\id 1TH
\h 1 TESALONICENSES
\mt Quityi nu nguscua San Pablo ndyaa ca slo ñati̱ jiˈi̱ Jesucristo nde quichi̱ Tesalónica
\c 1
\p
\v 1 Pablo laca naˈ. Loˈo Silvano loˈo Timoteo ndiˈi̱ nguˈ ca nde loˈo naˈ. Nscua ya quityi re chaˈ tsaa slo cuˈma̱, ñaˈa̱ taju ti ma̱ nguˈ quichi̱ Tesalónica nu ntsuˈu chaˈ jiˈi̱ ma̱ loˈo ycuiˈ Ndyosi Sti na, juaˈa̱ ntsuˈu chaˈ jiˈi̱ ma̱ loˈo Jesucristo nu Xuˈna na. Ntiˈ tsa ya chaˈ ñaˈa̱ ti cuaˈni ycuiˈ Ndyosi chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱.
\s Tsoˈo tsa ngusñi nguˈ biˈ chaˈ jiˈi̱ ycuiˈ Ndyosi
\p
\v 2 Lcaa quiyaˈ loˈo nchcuiˈ ya loˈo ycuiˈ Ndyosi cuentya jiˈi̱ cuˈma̱, ndya ya xlyaˈbe jiˈi̱ ycuiˈ Ni liˈ.
\v 3 Ntsuˈu tiˈ ya chaˈ ntsuˈu tsa chaˈ tsoˈo nu ndyuˈni ma̱, chaˈ ntsuˈu tsa tyiquee ma̱ ñaˈa̱ ma̱ jiˈi̱ tyaˈa ma̱, xquiˈya chaˈ ngusñi ma̱ chaˈ jiˈi̱ Jesucristo. Ndalo tsa tyiquee ma̱ xquiˈya chaˈ jlo tiˈ ma̱ chaˈ ntucua Jesucristo nu Xuˈna na ca slo ycuiˈ Ndyosi Sti na; biˈ chaˈ xcuiˈ chaˈ tsoˈo ndyuˈni ma̱, masi tlyu tsa cña.
\v 4 Loˈo juaˈa̱ ntsuˈu tsa tyiquee ycuiˈ Ndyosi ñaˈa̱ Ni jiˈi̱ ma̱. Cuˈma̱ nguˈ tyaˈa ngusñi na chaˈ jiˈi̱ Jesús, jlo tiˈ ya chaˈ cua ngusubi Ni jiˈi̱ ma̱,
\v 5 xquiˈya chaˈ ngusñi ma̱ chaˈ tsoˈo nu cua nchcuiˈ ya loˈo ma̱, la cuiˈ chaˈ tlyu nu nda Xtyiˈi ycuiˈ Ni chaˈ chcuiˈ ya loˈo ma̱; Xtyiˈi ycuiˈ Ndyosi nguaˈni cña laja loˈo nchcuiˈ ya loˈo ma̱, biˈ chaˈ ngusñi ma̱ chaˈ biˈ. Loˈo juaˈa̱ jlo tiˈ ma̱ ñiˈya̱ ngua cña nu nguaˈni ya loˈo ngutiˈi̱ ya ca slo cuˈma̱.
\p
\v 6 Biˈ chaˈ juani ndyuˈni ma̱ cña nu ndyuˈni ya, la cuiˈ tyaˈa cña nu ndyuˈni ycuiˈ nu Xuˈna na. Cua ngusñi ma̱ chaˈ jiˈi̱ ycuiˈ Ni, masi tiˈí tsa tiˈ nguˈ ñaˈa̱ nguˈ jiˈi̱ ma̱; pana tsoˈo tsa ntsuˈu tyiquee ma̱ xquiˈya Xtyiˈi ycuiˈ Ndyosi.
\v 7 Loˈo liˈ naˈa̱ xaˈ la ñati̱ jiˈi̱ Jesucristo ñiˈya̱ ndyuˈni ma̱; biˈ chaˈ juani ndyuˈni nguˈ ñiˈya̱ nu ndyuˈni cuˈma̱, masi ca taˈa nguˈ Macedonia nu ngusñi chaˈ jiˈi̱ ycuiˈ nu Xuˈna na, masi ca taˈa nguˈ Acaya nu ngusñi chaˈ biˈ.
\v 8 Cua ngañi chaˈ jiˈi̱ ycuiˈ nu Xuˈna na nde lcaa quichi̱ xquiˈya cuˈma̱. Siˈi nguˈ Macedonia ti, ni siˈi nguˈ Acaya ti, masi ca taˈa ñati̱ jiˈi̱ Jesucristo, cua ndyuna nguˈ chaˈ biˈ tyucui ñaˈa̱ chalyuu; ngaˈaa ntsuˈu chaˈ ta ya chaˈ loˈo nguˈ biˈ cuentya jiˈi̱ ma̱, chaˈ ngusñi ma̱ chaˈ jiˈi̱ ycuiˈ Ndyosi, chaˈ cua jlo tiˈ nguˈ chaˈ biˈ.
\v 9 La cuiˈ nguˈ biˈ nda nguˈ chaˈ loˈo ya ñiˈya̱ ngua loˈo ndyalaa ya slo ma̱ tya clyo, chaˈ liˈ nguxtyanu ma̱ jiˈi̱ lcua ti lo joˈó nu ntsuˈu jiˈi̱ ma̱ tya saˈni la, chaˈ cuaˈni ma̱ cña jiˈi̱ ycuiˈ Ndyosi nu luˈú ca, nu sca ti Ndyosi nu chañi ca.
