\id COL
\h COLOSENSES
\mt Quityi nu nguscua San Pablo ndyaa ca slo ñati̱ jiˈi̱ Jesucristo nde quichi̱ Colosas
\c 1
\p
\v 1 Pablo laca naˈ nu nscua naˈ quityi re. Ycuiˈ Ndyosi ngulo cña ˈna, biˈ chaˈ ndyaˈa̱ naˈ nchcuiˈ naˈ chaˈ jiˈi̱ Jesucristo loˈo nguˈ xaˈ quichi̱ ca tyijyuˈ la. Stuˈba ti ndiˈi̱ naˈ ca nde loˈo yu Timoteo tyaˈa ngusñi na chaˈ jiˈi̱ Cristo.
\v 2 Nda naˈ quityi re chaˈ ca̱a̱ ca slo cuˈma̱ ca quichi̱ Colosas jua, cuˈma̱ nguˈ nu ntsuˈu chaˈ jiˈi̱ ma̱ loˈo ycuiˈ Ndyosi, cuˈma̱ nu laca ma̱ nguˈ tyaˈa na xquiˈya chaˈ cua ngusñi tsoˈo ma̱ chaˈ jiˈi̱ Cristo.
\p Ndiˈya̱ ntiˈ naˈ, chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱, ca su ndiˈi̱ ma̱ ca jua.
\s Nchcuiˈ Pablo loˈo ycuiˈ Ndyosi cuentya jiˈi̱ nguˈ biˈ 
\p
\v 3 Nu loˈo nchcuiˈ ya loˈo ycuiˈ Ndyosi Sti Jesucristo nu Xuˈna na cuentya jiˈi̱ cuˈma̱, luˈba ti ndya ya xlyaˈbe jiˈi̱ ycuiˈ Ndyosi xquiˈya cuˈma̱.
\v 4 Cua ngujui chaˈ jiˈi̱ ya chaˈ tsoˈo tsa ngusñi ma̱ chaˈ jiˈi̱ Jesucristo, loˈo juaˈa̱ nacui̱ nguˈ chaˈ ntsuˈu tsa tyiquee ma̱ ñaˈa̱ ma̱ jiˈi̱ lcaa nguˈ tyaˈa ngusñi ma̱ chaˈ jiˈi̱ ycuiˈ Ndyosi.
\v 5 Tya clyo loˈo ndyuna ma̱ chaˈ tsoˈo biˈ, chaˈ nu nchcuiˈ jiˈi̱ ycuiˈ Ndyosi nu chañi ca, liˈ ngua cuayáˈ tiˈ ma̱ chaˈ tya ntsuˈu chaca chaˈ nu cua tlyu la nu ngaˈa̱ chaˈ tyacua jiˈna tyempo nde loo la loˈo tyalaa na ca su ntucua ycuiˈ Ndyosi. Ca biˈ ntsuˈu coˈo chaˈ biˈ cuentya jiˈi̱ ma̱; biˈ laca chaˈ nu tyacua jiˈi̱ ma̱ ca tiyaˈ la xquiˈya chaˈ ngusñi ma̱ chaˈ jiˈi̱ Cristo, loˈo juaˈa̱ tsoˈo tsa ntsuˈu tyiquee ma̱ ñaˈa̱ ma̱ jiˈi̱ xaˈ la tyaˈa ñati̱ ma̱.
\v 6 Cua lijya̱ ngañi la chaˈ tsoˈo jiˈi̱ Jesús biˈ tyucui ñaˈa̱ chalyuu, loˈo juaˈa̱ lijya̱ ndyaca tsoˈo la cresiya jiˈi̱ ñati̱ macala su nduna nguˈ chaˈ biˈ. La cuiˈ juaˈa̱ ndyaca tya loˈo ndyuna ma̱ chaˈ biˈ tya clyo; tya liˈ cua ndyuna ma̱ chaˈ nduˈni tsa ycuiˈ Ndyosi chaˈ xlyaˈbe loˈo ñati̱, liˈ ngua cuayáˈ tiˈ ma̱ chaˈ chañi tsa laca chaˈ biˈ.
\v 7 Cua ngujui chaˈ biˈ jiˈi̱ ma̱ loˈo nguluˈu yu Epafras jiˈi̱ ma̱; tsoˈo tsa tyaˈa ndyaˈa̱ ya cña laca yu biˈ. Jlo tiˈ ya chaˈ tsoˈo tsa nchcuiˈ yu chaˈ jiˈi̱ Cristo loˈo nguˈ lcaa su ndyaˈa̱ yu cuentya jiˈi̱ ya.
\v 8 La cuiˈ yu biˈ laca nu nacui̱ jiˈi̱ ya chaˈ nduˈni Xtyiˈi ycuiˈ Ndyosi chaˈ ntsuˈu tsa tyiquee ma̱ ñaˈa̱ ma̱ jiˈi̱ xaˈ la ñati̱.
\p
\v 9 Biˈ chaˈ juani luˈba ti nchcuiˈ ya loˈo ycuiˈ Ndyosi cuentya jiˈi̱ cuˈma̱; tya loˈo ngujui chaˈ jiˈi̱ ya chaˈ cua ngusñi ma̱ chaˈ biˈ, ndijña ya chaˈ jiˈi̱ ycuiˈ Ndyosi chaˈ ta Ni chacuayáˈ chaˈ caca cuayáˈ lyiji tiˈ ma̱ lcaa chaˈ ñiˈya̱ nu ntiˈ Ni chaˈ cuaˈni ma̱, chaˈ juaˈa̱ taca culacua tsoˈo tiˈ ma̱, taca caˈya chaˈ tsoˈo hique ma̱ xquiˈya Xtyiˈi ycuiˈ Ndyosi liˈ. 
\v 10 Loˈo liˈ lcaa tsa̱ loˈo ndyaˈa̱ ma̱ chalyuu taca cuaˈni ma̱ cña, cua ñaˈa̱ ca cña nu ntiˈ ycuiˈ Ndyosi chaˈ cuaˈni ma̱; taca cuaˈni ma̱ lcaa lo cña tsoˈo cuentya jiˈi̱ ycuiˈ Ndyosi liˈ, loˈo juaˈa̱ taca ca cuayáˈ la tiˈ ma̱ ñiˈya̱ ndyuˈu lcaa chaˈ jiˈi̱ Ni. 
\v 11 Nguula tsa cña nduˈni ycuiˈ Ndyosi ca su tlyu ca su ntucua ycuiˈ Ni; biˈ chaˈ cua ndijña naˈ jiˈi̱ Ni chaˈ ta Ni la cuiˈ juersa biˈ jiˈi̱ ma̱, chaˈ caca tsoˈo ti tyiquee ma̱ talo ma̱ jiˈi̱ cua ñaˈa̱ ca chaˈ cuxi nu tyacua jiˈi̱ ma̱.
\v 12 Loˈo juaˈa̱ tya ma̱ xlyaˈbe jiˈi̱ ycuiˈ Ndyosi Sti ma̱ nu cua nda chacuayáˈ chaˈ tyacua chaˈ tsoˈo jiˈi̱ ma̱, la cuiˈ ti chaˈ nu cua nchcoˈo Ni chaˈ tyacua jiˈi̱ ñati̱ jiˈi̱ ycuiˈ Ni, nu loˈo tyalaa nguˈ ca su xee tsa ca su ntucua ycuiˈ Ni.
