\id 2JN
\h 2 JUAN
\mt Quityi sube nu nguscua San Juan nu nchca tyucuaa
\c 1
\s Nu loˈo chañi chaˈ ntsuˈu tsa tyiquee na ñaˈa̱ na jiˈi̱ tyaˈa ñati̱ na
\p
\v 1 La cuiˈ nu cusuˈ Juan laca naˈ. Nscua naˈ sca quityi re, maˈ cusuˈ, juaˈa̱ sñiˈ nuˈu̱, chaˈ ca̱a̱ quityi re ca slo cuˈma̱ nguˈ tyaˈa ngusñi na chaˈ jiˈi̱ Jesús, chaˈ cua ngusubi ycuiˈ Ni jiˈi̱ ma̱ chaˈ caca ma̱ ñati̱ jiˈi̱ Ni. Chañi chaˈ ntsuˈu tsa tyiquee naˈ ñaˈa̱ naˈ jiˈi̱ ma̱; ni siˈi sca ti naˈ, loˈo lcua ti ñaˈa̱ ñati̱ lcaa quichi̱ nu nduna chaˈ liñi jiˈi̱ Jesús, loˈo lcaa ñati̱ biˈ, ntsuˈu tsa tyiquee nguˈ ñaˈa̱ nguˈ jiˈi̱ ma̱.
\v 2 Cua ndyanu tsoˈo chaˈ liñi biˈ neˈ cresiya jiˈna, juaˈa̱ ná ngaˈa̱ chaˈ tye chaˈ nu cua ndyuna na biˈ; biˈ chaˈ tsoˈo tsa ntsuˈu tyiquee naˈ ñaˈa̱ naˈ jiˈi̱ ma̱.
\v 3 Ycuiˈ Ndyosi nu laca Sti na, loˈo juaˈa̱ Jesucristo nu sca ti Sñiˈ ycuiˈ Ni, xtyucua Ni jiˈi̱ ma̱. Loˈo juaˈa̱ cua ntiˈ naˈ chaˈ ñaˈa̱ ti tya cuaˈni Ni quiñaˈa̱ tsa chaˈ tsoˈo loˈo ma̱, chaˈ ñaˈa̱ ti tya cuaˈni tyaˈna tiˈ Ni jiˈi̱ ma̱, chaˈ ñaˈa̱ ti cuaˈni Ni chaˈ ti̱ ti tyiˈi̱ tyiquee ma̱; juaˈa̱ ntiˈ naˈ chaˈ cuaˈni Ni loˈo ma̱, xquiˈya chaˈ ntsuˈu tsa tyiquee Ni ñaˈa̱ Ni jiˈna, chaˈ chañi tsa chaˈ nu nguluˈu Ni jiˈna.
\p
\v 4 Tsoˈo tsa ngua tiˈ naˈ loˈo ngujui chaˈ ˈna chaˈ ñaˈa̱ ti tya ndaquiyaˈ tsoˈo xi nguˈ tyaˈa ma̱ lcaa chaˈ liñi nu cua nda ycuiˈ Ndyosi Sti na loˈo na;
\v 5 biˈ chaˈ chcuiˈ naˈ loˈo nuˈu̱, maˈ cusuˈ, juaˈa̱ loˈo lcaa nguˈ tyaˈa ma̱, chaˈ tsoˈo ti tyuˈu tyiquee na ñaˈa̱ na jiˈi̱ tyaˈa ñati̱ na. Siˈi sca chaˈ nu bilya ta Ni loˈo na laca chaˈ biˈ, sca chaˈ nu ndyuna na loˈo ngusñi na chaˈ jiˈi̱ Jesucristo tya clyo laca chaˈ biˈ. 
\v 6 Loˈo nu ni naˈ jiˈi̱ ma̱ chaˈ tsoˈo ti tyuˈu tyiquee na ñaˈa̱ na jiˈi̱ tyaˈa ñati̱ na, la cuiˈ juaˈa̱ ntsuˈu chaˈ taquiyaˈ na lcaa cña nu nclyo ycuiˈ Ndyosi jiˈna. Nu loˈo ngusñi ma̱ chaˈ biˈ tya clyo, cua ndyuna ma̱ lcaa cña nu ntsuˈu chaˈ cuaˈni ma̱ chaˈ tsoˈo ti tyuˈu tyiquee lcaa ma̱ ñaˈa̱ ma̱ jiˈi̱ tyaˈa ñati̱ ma̱.
