\id GAL
\h GALATAS
\mt Quityi nu nguscua San Pablo ndyaa ca slo ñati̱ jiˈi̱ Jesucristo nde Galacia
\c 1
\p
\v 1 Pablo laca naˈ nu nscua̱ quityi re. Cña ˈna laca chaˈ tsaˈa naˈ chcuiˈ naˈ chaˈ jiˈi̱ Jesucristo loˈo lcaa ñati̱. Siˈi ñati̱ chalyuu ti laca nu cua nda cña biˈ ˈna, siˈi ñati̱ laca nu nguane ˈna chaˈ cuaˈni naˈ cña biˈ; Jesucristo loˈo ycuiˈ Ndyosi Sti Jesús, biˈ laca nu cua nda cña biˈ ˈna. Ycuiˈ Ndyosi ni, biˈ laca nu nguaˈni chaˈ ndyuˈú Jesús chaca quiyaˈ loˈo ngujuii yu.
\v 2 Loˈo naˈ, loˈo lcaa tyaˈa ndiˈi̱ naˈ ca nde nu ntsuˈu chaˈ jiˈi̱ nguˈ loˈo Jesús, nscua ya quityi re chaˈ tsaa lcaa quichi̱ tyi cuˈma̱ nguˈ gálatas, lcaa quichi̱ su ntsuˈu cuˈma̱ taju ñati̱ jiˈi̱ Jesucristo.
\v 3 Ntiˈ tsa naˈ chaˈ ñaˈa̱ ti tya cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ cresiya jiˈi̱ ma̱ xquiˈya Jesucristo nu Xuˈna na.
\v 4 La cuiˈ Jesús laca nu nda jiˈi̱ ycuiˈ ca loˈo ngujuii yu chaˈ cuityi̱ quiˈya nu ntsuˈu jiˈna, chaˈ juaˈa̱ cuaˈni lyaá Ni jiˈna nde chalyuu su ngunuˈu̱ tsa tyiquee ñati̱ xquiˈya chaˈ cuxi; ngulo ycuiˈ Ndyosi Sti na cña jiˈi̱ Jesús, liˈ nguaˈni yu cña biˈ cuentya jiˈna.
\v 5 Biˈ chaˈ ná ngaˈa̱ chaˈ tye tsa̱ nu cuaˈni tlyu na jiˈi̱ ycuiˈ Ndyosi. Juaˈa̱ caca chaˈ biˈ lacua.
\s Ngaˈaa ntsuˈu xaˈ la chaˈ nu taca cuaˈni lyaá jiˈi̱ ñati̱ jiˈi̱ nu cuxi
\p
\v 6 Ndube tsa tiˈ naˈ chaˈ yala ti ngutaˈa̱chu̱ˈ ma̱ jiˈi̱ ycuiˈ Ndyosi, masi ngusubi Ni jiˈi̱ ma̱ xquiˈya chaˈ ntsuˈu tsa tyiquee Cristo ñaˈa̱ jiˈna; ndube tiˈ naˈ chaˈ nduna ma̱ chaca chaˈ nu siˈi chaˈ jiˈi̱ ycuiˈ Ndyosi laca, nu nacui̱ nguˈ chaˈ taca cuaˈni lyaá jiˈna jiˈi̱ nu cuxi.
\v 7 Pana liñi la ñacui̱ na chaˈ ngaˈaa ntsuˈu xaˈ la chaˈ tsoˈo jiˈi̱ Jesucristo nu taca cuaˈni lyaá jiˈna. Ndiˈya̱ ndyaca chaˈ: Ntsuˈu xi ñati̱ nu ndyuˈni chaˈ quichi̱ yaa chaˈ hique ma̱; cua ntiˈ tsa nguˈ biˈ, chaˈ xcutsaˈa̱ nguˈ ñiˈya̱ ntsuˈu chaˈ jiˈi̱ Cristo.
\v 8 Pana tlyu tsa quiˈya sta Ni jiˈi̱ ñati̱ nu chcuiˈ sca chaˈ cuiñi loˈo ma̱ ñiˈya̱ nu caca clyaá ma̱ jiˈi̱ chaˈ cuxi, nu culuˈu jiˈi̱ ma̱ sca chaˈ nu siˈi la cuiˈ chaˈ liñi laca, nu siˈi chaˈ nu cua nchcuiˈ ya loˈo ma̱ tya clyo. Loˈo cuare, sta ycuiˈ Ndyosi quiˈya jiˈi̱ ya si xcutsaˈa̱ ya chaˈ nu cua nda ya loˈo ma̱; masi sca xca̱ nu ngutuˈu ca slo ycuiˈ Ndyosi laca nu chcuiˈ chaˈ cuiñi juaˈa̱, xcubeˈ Ni jiˈi̱, chaˈ tlyu tsa quiˈya laca biˈ.
\v 9 Juaˈa̱ ni naˈ jiˈi̱ ma̱ tya tsubiˈ la, loˈo la cuiˈ chaˈ laca nu ta naˈ loˈo ma̱ chaca quiyaˈ juani: Tlyu tsa chaˈ tiˈí tyacua jiˈi̱ ñati̱ si ta nguˈ xaˈ la chaˈ loˈo ma̱, ñiˈya̱ nu cuaˈni ma̱ chaˈ clyaá ma̱ jiˈi̱ nu cuxi, nu siˈi la cuiˈ chaˈ nu cua ndyuna ma̱ tya clyo.
\p
\v 10 Loˈo nacui̱ naˈ juaˈa̱, siˈi chaˈ ndyuˈni cña tsa tiˈ naˈ chaˈ caja ñati̱ ˈna nu cuaˈni chi̱ loo naˈ. Tsa biˈ ti chaˈ tsoˈo ntiˈ naˈ, si ycuiˈ Ndyosi cuaˈni chi̱ Ni loo naˈ; siˈi na cua ntiˈ naˈ chaˈ tsoˈo ti chcuiˈ ñati̱ jnaˈ. Ngaˈaa caca cuaˈni naˈ cña jiˈi̱ Cristo, si xcuiˈ chaˈ cuaˈni tyaˈa naˈ loˈo ñati̱ ntsuˈu tyiquee naˈ.
\s Ñiˈya̱ ngua chaˈ ngujui cña jiˈi̱ Pablo
\p
\v 11 Cua ntiˈ naˈ chaˈ caca cuayáˈ tsoˈo tiˈ ma̱ chaˈ biˈ, chaˈ siˈi sca chaˈ nu nguaˈya hique ti ñati̱ laca chaˈ nu cua nda naˈ loˈo ma̱; chaˈ jiˈi̱ Jesús laca biˈ, chaˈ nu nchcuiˈ ñiˈya̱ taca clyaá ma̱ jiˈi̱ nu cuxi.
\v 12 Siˈi ñati̱ laca nu nda chaˈ biˈ loˈo naˈ tya clyo, ni sca ñati̱ chalyuu ná nguluˈu chaˈ biˈ ˈna; ycuiˈ Jesucristo nguluˈu loo yu ˈna, ycuiˈ biˈ laca nu cua nda chaˈ biˈ loˈo naˈ liˈ.
\p
\v 13 Cua jlo tiˈ ma̱ ñiˈya̱ nu nguaˈni naˈ nde chalyuu tya saˈni la, ñiˈya̱ ndaquiyaˈ tsa naˈ jiˈi̱ lcaa cña tacati nu nduˈni nguˈ judío tyaˈa ya. Cua jlo tiˈ ma̱ chaˈ tiˈí tsa nguxcubeˈ naˈ jiˈi̱ lcaa ñati̱ nu ntsuˈu chaˈ jiˈi̱ loˈo Jesucristo nu ngua liˈ; ngua tiˈ naˈ cuaˈni tye naˈ jiˈi̱ ñati̱ biˈ tsiyaˈ ti.
\v 14 Lye la nguaˈni naˈ lcaa cña tacati nu nduˈni nguˈ judío tyaˈa ya nu loˈo nduˈni tlyu ya jiˈi̱ ycuiˈ Ndyosi. Xaˈ nguˈ quichi̱ tyi naˈ nu tyaˈa stuˈba ti naˈ loˈo, ná stuˈba nguaˈni nguˈ ñiˈya̱ nu nguaˈni naˈ; lye la ndaquiyaˈ naˈ jiˈi̱ lcaa lo chaˈ nu ntsuˈu jiˈi̱ ya, nu cua nda jyoˈo cusuˈ loˈo nguˈ judío tyaˈa ya tya saˈni la.
\v 15 Pana yala la nguaˈni ycuiˈ Ndyosi; masi bilya cala naˈ cua ngusubi Ni ˈna chaˈ caca naˈ ñati̱ jiˈi̱ Ni, xquiˈya chaˈ juaˈa̱ ngua tiˈ ycuiˈ Ni; na cua ngusubi Ni ˈna xquiˈya chaˈ ntsuˈu tsa tyiquee Ni ñaˈa̱ Ni ˈna. 
\v 16-17 Loˈo juaˈa̱ nguaˈni Ni chaˈ ndyuloo naˈ jiˈi̱ Jesús, nu sca ti Sñiˈ ycuiˈ Ni, chaˈ liˈ nchca ˈna ta naˈ chaˈ jiˈi̱ Ni loˈo lcaa cuˈma̱, ñati̱ nu ndiˈi̱ xaˈ tsuˈ. Liˈ ndachaˈ naˈ jiˈi̱ lcaa ma̱ chaˈ xquiˈya Jesús taca clyaá ma̱ jiˈi̱ chaˈ cuxi nu ntsuˈu jiˈi̱ ma̱. Nu loˈo ngusñi ca ti naˈ chaˈ biˈ, liˈ hora ti nduˈu naˈ ngutaˈa̱ naˈ nde loyuu su naa Arabia; ca biˈ ngutiˈi̱ naˈ ycuiˈ ti naˈ. Ná ngutaˈa̱ naˈ ndyaana naˈ sca cui̱i̱ nu ta sca ñati̱ loˈo naˈ; la cuiˈ ti juaˈa̱ ná ngutaˈa̱ naˈ nde quichi̱ Jerusalén chaˈ chcuiˈ naˈ loˈo nguˈ tyaˈa ndyuˈni naˈ cña nu ndiˈi̱ nde jua, masi cua nda nguˈ biˈ chaˈ jiˈi̱ Jesús loˈo ñati̱ clyo la, nu loˈo tya lyiji cuna naˈ chaˈ biˈ. Pana ngutaˈa̱ naˈ nde Arabia, loˈo tiyaˈ la liˈ nguxtyu̱u̱ naˈ ngutaˈa̱ naˈ nde quichi̱ Damasco.
\p
\v 18 Ngaˈaa ndyaˈa naˈ nde Jerusalén liˈ; pana ca loˈo nduˈu scua sna yija̱, liˈ ngutaˈa̱ naˈ nde jua. Loˈo liˈ ndyuloo naˈ jiˈi̱ Pedro, ngutiˈi̱ naˈ tiˈñu tsa̱ loˈo yu liˈ.
\v 19 Ná naˈa̱ naˈ jiˈi̱ xaˈ tyaˈa nguˈ nu ngua tsaˈa̱ jiˈi̱ Cristo tya clyo ca biˈ; sca ti yu Jacobo tyaˈa Jesús nu Xuˈna na, biˈ nu cua naˈa̱ naˈ jiˈi̱.
\v 20 Chacuayáˈ jiˈi̱ ycuiˈ Ndyosi, liñi tsa chaˈ nu nscua naˈ lo quityi re; ni sca chaˈ cuiñi ná nscua naˈ tsiyaˈ ti re.
\p
\v 21 Tiyaˈ la liˈ ngutaˈa̱ naˈ nde loyuu su cuentya Siria, juaˈa̱ nde loyuu su cuentya Cilicia.
\v 22 Pana nu xaˈ la taju ñati̱ tyaˈa ngusñi na chaˈ jiˈi̱ Jesucristo nu ndiˈi̱ quichi̱ su cuentya Judea, tya lyiji tyuloo nguˈ biˈ ˈna nu ngua liˈ.