\v 10 Loˈo juaˈa̱ nchcuiˈ nguˈ chaˈ juani ndu̱ tiˈ ma̱ ni jacuaˈ tya̱a̱ Jesús nu sca ti Sñiˈ ycuiˈ Ndyosi, nu cua tyuˈu ca su ntucua ycuiˈ Ndyosi chaˈ ca̱a̱ nde chalyuu chaca quiyaˈ. La cuiˈ Jesús nu ngujuii, loˈo liˈ nguaˈni ycuiˈ Ndyosi Sti yu chaˈ ndyuˈú yu chaca quiyaˈ, biˈ laca nu nguaˈni lyaá jiˈna chaˈ ngaˈaa xcubeˈ ycuiˈ Ndyosi jiˈna, ngaˈaa caca ñasi̱ˈ Ni jiˈna loˈo tyalaa tsa̱ biˈ.
\c 2
\s Cña nu nguaˈni Pablo loˈo ngutiˈi̱ yu quichi̱ Tesalónica 
\p
\v 1 Cuˈma̱ nguˈ tyaˈa ngusñi na chaˈ jiˈi̱ Jesús, jlo tiˈ ma̱ chaˈ ná ngunaˈ cña nu nguaˈni ya loˈo ngutiˈi̱ ya slo cuˈma̱.
\v 2 Cua nguaˈni ycuiˈ Ndyosi chaˈ tlyu tyiquee ya, chaˈ nguluˈu ya chaˈ tsoˈo nu ntsuˈu jiˈi̱ ycuiˈ Ndyosi jiˈi̱ ma̱ loˈo ngulaa ya slo cuˈma̱, masi lyaˈ tsa tiˈ nguˈ jiˈi̱ ya tya tsubiˈ la ca quichi̱ Filipos. Jlo tiˈ ma̱ chaˈ cuxi tsa nguaˈni nguˈ biˈ loˈo ya liˈ, loˈo juaˈa̱ ntsuˈu nguˈ quichi̱ tyi ma̱ nu cuxi ntiˈ ñaˈa̱ nguˈ jiˈi̱ ya.
\v 3 Siˈi chaˈ cuiñi nguluˈu ya jiˈi̱ ma̱ nu ngua liˈ, siˈi na cuxi tyiquee ya ñaˈa̱ ya jiˈi̱ ma̱, ni siˈi na nñiloˈo ya jiˈi̱ ma̱.
\v 4 Cua nda ycuiˈ Ni chaˈ biˈ loˈo ya chaˈ culuˈu ya jiˈi̱ ñati̱, biˈ chaˈ liñi nchcuiˈ ya loˈo nguˈ nde lcaa quichi̱. Siˈi ñati̱ chalyuu laca nu Xuˈna na, ycuiˈ Ndyosi laca nu Xuˈna na; biˈ chaˈ cuentya jiˈi̱ ycuiˈ Ni ncluˈu ya chaˈ tsoˈo biˈ jiˈi̱ Ni jiˈi̱ lcaa ma̱, chaˈ jlo tiˈ Ni lcaa chaˈ nu ntsuˈu neˈ cresiya jiˈi̱ ya.
\v 5 Siˈi na tsoˈo tsa ndyuˈni ya loˈo ma̱ chaˈ cuaˈni ya ngana jiˈi̱ ma̱, ni siˈi na tsoˈo tsa nchcuiˈ ya loˈo ma̱ chaˈ caja chaˈ tsoˈo nu ntsuˈu jiˈi̱ ma̱ jiˈi̱ ya. Jlo tiˈ ycuiˈ Ndyosi chaˈ xcuiˈ chaˈ liñi nchcuiˈ ya; loˈo juaˈa̱ cuˈma̱, cua ndyuna ma̱ chaˈ biˈ.
\v 6 Ná ntiˈ ya chaˈ cuaˈni chi̱ ma̱ loo ya, masi chacuayáˈ jiˈi̱ ycuiˈ Jesucristo ndyalaa ya slo cuˈma̱; siˈi na nchcuiˈ tyucuaa tiˈ ya loˈo ma̱, chaˈ loo laca ya jiˈi̱ ma̱, ni siˈi na tyixi ya chaˈ loo laca ya jiˈi̱ xaˈ ñati̱.
\v 7 Pana ñiˈya̱ nu ñaˈa̱si̱i̱ sca nu cunaˈa̱ jiˈi̱ sñiˈ, juaˈa̱ ngunaˈa̱si̱i̱ ya jiˈi̱ ma̱, nu loˈo ngutiˈi̱ ya ca slo ma̱ nu ngua liˈ.
\v 8 Ntsuˈu tsa tyiquee ya ñaˈa̱ ya jiˈi̱ ma̱, chaˈ cua nda ya chaˈ tsoˈo jiˈi̱ ycuiˈ Ndyosi loˈo ma̱; lye tsa nclyacua tiˈ ya cuentya jiˈi̱ ma̱, hasta tsoˈo ntsuˈu tyiquee ya masi cujuii nguˈ jiˈi̱ ya xquiˈya cuˈma̱. 
\v 9 Cuˈma̱ nguˈ tyaˈa na, tyiˈu tiˈ ma̱ chaˈ lye tsa nguaˈni ya cña chaˈ caja ñiˈya̱ tyiji̱ yuˈu ya chalyuu; tsa̱ loˈo talya nguaˈni ya cña loˈo yaˈ ti ya, chaˈ ná culiji ma̱ cñi jiˈi̱ ma̱ lo ya laja loˈo nguluˈu ya chaˈ tsoˈo biˈ jiˈi̱ ma̱.
\p
\v 10 Cua naˈa̱ ma̱, loˈo juaˈa̱ cua naˈa̱ ycuiˈ Ndyosi, chaˈ tsoˈo ti ngutiˈi̱ ya slo cuˈma̱ nu ntsuˈu chaˈ jiˈi̱ ma̱ loˈo Ni. Ñati̱ lubii laca ya, ná ntsuˈu chaˈ jña nguˈ quiˈya jiˈi̱ ya liˈ.
