\id 2CO
\h 2 CORINTIOS
\mt Quityi nchca tyucuaa nu nguscua San Pablo ndyaa ca slo ñati̱ jiˈi̱ Jesucristo nde quichi̱ Corinto
\c 1
\p
\v 1 Pablo laca naˈ. Seˈi̱ ti ndiˈi̱ naˈ ca nde loˈo Timoteo tyaˈa ngusñi na chaˈ jiˈi̱ Cristo. Nscua ya quityi re chaˈ ca̱a̱ slo lcaa cuˈma̱ ca quichi̱ Corinto nu tsa tlyu ti ndyuˈni tlyu ma̱ jiˈi̱ ycuiˈ Ndyosi, loˈo juaˈa̱ tyaa quityi re slo lcaa ñati̱ nu ntsuˈu chaˈ jiˈi̱ loˈo ycuiˈ Ndyosi tyucui ñaˈa̱ loyuu su cuentya Acaya. Cua nda ycuiˈ Ndyosi cña ˈna chaˈ tsaˈa naˈ chcuiˈ naˈ loˈo nguˈ xaˈ quichi̱ ca tyijyuˈ la, lcaa chaˈ nu jiˈi̱ Jesucristo.
\v 2 Cua ntiˈ tsa ya chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱ xquiˈya Jesucristo nu Xuˈna na.
\s Nxtyucua tsa ycuiˈ Ndyosi jiˈna loˈo quiñaˈa̱ tsa chaˈ tiˈí ndyacua jiˈna
\p
\v 3 Cuaˈni tlyu na jiˈi̱ ycuiˈ Ndyosi nu laca Sti Jesucristo nu Xuˈna na, xquiˈya chaˈ tyaˈna tiˈ Ni ñaˈa̱ Ni jiˈna, loˈo juaˈa̱ nxtyucua tsa Ni jiˈna loˈo ndyacua cua ñaˈa̱ ca chaˈ tiˈí jiˈna.
\v 4 Nu nxtyucua Ni jiˈna ni, juaˈa̱ nduˈni Ni chaˈ tiyaˈ la taca xtyucua na jiˈi̱ xaˈ ñati̱, nu loˈo tyacua cua ñaˈa̱ ca chaˈ tiˈí jiˈi̱ nguˈ; ñiˈya̱ loˈo nguxtyucua ycuiˈ Ndyosi jiˈna, la cuiˈ juaˈa̱ taca xtyucua na jiˈi̱ xaˈ ñati̱ liˈ.
\v 5 Ñiˈya̱ loˈo nguaˈni lyaˈ tiˈ ñati̱ jiˈi̱ Cristo tya saˈni la, juaˈa̱ nda nguˈ quiñaˈa̱ tsa chaˈ tiˈí jiˈna juani, nu loˈo nchcuiˈ na chaˈ jiˈi̱ Cristo; pana ñaˈa̱ ti nxtyucua tsa Cristo jiˈna, la cuiˈ hora loˈo nchcubeˈ na.
\v 6 Masi tyacua chaˈ tiˈí jiˈi̱ ya, masi lyaˈ tiˈ nguˈ jiˈi̱ ya, xquiˈya cuˈma̱ laca chaˈ tiˈí biˈ, chaˈ taca xtyucua la ycuiˈ Ndyosi jiˈi̱ ma̱ chaˈ caja ñiˈya̱ clyaá ma̱ jiˈi̱ nu cuxi liˈ. Nu loˈo xtyucua Ni jiˈi̱ ya ni, xquiˈya cuˈma̱ nduˈni Ni juaˈa̱ liˈ, chaˈ caja ñiˈya̱ xtyucua ya jiˈi̱ ma̱; juaˈa̱ ta Ni juersa jiˈi̱ ma̱ chaˈ loˈo cuˈma̱ talo ma̱ jiˈi̱ chaˈ tiˈí, la cuiˈ ñaˈa̱ chaˈ tiˈí nu ndyaca jiˈi̱ ya.
\v 7 Ndyiˈu tsa tiˈ ya jiˈi̱ cuˈma̱. Jlo tiˈ ya chaˈ ñiˈya̱ ndyuˈni lyaˈ tiˈ nguˈ jiˈi̱ ya, juaˈa̱ cuaˈni lyaˈ tiˈ nguˈ jiˈi̱ ma̱; pana ñiˈya̱ nxtyucua Ni jiˈi̱ ya, juaˈa̱ xtyucua Ni jiˈi̱ cuˈma̱.
\p
\v 8 Cuˈma̱ tyaˈa ngusñi na chaˈ jiˈi̱ Cristo, cua ntiˈ ya chaˈ caca cuayáˈ tiˈ ma̱ ñiˈya̱ ngua loˈo ngujui chaˈ tiˈí jiˈi̱ ya ca quichi̱ su ndyaa ya ca loyuu su cuentya Asia, chaˈ tlyu tsa chaˈ cuxi nu ndyacua jiˈi̱ ya nu ngua liˈ. Ná jlo tiˈ ya tsiyaˈ ti ñiˈya̱ caca chaˈ tyiji̱loo ya jiˈi̱ chaˈ cuxi biˈ nquichaˈ; ngua tiˈ ya chaˈ ngaˈaa tyuˈú ya,
\v 9 chaˈ cua ndyalaa tyempo nu cua cajaa ti ya. Pana juaˈa̱ ngua chaˈ tsoˈo la jlya tiˈ ya jiˈi̱ sca ti ycuiˈ Ndyosi, chaˈ nchca jiˈi̱ Ni cuaˈni Ni chaˈ tyuˈú ñati̱ chaca quiyaˈ masi cua ngujuii nguˈ; biˈ chaˈ nchca jiˈi̱ Ni cuaˈni lyaá Ni jiˈna, siˈi na culacua tiˈ na chaˈ ycuiˈ ca ti na ntsuˈu chaˈ cuaˈni na chaˈ clyaá na laja chaˈ cuxi biˈ.
\v 10 Cua nguaˈni lyaá ycuiˈ Ndyosi jiˈi̱ ya tyempo biˈ, chaˈ ná ngujuii ya, masi cuxi tsa ngua chaˈ ca biˈ; loˈo juaˈa̱ tya cuaˈni lyaá la Ni jiˈi̱ ya ca nde loo la. Cua ngusñi ya chaˈ jiˈi̱ ycuiˈ Ndyosi, biˈ chaˈ jlya tiˈ ya jiˈi̱ ycuiˈ Ni, chaˈ ñaˈa̱ ti tya cuaˈni lyaá Ni jiˈi̱ ya.
\v 11 Loˈo juaˈa̱ taca xtyucua ma̱ jiˈi̱ ya nu loˈo chcuiˈ ma̱ loˈo ycuiˈ Ndyosi cuentya jiˈi̱ cuare. Tucuá Ni chaˈ nu chcuiˈ ma̱ loˈo Ni, chaˈ tyu̱u̱ tyaˈa ma̱; liˈ cuaˈni Ni chaˈ caca tsoˈo jiˈi̱ ya. Loˈo liˈ tyu̱u̱ tyaˈa ma̱ taca tya ma̱ xlyaˈbe jiˈi̱ ycuiˈ Ndyosi cuentya jiˈi̱ ya, nu loˈo cua ngulaá ya jiˈi̱ nu cuxi.
\s Ná ngua jiˈi̱ Pablo tsaa nde Corinto
\p
\v 12 Tsoˈo tsa ntiˈ ya chaˈ xcuiˈ nguaˈni tyucui tyiquee ya loˈo ma̱, xcuiˈ nda ya chaˈ liñi loˈo ma̱, ñiˈya̱ nu nguaˈni ya loˈo xaˈ ñati̱; juaˈa̱ ntiˈ ya. Ngua jiˈi̱ ya cuaˈni ya juaˈa̱ loˈo ma̱ xquiˈya chaˈ lye tsa nguaˈni tyaˈna tiˈ ycuiˈ Ndyosi jiˈna laja ti; siˈi chaˈ ndaˈya chaˈ hique ti ya, biˈ chaˈ nduˈni ya juaˈa̱.
\v 13-14 Tsa lo cua ti chaˈ nguscua ya lo quityi nu ca̱a̱ slo ma̱, sca chaˈ nu taca chcuiˈ cuˈma̱, sca chaˈ nu taca ca cuayáˈ tiˈ ma̱. Masi juani cua ngua cuayáˈ tiˈ ma̱ xi, pana cua ntiˈ ya chaˈ tya caca cuayáˈ tsoˈo la tiˈ ma̱ chaˈ biˈ. Loˈo tyalaa tsa̱ biˈ, nu loˈo ca̱a̱ Jesús nu Xuˈna na chaca quiyaˈ, liˈ caca tsoˈo tyiquee ma̱ ñaˈa̱ ma̱ jiˈi̱ ya; juaˈa̱ cuare tsoˈo ca tiˈ ya ñaˈa̱ ya jiˈi̱ ma̱ ca liˈ.
\p
\v 15 Juaˈa̱ ngua tiˈ naˈ, biˈ chaˈ ngulacua tiˈ naˈ tsaˈa naˈ slo cuˈma̱ tya clyo. Ná tyiqueeˈ tsaa naˈa̱ naˈ jiˈi̱ cuˈma̱ tucua quiyaˈ ngua tiˈ naˈ nquichaˈ, chaˈ ca tsoˈo cresiya jiˈi̱ ma̱.
\v 16 Clyo ngua tiˈ naˈ tyeje tacui naˈ nde su ndiˈi̱ ma̱ tyucui̱i̱ loˈo ndyaˈa naˈ ca Macedonia. Nu loˈo nguxtyu̱u̱ naˈ ndyaˈa naˈ ca Macedonia biˈ, tya̱a̱ naˈ ca su ndiˈi̱ ma̱ chaca quiyaˈ, chaˈ caca xtyucua cuˈma̱ jnaˈ tsaˈa naˈ nde tyucui̱i̱ Judea, ngua tiˈ naˈ.
\v 17 Pana loˈo ná ya̱a̱ naˈ slo cuˈma̱ ni, liˈ ngua tiˈ ma̱ chaˈ ná ngulacua tsoˈo tiˈ naˈ. Ná tsoˈo chaˈ chcuiˈ ma̱ chaˈ laca naˈ sca ñati̱ nu nchcuiˈ tucua ti chaˈ; nu loˈo ngüiñi tyucui̱i̱ ˈna tya clyo, ná nñiloˈo naˈ jiˈi̱ ni sca ñati̱.
\v 18 Cua jlo tiˈ ycuiˈ Ndyosi chaˈ ná nchcuiˈ ya tucua chaˈ loˈo cuˈma̱, ñiˈya̱ si nacui̱ ya chaˈ juaˈa̱ laca, loˈo liˈ nacui̱ ya chaˈ siˈi juaˈa̱. Ná nduˈni ya juaˈa̱, 
\v 19 chaˈ nu Jesucristo biˈ, nu sca ti Sñiˈ ycuiˈ Ndyosi ni, siˈi tucua chaˈ ntsuˈu tyiquee Ni. Cua nchcuiˈ ya chaˈ jiˈi̱ Ni su ndiˈi̱ cuˈma̱, loˈo naˈ, loˈo Silvano, loˈo Timoteo, nchcuiˈ cua chaˈ jiˈi̱ Ni. Ná chcuiˈ Ni chaˈ siˈi juaˈa̱ laca sca chaˈ si cua nchcuiˈ Ni tsaca quiyaˈ chaˈ juaˈa̱ laca chaˈ biˈ. Sca ti Cristo laca nu chañi chaˈ nchcuiˈ Ni chaˈ liñi,
\v 20 sca ti nu Cristo biˈ nu nduˈni chaˈ chañi chaˈ tyuˈu tucua lcaa chaˈ nu nda ycuiˈ Ndyosi loˈo na; biˈ chaˈ xquiˈya Jesucristo taca chcuiˈ na: “Amén, juaˈa̱ caca chaˈ lacua”. Juaˈa̱ ñacui̱ na laja loˈo nduˈni tlyu na jiˈi̱ ycuiˈ Ndyosi.
\v 21 Ycuiˈ Ndyosi laca nu nguaˈni loˈo ya chaˈ ngusñi tsoˈo ya chaˈ jiˈi̱ Cristo, loˈo juaˈa̱ nguaˈni Ni loˈo cuˈma̱; na cua nguaˈni ycuiˈ Ndyosi chaˈ laca na ñati̱ jiˈi̱ Ni.
\v 22 Ndiˈya̱ laca ñiˈya̱ si ngusta ycuiˈ Ni sca cuayáˈ nu jiˈi̱ Ni hichu̱ˈ na, nu loˈo nda Ni Xtyiˈi ycuiˈ Ni nu ndyanu neˈ cresiya jiˈna. Xtyiˈi ycuiˈ Ndyosi laca nu nda ycuiˈ Ndyosi jiˈna yala la, chaˈ caca cuayáˈ tiˈ na chaˈ chañi chaˈ cuaˈni Ni loˈo na lcaa ñaˈa̱ chaˈ nu nacui̱ Ni chaˈ cuaˈni Ni.
\p
\v 23 Ná ngutaˈa̱ naˈ quichi̱ tyi ma̱ tuˈni, chaˈ ná ntiˈ naˈ chaˈ caca ñasi̱ˈ naˈ jiˈi̱ cuˈma̱. Chañi chaˈ xquiˈya chaˈ biˈ ti, biˈ chaˈ ná ndyaˈa̱ naˈ ca slo ma̱ liˈ. Cua jlo tiˈ ycuiˈ Ndyosi chaˈ biˈ. Quiˈya ycuiˈ Ndyosi cresiya ˈna si ná chañi chaˈ nu nchcuiˈ naˈ re.
\v 24 Pana tsoˈo la masi siˈi xquiˈya cuare ti taquiyaˈ ma̱ chaˈ jiˈi̱ ycuiˈ Ndyosi, chaˈ neˈ tyiquee ycuiˈ ca ma̱ cua ngusñi tsoˈo ma̱ chaˈ jiˈi̱ Jesús. Na cua ntiˈ ya xtyucua ya jiˈi̱ ma̱ chaˈ ca chaa la tiˈ ma̱ laja loˈo ndyuˈni tlyu ycuiˈ ca ma̱ jiˈi̱ Jesús.
\c 2
\p
\v 1 Biˈ chaˈ ngulacua tiˈ naˈ chaˈ ngaˈaa suˈba naˈ chaˈ xñiˈi̱ tiˈ tyiquee ma̱ loˈo tsaˈa̱ slo ma̱ chaca quiyaˈ. 
\v 2 Ndiˈya̱ laca chaˈ: tsoˈo tsa ntiˈ naˈ loˈo ñaˈa̱ naˈ ñiˈya̱ nu ndyuˈni cuˈma̱; cua nda naˈ chaˈ xñiˈi̱ tiˈ jiˈi̱ ma̱ tsaca quiyaˈ, biˈ chaˈ ná tsoˈo si juaˈa̱ cuaˈni naˈ chaca quiyaˈ,
\v 3 chaˈ juaˈa̱ ngua chaˈ nu nguscua naˈ lo quityi biˈ tya tsubiˈ la. Ná ntiˈ naˈ tsaˈa naˈ slo cuˈma̱ nquichaˈ; ná tyiqueeˈ cuaˈni ma̱ chaˈ ca xñiˈi̱ tiˈ naˈ, ngua tiˈ naˈ. Pana tsoˈo la si tsoˈo ti caca tyiquee naˈ, chaˈ juaˈa̱ si tsoˈo ntsuˈu tyiquee naˈ, loˈo cuˈma̱ tsoˈo ti caca tyiquee ma̱ liˈ, ngua tiˈ naˈ.
\v 4 Nu loˈo nguscua naˈ quityi biˈ, quiñaˈa̱ tsa ngulacua tiˈ naˈ liˈ; xñiˈi̱ tsa tiˈ naˈ ngua liˈ, hasta ndyunaa naˈ xquiˈya cuˈma̱. Pana siˈi chaˈ ca xñiˈi̱ tiˈ cuˈma̱ nguscua naˈ quityi biˈ; ngua tiˈ naˈ chaˈ ca cuayáˈ tiˈ cuˈma̱ chaˈ ntsuˈu tsa tyiquee naˈ ñaˈa̱ naˈ jiˈi̱ cuˈma̱, biˈ chaˈ nguscua naˈ quityi biˈ.
\s Tyuˈu chaˈ clyu tiˈ jiˈi̱ cuˈma̱ loˈo nguˈ cuxi biˈ 
\p
\v 5 Cua ngua xñiˈi̱ tiˈ ma̱ xquiˈya chaˈ cuxi nu nguaˈni nu ñati̱ biˈ. Loˈo nguaˈni yu juaˈa̱ ni, siˈi sca ti naˈ ngua xñiˈi̱ tiˈ naˈ liˈ; loˈo lcaa cuˈma̱ ngua xñiˈi̱ xi tiˈ tyiquee ma̱ xquiˈya chaˈ cuxi biˈ. Pana juani ngaˈaa ntsuˈu chaˈ cuxi biˈ, biˈ chaˈ ngaˈaa ntiˈ naˈ cuaˈni tyaala naˈ jiˈi̱ cuˈma̱.
\v 6 Cuayáˈ tsa chaˈ nu nguaˈni cuˈma̱ loˈo yu biˈ, chaˈ cati̱ xquiˈya yu biˈ, nu loˈo ndyuˈu tiˈi̱ ma̱ tsa tlyu ti nu ngua liˈ.
\v 7 Biˈ chaˈ juani cuiˈya cuˈma̱ chaˈ clyu tiˈ jiˈi̱ yu biˈ, xaalaˈ ma̱ cresiya jiˈi̱ ma̱ loˈo yu, chaˈ ná chcunaˈ chalyuu jiˈi̱ yu biˈ xquiˈya chaˈ xñiˈi̱ tsa tiˈ yu.
\v 8 Ndijña ya chaˈ clyu tiˈ jiˈi̱ ma̱ juani chaˈ xtyucua ma̱ xi jiˈi̱ yu biˈ, chaˈ ca cuayáˈ tiˈ yu chaˈ ñaˈa̱ ti tya ntsuˈu tyiquee ma̱ ñaˈa̱ ma̱ jiˈi̱ yu.
\v 9 Cua laca nguscua naˈ quityi biˈ, chaˈ lijya̱ slo cuˈma̱, chaˈ ngua tiˈ naˈ quijeloo chaˈ ˈna si chañi chaˈ jiˈi̱ ma̱ chaˈ cuaˈni cuˈma̱ ñiˈya̱ nu ni naˈ jiˈi̱ ma̱ liˈ; ná jlo tiˈ naˈ nquichaˈ, si tyajaˈa̱ cuˈma̱ cuaˈni ma̱ juaˈa̱.
\v 10 Loˈo naˈ, cuiˈya naˈ chaˈ clyu tiˈ jiˈi̱ yu biˈ, si cua nguaˈni clyu tiˈ cuˈma̱ jiˈi̱ yu. Loˈo cuˈma̱ cua nguaˈni yu chaˈ cuxi biˈ, pana naˈ ngüiˈya̱ chaˈ clyu tiˈ jiˈi̱ yu biˈ cuentya jiˈi̱ ma̱, masi tyijyuˈ ndiˈi̱ naˈ, masi sca ti Cristo ndu̱ loˈo naˈ. Biˈ chaˈ juaˈa̱ culacua tsoˈo tiˈ ma̱ lacua,
\v 11 chaˈ ná caca tyiji̱loo nu xñaˈa̱ nu naa Satanás jiˈna; cua jlo tsa tiˈ na chaˈ tajuaˈ tsa nu xñaˈa̱ biˈ.