\v 23 Pana cua ndyuna nguˈ chaˈ ˈna loˈo nchcuiˈ ñati̱ ˈna ndiˈya̱: “Nu ñati̱ nu ngua tiˈ cuaˈni tye jiˈna biˈ, juani cua nguxcutsaˈa̱ Ni cresiya jiˈi̱ yu, chaˈ cua ntsuˈu chaˈ jiˈi̱ yu loˈo Jesús”, nacui̱ nguˈ jiˈi̱ tyaˈa nguˈ. “Juani ndyaˈa̱ yu nda yu chaˈ loˈo xaˈ la ñati̱, chaˈ loˈo ñati̱ biˈ caca xñi nguˈ chaˈ jiˈi̱ Jesús”, nacui̱ nguˈ.
\v 24 Loˈo liˈ nguxana nguaˈni tlyu nguˈ jiˈi̱ ycuiˈ Ndyosi xquiˈya naˈ.
\c 2
\s Nu xaˈ la tyaˈa ñati̱ nde Jerusalén ntucuá nguˈ chaˈ nu nchcuiˈ Pablo
\p
\v 1 Cua ndyaˈa tii jlyacua yija̱, liˈ xaˈ ndyaˈa̱ nde Jerusalén chaca quiyaˈ; loˈo Bernabé ndyaˈa̱, loˈo juaˈa̱ ndyaa loˈo ya jiˈi̱ Tito.
\v 2 Ndyaa ya Jerusalén, xquiˈya chaˈ cua nguaˈni ycuiˈ Ndyosi chaˈ nguaˈya sca chaˈ hique naˈ chaˈ tyaa ya; biˈ chaˈ loˈo cua ndyalaa ya quichi̱ biˈ, liˈ ndyaˈa̱ ca su ntucua nguˈ ycuiˈ ti nguˈ, nchcuiˈ naˈ loˈo nguˈ nu laca loo la jiˈi̱ taju tyaˈa ñati̱ jiˈi̱ Cristo quichi̱ biˈ. Liˈ ndachaˈ naˈ jiˈi̱ nguˈ biˈ, nchcuiˈ naˈ ni chaˈ nu nda naˈ loˈo nguˈ xaˈ tsuˈ cuentya jiˈi̱ Cristo, chaˈ nguaˈni lyaá Cristo jiˈna jiˈi̱ nu cuxi. Juaˈa̱ nchcuiˈ naˈ loˈo nguˈ biˈ, xquiˈya chaˈ ná ntiˈ naˈ chaˈ culacua cuxi tiˈ nguˈ biˈ ñaˈa̱ nguˈ jnaˈ; ná ntiˈ naˈ chaˈ chcuiˈ nguˈ chaˈ ná tsoˈo laca chaˈ nu nda naˈ loˈo cuˈma̱ nguˈ xaˈ tsuˈ tya tsubiˈ la, masi chcuiˈ nguˈ chaˈ ná tsoˈo nduˈni naˈ juani.
\v 3 Loˈo juaˈa̱ yu Tito tyaˈa ndyaˈa̱ naˈ ni, ná nchcuiˈ nguˈ loˈo yu chaˈ siˈyu quiji̱ yu chaˈ culacua̱ yu ñiˈya̱ nduˈni nguˈ judío, masi nguˈ xaˈ tsuˈ laca yu. 
\v 4 Pana ngulaa xi xaˈ la ñati̱ slo ya liˈ, nguˈ nu cuiñi ti nchcuiˈ chaˈ ntsuˈu chaˈ jiˈi̱ nguˈ loˈo Cristo; na nduˈni ti nguˈ chaˈ tyaˈa na laca nguˈ biˈ. Cuaana ti ngutiˈi̱ nguˈ biˈ laja lcaa tyaˈa na chaˈ ñaˈa̱ cuayáˈ nguˈ biˈ jiˈi̱ ya, si culacua̱ nguˈ nu ndyaˈa̱ loˈo ya, si ná culacua̱ nguˈ. Ngua tiˈ nguˈ biˈ tacu̱ˈ chaˈ tsoˈo jiˈi̱ Jesús loˈo na, chaˈ ná ndiya tiˈ nguˈ chaˈ tsoˈo ndiˈi̱ tyiquee na chalyuu xquiˈya Jesús; ngua tiˈ nguˈ biˈ tatsaa nguˈ jiˈna chaˈ cuaˈni na lcaa lo cña nu ngulo jyoˈo cusuˈ jiˈi̱ nguˈ judío tyaˈa ya.
\v 5 Pana ná ndaquiyaˈ ya jiˈi̱ chaˈ nu nchcuiˈ nguˈ biˈ tsiyaˈ ti. Ngua tiˈ ya chaˈ ná chcunaˈ tsiyaˈ ti ni sca chaˈ liñi nu cua nda Cristo loˈo na, nu loˈo cua nguaˈni lyaá yu jiˈna; ngua tiˈ ya chaˈ tyanu tsoˈo lcaa chaˈ biˈ neˈ cresiya jiˈi̱ ma̱.
\p
\v 6 Ná ndube tiˈ naˈ masi nacui̱ nguˈ chaˈ tlyu tsa ñati̱ laca nu nguˈ nu laca loo jiˈna biˈ; jlo tiˈ naˈ chaˈ sca ti cuayáˈ laca lcaa na cuentya jiˈi̱ ycuiˈ Ndyosi. Pana masi loo laca nguˈ biˈ, ná ngulo nguˈ biˈ cña jnaˈ chaˈ culuˈu naˈ xaˈ la chaˈ jiˈi̱ cuˈma̱ nguˈ xaˈ tsuˈ. 
\v 7 Ndiˈya̱ ngua: ngutucuá nguˈ biˈ jiˈi̱ chaˈ nu nchcuiˈ naˈ loˈo nguˈ; cua ngüiñi chaˈ jiˈi̱ nguˈ biˈ loˈo naˈ liˈ; cua ngua cuayáˈ tiˈ nguˈ chaˈ cua nda ycuiˈ Ndyosi cña ˈna chaˈ tsaˈa̱ ta naˈ chaˈ jiˈi̱ Ni loˈo cuˈma̱ nguˈ xaˈ tsuˈ, ñiˈya̱ taca clyaá ma̱ jiˈi̱ nu cuxi. Loˈo juaˈa̱ nacui̱ nguˈ chaˈ cua nda Ni la cuiˈ cña jiˈi̱ nu Pedro biˈ, chaˈ chcuiˈ yu chaˈ tsoˈo biˈ loˈo nguˈ judío.
\v 8 La cuiˈ ycuiˈ Ndyosi nu nda jiˈi̱ Pedro ndyaa nclyuˈu yu chaˈ jiˈi̱ Ni jiˈi̱ nguˈ judío, la cuiˈ ycuiˈ Ndyosi biˈ laca nu cua nda Ni ˈna ndyaˈa naˈ nclyuˈu naˈ chaˈ tsoˈo biˈ jiˈi̱ nguˈ xaˈ tsuˈ.
\p
\v 9 Biˈ chaˈ ngutucuá nguˈ cña ˈna, nu Jacobo loˈo Pedro loˈo Juan biˈ, la cuiˈ nguˈ nu laca loo jiˈi̱ nguˈ tyaˈa ngusñi na chaˈ jiˈi̱ Cristo. Stuˈba ti nchcuiˈ nguˈ biˈ, chaˈ tsoˈo tsa nguaˈni ycuiˈ Ndyosi loˈo naˈ nu loˈo nda Ni cña biˈ ˈna. Liˈ ngusñi yaˈ tyaˈa ya loˈo nguˈ biˈ, naˈ loˈo Bernabé, chaˈ caca cuayáˈ tiˈ ya chaˈ tsoˈo ti ntiˈ nguˈ ñaˈa̱ nguˈ jiˈi̱ ya, chaˈ stuˈba ntsuˈu chaˈ jiˈi̱ nguˈ loˈo ya, chaˈ tya tsaa la ya quichi̱ tyi nguˈ xaˈ tsuˈ. Tyanu ycuiˈ nguˈ biˈ ca su ndiˈi̱ tyaˈa ya, nu nguˈ judío biˈ liˈ.
\v 10 Tsa biˈ ti chaˈ nchcuiˈ nguˈ loˈo ya, nu ngüijña nguˈ jiˈi̱ ya chaˈ lcaa tyempo tyiˈu tiˈ na na laca nu lyiji jiˈi̱ nu nguˈ tiˈi tyaˈa na nu ndyanu nde Judea. Biˈ laca nu ndyuˈni cña tiˈ naˈ chaˈ cuaˈni naˈ. 
\s Lye xi nchcuiˈ Pablo loˈo Pedro nde quichi̱ Antioquía 
\p
\v 11 Loˈo liˈ ndyalaa Pedro nde quichi̱ Antioquía, ca su ndiˈi̱ naˈ. Tiyaˈ la liˈ ndyaˈa̱ naˈ slo yu, nguaˈa naˈ jiˈi̱ yu xquiˈya chaˈ cua ntsuˈu sca chaˈ cuxi nu ndyuˈni yu.
\v 12 Ndiˈya̱ ngua chaˈ biˈ: Nu loˈo ndyalaa ca ti yu, ná ngua tyujuˈu tiˈ yu; ndyacu yu loˈo nguˈ tyaˈa na ca biˈ, masi nguˈ xaˈ tsuˈ laca nguˈ. Pana nu loˈo ndyalaa xi xaˈ la tyaˈa nguˈ judío nu nda Jacobo jiˈi̱ lijya̱, liˈ ngutaˈa̱chu̱ˈ yu; ngaˈaa ntajaˈa̱ cacu yu loˈo nguˈ xaˈ tsuˈ biˈ liˈ. Cua ndyutsi̱i̱ yu si ñaˈa̱ nguˈ judío tyaˈa yu jiˈi̱ yu chaˈ ndyacu yu loˈo nguˈ xaˈ tsuˈ biˈ, chaˈ ná ntsuˈu chacuayáˈ jiˈi̱ nguˈ judío chaˈ cacu nguˈ loˈo nguˈ xaˈ tsuˈ, xquiˈya chaˈ ná lubii nguˈ xaˈ tsuˈ tsiyaˈ ti ngua tiˈ nguˈ judío. 
\v 13 Loˈo liˈ la cuiˈ juaˈa̱ nguaˈni xaˈ la nguˈ judío tyaˈa ntsuˈu chaˈ jiˈna loˈo Cristo, sca ti cuayáˈ siyaˈ tyiquee nguˈ loˈo Pedro; loˈo ycuiˈ Bernabé ngua tiˈ yu cuaˈni yu ñiˈya̱ nu nguaˈni nguˈ biˈ, chaˈ siyaˈ tsa tyiquee nguˈ.
\v 14 Pana nu loˈo ngua cuayáˈ tiˈ naˈ chaˈ ná ndyuˈni nguˈ ñiˈya̱ nu ndyuˈu chaˈ tsoˈo nu nguluˈu Cristo jiˈna chaˈ clyaá na jiˈi̱ nu cuxi, liˈ nchcuiˈ naˈ loˈo Pedro slo lcaa nguˈ nu ngusñi chaˈ jiˈi̱ Cristo quichi̱ biˈ. Ndiˈya̱ ni naˈ jiˈi̱ yu liˈ: “Nguˈ judío laca nuˈu̱”, nacui̱ naˈ jiˈi̱ Pedro biˈ. “Tya loˈo ndyalaa nuˈu̱ ca nde, cua nguaˈni nuˈu̱ ñiˈya̱ nu nduˈni nguˈ xaˈ tsuˈ re, chaˈ tyaˈa na laca nguˈ cuentya jiˈi̱ Cristo; ná nguaˈni nuˈu̱ ñiˈya̱ nu nduˈni nguˈ judío tyaˈa quichi̱ tyi na. Biˈ chaˈ lacua, ná tsoˈo si juani ntiˈ nuˈu̱ chaˈ tatsaa nuˈu̱ jiˈi̱ nguˈ xaˈ tsuˈ re, chaˈ cuaˈni nguˈ ñiˈya̱ nu nduˈni nguˈ judío.” Juaˈa̱ nacui̱ naˈ jiˈi̱ yu.
