\id 2TH
\h 2 TESALONICENSES
\mt Nguscua San Pablo chaca quityi ndyaa ca slo ñati̱ jiˈi̱ Jesucristo nde quichi̱ Tesalónica
\c 1
\p
\v 1 Pablo, Silvano, Timoteo naa ya. Nscua ya quityi re chaˈ tsaa ca slo ñaˈa̱ taju cuˈma̱ nguˈ quichi̱ Tesalónica nu ngusñi chaˈ jiˈi̱ ycuiˈ Ndyosi Sti na, cuˈma̱ nu cua ngusñi chaˈ jiˈi̱ Jesucristo nu Xuˈna na.
\v 2 Ndiˈya̱ ntiˈ ya, chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱ xquiˈya Jesucristo nu Xuˈna na laja loˈo ndiˈi̱ ma̱ chalyuu.
\s Xcubeˈ ycuiˈ Ndyosi jiˈi̱ ñati̱ nu ná ntiˈ taquiyaˈ jiˈi̱ chaˈ nu nchcuiˈ Ni
\p
\v 3 Cuˈma̱ tyaˈa ngusñi na chaˈ jiˈi̱ Jesús, ntsuˈu chaˈ tya ya xlyaˈbe jiˈi̱ ycuiˈ Ndyosi lcaa quiyaˈ loˈo chcuiˈ ya loˈo Ni cuentya jiˈi̱ cuˈma̱; nduˈni tsa chaˈ cuaˈni ya juaˈa̱, xquiˈya chaˈ lcaa tsa̱ tachaa la ndyanu chaˈ jiˈi̱ Jesús neˈ cresiya jiˈi̱ ma̱, lcaa tsa̱ ntsuˈu la tyiquee ma̱ ñaˈa̱ ma̱ jiˈi̱ tyaˈa ñati̱ ma̱.
\v 4 Tsoˈo tsa liˈ. Tsoˈo tsa ntsuˈu tyiquee ya xquiˈya cuˈma̱, biˈ chaˈ nda ya chaˈ jiˈi̱ ma̱ loˈo lcaa taju nguˈ tyaˈa ntsuˈu chaˈ jiˈna loˈo ycuiˈ Ndyosi. Nacui̱ ya jiˈi̱ nguˈ chaˈ tsoˈo tsa ndyuˈni ma̱, chaˈ tlyu tsa tyiquee ma̱ xquiˈya ycuiˈ Ndyosi, masi ndyiji tsa chaˈ tiˈí jiˈi̱ ma̱, masi lye tsa ndyuˈni lyaˈ tiˈ nguˈ jiˈi̱ ma̱. Tsoˈo tsa chaˈ ndalo tyiquee ma̱ jiˈi̱ nguˈ, masi cuxi tsa ndyuˈni nguˈ biˈ loˈo ma̱ juaˈa̱. 
\v 5 Liñi tsa nduˈni cuayáˈ ycuiˈ Ndyosi jiˈi̱ ñati̱; biˈ chaˈ caja su tyiˈi̱ ma̱ ca su laca ycuiˈ Ndyosi loo ca nde loo la, masi xñaˈa̱ tsa nguˈ loˈo ma̱ juani xquiˈya chaˈ jiˈi̱ ycuiˈ Ndyosi nu cua ngusñi ma̱.
\p
\v 6 Liñi tsa nduˈni ycuiˈ Ndyosi, loˈo juaˈa̱ chañi chaˈ ca tiyaˈ la xcubeˈ Ni jiˈi̱ lcaa ñati̱ nu nchcubeˈ jiˈi̱ cuˈma̱ juani.
\v 7 Ngaˈaa cuaˈni lyaˈ tiˈ nguˈ jiˈna tsiyaˈ ti loˈo tyuˈu tucua ycuiˈ Jesús nu Xuˈna na nde cua̱. Laja xee tlyu tya̱a̱ Jesús liˈ; stuˈba ti ca̱a̱ Ni loˈo quiñaˈa̱ tsa nguˈ xca̱ jiˈi̱ Ni, chaˈ tlyu tsa cña nchca jiˈi̱ xca̱ biˈ nu nduˈni nguˈ cuentya jiˈi̱ ycuiˈ Ndyosi.