\s Ngulacua tsa tiˈ Pablo ngaˈa̱ yu ca quichi̱ Troas
\p
\v 12 Ndyaˈa̱ naˈ ca quichi̱ Troas tya tsubiˈ la, ndyaa cachaˈ naˈ chaˈ jiˈi̱ Jesús jiˈi̱ nguˈ quichi̱ biˈ. Loˈo juaˈa̱ ngua liˈ, chaˈ tsoˈo tsa ndyuna nguˈ quichi̱ biˈ chaˈ jiˈi̱ ycuiˈ Ndyosi, xquiˈya chaˈ cua nda ycuiˈ nu Xuˈna na chacuayáˈ ˈna chaˈ cuaˈni naˈ cña jiˈi̱ Ni ca ndacua.
\v 13 Pana ná ndalo naˈ ca biˈ, chaˈ ngulacua tsa tiˈ naˈ ni chaˈ laca bilya tyalaa Tito tyaˈa ndyaˈa̱ ya cña slo naˈ; biˈ chaˈ yala ti ngusalyaˈ naˈ loˈo nguˈ quichi̱ biˈ. Liˈ tya ndyaa la naˈ nde loyuu su cuentya Macedonia. 
\s Ntiji̱loo na jiˈi̱ nu cuxi xquiˈya Cristo
\p
\v 14-15 Ndya tsa naˈ xlyaˈbe jiˈi̱ ycuiˈ Ndyosi chaˈ stuˈba chaˈ jiˈna loˈo Cristo. Laca chaˈ ñiˈya̱ si ndyaˈa̱ loˈo ycuiˈ Ndyosi jiˈna ndyaˈa̱ quiˈi ti na calle, chaˈ ndyuˈni chi̱ Ni loo Jesucristo chaˈ cua ntiji̱loo yu jiˈi̱ nu cuxi. Juaˈa̱ jiˈna ta Ni su tyaˈa̱ na laja ñati̱ biˈ, chaˈ loˈo na nsañi na chaˈ jiˈi̱ ycuiˈ Cristo ca slo lcaa ñati̱; ndachaˈ na chaˈ jiˈi̱ ycuiˈ Ndyosi ca slo ñati̱, masi nchcuiˈ na loˈo ñati̱ nu ntiˈ clyaá jiˈi̱ nu cuxi, masi nchcuiˈ na loˈo xaˈ ñati̱ nu ná ntiˈ cuna chaˈ tsoˈo biˈ. Pana ñiˈya̱ laca sca na tyixi xtyiˈi nu nda xtyiˈi ntyucua lcaa seˈi̱, juaˈa̱ laca cña nu nduˈni na cuentya jiˈi̱ ycuiˈ Ndyosi. Ndiya tsa tiˈ ycuiˈ Ndyosi jiˈi̱, la cuiˈ juaˈa̱ ndiya tiˈ Ni cña nu ndyuˈni Cristo nde chalyuu xquiˈya na.
\v 16 Ñati̱ nu chiyaˈa̱ tsa nduˈni ni, ná ndiyaˈ tiˈ nguˈ chaˈ nu nchcuiˈ na tsiyaˈ ti; na ndacane la chaˈ biˈ jiˈi̱ nguˈ chaˈ cua chcunaˈ ti chalyuu jiˈi̱ nguˈ xquiˈya chaˈ cuxi nu ndyuˈni nguˈ. Pana ñati̱ nu ntiˈ clyaá jiˈi̱ nu cuxi ni, xaˈ ñaˈa̱ nduˈni nguˈ biˈ; cua jlo tiˈ nguˈ chaˈ ntsuˈu chaca chalyuu tsoˈo la nu caja jiˈi̱ nguˈ. Ntsuˈu tsa ñati̱ nu ná caca cuaˈni cña biˈ; pana cuare ni, taca cuaˈni ya jiˈi̱ chacuayáˈ jiˈi̱ ycuiˈ Ndyosi.
\v 17 Siˈi ngana ndyuˈni ya loˈo chaˈ jiˈi̱ ycuiˈ Ndyosi biˈ, siˈi na nchcutsaˈa̱ ya jiˈi̱ loˈo xaˈ la chaˈ; tyucui tiˈ tyiquee ya nchcuiˈ ya loˈo ñati̱ ñiˈya̱ laca si na ndiˈi̱ ycuiˈ Ndyosi slo ya, xquiˈya chaˈ ycuiˈ Ndyosi laca nu nguaˈa̱ loo jiˈi̱ ya chaˈ cuaˈni ya cña biˈ cuentya jiˈi̱ Cristo.
\c 3
\s Nde laca sca chaˈ nu cua nguxana ca ti
\p
\v 1 Ná nchcuiˈ tyucuaa tiˈ ya loˈo cuˈma̱. Ná ntiˈ ya chaˈ chcuiˈ ma̱ chaˈ tlyu tsa ñati̱ laca ya. Loˈo ndyaˈa̱ ya slo ma̱, ná ntsuˈu chaˈ quiˈya ya sca quityi nu ñacui̱ chaˈ tsoˈo ti ndyuˈni ya cña; juaˈa̱ loˈo ndyaa ya chaca seˈi̱, ná ntsuˈu chaˈ jña ya sca quityi juaˈa̱ jiˈi̱ ma̱.
\v 2 Ná ntsuˈu chaˈ tyuˈú quityi jiˈi̱ ya juaˈa̱, chaˈ taca ñaˈa̱ nguˈ jiˈi̱ cuˈma̱. Cua jlo tiˈ nguˈ chaˈ xquiˈya cuare tsoˈo tsa ndyuna ma̱ chaˈ jiˈi̱ Jesús, jlo tiˈ nguˈ chaˈ ntsuˈu tsa tyiquee ya ñaˈa̱ ya jiˈi̱ cuˈma̱.
\v 3 Cristo nguaˈni cña biˈ neˈ cresiya jiˈi̱ cuˈma̱, nu loˈo nda Ni jiˈi̱ cua chaˈ ndyaa ya ca su ndiˈi̱ ma̱; biˈ laca sca cña jiˈi̱ Xtyiˈi ycuiˈ Ndyosi nu luˈú ca, nu nguaˈni Ni neˈ cresiya jiˈi̱ cuˈma̱ ñati̱ chalyuu, ni siˈi chaˈ nscua sca chaˈ chu̱ˈ quee cuajaˈ ti.
\p
\v 4 Taca chcuiˈ na juaˈa̱, chaˈ tlyu tsa ndyaca tyiquee na xquiˈya chaˈ jlya tiˈ na jiˈi̱ ycuiˈ Ndyosi, chaˈ cua ngusñi na chaˈ jiˈi̱ Jesús.
\v 5 Cuentya jiˈna, ná nchca jiˈna cuaˈni na cña jiˈi̱ ycuiˈ Ndyosi tsiyaˈ ti; pana ycuiˈ Ni nduˈni Ni loˈo na chaˈ taca jiˈna cuaˈni na lcaa lo cña jiˈi̱ Ni nu ndyuˈni na.
\v 6 Laca biˈ sca chaˈ nu cua nguxana ca ti, sca cña nu ndyuˈni Xtyiˈi ycuiˈ Ndyosi laca. Ná laca biˈ ñiˈya̱ laca sca cña nu ndacane ti quityi cusuˈ jiˈna chaˈ cuaˈni na. Ndyijii na xquiˈya yabeˈ nu ntsuˈu jiˈna xquiˈya cña nu nclyo quityi cusuˈ biˈ jiˈna, pana juani ndyiji chalyuu cucui jiˈna xquiˈya Xtyiˈi ycuiˈ Ndyosi.
\p
\v 7 Cña nu ngulo Moisés jiˈi̱ nguˈ biˈ cuentya jiˈi̱ ycuiˈ Ndyosi ni, chu̱ˈ quee cuajaˈ nscua chaˈ biˈ; nguscua Ni letra hichu̱ˈ quee cuajaˈ biˈ, chaˈ chcuiˈ nguˈ lo. Ndubi tsa ñaˈa̱ xee jiˈi̱ ycuiˈ Ndyosi ngua, nu loˈo nda ca ti Ni chaˈ cusuˈ biˈ; hasta tyucui ñaˈa̱ loo nu cusuˈ Moisés ndubi tsa ñaˈa̱ ngua, ni ngaˈaa ngua ñaˈa̱ tyaˈa nguˈ Israel jiˈi̱ loo nu cusuˈ biˈ. Pana yala ti nteje tacui chaˈ biˈ, xtyiˈi ti nguliji xee biˈ loo yu liˈ. Loˈo xee ndubi ndyalaa chaˈ cusuˈ biˈ lacua, masi xcuiˈ juaˈa̱ ndyijii ñati̱ loˈo yabeˈ nu ntsuˈu jiˈi̱ nguˈ xquiˈya cña nu nclyo chaˈ cusuˈ biˈ; 
\v 8 pana juani tlyu la chaˈ ndyaca nu loˈo nda na chaˈ jiˈi̱ Jesús loˈo ñati̱, loˈo liˈ nduˈni Xtyiˈi ycuiˈ Ni cña neˈ cresiya jiˈi̱ nguˈ biˈ.
\v 9 Cña nu nclyo chaˈ cusuˈ ni, biˈ nduˈni chaˈ quijeloo quiˈya nu ntsuˈu jiˈi̱ ñati̱; ntsuˈu chaˈ chcubeˈ nguˈ liˈ, masi ndubi tsa ñaˈa̱ xee nu ngua ca su ntucua quiyaˈ chaˈ cusuˈ biˈ. Biˈ chaˈ juani tlyu la chaˈ laca chaˈ jiˈi̱ ycuiˈ Jesús biˈ, chaˈ juaˈa̱ ndyaca lubii cresiya jiˈna cuentya jiˈi̱ ycuiˈ Ndyosi xquiˈya Jesús biˈ.
\v 10 Juani tlyu la chaˈ tsoˈo ndyaca ca su ndiˈi̱ na, biˈ chaˈ ngaˈaa ñaˈa̱ na jiˈi̱ chaˈ tsoˈo nu ngua jiˈi̱ chaˈ cusuˈ biˈ, masi tsoˈo tsa ñaˈa̱ ngua chaˈ biˈ tya clyo la.
\v 11 Xti ti tyempo ndalo nu chaˈ cusuˈ biˈ, masi tlyu xi xee ngua loˈo tya lyiji calo chaˈ biˈ. Pana tyucui tyempo nu lijya̱ nde loo la, ná ngaˈa̱ chaˈ tye chaˈ nu nguxana ca ti biˈ juani; tlyu la chaˈ laca biˈ tsiyaˈ ti.
\p
\v 12 Loˈo juani ngaˈaa ntsi̱i̱ na chcuiˈ na loˈo ñati̱, chaˈ jlo tiˈ na chaˈ tsoˈo tsa laca chaˈ jiˈi̱ Jesús nu nchcuiˈ na re.
\v 13 Ngaˈaa ntiˈ chaˈ tyacu̱ˈ sca lateˈ loo na ñiˈya̱ nu nguaˈni jyoˈo Moisés nu ngua saˈni biˈ, chaˈ ná ñaˈa̱ nguˈ Israel loo yu loˈo nguliji xee biˈ juaˈa̱ ti.
\v 14-15 Ndyacu̱ˈ tsa chaˈ hique nguˈ Israel nu ngua liˈ, chaˈ ná ngua cuayáˈ tiˈ nguˈ chaˈ jiˈi̱ ycuiˈ Ndyosi tsiyaˈ ti. Masi chalyuu juani, juaˈa̱ laca loˈo quityi chaˈ joˈó nu nguscua jyoˈo Moisés, la cuiˈ cña nu ngulo ycuiˈ Ndyosi jiˈi̱ ñati̱ nu ngua saˈni biˈ; nu loˈo chcuiˈ ti nguˈ judío lo quityi chaˈ joˈó biˈ, ñaˈa̱ ti ná nchca caˈya chaˈ biˈ hique nguˈ biˈ. Tsiyaˈ ti taca caˈya chaˈ biˈ hique nguˈ loˈo xñi nguˈ biˈ chaˈ jiˈi̱ Jesús; liˈ saala Ni hique nguˈ chaˈ cuna tsoˈo nguˈ chaˈ jiˈi̱ Ni.
\v 16 Pana loˈo xñi na chaˈ jiˈi̱ ycuiˈ nu Xuˈna na, liˈ tye chaˈ nu ndyacu̱ˈ hique na.
\v 17 Loˈo nchcuiˈ ca ti quityi re chaˈ jiˈi̱ nu “Xuˈna na”, biˈ ntiˈ ñacui̱ chaˈ Xtyiˈi ycuiˈ Ndyosi laca nu biˈ. Loˈo juaˈa̱ nu loˈo laca Xtyiˈi ycuiˈ Ndyosi nu Xuˈna na loo jiˈna, ngaˈaa tucui caca jiˈi̱ tatsaa jiˈna chaˈ cuaˈni na cua ñaˈa̱ ca cña cuxi liˈ.
\v 18 Juaˈa̱ laca chaˈ jiˈna, lcaa na loˈo tyaˈa na nu ntsuˈu chaˈ jiˈna loˈo Jesús, tyaca̱ˈ tyijyuˈ chaˈ cua nda nu Xuˈna na xee nu tyuˈu loo na. Pana ná ngaˈa̱ chaˈ tyacu̱ˈ sca lateˈ loo na, chaˈ la cuiˈ chaˈ tlyu biˈ laca nu ñaˈa̱ ti tya lye la ndyuˈni cña loˈo na chaˈ chaˈa̱ tyucui ñaˈa̱ na, chaˈ caca na ñiˈya̱ laca ycuiˈ Ndyosi nu Xuˈna na tsiyaˈ ti. Ca slo ycuiˈ nu Xuˈna na nu laca Xtyiˈi biˈ, ca biˈ ndyuˈu nu chaˈ tlyu biˈ. 
\c 4
\p
\v 1 Biˈ chaˈ ná nchca taja tiˈ ya jiˈi̱ cña nu ndyuˈni ya. La cuiˈ ycuiˈ Ndyosi laca nu cua nda cña biˈ jiˈi̱ ya, xquiˈya chaˈ tyaˈna tiˈ Ni ñaˈa̱ Ni jiˈi̱ ya.
\v 2 Cua nguxtyanu ya jiˈi̱ lcaa chaˈ cuxi nu ndyuˈni nguˈ cuaana ti, lcaa chaˈ nu ntyujuˈu tsa tiˈ nguˈ cuaˈni nguˈ jiˈi̱. Siˈi na nñiloˈo ya jiˈi̱ nguˈ, la cuiˈ juaˈa̱ ná nchcutsaˈa̱ ya chaˈ jiˈi̱ ycuiˈ Ndyosi loˈo xi xaˈ la chaˈ, nu loˈo nchcuiˈ ya chaˈ biˈ loˈo nguˈ; tsoˈo ti nclyuˈu ya tyucui chaˈ jiˈi̱ Jesús jiˈi̱ nguˈ. Loˈo juaˈa̱ chañi tsa laca chaˈ biˈ, chaˈ juaˈa̱ caca cuayáˈ tiˈ lcaa ñati̱ chaˈ tyucui tyiquee ya nduˈni ya cña jiˈi̱ ycuiˈ Ndyosi; juaˈa̱ ntiˈ ycuiˈ Ni ñaˈa̱ Ni jiˈi̱ ya.
\v 3 Loˈo liˈ si ntsuˈu ñati̱ nu ñacui̱ chaˈ tucui tsa ndyuˈu chaˈ tsoˈo jiˈi̱ Jesús nu nchcuiˈ ya loˈo nguˈ, liñi la ñacui̱ na liˈ chaˈ ñati̱ biˈ laca nu ngunaˈ nduˈni, biˈ chaˈ ná nchca cuaˈa̱ jyaca̱ ñati̱ biˈ jiˈi̱ chaˈ biˈ.
\v 4 Ná ntajaˈa̱ nguˈ biˈ xñi nguˈ chaˈ biˈ xquiˈya nu xñaˈa̱ nu ñiloˈo jiˈi̱ ñati̱ chalyuu. Ndacu̱ˈ nu cuxi biˈ chaˈ jiˈi̱ nguˈ chaˈ ná cuna nguˈ chaˈ tsoˈo nu cuentya jiˈi̱ Cristo, biˈ chaˈ ná nchca tyanu xee lubii jiˈi̱ Cristo neˈ cresiya jiˈi̱ nguˈ biˈ. Tlyu tsa chaˈ laca jiˈi̱ Cristo; lcaa chaˈ nu ntsuˈu jiˈi̱ Ni, stuˈba ntsuˈu chaˈ jiˈi̱ Ni loˈo ycuiˈ Ndyosi Sti Ni ca su ntucua Ni juani.
\v 5 Nu chaˈ nu nda ya loˈo nguˈ ni, siˈi chaˈ jiˈi̱ ycuiˈ ca ya nchcuiˈ ya. Ndiˈya̱ laca chaˈ nu nchcuiˈ ya loˈo nguˈ: Jesucristo laca Xuˈna tyucui ñaˈa̱ nde cua̱, loˈo la cuiˈ Ni laca Ni loo jiˈi̱ tyucui ñaˈa̱ nde chalyuu. Biˈ chaˈ ñacui̱ ya chaˈ xquiˈya Jesús nu Xuˈna na ndyuˈni ya cña cuentya jiˈi̱ ma̱.
\v 6 La cuiˈ ycuiˈ Ndyosi laca nu nda xee lubii jiˈi̱ Ni chaˈ tyanu neˈ cresiya jiˈna; biˈ chaˈ caca cuayáˈ tiˈ na lcaa chaˈ tlyu nu tsoˈo tsa nu ntsuˈu jiˈi̱ ycuiˈ Ndyosi, la cuiˈ ti chaˈ nu nchca tii na chaˈ ndyuˈni Ni cña neˈ cresiya jiˈna nu loˈo xñi na chaˈ jiˈi̱ Cristo. Ycuiˈ Ni ngulo Ni cña chaˈ tyucua xee ca su ngua chalyuu talya nu ngua tya saˈni la.
\s Ndiˈya̱ tyiˈi̱ na nde chalyuu loˈo ngusñi na chaˈ jiˈi̱ ycuiˈ Ndyosi
\p
\v 7 Masi tlyu tsa chaˈ tsoˈo nu ntsuˈu neˈ cresiya jiˈna xquiˈya Cristo, pana ñati̱ chalyuu ti laca na, siˈi na nguula tsa tiˈ na ycuiˈ ca na. Ñiˈya̱ laca sca quityu̱ˈ nu ndyaˈ loˈo yuu ti nu xtyiˈi ti nclaˈa, juaˈa̱ ti laca na. Tsoˈo la juaˈa̱, chaˈ liˈ taca ca cuayáˈ tiˈ na chaˈ sca ti ycuiˈ Ndyosi laca nu lcaa cña nchca jiˈi̱ Ni; ngaˈaa siˈi ycuiˈ ca na nu nchca jiˈna.
\v 8 Lcua ti seˈi̱ su ndyaˈa̱ ya, tlyu tsa cña ndyacua jiˈi̱ ya, pana ná nchca tyiji̱loo nu cuxi jiˈi̱ ya. Luˈba ti nclyacua tsa tiˈ ya, pana ná nchca taja tiˈ ya loˈo xñiˈi̱ tiˈ ya.
\v 9 Ntsuˈu tsa tyaˈa cusu̱u̱ ya, pana la cuiˈ ti chaˈ ná lyiji tyaˈa tsoˈo ya. Masi ntsuˈu nguˈ nu ndyuˈni chaˈ quicha ya, pana ná nchca cuaˈni tye nguˈ jiˈi̱ ya.
