\id 1PE
\h 1 PEDRO
\mt Quityi nu nguscua San Pedro ndyaa ca slo ñati̱ jiˈi̱ Jesucristo nu ndiˈi̱ tyijyuˈ
\c 1
\p
\v 1 Pedro laca naˈ nu nscua naˈ quityi re chaˈ ca̱a̱ slo lcaa cuˈma̱ nu ngusñi ma̱ chaˈ jiˈi̱ Jesús, cuˈma̱ nguˈ nu ndiˈi̱ tyijyuˈ. Ntsuˈu cuˈma̱ nu ndyalaa ma̱ nde loyuu su cuentya Ponto; xi xaˈ la tyaˈa cuˈma̱ ndyalaa ma̱ nde loyuu su cuentya Galacia, juaˈa̱ loyuu su cuentya Capadocia, juaˈa̱ loyuu su cuentya Asia, juaˈa̱ loyuu su cuentya Bitinia cua lye tsa ngañi ma̱. Cña nu nda ycuiˈ Jesucristo ˈna, biˈ laca chaˈ tsaˈa naˈ chcuiˈ naˈ chaˈ jiˈi̱ Ni loˈo xaˈ la ñati̱.
\v 2 Tya clyo la cua jlo tiˈ ycuiˈ Ndyosi Sti na lcaa ñaˈa̱ chaˈ nu caca nde loo la, biˈ chaˈ ngusubi ycuiˈ Ni jiˈi̱ ma̱. Loˈo juani ndyuˈni Xtyiˈi ycuiˈ Ndyosi cña chaˈ tyanu lubii cresiya jiˈi̱ ma̱, chaˈ taquiyaˈ ma̱ jiˈi̱ ycuiˈ Jesucristo; na cua ngujuii yu lo crusi xquiˈya cuˈma̱, ndyalú tañi yu chaˈ caja ñiˈya̱ caca lubii cresiya jiˈi̱ ma̱. Loˈo juani ntiˈ naˈ chaˈ ñaˈa̱ ti tya cuaˈni ycuiˈ Ndyosi chaˈ tsoˈo loˈo ma̱, chaˈ juaˈa̱ ti̱ ti tyiˈi̱ tyiquee ma̱ lcaa hora.
\s Ndu̱ tiˈ na chaˈ caja chalyuu nu ná ngaˈa̱ chaˈ tye jiˈna
\p
\v 3 Cuaˈni tlyu na jiˈi̱ ycuiˈ Ndyosi, la cuiˈ biˈ laca nu nduˈni tlyu Jesucristo nu Xuˈna na jiˈi̱, la cuiˈ Sti Jesucristo nu Xuˈna na laca biˈ. Tyaˈna tsa tiˈ ycuiˈ Ni ñaˈa̱ Ni jiˈna, biˈ chaˈ nguaˈni cucui Ni cresiya jiˈna; ntsuˈu chalyuu cucui jiˈna juani, xquiˈya chaˈ ndyuˈú ycuiˈ Jesucristo chaca quiyaˈ nu loˈo ngujuii yu. Loˈo nu juani cua ndu̱ tiˈ na chaˈ caja chalyuu nu ná ngaˈa̱ chaˈ tye jiˈna,
\v 4 xquiˈya chaˈ cua nguaˈni lyaá Jesús jiˈna. Ná ntsuˈu ni sca chaˈ, ni sca ñati̱ nu taca cuaˈni ñuˈu̱ jiˈi̱ chaˈ nu cua ngujui jiˈna; ni sca na tsiyaˈ ti, ná ca cuaˈni tye na biˈ jiˈi̱ chaˈ tsoˈo nu tyacua jiˈna ca slo ycuiˈ Ndyosi loˈo cua tye ti chaˈ, ná ntsuˈu na nu taca cuaˈni cuxi jiˈi̱ chaˈ biˈ.
\v 5 Cua ngusñi ma̱ chaˈ jiˈi̱ ycuiˈ Ndyosi, biˈ chaˈ ndu̱ Ni cua̱ jiˈi̱ ma̱ juani chaˈ ñaˈa̱si̱i̱ Ni jiˈi̱ ma̱. Ná ntsuˈu ni sca na nu nguula la juersa jiˈi̱, nu taca jiˈi̱ tyiji̱loo jiˈi̱ ycuiˈ Ndyosi; cuaˈa Ni jiˈi̱ ma̱ jiˈi̱ nu cuxi, chaˈ cuaˈni lyaá Ni jiˈi̱ ma̱ loˈo tye chalyuu re, chaˈ cua ndyaa Ni nguaˈni choˈo Ni su tyiˈi̱ ma̱ ca slo ycuiˈ Ndyosi.
\p
\v 6 Biˈ chaˈ caca chaa tiˈ ma̱ juani, chaˈ tsoˈo tsa ntsuˈu tyiquee ma̱, masi ntsuˈu quiyaˈ xñiˈi̱ tiˈ ma̱ xquiˈya lcaa lo chaˈ tiˈí nu ndyacua jiˈi̱ ma̱; pana xti ti tyempo nu ca xñiˈi̱ tiˈ ma̱.
\v 7 Ndyacua chaˈ tiˈí jiˈi̱ ma̱ juaˈa̱, chaˈ taca cuaˈni cuayáˈ Ni jiˈi̱ ma̱, si chañi chaˈ ngusñi ma̱ chaˈ jiˈi̱ ycuiˈ Ni. Jlo tiˈ ma̱ chaˈ quiñaˈa̱ tsa ngaˈa̱ chcua̱ oro; pana hora ti nduˈni cuayáˈ nguˈ jiˈi̱ oro biˈ loˈo quiiˈ chaˈ tyalá biˈ, chaˈ ñaˈa̱ nguˈ si chañi chaˈ xcuiˈ oro laca biˈ. Nde loo la quiñuˈu̱ chcua̱ oro, tye chaˈ jiˈi̱, masi quiñaˈa̱ tsa cña nguaˈni nguˈ chaˈ tyubii oro biˈ tya clyo; pana nu chaˈ jiˈi̱ Jesús nu cua ngusñi ma̱ ni, ndulo tsa chaˈ biˈ cuentya jiˈi̱ ycuiˈ Ndyosi. Masi quiñaˈa̱ tsa chcua̱ oro caja jiˈna, ná stuˈba tsiyaˈ ti chaˈ jiˈi̱ biˈ loˈo ycuiˈ Jesús. Loˈo ndye ndalo ma̱ jiˈi̱ lcaa chaˈ tiˈí nu ndyacua jiˈi̱ ma̱ xquiˈya chaˈ ngusñi ma̱ chaˈ jiˈi̱ Ni, liˈ tsoˈo tsa chaˈ nu caja jiˈi̱ ma̱ loˈo tyuˈu tucua ycuiˈ Jesucristo ca̱a̱ chaca quiyaˈ; ta Ni sca su tsoˈo chaˈ tyiˈi̱ ma̱ slo ycuiˈ Ni laja xee nu ndubi tsa ca su ntucua ycuiˈ Ni.
\p
\v 8 Ntsuˈu tsa tyiquee ma̱ ñaˈa̱ ma̱ jiˈi̱ Jesús, masi bilya ñaˈa̱ ma̱ jiˈi̱ Ni; hasta juani tya lyiji ñaˈa̱ ma̱ jiˈi̱, pana jlya tiˈ ma̱ chaˈ luˈú Ni. Chañi chaˈ tsoˈo tsa ntsuˈu tyiquee ma̱ juani xquiˈya Jesús, ni ná tye chca chaˈ chcuiˈ ma̱ lcaa chaˈ tsoˈo nu ntsuˈu tyiquee ma̱ cuentya jiˈi̱ ycuiˈ Jesús loˈo xaˈ ñati̱. 
\v 9 Cua ngusñi ma̱ chaˈ jiˈi̱ Ni, biˈ chaˈ taca ca cuayáˈ tiˈ ma̱ chaˈ chañi laca chaˈ cuaˈni lyaá Ni jiˈi̱ ma̱ loˈo cua ndye chalyuu.
\p
\v 10 Nu jyoˈo cusuˈ nu ngua tuˈba jiˈi̱ ycuiˈ Ndyosi saˈni la ni, nchcuiˈ tsa jyoˈo cusuˈ biˈ jiˈi̱ chaˈ tsoˈo nu cuaˈni ycuiˈ Ndyosi nde loo la, chaˈ cuaˈni lyaá Ni jiˈi̱ ñati̱ tyaˈa ndiˈi̱ na chalyuu; xcuiˈ cuentya jiˈi̱ ycuiˈ Ndyosi nchcuiˈ nguˈ chaˈ biˈ, pana ná ngua cuayáˈ tsoˈo tiˈ ycuiˈ ca nguˈ biˈ ñiˈya̱ nu cuaˈni ycuiˈ Ndyosi chaˈ caca nde loo la, ni jacuaˈ cuaˈni Ni chaˈ biˈ.
\v 11 Xtyiˈi ycuiˈ Cristo nguluˈu lcaa chaˈ jiˈi̱ nguˈ biˈ, ñiˈya̱ nu caca jiˈi̱ ycuiˈ Cristo nde loo la, ñiˈya̱ nu chcubeˈ yu nde loyuu chalyuu, ñiˈya̱ nu tlyu tsa chaˈ tsoˈo nu caca jiˈi̱ yu loˈo tyaa yu ca slo ycuiˈ Ndyosi chaca quiyaˈ. Loˈo liˈ ngulana tsa nu nguˈ jyoˈo biˈ, chaˈ quije chaˈ jiˈi̱ nguˈ tilaca caca nu Cristo biˈ, ni tsa̱ tyuˈu tucua yu nde chalyuu.