\v 13 Na cua nguaˈni lyaá Ni jiˈna, cua nguaˈni tye Ni jiˈi̱ chalyuu talya su ngutaˈa̱ na, loˈo juaˈa̱ cua nguluˈu Ni chaca tyucui̱i̱ jiˈna nu tsaa ca chalyuu tsoˈo su laca Cristo loo jiˈna. Sñiˈ ycuiˈ Ndyosi laca Cristo, loˈo juaˈa̱ tyacaˈa tsa yu jiˈi̱ ycuiˈ Ni;
\v 14 xquiˈya Cristo cua ngulaá na jiˈi̱ nu cuxi, xquiˈya Cristo cua ngüiˈya Ni chaˈ clyu tiˈ jiˈna jiˈi̱ quiˈya nu ntsuˈu jiˈna loˈo Ni.
\s Cua nguaalaˈ chaˈ jiˈi̱ ycuiˈ Ndyosi loˈo ñati̱ chalyuu 
\p
\v 15 Ná nchca ñaˈa̱ na jiˈi̱ ycuiˈ Ndyosi tsiyaˈ ti; pana nu loˈo ya̱a̱ Cristo Sñiˈ ycuiˈ Ni chalyuu, liˈ ngujui ñiˈya̱ nu ñaˈa̱ na jiˈi̱ ycuiˈ Ni. La cuiˈ yu biˈ laca nu ngutiˈi̱ tya clyo la loˈo ycuiˈ Ndyosi, la cuiˈ juaˈa̱ laca yu loo jiˈi̱ lcaa lo na nu ngüiñá Ni chalyuu. 
\v 16 Stuˈba ti ndu̱ yu biˈ loˈo ycuiˈ Ndyosi Sti yu loˈo ntucua quiyaˈ ndyaˈ chalyuu, masi loˈo ndyaˈ tyucui ñaˈa̱ nde cua̱, masi loˈo ndyaˈ tyucui ñaˈa̱ nde lo yuu. Cua ngüiñá Ni lcaa na nu nchca ñaˈa̱ na jiˈi̱ nde lo yuu chalyuu; loˈo juaˈa̱ cua ngüiñá Ni lcaa na nu ná nchca ñaˈa̱ na jiˈi̱, ñiˈya̱ ntiˈ lcaa cuiˈi̱ nu laca loo nde cua̱; juaˈa̱ cua ngüiñá Ni lcaa lo xuˈna nu culo cña jiˈi̱ nguˈ, masi nde lo yuu chalyuu, masi nde cua̱. Stuˈba ti ndu̱ Cristo loˈo ycuiˈ Ndyosi Sti yu nu loˈo ngüiñá Ni tyucui ñaˈa̱ chalyuu; la cuiˈ juaˈa̱ xquiˈya yu biˈ, biˈ chaˈ ndyaˈ lcaa lo na.
\v 17 Cua laca ntucua yu biˈ loˈo tya lyiji tyaˈ chalyuu, loˈo juaˈa̱ lcaa tsa̱ nduˈni yu cña chaˈ tyiˈi̱ tsoˈo ti lcaa na nu ntsuˈu lo yuu chalyuu.
\v 18 Ycuiˈ yu laca yu loo jiˈi̱ lcaa taju ñati̱ nu ndyuˈni tlyu jiˈi̱ ycuiˈ Ndyosi tsa tlyu ti, ycuiˈ laca nu nda chalyuu jiˈi̱ nguˈ biˈ. Tya clyo la cua ndyuˈú ycuiˈ yu chaca quiyaˈ loˈo cua ngujuii yu, chaˈ liˈ taca jiˈi̱ yu tyucua yu ca su laca yu loo jiˈi̱ lcaa lo chaˈ.
\v 19 Cua nacui̱ ycuiˈ Ndyosi chaˈ caca Sñiˈ Ni ñiˈya̱ laca ycuiˈ Ni tsiyaˈ ti,
\v 20 chaˈ juaˈa̱ ngua tiˈ Ni cuaˈni Ni, chaˈ chaca quiyaˈ caca Ni loo jiˈi̱ tyucui ñaˈa̱ chalyuu xquiˈya yu biˈ. Cua nguaalaˈ chaˈ jiˈi̱ ycuiˈ Ndyosi loˈo ñati̱ chalyuu loˈo ngujuii Cristo lo crusi xquiˈya na; juaˈa̱ nguaˈni yu chaˈ xaˈ caca tyucui ñaˈa̱ chalyuu cuentya jiˈi̱ ycuiˈ Ndyosi chaca quiyaˈ, masi nde lo yuu chalyuu, masi nde cua̱.
\p
\v 21 Nu ngua cua tsubiˈ la, tyijyuˈ tsa ngutaˈa̱ ma̱ jiˈi̱ ycuiˈ Ndyosi; tyaˈa cusu̱u̱ ma̱ jiˈi̱ ycuiˈ Ndyosi ngua ma̱ tyempo biˈ xquiˈya chaˈ cuxi nu cua ngulacua tiˈ ma̱, xquiˈya chaˈ cuxi nu cua nguaˈni ma̱. Pana juani cua nguaˈni Ni chaˈ taca cati̱ quiˈya nu ntsuˈu jiˈi̱ ma̱ loˈo ycuiˈ Ni,
\v 22 xquiˈya chaˈ tyucui ñaˈa̱ ycuiˈ Cristo Sñiˈ Ni, nchcubeˈ tsa yu loˈo ndyujuii nguˈ jiˈi̱ lo crusi. Juaˈa̱ nguaˈni Ni tya liˈ chaˈ taca caca ma̱ ñati̱ jiˈi̱ ycuiˈ Ni, ñati̱ nu ngaˈaa ntsuˈu yabeˈ hichu̱ˈ ma̱ tsiyaˈ ti, chaˈ ngaˈaa caca sta nguˈ quiˈya jiˈi̱ ma̱ loˈo Ni, nu loˈo ca̱a̱ Ni ca̱quiˈya Ni jiˈna chaˈ tsaloˈo Ni jiˈna ca su ntucua Ni.
\v 23 Pana juani ñaˈa̱ ti ndulo tsa chaˈ jiˈi̱ ma̱ chaˈ tyanu tachaa la chaˈ jiˈi̱ Cristo neˈ cresiya jiˈi̱ ma̱, chaˈ ycuiˈ yu biˈ laca su̱u̱ lcaa chaˈ biˈ. Ná ta ma̱ chacuayáˈ chaˈ cñiloˈo nguˈ jiˈi̱ ma̱, chaˈ si juaˈa̱, ngaˈaa culacua tiˈ ma̱ jiˈi̱ chaˈ tsoˈo nu tyacua jiˈi̱ ma̱ nde loo la, la cuiˈ chaˈ nu cua ndyuna ma̱ jiˈi̱ tya clyo. Xquiˈya chaˈ tsoˈo jiˈi̱ Cristo biˈ, biˈ chaˈ ndyaˈa̱ nguˈ tyucui ñaˈa̱ chalyuu nchcuiˈ nguˈ chaˈ biˈ loˈo ñati̱. Loˈo juaˈa̱ naˈ, Pablo, ndyaˈa̱ tsa naˈ lo cña biˈ.