\v 10 Macala su ndyaˈa̱ ya nde chalyuu, luˈba ti nchca quicha ya, ntsuˈu tsa chaˈ tiˈí nu ndyuˈni nguˈ loˈo ya, tsa ñaˈa̱ nu ngua jiˈi̱ Cristo loˈo ya̱a̱ yu nde chalyuu, nu loˈo ndyujuii nguˈ jiˈi̱ yu. Pana liˈ ca jlo tiˈ xaˈ ñati̱ chaˈ ñaˈa̱ ti tya luˈú ycuiˈ Cristo, nu loˈo ñaˈa̱ nguˈ biˈ chaˈ ñaˈa̱ ti tya luˈú ya.
\v 11 Cua ñaˈa̱ ca hora loˈo ndiˈi̱ ya chalyuu ntsuˈu tsa chaˈ cuxi nu taca cujuii jiˈi̱ ya, chaˈ quiñaˈa̱ tsa chaˈ cuxi ndyacua jiˈi̱ ya lcaa seˈi̱ su ndyaˈa̱ ya xquiˈya Jesús. Pana juaˈa̱ taca ñaˈa̱ nguˈ chaˈ tya ndiˈi̱ Jesús loˈo ya; biˈ chaˈ laca tya ntsuˈu chalyuu jiˈi̱ ya, masi quicha ti tiˈ ya ndyaˈa̱ ya.
\v 12 Juaˈa̱ laca chaˈ jiˈi̱ cuare, na ncliji tyucui ñaˈa̱ ya xquiˈya chaˈ tiˈí nu ndyacua jiˈi̱ ya nde chalyuu; pana cuˈma̱ ni, cua ngujui chalyuu nu ná ngaˈa̱ chaˈ tye jiˈi̱ ma̱ xquiˈya cña nu nguaˈni ya.
\p
\v 13 Ntsuˈu sca chaˈ nu nscua lo quityi cusuˈ su nchcuiˈ nguˈ ndiˈya̱: “Jlya tiˈ naˈ chaˈ chañi laca chaˈ biˈ, biˈ chaˈ nchcuiˈ naˈ chaˈ liñi biˈ loˈo xaˈ ñati̱”, nacui̱ jyoˈo cusuˈ biˈ. Loˈo juaˈa̱ cuare, nchcuiˈ ya chaˈ jiˈi̱ Jesús chaˈ cua ndyatí̱ tyiquee ya jiˈi̱ yu, xquiˈya chaˈ ngusñi ya chaˈ jiˈi̱ yu.
\v 14 Chañi jlya tiˈ ya chaˈ ngulo ycuiˈ Ndyosi jiˈi̱ Jesús nu Xuˈna na ca su ntsiya yu nguatsiˈ yu, loˈo la cuiˈ juaˈa̱ ca̱quiˈya Ni jiˈna, chaˈ stuˈba ti tyalaa na ca su ntucua ycuiˈ Ni.
\v 15 Ndalo ya jiˈi̱ lcaa chaˈ tiˈí nu ndyacua jiˈi̱ ya xquiˈya cuˈma̱; tiyaˈ la liˈ tyatu̱ quiñaˈa̱ la tyaˈa ñati̱ ma̱ nu taca tya xlyaˈbe jiˈi̱ ycuiˈ Ndyosi cuentya jiˈi̱ ya, chaˈ juaˈa̱ quiñaˈa̱ tsa tyaˈa ñati̱ ma̱ ntsuˈu nu cua ngujui xlyaˈbe nu ta ycuiˈ Ndyosi jiˈi̱ ma̱. Loˈo liˈ stuˈba ti taca cuaˈni chi̱ na loo ycuiˈ Ndyosi.
\p
\v 16 Biˈ chaˈ ná nchca taja tiˈ na jiˈi̱ cña nu ndyuˈni na cuentya jiˈi̱ ycuiˈ Ndyosi, masi ncliji tyucui ñaˈa̱ cuañaˈ na juaˈa̱ ti; pana ñaˈa̱ ti luˈba ti nduˈni ycuiˈ Ndyosi chaˈ ca tsoˈo la cresiya jiˈna.
\v 17 Siˈi na tlyu tsa chaˈ tiˈí nu ndyacua jiˈna chalyuu re juani, xti ti tyempo talo chaˈ tiˈí biˈ; pana tiyaˈ la ni, tlyu tsa chaˈ tsoˈo ngaˈa̱ chaˈ tyacua jiˈna ca slo ycuiˈ Ndyosi, loˈo ná ngaˈa̱ chaˈ tye biˈ tsiyaˈ ti. Ná stuˈba chaˈ tiˈí re loˈo chaˈ tsoˈo nu ngaˈa̱ chaˈ tyacua jiˈna nde loo la.
\v 18 Ná ntsuˈu tyiquee na jiˈi̱ sca na nu tsoˈo ñaˈa̱ ti, chaˈ ná talo lcaa na nu tsoˈo ñaˈa̱ biˈ tsiyaˈ ti; na nclyana na jiˈi̱ sca chaˈ nu ná nchca ñaˈa̱ na jiˈi̱ juani ti, pana nde loo la tyuˈu tucua chaˈ biˈ, ñaˈa̱ na jiˈi̱ liˈ. Biˈ laca nu ná ngaˈa̱ chaˈ tye chaˈ jiˈi̱.
\c 5
\p
\v 1 Jlo tiˈ na chaˈ ñiˈya̱ ntiˈ sca niˈi̱ cantaˈ ti, juaˈa̱ ntiˈ cuañaˈ na, chaˈ si cua ngujuii na ni, cua ndye cuañaˈ na nguti̱. Pana cua nguaˈni choˈo ycuiˈ Ndyosi chaca niˈi̱ nu tyacua jiˈna, chaca chaˈ laca biˈ; ycuiˈ Ndyosi xcutsaˈa̱ tyucui ñaˈa̱ na, loˈo ná ngaˈa̱ chaˈ tye chaˈ jiˈna tsiyaˈ ti liˈ. Ca su ntucua ycuiˈ Ndyosi laca chaˈ biˈ, siˈi ñati̱ nu cuiñá niˈi̱ biˈ.
\v 2 Ná tsoˈo ntiˈ na ndiˈi̱ na nde chalyuu, chaˈ xcuiˈ quicha tsa tiˈ na. Chañi chaˈ cua ntiˈ na tyuˈutsuˈ na nde chalyuu, tyaa clya na ca slo ycuiˈ Ndyosi, chaˈ yala la caja niˈi̱ cucui biˈ jiˈna liˈ.
\v 3 Niˈi̱ biˈ laca nu tacu̱ˈ lo tyucui ñaˈa̱ na, chaˈ caja su tyiˈi̱ cresiya jiˈna, chaˈ ná tyiˈi̱ na juaˈa̱ ti.
\v 4 Nchca taja tiˈ na su ndiˈi̱ na nde chalyuu, chaˈ ndyacua tsa chaˈ tiˈí jiˈna. Siˈi na ntiˈ na chaˈ cajaa na yala ti, pana ntiˈ tsa na chaˈ caca cucui tyucui ñaˈa̱ na; biˈ laca nu cuaˈni ycuiˈ Ndyosi loˈo tyalaa na ca su ntucua Ni. Loˈo liˈ tye chaˈ cuxi jiˈna, tye tyucui ñaˈa̱ cuañaˈ na nu nscua chaˈ cajaa, chaˈ liˈ taca quije chaca chalyuu nu tsoˈo la jiˈna, nu ná ngaˈa̱ chaˈ tye tsiyaˈ ti.
\v 5 Na cua nguaˈni choˈo ycuiˈ Ndyosi chaˈ juaˈa̱ caca jiˈna ca liˈ; cua nda Ni Xtyiˈi ycuiˈ Ni chaˈ tyanu neˈ cresiya jiˈna juani. Laca biˈ sca chaˈ nu nda Ni jiˈna yala ti, chaˈ tyiˈu tiˈ na lcaa chaˈ nu cuaˈni Ni cuentya jiˈna ca nde loo la.
\p
\v 6 Biˈ chaˈ nchca tlyu tyiquee na, chaˈ ndu̱ tiˈ na chaˈ juaˈa̱ cuaˈni ycuiˈ Ndyosi. Nu loˈo tya luˈú na chalyuu, jlo tiˈ na chaˈ tyijyuˈ tsa toˈ tyi na ca slo ycuiˈ Ndyosi, chaˈ tya lyiji tyalaa na ca su ntucua ycuiˈ nu Xuˈna na.
\v 7 Ndalo na ndiˈi̱ na chalyuu xquiˈya chaˈ jlya tiˈ na chaˈ nu nda Ni loˈo na, siˈi na cua naˈa̱ na ñiˈya̱ caca chaˈ nde loo la.
\v 8 Chaˈ nu tlyu nchca tyiquee na, biˈ chaˈ cua ntiˈ tsa na chaˈ xtyanu na jiˈi̱ chalyuu re su quicha ti tiˈ na ndiˈi̱ na, chaˈ tsaa na tyiˈi̱ na ca slo ycuiˈ nu Xuˈna na;
\v 9 ndyuˈni cña tiˈ na chaˈ cuaˈni na lcaa ñaˈa̱ cña nu ndiyaˈ la tiˈ nu Xuˈna na, masi tya luˈú na, masi cua ngujuii na.
\v 10 Lcaa na loˈo tyaˈa na ngaˈa̱ chaˈ tyalaa na ca su ntucua ycuiˈ Cristo chaˈ cuaˈni cuayáˈ Ni jiˈna. Loˈo liˈ tyacua chaˈ jiˈi̱ scaa na, ñaˈa̱ chaˈ nu ngaˈa̱ chaˈ tyacua jiˈna xquiˈya cña nu cua nguaˈni scaa na nde chalyuu, si chaˈ tsoˈo nguaˈni na, si chaˈ cuxi nguaˈni na.
\s Chcuiˈ na sca chaˈ, ñiˈya̱ nu caca cati̱ quiˈya jiˈna loˈo ycuiˈ Ndyosi
\p
\v 11 Xquiˈya chaˈ ndube tsa tiˈ ya chaˈ ñaˈa̱ ycuiˈ Ndyosi jiˈi̱ ya, biˈ chaˈ nchcuiˈ tsa ya chaˈ jiˈi̱ Jesús loˈo xaˈ ñati̱. Tsoˈo tsa nslo ycuiˈ Ndyosi jiˈi̱ ya, ñiˈya̱ nduˈni sa scaa ya. Loˈo juaˈa̱ cuˈma̱, ntiˈ ya chaˈ liñi tsa ndyuloo ma̱ jiˈi̱ ya,
\v 12 siˈi chaˈ tyixi ti ya nchcuiˈ tsoˈo ti ya chaˈ jiˈi̱ ycuiˈ ca ti ya. Ndiˈya̱ ntiˈ ya: caja ñiˈya̱ xtyacui ma̱ chaˈ loˈo nguˈ cuentya jiˈi̱ ya, si tsoˈo ti ntiˈ ma̱ ñaˈa̱ ma̱ jiˈi̱ ya. Ntsuˈu ñati̱ ca biˈ nu ná ndube tiˈ ñiˈya̱ nduˈni nguˈ loˈo tyaˈa nguˈ, pana ndube la tiˈ nguˈ biˈ ñiˈya̱ nduˈni chi̱ nguˈ loo ycuiˈ ca nguˈ.
\v 13 Ná nduˈni chaˈ masi ñacui̱ nguˈ biˈ chaˈ tonto tsa ya; juaˈa̱ laca ya tuˈni, xquiˈya chaˈ ndyuˈni ya cña jiˈi̱ ycuiˈ Ndyosi. Masi juaˈa̱ laca ya ntiˈ nguˈ biˈ, pana tyucui tyiquee ya taca xtyucua ya jiˈi̱ cuˈma̱ liˈ.
\v 14 Cua jlo tiˈ na chaˈ sca ti ycuiˈ Cristo ngujuii lo crusi cuentya jiˈi̱ lcaa ñati̱ chalyuu; ñiˈya̱ ntiˈ si cua ngujuii lcaa ñati̱ chalyuu xquiˈya quiˈya nu ntsuˈu jiˈi̱ nguˈ, juaˈa̱ laca chaˈ, xquiˈya chaˈ ngujuii yu lo crusi biˈ. Loˈo juani jlo tiˈ na chaˈ ntsuˈu tsa tyiquee Cristo ñaˈa̱ Ni jiˈi̱ lcaa ñati̱ chalyuu, biˈ chaˈ ngaˈa̱ chaˈ chcuiˈ na chaˈ jiˈi̱ Jesús loˈo xaˈ ñati̱.
\v 15 Xquiˈya lcaa ñati̱, biˈ chaˈ ntajaˈa̱ Cristo ngujuii yu lo crusi. Cua ntiˈ yu chaˈ ngaˈaa tyiˈi̱ ñati̱ chalyuu chaˈ jiˈi̱ ycuiˈ ti nguˈ; tyiˈi̱ nguˈ ni, pana xcuiˈ cuentya jiˈi̱ Cristo, chaˈ biˈ laca nu cua ngujuii cuentya jiˈi̱ nguˈ, biˈ laca nu cua ndyuˈú chaca quiyaˈ cuentya jiˈi̱ nguˈ.
\v 16 Biˈ chaˈ juani ngaˈaa chcuiˈ tyucuaa tiˈ na loˈo xaˈ ñati̱ si ná ndiya tiˈ na ñiˈya̱ nduˈni nguˈ biˈ nde chalyuu. Nu ngua tya saˈni la, la cuiˈ ti chaˈ ná ndiya tiˈ ya cña nu nguaˈni ycuiˈ Cristo; siˈi ñati̱ nguula, siˈi ñati̱ tlyu laca yu ngua tiˈ ya tya liˈ. Pana juani ngaˈaa siˈi juaˈa̱ nclyacua tiˈ ya ñaˈa̱ ya jiˈi̱ Cristo.
\v 17 Loˈo juani nu loˈo cua ngusñi sca ñati̱ chaˈ jiˈi̱ Cristo, liˈ cua nguxcutsaˈa̱ Ni chaˈ jiˈi̱ ñati̱ biˈ; cua ndye chaˈ jiˈi̱ yu loˈo chaˈ cuxi nu nguaˈni yu nu ngua tya tsubiˈ la. Chaca chalyuu cucui, biˈ laca nu cua ngujui jiˈi̱ yu juani.
\p
\v 18 Ycuiˈ Ndyosi laca nu nduˈni lcaa chaˈ biˈ, chaˈ cua ndyaca stuˈba chaˈ jiˈna loˈo Ni xquiˈya Cristo. Loˈo juani cua nda Ni cña jiˈna chaˈ chcuiˈ na loˈo nguˈ ñiˈya̱ caca stuˈba chaˈ jiˈi̱ nguˈ loˈo ycuiˈ Ni.
\v 19 Xquiˈya Cristo nduˈni Ni chaˈ cati̱ quiˈya nu ntsuˈu jiˈi̱ ñati̱ chalyuu loˈo Ni, ngaˈaa culotu̱ Ni jiˈi̱ chaˈ cuxi nu cua nguaˈni ñati̱. Loˈo liˈ cua nguaˈa̱ lo Ni jiˈna, chaˈ cuaˈni na cña cuentya jiˈi̱ Ni, chaˈ chcuiˈ na loˈo ñati̱ ñiˈya̱ taca ca stuˈba chaˈ jiˈi̱ nguˈ loˈo ycuiˈ Ndyosi;
\v 20 biˈ chaˈ laca ndyaˈa̱ ya ca slo ma̱ chacuayáˈ jiˈi̱ ycuiˈ Cristo. Ndiˈya̱ laca loˈo nchcuiˈ ya loˈo ma̱, ñiˈya̱ laca si ycuiˈ Ndyosi nchcuane Ni jiˈi̱ ma̱ chaˈ cuaˈa̱ jyaca̱ ma̱ jiˈi̱ chaˈ nu nchcuiˈ Cristo. Nchcuiˈ ya loˈo cuˈma̱ chacuayáˈ jiˈi̱ Cristo lacua, chaˈ cuaˈni ma̱ chaˈ caca stuˈba chaˈ jiˈi̱ ma̱ loˈo ycuiˈ Ndyosi. 
\v 21 Masi ná ntsuˈu quiˈya jiˈi̱ Cristo tsiyaˈ ti, pana ycuiˈ Ndyosi nguaˈni chaˈ ndyanu quiˈya nu ntsuˈu jiˈna hichu̱ˈ Cristo. Si cua ngua stuˈba chaˈ jiˈna loˈo Cristo, liˈ caca lubii cresiya jiˈna ñiˈya̱ nu ntiˈ ycuiˈ Ndyosi chaˈ caca na.
\c 6
\p
\v 1 Nguˈ tyaˈa ndyuˈni na cña jiˈi̱ ycuiˈ Ndyosi laca ma̱; biˈ chaˈ nchcuiˈ tsa ya loˈo cuˈma̱, chaˈ ná culiji ma̱ chaˈ tsoˈo juaˈa̱ ti, chaˈ tsoˈo nu cua nda Ni chaˈ tyanu neˈ cresiya jiˈi̱ ma̱. Na cua ngusñi ma̱ chaˈ biˈ tsaca quiyaˈ, biˈ chaˈ ñaˈa̱ ti taquiyaˈ ma̱ jiˈi̱ chaˈ biˈ juani.
\v 2 Ndiˈya̱ nchcuiˈ sca chaˈ nu nscua lo quityi jiˈi̱ ycuiˈ Ndyosi saˈni la:
\q Cua ntiˈ tsa naˈ chaˈ cuaˈni choˈo naˈ cresiya jiˈi̱ ma̱, nacui̱ ycuiˈ Ndyosi, biˈ chaˈ ntucuá naˈ chaˈ jiˈi̱ ma̱ loˈo nchcuiˈ ma̱ loˈu̱.
\q Cua ntiˈ naˈ chaˈ cuaˈni lyaá naˈ jiˈi̱ ma̱, biˈ chaˈ nguxtyucua tsa naˈ jiˈi̱ ma̱.
\m Juaˈa̱ nacui̱ ycuiˈ Ndyosi. Loˈo nu juani cua laca tyempo chaˈ cuaˈni choˈo Ni cresiya jiˈi̱ ma̱, juani cua laca la cuiˈ tyempo chaˈ cuaˈni lyaá ycuiˈ Ndyosi jiˈi̱ ma̱ jiˈi̱ nu cuxi.
\p
\v 3 Ná ntiˈ ya chaˈ xtyí loˈo nguˈ jiˈi̱ ya xquiˈya cña nu ndyuˈni ya, chaˈ loˈo jiˈi̱ ycuiˈ Ndyosi xtyí loˈo nguˈ biˈ liˈ; biˈ chaˈ ná ta ya chacuayáˈ chaˈ tyuˈu tucua sca chaˈ cuxi, nu xquiˈya biˈ taca chcuiˈ nguˈ jiˈi̱ ya.
\v 4 Tsoˈo la ntiˈ ya si caca cuayáˈ tiˈ nguˈ chaˈ ndyaˈa̱ ya lo cña jiˈi̱ ycuiˈ Ndyosi, nu loˈo ñaˈa̱ nguˈ cña nu ndyuˈni ya cuentya jiˈi̱ Ni. Ndalo tsa ya jiˈi̱ chaˈ tiˈí nu nduˈni nguˈ loˈo ya, masi ntsuˈu tsa na nu lyiji jiˈi̱ ya, masi ntsuˈu tsa chaˈ tucui nu ndyaca jiˈi̱ ya.
\v 5 Cua ngujuiˈi̱ juata nguˈ jiˈi̱ ya, juaˈa̱ cua ngusuˈba nguˈ jiˈi̱ ya neˈ chcua̱; cua ndyuˈu tiˈi̱ tsa tlyu ti ñati̱ ca slo ya chaˈ cuaˈni lyaˈ tiˈ nguˈ jiˈi̱ ya; loˈo juaˈa̱ ntsuˈu quiyaˈ nteje tacui ya cuayáˈ cña nu ndyuˈni ya, ntsuˈu quiyaˈ ná nchca cajaˈ ya, ntsuˈu quiyaˈ nu lye tsa ntyuteˈ ya.
