\id TIT
\h TITO
\mt Nguscua San Pablo quityi ndyaa ca slo Tito
\c 1
\p
\v 1 Pablo laca naˈ. Ndyaˈa̱ naˈ lo cña jiˈi̱ ycuiˈ Ndyosi, loˈo juaˈa̱ nguaˈa̱ lo Jesucristo cña ˈna chaˈ tsaˈa̱ chcuiˈ naˈ chaˈ tsoˈo jiˈi̱ Jesús loˈo xaˈ ñati̱; ngaˈa̱ chaˈ chcuiˈ naˈ loˈo ñati̱ nu cua laca ngusubi ycuiˈ Ndyosi jiˈi̱ chaˈ caca nguˈ ñati̱ jiˈi̱ ycuiˈ Ni, chaˈ jlya tsoˈo la tiˈ nguˈ biˈ jiˈi̱ Ni liˈ. Cua nda Jesucristo ˈna lijya̱a̱ chaˈ ca cuayáˈ tiˈ nguˈ lcaa chaˈ liñi jiˈi̱ Ni, chaˈ taca cuaˈni tlyu lcaa na jiˈi̱ ycuiˈ Ndyosi,
\v 2 loˈo juaˈa̱ taca jatya na jiˈi̱ chalyuu nu ná ngaˈa̱ chaˈ tye jiˈna liˈ. Ná cuiñi ycuiˈ Ndyosi. Saˈni tsa nchcuiˈ Ni chaˈ caja chalyuu biˈ jiˈna, tya loˈo ngüiñá Ni chalyuu; tya liˈ nda Ni chaˈ loˈo ñati̱ jiˈi̱ Ni nde chalyuu chaˈ taca tyiˈi̱ nguˈ slo Ni.
\v 3 Loˈo juani cua ntiˈ Ni chaˈ tsoˈo tsa tyempo chaˈ cañi tyijyuˈ chaˈ jiˈi̱ ycuiˈ Ndyosi nu ndyuˈni lyaá jiˈna, loˈo juaˈa̱ cua ngulo Ni cña jnaˈ chaˈ culuˈu naˈ chaˈ tsoˈo biˈ jiˈi̱ xaˈ ñati̱.
\v 4 Nscua naˈ quityi re chaˈ ca̱a̱ slo nuˈu̱, Tito, chaˈ ñiˈya̱ si laca nuˈu̱ sñiˈ naˈ, juaˈa̱ ntiˈ naˈ ñaˈa̱ naˈ jinuˈu̱, chaˈ stuˈba ti ngusñi na chaˈ jiˈi̱ ycuiˈ Ndyosi. Ndiˈya̱ ntiˈ naˈ chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo nuˈu̱, juaˈa̱ Jesucristo nu nguaˈni lyaá jiˈna; cuaˈni Ni chaˈ ti̱ ti tyiˈi̱ tyiquee nuˈu̱ liˈ.
\s Cña nu ndyuˈni Tito ca loyuu Creta
\p
\v 5 Nguxtyanu naˈ jinuˈu̱ ca loyuu Creta biˈ, chaˈ cuaˈni lyiji nuˈu̱ cña nu ngaˈa̱ chaˈ cuaˈni nuˈu̱, chaˈ subi nuˈu̱ jiˈi̱ nguˈ cusuˈ nu caca loo jiˈi̱ taju ñati̱ tyaˈa ngusñi na chaˈ jiˈi̱ Jesús lcaa quichi̱ cajua; subi nuˈu̱ jiˈi̱ nguˈ cusuˈ biˈ ñiˈya̱ nu nacui̱ naˈ jinuˈu̱ tya tsubiˈ la.
