\id PHP
\h FILIPENSES
\mt Quityi nu nguscua San Pablo ndyaa slo ñati̱ jiˈi̱ Jesucristo nde quichi̱ Filipos
\c 1
\p
\v 1 Pablo loˈo Timoteo laca cuare. Tyucuaa ya ndyuˈni ya cña jiˈi̱ Jesucristo, biˈ chaˈ nscua ya quityi re chaˈ ca̱a̱ ca slo cuˈma̱, chaˈ tyaˈa ñati̱ jiˈi̱ ycuiˈ Ndyosi laca na. Cua ngusñi na chaˈ jiˈi̱ Jesucristo, biˈ chaˈ laca na ñati̱ jiˈi̱ ycuiˈ Ndyosi. La cuiˈ juaˈa̱ loˈo quityi re chcuiˈ ya xi loˈo lcaa nguˈ cusuˈ nu laca loo jiˈi̱ ñaˈa̱ taju cuˈma̱, juaˈa̱ chcuiˈ ya xi loˈo xaˈ la nguˈ nu laca cña, nu ntsuˈu chaˈ xtyucua jiˈi̱ ma̱.
\v 2 Ndiˈya̱ ntiˈ naˈ, chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ ti̱ ti tyiˈi̱ tyiquee ma̱ xquiˈya Jesucristo nu Xuˈna na.
\s Nchcuiˈ Pablo loˈo ycuiˈ Ndyosi cuentya jiˈi̱ nguˈ Filipos biˈ
\p
\v 3 Lcaa quiyaˈ loˈo ndyiˈu tiˈ naˈ jiˈi̱ cuˈma̱, liˈ tsoˈo tsa ntsuˈu tyiquee naˈ; ndya naˈ xlyaˈbe jiˈi̱ ycuiˈ Ndyosi cuentya jiˈi̱ lcaa ma̱ liˈ.
\v 4 Loˈo nchcuiˈ naˈ loˈo Ni cuentya jiˈi̱ ma̱, chaa ti tiˈ naˈ nchcuiˈ naˈ loˈo Ni liˈ.
\v 5 Tya loˈo ndyuna ma̱ chaˈ tsoˈo jiˈi̱ Cristo tya clyo, ñaˈa̱ ti tsa cuˈ ti nxtyucua ma̱ ˈna chaˈ chcuiˈ naˈ chaˈ biˈ loˈo xaˈ la ñati̱;
\v 6 biˈ chaˈ cua jlo tiˈ naˈ juani chaˈ ñaˈa̱ ti tya cuaˈni ycuiˈ Ndyosi cña neˈ cresiya jiˈi̱ ma̱, ñaˈa̱ cuayáˈ nu tyuˈu scua cña biˈ, nu loˈo tya̱a̱ Jesucristo chaca quiyaˈ, chaˈ la cuiˈ ycuiˈ Ni laca nu nguxana nguaˈni cña neˈ cresiya jiˈi̱ ma̱ tya clyo.
\v 7 Tsoˈo si culacua xi tiˈ naˈ juaˈa̱ cuentya jiˈi̱ cuˈma̱, xquiˈya chaˈ lcaa tsa̱ ntsuˈu tsa tyiquee naˈ ñaˈa̱ naˈ jiˈi̱ cuˈma̱; stuˈba ti ndyaca chaˈ jiˈi̱ cuˈma̱ loˈo naˈ, tsoˈo tsa ndyuˈni Ni loˈo na chaˈ ndyuˈni na cña jiˈi̱ Jesucristo. Nguxtyucua ma̱ jnaˈ tsubiˈ loˈo ngutaˈa̱ naˈ slo nguˈ nu laca loo chaˈ nxacui̱ naˈ chaˈ jiˈi̱ nguˈ biˈ; nacui̱ naˈ jiˈi̱ nguˈ chaˈ tsoˈo tsa laca chaˈ nu cua nda ycuiˈ Ndyosi loˈo na, loˈo juaˈa̱ ndachaˈ liñi naˈ jiˈi̱ nguˈ ñiˈya̱ laca chaˈ liñi biˈ. Loˈo juani tya nxtyucua ma̱ ˈna, masi ntsuˈu naˈ neˈ chcua̱ xquiˈya chaˈ nchcuiˈ naˈ chaˈ jiˈi̱ Jesús loˈo ñati̱.
\v 8 Cua jlo tiˈ ycuiˈ Ndyosi chaˈ ñiˈya̱ ntsuˈu tyiquee ycuiˈ Jesucristo ñaˈa̱ Ni jiˈi̱ lcaa cuˈma̱, la cuiˈ juaˈa̱ ntsuˈu tsa tyiquee naˈ ñaˈa̱ naˈ jiˈi̱ cuˈma̱. 
\v 9 Ndiˈya̱ laca chaˈ nu nchcuiˈ naˈ loˈo ycuiˈ Ndyosi cuentya jiˈi̱ ma̱: ndijña naˈ chacuayáˈ jiˈi̱ Ni chaˈ ñaˈa̱ ti tsoˈo la tyuˈu tyiquee ma̱ ñaˈa̱ ma̱ jiˈi̱ tyaˈa ñati̱ ma̱, chaˈ juaˈa̱ taca ca cuayáˈ la tiˈ ma̱ lcaa chaˈ, chaˈ juaˈa̱ taca culacua tsoˈo la tiˈ ma̱;
\v 10 ndijña naˈ chaˈ lcaa tyempo taca caˈya chaˈ hique ma̱ ñiˈya̱ nu tsoˈo la chaˈ cuaˈni ma̱. Juaˈa̱ ngaˈaa tyajaˈa̱ ma̱ cuaˈni la ma̱ chaˈ cuxi, ngaˈaa tyanu yabeˈ hichu̱ˈ ma̱ nu loˈo tyalaa tsa̱ chaˈ ca̱a̱ Cristo chaca quiyaˈ.
\v 11 Quiñaˈa̱ tsa chaˈ tsoˈo taca cuaˈni ma̱ lcaa su ndiˈi̱ ma̱ chalyuu xquiˈya Jesucristo, chaˈ ndyuˈni Cristo cña neˈ cresiya jiˈi̱ ma̱; biˈ chaˈ taca cuaˈni tlyu ma̱ jiˈi̱ ycuiˈ Ndyosi, taca cuaˈni chi̱ ma̱ loo Ni.
\s Sca ti chaˈ ntiˈ Pablo nde chalyuu, chaˈ caca yu cña jiˈi̱ Cristo
\p
\v 12 Cuˈma̱ nguˈ tyaˈa ngusñi na chaˈ jiˈi̱ Cristo, ntiˈ naˈ chaˈ caca cuayáˈ tsoˈo tiˈ ma̱ chaˈ cua lijya̱ ngañi la chaˈ tsoˈo jiˈi̱ Jesús laja nguˈ quichi̱ re, xquiˈya chaˈ cuxi nu ndyaca ˈna re.
\v 13 Ngaˈa̱ naˈ neˈ chcua̱ juani, biˈ chaˈ jlo tiˈ lcaa ñati̱ nu ndiˈi̱ niˈi̱ tlyu jiˈi̱ gobierno re, chaˈ cua ngusuˈba nguˈ ˈna neˈ chcua̱ xquiˈya chaˈ ndyaˈa̱ naˈ lo cña jiˈi̱ Cristo; masi lcaa sendaru nu ndiˈi̱ ca nde, masi xaˈ la ñati̱, cua jlo tiˈ nguˈ.
