\id HEB
\h HEBREOS
\mt Quityi nu ndyaa ca slo nguˈ judío tyaˈa ngusñi na chaˈ jiˈi̱ Cristo
\c 1
\s Xquiˈya Cristo, biˈ chaˈ cua nchcuiˈ ycuiˈ Ndyosi loˈo ñati̱ chalyuu
\p
\v 1 Nu ngua tya saˈni la, tyu̱u̱ tsa quiyaˈ cua nchcuiˈ ycuiˈ Ndyosi loˈo jyoˈo cusuˈ jiˈna, quiñaˈa̱ xi chaˈ nda Ni loˈo jyoˈo biˈ; cua nda ycuiˈ Ndyosi chaˈ loˈo jyoˈo biˈ, chaˈ chcuiˈ nguˈ loˈo lcaa tyaˈa quichi̱ tyi nguˈ.
\v 2 Pana nu juani loˈo cua tye ti chalyuu, cua nchcuiˈ Ni loˈo na, xquiˈya chaˈ cua ñaa Jesús nde chalyuu ca su ndiˈi̱ na, la cuiˈ Jesús nu laca sca ti Sñiˈ ycuiˈ Ni. Cua ngutiˈi̱ nu Jesús biˈ loˈo ycuiˈ Ndyosi Sti yu nu loˈo ngüiñá Ni chalyuu tya clyo; tya loˈo ngüiñá Ni lcaa lo na nu ntsuˈu nde cua̱ loˈo lcaa lo na nu ntsuˈu lo yuu chalyuu, cua laca ndu̱ Jesús loˈo ycuiˈ Ndyosi Sti Jesús liˈ. Loˈo juaˈa̱ cua nda Ni chacuayáˈ jiˈi̱ chaˈ caca ycuiˈ Jesús loo jiˈi̱ lcaa na biˈ.
\v 3 Lcaa xee lubii nu ntsuˈu ca slo ycuiˈ Ndyosi, cua ndyanu xee biˈ lo Jesús Sñiˈ Ni loˈo ñaa Jesús ngutiˈi̱ yu chalyuu. Ñiˈya̱ nu laca ycuiˈ Ndyosi, la cuiˈ juaˈa̱ laca nu Jesús biˈ; liñi tsa nclyo Jesús cña jiˈi̱ lcaa na nu ntsuˈu chalyuu tsiyaˈ ti, biˈ chaˈ laca ndiˈi̱ tsoˈo ti lcaa na biˈ. Nu loˈo ndye nguaˈni Jesús cña nu ntsuˈu jiˈi̱ yu nde chalyuu, chaˈ ngüityi̱ yu yabeˈ nu ntsuˈu jiˈi̱ ñati̱, liˈ nguxtyu̱u̱ yu ndyaa yu ca slo ycuiˈ Ndyosi Sti yu, ndyaa tucua yu nde laˈa tsuˈ cui̱ su tlyu ca su ntucua ycuiˈ Ni.
\s Ná caca stuˈba chaˈ jiˈi̱ xca̱ jiˈi̱ ycuiˈ Ni loˈo Jesús 
\p
\v 4 Tlyu la chacuayáˈ ntsuˈu jiˈi̱ Jesús nu sca ti Sñiˈ ycuiˈ Ndyosi que xca̱ jiˈi̱ ycuiˈ Ni nu ntsuˈu nde cua̱, xquiˈya cña nu cua nguaˈni yu cuentya jiˈi̱ Sti yu; quiñaˈa̱ tsa chacuayáˈ nguxtyanu Ni jiˈi̱ Jesús, xquiˈya chaˈ stuˈba chaˈ jiˈi̱ yu loˈo ycuiˈ Ndyosi Sti yu.
\v 5 Nde laca sca chaˈ nu cua nchcuiˈ ycuiˈ Ndyosi cuentya jiˈi̱ Jesús nu laca Sñiˈ ycuiˈ ca Ni:
\q Sñiˈ naˈ laca nuˈu̱; cua nda naˈ chalyuu jinuˈu̱ chaˈ laca nuˈu̱ Sñiˈ naˈ.
\m Loˈo juaˈa̱ cua nchcuiˈ ycuiˈ Ndyosi chaca chaˈ cuentya jiˈi̱ Jesús:
\q Naˈ caca̱ Sti yu; caca yu Sñiˈ naˈ lacua.
\m Siˈi chaˈ jiˈi̱ sca xca̱ nu ntsuˈu nde cua̱ nchcuiˈ Ni chaˈ biˈ, cuentya jiˈi̱ Jesús nda Ni chaˈ biˈ.
\v 6 Tya clyo loˈo cua ta ti ycuiˈ Ndyosi jiˈi̱ Sñiˈ ycuiˈ ca Ni chaˈ ca̱a̱ yu chalyuu, liˈ nacui̱ Ni:
\q Lcaa xca̱ nu ntsuˈu cuentya jnaˈ nde cua̱, ngaˈa̱ chaˈ cuaˈni tlyu nguˈ xca̱ biˈ jiˈi̱ Sñiˈ naˈ.
\m
\v 7 Juaˈa̱ nchcuiˈ ycuiˈ Ndyosi jiˈi̱ Sñiˈ Ni; pana nu laca xca̱ jiˈi̱ ycuiˈ Ndyosi biˈ ni, ndiˈya̱ nchcuiˈ Ni cuentya jiˈi̱ xca̱ biˈ:
\q Laca biˈ ñiˈya̱ laca cuiˈi̱ ti, masi cuiˈi̱ nu tsoˈo tsa nduˈni.
\q Ñiˈya̱ ndyatu̱ sca quiiˈ tlyu, chaˈ tyijyuˈ tsa ntyijiˈi̱ xee, juaˈa̱ laca xca̱ biˈ jiˈi̱ ycuiˈ Ndyosi loˈo nduˈni biˈ cña.
\m
\v 8 Xaˈ ñaˈa̱ nchcuiˈ ycuiˈ Ndyosi cuentya jiˈi̱ Jesús nu laca Sñiˈ ycuiˈ ca:
\q Ná ngaˈa̱ chaˈ tye chaˈ caca nuˈu̱ loo, chaˈ ycuiˈ Ndyosi laca nuˈu̱, nacui̱ Ni,
\q liñi ti nduˈni nuˈu̱ loˈo ñati̱ ca su laca nuˈu̱ loo. 
\q
\v 9 Ndiya tsa tiˈ nuˈu̱ lcaa chaˈ liñi nu nduˈni ñati̱; ñasi̱ˈ tsa nuˈu̱ loˈo ndyuˈni ñati̱ chaˈ cuxi loˈo ycuiˈ Ndyosi Sti nuˈu̱.
\q Biˈ chaˈ ngusubi naˈ jinuˈu̱ chaˈ tyaˈa̱ nuˈu̱ lo cña jnaˈ, nacui̱ ycuiˈ Ndyosi.
\q Juaˈa̱ tsoˈo tsa ntiˈ nuˈu̱ juani, chaˈ tlyu la chacuayáˈ cua nda naˈ jinuˈu̱ que jiˈi̱ xaˈ la ñati̱, nacui̱ ycuiˈ Ndyosi.
\m
\v 10 Tya chaca chaˈ cua nchcuiˈ ycuiˈ Ndyosi loˈo Jesús nu laca Sñiˈ ycuiˈ ca Ni:
\q Nuˈu̱ laca Xuˈna tyucui ñaˈa̱ chalyuu, nacui̱ ycuiˈ Ndyosi.
\q Tya clyo ngüiñá nuˈu̱ lcaa na nu ntsuˈu chalyuu, loˈo juaˈa̱ ngüiñá nuˈu̱ lcaa na nu ntsuˈu nde cua̱.
\q
\v 11 Tiyaˈ la liˈ culiji lcaa chaˈ biˈ juaˈa̱ ti; pana ná sca caca jinuˈu̱ tsiyaˈ ti,
\q masi casu̱ chalyuu, masi casu̱ lcaa na nu ntsuˈu nde cua̱ ñiˈya̱ laca loˈo ndyasu̱ sca steˈ na.
\q
\v 12 Xcoˈo nuˈu̱ chaˈ biˈ, ñiˈya̱ laca loˈo nchcoˈo na sca lateˈ nu ngaˈaa cuaˈnijoˈo jiˈna;
\q nchcutsaˈa̱ na jiˈi̱ chaˈ caja xaˈ nu cucui.
\q Pana ñaˈa̱ ti tya ndiˈi̱ ycuiˈ nuˈu̱;
\q ná ntsuˈu chaˈ casuˈ nuˈu̱ tsiyaˈ ti, nacui̱ ycuiˈ Ndyosi jiˈi̱ Jesús Sñiˈ ycuiˈ ca Ni.
\m
\v 13 Nde ntsuˈu chaca chaˈ nu nscua lo quityi cusuˈ cuentya jiˈi̱ Jesús:
\q Cua̱a̱ clya nuˈu̱ ca nde, tyucua nuˈu̱ ca su ntucua naˈ re;
\q ñaˈa̱ cuayáˈ tyiji̱loo naˈ jiˈi̱ lcaa tyaˈa cusu̱u̱ nuˈu̱ tyucua nuˈu̱, chaˈ caca nuˈu̱ loo jiˈi̱ nguˈ biˈ tsiyaˈ ti.
\m Ni sca quiyaˈ bilya chcuiˈ ycuiˈ Ndyosi juaˈa̱ cuentya jiˈi̱ xca̱ jiˈi̱ Ni nde cua̱, sca ti loˈo Jesús cua nchcuiˈ Ni juaˈa̱.
\v 14 Lcaa nu laca xca̱ jiˈi̱ ycuiˈ Ndyosi nde cua̱ ni, lcaa tsa̱ nduˈni biˈ cña nu nclyo ycuiˈ Ndyosi jiˈi̱; cuiˈi̱ nu tsoˈo tsa laca nu nguˈ xca̱ biˈ. Nda Ni jiˈi̱ nguˈ xca̱ biˈ ca̱a̱ nde chalyuu, chaˈ xtyucua nguˈ jiˈi̱ ca taˈa ñati̱ nu cua clyaá ti jiˈi̱ nu cuxi xquiˈya Jesús, chaˈ cua ngulala ti tye chalyuu.
\c 2
\s Tlyu tsa chaˈ laca chaˈ cua ngulaá na jiˈi̱ nu cuxi 
\p
\v 1 Tlyu tsa chaˈ laca jiˈi̱ Jesús juani lacua, biˈ chaˈ ngaˈa̱ chaˈ xñi tsoˈo na lcaa chaˈ nu cua nchcuiˈ Jesús loˈo na, chaˈ ná tyuˈutsuˈ na jiˈi̱ tyucui̱i̱ liñi nu ngusñi na.
\v 2 Tyempo saˈni la nchcuiˈ xca̱ biˈ loˈo ñati̱ cuentya jiˈi̱ ycuiˈ Ndyosi. Liñi tsa nchcuiˈ xca̱ biˈ loˈo nguˈ, chaˈ tyempo biˈ lye tsa nguxcubeˈ Ni jiˈi̱ lcaa ñati̱ nu nguaˈni chaˈ cuxi; la cuiˈ juaˈa̱ nguxcubeˈ Ni jiˈi̱ ñati̱ nu ngaˈaa ndaquiyaˈ jiˈi̱ chaˈ nu nchcuiˈ Ni. 
\v 3 La cuiˈ ti chaˈ caca jiˈna juani, si ná taquiyaˈ na jiˈi̱ chaˈ nu cua ndyuna na biˈ, chaˈ clyaá na jiˈi̱ nu cuxi; ná caja ñiˈya̱ clyaá na jiˈi̱ ycuiˈ Ndyosi loˈo cua ndye chalyuu, nu loˈo cuaˈni cuayáˈ Ni jiˈi̱ lcaa ñati̱. Clyo ndachaˈ ycuiˈ Jesús nu Xuˈna na chaˈ biˈ jiˈi̱ ñati̱ nu ngua tsaˈa̱ jiˈi̱ yu, juaˈa̱ ndyuna nguˈ biˈ chaˈ nu nchcuiˈ yu; tiyaˈ la liˈ, loˈo jiˈna ndachaˈ nguˈ biˈ chaˈ biˈ. Biˈ chaˈ jlo tiˈ na chaˈ chañi laca chaˈ biˈ.
\v 4 Loˈo juaˈa̱ nguaˈni ycuiˈ Ndyosi cña chaˈ ca cuayáˈ tiˈ na chaˈ chañi tsa laca chaˈ nu nchcuiˈ nguˈ, nguaˈni Ni quiñaˈa̱ tsa chaˈ tlyu slo na chaˈ ñaˈa̱ na jiˈi̱. Tyu̱u̱ tsa chaˈ nu ná nchca cuaˈni ñati̱ chalyuu nguaˈni Ni, chaˈ cube tsa tiˈ na jiˈi̱ ycuiˈ Ni loˈo ñaˈa̱ na chaˈ tlyu biˈ. Loˈo liˈ cua nda Ni Xtyiˈi ycuiˈ Ni chaˈ tyanu neˈ cresiya jiˈi̱ ñati̱ chalyuu, tsa ñaˈa̱ nu ntsuˈu tyiquee ycuiˈ Ni nda Ni jiˈi̱ nguˈ; biˈ chaˈ nchca jiˈna cuaˈni na tyu̱u̱ lo cña cuentya jiˈi̱ ycuiˈ Ndyosi, nu ná nchca jiˈi̱ ñati̱ cuaˈni ycuiˈ ca nguˈ.
\s Tyaˈa na laca Jesús xquiˈya chaˈ ngua Ni ñati̱
\p
\v 5 Chaˈ jiˈi̱ chalyuu cucui biˈ nchcuiˈ na juani, pana siˈi nu nguˈ xca̱ jiˈi̱ ycuiˈ Ndyosi laca nu cua ngujui chacuayáˈ jiˈi̱ chaˈ caca nguˈ loo jiˈi̱ chalyuu cucui; sca ti ycuiˈ Ndyosi culo cña liˈ.
\v 6 Ntsuˈu sca chaˈ nu nscua lo quityi cusuˈ; ndiˈya̱ nchcuiˈ chaˈ biˈ:
\q Ndyosi Xuˈna ya, ná sca na tsiyaˈ ti laca ñati̱ chalyuu, ná ngaˈa̱ chaˈ cube tiˈ nuˈu̱ jiˈi̱ nguˈ;
\q ná ngaˈa̱ chaˈ cuaˈni tyaˈna tiˈ nuˈu̱ jiˈi̱ nguˈ, chaˈ laca nguˈ ñati̱ ti, nacui̱ jyoˈo cusuˈ.
\q
\v 7 Masi sube tsa ñati̱ laca nguˈ cuentya jinuˈu̱, pana cua nda nuˈu̱ sca ñati̱ nu lijya̱ chalyuu;
\q juaˈa̱ cua laca ti tyempo nda nuˈu̱ chacuayáˈ chaˈ caca xca̱ jinuˈu̱ loo jiˈi̱ yu biˈ.
\q Ca tiyaˈ la, liˈ ta nuˈu̱ sca su tsoˈo tsa su tyucua yu loˈo nuˈu̱, ñiˈya̱ laca su ntucua tlyu sca xuˈna ñati̱, sca seˈi̱ su caca chi̱ loo.
\q
\v 8 Loˈo juaˈa̱ cua nda nuˈu̱ chacuayáˈ chaˈ caca yu loo jiˈi̱ lcaa na.
\m Juaˈa̱ nacui̱ quityi biˈ. Cuentya jiˈi̱ lcaa ca na tsiyaˈ ti nchcuiˈ quityi biˈ, nu loˈo nacui̱ quityi chaˈ cua nda Ni chacuayáˈ chaˈ caca yu loo jiˈi̱ lcaa na, masi juani ti bilya ñaˈa̱ na chaˈ laca yu loo jiˈi̱ lcaa na biˈ.
\v 9 Pana cua jlo tiˈ na ñiˈya̱ ngua jiˈi̱ Jesús nu ngua liˈ, chaˈ xti ti tyempo ngua lcaa xca̱ jiˈi̱ ycuiˈ Ndyosi loo la jiˈi̱ ycuiˈ Jesús. Ngujuii yu lo crusi cuentya jiˈi̱ lcaa ñati̱ chalyuu, xquiˈya chaˈ xcuiˈ tsoˈo tsa nduˈni ycuiˈ Ndyosi loˈo na. Loˈo juaˈa̱ ndube tsa tiˈ na ñiˈya̱ ndyaca jiˈi̱ yu juani, chaˈ tsoˈo tsa ndyuˈni chi̱ nguˈ loo yu; ndyuˈni tlyu nguˈ jiˈi̱ yu xquiˈya chaˈ cua ngujuii yu, xquiˈya chaˈ tiˈí tsa ngua tiˈ yu cuentya jiˈna.
\p
\v 10 Clyo ngüiñá ycuiˈ Ndyosi lcaa ca na nu ntsuˈu chalyuu, juaˈa̱ tya ñaˈa̱si̱i̱ Ni lcaa na; loˈo juaˈa̱ ntiˈ Ni chaˈ tyalaa ca taˈa na nu laca na sñiˈ Ni ca su tsoˈo tsa ca su ntucua ycuiˈ Ni. Biˈ chaˈ clyo ndulo tsa chaˈ jiˈi̱ Ni chaˈ tye lcaa cña nu nguaˈni Jesucristo; loˈo nu juani cua ngulaá na jiˈi̱ nu cuxi xquiˈya Jesús, masi tiˈí tsa ngua tiˈ yu loˈo nguaˈni yu cña biˈ. 
\v 11 Na cua nguaˈni lubii Jesús jiˈi̱ cresiya jiˈi̱ ñati̱ chalyuu, biˈ chaˈ juani laca ycuiˈ Ndyosi Sti na; lcaa na nu cua ngua lubii cresiya jiˈna xquiˈya Jesús ni, ntsuˈu sca ti Sti na loˈo ycuiˈ Jesús, chaˈ laca ycuiˈ Ndyosi Sti na juani. Loˈo juaˈa̱ ná ndube tiˈ Jesús, nchcuiˈ yu chaˈ tyaˈa ycuiˈ yu laca na.
\v 12 Cua nscua tsaca chaˈ nu cua nacui̱ yu ndiˈya̱:
\q Ndyosi Sti naˈ, tsoˈo ti chcuiˈ naˈ chaˈ jinuˈu̱ su ndiˈi̱ naˈ loˈo nguˈ tyaˈa naˈ;
\q cula tuˈba naˈ ji̱i̱ loˈo cuaˈni tlyu naˈ jinuˈu̱ ca su ndyuˈu tiˈi̱ lcaa ñati̱.
\m
\v 13 Loˈo juaˈa̱ chaca chaˈ nacui̱ yu ndiˈya̱:
\q Loˈo naˈ xñi naˈ chaˈ jiˈi̱ ycuiˈ Ndyosi Sti naˈ, nacui̱. 
\m Loˈo liˈ nchcuiˈ yu chaca quiyaˈ ndiˈya̱:
\q Nde ti ndiˈi̱ ya, chaˈ stuˈba ti ndiˈi̱ naˈ loˈo sñiˈ naˈ nu cua nda ycuiˈ Ndyosi ˈna.
\m Juaˈa̱ nchcuiˈ chaˈ nu cua nscua lo quityi cusuˈ biˈ. 
\p
\v 14 Nu na, ñati̱ chalyuu na ni, sca ti cuañaˈ na, sca ti tañi na loˈo nguˈ cusuˈ jiˈna, juaˈa̱ loˈo nguˈ tyaˈa na. Ca taˈa na nu cua ngusñi na chaˈ jiˈi̱ Jesús laca na ñati̱ chalyuu; biˈ chaˈ loˈo nu Jesús biˈ ngua yu ñati̱, chaˈ liˈ ngua jiˈi̱ yu ngujuii yu cuentya jiˈna. Sca ti juaˈa̱ ngujui ñiˈya̱ tyiji̱loo yu jiˈi̱ nu xñaˈa̱ nu nclyo cña nde ca bilyaa, su ntiˈ nu xñaˈa̱ biˈ chaˈ tsaa cresiya jiˈi̱ lcaa ñati̱.
\v 15 Loˈo juaˈa̱ nguaˈni lyaá yu jiˈi̱ ñati̱ nu ntsi̱i̱ tsa chaˈ cajaa nguˈ; lcaa tsa̱ loˈo ñaa nguˈ biˈ chalyuu, cuxi ti ndiˈi̱ nguˈ biˈ, tiˈí tsa cña ntiˈ nguˈ, xquiˈya chaˈ xcuiˈ na ntsi̱i̱ tsa nguˈ si cajaa nguˈ. Nguaˈni tye Jesús chaˈ ntsi̱i̱ nguˈ juaˈa̱, nduˈni yu chaˈ tsoˈo ti tyiˈi̱ nguˈ biˈ juani.
\v 16 Ná ya̱a̱ Jesús chalyuu chaˈ xtyucua yu jiˈi̱ nguˈ xca̱ jiˈi̱ Ni nde cua̱; cuentya jiˈna ñati̱ chalyuu na ya̱a̱ Jesús, chaˈ xtyucua yu jiˈna ngua tiˈ yu, chaˈ ca taˈa na laca na tyaˈa ñati̱ jiˈi̱ jyoˈo Abraham, masi cua lijya̱ na chalyuu tiyaˈ la xi.
\v 17 Biˈ chaˈ lacua, stuˈba ti ntsuˈu chaˈ jiˈi̱ Jesús loˈo ñati̱ jiˈi̱ ycuiˈ nde chalyuu. Ngujuii yu lo crusi cuentya jiˈna, loˈo juani ntucua yu ca slo ycuiˈ Ndyosi chaˈ chcuiˈ yu loˈo Ni, chaˈ cuityi̱ Ni quiˈya nu ntsuˈu jiˈna. Juani laca Jesús ñiˈya̱ laca sca sti joˈó nu laca loo la nu ndyiˈu tsa tiˈ jiˈna, nu juaˈa̱ tsoˈo tsa nduˈni tyaˈna tiˈ jiˈna.
\v 18 Juani taca cuaˈni lyaá Jesús jiˈi̱ ñati̱ loˈo ndyojolaqui nu cuxi jiˈi̱; nchca jiˈi̱ yu cuaˈni juaˈa̱, xquiˈya chaˈ loˈo jiˈi̱ ycuiˈ yu ngua tiˈ nu cuxi cuaˈni ngana jiˈi̱, chaˈ loˈo ycuiˈ yu ngua tii yu jiˈi̱ chaˈ tiˈí loˈo ya̱a̱ yu nde chalyuu.
\c 3
\s Ná stuˈba Moisés loˈo Jesús
\p
\v 1 Cuˈma̱ tyaˈa ngusñi na chaˈ jiˈi̱ Cristo, cuˈma̱ nu cua ngusubi ycuiˈ Ndyosi jiˈi̱ ma̱, culacua tsoˈo tiˈ ma̱ tilaca laca Jesucristo. Cua nda ycuiˈ Ndyosi Sti yu jiˈi̱ yu chaˈ ya̱a̱ yu nde chalyuu, loˈo nu juani laca yu ñiˈya̱ laca sti joˈó nu laca loo la cuentya jiˈna, chaˈ ngusñi na chaˈ jiˈi̱ ycuiˈ.
\v 2 Ndaquiyaˈ Jesús lcaa cña nu ngulo ycuiˈ Ndyosi Sti yu jiˈi̱ yu, ndyiˈu tiˈ yu jiˈi̱ ycuiˈ Ni nu nguane jiˈi̱ yu chaˈ ca̱a̱ yu nde chalyuu tya clyo. La cuiˈ juaˈa̱ ndaquiyaˈ jyoˈo Moisés jiˈi̱ cña nu ngulo ycuiˈ Ndyosi jiˈi̱ nu ngua saˈni biˈ.
\v 3 Pana juani lye la nduˈni tlyu na jiˈi̱ Jesús, chaˈ ná stuˈba jyoˈo Moisés loˈo yu biˈ. Ñiˈya̱ laca loˈo ndye ndyaˈ sca niˈi̱ ni, tsoˈo tsa nchcuiˈ nguˈ chaˈ jiˈi̱ cuityi nu ngüiñá jiˈi̱ niˈi̱ biˈ, masi ná nchcuiˈ lye nguˈ chaˈ jiˈi̱ ycuiˈ niˈi̱; la cuiˈ juaˈa̱ laca loˈo Jesús ni, lye la ndyiˈu tiˈ nguˈ jiˈi̱ ycuiˈ Jesús, masi ngaˈaa lye ndyiˈu tiˈ nguˈ jiˈi̱ nu Moisés biˈ. 
