\id PHM
\h FILEMON
\mt Nguscua San Pablo quityi ndyaa ca slo Filemón
\c 1
\p
\v 1 Pablo laca naˈ, loˈo juani ntsuˈu naˈ neˈ chcua̱ cuentya jiˈi̱ Jesucristo. Nscua naˈ quityi re loˈo Timoteo tyaˈa na, chaˈ ta ya chaˈ loˈo nuˈu̱, Filemón, chaˈ tsoˈo tsa tyaˈa tsoˈo na laca nuˈu̱, chaˈ la cuiˈ tyaˈa cña ndyuˈni na.
\v 2 Loˈo juaˈa̱ nscua ya quityi re chaˈ taca cuna lcaa nguˈ nu ndyuˈu tiˈi̱ ca slo nuˈu̱ chaˈ nu nchcuiˈ ya re, loˈo maˈ Apia tyaˈa na, loˈo Arquipo nu stuˈba ti loˈo cuare nxu̱u̱ tyaˈa loˈo nu cuxi cuentya jiˈi̱ ycuiˈ Ndyosi.
\v 3 Ndiˈya̱ ntiˈ naˈ chaˈ ñaˈa̱ ti cuaˈni ycuiˈ Ndyosi Sti na chaˈ tsoˈo loˈo ma̱, chaˈ cuaˈni Ni chaˈ ti̱ ti tyiˈi̱ tyiquee ma̱ xquiˈya Jesucristo nu Xuˈna na.
\s Ñaˈa̱ ti ntsuˈu tsa chaˈ jiˈi̱ Filemón loˈo Jesucristo, chaˈ ngusñi tsoˈo yu chaˈ jiˈi̱ ycuiˈ Ndyosi
\p
\v 4 Ndya naˈ xlyaˈbe jiˈi̱ ycuiˈ Ndyosi cuentya jinuˈu̱, Filemón, lcaa quiyaˈ loˈo nchcuiˈ naˈ loˈo ycuiˈ Ndyosi. 
\v 5 Hasta ca su ndiˈi̱ naˈ re, cua ndañi chaˈ tsoˈo tsa ngusñi nuˈu̱ chaˈ jiˈi̱ Jesús nu Xuˈna na, juaˈa̱ ntsuˈu tsa tyiquee nuˈu̱ ñaˈa̱ nuˈu̱ jiˈi̱ Jesús loˈo jiˈi̱ lcaa ñati̱ jiˈi̱ Cristo cajua. Lcaa chaˈ biˈ cua ndyuna naˈ jiˈi̱;
\v 6 biˈ chaˈ ndijña naˈ chaˈ clyu tiˈ jiˈi̱ ycuiˈ Ndyosi, chaˈ ca cuayáˈ tsoˈo tiˈ lcaa nguˈ nu ndyuna chaˈ nu nchcuiˈ nuˈu̱ loˈo nguˈ cuentya jiˈi̱ Jesucristo, chaˈ loˈo ñaˈa̱ nguˈ jinuˈu̱, liˈ ca cuayáˈ tsoˈo tiˈ nguˈ chaˈ xcuiˈ tsoˈo tsa ndyuˈni Cristo loˈo na.
\v 7 Tsoˈo tsa tyiquee naˈ juani, tlyu tyiquee naˈ xquiˈya nuˈu̱, loˈo ngujui chaˈ ˈna chaˈ ntsuˈu tsa tyiquee nuˈu̱ ñaˈa̱ nuˈu̱ jiˈi̱ nguˈ tyaˈa na, chaˈ nxtyucua tsa nuˈu̱ jiˈi̱ nguˈ tyaˈa na chaˈ talo tyiquee nguˈ. Chañi chaˈ tyaˈa na cuentya jiˈi̱ Jesucristo laca nuˈu̱. 
\s Ndijña Pablo sca chaˈ tsoˈo cuentya jiˈi̱ Onésimo
\p
\v 8-9 Loˈo juani ndijña naˈ sca chaˈ clyu tiˈ jinuˈu̱. Jlo tiˈ naˈ ñiˈya̱ ntsuˈu tsa tyiquee nuˈu̱ ñaˈa̱ nuˈu̱ jiˈi̱ ñati̱, biˈ chaˈ siˈi sca cña nu culo naˈ jinuˈu̱ laca re, masi ntsuˈu chacuayáˈ jnaˈ chaˈ chcuiˈ naˈ juaˈa̱. Pablo laca naˈ, cua ngusuˈ naˈ juani, loˈo juaˈa̱ ntsuˈu naˈ neˈ chcua̱ juani xquiˈya chaˈ nchcuiˈ naˈ chaˈ jiˈi̱ Jesucristo loˈo ñati̱.
\v 10 Pana chcuiˈ naˈ sca chaˈ loˈo nuˈu̱ cuentya jiˈi̱ yu Onésimo, chaˈ ñiˈya̱ ntiˈ naˈ ñaˈa̱ naˈ jiˈi̱ sca sñiˈ naˈ, juaˈa̱ ntiˈ naˈ ñaˈa̱ naˈ jiˈi̱ yu biˈ juani, chaˈ neˈ chcua̱ re ngusñi yu chaˈ jiˈi̱ ycuiˈ Ndyosi xquiˈya naˈ.
\p
\v 11 Nu Onésimo biˈ ni, ná tsoˈo ca nguaˈnijoˈo yu jinuˈu̱ nu ngua tya saˈni la. Pana juani xaˈ ñaˈa̱ cuaˈni yu; masi cuentya jinuˈu̱, masi cuentya jnaˈ, tsoˈo tsa nduˈni yu cña juani.
