataꞌa tɨꞌij huaꞌutenyaꞌusiꞌiteꞌen aɨme ɨ maj rɨꞌɨ tiꞌiteseijreꞌe ɨ Dioj jemi. Ajta ayan tiraataꞌa tɨꞌij huaꞌutyamueꞌitɨn. Ayaa pu ajta tiraataꞌa tɨ aɨjna cɨn antyujmuaꞌaréera tɨꞌij tihuaꞌutaijteꞌen matɨj manaꞌa puaꞌamua yen seijreꞌe iiyan chaanaca japua, aɨme tyaɨtejraꞌa, majta aɨme tyaɨtejraꞌa, majta aɨme ɨ maj seij chuejraꞌa japua eꞌemaꞌacan, tɨj naꞌa ɨ tɨ seijreꞌe ɨ huaꞌanyuuca.
\v 8 Matɨj manaꞌa puaꞌamua iiyan huachaatɨme ɨ chaanaca japua, aɨ mu ranaꞌamichaꞌa muaꞌajuꞌun, matɨj manaꞌa ɨ maj cai áꞌayuꞌusiꞌihuacaꞌa ɨ yuꞌuxari jetze ɨ tɨ raꞌa aɨjna ɨ Canyaꞌa ɨ tɨ huaméꞌere tɨꞌɨj cai xɨ huataseijraꞌa ɨ chaanaca. Aɨjna ɨ yuꞌuxari, ai pu aɨn pueen tɨ jetzen teꞌeyuꞌusiꞌi aꞌij tɨ antyahuaa saɨj ajta saɨj matɨj manaꞌa puaꞌamua ruuri huatyájturaa jemin ɨ Canyaꞌa tɨj naꞌa rusen cɨmeꞌe.
\p
\v 9 Tɨ puaꞌa aꞌatɨ huityajnamua, cheꞌe aɨn tyamuaꞌa naa tiraanamua.
\v 10 Tɨ puaꞌa pɨtiꞌihuaujxaꞌapɨꞌɨntareꞌen, mej seij huateviꞌiran maj raꞌityaanan, aɨ mu xaa raatéviꞌira. Tɨ puaꞌa aꞌatɨ tityaacuiꞌini chun cɨmeꞌe, ayaa pu tyuꞌujxeꞌeveꞌe tɨ ayan cheꞌeta aɨjna cɨn tyuꞌumɨꞌɨni. Ayaa pu Dioj ayan tihuaꞌutajée aɨme ɨ maj rɨꞌɨ tiꞌiteseijreꞌe ɨ jemin mej mi tyaꞌutaviicueꞌi, mej mi majta raꞌatzaahuateꞌe.
\p
\v 11 Nyatɨꞌɨj ni seij huaseij ɨ tiꞌitɨ tɨ aꞌitanyej a chuaataꞌa. Huaꞌapuaca pu avaꞌahuajmee tɨj canyaꞌa. Ayaa pu ajta tiꞌixaxaꞌa tɨj ɨ cuꞌucuꞌu.
\v 12 Aɨ pu raꞌaraꞌastijre aɨjna jetze maꞌacan ɨ tiꞌitɨ ɨ taꞌanajca tɨj naꞌa ɨ tɨ cɨn antyujmuaꞌaree. Ayaa pu caꞌanyejri cɨn tihueꞌijteꞌe matɨj manaꞌa mej iiyan seijreꞌe chaanaca japua mej mi ratyaanajche maɨjna ɨ taꞌanajca tɨ huaruj ɨ tɨ tiꞌipueijtiꞌihuacaꞌa aɨjna cɨmeꞌe ɨ tɨ huamɨꞌɨ.
\v 13 Ayaa pu tiꞌimɨjhuaca aɨjna ɨ tɨ ravaɨreꞌe mej mi tiꞌitɨj cɨn rɨꞌɨ tiraꞌutaseij. Ee xaa, nyaꞌu, ayaa pu raayɨꞌɨtɨ tɨ taij u eꞌicajraiini u uteꞌe, mejseiiraca ɨ tyaɨte.
\p
\v 14 Aɨ pu huaꞌacuanamua ɨ tyaɨte ɨ mej yan seijreꞌe iiyan chaanaca japua aɨjna cɨmeꞌe tɨ caꞌanijraꞌa rataꞌaca tɨ ayan huarɨni aɨjna jetze maꞌacan ɨ taꞌanajca. Aj puꞌi ayan tihuéijca mej mi ratyatáahuan tiꞌitɨ tevijraꞌa tɨ ayan seijreꞌe tɨj aɨjna ɨ tiꞌitɨ taꞌanajca, aɨjna ɨ tɨ tyuꞌupueijtiꞌihuacaꞌa aɨjna cɨmeꞌe ɨ chun, ajta aɨjna ɨ tiꞌitɨ tɨ huaruj.
\v 15 Ajta aɨn ɨ taꞌanajca, ayaa pu ajta tiraataꞌa aɨjna ɨ tɨ ravaɨreꞌe tɨꞌij xaijnyuꞌucari raatátɨsten aɨjna ɨ tiꞌitɨ tevijraꞌa tɨꞌij tyuꞌutaxaj. Ayaa pu ajta tiraataꞌa tɨ aɨjna cɨn antyujmuaꞌaréera tɨ ayan tihuaꞌutaijteꞌen maj raajeꞌica aꞌatɨ tɨ naꞌa ɨ tɨ cai áꞌujcaꞌanye tɨ raatyaanajche aɨjna ɨ tiꞌitɨ tɨ tevijraꞌa.
\p
\v 16 Aɨ pu ajta tihueꞌijteꞌe mej mi anaujyuꞌuxaxɨꞌɨn ɨ rumuajcaꞌa jetze naꞌari maj araujyuꞌuxaxɨꞌɨn ɨ rucuaatzi jetze naijmiꞌi ɨ tyaɨte. Capu tihuaꞌutauuniꞌira tɨ puaꞌa aꞌatɨ ayan cɨleꞌen cɨn tiꞌitejvee nusu vaꞌacan cɨn tiꞌitejvee, tɨ puaꞌa chijtyaani pueen nusu cai aꞌij tiꞌijviicueꞌi. Capu ajta tɨ puaꞌa meyan ruxaahua áꞌujhuaꞌanyeꞌen naꞌari maj caꞌanejri cɨn tiꞌimuareꞌe.
\v 17 Tɨ puaꞌa cai aꞌatɨ aꞌayuꞌusiꞌihua aꞌij tɨ antyahuaa aɨjna ɨ tiꞌitɨ naꞌari ɨ tɨ cɨn tiꞌitej, capu rɨꞌɨrista aꞌame tɨ aɨjna ɨ aꞌatɨ tiꞌitɨ huananan. Capu ajta rɨꞌɨrista aꞌame tɨ tiꞌitɨ huatuaani.
\p
\v 18 Aɨj pu cɨn, ayan tyuꞌujxeꞌeveꞌe tɨ aꞌatɨ rɨꞌɨ metyaúumuaꞌaraj. Cheꞌe aɨn yauꞌeitaa aꞌaraꞌani aꞌij tɨ huataujmuaꞌa aɨjna ɨ tɨ cɨn tiꞌitej aꞌij tɨ antyahuaa aɨjna ɨ tiꞌitɨ. Aɨjna ɨ tɨ cɨn tiꞌitej, au pu aꞌuveꞌeme aɨme tzajtaꞌa ɨ tyetyaca. Ayaa pu tiꞌitej aꞌachu arájsevi sieentu japuan hueicate japuan arájsevi.
\c 14
\s Cɨmeꞌen ɨ maj muiꞌitɨ maj jajcuacan cɨn tiꞌichuiica
\p
\v 1 Nyatɨꞌɨj ni atanyeeracaꞌa. ¡Maꞌacui xaa!, an pu huatyavaacaꞌa jɨri japua aɨjna ɨ Canyaꞌa ɨ tɨ ayan tyajaꞌarajtyahuaa tɨcɨn Sión. Aɨ mu majta jamuan manna huatyáuuca ɨ maj anxɨte japuan huaꞌapuate japuan muaacua viꞌiraꞌa araꞌase. Ayaa pu teꞌeyuꞌusiꞌihuacaꞌa aj huaꞌacuaatzeꞌe aꞌij tɨ antyahuaa aɨjna ɨ Canyaꞌa, ajta aꞌij tɨ antyahuaa aɨjna ɨ tɨ rajyaꞌupua.
\v 2 Nyatɨꞌɨj ni raanamuajriꞌi tɨ aꞌatɨ u tajapua tyajaꞌutaxajtacaꞌa. Ayaa pu namuajraꞌacaa tɨj jaj tɨ sihuajna caꞌanin. Ayaa pu ajta namuajraꞌacaa matɨj maj tyenyuucaꞌan huapɨꞌɨ. Ajta ɨ nyuucari ɨ tɨ cɨn tyuꞌutaxajtacaꞌa, ayaa pu namuajraꞌacaa matɨj aɨme ɨ mej tiꞌicuiina aɨjna jetze ɨ aarpa.
\p
\v 3 Majta meyan tiꞌichuiicacaꞌa seij cɨmeꞌe ɨ chuiicari ɨ tɨ jajcua aɨjna jemi ɨ Dioj, majta aɨme jemi ɨ maj muaacua ɨ maj ruuri, majta aɨme jemi ɨ vaujsi ɨ maj seite japuan muaacua araꞌase. Capu aꞌatɨ raayɨꞌɨtɨhuaꞌa tɨ tyuꞌutachuiica aɨjna cɨmeꞌe ɨ chuiicari silu aɨ muꞌu ɨ maj anxɨte japuan huaꞌapuate japuan muaacua viꞌiraꞌa araꞌase, ɨ tɨ aɨn Canyaꞌa tyuꞌunajchitacaꞌa ɨ maj cɨmeꞌen téꞌechaɨcaꞌa ɨ Dioj jemi. Matɨꞌɨj mi maun iyaꞌujhuaꞌanyaꞌa iiyan chaanaca japua.
\p
\v 4 Ai mu aɨn pueen ɨ maj cai tiꞌihuaujxanaꞌacɨre juucate jemi aꞌini aɨ mu urareꞌenyamaꞌaca cɨn áꞌujhuaꞌanyaꞌa. Ai mu aɨn pueen ɨ mej meyan áꞌujhuaꞌanyaꞌa aɨjna jamuan ɨ Canyaꞌa aꞌu tɨ naꞌa tɨ aꞌumej. Aɨ pu hueꞌirajtuaa huaꞌa tzajtaꞌa aɨme ɨ maj yan seijreꞌe iiyan chaanaca japua. Ajta aɨn ɨ Canyaꞌa, aɨ pu ayan cheꞌeta naꞌa huáꞌaviꞌitɨsteꞌesin ɨ Dioj jemi tɨj aꞌatɨ tyuꞌutatuireꞌesin ɨ Dioj jemi aɨjna ɨ icɨɨri tɨ anacai ajtanyéj. Jamuan ɨ Dioj, aɨ pu ajta huaꞌancureꞌeviꞌitɨ.
\v 5 Ajta aɨme, camu aꞌatzu tiꞌihueꞌitaca, silu tyamuaꞌa mu uraréꞌen seijreꞌe ɨ Dioj jemi.
\s Aꞌij mej tyuꞌutaxajtacaꞌa ɨ maj hueica ɨ maj tiꞌivaɨreꞌe u tajapua
\p
\v 6 Nyatɨꞌɨj ni seij huaseij tɨ tajapua tiꞌivaɨreꞌe. Uteꞌe pu ráꞌaraꞌacaa tɨꞌij tihuaꞌutaꞌixaateꞌen ɨ nyuucari ɨ maj cɨn huataujtyamuaꞌaveꞌen matɨj manaꞌa rusen cɨmeꞌe. Aɨ pu ráꞌaraꞌacaa tɨꞌij tihuaꞌutaꞌixaateꞌen matɨj manaꞌa puaꞌamua yan huachaatɨme i chaanaca japua, matɨj manaꞌa puaꞌamua ɨ mej seij chuejraꞌa japua eꞌemaꞌacan, matɨj manaꞌa puaꞌamua maɨn pueen ɨ tyaɨte, matɨj manaꞌa puaꞌamua ɨ maɨn pueen ɨ tyaɨtestyamuaꞌameꞌen, majta naijmiꞌi aɨme ɨ maj saɨque tiꞌixaxaꞌa.
\p
\v 7 Aj puꞌi caꞌanin cɨn ayan tyuꞌutaxajtacaꞌa tɨcɨn:
\p ―Sataꞌaj raꞌatesaꞌa ɨ Dioj, sataꞌaj sajta rɨꞌɨ tiraatyajtuaani aꞌini puꞌuri ayan tyajaꞌureꞌenye ajna tɨ jetzen Dioj huaꞌaxɨjteꞌen naijmiꞌica ɨ tyaɨte. Sataꞌaj ranaꞌamicheꞌen aɨjna tɨ raatyataahuacaꞌa ɨ tajapua, ajta ɨ chaanaca, ajta ɨ jaj tɨ veꞌe, ajta aꞌu tɨ naꞌa tɨ huajaixaviꞌijmee.
\p
\v 8 Aj puꞌi saɨj tɨ tiꞌivaɨreꞌe u tajapua ɨ tɨ huaꞌapua, aɨ pu cujtaꞌan tyuꞌuxájtajmaꞌa. Ayan tɨcɨn:
\p ―Puꞌuri aꞌave. Nain pu cɨn aꞌave aɨjna ɨ Babilonia aɨjna ɨ tɨ huaꞌutyatɨmueꞌiraste aɨjna cɨmeꞌe tɨ huaꞌa jamuan huataujxanaꞌacɨre matɨj manaꞌa puaꞌamua seij chuejraꞌa japua eꞌemaꞌacantacaa. Dioj pu ajta raatatɨmueꞌirasteꞌesin aɨjna cɨmeꞌe tɨ huapɨꞌɨ nyuꞌucamɨꞌɨ.
\p
\v 9-10 Aj puꞌi saɨj tɨ tajapua tiꞌivaɨreꞌe, aɨjna ɨ tɨ hueica, aɨ pu ajta cujtaꞌan tyuꞌuxájtajmaꞌa caꞌanin cɨmeꞌe tɨcɨn:
\p ―Tɨ puaꞌa hui aꞌatɨ ranaꞌamicheꞌen aɨjna ɨ tevi tɨ huapɨꞌɨ áꞌatyesiꞌireꞌe, ajta aɨjna ɨ tevi, ajta ayan tiraꞌutyacaꞌanyen maj raꞌusɨɨmuaꞌan ɨ cuaatzajraꞌan jetze nusu muajcaꞌaraꞌaraꞌan jetze aꞌij tɨ antyahuaa aɨjna ɨ tiꞌitɨ ɨ tɨ huapɨꞌɨ áꞌatyesiꞌireꞌe, Dioj pu ajta raatyatɨmueꞌirasteꞌesin aɨjna cɨmeꞌe tɨ huapɨꞌɨ nyuꞌucamɨꞌɨ. Ajta aɨn ɨ aꞌatɨ, tiꞌitɨ pu hui antiꞌisin tɨ ayan raaruuren tɨ aɨjna ɨ huaꞌaveꞌeri tɨ cai tiꞌitɨ ranaxca, ɨ maj cɨn huaꞌacuiꞌica. Aɨ pu ajta rajpueiitzi aꞌame ɨ taij cɨmeꞌe, ajta aɨjna cɨmeꞌe tɨ ayan tyaꞌaaca tɨj tyapuustiꞌi. Ayaa pu hui tirajpueiitzi aꞌame huaꞌa jemi ɨ maj tajapua tiꞌivaɨreꞌe, ajta aɨjna jemi ɨ Canyaꞌa.
\v 11 Ajta aɨn ɨ cɨtzij tɨ ajcɨtzu aɨjna cɨmeꞌe ɨ maj cɨn rajpueijtzi, ayaa pu hui aꞌateeri tɨj naꞌa rusen cɨmeꞌe tɨ ájcɨtzúuta aꞌame. Capu ajta huaꞌataꞌaca maj huaujsaꞌupeꞌen tujcaꞌari tzajtaꞌa nusu tɨcaꞌari tzajtaꞌa. Ayaa mu hui tirajpueiitzi muaꞌajuꞌun aɨme ɨ maj ranaꞌamiche maɨjna ɨ tiꞌitɨ, ajta ɨ tevi, matɨj manaꞌa mej meyan raꞌancuraꞌa ɨ maj cɨn huaꞌa jetze raꞌuyuꞌuxa aꞌij tɨ antyahuaa aɨjna ɨ tiꞌitɨ.
\p
\v 12 ’Aɨj pu cɨn Dioj ayan tihuaꞌajee aɨme ɨ maj rɨꞌɨ tiꞌiteseijreꞌe ɨ jemin mej mi tyaꞌutaviicueꞌi, aɨme ɨ maj raꞌastijreꞌe aꞌij tɨ tyuꞌutaijtacaꞌa ɨ Dioj, aɨme ɨ maj majta raꞌatzaahuateꞌe maɨjna ɨ Jesús.