\v 6 Xcuiˈ tsoˈo ti ngaˈa̱ chaˈ cuaˈni nguˈ cusuˈ biˈ, chaˈ ná taca sta ñati̱ quiˈya jiˈi̱ nguˈ. Caja clyoˈo nguˈ biˈ loˈo sca ti nu cunaˈa̱, ni ná tsoˈo tyuˈu chaˈ jiˈi̱ nguˈ biˈ loˈo xaˈ nu cunaˈa̱. Ntsuˈu chaˈ xñi sñiˈ nguˈ cusuˈ biˈ chaˈ jiˈi̱ Jesucristo, loˈo juaˈa̱ ná cuaˈni subaˈ sñiˈ nguˈ loˈo xaˈ ñati̱; ntsuˈu chaˈ taquiyaˈ sñiˈ nguˈ jiˈi̱ chaˈ nu nchcuiˈ nguˈ cusuˈ.
\v 7 Loˈo juaˈa̱ nguˈ nu caca loo jiˈi̱ taju ñati̱ tyaˈa na ni, ná tsoˈo si ntsuˈu chaˈ sta ñati̱ quiˈya jiˈi̱ nguˈ biˈ, chaˈ cña jiˈi̱ ycuiˈ Ndyosi ndyuˈni nguˈ biˈ. Biˈ chaˈ clyana nuˈu̱ jiˈi̱ nguˈ nu ná nduˈni tyucuaa tiˈ jiˈi̱ tyaˈa nguˈ, nguˈ nu ná ñasi̱ˈ, nguˈ nu ná cuˈbi, nguˈ nu ná ntsuˈu chaˈ cusu̱u̱ loˈo tyaˈa ñati̱, nguˈ nu ná ndacui tsa tiˈ jiˈi̱ cñi;
\v 8 clyana nuˈu̱ jiˈi̱ nguˈ nu nda su tyiˈi̱ ñati̱ nu lijya̱ tyijyuˈ, nguˈ nu ndiya tiˈ cuaˈni xcuiˈ chaˈ tsoˈo, nguˈ nu tsoˈo ti nchcuiˈ loˈo ñati̱, nguˈ nu sca ti chaˈ jiˈi̱ Jesús ntsuˈu tyiquee nguˈ, nu nduˈni cua ñaˈa̱ ca chaˈ nu ntiˈ ycuiˈ Ndyosi chaˈ cuaˈni na, nguˈ nu nchca jiˈi̱ cuaˈa jiˈi̱ ycuiˈ ca nguˈ.
\v 9 Tsoˈo tsa ñati̱ nu cua nguiˈi̱ tsa jiˈi̱ chaˈ liñi nu nguluˈu na jiˈi̱, ñati̱ nu nchca jiˈi̱ culuˈu chaˈ liñi biˈ jiˈi̱ tyaˈa ñati̱, ñati̱ nu nchca jiˈi̱ tacu̱ˈ tsiyaˈ ti chaˈ jiˈi̱ nguˈ cuiñi.
\p
\v 10 Cua ntsuˈu tyu̱u̱ tyaˈa nguˈ nu ná ntajaˈa̱ taquiyaˈ nguˈ jiˈi̱ chaˈ nu nchcuiˈ nguˈ nu laca loo, ntsuˈu quiñaˈa̱ tsa nguˈ judío nu ndyuˈni juaˈa̱; cuiñi tsa chaˈ nu nchcuiˈ nguˈ biˈ, chaˈ juaˈa̱ cñiloˈo nguˈ jiˈi̱ tyaˈa nguˈ.
\v 11 Ngaˈa̱ chaˈ tacu̱ˈ ma̱ tuˈba nguˈ cuiñi biˈ, chaˈ ná tacu̱ˈ nguˈ chaˈ jiˈi̱ quiñaˈa̱ ñati̱, ñaˈa̱ tyaˈa ngaˈa̱ niˈi̱ ti nguˈ nu cua ngusñi chaˈ liñi biˈ. Nclyuˈu nguˈ cuiñi biˈ chaˈ jiˈi̱ tyaˈa na; pana na cuiñi nguˈ biˈ, chaˈ cua ntiˈ nguˈ caja cñi jiˈi̱ nguˈ.