\v 12 Pana ná nquije chaˈ biˈ jiˈi̱ nguˈ biˈ liˈ; sca ti chaˈ nchcuiˈ ycuiˈ Ni loˈo nguˈ biˈ, chaˈ siˈi ycuiˈ nguˈ biˈ laca nu ca cuayáˈ tsoˈo tiˈ ñiˈya̱ caca chaˈ biˈ tyempo nde loo la. Pana cuˈma̱ ni, nu lijya̱ chalyuu nde loo la jiˈi̱ nguˈ jyoˈo biˈ, nchca cuayáˈ tiˈ ma̱ juani, xquiˈya chaˈ cua ndyuna ma̱ lcaa chaˈ tlyu nu nguaˈni Jesucristo. Cua ndachaˈ liñi ya chaˈ biˈ jiˈi̱ ma̱; chacuayáˈ jiˈi̱ Xtyiˈi ycuiˈ Ndyosi nguluˈu ya chaˈ biˈ jiˈi̱ ma̱, chaˈ cua nda ycuiˈ Ndyosi Xtyiˈi ycuiˈ Ni lijya̱ lo ya nde chalyuu. Loˈo juaˈa̱ lcaa xca̱ jiˈi̱ ycuiˈ Ni nu ndiˈi̱ slo Ni, lcaa nguˈ biˈ ntiˈ tsa nguˈ ca cuayáˈ tiˈ nguˈ lcaa chaˈ nu ngua jiˈi̱ Cristo loˈo ñaa yu nde chalyuu.
\s Ntiˈ ycuiˈ Ndyosi chaˈ caca lubii cresiya jiˈna lcaa tsa̱ loˈo tya ndiˈi̱ na chalyuu
\p
\v 13 Biˈ chaˈ culacua xi tiˈ ma̱, tii tiˈ ma̱ tyiˈi̱ ma̱ chalyuu, chaˈ lcaa tsa̱ jatya ma̱ jiˈi̱ chaˈ tsoˈo nu cua tlyu xi, nu cuaˈni Ni loˈo ma̱ loˈo cuaˈni lyaá lyiji Ni jiˈi̱ ma̱; juaˈa̱ caca nu loˈo tyuˈu tucua Jesucristo chaca quiyaˈ.
\v 14 Taquiyaˈ tsoˈo ma̱ jiˈi̱ chaˈ nu nchcuiˈ ycuiˈ Ndyosi chaˈ caca ma̱ sñiˈ Ni nu tsoˈo tsa nduˈni; ngaˈaa cuaˈni ma̱ cua ñaˈa̱ ca chaˈ cuxi nu ndiya tiˈ ma̱ ñiˈya̱ nu nguaˈni ma̱ tya saˈni la, nu loˈo bilya ca cuayáˈ tiˈ ma̱ chaˈ tsoˈo jiˈi̱ ycuiˈ Ndyosi.
\v 15 Xcuiˈ na lubii tsiyaˈ ti laca ycuiˈ Ndyosi, xcuiˈ liñi tsa chaˈ nu nduˈni Ni, loˈo juaˈa̱ laca Ni nu Xuˈna na juani. Biˈ chaˈ ntiˈ Ni chaˈ xcuiˈ lubii tsa caca cresiya jiˈi̱ ma̱, xcuiˈ chaˈ liñi cuaˈni ma̱.
\v 16 Ndiˈya̱ nscua chaˈ lo quityi jiˈi̱ ycuiˈ Ndyosi: “Cuaˈni ma̱ chaˈ caca lubii cresiya jiˈi̱ ma̱ lcaa hora, chaˈ xcuiˈ lubii tsa laca naˈ tsiyaˈ ti”, nacui̱ ycuiˈ Ndyosi. 
\p
\v 17 Xcuiˈ liñi ti nduˈni cuayáˈ Ni jiˈi̱ ñati̱, ñiˈya̱ laca chaˈ tsoˈo nu nguaˈni scaa nguˈ, ñiˈya̱ laca chaˈ cuxi nu nguaˈni scaa nguˈ laja loˈo ndiˈi̱ nguˈ chalyuu. Biˈ chaˈ ntsuˈu chaˈ cutsi̱i̱ ma̱ xi loˈo chcuiˈ ma̱ loˈo ycuiˈ Ndyosi ndiˈya̱: “Sti ya”, ñacui̱ ma̱ jiˈi̱ Ni. Ntsuˈu chaˈ taquiyaˈ ma̱ jiˈi̱ ycuiˈ Ndyosi Sti na lcaa tsa̱ loˈo tyiˈi̱ ma̱ chalyuu, chaˈ xcuiˈ chaˈ tsoˈo cuaˈni ma̱ cuentya jiˈi̱ Ni.
\v 18 Cua nguaˈni lyaá Ni jiˈi̱ ma̱ jiˈi̱ lcaa chaˈ cuxi nu ntsuˈu jiˈi̱ ma̱, biˈ chaˈ ngaˈaa ntsuˈu chaˈ cube tiˈ ma̱ jiˈi̱ lcaa chaˈ nu nguxtyanu jyoˈo cusuˈ jiˈna chaˈ cuaˈni na. Nda jyoˈo cusuˈ biˈ chaˈ biˈ loˈo na, masi jlo tiˈ nguˈ biˈ chaˈ ná caja ñiˈya̱ nu clyaá na jiˈi̱ quiˈya nu ntsuˈu jiˈna loˈo chaˈ biˈ. Pana cua nda ycuiˈ Ndyosi cayaˈ chaˈ tyuˈú na su lubii juani; siˈi cñi plata laca chaˈ biˈ, ni siˈi cñi oro laca nu nda Ni, chaˈ si cñi laca biˈ ni, quiñuˈu̱ biˈ masi chalyuu juani ti.
\v 19 Nu loˈo ngujuii Cristo lo crusi loˈo ndyalú tañi ycuiˈ, liˈ nda Ni cayaˈ loo quiˈya nu ntsuˈu jiˈna, chaˈ ngua Cristo ñiˈya̱ ntiˈ sca msta̱ luˈú nu xcuiˈ na tsoˈo, nu xcuiˈ na lubii; loˈo nu tañi ycuiˈ Cristo biˈ ni, biˈ laca cayaˈ nu nguaˈni lyaá jiˈna.
\p
\v 20 Tya clyo loˈo bilya cuiñá Ni chalyuu, cua jlo tiˈ ycuiˈ Ndyosi chaˈ ntsuˈu chaˈ cuaˈni Cristo cña tonu biˈ; pana ngujuatya ycuiˈ Ni ni jacuaˈ nu tyalaa tyempo biˈ. Liˈ ñaa Cristo, nguaˈni yu cña biˈ cuentya jiˈna, chaˈ tyacua chaˈ tsoˈo biˈ jiˈna.
\v 21 Xquiˈya Cristo, biˈ chaˈ jlya tiˈ ma̱ jiˈi̱ ycuiˈ Ndyosi, chaˈ cua nguaˈni ycuiˈ Ni chaˈ ndyuˈú Cristo chaca quiyaˈ loˈo cua ngujuii yu. Loˈo liˈ nda ycuiˈ Ndyosi sca su tsoˈo su tyiˈi̱ Cristo, ca su tlyu su ntucua ycuiˈ Ni. Nguaˈni Cristo cña tonu biˈ, chaˈ taca xñi ma̱ chaˈ jiˈi̱ ycuiˈ Ndyosi, loˈo liˈ taca tyu̱ tiˈ ma̱ chaˈ caca lcaa ñaˈa̱ chaˈ nu nacui̱ Ni chaˈ caca.
\p
\v 22 Xquiˈya chaˈ nxtyucua Xtyiˈi ycuiˈ Ndyosi jiˈi̱ ma̱, na cua ndaquiyaˈ ma̱ jiˈi̱ chaˈ liñi nu nda ycuiˈ Ndyosi loˈo na, biˈ chaˈ ngua lubii cresiya jiˈi̱ ma̱; juani taca caca tsoˈo tyiquee ma̱ ñaˈa̱ ma̱ jiˈi̱ tyaˈa ñati̱ ma̱. Pana tyucui tyiquee ma̱ ntsuˈu chaˈ caca tsoˈo tyiquee ma̱ ñaˈa̱ ma̱ jiˈi̱ tyaˈa ñati̱ ma̱, siˈi ñiˈya̱ nduˈni nguˈ nu ntsuˈu tucua chaˈ tyiquee nguˈ cuaˈni cuˈma̱.
\v 23 Laca ma̱ ñiˈya̱ si cua ngula ma̱ chaca quiyaˈ, pana siˈi ñiˈya̱ nu ngula ti ma̱ jiˈi̱ xtyaˈa̱ ma̱; cua ngua cucui cresiya jiˈi̱ ma̱ xquiˈya chaˈ nduna ma̱ chaˈ nu nchcuiˈ ycuiˈ Ndyosi nu luˈú ca, ycuiˈ Ndyosi nu ná nscua chaˈ cajaa Ni tsiyaˈ ti.
\v 24 Ndiˈya̱ nscua chaˈ lo quityi jiˈi̱ ycuiˈ Ndyosi:
\q Ñiˈya̱ laca quixi̱ˈ, juaˈa̱ laca ñati̱ chalyuu.
\q Lcaa na nu tsoˈo ñaˈa̱ nu ntsuˈu jiˈi̱ ñati̱ laca ñiˈya̱ ntiˈ sca queé nu ndyuˈú neˈ quixi̱ˈ ti;
\q ndyanaa quixi̱ˈ biˈ, liˈ ndye queé biˈ, ngüityi tsiyaˈ ti.
\q Loˈo juaˈa̱ laca loˈo ñati̱ loˈo lcaa chaˈ tsoˈo nu ntsuˈu jiˈi̱ nguˈ nde chalyuu,
\q tye chaˈ tsoˈo biˈ jiˈi̱ nguˈ stuˈba ti loˈo ycuiˈ nguˈ.