\p
\v 13 Nyatɨꞌɨj ni raanamuajriꞌi tɨ aꞌatɨ uteꞌe tejeꞌicáxajtacaꞌa. Ayaa pu tinaataꞌixaa tɨcɨn:
\p ―Pataꞌaj peyan tiraꞌutéeyuꞌuxa yee: “Tɨj naꞌa tɨ yu aucaꞌatɨ aꞌame, micheꞌe rɨꞌɨ tityaujmuajtyaꞌa aɨme ɨ maj raꞌatzaahuateꞌe ɨ tavastaraꞌa.” Ajta aɨn ɨ xaijnyuꞌucaraꞌaraꞌan ɨ Dioj, ayan tɨcɨn: “Ee xaa nyaꞌu, rɨꞌɨ pu Dioj tihuaꞌutaꞌa aꞌini puꞌuri rɨꞌɨri maj huaujsaꞌupeꞌen, mej mi cai cheꞌe tiꞌitɨ cɨn áꞌaviicueꞌiraꞌa, aꞌini puꞌuri tihuaꞌucɨꞌɨ ɨ maj raamueꞌitɨ maɨjna cɨmeꞌe mej tyuꞌumuarej.”
\s Ɨ tɨ chuej japua tyuꞌucɨɨre
\p
\v 14 Nyatɨꞌɨj ni nyajtahuaꞌa atanyeeracaꞌa. Maꞌacui xaa, aɨj nu huaseij ɨ jaitɨri tɨ cueiina. Saɨj pu ajta aɨn japuan ujcatii tɨ ayan seijraꞌacaa tɨj tyaataꞌa. Aɨ pu curuun utyárujtyaꞌacaa tɨ ooro cɨn taavijhuacaꞌa, ajta ruꞌityechuaacaꞌa ruꞌɨrɨɨtaꞌa pujmeꞌen ɨ chun tɨ aicaujtuta tɨ ajta tyamuaꞌa naa tyaꞌantamɨɨmɨ.
\v 15 Aj puꞌi saɨj tɨ tajapua tiꞌivaɨreꞌe aun aꞌirájraa u teyujtaꞌa. Aɨ pu caꞌanin cɨn ayan tiraatajée aɨjna tɨ jaitɨri japua anuꞌujcatii tɨcɨn:
\p ―Pataꞌaj hui mɨ chun cɨn raareꞌeveijche ɨ tɨ ari tiꞌicɨɨri, pataꞌaj tyuꞌuráꞌatzaana, aꞌini puꞌuri ajna tyajaꞌureꞌenye ɨ paj jetzen tyuꞌuráꞌatzaana. Puꞌuri hui eihua tiꞌicɨɨri, ajta ari huaráꞌacaꞌanacaꞌa ɨ chaanaca japua.
\p
\v 16 Ajta aɨn ɨ tɨ jaitɨri japua anuꞌujcatii, aɨ pu caꞌanin cɨn tyuꞌureꞌeveijchacaꞌa ɨ chaanaca japua, ajta tyuꞌuraꞌatzaj tɨj naꞌa tɨ tyuꞌucɨɨracaꞌa.
\p
\v 17 Aj puꞌi saɨj tɨ tajapua tiꞌivaɨreꞌe ajta aun eꞌirajraa u teyujtaꞌa. Aɨ pu ajta ruꞌitechuaacaꞌa seij ɨ chun tɨ aicaujtuta, tɨ ajta tyamuaꞌa naa tyaꞌantamɨɨmɨ.
\v 18 Aj puꞌi saɨj tɨ tajapua tiꞌivaɨreꞌe aun eꞌirajraa aꞌu tɨ aꞌutejvee aɨjna ɨ maj japuan tiꞌimuaɨꞌɨvajtaca. Ai pu aɨn pueen ɨ tɨ aɨjna cɨn antyujmuaꞌaree ɨ taij cɨmeꞌe. Aj puꞌi ayan tiraatajée aɨjna ɨ tɨ ruꞌitechuaacaꞌa ɨ chun tɨ aicaujtuta, tɨ ajta antamɨɨmɨ. Ayan tɨcɨn:
\p ―Pataꞌaj hui raareꞌeveijche, pajta rajsaɨreꞌen ɨ tacaꞌiraꞌan ɨ piꞌista tɨ aun aꞌuvaatɨmee ɨ chaanaca japua aꞌini puꞌuri cuasi aɨjna ɨ uuva.
\p
\v 19 Cɨmeꞌen puꞌu ayan tiraataꞌixaa, aj puꞌi aɨn ayan raareꞌeveijchacaꞌa ɨ chaanaca japua, ajta rajsaɨj aɨjna ɨ tɨ tyuꞌucɨɨracaꞌa ɨ chaanaca japua. Aj puꞌi aun yaꞌucaahuaꞌaxɨ aɨjna tzajtaꞌa ɨ maj cɨn rajaachi ɨ uuva aꞌu tɨ Dioj yaꞌujáche aɨjna cɨmeꞌe tɨ huapɨꞌɨ nyuꞌucamɨꞌɨ.
\v 20 Aa mu yaꞌujáche a puaꞌaque ɨ chajtaꞌana. Xuureꞌe pu airamɨꞌɨyacaꞌa aɨjna ɨ maj raꞌajache. Tyamuaꞌa pu tyaꞌutɨꞌɨ aꞌaraa. Ayaa pu tyaꞌutɨꞌɨ aꞌutɨ jɨmɨ aꞌataꞌase ɨ xaachimaꞌaraꞌan jetze ɨ cahuaayuꞌu. Ajta, ayaa pu aꞌuyauucan japua huamɨꞌɨyajraa aꞌachu cumu hueica cieentu kilómetros.
\c 15
\s Aɨme ɨ maj tajapua tiꞌivaɨreꞌe, ajta ɨ pueijtzi tɨ aráhuaꞌapua
\p
\v 1 Nyatɨꞌɨj ni nyajtahuaꞌa seij huaseij ɨ tɨ tajapua eihua ruxeꞌeveꞌe. Eecan nu rɨꞌɨ tiraꞌutaseij. Ai mu aɨn pueen ɨ maj tiꞌivaɨreꞌe u tajapua, ɨ maj arahuaꞌapua araꞌase. Aɨj mu cɨn antyujmuaꞌaree maɨjna cɨmeꞌe ɨ pueijtzi ɨ tɨ ayan araꞌase aꞌachu cumu arahuaꞌapua. Ai pu aɨn pueen ɨ tɨ nain cɨn teꞌentipuaꞌari ɨ tɨ cɨmeꞌen Dioj ayan pueijtzi huaꞌutaꞌasin aɨjna cɨmeꞌe tɨ huapɨꞌɨ nyuꞌucamɨꞌɨ.
\p
\v 2 Nyatɨꞌɨj ni tiꞌitɨ huaseij. Naa pu tiꞌimestí. Aa pu aumuaanijmee, cu xuee viidriu naꞌa, taij tɨ tzajtaꞌan seijreꞌe. Majta aɨme ɨ maj raatyaamueꞌitɨ maɨjna ɨ tevi tɨ huapɨꞌɨ tyesiꞌireꞌe, majta ɨ tevi tɨ ravaɨreꞌe, majta ɨ tɨ cɨn tiꞌitáa aꞌayeꞌi ɨ tɨ cɨn ayan antyahuaa. Au mu huatyáuucaꞌa aꞌutɨ avastɨmee aɨjna ɨ viidriu tɨ aumuaanijmee. Aɨ mu teꞌityaɨꞌɨcaꞌa rumuajcaꞌa jetze maɨjna ɨ aarpa tɨ Dioj huaꞌutapueijve mej mi maɨjna cɨn tyuꞌutacuiina ɨ jemin.
\v 3 Majta meyan maɨjna cɨn tiꞌichuiicacaꞌa maɨjna cɨmeꞌe aꞌij tɨ huarɨj aɨjna ɨ Moisés tɨ tiꞌivaɨraꞌacaa ɨ Dioj jemi, majta maɨjna cɨmeꞌe aꞌij tɨ huarɨj ɨ Canyaꞌa. Meyan tɨcɨn:
\q Eecan paj huapɨꞌɨ rɨꞌɨ naa huarɨj patɨꞌɨj tuꞌirajtuaa muaa, tavastaraꞌa, mɨ pej Dioj pueen,
\q paj pajta nain cɨn antiꞌamuaꞌaree.
\q Aɨj tu cɨn rɨꞌɨ tyaꞌutaseij.
\q Tɨj naꞌa aꞌij paj rɨcɨ, xaꞌapɨꞌɨn paj rɨcɨ,
\q2 pajta tzaahuatiꞌiraꞌa cɨn raaxaꞌapɨꞌɨntareꞌe,
\q mɨ pej peyan tieꞌijta tɨj naꞌa tɨ yu aucaꞌitɨ aꞌame
\q2 tɨj naꞌa rusen cɨmeꞌe.
\q
\v 4 Naimiꞌi mu meyan rɨꞌɨ timuaatyajtuaani,
\q2 majta rɨꞌɨ timuaataꞌasin, mueetzi,
\q2 mɨ paj tavastaraꞌa pueen,
\q aꞌini muaa paj asaɨj urareꞌenyaꞌacan cɨn seijreꞌe
\q2 ɨ Dioj jemi.
\q Naijmiꞌi ɨ maj seij chuejraꞌa japua eꞌemaꞌacan,
\q2 aɨ mu aꞌuvaꞌajuꞌu muaꞌajuꞌun
\q2 mej mi muaatyaanajche,
\q aꞌini papuꞌuri tihuaꞌutaseijrate pej peyan xaꞌapɨꞌɨn huarɨj aꞌij tɨ tiraavijteꞌe.
\p
\v 5 Nyatɨꞌɨj ni atanyeeracaꞌa tɨ puaꞌa ari tyaꞌantacuuniꞌi u teyujtaꞌa aꞌu tɨ eꞌiracatii aɨjna ɨ tɨ tyáꞌanxajta aɨjna cɨmeꞌe ɨ Dioj.
\p
\v 6 Matɨꞌɨj mi maun aꞌiraacɨ u teyujtaꞌa aɨme ɨ maj tajapua tiꞌivaɨreꞌe ɨ maj arahuaꞌapua araꞌase. Muꞌuri raatɨsimaꞌa ɨ pueijtzi ɨ tɨ ajta arahuaꞌapua araꞌase. Cɨɨxuri mu majta tiꞌitéecha tɨ maꞌa tíꞌityatáatɨyeꞌi tyamuaꞌa naa. Majta mu avaꞌajɨꞌɨquiꞌihuajmaꞌacaa an rutaviitzeꞌe puaasi cɨmeꞌe tɨ ooro cɨn taavijhua.
\p
\v 7 Ajta saɨj ɨ maj muaacua ɨ maj ruuri, aɨ pu huaꞌuraꞌɨpɨꞌɨte aɨme ɨ maj arahuaꞌapua araꞌase aɨjna ɨ tuxaꞌa ɨ tɨ avaꞌɨstijmee ɨ tɨ cɨn huapɨꞌɨ nyuꞌucamɨꞌɨ ɨ Dioj ɨ tɨ iꞌiruuri rusen cɨmeꞌe. Saɨj ajta saɨj pu huaꞌuraꞌɨpɨꞌɨte aɨjna ɨ tuxaꞌa.
\v 8 Aj puꞌi tyamuaꞌa tyájcɨtzujtaracaꞌa u teyujtaꞌa aɨjna cɨmeꞌe ɨ muáreꞌeriꞌiraꞌaraꞌan ɨ Dioj. Ajta, eihua pu huapɨꞌɨ huatátzarajraa. Aj puꞌi tyamuaꞌa tyaꞌuhuajɨstyacaꞌa u teyujtaꞌa aɨjna ɨ cɨtzij. Capu cheꞌe huatarɨꞌɨristaracaꞌa tɨ saɨj aun aꞌutyarute u teyujtaꞌa asta manaꞌa cai raꞌantipuaꞌariteꞌe ɨ maj arahuaꞌapua araꞌase maj pueijtzi huaꞌutaꞌan ɨ tɨ ajta arahuaꞌapua araꞌase.
\c 16
\s Ɨ cutzapeꞌe tɨ aɨjna cɨn avaꞌajɨste aɨjna cɨmeꞌe tɨ Dioj huapɨꞌɨ nyuꞌucamɨꞌɨ
\p
\v 1 Nyatɨꞌɨj ni seij huaseij ɨ aꞌatɨ tɨ aun aꞌutyavaacaꞌa u teyujtaꞌa. Tɨꞌɨqui caꞌanin cɨn tyuꞌutaxajtacaꞌa tɨcɨn:
\p ―Sericu, sataꞌaj hui a yaꞌucáxɨreꞌen ɨ chaanaca japua tɨj naꞌa ɨ tɨ avaꞌɨsti ɨ cutzapeꞌe jetze ɨ tɨ arahuaꞌapua araꞌase mej mi raamuaꞌaree tɨ huapɨꞌɨ nyuꞌucamɨꞌɨ ɨ Dioj.
\p
\v 2 Cɨmeꞌen puꞌu ayan tyuꞌutaxajtacaꞌa aɨjna, aj puꞌi saɨj u aꞌuveꞌeme. Tɨꞌɨqui ayaꞌucajrai ɨ chaanaca japua ɨ cutzapeꞌe jetze tɨ aramuaacaꞌa. Aj puꞌi huaꞌa japua rajve aɨjna ɨ tɨ cɨn iꞌicáꞌatzata ɨ tɨ aꞌij puaꞌa tyaꞌaaca, ajta ɨ tɨ aꞌij puaꞌa seijraꞌacaa. Ayaa pu tihuaꞌuruu aɨme tɨ huaꞌa jetze teꞌeyuꞌusiꞌihuacaꞌa aꞌij tɨ antyahuaa aɨjna ɨ tiꞌitɨ, majta aɨme ɨ maj raatyanajchacaꞌa.
\p
\v 3 Ajta, ɨ tɨ huaꞌapua, aɨ pu ajta ayaꞌucajrai ɨ cutzapeꞌe ɨ tɨ aramuaacaꞌa japuan ɨ jaj tɨ veꞌe. Cɨmeꞌen puꞌu ayan huarɨj, aj puꞌi saɨque huaujruu ɨ jaj tɨj xuureꞌe tɨ airamɨꞌɨyacaꞌa tevi jetze tɨ huamɨꞌɨ. Ajta, naijmiꞌi ɨ maj jaj tzajtaꞌa chajcaꞌa, aɨ mu huacuii.
\p
\v 4 Ajta ɨ tɨ hueica, aɨ pu ayaꞌucajrai aɨjna ɨ saɨj ɨ tɨ cutzapeꞌe jetze aramuaacaꞌa ɨ atyaꞌana tzajtaꞌa, ajta japuan aꞌu tɨ aꞌajaijxajmee. Cɨmeꞌen puꞌu ayan huarɨj, tɨj naꞌa tɨ tiꞌiseijreꞌe saɨque pu huaujruu tɨj xuureꞌe.
\v 5 Nyatɨꞌɨj ni raanamuajriꞌi ɨ tɨ aɨjna cɨn antyujmuaꞌaree ɨ jaj, aɨ pu ayan tyuꞌutaxajtacaꞌa tɨcɨn:
\p ―Xaꞌapɨꞌɨn paj hui huarɨj paɨjna cɨmeꞌe paj huaꞌuxɨjte, muaa, mɨ paj jajcua jɨmɨ seijraꞌacaa, pajta ijii paj pauj seijreꞌe.
\v 6 Naa pu hui xaꞌapɨꞌɨn aꞌini aɨme ɨ tetyaca muꞌuri huaꞌucuii aɨme ɨ maj mueetzi jemi rɨꞌɨ tiꞌiteseijreꞌe, majta aɨme ɨ maj mueetzi jetze maꞌacan tiꞌixaxaꞌataꞌa. Aɨj paj cɨn peri huaꞌutaꞌa maj majta xuureꞌe huayeꞌen. Ayaa mu hui eenyeꞌequeꞌe raꞌantimueꞌitɨ.
\p
\v 7 Nyatɨꞌɨj ni raanamuajriꞌi tɨ aꞌatɨ tɨ aun aꞌutyavaacaꞌa jetzen aꞌu maj tyajaꞌamuaɨꞌɨvajtaca. Ayaa pu tyuꞌutaxajtacaꞌa tɨcɨn:
\p ―Ee xaa nyaꞌu, tavastaraꞌa, mɨ pej Dioj pueen, mɨ paj hui pajta nain cɨn antiꞌamuaꞌaree. Tzaahuatiꞌiraꞌa paj cɨn huaꞌaxɨjteꞌe. Naa pu tiraavijteꞌe aꞌij pej tihuaꞌutaꞌa.
