\id 1JN
\h 1 JUAN
\mt Quityi sube nu nguscua San Juan clyo, nu ndyaa ca slo lcaa ñati̱ jiˈi̱ Jesucristo
\c 1
\s Jesucristo laca nu nda chaca chalyuu cucui jiˈi̱ ñati̱ 
\p
\v 1 Cua laca ntucua Jesús loˈo ycuiˈ Ndyosi Sti yu nu loˈo nguxana chalyuu tya clyo; la cuiˈ yu laca nu nchcuiˈ ya jiˈi̱, nu loˈo nscua ya tilaca laca Jesucristo. Cua jlo tsoˈo tiˈ ya chaˈ biˈ, chaˈ cua naˈa̱ tsoˈo ya jiˈi̱ yu loˈo cloo ya, chaˈ stuˈba ti ngutaˈa̱ ya loˈo yu; cua ndyuloo ya jiˈi̱ yu loˈo cua nguaˈni caˈa̱ yaˈ ya jiˈi̱ ycuiˈ yu. Cua nchcuiˈ ya loˈo cuˈma̱ chaˈ Jesucristo laca nu nda chaca chalyuu cucui jiˈi̱ ñati̱. 
\v 2 Ngula Jesucristo nde lo yuu chalyuu su ndiˈi̱ ya, loˈo juaˈa̱ cua naˈa̱ ya jiˈi̱ ycuiˈ yu; biˈ laca chaˈ nu ndachaˈ ya jiˈi̱ ma̱ juani, chaˈ chañi tsa laca chaˈ biˈ. Nclyuˈu ya jiˈi̱ ma̱ ñiˈya̱ laca chaˈ tyucui tyempo luˈú Jesucristo, chaˈ ntucua yu ca slo ycuiˈ Ndyosi Sti na clyo; juaˈa̱ nclyuˈu ya ñiˈya̱ ngua chaˈ naˈa̱ ya jiˈi̱ yu nde chalyuu re.
\v 3 Juani culuˈu ya jiˈi̱ ma̱ cua ñaˈa̱ ca chaˈ nu cua naˈa̱ ya, culuˈu ya cua ñaˈa̱ ca chaˈ nu cua ndyuna ya. Chañi laca chaˈ stuˈba ntsuˈu tyiquee na loˈo ycuiˈ Ndyosi Sti na, juaˈa̱ loˈo Jesucristo nu sca ti Sñiˈ ycuiˈ Ni. Loˈo juani cua ntiˈ ya chaˈ stuˈba ti caca tyiquee ma̱ loˈo ya;
\v 4 biˈ chaˈ nscua ya quityi re, chaˈ lcaa tsa̱ tsoˈo ti tyiˈi̱ tyiquee na.
\s Xcuiˈ lubii tsa cresiya jiˈi̱ ycuiˈ Ndyosi
\p
\v 5 Nde culuˈu ya jiˈi̱ ma̱ chaˈ nu cua nda Jesucristo loˈo ya: Ñiˈya̱ ntiˈ sca xee nu ndubi tsa ñaˈa̱, juaˈa̱ ntiˈ ycuiˈ Ndyosi si tyuˈu tucua Ni slo na; xcuiˈ lubii tsa cresiya jiˈi̱ Ni, chaˈ neˈ cresiya jiˈi̱ ycuiˈ Ni ná ntsuˈu su talya ñaˈa̱, ná ntsuˈu chaˈ cuxi tsiyaˈ ti.
\v 6 Chaˈ cuiñi laca nu nda na si ñacui̱ na chaˈ stuˈba ntsuˈu tyiquee na loˈo ycuiˈ Ndyosi, loˈo liˈ ñaˈa̱ ti tya ndiya tiˈ na chaˈ cuxi; ndiˈi̱ na chalyuu ñiˈya̱ laca si talya tsa ñaˈa̱ su ndiˈi̱ na liˈ, chaˈ ná tsoˈo nduˈni na.
\v 7 Pana si lubii cresiya jiˈna ñiˈya̱ loˈo lubii cresiya jiˈi̱ ycuiˈ Ni, nduˈni na chaˈ tsoˈo liˈ; stuˈba ti caca tyiquee na loˈo tyaˈa ngusñi na chaˈ jiˈi̱ Jesús liˈ. Loˈo juaˈa̱ cuityi̱ Ni quiˈya nu ntsuˈu jiˈna, xquiˈya chaˈ cua ndyalú tañi Jesús Sñiˈ ycuiˈ Ni loˈo ngujuii yu lo crusi.
\p
\v 8 Si ñacui̱ na chaˈ ná ntsuˈu quiˈya jiˈna tsiyaˈ ti, na ñiloˈo na jiˈi̱ ycuiˈ ca ti na liˈ, chaˈ ná nchca chcuiˈ na chaˈ liñi.
\v 9 Pana taca jlya tiˈ na jiˈi̱ ycuiˈ Ndyosi chaˈ cuaˈni clyu tiˈ Ni jiˈna jiˈi̱ quiˈya nu ntsuˈu jiˈna, nu loˈo ñii na jiˈi̱ Ni chaˈ ntsuˈu quiˈya jiˈna. Tsoˈo tsa nduˈni Ni loˈo na liˈ; hasta cuityi̱ Ni lcaa chaˈ cuxi nu ntsuˈu neˈ cresiya jiˈna, xquiˈya chaˈ ngujuii Jesús lo crusi. 
\v 10 Ñiˈya̱ si cua nacui̱ na chaˈ na cuiñi ycuiˈ Ndyosi, juaˈa̱ ndyuˈu chaˈ si ñacui̱ na chaˈ ná ntsuˈu quiˈya jiˈna tsiyaˈ ti; ná ngusñi su̱u̱ chaˈ jiˈi̱ ycuiˈ Ndyosi neˈ cresiya jiˈna, si tya ñacui̱ na juaˈa̱.
\c 2
\s Cristo nu laca tuˈba jiˈna chaˈ chcuiˈ loˈo ycuiˈ Ndyosi cuentya jiˈna
\p
\v 1 Ñiˈya̱ ntiˈ naˈ ñaˈa̱a̱ jiˈi̱ sñiˈ naˈ, juaˈa̱ ntiˈ naˈ ñaˈa̱a̱ jiˈi̱ cuˈma̱, chaˈ tyacaˈa tsa ma̱ ˈna; biˈ chaˈ nscua naˈ quityi re chaˈ ca̱a̱ ca slo cuˈma̱, chaˈ ná ntiˈ naˈ chaˈ sta ycuiˈ Ndyosi quiˈya jiˈi̱ ma̱. Pana si ntsuˈu chaˈ sta Ni quiˈya jiˈna loˈo cua ngusñi na chaˈ jiˈi̱ Jesucristo, la cuiˈ Jesucristo laca nu cua nchcubeˈ yu cña loo na. Sca ñati̱ nu lubii tsa laca nu Jesucristo biˈ.
\v 2 Ngua cuxi tyiquee na cuentya jiˈi̱ ycuiˈ Ndyosi Sti na, xquiˈya chaˈ nguaˈni na chaˈ cuxi; biˈ chaˈ nchcubeˈ Jesucristo cña loo na, chaˈ quiˈya ycuiˈ yu yabeˈ nu ntsuˈu jiˈna xquiˈya chaˈ cuxi nu nguaˈni na. La cuiˈ juaˈa̱ quiˈya Jesucristo yabeˈ nu ntsuˈu jiˈi̱ lcaa ñati̱ chalyuu nu tsoˈo ntsuˈu tyiquee ñaˈa̱ jiˈi̱ ycuiˈ Ni.
\p
\v 3 Nu loˈo ntiˈ na taquiyaˈ na cua ñaˈa̱ ca cña nu ntiˈ Ni chaˈ cuaˈni na, liˈ taca jlo tiˈ na chaˈ chañi chaˈ ntsuˈu chaˈ jiˈna loˈo Jesucristo.
\v 4 Cuiñi tsa ñati̱ nu nacui̱ chaˈ ntsuˈu chaˈ jiˈi̱ nguˈ loˈo Jesucristo, si ná ndaquiyaˈ nguˈ jiˈi̱ cña nu nclyo Ni jiˈi̱ nguˈ; ná liñi chaˈ nu ntsuˈu tyiquee nguˈ biˈ. 