\q
\v 25 Pana scaa chaˈ nu nchcuiˈ ycuiˈ Ndyosi ni, tyanu chaˈ biˈ;
\q ná quiñuˈu̱ chaˈ biˈ tsiyaˈ ti.
\m Juaˈa̱ nacui̱ quityi biˈ. Loˈo juaˈa̱ nu chaˈ tsoˈo jiˈi̱ ycuiˈ Ndyosi nu nguluˈu ya jiˈi̱ ma̱, la cuiˈ chaˈ biˈ laca nu ná quiñuˈu̱ tsiyaˈ ti.
\c 2
\p
\v 1 Loˈo cuˈma̱ ni, ngaˈa̱ chaˈ xtyanu ma̱ jiˈi̱ lcaa chaˈ cuxi nu ntsuˈu tyiquee ma̱ ñaˈa̱ ma̱ jiˈi̱ tyaˈa ñati̱ ma̱: ngaˈaa cñiloˈo ma̱ jiˈi̱ tyaˈa ma̱, ngaˈaa siˈi tucua chaˈ tyuˈu tyiquee ma̱, ngaˈaa tyacui tiˈ ma̱ jiˈi̱ sca na nu ntsuˈu jiˈi̱ tyaˈa ñati̱ ma̱, ngaˈaa chcuiˈ ma̱ cuentyu jiˈi̱ tyaˈa ñati̱ ma̱.
\v 2 Ñiˈya̱ laca sca cubiˈ cuañiˈ nu ngula ca ti, juaˈa̱ laca cuˈma̱ cuentya jiˈi̱ ycuiˈ Ndyosi, chaˈ tsubiˈ ti ngusñi ma̱ chaˈ jiˈi̱ ycuiˈ Ni. Luˈba ti ntyiˈ cubiˈ cuañiˈ chaˈ ntyuteˈ tsa; si ná catiˈ luˈba ti, ná caluu cubiˈ tsiyaˈ ti. Loˈo juaˈa̱ cuˈma̱ ni, tsoˈo la si cuaˈni cña tiˈ ma̱ chaˈ ca tsaˈa̱ la ma̱ chaˈ jiˈi̱ ycuiˈ Ndyosi, chaˈ ñiˈya̱ ntiˈ styiˈ, juaˈa̱ laca chaˈ jiˈi̱ ycuiˈ Ndyosi cuentya jiˈi̱ ma̱. Cuaˈni biˈ chaˈ caca nguula la tiˈ tyiquee ma̱ cuentya jiˈi̱ ycuiˈ Ndyosi, chaˈ taca clyaá ma̱ jiˈi̱ chaˈ cuxi.
\v 3 Cua ndyoˈo cuayáˈ ma̱ xi styiˈ biˈ, biˈ chaˈ ngua cuayáˈ tiˈ ma̱ chaˈ tsoˈo tsa ntsuˈu tyiquee nu Xuˈna na ñaˈa̱ Ni jiˈna.
\s Laca Cristo ñiˈya̱ ntiˈ sca quee nu ntucua quiyaˈ niˈi̱ 
\p
\v 4 Ycuiˈ Cristo nu Xuˈna na ni, ñiˈya̱ ntiˈ sca quee nu ntucua quiyaˈ niˈi̱, juaˈa̱ laca yu, masi na luˈú ycuiˈ. Nacui̱ ñati̱ chalyuu nu ntiˈ cuiñá niˈi̱ chaˈ ná tsoˈo quee biˈ; ná ca cuaˈni nguˈ cña tsoˈo loˈo biˈ, nacui̱ nguˈ. Pana la cuiˈ Jesús laca nu cua ngusubi ycuiˈ Ndyosi jiˈi̱ chaˈ caca cña jiˈi̱ Ni, chaˈ tyucua yu ca su ntucua quiyaˈ chaˈ, lcaa chaˈ nu ntsuˈu jiˈi̱ ycuiˈ Ndyosi. 
\p Biˈ chaˈ ngaˈa̱ chaˈ tyatí̱ tsoˈo tyiquee ma̱ chaˈ jiˈi̱ Cristo biˈ,
\v 5 chaˈ loˈo cuˈma̱ caca ma̱ ñiˈya̱ si laca ma̱ tyuu chaˈ tyaˈ sca niˈi̱ jiˈi̱ ycuiˈ Ndyosi, masi ñaˈa̱ luˈú ti ma̱. Liˈ xñi ycuiˈ Ni tyuu biˈ, chaˈ cuiñá Ni sca niˈi̱ nu tacati tsa cuentya jiˈi̱ ycuiˈ Ni. Chaca chaˈ ni, ñiˈya̱ ntiˈ sti joˈó nu lubii cresiya jiˈi̱ tsiyaˈ ti, juaˈa̱ caca lcaa cuˈma̱, chaˈ taca jiˈi̱ ma̱ sta ma̱ msta̱ slo ycuiˈ Ndyosi juani xquiˈya Jesucristo; nu msta̱ biˈ laca ycuiˈ ca ma̱, si chañi chaˈ tyucui tyiquee ma̱ ntiˈ ma̱ taquiyaˈ ma̱ jiˈi̱ chaˈ nu nchcuiˈ ycuiˈ Ndyosi.
\v 6 Ndiˈya̱ nscua chaˈ lo quityi jiˈi̱ ycuiˈ Ndyosi:
\q Ñaˈa̱ ma̱ yiˈa̱. Cua ngusubi naˈ jiˈi̱ sca ñati̱ nu ndulo tsa chaˈ jiˈi̱, ñiˈya̱ ntiˈ sca quee tonu nu quiñaˈa̱ tsa ngaˈa̱, nacui̱ ycuiˈ Ndyosi.
\q Sta naˈ jiˈi̱ ñati̱ biˈ chaˈ caca quee nu nscua quiyaˈ niˈi̱ ˈna nde quichi̱ Sión.
\q Lcaa nguˈ nu xñi chaˈ nu nchcuiˈ nu ñati̱ biˈ, caca tsoˈo tyiquee nguˈ liˈ;
\q chaˈ liñi tsiyaˈ ti laca chaˈ nu nchcuiˈ ñati̱ biˈ. 
\m Juaˈa̱ laca chaˈ nu nscua lo quityi biˈ.
\p
\v 7 Loˈo cuˈma̱ ni, ndulo tsa chaˈ jiˈi̱ quee biˈ cuentya jiˈi̱ ma̱, cuˈma̱ nu ngusñi ma̱ chaˈ jiˈi̱ ycuiˈ Ndyosi; pana cuxi tsa chaˈ caca jiˈi̱ ñati̱ nu ná jlya tiˈ jiˈi̱ ycuiˈ Ndyosi tsiyaˈ ti. Ndiˈya̱ nscua chaˈ lo quityi chaˈ jiˈi̱ quee biˈ:
\q Cua nguxcua̱a̱ cuityi niˈi̱ quee tonu biˈ clyo, chaˈ ná tsoˈo ñaˈa̱ quee biˈ ngua tiˈ nguˈ;
\q pana juani cua ngujui cña nu cuaˈni quee biˈ, chaˈ ndu̱ su ndulo la chaˈ jiˈi̱ cuentya jiˈi̱ ycuiˈ Ndyosi. 
\m
\v 8 Ndiˈya̱ nscua chaca chaˈ nu nchcuiˈ jiˈi̱ quee biˈ chaca seˈi̱ lo quityi:
\q Tyeje sna quiyaˈ nguˈ chu̱ˈ quee biˈ, clyú nguˈ tyucui̱i̱ su lijya̱ nguˈ loˈo tyucua quee biˈ quiyaˈ nguˈ.
\m Juaˈa̱ nscua chaˈ lo quityi biˈ; na nclyú nguˈ tyucui̱i̱ chaˈ ná ndaquiyaˈ nguˈ jiˈi̱ chaˈ nu nchcuiˈ ycuiˈ Ndyosi. Nguaˈni ycuiˈ Ndyosi juaˈa̱ chaˈ ná taca tyaˈa̱ nguˈ tyucui̱i̱ jiˈi̱ Ni si ná xñi nguˈ chaˈ jiˈi̱ ycuiˈ Ni.
\s Ñati̱ nu ntsuˈu chaˈ jiˈi̱ loˈo ycuiˈ Ndyosi
\p
\v 9 Pana cuˈma̱ ni, cua ngusubi ycuiˈ Ndyosi jiˈi̱ cuˈma̱ chaˈ caca ma̱ ñaˈa̱ tsaca taju ñati̱ nu ndyuˈni tlyu jiˈi̱ ycuiˈ Ni. Laca ma̱ ñiˈya̱ laca sca latya sti joˈó nu cuentya jiˈi̱ ycuiˈ Ndyosi nu laca loo tsiyaˈ ti; ñiˈya̱ tsaca taju ñati̱ lubii laca ma̱ chaˈ cuaˈni tlyu ma̱ jiˈi̱ ycuiˈ Ndyosi lcaa tsa̱. Nduˈni Ni loˈo ma̱: “Ñati̱ ˈna laca ma̱”, nacui̱ Ni. Biˈ chaˈ ntiˈ tsa Ni chaˈ chcuiˈ ma̱ loˈo lcaa ñati̱ lcaa ñaˈa̱ chaˈ tsoˈo nu nguaˈni ycuiˈ Ndyosi loˈo ma̱; cua ngulo Ni jiˈi̱ ma̱ jiˈi̱ chalyuu cuxi su talya tsa ñaˈa̱, chaˈ tyaˈa̱ ma̱ ca su ndubi tsa xee jiˈi̱ ycuiˈ Ni.