\v 14 Loˈo juaˈa̱ cua ñaˈa̱ ca nguˈ tyaˈa ngusñi na chaˈ jiˈi̱ Jesús, tsa ndu̱ cua tsoˈo la jlya tiˈ nguˈ chaˈ jiˈi̱ nu Xuˈna na juani, cua tlyu la xi tyiquee nguˈ juani; ngaˈaa ntsi̱i̱ nguˈ chcuiˈ nguˈ chaˈ jiˈi̱ ycuiˈ Ndyosi loˈo xaˈ ñati̱, xquiˈya chaˈ ná ntsi̱i̱ naˈ loˈo ntsuˈu naˈ neˈ chcua̱ re.
\p
\v 15 Chañi chaˈ ntsuˈu ñati̱ nu nchcuiˈ chaˈ jiˈi̱ Cristo loˈo tyaˈa xquiˈya chaˈ chi̱i̱ ti ntiˈ ñati̱ biˈ, na cua ntiˈ tsa ñati̱ biˈ xu̱u̱ tyaˈa loˈo ya; pana tya ntsuˈu la xi xaˈ la nguˈ nu nchcuiˈ chaˈ biˈ xquiˈya chaˈ tsoˈo ti tyiquee nguˈ.
\v 16-17 Ntsuˈu tsa tyiquee nguˈ biˈ ñaˈa̱ nguˈ jiˈi̱ ycuiˈ Ndyosi, loˈo juaˈa̱ jlo tiˈ nguˈ chaˈ cua nda Ni cña ˈna chaˈ xacui̱ naˈ chaˈ jiˈi̱ ñati̱ nu xu̱u̱ tyaˈa loˈo na xquiˈya chaˈ tsoˈo jiˈi̱ Cristo. Nu ñati̱ nu chi̱i̱ ntiˈ ni, siˈi na tyucui tyiquee ñati̱ biˈ nchcuiˈ nguˈ chaˈ jiˈi̱ Cristo; laca chaˈ cua ntiˈ nguˈ tyiji̱loo nguˈ jiˈi̱ tyaˈa nguˈ. Loˈo juaˈa̱ cua ntiˈ tsa nguˈ chaˈ ta la nguˈ chaˈ tiˈí ˈna laja loˈo ndiˈi̱ naˈ neˈ chcua̱.
\v 18 Ná ndube tiˈ naˈ ñiˈya̱ ndyuˈni nguˈ biˈ, masi tyucui tyiquee chcuiˈ nguˈ chaˈ jiˈi̱ Cristo loˈo ñati̱, masi chaˈ cuiñi ti ntsuˈu tyiquee nguˈ nu loˈo nchcuiˈ nguˈ chaˈ biˈ; pana tsoˈo tsa ntiˈ naˈ si ñaˈa̱ ti tya cañi la chaˈ jiˈi̱ Cristo biˈ.
\p Loˈo juaˈa̱ tya caca chaa la tiˈ naˈ tyempo nde loo la.
\v 19 Ndu̱ tiˈ naˈ chaˈ yala ti caca tsoˈo la chaˈ jnaˈ re, chaˈ cua jlo tiˈ naˈ ñiˈya̱ ndijña tsa ma̱ jiˈi̱ ycuiˈ Ndyosi chaˈ tyuˈu naˈ neˈ chcua̱ re, chaˈ tyuˈu naˈ nde liyaˈ; jlo tiˈ naˈ chaˈ nxtyucua tsa la cuiˈ Xtyiˈi ycuiˈ Jesucristo ˈna.
\v 20 Ndiˈya̱ ntiˈ naˈ cuaˈni naˈ: ntiˈ tsa naˈ chaˈ ná caca tyujuˈu tiˈ naˈ loˈo chcuiˈ naˈ chaˈ jiˈi̱ Jesús loˈo ñati̱; masi tyempo nu lijya̱ nde loo la, masi tyempo juani, tlyu caca tyiquee naˈ loˈo chcuiˈ naˈ chaˈ jiˈi̱ Jesús. Juaˈa̱ ntiˈ naˈ cuaˈni naˈ, chaˈ ñaˈa̱ ti cuaˈni tlyu naˈ jiˈi̱ Cristo, masi tya luˈú ti naˈ, masi cua ngujuii naˈ.
\v 21 Sca ti chaˈ ntiˈ naˈ cuaˈni naˈ nde chalyuu, chaˈ caca naˈ cña jiˈi̱ Cristo. Tsoˈo la masi cajaa naˈ, ntiˈ naˈ, chaˈ liˈ taca ñaˈa̱ naˈ jiˈi̱ ycuiˈ Ni;
\v 22 pana ná jlo tiˈ naˈ na laca nu tsoˈo la chaˈ cuaˈni naˈ, chaˈ ná tyiqueeˈ tya taca cuaˈni naˈ tya quiñaˈa̱ la xi cña jiˈi̱ nu Xuˈna na, si tya tyiˈi̱ la naˈ xi chalyuu.
\v 23 Tyucuaa lo chaˈ ntiˈ naˈ chaˈ caca ˈna lacua: Ntiˈ tsa naˈ chaˈ xtyanu naˈ jiˈi̱ chalyuu re, chaˈ liˈ taca tyiˈi̱ naˈ loˈo Cristo, chaˈ biˈ nu tsoˈo la ntiˈ naˈ;
\v 24 pana juani ni, ndulo la chaˈ jiˈi̱ cuˈma̱ si tya tyiˈi̱ la naˈ xi chalyuu.
\v 25 Nda tiˈ naˈ chaˈ juaˈa̱ caca ˈna, chaˈ tya tyiˈi̱ la naˈ xi chalyuu. Liˈ taca xtyucua la naˈ jiˈi̱ lcaa cuˈma̱, chaˈ xñi tsoˈo la ma̱ chaˈ jiˈi̱ Cristo; juaˈa̱ caca chaa la tiˈ ma̱ loˈo jlya tsoˈo tiˈ ma̱ jiˈi̱ Ni.
\v 26 Loˈo ca̱a̱ naˈ chaˈ tyiˈi̱ naˈ slo ma̱ chaca quiyaˈ, liˈ tsoˈo tsa caca tyiquee ma̱ cuentya jiˈi̱ Jesucristo xquiˈya naˈ.
\p
\v 27 Biˈ chaˈ juani, cuiˈya ma̱ cuentya ñiˈya̱ ngaˈa̱ chaˈ cuaˈni ma̱ chalyuu cuentya jiˈi̱ chaˈ jiˈi̱ Cristo nu cua ngusñi ma̱. Si juaˈa̱ nduˈni ma̱, liˈ ná nduˈni chaˈ masi ca̱a̱ naˈ ca quichi̱ tyi ma̱, masi ná caca ca̱a̱ naˈ. Ná tyiqueeˈ caja chaˈ ˈna chaˈ sca ti chaˈ ntsuˈu tyiquee ma̱ loˈo tyaˈa ma̱, chaˈ ndalo tsa tyiquee ma̱ jiˈi̱ tyaˈa cusu̱u̱ ma̱ ca biˈ; ná tyiqueeˈ stuˈba ti culacua tiˈ ma̱ loˈo tyaˈa ma̱ laja loˈo tyiqueeˈ tsa nchcuiˈ ma̱ loˈo nguˈ chaˈ xñi nguˈ chaˈ tsoˈo biˈ jiˈi̱ Cristo.