\v 8 Liˈ xcubeˈ ycuiˈ Ndyosi jiˈi̱ cua ñaˈa̱ ca ñati̱ nu ná ntajaˈa̱ taquiyaˈ jiˈi̱ Ni, loˈo juaˈa̱ xcubeˈ Ni jiˈi̱ ñati̱ nu ná ntajaˈa̱ xñi chaˈ tsoˈo jiˈi̱ ycuiˈ Jesús nu Xuˈna na.
\v 9 Chañi chaˈ xcubeˈ Ni jiˈi̱ nguˈ biˈ; ngaˈaa ñaˈa̱ nguˈ biˈ jiˈi̱ ycuiˈ nu Xuˈna na tsiyaˈ ti, ngaˈa̱ chaˈ tsaa nguˈ ca su ná ngaˈa̱ chaˈ tye chaˈ chcubeˈ nguˈ. Ngaˈaa ñaˈa̱ nguˈ biˈ xee ndubi jiˈi̱ ycuiˈ Ni liˈ, ngaˈaa ñaˈa̱ nguˈ jiˈi̱ ycuiˈ Ndyosi nu nchca jiˈi̱ nduˈni lcaa cña tsiyaˈ ti.
\v 10 Juaˈa̱ xcubeˈ Ni jiˈi̱ nguˈ biˈ tsa̱ loˈo tya̱a̱ Jesús chaca quiyaˈ. Pana si ntsuˈu chaˈ jiˈna loˈo Ni, liˈ cuaˈni tlyu na jiˈi̱ Ni tsa̱ biˈ; la cuiˈ juaˈa̱ cuaˈni chi̱ na loo ycuiˈ Ndyosi loˈo tyaˈa na loˈo tyalaa tsa̱ biˈ, si cua ngusñi na chaˈ jiˈi̱ Ni. Loˈo cuˈma̱, stuˈba ti tyuˈu tiˈi̱ ma̱ loˈo ya slo Jesús tsa̱ biˈ, chaˈ ngusñi ma̱ chaˈ jiˈi̱ Jesús loˈo nguluˈu ya chaˈ biˈ jiˈi̱ ma̱ nu ngua tya clyo la.
\p
\v 11 Biˈ chaˈ lcaa tsa̱ nchcuiˈ ya loˈo ycuiˈ Ndyosi Sti na chaˈ cuaˈni Ni cña neˈ cresiya jiˈi̱ ma̱, chaˈ tsoˈo ti cuaˈni ma̱ cña nu nda Ni jiˈi̱ ma̱ tya loˈo ngusubi Ni jiˈi̱ ma̱. Nchcuiˈ ya loˈo Ni chaˈ xtyucua Ni jiˈi̱ ma̱, chaˈ juaˈa̱ cuaˈni lyiji ma̱ lcaa chaˈ tsoˈo nu nclyacua tiˈ ma̱ chaˈ cuaˈni ma̱ cuentya jiˈi̱ ycuiˈ Ni, lcaa lo chaˈ tsoˈo nu ndyuˈni ma̱ xquiˈya chaˈ ngusñi ma̱ chaˈ jiˈi̱ ycuiˈ Ndyosi.
\v 12 Juaˈa̱ nduˈni tlyu ma̱ jiˈi̱ Jesucristo nu Xuˈna na, nu loˈo nduˈni ma̱ cña jiˈi̱ Ni; juaˈa̱ ca cuayáˈ tiˈ nguˈ liˈ chaˈ ndyanu Xtyiˈi ycuiˈ Ni neˈ cresiya jiˈi̱ ma̱. Loˈo liˈ caca cuayáˈ tiˈ nguˈ chaˈ tsoˈo tsa nduˈni ycuiˈ Ndyosi loˈo ma̱, chaˈ stuˈba ti nduˈni ycuiˈ Ndyosi Sti na cña loˈo Jesucristo nu Xuˈna na.