\v 4 Cua ñaˈa̱ ca niˈi̱ nu ndiñá ñati̱ ni, cua ntsuˈu xuˈna niˈi̱ biˈ; pana ycuiˈ Ndyosi ngüiñá lcaa ca na, loˈo lcaa ca chalyuu, loˈo lcaa ñati̱ nu ndiˈi̱ chalyuu. 
\v 5 Tsoˈo tsa cña nu nguaˈni nu Moisés biˈ loˈo ngua yu cña saˈni, chaˈ cuentya jiˈi̱ ñati̱ jiˈi̱ ycuiˈ Ndyosi nde chalyuu ngua yu cña; nchcuiˈ tsa jyoˈo biˈ lcaa chaˈ nu ngua tiˈ ycuiˈ Ndyosi chaˈ chcuiˈ Ni loˈo nguˈ biˈ.
\v 6 Pana nu Cristo biˈ ni, tsoˈo la cña nduˈni yu, xquiˈya chaˈ laca yu Sñiˈ ycuiˈ Ndyosi, loˈo juaˈa̱ laca yu loo jiˈi̱ lcaa ñati̱ nu ntsuˈu cuentya jiˈi̱ Ni. La cuiˈ ñati̱ jiˈi̱ ycuiˈ Ni laca na, si ñaˈa̱ ti ná ntsi̱i̱ na ñaˈa̱ cuayáˈ tye chalyuu jiˈna, si ñaˈa̱ ti tya tsoˈo ntsuˈu tyiquee na laja loˈo ndu̱ tiˈ na jiˈi̱ Cristo chaˈ cuaˈni lyaá lyiji yu jiˈna.
\s Caja ñiˈya̱ nu tsoˈo ti tyiˈi̱ tyiquee na, si taquiyaˈ na jiˈi̱ chaˈ nu nchcuiˈ ycuiˈ Ndyosi
\p
\v 7 Lo quityi cua nscua sca chaˈ nu nda Xtyiˈi ycuiˈ Ndyosi loˈo ñati̱ saˈni. Ndiˈya̱ nchcuiˈ Ni loˈo nguˈ tya liˈ: 
\q Juani ti cuaˈa̱ jyaca̱ ma̱ jiˈi̱ chaˈ nu nda naˈ loˈo ma̱:
\q
\v 8 Ngaˈaa tyuˈu chaˈ cuxi tyiquee ma̱ ñaˈa̱ ma̱ ˈna chaca quiyaˈ,
\q ni ngaˈaa cuaˈni ma̱ ñiˈya̱ nu nguaˈni jyoˈo cusuˈ jiˈi̱ ma̱ tsaca quiyaˈ nu ngua saˈni la.
\q Nu ngua liˈ lye tsa ngusu̱u̱ tyaˈa nguˈ loˈo naˈ ca neˈ quixi̱ˈ su ngutaˈa̱ yuˈu ti nguˈ, nacui̱ Ni.
\q Nu ngua liˈ ngua tiˈ nguˈ cuaˈni cuayáˈ nguˈ ˈna, si cuaˈni tyaala naˈ jiˈi̱ nguˈ.
\q
\v 9 Ngua tiˈ jyoˈo cusuˈ jiˈi̱ ma̱ chaˈ cuaˈni cuxi nguˈ loˈo naˈ nu ngua liˈ;
\q cua nxtyí loˈo ti nguˈ ˈna tyucui tuˈba yija̱, masi naˈa̱ nguˈ lcaa chaˈ tlyu nu cua nguaˈni naˈ cuentya jiˈi̱ nguˈ lcaa yija̱ biˈ, nacui̱ Ni.
\q
\v 10 Biˈ chaˈ ngua ñasi̱ˈ tsa naˈ jiˈi̱ nguˈ biˈ liˈ. 
\q Ni naˈ liˈ: “Xcuiˈ cuxi ti nclyacua tiˈ nguˈ biˈ, ná ntajaˈa̱ nguˈ tsiyaˈ ti chaˈ tyanu chaˈ jnaˈ neˈ cresiya jiˈi̱ nguˈ;
\q ná ntajaˈa̱ nguˈ cuaˈni nguˈ ñiˈya̱ nu ni naˈ jiˈi̱ nguˈ chaˈ cuaˈni nguˈ”, nacui̱ naˈ liˈ.
\q
\v 11 Ngua ñasi̱ˈ tsa naˈ jiˈi̱ nguˈ biˈ liˈ, ñaˈa̱ cuayáˈ lye tsa nchcuiˈ naˈ loˈo nguˈ biˈ liˈ:
\q “Ngaˈaa tyalaa ma̱ ca slo naˈ chaˈ tyiˈi̱ tsoˈo ti ma̱ loˈo naˈ”.
\m Juaˈa̱ ntsuˈu chaˈ nu nda ycuiˈ Ndyosi loˈo nguˈ tya liˈ.
\p
\v 12 Cuˈma̱ tyaˈa ngusñi na chaˈ jiˈi̱ Jesús, ñaˈa̱si̱i̱ ma̱ jiˈi̱ ycuiˈ ca ma̱, chaˈ ni tsaca ma̱ ná tyaˈa̱chu̱ˈ ma̱ jiˈi̱ chaˈ jiˈi̱ ycuiˈ Ndyosi nu luˈú ca, chaˈ ná caca cuxi cresiya jiˈi̱ ma̱, ñiˈya̱ si ngaˈaa taquiyaˈ ma̱ chaˈ jiˈi̱ Ni.
\v 13 Ná tsoˈo si cñiloˈo nu cuxi jiˈi̱ ma̱, loˈo liˈ xana caca cuxi cresiya jiˈi̱ ma̱. Biˈ chaˈ lcaa tsa̱ ngaˈa̱ chaˈ xtyucua ma̱ jiˈi̱ tyaˈa ma̱, chaˈ tyanu tachaa la chaˈ jiˈi̱ Jesús neˈ cresiya jiˈi̱ nguˈ tyaˈa ma̱, chaˈ ná cñiloˈo nu cuxi jiˈi̱ ma̱ tyucui loˈo tya ndiˈi̱ ti ma̱ chalyuu.
\v 14 Lcaa na loˈo tyaˈa na, tya ntsuˈu chaˈ jiˈna loˈo Cristo si ñaˈa̱ ti xñi na chaˈ jiˈi̱ Ni ñaˈa̱ cuayáˈ nu tye chalyuu jiˈna, la cuiˈ ñiˈya̱ loˈo jlya tiˈ na jiˈi̱ yu nu ngua tya clyo.
\p
\v 15 Ndiˈya̱ nchcuiˈ ycuiˈ Ndyosi chaˈ nu nscua lo quityi biˈ:
\q Juani ti cuaˈa̱ jyaca̱ ma̱ jiˈi̱ chaˈ nu ta naˈ loˈo ma̱:
\q Ngaˈaa tyuˈu chaˈ cuxi tyiquee ma̱ ñaˈa̱ ma̱ ˈna chaca quiyaˈ,
\q ngaˈaa cuaˈni ma̱ ñiˈya̱ nguaˈni jyoˈo cusuˈ jiˈi̱ ma̱ tsaca quiyaˈ tya saˈni la;
\q nu ngua liˈ lye tsa ngusu̱u̱ tyaˈa nguˈ loˈo naˈ. 
\m
\v 16 Lcaa ñati̱ nu cua ndyaloˈo Moisés jiˈi̱ nu loˈo ngutuˈu nguˈ ca loyuu Egipto ni, biˈ ñati̱ ngua nu cua ndyuna chaˈ nu nchcuiˈ ycuiˈ Ndyosi loˈo nguˈ nu ngua liˈ, pana lye tsa ngusu̱u̱ tyaˈa nguˈ loˈo Ni liˈ;
\v 17 biˈ chaˈ ngua ñasi̱ˈ tsa ycuiˈ Ndyosi jiˈi̱ ñati̱ biˈ tyucui tyempo loˈo ngutuˈu scua tuˈba yija̱, biˈ chaˈ ndyanu tyijya̱ jyoˈo biˈ juaˈa̱ ti toˈ tyucui̱i̱ ca neˈ quixi̱ˈ ca su ngutaˈa̱ yuˈu ti nguˈ.
\v 18 Cua lye tsa nchcuiˈ Ni chaˈ jiˈi̱ nguˈ nu ngusu̱u̱ tyaˈa loˈo Ni: “Ngaˈaa tyalaa nguˈ biˈ ca slo naˈ, chaˈ tyiˈi̱ tsoˈo ti nguˈ ca nde”, nacui̱ Ni liˈ.
\v 19 Nchca cuayáˈ tiˈ na lacua, chaˈ ngaˈaa ndyalaa nguˈ biˈ ca su nacui̱ Ni jiˈi̱ nguˈ chaˈ tsaa nguˈ, xquiˈya chaˈ ngaˈaa ndaquiyaˈ nguˈ chaˈ jiˈi̱ ycuiˈ Ndyosi. 
\c 4
\p
\v 1 Chaˈ nu laca juani, cua nguxtyanu Ni sca chaˈ loˈo na, chaˈ taca tyalaa na ca slo Ni, chaˈ tyiˈi̱ tsoˈo ti na ca biˈ. Tsoˈo si cube tiˈ na jiˈi̱ lcaa nguˈ tyaˈa na, chaˈ ná tyuˈutsuˈ ni tsaca nguˈ jiˈi̱ tyucui̱i̱ liñi nu tsaa ca su tyiˈi̱ na loˈo ycuiˈ Ndyosi.
\v 2 Ñiˈya̱ loˈo ndyuna jyoˈo cusuˈ biˈ chaˈ tsoˈo nu nchcuiˈ ycuiˈ Ndyosi loˈo nguˈ chaˈ clyaá nguˈ, la cuiˈ juaˈa̱ cua ndyuna na chaˈ tsoˈo nu nchcuiˈ Jesús. Pana nu jyoˈo biˈ ni, ná ngua tsoˈo cresiya jiˈi̱ nguˈ, masi cua ndyuna nguˈ chaˈ biˈ, xquiˈya chaˈ ná jlya tiˈ nguˈ chaˈ biˈ, ná ngusñi tsoˈo nguˈ chaˈ biˈ.
\v 3 Nu loˈo ngusñi na chaˈ jiˈi̱ Ni, liˈ taca tyalaa na slo ycuiˈ Ndyosi chaˈ tyiˈi̱ tsoˈo ti na ca biˈ. Pana ñiˈya̱ nu nscua lo quityi re, juaˈa̱ ngua chaˈ jiˈi̱ jyoˈo biˈ, chaˈ nchcuiˈ ycuiˈ Ndyosi ndiˈya̱:
\q Ngua ñasi̱ˈ naˈ liˈ, nacui̱ Ni. Lye nchcuiˈ naˈ jiˈi̱ nguˈ biˈ,
\q chaˈ ná tyalaa nguˈ biˈ ca slo naˈ, chaˈ ná tyiˈi̱ tsoˈo ti nguˈ ca nde.
\m Nacui̱ ycuiˈ Ndyosi juaˈa̱, masi cua ndye lcaa cña jiˈi̱ ycuiˈ Ni tya loˈo ndyaˈ chalyuu.
\v 4 Cua nscua sca chaˈ lo quityi cusuˈ nu nchcuiˈ chaˈ jiˈi̱ tsa̱ nchca cati, tsa̱ ndiˈi̱ cñaˈ ti na. Ndiˈya̱ nacui̱ quityi:
\q Ngutiˈi̱ cñaˈ ycuiˈ Ni tsa̱ nu nchca cati liˈ, chaˈ ná nguaˈni Ni cña tsa̱ biˈ liˈ.
\m
\v 5 Pana ndiˈya̱ nchcuiˈ lo quityi nu nscua jyoˈo biˈ: 
\q Ngaˈaa tyalaa nguˈ biˈ ca slo naˈ chaˈ tyiˈi̱ tsoˈo ti nguˈ ca nde.
\m
\v 6 Biˈ ñati̱ laca nu clyo ndyuna chaˈ tsoˈo nu cua nchcuiˈ Ni loˈo nguˈ, chaˈ clyaá nguˈ jiˈi̱ nu cuxi, loˈo liˈ ná ngua tyalaa nguˈ biˈ ca slo ycuiˈ Ndyosi, ná ngua tyiˈi̱ tsoˈo ti nguˈ ca su nacui̱ Ni chaˈ tyiˈi̱ nguˈ, xquiˈya chaˈ ná ntajaˈa̱ nguˈ biˈ taquiyaˈ nguˈ chaˈ biˈ. Pana tya lyiji xi chaˈ tyuˈu tiˈi̱ lcaa ñati̱ nu nscua chaˈ tyiˈi̱ tsoˈo ti ca slo ycuiˈ Ndyosi;
\v 7 tya nda la Ni xi tyempo jiˈna, chaˈ juani ti tya taca cuna na chaˈ biˈ. Cua ngua tyu̱u̱ yija̱ tya loˈo ngujuii jyoˈo Moisés biˈ, nu loˈo nchcuiˈ ycuiˈ Ndyosi loˈo David. Ndiˈya̱ nacui̱ Ni:
\q Juani ti cuaˈa̱ jyaca̱ ma̱ jiˈi̱ chaˈ nu nda naˈ loˈo ma̱,
\q ná tyuˈu chaˈ cuxi tyiquee ma̱ ñaˈa̱ ma̱ jnaˈ.
\m
\v 8 Nu ngua cua saˈni biˈ, ná ngua jiˈi̱ jyoˈo Josué tyaloˈo yu jiˈi̱ ñati̱ biˈ sca ti quiyaˈ ca su ndiˈi̱ ycuiˈ Ndyosi; biˈ chaˈ tiyaˈ la tya nda la Ni xi tyempo chaˈ cuna na chaˈ biˈ.
\v 9 Loˈo juani ni, si ñaˈa̱ ti tya xñi tsoˈo na chaˈ jiˈi̱ ycuiˈ Ndyosi, tya taca tyiˈi̱ tsoˈo ti na loˈo Ni liˈ, ñiˈya̱ loˈo nguaˈa̱ cñaˈ ycuiˈ Ni tsa̱ nchca cati biˈ. 
\v 10 Masi tye cña jiˈna nde chalyuu, tsaa na ca slo ycuiˈ Ndyosi, liˈ taca tyiˈi̱ tsoˈo ti na loˈo Ni ca biˈ, ñiˈya̱ nu ngutiˈi̱ ycuiˈ Ndyosi loˈo nguaˈni tye Ni cña jiˈi̱ Ni loˈo ngua tsa̱ nchca cati biˈ.
\v 11 Lcaa tsa̱ cuaˈni cña tiˈ na lacua, chaˈ ñaˈa̱ ti tyuˈu chaˈ jiˈna loˈo ycuiˈ Ni, chaˈ taca tyiˈi̱ tsoˈo ti na. Ná cuaˈni na ñiˈya̱ nu nguaˈni jyoˈo cusuˈ biˈ, nu ná ndaquiyaˈ tsiyaˈ ti jiˈi̱ ycuiˈ Ndyosi, chaˈ liˈ ná ngua tyalaa nguˈ biˈ ca su nacui̱ Ni chaˈ tsaa nguˈ. 
\p
\v 12 Lcaa chaˈ nu nchcuiˈ ycuiˈ Ndyosi loˈo ñati̱ ni, ñiˈya̱ ntiˈ sca na luˈú, juaˈa̱ laca chaˈ biˈ. Lcaa tyempo nduˈni biˈ cña neˈ cresiya jiˈi̱ ñati̱ nu cuna chaˈ biˈ. Laca chaˈ biˈ ñiˈya̱ si laca sca xlyu nu cha tsa tuˈba tyucuaa chu̱ˈ; nduˈni biˈ chaˈ saala cuañaˈ na ñaˈa̱ cuayáˈ nu tyalaa ca su ntsuˈu tyijya̱ na, ñaˈa̱ cuayáˈ tyaca̱ˈ ycua nu ntsuˈu neˈ tyijya̱ na. La cuiˈ juaˈa̱ laca loˈo cuna na chaˈ jiˈi̱ ycuiˈ Ndyosi biˈ, na nchcuiˈ caˈa̱ ti chaˈ biˈ jiˈi̱ tyucui ñaˈa̱ na, juaˈa̱ loˈo cresiya jiˈna. Loˈo nduna na sca chaˈ nu nchcuiˈ ycuiˈ Ndyosi loˈo ñati̱, liñi tsa quijeloo chaˈ jiˈi̱ Ni, lcaa chaˈ nu ntsuˈu tyiquee na chaˈ caja jiˈna, lcaa chaˈ nu nclyacua tiˈ scaa na.
\v 13 Ná taca tyuˈu cuaana ti chaˈ tyiquee na, ni tsaca chaˈ nu ntsuˈu jiˈna, chaˈ ná ca cuayáˈ tiˈ ycuiˈ Ndyosi jiˈi̱ chaˈ biˈ. Ná taca. Ñaˈa̱ Ni jiˈi̱ lcaa ñati̱ nu cua ngüiñá Ni, nu cua ngusta Ni chalyuu; nchca tii Ni lcaa chaˈ nu ntsuˈu jiˈna. Ná taca cuaˈni na ni sca cña ca slo ycuiˈ Ndyosi chaˈ tyuˈu cuatsiˈ ti sca chaˈ, chaˈ ngaˈa̱ chaˈ xacui̱ na chaˈ jiˈi̱ ycuiˈ Ni cuentya jiˈi̱ lcaa cña nu nguaˈni scaa na nde chalyuu, nu loˈo tye chalyuu jiˈna.
\s Sti joˈó cuentya jiˈna ca slo ycuiˈ Ndyosi laca Jesús 
\p
\v 14 Loˈo cua ngusñi na chaˈ jiˈi̱ Jesús, liˈ ngaˈa̱ chaˈ cuaˈni na chaˈ tsoˈo ti tyanu chaˈ biˈ neˈ cresiya jiˈna. Cua laca ntsuˈu sca sti joˈó nu laca loo la nu ndu̱ cuentya jiˈna; Jesús laca biˈ, nu sca ti Sñiˈ ycuiˈ Ndyosi laca yu. Cua ndyaa Jesús ca su ndiˈi̱ ycuiˈ Ndyosi Sti yu; juani ndu̱ Jesús slo Ni, nchcuiˈ chaˈ jiˈna loˈo Ni.
\v 15 Laca Jesús sti joˈó nu laca loo la cuentya jiˈna, loˈo juaˈa̱ tyaˈna tsa tiˈ Jesús ñaˈa̱ yu jiˈna. Cua jlo tiˈ yu chaˈ ntsuˈu tsa quiyaˈ loˈo cua cuaˈni ti nu cuxi ngana jiˈna, chaˈ nu loˈo tya ndiˈi̱ Jesús lo yuu chalyuu, la cuiˈ juaˈa̱ lye tsa nguaˈni cuayáˈ nu xñaˈa̱ jiˈi̱ yu, si cuaˈni yu chaˈ cuxi. Pana nu Jesús biˈ ni, ni sca chaˈ cuxi ná nguaˈni yu, biˈ chaˈ taca caca yu sti joˈó nu laca loo la cuentya jiˈna, chaˈ jlo tiˈ Jesús ñiˈya̱ nñiloˈo tsa nu xñaˈa̱ jiˈna. 
\v 16 Ná cutsi̱i̱ na tsiyaˈ ti lacua, tyucui tyiquee na jña na sca chaˈ jiˈi̱ ycuiˈ Ndyosi ca su tlyu ca su laca Ni loo; chcuiˈ na loˈo ycuiˈ Ndyosi nu xcuiˈ tsoˈo tsa nduˈni loˈo ñati̱, chaˈ cuiˈya Ni chaˈ clyu tiˈ jiˈna, chaˈ xtyucua Ni jiˈna, masi la cuiˈ ca hora nu lyiji tsa chaˈ jiˈna.
\c 5
\p
\v 1 Xaˈ la xuˈna sti joˈó nu ndiˈi̱ nde chalyuu ni, nsubi nguˈ jiˈi̱ tyaˈa nguˈ tilaca caca xuˈna sti joˈó, chaˈ caca yu biˈ cña jiˈi̱ ycuiˈ Ndyosi cuentya jiˈi̱ ñati̱. Nsta sti joˈó biˈ msta̱ nu lijya̱ loˈo xaˈ ñati̱ jiˈi̱ lo mesa jiˈi̱ ycuiˈ Ndyosi, juaˈa̱ ndijña tsa yu chaˈ clyu tiˈ jiˈi̱ Ni xquiˈya quiˈya nu ntsuˈu jiˈi̱ ñati̱ biˈ liˈ.
\v 2 Ñati̱ chalyuu ti laca sti joˈó biˈ; loˈo ycuiˈ yu ntsuˈu chaˈ cuxi nu ndyuˈni yu, biˈ chaˈ tsoˈo ti nchcuiˈ yu loˈo ñati̱ nu ná nduna tsiyaˈ ti, nu ndyuˈni tsa chaˈ cuxi.
\v 3 La cuiˈ tyempo loˈo ndyuˈni yu biˈ cña cuentya jiˈi̱ xaˈ ñati̱, la cuiˈ juaˈa̱ cuentya jiˈi̱ ycuiˈ ca yu ngaˈa̱ chaˈ jña yu chaˈ clyu tiˈ jiˈi̱ ycuiˈ Ndyosi, xquiˈya quiˈya nu ntsuˈu jiˈi̱ ycuiˈ yu.
\p
\v 4 Ni sca ñati̱ ná ntsuˈu chacuayáˈ chaˈ caca yu xuˈna sti joˈó hora nu ntiˈ ti yu chaˈ caca yu cña biˈ; ycuiˈ Ndyosi laca nu nsubi tilaca nu tsoˈo chaˈ caca xuˈna sti joˈó cuentya jiˈi̱ Ni, ñiˈya̱ ngusubi Ni jiˈi̱ jyoˈo Aarón chaˈ ngua yu xuˈna sti joˈó.
\v 5 Loˈo Cristo ni, laca Ni sti joˈó nu laca loo la cuentya jiˈna; siˈi chaˈ jiˈi̱ ycuiˈ ti Ni nduˈni Ni juaˈa̱, chaˈ ná ngüijña Ni chaˈ jiˈi̱ ycuiˈ Ndyosi Sti Ni chaˈ caca tlyu la Ni. Ycuiˈ Ndyosi laca nu cua nchcuiˈ loˈo Sñiˈ Ni tya clyo:
\q Sñiˈ naˈ laca nuˈu̱; ycuiˈ naˈ cua nda naˈ chalyuu jinuˈu̱, chaˈ laca nuˈu̱ Sñiˈ naˈ.
\m Juaˈa̱ chaˈ nda Ni loˈo Cristo.
\v 6 Loˈo liˈ cua nchcuiˈ ycuiˈ Ni chaca chaˈ ndiˈya̱:
\q Lcaa ca tyempo caca nuˈu̱ sti joˈó;
\q la cuiˈ ñiˈya̱ nu nguaˈni jyoˈo Melquisedec nu ngua cua saˈni la, juaˈa̱ cuaˈni nuˈu̱ cuentya jiˈi̱ ñati̱ juani.
\m
\v 7 Nu loˈo tya ndiˈi̱ Jesús lo yuu chalyuu, tyu̱u̱ tsa quiyaˈ ngusiˈya tsa yu loˈo nchcuiˈ yu loˈo ycuiˈ Ndyosi Sti yu; lye tsa ngua tiˈ cresiya jiˈi̱ yu loˈo ngüijña yu chaˈ jiˈi̱ Ni, chaˈ nchca tsa jiˈi̱ ycuiˈ Ndyosi. Ngua jiˈi̱ Ni cuaˈa jiˈi̱ ñati̱ chaˈ ná cujuii nguˈ jiˈi̱ Jesús nquichaˈ; pana ndyuna Ni chaˈ nu nchcuiˈ Jesús loˈo Ni, chaˈ ntajaˈa̱ yu cuaˈni yu lcaa cña nu ntiˈ ycuiˈ Ndyosi Sti yu.
\v 8 Biˈ chaˈ ndaquiyaˈ Jesús lcaa cña nu ntiˈ ycuiˈ Ni chaˈ cuaˈni yu. Nchcubeˈ tsa yu loˈo ngutiˈi̱ yu nde chalyuu; masi nu sca ti Sñiˈ ycuiˈ Ndyosi laca yu, pana tya ngua tsaˈa̱ la yu cua ñaˈa̱ ca cña nu cuaˈni yu cuentya jiˈi̱ Ni.