\p
\v 12 Chaˈ liñi nchcuiˈ sca jyoˈo cusuˈ tyaˈa quichi̱ tyi nguˈ Creta su ndiˈi̱ nuˈu̱, nu ngua tuˈba jiˈi̱ joˈó jiˈi̱ nguˈ cua saˈni. Ndiˈya̱ nchcuiˈ biˈ: “Cuiñi tsa lcaa nguˈ Creta tyaˈa naˈ, xñaˈa̱ tsa nguˈ. Loˈo juaˈa̱ ndacu tsa nguˈ, pana ná ntajaˈa̱ nguˈ cuaˈni nguˈ cña tsiyaˈ ti”, nacui̱ jyoˈo cusuˈ biˈ.
\v 13 Chañi chaˈ nu nchcuiˈ jyoˈo biˈ; biˈ chaˈ lye chcuiˈ nuˈu̱ loˈo nguˈ biˈ, chaˈ tsoˈo ti xñi nguˈ lcaa chaˈ jiˈi̱ Jesús nu nchcuiˈ na loˈo nguˈ,
\v 14 chaˈ ngaˈaa cuaˈa̱ jyaca̱ nguˈ jiˈi̱ cuentyu nu nchcuiˈ nguˈ judío, chaˈ ngaˈaa taquiyaˈ nguˈ jiˈi̱ chaˈ nu nchcuiˈ ñati̱ chalyuu ti nu cua ngulochu̱ˈ jiˈi̱ lcaa chaˈ liñi.
\p
\v 15 Lubii tsa laca lcaa lo na, juaˈa̱ ntiˈ sca nguˈ nu lubii cresiya jiˈi̱ cuentya jiˈi̱ ycuiˈ Ndyosi; pana ná ntsuˈu na lubii tsiyaˈ ti ntiˈ nguˈ nu cuxi tyiquee, chaˈ ná jlya tiˈ nguˈ biˈ jiˈi̱ chaˈ liñi. Loˈo cuaˈni nguˈ nu cuxi tyiquee chaˈ cuxi, liˈ ngaˈaa nda nguˈ biˈ cuentya chaˈ xcuiˈ chaˈ cuxi laca nu nduˈni nguˈ. 
\v 16 Ñati̱ jiˈi̱ ycuiˈ Ndyosi laca nguˈ biˈ, nacui̱ ycuiˈ nguˈ, pana ná ndyuˈni nguˈ tsiyaˈ ti ñiˈya̱ nu ntiˈ ycuiˈ Ndyosi; biˈ chaˈ caca cuayáˈ tiˈ na chaˈ cuiñi nguˈ biˈ. Cuxi tsa ndyuˈni nguˈ biˈ, chaˈ ná ntajaˈa̱ nguˈ taquiyaˈ nguˈ jiˈi̱ chaˈ nu liñi ca; ni sca chaˈ tsoˈo ná ca cuaˈni nguˈ biˈ tsiyaˈ ti.
\c 2
\s Chaˈ liñi culuˈu Tito jiˈi̱ ñati̱ chaˈ caca tsoˈo tyiquee nguˈ loˈo tyaˈa nguˈ
\p
\v 1 Loˈo nuˈu̱ ni, Tito, xcuiˈ chaˈ liñi culuˈu nuˈu̱ jiˈi̱ ñati̱.
\v 2 Culuˈu nuˈu̱ jiˈi̱ nguˈ nu cusuˈ la chaˈ ná caca cuˈbi nguˈ, chaˈ xcuiˈ chaˈ liñi jlya tiˈ nguˈ, chaˈ cuaˈa nguˈ jiˈi̱ ycuiˈ ca nguˈ, chaˈ xcuiˈ chaˈ tsoˈo cuaˈni nguˈ liˈ; culuˈu nuˈu̱ jiˈi̱ nguˈ biˈ chaˈ jlya tsoˈo tiˈ nguˈ lcaa chaˈ liñi, chaˈ tyuˈu tyiquee nguˈ ñaˈa̱ nguˈ jiˈi̱ tyaˈa ñati̱ nguˈ, chaˈ talo tyiquee nguˈ loˈo ndyuˈni lyaˈ tiˈ ñati̱ jiˈi̱ nguˈ.
