\id JAS
\h SANTIAGO
\mt Quityi nu nguscua Santiago
\c 1
\p
\v 1 Santiago laca naˈ nu nscua̱ quityi re chaˈ ca̱a̱ ca su ndiˈi̱ cuˈma̱, ñati̱ jiˈi̱ ycuiˈ Ndyosi nu ndyaa ma̱ tyucui ñaˈa̱ chalyuu. Cña laca naˈ cuentya jiˈi̱ ycuiˈ Ndyosi, la cuiˈ juaˈa̱ laca naˈ cña jiˈi̱ Jesucristo nu Xuˈna na. Cua ntiˈ naˈ chcuiˈ naˈ xlyo niˈi̱ loˈo lcaa ma̱ loˈo tyaˈa ma̱.
\s Nu loˈo ta ycuiˈ Ndyosi sca chaˈ nu caˈya tsoˈo hique scaa na
\p
\v 2 Cuˈma̱ tyaˈa ngusñi na chaˈ jiˈi̱ Cristo, si lye tsa ntiˈ ma̱ xquiˈya cua ñaˈa̱ ca lo chaˈ tiˈí nu ndyacua jiˈi̱ ma̱, ná xñiˈi̱ tsa culacua tiˈ ma̱ liˈ; pana tsoˈo tsa caca tyiquee ma̱ liˈ,
\v 3 chaˈ nu loˈo ngualo chaˈ tiˈí biˈ jiˈi̱ ma̱ xquiˈya chaˈ ngusñi tsoˈo ma̱ chaˈ jiˈi̱ Jesús, liˈ taca jlo tiˈ ma̱ chaˈ cua nchca la jiˈi̱ ma̱ talo ma̱ nde chalyuu. 
\v 4 Pana cuiˈya ma̱ cuentya chaˈ talo ma̱ tyucui tyempo loˈo ndiˈi̱ ma̱ chalyuu, ñaˈa̱ cuayáˈ nu tye chaˈ tiˈí jiˈi̱ ma̱, chaˈ caca ma̱ ñati̱ nu tyucui tyiquee, ñati̱ nu ná sca na lyiji jiˈi̱ chaˈ ngusñi ma̱ chaˈ jiˈi̱ Jesús.
\p
\v 5 Si ntsuˈu quiyaˈ nu loˈo ná jlo tiˈ ma̱ tsiyaˈ ti ñiˈya̱ nu cuaˈni ma̱, liˈ tsoˈo chcuiˈ ma̱ loˈo ycuiˈ Ndyosi, chaˈ ta Ni sca chaˈ nu caˈya hique ma̱ ñiˈya̱ nu cuaˈni ma̱ liˈ. Tsoˈo tsa chaˈ xlyaˈbe nda Ni jiˈi̱ lcaa ñati̱, cuati ná nduˈni tyaala Ni jiˈna loˈo nda Ni sca chaˈ tsoˈo jiˈna.
\v 6 Tsa biˈ ti chaˈ, nu loˈo jña ma̱ sca chaˈ jiˈi̱ ycuiˈ Ndyosi, liˈ ngaˈa̱ chaˈ jlya tiˈ ma̱ chaˈ nchca jiˈi̱ Ni cuaˈni Ni juaˈa̱; ná tsoˈo si tyaˈa̱chu̱ˈ ma̱ jiˈi̱ chaˈ biˈ, ñiˈya̱ si ñacui̱ ma̱ chaˈ ná nchca jiˈi̱ Ni cuaˈni Ni juaˈa̱. Ñati̱ nu juaˈa̱ ñacui̱ chaˈ ná nchca jiˈi̱ ycuiˈ Ni, laca nguˈ biˈ ñiˈya̱ laca sca clyooˈ nu ndyaˈa̱ lo tyujoˈo; ndyatu̱ clyooˈ ndyaa macala su nducuniˈi̱ cuiˈi̱ jiˈi̱ chaˈ tsaa.
\v 7 Ná ca tu̱ tiˈ nguˈ biˈ jiˈi̱ ni sca na, chaˈ ta ycuiˈ nu Xuˈna na jiˈi̱ nguˈ liˈ,
\v 8 chaˈ tucua chaˈ ntsuˈu tyiquee nguˈ biˈ; ná sca chaˈ caja jiˈi̱ nguˈ chaˈ xcuiˈ na nchaˈa̱ ti tyiquee nguˈ. Sca ti chaˈ chcuiˈ nguˈ sca tsa̱, chaca tsa̱ xaˈ chaˈ chcuiˈ nguˈ biˈ liˈ.
\p
\v 9 Tsoˈo ti caca tyiquee nguˈ tiˈi tyaˈa ngusñi na chaˈ jiˈi̱ ycuiˈ Ndyosi; xtyucua Ni jiˈi̱ nguˈ biˈ, chaˈ tsoˈo la tyiˈi̱ nguˈ nde loo la, masi nchcubeˈ tsa nguˈ su ndiˈi̱ nguˈ juani ti.
\v 10 Loˈo juaˈa̱ nduˈni chaˈ tsoˈo ti caca tyiquee nguˈ culiyaˈ tyaˈa ngusñi na chaˈ jiˈi̱ Ni, masi tye chaˈ culiyaˈ nguˈ; culiji yuˈu lcaa chaˈ tsoˈo nu ntsuˈu jiˈi̱ cua ñaˈa̱ ca nguˈ culiyaˈ, ñiˈya̱ ndye chaˈ jiˈi̱ sca queé nu tsoˈo ñaˈa̱ nu ntsuˈu ca neˈ quixi̱ˈ.
\v 11 Loˈo ndyaa cuichaa nde cua̱, ca tyiqueˈ tsa cua̱ liˈ, ndyanaa yaca queé, ndyalú lcaa cucuˈ queé, ndye chaˈ tsoˈo ñaˈa̱ jiˈi̱ liˈ. La cuiˈ juaˈa̱ tye chaˈ jiˈi̱ nguˈ culiyaˈ; laja loˈo ndyuˈni cña tiˈ nguˈ chaˈ tya caja la chaˈ tsoˈo jiˈi̱ nguˈ, tye chaˈ tsoˈo biˈ jiˈi̱ nguˈ liˈ.
\s Nu loˈo ndojolaqui nu xñaˈa̱ jiˈna chaˈ cuaˈni na chaˈ cuxi
\p
\v 12 Tsoˈo caca tyiquee ñati̱ nu ñaˈa̱ ti nxñi chaˈ jiˈi̱ Jesús, masi tyacua cua ñaˈa̱ ca chaˈ tiˈí jiˈi̱ nguˈ. Tsoˈo si talo nguˈ tyiqueeˈ, ñaˈa̱ cuayáˈ tye chaˈ tiˈí biˈ jiˈi̱ nguˈ, chaˈ caja chalyuu nu ná ngaˈa̱ chaˈ tye jiˈi̱ nguˈ biˈ liˈ; biˈ laca chaˈ tsoˈo nu cua nacui̱ Ni chaˈ ta Ni jiˈi̱ ñati̱ nu ntsuˈu tsa tyiquee ñaˈa̱ jiˈi̱ ycuiˈ Ni.
\v 13 Nu loˈo cojolaqui sca chaˈ cuxi jiˈna ni, ná tsoˈo si ñacui̱ na ndiˈya̱: “Ycuiˈ Ndyosi ndyuˈni chaˈ nñiloˈo chaˈ cuxi re ˈna”. Ná ntsuˈu chaˈ cuxi tsiyaˈ ti nu caca jiˈi̱ cñiloˈo jiˈi̱ ycuiˈ Ndyosi, loˈo juaˈa̱ ná nñiloˈo Ni jiˈi̱ ñati̱ loˈo sca chaˈ cuxi.
\v 14 Nu loˈo ndojolaqui chaˈ cuxi jiˈna, biˈ hora laca nu ná ndaquiyaˈ na jiˈi̱ sca chaˈ jiˈi̱ ycuiˈ Ni; liˈ la cuiˈ chaˈ cuxi nu ntsuˈu neˈ cresiya jiˈi̱ ycuiˈ ca na, biˈ laca nu ndatsaa jiˈna chaˈ tya cuaˈni la na chaˈ cuxi.
\v 15 Tsoˈo la ntiˈ na chaˈ cuaˈni na chaˈ cuxi biˈ, masi caca tlyu la quiˈya jiˈna; nu loˈo nguiˈi̱ na jiˈi̱ quiˈya biˈ jiˈna ñaˈa̱ cuayáˈ nu ngaˈaa caca xtyanu na jiˈi̱, liˈ xana na xtyanu na chalyuu tsoˈo nu cua ngujui jiˈna.