\s Ndyuˈni Pablo cña cuentya jiˈi̱ ñati̱ nu ngusñi chaˈ jiˈi̱ ycuiˈ Ni ca lcaa quichi̱
\p
\v 24 Tsoˈo ntiˈ naˈ masi cua ngujui xi chaˈ tiˈí ˈna cuentya jiˈi̱ cuˈma̱; tsoˈo ntiˈ naˈ chaˈ cuentya jiˈi̱ ca taˈa taju ñati̱ nu ngusñi chaˈ jiˈi̱ Cristo lcaa quichi̱, biˈ chaˈ ndyacua chaˈ tiˈí biˈ ˈna. Nchcubeˈ tsa Cristo nde chalyuu xquiˈya na, chaˈ laca na ñati̱ jiˈi̱ ycuiˈ yu; juaˈa̱ ndyacua chaˈ tiˈí ˈna, chaˈ cua lijya̱ caca stuˈba la chaˈ jiˈna loˈo ycuiˈ Cristo loˈo chaˈ tiˈí nu ndyaca jiˈna nde chalyuu chaˈ ngusñi na chaˈ jiˈi̱ Cristo.
\v 25 Ycuiˈ Ndyosi laca nu cua nda cña biˈ ˈna, chaˈ caca naˈ cña jiˈi̱ ca taˈa ñati̱ nu ngusñi chaˈ jiˈi̱ Ni lcaa quichi̱, chaˈ nguula la caca tyiquee ma̱. Ngaˈa̱ chaˈ ñaˈa̱ ti tya ta la naˈ chaˈ jiˈi̱ Cristo loˈo xaˈ ñati̱ ñaˈa̱ cuayáˈ nu tye cuna nguˈ chaˈ biˈ.
\v 26 Tyucui tyempo nu ngua saˈni la, ná ngujui ñiˈya̱ nu caca cuayáˈ tiˈ nguˈ chaˈ biˈ; cua ntsuˈu yacu̱ˈ ti chaˈ. Pana juani cua nguluˈu ycuiˈ Ndyosi chaˈ biˈ jiˈi̱ lcaa ñati̱ nu ntsuˈu cuentya jiˈi̱ Ni.
\v 27 Sca chaˈ tlyu nu tsoˈo tsa laca chaˈ biˈ, sca chaˈ nu caja jiˈi̱ lcaa lo ñati̱ chalyuu laca chaˈ jiˈi̱ ycuiˈ Ndyosi biˈ; pana ná ngujui chacuayáˈ chaˈ caca cuayáˈ tiˈ ñati̱ jiˈi̱ ycuiˈ Ndyosi chaˈ biˈ nu ngua cua saˈni la. Ndiˈya̱ ndyuˈu chaˈ biˈ, chaˈ nu bilya cuna nguˈ: Taca tyiˈi̱ Cristo loˈo na nde chalyuu, masi juani ti; loˈo juaˈa̱ tiyaˈ la liˈ taca tyuˈu chaˈ jiˈna loˈo ycuiˈ Ndyosi ca su tlyu su xee tsa ca su ntucua ycuiˈ Ni.
\p
\v 28 Biˈ chaˈ lye tsa nchcuiˈ ya chaˈ jiˈi̱ Cristo loˈo lcaa ñati̱; tsoˈo ti, quiˈi ti nclyuˈu ya chaˈ biˈ jiˈi̱ nguˈ, ndacane ya jiˈi̱ nguˈ chaˈ ngaˈaa cuaˈni nguˈ chaˈ cuxi. Cua ntiˈ tsa ya chaˈ tsoˈo tsa caca tyucui tiˈ tyiquee scaa nguˈ cuentya jiˈi̱ Cristo nu loˈo tyalaa nguˈ ca slo ycuiˈ Ni.
\v 29 Biˈ chaˈ lye tsa ndyuˈni naˈ cña cuentya jiˈi̱ chaˈ biˈ; nguula tsa cña ndyuˈni naˈ, loˈo juaˈa̱ tlyu tsa juersa nda ycuiˈ Cristo ˈna chaˈ tyuˈú neˈ cresiya ˈna, chaˈ talo naˈ cuaˈni naˈ cña biˈ.
\c 2
\p
\v 1 Ta naˈ sca chaˈ loˈo ma̱, chaˈ caca cuayáˈ tiˈ ma̱ chaˈ lye tsa nguaˈni naˈ cña cuentya jiˈi̱ ma̱, loˈo juaˈa̱ cuentya jiˈi̱ nguˈ quichi̱ Laodicea, loˈo juaˈa̱ cuentya jiˈi̱ tyu̱u̱ tyaˈa nguˈ, masi tya lyiji tyuloo nguˈ ˈna.
\v 2 Juaˈa̱ ndyuˈni naˈ cña, chaˈ caca tyucui tiˈ tyiquee nguˈ, chaˈ stuˈba ti caca tyiquee nguˈ loˈo xaˈ la tyaˈa nguˈ. Ngaˈaa cutsi̱i̱ nguˈ nu loˈo chcuiˈ nguˈ chaˈ jiˈi̱ Cristo liˈ, xquiˈya chaˈ tsoˈo tsa nchca cuayáˈ tiˈ nguˈ jiˈi̱ chaˈ biˈ. Juaˈa̱ liˈ quijeloo chaˈ jiˈi̱ nguˈ, chaˈ ycuiˈ Cristo laca chaˈ biˈ, la cuiˈ chaˈ jiˈi̱ ycuiˈ Ndyosi nu bilya caca cuayáˈ tiˈ nguˈ jiˈi̱ cua saˈni la.
\v 3 Xquiˈya chaˈ ngusñi na chaˈ jiˈi̱ Cristo, biˈ chaˈ taca quijeloo chaˈ jiˈna macala su ntucua quiyaˈ lcaa chaˈ nu ntsuˈu tyiquee ycuiˈ Ndyosi, masi lcaa chaˈ nu ndaˈya hique Ni chaˈ cuaˈni Ni nde chalyuu.
\v 4 Cua ntiˈ tsa naˈ chaˈ ná tucui cñiloˈo jiˈi̱ ma̱, masi ntiˈ ma̱ chaˈ tsoˈo tsa nchcuiˈ nguˈ biˈ; biˈ chaˈ laca nchcuiˈ naˈ loˈo cuˈma̱ juaˈa̱.
\v 5 Masi juani ti ná ndiˈi̱ naˈ ca su ndiˈi̱ ma̱, pana luˈba ti ndyiˈu tiˈ naˈ jiˈi̱ cuˈma̱. Tsoˈo tsa ntiˈ naˈ loˈo ndyuna naˈ chaˈ tsoˈo tsa ngusñi ma̱ chaˈ jiˈi̱ Cristo. Loˈo juaˈa̱ tsoˈo tsa ntiˈ naˈ chaˈ tsoˈo ti ndiˈi̱ ma̱ loˈo xaˈ la nguˈ tyaˈa ngusñi ma̱ chaˈ jiˈi̱ ycuiˈ Ndyosi.
\p
\v 6 Na cua ngüiñi tiˈ ma̱ loˈo Jesucristo chaˈ caca Ni nu Xuˈna ma̱, biˈ chaˈ cuiˈya ma̱ cuentya chaˈ stuˈba ti caca tyiquee ma̱ loˈo Ni lcaa tsa̱ loˈo tyiˈi̱ ma̱ chalyuu.