\v 11 Ñiˈya̱ nduˈni sca ñati̱ loˈo sñiˈ, juaˈa̱ nguluˈu ya jiˈi̱ ma̱ liˈ: nu loˈo nguaˈni ma̱ chaˈ tsoˈo, liˈ nguxtyucua ya jiˈi̱ ma̱; nu loˈo nguaˈni ma̱ chaˈ cuxi, liˈ nda ya sca cui̱i̱ loˈo ma̱.
\v 12 Nguxtyucua ya jiˈi̱ ma̱ chaˈ tyucui tyiquee ma̱ cuaˈni ma̱ ñaˈa̱ chaˈ tsoˈo nu ntiˈ ycuiˈ Ndyosi chaˈ cuaˈni na nde chalyuu, chaˈ juaˈa̱ xñi ma̱ chaˈ jiˈi̱ ycuiˈ Ndyosi chaˈ tsaa ma̱ ca su tlyu su xee tsa su laca Ni loo.
\p
\v 13 Loˈo juaˈa̱ lcaa hora ndya ya xlyaˈbe jiˈi̱ ycuiˈ Ndyosi cuentya jiˈi̱ ma̱, xquiˈya chaˈ nu loˈo ndyuna ma̱ chaˈ tsoˈo jiˈi̱ ycuiˈ Ndyosi, la cuiˈ chaˈ nu cua nda ya loˈo ma̱, liˈ jlya tiˈ ma̱ chaˈ biˈ. Ngua cuayáˈ tiˈ ma̱ chaˈ laca chaˈ biˈ nu chaˈ liñi jiˈi̱ ycuiˈ Ndyosi, siˈi chaˈ nguaˈya hique sca ñati̱ ti; ngusñi ma̱ chaˈ biˈ liˈ, biˈ chaˈ ndyuˈni ycuiˈ Ndyosi cña neˈ cresiya jiˈi̱ ma̱.
\v 14 Ñiˈya̱ nu ngua tya tsubiˈ la, chaˈ nguaˈni lyaˈ tiˈ nguˈ judío jiˈi̱ ñaˈa̱ taju ñati̱ tyaˈa ntsuˈu chaˈ jiˈna loˈo Jesucristo ca loyuu su cuentya Judea, juaˈa̱ nguaˈni lyaˈ tiˈ nguˈ tyaˈa quichi̱ tyi ma̱ jiˈi̱ cuˈma̱ liˈ. Cuˈma̱ nguˈ tyaˈa na, la cuiˈ tyaˈa chaˈ tiˈí ngua jiˈi̱ ma̱ ñiˈya̱ nu ngua jiˈi̱ nguˈ judío tyaˈa na biˈ.
\v 15 Ñiˈya̱ loˈo ndyujuii nguˈ judío cuxi nu ngutiˈi̱ nu ngua saˈni la jiˈi̱ jyoˈo nu ngua tuˈba jiˈi̱ ycuiˈ Ndyosi, la cuiˈ juaˈa̱ cua ndyujuii nu nguˈ judío cuxi biˈ jiˈi̱ ycuiˈ Jesús nu Xuˈna na cua tsubiˈ. Ca tiyaˈ la liˈ loˈo jiˈi̱ cuare nguloˈo nu nguˈ judío biˈ. Ná ndiya tiˈ ycuiˈ Ndyosi chaˈ ndyuˈni nguˈ biˈ juaˈa̱, chaˈ nxu̱u̱ tyaˈa nguˈ biˈ loˈo lcaa ñati̱.
\v 16 Ná nda nguˈ judío cuxi biˈ chacuayáˈ jiˈi̱ ya chaˈ chcuiˈ ya chaˈ jiˈi̱ Jesucristo loˈo nguˈ xaˈ tsuˈ, chaˈ cuaˈni lyaá Ni jiˈi̱ nguˈ xaˈ tsuˈ biˈ liˈ; biˈ chaˈ juaˈa̱ nchca tlyu la quiˈya nu ntsuˈu jiˈi̱ nguˈ judío cuxi biˈ, ñaˈa̱ cuayáˈ nchca ñasi̱ˈ tsa ycuiˈ Ndyosi jiˈi̱ nguˈ biˈ. Ntsuˈu chaˈ xcubeˈ tsa Ni jiˈi̱ nguˈ biˈ nde loo la.
\s Ntiˈ tsa Pablo tsaa naˈa̱ jiˈi̱ nguˈ chaca quiyaˈ
\p
\v 17 Masi xaˈ quichi̱ ndiˈi̱ ya juani, ntiˈ ya xtyu̱u̱ ya slo cuˈma̱ tyaˈa ngusñi na chaˈ jiˈi̱ Jesús; ndyiˈu tsa tiˈ ya jiˈi̱ ma̱, masi ná nchca ñaˈa̱ ya jiˈi̱ ma̱, biˈ chaˈ ntiˈ ya tya̱a̱ ya tya̱a̱ naˈa̱ ya jiˈi̱ ma̱ chaca quiyaˈ.
\v 18 Tyu̱u̱ quiyaˈ ngua tiˈ ya ca̱a̱ ya nquichaˈ. Loˈo naˈ ni, la cuiˈ Pablo laca naˈ, ntiˈ tsa naˈ ca̱a̱ naˈ; pana lcaa quiyaˈ nguaˈa Satanás chaˈ jiˈi̱ ya chaˈ ná ca̱a̱ ya.
\v 19 Tsoˈo tsa ntsuˈu tyiquee ya xquiˈya cuˈma̱, chaˈ loˈo cuˈma̱ nscua chaˈ tyatu̱ ma̱ loˈo ya slo Jesucristo nu Xuˈna na loˈo tya̱a̱ Jesús nde chalyuu chaca quiyaˈ. Liˈ tsoˈo tsa caca tyiquee Ni ñaˈa̱ Ni jiˈi̱ ya, xquiˈya chaˈ tsoˈo tsa ngusñi ma̱ chaˈ jiˈi̱ Ni nu cua nchcuiˈ ya loˈo ma̱.