\v 5 Si chañi laca chaˈ ntucuá na lcaa chaˈ nu nda Jesucristo loˈo na, liˈ chañi laca chaˈ ntsuˈu tyiquee na ñaˈa̱ na jiˈi̱ ycuiˈ Ndyosi Sti yu; juaˈa̱ caca cuayáˈ tiˈ na chaˈ chañi chaˈ laca na ñati̱ jiˈi̱ Jesucristo masi tya ndiˈi̱ na chalyuu.
\v 6 Ñati̱ nu nchcuiˈ loˈo xaˈ la nguˈ chaˈ ñati̱ jiˈi̱ Jesucristo laca ycuiˈ, ntsuˈu chaˈ cuaˈni ñati̱ biˈ cña, cua ñaˈa̱ ca cña nu nguaˈni ycuiˈ Jesucristo.
\s Sca cña cucui chaˈ cuaˈni na
\p
\v 7 Cuˈma̱ tyaˈa ngusñi na chaˈ jiˈi̱ Jesús, cua nscua chaˈ lo quityi re chaˈ tyajaˈa̱ ma̱ tyuˈu tsoˈo tyiquee ma̱ ñaˈa̱ ma̱ jiˈi̱ tyaˈa ñati̱ ma̱. Siˈi sca chaˈ nu bilya cuna ma̱ laca chaˈ biˈ; cua ndyuna ma̱ chaˈ biˈ tya loˈo ngusñi ma̱ chaˈ jiˈi̱ Jesucristo tya clyo la, chaˈ la cuiˈ ti chaˈ biˈ laca nu cua nscua cua saˈni. 
\v 8 Pana siˈi juaˈa̱ ndyuˈni ñati̱, biˈ chaˈ nacui̱ na chaˈ sca cña cucui laca biˈ. Tsubiˈ ti nguxana Jesucristo nguluˈu yu jiˈna ñiˈya̱ ntsuˈu chaˈ tyuˈu tsoˈo tyiquee na ñaˈa̱ na jiˈi̱ xaˈ la tyaˈa ñati̱ na, nguaˈni Jesús chaˈ taca cuaˈni na juaˈa̱. Sca chaˈ cucui laca biˈ, chaˈ cua tye ti chaˈ talya ñaˈa̱ neˈ cresiya jiˈna; juani tyanu nu chaˈ tsoˈo jiˈi̱ Jesucristo neˈ cresiya jiˈna, ñiˈya̱ ntiˈ si ntyijiˈi̱ sca xee nu ndubi tsa ñaˈa̱ su ndiˈi̱ na.
\p
\v 9 Ñati̱ nu ñacui̱: “Cua ngusñi ya chaˈ jiˈi̱ Jesucristo, lubii tsa cresiya jiˈi̱ ya juani”, ñacui̱ nguˈ, pana tya tiˈí tiˈ nguˈ biˈ ñaˈa̱ nguˈ jiˈi̱ tyaˈa ñati̱ nguˈ, ñaˈa̱ ti tya ntsuˈu tsa chaˈ cuxi neˈ cresiya jiˈi̱ nguˈ biˈ, ñiˈya̱ laca sca seˈi̱ su talya tsa ñaˈa̱.
\v 10 Ñati̱ nu ntsuˈu tsa tyiquee ñaˈa̱ jiˈi̱ tyaˈa ñati̱, biˈ laca ñati̱ nu ntsuˈu xee jiˈi̱ Jesucristo neˈ cresiya jiˈi̱. Ni sca chaˈ cuxi ná cuaˈni nguˈ biˈ, nu cuaˈni chaˈ tyaˈa̱chu̱ˈ xaˈ la ñati̱ jiˈi̱ chaˈ jiˈi̱ Jesucristo. 
\v 11 Ñati̱ nu tiˈí tiˈ jiˈi̱ tyaˈa ñati̱ ni, tya ntsuˈu tsa chaˈ cuxi neˈ cresiya jiˈi̱ nguˈ biˈ; ñiˈya̱ ntiˈ nguˈ loˈo ndiˈi̱ nguˈ su talya ñaˈa̱, juaˈa̱ ti ntiˈ nguˈ biˈ ndiˈi̱ nguˈ chalyuu, chaˈ ná nchca quije tyucui̱i̱ liñi su tsaa nguˈ, chaˈ lye tsa ndacu̱ˈ talya xee nu ñaˈa̱ nguˈ biˈ liˈ.
\p
\v 12 Cuˈma̱ sñiˈ naˈ, nscua naˈ quityi re chaˈ ca̱a̱ slo ma̱, xquiˈya chaˈ nguaˈni clyu tiˈ ycuiˈ Ndyosi jiˈi̱ ma̱; xquiˈya Jesucristo cua ngüityi̱ Ni quiˈya nu ntsuˈu jiˈi̱ ma̱.
\v 13 Nscua naˈ quityi re chaˈ ca̱a̱ slo cuˈma̱ nguˈ cusuˈ, chaˈ cua ngujui ñiˈya̱ nu tyuˈu chaˈ jiˈi̱ ma̱ loˈo Jesucristo nu stuˈba ti ntucua loˈo ycuiˈ Ndyosi Sti yu tya loˈo nguxana chalyuu. Loˈo juaˈa̱ nscua naˈ quityi re chaˈ ca̱a̱ slo cuˈma̱ nguˈ cuañiˈ, chaˈ cua ntiji̱loo ma̱ jiˈi̱ nu xñaˈa̱.
\p Cuˈma̱ sñiˈ naˈ, cua ngujui ñiˈya̱ nu tyuˈu chaˈ jiˈi̱ ma̱ loˈo ycuiˈ Ndyosi Sti na, biˈ chaˈ nscua naˈ quityi re chaˈ ca̱a̱ slo ma̱.
\v 14 Cuˈma̱ nguˈ cusuˈ, cua ngusñi ma̱ chaˈ jiˈi̱ Jesucristo, la cuiˈ Cristo nu cua luˈú loˈo ycuiˈ Ndyosi Sti yu tya clyo, biˈ chaˈ nscua naˈ quityi re chaˈ ca̱a̱ ca slo ma̱. Cuˈma̱ nguˈ cuañiˈ, nguula ti tiˈ ma̱ ndiˈi̱ ma̱, chaˈ cua ndyanu tsoˈo chaˈ jiˈi̱ ycuiˈ Ndyosi neˈ cresiya jiˈi̱ ma̱; cua ntiji̱loo ma̱ jiˈi̱ nu xñaˈa̱, biˈ chaˈ laca nscua naˈ quityi re chaˈ ca̱a̱ slo ma̱.
\p
\v 15 Ná tyuˈu tyiquee ma̱ ñaˈa̱ ma̱ chaˈ cuxi nu ntsuˈu chalyuu, ni ná ca tiji̱ˈ tsa tiˈ ma̱ jiˈi̱ cua ñaˈa̱ ca chaˈ culiyaˈ nu ndyiji jiˈi̱ ñati̱ chaˈ ndiya la tiˈ nguˈ jiˈi̱. Si ndiya la tiˈ na nu cuxi nu ntsuˈu chalyuu, ná caca jiˈna tsiyaˈ ti tyuˈu tyiquee na ñaˈa̱ na jiˈi̱ ycuiˈ Ndyosi Sti na.
\v 16 Lcaa chaˈ cuxi nu ndacaˈa jiˈi̱ ñati̱ chaˈ ná xñi tsoˈo nguˈ chaˈ jiˈi̱ ycuiˈ Ndyosi, siˈi ca su ntucua ycuiˈ Ndyosi Sti na ndyuˈu chaˈ biˈ. Lcaa chaˈ cuxi nu ndiya tiˈ ñati̱ jiˈi̱, chaˈ tyaalaˈ xi tyiquee nguˈ; juaˈa̱ lcaa chaˈ cuxi nu ntiˈ nguˈ cuaˈni nguˈ loˈo ñaˈa̱ nguˈ jiˈi̱; juaˈa̱ lcaa na nu ntiˈ nguˈ chaˈ caja jiˈi̱ nguˈ, chaˈ juaˈa̱ cuaˈni tyixi ti nguˈ loˈo tyaˈa nguˈ, nde chalyuu ti ndyuˈu lcaa chaˈ cuxi biˈ. 
