\id 1CO
\h 1 CORINTIOS
\mt Quityi nu nguscua San Pablo ndyaa ca slo ñati̱ jiˈi̱ Jesucristo nde quichi̱ Corinto
\c 1
\p
\v 1 Pablo laca naˈ nu nscua̱ quityi re, loˈo juaˈa̱ stuˈba ti ntucua naˈ loˈo Sóstenes tyaˈa ndyuˈni naˈ cña. Chacuayáˈ jiˈi̱ ycuiˈ Ndyosi ndyaˈa̱ naˈ nchcuiˈ naˈ chaˈ jiˈi̱ Jesucristo loˈo lcaa ñati̱.
\v 2 Nscua naˈ quityi re chaˈ ca̱a̱ slo cuˈma̱, nguˈ taju ñati̱ jiˈi̱ Jesucristo nu ndiˈi̱ ma̱ nde quichi̱ Corinto. Xquiˈya Jesucristo cua ngusubi Ni jiˈi̱ ma̱, loˈo juani laca ma̱ ñati̱ jiˈi̱ ycuiˈ Ni; ngaˈa̱ chaˈ tyiˈu tiˈ ma̱ jiˈi̱ Ni lcua ti lo cña nu nduˈni ma̱ su ndiˈi̱ ma̱ chalyuu. Stuˈba chaˈ jiˈi̱ ma̱ loˈo cua ñaˈa̱ ca ñati̱ nu nduˈni tlyu jiˈi̱ Jesucristo nu Xuˈna na tyucui ñaˈa̱ chalyuu, chaˈ ñiˈya̱ laca Ni Xuˈna na, juaˈa̱ laca Ni Xuˈna nguˈ biˈ.
\v 3 Ndiˈya̱ ntiˈ naˈ: chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱ xquiˈya Jesucristo nu Xuˈna na.
\s Lcaa chaˈ tsoˈo nu caja jiˈna xquiˈya Cristo
\p
\v 4 Lcaa tsa̱ nda naˈ xlyaˈbe jiˈi̱ ycuiˈ Ndyosi xquiˈya cuˈma̱, chaˈ cua nda Ni chaˈ tsoˈo loˈo ma̱ xquiˈya Jesucristo.
\v 5 Ntsuˈu tsa chaˈ nu cua nda ycuiˈ Ndyosi loˈo ma̱, chaˈ cua ngua stuˈba chaˈ jiˈi̱ ma̱ loˈo Cristo; biˈ laca chaˈ nu ntsuˈu neˈ cresiya jiˈi̱ ma̱ juani. Biˈ chaˈ cua jlo tsoˈo tiˈ ma̱ lcaa chaˈ nu jiˈi̱ Jesús, loˈo juaˈa̱ nchca jiˈi̱ ma̱ nchcuiˈ ma̱ chaˈ biˈ loˈo ñati̱. 
\v 6 Juaˈa̱ nchca cuayáˈ tiˈ xaˈ ñati̱ chaˈ liñi laca chaˈ nu ngusñi ma̱ jiˈi̱ Jesús, chaˈ cua naˈa̱ nguˈ lcaa cña nu nduˈni ma̱ su ndiˈi̱ ma̱ chalyuu.
\v 7 Ná sca chaˈ lyiji jiˈi̱ ma̱ neˈ cresiya jiˈi̱ ma̱; lcaa cña nchca jiˈi̱ ma̱ tyempo juani, xquiˈya chaˈ ndu̱ tsa tiˈ ma̱ chaˈ ca̱a̱ Jesucristo nu Xuˈna na chaca quiyaˈ.
\v 8 Ycuiˈ Jesús laca nu cuaˈni chaˈ tyanu tachaa chaˈ neˈ cresiya jiˈi̱ ma̱ ñaˈa̱ cuayáˈ nu tye chalyuu jiˈi̱ ma̱. Loˈo liˈ ná ntsuˈu quiˈya nu sta ycuiˈ Ndyosi hichu̱ˈ ma̱ loˈo ca̱a̱ Jesucristo nu Xuˈna na chaˈ cuaˈni cuayáˈ Ni jiˈi̱ ñati̱ chalyuu.
\v 9 Ycuiˈ Ndyosi nduˈni cña, lcaa cña nu cua nacui̱ Ni chaˈ cuaˈni Ni; biˈ laca nu ngusubi jiˈi̱ ma̱ chaˈ caca stuˈba chaˈ jiˈi̱ ma̱ loˈo Jesucristo nu Xuˈna na, nu sca ti Sñiˈ ycuiˈ Ndyosi.
\s Tsa claˈbe ti nguˈ nchcuiˈ nguˈ tsaca chaˈ
\p
\v 10 Cuˈma̱ tyaˈa ngusñi na chaˈ jiˈi̱ Cristo, chcuiˈ naˈ loˈo cuˈma̱ juani chacuayáˈ jiˈi̱ ycuiˈ Jesucristo nu Xuˈna na, chaˈ caca stuˈba chaˈ jiˈi̱ lcaa cuˈma̱ loˈo tyaˈa ma̱, chaˈ ná chcuiˈ ma̱ tucua lo chaˈ. Tsoˈo ti tyiˈi̱ ma̱ loˈo tyaˈa ma̱, sca ti chaˈ culacua tiˈ ma̱, sca ti chaˈ tyuˈu tyiquee ma̱.
\v 11 Tsubiˈ ti ngujui chaˈ jnaˈ, nu loˈo nacui̱ nguˈ tyaˈa Cloé ˈna chaˈ ntsuˈu tsa chaˈ cusu̱u̱ jiˈi̱ ma̱ loˈo tyaˈa ma̱, chaˈ ná stuˈba chaˈ jiˈi̱ ma̱ loˈo tyaˈa ma̱;
\v 12 xaˈ ñaˈa̱ nchcuiˈ sa scaa ma̱. Ntsuˈu sca taju jiˈi̱ ma̱ nu nacui̱: “Jiˈi̱ Pablo ngusñi ya chaˈ”; chaca taju jiˈi̱ ma̱ nacui̱: “Ñati̱ jiˈi̱ Apolos laca ya”; juaˈa̱ tya xaˈ la nguˈ taju jiˈi̱ ma̱ nacui̱ nguˈ: “Ñati̱ jiˈi̱ Pedro laca ya”; juaˈa̱ tya xaˈ la nguˈ nacui̱: “Ñati̱ jiˈi̱ Cristo laca ya”.
\v 13 ¿Ha tyu̱u̱ tyaˈa nu laca Cristo ntsuˈu chalyuu chaˈ cuaˈni lyaá jiˈi̱ ma̱ lacua? ¿Ha jnaˈ nu ngujuiˈi̱ caˈa̱ nguˈ ˈna lo crusi chaˈ cajaa naˈ xquiˈya cuˈma̱? ¿Ha cuentya jnaˈ cua ntyucuatya ma̱?
\v 14 Ni tsaca ma̱ ná ntyucuatya naˈ jiˈi̱ ma̱. Tsoˈo juaˈa̱ ntiˈ naˈ cuentya jiˈi̱ ycuiˈ Ndyosi chaˈ siˈi naˈ laca̱ nu nguaˈni jiˈi̱, masi ntsuˈu tucua tyaˈa ti nguˈ nu cua ntyucuatya naˈ jiˈi̱, yu Crispo loˈo yu Gayo.
\v 15 Ná ca ñacui̱ nguˈ chaˈ cua ntyucuatya ma̱ cuentya jnaˈ lacua.
\v 16 Tyuˈu chaˈ clyu tiˈ jiˈi̱ ma̱, ndyiˈu tiˈ naˈ chaˈ loˈo jiˈi̱ yu Estéfanas, loˈo jiˈi̱ nguˈ tyaˈa ndiˈi̱ yu, cua ntyucuatya naˈ jiˈi̱ nguˈ biˈ; pana ná ntsuˈu tiˈ naˈ si cua ntyucuatya naˈ jiˈi̱ xaˈ la nguˈ.
\v 17 Siˈi chaˈ tyucuatya naˈ jiˈi̱ ñati̱ nda ycuiˈ Ndyosi cña ˈna lijya̱a̱; cua ngulo Ni cña ˈna chaˈ tsaˈa̱ chcui̱ˈ chaˈ tsoˈo nu ntsuˈu jiˈi̱ Jesús loˈo ñati̱. Siˈi na lijya̱ naˈ loˈo quiñaˈa̱ tsa chaˈ nu culo hique ti naˈ, ñiˈya̱ nchcuiˈ ñati̱ chalyuu nu nchca tsa jiˈi̱; si juaˈa̱, ná ca cuayaˈ tiˈ ñati̱ ñiˈya̱ ngua chaˈ tlyu nu nguaˈni Cristo loˈo ngujuii yu lo crusi.
\s Cristo ntucua su̱u̱ lcaa chaˈ nu cua ntiˈ ycuiˈ Ndyosi chaˈ caca cuayáˈ tiˈ na jiˈi̱
\p
\v 18 Ñati̱ nu ngunuˈu̱ chalyuu jiˈi̱ xquiˈya chaˈ cuxi nu nduˈni nguˈ, ná nchca cuayáˈ tiˈ nguˈ biˈ tsiyaˈ ti; na nxtyí loˈo ti nguˈ jiˈna si chcuiˈ na loˈo nguˈ ñiˈya̱ ntsuˈu chaˈ jiˈi̱ Cristo, chaˈ ngujuii yu lo crusi xquiˈya na chaˈ cuityi̱ Ni quiˈya nu ntsuˈu jiˈna. Pana nu na ni, nu clyaá na jiˈi̱ quiˈya nu ntsuˈu jiˈna xquiˈya Cristo, tlyu tsa cña nguaˈni ycuiˈ Ndyosi, juaˈa̱ ntiˈ na.
\v 19 Ntsuˈu sca chaˈ nu nscua lo quityi cusuˈ jiˈi̱ ycuiˈ Ndyosi nu nchcuiˈ ndiˈya̱:
\q Cuaˈni tye naˈ jiˈi̱ lcaa chaˈ nu nchcuiˈ ñati̱ nu nchca tsa jiˈi̱, nacui̱ ycuiˈ Ndyosi.
\q Ngaˈaa taquiyaˈ naˈ jiˈi̱ chaˈ nu nclyo hique ti ñati̱ nu ngua tsaˈa̱ tsoˈo ti, nacui̱ Ni.
\p
\v 20 ¿Ni cña tsoˈo cuentya jiˈi̱ ycuiˈ Ndyosi nduˈni ñati̱ nu nchca tsa jiˈi̱ lacua? ¿Ni cña nduˈni nguˈ nu ngua tsaˈa̱ tsoˈo ti? ¿Ni cña nduˈni nguˈ nu nchca tsa nchcuiˈ lacua? Sca ti nde chalyuu cuaˈnijoˈo cña biˈ jiˈi̱ nguˈ. Cua nacui̱ ycuiˈ Ndyosi jiˈna chaˈ ná tsoˈo tsiyaˈ ti sca chaˈ nu ngua tsaˈa̱ ñati̱ chalyuu ti, chaˈ tonto laca biˈ.
\v 21 Nguaˈni Ni chaˈ ná caja ñiˈya̱ tyuloo ñati̱ chalyuu jiˈi̱ Ni chaˈ hique ti nguˈ; juaˈa̱ tsoˈo la, ngua tiˈ ycuiˈ Ndyosi. Pana nduˈni lyaá Ni jiˈi̱ ñati̱ nu xñi chaˈ jiˈi̱ Ni; la cuiˈ chaˈ nu ndachaˈ na jiˈi̱ nguˈ, masi chaˈ tonto nchcuiˈ na, nacui̱ nguˈ liˈ.
\p
\v 22 Cua ntiˈ nguˈ judío chaˈ cuaˈni na sca chaˈ tlyu slo nguˈ, chaˈ jlya tiˈ nguˈ chaˈ nu chcuiˈ na loˈo liˈ; cuati nu nguˈ xaˈ tsuˈ ni, cua ntiˈ nguˈ chaˈ tsoˈo tsa jlo tiˈ na lcaa chaˈ loˈo chcuiˈ na loˈo nguˈ.
\v 23 Pana nu na ni, ndachaˈ na jiˈi̱ nguˈ chaˈ jiˈi̱ Cristo nu cua ngujuii lo crusi chaˈ cuaˈni lyaá jiˈna. Liˈ chiyaˈa̱ ntiˈ nguˈ judío loˈo ndyuna nguˈ chaˈ nu nchcuiˈ na re; loˈo juaˈa̱ nguˈ xaˈ tsuˈ, chaˈ tonto nchcuiˈ na ntiˈ nguˈ biˈ, siˈi chaˈ biˈ tsiyaˈ ti ntiˈ nguˈ biˈ.
\v 24 Pana xaˈ ñaˈa̱ ntiˈ lcaa tyaˈa na nu cua ngusubi ycuiˈ Ndyosi jiˈna, masi laca na nguˈ judío, masi laca na nguˈ xaˈ tsuˈ. Sca ti chaˈ jiˈi̱ Cristo nchcuiˈ na, chaˈ jiˈi̱ ycuiˈ Cristo ntsuˈu lcaa chacuayáˈ, lcaa chaˈ tsoˈo nu cua ntiˈ ycuiˈ Ndyosi chaˈ caca cuayáˈ tiˈ na.
\v 25 Tsoˈo tsa ndyuˈu cua ñaˈa̱ ca chaˈ nu nchcuiˈ ycuiˈ Ndyosi, masi ñacui̱ ñati̱ chalyuu chaˈ tonto tsa laca chaˈ biˈ; pana cuxi la ndyuˈu lcaa chaˈ tlyu nu nda ñati̱ chalyuu nu nchca tsa jiˈi̱, ntiˈ nguˈ. La cuiˈ juaˈa̱ nguula la cña ndyaca, cua ñaˈa̱ ca cña nu nduˈni ycuiˈ Ndyosi, masi ñacui̱ nguˈ chaˈ ná nchca jiˈi̱ Ni; pana cuxi la cña ndyaca nu nduˈni ycuiˈ ca ñati̱.
\v 26 Cuˈma̱ tyaˈa ngusñi na chaˈ jiˈi̱ Cristo, tyiˈu tiˈ ma̱ juani ñiˈya̱ ñaˈa̱ ñati̱ ngua ma̱ tya clyo, nu loˈo ngusubi ca ti Ni jiˈi̱ ma̱: sca tucua ti ma̱ nu nchca tsa jiˈi̱ ma̱; siˈi ñati̱ tlyu laca ma̱, siˈi ñati̱ culiyaˈ laca ma̱ su ndiˈi̱ ma̱ chalyuu, sca tucua ti cuˈma̱ nu tsoˈo laca xi jiˈi̱ ma̱.
\v 27 La cuiˈ cuˈma̱ nu nacui̱ nguˈ chaˈ ná tsoˈo ma̱ tsiyaˈ ti, nu juani laca ma̱ ñati̱ nu ntiˈ la ycuiˈ Ndyosi jiˈi̱. Juaˈa̱ cua ntiˈ ycuiˈ Ndyosi ta chaˈ tyujuˈu tiˈ jiˈi̱ ñati̱ nu nchca tsa chcuiˈ, ntiˈ ycuiˈ nguˈ; biˈ chaˈ cua ngusubi Ni jiˈi̱ cuˈma̱, masi ñati̱ tiˈi laca ma̱. Loˈo juaˈa̱ nduˈni Ni chaˈ tyujuˈu tiˈ ñati̱ nu tlyu tsa cña nchca jiˈi̱, ntiˈ ycuiˈ nguˈ; biˈ chaˈ ngusubi Ni jiˈi̱ cuˈma̱ nu ná nchca lye jiˈi̱ ma̱.
\v 28 Nduˈni Ni chaˈ ngaˈaa nchca chcuiˈ tsiyaˈ ti nu ñati̱ nu ndulo tsa jiˈi̱ ycuiˈ ca; biˈ chaˈ nsubi Ni jiˈi̱ nguˈ tiˈi, nsubi Ni jiˈi̱ nguˈ nu nxtyí loˈo ñati̱ jiˈi̱, nsubi Ni jiˈi̱ nguˈ nu ná sca na ntsuˈu jiˈi̱ tsiyaˈ ti, biˈ nguˈ laca nu nsubi ycuiˈ Ndyosi jiˈi̱ chaˈ caca nguˈ ñati̱ jiˈi̱.
\v 29 Juaˈa̱ ca cuayáˈ tiˈ lcaa na chaˈ ná tsoˈo si cuaˈni tyucuaa tiˈ na jiˈi̱ tyaˈa ñati̱ na, si ndube tiˈ na jiˈi̱ ycuiˈ Ndyosi.
\v 30 Ndiˈya̱ laca chaˈ: cua nacui̱ ycuiˈ Ndyosi chaˈ caca stuˈba chaˈ jiˈna loˈo Jesucristo, loˈo juaˈa̱ cua nda Ni jiˈi̱ Jesucristo jiˈna. Masi ná nchca jiˈna, pana nu Jesucristo ni, lcaa chaˈ nchca jiˈi̱ ycuiˈ. Xquiˈya nu Jesús biˈ nchca tsoˈo cresiya jiˈna ñati̱ cuxi na cuentya jiˈi̱ ycuiˈ Ndyosi; xquiˈya Jesús taca caca na ñati̱ jiˈi̱ ycuiˈ Ndyosi, chaˈ Jesús laca nu nguaˈni lyaá jiˈna jiˈi̱ nu cuxi.
\v 31 Biˈ chaˈ cuaˈni na ndiˈya̱, ñiˈya̱ nu nscua lo quityi cusuˈ: “Si ntiˈ na chcuiˈ na loˈo xaˈ ñati̱ cuentya jiˈi̱ sca chaˈ tlyu, liˈ tsoˈo la si chcuiˈ na jiˈi̱ chaˈ tlyu nu nguaˈni ycuiˈ nu Xuˈna na”. Juaˈa̱ nacui̱ quityi biˈ.
\c 2
\s Ni chaˈ laca ngujuiˈi̱ caˈa̱ nguˈ jiˈi̱ Cristo lo crusi 
\p
\v 1 Cuˈma̱ tyaˈa ngusñi na chaˈ jiˈi̱ Cristo, tyiˈu tiˈ ma̱ ñiˈya̱ nguaˈni naˈ tya clyo, loˈo ndyalaa naˈ su ndiˈi̱ ma̱ chaˈ chcuiˈ naˈ loˈo ma̱ chaˈ tsoˈo nu cua nda ycuiˈ Ndyosi loˈo na, chaˈ jiˈi̱ Jesucristo biˈ; ná quiñaˈa̱ tsa chaˈ tucui nchcuiˈ naˈ loˈo cuˈma̱ liˈ, siˈi chaˈ nchca tsa naˈ nchcuiˈ naˈ loˈo cuˈma̱ liˈ.
\v 2 Laja loˈo ngutiˈi̱ naˈ quichi̱ tyi ma̱, ngüiñi tiˈ naˈ chaˈ ná ta naˈ xi xaˈ la chaˈ loˈo ma̱ tsiyaˈ ti; sca ti chaˈ jiˈi̱ ycuiˈ Jesucristo, la cuiˈ Cristo nu ngujuiˈi̱ caˈa̱ nguˈ jiˈi̱ lo crusi, tsa biˈ ti chaˈ nchcuiˈ naˈ loˈo ma̱ liˈ.
\v 3 Loˈo ndyalaa naˈ su ndiˈi̱ ma̱, ngunaˈa̱ tya tiˈ naˈ ndu̱ naˈ liˈ; nchcua̱ tya naˈ chaˈ ngulacua tsa tiˈ naˈ ni chaˈ xacui̱ ma̱ ˈna liˈ.
\v 4 Loˈo nda naˈ chaˈ biˈ loˈo ma̱, ná ngulana naˈ quiñaˈa̱ tsa chaˈ nu tyuˈu tuˈba naˈ, ná nguaˈni naˈ ñiˈya̱ nu nduˈni ñati̱ nu nchca tsa chcuiˈ. Pana cua nda ycuiˈ Ndyosi juersa jnaˈ; cua nchcuiˈ naˈ loˈo ma̱ lcaa chaˈ nu cua nda Xtyiˈi ycuiˈ Ndyosi loˈo naˈ, chaˈ caca cuayáˈ tsoˈo tiˈ ma̱.
\v 5 Xquiˈya cña nu nguaˈni ycuiˈ Ndyosi, biˈ chaˈ ngusñi ma̱ chaˈ jiˈi̱ Jesús liˈ; siˈi xquiˈya sca chaˈ nu ngulo hique ti naˈ chaˈ nchca tsa jnaˈ.
\s Sca chaˈ tsoˈo nu ntiˈ ycuiˈ Ndyosi chcuiˈ Ni loˈo ñati̱ 
\p
\v 6 Masi juaˈa̱, cua ntsuˈu chaˈ tsoˈo nu nchcuiˈ na loˈo ñati̱ nu nduna tsoˈo chaˈ jiˈi̱ ycuiˈ Ndyosi; chaˈ nu nguaˈya hique ycuiˈ Ndyosi laca chaˈ biˈ, siˈi sca chaˈ nu jlo tiˈ ñati̱ chalyuu. La cuiˈ ti ná jlo tiˈ nu laca loo chalyuu chaˈ biˈ, masi cua lijya̱ tye chaˈ culo nguˈ biˈ cña.
\v 7 Cua nda ycuiˈ Ndyosi chaˈ tsoˈo biˈ loˈo na chaˈ chcuiˈ na loˈo ñati̱. Bilya caca cuayáˈ tiˈ ñati̱ chalyuu jiˈi̱ chaˈ biˈ tya saˈni la, chaˈ ná ntiˈ Ni chaˈ cuna ñati̱ nu ngua liˈ. Pana tya loˈo bilya tyaˈ chalyuu, tya liˈ ngulacua tiˈ Ni ñiˈya̱ nu cuaˈni Ni; ngua tiˈ ycuiˈ Ndyosi chaˈ cuaˈni lyaá Ni jiˈna loˈo xñi na chaˈ jiˈi̱ Jesús. Tlyu tsa chaˈ tsoˈo caca jiˈna liˈ.
\v 8 Ni sca ñati̱ nu laca loo chalyuu, ná ngua cuayáˈ tiˈ nguˈ chaˈ biˈ. Si ngua jlo tiˈ nguˈ chaˈ biˈ, ñiˈya̱ nu ngua tiˈ ycuiˈ Ndyosi chaˈ cuaˈni Ni, ná ngujuiˈi̱ caˈa̱ nguˈ biˈ jiˈi̱ Jesús lo crusi liˈ, ycuiˈ Jesús nu Xuˈna na nu tlyu tsa chaˈ tsoˈo ntsuˈu jiˈi̱.
\v 9 Ñiˈya̱ nu nscua chaˈ lo quityi cusuˈ, juaˈa̱ laca chaˈ biˈ. Ndiˈya̱ nchcuiˈ quityi biˈ:
\q Cua nguaˈni choˈo ycuiˈ Ndyosi chaˈ tsoˈo nu tyacua jiˈi̱ ñati̱ nu ntsuˈu tyiquee jiˈi̱ ycuiˈ Ni;
\q laca biˈ chaˈ nu bilya ñaˈa̱ ñati̱ chalyuu jiˈi̱, chaˈ nu bilya cuna ñati̱ jiˈi̱,
\q ni ná ngulacua tiˈ nguˈ chaˈ caca chaˈ biˈ.
\m
\v 10 Pana nu na, nguˈ tyaˈa ngusñi na chaˈ jiˈi̱ Cristo, cua nguluˈu Ni jiˈna ñiˈya̱ caca chaˈ tsoˈo biˈ xquiˈya Xtyiˈi ycuiˈ Ni nu cua nda Ni chaˈ tyanu neˈ cresiya jiˈna. Tsoˈo tsa ndachaˈ loo Xtyiˈi ycuiˈ Ni jiˈna lcaa chaˈ nu ntsuˈu tyiquee ycuiˈ Ndyosi chaˈ cuaˈni Ni nde chalyuu, tsoˈo tsa jlo tiˈ na chaˈ biˈ xquiˈya Xtyiˈi ycuiˈ Ni. 
\p
\v 11 Nu ñati̱ chalyuu na ni, hique ti na ntsuˈu coˈo lcaa chaˈ nu ntsuˈu tyiquee na; sca ti ycuiˈ na loˈo ycuiˈ Ndyosi caca jlo tiˈ na lcaa chaˈ nu nclyacua tiˈ na. Loˈo juaˈa̱ laca ycuiˈ Ndyosi, sca ti Xtyiˈi ycuiˈ Ni jlo tiˈ lcaa chaˈ nu ntsuˈu tyiquee Ni.
\v 12 Siˈi sca cuiˈi̱ cuxi nu ntsuˈu nde chalyuu ti laca Xtyiˈi nu cua nda Ni chaˈ tyanu neˈ cresiya jiˈna juani; na cua nda Ni Xtyiˈi ycuiˈ Ni jiˈna, chaˈ cua ngusñi na chaˈ jiˈi̱ Ni. Loˈo juaˈa̱ xquiˈya Xtyiˈi ycuiˈ Ni caca cuayáˈ tiˈ na lcaa cña tsoˈo nu nduˈni Ni neˈ cresiya jiˈna.
\v 13 Nu loˈo cachaˈ na chaˈ tsoˈo nu jiˈi̱ ycuiˈ Ndyosi biˈ jiˈi̱ ñati̱ jiˈi̱ ycuiˈ Ni, nu nguˈ nu ntsuˈu Xtyiˈi ycuiˈ Ni neˈ cresiya jiˈi̱, liˈ clyana na sca chaˈ nu chcuiˈ na, sca chaˈ nu ta Xtyiˈi ycuiˈ Ni loˈo na; ná clyana na quiñaˈa̱ tsa chaˈ chcuiˈ na ñiˈya̱ nu nduˈni ñati̱ nu nchca tsa jiˈi̱ ycuiˈ ca nguˈ.
\p
\v 14 Pana ñati̱ nu ná stuˈba chaˈ jiˈi̱ loˈo ycuiˈ Ndyosi ni, ná taca ca cuayáˈ tiˈ nguˈ biˈ ni sca cña nu nduˈni ycuiˈ Ndyosi cuentya jiˈi̱ Xtyiˈi ycuiˈ Ni; ná nchca ca cuayáˈ tiˈ nguˈ biˈ jiˈi̱ chaˈ biˈ tsiyaˈ ti. Sca ti si ntsuˈu Xtyiˈi ycuiˈ Ndyosi neˈ cresiya jiˈna, liˈ caca cuayáˈ tiˈ na ni chaˈ laca biˈ, biˈ chaˈ ná sca chaˈ laca ntiˈ nguˈ biˈ.
\v 15 Taca ca cuayáˈ tiˈ na ñiˈya̱ ndyuˈu lcaa chaˈ si cua ntsuˈu Xtyiˈi ycuiˈ Ndyosi neˈ cresiya jiˈna, loˈo liˈ ná taca xacui̱ nguˈ xi xaˈ la chaˈ jiˈna.
\v 16 Ndiˈya̱ nscua lo quityi jiˈi̱ ycuiˈ Ndyosi: “¿Tilaca nchca cuayáˈ tiˈ ni chaˈ laca nu ndaˈya hique ycuiˈ Ndyosi? ¿Ha caca jiˈna ta na sca cui̱i̱ loˈo Ni?” nacui̱ quityi. Pana nu na ni, xquiˈya Xtyiˈi ycuiˈ Ndyosi cua ngujui chaˈ jiˈna ni chaˈ laca nu nclyacua tiˈ ycuiˈ Cristo.
\c 3
\s Sca ti cña jiˈi̱ ycuiˈ Ndyosi nduˈni ca taˈa nguˈ nu nguluˈu chaˈ jiˈi̱ Jesús
\p
\v 1 Cuˈma tyaˈa ngusñi na chaˈ jiˈi̱ ycuiˈ Ndyosi, tyucui tyempo loˈo ngutiˈi̱ naˈ ca slo ma̱ nu ngua tya liˈ, ná ngua ˈna chcuiˈ naˈ lcaa chaˈ nu ngua tiˈ naˈ chcui̱ˈ loˈo ma̱, chaˈ bilya xñi tsoˈo ma̱ chaˈ jiˈi̱ Xtyiˈi ycuiˈ Ndyosi nu nda Ni jiˈna. Xti ti chaˈ nchcuiˈ naˈ loˈo ma̱ liˈ, chaˈ ñaˈa̱ ti cuxi ti ngulacua tiˈ ma̱. Ñiˈya̱ laca nu sube cuañiˈ, juaˈa̱ ngua cuˈma̱, chaˈ bilya xñi tsoˈo ma̱ chaˈ jiˈi̱ ycuiˈ Ndyosi;
\v 2 biˈ chaˈ tiyaˈ ti nguluˈu naˈ scaa chaˈ jiˈi̱ ma̱. Ñiˈya̱ laca loˈo sca cubiˈ cuañiˈ, styiˈ xtyaˈa̱ ti ntyiˈ cubiˈ biˈ, chaˈ ná nchca cacu tsoˈo; juaˈa̱ ngua cuˈma̱, chaˈ ná ngua cuna tsoˈo ma̱ scaa chaˈ. Masi juani tya lyiji cuaˈni yala ma̱ chaˈ ca tsaˈa̱ tsoˈo ma̱,
\v 3 chaˈ ñaˈa̱ ti tya ndiya la tiˈ ma̱ ñaˈa̱ chaˈ cuxi nu ndyuˈni ñati̱ chalyuu. Nu loˈo liyeˈ tiˈ ma̱ jiˈi̱ tyaˈa ñati̱ ma̱, nu loˈo lye nxu̱u̱ tyaˈa ma̱, tyaca̱ˈ tyijyuˈ chaˈ ndiya la tiˈ ma̱ chaˈ cuxi nu ntsuˈu nde chalyuu. Tya nduˈni ma̱ ñiˈya̱ nu nduˈni ñati̱ cuxi. 
\v 4 Nu loˈo ñacui̱ sca nguˈ tyaˈa ma̱ chaˈ ndiˈya̱: “Ñati̱ jiˈi̱ Pablo laca ya”, cuati ñacui̱ xaˈ la nguˈ tyaˈa ma̱ chaˈ ndiˈya̱: “Ñati̱ jiˈi̱ Apolos laca ya”, ñiˈya̱ nduˈni ñati̱ cuxi, juaˈa̱ nduˈni ma̱ liˈ.
\p
\v 5 ¿Tilaca laca nu Apolos biˈ lacua? ¿Tilaca laca naˈ lacua? ¿Ha siˈi cña jiˈi̱ ycuiˈ Ndyosi ndyuˈni ca taˈa ya? ¿Ha siˈi xquiˈya chaˈ nda ya chaˈ loˈo ma̱, biˈ chaˈ ngusñi ma̱ chaˈ jiˈi̱ Cristo liˈ? Cua laca cña ndyuˈni scaa ya, la cuiˈ cña ñiˈya̱ nu cua nda ycuiˈ nu Xuˈna na chaˈ cuaˈni ya.