\v 3 Loˈo juaˈa̱ culuˈu nuˈu̱ jiˈi̱ maˈ cusuˈ ñiˈya̱ nu ngaˈa̱ chaˈ tyiˈi̱ maˈ chaˈ cuaˈni chi̱ maˈ loo ycuiˈ Ndyosi, chaˈ ná chcuiˈ maˈ cuentyu jiˈi̱ ñati̱, chaˈ ná ca cuˈbi maˈ, chaˈ culuˈu maˈ xcuiˈ chaˈ tsoˈo jiˈi̱ tyaˈa ñati̱ maˈ.
\v 4 Liˈ loˈo ñaˈa̱ nu cunaˈa̱ cuañiˈ la jiˈi̱ maˈ cusuˈ, juaˈa̱ ca tsaˈa̱ nguˈ chaˈ tsoˈo tsa tyuˈu tyiquee nguˈ ñaˈa̱ nguˈ jiˈi̱ clyoˈo nguˈ, ñaˈa̱ nguˈ jiˈi̱ sñiˈ nguˈ;
\v 5 ca tsaˈa̱ nu cunaˈa̱ cuañiˈ la chaˈ cuaˈa nguˈ jiˈi̱ ycuiˈ ca nguˈ, chaˈ xcuiˈ chaˈ tsoˈo cuaˈni nguˈ, ñiˈya̱ nu ngaˈa̱ chaˈ cuaˈni nguˈ nu cua ngua lubii cresiya jiˈi̱ cuentya jiˈi̱ ycuiˈ Ndyosi; ca tsaˈa̱ nguˈ ñiˈya nu tsoˈo ti cuaˈni nguˈ cña toˈ tyi nguˈ, ñiˈya̱ caca tyaˈna tiˈ nguˈ jiˈi̱ tyaˈa ñati̱ nguˈ, ñiˈya̱ nu taquiyaˈ nguˈ jiˈi̱ clyoˈo nguˈ. Si xcuiˈ tsoˈo ti nduˈni nu cunaˈa̱ cuañiˈ ni, liˈ ná ntsuˈu chaˈ chcuiˈ cuxi xaˈ ñati̱ jiˈi̱ ycuiˈ Ndyosi xquiˈya nguˈ biˈ liˈ.
\p
\v 6 La cuiˈ juaˈa̱, ta nuˈu̱ cui̱i̱ loˈo nu nguˈ quiˈyu cuañiˈ chaˈ cuaˈa nguˈ jiˈi̱ ycuiˈ ca nguˈ, chaˈ xcuiˈ chaˈ tsoˈo cuaˈni nguˈ.
\v 7 Xcuiˈ tsoˈo ti cuaˈni nuˈu̱, chaˈ juaˈa̱ ca tsaˈa̱ nu nguˈ cuañiˈ biˈ lcaa chaˈ tsoˈo loˈo ñaˈa̱ nguˈ cua ñaˈa̱ ca chaˈ nu ndyuˈni nuˈu̱; lcaa chaˈ liñi culuˈu tsoˈo nuˈu̱ jiˈi̱ nguˈ biˈ, siˈi chaˈ laja ti chcuiˈ nuˈu̱ loˈo nguˈ.
\v 8 Xcuiˈ chaˈ liñi culuˈu nuˈu̱ jiˈi̱ nguˈ, chaˈ ná tucui taca ñacui̱ chaˈ cuiñi nuˈu̱. Ca tyujuˈu tiˈ nguˈ nu cuxi tyiquee liˈ, chaˈ ná caja ñiˈya̱ chcuiˈ nguˈ chaˈ cuxi jiˈna liˈ.