\v 7 Juaˈa̱ xñi tsoˈo ma̱ chaˈ jiˈi̱ Jesús, chaˈ ca cuayáˈ tiˈ ma̱ lcaa chaˈ nu laca su̱u̱ chaˈ biˈ; chaˈ nu Jesús ni, biˈ laca su̱u̱ lcaa chaˈ nu cua ngusñi na, la cuiˈ ti chaˈ nu cua nguluˈu nguˈ jiˈi̱ ma̱ tya tsubiˈ la. Loˈo juaˈa̱ lcaa tsa̱ tya ma̱ xlyaˈbe jiˈi̱ nu Cristo biˈ liˈ.
\s Xquiˈya Cristo cua ngulacua̱ nguˈ
\p
\v 8 Cuiˈya tsoˈo ma̱ cuentya lacua, chaˈ ná tucui taca cñiloˈo jiˈi̱ ma̱ loˈo cua ñaˈa̱ ca chaˈ cuiñi nu chcuiˈ nguˈ loˈo ma̱, masi tajuaˈ tsa chcuiˈ nguˈ biˈ. Siˈi ycuiˈ Cristo nu ntucua quiyaˈ chaˈ jiˈi̱ nguˈ loˈo nchcuiˈ nguˈ juaˈa̱; biˈ laca cña cua̱ ti, biˈ laca chaˈ cuiñi nu nchcuiˈ ñati̱ chalyuu ti, masi nchcuiˈ nguˈ chaˈ jiˈi̱ sca joˈó, masi nchcuiˈ nguˈ chaˈ jiˈi̱ sca cuiˈi̱ nu ntsuˈu nde chalyuu ti.
\p
\v 9 Pana nu Cristo biˈ ni, ñiˈya̱ laca tyucui ñaˈa̱ ycuiˈ Ndyosi, juaˈa̱ laca yu loˈo ya̱a̱ yu nde chalyuu.
\v 10 Ycuiˈ Cristo laca loo jiˈi̱ lcaa nu laca xuˈna na, juaˈa̱ jiˈi̱ lcaa cuiˈi̱ nu laca loo; loˈo cuˈma̱ ni, xquiˈya chaˈ cua ntsuˈu chaˈ jiˈi̱ ma̱ loˈo Cristo, biˈ chaˈ cua ngua tyucui tiˈ tyiquee ma̱, cua ngujui tyucui chalyuu jiˈi̱ ma̱.
\v 11 La cuiˈ juaˈa̱ xquiˈya Cristo cua ngulacua̱ Ni jiˈi̱ ma̱; ni siˈi na ngusiˈyu lo quiji̱ ma̱ loˈo ngulacua̱ ma̱ ñiˈya̱ nu nduˈni nguˈ judío loˈo sñiˈ nguˈ, ycuiˈ Cristo ngulacua̱ jiˈi̱ ma̱ loˈo cua nguaˈni lyaá Ni jiˈi̱ ma̱ jiˈi̱ quiˈya nu ntsuˈu jiˈi̱ ma̱ nde chalyuu.
\v 12 Loˈo cua ntyucuatya ma̱ ni, ñiˈya̱ laca si cua nguatsiˈ ma̱ neˈ cuaá loˈo Cristo, juaˈa̱ laca ma̱ loˈo Cristo; loˈo liˈ ñiˈya̱ si cua ndyuˈú ma̱ stuˈba ti loˈo Cristo chaca quiyaˈ, juaˈa̱ laca chaˈ biˈ liˈ. Ycuiˈ Ndyosi laca nu nduˈni chaˈ tyuˈú ma̱, xquiˈya chaˈ ntsuˈu chaˈ jiˈi̱ ma̱ loˈo Ni.
\v 13 Ñiˈya̱ laca si cua ngujuii ma̱, juaˈa̱ ngua cuˈma̱, xquiˈya chaˈ cua ntsuˈu tsa quiˈya jiˈi̱ ma̱ loˈo ycuiˈ Ndyosi. Loˈo juaˈa̱ ná ngujui ñiˈya̱ nu culacua̱ ycuiˈ Ndyosi jiˈi̱ ma̱ liˈ, xquiˈya chaˈ ná ntsuˈu chaˈ jiˈi̱ ma̱ tsiyaˈ ti loˈo Ni nu ngua tyempo biˈ. Pana juani cua nguaˈni Ni chaˈ tyuˈú ma̱ chaca quiyaˈ ñiˈya̱ nu ndyuˈú ycuiˈ Cristo. Cua ngüiˈya Ni chaˈ clyu tiˈ jiˈna jiˈi̱ lcaa quiˈya nu ntsuˈu jiˈna loˈo Ni.
\v 14 Cua nguaˈni tye Ni chaˈ jiˈi̱ quityi biˈ su nscua lcaa cña nu ngaˈa̱ chaˈ cuaˈni na cuentya jiˈi̱ ycuiˈ Ndyosi. Na cua ndyanu yabeˈ chu̱ˈ na xquiˈya quityi biˈ; pana tya loˈo ngujuiˈi̱ caˈa̱ nguˈ jiˈi̱ Cristo lo crusi, tya liˈ cua ngüityi̱ Ni quiˈya biˈ jiˈna tsiyaˈ ti. 
\v 15 La cuiˈ ti lo crusi biˈ cua ntiji̱loo Cristo jiˈi̱ lcaa nu laca xuˈna na, juaˈa̱ jiˈi̱ lcaa cuiˈi̱ nu laca loo jiˈna. Loˈo nguaˈni chi̱ Ni loo Cristo xquiˈya chaˈ cua ntiji̱loo yu jiˈi̱ lcaa xuˈna na biˈ, liˈ ndyaloˈo Cristo jiˈi̱ xuˈna biˈ laja ñati̱ nu lijya̱ quiˈi ti, chaˈ ñaˈa̱ cuiˈya lcaa ñati̱ chaˈ cua ntiji̱loo Cristo jiˈi̱ lcaa xuˈna biˈ.
\s Tsoˈo tsa laca cua ñaˈa̱ ca chaˈ tsoˈo nu ndyuˈu ca slo ycuiˈ Ndyosi
\p
\v 16 Ngaˈaa ta ma̱ chacuayáˈ chaˈ culo xaˈ ñati̱ cña jiˈi̱ ma̱ lacua, na laca nu cacu ma̱, na laca nu coˈo ma̱ chaˈ cuaˈni tacati ma̱ loˈo ycuiˈ Ndyosi. La cuiˈ juaˈa̱ ná tsoˈo laca si ñacui̱ nguˈ jiˈi̱ ma̱ ni tsa̱ laca nu cuaˈni ma̱ taˈa; masi taˈa loˈo ndiˈi̱ cñaˈ na nu ndacui snuˈ tsa̱ ti, masi taˈa loˈo cuañiˈ coˈ, masi chaca taˈa nu nduˈni nguˈ nu ndacui yija̱ ti, ná ntsuˈu chaˈ cuaˈa̱ jyaca̱ ma̱ jiˈi̱ nguˈ biˈ tsiyaˈ ti, ntiˈ naˈ.