\c 2
\s Ca̱a̱ sca nu xñaˈa̱ chalyuu
\p
\v 1 Cuˈma̱ tyaˈa ngusñi na chaˈ jiˈi̱ Jesús, jlo tiˈ na chaˈ tya ca̱a̱ Jesucristo nu Xuˈna na chaca quiyaˈ, chaˈ tsaloˈo Ni jiˈna chaˈ tyacua tyaˈa na loˈo Ni ca biˈ; biˈ chaˈ liñi nchcuiˈ ya loˈo ma̱ juani,
\v 2 chaˈ ná tyaˈa̱chu̱ˈ ma̱ jiˈi̱ chaˈ tsoˈo biˈ. Ná cutsi̱i̱ ma̱ si ntiˈ nguˈ xcutsi̱i̱ nguˈ jiˈi̱ ma̱: masi chcuiˈ nguˈ cuentya jiˈi̱ Xtyiˈi ycuiˈ Ndyosi, nacui̱ nguˈ; masi culuˈu nguˈ chaˈ liñi jiˈi̱ ma̱, nacui̱ nguˈ; masi chcuiˈ nguˈ lo quityi nu nda ya lijya̱ slo ma̱, nacui̱ nguˈ. Chaˈ cuiñi laca si ñacui̱ nguˈ chaˈ nde tsa̱ laca nu ca̱a̱ ycuiˈ nu Xuˈna na, chaˈ ná jlo tiˈ nguˈ tsiyaˈ ti.
\v 3 Ná taquiyaˈ ma̱ jiˈi̱ nguˈ cuiñi nu chcuiˈ juaˈa̱. Nu loˈo tya lyiji tyalaa tsa̱ biˈ, lye tsa xu̱u̱ tyaˈa ñati̱ chalyuu loˈo ycuiˈ Ndyosi; liˈ ca̱a̱ sca ñati̱ nu nduˈni cña jiˈi̱ nu xñaˈa̱ nde chalyuu, nu ntsuˈu chaˈ tsaa ca bilyaa loˈo tye chalyuu.
\v 4 Biˈ laca nu ntiˈ cuaˈa jiˈi̱ lcaa lo joˈó chaˈ ná cuaˈni tlyu nguˈ jiˈi̱; ni ná cuaˈni tlyu nguˈ jiˈi̱ ycuiˈ Ndyosi, ntiˈ yu, chaˈ ntiˈ nu yu xñaˈa̱ biˈ chaˈ cuaˈni tlyu nguˈ jiˈi̱ ycuiˈ ca yu. Tyatí̱ yu neˈ laa tonu, tsaa tucua yu ca biˈ; liˈ chcuiˈ yu loˈo lcaa ñati̱ chaˈ cuaˈni tlyu nguˈ jiˈi̱ ycuiˈ ca yu, chaˈ ycuiˈ Ndyosi laca ycuiˈ yu, ñacui̱ yu.
\p
\v 5 Cua jlo tiˈ ma̱ chaˈ tyu̱u̱ quiyaˈ nguluˈu naˈ la cuiˈ ti chaˈ jiˈi̱ yu xñaˈa̱ biˈ jiˈi̱ ma̱, nu loˈo tya ndiˈi̱ naˈ loˈo cuˈma̱;
\v 6 jlo tiˈ ma̱ ñiˈya̱ ndacaˈa Ni jiˈi̱ yu xñaˈa̱ biˈ juani, chaˈ ná caca biˈ loo ñaˈa̱ cuayáˈ tyuˈu tucua tsa̱ jiˈi̱ yu biˈ ca nde loo la.
\v 7 Na cua nguxana cña cuxi biˈ laja ñati̱ chalyuu, masi juani ti tya ndacaˈa Ni jiˈi̱ yu xñaˈa̱ biˈ; pana loˈo ngaˈaa ndacaˈa Ni jiˈi̱ yu biˈ, chaˈ cua ndyaa Ni,
\v 8 liˈ caca yu xñaˈa̱ biˈ loo. Ca tiyaˈ la ca̱a̱ Jesús nu Xuˈna na, loˈo liˈ cujuii Jesús jiˈi̱ yu xñaˈa̱ biˈ nu loˈo culutuˈu ti Jesús jiˈi̱ yu biˈ loˈo cuiˈi̱ nu ntsuˈu tuˈba Ni; tye chaˈ jiˈi̱ yu xñaˈa̱ biˈ loˈo ca̱a̱ Jesús, chaˈ ná talo yu ñaˈa̱ yu jiˈi̱ xee ndubi jiˈi̱ ycuiˈ nu Xuˈna na.