\v 17 Yala ti tye chalyuu re, culiji juaˈa̱ ti lcaa chaˈ cuxi nu ndiya tiˈ ñati̱ chalyuu; pana ñati̱ nu taquiyaˈ jiˈi̱ chaˈ nu nchcuiˈ ycuiˈ Ndyosi ni, ná ngaˈa̱ chaˈ tye chalyuu jiˈi̱ nguˈ biˈ.
\s Ntsuˈu chaˈ liñi loˈo ntsuˈu chaˈ cuiñi
\p
\v 18 Cuˈma̱ sñiˈ naˈ, cua ndyalaa hora chaˈ tye lcaa chaˈ nu ntsuˈu chalyuu. Cua jlo tiˈ ma̱ chaˈ cua lijya̱ sca ñati̱ tlyu nu cñiloˈo jiˈi̱ tyaˈa ñati̱ na chaˈ Cristo laca ycuiˈ yu; xu̱u̱ tyaˈa yu biˈ loˈo lcaa na nu ntsuˈu chaˈ jiˈna loˈo Cristo. Masi tyempo juani, quiñaˈa̱ tsa nguˈ cuiñi ntsuˈu chalyuu, nu ntiˈ xu̱u̱ tyaˈa loˈo ñati̱ jiˈi̱ Cristo; biˈ chaˈ cua ngua cuayáˈ tiˈ na chaˈ cua ngulala ti tye lcaa chaˈ.
\v 19 Tya clyo ndyuˈu tiˈi̱ nu nguˈ cuiñi biˈ loˈo na, loˈo liˈ ngutuˈu nguˈ biˈ ndyaa nguˈ; siˈi ñati̱ tyaˈa ntsuˈu chaˈ jiˈna loˈo Jesucristo laca nguˈ biˈ. Si chañi chaˈ tyaˈa ndyaˈa̱ na laca nguˈ biˈ, cua ndyanu nguˈ loˈo na nquichaˈ; pana ngutuˈu nguˈ biˈ, chaˈ taca ca cuayáˈ tiˈ na chaˈ siˈi lcaa ñati̱ nu ndyuˈu tiˈi̱ loˈo na laca tyaˈa ngusñi na chaˈ jiˈi̱ Jesucristo. 
\p
\v 20 Cua nda Cristo Xtyiˈi ycuiˈ Ni chaˈ tyanu neˈ cresiya jiˈi̱ lcaa nguˈ tyaˈa ngusñi ma̱ chaˈ jiˈi̱ Ni, biˈ chaˈ cua ngua cuayáˈ tsoˈo tiˈ lcaa tyaˈa ma̱ lcaa chaˈ nu nclyuˈu ycuiˈ Ndyosi jiˈna.
\v 21 Cua nscua naˈ quityi re, xquiˈya chaˈ nchca cuayáˈ tiˈ ma̱ ñaˈa̱ chaˈ liñi nu ntsuˈu jiˈi̱ Cristo. Siˈi chaˈ ná jlo tiˈ ma̱ chaˈ liñi biˈ; cua jlo tiˈ ma̱ ñaˈa̱ chaˈ liñi nu nchcuiˈ na, chaˈ siˈi chaˈ cuiñi ti laca chaˈ biˈ.
\p
\v 22 ¿Tilaca laca nu cuiñi lacua? Ñati̱ cuiñi biˈ laca nu ñacui̱ chaˈ siˈi Cristo laca Jesús, la cuiˈ Cristo nu cua nda ycuiˈ Ndyosi jiˈi̱ chaˈ ya̱a̱ yu chalyuu. Nxu̱u̱ tyaˈa nguˈ biˈ loˈo ñati̱ nu ntsuˈu chaˈ jiˈi̱ loˈo Cristo, chaˈ ñacui̱ nguˈ biˈ chaˈ siˈi nu sca ti Sñiˈ ycuiˈ Ndyosi laca Jesucristo, chaˈ siˈi ycuiˈ Ndyosi laca Sti Jesucristo.
\v 23 Si ñacui̱ na jiˈi̱ ñati̱ chaˈ siˈi Sñiˈ ycuiˈ Ndyosi laca Jesucristo, ná ntsuˈu chaˈ jiˈna loˈo ycuiˈ Ndyosi Sti Jesucristo, juaˈa̱ ndyuˈu chaˈ biˈ liˈ; pana loˈo xñi na chaˈ jiˈi̱ Sñiˈ ycuiˈ Ni, cua ntsuˈu chaˈ jiˈna loˈo ycuiˈ Ndyosi Sti yu, juaˈa̱ ndyuˈu chaˈ biˈ liˈ. 
\p
\v 24 Biˈ chaˈ ngaˈa̱ chaˈ tyanu tachaa chaˈ biˈ neˈ cresiya jiˈi̱ ma̱, chaˈ nu cua ndyuna ma̱ jiˈi̱ Jesús tya loˈo ngusñi ma̱ chaˈ jiˈi̱ yu tya clyo. Si tya ndyanu chaˈ biˈ neˈ cresiya jiˈi̱ ma̱, stuˈba tsa ntsuˈu tyiquee ma̱ loˈo Jesucristo masi tya ndiˈi̱ ma̱ chalyuu, loˈo juaˈa̱ stuˈba ntsuˈu tyiquee ma̱ loˈo ycuiˈ Ndyosi Sti na liˈ.
\v 25 Biˈ laca chaˈ nu ngüiñi jiˈi̱ Jesucristo loˈo na, chaˈ taca caja chaca chalyuu cucui nu ná ngaˈa̱ chaˈ tye jiˈna.
\p
\v 26 Tsa biˈ ti chaˈ nchcuiˈ naˈ cuentya jiˈi̱ ñati̱ nu nñiloˈo jiˈi̱ ma̱ juaˈa̱.
\v 27 Nu cuˈma̱ ni, cua ndyanu Xtyiˈi ycuiˈ Ndyosi neˈ cresiya jiˈi̱ ma̱, biˈ chaˈ ngaˈaa ntiˈ chaˈ culuˈu xaˈ ñati̱ jiˈi̱ ma̱; Xtyiˈi ycuiˈ Ndyosi ni, biˈ laca nu culuˈu jiˈi̱ ma̱ lcaa chaˈ nu lyiji chaˈ ca tsaˈa̱ ma̱ jiˈi̱. Nu loˈo nclyuˈu Xtyiˈi ycuiˈ Ndyosi jiˈi̱ ma̱ ni, liñi tsa laca chaˈ biˈ; siˈi chaˈ cuiñi nda nu biˈ. Biˈ chaˈ lacua, ñiˈya̱ nu nclyuˈu Xtyiˈi ycuiˈ Ni jiˈi̱ ma̱, la cuiˈ juaˈa̱ ngaˈa̱ chaˈ xñi ma̱ chaˈ jiˈi̱ Jesús.
\p
\v 28 Nu juani ti, cuˈma̱ sñiˈ naˈ, xñi tsoˈo ma̱ chaˈ jiˈi̱ Jesucristo. Loˈo liˈ, loˈo ca̱a̱ Jesucristo chalyuu chaca quiyaˈ, ngaˈaa ntsuˈu chaˈ ca tyujuˈu tiˈ na loˈo ñaˈa̱ na jiˈi̱ Ni chaˈ ca̱a̱ Ni; tyucui tyiquee na tyacua tyaˈa na loˈo Ni liˈ.
\v 29 Cua nchca cuayáˈ tiˈ ma̱ chaˈ lubii tsa cresiya jiˈi̱ Jesucristo, biˈ chaˈ tsoˈo si ca cuayáˈ tiˈ ma̱ chaˈ cua ñaˈa̱ ca ñati̱ nu nduˈni chaˈ tsoˈo ñiˈya̱ ndyuˈni ycuiˈ Jesús, caca nguˈ biˈ sñiˈ ycuiˈ Ndyosi.
