\id ROM
\h ROMANOS
\mt Quityi nu nguscua San Pablo ndyaa ca slo ñati̱ jiˈi̱ Jesucristo nde quichi̱ Roma
\c 1
\p
\v 1 Pablo laca naˈ nu nscua̱ quityi re chaˈ ca̱a̱ nde quichi̱ Roma ca su ndiˈi̱ ma̱, cuˈma̱ nu ngusñi ma̱ chaˈ jiˈi̱ Jesucristo. Ndyuˈni naˈ cña jiˈi̱ ycuiˈ Ndyosi, chaˈ ycuiˈ Ni ngusubi Ni jnaˈ chaˈ tsaˈa naˈ chcuiˈ naˈ chaˈ tsoˈo jiˈi̱ Ni loˈo ñati̱.
\p
\v 2 Nu loˈo tya lyiji ca̱a̱ Jesucristo nde chalyuu, tya liˈ cua nchcuiˈ liñi ycuiˈ Ndyosi ñiˈya̱ nu caca chaˈ biˈ tyempo nu lijya̱ nde loo la. Cua nda Ni chaˈ biˈ loˈo xi ñati̱ nu ngua tuˈba jiˈi̱ ycuiˈ Ni, chaˈ nchcuiˈ Ni loˈo ñati̱ nu ngua saˈni la; nguscua nguˈ chaˈ biˈ lo quityi liˈ.
\v 3 Chaˈ tsoˈo jiˈi̱ Jesucristo nu Xuˈna na, nu laca Sñiˈ ycuiˈ Ndyosi, biˈ laca chaˈ nu nscua lo quityi biˈ. Ngula Jesús lo yuu ñiˈya̱ nu nclya cua ñaˈa̱ ca sñiˈ ñati̱, chaˈ la cuiˈ tyaˈa ñati̱ jiˈi̱ jyoˈo David laca Jesús;
\v 4 loˈo juaˈa̱ laca Jesús nu sca ti Sñiˈ nu ntsuˈu jiˈi̱ ycuiˈ Ndyosi. Ndiˈya̱ caca cuayáˈ tsoˈo tiˈ na chaˈ biˈ: chacuayáˈ jiˈi̱ ycuiˈ Ndyosi Sti yu ndyuˈú Jesús chaca quiyaˈ loˈo cua ngujuii yu, tlyu tsa chaˈ nguaˈni Ni liˈ. Nu loˈo nda ycuiˈ Ndyosi Xtyiˈi ycuiˈ Ni jiˈi̱ Jesús, nda Ni chaˈ loˈo na chaˈ Sñiˈ ycuiˈ ca Ni laca nu Jesús biˈ.
\v 5 Tsoˈo tsa nguaˈni ycuiˈ Ndyosi loˈo naˈ xquiˈya Jesucristo. Cua ngulo Ni cña jnaˈ chaˈ tsaˈa naˈ tyucui ñaˈa̱ chalyuu mala su ndiˈi̱ ñati̱; chacuayáˈ jiˈi̱ ycuiˈ Ni tsaˈa naˈ chcuiˈ naˈ chaˈ tsoˈo jiˈi̱ ycuiˈ Ndyosi loˈo ñati̱. Ntiˈ Ni chaˈ caja ñati̱ jiˈi̱ ycuiˈ Ni lcua ti seˈi̱, ñati̱ nu xñi chaˈ jiˈi̱ ycuiˈ Ni, ñati̱ nu taquiyaˈ jiˈi̱ chaˈ nu nchcuiˈ Ni.
\v 6 Loˈo cuˈma̱ ni, cua ngusubi Ni jiˈi̱ ma̱ chaˈ caca ma̱ ñati̱ jiˈi̱ Jesucristo.
\p
\v 7 Nscua naˈ quityi re chaˈ ca̱a̱ nde quichi̱ Roma ca su ndiˈi̱ ma̱. Nda naˈ xlyo niˈi̱ jiˈi̱ ma̱ cuentya jiˈi̱ ycuiˈ Ndyosi Sti na, cuentya jiˈi̱ Jesucristo nu Xuˈna na, chaˈ ntsuˈu tsa tyiquee ycuiˈ Ndyosi ñaˈa̱ Ni jiˈi̱ ma̱. Cua ngusubi Ni jiˈi̱ ma̱ chaˈ tyucui tyiquee ma̱ taca caca ma̱ ñati̱ jiˈi̱ Ni. Ndiˈya̱ ntiˈ naˈ, chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱ xquiˈya Jesucristo nu Xuˈna na.
\s Ntiˈ tsa Pablo tsaa naˈa̱ xi jiˈi̱ nguˈ biˈ
\p
\v 8 Su nguxana ti quityi re, ndyuˈni tlyu naˈ jiˈi̱ ycuiˈ Ndyosi xquiˈya Jesucristo. Tsoˈo tsa ntiˈ naˈ chaˈ cua ngusñi lcaa tyaˈa ma̱ chaˈ jiˈi̱ Jesús, ca lcaa quichi̱ ndañi chaˈ jlya tiˈ ma̱ chaˈ biˈ.
\v 9 Loˈo naˈ ni, cua ngujui cña jnaˈ chaˈ chcuiˈ naˈ chaˈ tsoˈo jiˈi̱ Jesucristo Sñiˈ ycuiˈ Ndyosi loˈo xaˈ ñati̱; tyucui tyiquee naˈ ndyuˈni naˈ cña biˈ cuentya jiˈi̱ Ni. Jlo tiˈ ycuiˈ Ndyosi chaˈ luˈba ti ndyiˈu tiˈ naˈ jiˈi̱ ma̱ laja loˈo nchcuiˈ naˈ loˈo ycuiˈ Ni.
\v 10 Loˈo juaˈa̱ lcaa tsa̱ ndijña naˈ chacuayáˈ jiˈi̱ Ni chaˈ tsaˈa naˈ slo cuˈma̱, chaˈ tyiˈi̱ naˈ xi loˈo ma̱, cua ñaˈa̱ ca hora nu ntiˈ ycuiˈ Ni.
\v 11 Ntiˈ tsa naˈ tyacua tyaˈa naˈ xi loˈo cuˈma̱, chaˈ cua ntiˈ naˈ ta̱ sca cui̱i̱ loˈo ma̱; Xtyiˈi ycuiˈ Ndyosi laca nu xtyucua ˈna, chaˈ taca jlya la tiˈ ma̱ jiˈi̱ Jesús. Liˈ tyatí̱ la tiˈ tyiquee ma̱.
\v 12 Tsoˈo si caca cuaˈni na chaˈ caca tyatí̱ la tiˈ tyiquee tyaˈa na, chaˈ stuˈba ti xñi tsoˈo la na chaˈ jiˈi̱ Jesús liˈ.
\p
\v 13 Cuˈma̱ tyaˈa ngusñi na chaˈ jiˈi̱ Jesús, ntiˈ naˈ chaˈ caca cuayáˈ tiˈ ma̱ ñiˈya̱ nu ntsuˈu tyiquee naˈ ñaˈa̱ naˈ jiˈi̱ cuˈma̱. Tyu̱u̱ quiyaˈ ngua tiˈ naˈ ca̱a̱ naˈ ca su ndiˈi̱ ma̱, pana hasta juani bilya caja ñiˈya̱ caca nu ca̱a̱ naˈ. Ñiˈya̱ nu nguaˈni naˈ ca xaˈ loyuu chalyuu, juaˈa̱ cua ntiˈ naˈ chaˈ caca su ndiˈi̱ cuˈma̱; ntiˈ naˈ chaˈ taquiyaˈ xaˈ la ñati̱ chaˈ jiˈi̱ Jesús, loˈo juaˈa̱ ntiˈ naˈ chaˈ tya culuˈu la naˈ chaˈ biˈ jiˈi̱ ma̱.
\v 14 Cua ngulo Ni cña ˈna chaˈ tsaˈa̱ chcui̱ˈ loˈo nguˈ xaˈ tsuˈ, masi ndiˈi̱ nguˈ biˈ quichi̱ tonu, masi ndiˈi̱ nguˈ tyijyuˈ la ca neˈ quixi̱ˈ; ngulo Ni cña jnaˈ chaˈ sca ti chaˈ chcuiˈ naˈ loˈo nguˈ, masi loˈo nguˈ nu nchca tsa jiˈi̱, masi loˈo nguˈ nu ná ndyiˈya cuentya tsiyaˈ ti.
\v 15 Biˈ chaˈ ntiˈ naˈ tsaˈa̱ chaˈ chcuiˈ naˈ chaˈ tsoˈo jiˈi̱ ycuiˈ Ndyosi loˈo cuˈma̱ nguˈ Roma, ñiˈya̱ loˈo cua nda naˈ chaˈ biˈ loˈo xaˈ ñati̱.
\s Tlyu tsa chaˈ tsoˈo nu ntsuˈu jiˈi̱ chaˈ nu nda Jesús chaˈ chcuiˈ na loˈo ñati̱
\p
\v 16 Ná ntyujuˈu tiˈ naˈ tsiyaˈ ti chaˈ culuˈu naˈ chaˈ tsoˈo nu ntsuˈu jiˈi̱ Jesús jiˈi̱ ñati̱. Lijya̱ chaˈ biˈ loˈo lcaa chacuayáˈ jiˈi̱ ycuiˈ Ndyosi, chaˈ cuaˈni lyaá Ni jiˈi̱ lcaa ñati̱ nu xñi chaˈ jiˈi̱ ycuiˈ Ni. Tya clyo nda Ni chaˈ tsoˈo biˈ loˈo nguˈ judío ti, liˈ loˈo nda Ni chaˈ tsoˈo biˈ loˈo nguˈ xaˈ tsuˈ.
\v 17 Loˈo cuna na chaˈ tsoˈo jiˈi̱ Jesús biˈ, liˈ caca cuayáˈ tiˈ na ñiˈya̱ nduˈni ycuiˈ Ndyosi chaˈ ca tsoˈo cresiya jiˈi̱ ñati̱ cuxi; xquiˈya chaˈ nu jlya tiˈ na jiˈi̱ cña nu nguaˈni Jesús, biˈ chaˈ taca caca tsoˈo cresiya jiˈi̱ ñati̱ cuxi na, sca ti si xñi na chaˈ jiˈi̱ ycuiˈ Ni. Ndiˈya̱ ndyuˈu sca chaˈ nu nscua lo quityi cusuˈ: “Nu loˈo jlya tiˈ na jiˈi̱ ycuiˈ Ni chaˈ taca cuaˈni Ni chaˈ caca tsoˈo cresiya jiˈna, liˈ caja sca chalyuu nu ná ngaˈa̱ chaˈ tye jiˈna”.
\s Yabeˈ nu ndyanu hichu̱ˈ ñati̱ chalyuu
\p
\v 18 Loˈo cuna na chaˈ jiˈi̱ Jesús biˈ, liˈ ca cuayáˈ tiˈ na chaˈ ñasi̱ˈ tsa ycuiˈ Ndyosi ca su ntucua Ni nde cua̱; xcubeˈ tsa ycuiˈ Ni jiˈi̱ cua ñaˈa̱ ca ñati̱ cuxi. Na ñasi̱ˈ Ni jiˈi̱ nguˈ biˈ, chaˈ cuxi tsa nduˈni nguˈ; cuxi tsa nguˈ biˈ, loˈo juaˈa̱ ná nda nguˈ chacuayáˈ cuna xaˈ ñati̱ lcaa ñaˈa̱ chaˈ liñi nu cua nda ycuiˈ Ndyosi loˈo ñati̱ chalyuu.
\v 19 Nchca cuayáˈ tiˈ nguˈ cuxi biˈ lcaa lo chaˈ nu caca cuayáˈ tiˈ ñati̱ nquichaˈ, chaˈ jiˈi̱ ycuiˈ Ndyosi, chaˈ cua nguluˈu ycuiˈ Ni chaˈ biˈ jiˈi̱ nguˈ.
\v 20 Ycuiˈ Ndyosi ni, ná nchca jiˈna ñaˈa̱ na jiˈi̱ Ni ca su ntucua Ni nde cua̱, ni ná taca ca cuayáˈ tiˈ na ñiˈya̱ laca chaˈ ná tye chca chaˈ tlyu nu nduˈni Ni. Pana tya loˈo nguxana chalyuu tya clyo, tya liˈ taca tyuloo na jiˈi̱ ycuiˈ Ni; tya liˈ ngujui ñiˈya̱ caca cuayáˈ tiˈ na tilaca laca ycuiˈ Ni, si clyana na jiˈi̱ Ni. Taca tyuloo ñati̱ jiˈi̱ Ni loˈo ñaˈa̱ nguˈ jiˈi̱ lcaa lo na nu ngüiñá Ni. Biˈ chaˈ ná ntsuˈu chaˈ clyu tiˈ jiˈi̱ ycuiˈ Ndyosi loˈo ñati̱ cuxi biˈ.
\v 21 Masi nslo nguˈ cuxi biˈ tilaca laca ycuiˈ Ni, ná ntajaˈa̱ nguˈ biˈ cuaˈni tlyu nguˈ jiˈi̱ Ni; masi ycuiˈ Ndyosi laca Ni, ná ndya nguˈ biˈ xlyaˈbe jiˈi̱ Ni. Xcuiˈ chaˈ cuxi ti ntsuˈu tyiquee nguˈ. Ngüichi̱ yaa chaˈ hique nguˈ chaˈ ná ntajaˈa̱ nguˈ xñi nguˈ chaˈ liñi biˈ. 
\v 22 Nacui̱ nguˈ chaˈ nchca tsa jiˈi̱ ycuiˈ ca nguˈ, pana lye tsa ndyuˈni tyucuaa tiˈ nguˈ loˈo nchcuiˈ nguˈ juaˈa̱; ple tsa nguˈ xquiˈya chaˈ cuxi nu nduˈni nguˈ. 
\v 23 Ná ntiˈ nguˈ cuaˈni tlyu nguˈ jiˈi̱ ycuiˈ Ndyosi nu laca loo la, la cuiˈ Ni laca nu ná tye chalyuu jiˈi̱ tsiyaˈ ti; ndiya la tiˈ nguˈ cuaˈni tlyu nguˈ jiˈi̱ lcui̱ ñati̱ nu ndyijii ti. Loˈo juaˈa̱ nduˈni tlyu nguˈ jiˈi̱ lcui̱ quiñi nu ndacui nde cua̱, loˈo jiˈi̱ lcui̱ naˈni nu ntucua quiyaˈ, loˈo jiˈi̱ lcui̱ naˈni nu nsubeˈ neˈ niˈ lo yuu; biˈ laca chaˈ nu nduˈni tlyu nguˈ jiˈi̱. 
\p
\v 24 Biˈ chaˈ cua ngulayaˈ Ni jiˈi̱ nguˈ cuxi biˈ; juani cua nda Ni tyempo jiˈi̱ nguˈ chaˈ caca subaˈ nguˈ, chaˈ cuaˈni subaˈ nguˈ loˈo tyaˈa nguˈ, sca lo chaˈ cuxi nu ntyujuˈu tsa tiˈ na chaˈ chcuiˈ na jiˈi̱.
\v 25 Cua nguxtyanu nguˈ biˈ lcaa chaˈ liñi nu nguluˈu ycuiˈ Ndyosi jiˈi̱ nguˈ, ndiya la tiˈ nguˈ chaˈ xñi nguˈ lcua ti lo chaˈ cuiñi; nduˈni tlyu nguˈ jiˈi̱ joˈó cuiñi, ndaquiyaˈ nguˈ jiˈi̱ lcui̱ scaa na nu cua ngüiñá ti ycuiˈ Ndyosi, ngaˈaa siˈi jiˈi̱ ycuiˈ Ni nu ngüiñá chaˈ biˈ nduˈni tlyu nguˈ. La cuiˈ ycuiˈ Ndyosi nu ntsuˈu tsa tyiquee na ñaˈa̱ na jiˈi̱, chaˈ xcuiˈ tsoˈo ti nduˈni Ni loˈo na laca Ni. Juaˈa̱ laca chaˈ tuˈni. 
\p
\v 26 Nguxtyanu Ni jiˈi̱ nguˈ cuxi lacua, chaˈ cuaˈni subaˈ nguˈ loˈo tyaˈa nguˈ; sca lo chaˈ cuxi nu ná ntiˈ na chcuiˈ na jiˈi̱ loˈo ñati̱, biˈ laca chaˈ cuxi nu nduˈni nguˈ biˈ. La cuiˈ ti nu nguˈ cunaˈa̱ ngaˈaa ndiˈi̱ loˈo nguˈ quiˈyu ñiˈya̱ nu ndiˈi̱ cua ñaˈa̱ ca ñati̱ tsoˈo, xcuiˈ loˈo tyaˈa cunaˈa̱ ti nduˈni nguˈ chaˈ subaˈ; 
\v 27 loˈo juaˈa̱ nu nguˈ quiˈyu ngaˈaa ndiˈi̱ loˈo nguˈ cunaˈa̱ ñiˈya̱ nu ndiˈi̱ ñati̱, ndacui tsa tiˈ nguˈ jiˈi̱ xaˈ quiˈyu, nduˈni subaˈ nguˈ loˈo tyaˈa quiˈyu nguˈ. Laja cuañaˈ ti nguˈ nda ycuiˈ Ndyosi chaˈ tiˈí jiˈi̱ nguˈ, chaˈ cuxi tsa cña nu ndyuˈni nguˈ biˈ. 
\p
\v 28 Juaˈa̱ laca jiˈi̱ nguˈ, chaˈ ná ntiˈ nguˈ tyuloo nguˈ jiˈi̱ ycuiˈ Ndyosi; biˈ chaˈ nguxtyanu Ni jiˈi̱ nguˈ chaˈ cuaˈni nguˈ chaˈ cuxi biˈ, nda Ni xi tyempo cuaˈni nguˈ ñiˈya̱ nu ntiˈ ti nguˈ cuaˈni nguˈ.
\v 29 Ná tsoˈo tsiyaˈ ti cña nu nduˈni nguˈ loˈo tyaˈa ñati̱ nguˈ: xcuiˈ chaˈ subaˈ ti nduˈni nguˈ, cuxi tsa nduˈni nguˈ; ndacui tsa tiˈ nguˈ jiˈi̱ scaa chaˈ tsoˈo nu ntsuˈu jiˈi̱ tyaˈa ñati̱ nguˈ, tiˈí tsa tiˈ nguˈ ñaˈa̱ nguˈ jiˈi̱ tyaˈa nguˈ; ntiˈ nguˈ chaˈ tsoˈo la caca jiˈi̱ ycuiˈ nguˈ que jiˈi̱ xaˈ la tyaˈa nguˈ, pana nxu̱u̱ tyaˈa nguˈ biˈ hasta ndujuii nguˈ jiˈi̱ tyaˈa nguˈ; nduˈni nguˈ ngana jiˈi̱ tyaˈa nguˈ; chiyaˈa̱ tsa chaˈ ntsuˈu tyiquee nguˈ ñaˈa̱ nguˈ jiˈi̱ tyaˈa ñati̱ nguˈ, hasta nclo que nguˈ cuentyu jiˈi̱ tyaˈa nguˈ,
\v 30 hasta nchcuiˈ nguˈ chaˈ tiˈí jiˈi̱ tyaˈa nguˈ; liyeˈ tiˈ nguˈ ñaˈa̱ nguˈ jiˈi̱ ycuiˈ Ndyosi, chaˈ subaˈ nchcuiˈ nguˈ; tyixi nduˈni nguˈ loˈo tyaˈa nguˈ, nduˈni tyucuaa tsa tiˈ nguˈ loˈo tyaˈa ñati̱ nguˈ. Loˈo juaˈa̱ tya nclyana la nguˈ chaˈ cuxi nu cuaˈni nguˈ, ni ná ndaquiyaˈ nguˈ jiˈi̱ sti nguˈ, jiˈi̱ xtyaˈa̱ nguˈ.
\v 31 Ni sca chaˈ ná ndube tiˈ nguˈ biˈ tsiyaˈ ti; ná nduˈni nguˈ ni sca cña nu cua nacui̱ nguˈ chaˈ cuaˈni nguˈ. Ná ntsuˈu tyiquee nguˈ ñaˈa̱ nguˈ jiˈi̱ tyaˈa nguˈ, ñiˈya̱ nduˈni ñati̱ tsoˈo; la cuiˈ ti ná nduˈni tyaˈna tiˈ nguˈ jiˈi̱ tyaˈa nguˈ.
\v 32 Nda nguˈ biˈ cuentya chaˈ nu cua nchcuiˈ ycuiˈ Ndyosi jiˈi̱ nguˈ, chaˈ ntsuˈu chaˈ cajaa nguˈ biˈ xquiˈya chaˈ cuxi nu nduˈni nguˈ. Masi jlo tiˈ nguˈ chaˈ biˈ, ná ndube tiˈ nguˈ biˈ; ñaˈa̱ ti nduˈni nguˈ chaˈ cuxi biˈ jiˈi̱ nguˈ. Loˈo juaˈa̱ tsoˈo tsa ntsuˈu tyiquee nguˈ loˈo ñaˈa̱ nguˈ jiˈi̱ xaˈ ñati̱ nu ndyuˈni la cuiˈ tyaˈa chaˈ cuxi biˈ.
\c 2
\s Liñi tsa cuaˈni cuayáˈ ycuiˈ Ndyosi jiˈi̱ ñati̱ chalyuu 
\p
\v 1 Loˈo cuˈma̱ ni, nchcuiˈ tsa ma̱ jiˈi̱ sca chaˈ cuxi nu ndyuˈni ñati̱; pana ná caja ñiˈya̱ nu cuaˈni clyu tiˈ Ni jiˈi̱ ycuiˈ ma̱, nu loˈo nclyotu̱ ma̱ quiˈya nu ntsuˈu jiˈi̱ xaˈ ñati̱, loˈo juaˈa̱ ycuiˈ ca ma̱ ntsuˈu quiˈya biˈ jiˈi̱ ma̱. Ñiˈya̱ nduˈni cuayáˈ bese jiˈi̱ ñati̱ cuxi, juaˈa̱ nduˈni ma̱, nu loˈo nchcuiˈ ma̱ juaˈa̱ jiˈi̱ ñati̱; pana stuˈba ntsuˈu quiˈya jiˈi̱ ma̱ loˈo nu ñati̱ cuxi biˈ.
\v 2 Cua jlo tiˈ ma̱ chaˈ liñi tsa nduˈni ycuiˈ Ndyosi loˈo nchcubeˈ Ni jiˈi̱ nguˈ nu nduˈni lcaa lo chaˈ cuxi. 
\v 3 ¿Ni chaˈ laca ntiˈ ma̱ chaˈ ná caca jiˈi̱ cuˈma̱ ñiˈya̱ nu ndyaca jiˈi̱ nu nguˈ cuxi biˈ? Chaˈ cuiñi, ná clyaá ma̱ jiˈi̱ ycuiˈ Ndyosi nu loˈo cuaˈni cuayáˈ Ni jiˈi̱ lcaa ñati̱; na nsta ma̱ quiˈya jiˈi̱ ñati̱ biˈ, masi nduˈni ma̱ la cuiˈ tyaˈa chaˈ cuxi nu nduˈni nguˈ biˈ.
\v 4 ¿Ni chaˈ laca ná ndube tiˈ ma̱ chaˈ tsoˈo tsa ntsuˈu tyiquee ycuiˈ Ndyosi ñaˈa̱ Ni jiˈna? Ntucuá Ni cña jiˈna, ndalo tsa tyiquee Ni jiˈna; tsoˈo tsa ntiˈ ycuiˈ Ndyosi ñaˈa̱ Ni jiˈna, chaˈ caja ñiˈya̱ nu tyaˈa̱chu̱ˈ na jiˈi̱ chaˈ cuxi nu ndiya tsa tiˈ na jiˈi̱.
\v 5 Ná ntajaˈa̱ ma̱ taquiyaˈ ma̱ jiˈi̱ chaˈ nu nchcuiˈ ycuiˈ Ndyosi loˈo ma̱, ná ntajaˈa̱ ma̱ ca tyujuˈu tiˈ ma̱ tsiyaˈ ti; biˈ chaˈ ndyanu chaˈ xcubeˈ Ni jiˈi̱ ma̱ loˈo tyalaa tsa̱, nu loˈo ñaˈa̱ nguˈ chaˈ liñi tsa cuaˈni cuayáˈ Ni jiˈi̱ ñati̱ chalyuu.
\v 6 Tsa̱ biˈ tya Ni jiˈna tsa ñaˈa̱ nu nguaˈni na loˈo ngutiˈi̱ na chalyuu;
\v 7 sca chalyuu tsoˈo nu ná ngaˈa̱ chaˈ tye, biˈ laca nu ta Ni jiˈi̱ nguˈ tsoˈo, nu ná nchca taja tiˈ nduˈni nguˈ cña tsoˈo loˈo tyaˈa nguˈ. Xcuiˈ ndyaˈa̱ chaˈ tyiquee nguˈ biˈ jiˈi̱ chaˈ tsoˈo nu ntsuˈu ca slo ycuiˈ Ndyosi, xcuiˈ ntiˈ nguˈ chaˈ tyiˈi̱ tsoˈo ti nguˈ cuentya jiˈi̱ Ni, xcuiˈ ndube tiˈ nguˈ jiˈi̱ chalyuu nu lijya̱ nde loo la.
\v 8 Pana nu ñati̱ cuxi ni, nu xcuiˈ chaˈ jiˈi̱ ycuiˈ ca nguˈ ntsuˈu tyiquee nguˈ, tlyu tsa chaˈ tiˈí ta Ni jiˈi̱ nguˈ biˈ; ñasi̱ˈ tsa ycuiˈ Ndyosi jiˈi̱ lcaa nguˈ biˈ, chaˈ ná ntajaˈa̱ nguˈ taquiyaˈ nguˈ tsiyaˈ ti jiˈi̱ lcaa chaˈ liñi nu nclyuˈu Ni jiˈi̱ nguˈ, chaˈ ndijña tsa tiˈ nguˈ jiˈi̱ cua ñaˈa̱ ca chaˈ cuxi nu ñaˈa̱ nguˈ.
\v 9 Xcubeˈ tsa Ni jiˈi̱ nguˈ biˈ liˈ, tlyu tsa chaˈ tiˈí caca jiˈi̱ lcaa ñati̱ chalyuu, cua ñaˈa̱ ca ñati̱ nu nduˈni xcuiˈ chaˈ cuxi. Clyo tyacua chaˈ tiˈí biˈ jiˈi̱ nguˈ judío, liˈ la cuiˈ juaˈa̱ tyacua jiˈi̱ nguˈ xaˈ tsuˈ, nu siˈi nguˈ judío laca nguˈ.
\v 10 Pana lcaa ñati̱ nu nduˈni chaˈ tsoˈo ni, ta ycuiˈ Ndyosi chaˈ tsoˈo nu ntsuˈu ca slo Ni jiˈi̱ nguˈ biˈ; cuaˈni chi̱ loo Ni jiˈi̱ nguˈ biˈ ca slo ycuiˈ Ni liˈ, cuaˈni Ni chaˈ ti̱ ti tyiˈi̱ tyiquee nguˈ liˈ. Clyo tyacua chaˈ tsoˈo biˈ jiˈi̱ nguˈ judío, loˈo liˈ la cuiˈ juaˈa̱ tyacua jiˈi̱ nguˈ xaˈ tsuˈ.
\p
\v 11 Siˈi cua laca ti ñati̱ nu nduˈni tyacaˈa ycuiˈ Ndyosi jiˈi̱, sca ti cuayáˈ nduˈni Ni loˈo cua ñaˈa̱ ca ñati̱ chalyuu.
\v 12 Nguˈ xaˈ tsuˈ ni, masi bilya cuna nguˈ lcaa chaˈ nu cua nda Moisés loˈo nguˈ judío, pana tye chaˈ jiˈi̱ nguˈ juaˈa̱ ti, si ntsuˈu quiˈya jiˈi̱ nguˈ. La cuiˈ juaˈa̱ xcubeˈ ycuiˈ Ndyosi jiˈi̱ nguˈ judío, nu cua ndyuna chaˈ liñi nu nda jyoˈo Moisés loˈo nguˈ; si ntsuˈu quiˈya jiˈi̱ nguˈ, cuaˈni cuayáˈ Ni jiˈi̱ nguˈ cuentya jiˈi̱ chaˈ nu nchcuiˈ Moisés biˈ liˈ. Loˈo juaˈa̱ sca ti cuayáˈ cuaˈni cuayáˈ Ni jiˈi̱ lcaa ñati̱ nu nduˈni chaˈ cuxi.
\v 13 Ná caca tsoˈo cresiya jiˈna cuentya jiˈi̱ ycuiˈ Ndyosi loˈo ndyuna ti na chaˈ liñi nu nda Ni loˈo na; sca ti si taquiyaˈ na jiˈi̱ chaˈ biˈ, si cuaˈni na lcaa ñaˈa̱ cña nu ngulo Ni jiˈna, liˈ caca tsoˈo cresiya jiˈna cuentya jiˈi̱ Ni.
\v 14-15 Ntsuˈu nguˈ xaˈ tsuˈ ni, cua laca nduˈni nguˈ ñiˈya̱ nu nscua lo quityi jiˈi̱ ycuiˈ Ndyosi, masi bilya cuna nguˈ chaˈ biˈ. Juaˈa̱ jlo tiˈ na chaˈ nchca cuayáˈ tiˈ nguˈ biˈ ni cña laca nu ntiˈ ycuiˈ Ndyosi, xquiˈya chaˈ tyucui tyiquee nguˈ nduˈni nguˈ tsa ñaˈa̱ chaˈ nu nda ycuiˈ Ndyosi loˈo nguˈ judío saˈni la, masi bilya ta Ni chaˈ loˈo nguˈ xaˈ tsuˈ biˈ; hique ti nguˈ biˈ ndaˈya chaˈ tsoˈo nu nduˈni nguˈ loˈo tyaˈa ñati̱ nguˈ. Loˈo juaˈa̱ hora ti nda nguˈ biˈ cuentya chaˈ quiˈya laca loˈo ndyuˈni nguˈ sca chaˈ cuxi, pana ná ntsuˈu chaˈ culacua tiˈ nguˈ loˈo nduˈni nguˈ sca chaˈ tsoˈo. 
\v 16 Juaˈa̱ caca lacua, nu loˈo tyuˈu lubii lcaa chaˈ nu ntsuˈu neˈ cresiya jiˈi̱ ñati̱, tsa̱ liˈ loˈo culo Ni cña jiˈi̱ Jesucristo chaˈ cuaˈni cuayáˈ Ni jiˈi̱ lcaa ñati̱; la cuiˈ tyempo biˈ culotu̱ Ni lcaa chaˈ nu ntsuˈu cuaana ti neˈ cresiya jiˈi̱ nguˈ. Juaˈa̱ laca chaˈ nu nchcuiˈ naˈ loˈo ñati̱ laja loˈo nclyuˈu naˈ chaˈ tsoˈo jiˈi̱ ycuiˈ Ndyosi jiˈi̱ nguˈ.
\s Cña nu ngulo ycuiˈ Ndyosi jiˈi̱ jyoˈo Moisés chaˈ cuaˈni nguˈ judío
\p
\v 17 Pana nu cuˈma̱ ni, nacui̱ ma̱ chaˈ nguˈ judío laca ma̱, biˈ chaˈ jlya tsa tiˈ ma̱ jiˈi̱ lcaa chaˈ nu nda ycuiˈ Ndyosi loˈo jyoˈo Moisés nu ngua saˈni. Lye tsa nduˈni tyucuaa tiˈ ma̱ loˈo xaˈ ñati̱, chaˈ nacui̱ ma̱ chaˈ sca ti cuˈma̱ laca ma̱ ñati̱ jiˈi̱ ycuiˈ Ndyosi. 
\v 18 Na cua jlo tiˈ ma̱ ñiˈya̱ laca cña nu ntiˈ ycuiˈ Ndyosi chaˈ cuaˈni ma̱, ntiˈ ma̱; cua nguscua Moisés chaˈ biˈ lo quityi cuentya jiˈi̱ ma̱, biˈ chaˈ cua nda la ma̱ xi cuentya ñiˈya̱ laca sca chaˈ tsoˈo, ñiˈya̱ laca sca chaˈ cuxi.