\v 9 Pana loˈo ca̱a̱ yu xñaˈa̱ biˈ, ca̱a̱ yu loˈo chacuayáˈ jiˈi̱ ycuiˈ Satanás biˈ, biˈ chaˈ nchca tsa jiˈi̱ yu biˈ cuaˈni yu chaˈ tlyu chaˈ cñiloˈo ti yu jiˈi̱ ñati̱ chalyuu, chaˈ culacua tiˈ nguˈ chaˈ tlyu tsa laca ycuiˈ yu xñaˈa̱ biˈ.
\v 10 Tucua chaˈ ntsuˈu tyiquee yu biˈ, pana ca jlya tiˈ ñati̱ chalyuu jiˈi̱ lcaa chaˈ cuiñi nu chcuiˈ yu biˈ, jlya tiˈ nguˈ xquiˈya chaˈ cua tsaa ti nguˈ ca bilyaa; ná ntiˈ nguˈ biˈ xñi nguˈ chaˈ tsoˈo nu caca cuaˈni lyaá jiˈi̱ nguˈ,
\v 11 biˈ chaˈ culayaˈ ycuiˈ Ndyosi jiˈi̱ nguˈ, xquiˈya chaˈ jlya la tiˈ nguˈ jiˈi̱ nu chaˈ cuiñi biˈ.
\v 12 Chañi chaˈ tsaa nguˈ biˈ ca su ná ngaˈa̱ chaˈ tye chcubeˈ nguˈ, lcaa nguˈ nu ná jlya tiˈ chaˈ tsoˈo jiˈi̱ ycuiˈ Ndyosi, nguˈ nu ndiya la tiˈ cuaˈni cua ñaˈa̱ ca lo chaˈ cuxi.
\s Ngusubi Ni jiˈna chaˈ clyaá na jiˈi̱ nu cuxi
\p
\v 13 Cuˈma̱ tyaˈa ngusñi na chaˈ jiˈi̱ Jesús, ntsuˈu tsa tyiquee ycuiˈ nu Xuˈna na ñaˈa̱ Ni jiˈi̱ ma̱. Loˈo juaˈa̱ ntsuˈu chaˈ tya ya xlyaˈbe jiˈi̱ ycuiˈ Ndyosi xquiˈya cuˈma̱, chaˈ ngusubi Ni jiˈi̱ ma̱ tya loˈo nguxana ti chalyuu chaˈ cuaˈni lyaá Ni jiˈi̱ ma̱; biˈ chaˈ nguaˈni Xtyiˈi ycuiˈ Ni chaˈ ngua lubii cresiya jiˈi̱ ma̱ loˈo ngusñi ma̱ chaˈ tsoˈo jiˈi̱ ycuiˈ Ndyosi.
\v 14 Cua ngusubi Ni jiˈi̱ ma̱, biˈ chaˈ ndyuna ma̱ chaˈ tsoˈo jiˈi̱ Jesucristo nu nguluˈu ya jiˈi̱ ma̱; ntiˈ Ni chaˈ stuˈba ti tyiˈi̱ ma̱ loˈo Jesucristo nu Xuˈna na ca su tlyu su xee tsa su ndiˈi̱ ycuiˈ.
\p
\v 15 Cuˈma̱ nguˈ tyaˈa na, juani tyiˈu tsoˈo tiˈ ma̱ lcaa chaˈ nu nguluˈu ya jiˈi̱ ma̱; cuaˈni ma̱ chaˈ caca cuayáˈ tsoˈo tiˈ ma̱ lcaa chaˈ nu cua nchcuiˈ ya loˈo ma̱, lcaa chaˈ nu cua nguscua ya lo quityi chaˈ ca̱a̱ ca slo ma̱.
\v 16-17 Ndiˈya̱ ntiˈ naˈ chaˈ cuaˈni Ni loˈo ma̱, masi Jesucristo nu Xuˈna na, masi ycuiˈ Ndyosi Sti na: cuaˈni Ni chaˈ caca nguula tiˈ tyiquee ma̱, chaˈ caja juersa jiˈi̱ ma̱, chaˈ taca cuaˈni ma̱ cua ñaˈa̱ ca chaˈ tsoˈo, chaˈ xcuiˈ chaˈ tsoˈo chcuiˈ ma̱ loˈo tyaˈa ma̱. Ntsuˈu tsa tyiquee ycuiˈ Ni ñaˈa̱ Ni jiˈna, biˈ chaˈ tsoˈo tsa nduˈni Ni loˈo na, chaˈ ti̱ ti tyiˈi̱ tyiquee na lcaa hora laja loˈo ntajatya na jiˈi̱ ycuiˈ Jesús chaˈ ca̱a̱ Ni.