\v 20 Nchcuiˈ tsa ya loˈo xaˈ ñati̱ chaˈ tsoˈo tsa nduˈni ma̱, chaˈ tsoˈo tsa ntsuˈu tyiquee ya xquiˈya cuˈma̱. 
\c 3
\p
\v 1-2 Loˈo liˈ ngaˈaa ndalo ya, xñiˈi̱ tsa tiˈ ya chaˈ tyijyuˈ tsa ndiˈi̱ ma̱; biˈ chaˈ nda naˈ jiˈi̱ Timoteo ndyaa yu slo ma̱. Tsoˈo la tyanu naˈ quichi̱ Atenas ngua tiˈ naˈ, masi ná loˈo tyaˈa ndyaˈa̱ naˈ. Tyaˈa na laca nu Timoteo biˈ ni, la cuiˈ cña jiˈi̱ ycuiˈ Ndyosi ndyuˈni ya; tyaˈa ndyuˈni ya cña laca yu loˈo nda ya chaˈ tsoˈo jiˈi̱ Jesucristo loˈo ñati̱. Liˈ ndyaa nu Timoteo biˈ nde slo ma̱ chaˈ xñi la tiˈ tyiquee ma̱, chaˈ caca tlyu la tyiquee ma̱ loˈo ngusñi ma̱ chaˈ tsoˈo biˈ. 
\v 3 Ná ntiˈ ya chaˈ ca taja tiˈ ni tsaca nguˈ tyaˈa ma̱, masi lye tsa ndyuˈni lyaˈ tiˈ nguˈ jiˈi̱ ma̱; jlo tiˈ ma̱ chaˈ juaˈa̱ ndyuˈni nguˈ loˈo ñati̱ jiˈi̱ Jesucristo lcua ti lo quichi̱.
\v 4 Loˈo tya ngutiˈi̱ ya slo ma̱, liˈ tyu̱u̱ quiyaˈ nda ya chaˈ loˈo ma̱ ndiˈya̱: “Cuaˈni lyaˈ tiˈ nguˈ jiˈna”, nacui̱ ya. Loˈo chañi lyaˈ tsa tiˈ nguˈ jiˈi̱ ma̱ juani. 
\v 5 Loˈo ngua cuayáˈ tiˈ naˈ chaˈ biˈ, ngaˈaa ndalo naˈ liˈ; xñiˈi̱ tsa tiˈ naˈ chaˈ ná jlo ta̱ˈ ñiˈya̱ ndyaca chaˈ jiˈi̱ ma̱. Biˈ chaˈ nda naˈ jiˈi̱ yu tyaˈa na ñaa yu slo ma̱, chaˈ ca cuayáˈ ta̱ˈ si ñaˈa̱ ti nxñi tsoˈo ma̱ chaˈ tsoˈo jiˈi̱ ycuiˈ Ndyosi, si tyiji̱loo ma̱ jiˈi̱ nu xñaˈa̱ nu ntiˈ chaˈ cuaˈni ma̱ chaˈ cuxi. Cua ngunaˈ cña jiˈi̱ ya loˈo ma̱ si ná caca tyiji̱loo ma̱ jiˈi̱ nu xñaˈa̱ biˈ.
\p
\v 6 Loˈo juani tsoˈo tsa ntsuˈu tyiquee ya xquiˈya cuˈma̱. Cua ndyalaa Timoteo ca nde chaca quiyaˈ; cua ndachaˈ yu jiˈi̱ ya ñiˈya̱ ndyuˈni ma̱, chaˈ tya ngusñi ma̱ chaˈ tsoˈo jiˈi̱ ycuiˈ Ni, chaˈ ntsuˈu tsa tyiquee ma̱ ñaˈa̱ ma̱ jiˈi̱ tyaˈa ma̱ xquiˈya ycuiˈ nu Xuˈna na. Nacui̱ yu chaˈ ndube tsa tiˈ ma̱ jiˈi̱ ya, ndu̱ tsa tiˈ ma̱ ni jacuaˈ tyacua tyaˈa na chaca quiyaˈ. Stuˈba ti ntsuˈu tyiquee na, ¿ni jacuaˈ tyacua tyaˈa na lacua? 
\v 7 Loˈo cua ndyuna ya chaˈ juaˈa̱ ndyaca chaˈ biˈ jiˈi̱ ma̱, ngua chaa la tiˈ ya liˈ, masi lyaˈ tsa tiˈ nguˈ jiˈi̱ ya ca nde, masi ndyiji tsa chaˈ tiˈí jiˈi̱ ya. Ngusñi tsoˈo ma̱ chaˈ biˈ,
\v 8 biˈ chaˈ chaa la tiˈ ya; nguula la tiˈ ya xquiˈya cuˈma̱, chaˈ tlyu tyiquee ma̱ cuentya jiˈi̱ ycuiˈ nu Xuˈna na.
\v 9 Ná nchca tye chaˈ tya ya xlyaˈbe jiˈi̱ ycuiˈ Ndyosi Sti na xquiˈya cuˈma̱, chaˈ tsoˈo tsa ntsuˈu tyiquee ya xquiˈya cuˈma̱.
\v 10 Nchcuiˈ ya loˈo ycuiˈ Ndyosi nde tsa̱ loˈo nde talya. Tyaˈna tsa nchcuiˈ ya loˈo Ni chaˈ ta Ni chacuayáˈ jiˈi̱ ya chaˈ tyacua tyaˈa na chaca quiyaˈ, chaˈ bilya tye culuˈu ya jiˈi̱ ma̱ lcaa chaˈ tsoˈo nu ngaˈa̱ chaˈ caca cuayáˈ tiˈ ma̱, chaˈ juaˈa̱ xñi tsoˈo ma̱ chaˈ jiˈi̱ Jesús.
\p
\v 11 Ntajatya ya jiˈi̱ ycuiˈ Ndyosi Sti na loˈo jiˈi̱ Jesús nu Xuˈna na ni jacuaˈ ta Ni chacuayáˈ tsaa ya ca slo cuˈma̱.