\v 19 Loˈo juaˈa̱ ntiˈ ma̱, chaˈ ycuiˈ ma̱ nchca jiˈi̱ ma̱ culuˈu ma̱ tyucui̱i̱ liñi jiˈi̱ ñati̱ nu ná jlo tiˈ; ntiˈ ma̱ chaˈ taca ta ma̱ chaˈ loˈo nguˈ nu ná ndyiji ñiˈya̱ nu caca cuayáˈ tiˈ nguˈ sca chaˈ liñi; 
\v 20 ntiˈ ma̱ chaˈ taca culuˈu quiˈi ma̱ jiˈi̱ ñati̱ nu ná nduna tsoˈo, chaˈ ple ti nguˈ xi; ntiˈ ma̱ chaˈ caca ma̱ mstru jiˈi̱ ñati̱ nu bilya caca tsaˈa̱ tsiyaˈ ti. Ntiˈ ma̱ chaˈ caca ma̱ juaˈa̱, xquiˈya chaˈ jlya tsa tiˈ ma̱ chaˈ nu nguscua jyoˈo Moisés biˈ; laja chaˈ biˈ nscua lcaa chaˈ nu caca jlo tiˈ na, lcaa chaˈ liñi nu ntsuˈu nde chalyuu, ntiˈ ma̱.
\v 21 Na nclyuˈu ma̱ jiˈi̱ tyaˈa ñati̱ ma̱ tuˈni, ¿ni chaˈ laca ná nchca culuˈu ma̱ jiˈi̱ ycuiˈ ca ti ma̱? Nacui̱ ma̱ chaˈ ná tsoˈo cuaana nguˈ na nu ntsuˈu jiˈi̱ xaˈ ñati̱. ¿Ha ná loˈo cuˈma̱ tya ntucuaana ma̱ ntsuˈu quiyaˈ?
\v 22 Nacui̱ ma̱ chaˈ ná tsoˈo tyuˈu chaˈ jiˈi̱ nguˈ loˈo clyoˈo xaˈ ñati̱. ¿Ni chaˈ laca chaˈ loˈo cuˈma̱ nduˈni ma̱ chaˈ cuxi biˈ lacua? Si ná ndiya tiˈ ma̱ tsiyaˈ ti loˈo nduˈni tlyu xaˈ ñati̱ jiˈi̱ joˈó nu siˈi ycuiˈ Ndyosi laca, ¿ni chaˈ laca ndyaˈa̱ ma̱ ntucuaana ma̱ chaˈ tsoˈo nu ntsuˈu neˈ laa jiˈi̱ nguˈ biˈ?
\v 23 Nacui̱ ma̱ chaˈ tsoˈo la tsiyaˈ ti laca chaˈ nu nda jyoˈo Moisés loˈo ma̱, pana ndyuˈni tsa ma̱ chaˈ cuxi loˈo ycuiˈ Ndyosi nu loˈo ná ndaquiyaˈ ma̱ jiˈi̱ chaˈ biˈ.
\v 24 Na nduˈni ti ma̱ ñiˈya̱ nu nacui̱ quityi cusuˈ, quityi jiˈi̱ ycuiˈ Ndyosi nu nchcuiˈ ndiˈya̱: “Cuxi tsa nchcuiˈ nguˈ xaˈ tsuˈ jiˈi̱ ycuiˈ Ndyosi xquiˈya cuˈma̱”. Juaˈa̱ chaˈ nscua lo quityi.
\p
\v 25 Jlya tsa tiˈ ma̱ chaˈ nu nacui̱ chaˈ siˈyu ma̱ quiji̱ nguˈ quiˈyu sñiˈ ma̱ loˈo tya cuañiˈ nguˈ, chaˈ culacua̱ nguˈ. Tsoˈo tsa si loˈo taquiyaˈ ma̱ lcaa chaˈ nu nda ycuiˈ Ndyosi loˈo jyoˈo Moisés; pana si ná taquiyaˈ ma̱ lcaa chaˈ biˈ, cua laca ma̱ ñiˈya̱ si ná nsiˈyu quiji̱ ma̱ tsiyaˈ ti liˈ.
\v 26 Loˈo juaˈa̱ nu nguˈ xaˈ tsuˈ nu ná nsiˈyu quiji̱ nguˈ ni, si taquiyaˈ nguˈ biˈ chaˈ nu nda Moisés loˈo na, liˈ stuˈba ti tucuá ycuiˈ Ndyosi chaˈ jiˈi̱ nguˈ biˈ, ñiˈya̱ ntucuá Ni chaˈ jiˈi̱ nguˈ judío tyaˈa na nu cua nsiˈyu quiji̱ nguˈ.
\v 27 Chañi chaˈ ná nguaˈa̱ cuayáˈ lo quiji̱ nguˈ biˈ juaˈa̱; ná ntsuˈu chaˈ biˈ jiˈi̱ nguˈ, chaˈ nguˈ xaˈ tsuˈ laca nguˈ. Pana si nduˈni nguˈ biˈ lcaa cña nu ntiˈ Ni chaˈ cuaˈni nguˈ, ta nguˈ chaˈ tyujuˈu tiˈ jiˈi̱ cuˈma̱ nguˈ judío, chaˈ ná ndaquiyaˈ ma̱ jiˈi̱ chaˈ biˈ, masi cua ndyuna ma̱ chaˈ liñi jiˈi̱ ycuiˈ Ndyosi, masi cua nguaˈa̱ cuayáˈ lo quiji̱ ma̱.
\v 28 Siˈi na tyucui tyiquee nguˈ judío laca na loˈo tacati tsa ndyuˈni na jiˈi̱ ycuiˈ Ni chaˈ ñaˈa̱ ti nguˈ jiˈna. Ná caca cña juaˈa̱, masi nguaˈa̱ cuayáˈ lo quiji̱ na; 
\v 29 siˈi juaˈa̱ laca na nguˈ judío. Tyucui tyiquee nguˈ judío laca na loˈo xñi tsoˈo na chaˈ jiˈi̱ ycuiˈ Ndyosi; liñi la tyuˈu chaˈ jiˈna loˈo Ni si chcaˈa̱ cuayáˈ jiˈi̱ ycuiˈ Ndyosi ca neˈ cresiya jiˈna. Liˈ taca culo Ni cña jiˈna loˈo Xtyiˈi ycuiˈ Ni, siˈi loˈo sca chaˈ nu nscua lo quityi ti. Loˈo liˈ tsoˈo tsa cuaˈni ycuiˈ Ndyosi loˈo na, ngaˈaa siˈi ñati̱ chalyuu ti nu chcuiˈ tsoˈo jiˈna liˈ.
\c 3
\p
\v 1 Tsoˈo ti xi na chaˈ laca na nguˈ judío lacua, tsoˈo xi chaˈ nsiˈyu quiji̱ na, chaˈ juaˈa̱ ngulacua̱ na. 
\v 2 Ndiˈya̱ laca sca chaˈ tsoˈo nu ntsuˈu jiˈna chaˈ laca na nguˈ judío: Sca ti loˈo nguˈ judío tyaˈa na cua nda ycuiˈ Ndyosi chaˈ jiˈi̱ Ni tya clyo.
\v 3 Masi ntsuˈu xi nguˈ judío nu ngaˈaa jlya tiˈ jiˈi̱ ycuiˈ Ndyosi, ná culayaˈ Ni jiˈi̱ cua ñaˈa̱ ca nguˈ judío xquiˈya nu xti ti ñati̱ biˈ.
\v 4 Ná ntiˈ Ni cuaˈni Ni juaˈa̱. Xcuiˈ chaˈ liñi nduˈni ycuiˈ Ndyosi loˈo ñati̱ jiˈi̱ Ni, masi chaˈ cuiñi laca nu nduˈni lcua ti lo ñati̱ chalyuu. Cua nscua sca chaˈ jiˈi̱ ycuiˈ Ndyosi lo quityi nu nchcuiˈ ndiˈya̱:
\q Loˈo chcuiˈ nuˈu̱, liˈ caca cuayáˈ tiˈ nguˈ chaˈ liñi tsa nduˈni nuˈu̱;
\q loˈo caca cuayáˈ jinuˈu̱ slo ñati̱, taca cuaˈni lyaá nuˈu̱ jiˈi̱ ycuiˈ ca liˈ.
\p
\v 5 Chaˈ nu na ni, ntsuˈu tsa chaˈ cuxi nu ndyuˈni na; loˈo nu chaˈ cuxi biˈ ni, nduˈni chaˈ taca ca cuayáˈ la tiˈ na chaˈ liñi tsa laca ycuiˈ Ndyosi. ¿Ñiˈya̱ ta ñacui̱ na liˈ? ¿Ha ná liñi nduˈni Ni loˈo na? ¿Ha ná tsoˈo si xcubeˈ Ni jiˈna loˈo ndyuˈni na chaˈ cuxi? Ntsuˈu ñati̱ nu nchcuiˈ juaˈa̱.
\v 6 Pana liñi tsa nduˈni Ni. Ná caca xcubeˈ Ni jiˈi̱ ñati̱ chalyuu xquiˈya quiˈya nu ntsuˈu jiˈi̱ nguˈ, si ná liñi nduˈni cuayáˈ Ni jiˈi̱ lcaa ñati̱.
\p
\v 7 Ná tyiqueeˈ ñacui̱ nguˈ chaˈ na cuiñi naˈ. Tsoˈo, chaˈ cuiñi nda naˈ lacua. Pana xquiˈya naˈ, biˈ chaˈ nchca cuayáˈ la tiˈ xaˈ ñati̱ chaˈ liñi nu nda ycuiˈ Ndyosi loˈo na; juaˈa̱ ndyuˈni tlyu la nguˈ jiˈi̱ Ni xquiˈya naˈ. Ná ntsuˈu chaˈ sta Ni quiˈya ˈna lacua.
\v 8 La cuiˈ ti ná tsoˈo laca chaˈ cuaˈni la na chaˈ cuxi chaˈ caca tsoˈo la chaˈ jiˈna nde loo la; pana ntsuˈu nguˈ nu ñiloˈo jiˈi̱ tyaˈa nguˈ loˈo nchcuiˈ nguˈ chaˈ juaˈa̱ laca chaˈ cuxi nu nchcuiˈ ya. Liñi tsa cuaˈni ycuiˈ Ndyosi loˈo xcubeˈ Ni jiˈi̱ nguˈ nu nchcuiˈ chaˈ cuiñi jiˈna juaˈa̱.
\s Lcaa ñati̱ ntsuˈu quiˈya jiˈi̱ nguˈ cuentya jiˈi̱ ycuiˈ Ndyosi
\p
\v 9 Ndiˈya̱ ñacui̱ na lacua: Ná caca chcuiˈ na chaˈ tsoˈo la na chaˈ laca na nguˈ judío, chaˈ siˈi chaˈ biˈ tsiyaˈ ti; cua ngua cuayáˈ ca tiˈ na chaˈ stuˈba ti ntsuˈu chaˈ cuxi jiˈi̱ nguˈ judío loˈo jiˈi̱ nguˈ xaˈ tsuˈ, chaˈ ntsuˈu tsa chaˈ cuxi nu laca loo jiˈi̱ lcaa ñati̱ chalyuu.
\v 10 La cuiˈ chaˈ nscua lo quityi jiˈi̱ ycuiˈ Ndyosi nu nchcuiˈ ndiˈya̱:
\q Ni tsaca nguˈ ná ntsuˈu nu xcuiˈ chaˈ tsoˈo nduˈni; 
\q
\v 11 ná ntsuˈu ñati̱ nu nchca cuayáˈ tiˈ chaˈ jiˈi̱ ycuiˈ Ndyosi,
\q ná tucui nclyana jiˈi̱ ycuiˈ Ni.
\q
\v 12 Cua ndyuˈutsuˈ lcaa nguˈ jiˈi̱ tyucui̱i̱ liñi, stuˈba ti ngua cuxi cresiya jiˈi̱ lcaa nguˈ;
\q ná ntsuˈu ni sca ñati̱ nu xcuiˈ chaˈ tsoˈo nduˈni. 
\q
\v 13 Ñiˈya̱ ntiˈ xtyiˈi tyucu̱ nu ntsuˈu toˈ cuaá nu tya lyiji tyacu̱ˈ lo, juaˈa̱ laca nguˈ biˈ,
\q chaˈ xcuiˈ chaˈ cuxi ndyuˈu tuˈba nguˈ.
\q Lye tsa ñiloˈo nguˈ jiˈi̱ tyaˈa nguˈ laja loˈo nchcuiˈ ti nguˈ.
\q Ñiˈya̱ laca hitya tyaala nu ntsuˈu tuˈba cuaña, juaˈa̱ laca nguˈ,
\q chaˈ tyaala tsa nchcuiˈ nguˈ.
\q
\v 14 Ná nxutacui nguˈ chaˈ nda nguˈ quiˈya jiˈi̱ tyaˈa nguˈ;
\q
\v 15 cujuii clya nguˈ biˈ jiˈi̱ tyaˈa nguˈ, ntiˈ nguˈ. 
\q
\v 16 Xcuiˈ na cua nduˈni ñuˈu̱ nguˈ jiˈi̱ tyaˈa nguˈ, nduˈni nguˈ chaˈ ca xñiˈi̱ tiˈ xaˈ ñati̱ macala su ndyaˈa̱ nguˈ biˈ.
\q
\v 17 Ná nslo nguˈ jiˈi̱ tyucui̱i̱ liñi nu cuaˈni chaˈ ti̱ ti tyiˈi̱ tyiquee nguˈ.
\q
\v 18 Pana ná ntsi̱i̱ nguˈ tsiyaˈ ti ñaˈa̱ nguˈ jiˈi̱ ycuiˈ Ndyosi, nacui̱ nguˈ.
\m Juaˈa̱ chaˈ nscua lo quityi biˈ.
\p
\v 19 Cua jlo tiˈ na chaˈ cua nscua lcaa chaˈ cusuˈ biˈ, chaˈ cube tiˈ nguˈ judío nu ntsuˈu chaˈ jiˈi̱ loˈo chaˈ biˈ; juaˈa̱ nguscua jyoˈo cusuˈ, chaˈ cua ntiˈ ycuiˈ Ndyosi chaˈ caca cuayáˈ tiˈ lcaa ñati̱ tyucui ñaˈa̱ chalyuu chaˈ ná caja ñiˈya̱ nu cuaˈni lyaá nguˈ jiˈi̱ ycuiˈ ca nguˈ loˈo Ni, chaˈ ngaˈa̱ chaˈ cuaˈni cuayáˈ Ni jiˈi̱ nguˈ.
\v 20 Masi cuaˈni na lcaa ca chaˈ nu nguscua nguˈ lo quityi cusuˈ biˈ, ná caca ca tsoˈo tyiquee na cuentya jiˈi̱ ycuiˈ Ndyosi loˈo ndyuˈni ti na juaˈa̱; tsa biˈ ti cña nduˈni quityi biˈ, chaˈ caca cuayáˈ tiˈ na chaˈ ntsuˈu tsa quiˈya jiˈna cuentya jiˈi̱ ycuiˈ Ndyosi.
\s Cuaˈni lyaá ycuiˈ Ndyosi jiˈi̱ ñati̱ loˈo xñi nguˈ chaˈ jiˈi̱ Jesucristo
\p
\v 21 Loˈo juani cua ngutuˈu tucua sca chaˈ cucui nde chalyuu, ná stuˈba tsiyaˈ ti chaˈ biˈ loˈo chaˈ cusuˈ biˈ. Loˈo nclyuˈu ycuiˈ Ndyosi chaˈ biˈ jiˈna, liˈ caca cuayáˈ tiˈ na ñiˈya̱ caca ca tsoˈo cresiya jiˈna cuentya jiˈi̱ ycuiˈ Ni. Cua nscua xi chaˈ nu nchcuiˈ jiˈi̱ chaˈ biˈ lo quityi cusuˈ biˈ, masi lo quityi nu nguscua jyoˈo cusuˈ nu ngua tuˈba jiˈi̱ ycuiˈ Ndyosi nchcuiˈ Ni loˈo ñati̱ saˈni.
\v 22 Nchcuiˈ quityi chaˈ cuaˈni ycuiˈ Ndyosi chaˈ caca tsoˈo cresiya jiˈna cuentya jiˈi̱ ycuiˈ Ni, si xñi na chaˈ jiˈi̱ Jesucristo. Stuˈba ti cuaˈni Ni loˈo ca taˈa na nu laca na nguˈ judío; juaˈa̱ loˈo lcaa ñati̱ nu cua ngusñi chaˈ jiˈi̱ ycuiˈ Ndyosi ca chaca tsuˈ chalyuu, stuˈba ti cuaˈni Ni loˈo lcaa ñati̱.
\v 23 Lcaa na ntsuˈu quiˈya jiˈna cuentya jiˈi̱ ycuiˈ Ndyosi, chaˈ ná nguaˈni na tsiyaˈ ti cña nu ntiˈ Ni chaˈ cuaˈni na.
\v 24 Pana cuaˈni Ni chaˈ caca tsoˈo cresiya jiˈna, chaˈ tsoˈo ti ntsuˈu tyiquee Ni ñaˈa̱ Ni jiˈna; sca chaˈ tsoˈo nu nguaˈni ti Ni cuentya jiˈna laca, chaˈ tlyu tsa cña nu nguaˈni ycuiˈ Jesucristo chaˈ cati̱ quiˈya nu ntsuˈu jiˈna, nu loˈo ngujuii yu lo crusi chaˈ cuaˈni lyaá yu jiˈna.
\v 25 Nda ycuiˈ Ndyosi jiˈi̱ Jesús ñaa chalyuu chaˈ tyajaˈa̱ yu cajaa yu; masi ycuiˈ yu chcubeˈ yu cña loo lcaa ñati̱ chalyuu, chaˈ quiˈya ycuiˈ yu yabeˈ nu ntsuˈu jiˈna. Caca chaˈ biˈ jiˈna si tyajaˈa̱ na xñi na chaˈ jiˈi̱ Jesús. Loˈo juaˈa̱ ntiˈ Ni culuˈu Ni jiˈna chaˈ xcuiˈ chaˈ liñi nduˈni Ni loˈo na, masi ná nguaˈni cuentya Ni jiˈi̱ quiˈya nu ntsuˈu jiˈi̱ jyoˈo cusuˈ jiˈna; pana ndalo tsa tyiquee Ni jiˈi̱ nguˈ biˈ liˈ.
\v 26 Nu juani nguluˈu Ni jiˈna chaˈ liñi tsa nduˈni ycuiˈ Ni; juaˈa̱ taca jiˈi̱ Ni cuaˈni lubii cresiya jiˈi̱ scaa na, si tyajaˈa̱ na xñi na chaˈ jiˈi̱ Jesús.
\p
\v 27 Chaˈ cuiñi nchcuiˈ na si ñacui̱ na chaˈ nchca tsa jiˈi̱ ycuiˈ ca na ñati̱ chalyuu, cuaˈni na chaˈ caca tsoˈo cresiya jiˈna cuentya jiˈi̱ ycuiˈ Ndyosi. Ná taca. Lye tsa ndyuˈni tyucuaa tiˈ na loˈo Ni si juaˈa̱ ntiˈ na. ¿Ñiˈya̱ juaˈa̱? Ná nchca jiˈna cuaˈni na chaˈ caca tsoˈo cresiya jiˈna cuentya jiˈi̱ ycuiˈ Ndyosi loˈo taquiyaˈ ti na lcaa chaˈ cusuˈ, sca ti nu loˈo xñi na chaˈ jiˈi̱ Jesús caca tsoˈo cresiya jiˈna. Pana ngaˈaa tsoˈo chcuiˈ na chaˈ tyixi liˈ, chaˈ siˈi ycuiˈ na laca nu nduˈni chaˈ ca tsoˈo cresiya jiˈi̱ ycuiˈ ca na.
\v 28 Biˈ chaˈ ni naˈ jiˈi̱ ma̱ chaˈ ntsuˈu sca ti ñaˈa̱, ñiˈya̱ nu caca ca tsoˈo cresiya jiˈna cuentya jiˈi̱ ycuiˈ Ndyosi; ntsuˈu chaˈ xñi na chaˈ jiˈi̱ Jesús, masi ná nchca jiˈna cuaˈni na lcaa lo chaˈ cusuˈ nu nguscua nguˈ saˈni.
\p
\v 29 Siˈi sca ti jiˈi̱ nguˈ judío ti laca ycuiˈ Ndyosi loo, loˈo jiˈi̱ nguˈ xaˈ tsuˈ laca Ni loo.
\v 30 Chañi tsa laca chaˈ biˈ, chaˈ sca ti ycuiˈ Ndyosi laca loo tyucui ñaˈa̱ chalyuu; ná ntsuˈu chaca nu laca loo la. Cuaˈni Ni chaˈ caca tsoˈo cresiya jiˈi̱ nguˈ judío loˈo xñi nguˈ chaˈ jiˈi̱ Ni; la cuiˈ juaˈa̱ cuaˈni Ni chaˈ caca tsoˈo cresiya jiˈi̱ nguˈ xaˈ tsuˈ, nu loˈo xñi nguˈ biˈ chaˈ jiˈi̱ Ni.
\v 31 Tsoˈo lacua. Na jlya ti tiˈ na jiˈi̱ cña nu nguaˈni Jesús, tsa biˈ ti chaˈ cuaˈni na chaˈ clyaá na jiˈi̱ lcaa quiˈya nu ntsuˈu jiˈna. ¿Ha ngaˈaa ntsuˈu chaˈ taquiyaˈ na lcaa chaˈ nu nguscua jyoˈo cusuˈ chaˈ cuaˈni na lacua? Siˈi chaˈ biˈ, masi tsoˈo la taquiyaˈ na chaˈ cusuˈ biˈ juani, nu loˈo ngusñi na chaˈ jiˈi̱ Jesús. 
\c 4
\s Ñiˈya̱ ngua jiˈi̱ Abraham
\p
\v 1 Juani ta naˈ sca chaˈ loˈo ma̱ ñiˈya̱ ngua jiˈi̱ Abraham, nu jyoˈo cusuˈ jiˈna nu ngua tya saˈni.
\v 2 Ycuiˈ ca Abraham ni, ná ngua cuaˈni yu chaˈ ca tsoˈo cresiya jiˈi̱ ycuiˈ ca yu cuentya jiˈi̱ ycuiˈ Ndyosi, ni ná ngua jiˈi̱ yu xacui̱ yu chaˈ jiˈi̱ ycuiˈ Ndyosi chaˈ ngua jiˈi̱ ycuiˈ yu.
\v 3 Nde laca chaˈ nu nscua lo quityi jiˈi̱ ycuiˈ Ndyosi: “Ngusñi Abraham chaˈ nu nda ycuiˈ Ndyosi loˈo yu; biˈ chaˈ ngüiñi chaˈ jiˈi̱ Ni loˈo yu chaˈ caca tsoˈo cresiya jiˈi̱ yu, xquiˈya chaˈ jlya ti tiˈ yu jiˈi̱ Ni”. Juaˈa̱ nscua lo quityi biˈ.
\v 4 Loˈo ndyaˈa̱ na neˈ xña jiˈi̱ ñati̱ ni, nda nguˈ xcayaˈ na liˈ; siˈi na nda laja ti nguˈ cñi jiˈna, cñi nu ndacui nguˈ jiˈna laca, chaˈ nguaˈni na cña.
\v 5 Pana nu loˈo jlya ti tiˈ na jiˈi̱ Jesús chaˈ ngulotsuˈ yu yabeˈ nu ntsuˈu jiˈna, liˈ taca xquiñi Ni chaˈ jiˈi̱ Ni loˈo na chaˈ caca tsoˈo cresiya jiˈna, masi ná sca na ndacui Ni jiˈna.
\v 6 Tya saˈni la nacui̱ jyoˈo David chaˈ tsoˈo tsa ntsuˈu tyiquee ñati̱ nu cua laca nguaˈni lubii ycuiˈ Ndyosi cresiya jiˈi̱. Cua nacui̱ Ni chaˈ lubii cresiya jiˈi̱ nguˈ, masi ná sca cña nguaˈni nguˈ cuentya jiˈi̱ Ni chaˈ caca lubii ycuiˈ nguˈ.
\v 7 Liˈ nacui̱ David ndiˈya̱:
\q Tsoˈo ntsuˈu tyiquee na loˈo cuaˈni clyu tiˈ Ni jiˈna jiˈi̱ quiˈya nu ntsuˈu jiˈna, loˈo culotsuˈ Ni yabeˈ nu ntsuˈu jiˈna, nacui̱.
\q
\v 8 Tsoˈo ntsuˈu tyiquee na si ngaˈaa cuaˈni Ni cuentya jiˈi̱ lcaa chaˈ cuxi nu cua nguaˈni na.
\p
\v 9 Siˈi xcuiˈ nguˈ judío ti nu tsoˈo ntsuˈu tyiquee nguˈ juaˈa̱, taca ñacui̱ na chaˈ loˈo nguˈ xaˈ tsuˈ caca tsoˈo tyiquee nguˈ juaˈa̱. Cua nchcuiˈ ca ti na chaˈ ngusñi Abraham chaˈ nu nda ycuiˈ Ndyosi loˈo yu, biˈ chaˈ cua nacui̱ Ni jiˈi̱ yu chaˈ ca tsoˈo cresiya jiˈi̱ yu cuentya jiˈi̱ ycuiˈ Ndyosi, xquiˈya chaˈ jlya ti tiˈ yu jiˈi̱ Ni.
\v 10 ¿Ni jacuaˈ ngua chaˈ biˈ? ¿Ha cua laca chaˈ cua nsiˈyu lo quiji̱ yu ñiˈya̱ nu nduˈni nguˈ judío chaˈ clyacua̱ nguˈ? Siˈi. Tya lyiji xiˈyu nguˈ quiji̱ yu tyempo biˈ;
\v 11 ca tiyaˈ la, liˈ ngulacua̱ yu juaˈa̱. Sca cuayáˈ ti ngua biˈ, chaˈ caca cuayáˈ tiˈ nguˈ chaˈ ngua tsoˈo cresiya jiˈi̱ yu cuentya jiˈi̱ ycuiˈ Ndyosi, nu loˈo jlya ti tiˈ yu jiˈi̱ Ni. Yala la ngua chaˈ ngusñi yu chaˈ jiˈi̱ ycuiˈ Ndyosi, tiyaˈ la ngulacua̱ yu. Biˈ chaˈ lcaa ma̱ nu ntsuˈu ma̱ xaˈ tsuˈ nu ngusñi ma̱ chaˈ jiˈi̱ Jesús, laca ma̱ ñiˈya̱ laca si Abraham laca jyoˈo cusuˈ jiˈi̱ ma̱ nu ya̱a̱ chalyuu tya clyo la. Loˈo xñi cua ñaˈa̱ ca na chaˈ jiˈi̱ Jesús, liˈ quiñi chaˈ jiˈi̱ ycuiˈ Ndyosi loˈo na chaˈ caca lubii cresiya jiˈna. 
\v 12 La cuiˈ juaˈa̱ laca tyiquee nguˈ judío tyaˈa na nu stuˈba ti ngusñi chaˈ jiˈi̱ Jesucristo loˈo na. Chañi chaˈ Abraham ngua jyoˈo cusuˈ jiˈi̱ nguˈ; pana tsoˈo la chaˈ jlya ti tiˈ nguˈ jiˈi̱ ycuiˈ Ndyosi, ñiˈya̱ jlya tiˈ nu jyoˈo Abraham biˈ, masi tya lyiji clyacua̱ yu.
\s Ngüiñi chaˈ jiˈi̱ Ni loˈo ñati̱ xquiˈya chaˈ jlya tiˈ nguˈ jiˈi̱ cña nu nguaˈni Jesús
\p
\v 13 Loˈo juaˈa̱ ngua chaˈ ngüiñi chaˈ jiˈi̱ ycuiˈ Ndyosi loˈo jyoˈo Abraham, loˈo ñati̱ jiˈi̱ Abraham nu ñaa chalyuu ca tiyaˈ la; nacui̱ Ni chaˈ tyucui ñaˈa̱ chalyuu caca jiˈi̱ nguˈ biˈ ca tiyaˈ la. Pana bilya ta Ni chaˈ loˈo jyoˈo Moisés nu ngua liˈ, chaˈ bilya cala nu Moisés biˈ; biˈ chaˈ ná ndaquiyaˈ jyoˈo Abraham jiˈi̱ cña nu ngulo Moisés, chaˈ tya lyiji caja chaˈ biˈ jiˈi̱ nguˈ. Ngua tsoˈo cresiya jiˈi̱ nguˈ biˈ cuentya jiˈi̱ ycuiˈ Ndyosi xquiˈya chaˈ jlya tiˈ nguˈ jiˈi̱ chaˈ nu nchcuiˈ Ni, biˈ chaˈ ngüiñi chaˈ jiˈi̱ Ni loˈo nguˈ.
\v 14 Ná ntiˈ ycuiˈ Ndyosi chaˈ tsa lo cua ti nguˈ caja chalyuu cucui jiˈi̱ nguˈ, nguˈ nu taquiyaˈ jiˈi̱ lcaa chaˈ nu nda jyoˈo cusuˈ loˈo nguˈ; tya ntiˈ Ni chaˈ xñi cua ñaˈa̱ ca ñati̱ chaˈ jiˈi̱ Jesús, chaˈ juaˈa̱ ti taca quiñi chaˈ jiˈi̱ ycuiˈ Ndyosi loˈo nguˈ liˈ. 
\v 15 Xcuiˈ na xcubeˈ ti Ni jiˈna, nu loˈo caca cuayáˈ jiˈna slo ycuiˈ Ndyosi cuentya jiˈi̱ chaˈ cusuˈ biˈ; pana ná caja ñiˈya̱ nu sta Ni quiˈya jiˈna si ná nscua sca chaˈ nu ndacaˈa jiˈna juaˈa̱.
\p
\v 16 Ngüiñi chaˈ jiˈi̱ Ni loˈo jyoˈo Abraham loˈo ngusñi ti yu chaˈ jiˈi̱ Ni, chaˈ caca cuayáˈ tiˈ lcaa na chaˈ xcuiˈ chaˈ tsoˈo ntsuˈu tyiquee Ni; biˈ chaˈ nda Ni chaˈ biˈ loˈo na. Ndyanu chaˈ biˈ jiˈi̱ lcaa ñati̱ jiˈi̱ Abraham nu cala chalyuu ca nde loo la. Ni siˈi tsa lo cua ti ñati̱ nu taquiyaˈ jiˈi̱ chaˈ cusuˈ ti laca nu tyanu chaˈ tsoˈo biˈ jiˈi̱, la cuiˈ juaˈa̱ tyanu chaˈ biˈ jiˈi̱ lcaa ñati̱ tyaˈa na nu xñi na chaˈ jiˈi̱ ycuiˈ Ndyosi ñiˈya̱ ngusñi ycuiˈ Abraham chaˈ jiˈi̱ Ni; juaˈa̱ ntiˈ na loˈo nacui̱ na chaˈ sti lcaa na ngua jyoˈo Abraham biˈ cuentya jiˈi̱ ycuiˈ Ndyosi.
\v 17 Ndiˈya̱ nchcuiˈ chaˈ nu nda Ni loˈo Abraham, nu nscua lo quityi: “Cua nda naˈ chacuayáˈ chaˈ caca nuˈu̱ sti tyu̱u̱ lo tyaˈa ñati̱ nu catu̱ chalyuu nde loo la”, nacui̱ Ni jiˈi̱ Abraham. Cua ngüiñi chaˈ jiˈi̱ ycuiˈ Ndyosi loˈo jyoˈo Abraham saˈni, chaˈ ngusñi yu chaˈ nu cua nchcuiˈ ycuiˈ Ndyosi loˈo yu, la cuiˈ Ni nu ndyuˈni chaˈ tyuˈú jyoˈo chaca quiyaˈ. Loˈo juaˈa̱ ngulo Ni cña chaˈ tyuˈu tucua lcaa chaˈ nde loo la, chaˈ nu cua nacui̱ Ni jiˈi̱ yu loˈo nchcuiˈ Ni ñiˈya̱ si cua laca ndiˈi̱ chaˈ biˈ jiˈi̱ yu nu ngua liˈ.