\p
\v 9 Chcuiˈ nuˈu̱ loˈo nguˈ nu laca msu nu ngüiˈya ñati̱ chaˈ taquiyaˈ nguˈ jiˈi̱ lcaa chaˈ nu nchcuiˈ xuˈna nguˈ, chaˈ tsoˈo ti cuaˈni nguˈ lcaa cña jiˈi̱ nguˈ, chaˈ ná xlyú nguˈ chaˈ hichu̱ˈ nu laca xuˈna nguˈ. 
\v 10 Ná tsoˈo si cuaana nguˈ msu na nu ntsuˈu jiˈi̱ xuˈna nguˈ, masi xtyi ti chaˈ; xcuiˈ chaˈ liñi cuaˈni nguˈ msu lacua. Cuaˈni chi̱ nguˈ loo xuˈna nguˈ, chaˈ ca cuayáˈ tiˈ xaˈ ñati̱ chaˈ tsoˈo tsa laca chaˈ jiˈi̱ ycuiˈ Ndyosi nu ndyuˈni lyaá jiˈna.
\p
\v 11 Tsoˈo tsa nduˈni ycuiˈ Ndyosi loˈo ñati̱ chalyuu chaˈ cua ntiˈ Ni chaˈ clyaá nguˈ jiˈi̱ nu cuxi;
\v 12 juaˈa̱ cua nguluˈu Ni jiˈna ñiˈya̱ taca tyiˈi̱ tsoˈo ti na nde chalyuu. Ntiˈ Ni chaˈ cuaˈa na jiˈi̱ ycuiˈ ca na, chaˈ tsoˈo ti cuaˈni na loˈo tyaˈa ñati̱ na. Taca cuaˈni tlyu na jiˈi̱ ycuiˈ Ndyosi nu loˈo cua ngulochu̱ˈ na jiˈi̱ lcaa chaˈ cuxi nu ná ndiya tiˈ Ni jiˈi̱, nu loˈo ngaˈaa nduˈni na lcaa chaˈ subaˈ nu ndiya tiˈ ñati̱ chalyuu ti.
\v 13 Juaˈa̱ ti nguluˈu Ni jiˈna, chaˈ taca ca tsoˈo tyiquee na laja loˈo ntajatya na jiˈi̱ ycuiˈ Ndyosi nu tlyu tsa chaˈ nu ntsuˈu jiˈi̱ Ni, ni jacuaˈ ca̱a̱ Ni chaca quiyaˈ. Ndubi tsa xee ntsuˈu jiˈi̱ Ni liˈ, nu loˈo tyuˈu tucua Jesucristo nu nguaˈni lyaá jiˈna.
\v 14 Nu loˈo nda Jesús chacuayáˈ chaˈ ndyujuii nguˈ jiˈi̱, nda yu tyucui ñaˈa̱ ycuiˈ ca yu chaˈ taca clyaá na jiˈi̱ nu cuxi. Nguaˈni lubii Ni jiˈi̱ cresiya jiˈna liˈ chaˈ caca na ñati̱ jiˈi̱ Ni, chaˈ tyajaˈa̱ na cuaˈni na xcuiˈ chaˈ tsoˈo liˈ.
\p
\v 15 Juaˈa̱ laca chaˈ nu ngaˈa̱ chaˈ ta nuˈu̱ loˈo nguˈ, pana lye chcuiˈ nuˈu̱ lcaa chaˈ biˈ loˈo nguˈ. Culo nuˈu̱ cña jiˈi̱ nguˈ, lcaa lo chaˈ tsoˈo nu cuaˈni nguˈ, lcaa lo chaˈ nu ná tsoˈo chaˈ cuaˈni nguˈ, chaˈ nuˈu̱ laca loo; ná ta nuˈu̱ chacuayáˈ jiˈi̱ nguˈ chaˈ chcuiˈ nguˈ chaˈ cuxi jinuˈu̱.