\v 28 Loˈo nduˈni ma̱ juaˈa̱, liˈ ngaˈaa ntsuˈu chaˈ cutsi̱i̱ ma̱ jiˈi̱ nguˈ tyaˈa cusu̱u̱ ma̱, chaˈ taca ca cuayáˈ tiˈ nguˈ chaˈ cua nscua chaˈ cuityi̱ ycuiˈ Ndyosi jiˈi̱ lcaa ñati̱ cuxi. Pana cuˈma̱ ni, cua ngulaá ma̱ jiˈi̱ nu cuxi biˈ; ycuiˈ Ndyosi nduˈni chaˈ taca tyiji̱loo ma̱ jiˈi̱ ñati̱ cuxi biˈ.
\v 29 Tsoˈo tsa laca chaˈ nda ycuiˈ Ndyosi chacuayáˈ chaˈ ngusñi ma̱ chaˈ jiˈi̱ Cristo; pana cua nscua chaˈ caja xi chaˈ tiˈí jiˈi̱ ma̱, nu loˈo cua ngusñi ma̱ chaˈ jiˈi̱ Cristo biˈ.
\v 30 Stuˈba ti ndyaca chaˈ jiˈi̱ cuˈma̱ loˈo naˈ, tiˈi̱ tsa cña nu cua ngujui jiˈna. Pana cua naˈa̱ ma̱ ñiˈya̱ nguaˈni naˈ cña tya tsubiˈ la, chaˈ lye tsa nxu̱u̱ tyaˈa naˈ loˈo nu cuxi; loˈo ñaˈa̱ ti taca ca cuayáˈ tiˈ ma̱ chaˈ lye tsa ndyuˈni naˈ cña juani.
\c 2
\s Ngua Jesús sca nguˈ tiˈi loˈo ya̱a̱ yu chalyuu, chaˈ tiyaˈ la liˈ tlyu tsa chacuayáˈ nda ycuiˈ Ndyosi jiˈi̱ yu
\p
\v 1 Ná tyiqueeˈ cua nguula la tiˈ tyiquee ma̱ juani, xquiˈya chaˈ cua ngusñi ma̱ chaˈ jiˈi̱ Cristo; cua tsoˈo la ntiˈ ma̱ chaˈ ntsuˈu tsa tyiquee Ni ñaˈa̱ Ni jiˈi̱ ma̱. La cuiˈ ti chaˈ xquiˈya nu Xtyiˈi ycuiˈ Ndyosi stuˈba ti ntsuˈu chaˈ jiˈi̱ ma̱ loˈo tyaˈa ma̱, juaˈa̱ loˈo ycuiˈ Ni, ñaˈa̱ cuayáˈ nu nchca tyaˈna tiˈ ma̱ ñaˈa̱ ma̱ jiˈi̱ tyaˈa ma̱, ñaˈa̱ cuayáˈ nu tsoˈo ntsuˈu tyiquee ma̱ ñaˈa̱ ma̱ jiˈi̱ tyaˈa ma̱.
\v 2 Biˈ chaˈ lacua, si chañi chaˈ juaˈa̱ ntiˈ ma̱, liˈ cuaˈni ma̱ chaˈ caca tsoˈo tyiquee naˈ; juaˈa̱ caca nu loˈo ñaˈa̱ naˈ chaˈ stuˈba tsa ntsuˈu chaˈ jiˈi̱ ma̱ loˈo tyaˈa ma̱, chaˈ sca ti chaˈ ntsuˈu tyiquee ma̱, chaˈ sca ti chaˈ nclyacua tiˈ ma̱, chaˈ sca ti cuayáˈ tsoˈo ti ntiˈ ma̱ ñaˈa̱ ma̱ jiˈi̱ tyaˈa ma̱. 
\v 3 Cuaˈni ma̱ chaˈ ná quiñaˈa̱ chaˈ tyuˈu tyiquee ma̱ loˈo cuaˈni ma̱ sca cña; siˈi xcuiˈ chaˈ jiˈi̱ ycuiˈ ca ma̱ culacua tiˈ ma̱, ni siˈi na cuaˈni tyucuaa tiˈ ma̱ loˈo tyaˈa ma̱. Tsoˈo la si culacua tiˈ ma̱ chaˈ tsoˈo la laca nu xaˈ la nguˈ tyaˈa ma̱, pana ná tsoˈo ycuiˈ ca ma̱;
\v 4 cube la tiˈ ma̱ ñiˈya̱ caca chaˈ ca tsoˈo chaˈ jiˈi̱ xaˈ la nguˈ tyaˈa ma̱, siˈi xcuiˈ chaˈ jiˈi̱ ycuiˈ ca ma̱ nu ngaˈa̱ chaˈ cube tiˈ ma̱.
\p
\v 5 Tsoˈo si culacua tiˈ ma̱ ñiˈya̱ nclyacua tiˈ ycuiˈ Jesucristo. Ndiˈya̱ ngua chaˈ jiˈi̱ yu:
\v 6 Tyucui tyempo ycuiˈ Ndyosi tsiyaˈ ti laca Jesucristo, ná ntsuˈu tyempo nu ná laca yu ycuiˈ Ndyosi; pana loˈo ya̱a̱ yu lo yuu chalyuu, ná ngulacua tiˈ Jesús chaˈ ca̱loˈo yu lcaa chacuayáˈ jiˈi̱ ycuiˈ Ndyosi, masi ntsuˈu tsa chacuayáˈ jiˈi̱ yu slo Ni nquichaˈ, chaˈ stuˈba ti ntsuˈu chaˈ jiˈi̱ yu loˈo ycuiˈ Ndyosi Sti yu.
\v 7 Pana nguxtyanu yu chacuayáˈ nu ntsuˈu jiˈi̱ yu ca slo ycuiˈ Ndyosi Sti yu, chaˈ tsoˈo la ngua tiˈ yu loˈo nguaˈni yu juaˈa̱. Loˈo liˈ ntajaˈa̱ yu ngua yu ñati̱, chaˈ caja ñiˈya̱ xtyucua yu jiˈna; ñiˈya̱ nclya lcaa ñati̱, juaˈa̱ ngula yu nde chalyuu, ñati̱ tsiyaˈ ti ngua yu.
\v 8 Ngua yu sca ñati̱ tiˈi, loˈo juaˈa̱ tsoˈo tsa ndaquiyaˈ yu cña nu cua nda ycuiˈ Ndyosi Sti yu jiˈi̱ yu; ngujuii yu, hasta ngujuii yu lo crusi, masi juaˈa̱ ndujuii nguˈ jiˈi̱ nguˈ nu xñaˈa̱ tsa nu ngua liˈ.
\v 9 Biˈ chaˈ juani cua ndyaa loˈo Ni jiˈi̱ yu chaˈ stuˈba ti tyiˈi̱ yu ca su tlyu la ca su ntucua ycuiˈ Ni; juani tlyu tsa chacuayáˈ cua nda Ni jiˈi̱ Jesús. Tyucui ñaˈa̱ chalyuu ngaˈaa ntsuˈu la xaˈ chacuayáˈ nu tlyu la, 
\v 10 chaˈ juaˈa̱ tyu̱ sti̱ˈ lcaa na luˈú nde loo Jesús, masi ñati̱, masi cuiˈi̱. Ná ntsuˈu su tye chaˈ cuaˈni chi̱ nguˈ loo yu xquiˈya chacuayáˈ nu cua nda Ni jiˈi̱ yu, masi nu ndiˈi̱ ca nde cua̱, masi nu ndiˈi̱ nde lo yuu chalyuu, masi nguˈ nu cua nguatsiˈ, loˈo jyoˈo biˈ cuaˈni chi̱ nguˈ loo yu.