\p
\v 18 Masi ngua tiˈ jyoˈo Abraham chaˈ ná caja sñiˈ, ná ndube tiˈ yu; jlya tiˈ yu jiˈi̱ ycuiˈ Ndyosi, ntajatya yu ni jacuaˈ caja sñiˈ yu. Biˈ chaˈ ngua jyoˈo Abraham sti tyu̱u̱ tyaˈa ñati̱ nu ndyatu̱ lo yuu ca nde loo la, ñiˈya̱ nu cua nchcuiˈ Ni loˈo yu: “Quiñaˈa̱ tsa ñati̱ tyuˈu jinuˈu̱ tyempo nde loo la”, nacui̱ Ni jiˈi̱ yu. 
\v 19 Ná ngujlyaa tiˈ Abraham chaˈ biˈ; ñaˈa̱ ti jlya tiˈ yu chaˈ nu cua nda ycuiˈ Ndyosi loˈo yu, masi ndube tiˈ yu chaˈ ngusuˈ tsa yu, chaˈ cua tyalaa ti sca siyento yija̱ ntsuˈu yu. Jlo tiˈ yu chaˈ cua ngulala ti cajaa tyucuaa nguˈ, loˈo ycuiˈ, loˈo maˈ Sara clyoˈo yu; ngaˈaa ntsuˈu tyempo chaˈ caja sñiˈ Sara, ngua tiˈ yu.
\v 20 Pana ná ngutaˈa̱chu̱ˈ yu, ná ngujlyaa tiˈ yu chaˈ nu cua nchcuiˈ Ni loˈo yu; jlya tsoˈo tiˈ yu chaˈ biˈ. Nguaˈni tlyu yu jiˈi̱ ycuiˈ Ndyosi,
\v 21 chaˈ jlo tiˈ yu chaˈ taca jiˈi̱ Ni cuaˈni lyiji Ni jiˈi̱ chaˈ nu ngüiñi jiˈi̱ Ni loˈo yu.
\v 22 Biˈ chaˈ nda Ni chacuayáˈ chaˈ caca tsoˈo cresiya jiˈi̱ yu, xquiˈya chaˈ jlya tsa tiˈ yu jiˈi̱ Ni.
\p
\v 23 Juaˈa̱ nscua lcaa chaˈ biˈ lo quityi nu nchcuiˈ chaˈ ngüiñi chaˈ jiˈi̱ Ni loˈo nu Abraham biˈ, chaˈ ngua tsoˈo cresiya jiˈi̱ yu loˈo ngusñi ti yu chaˈ jiˈi̱ ycuiˈ Ni. Siˈi cuentya jiˈi̱ jyoˈo Abraham ti nscua chaˈ biˈ,
\v 24 masi loˈo cuentya jiˈna nscua chaˈ caca juaˈa̱; loˈo jiˈna cua nchcuiˈ ycuiˈ Ndyosi chaˈ caca tsoˈo cresiya jiˈna cuentya jiˈi̱ ycuiˈ Ni si xñi na chaˈ jiˈi̱ Ni, la cuiˈ Ni nu nguaˈni chaˈ ndyuˈú Jesús nu Xuˈna na chaca quiyaˈ loˈo ngujuii yu.
\v 25 Nda Ni chacuayáˈ cujuii nguˈ jiˈi̱ Jesús, chaˈ cuityi̱ quiˈya nu ntsuˈu jiˈna; loˈo liˈ ndyuˈú Jesús chaca quiyaˈ, chaˈ caca tsoˈo cresiya jiˈna cuentya jiˈi̱ ycuiˈ Ndyosi.
\c 5
\s Ñiˈya̱ caca loˈo caca stuˈba chaˈ jiˈi̱ nguˈ loˈo ycuiˈ Ndyosi
\p
\v 1 Juaˈa̱ laca lacua; xquiˈya chaˈ ngusñi ti na chaˈ jiˈi̱ Jesús, biˈ chaˈ cua ngua tsoˈo cresiya jiˈna cuentya jiˈi̱ ycuiˈ Ndyosi. Loˈo liˈ ti̱ ti ndiˈi̱ tyiquee na, stuˈba ti ntsuˈu chaˈ jiˈna loˈo ycuiˈ Ndyosi xquiˈya Jesucristo nu Xuˈna na.
\v 2 Tsoˈo tsa ndyuˈni ycuiˈ Ndyosi loˈo na chacuayáˈ jiˈi̱ Cristo, nu loˈo ngusñi na chaˈ jiˈi̱ nu Cristo biˈ. Nguaˈni Ni chaˈ ntsuˈu chaˈ jiˈna loˈo ycuiˈ Ni, biˈ chaˈ ngaˈaa ntsuˈu chaˈ tyaˈa̱chu̱ˈ na jiˈi̱ Ni; tsoˈo tsa ntsuˈu tyiquee na, chaˈ jlo tiˈ na chaˈ ca tiyaˈ la caja sca seˈi̱ nu tsoˈo tsa su tyiˈi̱ na ca su ntucua ycuiˈ Ndyosi, chaˈ juaˈa̱ tsoˈo ti nduˈni Ni loˈo na.
\v 3 Masi juani tsoˈo ntsuˈu tyiquee na laja loˈo ndiˈi̱ na chalyuu; masi lyaˈ tsa tiˈ nguˈ jiˈna, jlo tiˈ na chaˈ taca talo na loˈo nchcubeˈ na juaˈa̱.
\v 4 Loˈo ngualoo chaˈ tiˈí biˈ, cua jlo tiˈ na chaˈ cua nguaˈni cuayáˈ ti Ni jiˈna. Loˈo liˈ si ñaˈa̱ ti tya tsoˈo cresiya jiˈna cuentya jiˈi̱ ycuiˈ Ndyosi, liˈ cua ndu̱ tiˈ na chaˈ caca tsoˈo jiˈna nde loo la.
\v 5 Loˈo juaˈa̱ siˈi sca chaˈ nu nda ti tiˈ na laca chaˈ biˈ, sca chaˈ chañi laca biˈ; cuaˈni Ni jiˈi̱. Cua nguaˈni Ni chaˈ ca tii cresiya jiˈna, chaˈ ntsuˈu tsa tyiquee ycuiˈ Ndyosi ñaˈa̱ Ni jiˈna; nguaˈni Ni juaˈa̱ nu loˈo nda Ni Xtyiˈi ycuiˈ Ni jiˈna.
\p
\v 6 Jlo tiˈ na chaˈ ná caca cuaˈni lyaá na jiˈi̱ ycuiˈ ca ti na jiˈi̱ quiˈya nu ntsuˈu jiˈna; pana loˈo ndyalaa la cuiˈ hora nu ngusta ycuiˈ Ndyosi, liˈ ngujuii Jesús xquiˈya na, ñati̱ cuxi na.
\v 7 Tlyu tsa chaˈ cuaˈni na si tyajaˈa̱ na cajaa na chaˈ caja ñiˈya̱ nu cuaˈni lyaá na jiˈi̱ chaca ñati̱; masi sca ñati̱ nu xcuiˈ chaˈ tsoˈo nduˈni, ná ntiˈ na cajaa na cuentya jiˈi̱ yu. Sca ti si sca ñati̱ nu tsoˈo tsa nduˈni laca biˈ, tsoˈo tsa nchcuiˈ loˈo tyaˈa, ná tyiqueeˈ tyajaˈa̱ sca nguˈ cajaa cuentya jiˈi̱ ñati̱ biˈ, si caca cuaˈni lyaá nguˈ jiˈi̱ nu ñati̱ biˈ liˈ.
\v 8 Pana juaˈa̱ nguaˈni ycuiˈ Ndyosi loˈo na, chaˈ culuˈu Ni jiˈna chaˈ ntsuˈu tsa tyiquee Ni ñaˈa̱ Ni jiˈna; nda Ni jiˈi̱ Cristo chaˈ cajaa cuentya jiˈna, masi tya ntsuˈu tsa quiˈya jiˈna.
\v 9 Tsoˈo lacua. Cua laca ngua tsoˈo cresiya jiˈna cuentya jiˈi̱ ycuiˈ Ndyosi, xquiˈya chaˈ ndyalú tañi ycuiˈ Cristo loˈo ngujuii yu lo crusi. La cuiˈ juaˈa̱ cua lijya̱ nclyaá na juani; xquiˈya Cristo ngaˈaa xcubeˈ Ni jiˈna loˈo tye chalyuu.
\v 10 Tyaˈa cusu̱u̱ ycuiˈ Ndyosi ngua na; pana juani ngua stuˈba chaˈ jiˈna loˈo Ni, nu loˈo ngujuii Sñiˈ ycuiˈ Ni lo crusi. Biˈ chaˈ juani ngua ti̱ chaˈ jiˈna loˈo ycuiˈ Ndyosi, loˈo juaˈa̱ cuaˈni lyaá Ni jiˈna xquiˈya chaˈ cua ndyuˈú nu Jesús biˈ chaca quiyaˈ.
\v 11 Ni siˈi tsa lo cua ti chaˈ, masi loˈo chaˈ tsoˈo tsa ntsuˈu tyiquee na ñaˈa̱ na jiˈi̱ ycuiˈ Ndyosi xquiˈya Jesucristo nu Xuˈna na, chaˈ biˈ laca nu nguaˈni chaˈ caca ca stuˈba chaˈ jiˈna loˈo Ni.
\s Xquiˈya sca ti ñati̱ ngua cuxi chalyuu
\p
\v 12 Cua ngua chaˈ, xquiˈya chaˈ cuxi nu nguaˈni sca ti jyoˈo cusuˈ nu naa Adán, biˈ chaˈ nguxana chaˈ ntsuˈu quiˈya jiˈi̱ ñati̱ chalyuu; biˈ chaˈ ntsuˈu chaˈ ndyijii ñati̱. Loˈo juaˈa̱ tiyaˈ la ntsuˈu chaˈ cajaa lcaa na, chaˈ ntsuˈu quiˈya jiˈi̱ lcaa na.
\v 13 Juaˈa̱ ntsuˈu quiˈya jiˈi̱ ñati̱ chalyuu nu ngua tya clyo, masi bilya culo ycuiˈ Ndyosi cña chaˈ ná cuaˈni nguˈ chaˈ cuxi tyempo biˈ. Tsa biˈ ti chaˈ, ná nacui̱ nguˈ chaˈ quiˈya ngua, chaˈ ná jlo tiˈ nguˈ chaˈ ná ndiya tiˈ Ni cña cuxi nu ndyuˈni nguˈ.
\v 14 Tya loˈo ngutuˈú nu Adán biˈ chalyuu, hasta ca loˈo nda ycuiˈ Ndyosi chaˈ loˈo jyoˈo Moisés, xcuiˈ ngujuii ñati̱ xquiˈya chaˈ ntsuˈu tsa quiˈya jiˈi̱ nguˈ, masi ná stuˈba chaˈ cuxi nu nguaˈni nguˈ biˈ ñiˈya̱ nu nguaˈni jyoˈo Adán tya clyo, nu loˈo ná ndaquiyaˈ yu sca cña nu ngulo ycuiˈ Ndyosi jiˈi̱ yu. Sca lo ti cña nguaˈni jyoˈo Adán, sca ti chaˈ cuxi nguaˈni yu; pana nu Jesucristo nu ñaa chalyuu tiyaˈ la ni, chaca lo cña nguaˈni yu, cña tsoˈo nguaˈni.
\p
\v 15 Nu jyoˈo Adán ni, nguxtyanu yu yabeˈ hichu̱ˈ na xquiˈya chaˈ cuxi nu nguaˈni ycuiˈ ca yu; xquiˈya sca ti nu quiˈyu biˈ ngua cuxi chalyuu tya liˈ, biˈ chaˈ quiñaˈa̱ tsa ñati̱ ndyijii. Pana juani ni, xquiˈya sca ti ñati̱ nu naa Jesucristo, chaca lo chaˈ nda ycuiˈ Ndyosi loˈo na, sca chaˈ tsoˈo tsa laca biˈ; tlyu tsa chaˈ tsoˈo nu nguaˈni ycuiˈ Ndyosi cuentya jiˈna liˈ. Nacui̱ Ni chaˈ laja ti taca cuaˈni lyaá Ni jiˈna jiˈi̱ lcaa chaˈ cuxi nu ntsuˈu jiˈna. Loˈo juaˈa̱ quiñaˈa̱ tsa ñati̱ laca nu ndyuˈni Ni chaˈ ndyaca lubii cresiya jiˈi̱ nguˈ. 
\v 16 Ná stuˈba ndyuˈu chaˈ jiˈi̱ cña nu nguaˈni jyoˈo Adán loˈo cña nu ndyuˈni ycuiˈ Ndyosi. Nu Adán biˈ ni, sca ti chaˈ cuxi nguaˈni yu su clyo, loˈo liˈ ndyanu yabeˈ hichu̱ˈ yu; loˈo juaˈa̱ ndyanu yabeˈ hichu̱ˈ lcaa na loˈo tyaˈa na juani xquiˈya chaˈ cuxi biˈ. Loˈo juani quiñaˈa̱ tsa chaˈ cuxi nduˈni na lacua. Pana Jesús ni, sca cña laja ti nguaˈni cuentya jiˈna nu loˈo nguaˈni lyaá jiˈna jiˈi̱ nu cuxi; nguaˈni Ni chaˈ caca tsoˈo cresiya jiˈna cuentya jiˈi̱ ycuiˈ Ndyosi liˈ. 
\v 17 Ntsuˈu chaˈ cajaa na xquiˈya quiˈya nu ntsuˈu jiˈi̱ nu sca ti Adán biˈ, masi sca ti chaˈ cuxi nguaˈni yu; pana tlyu la cña ndyuˈni ycuiˈ Ndyosi cuentya jiˈna juani, nu loˈo ndyuˈni lubii Ni cresiya jiˈna. Quiñaˈa̱ tsa chaˈ xlyaˈbe nguaˈni Ni loˈo na; juaˈa̱ caja chalyuu cucui jiˈna juani xquiˈya Jesucristo, masi sca ti ñati̱ laca biˈ.
\p
\v 18 Ndiˈya̱ ngua liˈ: loˈo nguaˈni jyoˈo Adán chaˈ cuxi biˈ, la cuiˈ juaˈa̱ ndyanu yabeˈ hichu̱ˈ na, loˈo hichu̱ˈ lcaa tyaˈa ñati̱ na. Pana ndiˈya̱ ndyuˈu chaˈ loˈo nguaˈni Jesucristo sca chaˈ tsoˈo: liˈ laja ti nguaˈni Ni chaˈ cuityi̱ Ni yabeˈ nu ntsuˈu hichu̱ˈ na, chaˈ caja chalyuu nu ná ngaˈa̱ chaˈ tye jiˈna.
\v 19 Tya clyo cua ntsuˈu sca ñati̱ nu ná ndaquiyaˈ jiˈi̱ cña nu ngulo ycuiˈ Ndyosi jiˈi̱ yu, biˈ chaˈ ndyanu quiˈya jiˈi̱ lcaa na loˈo tyaˈa na juani. Loˈo tiyaˈ la liˈ, ya̱a̱ chaca ñati̱ nu ndaquiyaˈ jiˈi̱ cña nu ngulo Ni jiˈi̱; xquiˈya nu biˈ ndyaca tsoˈo cresiya jiˈi̱ lcaa na cuentya jiˈi̱ ycuiˈ Ndyosi juani.
\p
\v 20 Nu loˈo cuna na ni cña laca nu nclyo ycuiˈ Ndyosi jiˈna, liˈ nchca cuayáˈ la tiˈ na ñiˈya̱ laca quiˈya nu sta Ni jiˈna. Masi ndube tsa tiˈ na chaˈ ntsuˈu tsa chaˈ cuxi jiˈna, la cuiˈ juaˈa̱ jlo tiˈ na chaˈ ntajaˈa̱ Ni cuaˈni lyaá Ni jiˈna; jlo tiˈ na chaˈ nchca jiˈi̱ Ni, chaˈ tsoˈo tsa nduˈni Ni loˈo na.
\v 21 Nu cuxi laca loo jiˈna, biˈ chaˈ ndyijii na; pana juani ntiˈ ycuiˈ Ndyosi caca Ni loo jiˈna, chaˈ tyaˈna tsa tiˈ Ni jiˈna. Loˈo caca tsoˈo cresiya jiˈna cuentya jiˈi̱ Ni, liˈ ta Ni sca chalyuu nu ná ngaˈa̱ chaˈ tye jiˈna xquiˈya Jesús nu Xuˈna na.
\c 6
\s Xquiˈya Cristo, biˈ chaˈ taca caja chalyuu cucui jiˈi̱ ñati̱
\p
\v 1 Ndiˈya̱ ñacui̱ na lacua: Ná tsoˈo si ñaˈa̱ ti tya cuaˈni na chaˈ cuxi, chaˈ liˈ tya quiñaˈa̱ la chaˈ tsoˈo cuaˈni ycuiˈ Ndyosi loˈo na, ntiˈ na.
\v 2 Ná tsoˈo tsiyaˈ ti cuaˈni na ñiˈya̱ nu nguaˈni na saˈni la. Juani laca na ñiˈya̱ laca si cua ngujuii na loˈo Cristo, chaˈ xaˈ tyucui̱i̱ tsaa na juani; ná tsoˈo si ñaˈa̱ ti tya cuaˈni na chaˈ cuxi lacua.
\v 3 Nu loˈo ntyucuatya nguˈ jiˈna loˈo nguxana ca ti chaˈ tyuˈu chaˈ jiˈna loˈo Jesucristo, liˈ ñiˈya̱ si na cua ngujuii na stuˈba ti loˈo Jesús, juaˈa̱ ngua.
\v 4 Loˈo ntyucuatya nguˈ jiˈna, ndyaa na neˈ hitya liˈ, ñiˈya̱ laca si cua ndyaa na nguatsiˈ na stuˈba ti loˈo Cristo neˈ cuaá. Ca biˈ ntsiya jyoˈo na, chaˈ taca tyuˈú na chaca quiyaˈ, ñiˈya̱ loˈo ngutuˈu na nde lo hitya, chaˈ juaˈa̱ tlyu tsa chaˈ nu nguaˈni ycuiˈ Ndyosi Sti yu nu loˈo ndyuˈú Cristo chaca quiyaˈ. Loˈo juaˈa̱ caja sca chalyuu cucui jiˈna xquiˈya Cristo.
\p
\v 5 Juaˈa̱ ndyaca chaˈ cua laca ntsuˈu chaˈ jiˈna loˈo nu Cristo biˈ. Ngujuii yu nu loˈo ngüityi̱ yu quiˈya nu ntsuˈu jiˈna. Loˈo na ni, ñiˈya̱ laca si na cua ngujuii na, juaˈa̱ laca na; pana loˈo tyuˈú na chaca quiyaˈ, liˈ caja chaca chalyuu cucui jiˈna, ñiˈya̱ loˈo ndyuˈú Jesús chaca quiyaˈ.
\v 6 Cuxi tsa ñati̱ ngua na; pana juani laca na ñiˈya̱ laca si loˈo na ngujuii na lo sca crusi loˈo ngujuii ycuiˈ Jesús, chaˈ ngüityi̱ yu tsiyaˈ ti chaˈ cuxi nu ntsuˈu neˈ cresiya jiˈna liˈ. Biˈ chaˈ juani ngaˈaa caca jiˈi̱ chaˈ cuxi biˈ caca loo jiˈna chaca quiyaˈ. 
\v 7 Loˈo cua ngujuii sca ñati̱ ni, cua ndye chaˈ jiˈi̱ loˈo quiˈya nu ntsuˈu jiˈi̱ nde chalyuu liˈ.
\v 8 Loˈo na laca na juaˈa̱, nu loˈo ntsuˈu chaˈ jiˈna loˈo Cristo, chaˈ laca na ñiˈya̱ si cua ngujuii na loˈo Cristo; loˈo liˈ caca na ñiˈya̱ laca si cua ndyuˈú na loˈo Cristo chaca quiyaˈ.
\v 9 Jlo tiˈ na chaˈ cua ngulo Ni jiˈi̱ Cristo ca su ntsiya nguatsiˈ yu; ngaˈaa cajaa yu chaca quiyaˈ, ngaˈaa caca tyatsiˈ yu chaca quiyaˈ.
\v 10 Cua ngujuii Cristo, chaˈ sca ti quiyaˈ cuaˈni tye Ni jiˈi̱ lcaa quiˈya nu ntsuˈu jiˈi̱ ñati̱ chalyuu na; loˈo liˈ cua ndyuˈú yu chaca quiyaˈ, chaˈ tyucui tyempo tyiˈi̱ yu cuentya jiˈi̱ ycuiˈ Ndyosi Sti yu.
\v 11 Loˈo juaˈa̱ cuˈma̱ ni, ñiˈya̱ si cua nguaˈni tye ma̱ tsiyaˈ ti jiˈi̱ chaˈ cuxi nu ntsuˈu neˈ cresiya jiˈi̱ ma̱, juaˈa̱ culacua tiˈ ma̱; ñiˈya̱ si cua ndyuˈú ma̱ chaca quiyaˈ chaˈ xcuiˈ cuaˈni ma̱ cña jiˈi̱ ycuiˈ Ndyosi stuˈba ti loˈo Jesucristo nu Xuˈna na, juaˈa̱ culacua tiˈ ma̱.
\p
\v 12 Biˈ chaˈ juani ngaˈaa ta ma̱ chacuayáˈ chaˈ caca loo chaˈ cuxi biˈ jiˈi̱ ma̱ loˈo ndiˈi̱ ma̱ nde chalyuu. Ná tsoˈo chaˈ taquiyaˈ na jiˈi̱ lcaa lo chaˈ cuxi nu jña tiˈ na chaˈ cuaˈni na jiˈi̱, chaˈ laca na ñati̱ chalyuu ti.
\v 13 Ni sca ti tsuˈ yaˈ ma̱, ni sca ti tsuˈ quiyaˈ ma̱, ná ta ma̱ jiˈi̱ chaˈ jña nu xñaˈa̱, chaˈ ná caca ma̱ msu jiˈi̱ nu biˈ, chaˈ ná cuaˈni ma̱ chaˈ cuxi loˈo. Xaˈ ñaˈa̱ culacua tiˈ ma̱ juani; ta ma̱ tyucui ñaˈa̱ ma̱ chaˈ caca ma̱ cuentya jiˈi̱ ycuiˈ Ndyosi, ñiˈya̱ laca si ngujuii ma̱ tsaca quiyaˈ, loˈo liˈ xaˈ ndyuˈú ma̱ chaca quiyaˈ. Biˈ chaˈ juani ngaˈa̱ chaˈ ta ma̱ tyucui ñaˈa̱ ma̱ chaˈ cuaˈni ma̱ cña jiˈi̱ ycuiˈ Ndyosi, laja loˈo nduˈni ma̱ chaˈ tsoˈo ca su ndiˈi̱ ma̱.
\v 14 Ngaˈaa siˈi nu cuxi nu ntsuˈu chalyuu nu caca loo jiˈi̱ ma̱ juani. Siˈi xcuiˈ chaˈ ntsi̱i̱ ti tiˈ ma̱ tyiˈi̱ ma̱ chalyuu, ñiˈya̱ si loˈo nchcubeˈ tsa chaˈ cusuˈ biˈ jiˈi̱ ma̱; taca tyiˈi̱ tsoˈo ti ma̱ chalyuu juani, chaˈ xcuiˈ tlyu tsa chaˈ tsoˈo nu ndyuˈni Ni loˈo ma̱.
\s Ngaˈa̱ chaˈ cuiˈya nguˈ cuentya tilaca laca nu laca loo jiˈi̱ nguˈ
\p
\v 15 Ná tsoˈo ñacui̱ na chaˈ juani ngaˈaa ntsuˈu chaˈ taquiyaˈ na jiˈi̱ chaˈ cusuˈ biˈ, chaˈ ndaquiyaˈ na jiˈi̱ chaˈ nu nchcuiˈ ycuiˈ Ndyosi nu xcuiˈ chaˈ xlyaˈbe ti nduˈni loˈo na. Ná tsoˈo laca si tya cuaˈni la na chaˈ cuxi liˈ, chaˈ ngaˈaa ntsuˈu chacuayáˈ jiˈna chaˈ cuaˈni na juaˈa̱.
\v 16 Nu loˈo ndyaˈa̱ na neˈ xña jiˈi̱ sca ñati̱ ni, taquiyaˈ na sca cña nu culo ñati̱ biˈ jiˈna liˈ; jlo tiˈ na chaˈ nu ñati̱ biˈ laca xuˈna na, loˈo juaˈa̱ ngaˈa̱ chaˈ taquiyaˈ na jiˈi̱ chaˈ nu nchcuiˈ nu xuˈna biˈ. Loˈo nu cuxi nu ndyuˈni chaˈ caca na cuxi ni, si ndyuˈni chaˈ cuxi biˈ chaˈ laca biˈ loo jiˈna, liˈ ntsuˈu chaˈ cajaa na tsiyaˈ ti; pana si ycuiˈ Ndyosi laca loo jiˈna, taquiyaˈ na jiˈi̱ chaˈ nu nchcuiˈ Ni liˈ, caca tsoˈo cresiya jiˈna liˈ.
\v 17-18 Tsoˈo tsa ntiˈ naˈ chaˈ tyucui tyiquee ma̱ ndyuˈni ma̱ cña jiˈi̱ ycuiˈ Ndyosi, tsa ñaˈa̱ chaˈ nu nguluˈu nguˈ jiˈi̱ ma̱. Nu chaˈ cuxi, biˈ laca nu ngua loo jiˈi̱ ma̱; pana loˈo cua ngulaá ma̱ jiˈi̱ nu cuxi biˈ, liˈ nguxana ma̱ nduˈni ma̱ cña chaˈ caja chaca chalyuu su caca lubii cresiya jiˈi̱ ma̱, chaˈ ycuiˈ Ndyosi laca loo jiˈi̱ ma̱ juani.
\v 19 Juaˈa̱ laca chaˈ nu nda naˈ loˈo cuˈma̱, chaˈ caca cuayáˈ la tiˈ ma̱ tilaca laca nu laca loo jiˈi̱ ma̱. Tya tsubiˈ la cua nda ma̱ tyucui ñaˈa̱ ma̱ chaˈ cuaˈni ma̱ chaˈ subaˈ, chaˈ cuaˈni ma̱ chaˈ cuxi, loˈo juaˈa̱ lye la ndyacua chaˈ cuxi jiˈi̱ ma̱ liˈ; biˈ chaˈ juani ta ma̱ tyucui ñaˈa̱ ma̱ chaˈ xcuiˈ cña tsoˈo cuaˈni ma̱, chaˈ xcuiˈ cuentya jiˈi̱ ycuiˈ Ndyosi tyiˈi̱ ma̱ chalyuu.
\p
\v 20 Cua tsubiˈ la loˈo tya nduˈni ma̱ xcuiˈ chaˈ cuxi, ná ngua jiˈi̱ ma̱ cuaˈni ma̱ cña tsoˈo ñiˈya̱ nu ntiˈ ycuiˈ Ndyosi chaˈ cuaˈni na;
\v 21 ni sca quiyaˈ ná ngua tsoˈo chaˈ jiˈi̱ ma̱ loˈo nguaˈni ma̱ chaˈ cuxi nu ngua liˈ. Loˈo juani ntyujuˈu tsa tiˈ ma̱ xquiˈya chaˈ cuxi nu nguaˈni ma̱. Tsa biˈ ti cña nduˈni nu chaˈ cuxi biˈ, chaˈ cuaˈni tye biˈ jiˈi̱ ñati̱ si taquiyaˈ nguˈ jiˈi̱; ngaˈaa caca tyuˈu chaˈ jiˈi̱ nguˈ loˈo ycuiˈ Ndyosi si juaˈa̱ nduˈni nguˈ. 
\v 22 Pana juani ni, ngaˈaa caca jiˈi̱ nu cuxi biˈ culo cña jiˈi̱ ma̱, chaˈ cua ndyatí̱ ma̱ lo cña jiˈi̱ ycuiˈ Ndyosi. Chaa tiˈ ma̱ ndyuˈni ma̱ cña jiˈi̱ Ni juani, chaˈ xcuiˈ na ndiˈi̱ ma̱ chalyuu cuentya jiˈi̱ ycuiˈ Ni; liˈ ná ngaˈa̱ chaˈ tye chalyuu nu ta Ni jiˈi̱ ma̱ loˈo cua ndye lcaa chaˈ.
\v 23 Tsa biˈ ti cayaˈ caja jiˈna loˈo nduˈni na chaˈ cuxi, chaˈ chcunaˈ lyiji cresiya jiˈna loˈo; pana si stuˈba ntsuˈu chaˈ jiˈna loˈo Jesús nu Xuˈna na, liˈ ta ycuiˈ Ndyosi sca chalyuu nu ná ngaˈa̱ chaˈ tye jiˈna. Sca chaˈ xlyaˈbe nu nda ti Ni jiˈna laca.
\c 7
\s Cua nscua sca chaˈ nu ndacaˈa jiˈi̱ ñati̱ nu ntsuˈu clyoˈo
\p
\v 1 Cuˈma̱ nguˈ tyaˈa na, ntsuˈu nguˈ tyaˈa ma̱ nu tsoˈo tsa jlo tiˈ lcaa cña nu ngulo ycuiˈ Ndyosi jiˈna; cua jlo tiˈ ma̱ chaˈ ndatsaa chaˈ biˈ jiˈna tyucui tyempo loˈo tya luˈú ti na.
\v 2 Ñiˈya̱ laca sca nu cunaˈa̱ nu ntsuˈu clyoˈo ni, cuentya jiˈi̱ cña nu ngulo Ni jiˈi̱ jyoˈo cusuˈ jiˈna biˈ, ngaˈa̱ chaˈ tyiˈi̱ nu cunaˈa̱ biˈ loˈo clyoˈo tyucui tyempo loˈo tya luˈú ti yu; sca ti nu loˈo cua ngujuii yu, liˈ ngaˈaa cuaˈa chaˈ biˈ jiˈi̱ nu cunaˈa̱ biˈ, ngaˈaa ntsuˈu nu cuentya jiˈi̱ liˈ.
\v 3 Ndiˈya̱ laca chaˈ: si tyuˈu chaˈ jiˈi̱ nu cunaˈa̱ biˈ loˈo chaca nu quiˈyu loˈo tya luˈú ti clyoˈo, cña cuxi laca nu cuaˈni nu cunaˈa̱ biˈ liˈ. Pana si cua ngujuii clyoˈo nu cunaˈa̱ biˈ, ngaˈaa ndatsaa chaˈ biˈ jiˈi̱; taca caja clyoˈo nu cunaˈa̱ biˈ loˈo xaˈ nu quiˈyu, chaˈ siˈi sca cña cuxi laca nu cuaˈni liˈ, nu loˈo ngaˈaa luˈú clyoˈo nu cunaˈa̱ biˈ.
\p
\v 4 Ndiˈya̱ laca na juani cuentya jiˈi̱ chaˈ cusuˈ nu ndaquiyaˈ tsa na jiˈi̱ tya saˈni la: ñiˈya̱ laca sca nu cunaˈa̱ nu ngaˈaa ntsuˈu clyoˈo, juaˈa̱ laca lcaa tyaˈa na nu ntsuˈu chaˈ jiˈna loˈo Cristo. Na cua ngujuii Cristo lo crusi, biˈ chaˈ juani ngaˈaa ntsuˈu chaˈ jiˈna loˈo nu chaˈ cusuˈ biˈ. Cua ngua stuˈba chaˈ jiˈna loˈo Cristo nu loˈo ndyuˈú yu chaca quiyaˈ loˈo cua ngujuii yu, biˈ chaˈ taca jiˈna cuaˈni na cña jiˈi̱ ycuiˈ Ndyosi laja loˈo tya ndiˈi̱ ti na nde chalyuu.