\s Stuˈba chaˈ laca jiˈi̱ nguˈ judío loˈo lcaa ñati̱ chalyuu 
\p
\v 15 Nu cuare ni, nguˈ judío laca ya tya loˈo ngula ya chalyuu nu ndaquiyaˈ jiˈi̱ lcaa chaˈ nu nda ycuiˈ Ndyosi loˈo ya; siˈi na ndaquiyaˈ ya jiˈi̱ cua ñaˈa̱ ca chaˈ cuxi ñiˈya̱ nduˈni nguˈ xaˈ tsuˈ.
\v 16 Pana jlo tiˈ ya chaˈ ná taca ca tsoˈo cresiya jiˈi̱ ya cuentya jiˈi̱ ycuiˈ Ndyosi, masi nduˈni ti ya cua ñaˈa̱ ca cña nu nda jyoˈo Moisés chaˈ cuaˈni ya; sca ti si jlya tiˈ ya jiˈi̱ cña nu nguaˈni Jesucristo cuentya jiˈna, liˈ taca ca tsoˈo cresiya jiˈi̱ ya. Biˈ chaˈ loˈo cuare cua ngusñi ya chaˈ jiˈi̱ Jesucristo, chaˈ taca ca tsoˈo cresiya jiˈi̱ ya cuentya jiˈi̱ ycuiˈ Ni, chaˈ nu jlya ti tiˈ ya jiˈi̱ Jesús, ngaˈaa siˈi xquiˈya cña nu ndyuˈni ya nu nda jyoˈo Moisés jiˈi̱ ya. Ni sca na ná taca jiˈna ca tsoˈo cresiya jiˈna cuentya jiˈi̱ ycuiˈ Ndyosi xquiˈya chaˈ ndaquiyaˈ ti na sca chaˈ nu nda jyoˈo cusuˈ loˈo na.
\p
\v 17 Tsoˈo lacua. Masi nguˈ judío laca ya, cua jlo tiˈ ya chaˈ xquiˈya cña nu cua nguaˈni Cristo cuentya jiˈna, biˈ chaˈ taca caca lubii cresiya jiˈi̱ ya cuentya jiˈi̱ ycuiˈ Ndyosi. La cuiˈ ti chaˈ, ngaˈa̱ chaˈ chcuiˈ ya jiˈi̱ ycuiˈ ca ya chaˈ loˈo lcaa nguˈ judío tyaˈa ya ntsuˈu quiˈya jiˈi̱ ya, ñiˈya̱ loˈo nacui̱ ya chaˈ ntsuˈu quiˈya jiˈi̱ nguˈ xaˈ tsuˈ. Pana siˈi Cristo laca nu nguaˈni chaˈ laca ya ñati̱ cuxi.
\v 18 Biˈ chaˈ ngaˈaa ndaquiyaˈ ya jiˈi̱ chaˈ cusuˈ nu jlya tsa tiˈ ya jiˈi̱ nquichaˈ; loˈo juani si xaˈ taquiyaˈ ya jiˈi̱ chaˈ cusuˈ nu ntsuˈu jiˈi̱ ya, liˈ ntsuˈu quiˈya jiˈi̱ ya loˈo ycuiˈ Ndyosi chaca quiyaˈ xquiˈya chaˈ siˈi na tyucui tyiquee ya ngusñi ya chaˈ jiˈi̱ Jesucristo.
\v 19 Loˈo naˈ ni, ná nchca cuaˈni naˈ lcaa chaˈ cusuˈ biˈ, biˈ chaˈ cua ndye chaˈ jnaˈ loˈo chaˈ biˈ; juani xcuiˈ ndiˈi̱ naˈ chalyuu chaˈ cuaˈni naˈ lcaa ñaˈa̱ cña nu ntiˈ ycuiˈ Ndyosi chaˈ cuaˈni naˈ.
\v 20 Cuentya jiˈi̱ chaˈ cusuˈ biˈ laca naˈ ñiˈya̱ laca si cua ngujuii naˈ, ñiˈya̱ laca si stuˈba ti ngaˈa̱ naˈ lo crusi loˈo Jesús; juani ngaˈaa siˈi ycuiˈ ca ti naˈ laca naˈ loo neˈ cresiya ˈna, chaˈ Cristo laca nu laca loo neˈ cresiya ˈna juani. Ndiˈi̱ tsoˈo ti naˈ chalyuu juani sca ti xquiˈya chaˈ jlya tiˈ naˈ jiˈi̱ cña nu cua nguaˈni ycuiˈ Jesús, nu sca ti Sñiˈ ycuiˈ Ndyosi; biˈ laca nu ntsuˈu tsa tyiquee ñaˈa̱ jnaˈ, biˈ laca nu cua nda chacuayáˈ jiˈi̱ nguˈ chaˈ cujuii nguˈ jiˈi̱ ycuiˈ yu cuentya jnaˈ.
\v 21 Siˈi chaˈ ná ndube tiˈ naˈ jiˈi̱ lcaa chaˈ tsoˈo nu nguaˈni ycuiˈ Ndyosi loˈo nguˈ judío tyaˈa ya; laca chaˈ ndube tsa tiˈ naˈ chaˈ ná taca ca tsoˈo cresiya jiˈna cuentya jiˈi̱ ycuiˈ Ndyosi, masi tsoˈo tsa ndaquiyaˈ na jiˈi̱ cña nu nclyo chaˈ cusuˈ biˈ jiˈna. Ndube tsa tiˈ naˈ chaˈ ná ngujuii Jesús juaˈa̱ ti; ntsuˈu cña nu nguaˈni yu loˈo ngujuii yu lo crusi biˈ, na cua nguaˈni tsoˈo yu jiˈi̱ cresiya jiˈna cuentya jiˈi̱ ycuiˈ Ndyosi nu ngua liˈ.
\c 3
\s Sca ti loˈo xñi na chaˈ jiˈi̱ Cristo, liˈ caca quiñi tsoˈo chaˈ jiˈna loˈo ycuiˈ Ndyosi
\p
\v 1 Na tonto tsa ma̱, cuˈma̱ nguˈ gálatas, chaˈ nduna ma̱ chaˈ nu nda nu nguˈ cuiñi biˈ; laca ma̱ ñiˈya̱ si ntsuˈu nu nguaˈni cuchaˈa̱ jiˈi̱ ma̱. Biˈ chaˈ juani ngaˈaa ntiˈ ma̱ xñi la ma̱ chaˈ liñi nu cua nda Cristo loˈo na. Pana loˈo nda ya chaˈ jiˈi̱ Cristo loˈo ma̱ tya clyo, liˈ nguluˈu tsa ya jiˈi̱ ma̱ ñiˈya̱ ngua loˈo ngujuii Jesucristo lo crusi xquiˈya na; juaˈa̱ nguluˈu ya jiˈi̱ ma̱ ñaˈa̱ cuayáˈ nu ngua cuayáˈ tsoˈo tiˈ ma̱ chaˈ biˈ.
\v 2 Xacui̱ ma̱ chaˈ ˈna lacua: ¿Ha cua ndyanu Xtyiˈi ycuiˈ Ndyosi neˈ cresiya jiˈi̱ ma̱ juani? ¿Ñiˈya̱ ngua jiˈi̱ ma̱ chaˈ ngujui Xtyiˈi ycuiˈ Ndyosi jiˈi̱ ma̱ lacua? ¿Ha ngujui Xtyiˈi Ni jiˈi̱ ma̱ xquiˈya chaˈ cua nguaˈni ma̱ cña nu nscua lo chaˈ cusuˈ biˈ chaˈ cuaˈni ma̱? Siˈi. Cua jlo tiˈ ma̱ chaˈ ngujui Xtyiˈi ycuiˈ Ni jiˈi̱ ma̱ loˈo ngusñi ma̱ chaˈ liñi nu cua nda ya loˈo ma̱, chaˈ jiˈi̱ ycuiˈ Cristo.
\v 3 ¿Ni chaˈ laca tonto tsa nclyacua tiˈ ma̱ juani? Xquiˈya cña nu ndyuˈni Xtyiˈi ycuiˈ Ndyosi loˈo ma̱, biˈ chaˈ nguxana ca ti ma̱ chaˈ ntsuˈu chaˈ jiˈi̱ ma̱ loˈo ycuiˈ Ndyosi nquichaˈ; pana nu juani ni, xquiˈya chaˈ lye tsa cuaˈni cña tiˈ ycuiˈ ca ma̱, juaˈa̱ ntiˈ ma̱ chaˈ caca jiˈi̱ ycuiˈ ca ma̱ quiñi tsoˈo chaˈ jiˈi̱ ma̱ loˈo ycuiˈ Ni.
\v 4 Masi nguaˈni Ni quiñaˈa̱ chaˈ tlyu ca slo ma̱ tya tsubiˈ la, ntsuˈu quiyaˈ nclyacua tiˈ naˈ chaˈ ná ngua tsoˈo cresiya jiˈi̱ ma̱ tsiyaˈ ti, nu loˈo ñaˈa̱ naˈ ñiˈya̱ nu ndyuˈni ma̱. Pana jlo tiˈ naˈ chaˈ ngua tsoˈo la xi cresiya jiˈi̱ ma̱ xquiˈya chaˈ tlyu biˈ.
\v 5 Na cua nda ycuiˈ Ndyosi Xtyiˈi ycuiˈ Ni chaˈ tyanu neˈ cresiya jiˈi̱ ma̱, loˈo xquiˈya nu biˈ cua ngujui ñiˈya̱ caca tyu̱u̱ lo chaˈ tlyu nu ndyuˈni ycuiˈ Ndyosi nde su ndiˈi̱ cuˈma̱. Loˈo nduˈni Ni juaˈa̱, siˈi xquiˈya chaˈ ndaquiyaˈ ma̱ jiˈi̱ chaˈ cusuˈ biˈ; pana nduˈni Ni juaˈa̱, xquiˈya chaˈ jlya tiˈ ma̱ loˈo ndyuna ma̱ chaˈ tsoˈo jiˈi̱ cña nu cua nguaˈni Jesús cuentya jiˈna. 
\p
\v 6 Nu jyoˈo cusuˈ jiˈi̱ ya, nu Abraham biˈ ni, cua jlya tsa tiˈ nu cusuˈ biˈ lcaa chaˈ nu cua nda ycuiˈ Ndyosi loˈo yu. Xquiˈya chaˈ cua jlya tiˈ yu chaˈ biˈ, liˈ ntucuá Ni chaˈ jiˈi̱ yu ñiˈya̱ si ngua yu sca ñati̱ nu nduˈni xcuiˈ chaˈ tsoˈo.
\v 7 Loˈo juaˈa̱ ngaˈa̱ chaˈ ca cuayáˈ tiˈ ma̱ chaˈ cua ñaˈa̱ ca ñati̱ nu ngusñi chaˈ jiˈi̱ Cristo, chañi chaˈ laca ñati̱ biˈ ñiˈya laca nguˈ judío, chaˈ ndyuˈni nguˈ biˈ la cuiˈ ñiˈya̱ nu nguaˈni jyoˈo Abraham, masi tyempo juani.
\v 8 Cua nscua lo quityi cusuˈ chaˈ ndiˈya̱ nchcuiˈ ycuiˈ Ndyosi loˈo nu Abraham biˈ nu ngua saˈni: “Caca tsoˈo cresiya jiˈi̱ lcaa ñati̱ nu ndiˈi̱ xaˈ tsuˈ xquiˈya nuˈu̱”, nacui̱ Ni jiˈi̱ Abraham. Ycuiˈ Ndyosi laca nu cua nda chaˈ biˈ loˈo jyoˈo biˈ yala la, chaˈ juaˈa̱ loˈo cuˈma̱ nguˈ xaˈ tsuˈ caca tsoˈo cresiya jiˈi̱ ma̱ cuentya jiˈi̱ ycuiˈ Ndyosi nde loo la, nu loˈo xñi ma̱ chaˈ jiˈi̱ ycuiˈ Ni.