\p
\v 8 Ajta ɨ tɨ muaacua, aɨ pu ayaꞌucajrai ɨ cutzapeꞌe aɨjna japua ɨ xɨcaj. Ajta ayan tiraataꞌa aɨjna ɨ xɨcaj tɨ huáꞌutaꞌixɨꞌɨri.
\p
\v 9 Majta aɨme ɨ tetyaca, huáꞌataixɨꞌɨ aɨjna cɨmeꞌe tɨ huapɨꞌɨ tyajxɨcacaa. Majta aꞌij puaꞌa tiraatajée ɨ Dioj ɨ tɨ aɨjna cɨn antyujmuaꞌaree tɨ pueijtzi huaꞌataꞌaca. Camu raatyaxaahuatacaꞌa aɨjna tɨ aꞌij puaꞌa een aꞌij maj rɨcɨ, camu majta rɨꞌɨ tiraataꞌa ɨ Dioj.
\p
\v 10 Ajta ɨ tyaꞌanxɨvi, aɨ pu ajta ayaꞌucajrai aɨjna ɨ cutzapeꞌe aɨjna japua aꞌu tɨ aꞌacajca aɨjna ɨ tiꞌitɨ tɨ aꞌij puaꞌa een. Cɨmeꞌen puꞌu ayan huarɨj, huapɨꞌɨ pu huatyatɨcaꞌaracaꞌa aꞌu tɨ tejeꞌijta. Majta aɨme ɨ tetyaca, aɨ mu avaꞌujcheꞌeveꞌe ɨ runyanu jetze maɨjna cɨmeꞌe mej eihua huapɨꞌɨ rajpueijtzicaꞌa.
\v 11 Majta eihua mu aꞌij puaꞌa tiraatajée maɨjna ɨ Dioj ɨ tɨ tajapua eꞌeseijreꞌe maɨjna cɨmeꞌe mej eihua huapɨꞌɨ rajpueijtzicaꞌa. Camu majta aꞌatzu raatyaxaahuatacaꞌa aꞌij maj rɨjcaa tɨ aꞌij puaꞌa een.
\p
\v 12 Ajta ɨ tɨ arájsevi, aɨ pu ajta ayaꞌucajrai ɨ cutzapeꞌe aɨjna japua ɨ jatyaꞌana ɨ tɨ veꞌe tɨ ayan tyajaꞌarajtyahuaa tɨcɨn Eufrates. Cɨmeꞌen puꞌu ayan huarɨj, aj puꞌi nainjapua atyaaxɨꞌɨ ɨ jatyaꞌana. Ayaa pu een cɨn atyaaxɨꞌɨ mej mi antacɨɨnye aɨme ɨ mej tieꞌijta aꞌu tɨ eꞌijninyei ɨ xɨcaj.
\p
\v 13 Nyatɨꞌɨj ni huaꞌuseij ɨ maj hueica ɨ maj aꞌijnyájxɨ huaꞌateneꞌetzeꞌe aɨjna ɨ cuꞌucuꞌu, ajta aɨjna ɨ tiꞌitɨ tɨ aꞌij puaꞌa een, ajta aɨjna tɨ huaꞌa jetze maꞌacan tiꞌixaxaꞌa hueꞌitzi cɨmeꞌe. Ayaa mu seijraꞌacaa matɨj tyaacujse. Ai mu aɨn pueen ɨ xaijnyuꞌucari ɨ maj aꞌij puaꞌa een.
\v 14 Ai mu majta aɨn pueen ɨ xaijnyuꞌucari ɨ maj tiyaaruꞌu jetze ajtyemaꞌacan. Au mu áꞌujhuaꞌan nainjapua ɨ chaanaca japua mej mi huaꞌajsaɨreꞌen aɨme ɨ mej tieꞌijta iiyan chaanaca japua mej mi huatenyaꞌuseꞌen ajna xɨcajraꞌan tɨ huapɨꞌɨ ruxeꞌeveꞌe tɨꞌɨj aɨn huataseijreꞌen ɨ Dioj tɨ nain cɨn antyujmuaꞌaree.
\p
\v 15 Ayaa pu tɨcɨn: “Maꞌacui xaa, yaa nu hui uveꞌenyejsin tɨj nahuaꞌari tɨ aviitzi cɨn utyaruꞌipi ɨ huaꞌa chiꞌita. Rɨꞌɨ pu tiraataꞌa aɨjna tɨ aꞌatanyee, ajta cɨn tiꞌityeechan tɨꞌij cai muaꞌaviꞌi áꞌuchaꞌacanyeꞌen, mejseij ɨ tyaɨte ɨ tɨ cɨn tiꞌityeviꞌiraꞌa.” Yaa pu tyuꞌutaxajtacaꞌa.
\p
\v 16 Majta aɨme ɨ maj hueica, au mu huaꞌajsaɨj aujna aꞌahuaꞌa tɨ ayan tyajaꞌarajtyahuaa huaꞌanyuuca cɨmeꞌe ɨ hebreos tɨcɨn Armagedón.
\p
\v 17 Ajta ɨ tɨ arahuaꞌapua, aɨ pu ayaꞌucajrai ɨ cutzapeꞌe. Cɨmeꞌen puꞌu ayan huarɨj, aj puꞌi saɨj caꞌanin cɨn tyuꞌutaxajtacaꞌa tɨ aun aꞌutyavaacaꞌa teyujtaꞌa. Aujna, aꞌu tɨ aꞌutejvee ɨ maj japuan tiꞌimuaɨꞌɨvajtaca, ayaa pu tyuꞌutaxajtacaꞌa aɨjna tɨcɨn:
\p ―Puꞌuri icu, antipuaꞌaracaꞌa.
\p
\v 18 Matɨꞌɨj mi huatyamaxcavaꞌaxɨ, majta tenyuucaꞌa. Eihua pu ajta tíꞌicaꞌarajnacaꞌa. Ajta eecan huapɨꞌɨ huataujcaꞌatzɨjxɨ ɨ chaanaca. Tɨj naꞌa tɨ yu eꞌireꞌenye maj yan huataseijre ɨ tyetyaca iiyan chaanaca japua, capu aꞌanaj ayan huataujcaꞌatzɨjxɨ. Eecan pu huapɨꞌɨ xaa huataujcaꞌatzɨjxɨ.
\p
\v 19 Ajta aɨjna ɨ chajtaꞌana ɨ tɨ veꞌe, hueica pu autatziꞌityacaꞌa. Ajta áꞌavatzɨjxɨ ɨ huaꞌachajtaꞌana ɨ mej seij chuejraꞌa japua eꞌemaꞌacan. Aɨ pu Dioj, ajta raꞌutamuaꞌareeriꞌi aujna u Babilonia tɨꞌij pueijtzi raataꞌan tɨꞌij tiraacɨꞌɨti ɨ tɨ cɨn huapɨꞌɨ nyuꞌucamɨꞌɨ ɨ Dioj.
\v 20 Ajta tɨj naꞌa aꞌu tɨ aꞌaraahuachi ɨ jaj tzajtaꞌa, aɨ pu ahuáujpuaꞌarixɨ. Capu ajta cheꞌe seijraꞌacaa aꞌu tɨ áꞌujɨrime.
\v 21 Majta mu teetej caavatzɨ, tyamuaꞌa mevivejmáꞌa. Tyamuaꞌa pu tijetyéjmaꞌacaa aꞌachu cumu hueicate kiilu. Aɨme pu japua rajve ɨ tetyaca. Majta aɨme ɨ tetyaca, aꞌij mu puaꞌa tiraatajée maɨjna ɨ Dioj maɨjna cɨmeꞌe ɨ teetej aꞌini eihua mu rajpueijtzicaꞌa mej meyan caavatzɨ ɨ teetej.
\c 17
\s Dioj pu ráꞌujxɨjte aɨjna ɨ jɨitaꞌa tɨ huaujtuiriꞌi
\p
\v 1 Aj puꞌi saɨj tɨ tajapua tiꞌivaɨreꞌe, tɨ ajta seij huityatɨɨcaꞌa ɨ cutzapeꞌe tɨ arahuaꞌapua araꞌase, aɨ pu mu aꞌuveꞌeme, ajta ayan tinaataꞌixaa tɨcɨn:
\p ―Iyaꞌa i, nyaa nu muaataseijrateꞌesin aɨjna tɨ cɨn Dioj raꞌuxɨ́jteꞌen aɨjna ɨ jɨitaꞌa tɨ vaꞌacan cɨn tiꞌityavaacaꞌa, tɨ ajta raamueꞌitɨcaꞌa ɨ tumin ɨ ruhueꞌiraꞌa cɨmeꞌe. Ai pu aɨn pueen ɨ tɨ aun áꞌujca ɨ jaj japua tɨ veꞌe.
\v 2 Majta aɨme ɨ mej tieꞌijta iiyan chaanaca japua, aɨ mu huataujxanaꞌacɨre maɨjna jamuan ɨ jɨitaꞌa. Majta aɨme ɨ maj iiyan huachaatɨme chaanaca japua, aɨ mu majta huatyaataꞌaru maɨjna cɨmeꞌe tɨ aɨn jɨitaꞌa ayan huaꞌutaꞌa maj majta jamuan tyuꞌuxanaꞌacɨreꞌen.
\p
\v 3 Aj puꞌi aɨn xaijnyuꞌucaraꞌaraꞌan ɨ Dioj, aɨ pu nyajaꞌuvíꞌitɨ ajna aꞌu tɨ cai eꞌe tiꞌitɨ. Au nu jɨitaꞌa huaseij tɨ aɨjna japua aꞌujcatii ɨ tiꞌitɨ tɨ paꞌu. Ajta aɨn ɨ tiꞌitɨ, eihua pu jetzen eꞌeyuꞌusiꞌihuacaꞌa ɨ tɨ cɨn ayan antyahuaacaꞌa, tɨ ajta cɨn aꞌij puaꞌa tiꞌijxa ɨ Dioj. Arahuaꞌapuaca pu huijmuꞌu aɨjna ɨ tiꞌitɨ, ajta tamuaamuataꞌa puaꞌamuaca avaꞌahuajmee.
\v 4 Tiꞌinacamua ɨ tɨ tiꞌityeechan, ajta cɨj caj tiꞌipaꞌuviꞌi. Eihua pu huapɨꞌɨ ucarujtiꞌihuacaꞌa aɨjna ɨ tɨ ooro cɨn taavijhua, ajta tetej tɨ huapɨꞌɨ tiꞌijnajchi, ajta peerla tiꞌitɨ. Aɨ pu ajta ruꞌityatɨɨcaꞌa ɨ cutzapeꞌe ɨ tɨ ooro cɨn taavijhua. Ajta aɨjna jetze ɨ cutzapeꞌe, tiꞌitɨ pu avaꞌɨsti ɨ tɨ tyúꞌuxanaꞌaviꞌisteꞌe, ajta ɨ tɨ cɨn huataujxanaꞌacɨre aɨjna ɨ jɨitaꞌa.
\v 5 Ajta ayan teꞌeyuꞌusiꞌihuacaꞌa ɨ cuaatzajraꞌan jetze aꞌij tɨ antyahuaa.
\p Nyajta inyaa, canu yauꞌeitaa naꞌaraa nyaɨjna ɨ nyuucari tɨ jetzen teꞌeyuꞌusiꞌihuacaꞌa tɨ cɨmeꞌen yee: “Babilonia, ɨ tɨ vaꞌacan cɨn tiꞌitejvee. Huaꞌanaꞌana aɨme ɨ juuca ɨ maj ramueꞌitɨcɨ ɨ tumin ɨ ruhueꞌiraꞌa cɨmeꞌe. Ai pu aɨn pueen tɨ jetzen aun aꞌuveꞌeme ɨ tɨ tyúꞌuxanaꞌavisteꞌe iiyan chaanaca japua.”
\v 6 Nyatɨꞌɨj ni raaseij tɨ aɨn jɨitaꞌa tahuáacaꞌa aɨjna cɨmeꞌe ɨ huaꞌaxuureꞌe aɨme ɨ maj rɨꞌɨ tiꞌiteseijreꞌe ɨ Dioj jemi, majta aɨme ɨ maj huácuiihuacaꞌa maɨjna cɨmeꞌe maj raꞌastijreꞌe maɨjna ɨ Jesús. Eecan nu aꞌij tyaꞌutaseij nyatɨꞌɨj raaseij.
\p
\v 7 Ajta aɨn ɨ tɨ tajapua tiꞌivaɨreꞌe, ayaa pu tinaataꞌixaa tɨcɨn:
\p ―¿Aꞌini een cɨn peyan tyaꞌutaseij? Nyaa nu muaataꞌixaateꞌesin aꞌij tɨ huataujmuaꞌa aɨjna tɨ cai amiteereꞌe aɨjna cɨmeꞌe ɨ jɨitaꞌa, ajta aɨjna ɨ tiꞌitɨ tɨ japuan avaꞌaca, ɨ tɨ ajta arahuaꞌapuaca huijmuꞌu, ajta tɨ tamuaamuataꞌa avaꞌahuajmee.
\v 8 Aɨjna ɨ tiꞌitɨ paj hui raaseij, aɨ pu ajmiꞌi huataseijre, ajta ijii, capu cheꞌe yaꞌa aꞌahuaꞌa. Ajta, aucheꞌe pu aꞌitaméj aujna aꞌutɨ eꞌetyacun tɨ cai aꞌij amiteereꞌe aꞌachu tɨ ucatee. Majcaꞌi huayee pu ajta áꞌapuaꞌaren aɨjna ɨ tiꞌitɨ. Majta aɨme ɨ mej yan huachaatɨme iiyan chaanaca japua, ɨ maj cai áꞌayuꞌusiꞌihuacaꞌa aɨjna jetze ɨ yuꞌuxari aꞌij maj antyaꞌaruu, aɨjna ɨ yuꞌuxari tɨ jajcua jɨmɨ jetzen teꞌeyuꞌusiꞌihuacaꞌa matɨj manaꞌa puaꞌamua ruuri huatyájturaa ɨ Dioj jemi, ayaa mu rɨꞌɨ tiyaꞌuseiira muaꞌajuꞌun matɨꞌɨj raaseij maɨjna ɨ tiꞌitɨ aꞌini aɨ pu ajmiꞌi huataseijre, ajta ajnaꞌɨmɨ iꞌiruuricaꞌa, ajta cai cheꞌe me iyaꞌahuaꞌa. Ajta, aucheꞌe pu huataseijreꞌesin.
\p
\v 9 ’Aijna ɨ nyuucari, tɨ hui aꞌatɨ yauꞌeitaa aꞌaraꞌani, ruxeꞌeveꞌe tɨ aɨjna jetze tyuꞌumuaꞌati tyamuaꞌa naa. Aɨjna ɨ tɨ arahuaꞌapuaca huijmuꞌu, ayaa pu hui huataujmuaꞌa tɨcɨn: Aɨjna ɨ jɨri tɨ arahuaꞌapua araꞌase tɨ japuan áꞌujca aɨjna ɨ jɨitaꞌa.
\v 10 Aɨ mu majta aɨn pueen ɨ maj tieꞌijta, ɨ maj majta arahuaꞌapua araꞌase. Muaꞌanxɨvi ɨ mej meri áꞌupuaꞌaracaꞌa. Saɨj puꞌu auj tiꞌitɨ cɨn tiꞌitejvee. Ajta ɨ saɨj, capu xɨ seijreꞌe. Ɨ tɨ ayan huataseijreꞌesin, ayaa pu hui tyuꞌujxeꞌeveꞌe tɨ cɨj naꞌa caj tyeꞌeteeviꞌin.
\v 11 Ajta aɨn ɨ tiꞌitɨ tɨ ajmiꞌi huataseijre, ajta ijii capu cheꞌe yaꞌa aꞌahuaꞌa, ai pu aɨn pueen ɨ taꞌarahueica. Aɨ pu ajta huaꞌa jetze ajtyamaꞌacan aɨme ɨ maj arahuaꞌapua araꞌase. Aɨ pu hui ajta áꞌapuaꞌaren.
\p
\v 12 ’Ajta aɨjna ɨ tɨ tamuaamuataꞌa avaꞌahuajmee, ayaa pu hui huataujmuaꞌa tɨcɨn tamuaamuataꞌa mu araꞌase ɨ maj tiꞌijta. Majta aɨme, camuuxɨ maɨjna cɨn tityeꞌentyajrupi mej mi tyuꞌutaijta. Maucheꞌe mu raꞌancuraꞌasin mej mi cɨj manaꞌa caj tityeꞌeteeviꞌin aꞌachu cumu sei oora maj tyuꞌutaijta jamuan ɨ tiꞌitɨ.