\v 12 Loˈo juaˈa̱ ndijña ya jiˈi̱ nu Xuˈna na chaˈ cuaˈni Ni chaˈ tsoˈo la tyuˈu tyiquee ma̱ ñaˈa̱ ma̱ jiˈi̱ tyaˈa ma̱, loˈo juaˈa̱ jiˈi̱ lcaa ñati̱, chaˈ ntsuˈu tsa tyiquee ya ñaˈa̱ ya jiˈi̱ cuˈma̱ xquiˈya ycuiˈ Ndyosi; 
\v 13 ndijña ya chaˈ cuaˈni Ni chaˈ caca lubii cresiya jiˈi̱ ma̱, chaˈ tyanu tsoˈo chaˈ jiˈi̱ ycuiˈ Ndyosi neˈ cresiya jiˈi̱ ma̱. Liˈ ngaˈaa ntsuˈu chaˈ sta ycuiˈ Ndyosi Sti na quiˈya jiˈi̱ ma̱ tsa̱ biˈ, nu loˈo ca̱a̱ Jesús nu Xuˈna na nde chalyuu chaca quiyaˈ. Ca̱a̱ ycuiˈ nu Xuˈna na loˈo lcaa ñati̱ jiˈi̱ Ni tsa̱ biˈ.
\c 4
\s Chaˈ tsoˈo nu ntiˈ ycuiˈ Ndyosi chaˈ cuaˈni na nde chalyuu 
\p
\v 1 Cuˈma̱ nguˈ tyaˈa na, juani ndijña ya jiˈi̱ ma̱ chacuayáˈ jiˈi̱ Jesús nu Xuˈna na, chaˈ ñaˈa̱ ti cuaˈni ma̱ lcaa ñaˈa̱ chaˈ tsoˈo nu ntiˈ ycuiˈ Ndyosi chaˈ cuaˈni ma̱ laja loˈo tyiˈi̱ ma̱ chalyuu. Liˈ tsoˈo la caca cuaˈni ma̱ cña jiˈi̱ ycuiˈ Ndyosi. Chañi chaˈ tsoˈo tsa ndyuˈni ma̱, pana cua ntiˈ ya chaˈ ñaˈa̱ ti tya cuaˈni la ma̱ la cuiˈ cña nu cua nguluˈu ya jiˈi̱ ma̱ tya tsubiˈ la cuentya jiˈi̱ ycuiˈ Ndyosi.
\p
\v 2 Tyiˈu tiˈ ma̱ jiˈi̱ cña nu ngulo ya jiˈi̱ ma̱ cuentya jiˈi̱ Jesús nu Xuˈna na,
\v 3 chaˈ ndiˈya̱ ntiˈ ycuiˈ Ndyosi: caca lubii cresiya jiˈi̱ ma̱, ná cuaˈni subaˈ ma̱ loˈo ñati̱;
\v 4 lcaa cuˈma̱, tsoˈo caja clyoˈo ma̱, pana ngaˈaa ñaˈa̱ ma̱ jiˈi̱ xaˈ nu cunaˈa̱ liˈ. Loˈo juaˈa̱ tsoˈo ti tyiˈi̱ ma̱ loˈo clyoˈo ma̱; tyuˈu tyiquee ma̱ ñaˈa̱ ma̱ jiˈi̱ clyoˈo ma̱,
\v 5 chaˈ ná ntiˈ ycuiˈ Ndyosi chaˈ cuaˈni subaˈ ma̱ loˈo clyoˈo ma̱, ñiˈya̱ nu nduˈni nguˈ nu ná ndaquiyaˈ jiˈi̱ ycuiˈ Ni tsiyaˈ ti.
\v 6 Ngaˈaa xlyaá ma̱ jiˈi̱ nu cunaˈa̱ jiˈi̱ nguˈ tyaˈa ma̱, masi jiˈi̱ clyoˈo nguˈ, masi jiˈi̱ sñiˈ nguˈ. Cua nchcuiˈ tsa ya loˈo ma̱ chaˈ lcaa chaˈ ñaˈa̱ ycuiˈ nu Xuˈna na; jlo tiˈ ycuiˈ Ndyosi, loˈo juaˈa̱ ntsuˈu chaˈ xcubeˈ Ni jiˈi̱ lcaa ñati̱ nu ná taquiyaˈ jiˈi̱ chaˈ biˈ,
\v 7 chaˈ cua ngusubi ycuiˈ Ndyosi jiˈna chaˈ caca na ñati̱ nu lubii cresiya jiˈi̱, siˈi chaˈ caca na ñati̱ nu ndyuˈni subaˈ.
\v 8 Siˈi sca chaˈ nu nchcuiˈ ñati̱ chalyuu ti laca chaˈ nu nchcuiˈ naˈ loˈo ma̱ juani, chaˈ liñi nu cua nda ycuiˈ Ndyosi loˈo na laca chaˈ biˈ; biˈ chaˈ si ná taquiyaˈ ma̱ jiˈi̱ chaˈ biˈ, na cua nguxtyanu ma̱ jiˈi̱ ycuiˈ Ndyosi nu nda Xtyiˈi ycuiˈ Ni chaˈ tyanu Ni neˈ cresiya jiˈna.
\p
\v 9 Ná ngaˈa̱ chaˈ scua la naˈ lo quityi re chaˈ tsoˈo ti tyuˈu tyiquee ma̱ ñaˈa̱ ma̱ jiˈi̱ ñati̱ tyaˈa ngusñi ma̱ chaˈ jiˈi̱ ycuiˈ Ni; cua laca ntsuˈu tsa tyiquee ma̱ ñaˈa̱ ma̱ jiˈi̱ nguˈ biˈ, xquiˈya chaˈ cua nguluˈu ycuiˈ Ndyosi jiˈi̱ ma̱ ñiˈya̱ nu cuaˈni ma̱ loˈo tyaˈa ma̱.