\c 3
\s Sñiˈ ycuiˈ Ndyosi laca na
\p
\v 1 Tlyu tsa chaˈ tsoˈo laca chaˈ ntsuˈu tsa tyiquee ycuiˈ Ndyosi Sti na ñaˈa̱ Ni jiˈi̱ ca taˈa nguˈ tyaˈa ntsuˈu chaˈ jiˈna loˈo Jesucristo; biˈ chaˈ laca chaˈ nchcuiˈ ycuiˈ Ndyosi jiˈna chaˈ sñiˈ ycuiˈ Ni laca na, loˈo juaˈa̱ chañi laca chaˈ biˈ. Ná ntajaˈa̱ ñati̱ chalyuu tyuloo jiˈna chaˈ sñiˈ Ni laca na; la cuiˈ juaˈa̱ loˈo ngutiˈi̱ Jesucristo chalyuu, ná ntajaˈa̱ nguˈ tyuloo nguˈ jiˈi̱ yu liˈ.
\v 2 Cuˈma̱ nguˈ tyaˈa na nu tyacaˈa tsa ma̱ ˈna, nu juani ti laca na sñiˈ ycuiˈ Ndyosi; pana bilya caja chaˈ jiˈna ñiˈya̱ nu tsoˈo la ñaˈa̱ na, nu loˈo tyiˈi̱ na loˈo ycuiˈ Ni nde loo la. Ñiˈya̱ laca ycuiˈ Jesucristo, juaˈa̱ caca na loˈo culuˈu loo Jesucristo jiˈna loˈo cua ndye chalyuu re; liˈ taca ñaˈa̱ na jiˈi̱ Jesucristo ñiˈya̱ nu laca ycuiˈ. Tsa biˈ ti chaˈ nchca cuayáˈ tiˈ na juani. 
\v 3 Lcaa ñati̱ nu ntiˈ ñaˈa̱ jiˈi̱ Ni ca liˈ, ngaˈa̱ chaˈ cuaˈni lubii nguˈ jiˈi̱ cresiya jiˈi̱ nguˈ, ñiˈya̱ nu lubii cresiya jiˈi̱ ycuiˈ Jesucristo.
\p
\v 4 Si nduˈni na chaˈ cuxi, laca chaˈ ná ntajaˈa̱ na cuaˈni na cña nu ngulo ycuiˈ Ndyosi jiˈna; ntsuˈu quiˈya jiˈna xquiˈya chaˈ ná ntajaˈa̱ na taquiyaˈ na jiˈi̱ chaˈ nu nchcuiˈ Ni loˈo na.
\v 5 Cua jlo tiˈ ma̱ chaˈ cua ya̱a̱ Jesucristo chalyuu chaˈ cuityi̱ Ni quiˈya nu ntsuˈu jiˈi̱ ñati̱; pana ycuiˈ Cristo ni, ná ntsuˈu quiˈya jiˈi̱ yu tsiyaˈ ti.
\v 6 Ni sca ñati̱ nu nxñi tsoˈo chaˈ jiˈi̱ Jesucristo lcaa tsa̱, ngaˈaa nscua chaˈ cuaˈni nguˈ biˈ chaˈ cuxi. Nu ñati̱ nu nduˈni chaˈ cuxi lcaa tsa̱, nduˈni nguˈ chaˈ cuxi xquiˈya chaˈ bilya tyuˈu chaˈ jiˈi̱ nguˈ biˈ loˈo Jesucristo, bilya xñi nguˈ chaˈ jiˈi̱ Ni.
\v 7 Cuˈma̱ sñiˈ naˈ, ná ntiˈ naˈ chaˈ cñiloˈo xaˈ ñati̱ jiˈi̱ ma̱. Xcuiˈ tsoˈo ti nguaˈni Jesucristo nde chalyuu; biˈ chaˈ lacua, lcaa ñati̱ nu ntsuˈu chaˈ jiˈi̱ loˈo Jesucristo, cua nscua chaˈ xcuiˈ chaˈ tsoˈo ti cuaˈni nguˈ biˈ laja loˈo tyiˈi̱ nguˈ chalyuu.
\v 8 Lcaa ñati̱ nu nduˈni xcuiˈ chaˈ cuxi, cua laca nguˈ biˈ sñiˈ ycuiˈ nu xñaˈa̱ nu laca xuˈna cuiñaja; tya lyiji tye chaˈ cuaˈni nu xñaˈa̱ biˈ chaˈ cuxi. Sca ti Jesús nu Sñiˈ ycuiˈ Ndyosi, cua ya̱a̱ Ni chalyuu chaˈ cuaˈni tye Ni jiˈi̱ lcaa cña nu ndyuˈni nu xñaˈa̱ biˈ.
\p
\v 9 Ñati̱ nu laca sñiˈ ycuiˈ Ndyosi ni, ngaˈaa nscua chaˈ cuaˈni nguˈ chaˈ cuxi, chaˈ cua nda ycuiˈ Ndyosi chaca chaˈ tsoˈo la nu tyanu neˈ cresiya jiˈi̱ nguˈ biˈ xquiˈya Xtyiˈi ycuiˈ Ndyosi. Ngaˈaa tyajaˈa̱ nguˈ biˈ cuaˈni nguˈ chaˈ cuxi, chaˈ sñiˈ ycuiˈ Ndyosi laca nguˈ biˈ.
\v 10 Biˈ chaˈ nchca cuayáˈ tiˈ ma̱ juani ñiˈya̱ laca ñati̱ nu laca sñiˈ ycuiˈ Nydosi, loˈo juaˈa̱ nchca cuayáˈ tiˈ ma̱ ñiˈya̱ nduˈni ñati̱ nu laca sñiˈ ycuiˈ nu xñaˈa̱. Siˈi sñiˈ ycuiˈ Ndyosi laca ñati̱ nu nduˈni chaˈ cuxi lcaa tsa̱, ni siˈi sñiˈ ycuiˈ Ndyosi laca ñati̱ nu ná ntsuˈu tyiquee ñaˈa̱ jiˈi̱ tyaˈa ñati̱.
\s Ngaˈa̱ chaˈ tyuˈu tyiquee na ñaˈa̱ na jiˈi̱ tyaˈa ñati̱ na
\p
\v 11 Nde nscua la cuiˈ chaˈ nu cua ndyuna ma̱ loˈo ngusñi ma̱ chaˈ jiˈi̱ Jesús tya clyo: ngaˈa̱ chaˈ tyuˈu tyiquee na ñaˈa̱ na jiˈi̱ tyaˈa ñati̱ na.
\v 12 Ná cuaˈni na ñiˈya̱ nu nguaˈni jyoˈo Caín; sñiˈ ycuiˈ nu xñaˈa̱ ngua yu biˈ, chaˈ ndyujuii yu jiˈi̱ tyaˈa yu. ¿Ni chaˈ laca nguaˈni yu juaˈa̱? Ndyujuii yu jiˈi̱ tyaˈa yu xquiˈya chaˈ xcuiˈ chaˈ cuxi nguaˈni jyoˈo Caín biˈ, biˈ chaˈ ná ndiya tiˈ yu chaˈ xcuiˈ chaˈ tsoˈo nguaˈni yu tyaˈa yu biˈ.
\p
\v 13 Cuˈma̱ tyaˈa ngusñi na chaˈ jiˈi̱ ycuiˈ Ndyosi, ná quiñaˈa̱ tsa chaˈ culacua tiˈ ma̱ si liyeˈ tsa tiˈ ñati̱ chalyuu ñaˈa̱ nguˈ jiˈi̱ ma̱.
\v 14 Xcuiˈ ngunaˈ tya ndiˈi̱ na chalyuu cua tsubiˈ la xquiˈya quiˈya nu ntsuˈu jiˈna; pana juani, cua nda ycuiˈ Ndyosi chaca chalyuu cucui jiˈna, chaˈ tsoˈo ti ndiˈi̱ tyiquee na juani. Ntsuˈu tsa tyiquee na ñaˈa̱ na jiˈi̱ xaˈ la tyaˈa ntsuˈu chaˈ jiˈna loˈo Jesucristo; biˈ chaˈ taca jlo tiˈ na chaˈ cua ntsuˈu chaca chalyuu cucui jiˈna juani, chaˈ ñati̱ nu ná ntsuˈu tyiquee ñaˈa̱ jiˈi̱ tyaˈa ñati̱, ngunaˈ tya ndiˈi̱ nguˈ chalyuu. 