\v 5 Nu ngua cua tsubiˈ la, cuxi ti ndiˈi̱ na, chaˈ ñati̱ chalyuu laca na; ngua tiˈ na cuaˈni na lcaa lo chaˈ cuxi nu ndiya tiˈ na jiˈi̱, masi cua ndyuna na chaˈ cusuˈ nu ntiˈ cuaˈa jiˈna. Biˈ chaˈ la cuiˈ chaˈ cuxi biˈ nguaˈni loˈo na chaˈ chcunaˈ lyiji chalyuu jiˈna. 
\v 6 Pana juani cua ndiˈi̱ laja ti na cuentya jiˈi̱ nu chaˈ cusuˈ biˈ, ngaˈaa caca jiˈi̱ chaˈ biˈ culo cña jiˈna. Cua ngua laja jiˈna juani chaˈ cuaˈni na cña nu ntiˈ ycuiˈ Ndyosi, xquiˈya chaˈ cua ngujui chaca chalyuu cucui nu nda Xtyiˈi ycuiˈ Ndyosi jiˈna.
\s Loo laca nu chaˈ cuxi nu ntsuˈu neˈ cresiya jiˈi̱ nguˈ 
\p
\v 7 Ndiˈya̱ ñacui̱ na lacua: Siˈi la cuiˈ chaˈ cusuˈ nu nduˈni chaˈ caca cuxi. Nu loˈo bilya cuna naˈ chaˈ biˈ, bilya ca cuayáˈ tiˈ naˈ na ca laca sca chaˈ cuxi; ná ngua cuayáˈ tiˈ naˈ nquichaˈ, masi cuxi tsa laca chaˈ tyacui tiˈ naˈ jiˈi̱ sca na nu ntsuˈu jiˈi̱ tyaˈa naˈ. Pana loˈo cua ndyuna naˈ ni cña ngulo ycuiˈ Ndyosi jiˈna, chaˈ ná tyacui tiˈ na jiˈi̱ chaˈ biˈ tsiyaˈ ti, liˈ ngua cuayáˈ tiˈ naˈ chaˈ ná tsoˈo laca chaˈ ndacui tiˈ naˈ jiˈi̱ sca na juaˈa̱.
\v 8 Pana nguaˈni nu cuxi ngana ˈna liˈ. Masi jlo tiˈ naˈ chaˈ cuxi tsa chaˈ biˈ, ñaˈa̱ ti ndiya tiˈ naˈ cuaˈni naˈ lcaa lo chaˈ cuxi; si ná loˈo nscua sca chaˈ nu cuaˈa ˈna, ná ta naˈ cuentya chaˈ cuxi laca sca cña nu ndyuˈni naˈ.
\v 9 Ngua tiˈ naˈ chaˈ tsoˈo tsa ngutiˈi̱ naˈ, nu loˈo tya lyiji ca cuayáˈ tiˈ naˈ ni chaˈ nda chaˈ cusuˈ biˈ; pana nu loˈo ngua cuayáˈ tiˈ naˈ, liˈ ngua tii naˈ chaˈ ntsuˈu tsa quiˈya jnaˈ. Na cua chcunaˈ ti chalyuu ˈna ngua liˈ.
\v 10 Ngua tiˈ ycuiˈ Ndyosi chaˈ caja chalyuu jiˈna nquichaˈ, nu loˈo taquiyaˈ na jiˈi̱ lcaa cña nu ngulo Ni nu ngua saˈni. Pana siˈi juaˈa̱ ngua loˈo naˈ; cua chcunaˈ ti chalyuu ˈna liˈ, chaˈ ngua tii naˈ chaˈ ntsuˈu tsa quiˈya ˈna liˈ.
\v 11 Chaˈ cuxi laca nu nguaˈni ngana ˈna; biˈ chaˈ tya nguaˈni la naˈ chaˈ cuxi, masi cua nchcuiˈ chaˈ cusuˈ biˈ loˈo naˈ chaˈ ná cuaˈni naˈ juaˈa̱. Na nchcubeˈ tsa chaˈ cuxi biˈ ˈna, cua laca chaˈ ˈna ñiˈya̱ laca si cua ngujuii naˈ.
\p
\v 12 Chañi chaˈ sca chaˈ tsoˈo jiˈi̱ ycuiˈ Ndyosi laca chaˈ cusuˈ biˈ; lcaa cña nu ngulo Ni jiˈna, ca slo ycuiˈ Ni ngutuˈu chaˈ biˈ. Liñi tsa nduˈni ycuiˈ Ndyosi, tsoˈo tsa ndyuˈu chaˈ nu nda Ni loˈo na;
\v 13 biˈ chaˈ ná taca ñacui̱ naˈ chaˈ cua chcunaˈ ti chalyuu ˈna xquiˈya chaˈ biˈ. Chaˈ cuxi nu ndyuˈni naˈ, biˈ laca nu nduˈni ñuˈu̱ jiˈi̱ chalyuu ˈna. Loˈo juani nchca cuayáˈ tiˈ naˈ ñiˈya̱ laca sca chaˈ cuxi; laja loˈo ndyuna naˈ chaˈ tsoˈo tsa ndyuˈu chaˈ cusuˈ biˈ, la cuiˈ hora liˈ nduˈni nu chaˈ cuxi biˈ ngana ˈna. Biˈ chaˈ tsoˈo la nchca cuayáˈ tiˈ naˈ chaˈ lye tsa laca nu chaˈ cuxi nu nduˈni naˈ.
\p
\v 14 Jlo tiˈ na chaˈ cña nu ngulo ycuiˈ Ndyosi laca nu chaˈ cusuˈ biˈ; sca ti si loˈo Xtyiˈi ycuiˈ Ndyosi cuaˈni cña neˈ cresiya jiˈna, liˈ taca jiˈna taquiyaˈ na jiˈi̱ cña biˈ. Pana nu naˈ ni, ñati̱ chalyuu ti laca naˈ, loo la laca nu chaˈ cuxi biˈ neˈ cresiya jnaˈ.
\v 15 Ná nchca ca cuayáˈ tiˈ naˈ ni chaˈ laca nduˈni naˈ xcuiˈ chaˈ cuxi. Ntiˈ naˈ cuaˈni naˈ sca cña tsoˈo nquichaˈ, pana ná nchca ˈna tsiyaˈ ti; chaˈ cuxi nu ná ndiya tiˈ naˈ jiˈi̱, biˈ laca nu nduˈni naˈ.
\v 16 Chaˈ ná tsoˈo ntiˈ naˈ loˈo nduˈni naˈ chaˈ cuxi biˈ, biˈ chaˈ jlo tiˈ naˈ chaˈ stuˈba ntsuˈu chaˈ jnaˈ loˈo nu chaˈ cusuˈ biˈ, masi ná ndaquiyaˈ naˈ jiˈi̱. 
\v 17 Biˈ chaˈ lacua, siˈi ycuiˈ naˈ laca̱ nu nduˈni chaˈ cuxi biˈ; masi nu chaˈ cuxi nu laca loo neˈ cresiya jnaˈ, biˈ laca nu ndatsaa ˈna chaˈ cuaˈni naˈ jiˈi̱ liˈ.
\v 18 Cua jlo tiˈ naˈ chaˈ ná tsoˈo laca chaˈ nu ntsuˈu neˈ cresiya jnaˈ, chaˈ ñati̱ chalyuu ti laca naˈ; masi ntiˈ tsa naˈ cuaˈni naˈ xcuiˈ chaˈ tsoˈo nquichaˈ, pana ná nchca jnaˈ tsiyaˈ ti.
\v 19 Ná nchca jnaˈ cuaˈni naˈ chaˈ tsoˈo nu ntiˈ naˈ cuaˈni; ñaˈa̱ ti nduˈni naˈ chaˈ cuxi, masi ngaˈaa ntiˈ naˈ cuaˈni naˈ juaˈa̱.
\v 20 Ndiˈya̱ ndyuˈu chaˈ lacua: loˈo ndyuˈni naˈ sca chaˈ nu ná tsoˈo ntiˈ naˈ, siˈi ycuiˈ naˈ nu nduˈni chaˈ cuxi biˈ liˈ; masi nu chaˈ cuxi nu laca loo neˈ cresiya jnaˈ, biˈ laca nu ndatsaa ˈna chaˈ ndyuˈni naˈ jiˈi̱. 
\p
\v 21 Loˈo liˈ ndiˈya̱ ndyaca chaˈ ˈna lacua: Masi ntiˈ tsa naˈ cuaˈni naˈ sca chaˈ tsoˈo nquichaˈ, nchca cuayáˈ tiˈ naˈ chaˈ xcuiˈ chaˈ cuxi ntsuˈu neˈ cresiya jnaˈ. 
\v 22 Tyucui tyiquee naˈ ndiya tsa tiˈ naˈ cuaˈni naˈ lcaa cña nu ngulo ycuiˈ Ndyosi jiˈna nu ngua saˈni;
\v 23 pana nchca cuayáˈ tiˈ naˈ chaˈ ndiˈi̱ chaca nu laca loo jiˈi̱ tyucui ñaˈa̱ naˈ. Nxu̱u̱ tyaˈa biˈ loˈo lcaa chaˈ tsoˈo nu ntsuˈu tyiquee naˈ jiˈi̱; biˈ laca chaˈ cuxi nu ntsuˈu neˈ cresiya jnaˈ, nu nduˈni loˈo naˈ chaˈ cuaˈni naˈ cña jiˈi̱, ñiˈya̱ ntiˈ si cua laca naˈ sca preso.
\p
\v 24 Xñiˈi̱ tsa tiˈ naˈ lacua. ¿Tilaca caca jiˈi̱ cuaˈni lyaá jiˈi̱ tyucui ñaˈa̱ naˈ, chaˈ ngaˈaa cuaˈni naˈ chaˈ cuxi juaˈa̱? Cua chcunaˈ ti chalyuu ˈna xquiˈya chaˈ cuxi nu ntsuˈu neˈ cresiya ˈna.
\v 25 Sca ti ycuiˈ Ndyosi Sti na taca jiˈi̱ Ni cuaˈni lyaá Ni ˈna, xquiˈya cña nu nguaˈni Jesucristo nu Xuˈna na. ¡Biˈ chaˈ quiñaˈa̱ tsa xlyaˈbe tya naˈ jiˈi̱ ycuiˈ Ndyosi lacua! Pana tsa biˈ ti chaˈ jlo tiˈ naˈ, chaˈ ngaˈa̱ chaˈ taquiyaˈ naˈ jiˈi̱ cña nu ngulo ycuiˈ Ndyosi; ná nchca jnaˈ cuaˈni lyaá naˈ jiˈi̱ ycuiˈ ca naˈ chaˈ ñati̱ chalyuu ti laca naˈ, loˈo juaˈa̱ ñaˈa̱ ti tya ndyuˈni ñati̱ chalyuu chaˈ cuxi.
\c 8
\s Chalyuu cucui nu ntsuˈu jiˈi̱ nguˈ xquiˈya Xtyiˈi ycuiˈ Ndyosi
\p
\v 1 Pana juani ni, ndiˈya̱ nguaˈni ycuiˈ Ndyosi: Ngaˈaa ndyanu yabeˈ hichu̱ˈ na, si stuˈba ntsuˈu chaˈ jiˈna loˈo Jesucristo; ngaˈaa taca jiˈi̱ nu cuxi nu ntsuˈu chalyuu cojolaqui jiˈna juani, chaˈ Xtyiˈi ycuiˈ Ndyosi laca loo jiˈna loˈo ndiˈi̱ na nde chalyuu.
\v 2 Nu loˈo laca Xtyiˈi ycuiˈ Ndyosi loo jiˈna, liˈ caja chalyuu cucui jiˈna xquiˈya Jesucristo, chaˈ stuˈba ntsuˈu chaˈ jiˈna loˈo Ni; na cua ngulo Ni jiˈna yaˈ nu cuxi nu ndyuˈni chaˈ chcunaˈ chalyuu jiˈna.
\v 3 Cua nguaˈni Ni sca chaˈ tlyu nu ná ngua cuaˈni nu chaˈ cusuˈ nu nda jyoˈo Moisés loˈo ñati̱ nu ngua saˈni. Ná ngua cña chaˈ biˈ, xquiˈya chaˈ cuxi tsa tyiquee ñati̱ chalyuu na; pana ngua jiˈi̱ ycuiˈ Ndyosi cuaˈni chaˈ tlyu biˈ, nu loˈo nda Ni jiˈi̱ Sñiˈ ycuiˈ ca Ni ya̱a̱ chalyuu re chaˈ ngua ñati̱. Nda Ni jiˈi̱ nu Jesús biˈ ya̱a̱, chaˈ caca yu sca msta̱ luˈú; biˈ laca msta̱ nu ngua jiˈi̱ cuityi̱ quiˈya nu ntsuˈu jiˈna. Ngua Jesús ñati̱; stuˈba ti ngua yu ñiˈya̱ laca cua ñaˈa̱ ca ñati̱ chalyuu, chaˈ juaˈa̱ ngua jiˈi̱ yu cuaˈni tye yu jiˈi̱ quiˈya nu ntsuˈu jiˈi̱ ñati̱ cuxi na. Biˈ chaˈ ngua Ni ñati̱.
\v 4 Loˈo nu juani taca cuaˈni na cña nu ngulo Ni jiˈna, la cuiˈ cña laca nu nchcuiˈ chaˈ cusuˈ biˈ chaˈ cuaˈni na; taca cuaˈni na jiˈi̱ juani, xquiˈya chaˈ ngaˈaa caca cojolaqui nu cuxi nu ntsuˈu chalyuu jiˈna, chaˈ Xtyiˈi ycuiˈ Ndyosi laca loo jiˈna loˈo ndiˈi̱ na chalyuu juani.
\p
\v 5 Nu loˈo cuaˈni na ñiˈya̱ nu nduˈni ñati̱ chalyuu ti, la cuiˈ chaˈ cuxi nu ntsuˈu jiˈi̱ ñati̱ biˈ, biˈ laca loo neˈ cresiya jiˈna liˈ; pana si Xtyiˈi ycuiˈ Ndyosi laca loo jiˈna loˈo ndiˈi̱ na chalyuu, liˈ taca taquiyaˈ na jiˈi̱ lcaa chaˈ nu nchcuiˈ ycuiˈ Ndyosi.
\v 6 Chcunaˈ chalyuu jiˈna, si xcuiˈ cuaˈni na chaˈ cuxi nu ntsuˈu nde chalyuu ti; pana caja chalyuu cucui jiˈna chaˈ ti̱ ti tyiˈi̱ tyiquee na, si taquiyaˈ na jiˈi̱ lcaa chaˈ nu nchcuiˈ ycuiˈ Ndyosi.
\v 7 Tyaˈa cusu̱u̱ ycuiˈ Ndyosi laca na, si ñaˈa̱ ti nduˈni na chaˈ cuxi ñiˈya̱ nu nduˈni ñati̱ chalyuu ti; ná nchca jiˈna tsiyaˈ ti taquiyaˈ na jiˈi̱ chaˈ nu nda ycuiˈ Ni loˈo na, si ñaˈa̱ ti tya ntiˈ na cuaˈni na chaˈ cuxi.
\v 8 Biˈ chaˈ ná taca jiˈna cuaˈni na cña nu ntiˈ ycuiˈ Ni chaˈ cuaˈni na, si tiji̱ˈ tsa tiˈ na jiˈi̱ chaˈ cuxi nu ntsuˈu chalyuu.
\p
\v 9 Ngaˈaa siˈi juaˈa̱ ndiˈi̱ ma̱ juani, ngaˈaa nchca tiji̱ˈ tiˈ ma̱ jiˈi̱ chaˈ cuxi nu ntsuˈu nde chalyuu; stuˈba ntsuˈu chaˈ jiˈi̱ ma̱ loˈo ycuiˈ Ndyosi juani, chaˈ cua nda ycuiˈ Ndyosi Xtyiˈi Ni chaˈ tyanu neˈ cresiya jiˈi̱ ma̱. Loˈo juaˈa̱ ná ntsuˈu chaˈ jiˈna loˈo Cristo tsiyaˈ ti, si bilya tyanu Xtyiˈi ycuiˈ Ni neˈ cresiya jiˈna, la cuiˈ Xtyiˈi nu ndyuˈu jiˈi̱ Cristo.
\v 10 Masi nguaˈni nu cuxi nu ntsuˈu chalyuu chaˈ chcunaˈ chalyuu jiˈi̱ ma̱, pana tya luˈú ma̱ juani, xquiˈya chaˈ luˈú Xtyiˈi ycuiˈ Ni neˈ cresiya jiˈi̱ ma̱ si ntsuˈu chaˈ jiˈi̱ ma̱ loˈo Cristo. Ndyanu Xtyiˈi ycuiˈ Ni loˈo ma̱ nu loˈo ngua tsoˈo cresiya jiˈi̱ ma̱ cuentya jiˈi̱ ycuiˈ Ndyosi chacuayáˈ jiˈi̱ Jesús.
\v 11 La cuiˈ Xtyiˈi ycuiˈ Ndyosi laca biˈ, la cuiˈ laca nu ngulo jiˈi̱ jyoˈo Jesús ca su ntsiya nguatsiˈ, ndyuˈú yu chaca quiyaˈ liˈ. Loˈo juaˈa̱ cua nda ycuiˈ Ndyosi Xtyiˈi ycuiˈ Ni chaˈ tyanu neˈ cresiya jiˈi̱ ma̱, chaˈ nu loˈo cajaa ma̱, liˈ cuaˈni Ni chaˈ tyuˈú ma̱ chaca quiyaˈ xquiˈya Xtyiˈi ycuiˈ Ni.
\p
\v 12 Cuˈma̱ nguˈ tyaˈa ntsuˈu chaˈ jiˈna loˈo Cristo, juani ngaˈaa caca jiˈi̱ ñati̱ culo nguˈ cña jiˈna, chaˈ cuaˈni na chaˈ cuxi ñiˈya̱ nduˈni ñati̱ chalyuu ti.
\v 13 Chcunaˈ chalyuu jiˈi̱ ma̱ si xcuiˈ culana ma̱ jiˈi̱ chaˈ cuxi loˈo ndiˈi̱ ma̱ chalyuu; pana chacuayáˈ jiˈi̱ Xtyiˈi ycuiˈ Ni taca tyiji̱loo ma̱ jiˈi̱ chaˈ cuxi nu ntsuˈu jiˈi̱ ma̱, chaˈ ngaˈaa cuaˈni la ma̱ jiˈi̱. Caja chalyuu nu ná ngaˈa̱ chaˈ tye jiˈi̱ ma̱ liˈ.
\p
\v 14 Cua ñaˈa̱ ca na, cua laca na sñiˈ ycuiˈ Ndyosi si nduˈni na cua ñaˈa̱ ca cña nu nclyo Xtyiˈi ycuiˈ Ndyosi jiˈna.
\v 15 Na cua nda ycuiˈ Ndyosi Xtyiˈi Ni jiˈi̱ ma̱, chaˈ nduˈni Xtyiˈi Ni chaˈ caca ma̱ sñiˈ ycuiˈ Ndyosi; nduˈni biˈ chaˈ ndiˈya̱ taca chcuiˈ na loˈo ycuiˈ Ndyosi: “Sti ya”, ñacui̱ na jiˈi̱ Ni. Siˈi chaˈ cuxi nduˈni Xtyiˈi Ni nu loˈo nclyo biˈ cña jiˈi̱ ma̱, siˈi chaˈ xcutsi̱i̱ jiˈi̱ ma̱ ñiˈya̱ nu ntsi̱i̱ ma̱ cua saˈni la, siˈi juaˈa̱ cña nduˈni nu biˈ.
\v 16 Chaˈ nu ntsuˈu neˈ cresiya jiˈna ni, stuˈba nchcuiˈ chaˈ biˈ loˈo chaˈ nu nda Xtyiˈi Ni loˈo na, chaˈ cua laca na sñiˈ ycuiˈ Ni.
\v 17 Nu loˈo cua laca na sñiˈ ycuiˈ Ni, loˈo jiˈna tyacua lcaa chaˈ tsoˈo nu ta Ni liˈ, lcaa ñaˈa̱ chaˈ nu cua nda Ni jiˈi̱ Cristo; pana si cua ntiˈ na chaˈ stuˈba ti tyiˈi̱ na loˈo Cristo ca su tlyu ca su ntucua Ni, liˈ ntsuˈu chaˈ talo na loˈo ndyuˈni lyaˈ tiˈ nguˈ jiˈna nde chalyuu ti, ñiˈya̱ ndalo ycuiˈ Cristo loˈo nguaˈni lyaˈ tiˈ nguˈ jiˈi̱ yu.
\p
\v 18 Ntsuˈu quiyaˈ ndyiji xi chaˈ tiˈí jiˈna laja loˈo ndiˈi̱ ti na nde chalyuu; pana xca ti chaˈ laca chaˈ biˈ, ná stuˈba laca chaˈ tiˈí biˈ loˈo chaˈ tsoˈo nu caja jiˈna ca nde loo la, ntiˈ naˈ. Loˈo juaˈa̱ tya lyiji culuˈu Ni lcaa chaˈ jiˈna, ñiˈya̱ caca chaˈ tsoˈo biˈ nde loo la.
\v 19 Lcaa ca na luˈú nu cua ngüiñá ycuiˈ Ndyosi nde chalyuu ni, ntajatya tsa na biˈ jiˈi̱ ycuiˈ Ndyosi, ni jacuaˈ culuˈu Ni jiˈi̱ ñati̱ chalyuu tilaca nu chañi chaˈ laca nguˈ sñiˈ ycuiˈ Ni.
\v 20 Cua ngunuˈu̱ lcaa chalyuu; lcaa lo na nu ntsuˈu nde chalyuu ni, ná lcaa na biˈ ngua ñiˈya̱ nu ngua tiˈ ycuiˈ Ndyosi chaˈ caca chaˈ biˈ loˈo ngüiñá Ni jiˈi̱. Cua nguxtyanu Ni chalyuu chaˈ tyanu juaˈa̱ ti, masi siˈi juaˈa̱ ndiya tiˈ lcaa lo na nu ntsuˈu chalyuu biˈ. Pana ná ngaˈa̱ chaˈ tyanu chaˈ juaˈa̱ tyucui tyempo; 
\v 21 cua tyalaa ti sca tsa̱ nu tye lcaa chaˈ cuxi nu nduˈni chaˈ quiñuˈu̱ chalyuu, lcaa chaˈ cuxi nu laca loo jiˈna. Loˈo liˈ tsoˈo tsa caca lcaa lo na nu ngüiñá Ni nde chalyuu, chaˈ stuˈba ti cuaˈni lyaá Ni jiˈi̱ nu na biˈ loˈo jiˈna nu laca na sñiˈ ycuiˈ Ni.
\v 22 Tya lyiji caca chaˈ tlyu biˈ, pana jlo tiˈ na chaˈ ntsuˈu tsa chaˈ tiˈí, ntsuˈu tsa chaˈ quicha tiˈ jiˈi̱ lcaa na nu ngüiñá ycuiˈ Ndyosi nde chalyuu. Ñiˈya̱ loˈo lijya̱ tiˈí jiˈi̱ sca nu cunaˈa̱ chaˈ cua cala ti sñiˈ, juaˈa̱ ntsuˈu chaˈ tiˈí chalyuu juani.
\v 23 La cuiˈ juaˈa̱ loˈo lcaa tyaˈa na nu ntsuˈu Xtyiˈi ycuiˈ Ndyosi jiˈna, nxiˈya na ndiˈi̱ na chaˈ ntsuˈu tsa chaˈ tiˈí jiˈna juani. Na cua nda Ni Xtyiˈi ycuiˈ Ni jiˈna loˈo ndiˈi̱ na nde chalyuu, sca chaˈ tsoˈo nu nda Ni jiˈna yala la laca. Laja liˈ ntajatya tsa na jiˈi̱ tsa̱ tlyu biˈ, chaˈ cuaˈni lyaá lyiji Ni jiˈna, chaˈ xcutsaˈa̱ Ni jiˈi̱ tyucui ñaˈa̱ na liˈ. Loˈo liˈ ta Ni su tyiˈi̱ na slo Ni, chaˈ cua laca na sñiˈ ycuiˈ Ni.
\v 24 Jlya tiˈ na chaˈ nguaˈni lyaá Ni jiˈna, masi ngaˈa̱ chaˈ jatya na jiˈi̱ tsa̱ tlyu biˈ, chaˈ cuaˈni tye Ni cña nu ndyuˈni Ni. Sca na nu ntajatya na jiˈi̱ ni, loˈo cua naˈa̱ na jiˈi̱, chaˈ nduˈu tucua chaˈ biˈ, ngaˈaa ntiˈ chaˈ jatya la na jiˈi̱ liˈ; siˈi na tya ntajatya na jiˈi̱, na cua naˈa̱ na jiˈi̱ liˈ.
\v 25 Pana loˈo chañi chaˈ tya ntajatya na jiˈi̱ sca chaˈ, liˈ ntsuˈu chaˈ talo na jiˈi̱, masi tya lyiji ñaˈa̱ na jiˈi̱, masi talo na tyiqueeˈ ñaˈa̱ cuayáˈ nu ñaˈa̱ na jiˈi̱ chaˈ cua ndyuˈu tucua.
\p
\v 26 Biˈ chaˈ laca chaˈ nxtyucua Xtyiˈi ycuiˈ Ndyosi jiˈna, chaˈ ná nchca jiˈna tsiyaˈ ti. Ná jlo tiˈ na ñiˈya̱ nu tsoˈo la chcuiˈ na loˈo ycuiˈ Ndyosi, pana Xtyiˈi ycuiˈ Ni laca nu ncluˈu jiˈna ñiˈya̱ nu chcuiˈ na loˈo Ni. Cua jlo tiˈ Xtyiˈi ycuiˈ Ni chaˈ tiˈi̱ tsa chaˈ nu ntsuˈu tyiquee na, chaˈ ná ndyiji ñiˈya̱ caca chcuiˈ na chaˈ biˈ loˈo Ni; biˈ chaˈ loˈo Xtyiˈi ycuiˈ Ndyosi nchcuiˈ loˈo ycuiˈ Ndyosi Sti na cuentya jiˈna liˈ.
\v 27 Nclyotu̱ ycuiˈ Ndyosi lcaa ca chaˈ nu ntsuˈu neˈ cresiya jiˈi̱ ñati̱. Loˈo juaˈa̱ jlo tiˈ Ni lcaa chaˈ nu ntiˈ Xtyiˈi ycuiˈ Ni ta loˈo Ni, chaˈ nu loˈo ndijña nu biˈ sca chaˈ jiˈi̱ ycuiˈ Ndyosi Sti na cuentya jiˈna, stuˈba ntiˈ Xtyiˈi Ni loˈo lcaa chaˈ nu nclyacua tiˈ ycuiˈ Ndyosi Sti na.
\s Ngaˈaa ntsuˈu nu cuxi nu caca cuaˈni chaˈ culayaˈ ycuiˈ Ndyosi jiˈi̱ ñati̱ jiˈi̱ Ni
\p
\v 28 Jlo tiˈ na chaˈ cua nda ycuiˈ Ndyosi chacuayáˈ ñiˈya̱ caca lcaa chaˈ nu ndyaca chalyuu, chaˈ caca tsoˈo chalyuu su ndiˈi̱ na si ntsuˈu tyiquee na ñaˈa̱ na jiˈi̱ Ni. Na cua ngusubi Ni jiˈna juani, chaˈ caca na ñiˈya̱ nu ngua tiˈ Ni tya clyo chaˈ caca na.
\v 29 Masi tya loˈo nguxana chalyuu, tya liˈ jlo tiˈ ycuiˈ Ni tilaca laca nu tyajaˈa̱ xñi chaˈ jiˈi̱ Ni nde loo la. Ngua tiˈ Ni chaˈ caca na ñiˈya̱ laca Jesús, Sñiˈ ycuiˈ ca Ni, ngua tiˈ Ni chaˈ caca Jesús tyaˈa na; quiñaˈa̱ tsa tyaˈa sñiˈ ycuiˈ Ni caca na liˈ, pana loo la laca Jesús.
\v 30 Juaˈa̱ ngua tiˈ Ni tya clyo la chaˈ caca na, biˈ chaˈ ngusubi Ni jiˈna. Nu loˈo cua ngusubi Ni jiˈna, liˈ nguaˈni Ni chaˈ caca tsoˈo cresiya jiˈna cuentya jiˈi̱ Ni; nu loˈo ndye caca tsoˈo cresiya jiˈna, liˈ ta Ni su tyiˈi̱ na ca su tlyu ca su ntucua ycuiˈ Ni.
\p
\v 31 Loˈo cua ndyuna na lcaa chaˈ tsoˈo biˈ, liˈ taca ñacui̱ na chaˈ ná ntsuˈu nu caca xu̱u̱ tyaˈa loˈo na, chaˈ ycuiˈ Ndyosi laca nu ndiˈi̱ loˈo na.
\v 32 Ná nda ycuiˈ Ndyosi chacuayáˈ jiˈi̱ Jesús chaˈ tyaˈa̱chu̱ˈ yu jiˈi̱ cña jiˈi̱ Ni juaˈa̱ ti, masi nu sca ti Sñiˈ ycuiˈ Ni laca yu; nda Ni jiˈi̱ yu chaˈ cajaa lo crusi cuentya jiˈi̱ lcaa na loˈo tyaˈa na. Cua nda Ni lcaa chaˈ tsoˈo nu jiˈi̱ ycuiˈ ca Ni jiˈi̱ Jesús, la cuiˈ nu laca nu sca ti Sñiˈ ycuiˈ Ni. Loˈo juaˈa̱ sca ti cuayáˈ nu ta Ni chaˈ biˈ jiˈna, ñiˈya̱ loˈo nda Ni chaˈ biˈ jiˈi̱ Sñiˈ ycuiˈ Ni.
\v 33 Ná tucui taca sta quiˈya jiˈna lacua, chaˈ cua laca ngusubi ycuiˈ Ndyosi jiˈna; ycuiˈ Ndyosi laca nu cua ngulo yabeˈ jiˈi̱ lcaa quiˈya nu ntsuˈu jiˈna.
\v 34 Ná ntsuˈu nu caca xcubeˈ jiˈna liˈ, chaˈ xquiˈya na cua ngujuii Jesús, xquiˈya na cua ndyuˈú yu chaca quiyaˈ. Loˈo juani ntucua Cristo laˈa tsuˈ cui̱ ca su ntucua ycuiˈ Ndyosi, ndijña yu chaˈ clyu tiˈ jiˈi̱ ycuiˈ Ndyosi Sti yu cuentya jiˈna.
\v 35 Ni sca chaˈ cuxi nu ntsuˈu chalyuu ná taca cuaˈni chaˈ culayaˈ Cristo jiˈna juani, chaˈ ntsuˈu tsa tyiquee nu Cristo biˈ ñaˈa̱ Ni jiˈna. Ná sca caca jiˈna, masi quicha tsa na, masi tiˈí ti ndiˈi̱ na chalyuu, masi xcubeˈ tsa nguˈ jiˈna, masi ndyiji jbiˈña jiˈna, masi tye steˈ na ngusu̱, masi ntsuˈu tsa chaˈ cuxi su ndiˈi̱ ti na, masi cujuii nguˈ jiˈna; lcaa chaˈ biˈ ná caca cuaˈni chaˈ culayaˈ Cristo jiˈna.
\v 36 Ndiˈya̱ nchcuiˈ sca chaˈ nu nscua lo quityi jiˈi̱ ycuiˈ Ndyosi:
\q Xquiˈya ycuiˈ Ndyosi, cua ñaˈa̱ ca hora ndyujuii nguˈ jiˈna.
\q Ndyuˈni nguˈ loˈo na ñiˈya̱ si laca na xlyaˈ, la cuiˈ xlyaˈ nu ndyaˈa̱ loˈo nguˈ jiˈi̱ slo ñati̱ nu ndujuii jiˈi̱.
\m
\v 37 Masi juaˈa̱, lye tsa ntyiji̱loo na jiˈi̱ nu cuxi biˈ; ngaˈaa nchca jiˈi̱ nu cuxi biˈ culo cña jiˈna tsiyaˈ ti xquiˈya Jesús, chaˈ ntsuˈu tsa tyiquee Ni ñaˈa̱ Ni jiˈna.