\v 10 Ni siˈi sca ti jiˈi̱ nguˈ tyaˈa quichi̱ tyi ti ma̱ ntsuˈu tyiquee ma̱, loˈo juaˈa̱ ntsuˈu tsa tyiquee ma̱ ñaˈa̱ ma̱ jiˈi̱ lcaa nguˈ tyaˈa ntsuˈu chaˈ jiˈi̱ ma̱ loˈo ycuiˈ Ndyosi nde lcaa lo quichi̱ loyuu su cuentya Macedonia. Tyaˈa na laca nguˈ biˈ, biˈ chaˈ nchcuiˈ ya loˈo ma̱ chaˈ tya cuaˈni la ma̱ chaˈ tsoˈo biˈ.
\v 11 Tsoˈo ti cuaˈni ma̱ loˈo tyaˈa ma̱ chaˈ ti̱ ti tyiˈi̱ tyiquee ma̱ liˈ. Ná tsoˈo si culo ma̱ cña jiˈi̱ taju ñati̱ tyaˈa ma̱, loˈo liˈ taja ycuiˈ ma̱; cuaˈni ma̱ cña chaˈ caja xi na cacu ma̱ ñiˈya̱ nu cua nchcuiˈ ya loˈo ma̱,
\v 12 chaˈ caca chcuiˈ nguˈ jiˈi̱ ma̱ chaˈ tsoˈo tsa ndyuˈni ma̱ cña. Ná ntsuˈu na laca nu lyiji jiˈi̱ ma̱ liˈ.
\s Tya ca̱a̱ Jesús nu Xuˈna na chaca quiyaˈ
\p
\v 13 Cuˈma̱ tyaˈa ngusñi na chaˈ jiˈi̱ Jesús, juani ta ya xi chaˈ loˈo ma̱ cuentya jiˈi̱ nguˈ tyaˈa na nu cua ngujuii, chaˈ ca cuayáˈ tiˈ ma̱ chaˈ ñiˈya̱ laca si na lajaˈ ti nguˈ, juaˈa̱ laca jyoˈo biˈ. Ná ca xñiˈi̱ tiˈ ma̱ cuentya jiˈi̱ jyoˈo tyaˈa ma̱ lacua, chaˈ ná stuˈba laca na loˈo ñati̱ nu bilya xñi chaˈ jiˈi̱ Jesucristo. 
\v 14 Jlo tiˈ na chaˈ ngujuii Jesús, loˈo liˈ ndyuˈú yu chaca quiyaˈ; biˈ chaˈ caca cuayáˈ tiˈ na chaˈ loˈo ca̱a̱ ycuiˈ Jesús nde chalyuu chaca quiyaˈ, liˈ cuaˈni ycuiˈ Ndyosi chaˈ chaca quiyaˈ tyuˈú lcaa jyoˈo nu ngusñi chaˈ jiˈi̱ Jesucristo tya clyo la, chaˈ stuˈba ti ca̱a̱ nguˈ loˈo Jesús liˈ.
\p
\v 15 Cua nchcuiˈ ycuiˈ nu Xuˈna na ñiˈya̱ caca jiˈi̱ lcaa na tsa̱ biˈ, nu loˈo ca̱a̱ ycuiˈ nu Xuˈna na chaca quiyaˈ: Lcaa na nu tya luˈú na ni, ná tyiji̱loo na jiˈi̱ nguˈ tyaˈa na nu cua ngujuii.
\v 16 Ndiˈya̱ caca chaˈ loˈo tyalaa tsa̱ biˈ: Nde cua̱ ca̱a̱ ycuiˈ nu Xuˈna na, caˈya Ni lo yuu; liˈ stuˈba ti cañi Xtyiˈi ycuiˈ Ni loˈo xtyiˈi xca̱ jiˈi̱ Ni nu laca loo, juaˈa̱ cañi cuiˈchcua̱ jiˈi̱ ycuiˈ Ndyosi liˈ. Clyo tyacuí̱ lcaa jyoˈo ñati̱ jiˈi̱ Jesucristo tyaa nguˈ nde cua̱; 
\v 17 liˈ tyacuí̱ lcaa nguˈ tyaˈa na ñaˈa̱ luˈú ti na, chaˈ tyaloˈo ycuiˈ Ni jiˈna. Ca laja coo nde cua̱ tyacua tyaˈa na loˈo jyoˈo tyaˈa na liˈ, chaˈ lcaa na, stuˈba ti tyacua tyaˈa na loˈo ycuiˈ nu Xuˈna na ca biˈ. Tsa cuˈ ti tyiˈi̱ na loˈo ycuiˈ Ndyosi liˈ.
\v 18 Biˈ chaˈ lacua, ta ma̱ chaˈ biˈ loˈo nguˈ tyaˈa ma̱, chaˈ tsoˈo ti caca tyiquee lcaa ma̱.
\c 5
\p
\v 1 Cuˈma̱ tyaˈa ngusñi na chaˈ jiˈi̱ Jesús, ná ntsuˈu chaˈ scua ya sca quityi chaˈ cachaˈ ya jiˈi̱ ma̱ ni jacuaˈ tyalaa tsa̱ loˈo ca̱a̱ Jesús chaca quiyaˈ, ni jacuaˈ tyalaa tyempo biˈ;
\v 2 cua laca ngua cuayáˈ tiˈ ma̱ chaˈ ni sca ñati̱ chalyuu, ná jlo tiˈ nguˈ ni tsa̱ ca̱a̱ ycuiˈ nu Xuˈna na. Ñiˈya̱ ndyalaa sca nu cuaana toˈ niˈi̱ jiˈi̱ nguˈ talya, juaˈa̱ cuaana ti ca̱a̱ Jesús.