\p
\v 16 Cuˈma̱ tyaˈa ngusñi na chaˈ jiˈi̱ ycuiˈ Ndyosi, tyacaˈa tsa ma̱ ˈna; ná ta ma̱ chacuayáˈ chaˈ cñiloˈo nu xñaˈa̱ jiˈi̱ ma̱.
\v 17 Lcaa chaˈ xlyaˈbe nu ndyiji jiˈna ni, lcaa chaˈ nu chañi chaˈ xcuiˈ chaˈ tsoˈo laca biˈ, ca su ntucua ycuiˈ Ndyosi tsiyaˈ ti, ca biˈ ngutuˈu lcaa chaˈ biˈ, la cuiˈ ycuiˈ Ndyosi nu ngüiñá lcaa xee tlyu nu ngaˈa̱ nde cua̱. Sca ti cuayáˈ ñaˈa̱ loo ycuiˈ Ndyosi ñaˈa̱ Ni jiˈna; ná xcutsaˈa̱ Ni chaˈ nu ntsuˈu tyiquee Ni ñaˈa̱ Ni jiˈna, chaˈ ná ntsuˈu chaˈ tyaˈa̱chu̱ˈ Ni jiˈi̱ scaa chaˈ nu cua nchcuiˈ Ni loˈo ñati̱.
\v 18 Lcaa chaˈ nu liñi ca cuentya jiˈi̱ ycuiˈ Ndyosi, cua nguluˈu Ni chaˈ biˈ jiˈna chaˈ caca na ñati̱ jiˈi̱ ycuiˈ Ni, chaˈ juaˈa̱ ntiˈ Ni chaˈ caca; cua ntiˈ Ni chaˈ caca na loo jiˈi̱ lcaa ca lo na nu cua ngüiñá ycuiˈ Ni, juaˈa̱ ntiˈ Ni.
\s Chaˈ tacati nu ngaˈa̱ chaˈ cuaˈni na cuentya jiˈi̱ ycuiˈ Ndyosi
\p
\v 19 Cuˈma̱ tyaˈa ngusñi na chaˈ jiˈi̱ ycuiˈ Ndyosi, nu tsoˈo tsa ntsuˈu tyiquee naˈ ñaˈa̱a̱ jiˈi̱ ma̱, tsoˈo si cuiˈya ma̱ cuentya jiˈi̱ chaˈ nu chcuiˈ naˈ re. Ntsuˈu cña jiˈi̱ lcaa na chaˈ yala ti cuaˈa̱ jyaca̱ na jiˈi̱ chaˈ nu chcuiˈ ñati̱ loˈo na; pana tiyaˈ ti xacui̱ na chaˈ jiˈi̱ nguˈ, juaˈa̱ tiyaˈ tsa caca ñasi̱ˈ na jiˈi̱ nguˈ.
\v 20 Nu loˈo nchca ñasi̱ˈ na ni, ná taca cuaˈni na chaˈ liñi nu ntiˈ ycuiˈ Ndyosi chaˈ cuaˈni na nde chalyuu. 
\v 21 Loˈo juaˈa̱ ngaˈa̱ chaˈ culochu̱ˈ na lcaa chaˈ subaˈ, lcaa chaˈ cuxi nu tya ntsuˈu neˈ cresiya jiˈna; tucuá na chaˈ jiˈi̱ ycuiˈ Ndyosi lacua, xñi tsoˈo na lcaa chaˈ nu nda Ni chaˈ tyanu neˈ cresiya jiˈna, chaˈ biˈ laca chaˈ nu taca cuaˈni lyaá jiˈna jiˈi̱ nu cuxi nu ntsuˈu jiˈna.
\p
\v 22 Tsa biˈ ti chaˈ, ngaˈa̱ chaˈ taquiyaˈ na lcaa chaˈ nu nclyuˈu Ni jiˈna, siˈi na cuaˈa̱ jyaca̱ ti na jiˈi̱ chaˈ biˈ; na cñiloˈo ti na jiˈi̱ ycuiˈ ca na, si xcuiˈ na cuaˈa̱ jyaca̱ ti na jiˈi̱ chaˈ biˈ, loˈo ná ndaquiyaˈ na chaˈ biˈ.
\v 23 Cua ñaˈa̱ ca ñati̱ nu ntiˈ cuna ti chaˈ nu nda Ni loˈo na, loˈo liˈ ná ntajaˈa̱ cuaˈni chaˈ biˈ, laca ñati̱ biˈ ñiˈya̱ laca ñati̱ nu ñaˈa̱ cuiˈya xi jiˈi̱ ycuiˈ ca lo sca cuanaa;
\v 24 yala ntchaa ti ñaˈa̱ nguˈ jiˈi̱ ycuiˈ ca nguˈ lo cuanaa, pana loˈo cua ndyaa nguˈ, liˈ hora ti cjlyaa tiˈ nguˈ ñiˈya̱ ñaˈa̱ ycuiˈ ca nguˈ.
\v 25 Xtyucua ycuiˈ Ndyosi jiˈi̱ cua ñaˈa̱ ca ñati̱ nu chañi chaˈ cuaˈa̱ jyaca̱ jiˈi̱ chaˈ tsoˈo nu nda Ni chaˈ tyanu neˈ cresiya jiˈna; biˈ laca chaˈ nu xtyucua jiˈna chaˈ taca tyiˈi̱ tyiquee na tsoˈo ti. Si tsoˈo ti cuaˈni na nde chalyuu, si cuaˈni na lcaa cña nu nclyuˈu ycuiˈ Ndyosi jiˈna lcaa tsa̱ loˈo tyiˈi̱ na chalyuu, tsoˈo tsa caca jiˈna liˈ. Siˈi na nduna ti na chaˈ biˈ, loˈo liˈ xtyanu na jiˈi̱.
\p
\v 26 Ná tyiqueeˈ ntsuˈu xi nguˈ tyaˈa ma̱ nu ntiˈ chaˈ tacati tsa nduˈni ycuiˈ ca nguˈ. Pana laja ti nduˈni nguˈ chaˈ tacati nguˈ, si ná ndube tiˈ nguˈ ñiˈya̱ nchcuiˈ nguˈ loˈo ñati̱; na ñiloˈo nguˈ jiˈi̱ ycuiˈ ca nguˈ chaˈ tacati nguˈ liˈ.
\v 27 Si tyucui tyiquee na tsiyaˈ ti nduˈni na chaˈ tacati cuentya jiˈi̱ Ni, si siˈi na tucua chaˈ ntsuˈu tyiquee na, ndiˈya̱ ntiˈ ycuiˈ Ndyosi Sti na chaˈ cuaˈni na liˈ: ngaˈa̱ chaˈ xtyucua na jiˈi̱ nu sube tiˈi, juaˈa̱ ngaˈa̱ chaˈ xtyucua na jiˈi̱ nu cunaˈa̱ nu ndyanu tiˈi ti, nu loˈo nchcubeˈ tsa nguˈ ndiˈi̱ nguˈ chalyuu; pana ná tsoˈo tyatí̱ yuˈu na loˈo chaˈ cuxi nu ntsuˈu nde chalyuu.
\c 2
\s Sca ti cuayáˈ cuaˈni tsoˈo na loˈo cua ñaˈa̱ ca ñati̱ nu lijya̱ slo na
\p
\v 1 Cuˈma̱ tyaˈa ngusñi na chaˈ jiˈi̱ Jesucristo nu Xuˈna na, nu ntucua Ni ca su tsoˈo tsa ñaˈa̱ nde cua̱, ná tsoˈo si xaˈ ñaˈa̱ ntsuˈu tyiquee ma̱ ñaˈa̱ ma̱ jiˈi̱ xi scaa ñati̱; stuˈba ti cuaˈni ma̱ loˈo cua ñaˈa̱ ca ñati̱, tsoˈo la.
\v 2 Ná tyiqueeˈ ca̱a̱ tyu̱u̱ lo ñati̱ ca su ndyuˈu tiˈi̱ ma̱, masi nguˈ culiyaˈ nu ntsuˈu cuiˈ oro sne yaˈ nguˈ, cuati tsoˈo tsa ñaˈa̱ steˈ nguˈ, masi nguˈ tiˈi nu ngusu̱ tsa steˈ nguˈ.