\v 6 Ñiˈya̱ laca sca ñati̱ nu cataa sca siˈyu, loˈo liˈ chaca laca nu suˈba hitya su̱u̱ na cuiñii biˈ, juaˈa̱ laca cuare loˈo ma̱; naˈ laca̱ nu ya̱a̱ ndachaˈ naˈ chaˈ biˈ jiˈi̱ ma̱ su clyo, loˈo tiyaˈ la liˈ ñaa Apolos nda la chaˈ biˈ loˈo ma̱. Pana sca ti ycuiˈ Ndyosi laca nu nduˈni chaˈ tyanu tsoˈo chaˈ biˈ neˈ cresiya jiˈi̱ ma̱;
\v 7 ná nduˈni chaˈ tilaca laca nu cua nda chaˈ biˈ loˈo ma̱ tya clyo la, ná nduˈni chaˈ tilaca laca nu tya nda la chaˈ biˈ loˈo ma̱ ca tiyaˈ la. Sca ti ycuiˈ Ndyosi laca nu ndulo tsa chaˈ jiˈi̱, chaˈ ycuiˈ Ndyosi laca nu nduˈni chaˈ tyanu tachaa chaˈ jiˈi̱ Ni neˈ cresiya jiˈi̱ ma̱.
\v 8 Sca ti cuayáˈ nduˈni ya loˈo tyaˈa ya, masi nda ya chaˈ loˈo cuˈma̱ su clyo, masi nclyuˈu tsoˈo la ya chaˈ biˈ jiˈi̱ ma̱ ca tiyaˈ la. Ycuiˈ Ndyosi ni, tya ta la Ni chaˈ tsoˈo jiˈi̱ ya, tsa ñaˈa̱ nu ndyuˈni tsoˈo ya cña jiˈi̱ Ni.
\v 9 Tyaˈa ndyuˈni ya cña jiˈi̱ ycuiˈ Ndyosi laca cuare; loˈo cuˈma̱ ni, nduˈni Ni cña neˈ cresiya jiˈi̱ ma̱, cña jiˈi̱ ycuiˈ Ndyosi laca biˈ.
\p Loˈo juaˈa̱ taca ta naˈ chaca cui̱i̱ loˈo ma̱ juani: ñiˈya̱ si laca ma̱ sca niˈi̱ tonu, juaˈa̱ laca ma̱ cuentya jiˈi̱ ycuiˈ Ndyosi;
\v 10 loˈo naˈ, ñiˈya̱ ntiˈ sca cuityi niˈi̱ cuentya jiˈi̱ ycuiˈ Ndyosi, juaˈa̱ laca naˈ loˈo cuˈma̱, laja loˈo nclyuˈu naˈ jiˈi̱ ma̱ chaˈ jiˈi̱ ycuiˈ Ni. Ndiˈya̱ ndyuˈni naˈ loˈo ma̱: ñiˈya̱ ntiˈ si cua ngusta tsoˈo naˈ quiyaˈ sca niˈi̱, loˈo liˈ ndyalaa xaˈ la nguˈ cuityi chaˈ cuaˈni lyiji nguˈ chaˈ tyaˈ niˈi̱ biˈ, biˈ laca ñati̱ nu tyaˈa ndyaˈa̱ naˈ cña nu cua nguluˈu tsoˈo la jiˈi̱ ma̱. Lcaa nguˈ cuityi ngaˈa̱ chaˈ culacua tiˈ clyo ñiˈya̱ ñaˈa̱ xana tyaˈ niˈi̱; loˈo juaˈa̱ lcaa ya tyaˈa ndyuˈni ya cña, ngaˈa̱ chaˈ cuiˈya tsoˈo ya cuentya ñiˈya̱ nu caca culuˈu tsoˈo la ya chaˈ biˈ jiˈi̱ ñati̱.
\v 11 Juaˈa̱ laca chaˈ lacua: cua laca ngusta ycuiˈ Ndyosi jiˈi̱ Jesucristo, chaˈ sca ti yu biˈ caca su̱u̱ lcaa chaˈ biˈ, chaˈ ycuiˈ Jesús laca nu ntucua quiyaˈ chaˈ nu cua ngusñi na jiˈi̱ ycuiˈ Ndyosi Sti na; ngaˈaa ntsuˈu xaˈ la joˈó xaˈ la ñati̱ nu laca su̱u̱ chaˈ biˈ.
\v 12 Ntsuˈu nguˈ tyaˈa na nu nclyuˈu tsoˈo la jiˈi̱ lcaa tyaˈa na, ñiˈya̱ ntiˈ si cuiñá chca nguˈ sca niˈi̱ tsoˈo, ñiˈya̱ laca si tyaˈ niˈi̱ biˈ masi loˈo oro, masi loˈo plata, masi loˈo quee ndubi nu quiñaˈa̱ tsa ngaˈa̱ tyaˈ niˈi̱ biˈ. Pana ntsuˈu xaˈ la nguˈ tyaˈa na nu cuxi la nclyuˈu jiˈi̱ tyaˈa, ñiˈya̱ laca si cuiñá chca nguˈ sca niˈi̱ yaca ti, nu cantaˈ ti tyaˈ loˈo quii loˈo quixi̱i̱ ti.
\v 13 Tiyaˈ la liˈ loˈo ca̱a̱ Jesucristo chaca quiyaˈ chaˈ cuaˈni cuayáˈ jiˈi̱ ñati̱ chalyuu, liˈ quijeloo chaˈ jiˈi̱ ycuiˈ Ndyosi ñiˈya̱ ñaˈa̱ cña nu nguaˈni scaa nguˈ. Tsa̱ biˈ tsaa cña nu nguaˈni scaa ñati̱ lo sca quiiˈ tlyu, chaˈ cuaˈni cuayáˈ Ni jiˈi̱; si tyaqui̱ cña biˈ, ná tsoˈo ngua cña biˈ liˈ; si ná tyaqui̱, liˈ caca cuayáˈ tiˈ Ni chaˈ tsoˈo tsa cña biˈ liˈ.
\v 14 Nu loˈo talo cña nu nguaˈni sca ñati̱ loˈo cua ndyaa lo quiiˈ biˈ, liˈ ta Ni chaˈ tsoˈo nu tyacua jiˈi̱ ñati̱ biˈ.
\v 15 Cuati ñati̱ nu tyaqui̱ cña jiˈi̱ lo quiiˈ biˈ, ngaˈaa ñaˈa̱ nguˈ jiˈi̱ liˈ; chcunaˈ cña biˈ tsiyaˈ ti. Pana tya culaá Ni jiˈi̱ nguˈ biˈ, masi tya xi tya lyiji chaˈ tyaqui̱ ycuiˈ nguˈ.
\p
\v 16-17 Nu laa tlyu su nduˈni tlyu nguˈ judío jiˈi̱ ycuiˈ Ndyosi tyacaˈa tsa jiˈi̱ Ni laca biˈ, chaˈ cuentya jiˈi̱ Ni ndyaˈ niˈi̱ biˈ; tyaala tsa ycuiˈ Ni si cuaˈni ñuˈu̱ ñati̱ jiˈi̱ laa biˈ. Loˈo cuˈma̱ ni, tyucui ñaˈa̱ taju cuˈma̱ nu ngusñi ma̱ chaˈ jiˈi̱ Cristo, tyacaˈa tsa ma̱ cuentya jiˈi̱ ycuiˈ Ndyosi; na cua ndyanu Xtyiˈi ycuiˈ Ndyosi neˈ cresiya jiˈi̱ ma̱. Loˈo juaˈa̱ cuaˈni tye ycuiˈ Ni jiˈi̱ cua ñaˈa̱ ca ñati̱ nu cuaˈni ñuˈu̱ tyucui̱i̱ jiˈi̱ sca ñati̱ nu tyaˈa ngusñi na chaˈ jiˈi̱ Jesús.
\p
\v 18 Cua ngusñi na chaˈ jiˈi̱ Cristo, biˈ chaˈ tsoˈo la si ná cñiloˈo na jiˈi̱ ycuiˈ ca na chaˈ ngua tsa jiˈna, ñiˈya̱ nduˈni ñati̱ chalyuu nu ngua tsa jiˈi̱ nguˈ. Ná tsoˈo si juaˈa̱ nclyacua tiˈ na; ngaˈa̱ chaˈ culacua tiˈ na chaˈ ná ngua jiˈna tsiyaˈ ti, loˈo liˈ taca cuaˈni ycuiˈ Ndyosi chaˈ caˈya sca chaˈ liñi hique na. 
\v 19 Masi nduˈni ñati̱ chalyuu chaˈ ngua tsa jiˈi̱, chaˈ tsoˈo tsa nclyacua tiˈ nguˈ, siˈi juaˈa̱ ntiˈ ycuiˈ Ndyosi ñaˈa̱ Ni jiˈi̱ nguˈ biˈ; ná tsoˈo tsiyaˈ ti chaˈ nu nchcuiˈ ñati̱ chalyuu ntiˈ Ni. Cua nscua sca chaˈ lo quityi cusuˈ nu nchcuiˈ ndiˈya̱: “Nduˈni ycuiˈ Ndyosi chaˈ quichi̱ yaa chaˈ hique ñati̱ chalyuu, masi tsoˈo tsa nduˈni nguˈ ntiˈ nguˈ”, nacui̱ lo quityi.
\v 20 Loˈo ndiˈya̱ laca chaˈ nu nscua chaca seˈi̱ lo quityi biˈ: “Cua jlo tiˈ ycuiˈ Ndyosi chaˈ ná tsoˈo tsiyaˈ ti chaˈ nu nchcuiˈ ñati̱ chalyuu nu nchca tsa jiˈi̱ nduˈni”. 
\v 21 Biˈ chaˈ ngaˈaa cuaˈni tyixi ma̱ loˈo tyaˈa ma̱, ngaˈaa tyuˈu lcaˈa̱ tsa ma̱ jiˈi̱ sca ti ñati̱ tyaˈa ya. Cuentya jiˈi̱ cuˈma̱ laca cua ñaˈa̱ ca tyaˈa ndyuˈni ya cña,
\v 22 masi naˈ, masi Apolos, masi Pedro; loˈo juaˈa̱ cuentya jiˈi̱ cuˈma̱ laca cua ñaˈa̱ ca chaˈ nu ndyaca nde chalyuu, masi luˈú na, masi cua ngujuii na, masi sca chaˈ nu ndyaca juani, masi sca chaˈ nu caca tyempo nde loo la; cuentya jiˈi̱ cuˈma̱ laca lcaa chaˈ nu ndyaca nde chalyuu lacua.
\v 23 Pana cuˈma̱ ni, cuentya jiˈi̱ Cristo laca ma̱; loˈo nu Cristo biˈ, cuentya jiˈi̱ ycuiˈ Ndyosi laca Ni.
\c 4
\s Cristo laca nu nda cña biˈ jiˈi̱ Pablo loˈo jiˈi̱ tyaˈa ndyaˈa̱ yu cña
\p
\v 1 Ngaˈa̱ chaˈ tyiˈu tiˈ ma̱ chaˈ cña jiˈi̱ ycuiˈ Cristo ndyuˈni ya. Na ndiˈya lo ya cña chaˈ culuˈu ya jiˈi̱ ñati̱ lcaa chaˈ nu cua nguluˈu ycuiˈ Ndyosi jiˈi̱ ya; sca chaˈ nu bilya cuna ñati̱ chalyuu tsiyaˈ ti, biˈ laca chaˈ nu culuˈu ya jiˈi̱ nguˈ.
\v 2 Loˈo ñati̱ nu cuiˈya loo sca cña ni, lcaa tsa̱ ngaˈa̱ chaˈ tyiˈu tiˈ nguˈ jiˈi̱ lcaa cña nu culo xuˈna nguˈ jiˈi̱ nguˈ.
\v 3 Cuentya jnaˈ, ná ntsi̱i̱ naˈ jiˈi̱ ma̱, ná ntsi̱i̱ naˈ jiˈi̱ cua ñaˈa̱ ca chaˈ nu chcuiˈ ma̱ jnaˈ; masi chcuiˈ cua ñaˈa̱ ca ñati̱ chalyuu jnaˈ, ná ntsi̱i̱ naˈ jiˈi̱ nguˈ tsiyaˈ ti. Ná sca chaˈ cuxi ntsuˈu jnaˈ si ntiˈ nguˈ sta nguˈ quiˈya ˈna, ntiˈ naˈ;
\v 4 loˈo juaˈa̱ cuentya jiˈi̱ ycuiˈ Ndyosi, ná ntsuˈu chaˈ cuxi nu nguaˈni naˈ, ntiˈ naˈ. Pana ná ñacui̱ naˈ chaˈ ná ntsuˈu chaˈ sta Ni quiˈya ˈna tsiyaˈ ti, sca ti ycuiˈ Ndyosi nu Xuˈna na taca cuaˈni cuayáˈ Ni jnaˈ ca loˈo tye chalyuu.
\v 5 Loˈo juaˈa̱ cuˈma̱, ná yala tsa clyacua tiˈ ma̱ chaˈ sta ma̱ quiˈya jiˈi̱ sca ñati̱; jatya ma̱ ñaˈa̱ cuayáˈ ca̱a̱ ycuiˈ nu Xuˈna na, biˈ laca nu cuaˈni cuayáˈ jiˈi̱ ca taˈa na. Liˈ culotu̱ Ni jiˈi̱ lcaa chaˈ cuxi nu ntsuˈu cuaana ti neˈ cresiya jiˈna, masi sca chaˈ nu ná ntiˈ na cachaˈ na jiˈi̱ tyaˈa ñati̱ chalyuu na. Juaˈa̱ cachaˈ Ni lcaa chaˈ nu ntsuˈu neˈ cresiya jiˈi̱ lcaa ñati̱ chalyuu, loˈo liˈ ta Ni nu tsoˈo jiˈna, cua ñaˈa̱ ca chaˈ tsoˈo nu ñacui̱ Ni chaˈ tyacua jiˈi̱ scaa na.
\p
\v 6 Nchcuiˈ naˈ chaˈ biˈ loˈo cuˈma̱ chaˈ taca tyiˈi̱ tsoˈo ti ma̱. Cua nchcuiˈ tsa naˈ jiˈi̱ tyucuaa ya, naˈ loˈo Apolos, chaˈ taca culacua xi tiˈ ma̱ ñiˈya̱ ntsuˈu chaˈ jiˈi̱ ya; juaˈa̱ caca cuayáˈ tiˈ ma̱ chaˈ ná tsoˈo xñi ma̱ xi xaˈ la chaˈ, nu siˈi ñiˈya̱ nu nscua lo quityi chaˈ jiˈi̱ ycuiˈ Ndyosi. Ná tsoˈo chaˈ chcuiˈ tsoˈo ma̱ loˈo sca yu tyaˈa ya nu lcaˈa̱ tsa ma̱ jiˈi̱, loˈo liˈ cuaˈni xñaˈa̱ ma̱ loˈo chaca yu tyaˈa ya.
\v 7 ¿Ni chaˈ laca chaˈ ndulo tsa chaˈ jiˈi̱ ycuiˈ ma̱ cuentya jiˈi̱ ma̱, pana ná ndube tiˈ ma̱ jiˈi̱ xaˈ ñati̱? Ycuiˈ Ndyosi cua nda lcaa na nu ntsuˈu jiˈi̱ ma̱, lcaa cña nu nchca jiˈi̱ ma̱; biˈ chaˈ lacua ná ntsuˈu chaˈ cuaˈni tyucuaa tiˈ ma̱ jiˈi̱ tyaˈa ma̱. Siˈi xquiˈya cña nu ndyuˈni ycuiˈ ma̱ ngutsaˈa̱ chalyuu jiˈi̱ ma̱, xquiˈya ycuiˈ Ndyosi cua laca ma̱ ñiˈya̱ nu laca ma̱ juani.
\p
\v 8 Nduˈni ma̱ chaˈ ndulo tsa chaˈ jiˈi̱ ycuiˈ ma̱, ngaˈaa ntsuˈu na nu lyiji jiˈi̱ ma̱ tsiyaˈ ti, ntiˈ ma̱; ndyuˈni ma̱ ñiˈya̱ nu nduˈni nguˈ culiyaˈ, ndiˈi̱ ma̱ ñiˈya̱ ndiˈi̱ nu laca loo chalyuu. Loˈo cuare ni, siˈi ñati̱ tlyu laca ya, ntiˈ ma̱. Pana si chañi chaˈ laca ma̱ loo jiˈi̱ ya, ¿ha ná ta ma̱ chacuayáˈ masi caca stuˈba xi chaˈ jiˈi̱ ya loˈo ma̱ liˈ, chaˈ loˈo ya caca ya ñati̱ tlyu liˈ?
\v 9 Ntiˈ naˈ chaˈ cua nguxtyanu ycuiˈ Ndyosi jiˈi̱ cuare, masi clyo ngulo Ni cña jiˈi̱ ya chaˈ tsaa ya tyijyuˈ chaˈ chcuiˈ ya chaˈ jiˈi̱ Ni; pana nu juani tyanu chu̱ˈ la ya jiˈi̱ lcaa nguˈ tyaˈa na, ñiˈya̱ laca preso nu tyiqueeˈ ntajatya chaˈ cujuii nguˈ jiˈi̱. Cua laca ya sca cuxeˈ, masi ñaˈa̱ ñati̱ chalyuu jiˈi̱ ya, masi xca̱ nu ntsuˈu jiˈi̱ ycuiˈ Ndyosi nde cua̱ ñaˈa̱ jiˈi̱ ya.
\v 10 ¡Xquiˈya ycuiˈ Cristo tonto tsa ya tuˈni! Loˈo cuˈma̱ ni, ntiˈ ma̱ chaˈ tsoˈo tsa jlo tiˈ ma̱ chaˈ jiˈi̱ Cristo. ¡Xti la cña nchca jiˈi̱ cuare, nguula la cña nchca jiˈi̱ cuˈma̱ ntiˈ ma̱! ¡Chiyaˈa̱ la nduˈni nguˈ loˈo cuare tuˈni; chi̱ la nduˈni nguˈ loo cuˈma̱!
\v 11 Masi la cuiˈ tyempo juani ti ntsuˈu quiyaˈ loˈo ná ndyiji na cacu ya, ná ndyiji na coˈo ya, masi lateˈ cusu̱ lacuˈ ya ntsuˈu quiyaˈ; ntyijiˈi̱ nguˈ jiˈi̱ ya, ni ná ntsuˈu tyi cua, xcuiˈ na ndyaˈa̱ yuˈu ti ya.
\v 12 Tiˈi̱ tsa cña nu nduˈni ya chaˈ caja ñiˈya̱ nu tyiji̱ yuˈu jiˈi̱ ya chalyuu. Nu loˈo tiˈí tsa chaˈ nu nda nguˈ loˈo ya, ná nsacui̱ tuˈba ya jiˈi̱ nguˈ; tsoˈo ti nchcuiˈ ya loˈo nguˈ liˈ. Loˈo nduˈni lyaˈ tiˈ nguˈ jiˈi̱ ya, ndalo ya liˈ; ná nsacui̱ yaˈ ya jiˈi̱ nguˈ tsiyaˈ ti.
\v 13 Masi chiyaˈa̱ tsa nchcuiˈ nguˈ loˈo ya, ndalo tyiquee ya jiˈi̱ nguˈ liˈ, nxaalaˈ ya chaˈ jiˈi̱ nguˈ. Masi juani ñaˈa̱ ti tya ndyuˈni cuxi ñati̱ loˈo cua, ñiˈya̱ si laca ya nanaˈ nu ndyanu lo hitya yuu; ñiˈya̱ ntiˈ sca nguti nu nchcua̱a̱ nguˈ, juaˈa̱ laca ya chaˈ ná ntsuˈu cuentya ya tsiyaˈ ti, nduˈni nguˈ loˈo tyaˈa nguˈ.
\p
\v 14 Loˈo nscua naˈ quityi re, ná ntiˈ naˈ chaˈ ca tyujuˈu tiˈ ma̱; tsa biˈ ti chaˈ ntiˈ naˈ chaˈ cuaˈa naˈ jiˈi̱ ma̱ chaˈ ná cuaˈni tyixi ma̱ loˈo ya. Na tyacaˈa cuˈma̱ jnaˈ ñiˈya̱ si laca ma̱ sñiˈ naˈ.
\v 15 Ntsuˈu tsa nguˈ tyaˈa ntsuˈu chaˈ jiˈna loˈo Cristo nu taca xtyucua nguˈ jiˈi̱ ma̱, pana sca ti naˈ nduˈni naˈ ñiˈya̱ nu nduˈni sti ma̱, chaˈ ndye ndachaˈ naˈ chaˈ tsoˈo nu cua nda Jesucristo loˈo na jiˈi̱ ma̱; xquiˈya naˈ ngusñi ma̱ chaˈ jiˈi̱ Jesús.
\v 16 Biˈ chaˈ juani nchcuiˈ tsa naˈ loˈo ma̱ chaˈ cuaˈni ma̱ ñiˈya̱ nu cua naˈa̱ ma̱ chaˈ nduˈni naˈ.
\p
\v 17 Juani nda naˈ jiˈi̱ yu Timoteo lijya̱ yu ca su ndiˈi̱ ma̱, chaˈ laca nu Timoteo biˈ ñiˈya̱ laca sca sñiˈ naˈ, chaˈ tyacaˈa tsa yu ˈna; juaˈa̱ tsoˈo tsa ngusñi yu chaˈ jiˈi̱ Jesucristo. Lcaa seˈi̱ su ndyaˈa̱ naˈ slo taju ñati̱ jiˈi̱ Jesús nu ndiˈi̱ sca quichi̱, ca biˈ nclyuˈu naˈ ñaˈa̱ chaˈ tsoˈo nu ngaˈa̱ chaˈ cuaˈni na chalyuu nu loˈo cua ngusñi na chaˈ jiˈi̱ Jesucristo; juaˈa̱ nduˈni naˈ tyucui tyempo xquiˈya Jesucristo. Loˈo Timoteo cachaˈ yu jiˈi̱ ma̱ chaˈ juaˈa̱ nduˈni naˈ. 
\v 18 ¿Ni cña nduˈni xi nguˈ tyaˈa ma̱ nu lye tsa nduˈni tyucuaa tiˈ jiˈi̱ tyaˈa ma̱? Ná ca̱a̱ naˈ ca quichi̱ Corinto slo ma̱, ntiˈ ma̱.
\v 19 Pana ná cube tiˈ ma̱, ca̱a̱ naˈ yala ti ca su ndiˈi̱ ma̱ chacuayáˈ jiˈi̱ ycuiˈ Ndyosi nu Xuˈna na. Loˈo liˈ quijeloo chaˈ jiˈi̱ ma̱ jnaˈ, nu loˈo ñaˈa̱ naˈ ñiˈya̱ ndyuˈni nu nguˈ tyixi biˈ; siˈi na ntucuá naˈ jiˈi̱ nguˈ xquiˈya chaˈ nu nda ti nguˈ biˈ liˈ.
\v 20 Ná taca tyatí̱ yuˈu na chaˈ jiˈi̱ ycuiˈ Ndyosi chaˈ laca Ni loo jiˈna si na nchcuiˈ ti na chaˈ jiˈi̱ Ni; na cua ntiˈ Ni chaˈ cuaˈni na cña jiˈi̱ Ni, tsa ñaˈa̱ cña nu nduˈni ycuiˈ Ni.
\v 21 Cua jlo tiˈ naˈ chaˈ tsoˈo la caca jiˈi̱ ma̱ si tsoˈo ti tyuˈu tyiquee naˈ ñaˈa̱ naˈ jiˈi̱ ma̱ loˈo tyalaa naˈ ca slo ma̱; tsoˈo la si tsoˈo ti chcuiˈ naˈ loˈo cuˈma̱ liˈ. Ná tsoˈo ca tiˈ ma̱ si ta naˈ chaˈ cusu̱u̱ loˈo ma̱ liˈ.
\c 5
\s Ngaˈa̱ chaˈ culoˈo nguˈ jiˈi̱ tyaˈa nguˈ nu nguaˈni chaˈ cuxi
\p
\v 1 Cua ngujui chaˈ ˈna, cua ndyuna naˈ chaˈ subaˈ tsa nguaˈni sca ñati̱ tyaˈa ngusñi ma̱ chaˈ jiˈi̱ Jesucristo; nguaˈni yu sca cña nu cuxi tsa. Pana ni nguˈ xaˈ tsuˈ, ná nduˈni nguˈ tsa lo cua chaˈ cuxi, masi ná ndaquiyaˈ nguˈ jiˈi̱ ycuiˈ Ndyosi tsiyaˈ ti. Ndiˈya̱ cña nguaˈni yu: nguaˈa̱ yu loˈo xtyaˈa̱ miñaˈa̱ yu.
\v 2 Loˈo ñaˈa̱ ti tya nduˈni tyucuaa tiˈ ma̱ jiˈi̱ tyaˈa ma̱, masi ngaˈa̱ chaˈ ca xñiˈi̱ tsa tiˈ ma̱ xquiˈya chaˈ cuxi biˈ. Ngaˈa̱ tsa chaˈ culoˈo ma̱ jiˈi̱ ñati̱ nu nguaˈni chaˈ cuxi biˈ, chaˈ ngaˈaa tyaˈa̱ yu stuˈba ti loˈo cuˈma̱.
\v 3 Sca ti cuayáˈ ndyuˈu chaˈ, masi ná ndiˈi̱ naˈ loˈo ma̱ juani chaˈ cuaˈni cuayáˈ naˈ jiˈi̱ yu biˈ; pana cacua tsa slo cuˈma̱ ndiˈi̱ naˈ, ntiˈ naˈ, xquiˈya chaˈ ndyiˈu tsa tiˈ naˈ jiˈi̱ ma̱. Cua laca ngusta naˈ quiˈya jiˈi̱ ñati̱ nu nguaˈni chaˈ cuxi biˈ.
\v 4 Biˈ chaˈ lacua tyuˈu tiˈi̱ ma̱ tsa tlyu ti ma̱ chacuayáˈ jiˈi̱ Jesús nu Xuˈna na, chaˈ cuaˈni cuayáˈ ma̱ jiˈi̱ yu biˈ yala ti. Sca ti chaˈ ntsuˈu tyiquee naˈ loˈo ma̱, loˈo juaˈa̱ cua nda ycuiˈ Jesucristo chacuayáˈ chaˈ cuaˈni ma̱ juaˈa̱.
\v 5 Liˈ xtyanu ma̱ jiˈi̱ yu biˈ yaˈ nu xñaˈa̱. Masi quiñuˈu̱ ycuiˈ yu liˈ, quiñuˈu̱ chaˈ jiˈi̱ yu su ndiˈi̱ yu chalyuu, pana ca loˈo tye chalyuu, ca liˈ cuaˈni lyaá ycuiˈ nu Xuˈna na jiˈi̱ yu, quiˈya Ni cresiya jiˈi̱ yu.
\p
\v 6 Siˈi chaˈ tsoˈo nduˈni ma̱ chaˈ nduˈni tyucuaa tiˈ ma̱ jiˈi̱ tyaˈa ma̱. ¿Ha ná jlo tiˈ ma̱ ñiˈya̱ nduˈni scua̱ tiyeˈ? Masi xti ti scua̱ tiyeˈ tyuˈu jiˈi̱ catyá xlyá, cuaˈni biˈ chaˈ tyacui̱ quiñaˈa̱ scua̱ liˈ.
\v 7 La cuiˈ juaˈa̱ laca cuˈma̱, chaˈ ntsuˈu quiˈya biˈ chu̱ˈ ma̱. Laca quiˈya biˈ jiˈi̱ ma̱ ñiˈya̱ laca scua̱ tiyeˈ nu ngaˈaa tsoˈo tsiyaˈ ti; tsoˈo si xcua̱a̱ ma̱ jiˈi̱, chaca quiyaˈ quixaˈ cucui scua̱ biˈ. Loˈo juaˈa̱ cuˈma̱, ngaˈa̱ chaˈ culotsuˈ ma̱ quiˈya nu ntsuˈu jiˈi̱ ma̱, chaˈ xcutsaˈa̱ Ni chaˈ nu ntsuˈu tyiquee ma̱, chaˈ caca lubii cresiya jiˈi̱ ma̱. Na cua laca lubii biˈ jiˈi̱ ma̱ xquiˈya Jesús. Loˈo caca taˈa pascua ni, liˈ tyiˈu tiˈ na chaˈ nguaˈni tye ycuiˈ Cristo jiˈi̱ quiˈya nu ntsuˈu jiˈna. Xquiˈya lcaa na ngujuii Ni lo crusi, ngua Cristo msta̱ luˈú cuentya jiˈi̱ quiˈya nu ntsuˈu jiˈna.
\v 8 Biˈ chaˈ tsoˈo la si tyiˈu tiˈ na jiˈi̱ Cristo lcaa tsa̱, chaˈ xaˈ ñaˈa̱ cuaˈni na liˈ; tsoˈo ti cuaˈni na loˈo ñati̱, xcuiˈ chaˈ liñi chcuiˈ na loˈo ñati̱. Laca na ñiˈya̱ laca xlyá cui nu ndyaˈ chaca quiyaˈ liˈ; ngaˈaa ntsuˈu chaˈ cuaˈni na ñiˈya̱ nu nguaˈni na saˈni loˈo ntsuˈu chaˈ cuxi jiˈna, loˈo ntsuˈu chaˈ subaˈ jiˈna, chaˈ ngua na ñiˈya̱ ngua tsa ycuˈ xlyá nu ná tsoˈo tyempo biˈ.
\p
\v 9 Lo quityi nu nda naˈ ndyaa slo ma̱ tya clyo la, biˈ nguscua naˈ chaˈ ná cuaˈni tyaˈa ma̱ loˈo ñati̱ nu xcuiˈ chaˈ subaˈ nduˈni;
\v 10 pana ná nguscua naˈ chaˈ ngaˈaa chcuiˈ ma̱ tsiyaˈ ti loˈo ñati̱ cuxi biˈ. Ntsuˈu tsa ñati̱ chalyuu nu ná ndaquiyaˈ jiˈi̱ ycuiˈ Ndyosi, nu nduˈni subaˈ, nu ndacui tiˈ, nu cuaana, nu nduˈni tlyu jiˈi̱ lcui̱ joˈó ti; loˈo juaˈa̱ ná caca tyuˈutsuˈ na jiˈi̱ nguˈ biˈ, sca ti si tyuˈu na chalyuu tyaa na tsiyaˈ ti.
\v 11 Pana ná tsoˈo chaˈ tyuˈu chaˈ jiˈi̱ ma̱ loˈo ñati̱ nu nduˈni juaˈa̱, masi nduˈni nguˈ biˈ loˈo ma̱ chaˈ tyaˈa ñati̱ jiˈi̱ Jesucristo laca nguˈ biˈ; biˈ laca chaˈ nu ngua tiˈ naˈ chcui̱ˈ loˈo ma̱. Ná caca stuˈba chaˈ jiˈi̱ ma̱ loˈo nguˈ si subaˈ nduˈni nguˈ, si ndacui tiˈ nguˈ, si nduˈni tlyu nguˈ jiˈi̱ lcui̱ joˈó ti, si cuxi tsa nchcuiˈ nguˈ loˈo ñati̱, si cuˈbi nguˈ, si cuaana nguˈ; ná caca xñi ma̱ chaˈ jiˈi̱ nguˈ nu nduˈni juaˈa̱. Masi nacui̱ ñati̱ biˈ chaˈ stuˈba ti ntsuˈu chaˈ jiˈi̱ nguˈ loˈo Jesús, ná caca tyuˈu chaˈ jiˈi̱ ma̱ loˈo nguˈ. La cuiˈ ti chaˈ, ni ná tsoˈo chcaˈa̱ ma̱ cacu ma̱ tyaja loˈo ñati̱ nu nduˈni juaˈa̱.