\v 15 Ñiˈya̱ laca ñati̱ nu ndyujuii jiˈi̱ tyaˈa ñati̱, juaˈa̱ laca na si liyeˈ tiˈ na ñaˈa̱ na jiˈi̱ tyaˈa ñati̱ na. Jlo tiˈ ma̱ chaˈ ngaˈaa caja chalyuu cucui biˈ jiˈi̱ ñati̱ si ndyujuii nguˈ jiˈi̱ tyaˈa ñati̱ nguˈ, pana la cuiˈ tyaˈa chaˈ laca si liyeˈ tsa tiˈ na ñaˈa̱ na jiˈi̱ tyaˈa ñati̱ na.
\v 16 Nu loˈo cube tiˈ na chaˈ cuentya jiˈna ntajaˈa̱ Cristo ngujuii yu lo crusi, chaˈ ntsuˈu tsa tyiquee Ni ñaˈa̱ Ni jiˈna, liˈ ca cuayáˈ tiˈ na ñaˈa̱ chaˈ nu tsoˈo la cuaˈni na, si ntsuˈu tyiquee na ñaˈa̱ na jiˈi̱ tyaˈa ngusñi na chaˈ jiˈi̱ Ni. Tsoˈo si tyajaˈa̱ na xtyucua na jiˈi̱ tyaˈa na juaˈa̱, masi hasta cajaa ycuiˈ na cuentya jiˈi̱ nguˈ tyaˈa na.
\v 17 Ntsuˈu nguˈ tyaˈa na nu ngaˈaa ntsuˈu na nu lyiji jiˈi̱ nguˈ tsiyaˈ ti chaˈ tyiji̱ yuˈu jiˈi̱ nguˈ chalyuu. Si juaˈa̱ tsoˈo ti ndiˈi̱ na, loˈo liˈ ñaˈa̱ na jiˈi̱ tyaˈa na nu ntsuˈu na nu lyiji jiˈi̱ nguˈ, pana ná ntajaˈa̱ na cuaˈni tyaˈna tiˈ na jiˈi̱ tyaˈa na, liˈ ná taca jiˈna ñacui̱ na chaˈ ntsuˈu tyiquee na ñaˈa̱ na jiˈi̱ ycuiˈ Ndyosi, chaˈ nu ycuiˈ Ndyosi ni, ntsuˈu tsa tyiquee Ni ñaˈa̱ Ni jiˈna.
\v 18 Cuˈma̱ sñiˈ naˈ, nu loˈo ntsuˈu tsa tyiquee na ñaˈa̱ na jiˈi̱ ycuiˈ Ndyosi loˈo jiˈi̱ tyaˈa ñati̱ na, siˈi sca cui̱i̱ ti laca nu chcuiˈ na loˈo nguˈ, siˈi sca chaˈ nu nda ti na loˈo nguˈ caca biˈ; tyucui tyiquee na ngaˈa̱ chaˈ xtyucua na jiˈi̱ nu nguˈ tyaˈa na biˈ. 
\s Taca jlo tiˈ na chaˈ chañi chaˈ ntsuˈu chaˈ jiˈna loˈo ycuiˈ Ndyosi
\p
\v 19 Si juaˈa̱ nduˈni na, liˈ caca cuayáˈ tiˈ na chaˈ liñi tsa laca chaˈ nu cua nda ycuiˈ Ndyosi loˈo na, chaˈ nu jlya tiˈ na jiˈi̱; ca tii na chaˈ cua ngüiñi tsoˈo chaˈ jiˈna loˈo ycuiˈ Ndyosi.
\v 20 Nu loˈo jlo tiˈ cresiya jiˈna chaˈ ntsuˈu quiˈya jiˈna, liˈ taca ca cuayáˈ tiˈ na chaˈ loˈo ycuiˈ Ni jlo tiˈ Ni chaˈ biˈ. Loˈo juaˈa̱ tlyu la laca ycuiˈ Ni, taca jiˈi̱ Ni cuaˈni lyaá Ni jiˈna jiˈi̱ chaˈ cuxi biˈ. 
\v 21 Cuˈma̱ nguˈ tyaˈa na nu tyacaˈa tsa ma̱ ˈna, si jlo tiˈ na chaˈ ná ntsuˈu quiˈya jiˈna, tyucui tyiquee na taca chcuiˈ na loˈo ycuiˈ Ndyosi liˈ;
\v 22 nu loˈo jña na chaˈ jiˈi̱ ycuiˈ Ni, caja cua ñaˈa̱ ca chaˈ jiˈna si taquiyaˈ na jiˈi̱ cña nu cua nda ycuiˈ Ni jiˈna, si cuaˈni na cña nu ndiya la tiˈ ycuiˈ Ni. 
\v 23 Nde laca cña nu cua nda ycuiˈ Ndyosi chaˈ cuaˈni sa scaa na: ngaˈa̱ chaˈ xñi tsoˈo na chaˈ jiˈi̱ Jesucristo Sñiˈ ycuiˈ Ni; la cuiˈ juaˈa̱ tsoˈo ti tyuˈu tyiquee na ñaˈa̱ na jiˈi̱ tyaˈa ñati̱ na, ñiˈya̱ nu cua nacui̱ ycuiˈ Ni jiˈna.
\v 24 Nu loˈo taquiyaˈ na jiˈi̱ cña nu cua ngulo ycuiˈ Ndyosi jiˈna chaˈ cuaˈni na, liˈ cua ntsuˈu chaˈ jiˈna loˈo ycuiˈ Ndyosi, loˈo juaˈa̱ ntsuˈu chaˈ jiˈi̱ Ni loˈo na liˈ. Jlo tiˈ na chaˈ biˈ, xquiˈya chaˈ cua nda ycuiˈ Ndyosi Xtyiˈi ycuiˈ Ni chaˈ tyanu neˈ cresiya jiˈna.
\c 4
\s Cuaˈni cuayáˈ na ñiˈya̱ nu ntsuˈu neˈ cresiya jiˈi̱ scaa ñati̱
\p
\v 1 Cuˈma̱ tyaˈa ngusñi na chaˈ jiˈi̱ Cristo nu tyacaˈa tsa ma̱ ˈna, ná xñi ma̱ chaˈ jiˈi̱ cua ñaˈa̱ ca ñati̱ nu ñacui̱ chaˈ cua nda ycuiˈ Ndyosi Xtyiˈi ycuiˈ Ni jiˈi̱ nguˈ biˈ. Cuaˈni cuayáˈ ma̱ jiˈi̱ nguˈ biˈ clyo, chaˈ quijeloo chaˈ jiˈi̱ ma̱ loˈo nguˈ si chañi chaˈ cua ndyanu Xtyiˈi ycuiˈ Ndyosi neˈ cresiya jiˈi̱ nguˈ biˈ, si chaˈ cuiñi ti laca nu nchcuiˈ nguˈ biˈ. Cua nduˈu tucua tyu̱u̱ tsa tyaˈa nguˈ cuiñi chalyuu juani, nu nñiloˈo jiˈi̱ ñati̱ chaˈ cuentya jiˈi̱ ycuiˈ Ndyosi nchcuiˈ nguˈ.
\v 2 Ndiˈya̱ ca cuayáˈ tiˈ na ñiˈya̱ laca ñati̱ nu cua ndyanu Xtyiˈi ycuiˈ Ndyosi neˈ cresiya jiˈi̱: lcaa ñati̱ nu nchcuiˈ chaˈ chañi chaˈ nu sca ti Sñiˈ ycuiˈ Ndyosi laca Jesucristo loˈo ngula yu chalyuu chaˈ ngua yu ñati̱, lcaa ñati̱ biˈ cua ntsuˈu Xtyiˈi ycuiˈ Ndyosi neˈ cresiya jiˈi̱ nguˈ;
\v 3 pana ñati̱ nu nacui̱ chaˈ siˈi Sñiˈ ycuiˈ Ndyosi laca Jesucristo loˈo ngula yu chalyuu ñiˈya̱ nu nclya ñati̱, ná ntsuˈu Xtyiˈi ycuiˈ Ni neˈ cresiya jiˈi̱ nguˈ biˈ. Chaˈ jiˈi̱ nu cuiñi nu ntiˈ tyiji̱loo jiˈi̱ Jesucristo laca chaˈ nu ntsuˈu neˈ cresiya jiˈi̱ nguˈ biˈ; juaˈa̱ cua ngua cuayáˈ tiˈ ma̱ chaˈ cua lijya̱ ti nu cuiñi biˈ, chaˈ masi juani cua laca ndiˈi̱ biˈ chalyuu.