\v 3 Ná tsoˈo si lye tsa cuaˈni chi̱ ma̱ loo sca ñati̱ nu nchcuˈ lateˈ nu tsoˈo tsa ñaˈa̱. Ná tsoˈo ñacui̱ ma̱ jiˈi̱ nu culiyaˈ biˈ: “Tyucua xi lo yaca xlya tsoˈo re, cusuˈ”, si ñacui̱ ma̱ jiˈi̱ sca nguˈ tiˈi ndiˈya̱: “Ndacua ti tyu̱ nuˈu̱. Cuaˈa̱ xi, masi lo yuu ti cua”. 
\v 4 Ntsuˈu quiˈya jiˈi̱ ma̱ liˈ, xquiˈya chaˈ xaˈ ñaˈa̱ ntsuˈu tyiquee ma̱ ñaˈa̱ ma̱ jiˈi̱ xi scaa ñati̱, loˈo juaˈa̱ cuxi ti ntsuˈu tyiquee ma̱ ñaˈa̱ ma̱ jiˈi̱ nu xaˈ ñati̱ biˈ liˈ.
\p
\v 5 Cuˈma̱ nguˈ tyaˈa na nu tyacaˈa tsa ma̱ ˈna, cuiˈya ma̱ cuentya jiˈi̱ chaˈ re: Cua ngusubi ycuiˈ Ndyosi jiˈi̱ ñati̱ tiˈi chaˈ taca xñi tsoˈo nguˈ chaˈ jiˈi̱ ycuiˈ Ni; ta Ni chalyuu tsoˈo jiˈi̱ nguˈ biˈ liˈ, la cuiˈ chalyuu nu nacui̱ Ni chaˈ caja jiˈi̱ ñati̱ nu ntsuˈu tsa tyiquee ñaˈa̱ jiˈi̱ ycuiˈ Ni. Masi tiˈi tsa ñati̱ biˈ nde chalyuu, pana culiyaˈ nguˈ cuentya jiˈi̱ ycuiˈ Ndyosi.
\v 6 Ná tsoˈo ndyuˈni cuˈma̱, chaˈ tiˈí tiˈ ma̱ ñaˈa̱ ma̱ jiˈi̱ nguˈ tiˈi. Xcuane naˈ sca chaˈ jiˈi̱ ma̱ lacua: ¿Ha siˈi nu culiyaˈ laca nu tiˈí tiˈ jiˈi̱ ma? ¿Ha siˈi nu culiyaˈ laca nu ndyaˈa̱loˈo jiˈi̱ ma̱ ca slo nguˈ tisiya?
\v 7 La cuiˈ nguˈ biˈ laca nu nchcuiˈ tsa chaˈ cuxi jiˈi̱ ycuiˈ Jesús nu ntsuˈu tsa chaˈ jiˈna loˈo.
\p
\v 8 Tsoˈo tsa si chañi chaˈ ndaquiyaˈ ma̱ chaˈ cusuˈ nu nscua tya clyo la; ndiˈya̱ nchcuiˈ chaˈ biˈ: “Ntsuˈu chaˈ cuaˈni tyaˈna tiˈ na jiˈi̱ tyaˈa ñati̱ na, ñiˈya̱ laca si nduˈni tyaˈna tiˈ na jiˈi̱ ycuiˈ ca na”, nacui̱ quityi.
\v 9 Si xaˈ ca ñaˈa̱ nduˈni ma̱ loˈo xi scaa ñati̱, cuxi nduˈni ma̱ liˈ, ntsuˈu quiˈya jiˈi̱ ma̱ cuentya jiˈi̱ ycuiˈ Ndyosi liˈ; la cuiˈ juaˈa̱ ndyuˈu chaˈ nu nscua lo quityi cusuˈ biˈ.
\v 10 Ñati̱ nu ndaquiyaˈ lcaa cña nu ngulo ycuiˈ Ndyosi jiˈna chaˈ cuaˈni na, loˈo liˈ ntsuˈu masi sca ti chaˈ cuxi nu ndyuˈni nguˈ biˈ, sca ti cuayáˈ ntsuˈu quiˈya jiˈi̱ nguˈ, ñiˈya̱ laca si ná ndaquiyaˈ nguˈ tsiyaˈ ti jiˈi̱ lcaa cña nu cua ngulo ycuiˈ Ni jiˈna.
\v 11 Ycuiˈ Ndyosi laca nu cua nacui̱ tyucuaa lo chaˈ ndiˈya̱: “Ná tyuˈu chaˈ jiˈi̱ ma̱ loˈo clyoˈo xaˈ ñati̱”, nacui̱ Ni; loˈo juaˈa̱: “Ná cujuii ma̱ jiˈi̱ tyaˈa ñati̱ ma̱”, nacui̱ Ni. Si cujuii ma̱ jiˈi̱ tyaˈa ñati̱ ma̱, ntsuˈu quiˈya jiˈi̱ ma̱ lacua, masi ná ntsuˈu chaˈ jiˈi̱ ma̱ loˈo clyoˈo xaˈ ñati̱; sca ti cuayáˈ cua ndyaˈa̱chu̱ˈ ma̱ jiˈi̱ chaˈ nu cua nchcuiˈ ycuiˈ Ndyosi loˈo na liˈ. 
\v 12 Cua nda Jesús sca chaˈ tsoˈo chaˈ tyanu neˈ cresiya jiˈna, chaˈ xtyucua jiˈna chaˈ taca tyiˈi̱ tyiquee na tsoˈo ti. Ngaˈa̱ chaˈ chcuiˈ tsoˈo na, juaˈa̱ ntsuˈu chaˈ cuaˈni na chaˈ tsoˈo loˈo ndiˈi̱ na chalyuu, chaˈ cua tyalaa ti tsa̱ nu loˈo cuaˈni cuayáˈ Ni jiˈi̱ lcaa ñati̱ chalyuu.
\v 13 Loˈo liˈ si ná nguaˈni tyaˈna tiˈ na jiˈi̱ tyaˈa ñati̱ na, ná taca cuaˈni tyaˈna tiˈ Ni jiˈna loˈo cuaˈni cuayáˈ Ni jiˈna; pana ñati̱ nu nguaˈni tyaˈna tiˈ jiˈi̱ tyaˈa ñati̱ ni, biˈ ñati̱ laca nu tsoˈo la caca chaˈ jiˈi̱ hora loˈo cuaˈni cuayáˈ Ni jiˈi̱ ñati̱.
\s Ntsuˈu cña tsoˈo chaˈ cuaˈni na loˈo ngusñi na chaˈ jiˈi̱ ycuiˈ Ni
\p
\v 14 Cuˈma̱ tyaˈa ngusñi na chaˈ jiˈi̱ Jesús, ná taca ñacui̱ na chaˈ ntsuˈu chaˈ jiˈna loˈo Jesús, si ná loˈo nduˈni na chaˈ tsoˈo nu xtyucua jiˈi̱ tyaˈa ñati̱ na. Sca ti ngusñi tsoˈo na chaˈ jiˈi̱ Jesús, si cuaˈni na chaˈ tsoˈo juaˈa̱; liˈ tyajaˈa̱ Ni cuaˈni lyaá Ni jiˈna.
\v 15 Ná tyiqueeˈ ntsuˈu nguˈ tyaˈa ndyuˈu tiˈi̱ ma̱ nu lyiji tsa steˈ nguˈ, nu lyiji tsa na cacu nguˈ, masi quiˈyu, masi cunaˈa̱.
\v 16 Si chcuiˈ ma̱ loˈo nguˈ biˈ ndiˈya̱: “Xtyucua Ni jiˈi̱ ma̱”, ñacui̱ ma̱ jiˈi̱ nguˈ, “cacuˈ ma̱ steˈ ma̱ chaˈ caca chcatsu̱ ma̱, cacu tsoˈo ma̱ tyaja”, ñacui̱ ma̱ jiˈi̱ nguˈ, pana ná nda ma̱ na nu lyiji jiˈi̱ nguˈ biˈ liˈ, ¿ha tsoˈo ntiˈ ma̱ chaˈ nchcuiˈ ma̱ loˈo nguˈ juaˈa̱? Ná tsoˈo chcuiˈ ma̱ juaˈa̱, chaˈ cua ngujlyaa tiˈ ma̱ chaˈ jiˈi̱ ycuiˈ Ndyosi si chcuiˈ ma̱ juaˈa̱; 
\v 17 ná taca ñacui̱ na jiˈi̱ nguˈ chaˈ cua ngusñi na chaˈ jiˈi̱ ycuiˈ Ndyosi, si ná loˈo cuaˈni na chaˈ tsoˈo nu xtyucua jiˈi̱ tyaˈa ñati̱ na.