\v 13 Naijmiꞌi mu meyan ruxaꞌaj tiꞌimuaꞌatze. Majta maj raatatuireꞌen maɨjna ɨ tiꞌitɨ matɨj manaꞌa ɨ maj cɨn antyujmuaꞌaree, ajta ɨ huaꞌamuareꞌeriꞌiraꞌa.
\v 14 Aɨ mu hui raatenyaꞌusiꞌiteꞌesin maɨjna ɨ Canyaꞌa.
\p ’Ajta aɨn ɨ Canyaꞌa, aɨ pu huaꞌutyaamueꞌitɨ aꞌini ai pu aɨn pueen ɨ tavastaraꞌa ɨ tɨ ajta tihueijteꞌe aɨme ɨ tɨ huaꞌavastaꞌa pueen ɨ tyaɨte. Ai pu hui ajta aɨn pueen ɨ tajtuhuan tɨ naijmiꞌica tieꞌijteꞌe ɨ seica ɨ tajtuhuaani. Majta aɨme ɨ mej jemin seijreꞌe ɨ Canyaꞌa, ai mu aɨn pueen ɨ tɨ huaꞌutajée, tɨ ajta huaꞌantihuau. Ai mu majta aɨn pueen ɨ maj cai atyaꞌɨtzaꞌara ɨ jemin.
\p
\v 15 Aj puꞌi ayan tinaataꞌixaa tɨcɨn:
\p ―Aɨjna ɨ jaj tɨ veꞌe ɨ paj hui raaseij, ɨ tɨ ajta japuan áꞌujca aɨjna ɨ jɨitaꞌa tɨ ramueꞌitɨcɨ ɨ tumin ɨ ruhueꞌiraꞌa cɨmeꞌe, ai mu aɨn pueen ɨ tyaɨtestyamuaꞌameꞌen aɨjna ɨ jɨitaꞌa, majta ɨ tyaɨtejraꞌan, majta ɨ mej seij chuejraꞌa japua eꞌemaꞌacan, ɨ maj majta seij cɨn tiꞌixaxaꞌa ɨ nyuucari.
\v 16 Ajta aɨjna tɨ tamuaamuataꞌa avaꞌahuajmee, ɨ mej tieꞌijta aɨjna jamuan ɨ tiꞌitɨ, aɨ mu rajchaɨ́ɨraꞌa muaꞌajuꞌun maɨjna ɨ jɨitaꞌa tɨ ramueꞌitɨcɨ ɨ tumin ɨ ruhueꞌiraꞌa cɨmeꞌe. Majta huaꞌareꞌitixɨꞌɨsin ɨ tyaɨte ɨ maj ráꞌajaahuatyaꞌacaa. Majta caꞌanyejri cɨn tiracáꞌariꞌira tɨj naꞌa ɨ tɨ tiꞌitéechan. Majta raatyacɨꞌɨsin ɨ hueꞌiraꞌaraꞌan. Majta raꞌatyátaira.
\p
\v 17 ’Ayaa pu teꞌeme, aꞌini Dioj pu ayan caꞌanijraꞌa huaꞌutaꞌasin mej mi meyan tiraꞌaraꞌasten aꞌij tɨ aɨn tiꞌijxeꞌeveꞌe maɨjna cɨmeꞌe maj ruxaꞌa manaꞌa tyuꞌumuaꞌati. Majta raatatuireꞌen ɨ tiꞌitɨ jemi matɨj manaꞌa tiꞌitɨ ɨ maj cɨn antyujmuaꞌaree. Ayaa mu ráruurén asta naꞌa cai ayan tyaꞌaraurasten aꞌij tɨ Dioj ari tiraataxajtacaꞌa.
\v 18 Ajta, aɨjna ɨ jɨitaꞌa ɨ paj raaseij, ai pu aɨn pueen ɨ chajtaꞌana tɨ veꞌe ɨ tɨ tihueꞌijteꞌe aɨme ɨ tajtuhuaani ɨ mej tiꞌitɨ cɨn títyatatí aꞌu tɨ naꞌa iiyan chaanaca japua. ―Ayaa pu tinaataꞌixaa aɨjna ɨ tɨ tajapua tiꞌivaɨreꞌe.
\c 18
\s Au pu áꞌavatzɨjxɨ aujna u Babilonia
\p
\v 1 Nyajta seij huaseij ɨ tɨ tajapua tiꞌivaɨreꞌe. Aa pu tajapua vaꞌacámaꞌacaa aɨjna. Eihua pu huapɨꞌɨ tiꞌitɨj cɨn antyujmuaꞌaree. Nain japua pu ajta huatátzarajraa iiyan chaanaca japua aɨjna cɨmeꞌe tɨ tyátaaveꞌe a rujetze.
\v 2 Aj puꞌi caꞌanin cɨn huajijhuacaꞌa ayan tɨcɨn:
\p ―Puꞌuri hui áꞌavatzɨjxɨ, puꞌuri xaa hui áꞌavatzɨjxɨ aujna u Babilonia, ɨ chajtaꞌana tɨ vivéjmee. Muꞌuri hui maun aꞌuchaatɨme aɨme ɨ tiyaaruꞌu. Puꞌuri ajta huaꞌachiꞌi pueen ɨ xaijnyuꞌucari ɨ maj xanaꞌavisiꞌi seijreꞌe. Au mu aꞌasaca, matɨj manaꞌa puaꞌamua ɨ pinaꞌase ɨ maj xanaꞌavisiꞌi seijreꞌe, ɨ tyaj cai aꞌatzu huaꞌaxeꞌeveꞌe.
\p
\v 3 ’Ayaa pu hui tiraaruu, aꞌini aɨ pu caꞌanijraꞌa huaꞌutaꞌa matɨj manaꞌa puaꞌamua ɨ mej seij chuejraꞌa japua eꞌemaꞌacan mej mi meyan cheꞌeta manaꞌa aꞌij puaꞌa huarɨni tɨj ajta huarɨj aɨjna ɨ Babilonia. Aɨj pu hui cɨn Dioj ayan cheꞌeta naꞌa pueijtzi tihuaꞌutaꞌasin aꞌini eecan pu huapɨꞌɨ nyuꞌucamɨꞌɨ aɨjna ɨ Dioj. Aɨme ɨ mej iiyan tieꞌijta ɨ chaanaca japua, matɨj manaꞌa puaꞌamua jamuan huataujxanaꞌacɨre. Majta aɨme ɨ mej tiꞌituaꞌaraca iiyan chaanaca japua, aɨ mu hui meri huataujchijtyaanitacaꞌa maɨjna cɨmeꞌe mej eihua huapɨꞌɨ tíꞌinyacuaꞌatzacaa mej huapɨꞌɨ tíꞌijchaɨca aɨme. ―Ayaa pu tyuꞌutaxajtacaꞌa aɨjna ɨ tɨ tajapua tiꞌivaɨreꞌe.
\p
\v 4 Nyatɨꞌɨj ni seij huanamuajriꞌi tɨ uteꞌe tejeꞌicáxajtacaꞌa ayan tɨcɨn:
\p ―Sataꞌaj hui saun huiracɨɨnye mɨ sej nyatyaɨtestyamuaꞌa pueen, sej si cai sajta seyan autaꞌɨtzen tɨj aɨjna, tɨ ij cai pueijtzi amuaataꞌan ɨ Dioj aꞌij tɨ aɨn raataꞌasin aɨjna ɨ jɨitaꞌa.
\v 5 Ee xaa, aɨjna ɨ tɨ cɨn ayan huarɨj, aɨ pu hui ari nain cɨn autyajturaa ɨ Dioj jemi. Puꞌuri xaahui amiteereꞌe ijii u tajapua Dioj tɨ eꞌeseijreꞌe. Ajta aɨn Dioj, aɨ pu ari raꞌutamuaꞌareeriꞌi tɨj naꞌa tɨ cɨn aꞌij puaꞌa tiꞌityujchaꞌɨ.
\p
\v 6 ’Cheꞌe ayan tiraacɨꞌɨti tɨj ajta aɨn pueijtzi tihuaꞌutaꞌa ɨ tɨ huaꞌutyaamueꞌitɨ. Cheꞌe ajta hui huaꞌapua tyuꞌutanajchita tɨj naꞌa seij cɨmeꞌe tɨ ayan huarɨj tɨ aꞌij puaꞌa een. Ajta aɨn ɨ vaasu tɨ jetzen rayaꞌaca aɨjna tɨ cɨn huataujtɨmueꞌira, cheꞌe hui ayan raꞌavaꞌɨsteꞌen aɨjna cɨmeꞌe ɨ tɨ huaꞌapua araꞌase ɨ tɨ cɨn huatyátahuan.
\v 7 Aɨ pu hui huaꞌujtzaahua rusaɨj, ajta huataujseijratacaꞌa aɨjna cɨmeꞌe tɨ eihua huapɨꞌɨ tíꞌijchaɨcaꞌa. Cheꞌe ruxaꞌa naꞌa tiraacɨꞌɨti tɨꞌij rajpueiitzi aꞌaraꞌani, ajta tɨ huataujxaamɨsteꞌen. Ayaa pu hui tiꞌixaj ɨ rutzajtaꞌa tɨcɨn yee: “Aɨ pu aɨjna cɨn tiꞌitejvee ɨ jɨitaꞌa tɨ tieꞌijta, ajta ayan tɨcɨn tɨ cai rusaɨjtacaꞌa, tɨ cai aꞌanaj ruxaamɨjtyaꞌa aꞌame.”
\v 8 Aɨj pu hui cɨn caꞌanacan japuan rávaɨjtzi sei xɨcaj cɨmeꞌe tɨ rajpueiitzi aꞌaraꞌani. Aj pu xaa tijcuiꞌini, ajta ruxaamɨjtyaꞌa aꞌame. Ajta ayan tirajpueiitzi aꞌame tujri cɨmeꞌe. Ajta huatyatairiꞌihua, aꞌini eihua pu raayɨꞌɨtɨ ɨ rumuareꞌeriꞌiraꞌa cɨmeꞌe ɨ tavastaraꞌa, aɨjna ɨ Dioj tɨ raꞌuxɨ́jteꞌen. ―Ayaa pu tyuꞌutaxajtacaꞌa aɨjna ɨ aꞌatɨ tɨ tajapua tiꞌivaɨreꞌe.
\p
\v 9 Ajta aɨme ɨ tajtuhuaani ɨ mej tieꞌijta iiyan chaanaca japua, ɨ maj majta jamuan huataujxanaꞌacɨre, majta jamuan huataujchijtyaanitacaꞌa, matɨꞌɨj raaseij aꞌutɨ áꞌajcɨtzu aɨjna cɨmeꞌe tɨ tyataasin, aɨ mu ruyeinixɨꞌɨn, majta ijhuan maɨjna cɨmeꞌe ɨ chajtaꞌana.
\v 10 Majta maɨn, a mu ɨmɨ aꞌuhuistɨraꞌasin maɨjna cɨmeꞌe maj ratzɨɨnyeꞌe ɨ tɨ cɨn rajpueiitzi aꞌame. Ayaa mu tiꞌixaata muaꞌajuꞌun tɨcɨn:
\p ―Cuiꞌi xaa, cuiꞌi xaa, muaa mɨ hui pej chajtaꞌana pueen tɨ veꞌe, mɨ paj eihua tiꞌitɨj cɨn antiꞌamuaꞌaree, mɨ paj hui Babilonia pueen, sei xɨcaj pu cɨn ayan tyajaꞌureꞌenye tɨ Dioj maꞌuxɨ́jteꞌe.
\p
\v 11-12 Majta aɨme ɨ mej tiꞌituꞌaraca iiyan chaanaca japua, aɨ mu majta ruyeinixɨꞌɨn, majta ruxaamɨstyaꞌa muaꞌajuꞌun maɨjna cɨmeꞌe ɨ chajtaꞌana aꞌini capu cheꞌe maꞌa aꞌatɨ tɨ tihuaꞌunanai ɨ mej tiꞌituaꞌaraca tiꞌitɨ tɨ naꞌa mej tiꞌitɨcɨ, tɨ puaꞌa ooro, nusu plaata, naꞌari tetej tɨ tyamuaꞌa tiꞌijnajchi, tiꞌitɨ peerla. Majta seica cɨɨxuri tiꞌituaꞌaraca. Capu cheꞌe aꞌatɨ tihuaꞌananairan ɨ tɨ tiꞌimestí, ɨ tɨ nacamua, tɨ taꞌati, tɨ paꞌu. Camu majta cheꞌe huaꞌananaira muaꞌajuꞌun ɨ cɨye maj tuꞌaraca tɨ eihua tiꞌijnajchi naꞌari tiꞌitɨ coobre nusu tyapuustiꞌi nusu aɨjna ɨ tetej ɨ maj racaamete, ɨ maj cɨn tyaꞌantamɨɨmɨteꞌen ɨ tyapueij naꞌari ɨ chun.
\p
\v 13 Camu majta cheꞌe meyan tihuaꞌananairan ɨ maj cueꞌira tiꞌinaꞌachitaꞌan tiꞌitɨ tzanca, naꞌari tiꞌitɨ tɨ naꞌa tɨ naa tyaꞌaaca nusu cuaaneꞌe naꞌari tiꞌitɨ mirra, naꞌari cuaaneꞌe tɨ cueina, tiꞌitɨ nahuaj, naꞌari aceiti, naꞌari hariina tɨ reꞌen, tiꞌitɨ triigu, ajta yaꞌamuaate maj seijreꞌe huaacasi, naꞌari canyaꞌaxɨ, ajta cahuaayuꞌu. Ajta, aɨjna ɨ carreta maj ruꞌuvaꞌajaapuaj maj muaꞌayeꞌi ɨ cahuaayuꞌu, majta aɨme ɨ maj caꞌanyejri cɨn tiꞌimuareꞌe ruxaꞌaj tyaɨte jemi, camu mij cheꞌe tihuaꞌananairan.
\v 14 Ayaa pu tyajaꞌureꞌenye aꞌij tɨ ajmiꞌi tyeꞌeyuꞌusiꞌihuacaꞌa ayan tɨcɨn:
\p ―Aɨjna tɨ tyamuaꞌa tiꞌireꞌen, ɨ paj huapɨꞌɨ raxeꞌevaꞌacaa, capu cheꞌe seiraꞌa aꞌame mueetzi jemi. Ajta, naijmiꞌi tɨj naꞌa tɨ huapɨꞌɨ tiꞌijnajchi, ajta tɨ naa seijreꞌe ɨ paj cɨn aꞌatzaahuateꞌe asaɨj, papuꞌuri tyajaꞌurai. Capej cheꞌe tiꞌityauni.
\p
\v 15 Majta aɨme ɨ maj tiꞌituꞌaraca, ɨ maj majta maɨjna cɨn huatyaujchijtyaanitacaꞌa maɨjna cɨmeꞌe mej tihuaꞌananairacaꞌa, aɨ mu aꞌɨmɨ huahuistɨraꞌasin, maɨjna cɨmeꞌe maj ratzɨɨnyaꞌa muaꞌajuꞌun tɨ Dioj pueijtzi raataꞌa. Maujyeinixɨꞌɨn, majta caꞌanin cɨn muaataujxaamɨsteꞌesin.
\v 16 Ayaa mu tiꞌixaata muaꞌajuꞌun tɨcɨn:
\p ―Cuiꞌi xaa, cuiꞌi xaa, muaa pej chajtaꞌana pueen, tɨ veꞌe. Ɨ paj paɨjna tiꞌitéchajcaꞌa ɨ tɨ mestí tɨ naa eꞌen, pajta paɨjna cɨmeꞌe tɨ nacamua, pajta ɨ tɨ paꞌu cɨmeꞌe. Ɨ paj ucaꞌarujtiꞌiriꞌi paɨjna ɨ tɨ ooro cɨn taavijhua, pajta paɨjna cɨmeꞌe ɨ tetej tɨ huapɨꞌɨ tiꞌijnajchi, pajta paɨjna cɨmeꞌe ɨ peerla tiꞌitɨ.
\v 17 Sei oora pu hui cɨn, naijmiꞌi tyuꞌuraꞌaxɨ tɨj naꞌa tɨ huapɨꞌɨ tiꞌinajchicaa.
\p Majta aɨme ɨ maj ramɨjhuaca maɨjna ɨ baarcu, majta aɨme ɨ mej tiꞌimɨjhuaca maɨjna jetze ɨ baarcu ɨ maj aꞌacɨɨnye ɨ jaj japua, majta naijmiꞌi ɨ maj hueꞌité viviꞌi, au mu ɨmɨ huahuistɨraa.
\v 18 Matɨꞌɨj raaseij maɨjna ɨ cɨtzij tɨ ajtyɨꞌɨmɨ ajcɨtzujtacaꞌa, tɨ tyaꞌajtaiira ɨ chajtaꞌana, matɨꞌɨj mi huataujyeinyajraa. Meyan tɨcɨn:
\p ―¿Tiꞌitajni maa chajtaꞌa seijraꞌacaa tɨj amɨjna? Capu hui meꞌe eꞌe chajtaꞌa.