\v 11 Cui̱i̱ tsa chcuiˈ lcaa ñati̱ chaˈ Jesucristo laca Xuˈna lcaa ca chalyuu, juaˈa̱ tsoˈo tsa cuaˈni tlyu nguˈ jiˈi̱ ycuiˈ Ndyosi Sti na.
\s Ñiˈya̱ nu ntyijiˈi̱ xee cuii nde talya, juaˈa̱ cuaˈni na loˈo ndiˈi̱ na chalyuu
\p
\v 12 Cuˈma̱ nguˈ tyaˈa na nu tyacaˈa tsa ma̱ ˈna, cua ndaquiyaˈ tsa ma̱ jiˈi̱ chaˈ nu nchcuiˈ naˈ lcaa tsa̱ loˈo ngutiˈi̱ naˈ loˈo ma̱; ñaˈa̱ ti tya ndulo tsa chaˈ jiˈi̱ ma̱ chaˈ taquiyaˈ la ma̱ jiˈi̱ chaˈ nu nchcuiˈ naˈ, masi tyijyuˈ tsa ngaˈa̱ naˈ ca su ndiˈi̱ ma̱ juani. Ñaˈa̱ ti cuaˈni cña tiˈ ma̱ chaˈ caca lyiji lcaa chaˈ nu ngua tiˈ ycuiˈ Ndyosi cuaˈni Ni neˈ cresiya jiˈi̱ ma̱ loˈo nguaˈni lyaá Jesucristo jiˈi̱ ma̱. Xti ti chaˈ tyuˈu tyiquee ma̱ cuentya jiˈi̱ ycuiˈ ma̱, pana cube la tiˈ ma̱ jiˈi̱ ycuiˈ Ndyosi.
\v 13 Tyiˈu tiˈ ma̱ chaˈ lcaa tsa̱ nduˈni ycuiˈ Ndyosi cña laja neˈ cresiya jiˈi̱ ma̱, chaˈ taca cuaˈni ma̱ cña jiˈi̱ Ni; juaˈa̱ nduˈni Ni chaˈ tyajaˈa̱ ma̱ cuaˈni ma̱ lcaa ñaˈa̱ nu ntiˈ ycuiˈ Ndyosi chaˈ cuaˈni ma̱.
\p
\v 14 Lcaa lo cña nu cuaˈni ma̱ ni, ná caca chi̱i̱ ntiˈ ma̱ ñaˈa̱ ma̱ jiˈi̱ nguˈ loˈo ndyuˈni ma̱ cña biˈ, ná xlyú ma̱ chaˈ hichu̱ˈ nguˈ,
\v 15 chaˈ ná caca ñacui̱ nguˈ chaˈ ntsuˈu quiˈya jiˈi̱ ma̱ liˈ, loˈo juaˈa̱ ná caja su lyiji cuaˈni ma̱ sca chaˈ liˈ. Tsoˈo la si caca cuayáˈ tiˈ nguˈ chaˈ chañi chaˈ laca ma̱ sñiˈ ycuiˈ Ndyosi tyucui tyiquee ma̱, masi xcuiˈ ndiˈi̱ ti ma̱ chalyuu laja ñati̱ cuxi, laja ñati̱ nu chi̱i̱ ntiˈ nguˈ ñaˈa̱ jiˈi̱ tyaˈa nguˈ. Xquiˈya cuˈma̱ ngaˈa̱ chaˈ cañi chaˈ jiˈi̱ Jesús lcaa su ndiˈi̱ ñati̱ biˈ; ñiˈya̱ nu ntyijiˈi̱ xee cuii nde talya, juaˈa̱ caca ma̱ xee nde chalyuu,
\v 16 nu loˈo ta ma̱ chaˈ loˈo nguˈ, si chcuiˈ ma̱ chaˈ tsoˈo jiˈi̱ Cristo nu taca ta chalyuu nu ná ngaˈa̱ chaˈ tye jiˈi̱ nguˈ. Si juaˈa̱ cuaˈni ma̱, tsoˈo tsa caca tyiquee naˈ ñaˈa̱ naˈ jiˈi̱ ma̱ loˈo tyalaa tsa̱ nu cuaˈni cuayáˈ Cristo jiˈi̱ lcaa ñati̱. Liˈ taca ca cuayáˈ tiˈ naˈ chaˈ tsoˈo ti ngutuˈu scua cña biˈ ˈna, siˈi na nguliji yuˈu cña biˈ juaˈa̱ ti.
\v 17-18 Jlo tiˈ naˈ chaˈ siˈi chaˈ xca ti laca nu nguaˈni ma̱ loˈo ngusñi ma̱ chaˈ jiˈi̱ ycuiˈ Ndyosi; quiñaˈa̱ tsa na nguxtyanu ma̱, tyu̱u̱ quiyaˈ cua nda ma̱ tyucui ñaˈa̱ ma̱ chaˈ caca ma̱ cña jiˈi̱ Cristo, xquiˈya chaˈ cua ngusñi ma̱ chaˈ jiˈi̱ Ni. Loˈo juani loˈo naˈ ni, cujuii nguˈ ˈna, ntiˈ naˈ; chcunaˈ chalyuu ˈna juaˈa̱ ti cuentya jiˈi̱ cuˈma̱. Pana ná ntsi̱i̱ naˈ; masi juaˈa̱ caca ˈna, chaa tsa tiˈ naˈ ndiˈi̱i̱. Loˈo juaˈa̱ ntiˈ naˈ chaˈ ca chaa tiˈ cuˈma̱, chaˈ stuˈba ti ca chaa tiˈ naˈ loˈo cuˈma̱.
\s Nchcuiˈ Pablo chaˈ jiˈi̱ Timoteo loˈo jiˈi̱ Epafrodito 
\p
\v 19 Chacuayáˈ jiˈi̱ Jesús nu Xuˈna na, ná tyiqueeˈ ta naˈ jiˈi̱ yu Timoteo chaˈ tsaa yu ca su ndiˈi̱ ma̱ yala ti, chaˈ quije xi chaˈ ˈna ñiˈya̱ nu ndiˈi̱ ca ma̱; tsoˈo tsa caca tyiquee naˈ loˈo cuna naˈ chaˈ biˈ. 
\v 20 Sca ti yu biˈ laca nu chañi chaˈ stuˈba ti ntiˈ yu loˈo naˈ, nu chañi chaˈ ntsuˈu tyiquee yu ñaˈa̱ yu jiˈi̱ cuˈma̱;
\v 21 ná ndiˈi̱ xaˈ la nguˈ tyaˈa na ca nde nu ndube tiˈ ñiˈya̱ ndyaca cña jiˈi̱ Jesucristo ca su ndiˈi̱ ma̱, xcuiˈ na ntsuˈu la tyiquee nguˈ jiˈi̱ cña jiˈi̱ ycuiˈ ca nguˈ.
\v 22 Loˈo cuˈma̱, cua jlo tiˈ ma̱ chaˈ lubii tsa cña nu ndyuˈni yu Timoteo biˈ. Stuˈba ti ndyuˈni yu cña loˈo naˈ ñiˈya̱ ntiˈ si cua laca yu sñiˈ naˈ, stuˈba ti ndyaˈa̱ ya nchcuiˈ ya chaˈ tsoˈo jiˈi̱ Jesús loˈo xaˈ ñati̱.
\v 23 Loˈo tye caca cuayáˈ jnaˈ, liˈ ta naˈ jiˈi̱ yu chaˈ hora ti tsaa yu ca su ndiˈi̱ ma̱,
\v 24 masi nda tiˈ naˈ chaˈ loˈo ycuiˈ naˈ taca ca̱a̱ naˈ yala ti ca su ndiˈi̱ ma̱ chacuayáˈ jiˈi̱ ycuiˈ nu Xuˈna na.