\c 3
\s Ñiˈya̱ nu ngaˈa̱ chaˈ cuaˈni na si laca na ñati̱ jiˈi̱ Jesús
\p
\v 1 Culuˈu nuˈu̱ jiˈi̱ nguˈ chaˈ taquiyaˈ nguˈ jiˈi̱ lcaa nguˈ nu laca loo, jiˈi̱ lcaa nguˈ tisiya; ngaˈa̱ chaˈ cuaˈni nguˈ lcaa lo cña tsoˈo nu culo nguˈ biˈ jiˈi̱ nguˈ chaˈ cuaˈni nguˈ.
\v 2 Ná tsoˈo chcuiˈ nguˈ cuentyu jiˈi̱ xaˈ ñati̱, ni ná tsoˈo xu̱u̱ tyaˈa nguˈ loˈo ñati̱; ntsuˈu chaˈ cube tiˈ nguˈ jiˈi̱ xaˈ ñati̱, chaˈ tsoˈo ti chcuiˈ nguˈ loˈo lcaa ñati̱.
\p
\v 3 Cua saˈni la ná nda na cuentya tsiyaˈ ti ñiˈya̱ ntsuˈu chaˈ jiˈi̱ ycuiˈ Ndyosi; ná ndaquiyaˈ na jiˈi̱ Ni liˈ, chaˈ cua ngüiñiloˈo nu xñaˈa̱ jiˈna chaˈ cuaˈni na lcaa chaˈ cuxi nu ndijña cresiya jiˈna chaˈ cuaˈni na. Ngua chaa tiˈ na loˈo ndyuˈni na chaˈ cuxi biˈ liˈ, masi nguaˈni lyaˈ tiˈ na jiˈi̱ ñati̱, masi ngua liyeˈ tiˈ na ñaˈa̱ na jiˈi̱ nguˈ, masi ngua tiˈí tiˈ na ñaˈa̱ na jiˈi̱ tyaˈa na; loˈo juaˈa̱ nguˈ tyaˈa na, ngua tiˈí tiˈ nguˈ ñaˈa̱ nguˈ jiˈna.
\v 4 Loˈo liˈ ngua tsaˈa̱ na chaˈ ntiˈ tsa ycuiˈ Ndyosi cuaˈni lyaá Ni jiˈna, chaˈ ntsuˈu tsa tyiquee Ni ñaˈa̱ Ni jiˈna, ñati̱ chalyuu na.
\v 5 Loˈo liˈ nguaˈni lyaá Ni jiˈna chaˈ tyaˈna tsa tiˈ Ni ñaˈa̱ Ni jiˈna; pana siˈi chaˈ nguaˈni na sca chaˈ tsoˈo, sca cña tacati, loˈo liˈ xquiˈya biˈ nguaˈni tyaˈna tiˈ Ni jiˈna. Siˈi juaˈa̱. Na cua nguaˈni lubii Ni jiˈi̱ cresiya jiˈna, biˈ chaˈ caca chcuiˈ na chaˈ cua ngula na chaca quiyaˈ; cua ngua cucui cresiya jiˈna xquiˈya cña nu cua nguaˈni Xtyiˈi ycuiˈ Ndyosi loˈo na. 
\v 6 Tsoˈo tsa nda Ni Xtyiˈi ycuiˈ Ni chaˈ tyanu neˈ cresiya jiˈna chacuayáˈ jiˈi̱ Jesucristo nu nguaˈni lyaá jiˈna; 
\v 7 tlyu tsa chaˈ tsoˈo nu nguaˈni ycuiˈ Ndyosi loˈo na juaˈa̱, chaˈ caca na ñiˈya̱ si laca na sñiˈ ycuiˈ Ni, nu ndu̱ tiˈ na chaˈ caja chalyuu cucui nu ná ngaˈa̱ chaˈ tye jiˈna.