\c 3
\s Chcuiˈ ma̱ loˈo ycuiˈ Ndyosi cuentya jiˈi̱ ya
\p
\v 1 Cuˈma̱ tyaˈa ngusñi na chaˈ jiˈi̱ Jesús, chcuiˈ ma̱ loˈo ycuiˈ Ndyosi cuentya jiˈi̱ ya, chaˈ xtyucua Ni jiˈi̱ ya laja loˈo nclyuˈu ya chaˈ jiˈi̱ ycuiˈ nu Xuˈna na jiˈi̱ nguˈ, chaˈ ná tacu̱ˈ nguˈ lo cua ñaˈa̱ ca chaˈ nu nclyuˈu ya jiˈi̱ nguˈ. Ñiˈya̱ loˈo ngusñi ma̱ chaˈ biˈ juani, juaˈa̱ ntiˈ ya chaˈ yala ti xñi tya quiñaˈa̱ la ñati̱ chaˈ biˈ, nde lcaa quichi̱ su nchcuiˈ ya chaˈ biˈ.
\v 2 Chcuiˈ ma̱ loˈo ycuiˈ Ndyosi chaˈ cuaˈa Ni jiˈi̱ ya chaˈ ná tyiji̱loo nguˈ cuxi jiˈi̱ ya, masi nguˈ nu cuxi tsa tyiquee nguˈ; ntsuˈu tsa ñati̱ chalyuu nu ná jlya tsoˈo tiˈ jiˈi̱ ycuiˈ Ndyosi.
\v 3 Chañi chaˈ nduˈni nu Xuˈna na lcaa chaˈ nu ñacui̱ Ni jiˈna, cuaˈni Ni chaˈ caca tlyu tyiquee ma̱, cuaˈa Ni jiˈi̱ ma̱ chaˈ ná calaˈ nu xñaˈa̱ jiˈi̱ ma̱.
\v 4 Jlo tiˈ ycuiˈ nu Xuˈna na chaˈ ndyuˈni ma̱ cña nu ngulo ya jiˈi̱ ma̱, chaˈ tya cuaˈni la ma̱ cña biˈ.
\v 5 Loˈo juaˈa̱ cuaˈni ycuiˈ nu Xuˈna na cña neˈ cresiya jiˈi̱ ma̱, chaˈ tyiˈu tiˈ ma̱ chaˈ ntsuˈu tsa tyiquee ycuiˈ Ndyosi ñaˈa̱ Ni jiˈi̱ ma̱; liˈ talo tyiquee ma̱ ñiˈya̱ loˈo ndalo tyiquee ycuiˈ Cristo loˈo ngutaˈa̱ yu loˈo ñati̱ tya clyo.
\s Ngaˈa̱ chaˈ cuaˈni na cña
\p
\v 6 Cuˈma̱ tyaˈa ngusñi na chaˈ jiˈi̱ Jesús, chaca quiyaˈ culo ya cña jiˈi̱ ma̱ chacuayáˈ jiˈi̱ Jesucristo nu Xuˈna na: ná tyaˈa̱ ma̱ stuˈba ti loˈo xaˈ la nguˈ tyaˈa ngusñi ma̱ chaˈ biˈ nu ná ntajaˈa̱ cuaˈni cña, la cuiˈ nguˈ tyaˈa ma̱ nu ná ntajaˈa̱ taquiyaˈ jiˈi̱ chaˈ nu cua nda ya loˈo ma̱.
\v 7 Siˈi na taja ya loˈo ngutiˈi̱ ya loˈo cuˈma̱ nu ngua liˈ, biˈ chaˈ tsoˈo si tyajaˈa̱ ma̱ cuaˈni ma̱ cña ñiˈya̱ nguaˈni ya loˈo yaˈ ti ya.
\v 8 Ná ndyacu laja ti ya slo cuˈma̱ nu ngua liˈ; nda ya cayaˈ chaˈ nguxacu ma̱ jiˈi̱ ya, chaˈ nguaˈni ya cña chaˈ cajá ñiˈya̱ nu tyiji̱ yuˈu jiˈi̱ ya. Tsa̱ loˈo talya nguaˈni ya cña loˈo yaˈ ti ya, chaˈ siˈi cuˈma̱ nu ngüiˈya ma̱ na nu ndyacu ya liˈ.