\p
\v 19 Matɨꞌɨj mi tiꞌitɨ aváꞌujratziiraxɨ tiꞌitɨ tɨ muiiní ɨ rumuꞌujetze, maj ruyein, majta ruxaamɨsteꞌe. Ayaa mu tiꞌityejíjhuacaꞌa tɨcɨn:
\p ―Cuiꞌi xaa, cuiꞌi xaa, muaa hui chajtaꞌana tɨ veꞌe, aꞌini mueetzi mu jetze huataujchijtyaanitacaꞌa matɨj manaꞌa puaꞌamua mej tihueꞌijtyaꞌacaa aɨme ɨ maj baarcu jetze antacɨꞌɨca ɨ jaj japua. Aɨ mu hui cɨn huataujchijtyaanitacaꞌa maɨjna cɨmeꞌe pej eihua huapɨꞌɨ tíꞌijchaɨcaꞌa. ―Ayaa mu tyuꞌutaxajtacaꞌa aɨme ɨ tyaɨte.
\p
\v 20 Sajta muan, mɨ saj tajapua eꞌeseijreꞌe, sataꞌaj huataujtyamuaꞌaveꞌen, sajta muan, mɨ saj rɨꞌɨ tiꞌiteseijreꞌe ɨ Dioj jemi, sajta muan, mɨ tɨ Dioj amuaꞌantihuau, sej siꞌi tihuaꞌutaꞌixaateꞌen ɨ tyaɨte, sajta muan, mɨ saj Dioj jetze maꞌacan tiꞌixaxaꞌataꞌa. Sataꞌaj huataujtyamuaꞌaveꞌen saɨjna cɨmeꞌe tɨ Dioj ayan tyajamuaaxaꞌapɨꞌɨntariꞌiriꞌi aɨjna cɨmeꞌe tɨ raꞌuxɨ́jte aɨjna ɨ jɨitaꞌa.
\p
\v 21 Aj puꞌi saɨj tɨ tajapua tiꞌivaɨreꞌe, tɨ ajta eihua huapɨꞌɨ rucaꞌanye, aɨ pu tetej ájtɨ tɨ ayan seijraꞌacaa tɨj aɨjna ɨ maj cɨn tyáꞌatɨꞌɨxɨca. Aj puꞌi raꞌatyájrai ɨ jaj tzajtaꞌa tɨ veꞌe. Ayaa pu tyuꞌutaxajtacaꞌa tɨcɨn:
\p ―Ayaa pu hui cheꞌeta naꞌa eenyeꞌequeꞌe raatyáuuna aɨjna ɨ chajtaꞌana tɨ veꞌe, tɨ ayan tyajaꞌarajtyahuaa tɨcɨn Babilonia. Capu cheꞌe meꞌe eꞌe seiraꞌa aꞌame.
\v 22 Camu cheꞌe meyan namuaara muaꞌajuꞌun aɨme ɨ mej tiꞌicuinaca aɨjna jetze ɨ aarpa nusu aɨme ɨ maj tiꞌicuinaca ruchuicari cɨmeꞌe. Camu hui majta namuaara muaꞌajuꞌun muejmi jemi aɨme ɨ mej tiꞌicɨꞌɨsita tuuturuꞌu jetze naꞌari aɨme ɨ maj ucaajíꞌihua muaꞌayeꞌi ɨ trompeeta jetze. Majta aɨme ɨ mej tiꞌimɨjhuaca, matɨj manaꞌa puaꞌamuaca, aꞌijtɨ manaꞌa tiraayɨꞌɨtɨ, camu hui cheꞌe muejmi jemi seiraꞌa muaꞌajuꞌun. Camu xaa nyaꞌu aꞌatzu. Camu majta cheꞌe namuaara muaꞌajuꞌun aɨme ɨ mej tyáꞌatɨꞌɨxɨca.
\p
\v 23 ’Ajta, capu hui cheꞌe aꞌatáa aꞌame muejmi jemi ɨ taij tɨ huatatza aꞌayeꞌi ɨ huaꞌachiꞌi tzajtaꞌa. Capu ajta cheꞌe ayan namuaara aꞌame maj xaahuaani cɨn tyuꞌutaxaj aɨme ɨ maj mauchan huanényaɨchacaꞌa, ajta maj mauchan huavɨɨche, aꞌini aɨme ɨ maj muejmi jemi tiꞌituꞌaracaꞌa, ai mu maɨn pueenyaꞌa ɨ mej yan japuan seijraꞌacaa ɨ chaanaca, ɨ maj majta vivejmeꞌen cɨn títyatatyáꞌacaꞌa. Pajta peyan tihuaꞌucuanamua matɨj manaꞌa puaꞌamua ɨ maj seij chuejraꞌa japua eꞌemaꞌacan paɨjna cɨmeꞌe pej peyan huataꞌaseijratacaꞌa paj huapɨꞌɨ naa seijreꞌe aɨme jemi mej mi meyan huarɨni tɨ aꞌij puaꞌa een ɨ Dioj jemi.
\p
\v 24 Ai pu ajta aɨn pueen tɨ huaꞌucuii naijmiꞌica aɨme ɨ maj Dioj jetze maꞌacan tiꞌixaxaꞌataꞌa, majta aɨme ɨ maj rɨꞌɨ tiꞌiteseijraꞌacaa ɨ Dioj jemi. Ee xaa nyaꞌu, aɨ pu huaꞌucuii matɨj manaꞌa puaꞌamua huácuiihuacaꞌa iiyan chaanaca japua, tɨj naꞌa jajcua ɨmɨ, tɨ ajta ijii.
\c 19
\s Aɨ mu tiꞌichuiica uteꞌe u tajapua
\p
\v 1 Nyatɨꞌɨjta ni huaꞌunamuajriꞌi ɨ maj tajapua caꞌanin cɨn tiꞌichuiicacaꞌa. Cu xuee eihua huapɨꞌɨ ajtyáxɨɨracaꞌa aɨme ɨ maj tiꞌichuiicacaꞌa. Meyan tɨcɨn:
\q Aleluuya, ticheꞌe rɨꞌɨ tiraataꞌan ɨ taDioj,
\q aꞌini aɨ pu ari tuꞌirajtuaa, aɨ pu jetze aꞌuveꞌeme
\q2 ɨ tyaj cɨn rɨꞌɨ tiraꞌutaseij,
\q2 ajta ai pu aɨn pueen ɨ tɨ nain cɨn antyujmuaꞌaree.
\q
\v 2 Tzaahuatiꞌiraꞌa pu cɨn huaꞌaxɨjteꞌe,
\q2 ajta ayan tiraavijteꞌe tɨ aɨn pueijtzi huaꞌataꞌaca.
\q Aɨ pu ari raꞌuxɨjte aɨjna ɨ jɨitaꞌa tɨ vaꞌacan cɨn tiꞌityavaacaꞌa,
\q aɨjna ɨ jɨitaꞌa tɨ ruhueꞌiraꞌa cɨn ramueꞌitɨcaꞌa ɨ tumin, tɨ ajta caꞌanijraꞌa huaꞌutaꞌa
\q aɨme ɨ maj an japuan huachaatɨmaꞌacaa an chaanaca japua mej mi aꞌij puaꞌa huarɨni maɨjna cɨmeꞌe maj jamuan huataujxanaꞌacɨre.
\q Dioj pu ajta pueijtzi raataꞌa aɨjna cɨmeꞌe tɨ aɨn jɨitaꞌa ayan huaꞌucuii aɨme ɨ maj ravaɨreꞌe ɨ Dioj.
\p
\v 3 Majtahuaꞌa mu huajijhuacaꞌa meyan tɨcɨn:
\p ―Aleluuya, eecan pu jetzen ájcɨtzúuta aꞌame tɨj naꞌa rusen cɨmeꞌe. ―Ayaa mu tyuꞌutaxajtacaꞌa.
\p
\v 4 Majta aɨme ɨ vaujsi ɨ maj seite japuan muaacua araꞌase, majta ɨ maj muaacua, ɨ maj majta ruuri, naijmiꞌi mu aꞌicaujtuuxɨ, mej mi raatyaanajche maɨjna ɨ Dioj ɨ tɨ aꞌacajca ɨpuari japua. Meyan tɨcɨn:
\p ―Cheꞌe ayan tyajaꞌureꞌenyen. Aleluuya.
\p
\v 5 Tɨꞌɨqui saɨj huajijhuacaꞌa tɨ aun aꞌutyavaacaꞌa ajna vejliꞌi jetzen ɨ maj japuan tiꞌimuaɨꞌɨvajtaca. Ayan tɨcɨn:
\q Sataꞌaj rɨꞌɨ tiraataꞌan saɨjna ɨ Dioj, naijmiꞌi muan mɨ saj ravaɨreꞌe ɨ Dioj.
\q Capu amɨn aꞌij tɨ puaꞌa seyan vivejmeꞌen cɨn títyatatí naꞌari saj cɨleꞌenyeꞌen cɨn títyatatí.
\s Tɨꞌɨj huatyenyaɨ́chen ɨ Canyaꞌa
\p
\v 6 Nyatɨꞌɨj ni nyajtahuaꞌa huaꞌunamuajriꞌi aɨme. Cu xuee eihua huapɨꞌɨ ajtyáxɨɨracaꞌa. Ajta, matɨꞌɨj tyuꞌutaxajtacaꞌa, ayaa pu namuajraꞌacaa tɨj jaj tɨ tetej tzajtaꞌa mɨꞌɨya. Ayaa pu ajta namuajraꞌacaa cumu mej tenyuucaꞌan. Meyan tɨcɨn:
\q Aleluuya, ticheꞌe rɨꞌɨ tiraataꞌan ɨ Dioj,
\q aꞌini puꞌuri nain cɨn tieꞌijta aɨjna ɨ tavastaraꞌa
\q2 ɨ tɨ taDioj pueen.
\q
\v 7 Ticheꞌe teyan huatatatyamuaꞌaveꞌen,
\q2 tyajta teyan tiraatataujtziꞌireꞌen,
\q2 tej ti rɨꞌɨ tiraataꞌan
\q aꞌini puꞌuri ajna tyajaꞌureꞌenye tɨ aɨn Canyaꞌa huatyenyaɨche.
\q Ajta aɨn ɨraꞌaraꞌan, puꞌuri rɨꞌɨ huaujruu.
\q
\v 8 Ayaa pu tiraataꞌa tɨ tyuꞌutaujchejte aɨjna cɨmeꞌe
\q2 ɨ cɨɨxuri tɨ mestí, tɨ ajta naa een,
\q2 tɨ tyámastájyeꞌi, tɨ cai aꞌatzu chuaamua.
\m Ajta aɨjna ɨ cɨɨxuri tɨ naa een, ai pu aɨn pueen aꞌij mej meri huarɨj aɨjna cɨmeꞌe ɨ tɨ xaꞌapɨꞌɨn een ɨ Dioj jemi. Aɨj pu xaa cɨn ucaujchejtyeꞌesin.
\p
\v 9 Ajta ɨ tɨ tajapua tiꞌivaɨreꞌe, ayaa pu tinaataꞌixaa tɨcɨn:
\p ―Pataꞌaj raꞌuteyuꞌuxa yee: “Rɨꞌɨ pu tihuaꞌutaꞌa aɨme ɨ tɨ Dioj huaꞌutaꞌinee mej tyuꞌucuaꞌani jamuan aɨjna ɨ Canyaꞌa ajna xɨcajraꞌan tɨ jetzen huatényaɨchi.”
\p Aj puꞌi ayan tinaataꞌixaa tɨcɨn:
\p ―Ayen tiꞌayajna ɨ Dioj jemi aꞌij nyej nyauchan timuéꞌixaa.
\p
\v 10 Cɨmeꞌen puꞌu ayan tinaataꞌixaa, nyatɨꞌɨj ni aꞌicantutzi aꞌu tɨ aꞌaraɨɨcajme nyej ni raatyaanajche. Ajta aɨn, ayaa pu tinaataꞌixaa tɨcɨn:
\p ―Capej hui peyan nyaruuraj aꞌini nyaa nu neyan cheꞌeta nyanaꞌa tiꞌivaɨreꞌe ɨ Dioj jemi patɨj muaa, majta aɨme ɨ aꞌihuaamuaꞌa ɨ maj meyan tyaꞌanxájta maɨjna cɨmeꞌe aꞌij tɨ tyuꞌutaxajtacaꞌa ɨ Jesús, majta aꞌij tɨ aɨn huarɨj. Pataꞌaj paɨjna huatyaanajche ɨ Dioj, aꞌini aɨjna ɨ nyuucari tɨ cɨmeꞌen raxaj aꞌij tɨ tyuꞌutaxajtacaꞌa ɨ Jesús, au pu jetze aꞌuveꞌeme ɨ xaijnyuꞌucari tɨ Dioj jetzen maꞌacan tiꞌixaxaꞌa. ―Ayaa pu tyuꞌutaxajtacaꞌa aɨjna ɨ aꞌatɨ.
\s Aɨ pu avaꞌaca japuan ɨ cahuaayuꞌu tɨ cueiinaraꞌa
\p
\v 11 Nyatɨꞌɨj ni raaseij tɨ antacuuniꞌihuacaꞌa u tajapua. Maꞌacui xaa, cahuaayuꞌu pu an aꞌutyavaacaꞌa. Naa pu tiꞌicueinaraꞌa, ajta aɨn ɨ tɨ japuan avaꞌaca, ayaa mu ratamuaꞌamua tɨcɨn, “Ɨ tɨ nain cɨn tyaꞌaste, ajta tɨ tzaahuatiꞌiraꞌa cɨn tiꞌixaxaꞌa.” Aɨ pu xaꞌapɨꞌɨn ayan rɨcɨ aɨjna cɨmeꞌe tɨ huaꞌaxɨjteꞌe ɨ tyaɨte aꞌij tɨ tiraavijteꞌe. Ajta ayaa pu cheꞌeta naꞌa tiꞌinyaꞌuseꞌe.
\v 12 Yaa pu seijreꞌe ɨ jɨꞌɨsaaraꞌan jetze tɨj taij tɨ aꞌataa. Eecan pu utyarujtiꞌihuajmee ɨ curuun. Ajta jetzen pu teꞌeyuꞌusiꞌi aꞌij tɨ antyahuaa. Ajta, capu aꞌatɨ yauꞌeite aꞌij tɨ huataujmuaꞌa, silu aɨ puꞌu naꞌa rusaɨj yauꞌeite.
\p
\v 13 Ayaa pu eꞌenyeꞌen tiꞌitéchajcaꞌa ɨ cɨɨxuri tɨ tɨtɨꞌɨj, ajta xuureꞌe raaméiriꞌihuajmaꞌacaa. Ayaa mu majta raatamuáꞌa tɨcɨn, “Aɨjna ɨ nyuucari tɨ cɨmeꞌen raxaj ɨ Dioj.”
\v 14 Majta cujtaꞌan huajuꞌucaa aɨme ɨ xantaaruꞌu maj tajapua eꞌemaꞌacan. Ayaa mu eꞌenyeꞌen tiꞌitéchajcaꞌa ɨ cɨɨxuri, tɨ mestí, tɨ ajta naa een. Naa pu tiꞌicueina, ajta naa tiꞌiseijraꞌacaa ɨ tihuaꞌacɨɨxu, ajta capu aꞌatzu tiꞌichuamuaviꞌicaa. Aɨ mu cujtaꞌan huajuꞌucaa ɨ ma taꞌaveꞌeteꞌete aɨme japua ɨ cahuaayuꞌu maj cueina.
\p
\v 15 Ajta aɨn nyuucaraꞌaraꞌan, ayaa pu huaꞌaruuren ɨ tyaɨte tɨj aꞌatɨ tiꞌitɨ antisijchacaꞌa aɨjna cɨmeꞌe ɨ chun. Ayaa pu pueijtzi tihuaꞌutaꞌasin aɨme ɨ mej seij chuejraꞌa japua eꞌemaꞌacan aɨjna cɨmeꞌe ɨ runyuuca. Caꞌanyejri pu cɨn tihuaꞌutaijteꞌesin. Ajta, huaꞌa japua pu ráavaɨjtzi tɨj naꞌa ɨ tɨ cɨn huapɨꞌɨ nyuꞌucamɨꞌɨ ɨ Dioj, tɨ nain cɨn antyujmuaꞌaree.
\v 16 Jetzen ɨ cɨɨxuraꞌaraꞌan, ajta aꞌu tɨ ajtaveꞌe ɨ chun, ayaa pu teꞌeyuꞌusiꞌi aꞌij maj ratamuaꞌamua tɨcɨn: “Huaꞌatajtuhuan aɨme ɨ tajtuhuaani, ajta, tɨ tihueꞌijteꞌe aɨme ɨ maj majta tieꞌijta”.