\v 12-13 Siˈi cuentya jnaˈ laca ñati̱ nu ná ndaquiyaˈ jiˈi̱ ycuiˈ Ndyosi tsiyaˈ ti, caca cuayáˈ jiˈi̱ nguˈ biˈ slo ycuiˈ Ndyosi. Pana nu nguˈ tyaˈa ma̱ nu ntsuˈu chaˈ jiˈi̱ loˈo Cristo, tsoˈo la si cuaˈni cuayáˈ ycuiˈ cuˈma̱ jiˈi̱ nguˈ, ntiˈ naˈ. Biˈ chaˈ lacua culoˈo ma̱ jiˈi̱ nu cuxi, chaˈ ná cuaˈni tyaˈa nguˈ biˈ loˈo ma̱ tsiyaˈ ti.
\c 6
\s Nu loˈo ntsuˈu chaˈ cusu̱u̱ jiˈna loˈo tyaˈa ñati̱ na 
\p
\v 1 Cuˈma̱ tyaˈa ngusñi na chaˈ jiˈi̱ Jesús, nu loˈo ndyaca sca chaˈ cusu̱u̱ jiˈi̱ ma̱ loˈo tyaˈa ñati̱ ma̱, ¿ha tsoˈo la chaˈ ndyaˈa̱ ma̱ slo bese, ntiˈ ma̱? ¿Ha tsoˈo ntiˈ ma̱ chaˈ ndyaˈa̱ ma̱ slo ñati̱ nu ná ndaquiyaˈ jiˈi̱ ycuiˈ Ndyosi tsiyaˈ ti? ¿Ha ná tsoˈo la si tsaa ma̱ slo nguˈ tyaˈa ngusñi ma̱ chaˈ jiˈi̱ Jesús? Juaˈa̱ taca ca ti̱ chaˈ jiˈi̱ ma̱ loˈo tyaˈa ma̱ liˈ.
\v 2 Cua jlo tiˈ ma̱ chaˈ cua nscua chaˈ ycuiˈ na cuaˈni cuayáˈ na jiˈi̱ lcaa ñati̱ chalyuu loˈo cua tye ti chaˈ, chaˈ cua ntsuˈu chaˈ jiˈna loˈo ycuiˈ Ndyosi. Si juaˈa̱ caca cña nu cuaˈni ma̱ ca tiyaˈ la, ¿ha ná caca jiˈi̱ ma̱ cuaˈni cuayáˈ ma̱ jiˈi̱ sca chaˈ xca ti nde chalyuu juani?
\v 3 Loˈo juaˈa̱ nu nguˈ xca̱ jiˈi̱ ycuiˈ Ndyosi ca nde cua̱, nda ma̱ cuentya chaˈ loˈo nguˈ biˈ ngaˈa̱ chaˈ cuaˈni cuayáˈ na jiˈi̱; biˈ chaˈ ycuiˈ ca na taca xquiñi na sca chaˈ nu ndyaca jiˈna loˈo tyaˈa na nde chalyuu. 
\v 4 Loˈo ndyaca sca chaˈ cusu̱u̱ jiˈi̱ ma̱ loˈo tyaˈa ma̱, ná tsoˈo tsaa loˈo ma̱ jiˈi̱ tyaˈa ma̱ chaˈ caca cuayáˈ jiˈi̱ ma̱ slo xaˈ ñati̱ nu ná stuˈba chaˈ jiˈi̱ loˈo tyaˈa ngusñi ma̱ chaˈ jiˈi̱ Jesús.
\v 5 Nscua naˈ chaˈ re chaˈ caca tyujuˈu tiˈ ma̱ slo ycuiˈ Ndyosi. ¿Ha ná ntsuˈu ni tsaca nguˈ tyaˈa ma̱ nu nchca cuayáˈ tiˈ ñiˈya̱ caca xquiñi chaˈ jiˈi̱ ma̱ loˈo tyaˈa ma̱?
\v 6 Pana xaˈ tsa ñaˈa̱ nduˈni ma̱ ca jua. Masi ñati̱ tyaˈa ngusñi ma̱ chaˈ jiˈi̱ Jesús, ndyaˈa̱ loˈo ma̱ jiˈi̱ ca slo nguˈ nu ná ndaquiyaˈ jiˈi̱ ycuiˈ Ndyosi tsiyaˈ ti, chaˈ cuaˈni cuayáˈ nguˈ biˈ jiˈi̱ nguˈ tyaˈa ma̱. 
\p
\v 7 Nu loˈo ntsuˈu chaˈ cusu̱u̱ jiˈi̱ ma̱ loˈo tyaˈa ma̱, liˈ hora ti caca cuayáˈ tiˈ na chaˈ tya lyiji xñi tsoˈo ma̱ chaˈ jiˈi̱ Jesús. ¿Ha ná tsoˈo la, masi ta ma̱ chacuayáˈ chaˈ caca chaˈ cuxi biˈ jiˈi̱ ma̱ juaˈa̱ ti? ¿Ha ná tsoˈo la, masi cuaana nguˈ chaˈ tsoˈo nu ntsuˈu jiˈi̱ ma̱ juaˈa̱ ti?
\v 8 Pana siˈi na tsoˈo la nduˈni ma̱; chaˈ cuxi ndyuˈni ma̱ loˈo ycuiˈ nguˈ tyaˈa ngusñi ma̱ chaˈ jiˈi̱ Jesús, hasta ntyucuaana ma̱ na nu ntsuˈu jiˈi̱ tyaˈa ma̱. 
\p
\v 9 Jlo tiˈ na chaˈ ná loˈo ñati̱ cuxi taca tsaa ca su tlyu ca su laca ycuiˈ Ndyosi loo. Tsoˈo si liñi tsa caca cuayáˈ tiˈ ma̱ chaˈ ná tsaa nguˈ cuxi ca su tsoˈo biˈ: ñati̱ nu subaˈ tsa nduˈni loˈo tyaˈa, loˈo juaˈa̱ ñati̱ nu nduˈni tlyu jiˈi̱ lcui̱ joˈó ti, loˈo juaˈa̱ ñati̱ nu ntsuˈu chaˈ jiˈi̱ loˈo clyoˈo xaˈ ñati̱, juaˈa̱ nu nguˈ quiˈyu nu nduˈni subaˈ loˈo tyaˈa quiˈyu ti nguˈ,
\v 10 loˈo juaˈa̱ nu cuaana, loˈo juaˈa̱ nu nxlyaá na nu ntsuˈu jiˈi̱ tyaˈa nguˈ, loˈo juaˈa̱ nu cuˈbi, loˈo juaˈa̱ nu nchcuiˈ chaˈ cuxi jiˈi̱ tyaˈa nguˈ, loˈo juaˈa̱ nu cuxi ti nduˈni ngana jiˈi̱ tyaˈa nguˈ, ná tsaa chca ñati̱ cuxi biˈ ca su tsoˈo su ntucua ycuiˈ Ndyosi.
\v 11 Loˈo juaˈa̱ ntsuˈu xi cuˈma̱ nu nguaˈni ma̱ la cuiˈ tyaˈa chaˈ cuxi biˈ tya saˈni la; pana cua xaˈ ñaˈa̱ nduˈni ma̱ juani, chaˈ cua ngüityi̱ Jesús lcaa quiˈya nu ntsuˈu jiˈi̱ ma̱ tya liˈ, cua ndyatí̱ ma̱ cuentya jiˈi̱ ycuiˈ Ndyosi liˈ. Cua ngüiñi chaˈ jiˈi̱ ma̱ loˈo ycuiˈ Ndyosi nu loˈo ngusñi ma̱ chaˈ jiˈi̱ ycuiˈ Jesucristo nu Xuˈna na, loˈo liˈ cua nda Ni Xtyiˈi ycuiˈ Ni chaˈ tyanu neˈ cresiya jiˈi̱ ma̱.
\s Ñaˈa̱ tsaca tyucui ñaˈa̱ na laca na jiˈi̱ ycuiˈ Ndyosi 
\p
\v 12 Ntsuˈu quiyaˈ nchcuiˈ ñati̱: “Ntsuˈu chacuayáˈ ˈna chaˈ cuaˈni naˈ cua ñaˈa̱ ca chaˈ, ñiˈya̱ nu ntiˈ naˈ chaˈ cuaˈni naˈ”, nacui̱ nguˈ. Chañi chaˈ jiˈi̱ nguˈ, pana ntsuˈu chaˈ nu cuaˈni na nu ná ntsuˈu su xtyucua jiˈna. Loˈo na, taca ñacui̱ na chaˈ ntsuˈu chacuayáˈ jiˈna chaˈ cuaˈni na ñiˈya̱ nu ntiˈ ti na cuaˈni na; pana ná tsoˈo si quiˈi̱ tsa na jiˈi̱ sca chaˈ nu nduˈni na ñaˈa̱ cuayáˈ nu ngaˈaa caca xtyanu na jiˈi̱.
\v 13 Ntsuˈu chaca chaˈ nu nchcuiˈ ñati̱: “Taca cacu na lcua ti lo na nu ntiˈ na cacu na”, nacui̱ nguˈ, “biˈ chaˈ ntsuˈu quiji̱ neˈ na chaˈ cuaˈni chaˈá̱ na biˈ loˈo na cacu na”, nacui̱ nguˈ. Chañi chaˈ biˈ, pana sca ti cuayáˈ cuaˈni tye ycuiˈ Ndyosi jiˈi̱ na ndacu na loˈo juaˈa̱ jiˈi̱ cuañaˈ ycuiˈ na. La cuiˈ juaˈa̱ cua ngüiñá ycuiˈ Ndyosi jiˈi̱ tyucui ñaˈa̱ na lijya̱ na chalyuu, pana siˈi chaˈ culiji ti cuañaˈ na loˈo nduˈni subaˈ na loˈo ñati̱, siˈi xquiˈya chaˈ biˈ ngüiñá Ni jiˈna; chaˈ caca na ñati̱ jiˈi̱ ycuiˈ Ni, chaˈ caca Ni nu Xuˈna na, biˈ chaˈ cua nda ycuiˈ Ndyosi jiˈna lijya̱ na chalyuu. 
\v 14 Tlyu tsa chaˈ nguaˈni ycuiˈ Ndyosi loˈo Jesús nu Xuˈna na loˈo nguaˈni Ni chaˈ cua ndyuˈú yu chaca quiyaˈ, ngulo Ni jiˈi̱ yu ca su ntsiya yu ngujuii. La cuiˈ juaˈa̱ tlyu tsa chaˈ caca loˈo cuaˈni Ni chaˈ tyuˈú na chaca quiyaˈ, quiˈya Ni jiˈna tyaa loˈo Ni jiˈna ca loˈo tye chalyuu.
\p
\v 15 Cristo ca jiˈi̱ tyucui ñaˈa̱ tsaca ma̱ lacua, stuˈba ti ntsuˈu chaˈ jiˈi̱ ma̱ loˈo nu xaˈ la ñati̱ tyaˈa ngusñi na chaˈ jiˈi̱ Cristo. Loˈo laca na ñati̱ jiˈi̱ Cristo ni, ¿ha caca saˈa na jiˈi̱ sca nu cunaˈa̱ calle ti? Ná tsoˈo cuaˈni na juaˈa̱ tsiyaˈ ti.
\v 16 ¿Ha ná jlo tiˈ ma̱ chaˈ stuˈba ti tyiquee na, sca ti tañi na loˈo ñati̱ biˈ, si tyuˈu chaˈ jiˈna loˈo, masi saˈa ti na jiˈi̱? La cuiˈ juaˈa̱ chaˈ nscua lo quityi chaˈ joˈó nu ndiˈya̱ nchcuiˈ: “Laca nu tyucuaa nguˈ biˈ ñiˈya̱ si laca nguˈ sca ti ñati̱”. Juaˈa̱ nchcuiˈ quityi biˈ.
\v 17 La cuiˈ juaˈa̱ caca jiˈna loˈo tyuˈu chaˈ jiˈna loˈo Jesús nu Xuˈna na; nchca stuˈba chaˈ jiˈna loˈo Jesús liˈ, chaˈ ntsuˈu Xtyiˈi ycuiˈ Ni neˈ cresiya jiˈna.
\p
\v 18 Biˈ chaˈ ná cuaˈni subaˈ ma̱ loˈo xaˈ ñati̱. Cua ñaˈa̱ ca quiˈya nu ntsuˈu jiˈna, ná cuaˈni ñuˈu̱ biˈ jiˈi̱ ycuiˈ na; pana loˈo calaˈ na jiˈi̱ xaˈ ñati̱ nu siˈi ñati̱ jiˈna, ycuiˈ ca na cuaˈni ñuˈu̱ na jiˈna liˈ. 
\v 19-20 ¿Ha ná nda ma̱ cuentya chaˈ tyacaˈa tsa ma̱ jiˈi̱ ycuiˈ Ndyosi, xquiˈya chaˈ nda Ni Xtyiˈi ycuiˈ Ni nu ndyanu neˈ cresiya jiˈi̱ ma̱? Ngaˈaa siˈi cuentya jiˈi̱ ycuiˈ ti ma̱ ndyaˈa̱ ma̱, cuentya jiˈi̱ ycuiˈ Ndyosi laca ma̱. Quiñaˈa̱ tsa chaˈ tsoˈo nguaˈni Ni cuentya jiˈna chaˈ ngulaá ma̱ jiˈi̱ nu cuxi, chaˈ laca ma̱ ñati̱ jiˈi̱ ycuiˈ Ni; biˈ chaˈ cuaˈni tlyu ma̱ jiˈi̱ ycuiˈ Ndyosi lcaa su ndyaˈa̱ ma̱, tyiˈu tiˈ ma̱ jiˈi̱ Ni, loˈo juaˈa̱ tyucui tyiquee ma̱ cuaˈni ma̱ lcaa cña nu culo ycuiˈ Ni jiˈi̱ ma̱.
\c 7
\s ¿Ha tsoˈo la si caja clyoˈo na?
\p
\v 1 Juani scua naˈ xi chaˈ, chaˈ xacui̱ naˈ chaˈ jiˈi̱ ma̱ cuentya jiˈi̱ quityi nu nguscua ma̱, nu ndyalaa slo naˈ tsubiˈ ti. Nu na nguˈ quiˈyu, tsoˈo la si ná caja clyoˈo na; tyanu na juaˈa̱ ti, ntiˈ naˈ.
\v 2 Pana nde chalyuu su ndiˈi̱ na, ntsuˈu tsa chaˈ subaˈ nu nduˈni nguˈ loˈo nguˈ cunaˈa̱; biˈ chaˈ ni naˈ jiˈi̱ ma̱ chaˈ tsoˈo la si lcaa ñati̱ caja clyoˈo nguˈ, caja sca nu cunaˈa̱ jiˈi̱ sca nu quiˈyu, loˈo juaˈa̱ nu cunaˈa̱ caja quiˈyu jiˈi̱.
\v 3 Ngaˈa̱ chaˈ tyiˈi̱ tsoˈo nu quiˈyu loˈo clyoˈo yu, ñiˈya̱ nu ngaˈa̱ chaˈ caca; loˈo juaˈa̱ nu cunaˈa̱ ni, ngaˈa̱ chaˈ tyiˈi̱ tsoˈo loˈo clyoˈo ñiˈya̱ nu ngaˈa̱ chaˈ caca.
\v 4 Biˈ chaˈ ngaˈaa culo sca nu cunaˈa̱ cña jiˈi̱ ycuiˈ ca si cua ngujui clyoˈo, chaˈ nu quiˈyu laca loo jiˈi̱; loˈo juaˈa̱ nu quiˈyu, ngaˈaa siˈi ycuiˈ ca yu nu culo cña jiˈi̱ yu loˈo cua ngujui clyoˈo yu, chaˈ nu cunaˈa̱ laca loo jiˈi̱ yu liˈ.
\v 5 Ná tsoˈo si tyeje tacui tyu̱u̱ tsa̱ nu ná ndiˈi̱ ma̱ loˈo clyoˈo ma̱; sca ti si tyuˈutsuˈ ma̱ xi jiˈi̱ tyaˈa ma̱ chaˈ caja xi tyempo chcuiˈ ma̱ loˈo ycuiˈ Ndyosi Sti ma̱. Loˈo nteje tacui chaˈ biˈ, xaˈ tyiˈi̱ ma̱ loˈo clyoˈo ma̱ liˈ, ñiˈya̱ nu ndiˈi̱ ti ma̱. Si ná cuaˈni ma̱ juaˈa̱, ná tyiqueeˈ quiñuˈu̱ chaˈ jiˈi̱ ma̱ loˈo clyoˈo ma̱ chaˈ ná nchca talo ma̱ tyu̱u̱ tsa̱. Loˈo liˈ cuaˈni nu xñaˈa̱ ngana jiˈi̱ ma̱.
\p
\v 6 Ná ñacui̱ ma̱ chaˈ nclyo naˈ cña jiˈi̱ ma̱ chaˈ caja clyoˈo ma̱; nde laca sca chaˈ nu nda ti naˈ loˈo ma̱, 
\v 7 chaˈ cuentya jnaˈ tsoˈo la si tyanu nguˈ ycuiˈ ti nguˈ ñiˈya̱ nu ndiˈi̱ naˈ, juaˈa̱ ntiˈ naˈ. Pana xi xaˈ ca ñaˈa̱ nduˈni ycuiˈ Ndyosi loˈo scaa ñati̱, chaˈ cua nda ycuiˈ Ndyosi chacuayáˈ ñiˈya̱ tyiˈi̱ scaa na; tsaca lo ñaˈa̱ ndiˈi̱ tsaca ñati̱, chaca lo ñaˈa̱ ndiˈi̱ chaca ñati̱, tsa ñaˈa̱ chacuayáˈ nu nda Ni jiˈna.
\p
\v 8 Nde laca chaˈ nu ta naˈ loˈo cuˈma̱ nu bilya caja clyoˈo ma̱, cuati juaˈa̱ loˈo nguˈ tyaˈa na nu ndyanu tiˈi ti: tsoˈo la caca jiˈi̱ ma̱ si tyiˈi̱ ma̱ ñiˈya̱ nu ndiˈi̱ ti naˈ, ntiˈ naˈ.
\v 9 Sca ti si ná talo ma̱ tyiˈi̱ ma̱ juaˈa̱ ti, tsoˈo la si caja clyoˈo ma̱ liˈ, chaˈ ná tsoˈo si quiñuˈu̱ tiˈ na chaˈ xcuiˈ ndijña tyiquee na jiˈi̱ ñati̱ nu caca clyoˈo na.
\p
\v 10 Nu cuˈma̱ nu ndiˈi̱ loˈo clyoˈo ma̱ ni, ndiˈya̱ cña ntsuˈu chaˈ cuaˈni ma̱; ni siˈi cuentya jnaˈ ngulo naˈ cña re jiˈi̱ ma̱, ndiˈya̱ cña nclyo ycuiˈ Ndyosi nu Xuˈna na jiˈi̱ ma̱: Ná xtyanu tiˈi̱ cuˈma̱ nguˈ cunaˈa̱ jiˈi̱ clyoˈo ma̱.
\v 11 Si cua nguxtyanu ma̱ jiˈi̱ nu quiˈyu, ngaˈa̱ chaˈ tyanu ma̱ ycuiˈ ti ma̱, sca ti si tyajaˈa̱ ma̱ tyaa ma̱ loˈo clyoˈo ma̱ chaca quiyaˈ. Loˈo juaˈa̱ cuˈma̱ nguˈ quiˈyu, ná ntsuˈu chacuayáˈ jiˈi̱ ma̱ chaˈ culoˈo ma̱ jiˈi̱ clyoˈo ma̱.
\p
\v 12 Nu juani ta naˈ sca chaˈ loˈo cuˈma̱ nguˈ quiˈyu tyaˈa ngusñi na chaˈ jiˈi̱ Jesús, nu ntsuˈu clyoˈo ma̱ nu tya lyiji xñi chaˈ jiˈi̱ Jesús; si tyajaˈa̱ biˈ tyiˈi̱ biˈ ñiˈya̱ nu ndiˈi̱ ti loˈo ma̱, tsoˈo liˈ. Ná ntsuˈu chacuayáˈ jiˈi̱ ma̱ chaˈ culoˈo ma̱ jiˈi̱ nu cunaˈa̱ biˈ chaˈ tyaa nguˈ. Naˈ laca̱ nu ngulo naˈ cña biˈ jiˈi̱ ma̱; masi ná ndu̱ ycuiˈ Ndyosi loˈo naˈ, pana sca ti cuayáˈ ndyuˈu chaˈ biˈ.
\v 13 La cuiˈ ti chaˈ ta naˈ loˈo cuˈma̱ nguˈ cunaˈa̱ tyaˈa na nu ntsuˈu clyoˈo ma̱ nu bilya xñi chaˈ jiˈi̱ Jesús, tyaˈa chaˈ nu ngusñi ma̱: ná tsoˈo culoˈo ma̱ jiˈi̱ nu quiˈyu clyoˈo ma̱ si tya ndiˈi̱ tsoˈo ti nguˈ loˈo ma̱.
\v 14 Ntucuá ycuiˈ Ndyosi jiˈi̱ chaˈ nu nchcuiˈ nguˈ cunaˈa̱ biˈ loˈo ycuiˈ Ni cuentya jiˈi̱ clyoˈo nguˈ, tsoˈo chaˈ biˈ cuentya jiˈi̱ ycuiˈ Ndyosi chaˈ clyoˈo laca nguˈ. Loˈo juaˈa̱ nu nguˈ cunaˈa̱ nu tya lyiji xñi chaˈ jiˈi̱ Jesús, tyaˈa chaˈ nu cua ngusñi clyoˈo, ntucuá ycuiˈ Ndyosi jiˈi̱ chaˈ nu nchcuiˈ nu quiˈyu biˈ loˈo ycuiˈ Ni cuentya jiˈi̱ clyoˈo nguˈ; tsoˈo chaˈ biˈ cuentya jiˈi̱ Ni chaˈ clyoˈo laca nguˈ. Ngaˈa̱ chaˈ caca juaˈa̱ xquiˈya nu sube sñiˈ ma̱. Ngaˈaa laca nguˈ sube biˈ ñiˈya̱ nu laca sñiˈ xaˈ ñati̱ nu ná ndaquiyaˈ jiˈi̱ ycuiˈ Ndyosi tsiyaˈ ti, chaˈ cua ngusñi Ni cuentya jiˈi̱ nu sube biˈ xquiˈya cuˈma̱.
\v 15 Sca ti chaˈ jiˈi̱ ñati̱ nu ná ntajaˈa̱ xñi chaˈ jiˈi̱ Jesús biˈ, si cua ntiˈ nguˈ xtyanu nguˈ jiˈi̱ clyoˈo nguˈ, si lyaˈ tiˈ nguˈ jiˈi̱ clyoˈo nguˈ chaˈ ngusñi clyoˈo nguˈ chaˈ jiˈi̱ Jesús, liˈ ta ma̱ chacuayáˈ chaˈ tyaa nguˈ nu ná ngusñi chaˈ jiˈi̱ Jesús biˈ. Nu nguˈ tyaˈa na nu ngusñi chaˈ jiˈi̱ Jesús, masi quiˈyu, masi cunaˈa̱, cua ntsuˈu chacuayáˈ jiˈi̱ ma̱ chaˈ xtyanu ma̱ jiˈi̱ clyoˈo ma̱, sca ti si juaˈa̱ ti taca tyiˈi̱ ma̱ ti̱ ti chalyuu. Cua ntiˈ ycuiˈ Ndyosi chaˈ tyiˈi̱ tsoˈo na chalyuu.
\v 16 Cuˈma̱ nguˈ cunaˈa̱, ná tyiqueeˈ xñi clyoˈo ma̱ chaˈ jiˈi̱ Jesús xquiˈya cuˈma̱ chaˈ jlya tiˈ ma̱ jiˈi̱ Jesús; clyaá yu biˈ jiˈi̱ nu xñaˈa̱ liˈ. La cuiˈ juaˈa̱ cuˈma̱ nguˈ quiˈyu, ná tyiqueeˈ xñi clyoˈo ma̱ chaˈ jiˈi̱ Jesús xquiˈya chaˈ jlya tiˈ ma̱ jiˈi̱ Jesús; clyaá choˈ jiˈi̱ nu cuxi liˈ.
\s Ná ndulo tsa chaˈ jiˈi̱ ycuiˈ Ndyosi na ca laca scaa na
\p
\v 17 Nu loˈo tya lyiji cusubi ycuiˈ Ndyosi jiˈna, tya liˈ cua laca nda Ni jiˈna ñiˈya̱ nu tyiˈi̱ scaa na chalyuu. Ycuiˈ Ndyosi laca nu nda chalyuu jiˈna tya clyo, loˈo juaˈa̱ ycuiˈ Ni laca nu ngusubi jiˈna chaˈ xñi na chaˈ jiˈi̱ Ni juani. Tya la cuiˈ chalyuu biˈ laca nu ntsuˈu jiˈna juani, la cuiˈ ñaˈa̱ chalyuu nu ngujui jiˈna tya clyo; pana juani tyucui tyiquee na ndiˈi̱ na chalyuu. La cuiˈ ti chaˈ nchcuiˈ naˈ loˈo nguˈ lcua ti quichi̱ su ndiˈi̱ nguˈ nu ngusñi chaˈ jiˈi̱ Cristo.
\v 18 Ñiˈya̱ ntiˈ nguˈ judío ni, loˈo ngusñi nguˈ chaˈ jiˈi̱ Jesús xquiˈya chaˈ ngusubi Ni jiˈi̱ nguˈ, ná tsoˈo si caca tyujuˈu tiˈ nguˈ chaˈ ngusiˈyu ñati̱ quiji̱ nguˈ chaˈ laca nguˈ judío; ntsuˈu chaˈ tyanu nguˈ ñiˈya̱ nu ñaˈa̱ ti nguˈ loˈo ngua cuañiˈ nguˈ. Nguˈ xaˈ nasiyu̱ ni, ná ntsuˈu chaˈ jiˈi̱ nguˈ chaˈ xiˈyu quiji̱ nguˈ juaˈa̱, nu loˈo xñi nguˈ biˈ chaˈ jiˈi̱ Jesús; ná ntsuˈu chaˈ cuaˈni nguˈ ñiˈya̱ nu nduˈni nguˈ judío, tyanu nguˈ ñiˈya̱ nu ndiˈi̱ ti nguˈ liˈ.
\v 19 Ná nduˈni chaˈ cuentya jiˈi̱ ycuiˈ Ndyosi, masi ngulacua̱ na juaˈa̱, masi ná ngulacua̱ na juaˈa̱; nu nduˈni chaˈ cuentya jiˈi̱ ycuiˈ Ndyosi laca chaˈ cuaˈni na cña nu nclyo Ni jiˈna.
\v 20 Biˈ chaˈ juani ñaˈa̱ ti tya ngaˈa̱ chaˈ tyiˈi̱ na chalyuu, ñiˈya̱ ndiˈi̱ ti na tya loˈo ngusubi Ni jiˈna chaˈ caca na ñati̱ jiˈi̱.
\v 21 Ná nduˈni chaˈ masi msu nu ngüiˈya ñati̱ laca ma̱ nu loˈo ngusubi Ni jiˈi̱ ma̱, pana tsoˈo laca si caja nu ta cayaˈ chaˈ tyuˈu ma̱ laja ti.
\v 22 Ñati̱ nu juaˈa̱ tya ntsuˈu xuˈna nguˈ nu loˈo cua ngusubi ycuiˈ Ndyosi jiˈi̱ nguˈ, juani ndiˈi̱ tsoˈo ti nguˈ biˈ, xquiˈya chaˈ cua ngusñi nguˈ biˈ chaˈ jiˈi̱ Jesús; masi ñaˈa̱ ti tya laca nguˈ ñati̱ jiˈi̱ xuˈna nguˈ, taca taquiyaˈ nguˈ biˈ jiˈi̱ chaˈ nu nchcuiˈ ycuiˈ Ndyosi juani. Loˈo juaˈa̱ nu nguˈ msu nu ndiˈi̱ tsoˈo ti ni, loˈo cusubi Cristo jiˈi̱ nguˈ biˈ, la cuiˈ juaˈa̱ caca nguˈ biˈ msu jiˈi̱ ycuiˈ Ndyosi.
\v 23 Quiñaˈa̱ tsa chaˈ tsoˈo nguaˈni ycuiˈ Ndyosi cuentya jiˈna, chaˈ ngulaá ma̱ jiˈi̱ nu xñaˈa̱; biˈ chaˈ ná ta ma̱ chacuayáˈ jiˈi̱ ñati̱ chalyuu ti nu ntiˈ cuaˈa jiˈi̱ ma̱ chaˈ ná tyiˈi̱ tsoˈo ti ma̱.
\v 24 Cuˈma̱ tyaˈa ngusñi na chaˈ jiˈi̱ Cristo, ndiˈya̱ clyacua tiˈ scaa ma̱: ngaˈa̱ chaˈ tyiˈi̱ ma̱ chalyuu ñiˈya̱ nu ndiˈi̱ ti ma̱ nu loˈo ngusubi Jesús jiˈi̱ ma̱ tya clyo, ñaˈa̱ ti tya xñi tsoˈo ti ma̱ chaˈ jiˈi̱ ycuiˈ Ndyosi.
\p
\v 25 Bilya ta ycuiˈ nu Xuˈna na chaˈ loˈo naˈ ñiˈya̱ cuaˈni ñati̱ nu ntucua ycuiˈ ti, si caja clyoˈo nguˈ, si ná caja clyoˈo nguˈ; biˈ chaˈ cuentya jnaˈ ti, ta naˈ xi chaˈ loˈo ma̱. Taca xñi ma̱ chaˈ jnaˈ, xquiˈya chaˈ loˈo naˈ nguaˈni tyaˈna tiˈ Ni ˈna; biˈ chaˈ ndyuˈni naˈ cña jiˈi̱ Ni.
\v 26 Lye tsa laca chalyuu juani, ndyacua tsa chaˈ tiˈí jiˈna; biˈ chaˈ tsoˈo la si tyanu na ñiˈya̱ nu ndiˈi̱ ti na, ntiˈ naˈ.
\v 27 Si ntsuˈu clyoˈo ma̱, tyiˈi̱ tsoˈo ma̱ loˈo lacua, ná culoˈo ma̱ jiˈi̱; si ndiˈi̱ ma̱ ycuiˈ ti ma̱, ná culana ma̱ jiˈi̱ ñiˈya̱ nu caca clyoˈo ma̱, ntiˈ naˈ. 