\p
\v 25 Loˈo juaˈa̱ nduˈni tsa chaˈ ca̱a̱ chaca yu ca slo ma̱, ntiˈ naˈ; Epafrodito laca yu biˈ. La cuiˈ yu tyaˈa ndyaˈa̱ ya cña laca yu, loˈo juaˈa̱ nguula tsa cña nguaˈni yu loˈo ya loˈo nguxacui̱ ya chaˈ jiˈi̱ nguˈ cuxi. La cuiˈ yu biˈ laca nu nda ma̱ ya̱a̱ ca slo naˈ tya tsubiˈ la, chaˈ xtyucua yu ˈna loˈo na laca nu lyiji xi ˈna chaˈ tyiji̱ yuˈu ˈna chalyuu.
\v 26 Tiji̱ˈ tsa tiˈ yu jiˈi̱ cuˈma̱, biˈ chaˈ ntiˈ yu ca̱a̱ naˈa̱ yu jiˈi̱ ma̱ chaca quiyaˈ; ngulacua tsa tiˈ yu loˈo ngujui chaˈ jiˈi̱ yu chaˈ cua ndyuna ma̱ chaˈ quicha tsa yu.
\v 27 Chañi tsa chaˈ quicha tsa yu nu ngua liˈ, cua cajaa ti yu ngua; pana ycuiˈ Ndyosi nguaˈni tyaˈna tiˈ Ni jiˈi̱ yu. La cuiˈ juaˈa̱ ngua tyaˈna tiˈ Ni ñaˈa̱ Ni ˈna, chaˈ cua laca ngujui tsa chaˈ xñiˈi̱ tiˈ ˈna ca nde; loˈo liˈ lye la ngua xñiˈi̱ tiˈ naˈ si cua ngujuii yu, pana ndyaca tsoˈo yu liˈ.
\v 28 Biˈ chaˈ tsoˈo tsa ntiˈ naˈ juani si yala ti ca̱a̱ yu ca slo cuˈma̱, chaˈ loˈo cuˈma̱ caca chaa tsa tiˈ ma̱, nu loˈo ñaˈa̱ ma̱ jiˈi̱ yu chaca quiyaˈ. Ngaˈaa culacua tsa tiˈ naˈ cuentya jiˈi̱ cuˈma̱ liˈ.
\v 29 Caca chaa tiˈ ma̱ loˈo yu lacua; tsoˈo tsa chcuiˈ ma̱ loˈo yu loˈo tyalaa yu ca slo ma̱, chaˈ laca yu tyaˈa ngusñi ma̱ chaˈ jiˈi̱ nu Xuˈna na. Loˈo juaˈa̱ cuaˈni chi̱ ma̱ loo cua ñaˈa̱ ca ñati̱ nu cuaˈni ñiˈya̱ nu nguaˈni yu biˈ;
\v 30 ná ndyutsi̱i̱ yu, masi cua cajaa ti yu laja loˈo nguxtyucua yu jiˈi̱ ya loˈo cña jiˈi̱ Cristo re tya tsubiˈ. Masi ná ngua ca̱a̱ cuˈma̱ ca nde, pana cua nda ma̱ jiˈi̱ ycuiˈ yu lijya̱ yu chaˈ cuaˈni yu la cuiˈ cña nu ná ngua cuaˈni cuˈma̱, nu nxtyucua tsa jiˈi̱ ya liˈ.
\c 3
\s Ñiˈya̱ nu chañi ca chaˈ ca ti̱ quiˈya nu ntsuˈu jiˈna cuentya jiˈi̱ ycuiˈ Ndyosi
\p
\v 1 Cuˈma̱ tyaˈa ngusñi na chaˈ jiˈi̱ Jesús, juani cua ntiˈ tsa naˈ chaˈ ca chaa tiˈ ma̱ xquiˈya ycuiˈ nu Xuˈna na. Ná nduˈni chaˈ ˈna, masi tya chaca quiyaˈ chcuiˈ naˈ la cuiˈ tyaˈa chaˈ nu nguscua naˈ tya clyo; ná tyiqueeˈ xtyucua naˈ xi jiˈi̱ ma̱, si chcuiˈ naˈ chaca quiyaˈ.
\v 2 Tii ti tiˈ ma̱, cuiˈya tsoˈo ma̱ cuentya jiˈi̱ nu nguˈ cuxi biˈ, chaˈ ñiˈya̱ nduˈni xneˈ taja, juaˈa̱ ndyuˈni nguˈ biˈ. Xquiˈya chaˈ cusuˈ nu jlya tsa tiˈ nguˈ biˈ jiˈi̱, biˈ chaˈ ndatsaa nguˈ jiˈi̱ xaˈ ñati̱ chaˈ xiˈyu nguˈ quiji̱ nguˈ, masi sca cña nu cuaˈni ñuˈu̱ jiˈi̱ nguˈ laca; siˈi sca chaˈ tsoˈo laca biˈ. 
\v 3 Pana nu na ni, chañi laca chaˈ ngulacua̱ ycuiˈ Ndyosi jiˈna, masi xaˈ ñaˈa̱ nchcuiˈ nu nguˈ biˈ. Cua nduˈni tlyu na jiˈi̱ ycuiˈ Ndyosi xquiˈya Xtyiˈi ycuiˈ Ni; chaa tsa tiˈ na ndiˈi̱ na chalyuu nu loˈo cua ngujui chalyuu jiˈna xquiˈya Jesucristo, chaˈ ngaˈaa jlya tiˈ na jiˈi̱ sca chaˈ nu ndatsaa ñati̱ chalyuu jiˈna chaˈ cuaˈni na jiˈi̱.
\v 4 Loˈo naˈ, jlya tsa tiˈ naˈ jiˈi̱ nu chaˈ cusuˈ biˈ. Tya tsubiˈ la ni, ná njyacua xaˈ la ñati̱ ˈna, lye la ndaquiyaˈ naˈ lcaa chaˈ cusuˈ nu ntsuˈu jiˈi̱ nguˈ judío tyaˈa ya.
\v 5 Cua snuˈ ti tsa̱ ntsuˈu naˈ loˈo ngusiˈyu nguˈ quiji̱ naˈ chaˈ ngulacua̱ nguˈ ˈna; nguˈ judío laca naˈ tya loˈo ngula naˈ, tañi nguˈ hebreo laca tañi naˈ. Juaˈa̱ la cuiˈ tyaˈa ñati̱ jiˈi̱ nguˈ Benjamín ngua nguˈ cusuˈ ˈna. Nguˈ fariseo laca naˈ, biˈ chaˈ ndaquiyaˈ tsa naˈ lcaa ca cña nu ntsuˈu chaˈ cuaˈni ya cuentya jiˈi̱ chaˈ cusuˈ jiˈi̱ nguˈ judío;
\v 6 chaˈ jlya tsa tiˈ naˈ jiˈi̱ nu chaˈ cusuˈ biˈ, biˈ chaˈ nguxcubeˈ tsa naˈ jiˈi̱ lcaa ñati̱ nu ngusñi chaˈ jiˈi̱ Jesucristo, lyaˈ tsa tiˈ naˈ jiˈi̱ nguˈ biˈ. Loˈo juaˈa̱ ná ntsuˈu quiˈya ˈna loˈo nguˈ judío cuentya jiˈi̱ chaˈ cusuˈ biˈ, chaˈ cua ndaquiyaˈ tsa naˈ lcaa nu chaˈ cusuˈ biˈ; tya saˈni cua ngua lubii cresiya jnaˈ, si chañi chaˈ caca tsoˈo cresiya jiˈna cuentya jiˈi̱ ycuiˈ Ndyosi juaˈa̱ ti.