\p
\v 4 Cuˈma̱ sñiˈ naˈ, cua ntsuˈu chaˈ jiˈi̱ ma̱ loˈo ycuiˈ Ndyosi, juaˈa̱ cua ngua nguula la tiˈ tyiquee ma̱ xquiˈya Xtyiˈi ycuiˈ Ndyosi nu ndyanu neˈ cresiya jiˈi̱ ma̱ liˈ; biˈ chaˈ nchca jiˈi̱ ma̱ tyiji̱loo ma̱ jiˈi̱ nguˈ cuiñi nu cua ntsuˈu chaˈ jiˈi̱ loˈo ycuiˈ nu xñaˈa̱. La cuiˈ nu xñaˈa̱ laca nu nclyo cña jiˈi̱ ñati̱ cuxi nde chalyuu. 
\v 5 Cua ntsuˈu chaˈ jiˈi̱ nu nguˈ cuiñi biˈ loˈo nu cuxi nu ntsuˈu chalyuu, loˈo juaˈa̱ xcuiˈ chaˈ jiˈi̱ nu xñaˈa̱ laca chaˈ nu nchcuiˈ nguˈ biˈ; biˈ chaˈ ndiya tsa tiˈ ñati̱ chalyuu cuna nguˈ chaˈ nu nda nu nguˈ cuiñi biˈ, lcaa ñati̱ nu ná ndaquiyaˈ jiˈi̱ Jesucristo tsiyaˈ ti.
\v 6 Pana ñati̱ jiˈi̱ ycuiˈ Ndyosi laca na. Nu loˈo ntsuˈu chaˈ jiˈi̱ ñati̱ loˈo ycuiˈ Ndyosi, cuna nguˈ lcaa chaˈ nu chcuiˈ na loˈo nguˈ liˈ; ñati̱ nu ná ntsuˈu chaˈ jiˈi̱ loˈo ycuiˈ Ndyosi tsiyaˈ ti, biˈ ñati̱ laca nu ná nduna chaˈ nu nchcuiˈ na. Juaˈa̱ taca quijeloo chaˈ jiˈna tilaca laca nu ntsuˈu chaˈ liñi jiˈi̱, tilaca laca nu ntsuˈu chaˈ cuiñi jiˈi̱.
\s Xcuiˈ ntsuˈu tyiquee ycuiˈ Ndyosi ñaˈa̱ Ni jiˈi̱ ñati̱ 
\p
\v 7 Cuˈma̱ nguˈ tyaˈa na nu tyacaˈa tsa ma̱ ˈna, ngaˈa̱ chaˈ tyuˈu tsoˈo tyiquee na ñaˈa̱ na jiˈi̱ tyaˈa ñati̱ na; ycuiˈ Ndyosi laca nu nclyo cña chaˈ xcuiˈ tsoˈo ti tyuˈu tyiquee na ñaˈa̱ na jiˈi̱ tyaˈa ñati̱ na. Lcaa ñati̱ nu ntsuˈu tyiquee ñaˈa̱ jiˈi̱ tyaˈa ñati̱, sñiˈ ycuiˈ Ndyosi laca nguˈ biˈ, loˈo juaˈa̱ tyuˈu chaˈ jiˈi̱ nguˈ biˈ loˈo ycuiˈ Ni.
\v 8 Pana ñati̱ nu ná ntsuˈu tyiquee ñaˈa̱ jiˈi̱ tyaˈa ñati̱, ná caja ñiˈya̱ nu tyuˈu chaˈ jiˈi̱ nguˈ biˈ loˈo ycuiˈ Ndyosi tsiyaˈ ti, chaˈ ycuiˈ Ndyosi ni, ntsuˈu tsa tyiquee Ni ñaˈa̱ Ni jiˈi̱ ñati̱.
\v 9 Nguluˈu Ni jiˈna ñiˈya̱ ntsuˈu tsa tyiquee Ni ñaˈa̱ Ni jiˈna, nu loˈo cua nda Ni jiˈi̱ nu sca ti Sñiˈ ycuiˈ ca Ni ya̱a̱ chalyuu, chaˈ juaˈa̱ taca caja chalyuu cucui jiˈna.
\v 10 Nde laca chaˈ nu nchcuiˈ naˈ loˈo ma̱: Siˈi chaˈ ntsuˈu tyiquee na ñaˈa̱ na jiˈi̱ ycuiˈ Ndyosi, masi ycuiˈ Ndyosi laca nu ntsuˈu tsa tyiquee Ni ñaˈa̱ Ni jiˈna tya clyo, biˈ chaˈ nda Ni jiˈi̱ Sñiˈ ycuiˈ ca Ni ya̱a̱ chalyuu chaˈ ngujuii yu lo crusi, chaˈ cua ngua cuxi tyiquee na loˈo ycuiˈ Ndyosi nu Xuˈna na xquiˈya chaˈ cuxi nu nguaˈni na; pana Jesucristo nu sca ti Sñiˈ ycuiˈ Ni, biˈ laca nu cua nchcubeˈ cña loo na, ngüiˈya Ni yabeˈ nu ntsuˈu jiˈna.
\p
\v 11 Cuˈma̱ nguˈ tyaˈa na nu tyacaˈa tsa ma̱ ˈna, ngaˈa̱ chaˈ tsoˈo ti tyuˈu tyiquee na ñaˈa̱ na jiˈi̱ tyaˈa ñati̱ na, chaˈ juaˈa̱ ntsuˈu tsa tyiquee ycuiˈ Ndyosi ñaˈa̱ Ni jiˈna.
\v 12 Ni sca ñati̱ chalyuu, bilya ñaˈa̱ nguˈ jiˈi̱ ycuiˈ Ndyosi; pana taca ca cuayáˈ tiˈ na chaˈ stuˈba ntsuˈu tyiquee na loˈo Ni juani, nu loˈo ñaˈa̱ na jiˈi̱ lcaa na loˈo tyaˈa na, chaˈ ntsuˈu tsa tyiquee na ñaˈa̱ na jiˈi̱ tyaˈa ñati̱ na. Ñiˈya̱ ntsuˈu tsa tyiquee Jesucristo ñaˈa̱ yu jiˈi̱ ñati̱ chalyuu, juaˈa̱ ngaˈa̱ chaˈ cuaˈni na loˈo tyaˈa ñati̱ na liˈ.
\v 13 Cua nda ycuiˈ Ndyosi Xtyiˈi Ni chaˈ tyanu neˈ cresiya jiˈna, biˈ chaˈ cua ngua jlo tiˈ na chaˈ stuˈba ntsuˈu tyiquee na loˈo ycuiˈ Ndyosi, loˈo juaˈa̱ stuˈba ntsuˈu tyiquee Ni loˈo na.
\v 14 Cua naˈa̱ ycuiˈ ya jiˈi̱ Jesús. Chañi laca chaˈ nu nchcuiˈ ya loˈo ma̱ juani, chaˈ cua nda ycuiˈ Ndyosi Sti Jesús chacuayáˈ jiˈi̱ Sñiˈ ycuiˈ ca Ni chaˈ cuaˈni lyaá jiˈi̱ cua ñaˈa̱ ca ñati̱ jiˈi̱ nu cuxi.
\v 15 Ñati̱ nu tyajaˈa̱ cachaˈ jiˈi̱ tyaˈa ñati̱ chaˈ nu sca ti Sñiˈ ycuiˈ Ndyosi laca Jesucristo, stuˈba ntsuˈu tyiquee ycuiˈ Ni loˈo nguˈ biˈ liˈ; juaˈa̱ stuˈba ntsuˈu tyiquee nguˈ biˈ loˈo ycuiˈ Ni.