\v 28 Pana la cuiˈ ti chaˈ, siˈi quiˈya laca masi caja clyoˈo ma̱; loˈo juaˈa̱ sca nu cunaˈa̱ nu bilya caja clyoˈo, siˈi quiˈya laca masi caja clyoˈo biˈ. Tsa biˈ ti chaˈ ndube tiˈ naˈ jiˈi̱ ma̱, lcaa ñaˈa̱ chaˈ tiˈí nu caca jiˈi̱ ma̱ nde loo la su ndiˈi̱ ma̱ chalyuu. Ná ntiˈ naˈ chaˈ quiñaˈa̱ tsa chaˈ tiˈí tyacua jiˈi̱ ma̱ xquiˈya chaˈ ntsuˈu clyoˈo ma̱, xquiˈya chaˈ ndiˈi̱ sñiˈ ma̱ liˈ.
\p
\v 29 Cuˈma̱ tyaˈa ngusñi na chaˈ jiˈi̱ Jesús, ndiˈya̱ laca chaˈ nu ta naˈ loˈo ma̱: Tya xti tya tyempo tya lijya̱ jiˈna chalyuu. Biˈ chaˈ cuaˈni yala ma̱ su ndiˈi̱ ma̱ chalyuu; masi ntsuˈu clyoˈo ma̱, siˈi xcuiˈ chaˈ jiˈi̱ clyoˈo ma̱ tyuˈu tyiquee ma̱;
\v 30 masi nxiˈya ma̱, ná ñacui̱ ma̱ chaˈ xñiˈi̱ tiˈ ma̱; masi nxtyí ma̱, ná ñacui̱ ma̱ chaˈ chaa tsa tiˈ ma̱; masi cuiˈya ma̱ sca yuˈba, ná culacua tiˈ ma̱ chaˈ tsa cuˈ ti na jiˈi̱ ma̱ laca biˈ;
\v 31 masi ntsuˈu tsa chaˈ tsoˈo jiˈi̱ ma̱ nde chalyuu, ná culiji tsa ma̱ tyempo jiˈi̱ ma̱ xquiˈya chaˈ tsoˈo biˈ. Cua lijya̱ ti tye tyucui ñaˈa̱ chalyuu, loˈo juaˈa̱ lcaa na nu ntsuˈu chalyuu ngaˈa̱ chaˈ tye chaˈ biˈ. 
\p
\v 32 Cua ntiˈ naˈ chaˈ ná caca xaˈ la chaˈ jiˈi̱ ma̱, chaˈ juaˈa̱ xquiˈya chaˈ biˈ ná caca cuaˈni tsoˈo ma̱ cña. Cuˈma̱ nguˈ quiˈyu nu bilya caja clyoˈo ma̱, taca cuaˈni ma̱ tsa lo ti cña jiˈi̱ ycuiˈ Ndyosi liˈ; cuaˈni ma̱ ñiˈya̱ nu ntiˈ ycuiˈ nu Xuˈna na chaˈ cuaˈni na liˈ.
\v 33 Pana nu cuˈma̱ nu ntsuˈu clyoˈo ma̱, cua ntsuˈu tsa cña jiˈi̱ ma̱ chaˈ caja ñiˈya̱ nu tyiji̱ yuˈu jiˈi̱ ma̱ chalyuu, chaˈ cuaˈni ma̱ ñiˈya̱ nu tsoˈo la ntiˈ clyoˈo ma̱. Tucua lo chaˈ ntsuˈu tyiquee ma̱ liˈ.
\v 34 Loˈo juaˈa̱ cuˈma̱ nguˈ cunaˈa̱ nu ntucua ycuiˈ ti, loˈo juaˈa̱ nu cuañiˈ nu bilya caja clyoˈo, taca cuaˈni ma̱ tsa lo ti cña jiˈi̱ ycuiˈ nu Xuˈna na; juaˈa̱ caca ma̱ ñati̱ jiˈi̱ ycuiˈ Ndyosi tyucui ñaˈa̱ tsaca ma̱, tyucui tyiquee ma̱. Pana nu cuˈma̱ nu cua ntsuˈu clyoˈo ma̱, cua ntsuˈu tsa chaˈ ndube tiˈ ma̱ chaˈ caja ñiˈya̱ nu tyiji̱ yuˈu jiˈi̱ ma̱ chalyuu, chaˈ cuaˈni ma̱ ñiˈya̱ nu tsoˈo la ntiˈ clyoˈo ma̱.
\p
\v 35 Ntiˈ tsa naˈ chaˈ xtyucua naˈ jiˈi̱ cuˈma̱, biˈ chaˈ nda naˈ chaˈ biˈ loˈo ma̱. Siˈi na ndacaˈa naˈ jiˈi̱ ma̱ chaˈ ná caja clyoˈo ma̱, chaˈ ntsuˈu chaˈ cuaˈni ma̱ ñiˈya̱ nu tsoˈo la cuentya jiˈi̱ sa scaa ma̱. Na cua ntiˈ naˈ chaˈ tyucui tyiquee ma̱ cuaˈni ma̱ cña jiˈi̱ ycuiˈ Ndyosi, loˈo liˈ ná caja nu cuaˈni ñuˈu̱ tyucui̱i̱ nu cua nguluˈu Jesús jiˈi̱ ma̱.
\p
\v 36 Tsoˈo si ta sti nu cunaˈa̱ cuañiˈ chacuayáˈ caja clyoˈo sñiˈ, siˈi quiˈya laca biˈ. Cua ndyalaa tiˈ choˈ, cua la cuiˈ tyempo caja clyoˈo. Ngaˈa̱ chaˈ cuaˈni sti nu cunaˈa̱ ñiˈya̱ nu tsoˈo la ntiˈ yu cuentya jiˈi̱ sñiˈ; ná ntsuˈu quiˈya jiˈi̱, masi caja clyoˈo sñiˈ. 
\v 37 Pana la cuiˈ ti tsoˈo cuaˈni xaˈ la nguˈ tyaˈa ma̱, nu tsoˈo la ntiˈ masi ná caja clyoˈo sñiˈ tsiyaˈ ti. Ná tsoˈo si tatsaa nguˈ jiˈi̱ sca ñati̱ chaˈ ta jiˈi̱ sñiˈ chaˈ caja clyoˈo loˈo sñiˈ nguˈ. Ntsuˈu chacuayáˈ jiˈi̱ sca ñati̱ chaˈ cuaˈni ñiˈya̱ nu tsoˈo la ntiˈ yu cuentya jiˈi̱ sñiˈ yu.
\v 38 Juaˈa̱ laca chaˈ cuentya jiˈi̱ nu cunaˈa̱ cuañiˈ tyaˈa ma̱; tsoˈo si ta ma̱ jiˈi̱ sñiˈ ma̱ chaˈ caja clyoˈo loˈo xaˈ ñati̱, loˈo juaˈa̱ sca ti cuayáˈ tsoˈo nduˈni ñati̱ nu ná nda jiˈi̱, ntiˈ naˈ.
\p
\v 39 Cuˈma̱ nguˈ cunaˈa̱ nu cua ngujui clyoˈo ma̱, ná ntsuˈu chacuayáˈ caja clyoˈo loˈo chaca ñati̱ laja loˈo tya luˈú clyoˈo ma̱. Sca ti si cua ngujuii nu quiˈyu jiˈi̱ ma̱, ca liˈ ntsuˈu chacuayáˈ caja clyoˈo ma̱ chaca quiyaˈ. Taca caja clyoˈo ma̱ liˈ chaca quiyaˈ loˈo cua ñaˈa̱ ca nu quiˈyu nu ntiˈ ma̱, sca ti si loˈo yu biˈ laca ñati̱ tyaˈa ngusñi na chaˈ jiˈi̱ Jesús. 
\v 40 Pana ntiˈ naˈ chaˈ tsoˈo la tyuˈu tyiquee ma̱ si ná caja clyoˈo ma̱, si tyanu ma̱ ycuiˈ ti ma̱. Juaˈa̱ nclyacua tiˈ naˈ, chaˈ Xtyiˈi ycuiˈ Ndyosi nacui̱ ˈna chaˈ chcuiˈ naˈ juaˈa̱, ntiˈ naˈ.
\c 8
\s ¿Ha cacu na sca na nu cua nscua slo joˈó?
\p
\v 1 Nde scua naˈ chaca chaˈ nu tsaa slo ma̱, chaˈ ca cuayáˈ tiˈ ma̱ ni chaˈ ndyuˈni ma̱ loˈo ndacu ma̱ msta̱ nu cua ngusta nguˈ slo joˈó tya clyo. Ntsuˈu cuˈma̱ nu ñacui̱ ma̱: “Cua jlo tiˈ ya, cua nda ya cuentya chaˈ ná ntsuˈu chaˈ tacati jiˈi̱ joˈó jua; taca cacu ya msta̱ biˈ”, ñacui̱ ma̱. Chañi tsa chaˈ biˈ. Pana tyixi cuaˈni na loˈo tyaˈa ñati̱ na nu loˈo chcuiˈ na juaˈa̱. Sca ti si ntsuˈu tyiquee na ñaˈa̱ na jiˈi̱ tyaˈa ñati̱ na, si cube tiˈ na jiˈi̱ nguˈ biˈ, ca liˈ taca xtyucua na jiˈi̱ nguˈ.
\v 2 Nu loˈo nduˈni na loˈo nguˈ chaˈ cua jlo tiˈ na sca chaˈ, chaˈ cua laca ngua tsaˈa̱ na sca chaˈ, chaˈ tyixi nda na loˈo nguˈ liˈ. Laca biˈ ñiˈya̱ si ná jlo tiˈ na tsiyaˈ ti, si bilya ca tsaˈa̱ na tsoˈo ti sca chaˈ nu ngaˈa̱ tsa chaˈ ca tsaˈa̱ na.
\v 3 Pana si tsoˈo ntsuˈu tyiquee na ñaˈa̱ na jiˈi̱ ycuiˈ Ndyosi, tyuloo Ni jiˈna liˈ, tyuˈu chaˈ jiˈi̱ Ni loˈo na liˈ.
\p
\v 4 Tsoˈo lacua. Ta na chaˈ loˈo tyaˈa na si tsoˈo cuentya jiˈi̱ ycuiˈ Ndyosi chaˈ cacu na msta̱ nu cua ngusta nguˈ slo joˈó tya clyo. Cua jlo tiˈ na ñiˈya̱ nu laca sca lcui̱ joˈó, lcui̱ ti laca biˈ. Ná tyaca̱ˈ ñaˈa̱ na sca na nu luˈú, ñiˈya̱ nu ñaˈa̱ lcui̱ joˈó biˈ. Sca ti ycuiˈ Ndyosi Sti na ntsuˈu chalyuu.
\v 5 Chañi chaˈ quiñaˈa̱ tsa joˈó ntsuˈu chalyuu, loˈo juaˈa̱ nde cua̱ ntsuˈu xaˈ la joˈó, ntucua biˈ cuentya jiˈi̱ ñati̱ chalyuu. Nduˈni nguˈ jiˈi̱ joˈó biˈ, chaˈ laca biˈ joˈó cuentya jiˈi̱ nguˈ; nduˈni nguˈ chaˈ laca biˈ xuˈna nguˈ.
\v 6 Pana nu ñati̱ tyaˈa ntsuˈu chaˈ jiˈna loˈo Jesús, sca ti ycuiˈ Ndyosi Sti na jlya tiˈ na jiˈi̱ tsiyaˈ ti; la cuiˈ ti juaˈa̱ sca ti ycuiˈ Jesucristo nu Xuˈna na ngusñi na chaˈ jiˈi̱. Ngüiñá Ni tyucui ñaˈa̱ chalyuu, xquiˈya Jesús ndyaˈ lcaa lo na; cuentya jiˈi̱ ycuiˈ Jesús laca lcaa lo na nu ntsuˈu chalyuu, loˈo juaˈa̱ xquiˈya ycuiˈ Jesús ndiˈi̱ na chalyuu.
\p
\v 7 Pana ná lcaa ñati̱ nchca cuayáˈ tiˈ chaˈ biˈ. Ntsuˈu nguˈ tyaˈa ngusñi na chaˈ jiˈi̱ Jesús nu ná nchca cacu sca na nu cua nscua slo joˈó tya clyo. Nu ngua tya saˈni la, cua nguiˈi̱ tsa nguˈ biˈ jiˈi̱ joˈó biˈ; loˈo juani ñaˈa̱ ti tya ntsuˈu tiˈ nguˈ biˈ chaˈ na cacu joˈó laca na nu cacu nguˈ biˈ. Biˈ chaˈ ná ndalo nguˈ biˈ tsiyaˈ ti chaˈ cacu nguˈ cuañaˈ nu ngua msta̱ biˈ; chaˈ cuxi laca chaˈ biˈ cuentya jiˈi̱ nguˈ biˈ.
\v 8 Masi jlo tiˈ na chaˈ sca na cacu na ni, siˈi biˈ laca nu nduˈni chaˈ tsoˈo la na cuentya jiˈi̱ ycuiˈ Ndyosi. Siˈi na caca tsoˈo la na, masi cacu na jiˈi̱; loˈo juaˈa̱ ná sca chaˈ caca jiˈna, masi ná cacu na jiˈi̱.
\v 9 Biˈ chaˈ cuiˈya ma̱ cuentya ñiˈya̱ cuaˈni ma̱ slo nguˈ nu tya nclyacua tsa tiˈ biˈ. Ntsuˈu chacuayáˈ jiˈna chaˈ cacu na cua ñaˈa̱ ca na tuˈni; pana ná tyiqueeˈ tyuˈutsuˈ nguˈ biˈ jiˈi̱ tyucui̱i̱ liñi si ná tsoˈo ti cuaˈni ma̱ slo nguˈ, si cacu ma̱ msta̱ nu nscua slo joˈó tya clyo.
\v 10 Ndiˈya̱ chaˈ caca loˈo ñati̱ nu tya quiñaˈa̱ tsa nclyacua tiˈ jiˈi̱ na nu nscua slo joˈó biˈ liˈ. Ntiˈ nguˈ chaˈ cua jlo tsoˈo tiˈ ma̱ lcaa chaˈ jiˈi̱ Jesús. Nu loˈo ñaˈa̱ nguˈ jiˈi̱ ma̱ chaˈ ngaˈa̱ ma̱ slo joˈó, ndacu ma̱ na laca nu nscua slo joˈó, loˈo nguˈ cuaˈni nguˈ ñiˈya̱ nu ndyuˈni ma̱ ntiˈ nguˈ liˈ, masi chaˈ cuxi laca biˈ cuentya jiˈi̱ nguˈ.
\v 11 Loˈo juaˈa̱ caca cuxi jiˈi̱ nguˈ liˈ, chcunaˈ tyucui̱i̱ jiˈi̱ nguˈ xquiˈya cuˈma̱ nu cua jlo tiˈ ma̱ chaˈ liñi jiˈi̱ ycuiˈ Ndyosi. Tsoˈo la tyiˈu tiˈ ma̱ chaˈ loˈo xquiˈya nguˈ biˈ ngujuii Cristo.
\v 12 Chaˈ cuxi ndyuˈni ma̱ loˈo ycuiˈ Cristo liˈ, xquiˈya chaˈ nguaˈni ma̱ chaˈ cuxi biˈ loˈo nguˈ tyaˈa ngusñi ma̱ chaˈ jiˈi̱ Ni; na ndyuˈni ñuˈu̱ ma̱ jiˈi̱ ycuiˈ nguˈ liˈ, xquiˈya chaˈ tya nclyacua tsa tiˈ nguˈ biˈ. Ná talo nguˈ biˈ si ñaˈa̱ nguˈ chaˈ nduˈni ma̱ juaˈa̱. 
\v 13 Loˈo juaˈa̱ naˈ, tsoˈo la masi ná cacu naˈ cuañaˈ nu cua nscua slo joˈó, chaˈ juaˈa̱ ná cuaˈni nguˈ tyaˈa naˈ chaˈ cuxi xquiˈya naˈ liˈ. Ná ntiˈ naˈ chaˈ tyuˈutsuˈ nguˈ tyaˈa naˈ jiˈi̱ tyucui̱i̱ liñi.
\c 9
\s Ntsuˈu chacuayáˈ jiˈi̱ Pablo, chaˈ ycuiˈ Ndyosi laca nu cua nda cña jiˈi̱ yu
\p
\v 1 Cua ntsuˈu chacuayáˈ ˈna chaˈ cuaˈni naˈ cua ñaˈa̱ ca lo chaˈ. Cua nguaˈa̱ loo ycuiˈ Ndyosi ˈna chaˈ cuaˈni naˈ cña jiˈi̱ Ni, nu loˈo naˈa̱ naˈ jiˈi̱ ycuiˈ Jesús nu Xuˈna na. Ngusñi ma̱ chaˈ jiˈi̱ Jesús juani xquiˈya chaˈ nduˈni naˈ cña jiˈi̱ Ni,
\v 2 masi ntiˈ xaˈ ñati̱ chaˈ siˈi cña jiˈi̱ Ni laca naˈ; pana cuˈma̱ nguˈ Corinto cua nslo ma̱ ˈna, chaˈ cua nda naˈ chaˈ jiˈi̱ Jesús loˈo ma̱ tya clyo. Chañi chaˈ biˈ. Taca jlo tiˈ nguˈ chaˈ juaˈa̱ laca cña nu ndyuˈni naˈ, loˈo ñaˈa̱ nguˈ ñiˈya̱ ndyaca chaˈ biˈ loˈo ma̱. 
\p
\v 3 Ndiˈya̱ nxacui̱ naˈ chaˈ jiˈi̱ nguˈ nu loˈo nchcuiˈ chu̱ˈ ti nguˈ ˈna:
\v 4 Ntsuˈu chacuayáˈ ˈna chaˈ xñi naˈ xi na cacu naˈ loˈo na coˈo naˈ cayaˈ lo cña nu ndyuˈni naˈ, ni naˈ jiˈi̱ nguˈ biˈ.
\v 5 Loˈo juaˈa̱ taca caja clyoˈo naˈ loˈo sca nu cunaˈa̱ nu tyaˈa ngusñi naˈ chaˈ jiˈi̱ Jesús, chaˈ tyaˈa̱ loˈo naˈ jiˈi̱ tyucui̱i̱ lcaa su ndyaˈa̱ naˈ tyijyuˈ, ni naˈ jiˈi̱ nguˈ biˈ. Juaˈa̱ nduˈni tyaˈa ndyaˈa̱ naˈ cña, masi tyaˈa ycuiˈ nu Xuˈna na, masi Pedro, ntsuˈu clyoˈo nguˈ biˈ.
\v 6 Siˈi sca ti naˈ loˈo Bernabé nu ngaˈa̱ chaˈ cuaˈni lye ya cña chaˈ caja na cacu ya, laja loˈo nclyuˈu ya chaˈ jiˈi̱ ycuiˈ Ndyosi jiˈi̱ nguˈ.
\v 7 ¿Ha ná jlo tiˈ ma̱ ñiˈya̱ nduˈni ñati̱ chalyuu chaˈ tyiji̱ yuˈu jiˈi̱ nguˈ chalyuu? Ñiˈya̱ ntiˈ nguˈ sendaru ni, ná ndyaˈa̱ biˈ cusu̱u̱ laja ti, ntsuˈu nu nda cayaˈ jiˈi̱ nguˈ. Loˈo juaˈa̱ ñati̱ nu ntsuˈu cña neˈ quixi̱ˈ ni, ndyiji na cacu nguˈ lo na nu ntyaa nguˈ; nu nguˈ nu ndyaˈa̱ loˈo scu̱ˈ ñati̱ ni, ndyiˈyu nguˈ styiˈ nu ndyuˈu jiˈi̱ scu̱ˈ nguˈ. Biˈ chaˈ ntsuˈu chacuayáˈ jiˈi̱ ya chaˈ caja na nu tyiji̱ yuˈu jiˈi̱ ya chalyuu. Juaˈa̱ ni naˈ jiˈi̱ nguˈ biˈ.
\v 8 Nchcuiˈ naˈ re ñiˈya̱ nu laca chaˈ jiˈi̱ ñati̱ chalyuu, ñiˈya̱ nu ndyiji na ndacu nguˈ; pana la cuiˈ juaˈa̱ nchcuiˈ chaˈ nu nscua lo quityi jiˈi̱ ycuiˈ Ndyosi, chaˈ joˈó nu nguscua Moisés tya saˈni.
\v 9 Ndiˈya̱ nchcuiˈ lo quityi biˈ: “Ná xca̱ˈ ma̱ tuˈba toro loˈo nxatá niˈ nguata trigo chaˈ tyuˈu siˈyu biˈ”. Juaˈa̱ chaˈ nchcuiˈ lo quityi biˈ. Ni siˈi chaˈ jiˈi̱ toro ti nchcuiˈ ycuiˈ Ndyosi, chaˈ tyaˈna tiˈ Ni jiˈi̱ niˈ chaˈ caja xi tyempo cacu niˈ;
\v 10 loˈo chaˈ jiˈi̱ ya nchcuiˈ Ni, jiˈi̱ cuare nu ndyaˈa̱ ya tyijyuˈ chaˈ chcuiˈ ya chaˈ jiˈi̱ ycuiˈ Ndyosi loˈo ñati̱. Ñiˈya̱ nu laca jiˈi̱ nguˈ nu nclyaˈa yuu loˈo toro, ñiˈya̱ nu laca jiˈi̱ nguˈ nu nduˈni clacua, juaˈa̱ laca jiˈi̱ ya; loˈo cuare ntsuˈu chacuayáˈ jiˈi̱ ya chaˈ jña ya xi chaˈ tsoˈo nu ntsuˈu jiˈi̱ nguˈ nu loˈo cua ndye cña jiˈi̱ ya.
\v 11 Nu cña nu ndyuˈni ya cuentya jiˈi̱ ma̱ ni, siˈi sca cña nu taca ñaˈa̱ ma̱ jiˈi̱ laca biˈ, neˈ cresiya jiˈi̱ ma̱ ndyaca cña biˈ; pana taca tyiˈu tiˈ ma̱ jiˈi̱ ya, na laca nu lyiji jiˈi̱ ya chaˈ tyiji̱ yuˈu jiˈi̱ ya nde chalyuu.
\v 12 Xaˈ la tyaˈa ndyuˈni ya cña ndyiji na laca nu lyiji jiˈi̱ nguˈ nu loˈo nda ma̱ xi xcayaˈ nguˈ biˈ. ¿Ha ná tsoˈo si la cuiˈ ti chaˈ caja jiˈi̱ ya, ñiˈya̱ nu ndyiji jiˈi̱ nguˈ biˈ?
\p Tsa biˈ ti chaˈ, ná ndijña ya chaˈ tsoˈo biˈ jiˈi̱ ma̱ tsiyaˈ ti. Ndalo tsa ya jiˈi̱ cua ñaˈa̱ ca chaˈ tiˈí nu ndyacua jiˈi̱ ya, chaˈ ná ntiˈ ya tsiyaˈ ti tacu̱ˈ ya jiˈi̱ chaˈ tsoˈo jiˈi̱ Cristo nu nchcuiˈ ya loˈo ma̱, chaˈ ná cuna ñati̱ jiˈi̱ chaˈ biˈ.
\v 13 Ná tyiqueeˈ cua jlo tiˈ ma̱ ñiˈya̱ nu ndyaca jiˈi̱ nu laca cña neˈ laa tlyu jiˈi̱ nguˈ judío. ¿Ha siˈi la cuiˈ ti neˈ laa biˈ ndyiji na ndacu nguˈ biˈ? Ndyiji na cacu sti joˈó neˈ laa biˈ nu tsa cuˈ ti nxñi msta̱ nu ndyaˈa̱ loˈo nguˈ neˈ laa, chaˈ taqui̱ lyiji nguˈ jiˈi̱ lo mesa jiˈi̱ ycuiˈ Ndyosi; sa yuˈbe ti msta̱ biˈ caja jiˈi̱ sti joˈó biˈ chaˈ cacu nguˈ.
\v 14 Loˈo cuare, loˈo ncliji chalyuu jiˈi̱ ya su ndyaˈa̱ ya tyijyuˈ chaˈ nchcuiˈ ya chaˈ tsoˈo nu jiˈi̱ ycuiˈ Ndyosi loˈo ñati̱, tsoˈo si ta nguˈ xi na tyiji̱ yuˈu jiˈi̱ ya chalyuu.
\v 15 Pana ná ngüijña naˈ na cacu naˈ jiˈi̱ nguˈ tsiyaˈ ti lcaa seˈi̱ su ndyaˈa̱ naˈ. La cuiˈ juaˈa̱ ná nscua naˈ quityi re chaˈ jña naˈ na cacu naˈ jiˈi̱ cuˈma̱, chaˈ ná xñi naˈ na nu ta nguˈ ˈna masi cajaa ycuiˈ naˈ; tsoˈo la ntiˈ naˈ chaˈ nduˈni naˈ cña re juaˈa̱ ti, ná loˈo cayaˈ.
\p
\v 16 Ná tsoˈo si tyucuaa tiˈ naˈ jiˈi̱ ma̱ xquiˈya chaˈ ndyaˈa̱ naˈ nchcuiˈ naˈ chaˈ tsoˈo nu jiˈi̱ Jesús loˈo ñati̱, na cua nguaˈa̱ loo Ni ˈna chaˈ cuaˈni naˈ cña biˈ. Tlyu tsa chaˈ tiˈí caca ˈna si ná chcuiˈ naˈ chaˈ jiˈi̱ Jesús loˈo ñati̱.
\v 17 Nu loˈo cuaˈni naˈ sca cña cuentya ˈna ti, ndu̱ tiˈ naˈ chaˈ caja xcayaˈ naˈ liˈ. Pana xaˈ ñaˈa̱ cña laca cña nu nda Ni ˈna; na cua ndyanu cña biˈ ˈna chaˈ biˈ ti cña cuaˈni naˈ, chaˈ cua ndatsaa Ni ˈna chaˈ cuaˈni naˈ jiˈi̱. Biˈ chaˈ ndyuˈni naˈ cña biˈ.
\v 18 ¿Ha ná caja xcayaˈ naˈ liˈ? Chañi chaˈ caja biˈ ˈna, pana xaˈ lo na laca biˈ liˈ; laca chaˈ tsoˈo tsa ntsuˈu tyiquee naˈ nu loˈo nchcuiˈ naˈ chaˈ tsoˈo jiˈi̱ Jesús loˈo ñati̱. Biˈ chaˈ tsoˈo tsa ntiˈ naˈ, masi ná nda nguˈ xcayaˈ naˈ. Ná ntiˈ naˈ jña naˈ xcayaˈ naˈ jiˈi̱ ma̱, masi ntsuˈu chacuayáˈ chaˈ jña naˈ chaˈ biˈ jiˈi̱ ma̱, laja loˈo ndyuˈni naˈ cña jiˈi̱ ycuiˈ Ni.
\p
\v 19 Ntsuˈu chacuayáˈ cuaˈni naˈ ni cña laca nu ntiˈ naˈ cuaˈni naˈ. Ná tucui ndatsaa ˈna chaˈ cuaˈni naˈ cña jiˈi̱ nguˈ nquichaˈ; pana ntiˈ naˈ chaˈ quiñaˈa̱ la ñati̱ xñi nguˈ chaˈ jiˈi̱ Cristo, biˈ chaˈ nda naˈ chacuayáˈ jiˈi̱ cua ñaˈa̱ ca nguˈ chaˈ tatsaa nguˈ ˈna.
\v 20 Nu loˈo ngaˈa̱ naˈ slo nguˈ judío, liˈ ndyuˈni naˈ ñiˈya̱ nu nduˈni lcaa nguˈ judío, chaˈ xñi la nguˈ judío chaˈ jiˈi̱ Cristo. Nchcuiˈ naˈ chaˈ jiˈi̱ Jesús loˈo nguˈ biˈ, biˈ chaˈ ñiˈya̱ nu nduˈni nguˈ judío loˈo tyaˈa nguˈ, juaˈa̱ nduˈni naˈ slo nguˈ, masi ngaˈaa ntsuˈu chaˈ taquiyaˈ naˈ jiˈi̱ chaˈ cusuˈ jiˈi̱ nguˈ biˈ, nu cña nu nguscua jyoˈo Moisés lo quityi chaˈ cuaˈni nguˈ biˈ tya saˈni la. Pana laca chaˈ cua ntiˈ naˈ chaˈ quiñaˈa̱ la ñati̱ biˈ xñi nguˈ chaˈ jiˈi̱ Cristo.
\v 21 Nguˈ xaˈ tsuˈ ni, ná ngaˈa̱ chaˈ taquiyaˈ nguˈ jiˈi̱ chaˈ nu laca jiˈi̱ nguˈ judío. Biˈ chaˈ ñiˈya̱ si laca naˈ ñati̱ tyaˈa nguˈ, juaˈa̱ ndiˈi̱ naˈ loˈo nguˈ xaˈ tsuˈ liˈ, chaˈ tsoˈo la xñi nguˈ biˈ chaˈ jiˈi̱ Cristo. Laja liˈ ndaquiyaˈ naˈ lcaa chaˈ nu nda ycuiˈ Ndyosi Sti na loˈo na, chaˈ juaˈa̱ ngaˈa̱ chaˈ caca si taquiyaˈ na jiˈi̱ Cristo.
\v 22 Loˈo liˈ, loˈo ndiˈi̱ naˈ loˈo nguˈ tyaˈa ngusñi na chaˈ jiˈi̱ Jesús nu tya lyiji jlya tsoˈo tiˈ nguˈ chaˈ jiˈi̱ Jesús, ñiˈya̱ si stuˈba ti chaˈ laca ˈna loˈo nguˈ, juaˈa̱ ndiˈi̱ naˈ loˈo nguˈ liˈ, chaˈ cuna la nguˈ biˈ chaˈ jiˈi̱ Cristo. Lcua ti lo cña cuaˈni naˈ chaˈ tyajaˈa̱ la ñati̱ xñi nguˈ chaˈ jiˈi̱ Cristo. 
\v 23 Juaˈa̱ nduˈni naˈ lcua ti seˈi̱ su ndyaˈa̱ naˈ, chaˈ nchcuiˈ naˈ loˈo nguˈ chaˈ tsoˈo jiˈi̱ Jesús. Cua ntiˈ naˈ chaˈ ñiˈya̱ ndyaca tsoˈo neˈ cresiya ˈna xquiˈya chaˈ biˈ, la cuiˈ juaˈa̱ caca tsoˈo neˈ cresiya jiˈi̱ lcaa ñati̱.
\p
\v 24 Ndiˈya̱ laca cña nu nda Ni ˈna, ñiˈya̱ ndyaca loˈo cuaˈni nguˈ sca posta loˈo nxna nguˈ. Tyu̱u̱ tyaˈa nguˈ xna nguˈ stuˈba ti liˈ, masi sca ti yu tyiji̱loo jiˈi̱ ca taˈa nguˈ su tye chaˈ biˈ. La cuiˈ juaˈa̱ caca loˈo na, ngaˈa̱ chaˈ tsa cuˈ ti cuaˈni na cña ñaˈa̱ cuayáˈ nu tye chalyuu jiˈna.