\p
\v 18 Ná tyiqueeˈ ñacui̱ sca ñati̱ jiˈna: “Tsoˈo tsa ngusñi ma̱ chaˈ jiˈi̱ ycuiˈ Ndyosi tuˈni. Pana nu naˈ ni, ntiˈ naˈ chaˈ cuayáˈ tsa cuentya jiˈi̱ ycuiˈ Ndyosi masi cuaˈni naˈ xi chaˈ tsoˈo loˈo ñati̱”, ñacui̱ nguˈ. Tsoˈo lacua. Ndiˈya̱ chcuiˈ naˈ loˈo nguˈ biˈ liˈ: “Cachaˈ ma̱ ˈna lacua chaˈ cua ngusñi ma̱ chaˈ jiˈi̱ ycuiˈ Ni, masi ndyuˈni ma̱ chaˈ tsoˈo loˈo ñati̱; pana laja loˈo ndyuˈni tsoˈo naˈ loˈo ñati̱, liˈ ca cuayáˈ tiˈ ma̱ chaˈ chañi chaˈ ngusñi naˈ chaˈ jiˈi̱ ycuiˈ Ni”, ñacui̱ naˈ jiˈi̱ nguˈ biˈ.
\v 19 Jlya tiˈ ma̱ chaˈ sca ti ycuiˈ Ndyosi ntsuˈu chalyuu. Tsoˈo tsa, pana cua ñaˈa̱ ca cuiˈi̱ xñaˈa̱ jlya tiˈ chaˈ biˈ; loˈo juaˈa̱ lye tsa nchcua̱ cuiˈi̱ xñaˈa̱ biˈ, chaˈ ntsi̱i̱ cuiˈi̱ jiˈi̱ ycuiˈ Ni.
\v 20 Ngaˈa̱ chaˈ ca cuayáˈ tiˈ ma̱, chaˈ ná chañi chaˈ ngusñi na chaˈ jiˈi̱ ycuiˈ Ndyosi si ná loˈo cuaˈni na chaˈ tsoˈo chaˈ xtyucua na jiˈi̱ tyaˈa ñati̱ na. 
\v 21 Ndiˈya̱ ngua chaˈ ngua cuayáˈ tiˈ ycuiˈ Ndyosi chaˈ ngua tsoˈo cresiya jiˈi̱ Abraham, jyoˈo cusuˈ jiˈna: naˈa̱ Ni chaˈ ntajaˈa̱ nu cusuˈ ta jiˈi̱ sñiˈ ycuiˈ ca, nu Isaac biˈ, chaˈ caca yu sca msta̱.
\v 22 Ntsuˈu sca cña nu nguaˈni Abraham lacua. Xquiˈya biˈ ngua cuayáˈ tiˈ ycuiˈ Ndyosi chaˈ cua ngusñi Abraham chaˈ nu nchcuiˈ Ni loˈo; jlya tsa tiˈ nu cusuˈ chaˈ biˈ, biˈ chaˈ ntajaˈa̱ yu nguaˈni yu cña biˈ.
\v 23 Biˈ laca chaˈ nu nscua lo quityi cusuˈ ndiˈya̱: “Ngusñi Abraham chaˈ jiˈi̱ ycuiˈ Ndyosi, biˈ chaˈ ntucuá Ni chaˈ jiˈi̱ Abraham chaˈ caca yu sca ñati̱ nu lubii tsa cresiya jiˈi̱”. Tyaˈa tsoˈo ycuiˈ Ndyosi ngua Abraham liˈ, nacui̱ quityi.
\p
\v 24 Juaˈa̱ ca cuayáˈ tiˈ cuˈma̱ lacua, chaˈ ntajaˈa̱ ycuiˈ Ndyosi tucuá Ni chaˈ jiˈi̱ ñati̱ loˈo ndyuˈni nguˈ chaˈ tsoˈo, siˈi xquiˈya chaˈ nacui̱ ti nguˈ chaˈ jlya tiˈ nguˈ jiˈi̱ Ni.
\v 25 La cuiˈ juaˈa̱ ntucuá Ni chaˈ jiˈi̱ nu cunaˈa̱ calle nu ngua naa Rahab; ntucuá Ni chaˈ nu nchcuiˈ maˈ biˈ, ñiˈya̱ laca si ngua maˈ sca ñati̱ tsoˈo, xquiˈya chaˈ tsoˈo tsa cña nu nguaˈni maˈ cuentya jiˈi̱ ycuiˈ Ndyosi. Cua nda maˈ su ngutiˈi̱ nguˈ nu ndyaa naˈa̱ jiˈi̱ quichi̱ tyi maˈ cuaana ti; liˈ nguluˈu maˈ chaca tyucui̱i̱ jiˈi̱ nguˈ su tyaa tsoˈo ti nguˈ biˈ, chaˈ xna nguˈ jiˈi̱ nguˈ xñaˈa̱ liˈ.
\v 26 Loˈo juaˈa̱ nu na ni, si ñacui̱ na chaˈ cua ngusñi na chaˈ jiˈi̱ ycuiˈ Ndyosi, pana ná nduˈni na chaˈ tsoˈo nu xtyucua jiˈi̱ tyaˈa ñati̱ na, liˈ laca na ñiˈya̱ laca ñati̱ nu ndyaa cresiya jiˈi̱ chaˈ cua ngujuii nguˈ.
\c 3
\s Cuaˈa na xi jiˈi̱ chaˈ nu chcuiˈ na
\p
\v 1 Cuˈma̱ tyaˈa ngusñi na chaˈ jiˈi̱ Cristo, ná tsoˈo si tyu̱u̱ tsa tyaˈa ma̱ culuˈu ma̱ jiˈi̱ tyaˈa ñati̱ ma̱; cuayáˈ xti ti na caca na mstru nu culuˈu chaˈ jiˈi̱ ycuiˈ Ndyosi jiˈi̱ nguˈ tyaˈa na. Cua jlo tiˈ ma̱ chaˈ lye tsa ndiˈi̱ loo nguˈ ñaˈa̱ nguˈ jiˈna, biˈ chaˈ yala tsa chcuiˈ nguˈ jiˈna si xñi na cña chaˈ culuˈu na jiˈi̱ nguˈ tyaˈa na.
\v 2 Chañi laca chaˈ ntsuˈu quiyaˈ lcaa na ndyuˈu tsaa tuˈba na loˈo nchcuiˈ na loˈo tyaˈa ñati̱ na; ná ntsuˈu ni sca ñati̱ nu bilya tyuˈu tsaa tuˈba tsiyaˈ ti, nu loˈo nchcuiˈ nguˈ loˈo tyaˈa ñati̱ nguˈ. Si ntsuˈu ñati̱ nu nchca jiˈi̱ cuaˈa jiˈi̱ chaˈ nu nchcuiˈ ycuiˈ ca nguˈ, ñati̱ nu tyucui tyiquee tsiyaˈ ti laca nguˈ biˈ. Ná tyiqueeˈ taca cuaˈa nguˈ biˈ jiˈi̱ ñaˈa̱ tsaca nguˈ, si juaˈa̱; pana tucui tsa laca chaˈ cuaˈa na jiˈi̱ ycuiˈ ca na, chaˈ ná chcuiˈ na chaˈ cuxi.
\v 3 Ndiˈya̱ nduˈni na loˈo sca cuayu: nsta na chcua̱ tyu tuˈba niˈ, chaˈ liˈ taca culo na cña jiˈi̱ niˈ, chaˈ tsaa niˈ loˈo na macala su ntiˈ na chaˈ tsaa na.
\v 4 Xaˈ ñaˈa̱ nduˈni nguˈ loˈo nclyaˈ nguˈ sca yaca niˈi̱: nu ñati̱ nu laca loo jiˈi̱ yaca niˈi̱ ni, loˈo calaˈ nguˈ sca yaˈ piti nu ntucua nde siyuˈ yaca niˈi̱ biˈ, taca jiˈi̱ nguˈ tsaloˈo nguˈ jiˈi̱ macala su ntiˈ nguˈ chaˈ tsaa nguˈ loˈo. Masi tonu tsa yaca niˈi̱ biˈ, masi lye tsa ndyaca cuiˈi̱ nu ndyaloˈo jiˈi̱, taca jiˈi̱ nguˈ tsaloˈo nguˈ jiˈi̱ macala su ntiˈ nguˈ tsaa nguˈ. 