\v 6 Pana ndiˈya̱ ca cuayáˈ tiˈ nguˈ chaˈ cña jiˈi̱ ycuiˈ Ndyosi laca nu ndyaˈa̱ ya loˈo: na cua ngua lubii cresiya jiˈi̱ ya cuentya jiˈi̱ ycuiˈ Ni; liñi tsa nchca cuayáˈ tiˈ ya chaˈ jiˈi̱ Ni; ndalo tsa tyiquee ya ñaˈa̱ ya jiˈi̱ nguˈ, chaˈ ndyanu Xtyiˈi ycuiˈ Ndyosi neˈ cresiya jiˈi̱ ya, loˈo juaˈa̱ chañi chaˈ ntsuˈu tsa tyiquee ya ñaˈa̱ ya jiˈi̱ tyaˈa ñati̱ ya;
\v 7 liñi tsa chaˈ jiˈi̱ ycuiˈ Ndyosi nu nchcuiˈ ya loˈo ñati̱, loˈo juaˈa̱ tyucui chacuayáˈ jiˈi̱ ycuiˈ Ndyosi nda Ni nu ndyaˈa̱ loˈo ya. Biˈ chaˈ nu loˈo ñaˈa̱ nguˈ lcaa chaˈ nu ndyaca jiˈi̱ ya, liˈ taca ca cuayáˈ tiˈ nguˈ chaˈ cña jiˈi̱ ycuiˈ Ndyosi laca nu ndyaˈa̱ ya loˈo. Na cua ngua tsoˈo cresiya jiˈi̱ ya juani cuentya jiˈi̱ ycuiˈ Ni, biˈ chaˈ cua ngujui juersa jiˈi̱ ya chaˈ taca xu̱u̱ tyaˈa ya loˈo nu xñaˈa̱; juaˈa̱ taca cuaˈa ya jiˈi̱ nu biˈ, chaˈ ná cuaˈni ñuˈu̱ nu biˈ jiˈi̱ ya.
\v 8 Ntsuˈu quiyaˈ nu nduˈni chi̱ nguˈ loo ya; xaˈ la tyempo, liˈ nchcuiˈ nguˈ chaˈ tiˈí jiˈi̱ ya. Nchcuiˈ nguˈ chaˈ tsoˈo jiˈi̱ ya, loˈo juaˈa̱ nchcuiˈ nguˈ chaˈ cuxi jiˈi̱ ya. Nchcuiˈ nguˈ chaˈ nu cuiñi tsa ya; xaˈ la tyempo, liˈ nchcuiˈ nguˈ chaˈ liñi tsa chaˈ nu nchcuiˈ ya.
\v 9 Ntsuˈu quiyaˈ nduˈni nguˈ chaˈ ndyuloo nguˈ jiˈi̱ ya; xaˈ la quiyaˈ, liˈ nduˈni nguˈ chaˈ ná nslo nguˈ jiˈi̱ ya tsiyaˈ ti. Ntsuˈu quiyaˈ ndyaˈa̱ ya su cua cajaa ti ya nchca, pana ñaˈa̱ ti tya luˈú ya; nchcubeˈ tsa nguˈ jiˈi̱ ya, pana ná nchca cujuii nguˈ jiˈi̱ ya.
\v 10 Masi xñiˈi̱ tsa tiˈ ya xquiˈya chaˈ tiˈí nu ndyacua jiˈi̱ ya tuˈni, pana ñaˈa̱ ti chaa tiˈ ya; tiˈi tsa ya tuˈni, pana ndyiji juersa jiˈi̱ ya chaˈ xtyucua ya jiˈi̱ tyu̱u̱ tyaˈa ñati̱. Masi ná sca na ntsuˈu jiˈi̱ ya tsiyaˈ ti loˈo ndiˈi̱ ya nde chalyuu; pana ycuiˈ Ndyosi nxtyucua jiˈi̱ ya, lcaa na ntsuˈu jiˈi̱ ya liˈ. 
\p
\v 11 Cuˈma̱ nguˈ tyaˈa na, nguˈ Corinto, ntsuˈu tsa tyiquee ya ñaˈa̱ ya jiˈi̱ ma̱, biˈ chaˈ cua liñi tsa nchcuiˈ ya loˈo cuˈma̱ lcaa chaˈ nu ntsuˈu tyiquee ya.
\v 12 Siˈi na ngaˈaa ntiˈ ya xtyucua ya jiˈi̱ ma̱, la cuiˈ cuˈma̱ laca nu lquiˈya tsa ntajaˈa̱ ma̱ xtyucua ma̱ jiˈi̱ ya;
\v 13 biˈ chaˈ juani tyaˈna tsa nchcuiˈ naˈ loˈo cuˈma̱. Ndiˈya̱ ntiˈ naˈ chcuiˈ naˈ loˈo cuˈma̱, ñiˈya̱ nchcuiˈ nguˈ loˈo sñiˈ nguˈ: Cuiˈya ma̱ chaˈ clyu tiˈ jiˈi̱ ya, tyucui tyiquee ma̱ cuaˈni choˈo ma̱ tyiquee ma̱ ñaˈa̱ ma̱ jiˈi̱ ya.
\s Tyacaˈa tsa na jiˈi̱ ycuiˈ Ndyosi nu luˈú ca
\p
\v 14 Ná clyana ma̱ ñiˈya̱ caca quiñi chaˈ jiˈi̱ ma̱ loˈo ñati̱ nu ná ntsuˈu chaˈ jiˈi̱ loˈo ycuiˈ Ndyosi, ná cuaˈni tyaˈa ma̱ loˈo ñati̱ biˈ tsiyaˈ ti. Ná taca ca stuˈba chaˈ jiˈi̱ ma̱ loˈo nguˈ biˈ, chaˈ nu ñati̱ nu cua ngua lubii cresiya jiˈi̱ cuentya jiˈi̱ ycuiˈ Ndyosi ni, ná taca cuaˈni tyaˈa nguˈ loˈo ñati̱ nu ná ndaquiyaˈ jiˈi̱ Ni tsiyaˈ ti; loˈo juaˈa̱ ñati̱ nu ntsuˈu xee jiˈi̱ ycuiˈ Ndyosi neˈ cresiya jiˈi̱, ná taca ca stuˈba chaˈ jiˈi̱ nguˈ biˈ loˈo ñati̱ nu ndiya la tiˈ chalyuu talya.
\v 15 Ná taca tsiyaˈ ti ca stuˈba chaˈ jiˈi̱ Cristo loˈo Satanás; loˈo juaˈa̱ ñati̱ nu cua ngusñi chaˈ jiˈi̱ Cristo ni, ná taca cuaˈni tyaˈa nguˈ loˈo ñati̱ nu ná ntajaˈa̱ xñi chaˈ biˈ tsiyaˈ ti.
\v 16 Ñiˈya̱ ntiˈ cuˈma̱ nu tyacaˈa tsa ma̱ jiˈi̱ ycuiˈ Ndyosi ni, ná taca cuaˈni tyaˈa ma̱ loˈo xaˈ ñati̱ nu ngusñi chaˈ jiˈi̱ cua ñaˈa̱ ca joˈó; tyacaˈa tsa na jiˈi̱ ycuiˈ Ndyosi nu luˈú ca xquiˈya chaˈ ndyanu Xtyiˈi ycuiˈ Ndyosi neˈ cresiya jiˈna. Ndiˈya̱ nacui̱ ycuiˈ Ndyosi:
\q Tyiˈi̱ naˈ ca slo ñati̱ biˈ, loˈo juaˈa̱ tyaˈa̱ naˈ loˈo ñati̱ biˈ;
\q caca naˈ ycuiˈ Ndyosi cuentya jiˈi̱ nguˈ biˈ,
\q biˈ chaˈ taca caca nguˈ biˈ ñati̱ ˈna.
\m Juaˈa̱ nacui̱ Ni.
\v 17 Loˈo juaˈa̱ nchcuiˈ ycuiˈ nu Xuˈna na chaca quiyaˈ loˈo na, nu ngusñi na chaˈ jiˈi̱ Ni. Ndiˈya̱ nacui̱ Ni: 
\q Tyuˈutsuˈ ma̱ nde su ndiˈi̱ nguˈ cuxi; ná cuaˈni tyaˈa ma̱ loˈo nu nguˈ cuxi biˈ,
\q chaˈ ná tyatí̱ chaˈ jiˈi̱ ma̱ loˈo chaˈ cuxi nu ndyuˈni nguˈ biˈ.
\q Liˈ quiñi chaˈ ˈna loˈo ma̱,
\q
\v 18 caca naˈ Sti ma̱;
\q juaˈa̱ cuˈma̱ caca ma̱ sñiˈ naˈ, masi nu cunaˈa̱, masi nu quiˈyu.
\q Juaˈa̱ nacui̱ ycuiˈ Ndyosi nu Xuˈna ma̱, nu lcaa tsiyaˈ ti cña nchca jiˈi̱ Ni.
\c 7
\p
\v 1 Cuˈma̱ nguˈ tyaˈa na, nu ntsuˈu tsa tyiquee naˈ ñaˈa̱ naˈ jiˈi̱ ma̱, juaˈa̱ laca chaˈ nu cua nda ycuiˈ Ndyosi loˈo na, chaˈ nu caca jiˈna nde loo la. Biˈ chaˈ lacua, ntsuˈu chaˈ cuaˈni tye na jiˈi̱ lcaa chaˈ cuxi nu ntiˈ cuaˈni ñuˈu̱ jiˈi̱ cresiya jiˈna, jiˈi̱ tyucui ñaˈa̱ na. Loˈo juaˈa̱ lye tsa cuaˈni na cña chaˈ caca na ñati̱ jiˈi̱ ycuiˈ Ni; na laca nu cuaˈni na nde chalyuu, cuaˈni na jiˈi̱ ñiˈya̱ ntiˈ si cua ndu̱ ycuiˈ Ndyosi ñaˈa̱ Ni jiˈna.
\s Nguxtyanu nguˈ chaˈ cuxi nu cua nguaˈni nguˈ
\p
\v 2 Cuaˈni choˈo tyiquee ma̱ ñaˈa̱ ma̱ jiˈi̱ ya lacua. Ni sca quiyaˈ ná nguaˈni ya chaˈ cuxi loˈo cuˈma̱, ni scaa cuˈma̱ ná nguaˈni ñuˈu̱ ya chalyuu jiˈi̱ ma̱; ná ntsuˈu mala su nñiloˈo ya jiˈi̱ ma̱, ni sca tyaˈa ma̱.
\v 3 Ná ntiˈ naˈ sta naˈ quiˈya hichu̱ˈ ma̱. Ndiˈya̱ ntiˈ naˈ chcuiˈ naˈ loˈo ma̱, ñiˈya̱ nu nacui̱ naˈ jiˈi̱ ma̱ tsubiˈ: lcaa tyempo ntsuˈu tsa tyiquee naˈ ñaˈa̱ naˈ jiˈi̱ cuˈma̱; masi cua ngujuii na, masi ñaˈa̱ ti tya tyiqueeˈ tyiˈi̱ na chalyuu, pana ñaˈa̱ ti stuˈba ntsuˈu tyiquee naˈ loˈo cuˈma̱.
\v 4 Tsoˈo tsa ntiˈ naˈ loˈo ndyiˈu tiˈ naˈ jiˈi̱ cuˈma̱, la cuiˈ juaˈa̱ ntiˈ naˈ loˈo nchcuiˈ naˈ chaˈ jiˈi̱ ma̱ loˈo xaˈ ñati̱. Ñaˈa̱ ti ndyaca tlyu tyiquee naˈ, ñaˈa̱ ti chaa ti tiˈ naˈ ndiˈi̱i̱, masi cua ngua lcaa chaˈ tiˈí biˈ jiˈi̱ ya.
\p
\v 5 Tya loˈo ndyalaa ya ca loyuu su cuentya Macedonia re, ngaˈaa ngujui tyempo chaˈ chcaˈa̱ cñaˈ ya tsiyaˈ ti, chaˈ lcua ti seˈi̱ tucui tsa cña ndyacua jiˈi̱ ya. Lcaa seˈi̱ su ndyaˈa̱ ya nda tsa nguˈ chaˈ cusu̱u̱ loˈo ya, loˈo juaˈa̱ hasta ca neˈ cresiya jiˈi̱ ya ndyatí̱ chaˈ ntsi̱i̱ ya.
\v 6 Pana ycuiˈ Ndyosi ni, nda la Ni juersa jiˈi̱ ñati̱ nu xñiˈi̱ ti tiˈ ngaˈa̱; biˈ chaˈ xaˈ juersa nda Ni jiˈi̱ ya chaˈ caca nguula la tyiquee ya, xquiˈya chaˈ cua ndyalaa Tito ca nde.
\v 7 Loˈo juaˈa̱ tsoˈo tsa chaˈ nu nda yu loˈo ya cuentya jiˈi̱ cña nu ndyuˈni cuˈma̱; nacui̱ yu chaˈ cua ntiˈ tsa cuˈma̱ ñaˈa̱ loo ma̱ jiˈi̱ ya chaca quiyaˈ, loˈo juaˈa̱ nacui̱ yu chaˈ ntyujuˈu ti tiˈ ma̱ ndiˈi̱ ma̱ xquiˈya chaˈ cuxi nu ngua jiˈi̱ ma̱ tya liˈ, nacui̱ yu chaˈ ngaˈaa ndiya tiˈ ma̱ chaˈ cuxi nu nchcuiˈ nguˈ ˈna tsubiˈ la. Xquiˈya lcaa chaˈ biˈ, chaa la tiˈ naˈ ndiˈi̱ naˈ juani.
\p
\v 8 Chañi chaˈ ndube tiˈ naˈ chaˈ ngua xñiˈi̱ xi tiˈ ma̱ xquiˈya quityi nu nguscua naˈ tya liˈ, pana ná ntyujuˈu tiˈ naˈ; ná tyaˈa̱chu̱ˈ naˈ jiˈi̱ chaˈ nu cua nguscua naˈ liˈ, masi ntsuˈu tsa̱ nu ntyujuˈu tiˈ naˈ chaˈ nguscua naˈ chaˈ biˈ. Jlo tiˈ naˈ chaˈ ngua xñiˈi̱ tiˈ ma̱ nquichaˈ, pana xtyiˈi ti ngualo chaˈ biˈ.
\v 9 Nu juani tsoˈo tsa ntsuˈu tyiquee naˈ chaˈ cua ndaquiyaˈ ma̱ chaˈ biˈ, chaˈ cua ngua xñiˈi̱ xi tiˈ ma̱, loˈo liˈ nguxtyanu ma̱ chaˈ cuxi nu nguaˈni ma̱ tya liˈ. Ngua xñiˈi̱ tiˈ ma̱ tuˈni, pana ngua tiˈ ycuiˈ Ndyosi chaˈ caca tsoˈo jiˈi̱ ma̱ loˈo cua ndye chaˈ, biˈ chaˈ siˈi na cua ngunuˈu̱ tyiquee ma̱ juani xquiˈya chaˈ ngua tyaala naˈ jiˈi̱ ma̱ liˈ.
\v 10 Nu loˈo ndube tiˈ na jiˈi̱ ycuiˈ Ndyosi laja loˈo ngaˈa̱ na xñiˈi̱ tiˈ na, liˈ caja ñiˈya̱ xtyanu na jiˈi̱ chaˈ cuxi nu ndyuˈni na; clyaá na jiˈi̱ nu cuxi liˈ, ngaˈaa ntsuˈu chaˈ culacua tsa tiˈ na liˈ. Pana ñati̱ nu xñiˈi̱ xi tiˈ, nu ná ndube tiˈ jiˈi̱ ycuiˈ Ndyosi ni, ná ntajaˈa̱ ñati̱ biˈ ca tyujuˈu tiˈ jiˈi̱ quiˈya nu ntsuˈu jiˈi̱; chcunaˈ chalyuu jiˈi̱ nguˈ biˈ juaˈa̱ ti liˈ.
\v 11 Culacua xi tiˈ ma̱ ñiˈya̱ ndyaca jiˈi̱ ma̱ juani, tya loˈo nguaˈni naˈ chaˈ ngua xñiˈi̱ tiˈ ma̱ nu ngua liˈ: tyucui tyiquee ma̱ nclyacua tiˈ ma̱ juani, chaˈ cua ntiˈ tsa ma̱ juani chaˈ tyuˈu lubii ma̱ jiˈi̱ chaˈ biˈ; tsa claˈbe ngua ñasi̱ˈ ma̱, tsa claˈbe ti ndyutsi̱i̱ ma̱, pana ndyiˈu tsa tiˈ ma̱ jnaˈ liˈ, ñaˈa̱ cuayáˈ nu lye tsa ngua tiˈ ma̱ chaˈ ñaˈa̱ loo ma̱ ˈna chaca quiyaˈ; yala ti ngua tiˈ ma̱ chcubeˈ ma̱ jiˈi̱ yu nu nguaˈni chaˈ cuxi biˈ. Juaˈa̱ nchca cuayáˈ tiˈ ya chaˈ ngaˈaa ndyanu yabeˈ jiˈi̱ ma̱ xquiˈya chaˈ cuxi biˈ. 
\v 12 Biˈ chaˈ laca nguscua naˈ nu quityi biˈ; siˈi na ngulacua tsa tiˈ naˈ xquiˈya yu nu nguaˈni chaˈ cuxi biˈ, ni siˈi na ngulacua tsa tiˈ naˈ xquiˈya nguˈ nu ngua cuxi jiˈi̱. Ngua tiˈ naˈ chaˈ culacua tsoˈo tiˈ ma̱ jiˈi̱ chaˈ nu cua nchcuiˈ ya loˈo ma̱, ñiˈya̱ laca si ndu̱ ycuiˈ Ndyosi ñaˈa̱ Ni jiˈna; biˈ chaˈ nguscua naˈ quityi nu ndyaa slo ma̱ biˈ.
\v 13 Loˈo nu juani tsoˈo la ntiˈ ya cuentya jiˈi̱ cuˈma̱. 
\p Tsoˈo ti ntiˈ ycuiˈ ya lacua; loˈo juaˈa̱ lye la chaa tiˈ ya juani chaˈ cua naˈa̱ ya jiˈi̱ Tito, chaˈ tsoˈo tsa ngua tiˈ yu. Ca taˈa cuˈma̱ nguaˈni ma̱ chaˈ ti̱ ti cresiya jiˈi̱ yu ndyalaa yu juani.
\v 14 Loˈo tya ndiˈi̱ yu ca slo naˈ, cua ni naˈ jiˈi̱ yu chaˈ tsoˈo tsa ngusñi ma̱ chaˈ jiˈi̱ Jesús, loˈo juaˈa̱ chañi tsa chaˈ biˈ. La cuiˈ juaˈa̱ lcaa quiyaˈ loˈo nchcuiˈ ya, chañi tsa laca chaˈ jiˈi̱ Jesús nu nchcuiˈ ya loˈo ma̱; loˈo juaˈa̱ chañi ngua chaˈ nu ni naˈ jiˈi̱ Tito, chaˈ tsoˈo ti ntiˈ ycuiˈ ya ñaˈa̱ ya jiˈi̱ ma̱.
\v 15 Tya cuayáˈ nu tsoˈo la ntsuˈu tyiquee Tito ñaˈa̱ yu jiˈi̱ ma̱ juani, nu loˈo ndyiˈu tiˈ yu jiˈi̱ lcaa cuˈma̱ chaˈ cua ndaquiyaˈ tsa ma̱ jiˈi̱ lcaa chaˈ nu cua nacui̱ yu jiˈi̱ ma̱; naˈa̱ yu chaˈ ndube tsa tiˈ ma̱ xquiˈya chaˈ nu cua nda yu loˈo ma̱, loˈo juaˈa̱ ná nguxtyacui ma̱ xi xaˈ la chaˈ loˈo yu liˈ.