\p
\v 16 Ngua cuayáˈ tiˈ na liˈ, chaˈ ntsuˈu tsa tyiquee ycuiˈ Ndyosi ñaˈa̱ Ni jiˈna; juaˈa̱ jlya tiˈ na liˈ, chaˈ xcuiˈ ntsuˈu tsa tyiquee ycuiˈ Ni ñaˈa̱ Ni jiˈi̱ ñati̱ chalyuu. Loˈo ñati̱ nu juaˈa̱ tsoˈo ntiˈ ñaˈa̱ nguˈ jiˈi̱ tyaˈa ñati̱, nu xcuiˈ juaˈa̱ nduˈni nguˈ laja loˈo ndiˈi̱ nguˈ chalyuu, cua stuˈba ntsuˈu tyiquee nguˈ biˈ loˈo ycuiˈ Ndyosi; la cuiˈ juaˈa̱ stuˈba ntsuˈu tyiquee ycuiˈ Ndyosi loˈo nguˈ biˈ liˈ.
\v 17 Tsoˈo ti ntsuˈu tyiquee na ñaˈa̱ na jiˈi̱ ycuiˈ Ndyosi, chaˈ nu loˈo tyalaa tsa̱ loˈo tya̱a̱ Jesucristo chaca quiyaˈ chaˈ cuaˈni cuayáˈ Ni jiˈi̱ lcaa ñati̱, liˈ tyucui tyiquee na taca tyacua tyaˈa na loˈo ycuiˈ Ni. Ndyaˈa̱ Ni loˈo na laja loˈo ndiˈi̱ na chalyuu, ñiˈya̱ ngutaˈa̱ Ni loˈo Jesucristo loˈo ngutiˈi̱ yu nde chalyuu, biˈ chaˈ ngaˈaa ntsuˈu chaˈ cutsi̱i̱ na.
\v 18 Ná ntsuˈu chaˈ cutsi̱i̱ na chaˈ xcubeˈ ycuiˈ Ndyosi jiˈna, si chañi chaˈ ntsuˈu tyiquee na ñaˈa̱ na jiˈi̱ ycuiˈ Ni; pana tya lyiji chaˈ tsoˈo ti tyuˈu tyiquee na ñaˈa̱ na jiˈi̱ ycuiˈ Ndyosi, si ñaˈa̱ ti tya ntsi̱i̱ na chaˈ xcubeˈ Ni jiˈna. Ñati̱ nu ntsi̱i̱ tsa jiˈi̱ ycuiˈ Ndyosi ni, cua nda tiˈ nguˈ chaˈ xcubeˈ Ni jiˈi̱ nguˈ.
\p
\v 19 Ntsuˈu tyiquee na ñaˈa̱ na jiˈi̱ ycuiˈ Ni, xquiˈya chaˈ tya clyo ntsuˈu tsa tyiquee Ni ñaˈa̱ Ni jiˈna.
\v 20 Nguˈ nu ñacui̱ ndiˈya̱: “Ntsuˈu tsa tyiquee naˈ ñaˈa̱ naˈ jiˈi̱ ycuiˈ Ndyosi”, loˈo liˈ ñaˈa̱ ti tya liyeˈ tiˈ nguˈ biˈ ñaˈa̱ nguˈ jiˈi̱ tyaˈa nguˈ, chaˈ cuiñi ti laca nu nchcuiˈ nguˈ biˈ. Ndiˈya̱ ndyuˈu chaˈ biˈ: taca ñaˈa̱ na jiˈi̱ tyaˈa ñati̱ na, pana ycuiˈ Ndyosi ni, bilya ñaˈa̱ na jiˈi̱ Ni tsiyaˈ ti; biˈ chaˈ lacua, si ná ntsuˈu tyiquee na ñaˈa̱ na jiˈi̱ tyaˈa ngusñi na chaˈ jiˈi̱ Jesucristo, liˈ ná taca ñacui̱ na chaˈ ntsuˈu tyiquee na ñaˈa̱ na jiˈi̱ ycuiˈ Ndyosi Sti na. 
\v 21 Cua ngulo Ni cña biˈ jiˈna ndiˈya̱: Tsoˈo ti tyuˈu tyiquee ma̱ ñaˈa̱ ma̱ jiˈi̱ ycuiˈ Ndyosi, loˈo juaˈa̱ xcuiˈ tsoˈo ti tyuˈu tyiquee ma̱ ñaˈa̱ ma̱ jiˈi̱ tyaˈa ñati̱ ma̱.
\c 5
\s Ntiji̱loo na jiˈi̱ nu cuxi nu ntsuˈu chalyuu
\p
\v 1 Lcaa ñati̱ nu jlya tiˈ jiˈi̱ Jesús, chaˈ laca yu Cristo nu cua nda ycuiˈ Ndyosi jiˈi̱ ya̱a̱ chalyuu, chañi chaˈ laca nguˈ biˈ sñiˈ ycuiˈ Ndyosi. Ycuiˈ Ndyosi laca Sti na, loˈo juaˈa̱ ntsuˈu tsa tyiquee na ñaˈa̱ na jiˈi̱ Ni, biˈ chaˈ ntsuˈu tyiquee na ñaˈa̱ na jiˈi̱ xaˈ la sñiˈ ycuiˈ Ni, tyaˈa ngusñi na chaˈ jiˈi̱ Jesús.
\v 2 Nu loˈo ntsuˈu tyiquee na ñaˈa̱ na jiˈi̱ ycuiˈ Ndyosi Sti na, loˈo juaˈa̱ taquiyaˈ na jiˈi̱ lcaa cña nu nda Ni loˈo na, liˈ tsoˈo ti taca tyuˈu tyiquee na ñaˈa̱ na jiˈi̱ xaˈ la sñiˈ ycuiˈ Ni.
\v 3 Si chañi chaˈ ntsuˈu tyiquee na ñaˈa̱ na jiˈi̱ Ni, taquiyaˈ na jiˈi̱ chaˈ nu chcuiˈ Ni loˈo na liˈ, chaˈ siˈi sca cña nu tucui tsa laca chaˈ taquiyaˈ na jiˈi̱ scaa chaˈ nu nchcuiˈ Ni.
\v 4 Cua ñaˈa̱ ca sñiˈ ycuiˈ Ndyosi taca tyiji̱loo jiˈi̱ lcaa nu cuxi nu ntsuˈu chalyuu; taca tyiji̱loo na jiˈi̱ nu cuxi, xquiˈya chaˈ cua ngusñi na chaˈ jiˈi̱ Jesucristo. 
\v 5 Pana ñati̱ nu jlya tiˈ chaˈ Jesús laca nu sca ti Sñiˈ ycuiˈ Ndyosi, biˈ ti ñati̱ nu caca jiˈi̱ tyiji̱loo jiˈi̱ lcaa nu cuxi nu ntsuˈu chalyuu.
\s Ndiˈya̱ ntsuˈu chaˈ jiˈi̱ Jesús nu laca Sñiˈ ycuiˈ ca Ndyosi
\p
\v 6 Nu sca ti Sñiˈ ycuiˈ ca Ndyosi laca Jesucristo, nu ya̱a̱ chalyuu. Ntyucuatya nguˈ jiˈi̱ yu liˈ. Ngujuii yu lo crusi, ndyalú tañi ycuiˈ yu liˈ. Siˈi xquiˈya chaˈ nu cua ntyucuatya ti yu, masi loˈo xquiˈya chaˈ cua ngujuii yu lo crusi ndyalú tañi yu, biˈ chaˈ nchca cuayáˈ tiˈ na juani chaˈ nu sca ti Sñiˈ ycuiˈ Ndyosi laca Jesucristo. Biˈ laca chaˈ nu ndachaˈ Xtyiˈi ycuiˈ Ndyosi jiˈna, loˈo juaˈa̱ chañi tsa laca chaˈ biˈ.
\v 7 Nde cua̱ ntucua sna tyaˈa nguˈ nu nchcuiˈ chaˈ chañi laca chaˈ jiˈi̱ Jesús biˈ: ycuiˈ Ndyosi Sti yu laca tsaca nguˈ biˈ; juaˈa̱ Jesucristo nu ntsuˈu tyucui chaˈ jiˈi̱ ycuiˈ Ndyosi jiˈi̱, biˈ laca chaca; loˈo juaˈa̱ Xtyiˈi ycuiˈ Ni, chaca laca biˈ. Stuˈba ti nchcuiˈ nu ca taˈa sna biˈ, chaˈ chañi laca chaˈ biˈ.
