\id 3JN
\h 3 JUAN
\mt Quityi sube nu nguscua San Juan nu nchca tyuna
\c 1
\s Tsoˈo tsa nchcuiˈ Juan jiˈi̱ Gayo
\p
\v 1 La cuiˈ nu cusuˈ Juan laca naˈ. Nscua naˈ quityi re chaˈ ca̱a̱ ca slo nuˈu̱, Gayo; jlya tiˈ nuˈu̱ lcaa chaˈ nu laca jiˈi̱ Jesucristo, biˈ chaˈ tsoˈo tsa ntsuˈu tyiquee naˈ chaˈ chcuiˈ naˈ loˈo nuˈu̱.
\p
\v 2 Tsoˈo tsa ñati̱ laca nuˈu̱, cusuˈ. Nchcuiˈ naˈ loˈo ycuiˈ Ndyosi cuentya jinuˈu̱ chaˈ tsoˈo ti taca tyiˈi̱ tyiquee nuˈu̱, chaˈ taca ca lye tiˈ nuˈu̱. Cua jlo tiˈ naˈ chaˈ tsoˈo tsa ngusñi nuˈu̱ chaˈ jiˈi̱ ycuiˈ Ndyosi. 
\v 3 Loˈo juani tsoˈo tsa ntsuˈu tyiquee naˈ chaˈ cua ndyalaa xi nguˈ tyaˈa ntsuˈu chaˈ jiˈna loˈo Cristo nu ngutuˈu ca su ndiˈi̱ ma̱ ya̱a̱ nguˈ ca nde. Nacui̱ nguˈ chaˈ ñaˈa̱ ti ndaquiyaˈ tsoˈo ma̱ jiˈi̱ chaˈ liñi nu cua nda Jesús loˈo na, chaˈ juaˈa̱ nduˈni ma̱ lcaa tsa̱. 
\v 4 Sca ti chaˈ nclyacua tiˈ naˈ cuentya jiˈi̱ cuˈma̱, si chañi chaˈ ndaquiyaˈ ma̱ jiˈi̱ chaˈ liñi nu cua nda Jesús loˈo na, chaˈ cuañiˈ la cuˈma̱ cuentya jnaˈ; tsoˈo tsa ntsuˈu tyiquee naˈ loˈo ndyuna naˈ chaˈ juaˈa̱ nduˈni ma̱.
\p
\v 5 Cusuˈ, ndube tsa tiˈ naˈ chaˈ lcaa tyempo tsoˈo tsa nxtyucua nuˈu̱ jiˈi̱ nguˈ tyaˈa na, masi ná nslo nuˈu̱ jiˈi̱ nguˈ, chaˈ nguˈ xaˈ quichi̱ laca nguˈ ntsuˈu quiyaˈ.
\v 6 Cua nchcuiˈ nguˈ biˈ loˈo lcaa nguˈ tyaˈa ntsuˈu chaˈ jiˈna loˈo Jesús nde quichi̱ re, ndachaˈ nguˈ jiˈi̱ ya ñiˈya̱ nu tsoˈo ntsuˈu tyiquee ma̱ ñaˈa̱ ma̱ jiˈi̱ ycuiˈ ca nguˈ. Loˈo juaˈa̱ cuaˈni ma̱ chaˈ tsoˈo tya xtyucua la ma̱ jiˈi̱ nguˈ biˈ tyucui̱i̱ su tsaa nguˈ, cuaˈni ma̱ ñiˈya̱ laca si na nxtyucua ma̱ jiˈi̱ ycuiˈ Ndyosi laca;
\v 7 cña jiˈi̱ Cristo ndyaˈa̱ nguˈ, biˈ chaˈ ngutuˈu nguˈ biˈ ndyaa nguˈ tyijyuˈ. Ná ntajaˈa̱ nguˈ xñi nguˈ ni sca centavo jiˈi̱ xaˈ ñati̱ nu ná ndaquiyaˈ jiˈi̱ Cristo tsiyaˈ ti, chaˈ xtyucua jiˈi̱ nguˈ tyucui̱i̱;
\v 8 biˈ chaˈ nu na ni, tyaˈa ngusñi na chaˈ jiˈi̱ Cristo, ngaˈa̱ chaˈ xtyucua na jiˈi̱ nguˈ biˈ. Loˈo juaˈa̱ taca ca stuˈba chaˈ jiˈna loˈo nguˈ biˈ loˈo sañi na chaˈ liñi nu cua nda Cristo loˈo na ca tyijyuˈ la.