\v 5 La cuiˈ juaˈa̱ laca loˈo sca chaˈ nu nchcuiˈ na; masi xca ti chaˈ laca biˈ ntiˈ na, pana quiñaˈa̱ tsa chaˈ tlyu nchcuiˈ na ntsuˈu quiyaˈ. Tucui tsa laca chaˈ cuaˈa na jiˈi̱ tuˈba na, chaˈ ná chcuiˈ na chaˈ cuxi juaˈa̱. Loˈo juaˈa̱ quiñaˈa̱ tsa chaˈ cuxi taca cuaˈni sca chaˈ nu chcuiˈ na; ñiˈya̱ laca chaˈ xti ti quiiˈ ntiˈ chaˈ chcaˈa̱ quiiˈ jiˈi̱ quixi̱ˈ tonu, quiñaˈa̱ tsa su tyaqui̱ quixi̱ˈ liˈ.
\v 6 Ñiˈya̱ laca sca quiiˈ, juaˈa̱ laca sca chaˈ nu chcuiˈ na; xquiˈya biˈ taca xana chaca chalyuu nu cuxi tsa jiˈna, nu loˈo cua ndyatí̱ nu chaˈ cuxi biˈ ndyaa nde neˈ cresiya jiˈna. Xana cañi chaˈ cuxi biˈ tyucui ñaˈa̱ na liˈ. Xquiˈya sca chaˈ nu chcuiˈ ti na, ndyacaˈa̱ quiiˈ liˈ; loˈo nu quiiˈ biˈ ni, nde ca bilyaa tsiyaˈ ti ndyuˈu biˈ lijya̱ cañi lcaa su ndiˈi̱ na.
\v 7 Taca jiˈi̱ ñati̱ chalyuu cuaˈni masu jiˈi̱ lcaa lo naˈni tyaala, masi naˈni nu ndyaˈa̱ quiyaˈ ti, masi naˈni nu ndyacui cua̱, masi naˈni nu subeˈ neˈ niˈ lo yuu, masi naˈni nu ntsuˈu lo tyujoˈo; na cua ndyuˈni masu ñati̱ jiˈi̱ lcaa lo naˈni biˈ.
\v 8 Pana chaˈ nu nchcuiˈ na ni, ná caja ñiˈya̱ nu cuaˈni masu na jiˈi̱, chaˈ ngaˈaa chcuiˈ na chaˈ cuxi loˈo ñati̱. Cuxi tsa laca tuˈba na, ná nchca jiˈna cuaˈa na jiˈi̱ ycuiˈ ca na. Ñiˈya̱ laca hitya tyaala nu ntsuˈu tuˈba cuaña tyaala, juaˈa̱ ntiˈ tuˈba na, chaˈ ntsuˈu tsa chaˈ cuxi nu nchcuiˈ na.
\v 9 Tucua lo chaˈ nchcuiˈ na, chaˈ ndyuˈni tlyu na jiˈi̱ ycuiˈ nu Xuˈna na, la cuiˈ Ndyosi Sti na; loˈo juaˈa̱ nsta na quiˈya jiˈi̱ tyaˈa ñati̱ na, masi ngüiñá ycuiˈ Ndyosi jiˈi̱ lcaa ñati̱ chalyuu na chaˈ laca na ñiˈya̱ ñaˈa̱ ycuiˈ Ni.
\v 10 La cuiˈ tyuu tuˈba na ndyuˈu lcaa chaˈ nu nchcuiˈ na, masi chaˈ tsoˈo nu nchcuiˈ na loˈo ycuiˈ Ndyosi, masi chaˈ cuxi nu nchcuiˈ na loˈo tyaˈa ñati̱ na. Cuˈma̱ tyaˈa ngusñi na chaˈ jiˈi̱ Cristo, ná tsoˈo chaˈ ndyaca juaˈa̱.
\v 11 Siˈi sca ti tyuu pilya ntyucua hitya tsoˈo stuˈba ti loˈo ntyucua hitya cñiˈ.
\v 12 Juaˈa̱ loˈo yaca siˈyu ni; ná taca tyuˈu ntsati̱ jiˈi̱ yaca quixuu, ni ná taca tyuˈu quixuu jiˈi̱ yaca jaˈba, chaˈ ná ca quixaˈ chaˈ. Ná caja hitya nu tsoˈo coˈo na ca su ntyucua hitya cñiˈ.
\s Nu loˈo chañi chaˈ tsoˈo tsa nchca cuayáˈ tiˈ na scaa chaˈ
\p
\v 13 Nu loˈo ntiˈ ma̱ chaˈ tsoˈo tsa nchca jiˈi̱ ma̱ nchcuiˈ ma̱, chaˈ tsoˈo tsa nduna ma̱ scaa chaˈ nu nda ñati̱ loˈo ma̱, liˈ xcuiˈ chaˈ tsoˈo ti cuaˈni ma̱ laja loˈo ndiˈi̱ ma̱ chalyuu, chaˈ taca cuiˈya xaˈ la ñati̱ cuentya jiˈi̱ ma̱ chaˈ ñati̱ tsoˈo laca ma̱. Ná quiñaˈa̱ chaˈ tyuˈu tyiquee ma̱ ñaˈa̱ ma̱ jiˈi̱ nguˈ, pana tsoˈo ti chcuiˈ ma̱ loˈo nguˈ.
\v 14 Ná taca ñaˈa̱ nguˈ chaˈ ñati̱ tsoˈo laca ma̱ si liyeˈ tiˈ ma̱, si chiyaˈa̱ tsa ntsuˈu tyiquee ma̱ ñaˈa̱ ma̱ jiˈi̱ ñati̱, si xcuiˈ cña jiˈi̱ ycuiˈ ca ma̱ ntsuˈu tyiquee ma̱; na nñiloˈo ma̱ jiˈi̱ tyaˈa ma̱ si juaˈa̱ nduˈni ma̱, hasta ndacu̱ˈ ma̱ chaˈ liñi nu cua nda ycuiˈ Ndyosi lijya̱ chalyuu.
\v 15 Siˈi nde su ntucua ycuiˈ Ndyosi ndyuˈu chaˈ cuxi nu nchcuiˈ ma̱, sca chaˈ cuxi nu ntsuˈu chalyuu laca biˈ; sca chaˈ nu cua nda ycuiˈ nu xñaˈa̱ laca chaˈ nu nchcuiˈ ma̱ biˈ.
\v 16 Si liyeˈ tiˈ na jiˈi̱ tyaˈa na, si xcuiˈ cña jiˈi̱ ycuiˈ ca na ntsuˈu tyiquee na, ná caca stuˈba chaˈ jiˈna loˈo tyaˈa na liˈ; lcaa lo chaˈ cuxi caca cuaˈni na liˈ.
\v 17 Pana lcaa chaˈ nu nda ycuiˈ Ndyosi chaˈ chcuiˈ na loˈo ñati̱, xcuiˈ chaˈ tsoˈo laca biˈ; ná nguxaˈ chaˈ tsoˈo biˈ loˈo chaˈ cuxi, ná ntsuˈu chaˈ xu̱u̱ tyaˈa na loˈo tyaˈa ñati̱ na. Chaˈ tsoˈo ti laca nu nda Ni chaˈ chcuiˈ na loˈo ñati̱, chaˈ xcuiˈ na tsoˈo ti cuaˈni na loˈo ñati̱ liˈ. Loˈo juaˈa̱ nduˈni chaˈ biˈ, chaˈ cuaˈni tyaˈna tiˈ na jiˈi̱ ñati̱, ñaˈa̱ cuayáˈ nu cuaˈni na chaˈ tsoˈo chaˈ xtyucua na jiˈi̱ nguˈ; nduˈni chaˈ sca ti chaˈ liñi chcuiˈ na loˈo ñati̱, siˈi chaˈ cuiñi chcuiˈ na loˈo nguˈ.