\v 9 Tiyaˈ la liˈ, loˈo cua ngua lcaa chaˈ jiˈi̱ Jesús chaˈ cua nguaˈni yu cña nu cua nda ycuiˈ Ndyosi jiˈi̱ yu chaˈ cuaˈni yu, tya liˈ ntucua quiyaˈ chaˈ cuaˈni lyaá Jesús jiˈi̱ cua ñaˈa̱ ca ñati̱ chalyuu nu tyajaˈa̱ cuaˈa̱ jyaca̱ jiˈi̱ chaˈ nu cua nchcuiˈ yu loˈo; ná tye tsiyaˈ ti chaˈ cuaˈni lyaá Ni jiˈna jiˈi̱ chaˈ cuxi nu ntsuˈu jiˈna.
\v 10 Biˈ chaˈ cua nacui̱ Ni chaˈ laca Jesús sti joˈó nu laca loo la; la cuiˈ ñiˈya̱ nu nguaˈni jyoˈo Melquisedec nu ngua cua saˈni la, juaˈa̱ cuaˈni Jesús cuentya jiˈna juani.
\s Caca cuxi chaˈ jiˈna si tyaˈa̱chu̱ˈ na jiˈi̱ Jesús
\p
\v 11 Cua quiñaˈa̱ tsa chaˈ ntiˈ ya chcuiˈ ya loˈo ma̱ chaˈ jiˈi̱ Cristo, chaˈ quiñaˈa̱ tsa chaˈ tya lyiji ca cuayáˈ tiˈ ma̱. Pana ná nchca culuˈu tsoˈo ya lcaa chaˈ biˈ jiˈi̱ ma̱; tlyu tsa cña caca, xquiˈya chaˈ ycuiˈ cuˈma̱ ná ndyuˈni yala ma̱ chaˈ ca cuayáˈ tiˈ ma̱ chaˈ biˈ.
\v 12 Tya saˈni tsa ngua loˈo ndyuna ma̱ chaˈ jiˈi̱ Cristo tya clyo; cua nteje tacui tyu̱u̱ tsa tyempo, ñaˈa̱ cuayáˈ taca caca ma̱ mstru cuentya jiˈi̱ Cristo nquichaˈ, pana ñaˈa̱ ti ndiˈi̱ ma̱ juani. Tya ntiˈ chaˈ culuˈu la nguˈ jiˈi̱ ma̱ tya chaca quiyaˈ ñiˈya̱ ntucua quiyaˈ chaˈ jiˈi̱ ycuiˈ Ndyosi, la cuiˈ chaˈ nu ngua tiˈ Ni chaˈ cachaˈ Ni jiˈi̱ ñati̱ chalyuu. Ñiˈya̱ nduˈni sca cubiˈ nu tya ntyiˈ, chaˈ bilya cacu biˈ tyaja, juaˈa̱ ndyuˈni ma̱, chaˈ ná nchca ca cuayáˈ tiˈ ma̱ chaˈ jiˈi̱ ycuiˈ Ndyosi biˈ.
\v 13 Tya cuañiˈ tsa nguˈ nu tya ntyiˈ; la cuiˈ juaˈa̱ laca cuˈma̱, chaˈ ná jlo tiˈ ma̱ tsiyaˈ ti ñiˈya̱ ngaˈa̱ chaˈ cuaˈni ma̱ loˈo ngua tsoˈo cresiya jiˈi̱ ma̱ cuentya jiˈi̱ Jesús, masi ntsuˈu chaˈ tsoˈo nu ngaˈa̱ chaˈ cuaˈni ma̱ juani.
\v 14 Ñati̱ nu cua nguluu xi laca nu ndacu tyaja; loˈo cuˈma̱ caca juaˈa̱, si quiˈi̱ ma̱ chaˈ culacua tsoˈo tiˈ ma̱ ñiˈya̱ laca sca chaˈ, si chaˈ tsoˈo laca, si chaˈ cuxi laca.
\c 6
\p
\v 1 Cuaˈni yala na lacua, chaˈ cuna tsoˈo na lcaa chaˈ nu ntsuˈu jiˈi̱ Cristo; cuaˈni na chaˈ caca na ñati̱ nu nclyacua tsoˈo ti tiˈ, chaˈ ná tsoˈo si xcuiˈ na nchcuiˈ na jiˈi̱ chaˈ nu ngua tsaˈa̱ na tya clyo ti. Juani cua jlo tsoˈo tiˈ na macala ntucua quiyaˈ chaˈ jiˈi̱ Cristo: cua nchcuiˈ na ñiˈya̱ caca tyuˈutsuˈ na jiˈi̱ chaˈ cuxi nu nguaˈni na tya saˈni la, ñiˈya̱ caca xñi na chaˈ jiˈi̱ Cristo;
\v 2 juaˈa̱ cua nchcuiˈ na ñiˈya̱ caca tyucuatya na chacuayáˈ jiˈi̱ Cristo, ñiˈya̱ caca sta yaˈ nguˈ hique na chacuayáˈ jiˈi̱ Cristo; cua nchcuiˈ na chaˈ tya tyuˈú na chaca quiyaˈ nde loo la, masi cua ngujuii na, chaˈ liˈ ntsuˈu chaˈ cuaˈni cuayáˈ Ni jiˈi̱ lcaa na loˈo tyaˈa na.
\v 3 Loˈo nu juani ni, ngaˈa̱ chaˈ cuaˈni yala ti na chaˈ taquiyaˈ na lcaa chaˈ jiˈi̱ Jesús nu tya lyiji xñi tsoˈo na; juaˈa̱ cuaˈni na lacua, si tya ta la ycuiˈ Ndyosi xi chalyuu jiˈna.
\p
\v 4 Ná caja ñiˈya̱ cuaˈni na loˈo ñati̱ nu nguxtyanu tsiyaˈ ti jiˈi̱ chaˈ biˈ. Cua jlo tiˈ nguˈ ñiˈya̱ laca loˈo cua ndyaala hique nguˈ chaˈ ngulacua tsoˈo tiˈ nguˈ, juaˈa̱ cua jlo tiˈ nguˈ chaˈ tsoˈo tsa cua ñaˈa̱ ca chaˈ nu nda ycuiˈ Ndyosi ya̱a̱ slo nguˈ. Loˈo nguˈ biˈ, cua nguaˈni Xtyiˈi ycuiˈ Ndyosi cña neˈ cresiya jiˈi̱ nguˈ xquiˈya Jesús nquichaˈ.
\v 5 Cua jlo tiˈ nguˈ biˈ, chaˈ cua naˈa̱ nguˈ chaˈ tsoˈo tsa lcaa chaˈ nu nacui̱ Ni jiˈna chaˈ cuaˈni Ni loˈo na; cua naˈa̱ nguˈ biˈ, chaˈ tlyu tsa chaˈ nu ndyaca loˈo cua nguxana tyalaa chalyuu cucui jiˈi̱ ycuiˈ Ndyosi ca su ndiˈi̱ nguˈ.
\v 6 Loˈo liˈ cua ndyaˈa̱chu̱ˈ nguˈ biˈ jiˈi̱ Jesús. Ngaˈaa caca cuaˈni na chaˈ chaca quiyaˈ xñi tsoˈo nguˈ biˈ chaˈ jiˈi̱ Jesús; xcuiˈ na nda nguˈ biˈ chaˈ tiˈí jiˈi̱ Jesús nu sca ti Sñiˈ ycuiˈ Ndyosi, chaˈ ndyuˈni nguˈ ñiˈya̱ laca si ntyijiˈi̱ caˈa̱ nguˈ jiˈi̱ Jesús lo crusi chaca quiyaˈ, chaˈ xaˈ xtyí loˈo ti ñati̱ chalyuu jiˈi̱ yu. 
\v 7 Ñiˈya̱ ntiˈ sca yuu tsoˈo su ndyuˈni nguˈ cña ni, luˈba ti ndaˈya tyo ndyalú lo yuu biˈ; ndyiˈyu yuu hitya tyo biˈ liˈ, chaˈ juaˈa̱ nxtyucua ycuiˈ Ndyosi jiˈi̱ yuu chaˈ tyucua na cuiñii nu cua ndyataa lo yuu, chaˈ cuaˈnijoˈo jiˈi̱ nguˈ nu ndyuˈni cña biˈ.
\v 8 Pana ná tsoˈo yuu tsiyaˈ ti si tyucua xcuiˈ quixi̱ˈ, xcuiˈ yaca quicheˈ; xtyanu nguˈ jiˈi̱ yuu nu nduˈni juaˈa̱, chaˈ ñiˈya̱ laca si cua ngusta ycuiˈ Ndyosi yabeˈ jiˈi̱ yuu biˈ, juaˈa̱ ndyuˈu chaˈ. Ngaˈa̱ chaˈ cuaˈa̱ nguˈ quiiˈ lo yuu biˈ, chaˈ tye tyaqui̱ lcaa na cuxi nu ntsuˈu ca ndacua. Ñiˈya̱ nu caca jiˈi̱ yuu nu ná tsoˈo tsiyaˈ ti biˈ, juaˈa̱ caca cuxi jiˈna si xtyanu na chaˈ jiˈi̱ Jesús.
\s Ñaˈa̱ ti tya xñi tsoˈo na chaˈ jiˈi̱ ycuiˈ Ndyosi, chaˈ ná xtyanu chca Ni jiˈna
\p
\v 9 Cuˈma̱ tyaˈa tsoˈo na, nu ntsuˈu tsa tyiquee ya ñaˈa̱ ya jiˈi̱ ma̱, ngaˈaa ntsuˈu chaˈ culacua tiˈ ya chaˈ jiˈi̱ ma̱ juaˈa̱, masi nchcuiˈ ya ñiˈya̱ nu cua nchcuiˈ ca ti ya. Cua jlo tiˈ ya chaˈ tsoˈo ti ndyaca jiˈi̱ ma̱ juani, tya loˈo nguaˈni lyaá Jesús jiˈi̱ ma̱ jiˈi̱ nu cuxi.
\v 10 Loˈo juaˈa̱ liñi tsa nduˈni ycuiˈ Ndyosi loˈo na. Ná cjlyaa tiˈ Ni lcaa chaˈ tsoˈo nu cua ndyuˈni ma̱, nu loˈo nxtyucua ma̱ jiˈi̱ nguˈ tyaˈa ngusñi na chaˈ jiˈi̱ Jesús, chaˈ cua quiñaˈa̱ xi cña ndyuˈni ma̱ cuentya jiˈi̱ nguˈ biˈ. Xquiˈya chaˈ ndyuˈni ma̱ juaˈa̱, biˈ chaˈ jlo tiˈ xaˈ ñati̱ chaˈ ntsuˈu tsa tyiquee ma̱ jiˈi̱ Jesús, chaˈ ñaˈa̱ ti tya ndyuˈni ma̱ chaˈ tsoˈo loˈo nguˈ juani.
\v 11 Tsoˈo si ñaˈa̱ ti tya cuaˈni ma̱ tyucui tyempo nde loo la ntiˈ ya, chaˈ ndu̱ tiˈ ma̱ jiˈi̱ ycuiˈ Ndyosi ñaˈa̱ cuayáˈ tyuˈu tucua lcaa chaˈ nu cua nchcuiˈ Ni loˈo ma̱.
\v 12 Ná ntiˈ ya chaˈ caca taja ma̱; na cua ntiˈ ya chaˈ cuaˈni ma̱ ñiˈya̱ nu nguaˈni xaˈ la tyaˈa ngusñi na chaˈ jiˈi̱ Jesús tya clyo la, nu cua ndalo tsa tyiquee chaˈ ndu̱ tiˈ nguˈ jiˈi̱ ycuiˈ Ndyosi. Biˈ chaˈ cua ngujui lcaa chaˈ jiˈi̱ nguˈ, ñiˈya̱ nu nacui̱ Ni chaˈ tyacua jiˈi̱ nguˈ.
\p
\v 13 Nu ngua saˈni la loˈo ngüiñi chaˈ jiˈi̱ ycuiˈ Ndyosi loˈo jyoˈo Abraham, liˈ ngulotu̱ Ni xtañi ycuiˈ Ni loˈo nacui̱ Ni ndiˈya̱ jiˈi̱ nu cusuˈ biˈ: “Chacuayáˈ jiˈi̱ ycuiˈ ca ti naˈ cuaˈni naˈ cña biˈ cuentya jinuˈu̱”, nacui̱ Ni. Ngaˈaa ntsuˈu la xaˈ ñati̱ nu tlyu la chaˈ jiˈi̱ que ycuiˈ Ndyosi, biˈ chaˈ ngulotu̱ Ni xtañi ycuiˈ Ni, chaˈ quiñi chaˈ jiˈi̱ Ni loˈo Abraham biˈ.
\v 14 Xaˈ nchcuiˈ Ni loˈo jyoˈo biˈ liˈ: “Chañi chaˈ nu chcuiˈ naˈ loˈo nuˈu̱, chaˈ tsoˈo tsa cuaˈni naˈ loˈo nuˈu̱, chaˈ quiñaˈa̱ tsa ñati̱ jinuˈu̱ tyatu̱ nde lo yuu tyempo ca nde loo la”. Juaˈa̱ nacui̱ Ni nu ngua liˈ.
\v 15 Ndalo tsa tyiquee Abraham biˈ liˈ, chaˈ ndu̱ tiˈ yu jiˈi̱ chaˈ nu nda ycuiˈ Ndyosi loˈo yu; biˈ chaˈ ngutuˈu tucua lcaa chaˈ jiˈi̱ yu, ñiˈya̱ nu cua nacui̱ Ni jiˈi̱ yu chaˈ caca jiˈi̱.
\v 16 Ndiˈya̱ nduˈni ñati̱ chalyuu: Si ntiˈ nguˈ chaˈ tyanu tachaa sca chaˈ nu cua quiñi ti jiˈi̱ nguˈ loˈo tyaˈa nguˈ, liˈ nclyotu̱ nguˈ tañi sca joˈó, masi xtañi sca ñati̱ tlyu laja loˈo nda nguˈ chaˈ; ná caja ñiˈya̱ xu̱u̱ tyaˈa nguˈ cuentya jiˈi̱ chaˈ biˈ liˈ.
\v 17 La cuiˈ juaˈa̱ nguaˈni ycuiˈ Ndyosi. Ngua tiˈ Ni cachaˈ liñi Ni jiˈi̱ nguˈ ñiˈya̱ nu caca chaˈ biˈ jiˈi̱ nguˈ biˈ ca nde loo la, chaˈ ca cuayáˈ tiˈ nguˈ chaˈ ngaˈaa tyaˈa̱chu̱ˈ Ni tsiyaˈ ti jiˈi̱ sca chaˈ nu cua nacui̱ Ni tsaca quiyaˈ; biˈ chaˈ xtañi ycuiˈ Ni ngulotu̱ Ni clyo, chaˈ juaˈa̱ ngüiñi chaˈ jiˈi̱ Ni loˈo jyoˈo biˈ.
\v 18 Xquiˈya lcaa chaˈ biˈ cua jlo tiˈ na chaˈ ná ngaˈa̱ chaˈ chaˈa̱ tsiyaˈ ti sca chaˈ nu cua nacui̱ ycuiˈ Ndyosi chaˈ caca, chaˈ ná ntiˈ Ni cñiloˈo Ni jiˈna tsiyaˈ ti. Tsoˈo ti ndiˈi̱ tyiquee na juani, chaˈ ni sca chaˈ cuxi ná taca xcutsi̱i̱ jiˈna, xquiˈya chaˈ jlya tiˈ na chaˈ nu nda ycuiˈ Ndyosi loˈo na; cua nguaˈni Ni chaˈ ndyaca tlyu la tyiquee na, chaˈ xñi tsoˈo na lcaa chaˈ nu cua nchcuiˈ Ni loˈo na ñaˈa̱ cuayáˈ nu tyuˈu tucua chaˈ biˈ.
\v 19 Ñiˈya̱ ntiˈ chcua̱ ngratu nu nsalú nguˈ nde siyuˈ yaca niˈi̱, chaˈ tachaa ti xñi caˈa̱ chcua̱ biˈ jiˈi̱ quee nde siyuˈ hitya, chaˈ tyacui seˈi̱ ti yaca niˈi̱ biˈ lo hitya, chaˈ ná caca tyuˈutsuˈ yaca niˈi̱ biˈ tsiyaˈ ti liˈ; la cuiˈ juaˈa̱ nduˈni Jesús loˈo na, chaˈ nduˈni yu chaˈ tyanu tachaa chaˈ jiˈi̱ ycuiˈ Ni neˈ cresiya jiˈna, chaˈ ná tyaˈa̱chu̱ˈ na jiˈi̱ Ni tsiyaˈ ti. Cua ndyalaa Jesús nde cua̱, ñiˈya̱ laca si cua nteje tacui yu tasá tlyu nu ndacui claˈbe neˈ laa tonu; juani cua ndyaa tucua yu la cuiˈ ca su ntucua ycuiˈ Ndyosi. 
\v 20 Cuentya jiˈna, cua ndyaa Jesús ca biˈ nde loo la, chaˈ taca xtyucua yu jiˈna. Ná ngaˈa̱ chaˈ tye chaˈ laca Jesús sti joˈó nu laca loo la cuentya jiˈna; la cuiˈ ñiˈya̱ nu nguaˈni jyoˈo Melquisedec nu ngua saˈni, juaˈa̱ cuaˈni Jesús cuentya jiˈna juani.
\c 7
\s Ñiˈya̱ ngua Melquisedec sti joˈó, juaˈa̱ laca Jesús cuentya jiˈna juani
\p
\v 1 Nu jyoˈo Melquisedec biˈ ni, xuˈna quichi̱ Salem ngua nu cusuˈ biˈ; cuentya jiˈi̱ ycuiˈ Ndyosi nu laca loo la nguaˈni yu cña chaˈ ngua yu sti joˈó. Nu ngua tyempo biˈ cua ndyaa lcaˈa̱ jyoˈo Abraham jiˈi̱ tyu̱u̱ tyaˈa rey xñaˈa̱, chaˈ ngusu̱u̱ tyaˈa yu loˈo nguˈ biˈ, ndyujuii yu jiˈi̱ nu nguˈ xñaˈa̱ biˈ liˈ. Tyucui̱i̱ loˈo ñaa yu, liˈ ngutuˈu nu Melquisedec biˈ ndyaa toˈ tyucui̱i̱ chaˈ tyacua tyaˈa loˈo nu Abraham biˈ; ngulacua̱ jiˈi̱ yu chacuayáˈ jiˈi̱ ycuiˈ Ndyosi liˈ.
\v 2 Biˈ chaˈ ngusaˈbe Abraham lcaa yuˈba nu nquije jiˈi̱ yu chaca quiyaˈ, nu nguaana nu nguˈ xñaˈa̱ biˈ; tii tyaˈa yuˈbe ngusaˈbe yu lcaa chaˈ biˈ, loˈo liˈ nda yu ñaˈa̱ tsaca yuˈbe jiˈi̱ nu cusuˈ Melquisedec biˈ. Ndiˈya̱ ndyuˈu xtañi nu cusuˈ biˈ: “xuˈna quichi̱ nu liñi ca nduˈni”, juaˈa̱ ndyuˈu chaˈ biˈ chaˈcña jiˈna; loˈo juaˈa̱ chaˈ xuˈna quichi̱ Salem ngua nu cusuˈ biˈ, biˈ chaˈ taca chcuiˈ na: “ti̱ ti ndiˈi̱ cresiya jiˈi̱ nguˈ xquiˈya nu xuˈna nguˈ”, chaˈ juaˈa̱ ndyuˈu xquichaˈ Salem chaˈcña jiˈna.
\v 3 Ná nchcuiˈ quityi ñiˈya̱ naa sti xtyaˈa̱ nu Melquisedec biˈ, juaˈa̱ ni sca chaˈ ná nscua lo quityi cuentya jiˈi̱ jyoˈo cusuˈ jiˈi̱ nu cusuˈ biˈ; ná nchcuiˈ ni jacuaˈ ngula, ni jacuaˈ ngujuii. Ñiˈya̱ ngua Melquisedec, juaˈa̱ laca Jesús, chaˈ lcaa tyempo laca yu sti joˈó cuentya jiˈna; pana Jesús ni, laca yu nu sca ti Sñiˈ ycuiˈ Ndyosi.
\p
\v 4 Culacua xi tiˈ ma̱ lacua, ni chaˈ ngua nu cusuˈ biˈ tlyu la que Abraham. Jiˈi̱ nu cusuˈ Melquisedec biˈ cua nda jyoˈo cusuˈ jiˈna ñaˈa̱ tsaca yuˈbe yuˈba, la cuiˈ yuˈba nu cua nquije jiˈi̱ yu chaca quiyaˈ, nu nguaana nu nguˈ xñaˈa̱ biˈ.
\v 5 Chalyuu nu ngua saˈni biˈ, sca ti nu ñati̱ tyaˈa jiˈi̱ jyoˈo Leví laca sti joˈó; biˈ ti nguˈ nu nda ycuiˈ Ndyosi chacuayáˈ jiˈi̱ chaˈ xñi nguˈ msta̱ nu nda cua ñaˈa̱ ca nguˈ Israel jiˈi̱ ycuiˈ Ndyosi. Msta̱ biˈ laca sa yuˈbe lcaa chaˈ tsoˈo nu ntsuˈu jiˈi̱ nguˈ. Loˈo juaˈa̱ laca sti joˈó biˈ la cuiˈ tyaˈa ñati̱ loˈo tyaˈa quichi̱ tyi nguˈ nu cuentya jiˈi̱ Abraham.
\v 6 Pana nu cusuˈ Melquisedec biˈ ni, siˈi tyaˈa nguˈ Leví ngua Melquisedec biˈ tsiyaˈ ti, masi ngusñi yu msta̱ nu cua nda Abraham jiˈi̱ ycuiˈ Ndyosi; liˈ ngulacua̱ nu cusuˈ biˈ jiˈi̱ Abraham, xquiˈya chaˈ cua ngüiñi chaˈ jiˈi̱ ycuiˈ Ndyosi loˈo Abraham tya clyo la.
\v 7 Biˈ chaˈ cua jlo tiˈ na chaˈ tlyu la ngua jyoˈo Melquisedec biˈ que jyoˈo Abraham; na cua ngulacua̱ nu cusuˈ biˈ jiˈi̱ jyoˈo Abraham nu ngua liˈ, biˈ chaˈ tlyu la chacuayáˈ ntsuˈu jiˈi̱ ycuiˈ nu cusuˈ biˈ que Abraham.
\v 8 Xcuiˈ na ndyijii sti joˈó nu nxñi msta̱ nu nda ñati̱ chalyuu ti jiˈi̱ ycuiˈ Ndyosi, tsa yuˈbe ti chaˈ tsoˈo nu ntsuˈu jiˈi̱ scaa nguˈ nda nguˈ biˈ; pana ná nscua lo quityi cusuˈ ni jacuaˈ ngujuii nu Melquisedec biˈ, la cuiˈ nu cusuˈ nu cua ngusñi msta̱ nu nda Abraham nu ngua liˈ.
\v 9 Taca ñacui̱ na chaˈ loˈo ycuiˈ jyoˈo Leví cua nda msta̱ jiˈi̱ nu Melquisedec biˈ nu ngua tsa̱ biˈ, masi tiyaˈ la ya̱a̱ nu Leví biˈ chalyuu; la cuiˈ jyoˈo Leví nu ngua jyoˈo cusuˈ jiˈi̱ lcaa tyaˈa nguˈ Leví nu nguaˈni nguˈ cña sti joˈó, chaˈ ngusñi nguˈ msta̱ nu nda ñati̱ chalyuu jiˈi̱ ycuiˈ Ndyosi.
\v 10 Nu loˈo ndyacua tyaˈa Melquisedec loˈo Abraham, ñiˈya̱ laca si loˈo Leví nda msta̱, juaˈa̱ ngua liˈ, masi tya lyiji cala Leví chalyuu, xquiˈya chaˈ Abraham ngua jyoˈo cusuˈ jiˈi̱ yu, chaˈ sñiˈ steˈ Abraham ngua sti Leví biˈ.
\p
\v 11 Nu sti joˈó nu ya̱a̱ chalyuu tiyaˈ la biˈ, la cuiˈ juaˈa̱ tyaˈa ñati̱ jiˈi̱ jyoˈo Leví, nclyuˈu quiˈi̱ nguˈ biˈ jiˈi̱ nguˈ Israel chaˈ cuaˈni nguˈ lcaa cña nu ngulo ycuiˈ Ndyosi jiˈi̱ nguˈ. Pana ná ndalo sti joˈó biˈ cuaˈni tyucui cña biˈ, biˈ chaˈ juani ngutuˈu tucua chaca nu laca sti joˈó nu cuentya jiˈna. Ná laca yu sti joˈó ñiˈya̱ ngua Aarón loˈo tyaˈa Aarón sti joˈó, masi laca yu sca sti joˈó nu ñiˈya̱ nguaˈni jyoˈo Melquisedec nu ngua saˈni la, la cuiˈ juaˈa̱ cuaˈni yu cuentya jiˈna juani.