\v 9 Tsoˈo ti ntiˈ Ni ñaˈa̱ Ni jiˈi̱ Abraham nu ngua saˈni, xquiˈya chaˈ ngusñi nu cusuˈ biˈ chaˈ nu nchcuiˈ ycuiˈ Ni loˈo yu; biˈ chaˈ caca cuayáˈ tiˈ na chaˈ tsoˈo ntiˈ Ni ñaˈa̱ Ni jiˈna, cua ñaˈa̱ ca na nu xñi na chaˈ jiˈi̱ Cristo.
\p
\v 10 Pana cua ñaˈa̱ ca ñati̱ nu tsa biˈ ti cña ntiˈ chaˈ taquiyaˈ jiˈi̱ chaˈ cusuˈ nu nguscua jyoˈo Moisés, tyanu yabeˈ hichu̱ˈ ñati̱ biˈ, chaˈ ndiˈya̱ nchcuiˈ quityi jiˈi̱ ycuiˈ Ndyosi: “Tyanu yabeˈ hichu̱ˈ lcaa ñati̱ si ná taquiyaˈ nguˈ jiˈi̱ lcaa ca chaˈ nu nscua lo quityi biˈ”.
\v 11 Biˈ chaˈ caca jlo tiˈ na chaˈ ná nchca ca lubii cresiya jiˈna cuentya jiˈi̱ ycuiˈ Ndyosi loˈo ndaquiyaˈ ti na jiˈi̱ cña nu nda chaˈ cusuˈ biˈ, chaˈ ná nchca tyiˈu tiˈ na lcaa ca chaˈ biˈ. Chaca chaˈ nchcuiˈ quityi biˈ: “Caca tsoˈo cresiya jiˈna cuentya jiˈi̱ ycuiˈ Ndyosi xquiˈya chaˈ ngusñi na chaˈ jiˈi̱ ycuiˈ Ni; liˈ taca caja sca chalyuu nu ná ngaˈa̱ chaˈ tye tsiyaˈ ti jiˈna”.
\v 12 Pana loˈo xcuiˈ ndaquiyaˈ na jiˈi̱ chaˈ cusuˈ biˈ, liˈ ná ntsuˈu sca chaˈ jiˈi̱ Cristo nu ngaˈa̱ chaˈ xñi na hasta ca neˈ cresiya jiˈna, chaˈ ndiˈya̱ nchcuiˈ chaˈ cusuˈ biˈ loˈo na: “Sca ti si cuaˈni na lcaa ca cña nu culo ycuiˈ Ndyosi jiˈna, caca tyiˈi̱ tsoˈo ti na chalyuu liˈ”, nacui̱ quityi biˈ.
\p
\v 13 Cua ngulo Cristo jiˈna jiˈi̱ yabeˈ nu ngusta ycuiˈ Ndyosi hichu̱ˈ na xquiˈya chaˈ ná ndaquiyaˈ na jiˈi̱ lcaa chaˈ tsiyaˈ ti nu nda Ni loˈo na; yabeˈ nu ntsuˈu jiˈna biˈ cua ndyanu hichu̱ˈ ycuiˈ Jesús liˈ. Ndiˈya̱ nscua chaˈ lo quityi jiˈi̱ ycuiˈ Ndyosi: “Si tlyu tsa yabeˈ ntsuˈu jiˈi̱ sca ñati̱, ntsuˈu chaˈ cujuiˈi̱ caˈa̱ nguˈ jiˈi̱ ñaˈa̱ luˈú ti lo sca yaca ndu̱ chaˈ cajaa yu”.
\v 14 Juaˈa̱ ngua chaˈ loˈo nguˈ xaˈ tsuˈ caja chaˈ tsoˈo jiˈi̱ nguˈ xquiˈya Jesucristo, chaˈ tsoˈo nu cua ngüiñi jiˈi̱ ycuiˈ Ndyosi loˈo nu jyoˈo Abraham biˈ nu ngua saˈni. Liˈ caca jiˈi̱ nguˈ xaˈ tsuˈ ñiˈya̱ nu nchcuiˈ ycuiˈ Ndyosi loˈo Abraham, chaˈ caja Xtyiˈi ycuiˈ Ni jiˈi̱ lcaa na nu loˈo xñi na chaˈ jiˈi̱ Cristo.
\s Saˈni la cua ngüiñi chaˈ jiˈi̱ ycuiˈ Ndyosi loˈo Abraham 
\p
\v 15 Cuˈma̱ tyaˈa ntsuˈu chaˈ jiˈna loˈo Cristo, ta naˈ sca cui̱i̱ loˈo ma̱ juani cuentya jiˈi̱ sca ñati̱ nu ntiˈ quiñi sca chaˈ jiˈi̱ yu loˈo tyaˈa yu. Clyo culo nguˈ sca quityi. Loˈo cua ndye ngua stuˈba chaˈ biˈ jiˈi̱ nguˈ, liˈ ngaˈaa caca jiˈi̱ xaˈ ñati̱ tacu̱ˈ nguˈ jiˈi̱ chaˈ biˈ; ngaˈaa caca xcutsaˈa̱ la nguˈ chaˈ biˈ.
\v 16 Juaˈa̱ nguaˈni ycuiˈ Ndyosi loˈo nu Abraham biˈ; cua ngüiñi chaˈ jiˈi̱ Ni loˈo jyoˈo cusuˈ biˈ, juaˈa̱ loˈo sca ñati̱ nu tyuˈu jiˈi̱ jyoˈo cusuˈ biˈ tyempo nde loo la. Ná nacui̱ quityi jiˈi̱ ycuiˈ Ndyosi chaˈ quiñi chaˈ jiˈi̱ Ni loˈo tyu̱u̱ tyaˈa ñati̱ biˈ. “Na cua ngüiñi chaˈ jiˈi̱ ycuiˈ Ndyosi loˈo sca ti ñati̱ nu tyuˈu jiˈi̱ Abraham nde loo la”, nacui̱ quityi. Loˈo nu sca ti ñati̱ biˈ ni, Cristo laca biˈ.
\v 17 Ndiˈya̱ chaˈ ntiˈ naˈ chcuiˈ naˈ loˈo ma̱: Cua ngua stuˈba chaˈ jiˈi̱ ycuiˈ Ndyosi loˈo Abraham nu ngua liˈ; cua ndyaˈa jacua siyento ntucua calaa tyii yija̱ tya loˈo cua ngüiñi chaˈ jiˈi̱ ycuiˈ Ni loˈo nu cusuˈ biˈ, loˈo liˈ nda ycuiˈ Ndyosi chaˈ loˈo Moisés chaˈ culo yu cña jiˈi̱ nguˈ cuentya jiˈi̱ Ni. Biˈ chaˈ ná ngua jiˈi̱ chaˈ nu nda Moisés biˈ tacu̱ˈ lo chaˈ nu cua ngüiñi jiˈi̱ ycuiˈ Ndyosi loˈo Abraham nu ngua saˈni la, chaˈ ná taca cuaˈa nguˈ jiˈi̱ chaˈ biˈ tsiyaˈ ti.
\v 18 Si ntsuˈu chaˈ taquiyaˈ na jiˈi̱ lcaa cña nu ngulo Moisés jiˈna, chaˈ juaˈa̱ clyaá na jiˈi̱ nu cuxi, liˈ ngaˈaa ntiˈ chaˈ jlya tiˈ na chaˈ nu cua ngüiñi jiˈi̱ ycuiˈ Ndyosi loˈo na chaˈ cuaˈni lyaá Ni jiˈna. Pana chaˈ liñi laca chaˈ cua ngüiñi chaˈ jiˈi̱ ycuiˈ Ni loˈo Abraham, chaˈ cuaˈni Ni sca chaˈ xlyaˈbe loˈo na nu loˈo cuaˈni lyaá Ni jiˈna.
\p
\v 19 ¿Ni chaˈ laca ngulo ycuiˈ Ndyosi cña jiˈi̱ nu jyoˈo Moisés biˈ, chaˈ nguscua yu cña biˈ lo quityi cuentya jiˈi̱ Ni lacua? Tiyaˈ la ngua chaˈ nda Ni chaˈ biˈ loˈo Moisés, chaˈ caca cuayáˈ tiˈ na ñiˈya̱ nu nacui̱ ycuiˈ Ndyosi chaˈ laca scaa chaˈ cuxi. Pana xti ti tyempo ndalo chaˈ biˈ ñaˈa̱ cuayáˈ nu ndyalaa Cristo, la cuiˈ tyaˈa ñati̱ jiˈi̱ jyoˈo Abraham; na cua nchcuiˈ ycuiˈ Ndyosi chaˈ jiˈi̱ nu Cristo biˈ nu loˈo cua ngüiñi chaˈ jiˈi̱ ycuiˈ Ni loˈo jyoˈo cusuˈ Abraham biˈ tya clyo. Nu loˈo nda Ni chaˈ biˈ loˈo nu jyoˈo Moisés biˈ ni, loˈo xca̱ jiˈi̱ ycuiˈ Ni ndu̱ lo xlya caˈya biˈ cuentya jiˈi̱ ycuiˈ Ndyosi, chaˈ chcuiˈ loˈo nu cusuˈ Moisés biˈ. Claˈbe la biˈ ngutu̱ jyoˈo Moisés biˈ chaˈ chcuiˈ yu loˈo ñati̱, chaˈ tuˈba jiˈi̱ ycuiˈ Ndyosi ngua nu cusuˈ biˈ.
\v 20 Pana juani ná nduˈni chaˈ caja sca ñati̱ chalyuu nu caca tuˈba jiˈi̱ ycuiˈ Ndyosi chaˈ chcuiˈ Ni loˈo na. Cua ngüiñi chaˈ jiˈi̱ Ni loˈo na nu ngua saˈni si jlya tiˈ na jiˈi̱ chaˈ biˈ, la cuiˈ chaˈ nu cua nguaˈni Jesús cuentya jiˈna juani.
\s Nde laca cña nu nguaˈni chaˈ cusuˈ biˈ
\p
\v 21 Tsoˈo si cuaˈni na cña nu nscua lo quityi cusuˈ chaˈ cuaˈni na lacua. Loˈo juaˈa̱ nduˈni tsa chaˈ xñi na lcaa chaˈ nu nda ycuiˈ Ndyosi loˈo ñati̱. Pana masi taquiyaˈ na jiˈi̱ lcaa chaˈ cusuˈ biˈ, ná taca caja chalyuu cucui biˈ jiˈna juaˈa̱ ti; ná taca ca tsoˈo cresiya jiˈna cuentya jiˈi̱ ycuiˈ Ni xquiˈya chaˈ ndyuˈni ti na lcaa cña nu nscua lo quityi cusuˈ biˈ chaˈ cuaˈni na; ná caca juaˈa̱ tsiyaˈ ti.
\v 22 Cua nchcuiˈ quityi jiˈi̱ ycuiˈ Ndyosi chaˈ nu cuxi laca loo la jiˈi̱ lcaa ñati̱ chalyuu, ñiˈya̱ si na cua laca na preso jiˈi̱. Si jlo tiˈ na chaˈ nu cuxi laca loo jiˈna, liˈ taca jiˈi̱ Ni cuaˈni lyaá Ni jiˈna; ta Ni chalyuu cucui jiˈna liˈ, nu loˈo xñi na chaˈ jiˈi̱ ycuiˈ Jesucristo. Biˈ laca nu chaˈ tsoˈo nu cua ngüiñi jiˈi̱ ycuiˈ Ni loˈo na.
\p
\v 23 Loˈo tya lyiji ca̱a̱ Jesucristo ni, tya lyiji caja ñiˈya̱ jlya tsoˈo tiˈ na chaˈ jiˈi̱ ycuiˈ Ni; biˈ chaˈ ngua chaˈ cusuˈ biˈ loo jiˈna, ñaˈa̱ cuayáˈ caca jlya tsoˈo tiˈ na jiˈi̱ Ni xquiˈya Cristo.