\v 16 Loˈo juaˈa̱ naˈ, tsoˈo tsa ntiˈ naˈ juani chaˈ taca tyiˈu tiˈ naˈ jiˈi̱ cuˈma̱ juaˈa̱.
\c 8
\s Nda nguˈ cñi chaˈ caca msta̱ cuentya jiˈi̱ Cristo
\p
\v 1-2 Cuˈma̱ tyaˈa ngusñi na chaˈ jiˈi̱ Cristo, juani ta naˈ sca chaˈ loˈo ma̱ cuentya jiˈi̱ la cuiˈ nguˈ tyaˈa na, nu ñati̱ jiˈi̱ Cristo nu ndiˈi̱ ca loyuu Macedonia. Tsoˈo tsa ngua tiˈ ca taˈa nguˈ nu ndiˈi̱ tyu̱u̱ quichi̱ su cuentya Macedonia biˈ; cua tlyu tsa msta̱ nu nguxtiˈi̱ nguˈ biˈ, ñiˈya̱ laca si na culiyaˈ tsa nguˈ. Masi lye tsa ngua tiˈ nguˈ biˈ xquiˈya chaˈ tiˈí nu cua ndyacua jiˈi̱ nguˈ, pana ñaˈa̱ ti tsoˈo tsa ntsuˈu tyiquee nguˈ liˈ. Loˈo juaˈa̱ ngua jiˈi̱ nguˈ nda nguˈ msta̱ biˈ xquiˈya chaˈ quiñaˈa̱ tsa chaˈ tsoˈo nguaˈni ycuiˈ Ndyosi loˈo nguˈ juaˈa̱ ti, juaˈa̱ ngulacua tiˈ nguˈ biˈ.
\v 3 Chañi tsa chaˈ nu ta naˈ loˈo ma̱ cuentya jiˈi̱ nguˈ biˈ: Chaˈ tsoˈo ti tyiquee nguˈ biˈ ni, cua nda nguˈ lcaa ñaˈa̱ nu ngujui ti xi jiˈi̱ nguˈ; loˈo juaˈa̱ tya quiñaˈa̱ la cñi nda nguˈ, masi ná ndyuˈu scua cñi nu ndyanu jiˈi̱ nguˈ.
\v 4 Hasta ngüijña nguˈ chacuayáˈ jiˈi̱ ya chaˈ ta nguˈ msta̱ biˈ, chaˈ xtyucua nguˈ jiˈi̱ xaˈ la tyaˈa ñati̱, nguˈ nu cua ngusñi chaˈ jiˈi̱ Jesús ca xaˈ quichi̱ su ntsuˈu tsa na nu lyiji jiˈi̱ nguˈ.
\v 5 Ni ná ngulacua tiˈ ya chaˈ ta nguˈ juaˈa̱. Tya clyo ntajaˈa̱ nguˈ tyucui tyiquee nguˈ chaˈ cuaˈni nguˈ ñiˈya̱ nu ntiˈ ycuiˈ Ndyosi; loˈo liˈ nacui̱ nguˈ chaˈ cuaˈni nguˈ ñiˈya̱ nu ntiˈ ya chaˈ cuaˈni nguˈ chacuayáˈ jiˈi̱ ycuiˈ Ndyosi.
\v 6 Biˈ chaˈ cua nchcuiˈ ya loˈo yu Tito biˈ, chaˈ cuaˈni lyiji yu chaˈ xtiˈi̱ yu msta̱ nu nda cuˈma̱ chaˈ tsoˈo ntsuˈu tyiquee ma̱, chaˈ tya tsubiˈ la cua nguxana nxtiˈi̱ yu msta̱ biˈ.
\v 7 Nu cuˈma̱ ni, tsoˈo tsa jlya tiˈ ma̱ jiˈi̱ ycuiˈ Ndyosi, tsoˈo tsa nchca jiˈi̱ ma̱ culuˈu ma̱ chaˈ jiˈi̱ ycuiˈ Ndyosi jiˈi̱ xaˈ ñati̱, tsoˈo tsa nchca cuayáˈ tiˈ ma̱ ñiˈya̱ ndyuˈu sca chaˈ; na cua ntiˈ tsa ma̱ xtyucua ma̱ jiˈi̱ nguˈ, la cuiˈ juaˈa̱ ntsuˈu tsa tyiquee ma̱ ñaˈa̱ ma̱ jiˈi̱ ya. Nchca tsa jiˈi̱ ma̱ cuentya jiˈi̱ lcaa cña, ntiˈ ya; biˈ chaˈ nclyacua tiˈ ya chaˈ ná tyiqueeˈ yala tsa cuaˈni ma̱ chaˈ xtiˈi̱ ma̱ cñi biˈ. 
\p
\v 8 Siˈi na nclyo naˈ cña jiˈi̱ ma̱ re; nu loˈo ñaˈa̱ ma̱ jiˈi̱ xaˈ la nguˈ tyaˈa na, chaˈ ntiˈ tsa nguˈ xtyucua nguˈ jiˈi̱ tyaˈa ñati̱ jiˈi̱ Cristo, liˈ taca cuaˈni cuayáˈ ma̱ jiˈi̱ ycuiˈ ca ma̱ si chañi ca chaˈ ntsuˈu tyiquee ma̱ ñaˈa̱ ma̱ jiˈi̱ la cuiˈ nguˈ tyaˈa ma̱.
\v 9 Cua jlo tiˈ ma̱ ñiˈya̱ nduˈni Jesucristo nu Xuˈna na, chaˈ xcuiˈ tsoˈo tsa nduˈni Ni loˈo ñati̱. Lcaa na cua ntsuˈu jiˈi̱ Ni, pana cua ntajaˈa̱ Ni ngua Ni sca ñati̱ ti, ñiˈya̱ ntiˈ sca ñati̱ tiˈi nu ná sca na ntsuˈu jiˈi̱ tsiyaˈ ti. Xquiˈya cuˈma̱, biˈ chaˈ nguaˈni Ni juaˈa̱, chaˈ tiyaˈ la liˈ taca caja lcaa na nu ntsuˈu jiˈi̱ ycuiˈ Ni jiˈi̱ ma̱.
\p
\v 10 Ndiˈya̱ ntiˈ naˈ, tsoˈo la si cuaˈni ma̱ chaˈ xcua seˈi̱ cña biˈ lacua, chaˈ tya yija̱ na ndyuˈni ma̱ jiˈi̱. Siˈi la xña cuaˈni ti ma̱ jiˈi̱; pana xquiˈya chaˈ ndiya tiˈ ma̱ nduˈni ma̱ juaˈa̱, biˈ chaˈ ta ma̱ msta̱ biˈ.
\v 11 La cuiˈ juaˈa̱ cuaˈni ma̱ cña biˈ, ñaˈa̱ cuayáˈ nu xcua seˈi̱ cña biˈ. Tsoˈo tsa ngua tiˈ ma̱ nu loˈo nguxana cña biˈ, loˈo juaˈa̱ tsoˈo si tyucui tyiquee ma̱ cuaˈni lyiji ma̱ jiˈi̱, tsa ñaˈa̱ cuayáˈ chaˈ tsoˈo nu ntsuˈu jiˈi̱ scaa ma̱ ta ma̱ msta̱ biˈ.
\v 12 Si chañi chaˈ ntsuˈu tyiquee nguˈ ta nguˈ tsa ñaˈa̱ nu ntsuˈu xi jiˈi̱ nguˈ, tsoˈo ti xñi ycuiˈ Ndyosi msta̱ biˈ jiˈi̱ nguˈ, ñiˈya̱ nu nchca ti jiˈi̱ nguˈ liˈ; ná ntiˈ Ni chaˈ ta nguˈ msta̱ si ná sca na ntsuˈu jiˈi̱ nguˈ.
\p
\v 13 Ná ntiˈ naˈ chaˈ lyiji tsa na jiˈi̱ ma̱ laja loˈo ta ma̱ cñi, chaˈ caja na nu lyiji jiˈi̱ nguˈ tiˈi tyaˈa na.
\v 14 Laca chaˈ cua ngujui xi chaˈ tsoˈo jiˈi̱ ma̱ juani ti, biˈ chaˈ ntsuˈu ñiˈya̱ nu taca xtyucua ma̱ jiˈi̱ xaˈ la nguˈ tyaˈa na nu lyiji tsa chaˈ jiˈi̱. Nde loo la liˈ, si lyiji ñiˈya̱ nu tyiji̱ yuˈu jiˈi̱ ma̱ chalyuu, ná tyiqueeˈ loˈo nguˈ biˈ taca xtyucua nguˈ jiˈi̱ cuˈma̱ liˈ, chaˈ juaˈa̱ caca stuˈba chaˈ jiˈi̱ ma̱ loˈo xaˈ la nguˈ tyaˈa ngusñi na chaˈ jiˈi̱ ycuiˈ Ndyosi.
\v 15 La cuiˈ juaˈa̱ nscua lo quityi jiˈi̱ ycuiˈ Ndyosi. Ndiˈya̱ nacui̱: “Masi nteje tacui cuayáˈ nguxutiˈi̱ nguˈ na cacu nguˈ, ngaˈaa ntyucua la jiˈi̱ nguˈ tsiyaˈ ti liˈ; loˈo nu nguˈ nu nguxutiˈi̱ xti ti chaˈ biˈ, ngaˈaa lyiji jiˈi̱ nguˈ tsiyaˈ ti loˈo cua ndye chaˈ liˈ”. 
\s Sca chaˈ cuentya jiˈi̱ Tito loˈo tyaˈa ndyaˈa̱ yu
\p
\v 16 Tsoˈo tsa ntiˈ ya loˈo nchcuiˈ ya loˈo ycuiˈ Ndyosi, chaˈ nu Tito, tyaˈa ndyaˈa̱ ya cña biˈ ni, ntiˈ tsa yu xtyucua yu jiˈi̱ ma̱. Stuˈba ti ntiˈ yu loˈo naˈ chaˈ xtyucua ya jiˈi̱ cuˈma̱.
\v 17 Tsoˈo tsa ntsuˈu tyiquee yu nguaˈni yu cña nu cua ni naˈ jiˈi̱ yu; loˈo juani ntiˈ tsa yu xtyucua yu jiˈi̱ ma̱, biˈ chaˈ tsaa yu tsaa naˈa̱ yu jiˈi̱ cuˈma̱ chaca quiyaˈ, chaˈ jiˈi̱ ti yu.
\p
\v 18 Loˈo yu ta ya chaca yu tyaˈa ntsuˈu chaˈ jiˈna loˈo Cristo, chaˈ ca̱a̱ loˈo Tito jiˈi̱ yu ca slo ma̱. Cua laca ndyuloo ma̱ jiˈi̱ yu biˈ, chaˈ tsoˈo tsa nchcuiˈ nguˈ jiˈi̱ yu macala su ndyuˈu tiˈi̱ nguˈ cuentya jiˈi̱ Cristo, chaˈ tsoˈo tsa nda yu chaˈ jiˈi̱ Cristo loˈo nguˈ.
\v 19 La cuiˈ juaˈa̱ nu ñati̱ jiˈi̱ Cristo nu ndyuˈu tiˈi̱ lcaa quichi̱ cua ngusubi nguˈ jiˈi̱ yu tyaˈa na biˈ, chaˈ tyaˈa̱ yu loˈo ya, chaˈ xtyucua yu jiˈi̱ ya loˈo ndyuˈni ya cña chaˈ xtiˈi̱ ya msta̱ nu nda nguˈ. Ndyuˈni ya cña biˈ cuentya jiˈi̱ nu Xuˈna na, chaˈ juaˈa̱ taca cuaˈni chi̱ ya loo Ni; loˈo juaˈa̱ ntiˈ ya chaˈ yala ti cuaˈni ma̱ cña biˈ, xquiˈya chaˈ ndiya tiˈ ma̱ nduˈni ma̱ juaˈa̱.
\v 20 Liˈ ná taca chcuiˈ nguˈ jiˈi̱ ya xquiˈya chaˈ cua nxtiˈi̱ ya cñi nu nda ma̱ chaˈ xlyaˈbe ti biˈ.
\v 21 Ndube tiˈ ya jiˈi̱ ycuiˈ nu Xuˈna na, loˈo juaˈa̱ ndube tiˈ ya ñiˈya̱ nu chcuiˈ ñati̱; biˈ chaˈ ntiˈ ya chaˈ xcuiˈ lubii ti cuaˈni ya lcaa cña biˈ.
\p
\v 22 Loˈo juaˈa̱ tya nda ya chaca yu tyaˈa ntsuˈu chaˈ jiˈna loˈo Cristo chaˈ stuˈba ti ca̱a̱ yu loˈo nu xaˈ ñati̱ nguˈ tyaˈa na biˈ. Quiñaˈa̱ tsa cña cua nguaˈni yu cuentya jiˈi̱ nu Xuˈna na, biˈ chaˈ jlo ti ya chaˈ ndiya tiˈ yu cuaˈni yu cña loˈo na. Masi juani tyaca̱ˈ tyijyuˈ chaˈ ndyiˈu tsa tiˈ yu jiˈi̱ ma̱.
\v 23 Biˈ chaˈ juani si xcuane nguˈ jiˈi̱ ma̱ ni cña laca ndyaˈa̱ Tito, ndiˈya̱ ñacui̱ ma̱ jiˈi̱ nguˈ: Tyaˈa ndyaˈa̱ na cña laca yu re. Loˈo juaˈa̱ xacui̱ ma̱ chaˈ jiˈi̱ nguˈ chaˈ stuˈba ndyuˈni yu cña loˈo cua cuentya jiˈi̱ cuˈma̱. La cuiˈ juaˈa̱ si xcuane nguˈ jiˈi̱ ma̱, ni cña laca nu ndyaˈa̱ xaˈ la tyaˈa ndyaˈa̱ Tito biˈ, ndiˈya̱ xacui̱ ma̱ chaˈ jiˈi̱ nguˈ liˈ: Ndyaˈa̱ nguˈ biˈ cuentya jiˈi̱ lcaa latya nguˈ xaˈ quichi̱ nu ndyuˈni tlyu jiˈi̱ Cristo, chaˈ nduˈni chi̱ nguˈ loo Cristo.
\v 24 Biˈ chaˈ chcuiˈ tsoˈo ma̱ loˈo nguˈ biˈ lacua, chaˈ ca cuayáˈ tiˈ xaˈ la nguˈ tyaˈa na chaˈ chañi chaˈ ntsuˈu tyiquee ma̱ ñaˈa̱ ma̱ jiˈi̱ Tito loˈo tyaˈa ndyaˈa̱ yu. Loˈo juaˈa̱ tsoˈo tsa ntiˈ ya loˈo ñaˈa̱ ya ñiˈya̱ nu ndyuˈni ma̱ loˈo nguˈ biˈ. Ca tiyaˈ la liˈ caja chaˈ biˈ jiˈi̱ lcaa taju ñati̱ nu cuentya jiˈi̱ Cristo biˈ. 
\c 9
\s Msta̱ nu nda ma̱ chaˈ xtyucua jiˈi̱ tyaˈa ñati̱ ma̱ 
\p
\v 1 Ngaˈaa ntiˈ chaˈ chcuiˈ la naˈ loˈo cuˈma̱ cuentya jiˈi̱ msta̱ nu nxtiˈi̱ ma̱ chaˈ xtyucua jiˈi̱ nguˈ tyaˈa ma̱ nu ntsuˈu chaˈ jiˈi̱ loˈo Cristo,
\v 2 chaˈ cua jlo tiˈ naˈ chaˈ tsoˈo ti ntiˈ ma̱ ñaˈa̱ ma̱ jiˈi̱ nguˈ. Luˈba ti nchcuiˈ naˈ loˈo nguˈ ca tyi re, ca loyuu su cuentya Macedonia re, chaˈ tsoˈo tsa ndyuˈni ma̱, cuˈma̱ nguˈ ca tyi nde loyuu su cuentya Acaya biˈ; ni naˈ jiˈi̱ nguˈ chaˈ yala tsa tiˈ cuˈma̱, chaˈ tya yija̱ na nguaˈni cña tiˈ ma̱ chaˈ xtiˈi̱ ma̱ msta̱ biˈ. Loˈo nu nguˈ Macedonia re ni, cua ngua chaa la tiˈ tyiquee nguˈ loˈo naˈa̱ nguˈ chaˈ yala tsa ndyuˈni ma̱ cña.
\v 3 Masi juaˈa̱ ñaˈa̱ ti tya ta naˈ jiˈi̱ nguˈ tyaˈa na biˈ, chaˈ ca̱a̱ nguˈ ca slo ma̱. Liˈ taca cuaˈni ma̱ tsa ñaˈa̱ nu cua nacui̱ naˈ jiˈi̱ nguˈ chaˈ nduˈni ma̱, siˈi chaˈ laja ti nchcuiˈ naˈ jiˈi̱ ma̱ lacua. Biˈ chaˈ cuaˈni ma̱ chaˈ xtiˈi̱ ma̱ msta̱ biˈ, chaˈ cua laca ti nguscua seˈi̱ chaˈ biˈ nu loˈo ca̱a̱ naˈ. 
\v 4 Ná jlo tiˈ naˈ si loˈo xi tyaˈa na nu laca nguˈ Macedonia re ca̱a̱ naˈ liˈ. ¿Ñiˈya̱ cuaˈni na liˈ, si ñaˈa̱ nguˈ chaˈ ná nguaˈni yala ma̱? Ca tyujuˈu tsa tiˈ ya liˈ, chaˈ cua nchcuiˈ ya loˈo nguˈ chaˈ tsoˈo tsa nduˈni ma̱; juaˈa̱ cuˈma̱ caca tyujuˈu tiˈ ma̱ liˈ.
\v 5 Biˈ chaˈ cua nchcuiˈ naˈ loˈo nguˈ tyaˈa na re, chaˈ tsaa nguˈ nde loo la que naˈ, chaˈ xtyucua nguˈ jiˈi̱ ma̱ chaˈ cuaˈni choˈo ma̱ msta̱, ñiˈya̱ nu nacui̱ ma̱ ˈna chaˈ ta ma̱; cua laca nscua seˈi̱ ti chaˈ biˈ loˈo ca̱a̱ naˈ liˈ. Juaˈa̱ laca biˈ sca cña tsoˈo nu nguaˈni ma̱ xquiˈya chaˈ ndiya tiˈ ma̱ nduˈni ma̱ jiˈi̱, siˈi sca cña nu ndatsaa tsa ya jiˈi̱ ma̱ laca nu nguaˈni ma̱ liˈ.
\p
\v 6 Tyiˈu tiˈ ma̱ ñiˈya̱ ndyaca loˈo ntyaa na na cuiñii. Si xti ti siˈyu na cuiñii biˈ cataa na, xti ti chaˈ tsoˈo tyuˈu jiˈna liˈ; pana si quiñaˈa̱ siˈyu cataa na, quiñaˈa̱ la chaˈ tsoˈo tyuˈu liˈ.
\v 7 La cuiˈ juaˈa̱ loˈo ta na cñi xlyaˈbe ti, ngaˈa̱ chaˈ quiñi tiˈ na ni tsa lo ta scaa na. Ná tsoˈo si chaˈ cuiñi ti na ta na jiˈi̱, la cuiˈ ti ná tsoˈo si chaˈ juersa ti ta na jiˈi̱; ndiya la tiˈ ycuiˈ Ndyosi si tsoˈo ntsuˈu tyiquee na ta na jiˈi̱.