\v 12 Nu loˈo nchaˈa̱ chaˈ jiˈi̱ sti joˈó ni, la cuiˈ juaˈa̱ nchaˈa̱ cña nu ngaˈa̱ chaˈ cuaˈni na cuentya jiˈi̱ ycuiˈ Ndyosi.
\v 13 Chaˈ jiˈi̱ Jesús nu Xuˈna na nchcuiˈ chaˈ nu nscua lo quityi cusuˈ biˈ; pana ycuiˈ Jesús ni, xaˈ ñati̱ laca biˈ, siˈi tyaˈa ñati̱ jiˈi̱ Leví laca yu. Ni sca ñati̱ tyaˈa xtañi Jesús ná ngua nguˈ sti joˈó nde chu̱ˈ la.
\v 14 Cua jlo tiˈ nguˈ chaˈ Judá ngua xtañi Jesús tya loˈo ngula yu; pana nu loˈo nchcuiˈ jyoˈo Moisés tilaca nu caca sti joˈó, ná nchcuiˈ tsiyaˈ ti jiˈi̱ nguˈ tyaˈa xtañi Judá biˈ.
\p
\v 15 Loˈo nu juani laca Jesús sti joˈó nu xaˈ ñaˈa̱ cuaˈni; ñiˈya̱ nguaˈni jyoˈo Melquisedec, juaˈa̱ cuaˈni Ni cña jiˈi̱ sti joˈó. Biˈ chaˈ tsoˈo la nchca cuayáˈ tiˈ na juani chaˈ cua ntyeje tacui chaˈ jiˈi̱ chaˈ cusuˈ biˈ, chaˈ cua ngutuˈu tucua Jesús nu sti joˈó cucui jiˈna. 
\v 16 Cua nda ycuiˈ Ndyosi cña jiˈi̱ Jesús chaˈ caca Ni sti joˈó, xquiˈya chaˈ ná ngua jiˈi̱ ñati̱ chalyuu cujuii nguˈ jiˈi̱ yu sca ti quiyaˈ; cua ndyuˈú Jesús chaca quiyaˈ loˈo cua ngujuii yu. Juani ná ngaˈa̱ chaˈ tye chalyuu jiˈi̱ Ni; biˈ chaˈ laca Jesús sti joˈó cuentya jiˈna juani, siˈi chaˈ cuaˈni Ni lcaa cña nu ndyuˈni nguˈ tyaˈa Leví nu laca ñati̱ chalyuu ti.
\v 17 Cua nscua lo quityi cusuˈ chaˈ ndiˈya̱ nchcuiˈ ycuiˈ Ndyosi loˈo Ni:
\q Lcaa ca tyempo caca nuˈu̱ sti joˈó;
\q ñiˈya̱ nu nguaˈni jyoˈo Melquisedec nu ngua saˈni, la cuiˈ juaˈa̱ cuaˈni nuˈu̱ cuentya jiˈi̱ ñati̱ juani. 
\m
\v 18 Biˈ chaˈ cua ngulotsuˈ ycuiˈ Ndyosi jiˈi̱ chaˈ cusuˈ nu lye tsa ngulo cña jiˈna, chaˈ ná caca xtyucua chaˈ cusuˈ biˈ jiˈna; ná nchca cati̱ quiˈya nu ntsuˈu jiˈna loˈo ycuiˈ Ndyosi juaˈa̱.
\v 19 Tya lyiji tsa chaˈ ca tsoˈo cresiya jiˈna cuentya jiˈi̱ ycuiˈ Ndyosi, masi cua nguaˈni na lcaa cña nu ngulo jyoˈo Moisés jiˈi̱ nguˈ tyaˈa na nu ngua liˈ, chaˈ ná ngua cuaˈni lyaá chaˈ cusuˈ biˈ jiˈna jiˈi̱ nu cuxi; pana juani taca xñi na chaˈ jiˈi̱ ycuiˈ Ndyosi. Cacua tsa laca ycuiˈ Ni jiˈna juani xquiˈya Jesús, chaˈ tsoˈo la tsiyaˈ ti laca chaˈ nu ya̱loˈo Jesús chaˈ chcuiˈ Ni loˈo na.
\p
\v 20 Tsoˈo la laca Jesús, xquiˈya chaˈ cua ngüiñi tsoˈo chaˈ jiˈi̱ ycuiˈ Ndyosi loˈo Sñiˈ ndiˈya̱: “Chacuayáˈ jiˈi̱ ycuiˈ ca naˈ caca nuˈu̱ sti joˈó”, nacui̱ ycuiˈ Ndyosi jiˈi̱ Jesús.
\v 21 Ná nchcuiˈ Ni juaˈa̱ loˈo sti joˈó tyaˈa nguˈ Leví. Pana ndiˈya̱ nchcuiˈ ycuiˈ Ni loˈo Jesús tya loˈo nguxana chaˈ caca Jesús sti joˈó:
\q Liñi tsa nda naˈ chaˈ cuentya jinuˈu̱, nacui̱ ycuiˈ Ndyosi,
\q ngaˈaa tyaˈa̱chu̱ˈ naˈ tsiyaˈ ti jiˈi̱ chaˈ nu cua nacui̱ naˈ biˈ:
\q “Lcaa ca tyempo caca nuˈu̱ sti joˈó.
\q Ñiˈya̱ nu nguaˈni jyoˈo Melquisedec nu ngua saˈni, la cuiˈ juaˈa̱ cuaˈni nuˈu̱ cuentya jiˈi̱ ñati̱ juani.” 
\m
\v 22 Biˈ chaˈ cua tsoˈo la ngüiñi chaˈ jiˈi̱ ycuiˈ Ni loˈo na juani, xquiˈya cña nu nguaˈni Jesús cuentya jiˈna.
\v 23 Pana nu sti joˈó tyaˈa nguˈ Leví biˈ ni, xcuiˈ na ndyijii nguˈ biˈ, loˈo liˈ xaˈ la tyaˈa nguˈ ndyatí̱ lo cña sti joˈó biˈ; biˈ chaˈ ngua quiñaˈa̱ tsa sti joˈó chu̱ˈ tyu̱u̱ yija̱ liˈ.
\v 24 Loˈo nu Jesús biˈ ni, ñaˈa̱ ti luˈú yu; ná nscua chaˈ cajaa Ni, biˈ chaˈ ná ngaˈa̱ chaˈ tye chaˈ caca Ni sti joˈó cuentya jiˈna, chaˈ ná ntsuˈu chaˈ cuaˈni xaˈ ñati̱ cña jiˈi̱.
\v 25 Lcaa ca tyempo, masi juani, masi nde loo la, taca jiˈi̱ Ni cuaˈni lyaá Ni jiˈi̱ cua ñaˈa̱ ca ñati̱ nu xñi chaˈ jiˈi̱ ycuiˈ Ndyosi xquiˈya Jesús. Tyucui tyempo ndiˈi̱ Jesús ca slo ycuiˈ Ndyosi, chaˈ chcuiˈ Ni loˈo ycuiˈ Sti Ni cuentya jiˈna.
\p
\v 26 Xñi na chaˈ jiˈi̱ Jesús lacua; biˈ laca sti joˈó nu laca loo la, nu chañi chaˈ taca xtyucua jiˈna. Ñati̱ lubii tsiyaˈ ti laca Ni, chaˈ ná ntsuˈu chaˈ cuxi, ná ntsuˈu quiˈya jiˈi̱ Ni. Xaˈ ñaˈa̱ laca Jesús, nu ná nda ycuiˈ Ndyosi chacuayáˈ chaˈ tyanu yu slo ñati̱ chalyuu nu nduˈni tsa chaˈ cuxi; cua nda Sti yu su tyucua yu la cuiˈ su tlyu ca su ntucua ycuiˈ Ndyosi Sti yu.
\v 27 Ndulo la tsiyaˈ ti chaˈ nu ntsuˈu jiˈi̱ Jesús que chaˈ nu ntsuˈu jiˈi̱ xaˈ la sti joˈó nu ndiˈi̱ chalyuu. Lcaa tsa̱ nsta nguˈ biˈ msta̱ lo mesa tacati, chaˈ juaˈa̱ cati̱ la quiˈya nu ntsuˈu jiˈi̱ nguˈ loˈo ycuiˈ Ndyosi; clyo nduˈni nguˈ chaˈ cati̱ quiˈya jiˈi̱ ycuiˈ ca nguˈ, loˈo liˈ nduˈni nguˈ chaˈ cati̱ quiˈya nu ntsuˈu jiˈi̱ lcaa nguˈ quichi̱ biˈ. Pana nu Jesús biˈ ni, sca ti quiyaˈ ngusta yu msta̱ loˈo ngutiˈi̱ yu chalyuu chaˈ cati̱ quiˈya nu ntsuˈu jiˈi̱ ñati̱; tyucui ñaˈa̱ ycuiˈ yu ngua msta̱ biˈ, nu loˈo ngujuiˈi̱ caˈa̱ nguˈ jiˈi̱ yu lo crusi.
\v 28 Ñati̱ chalyuu ti laca sti joˈó nu nduˈni cña nu cua nacui̱ jyoˈo Moisés chaˈ caca, ñati̱ nu tya ntsuˈu quiˈya jiˈi̱ laca nguˈ biˈ; pana nu sca ti Sñiˈ ycuiˈ Ndyosi ni, lubii tsiyaˈ ti cresiya jiˈi̱ Ni. Cua tyeje tacui ti tyempo cusuˈ loˈo ndaquiyaˈ tsa nguˈ jiˈi̱ cña nu ngulo jyoˈo Moisés. Biˈ chaˈ nguane ycuiˈ Ndyosi jiˈi̱ Sñiˈ ycuiˈ ca, nu Jesús biˈ ni, chaˈ caca Ni sti joˈó cuentya jiˈna. Cua nchcuiˈ Sti Ni loˈo Ni: “Chacuayáˈ jiˈi̱ ycuiˈ ca naˈ caca nuˈu̱ sti joˈó”, nacui̱ ycuiˈ Ndyosi jiˈi̱ Jesús.
\c 8
\s Jesús laca nu ndiˈi̱ ca slo ycuiˈ Ndyosi, chaˈ chcuiˈ loˈo Ni cuentya jiˈna
\p
\v 1 Ndiˈya̱ ndyuˈu chaˈ nu ntiˈ naˈ chcui̱ˈ loˈo ma̱ juani: Ca cua̱ ntucua Jesús, nde laˈa tsuˈ cui̱ ca su ntucua ycuiˈ Ndyosi, chaˈ nclyo Ni cña tyucui ñaˈa̱ chalyuu; ca biˈ ntucua Jesús chaˈ laca Ni sti joˈó nu laca loo la cuentya jiˈna.
\v 2 Nduˈni Ni cña ca sca seˈi̱ su tacati tsa nu ngüiñá ycuiˈ Ndyosi; siˈi ñati̱ chalyuu ti nu ngüiñá jiˈi̱, chaˈ laca biˈ ñiˈya̱ nu ngua tiˈ ycuiˈ Ndyosi chaˈ caca. 
\v 3 Lcaa xuˈna sti joˈó nde chalyuu ni, ntsuˈu chaˈ sta nguˈ msta̱ ca slo ycuiˈ Ndyosi, ntsuˈu chaˈ taqui̱ nguˈ xaˈ la msta̱ lo mesa quiiˈ, chaˈ biˈ laca cña jiˈi̱ nguˈ; loˈo juaˈa̱ Jesús ni, ntsuˈu msta̱ nu nda Ni ca slo ycuiˈ Ndyosi cuentya jiˈna,
\v 4 masi ná ngua Jesús sti joˈó loˈo ngutiˈi̱ yu nde chalyuu. Ná nda nguˈ cña biˈ jiˈi̱, chaˈ cua laca ndiˈi̱ xaˈ la sti joˈó nu nsta msta̱ nu ntsuˈu chaˈ ta nguˈ quichi̱ chacuayáˈ jiˈi̱ jyoˈo Moisés.
\v 5 Pana nu xaˈ la sti joˈó biˈ ni, ñati̱ nu cajaa ti laca nguˈ biˈ; cua laca ti cña nduˈni nguˈ. Xquiˈya nguˈ biˈ nchca cuayáˈ tiˈ na chaˈ tsoˈo la tsiyaˈ ti sti joˈó laca Jesús, nu ntucua ca slo ycuiˈ Ndyosi. Loˈo juaˈa̱ nu chcuaˈya lateˈ nu ngüiñá jyoˈo Moisés su nguaˈni tlyu jyoˈo cusuˈ jiˈna jiˈi̱ ycuiˈ Ndyosi nu ngua liˈ, ndiˈya̱ nchcuiˈ Ni loˈo nu cusuˈ biˈ cuentya jiˈi̱ chcuaˈya biˈ: “Cuiˈya nuˈu̱ cuentya chaˈ cuiñá ma̱ niˈi̱ biˈ ñiˈya̱ nu nguluˈu naˈ jiˈi̱ ma̱ chaˈ cuiñá ma̱ jiˈi̱, nu loˈo ngutu̱ nuˈu̱ nchcuiˈ nuˈu̱ loˈo naˈ lo xlya caˈya cua̱ biˈ”, nacui̱ Ni. Pana sca na nu culiji yuˈu ti ngua biˈ, tsoˈo la tsiyaˈ ti su ntucua Ni nde cua̱.
\v 6 Biˈ chaˈ cua nchca cuayáˈ tiˈ na chaˈ tsoˈo la tsiyaˈ ti cña nu nduˈni Jesús cuentya jiˈna, siyaˈ la cña nu ndyuˈni nu xaˈ la sti joˈó nde chalyuu. Loˈo juani ndulo tsa chaˈ jiˈna, la cuiˈ chaˈ nu cua ngüiñi jiˈi̱ ycuiˈ Ndyosi loˈo na xquiˈya Jesús, chaˈ xcuiˈ chaˈ liñi tsiyaˈ ti nchcuiˈ ycuiˈ Ndyosi loˈo na.
\p
\v 7 Ntsuˈu tsa chaˈ nu lyiji jiˈi̱ chaˈ cusuˈ nu ngua tya clyo, nu cua ngüiñi jiˈi̱ Ni loˈo ñati̱ tyempo biˈ, biˈ chaˈ nda ycuiˈ Ndyosi chaca chaˈ loˈo ñati̱. Ná ndyuˈu scua chaˈ cusuˈ biˈ, chaˈ taca ca tsoˈo cresiya jiˈi̱ ñati̱ cuentya jiˈi̱ ycuiˈ Ndyosi,
\v 8 chaˈ ná tsoˈo nguaˈni ñati̱ biˈ liˈ. Ndiˈya̱ nscua lo quityi jiˈi̱ ycuiˈ Ndyosi cuentya jiˈi̱ chaˈ biˈ: 
\q Cua ngulala ti tyalaa tsa̱ chaˈ quiñi chaˈ ˈna loˈo tyaˈa nguˈ Israel chaca quiyaˈ,
\q la cuiˈ juaˈa̱ loˈo tyaˈa nguˈ Judá, nacui̱ ycuiˈ Ndyosi nu Xuˈna na.
\q
\v 9 Siˈi la cuiˈ chaˈ ñiˈya̱ nu cua ngüiñi ˈna loˈo jyoˈo cusuˈ jiˈi̱ nguˈ biˈ nu ngua saˈni, nacui̱ Ni.
\q Nu ngua liˈ ntejeyaˈ naˈ jiˈi̱ nguˈ chaˈ ngutuˈu nguˈ ca quichi̱ tyi nguˈ Egipto, ndyaa nguˈ.
\q Pana ná ndaquiyaˈ nguˈ jiˈi̱ chaˈ nu cua ngüiñi ˈna loˈo nguˈ;
\q ñaˈa̱ ti nguaˈni tsa nguˈ chaˈ cuxi, biˈ chaˈ ngaˈaa ntucuá naˈ chaˈ jiˈi̱ nguˈ, nacui̱ ycuiˈ Ndyosi nu Xuˈna na.
\q
\v 10 Loˈo juani nde laca chaˈ cucui nu cua quiñi ti ˈna loˈo nguˈ Israel juani, nacui̱ Ni.
\q Nu loˈo tyalaa tyempo, liˈ cuaˈni naˈ chaˈ tyanu tsoˈo lcaa chaˈ neˈ cresiya jiˈi̱ nguˈ, ñiˈya̱ nu chcuiˈ naˈ loˈo nguˈ liˈ.
\q Tyucui tiˈ tyiquee nguˈ cuaˈni nguˈ cña ˈna liˈ;
\q caca naˈ ycuiˈ Ndyosi nu Xuˈna nguˈ liˈ, loˈo juaˈa̱ caca nguˈ biˈ ñati̱ jnaˈ.
\q
\v 11 Taca jlo tiˈ nguˈ tilaca laca naˈ liˈ,
\q lcaa nguˈ loˈo tyaˈa nguˈ, masi nu sube, masi ñati̱ cusuˈ.
\q Loˈo liˈ ngaˈaa ntsuˈu chaˈ cachaˈ nguˈ jiˈi̱ tyaˈa nguˈ tilaca laca naˈ;
\q ngaˈaa ntiˈ chaˈ culuˈu nguˈ jiˈi̱ tyaˈa quichi̱ tyi nguˈ chaˈ laca naˈ ycuiˈ Ndyosi nu Xuˈna nguˈ liˈ.
\q
\v 12 Cuaˈni clyu tiˈ naˈ jiˈi̱ nguˈ jiˈi̱ quiˈya nu ntsuˈu jiˈi̱ nguˈ liˈ; ngaˈaa culotu̱ naˈ quiˈya jiˈi̱ nguˈ liˈ.
\m Juaˈa̱ nchcuiˈ quityi jiˈi̱ ycuiˈ Ndyosi biˈ.
\v 13 Na cua culiji yuˈu ti chaˈ cusuˈ nu ngua tya clyo; juaˈa̱ ndyuˈu chaˈ biˈ liˈ, nu loˈo nchcuiˈ ycuiˈ Ndyosi jiˈi̱ chaca chaˈ cucui nu cua quiñi ti jiˈi̱ Ni loˈo na. Saˈni tsa nguxana chaˈ cusuˈ biˈ; cua jyoˈo ti chaˈ biˈ juani, cua culiji ti chaˈ juaˈa̱ ti.
\c 9
\s Cristo laca nu cua ngusaala tyucui̱i̱ jiˈna chaˈ ca̱a̱ na slo ycuiˈ Ndyosi
\p
\v 1 Nu chaˈ cusuˈ nu cua nda Ni loˈo nguˈ Israel nu ngua liˈ, nchcuiˈ biˈ ñiˈya̱ cuaˈni nguˈ loˈo nguaˈni tlyu nguˈ jiˈi̱ ycuiˈ Ndyosi. Loˈo juaˈa̱ cua ntsuˈu sca niˈi̱ nu tacati jiˈi̱ nguˈ, su nguaˈni tlyu nguˈ biˈ jiˈi̱ Ni, masi ñati̱ ti ngua nguˈ nu ngüiñá niˈi̱ biˈ;
\v 2 sca chcuaˈya lateˈ ngüiñá nguˈ biˈ nu nscua claˈbe neˈ loˈo su ndyaˈa̱ sti joˈó ti. Nde neˈ chcuaˈya biˈ cua ntucua candyeru chcua̱ su ndyaqui̱ quiiˈ lcaa hora; juaˈa̱ ntucua sca mesa su nscua xlyá lo, nu caca msta̱ jiˈi̱ ycuiˈ Ndyosi. Lcaa tsa̱ ngusta sti joˈó msta̱ biˈ. 
\v 3 Ca neˈ tasá nu ndacui claˈbe neˈ chcuaˈya biˈ, ca biˈ ntsuˈu chaca cuarto nu tacati tsa jiˈi̱ nguˈ.
\v 4 Nde neˈ cuarto biˈ ntucua mesa oro su ndaqui̱ sti joˈó yana joˈó lo; la cuiˈ ca biˈ ntucua cñáˈ tacati, nu ngüixi̱i̱ tyiˈi̱ ca chu̱ˈ yaca loˈo chcua̱ oro. Neˈ cñáˈ biˈ cua ntsuˈu coˈo tsa yuˈbe ti na nu ñiˈya̱ ñaˈa̱ scua̱ ñaˈa̱, nu nda ycuiˈ Ndyosi chaˈ ndyacu nguˈ Israel ca lo nati̱ˈ btyi su ngutaˈa̱ yuˈu nguˈ nu ngua saˈni; neˈ sca caatya̱ oro ntsuˈu coˈo na nu ndyacu nguˈ biˈ. Loˈo juaˈa̱ ca neˈ cñáˈ biˈ ntsuˈu coˈo yaca xca̱ jiˈi̱ jyoˈo Aarón, yaca nu ntyucua sati̱ chu̱ˈ juaˈa̱ ti; juaˈa̱ ntsuˈu tyucuaa quee cuajaˈ, nu nscua nu tii tyaˈa chaˈ biˈ lo, nu ndachaˈ ni cña nu cua ngulo ycuiˈ Ndyosi jiˈi̱ nguˈ chaˈ cuaˈni nguˈ. Ca taˈa na biˈ ntsuˈu coˈo neˈ cñáˈ tacati biˈ.
\v 5 Chu̱ˈ cñáˈ biˈ ntucua lcui̱ jiˈi̱ tucua tyaˈa xca̱ jiˈi̱ ycuiˈ Ndyosi nu ndubi tsa ñaˈa̱; ngatyaˈa ti lo luˈbe xca̱ ndubi biˈ chu̱ˈ cñáˈ, chaˈ tyiˈu tiˈ ñati̱ chaˈ ca biˈ lijya̱ ycuiˈ Ndyosi chaˈ cati̱ quiˈya nu ntsuˈu jiˈi̱ nguˈ. Xca̱ ndubi biˈ cua ntucua chaˈ ca cuayáˈ tiˈ nguˈ Israel chaˈ lcaa tsa̱ ngaˈa̱ ycuiˈ Ndyosi laja su ndiˈi̱ nguˈ. Pana ná caja tyempo chcuiˈ na jiˈi̱ lcaa chaˈ biˈ juani.
\p
\v 6 Juaˈa̱ ngua chaˈ ntucua lcaa yaca biˈ neˈ chcuaˈya lateˈ biˈ su nguaˈni tlyu nguˈ jiˈi̱ ycuiˈ Ndyosi, chaˈ lcaa tsa̱ ndyatí̱ sti joˈó ndyaa neˈ chcuaˈya biˈ, nguaˈni cña jiˈi̱ ycuiˈ Ndyosi ca jua;
\v 7 pana sca ti sti joˈó nu laca loo ngutaˈa̱ ca neˈ cuarto nu tacati tsa biˈ jiˈi̱ nguˈ, sca ti quiyaˈ ngutaˈa̱ nu cusuˈ biˈ sca yija̱. Loˈo tañi naˈni ndyaa nu cusuˈ biˈ liˈ, chaˈ scui̱ jiˈi̱ slo ycuiˈ Ndyosi ca neˈ cuarto tacati biˈ, chaˈ juaˈa̱ cuityi̱ Ni quiˈya nu ntsuˈu jiˈi̱ ycuiˈ nu cusuˈ biˈ, loˈo juaˈa̱ cuityi̱ Ni lcaa quiˈya nu ntsuˈu jiˈi̱ lcaa nguˈ quichi̱, masi quiˈya nu ná nda nguˈ cuentya si chaˈ cuxi nguaˈni nguˈ nquichaˈ, chaˈ cuentya jiˈi̱ ycuiˈ Ndyosi nguaˈni nu cusuˈ cña biˈ.
\v 8 Laja loˈo nchcuiˈ na jiˈi̱ chcuaˈya lateˈ biˈ nduˈni Xtyiˈi ycuiˈ Ndyosi chaˈ ca cuayáˈ tiˈ na, chaˈ tya lyiji xñi tsoˈo na tyucui̱i̱ chaˈ ca̱a̱ na slo ycuiˈ Ndyosi si ñaˈa̱ ti tya ndu̱ niˈi̱ cusuˈ biˈ, si tya nduˈni tlyu na jiˈi̱ ycuiˈ Ndyosi ñiˈya̱ nu nguaˈni nguˈ tya saˈni biˈ; tya lyiji caja ñiˈya̱ nu ca̱a̱ na slo ycuiˈ Ndyosi nu lubii tsiyaˈ ti chaˈ jiˈi̱ Ni liˈ, si juaˈa̱. 