\p
\v 17 Nyatɨꞌɨj ni aꞌatɨ huaseij tɨ tiꞌivaɨreꞌe u tajapua. Antyɨꞌɨmɨ pu aꞌutyavaacaꞌa ɨ xɨcaj jetze. Caꞌanin pu cɨn huaꞌutajée matɨj manaꞌa puaꞌamuacaa ɨ pinaꞌase ɨ maj cɨꞌɨcacaj, ɨ maj majta ráꞌaraꞌive u uteꞌe. Ayan tɨcɨn:
\p ―Iiyaꞌa xuꞌu hui, mu aꞌuvaꞌajuꞌun sej si seyan tyuꞌucuaꞌani saɨjna cɨmeꞌe tɨ Dioj ayan tyajaꞌamuamin.
\v 18 Sej si hui raacuaꞌani saɨjna ɨ huaꞌahueꞌiraꞌa aɨme ɨ maj tieꞌijta naꞌari huaꞌahueꞌiraꞌa ɨ huaꞌacapitan ɨ xantaaruꞌu. Sajta seyan raacuaꞌani huaꞌahueꞌiraꞌa saɨme ɨ tyetyaca ɨ maj eihua rucacaꞌanye, sajta hui huaꞌahueꞌiraꞌa ɨ cahuaayuꞌu, sajta huaꞌahueꞌiraꞌa saɨme ɨ maj avéꞌetyeꞌete. Nain xu hui cuaꞌani huaꞌahueꞌiraꞌa ɨ tetyaca, capu amɨn aꞌij tɨ puaꞌa meyan ruxaahua áꞌujhuaꞌanyeꞌen nusu maj caꞌanyejri cɨn tiꞌimuaraꞌacaa. Capu amɨn aꞌij ajta tɨ puaꞌa mej vivejmeꞌen títyatatí nusu meyan cɨleꞌenyeꞌen cɨn tiꞌivaɨreꞌe. Muan xu hui xaa huaꞌacuaꞌani ɨ huaꞌahueꞌiraꞌa. ―Ayaa pu tyuꞌutaxajtacaꞌa aɨjna tɨ tajapua tiꞌivaɨreꞌe.
\p
\v 19 Nyatɨꞌɨj ni huaꞌuseij maj eꞌetyujsaɨraꞌacaa aɨjna ɨ aꞌatɨ tɨ huapɨꞌɨ áꞌatyesiꞌireꞌe, majta aɨme ɨ maj yan tieꞌijta i chaanaca japua. Huaꞌa jamuan ɨ ruxantaaruꞌustyamuaꞌa, aɨ mu eꞌetyujsaɨj mej mi raatyenyaꞌusiꞌiteꞌen maɨjna ɨ tɨ avaꞌaca ɨ cahuaayuꞌu japua, majta maɨme ɨ xantaaruꞌustyamuaꞌameꞌen.
\v 20 Ajta aɨjna ɨ aꞌatɨ tɨ huapɨꞌɨ áꞌatyesiꞌireꞌe, aɨ pu huatéviꞌiriꞌihuacaꞌa aɨjna jamuan tɨ hueꞌitzi cɨn tiꞌixaxaꞌataꞌa aɨjna jetze maꞌacan. Ajta, aɨjna ɨ tɨ huapɨꞌɨ áꞌatyesiꞌireꞌe, aɨ pu tyuꞌumuarej ɨ maj cɨn rɨꞌɨ tiraꞌutaseij. Ayaa pu een cɨn huaꞌucuanamua aɨme ɨ maj raꞌancuraꞌa maɨjna ɨ maj huaꞌa jetze aꞌayuꞌusiꞌi aꞌij tɨ antyahuaa aɨjna ɨ jaꞌatɨ. Majta ratyaanajchacaꞌa aɨjna ɨ tiꞌitɨ tɨ ayan éenyaꞌa seijreꞌe tɨj aɨjna ɨ jaꞌatɨ tɨ huapɨꞌɨ áꞌatyesiꞌireꞌe. Cɨmeꞌen maj huavíviꞌiriꞌihuacaꞌa aɨme ɨ maj huaꞌapua, matɨꞌɨj mi man huajeꞌetyaahuaꞌaxɨ ruuricaa ajna aꞌahuaꞌa aꞌalaguun aꞌu tɨ azufre cɨn aꞌajtaasin.
\p
\v 21 Ajta, aɨjna tɨ cahuaayuꞌu japua avaꞌaca, aɨ pu ayan huaꞌaruu ɨ seica ɨ maj raꞌastijraꞌacaa maɨjna tɨ huapɨꞌɨ áꞌatyesiꞌireꞌe. Aɨ pu rusaɨj huaꞌucuii aɨjna cɨmeꞌe ɨ runyuuca tɨ ayan tiꞌivaɨreꞌe tɨj chun tɨ eꞌijninyei teneꞌetzeꞌen. Majta naijmiꞌi ɨ pinaꞌase, aɨ mu huájuꞌuxai tyamuaꞌa eihua maɨjna cɨmeꞌe ɨ huaꞌahueꞌiraꞌa aɨme ɨ maj huácuiihuacaꞌa.
\c 20
\s Cɨriistuꞌu pu nuꞌu tyuꞌutaijta sei viꞌiraꞌa ninyeꞌiraꞌa
\p
\v 1 Nyatɨꞌɨj ni seij huaseij tɨ tajapua tiꞌivaɨreꞌe. U uteꞌe pu ávaꞌacámaꞌacaa. Aɨ pu ajta yaavi huáchuisimaꞌa aɨjna tɨ cɨn teꞌityaanan aꞌu tɨ eꞌetyacun tɨ huápɨꞌɨ aꞌucatee. Aɨ pu ajta huapijsimaꞌa tiꞌitɨ cadeena, tɨ vivéjmee.
\v 2 Aj puꞌi raateeviꞌi aɨjna ɨ cuꞌucuꞌu, aɨjna tɨ jajcua ɨmɨ huataseijre. Ai pu aɨn pueen ɨ tɨ ayan antyahuaa tɨcɨn tiyaaruꞌu, ajta Satanás. Aj puꞌi raꞌijtápe tɨ ij aꞌateeviꞌin aꞌachu cumu seiviꞌiraꞌa ninyeꞌiraꞌa.
\v 3 Aj puꞌi aun yaꞌucajrai aꞌu tɨ eꞌetyacun. Ajta raꞌatyaana. Tiꞌitɨ pu ajta ancaaviꞌijte tɨꞌij cai cheꞌe huaꞌacuanamua aɨme ɨ mej seij chuejraꞌa japua eꞌemaꞌacan asta naꞌa cai teꞌentipuaꞌariteꞌen sei viꞌiraꞌa ninyeꞌiraꞌa. Aj puꞌi xaa, ayan tyuꞌujxeꞌeveꞌe maj ráꞌijxɨjta tɨꞌi aꞌatzu aꞌateeviꞌin tɨ ruxaahua áꞌuchaꞌacanyeꞌen.
\p
\v 4 Nyatɨꞌɨj ni ɨpuari tyuꞌuseij, nyajta nyaɨme ɨ mej jetzen acátyeꞌetyaꞌa. Ai mu aɨn pueen ɨ maj raꞌancuraꞌa maj maɨjna cɨn antyujmuaꞌaréera maj huaꞌuxɨjteꞌen ɨ tyaɨte. Nyajta eꞌeyan huaꞌaxaijnyuꞌuca huaseij aɨme ɨ maj hueꞌijveiichixɨ ɨ huaꞌamuꞌu jetze maɨjna cɨmeꞌe maj tyuꞌutaxajtacaꞌa maɨjna jetze maꞌacan ɨ Jesús, majta maɨjna cɨmeꞌe maj raꞌastijraꞌacaa maɨjna ɨ nyuucari tɨ cɨmeꞌen raxaj ɨ Dioj. Majta aɨme, camu raatyanajchacaꞌa maɨjna ɨ jaꞌatɨ tɨ huapɨꞌɨ áꞌatyesiꞌireꞌe, camu majta raatyanajchacaꞌa ɨ tɨ ravaɨreꞌe. Camu majta raꞌancuraꞌa ɨ tɨ teꞌeyuꞌusiꞌihuacaꞌa ɨ huaꞌacuaatzeꞌe nusu ɨ huaꞌamuajcaꞌa jetze aꞌij tɨ yeꞌi antyahuaa aɨjna ɨ aꞌatɨ tɨ huapɨꞌɨ áꞌatyesiꞌireꞌe. Aɨ mu majta huatarú jamuan ɨ Cɨriistuꞌu, majta maɨjna cɨn tiꞌityavaacaꞌa matɨj tajtuhuaani tɨj naꞌa sei viꞌiraꞌa ninyeꞌiraꞌa cɨmeꞌe.
\p
\v 5 Ai mu aɨn pɨrɨcɨ ɨ maj anacai huatarujsin ɨ mej meri huacuii. Majta ɨ seica, ɨ mej meri huacuii, camu meyan majtahuaꞌa huatarú asta naꞌa cai teꞌentipuaꞌariteꞌen sei viꞌiraꞌa ninyeꞌiraꞌa.
\v 6 Rɨꞌɨ pu tiraataꞌa ɨ aꞌatɨ tɨ ayan tiꞌijcɨꞌɨti, tɨ ajta huatarujsin huaꞌa jamuan ɨ maj anáatyáꞌa mu aꞌitajuꞌun huaꞌa tzajtaꞌa ɨ mɨꞌɨchitye. Rɨꞌɨ pu tiraataꞌa aꞌini Dioj pu ari huatauraꞌate ɨ rujemi aɨjna ɨ aꞌatɨ. Capu ajta cheꞌe rɨꞌɨrista aꞌame tɨ ajtahuaꞌa huamɨꞌɨni tɨj naꞌa rusen cɨmeꞌe, silu ayaa pu aɨjna cɨn teꞌentyaruti tɨꞌij tiꞌitɨ cɨn tiꞌivaɨraꞌa ɨ Dioj jemi, ajta jemin ɨ Cɨriistuꞌu. Aɨ pu jamuan tyuꞌutaijta. Ayaa pu aꞌateeviꞌi aꞌachu sei viꞌiraꞌa ninyeꞌiraꞌa.
\s Dioj pu raꞌantimueꞌitɨ ɨ tiyaaruꞌu
\p
\v 7 Tɨꞌɨj teꞌentipuaꞌare ɨ sei viꞌiraꞌa ninyeꞌiraꞌa, aj puꞌi ayan huatatuiihua aɨjna ɨ Satanás aujna aꞌu tɨ eꞌetyanamiꞌihuacaꞌa.
\v 8 Tɨꞌɨqui aꞌitamé tɨꞌij huaꞌucuanamuan aɨme ɨ mej seij chuejraꞌa japua eꞌemaꞌacan, matɨj manaꞌa puaꞌamua yen seijreꞌe iiyan chaanaca japua, tɨj naꞌa Teijmataꞌa pujmeꞌen, ajta Huaahuata pujmeꞌen, ajta Cuameche, ajta Tzereemen. Aɨme pu tisaɨreꞌesin ɨ mej meyan huataujmuaꞌa tɨcɨn Gog, ajta aɨme ɨ seica ɨ mej meyan huataujmuaꞌa tɨcɨn Magog. Ayaa mu araꞌase aꞌachu tɨ caj tíꞌitej ɨ sej tɨ huaca aꞌutɨ avastɨmee ɨ jaj tɨ veꞌe. Ajta aɨn ɨ cuꞌucuꞌu huaꞌajsaɨreꞌesin mej mi huatenyaꞌuseꞌen.
\p
\v 9 Matɨꞌɨj mi nain japua áꞌujhuaꞌanyaꞌa tɨj naꞌa caj tɨ auyauj ɨ chuej japua. Matɨꞌɨj mi rajnáj aꞌu mej tyaꞌutyáꞌɨnaamuacaꞌa aɨme ɨ maj rɨꞌɨ tiꞌiteseijreꞌe ɨ Dioj jemi, majta rajnáj maɨjna ɨ chajtaꞌana tɨ huapɨꞌɨ huaꞌaraanajchi aɨme ɨ maj tyaɨtestyamuaꞌameꞌen pueen ɨ Dioj. Ajta, taij pu u eꞌicajve u tajapua. Ajta huaꞌutyaatai aɨme ɨ maj jamuan áꞌujhuaꞌanyaꞌa ɨ tiyaaruꞌu.
\v 10 Ajta aɨn ɨ tiyaaruꞌu tɨ huaꞌucuanamua, au pu eꞌetyériihuacaꞌa aꞌutɨ a aꞌalaguun aꞌu tɨ azufre aꞌataa, aꞌu tɨ ajta eꞌeseijreꞌe aɨjna ɨ aꞌatɨ tɨ huapɨꞌɨ áꞌatyesiꞌireꞌe, ajta aɨjna tɨ ravaɨraꞌacaa, aɨjna tɨ hueꞌitzi cɨn tiꞌixaxaꞌataꞌa aɨjna jetze maꞌacan tɨ huapɨꞌɨ áꞌatyesiꞌireꞌe. Au mu mi rajpueiitzi muaꞌajuꞌun nain xɨcaj tzajtaꞌa, ajta nain tɨcaꞌari tzajtaꞌa tɨj naꞌa rusen cɨmeꞌe.
\s Dioj pu huaꞌaxɨjteꞌe aꞌutɨ eꞌeseijreꞌe ɨ ɨpuari tɨ veꞌe, tɨ ajta nuꞌu naa tiꞌicueinaraꞌa
\p
\v 11 Nyatɨꞌɨj ni ɨpuari huaseij tɨ veꞌe. Naa pu tiꞌicueinaraꞌa. Nyajta nyaɨjna huaseij ɨ tɨ acajca. Ajta ɨ chaanaca, ajta aɨjna ɨ tajapua, aa huaujpuaꞌarixɨ maɨjna jemi. Camu cheꞌe meꞌe eꞌeseijraꞌacaa.
\v 12 Nyatɨꞌɨj ni nyaɨme huaseij ɨ mej meri huacuii, ɨ mej vivejmeꞌen cɨn títyatatyáꞌacaa, majta ɨ maj cɨleꞌenyaꞌa cɨn tiꞌivaɨraꞌacaa. Au mu aꞌareꞌevaacaa maɨjna jemi ɨ ɨpuari. Majta seica raꞌutacuuracaꞌa ɨ yuꞌuxari. Majta seij autacuuracaꞌa ɨ yuꞌuxari tɨ jetzen teꞌeyuꞌusiꞌi aꞌij maj antyaꞌaruu ɨ mej meyan ruuri huatyaturaasin ɨ Dioj jemi. Dioj pu ajta huaꞌuxɨjte aɨme ɨ mej meri huacuii maɨjna cɨmeꞌe aꞌij tɨ teꞌeyuꞌusiꞌihuacaꞌa ɨ yuꞌuxari jetze, ɨ tɨ jetzen ayan tyaꞌaxa aꞌij maj huarɨj matɨꞌɨj mauj ruuricaa, saɨj ajta saɨj.
\p
\v 13 Matɨj manaꞌa puaꞌamua ɨ maj aujamɨ ɨ jaj tzajtaꞌa, aɨ mu huatarú. Majta ɨ seica, ɨ maj huacuii aꞌutɨ naꞌa, capu amɨn tiꞌitɨ pɨrɨcɨ ɨ tɨ huaꞌucuii naꞌari aꞌutɨ aꞌutyajturaa ɨ huaꞌaxaijnyuꞌuca, naijmiꞌi mu majtahuaꞌa huatarú. Ajta Dioj pu naijmiꞌica aꞌuxɨ́jte aɨjna cɨmeꞌe aꞌij mej titetyújchaɨcaꞌa matɨꞌɨj mauj ruuricaa.
\p
\v 14 Cɨmeꞌen puꞌu huaꞌuxɨjte, aɨ pu raꞌupuaꞌari naijmiꞌica tɨ tiꞌityacuiꞌica, ajta aujna aꞌu maj aꞌutyajturaa ɨ mej meri huacuii, ɨ tɨ ayan tyajaꞌarajtyahuaa tɨcɨn Hades. Naijmiꞌica pu atyaahuaꞌaxɨ aɨjna jetze ɨ aꞌalaguun tɨ azufre cɨn áꞌataacaꞌa. Ai pu aɨn pueen ɨ maj huaꞌapuacajretze huacuiꞌini, maj maun aꞌutyaturaasin maujna jetze ɨ aꞌalaguun tɨ azufre cɨn aꞌataa.
\v 15 Tɨ puaꞌa cai ayan teꞌeyuꞌusiꞌihuacajcheꞌe aꞌij tɨ saɨj antyahuaa aɨjna jetze ɨ yuꞌuxari tɨ jetzen teꞌeyuꞌusiꞌihuacaꞌa aꞌij maj antyaꞌaruu aɨme ɨ maj ruuri huatyaturaasin ɨ Dioj jemi, ayaa pu tiꞌijruuren aɨjna ɨ aꞌatɨ tɨ cai áꞌayuꞌusiꞌihuacaꞌa. Dioj pu raꞌatyajraisin aɨjna jetze ɨ aꞌalaguun tɨ azufre cɨn aꞌataa.