\v 18 Tsoˈo tsa ndyuˈni ñati̱ nu ná nclyana chaˈ cusu̱u̱ loˈo tyaˈa ñati̱, ñati̱ nu tsoˈo tsa ntsuˈu tyiquee nchcuiˈ loˈo tyaˈa ñati̱. Tiyaˈ la liˈ tyuˈu tucua quiñaˈa̱ la chaˈ tsoˈo nu cua ntiˈ ycuiˈ Ndyosi chaˈ caca nde chalyuu, xquiˈya chaˈ nclyacua tsoˈo tiˈ nguˈ biˈ. 
\c 4
\s Ná cuaˈni tyaˈa na loˈo ñati̱ cuxi nu ntsuˈu chalyuu 
\p
\v 1 ¿Ni chaˈ laca lye tsa nxu̱u̱ tyaˈa ma̱? ¿Ni chaˈ laca lyaˈ tsa tiˈ ma̱ jiˈi̱ tyaˈa ñati̱ ma̱? ¿Ha siˈi na ndacui tsa tiˈ ma̱ jiˈi̱ scaa na nu ntsuˈu jiˈi̱ tyaˈa ñati̱ ma̱? Ná nchca jiˈi̱ ma̱ chaˈ ti̱ ti tyiˈi̱ tyiquee ma̱ loˈo tyaˈa ma̱ xquiˈya lcaa lo chaˈ cuxi nu ndiya tsa tiˈ ma̱ jiˈi̱.
\v 2 Si ntsuˈu sca chaˈ nu tiji̱ˈ tsa tiˈ ma̱ jiˈi̱, loˈo ná ntsuˈu chacuayáˈ chaˈ caja chaˈ biˈ jiˈi̱ ma̱, liˈ ntiˈ ma̱ cujuii ma̱ jiˈi̱ ñati̱, chaˈ juaˈa̱ taca caja chaˈ biˈ jiˈi̱ ma̱, ntiˈ ma̱. La cuiˈ juaˈa̱ si ndacui tsa tiˈ ma̱ jiˈi̱ sca na nu ná nchca caja jiˈi̱ ma̱, liˈ nchcuiˈ ma̱ chaˈ tiˈí jiˈi̱ nu ca jiˈi̱ na biˈ, nxu̱u̱ tyaˈa ma̱ loˈo nguˈ biˈ liˈ. Pana ná ndyiji na nu ntiˈ ma̱ caja jiˈi̱ ma̱, xquiˈya chaˈ ná ndijña ma̱ chaˈ biˈ jiˈi̱ ycuiˈ Ndyosi su clyo;
\v 3 masi ndijña ma̱ sca chaˈ jiˈi̱ ycuiˈ Ndyosi, pana cuxi tsa tyiquee ma̱, biˈ chaˈ ná ndyiji chaˈ biˈ jiˈi̱ ma̱ liˈ. Tsa nde ti chaˈ ntsuˈu tyiquee ma̱: cua ntiˈ ma̱ chaˈ caja jiˈi̱ ma̱ cua ñaˈa̱ ca chaˈ nu tyaalaˈ tyiquee ycuiˈ ca ma̱, pana ná tsoˈo chaˈ ndyuˈni ma̱ juaˈa̱;
\v 4 cua nguxtyanu ma̱ jiˈi̱ ycuiˈ Ndyosi, cua ntsuˈu chaˈ jiˈi̱ ma̱ loˈo sca chaˈ nu cuxi tsa, si juaˈa̱ ndyuˈni ma̱. ¿Ha ná nchca cuayáˈ tiˈ ma̱ chaˈ tyaˈa cusu̱u̱ ycuiˈ Ndyosi laca na, si xcuiˈ chaˈ jiˈi̱ ycuiˈ ca ti na ntsuˈu tyiquee na? Na nxu̱u̱ tyaˈa na loˈo ycuiˈ Ndyosi, si cuaˈni tyaˈa na loˈo nu cuxi nu ntsuˈu nde chalyuu.
\v 5 Ndiˈya̱ nscua chaˈ lo quityi jiˈi̱ ycuiˈ Ndyosi, loˈo juaˈa̱ siˈi chaˈ laja ti nda Ni: “Nu Xtyiˈi ycuiˈ Ndyosi nu nda Ni chaˈ tyanu neˈ cresiya jiˈna, ntsuˈu tsa tyiquee Ni ñaˈa̱ Ni jiˈna; pana yala tsa caca chi̱i̱ tiˈ Ni jiˈna, si loˈo ntsuˈu sca chaˈ cuxi loo”. Juaˈa̱ nacui̱ quityi. 
\v 6 Tlyu la tsiyaˈ ti chaˈ tsoˈo nu nduˈni ycuiˈ Ndyosi loˈo na, chaˈ xtyucua Ni jiˈna. Ndiˈya̱ nscua chaca chaˈ lo quityi jiˈi̱ ycuiˈ Ndyosi: “Ná sca na ta ycuiˈ Ni jiˈi̱ ñati̱ nu xcuiˈ tyiji̱loo jiˈi̱ tyaˈa ñati̱ nguˈ, ntiˈ nguˈ; pana quiñaˈa̱ tsa chaˈ tsoˈo nduˈni Ni loˈo ñati̱ nu tsoˈo ti ndiˈi̱ chalyuu, nu ná ndyuˈni tyucuaa tiˈ loˈo xaˈ ñati̱”, nacui̱ quityi biˈ.
\v 7 Taquiyaˈ ma̱ chaˈ jiˈi̱ ycuiˈ Ndyosi lacua. Xu̱u̱ tyaˈa ma̱ loˈo nu xñaˈa̱, loˈo liˈ xna nu cuxi biˈ, tyuˈu clya biˈ su ndiˈi̱ ma̱ liˈ.
\v 8 Tsoˈo tsa xñi ma̱ chaˈ jiˈi̱ ycuiˈ Ndyosi, loˈo liˈ tucuá Ni chaˈ jiˈi̱ ma̱. Si ntsuˈu tsa quiˈya jiˈi̱ ma̱, ngaˈa̱ chaˈ xtyanu ma̱ lcaa chaˈ cuxi nu ntsuˈu chaˈ jiˈi̱ ma̱ loˈo; juaˈa̱ cuaˈni tye ma̱ jiˈi̱ lcaa chaˈ cuiñi nu ntsuˈu neˈ cresiya jiˈi̱ ma̱.
\v 9 Ntsuˈu chaˈ ca xñiˈi̱ tiˈ ma̱ xquiˈya nu quiñaˈa̱ tsa chaˈ cuxi nu ntsuˈu neˈ cresiya jiˈi̱ ma̱, biˈ chaˈ nduˈni chaˈ xiˈya ma̱, nduˈni chaˈ cunaa ma̱ xquiˈya chaˈ cuxi biˈ. Xiˈya ca ma̱ juani, masi nxtyí tsa ma̱ nquichaˈ; ca xñiˈi̱ tsa tiˈ ma̱ juani, masi chaa tsa tiˈ ma̱ nquichaˈ.
\v 10 Cuaˈni ma̱ chaˈ ca tyujuˈu tiˈ ma̱ nde loo ycuiˈ Ndyosi jiˈi̱ quiˈya nu ntsuˈu jiˈi̱ ma̱, loˈo liˈ ta Ni sca seˈi̱ tsoˈo la su tyiˈi̱ ma̱ ca su ntucua ycuiˈ Ni.
\s Ná chcuiˈ na chaˈ tiˈí jiˈi̱ nguˈ tyaˈa na
\p
\v 11 Cuˈma̱ tyaˈa ngusñi ma̱ chaˈ jiˈi̱ Cristo, ná chcuiˈ ma̱ jiˈi̱ nguˈ tyaˈa ma̱. Si chcuiˈ cuxi na jiˈi̱ nguˈ tyaˈa na ni, si sta na quiˈya jiˈi̱ nguˈ biˈ, laca chaˈ nchcuiˈ cuxi na jiˈi̱ lcaa chaˈ nu nda ycuiˈ Ndyosi Sti na loˈo ñati̱ tya clyo la; na ndacu̱ˈ na jiˈi̱ chaˈ biˈ. Juaˈa̱ ndyuˈu chaˈ si chcuiˈ na chaˈ tiˈí jiˈi̱ nguˈ tyaˈa na. Si ná ndaquiyaˈ na jiˈi̱ lcaa chaˈ nu cua nda ycuiˈ Ndyosi loˈo na, si chcuiˈ cuxi na jiˈi̱ chaˈ biˈ, na ndacu̱ˈ na jiˈi̱ chaˈ nu cua nda Ni loˈo na; juaˈa̱ ndyuˈu chaˈ liˈ.