\v 9 Xquiˈya lcaa chaˈ biˈ tsoˈo la ca cuayáˈ tiˈ na chaˈ nu ndyaca juani; ná caja ñiˈya̱ nu ca tsoˈo cresiya jiˈna cuentya jiˈi̱ ycuiˈ Ndyosi laja loˈo ndyuˈni tlyu ti na jiˈi̱ Ni ñiˈya̱ nu nguaˈni nguˈ biˈ, masi quiñaˈa̱ tsa msta̱ ta na jiˈi̱ Ni, masi taqui̱ tsa na naˈni lo mesa chaˈ cati̱ quiˈya nu ntsuˈu jiˈna.
\v 10 Xcuiˈ chaˈ nu nchcuiˈ ñati̱ chalyuu ti laca, masi ñacui̱ nguˈ chaˈ ná tsoˈo cacu na coˈo na sca lo na, masi ñacui̱ nguˈ ñiˈya̱ cuaˈni na chaˈ caca lubii cresiya jiˈna; cña nu ndatsaa ti ñati̱ chalyuu jiˈna chaˈ cuaˈni na, juaˈa̱ laca chaˈ biˈ. Xti ti tyempo talo chaˈ biˈ ñaˈa̱ cuayáˈ xcutsaˈa̱ ycuiˈ Ndyosi lcaa chaˈ.
\p
\v 11 Loˈo juani cua ya̱a̱ Cristo, nu laca chaca lo sti joˈó nu laca loo; cua laca nguxana ndyaca tsoˈo chalyuu xquiˈya Ni. Ná ndyaa Ni nguaˈni Ni cña neˈ sca niˈi̱ tlyu nu ngüiñá ñati̱ ti, chaˈ ná nduˈni chaˈ tyuˈu chaˈ jiˈi̱ Ni loˈo sca chaˈ nu ntsuˈu nde chalyuu.
\v 12 Ndiˈya̱ ñaˈa̱ cña nu nguaˈni Cristo cuentya jiˈna, nu loˈo ndyaa Ni la cuiˈ ca su tacati tsa ca su ntucua ycuiˈ Ndyosi: ná ngutaˈa̱ Ni loˈo tañi chivo loˈo tañi chqueru, chaˈ scui̱ Ni tañi biˈ nde slo ycuiˈ Ndyosi chaˈ cati̱ quiˈya nu ntsuˈu jiˈna; pana ngujuii Cristo lo crusi, ndye tañi ycuiˈ yu ndyalú cuentya jiˈi̱ quiˈya nu ntsuˈu jiˈna. Biˈ chaˈ sca ti quiyaˈ tsiyaˈ ti nguaˈni lyaá Cristo jiˈna, loˈo juaˈa̱ ná ngaˈa̱ chaˈ tye chaˈ ngulaá na jiˈi̱ nu cuxi, xquiˈya cña nu nguaˈni Ni cuentya jiˈna.
\v 13 Nu ngua saˈni la ni, si ntsuˈu sca chaˈ nu nguaˈni chaˈ ngaˈaa lubii sca ñati̱, liˈ nguscui̱ sti joˈó tañi chivo tañi toro lo nguˈ, chaˈ caca lubii nguˈ hichu̱ˈ ti nguˈ cuentya jiˈi̱ ycuiˈ Ndyosi; juaˈa̱ nguscui̱ sti joˈó jii lo nguˈ, jii jiˈi̱ chqueru msta̱ nu cua ndyaqui̱ cuentya jiˈi̱ nguˈ.
\v 14 Masi juaˈa̱ nguaˈni nguˈ cña nu ngua liˈ, pana tlyu la cña nu nguaˈni Cristo juani, chaˈ ndyalú tañi ycuiˈ yu loˈo ngujuii yu lo crusi cuentya jiˈna. Xquiˈya Xtyiˈi ycuiˈ Ni, biˈ chaˈ ngua jiˈi̱ Cristo ta yu tyucui ñaˈa̱ ycuiˈ ca yu, chaˈ sca ti quiyaˈ cati̱ quiˈya nu ntsuˈu jiˈna loˈo ycuiˈ Ndyosi; nu ycuiˈ Cristo ni, ná ntsuˈu quiˈya jiˈi̱ yu tsiyaˈ ti, biˈ chaˈ taca cuaˈni lubii Ni cresiya jiˈna, nu loˈo tyiˈu tiˈ na ñiˈya̱ nu nguaˈni Ni loˈo ndyalú tañi ycuiˈ Ni. Liˈ cuityi̱ Ni lcaa chaˈ cuxi nu ndyuˈni ñuˈu̱ tsa jiˈna, juaˈa̱ taca jiˈna cuaˈni na cña jiˈi̱ ycuiˈ Ndyosi nu luˈú ca nde chalyuu liˈ.
\p
\v 15 Biˈ chaˈ lacua, Cristo laca nu ngüiñi sca chaˈ cucui jiˈi̱ ycuiˈ Ndyosi loˈo ñati̱ chalyuu, masi loˈo cua ñaˈa̱ ca ñati̱ nu cua ngusubi ycuiˈ Ndyosi jiˈi̱. Juaˈa̱ nguaˈni Cristo, nu loˈo ngujuii yu, chaˈ juaˈa̱ ngulaá na jiˈi̱ lcaa chaˈ cuxi nu nguaˈni na loˈo tya ndaquiyaˈ tsa na jiˈi̱ chaˈ cusuˈ biˈ. Nu juani taca tyacua lcaa chaˈ nu cua nacui̱ ycuiˈ Ndyosi Sti na jiˈna chaˈ tyacua jiˈi̱ lcaa nguˈ nu ngusubi Ni jiˈi̱; ná ngaˈa̱ chaˈ culiji yuˈu chaˈ biˈ jiˈna tsiyaˈ ti.
\v 16 Sca quityi nu nclyo ñati̱ chaˈ tyanu xi chaˈ tsoˈo jiˈi̱ tyaˈa nguˈ loˈo cua ngujuii nguˈ ni, ndiˈya̱ ndyaca chaˈ jiˈi̱ quityi biˈ: ná caja chaˈ tsoˈo biˈ jiˈi̱ tyaˈa nguˈ, si bilya cajaa nu ca jiˈi̱ chaˈ tsoˈo biˈ;
\v 17 ná cuaˈnijoˈo quityi biˈ, si tya luˈú nu ca jiˈi̱ chaˈ tsoˈo biˈ. Sca ti si cua ngujuii yu biˈ, liˈ cuaˈnijoˈo quityi biˈ jiˈi̱ nguˈ.
\v 18 Loˈo juaˈa̱ nu chaˈ cusuˈ nu ngua clyo biˈ ni, nguaˈni chaˈ biˈ cña cuentya jiˈi̱ nguˈ, xquiˈya chaˈ ndyujuii nguˈ sca naˈni nu ngua msta̱ chaˈ cati̱ quiˈya nu ntsuˈu jiˈi̱ nguˈ.
\v 19 Nu ngua tya clyo ndachaˈ jyoˈo Moisés lcaa chaˈ cusuˈ biˈ jiˈi̱ lcaa nguˈ quichi̱, ndachaˈ yu lcaa cña nu cua ngulo ycuiˈ Ndyosi jiˈi̱ nguˈ chaˈ cuaˈni nguˈ. Liˈ ngusñi yu xi tañi chqueru loˈo tañi chivo nu ndyujuii ca nguˈ, nguxiyaˈ yu tañi biˈ loˈo xi hitya lubii. Liˈ ntejeyaˈ yu jiˈi̱ sca sta̱ˈ yaca nu ntsuˈu quicha̱ˈ xlyaˈ nu ngaˈa ñaˈa̱ chu̱ˈ; loˈo quicha̱ˈ xlyaˈ biˈ nguscui̱ yu tañi biˈ lo nguˈ quichi̱ biˈ, juaˈa̱ lo chaˈ cusuˈ biˈ nu nscua lo quee cuajaˈ.
\v 20 Loˈo liˈ nchcuiˈ yu loˈo nguˈ biˈ: “Loˈo tañi re ndatsaa ycuiˈ Ndyosi jiˈi̱ ma̱, chaˈ cuaˈni ma̱ lcaa lo cña nu cua ngulo Ni jiˈi̱ ma̱ chaˈ cuaˈni ma̱, nu loˈo ngüiñi chaˈ jiˈi̱ Ni loˈo ma̱”, nacui̱ Moisés jiˈi̱ nguˈ biˈ liˈ.
\v 21 La cuiˈ juaˈa̱ nguscui̱ Moisés tañi lo chcuaˈya biˈ, juaˈa̱ lo lcaa na nu ntucua ca su nduˈni tlyu nguˈ jiˈi̱ ycuiˈ Ndyosi.
\v 22 Cuentya jiˈi̱ chaˈ cusuˈ biˈ, xcuiˈ loˈo tañi sca naˈni nu cua ndyujuii nguˈ, juaˈa̱ ngua lubii lcaa na; loˈo juaˈa̱ juani, sca ti ndyiji chaˈ clyu tiˈ jiˈna loˈo ycuiˈ Ndyosi, chaˈ nu cua ngujuii Cristo cuentya jiˈna.
\s Ngüityi̱ Cristo quiˈya nu ntsuˈu jiˈi̱ ñati̱ nu loˈo ngujuii yu lo crusi
\p
\v 23 Nguaˈni jyoˈo cusuˈ jiˈna juaˈa̱ loˈo nguaˈni tlyu nguˈ jiˈi̱ ycuiˈ Ndyosi neˈ laa nu ngua liˈ, chaˈ caca lubii lcaa na nu cuaˈnijoˈo jiˈi̱ nguˈ; nde chalyuu ti ntucua lcaa na biˈ, masi ndiˈi̱ biˈ cuentya jiˈi̱ ycuiˈ Ndyosi. Pana tlyu la cña laca cati̱ quiˈya nu ntsuˈu jiˈi̱ ñati̱ chalyuu ca slo ycuiˈ Ndyosi, tsoˈo la cña laca nu cuaˈni lyaá Ni jiˈi̱ ñati̱ jiˈi̱ chaˈ cuxi biˈ. 
\v 24 Biˈ chaˈ ngaˈaa ndyaa Cristo nde neˈ laa nu ngüiñá ñati̱ nde chalyuu ti, masi ntucua biˈ cuentya jiˈi̱ ycuiˈ Ndyosi; na cua ndyaa liñi Ni ca slo ycuiˈ Ndyosi ca nde cua̱. Ca biˈ ntucua Ni juani, chaˈ chcuiˈ loˈo ycuiˈ Ndyosi cuentya jiˈna.
\v 25 Cuentya jiˈi̱ chaˈ cusuˈ ni, sca ti quiyaˈ sca yija̱ ndyaˈa̱ sti joˈó nu laca loo jiˈi̱ tyaˈa nguˈ judío neˈ cuarto nu tacati tsa cuentya jiˈi̱ nguˈ biˈ; ndyaˈa̱ loˈo nu cusuˈ jiˈi̱ tañi naˈni nu cua ndyujuii ca ti nguˈ jiˈi̱ chaˈ caca msta̱, chaˈ cuityi̱ quiˈya nu ntsuˈu jiˈi̱ nguˈ quichi̱. Pana siˈi tyu̱u̱ quiyaˈ ndyaa Cristo ca slo ycuiˈ Ndyosi nde cua̱.
\v 26 Si juaˈa̱ ngua, ná tyiqueeˈ cua tyu̱u̱ tsa quiyaˈ cua ngujuiˈi̱ caˈa̱ nguˈ jiˈi̱ Cristo lo crusi tya loˈo ndyaˈ chalyuu; pana siˈi juaˈa̱ ngua chaˈ biˈ, sca ti quiyaˈ cua ya̱a̱ yu chalyuu nu ngua saˈni xi loˈo cua tye ti chalyuu cusuˈ, chaˈ cuityi̱ yu quiˈya nu ntsuˈu jiˈi̱ lcaa ñati̱ loˈo ngujuii yu lo crusi.
\v 27 Cua ñaˈa̱ ca na ndyijii na sca ti quiyaˈ, loˈo liˈ nduˈni cuayáˈ ycuiˈ Ndyosi jiˈna;
\v 28 loˈo juaˈa̱ Cristo, sca ti quiyaˈ ngujuii yu lo crusi, chaˈ juaˈa̱ ngüityi̱ yu quiˈya nu ntsuˈu jiˈi̱ quiñaˈa̱ tsa ñati̱. Tya ca̱a̱ Cristo chaca quiyaˈ ca tiyaˈ la; pana ngaˈaa siˈi chaˈ cuityi̱ Ni quiˈya nu ntsuˈu jiˈi̱ ñati̱ ca̱a̱ Ni liˈ, chaˈ cua ndye nguaˈni Ni cña biˈ. Liˈ cuaˈni lyaá lyiji Ni jiˈi̱ lcaa ñati̱ nu ntajatya tsa jiˈi̱ Ni, ñaˈa̱ cuayáˈ nu ca̱a̱ Ni chaca quiyaˈ. 
\c 10
\p
\v 1 Nu loˈo nduna na xcuiˈ chaˈ cusuˈ nu nda jyoˈo Moisés loˈo jyoˈo cusuˈ jiˈna, ná nchca ca cuayáˈ tiˈ na ñiˈya̱ tyacua chaˈ tsoˈo jiˈna nde loo la xquiˈya Jesús, chaˈ ná nchcuiˈ chaˈ cusuˈ biˈ jiˈna ñiˈya̱ caca lcaa chaˈ biˈ; xti tsa chaˈ ndachaˈ chaˈ cusuˈ biˈ jiˈna, ñiˈya̱ ntiˈ sca cuityi nu sta cuayáˈ ti ñiˈya̱ caca sca cña lo yuu. Nu nguˈ judío tyaˈa na, lcaa yija̱ nduˈni nguˈ la cuiˈ ca ti chaˈ; lcaa yija̱ ndyaˈa̱ loˈo nguˈ jiˈi̱ la cuiˈ ca msta̱ chaˈ cati̱ quiˈya nu ntsuˈu jiˈi̱ nguˈ loˈo ycuiˈ Ndyosi chaca quiyaˈ, xquiˈya chaˈ ná ntsuˈu su tye cña tacati nu ndyuˈni nguˈ, chaˈ ná nchca cuaˈni lubii msta̱ nu ndyaˈa̱ loˈo nguˈ neˈ laa jiˈi̱ cresiya jiˈi̱ ñati̱ biˈ cuentya jiˈi̱ ycuiˈ Ndyosi. 
\v 2 Ná ndyiji ñiˈya̱ nu cuaˈni lubii chaˈ cusuˈ biˈ jiˈi̱ cresiya jiˈi̱ nguˈ biˈ, nu loˈo ndyaˈa̱ nguˈ nduˈni tlyu nguˈ jiˈi̱ Ni. Si ngua lubii cresiya jiˈi̱ nguˈ, ngaˈaa ngua tii nguˈ yabeˈ nu ntsuˈu jiˈi̱ nguˈ liˈ; ngaˈaa ntiˈ chaˈ tya̱loˈo nguˈ jiˈi̱ msta̱ jiˈi̱ nguˈ chaca quiyaˈ liˈ.
\v 3 Pana tsa biˈ ti cña nduˈni msta̱ biˈ cuentya jiˈi̱ nguˈ: lcaa yija̱ tsiyaˈ ti nduˈni chaˈ ndyiˈu tiˈ nguˈ chaˈ tya ntsuˈu quiˈya jiˈi̱ nguˈ loˈo ycuiˈ Ndyosi; 
\v 4 ná nchca cati̱ quiˈya nu ntsuˈu jiˈi̱ ñati̱, masi nscui̱ sti joˈó tañi toro, masi nscui̱ tañi chivo lo nguˈ.
\p
\v 5-6 Nu loˈo tya lyiji ca̱a̱ Cristo lo yuu chalyuu, liˈ nchcuiˈ Ni loˈo ycuiˈ Ndyosi Sti Ni. Ndiˈya̱ nacui̱ Ni:
\q Ngaˈaa ntiˈ nuˈu̱ chaˈ ca̱loˈo nguˈ jiˈi̱ naˈni nu tyaqui̱ chaˈ caca msta̱,
\m nacui̱ Cristo jiˈi̱ ycuiˈ Ndyosi.
\q Ná tsoˈo ntiˈ nuˈu̱ ñaˈa̱ nuˈu̱ jiˈi̱ nguˈ su ndaqui̱ nguˈ naˈni lo mesa quiiˈ, chaˈ caca biˈ msta̱;
\q masi xaˈ ñaˈa̱ msta̱ sta nguˈ chaˈ cuityi̱ quiˈya nu ntsuˈu jiˈi̱ nguˈ, ngaˈaa ndiya tiˈ nuˈu̱ chaˈ biˈ. 
\q Pana cua ta ti nuˈu̱ cuañaˈ ˈna, chaˈ caja ñiˈya̱ ca̱a̱ naˈ nde lo yuu chalyuu,
\m nacui̱ Cristo.
\q
\v 7 Biˈ chaˈ cua lijya̱ naˈ ca nde juani, Ndyosi Sti naˈ, 
\q chaˈ cuaˈni naˈ cua ñaˈa̱ ca cña nu ntiˈ nuˈu̱ chaˈ cuaˈni naˈ, ñiˈya̱ nchcuiˈ chaˈ nu nscua lo quityi cusuˈ cuentya jnaˈ.
\m Juaˈa̱ ngua chaˈ nu nda Cristo nu ngua liˈ.
\v 8 Lo quityi biˈ ni, clyo nacui̱ Cristo chaˈ ná ntiˈ ycuiˈ Ndyosi msta̱; la cuiˈ juaˈa̱ nacui̱ Ni chaˈ ná ndiya tiˈ ycuiˈ Ndyosi chaˈ xcuiˈ ndyaˈa̱ loˈo nguˈ jiˈi̱ msta̱, masi msta̱ juaˈa̱ ti, masi naˈni luˈú nu caca msta̱ nu tyaqui̱ lo mesa quiiˈ chaˈ cati̱ quiˈya nu ntsuˈu jiˈi̱ nguˈ loˈo ycuiˈ Ndyosi. Juaˈa̱ nacui̱ Ni, pana cuentya jiˈi̱ chaˈ cusuˈ jiˈi̱ nguˈ ngaˈa̱ chaˈ cuaˈni nguˈ biˈ juaˈa̱.
\v 9 Loˈo liˈ nacui̱ Ni: “Cua lijya̱ naˈ ca nde, Ndyosi Sti naˈ, chaˈ cuaˈni naˈ cua ñaˈa̱ ca cña nu ntiˈ nuˈu̱ chaˈ cuaˈni naˈ”. Juaˈa̱ ngua chaˈ nguxtyanu ycuiˈ Ndyosi chaˈ cusuˈ biˈ, chaˈ nu nscua ñiˈya̱ caca msta̱ nu tsaloˈo nguˈ scaa quiyaˈ; liˈ chaca chaˈ cucui nguaˈni ycuiˈ Ndyosi, nu loˈo nda Ni jiˈi̱ Cristo lijya̱ nde chalyuu cuentya jiˈna.
\v 10 Nguaˈni Jesucristo lcaa cña nu ngua tiˈ ycuiˈ Ndyosi Sti yu chaˈ cuaˈni yu, chaˈ nda yu jiˈi̱ tyucui ñaˈa̱ yu chaˈ ngujuiˈi̱ caˈa̱ nguˈ jiˈi̱ lo crusi; sca ti quiyaˈ tsiyaˈ ti ngua ycuiˈ ca yu msta̱, la cuiˈ msta̱ nu ngua tiˈ ycuiˈ Ndyosi Sti yu ngua biˈ. Biˈ chaˈ cua ngua lubii cresiya jiˈna cuentya jiˈi̱ ycuiˈ Ndyosi juani, cua ndye yabeˈ nu ntsuˈu jiˈna.
\p
\v 11 Nu nguˈ sti joˈó jiˈi̱ nguˈ judío ni, lcaa tsa̱ ndu̱ nguˈ biˈ nduˈni nguˈ cña chaˈ sta nguˈ la cuiˈ tyaˈa msta̱ slo ycuiˈ Ndyosi, masi tyu̱u̱ quiyaˈ sca yija̱; ná ntsuˈu su tye chaˈ sta nguˈ msta̱ biˈ, juaˈa̱ ni sca quiyaˈ ná ngua cati̱ quiˈya nu ntsuˈu jiˈi̱ ñati̱ loˈo msta̱ biˈ.
\v 12 Pana nu Jesucristo biˈ ni, sca ti quiyaˈ ngujuii yu lo crusi chaˈ cati̱ quiˈya nu ntsuˈu jiˈi̱ ñati̱, loˈo ñaˈa̱ ti tya ndyuˈu scua cña nu nguaˈni yu masi chalyuu juani. Liˈ ngutuˈu Jesús ndyaa Ni, ndyaa tucua Ni nde laˈa tsuˈ cui̱ su tlyu ca su ntucua ycuiˈ Ndyosi.
\v 13 Ca biˈ ntucua Ni juani, ntajatya Ni ñaˈa̱ cuayáˈ nu tyiji̱loo lyiji ycuiˈ Ndyosi jiˈi̱ lcaa tyaˈa cusu̱u̱ Ni.
\v 14 Sca ti quiyaˈ cua ndyaa Jesús lo crusi lacua, nguaˈni lubii yu jiˈi̱ cresiya jiˈi̱ ñati̱ cuentya jiˈi̱ ycuiˈ Ndyosi; juaˈa̱ ngua tyucui tiˈ tyiquee ñati̱ chaca quiyaˈ. 
\v 15 Sca ti xquiˈya Xtyiˈi ycuiˈ Ndyosi nchca cuayáˈ tiˈ na ni cña laca nu nguaˈni Cristo nu ngua liˈ, biˈ chaˈ nguaˈni Xtyiˈi ycuiˈ Ni chaˈ nscua chaˈ lo quityi nu nchcuiˈ ndiˈya̱:
\q
\v 16 Nde laca chaˈ cucui nu cua quiñi ti ˈna loˈo nguˈ chaca quiyaˈ, nacui̱ nu Xuˈna na:
\q Loˈo tyalaa tyempo biˈ, liˈ cuaˈni naˈ chaˈ tyanu tsoˈo chaˈ neˈ cresiya jiˈi̱ ñati̱ ˈna, lcaa chaˈ ñiˈya̱ nu chcuiˈ naˈ loˈo nguˈ liˈ;
\q tyucui tyiquee nguˈ cuaˈni nguˈ cña ˈna liˈ.
\m
\v 17 Chaca chaˈ nacui̱ Ni liˈ:
\q Liˈ ngaˈaa tyiˈu tiˈ naˈ chaˈ cuxi nu cua nguaˈni nguˈ, 
\q ngaˈaa culotu̱ naˈ quiˈya nu ntsuˈu jiˈi̱ nguˈ loˈo naˈ.
\m Juaˈa̱ nchcuiˈ ycuiˈ Ndyosi.
\v 18 Biˈ chaˈ juani, ngaˈaa ntsuˈu chaˈ tsaloˈo nguˈ jiˈi̱ msta̱ chaˈ cati̱ quiˈya nu ntsuˈu jiˈi̱ nguˈ, chaˈ cua laca nguaˈni clyu tiˈ ycuiˈ Ndyosi jiˈna jiˈi̱ quiˈya nu ntsuˈu jiˈna.
\s Cuaˈni na chaˈ caca stuˈba chaˈ jiˈna loˈo ycuiˈ Ndyosi 
\p
\v 19 Cuˈma̱ nguˈ tyaˈa ngusñi na chaˈ jiˈi̱ Cristo, tyucui chacuayáˈ jiˈi̱ Ni cua ntsuˈu jiˈna juani, chaˈ ca̱a̱ na slo ycuiˈ Ndyosi nu lubii tsiyaˈ ti chaˈ jiˈi̱ Ni. Jesús laca nu nda chacuayáˈ biˈ jiˈna, xquiˈya chaˈ ndyalú tañi ycuiˈ yu loˈo ngujuii yu lo crusi, chaˈ cuityi̱ Ni quiˈya nu ntsuˈu jiˈna.
\v 20 Nu loˈo nda yu tyucui ñaˈa̱ yu chaˈ ngujuii yu xquiˈya na, cua ngusaala yu chaca tyucui̱i̱ cucui cuentya jiˈna liˈ, chaˈ caja ñiˈya̱ ca̱a̱ na cacua ti slo ycuiˈ Ndyosi; xquiˈya ycuiˈ Jesús, biˈ chaˈ taca xñi na tyucui̱i̱ nu lijya̱ ca slo ycuiˈ Ndyosi juani.