\v 9 Pana tsoˈo si ta ma̱ xi cayaˈ jiˈi̱ nguˈ nu culuˈu jiˈi̱ ma̱; masi cuare ni, taca xtyucua ma̱ xi jiˈi̱ ya si ntiˈ ma̱. Pana ná ngusñi ya cayaˈ nu ngua liˈ, xquiˈya chaˈ ngua tiˈ ya culuˈu ya jiˈi̱ ma̱ chaˈ ná ca taja ma̱, chaˈ cuaˈni ma̱ cña chaˈ caja na nu lyiji chaˈ tyiji̱ yuˈu jiˈi̱ ma̱ chalyuu.
\v 10 Loˈo tya ndiˈi̱ ya slo cuˈma̱, tya liˈ ngulo ya cña jiˈi̱ ma̱ ndiˈya̱: ná ta ma̱ na cacu ñati̱ nu ná ntiˈ cuaˈni cña.
\v 11 Pana juani cua ngujui chaˈ jiˈi̱ ya chaˈ ntsuˈu xi nguˈ tyaˈa ma̱ nu ná tsoˈo nduˈni; ngaˈaa ndyuˈni nguˈ biˈ cña, ndyaˈa̱ nguˈ nchcuiˈ nguˈ chaˈ cuiñi ti loˈo tyaˈa nguˈ, xquiˈya chaˈ taja nguˈ.
\v 12 Biˈ chaˈ juani nclyo ya cña jiˈi̱ nguˈ biˈ chacuayáˈ jiˈi̱ Jesucristo nu Xuˈna na, chaˈ ntsuˈu chaˈ cuaˈni nguˈ biˈ cña; juaˈa̱ caja ñiˈya cacu nguˈ cuentya jiˈi̱ scaa nguˈ.
\p
\v 13 Cuˈma̱ nguˈ tyaˈa na, ná ca taja tiˈ ma̱ chaˈ cuaˈni ma̱ chaˈ tsoˈo loˈo ñati̱.
\v 14 Ñati̱ nu ná ntajaˈa̱ taquiyaˈ jiˈi̱ lcaa chaˈ nu nscua ya lo quityi re ni, cuiˈya ma̱ cuentya tilaca laca nguˈ biˈ; liˈ ngaˈaa tyaˈa̱ ma̱ stuˈba ti loˈo nguˈ biˈ, chaˈ juaˈa̱ caca tyujuˈu tiˈ nguˈ.
\v 15 Pana siˈi tyaˈa cusu̱u̱ ma̱ laca nguˈ biˈ, tyaˈa ma̱ laca nguˈ; biˈ chaˈ ntsuˈu chaˈ ta ma̱ sca cui̱i̱ loˈo nguˈ, ñiˈya̱ laca loˈo nchcuiˈ ma̱ loˈo sca nguˈ tyaˈa ma̱.
\s Ngusalyaˈ Pablo loˈo nguˈ
\p
\v 16 Cuaˈni ycuiˈ nu Xuˈna na loˈo ma̱ chaˈ ti̱ ti tyiˈi̱ tyiquee ma̱ lcaa tsa̱, masi tsa̱ tsoˈo jiˈi̱ ma̱, masi tsa̱ cuxi jiˈi̱ ma̱, xquiˈya chaˈ lcaa hora ti̱ ti ndiˈi̱ tyiquee ycuiˈ Ni. Loˈo juaˈa̱ tyanu ycuiˈ nu Xuˈna na loˈo ma̱ liˈ.
\p
\v 17 Xlyo niˈi̱ jiˈi̱ ma̱. Pablo laca naˈ loˈo ycuiˈ naˈ nscua naˈ letra juani, chaˈ caca cuayáˈ tiˈ ma̱ chaˈ chañi chaˈ quityi nu nguscua naˈ lijya̱ slo ma̱ laca quityi re.
\v 18 Ntiˈ ya chaˈ ñaˈa̱ ti cuaˈni Jesucristo nu Xuˈna na chaˈ tsoˈo loˈo lcaa cuˈma̱. Juaˈa̱ caca chaˈ lacua.