\v 3 “Ti̱ ti ndiˈi̱ chalyuu, tsoˈo ti ndiˈi̱ na”, ñacui̱ nguˈ; pana la cuiˈ hora biˈ tye chaˈ jiˈi̱ lcaa ñati̱ chalyuu, ngaˈaa caja mala xna nguˈ liˈ. Ñiˈya̱ laca sca nu cunaˈa̱ tana, chaˈ ná jlo tiˈ ni hora caca nu cala sñiˈ, ni hora ca̱a̱ nu tiˈí jiˈi̱; juaˈa̱ caca loˈo cua tyalaa ti hora biˈ liˈ, chaˈ ná jlo tiˈ na ni tsa̱ caca.
\v 4 Pana nu cuˈma̱ ni, ná ntsuˈu chaˈ xcutsi̱i̱ tsa̱ biˈ jiˈi̱ ma̱, masi jlo tiˈ ma̱ chaˈ cuaana ca ti tyalaa tsa̱ biˈ; siˈi na ndyaˈa̱ ma̱ su talya ñaˈa̱ xquiˈya chaˈ cuxi, ñiˈya̱ ndyaˈa̱ xaˈ la ñati̱.
\v 5 Cua ntsuˈu xee nu nda ycuiˈ Ndyosi neˈ cresiya jiˈi̱ ma̱; biˈ chaˈ ñati̱ nu ndyaˈa̱ su xee laca ma̱, ñati̱ nu lubii cresiya jiˈi̱ laca ma̱. Ná laca na ñati̱ nu ndyaˈa̱ su talya ñaˈa̱, chaˈ siˈi ñati̱ nu ngunaˈ chalyuu jiˈi̱ xquiˈya chaˈ cuxi laca na.
\v 6 Biˈ chaˈ tii ti tiˈ na tyiˈi̱ na chalyuu; siˈi ñiˈya̱ ntiˈ si xcuiˈ na lajaˈ ti na tyiˈi̱ na chalyuu, masi juaˈa̱ nduˈni xaˈ la ñati̱ nu ná ndaquiyaˈ jiˈi̱ Jesucristo tsiyaˈ ti. Loˈo juaˈa̱ ñaˈa̱si̱i̱ na jiˈi̱ ycuiˈ ca na chaˈ ná caca cuˈbi na.
\v 7 Xcuiˈ na ndyijaˈ ti ñati̱ ñiˈya̱ si talya laca, xquiˈya chaˈ ná ndube tiˈ nguˈ; xcuiˈ na cuˈbi ti nguˈ biˈ, chaˈ ná ndube tiˈ nguˈ tsiyaˈ ti.
\v 8 Pana nu na ni, ntsuˈu xee jiˈi̱ ycuiˈ Ndyosi neˈ cresiyaˈ jiˈna, biˈ chaˈ tii ti tiˈ na tyiˈi̱ na chalyuu; cua ngusñi na chaˈ jiˈi̱ ycuiˈ Ni, na cua ntsuˈu tyiquee na ñaˈa̱ na jiˈi̱ tyaˈa ñati̱ na xquiˈya Ni, loˈo juaˈa̱ ngaˈa̱ chaˈ cuaˈa na jiˈi̱ ycuiˈ ca na chaˈ ná cuaˈni na chaˈ cuxi nu ntiˈ cuaˈni ñuˈu̱ jiˈi̱ cresiya jiˈna. Na ndu̱ tiˈ na jiˈi̱ ycuiˈ Ndyosi, ni jacuaˈ tye cuityi̱ Ni jiˈi̱ lcaa chaˈ cuxi nu ntsuˈu jiˈna, biˈ chaˈ ngaˈa̱ chaˈ ñaˈa̱si̱i̱ na jiˈi̱ ycuiˈ ca na.
\v 9 Ná ngusubi ycuiˈ Ni jiˈna chaˈ xcubeˈ Ni jiˈna; cua ngusubi Ni jiˈna chaˈ cuaˈni lyaá Ni jiˈna xquiˈya Jesucristo nu Xuˈna na,
\v 10 la cuiˈ nu ngujuii chaˈ cuityi̱ quiˈya nu ntsuˈu jiˈna. Biˈ chaˈ taca tyiˈi̱ na slo ycuiˈ Ndyosi liˈ, masi ñaˈa̱ ti tya luˈú na chalyuu loˈo ca̱a̱ Jesús, masi cua ngujuii na liˈ; stuˈba ti tyiˈi̱ na ca slo Ni liˈ.
\v 11 Laja loˈo ndu̱ tiˈ na jiˈi̱ Jesús, tya culuˈu ma̱ chaˈ biˈ jiˈi̱ nu xaˈ la nguˈ tyaˈa ma̱, chaˈ caca tlyu la tyiquee ma̱ liˈ. Jlo tiˈ naˈ chaˈ juaˈa̱ nduˈni ma̱ tuˈni.
\s Xaˈ la cui̱i̱ nu nda Pablo loˈo nguˈ
\p
\v 12 Cuˈma̱ tyaˈa ngusñi na chaˈ jiˈi̱ Jesús, ndijña ya jiˈi̱ ma̱ chaˈ cuiˈya ma̱ cuentya jiˈi̱ lcaa ñaˈa̱ chaˈ tsoˈo nu ndyuˈni nguˈ nu laca cña jiˈi̱ ma̱. Cua nda ycuiˈ nu Xuˈna na cña jiˈi̱ nguˈ biˈ chaˈ caca nguˈ loo, chaˈ culuˈu nguˈ biˈ jiˈi̱ ma̱ cua ñaˈa̱ ca chaˈ tsoˈo nu caca cuaˈni ma̱ cuentya jiˈi̱ ycuiˈ Ndyosi. 