\v 12 Loˈo ycuiˈ Ndyosi ni, sca ti ycuiˈ Ni laca nu cua nda chaˈ biˈ loˈo ñati̱ tya clyo; sca ti ycuiˈ Ni cuaˈni cuayáˈ Ni jiˈi̱ lcaa ñati̱ cuentya jiˈi̱ chaˈ biˈ nde loo la; sca ti ycuiˈ Ni taca jiˈi̱ Ni cuaˈni lyaá Ni jiˈi̱ ñati̱, nu loˈo cuityi̱ Ni quiˈya nu ntsuˈu jiˈi̱ nguˈ; juaˈa̱ ycuiˈ Ndyosi laca nu taca cuaˈni tye Ni jiˈi̱ ñati̱ tsiyaˈ ti, nu loˈo ntiˈ ti Ni. Ná stuˈba laca ma̱ loˈo ycuiˈ Ndyosi, biˈ chaˈ ná ntsuˈu chacuayáˈ jiˈi̱ ma̱ chaˈ cuaˈni cuayáˈ ma̱ jiˈi̱ tyaˈa ñati̱ ma̱.
\s Ná chcuiˈ na quiñaˈa̱ tsa chaˈ tonu loˈo tyaˈa ñati̱ na
\p
\v 13 Ngaˈa̱ chaˈ chcuiˈ naˈ sca chaˈ loˈo cuˈma̱, chaˈ ntsuˈu cuˈma̱ nu nchcuiˈ ma̱ ndiˈya̱: “La quee, ca bcha la tsaa ya ca quichi̱ tyijyuˈ biˈ”, nacui̱ ma̱. “Ca biˈ tyanu ya tyucui sca yija̱, chaˈ quiñaˈa̱ tsa ngana cuaˈni ya ca biˈ”, nacui̱ ma̱.
\v 14 Pana ná sca chaˈ jlo tiˈ ma̱ tsiyaˈ ti ñiˈya̱ ñaˈa̱ chalyuu nu caja jiˈi̱ ma̱ quee bcha la. Chalyuu su ndiˈi̱ na juani, ñiˈya̱ laca sca cuichi coo, juaˈa̱ laca biˈ; tsiyaˈ ca ndyuˈu tucua cuichi coo, loˈo juaˈa̱ yala ti ncliji yuˈu biˈ.
\v 15 Tsoˈo la si ndiˈya̱ ti chaˈ ta ma̱ loˈo ñati̱: “Nde ti tyiˈi̱ ya”, ñacui̱ ma̱, “nde cña cuaˈni ya; masi cña biˈ cuaˈni ya, sca ti si ta ycuiˈ Ndyosi chacuayáˈ cuaˈni ya juaˈa̱”, ñacui̱ ma̱.
\v 16 Pana siˈi juaˈa̱ nchcuiˈ ma̱ juani, chaˈ tyixi tsa ndyuˈni ma̱ loˈo tyaˈa ñati̱ ma̱; lye tsa nchcuiˈ tyucuaa tiˈ ma̱ loˈo nguˈ tyaˈa ma̱. Lcaa quiyaˈ loˈo nchcuiˈ ma̱ juaˈa̱, chaˈ cuxi laca biˈ.
\v 17 Loˈo liˈ ntsuˈu quiˈya jiˈi̱ ma̱, chaˈ ná ntajaˈa̱ ma̱ cuaˈni ma̱ sca cña tsoˈo nu ngulo ycuiˈ Ni jiˈi̱ ma̱ chaˈ cuaˈni ma̱.
\c 5
\s Sca chaˈ nu nchcuiˈ yu loˈo nguˈ culiyaˈ
\p
\v 1 Juani ni, cuaˈa̱ jyaca̱ ma̱ xi ˈna laja loˈo ta naˈ sca chaˈ loˈo cuˈma̱, nu laca ma̱ nguˈ culiyaˈ. Tsoˈo la si xiˈya ma̱ juani, cunaa ma̱ liˈ xquiˈya chaˈ tiˈí nu cua lijya̱ chaˈ tyacua jiˈi̱ ma̱,
\v 2 chaˈ cua nguliji yuˈu chaˈ culiyaˈ jiˈi̱ ma̱ juaˈa̱ ti. Cua ngunuˈu̱ lyiji lcaa lateˈ tsoˈo jiˈi̱ ma̱, chaˈ cua ndyacu cuixu̱ˈ jiˈi̱.
\v 3 Loˈo juaˈa̱ cua ntyucua cuayaaˈ chu̱ˈ lcaa chcua̱ oro jiˈi̱ ma̱, lcaa chcua̱ plata jiˈi̱ ma̱. Nu loˈo ñaˈa̱ nguˈ ñiˈya̱ ndyaca jiˈi̱ yuˈba biˈ jiˈi̱ ma̱, liˈ ca cuayáˈ tiˈ nguˈ chaˈ ñiˈya̱ loˈo ngunuˈu̱ chcua̱ oro chcua̱ plata nu ntsuˈu jiˈi̱ ma̱, juaˈa̱ cua ndye chaˈ jiˈi̱ lcaa ma̱; ñiˈya̱ laca si ndyaqui̱ lyiji ma̱ lo quiiˈ, cua ndye chaˈ jiˈi̱ ma̱ liˈ. Quiñaˈa̱ tsa chaˈ tsoˈo cua nguxcoˈo ma̱ nquichaˈ, chaˈ cuaˈnijoˈo jiˈi̱ ma̱ nde chalyuu, pana cua ngulala ti tye lcaa chaˈ nde lo yuu chalyuu.
\v 4 Loˈo juaˈa̱ ná nda ma̱ xcayaˈ msu nu ndyaa neˈ xña jiˈi̱ ma̱, biˈ chaˈ juani cuaˈa̱ jyaca̱ ma̱ xi jiˈi̱ chaˈ nu nxlyú msu biˈ hichu̱ˈ ma̱; ca su ntucua ycuiˈ Ndyosi nu laca Xuˈna lcaa chalyuu, ca biˈ ndañi nchcuiˈ nu nguˈ nu nguaˈni clacua jiˈi̱ ma̱.
\v 5 Xcuiˈ tsoˈo tsa laca su ndiˈi̱ ma̱ chalyuu; pana bata chcu̱ˈ laca cuˈma̱, chaˈ xcuiˈ nclyana ma̱ lcaa ñaˈa̱ chaˈ tsoˈo nu caca tyaalaˈ tyiquee ma̱. Loˈo nu juani cua ngulala ti tyalaa tsa̱ chaˈ cajaa ma̱, chaˈ liˈ cuaˈni cuayáˈ ycuiˈ Ni jiˈi̱ ma̱.
\v 6 Laja loˈo tya ndiˈi̱ ma̱ nde chalyuu nsta ma̱ quiˈya jiˈi̱ nguˈ tiˈi nu ná ntsuˈu chaˈ cuxi nu nguaˈni biˈ; ndyujuii ma̱ jiˈi̱ nguˈ biˈ, masi ná nchca jiˈi̱ nguˈ biˈ cuaˈni lyaá nguˈ jiˈi̱ ycuiˈ ca nguˈ.
\s Talo na tyiqueeˈ chaˈ xacui̱ ycuiˈ Ni sca chaˈ jiˈna nu ngüijña na jiˈi̱
\p
\v 7 Cuˈma̱ tyaˈa ngusñi na chaˈ jiˈi̱ Jesús, talo ma̱ tyiqueeˈ chaˈ ntajatya ma̱ jiˈi̱ ycuiˈ nu Xuˈna na, ni jacuaˈ ca̱a̱ Ni chaca quiyaˈ nde chalyuu. Ñati̱ nu cua ndyataa xtya̱ jiˈi̱ ni, ndalo tsa tyiquee nguˈ ntajatya nguˈ ni jacuaˈ tyuˈu siˈyu nu ndulo tsa chaˈ caja jiˈi̱ nguˈ; ndu̱ tiˈ nguˈ biˈ chaˈ caˈya tyo, masi tyo nu caˈya yala la, masi tyo nu caˈya tiyaˈ la.
\v 8 Loˈo juaˈa̱ cuˈma̱ ni, ngaˈa̱ chaˈ talo ma̱ tyiqueeˈ; cuaˈni nguula tiˈ tyiquee ma̱, chaˈ ná tyaˈa̱chu̱ˈ ma̱ jiˈi̱ ycuiˈ Ndyosi, chaˈ cua ngulala ti ca̱a̱ ycuiˈ nu Xuˈna na chaca quiyaˈ nde chalyuu.