\v 25 Loˈo cua xna ti nguˈ sca posta ni, ná taquiyaˈ nguˈ jiˈi̱ sca chaˈ nu cuaˈa jiˈi̱ nguˈ chaˈ ná xna tsoˈo nguˈ; talo nguˈ ñaˈa̱ cuayáˈ nu tyiji̱loo nguˈ jiˈi̱ tyaˈa nguˈ, chaˈ cuaˈni nguˈ ngana. Su cua ndye, liˈ caja xi chaˈ tsoˈo jiˈi̱ nguˈ nu nguaˈni ngana biˈ, masi xti ti tyempo talo chaˈ biˈ, pana xaˈ ñaˈa̱ chaˈ ndyaca loˈo na. Lye tsa ndyuˈni cña tiˈ na lcaa hora, ñaˈa̱ cuayáˈ ta Ni sca chaˈ tsoˈo jiˈna, sca chaˈ nu ná ngaˈa̱ chaˈ tye tsiyaˈ ti.
\v 26 Loˈo naˈ, ñiˈya̱ laca sca ñati̱ nu nxna posta, juaˈa̱ nduˈni naˈ nde chalyuu; liñi tsa nxna naˈ ñaˈa̱ cuayáˈ tyalaa naˈ su ndye tyucui̱i̱. La cuiˈ ñiˈya̱ laca si nxu̱u̱ tyaˈa naˈ loˈo ndacu̱ˈ ti naˈ, ná nducu̱ naˈ ndacu̱ˈ naˈ lo cuiˈi̱ ti.
\v 27 Nchcubeˈ naˈ jiˈi̱ ycuiˈ ca naˈ, chaˈ talo chalyuu ˈna, chaˈ ná xtyanu tiˈi̱ Ni ˈna tsiyaˈ ti. Quiñaˈa̱ tsa chaˈ cua nguluˈu naˈ jiˈi̱ xaˈ ñati̱ cuentya jiˈi̱ ycuiˈ Ni, loˈo juaˈa̱ ntsuˈu chaˈ taquiyaˈ ycuiˈ naˈ jiˈi̱ chaˈ biˈ.
\c 10
\s Ná cuaˈni tlyu na jiˈi̱ cua ñaˈa̱ ca lcui̱ joˈó
\p
\v 1 Cuˈma̱ tyaˈa ngusñi na chaˈ jiˈi̱ Jesús, tya ntiˈ naˈ cachaˈ naˈ jiˈi̱ ma̱ chaca quiyaˈ ñiˈya̱ ngua jiˈi̱ jyoˈo cusuˈ jiˈna, nu loˈo ngutaˈa̱ nguˈ loˈo jyoˈo Moisés nu ngua saˈni. Ndacui sca coo nde cua̱ su ngutaˈa̱ nguˈ biˈ, chaˈ ná ñaˈa̱ nguˈ xñaˈa̱ biˈ jiˈi̱ nguˈ. Tsoˈo ti nteje tacui nguˈ biˈ claˈbe lo hitya su naa Tyujoˈo Ngaˈa, ngutuˈu nguˈ chaca tsuˈ liˈ.
\v 2 Coo nu ndacui biˈ, loˈo juaˈa̱ hitya tyujoˈo biˈ, biˈ laca nu nguaˈni chaˈ ngusñi nguˈ chaˈ jiˈi̱ Moisés; biˈ chaˈ ngutuˈu lcaˈa̱ nguˈ jiˈi̱, ñiˈya̱ laca chaˈ loˈo tyucuatya na cuentya jiˈi̱ Jesús.
\v 3 Ycuiˈ Ndyosi laca nu nda na ndyacu ca taˈa nguˈ biˈ; 
\v 4 la cuiˈ juaˈa̱ ngujui na ndyiˈo lcaa nguˈ biˈ, chaˈ ycuiˈ Ndyosi laca nu cua nda lcaa na biˈ jiˈi̱ nguˈ. Sca quee tlyu nu ngaˈa̱ ca siiˈ cuaˈa̱, ca quiyaˈ quee biˈ ngutuˈu hitya nu ndyiˈo nguˈ. Ycuiˈ Ndyosi laca nu nda hitya nu ndyiˈo nguˈ biˈ, chaˈ masi tya liˈ ngutaˈa̱ ycuiˈ Cristo loˈo nguˈ biˈ, ngunaˈa̱si̱i̱ Ni jiˈi̱ nguˈ su ngutaˈa̱ nguˈ.
\v 5 Masi juaˈa̱ nguaˈni ycuiˈ Ndyosi, ná ntajaˈa̱ nguˈ biˈ taquiyaˈ nguˈ chaˈ jiˈi̱ Ni tsiyaˈ ti. Biˈ chaˈ ngua taja tiˈ Ni jiˈi̱ nguˈ liˈ, nguxtyanu tiˈi̱ Ni jiˈi̱ nguˈ; ca lo nati̱ˈ btyi biˈ ngujuii nguˈ liˈ, ndyanu tyijya̱ nguˈ biˈ toˈ tyucui̱i̱ biˈ.
\p
\v 6 Loˈo juaˈa̱ na, taca tyiˈu tiˈ na ñiˈya̱ nu nguaˈni jyoˈo cusuˈ biˈ nu ngua saˈni. Ná tsoˈo si xcuiˈ na tyuˈu tyiquee na jiˈi̱ chaˈ cuxi, chaˈ la cuiˈ juaˈa̱ nguaˈni nguˈ biˈ tya liˈ.
\v 7 La cuiˈ ti ná tsoˈo chaˈ cuaˈni tlyu na jiˈi̱ lcui̱ joˈó, ñiˈya̱ nu nguaˈni nguˈ biˈ. Ndiˈya̱ nchcuiˈ chaˈ nu nscua lo quityi cusuˈ chaˈ jiˈi̱ ñati̱ biˈ: “Tsa cuˈ ti ndyaˈa̱ nguˈ ji̱i̱. Na ndiˈi̱ ti nguˈ ndyacu nguˈ ndyiˈo nguˈ loˈo tyaˈa nguˈ, liˈ ndatu̱ ti nguˈ chaˈ quijya nguˈ loˈo tyaˈa nguˈ”, nacui̱ lo quityi biˈ. 
\v 8 La cuiˈ ti ná tsoˈo chaˈ cuaˈni subaˈ na loˈo xaˈ cunaˈa̱, ñiˈya̱ nu nguaˈni nguˈ biˈ liˈ. ¿Ñiˈya̱ ngua liˈ? Sca ti tsa̱ ngujuii calaa ntucua sna mil tyaˈa ñati̱ biˈ xquiˈya chaˈ cuxi biˈ.
\v 9 Juaˈa̱ ná tsoˈo chaˈ xtyí loˈo ti na jiˈi̱ ycuiˈ Ndyosi nu Xuˈna na, chaˈ quiñaˈa̱ tsa chaˈ clyu tiˈ ngüiˈya Ni jiˈna. Juaˈa̱ nguaˈni nguˈ biˈ nu ngua saˈni, liˈ ngusuˈba Ni cuaña lijya̱ chaˈ ndyujuii niˈ jiˈi̱ nguˈ biˈ.
\v 10 La cuiˈ ti chaˈ ná ntsuˈu chaˈ chcuiˈ cuxi na jiˈi̱ ycuiˈ Ndyosi. Cua ntsuˈu xi jyoˈo cusuˈ biˈ nu nguaˈni nguˈ juaˈa̱, loˈo liˈ ndye nguˈ ndyujuii Ni jiˈi̱ nguˈ biˈ, chaˈ nda Ni sca xca̱ lijya̱ nu ndyujuii jiˈi̱ nguˈ biˈ.
\p
\v 11 Lcaa chaˈ tlyu biˈ ngua jiˈi̱ jyoˈo cusuˈ biˈ nu ngua saˈni, chaˈ caja ñiˈya̱ tyiˈu tiˈ xaˈ ñati̱ nde loo la na laca nu ngua jiˈi̱ jyoˈo cusuˈ biˈ, ni chaˈ laca ngua jiˈi̱ nguˈ biˈ juaˈa̱. Loˈo juaˈa̱ tya nscua chaˈ biˈ lo quityi chaˈ cube tiˈ na jiˈi̱ chaˈ biˈ. Cua ngulala ti tye chalyuu su ndiˈi̱ na juani;
\v 12 biˈ chaˈ tsoˈo si cube tiˈ ma̱ chaˈ ná tyuˈutsuˈ ma̱ jiˈi̱ tyucui̱i̱ nu liñi ca, si ntiˈ ma̱ chaˈ tsoˈo ti tyiˈi̱ cresiya jiˈi̱ ma̱, chaˈ ná tyacua sca chaˈ cuxi jiˈi̱ ma̱ tsiyaˈ ti.
\v 13 Lcaa quiyaˈ loˈo tyacua sca chaˈ cuxi jiˈi̱ ma̱, ná cube tiˈ ma̱ liˈ, la cuiˈ juaˈa̱ ndyaca jiˈi̱ cua ñaˈa̱ ca ñati̱ chalyuu. Pana ná cube tiˈ ma̱, ñaˈa̱ ycuiˈ Ndyosi jiˈna; lcaa cña nu nacui̱ Ni chaˈ cuaˈni Ni cuentya jiˈna, nduˈni Ni cña biˈ. Ná ta Ni chacuayáˈ chaˈ tyiji̱loo sca chaˈ cuxi jiˈi̱ ma̱ ñaˈa̱ cuayáˈ nu ngaˈaa caca xtyanu ma̱ jiˈi̱; pana la cuiˈ hora loˈo cua cñiloˈo ti chaˈ cuxi biˈ jiˈi̱ ma̱, liˈ xtyucua Ni jiˈi̱ ma̱ chaˈ ná cuaˈni ma̱ jiˈi̱, loˈo liˈ taca clyaá ma̱ jiˈi̱ chaˈ cuxi biˈ.
\p
\v 14 Cuˈma̱ tyaˈa tsoˈo na, ntsuˈu tsa tyiquee naˈ ñaˈa̱ naˈ jiˈi̱ ma̱, biˈ chaˈ nchcuiˈ tsa naˈ loˈo ma̱ juani chaˈ ná cuaˈni tlyu ma̱ tsiyaˈ ti jiˈi̱ lcui̱ joˈó jiˈi̱ nguˈ, ngaˈaa tsaa ma̱ su ntucua biˈ.
\v 15 Ntiˈ naˈ chaˈ nduna tsoˈo ma̱, cua laca nclyacua tsoˈo tiˈ ma̱ ntiˈ naˈ, biˈ chaˈ nchcuiˈ naˈ loˈo ma̱ juaˈa̱. Taca cuiˈya ma̱ cuentya chaˈ chañi laca chaˈ nu nda naˈ loˈo ma̱ juani.
\v 16 Loˈo ndyuˈu tiˈi̱ na stuˈba ti loˈo nguˈ tyaˈa ngusñi na chaˈ jiˈi̱ Jesús ndyiˈyu na, loˈo juaˈa̱ ndacu na liˈ; juaˈa̱ nduˈni na xquiˈya chaˈ ngulacua̱ Jesús jiˈi̱ chaˈ biˈ tya clyo. Biˈ chaˈ clyo nda na tsa xlyaˈbe jiˈi̱ ycuiˈ Ndyosi xquiˈya cña nu nguaˈni Jesús biˈ. Loˈo ndyiˈyu na vino biˈ, liˈ stuˈba ntsuˈu chaˈ jiˈna loˈo ycuiˈ Jesús loˈo lcaa nguˈ tyaˈa na, nu loˈo ntsuˈu tiˈ na chaˈ cua ndyalu tañi ycuiˈ Jesús loˈo ngujuii Ni lo crusi xquiˈya na. Loˈo ndacu na xlyá biˈ, la cuiˈ juaˈa̱ liˈ, stuˈba ntsuˈu chaˈ jiˈna loˈo Jesús loˈo lcaa nguˈ tyaˈa na, nu loˈo ntsuˈu tiˈ na chaˈ nda Jesús jiˈi̱ tyucui ñaˈa̱ ycuiˈ ca chaˈ ngujuii Ni lo crusi xquiˈya na.
\v 17 Sca ti ycuˈ xlyá nscua lo mesa su ndacu na stuˈba ti; loˈo ndyaˈbe xlyá biˈ, liˈ ndyiji na cacu ca taˈa na, masi tyu̱u̱ tsa tyaˈa na. Tsa tlyu ti ndiˈi̱ na chaˈ stuˈba ti laca na ñati̱ jiˈi̱ Jesús.
\p
\v 18 Cuiˈya ma̱ xi cuentya ñiˈya̱ nu nduˈni nguˈ judío. Ndyaˈa̱ loˈo nguˈ jiˈi̱ msta̱ chaˈ sta nguˈ jiˈi̱ lo mesa su nduˈni tlyu nguˈ jiˈi̱ ycuiˈ Ndyosi. Loˈo liˈ ntsuˈu nu laca cña neˈ laa biˈ, nu ndacu na nu ngua msta̱ biˈ. Ntsuˈu chaˈ jiˈi̱ nu ndyacu msta̱ biˈ loˈo ycuiˈ Ndyosi, chaˈ xquiˈya Ni ntucua mesa biˈ.
\v 19 Xaˈ ñaˈa̱ nduˈni nguˈ xaˈ tsuˈ loˈo lcui̱ joˈó jiˈi̱ nguˈ. Loˈo nguˈ biˈ nsta nguˈ cuañaˈ lo mesa chaˈ caca msta̱ jiˈi̱ joˈó jiˈi̱ nguˈ. ¿Ha tsoˈo la chacuayáˈ ntsuˈu jiˈi̱ lcui̱ joˈó biˈ lacua? Ná ntsuˈu chaˈ jiˈi̱ biˈ tsiyaˈ ti. Stuˈba ti ñaˈa̱ cuañaˈ msta̱ biˈ loˈo xaˈ la cuañaˈ.
\v 20 Ndiˈya̱ laca chaˈ loˈo nduˈni tlyu nguˈ jiˈi̱ joˈó biˈ: Siˈi jiˈi̱ ycuiˈ Ndyosi nduˈni tlyu nguˈ biˈ, jiˈi̱ tyu̱u̱ lo cuiˈi̱ xñaˈa̱ nduˈni tlyu nguˈ loˈo nduˈni nguˈ juaˈa̱. Loˈo cuˈma̱ ni, ná tsoˈo cuaˈni tyaˈa ma̱ loˈo cuiˈi̱ xñaˈa̱ biˈ.
\v 21 Ná tsoˈo coˈo ma̱ cuentya jiˈi̱ cuiˈi̱ xñaˈa̱ biˈ, loˈo liˈ coˈo ma̱ na nu cua nda Jesús nu Xuˈna na chaˈ coˈo na. Ná tsoˈo tsiyaˈ ti chaˈ biˈ; ni ná tsoˈo cacu ma̱ cuentya jiˈi̱ cuiˈi̱ xñaˈa̱ biˈ, liˈ nde loo la cacu ma̱ cuentya jiˈi̱ Jesús nu Xuˈna na.
\v 22 ¿Ha ntiˈ na chaˈ ca chi̱i̱ tiˈ ycuiˈ Ndyosi nu Xuˈna na ñaˈa̱ Ni jiˈna? ¿Ha nchca la jiˈna que ycuiˈ Ndyosi lacua, ntiˈ na?
\s Cube tiˈ na jiˈi̱ xaˈ ñati̱, siˈi xcuiˈ chaˈ jiˈi̱ ycuiˈ ca na cube tiˈ na
\p
\v 23 Chañi tsa chaˈ nu nchcuiˈ ñati̱: “Ntsuˈu chacuayáˈ cuaˈni na cua ñaˈa̱ ca chaˈ nu ntiˈ ti na cuaˈni na”, nacui̱ nguˈ. Pana ntsuˈu xi chaˈ nu nduˈni na nu ná taca xtyucua jiˈna tsiyaˈ ti. Chañi chaˈ taca cuaˈni na ñiˈya̱ nu ntiˈ ti na, pana siˈi lcaa chaˈ biˈ nduˈni chaˈ xñi tsoˈo na chaˈ jiˈi̱ ycuiˈ Ndyosi.
\v 24 Ngaˈa̱ chaˈ culacua tiˈ na ñiˈya̱ nu caca tsoˈo la chaˈ jiˈi̱ xaˈ ñati̱, siˈi xcuiˈ na cuentya jiˈna ti culacua tiˈ na.
\p
\v 25 Taca cacu ma̱ lcaa na ndacu nu nchca cayaˈ niˈi̱ lcayaˈ; ná sca culacua tiˈ ma̱ na ca laca biˈ, si tsoˈo, si ná tsoˈo laca biˈ cuentya jiˈi̱ ma̱.
\v 26 Ycuiˈ Ndyosi Sti na ca jiˈi̱ tyucui ñaˈa̱ chalyuu, loˈo juaˈa̱ la cuiˈ Ni ngüiñá Ni lcaa lo na nu ntsuˈu chalyuu.
\p
\v 27 Ná cube tiˈ ma̱ si chcuiˈ sca ñati̱ loˈo ma̱ chaˈ cacu ma̱ xi slo nguˈ, masi sca ñati̱ nu ná ntsuˈu chaˈ jiˈi̱ loˈo ycuiˈ Ndyosi laca biˈ. Tsoˈo si tsaa ma̱ slo nguˈ biˈ si ntiˈ ma̱ lacua. Loˈo liˈ cacu ma̱ jiˈi̱ na laca nu ta nguˈ jiˈi̱ ma̱; ná ntsuˈu chaˈ cube tiˈ ma̱ jiˈi̱ na biˈ, si tsoˈo, si ná tsoˈo laca biˈ cuentya jiˈi̱ ma̱.
\v 28 Sca ti si cachaˈ sca ñati̱ tyaˈa ndyacu ma̱ chaˈ msta̱ nu nscua slo joˈó laca nu cuañaˈ nu ndyacu ma̱ biˈ, liˈ ná tsoˈo chaˈ cacu ma̱ jiˈi̱. Tsoˈo la si cuiˈya nguˈ biˈ cuentya chaˈ cuxi laca na biˈ cuentya jiˈi̱ ma̱, chaˈ caca jlo tiˈ nguˈ chaˈ ná ntsuˈu chaˈ cacu ma̱ na biˈ loˈo ngusñi ma̱ chaˈ jiˈi̱ Jesús.
\v 29 Cuˈma̱ cua jlo tiˈ ma̱ chaˈ biˈ. Chaca yu biˈ tya lyiji caca cuayáˈ tsoˈo tiˈ yu, biˈ chaˈ ná ntiˈ na chaˈ tyuˈutsuˈ yu jiˈi̱ tyucui̱i̱ liñi si ñaˈa̱ yu chaˈ ndyacu ma̱ na biˈ.
\p Ná tyiqueeˈ ñacui̱ ma̱ ˈna liˈ: “¿Ni chaˈ laca xcuiˈ cuentya jiˈi̱ xaˈ ñati̱ culacua tiˈ naˈ? Ntsuˈu chacuayáˈ cuaˈni naˈ ñiˈya̱ nu ntiˈ naˈ cuaˈni naˈ.
\v 30 Si nda tsa naˈ xlyaˈbe jiˈi̱ ycuiˈ Ndyosi cuentya jiˈi̱ na ndacu naˈ, ¿ni chaˈ laca chcuiˈ ñati̱ chaˈ cuxi ˈna loˈo ndacu naˈ jiˈi̱ lacua?” ñacui̱ ma̱ ˈna. 
\v 31 Tsoˈo lacua masi cacu ma̱, masi coˈo ma̱, masi cuaˈni ma̱ lcua ti lo cña nu ndyuˈni ma̱, pana tyiˈu tiˈ ma̱ jiˈi̱ ycuiˈ Ndyosi laja loˈo cuaˈni ma̱ lcaa cña biˈ, chaˈ caca cuayáˈ tiˈ nguˈ liˈ chaˈ tsoˈo tsa laca chaˈ jiˈi̱ ycuiˈ Ndyosi, la cuiˈ chaˈ nu cua ngusñi ma̱. 
\v 32 Ná ta ma̱ chacuayáˈ tyuˈutsuˈ ni tsaca nguˈ jiˈi̱ tyucui̱i̱ liñi jiˈi̱ Cristo; ni nguˈ judío, ni nguˈ xaˈ tsuˈ nu siˈi nguˈ judío laca, ni tsaca ñati̱ tyaˈa ngusñi ma̱ chaˈ jiˈi̱ ycuiˈ Ndyosi, ná tsoˈo tsiyaˈ ti si tyú nguˈ yaˈ nu xñaˈa̱.
\v 33 Lcaa su ndyuˈni naˈ cña ndube tiˈ naˈ jiˈi̱ xaˈ ñati̱, si caca tsoˈo cresiya jiˈi̱ nguˈ loˈo cuaˈni naˈ cña biˈ. Siˈi na tyacua chaˈ tsoˈo jiˈi̱ ycuiˈ ca naˈ, ntiˈ naˈ chaˈ caca tsoˈo cresiya jiˈi̱ cua ñaˈa̱ ca ñati̱, chaˈ caja ñiˈya̱ clyaá nguˈ jiˈi̱ nu cuxi liˈ.
\c 11
\p
\v 1 Biˈ chaˈ cuiˈya tsoˈo ma̱ cuentya ñaˈa̱ cña nu nduˈni naˈ, loˈo la cuiˈ juaˈa̱ cuaˈni ma̱ liˈ, chaˈ ñiˈya̱ laca cña nu nguaˈni Cristo, juaˈa̱ laca cña nu nduˈni naˈ.
\s Ñiˈya̱ cuaˈni nu nguˈ cunaˈa̱ loˈo ndyuˈu tiˈi̱ nguˈ loˈo na
\p
\v 2 Cuˈma̱ tyaˈa ngusñi na chaˈ jiˈi̱ Cristo, tsoˈo tsa ntsuˈu tyiquee naˈ ñaˈa̱a̱ jiˈi̱ ma̱, chaˈ xcuiˈ ndyiˈu tiˈ ma̱ ˈna, loˈo juaˈa̱ nduˈni ma̱ lcaa lo chaˈ nu nguluˈu naˈ jiˈi̱ ma̱.
\v 3 Ndiˈya̱ ntiˈ naˈ chaˈ caca cuayáˈ tiˈ ma̱: Ycuiˈ Ndyosi laca loo jiˈi̱ Cristo, loˈo juaˈa̱ Cristo laca loo jiˈi̱ lcaa ñati̱; la cuiˈ juaˈa̱ nu quiˈyu laca loo jiˈi̱ nu cunaˈa̱.
\v 4 Biˈ chaˈ ná tyucua smalyu scuaˈ que nguˈ quiˈyu neˈ laa su ndyuˈu tiˈi̱ ma̱; masi chcuiˈ yu loˈo ycuiˈ Ndyosi, masi cachaˈ yu sca chaˈ jiˈi̱ Ni jiˈi̱ ñati̱, ná tyucua smalyu hique yu. Loo laca Cristo jiˈi̱ yu, biˈ chaˈ ná cuaˈni tyucuaa tiˈ yu jiˈi̱ Ni ñiˈya̱ si tyucua smalyu hique yu.
\v 5-6 Pana nu nguˈ cunaˈa̱ ni, tsoˈo si sta nguˈ payu̱ hique nguˈ loˈo ndyuˈu tiˈi̱ lcaa nguˈ neˈ laa; masi chcuiˈ nguˈ loˈo ycuiˈ Ndyosi, masi cachaˈ nguˈ sca chaˈ jiˈi̱ ycuiˈ Ndyosi jiˈi̱ ñati̱, sta nguˈ payu̱ hique nguˈ, chaˈ ná cuaˈni tyucuaa tiˈ nguˈ cunaˈa̱ jiˈi̱ clyoˈo nguˈ ca su ndyuˈu tiˈi̱ nguˈ liˈ, chaˈ loo la laca nu quiˈyu jiˈi̱ nu cunaˈa̱. Nclyá cuˈma̱ quicha̱ˈ hique nu cunaˈa̱ nu ngua saˈa jiˈi̱ nguˈ, chaˈ ca tyujuˈu tiˈ; la cuiˈ juaˈa̱ stuˈba ti laca nu cunaˈa̱ nu ná sta payu̱ hique neˈ laa. Biˈ chaˈ cuˈma̱ nguˈ cunaˈa̱, si ná ntiˈ ma̱ cuaˈni tyucuaa tiˈ ma̱ jiˈi̱ nu nguˈ quiˈyu su ndyuˈu tiˈi̱ ma̱ loˈo nguˈ, tsoˈo la si tacu̱ˈ ma̱ hique ma̱ liˈ; ná ntsuˈu chaˈ ca tyujuˈu tiˈ ma̱ liˈ.
\v 7 Ná ntsuˈu chaˈ tacu̱ˈ nguˈ quiˈyu hique nguˈ, chaˈ ycuiˈ Ndyosi ngüiñá jiˈi̱ sca nu quiˈyu tya clyo; ñiˈya̱ nu ñaˈa̱ ycuiˈ Ni, juaˈa̱ ñaˈa̱ ngüiñá Ni jiˈi̱ nu quiˈyu biˈ. Pana xaˈ chaˈ laca jiˈi̱ nu cunaˈa̱, tsoˈo tsa ñaˈa̱ nu cunaˈa̱ xquiˈya nu quiˈyu.
\v 8 Clyo ngüiñá ycuiˈ Ndyosi jiˈi̱ nu quiˈyu, tiyaˈ la liˈ ngüiñá Ni jiˈi̱ nu cunaˈa̱. Tyijya̱ siiˈ nu quiˈyu ngulo Ni chaˈ ngüiñá Ni jiˈi̱ nu cunaˈa̱, siˈi tyijya̱ nu cunaˈa̱ ngulo ycuiˈ Ndyosi loˈo ndyaˈ nu quiˈyu; 
\v 9 biˈ chaˈ xquiˈya nu quiˈyu ndyaˈ nu cunaˈa̱ nu ngua clyo, siˈi xquiˈya nu cunaˈa̱ ndyaˈ nu quiˈyu.
\v 10 Tsoˈo la tyacu̱ˈ hique nu cunaˈa̱ lacua, chaˈ caca cuayáˈ tiˈ nguˈ chaˈ ntsuˈu nu laca loo jiˈi̱ nguˈ. Hasta nu xca̱ jiˈi̱ ycuiˈ Ndyosi nde cua̱ nu ndyaˈa̱ lo yuu su ndyuˈu tiˈi̱ ma̱, loˈo biˈ caca cuayáˈ tiˈ chaˈ biˈ liˈ, loˈo ñaˈa̱ nguˈ jiˈi̱ nguˈ cunaˈa̱.
\v 11 Pana juani stuˈba ti ngusñi na chaˈ jiˈi̱ Jesús, masi quiˈyu na, masi cunaˈa̱ na. Ná caja ñiˈya̱ tyiˈi̱ nu quiˈyu chalyuu si ná loˈo nu cunaˈa̱; juaˈa̱ nu cunaˈa̱ ni, ná caja ñiˈya̱ tyiˈi̱ chalyuu si ná loˈo nu quiˈyu. 
\v 12 Chañi chaˈ xquiˈya nu quiˈyu ndyaˈ nu cunaˈa̱ tya clyo, pana la cuiˈ juaˈa̱ chañi chaˈ nu cunaˈa̱ laca nu nduˈni cala jiˈi̱ nu quiˈyu juani; loˈo juaˈa̱ ycuiˈ Ndyosi laca nu nduˈni chaˈ tyuˈú tyucuaa lo nguˈ biˈ chalyuu.
\p
\v 13 Ycuiˈ ca ma̱ cachaˈ liñi ma̱ ˈna si tsoˈo ntiˈ ma̱ chaˈ chcuiˈ sca nu cunaˈa̱ loˈo ycuiˈ Ndyosi loˈo ntucua yaala ti hique nu cunaˈa̱ biˈ.
\v 14 Nu na ñati̱ chalyuu na, cua jlo tiˈ na ñiˈya̱ ñaˈa̱ quicha̱ˈ hique na. Juaˈa̱ laca chaˈ jiˈna, ntyujuˈu tsa tiˈ na si tonu tsa quicha̱ˈ hique nu quiˈyu.
\v 15 Siˈi juaˈa̱ ntiˈ na loˈo nu cunaˈa̱, tsoˈo tsa ntiˈ na si tyucui̱ quicha̱ˈ hique nu cunaˈa̱. Cuaˈnijoˈo quicha̱ˈ hique nguˈ jiˈi̱ nguˈ, chaˈ ná ca tyujuˈu tiˈ nguˈ.
\v 16 Si chcuiˈ cuxi nguˈ xquiˈya chaˈ ndyacu̱ˈ hique nguˈ, tsoˈo si caca cuayáˈ tiˈ nguˈ biˈ, chaˈ sca ti cuayáˈ nduˈni ya ñiˈya̱ nu nduˈni lcaa ñati̱ jiˈi̱ Jesucristo lcua ti quichi̱ tyi nguˈ.
\s Chaˈ cuxi nu ndyaca nu loˈo ndyacu nguˈ si̱i̱ nu nguluˈu Jesús jiˈna chaˈ cuaˈni na
\p
\v 17 Chaca chaˈ nscua naˈ re, chaˈ caca cuayáˈ tiˈ ma̱ chaˈ ná ndiya tiˈ naˈ cña nu ndyuˈni ma̱ loˈo ndyuˈu tiˈi̱ ma̱ chaˈ cacu ma̱ si̱i̱ nu nguluˈu Jesús jiˈna chaˈ cuaˈni na. Cua nscua chaˈ caca tsoˈo cresiya jiˈi̱ ma̱ liˈ, nu loˈo cacu ma̱ si̱i̱ biˈ; pana xaˈ ñaˈa̱ ndyuˈni biˈ loˈo ma̱, ndyuˈni ñuˈu̱ biˈ jiˈi̱ cresiya jiˈi̱ ma̱ juani.
\v 18 Nacui̱ nguˈ chaˈ ná tsoˈo nduˈni ma̱ su ndyuˈu tiˈi̱ ma̱ chaˈ cacu ma̱ si̱i̱ biˈ. Xi xaˈ ca ñaˈa̱ nduˈni sa scaa ma̱, nacui̱ nguˈ. Cua jlo tiˈ naˈ chaˈ la cuiˈ juaˈa̱ ndyaca loˈo cuˈma̱ si ntiˈ.
\v 19 Si juaˈa̱ ná stuˈba ntsuˈu chaˈ jiˈi̱ ma̱ loˈo tyaˈa ma̱, chañi tiyaˈ la liˈ taca ca cuayáˈ tiˈ na tilaca nu chañi ca ndaquiyaˈ chaˈ jiˈi̱ Jesús.
\v 20 Pana ná tsoˈo chaˈ ngaˈaa nduˈni ma̱ si̱i̱ ñiˈya̱ tyaˈa si̱i̱ nu nguluˈu ycuiˈ Jesús jiˈna, chaˈ cuaˈni na nu loˈo ndyuˈu tiˈi̱ ma̱ loˈo tyaˈa ma̱ liˈ.
\v 21 Loˈo ndyalaa hora cacu ma̱, liˈ yala ti ndacu ma̱ si̱i̱ jiˈi̱ ycuiˈ ti ma̱, ná nda ma̱ tyempo tsiyaˈ ti cacu xaˈ la tyaˈa ma̱; biˈ chaˈ ntsuˈu nguˈ tyaˈa ma̱ nu ná ndyiji cacu tsoˈo, loˈo juaˈa̱ ntsuˈu xaˈ la nguˈ nu hasta nchca cuˈbi nguˈ, chaˈ quiñaˈa̱ tsa na ngusñi nguˈ ndyiˈo nguˈ.