\v 38 Biˈ chaˈ jlo tiˈ naˈ juani chaˈ ngaˈaa ntsuˈu ni sca na nu caca cuaˈni chaˈ culayaˈ ycuiˈ Ndyosi jiˈna, chaˈ ntsuˈu tsa tyiquee Ni ñaˈa̱ Ni jiˈna; masi cua ngujuii na, masi tya luˈú na, ná culayaˈ Ni jiˈna. Ni xca̱ jiˈi̱ ycuiˈ Ndyosi nu ntucua nde cua̱, ni sca cuiˈi̱ nu laca loo nde lo yuu, ná nchca jiˈi̱ tsiyaˈ ti cuaˈni chaˈ culayaˈ Ni jiˈna. Masi chalyuu su ndiˈi̱ na juani, masi chalyuu nu caca nde loo la, ná culayaˈ Ni jiˈna. Ná ntsuˈu nu laca loo nde chalyuu nu nchca jiˈi̱ culo jiˈna yaˈ nu Xuˈna na;
\v 39 ná sca na nu ntsuˈu nde cua̱, ná sca na nu ntsuˈu nde quiˈñi neˈ yuu, ná sca na tyucui ñaˈa̱ chalyuu nu ngüiñá ycuiˈ Ndyosi, ná caja ñiˈya̱ nu culo jiˈna yaˈ Jesucristo nu Xuˈna na, chaˈ ntsuˈu tsa tyiquee Ni ñaˈa̱ Ni jiˈna.
\c 9
\s Na cua ngusubi ycuiˈ Ndyosi jiˈi̱ nguˈ judío chaˈ caca nguˈ ñati̱ jiˈi̱ Ni
\p
\v 1 Ñati̱ nu ntsuˈu chaˈ jiˈi̱ loˈo Cristo laca naˈ, biˈ chaˈ xcuiˈ chaˈ liñi ta naˈ loˈo cuˈma̱; siˈi chaˈ cuiñi nchcuiˈ naˈ. Xtyiˈi ycuiˈ Ndyosi nguaˈni chaˈ nguaˈya chaˈ hique naˈ, biˈ chaˈ liñi tsa chaˈ nu ta naˈ loˈo ma̱ juani.
\v 2 Xñiˈi̱ tsa tiˈ naˈ, tiˈí tsa ntsuˈu tyiquee naˈ xquiˈya nguˈ judío tyaˈa naˈ;
\v 3 tyucui tyiquee naˈ tyajaˈa̱ naˈ chaˈ masi tyanu yabeˈ nu ntsuˈu jiˈi̱ nguˈ biˈ hichu̱ˈ ycuiˈ ca naˈ, masi ngaˈaa ñaˈa̱ Cristo jnaˈ tsiyaˈ ti ntiˈ naˈ, si juaˈa̱ ti taca cuaˈni lyaá Ni jiˈi̱ nguˈ tyaˈa quichi̱ tyi naˈ biˈ.
\v 4 Laca nguˈ biˈ la cuiˈ tyaˈa ñati̱ jiˈi̱ jyoˈo cusuˈ Israel, ñati̱ jiˈi̱ nu ya̱a̱ chalyuu nde loo la; sca ti tañi ntsuˈu jiˈi̱ nguˈ loˈo jyoˈo biˈ, loˈo juaˈa̱ cua nda ycuiˈ Ndyosi chacuayáˈ chaˈ caca nguˈ biˈ ñati̱ jiˈi̱ ycuiˈ Ni. Tlyu tsa chaˈ nu nguaˈni Ni, chaˈ ntajaˈa̱ ycuiˈ Ni tyiˈi̱ Ni loˈo nguˈ biˈ. Cua ngüiñi chaˈ jiˈi̱ ycuiˈ Ndyosi loˈo nguˈ biˈ; cua ngulo Ni cña jiˈi̱ Moisés, lcaa ñaˈa̱ cña nu culo yu jiˈi̱ nguˈ biˈ; cua nda Ni chaˈ loˈo nguˈ biˈ, ñiˈya̱ nu caca loˈo cuaˈni tlyu nguˈ jiˈi̱ ycuiˈ Ni; loˈo juaˈa̱ yala la nda Ni chaˈ loˈo nguˈ biˈ, ñiˈya̱ nu caca jiˈi̱ Cristo nu ntsuˈu chaˈ ca̱a̱ nde loo la.
\v 5 Sñiˈ jyoˈo cusuˈ jiˈna laca nguˈ biˈ. Nu loˈo ngula Cristo chalyuu ngua Ni ñati̱, la cuiˈ tyaˈa nguˈ Israel ngua yu liˈ. La cuiˈ juaˈa̱ laca Cristo ycuiˈ Ndyosi nu laca loo jiˈi̱ lcaa na tsiyaˈ ti, biˈ chaˈ lcaa tyempo nduˈni tlyu nguˈ jiˈi̱ Ni. Chañi tsa chaˈ biˈ.
\p
\v 6 Siˈi na ngujlyaa tiˈ ycuiˈ Ndyosi chaˈ nu nguxquiñi Ni loˈo nguˈ Israel tya saˈni la, chaˈ nu cuaˈni lyaá Ni jiˈi̱ nguˈ; pana nu tyaˈa ñati̱ jiˈi̱ jyoˈo Israel nu ya̱a̱ chalyuu nde loo la ni, ná lcaa nguˈ biˈ ndaquiyaˈ nguˈ jiˈi̱ chaˈ nu nchcuiˈ ycuiˈ Ndyosi, ñiˈya̱ ndaquiyaˈ ycuiˈ jyoˈo Israel jiˈi̱ chaˈ biˈ cua saˈni la.
\v 7 Loˈo juaˈa̱ siˈi cua ñaˈa̱ ca ñati̱ tyaˈa jiˈi̱ jyoˈo Abraham nu chañi ca laca nguˈ judío. Ná stuˈba nguaˈni jyoˈo Abraham loˈo lcaa sñiˈ yu, chaˈ cua nda ycuiˈ Ndyosi chaˈ loˈo yu tya tsubiˈ la ndiˈya̱: “Sca ti sñiˈ nuˈu̱, nu Isaac ni, jiˈi̱ biˈ tucuá naˈ chaˈ jiˈi̱; juaˈa̱ tucuá naˈ chaˈ jiˈi̱ lcaa ñati̱ nu tyuˈú jiˈi̱ yu tyempo nde loo la”, nacui̱ ycuiˈ Ndyosi jiˈi̱ Abraham. 
\v 8 Juaˈa̱ nchca cuayáˈ tiˈ na chaˈ ná caca nguˈ sñiˈ ycuiˈ Ndyosi sca ti xquiˈya chaˈ tyaˈa ñati̱ jiˈi̱ jyoˈo Abraham loˈo jiˈi̱ jyoˈo Israel laca nguˈ; sca ti si tyucui tyiquee nguˈ jlya tiˈ nguˈ chaˈ cuaˈni Ni lcaa cña nu ngüiñi chaˈ jiˈi̱ Ni loˈo nguˈ tya saˈni la chaˈ cuaˈni Ni, liˈ chañi chaˈ laca nguˈ ñati̱ jiˈi̱ ycuiˈ Ni.
\v 9 Nde laca cña nu cua ngüiñi chaˈ jiˈi̱ ycuiˈ Ndyosi loˈo jyoˈo Abraham cua saˈni liˈ: “Chaca yija̱ tya̱a̱ naˈ”, nacui̱ Ni jiˈi̱ Abraham. “Hasta ca liˈ ta naˈ sca sñiˈ nuˈu̱ loˈo maˈ Sara.”
\p
\v 10 Cua nchcuiˈ ycuiˈ Ndyosi chaˈ biˈ loˈo nu Isaac biˈ. Clyoˈo jyoˈo cusuˈ Isaac biˈ ngua naa Rebeca. Loˈo liˈ ngula tucua tyaˈa sñiˈ nu Rebeca biˈ loˈo sca ti sti nguˈ.
\v 11-13 Masi tya lyiji cala nu sube biˈ, tya lyiji cuna nguˈ ni sca chaˈ tsoˈo, ni sca chaˈ cuxi, liˈ ndachaˈ ycuiˈ Ndyosi jiˈi̱ Rebeca: “Nu cala clyo ni, biˈ caca msu jiˈi̱ nu cuañiˈ la”, nacui̱ Ni. Ndiˈya̱ chaˈ nu nscua lo quityi loˈo nchcuiˈ ycuiˈ Ndyosi jiˈi̱ tyucuaa nu sube biˈ: “Tyacaˈa tsa Jacob ˈna”, nacui̱ Ni, “pana ngaˈaa ndiya tiˈ naˈ jiˈi̱ Esaú tsiyaˈ ti”. Juaˈa̱ ndyanu chaˈ, chaˈ ntsuˈu chacuayáˈ jiˈi̱ ycuiˈ Ndyosi chaˈ subi Ni jiˈi̱ cua ñaˈa̱ ca ñati̱ nu ntiˈ ycuiˈ Ni; siˈi xquiˈya cña nu ndyuˈni ti na caca na ñati̱ jiˈi̱ ycuiˈ Ndyosi lacua.
\p
\v 14 ¿Ha tsoˈo ñacui̱ na chaˈ ná liñi nduˈni ycuiˈ Ndyosi lacua? Ná taca chcuiˈ na juaˈa̱.
\v 15 Nde laca chaˈ nu nda Ni loˈo Moisés tya saˈni la: “Cua ñaˈa̱ ca ñati̱ nu ntiˈ naˈ cuaˈni tyaˈna tiˈ naˈ jiˈi̱, biˈ laca ñati̱ nu cuaˈni tyaˈna tiˈ naˈ jiˈi̱”, nacui̱ Ni. “Tsoˈo ntiˈ naˈ ñaˈa̱ naˈ jiˈi̱ cua ñaˈa̱ ca ñati̱ nu ntsuˈu tyiquee naˈ ñaˈa̱a̱ jiˈi̱.”
\v 16 Biˈ chaˈ laca chaˈ siˈi na nduˈni clyu tiˈ ycuiˈ Ndyosi jiˈna xquiˈya chaˈ nu ndiya ti tiˈ na jiˈi̱ Ni, siˈi na nduˈni clyu tiˈ Ni jiˈna xquiˈya chaˈ nguula tsa ndyuˈni na cña jiˈi̱ Ni; laca chaˈ tyaˈna ti tiˈ Ni ñaˈa̱ Ni jiˈna, biˈ chaˈ nguaˈni lyaá Ni jiˈna.
\v 17 Ntsuˈu sca chaˈ nu nscua lo quityi cusuˈ, la cuiˈ chaˈ nu nda ycuiˈ Ndyosi loˈo jyoˈo rey jiˈi̱ nguˈ Egipto nu ngua liˈ: “Cua nda naˈ chacuayáˈ jinuˈu̱ chaˈ caca nuˈu̱ rey”, nacui̱ Ni, “chaˈ caca cuayáˈ tiˈ nuˈu̱ chaˈ nguula tsa cña nu nduˈni naˈ chalyuu. Loˈo juaˈa̱ caca cuayáˈ tiˈ ñati̱ tyucui ñaˈa̱ chalyuu tilaca laca naˈ”, nacui̱ Ni jiˈi̱ rey biˈ.
\v 18 Ca cuayáˈ tiˈ na liˈ, chaˈ tyaˈna tiˈ Ni ñaˈa̱ Ni jiˈi̱ cua ñaˈa̱ ca ñati̱ nu ntiˈ Ni cuaˈni tyaˈna tiˈ Ni jiˈi̱; juaˈa̱ ndacu̱ˈ Ni chaˈ jiˈi̱ cua ñaˈa̱ ca ñati̱ nu ntiˈ ti Ni tacu̱ˈ Ni chaˈ jiˈi̱, chaˈ ngaˈaa cuna nguˈ chaˈ jiˈi̱ Ni.
\p
\v 19 ¿Ni chaˈ laca nsta ycuiˈ Ndyosi quiˈya jiˈi̱ ñati̱ chalyuu lacua, si juaˈa̱ ná nchca jiˈna tsiyaˈ ti cuaˈni na xi xaˈ la chaˈ, si juaˈa̱ cua laca ngusubi ycuiˈ Ndyosi jiˈi̱ ñaˈa̱ ñati̱ nu ntiˈ ti Ni jiˈi̱?
\v 20 Pana na nu laca na ñati̱ chalyuu ti, ná tsoˈo si xlyú na chaˈ juaˈa̱ hichu̱ˈ ycuiˈ Ndyosi. Ñiˈya̱ laca sca quityu̱ˈ ni, ná nchca jiˈi̱ quityu̱ˈ biˈ xlyú chaˈ hichu̱ˈ ñati̱ nu ngüiñá jiˈi̱ loˈo yuu; ná nchca chcuiˈ quityu̱ˈ biˈ ndiˈya̱: “¿Ni chaˈ laca ngüiñá nuˈu̱ jnaˈ juaˈa̱?”
\v 21 Ntsuˈu chacuayáˈ jiˈi̱ cuityi yuu chaˈ cuiñá maˈ na laca nu ntiˈ maˈ cuiñá maˈ loˈo yuu jiˈi̱. Taca jiˈi̱ maˈ cuiñá maˈ sca quityu̱ˈ tsoˈo nu quiñaˈa̱ ngaˈa̱, loˈo juaˈa̱ taca jiˈi̱ maˈ cuiñá maˈ sca quityu̱ˈ nu cantaˈ ti ñaˈa̱, si juaˈa̱ ntiˈ maˈ; masi loˈo la cuiˈ tyaˈa yuu ndyaˈ nu tsoˈo biˈ, loˈo juaˈa̱ ndyaˈ nu cantaˈ ti biˈ.
\p
\v 22 Ngua tiˈ ycuiˈ Ndyosi culuˈu Ni jiˈna ñiˈya̱ ñaˈa̱ xcubeˈ Ni jiˈi̱ ñati̱ cuxi, chaˈ ca cuayáˈ tiˈ na chaˈ nguula tsa cña nu nduˈni Ni. Ndalo tsa tyiquee Ni jiˈi̱ ñati̱ cuxi biˈ, masi cua ntsuˈu tsa chacuayáˈ jiˈi̱ ycuiˈ Ndyosi chaˈ ca ñasi̱ˈ Ni jiˈi̱ nguˈ, chaˈ juaˈa̱ cuityi̱ Ni jiˈi̱ nguˈ tsiyaˈ ti.
\v 23 Pana ngua tiˈ Ni chaˈ caca cuayáˈ tiˈ na ñiˈya̱ tlyu tsa chaˈ tsoˈo nu ndyuˈni Ni loˈo na, chaˈ tyaˈna tsa tiˈ Ni ñaˈa̱ Ni jiˈna. Tya tsubiˈ la cua ngusubi ycuiˈ Ndyosi jiˈna, chaˈ loˈo na caja chaˈ tsoˈo nu ntsuˈu jiˈi̱ ycuiˈ Ndyosi jiˈna.
\v 24 Ñati̱ jiˈi̱ ycuiˈ Ndyosi laca na; stuˈba ti ngusubi Ni jiˈna, masi laca na nguˈ judío, masi laca na nguˈ xaˈ tsuˈ.
\v 25 Biˈ laca chaˈ nu nguscua jyoˈo Oseas lo quityi, nu loˈo nacui̱ ycuiˈ Ndyosi ndiˈya̱:
\q Cusubi naˈ jiˈi̱ ñati̱ nu caca ñati̱ jnaˈ, masi siˈi juaˈa̱ ngua nguˈ nquichaˈ;
\q la cuiˈ ñati̱ nu ná ntsuˈu tyiquee naˈ ñaˈa̱ naˈ jiˈi̱ nquichaˈ,
\q la cuiˈ nguˈ biˈ tsoˈo tsa caca tyiquee naˈ ñaˈa̱ naˈ jiˈi̱ nguˈ juani, nacui̱ Ni.
\q
\v 26 Lcaa quichi̱ su nacui̱ jiˈi̱ nguˈ biˈ tya tsubiˈ la: “Siˈi ñati̱ jiˈi̱ ycuiˈ Ndyosi laca ma̱”,
\q ca biˈ ñacui̱ jiˈi̱ nguˈ juani: “Sñiˈ ycuiˈ Ndyosi nu luˈú ca laca ma̱”.
\m
\v 27-28 Loˈo juaˈa̱ ntsuˈu chaca chaˈ nu nchcuiˈ jyoˈo Isaías jiˈi̱ nguˈ Israel ndiˈya̱: “Ná nduˈni chaˈ masi quiñaˈa̱ tsa ñati̱ tyuˈú jiˈi̱ Israel nde loo la; masi ñiˈya̱ laca yusi̱ nu ndiˈi̱ toˈ tyujoˈo, tsa lo cua tyaˈa ñati̱ caca na. Cua nacui̱ ycuiˈ Ndyosi nu Xuˈna na chaˈ yala ti cuityi̱ Ni jiˈna nu loˈo xcubeˈ Ni jiˈna, pana tya tyanu xi tya ñati̱ tyaˈa na nu cuaˈni lyaá Ni jiˈna.”
\v 29 La cuiˈ juaˈa̱ nchcuiˈ Isaías chaca chaˈ ndiˈya̱: 
\q Tya saˈni la ndye chaˈ tsiyaˈ ti jiˈi̱ nguˈ quichi̱ Sodoma loˈo jiˈi̱ nguˈ quichi̱ Gomorra;
\q la cuiˈ juaˈa̱ taca cuaˈni tye ycuiˈ nu Xuˈna na jiˈi̱ lcaa nguˈ Israel tyaˈa na.
\q Pana cua nda Ni chacuayáˈ clyaá tucua sna tyaˈa ti nguˈ tyaˈa na, xquiˈya chaˈ tyaˈna tsa tiˈ Ni ñaˈa̱ Ni jiˈna. 
\s Ná ntajaˈa̱ nguˈ judío xñi nguˈ chaˈ tsoˈo nu nda Jesucristo loˈo nguˈ
\p
\v 30 Ndiˈya̱ ñacui̱ na lacua: Cua ngua tsoˈo cresiya jiˈi̱ nguˈ xaˈ tsuˈ cuentya jiˈi̱ ycuiˈ Ndyosi, xquiˈya chaˈ ngusñi nguˈ chaˈ jiˈi̱ Jesús, masi siˈi nguˈ judío laca nguˈ biˈ; ngua tsoˈo cresiya jiˈi̱ nguˈ biˈ xquiˈya chaˈ jlya tiˈ nguˈ chaˈ nu nchcuiˈ ycuiˈ Ndyosi, siˈi na nguaˈni tsa nguˈ cña chaˈ caca tsoˈo cresiya jiˈi̱ ycuiˈ ca nguˈ.
\v 31 Pana nu nguˈ nu ngutuˈú jiˈi̱ jyoˈo Israel ni, ná ngujui ñiˈya̱ caca tsoˈo cresiya jiˈi̱ nguˈ cuentya jiˈi̱ ycuiˈ Ndyosi; cua ndyuna nguˈ chaˈ nu nda Ni loˈo nguˈ nquichaˈ, pana ná ndaquiyaˈ nguˈ lcaa chaˈ biˈ. 
\v 32 ¿Ni chaˈ laca ná ngua tsoˈo cresiya jiˈi̱ nguˈ judío lacua? Laca chaˈ ná jlya tiˈ nguˈ chaˈ taca jiˈi̱ Jesús cuaˈni choˈo jiˈi̱ cresiya jiˈi̱ ñati̱. Ntiˈ nu nguˈ judío biˈ chaˈ caca tsoˈo cresiya jiˈi̱ nguˈ cuentya jiˈi̱ ycuiˈ Ndyosi laja loˈo ndyuˈni ti nguˈ cña nu ngulo jyoˈo Moisés jiˈi̱ nguˈ. Ngua cuxi chaˈ jiˈi̱ nguˈ liˈ, ñiˈya̱ laca si cua nclyú tiˈi̱ nguˈ chu̱ˈ sca quee nu ntsiya claˈbe tyucui̱i̱ su ndyaˈa̱ nguˈ.
\v 33 Chaˈ jiˈi̱ quee biˈ nscua sca chaˈ lo quityi cusuˈ, nu nchcuiˈ ndiˈya̱:
\q Sta naˈ sca quee nu xtyii tyucui̱i̱ su ndyaˈa̱ nguˈ Israel, nguˈ quichi̱ Sión biˈ, nacui̱ ycuiˈ Ndyosi.
\m Jesús laca ñiˈya̱ laca quee biˈ, loˈo juaˈa̱ ta Jesús sca chaˈ tyujuˈu tiˈ jiˈi̱ nguˈ biˈ; tyu̱u̱ tyaˈa nguˈ biˈ ca tyujuˈu tiˈ nguˈ xquiˈya Jesús biˈ. Pana ná ntsuˈu chaˈ caca taja tiˈ nguˈ jiˈi̱ Jesús, si cua ngusñi nguˈ chaˈ jiˈi̱.
\c 10
\p
\v 1 Cuˈma̱ nguˈ tyaˈa ntsuˈu chaˈ jiˈna loˈo Jesús, tyucui tyiquee naˈ lye tsa nchcuiˈ tyaˈna naˈ loˈo ycuiˈ Ndyosi, chaˈ cuaˈni lyaá Ni jiˈi̱ nguˈ judío tyaˈa naˈ.
\v 2 Liñi tsa chaˈ nu chcuiˈ naˈ jiˈi̱ nguˈ biˈ, chaˈ tsoˈo tsa nduˈni tlyu nguˈ jiˈi̱ ycuiˈ Ndyosi nquichaˈ, pana ná jlo tsoˈo tiˈ nguˈ ñiˈya̱ laca cña nu ntiˈ Ni chaˈ cuaˈni nguˈ;
\v 3 ná nchca cuayáˈ tiˈ nguˈ biˈ ñiˈya̱ nduˈni Ni chaˈ ca tsoˈo cresiya jiˈi̱ ñati̱ cuentya jiˈi̱ ycuiˈ Ni. Xaˈ ñaˈa̱ ntiˈ nguˈ biˈ; chaˈ jiˈi̱ ycuiˈ ca nguˈ nclyana nguˈ ñiˈya̱ caca tsoˈo cresiya jiˈi̱ nguˈ, chaˈ ná ntajaˈa̱ nguˈ jlya tiˈ nguˈ jiˈi̱ cña nu ndyuˈni ycuiˈ Ndyosi.
\v 4 Pana cua ñaa Jesús chalyuu juani, cua ngusñi na chaˈ jiˈi̱ yu, biˈ chaˈ taca ca tsoˈo cresiya jiˈna cuentya jiˈi̱ ycuiˈ Ndyosi; ngaˈaa ntiˈ chaˈ taquiyaˈ tsa na chaˈ cusuˈ nu cua nda jyoˈo Moisés biˈ, chaˈ si juaˈa̱ taca ca tsoˈo cresiya jiˈna.
\p
\v 5 Ndiˈya̱ laca chaˈ nu nguscua jyoˈo Moisés lo quityi loˈo nchcuiˈ yu ñiˈya̱ caca tsoˈo cresiya jiˈna, si taquiyaˈ na lcaa chaˈ cusuˈ biˈ: “Tsoˈo ti tyiˈi̱ na chalyuu, si cuaˈni na lcaa ca cña nu ngulo ycuiˈ Ndyosi jiˈna”. Juaˈa̱ nchcuiˈ quityi biˈ.
\v 6 Pana chaca chaˈ nscua lo quityi ñiˈya̱ caca ca tsoˈo cresiya jiˈna loˈo xñi ti na chaˈ jiˈi̱ Jesús; ndiˈya̱ nchcuiˈ quityi biˈ: “Ná ngaˈa̱ chaˈ tsaa na tsaana na jiˈi̱ Cristo ca su ntucua ycuiˈ Ndyosi nde cua̱”, nacui̱ quityi, “chaˈ tya̱a̱ loˈo na jiˈi̱ Cristo nde lo yuu. 
\v 7 Ná ngaˈa̱ chaˈ tsaa na tsaana na jiˈi̱ Cristo ca su ntsiya jyoˈo”, nacui̱ quityi, “chaˈ tya̱a̱ loˈo na jiˈi̱ nde lo yuu chaca quiyaˈ.”
\v 8 Ndiˈya̱ ntsuˈu chaˈ loˈo jlya tiˈ na jiˈi̱ Ni: “Cacua tsa ntsuˈu chaˈ jiˈi̱ Jesús jiˈna. Taca tyuˈu chaˈ jiˈi̱ Cristo nde tuˈba na, taca tyuˈu chaˈ biˈ nde neˈ cresiya jiˈna.” Biˈ laca chaˈ tsoˈo nu ta na loˈo nguˈ, chaˈ taca cuaˈni lyaá Ni jiˈna jiˈi̱ nu cuxi, si chañi chaˈ xñi na chaˈ jiˈi̱ Jesús.
\v 9 Tsa biˈ ti chaˈ ntiˈ, chaˈ cachaˈ na jiˈi̱ nguˈ chaˈ Jesús laca nu Xuˈna na, loˈo juaˈa̱ tyucui tyiquee na jlya tiˈ na chaˈ nguaˈni ycuiˈ Ndyosi chaˈ ndyuˈú Jesús chaca quiyaˈ ca su nguatsiˈ. Liˈ taca jiˈi̱ Ni cuaˈni lyaá Ni jiˈna,
\v 10 chaˈ nde neˈ cresiya jiˈna ntsuˈu chaˈ jiˈi̱ Jesús nu cua ngusñi na, loˈo la cuiˈ juaˈa̱ nde tuˈba na ntsuˈu chaˈ jiˈi̱ Jesús nu nchcuiˈ na loˈo ñati̱; liˈ taca ca tsoˈo cresiya jiˈna cuentya jiˈi̱ ycuiˈ Ndyosi, loˈo juaˈa̱ cuaˈni lyaá Ni jiˈna jiˈi̱ lcaa chaˈ cuxi nu ntsuˈu chalyuu.
\p
\v 11 Cua nscua chaca chaˈ lo quityi jiˈi̱ ycuiˈ Ndyosi ndiˈya̱: “Ni tsaca na, tyaˈa ngusñi na chaˈ jiˈi̱ ycuiˈ Ndyosi, ná ntsuˈu chaˈ caca taja tiˈ na jiˈi̱ Ni liˈ”. Juaˈa̱ nchcuiˈ quityi.
\v 12 Sca ti cuayáˈ tyacua chaˈ biˈ jiˈi̱ nguˈ judío, la cuiˈ juaˈa̱ tyacua chaˈ biˈ jiˈi̱ nguˈ xaˈ tsuˈ, chaˈ sca ti ycuiˈ Ndyosi nu Xuˈna na laca loo jiˈi̱ lcaa ñati̱ chalyuu; sca ti cuayáˈ tsoˈo tsa nduˈni Ni loˈo lcaa ñati̱ nu jña chaˈ clyu tiˈ jiˈi̱ ycuiˈ Ni chacuayáˈ jiˈi̱ Jesús.
\v 13 Ndiˈya̱ ndyuˈu chaˈ nu nscua lo quityi cusuˈ: “Cuaˈni lyaá Ni jiˈi̱ lcaa ñati̱ nu jña chaˈ clyu tiˈ jiˈi̱ Ni chacuayáˈ jiˈi̱ ycuiˈ nu Xuˈna na”.
\v 14 Pana ná caca chcuiˈ nguˈ loˈo ycuiˈ Ndyosi chacuayáˈ jiˈi̱ Jesús si bilya xñi nguˈ chaˈ jiˈi̱ yu; juaˈa̱ ná caca xñi nguˈ chaˈ jiˈi̱ Jesús si bilya cuna nguˈ chaˈ biˈ; ni ná caca cuna nguˈ chaˈ biˈ si bilya caja ñati̱ nu ta chaˈ biˈ loˈo nguˈ.
\v 15 Pana ná tucui caca jiˈi̱ tsaa chaˈ ta chaˈ biˈ loˈo xaˈ la nguˈ si ná culo Ni cña jiˈi̱ chaˈ tsaa. Ndiˈya̱ nchcuiˈ quityi cusuˈ: “Tsoˈo tsa ntiˈ na loˈo tyalaa nguˈ slo na chaˈ ta nguˈ chaˈ tsoˈo jiˈi̱ ycuiˈ Ndyosi loˈo na, chaˈ culuˈu nguˈ ñiˈya̱ caca chaˈ ti̱ ti tyiˈi̱ tyiquee na”. Juaˈa̱ nchcuiˈ quityi.
\p
\v 16 Ná ndyuna tsoˈo lcaa ñati̱ chaˈ nu nda na loˈo nguˈ, nu loˈo ndachaˈ na jiˈi̱ nguˈ ñiˈya̱ cuaˈni lyaá Ni jiˈi̱ ñati̱. La cuiˈ juaˈa̱ ngua loˈo jyoˈo Isaías cua saˈni. “Ndyosi Xuˈna ya, ná tucui ndu̱ tsiyaˈ ti nu ngusñi chaˈ jinuˈu̱ nu nchcuiˈ ya loˈo nguˈ”, nacui̱ jyoˈo biˈ.
\v 17 Pana nu na ni, cua ngusñi na chaˈ jiˈi̱ Jesús nu ngua tya clyo, tya loˈo ndyuna na chaˈ tsoˈo nu cua nchcuiˈ nguˈ loˈo na chaˈ jiˈi̱ Cristo.
\p
\v 18 Ntiˈ naˈ xcuane naˈ sca chaˈ jiˈi̱ cuˈma̱: ¿Ha bilya cuna nguˈ judío chaˈ jiˈi̱ Cristo lacua? Cua ndyuna nguˈ, chaˈ cua nscua sca chaˈ lo quityi cusuˈ nu nchcuiˈ ndiˈya̱:
\q Tyucui ñaˈa̱ chalyuu nguañi chaˈ nu nda nguˈ loˈo; 
\q lcaa seˈi̱ ndyalaa chaˈ nu nchcuiˈ nguˈ, masi ca su cua tyijyuˈ la cua ndyalaa chaˈ biˈ.
\m Juaˈa̱ nchcuiˈ quityi.
\v 19 Chaca chaˈ xcuane naˈ jiˈi̱ ma̱ liˈ: ¿Ha ná nda nguˈ judío cuentya ñiˈya̱ ndyuˈu chaˈ biˈ lacua? Saˈni tsa nguscua jyoˈo Moisés chaˈ jiˈi̱ nguˈ biˈ, ndiˈya̱ nchcuiˈ quityi biˈ:
\q Cuaˈni naˈ chaˈ caca liyeˈ tiˈ ma̱ ñaˈa̱ ma̱ jiˈi̱ xaˈ ñati̱ nu siˈi ñati̱ tsoˈo laca nguˈ ntiˈ ma̱, nacui̱ Ni.
\q Nacui̱ ma̱ chaˈ ple tsa nguˈ; ná nchca cuayáˈ tiˈ nguˈ, ntiˈ ma̱.
\q Ta naˈ chaˈ ñasi̱ˈ tiˈ jiˈi̱ ma̱, xquiˈya chaˈ cua ngusñi ñati̱ biˈ chaˈ jnaˈ; masi cuˈma̱ ni, ná ntiˈ ma̱ cuna ma̱ chaˈ jnaˈ, nacui̱ Ni.
\m
\v 20 Loˈo juaˈa̱ liñi tsa chaˈ nu nda jyoˈo Isaías nu ngua saˈni cuentya jiˈi̱ ycuiˈ Ndyosi:
\q La cuiˈ ñati̱ nu bilya clyana nguˈ chaˈ ˈna, cua ngujui chaˈ jnaˈ jiˈi̱ nguˈ juani, nacui̱ Ni.
\q Masi bilya jña nguˈ sca chaˈ tsoˈo jnaˈ, cua nclyuˈuloo naˈ jiˈi̱ nguˈ biˈ juani.