\v 10 Nu juani laca ma̱ ñati̱ jiˈi̱ ycuiˈ Ndyosi, masi nu ngua tya tsubiˈ la ná ntsuˈu chaˈ jiˈi̱ ma̱ loˈo ycuiˈ Ndyosi tsiyaˈ ti. Loˈo juaˈa̱ cua nchca cuayáˈ tiˈ ma̱ juani chaˈ ndyuˈni tyaˈna tsa tiˈ Ni jiˈi̱ ma̱, masi tya tsubiˈ la ná nchca cuayáˈ tiˈ ma̱ chaˈ jiˈi̱ ycuiˈ Ndyosi tsiyaˈ ti.
\s Ndiˈi̱ na chalyuu chaˈ cuaˈni na cua ñaˈa̱ ca cña ñiˈya̱ nu ntiˈ ycuiˈ Ndyosi chaˈ cuaˈni na
\p
\v 11 Cuˈma̱ nguˈ tyaˈa tsoˈo na, cua nscua chaˈ tyiˈi̱ na ca slo ycuiˈ Ni tyempo ca nde loo la, biˈ chaˈ ngaˈa̱ chaˈ tyiˈi̱ na chalyuu juani ñiˈya̱ si laca na nguˈ tyijyuˈ nu ná ntsuˈu tyi nguˈ. Lye tsa chcuiˈ naˈ loˈo ma̱ juani chaˈ ngaˈaa cuaˈni ma̱ cua ñaˈa̱ ca chaˈ cuxi nu ndijña tyiquee ma̱ chaˈ cuaˈni ma̱; ngaˈaa taquiyaˈ ma̱ jiˈi̱ chaˈ cuxi biˈ, chaˈ juaˈa̱ ngaˈaa caca jiˈi̱ nu chaˈ cuxi biˈ cuaˈni ñuˈu̱ jiˈi̱ ma̱. 
\v 12 Xcuiˈ chaˈ liñi cuaˈni ma̱ lacua; xcuiˈ chaˈ tsoˈo cuaˈni ma̱, xquiˈya nu ñati̱ nu ná jlya tiˈ jiˈi̱ ycuiˈ Ndyosi tsiyaˈ ti, chaˈ loˈo nguˈ biˈ taca ca cuayáˈ tiˈ nguˈ chaˈ ñati̱ tsoˈo laca ma̱. Nu juani ntiˈ nguˈ biˈ chaˈ cuxi tsa ñati̱ laca ma̱, biˈ cha tsoˈo la si cuaˈni ma̱ xcuiˈ chaˈ tsoˈo ti chaˈ ñaˈa̱ ñati̱ biˈ jiˈi̱ ma̱; liˈ ta nguˈ biˈ cuentya chaˈ chañi chaˈ ñati̱ tsoˈo laca ma̱. Loˈo ñati̱ biˈ cuaˈni tlyu jiˈi̱ ycuiˈ Ndyosi tsa̱ nu cuaˈni cuayáˈ Ni jiˈi̱ ñati̱ liˈ. 
\p
\v 13 Xquiˈya Jesucristo nu Xuˈna na tucuá ma̱ chaˈ jiˈi̱ lcaa nguˈ nu laca loo, masi rey nu laca loo tsiyaˈ ti jiˈi̱ nasiyu̱ re,
\v 14 masi nguˈ gobernador nu laca cña cuentya jiˈi̱ rey biˈ. Nguˈ nu laca gobernador ni, nchcubeˈ nguˈ jiˈi̱ ñati̱ nu ndyuˈni chaˈ cuxi, loˈo juaˈa̱ nduˈni chi̱ nguˈ loo cua ñaˈa̱ ca ñati̱ nu ndyuˈni cña tsoˈo.
\v 15 Pana ntiˈ ycuiˈ Ndyosi chaˈ cuaˈni ma̱ xcuiˈ cña tsoˈo, ngaˈaa caca chcuiˈ nguˈ chaˈ cuxi jiˈi̱ ma̱ liˈ; masi nu nguˈ nu ná ntiˈ ca cuayáˈ tiˈ, masi nu nguˈ nu ná jlo tiˈ tsiyaˈ ti, ni sca quiyaˈ ná ntsuˈu chaˈ sta nguˈ biˈ quiˈya jiˈi̱ ma̱ liˈ.
\v 16 Ñati̱ nu ndiˈi̱ tsoˈo ti laca ma̱ juani, pana ná tsoˈo si ná taquiyaˈ ma̱ jiˈi̱ nguˈ nu laca loo lo yuu chalyuu; msu jiˈi̱ ycuiˈ Ndyosi laca ma̱ juani, biˈ chaˈ tsoˈo la si cuaˈni ma̱ cña nu cuentya jiˈi̱ ycuiˈ Ni lacua, chaˈ ñaˈa̱ xaˈ ñati̱ chaˈ ntsuˈu chaˈ jiˈi̱ ma̱ loˈo Ni.
\v 17 Tsoˈo si tucuá ma̱ chaˈ nu nchcuiˈ lcaa ñati̱. Loˈo juaˈa̱ cuaˈni ma̱ chaˈ tsoˈo ti caca tyiquee ma̱ ñaˈa̱ ma̱ jiˈi̱ lcaa ñati̱ jiˈi̱ Cristo, chaˈ tyaˈa ma̱ laca nguˈ biˈ. Nduˈni chaˈ cutsi̱i̱ ma̱ xi jiˈi̱ ycuiˈ Ndyosi, loˈo juaˈa̱ nduˈni chaˈ cuaˈni chi̱ ma̱ loo rey nu laca loo tsiyaˈ ti chalyuu.
\s Ñiˈya̱ nu ngaˈa̱ chaˈ cuaˈni nguˈ msu loˈo xuˈna nguˈ 
\p
\v 18 Cuˈma̱ nu laca ma̱ msu jiˈi̱ ñati̱ ni, taquiyaˈ tsoˈo ma̱ cña jiˈi̱ xuˈna ma̱, masi ndube tiˈ xuˈna ma̱ jiˈi̱ ma̱ xquiˈya chaˈ tsoˈo tyiquee nguˈ ñaˈa̱ nguˈ jiˈi̱ ma̱, masi xñaˈa̱ tyiquee nguˈ ñaˈa̱ nguˈ jiˈi̱ ma̱. 
\v 19 Tsoˈo tsa ndyuˈni sca msu nu laca ñati̱ jiˈi̱ ycuiˈ Ndyosi, nu loˈo ndalo tyiquee msu biˈ jiˈi̱ xuˈna yu, masi xñaˈa̱ tsa xuˈna yu, masi chaˈ laja ti xcubeˈ xuˈna yu jiˈi̱ yu.
\v 20 Si quijiˈi̱ xuˈna msu jiˈi̱ sca msu jiˈi̱ xquiˈya chaˈ nguaˈni msu biˈ sca chaˈ cuxi, ná sca chaˈ laca liˈ; ngaˈa̱ chaˈ chcubeˈ msu biˈ. Pana cuentya jiˈi̱ ycuiˈ Ndyosi, tsoˈo tsa nduˈni sca msu si talo tyiquee msu biˈ loˈo xcubeˈ xuˈna yu jiˈi̱ yu laja ti, nu loˈo tsoˈo tsa ndaquiyaˈ msu biˈ jiˈi̱ cña jiˈi̱ xuˈna yu. 
\v 21 Tya loˈo ngusubi Ni jiˈi̱ ma̱, tya liˈ jlo tiˈ Ni chaˈ juaˈa̱ xcubeˈ nguˈ jiˈi̱ ma̱, chaˈ la cuiˈ juaˈa̱ nguxcubeˈ nguˈ jiˈi̱ ycuiˈ Cristo tya clyo la cuentya jiˈi̱ cuˈma̱. Juaˈa̱ ngua chaˈ nguluˈu Cristo jiˈi̱ ma̱ ñiˈya̱ caca talo tyiquee ma̱ loˈo xcubeˈ nguˈ jiˈi̱ ma̱.
\v 22 Ná ntsuˈu ni sca quiˈya jiˈi̱ nu Cristo biˈ, ni sca chaˈ cuiñi ná nchcuiˈ yu;
\v 23 masi nchcuiˈ nguˈ chaˈ subaˈ loˈo yu, ni sca chaˈ tyaala ná nguxacui̱ yu jiˈi̱ nguˈ; nguxcubeˈ tsa nguˈ jiˈi̱ yu, pana ná ngua ñasi̱ˈ yu jiˈi̱ nguˈ liˈ. Sca ti loˈo ycuiˈ Ndyosi Sti yu nchcuiˈ yu jiˈi̱ chaˈ cuxi nu ndyuˈni nguˈ loˈo, chaˈ sca ti ycuiˈ Ni laca nu xcuiˈ liñi nduˈni cuayaˈ jiˈi̱ ñati̱.
\v 24 Ycuiˈ Cristo laca nu sca ti quiyaˈ ngujuiˈi̱ caˈa̱ nguˈ jiˈi̱ lo crusi chaˈ taca cuityi̱ Ni quiˈya nu ntsuˈu jiˈi̱ lcaa na, chaˈ clyaá na jiˈi̱ quiˈya nu ntsuˈu jiˈna; biˈ chaˈ cuentya jiˈi̱ Cristo taca tyiˈi̱ na chalyuu juani, chaˈ juaˈa̱ tyajaˈa̱ na cuaˈni na xcuiˈ chaˈ tsoˈo nu ntiˈ ycuiˈ nu Xuˈna na chaˈ cuaˈni na. Xquiˈya chaˈ nchcubeˈ ycuiˈ Cristo, biˈ chaˈ ngua ti̱ chaˈ cuxi nu ntsuˈu tyiquee na, ñiˈya̱ ntiˈ loˈo ngua ti̱ chaˈ quicha na loˈo ndyaca tsoˈo na.