\v 9 Cuˈma̱ tyaˈa ngusñi na chaˈ jiˈi̱ ycuiˈ Ni, ná chcuiˈ ma̱ chaˈ tiˈí jiˈi̱ nguˈ tyaˈa ma̱, chaˈ ná sta Ni quiˈya jiˈi̱ ma̱ liˈ. Cua ngulala ti tyalaa ycuiˈ nu Bese nu laca loo ca su ndiˈi̱ na.
\v 10 Cuˈma̱ nguˈ tyaˈa na, tyiˈu tiˈ ma̱ ñiˈya̱ ngua jiˈi̱ jyoˈo cusuˈ jiˈi̱ ma̱ nu ngua tuˈba jiˈi̱ ycuiˈ Ndyosi cua saˈni la; tyiqueeˈ tsa ndalo ñati̱ biˈ, masi lye tsa nchcubeˈ ycuiˈ nguˈ.
\v 11 Nacui̱ na chaˈ tsoˈo tsa ntsuˈu tyiquee jyoˈo biˈ, chaˈ cua ndalo tsa tyiquee nguˈ loˈo nguxcubeˈ ñati̱ jiˈi̱ nguˈ tyempo biˈ. Cua ndyuna ma̱ ñiˈya̱ ngua chaˈ tyiqueeˈ tsa ndalo jyoˈo Job, nu loˈo quiñaˈa̱ tsa chaˈ cuxi ngua jiˈi̱ yu. Loˈo liˈ su cua ndye chaˈ, xaˈ ndya Ni lcaa chaˈ tsoˈo jiˈi̱ yu chaca quiyaˈ. La cuiˈ juaˈa̱, xcuiˈ na tyaˈna tiˈ Ni jiˈna, xcuiˈ tsoˈo ntsuˈu tyiquee Ni ñaˈa̱ Ni jiˈna.
\p
\v 12 Nde laca sca cña nu ná ngaˈa̱ chaˈ cuaˈni na tsiyaˈ ti, cuˈma̱ tyaˈa ngusñi na chaˈ jiˈi̱ ycuiˈ Ndyosi: Ná cuaˈni ma̱ jura laja ti loˈo xtañi ycuiˈ Ni loˈo cua quiñi ti sca chaˈ jiˈi̱ ma̱ loˈo xaˈ ñati̱; ná ñacui̱ ma̱: “Chacuayáˈ jiˈi̱ ycuiˈ Ndyosi nu ntucua nde cua̱”, ni ná ñacui̱ ma̱: “Chacuayáˈ jiˈi̱ ndyosi nde lo yuu”. Ná culotu̱ ma̱ ni sca xtañi Ni tsiyaˈ ti, chaˈ caja ñiˈya̱ nu tyanu tachaa chaˈ jiˈi̱ ma̱ loˈo ñati̱. Tsa biˈ ti chaˈ ñacui̱ ma̱ jiˈi̱ ñati̱: “Cuaˈni naˈ”, ñacui̱ ma̱, si taca cuaˈni ma̱ jiˈi̱; loˈo juaˈa̱ “Ná cuaˈni naˈ”, ñacui̱ ma̱, si ná nchca cuaˈni ma̱ jiˈi̱. Ná caja ñiˈya̱ sta Ni quiˈya jiˈi̱ ma̱ liˈ.
\p
\v 13 Nu loˈo lye tsa nchcubeˈ scaa ma̱, xquiˈya chaˈ ngusñi ma̱ chaˈ jiˈi̱ Jesús, tsoˈo si chcuiˈ ma̱ loˈo ycuiˈ Ndyosi la cuiˈ hora biˈ. Loˈo juaˈa̱ si ntsuˈu scaa ma̱ nu chaa tsa tiˈ ma̱, tsoˈo tsa si cula tuˈba ma̱ sca ji̱i̱ jiˈi̱ ycuiˈ Ndyosi liˈ.
\v 14 Loˈo ntsiya sca nguˈ tyaˈa ma̱ nu quicha, liˈ tsoˈo cuane ma̱ jiˈi̱ nguˈ cusuˈ tyaˈa ngusñi ma̱ chaˈ jiˈi̱ ycuiˈ Ni, chaˈ ca̱a̱ nguˈ cuaˈni nguˈ joˈo jiˈi̱ nu quicha biˈ. Loˈo liˈ jña nguˈ biˈ chaˈ clyu tiˈ jiˈi̱ ycuiˈ Ndyosi, chaˈ cuaˈni Ni chaˈ tyaca tsoˈo nu quicha biˈ; cuati salú nguˈ setye nu ntsuˈu taná lo hichu̱ˈ yu quicha biˈ chacuayáˈ jiˈi̱ ycuiˈ nu Xuˈna na.
\v 15 Tyaca tsoˈo nu ñati̱ quicha biˈ liˈ, xquiˈya chaˈ jlya tiˈ ma̱ chaˈ nu cua nchcuiˈ ma̱ loˈo ycuiˈ Ndyosi; tya ta Ni chalyuu jiˈi̱ nu quicha biˈ chaca quiyaˈ, loˈo juaˈa̱ cuiˈya Ni chaˈ clyu tiˈ jiˈi̱ yu jiˈi̱ quiˈya nu ntsuˈu jiˈi̱ yu.
\v 16 Biˈ chaˈ lacua, ñii ma̱ jiˈi̱ nguˈ tyaˈa ma̱ si ntsuˈu quiˈya jiˈi̱ ma̱, cuati jña ma̱ chaˈ clyu tiˈ jiˈi̱ nguˈ tyaˈa ma̱ loˈo ycuiˈ Ndyosi, chaˈ ca tsoˈo tyucui ñaˈa̱ ma̱ chaca quiyaˈ. Quiñaˈa̱ tsa cña caca jiˈi̱ sca ñati̱ nu lubii cresiya jiˈi̱ cuentya jiˈi̱ ycuiˈ Ndyosi, nu loˈo jña yu sca chaˈ jiˈi̱ Ni.
\v 17 Ñati̱ chalyuu ti ngua jyoˈo Elías; ñiˈya̱ laca na ñati̱ chalyuu, la cuiˈ juaˈa̱ ngua yu ñati̱. Pana ngua sca quiyaˈ nu tyaˈna tsa nchcuiˈ yu loˈo ycuiˈ Ndyosi chaˈ ná caˈya tyo chalyuu biˈ; loˈo liˈ chu̱ˈ sna yija̱ claˈbe ná nguaˈya tyo tsiyaˈ ti.
\v 18 Ñaˈa̱ cuayáˈ nu nchcuiˈ yu loˈo Ni chaca quiyaˈ, liˈ xaˈ nguaˈya tyo tsoˈo ti; loˈo liˈ ngua tsoˈo lcaa na cuiñii jiˈi̱ nguˈ.
\p
\v 19 Cuˈma̱ tyaˈa ngusñi na chaˈ jiˈi̱ Jesús, nu loˈo ntsuˈu sca nguˈ tyaˈa ma̱ nu cua tyaˈa̱chu̱ˈ ti jiˈi̱ chaˈ tsoˈo jiˈi̱ Jesús biˈ, tsoˈo tsa caca chaˈ si caca jiˈi̱ scaa ma̱ chcuiˈ tsoˈo ma̱ loˈo yu, chaˈ xñi yu chaˈ jiˈi̱ ycuiˈ Ndyosi chaca quiyaˈ.
\v 20 Si ntsuˈu cuˈma̱ nu caca jiˈi̱ ma̱ cuaˈa ma̱ jiˈi̱ tyaˈa ñati̱ ma̱ chaˈ ná cuaˈni nguˈ chaˈ cuxi, chaˈ culuˈu ma̱ chaˈ jiˈi̱ ycuiˈ Ndyosi jiˈi̱ nguˈ biˈ chaca quiyaˈ, tsoˈo tsa cña cuaˈni ma̱ liˈ; taca cuaˈni lyaá ma̱ jiˈi̱ nguˈ biˈ liˈ, chaˈ ná chcunaˈ chalyuu jiˈi̱ nguˈ. Loˈo juaˈa̱ caja ñiˈya̱ nu cuiˈya ycuiˈ Ndyosi chaˈ clyu tiˈ jiˈi̱ nguˈ jiˈi̱ lcaa quiˈya nu ntsuˈu jiˈi̱ nguˈ biˈ.