\v 17 Saˈni la xcuiˈ ntsuˈu taˈa biˈ nde chalyuu, chaˈ taca ca cuayáˈ tiˈ nguˈ scaa chaˈ nu ngua tiˈ ycuiˈ Ndyosi chcuiˈ loˈo nguˈ nu ngua tya liˈ; pana juani ni, cua ñaa ycuiˈ Cristo chalyuu, biˈ chaˈ ngaˈaa ntiˈ na chaˈ cusuˈ biˈ. Cua naˈa̱ na jiˈi̱ ycuiˈ Cristo, biˈ laca nu chañi ca.
\v 18 Ná cube tiˈ ma̱ jiˈi̱ cua ñaˈa̱ ca ñati̱ nu cuaˈni tyucuaa tiˈ loˈo ma̱, nguˈ nu tacati la nduˈni ycuiˈ nguˈ, ntiˈ nguˈ, chaˈ ndyuˈni tlyu nguˈ jiˈi̱ sca xca̱ nu ntsuˈu jiˈi̱ ycuiˈ Ndyosi ca nde cua̱; siˈi jiˈi̱ ycuiˈ Ndyosi ndyuˈni tlyu nguˈ biˈ. Ñati̱ nu nduˈni juaˈa̱ ni, ntiˈ nguˈ chaˈ xaˈ la chaˈ jiˈi̱ ycuiˈ Ndyosi cua nguluˈuloo jiˈi̱ nguˈ. Lye tsa nduˈni tyucuaa tiˈ nguˈ biˈ loˈo tyaˈa nguˈ, masi ná ntsuˈu chaˈ cuaˈni nguˈ biˈ juaˈa̱, chaˈ ñaˈa̱ ti tya ntsuˈu chaˈ cuxi neˈ cresiya jiˈi̱ nguˈ biˈ;
\v 19 ngaˈaa ndaquiyaˈ nguˈ biˈ jiˈi̱ Cristo nu laca loo la jiˈna. Cristo laca loo jiˈi̱ lcaa taju ñati̱ nu nduˈni tlyu jiˈi̱ ycuiˈ Ndyosi tsa tlyu ti; biˈ chaˈ tsoˈo tsa stuˈba chaˈ jiˈna loˈo xaˈ la tyaˈa ñati̱ na, biˈ chaˈ tsoˈo la ndyanu tachaa chaˈ jiˈna loˈo Ni, chaˈ quiñaˈa̱ la cña ndyuˈni Cristo neˈ cresiya jiˈi̱ ñati̱ jiˈi̱ Ni, tsa ñaˈa̱ nu ntiˈ ycuiˈ Ndyosi chaˈ caca.
\p
\v 20 Pana cuˈma̱ ni, cua nguxtyanu ma̱ jiˈi̱ xaˈ la joˈó nu ngua xuˈna ma̱ cua tsubiˈ la, cua nguxtyanu ma̱ jiˈi̱ lcaa chaˈ nu jlya tsa tiˈ ñati̱ chalyuu jiˈi̱. Tya loˈo ngujuii Cristo lo crusi chaˈ cuaˈni tye jiˈi̱ chaˈ biˈ, tya liˈ cua nguxtyanu ma̱ jiˈi̱ chaˈ biˈ. Ngaˈaa ntiˈ chaˈ tya cuaˈni ma̱ ñiˈya̱ nu nduˈni xaˈ la ñati̱ chalyuu; ngaˈaa ntiˈ chaˈ taquiyaˈ ma̱ jiˈi̱ lcaa xaˈ la cña nu nclyo nguˈ jiˈi̱ ma̱,
\v 21 nu loˈo ñacui̱ nguˈ ndiˈya̱: “Tacati tsa nu cua. Ná calaˈ ma̱ jiˈi̱, ná cacu ma̱ jiˈi̱”, nacui̱ nguˈ.
\v 22 Lcaa na biˈ ni, na culiji ti laca na biˈ; yaˈ nu cua nguliji biˈ, ngaˈaa ñaˈa̱ na jiˈi̱ liˈ. Nu loˈo nchcuiˈ nguˈ juaˈa̱, sca cña nu ndyuˈni ñati̱ chalyuu ti laca biˈ.
\v 23 Chañi laca chaˈ tsoˈo tsa ndyuˈu chaˈ biˈ ngua tiˈ na nquichaˈ, ndatsaa tsa chaˈ biˈ jiˈna chaˈ cuaˈni tlyu na jiˈi̱ joˈó biˈ; loˈo juaˈa̱ biˈ laca nu nduˈni tsa chaˈ caca tacati na, chaˈ xcubeˈ na jiˈi̱ tyucui ñaˈa̱ na. Juaˈa̱ nduˈni chaˈ biˈ tuˈni; pana siˈi juaˈa̱ ngaˈa̱ chaˈ caca, nu cati̱ chaˈ cuaˈni na chaˈ cuxi nu tiji̱ˈ tsa tiˈ na jiˈi̱.
\c 3
\p
\v 1 Pana cuˈma̱ ni, cua ngujui chaca chalyuu cucui jiˈi̱ ma̱ xquiˈya chaˈ cua ngua stuˈba chaˈ jiˈi̱ ma̱ loˈo Cristo; biˈ chaˈ lacua, xcuiˈ na tyuˈu tyiquee ma̱ jiˈi̱ cua ñaˈa̱ ca chaˈ tsoˈo nu ndyuˈu jiˈi̱ Cristo lijya̱, chaˈ ntucua Cristo nde laˈa tsuˈ cui̱ su tlyu su ntucua ycuiˈ Ndyosi.
\v 2 Cuaˈni chaˈ tyanu tachaa chaˈ biˈ tyiquee ma̱, ngaˈaa tyaalaˈ tiˈ ma̱ loˈo cua ñaˈa̱ ca chaˈ cuxi nu ntsuˈu nde chalyuu.
\v 3 Nu juani ni, ngaˈaa ntsuˈu chaˈ jiˈi̱ ma̱ loˈo chaˈ cuxi nu ndyaca nde chalyuu; cua ndyanu tsoˈo chaˈ jiˈi̱ ma̱ loˈo ycuiˈ Ndyosi xquiˈya Cristo.
\v 4 Nu chaca chalyuu cucui nu ngujui jiˈi̱ ma̱ xquiˈya Cristo, biˈ laca chaˈ nu ndulo la chaˈ jiˈi̱ ma̱ juani. Stuˈba ti tyatu̱ na loˈo Cristo tsa̱ biˈ, nu loˈo tyuˈu tucua yu lijya̱ yu chaca quiyaˈ; liˈ taca caca stuˈba chaˈ jiˈi̱ ma̱ loˈo nu Cristo biˈ ca su caca tlyu la ycuiˈ yu, ca su ntucua ycuiˈ Ndyosi.