\v 24 Laca chaˈ cusuˈ biˈ loo jiˈna ñiˈya̱ ntiˈ si laca na sca nu sube; nguluˈu chaˈ cusuˈ biˈ xi chaˈ liñi jiˈna ñaˈa̱ cuayáˈ nu ñaa ycuiˈ Cristo. Pana juani cuaˈni Cristo chaˈ caca tsoˈo cresiya jiˈna cuentya jiˈi̱ ycuiˈ Ndyosi, ñiˈya̱ nu ntiˈ ycuiˈ Ni chaˈ caca na nu loˈo jlya tiˈ na jiˈi̱ nu Cristo biˈ.
\v 25 Loˈo juani taca jlya tsoˈo tiˈ na jiˈi̱ ycuiˈ Ndyosi xquiˈya Jesucristo, ngaˈaa siˈi chaˈ cusuˈ nu laca loo jiˈna.
\p
\v 26 Sñiˈ ycuiˈ Ndyosi laca lcaa cuˈma̱ juani loˈo ngusñi ma̱ chaˈ jiˈi̱ Jesucristo, xquiˈya chaˈ cua ntsuˈu chaˈ jiˈi̱ ma̱ loˈo Ni.
\v 27 Loˈo ngua stuˈba chaˈ jiˈna loˈo Ni, liˈ cua ntyucuatya nguˈ jiˈi̱ lcaa na chacuayáˈ jiˈi̱ Cristo, chaˈ juaˈa̱ cua ndyanu lcaa chaˈ jiˈi̱ Cristo neˈ cresiya jiˈna, ñiˈya̱ ntiˈ si cua laca chaˈ biˈ sca lateˈ nu quixi̱i̱ chu̱ˈ na.
\v 28 Nu loˈo cua ngua stuˈba chaˈ jiˈna loˈo Jesucristo, la cuiˈ tyempo biˈ ngua stuˈba chaˈ jiˈna loˈo tyaˈa ñati̱ na; biˈ chaˈ ngaˈaa chcuiˈ na chaˈ nguˈ judío laca ya, chaˈ nguˈ xaˈ tsuˈ laca ma̱; ngaˈaa chcuiˈ na chaˈ msu nu ngüiˈya ñati̱ laca ma̱, chaˈ ñati̱ nu ndiˈi̱ tsoˈo ti laca na; ngaˈaa chcuiˈ na chaˈ quiˈyu laca na, chaˈ cunaˈa̱ laca ma̱. Lcaa na, stuˈba chaˈ jiˈna loˈo tyaˈa na juani.
\v 29 Nu loˈo ngusñi na chaˈ jiˈi̱ ycuiˈ Cristo, liˈ la cuiˈ juaˈa̱ laca na ñati̱ nu ndyuˈu jiˈi̱ jyoˈo Abraham, masi tiyaˈ la ñaa na chalyuu. Su cua ndye, liˈ tyanu chaˈ jiˈna, lcaa ñaˈa̱ chaˈ nu cua ngüiñi jiˈi̱ ycuiˈ Ndyosi loˈo nu Abraham biˈ cua saˈni la chaˈ tyacua jiˈna. 
\c 4
\p
\v 1 Ndiˈya̱ chaˈ ntiˈ naˈ ta naˈ loˈo ma̱: Sca nu sube ni, masi nguxtyanu jyoˈo sti lcaa chaˈ tsoˈo jiˈi̱ loˈo ngujuii sti, chaˈ tya cuañiˈ nu sube biˈ, stuˈba ntiˈ loˈo msu nu ngüiˈya ti sti; na jiˈi̱ nu sube biˈ laca lcaa chaˈ tsoˈo biˈ, pana tya lyiji casuˈ yu.
\v 2 Ni jacuaˈ tyalaa tsa̱ nu caja chaˈ nu nguxtyanu jyoˈo sti nu sube biˈ jiˈi̱, xaˈ ñati̱ laca loo jiˈi̱ nu sube biˈ, xaˈ ñati̱ laca nu ndyiˈya loo cña jiˈi̱ nu sube biˈ.
\v 3 La cuiˈ juaˈa̱ laca jiˈna loˈo Jesús. Loˈo tya lyiji cuna na chaˈ jiˈi̱ Jesús, caca ñacui̱ na chaˈ tya sube na, xquiˈya chaˈ tya nduˈni na cña nu ndatsaa cua ñaˈa̱ ca joˈó jiˈna, ñiˈya̱ nu nduˈni ti xaˈ ñati̱.
\v 4 Pana loˈo cua ndyalaa tsa̱ nu nduˈu scua chaˈ nu ngüiñi jiˈi̱ Ni loˈo na, liˈ cua nda ycuiˈ Ndyosi jiˈi̱ Sñiˈ ycuiˈ ca Ni ñaa chalyuu; sñiˈ sca nu cunaˈa̱ nguˈ judío ngua nu Jesús biˈ, loˈo juaˈa̱ ndaquiyaˈ tsa yu jiˈi̱ lcaa chaˈ cusuˈ nu jlya tiˈ nguˈ judío.
\v 5 Juaˈa̱ ñaa Jesús nde chalyuu chaˈ cuaˈni lyaá yu jiˈna jiˈi̱ yabeˈ nu ntsuˈu jiˈna xquiˈya chaˈ cusuˈ biˈ. Loˈo juaˈa̱ ta Ni chacuayáˈ juani chaˈ cua cusuˈ la na, chaˈ tyanu chaˈ jiˈna ñiˈya̱ nu nscua chaˈ tyacua jiˈna, xquiˈya chaˈ laca na sñiˈ ycuiˈ Ni.
\p
\v 6 Biˈ chaˈ laca cua nda ycuiˈ Ndyosi Xtyiˈi ycuiˈ Ni nu tyanu neˈ cresiya jiˈi̱ ma̱, chaˈ culuˈu Ni jiˈi̱ ma̱ chaˈ cua laca ma̱ sñiˈ ycuiˈ Ni. Xtyiˈi ycuiˈ Ni nduˈni chaˈ taca chcuiˈ na loˈo ycuiˈ Ndyosi chañi ca: “¡Papá! ¡Sti naˈ!” ñacui̱ na.
\v 7 Ngaˈaa laca ma̱ ñiˈya̱ laca sca msu nu ngüiˈya ti ñati̱, na cua laca ma̱ sñiˈ ycuiˈ Ndyosi; biˈ chaˈ juani ta Ni lcaa chaˈ nu ndyanu chaˈ tyacua jiˈi̱ ma̱ chacuayáˈ jiˈi̱ Cristo, chaˈ laca ma̱ sñiˈ ycuiˈ Ni.
\s Ndube tsa tiˈ Pablo ñiˈya̱ nu nguñiloˈo nguˈ jiˈi̱ nguˈ gálatas
\p
\v 8 Saˈni la loˈo tya lyiji caca cuayáˈ tsoˈo tiˈ ma̱ chaˈ jiˈi̱ ycuiˈ Ndyosi, xaˈ la joˈó ndatsaa jiˈi̱ ma̱ chaˈ cuaˈni ma̱ cña jiˈi̱, joˈó nu siˈi joˈó nu chañi ca.
\v 9 Loˈo juani cua nslo ma̱ jiˈi̱ ycuiˈ Ndyosi; hasta tsoˈo la ñacui̱ na, cua ndyuloo ycuiˈ Ni jiˈi̱ ma̱. ¿Ni chaˈ laca ntiˈ ma̱ tyaˈa̱chu̱ˈ ma̱ jiˈi̱ chaˈ jiˈi̱ ycuiˈ Ndyosi lacua? Xaˈ cuaˈni ma̱ cña nu ndatsaa cua ñaˈa̱ ca joˈó nu cuxi ti biˈ jiˈi̱ ma̱ liˈ, joˈó nu ntsuˈu jiˈi̱ ñati̱ ti; pana ná ndyuˈu tsoˈo chaˈ biˈ tsiyaˈ ti, ná caca cuaˈni lyaá joˈó biˈ jiˈna.
\v 10 Loˈo juani caca tsoˈo cresiya jiˈi̱ ma̱ cuentya jiˈi̱ ycuiˈ Ndyosi si taquiyaˈ ma̱ jiˈi̱ tsa̱ tacati jiˈi̱ nguˈ judío, ntiˈ ma̱, masi taˈa nu ndacui snuˈ tsa̱, masi taˈa loˈo cuañiˈ coˈ, masi taˈa nu nduˈni nguˈ ndacui sca yija̱;
\v 11 biˈ chaˈ quiñaˈa̱ tsa chaˈ nclyacua tiˈ naˈ si ná nguaˈnijoˈo tsiyaˈ ti lcaa chaˈ nu nguluˈu naˈ jiˈi̱ ma̱, si xlyaˈbe ti nguluˈu naˈ chaˈ biˈ jiˈi̱ ma̱. 
\p
\v 12 Cuˈma̱ tyaˈa ntsuˈu chaˈ jiˈna loˈo Jesucristo, tyaˈna chcuiˈ naˈ loˈo ma̱ juani, chaˈ cua ntiˈ naˈ chaˈ caca ma̱ ñiˈya̱ nu laca naˈ tsiyaˈ ti. Ngaˈaa nchca tatsaa nguˈ ˈna juani loˈo chaˈ cusuˈ biˈ, masi nguˈ judío laca naˈ; stuˈba ti laca naˈ loˈo cuˈma̱ juani, chaˈ cua ngulaá naˈ jiˈi̱ nu chaˈ cusuˈ nu ndatsaa tsa ˈna. Tya loˈo ñaa naˈ ca slo ma̱ tya clyo, ná sca chaˈ cuxi nguaˈni ma̱ loˈo naˈ.
\v 13 Cua jlo tiˈ ma̱ ñiˈya̱ ngua ˈna nu loˈo nda naˈ chaˈ loˈo ma̱ tya clyo, chaˈ taca cuaˈni lyaá Cristo jiˈna; quicha tsa naˈ nu ngua liˈ, biˈ chaˈ ngua laja ˈna chaˈ ta naˈ chaˈ biˈ loˈo ma̱.
\v 14 Loˈo juaˈa̱ ná nchcuiˈ cuxi ma̱ ˈna liˈ, ná nguloˈo ma̱ ˈna, masi tya xi tya ndalo ma̱ ˈna chaˈ quicha tsa naˈ; xaˈ ñaˈa̱ nguaˈni ma̱ loˈo naˈ liˈ, ntucuá ma̱ chaˈ jnaˈ ñiˈya̱ si cua laca naˈ sca xca̱ jiˈi̱ ycuiˈ Ndyosi, ñiˈya̱ si cua laca naˈ ycuiˈ Jesucristo. 
\v 15 Tsoˈo tsa ntsuˈu tyiquee ma̱ ñaˈa̱ ma̱ ˈna nu ngua tyempo biˈ; hasta culo ma̱ la cuiˈ ca siˈyu cloo ma̱ chaˈ ta ma̱ ˈna ngua tiˈ ma̱ nquichaˈ, chaˈ cua ntiˈ tsa ma̱ xtyucua ma̱ jnaˈ. Loˈo juani ni, ¿na laca ngua jiˈi̱ ma̱ juani?
\v 16 ¿Ha ntiˈ ma̱ chaˈ tyaˈa cusu̱u̱ ma̱ laca naˈ xquiˈya chaˈ liñi nu nda naˈ loˈo ma̱?
\p
\v 17 Chañi chaˈ ntiˈ tsa nu nguˈ cuiñi biˈ, chaˈ taquiyaˈ ma̱ jiˈi̱ chaˈ nu nchcuiˈ nguˈ biˈ loˈo ma̱. Pana siˈi chaˈ tsoˈo tyiquee nguˈ ndyuˈni nguˈ juaˈa̱; na cua ntiˈ nguˈ biˈ, chaˈ ngaˈaa taquiyaˈ ma̱ jiˈi̱ chaˈ nu nchcuiˈ ya loˈo ma̱, chaˈ taquiyaˈ la ma̱ jiˈi̱ ycuiˈ ca nguˈ biˈ.