\v 21 Cua ntsuˈu chaˈ jiˈna loˈo nu Jesús biˈ, nu sti joˈó nu laca loo la, chaˈ ycuiˈ laca nu ndiˈya cña loo jiˈi̱ lcaa na cuentya jiˈi̱ ycuiˈ Ndyosi Sti yu.
\v 22 Tya̱a̱ na ca slo ycuiˈ Ndyosi lacua; tyucui tyiquee na cuaˈni na chaˈ caca stuˈba chaˈ jiˈna loˈo ycuiˈ Ndyosi Sti na, chaˈ taca xñi tsoˈo na chaˈ jiˈi̱ Ni liˈ. Cua ngüityi̱ Ni lcaa chaˈ cuxi nu nguaˈni chaˈ ngua tyujuˈu tiˈ na tya tsubiˈ la; cua ngua lubii cresiya jiˈna juani, ñiˈya̱ laca loˈo cua ndyaata na chcu loˈo hitya lubii ti.
\v 23 Cuaˈni na chaˈ jlya tsoˈo tiˈ na chaˈ nu cua ngusñi na tya clyo lacua, ná tyaˈa̱chu̱ˈ na jiˈi̱ chaˈ biˈ tsiyaˈ ti. Taca jlya tiˈ na jiˈi̱ ycuiˈ Ndyosi, chaˈ chañi chaˈ cuaˈni Ni lcaa chaˈ nu cua nacui̱ Ni jiˈna. 
\v 24 Culacua tsoˈo tiˈ na, chaˈ caja ñiˈya̱ xtyucua na jiˈi̱ xaˈ la nguˈ tyaˈa ngusñi na chaˈ jiˈi̱ Jesús; xtyucua na jiˈi̱ nguˈ biˈ, chaˈ xcuiˈ chaˈ tsoˈo ti cuaˈni nguˈ loˈo tyaˈa nguˈ, chaˈ juaˈa̱ caca tsoˈo tyiquee nguˈ ñaˈa̱ nguˈ jiˈi̱ tyaˈa nguˈ.
\v 25 Ntsuˈu nguˈ tyaˈa na nu ngaˈaa ndyaˈa̱ slo nguˈ tyaˈa ngusñi na chaˈ jiˈi̱ Jesús, nu ngaˈaa ndyuˈu tiˈi̱ loˈo tyaˈa na. Pana ná tsoˈo cuaˈni na juaˈa̱; tsoˈo la ñaˈa̱ ti tsaa na tyuˈu tiˈi̱ na loˈo tyaˈa na, chaˈ tyanu tachaa la chaˈ jiˈi̱ ycuiˈ Ndyosi neˈ cresiya jiˈna, lcaa na loˈo tyaˈa ngusñi na chaˈ jiˈi̱ Ni. Ntiˈ na chaˈ cua tya̱a̱ ti nu Xuˈna na chaca quiyaˈ, biˈ chaˈ luˈba ti tyuˈu tiˈi̱ na juani loˈo nguˈ tyaˈa na.
\p
\v 26 Ngaˈaa ntsuˈu xaˈ la msta̱ nu ta na, ngaˈaa ntsuˈu xaˈ la chaˈ nu cuaˈni na, chaˈ cati̱ quiˈya nu ntsuˈu jiˈna, si ñaˈa̱ ti tya cuaˈni na chaˈ cuxi liˈ; cua ngua cuayáˈ tiˈ na chaˈ chañi tsa chaˈ jiˈi̱ Jesús biˈ, loˈo juaˈa̱ ngaˈaa cuiˈya ycuiˈ Ndyosi chaˈ clyu tiˈ jiˈna si xtyanu na jiˈi̱ chaˈ biˈ.
\v 27 Juaˈa̱ ti caca na liˈ, cutsi̱i̱ tsa na jiˈi̱ ycuiˈ Ndyosi loˈo tyalaa hora nu cuaˈni cuayáˈ Ni jiˈi̱ lcaa ñati̱ tyaˈa ngusu̱u̱ loˈo Ni. Loˈo liˈ cuaˈni tye Ni jiˈi̱ lcaa nguˈ biˈ, tsaa nguˈ nde lo quiiˈ tlyu nu ná ngaˈa̱ chaˈ tye tyaqui̱.
\v 28 Nu ngua saˈni ni, loˈo ntsuˈu ñati̱ nu ná ndaquiyaˈ tsiyaˈ ti jiˈi̱ cña nu ngulo ycuiˈ Ndyosi, ndyujuii nguˈ jiˈi̱ ñati̱ biˈ liˈ. Nguaˈni cuayáˈ nguˈ jiˈi̱ ñati̱ biˈ clyo cuentya jiˈi̱ jyoˈo Moisés loˈo tucua sna tyaˈa xaˈ ñati̱ nu ndachaˈ liñi ñiˈya̱ ngua chaˈ biˈ; liˈ ngusta nguˈ yabeˈ hichu̱ˈ ñati̱ biˈ, ndyujuii nguˈ jiˈi̱ liˈ, chaˈ ngaˈaa ngujui ñiˈya̱ jña nguˈ chaˈ clyu tiˈ jiˈi̱ ycuiˈ Ndyosi cuentya jiˈi̱ nu cuxi biˈ liˈ. Juaˈa̱ ngua tya saˈni la.
\v 29 Loˈo juani ni, tlyu la chaˈ tiˈí tyacua jiˈi̱ tyaˈa ñati̱ na nu chi̱i̱ tsa ntiˈ ñaˈa̱ nguˈ jiˈi̱ Jesús, nu sca ti Sñiˈ ycuiˈ Ndyosi biˈ, nguˈ nu lye tsa chcuiˈ lo jiˈi̱ cña nu nguaˈni nu Jesús biˈ; sca ti xquiˈya chaˈ ngujuii yu lo crusi, biˈ chaˈ cua ndyaca lubii cresiya jiˈna. Loˈo juaˈa̱ si chcuiˈ subaˈ na jiˈi̱ Xtyiˈi ycuiˈ Ndyosi, liˈ lye la chaˈ nchcubeˈ tyacua jiˈna, chaˈ xcuiˈ tsoˈo tsa nduˈni Ni loˈo na xquiˈya Xtyiˈi ycuiˈ Ni.
\v 30 Cua jlo tiˈ na chaˈ ndiˈya̱ nchcuiˈ ycuiˈ Ndyosi tya saˈni la: “Naˈ laca̱ nu xcubi̱ˈ jiˈi̱ ñati̱ chalyuu”, nacui̱ Ni. “Ta naˈ chaˈ tiˈí jiˈi̱ ñati̱, nu loˈo ntsuˈu chaˈ chcubeˈ nguˈ.” Loˈo juaˈa̱ cua nchcuiˈ Ni chaca chaˈ loˈo nguˈ liˈ: “Cuaˈni cuayáˈ naˈ jiˈi̱ ñati̱ ˈna, chaˈ naˈ laca̱ Xuˈna nguˈ”, nacui̱ Ni.
\v 31 Tlyu tsa chaˈ laca, si tayaˈ ycuiˈ Ndyosi nu luˈú ca jiˈna chaˈ xcubeˈ Ni jiˈna.
\p
\v 32 Tyiˈu tiˈ ma̱ lacua, ñiˈya̱ nu ndyaca jiˈi̱ cuˈma̱ nu ngua tya tsubiˈ la, cua ndyaala hique ma̱ chaˈ ndyuna tsoˈo ma̱ chaˈ jiˈi̱ ycuiˈ Ndyosi, loˈo liˈ cua quiñaˈa̱ tsa chaˈ nchcubeˈ cua ndyacua jiˈi̱ ma̱ nde chalyuu. Pana ndalo tsa tyiquee ma̱ liˈ; ná ngua jiˈi̱ nu nguˈ xñaˈa̱ biˈ tyiji̱loo jiˈi̱ ma̱,
\v 33 masi tyu̱u̱ quiyaˈ nchcuiˈ tsa nguˈ chaˈ tiˈí jiˈi̱ ma̱, masi nguaˈni lyaˈ tiˈ nguˈ jiˈi̱ ma̱ su ndu̱ ma̱ laja ñati̱ nu ngua liˈ. Loˈo juaˈa̱ cua ntajaˈa̱ ma̱ tyanu ma̱ slo nguˈ tyaˈa ma̱ laja loˈo nguaˈni tiˈí tiˈ nguˈ jiˈi̱ nguˈ biˈ, masi siˈi jiˈi̱ ycuiˈ ca ma̱ ndyuˈni lyaˈ tiˈ nguˈ tyempo biˈ.
\v 34 Loˈo juaˈa̱ ndyaa naˈa̱ ma̱ jiˈi̱ nguˈ tyaˈa ma̱ nu loˈo ntsuˈu nguˈ biˈ neˈ chcua̱, nguxtyucua ma̱ jiˈi̱ nguˈ biˈ liˈ; masi nguaana xaˈ ñati̱ lcaa chaˈ tsoˈo nu ntsuˈu jiˈi̱ ma̱, ndalo tsa tyiquee ma̱ liˈ. Tsoˈo ntsuˈu tyiquee ma̱, chaˈ cua jlo tiˈ ma̱ chaˈ tsoˈo la tsiyaˈ ti laca nu chaˈ jiˈi̱ Jesús nu cua ngusñi ma̱ biˈ; jlo tiˈ ma̱ chaˈ ná tye chca chaˈ biˈ, chaˈ nu cua ndyuna ma̱ cuentya jiˈi̱ Jesús.
\v 35 Ná tyaˈa̱chu̱ˈ ma̱ jiˈi̱ chaˈ jiˈi̱ Jesús lacua. Ñaˈa̱ ti tya cuaˈni tlyu tyiquee ma̱, chaˈ tsoˈo tsa chaˈ nu tyacua jiˈi̱ ma̱ ca tiyaˈ la cuentya jiˈi̱ ycuiˈ Ndyosi, si ñaˈa̱ ti xñi tsoˈo ma̱ chaˈ biˈ.
\v 36 Ngaˈa̱ chaˈ talo tyiquee ma̱ masi tyiqueeˈ, si tya ntiˈ ma̱ cuaˈni ma̱ lcaa ñaˈa̱ cña nu ntiˈ ycuiˈ Ndyosi, si tya ntiˈ ma̱ ñaˈa̱ ma̱ chaˈ nu cua nacui̱ Ni chaˈ caca nde loo la.
\v 37 Cua nscua lo quityi cusuˈ chaˈ ndiˈya̱ nchcuiˈ ycuiˈ Ndyosi:
\q Tya xi tya tyempo tya lyiji chaˈ tyalaa ycuiˈ yu nu ngaˈa̱ chaˈ tya̱a̱ chaca quiyaˈ;
\q ngaˈaa tiyaˈ lye chaˈ ca̱a̱ yu biˈ, nacui̱ Ni.
\q
\v 38 Loˈo ñati̱ nu caca lubii cresiya jiˈi̱ xquiˈya naˈ ni, nu loˈo xñi nguˈ biˈ chaˈ ˈna,
\q liˈ caja chalyuu nu ná ngaˈa̱ chaˈ tye jiˈi̱ nguˈ biˈ, nacui̱ Ni.
\q Pana ná tsoˈo ntiˈ naˈ ñaˈa̱ naˈ jiˈi̱ ñati̱ nu tyaˈa̱chu̱ˈ jiˈi̱ chaˈ ˈna.
\m
\v 39 Nu na ni, ná taca tyaˈa̱chu̱ˈ na jiˈi̱ chaˈ jiˈi̱ Jesús; si tyaˈa̱chu̱ˈ na jiˈi̱ yu, chcunaˈ na tyucui ñaˈa̱ na, ñaˈa̱ loˈo cresiya jiˈna liˈ. Pana laca na ñati̱ nu tsa cuˈ ti xñi na chaˈ jiˈi̱ Ni, biˈ chaˈ nduˈni lyaá Ni jiˈna jiˈi̱ nu cuxi.
\c 11
\s Ñati̱ nu tyucui tyiquee nguˈ jlya tiˈ nguˈ chaˈ jiˈi̱ ycuiˈ Ndyosi
\p
\v 1 Na jlya tiˈ na jiˈi̱ sca chaˈ loˈo ndu̱ tiˈ na chaˈ caca chaˈ biˈ, nu loˈo jlo tiˈ na chaˈ caca chaˈ biˈ jiˈna, masi bilya ñaˈa̱ na jiˈi̱.
\v 2 Jlya tiˈ jyoˈo cusuˈ jiˈna nu nguaˈni tlyu jiˈi̱ ycuiˈ Ndyosi nu ngua saˈni la, biˈ chaˈ ñati̱ tsoˈo ngua nguˈ, loˈo juaˈa̱ ntucuá Ni chaˈ jiˈi̱ nguˈ biˈ.
\p
\v 3 Jlya tiˈ na jiˈi̱ ycuiˈ Ndyosi, biˈ chaˈ cua ngua cuayáˈ tiˈ na chaˈ clyo nda ycuiˈ Ndyosi chaˈ, loˈo liˈ ndyaˈ chalyuu nu ñaˈa̱ na juani; ná naˈa̱ na ñiˈya̱ ngua chaˈ ndyaˈ biˈ, tsa biˈ ti chaˈ jlya tiˈ na chaˈ ngüiñá Ni lcaa chaˈ nu ñaˈa̱ na lo yuu chalyuu juani.
\p
\v 4 Jlya tiˈ jyoˈo Abel jiˈi̱ ycuiˈ Ndyosi, biˈ chaˈ tsoˈo la nguaˈni yu que jyoˈo Caín tyaˈa yu, nu loˈo ngusta nguˈ msta̱ slo ycuiˈ Ndyosi. Ntucuá Ni chaˈ nu nchcuiˈ nu Abel biˈ, xquiˈya chaˈ jlya tiˈ yu; lubii tsa cresiya jiˈi̱ yu ngua tiˈ ycuiˈ Ndyosi, nu loˈo naˈa̱ Ni jiˈi̱ yu loˈo ngusta yu msta̱. Loˈo juaˈa̱ juani tya nchca cuayáˈ tiˈ na chaˈ ngusñi jyoˈo Abel chaˈ jiˈi̱ ycuiˈ Ndyosi, masi saˈni tsa ngujuii yu.
\p
\v 5 Jlya tiˈ jyoˈo Enoc jiˈi̱ ycuiˈ Ndyosi, biˈ chaˈ ná ngujuii yu. Juaˈa̱ ti ndyaloˈo ycuiˈ Ndyosi jiˈi̱ yu ca slo ycuiˈ Ni; ná nquije yu jiˈi̱ ñati̱ liˈ, xquiˈya chaˈ cua ya̱a̱ Ni ya̱quiˈya Ni jiˈi̱ yu. Pana nchcuiˈ quityi chaˈ cua ndiya tiˈ Ni ñiˈya̱ nu nguaˈni nu Enoc biˈ laja loˈo ngutiˈi̱ yu chalyuu.
\v 6 Ni sca na, ná taca cuaˈni na chaˈ caca tyaalaˈ tiˈ tyiquee ycuiˈ Ndyosi, si ná chañi chaˈ jlya tiˈ na jiˈi̱ Ni. Si ntiˈ na chaˈ jyacua na jiˈi̱ Ni chaˈ chcuiˈ na loˈo Ni, liˈ ngaˈa̱ chaˈ jlya tiˈ na chaˈ luˈú ycuiˈ Ndyosi; ngaˈa̱ chaˈ jlya tiˈ na chaˈ taca xtyucua Ni jiˈna loˈo jña na sca chaˈ jiˈi̱ Ni.
\p
\v 7 Jlya tiˈ jyoˈo Noé jiˈi̱ ycuiˈ Ndyosi, biˈ chaˈ ndyuna yu chaˈ nu nchcuiˈ Ni loˈo yu, nu loˈo nacui̱ Ni ñiˈya̱ ñaˈa̱ chaˈ cuxi nu lijya̱ caca nde loo la, masi ycuiˈ yu ná ngua tii yu ñiˈya̱ caca chaˈ biˈ. Ngusñi yu chaˈ jiˈi̱ ycuiˈ Ndyosi, liˈ ngüiñá yu sca yaca niˈi̱ su tyiˈi̱ yu loˈo lcaa tyaˈa ndiˈi̱ yu; juaˈa̱ ngua chaˈ ngulaá nguˈ jiˈi̱ tyo clyaa biˈ. Jlo tiˈ na juani chaˈ cuxi tsa ngua chalyuu cusuˈ biˈ, chaˈ sca ti Noé jlya tiˈ yu chaˈ nu nchcuiˈ Ni loˈo; nguaˈni ycuiˈ Ndyosi chaˈ ngua tsoˈo cresiya jiˈi̱ yu liˈ.
\p
\v 8 Jlya tiˈ jyoˈo Abraham jiˈi̱ ycuiˈ Ndyosi, biˈ chaˈ ngusñi yu chaˈ jiˈi̱ Ni, nu loˈo nguane Ni jiˈi̱ yu chaˈ tsaa yu sca loyuu tyijyuˈ tsa, su nacui̱ Ni jiˈi̱ yu chaˈ cajua caca quichi̱ tyi yu. Ngutuˈu yu loyuu su ngutiˈi̱ yu tya clyo, ndyaa yu liˈ, masi ná jlo tiˈ yu macala su tsaa yu.
\v 9 Xquiˈya chaˈ jlya tiˈ yu jiˈi̱ Ni, biˈ chaˈ ndyanu yu ca loyuu su nacui̱ Ni jiˈi̱ yu chaˈ cajua caca quichi̱ tyi yu. Ca biˈ ngutiˈi̱ yu ñiˈya̱ nduˈni ñati̱ nu ndyaˈa̱ xtyiˈi ti; chcuaˈya lateˈ ti ngüiñá yu chaˈ ngutiˈi̱ yu, loˈo la cuiˈ juaˈa̱ nguaˈni jyoˈo Isaac sñiˈ yu loˈo jyoˈo Jacob sñiˈ steˈ yu nde loo la. Tyucuaa jyoˈo cusuˈ biˈ jlya tiˈ jiˈi̱ la cuiˈ tyaˈa chaˈ nu cua nacui̱ Ni jiˈi̱ jyoˈo Abraham sti nguˈ biˈ.
\v 10 Jlya tiˈ Abraham chaˈ nde loo la cuaˈni choˈo ycuiˈ Ndyosi chaca seˈi̱ su tsoˈo la tyiˈi̱ yu, nu ná culiji tsiyaˈ ti; cuiñá ycuiˈ Ndyosi ñaˈa̱ tsaca quichi̱ biˈ. 
\p
\v 11 Loˈo ycuiˈ Sara clyoˈo yu ni, jlya tiˈ maˈ jiˈi̱ ycuiˈ Ndyosi, biˈ chaˈ ngua tana maˈ, masi cusuˈ tsa maˈ, masi bilya caja sñiˈ maˈ tsiyaˈ ti. Ngujui sñiˈ maˈ lacua, xquiˈya chaˈ jlya tiˈ maˈ jiˈi̱ ycuiˈ Ndyosi, chaˈ chañi cuaˈni Ni lcaa ñaˈa̱ chaˈ nu cua nacui̱ Ni jiˈi̱ maˈ.
\v 12 Loˈo juaˈa̱ ngua chaˈ quiñaˈa̱ tsa ñati̱ ndyatu̱ jiˈi̱ sca ti nu cusuˈ Abraham nde loo la, masi cua tye ti chaˈ jiˈi̱ yu chaˈ cusuˈ tsa yu; tsa ñaˈa̱ cuii nu ntsuˈu nde cua̱, tsa lo cua tyaˈa ñati̱ ndyatu̱ jiˈi̱ nde loo la. Loˈo juani ná caca culacua na jiˈi̱ nguˈ biˈ, ñiˈya̱ laca chaˈ ná caca culacua na ni tsa lo tyaˈa satya yusi̱ ndiˈi̱ toˈ tyujoˈo.
\p
\v 13 Ñaˈa̱ ti jlya tiˈ lcaa jyoˈo biˈ jiˈi̱ ycuiˈ Ndyosi loˈo ngujuii nguˈ, masi ngaˈaa naˈa̱ nguˈ loˈo ndyuˈu tucua lcaa chaˈ nu nacui̱ Ni chaˈ caca; pana tsoˈo tsa ngua tyiquee nguˈ biˈ, chaˈ nu jlo tiˈ nguˈ chaˈ cua ngulala ti caca chaˈ biˈ, ñiˈya̱ si tsa lyiji ti naˈa̱ nguˈ jiˈi̱. Jlo tiˈ nguˈ chaˈ tyijyuˈ ngutuˈu ycuiˈ ca nguˈ lijya̱ nguˈ, loˈo ná ntsuˈu tyi nguˈ lo yuu biˈ.
\v 14 Jlya tiˈ nguˈ chaˈ ntsuˈu sca seˈi̱ tsoˈo la su tyalaa nguˈ ca nde loo la, biˈ chaˈ ngua tiˈ nguˈ juaˈa̱. 
\v 15 Ngaˈaa ndyiˈu tsa tiˈ Abraham loˈo tyaˈa yu jiˈi̱ quichi̱ tyi nguˈ ca loyuu tyijyuˈ su ngutuˈu nguˈ; cua nguxtyu̱u̱ nguˈ ca biˈ hora ti, si juaˈa̱ ngulacua tiˈ nguˈ.
\v 16 Pana siˈi juaˈa̱ ngua tiˈ nguˈ, xquiˈya chaˈ jlya tiˈ nguˈ chaˈ ta ycuiˈ Ndyosi sca seˈi̱ su tsoˈo la tsiyaˈ ti su tyiˈi̱ nguˈ; ngua tiˈ nguˈ tyalaa nguˈ la cuiˈ ca su ntucua ycuiˈ Ni. Biˈ chaˈ ná tyujuˈu tiˈ Ni loˈo nacui̱ nguˈ chaˈ ycuiˈ Ndyosi nu Xuˈna nguˈ laca Ni; na cua nguaˈni choˈo Ni sca seˈi̱ su tyiˈi̱ nguˈ ca slo ycuiˈ Ni.
\p
\v 17-18 Jlya tiˈ jyoˈo Abraham chaˈ nu cua nda ycuiˈ Ndyosi loˈo, biˈ chaˈ ndyaloˈo yu jiˈi̱ Isaac sñiˈ yu, chaˈ ycuiˈ nu piti caca msta̱ chaˈ xcua lo mesa quee jiˈi̱ ycuiˈ Ndyosi liˈ; juaˈa̱ ngua chaˈ nguaˈni cuayáˈ Ni jiˈi̱ yu. Na cua ngüiñi chaˈ jiˈi̱ ycuiˈ Ni loˈo nu Abraham biˈ tya saˈni la chaˈ cala sñiˈ clyoˈo yu; tya liˈ cua nacui̱ Ni jiˈi̱ yu: “Xquiˈya Isaac catu̱ quiñaˈa̱ tsa ñati̱ jinuˈu̱ nde loo la”. Pana ñaˈa̱ ti ntajaˈa̱ Abraham ndyaloˈo yu jiˈi̱ nu piti Isaac biˈ, nu sca ti sñiˈ yu loˈo clyoˈo yu, chaˈ caca nu piti biˈ msta̱. 
\v 19 Taca jiˈi̱ ycuiˈ Ndyosi cuaˈni chaˈ tyuˈú Isaac chaca quiyaˈ si cua ngujuii, ngua tiˈ Abraham; biˈ chaˈ ntajaˈa̱ yu nguaˈni yu juaˈa̱ loˈo sñiˈ yu. Pana nu loˈo cua nscua Isaac lo mesa chaˈ cajaa, liˈ xaˈ ndya Ni jiˈi̱ nu piti biˈ jiˈi̱ Abraham sti yu chaca quiyaˈ; ná ngujuii nu piti biˈ.
\p
\v 20 Jlya tiˈ jyoˈo Isaac chaˈ nu nda ycuiˈ Ndyosi loˈo, biˈ chaˈ nchcuiˈ nu cusuˈ biˈ loˈo tyucuaa sñiˈ yu, nu Jacob loˈo Esaú biˈ, chaˈ tsoˈo tsa caca jiˈi̱ ñati̱ nu catu̱ jiˈi̱ nguˈ tyempo nde loo la.
\v 21 Jlya tiˈ jyoˈo Jacob chaˈ nu nda ycuiˈ Ndyosi loˈo, biˈ chaˈ ngusta yaˈ nu cusuˈ biˈ hique tyucuaa sñiˈ steˈ yu nu ngua sñiˈ José biˈ, nu loˈo cua cajaa ti nu cusuˈ biˈ; nchcuichaˈ nu cusuˈ jiˈi̱ nu nguˈ cuañiˈ biˈ liˈ. Loˈo liˈ nguaˈni tlyu yu jiˈi̱ ycuiˈ Ndyosi, laja loˈo ndu̱ yu nguatu̱ yu yaca xca̱ jiˈi̱ yu lyuu. 