\s Cua nguxtyanu nguˈ chalyuu cusuˈ jiˈi̱ nguˈ chaˈ juaˈa̱ ngujui chaca chalyuu cucui jiˈi̱ nguˈ
\p
\v 5 Cuaˈni tye ma̱ lcaa chaˈ cuxi nu ndiya tsa tiˈ ma̱ jiˈi̱ lacua: ngaˈaa cuaˈni cuxi ma̱ loˈo clyoˈo xaˈ ñati̱, ngaˈaa cuaˈni ma̱ chaˈ subaˈ loˈo tyaˈa ñati̱ ma̱, ngaˈaa tyacuiˈ tiˈ ma̱ ñaˈa̱ ma̱ jiˈi̱ tyaˈa ñati̱ ma̱, cuaˈni tye ma̱ jiˈi̱ lcaa lo chaˈ cuxi nu ndijña tsa tiˈ tyiquee ma̱ chaˈ cuaˈni ma̱ jiˈi̱, ngaˈaa tyacui tiˈ ma̱ jiˈi̱ scaa chaˈ tsoˈo nu ntsuˈu chalyuu. Sca na nu ndacui tiˈ na jiˈi̱ ni, stuˈba ti cuxi laca chaˈ biˈ ñiˈya̱ ntiˈ si cuaˈni tlyu na jiˈi̱ sca lcui̱ joˈó ti;
\v 6 nchca ñasi̱ˈ tsa ycuiˈ Ndyosi loˈo ñati̱ nu nduˈni chaˈ cuxi juaˈa̱.
\v 7 La cuiˈ tyaˈa chaˈ cuxi biˈ cua nguaˈni ma̱ lcaa su ndyaˈa̱ ma̱ nu ngua cua tsubiˈ la,
\v 8 pana juani ngaˈa̱ chaˈ xtyanu ma̱ jiˈi̱ lcaa chaˈ cuxi biˈ; masi nchca ñasi̱ˈ tsa ma̱ cua saˈni la, masi luˈba ti nxuˈba ñasi̱ˈ ma̱ jiˈi̱ ycuiˈ ca ma̱ tya liˈ, masi liyeˈ tiˈ ma̱ jiˈi̱ tyaˈa ñati̱ ma̱ tya tsubiˈ la, pana ngaˈaa cuaˈni ma̱ juaˈa̱ juani. La cuiˈ juaˈa̱ ngaˈaa chcuiˈ ma̱ cuentyu jiˈi̱ tyaˈa ñati̱ ma̱, ngaˈaa chcuiˈ subaˈ ma̱ loˈo nguˈ,
\v 9 ngaˈaa ta ma̱ chaˈ cuiñi loˈo tyaˈa ma̱; na cua nguxtyanu ma̱ jiˈi̱ chalyuu cusuˈ jiˈi̱ ma̱, juaˈa̱ cua nguxtyanu ma̱ jiˈi̱ lcaa chaˈ cuxi nu nguaˈni ma̱ tya tsubiˈ la,
\v 10 chaˈ juani cua ngujui chaca chalyuu cucui jiˈi̱ ma̱. Chaca lo ñati̱ cua laca ma̱ juani; cua nguxcutsaˈa̱ ycuiˈ Ndyosi lcaa chaˈ nu ntsuˈu neˈ cresiya jiˈi̱ ma̱ juani, chaˈ juaˈa̱ caca ma̱ ñiˈya̱ nu laca ycuiˈ Ni, nu loˈo ndyaca tsaˈa̱ lyiji ma̱ lcaa chaˈ nu ntsuˈu jiˈi̱ ycuiˈ Ni.
\v 11 Biˈ chaˈ juani ngaˈaa ndulo tsa chaˈ jiˈna loˈo tyaˈa na, masi la cuiˈ nguˈ judío laca na, masi siˈi nguˈ judío laca ma̱; ngaˈaa nduˈni chaˈ masi cua ngulacua̱ na, masi ná ngulacua̱ na; ngaˈaa nduˈni chaˈ si nguˈ xaˈ tsuˈ laca na, masi nguˈ tyaala laca na, masi nguˈ nu ndiˈi̱ tsoˈo ti laca na, masi msu nu ngüiˈya ti ñati̱ laca ma̱ chaˈ cuaˈni ma̱ cña jiˈi̱ ñati̱ laja ti. Ngaˈaa ndulo tsa chaˈ biˈ jiˈna juani, chaˈ sca ti Cristo laca nu ndulo tsa chaˈ jiˈi̱ cuentya jiˈna. Ndiˈi̱ Cristo loˈo lcaa ñati̱ jiˈi̱ Ni, ñiˈya̱ nu laca nguˈ, macala su ndiˈi̱ nguˈ.
\p
\v 12 Ñati̱ jiˈi̱ ycuiˈ Ndyosi laca cuˈma̱ lacua; na cua ngusubi Ni jiˈi̱ ma̱, xquiˈya chaˈ ntsuˈu tsa tyiquee Ni ñaˈa̱ Ni jiˈi̱ ma̱. Biˈ chaˈ ntsuˈu chaˈ cuaˈni tyaˈna tiˈ ma̱ jiˈi̱ xaˈ ñati̱; tsoˈo ti cuaˈni ma̱ loˈo nguˈ, ni ná cuaˈni tyucuaa tiˈ ma̱ loˈo nguˈ, masi tiyaˈ ti chcuiˈ ma̱ loˈo nguˈ, juaˈa̱ talo tsa tyiquee ma̱ jiˈi̱ nguˈ.
\v 13 Talo tyiquee ma̱ jiˈi̱ xaˈ la tyaˈa ñati̱ ma̱ lacua, ñaˈa̱ cuayáˈ nu cuiˈya ma̱ chaˈ clyu tiˈ jiˈi̱ nguˈ loˈo ntsuˈu quiˈya jiˈi̱ nguˈ loˈo ma̱. Tsa ñaˈa̱ nu ndyiˈya nu Xuˈna na chaˈ clyu tiˈ jiˈi̱ ma̱, juaˈa̱ ngaˈa̱ chaˈ cuaˈni clyu tiˈ ma̱ jiˈi̱ tyaˈa ñati̱ ma̱. 
\v 14 La cuiˈ juaˈa̱ tsoˈo tsa caca tyiquee ma̱ ñaˈa̱ ma̱ jiˈi̱ xaˈ la tyaˈa ñati̱ ma̱, chaˈ juaˈa̱ stuˈba tsa caca chaˈ jiˈi̱ ma̱ loˈo nguˈ liˈ.
\v 15 Ti̱ ti tyiˈi̱ tyiquee ma̱ lacua, xquiˈya chaˈ ycuiˈ Ndyosi laca loo jiˈi̱ ma̱; cua ngusubi Ni jiˈi̱ ma̱, juaˈa̱ jiˈi̱ xaˈ la tyaˈa ñati̱ ma̱, chaˈ caca ma̱ sca ti taju ñati̱ cuentya jiˈi̱ ycuiˈ Ni. Tsoˈo si lcaa hora tya ma̱ xlyaˈbe jiˈi̱ ycuiˈ Ni xquiˈya lcaa lo chaˈ.
\p
\v 16 Ngaˈa̱ chaˈ tyanu tyucui chaˈ jiˈi̱ Cristo ca neˈ cresiya jiˈi̱ ma̱. Tsoˈo tsa ndyuˈu chaˈ biˈ, biˈ chaˈ tsoˈo ti culuˈu ma̱ chaˈ biˈ jiˈi̱ tyaˈa ma̱ ñaˈa̱ cuayáˈ nu cuna tsoˈo lcaa nguˈ. La cuiˈ juaˈa̱ cula tuˈba ma̱ lcaa lo ji̱i̱ nu ntsuˈu jiˈi̱ ycuiˈ Ndyosi, masi ji̱i̱ salmo nu nscua lo quityi nu ngua saˈni, masi cua ñaˈa̱ ca ji̱i̱ nu caˈya hique ma̱ nu nchcuiˈ chaˈ jiˈi̱ ycuiˈ Ndyosi; cula tuˈba ma̱ ji̱i̱ chaˈ cuna ycuiˈ Ndyosi, xquiˈya chaˈ tsoˈo tsa ntsuˈu tyiquee ma̱ ñaˈa̱ ma̱ jiˈi̱ ycuiˈ Ni.