\c 21
\s Dioj pu rajajcuareꞌe tajapua tɨ seijreꞌe ajta ɨ chaanaca tɨ yan seijreꞌe
\p
\v 1 Nyatɨꞌɨj ni raaseij a uteꞌe tɨ ari jajcuacan cɨn seijreꞌe. Ajta ɨ chaanaca, ayaa pu cheꞌeta naꞌa jajcuacan cɨn seijreꞌe. Ajta a uteꞌe tɨ miꞌimaꞌacan, ajta ɨ chaanaca tɨ miꞌimaꞌacan, capu cheꞌe meꞌe jeꞌeseijraꞌacaa. Ajta ɨ jaj tɨ veꞌe, capu ajta cheꞌe seijraꞌacaa aꞌini naijmiꞌi pu ahuaujpuaꞌarixɨ.
\v 2 Nyatɨꞌɨj ni raaseij tɨ ávaꞌacámaꞌacaa a uteꞌe aꞌu tɨ Dioj eꞌeseijreꞌe aɨjna ɨ chajtaꞌana tɨ Dioj huatauraꞌate. Ayaa pu tyajaꞌarajtyahuaa tɨcɨn Jerusalén tɨ jajcua. Ayaa pu huaujruu aɨjna ɨ chajtaꞌana tɨj ajta jɨitaꞌa rɨꞌɨ tyuꞌutyaujchejte tɨꞌɨj ari huatevicheꞌesin.
\p
\v 3 Nyatɨꞌɨj ni raanamuajriꞌi tɨ caꞌanin cɨn tyuꞌutaxajtacaꞌa ɨ aꞌatɨ tɨ aun aꞌutyavaacaꞌa jemin ɨ ɨpuari. Ayaa pu tyuꞌutaxajtacaꞌa tɨcɨn:
\p ―Xaaseij, muan, aꞌini puꞌuri hui huataseijreꞌesin huaꞌa jemi ɨ tetyaca aɨjna ɨ chiꞌiraꞌan ɨ Dioj. Aɨ pu huatyaturaasin huaꞌa jemi, majta aɨme, aɨ mu tyaɨtejraꞌan pueenyaꞌa muaꞌajuꞌun. Ajta ɨ Dioj, aɨ pu rusaɨj seiraꞌa aꞌame huaꞌa jemi.
\v 4 Rɨꞌɨ pu hui tihuaꞌutaꞌasin mej mi cai cheꞌe tiꞌitɨj cɨn ruxaamɨstyaꞌa. Camu cheꞌe cuiꞌini. Camu cheꞌe maɨjna cɨn ruxaamɨstyaꞌa muaꞌajuꞌun maɨjna cɨmeꞌe tɨ saɨj huamɨꞌɨ. Camu majta cheꞌe ruyeinyaj muaꞌajuꞌun, camu cheꞌe meyan tirajpueiitzi muaꞌajuꞌun maɨjna cɨmeꞌe tɨ tiꞌitɨ huaꞌacucuiꞌi, aꞌini aɨjna ɨ tɨ miꞌimaꞌacan, aɨ pu ari ahuaujpuaꞌarixɨ. ―Ayaa pu tyuꞌutaxajtacaꞌa aɨjna ɨ aꞌatɨ.
\p
\v 5 Ajta aɨn ɨ tɨ ɨpuari jetze acajca, ayaa pu tyuꞌutaxajtacaꞌa tɨcɨn:
\p ―Maꞌacui xaa, naijmiꞌi ɨ tɨ tiꞌiseijreꞌe, nyaa nu hui raajajcuareꞌen.
\p Ajta ayan tɨcɨn:
\p ―Auteeyuꞌuxa aɨjna, aꞌini nyaa nu tzaahuatiꞌiraꞌa cɨn tiꞌixaxaꞌa nyaɨjna cɨmeꞌe tɨ ayan tiꞌayajna.
\p
\v 6 Aj puꞌi ayan tinaataꞌixaa tɨcɨn:
\p ―Puꞌuri icu. Antipuaꞌaracaꞌa. Nyaa nu hui nyaɨn pueen i nyaj anajca, nyajta i nyaj uveꞌetyajtɨ. Nyaa nu jajcua ɨmɨ huataseijre, nyajta nain nu tyuꞌutaahuacaꞌa tɨ yen tiꞌiseijreꞌe. Nyajta nu nain cɨn raanaijmiꞌireꞌe tɨj naꞌa tɨ ajta tiꞌiseijreꞌe. Aꞌatɨ tɨ naꞌa tɨ nyeetzi jemi aꞌujcaꞌanyen nyej ni neyan tiraataꞌan ɨ́ tɨ tiraꞌaturaateꞌe ɨ tzajtaꞌan, huaapuaꞌa nu tiraataꞌasin nyaɨjna ɨ jaj tɨ aun eꞌiraninyei aꞌu tɨ aꞌajaijxa. Jaj nu xaa tiraataꞌasin tɨ cɨn ruuri aꞌame tɨj naꞌa rusen cɨmeꞌe.
\v 7 Ajta aɨn tɨ tyuꞌutyaamueꞌitɨ, ayaa pu tiꞌijcɨꞌɨti. Nyaa nu Diojraꞌan pueenyaꞌa naꞌame, ajta aɨn, niyauj pu pueenyaꞌa aꞌame.
\p
\v 8 ’Majta aɨme matɨj manaꞌa puaꞌamua maj aꞌij puaꞌa tiꞌityetyújchaꞌɨ nyeetzi jemi, ayaa pu tihuaꞌacɨꞌɨti maj maun aꞌutyaturan aꞌalaguun tɨ azufre cɨn aꞌataasin. Ai pu aɨn pueen ɨ maj cɨn huaꞌapuacajretze huacuiꞌini. Au mu aꞌutyaturaasin aɨme ɨ maj cai áꞌujcaꞌanye maj rajpueijtzi nyeetzi jetze maꞌacan, majta aɨme ɨ maj cai tyaꞌatzaahuateꞌe, majta aɨme ɨ maj huáꞌanahuaꞌaca naijmiꞌica, ɨ tɨꞌɨrii, ma juuca, majta ma tyetyaca. Majta seica maun aꞌutyaturaasin. Ai mu aɨn pueen ɨ mej tiꞌityacuiꞌica, majta ɨ maj ruxanaꞌacɨreꞌe, majta ɨ maj tiꞌichyahuaara, majta aɨme ɨ maj ranaꞌamiche maɨjna ɨ tɨ cai Dioj pueen, majta matɨj manaꞌa puaꞌamua tiꞌihueꞌitaca. Matɨj manaꞌa puaꞌamua mej meyan eꞌen, au mu aꞌutyaturaasin aꞌalaguun. ―Ayaa pu tyuꞌutaxajtacaꞌa aɨjna ɨ Dioj.
\s Jerusalén tɨ jajcua
\p
\v 9 Aj puꞌi, saɨj pu a eꞌireꞌenye inyeetzi jemi. Ai pu aɨn pueenyaꞌa saɨj tɨ tajapua tiꞌivaɨreꞌe tɨ huaꞌa jetze ajtyamaꞌacan ɨ maj arahuaꞌapua araꞌase, ɨ maj ruꞌityatúꞌutujmaꞌacaa ɨ cutzapeꞌe tɨ ajta arahuaꞌapua araꞌase. Ajta aɨjna tzajtaꞌa ɨ cutzapeꞌe, aɨ pu uramuaacaꞌa saɨj ajta saɨj ɨ cuꞌiniꞌiraꞌa ɨ maj cɨn rajpueijtzicaꞌa ɨ tyaɨtye ɨ maj yan seijraꞌacaa japuan i chaanaca, ɨ tɨ ajta arahuaꞌapua araꞌase. Ayaa pu tinaataꞌixaa tɨcɨn:
\p ―Iyaꞌa ji, nyaa nu hui timuaataseijrateꞌesin nyaɨjna ɨ tɨ jemin tyaꞌataujratziiriꞌi ɨ Canyaꞌa tɨ ɨraꞌaraꞌan pueenyaꞌa aꞌame.
\p
\v 10 Cɨmeꞌen puꞌu ayan tinaataꞌixaa, aj puꞌi aɨn xaijnyuꞌucaraꞌan ɨ Dioj huatyajturaa inyeetzi jemi. Aj puꞌi aun nyajaꞌuvíꞌitɨ aꞌu tɨ jɨri aꞌutacáꞌa, tɨ huapɨꞌɨ ajtee, tɨ ajta vaꞌatɨ a aꞌutacáꞌa. Aj puꞌi tinaataseijrate aɨjna ɨ chajtaꞌana ɨ Dioj tɨ huatauraꞌate tɨ ayan tyajaꞌarajtyahuaa tɨcɨn Jerusalén. Au pu u tajapua eꞌicámaꞌacaa aujna tɨ Dioj eꞌeseijreꞌe.
\v 11 Naa pu tiꞌityamastajyeꞌicaa tɨj ajta Dioj huapɨꞌɨ naa seijreꞌe. Ajta aɨjna ɨ tɨ tyamastajyeꞌicaa, ayaa pu seijraꞌacaa tɨj tetej tɨ huapɨꞌɨ tiꞌijnajchi, tɨ ajta naa tiꞌitatza tɨj aɨjna ɨ cristal. Ayaa pu ajta seijraꞌacaa tɨj aɨjna ɨ jaspe.
\p
\v 12 Jaxuꞌu pu cɨn tiraꞌanamiꞌi au tɨ vaꞌatɨ autacáꞌa, tɨ tyamuaꞌa teꞌejtee. Tamuaamuataꞌa japuan huaꞌapua pu aráꞌaxcaa aꞌu tɨ aꞌapueerta. Majta aɨme ɨ maj majta tamuaamuataꞌa japuan huaꞌapua araꞌase aɨme ɨ maj tajapua tiꞌivaɨreꞌe, au mu eꞌityaꞌupuꞌumaꞌacaa aꞌu tɨ aꞌapueertajme saɨj ajta saɨj. Ajta, ɨ pueerta jetze, seij jetze ajta seij, ayaa pu teꞌeyuꞌusiꞌihuacaꞌa aꞌij maj antyaꞌaruu aɨme ɨ tyaɨtestyamuaꞌameꞌen ɨ maj huaꞌa jetze airaujneijte aɨme jetze ɨ yaujmuaꞌameꞌen aɨjna ɨ Israel tyaacan.
\p
\v 13 U Teijmataꞌa pujmeꞌen, hueicaque pu aꞌapueerta, ajta Tzareemeꞌen pujmeꞌen, ajta hueicaque pu ajta aꞌapueerta. Ayaa pu cheꞌeta naꞌa, hueicaque tyaꞌapueerta ajta u Cuameche pujmeꞌen, ajta u Huaahuata pujmeꞌen hueicaque pu ajta aꞌapueerta.
\v 14 Ajta tamuaamuataꞌa japuan huaꞌapua pu tyaꞌaraꞌase ɨ tɨ tajéꞌeste ɨ tɨ ajta japuan ájtaavijhuacaꞌa ɨ jaxuꞌu tɨ cɨn curaꞌanamiꞌihuacaꞌa ɨ chajtaꞌana. Ajta aɨjna jetze ɨ tɨ tajéꞌeste, ayaa pu teꞌeyuꞌusiꞌi aꞌij maj antyaꞌaruu aɨme ɨ maj majta tamuaamuataꞌa japuan huaꞌapua araꞌase, ɨ tɨ ajta Canyaꞌa huaꞌantihuau mej mi maɨn tyajáꞌuxajtanyeꞌen maɨjna jetze maꞌacan.
\p
\v 15 Ajta aɨn tɨ tiꞌineꞌixaatyaꞌacaa, aɨ pu tiꞌitɨ huiitechuaacaꞌa cumu tiꞌitɨ cɨye tɨ ooro cɨn taavijhuacaꞌa. Ai pu aɨn pueenyaꞌa tɨ cɨn raatéꞌiten aꞌachu tɨ caj auyauj ɨ chajtaꞌana, ajta aꞌachu tɨ caj antayauj ɨ pueerta, ajta aꞌachu tɨ ajtee ɨ jaxuꞌu.
\v 16 Ruxaꞌaj pu huatatɨtɨꞌɨjmee. Ayaa pu cheꞌeta naa huatatee tɨj ajta auyauj. Ajta aɨn raateꞌitee ɨ chajtaꞌana aɨjna cɨmeꞌe ɨ cɨye. Ayaa pu huatatee ɨ chajtaꞌana aꞌachu cumu huaꞌapua viꞌiraꞌa kiloometru. Ayaa pu cheꞌeta naꞌa auyauj, ayaa pu cheꞌeta naꞌa ajtee.
\v 17 Aɨ pu ajta raateꞌitee aɨjna ɨ jaxuꞌu. Ayaa pu cheꞌeta naꞌa tiraateꞌitee matɨj tiꞌijrɨꞌɨre ɨ tetyaca. Ayaa pu ajtee aꞌachu cumu hueicate japuan anxɨvi meetru.
\p
\v 18 Ajta ɨ jaxuꞌu, tetej pu cɨn ájtaavijhuacaꞌa mej meyan ratamuaꞌamua tɨcɨn jaspe. Ajta aɨn ɨ chajtaꞌana, nain pu cɨn taavijhuacaꞌa aɨjna cɨmeꞌe ɨ ooro tɨ naa tyáꞌajtaave tɨj ɨ viidriu.
\p
\v 19 Ajta aɨjna ɨ tɨ tajéꞌeste, tɨ ajta japuan ájtaavijhuacaꞌa aɨjna ɨ jaxuꞌu ɨ tɨ cɨn curaꞌanamiꞌi ɨ chajtaꞌana, naa pu rɨꞌɨ tirúurijhuacaꞌa tɨj naꞌa tɨ eꞌeseijreꞌe aɨjna cɨmeꞌe ɨ tetej tɨ huapɨꞌɨ tiꞌijnajchi. Aɨjna tɨ saɨj, aɨn pueenyaꞌa ɨ jaspe. Ajta ɨ tɨ huaꞌapua, zafiro pu pɨrɨcɨ. Ajta ɨ tɨ hueica, aɨ pu pueenyaꞌa aɨjna ɨ ágata tɨ sɨɨchiraꞌa. Ajta ɨ tɨ muaacua, aɨ pu pɨrɨcɨ ɨ esmeralda, tɨ ruꞌaararaꞌa.
\p
\v 20 Ajta ɨ taꞌanxɨvi, ai pu aɨn pueen aɨjna ɨ ónice tɨ yuꞌuxareꞌe. Ajta ɨ taꞌarajsevi, aɨ pu pɨrɨcɨ aɨjna ɨ cornalina tɨ iꞌipaꞌu. Ajta ɨ saɨj, ɨ tɨ arahuaꞌapua, crisólito pu pɨrɨcɨ tɨ tyaumuaraꞌa. Ajta ɨ saɨj, ɨ taꞌarahueica, berilo pu pɨrɨcɨ tɨ ruꞌaararaꞌa seijreꞌe, ɨ tɨ ajta cɨj caj tiꞌityaumuaraꞌa. Ajta ɨ tɨ aramuaacua, aɨ pu pɨrɨcɨ ɨ topacio tɨ naa tiꞌityaumuaraꞌa, tɨ ajta naa tiꞌitatza. Ajta ɨ seica, ayaa pu tiꞌen. Ɨ tɨ tamuaamuataꞌa, aɨ pu pɨrɨcɨ ɨ crisoprasa tɨ naa tiꞌityaumuaraꞌa, tɨ ajta cɨj tiꞌiruꞌaararaꞌa. Ajta ɨ tɨ tamuaamuataꞌa japuan saɨj, jacinto pu pueen tɨ tyaɨjraviꞌin cɨn nacamua. Ajta aɨn tɨ tamuaamuataꞌa japuan huaꞌapua araꞌase, ai pu aɨn pueenyaꞌa aɨjna ɨ amatista tɨ naa tiꞌijámuaꞌara.
\p
\v 21 Ajta aɨjna ɨ pueerta tɨ tamuaamuataꞌa japuan huaꞌapua araꞌase, aɨ pu cɨn taavijhuacaꞌa aɨjna cɨmeꞌe ɨ peerla, saɨj ajta saɨj ɨ pueerta, seij cɨmeꞌe ɨ peerla. Ajta ɨ caaye jetze, nain pu ooro cɨn taavijhuacaꞌa tɨ ajta ayan naa tiꞌitatza tɨj aɨjna ɨ viidriu.