\v 18 Tsoˈo tsa si loˈo xaˈ la ñati̱ culuˈu nguˈ la xi chaˈ liñi jiˈi̱ ma̱, si ntsuˈu chaˈ tsoˈo tyiquee nguˈ ñaˈa̱ nguˈ jiˈi̱ ma̱. Tsoˈo si juaˈa̱ caca tyucui tyempo, masi ndiˈi̱ naˈ loˈo ma̱, masi ná ndiˈi̱ naˈ.
\v 19 Chaca quiyaˈ tiˈí tsa ntsuˈu tyiquee naˈ ñaˈa̱ naˈ jiˈi̱ ma̱, chaˈ ñiˈya̱ laca sñiˈ naˈ, juaˈa̱ laca ma̱; ñaˈa̱ naˈ jiˈi̱ ma̱ ñiˈya̱ si laca naˈ sca nu cunaˈa̱ nu tiˈí tsa nchcubeˈ jiˈi̱ chaˈ cua cala ti sñiˈ. Talo chaˈ tiˈí biˈ ˈna ñaˈa̱ cuayáˈ nu tyuˈu xcuiˈ chaˈ jiˈi̱ Cristo tyiquee ma̱.
\v 20 Pana ná jlo tiˈ naˈ tsiyaˈ ti ñiˈya̱ scua naˈ quityi re nu tsaa slo ma̱ juani; tsoˈo la si caja ñiˈya̱ nu tsaˈa naˈ slo ma̱ chaˈ chcuiˈ naˈ xi loˈo ma̱, chaˈ ná tyiqueeˈ xaˈ ñaˈa̱ chaˈ chcuiˈ na liˈ.
\s Ñiˈya̱ ngua chaˈ jiˈi̱ Agar loˈo jiˈi̱ Sara
\p
\v 21 Cuˈma̱, cua ntiˈ ma̱ taquiyaˈ ma̱ jiˈi̱ chaˈ cusuˈ biˈ ti. Tsoˈo lacua. ¿Ha bilya cuna ma̱ chaˈ re, nu nchcuiˈ chaˈ jiˈi̱ Abraham?
\v 22 Nacui̱ quityi chaˈ ngula tucua tyaˈa sñiˈ jyoˈo Abraham biˈ: nu clyo ngua sñiˈ nu cunaˈa̱ cuaˈ, sca nu cunaˈa̱ nu cua ngüiˈya yu chaˈ cuaˈni cña jiˈi̱ yu; nu chaca biˈ ngua sñiˈ ycuiˈ clyoˈo yu, sca nu cunaˈa̱ nu ndiˈi̱ tsoˈo ti.
\v 23 Sñiˈ nu cunaˈa̱ cuaˈ biˈ ni, ngula biˈ juaˈa̱ ti, ñiˈya̱ nu nclya lcaa nu sube chalyuu; pana sñiˈ ycuiˈ clyoˈo yu ni, ngula biˈ xquiˈya sca chaˈ nu cua nda ycuiˈ Ndyosi loˈo sti, xtyaˈa̱ saˈni la, nu loˈo nacui̱ Ni chaˈ cala sñiˈ nguˈ.
\v 24 Sca cui̱i̱ nu nda naˈ loˈo ma̱ laca chaˈ biˈ: tucua tyaˈa nguˈ cunaˈa̱ ngua biˈ, nu juaˈa̱ ntiˈ ñacui̱ chaˈ ntsuˈu tucua lo chaˈ nu nda ycuiˈ Ndyosi loˈo ñati̱ chalyuu. Lo xlya caˈya Sinaí nu nscua nde Arabia, ca biˈ nguxana tsaca chaˈ; stuˈba ntiˈ chaˈ biˈ loˈo Agar, nu cunaˈa̱ nu ngüiˈya ti jyoˈo Abraham. Ñati̱ nu jlya tsa tiˈ jiˈi̱ chaˈ biˈ, laca nguˈ ñiˈya̱ laca sca msu nu ngüiˈya ti ñati̱.
\v 25 Stuˈba ñaˈa̱ naa Agar biˈ loˈo caˈya Sinaí biˈ, chaˈ juaˈa̱ ndyuˈu chaˈ biˈ chaˈcña jiˈi̱ nguˈ Arabia; la cuiˈ caˈya biˈ laca su nda ycuiˈ Ndyosi chaˈ loˈo nguˈ judío tya clyo. Hasta juani tlyu tsa cña ngaˈa̱ chaˈ cuaˈni lcaa nguˈ judío cuentya jiˈi̱ chaˈ cusuˈ biˈ, tsa lo cña ñiˈya̱ nu nguaˈni jyoˈo Agar cuentya jiˈi̱ jyoˈo Abraham nu ngua saˈni la. Loˈo nu nguˈ judío nu ndiˈi̱ quichi̱ Jerusalén ni, cua ntiˈ nguˈ biˈ tatsaa nguˈ jiˈna juani chaˈ taquiyaˈ na jiˈi̱ lcaa cña biˈ. 
\v 26 Pana cua ngujui chaca chaˈ jiˈna, xquiˈya chaca nu cunaˈa̱ biˈ nu ngua clyoˈo Abraham, nu cunaˈa̱ nu ndiˈi̱ tsoˈo ti biˈ. Chaca lo Jerusalén cucui laca loo jiˈna, biˈ laca ñiˈya̱ si laca quichi̱ tyi lcaa na nu jlya tiˈ na jiˈi̱ Jesucristo; taca tyiˈi̱ tsoˈo ti na ca biˈ.
\v 27 Ntsuˈu sca chaˈ nu nscua lo quityi cusuˈ nu nchcuiˈ ndiˈya̱:
\q Cuaˈni chaa tiˈ nuˈu̱, maˈ cusuˈ nu ná ndyiji sñiˈ, masi ná tucui ntsuˈu jinuˈu̱.
\q Chaa tiˈ xiˈya nuˈu̱, maˈ cusuˈ, masi bilya jlo tiˈ nuˈu̱ ñiˈya̱ ndyaa chaˈ nclya nu sube.
\q Ntsuˈu quiñaˈa̱ la sñiˈ nu cunaˈa̱ nu ná ngujui sñiˈ tya clyo;
\q ndiˈi̱ xti la sñiˈ nu cunaˈa̱ nu ntsuˈu quiˈyu jiˈi̱. 
\m Juaˈa̱ nscua lo quityi jiˈi̱ ycuiˈ Ndyosi.
\p
\v 28 Isaac sñiˈ ycuiˈ clyoˈo Abraham ngula xquiˈya sca chaˈ nu cua nda ycuiˈ Ndyosi loˈo nguˈ cusuˈ jiˈi̱, chaˈ caca juaˈa̱. Loˈo cuˈma̱, tyaˈa ngusñi na chaˈ jiˈi̱ Jesús ni, loˈo cuˈma̱ loˈo naˈ laca na sñiˈ ycuiˈ Ndyosi juani, xquiˈya sca chaˈ nu cua nda Ni loˈo na. 
\v 29 Nu loˈo ngutiˈi̱ jyoˈo Abraham biˈ chalyuu, nu sñiˈ nu ngula juaˈa̱ ti ni, biˈ laca nu nguaˈni lyaˈ tiˈ jiˈi̱ Isaac, sñiˈ ycuiˈ clyoˈo yu, masi ngula nu Isaac biˈ xquiˈya sca chaˈ nu nda Xtyiˈi ycuiˈ Ndyosi loˈo nguˈ. La cuiˈ juaˈa̱ laca juani, chaˈ nxu̱u̱ tyaˈa nguˈ biˈ loˈo na, chaˈ siˈi sñiˈ ycuiˈ Ndyosi laca nguˈ biˈ. 
\v 30 Loˈo juaˈa̱ ntsuˈu chaca chaˈ nu nchcuiˈ quityi cusuˈ biˈ, chaˈ ndiˈya̱ nacui̱ clyoˈo Abraham biˈ: “Culoˈo jiˈi̱ nu cunaˈa̱ nu ngüiˈya ti nuˈu̱ chaˈ tyaa choˈ, tyaaloˈo jiˈi̱ sñiˈ biˈ. Ná taca tyanu chaˈ tsoˈo nu ntsuˈu jinuˈu̱ loˈo tyucuaa sñiˈ nuˈu̱. Ná nchca ca stuˈba chaˈ jiˈi̱ sñiˈ nu cunaˈa̱ cuaˈ biˈ loˈo sñiˈ naˈ, chaˈ sca nu cunaˈa̱ nu ndiˈi̱ tsoˈo ti laca naˈ”, nacui̱ clyoˈo Abraham biˈ.
\v 31 Loˈo lcaa na tyaˈa ngusñi na chaˈ jiˈi̱ Cristo ni, siˈi sñiˈ nu cunaˈa̱ nu ndiˈi̱ ndyuˈni cña msu ti laca na; na ndiˈi̱ tsoˈo ti na ñiˈya̱ ngutiˈi̱ Isaac, sñiˈ nu cunaˈa̱ nu ndiˈi̱ tsoˈo ti biˈ.
\c 5
\s Ñaˈa̱ ti tya tyiˈi̱ tsoˈo ti na chalyuu lacua
\p
\v 1 Cua nguaˈni lyaá Cristo jiˈna, chaˈ taca tyiˈi̱ tsoˈo ti na chalyuu. Biˈ chaˈ ñaˈa̱ ti tya tyiˈi̱ tsoˈo ti ma̱ chalyuu lacua; ngaˈaa ta ma̱ tyempo chaˈ caca loo xaˈ ñati̱ jiˈi̱ ma̱, ñiˈya̱ si cua ngüiˈya nguˈ jiˈi̱ ma̱ chaˈ cuaˈni ma̱ cña jiˈi̱ nguˈ.
\p
\v 2 Cuaˈa̱ jyaca̱ ma̱ jiˈi̱ chaˈ nu nchcuiˈ naˈ loˈo ma̱. Pablo laca naˈ nu nda naˈ chaˈ re loˈo ma̱. Ndiˈya̱ nacui̱ naˈ jiˈi̱ ma̱: Ngaˈaa caca xtyucua Cristo jiˈi̱ ma̱ si ta ma̱ chacuayáˈ chaˈ siˈyu nguˈ quiji̱ ma̱ ñiˈya̱ nu nduˈni nguˈ judío chaˈ culacua̱ nguˈ.
\v 3 Tya chcuiˈ naˈ chaˈ biˈ loˈo ma̱ chaca quiyaˈ: Loˈo ngulacua̱ ma̱ ñiˈya̱ si laca ma̱ sca nguˈ judío, liˈ ntsuˈu chaˈ cuaˈni ma̱ lcaa ñaˈa̱ chaˈ nu nscua lo quityi cusuˈ cuentya jiˈi̱ nguˈ judío biˈ.
\v 4 Nu cuˈma̱ nu jlya tsa tiˈ ma̱ chaˈ caca tsoˈo cresiya jiˈi̱ ma̱ cuentya jiˈi̱ ycuiˈ Ndyosi si nduˈni tacati ma̱ jiˈi̱ chaˈ cusuˈ biˈ, na cua ngulochu̱ˈ ma̱ jiˈi̱ Cristo; ngaˈaa ndube tiˈ ma̱ chaˈ ntsuˈu tsa tyiquee ycuiˈ Ndyosi ñaˈa̱ Ni jiˈi̱ ma̱ si juaˈa̱ nduˈni ma̱. 
\v 5 Pana nu na ni, tsoˈo tsa ntsuˈu tyiquee na ndu̱ tiˈ na chaˈ cuaˈni Ni chaˈ ca tsoˈo lijyi cresiya jiˈna cuentya jiˈi̱ ycuiˈ Ni, nu loˈo tsaa na tsaa tyiˈi̱ na loˈo Ni. Biˈ laca cña nu nduˈni Xtyiˈi ycuiˈ Ni neˈ cresiya jiˈna, xquiˈya chaˈ ngusñi na chaˈ jiˈi̱ Cristo. 