\v 17 Lcaa ñaˈa̱ cña nu ntiˈ ma̱ chaˈ cuaˈni ma̱, lcaa ñaˈa̱ chaˈ nu ntiˈ ma̱ chcuiˈ ma̱ loˈo ñati̱, chacuayáˈ jiˈi̱ Jesús nu Xuˈna na cuaˈni ma̱ jiˈi̱ lacua. Loˈo juaˈa̱ la cuiˈ hora biˈ tya ma̱ xlyaˈbe jiˈi̱ ycuiˈ Ndyosi Sti na xquiˈya Jesús.
\s Chaˈ tsoˈo nu cuaˈni na loˈo laca Cristo loo jiˈna
\p
\v 18 Cuˈma̱ nguˈ cunaˈa̱ ni, taquiyaˈ ma̱ jiˈi̱ clyoˈo ma̱. Ndulo tsa chaˈ jiˈi̱ ma̱ chaˈ cuaˈni ma̱ juaˈa̱, chaˈ cua ntsuˈu chaˈ jiˈi̱ ma̱ loˈo Cristo nu Xuˈna na. 
\v 19 Cuˈma̱ nguˈ quiˈyu ni, caca tsoˈo tyiquee ma̱ ñaˈa̱ ma̱ jiˈi̱ clyoˈo ma̱; ná cuaˈni tyaala ma̱ jiˈi̱ clyoˈo ma̱.
\v 20 Cuˈma̱ nguˈ cuañiˈ ni, ngaˈa̱ chaˈ taquiyaˈ ma̱ cña nu culo nguˈ cusuˈ jiˈi̱ ma̱, chaˈ tsoˈo tsa ntiˈ nu Xuˈna na loˈo nduˈni ma̱ juaˈa̱.
\v 21 Cuˈma̱ nguˈ cusuˈ nu ntsuˈu sñiˈ ma̱ ni, ná suˈba ñasi̱ˈ ma̱ jiˈi̱ sñiˈ ma̱, chaˈ ná tsoˈo si caca taja tiˈ nguˈ biˈ xquiˈya ma̱.
\v 22 Cuˈma̱ nguˈ msu nu ndyuˈni cña jiˈi̱ nguˈ laja ti, taquiyaˈ ma̱ lcaa cña nu culo ñati̱ nu laca loo jiˈi̱ ma̱ nde chalyuu. Siˈi na cuaˈni ti ma̱ juaˈa̱ chaˈ tyanu tsoˈo chaˈ jiˈi̱ ma̱ loˈo nguˈ loˈo ndu̱ ti nguˈ slo ma̱, chaˈ ndyiˈya nguˈ cuentya jiˈi̱ ma̱ si nduˈni ma̱ cña; pana tyucui tyiquee ma̱ cuaˈni ma̱ cña biˈ, xquiˈya chaˈ lcaa hora ndube tiˈ ma̱ jiˈi̱ ycuiˈ nu Xuˈna na.
\v 23 Cua ñaˈa̱ ca cña nu cuaˈni ma̱, lubii tsa cña cuaˈni ma̱ liˈ. Ndiˈya̱ culacua tiˈ ma̱: ñiˈya̱ laca si cña jiˈi̱ ycuiˈ Ndyosi nu Xuˈna na laca nu ndyuˈni ma̱, ngaˈaa siˈi cña jiˈi̱ ñati̱ chalyuu ti.
\v 24 Cua jlo tiˈ ma̱ chaˈ ycuiˈ nu Xuˈna na laca nu nguxcoˈo chaˈ tsoˈo nu tyacua jiˈi̱ scaa ma̱ loˈo cua tye ti chaˈ. Cristo laca nu Xuˈna ma̱ nu chañi ca; cuentya jiˈi̱ ycuiˈ Cristo biˈ, biˈ chaˈ ndyuˈni ma̱ cña.
\v 25 Pana xcubeˈ ycuiˈ Ndyosi jiˈi̱ cua ñaˈa̱ ca ñati̱ nu nduˈni chaˈ cuxi; stuˈba ti nduˈni cuayáˈ Ni jiˈi̱ lcua ti ñaˈa̱ ñati̱, masi ñati̱ tonu, masi ñati̱ sube. 
\c 4
\p
\v 1 Cuˈma̱ nguˈ xuˈna msu, lcaa chaˈ nu ndyaca jiˈi̱ ma̱ loˈo nguˈ msu jiˈi̱ ma̱, cuaˈni liñi ma̱ chaˈ biˈ; tsoˈo ti cuaˈni ma̱ loˈo nguˈ biˈ. Tyiˈu tiˈ ma̱ chaˈ loˈo cuˈma̱, ntsuˈu nu laca loo la jiˈi̱ ma̱, ntucua nu biˈ ca su tlyu ca su ntucua ycuiˈ Ndyosi.
\p
\v 2 Lcaa cuˈma̱, ná ca taja tiˈ ma̱, lcaa tsa̱ chcuiˈ ma̱ loˈo ycuiˈ Ndyosi. Loˈo juaˈa̱ tii ti ma̱ tyiˈi̱ ma̱ loˈo chcuiˈ ma̱ loˈo Ni, juaˈa̱ ta ma̱ xlyaˈbe jiˈi̱ Ni loˈo chcuiˈ ma̱ loˈo Ni.
\v 3 La cuiˈ tyempo biˈ jña ma̱ chaˈ clyu tiˈ jiˈi̱ ycuiˈ Ndyosi cuentya jiˈi̱ ya chaˈ caja la juersa jiˈi̱ ya, chaˈ chcuiˈ ya chaˈ tsoˈo jiˈi̱ Cristo loˈo xaˈ la ñati̱, chaˈ cuna nguˈ chaˈ biˈ masi bilya caja ñiˈya̱ nu cuna nguˈ chaˈ biˈ yala la; xquiˈya chaˈ cua nchcuiˈ tsa naˈ loˈo nguˈ juaˈa̱, biˈ chaˈ ntsuˈu naˈ neˈ chcua̱ juani.
\v 4 Pana chcuiˈ ma̱ loˈo ycuiˈ Ndyosi lacua, chaˈ xtyucua Ni ˈna chaˈ tya chcuiˈ liñi naˈ jiˈi̱ lcaa chaˈ biˈ, ñiˈya̱ nu ngaˈa̱ chaˈ chcuiˈ naˈ jiˈi̱.
\p
\v 5 Tii ti tiˈ ma̱ tyiˈi̱ ma̱ slo xaˈ ñati̱ nu bilya xñi chaˈ jiˈi̱ Jesucristo; ná cuaˈni ma̱ chaˈ tonto slo nguˈ biˈ, chaˈ juaˈa̱ lcaa quiyaˈ loˈo ta nguˈ tyempo chaˈ chcuiˈ ma̱ loˈo nguˈ, liˈ tsoˈo tsa ta ma̱ chaˈ jiˈi̱ Jesús loˈo nguˈ.