\v 7 Saˈni la ngua tiˈ naˈ chaˈ tsoˈo tsa ñati̱ laca naˈ xquiˈya chaˈ cusuˈ biˈ, pana juani ngaˈaa nclyacua tiˈ naˈ jiˈi̱ chaˈ biˈ xquiˈya Cristo.
\v 8 Loˈo juaˈa̱, masi tucunaˈ naˈ lcaa chaˈ nu ndiya tsa tiˈ naˈ nde chalyuu, ná cube tiˈ naˈ; tlyu la tsiyaˈ ti laca chaˈ tsoˈo nu cua ngujui ˈna juani, laja loˈo ndyuloo naˈ jiˈi̱ Jesucristo nu Xuˈna naˈ. Xquiˈya Cristo, biˈ chaˈ cua nguxtyanu naˈ jiˈi̱ lcaa chaˈ cusuˈ biˈ; ngaˈaa tsoˈo chaˈ cusuˈ biˈ tsiyaˈ ti, ntiˈ naˈ, hasta xcua̱a̱ naˈ jiˈi̱, ntiˈ naˈ. Tsa biˈ ti chaˈ ntiˈ naˈ, chaˈ xñi tsoˈo naˈ chaˈ jiˈi̱ Cristo,
\v 9 chaˈ stuˈba ti tyuˈu tyiquee naˈ loˈo Ni. Ná ngüityi̱ ycuiˈ Ndyosi quiˈya ˈna nu loˈo ndaquiyaˈ tsa naˈ jiˈi̱ nu chaˈ cusuˈ biˈ; laca chaˈ cua ngüityi̱ ycuiˈ Ni quiˈya ˈna loˈo jlya ti tiˈ naˈ jiˈi̱ cña nu nguaˈni Cristo, tsa biˈ ti chaˈ. Biˈ chaˈ nguaˈni Ni chaˈ caca tsoˈo cresiya jnaˈ.
\v 10 Loˈo juani ni, tsa biˈ ti chaˈ ntiˈ naˈ, chaˈ tyuloo lyiji naˈ jiˈi̱ Cristo, chaˈ ca tii naˈ chaˈ tya ndyuˈni ycuiˈ Ndyosi cña loˈo naˈ loˈo la cuiˈ tyaˈa juersa nu cua ntsuˈu jiˈi̱ Ni loˈo nguaˈni Ni chaˈ ndyuˈú Jesús chaca quiyaˈ. Ná nduˈni chaˈ masi juaˈa̱ chcubeˈ naˈ ñiˈya̱ nu cua nchcubeˈ ycuiˈ Jesús, masi chcunaˈ chalyuu ˈna tsiyaˈ ti ñiˈya̱ loˈo cua ngujuii ycuiˈ Cristo lo crusi.
\v 11 Loˈo juani ndu̱ tiˈ naˈ chaˈ caja chaca chalyuu ˈna tiyaˈ la, sca chalyuu nu ná ngaˈa̱ chaˈ tye, masi cua ngujuii naˈ.
\s Cuaˈni cña tiˈ na chaˈ jyacua na jiˈi̱ chaˈ tlyu nu caja jiˈna nde loo la
\p
\v 12 Ná nacui̱ naˈ chaˈ cua ndye ngua tsoˈo cresiya jnaˈ cuentya jiˈi̱ ycuiˈ Ndyosi sca ti quiyaˈ, loˈo juani ngaˈaa ntsuˈu quiˈya ˈna; ná ni naˈ juaˈa̱. Na cua laca nacui̱ Jesucristo chaˈ laca naˈ ñati̱ jiˈi̱ ycuiˈ Ni, biˈ chaˈ lye tsa ndyuˈni cña tiˈ naˈ chaˈ ca tsoˈo lyiji cresiya ˈna.
\v 13 Cuˈma̱ nguˈ tyaˈa ngusñi na chaˈ jiˈi̱ Cristo, cua jlo tiˈ naˈ chaˈ tya lyiji caca juaˈa̱ loˈo naˈ. Tsa biˈ ti chaˈ ndulo tsa cuentya ˈna, chaˈ cuaˈni yala naˈ juani chaˈ jyacua naˈ jiˈi̱ chaˈ tlyu nu cua lijya̱ nde loo la, chaˈ ca tsoˈo lyiji cresiya ˈna loˈo ycuiˈ Ndyosi, masi ngaˈaa tyiˈu tiˈ naˈ lcaa ñaˈa̱ chaˈ nu ngua ˈna nu ngua tya saˈni la.
\v 14 Biˈ chaˈ lacua, liñi tyucui̱i̱ nxñi naˈ chaˈ jyacua naˈ jiˈi̱ nu chaˈ tlyu biˈ, chaˈ biˈ laca nu cua nguaˈni choˈo ycuiˈ Ndyosi cuentya jiˈna ca su ntucua ycuiˈ Ni. Taca caja chaˈ biˈ jiˈna ca liˈ, xquiˈya chaˈ cua ngua stuˈba chaˈ jiˈna loˈo Jesucristo.
\p
\v 15 Tsoˈo tsa si la cuiˈ juaˈa̱ culacua tiˈ ca taˈa na nu cua ngusñi tsoˈo na chaˈ jiˈi̱ Jesús; ycuiˈ Ndyosi laca nu culuˈu liñi la jiˈi̱ ma̱ liˈ, si ntsuˈu nguˈ tyaˈa ma̱ nu nclyacua tiˈ xi xaˈ la chaˈ.
\v 16 Tsoˈo lacua, tya cuaˈni la na la cuiˈ tyaˈa chaˈ, ñiˈya̱ nu ngua cuayáˈ tsoˈo tiˈ na tya clyo.
\p
\v 17 Cuˈma̱ nguˈ tyaˈa ngusñi na chaˈ jiˈi̱ Jesús, tsoˈo si cuaˈni ma̱ tsa ñaˈa̱ chaˈ nu cua naˈa̱ ma̱ ˈna chaˈ nduˈni naˈ. La cuiˈ juaˈa̱ cuiˈya tsoˈo ma̱ cuentya ñiˈya̱ nu ndyuˈni xaˈ la nguˈ tyaˈa na, nu nduˈni ñiˈya̱ nu nduˈni ti cuare, chaˈ juaˈa̱ cuaˈni ma̱.
\v 18 Cua tyu̱u̱ tsa quiyaˈ cua nda ya la cuiˈ chaˈ re loˈo cuˈma̱, loˈo juani chcuiˈ naˈ chaca quiyaˈ loˈo ma̱, masi xñiˈi̱ tsa tiˈ naˈ chcuiˈ naˈ ndiˈya̱: Ntsuˈu tsa nguˈ tyaˈa cusu̱u̱ Cristo, masi cua ngujuii yu lo crusi cuentya jiˈi̱ nguˈ; tyaˈa cusu̱u̱ Cristo laca nguˈ biˈ, chaˈ ntsuˈu tsa chaˈ cuxi nu nduˈni nguˈ lcaa seˈi̱ su ndyaˈa̱ nguˈ.