\s Nu nguˈ cuiñi nu tyaˈa cusu̱u̱ jiˈi̱ Cristo
\p
\v 7 Ntsuˈu tsa ñati̱ cuiñi nu nchcuiˈ chaˈ ná chañi chaˈ ngua Jesús ñati̱ loˈo ya̱a̱ yu chalyuu. Tyucui ñaˈa̱ lo yuu chalyuu ndyaˈa̱ ñati̱ nu nchcuiˈ chaˈ cuiñi biˈ; na nñiloˈo nguˈ biˈ jiˈi̱ tyaˈa ñati̱ na, juaˈa̱ tyaˈa cusu̱u̱ jiˈi̱ Cristo laca nguˈ biˈ.
\v 8 Biˈ chaˈ tii ti tiˈ ma̱ tyiˈi̱ ma̱ chalyuu, chaˈ ná culiji yuˈu juaˈa̱ ti lcaa chaˈ nu cua ndyuna ma̱ loˈo ngutiˈi̱ ya ca slo ma̱. Liˈ caja lcaa chaˈ tsoˈo nu cua ntiˈ ycuiˈ Ndyosi ta Ni jiˈi̱ ma̱ loˈo tye chalyuu. 
\p
\v 9 Lcaa ñati̱ nu tyatí̱ yuˈu loˈo xaˈ la chaˈ, ná ntsuˈu chaˈ jiˈi̱ nguˈ biˈ loˈo ycuiˈ Ndyosi tsiyaˈ ti, chaˈ ná cuayáˈ chaˈ jiˈna loˈo jlya tiˈ na jiˈi̱ Cristo, ntiˈ nguˈ biˈ; pana loˈo cua ngusñi na chaˈ jiˈi̱ Cristo ca neˈ cresiya jiˈna, liˈ stuˈba ntsuˈu chaˈ jiˈna loˈo ycuiˈ Ndyosi, juaˈa̱ loˈo ycuiˈ nu sca ti Sñiˈ ycuiˈ Ni.
\v 10 Biˈ chaˈ juani si tyalaa ñati̱ slo ma̱ nu ná nda la cuiˈ chaˈ jiˈi̱ Jesús biˈ loˈo ma̱, ngaˈaa ta ma̱ su tyiˈi̱ nguˈ biˈ, ni ná ta ma̱ xlyo niˈi̱ jiˈi̱ nguˈ biˈ.
\v 11 Nu loˈo chcuiˈ na loˈo ñati̱ biˈ, ñiˈya̱ laca si ndyuˈni tyaˈa na loˈo nguˈ biˈ, loˈo cña cuxi nu ndyuˈni nguˈ, juaˈa̱ ndyuˈu chaˈ biˈ.
\s Chaˈ nu nguscua Juan loˈo cua tye ti quityi
\p
\v 12 Tya ntsuˈu tsa chaˈ nu ntiˈ naˈ chcui̱ˈ loˈo ma̱, pana tsoˈo la masi ná loˈo chaˈ biˈ scua naˈ lo quityi re. Tiyaˈ la ntiˈ naˈ ca̱a̱ naˈ ca su ndiˈi̱ cuˈma̱, loˈo liˈ ycuiˈ ca naˈ taca ta naˈ chaˈ biˈ loˈo ma̱; liˈ chañi chaˈ tsoˈo ti taca tyuˈu tyiquee na ñaˈa̱ na jiˈi̱ tyaˈa na.
\p
\v 13 Loˈo juaˈa̱ nu ñati̱ tyaˈa ntsuˈu chaˈ jiˈi̱ ma̱ loˈo Cristo ca nde, nu nguˈ nu cua ngusubi ycuiˈ Ndyosi jiˈi̱, loˈo nguˈ biˈ cua ntiˈ nguˈ chcuichaˈ nguˈ jiˈi̱ ma̱. Juaˈa̱ caca chaˈ lacua.