\v 8 Taca xtyucua ycuiˈ Ndyosi jiˈi̱ ma̱ loˈo quiñaˈa̱ tsa chaˈ, loˈo liˈ tyuˈu scua jiˈi̱ ma̱ lcaa chaˈ nu lyiji jiˈi̱ ma̱; loˈo juaˈa̱ tya caja la ñiˈya̱ xtyucua ma̱ jiˈi̱ xaˈ ñati̱ loˈo cua ñaˈa̱ ca cña tsoˈo.
\v 9 Ndiˈya̱ nchcuiˈ chaˈ nu nscua lo quityi cusuˈ:
\q Sca ñati̱ nu ndaquiyaˈ tsoˈo jiˈi̱ ycuiˈ Ndyosi, quiñaˈa̱ tsa chaˈ xlyaˈbe nda yu jiˈi̱ nguˈ tiˈi tyaˈa yu;
\q biˈ chaˈ lcaa tyempo tyiˈu tiˈ nguˈ jiˈi̱ cña tsoˈo nu nduˈni yu.
\m
\v 10 Nda ycuiˈ Ndyosi na cuiñii cataa na, juaˈa̱ nda Ni na cacu na; la cuiˈ juaˈa̱ ta Ni lcaa na nu lyiji jiˈi̱ ma̱ chaˈ cuaˈni ma̱ sca cña tsoˈo loˈo ñati̱ chalyuu. Loˈo juaˈa̱ xtyucua Ni jiˈi̱ ma̱ chaˈ tyuˈu scua chaˈ tsoˈo nu ndyuˈni ma̱, chaˈ xquiˈya biˈ caca tsoˈo tyiquee ñati̱.
\v 11 Biˈ chaˈ juaˈa̱ ndyaca, chaˈ cua ndyiji lcaa na jiˈi̱ ma̱, ñaˈa̱ cuayáˈ taca ta ma̱ chaˈ xlyaˈbe jiˈi̱ xaˈ ñati̱. Loˈo cua ndye, liˈ tsoˈo tsa tya nguˈ xlyaˈbe jiˈi̱ ycuiˈ Ndyosi xquiˈya msta̱ nu cua nda ma̱, nu tsaa loˈo ya jiˈi̱ chaˈ tyalaa ca su ndiˈi̱ nguˈ tiˈi biˈ.
\v 12 Nu loˈo nda ma̱ na nu xtyucua jiˈi̱ nguˈ tyaˈa na ni, liˈ caja na nu lyiji chaˈ tyiji̱ yuˈu jiˈi̱ nguˈ biˈ chalyuu; juaˈa̱ tsoˈo tsa caca tyiquee nguˈ biˈ. Loˈo chcuiˈ nguˈ loˈo ycuiˈ Ndyosi,
\v 13 cuaˈni tlyu nguˈ jiˈi̱ ycuiˈ Ndyosi liˈ. Taca ñaˈa̱ nguˈ biˈ jiˈi̱ ma̱, chaˈ chañi chaˈ ndaquiyaˈ ma̱ jiˈi̱ chaˈ tsoˈo nu cua nda Cristo loˈo ma̱; ca cuayáˈ tiˈ nguˈ chaˈ biˈ loˈo ñaˈa̱ nguˈ cña nu cua nguaˈni ma̱ chaˈ caja xlyaˈbe jiˈi̱ nguˈ biˈ. Cuaˈni chi̱ nguˈ loo ycuiˈ Ndyosi liˈ, xquiˈya chaˈ tsoˈo tsa nda ma̱ msta̱ jiˈi̱ nguˈ biˈ, la cuiˈ ñiˈya̱ nu nda ma̱ jiˈi̱ lcaa ñati̱.
\v 14 Liˈ chcuiˈ nguˈ biˈ loˈo ycuiˈ Ndyosi cuentya jiˈi̱ ma̱, chaˈ tsoˈo tsa ntsuˈu tyiquee nguˈ ñaˈa̱ nguˈ jiˈi̱ ma̱; tyiˈu tiˈ nguˈ chaˈ quiñaˈa̱ tsa chaˈ tsoˈo nduˈni ycuiˈ Ndyosi loˈo ñati̱ xquiˈya msta̱ nu cua nda ma̱ jiˈi̱ nguˈ biˈ.
\v 15 Tsoˈo tsa laca si tya na xlyaˈbe jiˈi̱ ycuiˈ Ndyosi lacua, chaˈ tlyu tsa chaˈ tsoˈo laca nu cua nda Ni jiˈna, ni ngaˈaa nchca ca cuayáˈ tiˈ na chaˈ biˈ.
\c 10
\s Ycuiˈ Ndyosi nda chacuayáˈ macala su cuaˈni Pablo cña 
\p
\v 1 Pablo laca naˈ nu nchcuiˈ naˈ loˈo cuˈma̱ juani; tyuˈu chaˈ clyu tiˈ jiˈi̱ ma̱, masi chcuiˈ liñi naˈ loˈo ma̱. Nacui̱ nguˈ chaˈ ntsi̱i̱ naˈ loˈo nchcuiˈ naˈ loˈo ma̱ nu loˈo ndiˈi̱ naˈ slo ma̱, pana tyaala tsa nduˈni naˈ loˈo ma̱ nu loˈo ngaˈa̱ naˈ tyijyuˈ; juaˈa̱ chaˈ nda nguˈ. Tyiˈu tiˈ ma̱ lacua, chaˈ xcuiˈ tsoˈo ti ntiˈ Cristo loˈo ñaˈa̱ Ni jiˈna.
\v 2 Nu juani tyaˈna nchcuiˈ naˈ loˈo ma̱, chaˈ ná cuaˈni lye ma̱ loˈo naˈ, chaˈ juaˈa̱ ná cuaˈni tyaala naˈ loˈo ma̱ chaca quiyaˈ loˈo tyalaa naˈ ca su ndiˈi̱ ma̱. Taca cuaˈni tyaala naˈ loˈo ñati̱ tuˈni, ñati̱ nu cua nñiloˈo jiˈi̱ ma̱ chaˈ cuxi tsa cña ndyuˈni ya.
\v 3 Chañi tsa chaˈ laca na ñati̱ chalyuu, pana ná ndyuˈni na ngana jiˈi̱ nguˈ ñiˈya̱ nu nduˈni xaˈ ñati̱;
\v 4 siˈi na nxu̱u̱ tyaˈa na loˈo nguˈ cuxi ñiˈya̱ nu nxu̱u̱ tyaˈa sca ñati̱ chalyuu. Ycuiˈ Ndyosi ni, nchca tsa jiˈi̱ Ni, biˈ laca nu stuˈba ti nduˈni cña loˈo na chaˈ taca tyiji̱loo na jiˈi̱ lcaa chaˈ cuxi nu nxu̱u̱ loˈo na.
\v 5 Ntsuˈu chaˈ tyiji̱loo na jiˈi̱ lcaa chaˈ cuiñi nu nchcuiˈ nguˈ jiˈi̱ Cristo; juaˈa̱ ntsuˈu chaˈ tyiji̱loo na jiˈi̱ lcaa chaˈ cuxi nu tiji̱ˈ tsa tiˈ nguˈ jiˈi̱, nu ndacaˈa tsa jiˈi̱ nguˈ chaˈ ná xñi nguˈ chaˈ jiˈi̱ ycuiˈ Ndyosi. Nu loˈo cua nguxtyanu nguˈ jiˈi̱ lcaa chaˈ cuxi biˈ, liˈ taca cuaˈni na chaˈ taquiyaˈ nguˈ jiˈi̱ chaˈ nu ntsuˈu jiˈi̱ Cristo.
\v 6 Biˈ chaˈ loˈo cuˈma̱ ni, ngaˈa̱ chaˈ taquiyaˈ lyiji ma̱ lcaa chaˈ nu ntsuˈu jiˈi̱ Cristo, chaˈ tiyaˈ la liˈ taca culoˈo ya jiˈi̱ nu xaˈ la ñati̱ nu ná ntajaˈa̱ taquiyaˈ jiˈi̱ chaˈ biˈ tsiyaˈ ti.
\p
\v 7 Na la xña nchcuiˈ ti ma̱ jiˈi̱ ya. Pana tsoˈo la si culacua xi tiˈ ma̱ ñiˈya̱ ndyuˈu scaa chaˈ nu liñi ca; nu ñati̱ nu ntiˈ chaˈ cuentya jiˈi̱ Cristo laca nguˈ biˈ ni, nduˈni chaˈ culacua tsoˈo la xi tiˈ nguˈ biˈ, chaˈ caca cuayáˈ tiˈ nguˈ liˈ, chaˈ loˈo cuare laca ya cuentya jiˈi̱ Cristo.
\v 8 Cua nchcuiˈ tsa naˈ loˈo ma̱ chaˈ cua nda ycuiˈ nu Xuˈna na chacuayáˈ jiˈi̱ ya, nu loˈo ndyaˈa̱ ya slo cuˈma̱; loˈo juaˈa̱ ná nchca tyujuˈu tiˈ naˈ masi nchcuiˈ naˈ juaˈa̱ loˈo ma̱. Cua loˈo chacuayáˈ jiˈi̱ ycuiˈ Ndyosi ndyaˈa̱ ya, chaˈ taca tyatí̱ la tiˈ tyiquee ma̱ chaˈ jiˈi̱ Ni; siˈi na cuaˈni ñuˈu̱ lyiji ya jiˈi̱ ma̱. 
\v 9 Ná ntiˈ naˈ chaˈ ñacui̱ ma̱ chaˈ na nchcutsi̱i̱ ti naˈ jiˈi̱ ma̱ loˈo quityi nu nscua naˈ chaˈ ya̱a̱ slo ma̱.
\v 10 Nacui̱ nguˈ: Tonu tsa chaˈ nu nda nu Pablo biˈ, tyaala tsa nduˈni yu loˈo na, nu loˈo ndiˈi̱ yu tyijyuˈ. Nda yu chaˈ nu lijya̱ ca slo na, nacui̱ nguˈ jiˈi̱ ma̱, pana ná nchca culo tsoˈo yu cña jiˈna nu loˈo ndiˈi̱ yu slo na; ná nduna na tsiyaˈ ti chaˈ nu nda yu liˈ, nacui̱ nguˈ biˈ liˈ.
\v 11 Tsoˈo si caca cuayáˈ tiˈ nguˈ biˈ lacua, chaˈ sca ti cuayáˈ ndyuˈu chaˈ nu nscua ya lo quityi nu loˈo ngaˈa̱ ya tyijyuˈ, la cuiˈ ñiˈya̱ nu cuaˈni ya loˈo ma̱ nu loˈo tyiˈi̱ ya ca slo ma̱.
\p
\v 12 Siˈi na caca stuˈba chaˈ jiˈi̱ ya loˈo ñati̱ biˈ, ntiˈ ya; tyixi tsa nduˈni nguˈ biˈ loˈo tyaˈa nguˈ, tonto tsa nguˈ biˈ. Na ñaˈa̱ cuayáˈ nguˈ biˈ jiˈi̱ ycuiˈ ca nguˈ, biˈ chaˈ ntiˈ nguˈ chaˈ tsoˈo tsa ndyuˈni ycuiˈ nguˈ.
\v 13 Pana nu cuare ni, ná ntiˈ ya chaˈ chcuiˈ tsoˈo ti nguˈ jiˈi̱ ya cuentya jiˈi̱ sca cña nu cua nguaˈni xaˈ ñati̱; tsoˈo masi chcuiˈ nguˈ jiˈi̱ cña nu ndyuˈni ycuiˈ ca ya, chaˈ ycuiˈ Ndyosi laca nu nda chacuayáˈ macala su ngaˈa̱ chaˈ cuaˈni scaa ya cña. Loˈo juaˈa̱ nda Ni chacuayáˈ chaˈ ndyalaa ya ca slo cuˈma̱, nguˈ Corinto.
\v 14 Biˈ chaˈ lacua, cua loˈo chacuayáˈ jiˈi̱ ycuiˈ Ndyosi ndyaa ya ca slo ma̱ tya clyo, chaˈ nchcuiˈ ya chaˈ tsoˈo nu ntsuˈu jiˈi̱ Cristo loˈo ma̱; siˈi na ntyiji̱loo ya jiˈi̱ chacuayáˈ nu nda Ni jiˈi̱ ya biˈ.
\v 15 Ná ntsuˈu chaˈ chcuiˈ ya jiˈi̱ cña nu ndyuˈni xaˈ ñati̱ cuentya jiˈi̱ ycuiˈ Ndyosi, chcuiˈ ya jiˈi̱ tsa biˈ ti cña nu nda Ni chacuayáˈ chaˈ cuaˈni ycuiˈ ca ya ca slo ma̱. Na cua ntiˈ ya chaˈ xñi tsoˈo la ma̱ chaˈ jiˈi̱ ycuiˈ Ndyosi nde loo la, chaˈ liˈ quiñaˈa̱ la cña taca cuaˈni ya laja nguˈ tyaˈa ma̱, ñiˈya̱ nu cua nda Ni chacuayáˈ chaˈ cuaˈni ya.
\v 16 Loˈo liˈ xquiˈya cuˈma̱ caja ñiˈya̱ chcuiˈ ya chaˈ tsoˈo nu ntsuˈu jiˈi̱ Cristo loˈo nguˈ xaˈ quichi̱ nu ndiˈi̱ tyijyuˈ la, nde loo la ca su ndiˈi̱ cuˈma̱. Biˈ chaˈ lacua, ná nduˈni chaˈ chcuiˈ ya chaˈ jiˈi̱ cña nu cua nguaˈni xaˈ ñati̱ cuentya jiˈi̱ Cristo.
\p
\v 17 Si ngaˈa̱ chaˈ chcuiˈ na jiˈi̱ sca chaˈ, tsoˈo la chcuiˈ na jiˈi̱ sca cña nu ndyuˈni ycuiˈ Ndyosi lacua. 
\v 18 Siˈi na taquiyaˈ tsoˈo la Ni jiˈi̱ ñati̱ nu nchcuiˈ tsa jiˈi̱ cña nu ndyuˈni ycuiˈ ca nguˈ; nu loˈo tsoˈo ti ntiˈ Ni ñaˈa̱ Ni jiˈi̱ ñati̱, liˈ taquiyaˈ Ni jiˈi̱ cña nu ndyuˈni nguˈ biˈ.
\c 11
\s Nu nguˈ nu cuiñi ti nclyuˈu chaˈ jiˈi̱ Jesús
\p
\v 1 Loˈo juani tyuˈu chaˈ clyu tiˈ jiˈi̱ ma̱ loˈo naˈ, talo tyiquee ma̱ xi jnaˈ, masi chaˈ tonto ti naˈ nchcuiˈ tsa naˈ chaˈ jiˈi̱ ycuiˈ ca ti naˈ.
\v 2 Na tiji̱ˈ tsa tiˈ naˈ ñaˈa̱ naˈ jiˈi̱ cuˈma̱. Ni tyiqueeˈ la cuiˈ juaˈa̱ ntiˈ ycuiˈ Ndyosi ñaˈa̱ Ni jiˈi̱ cuˈma̱. Na cua ngüiñi chaˈ ˈna loˈo ycuiˈ Ndyosi chaˈ ta naˈ jiˈi̱ ma̱ chaˈ caca ma̱ ñati̱ jiˈi̱ Cristo, ñati̱ nu lubii tyiquee, la cuiˈ ñiˈya̱ laca loˈo sca nu cunaˈa̱ cuañiˈ nu caja clyoˈo loˈo sca ti nu quiˈyu jiˈi̱; 
\v 3 ndube tsa tiˈ naˈ si quiñuˈu̱ chca cresiya jiˈi̱ ma̱. Tya saˈni ni, cua nguñiloˈo nu cuaña jiˈi̱ Eva, chaˈ tajuaˈ tsa nchcuiˈ nu xñaˈa̱ biˈ. Pana ná ntiˈ naˈ chaˈ quiñuˈu̱ chaˈ jiˈi̱ ma̱ loˈo Cristo juaˈa̱, ná ntiˈ naˈ chaˈ ñiloˈo nu xñaˈa jiˈi̱ ma̱ xquiˈya xaˈ ñati̱; juani tsoˈo tsa chaˈ tyucui tyiquee ma̱ cua ngusñi ma̱ chaˈ jiˈi̱ ycuiˈ Cristo.
\v 4 Ngujui chaˈ jnaˈ chaˈ ndiˈya̱ nduˈni ma̱: tsoˈo tsa nchcuiˈ ma̱ loˈo cua ñaˈa̱ ca ñati̱ nu lijya̱ ca slo ma̱, masi xaˈ ñaˈa̱ chaˈ nu nda nguˈ cuentya jiˈi̱ Jesús, masi ná stuˈba chaˈ nu nda nguˈ biˈ loˈo chaˈ nu cua nda ya loˈo ma̱ tya clyo la. La cuiˈ juaˈa̱ nduna ma̱ chaca chaˈ, pana siˈi chaˈ tsoˈo jiˈi̱ Jesús nu nduˈni lyaá jiˈna jiˈi̱ nu cuxi nu cua nchcuiˈ ya loˈo ma̱ laca biˈ. Biˈ chaˈ laca chaˈ chaca xtyiˈi ndyuˈú neˈ cresiya jiˈi̱ ma̱ juani, ngaˈaa siˈi Xtyiˈi ycuiˈ Ndyosi laca biˈ.
\v 5 Ni siˈi na cuxi la laca chaˈ nu nchcuiˈ naˈ, siˈi na tsoˈo la chaˈ nu nchcuiˈ nu xaˈ ñati̱ biˈ; ntiˈ ma̱ juaˈa̱, masi cua nguñiloˈo nguˈ jiˈi̱ ma̱ loˈo nchcuiˈ nguˈ chaˈ laca nguˈ cña jiˈi̱ Cristo.
\v 6 Masi ná nchca ˈna chcuiˈ liñi naˈ loˈo ñati̱, ntiˈ ma̱, pana ndye chaˈ ngua tsaˈa̱ tsoˈo naˈ chaˈ jiˈi̱ Jesús biˈ; loˈo juaˈa̱ jlo tiˈ ma̱ chaˈ chañi tsa chaˈ nu nchcuiˈ naˈ re, chaˈ tyu̱u̱ quiyaˈ cua naˈa̱ ma̱ ˈna, lcaa ca chaˈ nu cua ngua ˈna.
\p
\v 7 Ná ngusñi naˈ cayaˈ jiˈi̱ ma̱ tsiyaˈ ti nu loˈo ndiˈi̱ naˈ nguluˈu naˈ chaˈ tsoˈo jiˈi̱ ycuiˈ Ndyosi jiˈi̱ ma̱. Cua ntajaˈa̱ naˈ liˈ chaˈ caca tiˈí la naˈ xquiˈya cuˈma̱, chaˈ caja ñiˈya̱ caca tsoˈo la tyiquee ycuiˈ cuˈma̱. ¿Ha ná tsoˈo chaˈ nguaˈni naˈ juaˈa̱, ntiˈ cuˈma̱?
\v 8 Ca taˈa taju nguˈ tyaˈa na nu ngusñi chaˈ jiˈi̱ Jesucristo xaˈ quichi̱ ni, biˈ laca nguˈ nu nxtyucua ˈna loˈo cñi tyucui tyempo loˈo nguaˈni naˈ cña ca su ndiˈi̱ cuˈma̱; ná ngusñi ti naˈ cayaˈ jiˈi̱ nguˈ biˈ, chaˈ juaˈa̱ ngua nxtyucua naˈ jiˈi̱ ma̱ liˈ.