\v 19 Ngaˈa̱ chaˈ tyaa nguˈ biˈ ca chalyuu talya nu loˈo cajaa nguˈ, xquiˈya chaˈ sca ndyosi cuiñi ntsuˈu jiˈi̱ nguˈ biˈ; cua ñaˈa̱ ca na nu ndacui tsa tiˈ nguˈ jiˈi̱ chaˈ caja jiˈi̱ nguˈ nde chalyuu, biˈ laca ndyosi jiˈi̱ nguˈ biˈ. Loˈo juaˈa̱ tyixi tsa nduˈni nguˈ loˈo tyaˈa nguˈ, masi ngaˈa̱ chaˈ ca tyujuˈu tsa tiˈ nguˈ; xcuiˈ ntsuˈu tyiquee nguˈ jiˈi̱ cua ñaˈa̱ ca na nu ntsuˈu nde chalyuu.
\v 20 Pana nu na ni, ca su ntucua ycuiˈ Ndyosi tsiyaˈ ti, ca ndacua ntsuˈu quichi̱ tyi na nu chañi ca. Loˈo juani chaa tsa tiˈ na ntajatya na jiˈi̱ Jesucristo nu Xuˈna na, ni jacuaˈ tyuˈu Ni nde cua̱ su ntsuˈu quichi̱ nu ca tyi na, chaˈ ca̱quiˈya Ni jiˈna nde chalyuu, chaˈ cuaˈni lyaá lyiji Ni jiˈna.
\v 21 Xcutsaˈa̱ Ni jiˈi̱ tyucui ñaˈa̱ na liˈ, chaˈ caca na ñiˈya̱ laca ycuiˈ Ni. Quicha ti tiˈ tyucui ñaˈa̱ na juani, pana ycuiˈ Ndyosi ni, tsoˈo tsa ñaˈa̱ tyucui ñaˈa̱ Ni; la cuiˈ juaˈa̱ caca tyucui ñaˈa̱ na nde loo la liˈ. Taca jiˈi̱ Ni culo Ni cña jiˈi̱ lcaa lo na nu ntsuˈu chalyuu, loˈo juaˈa̱ taca jiˈi̱ Ni xcutsaˈa̱ Ni jiˈi̱ tyucui ñaˈa̱ na tsiyaˈ ti.
\c 4
\s Lcaa tsa̱ caca chaa tiˈ na xquiˈya ycuiˈ nu Xuˈna na 
\p
\v 1 Cuˈma̱ tyaˈa ngusñi na chaˈ jiˈi̱ Jesús, tyacaˈa tsa cuˈma̱ ˈna; ñati̱ nu cua nda ycuiˈ Ndyosi jnaˈ laca cuˈma̱, xquiˈya chaˈ ndyuˈni naˈ cña jiˈi̱ Ni. Tsoˈo tsa ntsuˈu tyiquee naˈ xquiˈya cuˈma̱, loˈo juaˈa̱ xñiˈi̱ xi tiˈ naˈ loˈo ná ndiˈi̱ naˈ ca slo cuˈma̱. Ngaˈa̱ chaˈ cuaˈni ma̱ chaˈ tyanu tsoˈo chaˈ jiˈi̱ ycuiˈ nu Xuˈna na neˈ cresiya jiˈi̱ ma̱.
\p
\v 2 Loˈo cuˈma̱ maˈ Evodia loˈo maˈ Síntique ni, cuiˈya ma̱ chaˈ clyu tiˈ ˈna, cuaˈni ma̱ chaˈ stuˈba ti tyuˈu tyiquee ma̱ loˈo tyaˈa ma̱. Nguˈ tyaˈa na laca ma̱ xquiˈya nu Xuˈna na, biˈ chaˈ cuaˈni ma̱ chaˈ cati̱ chaˈ cusu̱u̱ nu ntsuˈu jiˈi̱ ma̱ loˈo tyaˈa ma̱.
\v 3 Loˈo nuˈu̱ nu tsoˈo tsa tyaˈa ndyaˈa̱ na cña, cua ntiˈ naˈ chaˈ xtyucua nuˈu̱ jiˈi̱ tyucuaa maˈ cusuˈ biˈ, chaˈ taca ca tsoˈo tyiquee nguˈ biˈ loˈo tyaˈa nguˈ. Tyucuaa maˈ cusuˈ biˈ cua nguaˈni tsa nguˈ cña chaˈ cañi la chaˈ tsoˈo jiˈi̱ Jesús nquichaˈ; stuˈba ti nguaˈni nguˈ biˈ cña loˈo naˈ, loˈo Clemente, loˈo xaˈ la nguˈ tyaˈa ndyaˈa̱ ya cña. Cua nscua xtañi lcaa nguˈ biˈ lo quityi jiˈi̱ ycuiˈ Ndyosi, nu nscua xtañi ñati̱ nu caja chalyuu nu ná ngaˈa̱ chaˈ tye jiˈi̱. 
\p
\v 4 Ntiˈ naˈ chaˈ lcaa tsa̱ caca chaa tiˈ ma̱ xquiˈya ycuiˈ nu Xuˈna na; masi tucua quiyaˈ chcuiˈ naˈ chaˈ biˈ loˈo ma̱: Ntiˈ naˈ chaˈ caca chaa tiˈ ma̱.
\v 5 Xcuiˈ cuaˈni tyaˈna tsa tiˈ ma̱ loˈo lcaa ñati̱, chaˈ ca cuayáˈ tiˈ ñati̱ chaˈ juaˈa̱ nduˈni ma̱. Cua ngulala ti ca̱a̱ ycuiˈ nu Xuˈna na chaca quiyaˈ.
\p
\v 6 Ni sca chaˈ ná culacua tsa tiˈ ma̱ jiˈi̱, pana jña ma̱ chaˈ jiˈi̱ ycuiˈ Ndyosi cuentya jiˈi̱ cua ñaˈa̱ ca chaˈ nu tyacua xi jiˈi̱ ma̱. Loˈo juaˈa̱ ta ma̱ xlyaˈbe jiˈi̱ ycuiˈ Ndyosi chaˈ juaˈa̱ ndyaca chaˈ jiˈi̱ ma̱, nu loˈo chcuiˈ ma̱ loˈo ycuiˈ Ni.
\v 7 Loˈo liˈ cuaˈni Ni chaˈ ti̱ ti tyiˈi̱ tyiquee ma̱, masi ná caca cuayáˈ tiˈ ñati̱ chalyuu ni chaˈ laca ma̱ juaˈa̱. Ngaˈaa caˈya chaˈ cuxi hique ma̱ liˈ, ngaˈaa caca cuxi cresiya jiˈi̱ ma̱ liˈ, xquiˈya chaˈ cua ngua stuˈba chaˈ jiˈi̱ ma̱ loˈo Jesucristo.
\s Tyuˈu tyiquee na jiˈi̱ cua ñaˈa̱ ca chaˈ nu tsoˈo laca 
\p
\v 8 Cuˈma̱ tyaˈa ngusñi na chaˈ jiˈi̱ Cristo, ndiˈya̱ ti culacua tiˈ ma̱ tyucui tyempo nu ndiˈi̱ ma̱ chalyuu: Cua ñaˈa̱ ca chaˈ nu chañi tsa chaˈ juaˈa̱ laca, biˈ laca nu ngaˈa̱ chaˈ tyuˈu tyiquee ma̱ jiˈi̱; juaˈa̱ lcaa chaˈ nu cuaˈni chi̱ nguˈ loo, lcaa chaˈ nu liñi ca, lcaa chaˈ su lubii ntsuˈu tyiquee na, lcaa chaˈ nu tsoˈo tsa ñaˈa̱, lcaa chaˈ nu tsoˈo tsa ntiˈ nguˈ ñaˈa̱ nguˈ jiˈi̱, masi lcaa chaˈ tsoˈo biˈ, nu juaˈa̱ tsoˈo tsa nchcuiˈ nguˈ jiˈi̱, biˈ laca nu ngaˈa̱ chaˈ tyuˈu tyiquee ma̱ jiˈi̱.