\v 22 Taca cacu ma̱ coˈo ma̱ toˈ tyi ma̱ si ntyuteˈ tsa ma̱. Pana ñiˈya̱ nu nduˈni ma̱ juani, na nduˈni ñuˈu̱ ma̱ jiˈi̱ tyaˈa ndiˈi̱ ma̱, tyaˈa ngusñi ma̱ chaˈ jiˈi̱ ycuiˈ Ndyosi, ñaˈa̱ cuayáˈ nda ma̱ chaˈ tyujuˈu tiˈ jiˈi̱ nguˈ tiˈi tyaˈa ngusñi ma̱ chaˈ jiˈi̱ Jesús. Ná tyiqueeˈ cua ngua cuayáˈ tiˈ ma̱ na laca nu ntiˈ naˈ chcui̱ˈ loˈo ma̱ juani, chaˈ ngaˈaa ntsuˈu chaˈ tsoˈo nu caca chcui̱ˈ loˈo ma̱ tsiyaˈ ti cuentya jiˈi̱ chaˈ biˈ.
\s Si̱i̱ nu nguluˈu Jesús nu Xuˈna na chaˈ cacu na
\p
\v 23 Ndiˈya̱ chaˈ nclyuˈu naˈ jiˈi̱ ma̱, la cuiˈ chaˈ nu ndyuna naˈ loˈo nchcuiˈ ñati̱ nu ngua tsaˈa̱ jiˈi̱ ycuiˈ nu Xuˈna na tya clyo: La cuiˈ talya nu loˈo ndyujuiˈ nguˈ cresiya jiˈi̱ Jesús, laja loˈo tya ndiˈi̱ ñati̱ biˈ loˈo Jesús, liˈ ndayaˈ Jesús jiˈi̱ xlyá,
\v 24 ndya yu xlyaˈbe jiˈi̱ ycuiˈ Ndyosi Sti na, loˈo liˈ ngusaˈbe yu xlyá biˈ; liˈ nacui̱ Jesús jiˈi̱ tyaˈa ndyaˈa̱ yu: “Jacu ma̱ xlyá re; ñiˈya̱ ntiˈ cuañaˈ naˈ, juaˈa̱ ntiˈ xlyá re. Cuentya jiˈi̱ ma̱ laca chaˈ nu chcubeˈ naˈ lo crusi, biˈ chaˈ tyiˈu tiˈ ma̱ ˈna loˈo cacu ma̱ xlyá re”, nacui̱ Jesús jiˈi̱ nguˈ biˈ.
\v 25 Tiyaˈ la liˈ loˈo cua ndye nguaˈni nguˈ si̱i̱, liˈ ndayaˈ Jesús jiˈi̱ vaso; ndiˈya̱ nacui̱ yu jiˈi̱ nguˈ liˈ: “Loˈo coˈo ma̱ na nu ntsuˈu neˈ vaso re, liˈ tyiˈu tiˈ ma̱ chaˈ tyalú tañi naˈ xquiˈya quiˈya nu ntsuˈu jiˈi̱ lcaa ñati̱, chaˈ juaˈa̱ quiñi chaˈ jiˈi̱ ycuiˈ Ndyosi Sti naˈ loˈo nguˈ. Loˈo coˈo ma̱ na re, tyiˈu tiˈ ma̱ ˈna liˈ”, nacui̱ Jesús jiˈi̱ nguˈ.
\v 26 Biˈ chaˈ lcaa quiyaˈ loˈo cacu ma̱ xlyá biˈ, loˈo coˈo ma̱ na nu ntsuˈu neˈ vaso biˈ, ñaˈa̱ cuayáˈ nu ca̱a̱ Jesús chaca quiyaˈ, liñi culuˈu ma̱ jiˈi̱ ñati̱ chaˈ ngujuii Jesús lo crusi xquiˈya na.
\s Ñiˈya̱ nu ngaˈa̱ chaˈ cacu na si̱i̱ biˈ
\p
\v 27 Ndiˈya̱ ndyaca liˈ: ntsuˈu quiˈya jiˈna loˈo ycuiˈ Ndyosi, si ná tyucui tyiquee na cacu na coˈo na si̱i̱ jiˈi̱ ycuiˈ Ni; na nduˈni cuxi na jiˈi̱ ycuiˈ nu Xuˈna na liˈ, chaˈ ná ndyiˈu tsoˈo tiˈ na chaˈ nda Jesús jiˈi̱ tyucui ñaˈa̱ ycuiˈ ca yu ngujuiˈi̱ caˈa̱ nguˈ jiˈi̱ yu lo crusi, cuati ndyalú tañi yu lo crusi loˈo ngujuii yu juaˈa̱ xquiˈya na.
\v 28 Biˈ chaˈ ntsuˈu chaˈ culacua tsoˈo tiˈ na loˈo cacu na si̱i̱ biˈ; liˈ tyucui tyiquee na cacu na xlyá biˈ, coˈo na na nu ntsuˈu neˈ vaso biˈ.
\v 29 Si ná culacua tsoˈo tiˈ na ni chaˈ laca nu ndacu na jiˈi̱, ni chaˈ laca nu ndyiˈyu na jiˈi̱, liˈ ntsuˈu quiˈya jiˈna loˈo ycuiˈ Ndyosi, chaˈ ná ndyiˈu tiˈ na jiˈi̱ ycuiˈ Jesús, loˈo juaˈa̱ ná ntsuˈu tiˈ na jiˈi̱ tyaˈa na nu stuˈba ndyuˈni tlyu na jiˈi̱ Ni.
\v 30 Biˈ chaˈ quiñaˈa̱ tsa cuˈma̱ nchca quicha ma̱, loˈo juaˈa̱ nchca ñuˈu̱ tiˈ ma̱, loˈo juaˈa̱ ntsuˈu cuˈma̱ nu ndyijii tsiyaˈ ti;
\v 31 pana si culacua tsoˈo tiˈ na tya clyo loˈo cacu na si̱i̱ biˈ, ná ntsuˈu chaˈ ca tyaala Ni jiˈna juaˈa̱ liˈ.
\v 32 Nchca tyaala Ni jiˈna juani, loˈo juaˈa̱ nchcubeˈ Ni jiˈna xquiˈya chaˈ cuxi nu ndyuˈni na, chaˈ tiyaˈ la loˈo cua ndye chalyuu ná tsaa na ca bilyaa loˈo ñati̱ nu ná ndaquiyaˈ jiˈi̱ Ni tsiyaˈ ti.
\p
\v 33 Cuˈma̱ tyaˈa ngusñi na chaˈ jiˈi̱ Jesús, tyiˈu tiˈ ma̱ chaˈ biˈ loˈo tyuˈu tiˈi̱ ma̱ chaˈ cuaˈni ma̱ si̱i̱ biˈ; jatya ma̱ xi jiˈi̱ tyaˈa ma̱ chaˈ stuˈba ti xana cacu ma̱ loˈo lcaa tyaˈa ma̱.
\v 34 Si ntsuˈu ma̱ nu ntyuteˈ ma̱, jacu ma̱ tyaja toˈ tyi ti ma̱ clyo. Loˈo liˈ ngaˈaa cuaˈni cuxi ma̱ loˈo tyuˈu tiˈi̱ ma̱, liˈ ná ntsuˈu chaˈ caca tyaala Ni jiˈi̱ ma̱. Loˈo ca̱a̱ naˈ, taca quiñi nu xaˈ la chaˈ biˈ jiˈna loˈo cuˈma̱ liˈ.
\c 12
\s Cña nu nduˈni Xtyiˈi ycuiˈ Ndyosi chaˈ caca cuaˈni sa scaa na
\p
\v 1 Cuˈma̱ tyaˈa ngusñi na chaˈ jiˈi̱ Jesús, ntsuˈu sca chaˈ nu ntiˈ naˈ chaˈ caca cuayáˈ tiˈ ma̱ cuentya jiˈi̱ cña nu caca jiˈi̱ sa scaa na xquiˈya Xtyiˈi ycuiˈ Ndyosi. 
\p
\v 2 Cua jlo tiˈ ma̱ ñiˈya̱ nu nguaˈni ma̱ tya saˈni la, nu loˈo bilya cuna ma̱ chaˈ jiˈi̱ Jesús; na nguñiloˈo lcui̱ joˈó jiˈi̱ ma̱, joˈó nu cuˈu̱ ti, chaˈ jlya tiˈ ma̱ lcua ti lo chaˈ nu ntsuˈu jiˈi̱ joˈó biˈ.
\v 3 Biˈ chaˈ ntiˈ tsa naˈ chaˈ caca cuayáˈ tiˈ ma̱ chaˈ re. Siˈi Xtyiˈi ycuiˈ Ndyosi nduˈni chaˈ ñacui̱ nguˈ: “Cuiñaja laca nu Jesús biˈ”. Ná taca ñacui̱ nguˈ juaˈa̱ xquiˈya Xtyiˈi ycuiˈ Ndyosi. Loˈo ñacui̱ nguˈ: “Xuˈna na laca Jesús”, Xtyiˈi ycuiˈ Ndyosi laca nu nduˈni chaˈ ñacui̱ nguˈ juaˈa̱ liˈ.
\p
\v 4 Tyu̱u̱ lo chaˈ nda ycuiˈ Ndyosi jiˈna chaˈ caca cuaˈni na sca cña jiˈi̱ Ni, pana sca ti Xtyiˈi ycuiˈ Ndyosi nduˈni chaˈ taca cuaˈni na cña biˈ.
\v 5 Loˈo juaˈa̱ xaˈ ñaˈa̱ cña ndyuˈni sa scaa na, pana cuentya jiˈi̱ ycuiˈ Ndyosi ndyuˈni lcaa na cña biˈ. 
\v 6 Masi ná stuˈba ndyuˈni lcaa na, pana sca ti ycuiˈ Ndyosi nduˈni chaˈ taca cuaˈni na cña biˈ, ca taˈa na. 
\v 7 Nduˈni Xtyiˈi ycuiˈ Ndyosi loˈo na chaˈ taca cuaˈni lcaa na sca cña cuentya jiˈi̱ ycuiˈ Ni, ca taˈa na nu ntsuˈu chaˈ jiˈna loˈo Jesús; biˈ laca sca lo cña nu xtyucua jiˈi̱ ca taˈa na, loˈo juaˈa̱ xquiˈya chaˈ biˈ cua jlo tiˈ na chaˈ cua ntsuˈu Xtyiˈi ycuiˈ Ndyosi neˈ cresiya jiˈna.
\v 8 Ndiˈya̱ laca cña nu taca cuaˈni na xquiˈya Xtyiˈi ycuiˈ Ndyosi: ntsuˈu nguˈ nu ndachaˈ liñi ñiˈya̱ nu ngua jiˈi̱ Jesús; loˈo juaˈa̱ ntsuˈu nguˈ nu tsoˈo tsa nclyuˈu tyucui̱i̱ chaˈ xñi na chaˈ jiˈi̱ ycuiˈ Ndyosi;
\v 9 loˈo juaˈa̱ ntsuˈu nguˈ nu tsoˈo tsa jlya tiˈ jiˈi̱ ycuiˈ Ndyosi; loˈo juaˈa̱ ntsuˈu nguˈ nu nchca jiˈi̱ cuaˈni chaˈ tyaca tsoˈo nu quicha chacuayáˈ jiˈi̱ Jesús; 
\v 10 loˈo juaˈa̱ ntsuˈu nguˈ nu nchca jiˈi̱ nduˈni xaˈ la chaˈ tlyu chacuayáˈ jiˈi̱ ycuiˈ Ndyosi, cña nu ná nchca cuaˈni ñati̱ nquichaˈ; cuati ntsuˈu xaˈ la nguˈ nu nchca jiˈi̱ ndachaˈ jiˈi̱ ñati̱ sca chaˈ nu nda ycuiˈ Ndyosi loˈo nguˈ biˈ; cuati juaˈa̱ ntsuˈu nguˈ nu nchca tii ni cña nduˈni sa scaa nguˈ, si cuentya jiˈi̱ Xtyiˈi ycuiˈ Ndyosi nduˈni nguˈ cña, si siˈi cuentya jiˈi̱ ycuiˈ Ndyosi nduˈni nguˈ cña; loˈo juaˈa̱ ntsuˈu nguˈ nu nchca jiˈi̱ nchcuiˈ chaˈcña jiˈi̱ xaˈ la ñati̱; juaˈa̱ tya ntsuˈu xaˈ la nguˈ nu nchca jiˈi̱ xtyacui chaˈ biˈ, chaˈ caca cuayáˈ tiˈ lcaa ñati̱ ni chaˈ nda nguˈ biˈ liˈ.
\v 11 Sca ti Xtyiˈi ycuiˈ Ndyosi nduˈni chaˈ nchca jiˈi̱ ñati̱ cuaˈni lcaa cña biˈ; biˈ laca nu nda sca lo cña cuaˈni sa scaa na, ñiˈya̱ nu ntsuˈu tyiquee Ni chaˈ caca jiˈna.
\s Sca ti ñati̱ laca na loˈo lcaa ñati̱ tyaˈa ngusñi na chaˈ jiˈi̱ Jesús
\p
\v 12 Nu ycuiˈ na ni, sca ti ñati̱ laca sca na, masi tyu̱u̱ tsa tyaˈa tyijya̱ ntsuˈu laja cuañaˈ scaa na. La cuiˈ juaˈa̱ laca loˈo ñaˈa̱ taju tyaˈa ngusñi na chaˈ jiˈi̱ Cristo; sca ti taju ñati̱ laca na, masi xaˈ ca ñaˈa̱ nduˈni sa scaa na.
\v 13 Ca taˈa na, masi nguˈ judío, masi nguˈ xaˈ tsuˈ laca na, masi msu nu ngüiˈya ñati̱, masi msu nu ndiˈi̱ tsoˈo ti laca na, na cua ntyucuatya na chacuayáˈ jiˈi̱ Xtyiˈi ycuiˈ Ndyosi; cua ndyanu Xtyiˈi ycuiˈ Ndyosi biˈ neˈ cresiya jiˈi̱ sa scaa na, chaˈ stuˈba ntsuˈu tyiquee na loˈo lcua ti tyaˈa ñati̱ nu ngusñi chaˈ jiˈi̱ Cristo. 
\p
\v 14 Tyu̱u̱ tsa tyaˈa tyijya̱ ntsuˈu laja cuañaˈ na nu nxtyucua jiˈna nu loˈo ndyuˈni na cña nde chalyuu, siˈi sca ti tyijya̱ nu ndulo la jiˈna.
\v 15 Si ndiˈya̱ chcuiˈ quiyaˈ na loˈo na: “Siˈi yaˈ nuˈu̱ laca naˈ, biˈ chaˈ ná ntsuˈu chaˈ jnaˈ loˈo nuˈu̱”, ñacui̱ biˈ. ¿Ñiˈya̱ ñacui̱ ta na? Pana ná nchca xuu biˈ, ca ñaˈa̱ ngalya biˈ jiˈi̱ tyucui ñaˈa̱ na.
\v 16 Loˈo liˈ si ndiˈya̱ ñacui̱ jyaca̱ na jiˈna: “Siˈi cloo nuˈu̱ laca naˈ, biˈ chaˈ ná ntsuˈu chaˈ jnaˈ loˈo nuˈu̱”, ñacui̱ biˈ. ¿Ñiˈya̱ ñacui̱ ta na? Pana ná nchca xuu biˈ, na ca ñaˈa̱ ngalya biˈ jiˈi̱ tyucui ñaˈa̱ na. 
\v 17 Ná ntsuˈu su cuna na liˈ, si xcuiˈ cloo na laca tyucui ñaˈa̱ na. ¿Ñiˈya̱ caca cui̱ˈ na sca na si xcuiˈ jyaca̱ na laca tyucui ñaˈa̱ na?
\v 18 Na cua ngusta seˈi̱ ti ycuiˈ Ndyosi scaa tyijya̱ laja cuañaˈ na, chaˈ ñiˈya̱ nu ndiya tiˈ Ni, juaˈa̱ ngüiñá Ni jiˈna.
\v 19 Ná laca na sca ñati̱ si sa yuˈbe ti na;
\v 20 pana juaˈa̱ laca chaˈ jiˈna chaˈ sca ti ñati̱ laca sca na, masi tyu̱u̱ tsa tyaˈa tyijya̱ ntsuˈu laja cuañaˈ na.
\p
\v 21 Ná ca ñacui̱ cloo na jiˈi̱ yaˈ na: “Ná cuaˈnijoˈo nuˈu̱ ˈna”. Loˈo juaˈa̱ ná ca ñacui̱ scuaˈ hique na jiˈi̱ quiyaˈ na: “Ná ntsuˈu su cuaˈnijoˈo nuˈu̱ ˈna”.
\v 22 Masi ntiˈ na chaˈ xti la cña nduˈni sca lo tyijya̱ na, biˈ laca nu lye la ndulo jiˈna;
\v 23 loˈo juaˈa̱ lacuˈ na steˈ chaˈ ntiˈ na chaˈ ná tsoˈo ñaˈa̱ xaˈ la seˈi̱ laja cuañaˈ na. Sca seˈi̱ su tacati jiˈna, nu ntyujuˈu tiˈ na si ñaˈa̱ nguˈ jiˈi̱, lcaa hora ndyacu̱ˈ lateˈ lo seˈi̱ biˈ;
\v 24 pana xaˈ la seˈi̱ laja cuañaˈ na, nda na chacuayáˈ masi ná tacu̱ˈ lateˈ lo biˈ. Juaˈa̱ ngüiñá ycuiˈ Ndyosi jiˈi̱ tyucui ñaˈa̱ na, chaˈ la cuiˈ seˈi̱ laja cuañaˈ na nu ná ñaˈa̱ nguˈ jiˈi̱, biˈ laca nu tacati la cuentya jiˈna.
\v 25 Pana stuˈba ti nduˈni lcaa tyijya̱ laja cuañaˈ na cña, stuˈba ti chaˈ jiˈi̱ sca tyijya̱ na su ngalya loˈo xi xaˈ la tyijya̱ na.
\v 26 Loˈo quicha xi sca tyijya̱ na, tyucui ñaˈa̱ na tiˈí liˈ; loˈo ndacaˈa na jiˈi̱ sca tyijya̱ na, tyucui ñaˈa̱ na tsoˈo ntiˈ na liˈ. (La cuiˈ juaˈa̱ laca ma̱, tyucui ñaˈa̱ tsaca taju cuˈma̱ nu cua ngusñi chaˈ jiˈi̱ Cristo). 
\p
\v 27 Ca taˈa cuˈma̱ lacua, stuˈba chaˈ jiˈi̱ ma̱ loˈo lcaa ñati̱ tyaˈa ngusñi na chaˈ jiˈi̱ Cristo scaa quichi̱; loˈo juaˈa̱ sa scaa ma̱ laca ma̱ ñati̱ jiˈi̱ Cristo. 
\v 28 Tsoˈo tsa ngusubi ycuiˈ Ndyosi jiˈi̱ ñati̱ nu caca cña jiˈi̱ laja lcaa tyaˈa ñati̱ nu cua ngusñi chaˈ jiˈi̱ Cristo scaa quichi̱: clyo ngusubi Ni jiˈi̱ ñati̱ nu ndyaˈa̱ xaˈ quichi̱ tyijyuˈ la chaˈ chcuiˈ nguˈ chaˈ jiˈi̱ Jesús loˈo nguˈ quichi̱ biˈ; liˈ ngusubi Ni jiˈi̱ ñati̱ nu ndachaˈ jiˈi̱ tyaˈa nguˈ sca chaˈ nu cua nda ycuiˈ Ndyosi loˈo nguˈ; loˈo juaˈa̱ ntsuˈu ñati̱ nu liñi tsa nclyuˈu chaˈ jiˈi̱ Jesús jiˈi̱ tyaˈa nguˈ; loˈo juaˈa̱ ntsuˈu ñati̱ nu nduˈni chaˈ tlyu chacuayáˈ jiˈi̱ ycuiˈ Ndyosi, cña nu ná nchca cuaˈni ñati̱ nquichaˈ; loˈo juaˈa̱ ntsuˈu ñati̱ nu nchca jiˈi̱ cuaˈni chaˈ tyaca tsoˈo nu quicha chacuayáˈ jiˈi̱ Jesús; loˈo juaˈa̱ ntsuˈu ñati̱ nu nchca jiˈi̱ xtyucua jiˈi̱ tyaˈa nguˈ loˈo cua ñaˈa̱ ca lo cña; loˈo juaˈa̱ ntsuˈu ñati̱ nu laca cña cuentya jiˈi̱ tyaˈa nguˈ, ntsuˈu ñati̱ nu nchca chcuiˈ chaˈcña jiˈi̱ xaˈ la ñati̱. Laja ñati̱ jiˈi̱ Ni, nsubi ycuiˈ Ndyosi jiˈi̱ nguˈ nu caca lcaa lo cña biˈ.
\v 29 Pana ná lcaa na ndyaˈa̱ na tyijyuˈ chaˈ chcuiˈ na chaˈ jiˈi̱ Jesús loˈo xaˈ ñati̱, ni ná lcaa na nchca jiˈna cachaˈ na sca chaˈ nu nda ycuiˈ Ndyosi loˈo ñati̱; juaˈa̱ cua laca ti na taca culuˈu liñi na chaˈ jiˈi̱ Jesús jiˈi̱ ñati̱, cua laca ti na nchca cuaˈni na chaˈ tlyu cuentya jiˈi̱ ycuiˈ Ndyosi;
\v 30 juaˈa̱ ná lcaa na nda Jesús chacuayáˈ jiˈna chaˈ cuaˈni na chaˈ tyaca tsoˈo nu quicha; la cuiˈ juaˈa̱ ná lcaa na nchcuiˈ na chaˈcña jiˈi̱ xaˈ la ñati̱, ni ná lcaa na nchca xtyacui na chaˈ biˈ, chaˈ caca cuayáˈ tiˈ xaˈ ñati̱ ni chaˈ nda nguˈ tyaˈa na loˈo nguˈ liˈ. 
\v 31 Biˈ chaˈ ngaˈa̱ chaˈ jña ma̱ chacuayáˈ jiˈi̱ ycuiˈ Ndyosi chaˈ caca cuaˈni la ma̱ cña, chaˈ caca xtyucua ma̱ jiˈi̱ xaˈ la nguˈ tyaˈa ma̱. Loˈo juaˈa̱ tya ntsuˈu chaca chaˈ nu ndulo la jiˈi̱ ma̱, nu bilya culuˈu naˈ jiˈi̱ ma̱; biˈ laca chaˈ nu culuˈu naˈ jiˈi̱ ma̱ juani. 
\c 13
\s Tsoˈo si ntsuˈu tsa tyiquee na ñaˈa̱ na jiˈi̱ tyaˈa ñati̱ na
\p
\v 1 Ná nduˈni chaˈ masi nchca tsa chcuiˈ na lcaa lo chaˈcña jiˈi̱ ñati̱ chalyuu, masi chaˈcña jiˈi̱ xca̱ nu ntucua ca slo ycuiˈ Ndyosi nde cua̱ chcuiˈ na; si ná ntsuˈu tyiquee na ñaˈa̱ na jiˈi̱ xaˈ la ñati̱, ná sca chaˈ tsoˈo ntsuˈu tyiquee na liˈ. Laca na ñiˈya̱ ntiˈ sca sniquiji̱ nu ntyijiˈi̱ na jiˈi̱ juaˈa̱ ti, juaˈa̱ laca na ñiˈya̱ laca sca cuiˈchcua̱ nu lye tsa nclyatuˈu na jiˈi̱; ná ntsuˈu chaˈ taquiyaˈ nguˈ jiˈna liˈ.
\v 2 Ná nduˈni chaˈ masi cachaˈ na lcaa chaˈ nu nda ycuiˈ Ndyosi loˈo ñati̱, si ná ntsuˈu tyiquee na ñaˈa̱ na jiˈi̱ nguˈ. Ná nduˈni chaˈ masi jlo tiˈ na lcaa chaˈ jiˈi̱ ycuiˈ Ndyosi, masi tsoˈo tsa nchca cuayáˈ tiˈ na sca chaˈ nu ná ngujui ñiˈya̱ nu caca cuayáˈ tiˈ ñati̱ nu ngua saˈni la; ná sca na laca na cuentya jiˈi̱ ycuiˈ Ndyosi si ná ntsuˈu tyiquee na ñaˈa̱ na jiˈi̱ ñati̱. La cuiˈ ti masi jlya tsa tiˈ na jiˈi̱ ycuiˈ Ndyosi ñiˈya̱ ntiˈ si caca cuityi̱ na jiˈi̱ sca caˈya cua̱, pana si ná ntsuˈu tyiquee na ñaˈa̱ na jiˈi̱ ñati̱, ná sca na laca na liˈ.
\v 3 La cuiˈ ti ná sca na laca na masi tacha na lcaa chaˈ tsoˈo nu ntsuˈu jiˈna jiˈi̱ ñati̱, si ná ntsuˈu tyiquee na ñaˈa̱ na jiˈi̱ nguˈ biˈ liˈ. Ná nduˈni chaˈ masi cuaˈni lyaˈ tiˈ nguˈ jiˈna, masi suˈba nguˈ jiˈna lo quiiˈ chaˈ cajaa na xquiˈya chaˈ ngusñi na chaˈ jiˈi̱ Jesús, si la cuiˈ tyempo biˈ ná ntsuˈu tyiquee na ñaˈa̱ na jiˈi̱ tyaˈa ñati̱ na, ná sca chaˈ laca na. Siˈi na tsoˈo la na si ná nduˈni na juaˈa̱.
\p
\v 4 Si chañi chaˈ ntsuˈu tyiquee na ñaˈa̱ na jiˈi̱ ñati̱, talo tyiquee na jiˈi̱ nguˈ liˈ, cuaˈni tyaˈna tiˈ na jiˈi̱ nguˈ liˈ; siˈi na tyiji̱ tiˈ na chaˈ jiˈi̱ nguˈ liˈ, siˈi na chcuiˈ tyucuaa tiˈ na loˈo nguˈ, ni siˈi na cuaˈni tyixi na loˈo nguˈ liˈ.
\v 5 Si chañi chaˈ biˈ, ná cuaˈni subaˈ na loˈo nguˈ, siˈi xcuiˈ chaˈ jiˈna ti tyaˈa̱ tyiquee na, ni ná ca ñasi̱ˈ na jiˈi̱ nguˈ luˈba ti. Ntsuˈu chaˈ clyu tiˈ jiˈna loˈo nguˈ, si chañi chaˈ ntsuˈu tyiquee na ñaˈa̱ na jiˈi̱ nguˈ.
\v 6 La cuiˈ juaˈa̱ siˈi na chaa tiˈ na loˈo ndyacua sca quiˈya jiˈi̱ nguˈ, tsoˈo la ntiˈ na si xñi nguˈ biˈ sca chaˈ liñi.
\v 7 Si ntsuˈu tyiquee na ñaˈa̱ na jiˈi̱ ñati̱, talo tyiquee na jiˈi̱ nguˈ, masi cua ñaˈa̱ ca chaˈ cuxi cuaˈni ñati̱ biˈ; jlya tiˈ na cua ñaˈa̱ ca chaˈ tsoˈo, ndu̱ tiˈ na chaˈ tsoˈo la caca chaˈ nde loo la, masi ná jlo tiˈ na; juaˈa̱ tyiqueeˈ talo na loˈo cua ñaˈa̱ ca chaˈ nu ndyaca jiˈna.
\p
\v 8 Nde loo la ná ntsuˈu chaˈ tye chaˈ ntsuˈu tyiquee na ñaˈa̱ na jiˈi̱ ñati̱. Nde loo la tyalaa tyempo nu loˈo ngaˈaa nduˈni chaˈ tya chcuiˈ la ycuiˈ Ndyosi loˈo na nde chalyuu, ngaˈaa nduˈni chaˈ chcuiˈ la na chaˈcña jiˈi̱ xaˈ ñati̱, ni ngaˈaa nduˈni chaˈ caca cuayáˈ tiˈ na lcaa chaˈ jiˈi̱ ycuiˈ Ndyosi ca loˈo caca tyempo biˈ; pana ná tye chca chaˈ ntsuˈu tyiquee na ñaˈa̱ na jiˈi̱ ñati̱.
\v 9 Juani bilya caca cuayáˈ tiˈ na lcaa chaˈ jiˈi̱ Ni, ná caja ñiˈya̱ chcuiˈ na lcaa ca chaˈ nu ntsuˈu tyiquee Ni;
\v 10 pana nde loo la liˈ, loˈo cuaˈni ycuiˈ Ndyosi chaˈ caca cuayáˈ tiˈ na lcaa chaˈ, liˈ ngaˈaa tyiˈu tiˈ na nu xca ti chaˈ nu nchca cuayáˈ tiˈ na juani.
\p
\v 11 Loˈo tya sube na ni, xcuiˈ cña nu nduˈni nu sube nguaˈni na; ñiˈya̱ nu nclacua tiˈ sca nu sube, juaˈa̱ nchcuiˈ na liˈ, juaˈa̱ nguaˈya chaˈ hique na, juaˈa̱ ngulacua tiˈ na. Pana loˈo nguluu na, liˈ ngaˈaa nclacua tiˈ na ñiˈya̱ nu nclacua tiˈ nu sube.
\v 12 Juaˈa̱ laca chaˈ jiˈna su ndiˈi̱ na chalyuu; juani nguxaˈ ti ndyiji sca chaˈ jiˈi̱ ycuiˈ Ndyosi jiˈna, siˈi tsa liñi ti nduna na chaˈ biˈ. Ñiˈya̱ ntiˈ si ñaˈa̱ na jiˈi̱ ycuiˈ ca na lo sca cuanaa, tsa lyiji ti ñaˈa̱ na jiˈna; pana nde loo la, liˈ caca cuayáˈ tsoˈo tiˈ na lcaa chaˈ biˈ. Cua laca ti chaˈ jlo tiˈ na juani, pana nde loo la ta na cuentya jiˈi̱ lcaa lo chaˈ; liˈ tyuloo na jiˈi̱ ycuiˈ Ndyosi ñiˈya̱ ndyuloo Ni jiˈna.
\v 13 Biˈ chaˈ lacua, lcaa tyempo nduˈni chaˈ tyiˈu tiˈ na jiˈi̱ ycuiˈ Ndyosi, lcaa tyempo nduˈni chaˈ tu̱ tiˈ na chaˈ caca tsoˈo la jiˈna ca nde loo la, loˈo juaˈa̱ tyucui tyempo nduˈni chaˈ tyuˈu tyiquee na ñaˈa̱ na jiˈi̱ tyaˈa ñati̱ na. Biˈ laca cña nu ndulo la chaˈ cuaˈni na, chaˈ tyuˈu tyiquee na ñaˈa̱ na jiˈi̱ tyaˈa ñati̱ na.
\c 14
\s ¿Ha chcuiˈ na chaˈcña jiˈi̱ xaˈ ñati̱ laja loˈo ndyuˈni tlyu na jiˈi̱ ycuiˈ Ndyosi?