\v 9 Tyucui tyempo nu loˈo ngutiˈi̱ naˈ loˈo cuˈma̱, nu loˈo lyiji cñi ˈna, liˈ ná ngüijña naˈ jiˈi̱ ma̱ chaˈ xtyucua ma̱ xi ˈna; nu nguˈ ca tyi Macedonia, tyaˈa ngusñi na chaˈ jiˈi̱ Cristo, cua ya̱a̱ ya̱loˈo nguˈ biˈ lcaa na nu nguliji ti xi ˈna. Juaˈa̱ nguaˈni naˈ nu ngua liˈ, chaˈ ná ta naˈ quiñaˈa̱ tsa cña jiˈi̱ cuˈma̱, ngua tiˈ naˈ. La cuiˈ juaˈa̱ tya cuaˈni la naˈ tyempo nde loo la, ntiˈ naˈ.
\v 10 Tsoˈo la ntiˈ naˈ chaˈ ndyaca jnaˈ juaˈa̱. Biˈ chaˈ juani macala su tyaˈa̱ naˈ tyucui loyuu su cuentya Grecia, ngaˈaa ntiˈ naˈ chaˈ ta nguˈ cayaˈ ˈna; cua jlo tiˈ ma̱ chaˈ chañi tsa chaˈ nu nchcuiˈ naˈ re, xquiˈya chaˈ laca naˈ ñati̱ jiˈi̱ Cristo.
\v 11 Siˈi xquiˈya chaˈ ná ntsuˈu tyiquee naˈ ñaˈa̱ naˈ jiˈi̱ ma̱, biˈ chaˈ nchcuiˈ naˈ juaˈa̱; cua jlo tiˈ ycuiˈ Ndyosi chaˈ tsoˈo tsa ntiˈ naˈ ñaˈa̱ naˈ jiˈi̱ cuˈma̱.
\p
\v 12 Loˈo juaˈa̱ tya cuaˈni la naˈ ñaˈa̱ nu nduˈni ti naˈ juani, chaˈ juaˈa̱ ná caca chcuiˈ lye nu xaˈ ñati̱ biˈ jiˈi̱ ya, loˈo ñacui̱ nguˈ chaˈ ndyuˈni ya cña ñiˈya̱ nu nduˈni ycuiˈ nguˈ.
\v 13 Ná chañi chaˈ ndyuˈni nguˈ biˈ cña jiˈi̱ Cristo; na cuiñi ti nguˈ biˈ, quiñaˈa̱ tsa chaˈ cuiñi nda nguˈ biˈ loˈo ñati̱ macala su ndyaˈa̱ nguˈ. Xaˈ ñaˈa̱ xi nduˈni loo nguˈ biˈ, chaˈ ñiloˈo nguˈ jiˈi̱ xaˈ ñati̱ chaˈ laca nguˈ biˈ ñati̱ tsoˈo, chaˈ ñati̱ nu ndyuˈni cña jiˈi̱ Cristo laca nguˈ biˈ.
\v 14 Ná tlyu cña laca chaˈ nduˈni nguˈ biˈ juaˈa̱, chaˈ loˈo nu xñaˈa̱ nu naa Satanás taca jiˈi̱ ñiloˈo jiˈi̱ ñati̱, nu loˈo xaˈ ñaˈa̱ cuaˈni loo yu ñaˈa̱ cuayáˈ nu ca tiˈ nguˈ chaˈ laca yu sca xca̱ nu ndyuˈu tucua loˈo xee jiˈi̱ ycuiˈ Ndyosi; pana ná chañi laca chaˈ biˈ.
\v 15 La cuiˈ juaˈa̱ loˈo nguˈ nu ndyuˈni cña cuentya jiˈi̱ nu xñaˈa̱ biˈ; ná tlyu cña chaˈ cuaˈni nguˈ chaˈ xaˈ ñaˈa̱ loo nguˈ, ñaˈa̱ cuayáˈ nu ñiloˈo nguˈ biˈ jiˈi̱ xaˈ la ñati̱ chaˈ cña jiˈi̱ ycuiˈ Ndyosi laca nu ndyuˈni nguˈ biˈ. Pana nu loˈo tyalaa hora chaˈ caca cuayáˈ jiˈi̱ nguˈ loˈo ycuiˈ Ndyosi, liˈ chcubeˈ nguˈ biˈ ñiˈya̱ nu ngaˈa̱ chaˈ tyacua jiˈi̱ nguˈ xquiˈya cña cuxi nu cua nguaˈni nguˈ loˈo ya̱a̱ nguˈ chalyuu.
\s Chaˈ tiˈí nu cua ngujui jiˈi̱ Pablo lcaa su ngutaˈa̱ yu
\p
\v 16 Chaca quiyaˈ chcuiˈ naˈ loˈo ma̱, chaˈ ná ngaˈa̱ chaˈ chcuiˈ ma̱ chaˈ nu tonto ti laca naˈ. Masi juaˈa̱ ntiˈ ma̱, chaˈ tonto laca naˈ, pana ta ma̱ xi chacuayáˈ ˈna chcuiˈ naˈ xi jiˈi̱ lcaa chaˈ nu cua ngua ˈna. 
\v 17 Ná ndiya tiˈ naˈ chaˈ nchcuiˈ naˈ jiˈi̱ chaˈ biˈ, chaˈ siˈi chaˈ nu cua nda ycuiˈ Ndyosi chaˈ chcuiˈ naˈ loˈo ñati̱ laca chaˈ biˈ, ntiˈ naˈ. Chañi chaˈ tonto tsa naˈ, ntiˈ naˈ, si lye tsa chcuiˈ naˈ chaˈ jiˈi̱ ycuiˈ ca naˈ.
\v 18 Pana ná ndube tiˈ naˈ, chcuiˈ naˈ xi juani, chaˈ ntsuˈu tsa nguˈ nu juaˈa̱ nchcuiˈ tsa nguˈ chaˈ caca chi̱ la loo ycuiˈ ca nguˈ, ntiˈ nguˈ; biˈ chaˈ loˈo naˈ ntsuˈu chacuayáˈ chcuiˈ naˈ xi, ntiˈ naˈ.
\v 19 ¡Nu cuˈma̱ nchca tsa jiˈi̱ ma̱! Biˈ chaˈ tsoˈo tsa ndalo tyiquee ma̱ jiˈi̱ nguˈ nu tonto ti nduˈni.
\v 20 Na ndalo tsa tyiquee ma̱ jiˈi̱ lcaa nguˈ tonto biˈ, masi lye tsa nclyo nguˈ cña jiˈi̱ ma̱, masi ndyuˈni nguˈ ngana jiˈi̱ ma̱, masi ndatsaa tsa nguˈ jiˈi̱ ma̱ chaˈ cuaˈni ma̱ chaˈ cuxi, masi nduˈni tyucuaa tsa tiˈ nguˈ loˈo ma̱, masi luˈba ti ntyijiˈi̱ nguˈ sacaˈ ma̱; cua ndalo tsa tyiquee ma̱ jiˈi̱ nguˈ biˈ.
\v 21 Loˈo liˈ nacui̱ ma̱ chaˈ ná ngulo tsoˈo ya cña jiˈi̱ ma̱. ¡Chañi chaˈ ná nguaˈni tyaala ya jiˈi̱ cuˈma̱ ñiˈya̱ nu ndyuˈni nu ñati̱ biˈ!
\p Tsoˈo lacua, chcuiˈ naˈ xi chaˈ jiˈi̱ ycuiˈ ca ti naˈ, masi chaˈ tonto ti ndyuˈni naˈ juaˈa̱; siˈi nguˈ biˈ ti nu ntsuˈu chacuayáˈ chcuiˈ nguˈ jiˈi̱ ycuiˈ ca nguˈ. 
\v 22 Laca naˈ nguˈ hebreo stuˈba ti loˈo nguˈ biˈ; juaˈa̱ laca naˈ nguˈ Israel stuˈba ti loˈo nguˈ biˈ, chaˈ juaˈa̱ ndyuˈu chaˈ jnaˈ loˈo jyoˈo Abraham stuˈba ti loˈo nguˈ biˈ.
\v 23 Nacui̱ nguˈ biˈ, chaˈ cña jiˈi̱ Cristo ndyuˈni nguˈ; la cuiˈ cña biˈ ndyuˈni naˈ. Masi tonto ti nchcuiˈ naˈ, pana tsoˈo la cña nu ndyuˈni naˈ que cña nu ndyuˈni nguˈ biˈ; lye la nguaˈni naˈ cña, luˈba la ngusuˈba nguˈ ˈna neˈ chcua̱, tyu̱u̱ tsa quiyaˈ cua ngujuiˈi̱ nguˈ juata hichu̱ˈ naˈ, luˈba ti ndyaca chaˈ cua cajaa ti naˈ xquiˈya Cristo.
\v 24 Calaa tyii ntucua caa quiyaˈ ndyaˈni nguˈ cuxi cuentya jiˈi̱ nguˈ judío ni, loˈo juaˈa̱ caˈyu quiyaˈ ngujuiˈi̱ nguˈ judío ˈna tsa lo cua quiyaˈ;
\v 25 juaˈa̱ sna quiyaˈ ngujuiˈi̱ nguˈ romano yaca hichu̱ˈ naˈ, loˈo juaˈa̱ tsaca quiyaˈ ngu̱ nguˈ quee ˈna chaˈ ngua tiˈ nguˈ cujuii nguˈ ˈna. Sna quiyaˈ ngua cuxi jiˈi̱ yaca niˈi̱ su ndyaˈa̱ naˈ, ngüilyuˈu biˈ nde neˈ hitya; loˈo juaˈa̱ sna quiyaˈ ngua chaˈ ndyanu naˈ nchcuatya ti naˈ lo hitya sca tsa̱ loˈo sca talya. 
\v 26 Quiñaˈa̱ tsa seˈi̱ ndyaˈa̱ naˈ tyucui̱i̱ su caca cuxi ˈna nquichaˈ: ntsuˈu hora ndyacua naˈ claˈbe staˈa̱ loˈo ndyaluu biˈ; la cuiˈ juaˈa̱ ntsuˈu tsa ñati̱ cuaana tyucui̱i̱; masi nguˈ judío tyaˈa naˈ, masi nguˈ xaˈ tsuˈ, ngua tiˈ nguˈ cuaˈni cuxi nguˈ loˈo naˈ; la cuiˈ juaˈa̱ masi ndyaˈa̱ naˈ nde quichi̱ tonu, masi ndyaˈa̱ naˈ nde neˈ quixi̱ˈ, masi ndyaˈa̱ naˈ nde lo tyujoˈo, ntsuˈu tsa chaˈ cuxi nu ndyacua ˈna; loˈo juaˈa̱ ntsuˈu nguˈ nu stuˈba ndyaˈa̱ loˈo ñati̱ jiˈi̱ Jesucristo, pana chaˈ cuiñi ndyuˈni nguˈ biˈ, cuxi ti ngulacua tiˈ nguˈ ñaˈa̱ nguˈ ˈna.
\v 27 Tucui tsa cña nu ndyacua ˈna, tiˈí tsa cña ndyacua ˈna ca su ndyaˈa̱ naˈ, ñaˈa̱ cuayaˈ tyu̱u̱ tsa quiyaˈ ná ngua cajaˈ naˈ; ntsuˈu quiyaˈ ntyuteˈ naˈ, juaˈa̱ ntsuˈu quiyaˈ nguityi naˈ hitya, loˈo juaˈa̱ ntsuˈu tsa̱ nu ná ngujui tsiyaˈ ti na cacu naˈ, ntsuˈu tsa̱ loˈo lye tsa nchca tlyaˈ naˈ, la cuiˈ juaˈa̱ ná ngujui lateˈ cacuˈ naˈ. Lcaa chaˈ biˈ ndyacua ˈna ca su ndyaˈa̱ naˈ.
\p
\v 28 Loˈo juaˈa̱ tya ntsuˈu la xi xaˈ la chaˈ ˈna; lcaa tsa̱ ndube tsa tiˈ naˈ ñiˈya̱ ndyaca jiˈi̱ lcaa taju ñati̱ nu cuentya jiˈi̱ Cristo ca xaˈ quichi̱, lye tsa nclyacua tiˈ naˈ neˈ cresiya jnaˈ loˈo ndyiˈu tiˈ naˈ jiˈi̱ nguˈ biˈ.
\v 29 Loˈo ná ndyiji juersa jiˈi̱ scaa nguˈ biˈ, liˈ caca ñuˈu̱ tiˈ naˈ cuentya jiˈi̱ nguˈ biˈ; loˈo ndyacua quiˈya jiˈi̱ scaa nguˈ biˈ, la cuiˈ juaˈa̱ naˈ, xñiˈi̱ tsa tiˈ naˈ liˈ.
\v 30 Laja loˈo nchcuiˈ ti naˈ, tsoˈo si chcuiˈ naˈ jiˈi̱ lcaa chaˈ nu ná nda chacuayáˈ chaˈ caja juersa jnaˈ su ntucua ycuiˈ ti naˈ.
\v 31 Ycuiˈ Ndyosi Sti Jesucristo nu Xuˈna na ni, tyucui tyempo ngaˈa̱ chaˈ cuaˈni tlyu na jiˈi̱ Ni: la cuiˈ Ni jlo tiˈ Ni chaˈ siˈi chaˈ cuiñi laca nu nda naˈ loˈo cuˈma̱. 
\v 32 Ndiˈya̱ chaˈ ngua ˈna loˈo ngutiˈi̱ naˈ ca quichi̱ Damasco: Nu laca xuˈna quichi̱ ca jua, cuentya jiˈi̱ rey Aretas laca yu cña; loˈo juaˈa̱ ngulo yu biˈ cña jiˈi̱ nguˈ policia chaˈ tsatu̱ nguˈ toˈ loˈo quichi̱ biˈ chaˈ tejeyaˈ nguˈ ˈna, chaˈ tyaa loˈo nguˈ ˈna nde neˈ chcua̱ liˈ.
\v 33 Pana xaˈ tyucui̱i̱ ngusñi naˈ ngutaˈa̱ naˈ liˈ; ya̱a̱ loˈo nguˈ tyaˈa na sca chcubi, chaˈ chcaˈa̱ naˈ nde neˈ chcubi biˈ, loˈo liˈ ngusuˈba nguˈ ˈna toniˈi̱ ventana chaˈ nguaˈya tiˈi̱ naˈ nde chu̱ˈ loˈo quichi̱ biˈ nde liyaˈ. Juaˈa̱ ngua, biˈ chaˈ laca chaˈ ngulaá naˈ jiˈi̱ xuˈna quichi̱ biˈ.
\c 12
\s Nguluˈuloo ycuiˈ Ndyosi jiˈi̱ Pablo laja xcalá yu
\p
\v 1 Tya ntiˈ chaˈ chcuiˈ naˈ la xi chaˈ jiˈi̱ ycuiˈ ca ti naˈ, masi ná tsoˈo chcuiˈ naˈ juaˈa̱ loˈo xaˈ ñati̱. Juani ta naˈ sca chaˈ loˈo ma̱ ñiˈya̱ nu cua nchcuiˈ xcalá naˈ tsaca quiyaˈ. Laja xcalá ti naˈ, liˈ nguluˈuloo ycuiˈ nu Xuˈna na ˈna, loˈo juaˈa̱ nda Ni sca chaˈ loˈo naˈ liˈ.
\v 2 Sca ñati̱ nu cua ngusñi chaˈ jiˈi̱ Cristo laca naˈ; nu juani cua ntsuˈu tii jlyacua yija̱ tya loˈo ngua tiˈ naˈ chaˈ ya̱a̱ ycuiˈ Ndyosi ya̱quiˈya Ni ˈna, chaˈ liˈ ndyaˈa̱a̱ ca chaca chalyuu nde cua̱ la, ca su ntucua ycuiˈ Ndyosi. Ngaˈaa jlo tiˈ naˈ si chañi chaˈ ndyaˈa̱ naˈ ca ndacua, si laja xcalá ti naˈ nguluˈuloo ti chaˈ biˈ ˈna; sca ti ycuiˈ Ndyosi jlo tiˈ.
\v 3 Chaca quiyaˈ chcuiˈ naˈ loˈo cuˈma̱ chaˈ ná jlo tiˈ naˈ si chañi chaˈ ndyaa loˈo lye ycuiˈ Ndyosi ˈna ca chalyuu biˈ su tsoˈo tsa ñaˈa̱ lcaa na, si na nchcuiloˈo ti ˈna chaˈ ndyaˈa̱ naˈ ca biˈ; sca ti ycuiˈ Ndyosi jlo tiˈ.
\v 4 Ca biˈ cua ndyuna naˈ quiñaˈa̱ tsa chaˈ; cua ntsuˈu tsa chaˈ nu ná nchca chcuiˈ naˈ jiˈi̱, juaˈa̱ ná caja ñiˈya̱ chcuiˈ ñati̱ chalyuu jiˈi̱ chaˈ biˈ tsiyaˈ ti. 
\v 5 Pana tsoˈo si chcuiˈ naˈ xi loˈo ma̱, chaˈ juaˈa̱ ngua ˈna tya liˈ; ná tsoˈo chcuiˈ naˈ xaˈ la chaˈ cuentya jiˈi̱ ycuiˈ ca naˈ, sca ti si chcuiˈ la naˈ xi jiˈi̱ scaa chaˈ nu ná nda chacuayáˈ ˈna chaˈ caja juersa ˈna su ntucua naˈ ycuiˈ ti naˈ.
\v 6 Ni siˈi na tonto laca naˈ chaˈ nchcuiˈ tsa naˈ jiˈi̱ ycuiˈ ca ti naˈ juaˈa̱, chaˈ liñi laca nu nda naˈ loˈo ma̱ juani. Pana ngaˈaa ntiˈ naˈ chcuiˈ naˈ quiñaˈa̱ la chaˈ loˈo ma̱ juani, chaˈ ná ntiˈ naˈ chaˈ cuaˈni chi̱ nguˈ loo naˈ si bilya ñaˈa̱ nguˈ ñiˈya̱ ndyuˈni naˈ, si bilya cuna nguˈ chaˈ nu nda naˈ; tsa ñaˈa̱ cuayáˈ nu ndyuloo ti nguˈ ˈna, juaˈa̱ ti taca cuaˈni chi̱ nguˈ loo naˈ ntiˈ naˈ.
\p
\v 7 Loˈo liˈ nda ycuiˈ Ndyosi chacuayáˈ chaˈ caja xi chaˈ chcubeˈ naˈ, chaˈ ná lye tsa caca tyucuaa tiˈ naˈ loˈo ñati̱ xquiˈya chaˈ tlyu ca nde cua̱ nu cua naˈa̱ naˈ laja xcalá̱; nda Ni sca lo quicha ˈna nu tiˈí tsa ndyuˈni loˈo naˈ. Loˈo juaˈa̱ laca biˈ ñiˈya̱ laca loˈo ntsuˈu na yaˈ nu xñaˈa̱ nchcubeˈ jiˈna, chaˈ tiˈí tsa ndyuˈni quicha biˈ loˈo naˈ, chaˈ ná caca tyucuaa tiˈ naˈ loˈo xaˈ ñati̱.
\v 8 Cua ndyaˈa sna quiyaˈ nchcuiˈ naˈ loˈo ycuiˈ Ndyosi; tyaˈna tsa nchcuiˈ naˈ loˈo Ni cuentya jiˈi̱ quicha biˈ chaˈ tyuˈutsuˈ biˈ jnaˈ.
\v 9 Pana ndiˈya̱ nacui̱ Ni ˈna liˈ: “Tsa biˈ ti chaˈ ngaˈa̱ chaˈ tyiˈu tiˈ nuˈu̱, chaˈ xcuiˈ chaˈ tsoˈo nduˈni naˈ loˈo nuˈu̱ juaˈa̱ ti. Lye la caca cuaˈni naˈ cña xquiˈya nuˈu̱, nu loˈo ná quiñaˈa̱ tsa juersa ntsuˈu jiˈi̱ ycuiˈ ca nuˈu̱”, nacui̱ Ni jnaˈ. Biˈ chaˈ juani tsoˈo tsa ntiˈ naˈ masi ná ndyiji juersa ˈna, chaˈ liˈ taca tyanu juersa jiˈi̱ ycuiˈ Cristo neˈ cresiya ˈna.