\v 9 Cuaˈni ma̱ chaˈ tyiˈu tiˈ ma̱ jiˈi̱ lcaa chaˈ nu cua ngua tsaˈa̱ ma̱ ˈna, masi sca chaˈ nu cua ndyuna ma̱ tya loˈo nda naˈ chaˈ loˈo ma̱, masi sca chaˈ nu cua naˈa̱ ma̱ chaˈ ndyuˈni naˈ; biˈ laca chaˈ nu ngaˈa̱ chaˈ cuaˈni ma̱, loˈo liˈ cuaˈni ycuiˈ Ndyosi chaˈ ti̱ ti tyiˈi̱ tyiquee ma̱.
\s Tsoˈo tsa ntsuˈu tyiquee Pablo chaˈ cua ya̱a̱ loˈo nguˈ msta̱ chaˈ xtyucua jiˈi̱
\p
\v 10 Tsoˈo tsa ntsuˈu tyiquee naˈ loˈo naˈa̱ naˈ chaˈ cua ndyalaa msta̱ nu nda cuˈma̱ lijya̱ slo naˈ. Tsoˈo ntiˈ naˈ chaˈ cua ndyiˈu tiˈ ma̱ ˈna chaca quiyaˈ, loˈo juaˈa̱ tsoˈo tsa ntiˈ naˈ chaˈ cua nda ma̱ msta̱ biˈ ˈna xquiˈya ycuiˈ nu Xuˈna na. Jlo tiˈ naˈ chaˈ siˈi na ngujlyaa tiˈ ma̱ ˈna, laca chaˈ ngaˈaa ngujui ñiˈya̱ nu xtyucua ma̱ ˈna tya tsubiˈ la.
\v 11 Ná nacui̱ naˈ chaˈ lyiji tsa chaˈ tsoˈo ˈna, chaˈ tsoˈo tsa ndyaalaˈ tiˈ naˈ loˈo na laca nu ndyiji ti xi ˈna.
\v 12 Ntsuˈu quiyaˈ lyiji tsa chaˈ ˈna, loˈo juaˈa̱ ntsuˈu quiyaˈ quiñaˈa̱ tsa chaˈ tsoˈo ndyiji ˈna; juaˈa̱ ti nguiˈi̱ naˈ, chaˈ cua nguiˈi̱ naˈ chaˈ tyaalaˈ tiˈ naˈ lcaa su tyaˈa̱ naˈ lo cña re. Ná nduˈni chaˈ masi tsoˈo tsa ndyiji na cacu̱, masi ntyuteˈ ti naˈ; masi quiñaˈa̱ tsa na ntsuˈu ˈna, masi xti ti chaˈ, ná ndulo chaˈ biˈ ˈna.
\v 13 Cua nda ycuiˈ Cristo juersa ˈna chaˈ talo naˈ jiˈi̱ cua ñaˈa̱ ca chaˈ, na laca nu tyacua ti xi ˈna.
\v 14 Masi juaˈa̱, tsoˈo tsa ntiˈ naˈ chaˈ cua nguxtyucua ma̱ ˈna laja loˈo ndyacua chaˈ cuxi ˈna ca nde.
\p
\v 15 Cuˈma̱ nguˈ Filipos, cua jlo tiˈ ma̱ ñiˈya̱ ngua loˈo ngutuˈu naˈ nde loyuu su cuentya Macedonia, ndyaˈa̱ naˈ nchcuiˈ naˈ chaˈ jiˈi̱ Jesús loˈo nguˈ biˈ; liˈ sca ti taju cuˈma̱ nu ndyuˈni tlyu ma̱ jiˈi̱ ycuiˈ Ndyosi ca jua, cua ndya ma̱ msta̱ chaˈ caca sca xlyaˈbe ˈna, xquiˈya chaˈ tsoˈo tsa ngua tsaˈa̱ ma̱ chaˈ jiˈi̱ Jesús laja loˈo ngutiˈi̱ naˈ loˈo ma̱.
\v 16 Loˈo juaˈa̱ tyu̱u̱ quiyaˈ cua nda ma̱ sca xlyaˈbe ˈna nu loˈo nguliji xi chaˈ tyiji̱ yuˈu ˈna ca quichi̱ Tesalónica.
\v 17 Ni siˈi chaˈ caja sca chaˈ xlyaˈbe ti ˈna nclyacua tiˈ naˈ, tsoˈo la ntiˈ naˈ si tyanu tsoˈo chaˈ jiˈi̱ ycuiˈ Ndyosi neˈ cresiya jiˈi̱ ma̱.
\v 18 Ndiˈya̱ xacui̱ naˈ chaˈ jiˈi̱ ma̱ juani: Cua quiñaˈa̱ tsa na nda ma̱ ˈna, biˈ chaˈ cua ntiˈ tsa naˈ tya naˈ tsa xlyaˈbe jiˈi̱ ma̱; ngaˈaa ntsuˈu chaca na nu lyiji ˈna tsiyaˈ ti juani, tya loˈo ya̱a̱ yu Epafrodito, ya̱loˈo yu lcaa chaˈ tsoˈo nu cua nda ma̱ ˈna. Ñiˈya̱ laca sca msta̱ nu ndiya tsa tiˈ ycuiˈ Ndyosi jiˈi̱, chaˈ tyixi tsa xtyiˈi nda biˈ nu ndacui lcua ti seˈi̱, juaˈa̱ laca chaˈ tsoˈo nu nda ma̱ ˈna cuentya jiˈi̱ ycuiˈ Ndyosi.
\v 19 Tlyu tsa chaˈ tsoˈo ntsuˈu jiˈi̱ ycuiˈ Ni, biˈ chaˈ ta Ni lcaa na nu lyiji chaˈ tyiji̱ yuˈu jiˈi̱ ma̱ chalyuu; cua jlo tiˈ naˈ chaˈ juaˈa̱ nduˈni ycuiˈ nu Xuˈna naˈ loˈo ñati̱ xquiˈya Jesucristo.
\v 20 Tsoˈo si tyucui tyempo cuaˈni tlyu na jiˈi̱ ycuiˈ Ndyosi Sti na lacua. Juaˈa̱ caca tuˈni.
\s Ngusalyaˈ yu loˈo nguˈ
\p
\v 21 Chacuayáˈ jiˈi̱ Jesucristo nda naˈ xlyo niˈi̱ jiˈi̱ lcaa tyaˈa ma̱, ñati̱ jiˈi̱ ycuiˈ Ndyosi cajua; la cuiˈ juaˈa̱ ntiˈ lcaa nguˈ tyaˈa ndyaˈa̱ ya ca nde.
\v 22 Loˈo lcaa nguˈ nu ngusñi chaˈ jiˈi̱ ycuiˈ Ndyosi ca quichi̱ re, juaˈa̱ nguˈ nu ndiˈi̱ ndyuˈni cña ca niˈi̱ tlyu cuentya jiˈi̱ nu xuˈna tlyu nu laca emperador, cua ntiˈ tsa nguˈ chcuichaˈ nguˈ jiˈi̱ ma̱.
\p
\v 23 Cua ntiˈ tsa naˈ chaˈ ñaˈa̱ ti tya cuaˈni la Jesucristo nu Xuˈna na chaˈ tsoˈo loˈo ma̱ tyucui tyempo nu lijya̱ nde loo la. Juaˈa̱ caca tuˈni.