\m
\v 21 Pana xaˈ ñaˈa̱ nguscua jyoˈo Isaías chaˈ jiˈi̱ nguˈ Israel: “Tyucui tsa̱ ngusiˈyana naˈ jiˈi̱ nguˈ”, nacui̱ Ni, “pana ná ndaquiyaˈ nguˈ biˈ ˈna tsiyaˈ ti; xcuiˈ na nxu̱u̱ tyaˈa ti nguˈ loˈo naˈ”. Juaˈa̱ nchcuiˈ quityi. 
\c 11
\s Siˈi lcaa nguˈ judío nu nguxtyanu nguˈ jiˈi̱ ycuiˈ Ni
\p
\v 1 Ná ntiˈ ycuiˈ Ndyosi tsiyaˈ ti culayaˈ Ni jiˈi̱ nguˈ judío, chaˈ laca nguˈ ñati̱ jiˈi̱ ycuiˈ Ni. Loˈo juaˈa̱ ycuiˈ naˈ laca naˈ nguˈ judío, chaˈ sca ti lo tañi naˈ loˈo jyoˈo Abraham; laca naˈ tyaˈa jyoˈo cusuˈ Benjamín.
\v 2 Nu ngua saˈni ngusubi ycuiˈ Ndyosi jiˈi̱ nguˈ Israel, chaˈ caca nguˈ ñati̱ jiˈi̱ Ni; juani ngaˈaa culayaˈ Ni jiˈi̱ nguˈ biˈ. ¿Ha ná ntsuˈu tiˈ ma̱ chaˈ nu nscua lo quityi cuentya jiˈi̱ nu Elías biˈ? Sca jyoˈo cusuˈ nu nda chaˈ jiˈi̱ ycuiˈ Ndyosi loˈo ñati̱ saˈni ngua jyoˈo Elías biˈ; pana nu loˈo nchcuiˈ Elías loˈo ycuiˈ Ndyosi, ngusta yu quiˈya jiˈi̱ nguˈ Israel ndiˈya̱:
\v 3 “Ndyosi Xuˈna naˈ, cua ndyujuii nguˈ biˈ jiˈi̱ lcaa ñati̱ nu laca tuˈba jinuˈu̱”, nacui̱ nu Elías biˈ. “Cua ngüityi̱ nguˈ jiˈi̱ lcaa su tlyu su nduˈni tlyu ya jinuˈu̱ nquichaˈ. Chaca tya naˈ ndyanu naˈ juani; loˈo juaˈa̱ naˈ, cujuii nguˈ jnaˈ cua ntiˈ nguˈ”, nacui̱ yu jiˈi̱ ycuiˈ Ndyosi.
\v 4 Liˈ nguxacui̱ Ni chaˈ jiˈi̱ yu biˈ: “Ná cube tiˈ nuˈu̱. Tya ndu̱ tya chcati mil tyaˈa nguˈ quiˈyu nu caca cña ˈna, ñati̱ nu bilya tyu̱ sti̱ˈ slo lcui̱ joˈó Baal”, nacui̱ Ni jiˈi̱ Elías.
\v 5 La cuiˈ juaˈa̱ laca tyempo juani, siˈi lcaa nguˈ judío nu nguxtyanu nguˈ jiˈi̱ ycuiˈ Ndyosi; tya ndiˈi̱ xi ñati̱ nu cua ngusubi Ni jiˈi̱, xquiˈya chaˈ tsoˈo tsa ntsuˈu tyiquee Ni ñaˈa̱ Ni jiˈi̱ ñati̱ biˈ.
\v 6 La cuiˈ juaˈa̱ tyaˈna tsa tiˈ Ni ñaˈa̱ Ni jiˈna, biˈ chaˈ tsoˈo tsa nduˈni Ni loˈo na. Siˈi na clyaá na jiˈi̱ nu cuxi xquiˈya sca cña nu nguaˈni ycuiˈ ca ti na, chaˈ ná ntsuˈu chaˈ ñacui̱ na chaˈ ycuiˈ Ndyosi nguaˈni lyaá jiˈna si cua nguaˈni lyaá na jiˈi̱ ycuiˈ ca na, ntiˈ na.
\p
\v 7 Ndiˈya̱ ngua liˈ: Ná lcaa nguˈ Israel ngua jiˈi̱ nguˈ cuaˈni nguˈ chaˈ ca tsoˈo cresiya jiˈi̱ nguˈ cuentya jiˈi̱ ycuiˈ Ndyosi, ñiˈya̱ ngua tiˈ nguˈ chaˈ cuaˈni nguˈ. Ñati̱ nu ngusubi ycuiˈ Ndyosi jiˈi̱ ni, ngujui ñiˈya̱ caca chaˈ biˈ jiˈi̱ nguˈ; pana nu xaˈ la tyaˈa nguˈ Israel biˈ, tsa tyempo ti ndyacu̱ˈ jyaca̱ nguˈ.
\v 8 Ndiˈya̱ nchcuiˈ quityi cusuˈ chaˈ jiˈi̱ nguˈ biˈ: “Ngaˈaa nda ycuiˈ Ndyosi chacuayáˈ chaˈ ca cuayáˈ tiˈ nguˈ biˈ. Laca nguˈ biˈ ñiˈya̱ si ntsuˈu cloo nguˈ, pana ná sca na ñaˈa̱ nguˈ tsiyaˈ ti; laca nguˈ ñiˈya̱ si ntucuá jyaca̱ nguˈ, pana ná nduna nguˈ tsiyaˈ ti. Loˈo juaˈa̱ ñaˈa̱ ti nduˈni nguˈ biˈ juani.”
\v 9 La cuiˈ tyaˈa chaˈ nda jyoˈo rey David, loˈo nacui̱ yu ndiˈya̱:
\q Quiñaˈa̱ tsa chaˈ tsoˈo ngusta ycuiˈ Ndyosi lo mesa jiˈi̱ nguˈ Israel,
\q pana cua ngunuˈu̱ cresiya jiˈi̱ nguˈ xquiˈya chaˈ tsoˈo biˈ;
\q biˈ chaˈ nchcubeˈ Ni jiˈi̱ nguˈ, ñiˈya̱ laca si na cua ndyú nguˈ neˈ sca lcoˈo,
\q ñiˈya̱ laca si na cua nclyú nguˈ chaˈ ntyucua quee quiyaˈ nguˈ.
\q
\v 10 Tsoˈo si caca cuityi̱ˈ ti nguˈ, chaˈ ngaˈaa caca ñaˈa̱ nguˈ;
\q tsoˈo si caja cña tiˈi̱ jiˈi̱ nguˈ, chaˈ catsa hichu̱ˈ nguˈ tsiyaˈ ti.
\m Juaˈa̱ nscua lo quityi biˈ.
\s Ñiˈya̱ cuaˈni lyaá Ni jiˈi̱ nguˈ xaˈ tsuˈ
\p
\v 11 Chaca chaˈ ñacui̱ naˈ juani: Nu loˈo nclyú nguˈ judío biˈ, siˈi na ngua cuxi jiˈi̱ nguˈ tsiyaˈ ti; xquiˈya chaˈ ná ndaquiyaˈ nguˈ biˈ tsiyaˈ ti jiˈi̱ ycuiˈ Ndyosi, biˈ chaˈ ngujui la xi tyempo jiˈi̱ nguˈ xaˈ tsuˈ chaˈ clyana nguˈ jiˈi̱ ycuiˈ Ndyosi, chaˈ cuaˈni lyaá Ni jiˈi̱ nguˈ. Cua ntiˈ ycuiˈ Ndyosi chaˈ ñaˈa̱ nguˈ judío ñiˈya̱ ngusñi nguˈ xaˈ tsuˈ chaˈ jiˈi̱ ycuiˈ Ni, loˈo liˈ jña nguˈ judío chaˈ clyu tiˈ jiˈi̱ ycuiˈ Ni chaˈ cuaˈni lyaá Ni jiˈi̱ ycuiˈ ca nguˈ.
\v 12 Juaˈa̱ ngua chaˈ tsoˈo la ndyuna nguˈ tyucui ñaˈa̱ chalyuu chaˈ jiˈi̱ ycuiˈ Ndyosi, masi chaˈ cuxi nguaˈni nguˈ judío biˈ. La cuiˈ juaˈa̱ ngua tsoˈo la chaˈ jiˈi̱ nguˈ xaˈ tsuˈ cuentya jiˈi̱ ycuiˈ Ndyosi, masi ngua cuxi la chalyuu jiˈi̱ ycuiˈ nguˈ judío. Biˈ chaˈ tlyu tsa chaˈ tsoˈo caca, nu loˈo xcutsaˈa̱ Ni tyiquee cua ñaˈa̱ ca nguˈ judío loˈo xñi nguˈ chaˈ tsoˈo nu jiˈi̱ Jesús.
\p
\v 13 Loˈo cuˈma̱ nguˈ xaˈ tsuˈ ni, ntiˈ naˈ ta naˈ xi chaˈ loˈo ma̱. Ycuiˈ Ndyosi laca nu ngusubi ˈna, chaˈ tsaˈa naˈ ta naˈ chaˈ jiˈi̱ Jesús loˈo cuˈma̱ nu ndiˈi̱ ma̱ xaˈ tsuˈ. Nchcuiˈ naˈ loˈo cuˈma̱ juaˈa̱, xquiˈya chaˈ ndulo tsa cña nu nda Ni ˈna.
\v 14 Ntiˈ tsa naˈ chaˈ loˈo xi nguˈ judío tyaˈa naˈ jña nguˈ jiˈi̱ ycuiˈ Ndyosi, chaˈ ta Ni la cuiˈ ti chaˈ tsoˈo nu ntsuˈu jiˈi̱ ma̱ jiˈi̱ nguˈ judío biˈ, chaˈ caca cuaˈni lyaá Ni jiˈi̱ nguˈ biˈ.
\v 15 Nu loˈo ngulayaˈ Ni jiˈi̱ nguˈ judío, liˈ nguaˈni Ni chaˈ caca stuˈba chaˈ jiˈi̱ ycuiˈ Ni loˈo nguˈ xaˈ tsuˈ. Tsoˈo la tsiyaˈ ti caca chaˈ loˈo quiñi chaˈ jiˈi̱ Ni loˈo nguˈ judío chaca quiyaˈ, chaˈ liˈ caca jiˈi̱ lcaa ñati̱ ñiˈya̱ laca si xaˈ ta Ni chalyuu jiˈi̱ ñati̱ nu cua ngujuii.
\v 16 Cuentya jiˈi̱ nguˈ judío ni, na jiˈi̱ ycuiˈ Ndyosi laca sca xlyá nu ndyaˈ tya clyo, loˈo liˈ si cua nda nguˈ tsa lo cua jiˈi̱ Ni, na jiˈi̱ ycuiˈ Ni laca ñaˈa̱ tsaca nguluˈ scua̱ xlyá biˈ. La cuiˈ juaˈa̱ laca loˈo sca yaca nu ndyataa nguˈ chaˈ caca cuentya jiˈi̱ ycuiˈ Ndyosi; loˈo caluu yaca biˈ, loˈo cuentya jiˈi̱ ycuiˈ Ni caca lcaa sta̱ˈ yaca biˈ. Ndiˈya̱ ndyuˈu tyucuaa chaˈ biˈ, chaˈ ñiˈya̱ ngua jyoˈo Abraham ñati̱ jiˈi̱ ycuiˈ Ndyosi chaˈ ngusñi yu chaˈ jiˈi̱ Ni, juaˈa̱ laca lcaa ñati̱ chalyuu ñati̱ jiˈi̱ ycuiˈ Ndyosi, nu loˈo xñi nguˈ chaˈ jiˈi̱ Ni.
\p
\v 17 Laca nguˈ judío ñiˈya̱ si laca nguˈ sca yaca cuiñii, sca yaca olivo ni. Na cua ngusiˈyu ycuiˈ Ndyosi jiˈi̱ tyu̱u̱ tyaˈa sta̱ˈ yaca biˈ, ngulotsuˈ Ni jiˈi̱ sta̱ˈ yaca biˈ liˈ; pana juani la cuiˈ ca su ngutucua sta̱ˈ yaca biˈ nquichaˈ, ndacua ngusca̱ˈ Ni tyu̱u̱ tyaˈa sta̱ˈ yaca quixi̱ˈ, chaˈ xñi caˈa̱ sta̱ yaca quixi̱ˈ biˈ jiˈi̱ yaca cuiñii biˈ. Ñiˈya̱ laca sta̱ˈ yaca quixi̱ˈ, juaˈa̱ laca cuˈma̱ nguˈ xaˈ tsuˈ, chaˈ cua ngujui la cuiˈ chaˈ tsoˈo jiˈi̱ ma̱, ñaˈa̱ chaˈ tsoˈo nu ntsuˈu jiˈi̱ nguˈ judío. Laca ma̱ ñiˈya̱ laca si sca ti su̱u̱ yaca laca ma̱ loˈo nguˈ judío, si sca ti siˈye laca ma̱ loˈo nguˈ biˈ.
\v 18 Biˈ chaˈ ná tsoˈo laca si culacua tiˈ ma̱ chaˈ tsoˈo la cuˈma̱, cuxi la nguˈ judío, nu nguˈ nu laca ñiˈya̱ laca sta̱ˈ ycuiˈ yaca. Si juaˈa̱ ntiˈ ma̱, tsoˈo la si tyiˈu tiˈ ma̱ chaˈ siˈi cuˈma̱ nu ndyuˈni cuˈú ma̱ jiˈi̱ su̱u̱ yaca biˈ, la cuiˈ su̱u̱ biˈ laca nu nda chaˈ tsoˈo jiˈi̱ cuˈma̱.
\p
\v 19 Ná tyiqueeˈ ñacui̱ ma̱ ˈna: “Ca su ngusiˈyu Ni jiˈi̱ sta̱ˈ yaca biˈ, ca biˈ ngujui su xñi caˈa̱ ya jiˈi̱ yaca olivo biˈ”, ñacui̱ ma̱.
\v 20 Chañi chaˈ jiˈi̱ ma̱. Pana ndiˈya̱ laca chaˈ: cua ngulotsuˈ ycuiˈ Ndyosi jiˈi̱ nguˈ judío jiˈi̱ yaca biˈ, xquiˈya chaˈ ná ngusñi nguˈ chaˈ jiˈi̱ Ni; pana cuˈma̱ ni, xquiˈya chaˈ ngusñi ma̱ chaˈ jiˈi̱ ycuiˈ Ni, biˈ ti chaˈ cua ngujui chacuayáˈ jiˈi̱ ma̱ chaˈ xñi caˈa̱ ma̱ jiˈi̱ yaca biˈ ca su ntucua ma̱ juani. Biˈ chaˈ ná ntsuˈu chaˈ cuaˈni tyucuaa tiˈ ma̱ loˈo nguˈ judío biˈ. Culacua tsoˈo tiˈ ma̱ xi.
\v 21 Ná nguaˈni ycuiˈ Ndyosi chaˈ clyu tiˈ jiˈi̱ nguˈ judío, nguˈ nu laca sta̱ˈ ycuiˈ yaca biˈ; ngusiˈyu cuˈ Ni jiˈi̱ sta̱ˈ biˈ. Loˈo juaˈa̱ ná cuiˈya Ni chaˈ clyu tiˈ jiˈi̱ cuˈma̱, si juaˈa̱ xtyanu ma̱ jiˈi̱ ycuiˈ Ni.
\v 22 Cuiˈya ma̱ cuentya lacua, chaˈ taca jiˈi̱ Ni cuaˈni tsoˈo Ni loˈo ñati̱, loˈo juaˈa̱ xaˈ tyempo taca jiˈi̱ Ni cuaˈni tyaala Ni jiˈi̱ ñati̱, si juaˈa̱ ntiˈ Ni. Tyaala tsa nguaˈni Ni loˈo nguˈ biˈ, xquiˈya chaˈ ná ndaquiyaˈ nguˈ jiˈi̱ ycuiˈ Ni; loˈo juaˈa̱ tsoˈo ti cuaˈni Ni loˈo cuˈma̱, si ñaˈa̱ ti taquiyaˈ ma̱ jiˈi̱ Ni nu ndyuˈni tsa chaˈ tsoˈo loˈo ma̱. Si ngaˈaa taquiyaˈ ma̱ jiˈi̱ chaˈ nu nchcuiˈ Ni, la cuiˈ juaˈa̱ culayaˈ Ni jiˈi̱ ma̱ liˈ.
\v 23 Pana xaˈ quiñi chaˈ jiˈi̱ ycuiˈ Ndyosi loˈo nguˈ judío, si xcutsaˈa̱ nguˈ biˈ chaˈ nu ntsuˈu neˈ cresiya jiˈi̱ nguˈ, si taquiyaˈ nguˈ jiˈi̱ ycuiˈ Ni chaca quiyaˈ. Liˈ xñi caˈa̱ nguˈ jiˈi̱ su̱u̱ yaca biˈ chaca quiyaˈ, la cuiˈ seˈi̱ biˈ su ngutucua nguˈ; taca jiˈi̱ ycuiˈ Ndyosi sta tsoˈo Ni jiˈi̱ nguˈ judío chaca quiyaˈ ca la cuiˈ su tsoˈo su ngutucua nguˈ clyo.
\v 24 Ná stuˈba chaˈ jiˈi̱ ma̱ loˈo nguˈ judío cua saˈni la. Na cua ngulotsuˈ ti Ni jiˈi̱ ma̱ ca su ngutucua ma̱ lo sca su̱u̱ yaca quixi̱ˈ; liˈ cua ngusca̱ˈ Ni jiˈi̱ ma̱, chaˈ xñi caˈa̱ ma̱ jiˈi̱ su̱u̱ yaca cuiñii biˈ. Pana siˈi juaˈa̱ ndyaluu yaca biˈ clyo. Loˈo nu nguˈ judío ni, ná tlyu cña masi xaˈ sca̱ˈ Ni jiˈi̱ nguˈ lo la cuiˈ su̱u̱ yaca su ngutucua nguˈ tya clyo; yala ti xñi caˈa̱ nguˈ jiˈi̱ su̱u̱ yaca biˈ chaca quiyaˈ, chaˈ sta̱ˈ ycuiˈ yaca biˈ laca nguˈ.
\s Loˈo cuaˈni lyaá Ni jiˈi̱ lcaa nguˈ judío
\p
\v 25 Cuˈma̱ nguˈ tyaˈa ntsuˈu chaˈ jiˈna loˈo Cristo, ntiˈ naˈ chaˈ caca cuayáˈ tiˈ ma̱ chaˈ tucui re, sca chaˈ jiˈi̱ ycuiˈ Ndyosi nu ntsuˈu cuatsiˈ ti nquichaˈ; loˈo caca cuayáˈ tiˈ ma̱ chaˈ re, ngaˈaa chcuiˈ ma̱ chaˈ tyixi loˈo nguˈ judío liˈ. Ndiˈya̱ laca chaˈ: Quiñaˈa̱ tsa tyaˈa nguˈ judío ntsuˈu nu ndyacu̱ˈ hique nguˈ tsiyaˈ ti, chaˈ ná caca cuna nguˈ chaˈ jiˈi̱ Jesús; ñaˈa̱ cuayáˈ nu tye cuna lcaa nguˈ xaˈ tsuˈ nu ngaˈa̱ chaˈ xñi chaˈ jiˈi̱ Jesús,
\v 26 liˈ cuaˈni lyaá ycuiˈ Ndyosi jiˈi̱ lcaa nguˈ nu chañi ca tyaˈa ñati̱ jiˈi̱ Israel. Ndiˈya̱ nscua chaˈ lo quityi cusuˈ:
\q Tya̱a̱ nu cuaˈni lyaá jiˈi̱ ma̱, nde quichi̱ Sión biˈ tyuˈu yu ca̱a̱ yu.
\q Culotsuˈ yu biˈ lcaa chaˈ cuxi nu ntsuˈu jiˈi̱ nguˈ Israel tyaˈa yu,
\q
\v 27 loˈo liˈ cuityi̱ naˈ lcaa quiˈya nu ntsuˈu jiˈi̱ nguˈ biˈ, nacui̱ ycuiˈ Ndyosi.
\q Liˈ tyuˈu tucua chaˈ nu nguxquiñi naˈ loˈo nguˈ biˈ nu ngua saˈni.
\m Juaˈa̱ nchcuiˈ quityi.
\p
\v 28 Tyaˈa cusu̱u̱ ycuiˈ Ndyosi laca nguˈ judío juani, xquiˈya chaˈ ná jlya tiˈ nguˈ chaˈ chañi chaˈ cua nguaˈni lyaá Ni jiˈi̱ nguˈ; biˈ chaˈ cua ngujui la xi tyempo jiˈi̱ cuˈma̱ nguˈ xaˈ tsuˈ, chaˈ xñi ma̱ chaˈ jiˈi̱ Jesucristo xquiˈya nguˈ judío. Pana ñaˈa̱ ti tya ntsuˈu tsa tyiquee ycuiˈ Ndyosi ñaˈa̱ Ni jiˈi̱ nguˈ biˈ, xquiˈya chaˈ cua ngusubi Ni jiˈi̱ jyoˈo cusuˈ jiˈi̱ nguˈ biˈ tya clyo chaˈ caca nguˈ ñati̱ jiˈi̱ Ni.
\v 29 Ná tyaˈa̱chu̱ˈ ycuiˈ Ni jiˈi̱ sca chaˈ nu cua nda Ni loˈo na, ná culayaˈ Ni jiˈi̱ sca ñati̱ nu ntsuˈu chaˈ jiˈi̱ loˈo ycuiˈ Ni.
\v 30 Loˈo juaˈa̱ cuˈma̱, ná ndaquiyaˈ ma̱ chaˈ jiˈi̱ ycuiˈ Ndyosi cua saˈni la; pana tyaˈna tiˈ Ni ñaˈa̱ Ni jiˈi̱ ma̱ nu loˈo ngaˈaa jlya tiˈ nguˈ judío jiˈi̱ Ni.
\v 31 Masi ná ndaquiyaˈ nguˈ judío biˈ jiˈi̱ ycuiˈ Ndyosi juani, pana la cuiˈ juaˈa̱ cuaˈni tyaˈna tiˈ ycuiˈ Ndyosi jiˈi̱ nguˈ biˈ ca nde loo la, ñiˈya̱ nu nduˈni tyaˈna tiˈ Ni jiˈi̱ ma̱.
\v 32 Sca ti cuayáˈ nguxtyanu Ni jiˈi̱ lcaa ñati̱ chalyuu chaˈ ná taquiyaˈ nguˈ jiˈi̱ ycuiˈ Ni, si juaˈa̱ ntiˈ nguˈ, chaˈ juaˈa̱ ná ntajaˈa̱ nguˈ taquiyaˈ nguˈ jiˈi̱ Ni tsiyaˈ ti. Pana tiyaˈ la liˈ caca jiˈi̱ ycuiˈ Ni cuaˈni tyaˈna tiˈ Ni jiˈi̱ nguˈ loˈo clyana nguˈ jiˈi̱ Ni chaca quiyaˈ.
\p
\v 33 Tlyu tsa chaˈ tsoˈo ndyuˈu ca slo ycuiˈ Ndyosi; lcaa chaˈ nchca cuayáˈ tiˈ Ni, lcaa chaˈ jlo tiˈ ycuiˈ Ni. Sca ti ycuiˈ Ndyosi jlo tiˈ na ca laca nu lijya̱ nde loo la, sca ti ycuiˈ Ndyosi jlo tiˈ na laca nu nduˈni ycuiˈ Ni. Ndiˈya̱ chaˈ nscua lo quityi cusuˈ cuentya jiˈi̱ chaˈ biˈ:
\v 34 “¿Tilaca caca cuayáˈ tiˈ ñiˈya̱ laca chaˈ nu caˈya hique ycuiˈ Ni? ¿Ha ntsuˈu ñati̱ nu nchca jiˈi̱ ta sca cui̱i̱ loˈo ycuiˈ Ndyosi?
\v 35 Ná caja ñiˈya̱ nu ta na sca na nu jña ycuiˈ Ni, chaˈ tiyaˈ la tya Ni cayaˈ jiˈi̱ jiˈna.”
\v 36 Lcaa na nu ntsuˈu chalyuu, na jiˈi̱ ycuiˈ Ndyosi laca biˈ, chaˈ cua ngüiñá ycuiˈ Ni lcaa na, chaˈ caca biˈ cña jiˈi̱ Ni. Ngaˈaa caca tye chaˈ cuaˈni tlyu na jiˈi̱ ycuiˈ Ndyosi. Loˈo juaˈa̱ chañi tsa chaˈ biˈ.
\c 12
\s Ta na tyucui ñaˈa̱ na jiˈi̱ ycuiˈ Ndyosi chaˈ xcuiˈ na tyiˈi̱ na chalyuu cuentya jiˈi̱ Ni
\p
\v 1 Cuˈma̱ nguˈ tyaˈa ntsuˈu chaˈ jiˈna loˈo Cristo, xquiˈya chaˈ lye tsa nduˈni tyaˈna tiˈ Ni jiˈna, biˈ chaˈ nchcuiˈ naˈ loˈo ma̱ juani. Ta ma̱ tyucui ñaˈa̱ ma̱ jiˈi̱ ycuiˈ Ndyosi, chaˈ cuaˈni ma̱ cua ñaˈa̱ ca cña nu ntiˈ Ni chaˈ cuaˈni ma̱ nde chalyuu; ta ma̱ tyucui ñaˈa̱ ma̱ jiˈi̱ Ni chaˈ xcuiˈ na tyiˈi̱ ma̱ chalyuu cuentya jiˈi̱ ycuiˈ Ni, chaˈ laca ma̱ ñiˈya̱ ntiˈ sca msta̱ luˈú ti. La cuiˈ juaˈa̱ ntiˈ ycuiˈ Ndyosi, chaˈ laca ma̱ ñati̱ jiˈi̱ Ni. Na cua laca ntsuˈu chaˈ cuaˈni ma̱ juaˈa̱.
\v 2 Ngaˈaa ta ma̱ tyempo chaˈ tatsaa nguˈ jiˈi̱ ma̱ chaˈ cuaˈni ma̱ chaˈ cuxi; xaˈ ñaˈa̱ tyiˈi̱ ma̱ chalyuu juani, chaˈ cua nchcutsaˈa̱ Ni lcaa chaˈ nu ntsuˈu neˈ cresiya jiˈi̱ ma̱. Biˈ chaˈ caca cuayáˈ tiˈ ma̱ cua ñaˈa̱ ca cña nu ntiˈ ycuiˈ Ndyosi chaˈ cuaˈni ma̱: ñaˈa̱ cña laca nu tsoˈo la chaˈ cuaˈni ma̱, ñaˈa̱ cña nu ndiya la tiˈ ycuiˈ Ndyosi jiˈi̱, ñaˈa̱ cña nu tyuˈu tsoˈo la jiˈi̱ ma̱ su cua ndye chaˈ biˈ; lcaa chaˈ biˈ caca cuayáˈ tiˈ ma̱ liˈ.
\p
\v 3 Tlyu tsa chaˈ tsoˈo nu nguaˈni ycuiˈ Ndyosi loˈo naˈ, nu loˈo nda Ni cña jnaˈ; biˈ chaˈ nchcuiˈ tsa naˈ loˈo ma̱ juani, chaˈ ngaˈaa cuaˈni tyucuaa tiˈ ma̱ loˈo xaˈ ñati̱. Ngaˈa̱ chaˈ culacua tiˈ ma̱ chaˈ lcaa cña nu cua nchca jiˈi̱ ma̱ juani, Cristo nguaˈni chaˈ caca jiˈi̱ ma̱, nu loˈo ngusñi ma̱ chaˈ jiˈi̱ Ni.
\v 4 Tyu̱u̱ tsa tyaˈa tyijya̱ ntsuˈu laja cuañaˈ scaa na, pana scaa cña ntsuˈu jiˈi̱ scaa tyijya̱ biˈ.
\v 5 Loˈo juaˈa̱ laca na, lcaa tyaˈa na nu ntsuˈu chaˈ jiˈna loˈo Cristo, chaˈ masi tyu̱u̱ tsa nguˈ tyaˈa na, pana sca ti taju ñati̱ laca na loˈo tyaˈa na; sca ti ñati̱ laca tsaca na, pana lcaa na stuˈba ti ntsuˈu chaˈ jiˈna loˈo tyaˈa na.
\p
\v 6 Xi xaˈ la cña nchca cuaˈni sa scaa na, ñaˈa̱ cña nu nda Ni chacuayáˈ chaˈ cuaˈni scaa na, chaˈ tsoˈo tsa ntsuˈu tyiquee Ni ñaˈa̱ Ni jiˈna. Nu loˈo ntsuˈu nguˈ tyaˈa ma̱ nu nchca jiˈi̱ nguˈ chcuiˈ nguˈ sca chaˈ nu ntiˈ ycuiˈ Ndyosi ta Ni loˈo ma̱, biˈ cña cuaˈni nguˈ lacua. La cuiˈ ñiˈya̱ nduna nguˈ biˈ chaˈ nu nda ycuiˈ Ndyosi, ñiˈya̱ ngusñi nguˈ chaˈ biˈ, la cuiˈ juaˈa̱ ta nguˈ chaˈ biˈ loˈo ma̱.
\v 7 Loˈo nchca jiˈi̱ tsaca ma̱ xtyucua ma̱ jiˈi̱ tyaˈa ma̱, tyucui tyiquee ma̱ xtyucua ma̱ jiˈi̱ nguˈ biˈ lacua. Loˈo nchca jiˈi̱ tsaca ma̱ culuˈu ma̱ chaˈ liñi jiˈi̱ tyaˈa ma̱, tyucui tyiquee ma̱ culuˈu ma̱ chaˈ biˈ jiˈi̱ nguˈ lacua.
\v 8 Nu loˈo ta ma̱ sca cui̱i̱ cuentya jiˈi̱ ycuiˈ Ndyosi loˈo nguˈ, tyucui tyiquee ma̱ ta ma̱ chaˈ biˈ lacua. Nu loˈo ta ma̱ chaˈ xlyaˈbe jiˈi̱ nguˈ, tyucui tyiquee ma̱ ta ma̱ chaˈ tsoˈo jiˈi̱ nguˈ lacua. Si laca ma̱ loo jiˈi̱ nguˈ tyaˈa ma̱, cuiˈya ma̱ cuentya chaˈ tsoˈo ti cuaˈni ma̱ lacua. Nu loˈo cuaˈni tyaˈna tiˈ ma̱ jiˈi̱ nguˈ, tsoˈo ti caca tyiquee ma̱ laja loˈo cuaˈni ma̱ cña biˈ cuentya jiˈi̱ nguˈ liˈ.
\s Ñiˈya̱ nu tsoˈo la tyiˈi̱ na chalyuu si ñati̱ jiˈi̱ ycuiˈ Ndyosi laca na
\p
\v 9 Cuaˈni ma̱ chaˈ tsoˈo tsa caca tyiquee ma̱ ñaˈa̱ ma̱ jiˈi̱ xaˈ la ñati̱, chaˈ siˈi sca chaˈ nu nda ti ma̱ laca biˈ, nu loˈo chcuiˈ tsoˈo ma̱ loˈo nguˈ, masi loˈo cuaˈni ma̱ chaˈ tsoˈo loˈo nguˈ. Ngaˈaa taquiyaˈ ma̱ jiˈi̱ chaˈ cuxi, tyucui tyiquee ma̱ clyana ma̱ jiˈi̱ chaˈ tsoˈo.
\v 10 Ndiˈya̱ caca tyiquee ma̱ ñaˈa̱ ma̱ jiˈi̱ nguˈ tyaˈa ntsuˈu chaˈ jiˈi̱ ma̱ loˈo Cristo: caca ñiˈya̱ si laca nguˈ biˈ tyaˈa ngula ma̱ tsiyaˈ ti; biˈ chaˈ cuaˈni chi̱ ma̱ loo tyaˈa ma̱, xti ti chaˈ tyuˈu tyiquee ycuiˈ ca ma̱ liˈ.
\p
\v 11 Ná cuaˈni taja ma̱ loˈo cuaˈni ma̱ cña jiˈi̱ ycuiˈ Ndyosi; na cua ndyanu Xtyiˈi ycuiˈ Ndyosi ca neˈ cresiya jiˈi̱ ma̱, biˈ chaˈ caca tlyu tyiquee ma̱ chaˈ cuaˈni la ma̱ cña biˈ.