\v 22 Jlya tiˈ jyoˈo José jiˈi̱ ycuiˈ Ndyosi, biˈ chaˈ loˈo cua cajaa ti yu, liˈ nda yu sca chaˈ loˈo nguˈ tyaˈa yu, chaˈ chañi chaˈ tyuˈu lcaa tyaˈa nguˈ Israel loyuu Egipto biˈ ca tiyaˈ la, tyaa nguˈ laja ti liˈ. Loˈo juaˈa̱ nacui̱ nu cusuˈ macala tyatsiˈ jyoˈo ycuiˈ yu chaca quiyaˈ ca tiyaˈ la, nu loˈo cua ngutuˈu nguˈ ndyaa nguˈ.
\p
\v 23 Jlya tiˈ sti xtyaˈa̱ jyoˈo Moisés jiˈi̱ ycuiˈ Ndyosi, biˈ chaˈ loˈo ngula sñiˈ nguˈ, ngusuˈba cuatsiˈ nguˈ jiˈi̱ yu niˈi̱ sna coˈ, chaˈ naˈa̱ nguˈ chaˈ tsoˈo tsa ñaˈa̱ cubiˈ cuañiˈ biˈ. Ngaˈaa ndyutsi̱i̱ nguˈ biˈ jiˈi̱ rey xñaˈa̱, masi ná ndaquiyaˈ nguˈ jiˈi̱ cña cuxi nu ngulo rey biˈ.
\v 24 Loˈo ngua tlyu la nu Moisés biˈ liˈ, ná ndiya tiˈ yu chaˈ ñacui̱ nguˈ jiˈi̱ chaˈ laca yu sñiˈ nu cunaˈa̱ sñiˈ rey nu laca loo jiˈi̱ nguˈ Egipto, xquiˈya chaˈ jlya tiˈ yu jiˈi̱ ycuiˈ Ndyosi nu Xuˈna nguˈ Israel;
\v 25 tsoˈo la chaˈ stuˈba ti caja chaˈ tiˈí jiˈi̱ yu loˈo lcaa tyaˈa ñati̱ jiˈi̱ ycuiˈ Ndyosi, ngua tiˈ yu. Ná ngua tiˈ yu tyaˈa̱ yu xcuiˈ chaˈ paseya ti, ni ná ngua tiˈ yu cuaˈni yu xi chaˈ cuxi chaˈ sca hora ti ca chaa tiˈ ycuiˈ ti yu;
\v 26 tsoˈo la stuˈba ti tyiˈi̱ yu loˈo nguˈ tyaˈa yu, masi chi̱i̱ ntiˈ xaˈ ñati̱ ñaˈa̱ jiˈi̱ yu, ngua tiˈ yu. Ñiˈya̱ nchcubeˈ ycuiˈ Cristo nde loo la, juaˈa̱ nchcubeˈ Moisés nu ngua liˈ; pana ná ndube tiˈ yu chaˈ culiyaˈ nguˈ, nguxtyanu yu lcaa chaˈ tsoˈo nu ntsuˈu jiˈi̱ nguˈ Egipto, chaˈ jlya tiˈ yu chaˈ tsoˈo la caca jiˈi̱ ñati̱ jiˈi̱ yu nde loo la xquiˈya ycuiˈ Ndyosi. 
\v 27 Jlya tiˈ jyoˈo Moisés biˈ jiˈi̱ ycuiˈ Ndyosi, biˈ chaˈ ngutuˈu yu loyuu Egipto biˈ; ná ndyutsi̱i̱ yu masi ngunasi̱ˈ tsa rey xñaˈa̱ biˈ liˈ, ni ná ngutaˈa̱chu̱ˈ Moisés tsiyaˈ ti. Ndyaloˈo yu jiˈi̱ nguˈ Israel tyucui̱i̱ tyijyuˈ, ñiˈya̱ si ndyaa lcaˈa̱ yu jiˈi̱ ycuiˈ Ndyosi, masi ná nchca ñaˈa̱ na jiˈi̱ ycuiˈ Ni.
\p
\v 28 Xquiˈya chaˈ jlya tiˈ Moisés chaˈ nu nda ycuiˈ Ndyosi loˈo, biˈ chaˈ nacui̱ yu chaˈ clyo cuaˈni nguˈ taˈa pascua la cuiˈ talya loˈo cua tyeje tacui ti sca xca̱ tyaala su ndiˈi̱ nguˈ; cuentya jiˈi̱ ycuiˈ Ndyosi ca̱a̱ xca̱ tyaala biˈ, chaˈ xcubeˈ jiˈi̱ nguˈ Egipto. Liˈ ngulo Moisés cña chaˈ taˈa̱ nguˈ tañi naˈni chu̱ˈ yaca nu ndu̱ toˈ tyuu niˈi̱ jiˈi̱ lcaa nguˈ, chaˈ nu loˈo ñaˈa̱ xca̱ tyaala biˈ tañi, ná cujuii jiˈi̱ sñiˈ nguˈ Israel liˈ; pana cua ndyujuii xca̱ biˈ jiˈi̱ sñiˈ nu ngula clyo jiˈi̱ lcaa nguˈ ca tyi.
\v 29 Xquiˈya chaˈ jlya tiˈ Moisés jiˈi̱ ycuiˈ Ndyosi, biˈ chaˈ ndyaala sca tyucui̱i̱ btyi ti claˈbe laja Tyujoˈo Ngaˈa, chaˈ tyuˈu nguˈ chaca tsuˈ. Pana nu loˈo ngua tiˈ nguˈ Egipto tyuˈu lcaˈa̱ jiˈi̱ nguˈ Israel, ngaˈaa ngua jiˈi̱ nguˈ liˈ, chaˈ ndyanu nguˈ neˈ hitya biˈ; ndye nguˈ Egipto, ngujuii nguˈ biˈ liˈ.
\p
\v 30 Jlya tiˈ nguˈ Israel chaˈ jiˈi̱ ycuiˈ Ndyosi, biˈ chaˈ ngutaˈa̱ nguˈ nguxtyiˈi̱ nguˈ tyiˈi̱ ca chu̱ˈ loˈo quee nu ndu̱ toˈ quichi̱ Jericó. Cati tsa̱ ngutaˈa̱ nguˈ tsa cuˈ ti, loˈo liˈ ndye loˈo biˈ nguti̱.
\v 31 Pana jyoˈo Rahab, sca nu cunaˈa̱ calle nu ngutiˈi̱ ca quichi̱ biˈ, jlya tiˈ choˈ jiˈi̱ ycuiˈ Ndyosi; biˈ chaˈ nchcuiˈ tsoˈo choˈ loˈo nu tucua tyaˈa nguˈ Israel nu cuaana ti ndyaa, ndyaa naˈa̱ nguˈ lo quichi̱ biˈ clyo. Nda choˈ su tyiˈi̱ nguˈ, biˈ chaˈ ná ngujuii choˈ loˈo ngujuii xaˈ la ñati̱ tyaˈa quichi̱ tyi choˈ nu ná ndaquiyaˈ jiˈi̱ ycuiˈ Ndyosi tsiyaˈ ti.
\p
\v 32 Tya ntsuˈu quiñaˈa̱ tsa chaˈ nu taca chcuiˈ naˈ loˈo ma̱ cuentya jiˈi̱ chaˈ tlyu nu nguaˈni jyoˈo cusuˈ jiˈna, nguˈ nu chañi chaˈ jlya tiˈ jiˈi̱ ycuiˈ Ndyosi: taca chcuiˈ naˈ jiˈi̱ Gedeón, loˈo jiˈi̱ Barac, loˈo jiˈi̱ Sansón, loˈo jiˈi̱ Jefté, loˈo jiˈi̱ David, loˈo jiˈi̱ Samuel, loˈo jiˈi̱ ca taˈa jyoˈo cusuˈ nu ngua tuˈba jiˈi̱ ycuiˈ Ndyosi tya saˈni la.
\v 33 Jlya tiˈ lcaa nguˈ biˈ jiˈi̱ ycuiˈ Ndyosi, biˈ chaˈ ngusu̱u̱ tyaˈa nguˈ loˈo ñati̱ cuxi nde xaˈ chalyuu, ntiji̱loo nguˈ jiˈi̱ lcaa ñati̱ nu ngutiˈi̱ ca biˈ liˈ; tsoˈo tsa cña nguaˈni nguˈ biˈ, biˈ chaˈ nguaˈni Ni cua ñaˈa̱ ca chaˈ nu nacui̱ Ni chaˈ cuaˈni Ni cuentya jiˈi̱ nguˈ biˈ. Ngua jiˈi̱ nguˈ biˈ cuaˈa jiˈi̱ cuichi tyaala chaˈ ná ndyacu jiˈi̱ nguˈ;
\v 34 juaˈa̱ cua ndalo nguˈ biˈ, masi ngusuˈba nguˈ xñaˈa̱ jiˈi̱ nguˈ lo quiiˈ tonu chaˈ tyaqui̱ nguˈ; ná sca ngua jiˈi̱ nguˈ biˈ, masi ngulo ñati̱ chcua̱ chaˈ cujuii jiˈi̱ nguˈ. Ná ndalo nguˈ biˈ tsiyaˈ ti tya clyo, chaˈ xti ti juersa ntsuˈu jiˈi̱ nguˈ; pana ca tiyaˈ la, liˈ nguula tsa tiˈ nguˈ biˈ, chaˈ tlyu tsa juersa ngujui jiˈi̱ nguˈ, nu loˈo nxu̱u̱ tyaˈa nguˈ loˈo ñati̱ xaˈ chalyuu nu tsa tlyu ti ñaa chaˈ tyiji̱loo jiˈi̱ nguˈ. 
\v 35 Loˈo juaˈa̱ nu nguˈ cunaˈa̱ ni, xaˈ ndyalaa nu quiˈyu jiˈi̱ nguˈ ñaˈa̱ luˈú ti nguˈ, xquiˈya chaˈ jlya tiˈ nguˈ chaˈ caca jiˈi̱ ycuiˈ Ndyosi cuaˈni lyaá Ni jiˈi̱ nguˈ, masi cua ngujuii nguˈ tsaca quiyaˈ.
\p Tiˈí tsa ngujuiˈi̱ nguˈ cuxi jiˈi̱ xaˈ la tyaˈa nguˈ biˈ. Si cua ngutaˈa̱chu̱ˈ nguˈ biˈ jiˈi̱ ycuiˈ Ndyosi, cua ngulaá nguˈ jiˈi̱ nguˈ cuxi biˈ liˈ, chaˈ ngaˈaa ngujuiˈi̱ nguˈ cuxi jiˈi̱ nguˈ biˈ; pana ná ntajaˈa̱ nguˈ biˈ tyaˈa̱chu̱ˈ nguˈ jiˈi̱ Ni, chaˈ tyuˈu laja ti nguˈ juaˈa̱. Ndu̱ tiˈ nguˈ biˈ ni jacuaˈ ca̱a̱ Ni ca̱quiˈya Ni jiˈi̱ nguˈ, chaˈ ta chaca chalyuu tsoˈo la jiˈi̱ nguˈ.
\v 36 Xaˈ la tyaˈa nguˈ biˈ ni, tiˈí tsa nchcuiˈ nguˈ jiˈi̱ nguˈ biˈ laja loˈo ngujuiˈi̱ nguˈ cuxi jiˈi̱ nguˈ biˈ, masi ngusca̱ˈ nguˈ cuxi jiˈi̱ nguˈ biˈ loˈo carena, masi ngusuˈba nguˈ jiˈi̱ nguˈ biˈ neˈ chcua̱.
\v 37 Ntsuˈu nguˈ biˈ nu ngujuii liˈ, chaˈ tiˈí tsa ngujuiˈi̱ quee hichu̱ˈ nguˈ loˈo ngu̱ nguˈ quee jiˈi̱ nguˈ biˈ, hasta ngusaˈbe nguˈ jiˈi̱ xaˈ la nguˈ biˈ loˈo chcua̱; juaˈa̱ xaˈ la nguˈ biˈ ngujuii xquiˈya maxtyi jiˈi̱ nguˈ cuxi. Loˈo juaˈa̱ ntsuˈu nguˈ biˈ nu ná ngujui lateˈ jiˈi̱, biˈ chaˈ lacuˈ nguˈ quiji̱ xlyaˈ ti liˈ, masi quiji̱ chivo; ntsuˈu nguˈ tiˈi, ntsuˈu nguˈ quicha, chaˈ lyaˈ tsa tiˈ nguˈ cuxi jiˈi̱ nguˈ biˈ, chaˈ tiˈí tiˈ nguˈ cuxi ñaˈa̱ nguˈ jiˈi̱ nguˈ biˈ.
\v 38 Cuxi tsa chalyuu re loˈo ngua juaˈa̱. Ná jlo tiˈ ñati̱ chalyuu chaˈ tsoˈo la nu nguˈ biˈ que ycuiˈ nguˈ, masi xcuiˈ ngutaˈa̱ yuˈu ti nguˈ biˈ, masi ndyuˈu cuatsiˈ nguˈ ca neˈ quixi̱ˈ, ca nde siiˈ caˈya, xquiˈya chaˈ lyaˈ tsa tiˈ ñati̱ chalyuu jiˈi̱ nguˈ; ngutiˈi̱ nguˈ biˈ tyuquee, loˈo juaˈa̱ hasta ngulu nguˈ tyuu su ngutiˈi̱ nguˈ.
\v 39 Loˈo nu juani tya ndyiˈu tiˈ na jiˈi̱ nguˈ biˈ, ñati̱ nu juaˈa̱ jlya tsa tiˈ jiˈi̱ ycuiˈ Ndyosi nu ngua saˈni; pana ná naˈa̱ nguˈ biˈ lcaa chaˈ nu cua nacui̱ Ni chaˈ caca nde loo la,
\v 40 xquiˈya chaˈ tsoˈo la chaˈ nu nguaˈya hique ycuiˈ Ni ñiˈya̱ cuaˈni Ni loˈo lcaa tyaˈa na juani, chaˈ loˈo cuentya jiˈna ngulacua tiˈ Ni. Ngua tiˈ Ni chaˈ caca na ñati̱ nu tyucui tyiquee na stuˈba ti loˈo nguˈ biˈ, lcaa na loˈo jyoˈo cusuˈ biˈ caca na ñiˈya̱ nu ngua tiˈ Ni chaˈ caca na liˈ.
\c 12
\s Culacua tiˈ na ñiˈya̱ nu nguaˈni Jesús chaˈ ntiji̱loo yu jiˈi̱ tyaˈa cusu̱u̱ yu
\p
\v 1 Loˈo juani, ¿ñiˈya̱ cuaˈni na lacua? Ndiˈya̱ cuaˈni na nde chalyuu: Ñiˈya̱ si tya ndiˈi̱ jyoˈo cusuˈ biˈ tsa tlyu ti loˈo na, juaˈa̱ cuaˈni na, chaˈ juaˈa̱ tyiˈu tsoˈo tiˈ na lcaa ñaˈa̱ chaˈ tlyu nu nguaˈni nguˈ biˈ tya saˈni la, xquiˈya chaˈ jlya tiˈ nguˈ jiˈi̱ ycuiˈ Ndyosi. Nduˈni chaˈ xtyanu na lcaa chaˈ nu ndacaˈa jiˈna chaˈ ná xñi tsoˈo na chaˈ jiˈi̱ Jesús; xtyanu na lcaa chaˈ cuxi nu tiji̱ˈ tsa tiˈ na jiˈi̱, culochu̱ˈ na chaˈ biˈ. Loˈo liˈ nguula tiˈ tyiquee na cuaˈni na chaˈ tsoˈo nde chalyuu, tsa lo cua tyempo nu tya ta ti Ni jiˈna.
\v 2 Xcuiˈ culacua tiˈ na ñiˈya̱ nguaˈni Jesús; lcaa chaˈ nu jlya tiˈ na ni, Jesús laca su̱u̱ lcaa chaˈ biˈ; si juaˈa̱, taca jlya tiˈ na jiˈi̱ Ni ñaˈa̱ cuayáˈ nu tye chalyuu. Nu ycuiˈ Jesús ni, ná ngutaˈa̱chu̱ˈ yu jiˈi̱ cña nu ngaˈa̱ chaˈ cuaˈni yu, masi cua jlo tiˈ yu chaˈ cua cajaa ti yu lo crusi. Pana tiyaˈ la liˈ, nu loˈo cua ntiji̱loo yu jiˈi̱ nu cuxi, tsoˈo tsa ntsuˈu tyiquee yu liˈ; biˈ chaˈ ná ngua tyujuˈu tiˈ yu tsiyaˈ ti, masi nguxcubeˈ nguˈ jiˈi̱ yu lo crusi. Loˈo juani cua ndyaa tucua Jesús nde laˈa tsuˈ cui̱ su tlyu ca su ntucua ycuiˈ Ndyosi Sti na.
\p
\v 3 Culacua tsoˈo tiˈ ma̱ jiˈi̱ lcaa chaˈ cuxi nu ngua jiˈi̱ Jesús tyempo biˈ. Ndalo tsa tyiquee yu jiˈi̱ chaˈ cuxi biˈ liˈ, masi liyeˈ tsa tiˈ nguˈ cuxi ñaˈa̱ nguˈ jiˈi̱ yu. Biˈ chaˈ loˈo cuˈma̱ ni, ná ntsuˈu chaˈ ca ñuˈu̱ tiˈ ma̱ xquiˈya Jesús, ná ntsuˈu chaˈ ca taja tiˈ ma̱ jiˈi̱ Ni.
\v 4 Masi lye tsa nxu̱u̱ tyaˈa ma̱ loˈo lcaa chaˈ cuxi, ni tsaca ma̱ bilya cujuii nguˈ jiˈi̱ ma̱ xquiˈya Jesús. 
\v 5 Ná ngaˈa̱ chaˈ cjlyaa tiˈ ma̱ chaˈ biˈ, chaˈ tsoˈo tsa nchcuiˈ ycuiˈ Ndyosi loˈo ma̱ ñiˈya̱ si laca ma̱ sñiˈ ycuiˈ Ni. Ndiˈya̱ nacui̱ Ni:
\q Sñiˈ, nacui̱ ycuiˈ Ndyosi, taquiyaˈ tsoˈo ma̱ ˈna, masi xcubeˈ naˈ jiˈi̱ ma̱;
\q ná ca taja tiˈ ma̱ ˈna, masi cuaˈa naˈ jiˈi̱ ma̱ chaˈ ná cuaˈni ma̱ sca chaˈ cuxi.
\q
\v 6 Chaˈ naˈ laca̱ nu Xuˈna ma̱, chaˈ ntsuˈu tsa tyiquee naˈ ñaˈa̱ naˈ jiˈi̱ cuˈma̱, biˈ chaˈ xcubeˈ naˈ xi jiˈi̱ ma̱, nacui̱ ycuiˈ Ndyosi.
\q Ntsuˈu quiyaˈ nda naˈ xi chaˈ tiˈí jiˈi̱ ñati̱ ˈna, chaˈ sñiˈ naˈ laca nguˈ.
\m Juaˈa̱ nchcuiˈ ycuiˈ Ndyosi loˈo na,
\v 7 biˈ chaˈ talo ma̱ tyiqueeˈ loˈo chcubeˈ ma̱ chacuayáˈ jiˈi̱ ycuiˈ Ndyosi Sti ma̱ lacua. Cua nchcubeˈ ma̱ xi juani, biˈ chaˈ caca cuayáˈ tiˈ ma̱ chaˈ laca ma̱ sñiˈ ycuiˈ Ni, si juaˈa̱ nduˈni ycuiˈ Ni loˈo ma̱. Lcaa ñati̱ nu ntsuˈu sñiˈ, ntsuˈu quiyaˈ ndyuˈni tyaala jiˈi̱ sñiˈ; loˈo ná ndaquiyaˈ nu sube biˈ jiˈi̱ chaˈ nu nchcuiˈ sti nguˈ, nchcubeˈ sti jiˈi̱ sñiˈ liˈ. La cuiˈ juaˈa̱ nduˈni Ni loˈo na.
\v 8 Ngaˈa̱ chaˈ xcubeˈ Ni jiˈi̱ ma̱ ñiˈya̱ nchcubeˈ Ni jiˈi̱ cua ñaˈa̱ ca sñiˈ Ni, chaˈ taca ca cuayáˈ tiˈ ma̱ chaˈ chañi chaˈ cua laca ma̱ sñiˈ ycuiˈ Ndyosi liˈ; ná laca ma̱ sñiˈ nu ngujui jiˈi̱ ñati̱ nde calle ti.
\v 9 Nde chalyuu nchcubeˈ sti na jiˈna, biˈ chaˈ ndaquiyaˈ na jiˈi̱ chaˈ nu nchcuiˈ nguˈ cusuˈ jiˈna loˈo na. ¿Ha ná tsoˈo si ta na chacuayáˈ chaˈ xcubeˈ ycuiˈ Ndyosi Sti na jiˈna, chaˈ tsoˈo la tyiˈi̱ tyiquee na nde loo la lacua?
\v 10 Cua laca ti tyempo nu nchcubeˈ sti na jiˈna nde chalyuu, tsa ñaˈa̱ nu tsoˈo cuentya jiˈna nduˈni nguˈ, chaˈ ca tsaˈa̱ na ntiˈ nguˈ; la cuiˈ ti chaˈ ntiˈ ycuiˈ Ndyosi chaˈ caca tsoˈo jiˈna, biˈ chaˈ nchcubeˈ Ni jiˈna juaˈa̱. Nu loˈo cati̱ quiˈya nu ntsuˈu jiˈna, liˈ taca ca stuˈba chaˈ jiˈna loˈo ycuiˈ Ndyosi Sti na, nu ná ntsuˈu chaˈ cuxi jiˈi̱ Ni tsiyaˈ ti.
\v 11 Ca xñiˈi̱ tiˈ na hora biˈ loˈo nchcubeˈ na, siˈi na chaa tiˈ na liˈ; pana tiyaˈ la liˈ taca cuaˈni la na chaˈ tsoˈo, chaˈ ti̱ ti taca tyiˈi̱ tyiquee na nde chalyuu liˈ, xquiˈya chaˈ cua ngusñi tsoˈo la na chaˈ jiˈi̱ ycuiˈ Ndyosi nu loˈo cua nchcubeˈ na.
\s Tlyu tsa chaˈ laca si tyaˈa̱chu̱ˈ na jiˈi̱ ycuiˈ Ndyosi 
\p
\v 12 Xaˈ ta ma̱ juersa jiˈi̱ tyucui ñaˈa̱ ma̱ lacua, masi ngua cñaˈ tsa ma̱; xaˈ cuaˈni chaˈ nguula tiˈ tyiquee ma̱, masi ngua taja tiˈ ma̱ tsubiˈ.
\v 13 Clyana la ma̱ tyucui̱i̱ liñi su tsaa ma̱, chaˈ ná quiñuˈu̱ la tyucui̱i̱ jiˈi̱ xaˈ la ñati̱ tyaˈa ma̱ nu siyaˈ la tyiquee nguˈ; cuaˈni ma̱ chaˈ tyatí̱ la tiˈ tyiquee ñati̱ biˈ, chaˈ siˈi na caca ñuˈu̱ la tiˈ nguˈ.
\p
\v 14 Cuaˈni cña tiˈ ma̱ chaˈ tsoˈo ti tyiˈi̱ ma̱ loˈo lcaa ñati̱, cuaˈni ma̱ chaˈ caca lubii cresiya jiˈi̱ ma̱; ni tsaca na, ná caca ñaˈa̱ na jiˈi̱ ycuiˈ Ndyosi si tya lyiji caca lubii cresiya jiˈna.
\v 15 Cuiˈya ma̱ cuentya chaˈ ni tsaca nguˈ tyaˈa ma̱ ná xtyanu juaˈa̱ ti lcaa chaˈ tsoˈo nu nduˈni ycuiˈ Ndyosi loˈo na. Loˈo juaˈa̱ cuiˈya ma̱ cuentya chaˈ ná cuaˈni ñuˈu̱ ma̱ jiˈi̱ tyiquee xaˈ la nguˈ tyaˈa ngusñi na chaˈ jiˈi̱ Jesús. Ñiˈya̱ laca sca quixi̱ˈ tyaala nu cuaˈni ñuˈu̱ jiˈi̱ ñati̱ loˈo coˈo nguˈ hitya biˈ, juaˈa̱ caca na jiˈi̱ tyaˈa na loˈo ntsuˈu sca chaˈ cuxi jiˈna.