\v 6 Loˈo juaˈa̱ si chañi chaˈ stuˈba ntsuˈu chaˈ jiˈna loˈo Jesucristo, liˈ ná nduˈni chaˈ masi ngulacua̱ na, masi ná ngulacua̱ na. Sca ti chaˈ ndulo tsa jiˈna chaˈ cuaˈni na, chaˈ xñi tsoˈo la na chaˈ jiˈi̱ ycuiˈ Ni; loˈo liˈ caca cuaˈni na chaˈ tsoˈo ti tyuˈu tyiquee na ñaˈa̱ na jiˈi̱ tyaˈa ñati̱ na.
\p
\v 7 Tsoˈo tsa ndyuˈni ma̱ nquichaˈ. ¿Tilaca laca nu ndacu̱ˈ chaˈ jiˈi̱ ma̱, chaˈ ngaˈaa taquiyaˈ la ma̱ jiˈi̱ chaˈ liñi nu cua nda Cristo loˈo ma̱?
\v 8 Ycuiˈ Ndyosi ngusubi jiˈi̱ ma̱ tya clyo, pana siˈi ycuiˈ Ni laca nu nguaˈni chaˈ nñiloˈo nguˈ jiˈi̱ ma̱ juani.
\v 9 Culacua xi tiˈ ma̱ ni cña cuaˈni xi ca ti scua̱ tiyeˈ, nu loˈo suˈba nguˈ jiˈi̱ lo quiñaˈa̱ catyá xlyá; la cuiˈ juaˈa̱ cña nu cuaˈni chaˈ cuxi nu nda nguˈ biˈ loˈo ma̱.
\v 10 Cuentya jnaˈ, ndyiˈu tsa tiˈ naˈ jiˈi̱ ma̱ xquiˈya ycuiˈ nu Xuˈna na, chaˈ jlya tiˈ naˈ chaˈ stuˈba ti ntsuˈu tyiquee ma̱ loˈo chaˈ nu cua nchcuiˈ ca naˈ. Ná nduˈni chaˈ tilaca laca nu ndyaˈa̱ nchcuiˈ chaˈ cuiñi loˈo ma̱ chaˈ xcutsi̱i̱ jiˈi̱ ma̱, xcubeˈ tsa ycuiˈ Ndyosi jiˈi̱ ñati̱ biˈ.
\p
\v 11 Cuˈma̱ tyaˈa ngusñi na chaˈ jiˈi̱ Cristo, jlo tiˈ ma̱ chaˈ ngaˈaa cuaˈni lyaˈ tiˈ nguˈ judío ˈna si cachaˈ naˈ jiˈi̱ ma̱ chaˈ culacua̱ ma̱ ñiˈya̱ nduˈni nguˈ biˈ; pana ñaˈa̱ ti tiˈí tiˈ nguˈ biˈ jnaˈ, xquiˈya chaˈ ná nda naˈ chaˈ biˈ loˈo ma̱, chaˈ sca ti nchcuiˈ naˈ loˈo cuˈma̱ ñiˈya̱ ndyuˈu chaˈ loˈo ngujuii Jesús lo crusi.
\v 12 Nu nguˈ nu ndyaˈa̱ ndatsaa jiˈi̱ ma̱ chaˈ culacua̱ ma̱ cuentya jiˈi̱ nguˈ, tsoˈo la masi tye cuañaˈ ycuiˈ ca nguˈ siˈyu nguˈ, si juaˈa̱ ntiˈ nguˈ.
\p
\v 13 Cua ngusubi ycuiˈ Ndyosi jiˈi̱ ma̱ chaˈ caca tyiˈi̱ tsoˈo ti ma̱ chalyuu. Tsa biˈ ti chaˈ, tii ti tiˈ ma̱ tyiˈi̱ ma̱ chalyuu; ná clyana ma̱ chaˈ cuxi nu cuaˈni ma̱ laja loˈo ndiˈi̱ tsoˈo ti ma̱, chaˈ siˈi na ndiˈi̱ tsoˈo ti na chaˈ culiji na na nu ntsuˈu jiˈna juaˈa̱ ti. Ntsuˈu chaˈ xtyucua na jiˈi̱ tyaˈa ñati̱ na xquiˈya chaˈ ntsuˈu tsa tyiquee na ñaˈa̱ na jiˈi̱ nguˈ, biˈ chaˈ ndiˈi̱ tsoˈo ti na.
\v 14 Liˈ taca cuaˈni na lcaa cña nu ntiˈ ycuiˈ Ndyosi chaˈ cuaˈni na, si taquiyaˈ na jiˈi̱ sca ti chaˈcña nu nchcuiˈ ndiˈya̱: “Ngaˈa̱ chaˈ tsoˈo ti tyuˈu tyiquee na ñaˈa̱ na jiˈi̱ xaˈ la ñati̱, ñiˈya̱ nu tsoˈo tsa ntsuˈu tyiquee na ñaˈa̱ na jiˈi̱ ycuiˈ ca ti na”.
\v 15 Pana si xcuiˈ chaˈ cusu̱u̱ ntsuˈu jiˈi̱ ma̱ loˈo tyaˈa ma̱, si xcuiˈ na cuaˈni ñuˈu̱ ma̱ jiˈi̱ tyaˈa ma̱ ntiˈ ma̱, ná tyiqueeˈ tye chaˈ jiˈi̱ ma̱ loˈo tyaˈa ma̱ tsiyaˈ ti. Ngaˈa̱ chaˈ cuiˈya ma̱ cuentya chaˈ ná cuaˈni ma̱ juaˈa̱.
\s Tsoˈo la si cube tiˈ na jiˈi̱ chaˈ nu nda Xtyiˈi ycuiˈ Ndyosi chaˈ tyanu neˈ cresiya jiˈna
\p
\v 16 Ndiˈya̱ chaˈ ta naˈ loˈo ma̱: Ta ma̱ chacuayáˈ chaˈ caca Xtyiˈi ycuiˈ Ndyosi loo neˈ cresiya jiˈi̱ ma̱ ca su ndiˈi̱ ma̱; liˈ ngaˈaa jña tiˈ tyiquee ma̱ chaˈ cuaˈni ma̱ cua ñaˈa̱ ca chaˈ cuxi nu ndiya tiˈ ma̱, chaˈ laca ma̱ ñati̱ chalyuu.
\v 17 Nu chaˈ cuxi nu ndiya tiˈ na ni, nxu̱u̱ tyaˈa chaˈ biˈ loˈo chaˈ nu nda Xtyiˈi ycuiˈ Ndyosi chaˈ tyanu neˈ cresiya jiˈna. Loˈo juaˈa̱ Xtyiˈi ycuiˈ Ndyosi ni, biˈ laca nu nxu̱u̱ tyaˈa loˈo chaˈ cuxi nu ndiya tiˈ na chaˈ cuaˈni na, chaˈ laca na ñati̱ chalyuu. Ná stuˈba chaˈ biˈ tsiyaˈ ti; biˈ chaˈ ngaˈaa caca cuaˈni ma̱ cua ñaˈa̱ ca chaˈ cuxi nu ndiya tiˈ ma̱, nu nguaˈni ma̱ cua tsubiˈ la.
\v 18 Loˈo taquiyaˈ ma̱ jiˈi̱ chaˈ nu nda Xtyiˈi ycuiˈ Ndyosi chaˈ tyanu neˈ cresiya jiˈi̱ ma̱, liˈ ngaˈaa siˈi chaˈ cusuˈ nu nda ñati̱ ti nu caca loo jiˈi̱ ma̱ liˈ.
\p
\v 19 Ndiˈya̱ laca chaˈ cuxi nu ndiya tiˈ ñati̱ chalyuu, si ná ta nguˈ chacuayáˈ chaˈ caca Xtyiˈi ycuiˈ Ndyosi loo neˈ cresiya jiˈi̱ nguˈ: xcuiˈ na nñiloˈo ti nguˈ jiˈi̱ nu cunaˈa̱, xcuiˈ na nduˈni subaˈ nguˈ loˈo ñati̱, cuxi tsa nduˈni nguˈ loˈo tyaˈa ñati̱ nguˈ;
\v 20 juaˈa̱ nduˈni tlyu nguˈ jiˈi̱ lcui̱ joˈó; juaˈa̱ nduˈni cuchaˈa̱ nguˈ biˈ jiˈi̱ tyaˈa ñati̱ nguˈ, loˈo juaˈa̱ liyeˈ tiˈ nguˈ ñaˈa̱ nguˈ jiˈi̱ tyaˈa ñati̱ nguˈ, lye tsa nxu̱u̱ tyaˈa nguˈ; juaˈa̱ ndacui tsa tiˈ nguˈ jiˈi̱ chaˈ tsoˈo nu ntsuˈu jiˈi̱ tyaˈa ñati̱ nguˈ, chaˈ xi ndaca tsa nchca ñasi̱ˈ nguˈ; ná ntajaˈa̱ nguˈ tsiyaˈ ti tyaˈa̱ tyiquee nguˈ chaˈ jiˈi̱ tyaˈa ñati̱ nguˈ, tsa cuˈ ti ndyaˈa̱ tyiquee nguˈ chaˈ jiˈi̱ ycuiˈ ca nguˈ; juaˈa̱ nclyana tsa nguˈ chaˈ cusu̱u̱ loˈo tyaˈa ñati̱ nguˈ, ndatsaa nguˈ jiˈi̱ tyaˈa ñati̱ nguˈ chaˈ ná cuaˈni stuˈba chaˈ jiˈi̱ nguˈ loˈo xaˈ la tyaˈa nguˈ;
\v 21 la cuiˈ juaˈa̱ xcuiˈ na nxlyaá ti nguˈ na nu ntsuˈu jiˈi̱ tyaˈa ñati̱ nguˈ, ndujuii nguˈ jiˈi̱ tyaˈa nguˈ; xcuiˈ na cuˈbi ti nguˈ, loˈo juaˈa̱ ntsuˈu nguˈ nu chcu̱ˈ tsa ndacu, chaˈ quiñaˈa̱ tsa na ntiˈ nguˈ biˈ cacu nguˈ; loˈo juaˈa̱ tya ntsuˈu xaˈ la chaˈ cuxi nu nduˈni nguˈ. Liñi tsa chaˈ nu ta naˈ loˈo ma̱ juani ñiˈya̱ nu ni naˈ jiˈi̱ ma̱ tya tsubiˈ la, chaˈ ná caca tyuˈu chaˈ jiˈna loˈo ycuiˈ Ndyosi nu loˈo caca ycuiˈ Ni loo ca nde loo la, si tsa cuˈ ti cuaˈni na chaˈ cuxi juaˈa̱.
\p
\v 22 Xaˈ ñaˈa̱ cña nduˈni Xtyiˈi ycuiˈ Ndyosi neˈ cresiya jiˈna: nduˈni Ni chaˈ tyuˈu tyiquee na ñaˈa̱ na jiˈi̱ tyaˈa ñati̱ na; juaˈa̱ nduˈni Ni chaˈ chaa tiˈ na cuentya jiˈi̱ Ni, chaˈ ti̱ ti tyiˈi̱ tyiquee na, chaˈ talo tyiquee na jiˈi̱ tyaˈa ñati̱ na; juaˈa̱ nduˈni Ni chaˈ ca tyaˈna tiˈ na ñaˈa̱ na jiˈi̱ ñati̱, chaˈ xcuiˈ tsoˈo ti cuaˈni na loˈo ñati̱, chaˈ liñi ti cuaˈni na loˈo ñati̱;
\v 23 juaˈa̱ nduˈni Xtyiˈi ycuiˈ Ndyosi loˈo na chaˈ ná quiñaˈa̱ chaˈ ntsuˈu tyiquee na cuentya jiˈi̱ ycuiˈ ca na, nduˈni Ni chaˈ taca jiˈna cuaˈa na jiˈi̱ ycuiˈ ca na liˈ. Ngaˈaa ntsuˈu chaˈ sta ycuiˈ Ndyosi quiˈya jiˈna, si cuaˈni na juaˈa̱.