\s Cuxi tsa cña nu ndyuˈni Diótrefes
\p
\v 9 Cua nscua naˈ sca quityi tya tsubiˈ la nu ndyaa ca su ndiˈi̱ ñaˈa̱ taju ti ma̱ ñati̱ jiˈi̱ Jesucristo, cuˈma̱ nu ndyuˈu tiˈi̱ ma̱ tsa tlyu ti ca biˈ; pana ná ntajaˈa̱ Diótrefes taquiyaˈ jiˈi̱ chaˈ nu nacui̱ naˈ jiˈi̱ ma̱, chaˈ ntiˈ yu biˈ chaˈ xuˈna ma̱ laca yu.
\v 10 Nu loˈo tyalaa naˈ ca slo ma̱, liˈ chcuiˈ naˈ loˈo ma̱ cuentya jiˈi̱ lcaa cña nu ndyuˈni yu biˈ, chaˈ chiyaˈa̱ tsa nchcuiˈ yu jiˈi̱ cuare; nchcuiˈ yu biˈ cua ñaˈa̱ ca lo chaˈ cuiñi loˈo ñati̱. Masi ndyuˈni yu juaˈa̱, ná cuayáˈ jiˈi̱ yu ntiˈ yu, chaˈ juani ná ntajaˈa̱ yu ta yu su tyiˈi̱ nguˈ tyaˈa ndyaˈa̱ ya cña loˈo ndyaa nguˈ quichi̱ tyi ma̱; ñaˈa̱ cuayáˈ ndacaˈa yu chacuayáˈ jiˈi̱ tyaˈa ma̱ chaˈ loˈo cuˈma̱ ná ta ma̱ su tyiˈi̱ nguˈ, masi ngua tiˈ ma̱ ta ma̱ su tyiˈi̱ nguˈ nquichaˈ. Loˈo juaˈa̱ ngua tiˈ yu culoˈo yu jiˈi̱ tyaˈa ndyaˈa̱ ya cña biˈ, chaˈ ná tyuˈu tiˈi̱ nguˈ loˈo ma̱.
\p
\v 11 Cusuˈ, ná tyatí̱ yuˈu ma̱ loˈo chaˈ cuxi nu ntsuˈu chalyuu, tsoˈo la si tyiˈu tiˈ ma̱ jiˈi̱ lcaa chaˈ nu tsoˈo ti. Lcaa ñati̱ nu xcuiˈ clyana chaˈ tsoˈo nu cuaˈni nguˈ chaˈ xtyucua nguˈ jiˈi̱ xaˈ la tyaˈa ñati̱ nguˈ, cua ntsuˈu chaˈ jiˈi̱ nguˈ biˈ loˈo ycuiˈ Ndyosi; lcaa ñati̱ nu xcuiˈ clyana chaˈ cuxi chaˈ cuaˈni nguˈ, bilya tyuˈu chaˈ jiˈi̱ nguˈ biˈ tsiyaˈ ti loˈo ycuiˈ Ndyosi.
\s Tsoˈo la ndyuˈni Demetrio
\p
\v 12 Tsoˈo tsa nchcuiˈ lcaa ñati̱ jiˈi̱ Demetrio; masi ycuiˈ ca na, loˈo ñaˈa̱ na jiˈi̱ yu nchca cuayáˈ tiˈ na chaˈ tsoˈo tsa ndyuˈni yu loˈo lcaa ñati̱. Juaˈa̱ cuare, nchcuiˈ ya loˈo ma̱ juani chaˈ chañi tsa chaˈ nu nchcuiˈ nguˈ jiˈi̱ yu chaˈ tsoˈo tsa tyiquee yu. Cua jlo tsoˈo tiˈ ma̱ chaˈ nchcuiˈ ya chaˈ liñi loˈo ma̱.
\s Chaˈ nu nguscua Juan loˈo cua tye ti quityi
\p
\v 13 Tya ntsuˈu tsa chaˈ nu ntiˈ naˈ chcui̱ˈ loˈo nuˈu̱, pana tsoˈo la masi ná scua naˈ chaˈ biˈ lo quityi re juani;
\v 14 tsoˈo la yala ti ca̱a̱ naˈ ca su ndiˈi̱ nuˈu̱ chaˈ ycuiˈ ca naˈ ta naˈ xi chaˈ loˈo nuˈu̱.
\p
\v 15 Ti̱ ti tyiˈi̱ tyiquee ma̱ lacua, chaˈ ycuiˈ Ndyosi xtyucua jiˈi̱ ma̱. Lcaa nguˈ tyaˈa tsoˈo ma̱ nu ndiˈi̱ ca su ndiˈi̱ cuare, cua ntiˈ nguˈ chcuichaˈ nguˈ jiˈi̱ ma̱, xquiˈya chaˈ nu scua naˈ lo quityi re; juaˈa̱ cuˈma̱, chcuichaˈ ma̱ jiˈi̱ lcaa nguˈ tyaˈa tsoˈo ya nu ndiˈi̱ ca ndacua.