\v 6 Laja loˈo nchcuiˈ ma̱ loˈo nguˈ ni, tsoˈo ti chcuiˈ ma̱ ñaˈa̱ cuayáˈ nu cuaˈa̱ jyaca̱ nguˈ jiˈi̱ chaˈ nu nchcuiˈ ma̱; tsoˈo si caja ñiˈya̱ nu xacui̱ ma̱ chaˈ jiˈi̱ lcaa nguˈ.
\s Chaˈ nu nchcuiˈ Pablo su cua tye ti quityi re
\p
\v 7 Yu Tíquico tyaˈa na ni, ta yu chaˈ loˈo ma̱, lcaa chaˈ ñiˈya̱ nu ndyaca jnaˈ ca nde. Ntsuˈu tsa tyiquee na ñaˈa̱ na jiˈi̱ yu biˈ, loˈo la cuiˈ juaˈa̱ tyaˈa ndyuˈni ya cña jiˈi̱ nu Xuˈna na laca yu; lcaa tsa̱ ndyuˈni yu cña biˈ, ná nchca taja tiˈ yu jiˈi̱.
\v 8 Biˈ chaˈ nda naˈ jiˈi̱ yu chaˈ ca̱a̱ yu ca su ndiˈi̱ ma̱, chaˈ ca chaa tiˈ ma̱ chaca quiyaˈ loˈo ñaˈa̱ ma̱ jiˈi̱ yu; ntiˈ naˈ chaˈ cachaˈ yu jiˈi̱ ma̱ ñiˈya̱ nu ndyaca jiˈi̱ lcaa tyaˈa ya su ndiˈi̱ ya ca nde. 
\v 9 Stuˈba ti ca̱a̱ yu loˈo Onésimo tyaˈa quichi̱ tyi ma̱; na tyacaˈa tsa nu Onésimo biˈ jiˈi̱ ya, xquiˈya chaˈ ná nchca taja tiˈ yu nchcuiˈ yu chaˈ jiˈi̱ nu Xuˈna na. Tyucuaa nguˈ biˈ, ta nguˈ chaˈ loˈo ma̱ ñiˈya̱ nu ndyaca lcaa chaˈ ca su ndiˈi̱ ya ca nde.
\p
\v 10 Aristarco tyaˈa ntsuˈu naˈ neˈ chcua̱, loˈo yu nda yu xlyo niˈi̱ jiˈi̱ ma̱; la cuiˈ juaˈa̱ chaˈ nda Marcos tyaˈa Bernabé. (Tya tsubiˈ la cua nda naˈ sca chaˈ nu ndyaa ca slo cuˈma̱ cuentya jiˈi̱ nu Marcos biˈ, chaˈ tsoˈo ti chcuiˈ ma̱ loˈo yu nu loˈo tyalaa yu slo ma̱). 
\v 11 Loˈo juaˈa̱ Jesús nu laca xtañi Justo, cua ntiˈ yu chcuichaˈ yu jiˈi̱ ma̱. Tyu̱u̱ tyaˈa nguˈ judío cua ngusñi chaˈ jiˈi̱ Cristo nquichaˈ; pana nu sna tyaˈa ti nguˈ biˈ ni, Aristarco loˈo Marcos loˈo Justo, tsa biˈ ti nguˈ ntajaˈa̱ tyaˈa̱ loˈo naˈ ca su ndyaˈa̱ naˈ nchcuiˈ naˈ loˈo xaˈ la ñati̱ ñiˈya̱ caca chaˈ loˈo caca ycuiˈ Ndyosi loo neˈ cresiya jiˈi̱ ñati̱. Loˈo juaˈa̱ cua nxtyucua tsa nguˈ biˈ ˈna.
\v 12 Loˈo yu Epafras tyaˈa quichi̱ tyi ma̱, nda yu xlyo niˈi̱ jiˈi̱ ma̱; stuˈba ti ndyaˈa̱ yu lo cña jiˈi̱ Jesucristo loˈo ya. Lcaa tsa̱ ndijña tsa yu chaˈ clyu tiˈ jiˈi̱ ycuiˈ Ndyosi cuentya jiˈi̱ cuˈma̱, ndijña yu chacuayáˈ jiˈi̱ ycuiˈ Ni chaˈ ná tyaˈa̱chu̱ˈ ma̱ tsiyaˈ ti chaˈ jiˈi̱ Ni. Ndiˈya̱ ntiˈ yu, chaˈ tyucui tyiquee ma̱ tsiyaˈ ti cuaˈni ma̱ na laca nu ntiˈ Ni chaˈ cuaˈni ma̱ nde lo yuu chalyuu.
\v 13 Jlo tiˈ naˈ chaˈ lye tsa nguaˈni yu cña chaˈ xtyucua yu jiˈi̱ cuˈma̱, juaˈa̱ jiˈi̱ nguˈ quichi̱ Laodicea, juaˈa̱ jiˈi̱ nguˈ quichi̱ Hierápolis tyaˈa ngusñi na chaˈ jiˈi̱ Cristo.
\v 14 Loˈo Lucas tyaˈa tsoˈo na nu ndyuˈni joˈo jiˈi̱ nguˈ, loˈo juaˈa̱ Demas, nda nguˈ xlyo niˈi̱ jiˈi̱ ma̱.
\p
\v 15 Loˈo juaˈa̱ ta ma̱ xlyo niˈi̱ jiˈi̱ nguˈ tyaˈa ngusñi na chaˈ jiˈi̱ Cristo nde quichi̱ Laodicea, loˈo juaˈa̱ jiˈi̱ maˈ Ninfas loˈo lcaa nguˈ tyaˈa na nu ndyuˈu tiˈi̱ ca slo maˈ cusuˈ biˈ.
\v 16 Chcuiˈ ma̱ lo quityi re clyo, loˈo liˈ tya ta ma̱ quityi re tsaa ca slo nguˈ Laodicea tyaˈa nduˈni tlyu na jiˈi̱ ycuiˈ Ndyosi. La cuiˈ juaˈa̱ ndulo tsa chaˈ jiˈi̱ ma̱ chaˈ chcuiˈ ma̱ lo chaca quityi nu nda naˈ chaˈ ndyalaa slo nguˈ Laodicea biˈ.
\v 17 Ndiˈya̱ chcuiˈ ma̱ loˈo yu Arquipo tyaˈa na: “Cua nguaˈa̱ lo ycuiˈ nu Xuˈna na jinuˈu̱ chaˈ cuaˈni nuˈu̱ cña biˈ cuentya jiˈi̱ ycuiˈ Ni”, ñacui̱ ma̱ jiˈi̱ yu, “biˈ chaˈ juani cuaˈni cña tiˈ nuˈu̱ chaˈ caca tsoˈo cña biˈ”. 
\p
\v 18 Su cua ndye quityi re, nde laca sca chaˈ nu cua nscua naˈ loˈo yaˈ ycuiˈ ti naˈ: Pablo laca naˈ, nda naˈ xlyo niˈi̱ jiˈi̱ ma̱; tyiˈu tiˈ ma̱ jnaˈ chaˈ ntsuˈu naˈ neˈ chcua̱ juani. Loˈo juaˈa̱ tya cuaˈni la ycuiˈ Ndyosi chaˈ xlyaˈbe loˈo ma̱ tyucui tyempo nu lijya̱ nde loo la. Juaˈa̱ caca chaˈ lacua.