\p
\v 22 Nyajta nu neyan raaseij tɨ cai teyuu maꞌa aꞌahuaꞌacaa aujna chajtaꞌana aꞌini aꞌu tɨ naꞌa aujna chajtaꞌana meyan ranaꞌamiche maɨjna ɨ tavastaraꞌa, ɨ Dioj, aɨn tɨ nain cɨn antyujmuaꞌaree, majta maɨjna ɨ Canyaꞌa.
\v 23 Capu ajta ruxeꞌeveꞌe tɨ aɨn xɨcaj huaꞌatatzaviꞌira tujcaꞌari tzajtaꞌa huaꞌa japua ɨ tyaɨte. Capu ajta ruxeꞌeveꞌe tɨ aɨn maxcɨraꞌi tatzavaꞌa tɨcaꞌari tzajtaꞌa aꞌini aɨjna ɨ tɨ Dioj cɨn rusaɨj tyámastájyeꞌi, ai pu aɨn pueen tɨ huaꞌatatzaviꞌira huaꞌa japua. Ajta aɨjna ɨ Canyaꞌa, ai pu aɨn pueen ɨ tatzari tɨ huaꞌa jemi huatatza.
\v 24 Ajta aɨjna tɨ huaꞌatátza huaꞌa japua ɨ maj maun huachaatɨme chajtaꞌa, aɨ pu huaꞌatatzaviꞌira aꞌame huaꞌa japua aɨme ɨ mej seij chuejraꞌa japua eꞌemaꞌacan.
\p Majta aɨme ɨ maj tihueꞌijteꞌe aɨme ɨ maj yan huachaatɨme i chaanaca japua, au mu aꞌuvaꞌajuꞌu muaꞌajuꞌun u chajtaꞌa mej mi rɨꞌɨ tiraatyajtuaani ɨ Dioj nain cɨmeꞌe ɨ maj cɨn rutyamuaꞌaveꞌe, majta nain cɨn mej tíꞌijchaꞌɨ tɨ eihua huapɨꞌɨ tiꞌijnajchi.
\p
\v 25 Camu aꞌanaj teꞌityanajsin tujcaꞌari tzajtaꞌa aꞌu tɨ aꞌapueerta aujna chajtaꞌa. Capu ajta aꞌanaj huatyatɨcaꞌari aujna.
\v 26 Au mu yaꞌaraꞌasin ɨ maj vaꞌacan cɨn títyatatí, ajta ɨ tɨ eihua huapɨꞌɨ tiꞌijnajchi, tɨ ajta naa tiꞌiseijreꞌe. Ayaa mu raruuren matɨj manaꞌa puaꞌamua seij chuejraꞌa japua mej eꞌemaꞌacan.
\v 27 Capu rɨꞌɨrista aꞌame tɨ tiꞌitɨ tɨ xanaꞌaviꞌiraꞌa pueen aun aꞌutyaturan aujna chajtaꞌana. Capu ajta huaꞌataꞌacareꞌen mej mi maun aꞌutyarute aɨme ɨ maj aꞌij puaꞌa tiꞌityujchaꞌɨ naꞌari aɨme ɨ mej tiꞌihueꞌitaca silu aɨme muꞌu maun aꞌutyaruti ɨ maj cɨmeꞌen ayan teꞌeyuꞌusiꞌi aꞌij mej antyaꞌaruu aɨjna jetze ɨ yuꞌuxari ɨ mej meyan ruurican huatyaturan maɨjna jemi ɨ Canyaꞌa.
\c 22
\s Cɨmeꞌen ɨ jatyaꞌana, ajta ɨ cɨye tɨ aun eꞌeseijreꞌe
\p
\v 1 Aj puꞌi tinaataseijrate aɨjna ɨ jatyaꞌana tɨ jetzen airaanye aꞌu tɨ aꞌutejvee ɨ ɨpuari tɨ jetzen acajca ɨ Dioj, ajta aɨjna ɨ Canyaꞌa. Ajta aɨjna ɨ jaj tɨ mɨꞌɨye, tyamuaꞌa pu naa tyuꞌumuaꞌatɨ́. Naa pu ajta tiꞌitatza tɨj ɨ cristal. Ai pu aɨn pueen ɨ jaj ɨ tɨ cai aꞌanaj atyaxɨꞌɨsin.
\v 2 Eꞌitaꞌa pu mɨꞌɨye ɨ caaye jetze tɨ aun aꞌatanínyeꞌij ɨ chajtaꞌana jetze.
\p Ajta, cɨye atavaatɨmaꞌacaa aꞌutɨ avastɨmee ɨ jaj, seica ayun pujmeꞌen, ajta seica u jetze pujmeꞌen. Ai pu aɨn pueen aɨjna ɨ cɨye ɨ maj cɨn ruuri muaꞌaraꞌani. Tamuaamuataꞌa japuan huaꞌapua pu araꞌase ɨ tɨ cɨn taajcaj tɨj naꞌa seij maxcɨraꞌi jetze pɨtiꞌirɨjcaa, aj puꞌi ajta seica cɨn tacaꞌan aɨjna ɨ cɨye. Ajta ɨ xamueꞌiraꞌan, ayaa pu tiꞌivaɨreꞌe mej mi maɨjna cɨn huaujrujteꞌen aɨme ɨ mej seij chuejraꞌa japua eꞌemaꞌacan.
\p
\v 3 Capu cheꞌe aun seiraꞌa aꞌame ɨ tiꞌitɨ tɨ Dioj ayan tiraaxaꞌapɨꞌɨntare tɨ ayan pueijtzi tiraataꞌan silu au mu aꞌujtyaꞌa muaꞌajuꞌun ɨ Dioj jamuan, majta aɨme ɨ maj maun huachaatɨme maujna chajtaꞌana jamuan aɨjna ɨ Canyaꞌa. Aɨ mu tyuꞌutaijta, majta aɨme ɨ mej tiꞌivaɨreꞌe, aɨ mu ranaꞌamichaꞌa muaꞌajuꞌun.
\v 4 Aɨ mu jemin seiraꞌa muaꞌajuꞌun, ajta aj pu aꞌaseiiraꞌa aꞌame aj huaꞌacuaatzeꞌe aꞌij tɨ antyahuaa aɨjna.
\v 5 Capu cheꞌe aꞌanaj huatyatɨcaꞌari aujna. Capu cheꞌe ruxeꞌevaꞌa aꞌame mej meyan tatzari cɨn huatyaujtatzaviꞌi naꞌari ayan tɨ huaꞌutyatatzaviꞌin ɨ xɨcaj, aꞌini aɨ pu tavastaraꞌa tɨ ajta Dioj pueen, aɨ pu huaꞌatatzaviꞌira aꞌame. Majta aɨme, aɨ mu tieꞌijta muaꞌajuꞌun tɨj naꞌa rusen cɨmeꞌe.
\s Tɨꞌɨj uvéꞌenyen ɨ Cɨriistuꞌu
\p
\v 6 Aj puꞌi ayan tinaataꞌixaa tɨcɨn:
\p ―Ayaa pu hui tiꞌayajna aꞌij nyej tiꞌimueꞌixaateꞌe aꞌini tzaahuatiꞌiraꞌa nu cɨn tiꞌixa. Ajta aɨn tavastaraꞌa, aɨjna tɨ u yaꞌutaityacaꞌa ɨ ruxaijnyuꞌuca tɨꞌij huaꞌa jemi huatyaturan aɨme ɨ mej Dioj jetze maꞌacan tiꞌixaxaꞌataꞌa, aɨ pu ari naataityacaꞌa i nyaj tajapua tiꞌivaɨreꞌe nyej ni tihuaꞌutaseijrateꞌen aɨme ɨ mej ravaɨreꞌe ɨ Dioj aꞌij tɨ tyuꞌujxeꞌeveꞌe tɨ caꞌanacan ayan tyajaꞌureꞌenyen.
\p
\v 7 ―Maꞌacui xaa, nyaa nu hui mu aꞌuvaꞌamaꞌa naꞌame.
\p Rɨꞌɨ pu tirataꞌaca aɨjna tɨ ayan aráurasten aꞌij tɨ teꞌeyuꞌusiꞌi aijna i yuꞌuxari jetze.
\p
\v 8 Nyajta inyaa, i nyaj iꞌi Juan, nyaa nu nyaɨn pueen nyaj raanamuajriꞌi, nyajta nyaj raaseij aꞌij tɨ teꞌeyuꞌusiꞌi aijna jetze i yuꞌuxari. Cɨmeꞌen nuꞌu neyan tiraanamuajriꞌi, nyajta tyuꞌuseij, aj nu ni neyan aꞌicantutzi aꞌu tɨ aꞌaraɨɨcajme aɨjna ɨ tɨ tajapua tiꞌivaɨreꞌe, tɨ ajta tinaataseijrate nyej ni raatyanajche. Aj nu ni raatyánaachecheꞌe nicu.
\v 9 Ajta aɨn, ayaa pu tinaataꞌixaa tɨcɨn:
\p ―Capaj hui peyan nyaruuraꞌa muaa, aꞌini ayaa nu cheꞌeta nyanaꞌa tiꞌivaɨreꞌe ɨ Dioj jemi patɨj muaa, ajta matɨj majta aɨme ɨ aꞌihuaamuaꞌa ɨ mej Dioj jetze maꞌacan tiꞌixaxaꞌataꞌa, majta matɨj manaꞌa puaꞌamua arauraste aꞌij tɨ teꞌeyuꞌusiꞌi eijna jetze ɨ yuꞌuxari. Pataꞌaj paɨjna papuꞌu huatyaanajche ɨ Dioj.
\p
\v 10 Aj puꞌi ayan tinaataꞌixaa tɨcɨn:
\p ―Capaj hui raꞌavaata ɨ nyuucari tɨ eijna jetze aꞌayuꞌusiꞌi i yuꞌuxari, tɨ ajta Dioj jetze maꞌacan tiꞌixa, aꞌini puꞌuri tɨn ajna tyajaꞌureꞌenyejsin ajna xɨcajraꞌan jetze tɨꞌɨj naijmiꞌi teꞌentipuaꞌari.
\v 11 Ajta ɨ tɨ hui aꞌij puaꞌa tiꞌityujchaꞌɨ, cheꞌe auj ayan aꞌij puaꞌa tiꞌityujchaꞌɨ. Ajta ɨ tɨ xanaꞌaviꞌireꞌe, cheꞌe auj xanaꞌavisiꞌi seijraꞌa. Ajta ɨ tɨ urareꞌenyaꞌacan cɨn seijreꞌe ɨ Dioj jemi, cheꞌe auj ayan rɨꞌɨ tiꞌiseijraꞌa aꞌaraꞌani.
\p
\v 12 ―Maꞌacui xaa, nyaa nu hui caꞌanacan mu aꞌuveꞌemaꞌa naꞌame nyej ni huaꞌutaꞌan aꞌij tɨ tiraamueꞌitɨn, nyej ni neyan tihuaꞌutaꞌan matɨj manaꞌa puaꞌamua ɨ mej tiraamueꞌitɨ, saɨj ajta saɨj, aꞌij tɨ tiraavijteꞌe.
\v 13 Nyaa nu nyaɨn pueen i taꞌanajca, nyajta i nyaj tuꞌuveꞌetyajtɨ, nyajta nyaɨn pueen i nyaj jajcua ɨmɨ huataseijre, nyajta nyaɨn pueen i nyej yan seiraꞌa naꞌame tɨj naꞌa rusen cɨmeꞌe. Nyaa nu nyajta nyaɨn pueen i nyej nyejmiꞌi huataseijre tɨꞌɨj cai xɨ tiꞌitɨ meꞌeseijraꞌacaa, nyajta nu nyaɨn pueen i nyaj nain ancuraꞌasin tɨꞌɨj teꞌentipuaꞌari tɨj naꞌa tɨ ijii tiꞌiseijreꞌe.
\p
\v 14 Rɨꞌɨ pu tihuaꞌutaꞌaca aɨme ɨ maj tiꞌijaꞌusica ɨ rucɨɨxu tɨꞌij ayan tihuaꞌucɨꞌɨti maj maɨjna jetze raacuaꞌani ɨ cɨye ɨ maj cɨn ruuri huatyaturan, mej mi majta maun aꞌutyarute maujna chajtaꞌa maɨjna jetze aꞌu tɨ aꞌapueerta.
\v 15 Ajta a puaꞌaque, au mu aꞌutyáuu muaꞌajuꞌun aɨme ɨ maj aꞌij puaꞌa titetyújchaꞌɨ, majta aɨme ɨ mej tiꞌichyahuaara, majta aɨme ɨ maj ruxanaꞌacɨreꞌe. Aɨ mu majta a puaꞌaque aꞌutyáuu muaꞌajuꞌun aɨme ɨ mej tiꞌityacuiꞌica, majta ɨ maj ranaꞌamiche ɨ tɨ cai Dioj pueen, majta matɨj manaꞌa puaꞌamua ɨ tɨ ayan tihuaꞌaraanajchi tɨ hueꞌitzi pueen, majta ɨ maj tiꞌihueꞌitaca.
\s Jesús pu tyaꞌanxájta
\p
\v 16 ―Inyaa, i nyaj Jesús pueen, nyaa nu u yaꞌutaityacaꞌa muejmi jemi nyaɨjna tɨ nyavaɨreꞌe tɨꞌij aɨn tyaꞌanxájta huaꞌa jemi aɨme ɨ maj maun eꞌetyujsaꞌɨri mej mi raatyaanajche ɨ Dioj. Nyaa nu nyaɨjna jetze huanyej ɨ David tyaacan. Nyaa nu huaacɨxaꞌaraꞌan pueen aɨjna ɨ David.
\s Aɨn tɨ huateeviche raataꞌineesin tɨ uvéꞌenyen
\p
\v 17 Ajta aɨn xaijnyuꞌucaraꞌaraꞌan ɨ Dioj, ajta aɨn tɨ auchan huateeviche, ayaa mu tiꞌixa tɨcɨn:
\p ―Cheꞌe mu aꞌuveꞌemeꞌen.
\p Ajta ɨ tɨ ranamua, cheꞌe ajta aɨn ayan tyuꞌutaxaj yee:
\p ―Cheꞌe aɨn mu aꞌuveꞌemeꞌen.
\p Ajta ɨ tɨ jetzen áꞌujcaꞌanye tɨ ayan tiraꞌaraꞌastijreꞌen, cheꞌe aꞌatɨ tɨ naꞌa ayan mu aꞌuveꞌemeꞌen, cheꞌe ajta huaapuaꞌa raꞌancuraꞌan ɨ jaj tɨ cɨn ruuri huatyaturan.
\s Aɨ pu taatájeevi ɨ Jesús
\p
\v 18 Ayaa nu neyan tihueꞌijcateꞌe aꞌatɨ tɨ naꞌa tɨ ranamua aꞌij tɨ teꞌeyuꞌusiꞌi aijna i yuꞌuxari jetze tɨ Dioj jetze maꞌacan tiꞌixa, tɨ puaꞌa aꞌatɨ ayan saɨque tyuꞌutaxaj, Dioj pu pueijtzi raataꞌasin aꞌij tɨ teꞌeyuꞌusiꞌi aijna jetze i yuꞌuxari.
\v 19 Ajta tɨ puaꞌa aꞌatɨ raꞌurauuna ɨ tiꞌitɨ tɨ aijna jetze teꞌeyuꞌusiꞌi tɨ Dioj jetze maꞌacan tiꞌixa, Dioj pu ajta ráꞌariꞌira aɨjna tɨꞌij cai cheꞌe raacɨꞌɨti tɨ aɨn aɨjna jetze raacuaꞌani aɨjna ɨ cɨye tɨ cɨn ruuri aꞌaraꞌani. Capu ajta cheꞌe ayan tiꞌijcɨꞌɨti tɨ aɨn aun aꞌutyarute ɨ chajtaꞌana jetze aꞌu tɨ Dioj hautauraꞌate. Ayej teꞌeyuꞌusiꞌi aijna i yuꞌuxari jetze.
\s Juan pu ayan tyeꞌevéꞌenyuuve
\p
\v 20 Nyajta inyaa, i nyaj tyaꞌanxájta nyaɨjna cɨmeꞌe, ayaa nu tiꞌixa nyeijna cɨmeꞌe tɨ ayan tiꞌayajna nyaj caꞌanacan mu aꞌuveꞌemaꞌa naꞌame.
\p Cheꞌe ayan tyajaꞌureꞌenyen, pataꞌaj ya uvéꞌenyen, tavastaraꞌa, mɨ paj Jesús pueen.
\p
\v 21 Cheꞌe aɨn tavastaraꞌa tɨ ajta Jesús pueen, cheꞌe aɨn rɨꞌɨ tihuaꞌutaꞌan aɨme ɨ maj tyaɨtestyamuaꞌameꞌen pueen ɨ Dioj. Cheꞌe ayan tyajaꞌureꞌenyen. Ayaa pu teꞌentipuaꞌaracaꞌa nyuucaraꞌaraꞌan ɨ tavastaraꞌa.