\v 16 Cuiˈya ma̱ cuentya chaˈ ni tsaca ma̱ ná caca ma̱ ñiˈya̱ ngua jyoˈo Esaú; nguaˈni lyaˈ tiˈ yu biˈ jiˈi̱ ñati̱ jiˈi̱ yu, loˈo juaˈa̱ ná ndube tiˈ yu jiˈi̱ ycuiˈ Ndyosi. Sñiˈ clyo ngua yu, pana ndye ndyujuiˈ yu lcaa chacuayáˈ nu caja jiˈi̱ yu nquichaˈ, xquiˈya chaˈ ngua tiˈ yu cacu yu masi sca ti caˈña scuaa; nguñiloˈo tyaˈa ngula yu jiˈi̱ yu liˈ.
\v 17 Cua jlo tiˈ ma̱ ñiˈya̱ ngua ca tiyaˈ la: nu loˈo ngua tiˈ yu chaˈ culacua̱ sti yu jiˈi̱ yu, liˈ ngaˈaa ndaquiyaˈ sti yu jiˈi̱ chaˈ nu nda yu loˈo; ngaˈaa ngujui ñiˈya̱ nu tyaˈa̱chu̱ˈ yu jiˈi̱ chaˈ nu cua nguaˈni yu, masi ngusiˈya tsa yu loˈo ngüijña yu chaˈ biˈ jiˈi̱ sti yu.
\p
\v 18 Loˈo ndyuna ma̱ chaˈ jiˈi̱ ycuiˈ Ndyosi juani, ná ndyaca jiˈi̱ ma̱ ñiˈya̱ nu ngua jiˈi̱ nguˈ Israel nu ngua saˈni la, nu loˈo ngutu̱ nguˈ biˈ quiyaˈ caˈya Sinaí. Ná nchca tii ma̱ juani, ñiˈya̱ nu ngua tiˈ nguˈ biˈ loˈo lye tsa ndyaqui̱ siiˈ caˈya Sinaí biˈ nu ngua liˈ; talya tsa ñaˈa̱ ngua liˈ, ná ngua ñaˈa̱ nguˈ tsiyaˈ ti, juaˈa̱ lye tsa ngua cuiˈi̱.
\v 19 La cuiˈ juaˈa̱ ná ndyuna ma̱ loˈo cui̱i̱ tsa nguañi ngulaˈá cuiˈchcua̱ jiˈi̱ ycuiˈ Ndyosi liˈ, nguañi nchcuiˈ Ni loˈo ñati̱ biˈ liˈ. Nu loˈo ndyuna nguˈ nchcuiˈ ycuiˈ Ndyosi loˈo nguˈ, liˈ lye tsa ngüijña nguˈ jiˈi̱ Ni, chaˈ ngaˈaa chcuiˈ ycuiˈ Ni loˈo nguˈ biˈ tsiyaˈ ti. 
\v 20 Ndyutsi̱i̱ tsa nguˈ liˈ, chaˈ ngaˈaa ndalo jyaca̱ nguˈ cuna nguˈ chaˈ nu nda jyoˈo Moisés loˈo nguˈ cuentya jiˈi̱ ycuiˈ Ndyosi; ndiˈya̱ nacui̱ Ni: “Ná ca̱a̱ ma̱ nde siiˈ caˈya re tsiyaˈ ti; masi ca̱a̱ sca naˈni jiˈi̱ ma̱ nde siiˈ caˈya re, ngaˈa̱ chaˈ cujuii clya ma̱ jiˈi̱ loˈo quee”.
\v 21 Lye tsa ñaˈa̱ ngua chaˈ biˈ, hasta ycuiˈ Moisés nacui̱ ndiˈya̱: “Lye tsa nchcua̱ naˈ chaˈ ndyutsi̱i̱ naˈ”.
\p
\v 22 Pana ngaˈaa siˈi juaˈa̱ ndyaca jiˈi̱ ma̱ juani, chaˈ chaca chalyuu tsaa ma̱ juani; la cuiˈ ca su ntucua tyi ycuiˈ Ndyosi ca nde cua̱, ndacua tsaa ma̱ juani. Ca biˈ ndiˈi̱ ycuiˈ Ndyosi loˈo tyu̱u̱ tsa mil tyaˈa xca̱ jiˈi̱ Ni. Tsoˈo tsa ñaˈa̱ ca biˈ; ñiˈya̱ si cua nscua chaca caˈya Sión nde cua̱, ñiˈya̱ si ca biˈ ntucua chaca quichi̱ Jerusalén nu tsoˈo la ñaˈa̱, juaˈa̱ laca biˈ.
\v 23 Loˈo juaˈa̱ ntsuˈu chaˈ tsaa ma̱ slo lcaa tyaˈa sñiˈ ycuiˈ Ndyosi nu cua ndyaloˈo Ni jiˈi̱ ndejua tya saˈni la, chaˈ cua nscua xtañi jyoˈo biˈ lo quityi jiˈi̱ ycuiˈ Ndyosi nde cua̱. Tsoˈo tsa ntsuˈu tyiquee nguˈ biˈ ca su ndyuˈu tiˈi̱ nguˈ. Na cua tsaa ti ma̱ la cuiˈ slo ycuiˈ Ndyosi nu nduˈni cuayáˈ jiˈi̱ lcaa ñati̱, ca su ndiˈi̱ lcaa ñati̱ jyoˈo nu lubii cresiya jiˈi̱ xquiˈya Jesús, chaˈ cua ndyaca cucui tyucui ñaˈa̱ nguˈ. 
\v 24 Loˈo juaˈa̱ ca biˈ ndiˈi̱ Jesús, nu ngüiñi chaca chaˈ nu tsoˈo la jiˈi̱ ycuiˈ Ni loˈo na; tsoˈo tsa ngua chaˈ ndyalú tañi ycuiˈ Jesús, chaˈ xquiˈya nu Jesús biˈ ni, biˈ chaˈ cua nguti̱ chaˈ cuxi nu ntsuˈu jiˈna. Pana nu loˈo ndyalú tañi jyoˈo Abel nu ngua saˈni, liˈ ntsuˈu chaˈ cajaa chaca yu nu cua ndyujuii jiˈi̱ tyaˈa; xcuiˈ chaˈ cuxi ndyuˈu jiˈi̱ chaˈ biˈ liˈ.
\p
\v 25 Cuiˈya ma̱ cuentya lacua, chaˈ cuaˈa̱ jyaca̱ ma̱ jiˈi̱ lcaa chaˈ nu cua nda Cristo loˈo ma̱. Nguxcubeˈ tsa ycuiˈ Ndyosi jiˈi̱ jyoˈo cusuˈ jiˈna, nu loˈo ná ntajaˈa̱ nguˈ cuaˈa̱ jyaca̱ nguˈ jiˈi̱ chaˈ nu nchcuiˈ jyoˈo Moisés loˈo nguˈ nde chalyuu chacuayáˈ jiˈi̱ ycuiˈ Ndyosi; ná ngua xna nguˈ biˈ jiˈi̱ ycuiˈ Ndyosi. La cuiˈ juaˈa̱ tlyu la chaˈ caca jiˈna juani, si ná taquiyaˈ na jiˈi̱ Cristo nu ngutuˈu ca slo ycuiˈ Ndyosi ya̱a̱ nde lo yuu chalyuu, loˈo juaˈa̱ cua xaˈ ndyaa tucua Ni ca slo ycuiˈ Ndyosi chaca quiyaˈ juani.
\v 26 Laja loˈo nchcuiˈ ycuiˈ Ndyosi loˈo ñati̱ saˈni, la cuiˈ hora biˈ ngulacui̱ chalyuu; pana juani cua nchcuiˈ Ni chaca quiyaˈ ndiˈya̱: “Chaca tya quiyaˈ cuaˈni naˈ chaˈ quiña lcaa lo yuu chalyuu, la cuiˈ hora nu quiña lcaa chalyuu nu ntsuˈu nde cua̱”, nacui̱ Ni.
\v 27 Loˈo nacui̱ Ni: “chaca tya quiyaˈ”, juaˈa̱ ca cuayáˈ tiˈ na chaˈ ntsuˈu chaˈ xquiña Ni tyucui ñaˈa̱ lcaa chalyuu nu cua ngüiñá Ni, culotsuˈ Ni jiˈi̱ chaˈ biˈ liˈ. Tsa ñaˈa̱ ti na nu ntsuˈu jiˈi̱ ycuiˈ Ndyosi, biˈ ti na nu tyanu liˈ, xquiˈya chaˈ ná nchca clyiji na biˈ tsiyaˈ ti.
\v 28 Loˈo juaˈa̱ ná taca chaˈa̱ chalyuu cucui nu ngujui jiˈna xquiˈya Cristo, ná clyiji tsiyaˈ ti biˈ; biˈ chaˈ tsoˈo tyuˈu tyiquee na ñaˈa̱ na jiˈi̱ ycuiˈ Ndyosi lacua. Cuaˈni chi̱ na loo ycuiˈ Ndyosi, chaˈ juaˈa̱ ntiˈ Ni chaˈ cuaˈni na; tyiˈu tiˈ na chaˈ lcaa tsa̱ cuaˈni tlyu na jiˈi̱ ycuiˈ Ni, chaˈ cube tsa tiˈ na jiˈi̱ Ni.
\v 29 La cuiˈ Ndyosi nu nduˈni tlyu na jiˈi̱ Ni, chañi chaˈ taca jiˈi̱ Ni cuityi̱ Ni jiˈna tsi tsiyaˈ ca loˈo sca quiiˈ tlyu, si juaˈa̱ ntiˈ Ni.
\c 13
\s Cña nu ndiya tiˈ ycuiˈ Ndyosi chaˈ cuaˈni na nde chalyuu 
\p
\v 1 Ñaˈa̱ ti tyuˈu tsoˈo tyiquee ma̱ ñaˈa̱ ma̱ jiˈi̱ nguˈ tyaˈa ngusñi ma̱ chaˈ jiˈi̱ Cristo, cuaˈni ma̱ chaˈ tsoˈo loˈo nguˈ biˈ.
\v 2 Tyiˈu tiˈ ma̱ chaˈ chcuiˈ tsoˈo ma̱ loˈo cua ñaˈa̱ ca nguˈ xta, nguˈ xaˈ quichi̱, si tyalaa nguˈ toniˈi̱ jiˈi̱ ma̱; ta ma̱ su tyiˈi̱ nguˈ biˈ, chaˈ juaˈa̱ nguaˈni xi jyoˈo cusuˈ jiˈi̱ ma̱ nu ngua saˈni la, loˈo tiyaˈ la liˈ nquijeloo jiˈi̱ nguˈ chaˈ xca̱ jiˈi̱ ycuiˈ Ndyosi nu ntsuˈu nde cua̱ laca ñati̱ nu ngulaa toniˈi̱ jiˈi̱ nguˈ biˈ.
\p
\v 3 Culacua tiˈ ma̱ ñiˈya̱ caca xtyucua ma̱ jiˈi̱ nguˈ tyaˈa ngusñi na chaˈ jiˈi̱ ycuiˈ Ndyosi, nu loˈo cua ngusuˈba nguˈ jiˈi̱ tyaˈa na biˈ neˈ chcua̱. Loˈo juaˈa̱ xtyucua ma̱ jiˈi̱ nguˈ tyaˈa na nu quicha tiˈ, xquiˈya chaˈ lyaˈ tiˈ nguˈ jiˈi̱ nguˈ biˈ. Tyiˈu tiˈ ma̱ chaˈ xtyucua ma̱ jiˈi̱ nguˈ biˈ, ñiˈya̱ si ycuiˈ ca ma̱ nchcubeˈ ma̱ loˈo nguˈ.
\p
\v 4 Lcaa ma̱ loˈo tyaˈa ma̱ ngaˈa̱ chaˈ cuaˈni tyacaˈa ma̱ jiˈi̱ clyoˈo ma̱; ná cuaˈni cuxi ma̱ loˈo clyoˈo ma̱, ñiˈya̱ ntiˈ si tyuˈu chaˈ jiˈi̱ ma̱ loˈo xaˈ ñati̱ laja ti. Xcubeˈ ycuiˈ Ndyosi jiˈi̱ cua ñaˈa̱ ca ñati̱ nu cuaˈni chaˈ subaˈ juaˈa̱, juaˈa̱ xcubeˈ Ni jiˈi̱ ñati̱ nu tyatí̱ yuˈu loˈo clyoˈo xaˈ ñati̱.
\p
\v 5 Ná tyuˈu tyiquee ma̱ xcuiˈ chaˈ jiˈi̱ cñi, pana tsoˈo si tyaalaˈ jiˈi̱ ma̱ loˈo tsa ñaˈa̱ nu ndyiji ti xi jiˈi̱ ma̱. Na cua nchcuiˈ Ni loˈo na ndiˈya̱: “Ná culatiˈi̱ naˈ jiˈi̱ ma̱”, nacui̱ Ni, “ná xtyanu naˈ jiˈi̱ ma̱ juaˈa̱ ti”.
\v 6 Biˈ chaˈ ndiˈya̱ culacua tiˈ na chaˈ nguula tiˈ tyiquee na:
\q Ycuiˈ nu Xuˈna na laca nu nxtyucua ˈna.
\q Ná ntsuˈu chaˈ cutsi̱i̱ naˈ lacua, chaˈ ná caca cuaˈni cuxi ñati̱ loˈo naˈ.
\p
\v 7 Tyiˈu tiˈ ma̱ jiˈi̱ nguˈ jyoˈo tyaˈa ma̱ nu ngua loo jiˈi̱ ma̱ chacuayáˈ jiˈi̱ Jesucristo; nguˈ biˈ laca nu cua nchcuiˈ chaˈ jiˈi̱ ycuiˈ Ndyosi loˈo ma̱ tya clyo, biˈ chaˈ culacua tsoˈo tiˈ ma̱ jiˈi̱ cña tsoˈo nu nguaˈni nguˈ biˈ nde chalyuu. Cuaˈni ma̱ ñiˈya̱ nu nguaˈni nguˈ biˈ loˈo ngusñi nguˈ chaˈ jiˈi̱ ycuiˈ Ndyosi.
\p
\v 8 Ná nchaˈa̱ Jesucristo: ñiˈya̱ ngua Ni tyempo saˈni, la cuiˈ juaˈa̱ laca Ni juani, loˈo la cuiˈ juaˈa̱ caca Ni tyempo nde loo la.
\v 9 Ná ta ma̱ chacuayáˈ culuˈu ñati̱ xi xaˈ la chaˈ jiˈi̱ ma̱, sca chaˈ nu ná stuˈba nchcuiˈ loˈo chaˈ biˈ, chaˈ ná xtyanu ma̱ juaˈa̱ jiˈi̱ tyucui̱i̱ liñi. Tsoˈo la si tyanu tsoˈo lcaa chaˈ jiˈi̱ ycuiˈ Ndyosi neˈ cresiya jiˈna, si cube tiˈ na jiˈi̱ lcaa chaˈ tsoˈo nu nduˈni Ni loˈo na lcaa hora; pana ná taca tyanu tsoˈo chaˈ jiˈi̱ ycuiˈ Ndyosi neˈ cresiya jiˈna loˈo taquiyaˈ na jiˈi̱ cua ñaˈa̱ ca cña nu tatsaa nguˈ jiˈna, ñiˈya̱ ntiˈ si nacui̱ nguˈ chaˈ ná tsoˈo cacu na sca lo na nu ndacu nguˈ. Masi cua ndaquiyaˈ tsa na jiˈi̱ cña biˈ tya tsubiˈ la, siˈi na tsoˈo la ngua tiˈ na loˈo nguaˈni na juaˈa̱.
\p
\v 10 Xaˈ ñaˈa̱ cña nguaˈni Cristo loˈo ndyaa yu lo crusi, chaˈ ngua yu msta̱ chaˈ cati̱ quiˈya nu ntsuˈu jiˈna loˈo ycuiˈ Ndyosi. Pana lcaa ñati̱ nu tya ndyiˈu tsa tiˈ jiˈi̱ msta̱ nu nsta sti joˈó cuentya jiˈi̱ nguˈ, ná caca tyiˈi̱ tsoˈo tyiquee nguˈ biˈ loˈo Cristo.
\v 11 Masi xuˈna sti joˈó nu cuentya jiˈi̱ nguˈ judío ni, xcuiˈ loˈo tañi naˈni ti ñaloˈo sti joˈó biˈ nde cuarto su tacati tsa neˈ laa biˈ, chaˈ cati̱ quiˈya nu ntsuˈu jiˈi̱ nguˈ loˈo biˈ. Nu loˈo ndye ngua cña biˈ, liˈ ndyaloˈo nguˈ jiˈi̱ ñaˈa̱ tsaca cuañaˈ naˈni nu laca msta̱ biˈ ca toˈ quichi̱; ca biˈ ndaqui̱ nguˈ cuañaˈ biˈ.
\v 12 La cuiˈ ti ca toˈ quichi̱ nchcubeˈ Jesús, chaˈ caja ñiˈya̱ nu cati̱ chaˈ cuxi nu ntsuˈu jiˈi̱ ñati̱, nu loˈo ndyalú tañi ycuiˈ ca yu loˈo ngujuii yu lo crusi ca biˈ.
\v 13 Loˈo juaˈa̱ na, tsoˈo si ná cutsi̱i̱ na, masi tsaloˈo nguˈ jiˈna chaˈ xcubeˈ nguˈ jiˈna cuentya jiˈi̱ Jesús; stuˈba ti caca jiˈna nde chalyuu, ñiˈya̱ nu ngua jiˈi̱ Jesús loˈo lyaˈ tsa tiˈ nguˈ jiˈi̱ yu.
\v 14 Nde lo yuu chalyuu ná ntsuˈu seˈi̱ tsoˈo su tyanu na; xcuiˈ na ndu̱ tiˈ na chaˈ tyalaa na chaca seˈi̱ su tsoˈo la tsiyaˈ ti, su tsaa na loˈo cua ndye chalyuu re.
\v 15 Biˈ chaˈ lcaa tsa̱ cuaˈni chi̱ na loo ycuiˈ Ndyosi xquiˈya Jesús, chaˈ ñiˈya̱ laca si ta na msta̱ jiˈi̱ Ni, juaˈa̱ laca nu loˈo tyucui tyiquee na cuaˈni tlyu na jiˈi̱ Ni. Loˈo juaˈa̱ tsoˈo tsa si lcaa tsa̱ chcuiˈ na chaˈ tlyu tsa chaˈ nu ntsuˈu jiˈi̱ ycuiˈ Ni.
\v 16 La cuiˈ juaˈa̱ ná ca taja tiˈ ma̱ cuaˈni ma̱ lcaa chaˈ tsoˈo, juaˈa̱ xtyucua ma̱ jiˈi̱ tyaˈa ñati̱ ma̱; biˈ laca cña nu ndiya tiˈ Ni chaˈ cuaˈni na cuentya jiˈi̱ ycuiˈ Ni.
\p
\v 17 Taquiyaˈ ma̱ jiˈi̱ ñati̱ nu laca cña cuentya jiˈi̱ ñaˈa̱ taju nguˈ tyaˈa ma̱; cuaˈni ma̱ lcaa cña nu ndijña nguˈ biˈ jiˈi̱ ma̱ chaˈ cuaˈni ma̱. Tlyu tsa cña nu ntsuˈu jiˈi̱ nguˈ biˈ, chaˈ xcuiˈ ndube tiˈ nguˈ ñiˈya̱ nu ndyuˈni sa scaa ma̱; ngaˈa̱ chaˈ xacui̱ nguˈ chaˈ jiˈi̱ ycuiˈ Ndyosi si chañi chaˈ ñaˈa̱ ti tya tsoˈo ndyuˈni ma̱, xquiˈya chaˈ ngusñi ma̱ chaˈ jiˈi̱ Ni. Pana tsoˈo la ntiˈ nguˈ biˈ, si ñaˈa̱ ti tsoˈo ntsuˈu tyiquee ma̱ cuaˈni ma̱ ñiˈya̱ nu nacui̱ nguˈ jiˈi̱ ma̱ chaˈ cuaˈni ma̱. Si ná cuaˈni ma̱ juaˈa̱, caca xñiˈi̱ tiˈ nguˈ biˈ liˈ, chaˈ ngaˈaa caca xtyucua nguˈ jiˈi̱ ma̱ liˈ.
\p
\v 18 Ñaˈa̱ ti chcuiˈ ma̱ loˈo ycuiˈ Ndyosi cuentya jiˈi̱ cuare. Tyucui tyiquee ya jlo tiˈ ya chaˈ ni sca chaˈ cuxi ná ntsuˈu jiˈi̱ ya nu caca tyujuˈu tiˈ ya jiˈi̱. Lcaa tyempo ntiˈ ya cuaˈni ya cua ñaˈa̱ ca chaˈ nu tsoˈo la cuentya jiˈi̱ ycuiˈ Ndyosi.
\v 19 Biˈ chaˈ xaˈ ndijña tsa naˈ jiˈi̱ ma̱, chaˈ luˈba ti chcuiˈ ma̱ loˈo ycuiˈ Ndyosi cuentya jnaˈ. Ná tyiqueeˈ cuaˈni Ni chaˈ xtyu̱u̱ naˈ ca̱a̱ naˈ yala la ca su ndiˈi̱ ma̱.
\s Ngusalyaˈ yu loˈo nguˈ
\p
\v 20 Ycuiˈ Ndyosi laca nu nguaˈni cña chaˈ ndyuˈú Jesucristo nu Xuˈna na chaca quiyaˈ loˈo ngujuii. Loˈo juani laca Jesús loo, chaˈ ñaˈa̱si̱i̱ Ni jiˈna nu laca na ñati̱ jiˈi̱ Ni, xquiˈya chaˈ ngujuii Ni cuentya jiˈna. Nu loˈo ngujuii Jesús, liˈ ngüiñi chaˈ jiˈi̱ Ni loˈo lcaa ñati̱ jiˈi̱ Ni, sca chaˈ cucui nu ná ngaˈa̱ chaˈ tye tsiyaˈ ti.
\v 21 Ycuiˈ Ndyosi nduˈni chaˈ ti̱ ti tyiˈi̱ tyiquee na, loˈo juani ntiˈ naˈ chaˈ xtyucua Ni jiˈi̱ ma̱ loˈo cua ñaˈa̱ ca chaˈ nu lyiji jiˈi̱ ma̱, chaˈ taca cuaˈni ma̱ lcaa cña, ñiˈya̱ nu ntiˈ Ni chaˈ cuaˈni ma̱; ntiˈ naˈ chaˈ cuentya jiˈi̱ ma̱ cuaˈni Ni na laca nu tsoˈo la ntiˈ Ni, chacuayáˈ jiˈi̱ Jesucristo. Loˈo juaˈa̱ ná ngaˈa̱ chaˈ tye chaˈ cuaˈni tlyu Ni jiˈi̱ Cristo. ¡Juaˈa̱ caca chaˈ lacua!
\p
\v 22 Cuˈma̱ tyaˈa ngusñi na chaˈ jiˈi̱ Cristo, cuaˈni clyu tiˈ ma̱ ˈna, talo tyiquee ma̱ xi ˈna chaˈ cuna ma̱ chaˈ nu nchcuiˈ naˈ re. Ná quiñaˈa̱ tsa chaˈ nscua naˈ lo quityi re, pana cua ntiˈ naˈ chaˈ tyanu tachaa la chaˈ biˈ neˈ cresiya jiˈi̱ ma̱.
\v 23 Chaca chaˈ ntiˈ naˈ chcui̱ˈ loˈo ma̱: Cua ngulaá nguˈ jiˈi̱ Timoteo, tyaˈa ndyaˈa̱ na cña, ca su ngutuˈú yu neˈ chcua̱; nu loˈo ca̱a̱ naˈ, ca̱loˈo naˈ jiˈi̱ yu liˈ, si yala ti tyalaa yu slo naˈ.
\p
\v 24 Chcuichaˈ naˈ jiˈi̱ lcaa nguˈ nu laca loo cuentya jiˈi̱ ma̱, juaˈa̱ chcuichaˈ naˈ jiˈi̱ lcua ti tyaˈa ma̱ nu ngusñi ma̱ chaˈ jiˈi̱ ycuiˈ Ndyosi. Ca taˈa nguˈ nu ntsuˈu chaˈ jiˈi̱ loˈo ycuiˈ Ndyosi, nu ndiˈi̱ nde Italia re, loˈo lcaa nguˈ biˈ ntiˈ nguˈ chcuichaˈ nguˈ jiˈi̱ ma̱.
\p
\v 25 Cua ntiˈ naˈ chaˈ tyiˈu tiˈ ma̱ lcaa tyempo chaˈ xcuiˈ tsoˈo ti nduˈni ycuiˈ Ndyosi loˈo lcaa na.