\v 8 Loˈo juaˈa̱ nde lo yuu cua ngua sna quiyaˈ loˈo nchcuiˈ ycuiˈ Ndyosi chaˈ chañi laca chaˈ Jesucristo laca nu sca ti Sñiˈ ycuiˈ Ni: tsaca laca chaˈ nu nchcuiˈ Xtyiˈi ycuiˈ Ndyosi loˈo na; juaˈa̱ chaca laca chaˈ nu nchcuiˈ Ni laja loˈo ntyucuatya Jesucristo; loˈo juaˈa̱ chaca laca chaˈ nu cua nchcuiˈ Ni laja loˈo ngujuii Jesucristo lo crusi, ndyalú tañi yu liˈ. Sca ti chaˈ nchcuiˈ Ni ca taˈa sna quiyaˈ biˈ.
\v 9 Ntucuá na jiˈi̱ chaˈ nu nchcuiˈ ñati̱ chalyuu loˈo na, pana juani ndulo la chaˈ nu nda ycuiˈ Ndyosi loˈo na. Ca taˈa sna chaˈ nu nda ycuiˈ Ndyosi, lcaa chaˈ biˈ nchcuiˈ chaˈ sca ti Jesucristo laca Sñiˈ ycuiˈ Ndyosi. 
\v 10 Ñati̱ nu jlya tiˈ jiˈi̱ yu chaˈ laca yu nu sca ti Sñiˈ ycuiˈ Ndyosi, ycuiˈ ca nguˈ jlo tiˈ nguˈ neˈ cresiya jiˈi̱ nguˈ chaˈ chañi tsa laca chaˈ biˈ; ñati̱ nu ná ntajaˈa̱ tucuá chaˈ jiˈi̱ Ni, chaˈ laca Jesucristo Sñiˈ ycuiˈ ca Ni, biˈ nguˈ laca nu ná jlya tiˈ tsiyaˈ ti chaˈ cua nchcuiˈ ycuiˈ Ndyosi chaˈ jiˈi̱ Sñiˈ ycuiˈ ca Ni. Ñati̱ cuiñi laca ycuiˈ Ndyosi ntiˈ nguˈ biˈ.
\v 11 Nde laca chaˈ liñi nu tsoˈo tsa chaˈ xñi na jiˈi̱, chaˈ cua nda ycuiˈ Ndyosi chalyuu nu ná ngaˈa̱ chaˈ tye jiˈna; Jesucristo laca nu nguluˈu jiˈna ñiˈya̱ caca chalyuu biˈ.
\v 12 Cua ñaˈa̱ ca ñati̱ nu ntsuˈu chaˈ jiˈi̱ loˈo Jesús nu laca Sñiˈ ycuiˈ ca Ni, biˈ ñati̱ laca nu ntsuˈu chalyuu nu ná ngaˈa̱ chaˈ tye jiˈi̱; ñati̱ nu ná ntsuˈu chaˈ jiˈi̱ loˈo nu sca ti Sñiˈ ycuiˈ Ndyosi, ná ntsuˈu chaˈ ta Ni chalyuu biˈ jiˈi̱ nguˈ.
\s Cua tye ti chaˈ nu nguscua Juan
\p
\v 13 Cua nscua naˈ quityi re lacua, chaˈ ca̱a̱ ca slo ma̱, lcaa tyaˈa ngusñi ma̱ chaˈ jiˈi̱ Jesús nu sca ti Sñiˈ ycuiˈ Ndyosi; xquiˈya chaˈ re taca ca cuayáˈ tiˈ ma̱ chaˈ cua ngujui chalyuu cucui jiˈi̱ ma̱, nu cua nda ycuiˈ Ndyosi jiˈna.
\p
\v 14 Tyucui tyiquee na taca chcuiˈ na loˈo ycuiˈ Ndyosi lacua. Loˈo jña na sca chaˈ jiˈi̱ ycuiˈ Ndyosi nu stuˈba ntiˈ loˈo sca chaˈ nu ntiˈ ycuiˈ Ni, liˈ taca jlo tiˈ na chaˈ taquiyaˈ Ni jiˈi̱ chaˈ nu chcuiˈ na loˈo Ni. 
\v 15 Si jlo tiˈ na chaˈ nduna ycuiˈ Ndyosi loˈo jña na sca chaˈ jiˈi̱ Ni, la cuiˈ juaˈa̱ taca jlo tiˈ na chaˈ cua caja ti chaˈ biˈ jiˈna liˈ.
\p
\v 16 Loˈo ñaˈa̱ na jiˈi̱ sca ñati̱ tyaˈa ngusñi na chaˈ jiˈi̱ Jesucristo chaˈ ndyuˈni yu sca chaˈ cuxi, pana nda na cuentya chaˈ ná nscua chaˈ chcunaˈ chalyuu jiˈi̱ yu xquiˈya chaˈ cuxi biˈ, liˈ tsoˈo la si jña na chaˈ clyu tiˈ jiˈi̱ ycuiˈ Ndyosi cuentya jiˈi̱ yu tyaˈa na biˈ, chaˈ ná ta Ni chacuayáˈ chaˈ chcunaˈ chalyuu jiˈi̱ yu tyaˈa na biˈ. Pana ntsuˈu quiˈya tlyu nu ná taca cuaˈni clyu tiˈ ycuiˈ Ndyosi jiˈi̱; ná ñacui̱ naˈ chaˈ jña na chaˈ clyu tiˈ jiˈi̱ Ni liˈ, si juaˈa̱ ntsuˈu quiˈya jiˈi̱ nguˈ.
\v 17 Chañi chaˈ sta ycuiˈ Ndyosi quiˈya jiˈi̱ lcaa na loˈo tyaˈa na xquiˈya chaˈ cuxi nu ndyuˈni na. Pana ntsuˈu sca lo quiˈya nu ná taca cuiˈya Ni chaˈ clyu tiˈ jiˈi̱ tsiyaˈ ti.
\p
\v 18 Jlo tiˈ na chaˈ ngaˈaa nduˈni ñati̱ jiˈi̱ Jesucristo chaˈ cuxi. Jesucristo nu laca nu sca ti Sñiˈ ycuiˈ Ndyosi, biˈ laca nu ndacaˈa jiˈi̱ nguˈ, chaˈ ná taca calaˈ nu xñaˈa̱ jiˈi̱ nguˈ biˈ liˈ.
\p
\v 19 Jlo tiˈ na chaˈ ñati̱ jiˈi̱ ycuiˈ Ndyosi laca na, xquiˈya chaˈ cua ngusñi na chaˈ jiˈi̱ Jesucristo; pana xaˈ la ñati̱ chalyuu nu ná ndaquiyaˈ jiˈi̱ Ni tsiyaˈ ti, ñaˈa̱ ti tya laca nu xñaˈa̱ loo jiˈi̱ ñati̱ biˈ. 
\p
\v 20 Cua jlo tiˈ na chaˈ cua ya̱a̱ nu sca ti Sñiˈ ycuiˈ Ndyosi nde lo yuu chalyuu, loˈo juaˈa̱ cua nda biˈ chacuayáˈ chaˈ caca tyuˈu chaˈ jiˈna loˈo ycuiˈ Ndyosi. Chañi chaˈ stuˈba ntsuˈu tyiquee na loˈo ycuiˈ Ndyosi juani, xquiˈya chaˈ stuˈba ntsuˈu tyiquee na loˈo Jesucristo nu laca Sñiˈ ycuiˈ ca Ni. Chañi chaˈ ycuiˈ Ndyosi tsiyaˈ ti laca nu Jesús biˈ, loˈo juaˈa̱ chañi chaˈ ná ngaˈa̱ chaˈ tye chalyuu cucui nu ta Ni jiˈna.
\v 21 Cuˈma̱ sñiˈ naˈ, tii ti tiˈ ma̱ tyiˈi̱ ma̱ chalyuu, chaˈ ná tyatí̱ yuˈu ma̱ loˈo xaˈ joˈó. Juaˈa̱ laca chaˈ biˈ lacua.