\p
\v 12 Nduˈni chaˈ tsoˈo tsa caca tyiquee ma̱ loˈo jatya ma̱ jiˈi̱ ycuiˈ Ndyosi chaˈ ca̱a̱ Ni cuaˈni lyaá Ni jiˈi̱ ma̱. Ná xtyanu ma̱ jiˈi̱ chaˈ biˈ, masi tiˈí tsa xcubeˈ nguˈ jiˈi̱ ma̱ su ndiˈi̱ ma̱ chalyuu. Lcaa tsa̱ chcuiˈ ma̱ loˈo ycuiˈ Ndyosi Sti na.
\p
\v 13 Nu loˈo lyiji sca na jiˈi̱ sca nguˈ tyaˈa ngusñi ma̱ chaˈ jiˈi̱ Cristo, ngaˈa̱ chaˈ tyaˈbe chaˈ tsoˈo nu ntsuˈu jiˈi̱ ycuiˈ ca ma̱, chaˈ ta ma̱ na jiˈi̱ nguˈ biˈ, na laca nu lyiji jiˈi̱ nguˈ. Lcaa tyempo ta ma̱ toˈ tyi ma̱ chaˈ tyiˈi̱ ñati̱ nu lijya̱ ti.
\p
\v 14 Chcuiˈ ma̱ loˈo ycuiˈ Ndyosi cuentya jiˈi̱ ñati̱ nu ndyuˈni lyaˈ tiˈ jiˈi̱ ma̱; pana ná jña ma̱ chaˈ tyanu yabeˈ jiˈi̱ nguˈ biˈ, masi xcuiˈ chaˈ tsoˈo ti jña ma̱ cuentya jiˈi̱ nguˈ biˈ.
\p
\v 15 Cuaˈni chaa tiˈ ma̱ loˈo xaˈ ñati̱, nu loˈo ñaˈa̱ ma̱ jiˈi̱ nguˈ chaˈ chaa tiˈ nguˈ ndiˈi̱ nguˈ; loˈo juaˈa̱ tsoˈo si caca xñiˈi̱ tiˈ ma̱ loˈo nguˈ, nu loˈo ñaˈa̱ ma̱ chaˈ xñiˈi̱ ti tiˈ nguˈ ndiˈi̱ nguˈ. Cuaˈni ma̱ chaˈ caca stuˈba tyiquee ma̱ loˈo xaˈ ñati̱.
\p
\v 16 Sca ti chaˈ chcuiˈ ma̱ loˈo lcaa nguˈ tyaˈa ntsuˈu chaˈ jiˈi̱ ma̱ loˈo Jesucristo; ná cuaˈni tyucuaa tiˈ ma̱ loˈo nguˈ tiˈi tyaˈa ma̱, tsoˈo ti chcuiˈ ma̱ loˈo nguˈ biˈ. Stuˈba ti tyaˈa̱ ma̱ loˈo nguˈ biˈ, ná culacua tiˈ ma̱ chaˈ nchca la jiˈi̱ ycuiˈ ca ma̱.
\p
\v 17 Nu loˈo cuxi ti cuaˈni nguˈ loˈo ma̱, ná tya ma̱ chaˈ cuxi jiˈi̱ nguˈ chaca quiyaˈ; clyana ma̱ sca cña tsoˈo nu caca cuaˈni ma̱ cuentya jiˈi̱ nguˈ, chaˈ juaˈa̱ ñaˈa̱ tsa ñati̱ jiˈna.
\v 18 Cuaˈni ma̱ chaˈ cajá ñiˈya̱ tyiˈi̱ tsoˈo ti ma̱ loˈo lcaa ñati̱, chaˈ ná caja tyaˈa cusu̱u̱ ma̱.
\v 19 Cuˈma̱ tyaˈa tsoˈo naˈ, ni sca quiyaˈ ná xtyacui ma̱ chaˈ cuxi jiˈi̱ nguˈ nu cuaˈni lyaˈ tiˈ jiˈi̱ ma̱, masi ta ma̱ tyempo jiˈi̱ ycuiˈ Ndyosi chaˈ xcubeˈ Ni jiˈi̱ nguˈ biˈ. Tsoˈo la juaˈa̱. La cuiˈ juaˈa̱ ndyuˈu chaˈ nu nscua lo quityi cusuˈ ndiˈya̱: “Cña ˈna laca chaˈ caca ñasi̱ˈ naˈ jiˈi̱ nguˈ, chaˈ ta naˈ nu tiˈí jiˈi̱ nguˈ, nacui̱ Ni”. Biˈ laca chaˈ liñi nu nda ycuiˈ nu Xuˈna na loˈo na.
\v 20 Loˈo juaˈa̱ tya nda Ni xi xaˈ la chaˈ: “Nu loˈo ngujui jbiˈña jiˈi̱ tyaˈa cusu̱u̱ ma̱”, nacui̱ Ni, “tsoˈo la si ta ma̱ na cacu nguˈ biˈ; nu loˈo nguityi tsa tyaˈa cusu̱u̱ ma̱ hitya, ta ma̱ na coˈo nguˈ liˈ. Juaˈa̱ ta ma̱ sca chaˈ tyujuˈu tiˈ jiˈi̱ nguˈ.” Juaˈa̱ chaˈ nscua lo quityi.
\v 21 Biˈ chaˈ ngaˈaa ta ma̱ tyempo jiˈi̱ nu cuxi chaˈ cuaˈni biˈ ngana jiˈi̱ ma̱. Juani taca tyiji̱loo ma̱ jiˈi̱ nu cuxi, xquiˈya chaˈ xcuiˈ chaˈ tsoˈo ndyuˈni ma̱.
\c 13
\p
\v 1 Lcaa cuˈma̱ nguˈ tyaˈa na, ngaˈa̱ chaˈ taquiyaˈ ma̱ jiˈi̱ nguˈ nu laca cña. Ycuiˈ Ndyosi laca nu cua nda chacuayáˈ jiˈi̱ nguˈ biˈ, chaˈ caca nguˈ loo jiˈna; ná ntsuˈu chaca nu taca ta chacuayáˈ biˈ jiˈi̱ nguˈ. 
\v 2 Biˈ chaˈ lacua, nu loˈo xu̱u̱ tyaˈa na loˈo nguˈ nu laca cña, laca ñiˈya̱ si nxu̱u̱ na loˈo ycuiˈ Ndyosi, chaˈ ycuiˈ Ni ngusta Ni jiˈi̱ nguˈ biˈ chaˈ caca nguˈ loo jiˈna. Si juaˈa̱ xu̱u̱ tyaˈa na loˈo nguˈ, caja ñiˈya̱ nu xcubeˈ nguˈ jiˈna liˈ;
\v 3 pana ná caca xcutsi̱i̱ nguˈ nu laca loo jiˈna si cña tsoˈo ti ndyuˈni na, sca ti jiˈi̱ nguˈ xñaˈa̱ xcutsi̱i̱ nguˈ biˈ. Si chañi chaˈ ntiˈ ma̱ chaˈ ná cutsi̱i̱ ma̱ jiˈi̱ nguˈ nu laca cña, xcuiˈ chaˈ tsoˈo ti cuaˈni ma̱ liˈ. Ná tyiqueeˈ loˈo nguˈ nu laca cña biˈ cuaˈni chi̱ nguˈ loo ma̱, si juaˈa̱ xcuiˈ chaˈ tsoˈo ti nduˈni ma̱.
\v 4 Chacuayáˈ jiˈi̱ ycuiˈ Ndyosi laca nguˈ biˈ loo jiˈna, chaˈ taca xtyucua nguˈ jiˈna; pana si cuaˈni ma̱ chaˈ cuxi, liˈ ntsuˈu chaˈ cutsi̱i̱ ma̱, chaˈ ntsuˈu chacuayáˈ xcubeˈ nguˈ biˈ jiˈi̱ ma̱ liˈ. Chacuayáˈ jiˈi̱ Ni laca nguˈ biˈ loo jiˈna lacua, cuentya jiˈi̱ Ni nchcubeˈ nguˈ jiˈi̱ nguˈ cuxi;
\v 5 biˈ chaˈ ntsuˈu chaˈ taquiyaˈ ma̱ jiˈi̱ chaˈ nu nchcuiˈ nguˈ biˈ. Xcubeˈ nguˈ biˈ jiˈna si ná taquiyaˈ na jiˈi̱ nguˈ. Loˈo juaˈa̱ jlo tiˈ na chaˈ ngaˈa̱ chaˈ taquiyaˈ na jiˈi̱ nguˈ biˈ, xquiˈya chaˈ liñi nu ntsuˈu hique scaa na.
\v 6 La cuiˈ juaˈa̱ sca chaˈ tsoˈo laca si tya ma̱ lcaa cñi cña loo nu jña nguˈ biˈ jiˈi̱ ma̱, chaˈ msu jiˈi̱ ycuiˈ Ndyosi laca nguˈ nu laca cña biˈ, chaˈ biˈ laca cña nu nda Ni jiˈi̱ nguˈ biˈ, chaˈ cuaˈni nguˈ nde chalyuu. 
\p
\v 7 Tya ma̱ jiˈi̱ nguˈ laca cña lcaa na nu ntsuˈu chacuayáˈ jiˈi̱ nguˈ chaˈ jña nguˈ jiˈi̱ ma̱. Ná tyacui ma̱ cñi cña loo, ni ná tyacui ma̱ cñi jiˈi̱ sca cña nu cua nguaˈni nguˈ; tya ma̱ cayaˈ biˈ jiˈi̱ nguˈ. Loˈo juaˈa̱ cuaˈni tlyu ma̱ jiˈi̱ nguˈ biˈ, cuaˈni chi̱ ma̱ loo nguˈ, tucuá ma̱ cña jiˈi̱ nguˈ biˈ.
\v 8 Ngaˈaa suˈba ma̱ taneˈ hichu̱ˈ ma̱. Sca lo ti cña lyiji chaˈ cuaˈni ma̱ loˈo xaˈ ñati̱, chaˈ tsoˈo tsa cuaˈni ma̱ ñaˈa̱ ma̱ jiˈi̱ nguˈ; cua laca ndyuˈni ma̱ lcaa cña nu ngulo ycuiˈ Ndyosi jiˈna, nu loˈo tsoˈo tsa ntsuˈu tyiquee ma̱ ñaˈa̱ ma̱ jiˈi̱ tyaˈa ñati̱ ma̱.
\v 9 Tyu̱u̱ lo cña ngulo Ni jiˈi̱ ñati̱ nu loˈo nda Ni chaˈ loˈo Moisés nu ngua saˈni; ndiˈya̱ nacui̱ Ni: “Ná tyuˈu chaˈ jiˈi̱ ma̱ loˈo clyoˈo xaˈ ñati̱”, nacui̱ Ni. “Ná cujuii ma̱ jiˈi̱ tyaˈa ñati̱ ma̱. Ná cuaana ma̱ na nu ntsuˈu jiˈi̱ tyaˈa ñati̱ ma̱. Ná tyacui tiˈ ma̱ na nu ntsuˈu jiˈi̱ tyaˈa ñati̱ ma̱”, nacui̱ Ni. Sca ti cuayáˈ ndyuˈu lcaa chaˈ biˈ loˈo chaca chaˈ nu nchcuiˈ quityi re: “Ntsuˈu chaˈ cuaˈni tyaˈna tiˈ ma̱ jiˈi̱ tyaˈa ñati̱ ma̱, ñiˈya̱ laca si nduˈni tyaˈna tiˈ ma̱ jiˈi̱ ycuiˈ ca ma̱”, nacui̱ Ni.
\v 10 Nu loˈo ntsuˈu tyiquee na ñaˈa̱ na jiˈi̱ tyaˈa ñati̱ na juaˈa̱, ná taca cuaˈni na chaˈ cuxi loˈo nguˈ biˈ liˈ. Biˈ chaˈ na cua ndye ndyuˈni na lcaa cña nu ngulo ycuiˈ Ndyosi jiˈna, nu loˈo cuaˈni tyaˈna tiˈ na jiˈi̱ tyaˈa ñati̱ na, chaˈ ntsuˈu tyiquee na ñaˈa̱ na jiˈi̱ nguˈ.
\p
\v 11 Cuaˈni ma̱ chaˈ tyiˈu tiˈ ma̱ lcaa chaˈ biˈ. Cua jlo tiˈ ma̱ chaˈ cua ndyalaa hora chaˈ clyana na jiˈi̱ ycuiˈ Ndyosi; biˈ chaˈ juani que tiˈ ma̱ lacua, chaˈ tii ti tiˈ ma̱ tyiˈi̱ ma̱ chalyuu. Cua tya̱a̱ ti ycuiˈ Jesús chaˈ cuaˈni lyaá Ni jiˈna, chaˈ ca̱quiˈya Ni jiˈna. Nu loˈo ngusñi na chaˈ jiˈi̱ Jesús tya clyo, liˈ ngua tiˈ na chaˈ tya lyiji tsa tyalaa tsa̱ biˈ chaˈ tya̱a̱ ycuiˈ Jesús; pana juani cua ngulala ti tyalaa tsa̱ biˈ. 
\v 12 Ñiˈya̱ laca chalyuu talya, juaˈa̱ laca loˈo ndiˈi̱ na chalyuu, xquiˈya chaˈ cuxi nu ntsuˈu jiˈna. Pana juani cua tye ti talya biˈ, cua tya̱a̱ ti Cristo chaˈ culotsuˈ Ni chaˈ cuxi biˈ. Liˈ caca chalyuu jiˈna ñiˈya̱ si cua nguxee tsoˈo, chaˈ lubii tsa xee caca liˈ. Biˈ chaˈ ngaˈa̱ chaˈ xtyanu na jiˈi̱ chaˈ cuxi nu nduˈni nguˈ, chaˈ cuxi tsa tyiquee nguˈ nu ndyaˈa̱ chalyuu talya biˈ. Cuaˈni choˈo na tyucui ñaˈa̱ na, chaˈ nguula tsa cuaˈni na cña cuentya jiˈi̱ Cristo nde chalyuu, ñiˈya̱ si laca na sendaru jiˈi̱ Cristo.
\v 13 Clyana na ñiˈya̱ caca tyiˈi̱ tsoˈo ti na loˈo ñati̱, ñiˈya̱ si laca na ñati̱ nu xcuiˈ ndyaˈa̱ ndacua̱ ti su caca ñaˈa̱ ñati̱ jiˈna. Liˈ ná tsoˈo laca si culiji na chalyuu jiˈna juaˈa̱ ti loˈo ndyaˈa̱ na chaˈ cuˈbi na, masi xaˈ la juersa jiˈna culiji na loˈo xcuiˈ ndiˈi̱ ti na taˈa. Ná tsoˈo biˈ. Loˈo juaˈa̱ ná ntsuˈu chaˈ cuaˈni subaˈ na loˈo xaˈ ñati̱, ná ntsuˈu chaˈ clyana na xaˈ la chaˈ cuxi nu cuaˈni na loˈo ñati̱; ni ngaˈaa clyana na chaˈ cusu̱u̱ loˈo nguˈ, ngaˈaa cuaˈni liyeˈ tiˈ na jiˈi̱ nguˈ.
\v 14 Ta ma̱ chacuayáˈ chaˈ caca loo ycuiˈ Jesucristo nu Xuˈna na jiˈi̱ tyucui ñaˈa̱ ma̱; ngaˈaa taquiyaˈ na jiˈi̱ lcaa lo chaˈ cuxi, chaˈ nu tiji̱ˈ tsa tiˈ na jiˈi̱ xquiˈya chaˈ laca na ñati̱ ti.
\c 14
\s Ná chcuiˈ nguˈ chaˈ cuxi jiˈi̱ xaˈ la ñati̱ tyaˈa ntsuˈu chaˈ jiˈi̱ nguˈ loˈo Cristo
\p
\v 1 Tsoˈo ti chcuiˈ ma̱ loˈo sca ñati̱ tyaˈa ngusñi na chaˈ jiˈi̱ Jesús, masi tya lyiji ca cuayáˈ tsoˈo tiˈ chaˈ biˈ; ná xu̱u̱ tyaˈa ma̱ loˈo nu ñati̱ biˈ xquiˈya sca chaˈ nu ná nchca cuayáˈ tsoˈo tiˈ.
\v 2 Ntsuˈu ñati̱ nu jlya tsa tiˈ jiˈi̱ Cristo, biˈ chaˈ ná ntsi̱i̱ nguˈ cacu nguˈ lcaa lo na. Xaˈ la ñati̱ nu ná jlya tsoˈo tiˈ jiˈi̱ Cristo, ntsi̱i̱ nguˈ biˈ si cuaˈni nguˈ chaˈ cuxi xquiˈya sca na cacu nguˈ; biˈ chaˈ ná ntajaˈa̱ nguˈ biˈ cacu nguˈ cuañaˈ. Ndacu nguˈ siˈyu, ndacu nguˈ cu̱u̱, ndacu nguˈ caatya, tsa biˈ ti na ndacu nguˈ biˈ.
\v 3 Pana nu nguˈ nu ná ntsi̱i̱ ndacu cuañaˈ ni, ná tsoˈo si xtyí loˈo nguˈ jiˈi̱ xaˈ la tyaˈa nguˈ nu ntsi̱i̱ cacu biˈ. La cuiˈ ti chaˈ, nu nguˈ nu ntsi̱i̱ cacu cuañaˈ biˈ, ná tsoˈo si chcuiˈ cuxi nguˈ biˈ jiˈi̱ nguˈ nu ndacu lcaa lo na nu nda ycuiˈ Ndyosi chaˈ cacu na, chaˈ cua nda Ni chacuayáˈ jiˈi̱ nguˈ chaˈ caca nguˈ sñiˈ ycuiˈ Ni.
\v 4 Ná tsoˈo si chcuiˈ cuxi ma̱ jiˈi̱ xaˈ la ñati̱ tyaˈa ngusñi na chaˈ jiˈi̱ Ni. Ycuiˈ Ndyosi laca Xuˈna nguˈ, siˈi cuentya jiˈi̱ cuˈma̱ laca nguˈ biˈ; cuentya jiˈi̱ ycuiˈ Ndyosi laca cña nu ndyuˈni nguˈ, si chaˈ tsoˈo ndyuˈni nguˈ, si chaˈ cuxi ndyuˈni nguˈ. Loˈo juaˈa̱ ná tyacua chaˈ cuxi jiˈi̱ nguˈ xquiˈya chaˈ biˈ, chaˈ loˈo nguˈ biˈ ngusñi nguˈ chaˈ jiˈi̱ ycuiˈ nu Xuˈna na; juaˈa̱ xtyucua Ni jiˈi̱ nguˈ, chaˈ tyiˈi̱ tsoˈo ti nguˈ chalyuu cuentya jiˈi̱ ycuiˈ Ni.
\p
\v 5 Ntsuˈu nguˈ tyaˈa ntsuˈu chaˈ jiˈna loˈo Cristo nu nduˈni tacati jiˈi̱ sca tsa̱, ná ntsuˈu chaˈ jiˈi̱ xaˈ la tsa̱ cuentya jiˈi̱ nguˈ biˈ; xaˈ la ñati̱ nchcuiˈ chaˈ na jiˈi̱ ycuiˈ Ndyosi laca lcaa tsa̱. Ta ma̱ chacuayáˈ cuaˈni scaa ñati̱ tsa ñaˈa̱ nu nclyacua tiˈ ycuiˈ ca nguˈ.
\v 6 Si tacati tsa sca tsa̱ cuentya jiˈi̱ tsaca nguˈ, biˈ laca tsa̱ nu ngaˈa̱ chaˈ cuaˈni chi̱ nguˈ biˈ loo ycuiˈ Ndyosi lacua; loˈo juaˈa̱ taca cuaˈni chi̱ nu xaˈ la ñati̱ loo ycuiˈ Ndyosi, masi ná ntsuˈu chaˈ tacati jiˈi̱ nguˈ loˈo tsa̱ biˈ. La cuiˈ juaˈa̱ ndyuˈu chaˈ loˈo ñati̱ nu ná ntsi̱i̱ cacu cuañaˈ biˈ; xquiˈya chaˈ ngusñi nguˈ chaˈ jiˈi̱ ycuiˈ Ndyosi, biˈ chaˈ ná ntsi̱i̱ nguˈ biˈ. Ndya nguˈ xlyaˈbe jiˈi̱ ycuiˈ Ni loˈo ndacu nguˈ jiˈi̱. Loˈo nu ntsi̱i̱ cacu cuañaˈ biˈ ni, la cuiˈ ti xquiˈya ycuiˈ Ndyosi ntsi̱i̱ nguˈ cacu nguˈ jiˈi̱; loˈo nguˈ biˈ ndya nguˈ xlyaˈbe jiˈi̱ ycuiˈ nu Xuˈna na chaˈ nda Ni na cacu nguˈ.
\p
\v 7 Ntsuˈu chaˈ caca na cña jiˈi̱ Ni, masi tya luˈú na, masi cajaa na. Siˈi chaˈ jiˈi̱ ycuiˈ ti na ndiˈi̱ na chalyuu, siˈi chaˈ jiˈi̱ ycuiˈ ti na cajaa na;
\v 8 chaˈ caca na cña jiˈi̱ ycuiˈ Ndyosi, biˈ chaˈ ndiˈi̱ na lo yuu chalyuu. Nu loˈo ntsuˈu chaˈ cajaa na, chaˈ jiˈi̱ Ni laca liˈ, chaˈ na jiˈi̱ ycuiˈ Ni laca na, masi tya luˈú na, masi cua ngujuii na.
\v 9 Cua ngujuii Cristo, loˈo juaˈa̱ cua ndyuˈú Cristo chaca quiyaˈ, chaˈ ca cuayáˈ tiˈ lcaa nguˈ chaˈ ycuiˈ Ndyosi laca Xuˈna lcaa jyoˈo nu ngusñi chaˈ jiˈi̱ Ni nu loˈo ngutiˈi̱ nguˈ chalyuu. Loˈo juaˈa̱ ycuiˈ Ni laca Xuˈna ñati̱ nu jlya tiˈ jiˈi̱ Ni nde chalyuu juani.
\p
\v 10 Ñati̱ jiˈi̱ Cristo laca cua ñaˈa̱ ca nguˈ tyaˈa ngusñi na chaˈ jiˈi̱ Ni, biˈ chaˈ ná ngaˈa̱ chaˈ chcuiˈ cuxi ma̱ jiˈi̱ cña nu nduˈni scaa nguˈ tyaˈa ntsuˈu chaˈ jiˈna loˈo Cristo. Ná chcuiˈ cuxi ma̱ jiˈi̱ nguˈ biˈ, ñiˈya̱ nu nguaˈni ma̱ tya tsubiˈ la; ntsuˈu chaˈ tyalaa tsa̱ biˈ loˈo tyaa lcaa tyaˈa na ca su ntucua ycuiˈ Ndyosi. Nde loo ycuiˈ Ni tsatu̱ na liˈ, chaˈ cuaˈni cuayáˈ Ni jiˈna.
\v 11 Ntsuˈu sca chaˈ nu nscua lo quityi cusuˈ nu nacui̱ ycuiˈ Ndyosi ndiˈya̱:
\q Ycuiˈ Ndyosi luˈú laca naˈ, nacui̱ Ni, ngaˈa̱ chaˈ tyatu̱ sti̱ˈ lcaa ñati̱ nde loo su ntucua naˈ,
\q chaˈ chcuiˈ liñi nguˈ loˈo tyaˈa ñati̱ chaˈ laca naˈ ycuiˈ Ndyosi Sti nguˈ.
\m
\v 12 Biˈ chaˈ lacua, lcaa na loˈo tyaˈa na ngaˈa̱ chaˈ xacui̱ na chaˈ jiˈi̱ ycuiˈ Ndyosi loˈo tyalaa tsa̱ biˈ, lcaa chaˈ ñiˈya̱ nu nguaˈni scaa na loˈo ñaa na chalyuu. 
\s Ná ta nguˈ tyempo jiˈi̱ tyaˈa nguˈ chaˈ tyaˈa̱chu̱ˈ nguˈ jiˈi̱ Jesús
\p
\v 13 Ngaˈaa chcuiˈ cuxi ma̱ jiˈi̱ cña nu ndyuˈni scaa nguˈ tyaˈa ngusñi ma̱ chaˈ jiˈi̱ Jesús lacua. Ndiˈya̱ cuaˈni ma̱ juani: ngaˈaa ta ma̱ tyempo jiˈi̱ nguˈ tyaˈa ma̱ chaˈ cuaˈni nguˈ chaˈ cuxi xquiˈya cuˈma̱.
\v 14 Cua nchcuiˈ Cristo loˈo naˈ, cua jlo tiˈ naˈ chaˈ ni sca na cuxi ná nda ycuiˈ Ndyosi chaˈ cacu ñati̱; lcaa na nu ndacu ñati̱ chalyuu, na tsoˈo laca biˈ. Pana ntsuˈu ñati̱ nu ná nchca cacu sca na, xquiˈya chaˈ ntiˈ ti nguˈ chaˈ na cuxi laca biˈ; cuxi tsa laca na biˈ cuentya jiˈi̱ nguˈ biˈ si cacu nguˈ jiˈi̱ liˈ. 
\v 15 Loˈo nguˈ tyaˈa ntsuˈu chaˈ jiˈi̱ ma̱ loˈo Jesús ni, si ñaˈa̱ nguˈ chaˈ ndyacu ma̱ sca na nu ná ntsuˈu chacuayáˈ cacu ycuiˈ nguˈ, ntiˈ nguˈ, chiyaˈa̱ culacua tiˈ nguˈ biˈ liˈ; ñiˈya̱ laca si ná tsoˈo ntsuˈu tyiquee ma̱ ñaˈa̱ ma̱ jiˈi̱ nguˈ, biˈ chaˈ ndyacu ma̱ na biˈ culacua tiˈ nguˈ. Ná tsoˈo juaˈa̱. Ná ntsuˈu chacuayáˈ jiˈi̱ ma̱ cacu ma̱ na laca nu ntiˈ ti ma̱, si juaˈa̱ cuaˈni ma̱ chaˈ xtyanu nguˈ tyaˈa ma̱ chaˈ jiˈi̱ Cristo xquiˈya chaˈ ndyacu ma̱ na biˈ. Loˈo nguˈ biˈ, laca nguˈ cuentya jiˈi̱ ycuiˈ Ndyosi; xquiˈya nguˈ biˈ, biˈ chaˈ ngujuii Cristo.
\v 16 Masi ndiˈi̱ tsoˈo ti ma̱, ná ngaˈa̱ chaˈ ta ma̱ tyempo jiˈi̱ nguˈ chaˈ chcuiˈ nguˈ chaˈ cuxi jiˈi̱ cña nu ndyuˈni ma̱ xquiˈya chaˈ ndyacu ma̱ na biˈ.
\v 17 Nu loˈo laca ycuiˈ Ndyosi loo jiˈna ni, ná ndulo tsa chaˈ jiˈna cuentya jiˈi̱ sca na nu ndacu na, sca na nu coˈo na; nu ndulo tsa jiˈna laca chaˈ tya̱a̱ Xtyiˈi ycuiˈ Ndyosi tyanu neˈ cresiya jiˈna, chaˈ ca tsoˈo cresiya jiˈna xquiˈya Jesús. Biˈ chaˈ ti̱ ti taca tyiˈi̱ tyiquee na chalyuu, taca ca chaa tiˈ na xquiˈya ycuiˈ Ndyosi; lcaa chaˈ biˈ caca nu loˈo laca Ni loo jiˈna. 
\v 18 Liˈ tsoˈo ntsuˈu tyiquee Ni ñaˈa̱ Ni jiˈi̱ ma̱, loˈo juaˈa̱ ñati̱ chalyuu cuaˈni chi̱ nguˈ loo ma̱, si cuaˈni ma̱ lcaa ñaˈa̱ cña nu nguluˈu Cristo jiˈna.
\p
\v 19 Tsoˈo lacua. Lcaa tyaˈa na ngaˈa̱ chaˈ clyana na cua ñaˈa̱ ca chaˈ nu cuaˈni chaˈ caca tyiˈi̱ tsoˈo na loˈo tyaˈa ñati̱ na, ñaˈa̱ chaˈ nu cuaˈni chaˈ xtyucua na jiˈi̱ tyaˈa ñati̱ na, chaˈ tsoˈo ti tyiˈi̱ na cuentya jiˈi̱ Cristo;
\v 20 ná cuaˈni ñuˈu̱ ma̱ jiˈi̱ cña nu ndyuˈni ycuiˈ Ndyosi xquiˈya sca na nu ndacu ma̱. Chañi chaˈ tsoˈo tsa laca lcaa na nu nda Ni chaˈ cacu ñati̱, pana caca cuxi na biˈ cuentya jiˈi̱ ma̱, si ntsuˈu nguˈ nu xtyanu chaˈ jiˈi̱ Jesús xquiˈya chaˈ ndacu ma̱ jiˈi̱.
\v 21 Tsoˈo la masi ná cacu ma̱ cuañaˈ tsiyaˈ ti, masi ná coˈo ma̱ lcui tsiyaˈ ti, si ntiˈ ma̱ chaˈ cuxi laca na biˈ cuentya jiˈi̱ tyaˈa ñati̱ ma̱. Ni sca na ná cuaˈni ma̱ nu cuaˈni chaˈ tyaˈa̱chu̱ˈ nguˈ tyaˈa ma̱ jiˈi̱ Jesús, chaˈ cuaˈni nguˈ chaˈ cuxi, chaˈ quiñuˈu̱ cresiya jiˈi̱ nguˈ.
\v 22 Nu loˈo ntiˈ ma̱ chaˈ tsoˈo tsa cuentya jiˈi̱ ycuiˈ Ndyosi laca sca cña nu nduˈni ma̱, masi ntsuˈu ñati̱ nu ná ndiya tiˈ chaˈ nduˈni ma̱ juaˈa̱, tsiyaˈ ti cuaˈni ma̱ cña biˈ liˈ ca su ngaˈa̱ ycuiˈ ti ma̱, ca su ñaˈa̱ sca ti ycuiˈ Ndyosi jiˈi̱ ma̱. Tsoˈo tsa ntsuˈu tyiquee ñati̱ nu nguiˈi̱ nduˈni juaˈa̱, ná ntsuˈu chaˈ culacua tsa tiˈ nguˈ biˈ; cua jlo tiˈ nguˈ biˈ chaˈ siˈi chaˈ cuxi nu nduˈni nguˈ.
\v 23 Pana ná tsoˈo ndyuˈni ñati̱ loˈo ndyacu cuañaˈ si ntiˈ nguˈ chaˈ cuxi laca chaˈ biˈ cuentya jiˈi̱ ycuiˈ Ni; quiˈya laca jiˈi̱ nguˈ biˈ, chaˈ siˈi na tyucui tyiquee nguˈ ndyacu nguˈ cuañaˈ biˈ liˈ. Lcaa cña nu ndyuˈni na chaˈ siyaˈ ti tyiquee na, quiˈya jiˈna laca biˈ.
\c 15
\s Siˈi xcuiˈ cña jiˈi̱ ycuiˈ ca na nu tyuˈu tyiquee na 
\p
\v 1 Lcaa na nu nguula tiˈ tyiquee na xquiˈya chaˈ ngusñi na chaˈ jiˈi̱ Cristo, ntsuˈu chaˈ talo tyiquee na jiˈi̱ tyaˈa ngusñi na chaˈ jiˈi̱ Cristo nu tya lyiji xñi tsoˈo chaˈ biˈ; ntsuˈu chaˈ xtyucua na jiˈi̱ nguˈ. Siˈi xcuiˈ cña jiˈi̱ ycuiˈ ca na nu ngaˈa̱ chaˈ tyuˈu tyiquee na jiˈi̱;
\v 2 clyana na ñiˈya̱ caca chaˈ caca tsoˈo jiˈi̱ nguˈ tyaˈa na nu ngaˈa̱ cacua ti slo na. Xtyucua na jiˈi̱ nguˈ biˈ, chaˈ tyatí̱ la tiˈ tyiquee nguˈ loˈo jlya tiˈ nguˈ jiˈi̱ Cristo;
\v 3 ñiˈya̱ nu nguaˈni ycuiˈ Cristo, ni sca cña ná nguaˈni yu chaˈ jiˈi̱ ti yu. Cua ntsuˈu sca chaˈ nu nscua lo quityi cusuˈ, sca chaˈ nu nda yu loˈo ycuiˈ Ndyosi Sti yu ndiˈya̱: “Lcaa chaˈ cuxi nu nchcuiˈ nguˈ jinuˈu̱, cua ndyanu chaˈ biˈ hichu̱ˈ naˈ; yabeˈ nu ngusta nguˈ jinuˈu̱ laca biˈ”.