\v 13 Tsoˈo ti cuaˈni ma̱ loˈo nguˈ biˈ lacua, chaˈ tsoˈo tsa cña ndyuˈni nguˈ biˈ cuentya jiˈi̱ ycuiˈ Ndyosi; tsoˈo ti tyuˈu tyiquee ma̱ ñaˈa̱ ma̱ jiˈi̱ nguˈ biˈ. La cuiˈ juaˈa̱ tsoˈo ti tyuˈu tyiquee ma̱ ñaˈa̱ ma̱ jiˈi̱ lcaa tyaˈa ma̱, chaˈ ngaˈaa tyuˈu chaˈ cusu̱u̱ jiˈi̱ ma̱ loˈo tyaˈa ma̱ liˈ.
\p
\v 14 Cuˈma̱ tyaˈa ngusñi na chaˈ jiˈi̱ Jesús, ndiˈya̱ chcuiˈ ya loˈo ma̱: Culo ma̱ cña jiˈi̱ nguˈ tyaˈa ma̱ nu ná ntiˈ cuaˈni cña, nu xcuiˈ na taja ti ntiˈ nguˈ; cuaˈni ma̱ chaˈ caca tlyu la tyiquee nguˈ tyaˈa ma̱ nu xñiˈi̱ ti tiˈ, chaˈ xñi tsoˈo la nguˈ chaˈ jiˈi̱ Jesús; xtyucua ma̱ jiˈi̱ nguˈ tyaˈa ma̱ nu ná ndyiji juersa jiˈi̱ chaˈ xu̱u̱ tyaˈa nguˈ loˈo nu cuxi, juaˈa̱ talo tyiquee ma̱ jiˈi̱ cua ñaˈa̱ ca nguˈ tyaˈa ma̱.
\p
\v 15 Si cuaˈni xñaˈa̱ ñati̱ loˈo ma̱, ná chcuiˈ ma̱ chaˈ tiˈí jiˈi̱ nguˈ biˈ liˈ; xtyucua ma̱ jiˈi̱ nguˈ tyaˈa ma̱ chaˈ talo ma̱ jiˈi̱ nguˈ xñaˈa̱, chaˈ xcuiˈ tsoˈo ti cuaˈni ma̱ loˈo lcaa ñati̱, masi loˈo tyaˈa ma̱, masi loˈo xaˈ ñati̱.
\p
\v 16 Tsoˈo ti caca tyiquee ma̱ lcaa tsa̱.
\v 17 Tyucui tyempo chcuiˈ ma̱ loˈo ycuiˈ Ndyosi.
\v 18 Loˈo juaˈa̱ tya ma̱ xlyaˈbe jiˈi̱ ycuiˈ Ndyosi cuentya jiˈi̱ cua ñaˈa̱ ca chaˈ nu ndyaca jiˈi̱ ma̱. Ntiˈ Ni chaˈ cuaˈni ma̱ juaˈa̱ si chañi chaˈ ngusñi ma̱ chaˈ jiˈi̱ Jesucristo.
\p
\v 19 Ñiˈya̱ ntiˈ sca xee, juaˈa̱ laca Xtyiˈi ycuiˈ Ndyosi; ná xubiˈ ma̱ jiˈi̱ xee biˈ.
\v 20 Ná xtyí loˈo ma̱ jiˈi̱ tyaˈa ma̱ loˈo chcuiˈ nguˈ sca chaˈ jiˈi̱ ycuiˈ Ndyosi loˈo ma̱;
\v 21 pana cuaˈni cuayáˈ ma̱ jiˈi̱ cua ñaˈa̱ ca chaˈ nu nchcuiˈ nguˈ biˈ, si tsoˈo ndyuˈu chaˈ, si ná tsoˈo. Liˈ xñi ma̱ chaˈ tsoˈo biˈ,
\v 22 pana culochu̱ˈ ma̱ jiˈi̱ lcaa chaˈ cuxi liˈ.
\p
\v 23 Nduˈni ycuiˈ Ndyosi chaˈ ti̱ ti tyiˈi̱ tyiquee na. Biˈ chaˈ juani cuaˈni Ni chaˈ caca ma̱ ñati̱ liñi tsiyaˈ ti; caca tsoˈo tyiquee ma̱, caca lubii cresiya jiˈi̱ ma̱, caca ma̱ ñati̱ nu tyucui tyiquee tsiyaˈ ti. Si lubii cresiya jiˈi̱ ma̱ loˈo ca̱a̱ ycuiˈ Jesucristo nu Xuˈna na chaca quiyaˈ, liˈ ngaˈaa ntsuˈu chaˈ sta Ni quiˈya jiˈi̱ ma̱;
\v 24 cua ngusubi ycuiˈ Ndyosi jiˈi̱ ma̱ chaˈ caca ma̱ ñati̱ jiˈi̱ Ni tsiyaˈ ti. Siˈi sca chaˈ cuiñi nu nda Ni loˈo nchcuiˈ Ni loˈo ma̱ juaˈa̱, chañi chaˈ cuaˈni Ni chaˈ caca ma̱ ñati̱ nu lubii cresiya jiˈi̱ cuentya jiˈi̱ ycuiˈ Ndyosi.
\s Ngusalyaˈ Pablo loˈo nguˈ
\p
\v 25 Cuˈma̱ nguˈ tyaˈa na, ñaˈa̱ ti tya chcuiˈ ma̱ loˈo ycuiˈ Ndyosi cuentya jiˈi̱ ya.
\p
\v 26 Xlyo niˈi̱ jiˈi̱ lcaa cuˈma̱ nguˈ tyaˈa na.
\p
\v 27 Nde cña nu culo naˈ jiˈi̱ ma̱ chaˈ cuaˈni ma̱ cuentya jiˈi̱ ycuiˈ nu Xuˈna na, chaˈ chcuiˈ ma̱ lcaa chaˈ nu nscua lo quityi re ñaˈa̱ cuayáˈ cuna lcaa nguˈ tyaˈa na.
\p
\v 28 Ndiˈya̱ ntiˈ ya chaˈ ñaˈa̱ ti cuaˈni ycuiˈ Jesucristo nu Xuˈna na chaˈ tsoˈo loˈo ma̱. Juaˈa̱ caca chaˈ lacua.