\v 25 Loˈo juani ngaˈaa ndyaˈa̱ yuˈu ti ma̱, ñiˈya̱ ndyaˈa̱ yuˈu xlyaˈ; na cua nguxtyu̱u̱ ma̱ ñaa ma̱ ca su ngaˈa̱ ycuiˈ nu Xuˈna ma̱ nu ñaˈa̱si̱i̱ jiˈi̱ cresiya jiˈi̱ ma̱.
\c 3
\s Ñiˈya̱ ntsuˈu chaˈ tyiˈi̱ ñati̱ loˈo clyoˈo
\p
\v 1 Loˈo juaˈa̱ cuˈma̱ nguˈ cunaˈa̱ ni, ntsuˈu chaˈ taquiyaˈ ma̱ jiˈi̱ chaˈ nu nchcuiˈ clyoˈo ma̱, chaˈ nu quiˈyu laca loo jiˈi̱ nu cunaˈa̱, masi tya lyiji taquiyaˈ nu quiˈyu biˈ jiˈi̱ ycuiˈ Ni. Pana loˈo ñaˈa̱ nu nguˈ quiˈyu clyoˈo ma̱ lcaa chaˈ tsoˈo nu nduˈni ma̱, liˈ xñi nguˈ chaˈ jiˈi̱ ycuiˈ Ni, masi bilya chcuiˈ ma̱ loˈo nguˈ jiˈi̱ chaˈ biˈ;
\v 2 loˈo ñaˈa̱ clyoˈo ma̱ chaˈ nduna ma̱ chaˈ nu nchcuiˈ ycuiˈ nguˈ loˈo ma̱, chaˈ lubii cresiya jiˈi̱ ma̱, ná tyiqueeˈ taquiyaˈ nguˈ biˈ jiˈi̱ chaˈ liñi jiˈi̱ ycuiˈ Ndyosi liˈ.
\v 3 Lcaa cuˈma̱ nguˈ cunaˈa̱ ni, tsoˈo si ñaˈa̱si̱i̱ ma̱ jiˈi̱ quicha̱ˈ hique ma̱; pana ná ntiˈ chaˈ culiji quiñaˈa̱ tsa hora jiˈi̱ ma̱, ni ná ntiˈ chaˈ culiji quiñaˈa̱ tsa cñi jiˈi̱ ma̱, chaˈ cuaˈni choˈo ma̱ quicha̱ˈ hique ma̱. Ná ntsuˈu chaˈ tyacui chcua̱ jyaca̱ ma̱ nu quiñaˈa̱ tsa ntsuˈu loo, ni ná ntsuˈu chaˈ cacuˈ ma̱ lateˈ nu quiñaˈa̱ tsa ngaˈa̱. Siˈi na cacuˈ nu cunaˈa̱ nu cuaˈni chaˈ ndiya la tiˈ nguˈ jiˈi̱.
\v 4 Pana ycuiˈ Ndyosi ndiya la tiˈ jiˈi̱ nu cunaˈa̱ nu tsoˈo tsa chaˈ ntsuˈu tyiquee nguˈ; si ná liyeˈ tiˈ nguˈ, si ná tyaala nguˈ, biˈ laca nguˈ cunaˈa̱ nu ndiya tiˈ ycuiˈ Ndyosi ñaˈa̱ Ni jiˈi̱. Ñiˈya̱ laca sca na nu tsoˈo tsa ñaˈa̱, nu quiñaˈa̱ tsa ngaˈa̱, juaˈa̱ laca nguˈ cunaˈa̱ nu ná cuxi tyiquee tsiyaˈ ti cuentya jiˈi̱ ycuiˈ Ni.
\v 5 Ná cuxi tyiquee tsiyaˈ ti jyoˈo maˈ cusuˈ nu ntsuˈu chaˈ jiˈi̱ loˈo ycuiˈ Ndyosi nu ngua cua saˈni. Tsoˈo tsa ñaˈa̱ maˈ cusuˈ biˈ, chaˈ nguaˈni tlyu maˈ jiˈi̱ ycuiˈ Ni, loˈo juaˈa̱ ndaquiyaˈ maˈ jiˈi̱ chaˈ nu nchcuiˈ clyoˈo maˈ.
\v 6 Jyoˈo maˈ Sara nguaˈni maˈ juaˈa̱, chaˈ ndaquiyaˈ maˈ biˈ jiˈi̱ jyoˈo Abraham nu ngua clyoˈo maˈ; “xuˈna naˈ”, nacui̱ maˈ biˈ jiˈi̱. Loˈo cuˈma̱ ni, ñiˈya̱ si laca ma̱ sñiˈ maˈ Sara biˈ, juaˈa̱ laca cuˈma̱ nguˈ cunaˈa̱ juani, si xcuiˈ chaˈ tsoˈo nduˈni ma̱. Ngaˈaa ntsuˈu chaˈ cutsi̱i̱ ma̱, ngaˈaa ntsuˈu chaˈ culacua tsa tiˈ ma̱ liˈ.
\p
\v 7 Loˈo juaˈa̱ cuˈma̱ nguˈ quiˈyu ni, tsoˈo ti tyiˈi̱ ma̱ loˈo clyoˈo ma̱, cuaˈni tyacaˈa ma̱ jiˈi̱ clyoˈo ma̱; masi xtyi la juersa ntsuˈu jiˈi̱ nu cunaˈa̱, pana stuˈba ti laca tyucuaa ma̱ cuentya jiˈi̱ ycuiˈ Ndyosi, chaˈ cua nda Ni chalyuu nu ná ngaˈa̱ chaˈ tye jiˈi̱ tyucuaa ma̱. Si cuaˈni ma̱ tsoˈo juaˈa̱, tsoˈo ti tyiˈi̱ ma̱ toˈ tyi ma̱; liˈ ná caja sca chaˈ cuxi nu cuaˈa jiˈi̱ ma̱, nu cuaˈni chaˈ ná chcuiˈ ma̱ loˈo ycuiˈ Ndyosi.
\s Ñiˈya nu chcubeˈ nguˈ, masi xcuiˈ chaˈ tsoˈo nduˈni nguˈ
\p
\v 8 Lcaa cuˈma̱ ni, ngaˈa̱ chaˈ caca stuˈba tyiquee ma̱ loˈo tyaˈa ma̱, chaˈ tyaˈa ngusñi ma̱ chaˈ jiˈi̱ Cristo laca ma̱; ngaˈa̱ chaˈ cube tiˈ ma̱ jiˈi̱ tyaˈa ma̱, ngaˈa̱ chaˈ cuaˈni tyacaˈa ma̱ jiˈi̱ lcaa tyaˈa ma̱. Loˈo juaˈa̱ cuaˈni tyaˈna tiˈ ma̱ jiˈi̱ tyaˈa ma̱, ná cuaˈni liyeˈ tiˈ ma̱ ñaˈa̱ ma̱ jiˈi̱ nguˈ biˈ.
\v 9 Ná cuaˈni cuxi ma̱ loˈo tyaˈa ñati̱ ma̱, masi nguaˈni cuxi nguˈ loˈo ma̱; loˈo juaˈa̱ ná chcuiˈ tyaala ma̱ loˈo tyaˈa̱ ñati̱ ma̱, masi tyaala tsa nchcuiˈ nguˈ loˈo ma̱. Na cua ngusubi ycuiˈ Ni jiˈi̱ ma̱ chaˈ xtyucua Ni jiˈi̱ cuˈma̱, biˈ chaˈ tsoˈo la si chcuiˈ ma̱ loˈo ycuiˈ Ndyosi chaˈ xtyucua Ni jiˈi̱ nguˈ tyaala biˈ.
\v 10 Ndiˈya̱ nscua chaˈ lo quityi jiˈi̱ ycuiˈ Ndyosi:
\q Lcaa nguˈ nu ntiˈ caja chalyuu tsoˈo jiˈi̱ nguˈ, chaˈ ca chaa tiˈ nguˈ,
\q ngaˈa̱ chaˈ cuaˈa nguˈ biˈ jiˈi̱ ycuiˈ ca nguˈ chaˈ ná chcuiˈ nguˈ chaˈ cuxi;
\q la cuiˈ juaˈa̱ ná tsoˈo si tyuˈu chaˈ cuiñi tuˈba nguˈ biˈ.
\q
\v 11 Ntsuˈu chaˈ tyaatsuˈ nguˈ biˈ jiˈi̱ lcaa chaˈ cuxi nu ntsuˈu jiˈi̱ nguˈ, chaˈ ngaˈaa cuaˈni nguˈ chaˈ cuxi biˈ.
\q Xcuiˈ chaˈ tsoˈo ntsuˈu chaˈ cuaˈni nguˈ biˈ.
\q Loˈo liˈ ntsuˈu chaˈ xtyucua nguˈ biˈ jiˈi̱ tyaˈa ñati̱ nguˈ lcaa tsa̱,
\q xquiˈya chaˈ tsoˈo ntsuˈu tyiquee nguˈ biˈ ñaˈa̱ nguˈ jiˈi̱ tyaˈa ñati̱ nguˈ; juaˈa̱ ngaˈaa xu̱u̱ tyaˈa nguˈ biˈ liˈ.
\q
\v 12 Tsoˈo la si juaˈa̱ cuaˈni nguˈ; cuaˈni tyacaˈa ycuiˈ nu Xuˈna na jiˈi̱ nu ñati̱ nu tsoˈo tyiquee biˈ liˈ, 
\q cuna Ni loˈo chcuiˈ nguˈ biˈ loˈo Ni.
\q Pana lye tyiˈi̱ loo Ni ñaˈa̱ Ni jiˈi̱ ñati̱ nu xñaˈa̱ tyiquee.
\m Juaˈa̱ nchcuiˈ lo quityi biˈ.