\v 10 Tsoˈo ntiˈ naˈ lacua, masi ná ntsuˈu juersa ˈna tsiyaˈ ti, masi quiñaˈa̱ tsa chaˈ tiˈí nchcuiˈ nguˈ jnaˈ, masi tiˈi tsa naˈ, masi lyaˈ tsa tiˈ nguˈ ˈna, masi tucui tsa laca cña su ndyaˈa̱ naˈ cuentya jiˈi̱ Cristo; la cuiˈ tyempo loˈo ná nchca ˈna tsiyaˈ ti, la cuiˈ hora biˈ tsoˈo tsa ndyiji juersa ˈna xquiˈya Cristo. 
\s Ndube tsa tiˈ Pablo ñiˈya̱ ndyaca jiˈi̱ nguˈ Corinto nu ngusñi chaˈ jiˈi̱ Cristo
\p
\v 11 Cuˈma̱ nguaˈni ma̱ loˈo naˈ chaˈ nchcuiˈ naˈ chaˈ tonto re, pana cuˈma̱ laca nu ngaˈa̱ chaˈ chcuiˈ tsoˈo ma̱ ˈna nquichaˈ. Masi ná sca chaˈ ndyaca ˈna tsiyaˈ ti, siˈi na xti la cña nchca ˈna loˈo quiñaˈa̱ la cña nchca jiˈi̱ nu nguˈ cuiñi biˈ, masi tyacaˈa tsa ndyuˈni ma̱ jiˈi̱ nguˈ; siˈi juaˈa̱ ndyuˈu chaˈ.
\v 12 Cua ndalo tsa naˈ laja lcaa chaˈ cuxi nu ngua ˈna, chaˈ ndyuˈni naˈ cña nu cua nda nu Xuˈna na ˈna, chaˈ ndu̱ naˈ nchcuiˈ naˈ loˈo cuˈma̱. Cua jlo tiˈ ma̱ chaˈ ycuiˈ Ndyosi laca nu cua nda cña biˈ ˈna nu loˈo cua naˈa̱ ma̱ chaˈ tlyu nu cua nguaˈni Ni ca slo ma̱ xquiˈya naˈ, chaˈ juaˈa̱ cube la tiˈ ma̱ jiˈi̱ ycuiˈ Ndyosi. Ná nchca cuaˈni ñati̱ chalyuu cña biˈ juaˈa̱ ti.
\v 13 Tsa biˈ ti chaˈ, ná ngüijña naˈ jiˈi̱ cuˈma̱ chaˈ xtyucua ma̱ ˈna, biˈ chaˈ ntiˈ ma̱ chaˈ chi̱i̱ ntiˈ naˈ ñaˈa̱ naˈ jiˈi̱ cuˈma̱; tsoˈo la nduˈni naˈ loˈo nguˈ xaˈ quichi̱, ntiˈ ma̱. Tyuˈu xi chaˈ clyu tiˈ jiˈi̱ ma̱ loˈo naˈ lacua, chaˈ ná ndijña naˈ chaˈ biˈ jiˈi̱ cuˈma̱.
\p
\v 14 Cua tya̱a̱ ti naˈ ca su ndiˈi̱ ma̱ chaca quiyaˈ. Cua tyaˈa ti sna quiyaˈ chaˈ ca̱a̱ naˈ slo ma̱ juani, loˈo ñaˈa̱ ti ná lijya̱ naˈ chaˈ culo naˈ sca cña tlyu jiˈi̱ cuˈma̱. Sca ti ntiˈ naˈ chaˈ caca ma̱ ñati̱ jiˈi̱ ycuiˈ Ndyosi, ná ntiˈ naˈ chaˈ jña naˈ cñi jiˈi̱ ma̱. Ñiˈya̱ ntiˈ na ni, si ntsuˈu sñiˈ na, ycuiˈ ti na ta na cayaˈ lo na laca nu lyiji jiˈi̱ sñiˈ na; siˈi sñiˈ na nu ta cayaˈ lo ycuiˈ na.
\v 15 Loˈo juaˈa̱ naˈ, tsoˈo tsa ntiˈ naˈ masi culiji naˈ lcaa na nu ntsuˈu xi ˈna, masi tye juersa jiˈi̱ ycuiˈ naˈ tsiyaˈ ti, chaˈ caja ñiˈya̱ xtyucua naˈ xi jiˈi̱ cuˈma̱. Biˈ chaˈ ná tsoˈo laca si xti ti ntsuˈu tyiquee ma̱ ñaˈa̱ ma̱ ˈna, masi tsoˈo la ntsuˈu tyiquee naˈ ñaˈa̱a̱ jiˈi̱ cuˈma̱.
\p
\v 16 Ná quiñaˈa̱ tsa cñi nguliji ma̱ lo naˈ liˈ; pana ñaˈa̱ ti tya ntsuˈu xi nguˈ tyaˈa ma̱ nu nchcuiˈ chaˈ cua nguñiloˈo naˈ jiˈi̱ ma̱ chaˈ cuaˈni naˈ ngana jiˈi̱ ma̱.
\v 17 ¿Ñiˈya̱ juaˈa̱? Ná nda naˈ ñati̱ lijya̱ ca slo ma̱ chaˈ cuaˈni nguˈ ngana jiˈi̱ ma̱ cuentya ˈna, siˈi juaˈa̱ ntiˈ naˈ.
\v 18 Chañi chaˈ nchcuiˈ naˈ loˈo yu Tito biˈ, chaˈ tsubiˈ ti tsaa yu ca su ndiˈi̱ ma̱; ndyaa yu loˈo chaca yu tyaˈa ngusñi na chaˈ jiˈi̱ Jesús biˈ liˈ. Pana siˈi Tito laca nu nguaˈni ngana jiˈi̱ ma̱; sca ti cuayáˈ ndyuˈni yu cña ñiˈya̱ nu ndyuˈni naˈ cña, sca ti chaˈ ntsuˈu tyiquee tyucuaa ya.
\p
\v 19 Ni siˈi xcuiˈ na cua ntiˈ ya chaˈ tyuˈu lubii chaˈ jiˈi̱ ya loˈo cuˈma̱; laca chaˈ ndube tiˈ ya chaˈ ñaˈa̱ ycuiˈ Ndyosi jiˈi̱ ya, biˈ chaˈ tsa lo cua ti chaˈ nchcuiˈ ya, tsa ñaˈa̱ chaˈ nu ntiˈ ycuiˈ Cristo chaˈ chcuiˈ ya loˈo cuˈma̱. La cuiˈ juaˈa̱ lcaa cña nu ndyuˈni ya, na xtyucua ya jiˈi̱ ma̱ laca cña biˈ, chaˈ ntsuˈu tsa tyiquee ya ñaˈa̱ ya jiˈi̱ cuˈma̱ tyaˈa tsoˈo na.
\v 20 Quiñaˈa̱ xi nclyacua tiˈ naˈ xquiˈya cuˈma̱ juani. Loˈo tyalaa naˈ ca su ndiˈi̱ ma̱, si quije chaˈ ˈna loˈo ma̱ chaˈ xaˈ ñaˈa̱ nduˈni ma̱, ngaˈaa siˈi ñiˈya̱ nu nguluˈu naˈ jiˈi̱ ma̱ tya clyo, ¿ñiˈya̱ cuaˈni ta naˈ loˈo ma̱ liˈ? Ca cuayáˈ tiˈ ma̱ chaˈ taca cuaˈni tyaala naˈ xi loˈo ma̱ liˈ, masi ná ndiya tiˈ ma̱ chaˈ cuaˈni naˈ juaˈa̱. Ndube tiˈ naˈ chaˈ tya ntsuˈu xi nguˈ tyaˈa ma̱ nu ñaˈa̱ ti nxu̱u̱ tyaˈa nguˈ, nu tiˈí tsa tiˈ nguˈ ñaˈa̱ jiˈi̱ tyaˈa nguˈ, nu ñasi̱ˈ tsa nguˈ ñaˈa̱ jiˈi̱ tyaˈa nguˈ, nu sca ti jiˈi̱ ycuiˈ ca nguˈ ndube tiˈ nguˈ; loˈo juaˈa̱ nchcuiˈ caˈa̱ ti nguˈ jiˈi̱ tyaˈa nguˈ, cuentyu tsa tiˈ nguˈ loˈo tyaˈa nguˈ, ntyucuaa tsa tiˈ nguˈ ndyuˈni nguˈ loˈo tyaˈa nguˈ. Lcaa lo chaˈ cuxi biˈ ndyuˈni nguˈ chaˈ ná ndube tiˈ nguˈ tsiyaˈ ti.
\v 21 Nu loˈo tyalaa naˈ chaca quiyaˈ ca slo ma̱ juani ti, si quije chaˈ jnaˈ chaˈ juaˈa̱ nduˈni ma̱, ná tyiqueeˈ quiñaˈa̱ tsa chaˈ tyujuˈu tiˈ caca ˈna cuentya jiˈi̱ ycuiˈ Ndyosi nu laca Xuˈna naˈ, nu loˈo ñaˈa̱ naˈ jiˈi̱ cuˈma̱. Xiˈya tsa naˈ liˈ, ñaˈa̱ cuayáˈ xñii hitya cloo naˈ; xiˈya naˈ xquiˈya nguˈ nu nguaˈni chaˈ cuxi biˈ tya tsubiˈ la, chaˈ bilya ca tyujuˈu tiˈ nguˈ biˈ jiˈi̱ chaˈ subaˈ nu nguaˈni nguˈ, chaˈ ntsuˈu tsa chaˈ cuxi nu ndyuˈni nguˈ loˈo tyaˈa nguˈ, chaˈ ná lubii cresiya jiˈi̱ nguˈ biˈ tsiyaˈ ti.
\c 13
\s Liñi nchcuiˈ Pablo loˈo nguˈ loˈo ndye nguscua yu quityi 
\p
\v 1 Cua tyaˈa ti sna quiyaˈ juani chaˈ ca̱a̱ naˈa̱ naˈ jiˈi̱ cuˈma̱. Ndiˈya̱ cuaˈni na juani: Xcuiˈ ngaˈa̱ chaˈ cuaˈni cuayáˈ na jiˈi̱ ñati̱ cuxi loˈo tucua sna tyaˈa ñati̱ nu cua naˈa̱ jiˈi̱ chaˈ cuxi biˈ.
\v 2 Biˈ laca chaˈ nu nchcuiˈ naˈ loˈo lcaa cuˈma̱ nguˈ Corinto nu cua ngusñi chaˈ jiˈi̱ Jesucristo, loˈo juaˈa̱ nchcuiˈ naˈ loˈo cuˈma̱ nguˈ taju jiˈi̱ Jesús ca ndacua nu nguaˈni chaˈ cuxi tya tsubiˈ la. Nu loˈo ñaa naˈ nu ndyaca tyucuaa quiyaˈ ni, cua laca nda naˈ chaˈ re loˈo cuˈma̱ liˈ, pana juani loˈo ndiˈi̱ naˈ tyijyuˈ, tya chaca quiyaˈ chcuiˈ naˈ chaˈ biˈ loˈo ma̱, chaˈ ni sca ñati̱ nu nduˈni chaˈ cuxi ná ngaˈa̱ chaˈ clyaá nguˈ loˈo ca̱a̱ naˈ chaca quiyaˈ; cuaˈni cuayáˈ naˈ jiˈi̱ lcaa nguˈ biˈ.
\v 3 Ca liˈ caca cuayáˈ tiˈ ma̱ chaˈ ycuiˈ Cristo laca nu nda chaˈ nu nchcuiˈ naˈ; loˈo juaˈa̱ siˈi na xti ti cña nchca jiˈi̱ Cristo loˈo xcubeˈ Ni jiˈi̱ ma̱, masi lye tsa cuaˈni Ni cña chaˈ chcubeˈ ma̱ liˈ.
\v 4 Chañi tsa chaˈ ndye juersa jiˈi̱ Cristo nu loˈo ndyujuii nguˈ jiˈi̱, loˈo ngujuiˈi̱ caˈa̱ nguˈ jiˈi̱ lo crusi; pana tlyu tsa cña nguaˈni ycuiˈ Ndyosi cuentya jiˈi̱ yu, biˈ chaˈ laca chaˈ ñaˈa̱ ti tya luˈú yu juani. Ñiˈya̱ ntiˈ Cristo, chaˈ ná nguxlyú chaˈ hichu̱ˈ ñati̱ nu ndyujuii jiˈi̱, la cuiˈ juaˈa̱ cuare, siˈi na lye tsa nclyo ya cña jiˈi̱ cuˈma̱ nquichaˈ; pana juani caca cuayáˈ tiˈ ma̱ chaˈ ñaˈa̱ ti tya luˈú ya xi, chaˈ la cuiˈ chacuayáˈ jiˈi̱ ycuiˈ Ndyosi ndyaˈa̱ loˈo ya lijya̱ ya, la cuiˈ tyaˈa chacuayáˈ nu ntsuˈu jiˈi̱ Cristo.
\p
\v 5 Cuaˈni cuayáˈ ma̱ jiˈi̱ ycuiˈ ca ma̱ lacua, chaˈ ca cuayáˈ tiˈ ma̱ si chañi chaˈ tya ndyanu tyucui chaˈ jiˈi̱ Jesucristo neˈ cresiya jiˈi̱ ma̱. Ngaˈa̱ chaˈ tyiˈu tiˈ ma̱ chaˈ ndyanu Xtyiˈi Jesucristo neˈ cresiya jiˈi̱ sa scaa ma̱; sca ti si cua ngunuˈu̱ cresiya jiˈi̱ ma̱ loˈo ycuiˈ Ndyosi tsiyaˈ ti, ngaˈaa tyanu Ni loˈo ma̱ liˈ.
\v 6 Loˈo juaˈa̱ ntiˈ naˈ chaˈ caca cuayáˈ tiˈ ma̱ chaˈ jiˈi̱ cuare, chaˈ siˈi na ngunuˈu̱ cresiya jiˈi̱ ya loˈo Ni.
\v 7 Luˈba ti ndijña ya chaˈ jiˈi̱ ycuiˈ Ndyosi, chaˈ ná ta Ni chacuayáˈ chaˈ cuaˈni ma̱ xaˈ la chaˈ cuxi; na cua ntiˈ ya chaˈ xtyucua Ni jiˈi̱ ma̱ chaˈ tsoˈo ti caca tyiquee ma̱. Ná ndube tiˈ ya, masi ñacui̱ nguˈ chaˈ ná nchca jiˈi̱ ya tsiyaˈ ti.
\v 8 Ná ntsuˈu chaˈ cuaˈni tyaala ya loˈo ma̱ si ñaˈa̱ ti tya ndyanu tsoˈo chaˈ neˈ cresiya jiˈi̱ ma̱, nu chaˈ jiˈi̱ Jesús nu cua ngusñi ma̱; pana si ndyuˈni ñuˈu̱ ca ma̱ jiˈi̱ nu chaˈ jiˈi̱ Jesús biˈ, liˈ cuaˈni tyaala ya loˈo ma̱.
\v 9 Si tsoˈo tsa ndyanu tachaa chaˈ jiˈi̱ ycuiˈ Ndyosi neˈ cresiya jiˈi̱ ma̱, tsoˈo tsa ntiˈ ya liˈ, masi xti ti chaˈ nchca jiˈi̱ ycuiˈ ya; biˈ chaˈ ndijña ya chaˈ jiˈi̱ ycuiˈ Ndyosi cuentya jiˈi̱ cuˈma̱ lacua, chaˈ juaˈa̱ caca tyucui la tiˈ tyiquee ma̱ ñaˈa̱ ma̱ jiˈi̱ ycuiˈ Ndyosi.
\v 10 Loˈo juaˈa̱ nscua naˈ quityi re, masi tyijyuˈ tsa ndiˈi̱ naˈ cuentya jiˈi̱ cuˈma̱, chaˈ ná caca tyaala naˈ loˈo cuˈma̱ nu loˈo cua ndyalaa naˈ ca quichi̱ tyi ma̱. Chañi chaˈ cua nda ycuiˈ nu Xuˈna na chacuayáˈ ˈna, pana ndiˈya̱ ndyuˈu chaˈ biˈ: cuaˈni naˈ chaˈ caja ñiˈya̱ tyanu tachaa la chaˈ biˈ neˈ cresiya jiˈi̱ ma̱; ná ntsuˈu chacuayáˈ ˈna chaˈ cuaˈni ñuˈu̱ lyiji naˈ jiˈi̱ cuˈma̱.
\p
\v 11 Cuˈma̱ tyaˈa ngusñi na chaˈ jiˈi̱ Jesucristo, chcuiˈ salyaˈ naˈ loˈo ma̱ juani, nu loˈo cua tye ti xcua seˈi̱ chaˈ nu nscua naˈ lo quityi re. Cuaˈni lyiji ma̱ ñiˈya̱ nu ngaˈa̱ chaˈ cuaˈni ma̱ chaˈ laca ma̱ ñati̱ jiˈi̱ ycuiˈ Ndyosi. Cuaˈa̱ jyaca̱ ma̱ jiˈi̱ lcaa chaˈ nu nda naˈ lo quityi re. Cuaˈni ma̱ chaˈ caca stuˈba tyiquee ma̱ loˈo xaˈ ñati̱ tyaˈa ma̱. Tsoˈo ti tyiˈi̱ ma̱ loˈo lcaa ñati̱. Loˈo liˈ la cuiˈ ycuiˈ Ndyosi laca nu tyiˈi̱ loˈo ma̱ lcaa tsa̱; ntsuˈu tsa tyiquee Ni ñaˈa̱ Ni jiˈna, loˈo juaˈa̱ nduˈni Ni chaˈ ti̱ ti tyiˈi̱ tyiquee na.
\v 12 Chcuichaˈ ma̱ jiˈi̱ tyaˈa ma̱ tyucui tyiquee ma̱, quityi ma̱ jiˈi̱ tyaˈa ma̱ chacuayáˈ jiˈi̱ Cristo.
\v 13 Lcaa nguˈ tyaˈa ngusñi na chaˈ jiˈi̱ ycuiˈ Ndyosi ca nde, cua ntiˈ nguˈ ta nguˈ xlyo niˈi̱ jiˈi̱ lcaa nguˈ tyaˈa ma̱ nu ndiˈi̱ cajua.
\p
\v 14 Loˈo juani ntiˈ tsa naˈ chaˈ ná tye chaˈ stuˈba chaˈ jiˈi̱ lcaa cuˈma̱ cajua loˈo Jesucristo nu Xuˈna na, la cuiˈ Ni laca nu quiñaˈa̱ tsa chaˈ tsoˈo nduˈni loˈo na lcaa tsa̱. Juaˈa̱ ntiˈ naˈ chaˈ lcaa tsa̱ caca stuˈba chaˈ jiˈi̱ ma̱ loˈo ycuiˈ Ndyosi, la cuiˈ Ni laca nu ntsuˈu tsa tyiquee Ni ñaˈa̱ Ni jiˈna. Juaˈa̱ ntiˈ naˈ chaˈ tyanu Xtyiˈi ycuiˈ Ndyosi neˈ cresiya jiˈi̱ ma̱, la cuiˈ Ni laca nu nduˈni chaˈ stuˈba ntsuˈu chaˈ jiˈna loˈo Ni, juaˈa̱ loˈo xaˈ la nguˈ tyaˈa ngusñi na chaˈ jiˈi̱ ycuiˈ Ndyosi. Juaˈa̱ caca chaˈ lacua.