\v 12 Cua ngulo naˈ cña jiˈi̱ yu chaˈ xtyu̱u̱ yu tya̱a̱ yu ca slo nuˈu̱ chaca quiyaˈ, masi ñiˈya̱ laca si la cuiˈ cresiya ˈna cua nda naˈ ndyaa ca slo nuˈu̱.
\v 13 Jlo tiˈ nuˈu̱ chaˈ ntsuˈu naˈ neˈ chcua̱ nde xquiˈya chaˈ cua nchcuiˈ naˈ chaˈ tsoˈo jiˈi̱ Jesucristo loˈo ñati̱, loˈo juaˈa̱ tsoˈo tsa ntsuˈu tyiquee naˈ si ndyanu yu ca nde loˈo naˈ, chaˈ xtyucua yu jnaˈ ñiˈya̱ laca si na cua ndiˈi̱ ycuiˈ nuˈu̱ ca nde.
\v 14 Pana ntiˈ naˈ quiñi chaˈ ˈna loˈo nuˈu̱ clyo, Filemón. Tsoˈo tsa tyiquee nuˈu̱, loˈo ntiˈ naˈ chaˈ cuaˈni nuˈu̱ loˈo yu ñiˈya̱ nu ntiˈ ycuiˈ nuˈu̱; ná ntiˈ naˈ culo naˈ cña jinuˈu̱ chaˈ tyanu yu loˈo naˈ.
\v 15 Ná tyiqueeˈ ngusna yu xi jinuˈu̱ chaˈ tya ta la ycuiˈ Ndyosi jiˈi̱ yu chaˈ tyalaa yu ca slo nuˈu̱ chaca quiyaˈ, chaˈ juani tyanu yu slo nuˈu̱ tyucui tyempo nu tyiˈi̱ yu chalyuu.
\v 16 Ngaˈaa siˈi msu juaˈa̱ ti caca yu juani, tyaˈa na laca yu; tyaˈa naˈ laca yu nu tsoˈo tsa ntsuˈu tyiquee naˈ ñaˈa̱ naˈ jiˈi̱. Loˈo juaˈa̱ tyaˈa nuˈu̱ nu tsoˈo la laca yu juani; msu tsoˈo jinuˈu̱ caca yu juani, chaˈ la cuiˈ tyaˈa ñati̱ jiˈi̱ Jesucristo laca ma̱. 
\p
\v 17 Biˈ chaˈ chcuiˈ tsoˈo nuˈu̱ loˈo yu loˈo tyalaa yu ca slo nuˈu̱, ñiˈya̱ nchcuiˈ tsoˈo nuˈu̱ loˈo naˈ loˈo ndyalaa naˈ ca slo nuˈu̱, xquiˈya chaˈ stuˈba ti ngusñi na chaˈ jiˈi̱ ycuiˈ Ndyosi.
\v 18 Si ntsuˈu cuentya nu ndacui yu jinuˈu̱ xquiˈya chaˈ cuxi nu nguaˈni yu cua saˈni la, sta nuˈu̱ taneˈ biˈ cuentya ˈna;
\v 19 tya naˈ cñi biˈ jinuˈu̱, biˈ chaˈ nscua naˈ xtañi naˈ ca nde ndiˈya̱: Pablo. Ná chcuiˈ na jiˈi̱ chaˈ nu ndacui nuˈu̱ jnaˈ, masi sca taneˈ tlyu laca biˈ, chaˈ ngujui chalyuu nu ná ngaˈa̱ chaˈ tye jinuˈu̱ xquiˈya naˈ.
\v 20 Tyaˈa na laca yu chacuayáˈ jiˈi̱ Jesucristo, biˈ chaˈ ñiˈya̱ nu ngüijña naˈ jinuˈu̱ tsa̱ chaˈ tsoˈo ti chcuiˈ nuˈu̱ loˈo yu, juaˈa̱ cuaˈni nuˈu̱ loˈo yu, chaˈ juaˈa̱ taca xtyucua nuˈu̱ ˈna chaˈ talo naˈ ca nde.
\p
\v 21 Jlo tiˈ naˈ chaˈ taquiyaˈ nuˈu̱ jiˈi̱ chaˈ nu nchcuiˈ naˈ loˈo nuˈu̱, biˈ chaˈ nscua naˈ quityi re chaˈ ca̱a̱ slo nuˈu̱; jlo tiˈ naˈ chaˈ tya quiñaˈa̱ la chaˈ tsoˈo tya cuaˈni la nuˈu̱.
\v 22 Loˈo chaca chaˈ ni, nduna ycuiˈ Ndyosi chaˈ luˈba ti ndijña ma̱ sca chaˈ cuentya jnaˈ, biˈ chaˈ tsoˈo si cuaˈni choˈo ma̱ sca seˈi̱ su tyiˈi̱ naˈ; ndu̱ tiˈ naˈ chaˈ laja ti tyuˈu naˈ neˈ chcua̱ nde, ca̱a̱ naˈ ca slo cuˈma̱ liˈ.
\s Nchcuiˈ salyaˈ loˈo nguˈ
\p
\v 23 Loˈo yu Epafras tyaˈa ntsuˈu naˈ neˈ chcua̱ re xquiˈya Jesucristo, loˈo yu biˈ nda yu xlyo niˈi̱ jiˈi̱ ma̱. 
\v 24 Loˈo juaˈa̱ Marcos, loˈo Aristarco, loˈo Demas, loˈo Lucas, ca taˈa nguˈ ndyiˈu tiˈ nguˈ jinuˈu̱. Nxtyucua tsa nguˈ biˈ ˈna loˈo cña jiˈi̱ ycuiˈ Ndyosi ca nde. 
\p
\v 25 Ñaˈa̱ ti cuaˈni Jesucristo nu Xuˈna na chaˈ tsoˈo loˈo lcaa cuˈma̱ lacua. Juaˈa̱ caca chaˈ lacua.