\p
\v 13 Ná ntsuˈu chaˈ cuaˈni cuxi nguˈ loˈo ma̱, si xcuiˈ chaˈ tsoˈo ti cuaˈni ma̱.
\v 14 Pana si ntsuˈu quiyaˈ nu cuaˈni lyaˈ tiˈ nguˈ jiˈi̱ ma̱ xquiˈya sca chaˈ tsoˈo nu ndyuˈni ma̱, tsoˈo la si ná caca xñiˈi̱ tiˈ tyiquee ma̱ liˈ; ná cube tiˈ ma̱, ná cutsi̱i̱ ma̱ jiˈi̱ nguˈ biˈ.
\v 15 Tyucui tyiquee ma̱ cuaˈni tlyu ma̱ jiˈi̱ Cristo, chaˈ chañi chaˈ laca Ni nu Xuˈna na. Loˈo juaˈa̱ culacua xi tiˈ ma̱ ñiˈya̱ caca xacui̱ ma̱ chaˈ jiˈi̱ nguˈ loˈo xcuane nguˈ jiˈi̱ ma̱ ndiˈya̱: ¿Ni chaˈ laca ndu̱ tiˈ ma̱ jiˈi̱ nu Cristo biˈ? Tsoˈo ti xacui̱ ma̱ chaˈ jiˈi̱ nguˈ biˈ, ná cuaˈni tyixi ma̱ loˈo nguˈ biˈ.
\v 16 Xcuiˈ chaˈ tsoˈo cuaˈni ma̱ loˈo nguˈ lacua, chaˈ taca tyanu lubii cresiya jiˈi̱ ma̱; liˈ caca tyujuˈu tiˈ nu nguˈ cuiñi biˈ, nguˈ nu nchcuiˈ cuentyu jiˈi̱ ma̱ xquiˈya chaˈ tsoˈo nu ndyuˈni ma̱ cuentya jiˈi̱ Cristo.
\v 17 Si ntsuˈu chaˈ chcubeˈ na, tsoˈo la xcubeˈ nguˈ jiˈna xquiˈya sca chaˈ tsoˈo nu ndyuˈni na, si ta ycuiˈ Ndyosi chacuayáˈ jiˈi̱ nguˈ; pana si nguaˈni na sca chaˈ cuxi, liñi tsa ndyuˈu chaˈ si xcubeˈ nguˈ jiˈna liˈ.
\p
\v 18 Ycuiˈ Cristo ngujuii xquiˈya quiˈya nu ntsuˈu jiˈna, masi lubii tsiyaˈ ti cresiya jiˈi̱ yu; nchcubeˈ yu cuentya jiˈna, chaˈ cuxi tsa tyiquee na. Loˈo juani taca tyalaa na slo ycuiˈ Ndyosi xquiˈya nu Cristo biˈ. Sca ti quiyaˈ ngua chaˈ tiˈí biˈ jiˈi̱ Cristo, ndye cña jiˈi̱ yu nde loyuu chalyuu liˈ. Ndyujuii nguˈ jiˈi̱ nu ñati̱ nu naa Jesucristo biˈ, pana nguaˈni Xtyiˈi ycuiˈ Ndyosi chaˈ ndyuˈú yu chaca quiyaˈ.
\v 19 Xtyiˈi ycuiˈ Cristo ngua nu ndyaa neˈ niˈi̱ chcua̱ su ntsuˈu nguˈ jyoˈo ca bilyaa, chaˈ chcuiˈ Ni loˈo nguˈ jyoˈo biˈ.
\v 20 Ná ntajaˈa̱ nguˈ, ná ndaquiyaˈ nguˈ jyoˈo biˈ jiˈi̱ ycuiˈ Ndyosi cua saˈni la loˈo ngutiˈi̱ nguˈ chalyuu. Ntsuˈu xi nguˈ jyoˈo biˈ nu ngutiˈi̱ tyempo loˈo ngüiñá jyoˈo Noé yaca niˈi̱ biˈ. Ngujuatya ycuiˈ Ndyosi jiˈi̱ nguˈ biˈ, ngua tiˈ Ni chaˈ taquiyaˈ nguˈ biˈ jiˈi̱ Ni, loˈo ná ntajaˈa̱ nguˈ biˈ tsiyaˈ ti; biˈ chaˈ snuˈ tyaˈa ti ñati̱ ngulaá neˈ yaca niˈi̱ biˈ loˈo nguaˈya tyo clyaa tyempo biˈ.
\v 21 Ñiˈya̱ nu nguaˈni lyaá Ni jiˈi̱ nguˈ nu ngutaˈa̱ neˈ yaca niˈi̱ biˈ lo hitya nu ngua saˈni la, chaˈ ndaquiyaˈ nguˈ biˈ jiˈi̱ chaˈ nu nchcuiˈ ycuiˈ Ni; juaˈa̱ clyaá ma̱ juani, chaˈ cua ndaquiyaˈ ma̱ jiˈi̱ chaˈ nu nchcuiˈ Ni. Cua ndyaa ma̱ lo hitya chaˈ tyucuatya ma̱ liˈ. Siˈi na caata ti na chcu laca chaˈ biˈ, siˈi chaˈ cuuˈ cuañaˈ na, biˈ chaˈ tyucuatya na liˈ; ndiˈya̱ laca chaˈ: na cua ndijña na jiˈi̱ ycuiˈ Ndyosi chaˈ cuaˈni lubii Ni jiˈi̱ cresiya jiˈna xquiˈya chaˈ cua ndyuˈú Jesucristo chaca quiyaˈ, biˈ chaˈ ntyucuatya na.
\v 22 Na cua ndyaa Jesucristo nde cua̱, loˈo juani ndiˈi̱ yu laˈa tsuˈ cui̱ ca su ntucua ycuiˈ Ndyosi. Nu Jesucristo biˈ ni, laca yu loo jiˈi̱ lcaa xca̱ jiˈi̱ ycuiˈ Ndyosi, jiˈi̱ lcaa nguˈ nu laca cña, jiˈi̱ lcaa cuiˈi̱ tsoˈo nu nchca xi jiˈi̱; laca yu loo tsiyaˈ ti.
\c 4
\s Cuaˈni na cua ñaˈa̱ ca cña jiˈi̱ ycuiˈ Ndyosi nu nchca jiˈna
\p
\v 1 Loˈo ndyiˈu tiˈ ma̱ chaˈ nchcubeˈ Cristo nde chalyuu, liˈ caca nguula la tiˈ ma̱ chaˈ talo tyiquee ma̱ loˈo chcubeˈ cuˈma̱; ñiˈya̱ nu ndalo tyiquee ycuiˈ Cristo, juaˈa̱ taca talo tyiquee ma̱ loˈo chcubeˈ ma̱ liˈ. Ngaˈaa caca cuaˈni chaˈ cuxi ngana jiˈi̱ ma̱ si loˈo cuˈma̱ chcubeˈ ma̱ juaˈa̱.
\v 2 Loˈo liˈ nu chaˈ cuxi nu ndiya tiˈ ñati̱ chalyuu ni, ngaˈaa siˈi chaˈ biˈ nu caca loo jiˈi̱ ma̱ lcaa tsa̱ loˈo ndiˈi̱ ma̱ chalyuu; xcuiˈ cña nu ndiya tiˈ ycuiˈ Ndyosi chaˈ cuaˈni ma̱, biˈ laca cña nu cuaˈni ma̱, chaˈ sca ti ycuiˈ Ndyosi caca loo jiˈi̱ ma̱ liˈ.
\v 3 Tyempo nu nteje tacui, cua nguaˈni ma̱ lcaa chaˈ cuxi ñiˈya̱ nu ndiya tiˈ ñati̱ nu ná ntsuˈu chaˈ jiˈi̱ loˈo ycuiˈ Ndyosi tsiyaˈ ti. Cuayáˈ tsa lo cua ti chaˈ cuxi: biˈ chaˈ ngaˈaa cuaˈni subaˈ ma̱ loˈo tyaˈa ñati̱ ma̱ juani, ngaˈaa cuaˈni ma̱ lcaa lo chaˈ cuxi nu ndiya tiˈ ma̱ cua saˈni la; ngaˈaa caca cuˈbi ma̱, ngaˈaa tyeje tacui ma̱ cuayáˈ cacu ma̱, coˈo ma̱, ñiˈya̱ nu ndyuˈni nguˈ nu ná ndube tiˈ loˈo ndyaˈa̱ nguˈ biˈ taˈa; ngaˈaa cuaˈni tlyu ma̱ jiˈi̱ lcui̱ joˈó, chaˈ subaˈ tsa chaˈ biˈ cuentya jiˈi̱ ycuiˈ Ndyosi.
\v 4 Nguaˈni ma̱ chaˈ cuxi juaˈa̱ cua tsubiˈ la; loˈo juani nu ñati̱ nu ngua tyaˈa tsoˈo ma̱ nquichaˈ, ndube tsa tiˈ nguˈ chaˈ ngaˈaa ntiˈ ma̱ cuaˈni ma̱ cua ñaˈa̱ ca chaˈ cuxi nu nguaˈni ma̱ cua tsubiˈ la. Ná nchca cuayáˈ tiˈ ñati̱ biˈ ni chaˈ laca ngaˈaa nduˈni ma̱ juaˈa̱, biˈ chaˈ nchcuiˈ nguˈ biˈ cuentyu jiˈi̱ ma̱ juani.
\v 5 Pana ná cube tiˈ ma̱, ntsuˈu chaˈ xacui̱ nguˈ biˈ chaˈ jiˈi̱ ycuiˈ Ndyosi cuentya jiˈi̱ chaˈ cuxi nu nduˈni nguˈ chalyuu. Cua ngulala ti tyalaa tsa̱ nu cuaˈni cuayáˈ Ni jiˈi̱ lcaa ñati̱, masi nguˈ jyoˈo, masi nguˈ nu tya ndiˈi̱ chalyuu.