\p
\v 1 Cuaˈni ma̱ chaˈ xcuiˈ tsoˈo tyuˈu tyiquee ma̱ ñaˈa̱ ma̱ jiˈi̱ tyaˈa ñati̱ ma̱ lacua. Loˈo juaˈa̱ jña ma̱ chacuayáˈ jiˈi̱ ycuiˈ Ndyosi chaˈ taca cuaˈni ma̱ la cuiˈ cña nu nda Xtyiˈi ycuiˈ Ni jiˈna. Pana loˈo chaca cña ntsuˈu nu ndulo tsa jiˈi̱ ma̱, chaˈ ca tsaˈa̱ ma̱ ta ma̱ chaˈ loˈo ñati̱, lcaa ñaˈa̱ chaˈ nu cua ntiˈ ycuiˈ Ndyosi chaˈ ta Ni loˈo nguˈ biˈ.
\v 2 Sca ñati̱ nu nchcuiˈ chaˈcña jiˈi̱ xaˈ ñati̱ laja loˈo ndyuˈu tiˈi̱ ti ma̱ ni, siˈi loˈo cuˈma̱ nchcuiˈ yu, chaˈ ná nchca cuayáˈ tiˈ ma̱ ni chaˈ nda yu; sca ti loˈo ycuiˈ Ndyosi nchcuiˈ yu biˈ, chaˈ Xtyiˈi ycuiˈ Ndyosi nduˈni chaˈ ta yu sca chaˈ nu ná ngaˈa̱ chaˈ cuna nguˈ tyaˈa ma̱.
\v 3 Xaˈ la ñati̱ nu ndachaˈ liñi sca chaˈ nu nda Ni loˈo nguˈ, loˈo cuˈma̱ nchcuiˈ ñati̱ biˈ. Taca xtyucua nguˈ biˈ jiˈi̱ ma̱ chaˈ taquiyaˈ tsoˈo la ma̱ chaˈ jiˈi̱ Ni, taca cuaˈni nguˈ chaˈ tyatí̱ la tyiquee ma̱ jiˈi̱ chaˈ biˈ; juaˈa̱ taca cuaˈni nguˈ chaˈ tyiˈi̱ ti̱ ti tyiquee ma̱ liˈ.
\v 4 Tsoˈo tsa cuentya jiˈi̱ ycuiˈ ca nguˈ nu nchca nchcuiˈ chaˈcña jiˈi̱ xaˈ ñati̱, chaˈ ndyatí̱ la tiˈ tyiquee ycuiˈ ca nguˈ jiˈi̱ ycuiˈ Ndyosi; pana tsoˈo la nduˈni ñati̱ nu ndachaˈ liñi sca chaˈ nu cua nda ycuiˈ Ndyosi loˈo ñati̱ biˈ jiˈi̱ tyaˈa nguˈ, chaˈ nduˈni nguˈ chaˈ tyatí̱ la tiˈ tyiquee lcaa nguˈ tyaˈa nduˈni tlyu ma̱ jiˈi̱ ycuiˈ Ndyosi.
\p
\v 5 Juaˈa̱ naˈ, tsoˈo ntiˈ naˈ si lcaa cuˈma̱ caca chcuiˈ ma̱ chaˈcña jiˈi̱ xaˈ ñati̱; pana cña nu ndulo la chaˈ jiˈi̱ ma̱ laca si ta ma̱ chaˈ loˈo tyaˈa ma̱, la cuiˈ chaˈ nu cua ntiˈ ycuiˈ Ndyosi chcuiˈ Ni loˈo ma̱. Tsoˈo la si juaˈa̱ taca ta ma̱ chaˈ loˈo tyaˈa ma̱; ná ntsuˈu chaˈ chcuiˈ ma̱ chaˈcña jiˈi̱ xaˈ ñati̱ liˈ, sca ti ca si ntsuˈu chaca nguˈ nu taca jiˈi̱ xtyacui chaˈ biˈ chaˈ caca cuayáˈ tiˈ tyaˈa ndyuˈu tiˈi̱ ma̱. Liˈ tsoˈo la tyatí̱ tiˈ tyiquee nguˈ tyaˈa ma̱.
\v 6 Loˈo tyalaa naˈ su ndiˈi̱ ma̱, siˈi na xtyucua naˈ jiˈi̱ ma̱ si xcuiˈ chaˈcña jiˈi̱ xaˈ ñati̱ chcuiˈ naˈ loˈo ma̱; taca xtyucua naˈ jiˈi̱ ma̱ sca ti si caja sca chaˈ ˈna, sca chaˈ nu cua ntiˈ ycuiˈ Ndyosi ta Ni loˈo ma̱. Sca ti si culuˈu liñi naˈ jiˈi̱ ma̱ chaˈ ca tsaˈa̱ tsoˈo la ma̱ chaˈ jiˈi̱ Ni, juaˈa̱ taca xtyucua naˈ jiˈi̱ ma̱ liˈ.
\p
\v 7 Cua ñaˈa̱ ca chcua̱ musca, masi cuiˈchcua̱, masi rube, ngaˈa̱ chaˈ culaˈá tsoˈo na jiˈi̱ chaˈ cuna tsoˈo nguˈ ni ji̱i̱ laca nu ndañi biˈ.
\v 8 Juaˈa̱ sendaru ni, ná tsaa nguˈ cusu̱u̱ si ná cañi cui̱i̱ culaˈá cuiˈchcua̱ nu xiˈyane jiˈi̱ nguˈ.
\v 9 La cuiˈ juaˈa̱ laca loˈo cuˈma̱, ná caca cuayáˈ tiˈ nguˈ ni chaˈ ntiˈ ma̱ ta ma̱ loˈo nguˈ si ná liñi chcuiˈ ma̱ chaˈcña jiˈi̱ nguˈ loˈo nguˈ; loˈo cuiˈi̱ ti nchcuiˈ ma̱ si ná nchcuiˈ ma̱ chaˈcña juaˈa̱.
\v 10 Chañi chaˈ quiñaˈa̱ tsa lo chaˈcña nchcuiˈ ñati̱ chalyuu, loˈo juaˈa̱ ntsuˈu scaa lo ñati̱ nu nduna sca lo chaˈcña.
\v 11 Pana si ná nduna na sca chaˈ nu nchcuiˈ sca ñati̱ slo na, liˈ culacua tiˈ na chaˈ nguˈ xta laca yu; ná ntsuˈu chaˈ jiˈna loˈo yu biˈ liˈ, masi tyaˈa quichi̱ tyi na laca yu.
\v 12 Cua jlo tiˈ naˈ chaˈ ntiˈ tsa ma̱ chaˈ caca cuaˈni ma̱ cua ñaˈa̱ ca cña nu nda Xtyiˈi ycuiˈ Ndyosi jiˈna; biˈ chaˈ jña la ma̱ chacuayáˈ jiˈi̱ ycuiˈ Ndyosi chaˈ taca jiˈi̱ ma̱ cuaˈni ma̱ lcaa lo cña tsoˈo, cua ñaˈa̱ ca cña nu xtyucua jiˈi̱ nguˈ tyaˈa ngusñi ma̱ chaˈ jiˈi̱ Jesús ca biˈ, chaˈ tyatí̱ la tiˈ tyiquee nguˈ. 
\p
\v 13 Tsoˈo lacua, si nchca chcuiˈ na chaˈcña jiˈi̱ xaˈ la ñati̱, pana tsoˈo la si jña na chacuayáˈ jiˈi̱ ycuiˈ Ndyosi chaˈ caca cuayáˈ tiˈ na ni chaˈ nda na loˈo nguˈ. 
\v 14 Ndiˈya̱ ndyaca si chaˈcña jiˈi̱ xaˈ ñati̱ chcuiˈ na nu loˈo nduˈni tlyu na jiˈi̱ ycuiˈ Ndyosi: Chañi chaˈ neˈ cresiya jiˈna nchcuiˈ na loˈo Ni tuˈni, pana ni ycuiˈ na, ná nchca cuayáˈ tiˈ na ni chaˈ nda na.
\v 15 Ndiˈya̱ cuaˈni na loˈo cuaˈni tlyu na jiˈi̱ Ni lacua: Taca chcuiˈ na loˈo Ni chaˈ jiˈna ti, sca chaˈ nu ntsuˈu neˈ cresiya jiˈna, pana ngaˈa̱ chaˈ caca cuayáˈ tiˈ na ni chaˈ nda na slo nguˈ tyaˈa na; la cuiˈ juaˈa̱ nu loˈo cula tuˈba na ji̱i̱ jiˈi̱ ycuiˈ Ndyosi, cula tuˈba na chaˈ jiˈna ti tuˈni, pana loˈo nduˈni chaˈ caca cuayáˈ tiˈ na ñiˈya̱ ndyuˈu chaˈ nu nchcuiˈ ji̱i̱ biˈ.
\v 16 Si ná cuaˈni na juaˈa̱, liˈ ná caja ñiˈya̱ ñacui̱ nguˈ chaˈ: “Juaˈa̱ caca chaˈ lacua”, loˈo ndye nchcuiˈ na liˈ. Cua ñaˈa̱ ca ñati̱ nu ndiˈi̱ slo na ni, si chaˈ jiˈna ti laca chaˈ nu chcuiˈ na loˈo nduˈni tlyu na jiˈi̱ ycuiˈ Ndyosi, ngaˈaa caja ñiˈya̱ chcuiˈ nguˈ liˈ, chaˈ ná nchca cuayáˈ tiˈ nguˈ ni chaˈ nda na, masi tsoˈo tsa ta na xlyaˈbe jiˈi̱ ycuiˈ Ndyosi.
\v 17 Ná tyiqueeˈ tsoˈo tsa nchcuiˈ na loˈo Ni, pana chaˈ nu nchcuiˈ na biˈ ná xtyucua jiˈi̱ xaˈ la nguˈ tyaˈa na tsiyaˈ ti.
\v 18 Tsoˈo tsa ntiˈ naˈ ñaˈa̱a̱ jiˈi̱ ycuiˈ Ndyosi chaˈ nchca ˈna nchcuiˈ naˈ chaˈcña jiˈi̱ xaˈ la ñati̱; nchca la jnaˈ, xti la chaˈ nchca jiˈi̱ cuˈma̱, ntiˈ naˈ. 
\v 19 Pana nu loˈo ndyuˈu tiˈi̱ na chaˈ cuaˈni tlyu na jiˈi̱ ycuiˈ Ndyosi, ntiˈ naˈ chaˈ tsoˈo la si chcuiˈ naˈ loˈo ma̱ sca tucua ti siˈyu chaˈ nu nchca cuayáˈ tiˈ ma̱ chaˈ ca tsaˈa̱ la ma̱ liˈ; ná ndulo chaˈ jiˈi̱ ma̱ masi chcuiˈ naˈ tii mil tyaˈa siˈyu chaˈ nu nchcuiˈ xaˈ ñati̱ nu ná nduna ma̱ jiˈi̱ tsiyaˈ ti, ná sca chaˈ laca biˈ.
\p
\v 20 Cuˈma̱ tyaˈa ngusñi na chaˈ jiˈi̱ Cristo, tsoˈo la si ná jlo tiˈ ma̱ tsiyaˈ ti na ca laca sca chaˈ cuxi; ñiˈya̱ laca nu sube, juaˈa̱ caca ma̱ chaˈ ná jlo tiˈ nguˈ sube chaˈ biˈ. Pana ngaˈaa culacua tiˈ ma̱ ñiˈya̱ nu nclacua tiˈ nu sube; juani culacua tsoˈo tiˈ ma̱, ñiˈya̱ nclacua tiˈ nguˈ cusuˈ.
\v 21 Ndiˈya̱ chaˈ nda quityi cusuˈ: “Chcuiˈ naˈ loˈo ñati̱ re”, nacui̱ ycuiˈ Ndyosi, “ta naˈ jiˈi̱ xaˈ ñati̱ ca xaˈ nasiyu̱ tyijyuˈ la chaˈ ca̱a̱ nguˈ chcuiˈ loˈo nguˈ re; pana masi cuaˈni naˈ juaˈa̱, ná xñi nguˈ re chaˈ ˈna”. Juaˈa̱ nacui̱ ycuiˈ Ndyosi nu Xuˈna na.
\v 22 Ntsuˈu quiyaˈ nu nduˈni Ni chaˈ caca chcuiˈ nguˈ chaˈcña jiˈi̱ xaˈ ñati̱ chaˈ cube tiˈ ñati̱ nu bilya xñi chaˈ jiˈi̱ Ni. Ná ntsuˈu chaˈ caca juaˈa̱ xquiˈya nguˈ nu cua ngusñi chaˈ jiˈi̱ ycuiˈ Ni; pana loˈo ta na sca chaˈ nu cua nda Ni loˈo ñati̱, biˈ laca cuentya jiˈi̱ nguˈ tyaˈa ngusñi na chaˈ jiˈi̱ Jesús, siˈi cuentya jiˈi̱ ñati̱ nu bilya xñi chaˈ biˈ.
\v 23 Ná tyiqueeˈ tyalaa xi xaˈ la ñati̱ ca su ndyuˈu tiˈi̱ ma̱, nguˈ nu bilya xñi chaˈ jiˈi̱ Jesús, juaˈa̱ nguˈ nu siˈi tyaˈa ndyuˈni tlyu ma̱ jiˈi̱ ycuiˈ Ndyosi laca nguˈ. Si tyalaa nguˈ biˈ su ndyuˈu tiˈi̱ ma̱ tsa tlyu ti, loˈo liˈ ñaˈa̱ nguˈ jiˈi̱ ma̱ chaˈ xcuiˈ chaˈcña jiˈi̱ xaˈ ñati̱ nchcuiˈ ma̱, liˈ ñacui̱ nguˈ biˈ chaˈ cua ngua loco ma̱.
\v 24 Xaˈ ñaˈa̱ caca si xcuiˈ chaˈ nu cua nda ycuiˈ Ndyosi loˈo ma̱ laca chaˈ nu chcuiˈ ma̱ loˈo tyaˈa ma̱; nu loˈo tyalaa nguˈ su ndyuˈu tiˈi̱ ma̱, si nguˈ nu bilya xñi chaˈ jiˈi̱ Jesús, nu siˈi tyaˈa ndyuˈni tlyu ma̱ jiˈi̱ ycuiˈ Ndyosi laca nguˈ, liˈ ca tyujuˈu tiˈ nguˈ biˈ jiˈi̱ quiˈya nu ntsuˈu jiˈi̱ nguˈ, nu loˈo cuna nguˈ chaˈ nu nchcuiˈ ma̱. Liˈ caca cuayáˈ tiˈ nguˈ chaˈ cuxi tsa laca ycuiˈ nguˈ,
\v 25 ycuiˈ ca ti nguˈ caca cuayáˈ tiˈ lcaa chaˈ cuxi nu ntsuˈu yacu̱ˈ ti neˈ cresiya jiˈi̱ nguˈ. Loˈo juaˈa̱ tyatu̱ sti̱ˈ nguˈ liˈ chaˈ cuaˈni tlyu nguˈ jiˈi̱ ycuiˈ Ndyosi, ñacui̱ nguˈ chaˈ chañi chaˈ ndiˈi̱ Xtyiˈi ycuiˈ Ndyosi loˈo cuˈma̱.
\s Tsoˈo ti cuaˈni na loˈo tyaˈa na loˈo tyuˈu tiˈi̱ na chaˈ cuaˈni tlyu na jiˈi̱ ycuiˈ Ndyosi
\p
\v 26 Cuˈma̱ tyaˈa ngusñi na chaˈ jiˈi̱ Jesús, ndiˈya̱ cuaˈni ma̱ nu loˈo tyuˈu tiˈi̱ ma̱ loˈo tyaˈa ma̱: Tyatu̱ tsaca ma̱ chaˈ cachaˈ ni ji̱i̱ caca nu cula tuˈba ma̱ cuentya jiˈi̱ ycuiˈ Ndyosi; cuati tyatu̱ chaca nu culuˈu chaˈ jiˈi̱ ycuiˈ Ni jiˈi̱ tyaˈa ma̱; loˈo liˈ chcuiˈ tsaca nguˈ sca chaˈ nu ntiˈ Ni ta Ni loˈo ma̱; loˈo juaˈa̱ taca ta ma̱ xi chaˈ loˈo chaˈcña jiˈi̱ xaˈ ñati̱, si loˈo nchca jiˈi̱ ma̱ xtyacui ma̱ chaˈ biˈ, chaˈ caca cuayáˈ tiˈ lcaa ñati̱ nu ngaˈa̱ ca ndacua. Lcaa ñaˈa̱ nu cuaˈni ma̱ ntsuˈu chaˈ tyatí̱ la tiˈ tyiquee lcaa ñati̱ tyaˈa ndyuˈu tiˈi̱ ma̱.
\v 27 Nu loˈo chcuiˈ ma̱ chaˈcña jiˈi̱ xaˈ ñati̱ ni, liˈ tsoˈo masi tucua sna tyaˈa ti ma̱ chcuiˈ ma̱, sa scaa ti ma̱ chcuiˈ ma̱ liˈ. Cuayáˈ tsa jua ti nguˈ. Loˈo juaˈa̱ ngaˈa̱ chaˈ caja sca nu xtyacui chaˈ biˈ, chaˈ caca cuayáˈ tiˈ lcaa ma̱;
\v 28 pana si ná caja sca nu xtyacui chaˈ biˈ, liˈ tsoˈo la masi ná chcuiˈ ma̱ chaˈcña jiˈi̱ xaˈ ñati̱ laja loˈo ndyuˈu tiˈi̱ ma̱. Sca ti tsoˈo si chcuiˈ ma̱ chaˈcña biˈ ca su ntucua ma̱ ycuiˈ ti ma̱. Sca ti ycuiˈ Ndyosi caca cuayáˈ tiˈ chaˈ biˈ liˈ.
\v 29 Loˈo chcuiˈ ma̱ sca chaˈ nu cua ntiˈ Ni ta Ni loˈo nguˈ tyaˈa ma̱ ni, liˈ chcuiˈ tucua sna tyaˈa ti ma̱; nu xaˈ la ñati̱ tyaˈa ndiˈi̱ ma̱ ca ndacua, culacua tiˈ ma̱ si liñi ca ndyuˈu chaˈ nu nchcuiˈ tyaˈa ma̱. 
\v 30 Loˈo liˈ si ta Ni sca chaˈ loˈo chaca ñati̱ nu ngaˈa̱ loˈo ma̱ ca ndacua, tsoˈo la si cuaˈa ma̱ jiˈi̱ nu nchcuiˈ clyo, chaˈ xutacui chaˈ nu nchcuiˈ yu.
\v 31 Lcaa tyaˈa ma̱ nu cua ngujui sca chaˈ jiˈi̱ ma̱, sca chaˈ nu cua ntiˈ Ni ta Ni loˈo ma̱, tsoˈo si chcuiˈ sa scaa ma̱ liˈ lacua, chaˈ ca tsaˈa̱ ma̱ ca taˈa ma̱ chaˈ biˈ, loˈo liˈ caca tlyu la tyiquee ma̱.
\v 32 Cuˈma̱ nu nchcuiˈ loˈo nguˈ sca chaˈ nu cua nda ycuiˈ Ndyosi loˈo ma̱, ycuiˈ ca ma̱ ngaˈa̱ chaˈ cuaˈa ma̱ jiˈi̱ ycuiˈ ma̱, chaˈ ná tyeje tacui ma̱ chacuayáˈ jiˈi̱ scaa ma̱.
\v 33 Ntiˈ Ni chaˈ tsoˈo ti cuaˈni na loˈo tyaˈa na loˈo tyuˈu tiˈi̱ na, ná tsoˈo ntiˈ Ni si lye tsa nguixaˈ nu nduˈni na.
\p Ndiˈya̱ nduˈni ca taˈa nguˈ tyaˈa ngusñi na chaˈ jiˈi̱ Jesús scaa quichi̱, nu loˈo ndyuˈu tiˈi̱ nguˈ:
\v 34 Ná nda nguˈ chacuayáˈ chcuiˈ nguˈ cunaˈa̱ ca su ndyuˈni tlyu nguˈ jiˈi̱ ycuiˈ Ndyosi; ngaˈa̱ chaˈ tucuá nu cunaˈa̱ chaˈ nu nchcuiˈ nu quiˈyu, chaˈ juaˈa̱ cña ngulo Ni jiˈi̱ nguˈ chaˈ cuaˈni nguˈ.
\v 35 Ca toniˈi̱ taca xcuane nu cunaˈa̱ jiˈi̱ clyoˈo si ntsuˈu sca chaˈ nu ntiˈ nguˈ chaˈ caca cuayáˈ tiˈ nguˈ. Siˈi chaˈ tsoˈo laca si chcuiˈ sca nu cunaˈa̱ laja su ndyuˈu tiˈi̱ nguˈ.
\p
\v 36 Ngaˈa̱ chaˈ tyiˈu tiˈ ma̱ chaˈ siˈi cuˈma̱ laca nu ya̱a̱ nchcuiˈ chaˈ jiˈi̱ ycuiˈ Ndyosi nu ngua su clyo, ni siˈi nguˈ tyaˈa quichi̱ tyi ti ma̱ nu cua ndyuna chaˈ biˈ tya clyo.
\v 37 ¿Ha ntsuˈu chacuayáˈ jiˈi̱ ma̱ chaˈ chcuiˈ ma̱ chaˈ nu cua nda ycuiˈ Ndyosi loˈo nguˈ ntiˈ ma̱? ¿Ha jiˈi̱ cuˈma̱ ti cua nda Ni Xtyiˈi ycuiˈ Ni chaˈ cuaˈni ma̱ cña jiˈi̱ Ni? Cuaˈa̱ jyaca̱ ma̱ lacua; cña nu nclyo naˈ jiˈi̱ ma̱ loˈo nscua naˈ quityi re, chacuayáˈ jiˈi̱ ycuiˈ Ndyosi laca cña biˈ,
\v 38 biˈ chaˈ ná tucuá ma̱ chaˈ jiˈi̱ ñati̱ nu ná ntajaˈa̱ taquiyaˈ jiˈi̱ chaˈ re.
\p
\v 39 Juaˈa̱ caca lacua, cuˈma̱ tyaˈa ngusñi na chaˈ jiˈi̱ Jesús, jña ma̱ chacuayáˈ jiˈi̱ ycuiˈ Ndyosi chaˈ caca chcuiˈ ma̱ lcaa chaˈ jiˈi̱ Ni nu cua ntiˈ Ni chaˈ ta Ni loˈo ñati̱. La cuiˈ juaˈa̱ tsoˈo laca si ná cuaˈa ma̱ jiˈi̱ ñati̱ nu nchcuiˈ chaˈcña jiˈi̱ xaˈ ñati̱. 
\v 40 Tsa biˈ ti chaˈ, xcuiˈ tsoˈo ti cuaˈni ma̱ loˈo tyuˈu tiˈi̱ ma̱ loˈo tyaˈa ma̱; liñi ti cuaˈni ma̱, ñiˈya̱ nu ngaˈa̱ chaˈ caca.
\c 15
\s Cua ndyuˈú Jesucristo chaca quiyaˈ
\p
\v 1 Cuˈma̱ tyaˈa ngusñi na chaˈ jiˈi̱ Jesús, cua ntiˈ naˈ chaˈ tyiˈu tiˈ ma̱ jiˈi̱ chaˈ nu cua ndachaˈ naˈ jiˈi̱ ma̱ tya clyo, chaˈ nduˈni lyaá ycuiˈ Jesús jiˈna jiˈi̱ nu cuxi; biˈ laca chaˈ nu cua ndyuna ma̱ tya clyo, loˈo juani cua ndyanu tsoˈo ti chaˈ biˈ neˈ cresiya jiˈi̱ ma̱.
\v 2 Xquiˈya chaˈ cua nchcuiˈ naˈ chaˈ jiˈi̱ Jesús loˈo ma̱, biˈ chaˈ ngulaá ma̱ jiˈi̱ nu cuxi; loˈo juani tya ngaˈa̱ chaˈ taquiyaˈ tsoˈo ma̱ jiˈi̱ chaˈ biˈ, chaˈ ná ngusñi ma̱ jiˈi̱ chaˈ biˈ chaˈ culiji yuˈu chaˈ biˈ juaˈa̱ ti.
\p
\v 3 Tya clyo cua ndachaˈ naˈ jiˈi̱ ma̱ lcaa chaˈ jiˈi̱ Jesucristo nu cua nguluˈu nguˈ ˈna. Ndiˈya̱ nguluˈu naˈ jiˈi̱ ma̱, chaˈ ngujuii Cristo lo crusi chaˈ cuityi̱ Ni quiˈya nu ntsuˈu jiˈna; la cuiˈ ñiˈya̱ nu cua nscua lo quityi cusuˈ chaˈ caca jiˈi̱ Cristo, juaˈa̱ ngua. 
\v 4 Liˈ nguxatsiˈ nguˈ jiˈi̱ jyoˈo biˈ neˈ cuaá; pana loˈo nduˈu scua sna tsa̱, liˈ ndyuˈú yu chaca quiyaˈ. Cua ndachaˈ liñi quityi cusuˈ tya clyo la chaˈ juaˈa̱ caca jiˈi̱ nu Cristo biˈ.
\v 5 Loˈo liˈ nguluˈu loo Jesús jiˈi̱ Pedro, loˈo juaˈa̱ jiˈi̱ ca taˈa tii chaca nguˈ nu ngua tsaˈa̱ jiˈi̱ tya clyo.
\v 6 Tiyaˈ la liˈ nguluˈu loo Jesús jiˈi̱ tyu̱u̱ tsa tyaˈa ñati̱, nteje tacui caˈyu siyento tyaˈa ñati̱ nu ndiˈi̱ seˈi̱ ti liˈ. Loˈo ñaˈa̱ ti tya tyu̱u̱ tyaˈa nguˈ biˈ tya luˈú nguˈ, masi ntsuˈu xi nguˈ biˈ nu cua ngujuii. 
\v 7 Loˈo liˈ nguluˈu loo Jesús jiˈi̱ Jacobo, loˈo juaˈa̱ jiˈi̱ lcaa tyaˈa nguˈ nu ndyaˈa̱ nchcuiˈ chaˈ jiˈi̱ Jesús loˈo ñati̱ tyijyuˈ la.
\p
\v 8 Su cua ndye liˈ, loˈo ˈna nguluˈu loo Ni ˈna, masi ná ntsuˈu chaˈ cuaˈni Ni loˈo naˈ juaˈa̱. Laca naˈ ñiˈya̱ si laca̱ sca cubiˈ nu ngula cuañiˈ ti, chaˈ ná loˈo naˈ ngutaˈa̱ naˈ loˈo ñati̱ nu ngua tsaˈa̱ tya clyo. 
\v 9 Ná tsoˈo naˈ tsiyaˈ ti ntiˈ naˈ, masi ngusubi Ni ˈna chaˈ sañi naˈ chaˈ jiˈi̱ Jesús ca xaˈ quichi̱ tyijyuˈ, chaˈ ntsuˈu xaˈ la nguˈ tyaˈa ya nu nchca la jiˈi̱ nguˈ cuaˈni nguˈ cña biˈ. Ná stuˈba naˈ loˈo nguˈ biˈ, chaˈ tya tsubiˈ la lyaˈ tsa tiˈ naˈ jiˈi̱ lcaa ñati̱ jiˈi̱ Jesucristo.
\v 10 Pana tyaˈna tiˈ ycuiˈ Ndyosi, biˈ chaˈ tsoˈo ti ntsuˈu tyiquee Ni ñaˈa̱ Ni jnaˈ; juaˈa̱ nguaˈni Ni chaˈ ndyaˈa̱ naˈ cña jiˈi̱ Ni liˈ. Ni siˈi na nguliji yuˈu chaˈ biˈ juaˈa̱ ti loˈo nguaˈni Ni chaˈ tsoˈo loˈo naˈ; masi loˈo nu xaˈ la nguˈ tyaˈa ya ndyuˈni nguˈ la cuiˈ cña nu ndyuˈni naˈ, pana tlyu la cña ntsuˈu jnaˈ que nguˈ biˈ. Siˈi na nchca tsa ˈna, pana ycuiˈ Ndyosi laca nu nduˈni loˈo naˈ chaˈ caca chcuiˈ naˈ loˈo ñati̱, chaˈ tsoˈo ti ntsuˈu tyiquee Ni ñaˈa̱ Ni ˈna.
\v 11 Loˈo juani ná nduˈni chaˈ jnaˈ tilaca laca nu nchcuiˈ loˈo ma̱, masi nchcuiˈ naˈ, masi nchcuiˈ xaˈ la ñati̱; sca ti cuayáˈ nchcuiˈ lcaa ya loˈo nchcuiˈ ya chaˈ biˈ loˈo ñati̱, la cuiˈ ti chaˈ nu cua ngusñi ma̱. 
\s Tyuˈú ñati̱ chaca quiyaˈ loˈo cua ngujuii nguˈ
\p
\v 12 Chañi laca chaˈ nu nda ya loˈo cuˈma̱, chaˈ cua ndyuˈú Cristo chaca quiyaˈ loˈo ngujuii yu. ¿Ni chaˈ laca lacua nchcuiˈ xi ñati̱ tyaˈa cuˈma̱ chaˈ ngaˈaa ntsuˈu chaˈ tyuˈú ñati̱ chaca quiyaˈ loˈo cua ngujuii nguˈ?
\v 13 Si chañi laca chaˈ ngaˈaa ntsuˈu chaˈ tyuˈú ñati̱ chaca quiyaˈ loˈo cua ngujuii nguˈ, ni ycuiˈ Cristo ná ndyuˈú yu loˈo cua ngujuii yu lacua.
\v 14 Na ñiloˈo nguˈ jiˈna si juaˈa̱, ni ná caja chaˈ nu ta ya loˈo ma̱ liˈ, si chaˈ cuiñi laca chaˈ ndyuˈú Cristo chaca quiyaˈ. Juaˈa̱ ná caja chaˈ jiˈi̱ Jesús nu xñi ma̱ si chañi chaˈ ngaˈaa ndyuˈú yu biˈ.
\v 15 La cuiˈ ti nguˈ cuiñi laca ya cuentya jiˈi̱ ycuiˈ Ndyosi si ná ngua juaˈa̱. Cua nchcuiˈ ya tya clyo chaˈ cua ndyuˈú Cristo chaca quiyaˈ chacuayáˈ jiˈi̱ ycuiˈ Ndyosi; pana ná ngua cuaˈni ycuiˈ Ndyosi juaˈa̱ loˈo Jesús, si ngaˈaa caca tyuˈú ñati̱ chaca quiyaˈ loˈo cua ngujuii nguˈ.
\v 16 Ná chañi chaˈ ndyuˈú Cristo chaca quiyaˈ loˈo cua ngujuii yu si ngaˈaa caca tyuˈú ñati̱ chaca quiyaˈ. 
\v 17 La cuiˈ ti ná ntsuˈu chaˈ xñi ma̱ chaˈ jiˈi̱ Jesús si juaˈa̱ ngua, chaˈ ná ndyuˈú yu chaca quiyaˈ liˈ, ñaˈa̱ ti tya ntsuˈu quiˈya chu̱ˈ ma̱ lacua.