\v 24 Cua ngujuii Cristo lo crusi chaˈ cati̱ quiˈya nu ntsuˈu jiˈna; biˈ chaˈ cua nguaˈni tye na jiˈi̱ lcaa chaˈ cuxi nu ntsuˈu neˈ cresiya jiˈna tya tsubiˈ la, lcaa na nu ndacui tiˈ na jiˈi̱ nquichaˈ, nguaˈni tye na jiˈi̱ xquiˈya chaˈ ntsuˈu chaˈ jiˈna loˈo ycuiˈ Cristo. Loˈo juaˈa̱ lcaa chaˈ nu tiji̱ˈ tiˈ na jiˈi̱, cua nguxtyanu na jiˈi̱ chaˈ cuxi biˈ juani.
\v 25 Tya loˈo ngusñi na chaˈ biˈ clyo, liˈ ngujui chalyuu tsoˈo jiˈna xquiˈya Xtyiˈi ycuiˈ Ndyosi. Juani tsoˈo la si taquiyaˈ na chaˈ nu nda Xtyiˈi ycuiˈ Ndyosi loˈo na chaˈ tyanu neˈ cresiya jiˈna lcaa seˈi̱ su ndiˈi̱ na. 
\p
\v 26 La cuiˈ ti ná tsoˈo si chcuiˈ tyucuaa tiˈ na loˈo ñati̱, chaˈ juaˈa̱ caja quiñaˈa̱ tsa chaˈ cusu̱u̱ jiˈna loˈo tyaˈa ñati̱ na liˈ, chaˈ tyixi tyiquee na. Loˈo juaˈa̱ ná tsoˈo si ñaˈa̱ tiˈí na jiˈi̱ tyaˈa na.
\c 6
\s Xtyucua na jiˈi̱ ñati̱ tyaˈa ntsuˈu chaˈ jiˈna loˈo Cristo
\p
\v 1 Cuˈma̱ nguˈ tyaˈa na, ndiˈya̱ ngaˈa̱ chaˈ cuaˈni ma̱ loˈo ñaˈa̱ ma̱ chaˈ ngua cuxi cresiya jiˈi̱ sca nguˈ tyaˈa ngusñi ma̱ chaˈ jiˈi̱ ycuiˈ Ndyosi, xquiˈya chaˈ nguaˈni yu sca chaˈ cuxi: ngaˈa̱ chaˈ xtyucua ma̱ xi jiˈi̱ yu biˈ, chaˈ cati̱ quiˈya nu ntsuˈu jiˈi̱ yu, chaˈ tucuá yu cña jiˈi̱ Cristo chaca quiyaˈ, chaˈ tyaˈa ntsuˈu chaˈ jiˈi̱ ma̱ loˈo Xtyiˈi ycuiˈ Ndyosi laca yu. Tsa tsoˈo ti chcuiˈ ma̱ loˈo yu biˈ. Loˈo juaˈa̱ tii ti tiˈ ma̱ tyiˈi̱ ycuiˈ ca ma̱ chaˈ ná cuaˈni ma̱ la cuiˈ chaˈ cuxi ñiˈya̱ nu nguaˈni yu biˈ.
\v 2 Cuaˈni ma̱ chaˈ stuˈba ti caca tyiquee ma̱ loˈo tyaˈa ma̱, chaˈ caca xtyucua ma̱ jiˈi̱ nguˈ loˈo sca chaˈ nu ntsuˈu jiˈi̱ nguˈ, chaˈ ná cuaˈni nguˈ sca chaˈ cuxi. Juaˈa̱ taca taquiyaˈ tsoˈo na lcaa cña nu nda Cristo chaˈ cuaˈni na.
\p
\v 3 Na ñiloˈo ti na jiˈi̱ ycuiˈ ca na si culacua tiˈ na chaˈ tsoˈo tsa laca na cuentya jiˈi̱ ycuiˈ Ndyosi; tsoˈo la si ta na cuentya chaˈ ná sca na laca na cuentya jiˈi̱ ycuiˈ Ni.
\v 4 Ntsuˈu chaˈ cuiˈya na cuentya ñiˈya̱ nu ndiˈi̱ scaa na chalyuu. Si chañi chaˈ tsoˈo tsa nduˈni na, chaˈ jiˈi̱ ycuiˈ na laca chaˈ biˈ; ná ntsuˈu chaˈ cuaˈni tyucuaa tiˈ na loˈo xaˈ la ñati̱.
\v 5 Ngaˈa̱ chaˈ talo na jiˈi̱ cña jiˈna, lcaa chaˈ nu ndyacua jiˈna chalyuu.
\p
\v 6 Lcaa tyaˈa na nu ndyaca tsaˈa̱ na chaˈ tsoˈo nu cua nda Cristo biˈ, ntsuˈu chaˈ ta na xi chaˈ tsoˈo nu ntsuˈu jiˈna chaˈ caja cua ñaˈa̱ ca na nu tyiji̱ yuˈu jiˈi̱ mstru nu nguluˈu chaˈ tsoˈo biˈ jiˈna.
\p
\v 7 Ná culacua tiˈ ma̱ chaˈ caca cñiloˈo na jiˈi̱ ycuiˈ Ndyosi. Ná tucui caca jiˈi̱ cuaˈni juaˈa̱, chaˈ ñiˈya̱ nu ndyuˈni sa scaa na chalyuu, juaˈa̱ tyacua chaˈ jiˈna tiyaˈ la nde slo ycuiˈ Ndyosi. Ñiˈya̱ ntiˈ loˈo cataa na sca siˈyu ni, chaˈ la cuiˈ siˈyu nu ndyataa na, nde loo la la cuiˈ biˈ tyuˈu lo na nu ndyataa na, siˈi xaˈ lo siˈyu;
\v 8 juaˈa̱ laca ñati̱ na loˈo ndiˈi̱ na chalyuu, chaˈ loˈo cuaˈni na cua ñaˈa̱ ca chaˈ cuxi nu ndiya tiˈ na chaˈ cuaˈni na, ná sca chaˈ tsoˈo tyacua jiˈna nu loˈo cua ndye chalyuu. Tsa lo cua ti chaˈ, ntsuˈu chaˈ cajaa na, loˈo juaˈa̱ ti culiji yuˈu ti lcaa chaˈ tsoˈo nu ntsuˈu jiˈna. Pana si cuaˈni na lcaa ñaˈa̱ cña nu ntiˈ Xtyiˈi ycuiˈ Ndyosi chaˈ cuaˈni na, tsoˈo tsa tyuˈu chaˈ jiˈna liˈ; caja chalyuu nu ná ngaˈa̱ chaˈ tye jiˈna. Talo ycuiˈ ca na liˈ, ná tye cña jiˈna juaˈa̱ ti.
\v 9 Biˈ chaˈ ná tsoˈo si ca taja tiˈ na chaˈ cuaˈni na chaˈ tsoˈo laja loˈo ndiˈi̱ na chalyuu. Loˈo tyalaa hora biˈ, liˈ tyuˈu tucua chaˈ tsoˈo nu nacui̱ Ni chaˈ tyacua jiˈna nde loo la, la cuiˈ chaˈ nu tyiqueeˈ tsa ngujuatya na jiˈi̱; pana ntsuˈu chaˈ talo na, chaˈ ná ca taja tiˈ na nduˈni na cña tsoˈo.
\v 10 Biˈ chaˈ tsoˈo si lcaa quiyaˈ loˈo ñaˈa̱ na ñiˈya̱ caca xtyucua na jiˈi̱ cua ñaˈa̱ ca ñati̱, liˈ cuaˈni clya na chaˈ xtyucua na jiˈi̱ nguˈ biˈ. Clyo nduˈni chaˈ xtyucua na jiˈi̱ tyaˈa na, nu nguˈ nu ntsuˈu chaˈ jiˈi̱ loˈo Cristo.
\s Chaˈ nu nscua Pablo su cua tye ti quityi
\p
\v 11 Loˈo juani scua ycuiˈ ca ti naˈ tucua sna tya siˈyu chaˈ lo quityi re. Tyaca̱ˈ chaˈ tonu letra nscua naˈ. 
\v 12 Nu ñati̱ nu ndatsaa tsa jiˈi̱ ma̱ chaˈ siˈyu quiji̱ ma̱ ñiˈya̱ nu nduˈni nguˈ judío chaˈ culacua̱ nguˈ ni, nduˈni nguˈ juaˈa̱ chaˈ ntiˈ nguˈ chaˈ caca stuˈba chaˈ jiˈi̱ ycuiˈ nguˈ loˈo tyaˈa nguˈ judío; liˈ ná cuaˈni lyaˈ tiˈ tyaˈa nguˈ judío jiˈi̱ nguˈ biˈ si ngusñi nguˈ chaˈ jiˈi̱ Jesucristo nu ngujuii lo crusi, ntiˈ nguˈ.
\v 13 Loˈo ycuiˈ nguˈ nu cua ngulacua̱ nguˈ juaˈa̱ ni, ná ndaquiyaˈ nguˈ jiˈi̱ lcaa ca cña nu nscua lo chaˈ cusuˈ chaˈ cuaˈni na biˈ. Tsa biˈ ti chaˈ ntiˈ nguˈ, chaˈ caja ñiˈya̱ nu chcuiˈ nguˈ chaˈ tyixi loˈo tyaˈa nguˈ: Cua ngulacua̱ nguˈ jua xquiˈya ycuiˈ ya, ñacui̱ nguˈ jiˈi̱ tyaˈa nguˈ liˈ.
\v 14 Pana nu naˈ ni, sca ti chaˈ tsoˈo ntsuˈu chalyuu ntiˈ naˈ, chaˈ nu ngujuii ycuiˈ Jesucristo nu Xuˈna na lo crusi cuentya jiˈna; biˈ chaˈ ngaˈaa ntiˈ naˈ ta naˈ xaˈ la chaˈ loˈo ñati̱. Loˈo juaˈa̱ xquiˈya chaˈ ngujuii ycuiˈ Cristo, ngaˈaa caca tatsaa nu cuxi nu ntsuˈu chalyuu jnaˈ, chaˈ ngaˈaa ntsuˈu chaˈ jnaˈ loˈo chaˈ cuxi nu ntsuˈu chalyuu juani.
\v 15 Nu loˈo stuˈba ntsuˈu chaˈ jiˈna loˈo Jesucristo, ná nduˈni chaˈ masi ngulacua̱ na, masi ná ngulacua̱ na, sca ti cuayáˈ laca na. Sca ti chaˈ nu ndulo la jiˈna juani, chaˈ xcutsaˈa̱ Ni tsiyaˈ ti lcaa chaˈ nu nduˈni na loˈo ndiˈi̱ na chalyuu, chaˈ xcuiˈ chaˈ tsoˈo cuaˈni na liˈ.
\v 16 Lcaa ñati̱ nu nduˈni juaˈa̱ xquiˈya Jesús laja loˈo ndiˈi̱ nguˈ chalyuu, taca tyiˈi̱ tyiquee nguˈ ti̱ ti liˈ, loˈo juaˈa̱ cuaˈni tyaˈna tiˈ ycuiˈ Ndyosi jiˈi̱ nguˈ biˈ liˈ; juaˈa̱ cuaˈni Ni loˈo lcaa na nu chañi chaˈ laca na ñati̱ jiˈi̱ Ni.
\p
\v 17 Tya tsubiˈ la, tlyu tsa cña nda ma̱ ˈna, chaˈ ná ndaquiyaˈ ma̱ jiˈi̱ chaˈ nu nchcuiˈ naˈ loˈo ma̱; biˈ chaˈ juani ngaˈaa cuaˈni ma̱ chaˈ cusu̱u̱ loˈo naˈ chaca quiyaˈ. Cua ntsuˈu cuayáˈ nu nscua lo cuañaˈ naˈ, biˈ laca cuayáˈ su nguxcubeˈ nguˈ ˈna xquiˈya chaˈ ndyuˈni naˈ cña jiˈi̱ Jesús.
\p
\v 18 Cuˈma̱ tyaˈa ngusñi na chaˈ jiˈi̱ ycuiˈ Ndyosi, lcaa hora tyiˈu tiˈ ma̱ jiˈi̱ ycuiˈ Jesucristo nu Xuˈna na, chaˈ xcuiˈ tsoˈo ti nduˈni Ni loˈo ma̱. Loˈo juaˈa̱ chañi tsa chaˈ caca chaˈ biˈ.