\v 4 Lcaa quityi nu nguscua jyoˈo cusuˈ tya saˈni la ni, nclyuˈu quityi biˈ jiˈna ñiˈya̱ nu caca jatya na jiˈi̱ sca chaˈ nu lijya̱ nde loo la; nda quityi chaˈ loˈo na ñiˈya̱ xtyucua ycuiˈ Ndyosi jiˈna chaˈ talo tsa tyiquee na laja loˈo ndu̱ tiˈ na jiˈi̱ Ni.
\v 5 Loˈo juaˈa̱ cua ntiˈ ya chaˈ xtyucua Ni jiˈi̱ cuˈma̱, la cuiˈ nu sca ti ycuiˈ Ndyosi nu nxtyucua jiˈi̱ lcaa na chaˈ talo tyiquee na, nu nduˈni chaˈ ca tlyu tyiquee na. Xtyucua Ni jiˈi̱ cuˈma̱, chaˈ juaˈa̱ talo tyiquee ma̱ jiˈi̱ tyaˈa ntsuˈu chaˈ jiˈi̱ ma̱ loˈo Ni, chaˈ caca stuˈba tyiquee ma̱ loˈo tyaˈa ma̱ xquiˈya Jesucristo. 
\v 6 Loˈo ngua stuˈba chaˈ jiˈi̱ ma̱ loˈo tyaˈa ma̱, liˈ sca ti chaˈ taca tyuˈu tyiquee ma̱, sca ti chaˈ taca tyuˈu tuˈba ma̱ loˈo cuaˈni tlyu ma̱ jiˈi̱ ycuiˈ Ndyosi Sti na, nu laca Sti Jesucristo nu Xuˈna na.
\s Nduna nguˈ xaˈ tsuˈ chaˈ tsoˈo nu nda Jesús
\p
\v 7 Ñiˈya̱ tsoˈo tsa nchcuiˈ Cristo loˈo ma̱, juaˈa̱ ngaˈa̱ chaˈ chcuiˈ tsoˈo ma̱ loˈo tyaˈa ñati̱ ma̱, chaˈ caja ñiˈya̱ cuaˈni tlyu nguˈ jiˈi̱ ycuiˈ Ndyosi loˈo ñaˈa̱ nguˈ jiˈi̱ ma̱.
\v 8 Cua ñaa Cristo chaˈ cuaˈni lyaá yu jiˈi̱ nguˈ judío, ñiˈya̱ nu ngüiñi chaˈ jiˈi̱ ycuiˈ Ndyosi loˈo jyoˈo cusuˈ jiˈi̱ ya saˈni la; caca cuayáˈ tiˈ na juaˈa̱ chaˈ liñi tsa chaˈ nu nda Ni loˈo jyoˈo cusuˈ biˈ.
\v 9 Ñaa nu Cristo biˈ, chaˈ juaˈa̱ caja ñiˈya̱ nu cuaˈni tlyu nguˈ xaˈ tsuˈ ma̱ jiˈi̱ ycuiˈ Ndyosi, chaˈ loˈo jiˈi̱ cuˈma̱ cuaˈni tyaˈna tsa tiˈ Ni, ñiˈya̱ nu ndyuˈu sca chaˈ nu nscua lo quityi cusuˈ nu ndiˈya̱ nchcuiˈ: 
\q Cuaˈni tlyu naˈ jinuˈu̱ laja nguˈ xaˈ tsuˈ, xquiˈya chaˈ nguaˈni lyaá nuˈu̱ jiˈi̱ nguˈ;
\q cula tuˈba naˈ ji̱i̱ jinuˈu̱, chaˈ cuaˈni chi̱ naˈ loo nuˈu̱, nacui̱ jyoˈo David.
\m
\v 10 Ntsuˈu chaca chaˈ nu nscua lo quityi cusuˈ nu nchcuiˈ ndiˈya̱:
\q Cuˈma̱ nguˈ xaˈ tsuˈ, stuˈba ti ca chaa tiˈ ma̱ loˈo lcaa ñati̱ nu ngusubi ycuiˈ Ndyosi jiˈi̱, nacui̱ jyoˈo Moisés.
\m
\v 11 Loˈo juaˈa̱ tya ntsuˈu chaca chaˈ nu nchcuiˈ ndiˈya̱: 
\q Cuaˈni tlyu lcaa nguˈ xaˈ tsuˈ jiˈi̱ ycuiˈ nu Xuˈna na;
\q lcaa nguˈ cula tuˈba nguˈ ji̱i̱ nu chcuiˈ chaˈ jiˈi̱ lcaa chaˈ tlyu nu nguaˈni ycuiˈ Ni, nacui̱ jyoˈo David. 
\m
\v 12 Loˈo jyoˈo Isaías nguscua sca chaˈ lo quityi cusuˈ nu nacui̱ ndiˈya̱:
\q Tyuˈu tucua sca ñati̱ tyaˈa ñati̱ jiˈi̱ jyoˈo Isaí, 
\q ca̱a̱ yu biˈ lo yuu chaˈ caca yu loo jiˈi̱ nguˈ xaˈ tsuˈ.
\q Ndu̱ tiˈ nguˈ xaˈ tsuˈ jiˈi̱ yu biˈ, chaˈ cuaˈni lyaá yu jiˈi̱ nguˈ.
\m Juaˈa̱ nchcuiˈ quityi cusuˈ biˈ.
\p
\v 13 Biˈ chaˈ juani ntiˈ naˈ chaˈ cuaˈni Ni chaˈ xñi tsoˈo la ma̱ chaˈ jiˈi̱ ycuiˈ Ni, chaˈ tsoˈo tsa caca tyiquee ma̱, chaˈ ti̱ ti taca tyiˈi̱ tyiquee ma̱ liˈ. Nu loˈo tyanu Xtyiˈi ycuiˈ Ndyosi neˈ cresiya jiˈna, liˈ ngaˈaa caca taja tiˈ na loˈo ntajatya na jiˈi̱ ycuiˈ Ndyosi chaˈ ca̱a̱ Ni.
\p
\v 14 Cuˈma̱ tyaˈa ntsuˈu chaˈ jiˈna loˈo Cristo, nslo tsa naˈ jiˈi̱ ma̱ chaˈ tsoˈo tsa tyiquee ma̱; tsoˈo tsa nchca cuayáˈ tiˈ ma̱ chaˈ jiˈi̱ Cristo, loˈo juaˈa̱ nchca tsa jiˈi̱ ma̱ ta ma̱ cui̱i̱ loˈo nguˈ tyaˈa ma̱. 
\v 15 Cua nscua naˈ quityi re chaˈ ca̱a̱ ca su ndiˈi̱ ma̱; ná ntsi̱i̱ naˈ tsiyaˈ ti chaˈ chcuiˈ naˈ chaˈ biˈ loˈo ma̱, chaˈ xñi tsoˈo la ma̱ chaˈ biˈ. Ntsuˈu chacuayáˈ chaˈ chcuiˈ naˈ loˈo ma̱, chaˈ ycuiˈ Ndyosi cua nda Ni cña biˈ ˈna, chaˈ tsoˈo tsa nduˈni Ni loˈo naˈ.
\v 16 Cua ngusubi ycuiˈ Ndyosi ˈna chaˈ cuaˈni naˈ cña jiˈi̱ Jesucristo; cña biˈ laca chaˈ tsaˈa naˈ ta naˈ chaˈ tsoˈo jiˈi̱ ycuiˈ Ndyosi loˈo nguˈ xaˈ tsuˈ, lcaa su ndiˈi̱ nguˈ. Juaˈa̱ ndyuˈni naˈ, chaˈ tyucui tyiquee nguˈ caca nguˈ biˈ ñati̱ jiˈi̱ ycuiˈ Ndyosi xquiˈya cña nu cuaˈni Xtyiˈi ycuiˈ Ndyosi neˈ cresiya jiˈi̱ nguˈ. Liˈ tyajaˈa̱ Ni quiñi chaˈ jiˈi̱ Ni loˈo nguˈ biˈ xquiˈya naˈ.
\p
\v 17 Xquiˈya Jesucristo ntsuˈu tsa chaˈ nu taca chcuiˈ naˈ loˈo cuˈma̱ nquichaˈ; taca chcuiˈ naˈ jiˈi̱ cña nu cua nguaˈni naˈ cuentya jiˈi̱ ycuiˈ Ndyosi, ni siˈi chaˈ cuaˈni tyucuaa tiˈ naˈ loˈo ma̱ laca si chcuiˈ naˈ juaˈa̱.
\v 18 Pana tsa biˈ ti chaˈ chcuiˈ naˈ loˈo ma̱, chaˈ jiˈi̱ cña nu nguaˈni Jesús, chaˈ caja ñiˈya̱ nu taquiyaˈ nguˈ xaˈ tsuˈ jiˈi̱ chaˈ nu nchcuiˈ ycuiˈ Ndyosi. Siˈi sca ti naˈ nu nguaˈni naˈ cña biˈ, pana Xtyiˈi ycuiˈ Ndyosi nguaˈni cña loˈo naˈ loˈo nchcuiˈ naˈ loˈo nguˈ.
\v 19 Nguaˈni Ni cña tonu nu ná ca cuaˈni ñati̱ chalyuu, chaˈ cube tiˈ xaˈ ñati̱ chaˈ ycuiˈ Ndyosi laca nu ndyuˈni cña biˈ. Juaˈa̱ ngua chaˈ cua ndyaˈa̱ naˈ ndiˈi̱ naˈ ca loyuu tyijyuˈ la. Nguxana naˈ nde quichi̱ Jerusalén, ñaˈa̱ cuayáˈ ndyalaa naˈ loyuu su cuentya Ilírico. Lcaa quichi̱ su ndyaˈa̱ naˈ, quiñaˈa̱ tsa chaˈ tsoˈo jiˈi̱ Cristo nda naˈ loˈo nguˈ ñaˈa̱ cuayáˈ nu ngua ˈna.
\v 20 Lye tsa ndyuˈni cña tiˈ naˈ, chaˈ tsaˈa naˈ tsaana naˈ lcua ti quichi̱ su bilya cuna nguˈ chaˈ jiˈi̱ Cristo. Biˈ ti quichi̱ ndyanu naˈ ncluˈu naˈ chaˈ tsoˈo biˈ jiˈi̱ nguˈ, chaˈ ná ntiˈ naˈ tyatí̱ yuˈu naˈ loˈo cña nu ndyuˈni xaˈ tyaˈa ñati̱ jiˈi̱ Cristo.
\v 21 Ntiˈ naˈ chaˈ tyuˈu tucua sca chaˈ nu nscua lo quityi cusuˈ nu nchcuiˈ ndiˈya̱:
\q Ca quichi̱ su bilya chcuiˈ nguˈ chaˈ jiˈi̱ ycuiˈ Ndyosi loˈo nguˈ, ca biˈ tyuloo tsoˈo ñati̱ jiˈi̱ ycuiˈ Ndyosi; 
\q ca su bilya cuna nguˈ chaˈ jiˈi̱ ycuiˈ Ni, ca biˈ ca cuayáˈ tsoˈo tiˈ ñati̱ chaˈ jiˈi̱ Ni.
\s Ntiˈ tsa Pablo tsaa ca quichi̱ Roma
\p
\v 22 Tyijyuˈ tsa ndyaˈa̱ naˈ, biˈ chaˈ bilya caja ñiˈya̱ nu ca̱a̱ naˈ ca su ndiˈi̱ ma̱,
\v 23 masi cua ngua tyu̱u̱ yija̱ nu ngua tiˈ naˈ chaˈ ca̱a̱ naˈ chcui̱ˈ loˈo ma̱. Ca juani ngua laja ˈna lijya̱a̱, chaˈ ngaˈaa ntsuˈu cña nu cuaˈni naˈ ca nde;
\v 24 biˈ chaˈ cua ntiˈ naˈ chaˈ ca̱a̱ naˈ tyiˈi̱ naˈ xi ca su ndiˈi̱ ma̱, tyucui̱i̱ su tsaˈa̱ nde España. Liˈ taca ta naˈ xi chaˈ loˈo ma̱. Nu loˈo ngua chaa xi tiˈ na loˈo tyaˈa na, liˈ taca chcuiˈ salyaˈ ma̱ loˈo naˈ, chaˈ xtyucua ma̱ jnaˈ tyucui̱i̱ su tsaˈa̱ nde loo la.
\v 25-26 Pana clyo la ntsuˈu chaˈ tsaˈa naˈ nde quichi̱ Jerusalén. Nu nguˈ tyaˈa ntsuˈu chaˈ jiˈna loˈo Cristo nu ndiˈi̱ nde Macedonia, nu ndiˈi̱ nde Acaya ni, tsoˈo tsa tyiquee nguˈ ñaˈa̱ nguˈ jiˈi̱ xaˈ ñati̱; biˈ chaˈ cua nguxutiˈi̱ nguˈ tsa ycuˈ cñi nu caca msta̱, chaˈ cua ntiˈ nguˈ xtyucua nguˈ jiˈi̱ nguˈ tiˈi tyaˈa na, nu ñati̱ jiˈi̱ Cristo nu ndiˈi̱ nde Jerusalén. Biˈ chaˈ tsaˈa naˈ tsaa loˈo naˈ jiˈi̱ cñi biˈ ca slo nguˈ tiˈi biˈ.
\v 27 Chañi chaˈ tyucui tsa tyiquee nguˈ biˈ nda nguˈ msta̱ biˈ. Taca ñacui̱ na chaˈ ñiˈya̱ laca si na ndacui ti nguˈ biˈ jiˈi̱ tyaˈa nguˈ, juaˈa̱ laca cña nu ndyuˈni nguˈ juani. Tya clyo nguˈ judío laca nu cua nda chaˈ jiˈi̱ Cristo loˈo nguˈ xaˈ tsuˈ; xquiˈya chaˈ biˈ ngua tsoˈo cresiya jiˈi̱ nguˈ cuentya jiˈi̱ ycuiˈ Ndyosi, masi nguˈ xaˈ tsuˈ laca nguˈ. Biˈ chaˈ juani loˈo ngua tiˈi nu nguˈ judío biˈ, tsoˈo si xtyucua nguˈ xaˈ tsuˈ jiˈi̱ nguˈ biˈ, chaˈ tyaˈa ñati̱ jiˈi̱ Cristo laca nguˈ. 
\v 28 Clyo cuaˈni naˈ chaˈ xcua seˈi̱ ti cña biˈ, ñaˈa̱ cuayáˈ nu cua nda naˈ cñi biˈ jiˈi̱ nguˈ; liˈ xñi naˈ tyucui̱i̱ tsaˈa̱ nde España. Pana laja tyucui̱i̱ tyeje tacui naˈ ca su ndiˈi̱ cuˈma̱.
\v 29 Nu loˈo tyalaa naˈ, liˈ jlo tiˈ naˈ chaˈ quiñaˈa̱ tsa chaˈ tsoˈo jiˈi̱ Cristo ntsuˈu chaˈ chcuiˈ naˈ loˈo ma̱, chaˈ caja ñiˈya̱ nu tyatí̱ la tiˈ tyiquee ma̱ liˈ.
\p
\v 30 Cuˈma̱ tyaˈa ngusñi na chaˈ jiˈi̱ ycuiˈ Ndyosi, tyuˈu chaˈ clyu tiˈ jiˈi̱ ma̱ loˈo naˈ xquiˈya Jesucristo nu Xuˈna na, chaˈ juaˈa̱ ntsuˈu tsa tyiquee ma̱ ñaˈa̱ ma̱ jiˈi̱ tyaˈa ñati̱ ma̱, xquiˈya cña nu ndyuˈni Xtyiˈi ycuiˈ Ni neˈ cresiya jiˈi̱ ma̱. Cuaˈni ma̱ chaˈ caca stuˈba tyiquee ma̱ loˈo naˈ, chaˈ luˈba tsa chcuiˈ ma̱ loˈo ycuiˈ Ndyosi cuentya jnaˈ.
\v 31 Jña ma̱ chaˈ clyu tiˈ jiˈi̱ ycuiˈ Ni, chaˈ clyaá naˈ jiˈi̱ nu nguˈ tyaala nu ná jlya tiˈ tsiyaˈ ti chaˈ jiˈi̱ Cristo, nu nguˈ nu ndiˈi̱ nde Judea ni. Loˈo juaˈa̱ jña ma̱ chaˈ jiˈi̱ Ni cuentya jiˈi̱ ñati̱ jiˈi̱ ycuiˈ Ndyosi nu ndiˈi̱ nde Jerusalén, chaˈ tsoˈo ti tyuˈu tyiquee nguˈ tyaˈa na chcuiˈ nguˈ loˈo naˈ, nu loˈo xñi nguˈ msta̱ nu ta naˈ jiˈi̱ nguˈ.
\v 32 Loˈo juaˈa̱ jña ma̱ chaˈ jiˈi̱ Ni, chaˈ tsoˈo ti caca tyiquee naˈ loˈo tyalaa naˈ ca su ndiˈi̱ ma̱, chaˈ xaˈ caca nguula tiˈ tyiquee naˈ nu loˈo tyiˈi̱ naˈ loˈo ma̱, si juaˈa̱ ntiˈ Ni chaˈ caca.
\v 33 Xtyucua Ni jiˈi̱ lcaa cuˈma̱ lacua, la cuiˈ ycuiˈ Ndyosi nu nduˈni chaˈ ti̱ ti tyiˈi̱ tyiquee na nde chalyuu. Chañi tsa chaˈ caca juaˈa̱.
\c 16
\s Nchcuichaˈ Pablo jiˈi̱ tyu̱u̱ tyaˈa ñati̱ jiˈi̱ Cristo 
\p
\v 1-2 Loˈo tyalaa maˈ Febe slo ma̱, chcuiˈ tsoˈo ma̱ loˈo maˈ xquiˈya ycuiˈ nu Xuˈna na, ñiˈya̱ nu ngaˈa̱ chaˈ cuaˈni ma̱, chaˈ tyaˈa ngusñi na chaˈ jiˈi̱ Cristo laca maˈ biˈ. Tyaˈa na laca maˈ Febe, ndyuˈni maˈ cña cuentya jiˈi̱ taju ñati̱ jiˈi̱ Cristo nu ndiˈi̱ quichi̱ Cencrea. Ta ma̱ na nu lyiji jiˈi̱ maˈ cusuˈ biˈ, chaˈ cua nguxtyucua tsa maˈ jiˈi̱ quiñaˈa̱ tsa ñati̱ tya tsubiˈ la; loˈo juaˈa̱ naˈ, cua nguxtyucua tsa maˈ jnaˈ.
\p
\v 3 Chcuichaˈ ma̱ jiˈi̱ Priscila loˈo Aquila, tyaˈa ndyuˈni naˈ cña jiˈi̱ Jesucristo.
\v 4 Cua tsubiˈ la hasta cua cajaa ti ycuiˈ nguˈ ngua cuentya jnaˈ, chaˈ nguaˈni lyaá nguˈ jnaˈ loˈo ntsuˈu naˈ sca su cuxi tsa. Loˈo ycuiˈ naˈ ndya naˈ xlyaˈbe jiˈi̱ nguˈ biˈ; juaˈa̱ lcaa tyaˈa nguˈ xaˈ tsuˈ nu ntsuˈu chaˈ jiˈi̱ loˈo Cristo nde quichi̱ tyijyuˈ la, juaˈa̱ ntiˈ nguˈ, chaˈ ta nguˈ tsaa xlyaˈbe jiˈi̱ nguˈ biˈ.
\v 5 Cuati chcuichaˈ ma̱ jiˈi̱ lcaa ñati̱ jiˈi̱ Cristo nu ndyuˈu tiˈi̱ ca toniˈi̱ jiˈi̱ nu Aquila biˈ. Loˈo juaˈa̱ chcuichaˈ ma̱ jiˈi̱ Epeneto tyaˈa tsoˈo naˈ, nguˈ Asia nu clyo ngusñi chaˈ jiˈi̱ Cristo laca yu biˈ.
\v 6 Juaˈa̱ chcuichaˈ ma̱ jiˈi̱ María, chaˈ nguaˈni tsa maˈ cña cuentya jiˈi̱ ma̱.
\v 7 Loˈo juaˈa̱ chcuichaˈ ma̱ jiˈi̱ Andrónico loˈo Junias tyaˈa quichi̱ tyi naˈ, tyaˈa ngutuˈu naˈ niˈi̱ chcua̱. Tyucuaa nguˈ biˈ laca nguˈ ñati̱ nu cua nda Cristo jiˈi̱ ndyaa, chaˈ ta nguˈ chaˈ jiˈi̱ ycuiˈ Ndyosi loˈo nguˈ nu cua tyijyuˈ la; nguula tsa cña nu nguaˈni nguˈ cuentya jiˈi̱ nu Xuˈna na. Pana yala la ngusñi nguˈ biˈ chaˈ jiˈi̱ Jesús, loˈo liˈ tiyaˈ la ngusñi naˈ chaˈ biˈ. 
\p
\v 8 Loˈo juaˈa̱ chcuichaˈ ma̱ jiˈi̱ lcaa nguˈ tyaˈa nscua xtañi nguˈ lo quityi re: jiˈi̱ Amplias, chaˈ tyacaˈa tsa yu ˈna xquiˈya ycuiˈ nu Xuˈna na;
\v 9 loˈo juaˈa̱ jiˈi̱ Urbano, tyaˈa ndyuˈni naˈ cña jiˈi̱ Jesucristo; juaˈa̱ jiˈi̱ Estaquis, la cuiˈ juaˈa̱ tyacaˈa tsa yu ˈna;
\v 10 juaˈa̱ jiˈi̱ Apeles, chaˈ cua jlo tiˈ na chaˈ ngusñi tsoˈo yu chaˈ jiˈi̱ Cristo xquiˈya lcaa cña nu ngua jiˈi̱ yu cuentya jiˈi̱ Cristo; juaˈa̱ jiˈi̱ lcaa nguˈ tyaˈa Aristóbulo;
\v 11 juaˈa̱ jiˈi̱ Herodión tyaˈa quichi̱ tyi naˈ; juaˈa̱ jiˈi̱ lcaa nguˈ tyaˈa Narciso nu jlya tiˈ jiˈi̱ ycuiˈ nu Xuˈna na;
\v 12 juaˈa̱ jiˈi̱ Trifena loˈo Trifosa, nu ndyuˈni tsa cña jiˈi̱ ycuiˈ nu Xuˈna na; juaˈa̱ jiˈi̱ Pérsida tyaˈa tsoˈo naˈ, chaˈ quiñaˈa̱ tsa cña tsoˈo jiˈi̱ ycuiˈ nu Xuˈna na nguaˈni maˈ biˈ;
\v 13 loˈo juaˈa̱ chcuichaˈ ma̱ jiˈi̱ Rufo, sca ñati̱ jiˈi̱ Cristo nu tsoˈo tsa chaˈ nchcuiˈ nguˈ jiˈi̱; loˈo juaˈa̱ jiˈi̱ xtyaˈa̱ Rufo, nu ngunaˈa̱si̱i̱ tsa jnaˈ ñiˈya̱ si laca maˈ xtyaˈa̱ naˈ;
\v 14 loˈo juaˈa̱ jiˈi̱ Asíncrito, jiˈi̱ Flegonte, jiˈi̱ Hermas, jiˈi̱ Patrobas, jiˈi̱ Hermes, loˈo juaˈa̱ jiˈi̱ lcaa tyaˈa ñati̱ jiˈi̱ Cristo nu ndyuˈu tiˈi̱ ca slo nguˈ biˈ;
\v 15 loˈo juaˈa̱ chcuichaˈ ma̱ jiˈi̱ Filólogo, jiˈi̱ Julia, jiˈi̱ Nereo, jiˈi̱ nu cunaˈa̱ tyaˈa ngula yu, jiˈi̱ Olimpas; loˈo juaˈa̱ jiˈi̱ lcaa tyaˈa nguˈ nu stuˈba ntsuˈu chaˈ jiˈi̱ nguˈ loˈo Cristo. Ntiˈ naˈ chaˈ chcuichaˈ ma̱ jiˈi̱ lcaa ñati̱ biˈ cuentya jnaˈ.
\p
\v 16 Nu loˈo chcuichaˈ ma̱ jiˈi̱ tyaˈa ma̱, tyucui tyiquee ma̱ quityi ma̱ jiˈi̱ tyaˈa ma̱ chacuayáˈ jiˈi̱ Cristo. Lcaa taju ñati̱ nu ntsuˈu chaˈ jiˈi̱ loˈo Cristo ca nde, cua ntiˈ nguˈ chcuichaˈ nguˈ jiˈi̱ ma̱.
\p
\v 17 Cuˈma̱ tyaˈa ntsuˈu chaˈ jiˈna loˈo Cristo, lye chcuiˈ naˈ loˈo ma̱ juani, chaˈ tii ti tiˈ tyiˈi̱ ma̱ xi, chaˈ ná tyuˈu tucua ñati̱ nu ta chaˈ cusu̱u̱ jiˈi̱ ma̱ loˈo tyaˈa ma̱, chaˈ ná tacu̱ˈ loo nguˈ biˈ chaˈ liñi jiˈi̱ Cristo nu cua ndyuna ma̱. Ná xñi ma̱ chaˈ jiˈi̱ nguˈ biˈ,
\v 18 chaˈ siˈi cña jiˈi̱ Cristo laca biˈ, si xaˈ la chaˈ nchcuiˈ nguˈ loˈo ma̱. Nduˈni nguˈ biˈ lcaa chaˈ cuxi nu nclyacua tiˈ ycuiˈ nguˈ chaˈ cuaˈni nguˈ. Loˈo juaˈa̱ ndyuˈni nguˈ chaˈ quichi̱ yaa chaˈ hique nguˈ tiˈi, chaˈ tsoˈo tsa ndañi chaˈ nu nda nguˈ, chaˈ tajuaˈ ti nchcuiˈ nguˈ.
\v 19 Pana nu cuˈma̱ ni, tsoˈo tsa nchcuiˈ ñati̱ chaˈ jiˈi̱ ma̱ lcaa quichi̱, chaˈ tsoˈo tsa ndaquiyaˈ ma̱ chaˈ jiˈi̱ Cristo. Tsoˈo tsa ntiˈ naˈ ñaˈa̱ naˈ jiˈi̱ ma̱ loˈo nduna naˈ chaˈ biˈ; cua ntiˈ naˈ chaˈ yala ti tyatí̱ tiˈ ma̱ chaˈ cuaˈni ma̱ cua ñaˈa̱ ca chaˈ tsoˈo, chaˈ ná tyatí̱ tiˈ ma̱ tsiyaˈ ti chaˈ cuaˈni ma̱ ni sca chaˈ cuxi.
\v 20 Ná tyu̱u̱ tsa̱ lyiji chaˈ cuaˈni tye ycuiˈ Ndyosi jiˈi̱ nu xñaˈa̱, chaˈ ngaˈaa tyaca̱ˈ cña cuxi nu nduˈni nu xñaˈa̱ biˈ tsiyaˈ ti. Cuaˈni Ni chaˈ ti̱ ti tyiˈi̱ tyiquee ma̱, ñiˈya̱ ntsuˈu tyiquee ycuiˈ Ni; loˈo juaˈa̱ ñaˈa̱ ti cuaˈni Jesucristo nu Xuˈna na chaˈ tsoˈo loˈo lcaa tyaˈa ma̱.
\p
\v 21 Loˈo Timoteo tyaˈa ndyaˈa̱ naˈ cña, loˈo Lucio, loˈo Jasón, loˈo Sosípater nguˈ tyaˈa quichi̱ tyi naˈ, cua ntiˈ nguˈ chcuichaˈ nguˈ jiˈi̱ ma̱.
\p
\v 22 Cuati loˈo naˈ, scaranu jiˈi̱ Pablo laca naˈ loˈo nscua ya quityi re, Tercio naa naˈ; loˈo naˈ, ntiˈ naˈ chcuichaˈ naˈ jiˈi̱ ma̱ chacuayáˈ jiˈi̱ ycuiˈ nu Xuˈna na.
\p
\v 23 Loˈo yu Gayo nda yu chaˈ loˈo naˈ chaˈ chcuichaˈ naˈ jiˈi̱ ma̱; la cuiˈ toˈ tyi yu nda yu su tyiˈi̱ naˈ, juaˈa̱ nda yu toniˈi̱ jiˈi̱ yu su tyuˈu tiˈi̱ ñaˈa̱ taju ñati̱ nu ntsuˈu chaˈ jiˈi̱ loˈo Cristo re. Cuati loˈo Erasto nu laca loo jiˈi̱ cñi quichi̱ re, ntiˈ yu chcuichaˈ yu jiˈi̱ ma̱; la cuiˈ ti chaˈ ntiˈ Cuarto, yu tyaˈa na.
\p
\v 24 Biˈ chaˈ lacua, xtyucua ycuiˈ Jesucristo nu Xuˈna na jiˈi̱ lcaa ma̱ loˈo tyaˈa ma̱, ñaˈa̱ ti cuaˈni Ni chaˈ tsoˈo loˈo ma̱; juaˈa̱ ntiˈ na chaˈ caca.
\s Ngusalyaˈ Pablo loˈo nguˈ
\p
\v 25 Cuaˈni tlyu na jiˈi̱ ycuiˈ Ndyosi lacua. Taca jiˈi̱ Ni ta Ni juersa jiˈi̱ ma̱, chaˈ tyiˈi̱ ma̱ ñiˈya̱ nu ngaˈa̱ chaˈ tyiˈi̱ ti na chalyuu, si xñi tsoˈo na chaˈ jiˈi̱ Jesús. Chaˈ tsoˈo jiˈi̱ la cuiˈ Jesucristo, biˈ laca chaˈ nu nda naˈ loˈo nguˈ, masi tyu̱u̱ tsa siyento yija̱ ntsuˈu cuatsiˈ ti chaˈ nu nchcuiˈ ñiˈya̱ nu cuaˈni ycuiˈ Ndyosi nde loo la;
\v 26 pana juani cua nguluˈu tsoˈo Ni chaˈ biˈ jiˈna. Biˈ chaˈ ngaˈa̱ chaˈ cañi chaˈ jiˈi̱ Cristo tyucui ñaˈa̱ lo yuu chalyuu su ndiˈi̱ ñati̱ ñaˈa̱ cuayáˈ cuna lcaa nguˈ xaˈ tsuˈ, chaˈ taca xñi nguˈ chaˈ jiˈi̱ sca ti ycuiˈ Ndyosi, chaˈ taquiyaˈ nguˈ jiˈi̱ chaˈ nu nchcuiˈ Ni. La cuiˈ chaˈ biˈ laca nu cua nscua lo quityi jiˈi̱ ycuiˈ Ndyosi, nu nguscua jyoˈo cusuˈ ñiˈya̱ caca chaˈ nde loo la. Ngua tiˈ ycuiˈ Ndyosi chaˈ caca chaˈ biˈ, biˈ chaˈ juaˈa̱ ndyaca juani; ycuiˈ Ndyosi laca nu ná ngaˈa̱ chaˈ tye chalyuu jiˈi̱ Ni tsiyaˈ ti.
\p
\v 27 Sca ti ycuiˈ Ndyosi jlo tiˈ lcaa chaˈ, biˈ chaˈ lcaa tyempo ná ngaˈa̱ chaˈ tye chaˈ cuaˈni tlyu na jiˈi̱ ycuiˈ Ni chacuayáˈ jiˈi̱ Jesucristo. Juaˈa̱ ntiˈ na chaˈ caca tuˈni.