\v 18 Loˈo juaˈa̱ lcaa jyoˈo cusuˈ nu ngusñi chaˈ jiˈi̱ Cristo tya tsubiˈ la, cua ngunaˈ chaˈ jiˈi̱ nguˈ biˈ si juaˈa̱.
\v 19 Tsoˈo tsa chaˈ siˈi sca ti nde chalyuu su ndu̱ tiˈ na jiˈi̱ Cristo chaˈ ñaˈa̱ na jiˈi̱. Si nde chalyuu ti xtyucua Cristo jiˈna, xñiˈi̱ tsa tiˈ na caca na su ndiˈi̱ na liˈ; xñiˈi̱ la tiˈ na caca na que lcaa nguˈ, ntiˈ naˈ. Pana ná ndyaca juaˈa̱ loˈo na, chaˈ cua ndyuˈú Cristo chaca quiyaˈ.
\p
\v 20 Chañi tsa chaˈ cua ndyuˈú Cristo chaca quiyaˈ lacua. Loˈo ca tiyaˈ la, liˈ tyuˈú quiñaˈa̱ la ñati̱ chaca quiyaˈ, lcaa ñati̱ nu ntsuˈu chaˈ jiˈi̱ nguˈ loˈo Cristo; tyuˈú jyoˈo su ntsiya nguatsiˈ nquichaˈ, xaˈ tyuˈú nguˈ chaca quiyaˈ, liˈ tsaa nguˈ tyiˈi̱ nguˈ loˈo Cristo. Pana juani cua yala la ndyuˈú Cristo chaca quiyaˈ chaˈ ta na cuentya ñiˈya̱ caca chaˈ biˈ.
\v 21 Xquiˈya quiˈya nu ntsuˈu jiˈi̱ sca ti ñati̱, biˈ chaˈ ntsuˈu chaˈ ndyijii na; la cuiˈ juaˈa̱ sca ñati̱ ngua nu nguaˈni chaˈ tyuˈú na chaca quiyaˈ, masi cua ngujuii na.
\v 22 Adán naa ñati̱ nu ngutuˈu tucua chalyuu clyo, loˈo lcaa na laca na ñati̱ nu ngutuˈú jiˈi̱ jyoˈo Adán tiyaˈ la, biˈ chaˈ ntsuˈu chaˈ ndyijii na nde chalyuu. Cristo laca nu ñati̱ nu ndyuˈú chaca quiyaˈ biˈ, xquiˈya biˈ taca tyuˈú na chaca quiyaˈ si ntsuˈu chaˈ jiˈna loˈo nu Cristo biˈ.
\v 23 Ntsuˈu ñiˈya̱ caca chaˈ re: tya clyo cua ndyuˈú ycuiˈ Cristo chaca quiyaˈ; tiyaˈ la loˈo tyalaa tsa̱ nu ca̱a̱ Cristo chaca quiyaˈ, liˈ tyuˈú na, lcaa na nu ntsuˈu chaˈ jiˈna loˈo ycuiˈ Ni;
\v 24 liˈ tye chalyuu. Cuaˈni tye Cristo jiˈi̱ lcaa nu laca loo, jiˈi̱ lcaa nguˈ tisiya, jiˈi̱ lcua ti ñaˈa̱ ñati̱ nu nxu̱u̱ tyaˈa loˈo ycuiˈ Ndyosi. Liˈ chaca quiyaˈ tya Jesús lcaa chacuayáˈ nu cua nda ycuiˈ Ndyosi jiˈi̱ tya clyo, chaˈ caca Ni loo jiˈi̱ lcua ti lo ñati̱ liˈ.
\v 25 Ndiˈya̱ ndyaca chaˈ: Juani tya ntsuˈu chacuayáˈ culo Jesús cña jiˈi̱ lcaa ñati̱, ñaˈa̱ cuayáˈ cuaˈni tye ycuiˈ Ndyosi jiˈi̱ lcaa ñati̱ nu nxu̱u̱ tyaˈa loˈo Jesús. 
\v 26 Loˈo cua ndye lcaa chaˈ, liˈ cuaˈni tye Ni chaˈ ndyijii ñati̱.
\v 27 Pana juani ti cua nda ycuiˈ Ndyosi Sti yu lcaa chacuayáˈ jiˈi̱ Sñiˈ Ni, chaˈ caca Cristo loo jiˈi̱ lcaa lo na nu ntsuˈu chalyuu. Nu loˈo nacui̱ quityi chaˈ lcaa na tsiyaˈ ti caca cuentya jiˈi̱ Cristo, cua jlo tiˈ na chaˈ ná loˈo jiˈi̱ ycuiˈ Ndyosi Sti yu culo Cristo cña, chaˈ ycuiˈ Ni laca nu cua nda chacuayáˈ jiˈi̱ Sñiˈ Ni tya clyo; ná nchcuiˈ Ni chaˈ jiˈi̱ ycuiˈ ca Ni liˈ.
\v 28 Tiyaˈ la liˈ, nu loˈo cua ndaquiyaˈ lcaa lo na nu ntsuˈu chalyuu jiˈi̱ Cristo, liˈ tsaa Jesús ca su ntucua ycuiˈ Ndyosi Sti yu, loˈo liˈ xaˈ tya Jesús lcaa cña cuentya jiˈi̱ ycuiˈ Ndyosi Sti yu chaca quiyaˈ. Biˈ laca nu cua nda chacuayáˈ jiˈi̱ Cristo tya clyo, chaˈ laca yu Sñiˈ ycuiˈ Ni. Loˈo liˈ sca ti ycuiˈ Ndyosi caca loo jiˈi̱ lcaa ca na nu ntsuˈu chalyuu, juaˈa̱ loˈo lcaa ca na nu ntsuˈu nde cua̱.
\p
\v 29 Ntsuˈu xi nguˈ tyaˈa ma̱ nu ntyucuatya nguˈ, masi siˈi cuentya jiˈi̱ ycuiˈ ca nguˈ ntyucuatya nguˈ biˈ, cuentya jiˈi̱ jyoˈo tyaˈa nguˈ ntyucuatya nguˈ. Cua jlya tiˈ jyoˈo nguˈ jiˈi̱ Jesús loˈo tya luˈú nguˈ chalyuu, pana ná ngulala jiˈi̱ jyoˈo ntyucuatya liˈ. ¿Ni chaˈ laca ntyucuatya nguˈ biˈ si ngaˈaa tyuˈú ñati̱ chaca quiyaˈ loˈo cua ngujuii nguˈ?
\p
\v 30 Loˈo cuare, quiñaˈa̱ tsa chaˈ cuxi ndyacua jiˈi̱ ya ca su ndyaˈa̱ ya tyijyuˈ; ná tsaa ya tsiyaˈ ti si ná jlo tiˈ ya chaˈ cua ndyuˈú Jesús chaca quiyaˈ.
\v 31 Loˈo naˈ, cua ñaˈa̱ ca tsa̱ cua cajaa ti naˈ xquiˈya Cristo; pana ná talo naˈ cuaˈni naˈ cña biˈ si ná ndyuˈú Jesús chaca quiyaˈ. Loˈo juani tsoˈo tsa ntsuˈu tyiquee naˈ chaˈ ngusñi ma̱ chaˈ jiˈi̱ Jesucristo nu Xuˈna na, tyu̱u̱ tyaˈa cuˈma̱ ca quichi̱ Corinto biˈ.
\v 32 Loˈo ngutaˈa̱ naˈ ca quichi̱ Efeso, lye tsa nguaˈni lyaˈ tiˈ nguˈ quichi̱ biˈ ˈna; tyaala tsa nguaˈni nguˈ ˈna, hasta ngusu̱u̱ tyaˈa nguˈ loˈo naˈ ñiˈya̱ nduˈni naˈni tyaala. ¿Ni chaˈ laca ndyaˈa̱ naˈ cajua si ná jlo tiˈ naˈ chaˈ cua ndyuˈú Jesús chaca quiyaˈ? Siˈi ngana ndyaˈa̱ naˈ cajua. Ntsuˈu ñati̱ nu nchcuiˈ ndiˈya̱: “Cacu na tyaja, coˈo na lcui, chaˈ la quee ti cajaa na”, nduˈni nguˈ loˈo na. Juaˈa̱ cuaˈni naˈ si ná jlo tiˈ naˈ chaˈ luˈú Jesús.
\p
\v 33 Chañi tsa laca chaˈ nu nchcuiˈ ñati̱ ndiˈya̱: “Si xcuiˈ loˈo ñati̱ cuxi ndyaˈa̱ na, xtyanu na jiˈi̱ chaˈ tsoˈo nu nduˈni na liˈ”. Ná tucuá ma̱ chaˈ jiˈi̱ ñati̱ nu ñacui̱ chaˈ ná caca cuxi tyiquee na loˈo nduˈni na chaˈ cuxi. 
\v 34 Ngaˈa̱ chaˈ xtyanu ma̱ jiˈi̱ chaˈ cuxi nu ndyuˈni ma̱, xana culacua tsoˈo tiˈ ma̱ liˈ; tsoˈo ti cuaˈni ma̱ loˈo tyaˈa ma̱. Ntiˈ naˈ chaˈ ntsuˈu xi cuˈma̱ nu bilya ca cuayáˈ tsoˈo tiˈ ma̱ chaˈ jiˈi̱ ycuiˈ Ndyosi, biˈ chaˈ nchcuiˈ naˈ loˈo ma̱ juaˈa̱ chaˈ caca tyujuˈu tiˈ ma̱.
\s Ñiˈya̱ ñaˈa̱ nguˈ loˈo tyuˈú nguˈ chaca quiyaˈ
\p
\v 35 Ná tyiqueeˈ xcuane ma̱ ˈna ndiˈya̱: “¿Ñiˈya̱ caca tyuˈú ñati̱ nu cua ngujuii? ¿Ñiˈya̱ ñaˈa̱ tyucui ñaˈa̱ nguˈ biˈ, nu loˈo tyuˈú nguˈ chaca quiyaˈ?”
\v 36 Ná tsoˈo ndyuˈu chaˈ si chcuiˈ ma̱ juaˈa̱. Loˈo cataa na sca siˈyu ni, catsuˈ scuaˈ siˈyu biˈ ñiˈya̱ laca si na cua ngujuii, chaˈ tyucua biˈ liˈ.
\v 37 Siˈi na cua laca ntyucua siˈyu loˈo ndyataa na jiˈi̱; siˈyu ti ndyataa na, masi siˈyu trigo, masi xi xaˈ la siˈyu.
\v 38 Tiyaˈ la liˈ nduˈni ycuiˈ Ndyosi chaˈ caluu na cuiñii biˈ liˈ, ndyaluu ñiˈya̱ nu ngaˈa̱ chaˈ caluu biˈ, chaˈ sca siˈyu caca sca lo na cuiñii. Xquiˈya chaˈ biˈ caca cuayáˈ tiˈ na chaˈ ntsuˈu sa scaa ca ñaˈa̱ sca lo na luˈú biˈ,
\v 39 ná stuˈba ñaˈa̱ lcaa lo na biˈ: tsaca lo ñaˈa̱ ñati̱ chalyuu, xaˈ lo ñaˈa̱ naˈni, xi xaˈ lo ñaˈa̱ naˈni luˈbe, chaca lo ñaˈa̱ cualya; ntsuˈu sa scaa ca ñaˈa̱ sca lo na nu ntsuˈu chalyuu.
\v 40 Ntsuˈu na nu ngaˈa̱ nde cua̱, cuati juaˈa̱ xaˈ lo na ntsuˈu chalyuu. Pana xaˈ ñaˈa̱ laca sca na nu ngaˈa̱ nde cua̱, chaca lo ñaˈa̱ na nu ntsuˈu nde lo yuu chalyuu: 
\v 41 xaˈ ñaˈa̱ xee cuichaa, loˈo juaˈa̱ xaˈ ñaˈa̱ xee cooˈ, xaˈ ñaˈa̱ xee cuii nu ngaˈa̱ nde cua̱. Juaˈa̱ nu cuii biˈ, siˈi sca ti cuayáˈ ñaˈa̱ xee biˈ.
\v 42 La cuiˈ juaˈa̱ caca na loˈo tyuˈú na chaca quiyaˈ. Loˈo cua ndyaa jyoˈo neˈ yuu, catsuˈ biˈ liˈ; pana loˈo tyuˈú biˈ chaca quiyaˈ, ngaˈaa quiñuˈu̱ biˈ tsiyaˈ ti liˈ.
\v 43 Chiyaˈa̱ ñaˈa̱ jyoˈo loˈo tyatsiˈ, pana lubii tsa ñaˈa̱ caca loˈo tyuˈú chaca quiyaˈ; sca na nu xcuiˈ quicha ti tiˈ laca jyoˈo nu tyatsiˈ, pana nguula tiˈ biˈ loˈo tyuˈú chaca quiyaˈ;
\v 44 cuañaˈ tya na laca nu tyatsiˈ, pana xaˈ ñaˈa̱ caca tyucui ñaˈa̱ na nu loˈo tyuˈú na chaca quiyaˈ. Nde chalyuu ti cuaˈnijoˈo cuañaˈ na, ñiˈya̱ nu laca na juani; pana chaˈa̱ tyucui ñaˈa̱ na chaˈ caca tyiˈi̱ na loˈo ycuiˈ Ndyosi chalyuu nde loo la.
\p
\v 45 Ndiˈya̱ nscua lo quityi jiˈi̱ ycuiˈ Ndyosi: “Ñati̱ luˈú ngua Adán nu ñati̱ nu ngutiˈi̱ chalyuu clyo, loˈo juaˈa̱ ycuiˈ Ndyosi laca nu cua nda cresiya jiˈi̱ yu”. Juaˈa̱ chaˈ nda quityi cusuˈ. Tiyaˈ la liˈ nda Ni jiˈi̱ chaca ñati̱ nu ya̱a̱ chalyuu; ngua biˈ ñati̱, la cuiˈ ñiˈya̱ nu ngua Adán ñati̱. Pana tsoˈo la ñaˈa̱ ñati̱ ngua nu Jesús biˈ; cua nda ycuiˈ yu chaca cresiya nu tsoˈo la jiˈi̱ ñati̱, chaˈ caca stuˈba chaˈ jiˈi̱ yu loˈo ycuiˈ Ndyosi.
\v 46 Loˈo ngula na chalyuu tya lyiji caca tsoˈo tyucui ñaˈa̱ na chaˈ caja chalyuu cucui jiˈna, chaˈ tya clyo ndyaˈ na ñiˈya̱ nu laca cuañaˈ ti na; tiyaˈ la liˈ ntsuˈu chaˈ caca tsoˈo tyucui ñaˈa̱ na chaˈ taca tsaa tyiˈi̱ na loˈo ycuiˈ Ndyosi.
\v 47 Loˈo yuu ti ngüiñá Ni jiˈi̱ Adán nu ngutiˈi̱ chalyuu clyo. Pana ca slo ycuiˈ Ndyosi ngutuˈu nu chaca ñati̱ nu ya̱a̱ chalyuu ca tiyaˈ la, la cuiˈ Jesucristo nu Xuˈna na.
\v 48 Ñiˈya̱ laca ñati̱ nu ndyaˈ loˈo yuu ti biˈ, juaˈa̱ laca lcaa na chaˈ laca na ñati̱ chalyuu; ñiˈya̱ laca Cristo nu ngutuˈu ya̱a̱ nde cua̱, juaˈa̱ taca caca na si xñi na chaˈ jiˈi̱ yu.
\v 49 Loˈo ndiˈi̱ na chalyuu, xti ti tyempo talo tyucui ñaˈa̱ na; pana loˈo tsaa na tyiˈi̱ na slo ycuiˈ Ni, liˈ xaˈ ñaˈa̱ caca na. Ñiˈya̱ nu laca ycuiˈ Cristo, juaˈa̱ caca na liˈ.
\p
\v 50 Cuˈma̱ tyaˈa ngusñi na chaˈ jiˈi̱ Cristo, ntsuˈu sca chaˈ nu ntiˈ naˈ chcuiˈ naˈ loˈo ma̱: Ñiˈya̱ nu ñaˈa̱ ti cuañaˈ na juani, ná caca tyuˈu chaˈ jiˈna loˈo ycuiˈ Ndyosi loˈo culo Ni cña loˈo cua ndye chalyuu; ná caca tsaa na ñiˈya̱ nu quicha ti tiˈ na ca chalyuu cucui nu caca nde loo la, su ná ntsuˈu quicha tsiyaˈ ti. 
\v 51 Ntiˈ naˈ chaˈ caca cuayáˈ tiˈ ma̱ sca chaˈ nu bilya cuna ñati̱: Ná lcaa na cajaa na; ntsuˈu na nu ñaˈa̱ luˈú ti na caca na loˈo quiˈya Ni jiˈna, nu loˈo cua tye ti chalyuu. Pana lcaa na tsi tsiyaˈ ca chaˈa̱ tyucui ñaˈa̱ na
\v 52 laja loˈo nchquiña ti quiji̱ cloo na. Liˈ cañi culaˈá cuiˈchcua̱ jiˈi̱ ycuiˈ Ndyosi. Loˈo cañi cuiˈchcua̱ biˈ, liˈ tyuˈú lcaa jyoˈo nu ngusñi chaˈ jiˈi̱ ycuiˈ Ndyosi loˈo ya̱a̱ nguˈ chalyuu; tyuˈú nguˈ chaca quiyaˈ chaˈ ngaˈaa ntsuˈu chaˈ cajaa nguˈ biˈ tsiyaˈ ti. Liˈ xcutsaˈa̱ Ni jiˈi̱ tyucui ñaˈa̱ tsaca na.
\v 53 Nde chu̱ˈ la loˈo tya ndiˈi̱ na chalyuu, ná tsoˈo ycuiˈ na tsiyaˈ ti, chaˈ xcuiˈ na quiñuˈu̱ ti na; pana nde loo la, tsoˈo tsa caca tyucui ñaˈa̱ na, ngaˈaa ntsuˈu chaˈ quiñuˈu̱ na, ngaˈaa ntsuˈu chaˈ tye na tsiyaˈ ti.
\v 54 Loˈo cua ngua nguxcutsaˈa̱ Ni jiˈi̱ tyucui ñaˈa̱ na chaˈ ngaˈaa quiñuˈu̱ na tsiyaˈ ti liˈ, ngaˈaa caca na ñiˈya̱ nu ngua na tyempo nu nteje tacui; xcutsaˈa̱ Ni lcaa chaˈ jiˈna. Liˈ tyuˈu scua sca chaˈ nu nscua lo quityi cusuˈ nu nchcuiˈ ndiˈya̱: “Cua nguaˈni tye Ni chaˈ ndyijii ñati̱ chalyuu, cua ntiji̱loo ycuiˈ Ndyosi jiˈi̱ lcaa tyaˈa ngusu̱u̱ Ni;
\v 55 ngaˈaa caca cuaˈni nu xñaˈa̱ ngana jiˈna chaˈ cajaa na, ngaˈaa caca cuaˈni lyaˈ tiˈ chaˈ tiˈí biˈ jiˈna juani”, nacui̱ quityi biˈ.
\v 56 Tiˈí tsa chaˈ nchca jiˈna loˈo ndyijii na xquiˈya chaˈ ntsuˈu tsa quiˈya jiˈna. Jlo tiˈ na chaˈ ntsuˈu quiˈya jiˈna, xquiˈya chaˈ ná ndaquiyaˈ na cña nu ngulo ycuiˈ Ndyosi jiˈna tya clyo chaˈ cuaˈni na.
\v 57 Pana cua xaˈ ñaˈa̱ laca juani, cua nda Ni chacuayáˈ chaˈ tyiji̱loo na jiˈi̱ nu xñaˈa̱ xquiˈya cña nu nguaˈni Jesús nu loˈo ndyuˈú yu chaca quiyaˈ, biˈ chaˈ quiñaˈa̱ tsa xlyaˈbe ta na jiˈi̱ ycuiˈ Ndyosi lacua.
\p
\v 58 Cuˈma̱ tyaˈa ngusñi na chaˈ jiˈi̱ Jesús, ntsuˈu tsa tyiquee naˈ ñaˈa̱a̱ jiˈi̱ cuˈma̱. Ndiˈya̱ ñacui̱ naˈ jiˈi̱ ma̱, chaˈ ñaˈa̱ ti xñi tsoˈo ma̱ chaˈ jiˈi̱ ycuiˈ Ndyosi, lcaa tsa̱ jlya tiˈ ma̱ jiˈi̱ Ni; xcuiˈ lye tsa cuaˈni ma̱ cña jiˈi̱ ycuiˈ nu Xuˈna na, ná ca taja tiˈ ma̱ loˈo cuaˈni ma̱ cña biˈ. Cua jlo tiˈ ma̱ chaˈ ná culiji juaˈa̱ ti sca cña nu ndyuˈni ma̱ cuentya jiˈi̱ ycuiˈ Ndyosi.
\c 16
\s Msta̱ chaˈ xtyucua jiˈi̱ tyaˈa tiˈi ti nguˈ ca Jerusalén 
\p
\v 1 Cua nda naˈ chaˈ nu ndyaa slo ca taˈa nguˈ nu ndyuˈu tiˈi̱ chaˈ cuaˈni tlyu nguˈ jiˈi̱ ycuiˈ Ndyosi ca lcaa quichi̱ ca loyuu su cuentya Galacia; cua nchcuiˈ naˈ ñiˈya̱ cuaˈni nguˈ loˈo xtiˈi̱ nguˈ msta̱. La cuiˈ juaˈa̱ cuaˈni cuˈma̱ nu loˈo xtiˈi̱ ma̱ msta̱ biˈ, chaˈ xtyucua ma̱ jiˈi̱ nguˈ tiˈi tyaˈa ngusñi na chaˈ jiˈi̱ Jesús nu ndiˈi̱ ca loyuu su cuentya Judea.
\v 2 Tsa̱ clyo nu nxana sca semana, liˈ tsoˈo si lcaa ma̱ xñi ma̱ xi xcayaˈ ma̱, cayaˈ nu cua ngujui jiˈi̱ ma̱ semana nu ndye. Tyucoˈo biˈ liˈ, loˈo liˈ ná ntsuˈu chaˈ xtiˈi̱ ma̱ msta̱ biˈ yala ntchaa ti nu loˈo tyalaa naˈ.
\v 3 Loˈo cua ngulaa naˈ, liˈ ta na xi ñati̱ nu tsaa ca quichi̱ Jerusalén, cua ñaˈa̱ ca nguˈ nu cuane ma̱ jiˈi̱ chaˈ tsaa nguˈ, ñati̱ nu cua ndyuloo tsoˈo ma̱ jiˈi̱. Ta na xi quityi cuiˈya nguˈ tsaa nguˈ, quityi biˈ cachaˈ ñiˈya̱ laca cña nu ndyaˈa̱ nguˈ. Liˈ tsaa loˈo nguˈ biˈ jiˈi̱ msta̱ nu ta ma̱ jiˈi̱ nguˈ tiˈi tyaˈa ngusñi na chaˈ jiˈi̱ Jesús ca Jerusalén biˈ.
\v 4 Ca liˈ ñacui̱ naˈ si tsaˈa̱, si ná tsaˈa̱ loˈo nguˈ biˈ. Ná jlo tiˈ naˈ ñiˈya̱ caca cña re ˈna, si ta chacuayáˈ tsaˈa̱.
\s Tyucui̱i̱ su tsaa Pablo
\p
\v 5 Ntsuˈu cña tsaˈa̱ tyu̱u̱ quichi̱ ca loyuu su cuentya Macedonia; loˈo tye cña biˈ, liˈ tyalaa naˈ ca quichi̱ tyi ma̱ ca ndacua,
\v 6 tyanu naˈ xi loˈo ma̱ liˈ. Ná tyiqueeˈ tyanu naˈ loˈo ma̱ tyucui tyempo tlyaˈ. Laja loˈo tyiˈi̱ naˈ loˈo cuˈma̱, liˈ taca xtyucua ma̱ xi ˈna chaˈ quiñi la tyucui̱i̱ ˈna chaˈ tsaˈa̱ tyijyuˈ la, macala su ntsuˈu chaˈ tsaˈa̱. 
\v 7 Ná ntiˈ naˈ chaˈ tyeje tacui naˈ juaˈa̱ ti slo ma̱; na cua ntiˈ naˈ tyanu naˈ xi tyempo loˈo ma̱, chacuayáˈ jiˈi̱ ycuiˈ nu Xuˈna na.
\v 8 Juani ti tyanu naˈ ca quichi̱ Efeso re ñaˈa̱ cuayáˈ tyalaa tsa̱ taˈa Pentecostés.
\v 9 Tsoˈo tsa ndyaca ˈna su ndiˈi̱ naˈ quichi̱ re, chaˈ ntsuˈu tsa nguˈ quichi̱ nu tsoˈo tsa ndacaˈa̱ jyaca̱ loˈo nchcuiˈ naˈ loˈo nguˈ, masi ñaˈa̱ ti ntsuˈu tsa ñati̱ nu nxu̱u̱ tyaˈa loˈo naˈ.
\p
\v 10 Si tyalaa Timoteo cajua, chcuiˈ tsoˈo ma̱ loˈo yu, chaˈ ná ca xñiˈi̱ tiˈ yu laja loˈo tyiˈi̱ yu loˈo ma̱. Cuentya jiˈi̱ ycuiˈ nu Xuˈna na ndyaˈa̱ yu, la cuiˈ tyaˈa cña nu ndyaˈa̱ naˈ.
\v 11 Ni tsaca ma̱, ná cñaˈa̱ tiˈí ma̱ jiˈi̱ yu; tsoˈo la si xtyucua ma̱ jiˈi̱ yu chaˈ quiñi tyucui̱i̱ jiˈi̱ yu chaˈ tyalaa yu ca slo naˈ. Ntajatya tsa ya jiˈi̱ yu, naˈ loˈo lcaa tyaˈa ngusñi na chaˈ jiˈi̱ Cristo ca nde.
\p
\v 12 Cua nchcuiˈ tsa naˈ loˈo Apolos tyaˈa tsoˈo ma̱, chaˈ ca̱a̱ naˈa̱ yu xi jiˈi̱ ma̱; ca̱a̱ yu loˈo xaˈ la nguˈ tyaˈa na re. Pana ná ntajaˈa̱ yu ca̱a̱ yu yala ti; ca loˈo laja jiˈi̱ yu, ca liˈ ca̱a̱ yu su ndiˈi̱ ma̱. 
\s Chaˈ nu nguscua Pablo su cua tye quityi
\p
\v 13 Tii ti tiˈ ma̱ tyiˈi̱ ma̱ chalyuu. Xñi tsoˈo ma̱ chaˈ jiˈi̱ Jesús. Cuaˈni tlyu tyiquee ma̱, ná cutsi̱i̱ ma̱. 
\v 14 Xcuiˈ tsoˈo ti tyuˈu tyiquee ma̱ ñaˈa̱ ma̱ jiˈi̱ ñati̱ lcua ti seˈi̱ su ndyuˈni ma̱ cña.
\p
\v 15 Cuˈma̱ tyaˈa ngusñi na chaˈ jiˈi̱ Jesús, cua jlo tiˈ ma̱ chaˈ lcaa nguˈ tyaˈa Estéfanas ngusñi nguˈ chaˈ jiˈi̱ Jesús clyo; clyo ca ngua nguˈ biˈ jiˈi̱ lcaa cuˈma̱ nguˈ quichi̱ nu ndiˈi̱ cacua ti nde Acaya. Lcaa tsa̱ ntajaˈa̱ nguˈ biˈ xtyucua nguˈ jiˈi̱ ñati̱ tyaˈa ngusñi na chaˈ jiˈi̱ ycuiˈ Ndyosi.
\v 16 Ntiˈ naˈ chaˈ taquiyaˈ ma̱ jiˈi̱ nguˈ biˈ; la cuiˈ juaˈa̱ taquiyaˈ ma̱ jiˈi̱ lcaa nguˈ nu cuaˈni cña stuˈba ti loˈo nguˈ biˈ, loˈo juaˈa̱ jiˈi̱ lcaa ñati̱ nu tsoˈo tsa cuaˈni cña ñiˈya̱ nu ndyuˈni nguˈ biˈ.
\v 17 Tsoˈo tsa ntsuˈu tyiquee naˈ chaˈ cua ndyalaa Estéfanas loˈo Fortunato loˈo Acaico slo naˈ ca nde. Ná nduˈni chaˈ masi ná ndiˈi̱ ma̱ loˈo naˈ juani, chaˈ nu nguˈ biˈ ni, nxtyucua tsa nguˈ ˈna;
\v 18 cua nguaˈni nguˈ biˈ chaˈ nguula la tiˈ tyiquee naˈ, la cuiˈ ñiˈya̱ nu nguaˈni nguˈ biˈ loˈo cuˈma̱. Ngaˈa̱ chaˈ taquiyaˈ ma̱ jiˈi̱ lcaa ñati̱ nu ndyuˈni cña juaˈa̱.
\p
\v 19 Lcaa quichi̱ ca loyuu su cuentya Asia su ntsuˈu ñati̱ nu ndyuˈu tiˈi̱ cuentya jiˈi̱ Jesús, nda nguˈ xlyo niˈi̱ jiˈi̱ ma̱. Loˈo juaˈa̱ Aquila loˈo Priscila, cuati juaˈa̱ lcaa ñati̱ nu ndyuˈu tiˈi̱ toˈ tyi nguˈ biˈ, nda nguˈ xlyo niˈi̱ jiˈi̱ ma̱ cuentya jiˈi̱ ycuiˈ nu Xuˈna na. 
\v 20 Lcaa nguˈ tyaˈa ngusñi na chaˈ jiˈi̱ Jesús, cua ntiˈ nguˈ chcuichaˈ nguˈ jiˈi̱ ma̱; tyucui tyiquee ma̱ quityi ma̱ jiˈi̱ tyaˈa ma̱ chacuayáˈ jiˈi̱ Cristo.
\p
\v 21 Loˈo ycuiˈ naˈ nda naˈ xlyo niˈi̱ jiˈi̱ ma̱, nu nscua naˈ xtañi naˈ lo quityi re, Pablo.
\p
\v 22 Chaca tya chaˈ chcuiˈ naˈ loˈo ma̱ juani: Si ntsuˈu nguˈ tyaˈa ndyuˈu tiˈi̱ ma̱ nu ná liñi chaˈ tsoˈo ntsuˈu tyiquee nguˈ ñaˈa̱ nguˈ jiˈi̱ ycuiˈ nu Xuˈna na, xtyanu tiˈi̱ ma̱ jiˈi̱ nguˈ liˈ, chaˈ xcubeˈ ycuiˈ Ndyosi jiˈi̱. ¡Tya̱a̱ nuˈu̱, Xuˈna, ca su ndiˈi̱ ya!
\p
\v 23 Xtyucua Jesucristo nu Xuˈna na jiˈi̱ ma̱.
\v 24 Tyiˈu tiˈ ma̱ ˈna, chaˈ ntsuˈu tsa tyiquee naˈ ñaˈa̱ naˈ jiˈi̱ ma̱ xquiˈya Jesucristo. Juaˈa̱ caca chaˈ lacua.