\p
\v 8 Ngaˈa̱ chaˈ jlya tsoˈo tiˈ ma̱ chaˈ liñi nu nscua naˈ re, biˈ chaˈ lye chcuiˈ nuˈu̱ chaˈ biˈ loˈo lcaa ñati̱ nu ngusñi chaˈ jiˈi̱ ycuiˈ Ndyosi ca biˈ, chaˈ xcuiˈ chaˈ tsoˈo cuaˈni ma̱ liˈ. Tsoˈo tsa laca chaˈ liñi, taca xtyucua chaˈ biˈ jiˈi̱ cua ñaˈa̱ ca ñati̱; 
\v 9 pana ná tsoˈo chcuiˈ ma̱ chaˈ laja ti, juaˈa̱ ná tsoˈo si xlyú ma̱ chaˈ hichu̱ˈ tyaˈa ma̱ xquiˈya jyoˈo cusuˈ jiˈna, masi xquiˈya sca chaˈ nu nguscua jyoˈo Moisés nu ngua saˈni la. Ná sca chaˈ tsoˈo ná taca cuaˈni ma̱ juaˈa̱. Chcunaˈ tyempo jiˈi̱ ma̱ juaˈa̱, chaˈ xcuiˈ chaˈ nu ndacui lo cuiˈi̱ ti nchcuiˈ ma̱ liˈ.
\p
\v 10 Tucua quiyaˈ chcuiˈ nuˈu̱ loˈo nguˈ chaˈ cuaˈa nuˈu̱ jiˈi̱ nguˈ nu ntiˈ xuˈba chaˈ cusu̱u̱ laja cuˈma̱ nu laca ma̱ ñati̱ jiˈi̱ Jesucristo. Si ná cuna nguˈ biˈ, liˈ xtyanu ma̱ jiˈi̱ nguˈ biˈ.
\v 11 Cua ngunuˈu̱ tsiyaˈ ti chaˈ nu ntsuˈu hique nguˈ, loˈo juaˈa̱ ntsuˈu quiˈya jiˈi̱ nguˈ biˈ; hasta ycuiˈ nguˈ biˈ jlo tiˈ nguˈ chaˈ ntsuˈu quiˈya jiˈi̱ nguˈ. 
\s Ngusalyaˈ Pablo loˈo Tito
\p
\v 12 Nu loˈo tyalaa ti masi Artemas, masi Tíquico, nu cua nda naˈ jiˈi̱ chaˈ ca̱a̱ slo nuˈu̱, liˈ yala ti tsaa nuˈu̱ ca quichi̱ Nicópolis si caca jinuˈu̱; tyacua tyaˈa na cajua liˈ, chaˈ tyiˈi̱ naˈ ca quichi̱ biˈ tyempo tlyaˈ nta̱ˈ.
\v 13 Xtyucua nuˈu̱ jiˈi̱ Zenas, nu yu nu laca tuˈba biˈ, loˈo jiˈi̱ Apolos. Liˈ cuiˈya nuˈu̱ cuentya chaˈ ngaˈaa ntsuˈu na nu lyiji jiˈi̱ nguˈ loˈo tya tsaa la nguˈ tyucui̱i̱.
\v 14 Ntsuˈu chaˈ ca tsaˈa̱ ca taˈa ñati̱ jiˈi̱ Jesucristo tyaˈa na chaˈ cuaˈni nguˈ lcaa lo chaˈ tsoˈo, chaˈ taca xtyucua nguˈ jiˈi̱ tyaˈa ñati̱ nguˈ nu lyiji xi jiˈi̱; ná tsoˈo si taja ti ndiˈi̱ nguˈ chalyuu.
\p
\v 15 Lcaa nguˈ ca nde loˈo naˈ nchcuiˈ ya xlyo niˈi̱ jinuˈu̱. Tsoˈo ti chcuiˈ nuˈu̱ loˈo lcaa nguˈ nu tsoˈo ti ntsuˈu tyiquee ñaˈa̱ nguˈ jiˈi̱ cua chaˈ laca nguˈ tyaˈa ngusñi na chaˈ jiˈi̱ Jesús. Ñaˈa̱ ti cuaˈni ycuiˈ Ndyosi chaˈ tsoˈo loˈo lcaa cuˈma̱. Juaˈa̱ caca chaˈ lacua.