\v 6 Loˈo juaˈa̱ nguˈ nu cua ngujuii, nu cua ndyuna chaˈ tsoˈo jiˈi̱ Jesucristo, ñati̱ chalyuu ti ngua nguˈ biˈ, biˈ chaˈ ngujuii nguˈ, ñiˈya̱ nu nscua chaˈ cajaa lcaa ñati̱; pana cuaˈni Xtyiˈi ycuiˈ Ndyosi chaˈ tyuˈú nguˈ biˈ chaca quiyaˈ, chaˈ caja chalyuu nu ná ngaˈa̱ chaˈ tye jiˈi̱ nguˈ biˈ, chaˈ cua ngusñi nguˈ chaˈ jiˈi̱ Jesús.
\p
\v 7 Cua tye ti chaˈ jiˈi̱ lcaa na nu ntsuˈu chalyuu; biˈ chaˈ tsoˈo la si cuaˈa ma̱ jiˈi̱ ycuiˈ ca ma̱, tii ti tiˈ ma̱ tyiˈi̱ ma̱ chalyuu chaˈ taca cuaˈni ma̱ cña tsoˈo, chaˈ luˈba ti taca chcuiˈ ma̱ loˈo ycuiˈ Ndyosi.
\v 8 Nu chaˈ nu ndulo tsa chaˈ cuaˈni ma̱ ni, biˈ laca chaˈ xcuiˈ tsoˈo caca tyiquee ma̱ ñaˈa̱ ma̱ jiˈi̱ tyaˈa ñati̱ ma̱. Loˈo si juaˈa̱ ntiˈ na ñaˈa̱ na jiˈi̱ tyaˈa na, ndyuˈni clyu tiˈ na jiˈi̱ quiˈya nu ntsuˈu jiˈi̱ tyaˈa na liˈ.
\v 9 Ta ma̱ xi toˈ tyi ma̱ su tyiˈi̱ tyaˈa ma̱, loˈo juaˈa̱ ta ma̱ na cacu nguˈ loˈo tyalaa nguˈ biˈ slo ma̱; ná chcuiˈ ma̱ chaˈ tiˈí jiˈi̱ tyaˈa ma̱ xquiˈya chaˈ ndyalaa nguˈ slo ma̱.
\v 10 Nda xlyaˈbe ti ycuiˈ Ndyosi ñiˈya̱ taca cuaˈni scaa ma̱ sca cña tsoˈo, lcaa ma̱ nu ngusñi ma̱ chaˈ jiˈi̱ Jesús. Ñiˈya̱ loˈo nxtyucua ycuiˈ Ndyosi jiˈna chaˈ caca tyaˈna tiˈ na jiˈi̱ tyaˈa ñati̱ na, la cuiˈ juaˈa̱ ngaˈa̱ chaˈ xtyucua na jiˈi̱ nguˈ loˈo cuaˈni na cña nu nda Ni chaˈ cuaˈni sa scaa na.
\v 11 Culuˈu ma̱ chaˈ jiˈi̱ ñati̱, si biˈ laca cña nu cua nda Ni jiˈi̱ ma̱ chaˈ cuaˈni ma̱; culuˈu ma̱ tsa ñaˈa̱ chaˈ nu ntiˈ ycuiˈ Ndyosi chcuiˈ Ni loˈo nguˈ. Loˈo juaˈa̱ xtyucua ma̱ jiˈi̱ tyaˈa ñati̱ ma̱ loˈo tyucui juersa nu nda ycuiˈ Ndyosi jiˈi̱ ma̱, si biˈ laca cña nu cua nda Ni jiˈi̱ ma̱ chaˈ cuaˈni ma̱. Nu loˈo ñaˈa̱ nguˈ cña tsoˈo nu ndyuˈni ma̱ biˈ, liˈ cuaˈni tlyu nguˈ jiˈi̱ ycuiˈ Ndyosi xquiˈya Jesucristo. Loˈo liˈ ná ngaˈa̱ chaˈ tye chaˈ cuaˈni tlyu nguˈ jiˈi̱ Cristo biˈ, chaˈ laca Cristo loo tsiyaˈ ti. Juaˈa̱ caca chaˈ tuˈni.
\s Ntsuˈu chaˈ tyacua chaˈ tiˈí jiˈi̱ ñati̱ nu ntsuˈu chaˈ jiˈi̱ loˈo Jesucristo
\p
\v 12 Cuˈma̱ tyaˈa tsoˈo na, masi lye tsa cuaˈni lyaˈ tiˈ ñati̱ jiˈi̱ ma̱, ñiˈya̱ ntiˈ si ntsuˈu ma̱ ndyaqui̱ ma̱ lo quiiˈ, ná ntsuˈu chaˈ cube tsa tiˈ ma̱; ná tsoˈo si culacua tsa tiˈ ma̱ liˈ, ñiˈya̱ si ná tsoˈo tyacua chaˈ cuxi jiˈi̱ ma̱, ntiˈ ma̱. Juaˈa̱ liˈ nchca cuayáˈ tiˈ Ni si chañi chaˈ ntsuˈu chaˈ jiˈi̱ ma̱ loˈo Ni, si ná chañi chaˈ biˈ.
\v 13 Ngaˈa̱ chaˈ caca tsoˈo tyiquee ma̱ loˈo tyiˈu tiˈ ma̱ chaˈ ñiˈya̱ ngua lyaˈ tiˈ nguˈ jiˈi̱ ycuiˈ Cristo, juaˈa̱ ca lyaˈ tiˈ nguˈ jiˈi̱ cuˈma̱ juani. Tlyu tsa laca Cristo cuentya jiˈi̱ ycuiˈ Ndyosi, lye tsa quijiˈi̱ xee jiˈi̱ Ni loˈo ca̱a̱ ycuiˈ Cristo chaca quiyaˈ nde loo la; liˈ ca chaa la tiˈ ma̱, ca tsoˈo la tyiquee ma̱.
\v 14 Nu loˈo nchcuiˈ nguˈ chaˈ tiˈí jiˈi̱ ma̱ xquiˈya Cristo, ca tsoˈo tyiquee ma̱ chaˈ ndiˈi̱ Xtyiˈi ycuiˈ Ndyosi loˈo ma̱, loˈo juaˈa̱ tlyu tsa chaˈ tsoˈo ntsuˈu jiˈi̱ ycuiˈ Ni. Nchcuiˈ nguˈ biˈ chaˈ cuxi jiˈi̱ ycuiˈ Ndyosi; pana cuˈma̱ ni, tsoˈo tsa si tya cuaˈni tlyu ma̱ jiˈi̱ Ni.
\v 15 Ná tsoˈo tsiyaˈ ti si cuaˈni ma̱ chaˈ cuxi. Liñi tsa laca si chcubeˈ nguˈ nu loˈo cuaˈni nguˈ chaˈ cuxi; masi cujuii nguˈ jiˈi̱ tyaˈa ñati̱, masi cuaana nguˈ na nu ntsuˈu jiˈi̱ tyaˈa ñati̱, masi cuaˈni nguˈ xaˈ lo chaˈ cuxi nu ná ntsuˈu chacuayáˈ cuaˈni nguˈ, masi xu̱u̱ tyaˈa nguˈ loˈo nguˈ nu laca loo, liñi tsa si chcubeˈ nguˈ biˈ.
\v 16 Pana ná ntsuˈu chaˈ ca tyujuˈu tiˈ ma̱ si xcubeˈ nguˈ jiˈi̱ ma̱ chaˈ laca ma̱ ñati̱ jiˈi̱ Jesucristo; cuaˈni tlyu ma̱ jiˈi̱ ycuiˈ Ndyosi chaˈ juaˈa̱ ndyaca jiˈi̱ ma̱ liˈ.
\p
\v 17 Cua ndyalaa hora chaˈ xana cuaˈni cuayáˈ Ni jiˈi̱ lcaa ñati̱, pana clyo nguxana Ni loˈo ñati̱ nu jiˈi̱ ycuiˈ Ni; biˈ chaˈ laca si ntsuˈu xi chaˈ tiˈí jiˈna juani loˈo nguxana ca ti Ni ndyuˈni cuayáˈ Ni jiˈi̱ ñati̱, caca cuayáˈ tiˈ na chaˈ tlyu la chaˈ caca loˈo chcubeˈ nguˈ cuxi nde loo la. Liˈ chcubeˈ ñati̱ nu ná ntajaˈa̱ taquiyaˈ jiˈi̱ chaˈ tsoˈo nu jiˈi̱ ycuiˈ Ndyosi.
\v 18 Tucui tsa chaˈ laca chaˈ clyaá ñati̱ nu nduˈni chaˈ tsoˈo ti; pana nu ñati̱ xñaˈa̱, loˈo juaˈa̱ ñati̱ nu ntsuˈu chaˈ cuxi jiˈi̱ ni, tye chaˈ jiˈi̱ nguˈ biˈ tsiyaˈ ti.
\v 19 Ndyiji xi chaˈ tiˈí jiˈi̱ ma̱ juani chacuayáˈ jiˈi̱ ycuiˈ Ndyosi. Cua jlo tiˈ Ni chaˈ biˈ, pana ná culatiˈi̱ Ni jiˈna si juaˈa̱. Ntsuˈu chaˈ tya cuaˈni na xcuiˈ chaˈ tsoˈo, chaˈ ñaˈa̱ ti xñi na chaˈ jiˈi̱ ycuiˈ Ni nu ngüiñá lcaa lo na, masi nchcubeˈ na; chañi chaˈ cñaˈa̱si̱i̱ Ni jiˈna liˈ.
\c 5
\s Cui̱i̱ nu nda Pedro loˈo ñati̱ tyaˈa ngusñi chaˈ jiˈi̱ Jesucristo
\p
\v 1 Sca nguˈ cusuˈ nu laca loo laca naˈ, loˈo juani ntiˈ naˈ ta naˈ sca cui̱i̱ loˈo cuˈma̱ tyaˈa cusuˈ na. Loˈo naˈ, cua naˈa̱ naˈ jiˈi̱ Cristo loˈo nguxcubeˈ nguˈ jiˈi̱ yu, biˈ chaˈ jlo tiˈ naˈ chaˈ stuˈba ti tyiˈi̱ lcaa tyaˈa na ca slo ycuiˈ Ndyosi; ñaˈa̱ na chaˈ tlyu nu caca liˈ.
\v 2 Ntsuˈu chaˈ ñaˈa̱si̱i̱ tsoˈo ma̱ jiˈi̱ lcaa nguˈ tyaˈa ma̱, ñaˈa̱ taju nguˈ tyaˈa ma̱ ca su laca ma̱ loo jiˈi̱ nguˈ. Ñiˈya̱ ntiˈ xlyaˈ, juaˈa̱ laca nguˈ biˈ; ñiˈya̱ ntiˈ ñati̱ nu ñaˈa̱si̱i̱ jiˈi̱ xlyaˈ, juaˈa̱ laca na, nguˈ cusuˈ tyaˈa na. Ngaˈa̱ chaˈ xtyucua na jiˈi̱ nguˈ tyaˈa na chaˈ tyanu tachaa la chaˈ jiˈi̱ Cristo tyiquee nguˈ. Tyucui tyiquee ma̱ cuaˈni ma̱ cña biˈ, chaˈ juaˈa̱ ntiˈ ycuiˈ Ndyosi chaˈ cuaˈni na; ná tsoˈo si ntsuˈu chaˈ tatsaa nguˈ tyaˈa ma̱ jiˈi̱ ma̱ chaˈ cuaˈni ma̱ cña biˈ. Loˈo juaˈa̱ ná tsoˈo si quiñaˈa̱ tsa cayaˈ xñi ma̱ jiˈi̱ nguˈ chaˈ cuaˈni ma̱ cña biˈ, pana tsoˈo la si tyucui tyiquee ma̱ cuaˈni ma̱ cña biˈ cuentya jiˈi̱ ycuiˈ Ndyosi.
\v 3 Ná laca ma̱ xuˈna nguˈ tyaˈa ma̱, biˈ chaˈ tsoˈo ti cuaˈni ma̱ slo nguˈ, chaˈ taca ca cuayáˈ tiˈ xaˈ la nguˈ tyaˈa ma̱ ñiˈya̱ nu ntsuˈu chaˈ cuaˈni nguˈ.
\v 4 Nu loˈo tyuˈu tucua ycuiˈ nu Xuˈna na, liˈ ta Ni na tsoˈo nu tyacua jiˈi̱ ma̱. Ná ngaˈa̱ chaˈ tye tsiyaˈ ti na nu ta Ni jiˈi̱ lcaa na nu ntsuˈu cña jiˈna chaˈ ñaˈa̱si̱i̱ na jiˈi̱ taju ñati̱ jiˈi̱ Ni; siˈi ñiˈya̱ ntiˈ ngana nu caja jiˈna loˈo ndyuˈni na cña nde chalyuu nu yala ti tye biˈ.
\p
\v 5 Loˈo juaˈa̱ cuˈma̱ nguˈ cuañiˈ ni, ta naˈ sca cui̱i̱ loˈo ma̱. Taquiyaˈ ma̱ jiˈi̱ chaˈ nu nchcuiˈ nguˈ cusuˈ nu laca loo jiˈi̱ ma̱. Loˈo juaˈa̱ ntsuˈu chaˈ xtyucua ma̱ jiˈi̱ tyaˈa ñati̱ ma̱, chaˈ ná tsoˈo cuaˈni tyucuaa tiˈ ma̱ jiˈi̱ nguˈ biˈ. Ndiˈya̱ nscua chaˈ lo quityi jiˈi̱ ycuiˈ Ndyosi:
\q Xu̱u̱ tyaˈa ycuiˈ Ndyosi loˈo ñati̱ nu nduˈni tyucuaa tiˈ jiˈi̱ tyaˈa ñati̱,
\q pana xtyucua tsa Ni jiˈi̱ ñati̱ nu xti ti chaˈ ntsuˈu tyiquee nguˈ cuentya jiˈi̱ ycuiˈ ca nguˈ.
\m
\v 6 Biˈ chaˈ taquiyaˈ ma̱ jiˈi̱ chaˈ nu nchcuiˈ ycuiˈ Ndyosi nu laca loo tsiyaˈ ti, chaˈ ná cuaˈni tyucuaa tiˈ ma̱ jiˈi̱ tyaˈa ñati̱ ma̱; cua jlo tiˈ ycuiˈ Ni ni tsa̱ laca nu loˈo cuaˈni Ni chaˈ caca ma̱ ñati̱ tlyu la.
\v 7 Cachaˈ ma̱ jiˈi̱ ycuiˈ Ni lcaa chaˈ nu nclyacua tsa tiˈ ma̱ jiˈi̱, loˈo liˈ cuaˈni Ni chaˈ ngaˈaa cube tiˈ ma̱ jiˈi̱ chaˈ biˈ. Chañi chaˈ ndube tiˈ ycuiˈ Ni ñaˈa̱ Ni jiˈi̱ cuˈma̱.
\p
\v 8 ¡Tii ti tiˈ ma̱ tyiˈi̱ ma̱ chalyuu! Ná cajaˈ ma̱, chaˈ tyaˈa cusu̱u̱ ma̱ laca ycuiˈ nu xñaˈa̱, loˈo juaˈa̱ cacua tsa ndu̱ biˈ slo ma̱. Ñiˈya̱ ntiˈ sca cuichi nu tyaala tsa nu nclyana jiˈi̱ sca ñati̱ chaˈ cacu niˈ, juaˈa̱ ntiˈ ndyaˈa̱ yuˈu nu xñaˈa̱ biˈ chalyuu. 
\v 9 Xñi tsoˈo ma̱ chaˈ jiˈi̱ ycuiˈ Ndyosi chaˈ caca nguula tiˈ tyiquee ma̱; liˈ ná ta ma̱ chacuayáˈ tyiji̱loo nu xñaˈa̱ biˈ jiˈi̱ ma̱. Jlo tiˈ na chaˈ sca ti cuayáˈ ndyacua chaˈ tiˈí jiˈi̱ lcaa tyaˈa na tyucui ñaˈa̱ chalyuu.
\v 10 Pana xti ti tsa̱ tyacua chaˈ tiˈí jiˈi̱ ma̱. Loˈo tye tsa̱ nu nchcubeˈ ma̱, liˈ cuaˈni ycuiˈ Ndyosi chaˈ caca tsoˈo ma̱, cuaˈni Ni chaˈ caca nguula tiˈ tyiquee ma̱ chaca quiyaˈ; ta Ni juersa jiˈi̱ ma̱, chaˈ xcuiˈ tsoˈo tsa nduˈni ycuiˈ Ni loˈo na. Xquiˈya Cristo cua ngusubi Ni jiˈna chaˈ taca tyiˈi̱ na ca su tlyu su ntucua ycuiˈ Ni.
\v 11 Ná ngaˈa̱ chaˈ tye tsa̱ nu cuaˈni tlyu na jiˈi̱ ycuiˈ Ndyosi liˈ, chaˈ laca Ni loo tsiyaˈ ti. Juaˈa̱ caca chaˈ tuˈni.
\s Nchcuiˈ salyaˈ Pedro loˈo nguˈ
\p
\v 12 Jlo tiˈ naˈ chaˈ tsoˈo tsa ngusñi Silvano tyaˈa na chaˈ jiˈi̱ ycuiˈ nu Xuˈna na; yu biˈ laca nu nguxtyucua tsa ˈna loˈo nguscua ya quityi sube re chaˈ ca̱a̱ slo cuˈma̱. Ntiˈ naˈ chaˈ caca nguula tiˈ tyiquee ma̱, chaˈ chañi chaˈ tlyu tsa chaˈ tsoˈo nduˈni ycuiˈ Ni loˈo na. Jlo tiˈ naˈ chaˈ biˈ, loˈo juaˈa̱ tsoˈo tsa si loˈo cuˈma̱ tyiˈu tiˈ ma̱ chaˈ biˈ, ñiˈya̱ laca loˈo nxtyucua tsa ycuiˈ Ni jiˈna lcaa tsa̱.
\p
\v 13 Ñaˈa̱ tsaca taju ñati̱ jiˈi̱ Jesucristo nde Babilonia re nda nguˈ xlyo niˈi̱ jiˈi̱ ma̱. Nguˈ tyaˈa na laca nguˈ biˈ, chaˈ loˈo tyucui taju nguˈ biˈ, ngusubi ycuiˈ Ndyosi jiˈi̱ nguˈ chaˈ caca nguˈ ñati̱ jiˈi̱ Ni. “Xlyo niˈi̱”, nacui̱ Marcos jiˈi̱ cuˈma̱, nu Marcos nu laca ñiˈya̱ ntiˈ sca sñiˈ naˈ.
\v 14 Chcuichaˈ ma̱ jiˈi̱ lcaa nguˈ tyaˈa ma̱; quityi ma̱ jiˈi̱ tyaˈa ma̱ cuentya jnaˈ, chaˈ chañi chaˈ tsoˈo ntsuˈu tyiquee na ñaˈa̱ na jiˈi̱ tyaˈa na.
\p Cuaˈni Ni chaˈ ti̱ ti tyiˈi̱ cresiya jiˈi̱ lcaa cuˈma̱ nu ntsuˈu chaˈ jiˈi̱ ma̱ loˈo Cristo.